੭. ਤਿਸ੍ਸਮੇਤ੍ਤੇਯ੍ਯਸੁਤ੍ਤਨਿਦ੍ਦੇਸਵਣ੍ਣਨਾ

੪੯. ਸਤ੍ਤਮੇ ਤਿਸ੍ਸਮੇਤ੍ਤੇਯ੍ਯਸੁਤ੍ਤੇ ਮੇਥੁਨਮਨੁਯੁਤ੍ਤਸ੍ਸਾਤਿ ਮੇਥੁਨਧਮ੍ਮਂ ਸਮਾਯੁਤ੍ਤਸ੍ਸ. ਇਤੀਤਿ ਏਵਮਾਹ. ਆਯਸ੍ਮਾਤਿ ਪਿਯਵਚਨਮੇਤਂ. ਤਿਸ੍ਸੋਤਿ ਨਾਮਂ ਤਸ੍ਸ ਥੇਰਸ੍ਸ. ਸੋਪਿ ਹਿ ਤਿਸ੍ਸੋਤਿ ਨਾਮੇਨ. ਮੇਤ੍ਤੇਯ੍ਯੋਤਿ ਗੋਤ੍ਤਂ, ਗੋਤ੍ਤਵਸੇਨੇਵ ਏਸ ਪਾਕਟੋ ਅਹੋਸਿ. ਤਸ੍ਮਾ ਅਟ੍ਠੁਪ੍ਪਤ੍ਤਿਯਂ (ਸੁ. ਨਿ. ਅਟ੍ਠ. ੨.੮੨੧) ਵੁਤ੍ਤਂ – ‘‘ਤਿਸ੍ਸਮੇਤ੍ਤੇਯ੍ਯਾ ਨਾਮ ਦ੍ਵੇ ਸਹਾਯਾ’’ਤਿ. ਵਿਘਾਤਨ੍ਤਿ ਉਪਘਾਤਂ. ਬ੍ਰੂਹੀਤਿ ਆਚਿਕ੍ਖ. ਮਾਰਿਸਾਤਿ ਪਿਯਵਚਨਮੇਤਂ, ਨਿਦ੍ਦੁਕ੍ਖਾਤਿ ਵੁਤ੍ਤਂ ਹੋਤਿ. ਸੁਤ੍ਵਾਨ ਤਵ ਸਾਸਨਨ੍ਤਿ ਤਵ ਵਚਨਂ ਸੁਤ੍ਵਾ. ਵਿਵੇਕੇ ਸਿਕ੍ਖਿਸ੍ਸਾਮਸੇਤਿ ਸਹਾਯਂ ਆਰਬ੍ਭ ਧਮ੍ਮਦੇਸਨਂ ਯਾਚਨ੍ਤੋ ਭਣਤਿ, ਸੋ ਪਨ ਸਿਕ੍ਖਿਤਸਿਕ੍ਖੋਯੇਵ.

ਮੇਥੁਨਧਮ੍ਮੋ ਨਾਮਾਤਿ ਇਦਂ ਨਿਦ੍ਦਿਸਿਤਬ੍ਬਸ੍ਸ ਮੇਥੁਨਧਮ੍ਮਸ੍ਸ ਉਪਦੇਸਪਦਂ. ਅਸਦ੍ਧਮ੍ਮੋਤਿ ਅਸਤਂ ਨੀਚਜਨਾਨਂ ਧਮ੍ਮੋ. ਗਾਮਧਮ੍ਮੋਤਿ ਗਾਮਵਾਸੀਨਂ ਸੇਵਨਧਮ੍ਮੋ. ਵਸਲਧਮ੍ਮੋਤਿ ਵਸਲਾਨਂ ਧਮ੍ਮੋ, ਕਿਲੇਸਵਸ੍ਸਨਤੋ ਵਾ ਸਯਮੇਵ ਵਸਲੋ ਧਮ੍ਮੋਤਿ ਵਸਲਧਮ੍ਮੋ. ਦੁਟ੍ਠੁਲ੍ਲੋਤਿ ਦੁਟ੍ਠੋ ਚ ਕਿਲੇਸੇਹਿ ਦੁਟ੍ਠਤ੍ਤਾ, ਥੂਲੋ ਚ ਅਨਿਪੁਣਭਾਵਤੋਤਿ ਦੁਟ੍ਠੁਲ੍ਲੋ. ਯਸ੍ਮਾ ਚ ਤਸ੍ਸ ਧਮ੍ਮਸ੍ਸ ਪਰਿਵਾਰਭੂਤਂ ਦਸ੍ਸਨਮ੍ਪਿ ਗਹਣਮ੍ਪਿ ਆਮਸਨਮ੍ਪਿ ਫੁਸਨਮ੍ਪਿ ਘਟ੍ਟਨਮ੍ਪਿ ਦੁਟ੍ਠੁਲ੍ਲਂ, ਤਸ੍ਮਾਪਿ ਦੁਟ੍ਠੁਲ੍ਲੋ ਸੋ ਮੇਥੁਨਧਮ੍ਮੋ. ਓਦਕਨ੍ਤਿਕੋਤਿ ਉਦਕਂ ਅਸ੍ਸ ਅਨ੍ਤੇ ਸੁਦ੍ਧਤ੍ਥਂ ਆਦਿਯਤੀਤਿ ਉਦਕਨ੍ਤੋ, ਉਦਕਨ੍ਤੋਯੇਵ ਓਦਕਨ੍ਤਿਕੋ. ਰਹੋ ਪਟਿਚ੍ਛਨ੍ਨੇ ਓਕਾਸੇ ਕਤ੍ਤਬ੍ਬਤਾਯ ਰਹਸ੍ਸੋ. ਵਿਨਯੇ ਪਨ ‘‘ਦੁਟ੍ਠੁਲ੍ਲਂ ਓਦਕਨ੍ਤਿਕਂ ਰਹਸ੍ਸ’’ਨ੍ਤਿ (ਪਾਰਾ. ੩੯) ਪਾਠੋ. ਤਤ੍ਥ ਤੀਸੁ ਪਦੇਸੁ ਯੋ ਸੋਤਿ ਪਦਂ ਪਰਿਵਤ੍ਤੇਤ੍ਵਾ ਯਂ ਤਨ੍ਤਿ ਕਤ੍ਵਾ ਯੋਜੇਤਬ੍ਬਂ ‘‘ਯਂ ਤਂ ਦੁਟ੍ਠੁਲ੍ਲਂ, ਸੋ ਮੇਥੁਨਧਮ੍ਮੋ, ਯਂ ਤਂ ਓਦਕਨ੍ਤਿਕਂ ਸੋ ਮੇਥੁਨਧਮ੍ਮੋ, ਯਂ ਤਂ ਰਹਸ੍ਸਂ, ਸੋ ਮੇਥੁਨਧਮ੍ਮੋ’’ਤਿ. ਇਧ ਪਨ ‘‘ਯੋ ਸੋ ਅਸਦ੍ਧਮ੍ਮੋ, ਸੋ ਮੇਥੁਨਧਮ੍ਮੋ…ਪੇ… ਯੋ ਸੋ ਰਹਸ੍ਸੋ, ਸੋ ਮੇਥੁਨਧਮ੍ਮੋ’’ਤਿ ਏਵਂ ਯੋਜਨਾ ਵੇਦਿਤਬ੍ਬਾ. ਦ੍ਵਯੇਨ ਦ੍ਵਯੇਨ ਸਮਾਪਜ੍ਜਿਤਬ੍ਬਤੋ ਦ੍ਵਯਂਦ੍ਵਯਸਮਾਪਤ੍ਤਿ. ਤਤ੍ਥ ਯੋਜਨਾ – ਯਾ ਸਾ ਦ੍ਵਯਂਦ੍ਵਯਸਮਾਪਤ੍ਤਿ, ਸੋ ਮੇਥੁਨਧਮ੍ਮੋ ਨਾਮਾਤਿ. ਕਿਂਕਾਰਣਾ ਵੁਚ੍ਚਤਿ ਮੇਥੁਨਧਮ੍ਮੋਤਿ ਕੇਨ ਕਾਰਣੇਨ ਕੇਨ ਪਰਿਯਾਯੇਨ ਮੇਥੁਨਧਮ੍ਮੋਤਿ ਕਥੀਯਤਿ. ਤਂ ਕਾਰਣਂ ਦਸ੍ਸੇਨ੍ਤੋ ‘‘ਉਭਿਨ੍ਨਂ ਰਤ੍ਤਾਨ’’ਨ੍ਤਿਆਦਿਮਾਹ. ਤਤ੍ਥ ਉਭਿਨ੍ਨਂ ਰਤ੍ਤਾਨਨ੍ਤਿ ਦ੍ਵਿਨ੍ਨਂ ਇਤ੍ਥਿਪੁਰਿਸਾਨਂ ਰਾਗੇਨ ਰਞ੍ਜਿਤਾਨਂ. ਸਾਰਤ੍ਤਾਨਨ੍ਤਿ ਵਿਸੇਸੇਨ ਸੁਟ੍ਠੁ ਰਞ੍ਜਿਤਾਨਂ. ਅਵਸ੍ਸੁਤਾਨਨ੍ਤਿ ਕਿਲੇਸੇਨ ਤਿਨ੍ਤਾਨਂ. ਪਰਿਯੁਟ੍ਠਿਤਾਨਨ੍ਤਿ ਕੁਸਲਾਚਾਰਂ ਪਰਿਯਾਦਿਯਿਤ੍ਵਾ ਮਦ੍ਦਿਤ੍ਵਾ ਠਿਤਾਨਂ ‘‘ਮਗ੍ਗੇ ਚੋਰਾ ਪਰਿਯੁਟ੍ਠਿਤਾ’’ਤਿਆਦੀਸੁ ਵਿਯ. ਪਰਿਯਾਦਿਨ੍ਨਚਿਤ੍ਤਾਨਨ੍ਤਿ ਕੁਸਲਚਿਤ੍ਤਂ ਪਰਿਯਾਦਿਯਿਤ੍ਵਾ ਖੇਪੇਤ੍ਵਾ ਠਿਤਚਿਤ੍ਤਾਨਂ. ਉਭਿਨ੍ਨਂ ਸਦਿਸਾਨਨ੍ਤਿ ਦ੍ਵਿਨ੍ਨਂ ਕਿਲੇਸੇਨ ਸਦਿਸਾਨਂ. ਧਮ੍ਮੋਤਿ ਸਭਾਵੋ. ਤਂ ਕਾਰਣਾਤਿ ਤੇਨ ਕਾਰਣੇਨ. ਤਂ ਉਪਮਾਯ ਸਾਧੇਨ੍ਤੋ ‘‘ਉਭੋ ਕਲਹਕਾਰਕਾ’’ਤਿਆਦਿਮਾਹ. ਤਤ੍ਥ ਉਭੋ ਕਲਹਕਾਰਕਾਤਿ ਪੁਬ੍ਬਭਾਗੇ ਕਲਹਕਾਰਕਾ ਦ੍ਵੇ. ਮੇਥੁਨਕਾਤਿ ਵੁਚ੍ਚਨ੍ਤੀਤਿ ਸਦਿਸਾਤਿ ਵੁਚ੍ਚਨ੍ਤਿ. ਭਣ੍ਡਨਕਾਰਕਾਤਿ ਤਤ੍ਥ ਤਤ੍ਥ ਗਨ੍ਤ੍ਵਾ ਭਣ੍ਡਨਂ ਕਰੋਨ੍ਤਾ. ਭਸ੍ਸਕਾਰਕਾਤਿ ਵਾਚਾਕਲਹਂ ਕਰੋਨ੍ਤਾ. ਵਿਵਾਦਕਾਰਕਾਤਿ ਨਾਨਾਵਚਨਂ ਕਰੋਨ੍ਤਾ. ਅਧਿਕਰਣਕਾਰਕਾਤਿ ਵਿਨਿਚ੍ਛਯਪਾਪੁਣਨਵਿਸੇਸਕਾਰਣਂ ਕਰੋਨ੍ਤਾ. ਵਾਦਿਨੋਤਿ ਵਾਦਪਟਿਵਾਦਿਨੋ. ਸਲ੍ਲਾਪਕਾਤਿ ਵਾਚਂ ਕਥੇਨ੍ਤਾ ਏਵਮੇਵਨ੍ਤਿ ਉਪਮਾਸਂਸਨ੍ਦਨਂ.

ਯੁਤ੍ਤਸ੍ਸਾਤਿ ਸਞ੍ਞੁਤ੍ਤਸ੍ਸ. ਪਯੁਤ੍ਤਸ੍ਸਾਤਿ ਆਦਰੇਨ ਯੁਤ੍ਤਸ੍ਸ. ਆਯੁਤ੍ਤਸ੍ਸਾਤਿ ਵਿਸੇਸੇਨ ਯੁਤ੍ਤਸ੍ਸ. ਸਮਾਯੁਤ੍ਤਸ੍ਸਾਤਿ ਏਕਤੋ ਯੁਤ੍ਤਸ੍ਸ. ਤਚ੍ਚਰਿਤਸ੍ਸਾਤਿ ਤਂਚਰਿਤਂ ਕਰੋਨ੍ਤਸ੍ਸ. ਤਬ੍ਬਹੁਲਸ੍ਸਾਤਿ ਤਂਬਹੁਲਂ ਕਰੋਨ੍ਤਸ੍ਸ. ਤਗ੍ਗਰੁਕਸ੍ਸਾਤਿ ਤਂਗਰੁਂ ਕਰੋਨ੍ਤਸ੍ਸ. ਤਨ੍ਨਿਨ੍ਨਸ੍ਸਾਤਿ ਤਸ੍ਮਿਂ ਨਤਚਿਤ੍ਤਸ੍ਸ. ਤਪ੍ਪੋਣਸ੍ਸਾਤਿ ਤਸ੍ਮਿਂ ਨਤਕਾਯਸ੍ਸ. ਤਪ੍ਪਬ੍ਭਾਰਸ੍ਸਾਤਿ ਤਸ੍ਮਿਂ ਅਭਿਮੁਖਕਾਯਸ੍ਸ. ਤਦਧਿਮੁਤ੍ਤਸ੍ਸਾਤਿ ਤਸ੍ਮਿਂ ਅਧਿਹਰਿਤਸ੍ਸ. ਤਦਧਿਪਤੇਯ੍ਯਸ੍ਸਾਤਿ ਤਂ ਅਧਿਪਤਿਂ ਜੇਟ੍ਠਕਂ ਕਤ੍ਵਾ ਪਵਤ੍ਤਸ੍ਸ.

ਵਿਘਾਤਨ੍ਤਿ ਨਿਦ੍ਦੇਸਸ੍ਸ ਉਦ੍ਦੇਸਵਚਨਂ. ਵਿਘਾਤਨ੍ਤਿ ਪੀਲ਼ਨਂ. ਉਪਘਾਤਨ੍ਤਿ ਸਮੀਪਂ ਕਤ੍ਵਾ ਪੀਲ਼ਨਂ. ਪੀਲ਼ਨਨ੍ਤਿ ਘਟ੍ਟਨਂ. ਘਟ੍ਟਨਨ੍ਤਿ ਪੀਲ਼ਨਂ. ਸਬ੍ਬਂ ਅਞ੍ਞਮਞ੍ਞਵੇਵਚਨਂ. ਉਪਦ੍ਦਵਨ੍ਤਿ ਹਿਂਸਨਂ. ਉਪਸਗ੍ਗਨ੍ਤਿ ਤਤ੍ਥ ਤਤ੍ਥ ਉਪਗਨ੍ਤ੍ਵਾ ਪੀਲ਼ਨਾਕਾਰਂ. ਬ੍ਰੂਹੀਤਿ ਕਥੇਹਿ. ਆਚਿਕ੍ਖਾਤਿ ਵਿਸ੍ਸਜ੍ਜੇਹਿ. ਦੇਸੇਹੀਤਿ ਦਸ੍ਸੇਹਿ. ਪਞ੍ਞਪੇਹੀਤਿ ਞਾਪੇਹਿ. ਪਟ੍ਠਪੇਹੀਤਿ ਠਪੇਹਿ. ਵਿਵਰਾਤਿ ਪਾਕਟਂ ਕਰੋਹਿ. ਵਿਭਜਾਤਿ ਭਾਜੇਹਿ. ਉਤ੍ਤਾਨੀਕਰੋਹੀਤਿ ਤੀਰਂ ਪਾਪੇਹਿ. ਪਕਾਸੇਹੀਤਿ ਪਾਕਟਂ ਕਰੋਹਿ.

ਤੁਯ੍ਹਂ ਵਚਨਨ੍ਤਿ ਤਵ ਵਾਚਂ. ਬ੍ਯਪ੍ਪਥਨ੍ਤਿ ਵਚਨਂ. ਦੇਸਨਨ੍ਤਿ ਆਚਿਕ੍ਖਨਂ. ਅਨੁਸਾਸਨਨ੍ਤਿ ਓਵਾਦਂ. ਅਨੁਸਿਟ੍ਠਨ੍ਤਿ ਅਨੁਸਾਸਨਂ. ਸੁਤ੍ਵਾਤਿ ਸੋਤੇਨ ਸੁਤ੍ਵਾ. ਸੁਣਿਤ੍ਵਾਤਿ ਤਸ੍ਸੇਵ ਵੇਵਚਨਂ. ਉਗ੍ਗਹੇਤ੍ਵਾਤਿ ਸਮ੍ਮਾ ਗਹੇਤ੍ਵਾ. ਉਪਧਾਰਯਿਤ੍ਵਾਤਿ ਅਨਾਸੇਤ੍ਵਾ. ਉਪਲਕ੍ਖਯਿਤ੍ਵਾਤਿ ਸਲ੍ਲਕ੍ਖੇਤ੍ਵਾ.

੫੦. ਮੁਸ੍ਸਤੇ ਵਾਪਿ ਸਾਸਨਨ੍ਤਿ ਪਰਿਯਤ੍ਤਿਪਟਿਪਤ੍ਤਿਤੋ ਦੁਵਿਧਮ੍ਪਿ ਸਾਸਨਂ ਨਸ੍ਸਤਿ. ਵਾਪੀਤਿ ਪਦਪੂਰਣਮਤ੍ਤਂ. ਏਤਂ ਤਸ੍ਮਿਂ ਅਨਰਿਯਨ੍ਤਿ ਤਸ੍ਮਿਂ ਪੁਗ੍ਗਲੇ ਏਤਂ ਅਨਰਿਯਂ, ਯਦਿਦਂ ਮਿਚ੍ਛਾਪਟਿਪਦਾ. ਗਾਰਵਾਧਿਵਚਨਨ੍ਤਿ ਗੁਣਵਿਸਿਟ੍ਠਸਬ੍ਬਸਤ੍ਤੁਤ੍ਤਮਗਰੁਗਾਰਵਾਧਿਵਚਨਂ. ਤੇਨਾਹੁ ਪੋਰਾਣਾ –

‘‘ਭਗਵਾਤਿ ਵਚਨਂ ਸੇਟ੍ਠਂ, ਭਗਵਾਤਿ ਵਚਨਮੁਤ੍ਤਮਂ;

ਗਰੁ ਗਾਰਵਯੁਤ੍ਤੋ ਸੋ, ਭਗਵਾ ਤੇਨ ਵੁਚ੍ਚਤੀ’’ਤਿ. (ਵਿਸੁਦ੍ਧਿ. ੧.੧੪੨);

ਚਤੁਬ੍ਬਿਧਂ ਵਾ ਨਾਮਂ ਆਵਤ੍ਥਿਕਂ, ਲਿਙ੍ਗਿਕਂ, ਨੇਮਿਤ੍ਤਿਕਂ, ਅਧਿਚ੍ਚਸਮੁਪ੍ਪਨ੍ਨਨ੍ਤਿ. ਅਧਿਚ੍ਚਸਮੁਪ੍ਪਨ੍ਨਂ ਨਾਮ ਲੋਕਿਯਵੋਹਾਰੇਨ ‘‘ਯਦਿਚ੍ਛਕ’’ਨ੍ਤਿ ਵੁਤ੍ਤਂ ਹੋਤਿ. ਤਤ੍ਥ ਵਚ੍ਛੋ, ਦਮ੍ਮੋ, ਬਲੀਬਦ੍ਧੋਤਿ ਏਵਮਾਦਿ ਆਵਤ੍ਥਿਕਂ, ਦਣ੍ਡੀ, ਛਤ੍ਤੀ, ਸਿਖੀ, ਕਰੀਤਿ ਏਵਮਾਦਿ ਲਿਙ੍ਗਿਕਂ, ਤੇਵਿਜ੍ਜੋ, ਛਲ਼ਭਿਞ੍ਞੋਤਿ ਏਵਮਾਦਿ ਨੇਮਿਤ੍ਤਿਕਂ, ਸਿਰਿਵਡ੍ਢਕੋ, ਧਨਵਡ੍ਢਕੋਤਿ ਏਵਮਾਦਿ ਵਚਨਤ੍ਥਂ ਅਨਪੇਕ੍ਖਿਤ੍ਵਾ ਪਵਤ੍ਤਂ ਅਧਿਚ੍ਚਸਮੁਪ੍ਪਨ੍ਨਂ. ਇਦਂ ਪਨ ਭਗਵਾਤਿ ਨਾਮਂ ਨੇਮਿਤ੍ਤਿਕਂ, ਨ ਮਹਾਮਾਯਾਯ, ਨ ਸੁਦ੍ਧੋਦਨਮਹਾਰਾਜੇਨ, ਨ ਅਸੀਤਿਯਾ ਞਾਤਿਸਹਸ੍ਸੇਹਿ ਕਤਂ, ਨ ਸਕ੍ਕਸਨ੍ਤੁਸਿਤਾਦੀਹਿ ਦੇਵਤਾਵਿਸੇਸੇਹਿ ਕਤਂ. ਵਕ੍ਖਤਿ ਚ ‘‘ਭਗਵਾਤਿ ਨੇਤਂ ਨਾਮਂ ਮਾਤਰਾ ਕਤਂ…ਪੇ… ਪਟਿਲਾਭਾ ਸਚ੍ਛਿਕਾ ਪਞ੍ਞਤ੍ਤਿ ਯਦਿਦਂ ਭਗਵਾ’’ਤਿ (ਮਹਾਨਿ. ੮੪).

