੧੦. ਵੇਵਚਨਹਾਰਸਮ੍ਪਾਤਵਣ੍ਣਨਾ

੭੨. ‘‘ਮਾਨਸਂ ਹਦਯਂ ਪਣ੍ਡਰਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਮਨੋਵਿਞ੍ਞਾਣਧਾਤੂ’’ਤਿ (ਧ. ਸ. ੬) ਚ ਚਿਤ੍ਤਸ੍ਸ ਵੇਵਚਨਂ. ‘‘ਤਕ੍ਕੋ ਵਿਤਕ੍ਕੋ ਸਙ੍ਕਪ੍ਪੋ ਅਪ੍ਪਨਾ ਬ੍ਯਪ੍ਪਨਾ ਚੇਤਸੋ ਅਭਿਨਿਰੋਪਨਾ’’ਤਿ ਚ ਸਮ੍ਮਾਸਙ੍ਕਪ੍ਪਸ੍ਸ. ‘‘ਪਞ੍ਞਾ ਪਜਾਨਨਾ ਵਿਚਯੋ ਪਵਿਚਯੋ’’ਤਿਆਦਿਨਾ (ਧ. ਸ. ੧੬) ਸਮ੍ਮਾਦਿਟ੍ਠਿਯਾ. ‘‘ਥਿਨਂ ਥਿਯਨਾ ਥਿਯਿਤਤ੍ਤਂ ਚਿਤ੍ਤਸ੍ਸ ਅਕਲ੍ਲਤਾ ਅਕਮ੍ਮਞ੍ਞਤਾ ਓਨਾਹੋ ਪਰਿਨਾਹੋ ਅਨ੍ਤੋਸਙ੍ਕੋਚੋ’’ਤਿ ਥਿਨਸ੍ਸ. ‘‘ਅਕਲ੍ਲਤਾ ਅਕਮ੍ਮਞ੍ਞਤਾ ਕਾਯਾਲਸਿਯਂ ਸੁਪ੍ਯਂ ਸੁਪ੍ਯਨਾ ਸੁਪਿਤਤ੍ਤ’’ਨ੍ਤਿ (ਧ. ਸ. ੧੧੬੩) ਮਿਦ੍ਧਸ੍ਸ. ‘‘ਭਿਕ੍ਖਕੋ ਭਿਕ੍ਖੂ’’ਤਿਆਦਿਨਾ (ਪਾਰਾ. ੪੫) ਭਿਕ੍ਖੁਪਦਸ੍ਸ. ‘‘ਦੁਗ੍ਗਤਿ ਅਪਾਯੋ ਵਿਨਿਪਾਤੋ ਵਟ੍ਟਦੁਕ੍ਖਂ ਸਂਸਾਰੋ’’ਤਿਆਦਿਨਾ ਦੁਗ੍ਗਤਿਯਾ ਵੇਵਚਨਂ ਵੇਦਿਤਬ੍ਬਂ.

ਵੇਵਚਨਹਾਰਸਮ੍ਪਾਤਵਣ੍ਣਨਾ ਨਿਟ੍ਠਿਤਾ.