੬. ਪਾਟਿਹਾਰਿਯਕਥਾ

ਪਾਟਿਹਾਰਿਯਕਥਾਵਣ੍ਣਨਾ

੩੦. ਇਦਾਨਿ ਲੋਕਤ੍ਥਚਰਿਯਾਪਰਿਯੋਸਾਨਾਯ ਚਰਿਯਾਕਥਾਯ ਅਨਨ੍ਤਰਂ ਲੋਕਤ੍ਥਾਨੁਸਾਸਨਪਰਿਯੋਸਾਨਂ ਪਾਟਿਹਾਰਿਯਂ ਦਸ੍ਸੇਨ੍ਤੇਨ ਕਥਿਤਾਯ ਸੁਤ੍ਤਨ੍ਤਪੁਬ੍ਬਙ੍ਗਮਾਯ ਪਾਟਿਹਾਰਿਯਕਥਾਯ ਅਪੁਬ੍ਬਤ੍ਥਾਨੁਵਣ੍ਣਨਾ. ਤਤ੍ਥ ਸੁਤ੍ਤਨ੍ਤੇ ਤਾਵ ਪਾਟਿਹਾਰਿਯਾਨੀਤਿ ਪਚ੍ਚਨੀਕਪਟਿਹਰਣਵਸੇਨ ਪਾਟਿਹਾਰਿਯਾਨਿ. ਇਦ੍ਧਿਪਾਟਿਹਾਰਿਯਨ੍ਤਿ ਇਜ੍ਝਨਵਸੇਨ ਇਦ੍ਧਿ, ਪਟਿਹਰਣਵਸੇਨ ਪਾਟਿਹਾਰਿਯਂ, ਇਦ੍ਧਿਯੇਵ ਪਾਟਿਹਾਰਿਯਂ ਇਦ੍ਧਿਪਾਟਿਹਾਰਿਯਂ. ਇਤਰੇਸੁ ਪਨ ਆਦਿਸ੍ਸਨਵਸੇਨ ਆਦੇਸਨਂ, ਅਨੁਸਾਸਨਵਸੇਨ ਅਨੁਸਾਸਨੀ. ਸੇਸਂ ਵੁਤ੍ਤਨਯਮੇਵ.

ਇਧਾਤਿ ਇਮਸ੍ਮਿਂ ਲੋਕੇ. ਏਕਚ੍ਚੋਤਿ ਏਕੋ ਪੋਸੋ. ਇਦ੍ਧਿਪਾਟਿਹਾਰਿਯਨਿਦ੍ਦੇਸੋ ਹੇਟ੍ਠਾ ਵੁਤ੍ਤਤ੍ਥੋਯੇਵ. ਨਿਮਿਤ੍ਤੇਨ ਆਦਿਸਤੀਤਿ ਆਗਤਨਿਮਿਤ੍ਤੇਨ ਵਾ ਗਤਨਿਮਿਤ੍ਤੇਨ ਵਾ ਠਿਤਨਿਮਿਤ੍ਤੇਨ ਵਾ ਕਥੇਤਿ. ਏਵਮ੍ਪਿ ਤੇ ਮਨੋਤਿ ਏਵਮ੍ਪਿ ਤਵ ਮਨੋ ਸੋਮਨਸ੍ਸਿਤੋ ਵਾ ਦੋਮਨਸ੍ਸਿਤੋ ਵਾ ਕਾਮਵਿਤਕ੍ਕਾਦਿਸਮ੍ਪਯੁਤ੍ਤੋ ਵਾ. ਅਪਿ-ਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਇਤ੍ਥਮ੍ਪਿ ਤੇ ਮਨੋਤਿ ਸੋਮਨਸ੍ਸਿਤਾਦਿਤੋ ਏਕੇਕਵਿਧੇਪਿ ਚਿਤ੍ਤੇ ਨਾਨਪ੍ਪਕਾਰਪਰਿਦੀਪਨਂ. ਇਤਿਪਿ ਤੇ ਚਿਤ੍ਤਨ੍ਤਿ ਇਤਿਪਿ ਤਵ ਚਿਤ੍ਤਂ, ਇਮਞ੍ਚ ਇਮਞ੍ਚ ਅਤ੍ਥਂ ਚਿਨ੍ਤਯਮਾਨਂ ਪਵਤ੍ਤਤੀਤਿ ਅਤ੍ਥੋ. ਬਹੁਂ ਚੇਪਿ ਆਦਿਸਤੀਤਿ ਚਿਤ੍ਤਤੋ ਅਞ੍ਞਂ ਵਾ ਇਦਞ੍ਚ ਇਦਞ੍ਚ ਨਾਮ ਅਹੋਸਿ ਭਵਤਿ ਭਵਿਸ੍ਸਤੀਤਿ ਬਹੁਕਮ੍ਪਿ ਕਥੇਤਿ. ਤਥੇਵ ਤਂ ਹੋਤਿ, ਨੋ ਅਞ੍ਞਥਾਤਿ ਤਂ ਸਬ੍ਬਮ੍ਪਿ ਯਥਾ ਯਥਾ ਕਥਿਤਂ, ਤਥੇਵ ਹੋਤਿ, ਅਞ੍ਞਥਾ ਨ ਹੋਤਿ.