‘‘ਭਾਗ੍ਯਵਾ ਭਗ੍ਗਵਾ ਯੁਤ੍ਤੋ, ਭਗੇਹਿ ਚ ਵਿਭਤ੍ਤਵਾ;

ਭਤ੍ਤਵਾ ਵਨ੍ਤਗਮਨੋ, ਭਵੇਸੁ ਭਗਵਾ ਤਤੋ’’ਤਿ. (ਵਿਸੁਦ੍ਧਿ. ੧.੧੪੪);

ਤਤ੍ਥ –

‘‘ਵਣ੍ਣਾਗਮੋ ਵਣ੍ਣਵਿਪਰਿਯਾਯੋ, ਦ੍ਵੇ ਚਾਪਰੇ ਵਣ੍ਣਵਿਕਾਰਨਾਸਾ;

ਧਾਤੂਨਮਤ੍ਥਾਤਿਸਯੇਨ ਯੋਗੋ, ਤਦੁਚ੍ਚਤੇ ਪਞ੍ਚਵਿਧਂ ਨਿਰੁਤ੍ਤਿ’’ਨ੍ਤਿ. –

ਏਵਂ ਵੁਤ੍ਤਨਿਰੁਤ੍ਤਿਲਕ੍ਖਣਂ ਗਹੇਤ੍ਵਾ ਪਦਸਿਦ੍ਧਿ ਵੇਦਿਤਬ੍ਬਾ. ਤਤ੍ਥ ‘‘ਨਕ੍ਖਤ੍ਤਰਾਜਾਰਿਵ ਤਾਰਕਾਨ’’ਨ੍ਤਿ ਏਤ੍ਥ ਰਕਾਰਾਗਮੋ ਵਿਯ ਅਵਿਜ੍ਜਮਾਨਸ੍ਸ ਅਕ੍ਖਰਸ੍ਸ ਆਗਮੋ ਵਣ੍ਣਾਗਮੋ ਨਾਮ. ‘‘ਹਿਂਸਨਾ, ਹਿਂਸੋ’’ਤਿ ਵਤ੍ਤਬ੍ਬੇ ‘‘ਸੀਹੋ’’ਤਿ ਵਿਯ ਵਿਜ੍ਜਮਾਨਕ੍ਖਰਾਨਂ ਹੇਟ੍ਠੁਪਰਿਯਵਸੇਨ ਪਰਿਵਤ੍ਤਨਂ ਵਣ੍ਣਵਿਪਰਿਯਾਯੋ ਨਾਮ. ‘‘ਨਵੇ ਛਨ੍ਨਕੇ ਦਾਨਂ ਦਿਯ੍ਯਤੀ’’ਤਿ ਏਤ੍ਥ ਅਕਾਰਸ੍ਸ ਏਕਾਰਾਪਜ੍ਜਨਤਾ ਵਿਯ ਅਞ੍ਞਕ੍ਖਰਸ੍ਸ ਅਞ੍ਞਕ੍ਖਰਾਪਜ੍ਜਨਤਾ ਵਣ੍ਣਵਿਕਾਰੋ ਨਾਮ. ‘‘ਜੀਵਨਸ੍ਸ ਮੂਤੋ ਜੀਵਨਮੂਤੋ’’ਤਿ ਵਤ੍ਤਬ੍ਬੇ ‘‘ਜੀਮੂਤੋ’’ਤਿ ਵਕਾਰਨਕਾਰਾਨਂ ਵਿਨਾਸੋ ਵਿਯ ਵਿਜ੍ਜਮਾਨਕ੍ਖਰਵਿਨਾਸੋ ਵਣ੍ਣਵਿਨਾਸੋ ਨਾਮ. ‘‘ਫਰੁਸਾਹਿ ਵਾਚਾਹਿ ਪਕ੍ਰੁਬ੍ਬਮਾਨੋ ਆਸਜ੍ਜ ਮਂ ਤ੍ਵਂ ਵਦਸਿ ਕੁਮਾਰਾ’’ਤਿ ਏਤ੍ਥ ਪਕ੍ਰੁਬ੍ਬਮਾਨੋਤਿ ਪਦਸ੍ਸ ਅਭਿਭਵਮਾਨੋਤਿ ਅਤ੍ਥਪਟਿਪਾਦਨਂ ਵਿਯ ਤਤ੍ਥ ਤਤ੍ਥ ਯਥਾਯੋਗਂ ਵਿਸੇਸਤ੍ਥਯੋਗੋ ਧਾਤੂਨਂ ਅਤ੍ਥਾਤਿਸਯੇਨ ਯੋਗੋ ਨਾਮ.

ਏਵਂ ਨਿਰੁਤ੍ਤਿਲਕ੍ਖਣਂ ਗਹੇਤ੍ਵਾ ਸਦ੍ਦਨਯੇਨ ਵਾ ਪਿਸੋਦਰਾਦਿਨਿਸ੍ਸਿਤੋ ਪਤਿਟ੍ਠਾਨੀਤਿ ਪਿਸੋਦਰਾਦਿਪਕ੍ਖੇਪਲਕ੍ਖਣਂ ਗਹੇਤ੍ਵਾ ਯਸ੍ਮਾ ਲੋਕਿਯਲੋਕੁਤ੍ਤਰਸੁਖਾਭਿਨਿਬ੍ਬਤ੍ਤਕਂ ਦਾਨਸੀਲਾਦਿਪਾਰਪ੍ਪਤ੍ਤਂ ਭਾਗ੍ਯਮਸ੍ਸ ਅਤ੍ਥਿ, ਤਸ੍ਮਾ ‘‘ਭਾਗ੍ਯਵਾ’’ਤਿ ਵਤ੍ਤਬ੍ਬੇ ‘‘ਭਗਵਾ’’ਤਿ ਵੁਚ੍ਚਤੀਤਿ ਞਾਤਬ੍ਬਂ.

ਯਸ੍ਮਾ ਪਨ ਲੋਭਦੋਸਮੋਹਵਿਪਰੀਤਮਨਸਿਕਾਰਅਹਿਰਿਕਾਨੋਤ੍ਤਪ੍ਪਕੋਧੂਪਨਾਹਮਕ੍ਖਪਲ਼ਾਸਇਸ੍ਸਾ- ਮਚ੍ਛਰਿਯਮਾਯਾਸਾਠੇਯ੍ਯਥਮ੍ਭਸਾਰਮ੍ਭਮਾਨਾਤਿਮਾਨਮਦਪਮਾਦਤਣ੍ਹਾਅਵਿਜ੍ਜਾਤਿਵਿਧਾਕੁਸਲਮੂਲਦੁਚ੍ਚਰਿਤ- ਸਂਕਿਲੇਸਮਲਵਿਸਮਸਞ੍ਞਾਵਿਤਕ੍ਕਪਪਞ੍ਚਚਤੁਬ੍ਬਿਧਵਿਪਰਿਯੇਸਆਸਵਗਨ੍ਥਓਘਯੋਗਅਗਤਿ- ਤਣ੍ਹੁਪ੍ਪਾਦੁਪਾਦਾਨਪਞ੍ਚਚੇਤੋਖੀਲਵਿਨਿਬਨ੍ਧਨੀਵਰਣਾਭਿਨਨ੍ਦਨਛਵਿਵਾਦਮੂਲਤਣ੍ਹਾਕਾਯਸਤ੍ਤਾਨੁਸਯ- ਅਟ੍ਠਮਿਚ੍ਛਤ੍ਤਨਵਤਣ੍ਹਾਮੂਲਕਦਸਾਕੁਸਲਕਮ੍ਮਪਥਦ੍ਵਾਸਟ੍ਠਿਦਿਟ੍ਠਿਗਤਅਟ੍ਠਸਤਤਣ੍ਹਾਵਿਚਰਿਤਪ੍ਪਭੇਸਬ੍ਬਦਰਥ- ਪਰਿਲ਼ਾਹਕਿਲੇਸਸਤਸਹਸ੍ਸਾਨਿ, ਸਙ੍ਖੇਪਤੋ ਵਾ ਪਞ੍ਚ ਕਿਲੇਸਖਨ੍ਧਅਭਿਸਙ੍ਖਾਰਦੇਵਪੁਤ੍ਤਮਚ੍ਚੁਮਾਰੇ ਅਭਞ੍ਜਿ, ਤਸ੍ਮਾ ਭਗ੍ਗਤ੍ਤਾ ਏਤੇਸਂ ਪਰਿਸ੍ਸਯਾਨਂ ‘‘ਭਗ੍ਗਵਾ’’ਤਿ ਵਤ੍ਤਬ੍ਬੇ ‘‘ਭਗਵਾ’’ਤਿ ਵੁਚ੍ਚਤਿ. ਆਹ ਚੇਤ੍ਥ –

‘‘ਭਗ੍ਗਰਾਗੋ ਭਗ੍ਗਦੋਸੋ, ਭਗ੍ਗਮੋਹੋ ਅਨਾਸਵੋ;

ਭਗ੍ਗਾਸ੍ਸ ਪਾਪਕਾ ਧਮ੍ਮਾ, ਭਗਵਾ ਤੇਨ ਵੁਚ੍ਚਤੀ’’ਤਿ. (ਪਾਰਾ. ਅਟ੍ਠ. ੧.੯੬; ਵਿਸੁਦ੍ਧਿ. ੧.੧੪੪);

ਭਾਗ੍ਯਵਨ੍ਤਤਾਯ ਚਸ੍ਸ ਸਤਪੁਞ੍ਞਜਲਕ੍ਖਣਵਰਸ੍ਸ ਰੂਪਕਾਯਸਮ੍ਪਤ੍ਤਿ ਦੀਪਿਤਾ ਹੋਤਿ. ਭਗ੍ਗਦੋਸਤਾਯ ਧਮ੍ਮਕਾਯਸਮ੍ਪਤ੍ਤਿ. ਤਥਾ ਲੋਕਿਯਸਰਿਕ੍ਖਕਾਨਂ ਬਹੁਮਤਭਾਵੋ, ਗਹਟ੍ਠਪਬ੍ਬਜਿਤੇਹਿ ਅਭਿਗਮਨੀਯਤਾ, ਅਭਿਗਤਾਨਞ੍ਚ ਨੇਸਂ ਕਾਯਚਿਤ੍ਤਦੁਕ੍ਖਾਪਨਯਨੇ ਪਟਿਬਲਭਾਵੋ, ਆਮਿਸਦਾਨਧਮ੍ਮਦਾਨੇਹਿ ਉਪਕਾਰਿਤਾ, ਲੋਕਿਯਲੋਕੁਤ੍ਤਰਸੁਖੇਹਿ ਚ ਸਞ੍ਞੋਜਨਸਮਤ੍ਥਤਾ ਦੀਪਿਤਾ ਹੋਤਿ.

ਯਸ੍ਮਾ ਚ ਲੋਕੇ ਇਸ੍ਸਰਿਯਧਮ੍ਮਯਸਸਿਰਿਕਾਮਪਯਤ੍ਤੇਸੁ ਛਸੁ ਧਮ੍ਮੇਸੁ ਭਗਸਦ੍ਦੋ ਪਵਤ੍ਤਤਿ, ਪਰਮਞ੍ਚਸ੍ਸ ਸਕਚਿਤ੍ਤੇ ਇਸ੍ਸਰਿਯਂ, ਅਣਿਮਾਲਙ੍ਘਿਮਾਦਿਕਂ ਵਾ ਲੋਕਿਯਸਮ੍ਮਤਂ ਸਬ੍ਬਾਕਾਰਪਰਿਪੂਰਂ ਅਤ੍ਥਿ, ਤਥਾ ਲੋਕੁਤ੍ਤਰੋ ਧਮ੍ਮੋ, ਲੋਕਤ੍ਤਯਬ੍ਯਾਪਕੋ ਯਥਾਭੁਚ੍ਚਗੁਣਾਧਿਗਤੋ ਅਤਿਵਿਯ ਪਰਿਸੁਦ੍ਧੋ ਯਸੋ, ਰੂਪਕਾਯਦਸ੍ਸਨਬ੍ਯਾਵਟਜਨਨਯਨਪ੍ਪਸਾਦਜਨਨਸਮਤ੍ਥਾ ਸਬ੍ਬਾਕਾਰਪਰਿਪੂਰਾ ਸਬ੍ਬਙ੍ਗਪਚ੍ਚਙ੍ਗਸਿਰੀ, ਯਂ ਯਂ ਏਤੇਨ ਇਚ੍ਛਿਤਂ ਪਤ੍ਥਿਤਂ ਅਤ੍ਤਹਿਤਂ ਪਰਹਿਤਂ ਵਾ, ਤਸ੍ਸ ਤਸ੍ਸ ਤਥੇਵ ਅਭਿਨਿਪ੍ਫਨ੍ਨਤ੍ਤਾ ਇਚ੍ਛਿਤਿਚ੍ਛਿਤਤ੍ਥਨਿਪ੍ਫਤ੍ਤਿਸਞ੍ਞਿਤੋ ਕਾਮੋ, ਸਬ੍ਬਲੋਕਗਰੁਭਾਵਪ੍ਪਤ੍ਤਿਹੇਤੁਭੂਤੋ ਸਮ੍ਮਾਵਾਯਾਮਸਙ੍ਖਾਤੋ ਪਯਤ੍ਤੋ ਚ ਅਤ੍ਥਿ, ਤਸ੍ਮਾ ਇਮੇਹਿ ਭਗੇਹਿ ਯੁਤ੍ਤਤ੍ਤਾਪਿ ਭਗਾ ਅਸ੍ਸ ਸਨ੍ਤੀਤਿ ਇਮਿਨਾ ਅਤ੍ਥੇਨ ‘‘ਭਗਵਾ’’ਤਿ ਵੁਚ੍ਚਤਿ.

ਯਸ੍ਮਾ ਪਨ ਕੁਸਲਾਦੀਹਿ ਭੇਦੇਹਿ ਸਬ੍ਬਧਮ੍ਮੇ, ਖਨ੍ਧਾਯਤਨਧਾਤੁਸਚ੍ਚਇਨ੍ਦ੍ਰਿਯਪਟਿਚ੍ਚਸਮੁਪ੍ਪਾਦਾਦੀਹਿ ਵਾ ਕੁਸਲਾਦਿਧਮ੍ਮੇ, ਪੀਲ਼ਨਸਙ੍ਖਤਸਨ੍ਤਾਪਵਿਪਰਿਣਾਮਟ੍ਠੇਨ ਵਾ ਦੁਕ੍ਖਮਰਿਯਸਚ੍ਚਂ, ਆਯੂਹਨਨਿਦਾਨਸਂਯੋਗਪਲਿਬੋਧਟ੍ਠੇਨ ਸਮੁਦਯਂ, ਨਿਸ੍ਸਰਣਵਿਵੇਕਾਸਙ੍ਖਤਅਮਤਟ੍ਠੇਨ ਨਿਰੋਧਂ, ਨਿਯ੍ਯਾਨਿਕਹੇਤੁਦਸ੍ਸਨਾਧਿਪਤੇਯ੍ਯਟ੍ਠੇਨ ਮਗ੍ਗਂ ਵਿਭਤ੍ਤਵਾ, ਵਿਭਜਿਤ੍ਵਾ ਵਿਵਰਿਤ੍ਵਾ ਦੇਸਿਤਵਾਤਿ ਵੁਤ੍ਤਂ ਹੋਤਿ, ਤਸ੍ਮਾ ‘‘ਵਿਭਤ੍ਤਵਾ’’ਤਿ ਵਤ੍ਤਬ੍ਬੇ ‘‘ਭਗਵਾ’’ਤਿ ਵੁਚ੍ਚਤਿ.

ਯਸ੍ਮਾ ਚ ਏਸ ਦਿਬ੍ਬਬ੍ਰਹ੍ਮਅਰਿਯਵਿਹਾਰੇ ਕਾਯਚਿਤ੍ਤਉਪਧਿਵਿਵੇਕੇ ਸੁਞ੍ਞਤਪ੍ਪਣਿਹਿਤਾਨਿਮਿਤ੍ਤਵਿਮੋਕ੍ਖੇ ਅਞ੍ਞੇ ਚ ਲੋਕਿਯਲੋਕੁਤ੍ਤਰੇ ਉਤ੍ਤਰਿਮਨੁਸ੍ਸਧਮ੍ਮੇ ਭਜਿ ਸੇਵਿ ਬਹੁਲਮਕਾਸਿ, ਤਸ੍ਮਾ ‘‘ਭਤ੍ਤਵਾ’’ਤਿ ਵਤ੍ਤਬ੍ਬੇ ‘‘ਭਗਵਾ’’ਤਿ ਵੁਚ੍ਚਤਿ.

ਯਸ੍ਮਾ ਪਨ ਤੀਸੁ ਭਵੇਸੁ ਤਣ੍ਹਾਸਙ੍ਖਾਤਂ ਗਮਨਂ ਅਨੇਨ ਵਨ੍ਤਂ, ਤਸ੍ਮਾ ‘‘ਭਵੇਸੁ ਵਨ੍ਤਗਮਨੋ’’ਤਿ ਵਤ੍ਤਬ੍ਬੇ ਭਵਸਦ੍ਦਤੋ ਭਕਾਰਂ ਗਮਨਸਦ੍ਦਤੋ ਗਕਾਰਂ ਵਨ੍ਤਸਦ੍ਦਤੋ ਵਕਾਰਞ੍ਚ ਦੀਘਂ ਕਤ੍ਵਾ ਆਦਾਯ ‘‘ਭਗਵਾ’’ਤਿ ਵੁਚ੍ਚਤਿ, ਯਥਾ ਲੋਕੇ ‘‘ਮੇਹਨਸ੍ਸ ਖਸ੍ਸ ਮਾਲਾ’’ਤਿ ਵਤ੍ਤਬ੍ਬੇ ‘‘ਮੇਖਲਾ’’ਤਿ ਵੁਚ੍ਚਤਿ.

ਪੁਨ ਅਪਰਮ੍ਪਿ ਪਰਿਯਾਯਂ ਨਿਦ੍ਦਿਸਨ੍ਤੋ ‘‘ਅਪਿ ਚ ਭਗ੍ਗਰਾਗੋਤਿ ਭਗਵਾ’’ਤਿਆਦਿਮਾਹ. ਤਤ੍ਥ ਭਗ੍ਗੋ ਰਾਗੋ ਅਸ੍ਸਾਤਿ ਭਗ੍ਗਰਾਗੋ. ਭਗ੍ਗਦੋਸਾਦੀਸੁਪਿ ਏਸੇਵ ਨਯੋ. ਕਣ੍ਡਕੋਤਿ ਵਿਨਿਵਿਜ੍ਝਨਟ੍ਠੇਨ ਕਿਲੇਸਾ ਏਵ. ਭਜੀਤਿ ਉਦ੍ਦੇਸਵਸੇਨ ਵਿਭਾਗਂ ਕਤ੍ਵਾ ਭਾਜੇਸਿ. ਵਿਭਜੀਤਿ ਨਿਦ੍ਦੇਸਵਸੇਨ ਵਿਵਿਧਾ ਭਾਜੇਸਿ. ਪਵਿਭਜੀਤਿ ਪਟਿਨਿਦ੍ਦੇਸਵਸੇਨ ਪਕਾਰੇਨ ਵਿਭਜਿ. ਉਗ੍ਘਟਿਤਞ੍ਞੂਨਂ ਵਸੇਨ ਭਜਿ. ਵਿਪਞ੍ਚਿਤਞ੍ਞੂਨਂ ਵਸੇਨ ਵਿਭਜਿ. ਨੇਯ੍ਯਾਨਂ ਵਸੇਨ ਪਵਿਭਜਿ.

