੧੧. ਪਾਟਲਿਪੁਤ੍ਤਪੇਤਵਤ੍ਥੁਵਣ੍ਣਨਾ

ਦਿਟ੍ਠਾ ਤਯਾ ਨਿਰਯਾ ਤਿਰਚ੍ਛਾਨਯੋਨੀਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਅਞ੍ਞਤਰਂ ਵਿਮਾਨਪੇਤਂ ਆਰਬ੍ਭ ਵੁਤ੍ਤਂ. ਸਾਵਤ੍ਥਿਵਾਸਿਨੋ ਕਿਰ ਪਾਟਲਿਪੁਤ੍ਤਵਾਸਿਨੋ ਚ ਬਹੂ ਵਾਣਿਜਾ ਨਾਵਾਯ ਸੁਵਣ੍ਣਭੂਮਿਂ ਅਗਮਿਂਸੁ. ਤਤ੍ਥੇਕੋ ਉਪਾਸਕੋ ਆਬਾਧਿਕੋ ਮਾਤੁਗਾਮੇ ਪਟਿਬਦ੍ਧਚਿਤ੍ਤੋ ਕਾਲਮਕਾਸਿ. ਸੋ ਕਤਕੁਸਲੋਪਿ ਦੇਵਲੋਕਂ ਅਨੁਪਪਜ੍ਜਿਤ੍ਵਾ ਇਤ੍ਥਿਯਾ ਪਟਿਬਦ੍ਧਚਿਤ੍ਤਤਾਯ ਸਮੁਦ੍ਦਮਜ੍ਝੇ ਵਿਮਾਨਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਯਸ੍ਸਂ ਪਨ ਸੋ ਪਟਿਬਦ੍ਧਚਿਤ੍ਤੋ, ਸਾ ਇਤ੍ਥੀ ਸੁਵਣ੍ਣਭੂਮਿਗਾਮਿਨਿਂ ਨਾਵਂ ਅਭਿਰੁਯ੍ਹ ਗਚ੍ਛਤਿ. ਅਥ ਖੋ ਸੋ ਪੇਤੋ ਤਂ ਇਤ੍ਥਿਂ ਗਹੇਤੁਕਾਮੋ ਨਾਵਾਯ ਗਮਨਂ ਉਪਰੁਨ੍ਧਿ. ਅਥ ਵਾਣਿਜਾ ‘‘ਕੇਨ ਨੁ ਖੋ ਕਾਰਣੇਨ ਅਯਂ ਨਾਵਾ ਨ ਗਚ੍ਛਤੀ’’ਤਿ ਵੀਮਂਸਨ੍ਤਾ ਕਾਲ਼ਕਣ੍ਣਿਸਲਾਕਂ ਵਿਚਾਰੇਸੁਂ. ਅਮਨੁਸ੍ਸਿਦ੍ਧਿਯਾ ਯਾਵਤਤਿਯਂ ਤਸ੍ਸਾ ਏਵ ਇਤ੍ਥਿਯਾ ਪਾਪੁਣਿ, ਯਸ੍ਸਂ ਸੋ ਪਟਿਬਦ੍ਧਚਿਤ੍ਤੋ. ਤਂ ਦਿਸ੍ਵਾ ਵਾਣਿਜਾ ਵੇਲ਼ੁਕਲਾਪਂ ਸਮੁਦ੍ਦੇ ਓਤਾਰੇਤ੍ਵਾ ਤਸ੍ਸ ਉਪਰਿ ਤਂ ਇਤ੍ਥਿਂ ਓਤਾਰੇਸੁਂ. ਇਤ੍ਥਿਯਾ ਓਤਾਰਿਤਮਤ੍ਤਾਯ ਨਾਵਾ ਵੇਗੇਨ ਸੁਵਣ੍ਣਭੂਮਿਂ ਅਭਿਮੁਖਾ ਪਾਯਾਸਿ. ਅਮਨੁਸ੍ਸੋ ਤਂ ਇਤ੍ਥਿਂ ਅਤ੍ਤਨੋ ਵਿਮਾਨਂ ਆਰੋਪੇਤ੍ਵਾ ਤਾਯ ਸਦ੍ਧਿਂ ਅਭਿਰਮਿ.

