੨. ਇਦ੍ਧਿਕਥਾ
ਇਦ੍ਧਿਕਥਾਵਣ੍ਣਨਾ
੯. ਇਦਾਨਿ ਪਞ੍ਞਾਕਥਾਯ ਅਨਨ੍ਤਰਂ ਪਞ੍ਞਾਨੁਭਾਵਂ ਦਸ੍ਸੇਨ੍ਤੇਨ ਕਥਿਤਾਯ ਇਦ੍ਧਿਕਥਾਯ ਅਪੁਬ੍ਬਤ੍ਥਾਨੁਵਣ੍ਣਨਾ. ਤਤ੍ਥ ਪੁਚ੍ਛਾਸੁ ਤਾਵ ਕਾ ਇਦ੍ਧੀਤਿ ਸਭਾਵਪੁਚ੍ਛਾ. ਕਤਿ ਇਦ੍ਧਿਯੋਤਿ ਪਭੇਦਪੁਚ੍ਛਾ. ਕਤਿ ਭੂਮਿਯੋਤਿ ਸਮ੍ਭਾਰਪੁਚ੍ਛਾ. ਕਤਿ ਪਾਦਾਤਿ ਪਤਿਟ੍ਠਪੁਚ੍ਛਾ. ਕਤਿ ਪਦਾਨੀਤਿ ਆਸਨ੍ਨਕਾਰਣਪੁਚ੍ਛਾ. ਕਤਿ ਮੂਲਾਨੀਤਿ ਆਦਿਕਾਰਣਪੁਚ੍ਛਾ. ਵਿਸਜ੍ਜਨੇਸੁ ਇਜ੍ਝਨਟ੍ਠੇਨ ਇਦ੍ਧੀਤਿ ਨਿਪ੍ਫਤ੍ਤਿਅਤ੍ਥੇਨ ਪਟਿਲਾਭਟ੍ਠੇਨ ਚਾਤਿ ਅਤ੍ਥੋ. ਯਞ੍ਹਿ ਨਿਪ੍ਫਜ੍ਜਤਿ ਪਟਿਲਬ੍ਭਤਿ ਚ, ਤਂ ਇਜ੍ਝਤੀਤਿ ਵੁਚ੍ਚਤਿ. ਯਥਾਹ – ‘‘ਕਾਮਂ ਕਾਮਯਮਾਨਸ੍ਸ, ਤਸ੍ਸ ਚੇਤਂ ਸਮਿਜ੍ਝਤੀ’’ਤਿ (ਸੁ. ਨਿ. ੭੭੨). ‘‘ਨੇਕ੍ਖਮ੍ਮਂ ਇਜ੍ਝਤੀਤਿ ਇਦ੍ਧਿ, ਪਟਿਹਰਤੀਤਿ ਪਾਟਿਹਾਰਿਯ’’ਨ੍ਤਿਆਦਿ (ਪਟਿ. ਮ. ੩.੩੨). ਅਪਰੋ ਨਯੋ – ਇਜ੍ਝਨਟ੍ਠੇਨ ਇਦ੍ਧਿ, ਉਪਾਯਸਮ੍ਪਦਾਯੇਤਂ ਅਧਿਵਚਨਂ. ਉਪਾਯਸਮ੍ਪਦਾ ਹਿ ਇਜ੍ਝਤਿ ਅਧਿਪ੍ਪੇਤਫਲਪ੍ਪਸਵਨਤੋ. ਯਥਾਹ – ‘‘ਅਯਂ ਖੋ, ਚਿਤ੍ਤੋ ਗਹਪਤਿ, ਸੀਲਵਾ ਕਲ੍ਯਾਣਧਮ੍ਮੋ, ਸਚੇ ਪਣਿਦਹਿਸ੍ਸਤਿ ‘ਅਨਾਗਤਮਦ੍ਧਾਨਂ ਰਾਜਾ ਅਸ੍ਸਂ ਚਕ੍ਕਵਤ੍ਤੀ’ਤਿ. ਇਜ੍ਝਿਸ੍ਸਤਿ ਹਿ ਸੀਲਵਤੋ ਚੇਤੋਪਣਿਧਿ ਵਿਸੁਦ੍ਧਤ੍ਤਾ’’ਤਿ (ਸਂ. ਨਿ. ੪.੩੫੨). ਅਪਰੋ ਨਯੋ – ਏਤਾਯ ਸਤ੍ਤਾ ਇਜ੍ਝਨ੍ਤੀਤਿ ਇਦ੍ਧਿ. ਇਜ੍ਝਨ੍ਤੀਤਿ ਇਦ੍ਧਾ ਵੁਦ੍ਧਾ ਉਕ੍ਕਂਸਗਤਾ ਹੋਨ੍ਤੀਤਿ ਵੁਤ੍ਤਂ ਹੋਤਿ.
੧੦. ਦਸਸੁ ਇਦ੍ਧੀਸੁ ਅਧਿਟ੍ਠਾਨਵਸੇਨ ਨਿਪ੍ਫਨ੍ਨਤ੍ਤਾ ਅਧਿਟ੍ਠਾਨਾ ਇਦ੍ਧਿ. ਪਕਤਿਵਣ੍ਣਵਿਜਹਨਵਿਕਾਰਵਸੇਨ ਪਵਤ੍ਤਤ੍ਤਾ ਵਿਕੁਬ੍ਬਨਾ ਇਦ੍ਧਿ. ਸਰੀਰਬ੍ਭਨ੍ਤਰੇ ਅਞ੍ਞਸ੍ਸ ਮਨੋਮਯਸ੍ਸ ਸਰੀਰਸ੍ਸ ਨਿਪ੍ਫਤ੍ਤਿਵਸੇਨ ਪਵਤ੍ਤਤ੍ਤਾ ਮਨੋਮਯਾ ਇਦ੍ਧਿ. ਞਾਣਪ੍ਪਵਤ੍ਤਿਤੋ ਪੁਬ੍ਬੇ ਵਾ ਪਚ੍ਛਾ ਵਾ ਤਂਖਣੇ ਵਾ ਞਾਣਾਨੁਭਾਵਨਿਬ੍ਬਤ੍ਤੋ ਵਿਸੇਸੋ ਞਾਣਵਿਪ੍ਫਾਰਾ ਇਦ੍ਧਿ. ਸਮਾਧਿਤੋ ਪੁਬ੍ਬੇ ਵਾ ਪਚ੍ਛਾ ਵਾ ਤਂਖਣੇ ਵਾ ਸਮਥਾਨੁਭਾਵਨਿਬ੍ਬਤ੍ਤੋ ਵਿਸੇਸੋ ਸਮਾਧਿਵਿਪ੍ਫਾਰਾ ਇਦ੍ਧਿ. ਚੇਤੋਵਸਿਪ੍ਪਤ੍ਤਾਨਂ ਅਰਿਯਾਨਂਯੇਵ ਸਮ੍ਭਵਤੋ ਅਰਿਯਾ ਇਦ੍ਧਿ. ਕਮ੍ਮਵਿਪਾਕਵਸੇਨ ਜਾਤੋ ਵਿਸੇਸੋ ਕਮ੍ਮਵਿਪਾਕਜਾ ਇਦ੍ਧਿ. ਪੁਬ੍ਬੇ ਕਤਪੁਞ੍ਞਸ੍ਸ ਜਾਤੋ ਵਿਸੇਸੋ ਪੁਞ੍ਞਵਤੋ ਇਦ੍ਧਿ. ਵਿਜ੍ਜਾਯ ਜਾਤੋ ਵਿਸੇਸੋ ਵਿਜ੍ਜਾਮਯਾ ਇਦ੍ਧਿ. ਤੇਨ ਤੇਨ ਸਮ੍ਮਾਪਯੋਗੇਨ ਤਸ੍ਸ ਤਸ੍ਸ ਕਮ੍ਮਸ੍ਸ ਇਜ੍ਝਨਂ ਤਤ੍ਥ ਤਤ੍ਥ ਸਮ੍ਮਾਪਯੋਗਪਚ੍ਚਯਾ ਇਜ੍ਝਨਟ੍ਠੇਨ ਇਦ੍ਧਿ.
ਇਦ੍ਧਿਯਾ ਚਤਸ੍ਸੋ ਭੂਮਿਯੋਤਿ ਅਵਿਸੇਸੇਤ੍ਵਾ ਵੁਤ੍ਤੇਪਿ ਯਥਾਲਾਭਵਸੇਨ ਅਧਿਟ੍ਠਾਨਵਿਕੁਬ੍ਬਨਮਨੋਮਯਿਦ੍ਧਿਯਾ ਏਵ ਭੂਮਿਯੋ, ਨ ਸੇਸਾਨਂ. ਵਿਵੇਕਜਾ ਭੂਮੀਤਿ ਵਿਵੇਕਤੋ ਵਾ ਵਿਵੇਕੇ ਵਾ ਜਾਤਾ ਵਿਵੇਕਜਾ ਭੂਮਿ. ਪੀਤਿਸੁਖਭੂਮੀਤਿ ਪੀਤਿਸੁਖਯੁਤ੍ਤਾ ਭੂਮਿ. ਉਪੇਕ੍ਖਾਸੁਖਭੂਮੀਤਿ ਤਤ੍ਰਮਜ੍ਝਤ੍ਤੁਪੇਕ੍ਖਾਯ ਚ ਸੁਖੇਨ ਚ ਯੁਤ੍ਤਾ ਭੂਮਿ. ਅਦੁਕ੍ਖਮਸੁਖਾਭੂਮੀਤਿ ਅਦੁਕ੍ਖਮਸੁਖਵੇਦਨਾਯੁਤ੍ਤਾ ਭੂਮਿ. ਤੇਸੁ ਪਠਮਦੁਤਿਯਾਨਿ ਝਾਨਾਨਿ ਪੀਤਿਫਰਣਤਾ, ਤੀਣਿ ਝਾਨਾਨਿ ਸੁਖਫਰਣਤਾ, ਚਤੁਤ੍ਥਜ੍ਝਾਨਂ ਚੇਤੋਫਰਣਤਾ. ਏਤ੍ਥ ਚ ਪੁਰਿਮਾਨਿ ਤੀਣਿ ਝਾਨਾਨਿ ਯਸ੍ਮਾ ਪੀਤਿਫਰਣੇਨ ਚ ਸੁਖਫਰਣੇਨ ਚ ਸੁਖਸਞ੍ਞਞ੍ਚ ਲਹੁਸਞ੍ਞਞ੍ਚ ਓਕ੍ਕਮਿਤ੍ਵਾ ਲਹੁਮੁਦੁਕਮ੍ਮਞ੍ਞਕਾਯੋ ਹੁਤ੍ਵਾ ਇਦ੍ਧਿਂ ਪਾਪੁਣਾਤਿ, ਤਸ੍ਮਾ ਇਮਿਨਾ ਪਰਿਯਾਯੇਨ ਇਦ੍ਧਿਲਾਭਾਯ ਸਂਵਤ੍ਤਨਤੋ ਸਮ੍ਭਾਰਭੂਮਿਯੋਤਿ ਵੇਦਿਤਬ੍ਬਾਨਿ. ਚਤੁਤ੍ਥਜ੍ਝਾਨਂ ਪਨ ਇਦ੍ਧਿਲਾਭਾਯ ਪਕਤਿਭੂਮਿਯੇਵ. ਇਦ੍ਧਿਲਾਭਾਯਾਤਿ ਅਤ੍ਤਨੋ ਸਨ੍ਤਾਨੇ ਪਾਤੁਭਾਵਵਸੇਨ ਇਦ੍ਧੀਨਂ ਲਾਭਾਯ. ਇਦ੍ਧਿਪਟਿਲਾਭਾਯਾਤਿ ਪਰਿਹੀਨਾਨਂ ਵਾ ਇਦ੍ਧੀਨਂ ਵੀਰਿਯਾਰਮ੍ਭਵਸੇਨ ਪੁਨ ਲਾਭਾਯ, ਉਪਸਗ੍ਗਵਸੇਨ ਵਾ ਪਦਂ ਵਡ੍ਢਿਤਂ. ਇਦ੍ਧਿਵਿਕੁਬ੍ਬਨਤਾਯਾਤਿ ਇਦ੍ਧਿਯਾ ਵਿਵਿਧਕਰਣਭਾਵਾਯ. ਇਦ੍ਧਿਵਿਸਵਿਤਾਯਾਤਿ ਵਿਵਿਧਂ ਵਿਸੇਸਂ ਸਵਤਿ ਜਨੇਤਿ ਪਵਤ੍ਤੇਤੀਤਿ ਵਿਸਵੀ, ਵਿਵਿਧਂ ਸਵਨਂ ਵਾ ਅਸ੍ਸ ਅਤ੍ਥੀਤਿ ਵਿਸਵੀ, ਤਸ੍ਸ ਭਾਵੋ ਵਿਸਵਿਤਾ. ਤਸ੍ਸਾ ਵਿਸਵਿਤਾਯ, ਇਦ੍ਧਿਯਾ ਵਿਵਿਧਵਿਸੇਸਪਵਤ੍ਤਨਭਾਵਾਯਾਤਿ ਅਤ੍ਥੋ. ਇਦ੍ਧਿਵਸੀਭਾਵਾਯਾਤਿ ਇਦ੍ਧਿਯਾ ਇਸ੍ਸਰਭਾਵਾਯ. ਇਦ੍ਧਿਵੇਸਾਰਜ੍ਜਾਯਾਤਿ ਇਦ੍ਧਿਵਿਸਾਰਦਭਾਵਾਯ. ਇਦ੍ਧਿਪਾਦਾ ਞਾਣਕਥਾਯਂ ਵੁਤ੍ਤਤ੍ਥਾ.
ਛਨ੍ਦਂ ਚੇ ਭਿਕ੍ਖੁ ਨਿਸ੍ਸਾਯਾਤਿ ਯਦਿ ਭਿਕ੍ਖੁ ਛਨ੍ਦਂ ਨਿਸ੍ਸਾਯ ਛਨ੍ਦਂ ਅਧਿਪਤਿਂ ਕਰਿਤ੍ਵਾ. ਲਭਤਿ ਸਮਾਧਿਨ੍ਤਿ ਸਮਾਧਿਂ ਪਟਿਲਭਤਿ ਨਿਬ੍ਬਤ੍ਤੇਤਿ. ਸੇਸੇਸੁਪਿ ਏਸੇਵ ਨਯੋ. ਤਤ੍ਥ ਛਨ੍ਦਵੀਰਿਯਚਿਤ੍ਤਵੀਮਂਸਾ ਚਤ੍ਤਾਰਿ ਪਦਾਨਿ, ਤਂਸਮ੍ਪਯੁਤ੍ਤਾ ਚਤ੍ਤਾਰੋ ਸਮਾਧੀ ਚਤ੍ਤਾਰਿ ਪਦਾਨੀਤਿ ਏਵਂ ਅਟ੍ਠ ਪਦਾਨਿ. ਯਸ੍ਮਾ ਪਨ ਇਦ੍ਧਿਮੁਪ੍ਪਾਦੇਤੁਕਾਮਤਾਛਨ੍ਦੋ ਸਮਾਧਿਨਾ ਏਕਤੋ ਨਿਯੁਤ੍ਤੋਵ ਇਦ੍ਧਿਲਾਭਾਯ ਸਂਵਤ੍ਤਤਿ, ਤਥਾ ਵੀਰਿਯਾਦਯੋ, ਤਸ੍ਮਾ ਇਮਾਨਿ ਅਟ੍ਠ ਪਦਾਨਿ ਵੁਤ੍ਤਾਨੀਤਿ ਵੇਦਿਤਬ੍ਬਾਨਿ.
ਯਂ ਤਂ ਭਗਵਤਾ ਅਭਿਞ੍ਞਾ ਉਪ੍ਪਾਦੇਤੁਕਾਮਸ੍ਸ ਯੋਗਿਨੋ ਕਤ੍ਤਬ੍ਬਯੋਗਵਿਧਿਂ ਦਸ੍ਸੇਨ੍ਤੇਨ ‘‘ਸੋ ਏਵਂ ਸਮਾਹਿਤੇ ਚਿਤ੍ਤੇ ਪਰਿਸੁਦ੍ਧੇ ਪਰਿਯੋਦਾਤੇ ਅਨਙ੍ਗਣੇ ਵਿਗਤੂਪਕ੍ਕਿਲੇਸੇ ਮੁਦੁਭੂਤੇ ਕਮ੍ਮਨਿਯੇ ਠਿਤੇ ਆਨੇਞ੍ਜਪ੍ਪਤ੍ਤੇ’’ਤਿ (ਦੀ. ਨਿ. ੧.੨੩੮) ਚਿਤ੍ਤਸ੍ਸ ਆਨੇਞ੍ਜਂ ਵੁਤ੍ਤਂ, ਤਂ ਥੇਰੋ ਸੋਲ਼ਸਧਾ ਦਸ੍ਸੇਨ੍ਤੋ ਸੋਲ਼ਸਮੂਲਾਨੀਤਿਆਦਿਮਾਹ. ਤਤ੍ਥ ਅਨੋਨਤਨ੍ਤਿ ਕੋਸਜ੍ਜਵਸੇਨ ਅਨੋਨਤਂ, ਅਸਲ੍ਲੀਨਨ੍ਤਿ ਅਤ੍ਥੋ. ਅਨੁਨ੍ਨਤਨ੍ਤਿ ਉਦ੍ਧਚ੍ਚਵਸੇਨ ਉਦ੍ਧਂ ਨ ਆਰੁਲ਼੍ਹਂ, ਅਨੁਦ੍ਧਤਨ੍ਤਿ ਅਤ੍ਥੋ. ਅਨਭਿਨਤਨ੍ਤਿ ਲੋਭਵਸੇਨ ਨ ਅਭਿਨਤਂ, ਅਨਲ੍ਲੀਨਨ੍ਤਿ ਅਤ੍ਥੋ. ਅਭਿਕਾਮਤਾਯ ਨਤਂ ਅਭਿਨਤਨ੍ਤਿ, ਇਦਂ ਤਾਦਿਸਂ ਨ ਹੋਤੀਤਿ ਵੁਤ੍ਤਂ ਹੋਤਿ. ਰਾਗੇਤਿ ਸਙ੍ਖਾਰਵਤ੍ਥੁਕੇਨ ਲੋਭੇਨ. ਅਨਪਨਤਨ੍ਤਿ ਦੋਸਵਸੇਨ ਨ ਅਪਨਤਂ, ਨ ਘਟ੍ਟਨਨ੍ਤਿ ਅਤ੍ਥੋ. ‘‘ਨਤਂ ਨਤੀ’’ਤਿ ਅਤ੍ਥਤੋ ਏਕਂ. ਅਪਗਤਨਤਨ੍ਤਿ ਅਪਨਤਂ, ਇਦਂ ਤਾਦਿਸਂ ਨ ਹੋਤੀਤਿ ਵੁਤ੍ਤਂ ਹੋਤਿ. ਅਨਿਸ੍ਸਿਤਨ੍ਤਿ ਅਨਤ੍ਤਤੋ ਦਿਟ੍ਠਤ੍ਤਾ ਦਿਟ੍ਠਿਵਸੇਨ ‘‘ਅਤ੍ਤਾ’’ਤਿ ਵਾ ‘‘ਅਤ੍ਤਨਿਯ’’ਨ੍ਤਿ ਵਾ ਕਿਞ੍ਚਿ ਨ ਨਿਸ੍ਸਿਤਂ. ਅਪ੍ਪਟਿਬਦ੍ਧਨ੍ਤਿ ਪਚ੍ਚੁਪਕਾਰਾਸਾਵਸੇਨ ਨਪ੍ਪਟਿਬਦ੍ਧਂ. ਛਨ੍ਦਰਾਗੇਤਿ ਸਤ੍ਤਵਤ੍ਥੁਕੇਨ ਲੋਭੇਨ. ਵਿਪ੍ਪਮੁਤ੍ਤਨ੍ਤਿ ਵਿਕ੍ਖਮ੍ਭਨਵਿਮੁਤ੍ਤਿਵਸੇਨ ਕਾਮਰਾਗਤੋ ਵਿਪ੍ਪਮੁਤ੍ਤਂ. ਅਥ ਵਾ ਪਞ੍ਚਵਿਮੁਤ੍ਤਿਵਸੇਨ ਕਾਮਰਾਗਤੋ ਵਿਪ੍ਪਮੁਤ੍ਤਂ. ਅਥ ਵਾ ਪਞ੍ਚਵਿਮੁਤ੍ਤਿਵਸੇਨ ਤਤੋ ਤਤੋ ਪਟਿਪਕ੍ਖਤੋ ਵਿਪ੍ਪਮੁਤ੍ਤਂ. ਇਦਂ ਪੁਥੁਜ੍ਜਨਸੇਖਾਸੇਖਾਨਮ੍ਪਿ ਅਭਿਞ੍ਞਾਯ ਉਪ੍ਪਾਦਨਤੋ ਨਿਰੋਧਸਮਾਪਤ੍ਤਿਞਾਣੇ ‘‘ਸੋਲ਼ਸਹਿ ਞਾਣਚਰਿਯਾਹੀ’’ਤਿ (ਪਟਿ. ਮ. ੧.੮੪) ਵੁਤ੍ਤਨਯੇਨ ਉਕ੍ਕਟ੍ਠਪਰਿਚ੍ਛੇਦੇਨ ਵੁਤ੍ਤਂ, ਯਥਾਲਾਭਵਸੇਨ ਪਨ ਗਹੇਤਬ੍ਬਂ. ਕਾਮਰਾਗੇਤਿ ਮੇਥੁਨਰਾਗੇਨ. ਵਿਸਞ੍ਞੁਤ੍ਤਨ੍ਤਿ ਵਿਕ੍ਖਮ੍ਭਨਤੋ ਸੇਸਕਿਲੇਸੇਹਿ ਵਿਸਂਯੁਤ੍ਤਂ, ਉਕ੍ਕਟ੍ਠਨਯੇਨ ਸਮੁਚ੍ਛੇਦਤੋ ਵਾ ਵਿਪ੍ਪਯੁਤ੍ਤਂ. ਕਿਲੇਸੇਤਿ ਸੇਸਕਿਲੇਸੇਨ. ਵਿਮਰਿਯਾਦਿਕਤਨ੍ਤਿ ਵਿਕ੍ਖਮ੍ਭਿਤਬ੍ਬਮਰਿਯਾਦਵਸੇਨ ਵਿਗਤਕਿਲੇਸਮਰਿਯਾਦਂ ਕਤਂ, ਤੇਨ ਤੇਨ ਮਗ੍ਗੇਨ ਪਹਾਤਬ੍ਬਮਰਿਯਾਦਵਸੇਨ ਵਾ ਵਿਗਤਕਿਲੇਸਮਰਿਯਾਦਂ ਕਤਂ. ਕਿਲੇਸਮਰਿਯਾਦੇਤਿ ਤੇਨ ਤੇਨ ਪਹੀਨੇਨ ਕਿਲੇਸਮਰਿਯਾਦੇਨ. ਲਿਙ੍ਗਵਿਪਲ੍ਲਾਸੋ ਚੇਤ੍ਥ ਦਟ੍ਠਬ੍ਬੋ. ਏਕਤ੍ਤਗਤਨ੍ਤਿ ਏਕਾਰਮ੍ਮਣਗਤਂ. ਨਾਨਤ੍ਤਕਿਲੇਸੇਹੀਤਿ ਨਾਨਾਰਮ੍ਮਣੇ ਪਵਤ੍ਤਮਾਨੇਹਿ ਕਿਲੇਸੇਹਿ. ਇਦਂ ਆਰਮ੍ਮਣਮਪੇਕ੍ਖਿਤ੍ਵਾ ਵੁਤ੍ਤਂ, ‘‘ਅਨੋਨਤ’’ਨ੍ਤਿਆਦਿ ਪਨ ਕਿਲੇਸੇ ਏਵ ਅਪੇਕ੍ਖਿਤ੍ਵਾ. ਓਭਾਸਗਤਨ੍ਤਿ ਪਞ੍ਞਾਯ ਵਿਸਦਪ੍ਪਵਤ੍ਤਿਵਸੇਨ ਪਞ੍ਞੋਭਾਸਂ ਗਤਂ. ਅਵਿਜ੍ਜਨ੍ਧਕਾਰੇਤਿ ਬਲਵਅਵਿਜ੍ਜਾਯ. ਚਤਸ੍ਸੋ ਚ ਭੂਮਿਯੋ ਸੋਲ਼ਸ ਚ ਮੂਲਾਨਿ ਇਦ੍ਧਿਯਾ ਪੁਬ੍ਬਭਾਗਵਸੇਨ ਵੁਤ੍ਤਾਨਿ, ਚਤ੍ਤਾਰੋ ਚ ਪਾਦਾ ਅਟ੍ਠ ਚ ਪਦਾਨਿ ਪੁਬ੍ਬਭਾਗਵਸੇਨ ਚ ਸਮ੍ਪਯੋਗਵਸੇਨ ਚ ਵੁਤ੍ਤਾਨੀਤਿ.
੧੦. ਏਵਂ ਇਦ੍ਧਿਯਾ ਭੂਮਿਪਾਦਪਦਮੂਲਭੂਤੇ ਧਮ੍ਮੇ ਦਸ੍ਸੇਤ੍ਵਾ ਇਦਾਨਿ ਤਾ ਇਦ੍ਧਿਯੋ ਦਸ੍ਸੇਨ੍ਤੋ ਕਤਮਾ ਅਧਿਟ੍ਠਾਨਾ ਇਦ੍ਧੀਤਿਆਦਿਮਾਹ. ਤਤ੍ਥ ਉਦ੍ਦੇਸਪਦਾਨਂ ਅਤ੍ਥੋ ਇਦ੍ਧਿਵਿਧਞਾਣਨਿਦ੍ਦੇਸੇ ਵੁਤ੍ਤੋਯੇਵ. ਇਧ ਭਿਕ੍ਖੂਤਿ ਇਮਸ੍ਮਿਂ ਸਾਸਨੇ ਭਿਕ੍ਖੁ. ਤੇਨ ਸਬ੍ਬਪਕਾਰਵਸੇਨ ਇਦ੍ਧਿਵਿਧਕਾਰਕਸ੍ਸ ਅਞ੍ਞਤ੍ਥ ਅਭਾਵਂ ਦੀਪੇਤਿ. ਇਮੇਸਂ ਦ੍ਵਿਨ੍ਨਂ ਪਦਾਨਂ ਨਿਦ੍ਦੇਸੋ ਹੇਟ੍ਠਾ ਵੁਤ੍ਤਤ੍ਥੋ. ਤੇਨੇਵ ਚ ਇਦ੍ਧਿਯਾ ਭੂਮਿਪਾਦਪਦਮੂਲਭੂਤੇਹਿ ਧਮ੍ਮੇਹਿ ਸਮਨ੍ਨਾਗਤੋ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੩੬੫-੩੬੬) ਵੁਤ੍ਤੇਹਿ ਚੁਦ੍ਦਸਹਿ ਪਨ੍ਨਰਸਹਿ ਵਾ ਆਕਾਰੇਹਿ ਪਰਿਦਮਿਤਚਿਤ੍ਤਤਾ ਚ ਛਨ੍ਦਾਦਿਏਕੇਕਾਧਿਪਤਿਸਮਾਪਜ੍ਜਨਵਸੇਨ ਆਵਜ੍ਜਨਾਦਿਵਸੀਭਾਵਵਸੇਨ ਚ ਮੁਦੁਕਮ੍ਮਞ੍ਞਕਤਚਿਤ੍ਤਤਾ ਚ ਵੁਤ੍ਤਾ ਹੋਤਿ. ਬਲਵਪੁਬ੍ਬਯੋਗਸਮ੍ਪਨ੍ਨੋ ਪੁਬ੍ਬਯੋਗਸਮ੍ਪਤ੍ਤਿਯਾ ਅਰਹਤ੍ਤਪਟਿਲਾਭੇਨੇਵ ਪਟਿਲਦ੍ਧਾਭਿਞ੍ਞਾਦਿਗੁਣੋ ਭਿਕ੍ਖੁ ਭੂਮਿਆਦੀਹਿ ਧਮ੍ਮੇਹਿ ਸਮਨ੍ਨਾਗਤੋ ਹੋਤੀਤਿ ਕਤ੍ਵਾ ਸੋਪਿ ਵੁਤ੍ਤੋਵ ਹੋਤਿ.
ਬਹੁਕਂ ਆਵਜ੍ਜਤੀਤਿ ਪਥਵੀਕਸਿਣਾਰਮ੍ਮਣਂ ਅਭਿਞ੍ਞਾਪਾਦਕਂ ਚਤੁਤ੍ਥਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਸਚੇ ਸਤਂ ਇਚ੍ਛਤਿ, ‘‘ਸਤਂ ਹੋਮਿ, ਸਤਂ ਹੋਮੀ’’ਤਿ ਪਰਿਕਮ੍ਮਕਰਣਵਸੇਨ ਆਵਜ੍ਜਤਿ. ਆਵਜ੍ਜਿਤ੍ਵਾ ਞਾਣੇਨ ਅਧਿਟ੍ਠਾਤੀਤਿ ਏਵਂ ਪਰਿਕਮ੍ਮਂ ਕਤ੍ਵਾ ਅਭਿਞ੍ਞਾਞਾਣੇਨ ਅਧਿਟ੍ਠਾਤਿ. ਏਤ੍ਥ ਪਰਿਕਮ੍ਮਂ ਕਤ੍ਵਾ ਪੁਨ ਪਾਦਕਜ੍ਝਾਨਸਮਾਪਜ੍ਜਨਂ ਨ ਵੁਤ੍ਤਂ. ਕਿਞ੍ਚਾਪਿ ਨ ਵੁਤ੍ਤਂ, ਅਥ ਖੋ ਅਟ੍ਠਕਥਾਯਂ (ਵਿਸੁਦ੍ਧਿ. ੨.੩੮੬) ‘‘ਆਵਜ੍ਜਤੀਤਿ ਪਰਿਕਮ੍ਮਵਸੇਨੇਵ ਵੁਤ੍ਤਂ, ਆਵਜ੍ਜਿਤ੍ਵਾ ਞਾਣੇਨ ਅਧਿਟ੍ਠਾਤੀਤਿ ਅਭਿਞ੍ਞਾਞਾਣਵਸੇਨ ਵੁਤ੍ਤਂ, ਤਸ੍ਮਾ ਬਹੁਕਂ ਆਵਜ੍ਜਤਿ, ਤਤੋ ਤੇਸਂ ਪਰਿਕਮ੍ਮਚਿਤ੍ਤਾਨਂ ਅਵਸਾਨੇ ਸਮਾਪਜ੍ਜਤਿ, ਸਮਾਪਤ੍ਤਿਤੋ ਵੁਟ੍ਠਹਿਤ੍ਵਾ ਪੁਨ ‘ਬਹੁਕੋ ਹੋਮੀ’ਤਿ ਆਵਜ੍ਜਿਤ੍ਵਾ ਤਤੋ ਪਰਂ ਪਵਤ੍ਤਾਨਂ ਤਿਣ੍ਣਂ ਚਤੁਨ੍ਨਂ ਵਾ ਪੁਬ੍ਬਭਾਗਚਿਤ੍ਤਾਨਂ ਅਨਨ੍ਤਰਾ ਉਪ੍ਪਨ੍ਨੇਨ ਸਨ੍ਨਿਟ੍ਠਾਪਨਵਸੇਨ ਅਧਿਟ੍ਠਾਨਨ੍ਤਿ ਲਦ੍ਧਨਾਮੇਨ ਏਕੇਨੇਵ ਅਭਿਞ੍ਞਾਞਾਣੇਨ ਅਧਿਟ੍ਠਾਤੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ’’ਤਿ ਵੁਤ੍ਤਤ੍ਤਾ ਏਵਮੇਵ ਦਟ੍ਠਬ੍ਬਂ. ਯਥਾ ‘‘ਭੁਞ੍ਜਿਤ੍ਵਾ ਸਯਤੀ’’ਤਿ ਵੁਤ੍ਤੇ ਪਾਨੀਯਂ ਅਪਿਵਿਤ੍ਵਾ ਹਤ੍ਥਧੋਵਨਾਦੀਨਿ ਅਕਤ੍ਵਾ ਭੁਤ੍ਤਾਨਨ੍ਤਰਮੇਵ ਸਯਤੀਤਿ ਅਤ੍ਥੋ ਨ ਹੋਤੀਤਿ ਅਨ੍ਤਰਾ ਸਨ੍ਤੇਸੁਪਿ ਅਞ੍ਞੇਸੁ ਕਿਚ੍ਚੇਸੁ ‘‘ਭੁਤ੍ਵਾ ਸਯਤੀ’’ਤਿ ਵੁਚ੍ਚਤਿ, ਏਵਮਿਧਾਪੀਤਿ ਦਟ੍ਠਬ੍ਬਂ. ਪਠਮਂ ਪਾਦਕਜ੍ਝਾਨਸਮਾਪਜ੍ਜਨਮ੍ਪਿ ਹਿ ਪਾਲ਼ਿਯਂ ਅਵੁਤ੍ਤਮੇਵਾਤਿ. ਤੇਨ ਪਨ ਅਧਿਟ੍ਠਾਨਞਾਣੇਨ ਸਹੇਵ ਸਤਂ ਹੋਤਿ. ਸਹਸ੍ਸੇਪਿ ਸਤਸਹਸ੍ਸੇਪਿ ਏਸੇਵ ਨਯੋ. ਸਚੇ ਏਵਂ ਨ ਇਜ੍ਝਤਿ, ਪੁਨ ਪਰਿਕਮ੍ਮਂ ਕਤ੍ਵਾ ਦੁਤਿਯਮ੍ਪਿ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਅਧਿਟ੍ਠਾਤਬ੍ਬਂ. ਸਂਯੁਤ੍ਤਟ੍ਠਕਥਾਯਞ੍ਹਿ ‘‘ਏਕਵਾਰਂ ਦ੍ਵਿਵਾਰਂ ਸਮਾਪਜ੍ਜਿਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਤਤ੍ਥ ਪਾਦਕਜ੍ਝਾਨਚਿਤ੍ਤਂ ਨਿਮਿਤ੍ਤਾਰਮ੍ਮਣਂ, ਪਰਿਕਮ੍ਮਚਿਤ੍ਤਾਨਿ ਸਤਾਰਮ੍ਮਣਾਨਿ ਵਾ ਸਹਸ੍ਸਾਰਮ੍ਮਣਾਨਿ ਵਾ. ਤਾਨਿ ਚ ਖੋ ਵਣ੍ਣਵਸੇਨ, ਨ ਪਣ੍ਣਤ੍ਤਿਵਸੇਨ. ਅਧਿਟ੍ਠਾਨਚਿਤ੍ਤਮ੍ਪਿ ਤਥੇਵ ਸਤਾਰਮ੍ਮਣਂ ਵਾ ਸਹਸ੍ਸਾਰਮ੍ਮਣਂ ਵਾ. ਤਂ ਪੁਬ੍ਬੇ ਵੁਤ੍ਤਅਪ੍ਪਨਾਚਿਤ੍ਤਮਿਵ ਗੋਤ੍ਰਭੁਅਨਨ੍ਤਰਂ ਏਕਮੇਵ ਉਪ੍ਪਜ੍ਜਤਿ ਰੂਪਾਵਚਰਚਤੁਤ੍ਥਜ੍ਝਾਨਿਕਂ.
ਯਥਾਯਸ੍ਮਾ ਚੂਲ਼ਪਨ੍ਥਕੋ ਏਕੋਪਿ ਹੁਤ੍ਵਾ ਬਹੁਧਾ ਹੋਤੀਤਿ ਬਹੁਧਾਭਾਵਸ੍ਸ ਕਾਯਸਕ੍ਖਿਦਸ੍ਸਨਤ੍ਥਂ ਵੁਤ੍ਤਂ. ਵਤ੍ਤਮਾਨਵਚਨਂ ਪਨੇਤ੍ਥ ਥੇਰਸ੍ਸ ਤਥਾਕਰਣਪਕਤਿਕਤ੍ਤਾ ਤਸ੍ਸ ਧਰਮਾਨਕਾਲਤ੍ਤਾ ਚ ਕਤਨ੍ਤਿ ਵੇਦਿਤਬ੍ਬਂ. ਏਕੋ ਹੋਤੀਤਿ ਵਾਰੇਪਿ ਏਸੇਵ ਨਯੋ.
ਤਤ੍ਰਿਦਂ ਵਤ੍ਥੁ (ਵਿਸੁਦ੍ਧਿ. ੨.੩੮੬) – ਤੇ ਦ੍ਵੇ ਭਾਤਰੋ ਕਿਰ ਥੇਰਾ ਪਨ੍ਥੇ ਜਾਤਤ੍ਤਾ ‘‘ਪਨ੍ਥਕਾ’’ਤਿ ਨਾਮਂ ਲਭਿਂਸੁ. ਤੇਸੁ ਜੇਟ੍ਠੋ ਮਹਾਪਨ੍ਥਕੋ ਪਬ੍ਬਜਿਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਸੋ ਅਰਹਾ ਹੁਤ੍ਵਾ ਚੂਲ਼ਪਨ੍ਥਕਂ ਪਬ੍ਬਾਜੇਤ੍ਵਾ –
‘‘ਪਦੁਮਂ ਯਥਾ ਕੋਕਨਦਂ ਸੁਗਨ੍ਧਂ, ਪਾਤੋ ਸਿਯਾ ਫੁਲ੍ਲਮਵੀਤਗਨ੍ਧਂ;
ਅਙ੍ਗੀਰਸਂ ਪਸ੍ਸ ਵਿਰੋਚਮਾਨਂ, ਤਪਨ੍ਤਮਾਦਿਚ੍ਚਮਿਵਨ੍ਤਲਿਕ੍ਖੇ’’ਤਿ. (ਅ. ਨਿ. ੫.੧੯੫; ਸਂ. ਨਿ. ੧.੧੨੩) –
ਇਮਂ ਗਾਥਂ ਅਦਾਸਿ. ਸੋ ਤਂ ਚਤੂਹਿ ਮਾਸੇਹਿ ਪਗੁਣਂ ਕਾਤੁਂ ਨਾਸਕ੍ਖਿ. ਅਥ ਨਂ ਥੇਰੋ ‘‘ਅਭਬ੍ਬੋ ਤ੍ਵਂ ਇਮਸ੍ਮਿਂ ਸਾਸਨੇ, ਨਿਕ੍ਖਮ ਇਤੋ’’ਤਿ ਆਹ. ਤਸ੍ਮਿਞ੍ਚ ਕਾਲੇ ਥੇਰੋ ਭਤ੍ਤੁਦ੍ਦੇਸਕੋ ਹੋਤਿ. ਜੀਵਕੋ ਕੋਮਾਰਭਚ੍ਚੋ ਬਹੁਂ ਮਾਲਾਗਨ੍ਧਵਿਲੇਪਨਂ ਆਦਾਯ ਅਤ੍ਤਨੋ ਅਮ੍ਬਵਨਂ ਗਨ੍ਤ੍ਵਾ ਸਤ੍ਥਾਰਂ ਪੂਜੇਤ੍ਵਾ ਧਮ੍ਮਂ ਸੁਤ੍ਵਾ ਦਸਬਲਂ ਵਨ੍ਦਿਤ੍ਵਾ ਥੇਰਂ ਉਪਸਙ੍ਕਮਿਤ੍ਵਾ ‘‘ਸ੍ਵੇ, ਭਨ੍ਤੇ, ਬੁਦ੍ਧਪ੍ਪਮੁਖਾਨਿ ਪਞ੍ਚ ਭਿਕ੍ਖੁਸਤਾਨਿ ਆਦਾਯ ਅਮ੍ਹਾਕਂ ਨਿਵੇਸਨੇ ਭਿਕ੍ਖਂ ਗਣ੍ਹਥਾ’’ਤਿ ਆਹ. ਥੇਰੋਪਿ ‘‘ਠਪੇਤ੍ਵਾ ਚੂਲ਼ਪਨ੍ਥਕਂ ਸੇਸਾਨਂ ਅਧਿਵਾਸੇਮੀ’’ਤਿ ਆਹ. ਤਂ ਸੁਤ੍ਵਾ ਚੂਲ਼ਪਨ੍ਥਕੋ ਭਿਯ੍ਯੋਸੋ ਮਤ੍ਤਾਯ ਦੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ਪੁਨਦਿਵਸੇ ਪਾਤੋਵ ਵਿਹਾਰਾ ਨਿਕ੍ਖਮਿਤ੍ਵਾ ਸਾਸਨੇ ਸਾਪੇਕ੍ਖਤਾਯ ਵਿਹਾਰਦ੍ਵਾਰਕੋਟ੍ਠਕੇ ਰੋਦਮਾਨੋ ਅਟ੍ਠਾਸਿ.