ਧਮ੍ਮਰਤਨਨ੍ਤਿ –

‘‘ਚਿਤ੍ਤੀਕਤਂ ਮਹਗ੍ਘਞ੍ਚ, ਅਤੁਲਂ ਦੁਲ੍ਲਭਦਸ੍ਸਨਂ;

ਅਨੋਮਸਤ੍ਤਪਰਿਭੋਗਂ, ਰਤਨਂ ਤੇਨ ਵੁਚ੍ਚਤੀ’’ਤਿ. (ਖੁ. ਪਾ. ਅਟ੍ਠ. ੬.੩; ਦੀ. ਨਿ. ਅਟ੍ਠ. ੨.੩੩) –

ਏਵਂ ਵਣ੍ਣਿਤਂ ਧਮ੍ਮਰਤਨਂ ਤਿਵਿਧੇਨ ਭਾਜੇਸਿ. ਭਵਾਨਂ ਅਨ੍ਤਕਰੋਤਿ ਕਾਮਭਵਾਦੀਨਂ ਨਵਨ੍ਨਂ ਭਵਾਨਂ ਪਰਿਚ੍ਛੇਦਂ ਪਰਿਯਨ੍ਤਂ ਪਰਿਵਟੁਮਂ ਕਾਰਕੋ. ਭਾਵਿਤਕਾਯੋਤਿ ਵਡ੍ਢਿਤਕਾਯੋ. ਤਥਾ ਇਤਰੇਸੁਪਿ. ਭਜੀਤਿ ਸੇਵਿ. ਅਰਞ੍ਞਵਨਪਤ੍ਥਾਨੀਤਿ ਗਾਮਸ੍ਸ ਵਾ ਨਗਰਸ੍ਸ ਵਾ ਇਨ੍ਦਖੀਲਤੋ ਬਹਿ ਅਰਞ੍ਞਂ. ਵਨਪਤ੍ਥਾਨਿ ਮਨੁਸ੍ਸੂਪਚਾਰਾਤਿਕ੍ਕਨ੍ਤਾਨਿ ਵਨਸਣ੍ਡਾਨਿ. ਪਨ੍ਤਾਨੀਤਿ ਯਤ੍ਥ ਮਨੁਸ੍ਸਾ ਨ ਕਸਨ੍ਤਿ ਨ ਵਪਨ੍ਤਿ ਦੂਰਾਨਿ ਸੇਨਾਸਨਾਨਿ. ਕੇਚਿ ਪਨ ‘‘ਵਨਪਤ੍ਤਾਨੀਤਿ ਯਸ੍ਮਾ ਯਤ੍ਥ ਬ੍ਯਗ੍ਘਾਦਯੋ ਅਤ੍ਥਿ, ਤਂ ਵਨਂ ਤੇ ਪਾਲਯਨ੍ਤਿ ਰਕ੍ਖਨ੍ਤਿ, ਤਸ੍ਮਾ ਤੇਹਿ ਰਕ੍ਖਿਤਤ੍ਤਾ ਵਨਪਤ੍ਤਾਨੀ’’ਤਿ ਵਦਨ੍ਤਿ. ਸੇਨਾਸਨਾਨੀਤਿ ਸੇਤਿ ਚੇਵ ਆਸਤਿ ਚ ਏਤ੍ਥਾਤਿ ਸੇਨਾਸਨਾਨਿ. ਅਪ੍ਪਸਦ੍ਦਾਨੀਤਿ ਵਚਨਸਦ੍ਦੇਨ ਅਪ੍ਪਸਦ੍ਦਾਨਿ. ਅਪ੍ਪਨਿਗ੍ਘੋਸਾਨੀਤਿ ਗਾਮਨਗਰਨਿਗ੍ਘੋਸਸਦ੍ਦੇਨ ਅਪ੍ਪਨਿਗ੍ਘੋਸਾਨਿ. ਵਿਜਨਵਾਤਾਨੀਤਿ ਅਨ੍ਤੋਸਞ੍ਚਰਣਜਨਸ੍ਸ ਸਰੀਰਵਾਤੇਨ ਵਿਰਹਿਤਾਨਿ. ‘‘ਵਿਜਨਵਾਦਾਨੀ’’ਤਿਪਿ ਪਾਠੋ, ‘‘ਅਨ੍ਤੋਜਨਵਾਦੇਨ ਵਿਰਹਿਤਾਨੀ’’ਤਿ ਅਤ੍ਥੋ. ‘‘ਵਿਜਨਪਾਤਾਨੀ’’ਤਿਪਿ ਪਾਠੋ, ‘‘ਜਨਸਞ੍ਚਾਰਵਿਰਹਿਤਾਨੀ’’ਤਿ ਅਤ੍ਥੋ. ਮਨੁਸ੍ਸਰਾਹਸ੍ਸੇਯ੍ਯਕਾਨੀਤਿ ਮਨੁਸ੍ਸਾਨਂ ਰਹਸ੍ਸਕਰਣਟ੍ਠਾਨਾਨਿ. ਪਟਿਸਲ੍ਲਾਨਸਾਰੁਪ੍ਪਾਨੀਤਿ ਵਿਵੇਕਾਨੁਰੂਪਾਨਿ. ਭਾਗੀ ਵਾਤਿ ‘‘ਭਾਗੋ ਚੀਵਰਾਦਿਕੋਟ੍ਠਾਸੋ ਅਸ੍ਸ ਅਤ੍ਥੀ’’ਤਿ ਭਾਗੀ. ‘‘ਪਟਿਲਾਭਵਸੇਨ ਅਤ੍ਥਰਸਾਦਿਭਾਗੋ ਅਸ੍ਸ ਅਤ੍ਥੀ’’ਤਿ ਭਾਗੀ. ਅਤ੍ਥਰਸਸ੍ਸਾਤਿ ਹੇਤੁਫਲਸਮ੍ਪਤ੍ਤਿਸਙ੍ਖਾਤਸ੍ਸ ਅਤ੍ਥਰਸਸ੍ਸ. ਧਮ੍ਮਰਸਸ੍ਸਾਤਿ ਹੇਤੁਸਮ੍ਪਤ੍ਤਿਸਙ੍ਖਾਤਸ੍ਸ ਧਮ੍ਮਰਸਸ੍ਸ. ਵੁਤ੍ਤਞ੍ਹੇਤਂ ‘‘ਹੇਤੁਫਲੇ ਞਾਣਂ ਅਤ੍ਥਪਟਿਸਮ੍ਭਿਦਾ, ਹੇਤੁਮ੍ਹਿ ਞਾਣਂ ਧਮ੍ਮਪਟਿਸਮ੍ਭਿਦਾ’’ਤਿ (ਵਿਭ. ੭੨੦). ਵਿਮੁਤ੍ਤਿਰਸਸ੍ਸਾਤਿ ਫਲਸਮ੍ਪਤ੍ਤਿਸਙ੍ਖਾਤਸ੍ਸ ਵਿਮੁਤ੍ਤਿਰਸਸ੍ਸ. ਵੁਤ੍ਤਮ੍ਪਿ ਚੇਤਂ ‘‘ਕਿਚ੍ਚਸਮ੍ਪਤ੍ਤਿਅਤ੍ਥੇਨ, ਰਸੋ ਨਾਮ ਪਵੁਚ੍ਚਤੀ’’ਤਿ (ਪਟਿ. ਮ. ਅਟ੍ਠ. ੧.੧.੨ ਮਾਤਿਕਾਵਣ੍ਣਨਾ; ਵਿਸੁਦ੍ਧਿ. ੧.੮).

ਚਤੁਨ੍ਨਂ ਝਾਨਾਨਨ੍ਤਿ ਪਠਮਜ੍ਝਾਨਾਦੀਨਂ ਚਤੁਨ੍ਨਂ ਝਾਨਾਨਂ. ਚਤੁਨ੍ਨਂ ਅਪ੍ਪਮਞ੍ਞਾਨਨ੍ਤਿ ਮੇਤ੍ਤਾਦੀਨਂ ਫਰਣਪ੍ਪਮਾਣਵਿਰਹਿਤਾਨਂ ਚਤੁਨ੍ਨਂ ਬ੍ਰਹ੍ਮਵਿਹਾਰਾਨਂ. ਚਤੁਨ੍ਨਂ ਅਰੂਪਸਮਾਪਤ੍ਤੀਨਨ੍ਤਿ ਆਕਾਸਾਨਞ੍ਚਾਯਤਨਾਦੀਨਂ ਚਤੁਨ੍ਨਂ ਅਰੂਪਜ੍ਝਾਨਾਨਂ. ਅਟ੍ਠਨ੍ਨਂ ਵਿਮੋਕ੍ਖਾਨਨ੍ਤਿ ‘‘ਰੂਪੀ ਰੂਪਾਨਿ ਪਸ੍ਸਤੀ’’ਤਿਆਦਿਨਾ (ਧ. ਸ. ੨੪੮) ਨਯੇਨ ਵੁਤ੍ਤਾਨਂ ਆਰਮ੍ਮਣਵਿਮੁਤ੍ਤਾਨਂ ਅਟ੍ਠਨ੍ਨਂ ਵਿਮੋਕ੍ਖਾਨਂ. ਅਭਿਭਾਯਤਨਾਨਨ੍ਤਿ ਏਤ੍ਥ ਅਭਿਭੂਤਾਨਿ ਆਯਤਨਾਨਿ ਏਤੇਸਂ ਝਾਨਾਨਨ੍ਤਿ ਅਭਿਭਾਯਤਨਾਨਿ, ਝਾਨਾਨਿ. ਆਯਤਨਾਨੀਤਿ ਅਧਿਟ੍ਠਾਨਟ੍ਠੇਨ ਆਯਤਨਸਙ੍ਖਾਤਾਨਿ ਕਸਿਣਾਰਮ੍ਮਣਾਨਿ. ਞਾਣੁਤ੍ਤਰਿਕੋ ਹਿ ਪੁਗ੍ਗਲੋ ਵਿਸਦਞਾਣੋਤਿ ਕਿਂ ਏਤ੍ਥ ਆਰਮ੍ਮਣੇ ਸਮਾਪਜ੍ਜਿਤਬ੍ਬਂ, ਨ ਮਯਿ ਚਿਤ੍ਤੇਕਗ੍ਗਤਾਕਰਣੇ ਭਾਰੋ ਅਤ੍ਥੀਤਿ ਤਾਨਿ ਆਰਮ੍ਮਣਾਨਿ ਅਭਿਭਵਿਤ੍ਵਾ ਸਮਾਪਜ੍ਜਤਿ. ਸਹ ਨਿਮਿਤ੍ਤੁਪ੍ਪਾਦੇਨੇਵੇਤ੍ਥ ਅਪ੍ਪਨਂ ਨਿਬ੍ਬਤ੍ਤੇਤੀਤਿ ਅਤ੍ਥੋ. ਏਵਂ ਉਪ੍ਪਾਦਿਤਾਨਿ ਝਾਨਾਨਿ ਅਭਿਭਾਯਤਨਾਨੀਤਿ ਵੁਚ੍ਚਨ੍ਤਿ, ਤੇਸਂ ਅਟ੍ਠਨ੍ਨਂ ਅਭਿਭਾਯਤਨਾਨਂ. ਨਵਨ੍ਨਂ ਅਨੁਪੁਬ੍ਬਵਿਹਾਰਸਮਾਪਤ੍ਤੀਨਨ੍ਤਿ ਪੁਬ੍ਬਂ ਪੁਬ੍ਬਂ ਅਨੁ ਅਨੁਪੁਬ੍ਬਂ, ਅਨੁਪੁਬ੍ਬਂ ਵਿਹਰਿਤਬ੍ਬਤੋ ਸਮਾਪਜ੍ਜਿਤਬ੍ਬਤੋ ਅਨੁਪੁਬ੍ਬਵਿਹਾਰਸਮਾਪਤ੍ਤਿ, ਅਨੁਪਟਿਪਾਟਿਯਾ ਸਮਾਪਜ੍ਜਿਤਬ੍ਬਾਤਿ ਅਤ੍ਥੋ, ਤਾਸਂ ਨਵਨ੍ਨਂ ਅਨੁਪੁਬ੍ਬਵਿਹਾਰਸਮਾਪਤ੍ਤੀਨਂ. ਦਸਨ੍ਨਂ ਸਞ੍ਞਾਭਾਵਨਾਨਨ੍ਤਿ ਗਿਰਿਮਾਨਨ੍ਦਸੁਤ੍ਤੇ (ਅ. ਨਿ. ੧੦.੬੦) ਆਗਤਾਨਂ ਅਨਿਚ੍ਚਸਞ੍ਞਾਦੀਨਂ ਦਸਨ੍ਨਂ ਸਞ੍ਞਾਭਾਵਨਾਨਂ. ਦਸਨ੍ਨਂ ਕਸਿਣਸਮਾਪਤ੍ਤੀਨਨ੍ਤਿ ਸਕਲਟ੍ਠੇਨ ਕਸਿਣਸਙ੍ਖਾਤਾਨਂ ਪਥਵੀਕਸਿਣਜ੍ਝਾਨਾਦੀਨਂ ਦਸਨ੍ਨਂ ਝਾਨਾਨਂ. ਆਨਾਪਾਨਸ੍ਸਤਿਸਮਾਧਿਸ੍ਸਾਤਿ ਆਨਾਪਾਨਸ੍ਸਤਿਸਮ੍ਪਯੁਤ੍ਤਸਮਾਧਿਸ੍ਸ. ਅਸੁਭਸਮਾਪਤ੍ਤਿਯਾਤਿ ਅਸੁਭਜ੍ਝਾਨਸਮਾਪਤ੍ਤਿਯਾ. ਦਸਨ੍ਨਂ ਤਥਾਗਤਬਲਾਨਨ੍ਤਿ ਦਸਬਲਬਲਾਨਂ ਦਸਨ੍ਨਂ. ਚਤੁਨ੍ਨਂ ਵੇਸਾਰਜ੍ਜਾਨਨ੍ਤਿ ਵਿਸਾਰਦਭਾਵਾਨਂ ਚਤੁਨ੍ਨਂ ਵੇਸਾਰਜ੍ਜਾਨਂ. ਚਤੁਨ੍ਨਂ ਪਟਿਸਮ੍ਭਿਦਾਨਨ੍ਤਿ ਪਟਿਸਮ੍ਭਿਦਾਞਾਣਾਨਂ ਚਤੁਨ੍ਨਂ. ਛਨ੍ਨਂ ਅਭਿਞ੍ਞਾਣਾਨਨ੍ਤਿ ਇਦ੍ਧਿਵਿਧਾਦੀਨਂ ਛਨ੍ਨਂ ਅਭਿਞ੍ਞਾਣਾਨਂ. ਛਨ੍ਨਂ ਬੁਦ੍ਧਧਮ੍ਮਾਨਨ੍ਤਿ ‘‘ਸਬ੍ਬਂ ਕਾਯਕਮ੍ਮਂ ਞਾਣਾਨੁਪਰਿਵਤ੍ਤੀ’’ਤਿਆਦਿਨਾ (ਚੂਲ਼ਨਿ. ਮੋਘਰਾਜਮਾਣਵਪੁਚ੍ਛਾਨਿਦ੍ਦੇਸ ੮੫; ਨੇਤ੍ਤਿ. ੧੫) ਨਯੇਨ ਉਪਰਿ ਆਗਤਾਨਂ ਛਨ੍ਨਂ ਬੁਦ੍ਧਧਮ੍ਮਾਨਂ.

ਤਤ੍ਥ ਚੀਵਰਾਦਯੋ ਭਾਗ੍ਯਸਮ੍ਪਤ੍ਤਿਵਸੇਨ ਵੁਤ੍ਤਾ. ਅਤ੍ਥਰਸਤਿਕੋ ਪਟਿਵੇਧਵਸੇਨ ਵੁਤ੍ਤੋ. ਅਧਿਸੀਲਤਿਕੋ ਪਟਿਪਤ੍ਤਿਵਸੇਨ. ਝਾਨਤ੍ਤਿਕੋ ਰੂਪਾਰੂਪਜ੍ਝਾਨਵਸੇਨ. ਵਿਮੋਕ੍ਖਤ੍ਤਿਕੋ ਸਮਾਪਤ੍ਤਿਵਸੇਨ. ਸਞ੍ਞਾਚਤੁਕ੍ਕੋ ਉਪਚਾਰਪ੍ਪਨਾਵਸੇਨ. ਸਤਿਪਟ੍ਠਾਨਾਦਯੋ ਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮਵਸੇਨ. ਤਥਾਗਤਬਲਾਨਨ੍ਤਿਆਦਯੋ ਆਵੇਣਿਕਧਮ੍ਮਵਸੇਨ ਵੁਤ੍ਤਾਤਿ ਵੇਦਿਤਬ੍ਬਾ.

ਇਤੋ ਪਰਂ ਭਗਵਾਤਿ ਨੇਤਂ ਨਾਮਨ੍ਤਿਆਦਿ ‘‘ਅਤ੍ਥਮਨੁਗਤਾ ਅਯਂ ਪਞ੍ਞਤ੍ਤੀ’’ਤਿ ਞਾਪਨਤ੍ਥਂ ਵੁਤ੍ਤਂ. ਤਤ੍ਥ ਸਮਣਾ ਪਬ੍ਬਜ੍ਜੁਪਗਤਾ. ਬ੍ਰਾਹ੍ਮਣਾ ਭੋਵਾਦਿਨੋ ਸਮਿਤਪਾਪਬਾਹਿਤਪਾਪਾ ਵਾ. ਦੇਵਤਾ ਸਕ੍ਕਾਦਯੋ ਬ੍ਰਹ੍ਮਾਨੋ ਚ. ਵਿਮੋਕ੍ਖਨ੍ਤਿਕਨ੍ਤਿ ਵਿਮੋਕ੍ਖੋ ਅਰਹਤ੍ਤਮਗ੍ਗੋ, ਵਿਮੋਕ੍ਖਸ੍ਸ ਅਨ੍ਤੋ ਅਰਹਤ੍ਤਫਲਂ, ਤਸ੍ਮਿਂ ਵਿਮੋਕ੍ਖਨ੍ਤੇ ਭਵਂ ਵਿਮੋਕ੍ਖਨ੍ਤਿਕਂ ਨਾਮਂ. ਸਬ੍ਬਞ੍ਞੁਭਾਵੋ ਹਿ ਅਰਹਤ੍ਤਮਗ੍ਗੇਨ ਸਿਜ੍ਝਤਿ, ਅਰਹਤ੍ਤਫਲਾਧਿਗਮੇਨ ਸਿਦ੍ਧੋ ਹੋਤਿ. ਤਸ੍ਮਾ ਸਬ੍ਬਞ੍ਞੁਭਾਵੋ ਵਿਮੋਕ੍ਖਨ੍ਤੇ ਭਵੋ ਹੋਤਿ. ਤਂ ਨੇਮਿਤ੍ਤਿਕਮ੍ਪਿ ਨਾਮਂ ਵਿਮੋਕ੍ਖਨ੍ਤੇ ਭਵਂ ਨਾਮ ਹੋਤਿ. ਤੇਨ ਵੁਤ੍ਤਂ – ‘‘ਵਿਮੋਕ੍ਖਨ੍ਤਿਕਮੇਤਂ ਬੁਦ੍ਧਾਨਂ ਭਗਵਨ੍ਤਾਨ’’ਨ੍ਤਿ. ਬੋਧਿਯਾ ਮੂਲੇ ਸਹ ਸਬ੍ਬਞ੍ਞੁਤਞ੍ਞਾਣਸ੍ਸ ਪਟਿਲਾਭਾਤਿ ਮਹਾਬੋਧਿਰੁਕ੍ਖਮੂਲੇ ਯਥਾਵੁਤ੍ਤਕ੍ਖਣੇ ਸਬ੍ਬਞ੍ਞੁਤਞ੍ਞਾਣਸ੍ਸ ਪਟਿਲਾਭੇਨ ਸਹ. ਸਚ੍ਛਿਕਾ ਪਞ੍ਞਤ੍ਤੀਤਿ ਅਰਹਤ੍ਤਫਲਸਚ੍ਛਿਕਿਰਿਯਾਯ ਸਬ੍ਬਧਮ੍ਮਸਚ੍ਛਿਕਿਰਿਯਾਯ ਵਾ ਜਾਤਾ ਪਞ੍ਞਤ੍ਤਿ. ਯਦਿਦਂ ਭਗਵਾਤਿ ਯਾ ਅਯਂ ਭਗਵਾਤਿ ਪਞ੍ਞਤ੍ਤਿ.

