੧੪. ਤੁਵਟਕਸੁਤ੍ਤਨਿਦ੍ਦੇਸਵਣ੍ਣਨਾ
੧੫੦. ਚੁਦ੍ਦਸਮੇ ਤੁਵਟਕਸੁਤ੍ਤਨਿਦ੍ਦੇਸੇ ਪੁਚ੍ਛਾਮਿ ਤਨ੍ਤਿ ਇਦਮ੍ਪਿ ਤਸ੍ਮਿਂਯੇਵ ਮਹਾਸਮਯੇ ‘‘ਕਾ ਨੁ ਖੋ ਅਰਹਤ੍ਤਪ੍ਪਤ੍ਤਿਯਾ ਪਟਿਪਤ੍ਤੀ’’ਤਿ ਉਪ੍ਪਨ੍ਨਚਿਤ੍ਤਾਨਂ ਏਕਚ੍ਚਾਨਂ ਦੇਵਤਾਨਂ ਤਮਤ੍ਥਂ ਪਕਾਸੇਤੁਂ ਪੁਰਿਮਨਯੇਨੇਵ ਨਿਮ੍ਮਿਤਬੁਦ੍ਧੇਨ ਅਤ੍ਤਾਨਂ ਪੁਚ੍ਛਾਪੇਤ੍ਵਾ ਵੁਤ੍ਤਂ.
ਤਤ੍ਥ ਆਦਿਪੁਚ੍ਛਾਗਾਥਾਯ ਤਾਵ ਪੁਚ੍ਛਾਮੀਤਿ ਏਤ੍ਥ ਅਦਿਟ੍ਠਜੋਤਨਾਦਿਵਸੇਨ ਪੁਚ੍ਛਾ ਵਿਭਜਿਤਾ. ਆਦਿਚ੍ਚਬਨ੍ਧੂਤਿ ਆਦਿਚ੍ਚਸ੍ਸ ਗੋਤ੍ਤਬਨ੍ਧੁ. ਵਿਵੇਕਂ ਸਨ੍ਤਿਪਦਞ੍ਚਾਤਿ ਵਿਵੇਕਞ੍ਚ ਸਨ੍ਤਿਪਦਞ੍ਚ. ਕਥਂ ਦਿਸ੍ਵਾਤਿ ਕੇਨ ਕਾਰਣੇਨ ਦਿਸ੍ਵਾ, ਕਥਂ ਪਵਤ੍ਤਦਸ੍ਸਨੋ ਹੁਤ੍ਵਾਤਿ ਵੁਤ੍ਤਂ ਹੋਤਿ.
ਤਿਸ੍ਸੋ ਪੁਚ੍ਛਾਤਿ ਗਣਨਪਰਿਚ੍ਛੇਦੋ. ਅਦਿਟ੍ਠਜੋਤਨਾਤਿ ਯਂ ਨ ਦਿਟ੍ਠਂ ਨ ਪਟਿਵਿਦ੍ਧਂ, ਤਸ੍ਸ ਪਾਕਟਕਰਣਤ੍ਥਾਯ ਪੁਚ੍ਛਾ. ਦਿਟ੍ਠਸਂਸਨ੍ਦਨਾਤਿ ਯਂ ਞਾਣਚਕ੍ਖੁਨਾ ਦਿਟ੍ਠਂ, ਤਸ੍ਸ ਘਟਨਤ੍ਥਾਯ. ਵਿਮਤਿਚ੍ਛੇਦਨਾਤਿ ਯਾ ਕਙ੍ਖਾ, ਤਸ੍ਸਾਚ੍ਛੇਦਨਤ੍ਥਂ. ਪਕਤਿਯਾ ਲਕ੍ਖਣਂ ਅਞ੍ਞਾਤਨ੍ਤਿ ਧਮ੍ਮਾਨਂ ਤਥਲਕ੍ਖਣਂ ਪਕਤਿਯਾ ਨ ਞਾਤਂ. ਅਦਿਟ੍ਠਨ੍ਤਿ ਨ ਦਿਟ੍ਠਂ. ‘‘ਨ ਨਿਟ੍ਠ’’ਨ੍ਤਿਪਿ ਪਾਠੋ. ਅਤੁਲਿਤਨ੍ਤਿ ਤੁਲਾਯ ਤੁਲਿਤਂ ਵਿਯ ਨ ਤੁਲਿਤਂ. ਅਤੀਰਿਤਨ੍ਤਿ ਤੀਰਣਾਯ ਨ ਤੀਰਿਤਂ. ਅਵਿਭੂਤਨ੍ਤਿ ਨ ਪਾਕਟਂ. ਅਵਿਭਾਵਿਤਨ੍ਤਿ ਪਞ੍ਞਾਯ ਨ ਵਡ੍ਢਿਤਂ. ਤਸ੍ਸ ਞਾਣਾਯਾਤਿ ਤਸ੍ਸ ਧਮ੍ਮਸ੍ਸ ਲਕ੍ਖਣਜਾਨਨਤ੍ਥਾਯ. ਦਸ੍ਸਨਾਯਾਤਿ ਦਸ੍ਸਨਤ੍ਥਾਯ. ਤੁਲਨਾਯਾਤਿ ਤੁਲਨਤ੍ਥਾਯ. ਤੀਰਣਾਯਾਤਿ ਤੀਰਣਤ੍ਥਾਯ. ਵਿਭਾਵਨਾਯਾਤਿ ਵਿਭਾਗਕਰਣਤ੍ਥਾਯ. ਅਞ੍ਞੇਹਿ ਪਣ੍ਡਿਤੇਹੀਤਿ ਅਞ੍ਞੇਹਿ ਬੁਦ੍ਧਿਸਮ੍ਪਨ੍ਨੇਹਿ. ਸਂਸਯਪਕ੍ਖਨ੍ਦੋਤਿ ਸਨ੍ਦੇਹਂ ਪਵਿਟ੍ਠੋ.
ਮਨੁਸ੍ਸਪੁਚ੍ਛਾਤਿ ਮਨੁਸ੍ਸਾਨਂ ਪੁਚ੍ਛਾ. ਅਮਨੁਸ੍ਸਪੁਚ੍ਛਾਤਿ ਨਾਗਸੁਪਣ੍ਣਾਦੀਨਂ ਪੁਚ੍ਛਾ. ਗਹਟ੍ਠਾਤਿ ਅਵਸੇਸਗਹਟ੍ਠਾ. ਪਬ੍ਬਜਿਤਾਤਿ ਲਿਙ੍ਗਵਸੇਨ ਵੁਤ੍ਤਾ. ਨਾਗਾਤਿ ਸੁਫਸ੍ਸਾਦਯੋ ਨਾਗਾ. ਸੁਪਣ੍ਣਾਤਿ ਸੁਪਣ੍ਣਸਂਯੁਤ੍ਤਵਸੇਨ (ਸਂ. ਨਿ. ੩.੩੯੨ ਆਦਯੋ). ਯਕ੍ਖਾਤਿ ਯਕ੍ਖਸਂਯੁਤ੍ਤਵਸੇਨ (ਸਂ. ਨਿ. ੧੦.੨੩੫ ਆਦਯੋ) ਚ ਵੇਦਿਤਬ੍ਬਾ. ਅਸੁਰਾਤਿ ਪਹਾਰਾਦਾਦਯੋ. ਗਨ੍ਧਬ੍ਬਾਤਿ ਪਞ੍ਚਸਿਖਗਨ੍ਧਬ੍ਬਪੁਤ੍ਤਾਦਯੋ. ਮਹਾਰਾਜਾਨੋਤਿ ਚਤ੍ਤਾਰੋ ਮਹਾਰਾਜਾਨੋ. ਅਹੀਨਿਨ੍ਦ੍ਰਿਯਨ੍ਤਿ ਸਣ੍ਠਾਨਵਸੇਨ ਅਵਿਕਲਿਨ੍ਦ੍ਰਿਯਂ. ਸੋ ਨਿਮ੍ਮਿਤੋਤਿ ਸੋ ਭਗਵਤਾ ਨਿਮ੍ਮਿਤੋ ਬੁਦ੍ਧੋ.
ਵੋਦਾਨਤ੍ਥਪੁਚ੍ਛਾਤਿ ਵਿਸੇਸਧਮ੍ਮਪੁਚ੍ਛਾ. ਅਤੀਤਪੁਚ੍ਛਾਤਿ ਅਤੀਤੇ ਧਮ੍ਮੇ ਆਰਬ੍ਭ ਪੁਚ੍ਛਾ. ਅਨਾਗਤਾਦੀਸੁਪਿ ਏਸੇਵ ਨਯੋ. ਕੁਸਲਪੁਚ੍ਛਾਤਿ ਅਨਵਜ੍ਜਧਮ੍ਮਪੁਚ੍ਛਾ. ਅਕੁਸਲਪੁਚ੍ਛਾਤਿ ਸਾਵਜ੍ਜਧਮ੍ਮਪੁਚ੍ਛਾ. ਅਬ੍ਯਾਕਤਪੁਚ੍ਛਾਤਿ ਤਦੁਭਯਵਿਪਰੀਤਧਮ੍ਮਪੁਚ੍ਛਾ.
ਅਜ੍ਝੇਸਾਮਿ ਤਨ੍ਤਿ ਤਂ ਆਣਾਪੇਮਿ. ਕਥਯਸ੍ਸੁ ਮੇਤਿ ਮਯ੍ਹਂ ਕਥੇਹਿ. ਗੋਤ੍ਤਞਾਤਕੋਤਿ ਗੋਤ੍ਤੇਨ ਞਾਤਕੋ. ਗੋਤ੍ਤਬਨ੍ਧੂਤਿ ਗੋਤ੍ਤਜ੍ਝਤ੍ਤਿਕੋ. ਏਕੇਨਾਕਾਰੇਨਾਤਿ ਏਕੇਨ ਕੋਟ੍ਠਾਸੇਨ.
ਸਨ੍ਤਿਪਦਨ੍ਤਿ ਸਨ੍ਤਿਸਙ੍ਖਾਤਂ ਨਿਬ੍ਬਾਨਪਦਂ. ਯੇ ਧਮ੍ਮਾ ਸਨ੍ਤਾਧਿਗਮਾਯਾਤਿ ਯੇ ਸਤਿਪਟ੍ਠਾਨਾਦਯੋ ਧਮ੍ਮਾ ਨਿਬ੍ਬਾਨਪਟਿਲਾਭਤ੍ਥਾਯ. ਸਨ੍ਤਿਫੁਸਨਾਯਾਤਿ ਞਾਣਫਸ੍ਸੇਨ ਨਿਬ੍ਬਾਨਫੁਸਨਤ੍ਥਾਯ. ਸਚ੍ਛਿਕਿਰਿਯਾਯਾਤਿ ਪਚ੍ਚਕ੍ਖਕਰਣਤ੍ਥਾਯ. ਮਹਨ੍ਤਂ ਸੀਲਕ੍ਖਨ੍ਧਨ੍ਤਿ ਮਹਨ੍ਤਂ ਸੀਲਰਾਸਿਂ. ਸਮਾਧਿਕ੍ਖਨ੍ਧਾਦੀਸੁਪਿ ਏਸੇਵ ਨਯੋ. ਸੀਲਕ੍ਖਨ੍ਧਾਦਯੋ ਲੋਕਿਯਲੋਕੁਤ੍ਤਰਾ, ਵਿਮੁਤ੍ਤਿਞਾਣਦਸ੍ਸਨਂ ਲੋਕਿਯਮੇਵ.
ਤਮੋਕਾਯਸ੍ਸ ਪਦਾਲਨਨ੍ਤਿ ਅਵਿਜ੍ਜਾਰਾਸਿਸ੍ਸ ਵਿਦ੍ਧਂਸਨਂ. ਵਿਪਲ੍ਲਾਸਸ੍ਸ ਭੇਦਨਨ੍ਤਿ ਚਤੁਬ੍ਬਿਧਵਿਪਲ੍ਲਾਸਸ੍ਸ ਭੇਦਨਂ. ਤਣ੍ਹਾਸਲ੍ਲਸ੍ਸ ਅਬ੍ਬੁਹਨਨ੍ਤਿ ਤਣ੍ਹਾਕਣ੍ਟਕਸ੍ਸ ਲੁਞ੍ਚਨਂ. ਅਭਿਸਙ੍ਖਾਰਸ੍ਸ ਵੂਪਸਮਨ੍ਤਿ ਪੁਞ੍ਞਾਦਿਅਭਿਸਙ੍ਖਾਰਸ੍ਸ ਨਿਬ੍ਬਾਪਨਂ. ਭਾਰਸ੍ਸ ਨਿਕ੍ਖੇਪਨਨ੍ਤਿ ਪਞ੍ਚਕ੍ਖਨ੍ਧਭਾਰਸ੍ਸ ਠਪਨਂ. ਸਂਸਾਰਵਟ੍ਟਸ੍ਸ ਉਪਚ੍ਛੇਦਨਨ੍ਤਿ ਸਂਸਾਰਪਵਤ੍ਤਸ੍ਸ ਛੇਦਨਂ. ਸਨ੍ਤਾਪਸ੍ਸ ਨਿਬ੍ਬਾਪਨਨ੍ਤਿ ਕਿਲੇਸਸਨ੍ਤਾਪਸ੍ਸ ਨਿਬ੍ਬੁਤਿ. ਪਰਿਲ਼ਾਹਸ੍ਸ ਪਟਿਪਸ੍ਸਦ੍ਧਿਨ੍ਤਿ ਕਿਲੇਸਦਰਥਸ੍ਸ ਸਨ੍ਨਿਸੀਦਨਂ. ਦੇਵਦੇਵੋਤਿ ਦੇਵਾਨਂ ਅਤਿਦੇਵੋ.
੧੫੧. ਅਥ ਭਗਵਾ ਯਸ੍ਮਾ ਯਥਾ ਪਸ੍ਸਨ੍ਤੋ ਕਿਲੇਸੇ ਉਪਰੁਨ੍ਧਤਿ, ਤਥਾ ਦਿਸ੍ਵਾ ਤਥਾ ਪਵਤ੍ਤਦਸ੍ਸਨੋ ਹੁਤ੍ਵਾ ਪਰਿਨਿਬ੍ਬਾਤਿ, ਤਸ੍ਮਾ ਤਮਤ੍ਥਂ ਆਵਿਕਰੋਨ੍ਤੋ ਨਾਨਪ੍ਪਕਾਰੇਨ ਤਂ ਦੇਵਪਰਿਸਂ ਕਿਲੇਸਪ੍ਪਹਾਨੇ ਨਿਯੋਜੇਨ੍ਤੋ ‘‘ਮੂਲਂ ਪਪਞ੍ਚਸਙ੍ਖਾਯਾ’’ਤਿ ਆਰਭਿਤ੍ਵਾ ਪਞ੍ਚ ਗਾਥਾ ਅਭਾਸਿ.
ਤਤ੍ਥ ਆਦਿਗਾਥਾਯ ਤਾਵ ਸਙ੍ਖੇਪਤ੍ਥੋ – ਪਪਞ੍ਚਸਙ੍ਖਾਤਿ ਪਪਞ੍ਚਾਤਿ ਸਙ੍ਖਾਤਤ੍ਤਾ ਪਪਞ੍ਚਾ ਏਵ ਪਪਞ੍ਚਸਙ੍ਖਾ. ਤਸ੍ਸਾ ਅਵਿਜ੍ਜਾਦਯੋ ਕਿਲੇਸਾ ਮੂਲਂ, ਤਂ ਪਪਞ੍ਚਸਙ੍ਖਾਯ ਮੂਲਂ ਅਸ੍ਮੀਤਿ ਪਵਤ੍ਤਮਾਨਞ੍ਚ ਸਬ੍ਬਂ ਮਨ੍ਤਾਯ ਉਪਰੁਨ੍ਧੇ. ਯਾ ਕਾਚਿ ਅਜ੍ਝਤ੍ਤਂ ਤਣ੍ਹਾ ਉਪ੍ਪਜ੍ਜੇਯ੍ਯੁਂ. ਤਾਸਂ ਵਿਨਯਾਯ ਪਹਾਨਾਯ ਸਦਾ ਸਤੋ ਸਿਕ੍ਖੇ ਉਪਟ੍ਠਿਤਸ੍ਸਤਿ ਹੁਤ੍ਵਾ ਸਿਕ੍ਖੇਯ੍ਯਾਤਿ.
ਅਜ੍ਝਤ੍ਤਸਮੁਟ੍ਠਾਨਾ ਵਾਤਿ ਚਿਤ੍ਤੇ ਉਪ੍ਪਨ੍ਨਾ ਵਾ. ਪੁਰੇਭਤ੍ਤਨ੍ਤਿ ਦਿਵਾਭਤ੍ਤਤੋ ਪੁਰੇਕਾਲਂ. ਅਚ੍ਚਨ੍ਤਸਂਯੋਗਤ੍ਥੇ ਉਪਯੋਗਵਚਨਂ, ਅਤ੍ਥਤੋ ਪਨ ਭੁਮ੍ਮਮੇਵ ਪੁਰੇਭਤ੍ਤੇਤਿ, ਏਸ ਨਯੋ ਪਚ੍ਛਾਭਤ੍ਤਾਦੀਸੁ. ਪਚ੍ਛਾਭਤ੍ਤਨ੍ਤਿ ਦਿਵਾਭਤ੍ਤਤੋ ਪਚ੍ਛਾਕਾਲਂ. ਪੁਰਿਮਂ ਯਾਮਨ੍ਤਿ ਰਤ੍ਤਿਯਾ ਪਠਮਕੋਟ੍ਠਾਸਂ. ਮਜ੍ਝਿਮਂ ਯਾਮਨ੍ਤਿ ਰਤ੍ਤਿਯਾ ਦੁਤਿਯਕੋਟ੍ਠਾਸਂ. ਪਚ੍ਛਿਮਂ ਯਾਮਨ੍ਤਿ ਰਤ੍ਤਿਯਾ ਤਤਿਯਕੋਟ੍ਠਾਸਂ. ਕਾਲ਼ੇਤਿ ਕਾਲ਼ਪਕ੍ਖੇ. ਜੁਣ੍ਹੇਤਿ ਸੁਕ੍ਕਪਕ੍ਖੇ. ਵਸ੍ਸੇਤਿ ਚਤ੍ਤਾਰੋ ਵਸ੍ਸਾਨਮਾਸੇ. ਹੇਮਨ੍ਤੇਤਿ ਚਤ੍ਤਾਰੋ ਹੇਮਨ੍ਤਮਾਸੇ. ਗਿਮ੍ਹੇਤਿ ਚਤ੍ਤਾਰੋ ਗਿਮ੍ਹਾਨਮਾਸੇ. ਪੁਰਿਮੇ ਵਯੋਖਨ੍ਧੇਤਿ ਪਠਮੇ ਵਯੋਕੋਟ੍ਠਾਸੇ, ਪਠਮਵਯੇਤਿ ਅਤ੍ਥੋ. ਤੀਸੁ ਚ ਵਯੇਸੁ ਵਸ੍ਸਸਤਾਯੁਕਸ੍ਸ ਪੁਰਿਸਸ੍ਸ ਏਕੇਕਸ੍ਮਿਂ ਵਯੇ ਚਤੁਮਾਸਾਧਿਕਾਨਿ ਤੇਤ੍ਤਿਂਸ ਵਸ੍ਸਾਨਿ ਹੋਨ੍ਤਿ.
੧੫੨. ਏਵਂ ਪਠਮਗਾਥਾਯ ਤਾਵ ਤੀਹਿ ਸਿਕ੍ਖਾਹਿ ਯੁਤ੍ਤਂ ਦੇਸਨਂ ਅਰਹਤ੍ਤਨਿਕੂਟੇਨ ਦੇਸੇਤ੍ਵਾ ਪੁਨ ਮਾਨਪ੍ਪਹਾਨਵਸੇਨ ਦੇਸੇਤੁਂ ‘‘ਯਂ ਕਿਞ੍ਚੀ’’ਤਿ ਗਾਥਮਾਹ. ਤਤ੍ਥ ਯਂ ਕਿਞ੍ਚਿ ਧਮ੍ਮਮਭਿਜਞ੍ਞਾ ਅਜ੍ਝਤ੍ਤਨ੍ਤਿ ਯਂ ਕਿਞ੍ਚਿ ਉਚ੍ਚਾਕੁਲੀਨਤਾਦਿਕਂ ਅਤ੍ਤਨੋ ਗੁਣਂ ਜਾਨੇਯ੍ਯ. ਅਥ ਵਾਪਿ ਬਹਿਦ੍ਧਾਤਿ ਅਥ ਵਾ ਬਹਿਦ੍ਧਾਪਿ ਆਚਰਿਯੁਪਜ੍ਝਾਯਾਨਂ ਵਾ ਗੁਣਂ ਜਾਨੇਯ੍ਯ. ਨ ਤੇਨ ਥਾਮਂ ਕੁਬ੍ਬੇਥਾਤਿ ਤੇਨ ਗੁਣੇਨ ਮਾਨਂ ਨ ਕਰੇਯ੍ਯ.
ਸਤਾਨਨ੍ਤਿ ਸਨ੍ਤਗੁਣਵਨ੍ਤਾਨਂ. ਸਨ੍ਤਾਨਨ੍ਤਿ ਨਿਬ੍ਬੁਤਸਨ੍ਤਾਨਂ. ਨ ਵੁਤ੍ਤਾਤਿ ਨ ਕਥਿਤਾ. ਨਪ੍ਪਵੁਤ੍ਤਾਤਿ ਨ ਵਿਸ੍ਸਜ੍ਜਿਤਾ.
੧੫੩. ਇਦਾਨਿਸ੍ਸ ਅਕਰਣਵਿਧਿਂ ਦਸ੍ਸੇਨ੍ਤੋ ‘‘ਸੇਯ੍ਯੋ ਨ ਤੇਨਾ’’ਤਿ ਗਾਥਮਾਹ. ਤਸ੍ਸਤ੍ਥੋ – ਤੇਨ ਚ ਮਾਨੇਨ ‘‘ਸੇਯ੍ਯੋਹ’’ਨ੍ਤਿ ਵਾ ‘‘ਨੀਚੋਹ’’ਨ੍ਤਿ ਵਾ ‘‘ਸਰਿਕ੍ਖੋਹ’’ਨ੍ਤਿ ਵਾਪਿ ਨ ਮਞ੍ਞੇਯ੍ਯ. ਤੇਹਿ ਚ ਉਚ੍ਚਾਕੁਲੀਨਤਾਦੀਹਿ ਗੁਣੇਹਿ ਫੁਟ੍ਠੋ ਅਨੇਕਰੂਪੇਹਿ ‘‘ਅਹਂ ਉਚ੍ਚਾ ਕੁਲਾ ਪਬ੍ਬਜਿਤੋ’’ਤਿਆਦਿਨਾ ਨਯੇਨ ਅਤ੍ਤਾਨਂ ਵਿਕਪ੍ਪੇਨ੍ਤੋ ਨ ਤਿਟ੍ਠੇਯ੍ਯਾਤਿ.
੧੫੪. ਏਵਂ ਮਾਨਪ੍ਪਹਾਨਵਸੇਨਪਿ ਦੇਸੇਤ੍ਵਾ ਇਦਾਨਿ ਸਬ੍ਬਕਿਲੇਸੂਪਸਮਵਸੇਨ ਦੇਸੇਤੁਂ ‘‘ਅਜ੍ਝਤ੍ਤਮੇਵਾ’’ਤਿ ਗਾਥਮਾਹ. ਤਤ੍ਥ ਅਜ੍ਝਤ੍ਤਮੇਵੁਪਸਮੇਤਿ ਅਤ੍ਤਨਿ ਏਵ ਰਾਗਾਦਿਸਬ੍ਬਕਿਲੇਸੇ ਉਪਸਮੇਯ੍ਯ. ਨ ਅਞ੍ਞਤੋ ਭਿਕ੍ਖੁ ਸਨ੍ਤਿਮੇਸੇਯ੍ਯਾਤਿ ਠਪੇਤ੍ਵਾ ਚ ਸਤਿਪਟ੍ਠਾਨਾਦੀਨਿ ਅਞ੍ਞੇਨ ਉਪਾਯੇਨ ਸਨ੍ਤਿਂ ਨ ਪਰਿਯੇਸੇਯ੍ਯ. ਕੁਤੋ ਨਿਰਤ੍ਤਾ ਵਾਤਿ ਨਿਰਤ੍ਤਾ ਕੁਤੋਯੇਵ.
ਨ ਏਸੇਯ੍ਯਾਤਿ ਸੀਲਬ੍ਬਤਾਦੀਹਿ ਨ ਮਗ੍ਗੇਯ੍ਯ. ਨ ਗਵੇਸੇਯ੍ਯਾਤਿ ਨ ਓਲੋਕੇਯ੍ਯ. ਨ ਪਰਿਯੇਸੇਯ੍ਯਾਤਿ ਪੁਨਪ੍ਪੁਨਂ ਨ ਇਕ੍ਖੇਯ੍ਯ.
੧੫੫. ਇਦਾਨਿ ਅਜ੍ਝਤ੍ਤਂ ਉਪਸਨ੍ਤਸ੍ਸ ਖੀਣਾਸਵਸ੍ਸ ਤਾਦਿਭਾਵਂ ਦਸ੍ਸੇਨ੍ਤੋ ‘‘ਮਜ੍ਝੇ ਯਥਾ’’ਤਿ ਗਾਥਮਾਹ. ਤਸ੍ਸਤ੍ਥੋ – ਯਥਾ ਮਹਾਸਮੁਦ੍ਦਸ੍ਸ ਉਪਰਿਹੇਟ੍ਠਿਮਭਾਗਾਨਂ ਵੇਮਜ੍ਝਸਙ੍ਖਾਤੇ ਚਤੁਯੋਜਨਸਹਸ੍ਸਪ੍ਪਮਾਣੇ ਮਜ੍ਝੇ ਪਬ੍ਬਤਨ੍ਤਰੇ ਠਿਤਸ੍ਸ ਵਾ ਮਜ੍ਝੇ ਸਮੁਦ੍ਦਸ੍ਸ ਊਮਿ ਨੋ ਜਾਯਤਿ, ਠਿਤੋਵ ਸੋ ਹੋਤਿ ਅਵਿਕਮ੍ਪਮਾਨੋ, ਏਵਂ ਅਨੇਜੋ ਖੀਣਾਸਵੋ ਲਾਭਾਦੀਸੁ ਠਿਤੋ ਅਸ੍ਸ ਅਵਿਕਮ੍ਪਮਾਨੋ, ਸੋ ਤਾਦਿਸੋ ਰਾਗਾਦਿਉਸ੍ਸਦਂ ਭਿਕ੍ਖੁ ਨ ਕਰੇਯ੍ਯ ਕੁਹਿਞ੍ਚੀਤਿ.
ਉਬ੍ਬੇਧੇਨਾਤਿ ਹੇਟ੍ਠਾਭਾਗੇਨ. ਗਮ੍ਭੀਰੋਤਿ ਉਦਕਪਿਟ੍ਠਿਤੋ ਪਟ੍ਠਾਯ ਚਤੁਰਾਸੀਤਿਯੋਜਨਸਹਸ੍ਸਾਨਿ ਗਮ੍ਭੀਰੋ. ‘‘ਉਬ੍ਬੇਧੋ’’ਤਿਪਿ ਪਾਠੋ, ਤਂ ਨ ਸੁਨ੍ਦਰਂ. ਹੇਟ੍ਠਾਤਿ ਅਨ੍ਤੋਉਦਕਂ. ਉਪਰੀਤਿ ਉਦ੍ਧਂਉਦਕਂ. ਮਜ੍ਝੇਤਿ ਵੇਮਜ੍ਝੇ. ਨ ਕਮ੍ਪਤੀਤਿ ਠਿਤਟ੍ਠਾਨਤੋ ਨ ਚਲਤਿ. ਨ ਵਿਕਮ੍ਪਤੀਤਿ ਇਤੋ ਚਿਤੋ ਚ ਨ ਚਲਤਿ. ਨ ਚਲਤੀਤਿ ਨਿਚ੍ਚਲਂ ਹੋਤਿ. ਨ ਵੇਧਤੀਤਿ ਨ ਫਨ੍ਦਤਿ. ਨਪ੍ਪਵੇਧਤੀਤਿ ਨ ਪਰਿਵਤ੍ਤਤਿ. ਨ ਸਮ੍ਪਵੇਧਤੀਤਿ ਨ ਪਰਿਬ੍ਭਮਤਿ. ਅਨੇਰਿਤੋਤਿ ਨ ਏਰਿਤੋ. ਅਘਟ੍ਟਿਤੋਤਿ ਅਕ੍ਖੋਭੋ. ਅਚਲਿਤੋਤਿ ਨ ਕਮ੍ਪਿਤੋ. ਅਲੁਲ਼ਿਤੋਤਿ ਨ ਕਲਲੀਭੂਤੋ. ਤਤ੍ਰ ਊਮਿ ਨੋ ਜਾਯਤੀਤਿ ਤਸ੍ਮਿਂ ਠਾਨੇ ਵੀਚਿ ਨ ਉਪ੍ਪਜ੍ਜਤਿ.
ਸਤ੍ਤਨ੍ਨਂ ਪਬ੍ਬਤਾਨਂ ਅਨ੍ਤਰਿਕਾਸੂਤਿ ਯੁਗਨ੍ਧਰਾਦੀਨਂ ਸਤ੍ਤਨ੍ਨਂ ਪਬ੍ਬਤਾਨਂ ਅਨ੍ਤਰਨ੍ਤਰਾ. ਸੀਦਨ੍ਤਰਾਤਿ ਅਨ੍ਤਮਸੋ ਸਿਮ੍ਬਲੀਤੂਲਮ੍ਪਿ ਤੇਸੁ ਪਤਿਤਪਤਿਤਂ ਸੀਦਤੀਤਿ ਸੀਦਾ, ਪਬ੍ਬਤਨ੍ਤਰੇ ਜਾਤਤ੍ਤਾ ਅਨ੍ਤਰਾ. ‘‘ਅਨ੍ਤਰਸੀਦਾ’’ਤਿਪਿ ਪਾਠੋ.
੧੫੬. ਇਦਾਨਿ ਏਵਂ ਅਰਹਤ੍ਤਨਿਕੂਟੇਨ ਦੇਸਿਤਂ ਧਮ੍ਮਦੇਸਨਂ ਅਬ੍ਭਾਨੁਮੋਦੇਨ੍ਤੋ ਤਸ੍ਸ ਚ ਅਰਹਤ੍ਤਸ੍ਸ ਆਦਿਪਟਿਪਦਂ ਪੁਚ੍ਛਨ੍ਤੋ ਨਿਮ੍ਮਿਤਬੁਦ੍ਧੋ ‘‘ਅਕਿਤ੍ਤਯੀ’’ਤਿ ਗਾਥਮਾਹ. ਤਤ੍ਥ ਅਕਿਤ੍ਤਯੀਤਿ ਆਚਿਕ੍ਖਿ. ਵਿਵਟਚਕ੍ਖੂਤਿ ਵਿਵਟੇਹਿ ਅਨਾਵਰਣੇਹਿ ਪਞ੍ਚਹਿ ਚਕ੍ਖੂਹਿ ਸਮਨ੍ਨਾਗਤੋ. ਸਕ੍ਖਿਧਮ੍ਮਨ੍ਤਿ ਸਕਾਯਤ੍ਤਂ ਸਯਂ ਅਭਿਞ੍ਞਾਤਂ ਅਤ੍ਤਪਚ੍ਚਕ੍ਖਧਮ੍ਮਂ. ਪਰਿਸ੍ਸਯਵਿਨਯਨ੍ਤਿ ਪਰਿਸ੍ਸਯਵਿਨਯਨਂ. ਪਟਿਪਦਂ ਵਦੇਹੀਤਿ ਇਦਾਨਿ ਪਟਿਪਤ੍ਤਿਂ ਵਦੇਹਿ. ਭਦ੍ਦਨ੍ਤੇਤਿ ਭਦ੍ਦਂ ਤਵ ਅਤ੍ਥੂਤਿ ਭਗਵਨ੍ਤਂ ਆਲਪਨ੍ਤੋ ਆਹ. ਅਥ ਵਾ ਭਦ੍ਦਂ ਸੁਨ੍ਦਰਂ ਤਵ ਪਟਿਪਦਂ ਵਦੇਹੀਤਿਪਿ ਵੁਤ੍ਤਂ ਹੋਤਿ. ਪਾਤਿਮੋਕ੍ਖਂ ਅਥ ਵਾਪਿ ਸਮਾਧਿਨ੍ਤਿ ਤਮੇਵ ਪਟਿਪਦਂ ਭਿਨ੍ਦਿਤ੍ਵਾ ਪੁਚ੍ਛਤਿ. ਪਟਿਪਦਨ੍ਤਿ ਏਤੇਨ ਵਾ ਮਗ੍ਗਂ ਪੁਚ੍ਛਤਿ. ਇਤਰੇਹਿ ਸੀਲਂ ਸਮਾਧਿਞ੍ਚ ਪੁਚ੍ਛਤਿ.
ਮਂਸਚਕ੍ਖੁਨਾਪੀਤਿ ਸਸਮ੍ਭਾਰਿਕਮਂਸਚਕ੍ਖੁਨਾਪਿ. ਦਿਬ੍ਬਚਕ੍ਖੁਨਾਪੀਤਿ ਦਿਬ੍ਬਸਦਿਸਤ੍ਤਾ ਦਿਬ੍ਬਂ. ਦੇਵਾਨਞ੍ਹਿ ਸੁਚਰਿਤਕਮ੍ਮਨਿਬ੍ਬਤ੍ਤਂ ਪਿਤ੍ਤਸੇਮ੍ਹਰੁਹਿਰਾਦੀਹਿ ਅਪਲਿਬੁਦ੍ਧਂ ਉਪਕ੍ਕਿਲੇਸਵਿਨਿਮੁਤ੍ਤਤਾਯ ਦੂਰੇਪਿ ਆਰਮ੍ਮਣਸਮ੍ਪਟਿਚ੍ਛਨਸਮਤ੍ਥਂ ਦਿਬ੍ਬਂ ਪਸਾਦਚਕ੍ਖੁ ਹੋਤਿ. ਇਦਞ੍ਚਾਪਿ ਵੀਰਿਯਭਾਵਨਾਬਲਨਿਬ੍ਬਤ੍ਤਂ ਞਾਣਚਕ੍ਖੁ ਤਾਦਿਸਮੇਵਾਤਿ ਦਿਬ੍ਬਸਦਿਸਤ੍ਤਾ ਦਿਬ੍ਬਂ. ਦਿਬ੍ਬਵਿਹਾਰਵਸੇਨ ਪਟਿਲਦ੍ਧਤ੍ਤਾ, ਅਤ੍ਤਨਾ ਚ ਦਿਬ੍ਬਵਿਹਾਰਸਨ੍ਨਿਸ੍ਸਿਤਤ੍ਤਾਪਿ ਦਿਬ੍ਬਂ. ਆਲੋਕਪਰਿਗ੍ਗਹੇਨ ਮਹਾਜੁਤਿਕਤ੍ਤਾਪਿ ਦਿਬ੍ਬਂ. ਤਿਰੋਕੁਟ੍ਟਾਦਿਗਤਰੂਪਦਸ੍ਸਨੇਨ ਮਹਾਗਤਿਕਤ੍ਤਾਪਿ ਦਿਬ੍ਬਂ. ਤਂ ਸਬ੍ਬਂ ਸਦ੍ਦਸਤ੍ਥਾਨੁਸਾਰੇਨ ਵੇਦਿਤਬ੍ਬਂ. ਦਸ੍ਸਨਟ੍ਠੇਨ ਚਕ੍ਖੁ, ਚਕ੍ਖੁਕਿਚ੍ਚਕਰਣੇਨ ਚਕ੍ਖੁਮਿਵਾਤਿਪਿ ਚਕ੍ਖੁ, ਦਿਬ੍ਬਞ੍ਚ ਤਂ ਚਕ੍ਖੁ ਚਾਤਿ ਦਿਬ੍ਬਚਕ੍ਖੁ. ਤੇਨ ਦਿਬ੍ਬਚਕ੍ਖੁਨਾਪਿ ਵਿਵਟਚਕ੍ਖੁ. ਇਦਾਨਿ ਪਞ੍ਚਵਿਧਂ ਚਕ੍ਖੁਂ ਵਿਤ੍ਥਾਰੇਨ ਕਥੇਤੁਂ ‘‘ਕਥਂ ਭਗਵਾ ਮਂਸਚਕ੍ਖੁਨਾਪਿਵਿਵਟਚਕ੍ਖੂ’’ਤਿਆਦਿਮਾਹ. ਮਂਸਚਕ੍ਖੁਮ੍ਹਿ ਭਗਵਤੋ ਪਞ੍ਚਵਣ੍ਣਾ ਸਂਵਿਜ੍ਜਨ੍ਤੀਤਿ ਏਤ੍ਥ ਸਸਮ੍ਭਾਰਾਦਿਕਚਕ੍ਖੁਮ੍ਹਿ ਬੁਦ੍ਧਸ੍ਸ ਭਗਵਤੋ ਪਞ੍ਚ ਕੋਟ੍ਠਾਸਾ ਪਚ੍ਚੇਕਂ ਪਚ੍ਚੇਕਂ ਉਪਲਬ੍ਭਨ੍ਤਿ.
ਨੀਲੋ ਚ ਵਣ੍ਣੋਤਿ ਉਮਾਪੁਪ੍ਫਵਣ੍ਣੋ. ਪੀਤਕੋ ਚ ਵਣ੍ਣੋਤਿ ਕਣਿਕਾਰਪੁਪ੍ਫਵਣ੍ਣੋ. ਲੋਹਿਤਕੋ ਚ ਵਣ੍ਣੋਤਿ ਇਨ੍ਦਗੋਪਕਵਣ੍ਣੋ. ਕਣ੍ਹੋ ਚ ਵਣ੍ਣੋਤਿ ਅਞ੍ਜਨਵਣ੍ਣੋ. ਓਦਾਤੋ ਚ ਵਣ੍ਣੋਤਿ ਓਸਧਿਤਾਰਕਵਣ੍ਣੋ. ਯਤ੍ਥ ਚ ਅਕ੍ਖਿਲੋਮਾਨਿ ਪਤਿਟ੍ਠਿਤਾਨੀਤਿ ਯਸ੍ਮਿਂ ਠਾਨੇ ਅਕ੍ਖਿਲੋਮਾਨਿ ਪਤਿਟ੍ਠਹਿਤ੍ਵਾ ਉਟ੍ਠਿਤਾਨਿ. ਤਂ ਨੀਲਂ ਹੋਤਿ ਸੁਨੀਲਨ੍ਤਿ ਏਤ੍ਥ ਨੀਲਨ੍ਤਿ ਸਬ੍ਬਸਙ੍ਗਾਹਕਵਸੇਨ ਵੁਤ੍ਤਂ. ਸੁਨੀਲਨ੍ਤਿ ਅਨ੍ਤਰਵਿਰਹਿਤਂ ਸੁਟ੍ਠੁ ਨੀਲਂ. ਪਾਸਾਦਿਕਨ੍ਤਿ ਪਸਾਦਜਨਕਂ. ਦਸ੍ਸਨੇਯ੍ਯਨ੍ਤਿ ਦਸ੍ਸਨੀਯਂ. ਉਮਾਪੁਪ੍ਫਸਮਾਨਨ੍ਤਿ ਦਕਸੀਤਲਪੁਪ੍ਫਸਦਿਸਂ. ਤਸ੍ਸ ਪਰਤੋਤਿ ਤਸ੍ਸ ਸਮਨ੍ਤਾ ਬਾਹਿਰਪਸ੍ਸੇ. ਪੀਤਕਨ੍ਤਿ ਸਬ੍ਬਸਙ੍ਗਾਹਕਂ. ਸੁਪੀਤਕਨ੍ਤਿ ਅਨ੍ਤਰਵਿਰਹਿਤਂ ਸੁਟ੍ਠੁ ਪੀਤਕਂ. ਉਭਯਤੋ ਚ ਅਕ੍ਖਿਕੂਟਾਨੀਤਿ ਦ੍ਵੇ ਚ ਅਕ੍ਖਿਕੋਟਿਯੋ. ਲੋਹਿਤਕਾਨੀਤਿ ਸਬ੍ਬਸਙ੍ਗਾਹਕਵਸੇਨ ਵੁਤ੍ਤਂ. ਸੁਲੋਹਿਤਕਾਨੀਤਿ ਅਪਞ੍ਞਾਯਮਾਨਵਿਵਰਾਨਿ ਸੁਟ੍ਠੁ ਲੋਹਿਤਕਾਨਿ. ਮਜ੍ਝੇ ਕਣ੍ਹਨ੍ਤਿ ਅਕ੍ਖੀਨਂ ਮਜ੍ਝਿਮਟ੍ਠਾਨਂ ਅਞ੍ਜਨਸਦਿਸਂ ਕਣ੍ਹਂ. ਸੁਕਣ੍ਹਨ੍ਤਿ ਅਨ੍ਤਰਵਿਰਹਿਤਂ ਸੁਟ੍ਠੁ ਕਣ੍ਹਂ. ਅਲੂਖਨ੍ਤਿ ਪਾਸਾਦਿਕਂ. ਸਿਨਿਦ੍ਧਨ੍ਤਿ ਪਣੀਤਂ. ਭਦ੍ਦਾਰਿਟ੍ਠਕਸਮਾਨਨ੍ਤਿ ਅਪਨੀਤਤਚਭਦ੍ਦਾਰਿਟ੍ਠਕਫਲਸਦਿਸਂ. ‘‘ਅਦ੍ਦਾਰਿਟ੍ਠਕਸਮਾਨ’’ਨ੍ਤਿਪਿ ਪਾਲ਼ਿ, ਤਸ੍ਸਾ ਤਿਨ੍ਤਕਾਕਸਦਿਸਨ੍ਤਿ ਅਤ੍ਥੋ. ਓਦਾਤਨ੍ਤਿ ਸਬ੍ਬਸਙ੍ਗਾਹਕਵਸੇਨ ਵੁਤ੍ਤਂ. ਸੁਓਦਾਤਨ੍ਤਿ ਅਨ੍ਤਰਵਿਰਹਿਤਂ ਰਜਤਮਣ੍ਡਲਸਦਿਸਂ ਸੁਟ੍ਠੁ ਓਦਾਤਂ. ਸੇਤਂ ਪਣ੍ਡਰਨ੍ਤਿ ਦ੍ਵੀਹਿਪਿ ਅਤਿਓਦਾਤਤਂ ਦਸ੍ਸੇਤਿ. ਪਾਕਤਿਕੇਨ ਮਂਸਚਕ੍ਖੁਨਾਤਿ ਪਕਤਿਮਂਸਚਕ੍ਖੁਨਾ. ਅਤ੍ਤਭਾਵਪਰਿਯਾਪਨ੍ਨੇਨਾਤਿ ਅਤ੍ਤਭਾਵਸਨ੍ਨਿਸ੍ਸਿਤੇਨ. ਪੁਰਿਮਸੁਚਰਿਤਕਮ੍ਮਾਭਿਨਿਬ੍ਬਤ੍ਤੇਨਾਤਿ ਪੁਰਿਮੇਸੁ ਤਤ੍ਥ ਤਤ੍ਥੁਪ੍ਪਨ੍ਨੇਸੁ ਅਤ੍ਤਭਾਵੇਸੁ ਕਾਯਸੁਚਰਿਤਾਦਿਕਮ੍ਮੁਨਾ ਉਪ੍ਪਾਦਿਤੇਨ. ਸਮਨ੍ਤਾ ਯੋਜਨਂ ਪਸ੍ਸਤੀਤਿ ਸਮਨ੍ਤਤੋ ਚਤੁਗਾਵੁਤਪ੍ਪਮਾਣੇ ਯੋਜਨੇ ਤਿਰੋਕੁਟ੍ਟਾਦਿਗਤਂ ਰੂਪਂ ਆਵਰਣਵਿਰਹਿਤਂ ਪਕਤਿਮਂਸਚਕ੍ਖੁਨਾ ਦਕ੍ਖਤਿ.
ਦਿਵਾ ਚੇਵ ਰਤ੍ਤਿਞ੍ਚਾਤਿ ਦਿਵਸਭਾਗੇ ਚ ਰਤ੍ਤਿਭਾਗੇ ਚ. ਚਤੁਰਙ੍ਗਸਮਨ੍ਨਾਗਤੋਤਿ ਚਤੂਹਿ ਅਙ੍ਗੇਹਿ ਸਮਨ੍ਨਾਗਤੋ ਪਰਿਪੁਣ੍ਣਅਨ੍ਧਕਾਰੋ ਆਲੋਕਵਿਰਹਿਤੋ. ਸੂਰਿਯੋ ਵਾ ਅਤ੍ਥਙ੍ਗਤੋਤਿ ਸੂਰਭਾਵਂ ਜਨਯਨ੍ਤੋ ਉਟ੍ਠਿਤੋ ਸੂਰਿਯੋ ਵਿਗਤੋ. ਕਾਲ਼ਪਕ੍ਖੋ ਚ ਉਪੋਸਥੋਤਿ ਕਾਲ਼ਪਕ੍ਖੇ ਚਾਤੁਦ੍ਦਸੀਉਪੋਸਥਦਿਵਸੋ ਚ. ਤਿਬ੍ਬੋ ਚ ਵਨਸਣ੍ਡੋਤਿ ਗਹਨੋ ਚ ਰੁਕ੍ਖਰਾਸਿ. ਮਹਾ ਚ ਕਾਲ਼ਮੇਘੋ ਅਬ੍ਭੁਟ੍ਠਿਤੋਤਿ ਮਹਨ੍ਤੋ ਕਾਲ਼ਮੇਘੋ ਅਬ੍ਭਪਟਲੋ ਚ ਉਟ੍ਠਿਤੋ ਹੋਤਿ. ਕੁਟ੍ਟੋ ਵਾਤਿ ਇਟ੍ਠਕਾਚਯੋ ਵਾ. ਕਵਾਟਂ ਵਾਤਿ ਦ੍ਵਾਰਵਾਤਪਾਨਾਦਿਕਵਾਟਂ ਵਾ. ਪਾਕਾਰੋ ਵਾਤਿ ਮਤ੍ਤਿਕਾਦਿਪਾਕਾਰੋ ਵਾ. ਪਬ੍ਬਤੋ ਵਾਤਿ ਪਂਸੁਪਬ੍ਬਤਾਦਿਪਬ੍ਬਤੋ ਵਾ. ਗਚ੍ਛਂ ਵਾਤਿ ਤਰੁਣਗਚ੍ਛਾਦਿਗਚ੍ਛਂ ਵਾ. ਲਤਾ ਵਾਤਿ ਕਰਵਿਨ੍ਦਾਦਿ ਲਤਾ ਵਾ. ਆਵਰਣਂ ਰੂਪਾਨਂ ਦਸ੍ਸਨਾਯਾਤਿ ਰੂਪਾਰਮ੍ਮਣਾਨਂ ਦਸ੍ਸਨਤ੍ਥਾਯ ਪਟਿਸੇਧਂ ਨਤ੍ਥਿ. ਏਕਞ੍ਚੇ ਤਿਲਫਲਂ ਨਿਮਿਤ੍ਤਂ ਕਤ੍ਵਾਤਿ ਸਚੇ ਏਕਂ ਤਿਲਬੀਜਂ ਸਞ੍ਞਾਣਂ ਕਤ੍ਵਾ. ਤਿਲਵਾਹੇ ਪਕ੍ਖਿਪੇਯ੍ਯਾਤਿ ਦ੍ਵੇ ਸਕਟੇ ਤਿਲਰਾਸਿਮ੍ਹਿ ਖਿਪੇਯ੍ਯ. ਕੇਚਿ ਪਨ ‘‘ਵਾਹੋ ਨਾਮ ਕੁਮ੍ਭਾਤਿਰੇਕਦ੍ਵੇਸਕਟ’’ਨ੍ਤਿ ਵਦਨ੍ਤਿ. ਤਞ੍ਞੇਵ ਤਿਲਫਲਂ ਉਦ੍ਧਰੇਯ੍ਯਾਤਿ ਤਂਨਿਮਿਤ੍ਤਕਤਂ ਤਿਲਬੀਜਂਯੇਵ ਉਦ੍ਧਰਿਤ੍ਵਾ ਗਣ੍ਹੇਯ੍ਯ.