ਭਗਵਾ ਤਸ੍ਸ ਉਪਨਿਸ੍ਸਯਂ ਦਿਸ੍ਵਾ ਤਂ ਉਪਸਙ੍ਕਮਿਤ੍ਵਾ ‘‘ਕਸ੍ਮਾ ਰੋਦਸੀ’’ਤਿ ਆਹ. ਸੋ ਤਂ ਪਵਤ੍ਤਿਂ ਆਚਿਕ੍ਖਿ. ਭਗਵਾ ‘‘ਨ ਸਜ੍ਝਾਯਂ ਕਾਤੁਂ ਅਸਕ੍ਕੋਨ੍ਤੋ ਮਮ ਸਾਸਨੇ ਅਭਬ੍ਬੋ ਨਾਮ ਹੋਤਿ, ਮਾ ਸੋਚਿ, ਪਨ੍ਥਕਾ’’ਤਿ ਚਕ੍ਕਚਿਤ੍ਤਤਲੇਨ ਪਾਣਿਨਾ ਤਸ੍ਸ ਸੀਸਂ ਪਰਾਮਸਿਤ੍ਵਾ ਤਂ ਬਾਹਾਯਂ ਗਹੇਤ੍ਵਾ ਵਿਹਾਰਂ ਪਵਿਸਿਤ੍ਵਾ ਗਨ੍ਧਕੁਟਿਪਮੁਖੇ ਨਿਸੀਦਾਪੇਤ੍ਵਾ ਇਦ੍ਧਿਯਾ ਅਭਿਸਙ੍ਖਤਂ ਪਰਿਸੁਦ੍ਧਂ ਪਿਲੋਤਿਕਖਣ੍ਡਂ ‘‘ਇਮਂ ਪਿਲੋਤਿਕਂ ‘ਰਜੋਹਰਣਂ ਰਜੋਹਰਣ’ਨ੍ਤਿ ਹਤ੍ਥੇਨ ਪਰਿਮਜ੍ਜਨ੍ਤੋ ਨਿਸੀਦ, ਪਨ੍ਥਕਾ’’ਤਿ ਵਤ੍ਵਾ ਤਸ੍ਸ ਪਿਲੋਤਿਕਖਣ੍ਡਂ ਦਤ੍ਵਾ ਕਾਲੇ ਆਰੋਚਿਤੇ ਭਿਕ੍ਖੁਸਙ੍ਘਪਰਿਵੁਤੋ ਜੀਵਕਸ੍ਸ ਗੇਹਂ ਗਨ੍ਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਿ. ਤਸ੍ਸ ਤਂ ਪਿਲੋਤਿਕਖਣ੍ਡਂ ਤਥਾਪਰਿਮਜ੍ਜਨ੍ਤਸ੍ਸ ਕਿਲਿਟ੍ਠਂ ਹੁਤ੍ਵਾ ਕਮੇਨ ਕਾਲ਼ਵਣ੍ਣਂ ਅਹੋਸਿ. ਸੋ ‘‘ਇਦਂ ਪਰਿਸੁਦ੍ਧਂ ਪਿਲੋਤਿਕਖਣ੍ਡਂ, ਨਤ੍ਥੇਤ੍ਥ ਦੋਸੋ, ਅਤ੍ਤਭਾਵਂ ਨਿਸ੍ਸਾਯ ਪਨਾਯਂ ਦੋਸੋ’’ਤਿ ਸਞ੍ਞਂ ਪਟਿਲਭਿਤ੍ਵਾ ਪਞ੍ਚਸੁ ਖਨ੍ਧੇਸੁ ਞਾਣਂ ਓਤਾਰੇਤ੍ਵਾ ਵਿਪਸ੍ਸਨਂ ਵਡ੍ਢੇਸਿ. ਅਥਸ੍ਸ ਭਗਵਾ ਓਭਾਸਂ ਵਿਸ੍ਸਜ੍ਜੇਤ੍ਵਾ ਪੁਰਤੋ ਨਿਸਿਨ੍ਨੋ ਵਿਯ ਪਞ੍ਞਾਯਮਾਨਰੂਪੋ ਹੁਤ੍ਵਾ ਇਮਾ ਓਭਾਸਗਾਥਾ ਅਭਾਸਿ –
‘‘ਰਾਗੋ ਰਜੋ ਨ ਚ ਪਨ ਰੇਣੁ ਵੁਚ੍ਚਤਿ, ਰਾਗਸ੍ਸੇਤਂ ਅਧਿਵਚਨਂ ਰਜੋਤਿ;
ਏਤਂ ਰਜਂ ਵਿਪ੍ਪਜਹਿਤ੍ਵ ਭਿਕ੍ਖਵੋ, ਵਿਹਰਨ੍ਤਿ ਤੇ ਵਿਗਤਰਜਸ੍ਸ ਸਾਸਨੇ.
‘‘ਦੋਸੋ…ਪੇ… ਸਾਸਨੇ.
‘‘ਮੋਹੋ ਰਜੋ ਨ ਚ ਪਨ ਰੇਣੁ ਵੁਚ੍ਚਤਿ, ਮੋਹਸ੍ਸੇਤਂ ਅਧਿਵਚਨਂ ਰਜੋਤਿ;
ਏਤਂ ਰਜਂ ਵਿਪ੍ਪਜਹਿਤ੍ਵ ਭਿਕ੍ਖਵੋ, ਵਿਹਰਨ੍ਤਿ ਤੇ ਵਿਗਤਰਜਸ੍ਸ ਸਾਸਨੇ. (ਮਹਾਨਿ. ੨੦੯);
‘‘ਅਧਿਚੇਤਸੋ ਅਪ੍ਪਮਜ੍ਜਤੋ, ਮੁਨਿਨੋ ਮੋਨਪਥੇਸੁ ਸਿਕ੍ਖਤੋ;
ਸੋਕਾ ਨ ਭਵਨ੍ਤਿ ਤਾਦਿਨੋ, ਉਪਸਨ੍ਤਸ੍ਸ ਸਦਾ ਸਤੀਮਤੋ’’ਤਿ. (ਉਦਾ. ੩੭);
ਗਾਥਾਪਰਿਯੋਸਾਨੇ ਥੇਰੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਸੋ ਮਨੋਮਯਜ੍ਝਾਨਲਾਭੀ ਹੁਤ੍ਵਾ ਏਕੋ ਹੁਤ੍ਵਾ ਬਹੁਧਾ, ਬਹੁਧਾ ਹੁਤ੍ਵਾ ਏਕੋ ਭਵਿਤੁਂ ਸਮਤ੍ਥੋ ਅਹੋਸਿ. ਅਰਹਤ੍ਤਮਗ੍ਗੇਨੇਵਸ੍ਸ ਤੀਣਿ ਪਿਟਕਾਨਿ ਛ ਚ ਅਭਿਞ੍ਞਾ ਆਗਮਿਂਸੁ.
ਜੀਵਕੋਪਿ ਖੋ ਦਸਬਲਸ੍ਸ ਦਕ੍ਖਿਣੋਦਕਂ ਉਪਨਾਮੇਸਿ. ਸਤ੍ਥਾ ਪਤ੍ਤਂ ਹਤ੍ਥੇਨ ਪਿਦਹਿਤ੍ਵਾ ‘‘ਕਿਂ ਭਨ੍ਤੇ’’ਤਿ ਪੁਟ੍ਠੋ ‘‘ਵਿਹਾਰੇ ਏਕੋ ਭਿਕ੍ਖੁ ਅਤ੍ਥਿ, ਜੀਵਕਾ’’ਤਿ ਆਹ. ਸੋ ਪੁਰਿਸਂ ਪੇਸੇਸਿ ‘‘ਗਚ੍ਛ ਅਯ੍ਯਂ ਗਹੇਤ੍ਵਾ ਸੀਘਂ ਏਹੀ’’ਤਿ. ਚੂਲ਼ਪਨ੍ਥਕਤ੍ਥੇਰੋ ਤਸ੍ਸ ਪੁਰਿਸਸ੍ਸ ਪੁਰੇ ਆਗਮਨਾਯੇਵ ਭਾਤਰਂ ਅਤ੍ਤਨੋ ਪਤ੍ਤਵਿਸੇਸਂ ਞਾਪੇਤੁਕਾਮੋ ਭਿਕ੍ਖੁਸਹਸ੍ਸਂ ਨਿਮ੍ਮਿਨਿਤ੍ਵਾ ਏਕਮ੍ਪਿ ਏਕੇਨ ਅਸਦਿਸਂ, ਏਕਸ੍ਸਾਪਿ ਚ ਚੀਵਰਵਿਚਾਰਣਾਦਿਸਾਮਣਕਕਮ੍ਮਂ ਅਞ੍ਞੇਨ ਅਸਦਿਸਂ ਅਕਾਸਿ. ਪੁਰਿਸੋ ਗਨ੍ਤ੍ਵਾ ਵਿਹਾਰੇ ਬਹੂ ਭਿਕ੍ਖੂ ਦਿਸ੍ਵਾ ਪਚ੍ਚਾਗਨ੍ਤ੍ਵਾ ‘‘ਬਹੂ, ਭਨ੍ਤੇ, ਵਿਹਾਰੇ ਭਿਕ੍ਖੂ, ਪਕ੍ਕੋਸਿਤਬ੍ਬਂ ਅਯ੍ਯਂ ਨ ਪਸ੍ਸਾਮੀ’’ਤਿ ਜੀਵਕਸ੍ਸ ਕਥੇਸਿ. ਜੀਵਕੋ ਸਤ੍ਥਾਰਂ ਪੁਚ੍ਛਿਤ੍ਵਾ ਤਸ੍ਸ ਨਾਮਂ ਵਤ੍ਵਾ ਪੁਨ ਤਂ ਪੇਸੇਸਿ. ਸੋ ਗਨ੍ਤ੍ਵਾ ‘‘ਚੂਲ਼ਪਨ੍ਥਕੋ ਨਾਮ ਕਤਰੋ ਭਨ੍ਤੇ’’ਤਿ ਪੁਚ੍ਛਿ. ‘‘ਅਹਂ ਚੂਲ਼ਪਨ੍ਥਕੋ, ਅਹਂ ਚੂਲ਼ਪਨ੍ਥਕੋ’’ਤਿ ਸਕਿਂਯੇਵ ਮੁਖਸਹਸ੍ਸਂ ਕਥੇਸਿ. ਸੋ ਪੁਨ ਗਨ੍ਤ੍ਵਾ ‘‘ਸਬ੍ਬੇਪਿ ਕਿਰ ਚੂਲ਼ਪਨ੍ਥਕਾ, ਅਹਂ ਪਕ੍ਕੋਸਿਤਬ੍ਬਂ ਨ ਜਾਨਾਮੀ’’ਤਿ ਆਹ. ਜੀਵਕੋ ਪਟਿਵਿਦ੍ਧਸਚ੍ਚਤਾਯ ‘‘ਇਦ੍ਧਿਮਾ ਭਿਕ੍ਖੂ’’ਤਿ ਨਯਤੋ ਅਞ੍ਞਾਸਿ. ਭਗਵਾ ਆਹ – ‘‘ਗਚ੍ਛ, ਯਂ ਪਠਮਂ ਪਸ੍ਸਸਿ, ਤਂ ਚੀਵਰਕਣ੍ਣੇ ਗਹੇਤ੍ਵਾ ਸਤ੍ਥਾ ਤਂ ਆਮਨ੍ਤੇਤੀਤਿ ਵਤ੍ਵਾ ਆਨੇਹੀ’’ਤਿ. ਸੋ ਗਨ੍ਤ੍ਵਾ ਤਥਾ ਅਕਾਸਿ. ਤਾਵਦੇਵ ਸਬ੍ਬੇਪਿ ਨਿਮ੍ਮਿਤਾ ਅਨ੍ਤਰਧਾਯਿਂਸੁ. ਥੇਰੋ ਤਂ ਉਯ੍ਯੋਜੇਤ੍ਵਾ ਮੁਖਧੋਵਨਾਦਿਸਰੀਰਕਿਚ੍ਚਂ ਨਿਟ੍ਠਪੇਤ੍ਵਾ ਪਠਮਤਰਂ ਗਨ੍ਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਿ. ਤਸ੍ਮਿਂ ਖਣੇ ਸਤ੍ਥਾ ਦਕ੍ਖਿਣੋਦਕਂ ਗਣ੍ਹਿਤ੍ਵਾ ਭਤ੍ਤਕਿਚ੍ਚਂ ਕਤ੍ਵਾ ਚੂਲ਼ਪਨ੍ਥਕਤ੍ਥੇਰੇਨੇਵ ਭਤ੍ਤਾਨੁਮੋਦਨਂ ਧਮ੍ਮਕਥਂ ਕਥਾਪੇਸਿ. ਥੇਰੋ ਦੀਘਮਜ੍ਝਿਮਾਗਮਪ੍ਪਮਾਣਂ ਧਮ੍ਮਕਥਂ ਕਥੇਸੀਤਿ.
ਅਞ੍ਞੇ ਭਿਕ੍ਖੂ ਅਧਿਟ੍ਠਾਨੇਨ ਮਨੋਮਯਂ ਕਾਯਂ ਅਭਿਨਿਮ੍ਮਿਨਿਤ੍ਵਾ ਤਯੋ ਵਾ ਚਤ੍ਤਾਰੋ ਵਾ ਅਭਿਨਿਮ੍ਮਿਨਨ੍ਤਿ, ਬਹੁਕੇ ਏਕਸਦਿਸੇਯੇਵ ਚ ਕਤ੍ਵਾ ਨਿਮ੍ਮਿਨਨ੍ਤਿ ਏਕਵਿਧਮੇਵ ਕਮ੍ਮਂ ਕੁਰੁਮਾਨੇ. ਚੂਲ਼ਪਨ੍ਥਕਤ੍ਥੇਰੋ ਪਨ ਏਕਾਵਜ੍ਜਨੇਨੇਵ ਭਿਕ੍ਖੁਸਹਸ੍ਸਂ ਮਾਪੇਸਿ. ਦ੍ਵੇਪਿ ਜਨੇ ਨ ਏਕਸਦਿਸੇ ਅਕਾਸਿ, ਨ ਏਕਵਿਧਂ ਕਮ੍ਮਂ ਕੁਰੁਮਾਨੇ. ਤਸ੍ਮਾ ਮਨੋਮਯਂ ਕਾਯਂ ਅਭਿਨਿਮ੍ਮਿਨਨ੍ਤਾਨਂ ਅਗ੍ਗੋ ਨਾਮ ਜਾਤੋ. ਅਞ੍ਞੇ ਪਨ ਬਹੂ ਅਨਿਯਮੇਤ੍ਵਾ ਨਿਮ੍ਮਿਤਾ ਇਦ੍ਧਿਮਤਾ ਸਦਿਸਾਵ ਹੋਨ੍ਤਿ. ਠਾਨਨਿਸਜ੍ਜਾਦੀਸੁ ਚ ਭਾਸਿਤਤੁਣ੍ਹੀਭਾਵਾਦੀਸੁ ਚ ਯਂ ਯਂ ਇਦ੍ਧਿਮਾ ਕਰੋਤਿ, ਤਂ ਤਦੇਵ ਕਰੋਨ੍ਤਿ. ਸਚੇ ਪਨ ਨਾਨਾਵਣ੍ਣਂ ਕਾਤੁਕਾਮੋ ਹੋਤਿ ਕੇਚਿ ਪਠਮਵਯੇ ਕੇਚਿ ਮਜ੍ਝਿਮਵਯੇ ਕੇਚਿ ਪਚ੍ਛਿਮਵਯੇ, ਤਥਾ ਦੀਘਕੇਸੇ ਉਪਡ੍ਢਮੁਣ੍ਡੇ ਮੁਣ੍ਡੇ ਮਿਸ੍ਸਕਕੇਸੇ ਉਪਡ੍ਢਰਤ੍ਤਚੀਵਰੇ ਪਣ੍ਡੁਕਚੀਵਰੇ ਪਦਭਾਣਧਮ੍ਮਕਥਾਸਰਭਞ੍ਞਪਞ੍ਹਾਪੁਚ੍ਛਨਪਞ੍ਹਾਵਿਸਜ੍ਜਨਰਜਨਪਚਨਚੀਵਰਸਿਬ੍ਬਨਧੋਵਨਾਦੀਨਿ ਕਰੋਨ੍ਤੇ ਅਪਰੇਪਿ ਵਾ ਨਾਨਪ੍ਪਕਾਰਕੇ ਕਾਤੁਕਾਮੋ ਹੋਤਿ, ਤੇਨ ਪਾਦਕਜ੍ਝਾਨਤੋ ਵੁਟ੍ਠਾਯ ‘‘ਏਤ੍ਤਕਾ ਭਿਕ੍ਖੂ ਪਠਮਵਯਾ ਹੋਨ੍ਤੂ’’ਤਿਆਦਿਨਾ ਨਯੇਨ ਪਰਿਕਮ੍ਮਂ ਕਤ੍ਵਾ ਪੁਨ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਅਧਿਟ੍ਠਾਤਬ੍ਬਂ, ਅਧਿਟ੍ਠਾਨਚਿਤ੍ਤੇਨ ਸਦ੍ਧਿਂ ਇਚ੍ਛਿਤਿਚ੍ਛਿਤਪ੍ਪਕਾਰਾਯੇਵ ਹੋਨ੍ਤੀਤਿ. ਏਸੇਵ ਨਯੋ ਬਹੁਧਾਪਿ ਹੁਤ੍ਵਾ ਏਕੋ ਹੋਤੀਤਿਆਦੀਸੁ.
ਅਯਂ ਪਨ ਵਿਸੇਸੋ – ਪਕਤਿਯਾ ਬਹੁਕੋਤਿ ਨਿਮ੍ਮਿਤਕਾਲਬ੍ਭਨ੍ਤਰੇ ਨਿਮ੍ਮਿਤਪਕਤਿਯਾ ਬਹੁਕੋ. ਇਮਿਨਾ ਚ ਭਿਕ੍ਖੁਨਾ ਏਵਂ ਬਹੁਭਾਵਂ ਨਿਮ੍ਮਿਨਿਤ੍ਵਾ ਪੁਨ ‘‘ਏਕੋਵ ਹੁਤ੍ਵਾ ਚਙ੍ਕਮਿਸ੍ਸਾਮਿ, ਸਜ੍ਝਾਯਂ ਕਰਿਸ੍ਸਾਮਿ, ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਵਾ, ‘‘ਅਯਂ ਵਿਹਾਰੋ ਅਪ੍ਪਭਿਕ੍ਖੁਕੋ, ਸਚੇ ਕੇਚਿ ਆਗਮਿਸ੍ਸਨ੍ਤਿ ‘ਕੁਤੋ ਇਮੇ ਏਤ੍ਤਕਾ ਏਕਸਦਿਸਾ ਭਿਕ੍ਖੂ, ਅਦ੍ਧਾ ਥੇਰਸ੍ਸ ਏਸ ਆਨੁਭਾਵੋ’ਤਿ ਮਂ ਜਾਨਿਸ੍ਸਨ੍ਤੀ’’ਤਿ ਅਪ੍ਪਿਚ੍ਛਤਾਯ ਵਾ ਅਨ੍ਤਰਾਵ ‘‘ਏਕੋ ਹੋਮੀ’’ਤਿ ਇਚ੍ਛਨ੍ਤੇਨ ਪਾਦਕਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ‘‘ਏਕੋ ਹੋਮੀ’’ਤਿ ਪਰਿਕਮ੍ਮਂ ਕਤ੍ਵਾ ਪੁਨ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ‘‘ਏਕੋ ਹੋਮੀ’’ਤਿ ਅਧਿਟ੍ਠਾਤਬ੍ਬਂ. ਅਧਿਟ੍ਠਾਨਚਿਤ੍ਤੇਨ ਸਦ੍ਧਿਂਯੇਵ ਏਕੋ ਹੋਤਿ. ਏਵਂ ਅਕਰੋਨ੍ਤੋ ਪਨ ਯਥਾਪਰਿਚ੍ਛਿਨ੍ਨਕਾਲਵਸੇਨ ਸਯਮੇਵ ਏਕੋ ਹੋਤਿ.
੧੧. ਆਵਿਭਾਵਨ੍ਤਿ ਪਦਂ ਨਿਕ੍ਖਿਪਿਤ੍ਵਾ ਕੇਨਚਿ ਅਨਾਵਟਂ ਹੋਤੀਤਿ ਵੁਤ੍ਤਤ੍ਤਾ ਕੇਨਚਿ ਅਨਾਵਟਪਦੇਨ ਆਵਿਭਾਵਪਦਸ੍ਸ ਪਾਕਟਭਾਵਤ੍ਥੋ ਵੁਤ੍ਤੋ. ‘‘ਹੋਤੀ’’ਤਿ ਪਦੇਨ ‘‘ਕਰੋਤੀ’’ਤਿ ਪਾਠਸੇਸੋ ਵੁਤ੍ਤੋ ਹੋਤਿ. ਪਾਕਟਂ ਹੋਨ੍ਤਞ੍ਹਿ ਆਵਿਭਾਵੇ ਕਤੇ ਹੋਤਿ. ਕੇਨਚਿ ਅਨਾਵਟਨ੍ਤਿ ਕੁਟ੍ਟਾਦਿਨਾ ਯੇਨ ਕੇਨਚਿ ਅਨਾਵਟਂ ਆਵਰਣਵਿਰਹਿਤਂ. ਅਪ੍ਪਟਿਚ੍ਛਨ੍ਨਨ੍ਤਿ ਉਪਰਿਤੋ ਅਚ੍ਛਾਦਿਤਂ. ਤਦੇਵ ਅਨਾਵਟਤ੍ਤਾ ਵਿਵਟਂ. ਅਪ੍ਪਟਿਚ੍ਛਨ੍ਨਤ੍ਤਾ ਪਾਕਟਂ. ਤਿਰੋਭਾਵਨ੍ਤਿ ਅਨ੍ਤਰਿਤਭਾਵਂ ਕਰੋਤਿ. ਆਵਟਂਯੇਵ ਤੇਨ ਆਵਰਣੇਨ ਪਿਹਿਤਂ. ਪਟਿਚ੍ਛਨ੍ਨਂਯੇਵ ਤੇਨ ਪਟਿਚ੍ਛਾਦਨੇਨ ਪਟਿਕੁਜ੍ਜਿਤਂ.
ਆਕਾਸਕਸਿਣਸਮਾਪਤ੍ਤਿਯਾਤਿ ਪਰਿਚ੍ਛੇਦਾਕਾਸਕਸਿਣੇ ਉਪ੍ਪਾਦਿਤਾਯ ਚਤੁਤ੍ਥਜ੍ਝਾਨਸਮਾਪਤ੍ਤਿਯਾ. ਲਾਭੀਤਿ ਲਾਭੋ ਅਸ੍ਸ ਅਤ੍ਥੀਤਿ ਲਾਭੀ. ਅਪਰਿਕ੍ਖਿਤ੍ਤੇਤਿ ਕੇਨਚਿ ਸਮਨ੍ਤਤੋ ਅਪਰਿਕ੍ਖਿਤ੍ਤੇ ਪਦੇਸੇ. ਇਧ ਆਕਾਸਕਸਿਣਸ੍ਸੇਵ ਵੁਤ੍ਤਤ੍ਤਾ ਤਤ੍ਥ ਭਾਵਿਤਮੇਵ ਝਾਨਂ ਆਕਾਸਕਰਣਸ੍ਸ ਪਚ੍ਚਯੋ ਹੋਤਿ, ਨ ਅਞ੍ਞਨ੍ਤਿ ਦਟ੍ਠਬ੍ਬਂ. ਉਪਰਿਆਪੋਕਸਿਣਾਦੀਸੁਪਿ ਤਦਾਰਮ੍ਮਣਮੇਵ ਝਾਨਂ ਦਟ੍ਠਬ੍ਬਂ, ਨ ਅਞ੍ਞਂ. ਪਥਵਿਂ ਆਵਜ੍ਜਤਿ, ਉਦਕਂ ਆਵਜ੍ਜਤਿ, ਆਕਾਸਂ ਆਵਜ੍ਜਤੀਤਿ ਪਕਤਿਪਥਵੀਉਦਕਆਕਾਸੇ ਆਵਜ੍ਜਤਿ. ਅਨ੍ਤਲਿਕ੍ਖੇਤਿ ਤਸ੍ਸ ਆਕਾਸਸ੍ਸ ਪਥਵਿਤੋ ਦੂਰਾਕਾਸਭਾਵਂ ਦੀਪੇਤਿ.
੧੨. ਚਨ੍ਦਿਮਸੂਰਿਯਪਰਿਮਜ੍ਜਨੇ ਕਸਿਣਨਿਯਮਂ ਅਕਤ੍ਵਾ ‘‘ਇਦ੍ਧਿਮਾ ਚੇਤੋਵਸਿਪ੍ਪਤ੍ਤੋ’’ਤਿ ਅਵਿਸੇਸੇਨ ਵੁਤ੍ਤਤ੍ਤਾ ਨਤ੍ਥੇਤ੍ਥ ਕਸਿਣਸਮਾਪਤ੍ਤਿਨਿਯਮੋਤਿ ਵੇਦਿਤਬ੍ਬਂ. ਨਿਸਿਨ੍ਨਕੋ ਵਾ ਨਿਪਨ੍ਨਕੋ ਵਾਤਿ ਨਿਸਿਨ੍ਨੋ ਵਾ ਨਿਪਨ੍ਨੋ ਵਾ. ਇਮੇਹੇਵ ਇਤਰਇਰਿਯਾਪਥਦ੍ਵਯਮ੍ਪਿ ਵੁਤ੍ਤਮੇਵ ਹੋਤਿ. ਹਤ੍ਥਪਾਸੇ ਹੋਤੂਤਿ ਹਤ੍ਥਸਮੀਪੇ ਹੋਤੁ. ਹਤ੍ਥਪਸ੍ਸੇ ਹੋਤੂਤਿਪਿ ਪਾਠੋ. ਇਦਂ ਤਥਾ ਕਾਤੁਕਾਮਸ੍ਸ ਵਸੇਨ ਵੁਤ੍ਤਂ. ਅਯਂ ਪਨ ਤਤ੍ਥ ਗਨ੍ਤ੍ਵਾਪਿ ਹਤ੍ਥਂ ਵਡ੍ਢੇਤ੍ਵਾਪਿ ਆਮਸਤਿ. ਆਮਸਤੀਤਿ ਈਸਕਂ ਫੁਸਤਿ. ਪਰਾਮਸਤੀਤਿ ਬਾਲ਼੍ਹਂ ਫੁਸਤਿ. ਪਰਿਮਜ੍ਜਤੀਤਿ ਸਮਨ੍ਤਤੋ ਫੁਸਤਿ. ਰੂਪਗਤਨ੍ਤਿ ਹਤ੍ਥਪਾਸੇ ਠਿਤਰੂਪਮੇਵ.
ਦੂਰੇਪਿ ਸਨ੍ਤਿਕੇ ਅਧਿਟ੍ਠਾਤੀਤਿ ਪਾਦਕਜ੍ਝਾਨਤੋ ਵੁਟ੍ਠਾਯ ਦੂਰੇ ਦੇਵਲੋਕਂ ਵਾ ਬ੍ਰਹ੍ਮਲੋਕਂ ਵਾ ਆਵਜ੍ਜਤਿ ‘‘ਸਨ੍ਤਿਕੇ ਹੋਤੂ’’ਤਿ. ਆਵਜ੍ਜਿਤ੍ਵਾ ਪਰਿਕਮ੍ਮਂ ਕਤ੍ਵਾ ਪੁਨ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਞਾਣੇਨ ਅਧਿਟ੍ਠਾਤਿ ‘‘ਸਨ੍ਤਿਕੇ ਹੋਤੂ’’ਤਿ. ਸਨ੍ਤਿਕੇ ਹੋਤਿ. ਏਸ ਨਯੋ ਸੇਸਪਦੇਸੁਪਿ. ਬ੍ਰਹ੍ਮਲੋਕਂ ਪਨ ਗਨ੍ਤੁਕਾਮਸ੍ਸ ਦੂਰਸ੍ਸ ਸਨ੍ਤਿਕਕਰਣਂ ਵਤ੍ਵਾ ਬ੍ਰਹ੍ਮਲੋਕਗਮਨਸ੍ਸ ਅਨੁਪਕਾਰਮ੍ਪਿ ਇਮਾਯ ਇਦ੍ਧਿਯਾ ਇਜ੍ਝਮਾਨਵਿਸੇਸਂ ਦਸ੍ਸੇਨ੍ਤੋ ਸਨ੍ਤਿਕੇਪੀਤਿਆਦਿਮਾਹ. ਤਤ੍ਥ ਨ ਕੇਵਲਂ ਥੋਕਕਰਣਬਹੁਕਰਣਮੇਵ, ‘‘ਅਮਧੁਰਂ ਮਧੁਰ’’ਨ੍ਤਿਆਦੀਸੁਪਿ ਯਂ ਯਂ ਇਚ੍ਛਤਿ, ਤਂ ਸਬ੍ਬਂ ਇਦ੍ਧਿਮਤੋ ਇਜ੍ਝਤਿ. ਅਪਰੋ ਨਯੋ – ਦੂਰੇਪਿ ਸਨ੍ਤਿਕੇ ਅਧਿਟ੍ਠਾਤੀਤਿ ਦੂਰੇ ਬ੍ਰਹ੍ਮਲੋਕਂ ਵਾ ਮਨੁਸ੍ਸਲੋਕਸ੍ਸ ਸਨ੍ਤਿਕੇ ਅਧਿਟ੍ਠਾਤਿ. ਸਨ੍ਤਿਕੇਪਿ ਦੂਰੇ ਅਧਿਟ੍ਠਾਤੀਤਿ ਸਨ੍ਤਿਕੇ ਮਨੁਸ੍ਸਲੋਕਂ ਵਾ ਦੂਰੇ ਬ੍ਰਹ੍ਮਲੋਕੇ ਅਧਿਟ੍ਠਾਤਿ. ਬਹੁਕਮ੍ਪਿ ਥੋਕਂ ਅਧਿਟ੍ਠਾਤੀਤਿ ਸਚੇ ਬ੍ਰਹ੍ਮਾਨੋ ਬਹੂ ਸਨ੍ਨਿਪਤਿਤਾ ਹੋਨ੍ਤਿ, ਮਹਾਅਤ੍ਤਭਾਵਤ੍ਤਾ ਦਸ੍ਸਨੂਪਚਾਰਂ ਸਵਨੂਪਚਾਰਂ ਪਜਹਨ੍ਤਿ, ਦਸ੍ਸਨੂਪਚਾਰੇ ਚ ਸਵਨੂਪਚਾਰੇ ਚ ਏਕਜ੍ਝਂ ਸਙ੍ਖਿਪਿਤ੍ਵਾ ਬਹੁਕਮ੍ਪਿ ਥੋਕਨ੍ਤਿ ਅਧਿਟ੍ਠਾਤਿ. ਥੋਕਮ੍ਪਿ ਬਹੁਕਂ ਅਧਿਟ੍ਠਾਤੀਤਿ ਸਚੇ ਮਹਾਪਰਿਵਾਰੇਨ ਗਨ੍ਤੁਕਾਮੋ ਹੋਤਿ, ਏਕਕਤ੍ਤਾ ਥੋਕਂ ਅਤ੍ਤਾਨਂ ਬਹੁਕਂ ਅਧਿਟ੍ਠਹਿਤ੍ਵਾ ਮਹਾਪਰਿਵਾਰੋ ਗਚ੍ਛਤੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਏਵਂ ਸਤਿ ਚਤੁਬ੍ਬਿਧਮ੍ਪਿ ਤਂ ਬ੍ਰਹ੍ਮਲੋਕਗਮਨੇ ਉਪਕਾਰੋ ਹੋਤਿ.
ਦਿਬ੍ਬੇਨ ਚਕ੍ਖੁਨਾ ਤਸ੍ਸ ਬ੍ਰਹ੍ਮੁਨੋ ਰੂਪਂ ਪਸ੍ਸਤੀਤਿ ਇਧ ਠਿਤੋ ਆਲੋਕਂ ਵਡ੍ਢੇਤ੍ਵਾ ਯਸ੍ਸ ਬ੍ਰਹ੍ਮੁਨੋ ਰੂਪਂ ਦਟ੍ਠੁਕਾਮੋ, ਦਿਬ੍ਬੇਨ ਚਕ੍ਖੁਨਾ ਤਸ੍ਸ ਬ੍ਰਹ੍ਮੁਨੋ ਰੂਪਂ ਪਸ੍ਸਤਿ. ਇਧੇਵ ਠਿਤੋ ਦਿਬ੍ਬਾਯ ਸੋਤਧਾਤੁਯਾ ਤਸ੍ਸ ਬ੍ਰਹ੍ਮੁਨੋ ਭਾਸਮਾਨਸ੍ਸ ਸਦ੍ਦਂ ਸੁਣਾਤਿ. ਚੇਤੋਪਰਿਯਞਾਣੇਨ ਤਸ੍ਸ ਬ੍ਰਹ੍ਮੁਨੋ ਚਿਤ੍ਤਂ ਪਜਾਨਾਤਿ. ਦਿਸ੍ਸਮਾਨੇਨਾਤਿ ਚਕ੍ਖੁਨਾ ਪੇਕ੍ਖਿਯਮਾਨੇਨ. ਕਾਯਵਸੇਨ ਚਿਤ੍ਤਂ ਪਰਿਣਾਮੇਤੀਤਿ ਰੂਪਕਾਯਸ੍ਸ ਵਸੇਨ ਚਿਤ੍ਤਂ ਪਰਿਣਾਮੇਤਿ. ਪਾਦਕਜ੍ਝਾਨਚਿਤ੍ਤਂ ਗਹੇਤ੍ਵਾ ਕਾਯੇ ਆਰੋਪੇਤਿ, ਕਾਯਾਨੁਗਤਿਕਂ ਕਰੋਤਿ ਦਨ੍ਧਗਮਨਂ. ਕਾਯਗਮਨਞ੍ਹਿ ਦਨ੍ਧਂ ਹੋਤਿ. ਅਧਿਟ੍ਠਾਤੀਤਿ ਤਸ੍ਸੇਵ ਵੇਵਚਨਂ, ਸਨ੍ਨਿਟ੍ਠਾਪੇਤੀਤਿ ਅਤ੍ਥੋ. ਸੁਖਸਞ੍ਞਞ੍ਚ ਲਹੁਸਞ੍ਞਞ੍ਚ ਓਕ੍ਕਮਿਤ੍ਵਾਤਿ ਪਾਦਕਜ੍ਝਾਨਾਰਮ੍ਮਣੇਨ ਇਦ੍ਧਿਚਿਤ੍ਤੇਨ ਸਹਜਾਤਂ ਸੁਖਸਞ੍ਞਞ੍ਚ ਲਹੁਸਞ੍ਞਞ੍ਚ ਓਕ੍ਕਮਿਤ੍ਵਾ ਪਵਿਸਿਤ੍ਵਾ ਫੁਸਿਤ੍ਵਾ ਪਾਪੁਣਿਤ੍ਵਾ. ਸੁਖਸਞ੍ਞਾ ਚ ਨਾਮ ਉਪੇਕ੍ਖਾਸਮ੍ਪਯੁਤ੍ਤਸਞ੍ਞਾ. ਉਪੇਕ੍ਖਾ ਹਿ ਸਨ੍ਤਂ ਸੁਖਨ੍ਤਿ ਵੁਤ੍ਤਾ, ਸਾਯੇਵ ਸਞ੍ਞਾ ਨੀਵਰਣੇਹਿ ਚੇਵ ਵਿਤਕ੍ਕਾਦਿਪਚ੍ਚਨੀਕੇਹਿ ਚ ਵਿਮੁਤ੍ਤਤ੍ਤਾ ਲਹੁਸਞ੍ਞਾਤਿਪਿ ਵੇਦਿਤਬ੍ਬਾ. ਤਂ ਓਕ੍ਕਨ੍ਤਸ੍ਸ ਪਨਸ੍ਸ ਕਰਜਕਾਯੋਪਿ ਤੂਲਪਿਚੁ ਵਿਯ ਸਲ੍ਲਹੁਕੋ ਹੋਤਿ. ਸੋ ਏਵਂ ਵਾਤਕ੍ਖਿਤ੍ਤਤੂਲਪਿਚੁਨਾ ਵਿਯ ਸਲ੍ਲਹੁਕੇਨ ਦਿਸ੍ਸਮਾਨੇਨ ਕਾਯੇਨ ਬ੍ਰਹ੍ਮਲੋਕਂ ਗਚ੍ਛਤਿ. ਏਵਂ ਗਚ੍ਛਨ੍ਤੋ ਚ ਸਚੇ ਇਚ੍ਛਤਿ, ਪਥਵੀਕਸਿਣਵਸੇਨ ਆਕਾਸੇ ਮਗ੍ਗਂ ਨਿਮ੍ਮਿਨਿਤ੍ਵਾ ਪਦਸਾ ਗਚ੍ਛਤਿ. ਸਚੇ ਇਚ੍ਛਤਿ, ਆਕਾਸੇ ਪਥਵੀਕਸਿਣਵਸੇਨੇਵ ਪਦੇ ਪਦੇ ਪਦੁਮਂ ਨਿਮ੍ਮਿਨਿਤ੍ਵਾ ਪਦੁਮੇ ਪਦੁਮੇ ਪਦਂ ਨਿਕ੍ਖਿਪਨ੍ਤੋ ਪਦਸਾ ਗਚ੍ਛਤਿ. ਸਚੇ ਇਚ੍ਛਤਿ, ਵਾਯੋਕਸਿਣਵਸੇਨ ਵਾਤਂ ਅਧਿਟ੍ਠਹਿਤ੍ਵਾ ਤੂਲਪਿਚੁ ਵਿਯ ਵਾਯੁਨਾ ਗਚ੍ਛਤਿ. ਅਪਿਚ ਗਨ੍ਤੁਕਾਮਤਾਵ ਏਤ੍ਥ ਪਮਾਣਂ. ਸਤਿ ਹਿ ਗਨ੍ਤੁਕਾਮਤਾਯ ਏਵਂਕਤਚਿਤ੍ਤਾਧਿਟ੍ਠਾਨੋ ਅਧਿਟ੍ਠਾਨਵੇਗਕ੍ਖਿਤ੍ਤੋਵ ਸੋ ਜਿਯਾਵੇਗਕ੍ਖਿਤ੍ਤੋ ਸਰੋ ਵਿਯ ਦਿਸ੍ਸਮਾਨੋ ਗਚ੍ਛਤਿ.
