੫. ਪਰਮਟ੍ਠਕਸੁਤ੍ਤਨਿਦ੍ਦੇਸਵਣ੍ਣਨਾ

੩੧. ਪਞ੍ਚਮੇ ਪਰਮਟ੍ਠਕਸੁਤ੍ਤੇ ਪਰਮਨ੍ਤਿ ਦਿਟ੍ਠੀਸੁ ਪਰਿਬ੍ਬਸਾਨੋਤਿ ਇਦਂ ਪਰਮਨ੍ਤਿ ਗਹੇਤ੍ਵਾ ਸਕਾਯ ਸਕਾਯ ਦਿਟ੍ਠਿਯਾ ਵਸਮਾਨੋ. ਯਦੁਤ੍ਤਰਿਂ ਕੁਰੁਤੇਤਿ ਯਂ ਅਤ੍ਤਨੋ ਸਤ੍ਥਾਰਾਦਿਂ ਸੇਟ੍ਠਂ ਕਰੋਤਿ. ਹੀਨਾਤਿ ਅਞ੍ਞੇ ਤਤੋ ਸਬ੍ਬਮਾਹਾਤਿ ਤਂ ਅਤ੍ਤਨੋ ਸਤ੍ਥਾਰਾਦਿਂ ਠਪੇਤ੍ਵਾ ਤਤੋ ਅਞ੍ਞੇ ਸਬ੍ਬੇ ‘‘ਹੀਨਾ ਇਮੇ’’ਤਿ ਆਹ. ਤਸ੍ਮਾ ਵਿਵਾਦਾਨਿ ਅਵੀਤਿਵਤ੍ਤੋਤਿ ਤੇਨ ਕਾਰਣੇਨ ਸੋ ਦਿਟ੍ਠਿਕਲਹੇ ਅਵੀਤਿਵਤ੍ਤੋਵ ਹੋਤਿ.

ਵਸਨ੍ਤੀਤਿ ਪਠਮੁਪ੍ਪਨ੍ਨਦਿਟ੍ਠਿਵਸੇਨ ਵਸਨ੍ਤਿ. ਪਵਸਨ੍ਤੀਤਿ ਪਵਿਸਿਤ੍ਵਾ ਵਸਨ੍ਤਿ. ਆਵਸਨ੍ਤੀਤਿ ਵਿਸੇਸੇਨ ਵਸਨ੍ਤਿ. ਪਰਿਵਸਨ੍ਤੀਤਿ ਸਬ੍ਬਭਾਗੇਨ ਵਸਨ੍ਤਿ. ਤਂ ਉਪਮਾਯ ਸਾਧੇਨ੍ਤੋ ‘‘ਯਥਾ ਆਗਾਰਿਕਾ ਵਾ’’ਤਿਆਦਿਮਾਹ. ਆਗਾਰਿਕਾ ਵਾਤਿ ਘਰਸਾਮਿਕਾ. ਘਰੇਸੁ ਵਸਨ੍ਤੀਤਿ ਅਤ੍ਤਨੋ ਘਰੇਸੁ ਆਸਙ੍ਕਵਿਰਹਿਤਾ ਹੁਤ੍ਵਾ ਨਿਵਸਨ੍ਤਿ. ਸਾਪਤ੍ਤਿਕਾ ਵਾਤਿ ਆਪਤ੍ਤਿਬਹੁਲਾ. ਸਕਿਲੇਸਾ ਵਾਤਿ ਰਾਗਾਦਿਕਿਲੇਸਬਹੁਲਾ. ਉਤ੍ਤਰਿਂ ਕਰੋਤੀਤਿ ਅਤਿਰੇਕਂ ਕਰੋਤਿ. ਅਯਂ ਸਤ੍ਥਾ ਸਬ੍ਬਞ੍ਞੂਤਿ ‘ਅਯਂ ਅਮ੍ਹਾਕਂ ਸਤ੍ਥਾ ਸਬ੍ਬਂ ਜਾਨਾਤਿ’.

ਸਬ੍ਬੇ ਪਰਪ੍ਪਵਾਦੇ ਖਿਪਤੀਤਿ ਸਬ੍ਬਾ ਪਰਲਦ੍ਧਿਯੋ ਛਡ੍ਡੇਤਿ. ਉਕ੍ਖਿਪਤੀਤਿ ਨੀਹਰਤਿ. ਪਰਿਕ੍ਖਿਪਤੀਤਿ ਪਰਮ੍ਮੁਖੇ ਕਰੋਤਿ. ਦਿਟ੍ਠਿਮੇਧਗਾਨੀਤਿ ਦਿਟ੍ਠਿਵਿਹੇਸਕਾਨਿ.

੩੨. ਦੁਤਿਯਗਾਥਾਯਤ੍ਥੋ – ਏਵਂ ਅਵੀਤਿਵਤ੍ਤੋ ਚ ਯਂ ਦਿਟ੍ਠੇ ਸੁਤੇ ਸੀਲਵਤੇ ਮੁਤੇਤਿ ਏਤੇਸੁ ਚਤੂਸੁ ਵਤ੍ਥੂਸੁ ਉਪ੍ਪਨ੍ਨਦਿਟ੍ਠਿਸਙ੍ਖਾਤੇ ਅਤ੍ਤਨਿ ਪੁਬ੍ਬੇ ਵੁਤ੍ਤਪ੍ਪਕਾਰਂ ਆਨਿਸਂਸਂ ਪਸ੍ਸਤਿ, ਤਦੇਵ ਸੋ ਤਤ੍ਥ ਸਕਾਯ ਦਿਟ੍ਠਿਯਾ ਆਨਿਸਂਸਂ ‘‘ਇਦਂ ਸੇਟ੍ਠ’’ਨ੍ਤਿ ਅਭਿਨਿਵਿਸਿਤ੍ਵਾ ਅਞ੍ਞਂ ਸਬ੍ਬਂ ਪਰਸਤ੍ਥਾਰਾਦਿਕਂ ਨਿਹੀਨਤੋ ਪਸ੍ਸਤਿ.