ਦਿਬ੍ਬੇਨ ਚਕ੍ਖੁਨਾਤਿ ਇਦਂ ਵੁਤ੍ਤਤ੍ਥਮੇਵ. ਵਿਸੁਦ੍ਧੇਨਾਤਿ ਚੁਤੂਪਪਾਤਦਸ੍ਸਨੇਨ ਦਿਟ੍ਠਿਵਿਸੁਦ੍ਧਿਹੇਤੁਤ੍ਤਾ ਵਿਸੁਦ੍ਧੇਨ. ਯੋ ਹਿ ਚੁਤਿਮਤ੍ਤਮੇਵ ਪਸ੍ਸਤਿ ਨ ਉਪਪਾਤਂ, ਸੋ ਉਚ੍ਛੇਦਦਿਟ੍ਠਿਂ ਗਣ੍ਹਾਤਿ. ਯੋ ਉਪਪਾਤਮੇਵ ਪਸ੍ਸਤਿ ਨ ਚੁਤਿਂ, ਸੋ ਨਵਸਤ੍ਤਪਾਤੁਭਾਵਸਸ੍ਸਤਦਿਟ੍ਠਿਂ ਗਣ੍ਹਾਤਿ. ਯੋ ਪਨ ਤਦੁਭਯਂ ਪਸ੍ਸਤਿ, ਸੋ ਯਸ੍ਮਾ ਦੁਵਿਧਮ੍ਪਿ ਤਂ ਦਿਟ੍ਠਿਗਤਂ ਅਤਿਵਤ੍ਤਤਿ, ਤਸ੍ਮਾਸ੍ਸ ਤਂ ਦਸ੍ਸਨਂ ਦਿਟ੍ਠਿਵਿਸੁਦ੍ਧਿਹੇਤੁ ਹੋਤਿ, ਉਭਯਞ੍ਚੇਤਂ ਬੁਦ੍ਧਪੁਤ੍ਤਾ ਪਸ੍ਸਨ੍ਤਿ. ਤੇਨ ਵੁਤ੍ਤਂ – ‘‘ਚੁਤੂਪਪਾਤਦਸ੍ਸਨੇਨ ਦਿਟ੍ਠਿਵਿਸੁਦ੍ਧਿਹੇਤੁਤ੍ਤਾ ਵਿਸੁਦ੍ਧ’’ਨ੍ਤਿ. ਮਨੁਸ੍ਸੂਪਚਾਰਂ ਅਤਿਕ੍ਕਮਿਤ੍ਵਾ ਰੂਪਦਸ੍ਸਨੇਨ ਅਤਿਕ੍ਕਨ੍ਤਮਾਨੁਸਕਂ, ਮਾਨੁਸਕਂ ਵਾ ਮਂਸਚਕ੍ਖੁਂ ਅਤਿਕ੍ਕਨ੍ਤਤ੍ਤਾ ਅਤਿਕ੍ਕਨ੍ਤਮਾਨੁਸਕਨ੍ਤਿ ਵੇਦਿਤਬ੍ਬਂ.
ਤੇਨ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਸਤ੍ਤੇ ਪਸ੍ਸਤੀਤਿ ਮਨੁਸ੍ਸਮਂਸਚਕ੍ਖੁਨਾ ਵਿਯ ਸਤ੍ਤੇ ਓਲੋਕੇਤਿ. ਚਵਮਾਨੇ ਉਪਪਜ੍ਜਮਾਨੇਤਿ ਏਤ੍ਥ ਚੁਤਿਕ੍ਖਣੇ ਉਪਪਤ੍ਤਿਕ੍ਖਣੇ ਵਾ ਦਿਬ੍ਬਚਕ੍ਖੁਨਾ ਦਟ੍ਠੁਂ ਨ ਸਕ੍ਕਾ. ਯੇ ਪਨ ਆਸਨ੍ਨਚੁਤਿਕਾ ਇਦਾਨਿ ਚਵਿਸ੍ਸਨ੍ਤਿ, ਤੇ ਚਵਮਾਨਾ. ਯੇ ਚ ਗਹਿਤਪਟਿਸਨ੍ਧਿਕਾ ਸਮ੍ਪਤਿਨਿਬ੍ਬਤ੍ਤਾਵ, ਤੇ ਉਪਪਜ੍ਜਮਾਨਾਤਿ ਅਧਿਪ੍ਪੇਤਾ. ਤੇ ਏਵਰੂਪੇ ਚਵਮਾਨੇ ਉਪਪਜ੍ਜਮਾਨੇ ਚ ਪਸ੍ਸਤੀਤਿ ਦਸ੍ਸੇਤਿ. ਹੀਨੇਤਿ ਮੋਹਨਿਸ੍ਸਨ੍ਦਯੁਤ੍ਤਤ੍ਤਾ ਹੀਨੇ. ਤਬ੍ਬਿਪਰੀਤੇ ਪਣੀਤੇ. ਸੁਵਣ੍ਣੇਤਿ ਅਦੋਸਨਿਸ੍ਸਨ੍ਦਯੁਤ੍ਤਤ੍ਤਾ ਇਟ੍ਠਕਨ੍ਤਮਨਾਪਵਣ੍ਣਯੁਤ੍ਤੇ. ਤਬ੍ਬਿਪਰੀਤੇ ਦੁਬ੍ਬਣ੍ਣੇ, ਅਭਿਰੂਪੇ ਵਿਰੂਪੇਤਿ ਅਤ੍ਥੋ. ਸੁਗਤੇਤਿ ਸੁਗਤਿਗਤੇ, ਅਲੋਭਨਿਸ੍ਸਨ੍ਦਯੁਤ੍ਤਤ੍ਤਾ ਵਾ ਅਡ੍ਢੇ ਮਹਦ੍ਧਨੇ. ਦੁਗ੍ਗਤੇਤਿ ਦੁਗ੍ਗਤਿਗਤੇ, ਲੋਭਨਿਸ੍ਸਨ੍ਦਯੁਤ੍ਤਤ੍ਤਾ ਵਾ ਦਲਿਦ੍ਦੇ ਅਪ੍ਪਨ੍ਨਪਾਨੇ. ਯਥਾਕਮ੍ਮੂਪਗੇਤਿ ਯਂ ਯਂ ਕਮ੍ਮਂ ਉਪਚਿਤਂ, ਤੇਨ ਤੇਨ ਉਪਗਤੇ. ਤਤ੍ਥ ਪੁਰਿਮੇਹਿ ‘‘ਚਵਮਾਨੇ’’ਤਿਆਦੀਹਿ ਦਿਬ੍ਬਚਕ੍ਖੁਕਿਚ੍ਚਂ ਵੁਤ੍ਤਂ. ਇਮਿਨਾ ਪਨ ਪਦੇਨ ਯਥਾਕਮ੍ਮੂਪਗਞਾਣਕਿਚ੍ਚਂ.
ਤਸ੍ਸ ਚ ਞਾਣਸ੍ਸ ਅਯਮੁਪ੍ਪਤ੍ਤਿਕ੍ਕਮੋ – ਇਧ ਭਿਕ੍ਖੁ ਹੇਟ੍ਠਾਨਿਰਯਾਭਿਮੁਖਂ ਆਲੋਕਂ ਵਡ੍ਢੇਤ੍ਵਾ ਨੇਰਯਿਕੇ ਸਤ੍ਤੇ ਪਸ੍ਸਤਿ ਮਹਾਦੁਕ੍ਖਂ ਅਨੁਭਵਮਾਨੇ, ਤਂ ਦਸ੍ਸਨਂ ਦਿਬ੍ਬਚਕ੍ਖੁਕਿਚ੍ਚਮੇਵ. ਸੋ ਏਵਂ ਮਨਸਿ ਕਰੋਤਿ ‘‘ਕਿਂ ਨੁ ਖੋ ਕਮ੍ਮਂ ਕਤ੍ਵਾ ਇਮੇ ਸਤ੍ਤਾ ਏਤਂ ਦੁਕ੍ਖਂ ਅਨੁਭਵਨ੍ਤੀ’’ਤਿ, ਅਥਸ੍ਸ ‘‘ਇਦਂ ਨਾਮ ਕਤ੍ਵਾ’’ਤਿ ਤਂ ਕਮ੍ਮਾਰਮ੍ਮਣਂ ਞਾਣਂ ਉਪ੍ਪਜ੍ਜਤਿ. ਤਥਾ ਉਪਰਿਦੇਵਲੋਕਾਭਿਮੁਖਂ ਆਲੋਕਂ ਵਡ੍ਢੇਤ੍ਵਾ ਨਨ੍ਦਨਵਨ ਮਿਸ੍ਸਕਵਨ ਫਾਰੁਸਕਵਨਾਦੀਸੁ ਸਤ੍ਤੇ ਪਸ੍ਸਤਿ ਮਹਾਸਮ੍ਪਤ੍ਤਿਂ ਅਨੁਭਵਮਾਨੇ. ਤਮ੍ਪਿ ਦਸ੍ਸਨਂ ਦਿਬ੍ਬਚਕ੍ਖੁਕਿਚ੍ਚਮੇਵ. ਸੋ ਏਵਂ ਮਨਸਿ ਕਰੋਤਿ ‘‘ਕਿਂ ਨੁ ਖੋ ਕਮ੍ਮਂ ਕਤ੍ਵਾ ਇਮੇ ਸਤ੍ਤਾ ਏਤਂ ਸਮ੍ਪਤ੍ਤਿਂ ਅਨੁਭਵਨ੍ਤੀ’’ਤਿ. ਅਥਸ੍ਸ ‘‘ਇਦਂ ਨਾਮ ਕਤ੍ਵਾ’’ਤਿ ਤਂ ਕਮ੍ਮਾਰਮ੍ਮਣਂ ਞਾਣਮੁਪ੍ਪਜ੍ਜਤਿ. ਇਦਂ ਯਥਾਕਮ੍ਮੂਪਗਞਾਣਂ ਨਾਮ. ਇਮਸ੍ਸ ਵਿਸੁਂ ਪਰਿਕਮ੍ਮਂ ਨਾਮ ਨਤ੍ਥਿ. ਯਥਾ ਚ ਇਮਸ੍ਸ, ਏਵਂ ਅਨਾਗਤਂਸਞਾਣਸ੍ਸਾਪਿ. ਦਿਬ੍ਬਚਕ੍ਖੁਪਾਦਕਾਨੇਵ ਹਿ ਇਮਾਨਿ ਦਿਬ੍ਬਚਕ੍ਖੁਨਾ ਸਹੇਵ ਇਜ੍ਝਨ੍ਤਿ.
ਇਮੇ ਵਤ ਭੋਨ੍ਤੋਤਿਆਦੀਸੁ ਇਮੇਤਿ ਦਿਬ੍ਬਚਕ੍ਖੁਨਾ ਦਿਟ੍ਠਾਨਂ ਨਿਦਸ੍ਸਨਵਚਨਂ. ਵਤਾਤਿ ਅਨੁਸੋਚਨਤ੍ਥੇ ਨਿਪਾਤੋ. ਭੋਨ੍ਤੋਤਿ ਭਵਨ੍ਤੋ. ਦੁਟ੍ਠੁ ਚਰਿਤਂ, ਦੁਟ੍ਠੁਂ ਵਾ ਚਰਿਤਂ ਕਿਲੇਸਪੂਤਿਕਤ੍ਤਾਤਿ ਦੁਚ੍ਚਰਿਤਂ; ਕਾਯੇਨ ਦੁਚ੍ਚਰਿਤਂ, ਕਾਯਤੋ ਵਾ ਉਪ੍ਪਨ੍ਨਂ ਦੁਚ੍ਚਰਿਤਨ੍ਤਿ ਕਾਯਦੁਚ੍ਚਰਿਤਂ. ਇਤਰੇਸੁਪਿ ਏਸੇਵ ਨਯੋ. ਸਮਨ੍ਨਾਗਤਾਤਿ ਸਮਙ੍ਗੀਭੂਤਾ.
ਅਰਿਯਾਨਂ ਉਪਵਾਦਕਾਤਿ ਬੁਦ੍ਧਪਚ੍ਚੇਕਬੁਦ੍ਧਬੁਦ੍ਧਸਾਵਕਾਨਂ ਅਰਿਯਾਨਂ ਅਨ੍ਤਮਸੋ ਗਿਹਿਸੋਤਾਪਨ੍ਨਾਨਮ੍ਪਿ ਅਨਤ੍ਥਕਾਮਾ ਹੁਤ੍ਵਾ ਅਨ੍ਤਿਮਵਤ੍ਥੁਨਾ ਵਾ ਗੁਣਪਰਿਧਂਸਨੇਨ ਵਾ ਉਪਵਾਦਕਾ, ਅਕ੍ਕੋਸਕਾ ਗਰਹਕਾਤਿ ਵੁਤ੍ਤਂ ਹੋਤਿ. ਤਤ੍ਥ ‘‘ਨਤ੍ਥਿ ਇਮੇਸਂ ਸਮਣਧਮ੍ਮੋ, ਅਸ੍ਸਮਣਾ ਏਤੇ’’ਤਿ ਵਦਨ੍ਤੋ ਅਨ੍ਤਿਮਵਤ੍ਥੁਨਾ ਉਪਵਦਤਿ. ‘‘ਨਤ੍ਥਿ ਇਮੇਸਂ ਝਾਨਂ ਵਾ ਵਿਮੋਕ੍ਖੋ ਵਾ ਮਗ੍ਗੋ ਵਾ ਫਲਂ ਵਾ’’ਤਿਆਦੀਨਿ ਵਦਨ੍ਤੋ ਗੁਣਪਰਿਧਂਸਨੇਨ ਉਪਵਦਤੀਤਿ ਵੇਦਿਤਬ੍ਬੋ. ਸੋ ਚ ਝਾਨਂ ਵਾ ਉਪਵਦੇਯ੍ਯ ਅਝਾਨਂ ਵਾ, ਉਭਯਥਾਪਿ ਅਰਿਯੂਪਵਾਦੋਵ ਹੋਤਿ; ਅਤਿਭਾਰਿਯਂ ਕਮ੍ਮਂ, ਅਨਨ੍ਤਰਿਯਕਮ੍ਮਸਦਿਸਂ, ਸਗ੍ਗਾਵਰਣਂ ਮਗ੍ਗਾਵਰਣਞ੍ਚ, ਸਤੇਕਿਚ੍ਛਂ ਪਨ ਹੋਤਿ. ਤਸ੍ਮਾ ਯੋ ਅਰਿਯਂ ਉਪਵਦਤਿ, ਤੇਨ ਗਨ੍ਤ੍ਵਾ ਸਚੇ ਅਤ੍ਤਨਾ ਵੁਡ੍ਢਤਰੋ ਹੋਤਿ, ਉਕ੍ਕੁਟਿਕਂ ਨਿਸੀਦਿਤ੍ਵਾ ‘‘ਅਹਂ ਆਯਸ੍ਮਨ੍ਤਂ ਇਦਞ੍ਚਿਦਞ੍ਚ ਅਵਚਂ, ਤਂ ਮੇ ਖਮਾਹੀ’’ਤਿ ਖਮਾਪੇਤਬ੍ਬੋ. ਸਚੇ ਪਨ ਨਵਕਤਰੋ ਹੋਤਿ, ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਅਹਂ, ਭਨ੍ਤੇ, ਤੁਮ੍ਹੇ ਇਦਞ੍ਚਿਦਞ੍ਚ ਅਵਚਂ, ਤਂ ਮੇ ਖਮਥਾ’’ਤਿ ਖਮਾਪੇਤਬ੍ਬੋ. ਸਚੇ ਸੋ ਨਕ੍ਖਮਤਿ, ਦਿਸਾਪਕ੍ਕਨ੍ਤੋ ਵਾ ਹੋਤਿ, ਸਯਂ ਵਾ ਗਨ੍ਤ੍ਵਾ ਸਦ੍ਧਿਵਿਹਾਰਿਕੇ ਵਾ ਪੇਸੇਤ੍ਵਾ ਖਮਾਪੇਤਬ੍ਬੋ. ਸਚੇ ਨਾਪਿ ਗਨ੍ਤੁਂ ਨ ਪੇਸੇਤੁਂ ਸਕ੍ਕਾ ਹੋਤਿ, ਯੇ ਤਸ੍ਮਿਂ ਵਿਹਾਰੇ ਭਿਕ੍ਖੂ ਵਸਨ੍ਤਿ, ਤੇਸਂ ਸਨ੍ਤਿਕਂ ਗਨ੍ਤ੍ਵਾ ਸਚੇ ਨਵਕਤਰਾ ਹੋਨ੍ਤਿ, ਉਕ੍ਕੁਟਿਕਂ ਨਿਸੀਦਿਤ੍ਵਾ ਸਚੇ ਵੁਡ੍ਢਤਰਾ, ਵੁਡ੍ਢੇ ਵੁਤ੍ਤਨਯੇਨੇਵ ਪਟਿਪਜ੍ਜਿਤ੍ਵਾ ‘‘ਅਹਂ, ਭਨ੍ਤੇ, ਅਸੁਕਂ ਨਾਮ ਆਯਸ੍ਮਨ੍ਤਂ ਇਦਞ੍ਚਿਦਞ੍ਚ ਅਵਚਂ, ਤਂ ਖਮਤੁ ਮੇ ਸੋ ਆਯਸ੍ਮਾ’’ਤਿ ਵਤ੍ਵਾ ਖਮਾਪੇਤਬ੍ਬੋ. ਸਮ੍ਮੁਖਾ ਅਖਮਨ੍ਤੇਪਿ ਏਤਦੇਵ ਕਾਤਬ੍ਬਂ. ਸਚੇ ਏਕਚਾਰਿਕਭਿਕ੍ਖੁ ਹੋਤਿ, ਨੇਵ ਤਸ੍ਸ ਵਸਨਟ੍ਠਾਨਂ ਨ ਗਤਟ੍ਠਾਨਂ ਪਞ੍ਞਾਯਤਿ, ਏਕਸ੍ਸ ਪਣ੍ਡਿਤਸ੍ਸ ਭਿਕ੍ਖੁਨੋ ਸਨ੍ਤਿਕਂ ਗਨ੍ਤ੍ਵਾ ‘‘ਅਹਂ, ਭਨ੍ਤੇ, ਅਸੁਕਂ ਨਾਮ ਆਯਸ੍ਮਨ੍ਤਂ ਇਦਞ੍ਚਿਦਞ੍ਚ ਅਵਚਂ, ਤਂ ਮੇ ਅਨੁਸ੍ਸਰਤੋ ਅਨੁਸ੍ਸਰਤੋ ਵਿਪ੍ਪਟਿਸਾਰੋ ਹੋਤਿ, ਕਿਂ ਕਰੋਮੀ’’ਤਿ ਵਤ੍ਤਬ੍ਬਂ. ਸੋ ਵਕ੍ਖਤਿ ‘‘ਤੁਮ੍ਹੇ ਮਾ ਚਿਨ੍ਤਯਿਤ੍ਥ, ਥੇਰੋ ਤੁਮ੍ਹਾਕਂ ਖਮਤਿ, ਚਿਤ੍ਤਂ ਵੂਪਸਮੇਥਾ’’ਤਿ. ਤੇਨਪਿ ਅਰਿਯਸ੍ਸ ਗਤਦਿਸਾਭਿਮੁਖੇਨ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਖਮਥਾ’’ਤਿ ਵਤ੍ਤਬ੍ਬਂ. ਯਦਿ ਸੋ ਪਰਿਨਿਬ੍ਬੁਤੋ ਹੋਤਿ, ਪਰਿਨਿਬ੍ਬੁਤਮਞ੍ਚਟ੍ਠਾਨਂ ਗਨ੍ਤ੍ਵਾ ਯਾਵ ਸਿਵਥਿਕਂ ਗਨ੍ਤ੍ਵਾਪਿ ਖਮਾਪੇਤਬ੍ਬੋ. ਏਵਂ ਕਤੇ ਨੇਵ ਸਗ੍ਗਾਵਰਣਂ ਨ ਮਗ੍ਗਾਵਰਣਂ ਹੋਤਿ, ਪਾਕਤਿਕਮੇਵ ਹੋਤੀਤਿ.
ਮਿਚ੍ਛਾਦਿਟ੍ਠਿਕਾਤਿ ਵਿਪਰੀਤਦਸ੍ਸਨਾ. ਮਿਚ੍ਛਾਦਿਟ੍ਠਿਕਮ੍ਮਸਮਾਦਾਨਾਤਿ ਮਿਚ੍ਛਾਦਿਟ੍ਠਿਵਸੇਨ ਸਮਾਦਿਨ੍ਨਨਾਨਾਵਿਧਕਮ੍ਮਾ, ਯੇ ਚ ਮਿਚ੍ਛਾਦਿਟ੍ਠਿਮੂਲਕੇਸੁ ਕਾਯਕਮ੍ਮਾਦੀਸੁ ਅਞ੍ਞੇਪਿ ਸਮਾਦਪੇਨ੍ਤਿ. ਏਤ੍ਥ ਚ ਵਚੀਦੁਚ੍ਚਰਿਤਗ੍ਗਹਣੇਨੇਵ ਅਰਿਯੂਪਵਾਦੇ, ਮਨੋਦੁਚ੍ਚਰਿਤਗ੍ਗਹਣੇਨ ਚ ਮਿਚ੍ਛਾਦਿਟ੍ਠਿਯਾ ਸਙ੍ਗਹਿਤਾਯਪਿ ਇਮੇਸਂ ਦ੍ਵਿਨ੍ਨਂ ਪੁਨਵਚਨਂ ਮਹਾਸਾਵਜ੍ਜਭਾਵਦਸ੍ਸਨਤ੍ਥਨ੍ਤਿ ਵੇਦਿਤਬ੍ਬਂ. ਮਹਾਸਾਵਜ੍ਜੋ ਹਿ ਅਰਿਯੂਪਵਾਦੋ ਆਨਨ੍ਤਰਿਯਸਦਿਸੋ. ਵੁਤ੍ਤਮ੍ਪਿ ਚੇਤਂ –
‘‘ਸੇਯ੍ਯਥਾਪਿ, ਸਾਰਿਪੁਤ੍ਤ, ਭਿਕ੍ਖੁ ਸੀਲਸਮ੍ਪਨ੍ਨੋ ਸਮਾਧਿਸਮ੍ਪਨ੍ਨੋ ਪਞ੍ਞਾਸਮ੍ਪਨ੍ਨੋ ਦਿਟ੍ਠੇਵ ਧਮ੍ਮੇ ਅਞ੍ਞਂ ਆਰਾਧੇਯ੍ਯ, ਏਵਂਸਮ੍ਪਦਮਿਦਂ, ਸਾਰਿਪੁਤ੍ਤ, ਵਦਾਮਿ. ਤਂ ਵਾਚਂ ਅਪ੍ਪਹਾਯ ਤਂ ਚਿਤ੍ਤਂ ਅਪ੍ਪਹਾਯ ਤਂ ਦਿਟ੍ਠਿਂ ਅਪ੍ਪਟਿਨਿਸ੍ਸਜ੍ਜਿਤ੍ਵਾ ਯਥਾਭਤਂ ਨਿਕ੍ਖਿਤ੍ਤੋ ਏਵਂ ਨਿਰਯੇ’’ਤਿ (ਮ. ਨਿ. ੧.੧੪੯).
ਮਿਚ੍ਛਾਦਿਟ੍ਠਿਤੋ ਚ ਮਹਾਸਾਵਜ੍ਜਤਰਂ ਨਾਮ ਅਞ੍ਞਂ ਨਤ੍ਥਿ. ਯਥਾਹ –
‘‘ਨਾਹਂ, ਭਿਕ੍ਖਵੇ, ਅਞ੍ਞਂ ਏਕਧਮ੍ਮਮ੍ਪਿ ਸਮਨੁਪਸ੍ਸਾਮਿ, ਯਂ ਏਵਂਮਹਾਸਾਵਜ੍ਜਂ ਯਥਯਿਦਂ, ਭਿਕ੍ਖਵੇ, ਮਿਚ੍ਛਾਦਿਟ੍ਠਿ. ਮਿਚ੍ਛਾਦਿਟ੍ਠਿਪਰਮਾਨਿ ਭਿਕ੍ਖਵੇ, ਮਹਾਸਾਵਜ੍ਜਾਨੀ’’ਤਿ (ਅ. ਨਿ. ੧.੩੧੦).
ਕਾਯਸ੍ਸ ਭੇਦਾਤਿ ਉਪਾਦਿਨ੍ਨਕ੍ਖਨ੍ਧਪਰਿਚ੍ਚਾਗਾ. ਪਰਂ ਮਰਣਾਤਿ ਤਦਨਨ੍ਤਰਾਭਿਨਿਬ੍ਬਤ੍ਤਕ੍ਖਨ੍ਧਗ੍ਗਹਣੇ. ਅਥ ਵਾ ਕਾਯਸ੍ਸ ਭੇਦਾਤਿ ਜੀਵਿਤਿਨ੍ਦ੍ਰਿਯਸ੍ਸੁਪਚ੍ਛੇਦਾ. ਪਰਂ ਮਰਣਾਤਿ ਚੁਤਿਚਿਤ੍ਤਤੋ ਉਦ੍ਧਂ. ਅਪਾਯਨ੍ਤਿ ਏਵਮਾਦਿ ਸਬ੍ਬਂ ਨਿਰਯਵੇਵਚਨਮੇਵ. ਨਿਰਯੋ ਹਿ ਸਗ੍ਗਮੋਕ੍ਖਹੇਤੁਭੂਤਾ ਪੁਞ੍ਞਸਮ੍ਮਤਾ ਅਯਾ ਅਪੇਤਤ੍ਤਾ, ਸੁਖਾਨਂ ਵਾ ਆਯਸ੍ਸ ਅਭਾਵਾ ਅਪਾਯੋ. ਦੁਕ੍ਖਸ੍ਸ ਗਤਿ ਪਟਿਸਰਣਨ੍ਤਿ ਦੁਗ੍ਗਤਿ, ਦੋਸਬਹੁਲਤਾਯ ਵਾ ਦੁਟ੍ਠੇਨ ਕਮ੍ਮੁਨਾ ਨਿਬ੍ਬਤ੍ਤਾ ਗਤੀਤਿ ਦੁਗ੍ਗਤਿ. ਵਿਵਸਾ ਨਿਪਤਨ੍ਤਿ ਤਤ੍ਥ ਦੁਕ੍ਕਟਕਾਰਿਨੋਤਿ ਵਿਨਿਪਾਤੋ, ਵਿਨਸ੍ਸਨ੍ਤਾ ਵਾ ਏਤ੍ਥ ਨਿਪਤਨ੍ਤਿ ਸਮ੍ਭਿਜ੍ਜਮਾਨਙ੍ਗਪਚ੍ਚਙ੍ਗਾਤਿਪਿ ਵਿਨਿਪਾਤੋ. ਨਤ੍ਥਿ ਏਤ੍ਥ ਅਸ੍ਸਾਦਸਞ੍ਞਿਤੋ ਅਯੋਤਿ ਨਿਰਯੋ.
ਅਥ ਵਾ ਅਪਾਯਗ੍ਗਹਣੇਨ ਤਿਰਚ੍ਛਾਨਯੋਨਿਂ ਦੀਪੇਤਿ, ਤਿਰਚ੍ਛਾਨਯੋਨਿ ਹਿ ਅਪਾਯੋ ਸੁਗਤਿਤੋ ਅਪੇਤਤ੍ਤਾ. ਨ ਦੁਗ੍ਗਤਿ, ਮਹੇਸਕ੍ਖਾਨਂ ਨਾਗਰਾਜਾਦੀਨਂ ਸਮ੍ਭਵਤੋ. ਦੁਗ੍ਗਤਿਗ੍ਗਹਣੇਨ ਪੇਤ੍ਤਿਵਿਸਯਂ ਦੀਪੇਤਿ, ਸੋ ਹਿ ਅਪਾਯੋ ਚੇਵ ਦੁਗ੍ਗਤਿ ਚ ਸੁਖਤੋ ਅਪੇਤਤ੍ਤਾ ਦੁਕ੍ਖਸ੍ਸ ਚ ਗਤਿਭੂਤਤ੍ਤਾ, ਨ ਤੁ ਵਿਨਿਪਾਤੋ, ਅਸੁਰਕਾਯਸਦਿਸਂ ਅਵਿਨਿਪਤਿਤਤ੍ਤਾ. ਵਿਨਿਪਾਤਗ੍ਗਹਣੇਨ ਅਸੁਰਕਾਯਂ ਦੀਪੇਤਿ. ਸੋ ਹਿ ਯਥਾਵੁਤ੍ਤੇਨ ਅਤ੍ਥੇਨ ਅਪਾਯੋ ਚੇਵ ਦੁਗ੍ਗਤਿ ਚ ਸਬ੍ਬਸਮੁਸ੍ਸਯੇਹਿ ਚ ਵਿਨਿਪਤਿਤਤ੍ਤਾ ਵਿਨਿਪਾਤੋਤਿ ਵੁਚ੍ਚਤਿ. ਨਿਰਯਗ੍ਗਹਣੇਨ ਅਵੀਚਿਆਦਿਅਨੇਕਪ੍ਪਕਾਰਂ ਨਿਰਯਮੇਵ ਦੀਪੇਤੀਤਿ. ਉਪਪਨ੍ਨਾਤਿ ਉਪਗਤਾ, ਤਤ੍ਥ ਅਭਿਨਿਬ੍ਬਤ੍ਤਾਤਿ ਅਧਿਪ੍ਪਾਯੋ. ਵੁਤ੍ਤਵਿਪਰਿਯਾਯੇਨ ਸੁਕ੍ਕਪਕ੍ਖੋ ਵੇਦਿਤਬ੍ਬੋ. ਅਯਂ ਪਨ ਵਿਸੇਸੋ – ਤਤ੍ਥ ਸੁਗਤਿਗ੍ਗਹਣੇਨ ਮਨੁਸ੍ਸਗਤਿਪਿ ਸਙ੍ਗਯ੍ਹਤਿ. ਸਗ੍ਗਗ੍ਗਹਣੇਨ ਦੇਵਗਤਿਯੇਵ. ਤਤ੍ਥ ਸੁਨ੍ਦਰਾ ਗਤੀਤਿ ਸੁਗਤਿ. ਰੂਪਾਦੀਹਿ ਵਿਸਯੇਹਿ ਸੁਟ੍ਠੁ ਅਗ੍ਗੋਤਿ ਸਗ੍ਗੋ. ਸੋ ਸਬ੍ਬੋਪਿ ਲੁਜ੍ਜਨਪਲੁਜ੍ਜਨਟ੍ਠੇਨ ਲੋਕੋਤਿ ਅਯਂ ਵਚਨਤ੍ਥੋ. ਇਤਿ ਦਿਬ੍ਬੇਨ ਚਕ੍ਖੁਨਾਤਿਆਦਿ ਸਬ੍ਬਂ ਨਿਗਮਨਵਚਨਂ.
ਏਵਂ ਦਿਬ੍ਬੇਨ ਚਕ੍ਖੁਨਾ ਪਸ੍ਸਤੀਤਿ ਅਯਮੇਤ੍ਥ ਸਙ੍ਖੇਪਤ੍ਥੋ – ਦਿਬ੍ਬਚਕ੍ਖੁਞਾਣਂ ਪਰਿਤ੍ਤਪਚ੍ਚੁਪ੍ਪਨ੍ਨਅਜ੍ਝਤ੍ਤਬਹਿਦ੍ਧਾਰਮ੍ਮਣਵਸੇਨ ਚਤੂਸੁ ਆਰਮ੍ਮਣੇਸੁ ਪਵਤ੍ਤਤਿ. ਯਥਾਕਮ੍ਮੂਪਗਞਾਣਂ ਪਰਿਤ੍ਤਮਹਗ੍ਗਤਾਤੀਤਅਜ੍ਝਤ੍ਤਬਹਿਦ੍ਧਾਰਮ੍ਮਣਵਸੇਨ ਪਞ੍ਚਸੁ ਆਰਮ੍ਮਣੇਸੁ ਪਵਤ੍ਤਤਿ. ਅਨਾਗਤਂਸਞਾਣਂ ਪਰਿਤ੍ਤਮਹਗ੍ਗਤਅਪ੍ਪਮਾਣਮਗ੍ਗਅਨਾਗਤਅਜ੍ਝਤ੍ਤਬਹਿਦ੍ਧਾਨਵਤ੍ਤਬ੍ਬਾਰਮ੍ਮਣਵਸੇਨ ਅਟ੍ਠਸੁ ਆਰਮ੍ਮਣੇਸੁ ਪਵਤ੍ਤਤੀਤਿ.
ਆਕਙ੍ਖਮਾਨੋ ਚ ਭਗਵਾਤਿ ਭਗਵਾ ਇਚ੍ਛਮਾਨੋ. ਏਕਮ੍ਪਿ ਲੋਕਧਾਤੁਂ ਪਸ੍ਸੇਯ੍ਯਾਤਿ ਏਕਂ ਚਕ੍ਕਵਾਲ਼ਂ ਓਲੋਕੇਯ੍ਯ. ਸਹਸ੍ਸਿਮ੍ਪਿ ਚੂਲ਼ਨਿਕਨ੍ਤਿ ਏਤ੍ਥ ਯਾਵਤਾ ਚਨ੍ਦਿਮਸੂਰਿਯਾ ਪਰਿਹਰਨ੍ਤਿ, ਦਿਸਾ ਭਾਨ੍ਤਿ ਵਿਰੋਚਮਾਨਾ, ਤਾਵ ਸਹਸ੍ਸਧਾ ਲੋਕੋ, ਏਸਾ ਸਹਸ੍ਸਿਚੂਲ਼ਨਿਕਾ ਨਾਮ. ਚੂਲ਼ਨਿਕਨ੍ਤਿ ਖੁਦ੍ਦਕਂ. ਦ੍ਵਿਸਹਸ੍ਸਿਮ੍ਪਿ ਮਜ੍ਝਿਮਿਕਂ ਲੋਕਧਾਤੁਨ੍ਤਿ ਏਤ੍ਥ ਸਹਸ੍ਸਚਕ੍ਕਵਾਲ਼ਾਨਂ ਸਹਸ੍ਸਭਾਗੇਨ ਗਣੇਤ੍ਵਾ ਦਸਸਤਸਹਸ੍ਸਚਕ੍ਕਵਾਲ਼ਪਰਿਮਾਣਾ ਦ੍ਵਿਸਹਸ੍ਸੀ ਮਜ੍ਝਿਮਿਕਾ ਲੋਕਧਾਤੁ ਨਾਮ. ਏਤ੍ਤਕੇਨ ਬੁਦ੍ਧਾਨਂ ਜਾਤਿਕ੍ਖੇਤ੍ਤਂ ਨਾਮ ਦਸ੍ਸਿਤਂ. ਬੋਧਿਸਤ੍ਤਾਨਞ੍ਹਿ ਪਚ੍ਛਿਮਭਵੇ ਦੇਵਲੋਕਤੋ ਚਵਿਤ੍ਵਾ ਮਾਤੁਕੁਚ੍ਛਿਯਂ ਪਟਿਸਨ੍ਧਿਗ੍ਗਹਣਦਿਵਸੇ ਚ ਮਾਤੁਕੁਚ੍ਛਿਤੋ ਨਿਕ੍ਖਮਨਦਿਵਸੇ ਚ ਮਹਾਭਿਨਿਕ੍ਖਮਨਦਿਵਸੇ ਚ ਸਮ੍ਬੋਧਿਧਮ੍ਮਚਕ੍ਕਪਵਤ੍ਤਨਆਯੁਸਙ੍ਖਾਰੋਸ੍ਸਜ੍ਜਨਪਰਿਨਿਬ੍ਬਾਨਦਿਵਸੇਸੁ ਚ ਏਤ੍ਤਕਂ ਠਾਨਂ ਕਮ੍ਪਤਿ.
ਤਿਸਹਸ੍ਸਿਮ੍ਪਿ. ਮਹਾਸਹਸ੍ਸਿਮ੍ਪਿ ਲੋਕਧਾਤੁਨ੍ਤਿ ਸਹਸ੍ਸਿਤੋ ਪਟ੍ਠਾਯ ਤਤਿਯਾਤਿ ਤਿਸਹਸ੍ਸੀ, ਪਠਮਸਹਸ੍ਸਿਂ ਸਹਸ੍ਸਧਾ ਕਤ੍ਵਾ ਗਣਿਤਂ ਮਜ੍ਝਿਮਿਕਂ ਸਹਸ੍ਸਧਾ ਕਤ੍ਵਾ ਗਣਿਤਤ੍ਤਾ ਮਹਨ੍ਤੇਹਿ ਸਹਸ੍ਸੇਹਿ ਗਣਿਤਾਤਿ ਮਹਾਸਹਸ੍ਸੀ. ਏਤ੍ਤਾਵਤਾ ਕੋਟਿਸਤਸਹਸ੍ਸਚਕ੍ਕਵਾਲ਼ਪਰਿਮਾਣੋ ਲੋਕੋ ਦਸ੍ਸਿਤੋ ਹੋਤਿ. ਗਣਕਪੁਤ੍ਤਤਿਸ੍ਸਤ੍ਥੇਰੋ ਪਨ ਏਵਮਾਹ – ‘‘ਨ ਹਿ ਤਿਸਹਸ੍ਸਿਮਹਾਸਹਸ੍ਸਿਲੋਕਧਾਤੁਯਾ ਏਤਂ ਪਰਿਮਾਣਂ. ਇਦਞ੍ਹਿ ਆਚਰਿਯਾਨਂ ਸਜ੍ਝਾਯਮੂਲਕਂ ਵਾਚਾਯ ਪਰਿਹੀਨਟ੍ਠਾਨਂ, ਦਸਕੋਟਿਸਤਸਹਸ੍ਸਚਕ੍ਕਵਾਲ਼ਪਰਿਮਾਣਂ ਪਨ ਠਾਨਂ ਤਿਸਹਸ੍ਸਿਮਹਾਸਹਸ੍ਸਿਲੋਕਧਾਤੁ ਨਾਮਾ’’ਤਿ. ਏਤ੍ਤਾਵਤਾ ਹਿ ਭਗਵਤੋ ਆਣਾਕ੍ਖੇਤ੍ਤਂ ਨਾਮ ਦਸ੍ਸਿਤਂ. ਏਤਸ੍ਮਿਞ੍ਹਿ ਅਨ੍ਤਰੇ ਆਟਾਨਾਟਿਯਪਰਿਤ੍ਤ- (ਦੀ. ਨਿ. ੩.੨੭੫ ਆਦਯੋ) ਇਸਿਗਿਲਿਪਰਿਤ੍ਤ- (ਮ. ਨਿ. ੩.੧੩੩ ਆਦਯੋ) ਧਜਗ੍ਗਪਰਿਤ੍ਤ- (ਸਂ. ਨਿ. ੧.੨੪੯) ਬੋਜ੍ਝਙ੍ਗਪਰਿਤ੍ਤਖਨ੍ਧਪਰਿਤ੍ਤ- (ਅ. ਨਿ. ੪.੬੭) ਮੋਰਪਰਿਤ੍ਤ- (ਜਾ. ੧.੨.੧੭-੧੮) ਮੇਤ੍ਤਪਰਿਤ੍ਤ- (ਖੁ. ਪਾ. ੯.੧ ਆਦਯੋ; ਸੁ. ਨਿ. ੧੪੩ ਆਦਯੋ) ਰਤਨਪਰਿਤ੍ਤਾਨਂ (ਖੁ. ਪਾ. ੬.੧ ਆਦਯੋ; ਸੁ. ਨਿ. ੨੨੪ ਆਦਯੋ) ਆਣਾ ਫਰਤਿ.
ਯਾਵਤਕਂ ਵਾ ਪਨ ਆਕਙ੍ਖੇਯ੍ਯਾਤਿ ਯਤ੍ਤਕਂ ਵਾ ਇਚ੍ਛੇਯ੍ਯ. ਇਮਿਨਾ ਵਿਸਯਕ੍ਖੇਤ੍ਤਂ ਦਸ੍ਸਿਤਂ. ਬੁਦ੍ਧਾਨਞ੍ਹਿ ਵਿਸਯਕ੍ਖੇਤ੍ਤਸ੍ਸ ਪਮਾਣਪਰਿਚ੍ਛੇਦੋ ਨਾਮ ਨਤ੍ਥਿ, ਨਤ੍ਥਿਕਭਾਵੇ ਚਸ੍ਸ ਇਮਂ ਉਪਮਂ ਆਹਰਨ੍ਤਿ – ਕੋਟਿਸਤਸਹਸ੍ਸਚਕ੍ਕਵਾਲ਼ਮ੍ਹਿ ਯਾਵ ਬ੍ਰਹ੍ਮਲੋਕਾ ਸਾਸਪੇਹਿ ਪੂਰੇਤ੍ਵਾ ਸਚੇ ਕੋਚਿ ਪੁਰਤ੍ਥਿਮਾਯ ਦਿਸਾਯ ਏਕਚਕ੍ਕਵਾਲ਼ੇ ਏਕਂ ਸਾਸਪਂ ਪਕ੍ਖਿਪਨ੍ਤੋ ਆਗਚ੍ਛੇਯ੍ਯ, ਸਬ੍ਬੇਪਿ ਤੇ ਸਾਸਪਾ ਪਰਿਕ੍ਖਯਂ ਗਚ੍ਛੇਯ੍ਯੁਂ. ਨ ਤ੍ਵੇਵ ਪੁਰਤ੍ਥਿਮਾਯ ਦਿਸਾਯ ਚਕ੍ਕਵਾਲ਼ਾਨਿ. ਦਕ੍ਖਿਣਾਦੀਸੁਪਿ ਏਸੇਵ ਨਯੋ. ਤਤ੍ਥ ਬੁਦ੍ਧਾਨਂ ਅਵਿਸਯੋ ਨਾਮ ਨਤ੍ਥਿ. ਤਾਵਤਕਂ ਪਸ੍ਸੇਯ੍ਯਾਤਿ ਤਤ੍ਤਕਂ ਓਲੋਕੇਯ੍ਯ. ਏਵਂ ਪਰਿਸੁਦ੍ਧਂ ਭਗਵਤੋ ਦਿਬ੍ਬਚਕ੍ਖੂਤਿ ਦਿਬ੍ਬਚਕ੍ਖੁਕਥਂ ਨਿਟ੍ਠਾਪੇਸਿ.
ਕਥਂ ਭਗਵਾ ਪਞ੍ਞਾਚਕ੍ਖੁਨਾਪਿ ਵਿਵਟਚਕ੍ਖੂਤਿ ਕੇਨਪ੍ਪਕਾਰੇਨ ਪਞ੍ਞਾਚਕ੍ਖੁਨਾ ਅਪਿਹਿਤਚਕ੍ਖੁ? ਮਹਾਪਞ੍ਞੋ ਪੁਥੁਪਞ੍ਞੋਤਿਆਦਿਕਂ ਤਤ੍ਥ ਅਤਿਰੋਚਤਿ ਯਦਿਦਂ ਪਞ੍ਞਾਯਾਤਿ ਪਰਿਯੋਸਾਨਂ ਹੇਟ੍ਠਾ ਵੁਤ੍ਤਤ੍ਥਮੇਵ.
