੬. ਪਞ੍ਚਪੁਤ੍ਤਖਾਦਕਪੇਤਿਵਤ੍ਥੁਵਣ੍ਣਨਾ

ਨਗ੍ਗਾ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਪਞ੍ਚਪੁਤ੍ਤਖਾਦਕਪੇਤਿਂ ਆਰਬ੍ਭ ਵੁਤ੍ਤਂ. ਸਾਵਤ੍ਥਿਯਾ ਕਿਰ ਅਵਿਦੂਰੇ ਗਾਮਕੇ ਅਞ੍ਞਤਰਸ੍ਸ ਕੁਟੁਮ੍ਬਿਕਸ੍ਸ ਭਰਿਯਾ ਵਞ੍ਝਾ ਅਹੋਸਿ. ਤਸ੍ਸ ਞਾਤਕਾ ਏਤਦਵੋਚੁਂ – ‘‘ਤਵ ਪਜਾਪਤਿ ਵਞ੍ਝਾ, ਅਞ੍ਞਂ ਤੇ ਕਞ੍ਞਂ ਆਨੇਮਾ’’ਤਿ. ਸੋ ਤਸ੍ਸੋ ਭਰਿਯਾਯ ਸਿਨੇਹੇਨ ਨ ਇਚ੍ਛਿ. ਅਥਸ੍ਸ ਭਰਿਯਾ ਤਂ ਪਵਤ੍ਤਿਂ ਸੁਤ੍ਵਾ ਸਾਮਿਕਂ ਏਵਮਾਹ – ‘‘ਸਾਮਿ, ਅਹਂ ਵਞ੍ਝਾ, ਅਞ੍ਞਾ ਕਞ੍ਞਾ ਆਨੇਤਬ੍ਬਾ, ਮਾ ਤੇ ਕੁਲਵਂਸੋ ਉਪਚ੍ਛਿਜ੍ਜੀ’’ਤਿ. ਸੋ ਤਾਯ ਨਿਪ੍ਪੀਲ਼ਿਯਮਾਨੋ ਅਞ੍ਞਂ ਕਞ੍ਞਂ ਆਨੇਸਿ. ਸਾ ਅਪਰੇਨ ਸਮਯੇਨ ਗਬ੍ਭਿਨੀ ਅਹੋਸਿ. ਵਞ੍ਝਿਤ੍ਥੀ – ‘‘ਅਯਂ ਪੁਤ੍ਤਂ ਲਭਿਤ੍ਵਾ ਇਮਸ੍ਸ ਗੇਹਸ੍ਸ ਇਸ੍ਸਰਾ ਭਵਿਸ੍ਸਤੀ’’ਤਿ ਇਸ੍ਸਾਪਕਤਾ ਤਸ੍ਸਾ ਗਬ੍ਭਪਾਤਨੂਪਾਯਂ ਪਰਿਯੇਸਨ੍ਤੀ ਅਞ੍ਞਤਰਂ ਪਰਿਬ੍ਬਾਜਿਕਂ ਅਨ੍ਨਪਾਨਾਦੀਹਿ ਸਙ੍ਗਣ੍ਹਿਤ੍ਵਾ ਤਾਯ ਤਸ੍ਸਾ ਗਬ੍ਭਪਾਤਨਂ ਦਾਪੇਸਿ. ਸਾ ਗਬ੍ਭੇ ਪਤਿਤੇ ਅਤ੍ਤਨੋ ਮਾਤੁਯਾ ਆਰੋਚੇਸਿ, ਮਾਤਾ ਅਤ੍ਤਨੋ ਞਾਤਕੇ ਸਮੋਧਾਨੇਤ੍ਵਾ ਤਮਤ੍ਥਂ ਨਿਵੇਦੇਸਿ. ਤੇ ਵਞ੍ਝਿਤ੍ਥਿਂ ਏਤਦਵੋਚੁਂ – ‘‘ਤਯਾ ਇਮਿਸ੍ਸਾ ਗਬ੍ਭੋ ਪਾਤਿਤੋ’’ਤਿ? ‘‘ਨਾਹਂ ਪਾਤੇਮੀ’’ਤਿ. ‘‘ਸਚੇ ਤਯਾ ਗਬ੍ਭੋ ਨ ਪਾਤਿਤੋ, ਸਪਥਂ ਕਰੋਹੀ’’ਤਿ. ‘‘ਸਚੇ ਮਯਾ ਗਬ੍ਭੋ ਪਾਤਿਤੋ, ਦੁਗ੍ਗਤਿਪਰਾਯਣਾ ਖੁਪ੍ਪਿਪਾਸਾਭਿਭੂਤਾ ਸਾਯਂ ਪਾਤਂ ਪਞ੍ਚ ਪਞ੍ਚ ਪੁਤ੍ਤੇ ਵਿਜਾਯਿਤ੍ਵਾ ਖਾਦਿਤ੍ਵਾ ਤਿਤ੍ਤਿਂ ਨ ਗਚ੍ਛੇਯ੍ਯਂ, ਨਿਚ੍ਚਂ ਦੁਗ੍ਗਨ੍ਧਾ ਮਕ੍ਖਿਕਾਪਰਿਕਿਣ੍ਣਾ ਚ ਭਵੇਯ੍ਯ’’ਨ੍ਤਿ ਮੁਸਾ ਵਤ੍ਵਾ ਸਪਥਂ ਅਕਾਸਿ. ਸਾ ਨਚਿਰਸ੍ਸੇਵ ਕਾਲਂ ਕਤ੍ਵਾ ਤਸ੍ਸੇਵ ਗਾਮਸ੍ਸ ਅਵਿਦੂਰੇ ਦੁਬ੍ਬਣ੍ਣਰੂਪਾ ਪੇਤੀ ਹੁਤ੍ਵਾ ਨਿਬ੍ਬਤ੍ਤਿ.

