੬. ਜਰਾਸੁਤ੍ਤਨਿਦ੍ਦੇਸਵਣ੍ਣਨਾ

੩੯. ਛਟ੍ਠੇ ਜਰਾਸੁਤ੍ਤੇ ਅਪ੍ਪਂ ਵਤ ਜੀਵਿਤਂ ਇਦਨ੍ਤਿ ਇਦਂ ਵਤ ਮਨੁਸ੍ਸਾਨਂ ਜੀਵਿਤਂ ਅਪ੍ਪਕਂ ਪਰਿਤ੍ਤਂ ਠਿਤਿਪਰਿਤ੍ਤਤਾਯ ਸਰਸਪਰਿਤ੍ਤਤਾਯਾਤਿ ਗੁਹਟ੍ਠਕਸੁਤ੍ਤੇਪਿ ਵੁਤ੍ਤਨਯਮੇਤਂ. ਓਰਂ ਵਸ੍ਸਸਤਾਪਿ ਮਿਯ੍ਯਤੀਤਿ ਵਸ੍ਸਸਤਾ ਓਰਂ ਕਲਲਾਦਿਕਾਲੇਪਿ ਮਿਯ੍ਯਤਿ. ਅਤਿਚ੍ਚਾਤਿ ਵਸ੍ਸਸਤਂ ਅਤਿਕ੍ਕਮਿਤ੍ਵਾ. ਜਰਸਾਪਿ ਮਿਯ੍ਯਤੀਤਿ ਜਰਾਯ ਮਿਯ੍ਯਤਿ. ਇਤੋ ਪਰਂ ਗੁਹਟ੍ਠਕਸੁਤ੍ਤਵਣ੍ਣਨਾਯ ਵੁਤ੍ਤਨਯੇਨੇਵ ਗਹੇਤਬ੍ਬਂ.

ਅਪ੍ਪਨ੍ਤਿ ਮਨ੍ਦਂ. ਗਮਨੀਯੋ ਸਮ੍ਪਰਾਯੋਤਿ ਪਰਲੋਕੋ ਗਨ੍ਤਬ੍ਬੋ. ਕਲਲਕਾਲੇਪੀਤਿ ਏਤ੍ਥ ਕਲਲਕਾਲਂ ਨਾਮ ਪਟਿਸਨ੍ਧਿਕ੍ਖਣੇ ਤੀਹਿ ਜਾਤਿਉਣ੍ਣਂਸੂਹਿ ਕਤਸੁਤ੍ਤਗ੍ਗੇ ਠਿਤਤੇਲਬਿਨ੍ਦੁਪ੍ਪਮਾਣਂ ਅਚ੍ਛਂ ਵਿਪ੍ਪਸਨ੍ਨਕਲਲਂ ਹੋਤਿ. ਯਂ ਸਨ੍ਧਾਯ ਵੁਤ੍ਤਂ –

‘‘ਤਿਲਤੇਲਸ੍ਸ ਯਥਾ ਬਿਨ੍ਦੁ, ਸਪ੍ਪਿਮਣ੍ਡੋ ਅਨਾਵਿਲੋ;

ਏਵਂ ਵਣ੍ਣਪ੍ਪਟਿਭਾਗਂ, ਕਲਲਂ ਸਮ੍ਪਵੁਚ੍ਚਤੀ’’ਤਿ. (ਸਂ. ਨਿ. ਅਟ੍ਠ. ੧.੧.੨੩੫; ਵਿਭ. ਅਟ੍ਠ. ੨੬ ਪਕਿਣ੍ਣਕਕਥਾ);

ਤਸ੍ਮਿਂ ਕਲਲਕਾਲੇਪਿ. ਚਵਤੀਤਿ ਜੀਵਿਤਂ ਗਲ਼ਤਿ. ਮਰਤੀਤਿ ਜੀਵਿਤਵਿਯੋਗਂ ਆਪਜ੍ਜਤਿ. ਅਨ੍ਤਰਧਾਯਤੀਤਿ ਅਦਸ੍ਸਨਂ ਪਾਪੁਣਾਤਿ. ਵਿਪ੍ਪਲੁਜ੍ਜਤੀਤਿ ਛਿਜ੍ਜਤਿ. ‘‘ਅਣ੍ਡਜਯੋਨਿਯਾ ਚਵਤਿ. ਜਲਾਬੁਜਯੋਨਿਯਾ ਮਰਤਿ. ਸਂਸੇਦਜਯੋਨਿਯਾ ਅਨ੍ਤਰਧਾਯਤਿ. ਓਪਪਾਤਿਕਯੋਨਿਯਾ ਵਿਪ੍ਪਲੁਜ੍ਜਤੀ’’ਤਿ ਏਵਮੇਕੇ ਵਣ੍ਣਯਨ੍ਤਿ. ਅਬ੍ਬੁਦਕਾਲੇਪੀਤਿ ਅਬ੍ਬੁਦਂ ਨਾਮ ਕਲਲਤੋ ਸਤ੍ਤਾਹਚ੍ਚਯੇਨ ਮਂਸਧੋਵਨਉਦਕਵਣ੍ਣਂ ਹੋਤਿ, ਕਲਲਨ੍ਤਿ ਨਾਮਂ ਅਨ੍ਤਰਧਾਯਤਿ. ਵੁਤ੍ਤਮ੍ਪਿ ਚੇਤਂ –

‘‘ਸਤ੍ਤਾਹਂ ਕਲਲਂ ਹੋਤਿ, ਪਰਿਪਕ੍ਕਂ ਸਮੂਹਤਂ;

ਵਿਵਟ੍ਟਮਾਨਂ ਤਬ੍ਭਾਵਂ, ਅਬ੍ਬੁਦਂ ਨਾਮ ਜਾਯਤੀ’’ਤਿ. (ਸਂ. ਨਿ. ਅਟ੍ਠ. ੧.੧.੨੩੫);

ਤਸ੍ਮਿਂ ਅਬ੍ਬੁਦਕਾਲੇਪਿ. ਪੇਸਿਕਾਲੇਪੀਤਿ ਤਸ੍ਮਾਪਿ ਅਬ੍ਬੁਦਾ ਸਤ੍ਤਾਹਚ੍ਚਯੇਨ ਵਿਲੀਨਤਿਪੁਸਦਿਸਾ ਪੇਸਿ ਨਾਮ ਸਞ੍ਜਾਯਤਿ. ਸਾ ਮਰਿਚਫਾਣਿਤੇਨ ਦੀਪੇਤਬ੍ਬਾ. ਗਾਮਦਾਰਿਕਾ ਹਿ ਸੁਪਕ੍ਕਾਨਿ ਮਰਿਚਾਨਿ ਗਹੇਤ੍ਵਾ ਸਾਟਕਨ੍ਤੇ ਭਣ੍ਡਿਕਂ ਕਤ੍ਵਾ ਪੀਲ਼ੇਤ੍ਵਾ ਮਣ੍ਡਂ ਆਦਾਯ ਕਪਾਲੇ ਪਕ੍ਖਿਪਿਤ੍ਵਾ ਆਤਪੇ ਠਪੇਨ੍ਤਿ, ਤਂ ਸੁਕ੍ਖਮਾਨਂ ਸਬ੍ਬਭਾਗੇਹਿ ਮੁਚ੍ਚਤਿ. ਏਵਰੂਪਾ ਪੇਸਿ ਹੋਤਿ, ਅਬ੍ਬੁਦਨ੍ਤਿ ਨਾਮਂ ਅਨ੍ਤਰਧਾਯਤਿ. ਵੁਤ੍ਤਮ੍ਪਿ ਚੇਤਂ –

‘‘ਸਤ੍ਤਾਹਂ ਅਬ੍ਬੁਦਂ ਹੋਤਿ, ਪਰਿਪਕ੍ਕਂ ਸਮੂਹਤਂ;

ਵਿਵਟ੍ਟਮਾਨਂ ਤਬ੍ਭਾਵਂ, ਪੇਸਿ ਨਾਮ ਪਜਾਯਤੀ’’ਤਿ. (ਸਂ. ਨਿ. ਅਟ੍ਠ. ੧.੧.੨੩੫);

ਤਸ੍ਮਿਂ ਪੇਸਿਕਾਲੇਪਿ. ਘਨਕਾਲੇਪੀਤਿ ਤਤੋਪਿ ਪੇਸਿਤੋ ਸਤ੍ਤਾਹਚ੍ਚਯੇਨ ਕੁਕ੍ਕੁਟਣ੍ਡਸਣ੍ਠਾਨੋ ਘਨੋ ਨਾਮ ਮਂਸਪਿਣ੍ਡੋ ਨਿਬ੍ਬਤ੍ਤਤਿ, ਪੇਸੀਤਿ ਨਾਮਂ ਅਨ੍ਤਰਧਾਯਤਿ. ਵੁਤ੍ਤਮ੍ਪਿ ਚੇਤਂ –

‘‘ਸਤ੍ਤਾਹਂ ਪੇਸਿ ਭਵਤਿ, ਪਰਿਪਕ੍ਕਂ ਸਮੂਹਤਂ;

ਵਿਵਟ੍ਟਮਾਨਂ ਤਬ੍ਭਾਵਂ, ਘਨੋਤਿ ਨਾਮ ਜਾਯਤਿ.

‘‘ਯਥਾ ਕੁਕ੍ਕੁਟਿਯਾ ਅਣ੍ਡਂ, ਸਮਨ੍ਤਾ ਪਰਿਮਣ੍ਡਲਂ;

ਏਵਂ ਘਨਸ੍ਸ ਸਣ੍ਠਾਨਂ, ਨਿਬ੍ਬਤ੍ਤਂ ਕਮ੍ਮਪਚ੍ਚਯਾ’’ਤਿ. (ਸਂ. ਨਿ. ਅਟ੍ਠ. ੧.੧.੨੩੫);

ਤਸ੍ਮਿਂ ਘਨਕਾਲੇਪਿ. ਪਸਾਖਕਾਲੇਪੀਤਿ ਪਞ੍ਚਮੇ ਸਤ੍ਤਾਹੇ ਦ੍ਵਿਨ੍ਨਂ ਦ੍ਵਿਨ੍ਨਂ ਹਤ੍ਥਪਾਦਾਨਂ ਸੀਸਸ੍ਸ ਚਤ੍ਥਾਯ ਪਞ੍ਚ ਪੀਲ਼ਕਾ ਜਾਯਨ੍ਤਿ, ਯਂ ਸਨ੍ਧਾਯ ਵੁਤ੍ਤਂ – ‘‘ਪਞ੍ਚਮੇ, ਭਿਕ੍ਖਵੇ, ਸਤ੍ਤਾਹੇ ਪਞ੍ਚ ਪੀਲ਼ਕਾ ਸਣ੍ਠਹਨ੍ਤਿ ਕਮ੍ਮਤੋ’’ਤਿ. ਤਸ੍ਮਿਂ ਪਸਾਖਕਾਲੇਪਿ. ਤਤੋ ਪਰਂ ਛਟ੍ਠਸਤ੍ਤਮਾਦੀਨਿ ਸਤ੍ਤਾਹਾਨਿ ਅਤਿਕ੍ਕਮ੍ਮ ਦੇਸਨਂ ਸਙ੍ਖਿਪਿਤ੍ਵਾ ਦ੍ਵਾਚਤ੍ਤਾਲੀਸਸਤ੍ਤਾਹੇ ਪਰਿਣਤਕਾਲੇ ਕੇਸਲੋਮਨਖਾਦੀਨਂ ਉਪ੍ਪਤ੍ਤਿਕਾਲਞ੍ਚ. ਤਸ੍ਸ ਚ ਨਾਭਿਤੋ ਉਟ੍ਠਿਤੋ ਨਾਲ਼ੋ ਮਾਤੁ ਉਦਰਪਟਲੇਨ ਏਕਾਬਦ੍ਧੋ ਹੋਤਿ, ਸੋ ਉਪ੍ਪਲਦਣ੍ਡਕੋ ਵਿਯ ਛਿਦ੍ਦੋ, ਤੇਨ ਆਹਾਰਰਸੋ ਸਂਸਰਿਤ੍ਵਾ ਆਹਾਰਸਮੁਟ੍ਠਾਨਰੂਪਂ ਸਮੁਟ੍ਠਾਪੇਤਿ. ਏਵਂ ਸੋ ਦਸਮਾਸੇ ਯਾਪੇਤਿ, ਤਂ ਸਬ੍ਬਂ ਅਵਤ੍ਵਾ ‘‘ਸੂਤਿਘਰੇ’’ਤਿ ਆਹ. ਯਂ ਸਨ੍ਧਾਯ ਵੁਤ੍ਤਂ –