ਚਿਤ੍ਤਵਸੇਨ ਕਾਯਂ ਪਰਿਣਾਮੇਤੀਤਿ ਕਰਜਕਾਯਂ ਗਹੇਤ੍ਵਾ ਪਾਦਕਜ੍ਝਾਨਚਿਤ੍ਤੇ ਆਰੋਪੇਤਿ, ਚਿਤ੍ਤਾਨੁਗਤਿਕਂ ਕਰੋਤਿ ਸੀਘਗਮਨਂ. ਚਿਤ੍ਤਗਮਨਞ੍ਹਿ ਸੀਘਂ ਹੋਤਿ. ਸੁਖਸਞ੍ਞਞ੍ਚ ਲਹੁਸਞ੍ਞਞ੍ਚ ਓਕ੍ਕਮਿਤ੍ਵਾਤਿ ਰੂਪਕਾਯਾਰਮ੍ਮਣੇਨ ਇਦ੍ਧਿਚਿਤ੍ਤੇਨ ਸਹਜਾਤਂ ਸੁਖਸਞ੍ਞਞ੍ਚ ਲਹੁਸਞ੍ਞਞ੍ਚ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਦਂ ਪਨ ਚਿਤ੍ਤਗਮਨਮੇਵ ਹੋਤਿ. ਏਵਂ ਅਦਿਸ੍ਸਮਾਨੇਨ ਕਾਯੇਨ ਗਚ੍ਛਨ੍ਤੋ ਪਨਾਯਂ ਕਿਂ ਤਸ੍ਸਾਧਿਟ੍ਠਾਨਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਗਚ੍ਛਤਿ? ਉਦਾਹੁ ਠਿਤਿਕ੍ਖਣੇ ਭਙ੍ਗਕ੍ਖਣੇ ਵਾਤਿ ਵੁਤ੍ਤੇ ‘‘ਤੀਸੁਪਿ ਖਣੇਸੁ ਗਚ੍ਛਤੀ’’ਤਿ ਥੇਰੋ ਆਹ. ਕਿਂ ਪਨ ਸੋ ਸਯਂ ਗਚ੍ਛਤਿ, ਨਿਮ੍ਮਿਤਂ ਪੇਸੇਤੀਤਿ? ਯਥਾਰੁਚਿ ਕਰੋਤਿ. ਇਧ ਪਨਸ੍ਸ ਸਯਂ ਗਮਨਮੇਵ ਆਗਤਂ.
ਮਨੋਮਯਨ੍ਤਿ ਅਧਿਟ੍ਠਾਨਮਨੇਨ ਨਿਮ੍ਮਿਤਤ੍ਤਾ ਮਨੋਮਯਂ. ਸਬ੍ਬਙ੍ਗਪਚ੍ਚਙ੍ਗਨ੍ਤਿ ਸਬ੍ਬਅਙ੍ਗਪਚ੍ਚਙ੍ਗਵਨ੍ਤਂ. ਅਹੀਨਿਨ੍ਦ੍ਰਿਯਨ੍ਤਿ ਇਦਂ ਚਕ੍ਖੁਸੋਤਾਦੀਨਂ ਸਣ੍ਠਾਨਵਸੇਨ ਵੁਤ੍ਤਂ, ਨਿਮ੍ਮਿਤਰੂਪੇ ਪਨ ਪਸਾਦੋ ਨਾਮ ਨਤ੍ਥਿ. ਸਚੇ ਸੋ ਇਦ੍ਧਿਮਾ ਚਙ੍ਕਮਤਿ, ਨਿਮ੍ਮਿਤੋਪਿ ਤਤ੍ਥ ਚਙ੍ਕਮਤੀਤਿਆਦਿ ਸਬ੍ਬਂ ਸਾਵਕਨਿਮ੍ਮਿਤਂ ਸਨ੍ਧਾਯ ਵੁਤ੍ਤਂ. ਬੁਦ੍ਧਨਿਮ੍ਮਿਤਾ ਪਨ ਯਂ ਯਂ ਭਗਵਾ ਕਰੋਤਿ, ਤਂ ਤਮ੍ਪਿ ਕਰੋਨ੍ਤਿ, ਭਗਵਤੋ ਚਿਤ੍ਤਵਸੇਨ ਅਞ੍ਞਮ੍ਪਿ ਕਰੋਨ੍ਤੀਤਿ. ਧੂਮਾਯਤਿ ਪਜ੍ਜਲਤੀਤਿ ਤੇਜੋਕਸਿਣਵਸੇਨ. ਧਮ੍ਮਂ ਭਾਸਤੀਤਿਆਦੀਨਿ ਤੀਣਿ ਅਨਿਯਮੇਤ੍ਵਾ ਵੁਤ੍ਤਾਨਿ. ਸਨ੍ਤਿਟ੍ਠਤੀਤਿ ਸਙ੍ਗਮ੍ਮ ਤਿਟ੍ਠਤਿ. ਸਲ੍ਲਪਤੀਤਿ ਸਙ੍ਗਮ੍ਮ ਲਪਤਿ. ਸਾਕਚ੍ਛਂ ਸਮਾਪਜ੍ਜਤੀਤਿ ਅਞ੍ਞਮਞ੍ਞਸ੍ਸ ਉਤ੍ਤਰਪਚ੍ਚੁਤ੍ਤਰਦਾਨਵਸੇਨ ਸਂਕਥਂ ਕਰੋਤਿ. ਏਤ੍ਥ ਚ ਯਂ ਸੋ ਇਦ੍ਧਿਮਾ ਇਧੇਵ ਠਿਤੋ ਦਿਬ੍ਬੇਨ ਚਕ੍ਖੁਨਾ ਰੂਪਂ ਪਸ੍ਸਤਿ, ਦਿਬ੍ਬਾਯ ਸੋਤਧਾਤੁਯਾ ਸਦ੍ਦਂ ਸੁਣਾਤਿ, ਚੇਤੋਪਰਿਯਞਾਣੇਨ ਚਿਤ੍ਤਂ ਪਜਾਨਾਤਿ, ਯਮ੍ਪਿ ਸੋ ਇਧੇਵ ਠਿਤੋ ਤੇਨ ਬ੍ਰਹ੍ਮੁਨਾ ਸਦ੍ਧਿਂ ਸਨ੍ਤਿਟ੍ਠਤਿ, ਸਲ੍ਲਪਤਿ, ਸਾਕਚ੍ਛਂ ਸਮਾਪਜ੍ਜਤਿ, ਯਮ੍ਪਿਸ੍ਸ ‘‘ਦੂਰੇਪਿ ਸਨ੍ਤਿਕੇ ਅਧਿਟ੍ਠਾਤੀ’’ਤਿਆਦਿਕਂ ਅਧਿਟ੍ਠਾਨਂ, ਯਮ੍ਪਿ ਸੋ ਦਿਸ੍ਸਮਾਨੇਨ ਵਾ ਅਦਿਸ੍ਸਮਾਨੇਨ ਵਾ ਕਾਯੇਨ ਬ੍ਰਹ੍ਮਲੋਕਂ ਗਚ੍ਛਤਿ, ਏਤ੍ਤਾਵਤਾ ਨ ਕਾਯੇਨ ਵਸਂ ਵਤ੍ਤੇਤਿ. ਯਞ੍ਚ ਖੋ ‘‘ਸੋ ਤਸ੍ਸ ਬ੍ਰਹ੍ਮੁਨੋ ਪੁਰਤੋ ਰੂਪਿਂ ਅਭਿਨਿਮ੍ਮਿਨਾਤੀ’’ਤਿਆਦਿਨਾ ਨਯੇਨ ਵੁਤ੍ਤਵਿਧਾਨਂ ਆਪਜ੍ਜਤਿ, ਏਤ੍ਤਾਵਤਾ ਕਾਯੇਨ ਵਸਂ ਵਤ੍ਤੇਤਿ ਨਾਮ. ਸੇਸਂ ਪਨ ਕਾਯੇਨ ਵਸਵਤ੍ਤਨਾਯ ਪੁਬ੍ਬਭਾਗਦਸ੍ਸਨਤ੍ਥਂ ਵੁਤ੍ਤਨ੍ਤਿ. ਅਯਂ ਤਾਵ ਅਧਿਟ੍ਠਾਨਾ ਇਦ੍ਧਿ.
੧੩. ਵਿਕੁਬ੍ਬਨਿਦ੍ਧਿਨਿਦ੍ਦੇਸੇ ਸਿਖਿਸ੍ਸ ਭਗਵਤੋ ਸਾਵਕਨਿਦਸ੍ਸਨਂ ਵਿਕੁਬ੍ਬਨਿਦ੍ਧਿਯਾ ਕਾਯਸਕ੍ਖਿਪੁਗ੍ਗਲਦਸ੍ਸਨਤ੍ਥਂ ਵੁਤ੍ਤਂ. ਤਮ੍ਪਿ ਦਸ੍ਸੇਨ੍ਤੋ ਪਠਮਂ ਤਾਵ ਬ੍ਰਹ੍ਮਲੋਕੇ ਠਿਤੋ ਸਹਸ੍ਸਿਲੋਕਧਾਤੁਂ ਸਰੇਨ ਵਿਞ੍ਞਾਪੇਸੀਤਿ ਅਤਿਵਿਯ ਅਚ੍ਛਰਿਯਅਬ੍ਭੁਤਭੂਤਂ ਸਹਸ੍ਸਿਲੋਕਧਾਤੁਯਾ ਸਦ੍ਦਸਵਨਂ ਅਧਿਟ੍ਠਾਨਿਦ੍ਧਿਂ ਦਸ੍ਸੇਸਿ. ਇਦਾਨਿ ਤਸ੍ਸ ਵਤ੍ਥੁਸ੍ਸ ਪਰਿਦੀਪਨਤ੍ਥਮਿਦਂ ਵੁਚ੍ਚਤਿ – ਇਮਸ੍ਮਾ ਹਿ ਕਪ੍ਪਾ ਏਕਤਿਂਸੇ ਕਪ੍ਪੇ ਸਿਖੀ ਭਗਵਾ ਅਨਨ੍ਤਰਜਾਤਿਯਾ ਤੁਸਿਤਪੁਰਤੋ ਚਵਿਤ੍ਵਾ ਅਰੁਣਵਤੀਨਗਰੇ ਅਰੁਣਵਤੋ ਰਞ੍ਞੋ ਪਭਾਵਤਿਯਾ ਨਾਮ ਮਹੇਸਿਯਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿਤ੍ਵਾ ਪਰਿਪਕ੍ਕਞਾਣੋ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਬੋਧਿਮਣ੍ਡੇ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿਤ੍ਵਾ ਪਵਤ੍ਤਵਰਧਮ੍ਮਚਕ੍ਕੋ ਅਰੁਣਵਤਿਂ ਨਿਸ੍ਸਾਯ ਵਿਹਰਨ੍ਤੋ ਏਕਦਿਵਸਂ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਮਹਾਭਿਕ੍ਖੁਸਙ੍ਘਪਰਿਵਾਰੋ ‘‘ਅਰੁਣਵਤਿਂ ਪਿਣ੍ਡਾਯ ਪਵਿਸਿਸ੍ਸਾਮੀ’’ਤਿ ਨਿਕ੍ਖਮਿਤ੍ਵਾ ਵਿਹਾਰਦ੍ਵਾਰਕੋਟ੍ਠਕਸਮੀਪੇ ਠਿਤੋ ਅਭਿਭੁਂ ਨਾਮ ਅਗ੍ਗਸਾਵਕਂ ਆਮਨ੍ਤੇਸਿ – ‘‘ਅਤਿਪ੍ਪਗੋ ਖੋ, ਭਿਕ੍ਖੁ, ਅਰੁਣਵਤਿਂ ਪਿਣ੍ਡਾਯ ਪਵਿਸਿਤੁਂ. ਯੇਨ ਅਞ੍ਞਤਰੋ ਬ੍ਰਹ੍ਮਲੋਕੋ ਤੇਨੁਪਸਙ੍ਕਮਿਸ੍ਸਾਮਾ’’ਤਿ. ਯਥਾਹ –
‘‘ਅਥ ਖੋ, ਭਿਕ੍ਖਵੇ, ਸਿਖੀ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਅਭਿਭੁਂ ਭਿਕ੍ਖੁਂ ਆਮਨ੍ਤੇਸਿ – ‘ਆਯਾਮ, ਬ੍ਰਾਹ੍ਮਣ, ਯੇਨ ਅਞ੍ਞਤਰੋ ਬ੍ਰਹ੍ਮਲੋਕੋ, ਤੇਨੁਪਸਙ੍ਕਮਿਸ੍ਸਾਮ ਯਾਵ ਭਤ੍ਤਸ੍ਸ ਕਾਲੋ ਭਵਿਸ੍ਸਤੀ’ਤਿ. ‘ਏਵਂ ਭਨ੍ਤੇ’ਤਿ ਖੋ, ਭਿਕ੍ਖਵੇ, ਅਭਿਭੂ ਭਿਕ੍ਖੁ ਸਿਖਿਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਪਚ੍ਚਸ੍ਸੋਸਿ. ਅਥ ਖੋ, ਭਿਕ੍ਖਵੇ, ਸਿਖੀ ਚ ਭਗਵਾ ਅਭਿਭੂ ਚ ਭਿਕ੍ਖੁ ਯੇਨ ਅਞ੍ਞਤਰੋ ਬ੍ਰਹ੍ਮਲੋਕੋ, ਤੇਨੁਪਸਙ੍ਕਮਿਂਸੂ’’ਤਿ (ਸਂ. ਨਿ. ੧.੧੮੫).
ਤਤ੍ਥ ਮਹਾਬ੍ਰਹ੍ਮਾ ਸਮ੍ਮਾਸਮ੍ਬੁਦ੍ਧਂ ਦਿਸ੍ਵਾ ਅਤ੍ਤਮਨੋ ਪਚ੍ਚੁਗ੍ਗਮਨਂ ਕਤ੍ਵਾ ਬ੍ਰਹ੍ਮਾਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਥੇਰਸ੍ਸਾਪਿ ਅਨੁਚ੍ਛਵਿਕਂ ਆਸਨਂ ਪਞ੍ਞਾਪਯਿਂਸੁ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ, ਥੇਰੋਪਿ ਅਤ੍ਤਨੋ ਪਤ੍ਤਾਸਨੇ ਨਿਸੀਦਿ. ਮਹਾਬ੍ਰਹ੍ਮਾਪਿ ਦਸਬਲਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਤੇਨਾਹ – ਅਥ ਖੋ, ਭਿਕ੍ਖਵੇ, ਸਿਖੀ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਅਭਿਭੁਂ ਭਿਕ੍ਖੁਂ ਆਮਨ੍ਤੇਸਿ – ‘‘ਪਟਿਭਾਤੁ, ਬ੍ਰਾਹ੍ਮਣ, ਤਂ ਬ੍ਰਹ੍ਮੁਨੋ ਚ ਬ੍ਰਹ੍ਮਪਰਿਸਾਯ ਚ ਬ੍ਰਹ੍ਮਪਾਰਿਸਜ੍ਜਾਨਞ੍ਚ ਧਮ੍ਮੀ ਕਥਾ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ, ਭਿਕ੍ਖਵੇ, ਅਭਿਭੂ ਭਿਕ੍ਖੁ ਸਿਖਿਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਪਟਿਸ੍ਸੁਣਿਤ੍ਵਾ ਬ੍ਰਹ੍ਮੁਨੋ ਚ ਬ੍ਰਹ੍ਮਪਰਿਸਾਯ ਚ ਬ੍ਰਹ੍ਮਪਾਰਿਸਜ੍ਜਾਨਞ੍ਚ ਧਮ੍ਮਕਥਂ ਕਥੇਸਿ. ਥੇਰੇ ਧਮ੍ਮਕਥਂ ਕਥੇਨ੍ਤੇ ਬ੍ਰਹ੍ਮਾਨੋ ਉਜ੍ਝਾਯਿਂਸੁ ‘‘ਚਿਰਸ੍ਸਞ੍ਚ ਮਯਂ ਸਤ੍ਥੁ ਬ੍ਰਹ੍ਮਲੋਕਾਗਮਨਂ ਲਭਿਮ੍ਹਾ, ਅਯਞ੍ਚ ਭਿਕ੍ਖੁ ਠਪੇਤ੍ਵਾ ਸਤ੍ਥਾਰਂ ਸਯਂ ਧਮ੍ਮਕਥਂ ਆਰਭੀ’’ਤਿ. ਸਤ੍ਥਾ ਤੇਸਂ ਅਨਤ੍ਤਮਨਭਾਵਂ ਞਤ੍ਵਾ ਅਭਿਭੁਂ ਭਿਕ੍ਖੁਂ ਏਤਦਵੋਚ – ‘‘ਉਜ੍ਝਾਯਨ੍ਤਿ ਖੋ ਤੇ, ਬ੍ਰਾਹ੍ਮਣ, ਬ੍ਰਹ੍ਮਾ ਚ ਬ੍ਰਹ੍ਮਪਰਿਸਾ ਚ ਬ੍ਰਹ੍ਮਪਾਰਿਸਜ੍ਜਾ ਚ. ਤੇਨ ਹਿ, ਤ੍ਵਂ ਬ੍ਰਾਹ੍ਮਣ, ਭਿਯ੍ਯੋਸੋ ਮਤ੍ਤਾਯ ਸਂਵੇਜੇਹੀ’’ਤਿ. ਥੇਰੋ ਸਤ੍ਥੁ ਵਚਨਂ ਸਮ੍ਪਟਿਚ੍ਛਿਤ੍ਵਾ ਅਨੇਕਵਿਹਿਤਂ ਇਦ੍ਧਿਵਿਕੁਬ੍ਬਨਂ ਕਤ੍ਵਾ ਸਹਸ੍ਸਿਲੋਕਧਾਤੁਂ ਸਰੇਨ ਵਿਞ੍ਞਾਪੇਨ੍ਤੋ –
‘‘ਆਰਮ੍ਭਥ ਨਿਕ੍ਕਮਥ, ਯੁਞ੍ਜਥ ਬੁਦ੍ਧਸਾਸਨੇ;
ਧੁਨਾਥ ਮਚ੍ਚੁਨੋ ਸੇਨਂ, ਨਲ਼ਾਗਾਰਂਵ ਕੁਞ੍ਜਰੋ.
‘‘ਯੋ ਇਮਸ੍ਮਿਂ ਧਮ੍ਮਵਿਨਯੇ, ਅਪ੍ਪਮਤ੍ਤੋ ਵਿਹਸ੍ਸਤਿ;
ਪਹਾਯ ਜਾਤਿਸਂਸਾਰਂ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਤੀ’’ਤਿ. (ਅ. ਨਿ. ੧.੧੮੫) –
ਇਮਂ ਗਾਥਾਦ੍ਵਯਂ ਅਭਾਸਿ.
ਕਿਂ ਪਨ ਕਤ੍ਵਾ ਥੇਰੋ ਸਹਸ੍ਸਿਲੋਕਧਾਤੁਂ ਸਰੇਨ ਵਿਞ੍ਞਾਪੇਸੀਤਿ? ਨੀਲਕਸਿਣਂ ਤਾਵ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਅਭਿਞ੍ਞਾਞਾਣੇਨ ਚਕ੍ਕਵਾਲ਼ਸਹਸ੍ਸੇ ਸਬ੍ਬਤ੍ਥ ਅਨ੍ਧਕਾਰਂ ਫਰਿ. ਤਤੋ ‘‘ਕਿਮਿਦਂ ਅਨ੍ਧਕਾਰ’’ਨ੍ਤਿ ਸਤ੍ਤਾਨਂ ਆਭੋਗੇ ਉਪ੍ਪਨ੍ਨੇ ਆਲੋਕਕਸਿਣਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਆਲੋਕਂ ਦਸ੍ਸੇਸਿ. ‘‘ਕਿਂ ਆਲੋਕੋ ਅਯ’’ਨ੍ਤਿ ਵਿਚਿਨਨ੍ਤਾਨਂ ਅਤ੍ਤਾਨਂ ਦਸ੍ਸੇਸਿ. ਚਕ੍ਕਵਾਲ਼ਸਹਸ੍ਸੇ ਚ ਦੇਵਮਨੁਸ੍ਸਾ ਅਞ੍ਜਲਿਂ ਪਗ੍ਗਣ੍ਹਿਤ੍ਵਾ ਥੇਰਂਯੇਵ ਨਮਸ੍ਸਮਾਨਾ ਅਟ੍ਠਂਸੁ. ਥੇਰੋ ‘‘ਮਹਾਜਨੋ ਮਯ੍ਹਂ ਧਮ੍ਮਂ ਦੇਸੇਨ੍ਤਸ੍ਸ ਸਦ੍ਦਂ ਸੁਣਾਤੂ’’ਤਿ ਇਮਾ ਗਾਥਾ ਅਭਾਸਿ. ਸਬ੍ਬੇ ਓਸਟਾਯ ਪਰਿਸਾਯ ਮਜ੍ਝੇ ਨਿਸੀਦਿਤ੍ਵਾ ਧਮ੍ਮਂ ਦੇਸੇਨ੍ਤਸ੍ਸ ਵਿਯ ਸਦ੍ਦਂ ਅਸ੍ਸੋਸੁਂ. ਅਤ੍ਥੋਪਿ ਤੇਸਂ ਪਾਕਟੋ ਅਹੋਸਿ. ਤਂ ਵਿਞ੍ਞਾਪਨਂ ਸਨ੍ਧਾਯ ‘‘ਸਰੇਨ ਵਿਞ੍ਞਾਪੇਸੀ’’ਤਿ ਵੁਤ੍ਤਂ. ਤੇਨ ਕਤਂ ਅਨੇਕਵਿਹਿਤਂ ਇਦ੍ਧਿਵਿਕੁਬ੍ਬਨਂ ਸਨ੍ਧਾਯ ਪੁਨ ਸੋ ਦਿਸ੍ਸਮਾਨੇਨਪੀਤਿਆਦਿ ਵੁਤ੍ਤਂ. ਤਤ੍ਥ ਧਮ੍ਮਂ ਦੇਸੇਸੀਤਿ ਪਠਮਂ ਵੁਤ੍ਤਪ੍ਪਕਾਰਂ ਇਦ੍ਧਿਵਿਕੁਬ੍ਬਨਂ ਦਸ੍ਸੇਨ੍ਤੋ ਧਮ੍ਮਂ ਦੇਸੇਸਿ, ਤਤੋ ਯਥਾਵੁਤ੍ਤਕ੍ਕਮੇਨ ਦ੍ਵੇ ਗਾਥਾ ਭਾਸਨ੍ਤੋ ਸਰੇਨ ਵਿਞ੍ਞਾਪੇਸੀਤਿ ਵੇਦਿਤਬ੍ਬਂ. ਦਿਸ੍ਸਮਾਨੇਨਪਿ ਕਾਯੇਨਾਤਿਆਦੀਸੁ ਚ ਇਤ੍ਥਂਭੂਤਲਕ੍ਖਣੇ ਕਰਣਵਚਨਂ, ਏਵਂਭੂਤਕਾਯੋ ਹੁਤ੍ਵਾਤਿ ਅਤ੍ਥੋ.
ਇਦਾਨਿ ਤਂ ਵਤ੍ਥੁਂ ਦਸ੍ਸੇਤ੍ਵਾ ਅਞ੍ਞਸ੍ਸਾਪਿ ਇਦ੍ਧਿਮਤੋ ਵਿਕੁਬ੍ਬਨਿਦ੍ਧਿਕਰਣਵਿਧਾਨਂ ਦਸ੍ਸੇਨ੍ਤੋ ਸੋ ਪਕਤਿਵਣ੍ਣਂ ਵਿਜਹਿਤ੍ਵਾਤਿਆਦਿਮਾਹ. ਤਤ੍ਥ ਸੋਤਿ ਹੇਟ੍ਠਾ ਵੁਤ੍ਤਵਿਧਾਨੇਨ ਮੁਦੁਕਮ੍ਮਞ੍ਞਕਤਚਿਤ੍ਤੋ ਸੋ ਇਦ੍ਧਿਮਾ ਭਿਕ੍ਖੁ. ਸਚੇ ਵਿਕੁਬ੍ਬਨਿਦ੍ਧਿਂ ਕਾਤੁਕਾਮੋ ਹੋਤਿ, ਅਤ੍ਤਨੋ ਪਕਤਿਵਣ੍ਣਂ ਪਕਤਿਸਣ੍ਠਾਨਂ ਵਿਜਹਿਤ੍ਵਾ ਕੁਮਾਰਕਵਣ੍ਣਂ ਵਾ ਦਸ੍ਸੇਤਿ. ਕਥਂ? ਪਥਵੀਕਸਿਣਾਰਮ੍ਮਣਾਭਿਞ੍ਞਾਪਾਦਕਚਤੁਤ੍ਥਜ੍ਝਾਨਤੋ ਵੁਟ੍ਠਾਯ ‘‘ਏਵਰੂਪੋ ਕੁਮਾਰਕੋ ਹੋਮੀ’’ਤਿ ਨਿਮ੍ਮਿਨਿਤਬ੍ਬਂ ਕੁਮਾਰਕਵਣ੍ਣਂ ਆਵਜ੍ਜਿਤ੍ਵਾ ਕਤਪਰਿਕਮ੍ਮਾਵਸਾਨੇ ਪੁਨ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ‘‘ਏਵਰੂਪੋ ਨਾਮ ਕੁਮਾਰਕੋ ਹੋਮੀ’’ਤਿ ਅਭਿਞ੍ਞਾਞਾਣੇਨ ਅਧਿਟ੍ਠਾਤਿ, ਸਹ ਅਧਿਟ੍ਠਾਨੇਨ ਕੁਮਾਰਕੋ ਹੋਤੀਤਿ. ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੦੦) ਕਸਿਣਨਿਦ੍ਦੇਸੇ ‘‘ਪਥਵੀਕਸਿਣਵਸੇਨ ਏਕੋਪਿ ਹੁਤ੍ਵਾ ਬਹੁਧਾ ਹੋਤੀਤਿਆਦਿਭਾਵੋ…ਪੇ… ਏਵਮਾਦੀਨਿ ਇਜ੍ਝਨ੍ਤੀ’’ਤਿ ਵਚਨੇਨ ਇਧ ਪਥਵੀਕਸਿਣਾਰਮ੍ਮਣਂ ਪਾਦਕਜ੍ਝਾਨਂ ਯੁਜ੍ਜਤਿ. ਤਤ੍ਥੇਵ ਪਨ ਅਭਿਞ੍ਞਾਨਿਦ੍ਦੇਸੇ ਵਿਕੁਬ੍ਬਨਿਦ੍ਧਿਯਾ ‘‘ਪਥਵੀਕਸਿਣਾਦੀਸੁ ਅਞ੍ਞਤਰਾਰਮ੍ਮਣਤੋ ਅਭਿਞ੍ਞਾਪਾਦਕਜ੍ਝਾਨਤੋ ਵੁਟ੍ਠਾਯਾ’’ਤਿ ਵੁਤ੍ਤਂ, ਤਤ੍ਥੇਵ (ਵਿਸੁਦ੍ਧਿ. ੨.੩੯੮) ਚ ‘‘ਅਤ੍ਤਨੋ ਕੁਮਾਰਕਵਣ੍ਣੋ ਆਵਜ੍ਜਿਤਬ੍ਬੋ’’ਤਿ ਵੁਤ੍ਤਂ, ਤਂ ਨਾਗਾਦਿਨਿਮ੍ਮਾਨੇ ਨ ਯੁਜ੍ਜਤਿ ਵਿਯ. ਨਾਗਵਣ੍ਣਾਦਿਨਿਮ੍ਮਾਨੇਪਿ ਏਸੇਵ ਨਯੋ.
ਤਤ੍ਥ ਨਾਗਵਣ੍ਣਨ੍ਤਿ ਸਪ੍ਪਸਣ੍ਠਾਨਂ. ਸੁਪਣ੍ਣਵਣ੍ਣਨ੍ਤਿ ਗਰੁਲ਼ਸਣ੍ਠਾਨਂ. ਇਨ੍ਦਵਣ੍ਣਨ੍ਤਿ ਸਕ੍ਕਸਣ੍ਠਾਨਂ. ਦੇਵਵਣ੍ਣਨ੍ਤਿ ਸੇਸਦੇਵਸਣ੍ਠਾਨਂ. ਸਮੁਦ੍ਦਵਣ੍ਣਂ ਪਨ ਆਪੋਕਸਿਣਵਸੇਨ ਇਜ੍ਝਤਿ. ਪਤ੍ਤਿਨ੍ਤਿ ਪਦਾਤਿਂ. ਵਿਵਿਧਮ੍ਪਿ ਸੇਨਾਬ੍ਯੂਹਨ੍ਤਿ ਹਤ੍ਥਿਆਦੀਨਂ ਵਸੇਨ ਅਨੇਕਵਿਹਿਤਂ ਸੇਨਾਸਮੂਹਂ. ਵਿਸੁਦ੍ਧਿਮਗ੍ਗੇ ਪਨ ‘‘ਹਤ੍ਥਿਮ੍ਪਿ ਦਸ੍ਸੇਤੀਤਿਆਦਿ ਪਨੇਤ੍ਥ ਬਹਿਦ੍ਧਾਪਿ ਹਤ੍ਥਿਆਦਿਦਸ੍ਸਨਵਸੇਨ ਵੁਤ੍ਤਂ. ਤਤ੍ਥ ‘ਹਤ੍ਥੀ ਹੋਮੀ’ਤਿ ਅਨਧਿਟ੍ਠਹਿਤ੍ਵਾ ‘ਹਤ੍ਥੀ ਹੋਤੂ’ਤਿ ਅਧਿਟ੍ਠਾਤਬ੍ਬਂ. ਅਸ੍ਸਾਦੀਸੁਪਿ ਏਸੇਵ ਨਯੋ’’ਤਿ ਵੁਤ੍ਤਂ, ਤਂ ‘‘ਪਕਤਿਵਣ੍ਣਂ ਵਿਜਹਿਤ੍ਵਾ’’ਤਿ ਵੁਤ੍ਤਮੂਲਪਦੇਨ ਚ ਵਿਕੁਬ੍ਬਨਿਦ੍ਧਿਭਾਵੇਨ ਚ ਵਿਰੁਜ੍ਝਤਿ. ਪਾਲ਼ਿਯਂ ਵੁਤ੍ਤਕ੍ਕਮੇਨ ਹਿ ਪਕਤਿਵਣ੍ਣਂ ਅਵਿਜਹਿਤ੍ਵਾ ਅਧਿਟ੍ਠਾਨਵਸੇਨ ਅਞ੍ਞਸ੍ਸ ਦਸ੍ਸਨਂ ਅਧਿਟ੍ਠਾਨਿਦ੍ਧਿ ਨਾਮ, ਪਕਤਿਵਣ੍ਣਂ ਵਿਜਹਿਤ੍ਵਾ ਅਧਿਟ੍ਠਾਨਵਸੇਨ ਅਤ੍ਤਨੋ ਅਞ੍ਞਥਾਦਸ੍ਸਨਂ ਵਿਕੁਬ੍ਬਨਿਦ੍ਧਿ ਨਾਮ.
੧੪. ਮਨੋਮਯਿਦ੍ਧਿਞਾਣਨਿਦ੍ਦੇਸੇ ਇਮਮ੍ਹਾ ਕਾਯਾ ਅਞ੍ਞਂ ਕਾਯਂ ਅਭਿਨਿਮ੍ਮਿਨਾਤੀਤਿਆਦੀਸੁ ਇਦ੍ਧਿਮਾ ਭਿਕ੍ਖੁ ਮਨੋਮਯਿਦ੍ਧਿਂ ਕਾਤੁਕਾਮੋ ਆਕਾਸਕਸਿਣਾਰਮ੍ਮਣਪਾਦਕਜ੍ਝਾਨਤੋ ਵੁਟ੍ਠਾਯ ਅਤ੍ਤਨੋ ਰੂਪਕਾਯਂ ਤਾਵ ਆਵਜ੍ਜਿਤ੍ਵਾ ਵੁਤ੍ਤਨਯੇਨੇਵ ‘‘ਸੁਸਿਰੋ ਹੋਤੂ’’ਤਿ ਅਧਿਟ੍ਠਾਤਿ, ਸੁਸਿਰੋ ਹੋਤਿ. ਅਥ ਤਸ੍ਸ ਅਬ੍ਭਨ੍ਤਰੇ ਪਥਵੀਕਸਿਣਵਸੇਨ ਅਞ੍ਞਂ ਕਾਯਂ ਆਵਜ੍ਜਿਤ੍ਵਾ ਪਰਿਕਮ੍ਮਂ ਕਤ੍ਵਾ ਵੁਤ੍ਤਨਯੇਨੇਵ ਅਧਿਟ੍ਠਾਤਿ, ਤਸ੍ਸ ਅਬ੍ਭਨ੍ਤਰੇ ਅਞ੍ਞੋ ਕਾਯੋ ਹੋਤਿ. ਸੋ ਤਂ ਮੁਖਤੋ ਅਬ੍ਬੂਹਿਤ੍ਵਾ ਬਹਿ ਠਪੇਤਿ. ਇਦਾਨਿ ਤਮਤ੍ਥਂ ਉਪਮਾਹਿ ਪਕਾਸੇਨ੍ਤੋ ਸੇਯ੍ਯਥਾਪੀਤਿਆਦਿਮਾਹ. ਤਤ੍ਥ ਮੁਞ੍ਜਮ੍ਹਾਤਿ ਮੁਞ੍ਜਤਿਣਮ੍ਹਾ. ਈਸਿਕਂ ਪਵਾਹੇਯ੍ਯਾਤਿ ਕਲ਼ੀਰਂ ਲੁਞ੍ਚੇਯ੍ਯ. ਕੋਸਿਯਾਤਿ ਕੋਸਕਤੋ. ਕਰਣ੍ਡਾਤਿ ਕਰਣ੍ਡਾਯ, ਪੁਰਾਣਤਚਕਞ੍ਚੁਕਤੋਤਿ ਅਤ੍ਥੋ. ਤਤ੍ਥ ਚ ਉਦ੍ਧਰੇਯ੍ਯਾਤਿ ਚਿਤ੍ਤੇਨੇਵਸ੍ਸ ਉਦ੍ਧਰਣਂ ਵੇਦਿਤਬ੍ਬਂ. ਅਯਞ੍ਹਿ ਅਹਿ ਨਾਮ ਸਜਾਤਿਯਂ ਠਿਤੋ, ਕਟ੍ਠਨ੍ਤਰਂ ਵਾ ਰੁਕ੍ਖਨ੍ਤਰਂ ਵਾ ਨਿਸ੍ਸਾਯ, ਤਚਤੋ ਸਰੀਰਂ ਨਿਕ੍ਕਡ੍ਢਨਪਯੋਗਸਙ੍ਖਾਤੇਨ ਥਾਮੇਨ, ਸਰੀਰਂ ਖਾਦਯਮਾਨਂ ਵਿਯ ਪੁਰਾਣਤਚਂ ਜਿਗੁਚ੍ਛਨ੍ਤੋ ਇਮੇਹਿ ਚਤੂਹਿ ਕਾਰਣੇਹਿ ਸਯਮੇਵ ਕਞ੍ਚੁਕਂ ਪਜਹਾਤਿ.
ਏਤ੍ਥ ਚ ਯਥਾ ਈਸਿਕਾਦਯੋ ਮੁਞ੍ਜਾਦੀਹਿ ਸਦਿਸਾ ਹੋਨ੍ਤਿ, ਏਵਮਿਦਂ ਮਨੋਮਯਂ ਰੂਪਂ ਇਦ੍ਧਿਮਤਾ ਸਬ੍ਬਾਕਾਰੇਹਿ ਸਦਿਸਮੇਵ ਹੋਤੀਤਿ ਦਸ੍ਸਨਤ੍ਥਂ ਇਮਾ ਉਪਮਾ ਵੁਤ੍ਤਾਤਿ. ‘‘ਮਨੋਮਯੇਨ ਕਾਯੇਨ, ਇਦ੍ਧਿਯਾ ਉਪਸਙ੍ਕਮੀ’’ਤਿ (ਥੇਰਗਾ. ੯੦੧) ਏਤ੍ਥ ਅਭਿਞ੍ਞਾਮਨੇਨ ਕਤਕਾਯੋ ਮਨੋਮਯਕਾਯੋ ਨਾਮ. ‘‘ਅਞ੍ਞਤਰਂ ਮਨੋਮਯਂ ਕਾਯਂ ਉਪਪਜ੍ਜਤੀ’’ਤਿ (ਚੂਲ਼ਵ. ੩੩੩) ਏਤ੍ਥ ਝਾਨਮਨੇਨ ਨਿਬ੍ਬਿਤ੍ਤਿਤਕਾਯੋ ਤੇਨ ਮਨੇਨ ਕਤਤ੍ਤਾ ਮਨੋਮਯਕਾਯੋ ਨਾਮ. ਇਧ ਪਨ ਅਭਿਞ੍ਞਾਮਨੇਨ ਉਪ੍ਪਾਦਿਤਕਾਯੋ ਤੇਨ ਮਨੇਨ ਕਤਤ੍ਤਾ ਮਨੋਮਯਕਾਯੋ ਨਾਮ. ਏਵਂ ਸਤਿ ਅਧਿਟ੍ਠਾਨਿਦ੍ਧਿਯਾ ਵਿਕੁਬ੍ਬਨਿਦ੍ਧਿਯਾ ਚ ਕਤੋ ਮਨੋਮਯਕਾਯੋ ਨਾਮ ਹੋਤੀਤਿ ਚੇ? ਹੋਤਿਯੇਵ. ਇਧ ਪਨ ਤਾਸਂ ਵਿਸੁਂ ਵਿਸੁਂ ਵਿਸੇਸੇਨ ਵਿਸੇਸੇਤ੍ਵਾ ਅਧਿਟ੍ਠਾਨਿਦ੍ਧਿ ਵਿਕੁਬ੍ਬਨਿਦ੍ਧੀਤਿ ਚ ਵੁਤ੍ਤਤ੍ਤਾ ਅਬ੍ਭਨ੍ਤਰਤੋ ਨਿਮ੍ਮਾਨਮੇਵ ਮਨੋਮਯਿਦ੍ਧਿ ਨਾਮ.
