੧੦. ਖਲ੍ਲਾਟਿਯਪੇਤਿਵਤ੍ਥੁਵਣ੍ਣਨਾ

ਕਾ ਨੁ ਅਨ੍ਤੋਵਿਮਾਨਸ੍ਮਿਨ੍ਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਅਞ੍ਞਤਰਂ ਖਲ੍ਲਾਟਿਯਪੇਤਿਂ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ਬਾਰਾਣਸਿਯਂ ਅਞ੍ਞਤਰਾ ਰੂਪੂਪਜੀਵਿਨੀ ਇਤ੍ਥੀ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ ਅਤਿਮਨੋਹਰਕੇਸਕਲਾਪੀ ਅਹੋਸਿ. ਤਸ੍ਸਾ ਹਿ ਕੇਸਾ ਨੀਲਾ ਦੀਘਾ ਤਨੂ ਮੁਦੂ ਸਿਨਿਦ੍ਧਾ ਵੇਲ੍ਲਿਤਗ੍ਗਾ ਦ੍ਵਿਹਤ੍ਥਗਯ੍ਹਾ ਵਿਸਟ੍ਠਾ ਯਾਵ ਮੇਖਲਾ ਕਲਾਪਾ ਓਲਮ੍ਬਨ੍ਤਿ. ਤਂ ਤਸ੍ਸਾ ਕੇਸਸੋਭਂ ਦਿਸ੍ਵਾ ਤਰੁਣਜਨੋ ਯੇਭੁਯ੍ਯੇਨ ਤਸ੍ਸਂ ਪਟਿਬਦ੍ਧਚਿਤ੍ਤੋ ਅਹੋਸਿ. ਅਥਸ੍ਸਾ ਤਂ ਕੇਸਸੋਭਂ ਅਸਹਮਾਨਾ ਇਸ੍ਸਾਪਕਤਾ ਕਤਿਪਯਾ ਇਤ੍ਥਿਯੋ ਮਨ੍ਤੇਤ੍ਵਾ ਤਸ੍ਸਾ ਏਵ ਪਰਿਚਾਰਿਕਦਾਸਿਂ ਆਮਿਸੇਨ ਉਪਲਾਪੇਤ੍ਵਾ ਤਾਯ ਤਸ੍ਸਾ ਕੇਸੂਪਪਾਤਨਂ ਭੇਸਜ੍ਜਂ ਦਾਪੇਸੁਂ. ਸਾ ਕਿਰ ਦਾਸੀ ਤਂ ਭੇਸਜ੍ਜਂ ਨ੍ਹਾਨਿਯਚੁਣ੍ਣੇਨ ਸਦ੍ਧਿਂ ਪਯੋਜੇਤ੍ਵਾ ਗਙ੍ਗਾਯ ਨਦਿਯਾ ਨ੍ਹਾਨਕਾਲੇ ਤਸ੍ਸਾ ਅਦਾਸਿ. ਸਾ ਤੇਨ ਕੇਸਮੂਲੇਸੁ ਤੇਮੇਤ੍ਵਾ ਉਦਕੇ ਨਿਮੁਜ੍ਜਿ, ਨਿਮੁਜ੍ਜਨਮਤ੍ਤੇਯੇਵ ਕੇਸਾ ਸਮੂਲਾ ਪਰਿਪਤਿਂਸੁ, ਸੀਸਂ ਚਸ੍ਸਾ ਤਿਤ੍ਤਕਲਾਬੁਸਦਿਸਂ ਅਹੋਸਿ. ਅਥ ਸਾ ਸਬ੍ਬਸੋ ਵਿਲੂਨਕੇਸਾ ਲੁਞ੍ਚਿਤਮਤ੍ਥਕਾ ਕਪੋਤੀ ਵਿਯ ਵਿਰੂਪਾ ਹੁਤ੍ਵਾ ਲਜ੍ਜਾਯ ਅਨ੍ਤੋਨਗਰਂ ਪਵਿਸਿਤੁਂ ਅਸਕ੍ਕੋਨ੍ਤੀ ਵਤ੍ਥੇਨ ਸੀਸਂ ਵੇਠੇਤ੍ਵਾ ਬਹਿਨਗਰੇ ਅਞ੍ਞਤਰਸ੍ਮਿਂ ਪਦੇਸੇ ਵਾਸਂ ਕਪ੍ਪੇਨ੍ਤੀ ਕਤਿਪਾਹਚ੍ਚਯੇਨ ਅਪਗਤਲਜ੍ਜਾ ਤਤੋ ਨਿਵਤ੍ਤੇਤ੍ਵਾ ਤਿਲਾਨਿ ਪੀਲ਼ੇਤ੍ਵਾ ਤੇਲਵਣਿਜ੍ਜਂ ਸੁਰਾਵਣਿਜ੍ਜਞ੍ਚ ਕਰੋਨ੍ਤੀ ਜੀਵਿਕਂ ਕਪ੍ਪੇਸਿ. ਸਾ ਏਕਦਿਵਸਂ ਦ੍ਵੀਸੁ ਤੀਸੁ ਮਨੁਸ੍ਸੇਸੁ ਸੁਰਾਮਤ੍ਤੇਸੁ ਮਹਾਨਿਦ੍ਦਂ ਓਕ੍ਕਮਨ੍ਤੇਸੁ ਸਿਥਿਲਭੂਤਾਨਿ ਤੇਸਂ ਨਿਵਤ੍ਥਵਤ੍ਥਾਨਿ ਅਵਹਰਿ.

