੧੫. ਅਤ੍ਤਦਣ੍ਡਸੁਤ੍ਤਨਿਦ੍ਦੇਸਵਣ੍ਣਨਾ
੧੭੦. ਪਨ੍ਨਰਸਮੇ ਅਤ੍ਤਦਣ੍ਡਸੁਤ੍ਤਨਿਦ੍ਦੇਸੇ ਅਤ੍ਤਦਣ੍ਡਾ ਭਯਂ ਜਾਤਨ੍ਤਿ ਪਠਮਗਾਥਾਯ ਅਤ੍ਥੋ – ਯਂ ਲੋਕਸ੍ਸ ਦਿਟ੍ਠਧਮ੍ਮਿਕਂ ਵਾ ਸਮ੍ਪਰਾਯਿਕਂ ਵਾ ਭਯਂ ਜਾਤਂ, ਤਂ ਸਬ੍ਬਂ ਅਤ੍ਤਦਣ੍ਡਾ ਭਯਂ ਜਾਤਂ ਅਤ੍ਤਨੋ ਦੁਚ੍ਚਰਿਤਕਾਰਣਾ ਜਾਤਂ, ਏਵਂ ਸਨ੍ਤੇਪਿ ਜਨਂ ਪਸ੍ਸਥ ਮੇਧਗਂ, ਇਮਂ ਸਾਕਿਯਾਦਿਜਨਂ ਪਸ੍ਸਥ ਅਞ੍ਞਮਞ੍ਞਂ ਮੇਧਗਂ ਹਿਂਸਕਂ ਬਾਧਕਨ੍ਤਿ. ਏਵਂ ਤਂ ਪਟਿਵਿਰੁਦ੍ਧਂ ਵਿਪ੍ਪਟਿਪਨ੍ਨਂ ਜਨਂ ਪਰਿਭਾਸਿਤ੍ਵਾ ਅਤ੍ਤਨੋ ਸਮ੍ਮਾ ਪਟਿਪਤ੍ਤਿਦਸ੍ਸਨੇਨ ਤਸ੍ਸ ਸਂਵੇਗਂ ਜਨੇਤੁਂ ਆਹ ‘‘ਸਂਵੇਗਂ ਕਿਤ੍ਤਯਿਸ੍ਸਾਮਿ, ਯਥਾ ਸਂਵਿਜਿਤਂ ਮਯਾ’’ਤਿ. ਪੁਬ੍ਬੇ ਬੋਧਿਸਤ੍ਤੇਨੇਵ ਸਤਾਤਿ ਅਧਿਪ੍ਪਾਯੋ.
ਤਯੋਤਿ ਗਣਨਪਰਿਚ੍ਛੇਦੋ. ਦਣ੍ਡਾਤਿ ਦੁਚ੍ਚਰਿਤਾ. ਕਾਯਦਣ੍ਡੋਤਿ ਕਾਯਦੁਚ੍ਚਰਿਤਂ. ਵਚੀਦਣ੍ਡਾਦੀਸੁਪਿ ਏਸੇਵ ਨਯੋ. ਤਿਵਿਧਂ ਕਾਯਦੁਚ੍ਚਰਿਤਨ੍ਤਿ ਪਾਣਾਤਿਪਾਤਾਦਿਕਾਯਤੋ ਪਵਤ੍ਤਂ ਦੁਟ੍ਠੁਂ ਚਰਿਤਂ, ਕਿਲੇਸਪੂਤਿਕਤ੍ਤਾ ਵਾ ਦੁਟ੍ਠੁ ਚਰਿਤਨ੍ਤਿ ਲਦ੍ਧਨਾਮਂ ਤਿਵਿਧਂ ਦੁਚ੍ਚਰਿਤਂ ਕਾਯਦੁਚ੍ਚਰਿਤਂ. ਚਤੁਬ੍ਬਿਧਨ੍ਤਿ ਮੁਸਾਵਾਦਾਦਿਚਤੁਬ੍ਬਿਧਂ. ਤਿਵਿਧਨ੍ਤਿ ਅਭਿਜ੍ਝਾਦਿਤਿਵਿਧਂ. ਦਿਟ੍ਠਧਮ੍ਮਿਕਨ੍ਤਿ ਦਿਟ੍ਠੇਵ ਧਮ੍ਮੇ ਇਮਸ੍ਮਿਂਯੇਵ ਅਤ੍ਤਭਾਵੇ ਪਟਿਸਂਵੇਦਨੀਯਂ. ਸਮ੍ਪਰਾਯਿਕਨ੍ਤਿ ਅਨਾਗਤੇ ਅਤ੍ਤਭਾਵੇ ਪਟਿਸਂਵੇਦਨੀਯਂ. ਆਗੁਚਾਰੀਤਿ ਪਾਪਕਾਰੀ ਅਪਰਾਧਕਾਰੀ. ਤਮੇਨਂ ਰਾਜਾ ਪਰਿਭਾਸਤੀਤਿ ਪਾਪਕਾਰਿਂ ਰਾਜਾ ਪਰਿਭਾਸਤਿ, ਭਯਂ ਉਪ੍ਪਾਦੇਤਿ. ਦੁਕ੍ਖਂ ਦੋਮਨਸ੍ਸਂ ਪਟਿਸਂਵੇਦੇਤੀਤਿ ਕਾਯਿਕਂ ਦੁਕ੍ਖਂ ਚੇਤਸਿਕਂ ਦੋਮਨਸ੍ਸਂ ਵਿਨ੍ਦਤਿ. ਏਤਂ ਭਯਂ ਦੁਕ੍ਖਂ ਦੋਮਨਸ੍ਸਨ੍ਤਿ ਏਵਰੂਪਂ ਭਯਞ੍ਚ ਦੁਕ੍ਖਞ੍ਚ ਦੋਮਨਸ੍ਸਞ੍ਚ. ਕੁਤੋ ਤਸ੍ਸਾਤਿ ਤਸ੍ਸ ਚੋਰਸ੍ਸ ਕੁਤੋ ਉਪ੍ਪਨ੍ਨਂ. ਅਤ੍ਤਦਣ੍ਡਤੋ ਜਾਤਨ੍ਤਿ ਅਤ੍ਤਨਾ ਕਤਦੁਚ੍ਚਰਿਤਤੋ ਉਪ੍ਪਨ੍ਨਂ.
ਅਨ੍ਤਮਸੋਤਿ ਹੇਟ੍ਠਿਮਤੋ. ਸਵਚਨੀਯਮ੍ਪਿ ਕਰੋਤਿ ‘‘ਨ ਤੇ ਲਬ੍ਭਾ ਇਤੋ ਪਕ੍ਕਮਿਤੁ’’ਨ੍ਤਿ ਇਤੋ ਇਮਮ੍ਹਾ ਗਾਮਾਦਿਨਾ ਗਨ੍ਤੁਂ ਨ ਲਬ੍ਭਾ. ਨ ਸਕ੍ਕਾ ਬਹਿ ਨਿਕ੍ਖਮਿਤੁਨ੍ਤਿ ਪਲਿਬੋਧਂ ਸਙ੍ਗਂ ਕਰੋਤਿ. ਧਨਜਾਨਿਪਚ੍ਚਯਾਪੀਤਿ ਧਨਪਰਿਹਾਨਿਕਾਰਣਾਪਿ. ਰਾਜਾ ਤਸ੍ਸ ਵਿਵਿਧਾ ਕਮ੍ਮਕਾਰਣਾ ਕਾਰਾਪੇਤਿ. ਕਸਾਹਿਪਿ ਤਾਲ਼ੇਤੀਤਿ ਕਸਾਦਣ੍ਡਕੇਹਿ ਪੋਥੇਤਿ. ਵੇਤ੍ਤੇਹਿਪਿ ਤਾਲ਼ੇਤੀਤਿ ਸਕਣ੍ਟਕਵੇਤ੍ਤਲਤਾਹਿ ਪੋਥੇਤਿ. ਅਡ੍ਢਦਣ੍ਡਕੇਹੀਤਿਆਦਯੋ ਹੇਟ੍ਠਾ ਵੁਤ੍ਤਨਯਾਯੇਵ. ਸੁਨਖੇਹਿਪਿਖਾਦਾਪੇਤੀਤਿ ਕਤਿਪਯਾਨਿ ਦਿਵਸਾਨਿ ਆਹਾਰੇ ਅਦਤ੍ਵਾ ਛਾਤਸੁਨਖੇਹਿ ਖਾਦਾਪੇਤਿ. ਤੇ ਮੁਹੁਤ੍ਤੇਨ ਅਟ੍ਠਿਕਸਙ੍ਖਲਿਕਮੇਵ ਕਰੋਤਿ. ਸੂਲੇ ਉਤ੍ਤਾਸੇਤੀਤਿ ਸੂਲਂ ਆਰੋਪੇਤਿ. ਰਾਜਾ ਇਮੇਸਂ ਚਤੁਨ੍ਨਂ ਦਣ੍ਡਾਨਂ ਇਸ੍ਸਰੋਤਿ ਇਮਾਸਂ ਚਤੁਨ੍ਨਂ ਆਣਾਨਂ ਕਾਤੁਂ ਰਾਜਾ ਸਮਤ੍ਥੋ.
ਸਕੇਨ ਕਮ੍ਮੇਨਾਤਿ ਸਯਂਕਤੇਨ ਕਮ੍ਮੇਨ. ਤਮੇਨਂ ਨਿਰਯਪਾਲਾਤਿ ਏਤ੍ਥ ਏਕਚ੍ਚੇ ਥੇਰਾ ‘‘ਨਿਰਯਪਾਲਾ ਨਾਮ ਨਤ੍ਥਿ, ਯਨ੍ਤਰੂਪਂ ਵਿਯ ਕਮ੍ਮਮੇਵ ਕਾਰਣਂ ਕਾਰੇਤੀ’’ਤਿ ਵਦਨ੍ਤਿ. ਤੇਸਂ ਤਂ ‘‘ਅਤ੍ਥਿ ਨਿਰਯੇਸੁ ਨਿਰਯਪਾਲਾਤਿ, ਆਮਨ੍ਤਾ. ਅਤ੍ਥਿ ਚ ਕਾਰਣਿਕਾ’’ਤਿਆਦਿਨਾ ਨਯੇਨ ਅਭਿਧਮ੍ਮੇ (ਕਥਾ. ੮੬੬ ਆਦਯੋ) ਪਟਿਸੇਧਿਤਮੇਵ. ਯਥਾ ਹਿ ਮਨੁਸ੍ਸਲੋਕੇ ਕਮ੍ਮਕਾਰਣਕਾਰਕਾ ਅਤ੍ਥਿ, ਏਵਮੇਵ ਨਿਰਯੇਸੁ ਨਿਰਯਪਾਲਾ ਅਤ੍ਥੀਤਿ. ਤਤ੍ਤਂ ਅਯੋਖਿਲਨ੍ਤਿ ਤਿਗਾਵੁਤਂ ਅਤ੍ਤਭਾਵਂ ਸਮ੍ਪਜ੍ਜਲਿਤਾਯ ਲੋਹਪਥਵਿਯਾ ਉਤ੍ਤਾਨਕਂ ਨਿਪਜ੍ਜਾਪੇਤ੍ਵਾ ਦਕ੍ਖਿਣਹਤ੍ਥੇ ਤਾਲਪ੍ਪਮਾਣਂ ਅਯਸੂਲਂ ਪਵੇਸੇਨ੍ਤਿ, ਤਥਾ ਵਾਮਹਤ੍ਥਾਦੀਸੁ. ਯਥਾ ਚ ਉਤ੍ਤਾਨਕਂ ਨਿਪਜ੍ਜਾਪੇਤ੍ਵਾ ਏਵਂ ਉਰੇਨਪਿ ਵਾਮਪਸ੍ਸੇਨਪਿ ਦਕ੍ਖਿਣਪਸ੍ਸੇਨਪਿ ਨਿਪਜ੍ਜਾਪੇਤ੍ਵਾ ਤਂ ਕਮ੍ਮਕਾਰਣਂ ਕਰੋਨ੍ਤਿਯੇਵ.
ਸਂਵੇਸੇਤ੍ਵਾਤਿ ਜਲਿਤਾਯ ਲੋਹਪਥਵਿਯਾ ਤਿਗਾਵੁਤਂ ਅਤ੍ਤਭਾਵਂ ਨਿਪਜ੍ਜਾਪੇਤ੍ਵਾ. ਕੁਠਾਰੀਹੀਤਿ ਮਹਤੀਹਿ ਗੇਹਚ੍ਛਾਦਨਸ੍ਸ ਏਕਪਕ੍ਖਮਤ੍ਤਾਹਿ ਕੁਠਾਰੀਹਿ ਤਚ੍ਛੇਨ੍ਤਿ, ਲੋਹਿਤਂ ਨਦੀ ਹੁਤ੍ਵਾ ਸਨ੍ਦਤਿ, ਲੋਹਪਥਵਿਤੋ ਜਾਲਾ ਉਟ੍ਠਹਿਤ੍ਵਾ ਤਚ੍ਛਿਤਟ੍ਠਾਨਂ ਗਣ੍ਹਾਤਿ, ਮਹਾਦੁਕ੍ਖਂ ਉਪ੍ਪਜ੍ਜਤਿ, ਤਚ੍ਛਨ੍ਤਾ ਪਨ ਸੁਤ੍ਤਾਹਤਂ ਕਰਿਤ੍ਵਾ ਦਾਰੁ ਵਿਯ ਅਟ੍ਠਂਸਮ੍ਪਿ ਛਲ਼ਂਸਮ੍ਪਿ ਕਰੋਨ੍ਤਿ. ਵਾਸੀਹੀਤਿ ਮਹਾਸੁਪ੍ਪਪਮਾਣਾਹਿ ਵਾਸੀਹਿ. ਰਥੇ ਯੋਜੇਤ੍ਵਾਤਿ ਸਦ੍ਧਿਂ ਯੁਗਯੋਤ੍ਤਉਪਕ੍ਖਰਚਕ੍ਕਕੁਬ੍ਬਰਪਾਜਨੇਹਿ ਸਬ੍ਬਤੋ ਪਜ੍ਜਲਿਤੇ ਰਥੇ ਯੋਜੇਤ੍ਵਾ. ਮਹਨ੍ਤਨ੍ਤਿ ਮਹਾਕੂਟਾਗਾਰਪ੍ਪਮਾਣਂ. ਆਰੋਪੇਨ੍ਤੀਤਿ ਸਮ੍ਪਜ੍ਜਲਿਤੇਹਿ ਅਯਮੁਗ੍ਗਰੇਹਿ ਪੋਥੇਨ੍ਤਾ ਆਰੋਪੇਨ੍ਤਿ. ਸਕਿਮ੍ਪਿ ਉਦ੍ਧਨ੍ਤਿ ਸੁਪਕ੍ਕੁਤ੍ਥਿਤਾਯ ਉਕ੍ਖਲਿਯਾ ਪਕ੍ਖਿਤ੍ਤਤਣ੍ਡੁਲਂ ਵਿਯ ਉਦ੍ਧਂ ਅਧੋ ਤਿਰਿਯਞ੍ਚ ਗਚ੍ਛਤਿ. ਮਹਾਨਿਰਯੇਤਿ ਅਵੀਚਿਮਹਾਨਿਰਯਮ੍ਹਿ.
ਚਤੁਕ੍ਕਣ੍ਣੋਤਿ ਚਤੁਰਸ੍ਸਮਞ੍ਜੂਸਾਸਦਿਸੋ. ਵਿਭਤ੍ਤੋਤਿ ਚਤੁਦ੍ਵਾਰਵਸੇਨ ਵਿਭਤ੍ਤੋ. ਭਾਗਸੋ ਮਿਤੋਤਿ ਦ੍ਵਾਰਵੀਥੀਨਂ ਵਸੇਨ ਭਾਗੇ ਠਪੇਤ੍ਵਾ ਠਪੇਤ੍ਵਾ ਵਿਭਤ੍ਤੋ. ਪਰਿਯਨ੍ਤੋਤਿ ਪਰਿਕ੍ਖਿਤ੍ਤੋ. ਅਯਸਾਤਿ ਉਪਰਿ ਨਵਯੋਜਨਿਕੇਨ ਅਯਪਤ੍ਤੇਨ ਛਾਦਿਤੋ. ਸਮਨ੍ਤਾ ਯੋਜਨਸਤਂ ਫਰਿਤ੍ਵਾ ਤਿਟ੍ਠਤੀਤਿ ਏਵਂ ਫਰਿਤ੍ਵਾ ਤਿਟ੍ਠਤਿ, ਯਥਾ ਸਮਨ੍ਤਾ ਯੋਜਨਸਤੇ ਠਤ੍ਵਾ ਓਲੋਕੇਨ੍ਤਸ੍ਸ ਅਕ੍ਖੀਨਿ ਯਮਕਗੋਲ਼ਕਾ ਵਿਯ ਨਿਕ੍ਖਮਨ੍ਤਿ. ਕਦਰਿਯਾਤਪਨਾਤਿ ਸਬ੍ਬੇਪਿ ਤੇ ਉਸ੍ਸਦੇਹਿ ਸਦ੍ਧਿਂ ਅਟ੍ਠ ਮਹਾਨਿਰਯਾ ਕਦਰਿਯਾ ਨਿਚ੍ਚਂ ਤਪਨ੍ਤੀਤਿ ਕਦਰਿਯਾਤਪਨਾ. ਬਲਵਦੁਕ੍ਖਤਾਯ ਘੋਰਾ. ਕਪ੍ਪਟ੍ਠਿਕਾਨਂ ਅਚ੍ਚੀਨਂ ਅਤ੍ਥਿਤਾਯ ਅਚ੍ਚਿਮਨ੍ਤੋ. ਆਸਾਦੇਤੁਂ ਘਟ੍ਟੇਤੁਂ ਦੁਕ੍ਕਰਤਾਯ ਦੁਰਾਸਦਾ. ਦਿਟ੍ਠਮਤ੍ਤਾ ਵਾ ਸੁਤਮਤ੍ਤਾ ਵਾ ਲੋਮਾਨਿ ਹਂਸੇਨ੍ਤੀਤਿ ਲੋਮਹਂਸਨਰੂਪਾ. ਭੀਸਨਤਾਯ ਭਿਸ੍ਮਾ. ਭਯਜਨਨਤਾਯ ਪਟਿਭਯਾ. ਸੁਖਾਭਾਵੇਨ ਦੁਖਾ.
ਪੁਰਤ੍ਥਿਮਾਯ ਭਿਤ੍ਤਿਯਾਤਿਆਦਿਗਾਥਾਨਂ ਏਵਂ ਅਵੀਚਿਨਿਰਯੋਤਿ ਪਰਿਯਨ੍ਤਂ ਕਤ੍ਵਾ ਅਯਂ ਸਙ੍ਖੇਪਤ੍ਥੋ – ਅਗ੍ਗਿਜਾਲਾਨਂ ਵਾ ਪਨ ਸਤ੍ਤਾਨਂ ਵਾ ਤੇਸਂ ਦੁਕ੍ਖਸ੍ਸ ਵਾ ਵੀਚਿ ਅਨ੍ਤਰਂ ਨਤ੍ਥਿ ਏਤ੍ਥਾਤਿ ਅਵੀਚਿ. ਤਤ੍ਰ ਹਿ ਪੁਰਤ੍ਥਿਮਾਦੀਹਿ ਭਿਤ੍ਤੀਹਿ ਜਾਲਾਰਾਸਿ ਉਟ੍ਠਹਿਤ੍ਵਾ ਪਾਪਕਮ੍ਮਿਨੋ ਪੁਗ੍ਗਲੇ ਝਾਪੇਨ੍ਤੋ ਪਚ੍ਛਿਮਾਦੀਸੁ ਭਿਤ੍ਤੀਸੁ ਪਟਿਹਞ੍ਞਤਿ ਪਹਰਤਿ, ਤਾ ਚ ਭਿਤ੍ਤਿਯੋ ਵਿਨਿਵਿਜ੍ਝਿਤ੍ਵਾ ਪਰਤੋ ਯੋਜਨਸਤਂ ਗਣ੍ਹਾਤਿ, ਹੇਟ੍ਠਾ ਉਟ੍ਠਿਤਾ ਉਪਰਿ ਪਟਿਹਞ੍ਞਤਿ, ਉਪਰਿ ਉਟ੍ਠਿਤਾ ਹੇਟ੍ਠਾ ਪਟਿਹਞ੍ਞਤਿ. ਏਵਂ ਤਾਵੇਤ੍ਥ ਜਾਲਾਨਂ ਵੀਚਿ ਨਾਮ ਨਤ੍ਥਿ. ਤਸ੍ਸ ਪਨ ਅਨ੍ਤੋ ਯੋਜਨਸਤਟ੍ਠਾਨਂ ਖੀਰਵਲ੍ਲਿਪਿਟ੍ਠਸ੍ਸ ਪੂਰਿਤਨਾਲ਼ਿ ਵਿਯ ਸਤ੍ਤੇਹਿ ਨਿਰਨ੍ਤਰਂ ਪੂਰਿਤਂ ਚਤੂਹਿ ਇਰਿਯਾਪਥੇਹਿ ਪਚ੍ਚਨ੍ਤਾਨਂ ਸਤ੍ਤਾਨਂ ਪਮਾਣਂ ਨਤ੍ਥਿ, ਨ ਚ ਅਞ੍ਞਮਞ੍ਞਂ ਬ੍ਯਾਬਾਧੇਨ੍ਤਿ, ਸਕਸਕਟ੍ਠਾਨੇਯੇਵ ਪਚ੍ਚਨ੍ਤਿ. ਏਵਮੇਤ੍ਥ ਸਤ੍ਤਾਨਂ ਵੀਚਿ ਨਾਮ ਨਤ੍ਥਿ. ਯਥਾ ਪਨ ਜਿਵ੍ਹਗ੍ਗੇ ਛ ਮਧੁਬਿਨ੍ਦੂਨਿ ਸਤ੍ਤਮਸ੍ਸ ਤਮ੍ਬਲੋਹਬਿਨ੍ਦੁਨੋ ਅਨੁਦਹਨਬਲਵਤਾਯ ਅਬ੍ਬੋਹਾਰਿਕਾਨਿ ਹੋਨ੍ਤਿ, ਤਥਾ ਤਤ੍ਥ ਅਨੁਦਹਨਬਲਵਤਾਯ ਸੇਸਾ ਛ ਅਕੁਸਲਵਿਪਾਕੁਪੇਕ੍ਖਾ ਅਬ੍ਬੋਹਾਰਿਕਾ ਹੋਨ੍ਤਿ, ਦੁਕ੍ਖਮੇਵ ਨਿਰਨ੍ਤਰਂ ਪਞ੍ਞਾਯਤਿ. ਏਵਮੇਤ੍ਥ ਦੁਕ੍ਖਸ੍ਸ ਵੀਚਿ ਨਾਮ ਨਤ੍ਥਿ. ਨਿਰਸ੍ਸਾਦਟ੍ਠੇਨ ਨਿਰਯੋ.
ਤਤ੍ਥ ਸਤ੍ਤਾ ਮਹਾਲੁਦ੍ਦਾਤਿ ਤਸ੍ਮਿਂ ਨਿਬ੍ਬਤ੍ਤਾ ਸਤ੍ਤਾ ਮਹਨ੍ਤਾ ਲੁਦ੍ਦਾ. ਮਹਾਕਿਬ੍ਬਿਸਕਾਰਿਨੋਤਿ ਮਹਨ੍ਤਦਾਰੁਣਕਮ੍ਮਕਾਰਿਨੋ. ਅਚ੍ਚਨ੍ਤਪਾਪਕਮ੍ਮਨ੍ਤਾਤਿ ਏਕਂਸੇਨ ਪਾਪਕਮ੍ਮਿਨੋ. ਪਚ੍ਚਨ੍ਤਿ ਨ ਚ ਮਿਯ੍ਯਰੇਤਿ ਛਨ੍ਨਂ ਜਾਲਾਨਮਨ੍ਤਰੇ ਪਚ੍ਚਨ੍ਤਿ, ਨ ਚ ਮਿਯ੍ਯਨ੍ਤਿ. ਜਾਤਵੇਦਸਮੋ ਕਾਯੋਤਿ ਤੇਸਂ ਸਰੀਰਂ ਅਗ੍ਗਿਸਦਿਸਂ. ਤੇਸਂ ਨਿਰਯਵਾਸਿਨਨ੍ਤਿ ਤੇਸਂ ਪਾਪਕਮ੍ਮਾਨਂ ਨਿਰਯਵਾਸੀਨਂ. ਪਸ੍ਸ ਕਮ੍ਮਾਨਂ ਦਲ਼੍ਹਤ੍ਤਨ੍ਤਿ ਪਾਪਕਮ੍ਮਾਨਂ ਥਿਰਭਾਵਂ ਓਲੋਕੇਹਿ. ਨ ਭਸ੍ਮਾ ਹੋਤਿ ਨਪੀ ਮਸੀਤਿ ਛਾਰਿਕਾਪਿ ਨ ਹੋਤਿ ਅਙ੍ਗਾਰੋਪਿ. ਪੁਰਤ੍ਥਿਮੇਨਾਤਿ ਯਦਾ ਤਂ ਦ੍ਵਾਰਂ ਅਪਾਰੁਤਂ ਹੋਤਿ, ਅਥ ਤਦਭਿਮੁਖਾ ਧਾਵਨ੍ਤਿ, ਤੇਸਂ ਤਤ੍ਥ ਛਵਿਆਦੀਨਿ ਝਾਯਨ੍ਤਿ. ਦ੍ਵਾਰਸਮੀਪਂ ਪਤ੍ਤਾਨਞ੍ਚ ਤੇਸਂ ਤਂ ਪੀਧੀਯਤਿ, ਪਚ੍ਛਿਮਂ ਅਪਾਰੁਤਂ ਵਿਯ ਖਾਯਤਿ. ਏਸ ਨਯੋ ਸਬ੍ਬਤ੍ਥ. ਅਭਿਨਿਕ੍ਖਮਿਤਾਸਾ ਤੇਤਿ ਨਿਰਯਾ ਨਿਕ੍ਖਮਿਤੁਂ ਆਸਾ ਏਤੇਸਨ੍ਤਿ ਨਿਕ੍ਖਮਿਤਾਸਾ. ਮੋਕ੍ਖਗਵੇਸਿਨੋਤਿ ਮੁਞ੍ਚਨੁਪਾਯਂ ਏਸਨ੍ਤਾ ਗਵੇਸਨ੍ਤਾਪਿ. ਨ ਤੇ ਤਤੋ ਨਿਕ੍ਖਮਿਤੁਂ, ਲਭਨ੍ਤਿ ਕਮ੍ਮਪਚ੍ਚਯਾਤਿ ਤੇ ਸਤ੍ਤਾ ਨਿਰਯਤੋ ਨਿਕ੍ਖਮਨਦ੍ਵਾਰਂ ਪਾਪਕਮ੍ਮਪਚ੍ਚਯਾ ਨਾਧਿਗਚ੍ਛਨ੍ਤਿ. ਤੇਸਞ੍ਚ ਪਾਪਕਮ੍ਮਨ੍ਤਂ, ਅਵਿਪਕ੍ਕਂ ਕਤਂ ਬਹੁਨ੍ਤਿ ਤੇਸਞ੍ਚ ਸਤ੍ਤਾਨਂ ਲਾਮਕਂ ਦਾਰੁਣਕਮ੍ਮਂ ਅਵਿਪਾਕਂ ਬਹੁਵਿਧਂ ਨਾਨਪ੍ਪਕਾਰਂ ਅਦਿਨ੍ਨਵਿਪਾਕਂ ਕਤਂ ਉਪਚਿਤਂ ਅਤ੍ਥਿ.
ਸਂਵੇਗਨ੍ਤਿ ਵਿਨਿਲਨਂ. ਉਬ੍ਬੇਗਨ੍ਤਿ ਠਿਤਟ੍ਠਾਨਤੋ ਗਮਨਂ. ਉਤ੍ਰਾਸਨ੍ਤਿ ਉਬ੍ਬੇਜਨਂ ਅਸਨ੍ਨਿਟ੍ਠਾਨਂ. ਭਯਨ੍ਤਿ ਚਿਤ੍ਤੁਤ੍ਰਾਸਨਂ. ਪੀਲ਼ਨਨ੍ਤਿ ਘਟ੍ਟਨਂ. ਘਟ੍ਟਨਨ੍ਤਿ ਪੀਲ਼ਾਕਰਣਂ. ਉਪਦ੍ਦਵਨ੍ਤਿ ਈਤਿਂ. ਉਪਸਗ੍ਗਨ੍ਤਿ ਰੁਨ੍ਧਨਂ.
੧੭੧. ਇਦਾਨਿ ਯਥਾਨੇਨ ਸਂਵਿਜਿਤਂ, ਤਂ ਪਕਾਰਂ ਦਸ੍ਸੇਨ੍ਤੋ ‘‘ਫਨ੍ਦਮਾਨ’’ਨ੍ਤਿਆਦਿਮਾਹ. ਤਤ੍ਥ ਫਨ੍ਦਮਾਨਨ੍ਤਿ ਤਣ੍ਹਾਦਿਟ੍ਠੀਹਿ ਕਮ੍ਪਮਾਨਂ. ਅਪ੍ਪੋਦਕੇਤਿ ਅਪ੍ਪੇ ਉਦਕੇ. ਅਞ੍ਞਮਞ੍ਞੇਹਿ ਬ੍ਯਾਰੁਦ੍ਧੇ ਦਿਸ੍ਵਾਤਿ ਨਾਨਾਸਤ੍ਤੇ ਚ ਅਞ੍ਞਮਞ੍ਞੇਹਿ ਸਦ੍ਧਿਂ ਵਿਰੁਦ੍ਧੇ ਦਿਸ੍ਵਾ. ਮਂ ਭਯਮਾਵਿਸੀਤਿ ਮਂ ਭਯਂ ਪਵਿਟ੍ਠਂ.
ਕਿਲੇਸਫਨ੍ਦਨਾਯ ਫਨ੍ਦਮਾਨਨ੍ਤਿ ਰਾਗਾਦਿਕਿਲੇਸਚਲਨਾਯ ਚਲਮਾਨਂ. ਪਯੋਗੋਤਿ ਕਾਯਵਚੀਮਨੋਪਯੋਗੋ.
ਵਿਰੁਦ੍ਧਾਤਿ ਵਿਰੋਧਮਾਪਨ੍ਨਾ. ਪਟਿਵਿਰੁਦ੍ਧਾਤਿ ਪਟਿਮੁਖਂ ਹੁਤ੍ਵਾ ਵਿਰੋਧਮਾਪਨ੍ਨਾ, ਸੁਟ੍ਠੁ ਵਿਰੁਦ੍ਧਾ ਵਾ. ਆਹਤਾਤਿ ਕੋਧੇਨ ਆਹਤਾ ਪਹਤਾ. ਪਚ੍ਚਾਹਤਾਤਿ ਪਟਿਮਲ੍ਲਾ ਹੁਤ੍ਵਾ ਆਹਤਾ. ਆਘਾਤਿਤਾਤਿ ਘਟ੍ਟਿਤਾ. ਪਚ੍ਚਾਘਾਤਿਤਾਤਿ ਵਿਸੇਸੇਨ ਘਟ੍ਟਿਤਾ. ਪਾਣੀਹਿਪਿ ਉਪਕ੍ਕਮਨ੍ਤੀਤਿ ਹਤ੍ਥੇਹਿਪਿ ਪਹਰਨ੍ਤਿ.
੧੭੨. ਸਮਨ੍ਤਮਸਾਰੋ ਲੋਕੋਤਿ ਨਿਰਯਂ ਆਦਿਂ ਕਤ੍ਵਾ ਸਮਨ੍ਤਤੋ ਲੋਕੋ ਅਸਾਰੋ ਨਿਚ੍ਚਸਾਰਾਦਿਰਹਿਤੋ. ਦਿਸਾ ਸਬ੍ਬਾ ਸਮੇਰਿਤਾਤਿ ਸਬ੍ਬਾ ਦਿਸਾ ਅਨਿਚ੍ਚਤਾਯ ਕਮ੍ਪਿਤਾ. ਇਚ੍ਛਂ ਭਵਨਮਤ੍ਤਨੋਤਿ ਅਤ੍ਤਨੋ ਤਾਣਂ ਇਚ੍ਛਨ੍ਤੋ. ਨਾਦ੍ਦਸਾਸਿਂ ਅਨੋਸਿਤਨ੍ਤਿ ਕਿਞ੍ਚਿ ਠਾਨਂ ਜਰਾਦੀਹਿ ਅਨਜ੍ਝਾਵੁਟ੍ਠਂ ਨਾਦ੍ਦਕ੍ਖਿਨ੍ਤਿ.
ਅਸਾਰੋਤਿ ਨ ਸਾਰੋ, ਸਾਰਵਿਰਹਿਤੋ ਵਾ. ਨਿਸ੍ਸਾਰੋਤਿ ਸਬ੍ਬੇਨ ਸਬ੍ਬਂ ਸਾਰਵਿਰਹਿਤੋ. ਸਾਰਾਪਗਤੋਤਿ ਸਾਰਤੋ ਅਪਗਤੋ. ਨਿਚ੍ਚਸਾਰਸਾਰੇਨ ਵਾਤਿ ਸਤਤਸਾਰਸਙ੍ਖਾਤੇਨ ਸਾਰੇਨ ਵਾ. ਉਪਰਿਪਦਦ੍ਵਯੇਪਿ ਏਸੇਵ ਨਯੋ. ਯੇ ਪੁਰਤ੍ਥਿਮਾਯ ਦਿਸਾਯ ਸਙ੍ਖਾਰਾਤਿ ਯੇ ਪੁਰਤ੍ਥਿਮਾਯ ਦਿਸਾਯ ਪਚ੍ਚਯੇਹਿ ਸਙ੍ਗਮ੍ਮ ਸਮਾਗਮ੍ਮ ਕਤਾ ਸਙ੍ਖਾਰਾ. ਤੇਪਿ ਏਰਿਤਾਤਿ ਤੇਪਿ ਸਙ੍ਖਾਰਾ ਕਮ੍ਪਿਤਾ. ਸਮੇਰਿਤਾਤਿ ਸਮ੍ਮਾ ਕਮ੍ਪਿਤਾ. ਚਲਿਤਾਤਿ ਚਲਨਂ ਗਤਾ. ਘਟ੍ਟਿਤਾਤਿ ਉਦਯਬ੍ਬਯੇਨ ਪੀਲ਼ਿਤਾ. ਅਨਿਚ੍ਚਤਾਯਾਤਿ ਹੁਤ੍ਵਾ ਅਭਾਵਤਾਯ. ਜਾਤਿਯਾ ਅਨੁਗਤਾਤਿ ਨਿਬ੍ਬਤ੍ਤਿਯਾ ਅਨੁਪਵਿਟ੍ਠਾ. ਜਰਾਯ ਅਨੁਸਟਾਤਿ ਪਰਿਪਕ੍ਕਤਾਯ ਅਨੁਪਤ੍ਥਟਾ. ਬ੍ਯਾਧਿਨਾ ਅਭਿਭੂਤਾਤਿ ਚਾਤੁਵਿਸਮੇਨ ਉਪ੍ਪਨ੍ਨਬ੍ਯਾਧਿਨਾ ਅਜ੍ਝੋਤ੍ਥਟਾ. ਮਰਣੇਨ ਅਬ੍ਭਾਹਤਾਤਿ ਮਚ੍ਚੁਨਾ ਅਭਿਆਹਤਾ ਪਹਤਾ. ਅਤਾਣਾਤਿ ਰਕ੍ਖਵਿਰਹਿਤਾ. ਅਲੇਣਾਤਿ ਲੇਣਵਿਰਹਿਤਾ. ਅਸਰਣਾਤਿ ਨਤ੍ਥਿ ਏਤੇਸਂ ਸਰਣਨ੍ਤਿ ਅਸਰਣਾ. ਅਸਰਣੀਭੂਤਾਤਿ ਸਯਂ ਸਰਣਕਿਚ੍ਚਂ ਨ ਕਰੋਨ੍ਤੀਤਿ ਅਸਰਣੀਭੂਤਾ.
ਅਤ੍ਤਨੋ ਭਵਨਨ੍ਤਿ ਨਿਦ੍ਦੇਸਪਦਸ੍ਸ ਉਦ੍ਦੇਸਪਦਂ. ਤਾਣਨ੍ਤਿ ਪਾਲਨਂ. ਲੇਣਨ੍ਤਿ ਲੇਣਟ੍ਠਾਨਂ. ਸਰਣਨ੍ਤਿ ਦੁਕ੍ਖਨਾਸਨਂ. ਗਤਿਨ੍ਤਿ ਪਤਿਟ੍ਠਂ. ਪਰਾਯਨਨ੍ਤਿ ਪਰਂ ਅਯਨਂ. ਅਜ੍ਝੋਸਿਤਂਯੇਵ ਅਦ੍ਦਸਨ੍ਤਿ ਜਰਾਦੀਹਿ ਮਦ੍ਦਿਤਂਯੇਵ ਅਦ੍ਦਕ੍ਖਿਂ. ਸਬ੍ਬਂ ਯੋਬ੍ਬਞ੍ਞਨ੍ਤਿ ਯੋਬ੍ਬਨਭਾਵੋ ਯੋਬ੍ਬਞ੍ਞਂ, ਸਚੇਤਨਾਨਂ ਸਬ੍ਬਂ ਯੋਬ੍ਬਞ੍ਞਂ. ਜਰਾਯ ਓਸਿਤਨ੍ਤਿ ਪਰਿਪਾਕਾਯ ਜਰਾਯ ਅਵਸਿਤਂ ਮਦ੍ਦਿਤਂ. ਏਵਂ ਸਬ੍ਬਤ੍ਥ.
੧੭੩. ਓਸਾਨੇ ਤ੍ਵੇਵ ਬ੍ਯਾਰੁਦ੍ਧੇ, ਦਿਸ੍ਵਾ ਮੇ ਅਰਤੀ ਅਹੂਤਿ ਯੋਬ੍ਬਞ੍ਞਾਦੀਨਂ ਓਸਾਨੇਯੇਵ ਅਨ੍ਤਗਮਕੇ ਏਵ ਵਿਨਾਸਕੇ ਏਵ ਜਰਾਦੀਹਿ ਬ੍ਯਾਰੁਦ੍ਧੇ ਆਹਤਚਿਤ੍ਤੇ ਸਤ੍ਤੇ ਦਿਸ੍ਵਾ ਅਰਤਿ ਮੇ ਅਹੋਸਿ. ਅਥੇਤ੍ਥ ਸਲ੍ਲਨ੍ਤਿ ਅਥ ਏਤੇਸੁ ਸਤ੍ਤੇਸੁ ਰਾਗਾਦਿਸਲ੍ਲਂ. ਹਦਯਸ੍ਸਿਤਨ੍ਤਿ ਚਿਤ੍ਤਨਿਸ੍ਸਿਤਂ.
ਯੋਬ੍ਬਞ੍ਞਂ ਜਰਾ ਓਸਾਪੇਤੀਤਿ ਜਰਾ ਅਤ੍ਥਙ੍ਗਮੇਤਿ ਵਿਨਾਸੇਤਿ. ਏਵਂ ਸਬ੍ਬਤ੍ਥ.
੧੭੪. ‘‘ਕਥਂ ਆਨੁਭਾਵਂ ਸਲ੍ਲ’’ਨ੍ਤਿ ਚੇ? ਯੇਨ ਸਲ੍ਲੇਨ ਓਤਿਣ੍ਣੋਤਿ ਗਾਥਾ. ਤਤ੍ਥ ਦਿਸਾ ਸਬ੍ਬਾ ਵਿਧਾਵਤੀਤਿ ਸਬ੍ਬਾ ਦੁਚ੍ਚਰਿਤਦਿਸਾਪਿ ਪੁਰਤ੍ਥਿਮਾਦਿਦਿਸਾਪਿ ਵਿਦਿਸਾਪਿ ਧਾਵਤਿ. ਤਮੇਵ ਸਲ੍ਲਮਬ੍ਬੁਯ੍ਹ, ਨ ਧਾਵਤਿ ਨ ਸੀਦਤੀਤਿ ਤਮੇਵ ਸਲ੍ਲਂ ਉਦ੍ਧਰਿਤ੍ਵਾ ਤਾ ਚ ਦਿਸਾ ਨ ਧਾਵਤਿ, ਚਤੁਰੋਘੇ ਚ ਨ ਸੀਦਤਿ.
ਅਞ੍ਞਾਣਨ੍ਤਿਆਦੀਸੁ ਞਾਣਦਸ੍ਸਨਪਟਿਪਕ੍ਖਤੋ ਅਞ੍ਞਾਣਂ ਅਦਸ੍ਸਨਂ. ਅਭਿਮੁਖੋ ਹੁਤ੍ਵਾ ਧਮ੍ਮੇਨ ਨ ਸਮੇਤਿ ਨ ਸਮਾਗਚ੍ਛਤੀਤਿ ਅਨਭਿਸਮਯੋ. ਅਨੁਰੂਪਤੋ ਧਮ੍ਮੇ ਬੁਜ੍ਝਤੀਤਿ ਅਨੁਬੋਧੋ. ਤਪ੍ਪਟਿਪਕ੍ਖਤਾਯ ਅਨਨੁਬੋਧੋ. ਅਨਿਚ੍ਚਾਦੀਹਿ ਸਦ੍ਧਿਂ ਯੋਜੇਤ੍ਵਾ ਨ ਬੁਜ੍ਝਤੀਤਿ ਅਸਮ੍ਬੋਧੋ. ਅਸਨ੍ਤਂ ਅਸਮਞ੍ਚ ਬੁਜ੍ਝਤੀਤਿਪਿ ਅਸਮ੍ਬੋਧੋ. ਚਤੁਸਚ੍ਚਧਮ੍ਮਂ ਨ ਪਟਿਵਿਜ੍ਝਤੀਤਿ ਅਪ੍ਪਟਿਵੇਧੋ. ਰੂਪਾਦੀਸੁ ਏਕਧਮ੍ਮਮ੍ਪਿ ਅਨਿਚ੍ਚਾਦਿਸਾਮਞ੍ਞਤੋ ਨ ਸਙ੍ਗਣ੍ਹਾਤੀਤਿ ਅਸਙ੍ਗਾਹਣਾ. ਤਮੇਵ ਧਮ੍ਮਂ ਨ ਪਰਿਯੋਗਾਹਤੀਤਿ ਅਪਰਿਯੋਗਾਹਣਾ. ਨ ਸਮਂ ਪੇਕ੍ਖਤੀਤਿ ਅਸਮਪੇਕ੍ਖਨਾ. ਧਮ੍ਮਾਨਂ ਸਭਾਵਂ ਪਤਿ ਨ ਅਪੇਕ੍ਖਤੀਤਿ ਅਪਚ੍ਚਵੇਕ੍ਖਣਾ.
ਕੁਸਲਾਕੁਸਲਕਮ੍ਮੇਸੁ ਵਿਪਰੀਤਵੁਤ੍ਤਿਯਾ ਸਭਾਵਗਹਣਾਭਾਵੇਨ ਵਾ ਏਕਮ੍ਪਿ ਕਮ੍ਮਂ ਏਤਸ੍ਸ ਪਚ੍ਚਕ੍ਖਂ ਨਤ੍ਥਿ, ਸਯਂ ਵਾ ਕਸ੍ਸਚਿ ਧਮ੍ਮਸ੍ਸ ਪਚ੍ਚਕ੍ਖਕਰਣਂ ਨਾਮ ਨ ਹੋਤੀਤਿ ਅਪਚ੍ਚਕ੍ਖਕਮ੍ਮਂ. ਯਂ ਏਤਸ੍ਮਿਂ ਅਨੁਪ੍ਪਜ੍ਜਮਾਨੇ ਚਿਤ੍ਤਸਨ੍ਤਾਨਂ ਮੇਜ੍ਝਂ ਭਵੇਯ੍ਯ ਸੁਚਿ ਵੋਦਾਨਂ, ਤਂ ਦੁਟ੍ਠੁਂ ਮੇਜ੍ਝਂ ਇਮਿਨਾਤਿ ਦੁਮ੍ਮੇਜ੍ਝਂ. ਬਾਲਾਨਂ ਭਾਵੋ ਬਾਲ੍ਯਂ. ਮੁਯ੍ਹਤੀਤਿ ਮੋਹੋ. ਬਲਵਤਰੋ ਮੋਹੋ ਪਮੋਹੋ. ਸਮਨ੍ਤਤੋ ਮੁਯ੍ਹਤੀਤਿ ਸਮ੍ਮੋਹੋ. ਵਿਜ੍ਜਾਯ ਪਟਿਪਕ੍ਖਭਾਵਤੋ ਨ ਵਿਜ੍ਜਾਤਿ ਅਵਿਜ੍ਜਾ. ਓਘਯੋਗਤ੍ਥੋ ਵੁਤ੍ਤੋਯੇਵ. ਥਾਮਗਤਟ੍ਠੇਨ ਅਨੁਸੇਤੀਤਿ ਅਨੁਸਯੋ. ਚਿਤ੍ਤਂ ਪਰਿਯੁਟ੍ਠਾਤਿ ਅਭਿਭਵਤੀਤਿ ਪਰਿਯੁਟ੍ਠਾਨਂ. ਹਿਤਗ੍ਗਹਣਾਭਾਵੇਨ ਹਿਤਾਭਿਮੁਖਂ ਗਨ੍ਤੁਂ ਨ ਸਕ੍ਕੋਤਿ ਅਞ੍ਞਦਤ੍ਥੁ ਲਙ੍ਗਤਿਯੇਵਾਤਿ ਲਙ੍ਗੀ, ਖਞ੍ਜਤੀਤਿ ਅਤ੍ਥੋ. ਦੁਰੁਗ੍ਘਾਟਨਟ੍ਠੇਨ ਵਾ ਲਙ੍ਗੀ. ਯਥਾ ਹਿ ਮਹਾਪਲਿਘਸਙ੍ਖਾਤਾ ਲਙ੍ਗੀ ਦੁਰੁਗ੍ਘਾਟਾ ਹੋਤਿ, ਏਵਮਯਮ੍ਪਿ ਲਙ੍ਗੀ ਵਿਯਾਤਿ ਲਙ੍ਗੀ. ਸੇਸਂ ਉਤ੍ਤਾਨਤ੍ਥਮੇਵ.
ਯਾ ਏਵਰੂਪਾ ਕਙ੍ਖਾਤਿ ਏਤ੍ਥ ਕਙ੍ਖਨਵਸੇਨ ਕਙ੍ਖਾ. ਕਙ੍ਖਂ ਆਨਯਤੀਤਿ ਕਙ੍ਖਾਯਨਾ. ਪੁਰਿਮਕਙ੍ਖਾ ਹਿ ਉਤ੍ਤਰਕਙ੍ਖਂ ਆਨਯਤਿ ਨਾਮ. ਆਕਾਰਵਸੇਨ ਵਾ ਏਤਂ ਵੁਤ੍ਤਂ. ਕਙ੍ਖਾਸਮਙ੍ਗਿਚਿਤ੍ਤਂ ਕਙ੍ਖਾਯ ਆਯਿਤਤ੍ਤਾ ਕਙ੍ਖਾਯਿਤਂ ਨਾਮ. ਤਸ੍ਸ ਭਾਵੋ ਕਙ੍ਖਾਯਿਤਤ੍ਤਂ. ਵਿਮਤੀਤਿ ਵਿਗਤਾ ਮਤਿ ਵਿਮਤਿ. ਵਿਚਿਕਿਚ੍ਛਾਤਿ ਵਿਗਤਾ ਚਿਕਿਚ੍ਛਾ ਵਿਚਿਕਿਚ੍ਛਾ, ਸਭਾਵਂ ਵਾ ਵਿਚਿਨਨ੍ਤੋ ਕਿਚ੍ਛਤਿ ਕਿਲਮਤਿ ਏਤਾਯਾਤਿ ਵਿਚਿਕਿਚ੍ਛਾ. ਸਾ ਸਂਸਯਲਕ੍ਖਣਾ, ਕਮ੍ਪਨਰਸਾ, ਅਨਿਚ੍ਛਯਪਚ੍ਚੁਪਟ੍ਠਾਨਾ, ਅਨੇਕਂਸਗ੍ਗਾਹਪਚ੍ਚੁਪਟ੍ਠਾਨਾ ਵਾ, ਅਯੋਨਿਸੋਮਨਸਿਕਾਰਪਦਟ੍ਠਾਨਾ, ਪਟਿਪਤ੍ਤਿਯਾ ਅਨ੍ਤਰਾਯਕਰਾਤਿ ਦਟ੍ਠਬ੍ਬਾ.
ਕਮ੍ਪਨਟ੍ਠੇਨ ਦ੍ਵਿਧਾ ਏਲ਼ਯਤੀਤਿ ਦ੍ਵੇਲ਼੍ਹਕਂ. ਪਟਿਪਤ੍ਤਿਨਿਵਾਰਣੇਨ ਦ੍ਵਿਧਾਪਥੋ ਵਿਯਾਤਿ ਦ੍ਵੇਧਾਪਥੋ. ‘‘ਨਿਚ੍ਚਂ ਵਾ ਇਦਂ ਅਨਿਚ੍ਚਂ ਵਾ’’ਤਿਆਦਿਪਵਤ੍ਤਿਯਾ ਏਕਸ੍ਮਿਂ ਆਕਾਰੇ ਸਣ੍ਠਾਤੁਂ ਅਸਮਤ੍ਥਤਾਯ ਸਮਨ੍ਤਤੋ ਸੇਤੀਤਿ ਸਂਸਯੋ. ਏਕਂਸਂ ਗਹੇਤੁਂ ਅਸਮਤ੍ਥਤਾਯ ਨ ਏਕਂਸਗ੍ਗਾਹੋਤਿ ਅਨੇਕਂਸਗ੍ਗਾਹੋ. ਨਿਚ੍ਛੇਤੁਂ ਅਸਕ੍ਕੋਨ੍ਤੀ ਆਰਮ੍ਮਣਤੋ ਓਸਕ੍ਕਤੀਤਿ ਆਸਪ੍ਪਨਾ. ਓਗਾਹਿਤੁਂ ਅਸਕ੍ਕੋਨ੍ਤੀ ਪਰਿਸਮਨ੍ਤਤੋ ਸਪ੍ਪਤੀਤਿ ਪਰਿਸਪ੍ਪਨਾ. ਪਰਿਯੋਗਾਹਿਤੁਂ ਅਸਮਤ੍ਥਤਾਯ ਅਪਰਿਯੋਗਾਹਣਾ. ਨਿਚ੍ਛਯਵਸੇਨ ਆਰਮ੍ਮਣੇ ਪਵਤ੍ਤਿਤੁਂ ਅਸਮਤ੍ਥਤਾਯ ਛਮ੍ਭਿਤਤ੍ਤਂ ਚਿਤ੍ਤਸ੍ਸ, ਥਦ੍ਧਭਾਵੋਤਿ ਅਤ੍ਥੋ. ਵਿਚਿਕਿਚ੍ਛਾ ਹਿ ਉਪ੍ਪਜ੍ਜਿਤ੍ਵਾ ਚਿਤ੍ਤਂ ਥਦ੍ਧਂ ਕਰੋਤਿ, ਯਸ੍ਮਾ ਪਨ ਸਾ ਉਪ੍ਪਜ੍ਜਮਾਨਾ ਆਰਮ੍ਮਣਂ ਗਹੇਤ੍ਵਾ ਮਨਂ ਵਿਲਿਖਨ੍ਤੀ ਵਿਯ, ਤਸ੍ਮਾ ਮਨੋਵਿਲੇਖੋਤਿ ਵੁਤ੍ਤਾ.
ਵਿਦ੍ਧੋਤਿ ਸਲ੍ਲੇਨ ਲਦ੍ਧਪ੍ਪਹਾਰੋ. ਫੁਟ੍ਠੋਤਿ ਘਟ੍ਟਿਤੋ. ਪਰੇਤੋਤਿ ਪੀਲ਼ਿਤੋ. ਧਾਵਤੀਤਿ ਪੁਰਤੋ ਗਚ੍ਛਤਿ. ਵਿਧਾਵਤੀਤਿ ਅਨੇਕਵਿਧੇਨ ਗਚ੍ਛਤਿ. ਸਨ੍ਧਾਵਤੀਤਿ ਵੇਗੇਨ ਧਾਵਤਿ. ਸਂਸਰਤੀਤਿ ਇਤੋ ਚਿਤੋ ਚ ਚਰਤਿ.
ਅਚੇਲਕੋਤਿ ਨਿਚ੍ਚੋਲੋ, ਨਗ੍ਗੋਤਿ ਅਤ੍ਥੋ. ਮੁਤ੍ਤਾਚਾਰੋਤਿ ਵਿਸਟ੍ਠਾਚਾਰੋ, ਉਚ੍ਚਾਰਕਮ੍ਮਾਦੀਸੁ ਲੋਕਿਯਕੁਲਪੁਤ੍ਤਾਚਾਰੇਨ ਵਿਰਹਿਤੋ ਠਿਤਕੋਵ ਉਚ੍ਚਾਰਂ ਕਰੋਤਿ, ਪਸ੍ਸਾਵਂ ਕਰੋਤਿ, ਖਾਦਤਿ ਭੁਞ੍ਜਤਿ. ਹਤ੍ਥਾਪਲੇਖਨੋਤਿ ਹਤ੍ਥੇ ਪਿਣ੍ਡਮ੍ਹਿ ਠਿਤੇ ਜਿਵ੍ਹਾਯ ਹਤ੍ਥਂ ਅਪਲਿਖਤਿ, ਉਚ੍ਚਾਰਂ ਵਾ ਕਤ੍ਵਾ ਹਤ੍ਥਮ੍ਹਿਯੇਵ ਦਣ੍ਡਕਸਞ੍ਞੀ ਹੁਤ੍ਵਾ ਹਤ੍ਥੇਨ ਅਪਲਿਖਤਿ. ਤੇ ਕਿਰ ਦਣ੍ਡਕਂ ‘‘ਸਤ੍ਤੋ’’ਤਿ ਪਞ੍ਞਪੇਨ੍ਤਿ. ਭਿਕ੍ਖਾਗਹਣਤ੍ਥਂ ‘‘ਏਹਿ ਭਦਨ੍ਤੇ’’ਤਿ ਵੁਤ੍ਤੋ ਨ ਏਤੀਤਿ ਨ ਏਹਿਭਦਨ੍ਤਿਕੋ. ਤੇਨ ਹਿ ‘‘ਤਿਟ੍ਠ ਭਦਨ੍ਤੇ’’ਤਿ ਵੁਤ੍ਤੋਪਿ ਨ ਤਿਟ੍ਠਤੀਤਿ ਨ ਤਿਟ੍ਠਭਦਨ੍ਤਿਕੋ. ਤਦੁਭਯਮ੍ਪਿ ਕਿਰ ਸੋ ‘‘ਏਤਸ੍ਸ ਵਚਨਂ ਕਤਂ ਭਵਿਸ੍ਸਤੀ’’ਤਿ ਨ ਕਰੋਤਿ.
ਅਭਿਹਟਨ੍ਤਿ ਪੁਰੇਤਰਂ ਗਹੇਤ੍ਵਾ ਆਹਟਂ ਭਿਕ੍ਖਂ. ਉਦ੍ਦਿਸ੍ਸਕਤਨ੍ਤਿ ‘‘ਇਦਂ ਤੁਮ੍ਹੇ ਉਦ੍ਦਿਸ੍ਸ ਕਤ’’ਨ੍ਤਿ ਏਵਂ ਆਰੋਚਿਤਂ ਭਿਕ੍ਖਂ. ਨ ਨਿਮਨ੍ਤਨਨ੍ਤਿ ‘‘ਅਸੁਕਂ ਨਾਮ ਕੁਲਂ ਵਾ ਵੀਥਿਂ ਵਾ ਗਾਮਂ ਵਾ ਪਵਿਸੇਯ੍ਯਾਥਾ’’ਤਿ ਏਵਂ ਨਿਮਨ੍ਤਿਤਭਿਕ੍ਖਮ੍ਪਿ ਨ ਸਾਦਿਯਤਿ ਨ ਗਣ੍ਹਾਤਿ. ਨ ਕੁਮ੍ਭਿਮੁਖਾਤਿ ਕੁਮ੍ਭਿਤੋ ਉਦ੍ਧਰਿਤ੍ਵਾ ਦਿਯ੍ਯਮਾਨਂ ਭਿਕ੍ਖਂ ਨ ਗਣ੍ਹਾਤਿ. ਨ ਕਲ਼ੋਪਿਮੁਖਾਤਿ ਕਲ਼ੋਪੀਤਿ ਉਕ੍ਖਲਿ ਵਾ ਪਚ੍ਛਿ ਵਾ, ਤਤੋਪਿ ਨ ਗਣ੍ਹਾਤਿ. ਕਸ੍ਮਾ? ਕੁਮ੍ਭਿਕਲ਼ੋਪਿਯੋ ਮਂ ਨਿਸ੍ਸਾਯ ਕਟਚ੍ਛੁਨਾ ਪਹਾਰਂ ਲਭਨ੍ਤੀਤਿ. ਨ ਏਲ਼ਕਮਨ੍ਤਰਨ੍ਤਿ ਉਮ੍ਮਾਰਂ ਅਨ੍ਤਰਂ ਕਰਿਤ੍ਵਾ ਦਿਯ੍ਯਮਾਨਂ ਨ ਗਣ੍ਹਾਤਿ. ਕਸ੍ਮਾ? ਅਯਂ ਮਂ ਨਿਸ੍ਸਾਯ ਅਨ੍ਤਰਕਰਣਂ ਲਭਤੀਤਿ. ਦਣ੍ਡਮੁਸਲੇਸੁਪਿ ਏਸੇਵ ਨਯੋ.
ਨ ਦ੍ਵਿਨ੍ਨਨ੍ਤਿ ਦ੍ਵੀਸੁ ਭੁਞ੍ਜਮਾਨੇਸੁ ਏਕਸ੍ਮਿਂ ਉਟ੍ਠਾਯ ਦੇਨ੍ਤੇ ਨ ਗਣ੍ਹਾਤਿ. ਕਸ੍ਮਾ? ਕਬਲ਼ਨ੍ਤਰਾਯੋ ਹੋਤੀਤਿ. ਨ ਗਬ੍ਭਿਨਿਯਾਤਿਆਦੀਸੁ ਪਨ ‘‘ਗਬ੍ਭਿਨਿਯਾ ਕੁਚ੍ਛਿਯਂ ਦਾਰਕੋ ਕਿਲਮਤੀ’’ਤਿ, ਪਾਯਨ੍ਤਿਯਾ ਦਾਰਕਸ੍ਸ ਖੀਰਨ੍ਤਰਾਯੋ ਹੋਤੀ’’ਤਿ, ‘‘ਪੁਰਿਸਨ੍ਤਰਗਤਾਯ ਰਤਿਅਨ੍ਤਰਾਯੋ ਹੋਤੀ’’ਤਿ ਨ ਗਣ੍ਹਾਤਿ. ਨ ਸਂਕਿਤ੍ਤੀਸੂਤਿ ਸਂਕਿਤ੍ਤੇਤ੍ਵਾ ਕਤਭਤ੍ਤੇਸੁ. ਦੁਬ੍ਭਿਕ੍ਖਸਮਯੇ ਕਿਰ ਅਚੇਲਕਸਾਵਕਾ ਅਚੇਲਕਾਨਮਤ੍ਥਾਯ ਤਤੋ ਤਤੋ ਤਣ੍ਡੁਲਾਦੀਨਿ ਸਮਾਦਪੇਤ੍ਵਾ ਭਤ੍ਤਂ ਪਚਨ੍ਤਿ, ਉਕ੍ਕਟ੍ਠੋ ਅਚੇਲਕੋ ਤਤੋਪਿ ਨ ਪਟਿਗ੍ਗਣ੍ਹਾਤਿ. ਨ ਯਤ੍ਥ ਸਾਤਿ ਯਤ੍ਥ ਸੁਨਖੋ ‘‘ਪਿਣ੍ਡਂ ਲਭਿਸ੍ਸਾਮੀ’’ਤਿ ਉਪਟ੍ਠਿਤੋ ਹੋਤਿ, ਤਤ੍ਥ ਤਸ੍ਸ ਅਦਤ੍ਵਾ ਆਹਟਂ ਨ ਗਣ੍ਹਾਤਿ. ਕਸ੍ਮਾ? ਏਤਸ੍ਸ ਪਿਣ੍ਡਨ੍ਤਰਾਯੋ ਹੋਤੀਤਿ. ਸਣ੍ਡਸਣ੍ਡਚਾਰਿਨੀਤਿ ਸਮੂਹਸਮੂਹਚਾਰਿਨੀ. ਸਚੇ ਹਿ ਅਚੇਲਕਂ ਦਿਸ੍ਵਾ ‘‘ਇਮਸ੍ਸ ਭਿਕ੍ਖਂ ਦਸ੍ਸਾਮਾ’’ਤਿ ਮਨੁਸ੍ਸਾ ਭਤ੍ਤਗੇਹਂ ਪਵਿਸਨ੍ਤਿ, ਤੇਸੁ ਚ ਪਵਿਸਨ੍ਤੇਸੁ ਕਲ਼ੋਪਿਮੁਖਾਦੀਸੁ ਨਿਲੀਨਾ ਮਕ੍ਖਿਕਾ ਉਪ੍ਪਤਿਤ੍ਵਾ ਸਣ੍ਡਸਣ੍ਡਾ ਚਰਨ੍ਤਿ. ਤਤੋ ਆਹਟਂ ਭਿਕ੍ਖਂ ਨ ਗਣ੍ਹਾਤਿ. ਕਸ੍ਮਾ? ਮਂ ਨਿਸ੍ਸਾਯ ਮਕ੍ਖਿਕਾਨਂ ਗੋਚਰਨ੍ਤਰਾਯੋ ਜਾਤੋਤਿ. ਥੁਸੋਦਕਨ੍ਤਿ ਸਬ੍ਬਸਸ੍ਸਸਮ੍ਭਾਰੇਹਿ ਕਤਂ ਸੋਵੀਰਕਂ. ਏਤ੍ਥ ਚ ਸੁਰਾਪਾਨਮੇਵ ਸਾਵਜ੍ਜਂ, ਅਯਂ ਪਨ ਸਬ੍ਬੇਸੁਪਿ ਸਾਵਜ੍ਜਸਞ੍ਞੀ.
ਏਕਾਗਾਰਿਕੋਤਿ ਯੋ ਏਕਸ੍ਮਿਂਯੇਵ ਗੇਹੇ ਭਿਕ੍ਖਂ ਲਭਿਤ੍ਵਾ ਨਿਵਤ੍ਤਤਿ. ਏਕਾਲੋਪਿਕੋਤਿ ਯੋ ਏਕੇਨੇਵ ਆਲੋਪੇਨ ਯਾਪੇਤਿ. ਦ੍ਵਾਗਾਰਿਕਾਦੀਸੁਪਿ ਏਸੇਵ ਨਯੋ. ਏਕਿਸ੍ਸਾਪਿ ਦਤ੍ਤਿਯਾਤਿ ਏਕਾਯ ਦਤ੍ਤਿਯਾ. ਦਤ੍ਤਿ ਨਾਮ ਏਕਾ ਖੁਦ੍ਦਕਪਾਤਿ ਹੋਤਿ, ਯਤ੍ਥ ਅਗ੍ਗਭਿਕ੍ਖਂ ਪਕ੍ਖਿਪਿਤ੍ਵਾ ਠਪੇਨ੍ਤਿ. ਏਕਾਹਿਕਨ੍ਤਿ ਏਕਦਿਵਸਨ੍ਤਰਿਕਂ. ਅਡ੍ਢਮਾਸਿਕਨ੍ਤਿ ਅਡ੍ਢਮਾਸਨ੍ਤਰਿਕਂ. ਪਰਿਯਾਯਭਤ੍ਤਭੋਜਨਨ੍ਤਿ ਵਾਰਭਤ੍ਤਭੋਜਨਂ, ਏਕਾਹਵਾਰੇਨ ਦ੍ਵੀਹਵਾਰੇਨ ਸਤ੍ਤਾਹਵਾਰੇਨ ਅਡ੍ਢਮਾਸਵਾਰੇਨਾਤਿ ਏਵਂ ਦਿਵਸਵਾਰੇਨ ਆਭਤਂ ਭਤ੍ਤਭੋਜਨਂ.
ਸਾਕਭਕ੍ਖੋਤਿਆਦੀਨਿ ਵੁਤ੍ਤਤ੍ਥਾਨੇਵ. ਉਬ੍ਭਟ੍ਠਕੋਤਿ ਉਦ੍ਧਂ ਠਿਤਕੋ. ਉਕ੍ਕੁਟਿਕਪ੍ਪਧਾਨਮਨੁਯੁਤ੍ਤੋਤਿ ਉਕ੍ਕੁਟਿਕਂ ਵੀਰਿਯਂ ਅਨੁਯੁਤ੍ਤੋ. ਗਚ੍ਛਨ੍ਤੋਪਿ ਉਕ੍ਕੁਟਿਕੋਵ ਹੁਤ੍ਵਾ ਉਪ੍ਪਤਿਤ੍ਵਾ ਉਪ੍ਪਤਿਤ੍ਵਾ ਗਚ੍ਛਤਿ. ਕਣ੍ਟਕਾਪਸ੍ਸਯਿਕੋਤਿ ਅਯਕਣ੍ਟਕੇ ਵਾ ਪਕਤਿਕਣ੍ਟਕੇ ਵਾ ਭੂਮਿਯਂ ਕੋਟ੍ਟੇਤ੍ਵਾ ਤਤ੍ਥ ਚਮ੍ਮਂ ਅਤ੍ਥਰਿਤ੍ਵਾ ਠਾਨਚਙ੍ਕਮਾਦੀਨਿ ਕਰੋਤਿ. ਸੇਯ੍ਯਨ੍ਤਿ ਸਯਨ੍ਤੋਪਿ ਤਤ੍ਥੇਵ ਸੇਯ੍ਯਂ ਕਪ੍ਪੇਤਿ. ਫਲਕਸੇਯ੍ਯਨ੍ਤਿ ਰੁਕ੍ਖਫਲਕੇ ਸੇਯ੍ਯਂ. ਥਣ੍ਡਿਲਸੇਯ੍ਯਨ੍ਤਿ ਥਣ੍ਡਿਲੇ ਉਚ੍ਚੇ ਭੂਮਿਟ੍ਠਾਨੇ ਸੇਯ੍ਯਂ. ਏਕਪਸ੍ਸਯਿਕੋਤਿ ਏਕਪਸ੍ਸੇਨੇਵ ਸਯਤਿ. ਰਜੋਜਲ੍ਲਧਰੋਤਿ ਸਰੀਰਂ ਤੇਲੇਨ ਮਕ੍ਖੇਤ੍ਵਾ ਰਜੁਟ੍ਠਾਨਟ੍ਠਾਨੇ ਤਿਟ੍ਠਤਿ, ਅਥਸ੍ਸ ਸਰੀਰੇ ਰਜੋਜਲ੍ਲਂ ਲਗ੍ਗਤਿ, ਤਂ ਧਾਰੇਤਿ. ਯਥਾਸਨ੍ਥਤਿਕੋਤਿ ਲਦ੍ਧਂ ਆਸਨਂ ਅਕੋਪੇਤ੍ਵਾ ਯਦੇਵ ਲਭਤਿ, ਤਤ੍ਥੇਵ ਨਿਸੀਦਨਸੀਲੋ. ਵੇਕਟਿਕੋਤਿ ਵਿਕਟਖਾਦਨਸੀਲੋ, ਵਿਕਟਨ੍ਤਿ ਗੂਥਂ ਵੁਚ੍ਚਤਿ. ਅਪਾਨਕੋਤਿ ਪਟਿਕ੍ਖਿਤ੍ਤਸੀਤੁਦਕਪਾਨੋ. ਸਾਯਂ ਤਤਿਯਂ ਅਸ੍ਸਾਤਿ ਸਾਯਤਤਿਯਕਂ. ਪਾਤੋ ਮਜ੍ਝਨ੍ਹਿਕੇ ਸਾਯਨ੍ਤਿ ਦਿਵਸਸ੍ਸ ਤਿਕ੍ਖਤ੍ਤੁਂ ‘‘ਪਾਪਂ ਪਵਾਹੇਸ੍ਸਾਮੀ’’ਤਿ ਉਦਕੋਰੋਹਨਾਨੁਯੋਗਂ ਅਨੁਯੁਤ੍ਤੋ ਵਿਹਰਤਿ.
ਤੇ ਸਲ੍ਲੇ ਅਭਿਸਙ੍ਖਰੋਤੀਤਿ ਤੇ ਰਾਗਾਦਿਸਤ੍ਤਸਲ੍ਲੇ ਅਭਿਨਿਬ੍ਬਤ੍ਤੇਤਿ. ਅਭਿਸਙ੍ਖਰੋਨ੍ਤੋਤਿ ਅਭਿਨਿਬ੍ਬਤ੍ਤੇਨ੍ਤੋ. ਸਲ੍ਲਾਭਿਸਙ੍ਖਾਰਵਸੇਨਾਤਿ ਸਲ੍ਲਾਭਿਨਿਬ੍ਬਤ੍ਤਾਪਨਕਾਰਣਾ. ਪੁਰਤ੍ਥਿਮਂ ਦਿਸਂ ਧਾਵਤੀਤਿ ਪੁਰਿਮਂ ਦਿਸਂ ਗਚ੍ਛਤਿ. ਤੇ ਸਲ੍ਲਾਭਿਸਙ੍ਖਾਰਾ ਅਪ੍ਪਹੀਨਾਤਿ ਏਤੇ ਰਾਗਾਦਿਸਲ੍ਲਾ ਪਯੋਗਾ ਨਪ੍ਪਹੀਨਾ. ਸਲ੍ਲਾਭਿਸਙ੍ਖਾਰਾਨਂ ਅਪ੍ਪਹੀਨਤ੍ਤਾਤਿ ਸਲ੍ਲਪਯੋਗਾਨਂ ਅਪ੍ਪਹੀਨਭਾਵੇਨ. ਗਤਿਯਾ ਧਾਵਤੀਤਿ ਗਤਿਯਂ ਧਾਵਤਿ. ਗਤਿਯਾ ਗਤਿਨ੍ਤਿ ਗਤਿਤੋ ਗਤਿਂ.
ਨ ਸੀਦਤੀਤਿ ਨ ਨਿਮੁਜ੍ਜਤਿ. ਨ ਸਂਸੀਦਤੀਤਿ ਨ ਸਮਨ੍ਤਤੋ ਮੁਜ੍ਜਤਿ. ਨ ਓਸੀਦਤੀਤਿ ਨ ਓਸਕ੍ਕਤਿ. ਨ ਅਵਸੀਦਤੀਤਿ ਨ ਪਚ੍ਚੋਸਕ੍ਕਤਿ. ਨ ਅਵਗਚ੍ਛਤੀਤਿ ਨ ਹੇਟ੍ਠਾ ਗਚ੍ਛਤਿ.
੧੭੫. ਏਵਂ ਮਹਾਨੁਭਾਵੇਨ ਸਲ੍ਲੇਨ ਓਤਿਣ੍ਣੇਸੁ ਚ ਸਤ੍ਤੇਸੁ – ਤਤ੍ਥ ਸਿਕ੍ਖਾਨੁਗੀਯਨ੍ਤਿ, ਯਾਨਿ ਲੋਕੇ ਗਧਿਤਾਨੀਤਿ ਗਾਥਾ. ਤਸ੍ਸਤ੍ਥੋ – ਯੇ ਲੋਕੇ ਪਞ੍ਚ ਕਾਮਗੁਣਾ ਪਟਿਲਾਭਾਯ ਗਿਜ੍ਝਨ੍ਤੀਤਿ ਕਤ੍ਵਾ ‘‘ਗਧਿਤਾਨੀ’’ਤਿ ਵੁਚ੍ਚਨ੍ਤਿ, ਚਿਰਕਾਲਸੇਵਿਤਤ੍ਤਾ ਵਾ ‘‘ਗਧਿਤਾਨੀ’’ਤਿ ਵੁਚ੍ਚਨ੍ਤਿ. ਤਤ੍ਥ ਤਂ ਨਿਮਿਤ੍ਤਂ ਹਤ੍ਥਿਸਿਕ੍ਖਾਦਿਕਾ ਅਨੇਕਾ ਸਿਕ੍ਖਾ ਕਥੀਯਨ੍ਤਿ, ਉਗ੍ਗਯ੍ਹਨ੍ਤਿ ਵਾ. ਪਸ੍ਸਥ ਯਾਵ ਸਮਤ੍ਥੋ ਵਾਯਂ ਲੋਕੋ, ਯਤੋ ਪਣ੍ਡਿਤੋ ਕੁਲਪੁਤ੍ਤੋ ਤੇਸੁ ਵਾ ਗਧਿਤੇਸੁ ਤਾਸੁ ਵਾ ਸਿਕ੍ਖਾਸੁ ਅਧਿਮੁਤ੍ਤੋ ਨ ਸਿਯਾ, ਅਞ੍ਞਦਤ੍ਥੁ ਅਨਿਚ੍ਚਾਦਿਦਸ੍ਸਨੇਨ ਨਿਬ੍ਬਿਜ੍ਝ ਸਬ੍ਬਸੋ ਕਾਮੇ. ਅਤ੍ਤਨੋ ਨਿਬ੍ਬਾਨਮੇਵ ਸਿਕ੍ਖੇਤਿ.
ਪਟਿਵਿਜ੍ਝਿਤ੍ਵਾਤਿ ਞਾਣੇਨ ਨਿਕ੍ਖਮੇਤ੍ਵਾ ਵਾ ਨਿਬ੍ਬਿਜ੍ਝਿਤ੍ਵਾ ਵਾ.
੧੭੬. ਇਦਾਨਿ ਯਥਾ ਨਿਬ੍ਬਾਨਾਯ ਸਿਕ੍ਖਿਤਬ੍ਬਂ, ਤਂ ਦਸ੍ਸੇਨ੍ਤੋ ‘‘ਸਚ੍ਚੋ ਸਿਯਾ’’ਤਿਆਦਿਮਾਹ. ਤਤ੍ਥ ਸਚ੍ਚੋਤਿ ਵਾਚਾਸਚ੍ਚੇਨ ਞਾਣਸਚ੍ਚੇਨ ਮਗ੍ਗਸਚ੍ਚੇਨ ਚ ਸਮਨ੍ਨਾਗਤੋ. ਰਿਤ੍ਤਪੇਸੁਣੋਤਿ ਪਹੀਨਪੇਸੁਣੋ. ਵੇਵਿਚ੍ਛਨ੍ਤਿ ਮਚ੍ਛਰਿਯਂ.
੧੭੭. ਨਿਦ੍ਦਂ ਤਨ੍ਦਿਂ ਸਹੇ ਥੀਨਨ੍ਤਿ ਪਚਲਾਯਿਕਞ੍ਚ ਕਾਯਾਲਸਿਯਞ੍ਚ ਚਿਤ੍ਤਾਲਸਿਯਞ੍ਚਾਤਿ ਇਮੇ ਤਯੋ ਧਮ੍ਮੇ ਅਭਿਭਵੇਯ੍ਯ. ਨਿਬ੍ਬਾਨਮਾਨਸੋਤਿ ਨਿਬ੍ਬਾਨਨਿਨ੍ਨਚਿਤ੍ਤੋ.
ਕਾਯਸ੍ਸ ਅਕਲ੍ਯਤਾਤਿ ਖਨ੍ਧਤ੍ਤਯਸਙ੍ਖਾਤਸ੍ਸ ਨਾਮਕਾਯਸ੍ਸ ਗਿਲਾਨਭਾਵੋ. ਗਿਲਾਨੋ ਹਿ ਅਕਲ੍ਲਕੋਤਿ ਵੁਚ੍ਚਤਿ. ਵਿਨਯੇਪਿ (ਪਾਰਾ. ੧੫੧) ਵੁਤ੍ਤਂ – ‘‘ਨਾਹਂ, ਭਨ੍ਤੇ, ਅਕਲ੍ਲਕੋ’’ਤਿ. ਅਕਮ੍ਮਞ੍ਞਤਾਤਿ ਕਾਯਗੇਲਞ੍ਞਸਙ੍ਖਾਤੋ ਅਕਮ੍ਮਞ੍ਞਤਾਕਾਰੋ. ਮੇਘੋ ਵਿਯ ਆਕਾਸਂ ਕਾਯਂ ਓਨਯ੍ਹਤੀਤਿ ਓਨਾਹੋ. ਸਬ੍ਬਤੋ ਭਾਗੇਨ ਓਨਾਹੋ ਪਰਿਯੋਨਾਹੋ. ਅਬ੍ਭਨ੍ਤਰੇ ਸਮੋਰੁਨ੍ਧਤੀਤਿ ਅਨ੍ਤੋਸਮੋਰੋਧੋ. ਮੇਧਤੀਤਿ ਮਿਦ੍ਧਂ, ਅਕਮ੍ਮਞ੍ਞਭਾਵੇਨ ਵਿਹਿਂਸਤੀਤਿ ਅਤ੍ਥੋ. ਸੁਪਨ੍ਤਿ ਤੇਨਾਤਿ ਸੁਪ੍ਪਂ. ਅਕ੍ਖਿਦਲਾਦੀਨਂ ਪਚਲਭਾਵਂ ਕਰੋਤੀਤਿ ਪਚਲਾਯਿਕਾ. ਸੁਪ੍ਪਨਾ ਸੁਪ੍ਪਿਤਤ੍ਤਨ੍ਤਿ ਆਕਾਰਭਾਵਨਿਦ੍ਦੇਸਾ. ਓਲੀਯਨਾਤਿ ਓਲੀਯਨਾਕਾਰੋ. ਦੁਤਿਯਂ ਉਪਸਗ੍ਗਵਸੇਨ ਵਡ੍ਢਿਤਂ. ਲੀਨਨ੍ਤਿ ਅਵਿਪ੍ਫਾਰਿਕਤਾਯ ਪਟਿਕੁਟਿਕਂ. ਇਤਰੇ ਦ੍ਵੇ ਆਕਾਰਭਾਵਨਿਦ੍ਦੇਸਾ. ਥਿਨਨ੍ਤਿ ਸਪ੍ਪਿਪਿਣ੍ਡੋ ਵਿਯ ਅਵਿਪ੍ਫਾਰਿਕਤਾਯ ਘਨਭਾਵੇਨ ਠਿਤਂ. ਥਿਯਨਾਤਿ ਆਕਾਰਨਿਦ੍ਦੇਸੋ. ਥਿਯਿਤਸ੍ਸ ਭਾਵੋ ਥਿਯਿਤਤ੍ਤਂ, ਅਵਿਪ੍ਫਾਰਵਸੇਨ ਥਦ੍ਧਤਾਤਿ ਅਤ੍ਥੋ.
ਸਬ੍ਬਸਙ੍ਖਾਰਧਾਤੁਯਾਤਿ ਨਿਬ੍ਬਾਨਨਿਨ੍ਨਮਾਨਸੋ ਸਬ੍ਬਤੇਭੂਮਿਕਸਙ੍ਖਾਤਧਾਤੁਯਾ. ਚਿਤ੍ਤਂ ਪਟਿਵਾਪੇਤ੍ਵਾਤਿ ਚਿਤ੍ਤਂ ਨਿਵਤ੍ਤਾਪੇਤ੍ਵਾ. ਏਤਂ ਸਨ੍ਤਨ੍ਤਿ ਏਤਂ ਨਿਬ੍ਬਾਨਂ. ਕਿਲੇਸਸਨ੍ਤਤਾਯ ਸਨ੍ਤਂ. ਅਤਪ੍ਪਕਟ੍ਠੇਨ ਪਣੀਤਂ.
ਨ ਪਣ੍ਡਿਤਾ ਉਪਧਿਸੁਖਸ੍ਸ ਹੇਤੂਤਿ ਦਬ੍ਬਜਾਤਿਕਾ ਕਾਮਸੁਖਸ੍ਸ ਕਾਰਣਾ ਦਾਨਾਨਿ ਨ ਦੇਨ੍ਤਿ. ਕਾਮਞ੍ਚ ਤੇ ਉਪਧਿਪਰਿਕ੍ਖਯਾਯਾਤਿ ਏਕਂਸੇਨ ਤੇ ਪਣ੍ਡਿਤਾ ਕਾਮਕ੍ਖਯਾਯ ਕਾਮਕ੍ਖੇਪਨਤ੍ਥਂ ਦਾਨਾਨਿ ਦੇਨ੍ਤਿ. ਅਪੁਨਬ੍ਭਵਾਯਾਤਿ ਨਿਬ੍ਬਾਨਤ੍ਥਾਯ. ਝਾਨਾਨਿ ਭਾਵੇਨ੍ਤੀਤਿ ਪਠਮਜ੍ਝਾਨਾਦੀਨਿ ਵਡ੍ਢੇਨ੍ਤਿ. ਪੁਨਬ੍ਭਵਾਯਾਤਿ ਪੁਨਬ੍ਭਵਕਾਰਣਾ. ਤੇ ਪਣ੍ਡਿਤਾ ਨਿਬ੍ਬਾਨਂ ਅਭਿਮੁਖਂ ਹੁਤ੍ਵਾ ਦਾਨਂ ਦਦਨ੍ਤਿ.
੧੭੮. ਸਾਹਸਾਤਿ ਰਤ੍ਤਸ੍ਸ ਰਾਗਚਰਿਤਾਦਿਭੇਦਾ ਸਾਹਸਾਕਾਰਣਾ. ਨਿਦ੍ਦੇਸੋ ਉਤ੍ਤਾਨਤ੍ਥੋਯੇਵ.
੧੭੯. ਪੁਰਾਣਂ ਨਾਭਿਨਨ੍ਦੇਯ੍ਯਾਤਿ ਅਤੀਤਂ ਰੂਪਾਦਿਂ ਨਾਭਿਨਨ੍ਦੇਯ੍ਯ. ਨਵੇਤਿ ਪਚ੍ਚੁਪ੍ਪਨ੍ਨੇ. ਹੀਯਮਾਨੇਤਿ ਵਿਨਸ੍ਸਮਾਨੇ. ਆਕਾਸਂ ਨ ਸਿਤੋ ਸਿਯਾਤਿ ਤਣ੍ਹਾਨਿਸ੍ਸਿਤੋ ਨ ਭਵੇਯ੍ਯ. ਤਣ੍ਹਾ ਹਿ ਰੂਪਾਦੀਨਂ ਆਕਾਸਨਤੋ ‘‘ਆਕਾਸੋ’’ਤਿ ਵੁਚ੍ਚਤਿ.
ਵੇਮਾਨੇਤਿ ਅਭਵਮਾਨੇ. ਵਿਗਚ੍ਛਮਾਨੇਤਿ ਅਪਗਚ੍ਛਮਾਨੇ.
‘‘ਆਕਾਸਤੀ’’ਤਿ ‘‘ਆਕਸ੍ਸਤੀ’’ਤਿ ਚ ਦੁਵਿਧੋ ਪਾਠੋ.
੧੮੦. ਕਿਂ ਕਾਰਣਾ ਆਕਾਸਂ ਨ ਸਿਤੋ ਸਿਯਾਤਿ ਚੇ? ਗੇਧਂ ਬ੍ਰੂਮੀਤਿ ਗਾਥਾ. ਤਸ੍ਸਤ੍ਥੋ – ਅਹਞ੍ਹਿ ਇਮਂ ਆਕਾਸਸਙ੍ਖਾਤਂ ਤਣ੍ਹਂ ਰੂਪਾਦੀਸੁ ਗਿਜ੍ਝਨਤੋ ਗੇਧਂ ਬ੍ਰੂਮਿ ‘‘ਗੇਧੋ’’ਤਿ ਵਦਾਮਿ. ਕਿਞ੍ਚ ਭਿਯ੍ਯੋ – ਅਵਹਨਨਟ੍ਠੇਨ ‘‘ਓਘੋ’’ਤਿ ਚ ਆਜਵਨਟ੍ਠੇਨ ‘‘ਆਜਵ’’ਨ੍ਤਿ ਚ ‘‘ਇਦਂ ਮਯ੍ਹਂ, ਇਦਂ ਮਯ੍ਹ’’ਨ੍ਤਿ ਜਪ੍ਪਕਾਰਣਤੋ ‘‘ਜਪ੍ਪਨ’’ਨ੍ਤਿ ਚ ਦੁਮ੍ਮੁਞ੍ਚਨਟ੍ਠੇਨ ‘‘ਆਰਮ੍ਮਣ’’ਨ੍ਤਿ ਚ ਕਮ੍ਪਕਰਣਟ੍ਠੇਨ ‘‘ਕਮ੍ਪਨ’’ਨ੍ਤਿ ਚ ਬ੍ਰੂਮਿ, ਏਸਾਵ ਲੋਕਸ੍ਸ ਪਲਿਬੋਧਟ੍ਠੇਨ ਦੁਰਤਿਕ੍ਕਮਨੀਯਟ੍ਠੇਨ ਚ ‘‘ਕਾਮਪਙ੍ਕੋ ਦੁਰਚ੍ਚਯੋ’’ਤਿ.
ਆਜਵਨ੍ਤਿ ਆਪਟਿਸਨ੍ਧਿਤੋ ਜਵਤਿ ਧਾਵਤੀਤਿ ਆਜਵਂ, ਵਟ੍ਟਮੂਲਤਾਯ ਪੁਨਬ੍ਭਵੇ ਪਟਿਸਨ੍ਧਿਦਾਨਤਣ੍ਹਾਯੇਤਂ ਅਧਿਵਚਨਂ. ਜਪ੍ਪਨਨ੍ਤਿ ਪਤ੍ਥਨਾ, ਤਣ੍ਹਾਯੇਤਂ ਅਧਿਵਚਨਂ. ਆਰਮ੍ਮਣਮ੍ਪਿ ਵੁਚ੍ਚਤਿ ਤਣ੍ਹਾਤਿ ਰੂਪਾਦੀਸੁ ਆਰਮ੍ਮਣੇਸੁ ਉਪ੍ਪਨ੍ਨਤਣ੍ਹਾ ਮੁਚ੍ਚਿਤੁਂ ਅਸਕ੍ਕੁਣੇਯ੍ਯਟ੍ਠੇਨ ਆਰਮ੍ਮਣਾਤਿ ਕਥੀਯਤਿ. ਕਾਮਪਙ੍ਕੋਤਿ ਓਸੀਦਨਟ੍ਠੇਨ ਕਲਲਂ. ਕਦ੍ਦਮੋਤਿ ਸਙ੍ਗਟ੍ਠੇਨ ਕਦ੍ਦਮੋ. ਤਾਪਨਟ੍ਠੇਨ ਕਿਲੇਸੋ. ਨਿਯ੍ਯਾਸਂ ਵਿਯ ਲਗ੍ਗਾਪਨਟ੍ਠੇਨ ਪਲਿਪੋ. ਰੁਨ੍ਧਿਤ੍ਵਾ ਧਾਰਣਟ੍ਠੇਨ ਪਲਿਰੋਧੋ. ਏਵਮੇਤਂ ਗੇਧਾਦਿਪਰਿਯਾਯਂ ਆਕਾਸਂ ਅਨਿਸ੍ਸਿਤੋ.
੧੮੧. ਸਚ੍ਚਾ ਅਵੋਕ੍ਕਮਨ੍ਤਿ ਗਾਥਾ. ਤਸ੍ਸਤ੍ਥੋ – ਪੁਬ੍ਬੇ ਵੁਤ੍ਤਾ ਤਿਵਿਧਾਪਿ ਸਚ੍ਚਾ ਅਵੋਕ੍ਕਮਂ ਮੋਨੇਯ੍ਯਪਤ੍ਤਿਯਾ ਮੁਨੀਤਿ ਸਙ੍ਖਂ ਗਤੋ ਨਿਬ੍ਬਾਨਥਲੇ ਤਿਟ੍ਠਤਿ ਬ੍ਰਾਹ੍ਮਣੋ, ਸ ਵੇਏਵਰੂਪੋ ਸਬ੍ਬਾਨਿ ਆਯਤਨਾਨਿ ਨਿਸ੍ਸਜ੍ਜਿਤ੍ਵਾ ‘‘ਸਨ੍ਤੋ’’ਤਿ ਵੁਚ੍ਚਤਿ. ਨਿਦ੍ਦੇਸੇ ਵਤ੍ਤਬ੍ਬਂ ਨਤ੍ਥਿ.
੧੮੨. ਕਿਞ੍ਚ ਭਿਯ੍ਯੋ – ਸ ਵੇ ਵਿਦ੍ਵਾਤਿ ਗਾਥਾ. ਤਤ੍ਥ ਞਤ੍ਵਾ ਧਮ੍ਮਨ੍ਤਿ ਅਨਿਚ੍ਚਾਦਿਨਯੇਨ ਸਙ੍ਖਤਧਮ੍ਮਂ ਅਞ੍ਞਾਯ. ਸਮ੍ਮਾ ਸੋ ਲੋਕੇ ਇਰਿਯਾਨੋਤਿ ਅਸਮ੍ਮਾਇਰਿਯਨਕਰਾਨਂ ਕਿਲੇਸਾਨਂ ਪਹਾਨਾ ਸਮ੍ਮਾ ਸੋ ਲੋਕੇ ਇਰਿਯਮਾਨੋ.
੧੮੩. ਏਵਂ ਅਪਿਹੇਨ੍ਤੋ ਚ – ਯੋਧ ਕਾਮੇਤਿ ਗਾਥਾ. ਤਤ੍ਥ ਸਙ੍ਗਨ੍ਤਿ ਸਤ੍ਤਵਿਧਂ ਸਙ੍ਗਂ ਯੋ ਅਚ੍ਚਤਰਿ. ਨਾਜ੍ਝੇਤੀਤਿ ਨ ਅਭਿਜ੍ਝਾਯਤਿ.
੧੮੪. ਤਸ੍ਮਾ ਤੁਮ੍ਹੇਸੁਪਿ ਯੋ ਏਵਰੂਪੋ ਹੋਤੁਂ ਇਚ੍ਛਤਿ, ਤਂ ਵਦਾਮਿ – ਯਂ ਪੁਬ੍ਬੇਤਿ ਗਾਥਾ. ਤਤ੍ਥ ਯਂ ਪੁਬ੍ਬੇਤਿ ਅਤੀਤੇ ਸਙ੍ਖਾਰੇ ਆਰਬ੍ਭ ਉਪ੍ਪਜ੍ਜਨਧਮ੍ਮਂ ਕਿਲੇਸਜਾਤਂ ਅਤੀਤਂ ਕਮ੍ਮਞ੍ਚ. ਪਚ੍ਛਾ ਤੇ ਮਾਹੁ ਕਿਞ੍ਚਨਨ੍ਤਿ ਅਨਾਗਤੇਪਿ ਸਙ੍ਖਾਰੇ ਆਰਬ੍ਭ ਉਪ੍ਪਜ੍ਜਨਧਮ੍ਮਂ ਰਾਗਾਦਿਕਿਞ੍ਚਨਂ ਮਾ ਅਹੁ. ਮਜ੍ਝੇ ਚੇ ਨੋ ਗਹੇਸ੍ਸਸੀਤਿ ਪਚ੍ਚੁਪ੍ਪਨ੍ਨਰੂਪਾਦਿਧਮ੍ਮੇਪਿ ਨ ਗਹੇਸ੍ਸਸਿ ਚੇ. ਏਵਂ ਉਪਸਨ੍ਤੋ ਚਰਿਸ੍ਸਸਿ.
ਅਬੀਜਂ ਕਰੋਹੀਤਿ ਮਗ੍ਗਞਾਣੇਨ ਨ ਬੀਜਂ ਕਰੋਹਿ. ਰਾਗਕਿਞ੍ਚਨਨ੍ਤਿ ਰਾਗਫਨ੍ਦਨਂ. ਦੋਸਕਿਞ੍ਚਨਾਦੀਸੁਪਿ ਏਸੇਵ ਨਯੋ.
੧੮੫. ਏਵਂ ਅਰਹਤ੍ਤਪ੍ਪਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਅਰਹਤੋ ਥੁਤਿਵਸੇਨ ਇਤੋ ਪਰਾ ਗਾਥਾਯੋ ਅਭਾਸਿ. ਤਤ੍ਥ ਸਬ੍ਬਸੋਤਿ ਗਾਥਾਯ ਮਮਾਯਿਤਨ੍ਤਿ ਮਮਤ੍ਤਕਰਣਂ. ‘‘ਮਮ ਇਦ’’ਨ੍ਤਿ ਗਹਿਤਂ ਵਾ ਵਤ੍ਥੁ. ਅਸਤਾ ਚ ਨ ਸੋਚਤੀਤਿ ਅਵਿਜ੍ਜਮਾਨਕਾਰਣਾ ਅਸਨ੍ਤਕਾਰਣਾ ਨ ਸੋਚਤਿ. ਨ ਜੀਯਤੀਤਿ ਜਾਨਿਂ ਨਾਧਿਗਚ੍ਛਤਿ.