੧੫. ਞਾਣਵਿਪ੍ਫਾਰਿਦ੍ਧਿਨਿਦ੍ਦੇਸੇ ਞਾਣਸ੍ਸ ਵਿਪ੍ਫਾਰੋ ਵੇਗੋ ਅਸ੍ਸਾ ਅਤ੍ਥੀਤਿ ਞਾਣਵਿਪ੍ਫਾਰਾ. ਏਤ੍ਥ ਚ ਸਤ੍ਤਅਨੁਪਸ੍ਸਨਾਵਸੇਨੇਵ ਇਦ੍ਧਿਂ ਦਸ੍ਸੇਤ੍ਵਾ ਸੇਸਾ ਯਾਵ ਅਰਹਤ੍ਤਮਗ੍ਗਾ ਸਙ੍ਖਿਤ੍ਤਾਤਿ ਵੇਦਿਤਬ੍ਬਾ.
ਆਯਸ੍ਮਤੋ ਬਾਕੁਲਸ੍ਸ ਞਾਣਵਿਪ੍ਫਾਰਾ ਇਦ੍ਧੀਤਿਆਦੀਸੁ ਬਾਕੁਲਤ੍ਥੇਰੋ ਤਾਵ ਦ੍ਵੀਸੁ ਕੁਲੇਸੁ ਵਡ੍ਢਿਤਤ੍ਤਾ ਏਵਂਲਦ੍ਧਨਾਮੋ ਪੁਬ੍ਬਬੁਦ੍ਧੇਸੁ ਕਤਾਧਿਕਾਰੋ ਪੁਞ੍ਞਸਮ੍ਪਦਾਯ ਸਮ੍ਪਨ੍ਨੋ ਥੇਰੋ. ਸੋ ਹਿ ਮਹਾਸਮ੍ਪਤ੍ਤਿਂ ਅਨੁਭਵਮਾਨੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਮ੍ਹਾਕਂ ਦਸਬਲਸ੍ਸ ਨਿਬ੍ਬਤ੍ਤਿਤੋ ਪੁਰੇਤਰਮੇਵ ਕੋਸਮ੍ਬਿਯਂ ਸੇਟ੍ਠਿਕੁਲੇ ਨਿਬ੍ਬਤ੍ਤਿ. ਤਂ ਜਾਤਕਾਲੇ ਮਙ੍ਗਲਤ੍ਥਾਯ ਮਹਾਪਰਿਵਾਰੇਨ ਯਮੁਨਂ ਨੇਤ੍ਵਾ ਸਪਰਿਵਾਰਾ ਧਾਤੀ ਨਿਮੁਜ੍ਜਨੁਮ੍ਮੁਜ੍ਜਨਵਸੇਨ ਕੀਲ਼ਾਪੇਨ੍ਤੀ ਨ੍ਹਾਪੇਤਿ. ਏਕੋ ਮਹਾਮਚ੍ਛੋ ‘‘ਭਕ੍ਖੋ ਮੇ ਅਯ’’ਨ੍ਤਿ ਮਞ੍ਞਮਾਨੋ ਮੁਖਂ ਵਿਵਰਿਤ੍ਵਾ ਉਪਗਤੋ. ਧਾਤੀ ਦਾਰਕਂ ਛਡ੍ਡੇਤ੍ਵਾ ਪਲਾਤਾ. ਮਹਾਮਚ੍ਛੋ ਤਂ ਗਿਲਿ. ਪੁਞ੍ਞਵਾ ਸਤ੍ਤੋ ਸਯਨਗਬ੍ਭਂ ਪਵਿਸਿਤ੍ਵਾ ਨਿਪਨ੍ਨੋ ਵਿਯ ਨ ਕਿਞ੍ਚਿ ਦੁਕ੍ਖਂ ਪਾਪੁਣਿ. ਮਚ੍ਛੋ ਦਾਰਕਸ੍ਸ ਤੇਜੇਨ ਤਤ੍ਤਕਂ ਫਾਲਂ ਗਿਲਿਤ੍ਵਾ ਵਿਯ ਦਯ੍ਹਮਾਨੋ ਵੇਗੇਨ ਤਿਂਸਯੋਜਨਂ ਗਨ੍ਤ੍ਵਾ ਬਾਰਾਣਸਿਵਾਸਿਨੋ ਮਚ੍ਛਬਨ੍ਧਸ੍ਸ ਜਾਲਂ ਪਾਵਿਸਿ. ਸੋ ਦਾਰਕਸ੍ਸ ਤੇਜੇਨ ਜਾਲਤੋ ਨੀਹਟਮਤ੍ਤੋਵ ਮਤੋ. ਮਚ੍ਛਬਨ੍ਧਾ ਤਂ ਸਕਲਮੇਵ ਅਨ੍ਤਰਕਾਜੇਨ ਆਦਾਯ ‘‘ਸਹਸ੍ਸੇਨ ਦੇਮਾ’’ਤਿ ਨਗਰੇ ਚਰਨ੍ਤਾ ਅਸੀਤਿਕੋਟਿਧਨਸ੍ਸ ਅਪੁਤ੍ਤਕਸ੍ਸ ਸੇਟ੍ਠਿਸ੍ਸ ਘਰਦ੍ਵਾਰਂ ਗਨ੍ਤ੍ਵਾ ਸੇਟ੍ਠਿਭਰਿਯਾਯ ਏਕੇਨ ਕਹਾਪਣੇਨ ਅਦਂਸੁ. ਸਾ ਤਂ ਸਯਮੇਵ ਫਲਕੇ ਠਪੇਤ੍ਵਾ ਪਿਟ੍ਠਿਤੋ ਫਾਲੇਨ੍ਤੀ ਮਚ੍ਛਕੁਚ੍ਛਿਯਂ ਸੁਵਣ੍ਣਵਣ੍ਣਂ ਦਾਰਕਂ ਦਿਸ੍ਵਾ ‘‘ਮਚ੍ਛਕੁਚ੍ਛਿਯਂ ਮੇ ਪੁਤ੍ਤੋ ਲਦ੍ਧੋ’’ਤਿ ਨਾਦਂ ਨਦਿਤ੍ਵਾ ਦਾਰਕਂ ਆਦਾਯ ਸਾਮਿਕਂ ਉਪਗਚ੍ਛਿ. ਸੇਟ੍ਠਿ ਤਾਵਦੇਵ ਭੇਰਿਂ ਚਰਾਪੇਤ੍ਵਾ ਦਾਰਕਂ ਆਦਾਯ ਰਞ੍ਞੋ ਸਨ੍ਤਿਕਂ ਆਨੇਤ੍ਵਾ ਤਮਤ੍ਥਂ ਆਰੋਚੇਸਿ. ਰਾਜਾ ‘‘ਪੁਞ੍ਞਵਾ ਦਾਰਕੋ, ਪੋਸੇਹਿ ਨ’’ਨ੍ਤਿ ਆਹ. ਇਤਰਮ੍ਪਿ ਸੇਟ੍ਠਿਕੁਲਂ ਤਂ ਪਵਤ੍ਤਿਂ ਸੁਤ੍ਵਾ ਤਤ੍ਥ ਗਨ੍ਤ੍ਵਾ ‘‘ਅਮ੍ਹਾਕਂ ਪੁਤ੍ਤੋ’’ਤਿ ਤਂ ਦਾਰਕਂ ਗਣ੍ਹਿਤੁਂ ਵਿਵਦਿ. ਉਭੋਪਿ ਰਾਜਕੁਲਂ ਅਗਮਂਸੁ. ਰਾਜਾ ‘‘ਦ੍ਵਿਨ੍ਨਮ੍ਪਿ ਅਪੁਤ੍ਤਕਂ ਕਾਤੁਂ ਨ ਸਕ੍ਕਾ, ਦ੍ਵਿਨ੍ਨਮ੍ਪਿ ਦਾਯਾਦੋ ਹੋਤੂ’’ਤਿ ਆਹ. ਤਤੋ ਪਟ੍ਠਾਯ ਦ੍ਵੇਪਿ ਕੁਲਾਨਿ ਲਾਭਗ੍ਗਯਸਗ੍ਗਪ੍ਪਤ੍ਤਾਨਿ ਅਹੇਸੁਂ. ਤਸ੍ਸ ਦ੍ਵੀਹਿ ਕੁਲੇਹਿ ਵਡ੍ਢਿਤਤ੍ਤਾ ‘‘ਬਾਕੁਲਕੁਮਾਰੋ’’ਤਿ ਨਾਮਂ ਅਕਂਸੁ. ਤਸ੍ਸ ਵਿਞ੍ਞੁਤਂ ਪਤ੍ਤਸ੍ਸ ਦ੍ਵੀਸੁਪਿ ਨਗਰੇਸੁ ਤਯੋ ਤਯੋ ਪਾਸਾਦੇ ਕਾਰੇਤ੍ਵਾ ਨਾਟਕਾਨਿ ਪਚ੍ਚੁਪਟ੍ਠਪੇਸੁਂ. ਏਕੇਕਸ੍ਮਿਂ ਨਗਰੇ ਚਤ੍ਤਾਰੋ ਚਤ੍ਤਾਰੋ ਮਾਸੇ ਵਸਿ. ਤਹਿਂ ਏਕਸ੍ਮਿਂ ਨਗਰੇ ਚਤ੍ਤਾਰੋ ਮਾਸੇ ਵੁਟ੍ਠਸ੍ਸ ਸਙ੍ਘਾਟਨਾਵਾਸੁ ਮਣ੍ਡਪਂ ਕਾਰੇਤ੍ਵਾ ਤਤ੍ਥ ਨਂ ਨਾਟਕੇਹਿ ਸਦ੍ਧਿਂ ਆਰੋਪੇਤ੍ਵਾ ਮਹਾਸਮ੍ਪਤ੍ਤਿਂ ਅਨੁਭਵਮਾਨਂ ਦ੍ਵੀਹਿ ਮਾਸੇਹਿ ਇਤਰਂ ਨਗਰਂ ਉਪਡ੍ਢਪਥਂ ਨੇਨ੍ਤਿ. ਇਤਰਨਗਰਵਾਸਿਨੋ ਨਾਟਕਾਪਿ ‘‘ਦ੍ਵੀਹਿ ਮਾਸੇਹਿ ਉਪਡ੍ਢਪਥਂ ਆਗਤੋ ਭਵਿਸ੍ਸਤੀ’’ਤਿ ਤਥੇਵ ਪਚ੍ਚੁਗ੍ਗਨ੍ਤ੍ਵਾ ਦ੍ਵੀਹਿ ਮਾਸੇਹਿ ਅਤ੍ਤਨੋ ਨਗਰਂ ਆਨੇਨ੍ਤਿ. ਇਤਰਨਾਟਕਾ ਮਜ੍ਝੇ ਨਿਵਤ੍ਤਿਤ੍ਵਾ ਅਤ੍ਤਨੋ ਨਗਰਮੇਵ ਗਚ੍ਛਨ੍ਤਿ. ਤਤ੍ਥ ਚਤ੍ਤਾਰੋ ਮਾਸੇ ਵਸਿਤ੍ਵਾ ਤੇਨੇਵ ਨਿਯਾਮੇਨ ਪੁਨ ਇਤਰਨਗਰਂ ਗਚ੍ਛਤਿ. ਏਵਮਸ੍ਸ ਸਮ੍ਪਤ੍ਤਿਂ ਅਨੁਭਵਨ੍ਤਸ੍ਸ ਅਸੀਤਿ ਵਸ੍ਸਾਨਿ ਪਰਿਪੁਣ੍ਣਾਨਿ.
ਤਸ੍ਮਿਂ ਸਮਯੇ ਅਮ੍ਹਾਕਂ ਬੋਧਿਸਤ੍ਤੋ ਸਬ੍ਬਞ੍ਞੁਤਂ ਪਾਪੁਣਿਤ੍ਵਾ ਪਵਤ੍ਤਵਰਧਮ੍ਮਚਕ੍ਕੋ ਅਨੁਕ੍ਕਮੇਨ ਚਾਰਿਕਂ ਚਰਨ੍ਤੋ ਕੋਸਮ੍ਬਿਂ ਪਾਪੁਣਿ. ‘‘ਬਾਰਾਣਸਿ’’ਨ੍ਤਿ ਮਜ੍ਝਿਮਭਾਣਕਾ. ਬਾਕੁਲਸੇਟ੍ਠਿਪਿ ਖੋ ‘‘ਦਸਬਲੋ ਆਗਤੋ’’ਤਿ ਸੁਤ੍ਵਾ ਬਹੁਂ ਗਨ੍ਧਮਾਲਂ ਆਦਾਯ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਕਥਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿ. ਸੋ ਸਤ੍ਤਾਹਮੇਵ ਪੁਥੁਜ੍ਜਨੋ ਹੁਤ੍ਵਾ ਅਟ੍ਠਮੇ ਅਰੁਣੇ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਅਥਸ੍ਸ ਦ੍ਵੀਸੁ ਨਗਰੇਸੁ ਪਰਿਚਿਤਮਾਤੁਗਾਮਾ ਅਤ੍ਤਨੋ ਕੁਲਘਰਾਨਿ ਆਗਨ੍ਤ੍ਵਾ ਤਤ੍ਥੇਵ ਵਸਮਾਨਾ ਚੀਵਰਾਨਿ ਕਰਿਤ੍ਵਾ ਪਹਿਣਿਂਸੁ. ਥੇਰੋ ਏਕਂ ਅਡ੍ਢਮਾਸਂ ਕੋਸਮ੍ਬਿਵਾਸੀਹਿ ਪਹਿਤਂ ਚੀਵਰਂ ਪਰਿਭੁਞ੍ਜਤਿ, ਏਕਂ ਅਡ੍ਢਮਾਸਂ ਬਾਰਾਣਸਿਵਾਸੀਹੀਤਿ ਏਤੇਨੇਵ ਨਿਯਾਮੇਨ ਦ੍ਵੀਸੁ ਨਗਰੇਸੁ ਯਂ ਯਂ ਉਤ੍ਤਮਂ, ਤਂ ਤਂ ਥੇਰਸ੍ਸੇਵ ਆਹਰੀਯਤਿ. ਪਬ੍ਬਜਿਤਸ੍ਸਾਪਿਸ੍ਸ ਸੁਖੇਨੇਵ ਅਸੀਤਿ ਵਸ੍ਸਾਨਿ ਅਗਮਂਸੁ. ਉਭਯਤ੍ਥਾਪਿਸ੍ਸ ਮੁਹੁਤ੍ਤਮਤ੍ਤਮ੍ਪਿ ਅਪ੍ਪਮਤ੍ਤਕੋਪਿ ਆਬਾਧੋ ਨ ਉਪ੍ਪਨ੍ਨਪੁਬ੍ਬੋ. ਸੋ ਪਚ੍ਛਿਮੇ ਕਾਲੇ ਬਾਕੁਲਸੁਤ੍ਤਂ (ਮ. ਨਿ. ੩.੨੦੯ ਆਦਯੋ) ਕਥੇਤ੍ਵਾ ਪਰਿਨਿਬ੍ਬਾਯੀਤਿ. ਏਵਂ ਮਚ੍ਛਕੁਚ੍ਛਿਯਂ ਅਰੋਗਭਾਵੋ ਆਯਸ੍ਮਤੋ ਬਾਕੁਲਸ੍ਸ ਪਚ੍ਛਿਮਭਵਿਕਸ੍ਸ ਤੇਨ ਅਤ੍ਤਭਾਵੇਨ ਪਟਿਲਭਿਤਬ੍ਬਅਰਹਤ੍ਤਞਾਣਾਨੁਭਾਵੇਨ ਨਿਬ੍ਬਤ੍ਤਤ੍ਤਾ ਞਾਣਵਿਪ੍ਫਾਰਾ ਇਦ੍ਧਿ ਨਾਮ. ਸੁਚਰਿਤਕਮ੍ਮਫਲਪ੍ਪਤ੍ਤਸ੍ਸ ਪਟਿਸਮ੍ਭਿਦਾਞਾਣਸ੍ਸ ਆਨੁਭਾਵੇਨਾਤਿਪਿ ਵਦਨ੍ਤਿ.
ਸਂਕਿਚ੍ਚਤ੍ਥੇਰੋਪਿ (ਵਿਸੁਦ੍ਧਿ. ੨.੩੭੩) ਪੁਬ੍ਬੇ ਕਤਪੁਞ੍ਞੋ ਧਮ੍ਮਸੇਨਾਪਤਿਤ੍ਥੇਰਸ੍ਸ ਉਪਟ੍ਠਾਕਸ੍ਸ ਸਾਵਤ੍ਥਿਯਂ ਅਡ੍ਢਕੁਲਸ੍ਸ ਧੀਤੁ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿ. ਸਾ ਤਸ੍ਮਿਂ ਕੁਚ੍ਛਿਗਤੇ ਏਕੇਨ ਬ੍ਯਾਧਿਨਾ ਤਂ ਖਣਂਯੇਵ ਕਾਲਮਕਾਸਿ, ਤਸ੍ਸਾ ਸਰੀਰੇ ਝਾਪਿਯਮਾਨੇ ਠਪੇਤ੍ਵਾ ਗਬ੍ਭਮਂਸਂ ਸੇਸਮਂਸਂ ਝਾਪਯਿ. ਅਥਸ੍ਸਾ ਗਬ੍ਭਮਂਸਂ ਚਿਤਕਤੋ ਓਤਾਰੇਤ੍ਵਾ ਦ੍ਵੀਸੁ ਤੀਸੁ ਠਾਨੇਸੁ ਸੂਲੇਹਿ ਵਿਜ੍ਝਿਂਸੁ. ਸੂਲਕੋਟਿ ਦਾਰਕਸ੍ਸ ਅਕ੍ਖਿਕੋਟਿਂ ਫੁਸਿ. ਏਵਂ ਗਬ੍ਭਮਂਸਂ ਵਿਜ੍ਝਿਤ੍ਵਾ ਅਙ੍ਗਾਰਰਾਸਿਮ੍ਹਿ ਪਕ੍ਖਿਪਿਤ੍ਵਾ ਅਙ੍ਗਾਰੇਹੇਵ ਪਟਿਚ੍ਛਾਦੇਤ੍ਵਾ ਪਕ੍ਕਮਿਂਸੁ. ਗਬ੍ਭਮਂਸਂ ਝਾਯਿ, ਅਙ੍ਗਾਰਮਤ੍ਥਕੇ ਪਨ ਸੁਵਣ੍ਣਬਿਮ੍ਬਸਦਿਸੋ ਦਾਰਕੋ ਪਦੁਮਗਬ੍ਭੇ ਨਿਪਨ੍ਨੋ ਵਿਯ ਅਹੋਸਿ. ਪਚ੍ਛਿਮਭਵਿਕਸਤ੍ਤਸ੍ਸ ਹਿ ਸਿਨੇਰੁਨਾ ਓਤ੍ਥਰਿਯਮਾਨਸ੍ਸਾਪਿ ਅਰਹਤ੍ਤਂ ਅਪ੍ਪਤ੍ਵਾ ਜੀਵਿਤਕ੍ਖਯੋ ਨਾਮ ਨਤ੍ਥਿ. ਪੁਨਦਿਵਸੇ ‘‘ਚਿਤਕਂ ਨਿਬ੍ਬਾਪੇਸ੍ਸਾਮਾ’’ਤਿ ਆਗਤਾ ਤਥਾ ਨਿਪਨ੍ਨਂ ਦਾਰਕਂ ਦਿਸ੍ਵਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ਦਾਰਕਂ ਆਦਾਯ ਨਗਰਂ ਗਨ੍ਤ੍ਵਾ ਨੇਮਿਤ੍ਤਕੇ ਪੁਚ੍ਛਿਂਸੁ. ਨੇਮਿਤ੍ਤਕਾ ‘‘ਸਚੇ ਅਯਂ ਦਾਰਕੋ ਅਗਾਰਂ ਅਜ੍ਝਾਵਸਿਸ੍ਸਤਿ, ਯਾਵ ਸਤ੍ਤਮਾ ਕੁਲਪਰਿਵਟ੍ਟਾ ਞਾਤਕਾ ਦੁਗ੍ਗਤਾ ਭਵਿਸ੍ਸਨ੍ਤਿ. ਸਚੇ ਪਬ੍ਬਜਿਸ੍ਸਤਿ, ਪਞ੍ਚਹਿ ਸਮਣਸਤੇਹਿ ਪਰਿਵੁਤੋ ਚਰਿਸ੍ਸਤੀ’’ਤਿ ਆਹਂਸੁ. ਅਯ੍ਯਕਾ ਤਂ ਦਾਰਕਂ ਵਡ੍ਢੇਸਿ. ਞਾਤਕਾਪਿ ਵਡ੍ਢਿਤਕਾਲੇ ‘‘ਅਮ੍ਹਾਕਂ ਅਯ੍ਯਸ੍ਸ ਸਨ੍ਤਿਕੇ ਪਬ੍ਬਾਜੇਸ੍ਸਾਮਾ’’ਤਿ ਪੋਸਯਿਂਸੁ. ਸੋ ਸਤ੍ਤਵਸ੍ਸਿਕਕਾਲੇ ‘‘ਤਵ ਕੁਚ੍ਛਿਯਾ ਵਸਨਕਾਲੇ ਮਾਤਾ ਤੇ ਕਾਲਮਕਾਸਿ, ਤਸ੍ਸਾ ਸਰੀਰੇ ਝਾਪਿਯਮਾਨੇਪਿ ਤ੍ਵਂ ਨ ਝਾਯੀ’’ਤਿ ਕੁਮਾਰਕਾਨਂ ਕਥਂ ਸੁਤ੍ਵਾ ‘‘ਅਹਂ ਕਿਰ ਏਵਰੂਪਾ ਭਯਾ ਮੁਤ੍ਤੋ, ਕਿਂ ਮੇ ਘਰਾਵਾਸੇਨ ਪਬ੍ਬਜਿਸ੍ਸਾਮੀ’’ਤਿ ਞਾਤਕਾਨਂ ਆਰੋਚੇਸਿ. ਤੇ ‘‘ਸਾਧੁ, ਤਾਤਾ’’ਤਿ ਤਂ ਧਮ੍ਮਸੇਨਾਪਤਿਤ੍ਥੇਰਸ੍ਸ ਸਨ੍ਤਿਕਂ ਨੇਤ੍ਵਾ ‘‘ਭਨ੍ਤੇ, ਇਮਂ ਪਬ੍ਬਾਜੇਥਾ’’ਤਿ ਅਦਂਸੁ. ਥੇਰੋ ਤਚਪਞ੍ਚਕਕਮ੍ਮਟ੍ਠਾਨਂ ਦਤ੍ਵਾ ਪਬ੍ਬਾਜੇਸਿ. ਸੋ ਖੁਰਗ੍ਗੇਯੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਪਰਿਪੁਣ੍ਣਵਸ੍ਸੋ ਚ ਉਪਸਮ੍ਪਦਂ ਲਭਿਤ੍ਵਾ ਦਸਵਸ੍ਸੋ ਹੁਤ੍ਵਾ ਪਞ੍ਚਸਤਭਿਕ੍ਖੁਪਰਿਵਾਰੋ ਵਿਚਰੀਤਿ. ਏਵਂ ਵੁਤ੍ਤਨਯੇਨੇਵ ਦਾਰੁਚਿਤਕਾਯ ਅਰੋਗਭਾਵੋ ਆਯਸ੍ਮਤੋ ਸਂਕਿਚ੍ਚਸ੍ਸ ਞਾਣਵਿਪ੍ਫਾਰਾ ਇਦ੍ਧਿ ਨਾਮ.
ਭੂਤਪਾਲਤ੍ਥੇਰੋਪਿ (ਵਿਸੁਦ੍ਧਿ. ੨.੩੭੩) ਪੁਬ੍ਬਹੇਤੁਸਮ੍ਪਨ੍ਨੋ. ਤਸ੍ਸ ਪਿਤਾ ਰਾਜਗਹੇ ਦਲਿਦ੍ਦਮਨੁਸ੍ਸੋ. ਸੋ ਤਂ ਦਾਰਕਂ ਗਹੇਤ੍ਵਾ ਦਾਰੂਨਂ ਅਤ੍ਥਾਯ ਸਕਟੇਨ ਅਟਵਿਂ ਗਨ੍ਤ੍ਵਾ ਦਾਰੁਭਾਰਂ ਕਤ੍ਵਾ ਸਾਯਂ ਨਗਰਦ੍ਵਾਰਸਮੀਪਂ ਪਤ੍ਤੋ. ਅਥਸ੍ਸ ਗੋਣਾ ਯੁਗਂ ਓਸ੍ਸਜਿਤ੍ਵਾ ਨਗਰਂ ਪਵਿਸਿਂਸੁ. ਸੋ ਸਕਟਮੂਲੇ ਪੁਤ੍ਤਕਂ ਨਿਸੀਦਾਪੇਤ੍ਵਾ ਗੋਣਾਨਂ ਅਨੁਪਦਂ ਗਚ੍ਛਨ੍ਤੋ ਨਗਰਮੇਵ ਪਾਵਿਸਿ. ਤਸ੍ਸ ਅਨਿਕ੍ਖਨ੍ਤਸ੍ਸੇਵ ਦ੍ਵਾਰਂ ਪਿਦਹਿ. ਦਾਰਕੋ ਸਕਲਰਤ੍ਤਿਂ ਸਕਟਸ੍ਸ ਹੇਟ੍ਠਾ ਨਿਪਜ੍ਜਿਤ੍ਵਾ ਨਿਦ੍ਦਂ ਓਕ੍ਕਮਿ. ਰਾਜਗਹਂ ਪਕਤਿਯਾਪਿ ਅਮਨੁਸ੍ਸਬਹੁਲਂ, ਇਦਂ ਪਨ ਸੁਸਾਨਸਮੀਪਟ੍ਠਾਨਂ. ਨ ਚ ਕੋਚਿ ਯਕ੍ਖੋ ਤਸ੍ਸ ਪਚ੍ਛਿਮਭਵਿਕਸ੍ਸ ਦਾਰਕਸ੍ਸ ਉਪਦ੍ਦਵਂ ਕਾਤੁਮਸਕ੍ਖਿ. ਸੋ ਅਪਰੇਨ ਸਮਯੇਨ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਤ੍ਵਾ ਭੂਤਪਾਲਤ੍ਥੇਰੋ ਨਾਮ ਅਹੋਸੀਤਿ. ਏਵਂ ਵਾਲ਼ਯਕ੍ਖਾਨੁਚਰਿਤੇਪਿ ਪਦੇਸੇ ਵੁਤ੍ਤਨਯੇਨੇਵ ਅਰੋਗਭਾਵੋ ਆਯਸ੍ਮਤੋ ਭੂਤਪਾਲਸ੍ਸ ਞਾਣਵਿਪ੍ਫਾਰਾ ਇਦ੍ਧਿ ਨਾਮ.
੧੬. ਸਮਾਧਿਵਿਪ੍ਫਾਰਿਦ੍ਧਿਨਿਦ੍ਦੇਸੇ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਸਮਾਧਿਵਿਪ੍ਫਾਰਾ ਇਦ੍ਧੀਤਿਆਦੀਸੁ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਮਹਾਮੋਗ੍ਗਲ੍ਲਾਨਤ੍ਥੇਰੇਨ ਸਦ੍ਧਿਂ ਕਪੋਤਕਨ੍ਦਰਾਯਂ ਵਿਹਰਤੋ ਜੁਣ੍ਹਾਯ ਰਤ੍ਤਿਯਾ ਨਵੋਰੋਪਿਤੇਹਿ ਕੇਸੇਹਿ ਅਜ੍ਝੋਕਾਸੇ ਨਿਸਿਨ੍ਨਸ੍ਸ ਏਕੋ ਦੁਟ੍ਠਯਕ੍ਖੋ ਸਹਾਯਕੇਨ ਯਕ੍ਖੇਨ ਵਾਰਿਯਮਾਨੋਪਿ ਸੀਸੇ ਪਹਾਰਂ ਅਦਾਸਿ. ਯਸ੍ਸ ਮੇਘਸ੍ਸ ਵਿਯ ਗਜ੍ਜਤੋ ਸਦ੍ਦੋ ਅਹੋਸਿ, ਥੇਰੋ ਤਸ੍ਸ ਪਹਰਣਸਮਯੇ ਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸਿਨ੍ਨੋ ਹੋਤਿ. ਅਥਸ੍ਸ ਤੇਨ ਪਹਾਰੇਨ ਨ ਕੋਚਿ ਆਬਾਧੋ ਅਹੋਸਿ. ਅਯਂ ਤਸ੍ਸ ਆਯਸ੍ਮਤੋ ਸਮਾਧਿਵਿਪ੍ਫਾਰਾ ਇਦ੍ਧਿ. ਯਥਾਹ –
‘‘ਏਵਂ ਮੇ ਸੁਤਂ (ਉਦਾ. ੩੪) – ਏਕਂ ਸਮਯਂ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਚ ਸਾਰਿਪੁਤ੍ਤੋ ਆਯਸ੍ਮਾ ਚ ਮਹਾਮੋਗ੍ਗਲ੍ਲਾਨੋ ਕਪੋਤਕਨ੍ਦਰਾਯਂ ਵਿਹਰਨ੍ਤਿ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਸਾਰਿਪੁਤ੍ਤੋ ਜੁਣ੍ਹਾਯ ਰਤ੍ਤਿਯਾ ਨਵੋਰੋਪਿਤੇਹਿ ਕੇਸੇਹਿ ਅਬ੍ਭੋਕਾਸੇ ਨਿਸਿਨ੍ਨੋ ਹੋਤਿ ਅਞ੍ਞਤਰਂ ਸਮਾਧਿਂ ਸਮਾਪਜ੍ਜਿਤ੍ਵਾ.
‘‘ਤੇਨ ਖੋ ਪਨ ਸਮਯੇਨ ਦ੍ਵੇ ਯਕ੍ਖਾ ਸਹਾਯਕਾ ਉਤ੍ਤਰਾਯ ਦਿਸਾਯ ਦਕ੍ਖਿਣਂ ਦਿਸਂ ਗਚ੍ਛਨ੍ਤਿ ਕੇਨਚਿਦੇਵ ਕਰਣੀਯੇਨ. ਅਦ੍ਦਸਂਸੁ ਖੋ ਤੇ ਯਕ੍ਖਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਜੁਣ੍ਹਾਯ ਰਤ੍ਤਿਯਾ ਨਵੋਰੋਪਿਤੇਹਿ ਕੇਸੇਹਿ ਅਬ੍ਭੋਕਾਸੇ ਨਿਸਿਨ੍ਨਂ, ਦਿਸ੍ਵਾਨ ਏਕੋ ਯਕ੍ਖੋ ਦੁਤਿਯਂ ਯਕ੍ਖਂ ਏਤਦਵੋਚ – ‘ਪਟਿਭਾਤਿ ਮਂ, ਸਮ੍ਮ, ਇਮਸ੍ਸ ਸਮਣਸ੍ਸ ਸੀਸੇ ਪਹਾਰਂ ਦਾਤੁ’ਨ੍ਤਿ. ਏਵਂ ਵੁਤ੍ਤੇ ਸੋ ਯਕ੍ਖੋ ਤਂ ਯਕ੍ਖਂ ਏਤਦਵੋਚ – ‘ਅਲਂ, ਸਮ੍ਮ, ਮਾ ਸਮਣਂ ਆਸਾਦੇਸਿ, ਉਲ਼ਾਰੋ ਸੋ, ਸਮ੍ਮ, ਸਮਣੋ ਮਹਿਦ੍ਧਿਕੋ ਮਹਾਨੁਭਾਵੋ’ਤਿ.
‘‘ਦੁਤਿਯਮ੍ਪਿ ਖੋ…ਪੇ… ਤਤਿਯਮ੍ਪਿ ਖੋ ਸੋ ਯਕ੍ਖੋ ਤਂ ਯਕ੍ਖਂ ਏਤਦਵੋਚ – ‘ਪਟਿਭਾਤਿ ਮਂ, ਸਮ੍ਮ, ਇਮਸ੍ਸ ਸਮਣਸ੍ਸ ਸੀਸੇ ਪਹਾਰਂ ਦਾਤੁ’ਨ੍ਤਿ. ਤਤਿਯਮ੍ਪਿ ਖੋ ਸੋ ਯਕ੍ਖੋ ਤਂ ਯਕ੍ਖਂ ਏਤਦਵੋਚ – ‘ਅਲਂ, ਸਮ੍ਮ, ਮਾ ਸਮਣਂ ਆਸਾਦੇਸਿ, ਉਲ਼ਾਰੋ ਸੋ, ਸਮ੍ਮ, ਸਮਣੋ ਮਹਿਦ੍ਧਿਕੋ ਮਹਾਨੁਭਾਵੋ’ਤਿ.
‘‘ਅਥ ਖੋ ਸੋ ਯਕ੍ਖੋ ਤਂ ਯਕ੍ਖਂ ਅਨਾਦਿਯਿਤ੍ਵਾ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਸੀਸੇ ਪਹਾਰਂ ਅਦਾਸਿ. ਤਾਵ ਮਹਾਪਹਾਰੋ ਅਹੋਸਿ, ਅਪਿ ਤੇਨ ਪਹਾਰੇਨ ਸਤ੍ਤਰਤਨਂ ਵਾ ਅਡ੍ਢਟ੍ਠਮਰਤਨਂ ਵਾ ਨਾਗਂ ਓਸਾਰੇਯ੍ਯ, ਮਹਨ੍ਤਂ ਵਾ ਪਬ੍ਬਤਕੂਟਂ ਪਦਾਲੇਯ੍ਯ. ਅਥ ਚ ਪਨ ਸੋ ਯਕ੍ਖੋ ‘ਦਯ੍ਹਾਮਿ ਦਯ੍ਹਾਮੀ’ਤਿ ਤਤ੍ਥੇਵ ਮਹਾਨਿਰਯਂ ਅਪਤਾਸਿ.
‘‘ਅਦ੍ਦਸਾ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਤੇਨ ਯਕ੍ਖੇਨ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਸੀਸੇ ਪਹਾਰਂ ਦੀਯਮਾਨਂ, ਦਿਸ੍ਵਾ ਯੇਨ ਆਯਸ੍ਮਾ ਸਾਰਿਪੁਤ੍ਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ – ‘ਕਚ੍ਚਿ ਤੇ, ਆਵੁਸੋ ਸਾਰਿਪੁਤ੍ਤ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿ ਨ ਕਿਞ੍ਚਿ ਦੁਕ੍ਖ’ਨ੍ਤਿ. ‘ਖਮਨੀਯਂ ਮੇ, ਆਵੁਸੋ ਮੋਗ੍ਗਲ੍ਲਾਨ, ਯਾਪਨੀਯਂ ਮੇ, ਆਵੁਸੋ ਮੋਗ੍ਗਲ੍ਲਾਨ, ਅਪਿ ਚ ਮੇ ਸੀਸਂ ਥੋਕਂ ਦੁਕ੍ਖ’ਨ੍ਤਿ.
‘‘ਅਚ੍ਛਰਿਯਂ, ਆਵੁਸੋ ਸਾਰਿਪੁਤ੍ਤ, ਅਬ੍ਭੁਤਂ, ਆਵੁਸੋ ਸਾਰਿਪੁਤ੍ਤ, ਯਾਵ ਮਹਿਦ੍ਧਿਕੋ ਆਯਸ੍ਮਾ ਸਾਰਿਪੁਤ੍ਤੋ ਮਹਾਨੁਭਾਵੋ. ਇਧ ਤੇ, ਆਵੁਸੋ ਸਾਰਿਪੁਤ੍ਤ, ਅਞ੍ਞਤਰੋ ਯਕ੍ਖੋ ਸੀਸੇ ਪਹਾਰਂ ਅਦਾਸਿ. ਤਾਵ ਮਹਾ ਪਹਾਰੋ ਅਹੋਸਿ, ਅਪਿ ਤੇਨ ਪਹਾਰੇਨ ਸਤ੍ਤਰਤਨਂ ਵਾ ਅਡ੍ਢਟ੍ਠਮਰਤਨਂ ਵਾ ਨਾਗਂ ਓਸਾਰੇਯ੍ਯ, ਮਹਨ੍ਤਂ ਵਾ ਪਬ੍ਬਤਕੂਟਂ ਪਦਾਲੇਯ੍ਯ. ਅਥ ਚ ਪਨਾਯਸ੍ਮਾ ਸਾਰਿਪੁਤ੍ਤੋ ਏਵਮਾਹ – ‘ਖਮਨੀਯਂ ਮੇ, ਆਵੁਸੋ ਮੋਗ੍ਗਲ੍ਲਾਨ, ਯਾਪਨੀਯਂ ਮੇ, ਆਵੁਸੋ ਮੋਗ੍ਗਲ੍ਲਾਨ, ਅਪਿ ਚ ਮੇ ਸੀਸਂ ਥੋਕਂ ਦੁਕ੍ਖ’ਨ੍ਤਿ.
‘‘ਅਚ੍ਛਰਿਯਂ, ਆਵੁਸੋ ਮੋਗ੍ਗਲ੍ਲਾਨ, ਅਬ੍ਭੁਤਂ, ਆਵੁਸੋ ਮੋਗ੍ਗਲ੍ਲਾਨ, ਯਾਵ ਮਹਿਦ੍ਧਿਕੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਯਕ੍ਖਮ੍ਪਿ ਪਸ੍ਸਿਸ੍ਸਤਿ, ਮਯਂ ਪਨੇਤਰਹਿ ਪਂਸੁਪਿਸਾਚਕਮ੍ਪਿ ਨ ਪਸ੍ਸਾਮਾਤਿ.
‘‘ਅਸ੍ਸੋਸਿ ਖੋ ਭਗਵਾ ਦਿਬ੍ਬਾਯ ਸੋਤਧਾਤੁਯਾ ਵਿਸੁਦ੍ਧਾਯ ਅਤਿਕ੍ਕਨ੍ਤਮਾਨੁਸਿਕਾਯ ਤੇਸਂ ਉਭਿਨ੍ਨਂ ਮਹਾਨਾਗਾਨਂ ਇਮਂ ਏਵਰੂਪਂ ਕਥਾਸਲ੍ਲਾਪਂ.
