੮. ਗੋਣਪੇਤਵਤ੍ਥੁਵਣ੍ਣਨਾ

ਕਿਂ ਨੁ ਉਮ੍ਮਤ੍ਤਰੂਪੋ ਵਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਮਤਪਿਤਿਕਂ ਕੁਟੁਮ੍ਬਿਕਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰ ਅਞ੍ਞਤਰਸ੍ਸ ਕੁਟੁਮ੍ਬਿਕਸ੍ਸ ਪਿਤਾ ਕਾਲਮਕਾਸਿ. ਸੋ ਪਿਤੁ ਮਰਣੇਨ ਸੋਕਸਨ੍ਤਤ੍ਤਹਦਯੋ ਰੋਦਮਾਨੋ ਉਮ੍ਮਤ੍ਤਕੋ ਪਿਯ ਵਿਚਰਨ੍ਤੋ ਯਂ ਯਂ ਪਸ੍ਸਤਿ, ਤਂ ਤਂ ਪੁਚ੍ਛਤਿ – ‘‘ਅਪਿ ਮੇ ਪਿਤਰਂ ਪਸ੍ਸਿਤ੍ਥਾ’’ਤਿ? ਨ ਕੋਚਿ ਤਸ੍ਸ ਸੋਕਂ ਵਿਨੋਦੇਤੁਂ ਅਸਕ੍ਖਿ. ਤਸ੍ਸ ਪਨ ਹਦਯੇ ਘਟੇ ਪਦੀਪੋ ਵਿਯ ਸੋਤਾਪਤ੍ਤਿਫਲਸ੍ਸ ਉਪਨਿਸ੍ਸਯੋ ਪਜ੍ਜਲਤਿ.

ਸਤ੍ਥਾ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋ ਤਸ੍ਸ ਸੋਤਾਪਤ੍ਤਿਫਲਸ੍ਸ ਉਪਨਿਸ੍ਸਯਂ ਦਿਸ੍ਵਾ ‘‘ਇਮਸ੍ਸ ਅਤੀਤਕਾਰਣਂ ਆਹਰਿਤ੍ਵਾ ਸੋਕਂ ਵੂਪਸਮੇਤ੍ਵਾ ਸੋਤਾਪਤ੍ਤਿਫਲਂ ਦਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਪੁਨਦਿਵਸੇ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਪਚ੍ਛਾਸਮਣਂ ਅਨਾਦਾਯ ਤਸ੍ਸ ਘਰਦ੍ਵਾਰਂ ਅਗਮਾਸਿ. ਸੋ ‘‘ਸਤ੍ਥਾ ਆਗਤੋ’’ਤਿ ਸੁਤ੍ਵਾ ਪਚ੍ਚੁਗ੍ਗਨ੍ਤ੍ਵਾ ਸਤ੍ਥਾਰਂ ਗੇਹਂ ਪਵੇਸੇਤ੍ਵਾ ਸਤ੍ਥਰਿ ਪਞ੍ਞਤ੍ਤੇ ਆਸਨੇ ਨਿਸਿਨ੍ਨੇ ਸਯਂ ਭਗਵਨ੍ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ‘‘ਕਿਂ, ਭਨ੍ਤੇ, ਮਯ੍ਹਂ ਪਿਤੁ ਗਤਟ੍ਠਾਨਂ ਜਾਨਾਥਾ’’ਤਿ ਆਹ. ਅਥ ਨਂ ਸਤ੍ਥਾ, ‘‘ਉਪਾਸਕ, ਕਿਂ ਇਮਸ੍ਮਿਂ ਅਤ੍ਤਭਾਵੇ ਪਿਤਰਂ ਪੁਚ੍ਛਸਿ, ਉਦਾਹੁ ਅਤੀਤੇ’’ਤਿ ਆਹ. ਸੋ ਤਂ ਵਚਨਂ ਸੁਤ੍ਵਾ ‘‘ਬਹੂ ਕਿਰ ਮਯ੍ਹਂ ਪਿਤਰੋ’’ਤਿ ਤਨੁਭੂਤਸੋਕੋ ਥੋਕਂ ਮਜ੍ਝਤ੍ਤਤਂ ਪਟਿਲਭਿ. ਅਥਸ੍ਸ ਸਤ੍ਥਾ ਸੋਕਵਿਨੋਦਨਂ ਧਮ੍ਮਕਥਂ ਕਤ੍ਵਾ ਅਪਗਤਸੋਕਂ ਕਲ੍ਲਚਿਤ੍ਤਂ ਵਿਦਿਤ੍ਵਾ ਸਾਮੁਕ੍ਕਂਸਿਕਾਯ ਧਮ੍ਮਦੇਸਨਾਯ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਤ੍ਵਾ ਵਿਹਾਰਂ ਅਗਮਾਸਿ.

