੭. ਸਤ੍ਤਪੁਤ੍ਤਖਾਦਕਪੇਤਿਵਤ੍ਥੁਵਣ੍ਣਨਾ

ਨਗ੍ਗਾ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਸਤ੍ਤਪੁਤ੍ਤਖਾਦਕਪੇਤਿਂ ਆਰਬ੍ਭ ਵੁਤ੍ਤਂ. ਸਾਵਤ੍ਥਿਯਾ ਕਿਰ ਅਵਿਦੂਰੇ ਅਞ੍ਞਤਰਸ੍ਮਿਂ ਗਾਮਕੇ ਅਞ੍ਞਤਰਸ੍ਸ ਉਪਾਸਕਸ੍ਸ ਦ੍ਵੇ ਪੁਤ੍ਤਾ ਅਹੇਸੁਂ – ਪਠਮਵਯੇ ਠਿਤਾ ਰੂਪਸਮ੍ਪਨ੍ਨਾ ਸੀਲਾਚਾਰੇਨ ਸਮਨ੍ਨਾਗਤਾ. ਤੇਸਂ ਮਾਤਾ ‘‘ਪੁਤ੍ਤਵਤੀ ਅਹ’’ਨ੍ਤਿ ਪੁਤ੍ਤਬਲੇਨ ਭਤ੍ਤਾਰਂ ਅਤਿਮਞ੍ਞਤਿ. ਸੋ ਭਰਿਯਾਯ ਅਵਮਾਨਿਤੋ ਨਿਬ੍ਬਿਨ੍ਨਮਾਨਸੋ ਅਞ੍ਞਂ ਕਞ੍ਞਂ ਆਨੇਸਿ. ਸਾ ਨਚਿਰਸ੍ਸੇਵ ਗਬ੍ਭਿਨੀ ਅਹੋਸਿ. ਅਥਸ੍ਸ ਜੇਟ੍ਠਭਰਿਯਾ ਇਸ੍ਸਾਪਕਤਾ ਅਞ੍ਞਤਰਂ ਵੇਜ੍ਜਂ ਆਮਿਸੇਨ ਉਪਲਾਪੇਤ੍ਵਾ ਤੇਨ ਤਸ੍ਸਾ ਤੇਮਾਸਿਕਂ ਗਬ੍ਭਂ ਪਾਤੇਸਿ. ਅਥ ਸਾ ਞਾਤੀਹਿ ਚ ਭਤ੍ਤਾਰਾ ਚ ‘‘ਤਯਾ ਇਮਿਸ੍ਸਾ ਗਬ੍ਭੋ ਪਾਤਿਤੋ’’ਤਿ ਪੁਟ੍ਠਾ ‘‘ਨਾਹਂ ਪਾਤੇਮੀ’’ਤਿ ਮੁਸਾ ਵਤ੍ਵਾ ਤੇਹਿ ਅਸਦ੍ਦਹਨ੍ਤੇਹਿ ‘‘ਸਪਥਂ ਕਰੋਹੀ’’ਤਿ ਵੁਤ੍ਤਾ ‘‘ਸਾਯਂ ਪਾਤਂ ਸਤ੍ਤ ਸਤ੍ਤ ਪੁਤ੍ਤੇ ਵਿਜਾਯਿਤ੍ਵਾ ਪੁਤ੍ਤਮਂਸਾਨਿ ਖਾਦਾਮਿ, ਨਿਚ੍ਚਂ ਦੁਗ੍ਗਨ੍ਧਾ ਚ ਮਕ੍ਖਿਕਾਪਰਿਕਿਣ੍ਣਾ ਚ ਭਵੇਯ੍ਯ’’ਨ੍ਤਿ ਸਪਥਂ ਅਕਾਸਿ.

ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਸ੍ਸ ਗਬ੍ਭਪਾਤਨਸ੍ਸ ਮੁਸਾਵਾਦਸ੍ਸ ਚ ਫਲੇਨੇਵ ਪੇਤਯੋਨਿਯਂ ਨਿਬ੍ਬਤ੍ਤਿਤ੍ਵਾ ਪੁਤ੍ਤਨਯੇਨ ਪੁਤ੍ਤਮਂਸਾਨਿ ਖਾਦਨ੍ਤੀ ਤਸ੍ਸੇਵ ਗਾਮਸ੍ਸ ਅਵਿਦੂਰੇ ਵਿਚਰਤਿ. ਤੇਨ ਚ ਸਮਯੇਨ ਸਮ੍ਬਹੁਲਾ ਥੇਰਾ ਗਾਮਕਾਵਾਸੇ ਵੁਤ੍ਥਵਸ੍ਸਾ ਭਗਵਨ੍ਤਂ ਦਸ੍ਸਨਾਯ ਸਾਵਤ੍ਥਿਂ ਆਗਚ੍ਛਨ੍ਤਾ ਤਸ੍ਸ ਗਾਮਸ੍ਸ ਅਵਿਦੂਰੇ ਏਕਸ੍ਮਿਂ ਪਦੇਸੇ ਰਤ੍ਤਿਯਂ ਵਾਸਂ ਕਪ੍ਪੇਸੁਂ. ਅਥ ਸਾ ਪੇਤੀ ਤੇਸਂ ਥੇਰਾਨਂ ਅਤ੍ਤਾਨਂ ਦਸ੍ਸੇਸਿ. ਤਂ ਮਹਾਥੇਰੋ ਗਾਥਾਯ ਪੁਚ੍ਛਿ –

੩੫. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਦੁਗ੍ਗਨ੍ਧਾ ਪੂਤਿ ਵਾਯਸਿ;

ਮਕ੍ਖਿਕਾਹਿ ਪਰਿਕਿਣ੍ਣਾ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ.

ਸਾ ਥੇਰੇਨ ਪੁਟ੍ਠਾ ਤੀਹਿ ਗਾਥਾਹਿ ਪਟਿਵਚਨਂ ਅਦਾਸਿ –

੩੬. ‘‘ਅਹਂ ਭਦਨ੍ਤੇ ਪੇਤੀਮ੍ਹਿ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

੩੭. ‘‘ਕਾਲੇਨ ਸਤ੍ਤ ਪੁਤ੍ਤਾਨਿ, ਸਾਯਂ ਸਤ੍ਤ ਪੁਨਾਪਰੇ;

ਵਿਜਾਯਿਤ੍ਵਾਨ ਖਾਦਾਮਿ, ਤੇਪਿ ਨਾ ਹੋਨ੍ਤਿ ਮੇ ਅਲਂ.

੩੮. ‘‘ਪਰਿਡਯ੍ਹਤਿ ਧੂਮਾਯਤਿ, ਖੁਦਾਯ ਹਦਯਂ ਮਮ;

ਨਿਬ੍ਬੁਤਿਂ ਨਾਧਿਗਚ੍ਛਾਮਿ, ਅਗ੍ਗਿਦਡ੍ਢਾਵ ਆਤਪੇ’’ਤਿ.

੩੮. ਤਤ੍ਥ ਨਿਬ੍ਬੁਤਿਨ੍ਤਿ ਖੁਪ੍ਪਿਪਾਸਾਦੁਕ੍ਖਸ੍ਸ ਵੂਪਸਮਂ. ਨਾਧਿਗਚ੍ਛਾਮੀਤਿ ਨ ਲਭਾਮਿ. ਅਗ੍ਗਿਦਡ੍ਢਾਵ ਆਤਪੇਤਿ ਅਤਿਉਣ੍ਹਆਤਪੇ ਅਗ੍ਗਿਨਾ ਡਯ੍ਹਮਾਨਾ ਵਿਯ ਨਿਬ੍ਬੁਤਿਂ ਨਾਧਿਗਚ੍ਛਾਮੀਤਿ ਯੋਜਨਾ.

ਤਂ ਸੁਤ੍ਵਾ ਮਹਾਥੇਰੋ ਤਾਯ ਕਤਕਮ੍ਮਂ ਪੁਚ੍ਛਨ੍ਤੋ –

੩੯. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪੁਤ੍ਤਮਂਸਾਨਿ ਖਾਦਸੀ’’ਤਿ. – ਗਾਥਮਾਹ;

ਅਥ ਸਾ ਪੇਤੀ ਅਤ੍ਤਨੋ ਪੇਤਲੋਕੂਪਪਤ੍ਤਿਞ੍ਚ ਪੁਤ੍ਤਮਂਸਖਾਦਨਕਾਰਣਞ੍ਚ ਕਥੇਨ੍ਤੀ –

੪੦. ‘‘ਅਹੂ ਮਯ੍ਹਂ ਦੁਵੇ ਪੁਤ੍ਤਾ, ਉਭੋ ਸਮ੍ਪਤ੍ਤਯੋਬ੍ਬਨਾ;

ਸਾਹਂ ਪੁਤ੍ਤਬਲੂਪੇਤਾ, ਸਾਮਿਕਂ ਅਤਿਮਞ੍ਞਿਸਂ.

