੧੧. ਨਾਗਪੇਤਵਤ੍ਥੁਵਣ੍ਣਨਾ

ਪੁਰਤੋਵ ਸੇਤੇਨ ਪਲੇਤਿ ਹਤ੍ਥਿਨਾਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਦ੍ਵੇ ਬ੍ਰਾਹ੍ਮਣਪੇਤੇ ਆਰਮ੍ਭ ਵੁਤ੍ਤਂ. ਆਯਸ੍ਮਾ ਕਿਰ ਸਂਕਿਚ੍ਚੋ ਸਤ੍ਤਵਸ੍ਸਿਕੋ ਖੁਰਗ੍ਗੇਯੇਵ ਅਰਹਤ੍ਤਂ ਪਤ੍ਵਾ ਸਾਮਣੇਰਭੂਮਿਯਂ ਠਿਤੋ ਤਿਂਸਮਤ੍ਤੇਹਿ ਭਿਕ੍ਖੂਹਿ ਸਦ੍ਧਿਂ ਅਰਞ੍ਞਾਯਤਨੇ ਵਸਨ੍ਤੋ ਤੇਸਂ ਭਿਕ੍ਖੂਨਂ ਪਞ੍ਚਨ੍ਨਂ ਚੋਰਸਤਾਨਂ ਹਤ੍ਥਤੋ ਆਗਤਂ ਮਰਣਮ੍ਪਿ ਬਾਹਿਤ੍ਵਾ ਤੇ ਚ ਚੋਰੇ ਦਮੇਤ੍ਵਾ ਪਬ੍ਬਾਜੇਤ੍ਵਾ ਸਤ੍ਥੁ ਸਨ੍ਤਿਕਂ ਅਗਮਾਸਿ. ਸਤ੍ਥਾ ਤੇਸਂ ਭਿਕ੍ਖੂਨਂ ਧਮ੍ਮਂ ਦੇਸੇਸਿ, ਦੇਸਨਾਵਸਾਨੇ ਤੇ ਭਿਕ੍ਖੂ ਅਰਹਤ੍ਤਂ ਪਾਪੁਣਿਂਸੁ. ਅਥਾਯਸ੍ਮਾ ਸਂਕਿਚ੍ਚੋ ਪਰਿਪੁਣ੍ਣਵਸ੍ਸੋ ਲਦ੍ਧੂਪਸਮ੍ਪਦੋ ਤੇਹਿ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਬਾਰਾਣਸਿਂ ਗਨ੍ਤ੍ਵਾ ਇਸਿਪਤਨੇ ਵਿਹਾਸਿ. ਮਨੁਸ੍ਸਾ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਪਸਨ੍ਨਮਾਨਸਾ ਵੀਥਿਪਟਿਪਾਟਿਯਾ ਵਗ੍ਗਵਗ੍ਗਾ ਹੁਤ੍ਵਾ ਆਗਨ੍ਤੁਕਦਾਨਂ ਅਦਂਸੁ. ਤਤ੍ਥ ਅਞ੍ਞਤਰੋ ਉਪਾਸਕੋ ਮਨੁਸ੍ਸੇ ਨਿਚ੍ਚਭਤ੍ਤੇ ਸਮਾਦਪੇਸਿ, ਤੇ ਯਥਾਬਲਂ ਨਿਚ੍ਚਭਤ੍ਤਂ ਪਟ੍ਠਪੇਸੁਂ.

ਤੇਨ ਚ ਸਮਯੇਨ ਬਾਰਾਣਸਿਯਂ ਅਞ੍ਞਤਰਸ੍ਸ ਮਿਚ੍ਛਾਦਿਟ੍ਠਿਕਸ੍ਸ ਬ੍ਰਾਹ੍ਮਣਸ੍ਸ ਦ੍ਵੇ ਪੁਤ੍ਤਾ ਏਕਾ ਚ ਧੀਤਾ ਅਹੇਸੁਂ. ਤੇਸੁ ਜੇਟ੍ਠਪੁਤ੍ਤੋ ਤਸ੍ਸ ਉਪਾਸਕਸ੍ਸ ਮਿਤ੍ਤੋ ਅਹੋਸਿ. ਸੋ ਤਂ ਗਹੇਤ੍ਵਾ ਆਯਸ੍ਮਤੋ ਸਂਕਿਚ੍ਚਸ੍ਸ ਸਨ੍ਤਿਕਂ ਅਗਮਾਸਿ. ਆਯਸ੍ਮਾ ਸਂਕਿਚ੍ਚੋ ਤਸ੍ਸ ਧਮ੍ਮਂ ਦੇਸੇਸਿ. ਸੋ ਮੁਦੁਚਿਤ੍ਤੋ ਅਹੋਸਿ. ਅਥ ਨਂ ਸੋ ਉਪਾਸਕੋ ਆਹ – ‘‘ਤ੍ਵਂ ਏਕਸ੍ਸ ਭਿਕ੍ਖੁਨੋ ਨਿਚ੍ਚਭਤ੍ਤਂ ਦੇਹੀ’’ਤਿ. ‘‘ਅਨਾਚਿਣ੍ਣਂ ਅਮ੍ਹਾਕਂ ਬ੍ਰਾਹ੍ਮਣਾਨਂ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਨਿਚ੍ਚਭਤ੍ਤਦਾਨਂ, ਤਸ੍ਮਾ ਨਾਹਂ ਦਸ੍ਸਾਮੀ’’ਤਿ. ‘‘ਕਿਂ ਮਯ੍ਹਮ੍ਪਿ ਭਤ੍ਤਂ ਨ ਦਸ੍ਸਸੀ’’ਤਿ? ‘‘ਕਥਂ ਨ ਦਸ੍ਸਾਮੀ’’ਤਿ ਆਹ. ‘‘ਯਦਿ ਏਵਂ ਯਂ ਮਯ੍ਹਂ ਦੇਸਿ, ਤਂ ਏਕਸ੍ਸ ਭਿਕ੍ਖੁਸ੍ਸ ਦੇਹੀ’’ਤਿ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਦੁਤਿਯਦਿਵਸੇ ਪਾਤੋਵ ਵਿਹਾਰਂ ਗਨ੍ਤ੍ਵਾ ਏਕਂ ਭਿਕ੍ਖੁਂ ਆਨੇਤ੍ਵਾ ਭੋਜੇਸਿ.