ਅਥ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ – ‘‘ਪਸ੍ਸਥ, ਆਵੁਸੋ, ਬੁਦ੍ਧਾਨੁਭਾਵਂ, ਤਥਾ ਸੋਕਪਰਿਦੇਵਸਮਾਪਨ੍ਨੋ ਉਪਾਸਕੋ ਖਣੇਨੇਵ ਭਗਵਤਾ ਸੋਤਾਪਤ੍ਤਿਫਲੇ ਵਿਨੀਤੋ’’ਤਿ. ਸਤ੍ਥਾ ਤਤ੍ਥ ਗਨ੍ਤ੍ਵਾ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਿਨ੍ਨੋ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿ. ਭਿਕ੍ਖੂ ਤਮਤ੍ਥਂ ਭਗਵਤੋ ਆਰੋਚੇਸੁਂ. ਸਤ੍ਥਾ ‘‘ਨ, ਭਿਕ੍ਖਵੇ, ਇਦਾਨੇਵ ਮਯਾ ਇਮਸ੍ਸ ਸੋਕੋ ਅਪਨੀਤੋ, ਪੁਬ੍ਬੇਪਿ ਅਪਨੀਤੋਯੇਵਾ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਅਞ੍ਞਤਰਸ੍ਸ ਗਹਪਤਿਕਸ੍ਸ ਪਿਤਾ ਕਾਲਮਕਾਸਿ. ਸੋ ਪਿਤੁ ਮਰਣੇਨ ਸੋਕਪਰਿਦੇਵਸਮਾਪਨ੍ਨੋ ਅਸ੍ਸੁਮੁਖੋ ਰਤ੍ਤਕ੍ਖੋ ਕਨ੍ਦਨ੍ਤੋ ਚਿਤਕਂ ਪਦਕ੍ਖਿਣਂ ਕਰੋਤਿ. ਤਸ੍ਸ ਪੁਤ੍ਤੋ ਸੁਜਾਤੋ ਨਾਮ ਕੁਮਾਰੋ ਪਣ੍ਡਿਤੋ ਬ੍ਯਤ੍ਤੋ ਬੁਦ੍ਧਿਸਮ੍ਪਨ੍ਨੋ ਪਿਤੁਸੋਕਵਿਨਯਨੂਪਾਯਂ ਚਿਨ੍ਤੇਨ੍ਤੋ ਏਕਦਿਵਸਂ ਬਹਿਨਗਰੇ ਏਕਂ ਮਤਗੋਣਂ ਦਿਸ੍ਵਾ ਤਿਣਞ੍ਚ ਪਾਨੀਯਞ੍ਚ ਆਹਰਿਤ੍ਵਾ ਤਸ੍ਸ ਪੁਰਤੋ ਠਪੇਤ੍ਵਾ ‘‘ਖਾਦ, ਖਾਦ, ਪਿਵ, ਪਿਵਾ’’ਤਿ ਵਦਨ੍ਤੋ ਅਟ੍ਠਾਸਿ. ਆਗਤਾਗਤਾ ਤਂ ਦਿਸ੍ਵਾ ‘‘ਸਮ੍ਮ ਸੁਜਾਤ, ਕਿਂ ਉਮ੍ਮਤ੍ਤਕੋਸਿ, ਯੋ ਤ੍ਵਂ ਮਤਸ੍ਸ ਗੋਣਸ੍ਸ ਤਿਣੋਦਕਂ ਉਪਨੇਸੀ’’ਤਿ ਵਦਨ੍ਤਿ? ਸੋ ਨ ਕਿਞ੍ਚਿ ਪਟਿਵਦਤਿ. ਮਨੁਸ੍ਸਾ ਤਸ੍ਸ ਪਿਤੁ ਸਨ੍ਤਿਕਂ ਗਨ੍ਤ੍ਵਾ ‘‘ਪੁਤ੍ਤੋ ਤੇ ਉਮ੍ਮਤ੍ਤਕੋ ਜਾਤੋ, ਮਤਗੋਣਸ੍ਸ ਤਿਣੋਦਕਂ ਦੇਤੀ’’ਤਿ ਆਹਂਸੁ. ਤਂ ਸੁਤ੍ਵਾ ਚ ਕੁਟੁਮ੍ਬਿਕਸ੍ਸ ਪਿਤਰਂ ਆਰਬ੍ਭ ਠਿਤੋ ਸੋਕੋ ਅਪਗਤੋ. ਸੋ ‘‘ਮਯ੍ਹਂ ਕਿਰ ਪੁਤ੍ਤੋ ਉਮ੍ਮਤ੍ਤਕੋ ਜਾਤੋ’’ਤਿ ਸਂਵੇਗਪ੍ਪਤ੍ਤੋ ਵੇਗੇਨ ਗਨ੍ਤ੍ਵਾ ‘‘ਨਨੁ ਤ੍ਵਂ, ਤਾਤ ਸੁਜਾਤ, ਪਣ੍ਡਿਤੋ ਬ੍ਯਤ੍ਤੋ ਬੁਦ੍ਧਿਸਮ੍ਪਨ੍ਨੋ, ਕਸ੍ਮਾ ਮਤਗੋਣਸ੍ਸ ਤਿਣੋਦਕਂ ਦੇਸੀ’’ਤਿ ਚੋਦੇਨ੍ਤੋ –