ਤਦਾ ਜਨਪਦੇ ਵੁਤ੍ਥਵਸ੍ਸਾ ਅਟ੍ਠ ਥੇਰਾ ਸਤ੍ਥੁ ਦਸ੍ਸਨਤ੍ਥਂ ਸਾਵਤ੍ਥਿਂ ਆਗਚ੍ਛਨ੍ਤਾ ਤਸ੍ਸ ਗਾਮਸ੍ਸ ਅਵਿਦੂਰੇ ਛਾਯੂਦਕਸਮ੍ਪਨ੍ਨੇ ਅਰਞ੍ਞਟ੍ਠਾਨੇ ਵਾਸਂ ਉਪਗਚ੍ਛਿਂਸੁ. ਅਥ ਸਾ ਪੇਤੀ ਥੇਰਾਨਂ ਅਤ੍ਤਾਨਂ ਦਸ੍ਸੇਸਿ. ਤੇਸੁ ਸਙ੍ਘਤ੍ਥੇਰੋ ਤਂ ਪੇਤਿਂ –

੨੬. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਦੁਗ੍ਗਨ੍ਧਾ ਪੂਤਿ ਵਾਯਸਿ;

ਮਕ੍ਖਿਕਾਹਿ ਪਰਿਕਿਣ੍ਣਾ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ. –

ਗਾਥਾਯ ਪਟਿਪੁਚ੍ਛਿ. ਤਤ੍ਥ ਨਗ੍ਗਾਤਿ ਨਿਚ੍ਚੋਲ਼ਾ. ਦੁਬ੍ਬਣ੍ਣਰੂਪਾਸੀਤਿ ਣਵਿਰੂਪਾ ਅਤਿਵਿਯ ਬੀਭਚ੍ਛਰੂਪੇਨ ਸਮਨ੍ਨਾਗਤਾ ਅਸਿ. ਦੁਗ੍ਗਨ੍ਧਾਤਿ ਅਨਿਟ੍ਠਗਨ੍ਧਾ. ਪੂਤਿ ਵਾਯਸੀਤਿ ਸਰੀਰਤੋ ਕੁਣਪਗਨ੍ਧਂ ਵਾਯਸਿ. ਮਕ੍ਖਿਕਾਹਿ ਪਰਿਕਿਣ੍ਣਾਤਿ ਨੀਲਮਕ੍ਖਿਕਾਹਿ ਸਮਨ੍ਤਤੋ ਆਕਿਣ੍ਣਾ. ਕਾ ਨੁ ਤ੍ਵਂ ਇਧ ਤਿਟ੍ਠਸੀਤਿ ਕਾ ਨਾਮ ਏਵਰੂਪਾ ਇਮਸ੍ਮਿਂ ਠਾਨੇ ਤਿਟ੍ਠਸਿ, ਇਤੋ ਚਿਤੋ ਚ ਵਿਚਰਸੀਤਿ ਅਤ੍ਥੋ.

