੯. ਮਹਾਪੇਸਕਾਰਪੇਤਿਵਤ੍ਥੁਵਣ੍ਣਨਾ

ਗੂਥਞ੍ਚ ਮੁਤ੍ਤਂ ਰੁਹਿਰਞ੍ਚ ਪੁਬ੍ਬਨ੍ਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਅਞ੍ਞਤਰਂ ਪੇਸਕਾਰਪੇਤਿਂ ਆਰਬ੍ਭ ਵੁਤ੍ਤਂ. ਦ੍ਵਾਦਸਮਤ੍ਤਾ ਕਿਰ ਭਿਕ੍ਖੂ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਵਸਨਯੋਗ੍ਗਟ੍ਠਾਨਂ ਵੀਮਂਸਨ੍ਤਾ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਅਞ੍ਞਤਰਂ ਛਾਯੂਦਕਸਮ੍ਪਨ੍ਨਂ ਰਮਣੀਯਂ ਅਰਞ੍ਞਾਯਤਨਂ ਤਸ੍ਸ ਚ ਨਾਤਿਦੂਰੇ ਨਾਚ੍ਚਾਸਨ੍ਨੇ ਗੋਚਰਗਾਮਂ ਦਿਸ੍ਵਾ ਤਤ੍ਥ ਏਕਰਤ੍ਤਿਂ ਵਸਿਤ੍ਵਾ ਦੁਤਿਯਦਿਵਸੇ ਗਾਮਂ ਪਿਣ੍ਡਾਯ ਪਵਿਸਿਂਸੁ. ਤਤ੍ਥ ਏਕਾਦਸ ਪੇਸਕਾਰਾ ਪਟਿਵਸਨ੍ਤਿ, ਤੇ ਤੇ ਭਿਕ੍ਖੂ ਦਿਸ੍ਵਾ ਸਞ੍ਜਾਤਸੋਮਨਸ੍ਸਾ ਹੁਤ੍ਵਾ ਅਤ੍ਤਨੋ ਅਤ੍ਤਨੋ ਗੇਹਂ ਨੇਤ੍ਵਾ ਪਣੀਤੇਨ ਆਹਾਰੇਨ ਪਰਿਵਿਸਿਤ੍ਵਾ ਆਹਂਸੁ ‘‘ਕੁਹਿਂ, ਭਨ੍ਤੇ, ਗਚ੍ਛਥਾ’’ਤਿ? ‘‘ਯਤ੍ਥ ਅਮ੍ਹਾਕਂ ਫਾਸੁਕਂ, ਤਤ੍ਥ ਗਮਿਸ੍ਸਾਮਾ’’ਤਿ. ‘‘ਯਦਿ ਏਵਂ, ਭਨ੍ਤੇ, ਇਧੇਵ ਵਸਿਤਬ੍ਬ’’ਨ੍ਤਿ ਵਸ੍ਸੂਪਗਮਨਂ ਯਾਚਿਂਸੁ. ਭਿਕ੍ਖੂ ਸਮ੍ਪਟਿਚ੍ਛਿਂਸੁ. ਉਪਾਸਕਾ ਤੇਸਂ ਤਤ੍ਥ ਅਰਞ੍ਞਕੁਟਿਕਾਯੋ ਕਾਰੇਤ੍ਵਾ ਅਦਂਸੁ. ਭਿਕ੍ਖੂ ਤਤ੍ਥ ਵਸ੍ਸਂ ਉਪਗਚ੍ਛਿਂਸੁ.

