੩੬. ਸਮਸੀਸਟ੍ਠਞਾਣਨਿਦ੍ਦੇਸਵਣ੍ਣਨਾ

੮੭. ਸਮਸੀਸਟ੍ਠਞਾਣਨਿਦ੍ਦੇਸੇ ਪਞ੍ਚਕ੍ਖਨ੍ਧਾਤਿਆਦੀਹਿ ਦਸਹਿ ਰਾਸੀਹਿ ਸਬ੍ਬਧਮ੍ਮਸਙ੍ਗਹੋ ਵੇਦਿਤਬ੍ਬੋ. ਨ ਹਿ ਏਕੇਕਸ੍ਸ ਵਸੇਨ ਆਯਤਨਧਾਤੁਰਾਸਿਵਜ੍ਜੇਹਿ ਸੇਸੇਹਿ ਅਟ੍ਠਹਿ ਰਾਸੀਹਿ ਵਿਸੁਂ ਵਿਸੁਂ ਸਬ੍ਬਧਮ੍ਮੋ ਸਙ੍ਗਯ੍ਹਤੀਤਿ. ਯਸ੍ਮਾ ਪਨ ਲੋਕੁਤ੍ਤਰਧਮ੍ਮਾ ਹੇਤੁਸਮੁਚ੍ਛੇਦੇਨ ਸਮੁਚ੍ਛਿਨ੍ਦਿਤਬ੍ਬਾ ਨ ਹੋਨ੍ਤਿ, ਤਸ੍ਮਾ ਸਬ੍ਬਧਮ੍ਮਸਦ੍ਦੇਨ ਸਙ੍ਗਹਿਤਾਪਿ ਲੋਕੁਤ੍ਤਰਧਮ੍ਮਾ ਸਮੁਚ੍ਛੇਦਵਸੇਨ ਸਮ੍ਭਵਤੋ ਇਧ ਨ ਗਹੇਤਬ੍ਬਾ, ਹੇਤੁਸਮੁਚ੍ਛੇਦੇਨ ਸਮੁਚ੍ਛਿਨ੍ਦਿਤਬ੍ਬਾ ਏਵ ਤੇਭੂਮਕਧਮ੍ਮਾ ਗਹੇਤਬ੍ਬਾ. ਸਮ੍ਮਾ ਸਮੁਚ੍ਛਿਨ੍ਦਤੀਤਿ ਯਥਾਯੋਗਂ ਵਿਕ੍ਖਮ੍ਭਨਤਦਙ੍ਗਸਮੁਚ੍ਛੇਦਪਹਾਨਵਸੇਨ ਪਰਿਯੁਟ੍ਠਾਨਂ ਅਨੁਸਯਞ੍ਚ ਨਿਰੋਧੇਨ੍ਤੋ ਸਮ੍ਮਾ ਸਮੁਚ੍ਛਿਨ੍ਦਤਿ. ਏਵਂ ਪੁਗ੍ਗਲਾਧਿਟ੍ਠਾਨਾਯ ਦੇਸਨਾਯ ਸਮ੍ਮਾ ਸਮੁਚ੍ਛੇਦੋ ਨਿਦ੍ਦਿਟ੍ਠੋ. ਨਿਰੋਧੇਤੀਤਿ ਅਨੁਪ੍ਪਾਦਨਿਰੋਧੇਨ ਨਿਰੋਧੇਤਿ. ਇਮਿਨਾ ਸਮੁਚ੍ਛੇਦਤ੍ਥੋ ਵੁਤ੍ਤੋ. ਨ ਉਪਟ੍ਠਾਤੀਤਿ ਏਵਂ ਨਿਰੋਧੇ ਕਤੇ ਸੋ ਸੋ ਧਮ੍ਮੋ ਪੁਨ ਨ ਉਪਤਿਟ੍ਠਤਿ, ਨ ਉਪ੍ਪਜ੍ਜਤੀਤਿ ਅਤ੍ਥੋ. ਇਮਿਨਾ ਨਿਰੋਧਤ੍ਥੋ ਵੁਤ੍ਤੋ. ਏਵਂ ਅਨੁਪਟ੍ਠਹਨਧਮ੍ਮਵਸੇਨ ਅਨੁਪਟ੍ਠਾਨਭਾਵੋ ਨਿਦ੍ਦਿਟ੍ਠੋ. ਸਮਨ੍ਤਿ ਕਾਮਚ੍ਛਨ੍ਦਾਦੀਨਂ ਸਮਿਤਤ੍ਤਾ ਸਮਂ. ਤਾਨਿ ਪਨ ਨੇਕ੍ਖਮ੍ਮਾਦੀਨਿ ਸਤ੍ਤ, ਰੂਪਾਰੂਪਜ੍ਝਾਨਾਨਿ ਅਟ੍ਠ, ਮਹਾਵਿਪਸ੍ਸਨਾ ਅਟ੍ਠਾਰਸ, ਅਰਿਯਮਗ੍ਗਾ ਚਤ੍ਤਾਰੋਤਿ ਸਤ੍ਤਤਿਂਸ ਹੋਨ੍ਤਿ.