੪੬. ‘‘ਕਿਂ ਨੁ ਉਮ੍ਮਤ੍ਤਰੂਪੋਵ, ਲਾਯਿਤ੍ਵਾ ਹਰਿਤਂ ਤਿਣਂ;

ਖਾਦ ਖਾਦਾਤਿ ਲਪਸਿ, ਗਤਸਤ੍ਤਂ ਜਰਗ੍ਗਵਂ.

੪੭. ‘‘ਨ ਹਿ ਅਨ੍ਨੇਨ ਪਾਨੇਨ, ਮਤੋ ਗੋਣੋ ਸਮੁਟ੍ਠਹੇ;

ਤ੍ਵਂਸਿ ਬਾਲੋ ਚ ਦੁਮ੍ਮੇਧੋ, ਯਥਾ ਤਞ੍ਞੋਵ ਦੁਮ੍ਮਤੀ’’ਤਿ. –

ਗਾਥਾਦ੍ਵਯਮਾਹ. ਤਤ੍ਥ ਕਿਂ ਨੂਤਿ ਪੁਚ੍ਛਾਵਚਨਂ. ਉਮ੍ਮਤ੍ਤਰੂਪੋਵਾਤਿ ਉਮ੍ਮਤ੍ਤਕਸਭਾਵੋ ਵਿਯ ਚਿਤ੍ਤਕ੍ਖੇਪਂ ਪਤ੍ਤੋ ਵਿਯ. ਲਾਯਿਤ੍ਵਾਤਿ ਲਵਿਤ੍ਵਾ. ਹਰਿਤਂ ਤਿਣਨ੍ਤਿ ਅਲ੍ਲਤਿਣਂ. ਲਪਸਿ ਵਿਲਪਸਿ. ਗਤਸਤ੍ਤਨ੍ਤਿ ਵਿਗਤਜੀਵਿਤਂ. ਜਰਗ੍ਗਵਨ੍ਤਿ ਬਲਿਬਦ੍ਦਂ ਜਿਣ੍ਣਗੋਣਂ. ਅਨ੍ਨੇਨ ਪਾਨੇਨਾਤਿ ਤਯਾ ਦਿਨ੍ਨੇਨ ਹਰਿਤਤਿਣੇਨ ਵਾ ਪਾਨੀਯੇਨ ਵਾ. ਮਤੋ ਗੋਣੋ ਸਮੁਟ੍ਠਹੇਤਿ ਕਾਲਕਤੋ ਗੋਣੋ ਲਦ੍ਧਜੀਵਿਤੋ ਹੁਤ੍ਵਾ ਨ ਹਿ ਸਮੁਟ੍ਠਹੇਯ੍ਯ. ਤ੍ਵਂਸਿ ਬਾਲੋ ਚ ਦੁਮ੍ਮੇਧੋਤਿ ਤ੍ਵਂ ਬਾਲ੍ਯਯੋਗਤੋ ਬਾਲੋ, ਮੇਧਾਸਙ੍ਖਾਤਾਯ ਪਞ੍ਞਾਯ ਅਭਾਵਤੋ ਦੁਮ੍ਮੇਧੋ ਅਸਿ. ਯਥਾ ਤਞ੍ਞੋਵ ਦੁਮ੍ਮਤੀਤਿ ਯਥਾ ਤਂ ਅਞ੍ਞੋਪਿ ਨਿਪ੍ਪਞ੍ਞੋ ਵਿਪ੍ਪਲਪੇਯ੍ਯ, ਏਵਂ ਤ੍ਵਂ ਨਿਰਤ੍ਥਕਂ ਵਿਪ੍ਪਲਪਸੀਤਿ ਅਤ੍ਥੋ. ਯਥਾ ਤਨ੍ਤਿ ਨਿਪਾਤਮਤ੍ਤਂ.