ਏਵਂ ਗਚ੍ਛਨ੍ਤੇ ਕਾਲੇ ਭਿਕ੍ਖੂਨਂ ਪਟਿਪਤ੍ਤਿਂ ਦਿਸ੍ਵਾ ਧਮ੍ਮਞ੍ਚ ਸੁਣਿਤ੍ਵਾ ਤਸ੍ਸ ਕਨਿਟ੍ਠਭਾਤਾ ਚ ਭਗਿਨੀ ਚ ਸਾਸਨੇ ਅਭਿਪ੍ਪਸਨ੍ਨਾ ਪੁਞ੍ਞਕਮ੍ਮਰਤਾ ਚ ਅਹੇਸੁਂ. ਏਵਂ ਤੇ ਤਯੋ ਜਨਾ ਯਥਾਵਿਭਵਂ ਦਾਨਾਨਿ ਦੇਨ੍ਤਾ ਸਮਣਬ੍ਰਾਹ੍ਮਣੇ ਸਕ੍ਕਰਿਂਸੁ ਗਰੁਂ ਕਰਿਂਸੁ ਮਾਨੇਸੁਂ ਪੂਜੇਸੁਂ. ਮਾਤਾਪਿਤਰੋ ਪਨ ਨੇਸਂ ਅਸ੍ਸਦ੍ਧਾ ਅਪ੍ਪਸਨ੍ਨਾ ਸਮਣਬ੍ਰਾਹ੍ਮਣੇਸੁ ਅਗਾਰਵਾ ਪੁਞ੍ਞਕਿਰਿਯਾਯ ਅਨਾਦਰਾ ਅਚ੍ਛਨ੍ਦਿਕਾ ਅਹੇਸੁਂ. ਤੇਸਂ ਧੀਤਰਂ ਦਾਰਿਕਂ ਮਾਤੁਲਪੁਤ੍ਤਸ੍ਸਤ੍ਥਾਯ ਞਾਤਕਾ ਵਾਰੇਸੁਂ. ਸੋ ਚ ਆਯਸ੍ਮਤੋ ਸਂਕਿਚ੍ਚਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਸਂਵੇਗਜਾਤੋ ਪਬ੍ਬਜਿਤ੍ਵਾ ਨਿਚ੍ਚਂ ਅਤ੍ਤਨੋ ਮਾਤੁ-ਗੇਹਂ ਭੁਞ੍ਜਿਤੁਂ ਗਚ੍ਛਤਿ. ਤਂ ਮਾਤਾ ਅਤ੍ਤਨੋ ਭਾਤੁ-ਧੀਤਾਯ ਦਾਰਿਕਾਯ ਪਲੋਭੇਤਿ. ਤੇਨ ਸੋ ਉਕ੍ਕਣ੍ਠਿਤੋ ਹੁਤ੍ਵਾ ਉਪਜ੍ਝਾਯਂ ਉਪਸਙ੍ਗਮਿਤ੍ਵਾ ਆਹ – ‘‘ਉਪ੍ਪਬ੍ਬਜਿਸ੍ਸਾਮਹਂ, ਭਨ੍ਤੇ, ਅਨੁਜਾਨਾਥ ਮ’’ਨ੍ਤਿ. ਉਪਜ੍ਝਾਯੋ ਤਸ੍ਸ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਆਹ – ‘‘ਸਾਮਣੇਰ, ਮਾਸਮਤ੍ਤਂ ਆਗਮੇਹੀ’’ਤਿ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਮਾਸੇ ਅਤਿਕ੍ਕਨ੍ਤੇ ਤਥੇਵ ਆਰੋਚੇਸਿ. ਉਪਜ੍ਝਾਯੋ ਪੁਨ ‘‘ਅਡ੍ਢਮਾਸਂ ਆਗਮੇਹੀ’’ਤਿ ਆਹ. ਅਡ੍ਢਮਾਸੇ ਅਤਿਕ੍ਕਨ੍ਤੇ ਤਥੇਵ ਵੁਤ੍ਤੇ ਪੁਨ ‘‘ਸਤ੍ਤਾਹਂ ਆਗਮੇਹੀ’’ਤਿ ਆਹ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿ. ਅਥ ਤਸ੍ਮਿਂ ਅਨ੍ਤੋਸਤ੍ਤਾਹੇ ਸਾਮਣੇਰਸ੍ਸ ਮਾਤੁਲਾਨਿਯਾ ਗੇਹਂ ਵਿਨਟ੍ਠਚ੍ਛਦਨਂ ਜਿਣ੍ਣਂ ਦੁਬ੍ਬਲਕੁਟ੍ਟਂ ਵਾਤਵਸ੍ਸਾਭਿਹਤਂ ਪਰਿਪਤਿ. ਤਤ੍ਥ ਬ੍ਰਾਹ੍ਮਣੋ ਬ੍ਰਾਹ੍ਮਣੀ ਦ੍ਵੇ ਪੁਤ੍ਤਾ ਘੀਤਾ ਚ ਗੇਹੇਨ ਅਜ੍ਝੋਤ੍ਥਟਾ ਕਾਲਮਕਂਸੁ. ਤੇਸੁ ਬ੍ਰਾਹ੍ਮਣੋ ਬ੍ਰਾਹ੍ਮਣੀ ਚ ਪੇਤਯੋਨਿਯਂ ਨਿਬ੍ਬਤ੍ਤਿਂਸੁ, ਦ੍ਵੇ ਪੁਤ੍ਤਾ ਧੀਤਾ ਚ ਭੁਮ੍ਮਦੇਵੇਸੁ. ਤੇਸੁ ਜੇਟ੍ਠਪੁਤ੍ਤਸ੍ਸ ਹਤ੍ਥਿਯਾਨਂ ਨਿਬ੍ਬਤ੍ਤਿ, ਕਨਿਟ੍ਠਸ੍ਸ ਅਸ੍ਸਤਰੀਰਥੋ, ਧੀਤਾਯ ਸੁਵਣ੍ਣਸਿਵਿਕਾ. ਬ੍ਰਾਹ੍ਮਣੋ ਚ ਬ੍ਰਾਹ੍ਮਣੀ ਚ ਮਹਨ੍ਤੇ ਮਹਨ੍ਤੇ ਅਯੋਮੁਗ੍ਗਰੇ ਗਹੇਤ੍ਵਾ ਅਞ੍ਞਮਞ੍ਞਂ ਆਕੋਟੇਨ੍ਤਿ, ਅਭਿਹਤਟ੍ਠਾਨੇਸੁ ਮਹਨ੍ਤਾ ਮਹਨ੍ਤਾ ਘਟਪ੍ਪਮਾਣਾ ਗਣ੍ਡਾ ਉਟ੍ਠਹਿਤ੍ਵਾ ਮੁਹੁਤ੍ਤੇਨੇਵ ਪਚਿਤ੍ਵਾ ਪਰਿਭੇਦਪ੍ਪਤ੍ਤਾ ਹੋਨ੍ਤਿ. ਤੇ ਅਞ੍ਞਮਞ੍ਞਸ੍ਸ ਗਣ੍ਡੇ ਫਾਲੇਤ੍ਵਾ ਕੋਧਾਭਿਭੂਤਾ ਨਿਕ੍ਕਰੁਣਾ ਫਰੁਸਵਚਨੇਹਿ ਤਜ੍ਜੇਨ੍ਤਾ ਪੁਬ੍ਬਲੋਹਿਤਂ ਪਿਵਨ੍ਤਿ, ਨ ਚ ਤਿਤ੍ਤਿਂ ਪਟਿਲਭਨ੍ਤਿ.