ਤੇਰਸ ਸੀਸਾਨਿ ਸੀਸਭੂਤਾਨਂ ਸਬ੍ਬੇਸਂ ਸਙ੍ਗਹਵਸੇਨ ਵੁਤ੍ਤਾਨਿ. ਇਧ ਪਨ ਸਦ੍ਧਾਦੀਨਿ ਅਟ੍ਠੇਵ ਸੀਸਾਨਿ ਯੁਜ੍ਜਨ੍ਤਿ. ਨ ਹਿ ਅਰਹਤੋ ਤਣ੍ਹਾਦੀਨਿ ਪਞ੍ਚ ਸੀਸਾਨਿ ਸਨ੍ਤਿ. ਪਲਿਬੋਧਸੀਸਨ੍ਤਿ ਪਲਿਬੁਨ੍ਧਨਂ ਪਲਿਬੋਧੋ, ਨਿਬ੍ਬਾਨਮਗ੍ਗਾਵਰਣਨ੍ਤਿ ਅਤ੍ਥੋ. ਸੀਸਨ੍ਤਿ ਪਧਾਨਂ, ਅਧਿਕਨ੍ਤਿ ਅਤ੍ਥੋ. ਪਲਿਬੋਧੋਯੇਵ ਸੀਸਂ, ਤਂਸਮ੍ਪਯੁਤ੍ਤਾਦਿਸਬ੍ਬਪਲਿਬੋਧੇਸੁ ਵਾ ਸੀਸਨ੍ਤਿ ਪਲਿਬੋਧਸੀਸਂ. ਏਸ ਨਯੋ ਸੇਸੇਸੁ. ਵਿਸੇਸਤੋ ਪਨ ਵਿਨਿਬਨ੍ਧਨਨ੍ਤਿ ਉਨ੍ਨਤਿਵਸੇਨ ਸਂਸਾਰੇ ਬਨ੍ਧਨਂ. ਪਰਾਮਾਸੋਤਿ ਅਭਿਨਿਵੇਸੋ. ਵਿਕ੍ਖੇਪੋਤਿ ਵਿਪ੍ਪਕਿਣ੍ਣਤਾ. ਕਿਲੇਸੋਤਿ ਕਿਲਿਸ੍ਸਨਂ. ਅਧਿਮੋਕ੍ਖੋਤਿ ਅਧਿਮੁਚ੍ਚਨਂ. ਪਗ੍ਗਹੋਤਿ ਉਸ੍ਸਾਹਨਂ. ਉਪਟ੍ਠਾਨਨ੍ਤਿ ਅਪਿਲਾਪਨਂ. ਅਵਿਕ੍ਖੇਪੋਤਿ ਅਵਿਪ੍ਪਕਿਣ੍ਣਤਾ. ਦਸ੍ਸਨਨ੍ਤਿ ਯਥਾਸਭਾਵਪਟਿਵੇਧੋ. ਪਵਤ੍ਤਨ੍ਤਿ ਉਪਾਦਿਨ੍ਨਕ੍ਖਨ੍ਧਪਵਤ੍ਤਂ. ਗੋਚਰੋਤਿ ਆਰਮ੍ਮਣਂ. ਇਮੇਸੁ ਦ੍ਵਾਦਸਸੁਪਿ ਵਾਰੇਸੁ ਪਧਾਨਟ੍ਠੋ ਸੀਸਟ੍ਠੋ. ਵਿਮੋਕ੍ਖੋਤਿ ਵਿਕ੍ਖਮ੍ਭਨਤਦਙ੍ਗਸਮੁਚ੍ਛੇਦਪਟਿਪ੍ਪਸ੍ਸਦ੍ਧਿਨਿਸ੍ਸਰਣਵਿਮੁਤ੍ਤੀਸੁ ਪਞ੍ਚਸੁ ਨਿਸ੍ਸਰਣਵਿਮੁਤ੍ਤਿ ਨਿਬ੍ਬਾਨਂ. ਸਙ੍ਖਾਰਸੀਸਨ੍ਤਿ ਸਬ੍ਬਸਙ੍ਖਤਸਙ੍ਖਾਰਾਨਂ ਸੀਸਂ, ਕੋਟਿ ਅਵਸਾਨਨ੍ਤਿ ਅਤ੍ਥੋ. ਏਤੇਨ ਅਨੁਪਾਦਿਸੇਸਪਰਿਨਿਬ੍ਬਾਨਂ ਵੁਤ੍ਤਂ. ਸਙ੍ਖਾਰਾਭਾਵਮਤ੍ਤਵਸੇਨ ਵਾ ਖਨ੍ਧਪਰਿਨਿਬ੍ਬਾਨਮੇਵ ਵੁਤ੍ਤਂ ਹੋਤਿ. ਨੇਕ੍ਖਮ੍ਮਾਦਿਕਂ ਸਮਞ੍ਚ ਸਦ੍ਧਾਦਿਕਂ ਸੀਸਞ੍ਚ, ਸਮਸੀਸਂ ਵਾ ਅਸ੍ਸ ਅਤ੍ਥੀਤਿ ਸਮਸੀਸੀਤਿ. ਅਥ ਵਾ ਤੇਰਸਨ੍ਨਂ ਸੀਸਾਨਂ ਤਣ੍ਹਾਦੀਨਿ ਪਞ੍ਚ ਸੀਸਾਨਿ ਸਮੁਦਯਸਚ੍ਚਂ, ਸਦ੍ਧਾਦੀਨਿ ਪਞ੍ਚ ਮਗ੍ਗਸਚ੍ਚਂ, ਪਵਤ੍ਤਸੀਸਂ ਜੀਵਿਤਿਨ੍ਦ੍ਰਿਯਂ ਦੁਕ੍ਖਸਚ੍ਚਂ, ਗੋਚਰਸੀਸਞ੍ਚ ਸਙ੍ਖਾਰਸੀਸਞ੍ਚ ਨਿਰੋਧਸਚ੍ਚਨ੍ਤਿ ਇਮੇਸਂ ਚਤੁਨ੍ਨਂ ਅਰਿਯਸਚ੍ਚਾਨਂ ਏਕਸ੍ਮਿਂ ਰੋਗੇ ਵਾ ਏਕਸ੍ਮਿਂ ਇਰਿਯਾਪਥੇ ਵਾ ਏਕਸ੍ਮਿਂ ਸਭਾਗਜੀਵਿਤਿਨ੍ਦ੍ਰਿਯੇ ਵਾ ਅਭਿਸਮਯੋ ਚ ਅਨੁਪਾਦਿਸੇਸਪਰਿਨਿਬ੍ਬਾਨਞ੍ਚ ਯਸ੍ਸ ਹੋਤਿ, ਸੋ ਪੁਬ੍ਬੇ ਵੁਤ੍ਤਸਮਾਨਞ੍ਚ ਇਮੇਸਞ੍ਚ ਸੀਸਾਨਂ ਅਤ੍ਥਿਤਾਯ ਸਮਸੀਸੀਤਿ ਵੁਚ੍ਚਤਿ.

ਸਮਸੀਸਟ੍ਠਞਾਣਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.