ਅਥੇਕਦਿਵਸਂ ਸਾ ਏਕਂ ਖੀਣਾਸਵਤ੍ਥੇਰਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤਾ ਅਤ੍ਤਨੋ ਘਰਂ ਨੇਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਾਪੇਤ੍ਵਾ ਤੇਲਸਂਸਟ੍ਠਂ ਦੋਣਿਨਿਮ੍ਮਜ੍ਜਨਿਂ ਪਿਞ੍ਞਾਕਮਦਾਸਿ. ਸੋ ਤਸ੍ਸਾ ਅਨੁਕਮ੍ਪਾਯ ਤਂ ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿ. ਸਾ ਪਸਨ੍ਨਮਾਨਸਾ ਉਪਰਿ ਛਤ੍ਤਂ ਧਾਰਯਮਾਨਾ ਅਟ੍ਠਾਸਿ. ਸੋ ਚ ਥੇਰੋ ਤਸ੍ਸਾ ਚਿਤ੍ਤਂ ਪਹਂਸੇਨ੍ਤੋ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸਾ ਚ ਇਤ੍ਥੀ ਅਨੁਮੋਦਨਕਾਲੇਯੇਵ ‘‘ਮਯ੍ਹਂ ਕੇਸਾ ਦੀਘਾ ਤਨੂ ਸਿਨਿਦ੍ਧਾ ਮੁਦੂ ਵੇਲ੍ਲਿਤਗ੍ਗਾ ਹੋਨ੍ਤੂ’’ਤਿ ਪਤ੍ਥਨਮਕਾਸਿ.

ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਮਿਸ੍ਸਕਕਮ੍ਮਸ੍ਸ ਫਲੇਨ ਸਮੁਦ੍ਦਮਜ੍ਝੇ ਕਨਕਵਿਮਾਨੇ ਏਕਿਕਾ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸਾ ਕੇਸਾ ਪਤ੍ਥਿਤਾਕਾਰਾਯੇਵ ਸਮ੍ਪਜ੍ਜਿਂਸੁ. ਮਨੁਸ੍ਸਾਨਂ ਸਾਟਕਾਵਹਰਣੇਨ ਪਨ ਨਗ੍ਗਾ ਅਹੋਸਿ. ਸਾ ਤਸ੍ਮਿਂ ਕਨਕਵਿਮਾਨੇ ਪੁਨਪ੍ਪੁਨਂ ਉਪ੍ਪਜ੍ਜਿਤ੍ਵਾ ਏਕਂ ਬੁਦ੍ਧਨ੍ਤਰਂ ਨਗ੍ਗਾਵ ਹੁਤ੍ਵਾ ਵੀਤਿਨਾਮੇਸਿ. ਅਥ ਅਮ੍ਹਾਕਂ ਭਗਵਤਿ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਪੁਬ੍ਬੇਨ ਸਾਵਤ੍ਥਿਯਂ ਵਿਹਰਨ੍ਤੇ ਸਾਵਤ੍ਥਿਵਾਸਿਨੋ ਸਤ੍ਤਸਤਾ ਵਾਣਿਜਾ ਸੁਵਣ੍ਣਭੂਮਿਂ ਉਦ੍ਦਿਸ੍ਸ ਨਾਵਾਯ ਮਹਾਸਮੁਦ੍ਦਂ ਓਤਰਿਂਸੁ. ਤੇਹਿ ਆਰੁਲ਼੍ਹਾ ਨਾਵਾ ਵਿਸਮਵਾਤਵੇਗੁਕ੍ਖਿਤ੍ਤਾ ਇਤੋ ਚਿਤੋ ਚ ਪਰਿਬ੍ਭਮਨ੍ਤੀ ਤਂ ਪਦੇਸਂ ਅਗਮਾਸਿ. ਅਥ ਸਾ ਵਿਮਾਨਪੇਤੀ ਸਹ ਵਿਮਾਨੇਨ ਤੇਸਂ ਅਤ੍ਤਾਨਂ ਦਸ੍ਸੇਸਿ. ਤਂ ਦਿਸ੍ਵਾ ਜੇਟ੍ਠਵਾਣਿਜੋ ਪੁਚ੍ਛਨ੍ਤੋ –

੫੮. ‘‘ਕਾ ਨੁ ਅਨ੍ਤੋਵਿਮਾਨਸ੍ਮਿਂ, ਤਿਟ੍ਠਨ੍ਤੀ ਨੂਪਨਿਕ੍ਖਮਿ;

ਉਪਨਿਕ੍ਖਮਸ੍ਸੁ ਭਦ੍ਦੇ, ਪਸ੍ਸਾਮ ਤਂ ਬਹਿਟ੍ਠਿਤ’’ਨ੍ਤਿ. –

ਗਾਥਮਾਹ. ਤਤ੍ਥ ਕਾ ਨੁ ਅਨ੍ਤੋਵਿਮਾਨਸ੍ਮਿਂ ਤਿਟ੍ਠਨ੍ਤੀਤਿ ਵਿਮਾਨਸ੍ਸ ਅਨ੍ਤੋ ਅਬ੍ਭਨ੍ਤਰੇ ਤਿਟ੍ਠਨ੍ਤੀ ਕਾ ਨੁ ਤ੍ਵਂ, ਕਿਂ ਮਨੁਸ੍ਸਿਤ੍ਥੀ, ਉਦਾਹੁ ਅਮਨੁਸ੍ਸਿਤ੍ਥੀਤਿ ਪੁਚ੍ਛਤਿ. ਨੂਪਨਿਕ੍ਖਮੀਤਿ ਵਿਮਾਨਤੋ ਨ ਨਿਕ੍ਖਮਿ. ਉਪਨਿਕ੍ਖਮਸ੍ਸੁ, ਭਦ੍ਦੇ, ਪਸ੍ਸਾਮ ਤਂ ਬਹਿਟ੍ਠਿਤਨ੍ਤਿ, ਭਦ੍ਦੇ, ਤਂ ਮਯਂ ਬਹਿ ਠਿਤਂ ਪਸ੍ਸਾਮ ਦਟ੍ਠੁਕਾਮਮ੍ਹਾ, ਤਸ੍ਮਾ ਵਿਮਾਨਤੋ ਨਿਕ੍ਖਮਸ੍ਸੁ. ‘‘ਉਪਨਿਕ੍ਖਮਸ੍ਸੁ ਭਦ੍ਦਨ੍ਤੇ’’ਤਿ ਵਾ ਪਾਠੋ, ਭਦ੍ਦਂ ਤੇ ਅਤ੍ਥੂਤਿ ਅਤ੍ਥੋ.