‘‘ਕੇਸਾ ਲੋਮਾ ਨਖਾਨਿ ਚ’’;

‘‘ਯਞ੍ਚਸ੍ਸ ਭੁਞ੍ਜਤੀ ਮਾਤਾ, ਅਨ੍ਨਂ ਪਾਨਞ੍ਚ ਭੋਜਨਂ;

ਤੇਨ ਸੋ ਤਤ੍ਥ ਯਾਪੇਤਿ, ਮਾਤੁਕੁਚ੍ਛਿਗਤੋ ਨਰੋ’’ਤਿ. (ਸਂ. ਨਿ. ੧.੨੩੫; ਕਥਾ. ੬੯੨);

ਤਤ੍ਥ ਸੂਤਿਘਰੇਤਿ ਸੂਤਿਕਘਰੇ, ਵਿਜਾਯਨਘਰੇਤਿ ਅਤ੍ਥੋ. ‘‘ਸੂਤਿਕਾਘਰੇ’’ਤਿ ਵਾ ਪਾਠੋ, ਸੂਤਿਕਾਯਾਤਿ ਪਦਚ੍ਛੇਦੋ. ਅਦ੍ਧਮਾਸਿਕੋਪੀਤਿ ਜਾਤਦਿਵਸਤੋ ਪਟ੍ਠਾਯ ਅਦ੍ਧਮਾਸੋ ਏਤਸ੍ਸ ਅਤ੍ਥੀਤਿ ਅਦ੍ਧਮਾਸਿਕੋ. ਦ੍ਵੇਮਾਸਿਕਾਦੀਸੁਪਿ ਏਸੇਵ ਨਯੋ. ਜਾਤਦਿਵਸਤੋ ਪਟ੍ਠਾਯ ਏਕਂ ਸਂਵਚ੍ਛਰਂ ਏਤਸ੍ਸ ਅਤ੍ਥੀਤਿ ਸਂਵਚ੍ਛਰਿਕੋ. ਉਪਰਿ ਦ੍ਵੇਵਸ੍ਸਿਕਾਦੀਸੁਪਿ ਏਸੇਵ ਨਯੋ.

ਯਦਾ ਜਿਣ੍ਣੋ ਹੋਤੀਤਿ ਯਸ੍ਮਿਂ ਕਾਲੇ ਜਰਾਜਿਣ੍ਣੋ ਭਵਤਿ ਜਜ੍ਜਰੀਭੂਤੋ. ਵੁਦ੍ਧੋਤਿ ਵਯੋਵੁਦ੍ਧੋ. ਮਹਲ੍ਲਕੋਤਿ ਜਾਤਿਮਹਲ੍ਲਕੋ. ਅਦ੍ਧਗਤੋਤਿ ਤਯੋ ਅਦ੍ਧੇ ਅਤਿਕ੍ਕਨ੍ਤੋ. ਵਯੋਅਨੁਪ੍ਪਤ੍ਤੋਤਿ ਤਤਿਯਂ ਵਯਂ ਅਨੁਪ੍ਪਤ੍ਤੋ. ਖਣ੍ਡਦਨ੍ਤੋਤਿ ਅਨ੍ਤਰਨ੍ਤਰਾ ਪਤਿਤਾ ਦਨ੍ਤਾ ਫਾਲਿਤਾ ਚ ਜਰਾਨੁਭਾਵੇਨ ਖਣ੍ਡਾ ਦਨ੍ਤਾ ਜਾਤਾ ਅਸ੍ਸਾਤਿ ਖਣ੍ਡਦਨ੍ਤੋ. ਪਲਿਤਕੇਸੋਤਿ ਪਣ੍ਡਰਕੇਸੋ. ਵਿਲੂਨਨ੍ਤਿ ਲੁਞ੍ਚਿਤ੍ਵਾ ਗਹਿਤਕੇਸਾ ਵਿਯ ਖਲ੍ਲਾਟਸੀਸੋ. ਖਲਿਤਸਿਰੋਤਿ ਮਹਾਖਲ੍ਲਾਟਸੀਸੋ. ਵਲਿਨਨ੍ਤਿ ਸਞ੍ਜਾਤਵਲਿ. ਤਿਲਕਾਹਤਗਤ੍ਤੋਤਿ ਸੇਤਤਿਲਕਕਾਲ਼ਤਿਲਕੇਹਿ ਵਿਕਿਣ੍ਣਸਰੀਰੋ. ਭੋਗ੍ਗੋਤਿ ਭਗ੍ਗੋ, ਇਮਿਨਾਪਿਸ੍ਸ ਵਙ੍ਕਭਾਵਂ ਦੀਪੇਤਿ. ਦਣ੍ਡਪਰਾਯਣੋਤਿ ਦਣ੍ਡਪਟਿਸ੍ਸਰਣੋ ਦਣ੍ਡਦੁਤਿਯੋ. ਸੋ ਜਰਾਯਪੀਤਿ ਸੋ ਪੁਗ੍ਗਲੋ ਜਰਾਯਪਿ ਅਭਿਭੂਤੋ ਮਰਤਿ. ਨਤ੍ਥਿ ਮਰਣਮ੍ਹਾ ਮੋਕ੍ਖੋਤਿ ਮਰਣਤੋ ਮੁਞ੍ਚਨੁਪਾਯੋ ਨਤ੍ਥਿ ਨੁਪਲਬ੍ਭਤਿ.

ਫਲਾਨਮਿਵ ਪਕ੍ਕਾਨਂ, ਪਾਤੋ ਪਤਨਤੋ ਭਯਨ੍ਤਿ ਪਰਿਪਾਕਗਤਾਨਂ ਸਿਥਿਲਵਣ੍ਟਾਨਂ ਪਨਸਫਲਾਦਿਪਕ੍ਕਾਨਂ ਪਚ੍ਚੂਸਕਾਲੇ ਅਵਸ੍ਸਂ ਪਤਿਸ੍ਸਨ੍ਤੀਤਿ ਫਲਸਾਮਿਕਾਨਂ ਭਾਯਮਾਨਾਨਂ ਵਿਯ. ਏਵਂ ਜਾਤਾਨ ਮਚ੍ਚਾਨਂ, ਨਿਚ੍ਚਂ ਮਰਣਤੋ ਭਯਨ੍ਤਿ ਏਵਮੇਵ ਉਪ੍ਪਨ੍ਨਾਨਂ ਸਤ੍ਤਾਨਂ ਮਚ੍ਚੁਸਙ੍ਖਾਤਮਰਣਤੋ ਸਤਤਂ ਕਾਲਂ ਭਯਂ.

ਯਥਾਪਿ ਕੁਮ੍ਭਕਾਰਸ੍ਸਾਤਿ ਯਥਾ ਨਾਮ ਮਤ੍ਤਿਕਾਭਾਜਨਂ ਕਰੋਨ੍ਤਸ੍ਸ. ਕਤਂ ਮਤ੍ਤਿਕਭਾਜਨਨ੍ਤਿ (ਸੁ. ਨਿ. ੫੮੨) ਤੇਨ ਨਿਟ੍ਠਾਪਿਤਭਾਜਨਂ. ਸਬ੍ਬਂ ਭੇਦਨਪਰਿਯਨ੍ਤਨ੍ਤਿ ਪਕ੍ਕਾਪਕ੍ਕਂ ਸਬ੍ਬਂ ਭੇਦਨਂ ਭਿਜ੍ਜਪਰਿਯਨ੍ਤਂ ਅਵਸਾਨਂ ਅਸ੍ਸਾਤਿ ਭੇਦਨਪਰਿਯਨ੍ਤਂ. ਏਵਂ ਮਚ੍ਚਾਨ ਜੀਵਿਤਨ੍ਤਿ ਏਵਮੇਵ ਸਤ੍ਤਾਨਂ ਆਯੁਸਙ੍ਖਾਰਂ.

ਦਹਰਾ ਚ ਮਹਨ੍ਤਾ ਚਾਤਿ ਤਰੁਣਾ ਚ ਮਹਲ੍ਲਕਾ ਚ. ਯੇ ਬਾਲਾ ਯੇ ਚ ਪਣ੍ਡਿਤਾਤਿ ਯੇ ਚ ਅਸ੍ਸਾਸਪਸ੍ਸਾਸਾਯਤ੍ਤਾ ਜੀਵਿਤਾ ਬਾਲਾ ਯੇ ਚ ਪਣ੍ਡਿਚ੍ਚੇਨ ਸਮਨ੍ਨਾਗਤਾ ਬੁਦ੍ਧਾਦਯੋ. ਸਬ੍ਬੇ ਮਚ੍ਚੁਵਸਂ ਯਨ੍ਤੀਤਿ ਏਤੇ ਵੁਤ੍ਤਪ੍ਪਕਾਰਾ ਦਹਰਾਦਯੋ ਸਬ੍ਬੇ ਮਚ੍ਚੁਨੋ ਇਸ੍ਸਰਿਯਂ ਉਪਗਚ੍ਛਨ੍ਤਿ.

ਤੇਸਂ ਮਚ੍ਚੁਪਰੇਤਾਨਨ੍ਤਿ ਏਤੇਸਂ ਮਚ੍ਚੁਨਾ ਪਰਿਵਾਰਿਤਾਨਂ. ਗਚ੍ਛਤਂ ਪਰਲੋਕਤੋਤਿ ਇਤੋ ਮਨੁਸ੍ਸਲੋਕਤੋ ਪਰਲੋਕਂ ਗਚ੍ਛਨ੍ਤਾਨਂ. ਨ ਪਿਤਾ ਤਾਯਤੇ ਪੁਤ੍ਤਨ੍ਤਿ ਪਿਤਾ ਪੁਤ੍ਤਂ ਨ ਰਕ੍ਖਤਿ. ਞਾਤੀ ਵਾ ਪਨ ਞਾਤਕੇਤਿ ਮਾਤਾਪਿਤਿਪਕ੍ਖਿਕਾ ਞਾਤੀ ਵਾ ਤੇਯੇਵ ਞਾਤਕੇ ਰਕ੍ਖਿਤੁਂ ਨ ਸਕ੍ਕੋਨ੍ਤਿ.

ਪੇਕ੍ਖਤਞ੍ਞੇਵ ਞਾਤੀਨਨ੍ਤਿ ਵੁਤ੍ਤਵਿਧਾਨਂਯੇਵ ਞਾਤੀਨਂ ਪੇਕ੍ਖਨ੍ਤਾਨਂਯੇਵ ਓਲੋਕੇਨ੍ਤਾਨਂਯੇਵ. ਪਸ੍ਸ ਲਾਲਪ੍ਪਤਂ ਪੁਥੂਤਿ ਪਸ੍ਸਾਤਿ ਆਲਪਨਂ. ਲਾਲਪਨ੍ਤਾਨਂ ਵਿਲਪਨ੍ਤਾਨਂ ਪੁਥੂਨਂ ਨਾਨਪ੍ਪਕਾਰਾਨਂ. ਏਕਮੇਕੋਵ ਮਚ੍ਚਾਨਂ, ਗੋਵਜ੍ਝੋ ਵਿਯ ਨਿਯ੍ਯਤੀਤਿ ਸਤ੍ਤਾਨਂ ਏਕਮੇਕੋ ਵਧਾਯ ਨਿਯ੍ਯਮਾਨਗੋਣੋ ਵਿਯ ਮਰਣਾਯ ਨਿਯ੍ਯਤਿ ਪਾਪੁਣੀਯਤਿ. ਏਵਮਬ੍ਭਾਹਤੋ ਲੋਕੋਤਿ ਏਵਮੇਵ ਸਤ੍ਤਲੋਕੋ ਭੁਸਂ ਆਹਤੋ. ਮਚ੍ਚੁਨਾ ਚ ਜਰਾਯ ਚਾਤਿ ਮਰਣੇਨ ਚ ਜਰਾਯ ਚ ਅਭਿਭੂਤੋ.