ਦ੍ਵੀਹਿ ਕਾਰਣੇਹੀਤਿ ਦ੍ਵੀਹਿ ਕੋਟ੍ਠਾਸੇਹਿ. ਪਰਿਯਤ੍ਤਿਸਾਸਨਨ੍ਤਿ ਤੇਪਿਟਕਂ ਬੁਦ੍ਧਵਚਨਂ. ਪਟਿਪਤ੍ਤੀਤਿ ਪਟਿਪਜ੍ਜਤਿ ਏਤਾਯਾਤਿ ਪਟਿਪਤ੍ਤਿ. ਯਂ ਤਸ੍ਸ ਪਰਿਯਾਪੁਟਨ੍ਤਿ ਤੇਨ ਪੁਗ੍ਗਲੇਨ ਯਂ ਪਰਿਯਾਪੁਟਂ ਸਜ੍ਝਾਯਿਤਂ ਕਰਣਤ੍ਥੇ ਸਾਮਿਵਚਨਂ. ‘‘ਪਰਿਯਾਪੁਟ੍ਟ’’ਨ੍ਤਿਪਿ ਪਾਠੋ. ਸੁਤ੍ਤਨ੍ਤਿ ਉਭਤੋਵਿਭਙ੍ਗਨਿਦ੍ਦੇਸਖਨ੍ਧਕਪਰਿਵਾਰਾ, ਸੁਤ੍ਤਨਿਪਾਤੇ ਮਙ੍ਗਲਸੁਤ੍ਤ- (ਖੁ. ਪਾ. ੫.੧ ਆਦਯੋ; ਸੁ. ਨਿ. ੨੬੧ ਆਦਯੋ) ਰਤਨਸੁਤ੍ਤ- (ਖੁ. ਪਾ. ੬.੧ ਆਦਯੋ) ਤੁਵਟਕਸੁਤ੍ਤਾਨਿ (ਸੁ. ਨਿ. ੯੨੧ ਆਦਯੋ), ਅਞ੍ਞਮ੍ਪਿ ਚ ਸੁਤ੍ਤਨਾਮਕਂ ਤਥਾਗਤਵਚਨਂ ਸੁਤ੍ਤਨ੍ਤਿ ਵੇਦਿਤਬ੍ਬਂ. ਗੇਯ੍ਯਨ੍ਤਿ ਸਬ੍ਬਮ੍ਪਿ ਸਗਾਥਕਂ ਸੁਤ੍ਤਂ ਗੇਯ੍ਯਨ੍ਤਿ ਵੇਦਿਤਬ੍ਬਂ, ਵਿਸੇਸੇਨ ਸਂਯੁਤ੍ਤਕੇ ਸਕਲੋਪਿ ਸਗਾਥਾਵਗ੍ਗੋ. ਵੇਯ੍ਯਾਕਰਣਨ੍ਤਿ ਸਕਲਂ ਅਭਿਧਮ੍ਮਪਿਟਕਂ ਨਿਗ੍ਗਾਥਕਂ ਸੁਤ੍ਤਂ, ਯਞ੍ਚ ਅਞ੍ਞਮ੍ਪਿ ਅਟ੍ਠਹਿ ਅਙ੍ਗੇਹਿ ਅਸਙ੍ਗਹਿਤਂ ਬੁਦ੍ਧਵਚਨਂ, ਤਂ ‘‘ਵੇਯ੍ਯਾਕਰਣ’’ਨ੍ਤਿ ਵੇਦਿਤਬ੍ਬਂ. ਗਾਥਾਤਿ ਧਮ੍ਮਪਦਂ, ਥੇਰਗਾਥਾ, ਥੇਰੀਗਾਥਾ, ਸੁਤ੍ਤਨਿਪਾਤੇ ਨੋਸੁਤ੍ਤਨਾਮਿਕਾ ਸੁਦ੍ਧਿਕਗਾਥਾ ਚ ‘‘ਗਾਥਾ’’ਤਿ ਵੇਦਿਤਬ੍ਬਾ. ਉਦਾਨਨ੍ਤਿ ਸੋਮਨਸ੍ਸਞਾਣਮਯਿਕਗਾਥਾਪਟਿਸਂਯੁਤ੍ਤਾ ਦ੍ਵੇਅਸੀਤਿ ਸੁਤ੍ਤਨ੍ਤਾ ‘‘ਉਦਾਨ’’ਨ੍ਤਿ ਵੇਦਿਤਬ੍ਬਂ. ਇਤਿਵੁਤ੍ਤਕਨ੍ਤਿ ‘‘ਵੁਤ੍ਤਞ੍ਹੇਤਂ ਭਗਵਤਾ’’ਤਿਆਦਿਨਯਪ੍ਪਵਤ੍ਤਾ (ਇਤਿਵੁ. ੧ ਆਦਯੋ) ਦਸੁਤ੍ਤਰਸਤਸੁਤ੍ਤਨ੍ਤਾ ‘‘ਇਤਿਵੁਤ੍ਤਕ’’ਨ੍ਤਿ ਵੇਦਿਤਬ੍ਬਂ. ਜਾਤਕਨ੍ਤਿ ਅਪਣ੍ਣਕਜਾਤਕਾਦੀਨਿ (ਜਾ. ੧.੧.੧) ਪਣ੍ਣਾਸਾਧਿਕਾਨਿ ਪਞ੍ਚਜਾਤਕਸਤਾਨਿ ‘‘ਜਾਤਕ’’ਨ੍ਤਿ ਵੇਦਿਤਬ੍ਬਂ. ਅਬ੍ਭੁਤਧਮ੍ਮਨ੍ਤਿ ‘‘ਚਤ੍ਤਾਰੋਮੇ, ਭਿਕ੍ਖਵੇ, ਅਚ੍ਛਰਿਯਾ ਅਬ੍ਭੁਤਧਮ੍ਮਾ ਆਨਨ੍ਦੇ’’ਤਿਆਦਿਨਯਪ੍ਪਵਤ੍ਤਾ (ਦੀ. ਨਿ. ੨.੨੦੯; ਅ. ਨਿ. ੪.੧੨੯) ਸਬ੍ਬੇਪਿ ਅਚ੍ਛਰਿਯਅਬ੍ਭੁਤਧਮ੍ਮਪਟਿਸਂਯੁਤ੍ਤਾ ਸੁਤ੍ਤਨ੍ਤਾ ‘‘ਅਬ੍ਭੁਤਧਮ੍ਮ’’ਨ੍ਤਿ ਵੇਦਿਤਬ੍ਬਂ. ਵੇਦਲ੍ਲਨ੍ਤਿ ਚੂਲ਼ਵੇਦਲ੍ਲ- (ਮ. ਨਿ. ੧.੪੬੦ ਆਦਯੋ) ਮਹਾਵੇਦਲ੍ਲ- (ਮ. ਨਿ. ੧.੪੪੯ ਆਦਯੋ) ਸਮ੍ਮਾਦਿਟ੍ਠਿ- (ਮ. ਨਿ. ੧.੮੯ ਆਦਯੋ) ਸਕ੍ਕਪਞ੍ਹ- (ਦੀ. ਨਿ. ੨.੩੪੪ ਆਦਯੋ) ਸਙ੍ਖਾਰਭਾਜਨਿਯਮਹਾਪੁਣ੍ਣਮਸੁਤ੍ਤਾਦਯੋ (ਮ. ਨਿ. ੩.੮੫ ਆਦਯੋ) ਸਬ੍ਬੇਪਿ ਵੇਦਞ੍ਚ ਤੁਟ੍ਠਿਞ੍ਚ ਲਦ੍ਧਾ ਲਦ੍ਧਾ ਪੁਚ੍ਛਿਤਸੁਤ੍ਤਨ੍ਤਾ ‘‘ਵੇਦਲ੍ਲ’’ਨ੍ਤਿ ਵੇਦਿਤਬ੍ਬਂ. ਇਦਂ ਪਰਿਯਤ੍ਤਿਸਾਸਨਨ੍ਤਿ ਇਦਂ ਵੁਤ੍ਤਪ੍ਪਕਾਰਂ ਤੇਪਿਟਕਂ ਬੁਦ੍ਧਵਚਨਂ ਪਰਿਯਾਪੁਣਿਤਬ੍ਬਟ੍ਠੇਨ ਪਰਿਯਤ੍ਤਿ, ਅਨੁਸਾਸਨਟ੍ਠੇਨ ਸਾਸਨਨ੍ਤਿ ਕਤ੍ਵਾ ਪਰਿਯਤ੍ਤਿਸਾਸਨਂ. ਤਮ੍ਪਿ ਮੁਸ੍ਸਤੀਤਿ ਤਮ੍ਪਿ ਪਰਿਯਤ੍ਤਿਸਾਸਨਂ ਨਸ੍ਸਤਿ. ਸਮ੍ਮੁਸ੍ਸਤੀਤਿ ਆਦਿਤੋ ਨਸ੍ਸਤਿ. ਪਰਿਬਾਹਿਰੋ ਹੋਤੀਤਿ ਪਰਮ੍ਮੁਖੋ ਹੋਤਿ.

ਕਤਮਂ ਪਟਿਪਤ੍ਤਿਸਾਸਨਨ੍ਤਿ ਲੋਕੁਤ੍ਤਰਧਮ੍ਮਤੋ ਪੁਬ੍ਬਭਾਗੋ ਤਦਤ੍ਥਂ ਪਟਿਪਜ੍ਜੀਯਤੀਤਿ ਪਟਿਪਤ੍ਤਿ. ਸਾਸੀਯਨ੍ਤਿ ਏਤ੍ਥ ਵੇਨੇਯ੍ਯਾਤਿ ਸਾਸਨਂ. ਸਮ੍ਮਾਪਟਿਪਦਾਤਿਆਦਯੋ ਵੁਤ੍ਤਨਯਾ ਏਵ.

ਪਾਣਮ੍ਪਿ ਹਨਤੀਤਿ ਜੀਵਿਤਿਨ੍ਦ੍ਰਿਯਮ੍ਪਿ ਘਾਤੇਤਿ. ਅਦਿਨ੍ਨਮ੍ਪਿ ਆਦਿਯਤੀਤਿ ਪਰਪਰਿਗ੍ਗਹਿਤਮ੍ਪਿ ਵਤ੍ਥੁਂ ਗਣ੍ਹਾਤਿ. ਸਨ੍ਧਿਮ੍ਪਿ ਛਿਨ੍ਦਤੀਤਿ ਘਰਸਨ੍ਧਿਮ੍ਪਿ ਛਿਨ੍ਦਤਿ. ਨਿਲ੍ਲੋਪਮ੍ਪਿ ਹਰਤੀਤਿ ਗਾਮੇ ਪਹਰਿਤ੍ਵਾ ਮਹਾਵਿਲੋਪਮ੍ਪਿ ਕਰੋਤਿ. ਏਕਾਗਾਰਿਕਮ੍ਪਿ ਕਰੋਤੀਤਿ ਪਣ੍ਣਾਸਮਤ੍ਤੇਹਿਪਿ ਸਟ੍ਠਿਮਤ੍ਤੇਹਿਪਿ ਪਰਿਵਾਰੇਤ੍ਵਾ ਜੀਵਗ੍ਗਾਹਂ ਗਹੇਤ੍ਵਾਪਿ ਧਨਂ ਆਹਰਾਪੇਤਿ. ਪਰਿਪਨ੍ਥੇਪਿ ਤਿਟ੍ਠਤੀਤਿ ਪਨ੍ਥਦੂਹਨਕਮ੍ਮਂ ਕਰੋਤਿ. ਪਰਦਾਰਮ੍ਪਿ ਗਚ੍ਛਤੀਤਿ ਪਰਦਾਰੇਸੁ ਚਾਰਿਤ੍ਤਂ ਆਪਜ੍ਜਤਿ. ਮੁਸਾਪਿ ਭਣਤੀਤਿ ਅਤ੍ਥਭਞ੍ਜਨਕਂ ਮੁਸਾਪਿ ਵਦਤਿ. ਅਨਰਿਯਧਮ੍ਮੋਤਿ ਅਨਰਿਯਸਭਾਵੋ.

੫੧. ਏਕੋ ਪੁਬ੍ਬੇ ਚਰਿਤ੍ਵਾਨਾਤਿ ਪਬ੍ਬਜ੍ਜਾਸਙ੍ਖਾਤੇਨ ਵਾ ਗਣਾਵਵਸ੍ਸਗ੍ਗਟ੍ਠੇਨ ਵਾ ਪੁਬ੍ਬੇ ਲੋਕੇ ਵਿਹਰਿਤ੍ਵਾ. ਯਾਨਂ ਭਨ੍ਤਂਵ ਤਂ ਲੋਕੇ, ਹੀਨਮਾਹੁ ਪੁਥੁਜ੍ਜਨਨ੍ਤਿ ਤਂ ਵਿਬ੍ਭਨ੍ਤਕਂ ਪੁਗ੍ਗਲਂ ਯਥਾ ਹਤ੍ਥਿਯਾਨਾਦਿਯਾਨਂ ਅਦਨ੍ਤਂ ਵਿਸਮਮ੍ਪਿ ਆਰੋਹਤਿ, ਆਰੋਹਨਕਮ੍ਪਿ ਭਞ੍ਜਤਿ, ਪਪਾਤੇਪਿ ਪਪਤਤਿ, ਏਵਂ ਕਾਯਦੁਚ੍ਚਰਿਤਾਦਿਵਿਸਮਾਰੋਹਨੇਨ ਨਿਰਯਾਦੀਸੁ, ਅਤ੍ਥਭਞ੍ਜਨੇਨ ਜਾਤਿਪਪਾਤਾਦੀਸੁ ਪਪਤਨੇਨ ਚ ਯਾਨਂ ਭਨ੍ਤਂਵ ਹੀਨਂ ਪੁਥੁਜ੍ਜਨਞ੍ਚ ਆਹੂਤਿ.

ਪਬ੍ਬਜ੍ਜਾਸਙ੍ਖਾਤੇਨ ਵਾਤਿ ਪਬ੍ਬਜ੍ਜਾਕੋਟ੍ਠਾਸੇਨ ਵਾ ‘‘ਪਬ੍ਬਜਿਤੋ ਸਮਣੋ’’ਤਿ ਗਣਨਾਰੋਪਨੇਨ ਵਾ. ਗਣਾਵਵਸ੍ਸਗ੍ਗਟ੍ਠੇਨ ਵਾਤਿ ਗਣਸਙ੍ਗਣਿਕਾਰਾਮਤਂ ਵਿਸ੍ਸਜ੍ਜੇਤ੍ਵਾ ਵਸ੍ਸਗ੍ਗਟ੍ਠੇਨ ਵਾ.

ਏਕੋ ਪਟਿਕ੍ਕਮਤੀਤਿ ਏਕਕੋਵ ਗਾਮਤੋ ਨਿਵਤ੍ਤਤਿ. ਯੋ ਨਿਸੇਵਤੀਤਿ ਨਿਦ੍ਦੇਸਸ੍ਸ ਉਦ੍ਦੇਸਪਦਂ. ਅਪਰੇਨ ਸਮਯੇਨਾਤਿ ਅਞ੍ਞਸ੍ਮਿਂ ਕਾਲੇ ਅਪਰਭਾਗੇ. ਬੁਦ੍ਧਨ੍ਤਿ ਸਬ੍ਬਞ੍ਞੁਬੁਦ੍ਧਂ. ਧਮ੍ਮਨ੍ਤਿ ਸ੍ਵਾਕ੍ਖਾਤਤਾਦਿਗੁਣਯੁਤ੍ਤਂ ਧਮ੍ਮਂ. ਸਙ੍ਘਨ੍ਤਿ ਸੁਪ੍ਪਟਿਪਨ੍ਨਤਾਦਿਗੁਣਯੁਤ੍ਤਂ ਸਙ੍ਘਂ. ਸਿਕ੍ਖਨ੍ਤਿ ਅਧਿਸੀਲਾਦਿਸਿਕ੍ਖਿਤਬ੍ਬਂ ਸਿਕ੍ਖਂ. ਪਚ੍ਚਕ੍ਖਾਯਾਤਿ ਬੁਦ੍ਧਾਦਿਂ ਪਟਿਕ੍ਖਿਪਿਤ੍ਵਾ. ਹੀਨਾਯਾਤਿ ਹੀਨਤ੍ਥਾਯ ਗਿਹਿਭਾਵਾਯ. ਆਵਤ੍ਤਿਤ੍ਵਾਤਿ ਨਿਵਤ੍ਤਿਤ੍ਵਾ. ਸੇਵਤਿ ਏਕਵਾਰਂ ਸੇਵਤਿ. ਨਿਸੇਵਤਿ ਅਨੇਕਵਿਧੇਨ ਸੇਵਤਿ. ਸਂਸੇਵਤਿ ਅਲ੍ਲੀਯਿਤ੍ਵਾ ਸੇਵਤਿ. ਪਟਿਸੇਵਤਿ ਪੁਨਪ੍ਪੁਨਂ ਸੇਵਤਿ.

ਭਨ੍ਤਨ੍ਤਿ ਵਿਬ੍ਭਨ੍ਤਂ. ਅਦਨ੍ਤਨ੍ਤਿ ਦਨ੍ਤਭਾਵਂ ਅਨੁਪਨੀਤਂ. ਅਕਾਰਿਤਨ੍ਤਿ ਸੁਸਿਕ੍ਖਿਤਕਿਰਿਯਂ ਅਸਿਕ੍ਖਾਪਿਤਂ. ਅਵਿਨੀਤਨ੍ਤਿ ਨ ਵਿਨੀਤਂ ਆਚਾਰਸਮ੍ਪਤ੍ਤਿਯਾ ਅਸਿਕ੍ਖਿਤਂ. ਉਪ੍ਪਥਂ ਗਣ੍ਹਾਤੀਤਿ ਵੁਤ੍ਤਪ੍ਪਕਾਰਂ ਯਾਨਂ ਅਦਨ੍ਤਾਤਿਯੁਤ੍ਤਂ ਭਨ੍ਤਂ ਵਿਸਮਮਗ੍ਗਂ ਉਪੇਤਿ. ਵਿਸਮਂ ਖਾਣੁਮ੍ਪਿ ਪਾਸਾਣਮ੍ਪਿ ਅਭਿਰੁਹਤੀਤਿ ਵਿਸਮਂ ਹੁਤ੍ਵਾ ਠਿਤਂ ਖਰਖਾਣੁਮ੍ਪਿ ਤਥਾ ਪਬ੍ਬਤਪਾਸਾਣਮ੍ਪਿ ਆਰੋਹਤਿ. ਯਾਨਮ੍ਪਿ ਆਰੋਹਨਕਮ੍ਪਿ ਭਞ੍ਜਤੀਤਿ ਵਯ੍ਹਾਦਿਯਾਨਂ ਆਰੋਹਨ੍ਤਸ੍ਸ ਪਾਜੇਨ੍ਤਸ੍ਸ ਹਤ੍ਥਪਾਦਾਦਿਮ੍ਪਿ ਭਿਨ੍ਦਤਿ. ਪਪਾਤੇਪਿ ਪਪਤਤੀਤਿ ਏਕਤੋਚ੍ਛਿਨ੍ਨਪਬ੍ਭਾਰਪਪਾਤੇਪਿ ਪਾਤੇਤਿ. ਸੋ ਵਿਬ੍ਭਨ੍ਤਕੋਤਿ ਸੋ ਪਟਿਕ੍ਕਨ੍ਤਕੋ. ਭਨ੍ਤਯਾਨਪਟਿਭਾਗੋਤਿ ਅਨਵਟ੍ਠਿਤਯਾਨਸਦਿਸੋ. ਉਪ੍ਪਥਂ ਗਣ੍ਹਾਤੀਤਿ ਕੁਸਲਕਮ੍ਮਪਥਤੋ ਪਟਿਕ੍ਕਮਿਤ੍ਵਾ ਅਪਾਯਪਥਭੂਤਂ ਉਪ੍ਪਥਂ ਮਿਚ੍ਛਾਮਗ੍ਗਂ ਉਪੇਤਿ. ਵਿਸਮਂ ਕਾਯਕਮ੍ਮਂ ਅਭਿਰੁਹਤੀਤਿ ਸਮਸ੍ਸ ਪਟਿਪਕ੍ਖਂ ਕਾਯਦੁਚ੍ਚਰਿਤਸਙ੍ਖਾਤਂ ਵਿਸਮਂ ਕਾਯਕਮ੍ਮਂ ਆਰੋਹਤਿ. ਸੇਸੇਸੁਪਿ ਏਸੇਵ ਨਯੋ. ਨਿਰਯੇ ਅਤ੍ਤਾਨਂ ਭਞ੍ਜਤੀਤਿ ਨਿਰਸ੍ਸਾਦਸਙ੍ਖਾਤੇ ਨਿਰਯੇ ਅਤ੍ਤਭਾਵਂ ਚੁਣ੍ਣਵਿਚੁਣ੍ਣਂ ਕਰੋਤਿ. ਮਨੁਸ੍ਸਲੋਕੇ ਅਤ੍ਤਾਨਂ ਭਞ੍ਜਤੀਤਿ ਵਿਵਿਧਕਮ੍ਮਕਾਰਣਵਸੇਨ ਭਞ੍ਜਤਿ. ਦੇਵਲੋਕੇ ਅਤ੍ਤਾਨਂ ਭਞ੍ਜਤੀਤਿ ਪਿਯਵਿਪ੍ਪਯੋਗਾਦਿਦੁਕ੍ਖਵਸੇਨ. ਜਾਤਿਪਪਾਤਮ੍ਪਿ ਪਪਤਤੀਤਿ ਜਾਤਿਪਪਾਤੇਪਿ ਪਾਤੇਤਿ. ਜਰਾਪਪਾਤਾਦੀਸੁਪਿ ਏਸੇਵ ਨਯੋ. ਮਨੁਸ੍ਸਲੋਕੇਤਿ ਇਧ ਅਧਿਪ੍ਪੇਤਲੋਕਮੇਵ ਦਸ੍ਸੇਤਿ.