ਅਥਸ੍ਸ ਸਾ ਅਤ੍ਤਨੋ ਬਹਿ ਨਿਕ੍ਖਮਿਸੁਂ ਅਸਕ੍ਕੁਣੇਯ੍ਯਤਂ ਪਕਾਸੇਨ੍ਤੀ –

੫੯. ‘‘ਅਟ੍ਟੀਯਾਮਿ ਹਰਾਯਾਮਿ, ਨਗ੍ਗਾ ਨਿਕ੍ਖਮਿਤੁਂ ਬਹਿ;

ਕੇਸੇਹਮ੍ਹਿ ਪਟਿਚ੍ਛਨ੍ਨਾ, ਪੁਞ੍ਞਂ ਮੇ ਅਪ੍ਪਕਂ ਕਤ’’ਨ੍ਤਿ. –

ਗਾਥਮਾਹ. ਤਤ੍ਥ ਅਟ੍ਟੀਯਾਮੀਤਿ ਨਗ੍ਗਾ ਹੁਤ੍ਵਾ ਬਹਿ ਨਿਕ੍ਖਮਿਤੁਂ ਅਟ੍ਟਿਕਾ ਦੁਕ੍ਖਿਤਾ ਅਮ੍ਹਿ. ਹਰਾਯਾਮੀਤਿ ਲਜ੍ਜਾਮਿ. ਕੇਸੇਹਮ੍ਹਿ ਪਟਿਚ੍ਛਨ੍ਨਾਤਿ ਕੇਸੇਹਿ ਅਮ੍ਹਿ ਅਹਂ ਪਟਿਚ੍ਛਾਦਿਤਾ ਪਾਰੁਤਸਰੀਰਾ. ਪੁਞ੍ਞਂ ਮੇ ਅਪ੍ਪਕਂ ਕਤਨ੍ਤਿ ਅਪ੍ਪਕਂ ਪਰਿਤ੍ਤਂ ਮਯਾ ਕੁਸਲਕਮ੍ਮਂ ਕਤਂ, ਪਿਞ੍ਞਾਕਦਾਨਮਤ੍ਤਨ੍ਤਿ ਅਧਿਪ੍ਪਾਯੋ.

ਅਥਸ੍ਸਾ ਵਾਣਿਜੋ ਅਤ੍ਤਨੋ ਉਤ੍ਤਰਿਸਾਟਕਂ ਦਾਤੁਕਾਮੋ –-

੬੦. ‘‘ਹਨ੍ਦੁਤ੍ਤਰੀਯਂ ਦਦਾਮਿ ਤੇ, ਇਦਂ ਦੁਸ੍ਸਂ ਨਿਵਾਸਯ;

ਇਦਂ ਦੁਸ੍ਸਂ ਨਿਵਾਸੇਤ੍ਵਾ, ਏਹਿ ਨਿਕ੍ਖਮ ਸੋਭਨੇ;

ਉਪਨਿਕ੍ਖਮਸ੍ਸੁ ਭਦ੍ਦੇ, ਪਸ੍ਸਾਮ ਤਂ ਬਹਿਟ੍ਠਿਤ’’ਨ੍ਤਿ. –

ਗਾਥਮਾਹ. ਤਤ੍ਥ ਹਨ੍ਦਾਤਿ ਗਣ੍ਹ. ਉਤ੍ਤਰੀਯਨ੍ਤਿ ਉਪਸਂਬ੍ਯਾਨਂ ਉਤ੍ਤਰਿਸਾਟਕਨ੍ਤਿ ਅਤ੍ਥੋ. ਦਦਾਮਿ ਤੇਤਿ ਤੁਯ੍ਹਂ ਦਦਾਮਿ. ਇਦਂ ਦੁਸ੍ਸਂ ਨਿਵਾਸਯਾਤਿ ਇਦਂ ਮਮ ਉਤ੍ਤਰਿਸਾਟਕਂ ਤ੍ਵਂ ਨਿਵਾਸੇਹਿ. ਸੋਭਨੇਤਿ ਸੁਨ੍ਦਰਰੂਪੇ.

ਏਵਞ੍ਚ ਪਨ ਵਤ੍ਵਾ ਅਤ੍ਤਨੋ ਉਤ੍ਤਰਿਸਾਟਕਂ ਤਸ੍ਸਾ ਉਪਨੇਸਿ, ਸਾ ਤਥਾ ਦਿਯ੍ਯਮਾਨਸ੍ਸ ਅਤ੍ਤਨੋ ਅਨੁਪਕਪ੍ਪਨੀਯਤਞ੍ਚ, ਯਥਾ ਦਿਯ੍ਯਮਾਨਂ ਉਪਕਪ੍ਪਤਿ, ਤਞ੍ਚ ਦਸ੍ਸੇਨ੍ਤੀ –

੬੧. ‘‘ਹਤ੍ਥੇਨ ਹਤ੍ਥੇ ਤੇ ਦਿਨ੍ਨਂ, ਨ ਮਯ੍ਹਂ ਉਪਕਪ੍ਪਤਿ;

ਏਸੇਤ੍ਥੁਪਾਸਕੋ ਸਦ੍ਧੋ, ਸਮ੍ਮਾਸਮ੍ਬੁਦ੍ਧਸਾਵਕੋ.