੪੦. ਮਮਾਯਿਤੇਤਿ ਮਮਾਯਿਤਵਤ੍ਥੁਕਾਰਣਾ. ਵਿਨਾਭਾਵਂ ਸਨ੍ਤਮੇਵਿਦਨ੍ਤਿ ਸਨ੍ਤਂ ਵਿਜ੍ਜਮਾਨਂ ਵਿਨਾਭਾਵਮੇਵ ਇਦਂ, ਨ ਸਕ੍ਕਾ ਅਵਿਨਾਭਾਵੇਨ ਭਵਿਤੁਨ੍ਤਿ ਵੁਤ੍ਤਂ ਹੋਤਿ.

ਸੋਚਨ੍ਤੀਤਿ ਚਿਤ੍ਤੇਨ ਸੋਚਨਂ ਕਰੋਨ੍ਤਿ. ਕਿਲਮਨ੍ਤੀਤਿ ਕਾਯੇਨ ਕਿਲਮਥਂ ਪਾਪੁਣਨ੍ਤਿ. ਪਰਿਦੇਵਨ੍ਤੀਤਿ ਨਾਨਾਵਿਧਂ ਵਾਚਾਵਿਲਾਪਂ ਭਣਨ੍ਤਿ. ਉਰਤ੍ਤਾਲ਼ਿਂ ਕਨ੍ਦਨ੍ਤੀਤਿ ਉਰਂ ਤਾਲ਼ੇਤ੍ਵਾ ਤਾਲ਼ੇਤ੍ਵਾ ਕਨ੍ਦਨ੍ਤਿ. ਸਮ੍ਮੋਹਂ ਆਪਜ੍ਜਨ੍ਤੀਤਿ ਸਮ੍ਮੋਹਭਾਵਂ ਪਾਪੁਣਨ੍ਤਿ.

ਅਨਿਚ੍ਚੋਤਿ ਹੁਤ੍ਵਾ ਅਭਾਵਟ੍ਠੇਨ. ਸਙ੍ਖਤੋਤਿ ਪਚ੍ਚਯੇਹਿ ਸਙ੍ਗਮ੍ਮ ਕਤੋ. ਪਟਿਚ੍ਚਸਮੁਪ੍ਪਨ੍ਨੋਤਿ ਪਚ੍ਚਯਸਾਮਗ੍ਗਿਂ ਪਟਿਚ੍ਚ ਨ ਪਚ੍ਚਕ੍ਖਾਯ ਸਹ ਸਮ੍ਮਾ ਚ ਉਪ੍ਪਨ੍ਨੋ. ਖਯਧਮ੍ਮੋਤਿ ਖਯਂ ਗਮਨਸਭਾਵੋ. ਵਯਧਮ੍ਮੋਤਿ ਵਯਂ ਗਮਨਸਭਾਵੋ, ਭਙ੍ਗਵਸੇਨ ਭਙ੍ਗਗਮਨਸਭਾਵੋਤਿ ਅਤ੍ਥੋ. ਵਿਰਾਗਧਮ੍ਮੋਤਿ ਵਿਰਜ੍ਜਨਸਭਾਵੋ. ਨਿਰੋਧਧਮ੍ਮੋਤਿ ਨਿਰੁਜ੍ਝਨਸਭਾਵੋ. ਯ੍ਵਾਯਂ ਪਰਿਗ੍ਗਹੋਤਿ ਯੋ ਅਯਂ ਪਰਿਗ੍ਗਹੋ. ‘‘ਯਾਯ ਪਰਿਗ੍ਗਹੋ’’ਤਿਪਿ ਪਾਠੋ, ਅਯਮੇਵ ਪਦਚ੍ਛੇਦੋ. ਨਿਚ੍ਚੋਤਿ ਸਤਤਕਾਲਿਕੋ. ਧੁਵੋਤਿ ਥਿਰੋ. ਸਸ੍ਸਤੋਤਿ ਅਚਵਨੋ. ਅਵਿਪਰਿਣਾਮਧਮ੍ਮੋਤਿ ਪਕਤਿਅਜਹਨਸਭਾਵੋ. ਸਸ੍ਸਤਿ ਸਮਂ ਤਥੇਵ ਠਸ੍ਸਤੀਤਿ ਚਨ੍ਦਸੂਰਿਯਸਿਨੇਰੁਮਹਾਸਮੁਦ੍ਦਪਥਵੀਪਬ੍ਬਤਾਦਯੋ ਵਿਯ ਤਿਟ੍ਠੇਯ੍ਯ.

ਨਾਨਾਭਾਵੋਤਿ ਜਾਤਿਯਾ ਨਾਨਾਭਾਵੋ. ਵਿਨਾਭਾਵੋਤਿ ਮਰਣੇਨ ਵਿਯੋਗਭਾਵੋ. ਅਞ੍ਞਥਾਭਾਵੋਤਿ ਸਬ੍ਭਾਵਤੋ ਅਞ੍ਞਥਾਭਾਵੋ. ਪੁਰਿਮਾਨਂ ਪੁਰਿਮਾਨਂ ਖਨ੍ਧਾਨਨ੍ਤਿ ਅਨਨ੍ਤਰੇ ਪੁਰੇ ਉਪ੍ਪਨ੍ਨਾਨਂ ਖਨ੍ਧਾਨਂ. ਵਿਪਰਿਣਾਮਞ੍ਞਥਾਭਾਵਾਤਿ ਪਕਤਿਭਾਵਂ ਜਹਿਤ੍ਵਾ ਅਞ੍ਞਥਾਭਾਵੇਨ. ਪਚ੍ਛਿਮਾ ਪਚ੍ਛਿਮਾ ਖਨ੍ਧਾਦਯੋ ਪਵਤ੍ਤਨ੍ਤਿ ਉਪ੍ਪਜ੍ਜਨ੍ਤੀਤਿ ਸਮ੍ਬਨ੍ਧੋ.

ਸਬ੍ਬਂ ਘਰਾਵਾਸਪਲਿਬੋਧਨ੍ਤਿ ਸਕਲਂ ਗਿਹਿਭਾਵਜਟਂ. ਞਾਤਿਮਿਤ੍ਤਾਮਚ੍ਚਪਲਿਬੋਧਨ੍ਤਿ ਮਾਤਾਪਿਤੁਪਕ੍ਖਿਕਾ ਞਾਤੀ, ਮਿਤ੍ਤਾ ਸਹਾਯਾ, ਅਮਚ੍ਚਾ ਭਚ੍ਚਾ. ਸਨ੍ਨਿਧਿਪਲਿਬੋਧਨ੍ਤਿ ਨਿਧਾਨਜਟਂ ਛਿਨ੍ਦਿਤ੍ਵਾ. ਕੇਸਮਸ੍ਸੁਂ ਓਹਾਰੇਤ੍ਵਾਤਿ ਕੇਸੇ ਚ ਮਸ੍ਸੂਨਿ ਚ ਓਰੋਪਯਿਤ੍ਵਾ. ਕਾਸਾਯਾਨਿ ਵਤ੍ਥਾਨੀਤਿ ਕਸਾਯਰਸਪੀਤਾਨਿ ਵਤ੍ਥਾਨਿ.

੪੧. ਮਾਮਕੋਤਿ ਮਮ ਉਪਾਸਕੋ ਭਿਕ੍ਖੁ ਵਾਤਿ ਸਙ੍ਖਂ ਗਤੋ, ਬੁਦ੍ਧਾਦੀਨਿ ਵਾ ਵਤ੍ਥੂਨਿ ਮਮਾਯਮਾਨੋ.

ਤੇਸਂ ਤੇਸਂ ਸਤ੍ਤਾਨਨ੍ਤਿ ਅਨੇਕੇਸਂ ਸਤ੍ਤਾਨਂ ਸਾਧਾਰਣਨਿਦ੍ਦੇਸੋ. ‘‘ਯਞ੍ਞਦਤ੍ਤਸ੍ਸ ਮਰਣਂ, ਸੋਮਦਤ੍ਤਸ੍ਸ ਮਰਣ’’ਨ੍ਤਿ ਏਵਞ੍ਹਿ ਦਿਵਸਮ੍ਪਿ ਕਥਿਯਮਾਨੇ ਨੇਵ ਸਤ੍ਤਾ ਪਰਿਯਾਦਾਨਂ ਗਚ੍ਛਨ੍ਤਿ, ਨ ਸਬ੍ਬਂ ਅਪਰਤ੍ਤਦੀਪਨਂ ਸਿਜ੍ਝਤਿ. ਇਮੇਹਿ ਪਨ ਦ੍ਵੀਹਿ ਪਦੇਹਿ ਨ ਕੋਚਿ ਸਤ੍ਤੋ ਅਪਰਿਯਾਦਿਨ੍ਨੋ ਹੋਤਿ, ਨ ਕਿਞ੍ਚਿ ਅਪਰਤ੍ਤਾਦੀਪਨਂ ਨ ਸਿਜ੍ਝਤਿ. ਤਮ੍ਹਾ ਤਮ੍ਹਾਤਿ ਅਯਂ ਗਤਿਵਸੇਨ ਅਨੇਕੇਸਂ ਨਿਕਾਯਾਨਂ ਸਾਧਾਰਣਨਿਦ੍ਦੇਸੋ. ਸਤ੍ਤਨਿਕਾਯਾਤਿ ਸਤ੍ਤਾਨਂ ਨਿਕਾਯਾ, ਸਤ੍ਤਘਟਾ ਸਤ੍ਤਸਮੂਹਾਤਿ ਅਤ੍ਥੋ. ਚੁਤੀਤਿ ਚਵਨਵਸੇਨ ਵੁਤ੍ਤਂ. ਏਕਚਤੁਪਞ੍ਚਕ੍ਖਨ੍ਧਾਯ ਚੁਤਿਯਾ ਸਾਮਞ੍ਞਵਚਨਮੇਤਂ. ਚਵਨਤਾਤਿ ਭਾਵਵਚਨੇਨ ਲਕ੍ਖਣਨਿਦਸ੍ਸਨਂ. ਭੇਦੋਤਿ ਚੁਤਿਖਨ੍ਧਾਨਂ ਭਙ੍ਗੁਪ੍ਪਤ੍ਤਿਪਰਿਦੀਪਨਂ. ਅਨ੍ਤਰਧਾਨਨ੍ਤਿ ਘਟਸ੍ਸ ਵਿਯ ਭਿਨ੍ਨਸ੍ਸ ਭਿਨ੍ਨਾਨਂ ਖਨ੍ਧਾਨਂ ਯੇਨ ਕੇਨਚਿ ਪਰਿਯਾਯੇਨ ਠਾਨਾਭਾਵਪਰਿਦੀਪਨਂ. ਮਚ੍ਚੁਮਰਣਨ੍ਤਿ ਮਚ੍ਚੁਸਙ੍ਖਾਤਂ ਮਰਣਂ, ਨ ਖਣਿਕਮਰਣਂ. ਕਾਲੋ ਨਾਮ ਅਨ੍ਤਕੋ, ਤਸ੍ਸ ਕਿਰਿਯਾਤਿ ਕਾਲਂਕਿਰਿਯਾ. ਏਤ੍ਤਾਵਤਾ ਸਮ੍ਮੁਤਿਮਰਣਂ ਦੀਪਿਤਂ. ਇਦਾਨਿ ਪਰਮਤ੍ਥੇਨ ਦੀਪੇਤੁਂ ‘‘ਖਨ੍ਧਾਨਂ ਭੇਦੋ’’ਤਿਆਦਿਮਾਹ. ਪਰਮਤ੍ਥੇਨ ਹਿ ਖਨ੍ਧਾਯੇਵ ਭਿਜ੍ਜਨ੍ਤਿ, ਨ ਸਤ੍ਤੋ ਨਾਮ ਕੋਚਿ ਮਰਤਿ. ਖਨ੍ਧੇਸੁ ਪਨ ਭਿਜ੍ਜਮਾਨੇਸੁ ਸਤ੍ਤੋ ਮਰਤਿ, ਭਿਨ੍ਨੇਸੁ ‘‘ਮਤੋ’’ਤਿ ਵੋਹਾਰੋ ਹੋਤਿ.