ਤਤ੍ਥ ਜੇਟ੍ਠਕਪੇਸਕਾਰੋ ਦ੍ਵੇ ਭਿਕ੍ਖੂ ਚਤੂਹਿ ਪਚ੍ਚਯੇਹਿ ਸਕ੍ਕਚ੍ਚਂ ਉਪਟ੍ਠਹਿ, ਇਤਰੇ ਏਕੇਕਂ ਭਿਕ੍ਖੁਂ ਉਪਟ੍ਠਹਿਂਸੁ. ਜੇਟ੍ਠਕਪੇਸਕਾਰਸ੍ਸ ਭਰਿਯਾ ਅਸ੍ਸਦ੍ਧਾ ਅਪ੍ਪਸਨ੍ਨਾ ਮਿਚ੍ਛਾਦਿਟ੍ਠਿਕਾ ਮਚ੍ਛਰਿਨੀ ਭਿਕ੍ਖੂ ਨ ਸਕ੍ਕਚ੍ਚਂ ਉਪਟ੍ਠਾਤਿ. ਸੋ ਤਂ ਦਿਸ੍ਵਾ ਤਸ੍ਸਾਯੇਵ ਕਨਿਟ੍ਠਭਗਿਨਿਂ ਆਨੇਤ੍ਵਾ ਅਤ੍ਤਨੋ ਗੇਹੇ ਇਸ੍ਸਰਿਯਂ ਨਿਯ੍ਯਾਦੇਸਿ. ਸਾ ਸਦ੍ਧਾ ਪਸਨ੍ਨਾ ਹੁਤ੍ਵਾ ਸਕ੍ਕਚ੍ਚਂ ਭਿਕ੍ਖੂ ਪਟਿਜਗ੍ਗਿ. ਤੇ ਸਬ੍ਬੇ ਪੇਸਕਾਰੋ ਵਸ੍ਸਂ ਵੁਤ੍ਥਾਨਂ ਭਿਕ੍ਖੂਨਂ ਏਕੇਕਸ੍ਸ ਏਕੇਕਂ ਸਾਟਕਮਦਂਸੁ. ਤਤ੍ਥ ਮਚ੍ਛਰਿਨੀ ਜੇਟ੍ਠਪੇਸਕਾਰਸ੍ਸ ਭਰਿਯਾ ਪਦੁਟ੍ਠਚਿਤ੍ਤਾ ਅਤ੍ਤਨੋ ਸਾਮਿਕਂ ਪਰਿਭਾਸਿ – ‘‘ਯਂ ਤਯਾ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਦਾਨਂ ਦਿਨ੍ਨਂ ਅਨ੍ਨਪਾਨਂ, ਤਂ ਤੇ ਪਰਲੋਕੇ ਗੂਥਮੁਤ੍ਤਂ ਪੁਬ੍ਬਲੋਹਿਤਞ੍ਚ ਹੁਤ੍ਵਾ ਨਿਬ੍ਬਤ੍ਤਤੁ, ਸਾਟਕਾ ਚ ਜਲਿਤਾ ਅਯੋਮਯਪਟ੍ਟਾ ਹੋਨ੍ਤੂ’’ਤਿ.