ਦ੍ਵੇ ਆਨਿਸਂਸੇ ਪਸ੍ਸਤੀਤਿ ਦ੍ਵੇ ਗੁਣੇ ਓਲੋਕੇਤਿ. ਦਿਟ੍ਠਧਮ੍ਮਿਕਞ੍ਚਾਤਿ ਦਿਟ੍ਠੇ ਪਚ੍ਚਕ੍ਖੇ ਅਤ੍ਤਭਾਵੇ ਵਿਪਚ੍ਚਨਕਰਣਂ. ਸਮ੍ਪਰਾਯਿਕਞ੍ਚਾਤਿ ਪਰਲੋਕੇ ਪਟਿਲਭਿਤਬ੍ਬਗੁਣਞ੍ਚ. ਯਂਦਿਟ੍ਠਿਕੋ ਸਤ੍ਥਾਤਿ ਯਂਲਦ੍ਧਿਕੋ ਤਿਤ੍ਥਾਯਤਨਸਾਮਿਕੋ. ਅਲਂ ਨਾਗਤ੍ਤਾਯ ਵਾਤਿ ਨਾਗਰਾਜਭਾਵਾਯ ਵਾ ਪਰਿਯਤ੍ਤਂ. ਸੁਪਣ੍ਣਤ੍ਤਾਦੀਸੁਪਿ ਏਸੇਵ ਨਯੋ. ਦੇਵਤ੍ਤਾਯ ਵਾਤਿ ਸਮ੍ਮੁਤਿਦੇਵਾਦਿਭਾਵਾਯ. ਆਯਤਿਂ ਫਲਪਾਟਿਕਙ੍ਖੀ ਹੋਤੀਤਿ ਅਨਾਗਤੇ ਵਿਪਾਕਫਲਂ ਪਤ੍ਥਯਾਨੋ ਹੋਤਿ. ਦਿਟ੍ਠਸੁਦ੍ਧਿਯਾਪਿ ਦ੍ਵੇ ਆਨਿਸਂਸੇ ਪਸ੍ਸਤੀਤਿ ਚਕ੍ਖੁਵਿਞ੍ਞਾਣੇਨ ਦਿਟ੍ਠਰੂਪਾਯਤਨਸ੍ਸ ਵਸੇਨ ਸੁਦ੍ਧਿਯਾ ਹੇਤੁਤ੍ਤਾਪਿ ਅਤ੍ਤਨੋ ਗਹਿਤਗਹਣੇਨ ਦ੍ਵੇ ਗੁਣੇ ਓਲੋਕੇਤਿ. ਸੁਤਸੁਦ੍ਧਿਯਾਦੀਸੁਪਿ ਏਸੇਵ ਨਯੋ.

੩੩. ਤਤਿਯਗਾਥਾਯਤ੍ਥੋ – ਏਵਂ ਪਸ੍ਸਤੋ ਚ ਯਂ ਅਤ੍ਤਨੋ ਸਤ੍ਥਾਰਾਦਿਂ ਨਿਸ੍ਸਿਤੋ ਅਞ੍ਞਂ ਪਰਸਤ੍ਥਾਰਾਦਿਂ ਹੀਨਂ ਪਸ੍ਸਤਿ, ਤਂ ਪਨ ਦਸ੍ਸਨਂ ਗਨ੍ਥਮੇਵ ਕੁਸਲਾ ਵਦਨ੍ਤਿ, ਬਨ੍ਧਨਨ੍ਤਿ ਵੁਤ੍ਤਂ ਹੋਤਿ. ਯਸ੍ਮਾ ਏਤਦੇਵ, ਤਸ੍ਮਾ ਹਿ ਦਿਟ੍ਠਂ ਵ ਸੁਤਂ ਮੁਤਂ ਵਾ, ਸੀਲਬ੍ਬਤਂ ਭਿਕ੍ਖੁ ਨ ਨਿਸ੍ਸਯੇਯ੍ਯ, ਨਾਭਿਨਿਵੇਸੇਯ੍ਯਾਤਿ ਵੁਤ੍ਤਂ ਹੋਤਿ.

ਕੁਸਲਾਤਿ ਖਨ੍ਧਾਦਿਜਾਨਨੇ ਛੇਕਾ. ਖਨ੍ਧਕੁਸਲਾਤਿ ਰੂਪਾਦੀਸੁ ਪਞ੍ਚਸੁ ਖਨ੍ਧੇਸੁ ਕੁਸਲਾ. ਧਾਤੁਆਯਤਨਪਟਿਚ੍ਚਸਮੁਪ੍ਪਾਦਸਤਿਪਟ੍ਠਾਨਸਮ੍ਮਪ੍ਪਧਾਨਇਦ੍ਧਿਪਾਦਇਨ੍ਦ੍ਰਿਯਬਲਬੋਜ੍ਝਙ੍ਗਮਗ੍ਗਫਲਨਿਬ੍ਬਾਨੇਸੁਪਿ ਏਸੇਵ ਨਯੋ. ਤਤ੍ਥ ਮਗ੍ਗਕੁਸਲਾਤਿ ਚਤੂਸੁ ਮਗ੍ਗੇਸੁ. ਫਲਕੁਸਲਾਤਿ ਚਤੂਸੁ ਫਲੇਸੁ. ਨਿਬ੍ਬਾਨਕੁਸਲਾਤਿ ਦੁਵਿਧੇ ਨਿਬ੍ਬਾਨੇ ਛੇਕਾ. ਤੇ ਕੁਸਲਾਤਿ ਤੇ ਏਤੇਸੁ ਵੁਤ੍ਤਪ੍ਪਕਾਰੇਸੁ ਛੇਕਾ. ਏਵਂ ਵਦਨ੍ਤੀਤਿ ਏਵਂ ਕਥੇਨ੍ਤਿ. ਗਨ੍ਥੋ ਏਸੋਤਿ ਪਸ੍ਸਤੋ ਚ ਅਤ੍ਤਨੋ ਸਤ੍ਥਾਰਾਦਿਨਿਸ੍ਸਿਤਞ੍ਚ ਅਞ੍ਞਂ ਪਰਸਤ੍ਥਾਰਾਦਿਂ ਹੀਨਤੋ ਦਸ੍ਸਨਞ੍ਚ ਗਨ੍ਥੋ ਬਨ੍ਧਨੋ ਏਸੋਤਿ ਵਦਨ੍ਤਿ. ਲਗ੍ਗਨਂ ਏਤਨ੍ਤਿ ਏਤਂ ਵੁਤ੍ਤਪ੍ਪਕਾਰਂ ਨਾਗਦਨ੍ਤੇ ਲਗ੍ਗਿਤਂ ਵਿਯ ਅਧੋਲਮ੍ਬਨਂ. ਬਨ੍ਧਨਂ ਏਤਨ੍ਤਿ ਨਿਚ੍ਛਿਨ੍ਦਿਤੁਂ ਦੁਕ੍ਖਟ੍ਠੇਨ ਸਙ੍ਖਲਿਕਾਦਿਬਨ੍ਧਨਂ ਵਿਯ ਏਤਂ ਬਨ੍ਧਨਂ. ਪਲਿਬੋਧੋ ਏਸੋਤਿ ਸਂਸਾਰਤੋ ਨਿਕ੍ਖਮਿਤੁਂ ਅਪ੍ਪਦਾਨਟ੍ਠੇਨ ਏਸੋ ਪਲਿਬੋਧੋ.