ਏਤ੍ਥ ਚ ਚਤੁਵੋਕਾਰਪਞ੍ਚਵੋਕਾਰਵਸੇਨ ਖਨ੍ਧਾਨਂ ਭੇਦੋ, ਏਕਵੋਕਾਰਵਸੇਨ ਕਲ਼ੇਵਰਸ੍ਸ ਨਿਕ੍ਖੇਪੋ. ਚਤੁਵੋਕਾਰਵਸੇਨ ਵਾ ਖਨ੍ਧਾਨਂ ਭੇਦੋ, ਸੇਸਦ੍ਵਯਵਸੇਨ ਕਲ਼ੇਵਰਸ੍ਸ ਨਿਕ੍ਖੇਪੋ ਵੇਦਿਤਬ੍ਬੋ. ਕਸ੍ਮਾ? ਕਾਮਰੂਪਭਵਦ੍ਵਯੇਪਿ ਰੂਪਕਾਯਸਙ੍ਖਾਤਸ੍ਸ ਕਲ਼ੇਵਰਸ੍ਸ ਸਬ੍ਭਾਵਤੋ. ਯਸ੍ਮਾ ਵਾ ਚਾਤੁਮਹਾਰਾਜਿਕਾਦੀਸੁ ਖਨ੍ਧਾ ਭਿਜ੍ਜਨ੍ਤੇਵ, ਨ ਕਿਞ੍ਚਿ ਨਿਕ੍ਖਿਪਨ੍ਤਿ, ਤਸ੍ਮਾ ਤੇਸਂ ਵਸੇਨ ਖਨ੍ਧਾਨਂ ਭੇਦੋ, ਮਨੁਸ੍ਸਾਦੀਸੁ ਕਲ਼ੇਵਰਸ੍ਸ ਨਿਕ੍ਖੇਪੋ. ਏਤ੍ਥ ਚ ਕਲ਼ੇਵਰਸ੍ਸ ਨਿਕ੍ਖੇਪਕਰਣਤੋ ਮਰਣਂ ‘‘ਕਲ਼ੇਵਰਸ੍ਸ ਨਿਕ੍ਖੇਪੋ’’ਤਿ ਵੁਤ੍ਤਂ. ਜੀਵਿਤਿਨ੍ਦ੍ਰਿਯਸ੍ਸੁਪਚ੍ਛੇਦੋਤਿ ਇਮਿਨਾ ਇਨ੍ਦ੍ਰਿਯਬਦ੍ਧਸ੍ਸੇਵ ਮਰਣਂ ਨਾਮ ਹੋਤਿ, ਅਨਿਨ੍ਦ੍ਰਿਯਬਦ੍ਧਸ੍ਸ ਮਰਣਂ ਨਾਮ ਨਤ੍ਥੀਤਿ ਦਸ੍ਸੇਤਿ. ‘‘ਸਸ੍ਸਂ ਮਤਂ, ਰੁਕ੍ਖੋ ਮਤੋ’’ਤਿ ਇਦਂ ਪਨ ਵੋਹਾਰਮਤ੍ਤਮੇਵ. ਅਤ੍ਥਤੋ ਪਨ ਏਵਰੂਪਾਨਿ ਵਚਨਾਨਿ ਸਸ੍ਸਾਦੀਨਂ ਖਯਵਯਭਾਵਮੇਵ ਦੀਪੇਨ੍ਤਿ. ਰੂਪਗਤਨ੍ਤਿ ਰੂਪਮੇਵ ਰੂਪਗਤਂ. ਵੇਦਨਾਗਤਨ੍ਤਿਆਦੀਸੁਪਿ ਏਸੇਵ ਨਯੋ.

ਤਤ੍ਥ ਪੁਬ੍ਬੇਵ ਮਚ੍ਚਨ੍ਤਿ ਮਚ੍ਚਂ ਵਾ ਭੋਗਾ ਪੁਬ੍ਬੇਵ ਪਠਮਤਰਞ੍ਞੇਵ ਵਿਜਹਨ੍ਤਿ. ਮਚ੍ਚੋ ਵਾ ਤੇ ਭੋਗੇ ਪੁਬ੍ਬਤਰਂ ਜਹਤਿ. ਕਾਮਕਾਮੀਤਿ ਚੋਰਰਾਜਾਨਂ ਆਲਪਤਿ. ਅਮ੍ਭੋ ਕਾਮੇ ਕਾਮਯਮਾਨ ਕਾਮਕਾਮਿ ਭੋਗਿਨੋ ਨਾਮ ਲੋਕੇ ਅਸਸ੍ਸਤਾ, ਭੋਗੇਸੁ ਵਾ ਨਟ੍ਠੇਸੁ ਜੀਵਮਾਨਾ ਚ ਅਭੋਗਿਨੋ ਹੋਨ੍ਤਿ. ਭੋਗੇ ਵਾ ਪਹਾਯ ਸਯਂ ਨਸ੍ਸਨ੍ਤਿ, ਤਸ੍ਮਾ ਅਹਂ ਮਹਾਜਨਸ੍ਸ ਸੋਕਕਾਲੇਪਿ ਨ ਸੋਚਾਮੀਤਿ ਅਤ੍ਥੋ.

ਵਿਦਿਤਾ ਮਯਾ ਸਤ੍ਤੁਕ ਲੋਕਧਮ੍ਮਾਤਿ ਚੋਰਰਾਜਾਨਂ ਆਲਪਨ੍ਤੋ ਆਹ. ਅਮ੍ਭੋ ਸਤ੍ਤੁਕ ਮਯਾ ਲਾਭੋ ਅਲਾਭੋ ਯਸੋ ਅਯਸੋਤਿਆਦਯੋ ਲੋਕਧਮ੍ਮਾ ਵਿਦਿਤਾ. ਯਥੇਵ ਹਿ ਚਨ੍ਦੋ ਉਦੇਤਿ ਚ ਪੂਰਤਿ ਚ ਪੁਨ ਚ ਖੀਯਤਿ, ਯਥਾ ਚ ਸੂਰਿਯੋ ਅਨ੍ਧਕਾਰਂ ਵਿਧਮੇਨ੍ਤੋ ਮਹਨ੍ਤਂ ਲੋਕਪ੍ਪਦੇਸਂ ਤਪਿਤ੍ਵਾਨ ਪੁਨ ਸਾਯਂ ਅਤ੍ਥਂ ਪਲੇਤਿ ਅਤ੍ਥਂ ਗਚ੍ਛਤਿ ਨ ਦਿਸ੍ਸਤਿ, ਏਵਮੇਵ ਭੋਗਾ ਉਪ੍ਪਜ੍ਜਨ੍ਤਿ ਚ ਵਿਨਸ੍ਸਨ੍ਤਿ ਚ, ਤਤ੍ਥ ਕਿਂ ਸੋਕੇਨ, ਤਸ੍ਮਾ ਨ ਸੋਚਾਮੀਤਿ ਅਤ੍ਥੋ.

ਤਣ੍ਹਾਮਞ੍ਞਨਾਯ ਮਞ੍ਞਤੀਤਿ ਤਣ੍ਹਾਯ ਜਨਿਤਮਾਨਮਞ੍ਞਨਾਯ ਮਞ੍ਞਤਿ. ਮਾਨਂ ਕਰੋਤਿ ਦਿਟ੍ਠਿਮਞ੍ਞਨਾਯਾਤਿ ਦਿਟ੍ਠਿਂ ਉਪਨਿਸ੍ਸਯਂ ਕਤ੍ਵਾ ਉਪ੍ਪਨ੍ਨਾਯ ਮਞ੍ਞਨਾਯ. ਮਾਨਮਞ੍ਞਨਾਯਾਤਿ ਸਹਜਾਤਮਾਨਮਞ੍ਞਨਾਯ. ਕਿਲੇਸਮਞ੍ਞਨਾਯਾਤਿ ਵੁਤ੍ਤਪ੍ਪਕਾਰਾਯ ਉਪਤਾਪਨਟ੍ਠੇਨ ਕਿਲੇਸਮਞ੍ਞਨਾਯ ਮਞ੍ਞਤਿ.

ਕੁਹਾਤਿ ਵਿਮ੍ਹਾਪਕਾ. ਥਦ੍ਧਾਤਿ ਖਾਣੁ ਵਿਯ ਥਦ੍ਧਾ. ਲਪਾਤਿ ਪਚ੍ਚਯਨਿਮਿਤ੍ਤੇਨ ਲਪਨਕਾ.

੪੨. ਸਙ੍ਗਤਨ੍ਤਿ ਸਮਾਗਤਂ, ਦਿਟ੍ਠਂ ਫੁਟ੍ਠਂ ਵਾ. ਪਿਯਾਯਿਤਨ੍ਤਿ ਪਿਯਕਤਂ.

ਸਙ੍ਗਤਨ੍ਤਿ ਸਮ੍ਮੁਖੀਭੂਤਂ. ਸਮਾਗਤਨ੍ਤਿ ਸਮੀਪਂ ਆਗਤਂ. ਸਮਾਹਿਤਨ੍ਤਿ ਏਕੀਭੂਤਂ. ਸਨ੍ਨਿਪਤਿਤਨ੍ਤਿ ਪਿਣ੍ਡਿਤਂ. ਸੁਪਿਨਗਤੋਤਿ ਸੁਪਿਨਂ ਪਵਿਟ੍ਠੋ. ਸੇਨਾਬ੍ਯੂਹਂ ਪਸ੍ਸਤੀਤਿ ਸੇਨਾਸਨ੍ਨਿਵੇਸਂ ਦਕ੍ਖਤਿ. ਆਰਾਮਰਾਮਣੇਯ੍ਯਕਨ੍ਤਿ ਪੁਪ੍ਫਾਰਾਮਾਦੀਨਂ ਰਮਣੀਯਭਾਵਂ. ਵਨਰਾਮਣੇਯ੍ਯਕਾਦੀਸੁਪਿ ਏਸੇਵ ਨਯੋ. ਪੇਤਨ੍ਤਿ ਇਤੋ ਪਰਲੋਕਂ ਗਤਂ. ਕਾਲਙ੍ਕਤਨ੍ਤਿ ਮਤਂ.

੪੩. ਨਾਮਂਯੇਵਾਵਸਿਸ੍ਸਤਿ, ਅਕ੍ਖੇਯ੍ਯਨ੍ਤਿ ਸਬ੍ਬਂ ਰੂਪਾਦਿਧਮ੍ਮਜਾਤਂ ਪਹੀਯਤਿ, ਨਾਮਮਤ੍ਤਮੇਵ ਤੁ ਅਵਸਿਸ੍ਸਤਿ ‘‘ਬੁਦ੍ਧਰਕ੍ਖਿਤੋ ਧਮ੍ਮਰਕ੍ਖਿਤੋ’’ਤਿ ਏਵਂ ਅਕ੍ਖਾਤੁਂ ਕਥੇਤੁਂ.

ਯੇ ਚਕ੍ਖੁਵਿਞ੍ਞਾਣਾਭਿਸਮ੍ਭੂਤਾਤਿ ਯੇ ਸਯਂ ਚਕ੍ਖੁਵਿਞ੍ਞਾਣੇਨ ਅਭਿਸਮ੍ਭੂਤਾ ਰਾਸਿਕਤਾ ਦਿਟ੍ਠਾ ਚਤੁਸਮੁਟ੍ਠਾਨਿਕਾ ਰੂਪਾ. ਸੋਤਵਿਞ੍ਞਾਣਾਭਿਸਮ੍ਭੂਤਾਤਿ ਪਰਤੋਘੋਸੇਨ ਸੋਤਵਿਞ੍ਞਾਣੇਨ ਰਾਸਿਕਤਾ ਸੁਤਾ ਦ੍ਵਿਸਮੁਟ੍ਠਾਨਿਕਾ ਸਦ੍ਦਾ.

੪੪. ਮੁਨਯੋਤਿ ਖੀਣਾਸਵਮੁਨਯੋ. ਖੇਮਦਸ੍ਸਿਨੋਤਿ ਨਿਬ੍ਬਾਨਦਸ੍ਸਿਨੋ.

