੧੩. ਵਿਮੁਤ੍ਤਿਞਾਣਨਿਦ੍ਦੇਸਵਣ੍ਣਨਾ

੬੪. ਵਿਮੁਤ੍ਤਿਞਾਣਨਿਦ੍ਦੇਸੇ ਸਕ੍ਕਾਯਦਿਟ੍ਠੀਤਿ ਵਿਜ੍ਜਮਾਨਟ੍ਠੇਨ ਸਤਿ ਖਨ੍ਧਪਞ੍ਚਕਸਙ੍ਖਾਤੇ ਕਾਯੇ, ਸਯਂ ਵਾ ਸਤੀ ਤਸ੍ਮਿਂ ਕਾਯੇ ਦਿਟ੍ਠੀਤਿ ਸਕ੍ਕਾਯਦਿਟ੍ਠਿ. ਵਿਚਿਕਿਚ੍ਛਾਤਿ ਵਿਗਤਾ ਚਿਕਿਚ੍ਛਾ, ਸਭਾਵਂ ਵਾ ਵਿਚਿਨਨ੍ਤੋ ਏਤਾਯ ਕਿਚ੍ਛਤਿ ਕਿਲਮਤੀਤਿ ਵਿਚਿਕਿਚ੍ਛਾ. ਸੀਲਬ੍ਬਤਪਰਾਮਾਸੋਤਿ ਸੀਲੇਨ ਸੁਦ੍ਧਿ ਵਤੇਨ ਸੁਦ੍ਧਿ ਸੀਲਬ੍ਬਤੇਨ ਸੁਦ੍ਧੀਤਿ ਗਹਿਤਅਭਿਨਿਵੇਸੋ. ਸੋ ਹਿ ਸਭਾਵਂ ਅਤਿਕ੍ਕਮਿਤ੍ਵਾ ਪਰਤੋ ਆਮਸਤੀਤਿ ਸੀਲਬ੍ਬਤਪਰਾਮਾਸੋ. ਉਭਿਨ੍ਨਂ ਸਮਾਨੇਪਿ ਦਿਟ੍ਠਿਭਾਵੇ ਤਕ੍ਕਞ੍ਚ ਪਰੂਪਦੇਸਞ੍ਚ ਵਿਨਾ ਪਕਤਿਯਾ ਏਵ ਸਕ੍ਕਾਯਦਿਟ੍ਠਿਗਹਣਤੋ ਪਕਤਿਭੂਤਾਯ ਵੀਸਤਿਵਤ੍ਥੁਕਾਯ ਸਕ੍ਕਾਯਦਿਟ੍ਠਿਯਾ ਪਹਾਨੇਨੇਵ ਸਬ੍ਬਦਿਟ੍ਠਿਪ੍ਪਹਾਨਦਸ੍ਸਨਤ੍ਥਂ ਸਕ੍ਕਾਯਦਿਟ੍ਠਿ ਵੁਤ੍ਤਾ. ਸੀਲਬ੍ਬਤਪਰਾਮਾਸੋ ਪਨ ‘‘ਸੁਦ੍ਧਿਪਟਿਪਦਂ ਪਟਿਪਜ੍ਜਾਮਾ’’ਤਿ ਪਟਿਪਨ੍ਨਾਨਂ ਪਟਿਪਦਾਯ ਮਿਚ੍ਛਾਭਾਵਦਸ੍ਸਨਤ੍ਥਂ ਵਿਸੁਂ ਵੁਤ੍ਤੋਤਿ ਵੇਦਿਤਬ੍ਬੋ. ਤਿਣ੍ਣਮ੍ਪਿ ਅਨੁਸਯਪ੍ਪਹਾਨੇਨੇਵ ਪਹਾਨਂ ਦਸ੍ਸੇਤੁਂ ਦਿਟ੍ਠਾਨੁਸਯੋ ਵਿਚਿਕਿਚ੍ਛਾਨੁਸਯੋਤਿ ਵੁਤ੍ਤਂ, ਨ ਵਿਸੁਂ ਕਿਲੇਸਤ੍ਤਾ. ਉਪਕ੍ਕਿਲੇਸਾਤਿ ਕਿਲੇਸੇਨ੍ਤਿ ਉਪਤਾਪੇਨ੍ਤਿ ਵਿਬਾਧੇਨ੍ਤੀਤਿ ਕਿਲੇਸਾ, ਥਾਮਗਤਟ੍ਠੇਨ ਭੁਸਾ ਕਿਲੇਸਾਤਿ ਉਪਕ੍ਕਿਲੇਸਾ. ਸਮ੍ਮਾ ਸਮੁਚ੍ਛਿਨ੍ਨਾ ਹੋਨ੍ਤੀਤਿ ਸਮੁਚ੍ਛੇਦਪ੍ਪਹਾਨੇਨ ਅਨੁਪ੍ਪਾਦਨਿਰੋਧੇਨ ਸਮ੍ਮਾ ਸਮੁਚ੍ਛਿਨ੍ਨਾ ਹੋਨ੍ਤਿ. ਸਪਰਿਯੁਟ੍ਠਾਨੇਹੀਤਿ ਚਿਤ੍ਤਂ ਪਰਿਯੋਨਨ੍ਧਨ੍ਤਾਨਿ ਉਟ੍ਠੇਨ੍ਤਿ ਉਪ੍ਪਜ੍ਜਨ੍ਤੀਤਿ ਪਰਿਯੁਟ੍ਠਾਨਾਨਿ, ਸਮੁਦਾਚਾਰਪ੍ਪਤ੍ਤਾਨਂ ਕਿਲੇਸਾਨਮੇਤਂ ਅਧਿਵਚਨਂ. ਸਹ ਪਰਿਯੁਟ੍ਠਾਨੇਹੀਤਿ ਸਪਰਿਯੁਟ੍ਠਾਨਾਨਿ. ਤੇਹਿ ਸਪਰਿਯੁਟ੍ਠਾਨੇਹਿ ਅਨੁਸਯਿਤਉਪਕ੍ਕਿਲੇਸੇਹਿ. ਚਿਤ੍ਤਂ ਵਿਮੁਤ੍ਤਂ ਹੋਤੀਤਿ ਤੇਸਂ ਅਭਬ੍ਬੁਪ੍ਪਤ੍ਤਿਕਭੂਤਤ੍ਤਾ ਸਨ੍ਤਤਿਵਸੇਨ ਪਵਤ੍ਤਮਾਨਂ ਚਿਤ੍ਤਂ ਤਤੋ ਵਿਮੁਤ੍ਤਂ ਨਾਮ ਹੋਤਿ. ਤਦੇਵ ਸੁਟ੍ਠੁ ਵਿਮੁਤ੍ਤਤ੍ਤਾ ਸੁਵਿਮੁਤ੍ਤਂ. ਤਂਵਿਮੁਤ੍ਤਿਞਾਤਟ੍ਠੇਨਾਤਿ ਤਸ੍ਸਾ ਵਿਮੁਤ੍ਤਿਯਾ ਜਾਨਨਟ੍ਠੇਨ.

ਵਿਮੁਤ੍ਤਿਞਾਣਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.