੩੪. ਚਤੁਤ੍ਥਗਾਥਾਯਤ੍ਥੋ – ਨ ਕੇਵਲਂ ਦਿਟ੍ਠਸੁਤਾਦੀਸੁ ਨ ਨਿਸ੍ਸਯੇਯ੍ਯ, ਅਪਿਚ ਖੋ ਪਨ ਅਸਞ੍ਜਾਤਂ ਉਪਰੂਪਰਿ ਦਿਟ੍ਠਿਮ੍ਪਿ ਲੋਕਸ੍ਮਿਂ ਨ ਕਪ੍ਪਯੇਯ੍ਯ, ਨ ਜਨੇਯ੍ਯਾਤਿ ਵੁਤ੍ਤਂ ਹੋਤਿ. ਕੀਦਿਸਂ? ਞਾਣੇਨ ਵਾ ਸੀਲਵਤੇਨ ਵਾਪਿ, ਸਮਾਪਤ੍ਤਿਞਾਣਾਦਿਞਾਣੇਨ ਵਾ ਸੀਲਵਤੇਨ ਵਾ ਯਾ ਕਪ੍ਪਿਯਤਿ, ਏਤਂ ਦਿਟ੍ਠਿਂ ਨ ਕਪ੍ਪੇਯ੍ਯ. ਨ ਕੇਵਲਞ੍ਚ ਦਿਟ੍ਠਿਂ ਨ ਕਪ੍ਪਯੇਯ੍ਯ, ਅਪਿਚ ਖੋ ਪਨ ਮਾਨੇਨਪਿ ਜਾਤਿਆਦੀਹਿ ਵਤ੍ਥੂਹਿ ਸਮੋਤਿ ਅਤ੍ਤਾਨਮਨੂਪਨੇਯ੍ਯ, ਹੀਨੋ ਨ ਮਞ੍ਞੇਥ ਵਿਸੇਸਿ ਵਾਪੀਤਿ.

ਅਟ੍ਠਸਮਾਪਤ੍ਤਿਞਾਣੇਨ ਵਾਤਿ ਪਠਮਜ੍ਝਾਨਾਦੀਨਂ ਅਟ੍ਠਨ੍ਨਂ ਸਮਾਪਤ੍ਤੀਨਂ ਸਮ੍ਪਯੁਤ੍ਤਪਞ੍ਞਾਯ ਵਾ. ਪਞ੍ਚਾਭਿਞ੍ਞਾਞਾਣੇਨ ਵਾਤਿ ਲੋਕਿਯਾਨਂ ਪਞ੍ਚਨ੍ਨਂ ਅਭਿਞ੍ਞਾਨਂ ਸਮ੍ਪਯੁਤ੍ਤਪਞ੍ਞਾਯ ਵਾ. ਮਿਚ੍ਛਾਞਾਣੇਨ ਵਾਤਿ ਵਿਪਰੀਤਸਭਾਵੇਨ ਪਵਤ੍ਤਾਯ ਪਞ੍ਞਾਯ ਅਮੁਤ੍ਤੇ ਮੁਤ੍ਤਂ ਪਸ੍ਸਾਤਿ ਏਵਂ ਉਪ੍ਪਨ੍ਨੇਨ ਮਿਚ੍ਛਾਞਾਣੇਨ ਵਾ.

੩੫. ਪਞ੍ਚਮਗਾਥਾਯਤ੍ਥੋ – ਏਵਞ੍ਹਿ ਦਿਟ੍ਠਿਂ ਅਕਪ੍ਪੇਨ੍ਤੋ ਅਮਞ੍ਞਮਾਨੋ ਚ ਅਤ੍ਤਂ ਪਹਾਯ ਅਨੁਪਾਦਿਯਾਨੋ ਯਂ ਪੁਬ੍ਬੇ ਗਹਿਤਂ, ਤਂ ਪਹਾਯ ਪਰਂ ਅਗ੍ਗਣ੍ਹਨ੍ਤੋ ਤਸ੍ਮਿਮ੍ਪਿ ਵੁਤ੍ਤਪ੍ਪਕਾਰੇ ਞਾਣੇ ਦੁਵਿਧਂ ਨਿਸ੍ਸਯਂ ਨੋ ਕਰੋਤਿ, ਅਕਰੋਨ੍ਤੋ ਚ ਸ ਵੇ ਵਿਯਤ੍ਤੇਸੁ ਨਾਨਾਦਿਟ੍ਠਿਵਸੇਨ ਭਿਨ੍ਨੇਸੁ ਸਤ੍ਤੇਸੁ ਨ ਵਗ੍ਗਸਾਰੀ ਛਨ੍ਦਾਦਿਵਸੇਨ ਅਗਚ੍ਛਨਧਮ੍ਮੋ ਹੁਤ੍ਵਾ ਦ੍ਵਾਸਟ੍ਠਿਯਾ ਦਿਟ੍ਠੀਸੁ ਕਿਞ੍ਚਿ ਦਿਟ੍ਠਿਂ ਨ ਪਚ੍ਚੇਤਿ, ਨ ਪਚ੍ਚਾਗਚ੍ਛਤੀਤਿ ਵੁਤ੍ਤਂ ਹੋਤਿ.

ਚਤੂਹਿ ਉਪਾਦਾਨੇਹੀਤਿ ਕਾਮੁਪਾਦਾਨਾਦੀਹਿ ਚਤੂਹਿ ਭੁਸਂ ਗਹਣੇਹਿ ਸ ਵੇ ਵਿਯਤ੍ਤੇਸੂਤਿ ਸੋ ਪੁਗ੍ਗਲੋ ਨਿਚ੍ਛਿਤੇਸੁ. ਭਿਨ੍ਨੇਸੂਤਿ ਦ੍ਵਿਧਾ ਭਿਨ੍ਨੇਸੁ.

