੧੦. ਗਣਪੇਤਵਤ੍ਥੁਵਣ੍ਣਨਾ

ਨਗ੍ਗਾ ਦੁਬ੍ਬਣ੍ਣਰੂਪਾਤ੍ਥਾਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਸਮ੍ਬਹੁਲੇ ਪੇਤੇ ਆਰਬ੍ਭ ਵੁਤ੍ਤਂ. ਸਾਵਤ੍ਥਿਯਂ ਕਿਰ ਸਮ੍ਬਹੁਲਾ ਮਨੁਸ੍ਸਾ ਗਣਭੂਤਾ ਅਸ੍ਸਦ੍ਧਾ ਅਪ੍ਪਸਨ੍ਨਾ ਮਚ੍ਛੇਰਮਲਪਰਿਯੁਟ੍ਠਿਤਚਿਤ੍ਤਾ ਦਾਨਾਦਿਸੁਚਰਿਤਵਿਮੁਖਾ ਹੁਤ੍ਵਾ ਚਿਰਂ ਜੀਵਿਤ੍ਵਾ ਕਾਯਸ੍ਸ ਭੇਦਾ ਨਗਰਸ੍ਸ ਸਮੀਪੇ ਪੇਤਯੋਨਿਯਂ ਨਿਬ੍ਬਤ੍ਤਿਂਸੁ. ਅਥੇਕਦਿਵਸਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਸਾਵਤ੍ਥਿਯਂ ਪਿਣ੍ਡਾਯ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਪੇਤੇ ਦਿਸ੍ਵਾ –

੭੮੨. ‘‘ਨਗ੍ਗਾ ਦੁਬ੍ਬਣਰੂਪਾਤ੍ਥ, ਕਿਸਾ ਧਮਨਿਸਨ੍ਥਤਾ;

ਉਪ੍ਫਾਸੁਲਿਕਾ ਕਿਸਿਕਾ, ਕੇ ਨੁ ਤੁਮ੍ਹੇਤ੍ਥ ਮਾਰਿਸਾ’’ਤਿ. –

ਗਾਥਾਯ ਪੁਚ੍ਛਿ. ਤਤ੍ਥ ਦੁਬ੍ਬਣ੍ਣਰੂਪਾਤ੍ਥਾਤਿ ਦੁਬ੍ਬਣ੍ਣਸਰੀਰਾ ਹੋਥ. ਕੇ ਨੁ ਤੁਮ੍ਹੇਤ੍ਥਾਤਿ ਤੁਮ੍ਹੇ ਕੇ ਨੁ ਨਾਮ ਭਵਥ. ਮਾਰਿਸਾਤਿ ਤੇ ਅਤ੍ਤਨੋ ਸਾਰੁਪ੍ਪਵਸੇਨ ਆਲਪਤਿ.

ਤਂ ਸੁਤ੍ਵਾ ਪੇਤਾ –

੭੮੩. ‘‘ਮਯਂ ਭਦਨ੍ਤੇ ਪੇਤਮ੍ਹਾ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ਅਤ੍ਤਨੋ ਪੇਤਭਾਵਂ ਪਕਾਸੇਤ੍ਵਾ ਪੁਨ ਥੇਰੇਨ –

੭੮੪. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ਕਤਕਮ੍ਮਂ ਪੁਚ੍ਛਿਤਾ –

੭੮੫. ‘‘ਅਨਾਵਟੇਸੁ ਤਿਤ੍ਥੇਸੁ, ਵਿਚਿਨਿਮ੍ਹਦ੍ਧਮਾਸਕਂ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਮ੍ਹ ਅਤ੍ਤਨੋ.

੭੮੬. ‘‘ਨਦਿਂ ਉਪੇਮ ਤਸਿਤਾ, ਰਿਤ੍ਤਕਾ ਪਰਿਵਤ੍ਤਤਿ;

ਛਾਯਂ ਉਪੇਮ ਉਣ੍ਹੇਸੁ, ਆਤਪੋ ਪਰਿਵਤ੍ਤਤਿ.

੭੮੭. ‘‘ਅਗ੍ਗਿਵਣ੍ਣੋ ਚ ਨੋ ਵਾਤੋ, ਡਹਨ੍ਤੋ ਉਪਵਾਯਤਿ;

ਏਤਞ੍ਚ ਭਨ੍ਤੇ ਅਰਹਾਮ, ਅਞ੍ਞਞ੍ਚ ਪਾਪਕਂ ਤਤੋ.

੭੮੮. ‘‘ਅਪਿ ਯੋਜਨਾਨਿ ਗਚ੍ਛਾਮ, ਛਾਤਾ ਆਹਾਰਗੇਧਿਨੋ;

ਅਲਦ੍ਧਾਵ ਨਿਵਤ੍ਤਾਮ, ਅਹੋ ਨੋ ਅਪ੍ਪਪੁਞ੍ਞਤਾ.