ਪੁਥੁਜ੍ਜਨਾਤਿ ਨਿਦ੍ਦੇਸਸ੍ਸ ਉਦ੍ਦੇਸਪਦਂ. ਤਤ੍ਥ ਪੁਥੁਜ੍ਜਨਾਤਿ –

ਪੁਥੂਨਂ ਜਨਨਾਦੀਹਿ, ਕਾਰਣੇਹਿ ਪੁਥੁਜ੍ਜਨੋ;

ਪੁਥੁਜ੍ਜਨਨ੍ਤੋਗਧਤ੍ਤਾ, ਪੁਥੁਵਾਯਂ ਜਨੋ ਇਤਿ.

ਸੋ ਹਿ ਪੁਥੂਨਂ ਨਾਨਪ੍ਪਕਾਰਾਨਂ ਕਿਲੇਸਾਦੀਨਂ ਜਨਨਾਦੀਹਿਪਿ ਕਾਰਣੇਹਿ ਪੁਥੁਜ੍ਜਨੋ. ਤਂ ਵਿਭਾਗਤੋ ਦਸ੍ਸੇਤੁਂ ‘‘ਪੁਥੁ ਕਿਲੇਸੇ ਜਨੇਨ੍ਤੀ’’ਤਿਆਦਿਮਾਹ. ਤਤ੍ਥ ਬਹੂਨਂ ਨਾਨਪ੍ਪਕਾਰਾਨਂ ਸਕ੍ਕਾਯਦਿਟ੍ਠੀਨਂ ਅਵਿਹਤਤ੍ਤਾ ਵਾ ਤਾ ਜਨੇਨ੍ਤਿ, ਤਾਹਿ ਜਨਿਤਾਤਿ ਵਾ ਪੁਥੁਜ੍ਜਨਾ. ਅਵਿਹਤਮੇਵਤ੍ਥਂ ਜਨਸਦ੍ਦੋ ਵਦਤਿ. ਪੁਥੁ ਸਤ੍ਥਾਰਾਨਂ ਮੁਖੁਲ੍ਲੋਕਿਕਾਤਿ ਏਤ੍ਥ ਪੁਥੂ ਨਾਨਾਜਨਾ ਸਤ੍ਥੁਪਟਿਞ੍ਞਾ ਏਤੇਸਨ੍ਤਿ ਪੁਥੁਜ੍ਜਨਾਤਿ ਵਚਨਤ੍ਥੋ. ਪੁਥੁ ਸਬ੍ਬਗਤੀਹਿ ਅਵੁਟ੍ਠਿਤਾਤਿ ਏਤ੍ਥ ਜਨੇਤਬ੍ਬਾ ਜਨਯਨ੍ਤਿ ਏਤ੍ਥਾਤਿ ਜਨਾ, ਗਤਿਯੋ. ਪੁਥੂ ਜਨਾ ਏਤੇਸਨ੍ਤਿ ਪੁਥੁਜ੍ਜਨਾ. ਇਤੋ ਪਰੇ ਜਾਯਨ੍ਤਿ ਏਤੇਹੀਤਿ ਜਨਾ, ਅਭਿਸਙ੍ਖਾਰਾਦਯੋ. ਤੇ ਏਤੇਸਂ ਵਿਜ੍ਜਨ੍ਤੀਤਿ ਪੁਥੁਜ੍ਜਨਾ. ਅਭਿਸਙ੍ਖਰਣਾਦਿਅਤ੍ਥੋ ਏਵ ਵਾ ਜਨਸਦ੍ਦੋ ਦਟ੍ਠਬ੍ਬੋ. ਨਾਨਾਸਨ੍ਤਾਪੇਹਿ ਸਨ੍ਤਪਨ੍ਤੀਤਿ ਰਾਗਗ੍ਗਿਆਦਯੋ ਸਨ੍ਤਾਪਾ. ਤੇ ਏਵ ਵਾ ਸਬ੍ਬੇਪਿ ਵਾ ਕਿਲੇਸਾ ਪਰਿਲ਼ਾਹਾ. ਪੁਥੁ ਪਞ੍ਚਸੁ ਕਾਮਗੁਣੇਸੂਤਿ ਏਤ੍ਥ ਜਾਯਤੀਤਿ ਜਨੋ, ਰਾਗੋ ਗੇਧੋਤਿ ਏਵਮਾਦਿਕੋ, ਪੁਥੁ ਜਨੋ ਏਤੇਸਨ੍ਤਿ ਪੁਥੁਜ੍ਜਨਾ. ਪੁਥੁ ਜਾਤਾ ਰਤ੍ਤਾਤਿ ਏਵਂ ਰਾਗਾਦਿਅਤ੍ਥੋ ਏਵ ਵਾ ਜਨਸਦ੍ਦੋ ਦਟ੍ਠਬ੍ਬੋ. ਪਲਿਬੁਦ੍ਧਾਤਿ ਸਮ੍ਬਦ੍ਧਾ. ਆਵੁਤਾਤਿ ਆਵਰਿਤਾ. ਨਿਵੁਤਾਤਿ ਵਾਰਿਤਾ. ਓਵੁਤਾਤਿ ਉਪਰਿਤੋ ਪਿਹਿਤਾ. ਪਿਹਿਤਾਤਿ ਹੇਟ੍ਠਾਭਾਗੇਨ ਪਿਹਿਤਾ. ਪਟਿਚ੍ਛਨ੍ਨਾਤਿ ਅਪਾਕਟਾ. ਪਟਿਕੁਜ੍ਜਿਤਾਤਿ ਅਧੋਮੁਖਗਤਾ.

ਅਥ ਵਾ ਪੁਥੂਨਂ ਵਾ ਗਣਨਪਥਮਤੀਤਾਨਂ ਅਰਿਯਧਮ੍ਮਪਰਮ੍ਮੁਖਾਨਂ ਨੀਚਧਮ੍ਮਸਮਾਚਾਰਾਨਂ ਜਨਾਨਂ ਅਨ੍ਤੋਗਧਤ੍ਤਾਪਿ ਪੁਥੁਜ੍ਜਨਾ. ਪੁਥੁ ਵਾ ਅਯਂ ਵਿਸੁਂਯੇਵ ਸਙ੍ਖਂ ਗਤੋ, ਵਿਸਂਸਟ੍ਠੋ ਸੀਲਸੁਤਾਦਿਗੁਣਯੁਤ੍ਤੇਹਿ ਅਰਿਯੇਹਿ ਜਨੋਤਿਪਿ ਪੁਥੁਜ੍ਜਨੋ.

ਏਵਂ ਯੇ ਤੇ –

‘‘ਦੁਵੇ ਪੁਥੁਜ੍ਜਨਾ ਵੁਤ੍ਤਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ;

ਅਨ੍ਧੋ ਪੁਥੁਜ੍ਜਨੋ ਏਕੋ, ਕਲ੍ਯਾਣੇਕੋ ਪੁਥੁਜ੍ਜਨੋ’’ਤਿ. –

ਦ੍ਵੇਵ ਪੁਥੁਜ੍ਜਨਾ ਵੁਤ੍ਤਾ, ਤੇਸੁ ਅਨ੍ਧਪੁਥੁਜ੍ਜਨੋ ਵੁਤ੍ਤੋ ਹੋਤੀਤਿ ਵੇਦਿਤਬ੍ਬੋ.

੫੨. ਯਸੋ ਕਿਤ੍ਤਿ ਚਾਤਿ ਲਾਭਸਕ੍ਕਾਰੋ ਪਸਂਸਾ ਚ. ਪੁਬ੍ਬੇਤਿ ਪਬ੍ਬਜਿਤਭਾਵੇ. ਹਾਯਤੇ ਵਾਪਿ ਤਸ੍ਸ ਸਾਤਿ ਤਸ੍ਸ ਵਿਬ੍ਭਨ੍ਤਕਸ੍ਸ ਸਤੋ ਸੋ ਚ ਯਸੋ ਸਾ ਚ ਕਿਤ੍ਤਿ ਹਾਯਤਿ. ਏਤਮ੍ਪਿ ਦਿਸ੍ਵਾਤਿ ਏਤਮ੍ਪਿ ਪੁਬ੍ਬੇ ਯਸਕਿਤ੍ਤੀਨਂ ਲਾਭਂ ਪਚ੍ਛਾ ਚ ਹਾਨਿਂ ਦਿਸ੍ਵਾ. ਸਿਕ੍ਖੇਥ ਮੇਥੁਨਂ ਵਿਪ੍ਪਹਾਤਵੇਤਿ ਤਿਸ੍ਸੋ ਸਿਕ੍ਖਾਯੋ ਸਿਕ੍ਖੇਥ. ਕਿਂ ਕਾਰਣਾ? ਮੇਥੁਨਂ ਵਿਪ੍ਪਹਾਤਵੇ, ਮੇਥੁਨਪ੍ਪਹਾਨਤ੍ਥਾਯਾਤਿ ਵੁਤ੍ਤਂ ਹੋਤਿ.

ਕਿਤ੍ਤਿਵਣ੍ਣਗਤੋਤਿ ਭਗਵਾ ਕਿਤ੍ਤਿਵਣ੍ਣੋ, ਕਿਤ੍ਤਿਸਦ੍ਦਞ੍ਚੇਵ ਗੁਣਞ੍ਚ ਉਕ੍ਖਿਪਿਤ੍ਵਾ ਵਦਨ੍ਤੋ ਹੋਤੀਤਿ ਅਤ੍ਥੋ. ਚਿਤ੍ਤਂ ਨਾਨਾਨਯੇਨ ਕਥਨਂ ਅਸ੍ਸ ਅਤ੍ਥੀਤਿ ਚਿਤ੍ਤਕਥੀ. ਕਲ੍ਯਾਣਪਟਿਭਾਨੋਤਿ ਸੁਨ੍ਦਰਪਞ੍ਞੋ.

ਹਾਯਤੀਤਿ ਨਿਦ੍ਦੇਸਸ੍ਸ ਉਦ੍ਦੇਸਪਦਂ. ਪਰਿਹਾਯਤੀਤਿ ਸਮਨ੍ਤਤੋ ਹਾਯਤਿ. ਪਰਿਧਂਸਤੀਤਿ ਅਧੋਪਥਵਿਂ ਪਤਤਿ. ਪਰਿਪਤਤੀਤਿ ਸਮਨ੍ਤਤੋ ਅਪਗਚ੍ਛਤਿ. ਅਨ੍ਤਰਧਾਯਤੀਤਿ ਅਦਸ੍ਸਨਂ ਯਾਤਿ. ਵਿਪ੍ਪਲੁਜ੍ਜਤੀਤਿ ਉਚ੍ਛਿਜ੍ਜਤਿ.

ਖੁਦ੍ਦਕੋ ਸੀਲਕ੍ਖਨ੍ਧੋਤਿ ਥੁਲ੍ਲਚ੍ਚਯਾਦਿ. ਮਹਨ੍ਤੋ ਸੀਲਕ੍ਖਨ੍ਧੋਤਿ ਪਾਰਾਜਿਕਸਂਙ੍ਘਾਦਿਸੇਸੋ.

ਮੇਥੁਨਧਮ੍ਮਸ੍ਸ ਪਹਾਨਾਯਾਤਿ ਤਦਙ੍ਗਾਦਿਪਹਾਨੇਨ ਪਜਹਨਤ੍ਥਾਯ. ਵੂਪਸਮਾਯਾਤਿ ਮਲਾਨਂ ਵੂਪਸਮਨਤ੍ਥਾਯ. ਪਟਿਨਿਸ੍ਸਗ੍ਗਾਯਾਤਿ ਪਕ੍ਖਨ੍ਦਨਪਰਿਚ੍ਚਾਗਪਟਿਨਿਸ੍ਸਗ੍ਗਤ੍ਥਾਯ. ਪਟਿਪਸ੍ਸਦ੍ਧਿਯਾਤਿ ਪਟਿਪਸ੍ਸਦ੍ਧਿਸਙ੍ਖਾਤਸ੍ਸ ਫਲਸ੍ਸ ਅਤ੍ਥਾਯ.

੫੩. ਯੋ ਹਿ ਮੇਥੁਨਂ ਨ ਵਿਪ੍ਪਜਹਤਿ ਸਙ੍ਕਪ੍ਪੇਹਿ…ਪੇ… ਤਥਾਵਿਧੋ. ਤਤ੍ਥ ਪਰੇਤੋਤਿ ਸਮਨ੍ਨਾਗਤੋ. ਪਰੇਸਂ ਨਿਗ੍ਘੋਸਨ੍ਤਿ ਉਪਜ੍ਝਾਯਾਦੀਨਂ ਨਿਨ੍ਦਾਵਚਨਂ. ਮਙ੍ਕੁ ਹੋਤੀਤਿ ਦੁਮ੍ਮਨੋ ਹੋਤਿ.

ਕਾਮਸਙ੍ਕਪ੍ਪੇਨਾਤਿ ਕਾਮਪਟਿਸਂਯੁਤ੍ਤੇਨ ਵਿਤਕ੍ਕੇਨ. ਉਪਰਿਟ੍ਠੇਪਿ ਏਸੇਵ ਨਯੋ. ਫੁਟ੍ਠੋਤਿ ਵਿਤਕ੍ਕੇਹਿ ਫੁਸਿਤੋ. ਪਰੇਤੋਤਿ ਅਪਰਿਹੀਨੋ. ਸਮੋਹਿਤੋਤਿ ਸਮ੍ਮਾ ਓਹਿਤੋ ਅਨ੍ਤੋ ਪਵਿਟ੍ਠੋ. ਕਪਣੋ ਵਿਯਾਤਿ ਦੁਗ੍ਗਤਮਨੁਸ੍ਸੋ ਵਿਯ. ਮਨ੍ਦੋ ਵਿਯਾਤਿ ਅਞ੍ਞਾਣੀ ਵਿਯ. ਮੋਮੂਹੋ ਵਿਯਾਤਿ ਸਮ੍ਮੋਹਭੂਤੋ ਵਿਯ. ਝਾਯਤੀਤਿ ਚਿਨ੍ਤੇਤਿ. ਪਜ੍ਝਾਯਤੀਤਿ ਭੁਸਂ ਚਿਨ੍ਤੇਤਿ. ਨਿਜ੍ਝਾਯਤੀਤਿ ਅਨੇਕਵਿਧੇਨ ਚਿਨ੍ਤੇਤਿ. ਅਪਜ੍ਝਾਯਤੀਤਿ ਤਤੋ ਅਪਗਨ੍ਤ੍ਵਾ ਚਿਨ੍ਤੇਤਿ. ਉਲੂਕੋਤਿ ਉਲੂਕਸਕੁਣੋ. ਰੁਕ੍ਖਸਾਖਾਯਨ੍ਤਿ ਰੁਕ੍ਖੇ ਉਟ੍ਠਿਤਸਾਖਾਯ, ਵਿਟਪੇ ਵਾ. ਮੂਸਿਕਂ ਮਗਯਮਾਨੋਤਿ ਮੂਸਿਕਂ ਗਵੇਸਮਾਨੋ, ‘‘ਮਗ੍ਗਯਮਾਨੋ’’ਤਿਪਿ ਪਠਨ੍ਤਿ. ਕੋਤ੍ਥੂਤਿ ਸਿਙ੍ਗਾਲੋ. ਬਿਲ਼ਾਰੋਤਿ ਬਬ੍ਬੁ. ਸਨ੍ਧਿਸਮਲਸਙ੍ਕਟਿਰੇਤਿ ਦ੍ਵਿਨ੍ਨਂ ਘਰਾਨਂ ਅਨ੍ਤਰੇ ਚ ਉਦਕਨਿਦ੍ਧਮਨਚਿਕ੍ਖਲ੍ਲਕਚਵਰਨਿਕ੍ਖਿਪਨਟ੍ਠਾਨੇ ਚ ਥਣ੍ਡਿਲੇ ਚ. ਵਹਚ੍ਛਿਨ੍ਨੋਤਿ ਪਿਟ੍ਠਿਗੀਵਮਂਸਚ੍ਛਿਨ੍ਨੋ. ਇਤੋ ਪਰਾ ਗਾਥਾ ਪਾਕਟਸਮ੍ਬਨ੍ਧਾ ਏਵ.

੫੪. ਤਾਸੁ ਸਤ੍ਥਾਨੀਤਿ ਕਾਯਦੁਚ੍ਚਰਿਤਾਦੀਨਿ. ਤਾਨਿ ਹਿ ਅਤ੍ਤਨੋ ਪਰੇਸਞ੍ਚ ਛੇਦਨਟ੍ਠੇਨ ‘‘ਸਤ੍ਥਾਨੀ’’ਤਿ ਵੁਚ੍ਚਨ੍ਤਿ. ਤੇਸੁ ਵਾਯਂ ਵਿਸੇਸੇਨ ਤਾਵ ਆਦਿਤੋ ਮੁਸਾਵਚਨਸਤ੍ਥਾਨੇਵ ਕਰੋਤਿ, ‘‘ਇਮਿਨਾ ਕਾਰਣੇਨਾਹਂ ਵਿਬ੍ਭਨ੍ਤੋ’’ਤਿ ਭਣਨ੍ਤੋ. ਤੇਨੇਵਾਹ – ‘‘ਏਸ ਖ੍ਵਸ੍ਸ ਮਹਾਗੇਧੋ, ਮੋਸਵਜ੍ਜਂ ਪਗਾਹਤੀ’’ਤਿ. ਤਤ੍ਥ ਏਸ ਖ੍ਵਸ੍ਸਾਤਿ ਏਸ ਖੋ ਅਸ੍ਸ. ਮਹਾਗੇਧੋਤਿ ਮਹਾਬਨ੍ਧਨਂ. ਕਤਮੋਤਿ ਚੇ? ਯਦਿਦਂ ਮੋਸਵਜ੍ਜਂ ਪਗਾਹਤਿ, ਸ੍ਵਾਯਂ ਮੁਸਾਵਾਦਜ੍ਝੋਗਾਹੋ ‘‘ਮਹਾਗੇਧੋ’’ਤਿ ਵੇਦਿਤਬ੍ਬੋ.