ਅਥ ਸਾਮਣੇਰੋ ਉਕ੍ਕਣ੍ਠਾਭਿਭੂਤੋ ਉਪਜ੍ਝਾਯਂ ਉਪਸਙ੍ਕਮਿਤ੍ਵਾ ਆਹ – ‘‘ਭਨ੍ਤੇ, ਮਯਾ ਪਟਿਞ੍ਞਾਤਦਿਵਸਾ ਵੀਤਿਵਤ੍ਤਾ, ਗੇਹਂ ਗਮਿਸ੍ਸਾਮਿ, ਅਨੁਜਾਨਾਥ ਮ’’ਨ੍ਤਿ. ਅਥ ਨਂ ਉਪਜ੍ਝਾਯੋ ‘‘ਅਤ੍ਥਙ੍ਗਤੇ ਸੂਰਿਯੇ ਕਾਲਪਕ੍ਖਚਾਤੁਦ੍ਦਸਿਯਾ ਪਵਤ੍ਤਮਾਨਾਯ ਏਹੀ’’ਤਿ ਵਤ੍ਵਾ ਇਸਿਪਤਨਵਿਹਾਰਸ੍ਸ ਪਿਟ੍ਠਿਪਸ੍ਸੇਨ ਥੋਕਂ ਗਨ੍ਤ੍ਵਾ ਅਟ੍ਠਾਸਿ. ਤੇਨ ਚ ਸਮਯੇਨ ਤੇ ਦ੍ਵੇ ਦੇਵਪੁਤ੍ਤਾ ਸਦ੍ਧਿਂ ਭਗਿਨਿਯਾ ਤੇਨੇਵ ਮਗ੍ਗੇਨ ਯਕ੍ਖਸਮਾਗਮਂ ਸਮ੍ਭਾਵੇਤੁਂ ਗਚ੍ਛਨ੍ਤਿ, ਤੇਸਂ ਪਨ ਮਾਤਾਪਿਤਰੋ ਮੁਗ੍ਗਰਹਤ੍ਥਾ ਫਰੁਸਵਾਚਾ ਕਾਲ਼ਰੂਪਾ ਆਕੁਲਾਕੁਲਲੂਖਪਤਿਤਕੇਸਭਾਰਾ ਅਗ੍ਗਿਦਡ੍ਢਤਾਲਕ੍ਖਨ੍ਧਸਦਿਸਾ ਵਿਗਲਿਤਪੁਬ੍ਬਲੋਹਿਤਾ ਵਲਿਤਗਤ੍ਤਾ ਅਤਿਵਿਯ ਜੇਗੁਚ੍ਛਬੀਭਚ੍ਛਦਸ੍ਸਨਾ ਤੇ ਅਨੁਬਨ੍ਧਨ੍ਤਿ.

ਅਥਾਯਸ੍ਮਾ ਸਂਕਿਚ੍ਚੋ ਯਥਾ ਸੋ ਸਾਮਣੇਰੋ ਤੇ ਸਬ੍ਬੇ ਗਚ੍ਛਨ੍ਤੇ ਪਸ੍ਸਤਿ, ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਰਿਤ੍ਵਾ ਸਾਮਣੇਰਂ ਆਹ – ‘‘ਪਸ੍ਸਸਿ ਤ੍ਵਂ, ਸਾਮਣੇਰ, ਇਮੇ ਗਚ੍ਛਨ੍ਤੇ’’ਤਿ? ‘‘ਆਮ, ਭਨ੍ਤੇ, ਪਸ੍ਸਾਮੀ’’ਤਿ. ‘‘ਤੇਨ ਹਿ ਇਮੇਹਿ ਕਤਕਮ੍ਮਂ ਪਟਿਪੁਚ੍ਛਾ’’ਤਿ. ਸੋ ਹਤ੍ਥਿਯਾਨਾਦੀਹਿ ਗਚ੍ਛਨ੍ਤੇ ਅਨੁਕ੍ਕਮੇਨ ਪਟਿਪੁਚ੍ਛਿ. ਤੇ ਆਹਂਸੁ – ‘‘ਯੇ ਪਚ੍ਛਤੋ ਪੇਤਾ ਆਗਚ੍ਛਨ੍ਤਿ, ਤੇ ਪਟਿਪੁਚ੍ਛਾ’’ਤਿ. ਸਾਮਣੇਰੋ ਤੇ ਪੇਤੇ ਗਾਥਾਹਿ ਅਜ੍ਝਭਾਸਿ –