ਤਤ੍ਥ ਜੇਟ੍ਠਪੇਸਕਾਰੋ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਵਿਞ੍ਝਾਟਵਿਯਂ ਆਨੁਭਾਵਸਮ੍ਪਨ੍ਨਾ ਰੁਕ੍ਖਦੇਵਤਾ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਪਨ ਕਦਰਿਯਾ ਭਰਿਯਾ ਕਾਲਂ ਕਤ੍ਵਾ ਤਸ੍ਸੇਵ ਵਸਨਟ੍ਠਾਨਸ੍ਸ ਅਵਿਦੂਰੇ ਪੇਤੀ ਹੁਤ੍ਵਾ ਨਿਬ੍ਬਤ੍ਤਿ. ਸਾ ਨਗ੍ਗਾ ਦੁਬ੍ਬਣ੍ਣਰੂਪਾ ਜਿਘਚ੍ਛਾਪਿਪਾਸਾਭਿਭੂਤਾ ਤਸ੍ਸ ਭੂਮਦੇਵਸ੍ਸ ਸਨ੍ਤਿਕਂ ਗਨ੍ਤ੍ਵਾ ਆਹ – ‘‘ਅਹਂ, ਸਾਮਿ, ਨਿਚ੍ਚੋਲ਼ਾ ਅਤਿਵਿਯ ਜਿਘਚ੍ਛਾਪਿਪਾਸਾਭਿਭੂਤਾ ਵਿਚਰਾਮਿ, ਦੇਹਿ ਮੇ ਵਤ੍ਥਂ ਅਨ੍ਨਪਾਨਞ੍ਚਾ’’ਤਿ. ਸੋ ਤਸ੍ਸਾ ਦਿਬ੍ਬਂ ਉਲ਼ਾਰਂ ਅਨ੍ਨਪਾਨਂ ਉਪਨੇਸਿ. ਤਂ ਤਾਯ ਗਹਿਤਮਤ੍ਤਮੇਵ ਗੂਥਮੁਤ੍ਤਂ ਪੁਬ੍ਬਲੋਹਿਤਞ੍ਚ ਸਮ੍ਪਜ੍ਜਤਿ, ਸਾਟਕਞ੍ਚ ਦਿਨ੍ਨਂ ਤਾਯ ਪਰਿਦਹਿਤਂ ਪਜ੍ਜਲਿਤਂ ਅਯੋਮਯਪਟ੍ਟਂ ਹੋਤਿ. ਸਾ ਮਹਾਦੁਕ੍ਖਂ ਅਨੁਭਵਨ੍ਤੀ ਤਂ ਛਡ੍ਡੇਤ੍ਵਾ ਕਨ੍ਦਨ੍ਤੀ ਵਿਚਰਤਿ.