ਤੀਣਿ ਸਤ੍ਥਾਨੀਤਿ ਤਯੋ ਛੇਦਕਾ. ਕਾਯਦੁਚ੍ਚਰਿਤਂ ਕਾਯਸਤ੍ਥਂ. ਵਚੀਸਤ੍ਥਾਦੀਸੁਪਿ ਏਸੇਵ ਨਯੋ. ਤਂ ਵਿਭਾਗਤੋ ਦਸ੍ਸੇਤੁਂ ‘‘ਤਿਵਿਧਂ ਕਾਯਦੁਚ੍ਚਰਿਤਂ ਕਾਯਸਤ੍ਥ’’ਨ੍ਤਿ ਆਹ. ਸਮ੍ਪਜਾਨਮੁਸਾ ਭਾਸਤੀਤਿ ਜਾਨਨ੍ਤੋ ਤੁਚ੍ਛਂ ਵਾਚਂ ਭਾਸਤਿ. ਅਭਿਰਤੋ ਅਹਂ ਭਨ੍ਤੇ ਅਹੋਸਿਂ ਪਬ੍ਬਜ੍ਜਾਯਾਤਿ ਸਾਸਨੇ ਪਬ੍ਬਜ੍ਜਾਯ ਅਨਭਿਰਤਿਵਿਰਹਿਤੋ ਅਹਂ ਆਸਿਂ. ਮਾਤਾ ਮੇ ਪੋਸੇਤਬ੍ਬਾਤਿ ਮਾਤਾ ਮਯਾ ਪੋਸੇਤਬ੍ਬਾ. ਤੇਨਮ੍ਹਿ ਵਿਬ੍ਭਨ੍ਤੋਤਿ ਭਣਤੀਤਿ ਤੇਨ ਕਾਰਣੇਨ ਪਟਿਕ੍ਕਨ੍ਤੋ ਅਸ੍ਮੀਤਿਪਿ ਕਥੇਤਿ. ਪਿਤਾ ਮੇ ਪੋਸੇਤਬ੍ਬੋਤਿਆਦੀਸੁਪਿ ਏਸੇਵ ਨਯੋ.

ਏਸੋ ਤਸ੍ਸ ਮਹਾਗੇਧੋਤਿ ਤਸ੍ਸ ਪੁਗ੍ਗਲਸ੍ਸ ਏਸੋ ਮਹਾਬਨ੍ਧੋ. ਮਹਾਵਨਨ੍ਤਿ ਮਹਨ੍ਤਂ ਦੁਟ੍ਠਵਨਂ. ਗਹਨਨ੍ਤਿ ਦੁਰਤਿਕ੍ਕਮਂ. ਕਨ੍ਤਾਰੋਤਿ ਚੋਰਕਨ੍ਤਾਰਾਦਿਸਦਿਸੋ. ਵਿਸਮੋਤਿ ਕਣ੍ਟਕਵਿਸਮੋ. ਕੁਟਿਲੋਤਿ ਵਙ੍ਕਕਟਕਸਦਿਸੋ. ਪਙ੍ਕੋਤਿ ਪਲ੍ਲਲਸਦਿਸੋ. ਪਲਿਪੋਤਿ ਕਦ੍ਦਮਸਦਿਸੋ. ਪਲਿਬੋਧੋਤਿ ਮਹਾਦੁਕ੍ਖੋ. ਮਹਾਬਨ੍ਧਨਨ੍ਤਿ ਮਹਨ੍ਤਂ ਦੁਮੋਚਯਬਨ੍ਧਨਂ. ਯਦਿਦਂ ਸਮ੍ਪਜਾਨਮੁਸਾਵਾਦੋਤਿ ਯੋ ਅਯਂ ਸਮ੍ਪਜਾਨਮੁਸਾਵਾਦੋ.

ਸਭਗ੍ਗਤੋ ਵਾਤਿ ਸਭਾਯਂ ਠਿਤੋ ਵਾ. ਪਰਿਸਗ੍ਗਤੋ ਵਾਤਿ ਗਾਮਪਰਿਸਾਯਂ ਠਿਤੋ ਵਾ. ਞਾਤਿਮਜ੍ਝਗਤੋ ਵਾਤਿ ਦਾਯਾਦਾਨਂ ਮਜ੍ਝੇ ਠਿਤੋ ਵਾ. ਪੂਗਮਜ੍ਝਗਤੋ ਵਾਤਿ ਸੇਨੀਨਂ ਮਜ੍ਝੇ ਠਿਤੋ ਵਾ. ਰਾਜਕੁਲਮਜ੍ਝਗਤੋ ਵਾਤਿ ਰਾਜਕੁਲਸ੍ਸ ਮਜ੍ਝੇ ਮਹਾਵਿਨਿਚ੍ਛਯੇ ਠਿਤੋ ਵਾ. ਅਭਿਨੀਤੋਤਿ ਪੁਚ੍ਛਨਤ੍ਥਾਯ ਨੀਤੋ. ਸਕ੍ਖਿਪੁਟ੍ਠੋਤਿ ਸਕ੍ਖਿਂ ਕਤ੍ਵਾ ਪੁਚ੍ਛਿਤੋ. ਏਹਮ੍ਭੋ ਪੁਰਿਸਾਤਿ ਆਲਪਨਮੇਤਂ. ਅਤ੍ਤਹੇਤੁ ਵਾ ਪਰਹੇਤੁ ਵਾਤਿ ਅਤ੍ਤਨੋ ਵਾ ਪਰਸ੍ਸ ਵਾ ਹਤ੍ਥਪਾਦਾਦਿਹੇਤੁ ਵਾ ਧਨਹੇਤੁ ਵਾ. ਆਮਿਸਕਿਞ੍ਚਿਕ੍ਖਹੇਤੁ ਵਾਤਿ ਏਤ੍ਥ ਆਮਿਸਨ੍ਤਿ ਲਾਭੋ ਅਧਿਪ੍ਪੇਤੋ. ਕਿਞ੍ਚਿਕ੍ਖਨ੍ਤਿ ਯਂ ਵਾ ਤਂ ਵਾ ਅਪ੍ਪਮਤ੍ਤਕਂ, ਅਨ੍ਤਮਸੋ ਤਿਤ੍ਤਿਰਵਟ੍ਟਕਸਪ੍ਪਿਪਿਣ੍ਡਨਵਨੀਤਪਿਣ੍ਡਾਦਿਮਤ੍ਤਕਸ੍ਸਪਿ ਲਾਭਸ੍ਸ ਹੇਤੂਤਿ ਅਤ੍ਥੋ. ਸਮ੍ਪਜਾਨਮੁਸਾ ਭਾਸਤੀਤਿ ਜਾਨਨ੍ਤੋਯੇਵ ਮੁਸਾਵਾਦਂ ਕਰੋਤਿ.

ਪੁਨ ਅਞ੍ਞਂ ਪਰਿਯਾਯਂ ਦਸ੍ਸੇਨ੍ਤੋ ‘‘ਅਪਿ ਚ ਤੀਹਾਕਾਰੇਹਿ ਮੁਸਾਵਾਦੋ ਹੋਤਿ, ਪੁਬ੍ਬੇਵਸ੍ਸ ਹੋਤੀ’’ਤਿਆਦਿਮਾਹ. ਤਤ੍ਥ ਤੀਹਾਕਾਰੇਹੀਤਿ ਸਮ੍ਪਜਾਨਮੁਸਾਵਾਦਸ੍ਸ ਅਙ੍ਗਭੂਤੇਹਿ ਤੀਹਿ ਕਾਰਣੇਹਿ. ਪੁਬ੍ਬੇਵਸ੍ਸ ਹੋਤੀਤਿ ਪੁਬ੍ਬਭਾਗੇਯੇਵ ਅਸ੍ਸ ਪੁਗ੍ਗਲਸ੍ਸ ਏਵਂ ਹੋਤਿ ‘‘ਮੁਸਾ ਭਣਿਸ੍ਸ’’ਨ੍ਤਿ. ਭਣਨ੍ਤਸ੍ਸ ਹੋਤੀਤਿ ਭਣਮਾਨਸ੍ਸ ਹੋਤਿ. ਭਣਿਤਸ੍ਸ ਹੋਤੀਤਿ ਭਣਿਤੇ ਅਸ੍ਸ ਹੋਤਿ. ਯਂ ਵਤ੍ਤਬ੍ਬਂ ਤਸ੍ਮਿਂ ਵੁਤ੍ਤੇ ਹੋਤੀਤਿ ਅਤ੍ਥੋ. ਅਥ ਵਾ ਭਣਿਤਸ੍ਸਾਤਿ ਵੁਤ੍ਤਵਤੋ ਨਿਟ੍ਠਿਤਵਚਨਸ੍ਸ ਹੋਤੀਤਿ. ਯੋ ਏਵਂ ਪੁਬ੍ਬਭਾਗੇਪਿ ਜਾਨਾਤਿ, ਭਣਨ੍ਤੋਪਿ ਜਾਨਾਤਿ, ਪਚ੍ਛਾਪਿ ਜਾਨਾਤਿ ‘‘ਮੁਸਾ ਮਯਾ ਭਣਿਤ’’ਨ੍ਤਿ, ਸੋ ਏਵਂ ਵਦਨ੍ਤੋ ਮੁਸਾਵਾਦਕਮ੍ਮੁਨਾ ਬਜ੍ਝਤੀਤਿ ਅਯਮੇਤ੍ਥ ਅਤ੍ਥੋ ਦਸ੍ਸਿਤੋ. ਕਿਞ੍ਚਾਪਿ ਦਸ੍ਸਿਤੋ, ਅਥ ਖੋ ਅਯਮੇਤ੍ਥ ਵਿਸੇਸੋ – ਪੁਚ੍ਛਾ ਤਾਵ ਹੋਤਿ, ‘‘ਮੁਸਾ ਭਣਿਸ੍ਸ’’ਨ੍ਤਿ ਪੁਬ੍ਬਭਾਗੋ ਅਤ੍ਥਿ, ‘‘ਮੁਸਾ ਮਯਾ ਭਣਿਤ’’ਨ੍ਤਿ ਪਚ੍ਛਾਭਾਗੋ ਨਤ੍ਥਿ. ਵੁਤ੍ਤਮਤ੍ਤਮੇਵ ਹਿ ਕੋਚਿ ਪਮੁਸ੍ਸਤਿ ਕਿਂ ਤਸ੍ਸ ਮੁਸਾਵਾਦੋ ਹੋਤਿ, ਨ ਹੋਤੀਤਿ? ਸਾ ਏਵਂ ਅਟ੍ਠਕਥਾਸੁ ਵਿਸ੍ਸਜ੍ਜਿਤਾ – ਪੁਬ੍ਬਭਾਗੇ ‘‘ਮੁਸਾ ਭਣਿਸ੍ਸ’’ਨ੍ਤਿ ਚ, ਭਣਨ੍ਤਸ੍ਸ ‘‘ਮੁਸਾ ਭਣਾਮੀ’’ਤਿ ਚ ਜਾਨਤੋ ਪਚ੍ਛਾਭਾਗੇ ‘‘ਮੁਸਾ ਮਯਾ ਭਣਿਤ’’ਨ੍ਤਿ ਨ ਸਕ੍ਕਾ ਨ ਭਵਿਤੁਂ, ਸਚੇਪਿ ਨ ਹੋਤਿ, ਮੁਸਾਵਾਦੋਯੇਵ. ਪੁਰਿਮਮੇਵ ਹਿ ਅਙ੍ਗਦ੍ਵਯਂ ਪਮਾਣਂ. ਯਸ੍ਸਾਪਿ ਪੁਬ੍ਬਭਾਗੇ ‘‘ਮੁਸਾ ਭਣਿਸ੍ਸ’’ਨ੍ਤਿ ਆਭੋਗੋ ਨਤ੍ਥਿ, ਭਣਨ੍ਤੋ ਪਨ ‘‘ਮੁਸਾ ਭਣਾਮੀ’’ਤਿ ਜਾਨਾਤਿ. ਭਣਿਤੇਪਿ ‘‘ਮੁਸਾ ਮਯਾ ਭਣਿਤ’’ਨ੍ਤਿ ਜਾਨਾਤਿ. ਸੋ ਮੁਸਾਵਾਦੇਨ ਨ ਕਾਰੇਤਬ੍ਬੋ. ਪੁਬ੍ਬਭਾਗੋ ਹਿ ਪਮਾਣਤਰੋ. ਤਸ੍ਮਿਂ ਅਸਤਿ ਦਵਾ ਭਣਿਤਂ ਵਾ, ਰਵਾ ਭਣਿਤਂ ਵਾ ਹੋਤੀਤਿ.

ਏਤ੍ਥ ਚ ਤਂਞਾਣਤਾ ਚ ਞਾਣਸਮੋਧਾਨਞ੍ਚ ਪਰਿਚ੍ਚਜਿਤਬ੍ਬਂ. ਤਂਞਾਣਤਾ ਪਰਿਚ੍ਚਜਿਤਬ੍ਬਾਤਿ ਯੇਨ ਚਿਤ੍ਤੇਨ ‘‘ਮੁਸਾ ਭਣਿਸ੍ਸ’’ਨ੍ਤਿ ਜਾਨਾਤਿ, ਤੇਨੇਵ ‘‘ਮੁਸਾ ਭਣਾਮੀ’’ਤਿ ਚ, ‘‘ਮੁਸਾ ਮਯਾ ਭਣਿਤ’’ਨ੍ਤਿ ਚ ਜਾਨਾਤੀਤਿ ਏਵਂ ਏਕਚਿਤ੍ਤੇਨੇਵ ਤੀਸੁ ਖਣੇਸੁ ਜਾਨਾਤੀਤਿ ਅਯਂ ਤਂਞਾਣਤਾ ਪਰਿਚ੍ਚਜਿਤਬ੍ਬਾ. ਨ ਹਿ ਸਕ੍ਕਾ ਤੇਨੇਵ ਚਿਤ੍ਤੇਨ ਤਂ ਚਿਤ੍ਤਂ ਜਾਨਿਤੁਂ, ਯਥਾ ਨ ਸਕ੍ਕਾ ਤੇਨੇਵ ਅਸਿਨਾ ਸੋ ਅਸਿ ਛਿਨ੍ਦਿਤੁਨ੍ਤਿ. ਪੁਰਿਮਂ ਪੁਰਿਮਂ ਪਨ ਚਿਤ੍ਤਂ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਚਿਤ੍ਤਸ੍ਸ ਤਥਾ ਉਪ੍ਪਤ੍ਤਿਯਾ ਪਚ੍ਚਯੋ ਹੁਤ੍ਵਾ ਨਿਰੁਜ੍ਝਤਿ. ਤੇਨੇਤਂ ਵੁਚ੍ਚਤਿ –

‘‘ਪਮਾਣਂ ਪੁਬ੍ਬਭਾਗੋਵ, ਤਸ੍ਮਿਂ ਸਤਿ ਨ ਹੇਸ੍ਸਤਿ;

ਸੇਸਦ੍ਵਯਨ੍ਤਿ ਨਤ੍ਥੇਤ, ਮਿਤਿ ਵਾਚਾ ਤਿਵਙ੍ਗਿਕਾ’’ਤਿ. (ਪਾਰਾ. ਅਟ੍ਠ. ੨.੨੦੦);

ਞਾਣਸਮੋਧਾਨਂ ਪਰਿਚ੍ਚਜਿਤਬ੍ਬਨ੍ਤਿ ਏਤਾਨਿ ਤੀਣਿ ਚਿਤ੍ਤਾਨਿ ਏਕਕ੍ਖਣੇ ਉਪ੍ਪਜ੍ਜਨ੍ਤੀਤਿ ਨ ਗਹੇਤਬ੍ਬਾਨਿ. ਇਦਞ੍ਹਿ ਚਿਤ੍ਤਂ ਨਾਮ –

‘‘ਅਨਿਰੁਦ੍ਧਮ੍ਹਿ ਪਠਮੇ, ਨ ਉਪ੍ਪਜ੍ਜਤਿ ਪਚ੍ਛਿਮਂ;

ਨਿਰਨ੍ਤਰੁਪ੍ਪਜ੍ਜਨਤੋ, ਏਕਂ ਵਿਯ ਪਕਾਸਤੀ’’ਤਿ. (ਪਾਰਾ. ਅਟ੍ਠ. ੨.੨੦੦);

ਇਤੋ ਪਰਂ ਪਨ ਯ੍ਵਾਯਂ ਅਜਾਨਂਯੇਵ ‘‘ਜਾਨਾਮੀ’’ਤਿਆਦਿਨਾ ਨਯੇਨ ਸਮ੍ਪਜਾਨਮੁਸਾ ਭਣਤਿ, ਯਸ੍ਮਾ ਸੋ ‘‘ਇਦਂ ਅਭੂਤ’’ਨ੍ਤਿ ਏਵਂਦਿਟ੍ਠਿਕੋ ਹੋਤਿ, ਤਸ੍ਸ ਹਿ ਅਤ੍ਥੇਵ ਅਯਂ ਲਦ੍ਧਿ. ਤਥਾ ‘‘ਇਦਂ ਅਭੂਤ’’ਨ੍ਤਿ ਏਵਮਸ੍ਸ ਖਮਤਿ ਚੇਵ ਰੁਚ੍ਚਤਿ ਚ. ਏਵਮਸ੍ਸ ਸਞ੍ਞਾ, ਏਵਂਸਭਾਵਮੇਵ ਚਸ੍ਸ ਚਿਤ੍ਤਂ ‘‘ਇਦਂ ਅਭੂਤ’’ਨ੍ਤਿ. ਯਦਾ ਪਨ ਮੁਸਾ ਵਤ੍ਤੁਕਾਮੋ ਹੋਤਿ, ਤਦਾ ਤਂ ਦਿਟ੍ਠਿਂ ਵਾ ਦਿਟ੍ਠਿਯਾ ਸਹ ਖਨ੍ਤਿਂ ਵਾ ਦਿਟ੍ਠਿਖਨ੍ਤੀਹਿ ਸਦ੍ਧਿਂ ਰੁਚਿਂ ਵਾ ਦਿਟ੍ਠਿਖਨ੍ਤਿਰੁਚੀਹਿ ਸਦ੍ਧਿਂ ਸਞ੍ਞਂ ਵਾ ਦਿਟ੍ਠਿਖਨ੍ਤਿਰੁਚਿਸਞ੍ਞਾਹਿ ਸਦ੍ਧਿਂ ਭਾਵਂ ਵਾ ਵਿਨਿਧਾਯ ਨਿਕ੍ਖਿਪਿਤ੍ਵਾ ਪਟਿਚ੍ਛਾਦੇਤ੍ਵਾ ਅਭੂਤਂ ਕਤ੍ਵਾ ਭਣਤਿ. ਤਸ੍ਮਾ ਤੇਸਮ੍ਪਿਵਸੇਨ ਅਙ੍ਗਭੇਦਂ ਦਸ੍ਸੇਤੁਂ ‘‘ਅਪਿ ਚ ਚਤੂਹਾਕਾਰੇਹੀ’’ਤਿਆਦਿ ਵੁਤ੍ਤਂ.

ਏਤ੍ਥ ਚ ਵਿਨਿਧਾਯ ਦਿਟ੍ਠਿਨ੍ਤਿ ਬਲਵਧਮ੍ਮਵਿਨਿਧਾਨਵਸੇਨੇਤਂ ਵੁਤ੍ਤਂ. ਵਿਨਿਧਾਯ ਖਨ੍ਤਿਨ੍ਤਿਆਦੀਨਿ ਤਤੋ ਦੁਬ੍ਬਲਦੁਬ੍ਬਲਾਨਂ ਵਿਨਿਧਾਨਵਸੇਨ. ਵਿਨਿਧਾਯ ਸਞ੍ਞਨ੍ਤਿ ਇਦਂ ਪਨੇਤ੍ਥ ਸਬ੍ਬਦੁਬ੍ਬਲਧਮ੍ਮਵਿਨਿਧਾਨਵਸੇਨ. ਸਞ੍ਞਾਮਤ੍ਤਮ੍ਪਿ ਨਾਮ ਅਵਿਨਿਧਾਯ ਸਮ੍ਪਜਾਨਮੁਸਾ ਭਾਸਿਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ.

੫੫. ਮਨ੍ਦੋਵ ਪਰਿਕਿਸ੍ਸਤੀਤਿ ਪਾਣਵਧਾਦੀਨਿ ਕਰੋਨ੍ਤੋ ਤਤੋਨਿਦਾਨਞ੍ਚ ਦੁਕ੍ਖਮਨੁਭੋਨ੍ਤੋ ਭੋਗਪਰਿਯੇਸਨਾਰਕ੍ਖਣਾਨਿ ਚ ਕਰੋਨ੍ਤੋ ਮੋਮੂਹੋ ਵਿਯ ਪਰਿਕਿਲਿਸ੍ਸਤਿ.