ਸੋਕੋਤਿ ਸੋਕਨਿਦ੍ਦੇਸੇ – ਬ੍ਯਸਤੀਤਿ ਬ੍ਯਸਨਂ, ਹਿਤਸੁਖਂ ਖਿਪਤਿ ਵਿਦ੍ਧਂਸੇਤੀਤਿ ਅਤ੍ਥੋ. ਞਾਤੀਨਂ ਬ੍ਯਸਨਂ ਞਾਤਿਬ੍ਯਸਨਂ, ਚੋਰਰੋਗਭਯਾਦੀਹਿ ਞਾਤਿਕ੍ਖਯੋ ਞਾਤਿਵਿਨਾਸੋਤਿ ਅਤ੍ਥੋ. ਤੇਨ ਞਾਤਿਬ੍ਯਸਨੇਨ. ਫੁਟ੍ਠਸ੍ਸਾਤਿ ਅਜ੍ਝੋਤ੍ਥਟਸ੍ਸ, ਅਭਿਭੂਤਸ੍ਸ ਸਮਨ੍ਨਾਗਤਸ੍ਸਾਤਿ ਅਤ੍ਥੋ. ਸੇਸੇਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਭੋਗਾਨਂ ਬ੍ਯਸਨਂ ਭੋਗਬ੍ਯਸਨਂ, ਰਾਜਚੋਰਾਦਿਵਸੇਨ ਭੋਗਕ੍ਖਯੋ ਭੋਗਵਿਨਾਸੋਤਿ ਅਤ੍ਥੋ. ਰੋਗੋਯੇਵ ਬ੍ਯਸਨਂ ਰੋਗਬ੍ਯਸਨਂ. ਰੋਗੋ ਹਿ ਆਰੋਗ੍ਯਂ ਬ੍ਯਸਤਿ ਵਿਨਾਸੇਤੀਤਿ ਬ੍ਯਸਨਂ. ਸੀਲਸ੍ਸ ਬ੍ਯਸਨਂ ਸੀਲਬ੍ਯਸਨਂ, ਦੁਸ੍ਸਿਲ੍ਯਸ੍ਸੇਤਂ ਨਾਮਂ. ਸਮ੍ਮਾਦਿਟ੍ਠਿਂ ਵਿਨਾਸਯਮਾਨਾ ਉਪ੍ਪਨ੍ਨਾ ਦਿਟ੍ਠਿਯੇਵ ਬ੍ਯਸਨਂ ਦਿਟ੍ਠਿਬ੍ਯਸਨਂ. ਏਤ੍ਥ ਚ ਪੁਰਿਮਾਨਿ ਦ੍ਵੇ ਅਨਿਪ੍ਫਨ੍ਨਾਨਿ, ਪਚ੍ਛਿਮਾਨਿ ਤੀਣਿ ਨਿਪ੍ਫਨ੍ਨਾਨਿ ਤਿਲਕ੍ਖਣਬ੍ਭਾਹਤਾਨਿ. ਪੁਰਿਮਾਨਿ ਚ ਤੀਣਿ ਨੇਵ ਕੁਸਲਾਨਿ ਨਾਕੁਸਲਾਨਿ, ਸੀਲਦਿਟ੍ਠਿਬ੍ਯਸਨਦ੍ਵਯਂ ਅਕੁਸਲਂ.

ਅਞ੍ਞਤਰਞ੍ਞਤਰੇਨਾਤਿ ਗਹਿਤੇਸੁ ਵਾ ਯੇਨ ਕੇਨਚਿ ਅਗ੍ਗਹਿਤੇਸੁ ਵਾ ਮਿਤ੍ਤਾਮਚ੍ਚਬ੍ਯਸਨਾਦੀਸੁ ਯੇਨ ਕੇਨਚਿ. ਸਮਨ੍ਨਾਗਤਸ੍ਸਾਤਿ ਸਮਨੁਬਨ੍ਧਸ੍ਸ ਅਪਰਿਮੁਚ੍ਚਮਾਨਸ੍ਸ. ਅਞ੍ਞਤਰਞ੍ਞਤਰੇਨ ਦੁਕ੍ਖਧਮ੍ਮੇਨਾਤਿ ਯੇਨ ਕੇਨਚਿ ਸੋਕਦੁਕ੍ਖਸ੍ਸ ਉਪ੍ਪਤ੍ਤਿਹੇਤੁਨਾ. ਸੋਕੋਤਿ ਸੋਚਨਕਵਸੇਨ ਸੋਕੋ. ਇਦਂ ਤੇਹਿ ਕਾਰਣੇਹਿ ਉਪ੍ਪਜ੍ਜਨਕਸੋਕਸ੍ਸ ਸਭਾਵਪਚ੍ਚਤ੍ਤਂ. ਸੋਚਨਾਤਿ ਸੋਚਨਾਕਾਰੋ. ਸੋਚਿਤਤ੍ਤਨ੍ਤਿ ਸੋਚਿਤਭਾਵੋ. ਅਨ੍ਤੋਸੋਕੋਤਿ ਅਬ੍ਭਨ੍ਤਰਸੋਕੋ. ਦੁਤਿਯਪਦਂ ਉਪਸਗ੍ਗੇਨ ਵਡ੍ਢਿਤਂ. ਸੋ ਹਿ ਅਬ੍ਭਨ੍ਤਰਂ ਸੁਕ੍ਖਾਪੇਨ੍ਤੋ ਵਿਯ ਪਰਿਸੁਕ੍ਖਾਪੇਨ੍ਤੋ ਵਿਯ ਉਪ੍ਪਜ੍ਜਤੀਤਿ ‘‘ਅਨ੍ਤੋਸੋਕੋ ਅਨ੍ਤੋਪਰਿਸੋਕੋ’’ਤਿ ਵੁਚ੍ਚਤਿ. ਅਨ੍ਤੋਦਾਹੋਤਿ ਅਬ੍ਭਨ੍ਤਰਦਾਹੋ. ਦੁਤਿਯਪਦਂ ਉਪਸਗ੍ਗੇਨ ਵਡ੍ਢਿਤਂ. ਚੇਤਸੋ ਪਰਿਜ੍ਝਾਯਨਾਤਿ ਚਿਤ੍ਤਸ੍ਸ ਝਾਨਨਾਕਾਰੋ. ਸੋਕੋ ਹਿ ਉਪ੍ਪਜ੍ਜਮਾਨੋ ਅਗ੍ਗਿ ਵਿਯ ਚਿਤ੍ਤਂ ਝਾਪੇਤਿ ਦਹਤਿ, ‘‘ਚਿਤ੍ਤਂ ਮੇ ਝਾਮਂ, ਨ ਮੇ ਕਿਞ੍ਚਿ ਪਟਿਭਾਤੀ’’ਤਿ ਵਦਾਪੇਤਿ. ਦੁਕ੍ਖਿਤੋ ਮਨੋ ਦੁਮ੍ਮਨੋ, ਤਸ੍ਸ ਭਾਵੋ ਦੋਮਨਸ੍ਸਂ. ਅਨੁਪਵਿਟ੍ਠਟ੍ਠੇਨ ਸੋਕੋਵ ਸਲ੍ਲਨ੍ਤਿ ਸੋਕਸਲ੍ਲਂ.

ਪਰਿਦੇਵਨਿਦ੍ਦੇਸੇ – ‘‘ਮਯ੍ਹਂ ਧੀਤਾ, ਮਯ੍ਹਂ ਪੁਤ੍ਤੋ’’ਤਿ ਏਵਂ ਆਦਿਸ੍ਸ ਆਦਿਸ੍ਸ ਦੇਵਨ੍ਤਿ ਰੋਦਨ੍ਤਿ ਏਤੇਨਾਤਿ ਆਦੇਵੋ. ਤਂ ਤਂ ਵਣ੍ਣਂ ਪਰਿਕਿਤ੍ਤੇਤ੍ਵਾ ਪਰਿਕਿਤ੍ਤੇਤ੍ਵਾ ਦੇਵਨ੍ਤਿ ਏਤੇਨਾਤਿ ਪਰਿਦੇਵੋ. ਤਤੋ ਪਰਾਨਿ ਦ੍ਵੇ ਦ੍ਵੇ ਪਦਾਨਿ ਪੁਰਿਮਦ੍ਵਯਸ੍ਸੇਵ ਆਕਾਰਭਾਵਨਿਦ੍ਦੇਸਵਸੇਨ ਵੁਤ੍ਤਾਨਿ. ਵਾਚਾਤਿ ਵਚਨਂ. ਪਲਾਪੋਤਿ ਤੁਚ੍ਛਂ ਨਿਰਤ੍ਥਕਵਚਨਂ. ਉਪ੍ਪਡ੍ਢਭਣਿਤਅਞ੍ਞਭਣਿਤਾਦਿਵਸੇਨ ਵਿਰੂਪੋ ਪਲਾਪੋ ਵਿਪ੍ਪਲਾਪੋ. ਲਾਲਪ੍ਪੋਤਿ ਪੁਨਪ੍ਪੁਨਂ ਲਪਨਂ. ਲਾਲਪ੍ਪਨਾਕਾਰੋ ਲਾਲਪ੍ਪਨਾ. ਲਾਲਪ੍ਪਿਤਸ੍ਸ ਭਾਵੋ ਲਾਲਪ੍ਪਿਤਤ੍ਤਂ. ਮਚ੍ਛਰਿਯਾਦੀਨਿ ਵੁਤ੍ਤਤ੍ਥਾਨੇਵ.

੪੫. ਸਤ੍ਤਮਗਾਥਾ ਏਵਂ ਮਰਣਬ੍ਭਾਹਤੇ ਲੋਕੇ ਅਨੁਰੂਪਪਟਿਪਤ੍ਤਿਦਸ੍ਸਨਤ੍ਥਂ ਵੁਤ੍ਤਾ. ਤਤ੍ਥ ਪਤਿਲੀਨਚਰਸ੍ਸਾਤਿ ਤਤੋ ਤਤੋ ਪਤਿਲੀਨਂ ਚਿਤ੍ਤਂ ਕਤ੍ਵਾ ਚਰਨ੍ਤਸ੍ਸ. ਭਿਕ੍ਖੁਨੋਤਿ ਕਲ੍ਯਾਣਪੁਥੁਜ੍ਜਨਸ੍ਸ ਵਾ ਸੇਕ੍ਖਸ੍ਸ ਵਾ. ਸਾਮਗ੍ਗਿਯਮਾਹੁ ਤਸ੍ਸ ਤਂ, ਯੋ ਅਤ੍ਤਾਨਂ ਭਵਨੇ ਨ ਦਸ੍ਸਯੇਤਿ ਤਸ੍ਸੇਤਂ ਪਤਿਰੂਪਮਾਹੁ, ਯੋ ਏਵਂਪਟਿਪਨ੍ਨੋ ਨਿਰਯਾਦਿਭੇਦੇ ਭਵਨੇ ਅਤ੍ਤਾਨਂ ਨ ਦਸ੍ਸਯੇ. ਏਵਞ੍ਹਿ ਸੋ ਇਮਮ੍ਹਾ ਮਰਣਾ ਮੁਚ੍ਚੇਯ੍ਯਾਤਿ ਅਧਿਪ੍ਪਾਯੋ.