ਅਹੁ ਵਤ ਮੇਤਿ ਮਯ੍ਹਂ ਅਹੋਸਿ ਵਤ. ਤਂ ਵਤ ਮੇ ਨਤ੍ਥੀਤਿ ਯਂ ਅਤੀਤੇ ਅਹੋਸਿ, ਤਂ ਮਯ੍ਹਂ ਇਦਾਨਿ ਨ ਸਨ੍ਤਿ. ਸਿਯਾ ਵਤ ਮੇਤਿ ਯਂ ਮਯ੍ਹਂ ਭਵਿਸ੍ਸਤਿ, ਤਂ ਵਤਾਹਂ ਨ ਲਭਾਮੀਤਿ ਇਦਾਨਿ ਅਹਂ ਏਕਂਸੇਨ ਨ ਪਾਪੁਣਾਮਿ.
੧੮੬. ਕਿਞ੍ਚ ਭਿਯ੍ਯੋ – ਯਸ੍ਸ ਨਤ੍ਥੀਤਿ ਗਾਥਾ. ਤਤ੍ਥ ਕਿਞ੍ਚਨਨ੍ਤਿ ਕਿਞ੍ਚਿ ਰੂਪਾਦਿਧਮ੍ਮਜਾਤਂ.
ਅਭਿਸਙ੍ਖਤਨ੍ਤਿ ਕਮ੍ਮੇਨ ਸਙ੍ਖਰਿਤਂ. ਅਭਿਸਞ੍ਚੇਤਯਿਤਨ੍ਤਿ ਚਿਤ੍ਤੇਨ ਰਾਸਿਕਤਂ. ਅਵਿਜ੍ਜਾਯ ਤ੍ਵੇਵਾਤਿ ਅਵਿਜ੍ਜਾਯ ਤੁ ਏਵ. ਅਸੇਸਵਿਰਾਗਨਿਰੋਧਾਤਿ ਵਿਰਾਗਸਙ੍ਖਾਤੇਨ ਮਗ੍ਗੇਨ ਨਿਰਵਸੇਸਨਿਰੋਧਾ.
ਸੁਞ੍ਞਤੋ ਲੋਕਂ ਅਵੇਕ੍ਖਸ੍ਸੂਤਿ ਅਵਸਵਤ੍ਤਿਸਲ੍ਲਕ੍ਖਣਵਸੇਨ ਵਾ ਤੁਚ੍ਛਸਙ੍ਖਾਰਸਮਨੁਪਸ੍ਸਨਵਸੇਨ ਵਾਤਿ ਦ੍ਵੀਹਾਕਾਰੇਹਿ ਸੁਞ੍ਞਤੋ ਲੋਕਂ ਪਸ੍ਸ. ਅਤ੍ਤਾਨੁਦਿਟ੍ਠਿਂ ਊਹਚ੍ਚਾਤਿ ਸਕ੍ਕਾਯਦਿਟ੍ਠਿਂ ਉਦ੍ਧਰਿਤ੍ਵਾ. ਏਵਂ ਮਚ੍ਚੁਤਰੋ ਸਿਯਾਤਿ ਏਵਂ ਮਰਣਸ੍ਸ ਤਰਣੋ ਭਵੇਯ੍ਯ. ਏਵਂ ਲੋਕਂ ਅਵੇਕ੍ਖਨ੍ਤਨ੍ਤਿ ਏਵਂ ਖਨ੍ਧਲੋਕਂ ਪਸ੍ਸਨ੍ਤਂ. ਮਚ੍ਚੁਰਾਜਾ ਨ ਪਸ੍ਸਤੀਤਿ ਮਰਣਰਾਜਾ ਨ ਓਲੋਕੇਤਿ ਨ ਦਕ੍ਖਤਿ.
ਨਾਞ੍ਞਂ ਪਤ੍ਥਯਤੇ ਕਿਞ੍ਚੀਤਿ ਅਞ੍ਞਂ ਅਪ੍ਪਮਤ੍ਤਕਮ੍ਪਿ ਨ ਪਤ੍ਥਯਤਿ ਨ ਪਿਹਯਤਿ. ਅਞ੍ਞਤ੍ਰ ਅਪ੍ਪਟਿਸਨ੍ਧਿਯਾਤਿ ਨਿਬ੍ਬਾਨਂ ਠਪੇਤ੍ਵਾ. ‘‘ਅਞ੍ਞਤ੍ਰਪ੍ਪਟਿਸਨ੍ਧਿਯਾ’’ਤਿ ਏਕਪਦਂ ਕਤ੍ਵਾਪਿ ਪਠਨ੍ਤਿ.
੧੮੭. ਕਿਞ੍ਚ ਭਿਯ੍ਯੋ – ਅਨਿਟ੍ਠੁਰੀਤਿ ਗਾਥਾ. ਤਤ੍ਥ ਅਨਿਟ੍ਠੁਰੀਤਿ ਅਨਿਸ੍ਸੁਕੀ. ‘‘ਅਨਿਟ੍ਠਰੀ’’ਤਿਪਿ ਕੇਚਿ ਪਠਨ੍ਤਿ. ਸਬ੍ਬਧੀ ਸਮੋਤਿ ਸਬ੍ਬਤ੍ਥ ਸਮੋ, ਉਪੇਕ੍ਖਕੋਤਿ ਅਧਿਪ੍ਪਾਯੋ. ਕਿਂ ਵੁਤ੍ਤਂ ਹੋਤਿ? ਯੋ ਸੋ ‘‘ਨਤ੍ਥਿ ਮੇ’’ਤਿ ਨ ਸੋਚਤਿ, ਤਮਹਂ ਅਵਿਕਮ੍ਪਿਨਂ ਪੁਗ੍ਗਲਂ ਪੁਟ੍ਠੋ ਸਮਾਨੋ ਅਨਿਟ੍ਠੁਰੀ ਅਨਨੁਗਿਦ੍ਧੋ, ਅਨੇਜੋ ਸਬ੍ਬਧੀ ਸਮੋਤਿ ਇਮਂ ਤਸ੍ਮਿਂ ਪੁਗ੍ਗਲੇ ਚਤੁਬ੍ਬਿਧਂ ਆਨਿਸਂਸਂ ਬ੍ਰੂਮੀਤਿ.
ਨਿਟ੍ਠੁਰਿਯੋਤਿ ਇਸ੍ਸੁਕੀ. ਨਿਟ੍ਠੁਰਭਾਵੋ ਨਿਟ੍ਠੁਰਿਯਂ, ਤਂ ਨਿਸ੍ਸਾਯ ਏਤ੍ਤਕਮ੍ਪਿ ਨਤ੍ਥੀਤਿ ਖੇਲ਼ਪਾਤਨ੍ਤਿ ਅਤ੍ਥੋ. ਨਿਟ੍ਠੁਰਿਯਕਮ੍ਮਨ੍ਤਿ ਨਿਟ੍ਠੁਰਿਯਕਰਣਂ. ਗਹਟ੍ਠੋ ਵਾ ਹਿ ਗਹਟ੍ਠਂ ਭਿਕ੍ਖੁ ਵਾ ਭਿਕ੍ਖੁਂ ਨਿਸ੍ਸਾਯ ਵਸਨ੍ਤੋ ਅਪ੍ਪਮਤ੍ਤਕੇਨੇਵ ਕੁਜ੍ਝਿਤ੍ਵਾ ਤਂ ਨਿਸ੍ਸਾਯ ਏਤ੍ਤਕਮ੍ਪਿ ਨਤ੍ਥੀਤਿ ਖੇਲ਼ਂ ਪਾਤੇਤ੍ਵਾ ਪਾਦੇਨ ਮਦ੍ਦਨ੍ਤੋ ਵਿਯ ਨਿਟ੍ਠੁਰਿਯਂ ਨਾਮ ਕਰੋਤਿ. ਤਸ੍ਸ ਤਂ ਕਮ੍ਮਂ ‘‘ਨਿਟ੍ਠੁਰਿਯਕਮ੍ਮ’’ਨ੍ਤਿ ਵੁਚ੍ਚਤਿ. ਇਸ੍ਸਾਤਿ ਸਭਾਵਨਿਦ੍ਦੇਸੋ. ਤਤੋ ਪਰਾ ਦ੍ਵੇ ਆਕਾਰਭਾਵਨਿਦ੍ਦੇਸਾ. ਇਤਰਤ੍ਤਯਂ ਪਰਿਯਾਯਵਚਨਂ. ਲਕ੍ਖਣਾਦਿਤੋ ਪਨੇਸਾ ਪਰਸਮ੍ਪਤ੍ਤੀਨਂ ਉਸੂਯਨਲਕ੍ਖਣਾ ਇਸ੍ਸਾ; ਤਤ੍ਥ ਚ ਅਨਭਿਰਤਿਰਸਾ; ਤਤੋ ਵਿਮੁਖਭਾਵਪਚ੍ਚੁਪਟ੍ਠਾਨਾ; ਪਰਸਮ੍ਪਤ੍ਤਿਪਦਟ੍ਠਾਨਾ.
ਲਾਭੇਪਿ ਨ ਇਞ੍ਜਤੀਤਿ ਪਚ੍ਚਯਲਾਭੇ ਨ ਚਲਤਿ. ਅਲਾਭੇਪੀਤਿ ਪਚ੍ਚਯਾਨਂ ਅਲਾਭੇਪਿ.
੧੮੮. ਕਿਞ੍ਚ ਭਿਯ੍ਯੋ – ਅਨੇਜਸ੍ਸਾਤਿ ਗਾਥਾ. ਤਤ੍ਥ ਨਿਸਙ੍ਖਤੀਤਿ ਪੁਞ੍ਞਾਭਿਸਙ੍ਖਾਰਾਦੀਸੁ ਯੋ ਕੋਚਿ ਸਙ੍ਖਾਰੋ. ਸੋ ਹਿ ਯਸ੍ਮਾ ਨਿਸਙ੍ਖਰਿਯਤਿ, ਨਿਸਙ੍ਖਰੋਤਿ ਵਾ, ਤਸ੍ਮਾ ‘‘ਨਿਸਙ੍ਖਤੀ’’ਤਿ ਵੁਚ੍ਚਤਿ. ਵਿਯਾਰਮ੍ਭਾਤਿ ਵਿਵਿਧਾ ਪੁਞ੍ਞਾਭਿਸਙ੍ਖਾਰਾਦਿਕਾ ਆਰਮ੍ਭਾ. ਖੇਮਂ ਪਸ੍ਸਤਿ ਸਬ੍ਬਧੀਤਿ ਸਬ੍ਬਤ੍ਥ ਅਭਯਮੇਵ ਪਸ੍ਸਤਿ.
ਆਰਮ੍ਭਾਤਿ ਕਮ੍ਮਾਨਂ ਪਠਮਾਰਮ੍ਭਾ. ਵਿਯਾਰਮ੍ਭਾਤਿ ਉਪਰੂਪਰਿ ਵਿਵਿਧਆਰਮ੍ਭਨਵਸੇਨ ਵੀਰਿਯਾਰਮ੍ਭਾ. ਤੀਸੁ ਭਵੇਸੁ ਪਟਿਸਨ੍ਧਿਜਨਕਕਮ੍ਮਾਨਂ ਏਤਂ ਅਧਿਵਚਨਂ. ਤਸ੍ਮਾ ਵਿਯਾਰਮ੍ਭਾ ਆਰਤੋ.
੧੮੯. ਏਵਂ ਪਸ੍ਸਨ੍ਤੋ ਨ ਸਮੇਸੂਤਿ ਗਾਥਾ. ਤਤ੍ਥ ਨ ਵਦਤੇਤਿ ‘‘ਸਦਿਸੋਹਮਸ੍ਮੀ’’ਤਿਆਦਿਨਾ ਮਾਨਵਸੇਨ ਸਮੇਸੁਪਿ ਅਤ੍ਤਾਨਂ ਨ ਵਦਤਿ ਓਮੇਸੁਪਿ ਉਸ੍ਸੇਸੁਪਿ. ਨਾਦੇਤਿ ਨ ਨਿਰਸ੍ਸਤੀਤਿ ਰੂਪਾਦੀਸੁ ਕਞ੍ਚਿ ਧਮ੍ਮਂ ਨ ਗਣ੍ਹਾਤਿ ਨ ਨਿਸ੍ਸਜ੍ਜਤਿ. ਸੇਸਂ ਸਬ੍ਬਤ੍ਥ ਤਤ੍ਥ ਤਤ੍ਥ ਵੁਤ੍ਤਨਯਤ੍ਤਾ ਪਾਕਟਮੇਵ. ਏਵਂ ਅਰਹਤ੍ਤਨਿਕੂਟੇਨੇਵ ਦੇਸਨਂ ਨਿਟ੍ਠਾਪੇਸੀਤਿ.
ਸਦ੍ਧਮ੍ਮਪ੍ਪਜ੍ਜੋਤਿਕਾਯ ਮਹਾਨਿਦ੍ਦੇਸਟ੍ਠਕਥਾਯ
ਅਤ੍ਤਦਣ੍ਡਸੁਤ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.