ਤਮੇਨਂ ਰਾਜਾਨੋ ਗਹੇਤ੍ਵਾ ਵਿਵਿਧਾ ਕਮ੍ਮਕਾਰਣਾ ਕਾਰੇਨ੍ਤੀਤਿ ਨ ਰਾਜਾਨੋ ਕਰੋਨ੍ਤਿ, ਰਾਜਾਧੀਨਪੁਰਿਸਾ ਨਾਨਾਵਿਧਾਨਿ ਕਮ੍ਮਕਾਰਣਾਨਿ ਕਰੋਨ੍ਤਿ. ਕਸਾਹਿਪਿ ਤਾਲ਼ੇਨ੍ਤੀਤਿ ਕਸਾਦਣ੍ਡਕੇਹਿਪਿ ਵਿਤਜ੍ਜੇਨ੍ਤਿ. ਵੇਤ੍ਤੇਹੀਤਿ ਵੇਤ੍ਤਲਤਾਹਿ. ਅਦ੍ਧਦਣ੍ਡਕੇਹੀਤਿ ਮੁਗ੍ਗਰੇਹਿ, ਪਹਾਰਸਾਧਨਤ੍ਥਂ ਵਾ ਚਤੁਹਤ੍ਥਦਣ੍ਡਂ ਦ੍ਵੇਧਾ ਛੇਤ੍ਵਾ ਗਹਿਤਦਣ੍ਡਕੇਹਿ. ਬਿਲਙ੍ਗਥਾਲਿਕਨ੍ਤਿ ਕਞ੍ਜਿਯਉਕ੍ਖਲਿਕਕਮ੍ਮਕਾਰਣਂ. ਤਂ ਕਰੋਨ੍ਤਾ ਸੀਸਕਪਾਲਂ ਉਪ੍ਪਾਟੇਤ੍ਵਾ ਤਤ੍ਤਂ ਅਯੋਗੁਲ਼ਂ ਸਣ੍ਡਾਸੇਨ ਗਹੇਤ੍ਵਾ ਤਤ੍ਥ ਪਕ੍ਖਿਪਨ੍ਤਿ, ਤੇਨ ਮਤ੍ਥਲੁਙ੍ਗਂ ਪਕ੍ਕੁਟ੍ਠਿਤ੍ਵਾ ਉਪਰਿ ਉਤ੍ਤਰਤਿ. ਸਙ੍ਖਮੁਣ੍ਡਿਕਨ੍ਤਿ ਸਙ੍ਖਮੁਣ੍ਡਕਮ੍ਮਕਾਰਣਂ. ਤਂ ਕਰੋਨ੍ਤਾ ਉਤ੍ਤਰੋਟ੍ਠਉਭਤੋਕਣ੍ਣਚੂਲ਼ਿਕਗਲਵਾਟਕਪਰਿਚ੍ਛੇਦੇਨ ਚਮ੍ਮਂ ਛਿਨ੍ਦਿਤ੍ਵਾ ਸਬ੍ਬਕੇਸੇ ਏਕਤੋ ਗਣ੍ਠਿਂ ਕਤ੍ਵਾ ਦਣ੍ਡਕੇਨ ਵੇਠੇਤ੍ਵਾ ਉਪ੍ਪਾਟੇਨ੍ਤਿ, ਸਹ ਕੇਸੇਹਿ ਚਮ੍ਮਂ ਉਟ੍ਠਹਤਿ. ਤਤੋ ਸੀਸਕਟਾਹਂ ਥੂਲਸਕ੍ਖਰਾਹਿ ਘਂਸਿਤ੍ਵਾ ਧੋਵਨ੍ਤਾ ਸਙ੍ਖਵਣ੍ਣਂ ਕਰੋਨ੍ਤਿ. ਰਾਹੁਮੁਖਨ੍ਤਿ ਰਾਹੁਮੁਖਕਮ੍ਮਕਾਰਣਂ. ਤਂ ਕਰੋਨ੍ਤਾ ਸਙ੍ਕੁਨਾ ਮੁਖਂ ਵਿਵਰਿਤ੍ਵਾ ਅਨ੍ਤੋਮੁਖੇ ਦੀਪਂ ਜਾਲੇਨ੍ਤਿ, ਕਣ੍ਣਚੂਲ਼ਿਕਾਹਿ ਵਾ ਪਟ੍ਠਾਯ ਮੁਖਂ ਨਿਖਾਦਨੇਨ ਖਨਨ੍ਤਿ, ਲੋਹਿਤਂ ਪਗ੍ਘਰਿਤ੍ਵਾ ਮੁਖਂ ਪੂਰੇਤਿ.

ਜੋਤਿਮਾਲਿਕਨ੍ਤਿ ਸਕਲਸਰੀਰਂ ਤੇਲਪਿਲੋਤਿਕਾਯ ਵੇਠੇਤ੍ਵਾ ਆਲਿਮ੍ਪੇਨ੍ਤਿ. ਹਤ੍ਥਪਜ੍ਜੋਤਿਕਨ੍ਤਿ ਹਤ੍ਥੇ ਤੇਲਪਿਲੋਤਿਕਾਯ ਵੇਠੇਤ੍ਵਾ ਦੀਪਂ ਵਿਯ ਪਜ੍ਜਾਲੇਨ੍ਤਿ. ਏਰਕਵਤ੍ਤਿਕਨ੍ਤਿ ਏਰਕਵਤ੍ਤਕਮ੍ਮਕਾਰਣਂ. ਤਂ ਕਰੋਨ੍ਤਾ ਹੇਟ੍ਠਾਗੀਵਤੋ ਪਟ੍ਠਾਯ ਚਮ੍ਮਵਟ੍ਟੇ ਕਨ੍ਤਿਤ੍ਵਾ ਗੋਪ੍ਫਕੇ ਪਾਤੇਨ੍ਤਿ. ਅਥ ਨਂ ਯੋਤ੍ਤੇਹਿ ਬਨ੍ਧਿਤ੍ਵਾ ਕਡ੍ਢਨ੍ਤਿ. ਸੋ ਅਤ੍ਤਨੋ ਚਮ੍ਮਵਟ੍ਟੇ ਅਕ੍ਕਮਿਤ੍ਵਾ ਅਕ੍ਕਮਿਤ੍ਵਾ ਪਤਤਿ. ਚਿਰਕਵਾਸਿਕਨ੍ਤਿ ਚਿਰਕਵਾਸਿਕਕਮ੍ਮਕਾਰਣਂ. ਤਂ ਕਰੋਨ੍ਤਾ ਤਥੇਵ ਚਮ੍ਮਵਟ੍ਟੇ ਕਨ੍ਤਿਤ੍ਵਾ ਕਟਿਯਂ ਠਪੇਨ੍ਤਿ, ਕਟਿਤੋ ਪਟ੍ਠਾਯ ਕਨ੍ਤਿਤ੍ਵਾ ਗੋਪ੍ਫਕੇਸੁ ਠਪੇਨ੍ਤਿ, ਉਪਰਿਮੇਹਿ ਹੇਟ੍ਠਿਮਸਰੀਰਂ ਚਿਰਕਨਿਵਾਸਨਨਿਵਤ੍ਥਂ ਵਿਯ ਹੋਤਿ. ਏਣੇਯ੍ਯਕਨ੍ਤਿ ਏਣੇਯ੍ਯਕਕਮ੍ਮਕਾਰਣਂ. ਤਂ ਕਰੋਨ੍ਤਾ ਉਭੋਸੁ ਕਪ੍ਪਰੇਸੁ ਚ ਉਭੋਸੁ ਜਣ੍ਣੁਕੇਸੁ ਚ ਅਯਵਲਯਾਨਿ ਦਤ੍ਵਾ ਅਯਸੂਲਾਨਿ ਕੋਟ੍ਟੇਨ੍ਤਿ, ਸੋ ਚਤੂਹਿ ਅਯਸੂਲੇਹਿ ਭੂਮਿਯਂ ਪਤਿਟ੍ਠਹਤਿ. ਅਥ ਨਂ ਪਰਿਵਾਰੇਤ੍ਵਾ ਅਗ੍ਗਿਂ ਕਰੋਨ੍ਤਿ. ‘‘ਏਣੇਯ੍ਯਕੋ ਜੋਤਿਪਰਿਗ੍ਗਹੋ ਯਥਾ’’ਤਿ ਆਗਤਟ੍ਠਾਨੇਪਿ ਇਦਮੇਵ ਵੁਤ੍ਤਂ. ਤਂ ਸਨ੍ਧਿਤੋ ਸਨ੍ਧਿਤੋ ਸੂਲਾਨਿ ਅਪਨੇਤ੍ਵਾ ਚਤੂਹਿ ਅਟ੍ਠਿਕੋਟੀਹਿਯੇਵ ਠਪੇਨ੍ਤਿ. ਏਵਰੂਪਾ ਕਮ੍ਮਕਾਰਣਾ ਨਾਮ ਨਤ੍ਥਿ.

ਬਲ਼ਿਸਮਂਸਿਕਨ੍ਤਿ ਉਭਤੋਮੁਖੇਹਿ ਬਲ਼ਿਸੇਹਿ ਪਹਰਿਤ੍ਵਾ ਚਮ੍ਮਮਂਸਨ੍ਹਾਰੂਨਿ ਉਪ੍ਪਾਟੇਨ੍ਤਿ. ਕਹਾਪਣਿਕਨ੍ਤਿ ਸਕਲਸਰੀਰਂ ਤਿਣ੍ਹਾਹਿ ਵਾਸੀਹਿ ਕੋਟਿਤੋ ਪਟ੍ਠਾਯ ਕਹਾਪਣਮਤ੍ਤਂ ਕਹਾਪਣਮਤ੍ਤਂ ਪਾਤੇਨ੍ਤਾ ਕੋਟ੍ਟੇਨ੍ਤਿ. ਖਾਰਾਪਤਚ੍ਛਿਕਨ੍ਤਿ ਸਰੀਰਂ ਤਤ੍ਥ ਤਤ੍ਥ ਆਵੁਧੇਹਿ ਪਹਰਿਤ੍ਵਾ ਕੋਚ੍ਛੇਹਿ ਖਾਰਂ ਘਂਸੇਨ੍ਤਿ, ਚਮ੍ਮਮਂਸਨ੍ਹਾਰੂਨਿ ਪਗ੍ਘਰਿਤ੍ਵਾ ਪਸਵਨ੍ਤਿ, ਅਟ੍ਠਿਕਸਙ੍ਖਲਿਕਾਵ ਤਿਟ੍ਠਤਿ. ਪਲਿਘਪਰਿਵਤ੍ਤਿਕਨ੍ਤਿ ਏਕੇਨ ਪਸ੍ਸੇਨ ਨਿਪਜ੍ਜਾਪੇਤ੍ਵਾ ਕਣ੍ਣਚ੍ਛਿਦ੍ਦੇਨ ਅਯਸੂਲਂ ਕੋਟ੍ਟੇਤ੍ਵਾ ਪਥਵਿਯਾ ਏਕਾਬਦ੍ਧਂ ਕਰੋਨ੍ਤਿ. ਅਥ ਨਂ ਪਾਦੇ ਗਹੇਤ੍ਵਾ ਆਵਿਞ੍ਛਨ੍ਤਿ. ਪਲਾਲਪੀਠਕਨ੍ਤਿ ਛੇਕਾ ਕਾਰਣਿਕਾ ਛਵਿਚਮ੍ਮਂ ਅਚ੍ਛਿਨ੍ਦਿਤ੍ਵਾ ਨਿਸਦਪੋਤਕਾਹਿ ਅਟ੍ਠੀਨਿ ਛਿਨ੍ਦਿਤ੍ਵਾ ਕੇਸੇਸੁ ਗਹੇਤ੍ਵਾ ਉਕ੍ਖਿਪਨ੍ਤਿ, ਮਂਸਰਾਸਿਯੇਵ ਹੋਤਿ. ਅਥ ਨਂ ਕੇਸੇਹੇਵ ਪਰਿਯੋਨਨ੍ਧਿਤ੍ਵਾ ਗਣ੍ਹਨ੍ਤਿ, ਪਲਾਲਪੀਠਂ ਵਿਯ ਕਤ੍ਵਾ ਪਲਿਵੇਠੇਨ੍ਤਿ. ਸੁਨਖੇਹਿਪੀਤਿ ਕਤਿਪਯਾਨਿ ਦਿਵਸਾਨਿ ਆਹਾਰਂ ਅਦਤ੍ਵਾ ਛਾਤਸੁਨਖੇਹਿ ਖਾਦਾਪੇਨ੍ਤਿ. ਤੇ ਮੁਹੁਤ੍ਤੇਨ ਅਟ੍ਠਿਸਙ੍ਖਲਿਕਮੇਵ ਕਰੋਨ੍ਤਿ. ਏਵਮ੍ਪਿ ਕਿਸ੍ਸਤੀਤਿ ਏਵਮ੍ਪਿ ਵਿਘਾਤਂ ਪਾਪੁਣਾਤਿ. ਪਰਿਕਿਸ੍ਸਤੀਤਿ ਸਬ੍ਬਭਾਗੇਨ ਵਿਘਾਤਂ ਪਾਪੁਣਾਤਿ. ਪਰਿਕਿਲਿਸ੍ਸਤੀਤਿ ਉਪਤਾਪਂ ਪਾਪੁਣਾਤਿ.

ਪੁਨ ਅਞ੍ਞਂ ਕਾਰਣਂ ਦਸ੍ਸੇਨ੍ਤੋ ‘‘ਅਥ ਵਾ ਕਾਮਤਣ੍ਹਾਯ ਅਭਿਭੂਤੋ’’ਤਿਆਦਿਮਾਹ. ਤਤ੍ਥ ਕਾਮਤਣ੍ਹਾਯਾਤਿ ਪਞ੍ਚਕਾਮਗੁਣਿਕਲੋਭੇਨ. ਅਭਿਭੂਤੋਤਿ ਤੇਨ ਮਦ੍ਦਿਤੋ. ਪਰਿਯਾਦਿਨ੍ਨਚਿਤ੍ਤੋਤਿ ਕੁਸਲਾਚਾਰਂ ਖੇਪੇਤ੍ਵਾ ਗਹਿਤਚਿਤ੍ਤੋ. ਭੋਗੇ ਪਰਿਯੇਸਨ੍ਤੋਤਿ ਧਨਂ ਗਵੇਸਮਾਨੋ. ਨਾਵਾਯ ਮਹਾਸਮੁਦ੍ਦਂ ਪਕ੍ਖਨ੍ਦਤੀਤਿ ਤਰਣੀਸਙ੍ਖਾਤਾਯ ਨਾਵਾਯ ਮਹਨ੍ਤਂ ਲੋਣਸਾਗਰਂ ਪਵਿਸਤਿ. ਸੀਤਸ੍ਸ ਪੁਰਕ੍ਖਤੋਤਿ ਸੀਤਂ ਪੁਰਤੋ ਕਤ੍ਵਾ. ਉਣ੍ਹਸ੍ਸ ਪੁਰਕ੍ਖਤੋਤਿ ਉਣ੍ਹਂ ਪੁਰਤੋ ਕਤ੍ਵਾ. ਡਂਸਾਤਿ ਪਿਙ੍ਗਲਮਕ੍ਖਿਕਾ. ਮਕਸਾਤਿ ਮਕਸਾ ਏਵ. ਪੀਲ਼ਿਯਮਾਨੋਤਿ ਡਂਸਾਦਿਸਮ੍ਫਸ੍ਸੇਹਿ ਵਿਹੇਸਿਯਮਾਨੋ. ਖੁਪ੍ਪਿਪਾਸਾਯ ਮਿਯ੍ਯਮਾਨੋਤਿ ਖੁਦ੍ਦਾਪਿਪਾਸਾਯ ਮਰਮਾਨੋ. ਤਿਗੁਮ੍ਬਂ ਗਚ੍ਛਤੀਤਿਆਦੀਨਿ ਮੂਲਪਦਂ ਗਚ੍ਛਤੀਤਿਪਰਿਯੋਸਾਨਾਨਿ ਚਤੁਵੀਸਤਿ ਪਦਾਨਿ ਰਟ੍ਠਨਾਮੇਨ ਵੁਤ੍ਤਾਨਿ. ਮਰੁਕਨ੍ਤਾਰਂ ਗਚ੍ਛਤੀਤਿ ਵਾਲੁਕਕਨ੍ਤਾਰਂ ਤਾਰਕਸਞ੍ਞਾਯ ਗਚ੍ਛਤਿ. ਜਣ੍ਣੁਪਥਨ੍ਤਿ ਜਾਣੂਹਿ ਗਨ੍ਤਬ੍ਬਮਗ੍ਗਂ. ਅਜਪਥਨ੍ਤਿ ਅਜੇਹਿ ਗਨ੍ਤਬ੍ਬਮਗ੍ਗਂ. ਮੇਣ੍ਡਪਥੇਪਿ ਏਸੇਵ ਨਯੋ.

ਸਙ੍ਕੁਪਥਨ੍ਤਿ ਖਾਣੁਕੇ ਕੋਟ੍ਟੇਤ੍ਵਾ ਤੇਹਿ ਉਗ੍ਗਮਿਤਬ੍ਬਂ ਖਾਣੁਮਗ੍ਗਂ, ਤਂ ਗਚ੍ਛਨ੍ਤੋ ਪਬ੍ਬਤਪਾਦੇ ਠਤ੍ਵਾ ਅਯਸਿਙ੍ਘਾਟਕਂ ਯੋਤ੍ਤੇਨ ਬਨ੍ਧਿਤ੍ਵਾ ਉਦ੍ਧਂ ਖਿਪਿਤ੍ਵਾ ਪਬ੍ਬਤੇ ਲਗ੍ਗਾਪੇਤ੍ਵਾ ਯੋਤ੍ਤੇਨਾਰੁਯ੍ਹ ਵਜਿਰਗ੍ਗੇਨ ਲੋਹਦਣ੍ਡੇਨ ਪਬ੍ਬਤਂ ਵਿਜ੍ਝਿਤ੍ਵਾ ਖਾਣੁਕਂ ਕੋਟ੍ਟੇਤ੍ਵਾ ਤਤ੍ਥ ਠਤ੍ਵਾ ਸਿਙ੍ਘਾਟਕਂ ਆਕਡ੍ਢਿਤ੍ਵਾ ਪੁਨ ਉਪਰਿ ਲਗ੍ਗਾਪੇਤ੍ਵਾ ਤਤ੍ਥ ਠਿਤੋ ਚਮ੍ਮਯੋਤ੍ਤਂ ਓਲਮ੍ਬੇਤ੍ਵਾ ਤਂ ਆਦਾਯ ਓਤਰਿਤ੍ਵਾ ਹੇਟ੍ਠਿਮਖਾਣੁਕੇ ਬਨ੍ਧਿਤ੍ਵਾ ਵਾਮਹਤ੍ਥੇਨ ਯੋਤ੍ਤਂ ਗਹੇਤ੍ਵਾ ਦਕ੍ਖਿਣਹਤ੍ਥੇਨ ਮੁਗ੍ਗਰਂ ਆਦਾਯ ਯੋਤ੍ਤਂ ਪਹਰਿਤ੍ਵਾ ਖਾਣੁਕਂ ਨੀਹਰਿਤ੍ਵਾ ਪੁਨ ਅਭਿਰੁਹਤਿ. ਏਤੇਨੁਪਾਯੇਨ ਪਬ੍ਬਤਮਤ੍ਥਕਂ ਅਭਿਰੁਯ੍ਹ ਪਰਤੋ ਓਤਰਨ੍ਤੋ ਪੁਰਿਮਨਯੇਨੇਵ ਪਠਮਂ ਪਬ੍ਬਤਮਤ੍ਥਕੇ ਖਾਣੁਕਂ ਕੋਟ੍ਟੇਤ੍ਵਾ ਚਮ੍ਮਪਸਿਬ੍ਬਕੇ ਯੋਤ੍ਤਂ ਬਨ੍ਧਿਤ੍ਵਾ ਖਾਣੁਕੇ ਵੇਠੇਤ੍ਵਾ ਸਯਂ ਅਨ੍ਤੋਪਸਿਬ੍ਬਕੇ ਨਿਸੀਦਿਤ੍ਵਾ ਮਕ੍ਕਟਕਾਨਂ ਸੁਤ੍ਤਵਿਸ੍ਸਜ੍ਜਨਾਕਾਰੇਨ ਯੋਤ੍ਤਂ ਵਿਨਿਵੇਠੇਤ੍ਵਾ ਓਤਰਤਿ. ਤੇਨ ਵੁਤ੍ਤਂ – ‘‘ਖਾਣੁਕੇ ਕੋਟ੍ਟੇਤ੍ਵਾ ਤੇਹਿ ਉਗ੍ਗਮਿਤਬ੍ਬਂ ਖਾਣੁਮਗ੍ਗ’’ਨ੍ਤਿ. ਛਤ੍ਤਪਥਨ੍ਤਿ ਚਮ੍ਮਛਤ੍ਤੇਨ ਵਾਤਂ ਗਾਹਾਪੇਤ੍ਵਾ ਸਕੁਣੇਹਿ ਵਿਯ ਓਤਰਿਤਬ੍ਬਂ ਮਗ੍ਗਂ. ਵਂਸਪਥਨ੍ਤਿ ਵੇਣੁਗੁਮ੍ਬਛੇਦਨਸਤ੍ਥੇਨ ਛਿਨ੍ਦਿਤ੍ਵਾ ਰੁਕ੍ਖਂ ਫਰਸੁਨਾ ਕੋਟ੍ਟੇਤ੍ਵਾ ਮਗ੍ਗਂ ਕਰੋਨ੍ਤੋ ਵੇਲ਼ੁਵਨੇ ਨਿਸ੍ਸੇਣਿਂ ਕਤ੍ਵਾ ਵੇਲ਼ੁਗੁਮ੍ਬੇ ਆਰੁਯ੍ਹ ਵੇਲ਼ੁਂ ਛਿਨ੍ਦਿਤ੍ਵਾ ਅਪਰਸ੍ਸ ਵੇਲ਼ੁਗੁਮ੍ਬਸ੍ਸ ਉਪਰਿ ਪਾਤੇਤ੍ਵਾ ਵੇਲ਼ੁਗੁਮ੍ਬਮਤ੍ਥਕੇਨੇਵ ਗਨ੍ਤਬ੍ਬਂ ਮਗ੍ਗਂ ਸਨ੍ਧਾਯ ‘‘ਵਂਸਪਥਂ ਗਚ੍ਛਤੀ’’ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਗਵੇਸਨ੍ਤੋ ਨ ਵਿਨ੍ਦਤਿ, ਅਲਾਭਮੂਲਕਮ੍ਪਿ ਦੁਕ੍ਖਂ ਦੋਮਨਸ੍ਸਂ ਪਟਿਸਂਵੇਦੇਤੀਤਿ ਅਵਿਨ੍ਦਨਮੂਲਕਮ੍ਪਿ ਕਾਯਿਕਚੇਤਸਿਕਂ ਦੁਕ੍ਖਂ ਪਟਿਲਭਤਿ.

