੧੩. ਮਹਾਬ੍ਯੂਹਸੁਤ੍ਤਨਿਦ੍ਦੇਸਵਣ੍ਣਨਾ

੧੩੦. ਤੇਰਸਮੇ ਮਹਾਬ੍ਯੂਹਸੁਤ੍ਤਨਿਦ੍ਦੇਸੇ ਯੇ ਕੇਚਿਮੇ ਦਿਟ੍ਠਿਪਰਿਬ੍ਬਸਾਨਾਤਿ ਇਦਮ੍ਪਿ ‘‘ਕਿਂ ਨੁ ਖੋ ਇਮੇ ਦਿਟ੍ਠਿਪਰਿਬ੍ਬਸਾਨਾ ਵਿਞ੍ਞੂਨਂ ਸਨ੍ਤਿਕਾ ਨਿਨ੍ਦਮੇਵ ਲਭਨ੍ਤਿ, ਉਦਾਹੁ ਪਸਂਸਮ੍ਪੀ’’ਤਿ ਉਪ੍ਪਨ੍ਨਚਿਤ੍ਤਾਨਂ ਏਕਚ੍ਚਾਨਂ ਦੇਵਤਾਨਂ ਤਮਤ੍ਥਂ ਆਵਿਕਾਤੁਂ ਪੁਰਿਮਨਯੇਨੇਵ ਨਿਮ੍ਮਿਤਬੁਦ੍ਧੇਨ ਅਤ੍ਤਾਨਂ ਪੁਚ੍ਛਾਪੇਤ੍ਵਾ ਵੁਤ੍ਤਂ. ਤਤ੍ਥ ਅਨ੍ਵਾਨਯਨ੍ਤੀਤਿ ਅਨੁ ਆਨਯਨ੍ਤਿ ਪੁਨਪ੍ਪੁਨਂ ਆਹਰਨ੍ਤਿ.

ਨਿਨ੍ਦਮੇਵ ਅਨ੍ਵੇਨ੍ਤੀਤਿ ਗਰਹਮੇਵ ਉਪਗਚ੍ਛਨ੍ਤਿ.

੧੩੧. ਇਦਾਨਿ ਯਸ੍ਮਾ ਤੇ ‘‘ਇਦਮੇਵ ਸਚ੍ਚ’’ਨ੍ਤਿ ਵਦਨ੍ਤਾਪਿ ਦਿਟ੍ਠਿਗਤਿਕਵਾਦਿਨੋ ਕਦਾਚਿ ਕਤ੍ਥਚਿ ਪਸਂਸਮ੍ਪਿ ਲਭਨ੍ਤਿ, ਯਂ ਏਤਂ ਪਸਂਸਾਸਙ੍ਖਾਤਂ ਵਾਦਫਲਂ, ਤਂ ਅਪ੍ਪਂ, ਰਾਗਾਦੀਨਂ ਸਮਾਯ ਸਮਤ੍ਥਂ ਨ ਹੋਤਿ, ਕੋ ਪਨ ਵਾਦੋ ਦੁਤਿਯੇ ਨਿਨ੍ਦਾਫਲੇ, ਤਸ੍ਮਾ ਏਤਮਤ੍ਥਂ ਦਸ੍ਸੇਨ੍ਤੋ ਇਮਂ ਤਾਵ ਵਿਸ੍ਸਜ੍ਜਨਗਾਥਂ ਆਹ ‘‘ਅਪ੍ਪਞ੍ਹਿ ਏਤਂ ਨ ਅਲਂ ਸਮਾਯ, ਦੁਵੇ ਵਿਵਾਦਸ੍ਸ ਫਲਾਨਿ ਬ੍ਰੂਮੀ’’ਤਿ. ਤਤ੍ਥ ਦੁਵੇ ਵਿਵਾਦਸ੍ਸ ਫਲਾਨੀਤਿ ਨਿਨ੍ਦਾ ਚ ਪਸਂਸਾ ਚ ਜਯਪਰਾਜਯਾਦੀਨਿ ਵਾ ਤਂਸਭਾਗਾਨਿ. ਏਤਮ੍ਪਿ ਦਿਸ੍ਵਾਤਿ ‘‘ਨਿਨ੍ਦਾ ਅਨਿਟ੍ਠਾ ਏਵ, ਪਸਂਸਾ ਨਾਲਂ ਸਮਾਯਾ’’ਤਿ ਏਤਮ੍ਪਿ ਵਿਵਾਦਫਲੇ ਆਦੀਨਵਂ ਦਿਸ੍ਵਾ. ਖੇਮਾਭਿਪਸ੍ਸਂ ਅਵਿਵਾਦਭੂਮਿਨ੍ਤਿ ਅਵਿਵਾਦਭੂਮਿਂ ਨਿਬ੍ਬਾਨਂ ਖੇਮਨ੍ਤਿ ਪਸ੍ਸਮਾਨੋ.