ਪਤਿਲੀਨਚਰਾ ਵੁਚ੍ਚਨ੍ਤੀਤਿ ਤਤੋ ਤਤੋ ਲੀਨਚਿਤ੍ਤਾਚਾਰਾ ਕਥੀਯਨ੍ਤਿ. ਸਤ੍ਤ ਸੇਕ੍ਖਾਤਿ ਅਧਿਸੀਲਾਦੀਸੁ ਤੀਸੁ ਸਿਕ੍ਖਾਸੁ ਸਿਕ੍ਖਨ੍ਤੀਤਿ ਸੋਤਾਪਤ੍ਤਿਮਗ੍ਗਟ੍ਠਂ ਆਦਿਂ ਕਤ੍ਵਾ ਯਾਵ ਅਰਹਤ੍ਤਮਗ੍ਗਟ੍ਠਾ ਸਤ੍ਤ ਸੇਕ੍ਖਾ. ਅਰਹਾਤਿ ਫਲਟ੍ਠੋ. ਸੋ ਨਿਟ੍ਠਿਤਚਿਤ੍ਤਤ੍ਤਾ ਪਤਿਲੀਨੋ. ਸੇਕ੍ਖਾਨਂ ਪਤਿਲੀਨਚਰਣਭਾਵੇ ਕਾਰਣਂ ਦਸ੍ਸੇਨ੍ਤੋ ‘‘ਕਿਂ ਕਾਰਣਾ’’ਤਿਆਦਿਮਾਹ. ਤੇ ਤਤੋ ਤਤੋਤਿ ਤੇ ਸਤ੍ਤ ਸੇਕ੍ਖਾ ਤੇਹਿ ਤੇਹਿ ਆਰਮ੍ਮਣੇਹਿ ਚਿਤ੍ਤਂ ਪਤਿਲੀਨੇਨ੍ਤਾਤਿ ਅਤ੍ਤਨੋ ਚਿਤ੍ਤਂ ਨਿਲੀਨੇਨ੍ਤਾ. ਪਤਿਕੁਟੇਨ੍ਤਾਤਿ ਸਙ੍ਕੋਚੇਨ੍ਤਾ. ਪਤਿਵਟ੍ਟੇਨ੍ਤਾਤਿ ਕਟਸਾਰਕਂ ਵਿਯ ਆਭੁਜੇਨ੍ਤਾ. ਸਨ੍ਨਿਰੁਦ੍ਧਨ੍ਤਾਤਿ ਸਨ੍ਨਿਰੁਜ੍ਝਨ੍ਤਾ. ਸਨ੍ਨਿਗਣ੍ਹਨ੍ਤਾਤਿ ਨਿਗ੍ਗਹਂ ਕੁਰੁਮਾਨਾ. ਸਨ੍ਨਿਵਾਰੇਨ੍ਤਾਤਿ ਵਾਰਯਮਾਨਾ. ਰਕ੍ਖਨ੍ਤਾਤਿ ਰਕ੍ਖਂ ਕੁਰੁਮਾਨਾ. ਗੋਪੇਨ੍ਤਾਤਿ ਚਿਤ੍ਤਮਞ੍ਜੂਸਾਯ ਗੋਪਯਮਾਨਾ.

ਇਦਾਨਿ ਦ੍ਵਾਰਵਸੇਨ ਦਸ੍ਸੇਨ੍ਤੋ ‘‘ਚਕ੍ਖੁਦ੍ਵਾਰੇ’’ਤਿਆਦਿਮਾਹ. ਤਤ੍ਥ ਚਕ੍ਖੁਦ੍ਵਾਰੇਤਿ ਚਕ੍ਖੁਵਿਞ੍ਞਾਣਦ੍ਵਾਰੇ. ਸੋਤਦ੍ਵਾਰਾਦੀਸੁਪਿ ਏਸੇਵ ਨਯੋ. ਭਿਕ੍ਖੁਨੋਤਿ ਪੁਥੁਜ੍ਜਨਕਲ੍ਯਾਣਕਸ੍ਸ ਵਾ ਭਿਕ੍ਖੁਨੋ, ਸੇਕ੍ਖਸ੍ਸ ਵਾ ਭਿਕ੍ਖੁਨੋਤਿ ਭਿਕ੍ਖੁਸਦ੍ਦਸ੍ਸ ਵਚਨਤ੍ਥਂ ਅਵਤ੍ਵਾ ਇਧਾਧਿਪ੍ਪੇਤਭਿਕ੍ਖੁਯੇਵ ਦਸ੍ਸਿਤੋ. ਤਤ੍ਥ ਪੁਥੁਜ੍ਜਨੋ ਚ ਸੋ ਕਿਲੇਸਾਨਂ ਅਸਮੁਚ੍ਛਿਨ੍ਨਤ੍ਤਾ, ਕਲ੍ਯਾਣੋ ਚ ਸੀਲਾਦਿਪਟਿਪਤ੍ਤਿਯੁਤ੍ਤਤ੍ਤਾਤਿ ਪੁਥੁਜ੍ਜਨਕਲ੍ਯਾਣੋਵ ਪੁਥੁਜ੍ਜਨਕਲ੍ਯਾਣਕੋ, ਤਸ੍ਸ ਪੁਥੁਜ੍ਜਨਕਲ੍ਯਾਣਕਸ੍ਸ. ਅਧਿਸੀਲਾਦੀਨਿ ਸਿਕ੍ਖਤੀਤਿ ਸੇਕ੍ਖੋ, ਤਸ੍ਸ ਸੇਕ੍ਖਸ੍ਸ ਵਾ ਸੋਤਾਪਨ੍ਨਸ੍ਸ ਵਾ ਸਕਦਾਗਾਮਿਨੋ ਵਾ ਅਨਾਗਾਮਿਨੋ ਵਾ.

ਆਸਨ੍ਤਿ ਨਿਸੀਦਨ੍ਤਿ ਏਤ੍ਥਾਤਿ ਆਸਨਂ. ਯਤ੍ਥਾਤਿ ਯੇਸੁ ਮਞ੍ਚਪੀਠਾਦੀਸੁ. ਮਞ੍ਚੋਤਿਆਦੀਨਿ ਆਸਨਸ੍ਸ ਪਭੇਦਵਚਨਾਨਿ. ਮਞ੍ਚੋਪਿ ਹਿ ਨਿਸਜ੍ਜਾਯਪਿ ਓਕਾਸਤ੍ਤਾ ਇਧ ਆਸਨੇਸੁ ਵੁਤ੍ਤੋ, ਸੋ ਪਨ ਮਸਾਰਕਬੁਨ੍ਦਿਕਾਬਦ੍ਧਕੁਲ਼ੀਰਪਾਦਕਆਹਚ੍ਚਪਾਦਕਾਨਂ ਅਞ੍ਞਤਰੋ. ਪੀਠਮ੍ਪਿ ਤੇਸਂ ਅਞ੍ਞਤਰਮੇਵ. ਭਿਸੀਤਿ ਉਣ੍ਣਭਿਸਿ ਚੋਲ਼ਭਿਸਿ ਵਾਕਭਿਸਿ ਤਿਣਭਿਸਿ ਪਣ੍ਣਭਿਸੀਨਂ ਅਞ੍ਞਤਰਾ. ਤਟ੍ਟਿਕਾਤਿ ਤਾਲਪਣ੍ਣਾਦੀਹਿ ਵਿਨਿਤ੍ਵਾ ਕਤਾ. ਚਮ੍ਮਖਣ੍ਡੋਤਿ ਨਿਸਜ੍ਜਾਰਹੋ ਯੋ ਕੋਚਿ ਚਮ੍ਮਖਣ੍ਡੋ. ਤਿਣਸਨ੍ਥਾਰਾਦਯੋ ਤਿਣਾਦੀਨਿ ਗੁਮ੍ਬੇਤ੍ਵਾ ਕਤਾ. ਅਸਪ੍ਪਾਯਰੂਪਦਸ੍ਸਨੇਨਾਤਿ ਅਸਪ੍ਪਾਯਾਨਂ ਇਟ੍ਠਰੂਪਾਨਂ ਓਲੋਕਨੇਨ. ਰਿਤ੍ਤਨ੍ਤਿ ਅਬ੍ਭਨ੍ਤਰਤੋ ਤੁਚ੍ਛਂ. ਵਿਵਿਤ੍ਤਨ੍ਤਿ ਬਹਿਦ੍ਧਾਪਵੇਸਨੇਨ ਸੁਞ੍ਞਂ. ਪਵਿਵਿਤ੍ਤਨ੍ਤਿ ਕੋਚਿ ਗਹਟ੍ਠੋ ਤਤ੍ਥ ਨਤ੍ਥੀਤਿ ਅਤਿਰੇਕੇਨ ਸੁਞ੍ਞਂ. ਅਸਪ੍ਪਾਯਸਦ੍ਦਸ੍ਸਵਨੇਪਿ ਏਸੇਵ ਨਯੋ. ਪਞ੍ਚਹਿ ਕਾਮਗੁਣੇਹੀਤਿ ਇਤ੍ਥਿਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬੇਹਿ ਪਞ੍ਚਹਿ ਕਾਮਕੋਟ੍ਠਾਸੇਹਿ. ਵੁਤ੍ਤਮ੍ਪਿ ਚੇਤਂ –

‘‘ਰੂਪਾ ਸਦ੍ਦਾ ਰਸਾ ਗਨ੍ਧਾ, ਫੋਟ੍ਠਬ੍ਬਾ ਚ ਮਨੋਰਮਾ;

ਪਞ੍ਚ ਕਾਮਗੁਣਾ ਲੋਕੇ, ਇਤ੍ਥਿਰੂਪਸ੍ਮਿਂ ਦਿਸ੍ਸਰੇ’’ਤਿ. (ਅ. ਨਿ. ੫.੫੫);

ਭਜਤੋਤਿ ਚਿਤ੍ਤੇਨ ਸੇਵਨਂ ਕਰੋਨ੍ਤਸ੍ਸ. ਸਮ੍ਭਜਤੋਤਿ ਸਮ੍ਮਾ ਸੇਵਨ੍ਤਸ੍ਸ. ਸੇਵਤੋਤਿ ਉਪਸਙ੍ਕਮਨ੍ਤਸ੍ਸ. ਨਿਸੇਵਤੋਤਿ ਨਿਸ੍ਸਯਂ ਕਤ੍ਵਾ ਸੇਵਨ੍ਤਸ੍ਸ. ਸਂਸੇਵਤੋਤਿ ਸੁਟ੍ਠੁ ਸੇਵਨ੍ਤਸ੍ਸ. ਪਟਿਸੇਵਤੋਤਿ ਪੁਨਪ੍ਪੁਨਂ ਉਪਸਙ੍ਕਮਨ੍ਤਸ੍ਸ.

ਗਣਸਾਮਗ੍ਗੀਤਿ ਸਮਣਾਨਂ ਏਕੀਭਾਵੋ ਸਮਗ੍ਗਭਾਵੋ. ਧਮ੍ਮਸਾਮਗ੍ਗੀਤਿ ਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮਾਨਂ ਸਮੂਹਭਾਵੋ. ਅਨਭਿਨਿਬ੍ਬਤ੍ਤਿਸਾਮਗ੍ਗੀਤਿ ਅਨਿਬ੍ਬਤ੍ਤਮਾਨਾਨਂ ਅਨੁਪ੍ਪਜ੍ਜਮਾਨਾਨਂ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤਾਨਂ ਅਰਹਨ੍ਤਾਨਂ ਸਮੂਹੋ. ਸਮਗ੍ਗਾਤਿ ਕਾਯੇਨ ਅਵਿਯੋਗਾ. ਸਮ੍ਮੋਦਮਾਨਾਤਿ ਚਿਤ੍ਤੇਨ ਸੁਟ੍ਠੁ ਮੋਦਮਾਨਾ ਤੁਸ੍ਸਮਾਨਾ. ਅਵਿਵਦਮਾਨਾਤਿ ਵਾਚਾਯ ਵਿਵਾਦਂ ਅਕੁਰੁਮਾਨਾ. ਖੀਰੋਦਕੀਭੂਤਾਤਿ ਖੀਰੇਨ ਸਂਸਟ੍ਠਉਦਕਸਦਿਸਾ.

ਤੇ ਏਕਤੋ ਪਕ੍ਖਨ੍ਦਨ੍ਤੀਤਿ ਤੇ ਬੋਧਿਪਕ੍ਖਿਯਧਮ੍ਮਾ ਏਕਂ ਆਰਮ੍ਮਣਂ ਪਵਿਸਨ੍ਤਿ. ਪਸੀਦਨ੍ਤੀਤਿ ਤਸ੍ਮਿਂਯੇਵ ਆਰਮ੍ਮਣੇ ਪਸਾਦਮਾਪਜ੍ਜਨ੍ਤਿ. ਅਨੁਪਾਦਿਸੇਸਾਯਾਤਿ ਉਪਾਦਿਵਿਰਹਿਤਾਯ.