ਬੁਦ੍ਧਚਕ੍ਖੁਨਾਤਿ ਇਨ੍ਦ੍ਰਿਯਪਰੋਪਰਿਯਤ੍ਤਞਾਣੇਨ ਚ ਆਸਯਾਨੁਸਯਞਾਣੇਨ ਚ. ਇਮੇਸਂ ਦ੍ਵਿਨ੍ਨਂ ਞਾਣਾਨਂ ਬੁਦ੍ਧਚਕ੍ਖੂਤਿ ਨਾਮਂ, ਸਬ੍ਬਞ੍ਞੁਤਞ੍ਞਾਣਸ੍ਸ ਸਮਨ੍ਤਚਕ੍ਖੂਤਿ, ਤਿਣ੍ਣਂ ਮਗ੍ਗਞਾਣਾਨਂ ਧਮ੍ਮਚਕ੍ਖੂਤਿ. ਲੋਕਂ ਵੋਲੋਕੇਨ੍ਤੋ ਅਦ੍ਦਸ ਸਤ੍ਤੇਤਿ ਸਤ੍ਤੇ ਅਦ੍ਦਕ੍ਖਿ. ਅਪ੍ਪਰਜਕ੍ਖੇਤਿਆਦੀਸੁ ਯੇਸਂ ਵੁਤ੍ਤਨਯੇਨੇਵ ਪਞ੍ਞਾਚਕ੍ਖੁਮ੍ਹਿ ਰਾਗਾਦਿਰਜਂ ਅਪ੍ਪਂ, ਤੇ ਅਪ੍ਪਰਜਕ੍ਖਾ. ਯੇਸਂ ਤਂ ਮਹਨ੍ਤਂ, ਤੇ ਮਹਾਰਜਕ੍ਖਾ. ਯੇਸਂ ਸਦ੍ਧਾਦੀਨਿ ਇਨ੍ਦ੍ਰਿਯਾਨਿ ਤਿਕ੍ਖਾਨਿ, ਤੇ ਤਿਕ੍ਖਿਨ੍ਦ੍ਰਿਯਾ. ਯੇਸਂ ਤਾਨਿ ਮੁਦੂਨਿ, ਤੇ ਮੁਦਿਨ੍ਦ੍ਰਿਯਾ. ਯੇਸਂ ਤੇਯੇਵ ਸਦ੍ਧਾਦਯੋ ਆਕਾਰਾ ਸੁਨ੍ਦਰਾ, ਤੇ ਸ੍ਵਾਕਾਰਾ. ਯੇ ਕਥਿਤਕਾਰਣਂ ਸਲ੍ਲਕ੍ਖੇਨ੍ਤਿ, ਸੁਖੇਨ ਸਕ੍ਕਾ ਹੋਨ੍ਤਿ ਵਿਞ੍ਞਾਪੇਤੁਂ ਤੇ ਸੁਵਿਞ੍ਞਾਪਯਾ. ਯੇ ਪਰਲੋਕਞ੍ਚੇਵ ਵਜ੍ਜਞ੍ਚ ਭਯਤੋ ਪਸ੍ਸਨ੍ਤਿ, ਤੇ ਪਰਲੋਕਵਜ੍ਜਭਯਦਸ੍ਸਾਵਿਨੋ ਨਾਮ.
ਉਪ੍ਪਲਿਨਿਯਨ੍ਤਿ ਉਪ੍ਪਲਵਨੇ. ਇਤਰੇਸੁਪਿ ਏਸੇਵ ਨਯੋ. ਅਨ੍ਤੋਨਿਮੁਗ੍ਗਪੋਸੀਨੀਤਿ ਯਾਨਿ ਅਨ੍ਤੋਨਿਮੁਗ੍ਗਾਨੇਵ ਪੋਸਿਯਨ੍ਤਿ. ਉਦਕਂ ਅਚ੍ਚੁਗ੍ਗਮ੍ਮ ਤਿਟ੍ਠਨ੍ਤੀਤਿ ਉਦਕਂ ਅਤਿਕ੍ਕਮਿਤ੍ਵਾ ਤਿਟ੍ਠਨ੍ਤਿ. ਤਤ੍ਥ ਯਾਨਿ ਯਾਨਿ ਅਚ੍ਚੁਗ੍ਗਮ੍ਮ ਠਿਤਾਨਿ, ਤਾਨਿ ਤਾਨਿ ਸੂਰਿਯਰਸ੍ਮਿਸਮ੍ਫਸ੍ਸਂ ਆਗਮਯਮਾਨਾਨਿ ਠਿਤਾਨਿ ਅਜ੍ਜ ਪੁਪ੍ਫਨਕਾਨਿ. ਯਾਨਿ ਸਮੋਦਕਂ ਠਿਤਾਨਿ, ਤਾਨਿ ਸ੍ਵੇ ਪੁਪ੍ਫਨਕਾਨਿ. ਯਾਨਿ ਉਦਕਾ ਅਨੁਗ੍ਗਤਾਨਿ ਅਨ੍ਤੋਨਿਮੁਗ੍ਗਪੋਸੀਨਿ, ਤਾਨਿ ਤਤਿਯਦਿਵਸੇਵ ਪੁਪ੍ਫਨਕਾਨਿ. ਉਦਕਾ ਪਨ ਅਨੁਗ੍ਗਤਾਨਿ ਅਞ੍ਞਾਨਿਪਿ ਸਰੋਗਉਪ੍ਪਲਾਨਿ ਨਾਮ ਅਤ੍ਥਿ, ਯਾਨਿ ਨੇਵ ਪੁਪ੍ਫਿਸ੍ਸਨ੍ਤਿ, ਮਚ੍ਛਕਚ੍ਛਪਭਕ੍ਖਾਨੇਵ ਭਵਿਸ੍ਸਨ੍ਤਿ, ਤਾਨਿ ਪਾਲ਼ਿਂ ਨਾਰੂਲ਼੍ਹਾਨਿ, ਆਹਰਿਤ੍ਵਾ ਪਨ ਦੀਪੇਤਬ੍ਬਾਨੀਤਿ ਦੀਪਿਤਾਨਿ.
ਯਥੇਵ ਹਿ ਤਾਨਿ ਚਤੁਬ੍ਬਿਧਪੁਪ੍ਫਾਨਿ, ਏਵਮੇਵ ਉਗ੍ਘਟਿਤਞ੍ਞੂ ਵਿਪਞ੍ਚਿਤਞ੍ਞੂ ਨੇਯ੍ਯੋ ਪਦਪਰਮੋਤਿ ਚਤ੍ਤਾਰੋ ਪੁਗ੍ਗਲਾ. ਯਸ੍ਸ ਪੁਗ੍ਗਲਸ੍ਸ ਉਦਾਹਟਵੇਲਾਯ ਧਮ੍ਮਾਭਿਸਮਯੋ ਹੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਉਗ੍ਘਟਿਤਞ੍ਞੂ. ਯਸ੍ਸ ਪੁਗ੍ਗਲਸ੍ਸ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥੇ ਵਿਭਜੀਯਮਾਨੇ ਧਮ੍ਮਾਭਿਸਮਯੋ ਹੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਵਿਪਞ੍ਚਿਤਞ੍ਞੂ. ਯਸ੍ਸ ਪੁਗ੍ਗਲਸ੍ਸ ਉਦ੍ਦੇਸਤੋ ਪਰਿਪੁਚ੍ਛਤੋ ਯੋਨਿਸੋ ਮਨਸਿਕਰੋਤੋ ਕਲ੍ਯਾਣਮਿਤ੍ਤੇ ਸੇਵਤੋ ਭਜਤੋ ਪਯਿਰੁਪਾਸਤੋ ਧਮ੍ਮਾਭਿਸਮਯੋ ਹੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਨੇਯ੍ਯੋ. ਯਸ੍ਸ ਪੁਗ੍ਗਲਸ੍ਸ ਬਹੁਮ੍ਪਿ ਸੁਣਤੋ ਬਹੁਮ੍ਪਿ ਭਣਤੋ ਬਹੁਮ੍ਪਿ ਧਾਰਯਤੋ ਬਹੁਮ੍ਪਿ ਵਾਚਤੋ ਨ ਤਾਯ ਜਾਤਿਯਾ ਧਮ੍ਮਾਭਿਸਮਯੋ ਹੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਪਦਪਰਮੋ. ਤਤ੍ਥ ਭਗਵਾ ਉਪ੍ਪਲਵਨਾਦਿਸਦਿਸਂ ਦਸਸਹਸ੍ਸਿਲੋਕਧਾਤੁਂ ਓਲੋਕੇਨ੍ਤੋ ਅਜ੍ਜ ਪੁਪ੍ਫਨਕਾਨਿ ਉਗ੍ਘਟਿਤਞ੍ਞੂ, ਸ੍ਵੇ ਪੁਪ੍ਫਨਕਾਨਿ ਵਿਪਞ੍ਚਿਤਞ੍ਞੂਤਿ ਏਵਂ ਸਬ੍ਬਾਕਾਰਤੋ ਚ ਅਦ੍ਦਸ. ਤਤ੍ਥ ਤਿਣ੍ਣਂ ਪੁਗ੍ਗਲਾਨਂ ਇਮਸ੍ਮਿਂਯੇਵ ਅਤ੍ਤਭਾਵੇ ਭਗਵਤੋ ਧਮ੍ਮਦੇਸਨਾ ਅਤ੍ਥਂ ਸਾਧੇਤਿ, ਪਦਪਰਮਾਨਂ ਅਨਾਗਤਤ੍ਥਾਯ ਵਾਸਨਾ ਹੋਤਿ.
ਰਾਗਚਰਿਤੋਤਿਆਦੀਸੁ ਰਜ੍ਜਨਵਸੇਨ ਆਰਮ੍ਮਣੇ ਚਰਣਂ ਏਤਸ੍ਸ ਅਤ੍ਥੀਤਿ ਰਾਗਚਰਿਤੋ. ਦੁਸ੍ਸਨਵਸੇਨ ਆਰਮ੍ਮਣੇ ਚਰਣਂ ਏਤਸ੍ਸ ਅਤ੍ਥੀਤਿ ਦੋਸਚਰਿਤੋ. ਮੁਯ੍ਹਨਵਸੇਨ ਆਰਮ੍ਮਣੇ ਚਰਣਂ ਏਤਸ੍ਸ ਅਤ੍ਥੀਤਿ ਮੋਹਚਰਿਤੋ. ਵਿਤਕ੍ਕਨਵਸੇਨ ਊਹਨਵਸੇਨ ਆਰਮ੍ਮਣੇ ਚਰਣਂ ਏਤਸ੍ਸ ਅਤ੍ਥੀਤਿ ਵਿਤਕ੍ਕਚਰਿਤੋ. ਓਕਪ੍ਪਨਸਦ੍ਧਾਵਸੇਨ ਆਰਮ੍ਮਣੇ ਚਰਣਂ ਏਤਸ੍ਸ ਅਤ੍ਥੀਤਿ ਸਦ੍ਧਾਚਰਿਤੋ. ਞਾਣਮੇਵ ਚਰਣਂ, ਞਾਣੇਨ ਵਾ ਚਰਣਂ, ਞਾਣਸ੍ਸ ਵਾ ਚਰਣਂ, ਞਾਣਤੋ ਵਾ ਚਰਣਂ ਏਤਸ੍ਸ ਅਤ੍ਥੀਤਿ ਞਾਣਚਰਿਤੋ. ਰਾਗਚਰਿਤਸ੍ਸਾਤਿ ਰਾਗੁਸ੍ਸਦਸ੍ਸ ਰਾਗਬਹੁਲਸ੍ਸ. ਪਰਤੋਪਿ ਏਸੇਵ ਨਯੋ.
ਅਸੁਭਕਥਂ ਕਥੇਤੀਤਿ ਉਦ੍ਧੁਮਾਤਕਾਦਿਦਸਵਿਧਂ ਅਸੁਭਪਟਿਸਂਯੁਤ੍ਤਕਥਂ ਆਚਿਕ੍ਖਤਿ. ਵੁਤ੍ਤਞ੍ਹੇਤਂ – ‘‘ਅਸੁਭਾ ਭਾਵੇਤਬ੍ਬਾ ਰਾਗਸ੍ਸ ਪਹਾਨਾਯਾ’’ਤਿ (ਅ. ਨਿ. ੯.੧). ਮੇਤ੍ਤਾਭਾਵਨਂ ਆਚਿਕ੍ਖਤੀਤਿ ਮੇਤ੍ਤਾਭਾਵਨਂ ਚਿਤ੍ਤਸਿਨੇਹਨਂ ਕਥੇਤਿ. ਵੁਤ੍ਤਞ੍ਹੇਤਂ – ‘‘ਮੇਤ੍ਤਾ ਭਾਵੇਤਬ੍ਬਾ ਬ੍ਯਾਪਾਦਸ੍ਸ ਪਹਾਨਾਯਾ’’ਤਿ. ਉਦ੍ਦੇਸੇਤਿ ਸਜ੍ਝਾਯਨੇ. ਪਰਿਪੁਚ੍ਛਾਯਾਤਿ ਅਟ੍ਠਕਥਾਯ. ਕਾਲੇਨ ਧਮ੍ਮਸ੍ਸਵਨੇਤਿ ਯੁਤ੍ਤਪ੍ਪਤ੍ਤਕਾਲੇ ਉਤ੍ਤਰਿ ਪਰਿਯਤ੍ਤਿਧਮ੍ਮਸ੍ਸਵਨੇ. ਧਮ੍ਮਸਾਕਚ੍ਛਾਯਾਤਿ ਅਞ੍ਞੇਹਿ ਸਦ੍ਧਿਂ ਸਾਕਚ੍ਛਾਯ. ਗਰੁਸਂਵਾਸੇਤਿ ਗਰੂਨਂ ਪਯਿਰੁਪਾਸਨੇ. ਨਿਵੇਸੇਤੀਤਿ ਆਚਰਿਯਾਨਂ ਸਨ੍ਤਿਕੇ ਪਤਿਟ੍ਠਾਪੇਤਿ. ਆਨਾਪਾਨਸ੍ਸਤਿਂ ਆਚਿਕ੍ਖਤੀਤਿ ਆਨਾਪਾਨਸ੍ਸਤਿਸਮ੍ਪਯੁਤ੍ਤਕਮ੍ਮਟ੍ਠਾਨਂ ਕਥੇਤਿ. ਵੁਤ੍ਤਞ੍ਹੇਤਂ – ‘‘ਆਨਾਪਾਨਸ੍ਸਤਿ ਭਾਵੇਤਬ੍ਬਾ ਵਿਤਕ੍ਕੁਪਚ੍ਛੇਦਾਯਾ’’ਤਿ (ਅ. ਨਿ. ੯.੧). ਪਸਾਦਨੀਯਂ ਨਿਮਿਤ੍ਤਂ ਆਚਿਕ੍ਖਤੀਤਿ ਚੂਲ਼ਵੇਦਲ੍ਲ- (ਮ. ਨਿ. ੧.੪੬੦ ਆਦਯੋ) ਮਹਾਵੇਦਲ੍ਲਾ- (ਮ. ਨਿ. ੧.੪੪੯ ਆਦਯੋ) ਦਿਪਸਾਦਜਨਕਂ ਸੁਤ੍ਤਂ ਕਥੇਤਿ. ਬੁਦ੍ਧਸੁਬੋਧਿਨ੍ਤਿ ਬੁਦ੍ਧਸ੍ਸ ਭਗਵਤੋ ਬੁਦ੍ਧਤ੍ਤਪਟਿਵੇਧਂ. ਧਮ੍ਮਸੁਧਮ੍ਮਤਨ੍ਤਿ ਨਵਵਿਧਲੋਕੁਤ੍ਤਰਧਮ੍ਮਸ੍ਸ ਸ੍ਵਾਕ੍ਖਾਤਤਂ. ਸਙ੍ਘਸੁਪ੍ਪਟਿਪਤ੍ਤਿਨ੍ਤਿ ਅਟ੍ਠਵਿਧਅਰਿਯਸਙ੍ਘਸ੍ਸ ਸੁਪ੍ਪਟਿਪਨ੍ਨਤਾਦਿਸੁਟ੍ਠੁਪਟਿਪਤ੍ਤਿਂ. ਸੀਲਾਨਿ ਚ ਅਤ੍ਤਨੋਤਿ ਅਤ੍ਤਨੋ ਸਨ੍ਤਕਸੀਲਾਨਿ ਚ. ਆਚਿਕ੍ਖਤਿ ਵਿਪਸ੍ਸਨਾਨਿਮਿਤ੍ਤਨ੍ਤਿ ਉਦਯਬ੍ਬਯਾਦਿਪਟਿਸਂਯੁਤ੍ਤਂ ਕਥੇਤਿ. ਅਨਿਚ੍ਚਾਕਾਰਨ੍ਤਿ ਹੁਤ੍ਵਾ ਅਭਾਵਾਕਾਰਂ. ਦੁਕ੍ਖਾਕਾਰਨ੍ਤਿ ਉਦਯਬ੍ਬਯਪਟਿਪੀਲ਼ਨਾਕਾਰਂ. ਅਨਤ੍ਤਾਕਾਰਨ੍ਤਿ ਅਵਸਵਤ੍ਤਨਾਕਾਰਂ.
ਸੇਲੇ ਯਥਾ ਪਬ੍ਬਤਮੁਦ੍ਧਨਿਟ੍ਠਿਤੋਤਿ ਸੇਲਮਯੇ ਏਕਗ੍ਘਨੇ ਪਬ੍ਬਤਮੁਦ੍ਧਨਿ ਠਿਤੋਵ, ਨ ਹਿ ਤਤ੍ਥ ਠਿਤਸ੍ਸ ਦਸ੍ਸਨਤ੍ਥਂ ਅਭਿਮੁਖੇ ਗੀਵੁਕ੍ਖਿਪਨਪਸਾਰਣਾਦਿਕਿਚ੍ਚਂ ਅਤ੍ਥਿ. ਤਥੂਪਮਨ੍ਤਿ ਤਪ੍ਪਟਿਭਾਗਂ ਸੇਲਪਬ੍ਬਤੂਪਮਂ. ਅਯਂ ਪਨੇਤ੍ਥ ਸਙ੍ਖੇਪਤ੍ਥੋ – ਯਥਾ ਸੇਲਪਬ੍ਬਤਮੁਦ੍ਧਨ੍ਤਿ ਠਿਤੋਵ ਚਕ੍ਖੁਨਾ ਪੁਰਿਸੋ ਸਮਨ੍ਤਤੋ ਜਨਤਂ ਪਸ੍ਸੇਯ੍ਯ. ਸੁਮੇਧ ਸੁਨ੍ਦਰਪਞ੍ਞ ਸਬ੍ਬਞ੍ਞੁਤਞ੍ਞਾਣੇਨ ਸਮਨ੍ਤਚਕ੍ਖੁ ਭਗਵਾ ਧਮ੍ਮਮਯਂ ਪਞ੍ਞਾਮਯਂ ਪਾਸਾਦਮਾਰੁਯ੍ਹ ਸਯਂ ਅਪੇਤਸੋਕੋ ਸੋਕਾਵਤਿਣ੍ਣਂ ਜਾਤਿਜਰਾਭਿਭੂਤਞ੍ਚ ਜਨਤਂ ਅਵੇਕ੍ਖਸ੍ਸੁ ਉਪਧਾਰਯਤੁ ਉਪਪਰਿਕ੍ਖਤੁ.
ਅਯਂ ਪਨੇਤ੍ਥ ਅਧਿਪ੍ਪਾਯੋ – ਯਥਾ ਹਿ ਪਬ੍ਬਤਪਾਦਸਾਮਨ੍ਤਾ ਮਹਨ੍ਤਂ ਖੇਤ੍ਤਂ ਕਤ੍ਵਾ ਤਤ੍ਥ ਕੇਦਾਰਪਾਲ਼ੀਸੁ ਕੁਟਿਯੋ ਕਤ੍ਵਾ ਰਤ੍ਤਿਂ ਅਗ੍ਗਿਂ ਜਾਲੇਯ੍ਯ, ਚਤੁਰਙ੍ਗਸਮਨ੍ਨਾਗਤਞ੍ਚ ਅਨ੍ਧਕਾਰਂ ਅਸ੍ਸ, ਅਥ ਤਸ੍ਸ ਪਬ੍ਬਤਸ੍ਸ ਮਤ੍ਥਕੇ ਠਤ੍ਵਾ ਚਕ੍ਖੁਮਤੋ ਪੁਰਿਸਸ੍ਸ ਭੂਮਿਂ ਓਲੋਕਯਤੋ ਨੇਵ ਖੇਤ੍ਤਂ ਨ ਕੇਦਾਰਪਾਲ਼ਿਯੋ ਨ ਕੁਟਿਯੋ ਨ ਤਤ੍ਥ ਸਯਿਤਮਨੁਸ੍ਸਾ ਪਞ੍ਞਾਯੇਯ੍ਯੁਂ, ਕੁਟਿਕਾਸੁ ਪਨ ਅਗ੍ਗਿਜਾਲਮਤ੍ਤਮੇਵ ਪਞ੍ਞਾਯੇਯ੍ਯ. ਏਵਂ ਧਮ੍ਮਪਾਸਾਦਂ ਆਰੁਯ੍ਹ ਸਤ੍ਤਕਾਯਂ ਓਲੋਕਯਤੋ ਤਥਾਗਤਸ੍ਸ ਯੇ ਤੇ ਅਕਤਕਲ੍ਯਾਣਾ ਸਤ੍ਤਾ, ਤੇ ਏਕਵਿਹਾਰੇ ਦਕ੍ਖਿਣਜਾਣੁਪਸ੍ਸੇ ਨਿਸਿਨ੍ਨਾਪਿ ਬੁਦ੍ਧਚਕ੍ਖੁਸ੍ਸ ਆਪਾਥਂ ਨਾਗਚ੍ਛਨ੍ਤਿ, ਰਤ੍ਤਿਂ ਖਿਤ੍ਤਸਰਾ ਵਿਯ ਹੋਨ੍ਤਿ. ਯੇ ਪਨ ਕਤਕਲ੍ਯਾਣਾ ਵੇਨੇਯ੍ਯਪੁਗ੍ਗਲਾ, ਤੇ ਏਵਸ੍ਸ ਦੂਰੇਪਿ ਠਿਤਾ ਆਪਾਥਂ ਗਚ੍ਛਨ੍ਤਿ, ਤੇ ਏਵ ਅਗ੍ਗਿ ਵਿਯ ਹਿਮਵਨ੍ਤਪਬ੍ਬਤੋ ਵਿਯ ਚ. ਵੁਤ੍ਤਮ੍ਪਿ ਚੇਤਂ –
‘‘ਦੂਰੇ ਸਨ੍ਤੋ ਪਕਾਸੇਨ੍ਤਿ, ਹਿਮਵਨ੍ਤੋਵ ਪਬ੍ਬਤੋ;
ਅਸਨ੍ਤੇਤ੍ਥ ਨ ਦਿਸ੍ਸਨ੍ਤਿ, ਰਤ੍ਤਿਂ ਖਿਤ੍ਤਾ ਯਥਾ ਸਰਾ’’ਤਿ. (ਧ. ਪ. ੩੦੪; ਨੇਤ੍ਤਿ. ੧੧);
ਸਬ੍ਬਞ੍ਞੁਤਞ੍ਞਾਣਨ੍ਤਿ ਏਤ੍ਥ ਪਞ੍ਚਨੇਯ੍ਯਪਥਪ੍ਪਭੇਦਂ ਸਬ੍ਬਂ ਅਞ੍ਞਾਸੀਤਿ ਸਬ੍ਬਞ੍ਞੂ. ਸਙ੍ਖਤਾਸਙ੍ਖਤਾਦਿਭੇਦਾ ਸਬ੍ਬਧਮ੍ਮਾ ਹਿ ਸਙ੍ਖਾਰੋ ਵਿਕਾਰੋ ਲਕ੍ਖਣਂ ਨਿਬ੍ਬਾਨਂ ਪਞ੍ਞਤ੍ਤੀਤਿ ਪਞ੍ਚੇਵ ਨੇਯ੍ਯਪਥਾ ਹੋਨ੍ਤਿ. ਸਬ੍ਬਞ੍ਞੁਸ੍ਸ ਭਾਵੋ ਸਬ੍ਬਞ੍ਞੁਤਾ, ਸਬ੍ਬਞ੍ਞੁਤਾ ਏਵ ਞਾਣਂ ‘‘ਸਬ੍ਬਞ੍ਞੁਤਾਞਾਣ’’ਨ੍ਤਿ ਵਤ੍ਤਬ੍ਬੇ ‘‘ਸਬ੍ਬਞ੍ਞੁਤਞ੍ਞਾਣ’’ਨ੍ਤਿ ਵੁਤ੍ਤਂ. ਸਬ੍ਬਞ੍ਞੂਤਿ ਚ ਕਮਸਬ੍ਬਞ੍ਞੂ ਸਕਿਂਸਬ੍ਬਞ੍ਞੂ ਸਤਤਸਬ੍ਬਞ੍ਞੂ ਸਤ੍ਤਿਸਬ੍ਬਞ੍ਞੂ ਞਾਤਸਬ੍ਬਞ੍ਞੂਤਿ ਪਞ੍ਚਵਿਧਾ ਸਬ੍ਬਞ੍ਞੁਨੋ ਸਿਯੁਂ. ਤੇਸੁ ਕਮੇਨ ਸਬ੍ਬਜਾਨਨਕਾਲਾਸਮ੍ਭਵਤੋ ਕਮਸਬ੍ਬਞ੍ਞੁਤਾ ਨ ਹੋਤਿ, ਸਕਿਂ ਸਬ੍ਬਾਰਮ੍ਮਣਗ੍ਗਹਣਾਭਾਵਤੋ ਸਕਿਂਸਬ੍ਬਞ੍ਞੁਤਾ ਨ ਹੋਤਿ, ਚਕ੍ਖੁਵਿਞ੍ਞਾਣਾਦੀਨਂ ਯਥਾਰਮ੍ਮਣਚਿਤ੍ਤਸਮ੍ਭਵਤੋ ਭਵਙ੍ਗਚਿਤ੍ਤਵਿਰੋਧਤੋ ਯੁਤ੍ਤਿਅਭਾਵਤੋ ਚ ਸਤਤਸਬ੍ਬਞ੍ਞੁਤਾ ਨ ਹੋਤਿ, ਪਰਿਸੇਸਤੋ ਸਬ੍ਬਜਾਨਨਸਮਤ੍ਥਤਾਯ ਸਤ੍ਤਿਸਬ੍ਬਞ੍ਞੁਤਾ ਵਾ ਸਿਯਾ, ਵਿਦਿਤਸਬ੍ਬਧਮ੍ਮਤ੍ਤਾ ਞਾਤਸਬ੍ਬਞ੍ਞੁਤਾ ਵਾ, ਸਤ੍ਤਿਸਬ੍ਬਞ੍ਞੁਨੋ ਸਬ੍ਬਜਾਨਨਤ੍ਤਂ ਨਤ੍ਥੀਤਿ ਤਮ੍ਪਿ ਨ ਯੁਜ੍ਜਤਿ, ‘‘ਨ ਤਸ੍ਸ ਅਦਿਟ੍ਠਮਿਧਤ੍ਥਿ ਕਿਞ੍ਚਿ…ਪੇ… ਸਮਨ੍ਤਚਕ੍ਖੂ’’ਤਿ ਵੁਤ੍ਤਤ੍ਤਾ ਞਾਤਸਬ੍ਬਞ੍ਞੁਤਾ ਏਵ ਯੁਜ੍ਜਤਿ. ਏਵਞ੍ਹਿ ਸਤਿ ਕਿਚ੍ਚਤੋ ਅਸਮ੍ਮੋਹਤੋ ਕਾਰਣਸਿਦ੍ਧਿਤੋ ਆਵਜ੍ਜਨਪਟਿਬਦ੍ਧਤੋ ਸਬ੍ਬਞ੍ਞੁਤਮੇਵ ਹੋਤੀਤਿ. ਤੇਨ ਞਾਣੇਨਾਤਿ ਤੇਨ ਸਬ੍ਬਜਾਨਨਞਾਣੇਨ.
ਪੁਨ ਅਪਰੇਨ ਪਰਿਯਾਯੇਨ ਸਬ੍ਬਞ੍ਞੁਭਾਵਸਾਧਨਤ੍ਥਂ ‘‘ਨ ਤਸ੍ਸਾ’’ਤਿ ਗਾਥਮਾਹ. ਤਤ੍ਥ ਨ ਤਸ੍ਸ ਅਦ੍ਦਿਟ੍ਠਮਿਧਤ੍ਥਿ ਕਿਞ੍ਚੀਤਿ ਤਸ੍ਸ ਤਥਾਗਤਸ੍ਸ ਇਧ ਇਮਸ੍ਮਿਂ ਤੇਧਾਤੁਕੇ ਲੋਕੇ ਇਮਸ੍ਮਿਂ ਪਚ੍ਚੁਪ੍ਪਨ੍ਨਕਾਲੇ ਵਾ ਪਞ੍ਞਾਚਕ੍ਖੁਨਾ ਅਦਿਟ੍ਠਂ ਨਾਮ ਕਿਞ੍ਚਿ ਅਪ੍ਪਮਤ੍ਤਕਮ੍ਪਿ ਨ ਅਤ੍ਥਿ ਨ ਸਂਵਿਜ੍ਜਤਿ. ਅਤ੍ਥੀਤਿ ਇਦਂ ਵਤ੍ਤਮਾਨਕਾਲਿਕਂ ਆਖ੍ਯਾਤਪਦਂ, ਇਮਿਨਾ ਪਚ੍ਚੁਪ੍ਪਨ੍ਨਕਾਲਿਕਸ੍ਸ ਸਬ੍ਬਧਮ੍ਮਸ੍ਸ ਞਾਤਭਾਵਂ ਦਸ੍ਸੇਤਿ. ਗਾਥਾਬਨ੍ਧਸੁਖਤ੍ਥਂ ਪਨੇਤ੍ਥ ਦ-ਕਾਰੋ ਪਯੁਤ੍ਤੋ. ਅਥੋ ਅਵਿਞ੍ਞਾਤਨ੍ਤਿ ਏਤ੍ਥ ਅਥੋਤਿ ਵਚਨੋਪਾਦਾਨੇ ਨਿਪਾਤੋ. ਅਵਿਞ੍ਞਾਤਨ੍ਤਿ ਅਤੀਤਕਾਲਿਕਂ ਅਵਿਞ੍ਞਾਤਂ ਨਾਮ ਕਿਞ੍ਚਿ ਧਮ੍ਮਜਾਤਂ ਨਾਹੋਸੀਤਿ ਪਾਠਸੇਸੋ. ਅਬ੍ਯਯਭੂਤਸ੍ਸ ਅਤ੍ਥਿ-ਸਦ੍ਦਸ੍ਸ ਗਹਣੇ ਪਾਠਸੇਸਂ ਵਿਨਾਪਿ ਯੁਜ੍ਜਤਿਯੇਵ. ਇਮਿਨਾ ਅਤੀਤਕਾਲਿਕਸ੍ਸ ਸਬ੍ਬਧਮ੍ਮਸ੍ਸ ਞਾਤਭਾਵਂ ਦਸ੍ਸੇਤਿ. ਅਜਾਨਿਤਬ੍ਬਨ੍ਤਿ ਅਨਾਗਤਕਾਲਿਕਂ ਅਜਾਨਿਤਬ੍ਬਂ ਨਾਮ ਧਮ੍ਮਜਾਤਂ ਨ ਭਵਿਸ੍ਸਤਿ ਨਤ੍ਥੀਤਿ. ਇਮਿਨਾ ਅਨਾਗਤਕਾਲਿਕਸ੍ਸ ਸਬ੍ਬਧਮ੍ਮਸ੍ਸ ਞਾਤਭਾਵਂ ਦਸ੍ਸੇਤਿ. ਜਾਨਨਕਿਰਿਯਾਵਿਸੇਸਮਤ੍ਤਮੇਵ ਵਾ ਏਤ੍ਥ ਅ-ਕਾਰੋ. ਸਬ੍ਬਂ ਅਭਿਞ੍ਞਾਸਿ ਯਦਤ੍ਥਿ ਨੇਯ੍ਯਨ੍ਤਿ ਏਤ੍ਥ ਯਂ ਤੇਕਾਲਿਕਂ ਵਾ ਕਾਲਵਿਨਿਮੁਤ੍ਤਂ ਵਾ ਨੇਯ੍ਯਂ ਜਾਨਿਤਬ੍ਬਂ ਕਿਞ੍ਚਿ ਧਮ੍ਮਜਾਤਂ ਅਤ੍ਥਿ, ਤਂ ਸਬ੍ਬਂ ਤਥਾਗਤੋ ਅਭਿਞ੍ਞਾਸਿ ਅਧਿਕੇਨ ਸਬ੍ਬਞ੍ਞੁਤਞ੍ਞਾਣੇਨ ਜਾਨਿ ਪਟਿਵਿਜ੍ਝਿ, ਏਤ੍ਥ ਅਤ੍ਥਿ-ਸਦ੍ਦੇਨ ਤੇਕਾਲਿਕਸ੍ਸ ਕਾਲਵਿਮੁਤ੍ਤਸ੍ਸ ਚ ਗਹਣਾ ਅਤ੍ਥਿ-ਸਦ੍ਦੋ ਅਬ੍ਯਯਭੂਤੋਯੇਵ ਦਟ੍ਠਬ੍ਬੋ. ਤਥਾਗਤੋ ਤੇਨ ਸਮਨ੍ਤਚਕ੍ਖੂਤਿ ਕਾਲਵਸੇਨ ਓਕਾਸਵਸੇਨ ਚ ਨਿਪ੍ਪਦੇਸਤ੍ਤਾ ਸਮਨ੍ਤਾ ਸਬ੍ਬਤੋ ਪਵਤ੍ਤਂ ਞਾਣਚਕ੍ਖੁ ਅਸ੍ਸਾਤਿ ਸਮਨ੍ਤਚਕ੍ਖੁ, ਤੇਨ ਯਥਾਵੁਤ੍ਤੇਨ ਕਾਰਣੇਨ ਤਥਾਗਤੋ ਸਮਨ੍ਤਚਕ੍ਖੁ ਸਬ੍ਬਞ੍ਞੂਤਿ ਵੁਤ੍ਤਂ ਹੋਤਿ. ਇਮਿਸ੍ਸਾ ਗਾਥਾਯ ਪੁਗ੍ਗਲਾਧਿਟ੍ਠਾਨਾਯ ਦੇਸਨਾਯ ਸਬ੍ਬਞ੍ਞੁਤਞ੍ਞਾਣਂ ਸਾਧਿਤਂ.
ਨ ਇਤਿਹਿਤਿਹਨ੍ਤਿ ‘‘ਏਵਂ ਕਿਰ ਆਸਿ, ਏਵਂ ਕਿਰ ਆਸੀ’’ਤਿ ਨ ਹੋਤਿ. ਨ ਇਤਿਕਿਰਾਯਾਤਿ ‘‘ਏਵਂ ਕਿਰ ਏਤ’’ਨ੍ਤਿ ਨ ਹੋਤਿ. ਨ ਪਰਮ੍ਪਰਾਯਾਤਿ ਪਰਮ੍ਪਰਕਥਾਯਾਪਿ ਨ ਹੋਤਿ. ਨ ਪਿਟਕਸਮ੍ਪਦਾਯਾਤਿ ਅਮ੍ਹਾਕਂ ਪਿਟਕਤਨ੍ਤਿਯਾ ਸਦ੍ਧਿਂ ਸਮੇਤੀਤਿ ਨ ਹੋਤਿ. ਨ ਤਕ੍ਕਹੇਤੂਤਿ ਤਕ੍ਕਗ੍ਗਾਹੇਨਪਿ ਨ ਹੋਤਿ. ਨ ਆਕਾਰਪਰਿਵਿਤਕ੍ਕੇਨਾਤਿ ‘‘ਸੁਨ੍ਦਰਮਿਦਂ ਕਾਰਣ’’ਨ੍ਤਿ ਏਵਂ ਕਾਰਣਪਰਿਵਿਤਕ੍ਕੇਨਪਿ ਨ ਹੋਤਿ. ਨ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿਯਾਤਿ ਅਮ੍ਹਾਕਂ ਨਿਜ੍ਝਾਯਿਤ੍ਵਾ ਖਮਿਤ੍ਵਾ ਗਹਿਤਦਿਟ੍ਠਿਯਾ ਸਦ੍ਧਿਂ ਸਮੇਤੀਤਿਪਿ ਨ ਹੋਤਿ.
ਅਥ ਵਾਪਿ ਸਮਾਧਿਨ੍ਤਿ ਏਤ੍ਥ ਸਮਾਧਿਨ੍ਤਿ ਕੁਸਲਚਿਤ੍ਤੇਕਗ੍ਗਤਾ ਸਮਾਧਿ. ਕੇਨਟ੍ਠੇਨ ਸਮਾਧੀਤਿ? ਸਮਾਧਾਨਟ੍ਠੇਨ. ਕਿਮਿਦਂ ਸਮਾਧਾਨਂ ਨਾਮ? ਏਕਾਰਮ੍ਮਣੇ ਚਿਤ੍ਤਚੇਤਸਿਕਾਨਂ ਸਮਂ ਸਮ੍ਮਾ ਚ ਆਧਾਨਂ, ਠਪਨਨ੍ਤਿ ਵੁਤ੍ਤਂ ਹੋਤਿ. ਤਸ੍ਮਾ ਯਸ੍ਸ ਧਮ੍ਮਸ੍ਸ ਆਨੁਭਾਵੇਨ ਏਕਾਰਮ੍ਮਣੇ ਚਿਤ੍ਤਚੇਤਸਿਕਾ ਸਮਂ ਸਮ੍ਮਾ ਚ ਅਵਿਕ੍ਖਿਪ੍ਪਮਾਨਾ ਅਵਿਪ੍ਪਕਿਣ੍ਣਾ ਚ ਹੁਤ੍ਵਾ ਤਿਟ੍ਠਨ੍ਤਿ, ਇਦਂ ਸਮਾਧਾਨਨ੍ਤਿ ਵੇਦਿਤਬ੍ਬਂ. ਤਸ੍ਸ ਖੋ ਪਨ ਸਮਾਧਿਸ੍ਸ –
‘‘ਲਕ੍ਖਣਂ ਤੁ ਅਵਿਕ੍ਖੇਪੋ, ਵਿਕ੍ਖੇਪਦ੍ਧਂਸਨਂ ਰਸੋ;
ਅਕਮ੍ਪਨਮੁਪਟ੍ਠਾਨਂ, ਪਦਟ੍ਠਾਨਂ ਸੁਖਂ ਪਨ’’. (ਪਟਿ. ਮ. ਅਟ੍ਠ. ੧.੧.੩);
ਸਮਾਧਿ ਅਨਾਵਿਲਅਚਲਭਾਵੇਨ ਆਰਮ੍ਮਣੇ ਤਿਟ੍ਠਤੀਤਿ ਠਿਤਿ. ਪਰਤੋ ਪਦਦ੍ਵਯਂ ਉਪਸਗ੍ਗਵਸੇਨ ਵਡ੍ਢਿਤਂ. ਅਪਿ ਚ ਸਮ੍ਪਯੁਤ੍ਤਧਮ੍ਮੇ ਆਰਮ੍ਮਣਮ੍ਹਿ ਸਮ੍ਪਿਣ੍ਡੇਤ੍ਵਾ ਤਿਟ੍ਠਤੀਤਿ ਸਣ੍ਠਿਤਿ. ਆਰਮ੍ਮਣਂ ਓਗਾਹੇਤ੍ਵਾ ਅਨੁਪਵਿਸਿਤ੍ਵਾ ਤਿਟ੍ਠਤੀਤਿ ਅਵਟ੍ਠਿਤਿ. ਕੁਸਲਪਕ੍ਖਸ੍ਮਿਞ੍ਹਿ ਚਤ੍ਤਾਰੋਵ ਧਮ੍ਮਾ ਆਰਮ੍ਮਣਂ ਓਗਾਹਨ੍ਤਿ ਸਦ੍ਧਾ ਸਤਿ ਸਮਾਧਿ ਪਞ੍ਞਾਤਿ. ਤੇਨੇਵ ਸਦ੍ਧਾ ‘‘ਓਕਪ੍ਪਨਾ’’ਤਿ ਵੁਤ੍ਤਾ, ਸਤਿ ‘‘ਅਪਿਲਾਪਨਤਾ’’ਤਿ, ਸਮਾਧਿ ‘‘ਅਵਟ੍ਠਿਤੀ’’ਤਿ, ਪਞ੍ਞਾ ‘‘ਪਰਿਯੋਗਾਹਨਾ’’ਤਿ. ਅਕੁਸਲਪਕ੍ਖੇ ਪਨ ਤਯੋ ਧਮ੍ਮਾ ਆਰਮ੍ਮਣਂ ਓਗਾਹਨ੍ਤਿ ਤਣ੍ਹਾ ਦਿਟ੍ਠਿ ਅਵਿਜ੍ਜਾਤਿ. ਤੇਨੇਵੇਤੇ ‘‘ਓਘਾ’’ਤਿ ਵੁਤ੍ਤਾ. ਚਿਤ੍ਤੇਕਗ੍ਗਤਾ ਪਨੇਤ੍ਥ ਨ ਬਲਵਤੀ ਹੋਤਿ. ਯਥਾ ਹਿ ਰਜੁਟ੍ਠਾਨਟ੍ਠਾਨੇ ਉਦਕੇਨ ਸਿਞ੍ਚਿਤ੍ਵਾ ਸਮ੍ਮਟ੍ਠੇ ਥੋਕਮੇਵ ਕਾਲਂ ਰਜੋ ਸਨ੍ਨਿਸੀਦਤਿ, ਸੁਕ੍ਖਨ੍ਤੇ ਸੁਕ੍ਖਨ੍ਤੇ ਪੁਨ ਪਕਤਿਭਾਵੇਨੇਵ ਵੁਟ੍ਠਾਤਿ, ਏਵਮੇਵ ਅਕੁਸਲਪਕ੍ਖੇ ਚਿਤ੍ਤੇਕਗ੍ਗਤਾ ਨ ਬਲਵਤੀ ਹੋਤਿ.
ਉਦ੍ਧਚ੍ਚਵਿਚਿਕਿਚ੍ਛਾਵਸੇਨ ਪਵਤ੍ਤਸ੍ਸ ਵਿਸਾਹਾਰਸ੍ਸ ਪਟਿਪਕ੍ਖਤੋ ਅਵਿਸਾਹਾਰੋ. ਉਦ੍ਧਚ੍ਚਵਿਚਿਕਿਚ੍ਛਾਵਸੇਨੇਵ ਗਚ੍ਛਨ੍ਤਂ ਚਿਤ੍ਤਂ ਵਿਕ੍ਖਿਪਤਿ ਨਾਮ. ਅਯਂ ਪਨ ਤਥਾਵਿਧੋ ਵਿਕ੍ਖੇਪੋ ਨ ਹੋਤੀਤਿ ਅਵਿਕ੍ਖੇਪੋ. ਉਦ੍ਧਚ੍ਚਵਿਚਿਕਿਚ੍ਛਾਵਸੇਨੇਵ ਚਿਤ੍ਤਂ ਵਿਸਾਹਟਂ ਨਾਮ ਹੋਤਿ, ਇਤੋ ਚਿਤੋ ਚ ਹਰੀਯਤਿ, ਅਯਂ ਪਨ ਏਵਂ ਅਵਿਸਾਹਟਮਾਨਸਸ੍ਸ ਭਾਵੋਤਿ ਅਵਿਸਾਹਟਮਾਨਸਤਾ. ਸਮਥੋਤਿ ਤਿਵਿਧੋ ਸਮਥੋ ਚਿਤ੍ਤਸਮਥੋ ਅਧਿਕਰਣਸਮਥੋ ਸਬ੍ਬਸਙ੍ਖਾਰਸਮਥੋਤਿ. ਤਤ੍ਥ ਅਟ੍ਠਸੁ ਸਮਾਪਤ੍ਤੀਸੁ ਚਿਤ੍ਤੇਕਗ੍ਗਤਾ ਚਿਤ੍ਤਸਮਥੋ ਨਾਮ. ਤਞ੍ਹਿ ਆਗਮ੍ਮ ਚਿਤ੍ਤਚਲਨਂ ਚਿਤ੍ਤਵਿਪ੍ਫਨ੍ਦਿਤਂ ਸਮ੍ਮਤਿ ਵੂਪਸਮ੍ਮਤਿ, ਤਸ੍ਮਾ ਸੋ ‘‘ਚਿਤ੍ਤਸਮਥੋ’’ਤਿ ਵੁਚ੍ਚਤਿ. ਸਮ੍ਮੁਖਾਵਿਨਯਾਦਿਸਤ੍ਤਵਿਧੋ ਸਮਥੋ ਅਧਿਕਰਣਸਮਥੋ ਨਾਮ. ਤਞ੍ਹਿ ਆਗਮ੍ਮ ਤਾਨਿ ਤਾਨਿ ਅਧਿਕਰਣਾਨਿ ਸਮ੍ਮਨ੍ਤਿ ਵੂਪਸਮ੍ਮਨ੍ਤਿ, ਤਸ੍ਮਾ ਸੋ ‘‘ਅਧਿਕਰਣਸਮਥੋ’’ਤਿ ਵੁਚ੍ਚਤਿ. ਯਸ੍ਮਾ ਪਨ ਸਬ੍ਬੇ ਸਙ੍ਖਾਰਾ ਨਿਬ੍ਬਾਨਂ ਆਗਮ੍ਮ ਸਮ੍ਮਨ੍ਤਿ ਵੂਪਸਮ੍ਮਨ੍ਤਿ ਵੂਪਸਮ੍ਮਨ੍ਤਿ, ਤਸ੍ਮਾ ਤਂ ‘‘ਸਬ੍ਬਸਙ੍ਖਾਰਸਮਥੋ’’ਤਿ ਵੁਚ੍ਚਤਿ. ਇਮਸ੍ਮਿਂ ਅਤ੍ਥੇ ਚਿਤ੍ਤਸਮਥੋ ਅਧਿਪ੍ਪੇਤੋ. ਸਮਾਧਿਲਕ੍ਖਣੇ ਇਨ੍ਦਟ੍ਠਂ ਕਾਰੇਤੀਤਿ ਸਮਾਧਿਨ੍ਦ੍ਰਿਯਂ. ਉਦ੍ਧਚ੍ਚੇ ਨ ਕਮ੍ਪਤੀਤਿ ਸਮਾਧਿਬਲਂ. ਸਮ੍ਮਾਸਮਾਧੀਤਿ ਯਾਥਾਵਸਮਾਧਿ ਨਿਯ੍ਯਾਨਿਕਸਮਾਧਿ.
੧੫੭. ਅਥਸ੍ਸ ਭਗਵਾ ਯਸ੍ਮਾ ਇਨ੍ਦ੍ਰਿਯਸਂਵਰੋ ਸੀਲਸ੍ਸ ਰਕ੍ਖਾ, ਯਸ੍ਮਾ ਵਾ ਇਮਿਨਾਨੁਕ੍ਕਮੇਨ ਦੇਸਿਯਮਾਨਾ ਅਯਂ ਦੇਸਨਾ ਤਾਸਂ ਦੇਵਤਾਨਂ ਸਪ੍ਪਾਯਾ, ਤਸ੍ਮਾ ਇਨ੍ਦ੍ਰਿਯਸਂਵਰਤੋ ਪਭੁਤਿ ਪਟਿਪਦਂ ਦਸ੍ਸੇਨ੍ਤੋ ‘‘ਚਕ੍ਖੂਹੀ’’ਤਿਆਦਿ ਆਰਦ੍ਧੋ. ਤਤ੍ਥ ਚਕ੍ਖੂਹਿ ਨੇਵ ਲੋਲਸ੍ਸਾਤਿ ਅਦਿਟ੍ਠਦਕ੍ਖਿਤਬ੍ਬਾਦਿਵਸੇਨ ਚਕ੍ਖੂਹਿ ਲੋਲੋ ਨੇਵ ਅਸ੍ਸ. ਗਾਮਕਥਾਯ ਆਵਰਯੇ ਸੋਤਨ੍ਤਿ ਤਿਰਚ੍ਛਾਨਕਥਾਯ ਸੋਤਂ ਆਵਰੇਯ੍ਯ.