੪੧. ‘‘ਤਤੋ ਮੇ ਸਾਮਿਕੋ ਕੁਦ੍ਧੋ, ਸਪਤਿਂ ਮਯ੍ਹਮਾਨਯਿ;

ਸਾ ਚ ਗਬ੍ਭਂ ਅਲਭਿਤ੍ਥ, ਤਸ੍ਸਾ ਪਾਪਂ ਅਚੇਤਯਿਂ.

੪੨. ‘‘ਸਾਹਂ ਪਦੁਟ੍ਠਮਨਸਾ, ਅਕਰਿਂ ਗਬ੍ਭਪਾਤਨਂ;

ਤਸ੍ਸ ਤੇਮਾਸਿਕੋ ਗਬ੍ਭੋ, ਪੂਤਿਲੋਹਿਤਕੋ ਪਤਿ.

੪੩. ‘‘ਤਦਸ੍ਸਾ ਮਾਤਾ ਕੁਪਿਤਾ, ਮਯ੍ਹਂ ਞਾਤੀ ਸਮਾਨਯਿ;

ਸਪਥਞ੍ਚ ਮਂ ਕਾਰੇਸਿ, ਪਰਿਭਾਸਾਪਯੀ ਚ ਮਂ.

੪੪. ‘‘ਸਾਹਂ ਘੋਰਞ੍ਚ ਸਪਥਂ, ਮੁਸਾਵਾਦਂ ਅਭਾਸਿਸਂ;

‘ਪੁਤ੍ਤਮਂਸਾਨਿ ਖਾਦਾਮਿ, ਸਚੇ ਤਂ ਪਕਤਂ ਮਯਾ’.

੪੫. ‘‘ਤਸ੍ਸ ਕਮ੍ਮਸ੍ਸ ਵਿਪਾਕੇਨ, ਮੁਸਾਵਾਦਸ੍ਸ ਚੂਭਯਂ;

ਪੁਤ੍ਤਮਂਸਾਨਿ ਖਾਦਾਮਿ, ਪੁਬ੍ਬਲੋਹਿਤਮਕ੍ਖਿਤਾ’’ਤਿ. – ਇਮਾ ਗਾਥਾ ਅਭਾਸਿ;

੪੦-੪੫. ਤਤ੍ਥ ਪੁਤ੍ਤਬਲੂਪੇਤਾਤਿ ਪੁਤ੍ਤਬਲੇਨ ਉਪੇਤਾ, ਪੁਤ੍ਤਾਨਂ ਵਸੇਨ ਲਦ੍ਧਬਲਾ. ਅਤਿਮਞ੍ਞਿਸਨ੍ਤਿ ਅਤਿਕ੍ਕਮਿਤ੍ਵਾ ਮਞ੍ਞਿਂ ਅਵਮਞ੍ਞਿਂ. ਪੂਤਿਲੋਹਿਤਕੋ ਪਤੀਤਿ ਕੁਣਪਲੋਹਿਤਂ ਹੁਤ੍ਵਾ ਗਬ੍ਭੋ ਪਰਿਪਤਿ. ਸੇਸਂ ਸਬ੍ਬਂ ਅਨਨ੍ਤਰਸਦਿਸਮੇਵ. ਤਤ੍ਥ ਅਟ੍ਠ ਥੇਰਾ, ਇਧ ਸਮ੍ਬਹੁਲਾ. ਤਤ੍ਥ ਪਞ੍ਚ ਪੁਤ੍ਤਾ, ਇਧ ਸਤ੍ਤਾਤਿ ਅਯਮੇਵ ਵਿਸੇਸੋਤਿ.

ਸਤ੍ਤਪੁਤ੍ਤਖਾਦਕਪੇਤਿਵਤ੍ਥੁਵਣ੍ਣਾਨਾ ਨਿਟ੍ਠਿਤਾ.