੩੬. ਇਦਾਨਿ ਯੋ ਸੋ ਇਮਾਯ ਗਾਥਾਯ ਵੁਤ੍ਤੋ ਖੀਣਾਸਵੋ, ਤਸ੍ਸ ਵਣ੍ਣਭਣਨਤ੍ਥਂ ‘‘ਯਸ੍ਸੂਭਯਨ੍ਤੇ’’ਤਿਆਦਿਕਾ ਤਿਸ੍ਸੋ ਗਾਥਾਯੋ ਆਹ. ਤਤ੍ਥ ਪਠਮਗਾਥਾਯ ਯਸ੍ਸੂਭਯਨ੍ਤੇਤਿ ਪੁਬ੍ਬੇ ਵੁਤ੍ਤੇ ਫਸ੍ਸਾਦਿਭੇਦੇ. ਪਣਿਧੀਤਿ ਤਣ੍ਹਾ. ਭਵਾਭਵਾਯਾਤਿ ਪੁਨਪ੍ਪੁਨਭਵਾਯ. ਇਧ ਵਾ ਹੁਰਂ ਵਾਤਿ ਸਕਤ੍ਤਭਾਵਾਦਿਭੇਦੇ ਇਧ ਵਾ ਪਰਤ੍ਤਭਾਵਾਦਿਭੇਦੇ ਪਰਤ੍ਥ ਵਾ.

ਫਸ੍ਸੋ ਏਕੋ ਅਨ੍ਤੋਤਿ ਚਕ੍ਖੁਸਮ੍ਫਸ੍ਸਾਦਿਕੋ ਏਕੋ ਕੋਟ੍ਠਾਸੋ. ਫਸ੍ਸਸਮੁਦਯੋਤਿ ਵਤ੍ਥਾਰਮ੍ਮਣੋ. ਯਤੋ ਸਮੁਦੇਤਿ ਉਪ੍ਪਜ੍ਜਤਿ, ਸੋ ਸਮੁਦਯੋ. ਦੁਤਿਯੋ ਅਨ੍ਤੋਤਿ ਦੁਤਿਯੋ ਕੋਟ੍ਠਾਸੋ. ਅਤੀਤਨ੍ਤਿ ਅਤਿ ਇਤਂ ਅਤੀਤਂ, ਅਤਿਕ੍ਕਨ੍ਤਨ੍ਤਿ ਵੁਤ੍ਤਂ ਹੋਤਿ. ਅਨਾਗਤਨ੍ਤਿ ਨ ਆਗਤਂ, ਅਨੁਪ੍ਪਨ੍ਨਨ੍ਤਿ ਵੁਤ੍ਤਂ ਹੋਤਿ. ਸੁਖਾ ਵੇਦਨਾਦਯੋ ਵਿਸਭਾਗਵਸੇਨ. ਨਾਮਰੂਪਦੁਕਂ ਨਮਨਰੁਪ੍ਪਨਵਸੇਨ. ਅਜ੍ਝਤ੍ਤਿਕਾਦਯੋ ਅਜ੍ਝਤ੍ਤਬਾਹਿਰਵਸੇਨ. ਸਕ੍ਕਾਯਾਦਯੋ ਖਨ੍ਧਪਞ੍ਚਕਾਨਂ ਪਵਤ੍ਤਿਸਮੁਦਯਵਸੇਨ ਵੁਤ੍ਤਾਤਿ ਵੇਦਿਤਬ੍ਬਾ.

ਸਕਤ੍ਤਭਾਵੋਤਿ ਅਤ੍ਤਨੋ ਅਤ੍ਤਭਾਵੋ. ਪਰਤ੍ਤਭਾਵੋਤਿ ਪਰਸ੍ਸ ਅਤ੍ਤਭਾਵੋ.

੩੭. ਦੁਤਿਯਗਾਥਾਯ ਦਿਟ੍ਠੇ ਵਾਤਿ ਦਿਟ੍ਠਸੁਦ੍ਧਿਯਾ ਵਾ. ਏਸ ਨਯੋ ਸੁਤਾਦੀਸੁ. ਸਞ੍ਞਾਤਿ ਸਞ੍ਞਾਸਮੁਟ੍ਠਾਪਿਕਾ ਦਿਟ੍ਠਿ.

ਅਪਰਾਮਸਨ੍ਤਨ੍ਤਿ ਤਣ੍ਹਾਮਾਨਦਿਟ੍ਠੀਹਿ ਨ ਪਰਾਮਸਨ੍ਤਂ. ਅਨਭਿਨਿਵੇਸਨ੍ਤਨ੍ਤਿ ਤੇਹੇਵ ਅਨਭਿਨਿਵਿਸਨ੍ਤਂ.

‘‘ਵਿਨਿਬਦ੍ਧੋ’’ਤਿ ਵਾਤਿ ਮਾਨੇਨ ਵਿਨਿਬਦ੍ਧੋਤਿ ਵਾ. ‘‘ਪਰਾਮਟ੍ਠੋ’’ਤਿ ਵਾਤਿ ਪਰਤੋ ਨਿਚ੍ਚਸੁਖਸੁਭਾਦੀਹਿ ਪਰਾਮਟ੍ਠੋਤਿ ਵਾ. ਵਿਕ੍ਖੇਪਗਤੋਤਿ ਉਦ੍ਧਚ੍ਚਵਸੇਨ. ਅਨਿਟ੍ਠਙ੍ਗਤੋਤਿ ਵਿਚਿਕਿਚ੍ਛਾਵਸੇਨ. ਥਾਮਗਤੋਤਿ ਅਨੁਸਯਵਸੇਨ. ਗਤਿਯਾਤਿ ਗਨ੍ਤਬ੍ਬਵਸੇਨ.