ਅਥ ਸਾ ਪੇਤੀ ਮਹਾਥੇਰੇਨ ਏਵਂ ਪੁਟ੍ਠਾ ਅਤ੍ਤਾਨਂ ਪਕਾਸੇਨ੍ਤੀ ਸਤ੍ਤਾਨਂ ਸਂਵੇਗਂ ਜਨੇਨ੍ਤੀ –

੨੭. ‘‘ਅਹਂ ਭਦਨ੍ਤੇ ਪੇਤੀਮ੍ਹਿ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

੨੮. ‘‘ਕਾਲੇਨ ਪਞ੍ਚ ਪੁਤ੍ਤਾਨਿ, ਸਾਯਂ ਪਞ੍ਚ ਪੁਨਾਪਰੇ;

ਵਿਜਾਯਿਤ੍ਵਾਨ ਖਾਦਾਮਿ, ਤੇਪਿ ਨਾ ਹੋਨ੍ਤਿ ਮੇ ਅਲਂ.

੨੯. ‘‘ਪਰਿਡਯ੍ਹਤਿ ਧੂਮਾਯਤਿ, ਖੁਦਾਯ ਹਦਯਂ ਮਮ;

ਪਾਨੀਯਂ ਨ ਲਭੇ ਪਾਤੁਂ, ਪਸ੍ਸ ਮਂ ਬ੍ਯਸਨਂ ਗਤ’’ਨ੍ਤਿ. –

ਇਮਾ ਤਿਸ੍ਸੋ ਗਾਥਾ ਅਭਾਸਿ.

੨੭. ਤਤ੍ਥ ਭਦਨ੍ਤੇਤਿ ਥੇਰਂ ਗਾਰਵੇਨ ਆਲਪਤਿ. ਦੁਗ੍ਗਤਾਤਿ ਦੁਗ੍ਗਤਿਂ ਗਤਾ. ਯਮਲੋਕਿਕਾਤਿ ‘‘ਯਮਲੋਕੋ’’ਤਿ ਲਦ੍ਧਨਾਮੇ ਪੇਤਲੋਕੇ ਤਤ੍ਥ ਪਰਿਯਾਪਨ੍ਨਭਾਵੇਨ ਵਿਦਿਤਾ. ਇਤੋ ਗਤਾਤਿ ਇਤੋ ਮਨੁਸ੍ਸਲੋਕਤੋ ਪੇਤਲੋਕਂ ਉਪਪਜ੍ਜਨਵਸੇਨ ਗਤਾ, ਉਪਪਨ੍ਨਾਤਿ ਅਤ੍ਥੋ.