ਚਕ੍ਖੁਲੋਲਿਯੇਨਾਤਿ ਚਕ੍ਖੁਦ੍ਵਾਰੇ ਉਪ੍ਪਨ੍ਨਲੋਲਵਸੇਨ ਚਕ੍ਖੁਲੋਲਿਯੇਨ. ਅਦਿਟ੍ਠਂ ਦਕ੍ਖਿਤਬ੍ਬਨ੍ਤਿ ਅਦਿਟ੍ਠਪੁਬ੍ਬਂ ਰੂਪਾਰਮ੍ਮਣਂ ਪਸ੍ਸਿਤੁਂ ਯੁਤ੍ਤਂ. ਦਿਟ੍ਠਂ ਸਮਤਿਕ੍ਕਮਿਤਬ੍ਬਨ੍ਤਿ ਦਿਟ੍ਠਪੁਬ੍ਬਰੂਪਾਰਮ੍ਮਣਂ ਅਤਿਕ੍ਕਮਿਤੁਂ ਯੁਤ੍ਤਂ. ਆਰਾਮੇਨ ਆਰਾਮਨ੍ਤਿ ਪੁਪ੍ਫਾਰਾਮਾਦਿਆਰਾਮੇਨ ਫਲਾਰਾਮਾਦਿਂ ਵਾ ਪੁਪ੍ਫਾਰਾਮਾਦਿਂ ਵਾ. ਦੀਘਚਾਰਿਕਨ੍ਤਿ ਦੀਘਚਰਣਂ. ਅਨਵਟ੍ਠਿਤਚਾਰਿਕਨ੍ਤਿ ਅਸਨ੍ਨਿਟ੍ਠਾਨਚਰਣਂ. ਅਨੁਯੁਤ੍ਤੋ ਹੋਤਿ ਰੂਪਦਸ੍ਸਨਾਯਾਤਿ ਰੂਪਾਰਮ੍ਮਣਦਸ੍ਸਨਤ੍ਥਾਯ ਪੁਨਪ੍ਪੁਨਂ ਯੁਤ੍ਤੋ ਹੋਤਿ.
ਅਨ੍ਤਰਘਰਂ ਪਵਿਟ੍ਠੋਤਿ ਉਮ੍ਮਾਰਬ੍ਭਨ੍ਤਰਂ ਪਵਿਟ੍ਠੋ. ਵੀਥਿਂ ਪਟਿਪਨ੍ਨੋਤਿ ਅਨ੍ਤਰਵੀਥਿਂ ਓਤਿਣ੍ਣੋ. ਘਰਮੁਖਾਨਿ ਓਲੋਕੇਨ੍ਤੋਤਿ ਘਰਦ੍ਵਾਰਾਨਿ ਅਵਲੋਕੇਨ੍ਤੋ. ਉਦ੍ਧਂ ਉਲ੍ਲੋਕੇਨ੍ਤੋਤਿ ਉਪਰਿਦਿਸਂ ਉਦ੍ਧਂਮੁਖੋ ਹੁਤ੍ਵਾ ਵਿਲੋਕੇਨ੍ਤੋ.
ਚਕ੍ਖੁਨਾ ਰੂਪਂ ਦਿਸ੍ਵਾਤਿ ਕਾਰਣਵਸੇਨ ਚਕ੍ਖੂਤਿ ਲਦ੍ਧਵੋਹਾਰੇਨ ਰੂਪਦਸ੍ਸਨਸਮਤ੍ਥੇਨ ਚਕ੍ਖੁਵਿਞ੍ਞਾਣੇਨ ਰੂਪਂ ਦਿਸ੍ਵਾ. ਪੋਰਾਣਾ ਪਨਾਹੁ – ‘‘ਚਕ੍ਖੁ ਰੂਪਂ ਨ ਪਸ੍ਸਤਿ ਅਚਿਤ੍ਤਕਤ੍ਤਾ, ਚਿਤ੍ਤਂ ਨ ਪਸ੍ਸਤਿ ਅਚਕ੍ਖੁਕਤ੍ਤਾ. ਦ੍ਵਾਰਾਰਮ੍ਮਣਸਙ੍ਘਟ੍ਟੇ ਪਨ ਪਸਾਦਵਤ੍ਥੁਕੇਨ ਚਿਤ੍ਤੇਨ ਪਸ੍ਸਤਿ. ਈਦਿਸੀ ਪਨੇਸਾ ‘ਧਨੁਨਾ ਵਿਜ੍ਝਤੀ’ਤਿਆਦੀਸੁ ਵਿਯ ਸਸਮ੍ਭਾਰਕਥਾ ਨਾਮ ਹੋਤਿ. ਤਸ੍ਮਾ ਚਕ੍ਖੁਵਿਞ੍ਞਾਣੇਨ ਰੂਪਂ ਦਿਸ੍ਵਾਤਿ ਅਯਮੇਤ੍ਥ ਅਤ੍ਥੋ’’ਤਿ. ਨਿਮਿਤ੍ਤਗ੍ਗਾਹੀਤਿ ਇਤ੍ਥਿਪੁਰਿਸਨਿਮਿਤ੍ਤਂ ਵਾ ਸੁਭਨਿਮਿਤ੍ਤਾਦਿਕਂ ਵਾ ਕਿਲੇਸਵਤ੍ਥੁਭੂਤਂ ਨਿਮਿਤ੍ਤਂ ਛਨ੍ਦਰਾਗਵਸੇਨ ਗਣ੍ਹਾਤਿ, ਦਿਟ੍ਠਮਤ੍ਤੇਯੇਵ ਨ ਸਣ੍ਠਾਤਿ. ਅਨੁਬ੍ਯਞ੍ਜਨਗ੍ਗਾਹੀਤਿ ਕਿਲੇਸਾਨਂ ਅਨੁਅਨੁਬ੍ਯਞ੍ਜਨਤੋ ਪਾਕਟਭਾਵਕਰਣਤੋ ਅਨੁਬ੍ਯਞ੍ਜਨਨ੍ਤਿ ਲਦ੍ਧਵੋਹਾਰਂ ਹਤ੍ਥਪਾਦਸਿਤਹਸਿਤਕਥਿਤਆਲੋਕਿਤਵਿਲੋਕਿਤਾਦਿਭੇਦਂ ਆਕਾਰਂ ਗਣ੍ਹਾਤਿ. ਯਤ੍ਵਾਧਿਕਰਣਮੇਨਨ੍ਤਿਆਦਿਮ੍ਹਿ ਯਂਕਾਰਣਾ ਯਸ੍ਸ ਚਕ੍ਖੁਨ੍ਦ੍ਰਿਯਾਸਂਵਰਸ੍ਸ ਹੇਤੁ ਏਤਂ ਪੁਗ੍ਗਲਂ ਸਤਿਕਵਾਟੇਨ ਚਕ੍ਖੁਨ੍ਦ੍ਰਿਯਂ ਅਸਂਵੁਤਂ ਅਪਿਹਿਤਚਕ੍ਖੁਦ੍ਵਾਰਂ ਹੁਤ੍ਵਾ ਵਿਹਰਨ੍ਤਂ ਏਤੇ ਅਭਿਜ੍ਝਾਦਯੋ ਧਮ੍ਮਾ ਅਨ੍ਵਾਸ੍ਸਵੇਯ੍ਯੁਂ ਅਨੁਪ੍ਪਬਨ੍ਧੇਯ੍ਯੁਂ ਅਜ੍ਝੋਤ੍ਥਰੇਯ੍ਯੁਂ. ਤਸ੍ਸ ਸਂਵਰਾਯ ਨ ਪਟਿਪਜ੍ਜਤੀਤਿ ਤਸ੍ਸ ਚਕ੍ਖੁਨ੍ਦ੍ਰਿਯਸ੍ਸ ਸਤਿਕਵਾਟੇਨ ਪਿਦਹਨਤ੍ਥਾਯ ਨ ਪਟਿਪਜ੍ਜਤਿ. ਏਵਂਭੂਤੋਯੇਵ ਚ ਨ ਰਕ੍ਖਤਿ ਚਕ੍ਖੁਨ੍ਦ੍ਰਿਯਂ. ਨ ਚਕ੍ਖੁਨ੍ਦ੍ਰਿਯੇ ਸਂਵਰਂ ਆਪਜ੍ਜਤੀਤਿਪਿ ਵੁਚ੍ਚਤਿ. ਤਤ੍ਥ ਕਿਞ੍ਚਾਪਿ ਚਕ੍ਖੁਨ੍ਦ੍ਰਿਯੇ ਸਂਵਰੋ ਵਾ ਅਸਂਵਰੋ ਵਾ ਨਤ੍ਥਿ. ਨ ਹਿ ਚਕ੍ਖੁਪਸਾਦਂ ਨਿਸ੍ਸਾਯ ਸਤਿ ਵਾ ਮੁਟ੍ਠਸ੍ਸਚ੍ਚਂ ਵਾ ਉਪ੍ਪਜ੍ਜਤਿ. ਅਪਿਚ ਯਦਾ ਰੂਪਾਰਮ੍ਮਣਂ ਚਕ੍ਖੁਸ੍ਸ ਆਪਾਥਂ ਆਗਚ੍ਛਤਿ, ਤਦਾ ਭਵਙ੍ਗੇ ਦ੍ਵਿਕ੍ਖਤ੍ਤੁਂ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧੇ ਕਿਰਿਯਾਮਨੋਧਾਤੁ ਆਵਜ੍ਜਨਕਿਚ੍ਚਂ ਸਾਧਯਮਾਨਾ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਤਿ, ਤਤੋ ਚਕ੍ਖੁਵਿਞ੍ਞਾਣਂ ਦਸ੍ਸਨਕਿਚ੍ਚਂ, ਤਤੋ ਮਨੋਧਾਤੁ ਸਮ੍ਪਟਿਚ੍ਛਨਕਿਚ੍ਚਂ, ਤਤੋ ਵਿਪਾਕਾਹੇਤੁਕਮਨੋਵਿਞ੍ਞਾਣਧਾਤੁ ਸਨ੍ਤੀਰਣਕਿਚ੍ਚਂ, ਤਤੋ ਕਿਰਿਯਾਹੇਤੁਕਮਨੋਵਿਞ੍ਞਾਣਧਾਤੁ ਵੋਟ੍ਠਬ੍ਬਨਕਿਚ੍ਚਂ ਸਾਧਯਮਾਨਾ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਤਿ, ਤਦਨਨ੍ਤਰਂ ਜਵਨਂ ਜਵਤਿ.
ਤਤ੍ਰਾਪਿ ਨੇਵ ਭਵਙ੍ਗਸਮਯੇ ਨ ਆਵਜ੍ਜਨਾਦੀਨਂ ਅਞ੍ਞਤਰਸਮਯੇ ਸਂਵਰੋ ਵਾ ਅਸਂਵਰੋ ਵਾ ਅਤ੍ਥਿ. ਜਵਨਕ੍ਖਣੇ ਪਨ ਸਚੇ ਦੁਸ੍ਸੀਲ੍ਯਂ ਵਾ ਮੁਟ੍ਠਸ੍ਸਚ੍ਚਂ ਵਾ ਅਞ੍ਞਾਣਂ ਵਾ ਅਕ੍ਖਨ੍ਤਿ ਵਾ ਕੋਸਜ੍ਜਂ ਵਾ ਉਪ੍ਪਜ੍ਜਤਿ, ਅਸਂਵਰੋ ਹੋਤਿ. ਏਵਂ ਹੋਨ੍ਤੋ ਪਨ ਸੋ ‘‘ਚਕ੍ਖੁਨ੍ਦ੍ਰਿਯੇ ਅਸਂਵਰੋ’’ਤਿ ਵੁਚ੍ਚਤਿ. ਕਸ੍ਮਾ? ਯਸ੍ਮਾ ਤਸ੍ਮਿਂ ਅਸਂਵਰੇ ਸਤਿ ਦ੍ਵਾਰਮ੍ਪਿ ਅਗੁਤ੍ਤਂ ਹੋਤਿ, ਭਵਙ੍ਗਮ੍ਪਿ ਆਵਜ੍ਜਨਾਦੀਨਿਪਿ ਵੀਥਿਚਿਤ੍ਤਾਨਿ. ਯਥਾ ਕਿਂ? ਯਥਾ ਨਗਰੇ ਚਤੂਸੁ ਦ੍ਵਾਰੇਸੁ ਅਸਂਵੁਤੇਸੁ ਕਿਞ੍ਚਾਪਿ ਅਨ੍ਤੋਘਰਦ੍ਵਾਰਕੋਟ੍ਠਕਗਬ੍ਭਾਦਯੋ ਸਂਵੁਤਾ, ਤਥਾਪਿ ਅਨ੍ਤੋਨਗਰੇ ਸਬ੍ਬਂ ਭਣ੍ਡਂ ਅਰਕ੍ਖਿਤਂ ਅਗੋਪਿਤਮੇਵ ਹੋਤਿ. ਨਗਰਦ੍ਵਾਰੇਨ ਹਿ ਪਵਿਸਿਤ੍ਵਾ ਚੋਰਾ ਯਦਿਚ੍ਛਨ੍ਤਿ ਤਂ ਕਰੇਯ੍ਯੁਂ, ਏਵਮੇਵ ਜਵਨੇ ਦੁਸ੍ਸੀਲ੍ਯਾਦੀਸੁ ਉਪ੍ਪਨ੍ਨੇਸੁ ਤਸ੍ਮਿਂ ਅਸਂਵਰੇ ਸਤਿ ਦ੍ਵਾਰਮ੍ਪਿ ਅਗੁਤ੍ਤਂ ਹੋਤਿ ਭਵਙ੍ਗਮ੍ਪਿ ਆਵਜ੍ਜਨਾਦੀਨਿਪਿ ਵੀਥਿਚਿਤ੍ਤਾਨਿ.
ਸਦ੍ਧਾਦੇਯ੍ਯਾਨੀਤਿ ਕਮ੍ਮਞ੍ਚ ਫਲਞ੍ਚ ਇਧਲੋਕਞ੍ਚ ਪਰਲੋਕਞ੍ਚ ਸਦ੍ਦਹਿਤ੍ਵਾ ਦਿਨ੍ਨਾਨਿ. ‘‘ਅਯਂ ਮੇ ਞਾਤੀਤਿ ਵਾ, ਮਿਤ੍ਤੋਤਿ ਵਾ, ਇਦਂ ਵਾ ਪਟਿਕਰਿਸ੍ਸਤਿ, ਇਦਂ ਵਾਨੇਨ ਕਤਪੁਬ੍ਬ’’ਨ੍ਤਿ ਵਾ ਏਵਂ ਨ ਦਿਨ੍ਨਾਨੀਤਿ ਅਤ੍ਥੋ. ਏਵਂ ਦਿਨ੍ਨਾਨਿ ਹਿ ਨ ਸਦ੍ਧਾਦੇਯ੍ਯਾਨਿ ਨਾਮ ਹੋਨ੍ਤਿ. ਭੋਜਨਾਨੀਤਿ ਚ ਦੇਸਨਾਸੀਸਮਤ੍ਤਮੇਤਂ, ਅਤ੍ਥਤੋ ਪਨ ਸਦ੍ਧਾਦੇਯ੍ਯਾਨਿ ਭੋਜਨਾਨਿ ਭੁਞ੍ਜਿਤ੍ਵਾ ਚੀਵਰਾਨਿ ਪਾਰੁਪਿਤ੍ਵਾ ਸੇਨਾਸਨਾਨਿ ਸੇਵਮਾਨਾ ਗਿਲਾਨਪਚ੍ਚਯਭੇਸਜ੍ਜਂ ਪਰਿਭੁਞ੍ਜਮਾਨਾਤਿ ਸਬ੍ਬਮੇਤਂ ਵੁਤ੍ਤਮੇਵ ਹੋਤਿ.
ਸੇਯ੍ਯਥਿਦਨ੍ਤਿ ਨਿਪਾਤੋ. ਤਸ੍ਸਤ੍ਥੋ, ਕਤਮੋ ਹੋਤਿ. ਨਚ੍ਚਂ ਨਾਮ ਯਂਕਿਞ੍ਚਿ ਨਚ੍ਚਂ, ਤਂ ਮਗ੍ਗਂ ਗਚ੍ਛਨ੍ਤੇਨਾਪਿ ਗੀਵਂ ਪਸਾਰੇਤ੍ਵਾ ਦਟ੍ਠੁਂ ਨ ਵਟ੍ਟਤਿ. ਗੀਤਨ੍ਤਿ ਯਂਕਿਞ੍ਚਿ ਗੀਤਂ. ਵਾਦਿਤਨ੍ਤਿ ਯਂਕਿਞ੍ਚਿ ਵਾਦਿਤਂ. ਪੇਕ੍ਖਨ੍ਤਿ ਨਟਸਮਜ੍ਜਂ. ਅਕ੍ਖਾਨਨ੍ਤਿ ਭਾਰਤਰਾਮਾਯਨਾਦਿਕਂ. ਯਸ੍ਮਿਂ ਠਾਨੇ ਕਥੀਯਤਿ, ਤਤ੍ਥ ਗਨ੍ਤੁਮ੍ਪਿ ਨ ਵਟ੍ਟਤਿ. ਪਾਣਿਸ੍ਸਰਨ੍ਤਿ ਕਂਸਤਾਲ਼ਂ, ‘‘ਪਾਣਿਤਾਲ਼’’ਨ੍ਤਿਪਿ ਵਦਨ੍ਤਿ. ਵੇਤਾਲ਼ਨ੍ਤਿ ਘਨਤਾਲ਼ਂ, ‘‘ਮਨ੍ਤੇਨ ਮਤਸਰੀਰੁਟ੍ਠਾਪਨ’’ਨ੍ਤਿਪਿ ਏਕੇ. ਕੁਮ੍ਭਥੂਣਨ੍ਤਿ ਚਤੁਰਸ੍ਸਅਮ੍ਬਣਕਤਾਲ਼ਂ, ‘‘ਕੁਮ੍ਭਸਦ੍ਦ’’ਨ੍ਤਿਪਿ ਏਕੇ. ਸੋਭਨਕਨ੍ਤਿ ਨਟਾਨਂ ਅਬ੍ਭੋਕ੍ਕਿਰਣਂ; ਸੋਭਨਕਰਂ ਵਾ, ਪਟਿਭਾਨਚਿਤ੍ਤਨ੍ਤਿ ਵੁਤ੍ਤਂ ਹੋਤਿ. ਚਣ੍ਡਾਲਨ੍ਤਿ ਅਯੋਗੁਲ਼ਕੀਲ਼ਾ, ‘‘ਚਣ੍ਡਾਲਾਨਂ ਸਾਣਧੋਵਨਕੀਲ਼ਾ’’ਤਿਪਿ ਵਦਨ੍ਤਿ. ਵਂਸਨ੍ਤਿ ਵੇਣੁਂ ਉਸ੍ਸਾਪੇਤ੍ਵਾ ਕੀਲ਼ਨਂ.
ਧੋਵਨਨ੍ਤਿ ਅਟ੍ਠਿਧੋਵਨਂ, ਏਕਚ੍ਚੇਸੁ ਕਿਰ ਜਨਪਦੇਸੁ ਕਾਲਙ੍ਕਤੇ ਞਾਤਕੇ ਨ ਝਾਪੇਨ੍ਤਿ, ਨਿਖਣਿਤ੍ਵਾ ਠਪੇਨ੍ਤਿ. ਅਥ ਤੇਸਂ ਪੂਤਿਭੂਤਂ ਕਾਯਂ ਞਤ੍ਵਾ ਨੀਹਰਿਤ੍ਵਾ ਅਟ੍ਠੀਨਿ ਧੋਵਿਤ੍ਵਾ ਗਨ੍ਧੇਹਿ ਮਕ੍ਖੇਤ੍ਵਾ ਠਪੇਨ੍ਤਿ. ਤੇ ਨਕ੍ਖਤ੍ਤਕਾਲੇ ਏਕਸ੍ਮਿਂ ਠਾਨੇ ਅਟ੍ਠੀਨਿ ਠਪੇਤ੍ਵਾ ਏਕਸ੍ਮਿਂ ਠਾਨੇ ਸੁਰਾਦੀਨਿ ਠਪੇਤ੍ਵਾ ਰੋਦਨ੍ਤਾ ਪਰਿਦੇਵਨ੍ਤਾ ਸੁਰਂ ਪਿਵਨ੍ਤਿ. ਵੁਤ੍ਤਮ੍ਪਿ ਚੇਤਂ ‘‘ਅਤ੍ਥਿ ਭਿਕ੍ਖਵੇ ਦਕ੍ਖਿਣੇਸੁ ਜਨਪਦੇਸੁ ਧੋਵਨਂ ਨਾਮ, ਤਤ੍ਥ ਹੋਤਿ ਅਨ੍ਨਮ੍ਪਿ ਪਾਨਮ੍ਪਿ ਖਜ੍ਜਮ੍ਪਿ ਭੋਜ੍ਜਮ੍ਪਿ ਲੇਯ੍ਯਮ੍ਪਿ ਪੇਯ੍ਯਮ੍ਪਿ ਨਚ੍ਚਮ੍ਪਿ ਗੀਤਮ੍ਪਿ ਵਾਦਿਤਮ੍ਪਿ. ਅਤ੍ਥੇਕਂ ਭਿਕ੍ਖਵੇ ਧੋਵਨਂ, ਨੇਤਂ ਨਤ੍ਥੀਤਿ ਵਦਾਮੀ’’ਤਿ (ਅ. ਨਿ. ੧੦.੧੦੭). ਏਕਚ੍ਚੇ ਪਨ ‘‘ਇਨ੍ਦਜਾਲੇਨ ਅਟ੍ਠਿਧੋਵਨਂ ਧੋਵਨ’’ਨ੍ਤਿ ਵਦਨ੍ਤਿ. ਹਤ੍ਥਿਯੁਦ੍ਧਾਦੀਸੁ ਭਿਕ੍ਖੁਨੋ ਨੇਵ ਹਤ੍ਥਿਆਦੀਹਿ ਸਦ੍ਧਿਂ ਯੁਜ੍ਝਿਤੁਂ, ਨ ਤੇ ਯੁਜ੍ਝਾਪੇਤੁਂ, ਨ ਯੁਜ੍ਝਨ੍ਤੇ ਦਟ੍ਠੁਂ ਵਟ੍ਟਤਿ. ਨਿਬ੍ਬੁਦ੍ਧਨ੍ਤਿ ਮਲ੍ਲਯੁਦ੍ਧਂ. ਉਯ੍ਯੋਧਿਕਨ੍ਤਿ ਯਤ੍ਥ ਸਮ੍ਪਹਾਰੋ ਦਿਯ੍ਯਤਿ. ਬਲਗ੍ਗਨ੍ਤਿ ਬਲਗਣਨਟ੍ਠਾਨਂ. ਸੇਨਾਬ੍ਯੂਹਨ੍ਤਿ ਸੇਨਾਨਿਵੇਸੋ, ਸਕਟਬ੍ਯੂਹਾਦਿਵਸੇਨ ਸੇਨਾਯ ਨਿਵੇਸਨਂ. ਅਨੀਕਦਸ੍ਸਨਨ੍ਤਿ ‘‘ਤਯੋ ਹਤ੍ਥੀ ਪਚ੍ਛਿਮਂ ਹਤ੍ਥਾਨੀਕ’’ਨ੍ਤਿਆਦਿਨਾ (ਪਾਚਿ. ੩੨੪) ਨਯੇਨ ਵੁਤ੍ਤਸ੍ਸ ਅਨੀਕਸ੍ਸ ਦਸ੍ਸਨਂ.
ਨ ਨਿਮਿਤ੍ਤਗ੍ਗਾਹੀ ਹੋਤੀਤਿ ਛਨ੍ਦਰਾਗਵਸੇਨ ਵੁਤ੍ਤਪ੍ਪਕਾਰਂ ਨਿਮਿਤ੍ਤਂ ਨ ਗਣ੍ਹਾਤਿ. ਏਵਂ ਸੇਸਪਦਾਨਿਪਿ ਵੁਤ੍ਤਪਟਿਪਕ੍ਖਨਯੇਨ ਵੇਦਿਤਬ੍ਬਾਨਿ. ਯਥਾ ਚ ਹੇਟ੍ਠਾ ਜਵਨੇ ਦੁਸ੍ਸੀਲ੍ਯਾਦੀਸੁ ਉਪ੍ਪਨ੍ਨੇਸੁ ਤਸ੍ਮਿਂ ਅਸਂਵਰੇ ਸਤਿ ਦ੍ਵਾਰਮ੍ਪਿ ਅਗੁਤ੍ਤਂ ਹੋਤਿ, ਭਵਙ੍ਗਮ੍ਪਿ ਆਵਜ੍ਜਨਾਦੀਨਿਪਿ ਵੀਥਿਚਿਤ੍ਤਾਨੀਤਿ ਵੁਤ੍ਤਂ, ਏਵਮਿਧ ਤਸ੍ਮਿਂ ਸੀਲਾਦੀਸੁ ਉਪ੍ਪਨ੍ਨੇਸੁ ਦ੍ਵਾਰਮ੍ਪਿ ਗੁਤ੍ਤਂ ਹੋਤਿ, ਭਵਙ੍ਗਮ੍ਪਿ ਆਵਜ੍ਜਨਾਦੀਨਿਪਿ ਵੀਥਿਚਿਤ੍ਤਾਨਿ. ਯਥਾ ਕਿਂ? ਯਥਾ ਨਗਰਦ੍ਵਾਰੇਸੁ ਸਂਵੁਤੇਸੁ ਕਿਞ੍ਚਾਪਿ ਅਨ੍ਤੋਘਰਾਦਯੋ ਅਸਂਵੁਤਾ ਹੋਨ੍ਤਿ, ਤਥਾਪਿ ਅਨ੍ਤੋਨਗਰੇ ਸਬ੍ਬਂ ਭਣ੍ਡਂ ਸੁਰਕ੍ਖਿਤਂ ਸੁਗੋਪਿਤਮੇਵ ਹੋਤਿ, ਨਗਰਦ੍ਵਾਰੇਸੁ ਪਿਹਿਤੇਸੁ ਚੋਰਾਨਂ ਪਵੇਸੋ ਨਤ੍ਥਿ. ਏਵਮੇਵ ਜਵਨੇ ਸੀਲਾਦੀਸੁ ਉਪ੍ਪਨ੍ਨੇਸੁ ਦ੍ਵਾਰਮ੍ਪਿ ਗੁਤ੍ਤਂ ਹੋਤਿ, ਭਵਙ੍ਗਮ੍ਪਿ ਆਵਜ੍ਜਨਾਦੀਨਿਪਿ ਵੀਥਿਚਿਤ੍ਤਾਨਿ. ਤਸ੍ਮਾ ਜਵਨਕ੍ਖਣੇ ਉਪ੍ਪਜ੍ਜਮਾਨੋਪਿ ‘‘ਚਕ੍ਖੁਨ੍ਦ੍ਰਿਯੇ ਸਂਵਰੋ’’ਤਿ ਵੁਤ੍ਤੋ. ਇਤੋ ਪਰਂ ਹੇਟ੍ਠਾ ਚ ਉਪਰਿ ਚ ਵੁਤ੍ਤਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ.
ਵਿਸੂਕਦਸ੍ਸਨਾਤਿ ਪਟਾਣੀਦਸ੍ਸਨਤੋ. ਗਾਮਕਥਾਤਿ ਗਾਮਵਾਸੀਨਂ ਕਥਾ. ਬਾਤ੍ਤਿਂਸਾਤਿ ਦ੍ਵਤ੍ਤਿਂਸ. ਅਨਿਯ੍ਯਾਨਿਕਤ੍ਤਾ ਸਗ੍ਗਮੋਕ੍ਖਮਗ੍ਗਾਨਂ ਤਿਰਚ੍ਛਾਨਭੂਤਾ ਕਥਾਤਿ ਤਿਰਚ੍ਛਾਨਕਥਾ. ਤਤ੍ਥ ਰਾਜਾਨਂ ਆਰਬ੍ਭ ‘‘ਮਹਾਸਮ੍ਮਤੋ ਮਨ੍ਧਾਤਾ ਧਮ੍ਮਾਸੋਕੋ ਏਵਂ ਮਹਾਨੁਭਾਵੋ’’ਤਿਆਦਿਨਾ ਨਯੇਨ ਪਵਤ੍ਤਾ ਕਥਾ ਰਾਜਕਥਾ. ਏਸ ਨਯੋ ਚੋਰਕਥਾਦੀਸੁ. ਤੇਸੁ ‘‘ਅਸੁਕੋ ਰਾਜਾ ਅਭਿਰੂਪੋ ਦਸ੍ਸਨੀਯੋ’’ਤਿਆਦਿਨਾ ਨਯੇਨ ਗੇਹਸ੍ਸਿਤਕਥਾਵ ਤਿਰਚ੍ਛਾਨਕਥਾ ਹੋਤਿ. ‘‘ਸੋਪਿ ਨਾਮ ਏਵਂ ਮਹਾਨੁਭਾਵੋ ਖਯਂ ਗਤੋ’’ਤਿ ਏਵਂ ਪਵਤ੍ਤਾ ਪਨ ਕਮ੍ਮਟ੍ਠਾਨਭਾਵੇ ਤਿਟ੍ਠਤਿ. ਚੋਰੇਸੁਪਿ ‘‘ਮੂਲਦੇਵੋ ਏਵਂ ਮਹਾਨੁਭਾਵੋ, ਮੇਘਮਾਲੋ ਏਵਂ ਮਹਾਨੁਭਾਵੋ’’ਤਿ ਤੇਸਂ ਕਮ੍ਮਂ ਪਟਿਚ੍ਚ ‘‘ਅਹੋ ਸੂਰਾ’’ਤਿ ਗੇਹਸ੍ਸਿਤਕਥਾਵ ਤਿਰਚ੍ਛਾਨਕਥਾ. ਯੁਦ੍ਧੇਪਿ ਭਾਰਤਯੁਦ੍ਧਾਦੀਸੁ ‘‘ਅਸੁਕੇਨ ਅਸੁਕੋ ਏਵਂ ਮਾਰਿਤੋ ਏਵਂ ਵਿਦ੍ਧੋ’’ਤਿ ਕਾਮਸ੍ਸਾਦਵਸੇਨੇਵ ਕਥਾ ਤਿਰਚ੍ਛਾਨਕਥਾ. ‘‘ਤੇਪਿ ਨਾਮ ਖਯਂ ਗਤਾ’’ਤਿ ਏਵਂ ਪਵਤ੍ਤਾ ਪਨ ਸਬ੍ਬਤ੍ਥ ਕਮ੍ਮਟ੍ਠਾਨਮੇਵ ਹੋਤਿ.
ਅਪਿ ਚ ਅਨ੍ਨਾਦੀਸੁ ‘‘ਏਵਂ ਵਣ੍ਣਵਨ੍ਤਂ ਗਨ੍ਧਵਨ੍ਤਂ ਰਸਵਨ੍ਤਂ ਫਸ੍ਸਸਮ੍ਪਨ੍ਨਂ ਖਾਦਿਮ੍ਹ ਭੁਞ੍ਜਿਮ੍ਹ ਪਿਵਿਮ੍ਹ ਪਰਿਭੁਞ੍ਜਿਮ੍ਹਾ’’ਤਿ ਕਾਮਸ੍ਸਾਦਵਸੇਨ ਕਥੇਤੁਂ ਨ ਵਟ੍ਟਤਿ, ਸਾਤ੍ਥਕਂ ਪਨ ਕਤ੍ਵਾ ‘‘ਪੁਬ੍ਬੇ ਏਵਂ ਵਣ੍ਣਾਦਿਸਮ੍ਪਨ੍ਨਂ ਅਨ੍ਨਂ ਪਾਨਂ ਵਤ੍ਥਂ ਸਯਨਂ ਮਾਲਂ ਗਨ੍ਧਂ ਸੀਲਵਨ੍ਤਾਨਂ ਅਦਮ੍ਹ, ਚੇਤਿਯਪੂਜਂ ਅਕਰਿਮ੍ਹਾ’’ਤਿ ਕਥੇਤੁਂ ਵਟ੍ਟਤਿ. ਞਾਤਿਕਥਾਦੀਸੁ ਪਨ ‘‘ਅਮ੍ਹਾਕਂ ਞਾਤਕਾ ਸੂਰਾ ਸਮਤ੍ਥਾ’’ਤਿ ਵਾ, ‘‘ਪੁਬ੍ਬੇ ਮਯਂ ਏਵਂ ਵਿਚਿਤ੍ਰੇਹਿ ਯਾਨੇਹਿ ਵਿਚਰਿਮ੍ਹਾ’’ਤਿ ਵਾ ਅਸ੍ਸਾਦਵਸੇਨ ਵਤ੍ਤੁਂ ਨ ਵਟ੍ਟਤਿ, ਸਾਤ੍ਥਕਂ ਪਨ ਕਤ੍ਵਾ ‘‘ਤੇਪਿ ਨੋ ਞਾਤਕਾ ਖਯਂ ਗਤਾ’’ਤਿ ਵਾ, ‘‘ਪੁਬ੍ਬੇ ਮਯਂ ਏਵਰੂਪਾ ਉਪਾਹਨਾ ਸਙ੍ਘਸ੍ਸ ਅਦਮ੍ਹਾ’’ਤਿ ਵਾ ਕਥੇਤੁਂ ਵਟ੍ਟਤਿ. ਗਾਮਕਥਾਪਿ ਸੁਨਿਵਿਟ੍ਠਦੁਨ੍ਨਿਵਿਟ੍ਠਸੁਭਿਕ੍ਖਦੁਬ੍ਭਿਕ੍ਖਾਦਿਵਸੇਨ ‘‘ਅਸੁਕਗਾਮਵਾਸਿਨੋ ਸੂਰਾ ਸਮਤ੍ਥਾ’’ਤਿ ਵਾ ਏਵਂ ਅਸ੍ਸਾਦਵਸੇਨ ਵਤ੍ਤੁਂ ਨ ਵਟ੍ਟਤਿ, ਸਾਤ੍ਥਕਂ ਪਨ ਕਤ੍ਵਾ ‘‘ਸਦ੍ਧਾ ਪਸਨ੍ਨਾ’’ਤਿ ਵਾ, ‘‘ਖਯਵਯਂ ਗਤਾ’’ਤਿ ਵਾ ਵਤ੍ਤੁਂ ਵਟ੍ਟਤਿ.
ਨਿਗਮਨਗਰਜਨਪਦਕਥਾਸੁਪਿ ਏਸੇਵ ਨਯੋ. ਇਤ੍ਥਿਕਥਾਪਿ ਵਣ੍ਣਸਣ੍ਠਾਨਾਦੀਨਿ ਪਟਿਚ੍ਚ ਅਸ੍ਸਾਦਵਸੇਨ ਨ ਵਟ੍ਟਤਿ, ‘‘ਸਦ੍ਧਾ ਪਸਨ੍ਨਾ, ਖਯਵਯਂ ਗਤਾ’’ਤਿ ਏਵਮੇਵ ਵਟ੍ਟਤਿ. ਸੂਰਕਥਾਪਿ ‘‘ਨਨ੍ਦਿਮਿਤ੍ਤੋ ਨਾਮ ਯੋਧੋ ਸੂਰੋ ਅਹੋਸੀ’’ਤਿ ਅਸ੍ਸਾਦਵਸੇਨ ਨ ਵਟ੍ਟਤਿ. ‘‘ਸਦ੍ਧੋ ਅਹੋਸਿ, ਖਯਵਯਂ ਗਤੋ’’ਤਿ ਏਵਮੇਵ ਵਟ੍ਟਤਿ. ਵਿਸਿਖਾਕਥਾਪਿ ‘‘ਅਸੁਕਾ ਵਿਸਿਖਾ ਸੁਨਿਵਿਟ੍ਠਾ ਦੁਨ੍ਨਿਵਿਟ੍ਠਾ ਸੂਰਾ ਸਮਤ੍ਥਾ’’ਤਿ ਅਸ੍ਸਾਦਵਸੇਨ ਨ ਵਟ੍ਟਤਿ. ‘‘ਸਦ੍ਧਾ ਪਸਨ੍ਨਾ, ਖਯਵਯਂ ਗਤਾ’’ਇਚ੍ਚੇਵ ਵਟ੍ਟਤਿ.
ਕੁਮ੍ਭਟ੍ਠਾਨਕਥਾਤਿ ਉਦਕਟ੍ਠਾਨਕਥਾ, ‘‘ਉਦਕਤਿਤ੍ਥਕਥਾ’’ਤਿਪਿ ਵੁਚ੍ਚਤਿ, ਕੁਮ੍ਭਦਾਸਿਕਥਾ ਵਾ. ਸਾਪਿ ‘‘ਪਾਸਾਦਿਕਾ, ਨਚ੍ਚਿਤੁਂ ਗਾਯਿਤੁਂ ਛੇਕਾ’’ਤਿ ਅਸ੍ਸਾਦਵਸੇਨ ਨ ਵਟ੍ਟਤਿ, ‘‘ਸਦ੍ਧਾ ਪਸਨ੍ਨਾ’’ਤਿਆਦਿਨਾ ਨਯੇਨ ਵਟ੍ਟਤਿ. ਪੁਬ੍ਬਪੇਤਕਥਾਤਿ ਅਤੀਤਞਾਤਿਕਥਾ. ਤਤ੍ਥ ਵਤ੍ਤਮਾਨਞਾਤਿਕਥਾਸਦਿਸੋਵ ਵਿਨਿਚ੍ਛਯੋ.
ਨਾਨਤ੍ਤਕਥਾਤਿ ਪੁਰਿਮਪਚ੍ਛਿਮਕਥਾਹਿ ਵਿਮੁਤ੍ਤਾ ਅਵਸੇਸਾ ਨਾਨਾਸਭਾਵਾ ਨਿਰਤ੍ਥਕਕਥਾ. ਲੋਕਕ੍ਖਾਯਿਕਾਤਿ ‘‘ਅਯਂ ਲੋਕੋ ਕੇਨ ਨਿਮ੍ਮਿਤੋ? ਅਸੁਕੇਨ ਨਾਮ ਨਿਮ੍ਮਿਤੋ. ਕਾਕੋ ਸੇਤੋ ਅਟ੍ਠੀਨਂ ਸੇਤਤ੍ਤਾ, ਬਲਾਕਾ ਰਤ੍ਤਾ ਲੋਹਿਤਸ੍ਸ ਰਤ੍ਤਤ੍ਤਾ’’ਤਿ ਏਵਮਾਦਿਕਾ ਲੋਕਾਯਤਵਿਤਣ੍ਡਸਲ੍ਲਾਪਕਥਾ.
ਸਮੁਦ੍ਦਕ੍ਖਾਯਿਕਾ ਨਾਮ ਕਸ੍ਮਾ ਸਮੁਦ੍ਦੋ ਸਾਗਰੋ? ਸਾਗਰਦੇਵੇਨ ਖਤਤ੍ਤਾ ਸਾਗਰੋ, ‘‘ਖਤੋ ਮੇ’’ਤਿ ਹਤ੍ਥਮੁਦ੍ਦਾਯ ਸਯਂ ਨਿਵੇਦਿਤਤ੍ਤਾ ਸਮੁਦ੍ਦੋਤਿ ਏਵਮਾਦਿਕਾ ਨਿਰਤ੍ਥਕਾ ਸਮੁਦ੍ਦਕ੍ਖਾਨਕਥਾ. ਭਵੋਤਿ ਵੁਦ੍ਧਿ. ਅਭਵੋਤਿ ਹਾਨਿ. ਇਤਿ ਭਵੋ ਇਤਿ ਅਭਵੋਤਿ ਯਂ ਵਾ ਤਂ ਵਾ ਨਿਰਤ੍ਥਕਕਾਰਣਂ ਵਤ੍ਵਾ ਪਵਤ੍ਤਿਤਕਥਾ ਇਤਿਭਵਾਭਵਕਥਾ.
ਆਵਰੇਯ੍ਯਾਤਿ ਆਵਰਣਂ ਕਰੇਯ੍ਯ. ਨਿਵਾਰੇਯ੍ਯਾਤਿ ਆਰਮ੍ਮਣਤੋ ਵਾਰੇਯ੍ਯ. ਸਂਵਰੇਯ੍ਯਾਤਿ ਸਮ੍ਮਾ ਨਿਸ੍ਸੇਸਂ ਕਤ੍ਵਾ ਵਾਰੇਯ੍ਯ. ਰਕ੍ਖੇਯ੍ਯਾਤਿ ਰਕ੍ਖਂ ਕਰੇਯ੍ਯ. ਗੋਪੇਯ੍ਯਾਤਿ ਸਂਗੋਪੇਯ੍ਯ. ਪਿਦਹੇਯ੍ਯਾਤਿ ਪਿਦਹਨਂ ਕਰੇਯ੍ਯ. ਪਚ੍ਛਿਨ੍ਦੇਯ੍ਯਾਤਿ ਸੋਤਂ ਛਿਨ੍ਦੇਯ੍ਯ.
ਤੇਨ ਤੇਨ ਨ ਤੁਸ੍ਸਨ੍ਤੀਤਿ ਤੇਨ ਤੇਨ ਅਮ੍ਬਿਲਾਦਿਨਾ ਰਸੇਨ ਨ ਸਨ੍ਤੋਸਂ ਆਪਜ੍ਜਨ੍ਤਿ. ਅਪਰਾਪਰਂ ਪਰਿਯੇਸਨ੍ਤੀਤਿ ਉਪਰੂਪਰਿ ਗਵੇਸਨ੍ਤਿ.
੧੫੮. ਫਸ੍ਸੇਨਾਤਿ ਰੋਗਫਸ੍ਸੇਨ. ਭਵਞ੍ਚ ਨਾਭਿਜਪ੍ਪੇਯ੍ਯਾਤਿ ਤਸ੍ਸ ਫਸ੍ਸਸ੍ਸ ਵਿਨੋਦਨਤ੍ਥਾਯ ਕਾਮਭਵਾਦਿਭਵਞ੍ਚ ਨ ਪਤ੍ਥੇਯ੍ਯ. ਭੇਰਵੇਸੁ ਚ ਨ ਸਮ੍ਪਵੇਧੇਯ੍ਯਾਤਿ ਤਸ੍ਸ ਫਸ੍ਸਸ੍ਸ ਪਚ੍ਚਯਭੂਤੇਸੁ ਸੀਹਬ੍ਯਗ੍ਘਾਦੀਸੁ ਭੇਰਵੇਸੁ ਚ ਨ ਸਮ੍ਪਵੇਧੇਯ੍ਯ, ਅਵਸੇਸੇਸੁ ਵਾ ਘਾਨਿਨ੍ਦ੍ਰਿਯਮਨਿਨ੍ਦ੍ਰਿਯਵਿਸਯੇਸੁ ਨ ਸਮ੍ਪਵੇਧੇਯ੍ਯ. ਏਵਂ ਪਰਿਪੂਰੋ ਇਨ੍ਦ੍ਰਿਯਸਂਵਰੋ ਚ ਵੁਤ੍ਤੋ ਹੋਤਿ. ਪੁਰਿਮੇਹਿ ਵਾ ਇਨ੍ਦ੍ਰਿਯਸਂਵਰਂ ਦਸ੍ਸੇਤ੍ਵਾ ਇਮਿਨਾ ‘‘ਅਰਞ੍ਞੇ ਵਸਤਾ ਭੇਰਵਂ ਦਿਸ੍ਵਾ ਵਾ ਸੁਤ੍ਵਾ ਵਾ ਨਪ੍ਪਵੇਧਿਤਬ੍ਬ’’ਨ੍ਤਿ ਦਸ੍ਸੇਤਿ.
ਏਕੇਨਾਕਾਰੇਨਾਤਿ ਏਕੇਨ ਕਾਰਣੇਨ. ਭਯਮ੍ਪਿ ਭੇਰਵਮ੍ਪਿ ਤਞ੍ਞੇਵਾਤਿ ਭਯਨ੍ਤਿ ਚ ਭੇਰਵਨ੍ਤਿ ਚ ਖੁਦ੍ਦਕਮ੍ਪਿ ਮਹਨ੍ਤਮ੍ਪਿ ਉਤ੍ਤਾਸਨਿਮਿਤ੍ਤਮੇਵ. ਤਮੇਵਤ੍ਥਂ ਦਸ੍ਸੇਤੁਂ ‘‘ਵੁਤ੍ਤਂ ਹੇਤ’’ਨ੍ਤਿਆਦਿਮਾਹ. ਭਯਨ੍ਤਿ ਤਪ੍ਪਚ੍ਚਯਾ ਉਪ੍ਪਨ੍ਨਭਯਂ. ਭਯਾਨਕਨ੍ਤਿ ਆਕਾਰਨਿਦ੍ਦੇਸੋ. ਛਮ੍ਭਿਤਤ੍ਤਨ੍ਤਿ ਭਯਵਸੇਨ ਗਤ੍ਤਚਲਨਂ. ਲੋਮਹਂਸੋਤਿ ਲੋਮਾਨਂ ਹਂਸਨਂ ਉਦ੍ਧਗ੍ਗਭਾਵੋ. ਇਮਿਨਾ ਪਦਦ੍ਵਯੇਨ ਕਿਚ੍ਚਤੋ ਭਯਂ ਦਸ੍ਸੇਤ੍ਵਾ ਪੁਨ ‘‘ਚੇਤਸੋ ਉਬ੍ਬੇਗੋ ਉਤ੍ਰਾਸੋ’’ਤਿ ਸਭਾਵਤੋ ਦਸ੍ਸੇਤਿ. ਉਬ੍ਬੇਗ੍ਗੋਤਿ ਭੀਰੁਕੋ, ਉਤ੍ਰਾਸੋਤਿ ਚਿਤ੍ਤਕ੍ਖੋਭੋ. ਜਾਤਿਭਯਨ੍ਤਿ ਜਾਤਿਂ ਪਟਿਚ੍ਚ ਉਪ੍ਪਨ੍ਨਭਯਂ. ਸੇਸੇਸੁਪਿ ਏਸੇਵ ਨਯੋ. ਰਾਜਤੋ ਉਪ੍ਪਨ੍ਨਭਯਂ ਰਾਜਭਯਂ. ਸੇਸੇਸੁਪਿ ਏਸੇਵ ਨਯੋ. ਅਤ੍ਤਾਨੁਵਾਦਭਯਨ੍ਤਿ ਪਾਪਕਮ੍ਮਿਨੋ ਅਤ੍ਤਾਨਂ ਅਨੁਵਦਨ੍ਤਸ੍ਸ ਉਪ੍ਪਜ੍ਜਨਕਭਯਂ. ਪਰਾਨੁਵਾਦਭਯਨ੍ਤਿ ਪਰਸ੍ਸ ਅਨੁਵਾਦਤੋ ਉਪ੍ਪਜ੍ਜਨਕਭਯਂ.