ਸਾ ਏਕਂ ਸਂਵਚ੍ਛਰਂ ਅਤਿਕ੍ਕਮਿਤ੍ਵਾ ਨਿਬ੍ਬਿਨ੍ਨਰੂਪਾ ਤਂ ਪੇਤਂ ਯਾਚਨ੍ਤੀ ਆਹ – ‘‘ਅਹਂ ਇਧ ਵਸਨ੍ਤੀ ਮਯ੍ਹਂ ਸਮ੍ਪਰਾਯਿਕਂ ਅਤ੍ਥਂ ਕਾਤੁਂ ਨ ਲਭਾਮਿ, ਸਾਧੁ, ਮਾਰਿਸ, ਮਂ ਪਾਟਲਿਪੁਤ੍ਤਮੇਵ ਨੇਹੀ’’ਤਿ. ਸੋ ਤਾਯ ਯਾਚਿਤੋ –

੭੯੩. ‘‘ਦਿਟ੍ਠਾ ਤਯਾ ਨਿਰਯਾ ਤਿਰਚ੍ਛਾਨਯੋਨਿ, ਪੇਤਾ ਅਸੁਰਾ ਅਥਵਾਪਿ ਮਾਨੁਸਾ ਦੇਵਾ;

ਸਯਮਦ੍ਦਸ ਕਮ੍ਮਵਿਪਾਕਮਤ੍ਤਨੋ, ਨੇਸ੍ਸਾਮਿ ਤਂ ਪਾਟਲਿਪੁਤ੍ਤਮਕ੍ਖਤਂ;

ਤਤ੍ਥ ਗਨ੍ਤ੍ਵਾ ਕੁਸਲਂ ਕਰੋਹਿ ਕਮ੍ਮ’’ਨ੍ਤਿ. –

ਗਾਥਮਾਹ. ਤਤ੍ਥ ਦਿਟ੍ਠਾ ਤਯਾ ਨਿਰਯਾਤਿ ਏਕਚ੍ਚੇ ਪਚ੍ਚੇਕਨਿਰਯਾਪਿ ਤਯਾ ਦਿਟ੍ਠਾ. ਤਿਰਚ੍ਛਾਨਯੋਨੀਤਿ ਮਹਾਨੁਭਾਵਾ ਨਾਗਸੁਪਣ੍ਣਾਦਿਤਿਰਚ੍ਛਾਨਾਪਿ ਦਿਟ੍ਠਾ ਤਯਾਤਿ ਯੋਜਨਾ. ਪੇਤਾਤਿ ਖੁਪ੍ਪਿਪਾਸਾਦਿਭੇਦਾ ਪੇਤਾ. ਅਸੁਰਾਤਿ ਕਾਲਕਞ੍ਚਿਕਾਦਿਭੇਦਾ ਅਸੁਰਾ. ਦੇਵਾਤਿ ਏਕਚ੍ਚੇ ਚਾਤੁਮਹਾਰਾਜਿਕਾ ਦੇਵਾ. ਸੋ ਕਿਰ ਅਤ੍ਤਨੋ ਆਨੁਭਾਵੇਨ ਅਨ੍ਤਰਨ੍ਤਰਾ ਤਂ ਗਹੇਤ੍ਵਾ ਪਚ੍ਚੇਕਨਿਰਯਾਦਿਕੇ ਦਸ੍ਸੇਨ੍ਤੋ ਵਿਚਰਤਿ, ਤੇਨ ਏਵਮਾਹ. ਸਯਮਦ੍ਦਸ ਕਮ੍ਮਵਿਪਾਕਮਤ੍ਤਨੋਤਿ ਨਿਰਯਾਦਿਕੇ ਵਿਸੇਸਤੋ ਗਨ੍ਤ੍ਵਾ ਪਸ੍ਸਨ੍ਤੀ ਸਯਮੇਵ ਅਤ੍ਤਨਾ ਕਤਕਮ੍ਮਾਨਂ ਵਿਪਾਕਂ ਪਚ੍ਚਕ੍ਖਤੋ ਅਦ੍ਦਸ ਅਦਕ੍ਖਿ. ਨੇਸ੍ਸਾਮਿ ਤਂ ਪਾਟਲਿਪੁਤ੍ਤਮਕ੍ਖਤਨ੍ਤਿ ਇਦਾਨਾਹਂ ਤਂ ਅਕ੍ਖਤਂ ਕੇਨਚਿ ਅਪਰਿਕ੍ਖਤਂ ਮਨੁਸ੍ਸਰੂਪੇਨੇਵ ਪਾਟਲਿਪੁਤ੍ਤਂ ਨਯਿਸ੍ਸਾਮਿ. ਤ੍ਵਂ ਪਨ ਤਤ੍ਥ ਗਨ੍ਤ੍ਵਾ ਕੁਸਲਂ ਕਰੋਹਿ ਕਮ੍ਮਂ, ਕਮ੍ਮਵਿਪਾਕਸ੍ਸ ਪਚ੍ਚਕ੍ਖਤੋ ਦਿਟ੍ਠਤ੍ਤਾ ਯੁਤ੍ਤਪਯੁਤ੍ਤਾ ਪੁਞ੍ਞਨਿਰਤਾ ਹੋਹੀਤਿ ਅਤ੍ਥੋ.