ਤੇਨ ਚ ਸਮਯੇਨ ਅਞ੍ਞਤਰੋ ਭਿਕ੍ਖੁ ਵੁਤ੍ਥਵਸ੍ਸੋ ਸਤ੍ਥਾਰਂ ਵਨ੍ਦਿਤੁਂ ਗਚ੍ਛਨ੍ਤੋ ਮਹਤਾ ਸਤ੍ਥੇਨ ਸਦ੍ਧਿਂ ਵਿਞ੍ਝਾਟਵਿਂ ਪਟਿਪਜ੍ਜਿ. ਸਤ੍ਥਿਕਾ ਰਤ੍ਤਿਂ ਮਗ੍ਗਂ ਗਨ੍ਤ੍ਵਾ ਦਿਵਾ ਵਨੇ ਸਨ੍ਦਚ੍ਛਾਯੂਦਕਸਮ੍ਪਨ੍ਨਂ ਪਦੇਸਂ ਦਿਸ੍ਵਾ ਯਾਨਾਨਿ ਮੁਞ੍ਚਿਤ੍ਵਾ ਮੁਹੁਤ੍ਤਂ ਵਿਸ੍ਸਮਿਂਸੁ. ਭਿਕ੍ਖੁ ਪਨ ਵਿਵੇਕਕਾਮਤਾਯ ਥੋਕਂ ਅਪਕ੍ਕਮਿਤ੍ਵਾ ਅਞ੍ਞਤਰਸ੍ਸ ਸਨ੍ਦਚ੍ਛਾਯਸ੍ਸ ਵਨਗਹਨਪਟਿਚ੍ਛਨ੍ਨਸ੍ਸ ਰੁਕ੍ਖਸ੍ਸ ਮੂਲੇ ਸਙ੍ਘਾਟਿਂ ਪਞ੍ਞਪੇਤ੍ਵਾ ਨਿਪਨ੍ਨੋ ਰਤ੍ਤਿਯਂ ਮਗ੍ਗਗਮਨਪਰਿਸ੍ਸਮੇਨ ਕਿਲਨ੍ਤਕਾਯੋ ਨਿਦ੍ਦਂ ਉਪਗਞ੍ਛਿ. ਸਤ੍ਥਿਕਾ ਵਿਸ੍ਸਮਿਤ੍ਵਾ ਮਗ੍ਗਂ ਪਟਿਪਜ੍ਜਿਂਸੁ, ਸੋ ਭਿਕ੍ਖੁ ਨ ਪਟਿਬੁਜ੍ਝਿ. ਅਥ ਸਾਯਨ੍ਹਸਮਯੇ ਉਟ੍ਠਹਿਤ੍ਵਾ ਤੇ ਅਪਸ੍ਸਨ੍ਤੋ ਅਞ੍ਞਤਰਂ ਕੁਮ੍ਮਗ੍ਗਂ ਪਟਿਪਜ੍ਜਿਤ੍ਵਾ ਅਨੁਕ੍ਕਮੇਨ ਤਸ੍ਸਾ ਦੇਵਤਾਯ ਵਸਨਟ੍ਠਾਨਂ ਸਮ੍ਪਾਪੁਣਿ. ਅਥ ਨਂ ਸੋ ਦੇਵਪੁਤ੍ਤੋ ਦਿਸ੍ਵਾ ਮਨੁਸ੍ਸਰੂਪੇਨ ਉਪਗਨ੍ਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਅਤ੍ਤਨੋ ਵਿਮਾਨਂ ਪਵੇਸੇਤ੍ਵਾ ਪਾਦਬ੍ਭਞ੍ਜਨਾਦੀਨਿ ਦਤ੍ਵਾ ਪਯਿਰੁਪਾਸਨ੍ਤੋ ਨਿਸੀਦਿ. ਤਸ੍ਮਿਞ੍ਚ ਸਮਯੇ ਸਾ ਪੇਤੀ ਆਗਨ੍ਤ੍ਵਾ ‘‘ਦੇਹਿ ਮੇ, ਸਾਮਿ, ਅਨ੍ਨਪਾਨਂ ਸਾਟਕਞ੍ਚਾ’’ਤਿ ਆਹ. ਸੋ ਤਸ੍ਸਾ ਤਾਨਿ ਅਦਾਸਿ. ਤਾਨਿ ਚ ਤਾਯ ਗਹਿਤਮਤ੍ਤਾਨਿ ਗੂਥਮੁਤ੍ਤਪੁਬ੍ਬਲੋਹਿਤਪਜ੍ਜਲਿਤਅਯੋਪਟ੍ਟਾਯੇਵ ਅਹੇਸੁਂ. ਸੋ ਭਿਕ੍ਖੁ ਤਂ ਦਿਸ੍ਵਾ ਸਞ੍ਜਾਤਸਂਵੇਗੋ ਤਂ ਦੇਵਪੁਤ੍ਤਂ –

੫੪. ‘‘ਗੂਥਞ੍ਚ ਮੁਤ੍ਤਂ ਰੁਹਿਰਞ੍ਚ ਪੁਬ੍ਬਂ, ਪਰਿਭੁਞ੍ਜਤਿ ਕਿਸ੍ਸ ਅਯਂ ਵਿਪਾਕੋ;

ਅਯਂ ਨੁ ਕਿਂ ਕਮ੍ਮਮਕਾਸਿ ਨਾਰੀ, ਯਾ ਸਬ੍ਬਦਾ ਲੋਹਿਤਪੁਬ੍ਬਭਕ੍ਖਾ.

੫੫. ‘‘ਨਵਾਨਿ ਵਤ੍ਥਾਨਿ ਸੁਭਾਨਿ ਚੇਵ, ਮੁਦੂਨਿ ਸੁਦ੍ਧਾਨਿ ਚ ਲੋਮਸਾਨਿ;