ਨ ਹੇਵ ਖੋ ਨਿਮਿਤ੍ਤੇਨ ਆਦਿਸਤੀਤਿ ਨਿਮਿਤ੍ਤਂ ਜਾਨਨ੍ਤੋਪਿ ਕੇਵਲਂ ਨਿਮਿਤ੍ਤੇਨੇਵ ਨ ਕਥੇਤਿ. ਅਪਿਚਾਤਿ ਅਪਰਪਰਿਯਾਯਦਸ੍ਸਨਂ. ਮਨੁਸ੍ਸਾਨਨ੍ਤਿ ਚਿਤ੍ਤਂ ਜਾਨਨਕਮਨੁਸ੍ਸਾਨਂ. ਅਮਨੁਸ੍ਸਾਨਨ੍ਤਿ ਸਾਵਿਤਾਨਂ ਵਾ ਅਸ੍ਸਾਵਿਤਾਨਂ ਵਾ ਯਕ੍ਖਪਿਸਾਚਾਦੀਨਂ. ਦੇਵਤਾਨਨ੍ਤਿ ਚਾਤੁਮਹਾਰਾਜਿਕਾਦੀਨਂ. ਸਦ੍ਦਂ ਸੁਤ੍ਵਾਤਿ ਅਞ੍ਞਸ੍ਸ ਚਿਤ੍ਤਂ ਞਤ੍ਵਾ ਕਥੇਨ੍ਤਾਨਂ ਸਦ੍ਦਂ ਸੁਣਿਤ੍ਵਾ. ਪਨਾਤਿ ਨਿਪਾਤੋ ਪੁਨ ਆਰਮ੍ਭੇ. ਵਿਤਕ੍ਕਯਤੋਤਿ ਯਂ ਵਾ ਤਂ ਵਾ ਵਿਤਕ੍ਕੇਨ ਵਿਤਕ੍ਕੇਨ੍ਤਸ੍ਸ. ਵਿਚਾਰਯਤੋਤਿ ਵਿਤਕ੍ਕਸਮ੍ਪਯੁਤ੍ਤੇਨੇਵ ਵਿਚਾਰੇਨ ਵਿਚਾਰੇਨ੍ਤਸ੍ਸ. ਵਿਤਕ੍ਕਵਿਪ੍ਫਾਰਸਦ੍ਦਂ ਸੁਤ੍ਵਾਤਿ ਵਿਤਕ੍ਕਵੇਗਵਸੇਨ ਉਪ੍ਪਨ੍ਨਂ ਵਿਪ੍ਪਲਪਨ੍ਤਾਨਂ ਸੁਤ੍ਤਪ੍ਪਮਤ੍ਤਾਦੀਨਂ ਕੂਜਨਸਦ੍ਦਂ ਸੁਤ੍ਵਾ. ਯਂ ਵਿਤਕ੍ਕਯਤੋ ਸੋ ਸਦ੍ਦੋ ਉਪ੍ਪਨ੍ਨੋ, ਤਸ੍ਸ ਵਸੇਨ ‘‘ਏਵਮ੍ਪਿ ਤੇ ਮਨੋ’’ਤਿਆਦੀਨਿ ਆਦਿਸਤਿ.