੩੮. ਤਤਿਯਗਾਥਾਯ ਧਮ੍ਮਾਪਿ ਤੇਸਂ ਨ ਪਟਿਚ੍ਛਿਤਾਸੇਤਿ ਦ੍ਵਾਸਟ੍ਠਿਦਿਟ੍ਠਿਗਤਧਮ੍ਮਾਪਿ ਤੇਸਂ ‘‘ਇਦਮੇਵ ਸਚ੍ਚਂ, ਮੋਘਮਞ੍ਞ’’ਨ੍ਤਿ (ਉਦਾ. ੫੪) ਏਵਂ ਨ ਪਟਿਚ੍ਛਿਤਾ. ਪਾਰਙ੍ਗਤੋ ਨ ਪਚ੍ਚੇਤਿ ਤਾਦੀਤਿ ਨਿਬ੍ਬਾਨਪਾਰਂ ਗਤੋ ਤੇਨ ਤੇਨ ਮਗ੍ਗੇਨ ਪਹੀਨੇ ਕਿਲੇਸੇ ਪੁਨ ਨਾਗਚ੍ਛਤਿ ਪਞ੍ਚਹਿ ਚ ਆਕਾਰੇਹਿ ਤਾਦੀ ਹੋਤੀਤਿ. ਸੇਸਂ ਪਾਕਟਮੇਵ.

ਵੀਸਤਿਵਤ੍ਥੁਕਾ ਸਕ੍ਕਾਯਦਿਟ੍ਠੀਤਿ ‘‘ਰੂਪਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿਆਦਿਨਾ (ਪਟਿ. ਮ. ੧.੧੩੨) ਨਯੇਨ ਏਕੇਕਸ੍ਮਿਂ ਖਨ੍ਧੇ ਚਤੂਹਿ ਚਤੂਹਿ ਆਕਾਰੇਹਿ ਪਞ੍ਚਕ੍ਖਨ੍ਧੇ ਪਤਿਟ੍ਠਂ ਕਤ੍ਵਾ ਪਵਤ੍ਤਾ ਵਿਜ੍ਜਮਾਨੇ ਕਾਯੇ ਦਿਟ੍ਠਿ. ਦਸਵਤ੍ਥੁਕਾ ਮਿਚ੍ਛਾਦਿਟ੍ਠੀਤਿ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਯਪ੍ਪਵਤ੍ਤਾ (ਧ. ਸ. ੧੨੨੧) ਦਿਟ੍ਠਿ. ਅਨ੍ਤਗ੍ਗਾਹਿਕਾਦਿਟ੍ਠੀਤਿ ‘‘ਸਸ੍ਸਤੋ ਲੋਕੋ ਇਦਮੇਵ ਸਚ੍ਚਂ, ਮੋਘਮਞ੍ਞ’’ਨ੍ਤਿਆਦਿਨਯਪ੍ਪਵਤ੍ਤਾ (ਮ. ਨਿ. ੩.੨੭) ਏਕੇਕਂ ਅਨ੍ਤਂ ਅਤ੍ਥੀਤਿ ਗਹੇਤ੍ਵਾ ਪਵਤ੍ਤਾ ਦਿਟ੍ਠਿ. ਯਾ ਏਵਰੂਪਾ ਦਿਟ੍ਠੀਤਿ ਇਦਾਨਿ ਵੁਚ੍ਚਮਾਨਾਨਂ ਏਕੂਨਵੀਸਪਦਾਨਂ ਸਾਧਾਰਣਂ ਮੂਲਪਦਂ. ਯਾ ਦਿਟ੍ਠਿ, ਤਦੇਵ ਦਿਟ੍ਠਿਗਤਂ; ਯਾ ਦਿਟ੍ਠਿ, ਤਦੇਵ ਦਿਟ੍ਠਿਗਹਨਨ੍ਤਿ ਸਬ੍ਬੇਸਂ ਸਮ੍ਬਨ੍ਧੋ ਕਾਤਬ੍ਬੋ. ਯਾ ਅਯਾਥਾਵਦਸ੍ਸਨਟ੍ਠੇਨ ਦਿਟ੍ਠਿ, ਤਦੇਵ ਦਿਟ੍ਠੀਸੁ ਗਤਂ ਦਸ੍ਸਨਂ ਦ੍ਵਾਸਟ੍ਠਿਦਿਟ੍ਠਿਯਾ ਅਨ੍ਤੋਗਤਤ੍ਤਾਤਿ ਦਿਟ੍ਠਿਗਤਂ. ਹੇਟ੍ਠਾਪਿਸ੍ਸ ਅਤ੍ਥੋ ਵੁਤ੍ਤੋਯੇਵ.