੬੨. ‘‘ਏਤਂ ਅਚ੍ਛਾਦਯਿਤ੍ਵਾਨ, ਮਮ ਦਕ੍ਖਿਣਮਾਦਿਸ;

ਤਥਾਹਂ ਸੁਖਿਤਾ ਹੇਸ੍ਸਂ, ਸਬ੍ਬਕਾਮਸਮਿਦ੍ਧਿਨੀ’’ਤਿ. –

ਗਾਥਾਦ੍ਵਯਮਾਹ. ਤਤ੍ਥ ਹਤ੍ਥੇਨ ਹਤ੍ਥੇ ਤੇ ਦਿਨ੍ਨਂ, ਨ ਮਯ੍ਹਂ ਉਪਕਪ੍ਪਤੀਤਿ, ਮਾਰਿਸ, ਤਵ ਹਤ੍ਥੇਨ ਮਮ ਹਤ੍ਥੇ ਤਯਾ ਦਿਨ੍ਨਂ ਨ ਮਯ੍ਹਂ ਉਪਕਪ੍ਪਤਿ ਨ ਵਿਨਿਯੁਜ੍ਜਤਿ, ਉਪਭੋਗਯੋਗ੍ਗਂ ਨ ਹੋਤੀਤਿ ਅਤ੍ਥੋ. ਏਸੇਤ੍ਥੁਪਾਸਕੋ ਸਦ੍ਧੋਤਿ ਏਸੋ ਰਤਨਤ੍ਤਯਂ ਉਦ੍ਦਿਸ੍ਸ ਸਰਣਗਮਨੇਨ ਉਪਾਸਕੋ ਕਮ੍ਮਫਲਸਦ੍ਧਾਯ ਚ ਸਮਨ੍ਨਾਗਤਤ੍ਤਾ ਸਦ੍ਧੋ ਏਤ੍ਥ ਏਤਸ੍ਮਿਂ ਜਨਸਮੂਹੇ ਅਤ੍ਥਿ. ਏਤਂ ਅਚ੍ਛਾਦਯਿਤ੍ਵਾਨ, ਮਮ ਦਕ੍ਖਿਣਮਾਦਿਸਾਤਿ ਏਤਂ ਉਪਾਸਕਂ ਮਮ ਦਿਯ੍ਯਮਾਨਂ ਸਾਟਕਂ ਪਰਿਦਹਾਪੇਤ੍ਵਾ ਤਂ ਦਕ੍ਖਿਣਂ ਮਯ੍ਹਂ ਆਦਿਸ ਪਤ੍ਤਿਦਾਨਂ ਦੇਹਿ. ਤਥਾਹਂ ਸੁਖਿਤਾ ਹੇਸ੍ਸਨ੍ਤਿ ਤਥਾ ਕਤੇ ਅਹਂ ਸੁਖਿਤਾ ਦਿਬ੍ਬਵਤ੍ਥਨਿਵਤ੍ਥਾ ਸੁਖਪ੍ਪਤ੍ਤਾ ਭਵਿਸ੍ਸਾਮੀਤਿ.

ਤਂ ਸੁਤ੍ਵਾ ਵਾਣਿਜਾ ਤਂ ਉਪਾਸਕਂ ਨ੍ਹਾਪੇਤ੍ਵਾ ਵਿਲਿਮ੍ਪੇਤ੍ਵਾ ਵਤ੍ਥਯੁਗੇਨ ਅਚ੍ਛਾਦੇਸੁਂ. ਤਮਤ੍ਥਂ ਪਕਾਸੇਨ੍ਤਾ ਸਙ੍ਗੀਤਿਕਾਰਾ –

੬੩. ‘‘ਤਞ੍ਚ ਤੇ ਨ੍ਹਾਪਯਿਤ੍ਵਾਨ, ਵਿਲਿਮ੍ਪੇਤ੍ਵਾਨ ਵਾਣਿਜਾ;

ਵਤ੍ਥੇਹਚ੍ਛਾਦਯਿਤ੍ਵਾਨ, ਤਸ੍ਸਾ ਦਕ੍ਖਿਣਮਾਦਿਸੁਂ.

੬੪. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਵਿਪਾਕੋ ਉਦਪਜ੍ਜਥ;

ਭੋਜਨਚ੍ਛਾਦਨਪਾਨੀਯਂ, ਦਕ੍ਖਿਣਾਯ ਇਦਂ ਫਲਂ.

੬੫. ‘‘ਤਤੋ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਹਸਨ੍ਤੀ ਵਿਮਾਨਾ ਨਿਕ੍ਖਮਿ, ਦਕ੍ਖਿਣਾਯ ਇਦਂ ਫਲ’’ਨ੍ਤਿ. –

ਤਿਸ੍ਸੋ ਗਾਥਾਯੋ ਅਵੋਚੁਂ.