੭੩. ‘‘ਪੁਰਤੋਵ ਸੇਤੇਨ ਪਲੇਤਿ ਹਤ੍ਥਿਨਾ, ਮਜ੍ਝੇ ਪਨ ਅਸ੍ਸਤਰੀਰਥੇਨ;

ਪਚ੍ਛਾ ਚ ਕਞ੍ਞਾ ਸਿਵਿਕਾਯ ਨੀਯਤਿ, ਓਭਾਸਯਨ੍ਤੀ ਦਸ ਸਬ੍ਬਸੋ ਦਿਸਾ.

੭੪. ‘‘ਤੁਮ੍ਹੇ ਪਨ ਮੁਗ੍ਗਰਹਤ੍ਥਪਾਣਿਨੋ, ਰੁਦਂਮੁਖਾ ਛਿਨ੍ਨਪਭਿਨ੍ਨਗਤ੍ਤਾ;

ਮਨੁਸ੍ਸਭੂਤਾ ਕਿਮਕਤ੍ਥ ਪਾਪਂ, ਯੇਨਞ੍ਞਮਞ੍ਞਸ੍ਸ ਪਿਵਾਥ ਲੋਹਿਤ’’ਨ੍ਤਿ.

ਤਤ੍ਥ ਪੁਰਤੋਤਿ ਸਬ੍ਬਪਠਮਂ. ਸੇਤੇਨਾਤਿ ਪਣ੍ਡਰੇਨ. ਪਲੇਤੀਤਿ ਗਚ੍ਛਤਿ. ਮਜ੍ਝੇ ਪਨਾਤਿ ਹਤ੍ਥਿਂ ਆਰੁਲ਼੍ਹਸ੍ਸ ਸਿਵਿਕਂ ਆਰੁਲ਼੍ਹਾਯ ਚ ਅਨ੍ਤਰੇ. ਅਸ੍ਸਤਰੀਰਥੇਨਾਤਿ ਅਸ੍ਸਤਰੀਯੁਤ੍ਤੇਨ ਰਥੇਨ ਪਲੇਤੀਤਿ ਯੋਜਨਾ. ਨੀਯਤੀਤਿ ਵਹੀਯਤਿ. ਓਭਾਸਯਨ੍ਤੀ ਦਸ ਸਬ੍ਬਸੋ ਦਿਸਾਤਿ ਸਬ੍ਬਤੋ ਸਮਨ੍ਤਤੋ ਸਬ੍ਬਾ ਦਸ ਦਿਸਾ ਅਤ੍ਤਨੋ ਸਰੀਰਪ੍ਪਭਾਹਿ ਵਤ੍ਥਾਭਰਣਾਦਿਪ੍ਪਭਾਹਿ ਚ ਵਿਜ੍ਜੋਤਯਮਾਨਾ. ਮੁਗ੍ਗਰਹਤ੍ਥਪਾਣਿਨੋਤਿ ਮੁਗ੍ਗਰਾ ਹਤ੍ਥਸਙ੍ਖਾਤੇਸੁ ਪਾਣੀਸੁ ਯੇਸਂ ਤੇ ਮੁਗ੍ਗਰਹਤ੍ਥਪਾਣਿਨੋ, ਭੂਮਿਸਣ੍ਹਕਰਣੀਯਾਦੀਸੁ ਪਾਣਿਵੋਹਾਰਸ੍ਸ ਲਬ੍ਭਮਾਨਤ੍ਤਾ ਹਤ੍ਥਸਦ੍ਦੇਨ ਪਾਣਿ ਏਵ ਵਿਸੇਸਿਤੋ. ਛਿਨ੍ਨਪਭਿਨ੍ਨਗਤ੍ਤਾਤਿ ਮੁਗ੍ਗਰਪ੍ਪਹਾਰੇਨ ਤਤ੍ਥ ਤਤ੍ਥ ਛਿਨ੍ਨਪਭਿਨ੍ਨਸਰੀਰਾ. ਪਿਵਾਥਾਤਿ ਪਿਵਥ.

ਏਵਂ ਸਾਮਣੇਰੇਨ ਪੁਟ੍ਠਾ ਤੇ ਪੇਤਾ ਸਬ੍ਬਂ ਤਂ

ਪਵਤ੍ਤਿਂ ਚਤੂਹਿ ਗਾਥਾਹਿ ਪਚ੍ਚਭਾਸਿਂਸੁ –

੭੫. ‘‘ਪੁਰਤੋਵ ਯੋ ਗਚ੍ਛਤਿ ਕੁਞ੍ਜਰੇਨ, ਸੇਤੇਨ ਨਾਗੇਨ ਚਤੁਕ੍ਕਮੇਨ;

ਅਮ੍ਹਾਕ ਪੁਤ੍ਤੋ ਅਹੁ ਜੇਟ੍ਠਕੋ ਸੋ, ਦਾਨਾਨਿ ਦਤ੍ਵਾਨ ਸੁਖੀ ਪਮੋਦਤਿ.

੭੬. ‘‘ਯੋ ਯੋ ਮਜ੍ਝੇ ਅਸ੍ਸਤਰੀਰਥੇਨ, ਚਤੁਬ੍ਭਿ ਯੁਤ੍ਤੇਨ ਸੁਵਗ੍ਗਿਤੇਨ;

ਅਮ੍ਹਾਕ ਪੁਤ੍ਤੋ ਅਹੁ ਮਜ੍ਝਿਮੋ ਸੋ, ਅਮਚ੍ਛਰੀ ਦਾਨਪਤੀ ਵਿਰੋਚਤਿ.