ਦ੍ਵਿਨ੍ਨਂ ਅਨ੍ਤਾਨਂ ਏਕਨ੍ਤਗਤਤ੍ਤਾਤਿਪਿ ਦਿਟ੍ਠਿਗਤਂ. ਤਤ੍ਥ ਸਸ੍ਸਤੋਤਿ ਨਿਚ੍ਚੋ. ਲੋਕੋਤਿ ਅਤ੍ਤਾ. ‘‘ਇਧ ਸਰੀਰਂਯੇਵ ਨਸ੍ਸਤਿ, ਅਤ੍ਤਾ ਪਨ ਇਧ ਪਰਤ੍ਥ ਚ ਸੋਯੇਵਾ’’ਤਿ ਮਞ੍ਞਨ੍ਤਿ. ਸੋ ਹਿ ਸਾਮਞ੍ਞੇਵ ਆਲੋਕੇਤੀਤਿ ਕਤ੍ਵਾ ਲੋਕੋਤਿ ਮਞ੍ਞਤਿ. ਅਸਸ੍ਸਤੋਤਿ ਅਨਿਚ੍ਚੋ. ਅਤ੍ਤਾ ਸਰੀਰੇਨੇਵ ਸਹ ਨਸ੍ਸਤੀਤਿ ਮਞ੍ਞਨ੍ਤਿ. ਅਨ੍ਤਵਾਤਿ ਪਰਿਤ੍ਤੇ ਕਸਿਣੇ ਝਾਨਂ ਉਪ੍ਪਾਦੇਤ੍ਵਾ ਤਂ ਪਰਿਤ੍ਤਕਸਿਣਾਰਮ੍ਮਣਂ ਚੇਤਨਂ ‘‘ਸਪਰਿਯਨ੍ਤੋ ਅਤ੍ਤਾ’’ਤਿ ਮਞ੍ਞਨ੍ਤਿ. ਅਨਨ੍ਤ ਵਾਤਿ ਨ ਅਨ੍ਤਵਾ ਅਪ੍ਪਮਾਣੇ ਕਸਿਣੇ ਝਾਨਂ ਉਪ੍ਪਾਦੇਤ੍ਵਾ ਤਂ ਅਪ੍ਪਮਾਣਕਸਿਣਾਰਮ੍ਮਣਂ ਚੇਤਨਂ ‘‘ਅਪਰਿਯਨ੍ਤੋ ਅਤ੍ਤਾ’’ਤਿ ਮਞ੍ਞਨ੍ਤਿ. ਤਂ ਜੀਵਂ ਤਂ ਸਰੀਰਨ੍ਤਿ ਜੀਵੋ ਚ ਸਰੀਰਞ੍ਚ ਤਂਯੇਵ. ਜੀਵੋਤਿ ਅਤ੍ਤਾ, ਲਿਙ੍ਗਵਿਪਲ੍ਲਾਸੇਨ ਨਪੁਂਸਕਵਚਨਂ ਕਤਂ. ਸਰੀਰਨ੍ਤਿ ਰਾਸਟ੍ਠੇਨ ਖਨ੍ਧਪਞ੍ਚਕਂ. ਅਞ੍ਞਂ ਜੀਵਂ ਅਞ੍ਞਂ ਸਰੀਰਨ੍ਤਿ ਅਞ੍ਞੋ ਜੀਵੋ ਅਞ੍ਞਂ ਖਨ੍ਧਪਞ੍ਚਕਂ. ਹੋਤਿ ਤਥਾਗਤੋ ਪਰਂ ਮਰਣਾਤਿ ਖਨ੍ਧਾ ਇਧੇਵ ਵਿਨਸ੍ਸਨ੍ਤਿ, ਸਤ੍ਤੋ ਮਰਣਤੋ ਪਰਂ ਹੋਤਿ ਵਿਜ੍ਜਤਿ ਨ ਨਸ੍ਸਤਿ, ਤਥਾਗਤੋਤਿ ਚੇਤਂ ਸਤ੍ਤਾਧਿਵਚਨਨ੍ਤਿ. ਕੇਚਿ ਪਨ ‘‘ਤਥਾਗਤੋਤਿ ਅਰਹਾ’’ਤਿ ਵਦਨ੍ਤਿ. ਇਮੇ ਨ ਹੋਤੀਤਿ ਪਕ੍ਖੇ ਦੋਸਂ ਦਿਸ੍ਵਾ ਏਵਂ ਗਣ੍ਹਨ੍ਤਿ. ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਖਨ੍ਧਾਪਿ ਇਧੇਵ ਨਸ੍ਸਨ੍ਤਿ, ਤਥਾਗਤੋ ਚ ਮਰਣਤੋ ਪਰਂ ਨ ਹੋਤਿ ਉਚ੍ਛਿਜ੍ਜਤਿ. ਇਮੇ ਹੋਤੀਤਿ ਪਕ੍ਖੇ ਦੋਸਂ ਦਿਸ੍ਵਾ ਏਵਂ ਗਣ੍ਹਨ੍ਤਿ. ਹੋਤਿ ਚ ਨ ਚ ਹੋਤੀਤਿ ਇਮੇ ਏਕੇਕਪਕ੍ਖਪਰਿਗ੍ਗਹੇ ਦੋਸਂ ਦਿਸ੍ਵਾ ਉਭਯਪਕ੍ਖਂ ਗਣ੍ਹਨ੍ਤਿ. ਨੇਵ ਹੋਤਿ ਨ ਨ ਹੋਤੀਤਿ ਇਮੇ ਉਭਯਪਕ੍ਖਪਰਿਗ੍ਗਹੇ ਉਭਯਦੋਸਾਪਤ੍ਤਿਂ ਦਿਸ੍ਵਾ ‘‘ਹੋਤਿ ਚ ਨ ਹੋਤੀ’’ਤਿ ਚ ‘‘ਨੇਵ ਹੋਤਿ ਨ ਨ ਹੋਤੀ’’ਤਿ ਚ ਅਮਰਾਵਿਕ੍ਖੇਪਪਕ੍ਖਂ ਗਣ੍ਹਨ੍ਤਿ.