ਤਂ ਸੁਤ੍ਵਾ ਸੁਜਾਤੋ ਪਿਤਰਂ ਸਞ੍ਞਾਪੇਤੁਂ ਅਤ੍ਤਨੋ ਅਧਿਪ੍ਪਾਯਂ ਪਕਾਸੇਨ੍ਤੋ –

੪੮. ‘‘ਇਮੇ ਪਾਦਾ ਇਦਂ ਸੀਸਂ, ਅਯਂ ਕਾਯੋ ਸਵਾਲਧਿ;

ਨੇਤ੍ਤਾ ਤਥੇਵ ਤਿਟ੍ਠਨ੍ਤਿ, ਅਯਂ ਗੋਣੋ ਸਮੁਟ੍ਠਹੇ.

੪੯. ‘‘ਨਾਯ੍ਯਕਸ੍ਸ ਹਤ੍ਥਪਾਦਾ, ਕਾਯੋ ਸੀਸਞ੍ਚ ਦਿਸ੍ਸਤਿ;

ਰੁਦਂ ਮਤ੍ਤਿਕਥੂਪਸ੍ਮਿਂ, ਨਨੁ ਤ੍ਵਞ੍ਞੇਵ ਦੁਮ੍ਮਤੀ’’ਤਿ. –

ਗਾਥਾਦ੍ਵਯਂ ਅਭਾਸਿ. ਤਸ੍ਸਤ੍ਥੋ – ਇਮਸ੍ਸ ਗੋਣਸ੍ਸ ਇਮੇ ਚਤ੍ਤਾਰੋ ਪਾਦਾ, ਇਦਂ ਸੀਸਂ, ਸਹ ਵਾਲਧਿਨਾ ਵਤ੍ਤਤੀਤਿ ਸਵਾਲਧਿ ਅਯਂ ਕਾਯੋ. ਇਮਾਨਿ ਚ ਨੇਤ੍ਤਾ ਨਯਨਾਨਿ ਯਥਾ ਮਰਣਤੋ ਪੁਬ੍ਬੇ, ਤਥੇਵ ਅਭਿਨ੍ਨਸਣ੍ਠਾਨਾਨਿ ਤਿਟ੍ਠਨ੍ਤਿ. ਅਯਂ ਗੋਣੋ ਸਮੁਟ੍ਠਹੇਤਿ ਇਮਸ੍ਮਾ ਕਾਰਣਾ ਅਯਂ ਗੋਣੋ ਸਮੁਟ੍ਠਹੇਯ੍ਯ ਸਮੁਤ੍ਤਿਟ੍ਠੇਯ੍ਯਾਤਿ ਮਮ ਚਿਤ੍ਤਂ ਭਵੇਯ੍ਯ. ‘‘ਮਞ੍ਞੇ ਗੋਣੋ ਸਮੁਟ੍ਠਹੇ’’ਤਿ ਕੇਚਿ ਪਠਨ੍ਤਿ, ਤੇਨ ਕਾਰਣੇਨ ਅਯਂ ਗੋਣੋ ਸਹਸਾਪਿ ਕਾਯਂ ਸਮੁਟ੍ਠਹੇਯ੍ਯਾਤਿ ਅਹਂ ਮਞ੍ਞੇਯ੍ਯਂ, ਏਵਂ ਮੇ ਮਞ੍ਞਨਾ ਸਮ੍ਭਵੇਯ੍ਯਾਤਿ ਅਧਿਪ੍ਪਾਯੋ. ਅਯ੍ਯਕਸ੍ਸ ਪਨ ਮਯ੍ਹਂ ਪਿਤਾਮਹਸ੍ਸ ਨ ਹਤ੍ਥਪਾਦਾ ਕਾਯੋ ਸੀਸਂ ਦਿਸ੍ਸਤਿ, ਕੇਵਲਂ ਪਨ ਤਸ੍ਸ ਅਟ੍ਠਿਕਾਨਿ ਪਕ੍ਖਿਪਿਤ੍ਵਾ ਕਤੇ ਮਤ੍ਤਿਕਾਮਯੇ ਥੂਪੇ ਰੁਦਨ੍ਤੋ ਸਤਗੁਣੇਨ ਸਹਸ੍ਸਗੁਣੇਨ, ਤਾਤ, ਤ੍ਵਞ੍ਞੇਵ ਦੁਮ੍ਮਤਿ ਨਿਪ੍ਪਞ੍ਞੋ, ਭਿਜ੍ਜਨਧਮ੍ਮਾ ਸਙ੍ਖਾਰਾ ਭਿਜ੍ਜਨ੍ਤਿ, ਤਤ੍ਥ ਵਿਜਾਨਤਂ ਕਾ ਪਰਿਦੇਵਨਾਤਿ ਪਿਤੁ ਧਮ੍ਮਂ ਕਥੇਸਿ.