ਦਣ੍ਡਭਯਨ੍ਤਿ ਆਗਾਰਿਕਸ੍ਸ ਰਞ੍ਞਾ ਪਵਤ੍ਤਿਤਦਣ੍ਡਂ, ਅਨਾਗਾਰਿਕਸ੍ਸ ਵਿਨਯਦਣ੍ਡਂ ਪਟਿਚ੍ਚ ਉਪ੍ਪਜ੍ਜਨਕਭਯਂ. ਦੁਗ੍ਗਤਿਭਯਨ੍ਤਿ ਚਤ੍ਤਾਰੋ ਅਪਾਯੇ ਪਟਿਚ੍ਚ ਉਪ੍ਪਜ੍ਜਨਕਭਯਂ. ਊਮਿਭਯਨ੍ਤਿ ਮਹਾਸਮੁਦ੍ਦੇ ਉਦਕਂ ਓਰੋਹਨ੍ਤਸ੍ਸ ਪਵਤ੍ਤਭਯਂ. ਮਹਾਸਮੁਦ੍ਦੇ ਕਿਰ ਮਹਿਨ੍ਦਵੀਚਿ ਨਾਮ ਸਟ੍ਠਿ ਯੋਜਨਾਨਿ ਉਗ੍ਗਚ੍ਛਤਿ, ਤਰਙ੍ਗਵੀਚਿ ਨਾਮ ਪਣ੍ਣਾਸ ਯੋਜਨਾਨਿ, ਰੋਹਣਵੀਚਿ ਨਾਮ ਚਤ੍ਤਾਲੀਸ ਯੋਜਨਾਨਿ ਉਗ੍ਗਚ੍ਛਤਿ. ਏਵਰੂਪਾ ਊਮਿਯੋ ਪਟਿਚ੍ਚ ਪਵਤ੍ਤਂ ਊਮਿਭਯਂ. ਕੁਮ੍ਭੀਲਤੋ ਪਵਤ੍ਤਂ ਭਯਂ ਕੁਮ੍ਭੀਲਭਯਂ. ਉਦਕਾਵਟ੍ਟਤੋ ਭਯਂ ਆਵਟ੍ਟਭਯਂ. ਸੁਸੁਕਾ ਵੁਚ੍ਚਤਿ ਚਣ੍ਡਮਚ੍ਛੋ, ਤਤੋ ਭਯਂ ਸੁਸੁਕਾਭਯਂ. ਆਜੀਵਿਕਭਯਨ੍ਤਿ ਜੀਵਿਤਵੁਤ੍ਤਿਤੋ ਭਯਂ ਆਜੀਵਿਕਭਯਂ. ਅਸਿਲੋਕਭਯਨ੍ਤਿ ਗਰਹਤੋ ਭਯਂ.
੧੫੯. ਲਦ੍ਧਾ ਨ ਸਨ੍ਨਿਧਿਂ ਕਯਿਰਾਤਿ ਏਤੇਸਂ ਅਨ੍ਨਾਦੀਨਂ ਯਂਕਿਞ੍ਚਿ ਧਮ੍ਮੇਨ ਲਭਿਤ੍ਵਾ ‘‘ਅਰਞ੍ਞੇ ਚ ਸੇਨਾਸਨੇ ਵਸਤਾ ਦੁਲ੍ਲਭ’’ਨ੍ਤਿ ਚਿਨ੍ਤੇਤ੍ਵਾ ਸਨ੍ਨਿਧਿਂ ਨ ਕਰੇਯ੍ਯ.
ਓਦਨੋਤਿ ਸਾਲਿ ਵੀਹਿ ਯਵੋ ਗੋਧੁਮੋ ਕਙ੍ਗੁ ਵਰਕੋ ਕੁਦ੍ਰੂਸਕੋਤਿ ਸਤ੍ਤਨ੍ਨਂ ਧਞ੍ਞਾਨਂ ਧਞ੍ਞਾਨੁਲੋਮਾਨਞ੍ਚ ਤਣ੍ਡੁਲੇਹਿ ਨਿਬ੍ਬਤ੍ਤੋ. ਕੁਮ੍ਮਾਸੋਤਿ ਯਵੇਹਿ ਨਿਬ੍ਬਤ੍ਤੋ. ਸਤ੍ਤੂਤਿ ਸਾਲਿਆਦੀਹਿ ਕਤਸਤ੍ਤੁ. ਮਚ੍ਛੋ ਦਕਸਮ੍ਭਵੋ. ਮਂਸਂ ਪਾਕਟਮੇਵ. ਅਮ੍ਬਪਾਨਨ੍ਤਿ ਆਮੇਹਿ ਵਾ ਪਕ੍ਕੇਹਿ ਵਾ ਅਮ੍ਬੇਹਿ ਕਤਪਾਨਂ. ਤਤ੍ਥ ਆਮੇਹਿ ਕਰੋਨ੍ਤੇਨ ਅਮ੍ਬਤਰੁਣਾਨਿ ਭਿਨ੍ਦਿਤ੍ਵਾ ਉਦਕੇ ਪਕ੍ਖਿਪਿਤ੍ਵਾ ਆਤਪੇ ਆਦਿਚ੍ਚਪਾਕੇਨ ਪਚਿਤ੍ਵਾ ਪਰਿਸ੍ਸਾਵੇਤ੍ਵਾ ਤਦਹੁ ਪਟਿਗ੍ਗਹਿਤੇਹਿ ਮਧੁਸਕ੍ਕਰਕਪ੍ਪੂਰਾਦੀਹਿ ਯੋਜੇਤ੍ਵਾ ਕਾਤਬ੍ਬਂ. ਜਮ੍ਬੁਪਾਨਨ੍ਤਿ ਜਮ੍ਬੁਫਲੇਹਿ ਕਤਪਾਨਂ. ਚੋਚਪਾਨਨ੍ਤਿ ਅਟ੍ਠਿਕੇਹਿ ਕਦਲਿਫਲੇਹਿ ਕਤਪਾਨਂ. ਮੋਚਪਾਨਨ੍ਤਿ ਅਨਟ੍ਠਿਕੇਹਿ ਕਦਲਿਫਲੇਹਿ ਕਤਪਾਨਂ. ਮਧੁਕਪਾਨਨ੍ਤਿ ਮਧੁਕਾਨਂ ਜਾਤਿਰਸੇਨ ਕਤਪਾਨਂ. ਤਂ ਪਨ ਉਦਕਸਮ੍ਭਿਨ੍ਨਂ ਵਟ੍ਟਤਿ, ਸੁਦ੍ਧਂ ਨ ਵਟ੍ਟਤਿ. ਮੁਦ੍ਦਿਕਪਾਨਨ੍ਤਿ ਮੁਦ੍ਦਿਕਾ ਉਦਕੇ ਮਦ੍ਦਿਤ੍ਵਾ ਅਮ੍ਬਪਾਨਂ ਵਿਯ ਕਤਪਾਨਂ. ਸਾਲੂਕਪਾਨਨ੍ਤਿ ਰਤ੍ਤੁਪ੍ਪਲਨੀਲੁਪ੍ਪਲਾਦੀਨਂ ਸਾਲੂਕੇ ਮਦ੍ਦਿਤ੍ਵਾ ਕਤਪਾਨਂ. ਫਾਰੁਸਕਪਾਨਨ੍ਤਿ ਫਾਰੁਸਕੇਹਿ ਅਮ੍ਬਪਾਨਂ ਵਿਯ ਕਤਪਾਨਂ. ਕੋਸਮ੍ਬਪਾਨਨ੍ਤਿ ਕੋਸਮ੍ਬਫਲੇਹਿ ਕਤਪਾਨਂ. ਕੋਲਪਾਨਨ੍ਤਿ ਕੋਲਫਲੇਹਿ ਕਤਪਾਨਂ. ਬਦਰਪਾਨਨ੍ਤਿ ਮਹਾਕੋਲਫਲੇਹਿ ਅਮ੍ਬਪਾਨਂ ਵਿਯ ਕਤਪਾਨਂ. ਇਮਾਨਿ ਏਕਾਦਸ ਪਾਨਾਨਿ, ਤਾਨਿਪਿ ਆਦਿਚ੍ਚਪਾਕਾਨਿ ਵਟ੍ਟਨ੍ਤਿ.
ਘਤਪਾਨਨ੍ਤਿ ਸਪ੍ਪਿਪਾਨਂ. ਤੇਲਪਾਨਨ੍ਤਿ ਤਿਲਤੇਲਾਦੀਨਂ ਪਾਨਂ. ਪਯੋਪਾਨਨ੍ਤਿ ਖੀਰਪਾਨਂ. ਯਾਗੁਪਾਨਨ੍ਤਿ ਸੀਤਲਾਦਿਯਾਗੁਪਾਨਂ. ਰਸਪਾਨਨ੍ਤਿ ਸਾਕਾਦਿਰਸਪਾਨਂ. ਪਿਟ੍ਠਖਜ੍ਜਕਨ੍ਤਿ ਸਤ੍ਤਨ੍ਨਂ ਤਾਵ ਧਞ੍ਞਾਨਂ ਧਞ੍ਞਾਨੁਲੋਮਾਨਂ ਅਪਰਣ੍ਣਾਨਞ੍ਚ ਪਿਟ੍ਠਂ ਪਨਸਪਿਟ੍ਠਂ ਲਬੁਜਪਿਟ੍ਠਂ ਅਮ੍ਬਾਟਕਪਿਟ੍ਠਂ ਸਾਲਪਿਟ੍ਠਂ ਖੀਰਵਲ੍ਲਿਪਿਟ੍ਠਞ੍ਚਾਤਿ ਏਵਮਾਦੀਨਂ ਪਿਟ੍ਠੇਹਿ ਕਤਂ ਪਿਟ੍ਠਖਜ੍ਜਕਂ. ਪੂਵਖਜ੍ਜਕਮ੍ਪਿ ਏਤੇਹਿਯੇਵ ਕਤਂ. ਮੂਲਖਜ੍ਜਕਨ੍ਤਿ ਮੂਲਕਮੂਲਂ ਖਾਰਕਮੂਲਂ ਚੁਚ੍ਚੁਮੂਲਨ੍ਤਿ ਏਵਮਾਦਿ. ਤਚਖਜ੍ਜਕਨ੍ਤਿ ਉਚ੍ਛੁਤਚਾਦਯੋ. ਪਤ੍ਤਖਜ੍ਜਕਨ੍ਤਿ ਨਿਮ੍ਬਪਣ੍ਣਕੁਟਜਪਣ੍ਣਪਟੋਲਪਣ੍ਣਸੁਲਸਪਣ੍ਣਾਦਯੋ. ਪੁਪ੍ਫਖਜ੍ਜਕਨ੍ਤਿ ਮੂਲਕਪੁਪ੍ਫਖਾਰਕਪੁਪ੍ਫਸੇਤਵਰਣਸਿਗ੍ਗੁਉਪ੍ਪਲਪਦੁਮਕਾਦਯੋ. ਫਲਖਜ੍ਜਕਨ੍ਤਿ ਪਨਸਲਬੁਜਤਾਲਨਾਲ਼ਿਕੇਰਅਮ੍ਬਾਟਕਤਿਨ੍ਤਿਣਿਕਮਾਤੁਲੁਙ੍ਗਕਪਿਟ੍ਠਫਲਅਲਾਬੁਕੁਮ੍ਭਣ੍ਡਫੁਸ੍ਸ- ਫਲਤਿਮ੍ਬਰੂਸਕਤਿਲਵਾਤਿਙ੍ਗਣਚੋਚਮੋਚਮਧੁਕਾਦੀਨਂ ਫਲਾਨਂ ਖਜ੍ਜਕਂ.
ਨ ਕੁਹਨਾਯਾਤਿ ਨ ਵਿਮ੍ਹਾਪਨਾਯ. ਨ ਲਪਨਾਯਾਤਿ ਪਚ੍ਚਯਤ੍ਥਂ ਨ ਲਪਨਾਯ. ਵਿਹਾਰਂ ਆਗਤੇ ਮਨੁਸ੍ਸੇ ਦਿਸ੍ਵਾ ‘‘ਕਿਮਤ੍ਥਾਯ ਭੋਨ੍ਤੋ ਆਗਤਾ’’ਤਿ ਭਿਕ੍ਖੂ ਨਿਮਨ੍ਤੇਤੁਨ੍ਤਿ. ‘‘ਯਦਿ ਏਵਂ ਗਚ੍ਛਥ, ਅਹਂ ਪਚ੍ਛਤੋ ਗਹੇਤ੍ਵਾ ਆਗਚ੍ਛਾਮੀ’’ਤਿ ਏਵਂ ਨ ਲਪਨਾਯ. ਅਥ ਵਾ ਅਤ੍ਤਾਨਂ ਉਪਨੇਤ੍ਵਾ ‘‘ਅਹਂ ਤਿਸ੍ਸੋ, ਮਯਿ ਰਾਜਾ ਪਸਨ੍ਨੋ, ਮਯਿ ਅਸੁਕੋ ਰਾਜਾ ਅਸੁਕੋ ਚ ਰਾਜਮਹਾਮਤ੍ਤੋ ਪਸਨ੍ਨੋ’’ਤਿ ਏਵਂ ਨ ਲਪਨਾਯ. ਨ ਨੇਮਿਤ੍ਤਿਕਤਾਯਾਤਿ ਯੇਨ ਕੇਨਚਿ ਪਰੇਸਂ ਪਚ੍ਚਯਦਾਨਸਞ੍ਞਾਜਨਕੇਨ ਕਾਯਵਚੀਕਮ੍ਮੇਨ ਨ ਨੇਮਿਤ੍ਤਿਕਤਾਯ. ਨ ਨਿਪ੍ਪੇਸਿਕਤਾਯਾਤਿ ਯਾ ਪਰੇਸਂ ਅਕ੍ਕੋਸਨਾਦਿਕਿਰਿਯਾ ਯਸ੍ਮਾ ਵੇਲ਼ੁਪੇਸਿਕਾ ਵਿਯ ਅਬ੍ਭਙ੍ਗਂ ਪਰਸ੍ਸ ਗੁਣਂ ਨਿਪ੍ਪੇਸੇਤਿ ਨਿਪੁਞ੍ਛਤਿ, ਯਸ੍ਮਾ ਵਾ ਗਨ੍ਧਜਾਤਂ ਨਿਪਿਸਿਤ੍ਵਾ ਗਨ੍ਧਮਗ੍ਗਨਾ ਵਿਯ ਪਰਗੁਣੇ ਨਿਪਿਸਿਤ੍ਵਾ ਵਿਚੁਣ੍ਣੇਤ੍ਵਾ ਏਸਾ ਲਾਭਮਗ੍ਗਨਾ ਹੋਤਿ, ਤਸ੍ਮਾ ‘‘ਨਿਪ੍ਪੇਸਿਕਤਾ’’ਤਿ ਵੁਚ੍ਚਤਿ. ਨ ਏਵਰੂਪਾਯ ਨਿਪ੍ਪੇਸਿਕਤਾਯ. ਨ ਲਾਭੇਨ ਲਾਭਂ ਨਿਜਿਗੀਸਨਤਾਯਾਤਿ ਏਤ੍ਥ ਨਿਜਿਗੀਸਨਤਾਤਿ ਮਗ੍ਗਨਾ, ਅਞ੍ਞਤੋ ਲਦ੍ਧਞ੍ਹਿ ਅਞ੍ਞਤ੍ਥ ਹਰਣਵਸੇਨ ਲਾਭੇਨ ਲਾਭਮਗ੍ਗਨਾ ਨਾਮ ਹੋਤਿ. ਨ ਏਵਰੂਪਾਯ ਲਾਭੇਨ ਲਾਭਮਗ੍ਗਨਾਯ.
ਨ ਦਾਰੁਦਾਨੇਨਾਤਿ ਨ ਪਚ੍ਚਯਹੇਤੁਕੇਨ ਦਾਰੁਦਾਨੇਨ ਵਿਹਾਰੇ ਉਟ੍ਠਿਤਞ੍ਹਿ ਅਰਞ੍ਞਤੋ ਵਾ ਆਹਰਿਤ੍ਵਾ ਰਕ੍ਖਿਤਗੋਪਿਤਦਾਰੁਂ ‘‘ਏਵਂ ਮੇ ਪਚ੍ਚਯਂ ਦਸ੍ਸਨ੍ਤੀ’’ਤਿ ਉਪਟ੍ਠਾਕਾਨਂ ਦਾਤੁਂ ਨ ਵਟ੍ਟਤਿ. ਏਵਞ੍ਹਿ ਜੀਵਿਕਂ ਕਪ੍ਪੇਨ੍ਤੋ ਅਨੇਸਨਾਯ ਮਿਚ੍ਛਾਜੀਵੇਨ ਜੀਵਤਿ, ਸੋ ਦਿਟ੍ਠੇਵ ਧਮ੍ਮੇ ਗਰਹਂ ਪਾਪੁਣਾਤਿ, ਸਮ੍ਪਰਾਯੇ ਚ ਅਪਾਯਪਰਿਪੂਰਕੋ ਹੋਤਿ. ਅਤ੍ਤਨੋ ਪੁਗ੍ਗਲਿਕਂ ਦਾਰੁਂ ਕੁਸਲਙ੍ਗਹਤ੍ਥਾਯ ਦਦਨ੍ਤੋ ਕੁਲਦੂਸਕਦੁਕ੍ਕਟਂ ਆਪਜ੍ਜਤਿ, ਪਰਪੁਗ੍ਗਲਿਕਂ ਥੇਯ੍ਯਚਿਤ੍ਤੇਨ ਦਦਨ੍ਤੋ ਭਣ੍ਡਗ੍ਘੇਨ ਕਾਰੇਤਬ੍ਬੋ. ਸਙ੍ਘਿਕੇਪਿ ਏਸੇਵ ਨਯੋ. ਸਚੇ ਪਨ ਤਂ ਇਸ੍ਸਰਤਾਯ ਦੇਤਿ, ਗਰੁਭਣ੍ਡਵਿਸ੍ਸਜ੍ਜਨਂ ਆਪਜ੍ਜਤਿ. ਕਤਰਂ ਪਨ ਦਾਰੁ ਗਰੁਭਣ੍ਡਂ ਹੋਤਿ, ਕਤਰਂ ਨ ਹੋਤੀਤਿ? ਯਂ ਤਾਵ ਅਰੋਪਿਮਂ ਸਯਂਜਾਤਂ, ਤਂ ਸਙ੍ਘੇਨ ਪਰਿਚ੍ਛਿਨ੍ਨਟ੍ਠਾਨੇਯੇਵ ਗਰੁਭਣ੍ਡਂ, ਤਤੋ ਪਰਂ ਨ ਗਰੁਭਣ੍ਡਂ. ਰੋਪਿਮਟ੍ਠਾਨੇ ਚ ਸਬ੍ਬੇਨ ਸਬ੍ਬਂ ਗਰੁਭਣ੍ਡਂ, ਪਮਾਣਤੋ ਸੂਚਿਦਣ੍ਡਕਪ੍ਪਮਾਣਂ ਗਰੁਭਣ੍ਡਂ.
ਨ ਵੇਲ਼ੁਦਾਨੇਨਾਤਿਆਦੀਸੁਪਿ ਨ ਵੇਲ਼ੁਦਾਨੇਨਾਤਿ ਨ ਪਚ੍ਚਯਹੇਤੁਕੇਨ ਵੇਲ਼ੁਦਾਨੇਨਾਤਿਆਦਿ ਸਬ੍ਬਂ ਨ ਦਾਰੁਦਾਨੇਨਾਤਿ ਏਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਵੇਲ਼ੁ ਪਨ ਪਮਾਣਤੋ ਤੇਲਨਾਲ਼ਿਪ੍ਪਮਾਣੋ ਗਰੁਭਣ੍ਡਂ, ਨ ਤਤੋ ਹੇਟ੍ਠਾ. ਮਨੁਸ੍ਸਾ ਵਿਹਾਰਂ ਗਨ੍ਤ੍ਵਾ ਵੇਲ਼ੁਂ ਯਾਚਨ੍ਤਿ, ਭਿਕ੍ਖੂ ‘‘ਸਙ੍ਘਿਕੋ’’ਤਿ ਦਾਤੁਂ ਨ ਵਿਸਹਨ੍ਤਿ, ਮਨੁਸ੍ਸਾ ਪੁਨਪ੍ਪੁਨਂ ਯਾਚਨ੍ਤਿ ਵਾ ਤਜ੍ਜੇਨ੍ਤਿ ਵਾ, ਤਦਾ ਭਿਕ੍ਖੂਹਿ ‘‘ਦਣ੍ਡਕਮ੍ਮਂ ਕਤ੍ਵਾ ਗਣ੍ਹਥਾ’’ਤਿ ਵਤ੍ਤੁਂ ਵਟ੍ਟਤਿ, ਵੇਲ਼ੁਦਾਨਂ ਨਾਮ ਨ ਹੋਤਿ. ਸਚੇ ਤੇ ਦਣ੍ਡਕਮ੍ਮਤ੍ਥਾਯ ਵਾਸਿਫਰਸੁਆਦੀਨਿ ਵਾ ਖਾਦਨੀਯਂ ਵਾ ਭੋਜਨੀਯਂ ਵਾ ਦੇਨ੍ਤਿ, ਗਹੇਤੁਂ ਨ ਵਟ੍ਟਤਿ.
ਵਿਨਯਟ੍ਠਕਥਾਯਂ ਪਨ ‘‘ਦਡ੍ਢਗੇਹਾ ਮਨੁਸ੍ਸਾ ਗਣ੍ਹਿਤ੍ਵਾ ਗਚ੍ਛਨ੍ਤਾ ਨ ਵਾਰੇਤਬ੍ਬਾ’’ਤਿ ਵੁਤ੍ਤਂ. ਸਚੇ ਸਙ੍ਘਸ੍ਸ ਵੇਲ਼ੁਗੁਮ੍ਬੇ ਵੇਲ਼ੁਦੂਸਿਕਾ ਉਪ੍ਪਜ੍ਜਤਿ, ਤਂ ਅਕੋਟ੍ਟਾਪੇਨ੍ਤਾਨਂ ਵੇਲ਼ੁ ਨਸ੍ਸਤਿ. ‘‘ਕਿਂ ਕਾਤਬ੍ਬ’’ਨ੍ਤਿ ਭਿਕ੍ਖਾਚਾਰੇ ਮਨੁਸ੍ਸਾਨਂ ਆਚਿਕ੍ਖਿਤਬ੍ਬਂ. ਸਚੇ ਕੋਟ੍ਟੇਤੁਂ ਨ ਇਚ੍ਛਨ੍ਤਿ, ‘‘ਸਮਂ ਭਾਗਂ ਲਭਿਸ੍ਸਥਾ’’ਤਿ ਵਤ੍ਤਬ੍ਬਾ. ਨ ਇਚ੍ਛਨ੍ਤਿਯੇਵ, ‘‘ਦ੍ਵੇ ਕੋਟ੍ਠਾਸੇ ਲਭਿਸ੍ਸਥਾ’’ਤਿ ਵਤ੍ਤਬ੍ਬਾ. ਏਵਮ੍ਪਿ ਅਨਿਚ੍ਛਨ੍ਤੇਸੁ ਨਟ੍ਠੇਨ ਅਤ੍ਥੋ ਨਤ੍ਥਿ, ‘‘ਤੁਮ੍ਹਾਕਂ ਖਣੇ ਸਤਿ ਦਣ੍ਡਕਮ੍ਮਂ ਕਰਿਸ੍ਸਥ, ਕੋਟ੍ਟੇਤ੍ਵਾ ਗਣ੍ਹਥਾ’’ਤਿ ਵਤ੍ਤਬ੍ਬਾ, ਵੇਲ਼ੁਦਾਨਂ ਨਾਮ ਨ ਹੋਤਿ. ਵੇਲ਼ੁਗੁਮ੍ਬੇ ਅਗ੍ਗਿਮ੍ਹਿ ਉਟ੍ਠਿਤੇਪਿ ਉਦਕੇਨ ਵੁਯ੍ਹਮਾਨਵੇਲ਼ੂਸੁਪਿ ਏਸੇਵ ਨਯੋ.
ਪਤ੍ਤਦਾਨੇ ਗਰੁਭਣ੍ਡਤਾਯ ਅਯਂ ਵਿਨਿਚ੍ਛਯੋ – ਪਤ੍ਤਮ੍ਪਿ ਹਿ ਯਤ੍ਥ ਵਿਕ੍ਕਾਯਤਿ, ਗਨ੍ਧਕਾਰਾਦਯੋ ਗਨ੍ਧਪਲਿਵੇਠਨਾਦੀਨਂ ਅਤ੍ਥਾਯ ਗਣ੍ਹਨ੍ਤਿ, ਤਾਦਿਸੇ ਦੁਲ੍ਲਭਟ੍ਠਾਨੇਯੇਵ ਗਰੁਭਣ੍ਡਂ ਹੋਤਿ. ਏਸ ਤਾਵ ਕਿਂਸੁਕਪਤ੍ਤਕਣ੍ਣਪਿਲ਼ਨ੍ਧਨਤਾਲਪਤ੍ਤਾਦੀਸੁ ਵਿਨਿਚ੍ਛਯੋ. ਤਾਲਪਣ੍ਣਮ੍ਪਿ ਇਮਸ੍ਮਿਂਯੇਵ ਠਾਨੇ ਕਥੇਤਬ੍ਬਂ – ਤਾਲਪਣ੍ਣਮ੍ਪਿ ਹਿ ਸਯਂਜਾਤੇ ਤਾਲਵਨੇ ਸਙ੍ਘੇਨ ਪਰਿਚ੍ਛਿਨ੍ਨਟ੍ਠਾਨੇਯੇਵ ਗਰੁਭਣ੍ਡਂ, ਨ ਤਤੋ ਪਰਂ, ਰੋਪਿਮਤਾਲੇਸੁ ਸਬ੍ਬਮ੍ਪਿ ਗਰੁਭਣ੍ਡਂ, ਤਸ੍ਸ ਪਮਾਣਂ ਹੇਟ੍ਠਿਮਕੋਟਿਯਾ ਅਟ੍ਠਙ੍ਗੁਲਪ੍ਪਮਾਣੋਪਿ ਰਿਤ੍ਤਪੋਤ੍ਥਕੋ. ਤਿਣਮ੍ਪਿ ਏਤ੍ਥੇਵ ਪਕ੍ਖਿਪਿਤ੍ਵਾ ਕਥੇਤਬ੍ਬਂ. ਯਤ੍ਥ ਪਨ ਤਿਣਂ ਨਤ੍ਥਿ, ਤਤ੍ਥ ਤਾਲਨਾਲ਼ਿਕੇਰਪਣ੍ਣਾਦੀਹਿਪਿ ਛਾਦੇਨ੍ਤਿ. ਤਸ੍ਮਾ ਤਾਨਿਪਿ ਤਿਣੇਨੇਵ ਸਙ੍ਗਹਿਤਾਨਿ. ਇਤਿ ਮੁਞ੍ਜਪਲਾਲਾਦੀਸੁ ਯਂਕਿਞ੍ਚਿ ਮੁਟ੍ਠਿਪ੍ਪਮਾਣਂ ਤਿਣਂ. ਨਾਲ਼ਿਕੇਰਪਣ੍ਣਾਦੀਸੁ ਚ ਏਕਪਣ੍ਣਮ੍ਪਿ ਸਙ੍ਘਸ੍ਸ ਦਿਨ੍ਨਂ ਵਾ ਤਤ੍ਥ ਜਾਤਂ ਵਾ ਬਹਿਆਰਾਮੇ ਸਙ੍ਘਸ੍ਸ ਤਿਣਵਤ੍ਥੁਮ੍ਹਿ ਜਾਤਤਿਣਂ ਵਾ ਰਕ੍ਖਿਤਗੋਪਿਤਂ ਵਾ ਗਰੁਭਣ੍ਡਂ ਹੋਤਿ. ਤਂ ਪਨ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਕਤੇ ਅਤਿਰੇਕਂ ਪੁਗ੍ਗਲਿਕਕਮ੍ਮੇ ਦਾਤੁਂ ਵਟ੍ਟਤਿ. ਹੇਟ੍ਠਾ ਵੁਤ੍ਤਦਾਰੁਵੇਲ਼ੂਸੁਪਿ ਏਸੇਵ ਨਯੋ.
ਪੁਪ੍ਫਦਾਨੇ ‘‘ਏਤ੍ਤਕੇਸੁ ਰੁਕ੍ਖੇਸੁ ਪੁਪ੍ਫਾਨਿ ਵਿਸ੍ਸਜ੍ਜਿਤ੍ਵਾ ਯਾਗੁਭਤ੍ਤਤ੍ਥਾਯ ਉਪਨੇਨ੍ਤੁ, ਏਤ੍ਤਕੇਸੁ ਸੇਨਾਸਨਪਟਿਸਙ੍ਖਰਣੇ ਉਪਨੇਨ੍ਤੂ’’ਤਿ ਏਵਂ ਨਿਯਮਿਤਟ੍ਠਾਨੇਯੇਵ ਪੁਪ੍ਫਾਨਿ ਗਰੁਭਣ੍ਡਾਨਿ ਹੋਨ੍ਤਿ. ਯਦਿ ਸਾਮਣੇਰਾ ਪੁਪ੍ਫਾਨਿ ਓਚਿਨਿਤ੍ਵਾ ਰਾਸਿਂ ਕਰੋਨ੍ਤਿ, ਪਞ੍ਚਙ੍ਗਸਮਨ੍ਨਾਗਤੋ ਪੁਪ੍ਫਭਾਜਕੋ ਭਿਕ੍ਖੁ ਭਿਕ੍ਖੁਸਙ੍ਘਂ ਗਣੇਤ੍ਵਾ ਕੋਟ੍ਠਾਸੇ ਕਰੋਤਿ. ਸੋ ਸਮ੍ਪਤ੍ਤਪਰਿਸਾਯ ਸਙ੍ਘਂ ਅਨਾਪੁਚ੍ਛਿਤ੍ਵਾਵ ਦਾਤੁਂ ਲਭਤਿ. ਅਸਮ੍ਮਤੇਨ ਪਨ ਆਪੁਚ੍ਛਿਤ੍ਵਾ ਦਾਤਬ੍ਬਂ. ਭਿਕ੍ਖੁਨੋ ਪਨ ਕਸ੍ਸ ਪੁਪ੍ਫਾਨਿ ਦਾਤੁਂ ਲਬ੍ਭਤਿ, ਕਸ੍ਸ ਨ ਲਬ੍ਭਤੀਤਿ? ਮਾਤਾਪਿਤੂਨਂ ਗੇਹਂ ਹਰਿਤ੍ਵਾਪਿ ਗੇਹਤੋ ਪਕ੍ਕੋਸਾਪੇਤ੍ਵਾਪਿ ‘‘ਵਤ੍ਥੁਪੂਜਂ ਕਰੋਥਾ’’ਤਿ ਦਾਤੁਂ ਲਬ੍ਭਤਿ, ਪਿਲ਼ਨ੍ਧਨਤ੍ਥਾਯ ਨ ਲਬ੍ਭਤਿ. ਸੇਸਞਾਤੀਨਂ ਪਨ ਹਰਿਤ੍ਵਾ ਨ ਦਾਤਬ੍ਬਂ, ਪਕ੍ਕੋਸਾਪੇਤ੍ਵਾ ਪੂਜਨਤ੍ਥਾਯ ਦਾਤਬ੍ਬਂ. ਸੇਸਜਨਸ੍ਸ ਪੂਜਨਟ੍ਠਾਨਂ ਸਮ੍ਪਤ੍ਤਸ੍ਸ ਅਪਚ੍ਚਾਸੀਸਨ੍ਤੇਨ ਦਾਤਬ੍ਬਂ, ਪੁਪ੍ਫਦਾਨਂ ਨਾਮ ਨ ਹੋਤਿ.
ਵਿਹਾਰੇ ਬਹੂਨਿ ਪੁਪ੍ਫਾਨਿ ਪੁਪ੍ਫਨ੍ਤਿ, ਭਿਕ੍ਖੁਨਾ ਪਿਣ੍ਡਾਯ ਚਰਨ੍ਤੇਨ ਮਨੁਸ੍ਸੇ ਦਿਸ੍ਵਾ ‘‘ਵਿਹਾਰੇ ਬਹੂਨਿ ਪੁਪ੍ਫਾਨਿ ਪੂਜੇਥਾ’’ਤਿ ਵਤ੍ਤਬ੍ਬਂ, ਵਚਨਮਤ੍ਤੇ ਦੋਸੋ ਨਤ੍ਥਿ, ‘‘ਮਨੁਸ੍ਸਾ ਖਾਦਨੀਯਭੋਜਨੀਯਂ ਆਦਾਯ ਆਗਮਿਸ੍ਸਨ੍ਤੀ’’ਤਿ ਚਿਤ੍ਤੇਨ ਪਨ ਨ ਵਤ੍ਤਬ੍ਬਂ. ਸਚੇ ਵਦਤਿ, ਖਾਦਨੀਯਭੋਜਨੀਯਂ ਨ ਪਰਿਭੁਞ੍ਜਿਤਬ੍ਬਂ. ਮਨੁਸ੍ਸਾ ਅਤ੍ਤਨੋ ਧਮ੍ਮਤਾਯ ‘‘ਵਿਹਾਰੇ ਪੁਪ੍ਫਾਨਿ ਅਤ੍ਥੀ’’ਤਿ ਪੁਚ੍ਛਿਤ੍ਵਾ ‘‘ਅਸੁਕਦਿਵਸੇ ਵਿਹਾਰਂ ਆਗਮਿਸ੍ਸਾਮ, ਸਾਮਣੇਰਾਨਂ ਪੁਪ੍ਫਾਨਿ ਓਚਿਨਿਤੁਂ ਮਾ ਦੇਥਾ’’ਤਿ ਵਦਨ੍ਤਿ. ਭਿਕ੍ਖੁ ਸਾਮਣੇਰਾਨਂ ਕਥੇਤੁਂ ਪਮੁਟ੍ਠੋ, ਸਾਮਣੇਰੇਹਿ ਪੁਪ੍ਫਾਨਿ ਓਚਿਤਾਨਿ, ਮਨੁਸ੍ਸਾ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਮਯਂ ਤੁਮ੍ਹਾਕਂ ਅਸੁਕਦਿਵਸੇ ਏਵਂ ਆਰੋਚਯਿਮ੍ਹ ‘‘ਸਾਮਣੇਰਾਨਂ ਪੁਪ੍ਫਾਨਿ ਓਚਿਨਿਤੁਂ ਮਾ ਦੇਥਾ’’ਤਿ, ਕਸ੍ਮਾ ਨ ਵਾਰਯਿਤ੍ਥਾਤਿ? ‘‘ਸਤਿ ਮੇ ਪਮੁਟ੍ਠਾ, ਪੁਪ੍ਫਾਨਿ ਓਚਿਨਿਤਮਤ੍ਤਾਨੇਵ, ਨ ਤਾਵ ਪੂਜਾ ਕਤਾ’’ਤਿ ਵਤ੍ਤਬ੍ਬਂ, ‘‘ਗਣ੍ਹਥ ਪੂਜੇਥਾ’’ਤਿ ਨ ਵਤ੍ਤਬ੍ਬਂ. ਸਚੇ ਵਦਤਿ, ਆਮਿਸਂ ਨ ਪਰਿਭੁਞ੍ਜਿਤਬ੍ਬਂ. ਅਪਰੋ ਭਿਕ੍ਖੁ ਸਾਮਣੇਰਾਨਂ ਆਚਿਕ੍ਖਤਿ ‘‘ਅਸੁਕਗਾਮਵਾਸਿਨੋ ‘ਪੁਪ੍ਫਾਨਿ ਮਾ ਓਚਿਨਿਤ੍ਥਾ’ਤਿ ਆਹਂਸੂ’’ਤਿ ਮਨੁਸ੍ਸਾਪਿ ਆਮਿਸਂ ਆਹਰਿਤ੍ਵਾ ਦਾਨਂ ਦਤ੍ਵਾ ਵਦਨ੍ਤਿ ‘‘ਅਮ੍ਹਾਕਂ ਮਨੁਸ੍ਸਾ ਨ ਬਹੁਕਾ, ਸਾਮਣੇਰੇ ਅਮ੍ਹੇਹਿ ਸਹ ਪੁਪ੍ਫਾਨਿ ਓਚਿਨਿਤੁਂ ਆਣਾਪੇਥਾ’’ਤਿ. ‘‘ਸਾਮਣੇਰੇਹਿ ਭਿਕ੍ਖਾ ਲਦ੍ਧਾ. ਯੇ ਭਿਕ੍ਖਾਚਾਰਂ ਨ ਗਚ੍ਛਨ੍ਤਿ, ਤੇ ਸਯਮੇਵ ਜਾਨਿਸ੍ਸਨ੍ਤਿ ਉਪਾਸਕਾ’’ਤਿ ਵਤ੍ਤਬ੍ਬਂ. ਏਤ੍ਤਕਂ ਨਯਂ ਲਭਿਤ੍ਵਾ ਸਾਮਣੇਰੇ ਪੁਤ੍ਤੇ ਵਾ ਭਾਤਿਕੇ ਵਾ ਕਤ੍ਵਾ ਪੁਪ੍ਫਾਨਿ ਓਚਿਨਾਪੇਤੁਂ ਦੋਸੋ ਨਤ੍ਥਿ, ਪੁਪ੍ਫਦਾਨਂ ਨਾਮ ਨ ਹੋਤਿ.
ਫਲਦਾਨੇ ਫਲਮ੍ਪਿ ਪੁਪ੍ਫਂ ਵਿਯ ਨਿਯਮਿਤਮੇਵ ਗਰੁਭਣ੍ਡਂ ਹੋਤਿ. ਵਿਹਾਰੇ ਬਹੁਕਸ੍ਮਿਂ ਫਲਾਫਲੇ ਸਤਿ ਅਫਾਸੁਕਮਨੁਸ੍ਸਾ ਆਗਨ੍ਤ੍ਵਾ ਯਾਚਨ੍ਤਿ, ਭਿਕ੍ਖੂ ‘‘ਸਙ੍ਘਿਕ’’ਨ੍ਤਿ ਦਾਤੁਂ ਨ ਉਸ੍ਸਹਨ੍ਤਿ, ਮਨੁਸ੍ਸਾ ਵਿਪ੍ਪਟਿਸਾਰਿਨੋ ਅਕ੍ਕੋਸਨ੍ਤਿ ਪਰਿਭਾਸਨ੍ਤਿ, ਤਤ੍ਥ ਕਿਂ ਕਾਤਬ੍ਬਨ੍ਤਿ? ਫਲੇਹਿ ਵਾ ਰੁਕ੍ਖੇਹਿ ਵਾ ਪਰਿਚ੍ਛਿਨ੍ਦਿਤ੍ਵਾ ਕਥਿਕਾ ਕਾਤਬ੍ਬਾ ‘‘ਅਸੁਕੇ ਚ ਰੁਕ੍ਖੇ ਅਸੁਕੇ ਚ ਰੁਕ੍ਖੇ ਏਤ੍ਤਕਾਨਿ ਫਲਾਨਿ ਗਣ੍ਹਨ੍ਤਾ, ਏਤ੍ਤਕੇਸੁ ਵਾ ਰੁਕ੍ਖੇਸੁ ਫਲਾਨਿ ਗਣ੍ਹਨ੍ਤਾ ਨ ਵਾਰੇਤਬ੍ਬਾ’’ਤਿ. ਚੋਰਾ ਵਾ ਇਸ੍ਸਰਾ ਵਾ ਬਲਕ੍ਕਾਰੇਨ ਗਣ੍ਹਨ੍ਤਾ ਨ ਵਾਰੇਤਬ੍ਬਾ. ਕੁਦ੍ਧਾ ਹਿ ਤੇ ਸਕਲਵਿਹਾਰਮ੍ਪਿ ਨਾਸੇਯ੍ਯੁਂ, ਆਦੀਨਵੋ ਪਨ ਕਥੇਤਬ੍ਬੋਤਿ.
ਸਿਨਾਨਦਾਨੇ ਸਿਨਾਨਚੁਣ੍ਣਾਨਿ ਕੋਟ੍ਟਿਤਾਨਿ ਨ ਗਰੁਭਣ੍ਡਾਨਿ, ਅਕੋਟ੍ਟਿਤੋ ਰੁਕ੍ਖੇ ਠਿਤੋਵ ਰੁਕ੍ਖਤਚੋ ਗਰੁਭਣ੍ਡਂ, ਚੁਣ੍ਣਂ ਪਨ ਅਗਿਲਾਨਸ੍ਸ ਰਜਨਨਿਪਕ੍ਕਂ ਵਟ੍ਟਤਿ. ਗਿਲਾਨਸ੍ਸ ਯਂਕਿਞ੍ਚਿ ਚੁਣ੍ਣਂ ਦਾਤੁਂ ਵਟ੍ਟਤਿਯੇਵ.
ਨ ਚੁਣ੍ਣਦਾਨੇਨਾਤਿ ਵੁਤ੍ਤਨਯੇਨ ਸਿਰੀਸਚੁਣ੍ਣਾਦੀਨਂ ਦਾਨੇਨ. ਮਤ੍ਤਿਕਾਦਾਨੇਮਤ੍ਤਿਕਾ ਹਿ ਯਤ੍ਥ ਦੁਲ੍ਲਭਾ ਹੋਤਿ, ਤਤ੍ਥੇਵ ਗਰੁਭਣ੍ਡਂ. ਸਾਪਿ ਹੇਟ੍ਠਿਮਕੋਟਿਯਾ ਤਿਂਸਪਲਗੁਲ਼ਪਿਣ੍ਡਪ੍ਪਮਾਣਾਵ, ਤਤੋ ਹੇਟ੍ਠਾ ਨ ਗਰੁਭਣ੍ਡਨ੍ਤਿ.
ਦਨ੍ਤਕਟ੍ਠਦਾਨੇ ਦਨ੍ਤਕਟ੍ਠਂ ਅਚ੍ਛਿਨ੍ਨਕਮੇਵ ਗਰੁਭਣ੍ਡਂ. ਯੇਸਂ ਸਾਮਣੇਰਾਨਂ ਸਙ੍ਘਤੋ ਦਨ੍ਤਕਟ੍ਠਵਾਰੋ ਪਾਪੁਣਾਤਿ, ਤੇ ਅਤ੍ਤਨੋ ਆਚਰਿਯੁਪਜ੍ਝਾਯਾਨਂ ਪਾਟਿਯੇਕ੍ਕਂ ਦਾਤੁਂ ਨ ਲਭਨ੍ਤਿ. ਯੇਹਿ ਪਨ ‘‘ਏਤ੍ਤਕਾਨਿ ਦਨ੍ਤਕਟ੍ਠਾਨਿ ਆਹਰਿਤਬ੍ਬਾਨੀ’’ਤਿ ਪਰਿਚ੍ਛਿਨ੍ਦਿਤ੍ਵਾ ਵਾਰਾ ਗਹਿਤਾ, ਤੇ ਅਤਿਰੇਕਾਨਿ ਆਚਰਿਯੁਪਜ੍ਝਾਯਾਨਂ ਦਾਤੁਂ ਲਭਨ੍ਤਿ. ਏਕੇਨ ਭਿਕ੍ਖੁਨਾ ਦਨ੍ਤਕਟ੍ਠਮਾਲ਼ਕਤੋ ਬਹੂਨਿ ਦਨ੍ਤਕਟ੍ਠਾਨਿ ਨ ਗਹੇਤਬ੍ਬਾਨਿ, ਦੇਵਸਿਕਂ ਏਕੇਕਮੇਵ ਗਹੇਤਬ੍ਬਂ. ਪਾਟਿਯੇਕ੍ਕਂ ਵਸਨ੍ਤੇਨਾਪਿ ਭਿਕ੍ਖੁਸਙ੍ਘਂ ਗਣਯਿਤ੍ਵਾ ਯਤ੍ਤਕਾਨਿ ਅਤ੍ਤਨੋ ਪਾਪੁਣਨ੍ਤਿ, ਤਤ੍ਤਕਾਨੇਵ ਗਹੇਤ੍ਵਾ ਗਨ੍ਤਬ੍ਬਂ. ਅਨ੍ਤਰਾ ਆਗਨ੍ਤੁਕੇਸੁ ਵਾ ਆਗਤੇਸੁ ਦਿਸਂ ਵਾ ਪਕ੍ਕਮਨ੍ਤੇਸੁ ਆਹਰਿਤ੍ਵਾ ਗਹਿਤਟ੍ਠਾਨੇਯੇਵ ਠਪੇਤਬ੍ਬਾਨਿ. ਨ ਮੁਖੋਦਕਦਾਨੇਨਾਤਿ ਨ ਮੁਖਧੋਵਨਉਦਕਦਾਨੇਨ.
ਨ ਚਾਟੁਕਮ੍ਯਤਾਯਾਤਿਆਦੀਸੁ ਚਾਟੁਕਮ੍ਯਤਾ ਵੁਚ੍ਚਤਿ ਅਤ੍ਤਾਨਂ ਦਾਸਂ ਵਿਯ ਨੀਚਟ੍ਠਾਨੇ ਠਪੇਤ੍ਵਾ ਪਰਸ੍ਸ ਖਲਿਤਵਚਨਮ੍ਪਿ ਸਣ੍ਠਪੇਤ੍ਵਾ ਪਿਯਕਾਮਤਾਯ ਪਗ੍ਗਯ੍ਹਵਚਨਂ. ਨ ਮੁਗ੍ਗਸੂਪ੍ਯਤਾਯਾਤਿ ਨ ਮੁਗ੍ਗਸੂਪਸਮਾਨਤਾਯ. ਮੁਗ੍ਗਸੂਪਸਮਾਨਤਾਤਿ ਸਚ੍ਚਾਲਿਕੇਨ ਜੀਵਿਕਂ ਕਪ੍ਪਨਤਾਯ ਏਤਂ ਅਧਿਵਚਨਂ. ਯਥਾ ਹਿ ਮੁਗ੍ਗਸੂਪੇ ਪਚ੍ਚਨ੍ਤੇ ਬਹੂ ਮੁਗ੍ਗਾ ਪਾਕਂ ਗਚ੍ਛਨ੍ਤਿ ਥੋਕਾ ਨ ਗਚ੍ਛਨ੍ਤਿ, ਏਵਮੇਵ ਸਚ੍ਚਾਲਿਕੇਨ ਜੀਵਿਕਕਪ੍ਪਕੇ ਪੁਗ੍ਗਲੇ ਬਹੁ ਅਲਿਕਂ ਹੋਤਿ, ਅਪ੍ਪਕਂ ਸਚ੍ਚਂ. ਯਥਾ ਵਾ ਮੁਗ੍ਗਸੂਪਸ੍ਸ ਅਪਵਿਸਨਟ੍ਠਾਨਂ ਨਾਮ ਨਤ੍ਥਿ, ਏਵਮੇਵ ਸਚ੍ਚਾਲਿਕਵੁਤ੍ਤਿਨੋ ਪੁਗ੍ਗਲਸ੍ਸ ਅਪ੍ਪਤਿਟ੍ਠਾਨਂ ਨਾਮ ਨਤ੍ਥਿ. ਸਿਙ੍ਘਾਟਕਂ ਵਿਯ ਇਚ੍ਛਿਤਿਚ੍ਛਿਤਟ੍ਠਾਨਸ੍ਸ ਪਤਿਟ੍ਠਾਤਿ. ਤੇਨਸ੍ਸ ਸਾ ਮੁਸਾਵਾਦਿਤਾ ‘‘ਮੁਗ੍ਗਸੂਪ੍ਯਤਾ’’ਤਿ ਵੁਤ੍ਤਾ. ਨ ਪਾਰਿਭਟ੍ਯਤਾਯਾਤਿ ਨ ਪਰਿਭਟਕਮ੍ਮਭਾਵੇਨ. ਪਰਿਭਟਸ੍ਸ ਹਿ ਕਮ੍ਮਂ ਪਾਰਿਭਟ੍ਯਂ, ਤਸ੍ਸ ਭਾਵੋ ਪਾਰਿਭਟ੍ਯਤਾ, ਅਲਙ੍ਕਾਰਕਰਣਾਦੀਹਿ ਦਾਰਕਕੀਲ਼ਾਪਨਸ੍ਸੇਤਂ ਅਧਿਵਚਨਂ. ਨ ਪੀਠਮਦ੍ਦਿਕਤਾਯਾਤਿ ਨ ਸਹਸਾ ਘਰਂ ਪਵਿਸਿਤ੍ਵਾ ਪੀਠਕੇ ਨਿਸੀਦਨਕਤਾਯ.
ਨ ਵਤ੍ਥੁਵਿਜ੍ਜਾਯਾਤਿਆਦੀਸੁ ਵਤ੍ਥੁਵਿਜ੍ਜਾ ਨਾਮ ਗਾਮਨਿਗਮਨਗਰਾਦੀਨਂ ਸੁਨਿਵਿਟ੍ਠਦੁਨ੍ਨਿਵਿਟ੍ਠਜਾਨਨਸਤ੍ਥਂ. ਤਿਰਚ੍ਛਾਨਵਿਜ੍ਜਾ ਨਾਮ ਅਨਿਯ੍ਯਾਨਿਕਤ੍ਤਾ ਸਗ੍ਗਮੋਕ੍ਖਮਗ੍ਗਾਨਂ ਤਿਰਚ੍ਛਾਨਭੂਤਾ ਅਙ੍ਗਸਤ੍ਥਨਿਮਿਤ੍ਤਾਦਿਕਾ ਅਵਸੇਸਵਿਜ੍ਜਾ. ਅਙ੍ਗਵਿਜ੍ਜਾ ਨਾਮ ਇਤ੍ਥਿਪੁਰਿਸਾਨਂ ਸੁਭਗਦੁਬ੍ਭਗਲਕ੍ਖਣਜਾਨਨਂ. ਨਕ੍ਖਤ੍ਤਵਿਜ੍ਜਾ ਨਾਮ ਨਕ੍ਖਤ੍ਤਾਨਂ ਯੋਗਜਾਨਨਸਤ੍ਥਂ.
ਨ ਦੂਤਗਮਨੇਨਾਤਿ ਨ ਦੂਤੇਯ੍ਯਂ ਕਤ੍ਵਾ ਗਮਨੇਨ. ਨ ਪਹਿਣਗਮਨੇਨਾਤਿ ਨ ਗਿਹੀਨਂ ਸਾਸਨਂ ਗਹੇਤ੍ਵਾ ਘਰਾ ਘਰਂ ਪਹਿਤਸ੍ਸ ਗਮਨੇਨ. ਨ ਜਙ੍ਘਪੇਸਨਿਯੇਨਾਤਿ ਗਾਮਨ੍ਤਰਦੇਸਨ੍ਤਰਾਦੀਸੁ ਤੇਸਂ ਤੇਸਂ ਗਿਹੀਨਂ ਸਾਸਨਪਟਿਸਾਸਨਂ ਹਰਣੇਨ. ਇਦਞ੍ਹਿ ਜਙ੍ਘਪੇਸਨਿਯਂ ਨਾਮ ਅਤ੍ਤਨੋ ਮਾਤਾਪਿਤੂਨਂ, ਯੇ ਚਾਸ੍ਸ ਮਾਤਾਪਿਤਰੋ ਉਪਟ੍ਠਹਨ੍ਤਿ, ਤੇਸਂ ਸਾਸਨਂ ਗਹੇਤ੍ਵਾ ਕਤ੍ਥਚਿ ਗਮਨਵਸੇਨ ਵਟ੍ਟਤਿ. ਚੇਤਿਯਸ੍ਸ ਵਾ ਸਙ੍ਘਸ੍ਸ ਵਾ ਅਤ੍ਤਨੋ ਵਾ ਕਮ੍ਮਂ ਕਰੋਨ੍ਤਾਨਂ ਵਡ੍ਢਕੀਨਮ੍ਪਿ ਸਾਸਨਂ ਹਰਿਤੁਂ ਵਟ੍ਟਤਿ. ਮਨੁਸ੍ਸਾ ‘‘ਦਾਨਂ ਦਸ੍ਸਾਮ, ਪੂਜਂ ਕਰਿਸ੍ਸਾਮ, ਭਿਕ੍ਖੁਸਙ੍ਘਸ੍ਸ ਆਚਿਕ੍ਖਥਾ’’ਤਿ ਚ ਵਦਨ੍ਤਿ; ‘‘ਅਸੁਕਤ੍ਥੇਰਸ੍ਸ ਨਾਮ ਦੇਥਾ’’ਤਿ ਪਿਣ੍ਡਪਾਤਂ ਵਾ ਭੇਸਜ੍ਜਂ ਵਾ ਚੀਵਰਂ ਵਾ ਦੇਨ੍ਤਿ, ‘‘ਵਿਹਾਰੇ ਪੂਜਂ ਕਰੋਥਾ’’ਤਿ ਮਾਲਾਗਨ੍ਧਵਿਲੇਪਨਾਦੀਨਿ ਵਾ ਧਜਪਟਾਕਾਦੀਨਿ ਵਾ ਨਿਯ੍ਯਾਤੇਨ੍ਤਿ. ਸਬ੍ਬਂ ਹਰਿਤੁਂ ਵਟ੍ਟਤਿ, ਜਙ੍ਘਪੇਸਨਿਯਂ ਨਾਮ ਨ ਹੋਤਿ. ਸੇਸਸਾਸਨਂ ਗਹੇਤ੍ਵਾ ਗਚ੍ਛਨ੍ਤਸ੍ਸ ਪਦਵਾਰੇ ਪਦਵਾਰੇ ਦੋਸੋ.
ਨ ਵੇਜ੍ਜਕਮ੍ਮੇਨਾਤਿ ਨ ਵੇਜ੍ਜੇਨ ਹੁਤ੍ਵਾ ਕਾਯਤਿਕਿਚ੍ਛਨਾਦਿਭੇਸਜ੍ਜਕਰਣੇਨ. ਭੇਸਜ੍ਜਂ ਪਨ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਕਾਤਬ੍ਬਂ ਭਿਕ੍ਖੁਸ੍ਸ ਭਿਕ੍ਖੁਨਿਯਾ ਸਿਕ੍ਖਮਾਨਾਯ ਸਾਮਣੇਰਸ੍ਸ ਸਾਮਣੇਰਿਯਾ. ਸਮਸੀਲਸਦ੍ਧਾਪਞ੍ਞਾਨਞ੍ਹਿ ਏਤੇਸਂ ਤੀਸੁ ਸਿਕ੍ਖਾਸੁ ਯੁਤ੍ਤਾਨਂ ਭੇਸਜ੍ਜਂ ਅਕਾਤੁਂ ਨ ਲਬ੍ਭਤਿ. ਮਾਤਾਪਿਤੂਨਂ ਤਦੁਪਟ੍ਠਾਕਾਨਂ ਅਤ੍ਤਨੋ ਵੇਯ੍ਯਾਵਚ੍ਚਕਰਸ੍ਸ ਪਣ੍ਡੁਪਲਾਸਸ੍ਸਾਤਿ ਏਤੇਸਂ ਪਞ੍ਚਨ੍ਨਮ੍ਪਿ ਕਾਤੁਂ ਵਟ੍ਟਤਿ. ਜੇਟ੍ਠਭਾਤੁ, ਕਨਿਟ੍ਠਭਾਤੁ, ਜੇਟ੍ਠਭਗਿਨਿਯਾ, ਕਨਿਟ੍ਠਭਗਿਨਿਯਾ, ਚੂਲ਼ਮਾਤੁਯਾ, ਮਹਾਮਾਤੁਯਾ, ਚੂਲ਼ਪਿਤੁਨੋ, ਮਹਾਪਿਤੁਨੋ, ਪਿਤੁਚ੍ਛਾਯ, ਮਾਤੁਚ੍ਛਾਯਾਤਿ ਏਤੇਸਂ ਪਨ ਦਸਨ੍ਨਮ੍ਪਿ ਕਰੋਨ੍ਤੇਨ ਤੇਸਂਯੇਵ ਸਨ੍ਤਕਂ ਭੇਸਜ੍ਜਂ ਗਹੇਤ੍ਵਾ ਕੇਵਲਂ ਯੋਜੇਤ੍ਵਾ ਦਾਤਬ੍ਬਂ. ਸਚੇ ਨਪ੍ਪਹੋਤਿ, ਅਤ੍ਤਨੋ ਸਨ੍ਤਕਂ ਤਾਵਕਾਲਿਕਂ ਦਾਤਬ੍ਬਂ. ਏਤੇਸਂ ਪੁਤ੍ਤਪਰਮ੍ਪਰਾ ਯਾਵ ਸਤ੍ਤਮਾ ਕੁਲਪਰਿਵਟ੍ਟਾ, ਤਾਵ ਚਤ੍ਤਾਰੋ ਪਚ੍ਚਯੇ ਆਹਰਾਪੇਨ੍ਤਸ੍ਸ ਅਕਤਵਿਞ੍ਞਤ੍ਤਿ ਵਾ, ਭੇਸਜ੍ਜਂ ਕਰੋਨ੍ਤਸ੍ਸ ਵੇਜ੍ਜਕਮ੍ਮਂ ਵਾ, ਕੁਲਦੂਸਕਾਪਤ੍ਤਿ ਵਾ ਨ ਹੋਤਿ.
ਨ ਪਿਣ੍ਡਪਟਿਪਿਣ੍ਡਕੇਨਾਤਿ ਏਤ੍ਥ ਪਿਣ੍ਡਪਾਤੋ ਕਸ੍ਸ ਦਾਤਬ੍ਬੋ, ਕਸ੍ਸ ਨ ਦਾਤਬ੍ਬੋ? ਮਾਤਾਪਿਤੂਨਂ ਤਦੁਪਟ੍ਠਾਕਾਨਂ ਵੇਯ੍ਯਾਵਚ੍ਚਕਰਸ੍ਸ ਪਣ੍ਡੁਪਲਾਸਸ੍ਸ ਸਮ੍ਪਤ੍ਤਸ੍ਸ ਦਾਮਰਿਕਚੋਰਸ੍ਸ ਇਸ੍ਸਰਸ੍ਸਾਪਿ ਦਾਤਬ੍ਬੋ. ਏਤੇਸਂ ਦਤ੍ਵਾ ਪਚ੍ਛਾ ਲਦ੍ਧਮ੍ਪਿ ਪਿਣ੍ਡਪਟਿਪਿਣ੍ਡਂ ਨਾਮ ਨ ਹੋਤਿ. ਨ ਦਾਨਾਨੁਪ੍ਪਦਾਨੇਨਾਤਿ ਅਤ੍ਤਨੋ ਦਿਨ੍ਨਕਾਨਂ ਨ ਪੁਨ ਦਾਨੇਨ. ਧਮ੍ਮੇਨਾਤਿ ਧਮ੍ਮੇਨ ਉਪ੍ਪਨ੍ਨਂ. ਸਮੇਨਾਤਿ ਕਾਯਸੁਚਰਿਤਾਦਿਨਾ. ਲਦ੍ਧਾਤਿ ਕਾਯੇਨ ਲਦ੍ਧਾ. ਲਭਿਤ੍ਵਾਤਿ ਚਿਤ੍ਤੇਨ ਪਾਪੁਣਿਤ੍ਵਾ. ਅਧਿਗਨ੍ਤ੍ਵਾਤਿ ਸਮ੍ਪਾਪੁਣਿਤ੍ਵਾ. ਵਿਨ੍ਦਿਤ੍ਵਾਤਿ ਞਾਣੇਨ ਵਿਨ੍ਦਿਤ੍ਵਾ. ਪਟਿਲਭਿਤ੍ਵਾਤਿ ਪੁਨਪ੍ਪੁਨਂ ਲਭਿਤ੍ਵਾ.
ਅਨ੍ਨਸਨ੍ਨਿਧਿਨ੍ਤਿ ਏਤ੍ਥ ਦੁਵਿਧਾ ਅਨ੍ਨਕਥਾ ਵਿਨਯਵਸੇਨ ਚ ਸਲ੍ਲੇਖਵਸੇਨ ਚ. ਵਿਨਯਵਸੇਨ ਤਾਵ ਯਂਕਿਞ੍ਚਿ ਅਨ੍ਨਂ ਅਜ੍ਜ ਪਟਿਗ੍ਗਹਿਤਂ ਅਪਰਜ੍ਜੁ ਸਨ੍ਨਿਧਿਕਾਰਕਂ ਹੋਤਿ, ਤਸ੍ਸ ਪਰਿਭੋਗੇ ਪਾਚਿਤ੍ਤਿਯਂ. ਅਤ੍ਤਨਾ ਲਦ੍ਧਂ ਪਨ ਸਾਮਣੇਰਾਨਂ ਦਤ੍ਵਾ ਤੇਹਿ ਲਦ੍ਧਂ ਠਪਾਪੇਤ੍ਵਾ ਦੁਤਿਯਦਿਵਸੇ ਭੁਞ੍ਜਿਤੁਂ ਵਟ੍ਟਤਿ, ਸਲ੍ਲੇਖੋ ਪਨ ਨ ਹੋਤਿ.
ਪਾਨਸਨ੍ਨਿਧਿਮ੍ਹਿਪਿ ਏਸੇਵ ਨਯੋ. ਏਤ੍ਥ ਪਾਨਂ ਨਾਮ ਅਮ੍ਬਪਾਨਾਦੀਨਿ ਅਟ੍ਠ ਪਾਨਾਨਿ, ਯਾਨਿ ਚੇ ਤੇਸਂ ਅਨੁਲੋਮਾਨਿ.
ਵਤ੍ਥਸਨ੍ਨਿਧਿਨ੍ਤਿਆਦਿਮ੍ਹਿ ਅਨਧਿਟ੍ਠਿਤਾਵਿਕਪ੍ਪਿਤਂ ਸਨ੍ਨਿਧਿ ਚ ਹੋਤਿ ਸਲ੍ਲੇਖਞ੍ਚ ਕੋਪੇਤਿ. ਅਯਂ ਪਰਿਯਾਯ ਕਥਾਵ, ਨਿਪ੍ਪਰਿਯਾਯਤੋ ਪਨ ਤਿਚੀਵਰਸਨ੍ਤੁਟ੍ਠੇਨ ਭਵਿਤਬ੍ਬਂ, ਚਤੁਤ੍ਥਂ ਲਭਿਤ੍ਵਾ ਅਞ੍ਞਸ੍ਸ ਦਾਤਬ੍ਬਂ. ਸਚੇ ਯਸ੍ਸ ਕਸ੍ਸਚਿ ਦਾਤੁਂ ਨ ਸਕ੍ਕੋਤਿ, ਯਸ੍ਸ ਪਨ ਦਾਤੁਕਾਮੋ ਹੋਤਿ, ਸੋ ਉਦ੍ਦੇਸਤ੍ਥਾਯ ਵਾ ਪਰਿਪੁਚ੍ਛਤ੍ਥਾਯ ਵਾ ਗਤੋ, ਆਗਤਮਤ੍ਤੇ ਦਾਤਬ੍ਬਂ, ਅਦਾਤੁਂ ਨ ਵਟ੍ਟਤਿ. ਚੀਵਰੇ ਪਨ ਅਪ੍ਪਹੋਨ੍ਤੇ ਸਤਿਯਾ ਪਚ੍ਚਾਸਾਯ ਅਨੁਞ੍ਞਾਤਕਾਲਂ ਠਪੇਤੁਂ ਵਟ੍ਟਤਿ. ਸੂਚਿਸੁਤ੍ਤਚੀਵਰਕਾਰਕਾਨਂ ਅਲਾਭੇਨ ਤਤੋ ਪਰਮ੍ਪਿ ਵਿਨਯਕਮ੍ਮਂ ਕਤ੍ਵਾ ਠਪੇਤੁਂ ਵਟ੍ਟਤਿ. ‘‘ਇਮਸ੍ਮਿਂ ਜਿਣ੍ਣੇ ਪੁਨ ਈਦਿਸਂ ਕੁਤੋ ਲਭਿਸ੍ਸਾਮੀ’’ਤਿ ਪਨ ਠਪੇਤੁਂ ਨ ਵਟ੍ਟਤਿ, ਸਨ੍ਨਿਧਿ ਚ ਹੋਤਿ, ਸਲ੍ਲੇਖਞ੍ਚ ਵਿਕੋਪੇਤਿ.
ਯਾਨਸਨ੍ਨਿਧਿਮ੍ਹਿ ਯਾਨਂ ਨਾਮ ਵਯ੍ਹਂ ਰਥੋ ਸਕਟਂ ਸਨ੍ਦਮਾਨਿਕਾ ਸਿਵਿਕਾ ਪਾਟਙ੍ਕੀਤਿ ਨੇਤਂ ਪਬ੍ਬਜਿਤਸ੍ਸ ਯਾਨਂ. ਉਪਾਹਨਾ ਪਨ ਪਬ੍ਬਜਿਤਸ੍ਸ ਯਾਨਂਯੇਵ. ਏਕਭਿਕ੍ਖੁਸ੍ਸ ਹਿ ਏਕੋ ਅਰਞ੍ਞਤ੍ਥਾਯ, ਏਕਾ ਧੋਤਪਾਦਕਤ੍ਥਾਯਾਤਿ ਉਕ੍ਕਂਸਤੋ ਦ੍ਵੇ ਉਪਾਹਨਸਙ੍ਘਾਟਾ ਵਟ੍ਟਨ੍ਤਿ, ਤਤਿਯਂ ਲਭਿਤ੍ਵਾ ਅਞ੍ਞਸ੍ਸ ਦਾਤਬ੍ਬੋ, ‘‘ਇਮਸ੍ਮਿਂ ਜਿਣ੍ਣੇ ਅਞ੍ਞਂ ਕੁਤੋ ਲਭਿਸ੍ਸਾਮੀ’’ਤਿ ਹਿ ਠਪੇਤੁਂ ਨ ਵਟ੍ਟਤਿ, ਸਨ੍ਨਿਧਿ ਚ ਹੋਤਿ, ਸਲ੍ਲੇਖਞ੍ਚ ਵਿਕੋਪੇਤਿ.
ਸਯਨਸਨ੍ਨਿਧਿਮ੍ਹਿ ਸਯਨਨ੍ਤਿ ਮਞ੍ਚੋ. ਏਕਸ੍ਸ ਭਿਕ੍ਖੁਨੋ ਏਕੋ ਗਬ੍ਭੇ ਏਕੋ ਦਿਵਾਟ੍ਠਾਨੇਤਿ ਉਕ੍ਕਂਸਤੋ ਦ੍ਵੇ ਮਞ੍ਚਾ ਵਟ੍ਟਨ੍ਤਿ, ਤਤੋ ਉਤ੍ਤਰਿ ਲਭਿਤ੍ਵਾ ਅਞ੍ਞਸ੍ਸ ਭਿਕ੍ਖੁਨੋ ਵਾ ਗਣਸ੍ਸ ਵਾ ਦਾਤਬ੍ਬੋ, ਅਦਾਤੁਂ ਨ ਵਟ੍ਟਤਿ, ਸਨ੍ਨਿਧਿ ਚੇਵ ਹੋਤਿ, ਸਲ੍ਲੇਖਞ੍ਚ ਕੋਪੇਤਿ.
ਗਨ੍ਧਸਨ੍ਨਿਧਿਮ੍ਹਿ ਭਿਕ੍ਖੁਨੋ ਕਣ੍ਡੁਕਚ੍ਛੁਛਵਿਦੋਸਾਦਿਆਬਾਧੇ ਸਤਿ ਗਨ੍ਧੋ ਵਟ੍ਟਤਿ. ਤੇਨ ਗਨ੍ਧੇਨ ਤਸ੍ਮਿਂ ਰੋਗੇ ਵੂਪਸਨ੍ਤੇ ਅਞ੍ਞੇਸਂ ਵਾ ਆਬਾਧਿਕਾਨਂ ਦਾਤਬ੍ਬੋ. ਦ੍ਵਾਰੇ ਪਞ੍ਚਙ੍ਗੁਲਘਰਧੂਪਨਾਦੀਸੁ ਵਾ ਉਪਨੇਤਬ੍ਬੋ. ‘‘ਪੁਨ ਰੋਗੇ ਸਤਿ ਭਵਿਸ੍ਸਤੀ’’ਤਿ ਠਪੇਤੁਂ ਨ ਵਟ੍ਟਤਿ, ਗਨ੍ਧਸਨ੍ਨਿਧਿ ਚ ਹੋਤਿ, ਸਲ੍ਲੇਖਞ੍ਚ ਕੋਪੇਤਿ.
ਆਮਿਸਨ੍ਤਿ ਅਨ੍ਨਾਦਿਵੁਤ੍ਤਾਵਸੇਸਂਵ ਦਟ੍ਠਬ੍ਬਂ. ਸੇਯ੍ਯਥਿਦਂ – ਇਧੇਕਚ੍ਚੋ ਭਿਕ੍ਖੁ ‘‘ਤਥਾਰੂਪੇ ਕਾਲੇ ਉਪਕਾਰਾਯ ਭਵਿਸ੍ਸਨ੍ਤੀ’’ਤਿ ਤਿਲਤਣ੍ਡੁਲਮੁਗ੍ਗਮਾਸਨਾਲ਼ਿਕੇਰਲੋਣਮਚ੍ਛਮਂਸਵਲ੍ਲੂਰਸਪ੍ਪਿਤੇਲਗੁਲ਼- ਭਾਜਨਾਦੀਨਿ ਆਹਰਾਪੇਤ੍ਵਾ ਠਪੇਤਿ. ਸੋ ਵਸ੍ਸਕਾਲੇ ਕਾਲਸ੍ਸੇਵ ਸਾਮਣੇਰੇਹਿ ਯਾਗੁਂ ਪਚਾਪੇਤ੍ਵਾ ਭੁਞ੍ਜਿਤ੍ਵਾ ‘‘ਸਾਮਣੇਰ ਉਦਕਕਦ੍ਦਮੇ ਦੁਕ੍ਖਂ ਗਾਮਂ ਪਵਿਸਿਤੁਂ, ਗਚ੍ਛ ਅਸੁਕਕੁਲਂ ਗਨ੍ਤ੍ਵਾ ਮਯ੍ਹਂ ਵਿਹਾਰੇ ਨਿਸਿਨ੍ਨਭਾਵਂ ਆਰੋਚੇਹਿ, ਅਸੁਕਕੁਲਤੋ ਦਧਿਆਦੀਨਿ ਆਹਰਾ’’ਤਿ ਪੇਸੇਤਿ. ਭਿਕ੍ਖੂਹਿ ‘‘ਕਿਂ, ਭਨ੍ਤੇ, ਗਾਮਂ ਪਵਿਸਥਾ’’ਤਿ ਵੁਤ੍ਤੇਪਿ ‘‘ਦੁਪ੍ਪਵੇਸੋ ਆਵੁਸੋ ਇਦਾਨਿ ਗਾਮੋ’’ਤਿ ਵਦਤਿ. ਤੇ ‘‘ਹੋਤੁ, ਭਨ੍ਤੇ, ਅਚ੍ਛਥ ਤੁਮ੍ਹੇ, ਮਯਂ ਭਿਕ੍ਖਂ ਪਰਿਯੇਸਿਤ੍ਵਾ ਆਹਰਿਸ੍ਸਾਮਾ’’ਤਿ ਗਚ੍ਛਨ੍ਤਿ. ਅਥ ਸਾਮਣੇਰੋਪਿ ਦਧਿਆਦੀਨਿ ਆਹਰਿਤ੍ਵਾ ਭਤ੍ਤਞ੍ਚ ਬ੍ਯਞ੍ਜਨਞ੍ਚ ਸਮ੍ਪਾਦੇਤ੍ਵਾ ਉਪਨੇਤਿ, ਤਂ ਭੁਞ੍ਜਨ੍ਤਸ੍ਸੇਵ ਉਪਟ੍ਠਾਕਾ ਭਤ੍ਤਂ ਪਹਿਣਨ੍ਤਿ, ਤਤੋਪਿ ਮਨਾਪਂ ਮਨਾਪਂ ਭੁਞ੍ਜਤਿ. ਅਥ ਭਿਕ੍ਖੂ ਪਿਣ੍ਡਪਾਤਂ ਗਹੇਤ੍ਵਾ ਆਗਚ੍ਛਨ੍ਤਿ, ਤਤੋਪਿ ਮਨਾਪਂ ਮਨਾਪਂ ਗੀਵਾਯਾਮਕਂ ਭੁਞ੍ਜਤਿਯੇਵ. ਏਵਂ ਚਤੁਮਾਸਮ੍ਪਿ ਵੀਤਿਨਾਮੇਤਿ. ਅਯਂ ਵੁਚ੍ਚਤਿ ਭਿਕ੍ਖੁ ‘‘ਮੁਣ੍ਡਕੁਟੁਮ੍ਬਿਕਜੀਵਿਕਂ ਜੀਵਤਿ, ਨ ਸਮਣਜੀਵਿਕ’’ਨ੍ਤਿ. ਏਵਰੂਪੋ ਆਮਿਸਸਨ੍ਨਿਧਿ ਨਾਮ ਹੋਤਿ.
ਭਿਕ੍ਖੁਨੋ ਪਨ ਵਸਨਟ੍ਠਾਨੇ ਏਕਾ ਤਣ੍ਡੁਲਨਾਲ਼ਿ ਏਕੋ ਗੁਲ਼ਪਿਣ੍ਡੋ ਚਤੁਭਾਗਮਤ੍ਤਂ ਸਪ੍ਪੀਤਿ ਏਤ੍ਤਕਂ ਨਿਧੇਤੁਂ ਵਟ੍ਟਤਿ ਅਕਾਲੇ ਸਮ੍ਪਤ੍ਤਚੋਰਾਨਂ ਅਤ੍ਥਾਯ. ਤੇ ਹਿ ਏਤ੍ਤਕਮ੍ਪਿ ਆਮਿਸਪਟਿਸਨ੍ਥਾਰਂ ਅਲਭਨ੍ਤਾ ਜੀਵਿਤਾਪਿ ਵੋਰੋਪੇਯ੍ਯੁਂ, ਤਸ੍ਮਾ ਸਚੇਪਿ ਏਤ੍ਤਕਂ ਨਤ੍ਥਿ, ਆਹਰਾਪੇਤ੍ਵਾਪਿ ਠਪੇਤੁਂ ਵਟ੍ਟਤਿ. ਅਫਾਸੁਕਕਾਲੇ ਚ ਯਦੇਤ੍ਥ ਕਪ੍ਪਿਯਂ, ਤਂ ਅਤ੍ਤਨਾਪਿ ਪਰਿਭੁਞ੍ਜਿਤੁਂ ਵਟ੍ਟਤਿ. ਕਪ੍ਪਿਯਕੁਟਿਯਂ ਪਨ ਬਹੁਂ ਠਪੇਨ੍ਤਸ੍ਸਾਪਿ ਸਨ੍ਨਿਧਿ ਨਾਮ ਨਤ੍ਥਿ.
੧੬੦. ਝਾਯੀ ਨ ਪਾਦਲੋਲਸ੍ਸਾਤਿ ਝਾਨਾਭਿਰਤੋ ਚ ਨ ਚ ਪਾਦਲੋਲੋ ਅਸ੍ਸ. ਵਿਰਮੇ ਕੁਕ੍ਕੁਚ੍ਚਾ ਨਪ੍ਪਮਜ੍ਜੇਯ੍ਯਾਤਿ ਹਤ੍ਥਕੁਕ੍ਕੁਚ੍ਚਾਦਿਕੁਕ੍ਕੁਚ੍ਚਂ ਵਿਨੋਦੇਯ੍ਯ, ਸਕ੍ਕਚ੍ਚਕਾਰਿਤਾਯ ਚੇਤ੍ਥ ਨਪ੍ਪਮਜ੍ਜੇਯ੍ਯ.
ਏਕਤ੍ਤਮਨੁਯੁਤ੍ਤੋਤਿ ਏਕੀਭਾਵਂ ਅਨੁਯੁਤ੍ਤੋ. ਪਰਮਤ੍ਥਗਰੁਕੋਤਿ ਉਤ੍ਤਮਤ੍ਥਗਰੁਕੋ. ‘‘ਸਕਤ੍ਥਗਰੁਕੋ’’ਤਿ ਵਾ ਪਾਠੋ.
ਪਟਿਸਲ੍ਲਾਨਾਰਾਮੋਤਿ ਆਰਮਣਂ ਆਰਾਮੋ, ਤਤੋ ਤਤੋ ਆਰਮ੍ਮਣਤੋ ਪਟਿਸਂਹਰਿਤ੍ਵਾ ਏਕੀਭਾਵੇ ਪਟਿਸਲ੍ਲਾਨੇ ਆਰਾਮੋ ਯਸ੍ਸ ਸੋ ਪਟਿਸਲ੍ਲਾਨਾਰਾਮੋ. ਅਸ੍ਸਾਤਿ ਭਵੇਯ੍ਯ. ਤਸ੍ਮਿਂ ਰਤੋਤਿ ਪਟਿਸਲ੍ਲਾਨਰਤੋ. ਏਤੇਹਿ ਸੀਲੇਸੁ ਪਰਿਪੂਰਕਾਰਿਤਂ ਦਸ੍ਸੇਤਿ. ਤਂ ਕਿਸ੍ਸ ਹੇਤੁ? ਸੀਲਵਿਪਨ੍ਨਸ੍ਸ ਏਕਗ੍ਗਤਾਪਿ ਨ ਸਮ੍ਪਜ੍ਜਤਿ. ਅਜ੍ਝਤ੍ਤਂ ਚੇਤੋਸਮਥਮਨੁਯੁਤ੍ਤੋਤਿ ਅਤ੍ਤਨੋ ਚਿਤ੍ਤਸਮਥੇ ਯੁਤ੍ਤੋ. ਏਤ੍ਥ ਹਿ ਅਜ੍ਝਤ੍ਤਨ੍ਤਿ ਵਾ ਅਤ੍ਤਨੋਤਿ ਵਾ ਏਤਂ ਏਕਤ੍ਥਂ, ਬ੍ਯਞ੍ਜਨਮੇਵ ਨਾਨਂ. ਭੁਮ੍ਮਤ੍ਥੇ ਪਨੇਤਂ ਉਪਯੋਗਵਚਨਂ. ਅਨੂਤਿ ਇਮਿਨਾ ਉਪਸਗ੍ਗੇਨ ਯੋਗੇ ਸਿਦ੍ਧਂ.
ਅਨਿਰਾਕਤਜ੍ਝਾਨੋਤਿ ਬਹਿ ਅਨਿਹਤਜ੍ਝਾਨੋ ਅਵਿਨਾਸਿਤਜ੍ਝਾਨੋ ਵਾ. ਨੀਹਰਣਵਿਨਾਸਤ੍ਥਞ੍ਹਿ ਇਦਂ ਨਿਰਾਕਰਣਂ ਨਾਮ. ‘‘ਥਮ੍ਭਂ ਨਿਰਂਕਤ੍ਵਾ ਨਿਵਾਤਵੁਤ੍ਤੀ’’ਤਿਆਦੀਸੁ (ਸੁ. ਨਿ. ੩੨੮) ਚਸ੍ਸ ਪਯੋਗੋ ਦਟ੍ਠਬ੍ਬੋ. ਵਿਪਸ੍ਸਨਾਯ ਸਮਨ੍ਨਾਗਤੋਤਿ ਸਤ੍ਤਵਿਧਾਯ ਅਨੁਪਸ੍ਸਨਾਯ ਯੁਤ੍ਤੋ. ਸਤ੍ਤਵਿਧਾ ਅਨੁਪਸ੍ਸਨਾ ਨਾਮ ਅਨਿਚ੍ਚਾਨੁਪਸ੍ਸਨਾ ਦੁਕ੍ਖਾਨੁਪਸ੍ਸਨਾ ਅਨਤ੍ਤਾਨੁਪਸ੍ਸਨਾ ਨਿਬ੍ਬਿਦਾਨੁਪਸ੍ਸਨਾ ਵਿਰਾਗਾਨੁਪਸ੍ਸਨਾ ਨਿਰੋਧਾਨੁਪਸ੍ਸਨਾ ਪਟਿਨਿਸ੍ਸਗ੍ਗਾਨੁਪਸ੍ਸਨਾਤਿ. ਤਾ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੭੪੧ ਆਦਯੋ, ੮੪੯ ਆਦਯੋ) ਵਿਤ੍ਥਾਰਿਤਾ. ਬ੍ਯੂਹੇਤਾ ਸੁਞ੍ਞਾਗਾਰਾਨਨ੍ਤਿ ਵਡ੍ਢੇਤਾ ਸੁਞ੍ਞਾਗਾਰਾਨਂ. ਏਤ੍ਥ ਚ ਸਮਥਵਿਪਸ੍ਸਨਾਵਸੇਨ ਕਮ੍ਮਟ੍ਠਾਨਂ ਗਹੇਤ੍ਵਾ ਰਤ੍ਤਿਨ੍ਦਿਵਂ ਸੁਞ੍ਞਾਗਾਰਂ ਪਵਿਸਿਤ੍ਵਾ ਨਿਸੀਦਮਾਨੋ ਭਿਕ੍ਖੁ ‘‘ਬ੍ਰੂਹੇਤਾ ਸੁਞ੍ਞਾਗਾਰਾਨ’’ਨ੍ਤਿ ਵੇਦਿਤਬ੍ਬੋ. ਏਕਭੂਮਕਾਦਿਭੇਦੇ ਪਾਸਾਦੇ ਕੁਰੁਮਾਨੋਪਿ ਸੁਞ੍ਞਾਗਾਰਾਨਂ ਬ੍ਰੂਹੇਤਾਤਿ ਦਟ੍ਠਬ੍ਬੋ.
ਸਕ੍ਕਚ੍ਚਕਾਰੀਤਿਆਦੀਸੁ ਦਾਨਾਦੀਨਂ ਕੁਸਲਧਮ੍ਮਾਨਂ ਭਾਵਨਾਯ ਪੁਗ੍ਗਲਸ੍ਸ ਵਾ ਦੇਯ੍ਯਧਮ੍ਮਸ੍ਸ ਵਾ ਸਕ੍ਕਚ੍ਚਕਾਰਿਤਾਵਸੇਨ ਸਕ੍ਕਚ੍ਚਕਾਰੀ. ਅਸ੍ਸਾਤਿ ਭਵੇਯ੍ਯ. ਸਤਤਭਾਵੋ ਸਾਤਚ੍ਚਂ, ਸਾਤਚ੍ਚਕਾਰਿਤਾਵਸੇਨ ਸਾਤਚ੍ਚਕਾਰੀ. ਨਿਰਨ੍ਤਰਕਾਰਿਤਾਯ ਅਟ੍ਠਿਤਕਾਰੀ. ਯਥਾ ਨਾਮ ਕਕਣ੍ਟਕੋ ਥੋਕਂ ਗਨ੍ਤ੍ਵਾ ਥੋਕਂ ਤਿਟ੍ਠਤਿ, ਨ ਨਿਰਨ੍ਤਰਂ ਗਚ੍ਛਤਿ, ਏਵਮੇਵ ਯੋ ਪੁਗ੍ਗਲੋ ਏਕਦਿਵਸਂ ਦਾਨਂ ਦਤ੍ਵਾ ਪੂਜਂ ਵਾ ਕਤ੍ਵਾ ਧਮ੍ਮਂ ਵਾ ਸੁਤ੍ਵਾ ਸਮਣਧਮ੍ਮਂ ਵਾ ਕਤ੍ਵਾ ਪੁਨ ਚਿਰਸ੍ਸਂ ਕਰੋਤਿ, ਤਂ ਨ ਨਿਰਨ੍ਤਰਂ ਪਵਤ੍ਤੇਤਿ. ਸੋ ‘‘ਅਸਾਤਚ੍ਚਕਾਰੀ, ਠਿਤਕਾਰੀ’’ਤਿ ਵੁਚ੍ਚਤਿ. ਯੋ ਪਨ ਏਵਂ ਨ ਹੋਤਿ, ਸੋ ਅਟ੍ਠਿਤਕਾਰੀ. ਅਨੋਲੀਨਵੁਤ੍ਤਿਕੋਤਿ ਨਿਰਨ੍ਤਰਕਰਣਸਙ੍ਖਾਤਸ੍ਸ ਵਿਪ੍ਫਾਰਸ੍ਸ ਅਤ੍ਥਿਤਾਯ ਨ ਓਲੀਨਵੁਤ੍ਤਿਕੋ. ਅਨਿਕ੍ਖਿਤ੍ਤਚ੍ਛਨ੍ਦੋਤਿ ਕੁਸਲਕਿਰਿਯਾਯ ਵੀਰਿਯਚ੍ਛਨ੍ਦਸ੍ਸ ਅਨਿਕ੍ਖਿਤ੍ਤਭਾਵੇਨ ਅਨਿਕ੍ਖਿਤ੍ਤਚ੍ਛਨ੍ਦੋ. ਅਨਿਕ੍ਖਿਤ੍ਤਧੁਰੋਤਿ ਵੀਰਿਯਧੁਰਸ੍ਸ ਅਨੋਰੋਪਕੋ, ਅਨੋਸਕ੍ਕਿਤਮਾਨਸੋਤਿ ਅਤ੍ਥੋ.
ਅਪ੍ਪਟਿਵਾਨੀਤਿ ਅਨਿਵਤ੍ਤਨਂ. ਅਧਿਟ੍ਠਾਨਨ੍ਤਿ ਕੁਸਲਕਰਣੇ ਪਤਿਟ੍ਠਾਭਾਵੋ. ਅਨੁਯੋਗੋਤਿ ਅਨੁਯੁਞ੍ਜਨਂ. ਅਪ੍ਪਮਾਦੋਤਿ ਸਤਿਯਾ ਅਵਿਪ੍ਪਵਾਸੋ.
੧੬੧. ਤਨ੍ਦਿਂ ਮਾਯਂ ਹਸ੍ਸਂ ਖਿਡ੍ਡਨ੍ਤਿ ਆਲਸਿਯਞ੍ਚ ਮਾਯਞ੍ਚ ਹਸ੍ਸਞ੍ਚ ਕਾਯਿਕਂ ਵਾਚਸਿਕਂ ਖਿਡ੍ਡਞ੍ਚ. ਸਵਿਭੂਸਨ੍ਤਿ ਸਦ੍ਧਿਂ ਵਿਭੂਸਾਯ.
ਰਤ੍ਤਿਨ੍ਦਿਵਂ ਛਕੋਟ੍ਠਾਸਂ ਕਰਿਤ੍ਵਾਤਿ ਪੁਰਿਮਯਾਮਮਜ੍ਝਿਮਯਾਮਪਚ੍ਛਿਮਯਾਮਵਸੇਨ ਰਤ੍ਤਿਂ ਤਯੋ ਤਥਾ ਦਿਵਾਤਿ ਛਬ੍ਬਿਧਂ ਕੋਟ੍ਠਾਸਂ ਕਤ੍ਵਾ. ਪਞ੍ਚਕੋਟ੍ਠਾਸਂ ਪਟਿਜਗ੍ਗੇਯ੍ਯਾਤਿ ਰਤ੍ਤਿਂ ਮਜ੍ਝਿਮਯਾਮਂ ਵਿਸ੍ਸਜ੍ਜੇਤ੍ਵਾ ਅਵਸੇਸਪਞ੍ਚਕੋਟ੍ਠਾਸੇਸੁ ਨ ਨਿਦ੍ਦਂ ਓਕ੍ਕਮੇਯ੍ਯ. ਏਕਕੋਟ੍ਠਾਸਂ ਨਿਪਜ੍ਜੇਯ੍ਯਾਤਿ ਏਕਂ ਮਜ੍ਝਿਮਯਾਮਕੋਟ੍ਠਾਸਂ ਸਤੋ ਸਮ੍ਪਜਾਨੋ ਨਿਪਜ੍ਜਿਤ੍ਵਾ ਨਿਦ੍ਦਂ ਓਕ੍ਕਮੇਯ੍ਯ.
ਇਧ ਭਿਕ੍ਖੁ ਦਿਵਸਮ੍ਪਿ ਪੁਬ੍ਬਣ੍ਹੇ ਮਜ੍ਝਨ੍ਹੇ ਸਾਯਨ੍ਹੇਤਿ ਤਯੋਪਿ ਦਿਵਸਕੋਟ੍ਠਾਸਾ ਗਹਿਤਾ. ਚਙ੍ਕਮੇਨ ਨਿਸਜ੍ਜਾਯਾਤਿ ਸਕਲਂ ਦਿਵਸਂ ਇਮਿਨਾ ਇਰਿਯਾਪਥਦ੍ਵਯੇਨੇਵ ਵਿਹਰਨ੍ਤੋ ਚਿਤ੍ਤਸ੍ਸ ਆਵਰਣਤੋ ਆਵਰਣੀਯੇਹਿ ਧਮ੍ਮੇਹਿ ਪਞ੍ਚਹਿ ਨੀਵਰਣੇਹਿ ਸਬ੍ਬਾਕੁਸਲਧਮ੍ਮੇਹਿ ਵਾ. ਚਿਤ੍ਤਂ ਪਰਿਸੋਧੇਯ੍ਯਾਤਿ ਤੇਹਿ ਧਮ੍ਮੇਹਿ ਚਿਤ੍ਤਂ ਵਿਸੋਧੇਯ੍ਯ. ਠਾਨਂ ਪਨੇਤ੍ਥ ਕਿਞ੍ਚਾਪਿ ਨ ਗਹਿਤਂ, ਚਙ੍ਕਮਨਿਸਜ੍ਜਾਸਨ੍ਨਿਸ੍ਸਿਤਂ ਪਨ ਕਤ੍ਵਾ ਗਹੇਤਬ੍ਬਮੇਵ. ਪਠਮਂ ਯਾਮਨ੍ਤਿ ਸਕਲਸ੍ਮਿਮ੍ਪਿ ਪਠਮਯਾਮੇ.
ਸੇਯ੍ਯਨ੍ਤਿ ਏਤ੍ਥ ਕਾਮਭੋਗੀਸੇਯ੍ਯਾ ਪੇਤਸੇਯ੍ਯਾ ਸੀਹਸੇਯ੍ਯਾ ਤਥਾਗਤਸੇਯ੍ਯਾਤਿ ਚਤਸ੍ਸੋ ਸੇਯ੍ਯਾ. ਤਤ੍ਥ ‘‘ਯੇਭੁਯ੍ਯੇਨ, ਭਿਕ੍ਖਵੇ, ਕਾਮਭੋਗੀ ਵਾਮੇਨ ਪਸ੍ਸੇਨ ਸੇਨ੍ਤੀ’’ਤਿ (ਅ. ਨਿ. ੧.੪੨੪੬) ਅਯਂ ਕਾਮਭੋਗੀਸੇਯ੍ਯਾ. ਤੇਸੁ ਹਿ ਯੇਭੁਯ੍ਯੇਨ ਦਕ੍ਖਿਣਪਸ੍ਸੇਨ ਸਯਾਨੋ ਨਾਮ ਨਤ੍ਥਿ. ‘‘ਯੇਭੁਯ੍ਯੇਨ, ਭਿਕ੍ਖਵੇ, ਪੇਤਾ ਉਤ੍ਤਾਨਾ ਸੇਨ੍ਤੀ’’ਤਿ (ਅ. ਨਿ. ੪.੨੪੬) ਅਯਂ ਪੇਤਸੇਯ੍ਯਾ. ਅਪ੍ਪਮਂਸਲੋਹਿਤਤ੍ਤਾ ਹਿ ਅਟ੍ਠਿਸਙ੍ਘਾਟਘਟ੍ਟਿਤਾ ਏਕੇਨ ਪਸ੍ਸੇਨ ਸਯਿਤੁਂ ਨ ਸਕ੍ਕੋਨ੍ਤਿ, ਉਤ੍ਤਾਨਾਵ ਸੇਨ੍ਤਿ. ‘‘ਸੀਹੋ, ਭਿਕ੍ਖਵੇ, ਮਿਗਰਾਜਾ ਦਕ੍ਖਿਣੇਨ ਪਸ੍ਸੇਨ ਸੇਯ੍ਯਂ ਕਪ੍ਪੇਤਿ…ਪੇ… ਅਤ੍ਤਮਨੋ ਹੋਤੀ’’ਤਿ (ਅ. ਨਿ. ੪.੨੪੬) ਅਯਂ ਸੀਹਸੇਯ੍ਯਾ. ਤੇਜੁਸ੍ਸਦਤ੍ਤਾ ਹਿ ਸੀਹੋ ਮਿਗਰਾਜਾ ਦ੍ਵੇ ਪੁਰਿਮਪਾਦੇ ਏਕਸ੍ਮਿਂ ਪਚ੍ਛਿਮਪਾਦੇ ਏਕਸ੍ਮਿਂ ਠਾਨੇ ਠਪੇਤ੍ਵਾ ਨਙ੍ਗੁਟ੍ਠਂ ਅਨ੍ਤਰਸਤ੍ਥਿਮ੍ਹਿ ਪਕ੍ਖਿਪਿਤ੍ਵਾ ਪੁਰਿਮਪਾਦਪਚ੍ਛਿਮਪਾਦਨਙ੍ਗੁਟ੍ਠਾਨਂ ਠਿਤੋਕਾਸਂ ਸਲ੍ਲਕ੍ਖੇਤ੍ਵਾ ਦ੍ਵਿਨ੍ਨਂ ਪੁਰਿਮਪਾਦਾਨਂ ਮਤ੍ਥਕੇ ਸੀਸਂ ਠਪੇਤ੍ਵਾ ਸਯਤਿ. ਦਿਵਸਮ੍ਪਿ ਸਯਿਤ੍ਵਾ ਪਬੁਜ੍ਝਮਾਨੋ ਨ ਉਤ੍ਰਸ੍ਤੋ ਪਬੁਜ੍ਝਤਿ, ਸੀਸਂ ਪਨ ਉਕ੍ਖਿਪਿਤ੍ਵਾ ਪੁਰਿਮਪਾਦਾਦੀਨਂ ਠਿਤੋਕਾਸਂ ਸਲ੍ਲਕ੍ਖੇਤਿ. ਸਚੇ ਕਿਞ੍ਚਿ ਠਾਨਂ ਵਿਜਹਿਤ੍ਵਾ ਠਿਤਂ ਹੋਤਿ, ‘‘ਨਯਿਦਂ ਤੁਯ੍ਹਂ ਜਾਤਿਯਾ, ਨ ਸੂਰਭਾਵਸ੍ਸ ਅਨੁਰੂਪ’’ਨ੍ਤਿ ਅਨਤ੍ਤਮਨੋ ਹੁਤ੍ਵਾ ਤਤ੍ਥੇਵ ਸਯਤਿ, ਨ ਗੋਚਰਾਯ ਪਕ੍ਕਮਤਿ. ਅਵਿਜਹਿਤ੍ਵਾ ਠਿਤੇ ਪਨ ‘‘ਤੁਯ੍ਹਂ ਜਾਤਿਯਾ ਚ ਸੂਰਭਾਵਸ੍ਸ ਚ ਅਨੁਰੂਪਮਿਦ’’ਨ੍ਤਿ ਹਟ੍ਠਤੁਟ੍ਠੋ ਉਟ੍ਠਾਯ ਸੀਹਵਿਜਮ੍ਭਿਤਂ ਵਿਜਮ੍ਭਿਤ੍ਵਾ ਕੇਸਰਭਾਰਂ ਵਿਧੁਨਿਤ੍ਵਾ ਤਿਕ੍ਖਤ੍ਤੁਂ ਸੀਹਨਾਦਂ ਨਦਿਤ੍ਵਾ ਗੋਚਰਾਯ ਪਕ੍ਕਮਤਿ. ਚਤੁਤ੍ਥਜ੍ਝਾਨਸੇਯ੍ਯਾ ਪਨ ਤਥਾਗਤਸੇਯ੍ਯਾਤਿ ਵੁਚ੍ਚਤਿ. ਤਾਸੁ ਇਧ ਸੀਹਸੇਯ੍ਯਾ ਆਗਤਾ. ਅਯਞ੍ਹਿ ਤੇਜੁਸ੍ਸਦਇਰਿਯਾਪਥਤ੍ਤਾ ਉਤ੍ਤਮਸੇਯ੍ਯਾ ਨਾਮ.
ਪਾਦੇ ਪਾਦਨ੍ਤਿ ਦਕ੍ਖਿਣਪਾਦੇ ਵਾਮਪਾਦਂ. ਅਚ੍ਚਾਧਾਯਾਤਿ ਅਤਿਆਧਾਯ ਈਸਕਂ ਅਤਿਕ੍ਕਮ੍ਮ ਠਪੇਤ੍ਵਾ. ਗੋਪ੍ਫਕੇਨ ਹਿ ਗੋਪ੍ਫਕੇ, ਜਾਣੁਨਾ ਵਾ ਜਾਣੁਮ੍ਹਿ ਸਙ੍ਘਟ੍ਟਿਯਮਾਨੇ ਅਭਿਣ੍ਹਂ ਵੇਦਨਾ ਉਪ੍ਪਜ੍ਜਤਿ, ਚਿਤ੍ਤਂ ਏਕਗ੍ਗਂ ਨ ਹੋਤਿ, ਸੇਯ੍ਯਾ ਅਫਾਸੁ ਹੋਤਿ. ਯਥਾ ਪਨ ਨ ਸਙ੍ਘਟ੍ਟੇਤਿ, ਏਵਂ ਅਤਿਕ੍ਕਮ੍ਮ ਠਪਿਤੇ ਵੇਦਨਾ ਨੁਪ੍ਪਜ੍ਜਤਿ, ਚਿਤ੍ਤਂ ਏਕਗ੍ਗਂ ਹੋਤਿ, ਸੇਯ੍ਯਾ ਫਾਸੁ ਹੋਤਿ. ਤੇਨ ਵੁਤ੍ਤਂ – ‘‘ਪਾਦੇ ਪਾਦਂ ਅਚ੍ਚਾਧਾਯਾ’’ਤਿ. ਸਤੋ ਸਮ੍ਪਜਾਨੋਤਿ ਸਤਿਯਾ ਚੇਵ ਸਮ੍ਪਜਾਨਪਞ੍ਞਾਯ ਚ ਸਮਨ੍ਨਾਗਤੋ ਹੁਤ੍ਵਾ. ਇਮਿਨਾ ਸੁਪਰਿਗ੍ਗਾਹਕਂ ਸਤਿਸਮ੍ਪਜਞ੍ਞਂ ਕਥਿਤਂ. ਉਟ੍ਠਾਨਸਞ੍ਞਂ ਮਨਸਿਕਰਿਤ੍ਵਾਤਿ ‘‘ਅਸੁਕਵੇਲਾਯ ਨਾਮ ਉਟ੍ਠਹਿਸ੍ਸਾਮੀ’’ਤਿ ਏਵਂ ਉਟ੍ਠਾਨਵੇਲਾਪਰਿਚ੍ਛੇਦਕਂ ਉਟ੍ਠਾਨਸਞ੍ਞਂ ਚਿਤ੍ਤੇ ਠਪੇਤ੍ਵਾ. ਏਵਂ ਕਤ੍ਵਾ ਨਿਪਨ੍ਨੋ ਹਿ ਯਥਾਪਰਿਚ੍ਛਿਨ੍ਨਕਾਲੇਯੇਵ ਉਟ੍ਠਾਤਿ.
ਵੀਰਿਯਿਨ੍ਦ੍ਰਿਯਨਿਦ੍ਦੇਸੇ ਚੇਤਸਿਕੋਤਿ ਇਦਂ ਵੀਰਿਯਸ੍ਸ ਨਿਯਮਤੋ ਚੇਤਸਿਕਭਾਵਦੀਪਨਤ੍ਥਂ ਵੁਤ੍ਤਂ, ਇਦਞ੍ਹਿ ਵੀਰਿਯਂ ‘‘ਯਦਪਿ, ਭਿਕ੍ਖਵੇ, ਕਾਯਿਕਂ ਵੀਰਿਯਂ, ਤਦਪਿ ਵੀਰਿਯਸਮ੍ਬੋਜ੍ਝਙ੍ਗੋ, ਯਦਪਿ ਚੇਤਸਿਕਂ ਵੀਰਿਯਂ, ਤਦਪਿ ਵੀਰਿਯਸਮ੍ਬੋਜ੍ਝਙ੍ਗੋਤਿ. ਇਤਿਹਿਦਂ ਉਦ੍ਦੇਸਂ ਗਚ੍ਛਤੀ’’ਤਿ ਏਵਮਾਦੀਸੁ ਸੁਤ੍ਤੇਸੁ (ਸਂ. ਨਿ. ੫.੨੩੩) ਚਙ੍ਕਮਾਦੀਨਿ ਕਰੋਨ੍ਤਸ੍ਸ ਉਪ੍ਪਜ੍ਜਨਤਾਯ ਕਾਯਿਕਨ੍ਤਿ ਵੁਚ੍ਚਮਾਨਮ੍ਪਿ ਕਾਯਵਿਞ੍ਞਾਣਂ ਵਿਯ ਕਾਯਿਕਂ ਨਾਮ ਨਤ੍ਥਿ, ਚੇਤਸਿਕਮੇਵ ਪਨੇਤਨ੍ਤਿ ਦੀਪੇਤੁਂ ‘‘ਚੇਤਸਿਕੋ’’ਤਿ ਵੁਤ੍ਤਂ. ਵੀਰਿਯਾਰਮ੍ਭੋਤਿ ਵੀਰਿਯਸਙ੍ਖਾਤੋ ਆਰਮ੍ਭੋ. ਅਯਞ੍ਹਿ ਆਰਮ੍ਭਸਦ੍ਦੋ ਕਮ੍ਮੇ ਆਪਤ੍ਤਿਯਂ ਕਿਰਿਯਾਯਂ ਵੀਰਿਯੇ ਹਿਂਸਾਯਂ ਵਿਕੋਪਨੇਤਿ ਅਨੇਕੇਸੁ ਅਤ੍ਥੇਸੁ ਆਗਤੋ.
‘‘ਯਂ ਕਿਞ੍ਚਿ ਦੁਕ੍ਖਂ ਸਮ੍ਭੋਤਿ, ਸਬ੍ਬਂ ਆਰਮ੍ਭਪਚ੍ਚਯਾ;
ਆਰਮ੍ਭਾਨਂ ਨਿਰੋਧੇਨ, ਨਤ੍ਥਿ ਦੁਕ੍ਖਸ੍ਸ ਸਮ੍ਭਵੋ’’ਤਿ. (ਸੁ. ਨਿ. ੭੪੯) –
ਏਤ੍ਥ ਹਿ ਕਮ੍ਮਂ ਆਰਮ੍ਭੋਤਿ ਆਗਤਂ. ‘‘ਆਰਮ੍ਭਤਿ ਚ ਵਿਪ੍ਪਟਿਸਾਰੀ ਚ ਹੋਤੀ’’ਤਿ (ਅ. ਨਿ. ੫.੧੪੨; ਪੁ. ਪ. ੧੯੧) ਏਤ੍ਥ ਆਪਤ੍ਤਿ. ‘‘ਮਹਾਯਞ੍ਞਾ ਮਹਾਰਮ੍ਭਾ, ਨ ਤੇ ਹੋਨ੍ਤਿ ਮਹਪ੍ਫਲਾ’’ਤਿ (ਅ. ਨਿ. ੪.੩੯; ਸਂ. ਨਿ. ੧.੧੨੦) ਏਤ੍ਥ ਯੂਪੁਸ੍ਸਾਪਨਾਦਿਕਿਰਿਯਾ. ‘‘ਆਰਮ੍ਭਥ ਨਿਕ੍ਕਮਥ, ਯੁਞ੍ਜਥ ਬੁਦ੍ਧਸਾਸਨੇ’’ਤਿ (ਸਂ. ਨਿ. ੧.੧੮੫; ਕਥਾ. ੩੩੩; ਨੇਤ੍ਤਿ. ੨੯; ਪੇਟਕੋ. ੩੮; ਮਿ. ਪ. ੫.੧.੪) ਏਤ੍ਥ ਵੀਰਿਯਂ. ‘‘ਸਮਣਂ ਗੋਤਮਂ ਉਦ੍ਦਿਸ੍ਸ ਪਾਣਂ ਆਰਮ੍ਭਨ੍ਤੀ’’ਤਿ (ਮ. ਨਿ. ੨.੫੧) ਏਤ੍ਥ ਹਿਂਸਾ. ‘‘ਬੀਜਗਾਮਭੂਤਗਾਮਸਮਾਰਮ੍ਭਾ ਪਟਿਵਿਰਤੋ ਹੋਤੀ’’ਤਿ (ਦੀ. ਨਿ. ੧.੧੦; ਮ. ਨਿ. ੧.੨੯੩) ਏਤ੍ਥ ਛੇਦਨਭਞ੍ਜਨਾਦਿਕਂ ਵਿਕੋਪਨਂ. ਇਧ ਪਨ ਵੀਰਿਯਮੇਵ ਅਧਿਪ੍ਪੇਤਂ. ਤੇਨਾਹ ‘‘ਵੀਰਿਯਾਰਮ੍ਭੋਤਿ ਵੀਰਿਯਸਙ੍ਖਾਤੋ ਆਰਮ੍ਭੋ’’ਤਿ. ਵੀਰਿਯਞ੍ਹਿ ਆਰਮ੍ਭਨਵਸੇਨ ਆਰਮ੍ਭੋਤਿ ਵੁਚ੍ਚਤਿ. ਇਦਮਸ੍ਸ ਸਭਾਵਪਦਂ. ਕੋਸਜ੍ਜਤੋ ਨਿਕ੍ਖਮਨਵਸੇਨ ਨਿਕ੍ਕਮੋ. ਪਰਂ ਪਰਂ ਠਾਨਂ ਅਕ੍ਕਮਨਵਸੇਨ ਪਰਕ੍ਕਮੋ. ਉਗ੍ਗਨ੍ਤ੍ਵਾ ਯਮਨਵਸੇਨ ਉਯ੍ਯਾਮੋ. ਵਾਯਮਨਵਸੇਨ ਵਾਯਾਮੋ. ਉਸ੍ਸਹਨਵਸੇਨ ਉਸ੍ਸਾਹੋ. ਅਧਿਮਤ੍ਤੁਸ੍ਸਹਨਵਸੇਨ ਉਸ੍ਸੋਲ਼੍ਹੀ. ਥਿਰਭਾਵਟ੍ਠੇਨ ਥਾਮੋ. ਚਿਤ੍ਤਚੇਤਸਿਕਾਨਂ ਧਾਰਣਵਸੇਨ ਅਵਿਚ੍ਛੇਦਤੋ ਵਾ ਪਵਤ੍ਤਨਵਸੇਨ ਕੁਸਲਸਨ੍ਤਾਨਂ ਧਾਰੇਤੀਤਿ ਧਿਤਿ.
ਅਪਰੋ ਨਯੋ – ਨਿਕ੍ਕਮੋ ਚੇਸੋ ਕਾਮਾਨਂ ਪਨੁਦਨਾਯ. ਪਰਕ੍ਕਮੋ ਚੇਸੋ ਬਨ੍ਧਨਚ੍ਛੇਦਾਯ. ਉਯ੍ਯਾਮੋ ਚੇਸੋ ਓਘਸ੍ਸ ਨਿਤ੍ਥਰਣਾਯ. ਵਾਯਾਮੋ ਚੇਸੋ ਪਾਰਂ ਗਮਨਟ੍ਠੇਨ. ਉਸ੍ਸਾਹੋ ਚੇਸੋ ਪੁਬ੍ਬਙ੍ਗਮਟ੍ਠੇਨ. ਉਸ੍ਸੋਲ਼੍ਹੀ ਚੇਸੋ ਅਧਿਮਤ੍ਤਟ੍ਠੇਨ. ਥਾਮੋ ਚੇਸੋ ਪਲਿਘੁਗ੍ਘਾਟਨਤਾਯ. ਧਿਤਿ ਚੇਸੋ ਅਟ੍ਠਿਤਕਾਰਿਤਾਯਾਤਿ.
‘‘ਕਾਮਂ ਤਚੋ ਚ ਨ੍ਹਾਰੁ ਚ, ਅਟ੍ਠਿ ਚ ਅਵਸਿਸ੍ਸਤੂ’’ਤਿ (ਅ. ਨਿ. ੨.੫) ਏਵਂ ਪਵਤ੍ਤਿਕਾਲੇ ਅਸਿਥਿਲਪਰਕ੍ਕਮਵਸੇਨ ਅਸਿਥਿਲਪਰਕ੍ਕਮਤਾ, ਥਿਰਪਰਕ੍ਕਮੋ ਦਲ਼੍ਹਪਰਕ੍ਕਮੋਤਿ ਅਤ੍ਥੋ. ਯਸ੍ਮਾ ਪਨੇਤਂ ਵੀਰਿਯਂ ਕੁਸਲਕਮ੍ਮਕਰਣਟ੍ਠਾਨੇ ਛਨ੍ਦਂ ਨ ਨਿਕ੍ਖਿਪਤਿ, ਧੁਰਂ ਨ ਨਿਕ੍ਖਿਪਤਿ, ਨ ਓਤਾਰੇਤਿ ਨ ਵਿਸ੍ਸਜ੍ਜੇਤਿ, ਅਨੋਸਕ੍ਕਿਤਮਾਨਸਤਂ ਆਵਹਤਿ, ਤਸ੍ਮਾ ‘‘ਅਨਿਕ੍ਖਿਤ੍ਤਚ੍ਛਨ੍ਦਤਾ ਅਨਿਕ੍ਖਿਤ੍ਤਧੁਰਤਾ’’ਤਿ ਵੁਤ੍ਤਂ. ਯਥਾ ਪਨ ਤਜ੍ਜਾਤਿਕੇ ਉਦਕਸਮ੍ਭਿਨ੍ਨਟ੍ਠਾਨੇ ਧੁਰਵਾਹਗੋਣਂ ‘‘ਗਣ੍ਹਥਾ’’ਤਿ ਵਦਨ੍ਤਿ, ਸੋ ਜਾਣੁਨਾ ਭੂਮਿਂ ਉਪ੍ਪੀਲ਼ੇਤ੍ਵਾਪਿ ਧੁਰਂ ਵਹਤਿ, ਭੂਮਿਯਂ ਪਤਿਤੁਂ ਨ ਦੇਤਿ, ਏਵਮੇਵ ਵੀਰਿਯਂ ਕੁਸਲਕਮ੍ਮਕਰਣਟ੍ਠਾਨੇ ਧੁਰਂ ਨ ਨਿਕ੍ਖਿਪਤਿ ਪਗ੍ਗਣ੍ਹਾਤਿ, ਤਸ੍ਮਾ ‘‘ਧੁਰਸਮ੍ਪਗ੍ਗਾਹੋ’’ਤਿ ਵੁਤ੍ਤਂ. ਪਗ੍ਗਹਲਕ੍ਖਣੇ ਇਨ੍ਦਟ੍ਠਂ ਕਾਰੇਤੀਤਿ ਵੀਰਿਯਿਨ੍ਦ੍ਰਿਯਂ. ਕੋਸਜ੍ਜੇ ਨ ਕਮ੍ਪਤੀਤਿ ਵੀਰਿਯਬਲਂ. ਯਾਥਾਵਨਿਯ੍ਯਾਨਿਕਕੁਸਲਵਾਯਾਮਤਾਯ ਸਮ੍ਮਾਵਾਯਾਮੋ.
ਤਨ੍ਦੀਤਿ ਜਾਤਿਆਲਸਿਯਂ. ਤਨ੍ਦਿਯਨਾਤਿ ਤਨ੍ਦਿਯਨਾਕਾਰੋ. ਤਨ੍ਦਿਮਨਕਤਾਤਿ ਤਨ੍ਦਿਯਾ ਅਭਿਭੂਤਚਿਤ੍ਤਤਾ. ਅਲਸਸ੍ਸ ਭਾਵੋ ਆਲਸ੍ਯਂ, ਆਲਸ੍ਯਾਯਨਾਕਾਰੋ ਆਲਸ੍ਯਾਯਨਾ. ਆਲਸ੍ਯਾਯਿਤਸ੍ਸ ਭਾਵੋ ਆਲਸ੍ਯਾਯਿਤਤ੍ਤਂ. ਇਤਿ ਸਬ੍ਬੇਹਿ ਇਮੇਹਿ ਪਦੇਹਿ ਕਿਲੇਸਵਸੇਨ ਕਾਯਾਲਸਿਯਂ ਕਥਿਤਂ.
ਵਞ੍ਚਨਿਕਾ ਚਰਿਯਾਤਿ ਵਞ੍ਚਨਿਕਾ ਕਿਰਿਯਾ. ਮਾ ਮਂ ਜਞ੍ਞਾਤਿ ਵਾਚਂ ਭਾਸਤੀਤਿ ਜਾਨਂਯੇਵ ਪਣ੍ਣਤ੍ਤਿਂ ਵੀਤਿਕ੍ਕਮਨ੍ਤੋ ਭਿਕ੍ਖੁ ਭਾਰਿਯਂ ਕਰੋਤਿ, ਅਮ੍ਹਾਕਂ ਪਨ ਵੀਤਿਕ੍ਕਮਟ੍ਠਾਨਂ ਨਾਮ ਨਤ੍ਥੀਤਿ ਉਪਸਨ੍ਤੋ ਵਿਯ ਭਾਸਤਿ. ਕਾਯੇਨ ਪਰਕ੍ਕਮਤੀਤਿ ‘‘ਮਯਾ ਕਤਂ ਇਦਂ ਪਾਪਕਮ੍ਮਂ ਮਾ ਕੇਚਿ ਜਾਨਿਂਸੂ’’ਤਿ ਕਾਯੇਨ ਵਤ੍ਤਂ ਕਰੋਤਿ. ਵਿਜ੍ਜਮਾਨਦੋਸਪਟਿਚ੍ਛਾਦਨਤੋ ਚਕ੍ਖੁਮੋਹਨਮਾਯਾ ਵਿਯਾਤਿ ਮਾਯਾ, ਮਾਯਾਵਿਨੋ ਭਾਵੋ ਮਾਯਾਵਿਤਾ. ਕਤ੍ਵਾ ਪਾਪਂ ਪੁਨ ਪਟਿਚ੍ਛਾਦਨਤੋ ਅਤਿ ਅਸ੍ਸਰਤਿ ਏਤਾਯ ਸਤ੍ਤੋਤਿ ਅਚ੍ਚਸਰਾ. ਕਾਯਵਾਚਾਕਿਰਿਯਾਹਿ ਅਞ੍ਞਥਾ ਦਸ੍ਸਨਤੋ ਵਞ੍ਚੇਤੀਤਿ ਵਞ੍ਚਨਾ. ਏਤਾਯ ਸਤ੍ਤਾ ਨਿਕਰੋਨ੍ਤੀਤਿ ਨਿਕਤਿ, ਮਿਚ੍ਛਾ ਕਰੋਨ੍ਤੀਤਿ ਅਤ੍ਥੋ. ‘‘ਨਾਹਂ ਏਵਂ ਕਰੋਮੀ’’ਤਿ ਪਾਪਾਨਂ ਨਿਕ੍ਖਿਪਨਤੋ ਨਿਕਿਰਣਾ. ‘‘ਨਾਹਂ ਏਵਂ ਕਰੋਮੀ’’ਤਿ ਪਰਿਵਜ੍ਜਨਤੋ ਪਰਿਹਰਣਾ. ਕਾਯਾਦੀਹਿ ਸਂਵਰਣਤੋ ਗੂਹਨਾ. ਸਬ੍ਬਤੋ ਭਾਗੇਨ ਗੂਹਨਾ ਪਰਿਗੂਹਨਾ. ਤਿਣਪਣ੍ਣੇਹਿ ਵਿਯ ਗੂਥਂ ਕਾਯਵਚੀਕਮ੍ਮੇਹਿ ਪਾਪਂ ਛਾਦਿਯਤੀਤਿ ਛਾਦਨਾ. ਸਬ੍ਬਤੋ ਭਾਗੇਨ ਛਾਦਨਾ ਪਰਿਚ੍ਛਾਦਨਾ. ਨ ਉਤ੍ਤਾਨਂ ਕਤ੍ਵਾ ਦਸ੍ਸੇਤੀਤਿ ਅਨੁਤ੍ਤਾਨੀਕਮ੍ਮਂ. ਨ ਪਾਕਟਂ ਕਤ੍ਵਾ ਦਸ੍ਸੇਤੀਤਿ ਅਨਾਵਿਕਮ੍ਮਂ. ਸੁਟ੍ਠੁ ਛਾਦਨਾ ਵੋਚ੍ਛਾਦਨਾ. ਕਤਪਾਪਪਟਿਚ੍ਛਾਦਨਵਸੇਨ ਪੁਨਪਿ ਪਾਪਸ੍ਸ ਕਰਣਤੋ ਪਾਪਕਿਰਿਯਾ. ਅਯਂ ਵੁਚ੍ਚਤੀਤਿ ਅਯਂ ਕਤਪਟਿਚ੍ਛਾਦਨਲਕ੍ਖਣਾ ਮਾਯਾ ਨਾਮ ਵੁਚ੍ਚਤਿ. ਯਾਯ ਸਮਨ੍ਨਾਗਤੋ ਪੁਗ੍ਗਲੋ ਭਸ੍ਮਾਪਟਿਚ੍ਛਨ੍ਨੋ ਵਿਯ ਅਙ੍ਗਾਰੋ, ਉਦਕਪਟਿਚ੍ਛਨ੍ਨੋ ਵਿਯ ਖਾਣੁ, ਪਿਲੋਤਿਕਾਯ ਪਲਿਵੇਠਿਤਂ ਵਿਯ ਚ ਸਤ੍ਥਂ ਹੋਤਿ. ਅਤਿਵੇਲਂ ਦਨ੍ਤਵਿਦਂਸਕਂ ਹਸਤੀਤਿ ਪਮਾਣਾਤਿਕ੍ਕਨ੍ਤਂ ਦਨ੍ਤਂ ਵਿਵਰਿਤ੍ਵਾ ਪਰੇਸਂ ਦਸ੍ਸੇਤ੍ਵਾ ਹਾਸਂ ਸੋਮਨਸ੍ਸਂ ਉਪ੍ਪਾਦੇਤ੍ਵਾ ਹਸਤਿ.
ਕਾਯਿਕਾ ਚ ਖਿਡ੍ਡਾਤਿ ਕਾਯੇਨ ਪਵਤ੍ਤਾ ਕੀਲ਼ਾ. ਏਸੇਵ ਨਯੋ ਵਾਚਸਿਕਾਯਪਿ. ਹਤ੍ਥੀਹਿਪਿ ਕੀਲ਼ਨ੍ਤੀਤਿ ਹਤ੍ਥੀਹਿ ਕੀਲ਼ਿਤਤ੍ਥਾਯ ਪੁਰਤੋ ਧਾਵਨਆਧਾਵਨਪਿਟ੍ਠਨਿਸੀਦਨਾਦਿਕੀਟ੍ਠਾਯ ਕੀਲ਼ਨ੍ਤਿ. ਏਸੇਵ ਨਯੋ ਅਸ੍ਸਰਥੇਸੁਪਿ. ਅਟ੍ਠਪਦੇਪਿ ਕੀਲ਼ਨ੍ਤੀਤਿ ਏਕੇਕਾਯ ਪਨ੍ਤਿਯਾ ਅਟ੍ਠ ਅਟ੍ਠ ਪਦਾਨਿ ਅਸ੍ਸਾਤਿ ਅਟ੍ਠਪਦਂ, ਤਸ੍ਮਿਂ ਅਟ੍ਠਪਦੇ. ਦਸਪਦੇਪਿ ਏਸੇਵ ਨਯੋ. ਆਕਾਸੇਪੀਤਿ ਅਟ੍ਠਪਦਦਸਪਦੇਸੁ ਵਿਯ ਆਕਾਸੇਯੇਵ ਕੀਲ਼ਨ੍ਤਿ. ਪਰਿਹਾਰਪਥੇਪੀਤਿ ਭੂਮਿਯਂ ਨਾਨਾਪਥਮਣ੍ਡਲਂ ਕਤ੍ਵਾ ਤਤ੍ਥ ਪਰਿਹਰਿਤਬ੍ਬਪਥਂ ਪਰਿਹਰਨ੍ਤਾ ਕੀਲ਼ਨ੍ਤਿ. ਸਨ੍ਤਿਕਾਯਪਿ ਕੀਲ਼ਨ੍ਤੀਤਿ ਸਨ੍ਤਿਕਕੀਲ਼ਾਯ ਕੀਲ਼ਨ੍ਤਿ, ਏਕਜ੍ਝਂ ਠਪਿਤਾ ਸਾਰਿਯੋ ਵਾ ਪਾਸਾਣਸਕ੍ਖਰਾਯੋ ਵਾ ਅਚਾਲੇਨ੍ਤਾ ਨਖੇਨੇਵ ਅਪਨੇਨ੍ਤਿ ਚ ਉਪਨੇਨ੍ਤਿ ਚ. ਸਚੇ ਤਤ੍ਥ ਕਾਚਿ ਚਲਤਿ, ਪਰਾਜਯੋ ਹੋਤੀਤਿ.
ਖਲਿਕਾਯਾਤਿ ਜੂਤਫਲਕੇ ਪਾਸਕਕੀਲ਼ਾਯ ਕੀਲ਼ਨ੍ਤਿ. ਘਟਿਕਾਯਾਤਿ ਘਟਿਕਾ ਵੁਚ੍ਚਤਿ ਦੀਘਦਣ੍ਡਕੇਨ ਰਸ੍ਸਦਣ੍ਡਕਂ ਪਹਰਣਕੀਲ਼ਾ, ਤਾਯ ਕੀਲ਼ਨ੍ਤਿ. ਸਲਾਕਹਤ੍ਥੇਨਾਤਿ ਲਾਖਾਯ ਵਾ ਮਞ੍ਜਟ੍ਠਿਯਾ ਵਾ ਪਿਟ੍ਠੋਦਕੇਨ ਵਾ ਸਲਾਕਹਤ੍ਥਂ ਤੇਮੇਤ੍ਵਾ ‘‘ਕਿਂ ਹੋਤੂ’’ਤਿ ਭੂਮਿਯਂ ਵਾ ਭਿਤ੍ਤਿਯਂ ਵਾ ਤਂ ਪਹਰਿਤ੍ਵਾ ਹਤ੍ਥਿਅਸ੍ਸਾਦਿਰੂਪਾਨਿ ਦਸ੍ਸੇਨ੍ਤਾ ਕੀਲ਼ਨ੍ਤਿ. ਅਕ੍ਖੇਨਾਤਿ ਗੁਲ਼ੇਨ. ਪਙ੍ਕਚੀਰੇਨਾਤਿ ਪਙ੍ਕਚੀਰਂ ਵੁਚ੍ਚਤਿ ਪਣ੍ਣਨਾਲ਼ਿਕਾ, ਤਂ ਧਮਨ੍ਤਾ ਕੀਲ਼ਨ੍ਤਿ. ਵਙ੍ਕਕੇਨਾਤਿ ਗਾਮਦਾਰਕਾਨਂ ਕੀਲ਼ਨਕੇਨ ਖੁਦ੍ਦਕਨਙ੍ਗਲੇਨ. ਮੋਕ੍ਖਚਿਕਾਯਾਤਿ ਸਮ੍ਪਰਿਵਤ੍ਤਕਕੀਲ਼ਾਯ, ਆਕਾਸੇ ਵਾ ਦਣ੍ਡਂ ਗਹੇਤ੍ਵਾ ਭੂਮਿਯਂ ਵਾ ਸੀਸਂ ਠਪੇਤ੍ਵਾ ਹੇਟ੍ਠੁਪਰਿਯਭਾਵੇਨ ਪਰਿਵਤ੍ਤਨ੍ਤਾ ਕੀਲ਼ਨ੍ਤੀਤਿ ਵੁਤ੍ਤਂ ਹੋਤਿ. ਚਿਙ੍ਗੁਲਕੇਨਾਤਿ ਚਿਙ੍ਗੁਲਕਂ ਵੁਚ੍ਚਤਿ ਤਾਲਪਣ੍ਣਾਦੀਹਿ ਕਤਂ ਵਾਤਪ੍ਪਹਾਰੇਨ ਪਰਿਬ੍ਭਮਨਚਕ੍ਕਂ, ਤੇਨ ਕੀਲ਼ਨ੍ਤਿ. ਪਤ੍ਤਾਲ਼੍ਹਕੇਨਾਤਿ ਪਤ੍ਤਾਲ਼੍ਹਕਂ ਵੁਚ੍ਚਤਿ ਪਣ੍ਣਨਾਲ਼ਿ, ਤਾਯ ਵਾਲਿਕਾਦੀਨਿ ਮਿਨਨ੍ਤਾ ਕੀਲ਼ਨ੍ਤਿ. ਰਥਕੇਨਾਤਿ ਖੁਦ੍ਦਕਰਥੇਨ. ਧਨੁਕੇਨਾਤਿ ਖੁਦ੍ਦਕਧਨੁਨਾ. ਅਕ੍ਖਰਿਕਾਯਾਤਿ ਅਕ੍ਖਰਿਕਾ ਵੁਚ੍ਚਤਿ ਆਕਾਸੇ ਵਾ ਪਿਟ੍ਠਿਯਂ ਵਾ ਅਕ੍ਖਰਜਾਨਨਕੀਲ਼ਾ, ਤਾਯ ਕੀਲ਼ਨ੍ਤਿ. ਮਨੇਸਿਕਾਯਾਤਿ ਮਨੇਸਿਕਾ ਵੁਚ੍ਚਤਿ ਮਨਸਾ ਚਿਨ੍ਤਿਤਜਾਨਨਕੀਲ਼ਾ, ਤਾਯ ਕੀਲ਼ਨ੍ਤਿ. ਯਥਾਵਜ੍ਜੇਨਾਤਿ ਯਥਾਵਜ੍ਜਂ ਵੁਚ੍ਚਤਿ ਕਾਣਕੁਣਿਖੁਜ੍ਜਾਦੀਨਂ ਯਂ ਯਂ ਵਜ੍ਜਂ, ਤਂ ਤਂ ਪਯੋਜੇਤ੍ਵਾ ਦਸ੍ਸਨਕੀਲ਼ਾ, ਤਾਯ ਕੀਲ਼ਨ੍ਤਿ. ਮੁਖਭੇਰਿਕਨ੍ਤਿ ਮੁਖਸਦ੍ਦੇਨ ਭੇਰੀ ਵਿਯ ਵਾਦਨਂ. ਮੁਖਾਲਮ੍ਬਰਨ੍ਤਿ ਮੁਖਾਨੁਲਿਤ੍ਤਭੇਰਿਸਦ੍ਦਕਰਣਂ. ਮੁਖਡਿਣ੍ਡਿਮਕਨ੍ਤਿ ਮੁਖੇਨ ਪਹਤਭੇਰਿਸਦ੍ਦਕਰਣਂ. ਮੁਖਵਲਿਮਕਨ੍ਤਿ ਓਟ੍ਠਮਂਸਂ ਜਿਮ੍ਹਂ ਕਤ੍ਵਾ ਸਦ੍ਦਕਰਣਂ. ‘‘ਮੁਖਤਲਿਕ’’ਨ੍ਤਿਪਿ ਪਾਠੋ, ਮੁਖਂ ਪਰਿਵਤ੍ਤੇਤ੍ਵਾ ਧਮਨਂ. ਮੁਖਭੇਰੁਲ਼ਕਨ੍ਤਿ ਮੁਖੇਨ ਭੇਰਿਵਾਦਨਂ. ਨਾਟਕਨ੍ਤਿ ਅਭਿਨਯਂ ਦਸ੍ਸੇਤ੍ਵਾ ਉਗ੍ਗਣ੍ਹਾਪਨਂ. ‘‘ਨਟ੍ਟਕ’’ਨ੍ਤਿਪਿ ਪਾਠੋ. ਲਾਪਨ੍ਤਿ ਉਕ੍ਕੁਟ੍ਠਿਤਕਰਣਂ. ਗੀਤਨ੍ਤਿ ਗਾਯਨਂ. ਦਵਕਮ੍ਮਨ੍ਤਿ ਹਸ੍ਸਕੀਲ਼ਾਕਰਣਂ. ਅਯਂ ਵਾਚਸਿਕਾ ਖਿਡ੍ਡਾਤਿ ਅਯਂ ਕੀਲ਼ਾ ਵਾਚਾਯ ਜਾਤਾ ਵਚੀਦ੍ਵਾਰੇ ਉਪ੍ਪਨ੍ਨਾ.
ਕੇਸਾ ਚ ਮਸ੍ਸੁ ਚਾਤਿਆਦੀਸੁ ਕੇਸਾਨਂ ਕਤ੍ਤਰਿਕਾਯ ਠਾਨਾਤਿਰਿਤ੍ਤਾਨਿ ਅਕਤ੍ਵਾ ਕਤ੍ਤਰਿਕਾਯ ਛੇਦਨਂ ਮਸ੍ਸੂਨਂ ਦਾਠਿਕਂ ਠਪੇਤ੍ਵਾ ਕਪ੍ਪਾਸਨਞ੍ਚ ਏਕਤੋਵਣ੍ਡਿਕਾਦਿਮਾਲਾ ਚ ਮੂਲਗਨ੍ਧਾਦਿਗਨ੍ਧਾ ਚ ਛਵਿਕਰਣਵਿਲੇਪਨਾ ਚ. ਗੀਵਾਦੀਸੁ ਪਿਲ਼ਨ੍ਧਨਆਭਰਣਾ ਚ ਸੀਸੇ ਪਟਿਮੁਞ੍ਚਨਪਸਾਧਨਪਿਲ਼ਨ੍ਧਨਾ ਚ ਸਰੀਰਨਿਵਾਸਨਵਿਚਿਤ੍ਰਵਤ੍ਥਾ ਚ ਸਂਵੇਲ੍ਲਿਯਬਨ੍ਧਨਪਸਾਧਨਞ੍ਚ. ‘‘ਪਰਾਸਨ’’ਨ੍ਤਿਪਿ ਪਾਠੋ. ਸੀਸਵੇਠਨਪਟਸਙ੍ਖਾਤਵੇਠਨਞ੍ਚ.
ਉਚ੍ਛਾਦਨਾਦੀਸੁ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤਦਾਰਕਾਨਂ ਸਰੀਰਗਨ੍ਧੋ ਦ੍ਵਾਦਸਮਤ੍ਤਵਸ੍ਸਕਾਲੇ ਨਸ੍ਸਤਿ, ਤੇਸਂ ਸਰੀਰਗਨ੍ਧਹਰਣਤ੍ਥਾਯ ਗਨ੍ਧਚੁਣ੍ਣਾਦੀਹਿ ਉਚ੍ਛਾਦੇਨ੍ਤਿ, ਏਵਰੂਪਂ ਉਚ੍ਛਾਦਨਂ ਨ ਵਟ੍ਟਤਿ. ਪੁਞ੍ਞਵਨ੍ਤੇ ਪਨ ਦਾਰਕੇ ਊਰੂਸੁ ਨਿਪਜ੍ਜਾਪੇਤ੍ਵਾ ਤੇਲੇਨ ਮਕ੍ਖੇਤ੍ਵਾ ਹਤ੍ਥਪਾਦਊਰੁਨਾਭਿਆਦੀਨਂ ਸਣ੍ਠਾਨਸਮ੍ਪਾਦਨਤ੍ਥਂ ਪਰਿਮਦ੍ਦਨ੍ਤਿ, ਏਵਰੂਪਂ ਪਰਿਮਦ੍ਦਨਂ ਨ ਵਟ੍ਟਤਿ.
ਨ੍ਹਾਪਨਨ੍ਤਿ ਤੇਸਂਯੇਵ ਦਾਰਕਾਨਂ ਗਨ੍ਧਾਦੀਹਿ ਨ੍ਹਾਪਨਂ. ਸਮ੍ਬਾਹਨਨ੍ਤਿ ਮਹਾਮਲ੍ਲਾਨਂ ਵਿਯ ਹਤ੍ਥਪਾਦੇ ਮੁਗ੍ਗਰਾਦੀਹਿ ਪਹਰਿਤ੍ਵਾ ਬਾਹੁਵਡ੍ਢਨਂ. ਆਦਾਸਨ੍ਤਿ ਯਂਕਿਞ੍ਚਿ ਆਦਾਸਂ ਪਰਿਹਰਿਤੁਂ ਨ ਵਟ੍ਟਤਿ. ਅਞ੍ਜਨਂ ਅਲਙ੍ਕਾਰਞ੍ਜਨਮੇਵ. ਮਾਲਾਤਿ ਬਦ੍ਧਮਾਲਾ ਵਾ ਅਬਦ੍ਧਮਾਲਾ ਵਾ. ਵਿਲੇਪਨਨ੍ਤਿ ਯਂਕਿਞ੍ਚਿ ਛਵਿਰਾਗਕਰਣਂ. ਮੁਖਚੁਣ੍ਣਕਂ ਮੁਖਲੇਪਨਨ੍ਤਿ ਮੁਖੇ ਕਾਲ਼ਪੀਲ਼ਕਾਦੀਨਂ ਹਰਣਤ੍ਥਾਯ ਮਤ੍ਤਿਕਾਕਕ੍ਕਂ ਦੇਨ੍ਤਿ. ਤੇਨ ਲੋਹਿਤੇ ਚਲਿਤੇ ਸਾਸਪਕਕ੍ਕਂ ਦੇਨ੍ਤਿ, ਤੇਨ ਦੋਸੇ ਖਾਦਿਤੇ ਤਿਲਕਕ੍ਕਂ ਦੇਨ੍ਤਿ, ਤੇਨ ਲੋਹਿਤੇ ਸਨ੍ਨਿਸਿਨ੍ਨੇ ਹਲਿਦ੍ਦਿਕਕ੍ਕਂ ਦੇਨ੍ਤਿ, ਤੇਨ ਛਵਿਵਣ੍ਣੇ ਆਰੂਲ਼੍ਹੇ ਮੁਖਚੁਣ੍ਣਕੇਨ ਮੁਖਂ ਚੁਣ੍ਣੇਨ੍ਤਿ, ਤਂ ਸਬ੍ਬਂ ਨ ਵਟ੍ਟਤਿ.
ਹਤ੍ਥਬਨ੍ਧਾਦੀਸੁ ਹਤ੍ਥੇ ਵਿਚਿਤ੍ਰਸਙ੍ਖਕਪਾਲਾਦੀਨਿ ਬਨ੍ਧਿਤ੍ਵਾ ਵਿਚਰਨ੍ਤਿ, ਤਂ ਵਾ ਅਞ੍ਞਂ ਵਾ ਸਬ੍ਬਮ੍ਪਿ ਹਤ੍ਥਾਭਰਣਂ ਨ ਵਟ੍ਟਤਿ. ਅਪਰੇ ਸਿਖਂ ਬਨ੍ਧਿਤ੍ਵਾ ਵਿਚਰਨ੍ਤਿ, ਸੁਵਣ੍ਣਚੀਰਕਮੁਤ੍ਤਾਵਲ਼ਿਆਦੀਹਿ ਚ ਤਂ ਪਰਿਕ੍ਖਿਪਨ੍ਤਿ, ਤਂ ਸਬ੍ਬਂ ਨ ਵਟ੍ਟਤਿ. ਅਪਰੇ ਚਤੁਹਤ੍ਥਦਣ੍ਡਂ ਵਾ ਅਞ੍ਞਂ ਵਾ ਪਨ ਅਲਙ੍ਕਤਦਣ੍ਡਕਂ ਗਹੇਤ੍ਵਾ ਵਿਚਰਨ੍ਤਿ, ਤਥਾ ਇਤ੍ਥਿਪੁਰਿਸਰੂਪਾਦਿਵਿਚਿਤ੍ਤਂ ਭੇਸਜ੍ਜਨਾਲ਼ਿਕਂ ਸੁਪਰਿਕ੍ਖਿਤ੍ਤਂ ਵਾਮਪਸ੍ਸੇ ਓਲਗ੍ਗੇਨ੍ਤਿ, ਅਪਰੇ ਅਨੇਕਚਿਤ੍ਰਕੋਸਂ ਅਤਿਤਿਖਿਣਂ ਅਸਿਂ, ਪਞ੍ਚਵਣ੍ਣਸੁਤ੍ਤਸਿਬ੍ਬਿਤਂ ਮਕਰਦਨ੍ਤਕਾਦਿਵਿਚਿਤ੍ਤਂ ਛਤ੍ਤਂ, ਸੁਵਣ੍ਣਰਜਤਾਦਿਵਿਚਿਤ੍ਰਾ ਮੋਰਪਿਞ੍ਛਾਦਿਪਰਿਕ੍ਖਿਤ੍ਤਾ ਉਪਾਹਨਾ, ਕੇਚਿ ਰਤਨਮਤ੍ਤਾਯਾਮਂ ਚਤੁਰਙ੍ਗੁਲਵਿਤ੍ਥਤਂ ਕੇਸਨ੍ਤਪਰਿਚ੍ਛੇਦਂ ਦਸ੍ਸੇਤ੍ਵਾ ਮੇਘਮੁਖੇ ਵਿਜ੍ਜੁਲਤਂ ਵਿਯ ਨਲਾਟੇ ਉਣ੍ਹੀਸਪਟ੍ਟਂ ਬਨ੍ਧਿਤ੍ਵਾ ਚੂਲ਼ਾਮਣਿਂ ਧਾਰੇਨ੍ਤਿ, ਚਾਮਰਵਾਲਬੀਜਨਿਂ ਧਾਰੇਨ੍ਤਿ, ਤਂ ਸਬ੍ਬਂ ਨ ਵਟ੍ਟਤਿ.
ਇਮਸ੍ਸ ਵਾ ਪੂਤਿਕਾਯਸ੍ਸਾਤਿ ਇਮਸ੍ਸ ਚਾਤੁਮਹਾਭੂਤਮਯਸ੍ਸ ਕੁਣਪਸਰੀਰਸ੍ਸ. ਕੇਲ਼ਨਾਤਿ ਕੀਲ਼ਾਪਨਾ. ਪਰਿਕੇਲ਼ਨਾਤਿ ਸਬ੍ਬਤੋ ਭਾਗੇਨ ਕੀਲ਼ਾਪਨਾ. ਗੇਧਿਤਤਾਤਿ ਅਭਿਕਙ੍ਖਿਤਤਾ. ਗੇਧਿਤਤ੍ਤਨ੍ਤਿ ਗਿਦ੍ਧਭਾਵੋ ਅਭਿਕਙ੍ਖਿਤਭਾਵੋ. ਚਪਲਤਾਤਿ ਅਲਙ੍ਕਾਰਕਰਣਂ. ਚਾਪਲ੍ਯਨ੍ਤਿ ਚਪਲਭਾਵਂ.