ਨਿਬ੍ਬਾਨਧਾਤੁਯਾਤਿ ਅਮਤਮਹਾਨਿਬ੍ਬਾਨਧਾਤੁਯਾ. ਊਨਤ੍ਤਂ ਵਾਤਿ ਏਤ੍ਥ ਉਨਭਾਵੋ ਊਨਤ੍ਤਂ, ਅਪਰਿਪੁਣ੍ਣਭਾਵੋਤਿ ਅਤ੍ਥੋ. ਪੁਣ੍ਣਤ੍ਤਂ ਵਾਤਿ ਪਰਿਪੁਣ੍ਣਭਾਵੋ ਪੁਣ੍ਣਤ੍ਤਂ, ਪੁਣ੍ਣਭਾਵੋ ਵਾ ਨ ਪਞ੍ਞਾਯਤਿ ਨਤ੍ਥੀਤਿ ਅਤ੍ਥੋ.

ਨੇਰਯਿਕਾਨਨ੍ਤਿ ਨਿਰਯੇ ਨਿਬ੍ਬਤ੍ਤਨਕਕਮ੍ਮਾਨਂ ਅਤ੍ਥਿਭਾਵੇਨ. ਨਿਰਯਂ ਅਰਹਨ੍ਤੀਤਿ ਨੇਰਯਿਕਾ, ਤੇਸਂ ਨੇਰਯਿਕਾਨਂ. ਨਿਰਯੋ ਭਵਨਨ੍ਤਿ ਨਿਰਯੋ ਏਵ ਤੇਸਂ ਵਸਨਟ੍ਠਾਨਂ ਘਰਂ. ਤਿਰਚ੍ਛਾਨਯੋਨਿਕਾਨਨ੍ਤਿਆਦੀਸੁਪਿ ਏਸੇਵ ਨਯੋ. ਤਸ੍ਸੇਸਾ ਸਾਮਗ੍ਗੀਤਿ ਤਸ੍ਸ ਖੀਣਾਸਵਸ੍ਸ ਏਸਾ ਨਿਬ੍ਬਾਨਸਾਮਗ੍ਗੀ. ਏਤਂ ਛਨ੍ਨਨ੍ਤਿ ਏਤਂ ਅਨੁਚ੍ਛਵਿਕਂ. ਪਤਿਰੂਪਨ੍ਤਿ ਸਦਿਸਂ ਪਟਿਭਾਗਂ, ਅਸਦਿਸਂ ਅਪ੍ਪਟਿਭਾਗਂ ਨ ਹੋਤਿ. ਅਨੁਚ੍ਛਵਿਕਨ੍ਤਿ ਏਤਂ ਸਮਣਬ੍ਰਾਹ੍ਮਣਾਨਂ ਵਾ ਧਮ੍ਮਾਨਂ, ਮਗ੍ਗਫਲਨਿਬ੍ਬਾਨਸਾਸਨਧਮ੍ਮਾਨਂ ਵਾ ਅਨੁਚ੍ਛਵਿਕਂ. ਤੇਸਂ ਛਵਿਂ ਛਾਯਂ ਸੁਨ੍ਦਰਭਾਵਂ ਅਨ੍ਵੇਤਿ ਅਨੁਗਚ੍ਛਤਿ, ਅਥ ਖੋ ਸਨ੍ਤਿਕਾਵ ਤੇਹਿ ਧਮ੍ਮੇਹਿ ਅਨੁਚ੍ਛਵਿਕਤ੍ਤਾ ਏਵ ਚ ਅਨੁਲੋਮਂ. ਤੇਸਞ੍ਚ ਅਨੁਲੋਮੇਤਿ, ਅਥ ਖੋ ਨ ਵਿਲੋਮਂ ਨ ਪਚ੍ਚਨੀਕਭਾਵੇ ਠਿਤਂ.

੪੬. ਇਦਾਨਿ ‘‘ਯੋ ਅਤ੍ਤਾਨਂ ਭਵਨੇ ਨ ਦਸ੍ਸਯੇ’’ਤਿ ਏਵਂ ਖੀਣਾਸਵੋ ਵਿਭਾਵਿਤੋ, ਤਸ੍ਸ ਵਣ੍ਣਭਣਨਤ੍ਥਂ ਇਤੋ ਪਰਾ ਤਿਸ੍ਸੋ ਗਾਥਾਯੋ ਆਹ. ਤਤ੍ਥ ਪਠਮਗਾਥਾਯ ਸਬ੍ਬਤ੍ਥਾਤਿ ਦ੍ਵਾਦਸਸੁ ਆਯਤਨੇਸੁ. ਨ ਪਿਯਂ ਕੁਬ੍ਬਤਿ ਨੋਪਿ ਅਪ੍ਪਿਯਨ੍ਤਿ ਨਿਦ੍ਦੇਸੇ ਪਿਯਾਤਿ ਚਿਤ੍ਤੇ ਪੀਤਿਕਰਾ. ਤੇ ਵਿਭਾਗਤੋ ਦਸ੍ਸੇਨ੍ਤੋ ‘‘ਕਤਮੇ ਸਤ੍ਤਾ ਪਿਯਾ, ਇਧ ਯਸ੍ਸ ਤੇ ਹੋਨ੍ਤੀ’’ਤਿ ਆਹ. ਤਤ੍ਥ ਯਸ੍ਸ ਤੇਤਿ ਯੇ ਅਸ੍ਸ ਤੇ. ਹੋਨ੍ਤੀਤਿ ਭਵਨ੍ਤਿ. ਅਤ੍ਥਕਾਮਾਤਿ ਵਡ੍ਢਿਕਾਮਾ. ਹਿਤਕਾਮਾਤਿ ਸੁਖਕਾਮਾ. ਫਾਸੁਕਾਮਾਤਿ ਸੁਖਵਿਹਾਰਕਾਮਾ. ਯੋਗਕ੍ਖੇਮਕਾਮਾਤਿ ਚਤੂਹਿ ਯੋਗੇਹਿ ਖੇਮਂ ਨਿਬ੍ਭਯਂ ਕਾਮਾ. ਮਮਾਯਤੀਤਿ ਮਾਤਾ. ਪਿਯਾਯਤੀਤਿ ਪਿਤਾ. ਭਜਤੀਤਿ ਭਾਤਾ. ਭਗਿਨੀਤਿ ਏਤ੍ਥਾਪਿ ਏਸੇਵ ਨਯੋ. ਪੁਂ ਤਾਯਤਿ ਰਕ੍ਖਤੀਤਿ ਪੁਤ੍ਤੋ. ਕੁਲਵਂਸਂ ਧਾਰੇਤੀਤਿ ਧੀਤਾ. ਮਿਤ੍ਤਾ ਸਹਾਯਾ. ਅਮਚ੍ਚਾ ਭਚ੍ਚਾ. ਞਾਤੀ ਪਿਤੁਪਕ੍ਖਿਕਾ. ਸਾਲੋਹਿਤਾ ਮਾਤਿਪਕ੍ਖਿਕਾ. ਇਮੇ ਸਤ੍ਤਾ ਪਿਯਾਤਿ ਇਮੇ ਸਤ੍ਤਾ ਪੀਤਿਜਨਕਾ. ਵੁਤ੍ਤਵਿਪਰਿਯਾਯੇਨ ਅਪ੍ਪਿਯਾ ਵੇਦਿਤਬ੍ਬਾ.

੪੭. ਯਦਿਦਂ ਦਿਟ੍ਠਸੁਤਮੁਤੇਸੁ ਵਾਤਿ ਏਤ੍ਥ ਪਨ ਯਦਿਦਂ ਦਿਟ੍ਠਸੁਤਂ, ਏਤ੍ਥ ਵਾ ਮੁਤੇਸੁ ਵਾ ਧਮ੍ਮੇਸੁ; ਏਵਂ ਮੁਨਿ ਨ ਉਪਲਿਮ੍ਪਤੀਤਿ ਏਵਂ ਸਮ੍ਬਨ੍ਧੋ ਵੇਦਿਤਬ੍ਬੋ.

ਉਦਕਥੇਵੋਤਿ ਉਦਕਸ੍ਸ ਥੇਵੋ. ‘‘ਉਦਕਤ੍ਥੇਵਕੋ’’ਤਿਪਿ ਪਾਠੋ. ਪਦੁਮਪਤ੍ਤੇਤਿ ਪਦੁਮਿਨਿਪਤ੍ਤੇ.

੪੮. ਧੋਨੋ ਨ ਹਿ ਤੇਨ ਮਞ੍ਞਤਿ, ਯਦਿਦਂ ਦਿਟ੍ਠਸੁਤਮੁਤੇਸੁ ਵਾਤਿ ਅਤ੍ਰਾਪਿ ਯਦਿਦਂ ਦਿਟ੍ਠਸੁਤਂ, ਤੇਨ ਵਤ੍ਥੁਨਾ ਨ ਮਞ੍ਞਤਿ, ਮੁਤੇਸੁ ਵਾ ਧਮ੍ਮੇਸੁ ਨ ਮਞ੍ਞਤੀਤਿ ਏਵਮੇਵ ਸਮ੍ਬਨ੍ਧੋ ਵੇਦਿਤਬ੍ਬੋ. ਨ ਹਿ ਸੋ ਰਜ੍ਜਤਿ, ਨੋ ਵਿਰਜ੍ਜਤੀਤਿ ਬਾਲਪੁਥੁਜ੍ਜਨੋ ਵਿਯ ਨ ਰਜ੍ਜਤਿ, ਕਲ੍ਯਾਣਪੁਥੁਜ੍ਜਨਸੇਕ੍ਖਾ ਵਿਯ ਨ ਵਿਰਜ੍ਜਤਿ, ਰਾਗਸ੍ਸ ਖੀਣਤ੍ਤਾ ‘‘ਵਿਰਤ੍ਤੋ’’ਤ੍ਵੇਵ ਸਙ੍ਖਂ ਗਚ੍ਛਤਿ. ਸੇਸਂ ਪਾਕਟਮੇਵਾਤਿ.

ਤਾਯ ਪਞ੍ਞਾਯ ਕਾਯਦੁਚ੍ਚਰਿਤਨ੍ਤਿ ਸਮ੍ਪਯੁਤ੍ਤਾਯ ਪੁਬ੍ਬਭਾਗਾਯੇਵ ਵਾ ਪਞ੍ਞਾਯ ਪਰਿਗ੍ਗਹੇਤਬ੍ਬੇ ਪਰਿਗ੍ਗਣ੍ਹਨ੍ਤੋ ਯੋਗੀ ਤਿਵਿਧਂ ਕਾਯਦੁਚ੍ਚਰਿਤਂ ਸਮੁਚ੍ਛੇਦਵਸੇਨ ਧੁਨਾਤਿ. ਅਯਞ੍ਚ ਪੁਗ੍ਗਲੋ ਵਿਪਨ੍ਨਧਮ੍ਮਂ ਦੇਸਨਾਧਮ੍ਮੇਸੁ ਧੁਨਨ੍ਤੇਸੁ ਤਂਧਮ੍ਮਸਮਙ੍ਗੀਪੁਗ੍ਗਲੋਪਿ ਧੁਨਾਤਿ ਨਾਮ. ਤੇ ਚ ਧਮ੍ਮੇ ਪਞ੍ਞਾਯ ਅਤ੍ਤਨੋ ਪਵਤ੍ਤਿਕ੍ਖਣੇ ਧੁਨਿਤੁਮਾਰਦ੍ਧੋ ਧੁਤਾਤਿ ਵੁਚ੍ਚਤਿ, ਯਥਾ ਭੁਞ੍ਜਿਤੁਮਾਰਦ੍ਧੋ ਭੁਤ੍ਤੋਤਿ ਵੁਚ੍ਚਤਿ. ਲਕ੍ਖਣਂ ਪਨੇਤ੍ਥ ਸਦ੍ਦਸਤ੍ਥਤੋ ਵੇਦਿਤਬ੍ਬਂ. ਧੁਤਨ੍ਤਿ ਕਤ੍ਤੁਸਾਧਨਂ. ਧੁਤਂ ਪਠਮਮਗ੍ਗੇਨ. ਧੋਤਂ ਦੁਤਿਯਮਗ੍ਗੇਨ. ਸਨ੍ਧੋਤਂ ਤਤਿਯਮਗ੍ਗੇਨ. ਨਿਦ੍ਧੋਤਂ ਚਤੁਤ੍ਥਮਗ੍ਗੇਨ.