੭੮੯. ‘‘ਛਾਤਾ ਪਮੁਚ੍ਛਿਤਾ ਭਨ੍ਤਾ, ਭੂਮਿਯਂ ਪਟਿਸੁਮ੍ਭਿਤਾ;

ਉਤ੍ਤਾਨਾ ਪਟਿਕਿਰਾਮ, ਅਵਕੁਜ੍ਜਾ ਪਤਾਮਸੇ.

੭੯੦. ‘‘ਤੇ ਚ ਤਤ੍ਥੇਵ ਪਤਿਤਾ, ਭੂਮਿਯਂ ਪਟਿਸੁਮ੍ਭਿਤਾ;

ਉਰਂ ਸੀਸਞ੍ਚ ਘਟ੍ਟੇਮ, ਅਹੋ ਨੋ ਅਪ੍ਪਪੁਞ੍ਞਤਾ.

੭੯੧. ‘‘ਏਤਞ੍ਚ ਭਨ੍ਤੇ ਅਰਹਾਮ, ਅਞ੍ਞਞ੍ਚ ਪਾਪਕਂ ਤਤੋ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਮ੍ਹ ਅਤ੍ਤਨੋ.

੭੯੨. ‘‘ਤੇ ਹਿ ਨੂਨ ਇਤੋ ਗਨ੍ਤ੍ਵਾ, ਯੋਨਿਂ ਲਦ੍ਧਾਨ ਮਾਨੁਸਿਂ;

ਵਦਞ੍ਞੂ ਸੀਲਸਮ੍ਪਨ੍ਨਾ, ਕਾਹਾਮ ਕੁਸਲਂ ਬਹੁ’’ਨ੍ਤਿ. –

ਅਤ੍ਤਨਾ ਕਤਕਮ੍ਮਂ ਕਥੇਸੁਂ.

੭੮੮. ਤਤ੍ਥ ਅਪਿ ਯੋਜਨਾਨਿ ਗਚ੍ਛਾਮਾਤਿ ਅਨੇਕਾਨਿਪਿ ਯੋਜਨਾਨਿ ਗਚ੍ਛਾਮ. ਕਥਂ? ਛਾਤਾ ਆਹਾਰਗੇਧਿਨੋਤਿ, ਚਿਰਕਾਲਂ ਜਿਘਚ੍ਛਾਯ ਜਿਘਚ੍ਛਿਤਾ ਆਹਾਰੇ ਗਿਦ੍ਧਾ ਅਭਿਗਿਜ੍ਝਨ੍ਤਾ ਹੁਤ੍ਵਾ, ਏਵਂ ਗਨ੍ਤ੍ਵਾਪਿ ਕਿਞ੍ਚਿ ਆਹਾਰਂ ਅਲਦ੍ਧਾਯੇਵ ਨਿਵਤ੍ਤਾਮ. ਅਪ੍ਪਪੁਞ੍ਞਤਾਤਿ ਅਪੁਞ੍ਞਤਾ ਅਕਤਕਲ੍ਯਾਣਤਾ.

੭੮੯. ਉਤ੍ਤਾਨਾ ਪਟਿਕਿਰਾਮਾਤਿ ਕਦਾਚਿ ਉਤ੍ਤਾਨਾ ਹੁਤ੍ਵਾ ਵਿਕਿਰਿਯਮਾਨਙ੍ਗਪਚ੍ਚਙ੍ਗਾ ਵਿਯ ਵਤ੍ਤਾਮ. ਅਵਕੁਜ੍ਜਾ ਪਤਾਮਸੇਤਿ ਕਦਾਚਿ ਅਵਕੁਜ੍ਜਾ ਹੁਤ੍ਵਾ ਪਤਾਮ.

੭੯੦. ਤੇ ਚਾਤਿ ਤੇ ਮਯਂ. ਉਰਂ ਸੀਸਞ੍ਚ ਘਟ੍ਟੇਮਾਤਿ ਅਵਕੁਜ੍ਜਾ ਹੁਤ੍ਵਾ ਪਤਿਤਾ ਉਟ੍ਠਾਤੁਂ ਅਸਕ੍ਕੋਨ੍ਤਾ ਵੇਧਨ੍ਤਾ ਵੇਦਨਾਪ੍ਪਤ੍ਤਾ ਅਤ੍ਤਨੋ ਅਤ੍ਤਨੋ ਉਰਂ ਸੀਸਞ੍ਚ ਪਟਿਘਂਸਾਮ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

ਥੇਰੋ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਤਂ ਸੁਤ੍ਵਾ ਮਹਾਜਨੋ ਮਚ੍ਛੇਰਮਲਂ ਪਹਾਯ ਦਾਨਾਦਿਸੁਚਰਿਤਨਿਰਤੋ ਅਹੋਸੀਤਿ.

ਗਣਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.