ਲਦ੍ਧਾਤਿ ਲਭਿਤ੍ਵਾ. ਆਰਕ੍ਖਮੂਲਕਨ੍ਤਿ ਰਕ੍ਖਣਮੂਲਕਮ੍ਪਿ. ਕਿਨ੍ਤਿ ਮੇ ਭੋਗੇਤਿ ਕੇਨ ਉਪਾਯੇਨ ਮਮ ਭੋਗੇ. ਨੇਵ ਰਾਜਾਨੋ ਹਰੇਯ੍ਯੁਂ…ਪੇ… ਨ ਅਪ੍ਪਿਯਾ ਦਾਯਾਦਾ ਹਰੇਯ੍ਯੁਨ੍ਤਿ. ਗੋਪਯਤੋਤਿ ਮਞ੍ਜੂਸਾਦੀਹਿ ਗੋਪਯਨ੍ਤਸ੍ਸ. ਵਿਪ੍ਪਲੁਜ੍ਜਨ੍ਤੀਤਿ ਵਿਨਸ੍ਸਨ੍ਤਿ.

੫੬. ਏਤਮਾਦੀਨਵਂ ਞਤ੍ਵਾ, ਮੁਨਿ ਪੁਬ੍ਬਾਪਰੇ ਇਧਾਤਿ ਏਤਂ ‘‘ਯਸੋ ਕਿਤ੍ਤਿ ਚ ਯਾ ਪੁਬ੍ਬੇ, ਹਾਯਤੇ ਵਾਪਿ ਤਸ੍ਸ ਸਾ’’ਤਿ ਇਤੋ ਪਭੁਤਿ ਵੁਤ੍ਤੇ ਪੁਬ੍ਬਾਪਰੇ ਇਧ ਇਮਸ੍ਮਿਂ ਸਾਸਨੇ ਪੁਬ੍ਬਤੋ ਅਪਰੇ ਸਮਣਭਾਵਤੋ ਵਿਬ੍ਭਨ੍ਤਕਭਾਵੇ ਆਦੀਨਵਂ ਮੁਨਿ ਞਤ੍ਵਾ.

ਦਲ਼੍ਹਂ ਕਰੇਯ੍ਯਾਤਿ ਨਿਦ੍ਦੇਸਪਦਸ੍ਸ ਉਦ੍ਦੇਸਪਦਂ. ਥਿਰਂ ਕਰੇਯ੍ਯਾਤਿ ਅਸਿਥਿਲਂ ਕਰੇਯ੍ਯ. ਦਲ਼੍ਹਂ ਸਮਾਦਾਨੋ ਅਸ੍ਸਾਤਿ ਥਿਰਪਟਿਞ੍ਞੋ ਭਵੇਯ੍ਯ. ਅਵਟ੍ਠਿਤਸਮਾਦਾਨੋਤਿ ਸਨ੍ਨਿਟ੍ਠਾਨਪਟਿਞ੍ਞੋ.

੫੭. ਏਤਂ ਅਰਿਯਾਨਮੁਤ੍ਤਮਨ੍ਤਿ ਯਦਿਦਂ ਵਿਵੇਕਚਰਿਯਾ, ਏਤਂ ਬੁਦ੍ਧਾਦੀਨਂ ਅਰਿਯਾਨਂ ਉਤ੍ਤਮਂ. ਤਸ੍ਮਾ ਵਿਵੇਕਂਯੇਵ ਸਿਕ੍ਖੇਥਾਤਿ ਅਧਿਪ੍ਪਾਯੋ. ਨ ਤੇਨ ਸੇਟ੍ਠੋ ਮਞ੍ਞੇਥਾਤਿ ਤੇਨ ਚ ਵਿਵੇਕੇਨ ਅਤ੍ਤਾਨਂ ‘‘ਸੇਟ੍ਠੋ ਅਹ’’ਨ੍ਤਿ ਨ ਮਞ੍ਞੇਯ੍ਯ, ਤੇਨ ਮਾਨਥਦ੍ਧੋ ਨ ਭਵੇਯ੍ਯਾਤਿ ਵੁਤ੍ਤਂ ਹੋਤਿ.

ਉਨ੍ਨਤਿਨ੍ਤਿ ਉਸ੍ਸਾਪਨਂ. ਉਨ੍ਨਮਨ੍ਤਿ ਉਗ੍ਗਨ੍ਤ੍ਵਾ ਪਟ੍ਠਪਨਂ. ਮਾਨਨ੍ਤਿ ਅਹਂਕਾਰਂ. ਥਾਮਨ੍ਤਿ ਬਲਕ੍ਕਾਰਂ. ਥਮ੍ਭਨ੍ਤਿ ਥਦ੍ਧਕਰਣਂ. ਥਦ੍ਧੋਤਿ ਅਮਦ੍ਦਵੋ. ਪਤ੍ਥਦ੍ਧੋਤਿ ਵਿਸੇਸੇਨ ਅਮਦ੍ਦਵੋ. ਪਗ੍ਗਹਿਤਸਿਰੋਤਿ ਉਟ੍ਠਿਤਸੀਸੋ. ਸਾਮਨ੍ਤਾਤਿ ਨ ਆਰਕਾ. ਆਸਨ੍ਨੇਤਿ ਨ ਦੂਰੇ. ਅਵਿਦੂਰੇਤਿ ਸਮੀਪੇ. ਉਪਕਟ੍ਠੇਤਿ ਸਨ੍ਤਿਕੇ.

੫੮. ਰਿਤ੍ਤਸ੍ਸਾਤਿ ਵਿਵਿਤ੍ਤਸ੍ਸ, ਕਾਯਦੁਚ੍ਚਰਿਤਾਦੀਹਿ ਵਿਰਹਿਤਸ੍ਸ. ਓਘਤਿਣ੍ਣਸ੍ਸ ਪਿਹਯਨ੍ਤਿ, ਕਾਮੇਸੁ ਗਧਿਤਾ ਪਜਾਤਿ ਵਤ੍ਥੁਕਾਮੇਸੁ ਲਗ੍ਗਾ ਸਤ੍ਤਾ ਤਸ੍ਸ ਚਤੁਰੋਘਤਿਣ੍ਣਸ੍ਸ ਪਿਹਯਨ੍ਤਿ ਇਣਾਯਿਕਾ ਵਿਯ ਆਣਣ੍ਯਸ੍ਸਾਤਿ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ.

ਰਿਤ੍ਤਸ੍ਸਾਤਿ ਸਬ੍ਬਕਿਲੇਸੇਹਿ ਤੁਚ੍ਛਸ੍ਸ. ਵਿਵਿਤ੍ਤਸ੍ਸਾਤਿ ਸੁਞ੍ਞਸ੍ਸ. ਪਵਿਵਿਤ੍ਤਸ੍ਸਾਤਿ ਏਕਕਸ੍ਸ. ਇਦਾਨਿ ਯੇਹਿ ਰਿਤ੍ਤੋ ਹੋਤਿ, ਤੇ ਦਸ੍ਸੇਨ੍ਤੋ ‘‘ਕਾਯਦੁਚ੍ਚਰਿਤੇਨ ਰਿਤ੍ਤਸ੍ਸਾ’’ਤਿਆਦਿਮਾਹ. ਤਤ੍ਥ ਕਿਲੇਸਪਟਿਪਾਟਿਯਾ ਮਗ੍ਗਪਟਿਪਾਟਿਯਾਤਿ ਦ੍ਵਿਧਾ ਰਿਤ੍ਤਤਾ ਵੇਦਿਤਬ੍ਬਾ. ਕਿਲੇਸਪਟਿਪਾਟਿਯਾ ਤਾਵ ਰਾਗੋ ਮੋਹੋ ਥਮ੍ਭੋ ਸਾਰਮ੍ਭੋ ਮਾਨੋ ਮਦੋਤਿ, ਇਮੇਹਿ ਛਹਿ ਕਿਲੇਸੇਹਿ ਅਰਹਤ੍ਤਮਗ੍ਗੇਨ ਰਿਤ੍ਤੋ ਹੋਤਿ; ਦੋਸੋ ਕੋਧੋ ਉਪਨਾਹੋ ਪਮਾਦੋਤਿ, ਇਮੇਹਿ ਚਤੂਹਿ ਕਿਲੇਸੇਹਿ ਅਨਾਗਾਮਿਮਗ੍ਗੇਨ ਰਿਤ੍ਤੋ ਹੋਤਿ; ਅਤਿਮਾਨੋ ਮਕ੍ਖੋ ਪਲ਼ਾਸੋ ਇਸ੍ਸਾ ਮਚ੍ਛਰਿਯਂ ਮਾਯਾ ਸਾਠੇਯ੍ਯਨ੍ਤਿ, ਇਮੇਹਿ ਸਤ੍ਤਹਿ ਸੋਤਾਪਤ੍ਤਿਮਗ੍ਗੇਨ ਰਿਤ੍ਤੋ ਹੋਤਿ.

ਮਗ੍ਗਪਟਿਪਾਟਿਯਾ ਪਨ ਸੋਤਾਪਤ੍ਤਿਮਗ੍ਗੇਨ ਅਤਿਮਾਨੋ ਮਕ੍ਖੋ ਪਲ਼ਾਸੋ ਇਸ੍ਸਾ ਮਚ੍ਛਰਿਯਂ ਮਾਯਾ ਸਾਠੇਯ੍ਯਨ੍ਤਿ; ਇਮੇਹਿ ਸਤ੍ਤਹਿ ਰਿਤ੍ਤੋ ਹੋਤਿ, ਅਨਾਗਾਮਿਮਗ੍ਗੇਨ ਦੋਸੋ ਕੋਧੋ ਉਪਨਾਹੋ ਪਮਾਦੋਤਿ, ਇਮੇਹਿ ਚਤੂਹਿ ਰਿਤ੍ਤੋ ਹੋਤਿ; ਅਰਹਤ੍ਤਮਗ੍ਗੇਨ ਰਾਗੋ ਮੋਹੋ ਥਮ੍ਭੋ ਸਾਰਮ੍ਭੋ ਮਾਨੋ ਮਦੋਤਿ, ਇਮੇਹਿ ਛਹਿ ਰਿਤ੍ਤੋ ਹੋਤਿ. ਤੀਣਿ ਦੁਚ੍ਚਰਿਤਾਨਿ ਸਬ੍ਬਕਿਲੇਸੇਹੀਤਿਆਦਿਨਾ ਨਯੇਨ ਅਵਸੇਸਾਪਿ ਯਥਾਯੋਗਂ ਯੋਜੇਤਬ੍ਬਾ.

ਵਤ੍ਥੁਕਾਮੇ ਪਰਿਜਾਨਿਤ੍ਵਾਤਿ ਤੇਭੂਮਕੇ ਵਤ੍ਥੁਕਾਮੇ ਞਾਤਤੀਰਣਪਰਿਞ੍ਞਾਹਿ ਸਮਾਪਨਵਸੇਨ ਜਾਨਿਤ੍ਵਾ. ਕਿਲੇਸਕਾਮੇ ਪਹਾਯਾਤਿ ਛਨ੍ਦਾਦਯੋ ਕਿਲੇਸਕਾਮੇ ਪਹਾਨਪਰਿਞ੍ਞਾਯ ਜਹਿਤ੍ਵਾ. ਬ੍ਯਨ੍ਤਿਂ ਕਰਿਤ੍ਵਾਤਿ ਵਿਗਤਨ੍ਤਂ ਵਿਗਤਕੋਟਿਂ ਕਰਿਤ੍ਵਾ.

ਕਾਮੋਘਂ ਤਿਣ੍ਣਸ੍ਸਾਤਿ ਅਨਾਗਾਮਿਮਗ੍ਗੇਨ ਅਵਸਾਨਸਙ੍ਖਾਤਂ ਕਾਮੋਘਂ ਤਰਿਤ੍ਵਾ ਠਿਤਸ੍ਸ. ਭਵੋਘਨ੍ਤਿ ਅਰਹਤ੍ਤਮਗ੍ਗੇਨ. ਦਿਟ੍ਠੋਘਨ੍ਤਿ ਸੋਤਾਪਤ੍ਤਿਮਗ੍ਗੇਨ. ਅਵਿਜ੍ਜੋਘਨ੍ਤਿ ਅਰਹਤ੍ਤਮਗ੍ਗੇਨ. ਸਬ੍ਬਂ ਸਂਸਾਰਪਥਨ੍ਤਿ ਸਬ੍ਬਖਨ੍ਧਧਾਤੁਆਯਤਨਪਟਿਪਾਟਿਸਙ੍ਖਾਤਂ ਪਥਂ ਅਰਹਤ੍ਤਮਗ੍ਗੇਨੇਵ ਤਰਿਤ੍ਵਾ ਠਿਤਸ੍ਸ. ਸੋਤਾਪਤ੍ਤਿਮਗ੍ਗੇਨ ਉਤ੍ਤਿਣ੍ਣਸ੍ਸ. ਸਕਦਾਗਾਮਿਮਗ੍ਗੇਨ ਨਿਤ੍ਤਿਣ੍ਣਸ੍ਸ. ਅਨਾਗਾਮਿਮਗ੍ਗੇਨ ਕਾਮਧਾਤੁਂ ਅਤਿਕ੍ਕਨ੍ਤਸ੍ਸ. ਅਰਹਤ੍ਤਮਗ੍ਗੇਨ ਸਬ੍ਬਭਵਂ ਸਮਤਿਕ੍ਕਨ੍ਤਸ੍ਸ. ਫਲਸਮਾਪਤ੍ਤਿਵਸੇਨ ਵੀਤਿਵਤ੍ਤਸ੍ਸ. ਪਾਰਂਗਤਸ੍ਸਾਤਿਆਦੀਨਿ ਨਿਬ੍ਬਾਨਵਸੇਨ ਵੁਤ੍ਤਾਨਿ. ਯਥਾ ਇਣਾਯਿਕਾ ਆਣਣ੍ਯਨ੍ਤਿ ਪਵਡ੍ਢਕਇਣਂ ਆਦਾਯ ਵਿਚਰਨ੍ਤਾ ਆਣਣ੍ਯਂ. ਪਤ੍ਥੇਨ੍ਤੀਤਿ ਪਤ੍ਥਨਂ ਉਪ੍ਪਾਦੇਨ੍ਤਿ. ਆਬਾਧਿਕਾ ਆਰੋਗ੍ਯਨ੍ਤਿ ਪਿਤ੍ਤਾਦਿਰੋਗਾਤੁਰੋ ਭੇਸਜ੍ਜਕਿਰਿਯਾਯ ਤਂਰੋਗਵੂਪਸਮਨਤ੍ਥਂ ਆਰੋਗ੍ਯਂ. ਯਥਾ ਬਨ੍ਧਨਬਦ੍ਧਾਤਿ ਨਕ੍ਖਤ੍ਤਦਿਵਸੇ ਬਨ੍ਧਨਾਗਾਰੇ ਬਦ੍ਧਪੁਰਿਸਾ. ਯਥਾ ਦਾਸਾ ਭੁਜਿਸ੍ਸਨ੍ਤਿ ਯਸ੍ਮਾ ਭੁਜਿਸ੍ਸਾ ਪੁਰਿਸਾ ਯਂ ਇਚ੍ਛਨ੍ਤਿ, ਤਂ ਕਰੋਨ੍ਤਿ, ਨ ਨਂ ਕੋਚਿ ਬਲਕ੍ਕਾਰੇਨ ਤਤੋ ਨਿਵਤ੍ਤੇਤਿ, ਤਸ੍ਮਾ ਦਾਸਾ ਭੁਜਿਸ੍ਸਭਾਵਂ ਪਤ੍ਥੇਨ੍ਤਿ. ਯਥਾ ਕਨ੍ਤਾਰਦ੍ਧਾਨਪਕ੍ਖਨ੍ਦਾਤਿ ਯਸ੍ਮਾ ਬਲਵਨ੍ਤੋ ਪੁਰਿਸਾ ਹਤ੍ਥਭਾਰਂ ਗਹੇਤ੍ਵਾ ਸਜ੍ਜਾਵੁਧਾ ਸਪਰਿਵਾਰਾ ਕਨ੍ਤਾਰਂ ਪਟਿਪਜ੍ਜਨ੍ਤਿ, ਤੇ ਚੋਰਾ ਦੂਰਤੋਵ ਦਿਸ੍ਵਾ ਪਲਾਯਨ੍ਤਿ. ਤੇ ਸੋਤ੍ਥਿਨਾ ਕਨ੍ਤਾਰਂ ਨਿਤ੍ਥਰਿਤ੍ਵਾ ਖੇਮਨ੍ਤਂ ਪਤ੍ਵਾ ਹਟ੍ਠਤੁਟ੍ਠਾ ਹੋਨ੍ਤਿ. ਤਸ੍ਮਾ ਕਨ੍ਤਾਰਪਕ੍ਖਨ੍ਦਾ ਖੇਮਨ੍ਤਭੂਮਿਂ ਪਤ੍ਥੇਨ੍ਤਿ. ਦੇਸਨਾਪਰਿਯੋਸਾਨੇ ਤਿਸ੍ਸੋ ਸੋਤਾਪਤ੍ਤਿਫਲਂ ਪਤ੍ਵਾ ਪਚ੍ਛਾ ਪਬ੍ਬਜਿਤ੍ਵਾ ਅਰਹਤ੍ਤਂ ਸਚ੍ਛਾਕਾਸਿ.

ਸਦ੍ਧਮ੍ਮਪਜ੍ਜੋਤਿਕਾਯ ਮਹਾਨਿਦ੍ਦੇਸਟ੍ਠਕਥਾਯ

ਤਿਸ੍ਸਮੇਤ੍ਤੇਯ੍ਯਸੁਤ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.