੨੮. ਕਾਲੇਨਾਤਿ ਰਤ੍ਤਿਯਾ ਵਿਭਾਤਕਾਲੇ. ਭੁਮ੍ਮਤ੍ਥੇ ਹਿ ਏਤਂ ਕਰਣਵਚਨਂ. ਪਞ੍ਚ ਪੁਤ੍ਤਾਨੀਤਿ ਪਞ੍ਚ ਪੁਤ੍ਤੇ. ਲਿਙ੍ਗਵਿਪਲ੍ਲਾਸੇਨ ਹੇਤਂ ਵੁਤ੍ਤਂ. ਸਾਯਂ ਪਞ੍ਚ ਪੁਨਾਪਰੇਤਿ ਸਾਯਨ੍ਹਕਾਲੇ ਪੁਨ ਅਪਰੇ ਪਞ੍ਚ ਪੁਤ੍ਤੇ ਖਾਦਾਮੀਤਿ ਯੋਜਨਾ. ਵਿਜਾਯਿਤ੍ਵਾਨਾਤਿ ਦਿਵਸੇ ਦਿਵਸੇ ਦਸ ਦਸ ਪੁਤ੍ਤੇ ਵਿਜਾਯਿਤ੍ਵਾ. ਤੇਪਿ ਨਾ ਹੋਨ੍ਤਿ ਮੇ ਅਲਨ੍ਤਿ ਤੇਪਿ ਦਸਪੁਤ੍ਤਾ ਏਕਦਿਵਸਂ ਮਯ੍ਹਂ ਖੁਦਾਯ ਪਟਿਘਾਤਾਯ ਅਹਂ ਪਰਿਯਤ੍ਤਾ ਨ ਹੋਨ੍ਤਿ. ਗਾਥਾਸੁਖਤ੍ਥਞ੍ਹੇਤ੍ਥ ਨਾ-ਇਤਿ ਦੀਘਂ ਕਤ੍ਵਾ ਵੁਤ੍ਤਂ.

੨੯. ਪਰਿਡਯ੍ਹਤਿ ਧੂਮਾਯਤਿ ਖੁਦਾਯ ਹਦਯਂ ਮਮਾਤਿ ਖੁਦਾਯ ਜਿਘਚ੍ਛਾਯ ਬਾਧਿਯਮਾਨਾਯ ਮਮ ਹਦਯਪਦੇਸੋ ਉਦਰਗ੍ਗਿਨਾ ਪਰਿਸਮਨ੍ਤਤੋ ਝਾਯਤਿ ਧੂਮਾਯਤਿ ਸਨ੍ਤਪ੍ਪਤਿ. ਪਾਨੀਯਂ ਨ ਲਭੇ ਪਾਤੁਨ੍ਤਿ ਪਿਪਾਸਾਭਿਭੂਤਾ ਤਤ੍ਥ ਤਤ੍ਥ ਵਿਚਰਨ੍ਤੀ ਪਾਨੀਯਮ੍ਪਿ ਪਾਤੁਂ ਨ ਲਭਾਮਿ. ਪਸ੍ਸ ਮਂ ਬ੍ਯਸਨਂ ਗਤਨ੍ਤਿ ਪੇਤੂਪਪਤ੍ਤਿਯਾ ਸਾਧਾਰਣਂ ਅਸਾਧਾਰਣਞ੍ਚ ਇਮਂ ਈਦਿਸਂ ਬ੍ਯਸਨਂ ਉਪਗਤਂ ਮਂ ਪਸ੍ਸ, ਭਨ੍ਤੇਤਿ ਅਤ੍ਤਨਾ ਅਨੁਭਵਿਯਮਾਨਂ ਦੁਕ੍ਖਂ ਥੇਰਸ੍ਸ ਪਵੇਦੇਸਿ.

ਤਂ ਸੁਤ੍ਵਾ ਥੇਰੋ ਤਾਯ ਕਤਕਮ੍ਮਂ ਪੁਚ੍ਛਨ੍ਤੋ –

੩੦. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸ ਕਮ੍ਮਵਿਪਾਕੇਨ, ਪੁਤ੍ਤਮਂਸਾਨਿ ਖਾਦਸੀ’’ਤਿ. –

ਗਾਥਮਾਹ. ਤਤ੍ਥ ਦੁਕ੍ਕਟਨ੍ਤਿ ਦੁਚ੍ਚਰਿਤਂ. ਕਿਸ੍ਸ ਕਮ੍ਮਵਿਪਾਕੇਨਾਤਿ ਕੀਦਿਸਸ੍ਸ ਕਮ੍ਮਸ੍ਸ ਵਿਪਾਕੇਨ, ਕਿਂ ਪਾਣਾਤਿਪਾਤਸ੍ਸ, ਉਦਾਹੁ ਅਦਿਨ੍ਨਾਦਾਨਾਦੀਸੁ ਅਞ੍ਞਤਰਸ੍ਸਾਤਿ ਅਤ੍ਥੋ. ‘‘ਕੇਨ ਕਮ੍ਮਵਿਪਾਕੇਨਾ’’ਤਿ ਕੇਚਿ ਪਠਨ੍ਤਿ.