ਦਿਨ੍ਨਾਨਿ ਮਿਸ੍ਸਾ ਕਿਤਕਾ ਭਵਨ੍ਤਿ, ਅਯਂ ਨੁ ਕਿਂ ਕਮ੍ਮਮਕਾਸਿ ਨਾਰੀ’’ਤਿ. –

ਦ੍ਵੀਹਿ ਗਾਥਾਹਿ ਪਟਿਪੁਚ੍ਛਿ. ਤਤ੍ਥ ਕਿਸ੍ਸ ਅਯਂ ਵਿਪਾਕੋਤਿ ਕੀਦਿਸਸ੍ਸ ਕਮ੍ਮਸ੍ਸ ਅਯਂ ਵਿਪਾਕੋ, ਯਂ ਏਸਾ ਇਦਾਨਿ ਪਚ੍ਚਨੁਭਵਤੀਤਿ. ਅਯਂ ਨੁ ਕਿਂ ਕਮ੍ਮਮਕਾਸਿ ਨਾਰੀਤਿ ਅਯਂ ਇਤ੍ਥੀ ਕਿਂ ਨੁ ਖੋ ਕਮ੍ਮਂ ਪੁਬ੍ਬੇ ਅਕਾਸਿ. ਯਾ ਸਬ੍ਬਦਾ ਲੋਹਿਤਪੁਬ੍ਬਭਕ੍ਖਾਤਿ ਯਾ ਸਬ੍ਬਕਾਲਂ ਰੁਹਿਰਪੁਬ੍ਬਮੇਵ ਭਕ੍ਖਤਿ ਪਰਿਭੁਞ੍ਜਤਿ. ਨਵਾਨੀਤਿ ਪਚ੍ਚਗ੍ਘਾਨਿ ਤਾਵਦੇਵ ਪਾਤੁਭੂਤਾਨਿ. ਸੁਭਾਨੀਤਿ ਸੁਨ੍ਦਰਾਨਿ ਦਸ੍ਸਨੀਯਾਨਿ. ਮੁਦੂਨੀਤਿ ਸੁਖਸਮ੍ਫਸ੍ਸਾਨਿ. ਸੁਦ੍ਧਾਨੀਤਿ ਪਰਿਸੁਦ੍ਧਵਣ੍ਣਾਨਿ. ਲੋਮਸਾਨੀਤਿ ਸਲੋਮਕਾਨਿ ਸੁਖਸਮ੍ਫਸ੍ਸਾਨਿ, ਸੁਨ੍ਦਰਾਨੀਤਿ ਅਤ੍ਥੋ. ਦਿਨ੍ਨਾਨਿ ਮਿਸ੍ਸਾ ਕਿਤਕਾ ਭਵਨ੍ਤੀਤਿ ਕਿਤਕਕਣ੍ਟਕਸਦਿਸਾਨਿ ਲੋਹਪਟ੍ਟਸਦਿਸਾਨਿ ਭਵਨ੍ਤਿ. ‘‘ਕੀਟਕਾ ਭਵਨ੍ਤੀ’’ਤਿ ਵਾ ਪਾਠੋ, ਖਾਦਕਪਾਣਕਵਣ੍ਣਾਨਿ ਭਵਨ੍ਤੀਤਿ ਅਤ੍ਥੋ.

ਏਵਂ ਸੋ ਦੇਵਪੁਤ੍ਤੋ ਤੇਨ ਭਿਕ੍ਖੁਨਾ ਪੁਟ੍ਠੋ ਤਾਯ ਪੁਰਿਮਜਾਤਿਯਾ ਕਤਕਮ੍ਮਂ ਪਕਾਸੇਨ੍ਤੋ –

੫੬. ‘‘ਭਰਿਯਾ ਮਮੇਸਾ ਅਹੁ ਭਦਨ੍ਤੇ, ਅਦਾਯਿਕਾ ਮਚ੍ਛਰਿਨੀ ਕਦਰਿਯਾ;

ਸਾ ਮਂ ਦਦਨ੍ਤਂ ਸਮਣਬ੍ਰਾਹ੍ਮਣਾਨਂ, ਅਕ੍ਕੋਸਤਿ ਚ ਪਰਿਭਾਸਤਿ ਚ.