ਅਯਂ ਪਨੇਤ੍ਥ ਅਟ੍ਠਕਥਾਨਯੋ (ਪਟਿ. ਮ. ਅਟ੍ਠ. ੨.੧.੧੧੩) – ‘‘ਸਸ੍ਸਤੋ ਲੋਕੋ’’ਤਿ ਵਾਤਿਆਦੀਹਿ ਦਸਹਾਕਾਰੇਹਿ ਦਿਟ੍ਠਿਪਭੇਦੋਵ ਵੁਤ੍ਤੋ. ਤਤ੍ਥ ਸਸ੍ਸਤੋਲੋਕੋਤਿ ਚ ਖਨ੍ਧਪਞ੍ਚਕਂ ਲੋਕੋਤਿ ਗਹੇਤ੍ਵਾ ‘‘ਅਯਂ ਲੋਕੋ ਨਿਚ੍ਚੋ ਧੁਵੋ ਸਬ੍ਬਕਾਲਿਕੋ’’ਤਿ ਗਣ੍ਹਨ੍ਤਸ੍ਸ ਸਸ੍ਸਤਨ੍ਤਿ ਗਹਣਾਕਾਰਪ੍ਪਵਤ੍ਤਾ ਦਿਟ੍ਠਿ. ਅਸਸ੍ਸਤੋਤਿ ਤਮੇਵ ਲੋਕਂ ‘‘ਉਚ੍ਛਿਜ੍ਜਤਿ ਵਿਨਸ੍ਸਤੀ’’ਤਿ ਗਣ੍ਹਨ੍ਤਸ੍ਸ ਉਚ੍ਛੇਦਗ੍ਗਹਣਾਕਾਰਪ੍ਪਵਤ੍ਤਾ ਦਿਟ੍ਠਿ. ਅਨ੍ਤਵਾਤਿ ਪਰਿਤ੍ਤਕਸਿਣਲਾਭਿਨੋ ਸੁਪ੍ਪਮਤ੍ਤੇ ਵਾ ਸਰਾਵਮਤ੍ਤੇ ਵਾ ਕਸਿਣੇ ਸਮਾਪਨ੍ਨਸ੍ਸ ਅਨ੍ਤੋਸਮਾਪਤ੍ਤਿਯਂ ਪਵਤ੍ਤਿਤਰੂਪਾਰੂਪਧਮ੍ਮੇ ‘‘ਲੋਕੋ’’ਤਿ ਚ ਕਸਿਣਪਰਿਚ੍ਛੇਦਨ੍ਤੇਨ ‘‘ਅਨ੍ਤਵਾ’’ਤਿ ਚ ਗਣ੍ਹਨ੍ਤਸ੍ਸ ‘‘ਅਨ੍ਤਵਾ ਲੋਕੋ’’ਤਿ ਗਹਣਾਕਾਰਪ੍ਪਵਤ੍ਤਾ ਦਿਟ੍ਠਿ. ਸਾ ਸਸ੍ਸਤਦਿਟ੍ਠਿਪਿ ਹੋਤਿ ਉਚ੍ਛੇਦਦਿਟ੍ਠਿਪਿ. ਵਿਪੁਲਕਸਿਣਲਾਭਿਨੋ ਪਨ ਤਸ੍ਮਿਂ ਕਸਿਣੇ ਸਮਾਪਨ੍ਨਸ੍ਸ ਅਨ੍ਤੋਸਮਾਪਤ੍ਤਿਯਂ ਪਵਤ੍ਤਿਤਰੂਪਾਰੂਪਧਮ੍ਮੇ ‘‘ਲੋਕੋ’’ਤਿ ਚ ਕਸਿਣਪਰਿਚ੍ਛੇਦਨ੍ਤੇਨ ਚ ‘‘ਅਨਨ੍ਤੋ’’ਤਿ ਗਣ੍ਹਨ੍ਤਸ੍ਸ ‘‘ਅਨਨ੍ਤਵਾ ਲੋਕੋ’’ਤਿ ਗਹਣਾਕਾਰਪ੍ਪਵਤ੍ਤਾ ਦਿਟ੍ਠਿ. ਸਾ ਸਸ੍ਸਤਦਿਟ੍ਠਿ ਹੋਤਿ, ਉਚ੍ਛੇਦਦਿਟ੍ਠਿਪਿ. ਤਂ ਜੀਵਂ ਤਂ ਸਰੀਰਨ੍ਤਿ ਭੇਦਨਧਮ੍ਮਸ੍ਸ ਸਰੀਰਸ੍ਸੇਵ ‘‘ਜੀਵ’’ਨ੍ਤਿ ਗਹਿਤਤ੍ਤਾ ‘‘ਸਰੀਰੇ ਉਚ੍ਛਿਜ੍ਜਮਾਨੇ ਜੀਵਮ੍ਪਿ ਉਚ੍ਛਿਜ੍ਜਤੀ’’ਤਿ ਉਚ੍ਛੇਦਗ੍ਗਹਣਾਕਾਰਪ੍ਪਵਤ੍ਤਾ ਦਿਟ੍ਠਿ. ਦੁਤਿਯਪਦੇਨ ਸਰੀਰਤੋ ਅਞ੍ਞਸ੍ਸ ਜੀਵਸ੍ਸ ਗਹਿਤਤ੍ਤਾ ‘‘ਸਰੀਰੇ ਚ ਉਚ੍ਛਿਜ੍ਜਮਾਨੇਪਿ ਜੀਵਂ ਨ ਉਚ੍ਛਿਜ੍ਜਤੀ’’ਤਿ ਸਸ੍ਸਤਗਹਣਾਕਾਰਪ੍ਪਵਤ੍ਤਾ ਦਿਟ੍ਠਿ. ਹੋਤਿ ਤਥਾਗਤੋਤਿਆਦੀਸੁ ‘‘ਸਤ੍ਤੋ ਤਥਾਗਤੋ ਨਾਮ, ਸੋ ਪਰਂ ਮਰਣਾ ਹੋਤੀ’’ਤਿ ਗਣ੍ਹਤੋ ਪਠਮਾ ਸਸ੍ਸਤਦਿਟ੍ਠਿ. ‘‘ਨ ਹੋਤੀ’’ਤਿ ਗਣ੍ਹਤੋ ਦੁਤਿਯਾ ਉਚ੍ਛੇਦਦਿਟ੍ਠਿ. ‘‘ਹੋਤਿ ਚ ਨ ਚ ਹੋਤੀ’’ਤਿ ਗਣ੍ਹਤੋ ਤਤਿਯਾ ਏਕਚ੍ਚਸਸ੍ਸਤਦਿਟ੍ਠਿ. ‘‘ਨੇਵ ਹੋਤਿ ਨ ਨ ਹੋਤੀ’’ਤਿ ਗਣ੍ਹਤੋ ਚਤੁਤ੍ਥਾ ਅਮਰਾਵਿਕ੍ਖੇਪਦਿਟ੍ਠੀਤਿ ਵੁਤ੍ਤਪ੍ਪਕਾਰਾ ਦਸਵਿਧਾ ਦਿਟ੍ਠਿ. ਯਥਾਯੋਗਂ ਭਵਦਿਟ੍ਠਿ ਚ ਵਿਭਵਦਿਟ੍ਠਿ ਚਾਤਿ ਦ੍ਵਿਧਾ ਹੋਤਿ. ਤਾਸੁ ਏਕਾਪਿ ਤੇਸਂ ਖੀਣਾਸਵਾਨਂ ਨ ਪਟਿਚ੍ਛਿਤਾਤਿ ਅਤ੍ਥੋ.

ਯੇ ਕਿਲੇਸਾਤਿ ਯੇ ਕਿਲੇਸਾ ਸੋਤਾਪਤ੍ਤਿਮਗ੍ਗੇਨ ਪਹੀਨਾ, ਤੇ ਕਿਲੇਸੇ. ਨ ਪੁਨੇਤੀਤਿ ਨ ਪੁਨ ਏਤਿ. ਨ ਪਚ੍ਚੇਤੀਤਿ ਪੁਨ ਨਿਬ੍ਬਤ੍ਤੇਤ੍ਵਾ ਨ ਪਟਿਏਤਿ, ਨ ਪਚ੍ਚਾਗਚ੍ਛਤੀਤਿ ਪਚ੍ਚਭਵੇ ਨਾਗਚ੍ਛਤਿ. ਪਞ੍ਚਹਾਕਾਰੇਹਿ ਤਾਦੀਤਿ ਪਞ੍ਚਹਿ ਕਾਰਣੇਹਿ ਕੋਟ੍ਠਾਸੇਹਿ ਵਾ ਸਦਿਸੋ. ਇਟ੍ਠਾਨਿਟ੍ਠੇ ਤਾਦੀਤਿ ਇਟ੍ਠਾਰਮ੍ਮਣੇ ਚ ਅਨਿਟ੍ਠਾਰਮ੍ਮਣੇ ਚ ਅਨੁਨਯਪਟਿਘਂ ਮੁਞ੍ਚਿਤ੍ਵਾ ਠਿਤਤ੍ਤਾ ਦ੍ਵੀਸੁ ਸਦਿਸੋ. ਚਤ੍ਤਾਵੀਤਿ ਕਿਲੇਸੇ ਚਜਿਤਵਾ. ਤਿਣ੍ਣਾਵੀਤਿ ਸਂਸਾਰਂ ਅਤਿਕ੍ਕਮਿਤਵਾ. ਮੁਤ੍ਤਾਵੀਤਿ ਰਾਗਾਦਿਤੋ ਮੁਤ੍ਤਵਾ. ਤਂਨਿਦ੍ਦੇਸਾ ਤਾਦੀਤਿ ਤੇਨ ਤੇਨ ਸੀਲਸਦ੍ਧਾਦਿਨਾ ਨਿਦ੍ਦਿਸਿਤ੍ਵਾ ਨਿਦ੍ਦਿਸਿਤ੍ਵਾ ਕਥੇਤਬ੍ਬਤੋ ਸਦਿਸੋ.