ਤਂ ਸੁਤ੍ਵਾ ਬੋਧਿਸਤ੍ਤਸ੍ਸ ਪਿਤਾ ‘‘ਮਮ ਮੁਤ੍ਤੋ ਪਣ੍ਡਿਤੋ ਮਂ ਸਞ੍ਞਾਪੇਤੁਂ ਇਮਂ ਕਮ੍ਮਂ ਅਕਾਸੀ’’ਤਿ ਚਿਨ੍ਤੇਤ੍ਵਾ ‘‘ਤਾਤ ਸੁਜਾਤ, ‘ਸਬ੍ਬੇਪਿ ਸਤ੍ਤਾ ਮਰਣਧਮ੍ਮਾ’ਤਿ ਅਞ੍ਞਾਤਮੇਤਂ, ਇਤੋ ਪਟ੍ਠਾਯ ਨ ਸੋਚਿਸ੍ਸਾਮਿ, ਸੋਕਹਰਣਸਮਤ੍ਥੇਨ ਨਾਮ ਮੇਧਾਵਿਨਾ ਤਾਦਿਸੇਨੇਵ ਭਵਿਤਬ੍ਬ’’ਨ੍ਤਿ ਪੁਤ੍ਤਂ ਪਸਂਸਨ੍ਤੋ –

੫੦. ‘‘ਆਦਿਤ੍ਤਂ ਵਤ ਮਂ ਸਨ੍ਤਂ, ਘਤਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

੫੧. ‘‘ਅਬ੍ਬਹੀ ਵਤ ਮੇ ਸਲ੍ਲਂ, ਸੋਕਂ ਹਦਯਨਿਸ੍ਸਿਤਂ;

ਯੋ ਮੇ ਸੋਕਪਰੇਤਸ੍ਸ, ਪਿਤੁਸੋਕਂ ਅਪਾਨੁਦਿ.

੫੨. ‘‘ਸ੍ਵਾਹਂ ਅਬ੍ਬੂਲ਼੍ਹਸਲ੍ਲੋਸ੍ਮਿ, ਸੀਤਿਭੂਤੋਸ੍ਮਿ ਨਿਬ੍ਬੁਤੋ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾਨ ਮਾਣਵ.