ਅਥ ਖੋ ਭਗਵਾ ਏਤਮਤ੍ਥਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸਿ –
‘‘ਯਸ੍ਸ ਸੇਲੂਪਮਂ ਚਿਤ੍ਤਂ, ਠਿਤਂ ਨਾਨੁਪਕਮ੍ਪਤਿ;
ਵਿਰਤ੍ਤਂ ਰਜਨੀਯੇਸੁ, ਕੋਪਨੀਯੇ ਨ ਕੁਪ੍ਪਤਿ;
ਯਸ੍ਸੇਵਂ ਭਾਵਿਤਂ ਚਿਤ੍ਤਂ, ਕੁਤੋ ਤਂ ਦੁਕ੍ਖਮੇਸ੍ਸਤੀ’’ਤਿ. (ਉਦਾ. ੩੪);
ਏਤ੍ਥ ਚ ‘‘ਕੁਤੋ ਤਂ ਦੁਕ੍ਖਮੇਸ੍ਸਤੀ’’ਤਿ ਭਗਵਤਾ ਵੁਤ੍ਤਵਚਨੇਨ ‘‘ਤੇਨ ਪਹਾਰੇਨ ਨ ਕੋਚਿ ਆਬਾਧੋ ਅਹੋਸੀ’’ਤਿ ਅਟ੍ਠਕਥਾਵਚਨਂ ਅਤਿਵਿਯ ਸਮੇਤਿ. ਤਸ੍ਮਾ ‘‘ਅਪਿਚ ਮੇ ਸੀਸਂ ਥੋਕਂ ਦੁਕ੍ਖ’’ਨ੍ਤਿ ਵਚਨੇਨ ਦੁਕ੍ਖਵੇਦਨਾ ਨ ਹੋਤਿ, ਸੀਸਸ੍ਸ ਪਨ ਅਕਮ੍ਮਞ੍ਞਭਾਵਂ ਸਨ੍ਧਾਯ ‘‘ਦੁਕ੍ਖ’’ਨ੍ਤਿ ਵੁਤ੍ਤਂ. ਲੋਕੇਪਿ ਹਿ ਅਕਿਚ੍ਛੇਨ ਪਰਿਹਰਿਤੁਂ ਸਕ੍ਕੁਣੇਯ੍ਯੋ ਸੁਖਸੀਲੋ, ਕਿਚ੍ਛੇਨ ਪਰਿਹਰਿਤੁਂ ਸਕ੍ਕੁਣੇਯ੍ਯੋ ਦੁਕ੍ਖਸੀਲੋਤਿ ਵੁਚ੍ਚਤਿ. ਤਮ੍ਪਿ ਖੋ ਅਕਮ੍ਮਞ੍ਞਤਂ ਸਮਾਪਤ੍ਤਿਤੋ ਵੁਟ੍ਠਿਤਸਮਯਤ੍ਤਾ ਅਹੋਸੀਤਿ ਵੇਦਿਤਬ੍ਬੋ. ਸਮਾਪਤ੍ਤਿਅਪ੍ਪਿਤਸਮਯੇ ਹਿ ਤਮ੍ਪਿ ਨ ਭਵੇਯ੍ਯਾਤਿ. ‘‘ਏਤਰਹਿ ਪਂਸੁਪਿਸਾਚਕਮ੍ਪਿ ਨ ਪਸ੍ਸਾਮਾ’’ਤਿ ਦਟ੍ਠੁਂ ਅਸਮਤ੍ਥਤਾਯ ਨ ਵੁਤ੍ਤਂ, ਅਭਿਞ੍ਞਾਸੁ ਬ੍ਯਾਪਾਰਾਭਾਵੇਨ ਵੁਤ੍ਤਂ. ਥੇਰੋ ਕਿਰ ‘‘ਪਚ੍ਛਿਮਾ ਜਨਤਾ ਪੋਥੁਜ੍ਜਨਿਕਾਯ ਇਦ੍ਧਿਯਾ ਸਾਰਸਞ੍ਞਾ ਮਾਹੇਸੁ’’ਨ੍ਤਿ ਪਚ੍ਛਿਮਂ ਜਨਤਂ ਅਨੁਕਮ੍ਪਮਾਨੋ ਯੇਭੁਯ੍ਯੇਨ ਇਦ੍ਧਿਂ ਨ ਵਲਞ੍ਜੇਸਿ. ਥੇਰਗਾਥਾਯ ਚ –
‘‘ਨੇਵ ਪੁਬ੍ਬੇਨਿਵਾਸਾਯ, ਨਪਿ ਦਿਬ੍ਬਸ੍ਸ ਚਕ੍ਖੁਨੋ;
ਚੇਤੋਪਰਿਯਾਯ ਇਦ੍ਧਿਯਾ, ਚੁਤਿਯਾ ਉਪਪਤ੍ਤਿਯਾ;
ਸੋਤਧਾਤੁਵਿਸੁਦ੍ਧਿਯਾ, ਪਣਿਧਿ ਮੇ ਨ ਵਿਜ੍ਜਤੀ’’ਤਿ. (ਥੇਰਗਾ. ੯੯੬) –
ਥੇਰੇਨ ਸਯਮੇਵ ਅਭਿਞ੍ਞਾਸੁ ਪਤ੍ਥਨਾਭਾਵੋ ਵੁਤ੍ਤੋ. ਥੇਰੋ ਪਨ ਸਤ੍ਤਸਟ੍ਠਿਯਾ ਸਾਵਕਪਾਰਮੀਞਾਣੇਸੁ ਪਾਰਮਿਪ੍ਪਤ੍ਤੋਤਿ.
ਸਞ੍ਜੀਵਤ੍ਥੇਰਂ ਪਨ ਕਕੁਸਨ੍ਧਸ੍ਸ ਭਗਵਤੋ ਦੁਤਿਯਅਗ੍ਗਸਾਵਕਂ ਨਿਰੋਧਸਮਾਪਨ੍ਨਂ ‘‘ਕਾਲਙ੍ਕਤੋ’’ਤਿ ਸਲ੍ਲਕ੍ਖੇਤ੍ਵਾ ਗੋਪਾਲਕਾਦਯੋ ਤਿਣਕਟ੍ਠਾਦੀਨਿ ਸਂਕਡ੍ਢਿਤ੍ਵਾ ਅਗ੍ਗਿਂ ਅਦਂਸੁ. ਥੇਰਸ੍ਸ ਚੀਵਰੇ ਅਂਸੁਮਤ੍ਤਮ੍ਪਿ ਨ ਝਾਯਿਤ੍ਥ. ਅਯਮਸ੍ਸਾਯਸ੍ਮਤੋ ਅਨੁਪੁਬ੍ਬਸਮਾਪਤ੍ਤਿਵਸੇਨ ਪਵਤ੍ਤਸਮਥਾਨੁਭਾਵਨਿਬ੍ਬਤ੍ਤਤ੍ਤਾ ਸਮਾਧਿਵਿਪ੍ਫਾਰਾ ਇਦ੍ਧਿ. ਯਥਾਹ –
‘‘ਤੇਨ ਖੋ ਪਨ, ਪਾਪਿਮ, ਸਮਯੇਨ ਕਕੁਸਨ੍ਧੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਲੋਕੇ ਉਪ੍ਪਨ੍ਨੋ ਹੋਤਿ. ਕਕੁਸਨ੍ਧਸ੍ਸ ਖੋ ਪਨ, ਪਾਪਿਮ, ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਵਿਧੁਰਸਞ੍ਜੀਵਂ ਨਾਮ ਸਾਵਕਯੁਗਂ ਅਹੋਸਿ ਅਗ੍ਗਂ ਭਦ੍ਦਯੁਗਂ. ਯਾਵਤਾ ਪਨ, ਪਾਪਿਮ, ਕਕੁਸਨ੍ਧਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਸਾਵਕਾ. ਤੇਸੁ ਨ ਚ ਕੋਚਿ ਆਯਸ੍ਮਤਾ ਵਿਧੁਰੇਨ ਸਮਸਮੋ ਹੋਤਿ ਯਦਿਦਂ ਧਮ੍ਮਦੇਸਨਾਯ. ਇਮਿਨਾ ਖੋ ਏਤਂ, ਪਾਪਿਮ, ਪਰਿਯਾਯੇਨ ਆਯਸ੍ਮਤੋ ਵਿਧੁਰਸ੍ਸ ਵਿਧੁਰੋਤੇਵ ਸਮਞ੍ਞਾ ਉਦਪਾਦਿ. ਆਯਸ੍ਮਾ ਪਨ, ਪਾਪਿਮ, ਸਞ੍ਜੀਵੋ ਅਰਞ੍ਞਗਤੋਪਿ ਰੁਕ੍ਖਮੂਲਗਤੋਪਿ ਸੁਞ੍ਞਾਗਾਰਗਤੋਪਿ ਅਪ੍ਪਕਸਿਰੇਨੇਵ ਸਞ੍ਞਾਵੇਦਯਿਤਨਿਰੋਧਂ ਸਮਾਪਜ੍ਜਤਿ.
‘‘ਭੂਤਪੁਬ੍ਬਂ, ਪਾਪਿਮ, ਆਯਸ੍ਮਾ ਸਞ੍ਜੀਵੋ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਨਿਸਿਨ੍ਨੋ ਹੋਤਿ. ਅਦ੍ਦਸਂਸੁ ਖੋ, ਪਾਪਿਮ, ਗੋਪਾਲਕਾ ਪਸੁਪਾਲਕਾ ਕਸ੍ਸਕਾ ਪਥਾਵਿਨੋ ਆਯਸ੍ਮਨ੍ਤਂ ਸਞ੍ਜੀਵਂ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਂ, ਦਿਸ੍ਵਾਨ ਤੇਸਂ ਏਤਦਹੋਸਿ – ‘ਅਚ੍ਛਰਿਯਂ ਵਤ ਭੋ, ਅਬ੍ਭੁਤਂ ਵਤ ਭੋ, ਅਯਂ ਸਮਣੋ ਨਿਸਿਨ੍ਨਕੋ ਕਾਲਙ੍ਕਤੋ, ਹਨ੍ਦ ਨਂ ਦਹਾਮਾ’ਤਿ.
‘‘ਅਥ ਖੋ ਤੇ, ਪਾਪਿਮ, ਗੋਪਾਲਕਾ ਪਸੁਪਾਲਕਾ ਕਸ੍ਸਕਾ ਪਥਾਵਿਨੋ ਤਿਣਞ੍ਚ ਕਟ੍ਠਞ੍ਚ ਗੋਮਯਞ੍ਚ ਸਂਕਡ੍ਢਿਤ੍ਵਾ ਆਯਸ੍ਮਤੋ ਸਞ੍ਜੀਵਸ੍ਸ ਕਾਯੇ ਉਪਚਿਨਿਤ੍ਵਾ ਅਗ੍ਗਿਂ ਦਤ੍ਵਾ ਪਕ੍ਕਮਿਂਸੁ. ਅਥ ਖੋ, ਪਾਪਿਮ, ਆਯਸ੍ਮਾ ਸਞ੍ਜੀਵੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਤਾਯ ਸਮਾਪਤ੍ਤਿਯਾ ਵੁਟ੍ਠਹਿਤ੍ਵਾ ਚੀਵਰਾਨਿ ਪਪ੍ਫੋਟੇਤ੍ਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਗਾਮਂ ਪਿਣ੍ਡਾਯ ਪਾਵਿਸਿ. ਅਦ੍ਦਸਂਸੁ ਖੋ ਤੇ, ਪਾਪਿਮ, ਗੋਪਾਲਕਾ ਪਸੁਪਾਲਕਾ ਕਸ੍ਸਕਾ ਪਥਾਵਿਨੋ ਆਯਸ੍ਮਨ੍ਤਂ ਸਞ੍ਜੀਵਂ ਪਿਣ੍ਡਾਯ ਚਰਨ੍ਤਂ, ਦਿਸ੍ਵਾਨ ਨੇਸਂ ਏਤਦਹੋਸਿ – ‘ਅਚ੍ਛਰਿਯਂ ਵਤ ਭੋ, ਅਬ੍ਭੁਤਂ ਵਤ ਭੋ, ਅਯਂ ਸਮਣੋ ਨਿਸਿਨ੍ਨਕੋਵ ਕਾਲਙ੍ਕਤੋ, ਸ੍ਵਾਯਂ ਪਟਿਸਞ੍ਜੀਵਿਤੋ’ਤਿ. ਇਮਿਨਾ ਖੋ ਏਵਂ, ਪਾਪਿਮ, ਪਰਿਯਾਯੇਨ ਆਯਸ੍ਮਤੋ ਸਞ੍ਜੀਵਸ੍ਸ ਸਞ੍ਜੀਵੋਤੇਵ ਸਮਞ੍ਞਾ ਉਦਪਾਦੀ’’ਤਿ (ਮ. ਨਿ. ੧.੫੦੭).
ਖਾਣੁਕੋਣ੍ਡਞ੍ਞਤ੍ਥੇਰੋ ਪਨ ਪਕਤਿਯਾਵ ਸਮਾਪਤ੍ਤਿਬਹੁਲੋ, ਸੋ ਅਞ੍ਞਤਰਸ੍ਮਿਂ ਅਰਞ੍ਞੇ ਰਤ੍ਤਿਂ ਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਿ, ਪਞ੍ਚਸਤਾ ਚੋਰਾ ਭਣ੍ਡਕਂ ਥੇਨੇਤ੍ਵਾ ਗਚ੍ਛਨ੍ਤਾ ‘‘ਇਦਾਨਿ ਅਮ੍ਹਾਕਂ ਅਨੁਪਦਂ ਗਚ੍ਛਨ੍ਤਾ ਨਤ੍ਥੀ’’ਤਿ ਵਿਸ੍ਸਮਿਤੁਕਾਮਾ ਭਣ੍ਡਕਂ ਓਰੋਪਯਮਾਨਾ ‘‘ਖਾਣੁਕੋ ਅਯ’’ਨ੍ਤਿ ਮਞ੍ਞਮਾਨਾ ਥੇਰਸ੍ਸੇਵ ਉਪਰਿ ਸਬ੍ਬਭਣ੍ਡਕਾਨਿ ਠਪੇਸੁਂ. ਤੇਸਂ ਵਿਸ੍ਸਮਿਤ੍ਵਾ ਗਚ੍ਛਨ੍ਤਾਨਂ ਪਠਮਂ ਠਪਿਤਭਣ੍ਡਕਸ੍ਸ ਗਹਣਕਾਲੇ ਕਾਲਪਰਿਚ੍ਛੇਦਵਸੇਨ ਥੇਰੋ ਵੁਟ੍ਠਾਸਿ. ਤੇ ਥੇਰਸ੍ਸ ਚਲਨਾਕਾਰਂ ਦਿਸ੍ਵਾ ਭੀਤਾ ਵਿਰਵਿਂਸੁ. ਥੇਰੋ ‘‘ਮਾ ਭਾਯਥ, ਉਪਾਸਕਾ, ਭਿਕ੍ਖੁ ਅਹ’’ਨ੍ਤਿ ਆਹ. ਤੇ ਆਗਨ੍ਤ੍ਵਾ ਵਨ੍ਦਿਤ੍ਵਾ ਥੇਰਗਤੇਨ ਪਸਾਦੇਨ ਪਬ੍ਬਜਿਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿਂਸੁ. ਤਤੋ ਪਭੁਤਿ ਚ ਥੇਰੋ ਖਾਣੁਕੋਣ੍ਡਞ੍ਞਤ੍ਥੇਰੋ ਨਾਮ ਅਹੋਸਿ. ਅਯਮੇਤ੍ਥ ਪਞ੍ਚਹਿ ਭਣ੍ਡਕਸਤੇਹਿ ਅਜ੍ਝੋਤ੍ਥਟਸ੍ਸ ਤਸ੍ਸਾਯਸ੍ਮਤੋ ਆਬਾਧਾਭਾਵੋ ਸਮਾਧਿਵਿਪ੍ਫਾਰਾ ਇਦ੍ਧਿ.
ਉਤ੍ਤਰਾ (ਅ. ਨਿ. ਅਟ੍ਠ. ੧.੧.੨੬੨) ਪਨ ਉਪਾਸਿਕਾ ਰਾਜਗਹੇ ਮਹਾਧਨਸ੍ਸ ਪੁਣ੍ਣਸ੍ਸ ਸੇਟ੍ਠਿਨੋ ਧੀਤਾ, ਕੁਮਾਰਿਕਕਾਲੇਯੇਵ ਸਦ੍ਧਿਂ ਮਾਤਾਪਿਤੂਹਿ ਸੋਤਾਪਤ੍ਤਿਫਲਂ ਪਤ੍ਤਾ, ਸਾ ਵਯਪ੍ਪਤ੍ਤਾ ਰਾਜਗਹਸੇਟ੍ਠਿਨੋ ਮਹਤਾ ਨਿਬਨ੍ਧੇਨ ਤਸ੍ਸ ਪੁਤ੍ਤਸ੍ਸ ਮਿਚ੍ਛਾਦਿਟ੍ਠਿਕਸ੍ਸ ਦਿਨ੍ਨਾ. ਸਾ ਬੁਦ੍ਧਦਸ੍ਸਨਾਯ ਧਮ੍ਮਸ੍ਸਵਨਾਯ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਾਨਞ੍ਚ ਦਾਤੁਂ ਧਮ੍ਮਞ੍ਚ ਸੋਤੁਂ ਓਕਾਸਂ ਅਲਭਮਾਨਾ ਉਪਦ੍ਦੁਤਾ ਹੁਤ੍ਵਾ ਤਸ੍ਮਿਂਯੇਵ ਨਗਰੇ ਸਿਰਿਮਂ ਨਾਮ ਗਣਿਕਂ ਪਕ੍ਕੋਸਾਪੇਤ੍ਵਾ ਓਕਾਸਕਰਣਤ੍ਥਮੇਵ ਪਿਤੁ ਘਰਾਵ ਆਨੀਤਾਨਿ ਪਞ੍ਚਦਸਕਹਾਪਣਸਹਸ੍ਸਾਨਿ ਤਸ੍ਸਾ ਦਤ੍ਵਾ ‘‘ਇਮੇ ਕਹਾਪਣੇ ਗਹੇਤ੍ਵਾ ਇਮਂ ਅਡ੍ਢਮਾਸਂ ਸੇਟ੍ਠਿਪੁਤ੍ਤਂ ਪਰਿਚਰਾਹੀ’’ਤਿ ਤਂ ਸਾਮਿਕਸ੍ਸ ਅਪ੍ਪੇਤ੍ਵਾ ਸਯਂ ਉਪੋਸਥਙ੍ਗਾਨਿ ਅਧਿਟ੍ਠਾਯ ‘‘ਇਮਂ ਅਡ੍ਢਮਾਸਂ ਬੁਦ੍ਧਦਸ੍ਸਨਾਦੀਨਿ ਲਭਿਸ੍ਸਾਮੀ’’ਤਿ ਤੁਟ੍ਠਮਾਨਸਾ ਯਾਵ ਪਵਾਰਣਾਯ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤਾਪੇਤ੍ਵਾ ਅਡ੍ਢਮਾਸਂ ਮਹਾਦਾਨਂ ਅਦਾਸਿ, ਪਚ੍ਛਾਭਤ੍ਤਂ ਮਹਾਨਸੇ ਖਜ੍ਜਭੋਜ੍ਜਾਦੀਨਿ ਸਂਵਿਦਹਾਪੇਤਿ. ਤਸ੍ਸਾ ਸਾਮਿਕੋ ‘‘ਸ੍ਵੇ ਪਵਾਰਣਾ’’ਤਿ ਸਿਰਿਮਾਯ ਸਹ ਵਾਤਪਾਨੇ ਠਤ੍ਵਾ ਬਹਿ ਓਲੋਕੇਨ੍ਤੋ ਤਂ ਤਥਾਵਿਚਰਨ੍ਤਿਂ ਸੇਦਕਿਲਿਨ੍ਨਂ ਛਾਰਿਕਾਯ ਓਕਿਣ੍ਣਂ ਅਙ੍ਗਾਰਮਸਿਮਕ੍ਖਿਤਂ ਦਿਸ੍ਵਾ ‘‘ਅਤ੍ਤਨੋ ਸਮ੍ਪਤ੍ਤਿਂ ਅਭੁਞ੍ਜਿਤ੍ਵਾ ਕੁਸਲਂ ਨਾਮ ਕਰੋਤਿ ਬਾਲਾ’’ਤਿ ਹਸਿ. ਉਤ੍ਤਰਾਪਿ ਤਂ ਓਲੋਕੇਤ੍ਵਾ ‘‘ਸਮ੍ਪਰਾਯਤ੍ਥਂ ਕੁਸਲਂ ਨ ਕਰੋਤਿ ਬਾਲੋ’’ਤਿ ਹਸਿ.
ਸਿਰਿਮਾ ਉਭਿਨ੍ਨਮ੍ਪਿ ਤਂ ਕਿਰਿਯਂ ਦਿਸ੍ਵਾ ‘‘ਅਹਂ ਘਰਸਾਮਿਨੀ’’ਤਿ ਮਞ੍ਞਮਾਨਾ ਇਸ੍ਸਾਪਕਤਾ ਉਤ੍ਤਰਾਯ ਕੁਜ੍ਝਿਤ੍ਵਾ ‘‘ਦੁਕ੍ਖਂ ਉਪ੍ਪਾਦੇਸ੍ਸਾਮੀ’’ਤਿ ਪਾਸਾਦਾ ਓਤਰਤਿ. ਉਤ੍ਤਰਾ ਤਂ ਞਤ੍ਵਾ ਪੀਠਕੇ ਨਿਸੀਦਿਤ੍ਵਾ ਤਂ ਮੇਤ੍ਤੇਨ ਚਿਤ੍ਤੇਨ ਫਰਿ. ਸਿਰਿਮਾ ਪਾਸਾਦਾ ਓਰੁਯ੍ਹ ਮਹਾਨਸਂ ਪਵਿਸਿਤ੍ਵਾ ਪੂਵਪਚਨਤੋ ਉਲ਼ੁਙ੍ਕਪੂਰਂ ਪਕ੍ਕੁਥਿਤਂ ਸਪ੍ਪਿਂ ਗਹੇਤ੍ਵਾ ਤਸ੍ਸਾ ਮਤ੍ਥਕੇ ਓਕਿਰਿ. ਤਂ ਪਦੁਮਿਨਿਪਣ੍ਣੇ ਸੀਤੂਦਕਂ ਵਿਯ ਵਿਨਿਵਟ੍ਟੇਤ੍ਵਾ ਅਗਮਾਸਿ. ਦਾਸਿਯੋ ਸਿਰਿਮਂ ਹਤ੍ਥੇਹਿ ਪਾਦੇਹਿ ਪੋਥੇਤ੍ਵਾ ਭੂਮਿਯਂ ਪਾਤੇਸੁਂ. ਉਤ੍ਤਰਾ ਮੇਤ੍ਤਾਝਾਨਤੋ ਵੁਟ੍ਠਾਯ ਦਾਸਿਯੋ ਵਾਰੇਸਿ. ਸਿਰਿਮਾ ਉਤ੍ਤਰਂ ਖਮਾਪੇਸਿ. ਉਤ੍ਤਰਾ ‘‘ਸ੍ਵੇ ਸਤ੍ਥੁ ਪੁਰਤੋ ਖਮਾਪੇਹੀ’’ਤਿ ਵਤ੍ਵਾ ਤਾਯ ਕਾਯਵੇਯ੍ਯਾਵਟਿਕਂ ਯਾਚਿਤਾਯ ਬ੍ਯਞ੍ਜਨਸਮ੍ਪਾਦਨਂ ਆਚਿਕ੍ਖਿ. ਸਾ ਤਂ ਸਮ੍ਪਾਦੇਤ੍ਵਾ ਅਤ੍ਤਨੋ ਪਰਿਵਾਰਾ ਪਞ੍ਚਸਤਾ ਗਣਿਕਾਯੋ ਸਸਙ੍ਘਂ ਸਤ੍ਥਾਰਂ ਪਰਿਵਿਸਿਤ੍ਵਾ ‘‘ਖਮਾਪਨਸਹਾਯਿਕਾ ਹੋਥਾ’’ਤਿ ਵਤ੍ਵਾ ਪੁਨਦਿਵਸੇ ਤਥਾ ਤਾਹਿ ਗਣਿਕਾਹਿ ਸਦ੍ਧਿਂ ਸਤ੍ਥੁ ਭਤ੍ਤਕਿਚ੍ਚਾਵਸਾਨੇ ਸਤ੍ਥਾਰਂ ਵਨ੍ਦਿਤ੍ਵਾ ‘‘ਅਹਂ ਭਗਵਾ ਉਤ੍ਤਰਾਯ ਅਪਰਜ੍ਝਿਂ, ਖਮਤੁ ਮੇ ਉਤ੍ਤਰਾ’’ਤਿ ਆਹ. ਸਤ੍ਥਾ ‘‘ਖਮ, ਉਤ੍ਤਰੇ’’ਤਿ ਵਤ੍ਵਾ ‘‘ਖਮਾਮਿ, ਭਗਵਾ’’ਤਿ ਵੁਤ੍ਤੇ ‘‘ਅਕ੍ਕੋਧੇਨ ਜਿਨੇ ਕੋਧ’’ਨ੍ਤਿਆਦਿਕਂ (ਧ. ਪ. ੨੨੩) ਧਮ੍ਮਂ ਦੇਸੇਸਿ. ਉਤ੍ਤਰਾ ਪੁਰੇਤਰਮੇਵ ਸਾਮਿਕਞ੍ਚ ਸਸ੍ਸੁਸਸੁਰੇ ਚ ਸਤ੍ਥੁ ਸਨ੍ਤਿਕੇ ਉਪਨੇਸਿ. ਦੇਸਨਾਵਸਾਨੇ ਤੇ ਚ ਤਯੋ ਜਨਾ, ਸਬ੍ਬਾ ਚ ਗਣਿਕਾਯੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੂਤਿ. ਏਵਂ ਉਤ੍ਤਰਾਯ ਉਪਾਸਿਕਾਯ ਪਕ੍ਕੁਥਿਤਸਪ੍ਪਿਨਾ ਪੀਲ਼ਾਭਾਵੋ ਸਮਾਧਿਵਿਪ੍ਫਾਰਾ ਇਦ੍ਧਿ.
ਸਾਮਾਵਤੀ ਉਪਾਸਿਕਾ ਨਾਮ ਕੋਸਮ੍ਬਿਯਂ ਉਦੇਨਸ੍ਸ ਰਞ੍ਞੋ ਅਗ੍ਗਮਹੇਸੀ. ਤਸ੍ਸ ਹਿ ਰਞ੍ਞੋ ਪਞ੍ਚਸਤਪਞ੍ਚਸਤਇਤ੍ਥਿਪਰਿਵਾਰਾ ਤਿਸ੍ਸੋ ਅਗ੍ਗਮਹੇਸਿਯੋ ਅਹੇਸੁਂ. ਤਾਸਂ ਸਾਮਾਵਤੀ ਭਦ੍ਦਿਯਨਗਰੇ ਭਦ੍ਦਿਯਸੇਟ੍ਠਿਨੋ ਧੀਤਾ. ਪਿਤਰਿ ਕਾਲਙ੍ਕਤੇ ਪਿਤੁ ਸਹਾਯਕਸ੍ਸ ਕੋਸਮ੍ਬਿਯਂ ਘੋਸਿਤਸੇਟ੍ਠਿਨੋ ਘਰੇ ਪਞ੍ਚਸਤਇਤ੍ਥਿਪਰਿਵਾਰਵਡ੍ਢਿਤਂ ਵਯਪ੍ਪਤ੍ਤਂ ਰਾਜਾ ਦਿਸ੍ਵਾ ਸਞ੍ਜਾਤਸਿਨੇਹੋ ਸਪਰਿਵਾਰਮਤ੍ਤਨੋ ਘਰਂ ਨੇਤ੍ਵਾ ਅਭਿਸੇਕਟ੍ਠਾਨਂ ਅਦਾਸਿ. ਚਣ੍ਡਪਜ੍ਜੋਤਸ੍ਸ ਰਞ੍ਞੋ ਧੀਤਾ ਵਾਸੁਲਦਤ੍ਤਾ ਨਾਮ ਏਕਾ ਮਹੇਸੀ. ਮਾਗਣ੍ਡਿਯਬ੍ਰਾਹ੍ਮਣਸ੍ਸ ਧੀਤਾ ਭਗਵਤੋ ਪਾਦਪਰਿਚਾਰਿਕਂ ਕਤ੍ਵਾ ਪਿਤਰਾ ਦਿਯ੍ਯਮਾਨਾ –
‘‘ਦਿਸ੍ਵਾਨ ਤਣ੍ਹਂ ਅਰਤਿਂ ਰਗਞ੍ਚ, ਨਾਹੋਸਿ ਛਨ੍ਦੋ ਅਪਿ ਮੇਥੁਨਸ੍ਮਿਂ;
ਕਿਮੇਵਿਦਂ ਮੁਤ੍ਤਕਰੀਸਪੁਣ੍ਣਂ, ਪਾਦਾਪਿ ਨਂ ਸਮ੍ਫੁਸਿਤੁਂ ਨ ਇਚ੍ਛੇ’’ਤਿ. (ਸੁ. ਨਿ. ੮੪੧) –
ਭਗਵਤਾ ਭਾਸਿਤਂ ਗਾਥਂ ਸੁਤ੍ਵਾ ਭਗਵਤਿ ਆਘਾਤਂ ਬਨ੍ਧਿ. ਤਸ੍ਸਾ ਮਾਤਾਪਿਤਰੋ ਮਾਗਣ੍ਡਿਯਸੁਤ੍ਤਦੇਸਨਾਵਸਾਨੇ ਅਨਾਗਾਮਿਫਲਂ ਪਤ੍ਵਾ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ. ਤਸ੍ਸਾ ਚੂਲ਼ਪਿਤਾ ਮਾਗਣ੍ਡਿਯੋ ਤਂ ਕੋਸਮ੍ਬਿਂ ਨੇਤ੍ਵਾ ਰਞ੍ਞੋ ਅਦਾਸਿ. ਸਾ ਰਞ੍ਞੋ ਏਕਾ ਮਹੇਸੀ.
ਅਥ ਖੋ ਘੋਸਿਤਸੇਟ੍ਠਿ ਕੁਕ੍ਕੁਟਸੇਟ੍ਠਿ ਪਾਵਾਰਿਕਸੇਟ੍ਠੀਤਿ ਤਯੋ ਸੇਟ੍ਠਿਨੋ ਲੋਕੇ ਤਥਾਗਤੁਪ੍ਪਾਦਂ ਸੁਤ੍ਵਾ ਜੇਤਵਨਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਸੋਤਾਪਤ੍ਤਿਫਲਂ ਪਤ੍ਵਾ ਅਡ੍ਢਮਾਸਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਸਤ੍ਥੁ ਕੋਸਮ੍ਬਿਗਮਨਂ ਆਯਾਚਿਤ੍ਵਾ ਕੋਸਮ੍ਬਿਂ ਗਨ੍ਤ੍ਵਾ ਘੋਸਿਤਾਰਾਮੋ ਕੁਕ੍ਕੁਟਾਰਾਮੋ ਪਾਵਾਰਿਕਾਰਾਮੋਤਿ ਤਯੋ ਜਨਾ ਤਯੋ ਆਰਾਮੇ ਕਾਰਾਪੇਤ੍ਵਾ ਅਨੁਪੁਬ੍ਬੇਨ ਤਤ੍ਥ ਆਗਤਂ ਸਤ੍ਥਾਰਂ ਪਟਿਪਾਟਿਯਾ ਏਕੇਕਸ੍ਮਿਂ ਦਿਵਸੇ ਏਕੇਕਸ੍ਮਿਂ ਵਿਹਾਰੇ ਵਸਾਪੇਤ੍ਵਾ ਏਕੇਕੋ ਸਸਙ੍ਘਸ੍ਸ ਭਗਵਤੋ ਮਹਾਦਾਨਮਦਾਸਿ. ਅਥੇਕਦਿਵਸਂ ਤੇਸਂ ਉਪਟ੍ਠਾਕੋ ਸੁਮਨੋ ਨਾਮ ਮਾਲਾਕਾਰੋ ਸੇਟ੍ਠਿਨੋ ਆਯਾਚਿਤ੍ਵਾ ਸਸਙ੍ਘਂ ਸਤ੍ਥਾਰਂ ਭੋਜੇਤੁਂ ਅਤ੍ਤਨੋ ਘਰੇ ਨਿਸੀਦਾਪੇਸਿ. ਤਸ੍ਮਿਂ ਖਣੇ ਸਾਮਾਵਤਿਯਾ ਪਰਿਚਾਰਿਕਾ ਖੁਜ੍ਜੁਤ੍ਤਰਾ ਨਾਮ ਦਾਸੀ ਅਟ੍ਠ ਕਹਾਪਣੇ ਗਹੇਤ੍ਵਾ ਤਸ੍ਸ ਘਰਂ ਅਗਮਾਸਿ. ਸੋ ‘‘ਸਸਙ੍ਘਸ੍ਸ ਤਾਵ ਸਤ੍ਥੁਨੋ ਪਰਿਵੇਸਨਸਹਾਯਾ ਹੋਹੀ’’ਤਿ ਆਹ. ਸਾ ਤਥਾ ਕਤ੍ਵਾ ਸਤ੍ਥੁ ਭਤ੍ਤਕਿਚ੍ਚਾਵਸਾਨੇ ਧਮ੍ਮਦੇਸਨਂ ਸੁਤ੍ਵਾ ਸੋਤਾਪਨ੍ਨਾ ਹੁਤ੍ਵਾ ਅਞ੍ਞਦਾ ਚਤ੍ਤਾਰੋ ਕਹਾਪਣੇ ਅਤ੍ਤਨੋ ਆਦਿਯਨ੍ਤੀ ਅਦਿਨ੍ਨਂ ਆਦਿਯਿਤੁਂ ਅਭਬ੍ਬਤ੍ਤਾ ਅਟ੍ਠਹਿ ਕਹਾਪਣੇਹਿ ਪੁਪ੍ਫਾਨਿ ਆਦਾਯ ਸਾਮਾਵਤਿਯਾ ਉਪਨਾਮੇਸਿ. ਤਾਯ ਪੁਪ੍ਫਾਨਂ ਬਹੁਭਾਵਕਾਰਣਂ ਪੁਟ੍ਠਾ ਮੁਸਾ ਭਣਿਤੁਂ ਅਭਬ੍ਬਤ੍ਤਾ ਯਥਾਸਭਾਵਂ ਆਹ. ‘‘ਅਜ੍ਜ ਕਸ੍ਮਾ ਨ ਗਣ੍ਹੀ’’ਤਿ ਵੁਤ੍ਤਾ ‘‘ਸਮ੍ਮਾਸਮ੍ਬੁਦ੍ਧਸ੍ਸ ਧਮ੍ਮਂ ਸੁਤ੍ਵਾ ਅਮਤਂ ਸਚ੍ਛਾਕਾਸਿ’’ਨ੍ਤਿ ਆਹ. ‘‘ਅਮ੍ਮ ਉਤ੍ਤਰੇ, ਤਂ ਧਮ੍ਮਂ ਅਮ੍ਹਾਕਮ੍ਪਿ ਕਥੇਹੀ’’ਤਿ. ‘‘ਤੇਨ ਹਿ ਮਂ ਨ੍ਹਾਪੇਤ੍ਵਾ ਸੁਦ੍ਧਂ ਵਤ੍ਥਯੁਗਂ ਦਤ੍ਵਾ ਉਚ੍ਚੇ ਆਸਨੇ ਨਿਸੀਦਾਪੇਤ੍ਵਾ ਸਬ੍ਬਾ ਨੀਚਾਸਨੇਸੁ ਨਿਸੀਦਥਾ’’ਤਿ ਆਹ. ਤਾ ਸਬ੍ਬਾਪਿ ਤਥਾ ਕਰਿਂਸੁ. ਸਾ ਸੇਖਪਟਿਸਮ੍ਭਿਦਪ੍ਪਤ੍ਤਾ ਅਰਿਯਸਾਵਿਕਾ ਏਕਂ ਵਤ੍ਥਂ ਨਿਵਾਸੇਤ੍ਵਾ ਏਕਂ ਉਤ੍ਤਰਾਸਙ੍ਗਂ ਕਤ੍ਵਾ ਬੀਜਨਿਂ ਗਹੇਤ੍ਵਾ ਤਾਸਂ ਧਮ੍ਮਂ ਦੇਸੇਸਿ. ਸਾਮਾਵਤੀ ਚ ਪਞ੍ਚਸਤਾ ਚ ਇਤ੍ਥਿਯੋ ਸੋਤਾਪਤ੍ਤਿਫਲਂ ਪਾਪੁਣਿਂਸੁ. ਤਾ ਸਬ੍ਬਾਪਿ ਖੁਜ੍ਜੁਤ੍ਤਰਂ ਵਨ੍ਦਿਤ੍ਵਾ ‘‘ਅਮ੍ਮ, ਅਜ੍ਜਤੋ ਪਟ੍ਠਾਯ ਵੇਯ੍ਯਾਵਚ੍ਚਂ ਅਕਤ੍ਵਾ ਅਮ੍ਹਾਕਂ ਮਾਤੁਟ੍ਠਾਨੇ ਆਚਰਿਯਟ੍ਠਾਨੇ ਚ ਠਤ੍ਵਾ ਸਤ੍ਥਾਰਾ ਦੇਸਿਤਦੇਸਿਤਂ ਧਮ੍ਮਂ ਸੁਤ੍ਵਾ ਅਮ੍ਹਾਕਂ ਕਥੇਹੀ’’ਤਿ ਆਹਂਸੁ. ਸਾ ਤਥਾ ਕਰੋਨ੍ਤੀ ਅਪਰਭਾਗੇ ਤਿਪਿਟਕਧਰਾ ਹੁਤ੍ਵਾ ਸਤ੍ਥਾਰਾ ਬਹੁਸ੍ਸੁਤਾਨਂ ਉਪਾਸਿਕਾਨਂ ਅਗ੍ਗਟ੍ਠਾਨੇ ਠਪਿਤਾ ਅਗ੍ਗਟ੍ਠਾਨਂ ਲਭਿ. ਸਾਮਾਵਤਿਮਿਸ੍ਸਿਕਾ ਬੁਦ੍ਧਸ੍ਸ ਦਸ੍ਸਨਂ ਪਿਹੇਨ੍ਤਿ, ਦਸਬਲੇ ਅਨ੍ਤਰਵੀਥਿਂ ਪਟਿਪਨ੍ਨੇ ਵਾਤਪਾਨੇਸੁ ਅਪ੍ਪਹੋਨ੍ਤੇਸੁ ਭਿਤ੍ਤਿਂ ਭਿਨ੍ਦਿਤ੍ਵਾ ਸਤ੍ਥਾਰਂ ਓਲੋਕੇਨ੍ਤਿ, ਵਨ੍ਦਨਪੂਜਨਞ੍ਚ ਕਰੋਨ੍ਤਿ.
ਮਾਗਣ੍ਡਿਯਾ ਤਤ੍ਥ ਗਤਾ ਤਾਨਿ ਛਿਦ੍ਦਾਨਿ ਦਿਸ੍ਵਾ ਤਤ੍ਥ ਕਾਰਣਂ ਪੁਚ੍ਛਨ੍ਤੀ ਸਤ੍ਥੁ ਆਗਤਭਾਵਂ ਞਤ੍ਵਾ ਭਗਵਤਿ ਆਘਾਤੇਨ ਤਾਸਮ੍ਪਿ ਕੁਜ੍ਝਿਤ੍ਵਾ ‘‘ਮਹਾਰਾਜ, ਸਾਮਾਵਤਿਮਿਸ੍ਸਿਕਾਨਂ ਬਹਿਦ੍ਧਾ ਪਤ੍ਥਨਾ ਅਤ੍ਥਿ, ਭਿਤ੍ਤਿਂ ਭਿਨ੍ਦਿਤ੍ਵਾ ਸਮਣਂ ਗੋਤਮਂ ਓਲੋਕੇਨ੍ਤਿ, ਕਤਿਪਾਹੇਨ ਤਂ ਮਾਰੇਸ੍ਸਨ੍ਤੀ’’ਤਿ ਰਾਜਾਨਂ ਆਹ. ਰਾਜਾ ਛਿਦ੍ਦਾਨਿ ਦਿਸ੍ਵਾਪਿ ਤਸ੍ਸਾ ਵਚਨਂ ਨ ਸਦ੍ਦਹਿ, ਉਦ੍ਧਚ੍ਛਿਦ੍ਦਕਵਾਤਪਾਨਾਨਿ ਕਾਰਾਪੇਸਿ. ਪੁਨ ਮਾਗਣ੍ਡਿਯਾ ਰਾਜਾਨਂ ਤਾਸੁ ਭਿਨ੍ਦਿਤੁਕਾਮਾ ਅਟ੍ਠ ਸਜੀਵਕੁਕ੍ਕੁਟੇ ਆਹਰਾਪੇਤ੍ਵਾ ‘‘ਮਹਾਰਾਜ, ਤਾਸਂ ਵੀਮਂਸਨਤ੍ਥਂ ਇਮੇ ਕੁਕ੍ਕੁਟੇ ਮਾਰੇਤ੍ਵਾ ‘ਮਮਤ੍ਥਾਯ ਪਚਾਹੀ’ਤਿ ਪੇਸੇਹੀ’’ਤਿ ਆਹ. ਰਾਜਾ ਤਥਾ ਪੇਸੇਸਿ. ਤਾਯ ‘‘ਪਾਣਾਤਿਪਾਤਂ ਨ ਕਰੋਮਾ’’ਤਿ ਵੁਤ੍ਤੇ ਪੁਨ ‘‘ਤਸ੍ਸ ਸਮਣਸ੍ਸ ਗੋਤਮਸ੍ਸ ਪਚਿਤ੍ਵਾ ਪੇਸੇਹੀ’’ਤਿ ਆਹ. ਰਞ੍ਞਾ ਤਥਾ ਪੇਸਿਤੇ ਮਾਗਣ੍ਡਿਯਾ ਅਟ੍ਠ ਮਾਰਿਤਕੁਕ੍ਕੁਟੇ ਤਥਾ ਵਤ੍ਵਾ ਪੇਸੇਸਿ. ਸਾਮਾਵਤੀ ਪਚਿਤ੍ਵਾ ਦਸਬਲਸ੍ਸ ਪਾਹੇਸਿ. ਮਾਗਣ੍ਡਿਯਾ ਤੇਨਪਿ ਰਾਜਾਨਂ ਕੋਪੇਤੁਂ ਨਾਸਕ੍ਖਿ.
ਰਾਜਾ ਪਨ ਤੀਸੁ ਮਹੇਸੀਸੁ ਏਕੇਕਿਸ੍ਸਾ ਵਸਨਟ੍ਠਾਨੇ ਸਤ੍ਤ ਸਤ੍ਤ ਦਿਵਸਾਨਿ ਵਸਤਿ. ਰਾਜਾ ਅਤ੍ਤਨੋ ਗਮਨਟ੍ਠਾਨਂ ਹਤ੍ਥਿਕਨ੍ਤਵੀਣਂ ਆਦਾਯ ਗਚ੍ਛਤਿ. ਮਾਗਣ੍ਡਿਯਾ ਰਞ੍ਞੋ ਸਾਮਾਵਤਿਯਾ ਪਾਸਾਦਗਮਨਕਾਲੇ ਦਾਠਾ ਅਗਦੇਨ ਧੋਵਾਪੇਤ੍ਵਾ ਵੇਲ਼ੁਪਬ੍ਬੇ ਪਕ੍ਖਿਪਾਪੇਤ੍ਵਾ ਏਕਂ ਕਣ੍ਹਸਪ੍ਪਪੋਤਕਂ ਆਹਰਾਪੇਤ੍ਵਾ ਅਨ੍ਤੋਵੀਣਾਯ ਪਕ੍ਖਿਪਿਤ੍ਵਾ ਮਾਲਾਗੁਲ਼ਕੇਨ ਛਿਦ੍ਦਂ ਪਿਦਹਿ. ਤਂ ਰਞ੍ਞੋ ਤਤ੍ਥ ਗਤਕਾਲੇ ਅਪਰਾਪਰਂ ਵਿਚਰਨ੍ਤੀ ਵਿਯ ਹੁਤ੍ਵਾ ਵੀਣਾਛਿਦ੍ਦਤੋ ਮਾਲਾਗੁਲ਼ਕਂ ਅਪਨੇਸਿ. ਸਪ੍ਪੋ ਨਿਕ੍ਖਮਿਤ੍ਵਾ ਪਸ੍ਸਸਨ੍ਤੋ ਫਣਂ ਕਤ੍ਵਾ ਸਯਨਪਿਟ੍ਠੇ ਨਿਪਜ੍ਜਿ. ਸਾ ਆਹ – ‘‘ਧੀ ਸਪ੍ਪੋ’’ਤਿ ਮਹਾਸਦ੍ਦਮਕਾਸਿ. ਰਾਜਾ ਸਪ੍ਪਂ ਦਿਸ੍ਵਾ ਕੁਜ੍ਝਿ. ਸਾਮਾਵਤੀ ਰਞ੍ਞੋ ਕੁਦ੍ਧਭਾਵਂ ਞਤ੍ਵਾ ਪਞ੍ਚਨ੍ਨਂ ਇਤ੍ਥਿਸਤਾਨਂ ਸਞ੍ਞਮਦਾਸਿ ‘‘ਅਜ੍ਜ ਓਧਿਸਕਮੇਤ੍ਤਾਫਰਣੇਨ ਰਾਜਾਨਂ ਫਰਥਾ’’ਤਿ. ਸਯਮ੍ਪਿ ਤਥਾ ਅਕਾਸਿ. ਰਾਜਾ ਸਹਸ੍ਸਥਾਮਧਨੁਂ ਆਦਾਯ ਜਿਯਂ ਪੋਠੇਤ੍ਵਾ ਸਾਮਾਵਤਿਂ ਧੁਰੇ ਕਤ੍ਵਾ ਸਬ੍ਬਾ ਤਾ ਇਤ੍ਥਿਯੋ ਪਟਿਪਾਟਿਯਾ ਠਪਾਪੇਤ੍ਵਾ ਵਿਸਪੀਤਂ ਖੁਰਪ੍ਪਂ ਸਨ੍ਨਯ੍ਹਿਤ੍ਵਾ ਧਨੁਂ ਪੂਰੇਤ੍ਵਾ ਅਟ੍ਠਾਸਿ. ਖੁਰਪ੍ਪਂ ਨੇਵ ਖਿਪਿਤੁਂ, ਨ ਓਰੋਪਿਤੁਂ ਸਕ੍ਕੋਤਿ, ਗਤ੍ਤੇਹਿ ਸੇਦਾ ਮੁਚ੍ਚਨ੍ਤਿ, ਸਰੀਰਂ ਵੇਧਤਿ, ਮੁਖਤੋ ਖੇਲ਼ੋ ਪਤਤਿ, ਗਣ੍ਹਿਤਬ੍ਬਗਹਣਂ ਨ ਪਸ੍ਸਤਿ, ਅਥ ਨਂ ਸਾਮਾਵਤੀ ‘‘ਕਿਂ, ਮਹਾਰਾਜ, ਕਿਲਮਸੀ’’ਤਿ ਆਹ. ‘‘ਆਮ, ਦੇਵਿ, ਕਿਲਮਾਮਿ, ਅਵਸ੍ਸਯੋ ਮੇ ਹੋਹੀ’’ਤਿ. ‘‘ਸਾਧੁ, ਮਹਾਰਾਜ, ਖੁਰਪ੍ਪਂ ਪਥਵੀਮੁਖਂ ਕਰੋਹੀ’’ਤਿ. ਰਾਜਾ ਤਥਾ ਅਕਾਸਿ. ਸਾ ‘‘ਰਞ੍ਞੋ ਹਤ੍ਥਤੋ ਖੁਰਪ੍ਪਂ ਮੁਚ੍ਚਤੂ’’ਤਿ ਅਧਿਟ੍ਠਾਸਿ. ਤਸ੍ਮਿਂ ਖਣੇ ਖੁਰਪ੍ਪਂ ਮੁਚ੍ਚਿ. ਰਾਜਾ ਤਂਖਣਞ੍ਞੇਵ ਉਦਕੇ ਨਿਮੁਜ੍ਜਿਤ੍ਵਾ ਅਲ੍ਲਵਤ੍ਥੋ ਅਲ੍ਲਕੇਸੋ ਸਾਮਾਵਤਿਯਾ ਪਾਦੇਸੁ ਨਿਪਤਿਤ੍ਵਾ ‘‘ਖਮ, ਦੇਵਿ, ਮਯ੍ਹਂ –
‘ਸਮ੍ਮੁਯ੍ਹਾਮਿ ਪਮੁਯ੍ਹਾਮਿ, ਸਬ੍ਬਾ ਮੁਯ੍ਹਨ੍ਤਿ ਮੇ ਦਿਸਾ;
ਸਾਮਾਵਤੀ ਮਂ ਤਾਯਸ੍ਸੁ, ਤ੍ਵਞ੍ਚ ਮੇ ਸਰਣਂ ਭਵਾ’’’ਤਿ. – ਆਹ;
ਸਾਮਾਵਤੀ –
‘‘ਮਾ ਮਂ ਤ੍ਵਂ ਸਰਣਂ ਗਚ੍ਛ, ਯਮਹਂ ਸਰਣਂ ਗਤਾ;
ਸਰਣਂ ਗਚ੍ਛ ਤਂ ਬੁਦ੍ਧਂ, ਤ੍ਵਞ੍ਚ ਮੇ ਸਰਣਂ ਭਵਾ’’ਤਿ. –
ਆਹ. ਰਾਜਾ ‘‘ਤੇਨ ਹਿ ਤਂ ਸਰਣਂ ਗਚ੍ਛਾਮਿ ਸਤ੍ਥਾਰਞ੍ਚ, ਵਰਞ੍ਚ ਤੇ ਦਮ੍ਮੀ’’ਤਿ ਆਹ. ਸਾ ‘‘ਵਰੋ ਗਹਿਤੋ ਹੋਤੁ, ਮਹਾਰਾਜਾ’’ਤਿ ਆਹ. ਰਾਜਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਸਰਣਂ ਗਨ੍ਤ੍ਵਾ ਨਿਮਨ੍ਤੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ‘‘ਸਾਮਾਵਤਿਂ ਵਰਂ ਗਣ੍ਹਾਹੀ’’ਤਿ ਆਹ. ‘‘ਸਾਧੁ, ਮਹਾਰਾਜ, ਇਮਂ ਮੇ ਵਰਂ ਦੇਹਿ, ਸਤ੍ਥਾ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਇਧਾਗਚ੍ਛਤੁ, ਧਮ੍ਮਂ ਸੋਸ੍ਸਾਮੀ’’ਤਿ ਆਹ. ਰਾਜਾ ਸਤ੍ਥਾਰਂ ਵਨ੍ਦਿਤ੍ਵਾ ‘‘ਭਨ੍ਤੇ, ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਨਿਬਦ੍ਧਂ ਇਧਾਗਚ੍ਛਥ, ਸਾਮਾਵਤਿਮਿਸ੍ਸਿਕਾ ‘ਧਮ੍ਮਂ ਸੋਸ੍ਸਾਮਾ’ਤਿ ਵਦਨ੍ਤੀ’’ਤਿ ਆਹ. ਸਤ੍ਥਾ ‘‘ਮਹਾਰਾਜ, ਬੁਦ੍ਧਾਨਂ ਨਾਮ ਏਕਟ੍ਠਾਨਂ ਨਿਬਦ੍ਧਂ ਗਨ੍ਤੁਂ ਨ ਵਟ੍ਟਤਿ, ਮਹਾਜਨੋਪਿ ਪਚ੍ਚਾਸੀਸਤੀ’’ਤਿ ਆਹ. ‘‘ਤੇਨ ਹਿ, ਭਨ੍ਤੇ, ਭਿਕ੍ਖੂ ਆਣਾਪੇਥਾ’’ਤਿ. ਸਤ੍ਥਾ ਆਨਨ੍ਦਤ੍ਥੇਰਂ ਆਣਾਪੇਸਿ. ਥੇਰੋ ਪਞ੍ਚ ਭਿਕ੍ਖੁਸਤਾਨਿ ਆਦਾਯ ਨਿਬਦ੍ਧਂ ਰਾਜਕੁਲਂ ਗਚ੍ਛਤਿ. ਤਾਪਿ ਦੇਵੀਪਮੁਖਾ ਇਤ੍ਥਿਯੋ ਥੇਰਂ ਭੋਜੇਤ੍ਵਾ ਧਮ੍ਮਂ ਸੁਣਿਂਸੁ. ਸਾਮਾਵਤਿਞ੍ਚ ਸਤ੍ਥਾ ਮੇਤ੍ਤਾਵਿਹਾਰੀਨਂ ਉਪਾਸਿਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ. ਏਵਂ ਰਞ੍ਞੋ ਖੁਰਪ੍ਪਂ ਮੁਞ੍ਚਿਤੁਂ ਅਵਿਸਹਨਭਾਵੋ ਸਾਮਾਵਤਿਯਾ ਉਪਾਸਿਕਾਯ ਸਮਾਧਿਵਿਪ੍ਫਾਰਾ ਇਦ੍ਧੀਤਿ. ਏਤ੍ਥ ਚ ਅਵੇਚ੍ਚਪ੍ਪਸਾਦੇਨ ਵਾ ਓਕਪ੍ਪਨਪਸਾਦੇਨ ਵਾ ਰਤਨਤ੍ਤਯਸਰਣਗਮਨੇਨ ਵਾ ਰਤਨਤ੍ਤਯਂ ਉਪਾਸਤੀਤਿ ਉਪਾਸਿਕਾਤਿ ਵੁਚ੍ਚਤੀਤਿ.
੧੭. ਅਰਿਯਿਦ੍ਧਿਨਿਦ੍ਦੇਸੇ ਅਰਿਯਾ ਇਦ੍ਧੀਤਿ ਚੇਤੋਵਸਿਪ੍ਪਤ੍ਤਾਨਂ ਖੀਣਾਸਵਅਰਿਯਾਨਂਯੇਵ ਸਮ੍ਭਵਤੋ ਅਰਿਯਾ ਇਦ੍ਧੀਤਿ ਵੁਚ੍ਚਤੀਤਿ. ਇਧ ਭਿਕ੍ਖੂਤਿ ਇਮਸ੍ਮਿਂ ਸਾਸਨੇ ਖੀਣਾਸਵੋ ਭਿਕ੍ਖੁ. ਅਨਿਟ੍ਠੇ ਵਤ੍ਥੁਸ੍ਮਿਨ੍ਤਿ ਆਰਮ੍ਮਣਪਕਤਿਯਾ ਅਮਨਾਪੇ ਵਤ੍ਥੁਸ੍ਮਿਂ ਸਤ੍ਤੇ ਵਾ ਸਙ੍ਖਾਰੇ ਵਾ. ਮੇਤ੍ਤਾਯ ਵਾ ਫਰਤੀਤਿ ਸਤ੍ਤੋ ਚੇ ਹੋਤਿ, ਮੇਤ੍ਤਾਭਾਵਨਾਯ ਫਰਤਿ. ਧਾਤੁਤੋ ਵਾ ਉਪਸਂਹਰਤੀਤਿ ਸਙ੍ਖਾਰੋ ਚੇ ਹੋਤਿ, ‘‘ਧਾਤੁਮਤ੍ਤ’’ਨ੍ਤਿ ਧਾਤੁਮਨਸਿਕਾਰਂ ਉਪਸਂਹਰਤਿ. ਸਤ੍ਤੇਪਿ ਧਾਤੂਪਸਂਹਾਰੋ ਵਟ੍ਟਤਿ. ਅਸੁਭਾਯ ਵਾ ਫਰਤੀਤਿ ਸਤ੍ਤੋ ਚੇ, ਅਸੁਭਭਾਵਨਾਯ ਫਰਤਿ. ਅਨਿਚ੍ਚਤੋ ਵਾ ਉਪਸਂਹਰਤੀਤਿ ਸਙ੍ਖਾਰੋ ਚੇ, ‘‘ਅਨਿਚ੍ਚ’’ਨ੍ਤਿ ਮਨਸਿਕਾਰਂ ਉਪਸਂਹਰਤਿ. ਤਦੁਭਯਨ੍ਤਿ ਤਂ ਉਭਯਂ. ਉਪੇਕ੍ਖਕੋਤਿ ਛਲ਼ਙ੍ਗੁਪੇਕ੍ਖਾਯ ਉਪੇਕ੍ਖਕੋ. ਸਤੋਤਿ ਸਤਿਵੇਪੁਲ੍ਲਪ੍ਪਤ੍ਤਤ੍ਤਾ. ਸਮ੍ਪਜਾਨੋਤਿ ਪਞ੍ਞਾਯ ਸਮ੍ਪਜਾਨਕਾਰਿਤ੍ਤਾ. ਚਕ੍ਖੁਨਾ ਰੂਪਂ ਦਿਸ੍ਵਾਤਿ ਕਾਰਣਵਸੇਨ ਚਕ੍ਖੂਤਿ ਲਦ੍ਧਵੋਹਾਰੇਨ ਰੂਪਦਸ੍ਸਨਸਮਤ੍ਥੇਨ ਚਕ੍ਖੁਵਿਞ੍ਞਾਣੇਨ ਰੂਪਂ ਦਿਸ੍ਵਾ. ਪੋਰਾਣਾ ਪਨਾਹੁ – ‘‘ਚਕ੍ਖੁ ਰੂਪਂ ਨ ਪਸ੍ਸਤਿ ਅਚਿਤ੍ਤਕਤ੍ਤਾ, ਚਿਤ੍ਤਂ ਨ ਪਸ੍ਸਤਿ ਅਚਕ੍ਖੁਕਤ੍ਤਾ, ਦ੍ਵਾਰਾਰਮ੍ਮਣਸਙ੍ਘਟ੍ਟਨੇ ਪਨ ਪਸਾਦਵਤ੍ਥੁਕੇਨ ਚਿਤ੍ਤੇਨ ਪਸ੍ਸਤਿ. ਈਦਿਸੀ ਪਨੇਸਾ ‘ਧਨੁਨਾ ਵਿਜ੍ਝਤੀ’ਤਿਆਦੀਸੁ ਵਿਯ ਸਸਮ੍ਭਾਰਕਥਾ ਨਾਮ ਹੋਤਿ. ਤਸ੍ਮਾ ਚਕ੍ਖੁਵਿਞ੍ਞਾਣੇਨ ਰੂਪਂ ਦਿਸ੍ਵਾਤਿ ਅਯਮੇਤ੍ਥ ਅਤ੍ਥੋ’’ਤਿ (ਧ. ਸ. ਅਟ੍ਠ. ੧੩੫੨). ਅਥ ਵਾ ਚਕ੍ਖੁਨਾ ਕਰਣਭੂਤੇਨ ਰੂਪਂ ਦਿਸ੍ਵਾਤਿ ਅਤ੍ਥੋ. ਨੇਵ ਸੁਮਨੋ ਹੋਤੀਤਿ ਗੇਹਸਿਤਸੋਮਨਸ੍ਸਪਟਿਕ੍ਖੇਪੋ, ਨ ਕਿਰਿਯਭੂਤਾਯ ਸੋਮਨਸ੍ਸਵੇਦਨਾਯ. ਨ ਦੁਮ੍ਮਨੋਤਿ ਸਬ੍ਬਦੋਮਨਸ੍ਸਪਟਿਕ੍ਖੇਪੋ. ਉਪੇਕ੍ਖਕੋ ਵਿਹਰਤੀਤਿ ਇਟ੍ਠਾਨਿਟ੍ਠਾਰਮ੍ਮਣਾਪਾਥੇ ਪਰਿਸੁਦ੍ਧਪਕਤਿਭਾਵਾਵਿਜਹਨਾਕਾਰਭੂਤਾਯ ਛਸੁ ਦ੍ਵਾਰੇਸੁ ਪਵਤ੍ਤਨਤੋ ‘‘ਛਲ਼ਙ੍ਗੁਪੇਕ੍ਖਾ’’ਤਿ ਲਦ੍ਧਨਾਮਾਯ ਤਤ੍ਰਮਜ੍ਝਤ੍ਤੁਪੇਕ੍ਖਾਯ ਉਪੇਕ੍ਖਕੋ ਵਿਹਰਤਿ. ਸੋਤੇਨ ਸਦ੍ਦਂ ਸੁਤ੍ਵਾਤਿਆਦੀਸੁਪਿ ਏਸੇਵ ਨਯੋ.
੧੮. ਕਮ੍ਮਵਿਪਾਕਜਿਦ੍ਧਿਨਿਦ੍ਦੇਸੇ ਸਬ੍ਬੇਸਂ ਪਕ੍ਖੀਨਨ੍ਤਿ ਸਬ੍ਬੇਸਂ ਪਕ੍ਖਿਜਾਤਾਨਂ ਝਾਨਾਭਿਞ੍ਞਾ ਵਿਨਾਯੇਵ ਆਕਾਸੇਨ ਗਮਨਂ. ਤਥਾ ਸਬ੍ਬੇਸਂ ਦੇਵਾਨਂ ਆਕਾਸਗਮਨਂ ਦਸ੍ਸਨਾਦੀਨਿ ਚ. ਏਕਚ੍ਚਾਨਂ ਮਨੁਸ੍ਸਾਨਨ੍ਤਿ ਪਠਮਕਪ੍ਪਿਕਾਨਂ ਮਨੁਸ੍ਸਾਨਂ. ਏਕਚ੍ਚਾਨਂ ਵਿਨਿਪਾਤਿਕਾਨਨ੍ਤਿ ਪਿਯਙ੍ਕਰਮਾਤਾ ਪੁਨਬ੍ਬਸੁਮਾਤਾ ਫੁਸ੍ਸਮਿਤ੍ਤਾ ਧਮ੍ਮਗੁਤ੍ਤਾਤਿਏਵਮਾਦੀਨਂ ਸੁਖਸਮੁਸ੍ਸਯਤੋ ਵਿਨਿਪਤਿਤਤ੍ਤਾ ਵਿਨਿਪਾਤਿਕਾਨਂ ਅਞ੍ਞੇਸਞ੍ਚ ਪੇਤਾਨਂ ਨਾਗਸੁਪਣ੍ਣਾਨਞ੍ਚ ਆਕਾਸਗਮਨਾਦਿਕਂ ਕਮ੍ਮਵਿਪਾਕਜਾ ਇਦ੍ਧਿ.
ਪੁਞ੍ਞਵਤੋ ਇਦ੍ਧਿਨਿਦ੍ਦੇਸੇ ਰਾਜਾਤਿ ਧਮ੍ਮੇਨ ਪਰੇਸਂ ਰਞ੍ਜਨਤੋ ਰਾਜਾ. ਰਤਨਚਕ੍ਕਂ ਵਤ੍ਤੇਤੀਤਿ ਚਕ੍ਕਵਤ੍ਤੀ. ਵੇਹਾਸਂ ਗਚ੍ਛਤੀਤਿ ਅਚ੍ਚਨ੍ਤਸਂਯੋਗਤ੍ਥੇ ਉਪਯੋਗਵਚਨਂ. ਚਤੁਰਙ੍ਗਿਨਿਯਾਤਿ ਹਤ੍ਥਿਅਸ੍ਸਰਥਪਤ੍ਤਿਸਙ੍ਖਾਤਚਤੁਅਙ੍ਗਵਤਿਯਾ. ਸੇਨਾਤਿ ਤੇਸਂ ਸਮੂਹਮਤ੍ਤਮੇਵ. ਅਨ੍ਤਮਸੋਤਿ ਹੇਟ੍ਠਿਮਨ੍ਤਤੋ. ਅਸ੍ਸਬਨ੍ਧਾ ਨਾਮ ਅਸ੍ਸਾਨਂ ਰਕ੍ਖਕਾ. ਗੋਪੁਰਿਸਾ ਨਾਮ ਗੁਨ੍ਨਂ ਰਕ੍ਖਕਾ. ਉਪਾਦਾਯਾਤਿ ਅਵਿਸ੍ਸਜ੍ਜੇਤ੍ਵਾ. ਏਵਂ ਤੇਸਂ ਵੇਹਾਸਗਮਨਞ੍ਚ ਪੁਞ੍ਞਵਤੋ ਇਦ੍ਧੀਤਿ ਅਤ੍ਥੋ.
ਜੋਤਿਕਸ੍ਸ ਗਹਪਤਿਸ੍ਸ ਪੁਞ੍ਞਵਤੋ ਇਦ੍ਧੀਤਿ ਜੋਤਿਕੋ ਨਾਮ ਪੁਬ੍ਬੇ ਪਚ੍ਚੇਕਬੁਦ੍ਧੇਸੁ ਕਤਾਧਿਕਾਰੋ ਰਾਜਗਹਨਗਰੇ ਸੇਟ੍ਠਿ. ਤਸ੍ਸ ਕਿਰ ਜਾਤਦਿਵਸੇ ਸਕਲਨਗਰੇ ਸਬ੍ਬਾਵੁਧਾਨਿ ਜਲਿਂਸੁ, ਸਬ੍ਬੇਸਂ ਕਾਯਾਰੁਲ਼੍ਹਾਨਿ ਆਭਰਣਾਨਿਪਿ ਪਜ੍ਜਲਿਤਾਨਿ ਵਿਯ ਓਭਾਸਂ ਮੁਞ੍ਚਿਂਸੁ, ਨਗਰਂ ਏਕਪਜ੍ਜੋਤਂ ਅਹੋਸਿ. ਅਥਸ੍ਸ ਨਾਮਗ੍ਗਹਣਦਿਵਸੇ ਸਕਲਨਗਰਸ੍ਸ ਏਕਜੋਤਿਭੂਤਤ੍ਤਾ ਜੋਤਿਕੋਤਿ ਨਾਮਂ ਕਰਿਂਸੁ. ਅਥਸ੍ਸ ਵਯਪ੍ਪਤ੍ਤਕਾਲੇ ਗੇਹਕਰਣਤ੍ਥਾਯ ਭੂਮਿਤਲੇ ਸੋਧਿਯਮਾਨੇ ਸਕ੍ਕੋ ਦੇਵਰਾਜਾ ਆਗਨ੍ਤ੍ਵਾ ਸੋਲ਼ਸਕਰੀਸਮਤ੍ਤੇ ਠਾਨੇ ਪਥਵਿਂ ਭਿਨ੍ਦਿਤ੍ਵਾ ਸਤ੍ਤਰਤਨਮਯਂ ਸਤ੍ਤਭੂਮਿਕਂ ਪਾਸਾਦਂ ਉਟ੍ਠਾਪੇਸਿ, ਪਾਸਾਦਂ ਪਰਿਕ੍ਖਿਪਿਤ੍ਵਾ ਸਤ੍ਤਰਤਨਮਯੇ ਸਤ੍ਤਦ੍ਵਾਰਕੋਟ੍ਠਕਯੁਤ੍ਤੇ ਸਤ੍ਤਪਾਕਾਰੇ ਉਟ੍ਠਾਪੇਸਿ, ਪਾਕਾਰਪਰਿਯਨ੍ਤੇ ਚਤੁਸਟ੍ਠਿ ਕਪ੍ਪਰੁਕ੍ਖੇ ਉਟ੍ਠਾਪੇਸਿ, ਪਾਸਾਦਸ੍ਸ ਚਤੂਸੁ ਕਣ੍ਣੇਸੁ ਯੋਜਨਿਕਤਿਗਾਵੁਤਿਕਦ੍ਵਿਗਾਵੁਤਿਕਏਕਗਾਵੁਤਿਕਾ ਚਤਸ੍ਸੋ ਨਿਧਿਕੁਮ੍ਭਿਯੋ ਉਟ੍ਠਾਪੇਸਿ. ਪਾਸਾਦਸ੍ਸ ਚਤੂਸੁ ਕਣ੍ਣੇਸੁ ਤਰੁਣਤਾਲਕ੍ਖਨ੍ਧਪ੍ਪਮਾਣਾ ਚਤਸ੍ਸੋ ਸੁਵਣ੍ਣਮਯਾ ਉਚ੍ਛੁਯਟ੍ਠਿਯੋ ਨਿਬ੍ਬਤ੍ਤਿਂਸੁ. ਤਾਸਂ ਮਣਿਮਯਾਨਿ ਪਤ੍ਤਾਨਿ ਸੁਵਣ੍ਣਮਯਾਨਿ ਪਬ੍ਬਾਨਿ ਅਹੇਸੁਂ. ਸਤ੍ਤਸੁ ਦ੍ਵਾਰਕੋਟ੍ਠਕੇਸੁ ਏਕੇਕਸ੍ਮਿਂ ਏਕਦ੍ਵਿਤਿਚਤੁਪਞ੍ਚਛਸਤ੍ਤਯਕ੍ਖਸਹਸ੍ਸਪਰਿਵਾਰਾ ਸਤ੍ਤ ਯਕ੍ਖਾ ਆਰਕ੍ਖਂ ਗਣ੍ਹਿਂਸੁ.
ਬਿਮ੍ਬਿਸਾਰਮਹਾਰਾਜਾ ਪਾਸਾਦਾਦੀਨਂ ਉਟ੍ਠਾਨਂ ਸੁਤ੍ਵਾ ਸੇਟ੍ਠਿਛਤ੍ਤਂ ਪਹਿਣਿ. ਸੋ ਜੋਤਿਕਸੇਟ੍ਠੀਤਿ ਸਕਲਜਮ੍ਬੁਦੀਪੇ ਪਾਕਟੋ ਹੁਤ੍ਵਾ ਉਤ੍ਤਰਕੁਰੁਤੋ ਦੇਵਤਾਹਿ ਆਨੇਤ੍ਵਾ ਸਿਰਿਗਬ੍ਭੇ ਨਿਸੀਦਾਪਿਤਾਯ ਏਕਞ੍ਚ ਤਣ੍ਡੁਲਨਾਲ਼ਿਂ ਤਯੋ ਚ ਜੋਤਿਪਾਸਾਣੇ ਗਹੇਤ੍ਵਾ ਆਗਤਾਯ ਭਰਿਯਾਯ ਸਦ੍ਧਿਂ ਤਸ੍ਮਿਂ ਪਾਸਾਦੇ ਮਹਾਸਮ੍ਪਤ੍ਤਿਂ ਅਨੁਭਵਨ੍ਤੋ ਵਸਿ. ਤੇਸਂ ਯਾਵਜੀਵਂ ਤਾਯ ਏਕਤਣ੍ਡੁਲਨਾਲ਼ਿਯਾ ਭਤ੍ਤਂ ਪਹੋਸਿ. ਸਚੇ ਕਿਰ ਤੇ ਸਕਟਸਤਮ੍ਪਿ ਤਣ੍ਡੁਲਾਨਂ ਪੂਰੇਤੁਕਾਮਾ ਹੋਨ੍ਤਿ, ਸਾ ਤਣ੍ਡੁਲਨਾਲ਼ਿਯੇਵ ਹੁਤ੍ਵਾ ਤਿਟ੍ਠਤਿ. ਭਤ੍ਤਪਚਨਕਾਲੇ ਤਣ੍ਡੁਲੇ ਉਕ੍ਖਲਿਯਂ ਪਕ੍ਖਿਪਿਤ੍ਵਾ ਤੇਸਂ ਪਾਸਾਣਾਨਂ ਉਪਰਿ ਠਪੇਨ੍ਤਿ. ਪਾਸਾਣਾ ਤਾਵਦੇਵ ਪਜ੍ਜਲਿਤ੍ਵਾ ਭਤ੍ਤੇ ਪਕ੍ਕਮਤ੍ਤੇ ਨਿਬ੍ਬਾਯਨ੍ਤਿ. ਤੇਨੇਵ ਸਞ੍ਞਾਣੇਨ ਭਤ੍ਤਸ੍ਸ ਪਕ੍ਕਭਾਵਂ ਜਾਨਨ੍ਤਿ. ਸੂਪੇਯ੍ਯਾਦਿਪਚਨਕਾਲੇਪਿ ਏਸੇਵ ਨਯੋ. ਏਵਂ ਤੇਸਂ ਜੋਤਿਪਾਸਾਣੇਹਿ ਆਹਾਰੋ ਪਚ੍ਚਤਿ, ਮਣਿਆਲੋਕੇਨ ਵਸਨ੍ਤਿ. ਅਗ੍ਗਿਸ੍ਸ ਵਾ ਦੀਪਸ੍ਸ ਵਾ ਓਭਾਸਮੇਵ ਨ ਜਾਨਿਂਸੁ. ਜੋਤਿਕਸ੍ਸ ਕਿਰ ਏਵਰੂਪਾ ਸਮ੍ਪਤ੍ਤੀਤਿ ਸਕਲਜਮ੍ਬੁਦੀਪੇ ਪਾਕਟੋ ਅਹੋਸਿ. ਮਹਾਜਨੋ ਯਾਨਾਦੀਹਿ ਦਸ੍ਸਨਤ੍ਥਾਯ ਆਗਚ੍ਛਤਿ. ਜੋਤਿਕਸੇਟ੍ਠਿ ਆਗਤਾਗਤਾਨਂ ਉਤ੍ਤਰਕੁਰੁਤਣ੍ਡੁਲਾਨਂ ਭਤ੍ਤਂ ਦਾਪੇਤਿ, ‘‘ਕਪ੍ਪਰੁਕ੍ਖੇਹਿ ਵਤ੍ਥਾਭਰਣਾਨਿ ਗਣ੍ਹਨ੍ਤੂ’’ਤਿ ਆਣਾਪੇਤਿ, ‘‘ਗਾਵੁਤਿਕਨਿਧਿਕੁਮ੍ਭਿਯਾ ਮੁਖਂ ਵਿਵਰਾਪੇਤ੍ਵਾ ਯਾਪਨਮਤ੍ਤਂ ਗਣ੍ਹਨ੍ਤੂ’’ਤਿ ਆਣਾਪੇਤਿ. ਸਕਲਜਮ੍ਬੁਦੀਪਵਾਸਿਕੇਸੁ ਧਨਂ ਗਹੇਤ੍ਵਾ ਗਚ੍ਛਨ੍ਤੇਸੁ ਨਿਧਿਕੁਮ੍ਭਿਯਾ ਅਙ੍ਗੁਲਮਤ੍ਤਮ੍ਪਿ ਊਨਂ ਨਾਹੋਸੀਤਿ ਅਯਮਸ੍ਸ ਪੁਞ੍ਞਵਤੋ ਇਦ੍ਧਿ.
ਜਟਿਲਸ੍ਸ ਗਹਪਤਿਸ੍ਸ ਪੁਞ੍ਞਵਤੋ ਇਦ੍ਧੀਤਿ ਜਟਿਲੋ ਨਾਮ ਕਸ੍ਸਪਸ੍ਸ ਭਗਵਤੋ ਧਾਤੁਚੇਤਿਯੇ ਕਤਾਧਿਕਾਰੋ ਤਕ੍ਕਸਿਲਾਯਂ ਸੇਟ੍ਠਿ. ਤਸ੍ਸ ਕਿਰ ਮਾਤਾ ਬਾਰਾਣਸਿਯਂ ਸੇਟ੍ਠਿਧੀਤਾ ਅਭਿਰੂਪਾ ਅਹੋਸਿ. ਤਂ ਪਨ੍ਨਰਸਸੋਲ਼ਸਵਸ੍ਸੁਦ੍ਦੇਸਿਕਕਾਲੇ ਆਰਕ੍ਖਨਤ੍ਥਾਯ ਸਤ੍ਤਭੂਮਿਕਸ੍ਸ ਪਾਸਾਦਸ੍ਸ ਉਪਰਿਤਲੇ ਵਾਸਯਿਂਸੁ. ਤਂ ਏਕਦਿਵਸਂ ਵਾਤਪਾਨਂ ਵਿਵਰਿਤ੍ਵਾ ਬਹਿ ਓਲੋਕਿਯਮਾਨਂ ਆਕਾਸੇਨ ਗਚ੍ਛਨ੍ਤੋ ਵਿਜ੍ਜਾਧਰੋ ਦਿਸ੍ਵਾ ਉਪ੍ਪਨ੍ਨਸਿਨੇਹੋ ਵਾਤਪਾਨੇਨ ਪਵਿਸਿਤ੍ਵਾ ਤਾਯ ਸਦ੍ਧਿਂ ਸਨ੍ਥਵਮਕਾਸਿ. ਸਾ ਤੇਨ ਗਬ੍ਭਂ ਗਣ੍ਹਿ. ਅਥ ਨਂ ਦਾਸੀ ਦਿਸ੍ਵਾ ‘‘ਅਮ੍ਮ, ਕਿਂ ਇਦ’’ਨ੍ਤਿ ਵਤ੍ਵਾ ‘‘ਹੋਤੁ, ਕਸ੍ਸਚਿ ਮਾ ਆਚਿਕ੍ਖੀ’’ਤਿ ਵੁਤ੍ਤਾ ਭਯੇਨ ਤੁਣ੍ਹੀ ਅਹੋਸਿ. ਸਾਪਿ ਦਸਮੇ ਮਾਸੇ ਪੁਤ੍ਤਂ ਵਿਜਾਯਿਤ੍ਵਾ ਨਵਭਾਜਨਂ ਆਹਰਾਪੇਤ੍ਵਾ ਤਤ੍ਥ ਤਂ ਦਾਰਕਂ ਨਿਪਜ੍ਜਾਪੇਤ੍ਵਾ ਤਂ ਭਾਜਨਂ ਪਿਦਹਿਤ੍ਵਾ ਉਪਰਿ ਪੁਪ੍ਫਦਾਮਾਨਿ ਠਪੇਤ੍ਵਾ ‘‘ਇਮਂ ਸੀਸੇਨ ਉਕ੍ਖਿਪਿਤ੍ਵਾ ਗਨ੍ਤ੍ਵਾ ਗਙ੍ਗਾਯ ਵਿਸ੍ਸਜ੍ਜੇਹਿ, ‘ਕਿਂ ਇਦ’ਨ੍ਤਿ ਚ ਪੁਟ੍ਠਾ ‘ਅਯ੍ਯਾਯ ਮੇ ਬਲਿਕਮ੍ਮ’ਨ੍ਤਿ ਵਦੇਯ੍ਯਾਸੀ’’ਤਿ ਦਾਸਿਂ ਆਣਾਪੇਸਿ. ਸਾ ਤਥਾ ਅਕਾਸਿ. ਹੇਟ੍ਠਾਗਙ੍ਗਾਯਪਿ ਦ੍ਵੇ ਇਤ੍ਥਿਯੋ ਨ੍ਹਾਯਮਾਨਾ ਤਂ ਭਾਜਨਂ ਉਦਕੇਨ ਆਹਰਿਯਮਾਨਂ ਦਿਸ੍ਵਾ ਏਕਾ ‘‘ਮਯ੍ਹੇਤਂ ਭਾਜਨ’’ਨ੍ਤਿ ਆਹ. ਏਕਾ ‘‘ਯਂ ਏਤਸ੍ਸ ਅਨ੍ਤੋ, ਤਂ ਮਯ੍ਹ’’ਨ੍ਤਿ ਵਤ੍ਵਾ ਭਾਜਨੇ ਸਮ੍ਪਤ੍ਤੇ ਤਂ ਆਦਾਯ ਥਲੇ ਠਪੇਤ੍ਵਾ ਵਿਵਰਿਤ੍ਵਾ ਦਾਰਕਂ ਦਿਸ੍ਵਾ ਏਕਾ ‘‘ਮਮ ਭਾਜਨ’’ਨ੍ਤਿ ਵੁਤ੍ਤਤ੍ਤਾ ‘‘ਦਾਰਕੋ ਮਮੇਵ ਹੋਤੀ’’ਤਿ ਆਹ. ਏਕਾ ‘‘ਯਂ ਭਾਜਨਸ੍ਸ ਅਨ੍ਤੋ, ਤਂ ਮਮਾ’’ਤਿ ਵੁਤ੍ਤਤ੍ਤਾ ‘‘ਮਮ ਦਾਰਕੋ’’ਤਿ ਆਹ. ਤਾ ਵਿਵਦਮਾਨਾ ਵਿਨਿਚ੍ਛਯਂ ਗਨ੍ਤ੍ਵਾ ਅਮਚ੍ਚੇਸੁ ਵਿਨਿਚ੍ਛਿਤੁਂ ਅਸਕ੍ਕੋਨ੍ਤੇਸੁ ਰਞ੍ਞੋ ਸਨ੍ਤਿਕਂ ਅਗਮਂਸੁ. ਰਾਜਾ ਤਾਸਂ ਵਚਨਂ ਸੁਤ੍ਵਾ ‘‘ਤ੍ਵਂ ਦਾਰਕਂ ਗਣ੍ਹ, ਤ੍ਵਂ ਭਾਜਨ’’ਨ੍ਤਿ ਆਹ. ਯਾਯ ਪਨ ਦਾਰਕੋ ਲਦ੍ਧੋ, ਸਾ ਮਹਾਕਚ੍ਚਾਯਨਤ੍ਥੇਰਸ੍ਸ ਉਪਟ੍ਠਾਯਿਕਾ ਹੋਤਿ. ਸਾ ਤਂ ਦਾਰਕਂ ‘‘ਥੇਰਸ੍ਸ ਸਨ੍ਤਿਕੇ ਪਬ੍ਬਾਜੇਸ੍ਸਾਮੀ’’ਤਿ ਪੋਸੇਸਿ. ਤਸ੍ਸ ਜਾਤਦਿਵਸੇ ਗਬ੍ਭਮਲਸ੍ਸ ਧੋਵਿਤ੍ਵਾ ਅਨਪਨੀਤਤ੍ਤਾ ਕੇਸਾ ਜਟਿਤਾ ਹੁਤ੍ਵਾ ਅਟ੍ਠਂਸੁ. ਤੇਨਸ੍ਸ ਜਟਿਲੋਤੇਵ ਨਾਮਂ ਅਕਂਸੁ.