੫੭. ‘‘ਗੂਥਞ੍ਚ ਮੁਤ੍ਤਂ ਰੁਹਿਰਞ੍ਚ ਪੁਬ੍ਬਂ, ਪਰਿਭੁਞ੍ਜ ਤ੍ਵਂ ਅਸੁਚਿਂ ਸਬ੍ਬਕਾਲਂ;

ਏਤਂ ਤੇ ਪਰਲੋਕਸ੍ਮਿਂ ਹੋਤੁ, ਵਤ੍ਥਾ ਚ ਤੇ ਕਿਤਕਸਮਾ ਭਵਨ੍ਤੁ;

ਏਤਾਦਿਸਂ ਦੁਚ੍ਚਰਿਤਂ ਚਰਿਤ੍ਵਾ, ਇਧਾਗਤਾ ਚਿਰਰਤ੍ਤਾਯ ਖਾਦਤੀ’’ਤਿ. –

ਦ੍ਵੇ ਗਾਥਾ ਅਭਾਸਿ. ਤਤ੍ਥ ਅਦਾਯਿਕਾਤਿ ਕਸ੍ਸਚਿ ਕਿਞ੍ਚਿਪਿ ਅਦਾਨਸੀਲਾ. ਮਚ੍ਛਰਿਨੀ ਕਦਰਿਯਾਤਿ ਪਠਮਂ ਮਚ੍ਛੇਰਮਲਸ੍ਸ ਸਭਾਵੇਨ ਮਚ੍ਛਰਿਨੀ, ਤਾਯ ਚ ਪੁਨਪ੍ਪੁਨਂ ਆਸੇਵਨਤਾਯ ਥਦ੍ਧਮਚ੍ਛਰਿਨੀ, ਤਾਯ ਕਦਰਿਯਾ ਅਹੂਤਿ ਯੋਜਨਾ. ਇਦਾਨਿ ਤਸ੍ਸਾ ਤਮੇਵ ਕਦਰਿਯਤਂ ਦਸ੍ਸੇਨ੍ਤੋ ‘‘ਸਾ ਮਂ ਦਦਨ੍ਤ’’ਨ੍ਤਿਆਦਿਮਾਹ. ਤਤ੍ਥ ਏਤਾਦਿਸਨ੍ਤਿ ਏਵਰੂਪਂ ਯਥਾਵੁਤ੍ਤਵਚੀਦੁਚ੍ਚਰਿਤਾਦਿਂ ਚਰਿਤ੍ਵਾ. ਇਧਾਗਤਾਤਿ ਇਮਂ ਪੇਤਲੋਕਂ ਆਗਤਾ, ਪੇਤਤ੍ਤਭਾਵਂ ਉਪਗਤਾ. ਚਿਰਰਤ੍ਤਾਯ ਖਾਦਤੀਤਿ ਚਿਰਕਾਲਂ ਗੂਥਾਦਿਮੇਵ ਖਾਦਤਿ. ਤਸ੍ਸਾ ਹਿ ਯੇਨਾਕਾਰੇਨ ਅਕ੍ਕੁਟ੍ਠਂ, ਤੇਨੇਵਾਕਾਰੇਨ ਪਵਤ੍ਤਮਾਨਮ੍ਪਿ ਫਲਂ. ਯਂ ਉਦ੍ਦਿਸ੍ਸ ਅਕ੍ਕੁਟ੍ਠਂ, ਤਤੋ ਅਞ੍ਞਤ੍ਥ ਪਥਵਿਯਂ ਕਮਨ੍ਤਕਸਙ੍ਖਾਤੇ ਮਤ੍ਥਕੇ ਅਸਨਿਪਾਤੋ ਵਿਯ ਅਤ੍ਤਨੋ ਉਪਰਿ ਪਤਤਿ.