ਤਂ ਪਞ੍ਚਵਿਧਂ ਵਿਤ੍ਥਾਰੇਤ੍ਵਾ ਕਥੇਤੁਕਾਮੋ ‘‘ਕਥਂ ਅਰਹਾ ਇਟ੍ਠਾਨਿਟ੍ਠੇ ਤਾਦੀ’’ਤਿਆਦਿਮਾਹ. ਤਤ੍ਥ ਲਾਭੇਪੀਤਿ ਚਤੁਨ੍ਨਂ ਪਚ੍ਚਯਾਨਂ ਲਾਭੇਪਿ. ਅਲਾਭੇਪੀਤਿ ਤੇਸਂ ਅਲਾਭੇਪਿ. ਯਸੇਪੀਤਿ ਪਰਿਵਾਰੇਪਿ. ਅਯਸੇਪੀਤਿ ਪਰਿਵਾਰਵਿਪਤ੍ਤਿਯਾਪਿ. ਪਸਂਸਾਯਪੀਤਿ ਵਣ੍ਣਭਣਨਾਯਪਿ. ਨਿਨ੍ਦਾਯਪੀਤਿ ਗਰਹਾਯਪਿ. ਸੁਖੇਪੀਤਿ ਕਾਯਿਕਸੁਖੇਪਿ. ਦੁਕ੍ਖੇਪੀਤਿ ਕਾਯਿਕਦੁਕ੍ਖੇਪਿ. ਏਕਞ੍ਚੇ ਬਾਹਂ ਗਨ੍ਧੇਨ ਲਿਮ੍ਪੇਯ੍ਯੁਨ੍ਤਿ ਸਚੇ ਏਕਂ ਬਾਹਂ ਚਤੁਜਾਤਿਯਗਨ੍ਧੇਨ ਲੇਪਂ ਉਪਰੂਪਰਿ ਦਦੇਯ੍ਯੁਂ. ਵਾਸਿਯਾ ਤਚ੍ਛੇਯ੍ਯੁਨ੍ਤਿ ਯਦਿ ਏਕਂ ਬਾਹਂ ਵਡ੍ਢਕੀ ਵਾਸਿਯਾ ਤਚ੍ਛੇਤ੍ਵਾ ਤਚ੍ਛੇਤ੍ਵਾ ਤਨੁਂ ਕਰੇਯ੍ਯੁਂ. ਅਮੁਸ੍ਮਿਂ ਨਤ੍ਥਿ ਰਾਗੋਤਿ ਅਮੁਸ੍ਮਿਂ ਗਨ੍ਧਲੇਪਨੇ ਸਿਨੇਹੋ ਨਤ੍ਥਿ ਨ ਸਂਵਿਜ੍ਜਤਿ. ਅਮੁਸ੍ਮਿਂ ਨਤ੍ਥਿ ਪਟਿਘਨ੍ਤਿ ਅਮੁਸ੍ਮਿਂ ਵਾਸਿਯਾ ਤਚ੍ਛਨੇ ਪਟਿਹਨਨਸਙ੍ਖਾਤਂ ਪਟਿਘਂ ਕੋਪਂ ਨਤ੍ਥਿ ਨ ਸਂਵਿਜ੍ਜਤਿ. ਅਨੁਨਯਪਟਿਘਵਿਪ੍ਪਹੀਨੋਤਿ ਸਿਨੇਹਞ੍ਚ ਕੋਪਞ੍ਚ ਪਜਹਿਤ੍ਵਾ ਠਿਤੋ. ਉਗ੍ਘਾਤਿਨਿਘਾਤਿਵੀਤਿਵਤ੍ਤੋਤਿ ਅਨੁਨਯਵਸੇਨ ਅਨੁਗ੍ਗਹਞ੍ਚ ਪਟਿਘਵਸੇਨ ਨਿਗ੍ਗਹਞ੍ਚ ਅਤਿਕ੍ਕਮਿਤ੍ਵਾ ਠਿਤੋ. ਅਨੁਰੋਧਵਿਰੋਧਸਮਤਿਕ੍ਕਨ੍ਤੋਤਿ ਅਨੁਨਯਞ੍ਚ ਪਟਿਘਞ੍ਚ ਸਮ੍ਮਾ ਅਤਿਕ੍ਕਨ੍ਤੋ.

ਸੀਲੇ ਸਤੀਤਿ ਸੀਲੇ ਸਂਵਿਜ੍ਜਮਾਨੇ. ਸੀਲਵਾਤਿ ਸੀਲਸਮ੍ਪਨ੍ਨੋ. ਤੇਨ ਨਿਦ੍ਦੇਸਂ ਕਥਨਂ ਲਭਤੀਤਿ ਤਾਦੀ. ਸਦ੍ਧਾਯ ਸਤਿ ਸਦ੍ਧੋਤਿ ਏਵਮਾਦੀਸੁਪਿ ਏਸੇਵ ਨਯੋ.

ਸਦ੍ਧਮ੍ਮਪ੍ਪਜ੍ਜੋਤਿਕਾਯ ਮਹਾਨਿਦ੍ਦੇਸਟ੍ਠਕਥਾਯ

ਪਰਮਟ੍ਠਕਸੁਤ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.