੬੩. ਤਤ੍ਥ ਤਨ੍ਤਿ ਤਂ ਉਪਾਸਕਂ. ਚ-ਸਦ੍ਦੋ ਨਿਪਾਤਮਤ੍ਤਂ. ਤੇਤਿ ਤੇ ਵਾਣਿਜਾਤਿ ਯੋਜਨਾ. ਵਿਲਿਮ੍ਪੇਤ੍ਵਾਨਾਤਿ ਉਤ੍ਤਮੇਨ ਗਨ੍ਧੇਨ ਵਿਲਿਮ੍ਪੇਤ੍ਵਾ. ਵਤ੍ਥੇਹਚ੍ਛਾਦਯਿਤ੍ਵਾਨਾਤਿ ਵਣ੍ਣਗਨ੍ਧਰਸਸਮ੍ਪਨ੍ਨਂ ਸਬ੍ਯਞ੍ਜਨਂ ਭੋਜਨਂ ਭੋਜੇਤ੍ਵਾ ਨਿਵਾਸਨਂ ਉਤ੍ਤਰੀਯਨ੍ਤਿ ਦ੍ਵੀਹਿ ਵਤ੍ਥੇਹਿ ਅਚ੍ਛਾਦੇਸੁਂ, ਦ੍ਵੇ ਵਤ੍ਥਾਨਿ ਅਦਂਸੂਤਿ ਅਤ੍ਥੋ. ਤਸ੍ਸਾ ਦਕ੍ਖਿਣਮਾਦਿਸੁਨ੍ਤਿ ਤਸ੍ਸਾ ਪੇਤਿਯਾ ਤਂ ਦਕ੍ਖਿਣਂ ਆਦਿਸਿਂਸੁ.

੬੪. ਸਮਨਨ੍ਤਰਾਨੁਦ੍ਦਿਟ੍ਠੇਤਿ ਅਨੂ-ਤਿ ਨਿਪਾਤਮਤ੍ਤਂ, ਤਸ੍ਸਾ ਦਕ੍ਖਿਣਾਯ ਉਦ੍ਦਿਟ੍ਠਸਮਨਨ੍ਤਰਮੇਵ. ਵਿਪਾਕੋ ਉਦਪਜ੍ਜਥਾਤਿ ਤਸ੍ਸਾ ਪੇਤਿਯਾ ਵਿਪਾਕੋ ਦਕ੍ਖਿਣਾਯ ਫਲਂ ਉਪ੍ਪਜ੍ਜਿ. ਕੀਦਿਸੋਤਿ ਪੇਤੀ ਆਹ ਭੋਜਨਚ੍ਛਾਦਨਪਾਨੀਯਨ੍ਤਿ. ਨਾਨਪ੍ਪਕਾਰਂ ਦਿਬ੍ਬਭੋਜਨਸਦਿਸਂ ਭੋਜਨਞ੍ਚ ਨਾਨਾਵਿਰਾਗਵਣ੍ਣਸਮੁਜ੍ਜਲਂ ਦਿਬ੍ਬਵਤ੍ਥਸਦਿਸਂ ਵਤ੍ਥਞ੍ਚ ਅਨੇਕਵਿਧਂ ਪਾਨਕਞ੍ਚ ਦਕ੍ਖਿਣਾਯ ਇਦਂ ਈਦਿਸਂ ਫਲਂ ਉਦਪਜ੍ਜਥਾਤਿ ਯੋਜਨਾ.

੬੫. ਤਤੋਤਿ ਯਥਾਵੁਤ੍ਤਭੋਜਨਾਦਿਪਟਿਲਾਭਤੋ ਪਚ੍ਛਾ. ਸੁਦ੍ਧਾਤਿ ਨ੍ਹਾਨੇਨ ਸੁਦ੍ਧਸਰੀਰਾ. ਸੁਚਿਵਸਨਾਤਿ ਸੁਵਿਸੁਦ੍ਧਵਤ੍ਥਨਿਵਤ੍ਥਾ. ਕਾਸਿਕੁਤ੍ਤਮਧਾਰਿਨੀਤਿ ਕਾਸਿਕਵਤ੍ਥਤੋਪਿ ਉਤ੍ਤਮਵਤ੍ਥਧਾਰਿਨੀ. ਹਸਨ੍ਤੀਤਿ ‘‘ਪਸ੍ਸਥ ਤਾਵ ਤੁਮ੍ਹਾਕਂ ਦਕ੍ਖਿਣਾਯ ਇਦਂ ਫਲਵਿਸੇਸ’’ਨ੍ਤਿ ਪਕਾਸਨਵਸੇਨ ਹਸਮਾਨਾ ਵਿਮਾਨਤੋ ਨਿਕ੍ਖਮਿ.

ਅਥ ਤੇ ਵਾਣਿਜਾ ਏਵਂ ਪਚ੍ਚਕ੍ਖਤੋ ਪੁਞ੍ਞਫਲਂ ਦਿਸ੍ਵਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ਤਸ੍ਮਿਂ ਉਪਾਸਕੇ ਸਞ੍ਜਾਤਗਾਰਵਬਹੁਮਾਨਾ ਕਤਞ੍ਜਲੀ ਤਂ ਪਯਿਰੁਪਾਸਿਂਸੁ. ਸੋਪਿ ਤੇ ਧਮ੍ਮਕਥਾਯ ਭਿਯ੍ਯੋਸੋਮਤ੍ਤਾਯ ਪਸਾਦੇਤ੍ਵਾ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਪੇਸਿ. ਤੇ ਤਾਯ ਵਿਮਾਨਪੇਤਿਯਾ ਕਤਕਮ੍ਮਂ –

੬੬. ‘‘ਸੁਚਿਤ੍ਤਰੂਪਂ ਰੁਚਿਰਂ, ਵਿਮਾਨਂ ਤੇ ਪਭਾਸਤਿ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਇਮਾਯ ਗਾਥਾਯ ਪੁਚ੍ਛਿਂਸੁ. ਤਤ੍ਥ ਸੁਚਿਤ੍ਤਰੂਪਨ੍ਤਿ ਹਤ੍ਥਿਅਸ੍ਸਇਤ੍ਥਿਪੁਰਿਸਾਦਿਵਸੇਨ ਚੇਵ ਮਾਲਾਕਮ੍ਮਲਤਾਕਮ੍ਮਾਦਿਵਸੇਨ ਚ ਸੁਟ੍ਠੁ ਵਿਹਿਤਚਿਤ੍ਤਰੂਪਂ. ਰੁਚਿਰਨ੍ਤਿ ਰਮਣੀਯਂ ਦਸ੍ਸਨੀਯਂ. ਕਿਸ੍ਸ ਕਮ੍ਮਸ੍ਸਿਦਂ ਫਲਨ੍ਤਿ ਕੀਦਿਸਸ੍ਸ ਕਮ੍ਮਸ੍ਸ, ਕਿਂ ਦਾਨਮਯਸ੍ਸ ਉਦਾਹੁ ਸੀਲਮਯਸ੍ਸ ਇਦਂ ਫਲਨ੍ਤਿ ਅਤ੍ਥੋ.