ਏਵਂ ਸੋ ਦੇਵਪੁਤ੍ਤੋ ਤਾਯ ਪੁਬ੍ਬੇ ਕਤਕਮ੍ਮਂ ਕਥੇਤ੍ਵਾ ਪੁਨ ਤਂ ਭਿਕ੍ਖੁਂ ਆਹ – ‘‘ਅਤ੍ਥਿ ਪਨ, ਭਨ੍ਤੇ, ਕੋਚਿ ਉਪਾਯੋ ਇਮਂ ਪੇਤਲੋਕਤੋ ਮੋਚੇਤੁ’’ਨ੍ਤਿ? ‘‘ਅਤ੍ਥੀ’’ਤਿ ਚ ਵੁਤ੍ਤੇ ‘‘ਕਥੇਥ, ਭਨ੍ਤੇ’’ਤਿ. ਯਦਿ ਭਗਵਤੋ ਅਰਿਯਸਙ੍ਘਸ੍ਸ ਚ ਏਕਸ੍ਸੇਵ ਵਾ ਭਿਕ੍ਖੁਨੋ ਦਾਨਂ ਦਤ੍ਵਾ ਇਮਿਸ੍ਸਾ ਉਦ੍ਦਿਸਿਯਤਿ, ਅਯਞ੍ਚ ਤਂ ਅਨੁਮੋਦਤਿ, ਏਵਮੇਤਿਸ੍ਸਾ ਇਤੋ ਦੁਕ੍ਖਤੋ ਮੁਤ੍ਤਿ ਭਵਿਸ੍ਸਤੀਤਿ. ਤਂ ਸੁਤ੍ਵਾ ਦੇਵਪੁਤ੍ਤੋ ਤਸ੍ਸ ਭਿਕ੍ਖੁਨੋ ਪਣੀਤਂ ਅਨ੍ਨਪਾਨਂ ਦਤ੍ਵਾ ਤਂ ਦਕ੍ਖਿਣਂ ਤਸ੍ਸਾ ਪੇਤਿਯਾ ਆਦਿਸਿ. ਤਾਵਦੇਵ ਸਾ ਪੇਤੀ ਸੁਹਿਤਾ ਪੀਣਿਨ੍ਦ੍ਰਿਯਾ ਦਿਬ੍ਬਾਹਾਰਸ੍ਸ ਤਿਤ੍ਤਾ ਅਹੋਸਿ. ਪੁਨ ਤਸ੍ਸੇਵ ਭਿਕ੍ਖੁਨੋ ਹਤ੍ਥੇ ਦਿਬ੍ਬਸਾਟਕਯੁਗਂ ਭਗਵਨ੍ਤਂ ਉਦ੍ਦਿਸ੍ਸ ਦਤ੍ਵਾ ਤਞ੍ਚ ਦਕ੍ਖਿਣਂ ਪੇਤਿਯਾ ਆਦਿਸਿ. ਤਾਵਦੇਵ ਚ ਸਾ ਦਿਬ੍ਬਵਤ੍ਥਨਿਵਤ੍ਥਾ ਦਿਬ੍ਬਾਲਙ੍ਕਾਰਵਿਭੂਸਿਤਾ ਸਬ੍ਬਕਾਮਸਮਿਦ੍ਧਾ ਦੇਵਚ੍ਛਰਾਪਟਿਭਾਗਾ ਅਹੋਸਿ. ਸੋ ਚ ਭਿਕ੍ਖੁ ਤਸ੍ਸ ਦੇਵਪੁਤ੍ਤਸ੍ਸ ਇਦ੍ਧਿਯਾ ਤਦਹੇਵ ਸਾਵਤ੍ਥਿਂ ਪਤ੍ਵਾ ਜੇਤਵਨਂ ਪਵਿਸਿਤ੍ਵਾ ਭਗਵਤੋ ਸਨ੍ਤਿਕਂ ਉਪਗਨ੍ਤ੍ਵਾ ਵਨ੍ਦਿਤ੍ਵਾ ਤਂ ਸਾਟਕਯੁਗਂ ਦਤ੍ਵਾ ਤਂ ਪਵਤ੍ਤਿਂ ਆਰੋਚੇਸਿ. ਭਗਵਾਪਿ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਮਹਾਪੇਸਕਾਰਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.