੫੩. ‘‘ਏਵਂ ਕਰੋਨ੍ਤਿ ਸਪ੍ਪਞ੍ਞਾ, ਯੇ ਹੋਨ੍ਤਿ ਅਨੁਕਮ੍ਪਕਾ;

ਵਿਨਿਵਤ੍ਤਯਨ੍ਤਿ ਸੋਕਮ੍ਹਾ, ਸੁਜਾਤੋ ਪਿਤਰਂ ਯਥਾ’’ਤਿ. –

ਚਤਸ੍ਸੋ ਗਾਥਾ ਅਭਾਸਿ. ਤਤ੍ਥ ਆਦਿਤ੍ਤਨ੍ਤਿ ਸੋਕਗ੍ਗਿਨਾ ਆਦਿਤ੍ਤਂ ਜਲਿਤਂ. ਸਨ੍ਤਨ੍ਤਿ ਸਮਾਨਂ. ਪਾਵਕਨ੍ਤਿ ਅਗ੍ਗਿ. ਵਾਰਿਨਾ ਵਿਯ ਓਸਿਞ੍ਚਨ੍ਤਿ ਉਦਕੇਨ ਅਵਸਿਞ੍ਚਨ੍ਤੋ ਵਿਯ. ਸਬ੍ਬਂ ਨਿਬ੍ਬਾਪਯੇ ਦਰਨ੍ਤਿ ਸਬ੍ਬਂ ਮੇ ਚਿਤ੍ਤਦਰਥਂ ਨਿਬ੍ਬਾਪੇਸਿ. ਅਬ੍ਬਹੀ ਵਤਾਤਿ ਨੀਹਰਿ ਵਤ. ਸਲ੍ਲਨ੍ਤਿ ਸੋਕਸਲ੍ਲਂ. ਹਦਯਨਿਸ੍ਸਿਤਨ੍ਤਿ ਚਿਤ੍ਤਸਨ੍ਨਿਸ੍ਸਿਤਸਲ੍ਲਭੂਤਂ. ਸੋਕਪਰੇਤਸ੍ਸਾਤਿ ਸੋਕੇਨ ਅਭਿਭੂਤਸ੍ਸ. ਪਿਤੁਸੋਕਨ੍ਤਿ ਪਿਤਰਂ ਆਰਬ੍ਭ ਉਪ੍ਪਨ੍ਨਂ ਸੋਕਂ. ਅਪਾਨੁਦੀਤਿ ਅਪਨੇਸਿ. ਤਵ ਸੁਤ੍ਵਾਨ ਮਾਣਵਾਤਿ, ਕੁਮਾਰ, ਤਵ ਵਚਨਂ ਸੁਤ੍ਵਾ ਇਦਾਨਿ ਪਨ ਨ ਸੋਚਾਮਿ ਨ ਰੋਦਾਮਿ. ਸੁਜਾਤੋ ਪਿਤਰਂ ਯਥਾਤਿ ਯਥਾ ਅਯਂ ਸੁਜਾਤੋ ਅਤ੍ਤਨੋ ਪਿਤਰਂ ਸੋਕਤੋ ਵਿਨਿਵਤ੍ਤੇਸਿ, ਏਵਂ ਅਞ੍ਞੇਪਿ ਯੇ ਅਨੁਕਮ੍ਪਕਾ ਅਨੁਗ੍ਗਣ੍ਹਸੀਲਾ ਹੋਨ੍ਤਿ, ਤੇ ਸਪ੍ਪਞ੍ਞਾ ਏਵਂ ਕਰੋਨ੍ਤਿ ਪਿਤੂਨਂ ਅਞ੍ਞੇਸਞ੍ਚ ਉਪਕਾਰਂ ਕਰੋਨ੍ਤੀਤਿ ਅਤ੍ਥੋ.

ਮਾਣਵਸ੍ਸ ਵਚਨਂ ਸੁਤ੍ਵਾ ਪਿਤਾ ਅਪਗਤਸੋਕੋ ਹੁਤ੍ਵਾ ਸੀਸਂ ਨਹਾਯਿਤ੍ਵਾ ਭੁਞ੍ਜਿਤ੍ਵਾ ਕਮ੍ਮਨ੍ਤੇ ਪਵਤ੍ਤੇਤ੍ਵਾ ਕਾਲਂ ਕਤ੍ਵਾ ਸਗ੍ਗਪਰਾਯਣੋ ਅਹੋਸਿ. ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਤੇਸਂ ਭਿਕ੍ਖੂਨਂ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਬਹੂ ਸੋਤਾਪਤ੍ਤਿਫਲਾਦੀਸੁ ਪਤਿਟ੍ਠਹਿਂਸੁ. ਤਦਾ ਸੁਜਾਤੋ ਲੋਕਨਾਥੋ ਅਹੋਸੀਤਿ.

ਗੋਣਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.