ਸਾ ਤੇਹਿ ਏਵਂ ਪੁਟ੍ਠਾ ‘‘ਮਯਾ ਕਤਸ੍ਸ ਪਰਿਤ੍ਤਕਸ੍ਸ ਕੁਸਲਕਮ੍ਮਸ੍ਸ ਤਾਵ ਇਦਂ ਫਲਂ, ਅਕੁਸਲਕਮ੍ਮਸ੍ਸ ਪਨ ਆਯਤਿਂ ਨਿਰਯੇ ਏਦਿਸਂ ਭਵਿਸ੍ਸਤੀ’’ਤਿ ਤਦੁਭਯਂ ਆਚਿਕ੍ਖਨ੍ਤੀ –

੬੭. ‘‘ਭਿਕ੍ਖੁਨੋ ਚਰਮਾਨਸ੍ਸ, ਦੋਣਿਨਿਮ੍ਮਜ੍ਜਨਿਂ ਅਹਂ;

ਅਦਾਸਿਂ ਉਜੁਭੂਤਸ੍ਸ, ਵਿਪ੍ਪਸਨ੍ਨੇਨ ਚੇਤਸਾ.

੬੮. ‘‘ਤਸ੍ਸ ਕਮ੍ਮਸ੍ਸ ਕੁਸਲਸ੍ਸ, ਵਿਪਾਕਂ ਦੀਘਮਨ੍ਤਰਂ;

ਅਨੁਭੋਮਿ ਵਿਮਾਨਸ੍ਮਿਂ, ਤਞ੍ਚ ਦਾਨਿ ਪਰਿਤ੍ਤਕਂ.

੬੯. ‘‘ਉਦ੍ਧਂ ਚਤੂਹਿ ਮਾਸੇਹਿ, ਕਾਲਂਕਿਰਿਯਾ ਭਵਿਸ੍ਸਤਿ;

ਏਕਨ੍ਤਕਟੁਕਂ ਘੋਰਂ, ਨਿਰਯਂ ਪਪਤਿਸ੍ਸਹਂ.

੭੦. ‘‘ਚਤੁਕ੍ਕਣ੍ਣਂ ਚਤੁਦ੍ਵਾਰਂ, ਵਿਭਤ੍ਤਂ ਭਾਗਸੋ ਮਿਤਂ;

ਅਯੋਪਾਕਾਰਪਰਿਯਨ੍ਤਂ, ਅਯਸਾ ਪਟਿਕੁਜ੍ਜਿਤਂ.

੭੧. ‘‘ਤਸ੍ਸ ਅਯੋਮਯਾ ਭੂਮਿ, ਜਲਿਤਾ ਤੇਜਸਾ ਯੁਤਾ;

ਸਮਨ੍ਤਾ ਯੋਜਨਸਤਂ, ਫਰਿਤ੍ਵਾ ਤਿਟ੍ਠਤਿ ਸਬ੍ਬਦਾ.

੭੨. ‘‘ਤਤ੍ਥਾਹਂ ਦੀਘਮਦ੍ਧਾਨਂ, ਦੁਕ੍ਖਂ ਵੇਦਿਸ੍ਸ ਵੇਦਨਂ;

ਫਲਞ੍ਚ ਪਾਪਕਮ੍ਮਸ੍ਸ, ਤਸ੍ਮਾ ਸੋਚਾਮਹਂ ਭੁਸ’’ਨ੍ਤਿ. – ਗਾਥਾਯੋ ਅਭਾਸਿ;

੬੭. ਤਤ੍ਥ ਭਿਕ੍ਖੁਨੋ ਚਰਮਾਨਸ੍ਸਾਤਿ ਅਞ੍ਞਤਰਸ੍ਸ ਭਿਨ੍ਨਕਿਲੇਸਸ੍ਸ ਭਿਕ੍ਖੁਨੋ ਭਿਕ੍ਖਾਯ ਚਰਨ੍ਤਸ੍ਸ. ਦੋਣਿਨਿਮ੍ਮਜ੍ਜਨਿਨ੍ਤਿ ਵਿਸ੍ਸਨ੍ਦਮਾਨਤੇਲਂ ਪਿਞ੍ਞਾਕਂ. ਉਜੁਭੂਤਸ੍ਸਾਤਿ ਚਿਤ੍ਤਜਿਮ੍ਹਵਙ੍ਕਕੁਟਿਲਭਾਵਕਰਾਨਂ ਕਿਲੇਸਾਨਂ ਅਭਾਵੇਨ ਉਜੁਭਾਵਪ੍ਪਤ੍ਤਸ੍ਸ. ਵਿਪ੍ਪਸਨ੍ਨੇਨ ਚੇਤਸਾਤਿ ਕਮ੍ਮਫਲਸਦ੍ਧਾਯ ਸੁਟ੍ਠੁ ਪਸਨ੍ਨੇਨ ਚਿਤ੍ਤੇਨ.

੬੮-੬੯. ਦੀਘਮਨ੍ਤਰਨ੍ਤਿ ਮ-ਕਾਰੋ ਪਦਸਨ੍ਧਿਕਰੋ, ਦੀਘਅਨ੍ਤਰਂ ਦੀਘਕਾਲਨ੍ਤਿ ਅਤ੍ਥੋ. ਤਞ੍ਚ ਦਾਨਿ ਪਰਿਤ੍ਤਕਨ੍ਤਿ ਤਞ੍ਚ ਪੁਞ੍ਞਫਲਂ ਵਿਪਕ੍ਕਵਿਪਾਕਤ੍ਤਾ ਕਮ੍ਮਸ੍ਸ ਇਦਾਨਿ ਪਰਿਤ੍ਤਕਂ ਅਪ੍ਪਾਵਸੇਸਂ, ਨ ਚਿਰੇਨੇਵ ਇਤੋ ਚਵਿਸ੍ਸਾਮੀਤਿ ਅਤ੍ਥੋ. ਤੇਨਾਹ ‘‘ਉਦ੍ਧਂ ਚਤੂਹਿ ਮਾਸੇਹਿ, ਕਾਲਂਕਿਰਿਯਾ ਭਵਿਸ੍ਸਤੀ’’ਤਿ ਚਤੂਹਿ ਮਾਸੇਹਿ ਉਦ੍ਧਂ ਚਤੁਨ੍ਨਂ ਮਾਸਾਨਂ ਉਪਰਿ ਪਞ੍ਚਮੇ ਮਾਸੇ ਮਮ ਕਾਲਂਕਿਰਿਯਾ ਭਵਿਸ੍ਸਤੀਤਿ ਦਸ੍ਸੇਤਿ. ਏਕਨ੍ਤਕਟੁਕਨ੍ਤਿ ਏਕਨ੍ਤੇਨੇਵ ਅਨਿਟ੍ਠਛਫਸ੍ਸਾਯਤਨਿਕਭਾਵਤੋ ਏਕਨ੍ਤਦੁਕ੍ਖਨ੍ਤਿ ਅਤ੍ਥੋ. ਘੋਰਨ੍ਤਿ ਦਾਰੁਣਂ. ਨਿਰਯਨ੍ਤਿ ਨਤ੍ਥਿ ਏਤ੍ਥ ਅਯੋ ਸੁਖਨ੍ਤਿ ਕਤ੍ਵਾ ‘‘ਨਿਰਯ’’ਨ੍ਤਿ ਲਦ੍ਧਨਾਮਂ ਨਰਕਂ. ਪਪਤਿਸ੍ਸਹਨ੍ਤਿ ਪਪਹਿਸ੍ਸਾਮਿ ਅਹਂ.

੭੦. ‘‘ਨਿਰਯ’’ਨ੍ਤਿ ਚੇਤ੍ਥ ਅਵੀਚਿਮਹਾਨਿਰਯਸ੍ਸ ਅਧਿਪ੍ਪੇਤਤ੍ਤਾ ਤਂ ਸਰੂਪਤੋ ਦਸ੍ਸੇਤੁਂ ‘‘ਚਤੁਕ੍ਕਣ੍ਣ’’ਨ੍ਤਿਆਦਿਮਾਹ. ਤਤ੍ਥ ਚਤੁਕ੍ਕਣ੍ਣਨ੍ਤਿ ਚਤੁਕ੍ਕੋਣਂ. ਚਤੁਦ੍ਵਾਰਨ੍ਤਿ ਚਤੂਸੁ ਦਿਸਾਸੁ ਚਤੂਹਿ ਦ੍ਵਾਰੇਹਿ ਯੁਤ੍ਤਂ. ਵਿਭਤ੍ਤਨ੍ਤਿ ਸੁਟ੍ਠੁ ਵਿਭਤ੍ਤਂ.

ਭਾਗਸੋਤਿ ਭਾਗਤੋ. ਮਿਤਨ੍ਤਿ ਤੁਲਿਤਂ. ਅਯੋਪਾਕਾਰਪਰਿਯਨ੍ਤਨ੍ਤਿ ਅਯੋਮਯੇਨ ਪਾਕਾਰੇਨ ਪਰਿਕ੍ਖਿਤ੍ਤਂ. ਅਯਸਾ ਪਟਿਕੁਜ੍ਜਿਤਨ੍ਤਿ ਅਯੋਪਟਲੇਨੇਵ ਉਪਰਿ ਪਿਹਿਤਂ.

੭੧-੭੨. ਤੇਜਸਾ ਯੁਤਾਤਿ ਸਮਨ੍ਤਤੋ ਸਮੁਟ੍ਠਿਤਜਾਲੇਨ ਮਹਤਾ ਅਗ੍ਗਿਨਾ ਨਿਰਨ੍ਤਰਂ ਸਮਾਯੁਤਜਾਲਾ. ਸਮਨ੍ਤਾ ਯੋਜਨਸਤਨ੍ਤਿ ਏਵਂ ਪਨ ਸਮਨ੍ਤਾ ਬਹਿ ਸਬ੍ਬਦਿਸਾਸੁ ਯੋਜਨਸਤਂ ਯੋਜਨਾਨਂ ਸਤਂ. ਸਬ੍ਬਦਾਤਿ ਸਬ੍ਬਕਾਲਂ. ਫਰਿਤ੍ਵਾ ਤਿਟ੍ਠਤੀਤਿ ਬ੍ਯਾਪੇਤ੍ਵਾ ਤਿਟ੍ਠਤਿ. ਤਤ੍ਥਾਤਿ ਤਸ੍ਮਿਂ ਮਹਾਨਿਰਯੇ. ਵੇਦਿਸ੍ਸਨ੍ਤਿ ਵੇਦਿਸ੍ਸਾਮਿ ਅਨੁਭਵਿਸ੍ਸਾਮਿ. ਫਲਞ੍ਚ ਪਾਪਕਮ੍ਮਸ੍ਸਾਤਿ ਇਦਂ ਈਦਿਸਂ ਦੁਕ੍ਖਾਨੁਭਵਨਂ ਮਹਾ ਏਵਂ ਕਤਸ੍ਸ ਪਾਪਸ੍ਸ ਕਮ੍ਮਸ੍ਸ ਫਲਨ੍ਤਿ ਅਤ੍ਥੋ.