ਅਪ੍ਪਕਨ੍ਤਿ ਮਨ੍ਦਂ. ਪਰਿਤ੍ਤਕਨ੍ਤਿ ਥੋਕਂ. ਓਮਕਨ੍ਤਿ ਹੇਟ੍ਠਿਮਕਂ. ਲਾਮਕਨ੍ਤਿ ਪਾਪਕਂ. ਸਮਾਯਾਤਿ ਰਾਗਾਦੀਨਂ ਸਮਨਤ੍ਥਾਯ. ਉਪਸਮਾਯਾਤਿ ਉਪਰੂਪਰਿ ਸਮਨਤ੍ਥਾਯ. ਵੂਪਸਮਾਯਾਤਿ ਸਨ੍ਨਿਸੀਦਾਪਨਤ੍ਥਾਯ. ਨਿਬ੍ਬਾਨਾਯਾਤਿ ਅਮਤਮਹਾਨਿਬ੍ਬਾਨਤ੍ਥਾਯ. ਪਟਿਨਿਸ੍ਸਗ੍ਗਾਯਾਤਿ ਮਗ੍ਗੇਨ ਕਿਲੇਸਾਨਂ ਨਿਸ੍ਸਜ੍ਜਨਤ੍ਥਾਯ. ਪਟਿਪਸ੍ਸਦ੍ਧਿਯਾਤਿ ਫਲੇਨ ਪਟਿਪਸ੍ਸਦ੍ਧਾਨਂ ਅਨੁਪ੍ਪਜ੍ਜਨਤ੍ਥਾਯ ਨਾਲਂ.

੧੩੨. ਏਵਞ੍ਹਿ ਅਵਿਵਾਦਮਾਨੋ – ਯਾ ਕਾਚਿਮਾਤਿ ਗਾਥਾ. ਤਤ੍ਥ ਸਮ੍ਮੁਤਿਯੋਤਿ ਦਿਟ੍ਠਿਯੋ. ਪੁਥੁਜ੍ਜਾਤਿ ਪੁਥੁਜ੍ਜਨਸਮ੍ਭਵਾ. ਸੋ ਉਪਯਂ ਕਿਮੇਯ੍ਯਾਤਿ ਸੋ ਉਪਗਨ੍ਤਬ੍ਬਟ੍ਠੇਨ ਉਪਯਂ ਰੂਪਾਦੀਸੁ ਏਕਮ੍ਪਿ ਧਮ੍ਮਂ ਕਿਂ ਉਪੇਯ੍ਯ, ਕੇਨ ਵਾ ਕਾਰਣੇਨ ਉਪੇਯ੍ਯ. ਦਿਟ੍ਠੇ ਸੁਤੇ ਖਨ੍ਤਿਮਕੁਬ੍ਬਮਾਨੋਤਿ ਦਿਟ੍ਠਸੁਤਸੁਦ੍ਧੀਸੁ ਪੇਮਂ ਅਕਰੋਨ੍ਤੋ.

ਪੁਥੁਜ੍ਜਨੇਹਿ ਜਨਿਤਾਤਿ ਪੁਥੁਜ੍ਜਨੇਹਿ ਉਪ੍ਪਾਦਿਤਾ. ਸਮ੍ਮੁਤਿਯੋਤਿ ਦਿਟ੍ਠਿਯੋ. ਪੁਥੁ ਨਾਨਾਜਨੇਹਿ ਜਨਿਤਾ ਵਾਤਿ ਅਨੇਕਵਿਧੇਹਿ ਦਿਟ੍ਠਿਗਤਿਕੇਹਿ ਉਪ੍ਪਾਦਿਤਾ ਵਾ. ਨੇਤੀਤਿ ਨ ਏਤਿ. ਨ ਉਪੇਤੀਤਿ ਸਮੀਪਂ ਨ ਏਤਿ. ਨ ਉਪਗਚ੍ਛਤੀਤਿ ਨਿਵਤ੍ਤਤਿ. ਨਾਭਿਨਿਵਿਸਤੀਤਿ ਪਵਿਸਿਤ੍ਵਾ ਨਪ੍ਪਤਿਟ੍ਠਤਿ.

੧੩੩. ਇਤੋ ਬਾਹਿਰਾ ਪਨ – ਸੀਲੁਤ੍ਤਮਾਤਿ ਗਾਥਾ ਤਸ੍ਸਤ੍ਥੋ – ਸੀਲਂਯੇਵ ‘‘ਉਤ੍ਤਮ’’ਨ੍ਤਿ ਮਞ੍ਞਮਾਨਾ ਸੀਲੁਤ੍ਤਮਾਤਿ ਏਕੇ ਭੋਨ੍ਤੋ ਸਂਯਮਮਤ੍ਤੇਨ ਸੁਦ੍ਧਿਂ ਵਦਨ੍ਤਿ, ਹਤ੍ਥਿਵਤਾਦਿਞ੍ਚ ਵਤਂ ਸਮਾਦਾਯ ਉਪਟ੍ਠਿਤਾਸੇ. ਇਧੇਵ ਦਿਟ੍ਠਿਯਂ ਅਸ੍ਸ ਸਤ੍ਥੁਨੋ ਸੁਦ੍ਧਿਂ ਭਵੂਪਨੀਤਾ ਭਵਜ੍ਝੋਸਿਤਾ ਸਮਾਨਾ ਵਦਨ੍ਤਿ, ਅਪਿ ਚ ਤੇ ਕੁਸਲਾਵਦਾਨਾ ‘‘ਕੁਸਲਾ ਮਯ’’ਨ੍ਤਿ ਏਵਂਵਾਦਾ.

੧੩੪. ਏਵਂ ਸੀਲੁਤ੍ਤਮੇਸੁ ਚ ਤੇਸੁ ਤਥਾ ਪਟਿਪਨ੍ਨੋ ਯੋ ