੩. ਦੁਟ੍ਠਟ੍ਠਕਸੁਤ੍ਤਨਿਦ੍ਦੇਸਵਣ੍ਣਨਾ
੧੫. ਦੁਟ੍ਠਟ੍ਠਕੇ ਪਠਮਗਾਥਾਯਂ ਤਾਵ ਤਤ੍ਥ ਵਦਨ੍ਤੀਤਿ ਭਗਵਨ੍ਤਂ ਭਿਕ੍ਖੁਸਙ੍ਘਞ੍ਚ ਉਪਵਦਨ੍ਤਿ. ਦੁਟ੍ਠਮਨਾਪਿ ਏਕੇ, ਅਥੋਪਿ ਵੇ ਸਚ੍ਚਮਨਾਤਿ ਏਕਚ੍ਚੇ ਦੁਟ੍ਠਚਿਤ੍ਤਾ, ਏਕਚ੍ਚੇ ਤਥਸਞ੍ਞਿਨੋਪਿ ਹੁਤ੍ਵਾ ਤਿਤ੍ਥਿਯਾ ਤੁਟ੍ਠਚਿਤ੍ਤਾ, ਯੇ ਤੇਸਂ ਸੁਤ੍ਵਾ ਸਦ੍ਦਹਿਂਸੁ, ਤੇ ਸਚ੍ਚਮਨਾਤਿ ਅਧਿਪ੍ਪਾਯੋ. ਵਾਦਞ੍ਚ ਜਾਤਨ੍ਤਿ ਏਤਂ ਅਕ੍ਕੋਸਵਾਦਂ ਉਪ੍ਪਨ੍ਨਂ. ਮੁਨਿ ਨੋ ਉਪੇਤੀਤਿ ਅਕਾਰਕਤਾਯ ਚ ਅਕੁਪ੍ਪਨਤਾਯ ਚ ਬੁਦ੍ਧਮੁਨਿ ਨ ਉਪੇਤਿ. ਤਸ੍ਮਾ ਮੁਨੀ ਨਤ੍ਥਿ ਖਿਲੋ ਕੁਹਿਞ੍ਚੀਤਿ ਤੇਨ ਕਾਰਣੇਨ ਅਯਂ ਮੁਨਿ, ਰਾਗਾਦਿਖਿਲੇਹਿ ਨਤ੍ਥਿ ਖਿਲੋ ਕੁਹਿਞ੍ਚੀਤਿ ਵੇਦਿਤਬ੍ਬੋ.
ਦੁਟ੍ਠਮਨਾਤਿ ਉਪ੍ਪਨ੍ਨੇਹਿ ਦੋਸੇਹਿ ਦੂਸਿਤਚਿਤ੍ਤਾ. ਵਿਰੁਦ੍ਧਮਨਾਤਿ ਤੇਹਿ ਕਿਲੇਸੇਹਿ ਕੁਸਲਸ੍ਸ ਦ੍ਵਾਰਂ ਅਦਤ੍ਵਾ ਆਵਰਿਤਚਿਤ੍ਤਾ. ਪਟਿਵਿਰੁਦ੍ਧਮਨਾਤਿ ਉਪਸਗ੍ਗਵਸੇਨ ਪਦਂ ਵਡ੍ਢਿਤਂ. ਆਹਤਮਨਾਤਿ ਪਟਿਘੇਨ ਆਹਤਂ ਚਿਤ੍ਤਂ ਏਤੇਸਨ੍ਤਿ ਆਹਤਮਨਾ. ਪਚ੍ਚਾਹਤਮਨਾਤਿ ਉਪਸਗ੍ਗਵਸੇਨੇਵ. ਆਘਾਤਿਤਮਨਾਤਿ ਵਿਹਿਂਸਾਵਸੇਨ ਆਘਾਤਿਤਂ ਮਨਂ ਏਤੇਸਨ੍ਤਿ ਆਘਾਤਿਤਮਨਾ. ਪਚ੍ਚਾਘਾਤਿਤਮਨਾਤਿ ਉਪਸਗ੍ਗਵਸੇਨੇਵ. ਅਥ ਵਾ ‘‘ਕੋਧਵਸੇਨ ਦੁਟ੍ਠਮਨਾ, ਉਪਨਾਹਵਸੇਨ ਪਦੁਟ੍ਠਮਨਾ, ਮਕ੍ਖਵਸੇਨ ਵਿਰੁਦ੍ਧਮਨਾ, ਪਲ਼ਾਸਵਸੇਨ ਪਟਿਵਿਰੁਦ੍ਧਮਨਾ, ਦੋਸਵਸੇਨ ਆਹਤਪਚ੍ਚਾਹਤਮਨਾ, ਬ੍ਯਾਪਾਦਵਸੇਨ ਆਘਾਤਿਤਪਚ੍ਚਾਘਾਤਿਤਮਨਾ. ਪਚ੍ਚਯਾਨਂ ਅਲਾਭੇਨ ਦੁਟ੍ਠਮਨਾ ਪਦੁਟ੍ਠਮਨਾ, ਅਯਸੇਨ ਵਿਰੁਦ੍ਧਮਨਾ ਪਟਿਵਿਰੁਦ੍ਧਮਨਾ, ਗਰਹੇਨ ਆਹਤਪਚ੍ਚਾਹਤਮਨਾ, ਦੁਕ੍ਖਵੇਦਨਾਸਮਙ੍ਗੀਭਾਵੇਨ ਆਘਾਤਿਤਪਚ੍ਚਾਘਾਤਿਤਮਨਾ’’ਤਿ ਏਵਮਾਦਿਨਾ ਨਯੇਨ ਏਕੇ ਵਣ੍ਣਯਨ੍ਤਿ. ਉਪਵਦਨ੍ਤੀਤਿ ਗਰਹਂ ਉਪ੍ਪਾਦੇਨ੍ਤਿ. ਅਭੂਤੇਨਾਤਿ ਅਸਂਵਿਜ੍ਜਮਾਨੇਨ.
ਸਦ੍ਦਹਨ੍ਤਾਤਿ ਪਸਾਦਵਸੇਨ ਸਦ੍ਧਂ ਉਪ੍ਪਾਦੇਨ੍ਤਾ. ਓਕਪ੍ਪੇਨ੍ਤਾਤਿ ਗੁਣਵਸੇਨ ਓਤਰਿਤ੍ਵਾ ਅਵਕਪ੍ਪਯਨ੍ਤਾ. ਅਧਿਮੁਚ੍ਚਨ੍ਤਾਤਿ ਸਮ੍ਪਸਾਦਨਵਸੇਨ ਸਨ੍ਨਿਟ੍ਠਾਨਂ ਕਤ੍ਵਾ ਤੇਸਂ ਕਥਂ ਅਧਿਵਾਸੇਨ੍ਤਾ. ਸਚ੍ਚਮਨਾਤਿ ਤਚ੍ਛਮਨਾ. ਸਚ੍ਚਸਞ੍ਞਿਨੋਤਿ ਤਚ੍ਛਸਞ੍ਞਿਨੋ. ਤਥਮਨਾਤਿ ਅਵਿਪਰੀਤਮਨਾ. ਭੂਤਮਨਾਤਿ ਭੂਤਤ੍ਥਮਨਾ. ਯਾਥਾਵਮਨਾਤਿ ਨਿਚ੍ਚਲਮਨਾ. ਅਵਿਪਰੀਤਮਨਾਤਿ ਨਿਚ੍ਛਯਮਨਾ. ਤਤ੍ਥ ‘‘ਸਚ੍ਚਮਨਾ ਸਚ੍ਚਸਞ੍ਞਿਨੋ’’ਤਿ ਸਚ੍ਚਵਾਦਿਗੁਣਂ, ‘‘ਤਥਮਨਾ ਤਥਸਞ੍ਞਿਨੋ’’ਤਿ ਸਚ੍ਚਸਦ੍ਧਾਗੁਣਂ, ‘‘ਭੂਤਮਨਾ ਭੂਤਸਞ੍ਞਿਨੋ’’ਤਿ ਠਿਤਗੁਣਂ, ‘‘ਯਾਥਾਵਮਨਾ ਯਾਥਾਵਸਞ੍ਞਿਨੋ’’ਤਿ ਪਚ੍ਚਯਿਕਗੁਣਂ, ‘‘ਅਵਿਪਰੀਤਮਨਾ ਅਵਿਪਰੀਤਸਞ੍ਞਿਨੋ’’ਤਿ ਅਵਿਸਂਵਾਦਗੁਣਂ ਕਥਿਤਨ੍ਤਿ ਞਾਤਬ੍ਬਂ.
ਪਰਤੋਘੋਸੋਤਿ ਅਞ੍ਞੇਸਂ ਸਨ੍ਤਿਕਾ ਉਪ੍ਪਨ੍ਨਸਦ੍ਦੋ. ਅਕ੍ਕੋਸੋਤਿ ਜਾਤਿਆਦੀਸੁ ਦਸਸੁ ਅਕ੍ਕੋਸੇਸੁ ਅਞ੍ਞਤਰੋ. ਯੋ ਵਾਦਂ ਉਪੇਤੀਤਿ ਯੋ ਪੁਗ੍ਗਲੋ ਉਪਵਾਦਂ ਉਪਗਚ੍ਛਤਿ. ਕਾਰਕੋ ਵਾਤਿ ਕਤਦੋਸੋ ਵਾ. ਕਾਰਕਤਾਯਾਤਿ ਦੋਸਸ੍ਸ ਕਤਭਾਵੇਨ ਵੁਚ੍ਚਮਾਨੋਤਿ ਕਥਿਯਮਾਨੋ. ਉਪਵਦਿਯਮਾਨੋਤਿ ਦੋਸਂ ਉਪਵਜ੍ਜਮਾਨੋ. ਕੁਪ੍ਪਤੀਤਿ ਕੋਪਂ ਕਰੋਤਿ.
ਖੀਲਜਾਤਤਾਪਿ ਨਤ੍ਥੀਤਿ ਚਿਤ੍ਤਬਨ੍ਧਭਾਵਚਿਤ੍ਤਕਚਵਰਭਾਵਸਙ੍ਖਾਤਂ ਪਟਿਘਖਿਲਂ ਜਾਤਂ ਅਸ੍ਸਾਤਿ ਖਿਲਜਾਤੋ, ਤਸ੍ਸ ਭਾਵੋ ਖਿਲਜਾਤਤਾ, ਤਾਪਿ ਨਤ੍ਥਿ ਨ ਸਨ੍ਤਿ. ਪਞ੍ਚਪਿ ਚੇਤੋਖਿਲਾਤਿ ਕਾਮੇ ਅਵੀਤਰਾਗੋ, ਕਾਯੇ ਅਵੀਤਰਾਗੋ, ਰੂਪੇ ਅਵੀਤਰਾਗੋ, ਯਾਵਦਤ੍ਥਂ ਉਦਰਾਵਦੇਹਕਂ ਭੁਞ੍ਜਿਤ੍ਵਾ ਸੇਯ੍ਯਸੁਖਂ ਪਸ੍ਸਸੁਖਂ ਮਿਦ੍ਧਸੁਖਂ ਅਨੁਯੁਤ੍ਤੋ ਵਿਹਰਤਿ, ਅਞ੍ਞਤਰਂ ਦੇਵਨਿਕਾਯਂ ਪਣਿਧਾਯ ਬ੍ਰਹ੍ਮਚਰਿਯਂ ਚਰਤਿ ‘‘ਇਮਿਨਾਹਂ ਸੀਲੇਨ ਵਾ ਵਤੇਨ ਵਾ ਤਪੇਨ ਵਾ ਬ੍ਰਹ੍ਮਚਰਿਯੇਨ ਵਾ ਦੇਵੋ ਵਾ ਭਵਿਸ੍ਸਾਮਿ, ਦੇਵਞ੍ਞਤਰੋ ਵਾ’’ਤਿ (ਮ. ਨਿ. ੧.੧੮੬) ਏਵਰੂਪਾ ਪਞ੍ਚਪਿ ਚਿਤ੍ਤਸ੍ਸ ਬਨ੍ਧਭਾਵਕਚਵਰਭਾਵਸਙ੍ਖਾਤਾ ਚੇਤੋਖਿਲਾ ਨਤ੍ਥਿ.
੧੬. ਇਮਞ੍ਚ ਗਾਥਂ ਵਤ੍ਵਾ ਭਗਵਾ ਆਨਨ੍ਦਤ੍ਥੇਰਂ ਪੁਚ੍ਛਿ – ‘‘ਏਵਂ ਖੁਂਸੇਤ੍ਵਾ ਵਮ੍ਭੇਤ੍ਵਾ ਵੁਚ੍ਚਮਾਨਾ ਭਿਕ੍ਖੂ, ਆਨਨ੍ਦ, ਕਿਂ ਵਦਨ੍ਤੀ’’ਤਿ, ‘‘ਨ ਕਿਞ੍ਚਿ ਭਗਵਾ’’ਤਿ. ‘‘ਨ, ਆਨਨ੍ਦ, ‘ਅਹਂ ਸੀਲਵਾ’ਤਿ ਸਬ੍ਬਤ੍ਥ ਤੁਣ੍ਹੀ ਭਵਿਤਬ੍ਬਂ. ਲੋਕੇ ਹਿ ਨਾਭਾਸਮਾਨਂ ਜਾਨਨ੍ਤਿ, ਮਿਸ੍ਸਂ ਬਾਲੇਹਿ ਪਣ੍ਡਿਤ’’ਨ੍ਤਿ (ਸਂ. ਨਿ. ੨.੨੪੧) ਵਤ੍ਵਾ ‘‘ਭਿਕ੍ਖੂ, ਆਨਨ੍ਦ, ਤੇ ਮਨੁਸ੍ਸੇ ਏਵਂ ਪਟਿਚੋਦੇਨ੍ਤੂ’’ਤਿ ਧਮ੍ਮਦੇਸਨਤ੍ਥਾਯ ‘‘ਅਭੂਤਵਾਦੀ ਨਿਰਯਂ ਉਪੇਤੀ’’ਤਿ (ਧ. ਪ. ੩੦੬; ਉਦਾ. ੩੮; ਇਤਿਵੁ. ੪੮; ਸੁ. ਨਿ. ੬੬੬) ਇਮਂ ਗਾਥਂ ਅਭਾਸਿ. ਥੇਰੋ ਤਂ ਉਗ੍ਗਹੇਤ੍ਵਾ ਭਿਕ੍ਖੂ ਆਹ – ‘‘ਮਨੁਸ੍ਸਾ ਤੁਮ੍ਹੇਹਿ ਇਮਾਯ ਗਾਥਾਯ ਪਟਿਚੋਦੇਤਬ੍ਬਾ’’ਤਿ. ਭਿਕ੍ਖੂ ਤਥਾ ਅਕਂਸੁ. ਪਣ੍ਡਿਤਮਨੁਸ੍ਸਾ ਤੁਣ੍ਹੀ ਅਹੇਸੁਂ. ਰਾਜਾਪਿ ਰਾਜਪੁਰਿਸੇ ਸਬ੍ਬਤ੍ਥ ਪੇਸੇਤ੍ਵਾ ਯੇਸਂ ਧੁਤ੍ਤਾਨਂ ਲਞ੍ਜਂ ਦਤ੍ਵਾ ਤਿਤ੍ਥਿਯਾ ਤਂ ਮਾਰਾਪੇਸੁਂ, ਤੇ ਗਹੇਤ੍ਵਾ ਨਿਗ੍ਗਯ੍ਹ ਤਂ ਪਵਤ੍ਤਿਂ ਞਤ੍ਵਾ ਤਿਤ੍ਥਿਯੇ ਪਰਿਭਾਸਿ. ਮਨੁਸ੍ਸਾਪਿ ਤਿਤ੍ਥਿਯੇ ਦਿਸ੍ਵਾ ਲੇਡ੍ਡੁਨਾ ਹਨਨ੍ਤਿ, ਪਂਸੁਨਾ ਓਕਿਰਨ੍ਤਿ ‘‘ਭਗਵਤੋ ਅਯਸਂ ਉਪ੍ਪਾਦੇਸੁ’’ਨ੍ਤਿ. ਆਨਨ੍ਦਤ੍ਥੇਰੋ ਤਂ ਦਿਸ੍ਵਾ ਭਗਵਤੋ ਆਰੋਚੇਸਿ, ਭਗਵਾ ਥੇਰਸ੍ਸ ਇਮਂ ਗਾਥਮਭਾਸਿ ‘‘ਸਕਞ੍ਹਿ ਦਿਟ੍ਠਿਂ…ਪੇ… ਵਦੇਯ੍ਯਾ’’ਤਿ.
ਤਸ੍ਸ ਅਤ੍ਥੋ – ਯਾਯਂ ਦਿਟ੍ਠਿ ਤਿਤ੍ਥਿਯਜਨਸ੍ਸ ‘‘ਸੁਨ੍ਦਰਿਂ ਮਾਰੇਤ੍ਵਾ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਅਵਣ੍ਣਂ ਪਕਾਸੇਤ੍ਵਾ ਏਤੇਨੁਪਾਯੇਨ ਲਦ੍ਧਂ ਸਕ੍ਕਾਰਂ ਸਾਦਿਯਿਸ੍ਸਾਮਾ’’ਤਿ ਸੋ ਤਂ ਦਿਟ੍ਠਿਂ ਕਥਂ ਅਤਿਕ੍ਕਮੇਯ੍ਯ? ਅਥ ਖੋ ਸੋ ਅਯਸੋ ਤਮੇਵ ਤਿਤ੍ਥਿਯਜਨਂ ਪਚ੍ਚਾਗਤੋ ਤਂ ਦਿਟ੍ਠਿਂ ਅਚ੍ਚੇਤੁਂ ਅਸਕ੍ਕੋਨ੍ਤਂ. ਯੋ ਵਾ ਸਸ੍ਸਤਾਦਿਵਾਦੀ, ਸੋਪਿ ਸਕਂ ਦਿਟ੍ਠਿਂ ਕਥਮਚ੍ਚਯੇਯ੍ਯ, ਤੇਨ ਦਿਟ੍ਠਿਛਨ੍ਦੇਨ ਅਨੁਨੀਤੋ ਤਾਯ ਚ ਦਿਟ੍ਠਿਰੁਚਿਯਾ ਨਿਵਿਟ੍ਠੋ, ਅਪਿ ਚ ਖੋ ਪਨ ਸਯਂ ਸਮਤ੍ਤਾਨਿ ਪਕੁਬ੍ਬਮਾਨੋ ਅਤ੍ਤਨਾਵ ਪਰਿਪੁਣ੍ਣਾਨਿ ਤਾਨਿ ਦਿਟ੍ਠਿਗਤਾਨਿ ਕਰੋਨ੍ਤੋ ਯਥਾ ਜਾਨੇਯ੍ਯ, ਤਥੇਵ ਵਦੇਯ੍ਯਾਤਿ.
ਅਵਣ੍ਣਂ ਪਕਾਸਯਿਤ੍ਵਾਤਿ ਅਗੁਣਂ ਪਾਕਟਂ ਕਤ੍ਵਾ. ਸਕ੍ਕਾਰਨ੍ਤਿ ਚਤੁਨ੍ਨਂ ਪਚ੍ਚਯਾਨਂ ਸਕ੍ਕਚ੍ਚਕਰਣਂ. ਸਮ੍ਮਾਨਨ੍ਤਿ ਚਿਤ੍ਤੇਨ ਬਹੁਮਾਨਨਂ. ਪਚ੍ਚਾਹਰਿਸ੍ਸਾਮਾਤਿ ਏਤਂ ਲਾਭਾਦਿਂ ਨਿਬ੍ਬਤ੍ਤੇਸ੍ਸਾਮ. ਏਵਂਦਿਟ੍ਠਿਕਾਤਿ ਏਵਂਲਦ੍ਧਿਕਾ. ਯਥਾ ਤਂ ‘‘ਲਾਭਾਦਿਂ ਨਿਬ੍ਬਤ੍ਤੇਸ੍ਸਾਮਾ’’ਤਿ ਏਵਂ ਅਯਂ ਲਦ੍ਧਿ ਤੇਸਂ ਅਤ੍ਥਿ, ਤਥਾ ‘‘ਅਤ੍ਥਿ ਮੇ ਵੁਤ੍ਤਪ੍ਪਕਾਰੋ ਧਮ੍ਮੋ’’ਤਿ ਏਤੇਸਂ ਖਮਤਿ ਚੇਵ ਰੁਚ੍ਚਤਿ ਚ, ਏਵਂਸਭਾਵਮੇਵ ਵਾ ਤੇਸਂ ਚਿਤ੍ਤਂ ‘‘ਅਤ੍ਥਿ ਮੇ ਚਿਤ੍ਤ’’ਨ੍ਤਿ. ਤਦਾ ਤੇਸਂ ਦਿਟ੍ਠਿ ਵਾ, ਦਿਟ੍ਠਿਯਾ ਸਹ ਖਨ੍ਤਿ ਵਾ, ਦਿਟ੍ਠਿਖਨ੍ਤੀਹਿ ਸਦ੍ਧਿਂ ਰੁਚਿ ਵਾ, ਦਿਟ੍ਠਿਖਨ੍ਤਿਰੁਚੀਹਿ ਸਦ੍ਧਿਂ ਲਦ੍ਧਿ ਵਾ, ਦਿਟ੍ਠਿਖਨ੍ਤਿਰੁਚਿਲਦ੍ਧੀਹਿ ਸਦ੍ਧਿਂ ਅਜ੍ਝਾਸਯੋ ਵਾ, ਦਿਟ੍ਠਿਖਨ੍ਤਿਰੁਚਿਲਦ੍ਧਿਅਜ੍ਝਾਸਯੇਹਿ ਸਦ੍ਧਿਂ ਅਧਿਪ੍ਪਾਯੋ ਵਾ ਹੋਤੀਤਿ ਦਸ੍ਸੇਨ੍ਤੋ ‘‘ਏਵਂਦਿਟ੍ਠਿਕਾ…ਪੇ… ਏਵਂਅਧਿਪ੍ਪਾਯਾ’’ਤਿ ਆਹ. ਸਕਂ ਦਿਟ੍ਠਿਨ੍ਤਿ ਅਤ੍ਤਨੋ ਦਸ੍ਸਨਂ. ਸਕਂ ਖਨ੍ਤਿਨ੍ਤਿ ਅਤ੍ਤਨੋ ਸਹਨਂ. ਸਕਂ ਰੁਚਿਨ੍ਤਿ ਅਤ੍ਤਨੋ ਰੁਚਿਂ. ਸਕਂ ਲਦ੍ਧਿਨ੍ਤਿ ਅਤ੍ਤਨੋ ਲਦ੍ਧਿਂ. ਸਕਂ ਅਜ੍ਝਾਸਯਨ੍ਤਿ ਅਤ੍ਤਨੋ ਅਜ੍ਝਾਸਯਂ. ਸਕਂ ਅਧਿਪ੍ਪਾਯਨ੍ਤਿ ਅਤ੍ਤਨੋ ਭਾਵਂ. ਅਤਿਕ੍ਕਮਿਤੁਨ੍ਤਿ ਸਮਤਿਕ੍ਕਮਿਤੁਂ. ਅਥ ਖੋ ਸ੍ਵੇਵ ਅਯਸੋਤਿ ਸੋ ਏਵ ਅਯਸੋ ਏਕਂਸੇਨ. ਤੇ ਪਚ੍ਚਾਗਤੋਤਿ ਤੇਸਂ ਪਤਿਆਗਤੋ. ਤੇਤਿ ਸਾਮਿਅਤ੍ਥੇ ਉਪਯੋਗਵਚਨਂ.
ਅਥ ਵਾਤਿ ਅਤ੍ਥਨ੍ਤਰਦਸ੍ਸਨਂ. ਸਸ੍ਸਤੋਤਿ ਨਿਚ੍ਚੋ ਧੁਵੋ. ਲੋਕੋਤਿ ਅਤ੍ਤਭਾਵੋ. ਇਦਮੇਵ ਸਚ੍ਚਂ, ਮੋਘਮਞ੍ਞਨ੍ਤਿ ਇਦਂ ਏਵ ਤਚ੍ਛਂ ਤਥਂ, ਅਞ੍ਞਂ ਤੁਚ੍ਛਂ. ਸਮਤ੍ਤਾਤਿ ਸਮ੍ਪੁਣ੍ਣਾ. ਸਮਾਦਿਨ੍ਨਾਤਿ ਸਮ੍ਮਾ ਆਦਿਨ੍ਨਾ. ਗਹਿਤਾਤਿ ਉਪਗਨ੍ਤ੍ਵਾ ਗਹਿਤਾ.
ਪਰਾਮਟ੍ਠਾਤਿ ਸਬ੍ਬਾਕਾਰੇਨ ਪਰਾਮਸਿਤ੍ਵਾ ਗਹਿਤਾ. ਅਭਿਨਿਵਿਟ੍ਠਾਤਿ ਵਿਸੇਸੇਨ ਲਦ੍ਧਪ੍ਪਤਿਟ੍ਠਾ. ਅਸਸ੍ਸਤੋਤਿ ਵੁਤ੍ਤਵਿਪਰਿਯਾਯੇਨ ਵੇਦਿਤਬ੍ਬੋ.
ਅਨ੍ਤਵਾਤਿ ਸਅਨ੍ਤੋ. ਅਨਨ੍ਤਵਾਤਿ ਵੁਦ੍ਧਿਅਨਨ੍ਤਵਾ. ਤਂ ਜੀਵਨ੍ਤਿ ਸੋ ਜੀਵੋ, ਲਿਙ੍ਗਵਿਪਲ੍ਲਾਸੋ ਕਤੋ. ਜੀਵੋਤਿ ਚ ਅਤ੍ਤਾਯੇਵ. ਤਥਾਗਤੋਤਿ ਸਤ੍ਤੋ, ‘‘ਅਰਹ’’ਨ੍ਤਿ ਏਕੇ. ਪਰਂ ਮਰਣਾਤਿ ਮਰਣਤੋ ਉਦ੍ਧਂ, ਪਰਲੋਕੇਤਿ ਅਤ੍ਥੋ. ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਮਰਣਤੋ ਉਦ੍ਧਂ ਨ ਹੋਤਿ. ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾਤਿ ਮਰਣਤੋ ਉਦ੍ਧਂ ਹੋਤਿ ਚ ਨ ਹੋਤਿ ਚ. ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਉਚ੍ਛੇਦਵਸੇਨ ਨੇਵ ਹੋਤਿ, ਤਕ੍ਕਿਕਵਸੇਨ ਨ ਨ ਹੋਤਿ.
ਸਕਾਯ ਦਿਟ੍ਠਿਯਾਤਿਆਦਯੋ ਕਰਣਵਚਨਂ. ਅਲ੍ਲੀਨੋਤਿ ਏਕੀਭੂਤੋ.
ਸਯਂ ਸਮਤ੍ਤਂ ਕਰੋਤੀਤਿ ਅਤ੍ਤਨਾ ਊਨਭਾਵਂ ਮੋਚੇਤ੍ਵਾ ਸਮ੍ਮਾ ਅਤ੍ਤਂ ਸਮਤ੍ਤਂ ਕਰੋਤਿ. ਪਰਿਪੁਣ੍ਣਨ੍ਤਿ ਅਤਿਰੇਕਦੋਸਂ ਮੋਚੇਤ੍ਵਾ ਸਮ੍ਪੁਣ੍ਣਂ. ਅਨੋਮਨ੍ਤਿ ਹੀਨਦੋਸਂ ਮੋਚੇਤ੍ਵਾ ਅਲਾਮਕਂ. ਅਗ੍ਗਨ੍ਤਿ ਆਦਿਂ. ਸੇਟ੍ਠਨ੍ਤਿ ਪਧਾਨਂ ਨਿਦ੍ਦੋਸਂ. ਵਿਸੇਸਨ੍ਤਿ ਜੇਟ੍ਠਕਂ. ਪਾਮੋਕ੍ਖਨ੍ਤਿ ਅਧਿਕਂ. ਉਤ੍ਤਮਨ੍ਤਿ ਵਿਸੇਸਂ ਨ ਹੇਟ੍ਠਿਮਂ. ਪਵਰਂ ਕਰੋਤੀਤਿ ਅਤਿਰੇਕੇਨ ਉਤ੍ਤਮਂ ਕਰੋਤਿ. ਅਥ ਵਾ ‘‘ਆਸਯਦੋਸਮੋਚਨੇਨ ਅਗ੍ਗਂ, ਸਂਕਿਲੇਸਦੋਸਮੋਚਨੇਨ ਸੇਟ੍ਠਂ, ਉਪਕ੍ਕਿਲੇਸਦੋਸਮੋਚਨੇਨ ਵਿਸੇਸਂ, ਪਮਤ੍ਤਦੋਸਮੋਚਨੇਨ ਪਾਮੋਕ੍ਖਂ, ਮਜ੍ਝਿਮਦੋਸਮੋਚਨੇਨ ਉਤ੍ਤਮਂ, ਉਤ੍ਤਮਮਜ੍ਝਿਮਦੋਸਮੋਚਨੇਨ ਪਵਰਂ ਕਰੋਤੀ’’ਤਿ ਏਵਮੇਕੇ ਵਣ੍ਣਯਨ੍ਤਿ. ਅਯਂ ਸਤ੍ਥਾ ਸਬ੍ਬਞ੍ਞੂਤਿ ਅਯਂ ਅਮ੍ਹਾਕਂ ਸਤ੍ਥਾ ਸਬ੍ਬਜਾਨਨਵਸੇਨ ਸਬ੍ਬਞ੍ਞੂ. ਅਯਂ ਧਮ੍ਮੋ ਸ੍ਵਾਕ੍ਖਾਤੋਤਿ ਅਯਂ ਅਮ੍ਹਾਕਂ ਧਮ੍ਮੋ ਸੁਟ੍ਠੁ ਅਕ੍ਖਾਤੋ. ਅਯਂ ਗਣੋ ਸੁਪ੍ਪਟਿਪਨ੍ਨੋਤਿ ਅਯਂ ਅਮ੍ਹਾਕਂ ਗਣੋ ਸੁਟ੍ਠੁ ਪਟਿਪਨ੍ਨੋ. ਅਯਂ ਦਿਟ੍ਠਿ ਭਦ੍ਦਿਕਾਤਿ ਅਯਂ ਅਮ੍ਹਾਕਂ ਲਦ੍ਧਿ ਸੁਨ੍ਦਰਾ. ਅਯਂ ਪਟਿਪਦਾ ਸੁਪਞ੍ਞਤ੍ਤਾਤਿ ਅਯਂ ਅਮ੍ਹਾਕਂ ਪੁਬ੍ਬਭਾਗਾ ਅਤ੍ਤਨ੍ਤ ਪਾਦਿਪਟਿਪਦਾ ਸੁਟ੍ਠੁ ਪਞ੍ਞਤ੍ਤਾ. ਅਯਂ ਮਗ੍ਗੋ ਨਿਯ੍ਯਾਨਿਕੋਤਿ ਅਯਂ ਅਮ੍ਹਾਕਂ ਨਿਯ੍ਯਾਮੋਕ੍ਕਨ੍ਤਿਕੋ ਮਗ੍ਗੋ ਨਿਯ੍ਯਾਨਿਕੋਤਿ ਸਯਂ ਸਮਤ੍ਤਂ ਕਰੋਤਿ.
ਕਥੇਯ੍ਯ ‘‘ਸਸ੍ਸਤੋ ਲੋਕੋ’’ਤਿ. ਭਣੇਯ੍ਯ ‘‘ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ. ਦੀਪੇਯ੍ਯ ‘‘ਅਨ੍ਤਵਾ ਲੋਕੋ’’ਤਿ. ਵੋਹਰੇਯ੍ਯ ਨਾਨਾਵਿਧੇਨ ਗਣ੍ਹਾਪੇਯ੍ਯ ‘‘ਹੋਤਿ ਚ ਨ ਚ ਹੋਤੀ’’ਤਿ.
੧੭. ਅਥ ਰਾਜਾ ਸਤ੍ਤਾਹਚ੍ਚਯੇਨ ਤਂ ਕੁਣਪਂ ਛਡ੍ਡਾਪੇਤ੍ਵਾ ਸਾਯਨ੍ਹਸਮਯਂ ਵਿਹਾਰਂ ਗਨ੍ਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਆਹ – ‘‘ਨਨੁ, ਭਨ੍ਤੇ, ਈਦਿਸੇ ਅਯਸੇ ਉਪ੍ਪਨ੍ਨੇ ਮਯ੍ਹਮ੍ਪਿ ਆਰੋਚੇਤਬ੍ਬਂ ਸਿਯਾ’’ਤਿ? ਏਵਂ ਵੁਤ੍ਤੇ ਭਗਵਾ ‘‘ਨ, ਮਹਾਰਾਜ, ‘ਅਹਂ ਸੀਲਵਾ ਗੁਣਸਮ੍ਪਨ੍ਨੋ’ਤਿ ਪਰੇਸਂ ਆਰੋਚੇਤੁਂ ਅਰਿਯਾਨਂ ਪਟਿਰੂਪ’’ਨ੍ਤਿ ਵਤ੍ਵਾ ਤਸ੍ਸਾ ਅਟ੍ਠੁਪ੍ਪਤ੍ਤਿਯਾ ‘‘ਯੋ ਅਤ੍ਤਨੋ ਸੀਲਵਤਾਨੀਤਿ ਅਵਸੇਸਗਾਥਾਯੋ ਅਭਾਸਿ.
ਤਤ੍ਥ ਸੀਲਵਤਾਨੀਤਿ ਪਾਤਿਮੋਕ੍ਖਾਦੀਨਿ ਸੀਲਾਨਿ, ਆਰਞ੍ਞਿਕਾਦੀਨਿ ਧੁਤਙ੍ਗਵਤਾਨਿ ਚ. ਅਨਾਨੁਪੁਟ੍ਠੋਤਿ ਅਪੁਚ੍ਛਿਤੋ. ਪਾਵਾਤਿ ਵਦਤਿ. ਅਨਰਿਯਧਮ੍ਮਂ ਕੁਸਲਾ ਤਮਾਹੁ, ਯੋ ਆਤੁਮਾਨਂ ਸਯਮੇਵ ਪਾਵਾਤਿ ਯੋ ਏਵਂ ਅਤ੍ਤਾਨਂ ਸਯਮੇਵ ਵਦਤਿ, ਤਸ੍ਸ ਤਂ ਵਾਦਂ ‘‘ਅਨਰਿਯਧਮ੍ਮੋ ਏਸੋ’’ਤਿ ਕੁਸਲਾ ਏਵਂ ਕਥੇਨ੍ਤਿ.
ਅਤ੍ਥਿ ਸੀਲਞ੍ਚੇਵ ਵਤਞ੍ਚਾਤਿ ਸੀਲਨਟ੍ਠੇਨ ਸੀਲਞ੍ਚੇਵ ਅਤ੍ਥਿ, ਸਮਾਦਾਨਟ੍ਠੇਨ ਵਤਞ੍ਚ ਅਤ੍ਥਿ, ਵਤਂ ਨ ਸੀਲਨ੍ਤਿ ਵੁਤ੍ਤਤ੍ਥੇਨ ਵਤਂ ਅਤ੍ਥਿ, ਤਂ ਨ ਸੀਲਂ. ਕਤਮਨ੍ਤਿ ਕਥੇਤੁਕਮ੍ਯਤਾਪੁਚ੍ਛਾ. ਇਧ ਭਿਕ੍ਖੁ ਸੀਲਵਾਤਿਆਦਯੋ ਵੁਤ੍ਤਨਯਾ ਏਵ. ਸਂਵਰਟ੍ਠੇਨਾਤਿ ਸਂਵਰਣਟ੍ਠੇਨ, ਵੀਤਿਕ੍ਕਮਦ੍ਵਾਰਂ ਪਿਦਹਨਟ੍ਠੇਨ. ਸਮਾਦਾਨਟ੍ਠੇਨਾਤਿ ਤਂ ਤਂ ਸਿਕ੍ਖਾਪਦਂ ਸਮ੍ਮਾ ਆਦਾਨਟ੍ਠੇਨ. ਆਰਞ੍ਞਿਕਙ੍ਗਨ੍ਤਿ ਅਰਞ੍ਞੇ ਨਿਵਾਸੋ ਸੀਲਂ ਅਸ੍ਸਾਤਿ ਆਰਞ੍ਞਿਕੋ, ਤਸ੍ਸ ਅਙ੍ਗਂ ਆਰਞ੍ਞਿਕਙ੍ਗਂ. ਪਿਣ੍ਡਪਾਤਿਕਙ੍ਗਨ੍ਤਿ ਭਿਕ੍ਖਾਸਙ੍ਖਾਤਾਨਂ ਪਰਆਮਿਸਪਿਣ੍ਡਾਨਂ ਪਾਤੋ ਪਿਣ੍ਡਪਾਤੋ, ਪਰੇਹਿ ਦਿਨ੍ਨਾਨਂ ਪਿਣ੍ਡਾਨਂ ਪਤ੍ਤੇ ਨਿਪਤਨਨ੍ਤਿ ਵੁਤ੍ਤਂ ਹੋਤਿ. ਤਂ ਪਿਣ੍ਡਪਾਤਂ ਉਞ੍ਛਤਿ ਤਂ ਤਂ ਕੁਲਂ ਉਪਸਙ੍ਕਮਨ੍ਤੋ ਗਵੇਸਤੀਤਿ ਪਿਣ੍ਡਪਾਤਿਕੋ, ਪਿਣ੍ਡਾਯ ਵਾ ਪਤਿਤੁਂ ਵਤਮੇਤਸ੍ਸਾਤਿ ਪਿਣ੍ਡਪਾਤੀ. ਪਤਿਤੁਨ੍ਤਿ ਚਰਿਤੁਂ. ਪਿਣ੍ਡਪਾਤੀ ਏਵ ਪਿਣ੍ਡਪਾਤਿਕੋ, ਤਸ੍ਸ ਅਙ੍ਗਂ ਪਿਣ੍ਡਪਾਤਿਕਙ੍ਗਂ. ਅਙ੍ਗਨ੍ਤਿ ਕਾਰਣਂ ਵੁਚ੍ਚਤਿ. ਤਸ੍ਮਾ ਯੇਨ ਸਮਾਦਾਨੇਨ ਸੋ ਪਿਣ੍ਡਪਾਤਿਕੋ ਹੋਤਿ, ਤਸ੍ਸੇਤਂ ਅਧਿਵਚਨਨ੍ਤਿ ਵੇਦਿਤਬ੍ਬਂ. ਏਤੇਨੇਵ ਨਯੇਨ ਰਥਿਕਾਸੁਸਾਨਸਙ੍ਕਾਰਕੂਟਾਦੀਨਂ ਯਤ੍ਥ ਕਤ੍ਥਚਿ ਪਂਸੂਨਂ ਉਪਰਿ ਠਿਤਤ੍ਤਾ ਅਬ੍ਭੁਗ੍ਗਤਟ੍ਠੇਨ ਤੇਸੁ ਪਂਸੁਕੂਲਮਿਵਾਤਿ ਪਂਸੁਕੂਲਂ. ਅਥ ਵਾ ਪਂਸੁ ਵਿਯ ਕੁਚ੍ਛਿਤਭਾਵਂ ਉਲਤੀਤਿ ਪਂਸੁਕੂਲਂ, ਕੁਚ੍ਛਿਤਭਾਵਂ ਗਚ੍ਛਤੀਤਿ ਵੁਤ੍ਤਂ ਹੋਤਿ. ਏਵਂ ਲਦ੍ਧਨਿਬ੍ਬਚਨਸ੍ਸ ਪਂਸੁਕੂਲਸ੍ਸ ਧਾਰਣਂ ਪਂਸੁਕੂਲਂ, ਪਂਸੁਕੂਲਂ ਸੀਲਮਸ੍ਸਾਤਿ ਪਂਸੁਕੂਲਿਕੋ, ਪਂਸੁਕੂਲਿਕਸ੍ਸ ਅਙ੍ਗਂ ਪਂਸੁਕੂਲਿਕਙ੍ਗਂ. ਸਙ੍ਘਾਟਿਉਤ੍ਤਰਾਸਙ੍ਗਅਨ੍ਤਰਵਾਸਕਸਙ੍ਖਾਤਂ ਤਿਚੀਵਰਂ ਸੀਲਮਸ੍ਸਾਤਿ ਤੇਚੀਵਰਿਕੋ, ਤੇਚੀਵਰਿਕਸ੍ਸ ਅਙ੍ਗਂ ਤੇਚੀਵਰਿਕਙ੍ਗਂ. ਸਪਦਾਨਚਾਰਿਕਙ੍ਗਨ੍ਤਿ ਦਾਨਂ ਵੁਚ੍ਚਤਿ ਅਵਖਣ੍ਡਨਂ, ਅਪੇਤਂ ਦਾਨਤੋ ਅਪਦਾਨਂ, ਅਨਵਖਣ੍ਡਨਨ੍ਤਿ ਅਤ੍ਥੋ. ਸਹ ਅਪਦਾਨੇਨ ਸਪਦਾਨਂ, ਅਵਖਣ੍ਡਨਵਿਰਹਿਤਂ, ਅਨੁਘਰਨ੍ਤਿ ਵੁਤ੍ਤਂ ਹੋਤਿ. ਸਪਦਾਨਂ ਚਰਿਤੁਂ ਇਦਮਸ੍ਸ ਸੀਲਨ੍ਤਿ ਸਪਦਾਨਚਾਰੀ, ਸਪਦਾਨਚਾਰੀਯੇਵ ਸਪਦਾਨਚਾਰਿਕੋ, ਤਸ੍ਸ ਅਙ੍ਗਂ ਸਪਦਾਨਚਾਰਿਕਙ੍ਗਂ. ਖਲੁਪਚ੍ਛਾਭਤ੍ਤਿਕਙ੍ਗਨ੍ਤਿ ਖਲੂਤਿ ਪਟਿਸੇਧਨਤ੍ਥੇ ਨਿਪਾਤੋ. ਪਵਾਰਿਤੇਨ ਸਤਾ ਪਚ੍ਛਾ ਲਦ੍ਧਂ ਭਤ੍ਤਂ ਪਚ੍ਛਾਭਤ੍ਤਂ ਨਾਮ, ਤਸ੍ਸ ਪਚ੍ਛਾਭਤ੍ਤਸ੍ਸ ਭੋਜਨਂ ਪਚ੍ਛਾਭਤ੍ਤਭੋਜਨਂ, ਤਸ੍ਮਿਂ ਪਚ੍ਛਾਭਤ੍ਤਭੋਜਨੇ ਪਚ੍ਛਾਭਤ੍ਤਸਞ੍ਞਂ ਕਤ੍ਵਾ ਪਚ੍ਛਾਭਤ੍ਤਂ ਸੀਲਮਸ੍ਸਾਤਿ ਪਚ੍ਛਾਭਤ੍ਤਿਕੋ, ਨ ਪਚ੍ਛਾਭਤ੍ਤਿਕੋ ਖਲੁਪਚ੍ਛਾਭਤ੍ਤਿਕੋ, ਸਮਾਦਾਨਵਸੇਨ ਪਟਿਕ੍ਖਿਤ੍ਤਾਤਿਰਿਤ੍ਤਭੋਜਨਸ੍ਸੇਤਂ ਨਾਮਂ, ਤਸ੍ਸ ਅਙ੍ਗਂ ਖਲੁਪਚ੍ਛਾਭਤ੍ਤਿਕਙ੍ਗਂ. ਨੇਸਜ੍ਜਿਕਙ੍ਗਨ੍ਤਿ ਸਯਨਂ ਪਟਿਕ੍ਖਿਪਿਤ੍ਵਾ ਨਿਸਜ੍ਜਾਯ ਵਿਹਰਿਤੁਂ ਸੀਲਮਸ੍ਸਾਤਿ ਨੇਸਜ੍ਜਿਕੋ, ਤਸ੍ਸ ਅਙ੍ਗਂ ਨੇਸਜ੍ਜਿਕਙ੍ਗਂ. ਯਥਾਸਨ੍ਥਤਿਕਙ੍ਗਨ੍ਤਿ ਯਦੇਵ ਸਨ੍ਥਤਂ ਯਥਾਸਨ੍ਥਤਂ, ‘‘ਇਦਂ ਤੁਯ੍ਹਂ ਪਾਪੁਣਾਤੀ’’ਤਿ ਏਵਂ ਪਠਮਂ ਉਦ੍ਦਿਟ੍ਠਸੇਨਾਸਨਸ੍ਸੇਤਂ ਅਧਿਵਚਨਂ. ਤਸ੍ਮਿਂ ਯਥਾਸਨ੍ਥਤੇ ਵਿਹਰਿਤੁਂ ਸੀਲਮਸ੍ਸਾਤਿ ਯਥਾਸਨ੍ਥਤਿਕੋ, ਤਸ੍ਸ ਅਙ੍ਗਂ ਯਥਾਸਨ੍ਥਤਿਕਙ੍ਗਂ. ਸਬ੍ਬਾਨੇਵ ਪਨੇਤਾਨਿ ਤੇਨ ਤੇਨ ਸਮਾਦਾਨੇਨ ਧੁਤਕਿਲੇਸਤ੍ਤਾ ਧੁਤਸ੍ਸ ਭਿਕ੍ਖੁਨੋ ਅਙ੍ਗਾਨਿ, ਕਿਲੇਸਧੁਨਨਤੋ ਵਾ ਧੁਤਨ੍ਤਿ ਲਦ੍ਧਵੋਹਾਰਂ ਞਾਣਂ ਅਙ੍ਗਂ ਏਤੇਸਨ੍ਤਿ ਧੁਤਙ੍ਗਾਨਿ. ਅਥ ਵਾ ਧੁਤਾਨਿ ਚ ਤਾਨਿ ਪਟਿਪਕ੍ਖਾਨਂ ਧੁਨਨਤੋ ਅਙ੍ਗਾਨਿ ਚ ਪਟਿਪਤ੍ਤਿਯਾਤਿਪਿ ਧੁਤਙ੍ਗਾਨਿ. ਏਵਂ ਤਾਵੇਤ੍ਥ ਅਤ੍ਥਤੋ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋ. ਸਬ੍ਬਾਨੇਵ ਚੇਤਾਨਿ ਸਮਾਦਾਨਚੇਤਨਾਲਕ੍ਖਣਾਨਿ. ਵੁਤ੍ਤਮ੍ਪਿ ਚੇਤਂ –
‘‘ਯੋ ਸਮਾਦਿਯਤਿ, ਸੋ ਪੁਗ੍ਗਲੋ. ਯੇਨ ਸਮਾਦਿਯਤਿ, ਚਿਤ੍ਤਚੇਤਸਿਕਾ ਏਤੇ ਧਮ੍ਮਾ. ਯਾ ਸਮਾਦਾਨਚੇਤਨਾ, ਤਂ ਧੁਤਙ੍ਗਂ. ਯਂ ਪਟਿਕ੍ਖਿਪਤਿ, ਤਂ ਵਤ੍ਥੁ’’ਨ੍ਤਿ (ਵਿਸੁਦ੍ਧਿ. ੧.੨੩).
ਸਬ੍ਬਾਨੇਵ ਚ ਲੋਲੁਪ੍ਪਵਿਦ੍ਧਂਸਨਰਸਾਨਿ, ਨਿਲ੍ਲੋਲੁਪ੍ਪਭਾਵਪਚ੍ਚੁਪਟ੍ਠਾਨਾਨਿ, ਅਪ੍ਪਿਚ੍ਛਤਾਦਿਅਰਿਯਧਮ੍ਮਪਦਟ੍ਠਾਨਾਨਿ. ਏਵਮੇਤ੍ਥ ਲਕ੍ਖਣਾਦੀਹਿ ਵਿਨਿਚ੍ਛਯੋ ਵੇਦਿਤਬ੍ਬੋ.
ਵੀਰਿਯਸਮਾਦਾਨਮ੍ਪੀਤਿ ਵੀਰਿਯਗ੍ਗਹਣਮ੍ਪਿ. ਕਾਮਨ੍ਤਿ ਏਕਂਸਤ੍ਥੇ ਨਿਪਾਤੋ. ਤਚੋ ਚ ਨ੍ਹਾਰੁ ਚਾਤਿ ਛਵਿ ਚ ਨ੍ਹਾਰੁਵਲ੍ਲਿਯੋ ਚ. ਅਟ੍ਠਿ ਚਾਤਿ ਸਬ੍ਬਾ ਅਟ੍ਠਿਯੋ ਚ. ਅਵਸਿਸ੍ਸਤੂਤਿ ਤਿਟ੍ਠਤੁ. ਉਪਸੁਸ੍ਸਤੁ ਮਂਸਲੋਹਿਤਨ੍ਤਿ ਸਬ੍ਬਂ ਮਂਸਞ੍ਚ ਲੋਹਿਤਞ੍ਚ ਸੁਕ੍ਖਤੁ. ‘‘ਤਚੋ’’ਤਿ ਏਕਂ ਅਙ੍ਗਂ, ‘‘ਨ੍ਹਾਰੂ’’ਤਿ ਏਕਂ, ‘‘ਅਟ੍ਠੀ’’ਤਿ ਏਕਂ, ‘‘ਉਪਸੁਸ੍ਸਤੁ ਮਂਸਲੋਹਿਤ’’ਨ੍ਤਿ ਏਕਂ ਅਙ੍ਗਂ. ਯਂ ਤਨ੍ਤਿ ਉਪਰਿ ਵਤ੍ਤਬ੍ਬਪਦੇਨ ਸਮ੍ਬਨ੍ਧੋ. ਪੁਰਿਸਥਾਮੇਨਾਤਿ ਪੁਰਿਸਸ੍ਸ ਕਾਯਿਕੇਨ ਬਲੇਨ, ਬਲੇਨਾਤਿ ਞਾਣਬਲੇਨ. ਵੀਰਿਯੇਨਾਤਿ ਚੇਤਸਿਕਞਾਣਵੀਰਿਯਤੇਜੇਨ. ਪਰਕ੍ਕਮੇਨਾਤਿ ਪਰਂ ਪਰਂ ਠਾਨਂ ਅਕ੍ਕਮਨੇਨ ਉਸ੍ਸਾਹਪ੍ਪਤ੍ਤਵੀਰਿਯੇਨ. ਪਤ੍ਤਬ੍ਬਨ੍ਤਿ ਯਂ ਤਂ ਪਾਪੁਣਿਤਬ੍ਬਂ. ਨ ਤਂ ਅਪਾਪੁਣਿਤ੍ਵਾਤਿ ਤਂ ਪਤ੍ਤਬ੍ਬਂ ਅਪ੍ਪਤ੍ਵਾ. ਵੀਰਿਯਸ੍ਸ ਸਣ੍ਠਾਨਂ ਭਵਿਸ੍ਸਤੀਤਿ ਵੁਤ੍ਤਪ੍ਪਕਾਰਸ੍ਸ ਵੀਰਿਯਸ੍ਸ ਸਿਥਿਲਤ੍ਤਂ ਓਸੀਦਨਂ ਨ ਭਵਿਸ੍ਸਤਿ. ‘‘ਪਟ੍ਠਾਨ’’ਨ੍ਤਿਪਿ ਪਾਠੋ, ਅਯਮੇਵਤ੍ਥੋ. ਚਿਤ੍ਤਂ ਪਗ੍ਗਣ੍ਹਾਤੀਤਿ ਚਿਤ੍ਤਂ ਉਸ੍ਸਾਹਂ ਗਣ੍ਹਾਪੇਤਿ. ਪਦਹਤੀਤਿ ਪਤਿਟ੍ਠਾਪੇਤਿ.
ਨਾਸਿਸ੍ਸਨ੍ਤਿ ਨ ਖਾਦਿਸ੍ਸਾਮਿ ਨ ਭੁਞ੍ਜਿਸ੍ਸਾਮਿ. ਨ ਪਿਵਿਸ੍ਸਾਮੀਤਿ ਯਾਗੁਪਾਨਾਦੀਨਿ ਨ ਪਿਵਿਸ੍ਸਾਮਿ. ਵਿਹਾਰਤੋ ਨ ਨਿਕ੍ਖਮੇਤਿ ਸੇਨਾਸਨਤੋ ਬਹਿ ਨ ਨਿਕ੍ਖਮੇਯ੍ਯਂ. ਨਪਿ ਪਸ੍ਸਂ ਨਿਪਾਤੇਸ੍ਸਨ੍ਤਿ ਪਸ੍ਸਂ ਮਞ੍ਚੇ ਵਾ ਪੀਠੇ ਵਾ ਭੂਮਿਯਂ ਵਾ ਕਟਸਨ੍ਥਰਕੇ ਵਾ ਪਾਤਨਂ ਠਪਨਂ ਨ ਕਰਿਸ੍ਸਾਮਿ. ਤਣ੍ਹਾਸਲ੍ਲੇ ਅਨੂਹਤੇਤਿ ਤਣ੍ਹਾਸਙ੍ਖਾਤੇ ਕਣ੍ਡੇ ਅਨੁਦ੍ਧਟੇ, ਅਵਿਗਤੇਤਿ ਅਤ੍ਥੋ.
ਇਮਂ ਪਲ੍ਲਙ੍ਕਨ੍ਤਿ ਸਮਨ੍ਤਤੋ ਆਭੁਜਿਤਂ ਊਰੁਬਦ੍ਧਾਸਨਂ. ਨ ਭਿਨ੍ਦਿਸ੍ਸਾਮੀਤਿ ਨ ਵਿਜਹਿਸ੍ਸਾਮਿ. ਯਾਵ ਮੇ ਨ ਅਨੁਪਾਦਾਯਾਤਿ ਚਤੂਹਿ ਉਪਾਦਾਨੇਹਿ ਗਹਣਂ ਅਗ੍ਗਹੇਤ੍ਵਾ. ਆਸਵੇਹੀਤਿ ਕਾਮਾਸਵਾਦੀਹਿ ਚਤੂਹਿ ਆਸਵੇਹਿ. ਵਿਮੁਚ੍ਚਿਸ੍ਸਤੀਤਿ ਸਮੁਚ੍ਛੇਦਵਿਮੁਤ੍ਤਿਯਾ ਨ ਮੁਚ੍ਚਿਸ੍ਸਤਿ. ਨ ਤਾਵਾਹਂ ਇਮਮ੍ਹਾ ਆਸਨਾ ਵੁਟ੍ਠਹਿਸ੍ਸਾਮੀਤਿ ਆਦਿਂ ਕਤ੍ਵਾ ਯਾਵ ਰੁਕ੍ਖਮੂਲਾ ਨਿਕ੍ਖਮਿਸ੍ਸਾਮੀਤਿ ਓਕਾਸਵਸੇਨ ਵੁਤ੍ਤਾ. ਇਮਸ੍ਮਿਞ੍ਞੇਵ ਪੁਬ੍ਬਣ੍ਹਸਮਯਂ ਅਰਿਯਧਮ੍ਮਂ ਆਹਰਿਸ੍ਸਾਮੀਤਿ ਆਦਿਂ ਕਤ੍ਵਾ ਯਾਵ ਗਿਮ੍ਹੇਤਿ ਕਾਲਵਸੇਨ ਵੁਤ੍ਤਾ. ਪੁਰਿਮੇ ਵਯੋਖਨ੍ਧੇਤਿਆਦਯੋ ਵਯਵਸੇਨ ਵੁਤ੍ਤਾ. ਤਤ੍ਥ ਆਸਨਾ ਨ ਵੁਟ੍ਠਹਿਸ੍ਸਾਮੀਤਿ ਨਿਸਿਨ੍ਨਾਸਨਾ ਨ ਉਟ੍ਠਹਿਸ੍ਸਾਮਿ. ਅਡ੍ਢਯੋਗਾਤਿ ਨਿਕੁਣ੍ਡਗੇਹਾ. ਪਾਸਾਦਾਤਿ ਦੀਘਪਾਸਾਦਾ. ਹਮ੍ਮਿਯਾਤਿ ਮੁਣ੍ਡਚ੍ਛਦਨਗੇਹਾ. ਗੁਹਾਯਾਤਿ ਪਂਸੁਗੁਹਾਯ. ਲੇਣਾਤਿ ਮਰਿਯਾਦਛਿਨ੍ਨਚ੍ਛਿਦ੍ਦਾ ਪਬ੍ਬਤਲੇਣਾ. ਕੁਟਿਯਾਤਿ ਉਲ੍ਲਿਤ੍ਤਾਦਿਕੁਟਿਯਾ. ਕੂਟਾਗਾਰਾਤਿ ਕਣ੍ਣਿਕਂ ਆਰੋਪੇਤ੍ਵਾ ਕਤਗੇਹਤੋ. ਅਟ੍ਟਾਤਿ ਦ੍ਵਾਰਟ੍ਟਾਲਕਾ. ਮਾਲ਼ਾਤਿ ਵਟ੍ਟਗੇਹਾ. ਉਦ੍ਦਣ੍ਡੋ ਨਾਮ ਏਕੋ ਪਤਿਸ੍ਸਯਵਿਸੇਸੋ. ‘‘ਤਿਛਦਨਗੇਹੋ’’ਤਿਪਿ ਏਕੇ. ਉਪਟ੍ਠਾਨਸਾਲਾਤਿ ਸਨ੍ਨਿਪਾਤਸਾਲਾ ਭੋਜਨਸਾਲਾ ਵਾ. ਮਣ੍ਡਪਾਦਯੋ ਪਾਕਟਾਯੇਵ. ਅਰਿਯਧਮ੍ਮਨ੍ਤਿ ਅਨਵਜ੍ਜਧਮ੍ਮਂ, ਅਰਿਯਾਨਂ ਵਾ ਬੁਦ੍ਧਪਚ੍ਚੇਕਬੁਦ੍ਧਬੁਦ੍ਧਸਾਵਕਾਨਂ ਧਮ੍ਮਂ. ਆਹਰਿਸ੍ਸਾਮੀਤਿ ਮਮ ਚਿਤ੍ਤਸਮੀਪਂ ਆਨਯਿਸ੍ਸਾਮਿ ਸੀਲੇਨ. ਸਮਾਹਰਿਸ੍ਸਾਮੀਤਿ ਵਿਸੇਸੇਨ ਆਨਯਿਸ੍ਸਾਮਿ ਸਮਾਧਿਨਾ. ਅਧਿਗਚ੍ਛਿਸ੍ਸਾਮੀਤਿ ਪਟਿਲਾਭਵਸੇਨ ਗਮਿਸ੍ਸਾਮਿ ਤਦਙ੍ਗੇਨ. ਫਸ੍ਸਯਿਸ੍ਸਾਮੀਤਿ ਫੁਸਿਸ੍ਸਾਮਿ ਮਗ੍ਗੇਨ. ਸਚ੍ਛਿਕਰਿਸ੍ਸਾਮੀਤਿ ਪਚ੍ਚਕ੍ਖਂ ਕਰਿਸ੍ਸਾਮਿ ਫਲੇਨ. ਅਥ ਵਾ ਸੋਤਾਪਤ੍ਤਿਮਗ੍ਗੇਨ ਆਹਰਿਸ੍ਸਾਮਿ. ਸਕਦਾਗਾਮਿਮਗ੍ਗੇਨ ਸਮਾਹਰਿਸ੍ਸਾਮਿ, ਅਨਾਗਾਮਿਮਗ੍ਗੇਨ ਅਧਿਗਚ੍ਛਿਸ੍ਸਾਮਿ, ਅਰਹਤ੍ਤਮਗ੍ਗੇਨ ਫਸ੍ਸਯਿਸ੍ਸਾਮਿ, ਪਚ੍ਚਵੇਕ੍ਖਣੇਨ ਸਚ੍ਛਿਕਰਿਸ੍ਸਾਮਿ. ਦ੍ਵੀਸੁਪਿ ਨਯੇਸੁ ਫਸ੍ਸਯਿਸ੍ਸਾਮੀਤਿ ਨਾਮਕਾਯੇਨ ਨਿਬ੍ਬਾਨਂ ਫੁਸਿਸ੍ਸਾਮੀਤਿ ਅਤ੍ਥੋ.
ਅਪੁਟ੍ਠੋਤਿ ਮੂਲਪਦਂ, ਤਸ੍ਸ ਅਪੁਚ੍ਛਿਤੋਤਿ ਅਤ੍ਥੋ. ਅਪੁਚ੍ਛਿਤੋਤਿ ਅਜਾਨਾਪਿਤੋ. ਅਯਾਚਿਤੋਤਿ ਅਨਾਯਾਚਿਤੋ. ਅਨਜ੍ਝੇਸਿਤੋਤਿ ਅਨਾਣਾਪਿਤੋ, ‘‘ਨ ਇਚ੍ਛਿਤੋ’’ਤਿ ਏਕੇ. ਅਪਸਾਦਿਤੋਤਿ ਨ ਪਸਾਦਾਪਿਤੋ. ਪਾਵਦਤੀਤਿ ਕਥਯਤਿ. ਅਹਮਸ੍ਮੀਤਿ ਅਹਂ ਅਸ੍ਮਿ ਭਵਾਮਿ. ਜਾਤਿਯਾ ਵਾਤਿ ਖਤ੍ਤਿਯਬ੍ਰਾਹ੍ਮਣਜਾਤਿਯਾ ਵਾ. ਗੋਤ੍ਤੇਨ ਵਾਤਿ ਗੋਤਮਾਦਿਗੋਤ੍ਤੇਨ ਵਾ. ਕੋਲਪੁਤ੍ਤਿਯੇਨ ਵਾਤਿ ਕੁਲਪੁਤ੍ਤਭਾਵੇਨ ਵਾ. ਵਣ੍ਣਪੋਕ੍ਖਰਤਾਯ ਵਾਤਿ ਸਰੀਰਸੁਨ੍ਦਰਤਾਯ ਵਾ. ਧਨੇਨ ਵਾਤਿ ਧਨਸਮ੍ਪਤ੍ਤਿਯਾ ਵਾ. ਅਜ੍ਝੇਨੇਨ ਵਾਤਿ ਅਜ੍ਝਾਯਕਰਣੇਨ ਵਾ. ਕਮ੍ਮਾਯਤਨੇਨ ਵਾਤਿ ਕਮ੍ਮਮੇਵ ਕਮ੍ਮਾਯਤਨਂ, ਤੇਨ ਕਮ੍ਮਾਯਤਨੇਨ, ਕਸਿਗੋਰਕ੍ਖਕਮ੍ਮਾਦਿਨਾ ਵਾ. ਸਿਪ੍ਪਾਯਤਨੇਨ ਵਾਤਿ ਧਨੁਸਿਪ੍ਪਾਦਿਨਾ ਵਾ. ਵਿਜ੍ਜਾਟ੍ਠਾਨੇਨ ਵਾਤਿ ਅਟ੍ਠਾਰਸਵਿਜ੍ਜਾਟ੍ਠਾਨੇਨ ਵਾ. ਸੁਤੇਨ ਵਾਤਿ ਬਹੁਸ੍ਸੁਤਗੁਣੇਨ ਵਾ. ਪਟਿਭਾਨੇਨ ਵਾਤਿ ਕਾਰਣਾਕਾਰਣਪਟਿਭਾਨਸਙ੍ਖਾਤਞਾਣੇਨ ਵਾ. ਅਞ੍ਞਤਰਞ੍ਞਤਰੇਨ ਵਾ ਵਤ੍ਥੁਨਾਤਿ ਜਾਤਿਆਦੀਨਂ ਏਕੇਕੇਨ ਵਤ੍ਥੁਨਾ ਵਾ.
ਉਚ੍ਚਾ ਕੁਲਾਤਿ ਖਤ੍ਤਿਯਬ੍ਰਾਹ੍ਮਣਕੁਲਾ, ਏਤੇਨ ਜਾਤਿਗੋਤ੍ਤਮਹਤ੍ਤਂ ਦੀਪੇਤਿ. ਮਹਾਭੋਗਕੁਲਾਤਿ ਗਹਪਤਿਮਹਾਸਾਲਕੁਲਾ, ਏਤੇਨ ਅਡ੍ਢਮਹਤ੍ਤਂ ਦੀਪੇਤਿ. ਉਲ਼ਾਰਭੋਗਕੁਲਾਤਿ ਅਵਸੇਸਵੇਸ੍ਸਾਦਿਕੁਲਾ, ਏਤੇਨ ਪਹੂਤਜਾਤਰੂਪਰਜਤਾਦਿਂ ਦੀਪੇਤਿ. ਚਣ੍ਡਾਲਾਪਿ ਹਿ ਉਲ਼ਾਰਭੋਗਾ ਹੋਨ੍ਤਿ. ਞਾਤੋਤਿ ਪਾਕਟੋ. ਯਸ੍ਸਸ੍ਸੀਤਿ ਪਰਿਵਾਰਸਮ੍ਪਨ੍ਨੋ. ਸੁਤ੍ਤਨ੍ਤਿਕੋਤਿ ਸੁਤ੍ਤਨ੍ਤੇ ਨਿਯੁਤ੍ਤੋ. ਵਿਨਯਧਰੋਤਿ ਵਿਨਯਪਿਟਕਧਰੋ. ਧਮ੍ਮਕਥਿਕੋਤਿ ਆਭਿਧਮ੍ਮਿਕੋ. ਆਰਞ੍ਞਿਕੋਤਿਆਦਯੋ ਧੁਤਙ੍ਗਪੁਬ੍ਬਙ੍ਗਮਪਟਿਪਤ੍ਤਿਦਸ੍ਸਨਤ੍ਥਂ ਵੁਤ੍ਤਾ. ਪਠਮਸ੍ਸ ਝਾਨਸ੍ਸ ਲਾਭੀਤਿਆਦਯੋ ਰੂਪਾਰੂਪਅਟ੍ਠਸਮਾਪਤ੍ਤਿਯੋ ਦਸ੍ਸੇਤ੍ਵਾ ਪਟਿਵੇਧਦਸ੍ਸਨਵਸੇਨ ਵੁਤ੍ਤਾ. ਪਾਵਦਤੀਤਿ ਮੂਲਪਦਂ. ਕਥੇਤੀਤਿ ‘‘ਪਿਟਕਾਚਰਿਯੋਸ੍ਮੀ’’ਤਿ ਕਥਯਤਿ. ਭਣਤੀਤਿ ‘‘ਧੁਤਙ੍ਗਿਕੋਮ੍ਹੀ’’ਤਿ ਪਾਕਟਂ ਕਰੋਤਿ. ਦੀਪਯਤੀਤਿ ‘‘ਰੂਪਜ੍ਝਾਨਂ ਲਾਭੀਮ੍ਹੀ’’ਤਿ ਪਰਿਦੀਪਯਤਿ. ਵੋਹਰਤੀਤਿ ‘‘ਅਰੂਪਜ੍ਝਾਨਂ ਲਾਭੀਮ੍ਹੀ’’ਤਿ ਵਾਕ੍ਯਭੇਦਂ ਕਰੋਤਿ.
ਖਨ੍ਧਕੁਸਲਾਤਿ ਪਞ੍ਚਸੁ ਖਨ੍ਧੇਸੁ ਸਲਕ੍ਖਣਸਾਮਞ੍ਞਲਕ੍ਖਣੇਸੁ ਛੇਕਾ, ਞਾਤਤੀਰਣਪਹਾਨਵਸੇਨ ਕੁਸਲਾਤਿ ਅਤ੍ਥੋ. ਧਾਤੁਆਯਤਨਪਟਿਚ੍ਚਸਮੁਪ੍ਪਾਦਾਦੀਸੁਪਿ ਏਸੇਵ ਨਯੋ. ਨਿਬ੍ਬਾਨਕੁਸਲਾਤਿ ਨਿਬ੍ਬਾਨੇ ਛੇਕਾ. ਅਨਰਿਯਾਨਨ੍ਤਿ ਨ ਅਰਿਯਾਨਂ. ਏਸੋ ਧਮ੍ਮੋਤਿ ਏਸੋ ਸਭਾਵੋ. ਬਾਲਾਨਨ੍ਤਿ ਅਪਣ੍ਡਿਤਾਨਂ. ਅਸਪ੍ਪੁਰਿਸਾਨਨ੍ਤਿ ਨ ਸੋਭਨਪੁਰਿਸਾਨਂ. ਅਤ੍ਤਾਤਿ ਅਤ੍ਤਾਨਂ.
੧੮. ਸਨ੍ਤੋਤਿ ਰਾਗਾਦਿਕਿਲੇਸੂਪਸਮੇਨ ਸਨ੍ਤੋ. ਤਥਾ ਅਭਿਨਿਬ੍ਬੁਤਤ੍ਤੋ. ਇਤਿ’ਹਨ੍ਤਿ ਸੀਲੇਸੁ ਅਕਤ੍ਥਮਾਨੋਤਿ ‘‘ਅਹਮਸ੍ਮਿ ਸੀਲਸਮ੍ਪਨ੍ਨੋ’’ਤਿਆਦਿਨਾ ਨਯੇਨ ਇਤਿ ਸੀਲੇਸੁ ਅਕਤ੍ਥਮਾਨੋ, ਸੀਲਨਿਮਿਤ੍ਤਂ ਅਤ੍ਤੁਪਨਾਯਿਕਂ ਵਾਚਂ ਅਭਾਸਮਾਨੋਤਿ ਵੁਤ੍ਤਂ ਹੋਤਿ. ਤਮਰਿਯਧਮ੍ਮਂ ਕੁਸਲਾ ਵਦਨ੍ਤੀਤਿ ਤਸ੍ਸ ਤਂ ਅਕਤ੍ਥਨਂ ‘‘ਅਰਿਯਧਮ੍ਮੋ ਏਸੋ’’ਤਿ ਬੁਦ੍ਧਾਦਯੋ ਖਨ੍ਧਾਦਿਕੁਸਲਾ ਵਦਨ੍ਤਿ. ਯਸ੍ਸੁਸ੍ਸਦਾ ਨਤ੍ਥਿ ਕੁਹਿਞ੍ਚਿ ਲੋਕੇਤਿ ਯਸ੍ਸ ਖੀਣਾਸਵਸ੍ਸ ਰਾਗਾਦਯੋ ਸਤ੍ਤੁਸ੍ਸਦਾ ਕੁਹਿਞ੍ਚਿ ਲੋਕੇ ਨਤ੍ਥਿ. ਤਸ੍ਸ ਤਂ ਅਕਤ੍ਥਨਂ ‘‘ਅਰਿਯਧਮ੍ਮੋ ਏਸੋ’’ਤਿ ਏਵਂ ਕੁਸਲਾ ਵਦਨ੍ਤੀਤਿ ਸਮ੍ਬਨ੍ਧੋ.
ਸਨ੍ਤੋਤਿ ਮੂਲਪਦਂ. ਰਾਗਸ੍ਸ ਸਮਿਤਤ੍ਤਾਤਿ ਰਞ੍ਜਨਲਕ੍ਖਣਸ੍ਸ ਰਾਗਸ੍ਸ ਸਮਿਤਭਾਵੇਨ. ਦੋਸਾਦੀਸੁਪਿ ਏਸੇਵ ਨਯੋ. ਵਿਜ੍ਝਾਤਤ੍ਤਾਤਿ ਸਬ੍ਬਪਰਿਲ਼ਾਹਾਨਂ ਝਾਪਿਤਤ੍ਤਾ. ਨਿਬ੍ਬੁਤਤ੍ਤਾਤਿ ਸਬ੍ਬਸਨ੍ਤਾਪਾਨਂ ਨਿਬ੍ਬਾਪਿਤਭਾਵੇਨ. ਵਿਗਤਤ੍ਤਾਤਿ ਸਬ੍ਬਾਕੁਸਲਾਭਿਸਙ੍ਖਾਰਾਨਂ ਵਿਗਤਭਾਵੇਨ ਦੂਰਭਾਵੇਨ. ਪਟਿਪਸ੍ਸਦ੍ਧਤ੍ਤਾਤਿ ਸਬ੍ਬਾਕਾਰੇਨ ਅਭਬ੍ਬੁਪ੍ਪਤ੍ਤਿਕਭਾਵੇਨ. ਸਤ੍ਤਨ੍ਨਂ ਧਮ੍ਮਾਨਂ ਭਿਨ੍ਨਤ੍ਤਾ ਭਿਕ੍ਖੂਤਿ ਉਪਰਿ ਵਤ੍ਤਬ੍ਬਾਨਂ ਸਤ੍ਤਧਮ੍ਮਾਨਂ ਭਿਨ੍ਦਿਤ੍ਵਾ ਠਿਤਭਾਵੇਨ ਭਿਕ੍ਖੁ. ਸਕ੍ਕਾਯਦਿਟ੍ਠਿਵਿਚਿਕਿਚ੍ਛਾਸੀਲਬ੍ਬਤਪਰਾਮਾਸੋਤਿ ਇਮੇ ਤਯੋ ਕਿਲੇਸਾ ਸੋਤਾਪਤ੍ਤਿਮਗ੍ਗੇਨ ਭਿਨ੍ਨਾ, ਰਾਗੋ ਦੋਸੋਤਿ ਇਮੇ ਦ੍ਵੇ ਕਿਲੇਸਾ ਓਲ਼ਾਰਿਕਾ ਸਕਦਾਗਾਮਿਮਗ੍ਗੇਨ ਭਿਨ੍ਨਾ, ਤੇ ਏਵ ਅਣੁਸਹਗਤਾ ਅਨਾਗਾਮਿਮਗ੍ਗੇਨ ਭਿਨ੍ਨਾ, ਮੋਹੋ ਮਾਨੋਤਿ ਇਮੇ ਦ੍ਵੇ ਕਿਲੇਸਾ ਅਰਹਤ੍ਤਮਗ੍ਗੇਨ ਭਿਨ੍ਨਾ. ਅਵਸੇਸੇ ਕਿਲੇਸੇ ਦਸ੍ਸੇਤੁਂ ‘‘ਭਿਨ੍ਨਾਸ੍ਸ ਹੋਨ੍ਤਿ ਪਾਪਕਾ ਅਕੁਸਲਾ ਧਮ੍ਮਾ’’ਤਿ ਆਹ. ਸਂਕਿਲੇਸਿਕਾਤਿ ਕਿਲੇਸਪਚ੍ਚਯਾ. ਪੋਨੋਭਵਿਕਾਤਿ ਪੁਨਬ੍ਭਵਦਾਯਿਕਾ. ਸਦਰਾਤਿ ਕਿਲੇਸਦਰਥਾ ਏਤ੍ਥ ਸਨ੍ਤੀਤਿ ਸਦਰਾ. ‘‘ਸਦ੍ਦਰਾ’’ਤਿਪਿ ਪਾਠੋ, ਸਹਦਰਥਾਤਿ ਅਤ੍ਥੋ. ਦੁਕ੍ਖਵਿਪਾਕਾਤਿ ਫਲਕਾਲੇ ਦੁਕ੍ਖਦਾਯਿਕਾ. ਆਯਤਿਂ ਜਾਤਿਜਰਾਮਰਣਿਯਾਤਿ ਅਨਾਗਤੇ ਜਾਤਿਜਰਾਮਰਣਸ੍ਸ ਪਚ੍ਚਯਾ.
ਪਜ੍ਜੇਨ ਕਤੇਨ ਅਤ੍ਤਨਾਤਿ ਗਾਥਾਯ ਅਯਂ ਪਿਣ੍ਡਤ੍ਥੋ – ਯੋ ਅਤ੍ਤਨਾ ਭਾਵਿਤੇਨ ਮਗ੍ਗੇਨ ਪਰਿਨਿਬ੍ਬਾਨਂ ਗਤੋ, ਕਿਲੇਸਪਰਿਨਿਬ੍ਬਾਨਂ ਪਤ੍ਤੋ, ਪਰਿਨਿਬ੍ਬਾਨਗਤਤ੍ਤਾ ਏਵ ਚ ਵਿਤਿਣ੍ਣਕਙ੍ਖੋ, ਵਿਪਤ੍ਤਿਸਮ੍ਪਤ੍ਤਿਹਾਨਿਵੁਦ੍ਧਿਉਚ੍ਛੇਦਸਸ੍ਸਤਅਪੁਞ੍ਞਪੁਞ੍ਞਪ੍ਪਭੇਦਂ ਭਵਞ੍ਚ ਵਿਭਵਞ੍ਚ ਵਿਪ੍ਪਹਾਯ ਮਗ੍ਗਵਾਸਂ ਵੁਸਿਤਵਾ ਖੀਣਪੁਨਬ੍ਭਵੋਤਿ ਏਤੇਸਂ ਥੁਤਿਵਚਨਾਨਂ ਅਰਹੋ ਸੋ ਭਿਕ੍ਖੂਤਿ.
ਇਤਿਹਨ੍ਤਿ, ਇਦਹਨ੍ਤੀਤਿ ਦੁਵਿਧੋ ਪਾਠੋ. ਇਤੀਤਿ ਪਦਸਨ੍ਧਿਆਦਯੋ ਸਨ੍ਧਾਯ ‘‘ਇਦਹ’’ਨ੍ਤਿ ਪਾਠਂ ਨ ਰੋਚੇਨ੍ਤਿ. ਤਤ੍ਥ ਇਤੀਤਿ ਯਂ ਵੁਤ੍ਤਂ. ਪਦਸਨ੍ਧੀਤਿ ਪਦਾਨਂ ਸਨ੍ਧਿ ਪਦਸਨ੍ਧਿ, ਪਦਘਟਨਨ੍ਤਿ ਅਤ੍ਥੋ. ਪਦਸਂਸਗ੍ਗੋਤਿ ਪਦਾਨਂ ਏਕੀਭਾਵੋ. ਪਦਪਾਰਿਪੂਰੀਤਿ ਪਦਾਨਂ ਪਰਿਪੂਰਣਂ ਦ੍ਵਿਨ੍ਨਂ ਪਦਾਨਂ ਏਕੀਭਾਵੋ. ਅਕ੍ਖਰਸਮਵਾਯੋਤਿ ਏਕੀਭੂਤੋਪਿ ਅਪਰਿਪੁਣ੍ਣੋਪਿ ਹੋਤਿ, ਅਯਂ ਨ ਏਵਂ. ਅਕ੍ਖਰਾਨਂ ਸਮਵਾਯੋ ਸਨ੍ਨਿਪਾਤੋ ਹੋਤੀਤਿ ਦਸ੍ਸਨਤ੍ਥਂ ‘‘ਅਕ੍ਖਰਸਮਵਾਯੋ’’ਤਿ ਆਹ. ਬ੍ਯਞ੍ਜਨਸਿਲਿਟ੍ਠਤਾਤਿ ਬ੍ਯਞ੍ਜਨਸਮੁਚ੍ਚਯੋ ਪਦਮੀਤਿ ਵੁਤ੍ਤਾਨਂ ਬ੍ਯਞ੍ਜਨਾਨਂ ਅਤ੍ਥਬ੍ਯਞ੍ਜਨਾਨਂ ਅਤ੍ਥਬ੍ਯਤ੍ਤਿਕਾਰਣਾਨਂ ਵਾ ਮਧੁਰਭਾਵਤ੍ਤਾ ਪਾਠਸ੍ਸ ਮੁਦੁਭਾਵੋ. ਪਦਾਨੁਪੁਬ੍ਬਤਾ ਮੇਤਨ੍ਤਿ ਪਦਾਨਂ ਅਨੁਪੁਬ੍ਬਭਾਵੋ ਪਦਾਨੁਪੁਬ੍ਬਤਾ, ਪਦਪਟਿਪਾਟਿਭਾਵੋਤਿ ਅਤ੍ਥੋ. ਮੇਤਨ੍ਤਿ ਏਤਂ. ਕਤਮਨ੍ਤਿ ਚੇ? ਇਤੀਤਿ ਇਦਂ. ਮੇਤਨ੍ਤਿ ਏਤ੍ਥ ਮ-ਕਾਰੋ ਪਦਸਨ੍ਧਿਵਸੇਨ ਵੁਤ੍ਤੋ. ਕਤ੍ਥੀ ਹੋਤੀਤਿ ‘‘ਅਹਮਸ੍ਮਿ ਸੀਲਸਮ੍ਪਨ੍ਨੋ’’ਤਿ ਅਤ੍ਤਾਨਂ ਉਕ੍ਕਂਸੇਤ੍ਵਾ ਕਥਨਸੀਲੋ ਹੋਤਿ. ਕਤ੍ਥਤੀਤਿ ਵੁਤ੍ਤਨਯੇਨ ਕਥਯਤਿ. ਵਿਕਤ੍ਥਤੀਤਿ ਵਿਵਿਧਾ ਕਥਯਤਿ. ਕਤ੍ਥਨਾਤਿ ਕਥਨਾ. ਆਰਤੋਤਿ ਦੂਰਤੋ ਰਤੋ. ਵਿਰਤੋਤਿ ਠਾਨਸਙ੍ਕਨ੍ਤਿਵਸੇਨ ਵਿਗਤਭਾਵੇਨ ਰਤੋ. ਪਟਿਵਿਰਤੋਤਿ ਤਤੋ ਨਿਵਤ੍ਤਿਤ੍ਵਾ ਸਬ੍ਬਾਕਾਰੇਨ ਵਿਯੁਤ੍ਤੋ ਹੁਤ੍ਵਾ ਰਤੋ. ਤਤ੍ਥ ਪਿਸਾਚਂ ਵਿਯ ਦਿਸ੍ਵਾ ਪਲਾਤੋ ਆਰਤੋ. ਹਤ੍ਥਿਮ੍ਹਿ ਮਦ੍ਦਨ੍ਤੇ ਵਿਯ ਪਰਿਧਾਵਿਤ੍ਵਾ ਗਤੋ ਵਿਰਤੋ. ਯੋਧਸਮ੍ਪਹਾਰਂ ਵਿਯ ਪੋਥੇਤ੍ਵਾ ਮਦ੍ਦੇਤ੍ਵਾ ਗਤੋ ਪਟਿਵਿਰਤੋ.
ਖੀਣਾਸਵਸ੍ਸਾਤਿ ਖੀਣਕਿਲੇਸਾਸਵਸ੍ਸ. ਕਮ੍ਮੁਸ੍ਸਦੋਤਿ ਪੁਞ੍ਞਾਭਿਸਙ੍ਖਾਰਅਪੁਞ੍ਞਾਭਿਸਙ੍ਖਾਰਆਨੇਞ੍ਜਾਭਿਸਙ੍ਖਾਰਸਙ੍ਖਾਤਾਨਂ ਕਮ੍ਮਾਨਂ ਉਸ੍ਸਦੋ ਉਸ੍ਸਨ੍ਨਤਾ. ਯਸ੍ਸਿਮੇਤਿ ਯਸ੍ਸ ਖੀਣਾਸਵਸ੍ਸ ਇਮੇ ਉਸ੍ਸਦਾ.
੧੯. ਏਵਂ ਖੀਣਾਸਵਪਟਿਪਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਦਿਟ੍ਠਿਗਤਿਕਾਨਂ ਤਿਤ੍ਥਿਯਾਨਂ ਪਟਿਪਤ੍ਤਿਞ੍ਚ ਦਸ੍ਸੇਨ੍ਤੋ ਆਹ ‘‘ਪਕਪ੍ਪਿਤਾ ਸਙ੍ਖਤਾ’’ਤਿ. ਤਤ੍ਥ ਪਕਪ੍ਪਿਤਾਤਿ ਪਰਿਕਪ੍ਪਿਤਾ. ਸਙ੍ਖਤਾਤਿ ਪਚ੍ਚਯਾਭਿਸਙ੍ਖਤਾ. ਯਸ੍ਸਾਤਿ ਯਸ੍ਸ ਕਸ੍ਸਚਿ ਦਿਟ੍ਠਿਗਤਿਕਸ੍ਸ. ਧਮ੍ਮਾਤਿ ਦਿਟ੍ਠਿਯੋ. ਪੁਰਕ੍ਖਤਾਤਿ ਪੁਰਤੋ ਕਤਾ. ਸਨ੍ਤੀਤਿ ਸਂਵਿਜ੍ਜਨ੍ਤਿ. ਅਵੀਵਦਾਤਾਤਿ ਅਵੋਦਾਤਾ. ਯਦਤ੍ਤਨਿ ਪਸ੍ਸਤਿ ਆਨਿਸਂਸਂ, ਤਂ ਨਿਸ੍ਸਿਤੋ ਕੁਪ੍ਪਪਟਿਚ੍ਚਸਨ੍ਤਿਨ੍ਤਿ ਯਸ੍ਸੇਤੇ ਦਿਟ੍ਠਿਧਮ੍ਮਾ ‘ਪੁਰਕ੍ਖਤਾ ਅਵੋਦਾਤਾ ਸਨ੍ਤਿ, ਸੋ ਏਵਂਵਿਧੋ ਯਸ੍ਮਾ ਅਤ੍ਤਨਿ ਤਸ੍ਸਾ ਦਿਟ੍ਠਿਯਾ ਦਿਟ੍ਠਧਮ੍ਮਿਕਞ੍ਚ ਸਕ੍ਕਾਰਾਦਿਂ, ਸਮ੍ਪਰਾਯਿਕਞ੍ਚ ਗਤਿਵਿਸੇਸਾਦਿਂ ਆਨਿਸਂਸਂ ਸਮ੍ਪਸ੍ਸਤਿ, ਤਸ੍ਮਾ ਤਞ੍ਚ ਆਨਿਸਂਸਂ, ਤਞ੍ਚ ਕੁਪ੍ਪਤਾਯ ਚ ਪਟਿਚ੍ਚਸਮੁਪ੍ਪਨ੍ਨਤਾਯ ਚ ਸਮ੍ਮੁਤਿਸਨ੍ਤਿਤਾਯ ਚ ਕੁਪ੍ਪਪਟਿਚ੍ਚਸਨ੍ਤਿਸਙ੍ਖਾਤਂ ਦਿਟ੍ਠਿਂ ਨਿਸ੍ਸਿਤੋ ਚ ਹੋਤਿ. ਸੋ ਤਂ ਨਿਸ੍ਸਿਤਤ੍ਤਾ ਅਤ੍ਤਾਨਂ ਵਾ ਉਕ੍ਕਂਸੇਯ੍ਯ, ਪਰੇ ਵਾ ਵਮ੍ਭੇਯ੍ਯ ਅਭੂਤੇਹਿਪਿ ਗੁਣਦੋਸੇਹਿ.
ਸਙ੍ਖਤਾਤਿ ਮੂਲਪਦਂ. ਸਙ੍ਖਤਾਤਿ ਪਚ੍ਚਯੇਹਿ ਸਮਾਗਨ੍ਤ੍ਵਾ ਕਤਾ. ਉਪਸਗ੍ਗਵਸੇਨ ਪਦਂ ਵਡ੍ਢਿਤਂ. ਅਭਿਸਙ੍ਖਤਾਤਿ ਪਚ੍ਚਯੇਹਿ ਅਭਿਕਤਾ. ਸਣ੍ਠਪਿਤਾਤਿ ਪਚ੍ਚਯਵਸੇਨੇਵ ਸਮ੍ਮਾ ਠਪਿਤਾ. ਅਨਿਚ੍ਚਾਤਿ ਹੁਤ੍ਵਾ ਅਭਾਵੇਨ. ਪਟਿਚ੍ਚਸਮੁਪ੍ਪਨ੍ਨਾਤਿ ਵਤ੍ਥਾਰਮ੍ਮਣਂ ਪਟਿਚ੍ਚ ਉਪ੍ਪਨ੍ਨਾ. ਖਯਧਮ੍ਮਾਤਿ ਕਮੇਨ ਖਯਸਭਾਵਾ. ਵਯਧਮ੍ਮਾਤਿ ਪਵਤ੍ਤਿਵਸੇਨ ਪਰਿਹਾਯਨਸਭਾਵਾ. ਵਿਰਾਗਧਮ੍ਮਾਤਿ ਅਨਿਵਤ੍ਤੀ ਹੁਤ੍ਵਾ ਵਿਗਚ੍ਛਨਸਭਾਵਾ. ਨਿਰੋਧਧਮ੍ਮਾਤਿ ਨਿਰੁਜ੍ਝਨਸਭਾਵਾ, ਅਨੁਪ੍ਪਤ੍ਤਿਧਮ੍ਮਾ ਹੁਤ੍ਵਾ ਨਿਰੁਜ੍ਝਨਸਭਾਵਾਤਿ ਅਤ੍ਥੋ. ਦਿਟ੍ਠਿਗਤਿਕਸ੍ਸਾਤਿ ਦ੍ਵਾਸਟ੍ਠਿਦਿਟ੍ਠਿਯੋ ਗਹੇਤ੍ਵਾ ਠਿਤਪੁਗ੍ਗਲਸ੍ਸ.
ਪੁਰੇਕ੍ਖਾਰਾਤਿ ਪੁਰੇ ਕਤਾ. ਤਣ੍ਹਾਧਜੋਤਿ ਉਸ੍ਸਾਪਿਤਟ੍ਠੇਨ ਤਣ੍ਹਾਧਜੋ, ਤਣ੍ਹਾਪਟਾਕਾ ਅਸ੍ਸ ਅਤ੍ਥੀਤਿ ਤਣ੍ਹਾਧਜੋ. ਪੁਰੇਚਾਰਿਕਟ੍ਠੇਨ ਤਣ੍ਹਾ ਏਵ ਕੇਤੁ ਅਸ੍ਸਾਤਿ ਤਣ੍ਹਾਕੇਤੁ. ਤਣ੍ਹਾਧਿਪਤੇਯ੍ਯੋਤਿ ਛਨ੍ਦਾਧਿਪਤਿਵਸੇਨ, ਤਣ੍ਹਾ ਅਧਿਪਤਿਤੋ ਆਗਤਾਤਿ ਵਾ ਤਣ੍ਹਾਧਿਪਤੇਯ੍ਯੋ, ਤਣ੍ਹਾਧਿਪਤਿ ਵਾ ਏਤਸ੍ਸ ਅਤ੍ਥੀਤਿ ਤਣ੍ਹਾਧਿਪਤੇਯ੍ਯੋ. ਦਿਟ੍ਠਿਧਜਾਦੀਸੁਪਿ ਏਸੇਵ ਨਯੋ. ਅਵੋਦਾਤਾਤਿ ਅਪਰਿਸੁਦ੍ਧਾ. ਸਂਕਿਲਿਟ੍ਠਾਤਿ ਸਯਂ ਕਿਲਿਟ੍ਠਾ. ਸਂਕਿਲੇਸਿਕਾਤਿ ਤਪਨੀਯਾ.
ਦ੍ਵੇ ਆਨਿਸਂਸੇ ਪਸ੍ਸਤੀਤਿ ਦ੍ਵੇ ਗੁਣੇ ਦਕ੍ਖਤਿ. ਦਿਟ੍ਠਧਮ੍ਮਿਕਞ੍ਚ ਆਨਿਸਂਸਨ੍ਤਿ ਇਮਸ੍ਮਿਂਯੇਵ ਅਤ੍ਤਭਾਵੇ ਪਚ੍ਚਕ੍ਖਧਮ੍ਮਾਨਿਸਂਸਞ੍ਚ. ਸਮ੍ਪਰਾਯਿਕਨ੍ਤਿ ਪਰਲੋਕੇ ਪਤ੍ਤਬ੍ਬਂ ਆਨਿਸਂਸਞ੍ਚ. ਯਂਦਿਟ੍ਠਿਕੋ ਸਤ੍ਥਾ ਹੋਤੀਤਿ ਸਤ੍ਥਾ ਯਥਾਲਦ੍ਧਿਕੋ ਭਵਤਿ. ਤਂਦਿਟ੍ਠਿਕਾ ਸਾਵਕਾ ਹੋਨ੍ਤੀਤਿ ਤਸ੍ਸ ਵਚਨਂ ਸੁਣਨ੍ਤਾ ਸਾਵਕਾਪਿ ਤਥਾਲਦ੍ਧਿਕਾ ਹੋਨ੍ਤਿ. ਸਕ੍ਕਰੋਨ੍ਤੀਤਿ ਸਕ੍ਕਾਰਪ੍ਪਤ੍ਤਂ ਕਰੋਨ੍ਤਿ. ਗਰੁਂ ਕਰੋਨ੍ਤੀਤਿ ਗਰੁਕਾਰਪ੍ਪਤ੍ਤਂ ਕਰੋਨ੍ਤਿ. ਮਾਨੇਨ੍ਤੀਤਿ ਮਨਸਾ ਪਿਯਾਯਨ੍ਤਿ. ਪੂਜੇਨ੍ਤੀਤਿ ਚਤੁਪਚ੍ਚਯਾਭਿਹਾਰਪੂਜਾਯ ਪੂਜੇਨ੍ਤਿ. ਅਪਚਿਤਿਂ ਕਰੋਨ੍ਤੀਤਿ ਅਪਚਿਤਿਪ੍ਪਤ੍ਤਂ ਕਰੋਨ੍ਤਿ. ਤਤ੍ਥ ਯਸ੍ਸ ਚਤ੍ਤਾਰੋ ਪਚ੍ਚਯੇ ਸਕ੍ਕਰਿਤ੍ਵਾ ਸੁਅਭਿਸਙ੍ਖਤੇ ਪਣੀਤੇ ਕਤ੍ਵਾ ਦੇਨ੍ਤਿ, ਸੋ ਸਕ੍ਕਤੋ. ਯਸ੍ਮਿਂ ਗਰੁਭਾਵਂ ਪਟ੍ਠਪੇਤ੍ਵਾ ਦੇਨ੍ਤਿ, ਸੋ ਗਰੁਕਤੋ. ਯਂ ਮਨਸਾ ਪਿਯਾਯਨ੍ਤਿ, ਸੋ ਮਾਨਿਤੋ. ਯਸ੍ਸ ਸਬ੍ਬਮ੍ਪੇਤਂ ਕਰੋਨ੍ਤਿ, ਸੋ ਪੂਜਿਤੋ. ਯਸ੍ਸ ਅਭਿਵਾਦਨਪਚ੍ਚੁਪਟ੍ਠਾਨਅਞ੍ਜਲਿਕਮ੍ਮਾਦਿਵਸੇਨ ਪਰਮਨਿਪਚ੍ਚਕਾਰਂ ਕਰੋਨ੍ਤਿ, ਸੋ ਅਪਚਿਤੋ. ਕੇਚਿ ‘‘ਸਕ੍ਕਰੋਨ੍ਤਿ ਕਾਯੇਨ, ਗਰੁਂ ਕਰੋਨ੍ਤਿ ਵਾਚਾਯ, ਮਾਨੇਨ੍ਤਿ ਚਿਤ੍ਤੇਨ, ਪੂਜੇਨ੍ਤਿ ਲਾਭੇਨਾ’’ਤਿ ਵਣ੍ਣਯਨ੍ਤਿ. ਅਲਂ ਨਾਗਤ੍ਤਾਯ ਵਾਤਿ ਨਾਗਭਾਵਾਯ ਨਾਗਰਾਜਭਾਵਾਯ ਵਾ ਅਲਂ ਪਰਿਯਤ੍ਤਂ. ਸੁਪਣ੍ਣਤ੍ਤਾਯ ਵਾਤਿ ਸੁਪਣ੍ਣਰਾਜਭਾਵਾਯ. ਯਕ੍ਖਤ੍ਤਾਯ ਵਾਤਿ ਯਕ੍ਖਸੇਨਾਪਤਿਭਾਵਾਯ. ਅਸੁਰਤ੍ਤਾਯ ਵਾਤਿ ਅਸੁਰਭਾਵਾਯ. ਗਨ੍ਧਬ੍ਬਤ੍ਤਾਯ ਵਾਤਿ ਗਨ੍ਧਬ੍ਬਦੇਵਘਟੇ ਨਿਬ੍ਬਤ੍ਤਭਾਵਾਯ. ਮਹਾਰਾਜਤ੍ਤਾਯ ਵਾਤਿ ਚਤੁਨ੍ਨਂ ਮਹਾਰਾਜਾਨਂ ਅਞ੍ਞਤਰਭਾਵਾਯ. ਇਨ੍ਦਤ੍ਤਾਯ ਵਾਤਿ ਸਕ੍ਕਭਾਵਾਯ. ਬ੍ਰਹ੍ਮਤ੍ਤਾਯ ਵਾਤਿ ਬ੍ਰਹ੍ਮਕਾਯਿਕਾਦੀਨਂ ਅਞ੍ਞਤਰਭਾਵਾਯ. ਦੇਵਤ੍ਤਾਯ ਵਾਤਿ ਸਮ੍ਮੁਤਿਦੇਵਾਦੀਨਂ ਅਞ੍ਞਤਰਭਾਵਾਯ. ਸੁਦ੍ਧਿਯਾਤਿ ਪਰਿਸੁਦ੍ਧਭਾਵਾਯ ਅਲਂ ਪਰਿਯਤ੍ਤਂ. ਵਿਸੁਦ੍ਧਿਯਾਤਿ ਸਬ੍ਬਮਲਰਹਿਤਅਚ੍ਚਨ੍ਤਪਰਿਸੁਦ੍ਧਭਾਵਾਯ. ਪਰਿਸੁਦ੍ਧਿਯਾਤਿ ਸਬ੍ਬਾਕਾਰੇਨ ਪਰਿਸੁਦ੍ਧਭਾਵਾਯ.
ਤਤ੍ਥ ਤਿਰਚ੍ਛਾਨਯੋਨਿਯਂ ਅਧਿਪਚ੍ਚਤ੍ਤਂ ਸੁਦ੍ਧਿਯਾ. ਦੇਵਲੋਕੇ ਅਧਿਪਚ੍ਚਤ੍ਤਂ ਵਿਸੁਦ੍ਧਿਯਾ. ਬ੍ਰਹ੍ਮਲੋਕੇ ਅਧਿਪਚ੍ਚਤ੍ਤਂ ਪਰਿਸੁਦ੍ਧਿਯਾ. ਚਤੁਰਾਸੀਤਿਕਪ੍ਪਸਹਸ੍ਸਾਨਿ ਅਤਿਕ੍ਕਮਿਤ੍ਵਾ ਮੁਚ੍ਚਨਤ੍ਥਂ ਮੁਤ੍ਤਿਯਾ. ਅਨ੍ਤਰਾਯਾਭਾਵੇਨ ਮੁਚ੍ਚਨਤ੍ਥਂ ਵਿਮੁਤ੍ਤਿਯਾ. ਸਬ੍ਬਾਕਾਰੇਨ ਮੁਤ੍ਤਿਯਾ ਪਰਿਮੁਤ੍ਤਿਯਾ. ਸੁਜ੍ਝਨ੍ਤੀਤਿ ਤਸ੍ਮਿਂ ਸਮਯੇ ਪਬ੍ਬਜਿਤਭਾਵੇਨ ਸੁਦ੍ਧਿਂ ਪਾਪੁਣਨ੍ਤਿ. ਵਿਸੁਜ੍ਝਨ੍ਤੀਤਿ ਪਬ੍ਬਜ੍ਜਂ ਗਹੇਤ੍ਵਾ ਪਟਿਪਤ੍ਤਿਯਾ ਯੁਤ੍ਤਭਾਵੇਨ ਵਿਵਿਧੇਨ ਸੁਜ੍ਝਨ੍ਤਿ. ਪਰਿਸੁਜ੍ਝਨ੍ਤੀਤਿ ਨਿਪ੍ਫਤ੍ਤਿਂ ਪਾਪੇਤ੍ਵਾ ਸਬ੍ਬਾਕਾਰੇਨ ਸੁਜ੍ਝਨ੍ਤਿ. ਮੁਚ੍ਚਨ੍ਤਿ ਤੇਸਂ ਸਮਯਨ੍ਤਰਧਮ੍ਮੇਨ. ਵਿਮੁਚ੍ਚਨ੍ਤਿ ਏਤਸ੍ਸ ਸਤ੍ਥੁਨੋ ਓਵਾਦੇਨ. ਪਰਿਮੁਚ੍ਚਨ੍ਤਿ ਏਤਸ੍ਸ ਸਤ੍ਥੁਨੋ ਅਨੁਸਾਸਨੇਨ. ਸੁਜ੍ਝਿਸ੍ਸਾਮੀਤਿਆਦਯੋ ਅਨਾਗਤਵਸੇਨ ਵੁਤ੍ਤਾ. ਆਯਤਿਂ ਫਲਪਾਟਿਕਙ੍ਖੀਤਿ ਅਨਾਗਤੇ ਵਿਪਾਕਫਲਮਾਕਙ੍ਖਮਾਨੋ. ਇਦਂ ਦਿਟ੍ਠਿਗਤਿਕਾਨਂ ਇਚ੍ਛਾਮਤ੍ਤਂ. ਦਿਟ੍ਠਿਗਤਞ੍ਹਿ ਇਜ੍ਝਮਾਨਂ ਨਿਰਯਂ ਵਾ ਤਿਰਚ੍ਛਾਨਯੋਨਿਂ ਵਾ ਨਿਪ੍ਫਾਦੇਤਿ.
ਅਚ੍ਚਨ੍ਤਸਨ੍ਤੀਤਿ ਅਤਿਅਨ੍ਤਨਿਸ੍ਸਰਣਸਨ੍ਤਿ. ਤਦਙ੍ਗਸਨ੍ਤੀਤਿ ਪਠਮਜ੍ਝਾਨਾਦਿਗੁਣਙ੍ਗੇਨ ਨੀਵਰਣਾਦਿਅਗੁਣਙ੍ਗਂ ਸਮੇਤੀਤਿ ਝਾਨਂ ਤਦਙ੍ਗਸਨ੍ਤਿ. ਸਮ੍ਮੁਤਿਸਨ੍ਤੀਤਿ ਸਮਾਹਾਰਵਸੇਨ ਦਿਟ੍ਠਿਸਨ੍ਤਿ. ਤਾ ਵਿਭਾਗਤੋ ਦਸ੍ਸੇਤੁਂ ‘‘ਕਤਮਾ ਅਚ੍ਚਨ੍ਤਸਨ੍ਤੀ’’ਤਿਆਦਿਮਾਹ. ਅਮਤਂ ਨਿਬ੍ਬਾਨਨ੍ਤਿ ਏਵਮਾਦਯੋ ਹੇਟ੍ਠਾ ਵੁਤ੍ਤਤ੍ਥਾਯੇਵ. ਪਠਮਂ ਝਾਨਂ ਸਮਾਪਨ੍ਨਸ੍ਸ ਨੀਵਰਣਾ ਸਨ੍ਤਾ ਹੋਨ੍ਤੀਤਿ ਏਵਮਾਦਯੋ ਅਨ੍ਤੋ ਅਪ੍ਪਨਾਯਂ ਅਤਿਸਯਵਸੇਨ ਵੁਤ੍ਤਾ. ਅਪਿ ਚ ਸਮ੍ਮੁਤਿਸਨ੍ਤਿ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ, ਸਨ੍ਤੀਤਿ ਇਤਰੇ ਦ੍ਵੇ ਸਨ੍ਤਿਯੋ ਪਟਿਕ੍ਖਿਪਿਤ੍ਵਾ ਸਮ੍ਮੁਤਿਸਨ੍ਤਿਮੇਵ ਦੀਪੇਤਿ. ਕੁਪ੍ਪਸਨ੍ਤਿਨ੍ਤਿ ਵਿਪਾਕਜਨਕਵਸੇਨ ਪਰਿਵਤ੍ਤਨਵਸੇਨ ਚਲਸਨ੍ਤਿਂ. ਪਕੁਪ੍ਪਸਨ੍ਤਿਨ੍ਤਿ ਵਿਸੇਸੇਨ ਚਲਸਨ੍ਤਿਂ. ਏਰਿਤਸਨ੍ਤਿਨ੍ਤਿ ਕਮ੍ਪਨਸਨ੍ਤਿਂ. ਸਮੇਰਿਤਸਨ੍ਤਿਨ੍ਤਿ ਵਿਸੇਸੇਨ ਕਮ੍ਪਿਤਸਨ੍ਤਿਂ. ਚਲਿਤਸਨ੍ਤਿਨ੍ਤਿ ਤਸ੍ਸੇਵ ਵੇਵਚਨਂ. ਘਟ੍ਟਿਤਸਨ੍ਤਿਨ੍ਤਿ ਪੀਲ਼ਿਤਸਨ੍ਤਿਂ. ਸਨ੍ਤਿਂ ਨਿਸ੍ਸਿਤੋਤਿ ਦਿਟ੍ਠਿਸਙ੍ਖਾਤਂ ਸਨ੍ਤਿਂ ਨਿਸ੍ਸਿਤੋ. ਅਸ੍ਸਿਤੋਤਿ ਆਸਿਤੋ ਵਿਸੇਸੇਨ ਨਿਸ੍ਸਿਤੋ. ਅਲ੍ਲੀਨੋਤਿ ਏਕੀਭੂਤੋ.
੨੦. ਏਵਂ ਨਿਸ੍ਸਿਤੇ ਤਾਵ ‘‘ਦਿਟ੍ਠੀਨਿਵੇਸਾ…ਪੇ… ਆਦਿਯਤੀ ਚ ਧਮ੍ਮ’’ਨ੍ਤਿ ਤਤ੍ਥ ਦਿਟ੍ਠੀਨਿਵੇਸਾਤਿ ਇਦਂਸਚ੍ਚਾਭਿਨਿਵੇਸਸਙ੍ਖਾਤਾਨਿ ਦਿਟ੍ਠਿਨਿਵੇਸਨਾਨਿ. ਨ ਹਿ ਸ੍ਵਾਤਿਵਤ੍ਤਾਤਿ ਸੁਖੇਨ ਅਤਿਵਤ੍ਤਿਤਬ੍ਬਾ ਨ ਹੋਨ੍ਤਿ. ਧਮ੍ਮੇਸੁ ਨਿਚ੍ਛੇਯ੍ਯ ਸਮੁਗ੍ਗਹੀਤਨ੍ਤਿ ਦ੍ਵਾਸਟ੍ਠਿਦਿਟ੍ਠਿਗਤੇਸੁ ਤਂ ਤਂ ਸਮੁਗ੍ਗਹਿਤਂ ਅਭਿਨਿਵਿਟ੍ਠਧਮ੍ਮਂ ਨਿਚ੍ਛਿਨਿਤ੍ਵਾ ਪਵਤ੍ਤਾ ਦਿਟ੍ਠਿਨਿਵੇਸਾ ਨ ਹਿ ਸ੍ਵਾਤਿਵਤ੍ਤਾਤਿ ਵੁਤ੍ਤਂ ਹੋਤਿ. ਤਸ੍ਮਾ ਨਰੋ ਤੇਸੁ ਨਿਵੇਸਨੇਸੁ, ਨਿਰਸ੍ਸਤੀ ਆਦਿਯਤੀ ਚ ਧਮ੍ਮਨ੍ਤਿ ਯਸ੍ਮਾ ਨ ਹਿ ਸ੍ਵਾਤਿਵਤ੍ਤਾ, ਤਸ੍ਮਾ ਨਰੋ ਤੇਸੁਯੇਵ ਦਿਟ੍ਠਿਨਿਵੇਸਨੇਸੁ ਅਜਸੀਲਗੋਸੀਲਕੁਕ੍ਕੁਰਸੀਲਪਞ੍ਚਾਤਪਮਰੁਪ੍ਪਪਾਤਉਕ੍ਕੁਟਿਕਪ੍ਪਧਾਨਕਣ੍ਟਕਾਪਸ੍ਸਯਾਦਿਭੇਦਂ ਸਤ੍ਥਾਰਂ ਧਮ੍ਮਕ੍ਖਾਨਂ ਗਣਾਦਿਭੇਦਞ੍ਚ ਤਂ ਤਂ ਧਮ੍ਮਂ ਨਿਰਸ੍ਸਤਿ ਚ ਆਦਿਯਤਿ ਚ ਜਹਤਿ ਚ ਗਣ੍ਹਾਤਿ ਚ ਵਨਮਕ੍ਕਟੋ ਵਿਯ ਤਂ ਤਂ ਸਾਖਨ੍ਤਿ ਵੁਤ੍ਤਂ ਹੋਤਿ.
ਏਵਂ ਨਿਰਸ੍ਸਨ੍ਤੋ ਚ ਆਦਿਯਨ੍ਤੋ ਚ ਅਨਵਟ੍ਠਿਤਚਿਤ੍ਤਤ੍ਤਾ ਅਸਨ੍ਤੇਹਿਪਿ ਗੁਣਦੋਸੇਹਿ ਅਤ੍ਤਨੋ ਵਾ ਪਰਸ੍ਸ ਵਾ ਯਸਾਯਸਂ ਉਪ੍ਪਾਦੇਯ੍ਯ. ਦੁਰਤਿਵਤ੍ਤਾਤਿ ਅਤਿਕ੍ਕਮਿਤੁਂ ਦੁਕ੍ਖਾ. ਦੁਤ੍ਤਰਾਤਿ ਦੁਉਤ੍ਤਰਾ. ਦੁਪ੍ਪਤਰਾ ਦੁਸ੍ਸਮਤਿਕ੍ਕਮਾ ਦੁਬ੍ਬਿਨਿਵਤ੍ਤਾਤਿ ਉਪਸਗ੍ਗੇਨ ਵਡ੍ਢਿਤਾ.
ਨਿਚ੍ਛਿਨਿਤ੍ਵਾਤਿ ਸਸ੍ਸਤਵਸੇਨ ਨਿਚ੍ਛਯਂ ਕਤ੍ਵਾ. ਵਿਨਿਚ੍ਛਿਨਿਤ੍ਵਾਤਿ ਅਤ੍ਤਵਸੇਨ ਨਾਨਾਵਿਧੇਨ ਵਿਨਿਚ੍ਛਯਂ ਕਤ੍ਵਾ. ਵਿਚਿਨਿਤ੍ਵਾਤਿ ਪਰਿਯੇਸਿਤ੍ਵਾ. ਪਵਿਚਿਨਿਤ੍ਵਾਤਿ ਅਤ੍ਤਨਿਯਵਸੇਨ ਸਬ੍ਬਾਕਾਰੇਨ ਪਰਿਯੇਸਿਤ੍ਵਾ. ‘‘ਨਿਚਿਨਿਤ੍ਵਾ ਵਿਚ੍ਚਿਨਿਤ੍ਵਾ’’ਤਿਪਿ ਪਾਠੋ. ਓਧਿਗ੍ਗਾਹੋਤਿ ਅਵਧਿਯਿਤ੍ਵਾ ਗਾਹੋ. ਬਿਲਗ੍ਗਾਹੋਤਿ ਕੋਟ੍ਠਾਸਵਸੇਨ ਗਾਹੋ ‘‘ਬਿਲਸੋ ਵਿਭਜਿਤ੍ਵਾ’’ਤਿਆਦੀਸੁ (ਦੀ. ਨਿ. ੨.੩੭੮; ਮ. ਨਿ. ੧.੧੧੧) ਵਿਯ. ਵਰਗ੍ਗਾਹੋਤਿ ਉਤ੍ਤਮਗਾਹੋ. ਕੋਟ੍ਠਾਸਗ੍ਗਾਹੋਤਿ ਅਵਯਵਵਸੇਨ ਗਾਹੋ. ਉਚ੍ਚਯਗ੍ਗਾਹੋਤਿ ਰਾਸਿਵਸੇਨ ਗਾਹੋ. ਸਮੁਚ੍ਚਯਗ੍ਗਾਹੋਤਿ ਕੋਟ੍ਠਾਸਵਸੇਨ ਰਾਸਿਵਸੇਨ ਚ ਗਾਹੋ. ਇਦਂ ਸਚ੍ਚਨ੍ਤਿ ਇਦਮੇਵ ਸਭਾਵਂ. ਤਚ੍ਛਨ੍ਤਿ ਤਥਭਾਵਂ ਅਵਿਪਰੀਤਸਭਾਵਂ. ਤਥਨ੍ਤਿ ਵਿਪਰਿਣਾਮਰਹਿਤਂ. ਭੂਤਨ੍ਤਿ ਵਿਜ੍ਜਮਾਨਂ. ਯਾਥਾਵਨ੍ਤਿ ਯਥਾਸਭਾਵਂ. ਅਵਿਪਰੀਤਨ੍ਤਿ ਨ ਵਿਪਰੀਤਂ.
ਨਿਰਸ੍ਸਤੀਤਿ ਨਿਅਸ੍ਸਤਿ ਵਿਕ੍ਖਿਪਤਿ. ਪਰਵਿਚ੍ਛਿਨ੍ਦਨਾਯ ਵਾਤਿ ਪਰੇਹਿ ਵਿਸ੍ਸਜ੍ਜਾਪਨੇਨ. ਅਨਭਿਸਮ੍ਭੁਣਨ੍ਤੋ ਵਾਤਿ ਅਸਮ੍ਪਾਪੁਣਨ੍ਤੋ ਵਾ ਅਸਕ੍ਕੋਨ੍ਤੋ ਵਾ ਵਿਸ੍ਸਜ੍ਜੇਤਿ. ਪਰੋ ਵਿਚ੍ਛਿਨ੍ਦੇਤੀਤਿ ਅਞ੍ਞੋ ਵਿਯੋਗਂ ਕਰੋਤਿ. ਨਤ੍ਥੇਤ੍ਥਾਤਿ ਨਤ੍ਥਿ ਏਤ੍ਥ. ਸੀਲਂ ਅਨਭਿਸਮ੍ਭੁਣਨ੍ਤੋਤਿ ਸੀਲਂ ਅਸਮ੍ਪਾਦੇਨ੍ਤੋ. ਸੀਲਂ ਨਿਰਸ੍ਸਤੀਤਿ ਸੀਲਂ ਵਿਸ੍ਸਜ੍ਜੇਤਿ. ਇਤੋ ਪਰੇਸੁਪਿ ਏਸੇਵ ਨਯੋ.
੨੧. ਯੋ ਪਨਾਯਂ ਸਬ੍ਬਦਿਟ੍ਠਿਗਤਾਦਿਦੋਸਧੁਨਨਾਯ ਪਞ੍ਞਾਯ ਸਮਨ੍ਨਾਗਤਤ੍ਤਾ ਧੋਨੋ, ਤਸ੍ਸ ਧੋਨਸ੍ਸ ਹਿ…ਪੇ… ਅਨੂਪਯੋ ਸੋ. ਕਿਂ ਵੁਤ੍ਤਂ ਹੋਤਿ? ਧੋਨਧਮ੍ਮਸਮਨ੍ਨਾਗਮਾ ਧੋਨਸ੍ਸ ਧੁਤਸਬ੍ਬਪਾਪਸ੍ਸ ਅਰਹਤੋ ਕਤ੍ਥਚਿ ਲੋਕੇ ਤੇਸੁ ਤੇਸੁ ਭਵੇਸੁ ਸਂਕਪ੍ਪਨਾ ਦਿਟ੍ਠਿ ਨਤ੍ਥਿ. ਸੋ ਤਸ੍ਸਾ ਦਿਟ੍ਠਿਯਾ ਅਭਾਵਾ, ਯਾਯ ਚ ਅਤ੍ਤਨਾ ਕਤਂ ਪਾਪਕਮ੍ਮਂ ਪਟਿਚ੍ਛਾਦੇਨ੍ਤਾ ਤਿਤ੍ਥਿਯਾ ਮਾਯਾਯ ਵਾ ਮਾਨੇਨ ਵਾ ਏਵਂ ਅਗਤਿਂ ਗਚ੍ਛਨ੍ਤਿ, ਤਮ੍ਪਿ ਮਾਯਞ੍ਚ ਮਾਨਞ੍ਚ ਪਹਾਯ ਧੋਨੋ ਰਾਗਾਦੀਨਂ ਦੋਸਾਨਂ ਕੇਨ ਗਚ੍ਛੇਯ੍ਯ, ਦਿਟ੍ਠਧਮ੍ਮੇ ਸਮ੍ਪਰਾਯੇ ਵਾ ਨਿਰਯਾਦੀਸੁ ਗਤਿਵਿਸੇਸੇਸੁ ਕੇਨ ਸਙ੍ਖਂ ਗਚ੍ਛੇਯ੍ਯ, ਅਨੂਪਯੋ ਸੋ, ਸੋ ਹਿ ਤਣ੍ਹਾਦਿਟ੍ਠਿਉਪਯਾਨਂ ਦ੍ਵਿਨ੍ਨਂ ਅਭਾਵੇਨ ਅਨੂਪਯੋਤਿ.
ਕਿਂ ਕਾਰਣਾਤਿ ਕੇਨ ਕਾਰਣੇਨ. ਧੋਨਾ ਵੁਚ੍ਚਤਿ ਪਞ੍ਞਾਤਿ ਧੋਨਾ ਇਤਿ ਕਿਂਕਾਰਣਾ ਪਞ੍ਞਾ ਕਥੀਯਤਿ. ਤਾਯ ਪਞ੍ਞਾਯ ਕਾਯਦੁਚ੍ਚਰਿਤਨ੍ਤਿ ਤਾਯ ਵੁਤ੍ਤਪ੍ਪਕਾਰਾਯ ਪਞ੍ਞਾਯ ਕਾਯਤੋ ਪਵਤ੍ਤਂ ਦੁਟ੍ਠੁ ਕਿਲੇਸਪੂਤਿਕਤ੍ਤਾ ਵਾ ਚਰਿਤਨ੍ਤਿ ਕਾਯਦੁਚ੍ਚਰਿਤਂ. ਧੂਤਞ੍ਚ ਧੋਤਞ੍ਚਾਤਿ ਕਮ੍ਪਿਤਞ੍ਚ ਧੋਵਿਤਞ੍ਚ. ਸਨ੍ਧੋਤਞ੍ਚਾਤਿ ਸਮ੍ਮਾ ਧੋਵਿਤਞ੍ਚ. ਨਿਦ੍ਧੋਤਞ੍ਚਾਤਿ ਵਿਸੇਸੇਨ ਸੁਟ੍ਠੁ ਨਿਦ੍ਧੋਤਞ੍ਚ. ਰਾਗੋ ਧੁਤੋ ਚਾਤਿਆਦਯੋ ਚਤੁਨ੍ਨਂ ਮਗ੍ਗਾਨਂ ਵਸੇਨ ਯੋਜੇਤਬ੍ਬਾ.
ਸਮ੍ਮਾਦਿਟ੍ਠਿਯਾ ਮਿਚ੍ਛਾਦਿਟ੍ਠਿ ਧੁਤਾ ਚਾਤਿ ਮਗ੍ਗਸਮ੍ਪਯੁਤ੍ਤਾਯ ਸਮ੍ਮਾਦਿਟ੍ਠਿਯਾ ਮਿਚ੍ਛਾਦਿਟ੍ਠਿ ਕਮ੍ਪਿਤਾ ਚਲਿਤਾ ਧੋਵਿਤਾ. ਸਮ੍ਮਾਸਙ੍ਕਪ੍ਪਾਦੀਸੁਪਿ ਏਸੇਵ ਨਯੋ. ਵੁਤ੍ਤਞ੍ਹੇਤਂ ‘‘ਸਮ੍ਮਾਦਿਟ੍ਠਿਕਸ੍ਸ, ਭਿਕ੍ਖਵੇ, ਮਿਚ੍ਛਾਦਿਟ੍ਠਿ ਨਿਜ੍ਜਿਣ੍ਣਾ ਹੋਤੀ’’ਤਿ ਸੁਤ੍ਤਂ (ਅ. ਨਿ. ੧੦.੧੦੬; ਦੀ. ਨਿ. ੩.੩੬੦) ਵਿਤ੍ਥਾਰੇਤਬ੍ਬਂ. ਸਮ੍ਮਾਞਾਣੇਨਾਤਿ ਮਗ੍ਗਸਮ੍ਪਯੁਤ੍ਤਞਾਣੇਨ, ਪਚ੍ਚਵੇਕ੍ਖਣਞਾਣੇਨ ਵਾ. ਮਿਚ੍ਛਾਞਾਣਨ੍ਤਿ ਵਿਪਰੀਤਞਾਣਂ ਅਯਾਥਾਵਞਾਣਂ, ਪਾਪਕਿਰਿਯਾਸੁ ਉਪਚਿਨ੍ਤਾਵਸੇਨ ਪਾਪਂ ਕਤ੍ਵਾ ‘‘ਸੁਕਤਂ ਮਯਾ’’ਤਿ ਪਚ੍ਚਵੇਕ੍ਖਣਾਕਾਰੇਨ ਚ ਉਪ੍ਪਨ੍ਨੋ ਮੋਹੋ. ਸਮ੍ਮਾਵਿਮੁਤ੍ਤਿਯਾ ਮਿਚ੍ਛਾਵਿਮੁਤ੍ਤੀਤਿ ਸਮੁਚ੍ਛੇਦਵਿਮੁਤ੍ਤਿਯਾ ਵਿਪਰੀਤਾ ਅਯਾਥਾਵਵਿਮੁਤ੍ਤਿਯੇਵ ਚੇਤੋਵਿਮੁਤ੍ਤਿਸਞ੍ਞਿਤਾ.
ਅਰਹਾ ਇਮੇਹਿ ਧੋਨੇਯ੍ਯੇਹਿ ਧਮ੍ਮੇਹੀਤਿ ਰਾਗਾਦੀਹਿ ਕਿਲੇਸੇਹਿ ਦੂਰੇ ਠਿਤੋ ਅਰਹਾ ਇਮੇਹਿ ਵੁਤ੍ਤਪ੍ਪਕਾਰੇਹਿ ਕਿਲੇਸਧੋਵਨੇਹਿ ਧਮ੍ਮੇਹਿ ਉਪੇਤੋ ਹੋਤਿ. ਧੋਨੋਤਿ ਧੋਨੋ ਪੁਗ੍ਗਲੋ, ਤੇਨੇਵ ‘‘ਸੋ ਧੁਤਰਾਗੋ’’ਤਿਆਦਯੋ ਆਹ.
ਮਾਯਾ ਵੁਚ੍ਚਤਿ ਵਞ੍ਚਨਿਕਾਚਰਿਯਾਤਿ ਵਞ੍ਚਨਕਿਰਿਯਂ ਵਞ੍ਚਨਕਰਣਂ ਅਸ੍ਸਾ ਅਤ੍ਥੀਤਿ ਵਞ੍ਚਨਿਕਾਚਰਿਯਾ. ਤਸ੍ਸ ਪਟਿਚ੍ਛਾਦਨਹੇਤੂਤਿ ਤੇਸਂ ਦੁਚ੍ਚਰਿਤਾਨਂ ਅਪ੍ਪਕਾਸਨਕਾਰਣਾ. ਪਾਪਿਕਂ ਇਚ੍ਛਂ ਪਣਿਦਹਤੀਤਿ ਲਾਮਕਂ ਪਤ੍ਥਨਂ ਪਤਿਟ੍ਠਾਪੇਤਿ. ‘‘ਮਾ ਮਂ ਜਞ੍ਞਾ’’ਤਿ ਇਚ੍ਛਤੀਤਿ ‘‘ਮਯ੍ਹਂ ਕਤਂ ਪਾਪਂ ਪਰੇ ਮਾ ਜਾਨਿਂਸੂ’’ਤਿ ਪਚ੍ਚਾਸੀਸਤਿ. ਸਙ੍ਕਪ੍ਪੇਤੀਤਿ ਵਿਤਕ੍ਕਂ ਉਪ੍ਪਾਦੇਤਿ. ਵਾਚਂ ਭਾਸਤੀਤਿ ਜਾਨਂਯੇਵ ਪਣ੍ਣਤ੍ਤਿਂ ਵੀਤਿਕ੍ਕਮਨ੍ਤੋ ਭਿਕ੍ਖੁ ਭਾਰਿਯਂ ਕਰੋਤਿ. ‘‘ਅਮ੍ਹਾਕਂ ਵੀਤਿਕ੍ਕਮਟ੍ਠਾਨਂ ਨਾਮ ਨਤ੍ਥੀ’’ਤਿ ਉਪਸਨ੍ਤੋ ਵਿਯ ਭਾਸਤਿ. ਕਾਯੇਨ ਪਰਕ੍ਕਮਤੀਤਿ ‘‘ਮਯਾ ਕਤਂ ਇਦਂ ਪਾਪਕਮ੍ਮਂ ਮਾ ਕੇਚਿ ਜਾਨਿਂਸੂ’’ਤਿ ਕਾਯੇਨ ਵਤ੍ਤਂ ਕਰੋਤਿ. ਵਿਜ੍ਜਮਾਨਦੋਸਪਟਿਚ੍ਛਾਦਨਤੋ ਚਕ੍ਖੁਮੋਹਨਮਾਯਾ ਅਸ੍ਸਾਤਿ ਮਾਯਾਵੀ, ਮਾਯਾਵਿਨੋ ਭਾਵੋ ਮਾਯਾਵਿਤਾ. ਕਤ੍ਵਾ ਪਾਪਂ ਪੁਨ ਪਟਿਚ੍ਛਾਦਨਤੋ ਅਤਿਚ੍ਚ ਅਸ੍ਸਰਤਿ ਏਤਾਯ ਸਤ੍ਤੋਤਿ ਅਚ੍ਚਸਰਾ. ਕਾਯਵਾਚਾਕਿਰਿਯਾਹਿ ਅਞ੍ਞਥਾ ਦਸ੍ਸਨਤੋ ਵਞ੍ਚੇਤੀਤਿ ਵਞ੍ਚਨਾ. ਏਤਾਯ ਸਤ੍ਤਾ ਨਿਕਰੋਨ੍ਤੀਤਿ ਨਿਕਤਿ, ਮਿਚ੍ਛਾ ਕਰੋਨ੍ਤੀਤਿ ਅਤ੍ਥੋ. ‘‘ਨਾਹਂ ਏਵਂ ਕਰੋਮੀ’’ਤਿ ਪਾਪਾਨਂ ਵਿਕ੍ਖਿਪਨਤੋ ਨਿਕਿਰਣਾ. ‘‘ਨਾਹਂ ਏਵਂ ਕਰੋਮੀ’’ਤਿ ਪਰਿਵਜ੍ਜਨਤੋ ਪਰਿਹਰਣਾ. ਕਾਯਾਦੀਹਿ ਸਂਹਰਣਤੋ ਗੂਹਨਾ. ਸਮਭਾਗੇਨ ਗੂਹਨਾ ਪਰਿਗੂਹਨਾ. ਤਿਣਪਣ੍ਣੇਹਿ ਵਿਯ ਗੂਥਂ ਕਾਯਵਚੀਕਮ੍ਮੇਹਿ ਪਾਪਂ ਛਾਦੇਤੀਤਿ ਛਾਦਨਾ. ਸਬ੍ਬਤੋ ਭਾਗੇਨ ਛਾਦਨਾ ਪਰਿਚ੍ਛਾਦਨਾ. ਨ ਉਤ੍ਤਾਨਿਂ ਕਤ੍ਵਾ ਦਸ੍ਸੇਤੀਤਿ ਅਨੁਤ੍ਤਾਨਿਕਮ੍ਮਂ. ਨ ਪਾਕਟਂ ਕਤ੍ਵਾ ਦਸ੍ਸੇਤੀਤਿ ਅਨਾਵਿਕਮ੍ਮਂ. ਸੁਟ੍ਠੁ ਛਾਦਨਾ ਵੋਚ੍ਛਾਦਨਾ. ਕਤਪਟਿਚ੍ਛਾਦਨਵਸੇਨ ਪੁਨਪਿ ਪਾਪਸ੍ਸ ਕਰਣਤੋ ਪਾਪਕਿਰਿਯਾ. ਅਯਂ ਵੁਚ੍ਚਤੀਤਿ ਅਯਂ ਕਤਪਟਿਚ੍ਛਾਦਨਲਕ੍ਖਣਾ ਮਾਯਾ ਨਾਮ ਵੁਚ੍ਚਤਿ, ਯਾਯ ਸਮਨ੍ਨਾਗਤੋ ਪੁਗ੍ਗਲੋ ਭਸ੍ਮਪਟਿਚ੍ਛਨ੍ਨੋ ਵਿਯ ਅਙ੍ਗਾਰੋ, ਉਦਕਪਟਿਚ੍ਛਨ੍ਨੋ ਵਿਯ ਖਾਣੁ, ਪਿਲੋਤਿਕਪਲਿਵੇਠਿਤਂ ਵਿਯ ਚ ਸਤ੍ਥਂ ਹੋਤਿ.
ਏਕਵਿਧੇਨ ਮਾਨੋਤਿ ਏਕਪਰਿਚ੍ਛੇਦੇਨ ਏਕਕੋਟ੍ਠਾਸੇਨ ਮਾਨੋ. ਯਾ ਚਿਤ੍ਤਸ੍ਸ ਉਨ੍ਨਤੀਤਿ ਯਾ ਚਿਤ੍ਤਸ੍ਸ ਅਬ੍ਭੁਸ੍ਸਾਪਨਾ, ਅਯਂ ਮਾਨੋਤਿ ਅਤ੍ਥੋ. ਏਤ੍ਥ ਪੁਗ੍ਗਲਂ ਅਨਾਮਸਿਤ੍ਵਾ ਨਿਬ੍ਬਤ੍ਤਿਤਮਾਨੋਵ ਵੁਤ੍ਤੋ.
ਅਤ੍ਤੁਕ੍ਕਂਸਨਮਾਨੋਤਿ ਅਤ੍ਤਾਨਂ ਉਪਰਿ ਠਪਨਮਾਨੋ. ਪਰਵਮ੍ਭਨਮਾਨੋਤਿ ਪਰੇ ਲਾਮਕਕਰਣਮਾਨੋ. ਇਮੇ ਦ੍ਵੇ ਮਾਨਾ ਯੇਭੁਯ੍ਯੇਨ ਤਥਾ ਪਵਤ੍ਤਾਕਾਰਵਸੇਨ ਵੁਤ੍ਤਾ.
‘‘ਸੇਯ੍ਯੋਹਮਸ੍ਮੀ’’ਤਿ ਮਾਨੋਤਿ ਜਾਤਿਆਦੀਨਿ ਨਿਸ੍ਸਾਯ ‘‘ਅਹਮਸ੍ਮਿ ਸੇਯ੍ਯੋ’’ਤਿ ਉਪ੍ਪਨ੍ਨੋ ਮਾਨੋ. ਸਦਿਸਮਾਨਾਦੀਸੁਪਿ ਏਸੇਵ ਨਯੋ. ਏਵਮਿਮੇਪਿ ਤਯੋ ਮਾਨਾ ਪੁਗ੍ਗਲਵਿਸੇਸਂ ਅਨਿਸ੍ਸਾਯ ਤਥਾ ਪਵਤ੍ਤਾਕਾਰਵਸੇਨ ਵੁਤ੍ਤਾ. ਤੇਸੁ ਏਕੇਕੋ ਤਿਣ੍ਣਮ੍ਪਿ ਸੇਯ੍ਯਸਦਿਸਹੀਨਾਨਂ ਉਪ੍ਪਜ੍ਜਤਿ. ਤਤ੍ਥ ‘‘ਸੇਯ੍ਯੋਹਮਸ੍ਮੀ’’ਤਿ ਮਾਨੋ ਸੇਯ੍ਯਸ੍ਸੇਵ ਯਾਥਾਵਮਾਨੋ, ਸੇਸਾਨਂ ਅਯਾਥਾਵਮਾਨੋ. ‘‘ਸਦਿਸੋਹਮਸ੍ਮੀ’’ਤਿ ਮਾਨੋ ਸਦਿਸਸ੍ਸੇਵ ਯਾਥਾਵਮਾਨੋ, ਸੇਸਾਨਂ ਅਯਾਥਾਵਮਾਨੋ. ‘‘ਹੀਨੋਹਮਸ੍ਮੀ’’ਤਿ ਮਾਨੋ ਹੀਨਸ੍ਸੇਵ ਯਾਥਾਵਮਾਨੋ, ਸੇਸਾਨਂ ਅਯਾਥਾਵਮਾਨੋ.
ਚਤੁਬ੍ਬਿਧੇਨ ਮਾਨੋ ਲੋਕਧਮ੍ਮਵਸੇਨ ਵੁਤ੍ਤੋ. ਪਞ੍ਚਵਿਧੇਨ ਮਾਨੋ ਪਞ੍ਚਕਾਮਗੁਣਵਸੇਨ ਵੁਤ੍ਤੋ. ਛਬ੍ਬਿਧੇਨ ਮਾਨੋ ਚਕ੍ਖਾਦਿਸਮ੍ਪਤ੍ਤਿਵਸੇਨ ਵੁਤ੍ਤੋ. ਤਤ੍ਥ ਮਾਨਂ ਜਨੇਤੀਤਿ ਮਾਨਂ ਉਪ੍ਪਾਦੇਤਿ.
ਸਤ੍ਤਵਿਧੇਨ ਮਾਨਨਿਦ੍ਦੇਸੇ ਮਾਨੋਤਿ ਉਨ੍ਨਮੋ. ਅਤਿਮਾਨੋਤਿ ‘‘ਜਾਤਿਆਦੀਹਿ ਮਯਾ ਸਦਿਸੋ ਨਤ੍ਥੀ’’ਤਿ ਅਤਿਕ੍ਕਮਿਤ੍ਵਾ ਮਞ੍ਞਨਵਸੇਨ ਉਪ੍ਪਨ੍ਨੋ ਮਾਨੋ. ਮਾਨਾਤਿਮਾਨੋਤਿ ‘‘ਅਯਂ ਪੁਬ੍ਬੇ ਮਯਾ ਸਦਿਸੋ, ਇਦਾਨਿ ਅਹਂ ਸੇਟ੍ਠੋ, ਅਯਂ ਹੀਨਤਰੋ’’ਤਿ ਉਪ੍ਪਨ੍ਨੋ ਮਾਨੋ. ਅਯਂ ਭਾਰਾਤਿਭਾਰੋ ਵਿਯ ਪੁਰਿਮਂ ਸਦਿਸਮਾਨਂ ਉਪਾਦਾਯ ਮਾਨਾਤਿਮਾਨੋ ਨਾਮਾਤਿ ਦਸ੍ਸੇਤੁਂ ‘‘ਮਾਨਾਤਿਮਾਨੋ’’ਤਿ ਆਹ. ਓਮਾਨੋਤਿ ਹੀਨਮਾਨੋ. ਯੋ ‘‘ਹੀਨੋਹਮਸ੍ਮੀ’’ਤਿ ਮਾਨੋ ਨਾਮ ਵੁਤ੍ਤੋ, ਅਯਂ ਓਮਾਨੋ ਨਾਮ. ਅਪਿ ਚੇਤ੍ਥ ‘‘ਤ੍ਵਂ ਜਾਤਿਮਾ, ਕਾਕਜਾਤਿ ਵਿਯ ਤੇ ਜਾਤਿ. ਤ੍ਵਂ ਗੋਤ੍ਤਵਾ, ਚਣ੍ਡਾਲਗੋਤ੍ਤਂ ਵਿਯ ਤੇ ਗੋਤ੍ਤਂ. ਤੁਯ੍ਹਂ ਸਰੋ ਅਤ੍ਥਿ, ਕਾਕਸਰੋ ਵਿਯ ਤੇ ਸਰੋ’’ਤਿ ਏਵਂ ਅਤ੍ਤਾਨਂ ਹੇਟ੍ਠਾ ਕਤ੍ਵਾ ਪਵਤ੍ਤਨਵਸੇਨ ਅਯਂ ‘‘ਓਮਾਨੋ’’ਤਿ ਵੇਦਿਤਬ੍ਬੋ.
ਅਧਿਮਾਨੋਤਿ ਚਤ੍ਤਾਰਿ ਸਚ੍ਚਾਨਿ ਅਪ੍ਪਤ੍ਵਾ ਪਤ੍ਤਸਞ੍ਞਿਸ੍ਸ, ਚਤੂਹਿ ਮਗ੍ਗੇਹਿ ਕਤ੍ਤਬ੍ਬੇ ਕਿਚ੍ਚੇ ਅਕਤੇਯੇਵ ਕਤਸਞ੍ਞਿਸ੍ਸ, ਚਤੁਸਚ੍ਚਧਮ੍ਮੇ ਅਨਧਿਗਤੇ ਅਧਿਗਤਸਞ੍ਞਿਸ੍ਸ, ਅਰਹਤ੍ਤੇ ਅਸਚ੍ਛਿਕਤੇ ਸਚ੍ਛਿਕਤਸਞ੍ਞਿਸ੍ਸ ਉਪ੍ਪਨ੍ਨੋ ਅਧਿਗਤਮਾਨੋ ਅਧਿਮਾਨੋ ਨਾਮ. ਅਯਂ ਪਨ ਕਸ੍ਸ ਉਪ੍ਪਜ੍ਜਤਿ, ਕਸ੍ਸ ਨ ਉਪ੍ਪਜ੍ਜਤੀਤਿ? ਅਰਿਯਸਾਵਕਸ੍ਸ ਤਾਵ ਨ ਉਪ੍ਪਜ੍ਜਤਿ. ਸੋ ਹਿ ਮਗ੍ਗਫਲਨਿਬ੍ਬਾਨਪਹੀਨਕਿਲੇਸਾਵਸਿਟ੍ਠਕਿਲੇਸਪਚ੍ਚਵੇਕ੍ਖਣੇਨ ਸਞ੍ਜਾਤਸੋਮਨਸ੍ਸੋ ਅਰਿਯਗੁਣਪਟਿਵੇਧੇ ਨਿਕ੍ਕਙ੍ਖੋ, ਤਸ੍ਮਾ ਸੋਤਾਪਨ੍ਨਾਦੀਨਂ ‘‘ਅਹਂ ਸਕਦਾਗਾਮੀ’’ਤਿਆਦਿਵਸੇਨ ਮਾਨੋ ਨ ਉਪ੍ਪਜ੍ਜਤਿ, ਦੁਸ੍ਸੀਲਸ੍ਸ ਚ ਨ ਉਪ੍ਪਜ੍ਜਤਿ. ਸੋ ਹਿ ਅਰਿਯਗੁਣਾਧਿਗਮੇ ਨਿਰਾਸੋਵ. ਸੀਲਵਤੋਪਿ ਪਰਿਚ੍ਚਤ੍ਤਕਮ੍ਮਟ੍ਠਾਨਸ੍ਸ ਨਿਦ੍ਦਾਰਾਮਤਾਦਿਮਨੁਯੁਤ੍ਤਸ੍ਸ ਨ ਉਪ੍ਪਜ੍ਜਤਿ, ਪਰਿਸੁਦ੍ਧਸੀਲਸ੍ਸ ਪਨ ਕਮ੍ਮਟ੍ਠਾਨੇ ਅਪ੍ਪਮਤ੍ਤਸ੍ਸ ਨਾਮਰੂਪਂ ਵਵਤ੍ਥਪੇਤ੍ਵਾ ਪਚ੍ਚਯਪਰਿਗ੍ਗਹੇਨ ਵਿਤਿਣ੍ਣਕਙ੍ਖਸ੍ਸ ਤਿਲਕ੍ਖਣਂ ਆਰੋਪੇਤ੍ਵਾ ਸਙ੍ਖਾਰੇ ਸਮ੍ਮਸਨ੍ਤਸ੍ਸ ਆਰਦ੍ਧਵਿਪਸ੍ਸਕਸ੍ਸ ਉਪ੍ਪਜ੍ਜਤਿ, ਉਪ੍ਪਨ੍ਨੇ ਚ ਸੁਦ੍ਧਸਮਥਲਾਭੀ ਸੁਦ੍ਧਵਿਪਸ੍ਸਨਾਲਾਭੀ ਵਾ ਅਨ੍ਤਰਾ ਠਪੇਤਿ. ਸੋ ਹਿ ਦਸਪਿ ਵਸ੍ਸਾਨਿ ਵੀਸਮ੍ਪਿ ਵਸ੍ਸਾਨਿ ਤਿਂਸਮ੍ਪਿ ਵਸ੍ਸਾਨਿ ਅਸੀਤਿਪਿ ਵਸ੍ਸਾਨਿ ਕਿਲੇਸਸਮੁਦਾਚਾਰਂ ਅਪਸ੍ਸਨ੍ਤੋ ‘‘ਅਹਂ ਸੋਤਾਪਨ੍ਨੋ’’ਤਿ ਵਾ ‘‘ਸਕਦਾਗਾਮੀ’’ਤਿ ਵਾ ‘‘ਅਨਾਗਾਮੀ’’ਤਿ ਵਾ ਮਞ੍ਞਤਿ, ਸਮਥਵਿਪਸ੍ਸਨਾਲਾਭੀ ਪਨ ਅਰਹਤ੍ਤੇਯੇਵ ਠਪੇਤਿ. ਤਸ੍ਸ ਹਿ ਸਮਾਧਿਬਲੇਨ ਕਿਲੇਸਾ ਵਿਕ੍ਖਮ੍ਭਿਤਾ, ਵਿਪਸ੍ਸਨਾਬਲੇਨ ਸਙ੍ਖਾਰਾ ਸੁਪਰਿਗ੍ਗਹਿਤਾ, ਤਸ੍ਮਾ ਸਟ੍ਠਿਪਿ ਵਸ੍ਸਾਨਿ ਅਸੀਤਿਪਿ ਵਸ੍ਸਾਨਿ ਵਸ੍ਸਸਤਮ੍ਪਿ ਕਿਲੇਸਾ ਨ ਸਮੁਦਾਚਰਨ੍ਤਿ, ਖੀਣਾਸਵਸ੍ਸੇਵ ਚਿਤ੍ਤਾਚਾਰੋ ਹੋਤਿ. ਸੋ ਏਵਂ ਦੀਘਰਤ੍ਤਂ ਕਿਲੇਸਸਮੁਦਾਚਾਰਂ ਅਪਸ੍ਸਨ੍ਤੋ ਅਨ੍ਤਰਾ ਅਟ੍ਠਤ੍ਵਾਵ ‘‘ਅਰਹਾ ਅਹ’’ਨ੍ਤਿ ਮਞ੍ਞਤਿ.
ਅਸ੍ਮਿਮਾਨੋਤਿ ਰੂਪੇ ਅਸ੍ਮੀਤਿਆਦਿਨਾ ਨਯੇਨ ਪਞ੍ਚਸੁ ਖਨ੍ਧੇਸੁ ‘‘ਅਹਂ ਰੂਪਾਦਯੋ’’ਤਿ ਉਪ੍ਪਨ੍ਨੋ ਮਾਨੋ. ਮਿਚ੍ਛਾਮਾਨੋਤਿ ਪਾਪਕੇਹਿ ਕਮ੍ਮਾਯਤਨਸਿਪ੍ਪਾਯਤਨਵਿਜ੍ਜਾਟ੍ਠਾਨਸੁਤਪਟਿਭਾਨਸੀਲਬ੍ਬਤੇਹਿ, ਪਾਪਿਕਾਯ ਚ ਦਿਟ੍ਠਿਯਾ ਉਪ੍ਪਨ੍ਨੋ ਮਾਨੋ. ਤਤ੍ਥ ਪਾਪਕਂ ਕਮ੍ਮਾਯਤਨਂ ਨਾਮ ਕੇਵਟ੍ਟਮਚ੍ਛਬਨ੍ਧਨੇਸਾਦਾਨਂ ਕਮ੍ਮਂ. ਪਾਪਕਂ ਸਿਪ੍ਪਾਯਤਨਂ ਨਾਮ ਮਚ੍ਛਜਾਲਖਿਪਕੁਮੀਨਕਰਣੇਸੁ ਚੇਵ ਪਾਸਓਡ੍ਡਨਸੂਲਾਰੋਪਨਾਦੀਸੁ ਚ ਛੇਕਤਾ. ਪਾਪਕਂ ਵਿਜ੍ਜਾਟ੍ਠਾਨਂ ਨਾਮ ਯਾ ਕਾਚਿ ਪਰੂਪਘਾਤਵਿਜ੍ਜਾ. ਪਾਪਕਂ ਸੁਤਂ ਨਾਮ ਭਾਰਤਯੁਦ੍ਧਸੀਤਾਹਰਣਾਦਿਪਟਿਸਂਯੁਤ੍ਤਂ. ਪਾਪਕਂ ਪਟਿਭਾਨਂ ਨਾਮ ਦੁਬ੍ਭਾਸਿਤਯੁਤ੍ਤਂ ਕਪ੍ਪਨਾਟਕਵਿਲਪ੍ਪਨਾਦਿਪਟਿਭਾਨਂ. ਪਾਪਕਂ ਸੀਲਂ ਨਾਮ ਅਜਸੀਲਂ ਗੋਸੀਲਂ. ਵਤਮ੍ਪਿ ਅਜਵਤਗੋਵਤਮੇਵ. ਪਾਪਿਕਾ ਦਿਟ੍ਠਿ ਪਨ ਦ੍ਵਾਸਟ੍ਠਿਯਾ ਦਿਟ੍ਠਿਗਤੇਸੁ ਯਾਕਾਚਿ ਦਿਟ੍ਠਿ. ਅਟ੍ਠਵਿਧਮਾਨੋ ਉਤ੍ਤਾਨਤ੍ਥੋਯੇਵ.
ਨਵਵਿਧੇਨ ਮਾਨਨਿਦ੍ਦੇਸੇ ਸੇਯ੍ਯਸ੍ਸ ‘‘ਸੇਯ੍ਯੋਹਮਸ੍ਮੀ’’ਤਿਆਦਯੋ ਨਵ ਮਾਨਾ ਪੁਗ੍ਗਲਂ ਨਿਸ੍ਸਾਯ ਵੁਤ੍ਤਾ. ਏਤ੍ਥ ਪਨ ਸੇਯ੍ਯਸ੍ਸ ‘‘ਸੇਯ੍ਯੋਹਮਸ੍ਮੀ’’ਤਿ ਮਾਨੋ ਰਾਜਾਨਞ੍ਚੇਵ ਪਬ੍ਬਜਿਤਾਨਞ੍ਚ ਉਪ੍ਪਜ੍ਜਤਿ. ਰਾਜਾ ਹਿ ‘‘ਰਟ੍ਠੇਨ ਵਾ ਧਨਵਾਹਨੇਹਿ ਵਾ ਕੋ ਮਯਾ ਸਦਿਸੋ ਅਤ੍ਥੀ’’ਤਿ ਏਤਂ ਮਾਨਂ ਕਰੋਤਿ. ਪਬ੍ਬਜਿਤੋਪਿ ‘‘ਸੀਲਧੁਤਙ੍ਗਾਦੀਹਿ ਕੋ ਮਯਾ ਸਦਿਸੋ ਅਤ੍ਥੀ’’ਤਿ ਏਤਂ ਮਾਨਂ ਕਰੋਤਿ.
ਸੇਯ੍ਯਸ੍ਸ ‘‘ਸਦਿਸੋਹਮਸ੍ਮੀ’’ਤਿ ਮਾਨੋਪਿ ਏਤੇਸਂਯੇਵ ਉਪ੍ਪਜ੍ਜਤਿ. ਰਾਜਾ ਹਿ ‘‘ਰਟ੍ਠੇਨ ਵਾ ਧਨਵਾਹਨੇਹਿ ਵਾ ਅਞ੍ਞਰਾਜੂਹਿ ਸਦ੍ਧਿਂ ਮਯ੍ਹਂ ਕਿਂ ਨਾਨਾਕਰਣ’’ਨ੍ਤਿ ਏਤਂ ਮਾਨਂ ਕਰੋਤਿ. ਪਬ੍ਬਜਿਤੋਪਿ ‘‘ਸੀਲਧੁਤਙ੍ਗਾਦੀਹਿ ਅਞ੍ਞੇਨ ਭਿਕ੍ਖੁਨਾ ਮਯ੍ਹਂ ਕਿਂ ਨਾਨਾਕਰਣ’’ਨ੍ਤਿ ਏਤਂ ਮਾਨਂ ਕਰੋਤਿ.
ਸੇਯ੍ਯਸ੍ਸ ‘‘ਹੀਨੋਹਮਸ੍ਮੀ’’ਤਿ ਮਾਨੋਪਿ ਏਤੇਸਂਯੇਵ ਉਪ੍ਪਜ੍ਜਤਿ. ਯਸ੍ਸ ਹਿ ਰਞ੍ਞੋ ਰਟ੍ਠਂ ਵਾ ਧਨਵਾਹਨਾਦੀਨਿ ਵਾ ਨਾਤਿਸਮ੍ਪਨ੍ਨਾਨਿ ਹੋਨ੍ਤਿ, ਸੋ ‘‘ਮਯ੍ਹਂ ਰਾਜਾਤਿ ਵੋਹਾਰਸੁਖਮਤ੍ਤਕਮੇਵ, ਕਿਂ ਰਾਜਾ ਨਾਮ ਅਹ’’ਨ੍ਤਿ ਏਤਂ ਮਾਨਂ ਕਰੋਤਿ. ਪਬ੍ਬਜਿਤੋਪਿ ਅਪ੍ਪਲਾਭਸਕ੍ਕਾਰੋ ‘‘ਅਹਂ ਧਮ੍ਮਕਥਿਕੋ, ਬਹੁਸ੍ਸੁਤੋ, ਮਹਾਥੇਰੋਤਿ ਕਥਾਮਤ੍ਤਮੇਵ, ਕਿਂ ਧਮ੍ਮਕਥਿਕੋ ਨਾਮਾਹਂ, ਕਿਂ ਬਹੁਸ੍ਸੁਤੋ ਨਾਮਾਹਂ, ਕਿਂ ਮਹਾਥੇਰੋ ਨਾਮਾਹਂ, ਯਸ੍ਸ ਮੇ ਲਾਭਸਕ੍ਕਾਰੋ ਨਤ੍ਥੀ’’ਤਿ ਏਤਂ ਮਾਨਂ ਕਰੋਤਿ.
ਸਦਿਸਸ੍ਸ ‘‘ਸੇਯ੍ਯੋਹਮਸ੍ਮੀ’’ਤਿ ਮਾਨਾਦਯੋ ਅਮਚ੍ਚਾਦੀਨਂ ਉਪ੍ਪਜ੍ਜਨ੍ਤਿ. ਅਮਚ੍ਚੋ ਵਾ ਹਿ ਰਟ੍ਠਿਯੋ ਵਾ ‘‘ਭੋਗਯਾਨਵਾਹਨਾਦੀਹਿ ਕੋ ਮਯਾ ਸਦਿਸੋ ਅਞ੍ਞੋ ਰਾਜਪੁਰਿਸੋ ਅਤ੍ਥੀ’’ਤਿ ਵਾ, ‘‘ਮਯ੍ਹਂ ਅਞ੍ਞੇਹਿ ਸਦ੍ਧਿਂ ਕਿਂ ਨਾਨਾਕਰਣ’’ਨ੍ਤਿ ਵਾ, ‘‘ਅਮਚ੍ਚੋਤਿ ਨਾਮਮੇਵ ਮਯ੍ਹਂ, ਘਾਸਚ੍ਛਾਦਨਮਤ੍ਤਮ੍ਪਿ ਮੇ ਨਤ੍ਥਿ, ਕਿਂ ਅਮਚ੍ਚੋ ਨਾਮਾਹ’’ਨ੍ਤਿ ਵਾ ਏਤੇ ਮਾਨੇ ਕਰੋਤਿ.
ਹੀਨਸ੍ਸ ‘‘ਸੇਯ੍ਯੋਹਮਸ੍ਮੀ’’ਤਿ ਮਾਨਾਦਯੋ ਦਾਸਾਦੀਨਂ ਉਪ੍ਪਜ੍ਜਨ੍ਤਿ. ਦਾਸੋ ਹਿ ‘‘ਮਾਤਿਤੋ ਵਾ ਪਿਤਿਤੋ ਵਾ ਕੋ ਮਯਾ ਸਦਿਸੋ ਅਞ੍ਞੋ ਦਾਸੋ ਨਾਮ ਅਤ੍ਥਿ, ਅਞ੍ਞੇ ਜੀਵਿਤੁਂ ਅਸਕ੍ਕੋਨ੍ਤਾ ਕੁਚ੍ਛਿਹੇਤੁ ਦਾਸਾ ਨਾਮ ਜਾਤਾ, ਅਹਂ ਪਨ ਪਵੇਣੀਆਗਤਤ੍ਤਾ ਸੇਯ੍ਯੋ’’ਤਿ ਵਾ, ‘‘ਪਵੇਣੀਆਗਤਭਾਵੇਨ ਉਭਤੋਸੁਦ੍ਧਿਕਦਾਸਤ੍ਤੇਨ ਅਸੁਕਦਾਸੇਨ ਨਾਮ ਸਦ੍ਧਿਂ ਕਿ ਮਯ੍ਹਂ ਨਾਨਾਕਰਣ’’ਨ੍ਤਿ ਵਾ, ‘‘ਕੁਚ੍ਛਿਵਸੇਨਾਹਂ ਦਾਸਬ੍ਯਂ ਉਪਗਤੋ, ਮਾਤਾਪਿਤੁਕੋਟਿਯਾ ਪਨ ਮੇ ਦਾਸਟ੍ਠਾਨਂ ਨਤ੍ਥਿ, ਕਿਂ ਦਾਸੋ ਨਾਮ ਅਹ’’ਨ੍ਤਿ ਵਾ ਏਤੇ ਮਾਨੇ ਕਰੋਤਿ. ਯਥਾ ਚ ਦਾਸੋ, ਏਵਂ ਪੁਕ੍ਕੁਸਚਣ੍ਡਾਲਾਦਯੋਪਿ ਏਤੇ ਮਾਨੇ ਕਰੋਨ੍ਤਿਯੇਵ.
ਏਤ੍ਥ ਚ ਸੇਯ੍ਯਸ੍ਸ ‘‘ਸੇਯ੍ਯੋਹਮਸ੍ਮੀ’’ਤਿ ਉਪ੍ਪਨ੍ਨਮਾਨੋਵ ਯਾਥਾਵਮਾਨੋ, ਇਤਰੇ ਦ੍ਵੇ ਅਯਾਥਾਵਮਾਨਾ. ਤਥਾ ਸਦਿਸਸ੍ਸ ‘‘ਸਦਿਸੋਹਮਸ੍ਮੀ’’ਤਿ, ਹੀਨਸ੍ਸ ‘‘ਹੀਨੋਹਮਸ੍ਮੀ’’ਤਿ ਉਪ੍ਪਨ੍ਨਮਾਨੋਵ ਯਾਥਾਵਮਾਨੋ, ਇਤਰੇ ਦ੍ਵੇ ਅਯਾਥਾਵਮਾਨਾ. ਤਤ੍ਥ ਯਾਥਾਵਮਾਨਾ ਅਰਹਤ੍ਤਮਗ੍ਗਵਜ੍ਝਾ, ਅਯਾਥਾਵਮਾਨਾ ਸੋਤਾਪਤ੍ਤਿਮਗ੍ਗਵਜ੍ਝਾ.
ਏਤ੍ਥ ਚ ਸੇਯ੍ਯਸ੍ਸ ‘‘ਸੇਯ੍ਯੋਹਮਸ੍ਮੀ’’ਤਿ ਮਾਨੋ ਉਤ੍ਤਮਸ੍ਸ ਉਤ੍ਤਮਟ੍ਠੇਨ ‘‘ਅਹਂ ਸੇਯ੍ਯੋ’’ਤਿ ਏਵਂ ਉਪ੍ਪਨ੍ਨਮਾਨੋ, ਸੇਯ੍ਯਸ੍ਸ ‘‘ਸਦਿਸੋਹਮਸ੍ਮੀ’’ਤਿ ਮਾਨੋ ਉਤ੍ਤਮਸ੍ਸ ਸਮਟ੍ਠੇਨ ‘‘ਅਹਂ ਸਦਿਸੋ’’ਤਿ ਏਵਂ ਉਪ੍ਪਨ੍ਨਮਾਨੋ. ਸੇਯ੍ਯਸ੍ਸ ‘‘ਹੀਨੋਹਮਸ੍ਮੀ’’ਤਿ ਮਾਨੋ ਉਤ੍ਤਮਸ੍ਸ ਲਾਮਕਟ੍ਠੇਨ ‘‘ਅਹਂ ਹੀਨੋ’’ਤਿ ਏਵਂ ਉਪ੍ਪਨ੍ਨਮਾਨੋ. ਏਵਂ ਸੇਯ੍ਯਮਾਨੋ ਸਦਿਸਮਾਨੋ ਹੀਨਮਾਨੋਤਿ ਇਮੇ ਤਯੋ ਮਾਨਾ ਸੇਯ੍ਯਸ੍ਸ ਉਪ੍ਪਜ੍ਜਨ੍ਤਿ. ਸਦਿਸਸ੍ਸਾਪਿ ਅਹਂ ਸੇਯ੍ਯੋ, ਸਦਿਸੋ, ਹੀਨੋਤਿ ਤਯੋ ਮਾਨਾ ਉਪ੍ਪਜ੍ਜਨ੍ਤਿ. ਹੀਨਸ੍ਸਾਪਿ ਅਹਂ ਹੀਨੋ, ਸਦਿਸੋ, ਸੇਯ੍ਯੋਤਿ ਤਯੋ ਮਾਨਾ ਉਪ੍ਪਜ੍ਜਨ੍ਤਿ.
ਦਸਵਿਧਮਾਨਨਿਦ੍ਦੇਸੇ ਇਧੇਕਚ੍ਚੋ ਮਾਨਂ ਜਨੇਤੀਤਿ ਏਕਚ੍ਚੋ ਪੁਗ੍ਗਲੋ ਮਾਨਂ ਜਨਯਤਿ. ਜਾਤਿਯਾ ਵਾਤਿ ਖਤ੍ਤਿਯਭਾਵਾਦਿਜਾਤਿਸਮ੍ਪਤ੍ਤਿਯਾ ਵਾ. ਗੋਤ੍ਤੇਨ ਵਾਤਿ ਗੋਤਮਗੋਤ੍ਤਾਦਿਨਾ ਉਕ੍ਕਟ੍ਠਗੋਤ੍ਤੇਨ ਵਾ. ਕੋਲਪੁਤ੍ਤਿਯੇਨ ਵਾਤਿ ਮਹਾਕੁਲਭਾਵੇਨ ਵਾ. ਵਣ੍ਣਪੋਕ੍ਖਰਤਾਯ ਵਾਤਿ ਵਣ੍ਣਸਮ੍ਪਨ੍ਨਸਰੀਰਤਾਯ ਵਾ. ਸਰੀਰਞ੍ਹਿ ‘‘ਪੋਕ੍ਖਰ’’ਨ੍ਤਿ ਵੁਚ੍ਚਤਿ, ਤਸ੍ਸ ਵਣ੍ਣਸਮ੍ਪਤ੍ਤਿਯਾ ਅਭਿਰੂਪਭਾਵੇਨਾਤਿ ਅਤ੍ਥੋ. ਧਨੇਨ ਵਾਤਿ ਧਨਸਮ੍ਪਨ੍ਨਭਾਵੇਨ ਵਾ, ਮਯ੍ਹਂ ਨਿਧਾਨਗਤਸ੍ਸ ਧਨਸ੍ਸ ਪਮਾਣਂ ਨਤ੍ਥੀਤਿ ਅਤ੍ਥੋ. ਅਜ੍ਝੇਨੇਨ ਵਾਤਿ ਅਜ੍ਝਾਯਨਵਸੇਨ ਵਾ. ਕਮ੍ਮਾਯਤਨੇਨ ਵਾਤਿ ‘‘ਅਵਸੇਸਾ ਸਤ੍ਤਾ ਛਿਨ੍ਨਪਕ੍ਖਕਾਕਸਦਿਸਾ, ਅਹਂ ਪਨ ਮਹਿਦ੍ਧਿਕੋ ਮਹਾਨੁਭਾਵੋ’’ਤਿ ਵਾ, ‘‘ਅਹਂ ਯਂ ਯਂ ਕਮ੍ਮਂ ਕਰੋਮਿ, ਤਂ ਤਂ ਸਮਿਜ੍ਝਤੀ’’ਤਿ ਵਾ ਏਵਮਾਦਿਨਯਪ੍ਪਵਤ੍ਤੇਨ ਕਮ੍ਮਾਯਤਨੇਨ ਵਾ. ਸਿਪ੍ਪਾਯਤਨੇਨ ਵਾਤਿ ‘‘ਅਵਸੇਸਾ ਸਤ੍ਤਾ ਨਿਸਿਪ੍ਪਾ, ਅਹਂ ਸਿਪ੍ਪਵਾ’’ਤਿ ਏਵਮਾਦਿਨਯਪ੍ਪਵਤ੍ਤੇਨ ਸਿਪ੍ਪਾਯਤਨੇਨ ਵਾ. ਵਿਜ੍ਜਾਟ੍ਠਾਨੇਨ ਵਾਤਿ ਇਦਂ ਹੇਟ੍ਠਾ ਵੁਤ੍ਤਨਯਮੇਵ. ਸੁਤੇਨ ਵਾਤਿ ‘‘ਅਵਸੇਸਾ ਸਤ੍ਤਾ ਅਪ੍ਪਸ੍ਸੁਤਾ, ਅਹਂ ਪਨ ਬਹੁਸ੍ਸੁਤੋ’’ਤਿ ਏਵਮਾਦਿਸੁਤੇਨ ਵਾ. ਪਟਿਭਾਨੇਨ ਵਾਤਿ ‘‘ਅਵਸੇਸਾ ਸਤ੍ਤਾ ਅਪ੍ਪਟਿਭਾਨਾ, ਮਯ੍ਹਂ ਪਨ ਪਟਿਭਾਨਪ੍ਪਮਾਣਂ ਨਤ੍ਥੀ’’ਤਿ ਏਵਮਾਦਿਪਟਿਭਾਨੇਨ ਵਾ. ਅਞ੍ਞਤਰਞ੍ਞਤਰੇਨ ਵਾ ਵਤ੍ਥੁਨਾਤਿ ਅਵੁਤ੍ਤੇਨ ਅਞ੍ਞੇਨ ਵਤ੍ਥੁਨਾ ਵਾ. ਯੋ ਏਵਰੂਪੋ ਮਾਨੋਤਿ ਮਾਨਕਰਣਵਸੇਨ ਮਾਨੋ. ਮਞ੍ਞਨਾ ਮਞ੍ਞਿਤਤ੍ਤਨ੍ਤਿ ਆਕਾਰਭਾਵਨਿਦ੍ਦੇਸੋ. ਉਸ੍ਸਿਤਟ੍ਠੇਨ ਉਨ੍ਨਤਿ. ਯਸ੍ਸੁਪ੍ਪਜ੍ਜਤਿ, ਤਂ ਪੁਗ੍ਗਲਂ ਉਨ੍ਨਾਮੇਤਿ ਉਕ੍ਖਿਪਿਤ੍ਵਾ ਠਪੇਤੀਤਿ ਉਨ੍ਨਾਮੋ. ਸਮੁਸ੍ਸਿਤਟ੍ਠੇਨ ਧਜੋ. ਉਕ੍ਖਿਪਨਟ੍ਠੇਨ ਚਿਤ੍ਤਂ ਸਮ੍ਪਗ੍ਗਣ੍ਹਾਤੀਤਿ ਸਮ੍ਪਗ੍ਗਾਹੋ. ਕੇਤੁ ਵੁਚ੍ਚਤਿ ਬਹੂਸੁ ਧਜੇਸੁ ਅਚ੍ਚੁਗ੍ਗਤਧਜੋ. ਮਾਨੋਪਿ ਪੁਨਪ੍ਪੁਨਂ ਉਪ੍ਪਜ੍ਜਮਾਨੋ ਅਪਰਾਪਰੇ ਉਪਾਦਾਯ ਅਚ੍ਚੁਗ੍ਗਤਟ੍ਠੇਨ ਕੇਤੁ ਵਿਯਾਤਿ ਕੇਤੁ, ਤਂ ਕੇਤੁਂ ਇਚ੍ਛਤੀਤਿ ਕੇਤੁਕਮ੍ਯਂ, ਤਸ੍ਸ ਭਾਵੋ ਕੇਤੁਕਮ੍ਯਤਾ. ਸਾ ਪਨ ਚਿਤ੍ਤਸ੍ਸ, ਨ ਅਤ੍ਤਨੋ. ਤੇਨ ਵੁਤ੍ਤਂ ‘‘ਕੇਤੁਕਮ੍ਯਤਾ ਚਿਤ੍ਤਸ੍ਸਾ’’ਤਿ. ਮਾਨਸਮ੍ਪਯੁਤ੍ਤਞ੍ਹਿ ਚਿਤ੍ਤਂ ਕੇਤੁਂ ਇਚ੍ਛਤਿ, ਤਸ੍ਸ ਭਾਵੋ, ਕੇਤੁਸਙ੍ਖਾਤੋ ਮਾਨੋਤਿ. ਧੋਨੋ ਮਾਯਞ੍ਚ ਮਾਨਞ੍ਚ ਪਹਾਯ ਪਜਹਿਤ੍ਵਾ ਯੋ ਸੋ ਧੋਨੋ ਅਰਹਾ ਹੇਟ੍ਠਾ ਵੁਤ੍ਤਨਯੇਨ ਵਿਨੋਦਨਬ੍ਯਨ੍ਤਿਕਰਣਾਦਿਵਸੇਨ ਕਿਲੇਸੇ ਪਜਹਿਤ੍ਵਾ ਠਿਤੋ, ਸੋ ਤੇਨ ਰਾਗਾਦਿਨਾ ਕਿਲੇਸੇਨ ਗਚ੍ਛੇਯ੍ਯ.
ਨੇਰਯਿਕੋਤਿ ਵਾਤਿ ਨਿਰਯੇ ਨਿਬ੍ਬਤ੍ਤਕਸਤ੍ਤੋਤਿ ਵਾ. ਤਿਰਚ੍ਛਾਨਯੋਨਿਕਾਦੀਸੁਪਿ ਏਸੇਵ ਨਯੋ. ਸੋ ਹੇਤੁ ਨਤ੍ਥੀਤਿ ਯੇਨ ਜਨਕਹੇਤੁਨਾ ਗਤਿਯਾਦੀਸੁ ਨਿਬ੍ਬਤ੍ਤੇਯ੍ਯ, ਸੋ ਹੇਤੁ ਨਤ੍ਥਿ. ਪਚ੍ਚਯੋਤਿ ਤਸ੍ਸੇਵ ਵੇਵਚਨਂ. ਕਾਰਣਨ੍ਤਿ ਠਾਨਂ. ਕਾਰਣਞ੍ਹਿ ਤਦਾਯਤ੍ਤਵੁਤ੍ਤਿਤਾਯ ਅਤ੍ਤਨੋ ਫਲਸ੍ਸ ਠਾਨਨ੍ਤਿ ਵੁਚ੍ਚਤਿ. ਤਸ੍ਮਾ ਯੇਨ ਹੇਤੁਨਾ ਯੇਨ ਪਚ੍ਚਯੇਨ ਗਤਿਯਾਦੀਸੁ ਨਿਬ੍ਬਤ੍ਤੇਯ੍ਯ, ਤਂ ਕਾਰਣਂ ਨਤ੍ਥਿ.
੨੨. ਯੋ ਪਨ ਨੇਸਂ ਦ੍ਵਿਨ੍ਨਂ ਉਪਯਾਨਂ ਭਾਵੇਨ ਉਪਯੋ ਹੋਤਿ, ਸੋ ਉਪਯੋ ਹਿ…ਪੇ… ਦਿਟ੍ਠਿਮਿਧੇਵ ਸਬ੍ਬਨ੍ਤਿ. ਤਤ੍ਥ ਉਪਯੋਤਿ ਤਣ੍ਹਾਦਿਟ੍ਠਿਨਿਸ੍ਸਿਤੋ. ਧਮ੍ਮੇਸੁ ਉਪੇਤਿ ਵਾਦਨ੍ਤਿ ‘‘ਰਤ੍ਤੋ’’ਤਿ ਵਾ ‘‘ਦੁਟ੍ਠੋ’’ਤਿ ਵਾ ਏਵਂ ਤੇਸੁ ਤੇਸੁ ਧਮ੍ਮੇਸੁ ਉਪੇਤਿ ਵਾਦਂ. ਅਨੂਪਯਂ ਕੇਨ ਕਥਂ ਵਦੇਯ੍ਯਾਤਿ ਤਣ੍ਹਾਦਿਟ੍ਠਿਪ੍ਪਹਾਨੇਨ ਪਨ ਅਨੂਪਯਂ ਖੀਣਾਸਵਂ ਕੇਨ ਰਾਗੇਨ ਵਾ ਦੋਸੇਨ ਵਾ ਕਥਂ ‘‘ਰਤ੍ਤੋ’’ਤਿ ਵਾ ‘‘ਦੁਟ੍ਠੋ’’ਤਿ ਵਾ ਵਦੇਯ੍ਯ. ਏਵਂ ਅਨੁਪਵਜ੍ਜੋ ਚ ਸੋ ਕਿਂ ਤਿਤ੍ਥਿਯਾ ਵਿਯ ਕਤਪਟਿਚ੍ਛਾਦਕੋ ਭਵਿਸ੍ਸਤੀਤਿ ਅਧਿਪ੍ਪਾਯੋ. ਅਤ੍ਤਾ ਨਿਰਤ੍ਤਾ ਨ ਹਿ ਤਸ੍ਸ ਅਤ੍ਥੀਤਿ ਤਸ੍ਸ ਹਿ ਅਤ੍ਤਦਿਟ੍ਠਿ ਵਾ ਉਚ੍ਛੇਦਦਿਟ੍ਠਿ ਵਾ ਨਤ੍ਥਿ, ਗਹਣਮੁਞ੍ਚਨਂ ਵਾਪਿ ਅਤ੍ਤਨਿਰਤ੍ਤਸਞ੍ਞਿਤਂ ਨਤ੍ਥਿ. ਕਿਂ ਕਾਰਣਾ ਨਤ੍ਥੀਤਿ ਚੇ? ਅਧੋਸਿ ਸੋ ਦਿਟ੍ਠਿਮਿਧੇਵ ਸਬ੍ਬਨ੍ਤਿ. ਯਸ੍ਮਾ ਸੋ ਇਧੇਵ ਅਤ੍ਤਭਾਵੇ ਞਾਣਮ੍ਬੁਨਾ ਸਬ੍ਬਦਿਟ੍ਠਿਗਤਂ ਅਧੋਸਿ ਪਜਹਿ ਵਿਨੋਦੇਸੀਤਿ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ. ਤਂ ਸੁਤ੍ਵਾ ਰਾਜਾ ਅਤ੍ਤਮਨੋ ਭਗਵਨ੍ਤਂ ਅਭਿਵਾਦੇਤ੍ਵਾ ਪਕ੍ਕਾਮੀਤਿ.
ਰਤ੍ਤੋਤਿ ਵਾਤਿ ਰਾਗੇਨ ਰਤ੍ਤੋਤਿ ਵਾ. ਦੁਟ੍ਠੋਤਿ ਵਾਤਿਆਦੀਸੁਪਿ ਏਸੇਵ ਨਯੋ. ਤੇ ਅਭਿਸਙ੍ਖਾਰਾ ਅਪ੍ਪਹੀਨਾਤਿ ਯੇ ਪੁਞ੍ਞਾਪੁਞ੍ਞਆਨੇਞ੍ਜਾਭਿਸਙ੍ਖਾਰਾ, ਤੇ ਅਪ੍ਪਹੀਨਾ. ਅਭਿਸਙ੍ਖਾਰਾਨਂ ਅਪ੍ਪਹੀਨਤ੍ਤਾਤਿ ਤੇਸਂ ਵੁਤ੍ਤਪ੍ਪਕਾਰਾਨਂ ਕਮ੍ਮਾਭਿਸਙ੍ਖਾਰਾਨਂ ਨ ਪਹੀਨਭਾਵੇਨ. ਗਤਿਯਾ ਵਾਦਂ ਉਪੇਤੀਤਿ ਪਞ੍ਚਨ੍ਨਂ ਗਤੀਨਂ ਅਞ੍ਞਤਰਾਯ ਕਥਨਂ ਉਪਗਚ੍ਛਤਿ. ਤੇਨੇਵਾਹ – ‘‘ਨੇਰਯਿਕੋਤਿ ਵਾ…ਪੇ… ਵਾਦਂ ਉਪੇਤਿ ਉਪਗਚ੍ਛਤੀ’’ਤਿ. ਵਦੇਯ੍ਯਾਤਿ ਕਥੇਯ੍ਯ. ਗਹਿਤਂ ਨਤ੍ਥੀਤਿ ਗਹੇਤਬ੍ਬਂ ਨਤ੍ਥਿ. ਮੁਞ੍ਚਿਤਬ੍ਬਂ ਨਤ੍ਥੀਤਿ ਮੁਞ੍ਚਿਤ੍ਵਾ ਠਿਤਤ੍ਤਾ ਮੋਚੇਤਬ੍ਬਂ ਨਤ੍ਥਿ.
ਯਸ੍ਸਤ੍ਥਿ ਗਹਿਤਨ੍ਤਿ ਯਸ੍ਸ ਪੁਗ੍ਗਲਸ੍ਸ ‘‘ਅਹਂ ਮਮਾ’’ਤਿ ਗਹਿਤਂ ਅਤ੍ਥਿ. ਤਸ੍ਸਤ੍ਥਿ ਮੁਞ੍ਚਿਤਬ੍ਬਨ੍ਤਿ ਤਸ੍ਸ ਪੁਗ੍ਗਲਸ੍ਸ ਮੋਚੇਤਬ੍ਬਂ ਅਤ੍ਥਿ. ਉਪਰਿ ਪਦਾਨਿ ਪਰਿਵਤ੍ਤੇਤ੍ਵਾ ਯੋਜੇਤਬ੍ਬਾਨਿ. ਗਹਣਂ ਮੁਞ੍ਚਨਾ ਸਮਤਿਕ੍ਕਨ੍ਤੋਤਿ ਗਹਣਮੋਚਨਾ ਅਰਹਾ ਅਤਿਕ੍ਕਨ੍ਤੋ. ਬੁਦ੍ਧਿਪਰਿਹਾਨਿਵੀਤਿਵਤ੍ਤੋਤਿ ਵਡ੍ਢਿਞ੍ਚ ਪਰਿਹਾਨਿਞ੍ਚ ਅਤਿਕ੍ਕਮਿਤ੍ਵਾ ਪਵਤ੍ਤੋ. ਸੋ ਵੁਟ੍ਠਵਾਸੋਤਿਆਦਿਂ ਕਤ੍ਵਾ ਞਾਣਗ੍ਗਿਨਾ ਦਡ੍ਢਾਨੀਤਿ ਪਰਿਯੋਸਾਨਂ ਹੇਟ੍ਠਾ ਵੁਤ੍ਤਨਯਮੇਵ. ਅਧੋਸੀਤਿ ਕਨ੍ਤੇਸਿ. ਧੁਨਿ ਸਨ੍ਧੁਨਿ ਨਿਦ੍ਧੁਨੀਤਿ ਉਪਸਗ੍ਗੇਨ ਪਦਂ ਵਡ੍ਢਿਤਂ.
ਸਦ੍ਧਮ੍ਮਪ੍ਪਜ੍ਜੋਤਿਕਾਯ ਮਹਾਨਿਦ੍ਦੇਸਟ੍ਠਕਥਾਯ
ਦੁਟ੍ਠਟ੍ਠਕਸੁਤ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.