ਅਥ ਸਾ ਪੇਤੀ ਅਤ੍ਤਨਾ ਕਤਕਮ੍ਮਂ ਥੇਰਸ੍ਸ ਕਥੇਨ੍ਤੀ –

੩੧. ‘‘ਸਪਤੀ ਮੇ ਗਬ੍ਭਿਨੀ ਆਸਿ, ਤਸ੍ਸਾ ਪਾਪਂ ਅਚੇਤਯਿਂ;

ਸਾਹਂ ਪਦੁਟ੍ਠਮਨਸਾ, ਅਕਰਿਂ ਗਬ੍ਭਪਾਤਨਂ.

੩੨. ‘‘ਤਸ੍ਸ ਦ੍ਵੇਮਾਸਿਕੋ ਗਬ੍ਭੋ, ਲੋਹਿਤਞ੍ਞੇਵ ਪਗ੍ਘਰਿ;

ਤਦਸ੍ਸਾ ਮਾਤਾ ਕੁਪਿਤਾ, ਮਯ੍ਹਂ ਞਾਤੀ ਸਮਾਨਯਿ;

ਸਪਥਞ੍ਚ ਮਂ ਅਕਾਰੇਸਿ, ਪਰਿਭਾਸਾਪਯੀ ਚ ਮਂ.

੩੩. ‘‘ਸਾਹਂ ਘੋਰਞ੍ਚ ਸਪਥਂ, ਮੁਸਾਵਾਦਂ ਅਭਾਸਿਸਂ;

‘ਪੁਤ੍ਤਮਂਸਾਨਿ ਖਾਦਾਮਿ, ਸਚੇ ਤਂ ਪਕਤਂ ਮਯਾ’.

੩੪. ‘‘ਤਸ੍ਸ ਕਮ੍ਮਸ੍ਸ ਵਿਪਾਕੇਨ, ਮੁਸਾਵਾਦਸ੍ਸ ਚੂਭਯਂ;

ਪੁਤ੍ਤਮਂਸਾਨਿ ਖਾਦਾਮਿ, ਪੁਬ੍ਬਲੋਹਿਤਮਕ੍ਖਿਤਾ’’ਤਿ. – ਗਾਥਾਯੋ ਅਭਾਸਿ;

੩੧-੩੨. ਤਤ੍ਥ ਸਪਤੀਤਿ ਸਮਾਨਪਤਿਕਾ ਇਤ੍ਥੀ ਵੁਚ੍ਚਤਿ. ਤਸ੍ਸਾ ਪਾਪਂ ਅਚੇਤਯਿਨ੍ਤਿ ਤਸ੍ਸ ਸਪਤਿਯਾ ਪਾਪਂ ਲੁਦ੍ਦਕਂ ਕਮ੍ਮਂ ਅਚੇਤਯਿਂ. ਪਦੁਟ੍ਠਮਨਸਾਤਿ ਪਦੁਟ੍ਠਚਿਤ੍ਤਾ, ਪਦੁਟ੍ਠੇਨ ਵਾ ਮਨਸਾ. ਦ੍ਵੇਮਾਸਿਕੋਤਿ ਦ੍ਵੇਮਾਸਜਾਤੋ ਪਤਿਟ੍ਠਿਤੋ ਹੁਤ੍ਵਾ ਦ੍ਵੇਮਾਸਿਕਾ. ਲੋਹਿਤਞ੍ਞੇਵ ਪਗ੍ਘਰੀਤਿ ਵਿਪਜ੍ਜਮਾਨੋ ਰੁਹਿਰਞ੍ਞੇਵ ਹੁਤ੍ਵਾ ਵਿਸ੍ਸਨ੍ਦਿ. ਤਦਸ੍ਸਾ ਮਾਤਾ ਕੁਪਿਤਾ, ਮਯ੍ਹਂ ਞਾਤੀ ਸਮਾਨਯੀਤਿ ਤਦਾ ਅਸ੍ਸਾ ਸਪਤਿਯਾ ਮਾਤਾ ਮਯ੍ਹਂ ਕੁਪਿਤਾ ਅਤ੍ਤਨੋ ਞਾਤਕੇ ਸਮੋਧਾਨੇਸਿ. ‘‘ਤਤਸ੍ਸਾ’’ਤਿ ਵਾ ਪਾਠੋ, ਤਤੋ ਅਸ੍ਸਾਤਿ ਪਦਵਿਭਾਗੋ.

੩੩-੩੪. ਸਪਥਨ੍ਤਿ ਸਪਨਂ. ਪਰਿਭਾਸਾਪਯੀਤਿ ਭਯੇਨ ਤਜ੍ਜਾਪੇਸਿ. ਸਪਥਂ ਮੁਸਾਵਾਦਂ ਅਭਾਸਿਸਨ੍ਤਿ ‘‘ਸਚੇ ਤਂ ਮਯਾ ਕਤਂ, ਈਦਿਸੀ ਭਵੇਯ੍ਯ’’ਨ੍ਤਿ ਕਤਮੇਵ ਪਾਪਂ ਅਕਤਂ ਕਤ੍ਵਾ ਦਸ੍ਸੇਨ੍ਤੀ ਮੁਸਾਵਾਦਂ ਅਭੂਤਂ ਸਪਥਂ ਅਭਾਸਿਂ. ਮੁਤ੍ਤਮਂਸਾਨਿ ਖਾਦਾਮਿ, ਸਚੇਤਂ ਪਕਤਂ ਮਯਾਤਿ ਇਦਂ ਤਦਾ ਸਪਥਸ੍ਸ ਕਤਾਕਾਰਦਸ੍ਸਨਂ. ਯਦਿ ਏਤਂ ਗਬ੍ਭਪਾਤਨਪਾਪਂ ਮਯਾ ਕਤਂ, ਆਯਤਿਂ ਪੁਨਬ੍ਭਵਾਭਿਨਿਬ੍ਬਤ੍ਤਿਯਂ ਮਯ੍ਹਂ ਪੁਤ੍ਤਮਂਸਾਨਿਯੇਵ ਖਾਦੇਯ੍ਯਨ੍ਤਿ ਅਤ੍ਥੋ. ਤਸ੍ਸ ਕਮ੍ਮਸ੍ਸਾਤਿ ਤਸ੍ਸ ਗਬ੍ਭਪਾਤਨਵਸੇਨ ਪਕਤਸ੍ਸ ਪਾਣਾਤਿਪਾਤਕਮ੍ਮਸ੍ਸ. ਮੁਸਾਵਾਦਸ੍ਸ ਚਾਤਿ ਮੁਸਾਵਾਦਕਮ੍ਮਸ੍ਸ ਚ. ਉਭਯਨ੍ਤਿ ਉਭਯਸ੍ਸਪਿ ਕਮ੍ਮਸ੍ਸ ਉਭਯੇਨ ਵਿਪਾਕੇਨ. ਕਰਣਤ੍ਥੇ ਹਿ ਇਦਂ ਪਚ੍ਚਤ੍ਤਵਚਨਂ. ਪੁਬ੍ਬਲੋਹਿਤਮਕ੍ਖਿਤਾਤਿ ਪਸਵਨਵਸੇਨ ਪਰਿਭਿਜ੍ਜਨਵਸੇਨ ਚ ਪੁਬ੍ਬੇਨ ਚ ਲੋਹਿਤੇਨ ਚ ਮਕ੍ਖਿਤਾ ਹੁਤ੍ਵਾ ਪੁਤ੍ਤਮਂਸਾਨਿ ਖਾਦਾਮੀਤਿ ਯੋਜਨਾ.