ਅਥ ਸਾ ਇਤ੍ਥੀ ਤਸ੍ਸ ਵਚਨਂ ਸੁਤ੍ਵਾ ਅਤ੍ਤਮਨਾ –

੭੯੪. ‘‘ਅਤ੍ਥਕਾਮੋਸਿ ਮੇ ਯਕ੍ਖ, ਹਿਤਕਾਮੋਸਿ ਦੇਵਤੇ;

ਕਰੋਮਿ ਤੁਯ੍ਹਂ ਵਚਨਂ, ਤ੍ਵਂਸਿ ਆਚਰਿਯੋ ਮਮ.

੭੯੫. ‘‘ਦਿਟ੍ਠਾ ਮਯਾ ਨਿਰਯਾ ਤਿਰਚ੍ਛਾਨਯੋਨਿ, ਪੇਤਾ ਅਸੁਰਾ ਅਥਵਾਪਿ ਮਾਨੁਸਾ ਦੇਵਾ;

ਸਯਮਦ੍ਦਸਂ ਕਮ੍ਮਵਿਪਾਕਮਤ੍ਤਨੋ, ਕਾਹਾਮਿ ਪੁਞ੍ਞਾਨਿ ਅਨਪ੍ਪਕਾਨੀ’’ਤਿ. –

ਗਾਥਮਾਹ.

ਅਥ ਸੋ ਪੇਤੋ ਤਂ ਇਤ੍ਥਿਂ ਗਹੇਤ੍ਵਾ ਆਕਾਸੇਨ ਗਨ੍ਤ੍ਵਾ ਪਾਟਲਿਪੁਤ੍ਤਨਗਰਸ੍ਸ ਮਜ੍ਝੇ ਠਪੇਤ੍ਵਾ ਪਕ੍ਕਾਮਿ. ਅਥਸ੍ਸਾ ਞਾਤਿਮਿਤ੍ਤਾਦਯੋ ਤਂ ਦਿਸ੍ਵਾ ‘‘ਮਯਂ ਪੁਬ੍ਬੇ ਸਮੁਦ੍ਦੇ ਪਕ੍ਖਿਤ੍ਤਾ ਮਤਾਤਿ ਅਸ੍ਸੁਮ੍ਹ. ਸਾ ਅਯਂ ਦਿਟ੍ਠਾ ਵਤ, ਭੋ, ਸੋਤ੍ਥਿਨਾ ਆਗਤਾ’’ਤਿ ਅਭਿਨਨ੍ਦਮਾਨਾ ਸਮਾਗਨ੍ਤ੍ਵਾ ਤਸ੍ਸਾ ਪਵਤ੍ਤਿਂ ਪੁਚ੍ਛਿਂਸੁ. ਸਾ ਤੇਸਂ ਆਦਿਤੋ ਪਟ੍ਠਾਯ ਅਤ੍ਤਨਾ ਦਿਟ੍ਠਂ ਅਨੁਭੂਤਞ੍ਚ ਸਬ੍ਬਂ ਕਥੇਸਿ. ਸਾਵਤ੍ਥਿਵਾਸਿਨੋਪਿ ਖੋ ਤੇ ਵਾਣਿਜਾ ਅਨੁਕ੍ਕਮੇਨ ਸਾਵਤ੍ਥਿਂ ਉਪਗਤਕਾਲੇ ਸਤ੍ਥੁ ਸਨ੍ਤਿਕਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨਾ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸੁਂ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਚਤੁਨ੍ਨਂ ਪਰਿਸਾਨਂ ਧਮ੍ਮਂ ਦੇਸੇਸਿ. ਤਂ ਸੁਤ੍ਵਾ ਮਹਾਜਨੋ ਸਂਵੇਗਜਾਤੋ ਦਾਨਾਦਿਕੁਸਲਧਮ੍ਮਨਿਰਤੋ ਅਹੋਸੀਤਿ.

ਪਾਟਲਿਪੁਤ੍ਤਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.