ਤਸ੍ਸ ਪਦਸਾ ਵਿਚਰਣਕਾਲੇ ਥੇਰੋ ਤਂ ਗੇਹਂ ਪਿਣ੍ਡਾਯ ਪਾਵਿਸਿ. ਉਪਾਸਿਕਾ ਥੇਰਂ ਨਿਸੀਦਾਪੇਤ੍ਵਾ ਆਹਾਰਮਦਾਸਿ. ਥੇਰੋ ਦਾਰਕਂ ਦਿਸ੍ਵਾ ‘‘ਉਪਾਸਿਕੇ, ਦਾਰਕੋ ਤੇ ਲਦ੍ਧੋ’’ਤਿ ਪੁਚ੍ਛਿ. ‘‘ਆਮ, ਭਨ੍ਤੇ, ਇਮਾਹਂ ਤੁਮ੍ਹਾਕਂ ਸਨ੍ਤਿਕੇ ਪਬ੍ਬਾਜੇਸ੍ਸਨ੍ਤਿ ਪੋਸੇਸਿ’’ਨ੍ਤਿ ਆਹ. ਥੇਰੋ ‘‘ਸਾਧੂ’’ਤਿ ਤਂ ਆਦਾਯ ਗਚ੍ਛਨ੍ਤੋ ‘‘ਅਤ੍ਥਿ ਨੁ ਖੋ ਇਮਸ੍ਸ ਗਿਹਿਸਮ੍ਪਤ੍ਤਿਂ ਅਨੁਭਵਿਤੁਂ ਪੁਞ੍ਞਕਮ੍ਮ’’ਨ੍ਤਿ ਓਲੋਕੇਨ੍ਤੋ ‘‘ਮਹਾਪੁਞ੍ਞੋ ਸਤ੍ਤੋ ਮਹਾਸਮ੍ਪਤ੍ਤਿਂ ਅਨੁਭਵਿਸ੍ਸਤਿ, ਦਹਰੋ ਏਵ ਚ ਤਾਵ, ਞਾਣਮ੍ਪਿ ਤਾਵਸ੍ਸ ਪਰਿਪਾਕਂ ਨ ਗਚ੍ਛਤੀ’’ਤਿ ਚਿਨ੍ਤੇਤ੍ਵਾ ਤਂ ਆਦਾਯ ਤਕ੍ਕਸਿਲਾਯਂ ਏਕਸ੍ਸ ਉਪਟ੍ਠਾਕਸ੍ਸ ਗੇਹਂ ਅਗਮਾਸਿ. ਸੋ ਥੇਰਂ ਵਨ੍ਦਿਤ੍ਵਾ ਠਿਤੋ ਦਾਰਕਂ ਦਿਸ੍ਵਾ ‘‘ਦਾਰਕੋ, ਭਨ੍ਤੇ, ਲਦ੍ਧੋ’’ਤਿ ਪੁਚ੍ਛਿ. ‘‘ਆਮ, ਉਪਾਸਕ, ਪਬ੍ਬਜਿਸ੍ਸਤਿ, ਦਹਰੋ ਤਾਵ ਤਵ ਸਨ੍ਤਿਕੇ ਹੋਤੂ’’ਤਿ. ਸੋ ‘‘ਸਾਧੁ, ਭਨ੍ਤੇ’’ਤਿ ਤਂ ਪੁਤ੍ਤਟ੍ਠਾਨੇ ਠਪੇਤ੍ਵਾ ਪਟਿਜਗ੍ਗਿ. ਤਸ੍ਸ ਪਨ ਗੇਹੇ ਦ੍ਵਾਦਸ ਵਸ੍ਸਾਨਿ ਭਣ੍ਡਕਂ ਉਸ੍ਸਨ੍ਨਂ ਹੋਤਿ. ਸੋ ਗਾਮਨ੍ਤਰਂ ਗਚ੍ਛਨ੍ਤੋ ਸਬ੍ਬਮ੍ਪਿ ਤਂ ਭਣ੍ਡਕਂ ਆਪਣਂ ਆਹਰਿਤ੍ਵਾ ਤਸ੍ਸ ਤਸ੍ਸ ਭਣ੍ਡਕਸ੍ਸ ਮੂਲਂ ਆਚਿਕ੍ਖਿਤ੍ਵਾ ‘‘ਇਦਞ੍ਚਿਦਞ੍ਚ ਏਤ੍ਤਕਂ ਨਾਮ ਧਨਂ ਗਹੇਤ੍ਵਾ ਦਦੇਯ੍ਯਾਸੀ’’ਤਿ ਵਤ੍ਵਾ ਪਕ੍ਕਾਮਿ.
ਤਂ ਦਿਵਸਂ ਨਗਰਪਰਿਗ੍ਗਾਹਿਕਾ ਦੇਵਤਾ ਅਨ੍ਤਮਸੋ ਜੀਰਕਮਰਿਚਮਤ੍ਤਕੇਨਾਪਿ ਅਤ੍ਥਿਕੇ ਤਸ੍ਸੇਵ ਆਪਣਾਭਿਮੁਖੇ ਕਰਿਂਸੁ. ਸੋ ਦ੍ਵਾਦਸ ਵਸ੍ਸਾਨਿ ਉਸ੍ਸਨ੍ਨਭਣ੍ਡਕਂ ਏਕਦਿਵਸੇਨੇਵ ਵਿਕ੍ਕਿਣਿ. ਕੁਟੁਮ੍ਬਿਕੋ ਆਗਨ੍ਤ੍ਵਾ ਆਪਣੇ ਕਿਞ੍ਚਿ ਅਦਿਸ੍ਵਾ ‘‘ਸਬ੍ਬਂ ਤੇ, ਤਾਤ, ਭਣ੍ਡਕਂ ਨਾਸਿਤ’’ਨ੍ਤਿ ਆਹ. ‘‘ਨ ਨਾਸਿਤਂ, ਤਾਤ, ਸਬ੍ਬਂ ਤੁਮ੍ਹੇਹਿ ਵੁਤ੍ਤਨਯੇਨ ਵਿਕ੍ਕਿਣਿਤਂ, ਇਦਂ ਅਸੁਕਸ੍ਸ ਮੂਲਂ, ਇਦਂ ਅਸੁਕਸ੍ਸ ਮੂਲ’’ਨ੍ਤਿ ਸਬ੍ਬਮੂਲਂ ਤਸ੍ਸੇਵ ਅਪ੍ਪੇਸਿ. ਕੁਟੁਮ੍ਬਿਕੋ ਪਸੀਦਿਤ੍ਵਾ ‘‘ਅਨਗ੍ਘੋ ਪੁਰਿਸੋ ਯਤ੍ਥ ਕਤ੍ਥਚਿ ਜੀਵਿਤੁਂ ਸਮਤ੍ਥੋ’’ਤਿ ਅਤ੍ਤਨੋ ਵਯਪ੍ਪਤ੍ਤਂ ਧੀਤਰਂ ਤਸ੍ਸ ਦਤ੍ਵਾ ‘‘ਗੇਹਮਸ੍ਸ ਕਰੋਥਾ’’ਤਿ ਪੁਰਿਸੇ ਆਣਾਪੇਤ੍ਵਾ ਨਿਟ੍ਠਿਤੇ ਗੇਹੇ ‘‘ਗਚ੍ਛਥ ਤੁਮ੍ਹੇ, ਅਤ੍ਤਨੋ ਗੇਹੇ ਵਸਥਾ’’ਤਿ ਆਹ. ਅਥਸ੍ਸ ਗੇਹਪਵਿਸਨਕਾਲੇ ਏਕੇਨ ਪਾਦੇਨ ਉਮ੍ਮਾਰੇ ਅਕ੍ਕਨ੍ਤਮਤ੍ਤੇ ਗੇਹਸ੍ਸ ਪਚ੍ਛਿਮਭਾਗੇ ਭੂਮਿਟ੍ਠਾਨੇ ਅਸੀਤਿਹਤ੍ਥੋ ਸੁਵਣ੍ਣਪਬ੍ਬਤੋ ਉਟ੍ਠਹਿ. ਰਾਜਾ ਕਿਰ ਜਟਿਲਸ੍ਸ ਗੇਹੇ ਭੂਮਿਂ ਭਿਨ੍ਦਿਤ੍ਵਾ ਸੁਵਣ੍ਣਪਬ੍ਬਤੋ ਉਟ੍ਠਿਤੋਤਿ ਸੁਤ੍ਵਾ ਤਸ੍ਸ ਸੇਟ੍ਠਿਛਤ੍ਤਂ ਪੇਸੇਸਿ. ਸੋ ਜਟਿਲਸੇਟ੍ਠਿ ਨਾਮ ਅਹੋਸੀਤਿ ਅਯਮਸ੍ਸ ਪੁਞ੍ਞਵਤੋ ਇਦ੍ਧਿ.
ਮੇਣ੍ਡਕਸ੍ਸ ਸੇਟ੍ਠਿਸ੍ਸ ਪੁਞ੍ਞਵਤੋ ਇਦ੍ਧੀਤਿ (ਮਹਾਵ. ੨੯੬) ਮੇਣ੍ਡਕੋ ਨਾਮ ਵਿਪਸ੍ਸਿਮ੍ਹਿ ਭਗਵਤਿ ਕਤਾਧਿਕਾਰੋ ਮਗਧਰਟ੍ਠੇ ਭਦ੍ਦਿਯਨਗਰੇ ਸੇਟ੍ਠਿ. ਤਸ੍ਸ ਕਿਰ ਪਚ੍ਛਿਮਗੇਹੇ ਅਟ੍ਠਕਰੀਸਮਤ੍ਤੇ ਠਾਨੇ ਹਤ੍ਥਿਅਸ੍ਸਉਸਭਪ੍ਪਮਾਣਾ ਸੁਵਣ੍ਣਮੇਣ੍ਡਕਾ ਪਥਵਿਂ ਭਿਨ੍ਦਿਤ੍ਵਾ ਪਿਟ੍ਠਿਯਾ ਪਿਟ੍ਠਿਂ ਪਹਰਮਾਨਾ ਉਟ੍ਠਹਿਂਸੁ, ਤੇਸਂ ਮੁਖੇਸੁ ਪਞ੍ਚਵਣ੍ਣਾਨਂ ਸੁਤ੍ਤਾਨਂ ਗੇਣ੍ਡੁਕਾ ਪਕ੍ਖਿਤ੍ਤਾ ਹੋਨ੍ਤਿ. ਸਪ੍ਪਿਤੇਲਮਧੁਫਾਣਿਤਾਦੀਹਿ ਚ ਵਤ੍ਥਚ੍ਛਾਦਨਹਿਰਞ੍ਞਸੁਵਣ੍ਣਾਦੀਹਿ ਚ ਅਤ੍ਥੇ ਸਤਿ ਤੇਸਂ ਮੁਖਤੋ ਗੇਣ੍ਡੁਕਂ ਅਪਨੇਨ੍ਤਿ. ਏਕਸ੍ਸਪਿ ਮੇਣ੍ਡਕਸ੍ਸ ਮੁਖਤੋ ਸਕਲਜਮ੍ਬੁਦੀਪਵਾਸੀਨਂ ਪਹੋਨਕਂ ਸਪ੍ਪਿਤੇਲਮਧੁਫਾਣਿਤਵਤ੍ਥਚ੍ਛਾਦਨਹਿਰਞ੍ਞਸੁਵਣ੍ਣਂ ਨਿਕ੍ਖਮਤਿ. ਤਤੋ ਪਟ੍ਠਾਯੇਸ ਮੇਣ੍ਡਕਸੇਟ੍ਠੀਤਿ ਪਞ੍ਞਾਯੀਤਿ ਅਯਮਸ੍ਸ ਪੁਞ੍ਞਵਤੋ ਇਦ੍ਧਿ.
ਘੋਸਿਤਸ੍ਸ ਗਹਪਤਿਸ੍ਸ ਪੁਞ੍ਞਵਤੋ ਇਦ੍ਧੀਤਿ ਘੋਸਿਤੋ (ਅ. ਨਿ. ਅਟ੍ਠ. ੧.੧.੨੬੦-੨੬੧) ਨਾਮ ਪਚ੍ਚੇਕਸਮ੍ਬੁਦ੍ਧੇ ਕਤਾਧਿਕਾਰੋ ਸਕ੍ਕਰਟ੍ਠੇ ਕੋਸਮ੍ਬਿਯਂ ਸੇਟ੍ਠਿ. ਸੋ ਕਿਰ ਦੇਵਲੋਕਤੋ ਚਵਿਤ੍ਵਾ ਕੋਸਮ੍ਬਿਯਂ ਨਗਰਸੋਭਿਨਿਯਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿ. ਸਾ ਤਂ ਵਿਜਾਤਦਿਵਸੇ ਸੁਪ੍ਪੇ ਸਯਾਪੇਤ੍ਵਾ ਸਙ੍ਕਾਰਕੂਟੇ ਛਡ੍ਡਾਪੇਸਿ. ਦਾਰਕਂ ਕਾਕਸੁਨਖਾ ਪਰਿਵਾਰੇਤ੍ਵਾ ਨਿਸੀਦਿਂਸੁ. ਏਕੋ ਪੁਰਿਸੋ ਤਂ ਦਿਸ੍ਵਾਵ ਪੁਤ੍ਤਸਞ੍ਞਂ ਪਟਿਲਭਿਤ੍ਵਾ ‘‘ਪੁਤ੍ਤੋ ਮੇ ਲਦ੍ਧੋ’’ਤਿ ਗੇਹਂ ਨੇਸਿ. ਤਦਾ ਕੋਸਮ੍ਬਿਕਸੇਟ੍ਠਿ ਪੁਰੋਹਿਤਂ ਦਿਸ੍ਵਾ ‘‘ਕਿਂ, ਆਚਰਿਯ, ਅਜ੍ਜ ਤੇ ਤਿਥਿਕਰਣਨਕ੍ਖਤ੍ਤਾਦਯੋ ਓਲੋਕਿਤਾ’’ਤਿ ਪੁਚ੍ਛਿਤ੍ਵਾ ‘‘ਆਮ, ਮਹਾਸੇਟ੍ਠੀ’’ਤਿ ਵੁਤ੍ਤੇ ‘‘ਜਨਪਦਸ੍ਸ ਕਿਂ ਭਵਿਸ੍ਸਤੀ’’ਤਿ ਪੁਚ੍ਛਿ. ‘‘ਇਮਸ੍ਮਿਂ ਨਗਰੇ ਅਜ੍ਜ ਜਾਤਦਾਰਕੋ ਜੇਟ੍ਠਸੇਟ੍ਠਿ ਭਵਿਸ੍ਸਤੀ’’ਤਿ ਆਹ. ਤਦਾ ਸੇਟ੍ਠਿਨੋ ਭਰਿਯਾ ਗਰੁਗਬ੍ਭਾ ਹੋਤਿ, ਤਸ੍ਮਾ ਸੋ ਸੀਘਂ ਗੇਹਂ ਪੇਸੇਸਿ ‘‘ਗਚ੍ਛ, ਜਾਨਾਹਿ ਨਂ ਵਿਜਾਤਾ ਵਾ, ਨ ਵਾ’’ਤਿ. ‘‘ਨ ਵਿਜਾਤਾ’’ਤਿ ਸੁਤ੍ਵਾ ਗੇਹਂ ਗਨ੍ਤ੍ਵਾ ਕਾਲ਼ਿਂ ਨਾਮ ਦਾਸਿਂ ਪਕ੍ਕੋਸਿਤ੍ਵਾ ਸਹਸ੍ਸਂ ਦਤ੍ਵਾ ‘‘ਗਚ੍ਛ, ਇਮਸ੍ਮਿਂ ਨਗਰੇ ਉਪਧਾਰੇਤ੍ਵਾ ਅਜ੍ਜ ਜਾਤਦਾਰਕਂ ਗਣ੍ਹਿਤ੍ਵਾ ਏਹੀ’’ਤਿ ਆਹ. ਸਾ ਉਪਧਾਰੇਨ੍ਤੀ ਤਂ ਗੇਹਂ ਗਨ੍ਤ੍ਵਾ ਤਂ ਦਾਰਕਂ ਤਂ ਦਿਵਸਂ ਜਾਤਂ ਞਤ੍ਵਾ ਸਹਸ੍ਸਂ ਦਤ੍ਵਾ ਆਨੇਤ੍ਵਾ ਸੇਟ੍ਠਿਨੋ ਦਸ੍ਸੇਸਿ. ਸੇਟ੍ਠਿ ‘‘ਸਚੇ ਮੇ ਧੀਤਾ ਜਾਯਿਸ੍ਸਤਿ, ਤਾਯ ਨਂ ਸਦ੍ਧਿਂ ਨਿਵਾਸੇਤ੍ਵਾ ਸੇਟ੍ਠਿਟ੍ਠਾਨਸ੍ਸ ਸਾਮਿਕਂ ਕਰਿਸ੍ਸਾਮਿ. ਸਚੇ ਪੁਤ੍ਤੋ ਜਾਯਿਸ੍ਸਤਿ, ਘਾਤੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਤਂ ਗੇਹੇ ਵਡ੍ਢਾਪੇਸਿ.
ਅਥਸ੍ਸ ਭਰਿਯਾ ਕਤਿਪਾਹਚ੍ਚਯੇਨ ਪੁਤ੍ਤਂ ਵਿਜਾਯਿ. ਸੇਟ੍ਠਿ ‘‘ਇਮਸ੍ਮਿਂ ਅਸਤਿ ਮਮ ਪੁਤ੍ਤੋ ਸੇਟ੍ਠਿਟ੍ਠਾਨਂ ਲਭਿਸ੍ਸਤਿ. ਇਦਾਨੇਵ ਨਂ ਮਾਰੇਤੁਂ ਵਟ੍ਟਤੀ’’ਤਿ ਕਾਲ਼ਿਂ ਆਮਨ੍ਤੇਤ੍ਵਾ ‘‘ਗਚ੍ਛ ਜੇ, ਵਜਤੋ ਗੁਨ੍ਨਂ ਨਿਕ੍ਖਮਨਵੇਲਾਯ ਵਜਦ੍ਵਾਰਮਜ੍ਝੇ ਇਮਂ ਤਿਰਿਯਂ ਨਿਪਜ੍ਜਾਪੇਹਿ, ਗਾਵਿਯੋ ਨਂ ਮਦ੍ਦਿਤ੍ਵਾ ਮਾਰੇਸ੍ਸਨ੍ਤਿ, ਮਦ੍ਦਿਤਾਮਦ੍ਦਿਤਭਾਵਂ ਪਨਸ੍ਸ ਞਤ੍ਵਾ ਏਹੀ’’ਤਿ ਆਹ. ਸਾ ਗਨ੍ਤ੍ਵਾ ਗੋਪਾਲਕੇਨ ਵਜਦ੍ਵਾਰੇ ਵਿਵਟਮਤ੍ਤੇਯੇਵ ਤਂ ਤਥਾ ਨਿਪਜ੍ਜਾਪੇਸਿ. ਗੋਗਣਜੇਟ੍ਠਕੋ ਉਸਭੋ ਅਞ੍ਞਸ੍ਮਿਂ ਕਾਲੇ ਸਬ੍ਬਪਚ੍ਛਾ ਨਿਕ੍ਖਮਨ੍ਤੋਪਿ ਤਂਦਿਵਸਂ ਸਬ੍ਬਪਠਮਂ ਨਿਕ੍ਖਮਿਤ੍ਵਾ ਦਾਰਕਂ ਚਤੁਨ੍ਨਂ ਪਾਦਾਨਂ ਅਨ੍ਤਰੇ ਕਤ੍ਵਾ ਅਟ੍ਠਾਸਿ. ਅਨੇਕਸਤਾ ਗਾਵੋ ਉਸਭਸ੍ਸ ਦ੍ਵੇ ਪਸ੍ਸਾਨਿ ਘਂਸਨ੍ਤਿਯੋ ਨਿਕ੍ਖਮਿਂਸੁ. ਗੋਪਾਲਕੋਪਿ ‘‘ਅਯਂ ਉਸਭੋ ਪੁਬ੍ਬੇ ਸਬ੍ਬਪਚ੍ਛਾ ਨਿਕ੍ਖਮਤਿ, ਅਜ੍ਜ ਪਨ ਪਠਮਂ ਨਿਕ੍ਖਮਿਤ੍ਵਾ ਦ੍ਵਾਰਮਜ੍ਝੇ ਨਿਚ੍ਚਲੋਵ ਠਿਤੋ, ਕਿਂ ਨੁ ਖੋ ਏਤ’’ਨ੍ਤਿ ਚਿਨ੍ਤੇਤ੍ਵਾ ਗਨ੍ਤ੍ਵਾ ਤਸ੍ਸ ਹੇਟ੍ਠਾ ਨਿਪਨ੍ਨਂ ਦਾਰਕਂ ਦਿਸ੍ਵਾ ਪੁਤ੍ਤਸਿਨੇਹਂ ਪਟਿਲਭਿਤ੍ਵਾ ‘‘ਪੁਤ੍ਤੋ ਮੇ ਲਦ੍ਧੋ’’ਤਿ ਗੇਹਂ ਨੇਸਿ.
ਕਾਲ਼ੀ ਗਨ੍ਤ੍ਵਾ ਸੇਟ੍ਠਿਨਾ ਪੁਚ੍ਛਿਤਾ ਤਮਤ੍ਥਂ ਆਰੋਚੇਤ੍ਵਾ ‘‘ਗਚ੍ਛ, ਨਂ ਪੁਨ ਇਮਂ ਸਹਸ੍ਸਂ ਦਤ੍ਵਾ ਆਨੇਹੀ’’ਤਿ ਵੁਤ੍ਤਾ ਪੁਨ ਆਨੇਤ੍ਵਾ ਅਦਾਸਿ. ਅਥ ਨਂ ਸੇਟ੍ਠਿ ਆਹ – ‘‘ਅਮ੍ਮ ਕਾਲ਼ਿ, ਇਮਸ੍ਮਿਂ ਨਗਰੇ ਪਞ੍ਚਸਕਟਸਤਾਨਿ ਪਚ੍ਚੂਸਕਾਲੇ ਉਟ੍ਠਾਯ ਵਾਣਿਜ੍ਜਾਯ ਗਚ੍ਛਨ੍ਤਿ, ਤ੍ਵਂ ਇਮਂ ਨੇਤ੍ਵਾ ਚਕ੍ਕਮਗ੍ਗੇ ਨਿਪਜ੍ਜਾਪੇਹਿ, ਗੋਣਾ ਵਾ ਨਂ ਮਦ੍ਦਿਸ੍ਸਨ੍ਤਿ, ਚਕ੍ਕਂ ਵਾ ਛਿਨ੍ਦਿਸ੍ਸਤਿ, ਪਵਤ੍ਤਿਞ੍ਚਸ੍ਸ ਞਤ੍ਵਾ ਆਗਚ੍ਛੇਯ੍ਯਾਸੀ’’ਤਿ. ਸਾ ਗਨ੍ਤ੍ਵਾ ਚਕ੍ਕਮਗ੍ਗੇ ਨਿਪਜ੍ਜਾਪੇਸਿ. ਸਾਕਟਿਕਜੇਟ੍ਠਕੋ ਪੁਰਤੋ ਅਹੋਸਿ. ਅਥਸ੍ਸ ਗੋਣਾ ਤਂ ਠਾਨਂ ਪਤ੍ਵਾ ਧੁਰਂ ਛਡ੍ਡੇਸੁਂ, ਪੁਨਪ੍ਪੁਨਂ ਆਰੋਪੇਤ੍ਵਾ ਪਾਜਿਯਮਾਨਾਪਿ ਪੁਰਤੋ ਨ ਗਚ੍ਛਿਂਸੁ. ਏਵਂ ਤਸ੍ਸ ਤੇਹਿ ਸਦ੍ਧਿਂ ਵਾਯਮਨ੍ਤਸ੍ਸੇਵ ਅਰੁਣਂ ਉਟ੍ਠਹਿ. ਸੋ ‘‘ਕਿਂ ਨਾਮ ਗੋਣਾ ਕਰਿਂਸੂ’’ਤਿ ਮਗ੍ਗਂ ਓਲੋਕੇਨ੍ਤੋ ਦਾਰਕਂ ਦਿਸ੍ਵਾ ‘‘ਭਾਰਿਯਂ ਵਤ ਕਮ੍ਮ’’ਨ੍ਤਿ ਚਿਨ੍ਤੇਤ੍ਵਾ ‘‘ਪੁਤ੍ਤੋ ਮੇ ਲਦ੍ਧੋ’’ਤਿ ਤੁਟ੍ਠਮਾਨਸੋ ਤਂ ਗੇਹਂ ਨੇਸਿ.
ਕਾਲ਼ੀਪਿ ਗਨ੍ਤ੍ਵਾ ਸੇਟ੍ਠਿਨਾ ਪੁਚ੍ਛਿਤਾ ਤਂ ਪਵਤ੍ਤਿਂ ਆਚਿਕ੍ਖਿਤ੍ਵਾ ‘‘ਗਚ੍ਛ, ਨਂ ਪੁਨ ਸਹਸ੍ਸਂ ਦਤ੍ਵਾ ਆਨੇਹੀ’’ਤਿ ਵੁਤ੍ਤਾ ਤਥਾ ਅਕਾਸਿ. ਅਥ ਨਂ ਸੇਟ੍ਠਿ ਆਹ – ‘‘ਇਦਾਨਿ ਨਂ ਆਮਕਸੁਸਾਨਂ ਨੇਤ੍ਵਾ ਗਚ੍ਛਨ੍ਤਰੇ ਨਿਪਜ੍ਜਾਪੇਹਿ, ਤਤ੍ਥ ਸੁਨਖਾਦੀਹਿ ਖਾਦਿਤੋ, ਅਮਨੁਸ੍ਸੇਨ ਵਾ ਪਹਟੋ ਮਰਿਸ੍ਸਤਿ, ਮਤਾਮਤਭਾਵਞ੍ਚਸ੍ਸ ਜਾਨਿਤ੍ਵਾ ਆਗਚ੍ਛੇਯ੍ਯਾਸੀ’’ਤਿ. ਸਾ ਤਂ ਨੇਤ੍ਵਾ ਤਤ੍ਥ ਨਿਪਜ੍ਜਾਪੇਤ੍ਵਾ ਏਕਮਨ੍ਤੇ ਅਟ੍ਠਾਸਿ. ਤਂ ਸੁਨਖਾਦਯੋ ਵਾ ਅਮਨੁਸ੍ਸੋ ਵਾ ਉਪਸਙ੍ਕਮਿਤੁਂ ਨਾਸਕ੍ਖਿਂਸੁ. ਅਥੇਕੋ ਅਜਪਾਲੋ ਅਜਾ ਗੋਚਰਂ ਨੇਨ੍ਤੋ ਸੁਸਾਨਪਸ੍ਸੇਨ ਗਚ੍ਛਤਿ. ਏਕਾ ਅਜਾ ਪਣ੍ਣਾਨਿ ਖਾਦਮਾਨਾ ਗਚ੍ਛਨ੍ਤਰਂ ਪਵਿਸਿਤ੍ਵਾ ਦਾਰਕਂ ਦਿਸ੍ਵਾ ਜਣ੍ਣੁਕੇਹਿ ਠਤ੍ਵਾ ਦਾਰਕਸ੍ਸ ਥਨਂ ਅਦਾਸਿ. ਅਜਪਾਲਕੇਨ ‘‘ਹੇ ਹੇ’’ਤਿ ਸਦ੍ਦੇ ਕਤੇਪਿ ਨ ਨਿਕ੍ਖਮਿ. ਸੋ ‘‘ਯਟ੍ਠਿਯਾ ਨਂ ਪਹਰਿਤ੍ਵਾ ਨੀਹਰਿਸ੍ਸਾਮੀ’’ਤਿ ਗਚ੍ਛਨ੍ਤਰਂ ਪਵਿਟ੍ਠੋ ਜਣ੍ਣੁਕੇਹਿ ਠਤ੍ਵਾ ਦਾਰਕਂ ਖੀਰਂ ਪਾਯਨ੍ਤਿਂ ਦਿਸ੍ਵਾ ਦਾਰਕੇ ਪੁਤ੍ਤਸਿਨੇਹਂ ਪਟਿਲਭਿਤ੍ਵਾ ‘‘ਪੁਤ੍ਤੋ ਮੇ ਲਦ੍ਧੋ’’ਤਿ ਆਦਾਯ ਪਕ੍ਕਾਮਿ.
ਕਾਲ਼ੀ ਗਨ੍ਤ੍ਵਾ ਸੇਟ੍ਠਿਨਾ ਪੁਚ੍ਛਿਤਾ ਤਂ ਪਵਤ੍ਤਿਂ ਆਚਿਕ੍ਖਿਤ੍ਵਾ ‘‘ਗਚ੍ਛ, ਨਂ ਪੁਨ ਸਹਸ੍ਸਂ ਦਤ੍ਵਾ ਆਨੇਹੀ’’ਤਿ ਵੁਤ੍ਤਾ ਤਥਾ ਅਕਾਸਿ. ਅਯ ਨਂ ਸੇਟ੍ਠਿ ਆਹ – ‘‘ਅਮ੍ਮ, ਇਮਂ ਆਦਾਯ ਚੋਰਪਪਾਤਪਬ੍ਬਤਂ ਅਭਿਰੁਹਿਤ੍ਵਾ ਪਪਾਤੇ ਖਿਪ, ਪਬ੍ਬਤਕੁਚ੍ਛਿਯਂ ਪਟਿਹਞ੍ਞਮਾਨੋ ਖਣ੍ਡਾਖਣ੍ਡਿਕੋ ਹੁਤ੍ਵਾ ਭੂਮਿਯਂ ਪਤਿਸ੍ਸਤਿ, ਮਤਾਮਤਭਾਵਞ੍ਚਸ੍ਸ ਞਤ੍ਵਾ ਆਗਚ੍ਛੇਯ੍ਯਾਸੀ’’ਤਿ. ਸਾ ਤਂ ਤਥਾ ਨੇਤ੍ਵਾ ਪਬ੍ਬਤਮਤ੍ਥਕੇ ਠਤ੍ਵਾ ਖਿਪਿ. ਤਂ ਖੋ ਪਨ ਪਬ੍ਬਤਕੁਚ੍ਛਿਂ ਨਿਸ੍ਸਾਯ ਮਹਾਵੇਲ਼ੁਗੁਮ੍ਬੋ ਪਬ੍ਬਤਾਨੁਸਾਰੇਨੇਵ ਵਡ੍ਢਿ, ਤਸ੍ਸ ਮਤ੍ਥਕਂ ਘਨਜਾਤੋ ਜਿਞ੍ਜੁਕਗੁਮ੍ਬੋ ਅਵਤ੍ਥਰਿ. ਦਾਰਕੋ ਪਤਨ੍ਤੋ ਕੋਜਵੇ ਵਿਯ ਤਸ੍ਮਿਂ ਪਤਿ. ਤਂ ਦਿਵਸਞ੍ਚ ਨਲ਼ਕਾਰਜੇਟ੍ਠਕਸ੍ਸ ਵੇਣੁਬਲਿ ਪਤ੍ਤੋ ਹੋਤਿ. ਸੋ ਪੁਤ੍ਤੇਨ ਸਦ੍ਧਿਂ ਗਨ੍ਤ੍ਵਾ ਤਂ ਵੇਲ਼ੁਗੁਮ੍ਬਂ ਛਿਨ੍ਦਿਤੁਂ ਆਰਭਿ. ਤਸ੍ਮਿਂ ਚਲਿਤੇ ਦਾਰਕੋ ਸਦ੍ਦਮਕਾਸਿ. ਸੋ ਦਾਰਕਸਦ੍ਦੋ ਵਿਯਾਤਿ ਏਕੇਨ ਪਸ੍ਸੇਨ ਅਭਿਰੁਹਿਤ੍ਵਾ ਤਂ ਦਿਸ੍ਵਾ ‘‘ਪੁਤ੍ਤੋ ਮੇ ਲਦ੍ਧੋ’’ਤਿ ਤੁਟ੍ਠਚਿਤ੍ਤੋ ਆਦਾਯ ਗਤੋ. ਕਾਲ਼ੀ ਗਨ੍ਤ੍ਵਾ ਸੇਟ੍ਠਿਨਾ ਪੁਚ੍ਛਿਤਾ ਤਂ ਪਵਤ੍ਤਿਂ ਆਚਿਕ੍ਖਿਤ੍ਵਾ ‘‘ਗਚ੍ਛ, ਨਂ ਪੁਨ ਸਹਸ੍ਸਂ ਦਤ੍ਵਾ ਆਨੇਹੀ’’ਤਿ ਵੁਤ੍ਤਾ ਤਥਾ ਅਕਾਸਿ.
ਸੇਟ੍ਠਿਨੋ ਇਦਞ੍ਚਿਦਞ੍ਚ ਕਰੋਨ੍ਤਸ੍ਸੇਵ ਦਾਰਕੋ ਵਡ੍ਢਿਤੋ. ਮਹਾਘੋਸਵਚਨਤ੍ਤਾ ਚਸ੍ਸ ਘੋਸਿਤੋਤੇਵ ਨਾਮਂ ਅਹੋਸਿ. ਸੋ ਸੇਟ੍ਠਿਨੋ ਅਕ੍ਖਿਮ੍ਹਿ ਕਣ੍ਟਕੋ ਵਿਯ ਖਾਯਿ, ਉਜੁਕਂ ਓਲੋਕੇਤੁਮ੍ਪਿ ਨ ਵਿਸਹਿ. ਅਥਸ੍ਸ ਮਰਣੂਪਾਯਂ ਚਿਨ੍ਤੇਨ੍ਤੋ ਅਤ੍ਤਨੋ ਕੁਮ੍ਭਕਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸ ‘‘ਕਦਾ ਆਵਾਪਂ ਆਲਿਮ੍ਪੇਸ੍ਸਸੀ’’ਤਿ ਪੁਚ੍ਛਿਤ੍ਵਾ ‘‘ਸ੍ਵੇ’’ਤਿ ਵੁਤ੍ਤੇ ‘‘ਤੇਨ ਹਿ ਇਦਂ ਸਹਸ੍ਸਂ ਗਣ੍ਹਿਤ੍ਵਾ ਮਮੇਕਂ ਕਮ੍ਮਂ ਕਰੋਹੀ’’ਤਿ ਆਹ. ‘‘ਕਿਂ ਸਾਮੀ’’ਤਿ? ‘‘ਏਕੋ ਮੇ ਅਵਜਾਤਪੁਤ੍ਤੋ ਅਤ੍ਥਿ, ਤਂ ਤਵ ਸਨ੍ਤਿਕਂ ਪੇਸਿਸ੍ਸਾਮਿ, ਅਥ ਨਂ ਗਬ੍ਭਂ ਪਵੇਸੇਤ੍ਵਾ ਤਿਣ੍ਹਾਯ ਵਾਸਿਯਾ ਖਣ੍ਡਾਖਣ੍ਡਿਕਂ ਛਿਨ੍ਦਿਤ੍ਵਾ ਚਾਟਿਯਂ ਪਕ੍ਖਿਪਿਤ੍ਵਾ ਆਵਾਪੇ ਪਵੇਸੇਯ੍ਯਾਸੀਤਿ. ਇਦਂ ਤੇ ਸਹਸ੍ਸਂ ਸਚ੍ਚਕਾਰਸਦਿਸਂ, ਉਤ੍ਤਰਿਂ ਪਨ ਤੇ ਕਤ੍ਤਬ੍ਬਯੁਤ੍ਤਕਂ ਪਚ੍ਛਾ ਕਰਿਸ੍ਸਾਮੀ’’ਤਿ. ਕੁਮ੍ਭਕਾਰੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ.