ਅਵਿਤਕ੍ਕਂ ਅਵਿਚਾਰਂ ਸਮਾਧਿਨ੍ਤਿ ਵਿਤਕ੍ਕਵਿਚਾਰਕ੍ਖੋਭਵਿਰਹਿਤਸਨ੍ਤਚਿਤ੍ਤਸ੍ਸਾਪਿ ਜਾਨਨਸਮਤ੍ਥਤਂ ਦਸ੍ਸੇਨ੍ਤੇਨ ਵੁਤ੍ਤਂ, ਸੇਸਚਿਤ੍ਤਜਾਨਨੇ ਪਨ ਵਤ੍ਤਬ੍ਬਮੇਵ ਨਤ੍ਥਿ. ਚੇਤਸਾ ਚੇਤੋ ਪਰਿਚ੍ਚ ਪਜਾਨਾਤੀਤਿ ਚੇਤੋਪਰਿਯਞਾਣਲਾਭੀ. ਭੋਤੋਤਿ ਭਵਨ੍ਤਸ੍ਸ. ਮਨੋਸਙ੍ਖਾਰਾ ਪਣਿਹਿਤਾਤਿ ਚਿਤ੍ਤਸਙ੍ਖਾਰਾ ਠਪਿਤਾ. ਅਮੁਕਂ ਨਾਮ ਵਿਤਕ੍ਕਂ ਵਿਤਕ੍ਕਯਿਸ੍ਸਤੀਤਿ ਕੁਸਲਾਦਿਵਿਤਕ੍ਕਂ ਵਿਤਕ੍ਕਯਿਸ੍ਸਤਿ ਪਵਤ੍ਤਯਿਸ੍ਸਤੀਤਿ ਪਜਾਨਾਤਿ. ਪਜਾਨਨ੍ਤੋ ਚ ਆਗਮਨੇਨ ਜਾਨਾਤਿ, ਪੁਬ੍ਬਭਾਗੇਨ ਜਾਨਾਤਿ, ਅਨ੍ਤੋਸਮਾਪਤ੍ਤਿਯਂ ਚਿਤ੍ਤਂ ਓਲੋਕੇਤ੍ਵਾ ਜਾਨਾਤਿ. ਆਗਮਨੇਨ ਜਾਨਾਤਿ ਨਾਮ ਕਸਿਣਪਰਿਕਮ੍ਮਕਾਲੇਯੇਵ ‘‘ਯੇਨਾਕਾਰੇਨੇਸ ਕਸਿਣਭਾਵਨਂ ਆਰਦ੍ਧੋ ਪਠਮਜ੍ਝਾਨਂ ਵਾ ਦੁਤਿਯਾਦਿਜ੍ਝਾਨਂ ਵਾ ਅਟ੍ਠ ਸਮਾਪਤ੍ਤਿਯੋ ਵਾ ਉਪ੍ਪਾਦੇਸ੍ਸਤੀ’’ਤਿ ਜਾਨਾਤਿ. ਪੁਬ੍ਬਭਾਗੇਨ ਜਾਨਾਤਿ ਨਾਮ ਪਠਮਵਿਪਸ੍ਸਨਾਯ ਆਰਦ੍ਧਾਯ ਏਵਂ ਜਾਨਾਤਿ, ‘‘ਯੇਨਾਕਾਰੇਨੇਸ ਵਿਪਸ੍ਸਨਂ ਆਰਦ੍ਧੋ ਸੋਤਾਪਤ੍ਤਿਮਗ੍ਗਂ ਵਾ ਉਪ੍ਪਾਦੇਸ੍ਸਤਿ…ਪੇ… ਅਰਹਤ੍ਤਮਗ੍ਗਂ ਵਾ ਉਪ੍ਪਾਦੇਸ੍ਸਤੀ’’ਤਿ ਜਾਨਾਤਿ. ਅਨ੍ਤੋਸਮਾਪਤ੍ਤਿਯਂ ਚਿਤ੍ਤਂ ਓਲੋਕੇਤ੍ਵਾ ਜਾਨਾਤਿ ਨਾਮ ‘‘ਯੇਨਾਕਾਰੇਨ ਇਮਸ੍ਸ ਮਨੋਸਙ੍ਖਾਰਾ ਠਪਿਤਾ, ਇਮਸ੍ਸ ਨਾਮ ਚਿਤ੍ਤਸ੍ਸ ਅਨਨ੍ਤਰਾ ਇਮਂ ਨਾਮ ਵਿਤਕ੍ਕਂ ਵਿਤਕ੍ਕੇਸ੍ਸਤਿ, ਇਤੋ ਵੁਟ੍ਠਿਤਸ੍ਸ ਏਤਸ੍ਸ ਹਾਨਭਾਗਿਯੋ ਵਾ ਸਮਾਧਿ ਭਵਿਸ੍ਸਤਿ, ਠਿਤਿਭਾਗਿਯੋ ਵਾ ਵਿਸੇਸਭਾਗਿਯੋ ਵਾ ਨਿਬ੍ਬੇਧਭਾਗਿਯੋ ਵਾ, ਅਭਿਞ੍ਞਾਯੋ ਵਾ ਉਪ੍ਪਾਦੇਸ੍ਸਤੀ’’ਤਿ ਜਾਨਾਤਿ. ਬਹੁਂ ਚੇਪਿ ਆਦਿਸਤੀਤਿ ਚੇਤੋਪਰਿਯਞਾਣਸ੍ਸ ਚਿਤ੍ਤਚੇਤਸਿਕਾਨਂਯੇਵ ਆਰਮ੍ਮਣਕਰਣਤੋ ਸਰਾਗਾਦਿਸੋਲ਼ਸਪਭੇਦਵਸੇਨੇਵ ਬਹੁਂ ਚੇਪਿ ਕਥੇਤਿ, ਨ ਅਞ੍ਞਵਸੇਨਾਤਿ ਵੇਦਿਤਬ੍ਬਂ. ਤਥੇਵ ਤਂ ਹੋਤੀਤਿ ਇਦਂ ਏਕਂਸੇਨ ਤਥੇਵ ਹੋਤਿ. ਚੇਤੋਪਰਿਯਞਾਣਵਸੇਨ ਞਾਤਞ੍ਹਿ ਅਞ੍ਞਥਾਭਾਵੀ ਨਾਮ ਨਤ੍ਥਿ.

ਏਵਂ ਵਿਤਕ੍ਕੇਥਾਤਿ ਏਵਂ ਨੇਕ੍ਖਮ੍ਮਵਿਤਕ੍ਕਾਦਯੋ ਪਵਤ੍ਤੇਨ੍ਤਾ ਵਿਤਕ੍ਕੇਥ. ਮਾ ਏਵਂ ਵਿਤਕ੍ਕਯਿਤ੍ਥਾਤਿ ਏਵਂ ਕਾਮਵਿਤਕ੍ਕਾਦਯੋ ਪਵਤ੍ਤੇਨ੍ਤਾ ਮਾ ਵਿਤਕ੍ਕਯਿਤ੍ਥ. ਏਵਂ ਮਨਸਿ ਕਰੋਥਾਤਿ ਏਵਂ ਅਨਿਚ੍ਚਸਞ੍ਞਮੇਵ, ਦੁਕ੍ਖਸਞ੍ਞਾਦੀਸੁ ਵਾ ਅਞ੍ਞਤਰਂ ਮਨਸਿ ਕਰੋਥ. ਮਾ ਏਵਂ ਮਨਸਾਕਤ੍ਥਾਤਿ ਏਵਂ ਨਿਚ੍ਚਨ੍ਤਿਆਦਿਨਾ ਨਯੇਨ ਮਾ ਮਨਸਿ ਅਕਤ੍ਥ. ਇਦਂ ਪਜਹਥਾਤਿ ਇਦਂ ਪਞ੍ਚਕਾਮਗੁਣਰਾਗਾਦਿਂ ਪਜਹਥ. ਇਦਂ ਉਪਸਮ੍ਪਜ੍ਜ ਵਿਹਰਥਾਤਿ ਇਦਂ ਚਤੁਮਗ੍ਗਫਲਪ੍ਪਭੇਦਂ ਲੋਕੁਤ੍ਤਰਧਮ੍ਮਮੇਵ ਪਾਪੁਣਿਤ੍ਵਾ ਨਿਪ੍ਫਾਦੇਤ੍ਵਾ ਵਿਹਰਥ.