ਏਵਂ ਸਾ ਪੇਤੀ ਅਤ੍ਤਨੋ ਕਮ੍ਮਵਿਪਾਕਂ ਪਵੇਦੇਤ੍ਵਾ ਪੁਨ ਥੇਰੇ ਏਵਮਾਹ – ‘‘ਅਹਂ, ਭਨ੍ਤੇ, ਇਮਸ੍ਮਿਂਯੇਵ ਗਾਮੇ ਅਸੁਕਸ੍ਸ ਕੁਟੁਮ੍ਬਿਕਸ੍ਸ ਭਰਿਯਾ ਇਸ੍ਸਾਪਕਤਾ ਹੁਤ੍ਵਾ ਪਾਪਕਮ੍ਮਂ ਕਤ੍ਵਾ ਏਵਂ ਪੇਤਯੋਨਿਯਂ ਨਿਬ੍ਬਤ੍ਤਾ. ਸਾਧੁ, ਭਨ੍ਤੇ, ਤਸ੍ਸ ਕੁਟੁਮ੍ਬਿਕਸ੍ਸ ਗੇਹਂ ਗਚ੍ਛਥ, ਸੋ ਤੁਮ੍ਹਾਕਂ ਦਾਨਂ ਦਸ੍ਸਤਿ, ਤਂ ਦਕ੍ਖਿਣਂ ਮਯ੍ਹਂ ਉਦ੍ਦਿਸਾਪੇਯ੍ਯਾਥ, ਏਵਂ ਮੇ ਇਤੋ ਪੇਤਲੋਕਤੋ ਮੁਤ੍ਤਿ ਭਵਿਸ੍ਸਤੀ’’ਤਿ. ਥੇਰਾ ਤਂ ਸੁਤ੍ਵਾ ਤਂ ਅਨੁਕਮ੍ਪਮਾਨਾ ਉਲ੍ਲੁਮ੍ਪਨਸਭਾਵਸਣ੍ਠਿਤਾ ਤਸ੍ਸ ਕੁਟੁਮ੍ਬਿਕਸ੍ਸ ਗੇਹਂ ਪਿਣ੍ਡਾਯ ਪਵਿਸਿਂਸੁ. ਕੁਟਮ੍ਬਿਕੋ ਥੇਰੇ ਦਿਸ੍ਵਾ ਸਞ੍ਜਾਤਪ੍ਪਸਾਦੋ ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਾਨਿ ਗਹੇਤ੍ਵਾ ਥੇਰੇ ਆਸਨੇਸੁ ਨਿਸੀਦਾਪੇਤ੍ਵਾ ਪਣੀਤੇਨ ਆਹਾਰੇਨ ਭੋਜੇਤੁਂ ਆਰਭਿ. ਥੇਰਾ ਤਂ ਪਵਤ੍ਤਿਂ ਕੁਟੁਮ੍ਬਿਕਸ੍ਸ ਆਰੋਚੇਤ੍ਵਾ ਤਂ ਦਾਨਂ ਤਸ੍ਸਾ ਪੇਤਿਯਾ ਉਦ੍ਦਿਸਾਪੇਸੁਂ. ਤਙ੍ਖਣਞ੍ਞੇਵ ਚ ਸਾ ਪੇਤੀ ਤਤੋ ਦੁਕ੍ਖਤੋ ਅਪੇਤਾ ਉਲ਼ਾਰਸਮ੍ਪਤ੍ਤਿਂ ਪਟਿਲਭਿਤ੍ਵਾ ਰਤ੍ਤਿਯਂ ਕੁਟੁਮ੍ਬਿਕਸ੍ਸ ਅਤ੍ਤਾਨਂ ਦਸ੍ਸੇਸਿ. ਅਥ ਥੇਰਾ ਅਨੁਕ੍ਕਮੇਨ ਸਾਵਤ੍ਥਿਂ ਗਨ੍ਤ੍ਵਾ ਭਗਵਤੋ ਤਮਤ੍ਥਂ ਆਰੋਚੇਸੁਂ. ਭਗਵਾ ਚ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਦੇਸਨਾਵਸਾਨੇ ਮਹਾਜਨੋ ਪਟਿਲਦ੍ਧਸਂਵੇਗੋ ਇਸ੍ਸਾਮਚ੍ਛੇਰਤੋ ਪਟਿਵਿਰਮਿ. ਏਵਂ ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਪਞ੍ਚਪੁਤ੍ਤਖਾਦਕਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.