ਸੇਟ੍ਠਿ ਪੁਨਦਿਵਸੇ ਘੋਸਿਤਂ ਪਕ੍ਕੋਸਿਤ੍ਵਾ ‘‘ਹਿਯ੍ਯੋ ਮਯਾ ਕੁਮ੍ਭਕਾਰੋ ਏਕਂ ਕਮ੍ਮਂ ਆਣਤ੍ਤੋ, ਏਹਿ, ਤ੍ਵਂ ਤਾਤ, ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਏਵਂ ਵਦੇਹਿ ‘ਹਿਯ੍ਯੋ ਕਿਰ ਮੇ ਪਿਤਰਾ ਆਣਤ੍ਤਂ ਕਮ੍ਮਂ ਨਿਪ੍ਫਾਦੇਹੀ’’’ਤਿ ਪਹਿਣਿ. ਸੋ ‘‘ਸਾਧੂ’’ਤਿ ਅਗਮਾਸਿ. ਤਂ ਤਤ੍ਥ ਗਚ੍ਛਨ੍ਤਂ ਇਤਰੋ ਸੇਟ੍ਠਿਨੋ ਪੁਤ੍ਤੋ ਦਾਰਕੇਹਿ ਸਦ੍ਧਿਂ ਗੁਲ਼ਕਕੀਲ਼ਂ ਕੀਲ਼ਨ੍ਤੋ ਦਿਸ੍ਵਾ ਪਕ੍ਕੋਸਿਤ੍ਵਾ ‘‘ਕੁਹਿਂ ਗਚ੍ਛਸੀ’’ਤਿ ਪੁਚ੍ਛਿਤ੍ਵਾ ਪਿਤੁ ਸਾਸਨਂ ਗਹੇਤ੍ਵਾ ‘‘ਕੁਮ੍ਭਕਾਰਸ੍ਸ ਸਨ੍ਤਿਕ’’ਨ੍ਤਿ ਵੁਤ੍ਤੇ ‘‘ਅਹਂ ਤਤ੍ਥ ਗਮਿਸ੍ਸਾਮਿ, ਇਮੇ ਮਂ ਦਾਰਕਾ ਬਹੁਲਕ੍ਖਂ ਜਿਨਿਂਸੁ, ਤਂ ਮੇ ਪਟਿਜਿਨਿਤ੍ਵਾ ਦੇਹੀ’’ਤਿ ਆਹ. ‘‘ਅਹਂ ਪਿਤੁ ਭਾਯਾਮੀ’’ਤਿ. ‘‘ਮਾ ਭਾਯਿ, ਭਾਤਿਕ, ਅਹਂ ਤਂ ਸਾਸਨਂ ਹਰਿਸ੍ਸਾਮੀ’’ਤਿ. ‘‘ਬਹੂਹਿ ਜਿਤੋ ਯਾਵਾਹਂ ਆਗਚ੍ਛਾਮਿ, ਤਾਵ ਮੇ ਲਕ੍ਖਂ ਪਟਿਜਿਨਾਹੀ’’ਤਿ. ਘੋਸਿਤੋ ਕਿਰ ਗੁਲ਼ਕਕੀਲ਼ਾਯਂ ਛੇਕੋ, ਤੇਨ ਨਂ ਏਵਂ ਨਿਬਨ੍ਧਿ. ਸੋਪਿ ਤਂ ‘‘ਤੇਨ ਹਿ ਗਨ੍ਤ੍ਵਾ ਕੁਮ੍ਭਕਾਰਂ ਵਦੇਹਿ ‘ਪਿਤਰਾ ਕਿਰ ਮੇ ਹਿਯ੍ਯੋ ਏਕਂ ਕਮ੍ਮਂ ਆਣਤ੍ਤਂ, ਤਂ ਨਿਪ੍ਫਾਦੇਹੀ’’’ਤਿ ਉਯ੍ਯੋਜੇਸਿ. ਸੋ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਥਾ ਅਵਚ. ਅਥ ਨਂ ਕੁਮ੍ਭਕਾਰੋ ਸੇਟ੍ਠਿਨਾ ਵੁਤ੍ਤਨਿਯਾਮੇਨ ਮਾਰੇਤ੍ਵਾ ਆਵਾਪੇ ਖਿਪਿ. ਘੋਸਿਤੋਪਿ ਦਿਵਸਭਾਗਂ ਕੀਲ਼ਿਤ੍ਵਾ ਸਾਯਨ੍ਹਸਮਯੇਵ ਗੇਹਂ ਗਨ੍ਤ੍ਵਾ ‘‘ਕਿਂ, ਤਾਤ, ਨ ਗਤੋਸੀ’’ਤਿ ਵੁਤ੍ਤੇ ਅਤ੍ਤਨੋ ਅਗਤਕਾਰਣਞ੍ਚ ਕਨਿਟ੍ਠਸ੍ਸ ਗਤਕਾਰਣਞ੍ਚ ਆਰੋਚੇਸਿ. ਸੇਟ੍ਠਿ ‘‘ਧੀ ਧੀ’’ਤਿ ਮਹਾਵਿਰਵਂ ਵਿਰਵਿਤ੍ਵਾ ਸਕਲਸਰੀਰੇ ਪਕ੍ਕੁਥਿਤਲੋਹਿਤੋ ਵਿਯ ਹੁਤ੍ਵਾ ‘‘ਅਮ੍ਭੋ ਕੁਮ੍ਭਕਾਰ, ਮਾ ਨਾਸਯਿ, ਮਾ ਨਾਸਯੀ’’ਤਿ ਬਾਹਾ ਪਗ੍ਗਯ੍ਹ ਕਨ੍ਦਨ੍ਤੋ ਤਸ੍ਸ ਸਨ੍ਤਿਕਂ ਅਗਮਾਸਿ. ਕੁਮ੍ਭਕਾਰੋ ਤਂ ਤਥਾ ਆਗਚ੍ਛਨ੍ਤਂ ਦਿਸ੍ਵਾ ‘‘ਸਾਮਿ, ਮਾ ਸਦ੍ਦਂ ਕਰਿ, ਕਮ੍ਮਂ ਨਿਪ੍ਫਨ੍ਨ’’ਨ੍ਤਿ ਆਹ. ਸੋ ਪਬ੍ਬਤੇਨ ਵਿਯ ਮਹਨ੍ਤੇਨ ਸੋਕੇਨ ਅਵਤ੍ਥਟੋ ਹੁਤ੍ਵਾ ਅਨਪ੍ਪਕਂ ਦੋਮਨਸ੍ਸਂ ਪਟਿਸਂਵੇਦੇਸਿ.
ਏਵਂ ਸਨ੍ਤੇਪਿ ਪਨ ਸੇਟ੍ਠਿ ਤਂ ਉਜੁਕਂ ਓਲੋਕੇਤੁਂ ਨ ਸਕ੍ਕੋਤਿ. ‘‘ਕਿਨ੍ਤਿ ਨਂ ਮਾਰੇਯ੍ਯ’’ਨ੍ਤਿ ਚਿਨ੍ਤੇਨ੍ਤੋ ‘‘ਮਮ ਗਾਮਸਤੇ ਆਯੁਤ੍ਤਕਸ੍ਸ ਸਨ੍ਤਿਕਂ ਪੇਸੇਤ੍ਵਾ ਮਾਰਾਪੇਸ੍ਸਾਮੀ’’ਤਿ ਉਪਾਯਂ ਦਿਸ੍ਵਾ ‘‘ਅਯਂ ਮੇ ਅਵਜਾਤਪੁਤ੍ਤੋ, ਇਮਂ ਮਾਰੇਤ੍ਵਾ ਵਚ੍ਚਕੂਪੇ ਖਿਪਤੁ, ਏਵਞ੍ਚ ਕਤੇ ਅਹਂ ਮਾਤੁਲਸ੍ਸ ਕਤ੍ਤਬ੍ਬਯੁਤ੍ਤਕਂ ਜਾਨਿਸ੍ਸਾਮੀ’’ਤਿ ਤਸ੍ਸ ਪਣ੍ਣਂ ਲਿਖਿਤ੍ਵਾ ‘‘ਤਾਤ ਘੋਸਿਤ, ਅਮ੍ਹਾਕਂ ਗਾਮਸਤੇ ਆਯੁਤ੍ਤਕੋ ਅਤ੍ਥਿ, ਇਮਂ ਪਣ੍ਣਂ ਹਰਿਤ੍ਵਾ ਤਸ੍ਸ ਦੇਹੀ’’ਤਿ ਵਤ੍ਵਾ ਪਣ੍ਣਂ ਤਸ੍ਸ ਦੁਸ੍ਸਨ੍ਤੇ ਬਨ੍ਧਿ. ਸੋ ਪਨ ਅਕ੍ਖਰਸਮਯਂ ਨ ਜਾਨਾਤਿ. ਦਹਰਕਾਲਤੋ ਪਟ੍ਠਾਯ ਹਿ ਤਂ ਮਾਰਾਪੇਨ੍ਤੋਵ ਸੇਟ੍ਠਿ ਮਾਰੇਤੁਂ ਨਾਸਕ੍ਖਿ, ਕਿਂ ਅਕ੍ਖਰਸਮਯਂ ਸਿਕ੍ਖਾਪੇਸ੍ਸਤਿ. ਸੋ ਅਤ੍ਤਨੋ ਮਰਣਪਣ੍ਣਮੇਵ ਦੁਸ੍ਸਨ੍ਤੇ ਬਨ੍ਧਿਤ੍ਵਾ ਨਿਕ੍ਖਮਨ੍ਤੋ ਆਹ – ‘‘ਪਾਥੇਯ੍ਯਂ ਮੇ, ਤਾਤ, ਨਤ੍ਥੀ’’ਤਿ. ‘‘ਪਾਥੇਯ੍ਯੇਨ ਕਮ੍ਮਂ ਨਤ੍ਥਿ, ਅਨ੍ਤਰਾਮਗ੍ਗੇ ਅਸੁਕਗਾਮੇ ਨਾਮ ਮਮ ਸਹਾਯਕੋ ਸੇਟ੍ਠਿ ਅਤ੍ਥਿ, ਤਸ੍ਸ ਘਰੇ ਪਾਤਰਾਸਂ ਕਤ੍ਵਾ ਪੁਰਤੋ ਗਚ੍ਛਾ’’ਤਿ. ਸੋ ‘‘ਸਾਧੂ’’ਤਿ ਪਿਤਰਂ ਵਨ੍ਦਿਤ੍ਵਾ ਨਿਕ੍ਖਨ੍ਤੋ ਤਂ ਗਾਮਂ ਪਤ੍ਵਾ ਸੇਟ੍ਠਿਘਰਂ ਪੁਚ੍ਛਿਤ੍ਵਾ ਗਨ੍ਤ੍ਵਾ ਸੇਟ੍ਠਿਜਾਯਂ ਪਸ੍ਸਿ. ‘‘ਕੁਤੋ ਆਗਤੋਸੀ’’ਤਿ ਚ ਵੁਤ੍ਤੇ ‘‘ਅਨ੍ਤੋਨਗਰਤੋ’’ਤਿ ਆਹ. ‘‘ਕਸ੍ਸ ਪੁਤ੍ਤੋਸੀ’’ਤਿ? ‘‘ਤੁਮ੍ਹਾਕਂ ਸਹਾਯਸੇਟ੍ਠਿਨੋ, ਅਮ੍ਮਾ’’ਤਿ. ‘‘ਤ੍ਵਂਸਿ ਘੋਸਿਤੋ ਨਾਮਾ’’ਤਿ? ‘‘ਆਮ, ਅਮ੍ਮਾ’’ਤਿ. ਤਸ੍ਸਾ ਸਹ ਦਸ੍ਸਨੇਨੇਵ ਤਸ੍ਮਿਂ ਪੁਤ੍ਤਸਿਨੇਹੋ ਉਪ੍ਪਜ੍ਜਿ. ਸੇਟ੍ਠਿਨੋ ਪਨੇਕਾ ਧੀਤਾ ਅਤ੍ਥਿ ਪਨ੍ਨਰਸਸੋਲ਼ਸਵਸ੍ਸੁਦ੍ਦੇਸਿਕਾ ਅਭਿਰੂਪਾ ਪਾਸਾਦਿਕਾ, ਤਂ ਰਕ੍ਖਿਤੁਂ ਏਕਮੇਵ ਪੇਸਨਕਾਰਿਕਂ ਦਾਸਿਂ ਦਤ੍ਵਾ ਸਤ੍ਤਭੂਮਿਕਸ੍ਸ ਪਾਸਾਦਸ੍ਸ ਉਪਰਿਮਤਲੇ ਸਿਰਿਗਬ੍ਭੇ ਵਸਾਪੇਨ੍ਤਿ. ਸੇਟ੍ਠਿਧੀਤਾ ਤਸ੍ਮਿਂ ਖਣੇ ਤਂ ਦਾਸਿਂ ਅਨ੍ਤਰਾਪਣਂ ਪੇਸੇਸਿ. ਅਥ ਨਂ ਸੇਟ੍ਠਿਜਾਯਾ ਦਿਸ੍ਵਾ ‘‘ਕੁਹਿਂ ਗਚ੍ਛਸੀ’’ਤਿ ਪੁਚ੍ਛਿਤ੍ਵਾ ‘‘ਅਯ੍ਯਧੀਤਾਯ ਪੇਸਨੇਨਾ’’ਤਿ ਵੁਤ੍ਤੇ ‘‘ਇਤੋ ਤਾਵ ਏਹਿ, ਤਿਟ੍ਠਤੁ ਪੇਸਨਂ, ਪੁਤ੍ਤਸ੍ਸ ਮੇ ਪੀਠਕਂ ਅਤ੍ਥਰਿਤ੍ਵਾ ਉਦਕਂ ਆਹਰਿਤ੍ਵਾ ਪਾਦੇ ਧੋਵਿਤ੍ਵਾ ਤੇਲਂ ਮਕ੍ਖਿਤ੍ਵਾ ਸਯਨਂ ਅਤ੍ਥਰਿਤ੍ਵਾ ਦੇਹਿ, ਪਚ੍ਛਾ ਪੇਸਨਂ ਕਰਿਸ੍ਸਸੀ’’ਤਿ ਆਹ. ਸਾ ਤਥਾ ਅਕਾਸਿ.
ਅਥ ਨਂ ਚਿਰੇਨਾਗਤਂ ਸੇਟ੍ਠਿਧੀਤਾ ਸਨ੍ਤਜ੍ਜੇਸਿ. ਅਥ ਨਂ ਸਾ ਆਹ – ‘‘ਮਾ ਮੇ ਕੁਜ੍ਝਿ, ਸੇਟ੍ਠਿਪੁਤ੍ਤੋ ਘੋਸਿਤੋ ਆਗਤੋ, ਤਸ੍ਸ ਇਦਞ੍ਚਿਦਞ੍ਚ ਕਤ੍ਵਾ ਤਤ੍ਥ ਗਨ੍ਤ੍ਵਾ ਆਗਤਾਮ੍ਹੀ’’ਤਿ. ਸੇਟ੍ਠਿਧੀਤਾਯ ‘‘ਸੇਟ੍ਠਿਪੁਤ੍ਤੋ ਘੋਸਿਤੋ’’ਤਿ ਨਾਮਂ ਸੁਤ੍ਵਾਵ ਪੁਬ੍ਬਸਨ੍ਨਿਵਾਸਵਸੇਨ ਪੇਮਂ ਛਵਿਆਦੀਨਿ ਛਿਨ੍ਦਿਤ੍ਵਾ ਅਟ੍ਠਿਮਿਞ੍ਜਂ ਆਹਚ੍ਚ ਠਿਤਂ. ਅਥ ਨਂ ਪੁਚ੍ਛਿ ‘‘ਕੁਹਿਂ ਸੋ ਅਮ੍ਮਾ’’ਤਿ? ‘‘ਸਯਨੇ ਨਿਪਨ੍ਨੋ ਨਿਦ੍ਦਾਯਤੀ’’ਤਿ. ‘‘ਅਤ੍ਥਿ ਪਨਸ੍ਸ ਹਤ੍ਥੇ ਕਿਞ੍ਚੀ’’ਤਿ? ‘‘ਦੁਸ੍ਸਨ੍ਤੇ ਪਣ੍ਣਂ ਅਤ੍ਥੀ’’ਤਿ. ਸਾ ‘‘ਕਿਂ ਪਣ੍ਣਂ ਨੁ ਖੋ ਏਤ’’ਨ੍ਤਿ ਤਸ੍ਮਿਂ ਨਿਦ੍ਦਾਯਨ੍ਤੇ ਮਾਤਾਪਿਤੂਨਂ ਅਞ੍ਞਵਿਹਿਤਤਾਯ ਅਪਸ੍ਸਨ੍ਤਾਨਂ ਓਤਰਿਤ੍ਵਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਪਣ੍ਣਂ ਮੋਚੇਤ੍ਵਾ ਆਦਾਯ ਅਤ੍ਤਨੋ ਗਬ੍ਭਂ ਪਵਿਸਿਤ੍ਵਾ ਦ੍ਵਾਰਂ ਪਿਧਾਯ ਵਾਤਪਾਨਂ ਵਿਵਰਿਤ੍ਵਾ ਅਕ੍ਖਰਸਮਯੇ ਕੁਸਲਤਾਯ ਤਂ ਪਣ੍ਣਂ ਵਾਚੇਤ੍ਵਾ ‘‘ਅਹੋ ਵਤ ਬਾਲੋ ਅਤ੍ਤਨੋ ਮਰਣਪਣ੍ਣਂ ਦੁਸ੍ਸਨ੍ਤੇ ਬਨ੍ਧਿਤ੍ਵਾ ਵਿਚਰਤਿ, ਸਚੇ ਮਯਾ ਨ ਦਿਟ੍ਠਂ ਅਸ੍ਸ, ਨਤ੍ਥਿ ਤਸ੍ਸ ਜੀਵਿਤ’’ਨ੍ਤਿ. ਤਂ ਪਣ੍ਣਂ ਫਾਲੇਤ੍ਵਾ ਨਾਸੇਤ੍ਵਾ ਸੇਟ੍ਠਿਸ੍ਸ ਵਚਨੇਨ ਅਪਰਂ ਪਣ੍ਣਂ ਲਿਖਿ – ‘‘ਅਯਂ ਮਮ ਪੁਤ੍ਤੋ ਘੋਸਿਤੋ ਨਾਮ, ਗਾਮਸਤਤੋ ਪਣ੍ਣਾਕਾਰਂ ਆਹਰਾਪੇਤ੍ਵਾ ਇਮਸ੍ਸ ਜਨਪਦਸੇਟ੍ਠਿਨੋ ਧੀਤਰਾ ਸਦ੍ਧਿਂ ਮਙ੍ਗਲਂ ਕਤ੍ਵਾ ਅਤ੍ਤਨੋ ਵਸਨਗਾਮਸ੍ਸ ਮਜ੍ਝੇ ਦ੍ਵਿਭੂਮਿਕਂ ਗੇਹਂ ਕਾਰੇਤ੍ਵਾ ਪਾਕਾਰਪਰਿਕ੍ਖੇਪੇਨ ਚੇਵ ਪੁਰਿਸਗੁਤ੍ਤੀਹਿ ਚ ਸੁਸਂਵਿਹਿਤਾਰਕ੍ਖਂ ਕਰੋਤੁ, ਮਯ੍ਹਂ ਇਦਞ੍ਚਿਦਞ੍ਚ ਮਯਾ ਕਤਨ੍ਤਿ ਸਾਸਨਂ ਪੇਸੇਤੁ. ਏਵਂ ਕਤੇ ਅਹਂ ਮਾਤੁਲਸ੍ਸ ਕਤ੍ਤਬ੍ਬਯੁਤ੍ਤਕਂ ਜਾਨਿਸ੍ਸਾਮੀ’’ਤਿ ਲਿਖਿਤ੍ਵਾ ਚ ਪਣ੍ਣਂ ਸਙ੍ਘਰਿਤ੍ਵਾ ਦੁਸ੍ਸਨ੍ਤੇਯੇਵਸ੍ਸ ਬਨ੍ਧਿ.
ਸੋ ਦਿਵਸਭਾਗਂ ਨਿਦ੍ਦਾਯਿਤ੍ਵਾ ਉਟ੍ਠਾਯ ਭੁਞ੍ਜਿਤ੍ਵਾ ਪਕ੍ਕਾਮਿ, ਪੁਨਦਿਵਸੇ ਪਾਤੋਵ ਤਂ ਗਾਮਂ ਗਨ੍ਤ੍ਵਾ ਆਯੁਤ੍ਤਕਂ ਗਾਮਕਿਚ੍ਚਂ ਕਰੋਨ੍ਤਮੇਵ ਪਸ੍ਸਿ. ਸੋ ਤਂ ਦਿਸ੍ਵਾ ‘‘ਕਿਂ ਤਾਤਾ’’ਤਿ ਪੁਚ੍ਛਿਤ੍ਵਾ ‘‘ਪਿਤਰਾ ਮੇ ਤੁਮ੍ਹਾਕਂ ਪਣ੍ਣਂ ਪੇਸਿਤ’’ਨ੍ਤਿ ਵੁਤ੍ਤੇ ਪਣ੍ਣਂ ਗਹੇਤ੍ਵਾ ਵਾਚੇਤ੍ਵਾ ਤੁਟ੍ਠਮਾਨਸੋ ‘‘ਪਸ੍ਸਥ, ਭੋ, ਮਮ ਸਾਮਿਨੋ ਮਯਿ ਸਿਨੇਹਂ ਕਤ੍ਵਾ ਜੇਟ੍ਠਪੁਤ੍ਤਸ੍ਸ ਮਙ੍ਗਲਂ ਕਰੋਤੂ’’ਤਿ ਮਮ ਸਨ੍ਤਿਕਂ ਪਹਿਣਿ. ‘‘ਸੀਘਂ ਦਾਰੁਆਦੀਨਿ ਆਹਰਥਾ’’ਤਿ ਗਹਪਤਿਕੇ ਆਣਾਪੇਤ੍ਵਾ ਗਾਮਮਜ੍ਝੇ ਵੁਤ੍ਤਪ੍ਪਕਾਰਂ ਗੇਹਂ ਕਾਰਾਪੇਤ੍ਵਾ ਗਾਮਸਤਤੋ ਪਣ੍ਣਾਕਾਰਂ ਆਹਰਾਪੇਤ੍ਵਾ ਜਨਪਦਸੇਟ੍ਠਿਨੋ ਧੀਤਰਂ ਆਨੇਤ੍ਵਾ ਮਙ੍ਗਲਂ ਕਤ੍ਵਾ ਸੇਟ੍ਠਿਸ੍ਸ ਸਾਸਨਂ ਪਹਿਣਿ ‘‘ਇਦਞ੍ਚਿਦਞ੍ਚ ਮਯਾ ਕਤ’’ਨ੍ਤਿ.
ਤਂ ਸੁਤ੍ਵਾ ਸੇਟ੍ਠਿਨੋ ‘‘ਯਂ ਕਾਰੇਮਿ, ਤਂ ਨ ਹੋਤਿ. ਯਂ ਨ ਕਾਰੇਮਿ, ਤਂ ਹੋਤੀ’’ਤਿ ਮਹਨ੍ਤਂ ਦੋਮਨਸ੍ਸਂ ਉਪ੍ਪਜ੍ਜਿ. ਪੁਤ੍ਤਸੋਕੇਨ ਸਦ੍ਧਿਂ ਸੋ ਸੋਕੋ ਏਕਤੋ ਹੁਤ੍ਵਾ ਕੁਚ੍ਛਿਦਾਹਂ ਉਪ੍ਪਾਦੇਤ੍ਵਾ ਅਤਿਸਾਰਂ ਜਨੇਸਿ. ਸੇਟ੍ਠਿਧੀਤਾਪਿ ‘‘ਸਚੇ ਕੋਚਿ ਸੇਟ੍ਠਿਨੋ ਸਨ੍ਤਿਕਾ ਆਗਚ੍ਛਤਿ, ਮਮ ਅਕਥੇਤ੍ਵਾ ਸੇਟ੍ਠਿਪੁਤ੍ਤਸ੍ਸ ਪਠਮਤਰਂ ਮਾ ਕਥੇਥਾ’’ਤਿ ਆਣਾਪੇਸਿ. ਸੇਟ੍ਠਿਪਿ ਖੋ ‘‘ਨ ਦਾਨਿ ਦੁਟ੍ਠਪੁਤ੍ਤਂ ਮਮ ਸਾਪਤੇਯ੍ਯਸ੍ਸ ਸਾਮਿਕਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਕਂ ਆਯੁਤ੍ਤਕਂ ਆਹ – ‘‘ਮਾਤੁਲ, ਪੁਤ੍ਤਂ ਮੇ ਦਟ੍ਠੁਕਾਮੋਮ੍ਹਿ, ਏਕਂ ਪਾਦਮੂਲਿਕਂ ਪੇਸੇਤ੍ਵਾ ਏਕਂ ਪਣ੍ਣਂ ਲਿਖਿਤ੍ਵਾ ਪੇਸੇਤ੍ਵਾ ਮਮ ਪੁਤ੍ਤਂ ਪਕ੍ਕੋਸਾਪੇਹੀ’’ਤਿ. ਸੋ ‘‘ਸਾਧੂ’’ਤਿ ਪਣ੍ਣਂ ਦਤ੍ਵਾ ਏਕਂ ਪੁਰਿਸਂ ਪੇਸੇਸਿ. ਸੇਟ੍ਠਿਧੀਤਾ ਸੇਟ੍ਠਿਸ੍ਸ ਬਲਵਗਿਲਾਨਕਾਲੇ ਘੋਸਿਤਕੁਮਾਰਂ ਆਦਾਯ ਅਗਮਾਸਿ. ਸੇਟ੍ਠਿ ਕਾਲਮਕਾਸਿ. ਰਾਜਾ ਪਿਤਰਿ ਕਾਲਙ੍ਕਤੇ ਪਿਤਰਾ ਭੁਤ੍ਤਭੋਗਂ ਦਤ੍ਵਾ ਸਬ੍ਬਸਤੇਨ ਸੇਟ੍ਠਿਟ੍ਠਾਨਂ ਅਦਾਸਿ. ਘੋਸਿਤਸੇਟ੍ਠਿ ਨਾਮ ਹੁਤ੍ਵਾ ਮਹਾਸਮ੍ਪਤ੍ਤਿਯਂ ਠਿਤੋ ਸੇਟ੍ਠਿਧੀਤਾਯ ਕਾਲ਼ਿਯਾ ਵਚਨੇਨ ਆਦਿਤੋ ਪਟ੍ਠਾਯ ਸਤ੍ਤਸੁ ਠਾਨੇਸੁ ਅਤ੍ਤਨੋ ਮਰਣਮੁਤ੍ਤਭਾਵਂ ਞਤ੍ਵਾ ਦੇਵਸਿਕਂ ਸਤਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਦਾਨਂ ਪਟ੍ਠਪੇਸੀਤਿ. ਏਵਮਸ੍ਸ ਸਤ੍ਤਸੁ ਠਾਨੇਸੁ ਅਰੋਗਭਾਵੋ ਪੁਞ੍ਞਵਤੋ ਇਦ੍ਧਿ. ਤਤ੍ਥ ਗਹਨ੍ਤਿ ਗੇਹਂ ਵੁਚ੍ਚਤਿ, ਗਹੇ ਪਤਿ ਗਹਪਤਿ. ਮਹਾਸਾਲਕੁਲੇ ਅਧਿਪਤਿਸ੍ਸੇਤਂ ਨਾਮਂ. ਕੇਸੁਚਿ ਪੋਤ੍ਥਕੇਸੁ ਘੋਸਿਤਾਨਨ੍ਤਰਂ ਮੇਣ੍ਡਕੋ ਲਿਖਿਤੋ.
ਪਞ੍ਚਨ੍ਨਂ ਮਹਾਪੁਞ੍ਞਾਨਂ ਪੁਞ੍ਞਵਤੋ ਇਦ੍ਧੀਤਿ ਏਤ੍ਥ ਪੁਞ੍ਞਿਦ੍ਧਿ ਪਞ੍ਚਨ੍ਨਂ ਮਹਾਪੁਞ੍ਞਾਨਂ ਦਟ੍ਠਬ੍ਬਾਤਿ ਅਤ੍ਥੋ. ਪਞ੍ਚ ਮਹਾਪੁਞ੍ਞਾ ਨਾਮ ਮੇਣ੍ਡਕਸੇਟ੍ਠਿ, ਤਸ੍ਸ ਭਰਿਯਾ ਚਨ੍ਦਪਦੁਮਾ, ਪੁਤ੍ਤੋ ਧਨਞ੍ਚਯਸੇਟ੍ਠਿ, ਸੁਣਿਸਾ ਸੁਮਨਦੇਵੀ, ਦੋਸੋ ਪੁਣ੍ਣੋ ਨਾਮਾਤਿ ਇਮੇ ਪਞ੍ਚ ਜਨਾ ਪਚ੍ਚੇਕਸਮ੍ਬੁਦ੍ਧੇ ਕਤਾਧਿਕਾਰਾ. ਤੇਸੁ ਮੇਣ੍ਡਕਸੇਟ੍ਠਿ ਅਡ੍ਢਤੇਰਸਾਨਿ ਕੋਟ੍ਠਸਤਾਨਿ ਸੋਧਾਪੇਤ੍ਵਾ ਸੀਸਂ ਨ੍ਹਾਤੋ ਦ੍ਵਾਰੇ ਨਿਸੀਦਿਤ੍ਵਾ ਉਦ੍ਧਂ ਉਲ੍ਲੋਕੇਤਿ, ਆਕਾਸਤੋ ਰਤ੍ਤਸਾਲਿਧਾਰਾ ਓਪਤਿਤ੍ਵਾ ਸਬ੍ਬਕੋਟ੍ਠੇ ਪੂਰੇਤਿ. ਤਸ੍ਸ ਭਰਿਯਾ ਤਣ੍ਡੁਲਂ ਏਕਨਾਲ਼ਿਮਤ੍ਤਂ ਗਹੇਤ੍ਵਾ ਭਤ੍ਤਂ ਪਚਾਪੇਤ੍ਵਾ ਏਕਸ੍ਮਿਂ ਸੂਪਬ੍ਯਞ੍ਜਨਕੇ ਸੂਪਂ ਕਾਰੇਤ੍ਵਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਦ੍ਵਾਰਕੋਟ੍ਠਕੇ ਪਞ੍ਞਤ੍ਤਾਸਨੇ ਨਿਸੀਦਿਤ੍ਵਾ ‘‘ਸਬ੍ਬੇ ਭਤ੍ਤੇਨ ਅਤ੍ਥਿਕਾ ਆਗਚ੍ਛਨ੍ਤੂ’’ਤਿ ਘੋਸਾਪੇਤ੍ਵਾ ਪਕ੍ਕੋਸਾਪੇਤ੍ਵਾ ਸੁਵਣ੍ਣਕਟਚ੍ਛੁਂ ਆਦਾਯ ਆਗਤਾਗਤਾਨਂ ਉਪਨੀਤਭਾਜਨਾਨਿ ਪੂਰੇਤ੍ਵਾ ਦੇਤਿ, ਸਕਲਦਿਵਸਮ੍ਪਿ ਦੇਨ੍ਤਿਯਾ ਕਟਚ੍ਛੁਨਾ ਸਕਿਂ ਗਹਿਤਟ੍ਠਾਨਮਤ੍ਤਮੇਵ ਪਞ੍ਞਾਯਤਿ. ਤਸ੍ਸ ਪੁਤ੍ਤੋ ਸੀਸਂ ਨ੍ਹਾਤੋ ਸਹਸ੍ਸਤ੍ਥਵਿਕਂ ਆਦਾਯ ‘‘ਕਹਾਪਣੇਹਿ ਅਤ੍ਥਿਕਾ ਆਗਚ੍ਛਨ੍ਤੂ’’ਤਿ ਘੋਸਾਪੇਤ੍ਵਾ ਆਗਤਾਗਤਾਨਂ ਗਹਿਤਭਾਜਨਾਨਿ ਪੂਰੇਤ੍ਵਾ ਦੇਤਿ. ਥਵਿਕਾਯ ਕਹਾਪਣਸਹਸ੍ਸਮੇਵ ਹੋਤਿ. ਤਸ੍ਸ ਸੁਣਿਸਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਚਤੁਦੋਣਿਕਂ ਵੀਹਿਪਿਟਕਂ ਆਦਾਯ ਆਸਨੇ ਨਿਸਿਨ੍ਨਾ ‘‘ਬੀਜਭਤ੍ਤੇਨ ਅਤ੍ਥਿਕਾ ਆਗਚ੍ਛਨ੍ਤੂ’’ਤਿ ਘੋਸਾਪੇਤ੍ਵਾ ਆਗਤਾਗਤਾਨਂ ਗਹਿਤਭਾਜਨਾਨਿ ਪੂਰੇਤ੍ਵਾ ਦੇਤਿ, ਪਿਟਕਂ ਯਥਾਪੂਰਿਤਮੇਵ ਹੋਤਿ. ਤਸ੍ਸ ਦਾਸੋ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਸੁਵਣ੍ਣਯੁਗੇ ਸੁਵਣ੍ਣਯੋਤ੍ਤੇਹਿ ਗੋਣੇ ਯੋਜੇਤ੍ਵਾ ਸੁਵਣ੍ਣਪਤੋਦਯਟ੍ਠਿਂ ਆਦਾਯ ਗੋਣਾਨਂ ਗਨ੍ਧਪਞ੍ਚਙ੍ਗੁਲਿਕਾਨਿ ਦਤ੍ਵਾ ਵਿਸਾਣੇਸੁ ਸੁਵਣ੍ਣਕੋਸਕੇ ਪਟਿਮੁਞ੍ਚਿਤ੍ਵਾ ਖੇਤ੍ਤਂ ਗਨ੍ਤ੍ਵਾ ਪਾਜੇਤਿ, ਇਤੋ ਤਿਸ੍ਸੋ, ਇਤੋ ਤਿਸ੍ਸੋ, ਮਜ੍ਝੇ ਏਕਾਤਿ ਸਤ੍ਤ ਸੀਤਾਯੋ ਭਿਜ੍ਜਿਤ੍ਵਾ ਗਚ੍ਛਨ੍ਤਿ. ਜਮ੍ਬੁਦੀਪਵਾਸਿਨੋ ਭਤ੍ਤਬੀਜਹਿਰਞ੍ਞਸੁਵਣ੍ਣਾਦੀਸੁ ਯਥਾਰੁਚਿਤਂ ਸੇਟ੍ਠਿਗੇਹਤੋਯੇਵ ਗਣ੍ਹਿਂਸੁ. ਅਨੁਕ੍ਕਮੇਨ ਪਨ ਭਦ੍ਦਿਯਨਗਰਂ ਅਨੁਪ੍ਪਤ੍ਤੇ ਭਗਵਤਿ ਭਗਵਤੋ ਧਮ੍ਮਦੇਸਨਾਯ ਪਞ੍ਚ ਮਹਾਪੁਞ੍ਞਾ ਚ ਧਨਞ੍ਚਯਸੇਟ੍ਠਿਸ੍ਸ ਧੀਤਾ ਵਿਸਾਖਾ ਚ ਸੋਤਾਪਤ੍ਤਿਫਲਂ ਪਾਪੁਣਿਂਸੁ. ਅਯਂ ਪਨ ਨੇਸਂ ਪਞ੍ਚਨ੍ਨਂ ਮਹਾਪੁਞ੍ਞਾਨਂ ਪੁਞ੍ਞਵਤੋ ਇਦ੍ਧਿ. ਸਙ੍ਖੇਪੇਨ ਪਨ ਪਰਿਪਾਕਗਤੇ ਪੁਞ੍ਞਸਮ੍ਭਾਰੇ ਇਜ੍ਝਨਕਵਿਸੇਸੋ ਪੁਞ੍ਞਵਤੋ ਇਦ੍ਧਿ.
ਵਿਜ੍ਜਾਮਯਿਦ੍ਧਿਨਿਦ੍ਦੇਸੇ ਇਜ੍ਝਨਾਕਾਰਂ ਗਨ੍ਧਾਰਿਵਿਜ੍ਜਂ ਵਾ ਉਪਚਾਰਸਿਦ੍ਧਂ ਪਤ੍ਥਿਤਸਿਦ੍ਧਂ ਅਞ੍ਞਂ ਵਾ ਵਿਜ੍ਜਂ ਧਾਰੇਨ੍ਤੀਤਿ ਵਿਜ੍ਜਾਧਰਾ. ਵਿਜ੍ਜਂ ਪਰਿਜਪ੍ਪੇਤ੍ਵਾਤਿ ਯਥੋਪਚਾਰਂ ਵਿਜ੍ਜਂ ਮੁਖੇਨ ਪਰਿਵਤ੍ਤੇਤ੍ਵਾ. ਸੇਸਂ ਵੁਤ੍ਤਤ੍ਥਮੇਵਾਤਿ.
ਸਮ੍ਮਾਪਯੋਗਿਦ੍ਧਿਨਿਦ੍ਦੇਸੇ ਇਜ੍ਝਨਾਕਾਰਮਤ੍ਤਂ ਪੁਚ੍ਛਿਤ੍ਵਾ ਅਞ੍ਞਸ੍ਸ ਵਿਸੇਸਸ੍ਸ ਅਭਾਵਤੋ ‘‘ਕਤਮਾ’’ਤਿ ਅਪੁਚ੍ਛਿਤ੍ਵਾ ਪਕਾਰਮਤ੍ਤਮੇਵ ਪੁਚ੍ਛਨ੍ਤੇਨ ‘‘ਕਥ’’ਨ੍ਤਿ ਪੁਚ੍ਛਾ ਕਤਾ, ਤਥੇਵ ‘‘ਏਵ’’ਨ੍ਤਿ ਨਿਗਮਨਂ ਕਤਂ. ਏਤ੍ਥ ਚ ਪਟਿਪਤ੍ਤਿਸਙ੍ਖਾਤਸ੍ਸੇਵ ਸਮ੍ਮਾਪਯੋਗਸ੍ਸ ਦੀਪਨਵਸੇਨ ਪੁਰਿਮਪਾਲ਼ਿਸਦਿਸਾਵ ਪਾਲ਼ਿ ਆਗਤਾ. ਅਟ੍ਠਕਥਾਯਂ ਪਨ ਸਕਟਬ੍ਯੂਹਾਦਿਕਰਣਵਸੇਨ ਯਂਕਿਞ੍ਚਿ ਸਂਵਿਦਹਨਂ ਯਂਕਿਞ੍ਚਿ ਸਿਪ੍ਪਕਮ੍ਮਂ ਯਂਕਿਞ੍ਚਿ ਵੇਜ੍ਜਕਮ੍ਮਂ ਤਿਣ੍ਣਂ ਵੇਦਾਨਂ ਉਗ੍ਗਹਣਂ ਤਿਣ੍ਣਂ ਪਿਟਕਾਨਂ ਉਗ੍ਗਹਣਂ, ਅਨ੍ਤਮਸੋ ਕਸਨਵਪਨਾਦੀਨਿ ਉਪਾਦਾਯ ਤਂ ਤਂ ਕਮ੍ਮਂ ਕਤ੍ਵਾ ਨਿਬ੍ਬਤ੍ਤਵਿਸੇਸੋ ਤਤ੍ਥ ਤਤ੍ਥ ਸਮ੍ਮਾਪਯੋਗਪਚ੍ਚਯਾ ਇਜ੍ਝਨਟ੍ਠੇਨ ਇਦ੍ਧੀਤਿ ਆਗਤਾਤਿ.
ਇਦ੍ਧਿਕਥਾਵਣ੍ਣਨਾ ਨਿਟ੍ਠਿਤਾ.