੭੭. ‘‘ਯਾ ਸਾ ਚ ਪਚ੍ਛਾ ਸਿਵਿਕਾਯ ਨੀਯਤਿ, ਨਾਰੀ ਸਪਞ੍ਞਾ ਮਿਗਮਨ੍ਦਲੋਚਨਾ;

ਅਮ੍ਹਾਕ ਧੀਤਾ ਅਹੁ ਸਾ ਕਨਿਟ੍ਠਿਕਾ, ਭਾਗਡ੍ਢਭਾਗੇਨ ਸੁਖੀ ਪਮੋਦਤਿ.

੭੮. ‘‘ਏਤੇ ਚ ਦਾਨਾਨਿ ਅਦਂਸੁ ਪੁਬ੍ਬੇ, ਪਸਨ੍ਨਚਿਤ੍ਤਾ ਸਮਣਬ੍ਰਾਹ੍ਮਣਾਨਂ;

ਮਯਂ ਪਨ ਮਚ੍ਛਰੀਨੋ ਅਹੁਮ੍ਹ, ਪਰਿਭਾਸਕਾ ਸਮਣਬ੍ਰਾਹ੍ਮਣਾਨਂ;

ਏਤੇ ਚ ਦਤ੍ਵਾ ਪਰਿਚਾਰਯਨ੍ਤਿ, ਮਯਞ੍ਚ ਸੁਸ੍ਸਾਮ ਨਲ਼ੋਵ ਛਿਨ੍ਨੋ’’ਤਿ.

੭੫. ਤਤ੍ਥ ਪੁਰਤੋਵ ਯੋ ਗਚ੍ਛਤੀਤਿ ਇਮੇਸਂ ਗਚ੍ਛਨ੍ਤਾਨਂ ਯੋ ਪੁਰਤੋ ਗਚ੍ਛਤਿ. ‘‘ਯੋਸੋ ਪੁਰਤੋ ਗਚ੍ਛਤੀ’’ਤਿ ਵਾ ਪਾਠੋ, ਤਸ੍ਸ ਯੋ ਏਸੋ ਪੁਰਤੋ ਗਚ੍ਛਤੀਤਿ ਅਤ੍ਥੋ. ਕੁਞ੍ਜਰੇਨਾਤਿ ਕੁਂ ਪਥਵਿਂ ਜੀਰਯਤਿ, ਕੁਞ੍ਜੇਸੁ ਵਾ ਰਮਤਿ ਚਰਤੀਤਿ ‘‘ਕੁਞ੍ਜਰੋ’’ਤਿ ਲਦ੍ਧਨਾਮੇਨ ਹਤ੍ਥਿਨਾ. ਨਾਗੇਨਾਤਿ, ਨਾਸ੍ਸ ਅਗਮਨੀਯਂ ਅਨਭਿਭਵਨੀਯਂ ਅਤ੍ਥੀਤਿ ਨਾਗਾ, ਤੇਨ ਨਾਗੇਨ. ਚਤੁਕ੍ਕਮੇਨਾਤਿ ਚਤੁਪ੍ਪਦੇਨ. ਜੇਟ੍ਠਕੋਤਿ ਪੁਬ੍ਬਜੋ.

੭੬-੭੭. ਚਤੁਬ੍ਭੀਤਿ ਚਤੂਹਿ ਅਸ੍ਸਤਰੀਹਿ. ਸੁਵਗ੍ਗਿਤੇਨਾਤਿ ਸੁਨ੍ਦਰਗਮਨੇਨ ਚਾਤੁਰਗਮਨੇਨ. ਮਿਗਮਨ੍ਦਲੋਚਨਾਤਿ ਮਿਗੀ ਵਿਯ ਮਨ੍ਦਕ੍ਖਿਕਾ. ਭਾਗਡ੍ਢਭਾਗੇਨਾਤਿ ਭਾਗਸ੍ਸ ਅਡ੍ਢਭਾਗੇਨ, ਅਤ੍ਤਨਾ ਲਦ੍ਧਕੋਟ੍ਠਾਸਤੋ ਅਡ੍ਢਭਾਗਦਾਨੇਨ ਹੇਤੁਭੂਤੇਨ. ਸੁਖੀਤਿ ਸੁਖਿਨੀ. ਲਿਙ੍ਗਵਿਪਲ੍ਲਾਸੇਨ ਹੇਤਂ ਵੁਤ੍ਤਂ.

੭੮. ਪਰਿਭਾਸਕਾਤਿ ਅਕ੍ਕੋਸਕਾ. ਪਰਿਚਾਰਯਨ੍ਤੀਤਿ ਦਿਬ੍ਬੇਸੁ ਕਾਮਗੁਣੇਸੁ ਅਤ੍ਤਨੋ ਇਨ੍ਦ੍ਰਿਯਾਨਿ ਇਤੋ ਚਿਤੋ ਚ ਯਥਾਸੁਖਂ ਚਾਰੇਨ੍ਤਿ, ਪਰਿਜਨੇਹਿ ਵਾ ਅਤ੍ਤਨੋ ਪੁਞ੍ਞਾਨੁਭਾਵਨਿਸ੍ਸਨ੍ਦੇਨ ਪਰਿਚਰਿਯਂ ਕਾਰੇਨ੍ਤਿ. ਮਯਞ੍ਚ ਸੁਸ੍ਸਾਮ ਨਲ਼ੋਵ ਛਿਨ੍ਨੋਤਿ ਮਯਂ ਪਨ ਛਿਨ੍ਨੋ ਆਤਪੇ ਖਿਤ੍ਤੋ ਨਲ਼ੋ ਵਿਯ ਸੁਸ੍ਸਾਮ, ਖੁਪ੍ਪਿਪਾਸਾਹਿ ਅਞ੍ਞਮਞ੍ਞਂ ਦਣ੍ਡਾਭਿਘਾਤੇਹਿ ਚ ਸੁਕ੍ਖਾ ਵਿਸੁਕ੍ਖਾ ਭਵਾਮਾਤਿ.