੩੧. ਇਦਾਨਿ ਇਦ੍ਧਿਪਾਟਿਹਾਰਿਯੇ ਅਪਰਂ ਪਰਿਯਾਯਂ ਵਿਸੇਸੇਨ ਦਸ੍ਸੇਨ੍ਤੋ ਨੇਕ੍ਖਮ੍ਮਂ ਇਜ੍ਝਤੀਤਿ ਇਦ੍ਧੀਤਿਆਦਿਮਾਹ. ਤਤ੍ਥ ਕਾਮਚ੍ਛਨ੍ਦਂ ਪਟਿਹਰਤੀਤਿ ਅਤ੍ਤਨੋ ਪਟਿਪਕ੍ਖਭੂਤਂ ਕਾਮਚ੍ਛਨ੍ਦਂ ਪਟਿਬਲਂ ਹੁਤ੍ਵਾ ਹਰਤਿ ਪਜਹਤੀਤਿ ਤਦੇਵ ਨੇਕ੍ਖਮ੍ਮਂ ਪਾਟਿਹਾਰਿਯਂ ਨਾਮਾਤਿ ਅਤ੍ਥੋ. ਯੇ ਤੇਨ ਨੇਕ੍ਖਮ੍ਮੇਨ ਸਮਨ੍ਨਾਗਤਾਤਿ ਏਵਂ ਕਾਮਚ੍ਛਨ੍ਦਪਟਿਹਾਰਕੇਨ ਤੇਨ ਨੇਕ੍ਖਮ੍ਮੇਨ ਯੇ ਪੁਗ੍ਗਲਾ ਪਟਿਲਾਭਵਸੇਨ ਸਮਨ੍ਨਾਗਤਾ. ਵਿਸੁਦ੍ਧਚਿਤ੍ਤਾਤਿ ਕਾਮਚ੍ਛਨ੍ਦਾਭਾਵਤੋ ਵਿਸੁਦ੍ਧਚਿਤ੍ਤਾ. ਅਨਾਵਿਲਸਙ੍ਕਪ੍ਪਾਤਿ ਕਾਮਸਙ੍ਕਪ੍ਪੇਨ ਅਨਾਲੁਲਿਤਨੇਕ੍ਖਮ੍ਮਸਙ੍ਕਪ੍ਪਾ. ਇਤਿ ਆਦੇਸਨਾਪਾਟਿਹਾਰਿਯਨ੍ਤਿ ਪਰਚਿਤ੍ਤਕੁਸਲੇਨ ਵਾ ਅਞ੍ਞੇਨ ਵਾ ਸਮ੍ਮਾਸਮ੍ਬੁਦ੍ਧੇਨ ਵਾ ਬੁਦ੍ਧਸਾਵਕੇਹਿ ਵਾ ਏਵਂ ਆਦੇਸਨਾ ਪਾਟਿਹਾਰਿਯਨ੍ਤਿ ਅਤ੍ਥੋ. ਅਥ ਵਾ ਇਤਿ ਏਵਂ ਆਦਿਸਨਂ ਆਦੇਸਨਾਪਾਟਿਹਾਰਿਯਨ੍ਤਿ ਆਦੇਸਨਸਦ੍ਦੋ ਪਾਠਸੇਸਂ ਕਤ੍ਵਾ ਪਯੁਜ੍ਜਿਤਬ੍ਬੋ. ਏਵਂ ਆਸੇਵਿਤਬ੍ਬਨ੍ਤਿ ਇਮਿਨਾ ਚ ਪਕਾਰੇਨ ਇਮਿਨਾ ਚ ਪਕਾਰੇਨ ਆਦਿਤੋ ਸੇਵਿਤਬ੍ਬਂ. ਸੇਸਤ੍ਤਯੇਪਿ ਏਸੇਵ ਨਯੋ. ਤਦਨੁਧਮ੍ਮਤਾ ਸਤਿ ਉਪਟ੍ਠਪੇਤਬ੍ਬਾਤਿ ਤਸ੍ਸ ਨੇਕ੍ਖਮ੍ਮਸ੍ਸ ਅਨੁਕੂਲਭੂਤਾ ਸਤਿ ਭੁਸਂ ਠਪੇਤਬ੍ਬਾ. ਇਤਿ ਅਨੁਸਾਸਨੀਪਾਟਿਹਾਰਿਯਨ੍ਤਿ ਏਤ੍ਥ ਆਦੇਸਨਾਪਾਟਿਹਾਰਿਯਯੋਜਨਾਯ ਵਿਯ ਯੋਜਨਾ ਕਾਤਬ੍ਬਾ. ਅਬ੍ਯਾਪਾਦਾਦੀਸੁਪਿ ਏਸੇਵ ਨਯੋ. ਪਾਠੋ ਪਨ ਝਾਨਾਦੀਨਿ ਸਙ੍ਖਿਪਿਤ੍ਵਾ ਅਨ੍ਤੇ ਅਰਹਤ੍ਤਮਗ੍ਗਮੇਵ ਦਸ੍ਸੇਤ੍ਵਾ ਲਿਖਿਤੋ. ਤਤ੍ਥ ਚਤੂਸੁਪਿ ਮਗ੍ਗੇਸੁ ‘‘ਏਵਂ ਆਸੇਵਿਤਬ੍ਬੋ’’ਤਿਆਦਿ ਏਕਚਿਤ੍ਤਕ੍ਖਣਿਕਤ੍ਤਾ ਮਗ੍ਗਸ੍ਸ ਪੁਬ੍ਬਭਾਗਵਸੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਮਗ੍ਗਸ੍ਸ ਹਿ ਪੁਬ੍ਬਭਾਗਭੂਤਾਯ ਲੋਕਿਯਮਗ੍ਗਸਙ੍ਖਾਤਾਯ ਵੁਟ੍ਠਾਨਗਾਮਿਨਿਯਾ ਵਿਪਸ੍ਸਨਾਯ ਮਗ੍ਗੁਪ੍ਪਾਦਨਤ੍ਥਂ ਆਸੇਵਨਾਦੀਸੁ ਕਤੇਸੁ ਤਾਯ ਉਪ੍ਪਨ੍ਨੋ ਮਗ੍ਗੋਪਿ ਆਸੇਵਿਤੋ ਭਾਵਿਤੋ ਬਹੁਲੀਕਤੋ ਨਾਮ ਹੋਤੀਤਿ ਵੇਦਿਤਬ੍ਬਂ. ਸਬ੍ਬਤ੍ਥਿਕਵਾਦਾਚਰਿਯਾ ਪਨ ‘‘ਏਕੇਕਮਗ੍ਗੋ ਸੋਲ਼ਸਕ੍ਖਣਿਕੋ’’ਤਿ ਵਦਨ੍ਤਿ. ਤਦਨੁਧਮ੍ਮਤਾਸਤਿਉਪਟ੍ਠਾਪਨਂ ਪਨ ਪੁਬ੍ਬਭਾਗੇ ਯੁਜ੍ਜਤਿਯੇਵਾਤਿ.

੩੨. ਪੁਨ ਨੇਕ੍ਖਮ੍ਮਂ ਇਜ੍ਝਤੀਤਿ ਇਦ੍ਧੀਤਿਆਦੀਨਿ ‘‘ਇਦ੍ਧਿਪਾਟਿਹਾਰਿਯ’’ਨ੍ਤਿਪਦਸ੍ਸ ਕਮ੍ਮਧਾਰਯਸਮਾਸਤ੍ਤਦੀਪਨਤ੍ਥਂ ਵੁਤ੍ਤਾਨਿ. ਸੁਤ੍ਤਨ੍ਤੇ ਵੁਤ੍ਤੇਸੁ ਤੀਸੁ ਇਦ੍ਧਿਪਾਟਿਹਾਰਿਯਸ੍ਸੇਵ ਸਮਾਸਤ੍ਤੇ ਵੁਤ੍ਤੇ ਸੇਸਾਨਂ ਦ੍ਵਿਨ੍ਨਮ੍ਪਿ ਵੁਤ੍ਤੋਵ ਹੋਤੀਤਿ ਇਮਸ੍ਮਿਂ ਪਰਿਯਾਯੇ ਮੂਲਭੂਤਸ੍ਸ ਇਦ੍ਧਿਪਾਟਿਹਾਰਿਯਸ੍ਸੇਵ ਸਮਾਸਤ੍ਥੋ ਵੁਤ੍ਤੋਤਿ ਵੇਦਿਤਬ੍ਬਨ੍ਤਿ.

ਪਾਟਿਹਾਰਿਯਕਥਾਵਣ੍ਣਨਾ ਨਿਟ੍ਠਿਤਾ.