ਸਵਿਭੂਸਨ੍ਤਿਆਦੀਸੁ ਵਿਭੂਸਾਯ ਸਹ ਸਵਿਭੂਸਂ. ਛਵਿਰਾਗਕਰਣਸਙ੍ਖਾਤੇਨ ਪਰਿਵਾਰੇਨ ਸਹ ਸਪਰਿਵਾਰਂ. ਪਰਿਭਣ੍ਡੇਨ ਸਹ ਸਪਰਿਭਣ੍ਡਂ. ਪਰਿਕ੍ਖਾਰੇਨ ਸਹ ਸਪਰਿਕ੍ਖਾਰਂ.
੧੬੨. ਆਥਬ੍ਬਣਨ੍ਤਿ ਆਥਬ੍ਬਣਿਕਮਨ੍ਤਪ੍ਪਯੋਗਂ. ਸੁਪਿਨਨ੍ਤਿ ਸੁਪਿਨਸਤ੍ਥਂ. ਲਕ੍ਖਣਨ੍ਤਿ ਮਣਿਲਕ੍ਖਣਾਦਿਂ. ਨੋ ਵਿਦਹੇਤਿ ਨਪ੍ਪਯੋਜੇਯ੍ਯ. ਵਿਰੁਤਞ੍ਚਾਤਿ ਮਿਗਾਦੀਨਂ ਵਟ੍ਟੇਤ੍ਵਾ ਵਸ੍ਸਿਤਂ.
ਆਥਬ੍ਬਣਿਕਾਤਿ ਪਰੂਪਘਾਤਮਨ੍ਤਜਾਨਨਕਾ. ਆਥਬ੍ਬਣਂ ਪਯੋਜੇਨ੍ਤੀਤਿ ਆਥਬ੍ਬਣਿਕਾ ਕਿਰ ਸਤ੍ਤਾਹਂ ਅਲੋਣਕਂ ਭੁਞ੍ਜਿਤ੍ਵਾ ਦਬ੍ਬੇ ਅਤ੍ਥਰਿਤ੍ਵਾ ਪਥਵਿਯਂ ਸਯਮਾਨਾ ਤਪਂ ਚਰਿਤ੍ਵਾ ਸਤ੍ਤਮੇ ਦਿਵਸੇ ਸੁਸਾਨਭੂਮਿਂ ਸਜ੍ਜੇਤ੍ਵਾ ਸਤ੍ਤਮੇ ਪਦੇ ਠਤ੍ਵਾ ਹਤ੍ਥਂ ਵਟ੍ਟੇਤ੍ਵਾ ਵਟ੍ਟੇਤ੍ਵਾ ਮੁਖੇਨ ਵਿਜ੍ਜਂ ਪਰਿਜਪ੍ਪਨ੍ਤਿ, ਅਥ ਤੇਸਂ ਕਮ੍ਮਂ ਸਮਿਜ੍ਝਤਿ. ਏਵਰੂਪਂ ਸਨ੍ਧਾਯ ‘‘ਆਥਬ੍ਬਣਂ ਪਯੋਜੇਨ੍ਤੀ’’ਤਿ ਆਹ. ਤਤ੍ਥ ਪਯੋਜੇਨ੍ਤੀਤਿ ਯੁਤ੍ਤਪ੍ਪਯੁਤ੍ਤਾ ਹੋਨ੍ਤਿ. ਨਗਰੇ ਵਾ ਰੁਦ੍ਧੇਤਿ ਨਗਰੇ ਸਮਨ੍ਤਤੋ ਰੁਨ੍ਧਿਤ੍ਵਾ ਆਵਰਿਤ੍ਵਾ ਗਹਿਤੇ. ਸਙ੍ਗਾਮੇ ਵਾ ਪਚ੍ਚੁਪਟ੍ਠਿਤੇਤਿ ਰਣੇ ਉਪਗਨ੍ਤ੍ਵਾ ਠਿਤੇ. ਪਚ੍ਚਤ੍ਥਿਕੇਸੁ ਪਚ੍ਚਾਮਿਤ੍ਤੇਸੂਤਿ ਪਟਾਣੀਭੂਤੇਸੁ ਵੇਰੀਸੁ. ਈਤਿਂ ਉਪ੍ਪਾਦੇਨ੍ਤੀਤਿ ਸਰੀਰਚਲਨਂ ਕਮ੍ਪਨਂ, ਤਸ੍ਸ ਉਪ੍ਪਾਦਨਂ ਕਰੋਨ੍ਤਿ. ਉਪਦ੍ਦਵਨ੍ਤਿ ਕਾਯਪੀਲ਼ਨਂ ਕਰੋਨ੍ਤਿ. ਰੋਗਨ੍ਤਿ ਬ੍ਯਾਧਿਂ. ਪਜ੍ਜਰਕਨ੍ਤਿ ਜਰਂ. ਸੂਲਨ੍ਤਿ ਉਦ੍ਧੁਮਾਤਕਂ. ਵਿਸੂਚਿਕਨ੍ਤਿ ਵਿਜ੍ਝਨਂ. ਪਕ੍ਖਨ੍ਦਿਕਨ੍ਤਿ ਲੋਹਿਤਪਕ੍ਖਨ੍ਦਿਕਂ. ਕਰੋਨ੍ਤੀਤਿ ਉਪ੍ਪਾਦੇਨ੍ਤਿ.
ਸੁਪਿਨਪਾਠਕਾਤਿ ਸੁਪਿਨਬ੍ਯਾਕਰਣਕਾ. ਆਦਿਸਨ੍ਤੀਤਿ ਬ੍ਯਾਕਰੋਨ੍ਤਿ. ਯੋ ਪੁਬ੍ਬਣ੍ਹਸਮਯਂ ਸੁਪਿਨਂ ਪਸ੍ਸਤੀਤਿਆਦੀਸੁ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ, ਪੁਬ੍ਬਣ੍ਹਸਮਯੇਤਿ ਅਤ੍ਥੋ. ਏਵਂ ਵਿਪਾਕੋ ਹੋਤੀਤਿ ਇਟ੍ਠਾਨਿਟ੍ਠਵਸੇਨ ਏਵਰੂਪੋ ਵਿਪਾਕੋ ਹੋਤਿ. ਅਵਕੁਜ੍ਜ ਨਿਪਨ੍ਨੋਤਿ ਅਧੋਮੁਖੋ ਹੁਤ੍ਵਾ ਨਿਪਨ੍ਨੋ ਪਸ੍ਸਤਿ. ਏਵਂ ਸੁਪਿਨਪਾਠਕਾ ਸੁਪਿਨਂ ਆਦਿਸਨ੍ਤਿ.
ਤਞ੍ਚ ਪਨ ਸੁਪਿਨਂ ਪਸ੍ਸਨ੍ਤੋ ਚਤੂਹਿ ਕਾਰਣੇਹਿ ਪਸ੍ਸਤਿ ਧਾਤੁਕ੍ਖੋਭਤੋ ਵਾ ਅਨੁਭੂਤਪੁਬ੍ਬਤੋ ਵਾ ਦੇਵਤੋਪਸਂਹਾਰਤੋ ਵਾ ਪੁਬ੍ਬਨਿਮਿਤ੍ਤਤੋ ਵਾਤਿ. ਤਤ੍ਥ ਪਿਤ੍ਤਾਦੀਨਂ ਖੋਭਕਰਣਪਚ੍ਚਯਯੋਗੇਨ ਖੁਭਿਤਧਾਤੁਕੋ ਧਾਤੁਕ੍ਖੋਭਤੋ ਸੁਪਿਨਂ ਪਸ੍ਸਤਿ, ਪਸ੍ਸਨ੍ਤੋ ਚ ਨਾਨਾਵਿਧਂ ਸੁਪਿਨਂ ਪਸ੍ਸਤਿ. ਅਨੁਭੂਤਪੁਬ੍ਬਤੋ ਪਸ੍ਸਨ੍ਤੋ ਪੁਬ੍ਬੇ ਅਨੁਭੂਤਪੁਬ੍ਬਂ ਆਰਮ੍ਮਣਂ ਪਸ੍ਸਤਿ. ਦੇਵਤੋਪਸਂਹਾਰਤੋ ਪਸ੍ਸਨ੍ਤੋ ਦੇਵਤਾਨਂ ਆਨੁਭਾਵੇਨ ਆਰਮ੍ਮਣਾਨਿ ਪਸ੍ਸਤਿ. ਪੁਬ੍ਬਨਿਮਿਤ੍ਤਤੋ ਪਸ੍ਸਨ੍ਤੋ ਪੁਞ੍ਞਾਪੁਞ੍ਞਵਸੇਨ ਉਪ੍ਪਜ੍ਜਿਤੁਕਾਮਸ੍ਸ ਅਤ੍ਥਸ੍ਸ ਵਾ ਅਨਤ੍ਥਸ੍ਸ ਵਾ ਪੁਬ੍ਬਨਿਮਿਤ੍ਤਭੂਤਂ ਸੁਪਿਨਂ ਪਸ੍ਸਤਿ. ਤਤ੍ਥ ਯਂ ਧਾਤੁਕ੍ਖੋਭਤੋ ਅਨੁਭੂਤਪੁਬ੍ਬਤੋ ਚ ਸੁਪਿਨਂ ਪਸ੍ਸਤਿ, ਨ ਤਂ ਸਚ੍ਚਂ ਹੋਤਿ. ਯਂ ਦੇਵਤੋਪਸਂਹਾਰਤੋ ਪਸ੍ਸਤਿ, ਤਂ ਸਚ੍ਚਂ ਵਾ ਹੋਤਿ ਅਲਿਕਂ ਵਾ. ਕੁਦ੍ਧਾ ਹਿ ਦੇਵਤਾ ਉਪਾਯੇਨ ਵਿਨਾਸੇਤੁਕਾਮਾ ਵਿਪਰੀਤਮ੍ਪਿ ਕਤ੍ਵਾ ਦਸ੍ਸੇਨ੍ਤਿ. ਯਂ ਪਨ ਪੁਬ੍ਬਨਿਮਿਤ੍ਤਤੋ ਪਸ੍ਸਤਿ, ਤਂ ਏਕਨ੍ਤਸਚ੍ਚਮੇਵ ਹੋਤਿ. ਏਤੇਸਂ ਚਤੁਨ੍ਨਂ ਮੂਲਕਾਰਣਾਨਂ ਸਂਸਗ੍ਗਭੇਦਤੋਪਿ ਸੁਪਿਨਭੇਦੋ ਹੋਤਿਯੇਵ. ਤਞ੍ਚ ਪਨੇਤਂ ਚਤੁਬ੍ਬਿਧਂ ਸੁਪਿਨਂ ਸੇਕ੍ਖਪੁਥੁਜ੍ਜਨਾਵ ਪਸ੍ਸਨ੍ਤਿ ਅਪ੍ਪਹੀਨਵਿਪਲ੍ਲਾਸਤ੍ਤਾ. ਅਸੇਕ੍ਖਾ ਨ ਪਸ੍ਸਨ੍ਤਿ ਪਹੀਨਵਿਪਲ੍ਲਾਸਤ੍ਤਾ.
ਕਿਂ ਪਨੇਤਂ ਪਸ੍ਸਨ੍ਤੋ ਸੁਤ੍ਤੋ ਪਸ੍ਸਤਿ, ਉਦਾਹੁ ਪਟਿਬੁਦ੍ਧੋ, ਉਦਾਹੁ ਨੇਵ ਸੁਤ੍ਤੋ ਨ ਪਟਿਬੁਦ੍ਧੋਤਿ? ਕਿਞ੍ਚੇਤ੍ਥ – ਯਦਿ ਤਾਵ ਸੁਤ੍ਤੋ ਪਸ੍ਸਤਿ, ਅਭਿਧਮ੍ਮਵਿਰੋਧੋ ਆਪਜ੍ਜਤਿ. ਭਵਙ੍ਗਚਿਤ੍ਤੇਨ ਹਿ ਸੁਪਤਿ, ਤਂ ਰੂਪਨਿਮਿਤ੍ਤਾਦਿਆਰਮ੍ਮਣਂ ਰਾਗਾਦਿਸਮ੍ਪਯੁਤ੍ਤਂ ਵਾ ਨ ਹੋਤਿ, ਸੁਪਿਨਂ ਪਸ੍ਸਨ੍ਤਸ੍ਸ ਚ ਈਦਿਸਾਨਿ ਚਿਤ੍ਤਾਨਿ ਉਪ੍ਪਜ੍ਜਨ੍ਤਿ. ਅਥ ਪਟਿਬੁਦ੍ਧੋ ਪਸ੍ਸਤਿ, ਵਿਨਯਵਿਰੋਧੋ ਆਪਜ੍ਜਤਿ. ਯਞ੍ਹਿ ਪਟਿਬੁਦ੍ਧੋ ਪਸ੍ਸਤਿ, ਤਂ ਸਬ੍ਬੋਹਾਰਿਕਚਿਤ੍ਤੇਨ ਪਸ੍ਸਤਿ, ਸਬ੍ਬੋਹਾਰਿਕਚਿਤ੍ਤੇਨ ਚ ਕਤੇ ਵੀਤਿਕ੍ਕਮੇ ਅਨਾਪਤ੍ਤਿ ਨਾਮ ਨਤ੍ਥਿ, ਸੁਪਿਨਂ ਪਸ੍ਸਨ੍ਤੇਨ ਪਨ ਕਤੇ ਵੀਤਿਕ੍ਕਮੇ ਏਕਨ੍ਤਂ ਅਨਾਪਤ੍ਤਿ ਏਵ. ਅਥ ਨੇਵ ਸੁਤ੍ਤੋ ਨ ਪਟਿਬੁਦ੍ਧੋ ਪਸ੍ਸਤਿ, ਕੋ ਨਾਮ ਪਸ੍ਸਤਿ. ਏਵਞ੍ਚ ਸਤਿ ਸੁਪਿਨਸ੍ਸ ਅਭਾਵੋਵ ਆਪਜ੍ਜਤਿ, ਨ ਅਭਾਵੋ. ਕਸ੍ਮਾ? ਯਸ੍ਮਾ ਕਪਿਨਿਦ੍ਦਾਪਰੇਤੋ ਪਸ੍ਸਤਿ. ਵੁਤ੍ਤਞ੍ਹੇਤਂ – ‘‘ਮਜ੍ਝੂਪਗਤੋ, ਮਹਾਰਾਜ, ਕਪਿਨਿਦ੍ਦਾਪਰੇਤੋ ਸੁਪਿਨਂ ਪਸ੍ਸਤੀ’’ਤਿ (ਮਿ. ਪ. ੫.੩.੫).
ਕਪਿਨਿਦ੍ਦਾਪਰੇਤੋਤਿ ਮਕ੍ਕਟਨਿਦ੍ਦਾਯ ਯੁਤ੍ਤੋ. ਯਥਾ ਹਿ ਮਕ੍ਕਟਸ੍ਸ ਨਿਦ੍ਦਾ ਲਹੁਪਰਿਵਤ੍ਤਾ ਹੋਤਿ, ਏਵਂ ਯਾ ਨਿਦ੍ਦਾ ਪੁਨਪ੍ਪੁਨਂ ਕੁਸਲਾਦਿਚਿਤ੍ਤਵੋਕਿਣ੍ਣਤ੍ਤਾ ਲਹੁਵਿਪਰਿਵਤ੍ਤਾ. ਯਸ੍ਸਾ ਪਵਤ੍ਤਿਯਂ ਪੁਨਪ੍ਪੁਨਂ ਭਵਙ੍ਗਤੋ ਉਤ੍ਤਰਣਂ ਹੋਤਿ, ਤਾਯ ਯੁਤ੍ਤੋ ਸੁਪਿਨਂ ਪਸ੍ਸਤਿ. ਤੇਨਾਯਂ ਸੁਪਿਨੋ ਕੁਸਲੋਪਿ ਹੋਤਿ ਅਕੁਸਲੋਪਿ ਅਬ੍ਯਾਕਤੋਪਿ. ਤਤ੍ਥ ਸੁਪਿਨਨ੍ਤੇ ਚੇਤਿਯਵਨ੍ਦਨਧਮ੍ਮਸ੍ਸਵਨਧਮ੍ਮਦੇਸਨਾਦੀਨਿ ਕਰੋਨ੍ਤਸ੍ਸ ਕੁਸਲੋ, ਪਾਣਾਤਿਪਾਤਾਦੀਨਿ ਕਰੋਨ੍ਤਸ੍ਸ ਅਕੁਸਲੋ, ਦ੍ਵੀਹਿ ਅਨ੍ਤੇਹਿ ਮੁਤ੍ਤੋ ਆਵਜ੍ਜਨਤਦਾਰਮ੍ਮਣਕ੍ਖਣੇ ਅਬ੍ਯਾਕਤੋਤਿ ਵੇਦਿਤਬ੍ਬੋ. ਸ੍ਵਾਯਂ ਦੁਬ੍ਬਲਵਤ੍ਥੁਕਤ੍ਤਾ ਚੇਤਨਾਯ ਪਟਿਸਨ੍ਧਿਂ ਆਕਡ੍ਢਿਤੁਂ ਅਸਮਤ੍ਥੋ, ਪਵਤ੍ਤੇ ਪਨ ਅਞ੍ਞੇਹਿ ਕੁਸਲਾਕੁਸਲੇਹਿ ਉਪਤ੍ਥਮ੍ਭਿਤੋ ਵਿਪਾਕਂ ਦੇਤਿ.
ਮਣਿਲਕ੍ਖਣਾਦੀਸੁ ਏਵਰੂਪੋ ਮਣਿ ਪਸਤ੍ਥੋ, ਏਵਰੂਪੋ ਅਪਸਤ੍ਥੋ, ਸਾਮਿਨੋ ਆਰੋਗ੍ਯਇਸ੍ਸਰਿਯਾਦੀਨਂ ਹੇਤੁ ਹੋਤਿ, ਨ ਹੋਤੀਤਿ ਏਵਂ ਵਣ੍ਣਸਣ੍ਠਾਨਾਦਿਵਸੇਨ ਮਣਿਆਦੀਨਂ ਲਕ੍ਖਣਂ ਆਦਿਸਨ੍ਤੀਤਿ ਅਤ੍ਥੋ. ਤਤ੍ਥ ਆਵੁਧਲਕ੍ਖਣਨ੍ਤਿ ਠਪੇਤ੍ਵਾ ਅਸਿਆਦੀਨਿ ਅਵਸੇਸਂ ਆਵੁਧਂ. ਇਤ੍ਥਿਲਕ੍ਖਣਾਦੀਨਿਪਿ ਯਮ੍ਹਿ ਕੁਲੇ ਇਤ੍ਥਿਪੁਰਿਸਾਦਯੋ ਵਸਨ੍ਤਿ, ਤਸ੍ਸ ਵੁਦ੍ਧਿਹਾਨਿਵਸੇਨੇਵ ਵੇਦਿਤਬ੍ਬਾਨਿ. ਅਜਲਕ੍ਖਣਾਦੀਸੁ ਪਨ ‘‘ਏਵਰੂਪਾਨਂ ਅਜਾਦੀਨਂ ਮਂਸਂ ਖਾਦਿਤਬ੍ਬਂ, ਏਵਰੂਪਾਨਂ ਨ ਖਾਦਿਤਬ੍ਬ’’ਨ੍ਤਿ ਅਯਮ੍ਪਿ ਵਿਸੇਸੋ ਵੇਦਿਤਬ੍ਬੋ.
ਅਪਿ ਚੇਤ੍ਥ ਗੋਧਾਯ ਲਕ੍ਖਣੇ ਚਿਤ੍ਤਕਮ੍ਮਪਿਲ਼ਨ੍ਧਨਾਦੀਸੁਪਿ ‘‘ਏਵਰੂਪਾਯ ਗੋਧਾਯ ਸਤਿ ਇਦਂ ਨਾਮ ਹੋਤੀ’’ਤਿ ਅਯਮ੍ਪਿ ਵਿਸੇਸੋ ਵੇਦਿਤਬ੍ਬੋ. ਕਣ੍ਣਿਕਾਲਕ੍ਖਣਂ ਪਿਲ਼ਨ੍ਧਨਕਣ੍ਣਿਕਾਯਪਿ ਗੇਹਕਣ੍ਣਿਕਾਯਪਿ ਵਸੇਨ ਵੇਦਿਤਬ੍ਬਂ. ਕਚ੍ਛਪਲਕ੍ਖਣਮ੍ਪਿ ਗੋਧਲਕ੍ਖਣਸਦਿਸਮੇਵ. ਮਿਗਲਕ੍ਖਣਂ ਸਬ੍ਬਸਙ੍ਗਾਹਿਕਂ ਸਬ੍ਬਚਤੁਪ੍ਪਦਾਨਂ ਲਕ੍ਖਣਵਸੇਨ ਵੁਤ੍ਤਂ. ਏਵਂ ਲਕ੍ਖਣਪਾਠਕਾ ਲਕ੍ਖਣਂ ਆਦਿਸਨ੍ਤੀਤਿ ਏਵਂ ਲਕ੍ਖਣਸਤ੍ਥਵਾਚਕਾ ਲਕ੍ਖਣਂ ਆਦਿਸਨ੍ਤਿ ਕਥੇਨ੍ਤਿ.
ਨਕ੍ਖਤ੍ਤਾਨੀਤਿ ਕਤ੍ਤਿਕਾਦੀਨਿ ਅਟ੍ਠਵੀਸਤਿ ਨਕ੍ਖਤ੍ਤਾਨਿ. ਇਮਿਨਾ ਨਕ੍ਖਤ੍ਤੇਨ ਘਰਪ੍ਪਵੇਸੋ ਕਾਤਬ੍ਬੋਤਿ ਗੇਹਪ੍ਪਵੇਸਮਙ੍ਗਲਂ ਕਾਤਬ੍ਬਂ. ਮਕੁਟਂ ਬਨ੍ਧਿਤਬ੍ਬਨ੍ਤਿ ਪਸਾਧਨਮਙ੍ਗਲਂ ਕਾਤਬ੍ਬਂ. ਵਾਰੇਯ੍ਯਨ੍ਤਿ ‘‘ਇਮਸ੍ਸ ਦਾਰਕਸ੍ਸ ਅਸੁਕਕੁਲਤੋ ਅਸੁਕਨਕ੍ਖਤ੍ਤੇਨ ਦਾਰਿਕਂ ਆਨੇਥਾ’’ਤਿ ਆਵਾਹਕਰਣਞ੍ਚ ‘‘ਇਮਂ ਦਾਰਿਕਂ ਅਸੁਕਸ੍ਸ ਨਾਮ ਦਾਰਕਸ੍ਸ ਅਸੁਕਨਕ੍ਖਤ੍ਤੇਨ ਦੇਥ, ਏਵਂ ਏਤੇਸਂ ਵੁਡ੍ਢਿ ਭਵਿਸ੍ਸਤੀ’’ਤਿ ਵਿਵਾਹਕਰਣਞ੍ਚ ਵਤ੍ਵਾ ਵਾਰੇਯ੍ਯਸਙ੍ਖਾਤਂ ਆਵਾਹਵਿਵਾਹਮਙ੍ਗਲਂ ਕਾਤਬ੍ਬਨ੍ਤਿ ਆਦਿਸਨ੍ਤਿ. ਬੀਜਨੀਹਾਰੋਤਿ ਬੀਜਾਨਂ ਵਪ੍ਪਤ੍ਥਾਯ ਬਹਿ ਨੀਹਰਣਂ. ‘‘ਨਿਹਰੋ’’ਤਿਪਿ ਪਾਲ਼ਿ. ਮਿਗਵਾਕ੍ਕਨ੍ਤਿ ਇਦਂ ਸਬ੍ਬਸਙ੍ਗਾਹਿਕਨਾਮਂ, ਸਬ੍ਬਸਕੁਣਚਤੁਪ੍ਪਦਾਨਂ ਰੁਤਞਾਣਵਸੇਨੇਵ ਵੁਤ੍ਤਂ. ਮਿਗਵਾਕ੍ਕਪਾਠਕਾਤਿ ਸਕੁਨ੍ਤਚਤੁਪ੍ਪਦਾਨਂ ਸਦ੍ਦਬ੍ਯਾਕਰਣਕਾ. ਮਿਗਵਾਕ੍ਕਂ ਆਦਿਸਨ੍ਤੀਤਿ ਤੇਸਂ ਸਦ੍ਦਂ ਸੁਤ੍ਵਾ ਬ੍ਯਾਕਰੋਨ੍ਤਿ. ਰੁਤਨ੍ਤਿ ਸਦ੍ਦਂ. ‘‘ਰੁਦ’’ਨ੍ਤਿ ਵਾ ਪਾਲ਼ਿ. ਵਸ੍ਸਿਤਨ੍ਤਿ ਵਾਚਂ. ਗਬ੍ਭਕਰਣੀਯਾਤਿ ਵਿਨਸ੍ਸਮਾਨਸ੍ਸ ਗਬ੍ਭਸ੍ਸ ਪੁਨ ਅਵਿਨਾਸਾਯ ਓਸਧਦਾਨੇਨ ਗਬ੍ਭਸਣ੍ਠਾਨਕਾਰਕਾ. ਗਬ੍ਭੋ ਹਿ ਵਾਤੇਨ ਪਾਣਕੇਹਿ ਕਮ੍ਮੁਨਾ ਚਾਤਿ ਤੀਹਿ ਕਾਰਣੇਹਿ ਵਿਨਸ੍ਸਤਿ. ਤਤ੍ਥ ਵਾਤੇਨ ਵਿਨਸ੍ਸਨ੍ਤੇ ਵਾਤਵਿਨਾਸਨਂ ਸੀਤਲਂ ਭੇਸਜ੍ਜਂ ਦੇਤਿ. ਪਾਣਕੇਹਿ ਵਿਨਸ੍ਸਨ੍ਤੇ ਪਾਣਕਾਨਂ ਪਟਿਕਮ੍ਮਂ ਕਰੋਤਿ. ਕਮ੍ਮੁਨਾ ਵਿਨਸ੍ਸਨ੍ਤੇ ਪਨ ਬੁਦ੍ਧਾਪਿ ਪਟਿਬਾਹਿਤੁਂ ਨ ਸਕ੍ਕੋਨ੍ਤਿ. ਤਸ੍ਮਾ ਨ ਤਂ ਇਧ ਗਹਿਤਂ. ਸਾਲਾਕਿਯਨ੍ਤਿ ਸਲਾਕਵੇਜ੍ਜਕਮ੍ਮਂ. ਸਲ੍ਲਕਤ੍ਤਿਯਨ੍ਤਿ ਸਲ੍ਲਕਤ੍ਤਵੇਜ੍ਜਕਮ੍ਮਂ. ਕਾਯਤਿਕਿਚ੍ਛਨ੍ਤਿ ਮੂਲਭੇਸਜ੍ਜਾਦੀਨਿ ਯੋਜੇਤ੍ਵਾ ਕਾਯਤਿਕਿਚ੍ਛਵੇਜ੍ਜਕਮ੍ਮਂ. ਭੂਤਿਯਨ੍ਤਿ ਭੂਤਵੇਜ੍ਜਕਮ੍ਮਂ. ਕੋਮਾਰਭਚ੍ਚਨ੍ਤਿ ਕੋਮਾਰਕਵੇਜ੍ਜਕਮ੍ਮਂ. ਕੁਹਾਤਿ ਵਿਮ੍ਹਾਪਕਾ. ਥਦ੍ਧਾਤਿ ਦਾਰੁਕ੍ਖਨ੍ਧਂ ਵਿਯ ਥਦ੍ਧਸਰੀਰਾ. ਲਪਾਤਿ ਪਚ੍ਚਯਪਟਿਬਦ੍ਧਵਚਨਕਾ. ਸਿਙ੍ਗਿਤਿ ਮਣ੍ਡਨਪਕਤਿਕਾ. ਉਨ੍ਨਲ਼ਾਤਿ ਉਗ੍ਗਤਮਾਨਨਲ਼ਾ. ਅਸਮਾਹਿਤਾਤਿ ਉਪਚਾਰਪ੍ਪਨਾਸਮਾਧਿਵਿਰਹਿਤਾ.
ਨ ਗਣ੍ਹੇਯ੍ਯਾਤਿਆਦੀਸੁ ਉਦ੍ਦੇਸਗ੍ਗਹਣਵਸੇਨ ਨ ਗਣ੍ਹੇਯ੍ਯ. ਸਜ੍ਝਾਯਵਸੇਨ ਨ ਉਗ੍ਗਣ੍ਹੇਯ੍ਯ. ਚਿਤ੍ਤੇ ਠਪਨਵਸੇਨ ਨ ਧਾਰੇਯ੍ਯ. ਸਮੀਪਂ ਕਤ੍ਵਾ ਠਪਨਵਸੇਨ ਨ ਉਪਧਾਰੇਯ੍ਯ. ਉਪਪਰਿਕ੍ਖਾਵਸੇਨ ਨ ਉਪਲਕ੍ਖੇਯ੍ਯ. ਅਞ੍ਞੇਸਂ ਵਾਚਨਵਸੇਨ ਨਪ੍ਪਯੋਜੇਯ੍ਯ.
੧੬੩. ਪੇਸੁਣਿਯਨ੍ਤਿ ਪੇਸੁਞ੍ਞਂ. ਸੇਸਨਿਦ੍ਦੇਸੋ ਚ ਵੁਤ੍ਤਤ੍ਥੋਯੇਵ.
੧੬੪. ਕਯਵਿਕ੍ਕਯੇਤਿ ਪਞ੍ਚਹਿ ਸਹਧਮ੍ਮਿਕੇਹਿ ਸਦ੍ਧਿਂ ਵਞ੍ਚਨਵਸੇਨ ਵਾ ਉਦਯਪਤ੍ਥਨਾਵਸੇਨ ਵਾ ਨ ਤਿਟ੍ਠੇਯ੍ਯ. ਉਪਵਾਦਂ ਭਿਕ੍ਖੁ ਨ ਕਰੇਯ੍ਯਾਤਿ ਉਪਵਾਦਕਰੇ ਕਿਲੇਸੇ ਅਨਿਬ੍ਬਤ੍ਤੇਨ੍ਤੋ ਅਤ੍ਤਨਿ ਪਰੇਹਿ ਸਮਣਬ੍ਰਾਹ੍ਮਣੇਹਿ ਉਪਵਾਦਂ ਨ ਜਨੇਯ੍ਯ. ਗਾਮੇ ਚ ਨਾਭਿਸਜ੍ਜੇਯ੍ਯਾਤਿ ਗਾਮੇ ਚ ਗਿਹਿਸਂਸਗ੍ਗਾਦੀਹਿ ਨਾਭਿਸਜ੍ਜੇਯ੍ਯ. ਲਾਭਕਮ੍ਯਾ ਜਨਂ ਨ ਲਪਯੇਯ੍ਯਾਤਿ ਲਾਭਕਾਮਤਾਯ ਜਨਂ ਨ ਲਪਯੇਯ੍ਯ.
ਯੇ ਕਯਵਿਕ੍ਕਯਾ ਵਿਨਯੇ ਪਟਿਕ੍ਖਿਤ੍ਤਾਤਿ ਯੇ ਦਾਨਪਟਿਗ੍ਗਹਣਵਸੇਨ ਕਯਵਿਕ੍ਕਯਸਿਕ੍ਖਾਪਦੇ (ਪਾਰਾ. ੫੯੩ ਆਦਯੋ) ਨ ਵਟ੍ਟਤੀਤਿ ਪਟਿਕ੍ਖਿਤ੍ਤਾ, ਇਧਾਧਿਪ੍ਪੇਤਂ ਕਯਵਿਕ੍ਕਯਂ ਦਸ੍ਸੇਤੁਂ ‘‘ਪਞ੍ਚਨ੍ਨਂ ਸਦ੍ਧਿਂ ਪਤ੍ਤਂ ਵਾ ਚੀਵਰਂ ਵਾ’’ਤਿਆਦਿਮਾਹ. ਤਤ੍ਥ ਪਞ੍ਚਨ੍ਨਂ ਸਦ੍ਧਿਨ੍ਤਿ ਪਞ੍ਚਹਿ ਸਹਧਮ੍ਮਿਕੇਹਿ ਸਹ. ਪਞ੍ਚ ਸਹਧਮ੍ਮਿਕਾ ਨਾਮ ਭਿਕ੍ਖੁਭਿਕ੍ਖੁਨੀਸਿਕ੍ਖਮਾਨਸਾਮਣੇਰਸਾਮਣੇਰਿਯੋ. ਵਞ੍ਚਨਿਯਂ ਵਾਤਿ ਪਟਿਰੂਪਕਂ ਦਸ੍ਸੇਤ੍ਵਾ ਵਞ੍ਚਨਿਯਂ ਵਾ. ਉਦਯਂ ਵਾ ਪਤ੍ਥਯਨ੍ਤੋਤਿ ਵੁਡ੍ਢਿਂ ਪਤ੍ਥੇਨ੍ਤੋ ਵਾ. ਪਰਿਵਤ੍ਤੇਤੀਤਿ ਪਰਿਵਤ੍ਤਨਂ ਕਰੋਤਿ.
ਇਦ੍ਧਿਮਨ੍ਤੋਤਿ ਇਜ੍ਝਨਪਭਾਵਵਨ੍ਤੋ. ਦਿਬ੍ਬਚਕ੍ਖੁਕਾਤਿ ਦਿਬ੍ਬਸਦਿਸਞਾਣਚਕ੍ਖੁਕਾ. ਅਥ ਵਾ ਦਿਬ੍ਬਵਿਹਾਰਸਨ੍ਨਿਸ੍ਸਯੇਨ ਲਦ੍ਧਞਾਣਚਕ੍ਖੁਕਾ. ਪਰਚਿਤ੍ਤਵਿਦੁਨੋਤਿ ਅਤ੍ਤਨੋ ਚਿਤ੍ਤੇਨ ਪਰੇਸਂ ਚਿਤ੍ਤਜਾਨਨਕਾ. ਤੇ ਦੂਰਤੋਪਿ ਪਸ੍ਸਨ੍ਤੀਤਿ ਏਕਯੋਜਨਤੋਪਿ ਯੋਜਨਸਤਤੋਪਿ ਯੋਜਨਸਹਸ੍ਸਤੋਪਿ ਯੋਜਨਸਤਸਹਸ੍ਸਤੋਪਿ ਚਕ੍ਕਵਾਲ਼ਤੋਪਿ ਦ੍ਵੇਤੀਣਿਚਤ੍ਤਾਰਿਪਞ੍ਚਦਸਵੀਸਤਿਚਤ੍ਤਾਲੀਸਸਹਸ੍ਸਤੋਪਿ ਤਤੋ ਅਤਿਰੇਕਤੋਪਿ ਚਕ੍ਕਵਾਲ਼ਤੋ ਪਸ੍ਸਨ੍ਤਿ ਦਕ੍ਖਨ੍ਤਿ. ਆਸਨ੍ਨਾਪਿ ਨ ਦਿਸ੍ਸਨ੍ਤੀਤਿ ਸਮੀਪੇ ਠਿਤਾਪਿ ਨਿਸਿਨ੍ਨਾਪਿ ਨ ਪਞ੍ਞਾਯਨ੍ਤਿ. ਚੇਤਸਾਪਿ ਚਿਤ੍ਤਂ ਪਜਾਨਨ੍ਤੀਤਿ ਅਤ੍ਤਨੋ ਚਿਤ੍ਤੇਨਾਪਿ ਪਰੇਸਂ ਚਿਤ੍ਤਂ ਪਜਾਨਨ੍ਤਿ. ਦੇਵਤਾਪਿ ਖੋ ਸਨ੍ਤਿ ਇਦ੍ਧਿਮਨ੍ਤਿਨਿਯੋਤਿ ਦੇਵਤਾਪਿ ਏਵਂ ਸਂਵਿਜ੍ਜਨ੍ਤਿ ਇਜ੍ਝਨਪਭਾਵਵਨ੍ਤਿਨਿਯੋ. ਪਰਚਿਤ੍ਤਵਿਦੁਨਿਯੋਤਿ ਪਰੇਸਂ ਚਿਤ੍ਤਂ ਜਾਨਨ੍ਤਿਯੋ. ਓਲ਼ਾਰਿਕੇਹਿ ਵਾ ਕਿਲੇਸੇਹੀਤਿ ਕਾਯਦੁਚ੍ਚਰਿਤਾਦਿਕੇਹਿ ਵਾ ਉਪਤਾਪੇਹਿ. ਮਜ੍ਝਿਮੇਹਿ ਵਾਤਿ ਕਾਮਵਿਤਕ੍ਕਾਦਿਕੇਹਿ ਵਾ. ਸੁਖੁਮੇਹਿ ਵਾਤਿ ਞਾਤਿਵਿਤਕ੍ਕਾਦਿਕੇਹਿ ਵਾ. ਕਾਯਦੁਚ੍ਚਰਿਤਾਦਯੋ ਕਮ੍ਮਪਥਵਸੇਨ, ਕਾਮਵਿਤਕ੍ਕਾਦਯੋ ਵਟ੍ਟਮੂਲਕਕਿਲੇਸਵਸੇਨ ਵੇਦਿਤਬ੍ਬਾ.
ਞਾਤਿਵਿਤਕ੍ਕਾਦੀਸੁ ‘‘ਮਯ੍ਹਂ ਞਾਤਯੋ ਸੁਖਜੀਵਿਨੋ ਸਮ੍ਪਤ੍ਤਿਯੁਤ੍ਤਾ’’ਤਿ ਏਵਂ ਪਞ੍ਚਕਾਮਗੁਣਸਨ੍ਨਿਸ੍ਸਿਤੇਨ ਗੇਹਸਨ੍ਨਿਸ੍ਸਿਤਪੇਮੇਨ ਞਾਤਕੇ ਆਰਬ੍ਭ ਉਪ੍ਪਨ੍ਨਵਿਤਕ੍ਕੋ ਞਾਤਿਵਿਤਕ੍ਕੋ. ‘‘ਮਯ੍ਹਂ ਞਾਤਯੋ ਖਯਂ ਗਤਾ ਵਯਂ ਗਤਾ ਸਦ੍ਧਾ ਪਸਨ੍ਨਾ’’ਤਿ ਏਵਂ ਪਵਤ੍ਤੋ ਪਨ ਞਾਤਿਵਿਤਕ੍ਕੋ ਨਾਮ ਨ ਹੋਤਿ.
‘‘ਅਮ੍ਹਾਕਂ ਜਨਪਦੋ ਸੁਭਿਕ੍ਖੋ ਸਮ੍ਪਨ੍ਨਸਸ੍ਸੋ’’ਤਿ ਤੁਟ੍ਠਮਾਨਸਸ੍ਸ ਗੇਹਸ੍ਸਿਤਪੇਮਵਸੇਨ ਉਪ੍ਪਨ੍ਨਵਿਤਕ੍ਕੋ ਜਨਪਦਵਿਤਕ੍ਕੋ. ‘‘ਅਮ੍ਹਾਕਂ ਜਨਪਦੇ ਮਨੁਸ੍ਸਾ ਸਦ੍ਧਾ ਪਸਨ੍ਨਾ ਖਯਂ ਗਤਾ ਵਯਂ ਗਤਾ’’ਤਿ ਏਵਂ ਪਵਤ੍ਤੋ ਪਨ ਜਨਪਦਵਿਤਕ੍ਕੋ ਨਾਮ ਨ ਹੋਤਿ.
ਅਮਰਤ੍ਤਾਯ ਵਿਤਕ੍ਕੋ, ਅਮਰੋ ਵਾ ਵਿਤਕ੍ਕੋਤਿ ਅਮਰਵਿਤਕ੍ਕੋ. ਤਤ੍ਥ ਉਕ੍ਕੁਟਿਕਪ੍ਪਧਾਨਾਦੀਹਿ ਦੁਕ੍ਖੇ ਨਿਜਿਣ੍ਣੇ ਸਮ੍ਪਰਾਯੇ ਅਤ੍ਤਾ ਸੁਖੀ ਹੋਤਿ. ਅਮਰੋਤਿ ਦੁਕ੍ਕਰਕਾਰਿਕਂ ਕਰੋਨ੍ਤਸ੍ਸ ਤਾਯ ਦੁਕ੍ਕਰਕਾਰਿਕਾਯ ਪਟਿਸਂਯੁਤ੍ਤੋ ਵਿਤਕ੍ਕੋ ਅਮਰਤ੍ਤਾਯ ਵਿਤਕ੍ਕੋ ਨਾਮ. ਦਿਟ੍ਠਿਗਤਿਕੋ ਪਨ ‘‘ਸਸ੍ਸਤਂ ਵਦੇਸੀ’’ਤਿਆਦੀਨਿ ਪੁਟ੍ਠੋ ‘‘ਏਵਨ੍ਤਿਪਿ ਮੇ ਨੋ, ਤਥਾਤਿਪਿ ਮੇ ਨੋ, ਅਞ੍ਞਥਾਤਿਪਿ ਮੇ ਨੋ, ਨੋਤਿਪਿ ਮੇ ਨੋ, ਨੋ ਨੋਤਿਪਿ ਮੇ ਨੋ’’ਤਿ ਵਿਕ੍ਖੇਪਂ ਆਪਜ੍ਜਤਿ, ਤਸ੍ਸ ਸੋ ਦਿਟ੍ਠਿਗਤਪਟਿਸਂਯੁਤ੍ਤੋ ਵਿਤਕ੍ਕੋ, ਯਥਾ ਅਮਰੋ ਨਾਮ ਮਚ੍ਛੋ ਉਦਕੇ ਗਹੇਤ੍ਵਾ ਮਾਰੇਤੁਂ ਨ ਸਕ੍ਕਾ, ਇਤੋ ਚਿਤੋ ਚ ਧਾਵਤਿ ਗਾਹਂ ਨ ਗਚ੍ਛਤਿ, ਏਵਮੇਵ ਏਕਸ੍ਮਿਂ ਪਕ੍ਖੇ ਅਸਣ੍ਠਹਨਤੋ ਨ ਮਰਤੀਤਿ ਅਮਰੋ ਨਾਮ ਹੋਤਿ, ਤਂ ਦੁਵਿਧਮ੍ਪਿ ਏਕਤੋ ਕਤ੍ਵਾ ‘‘ਅਮਰਵਿਤਕ੍ਕੋ’’ਤਿ ਵੁਤ੍ਤਂ.
ਪਰਾਨੁਦ੍ਦਯਤਾਪਟਿਸਞ੍ਞੁਤ੍ਤੋਤਿ ਅਨੁਦ੍ਦਯਤਾਪਟਿਰੂਪਕੇਨ ਗੇਹਸ੍ਸਿਤਪੇਮੇਨ ਪਟਿਸਂਯੁਤ੍ਤੋ. ਉਪਟ੍ਠਾਕੇਸੁ ਨਨ੍ਦਕੇਸੁ ਸੋਚਨ੍ਤੇਸੁ ਚ ਤੇਹਿ ਸਦ੍ਧਿਂ ਦਿਗੁਣਂ ਨਨ੍ਦਤਿ ਦਿਗੁਣਂ ਸੋਚਤਿ, ਤੇਸੁ ਸੁਖਿਤੇਸੁ ਦਿਗੁਣਂ ਸੁਖਿਤੋ ਹੋਤਿ, ਦੁਕ੍ਖਿਤੇਸੁ ਦਿਗੁਣਂ ਦੁਕ੍ਖਿਤੋ ਹੋਤਿ. ਉਪ੍ਪਨ੍ਨੇਸੁ ਕਿਚ੍ਚਕਰਣੀਯੇਸੁ ਅਤ੍ਤਨਾ ਵੋਯੋਗਂ ਆਪਜ੍ਜਤਿ. ਤਾਨਿ ਤਾਨਿ ਕਿਚ੍ਚਾਨਿ ਸਾਧੇਨ੍ਤੋ ਪਞ੍ਞਤ੍ਤਿਂ ਵੀਤਿਕ੍ਕਮਤਿ, ਸਲ੍ਲੇਖਂ ਕੋਪੇਤਿ. ਯੋ ਤਸ੍ਮਿਂ ਸਂਸਟ੍ਠਵਿਹਾਰੇ ਤਸ੍ਮਿਂ ਵਾ ਵੋਯੋਗਾਪਜ੍ਜਨੇ ਗੇਹਸ੍ਸਿਤੋ ਵਿਤਕ੍ਕੋ, ਅਯਂ ਪਰਾਨੁਦ੍ਦਯਤਾਪਟਿਸਞ੍ਞੁਤ੍ਤੋ ਵਿਤਕ੍ਕੋ ਨਾਮ.
ਲਾਭਸਕ੍ਕਾਰਸਿਲੋਕਪਟਿਸਞ੍ਞੁਤ੍ਤੋਤਿ ਚੀਵਰਾਦਿਲਾਭੇਨ ਚੇਵ ਸਕ੍ਕਾਰੇਨ ਚ ਕਿਤ੍ਤਿਸਦ੍ਦੇਨ ਚ ਸਦ੍ਧਿਂ ਆਰਮ੍ਮਣਕਰਣਵਸੇਨ ਪਟਿਸਞ੍ਞੁਤ੍ਤੋ. ਅਨਵਞ੍ਞਤ੍ਤਿਪਟਿਸਞ੍ਞੁਤ੍ਤੋਤਿ ‘‘ਅਹੋ ਵਤ ਮਂ ਪਰੇ ਨ ਅਵਜਾਨੇਯ੍ਯੁਂ, ਨ ਸੋਧੇਤ੍ਵਾ ਵਿਸੋਧੇਤ੍ਵਾ ਕਥੇਯ੍ਯੁ’’ਨ੍ਤਿ ਏਵਂ ਅਨਵਞ੍ਞਾਤਭਾਵਪਤ੍ਥਨਾਯ ਸਦ੍ਧਿਂ ਉਪ੍ਪਜ੍ਜਨਕਵਿਤਕ੍ਕੋ. ਸੋ ਤਸ੍ਮਿਂ ‘‘ਮਾ ਮਂ ਪਰੇ ਅਵਜਾਨਿਂਸੂ’’ਤਿ ਉਪ੍ਪਨ੍ਨੇ ਵਿਤਕ੍ਕੇ ਪਞ੍ਚਕਾਮਗੁਣਸਙ੍ਖਾਤਗੇਹਨਿਸ੍ਸਿਤੋ ਹੁਤ੍ਵਾ ਉਪ੍ਪਨ੍ਨਵਿਤਕ੍ਕੋ ਅਨਵਞ੍ਞਤ੍ਤਿਪਟਿਸਞ੍ਞੁਤ੍ਤੋ ਵਿਤਕ੍ਕੋ.