ਏਵਂ ਅਤ੍ਤਨੋ ਪਾਪਂ ਸਮ੍ਪਵੇਦੇਤ੍ਵਾ ‘‘ਮਯਂ ਤੁਯ੍ਹਂ ਮਾਤੁਲਮਾਤੁਲਾਨਿਯੋ’’ਤਿ ਆਚਿਕ੍ਖਿਂਸੁ. ਤਂ ਸੁਤ੍ਵਾ ਸਾਮਣੇਰੋ ਸਞ੍ਜਾਤਸਂਵੇਗੋ ‘‘ਏਵਰੂਪਾਨਂ ਕਿਬ੍ਬਿਸਕਾਰੀਨਂ ਕਥਂ ਨੁ ਖੋ ਭੋਜਨਾਨਿ ਸਿਜ੍ਝਨ੍ਤੀ’’ਤਿ ਪੁਚ੍ਛਨ੍ਤੋ –

੭੯. ‘‘ਕਿਂ ਤੁਮ੍ਹਾਕਂ ਭੋਜਨਂ ਕਿਂ ਸਯਾਨਂ, ਕਥਞ੍ਚ ਯਾਪੇਥ ਸੁਪਾਪਧਮ੍ਮਿਨੋ;

ਪਹੂਤਭੋਗੇਸੁ ਅਨਪ੍ਪਕੇਸੁ, ਸੁਖਂ ਵਿਰਾਧਾਯ ਦੁਕ੍ਖਜ੍ਜ ਪਤ੍ਤਾ’’ਤਿ. –

ਇਮਂ ਗਾਥਮਾਹ. ਤਤ੍ਥ ਕਿਂ ਤੁਮ੍ਹਾਕਂ ਭੋਜਨਨ੍ਤਿ ਕੀਦਿਸਂ ਤੁਮ੍ਹਾਕਂ ਭੋਜਨਂ? ਕਿਂ ਸਯਾਨਨ੍ਤਿ ਕੀਦਿਸਂ ਸਯਨਂ? ‘‘ਕਿਂ ਸਯਾਨਾ’’ਤਿ ਕੇਚਿ ਪਠਨ੍ਤਿ, ਕੀਦਿਸਾ ਸਯਨਾ, ਕੀਦਿਸੇ ਸਯਨੇ ਸਯਥਾਤਿ ਅਤ੍ਥੋ. ਕਥਞ੍ਚ ਯਾਪੇਥਾਤਿ ਕੇਨ ਪਕਾਰੇਨ ਯਾਪੇਥ, ‘‘ਕਥਂ ਵੋ ਯਾਪੇਥਾ’’ਤਿਪਿ ਪਾਠੋ, ਕਥਂ ਤੁਮ੍ਹੇ ਯਾਪੇਥਾਤਿ ਅਤ੍ਥੋ. ਸੁਪਾਪਧਮ੍ਮਿਨੋਤਿ ਸੁਟ੍ਠੁ ਅਤਿਵਿਯ ਪਾਪਧਮ੍ਮਾ. ਪਹੂਤਭੋਗੇਸੂਤਿ ਅਪਰਿਯਨ੍ਤੇਸੁ ਉਲ਼ਾਰੇਸੁ ਭੋਗੇਸੁ ਸਨ੍ਤੇਸੁ. ਅਨਪ੍ਪਕੇਸੂਤਿ ਨ ਅਪ੍ਪਕੇਸੁ ਬਹੂਸੁ. ਸੁਖਂ ਵਿਰਾਧਾਯਾਤਿ ਸੁਖਹੇਤੁਨੋ ਪੁਞ੍ਞਸ੍ਸ ਅਕਰਣੇਨ ਸੁਖਂ ਵਿਰਜ੍ਝਿਤ੍ਵਾ ਵਿਰਾਧੇਤ੍ਵਾ. ‘‘ਸੁਖਸ੍ਸ ਵਿਰਾਧੇਨਾ’’ਤਿ ਕੇਚਿ ਪਠਨ੍ਤਿ. ਦੁਕ੍ਖਜ੍ਜ ਪਤ੍ਤਾਤਿ ਅਜ੍ਜ ਇਦਾਨਿ ਇਦਂ ਪੇਤਯੋਨਿਪਰਿਯਾਪਨ੍ਨਂ ਦੁਕ੍ਖਂ ਅਨੁਪ੍ਪਤ੍ਤਾਤਿ.

ਏਵਂ ਸਾਮਣੇਰੇਨ ਪੁਟ੍ਠਾ ਪੇਤਾ ਤੇਨ ਪੁਚ੍ਛਿਤਮਤ੍ਥਂ ਵਿਸ੍ਸਜ੍ਜੇਨ੍ਤਾ –

੮੦. ‘‘ਅਞ੍ਞਮਞ੍ਞਂ ਵਧਿਤ੍ਵਾਨ, ਪਿਵਾਮ ਪੁਬ੍ਬਲੋਹਿਤਂ;

ਬਹੁਂ ਵਿਤ੍ਵਾ ਨ ਧਾਤਾ ਹੋਮ, ਨਚ੍ਛਾਦਿਮ੍ਹਸੇ ਮਯਂ.

੮੧. ‘‘ਇਚ੍ਚੇਵ ਮਚ੍ਚਾ ਪਰਿਦੇਵਯਨ੍ਤਿ, ਅਦਾਯਕਾ ਪੇਚ੍ਚ ਯਮਸ੍ਸ ਠਾਯਿਨੋ;

ਯੇ ਤੇ ਵਿਦਿਚ੍ਚ ਅਧਿਗਮ੍ਮ ਭੋਗੇ, ਨ ਭੁਞ੍ਜਰੇ ਨਾਪਿ ਕਰੋਨ੍ਤਿ ਪੁਞ੍ਞਂ.