ਏਵਂ ਤਾਯ ਅਤ੍ਤਨਾ ਕਤਕਮ੍ਮਫਲੇ ਆਯਤਿਂ ਨੇਰਯਿਕਭਯੇ ਚ ਪਕਾਸਿਤੇ ਸੋ ਉਪਾਸਕੋ ਕਰੁਣਾਸਞ੍ਚੋਦਿਤਮਾਨਸੋ ‘‘ਹਨ੍ਦਸ੍ਸਾਹਂ ਪਤਿਟ੍ਠਾ ਭਵੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਆਹ – ‘‘ਦੇਵਤੇ, ਤ੍ਵਂ ਮਯ੍ਹਂ ਏਕਸ੍ਸ ਦਾਨਵਸੇਨ ਸਬ੍ਬਕਾਮਸਮਿਦ੍ਧਾ ਉਟ੍ਠਾਰਸਮ੍ਪਤ੍ਤਿਯੁਤ੍ਤਾ ਜਾਤਾ, ਇਦਾਨਿ ਪਨ ਇਮੇਸਂ ਉਪਾਸਕਾਨਂ ਦਾਨਂ ਦਤ੍ਵਾ ਸਤ੍ਥੁ ਚ ਗੁਣੇ ਅਨੁਸ੍ਸਰਿਤ੍ਵਾ ਨਿਰਯੂਪਪਤ੍ਤਿਤੋ ਮੁਚ੍ਚਿਸ੍ਸਸੀ’’ਤਿ. ਸਾ ਪੇਤੀ ਹਟ੍ਠਤੁਟ੍ਠਾ ‘‘ਸਾਧੂ’’ਤਿ ਵਤ੍ਵਾ ਤੇ ਦਿਬ੍ਬੇਨ ਅਨ੍ਨਪਾਨੇਨ ਸਨ੍ਤਪ੍ਪੇਤ੍ਵਾ ਦਿਬ੍ਬਾਨਿ ਵਤ੍ਥਾਨਿ ਨਾਨਾਵਿਧਾਨਿ ਰਤਨਾਨਿ ਚ ਅਦਾਸਿ, ਭਗਵਨ੍ਤਞ੍ਚ ਉਦ੍ਦਿਸ੍ਸ ਦਿਬ੍ਬਂ ਦੁਸ੍ਸਯੁਗਂ ਤੇਸਂ ਹਤ੍ਥੇ ਦਤ੍ਵਾ ‘‘ਅਞ੍ਞਤਰਾ, ਭਨ੍ਤੇ, ਵਿਮਾਨਪੇਤੀ ਭਗਵਤੋ ਪਾਦੇ ਸਿਰਸਾ ਵਨ੍ਦਤੀਤਿ ਸਾਵਤ੍ਥਿਂ ਗਨ੍ਤ੍ਵਾ ਸਤ੍ਥਾਰਂ ਮਮ ਵਚਨੇਨ ਵਨ੍ਦਥਾ’’ਤਿ ਵਨ੍ਦਨਞ੍ਚ ਪੇਸੇਸਿ, ਤਞ੍ਚ ਨਾਵਂ ਅਤ੍ਤਨੋ ਇਦ੍ਧਾਨੁਭਾਵੇਨ ਤੇਹਿ ਇਚ੍ਛਿਤਪਟ੍ਟਨਂ ਤਂ ਦਿਵਸਮੇਵ ਉਪਨੇਸਿ.

ਅਥ ਤੇ ਵਾਣਿਜਾ ਤਤੋ ਪਟ੍ਟਨਤੋ ਅਨੁਕ੍ਕਮੇਨ ਸਾਵਤ੍ਥਿਂ ਪਤ੍ਵਾ ਜੇਤਵਨਂ ਪਵਿਸਿਤ੍ਵਾ ਸਤ੍ਥੁ ਤਂ ਦੁਸ੍ਸਯੁਗਂ ਦਤ੍ਵਾ ਵਨ੍ਦਨਞ੍ਚ ਨਿਵੇਦੇਤ੍ਵਾ ਆਦਿਤੋ ਪਟ੍ਠਾਯ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸੁਂ. ਸਤ੍ਥਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ, ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਜਾਤਾ. ਤੇ ਪਨ ਉਪਾਸਕਾ ਦੁਤਿਯਦਿਵਸੇ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਤਸ੍ਸਾ ਦਕ੍ਖਿਣਮਾਦਿਸਿਂਸੁ. ਸਾ ਚ ਤਤੋ ਪੇਤਲੋਕਤੋ ਚਵਿਤ੍ਵਾ ਵਿਵਿਧਰਤਨਵਿਜ੍ਜੋਤਿਤੇ ਤਾਵਤਿਂਸਭਵਨੇ ਕਨਕਵਿਮਾਨੇ ਅਚ੍ਛਰਾਸਹਸ੍ਸਪਰਿਵਾਰਾ ਨਿਬ੍ਬਤ੍ਤੀਤਿ.

ਖਲ੍ਲਾਟਿਯਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.