ਧੋਨੋ ਦਿਟ੍ਠਂ ਨ ਮਞ੍ਞਤੀਤਿ ਅਰਹਾ ਮਂਸਚਕ੍ਖੁਨਾ ਦਿਟ੍ਠਂ ਦਿਬ੍ਬਚਕ੍ਖੁਨਾ ਦਿਟ੍ਠਂ ਰੂਪਾਯਤਨਂ ਨ ਮਞ੍ਞਤਿ ਤੀਹਿ ਮਞ੍ਞਨਾਹਿ, ਕਥਂ? ਰੂਪਾਯਤਨਂ ਸੁਭਸਞ੍ਞਾਯ ਸੁਖਸਞ੍ਞਾਯ ਚ ਪਸ੍ਸਨ੍ਤੋ ਨ ਤਤ੍ਥ ਛਨ੍ਦਰਾਗਂ ਜਨੇਤਿ ਨ ਤਂ ਅਸ੍ਸਾਦੇਤਿ ਨਾਭਿਨਨ੍ਦਤਿ, ਏਵਂ ਦਿਟ੍ਠਂ ਤਣ੍ਹਾਮਞ੍ਞਨਾਯ ਨ ਮਞ੍ਞਤਿ. ‘‘ਇਤਿ ਮੇ ਰੂਪਂ ਸਿਯਾ ਅਨਾਗਤਮਦ੍ਧਾਨ’’ਨ੍ਤਿ ਵਾ ਪਨੇਤ੍ਥ ਨਨ੍ਦਿਂ ਨ ਸਮਨ੍ਨਾਨੇਤਿ. ਰੂਪਸਮ੍ਪਦਂ ਵਾ ਆਕਙ੍ਖਮਾਨੋ ਦਾਨਂ ਨ ਦੇਤਿ, ਸੀਲਂ ਨ ਸਮਾਦਿਯਤਿ, ਉਪੋਸਥਕਮ੍ਮਂ ਨ ਕਰੋਤਿ. ਏਵਮ੍ਪਿ ਦਿਟ੍ਠਂ ਤਣ੍ਹਾਮਞ੍ਞਨਾਯ ਨ ਮਞ੍ਞਤਿ, ਅਤ੍ਤਨੋ ਪਨ ਪਰਸ੍ਸ ਚ ਰੂਪਸਮ੍ਪਤ੍ਤਿਵਿਪਤ੍ਤਿਂ ਨਿਸ੍ਸਾਯ ਮਾਨਂ ਨ ਜਨੇਤਿ. ‘‘ਇਮਿਨਾਹਂ ਸੇਯ੍ਯੋਸ੍ਮੀਤਿ ਵਾ, ਸਦਿਸੋਸ੍ਮੀਤਿ ਵਾ, ਹੀਨੋਸ੍ਮੀਤਿ ਵਾ’’ਤਿ ਏਵਂ ਦਿਟ੍ਠਂ ਮਾਨਮਞ੍ਞਨਾਯ ਨ ਮਞ੍ਞਤਿ. ਰੂਪਾਯਤਨਂ ਪਨ ‘‘ਨਿਚ੍ਚਂ ਧੁਵਂ ਸਸ੍ਸਤ’’ਨ੍ਤਿ ਨ ਮਞ੍ਞਤਿ. ਅਤ੍ਤਾਨਂ ‘‘ਅਤ੍ਤਨਿਯ’’ਨ੍ਤਿ ਨ ਮਞ੍ਞਤਿ. ਮਙ੍ਗਲਂ ‘‘ਅਮਙ੍ਗਲ’’ਨ੍ਤਿ ਨ ਮਞ੍ਞਤਿ. ਏਵਂ ਦਿਟ੍ਠਂ ਦਿਟ੍ਠਿਮਞ੍ਞਨਾਯ ਨ ਮਞ੍ਞਤਿ. ਦਿਟ੍ਠਸ੍ਮਿਂ ਨ ਮਞ੍ਞਤੀਤਿ ਰੂਪਸ੍ਮਿਂ ਅਤ੍ਤਾਨਂ ਸਮਨੁਪਸ੍ਸਨਨਯੇਨ ਅਮਞ੍ਞਨ੍ਤੋ ਦਿਟ੍ਠਸ੍ਮਿਂ ਨ ਮਞ੍ਞਤਿ. ਯਥਾ ਵਾ ਥਨੇ ਥਞ੍ਞਂ, ਏਵਂ ਰੂਪਸ੍ਮਿਂ ਰਾਗਾਦਯੋਤਿ ਅਮਞ੍ਞਨ੍ਤੋਪਿ ਦਿਟ੍ਠਸ੍ਮਿਂ ਨ ਮਞ੍ਞਤਿ. ਤਸ੍ਮਿਂਯੇਵ ਪਨਸ੍ਸ ਦਿਟ੍ਠਿਮਞ੍ਞਨਾਯ ਅਮਞ੍ਞਿਤੇ ਵਤ੍ਥੁਸ੍ਮਿਂ ਸਿਨੇਹਂ ਮਾਨਞ੍ਚ ਨ ਉਪ੍ਪਾਦਯਤੋ ਤਣ੍ਹਾਮਾਨਮਞ੍ਞਨਾਪਿ ਨਤ੍ਥੀਤਿ ਵੇਦਿਤਬ੍ਬਾ. ਏਵਂ ਦਿਟ੍ਠਸ੍ਮਿਂ ਨ ਮਞ੍ਞਤਿ. ਦਿਟ੍ਠਤੋ ਨ ਮਞ੍ਞਤੀਤਿ ਏਤ੍ਥ ਪਨ ਦਿਟ੍ਠਤੋਤਿ ਨਿਸ੍ਸਕ੍ਕਵਚਨਂ. ਤਸ੍ਮਾ ਸਉਪਕਾਰਣਸ੍ਸ ਅਤ੍ਤਨੋ ਵਾ ਪਰਸ੍ਸ ਵਾ ਯਥਾਵੁਤ੍ਤਪ੍ਪਭੇਦਤੋ ਦਿਟ੍ਠਤੋ ਉਪਪਤ੍ਤਿ ਵਾ ਨਿਗ੍ਗਮਨਂ ਵਾ ਦਿਟ੍ਠਤੋ ਵਾ ਅਞ੍ਞੋ ਅਤ੍ਤਾਤਿ ਅਮਞ੍ਞਮਾਨੋ ਦਿਟ੍ਠਤੋ ਨ ਮਞ੍ਞਤੀਤਿ ਵੇਦਿਤਬ੍ਬੋ. ਅਯਮਸ੍ਸ ਨ ਦਿਟ੍ਠਿਮਞ੍ਞਨਾ. ਤਸ੍ਮਿਂਯੇਵ ਪਨਸ੍ਸ ਦਿਟ੍ਠਿਮਞ੍ਞਨਾਯ ਅਮਞ੍ਞਿਤੇ ਵਤ੍ਥੁਸ੍ਮਿਂ ਸਿਨੇਹਂ ਮਾਨਞ੍ਚ ਨ ਉਪ੍ਪਾਦਯਤੋ ਨ ਤਣ੍ਹਾਮਾਨਮਞ੍ਞਨਾਪਿ ਵੇਦਿਤਬ੍ਬਾ.

ਦਿਟ੍ਠਾ ਮੇਤਿ ਨ ਮਞ੍ਞਤੀਤਿ ਏਤ੍ਥ ਪਨ ‘‘ਏਤਂ ਮਮਾ’’ਤਿ ਤਣ੍ਹਾਵਸੇਨ ਅਮਮਾਯਮਾਨੋ ਦਿਟ੍ਠਂ ਤਣ੍ਹਾਮਞ੍ਞਨਾਯ ਨ ਮਞ੍ਞਤਿ. ਸੁਤਨ੍ਤਿ ਮਂਸਸੋਤੇਨਪਿ ਸੁਤਂ, ਦਿਬ੍ਬਸੋਤੇਨਪਿ ਸੁਤਂ, ਸਦ੍ਦਾਯਤਨਸ੍ਸੇਤਂ ਅਧਿਵਚਨਂ. ਮੁਤਨ੍ਤਿ ਮੁਤ੍ਵਾ ਮੁਨਿਤ੍ਵਾ ਚ ਗਹਿਤਂ ਆਹਚ੍ਚ ਉਪਗਨ੍ਤ੍ਵਾਤਿ ਅਤ੍ਥੋ. ਇਨ੍ਦ੍ਰਿਯਾਨਂ ਆਰਮ੍ਮਣਾਨਞ੍ਚ ਅਞ੍ਞਮਞ੍ਞਂ ਸਂਕਿਲੇਸੇ ਵਿਞ੍ਞਾਤਨ੍ਤਿ ਵੁਤ੍ਤਂ ਹੋਤਿ. ਗਨ੍ਧਰਸਫੋਟ੍ਠਬ੍ਬਾਯਤਨਾਨਂ ਏਤਂ ਅਧਿਵਚਨਂ. ਵਿਞ੍ਞਾਤਨ੍ਤਿ ਮਨਸਾ ਵਿਞ੍ਞਾਤਂ, ਸੇਸਾਨਂ ਸਤ੍ਤਾਨਂ ਆਯਤਨਾਨਮੇਤਂ ਅਧਿਵਚਨਂ, ਧਮ੍ਮਾਰਮ੍ਮਣਸ੍ਸ ਵਾ, ਇਧ ਪਨ ਸਕ੍ਕਾਯਪਰਿਯਾਪਨ੍ਨਮੇਵ ਲਬ੍ਭਤਿ. ਵਿਤ੍ਥਾਰੋ ਪਨੇਤ੍ਥ ਦਿਟ੍ਠਵਾਰੇ ਵੁਤ੍ਤਨਯੇਨ ਵੇਦਿਤਬ੍ਬੋ.

ਇਦਾਨਿ ਭਗਵਤਾ ਵੁਤ੍ਤਸੁਤ੍ਤਵਸੇਨ ਦਸ੍ਸੇਨ੍ਤੋ ‘‘ਅਸ੍ਮੀਤਿ ਭਿਕ੍ਖਵੇ’’ਤਿਆਦਿਮਾਹ. ਤਤ੍ਥ ਅਸ੍ਮੀਤਿ ਭਵਾਮਿ, ਨਿਚ੍ਚਸ੍ਸੇਤਂ ਅਧਿਵਚਨਂ. ਮਞ੍ਞਿਤਮੇਤਨ੍ਤਿ ਦਿਟ੍ਠਿਕਪ੍ਪਨਂ ਏਤਂ. ਅਯਮਹਮਸ੍ਮੀਤਿ ਅਯਂ ਅਹਂ ਅਸ੍ਮਿ ਭਵਾਮਿ.

ਅਞ੍ਞਤ੍ਰ ਸਤਿਪਟ੍ਠਾਨੇਹੀਤਿ ਠਪੇਤ੍ਵਾ ਚਤੁਸਤਿਪਟ੍ਠਾਨੇ.

ਸਬ੍ਬੇ ਬਾਲਪੁਥੁਜ੍ਜਨਾ ਰਜ੍ਜਨ੍ਤੀਤਿ ਸਕਲਾ ਅਨ੍ਧਬਾਲਾ ਨਾਨਾਜਨਾ ਲਗ੍ਗਨ੍ਤਿ. ਸਤ੍ਤ ਸੇਕ੍ਖਾ ਵਿਰਜ੍ਜਨ੍ਤੀਤਿ ਸੋਤਾਪਨ੍ਨਾਦਯੋ ਸਤ੍ਤ ਅਰਿਯਜਨਾ ਵਿਰਾਗਂ ਆਪਜ੍ਜਨ੍ਤਿ. ਅਰਹਾ ਨੇਵ ਰਜ੍ਜਤਿ ਨੋ ਵਿਰਜ੍ਜਤੀਤਿ ਕਿਲੇਸਾਨਂ ਪਰਿਨਿਬ੍ਬਾਪਿਤਤ੍ਤਾ ਉਭਯਮ੍ਪਿ ਨ ਕਰੋਤਿ. ਖਯਾ ਰਾਗਸ੍ਸਾਤਿਆਦਯੋ ਤਿਵਿਧਾਪਿ ਨਿਬ੍ਬਾਨਮੇਵ.

ਸਦ੍ਧਮ੍ਮਪ੍ਪਜ੍ਜੋਤਿਕਾਯ ਮਹਾਨਿਦ੍ਦੇਸਟ੍ਠਕਥਾਯ

ਜਰਾਸੁਤ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.