੮੨. ‘‘ਤੇ ਖੁਪ੍ਪਿਪਾਸੂਪਗਤਾ ਪਰਤ੍ਥ, ਪਚ੍ਛਾ ਚਿਰਂ ਝਾਯਰੇ ਡਯ੍ਹਮਾਨਾ;

ਕਮ੍ਮਾਨਿ ਕਤ੍ਵਾਨ ਦੁਖੁਦ੍ਰਾਨਿ, ਅਨੁਭੋਨ੍ਤਿ ਦੁਕ੍ਖਂ ਕਟੁਕਪ੍ਫਲਾਨਿ.

੮੩. ‘‘ਇਤ੍ਤਰਞ੍ਹਿ ਧਨਂ ਧਞ੍ਞਂ, ਇਤ੍ਤਰਂ ਇਧ ਜੀਵਿਤਂ;

ਇਤ੍ਤਰਂ ਇਤ੍ਤਰਤੋ ਞਤ੍ਵਾ, ਦੀਪਂ ਕਯਿਰਾਥ ਪਣ੍ਡਿਤੋ.

੮੪. ‘‘ਯੇ ਤੇ ਏਵਂ ਪਜਾਨਨ੍ਤਿ, ਨਰਾ ਧਮ੍ਮਸ੍ਸ ਕੋਵਿਦਾ;

ਤੇ ਦਾਨੇ ਨਪ੍ਪਮਜ੍ਜਨ੍ਤਿ, ਸੁਤ੍ਵਾ ਅਰਹਤਂ ਵਚੋ’’ਤਿ. –

ਪਞ੍ਚ ਗਾਥਾ ਅਭਾਸਿਂਸੁ.

੮੦-੮੧. ਤਤ੍ਥ ਨ ਧਾਤਾ ਹੋਮਾਤਿ ਧਾਤਾ ਸੁਹਿਤਾ ਤਿਤ੍ਤਾ ਨ ਹੋਮ. ਨਚ੍ਛਾਦਿਮ੍ਹਸੇਤਿ ਨ ਰੁਚ੍ਚਾਮ, ਨ ਰੁਚਿਂ ਉਪ੍ਪਾਦੇਮ, ਨ ਤਂ ਮਯਂ ਅਤ੍ਤਨੋ ਰੁਚਿਯਾ ਪਿਵਿਸ੍ਸਾਮਾਤਿ ਅਤ੍ਥੋ. ਇਚ੍ਚੇਵਾਤਿ ਏਵਮੇਵ. ਮਚ੍ਚਾ ਪਰਿਦੇਵਯਨ੍ਤੀਤਿ ਮਯਂ ਵਿਯ ਅਞ੍ਞੇਪਿ ਮਨੁਸ੍ਸਾ ਕਤਕਿਬ੍ਬਿਸਾ ਪਰਿਦੇਵਨ੍ਤਿ ਕਨ੍ਦਨ੍ਤਿ. ਅਦਾਯਕਾਤਿ ਅਦਾਨਸੀਲਾ ਮਚ੍ਛਰਿਨੋ. ਯਮਸ੍ਸ ਠਾਯਿਨੋਤਿ ਯਮਲੋਕਸਞ੍ਞਿਤੇ ਯਮਸ੍ਸ ਠਾਨੇ ਪੇਤ੍ਤਿਵਿਸਯੇ ਠਾਨਸੀਲਾ. ਯੇ ਤੇ ਵਿਦਿਚ੍ਚ ਅਧਿਗਮ੍ਮਭੋਗੇਤਿ ਯੇ ਤੇ ਸਮ੍ਪਤਿ ਆਯਤਿਞ੍ਚ ਸੁਖਵਿਸੇਸਵਿਧਾਯਕੇ ਭੋਗੇ ਵਿਨ੍ਦਿਤ੍ਵਾ ਪਟਿਲਭਿਤ੍ਵਾ. ਨ ਭੁਞ੍ਜਰੇ ਨਾਪਿ ਕਰੋਨ੍ਤਿ ਪੁਞ੍ਞਨ੍ਤਿ ਅਮ੍ਹੇ ਵਿਯ ਸਯਮ੍ਪਿ ਨ ਭੁਞ੍ਜਨ੍ਤਿ, ਪਰੇਸਂ ਦੇਨ੍ਤਾ ਦਾਨਮਯਂ ਪੁਞ੍ਞਮ੍ਪਿ ਨ ਕਰੋਨ੍ਤਿ.

੮੨. ਤੇ ਖੁਪ੍ਪਿਪਾਸੂਪਗਤਾ ਪਰਤ੍ਥਾਤਿ ਤੇ ਸਤ੍ਤਾ ਪਰਤ੍ਥ ਪਰਲੋਕੇ ਪੇਤ੍ਤਿਵਿਸਯੇ ਜਿਘਚ੍ਛਾਪਿਪਾਸਾਭਿਭੂਤਾ ਹੁਤ੍ਵਾ. ਚਿਰਂ ਝਾਯਰੇ ਡਯ੍ਹਮਾਨਾਤਿ ਖੁਦਾਦਿਹੇਤੁਕੇਨ ਦੁਕ੍ਖਗ੍ਗਿਨਾ ‘‘ਅਕਤਂ ਵਤ ਅਮ੍ਹੇਹਿ ਕੁਸਲਂ, ਕਤਂ ਪਾਪ’’ਨ੍ਤਿਆਦਿਨਾ ਵਤ੍ਤਮਾਨੇਨ ਵਿਪ੍ਪਟਿਸਾਰਗ੍ਗਿਨਾ ਪਰਿਡਯ੍ਹਮਾਨਾ ਝਾਯਨ੍ਤਿ, ਅਨੁਤ੍ਥੁਨਨ੍ਤੀਤਿ ਅਤ੍ਥੋ. ਦੁਖੁਦ੍ਰਾਨੀਤਿ ਦੁਕ੍ਖਵਿਪਾਕਾਨਿ. ਅਨੁਭੋਨ੍ਤਿ ਦੁਕ੍ਖਂ ਕਟੁਕਪ੍ਫਲਾਨੀਤਿ ਅਨਿਟ੍ਠਫਲਾਨਿ ਪਾਪਕਮ੍ਮਾਨਿ ਕਤ੍ਵਾ ਚਿਰਕਾਲਂ ਦੁਕ੍ਖਂ ਆਪਾਯਿਕਦੁਕ੍ਖਂ ਅਨੁਭਵਨ੍ਤਿ.

੮੩-੮੪. ਇਤ੍ਤਰਨ੍ਤਿ ਨ ਚਿਰਕਾਲਟ੍ਠਾਯੀ, ਅਨਿਚ੍ਚਂ ਵਿਪਰਿਣਾਮਧਮ੍ਮਂ. ਇਤ੍ਤਰਂ ਇਧ ਜੀਵਿਤਨ੍ਤਿ ਇਧ ਮਨੁਸ੍ਸਲੋਕੇ ਸਤ੍ਤਾਨਂ ਜੀਵਿਤਮ੍ਪਿ ਇਤ੍ਤਰਂ ਪਰਿਤ੍ਤਂ ਅਪ੍ਪਕਂ. ਤੇਨਾਹ ਭਗਵਾ – ‘‘ਯੋ ਚਿਰਂ ਜੀਵਤਿ, ਸੋ ਵਸ੍ਸਸਤਂ ਅਪ੍ਪਂ ਵਾ ਭਿਯ੍ਯੋ’’ਤਿ (ਦੀ. ਨਿ. ੨.੯੧; ਸਂ. ਨਿ. ੧.੧੪੫; ਅ. ਨਿ. ੭.੭੪). ਇਤ੍ਤਰਂ ਇਤ੍ਤਰਤੋ ਞਤ੍ਵਾਤਿ ਧਨਧਞ੍ਞਾਦਿਉਪਕਰਣਂ ਮਨੁਸ੍ਸਾਨਂ ਜੀਵਿਤਞ੍ਚ ਇਤ੍ਤਰਂ ਪਰਿਤ੍ਤਂ ਖਣਿਕਂ ਨ ਚਿਰਸ੍ਸਨ੍ਤਿ ਪਞ੍ਞਾਯ ਉਪਪਰਿਕ੍ਖਿਤ੍ਵਾ. ਦੀਪਂ ਕਯਿਰਾਥ ਪਣ੍ਡਿਤੋਤਿ ਸਪਞ੍ਞੋ ਪੁਰਿਸੋ ਦੀਪਂ ਅਤ੍ਤਨੋ ਪਤਿਟ੍ਠਂ ਪਰਲੋਕੇ ਹਿਤਸੁਖਾਧਿਟ੍ਠਾਨਂ ਕਰੇਯ੍ਯ. ਯੇ ਤੇ ਏਵਂ ਪਜਾਨਨ੍ਤੀਤਿ ਯੇ ਤੇ ਮਨੁਸ੍ਸਾ ਮਨੁਸ੍ਸਾਨਂ ਭੋਗਾਨਂ ਜੀਵਿਤਸ੍ਸ ਚ ਇਤ੍ਤਰਭਾਵਂ ਯਾਥਾਵਤੋ ਜਾਨਨ੍ਤਿ, ਤੇ ਦਾਨੇ ਸਬ੍ਬਕਾਲਂ ਨਪ੍ਪਮਜ੍ਜਨ੍ਤਿ. ਸੁਤ੍ਵਾ ਅਰਹਤਂ ਵਚੋਤਿ ਅਰਹਤਂ ਬੁਦ੍ਧਾਦੀਨਂ ਅਰਿਯਾਨਂ ਵਚਨਂ ਸੁਤ੍ਵਾ, ਸੁਤਤ੍ਤਾਤਿ ਅਤ੍ਥੋ. ਸੇਸਂ ਪਾਕਟਮੇਵ.

ਏਵਂ ਤੇ ਪੇਤਾ ਸਾਮਣੇਰੇਨ ਪੁਟ੍ਠਾ ਤਮਤ੍ਥਂ ਆਚਿਕ੍ਖਿਤ੍ਵਾ ‘‘ਮਯਂ ਤੁਯ੍ਹਂ ਮਾਤੁਲਮਾਤੁਲਾਨਿਯੋ’’ਤਿ ਪਵੇਦੇਸੁਂ. ਤਂ ਸੁਤ੍ਵਾ ਸਾਮਣੇਰੋ ਸਞ੍ਜਾਤਸਂਵੇਗੋ ਉਕ੍ਕਣ੍ਠਂ ਪਟਿਵਿਨੋਦੇਤ੍ਵਾ ਉਪਜ੍ਝਾਯਸ੍ਸ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਏਵਮਾਹ – ‘‘ਯਂ, ਭਨ੍ਤੇ, ਅਨੁਕਮ੍ਪਕੇਨ ਕਰਣੀਯਂ ਅਨੁਕਮ੍ਪਂ ਉਪਾਦਾਯ, ਤਂ ਮੇ ਤੁਮ੍ਹੇਹਿ ਕਤਂ, ਮਹਤਾ ਵਤਮ੍ਹਿ ਅਨਤ੍ਥਪਾਤਤੋ ਰਕ੍ਖਿਤੋ, ਨ ਦਾਨਿ ਮੇ ਘਰਾਵਾਸੇਨ ਅਤ੍ਥੋ, ਅਭਿਰਮਿਸ੍ਸਾਮਿ ਬ੍ਰਹ੍ਮਚਰਿਯਵਾਸੇ’’ਤਿ. ਅਥਾਯਸ੍ਮਾ ਸਂਕਿਚ੍ਚੋ ਤਸ੍ਸ ਅਜ੍ਝਾਸਯਾਨੁਰੂਪਂ ਕਮ੍ਮਟ੍ਠਾਨਂ ਆਚਿਕ੍ਖਿ. ਸੋ ਕਮ੍ਮਟ੍ਠਾਨਂ ਅਨੁਯੁਞ੍ਜਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਆਯਸ੍ਮਾ ਪਨ ਸਂਕਿਚ੍ਚੋ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਸਤ੍ਥਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ, ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਨਾਗਪੇਤਵਤ੍ਥੁਵਣਣਨਾ ਨਿਟ੍ਠਿਤਾ.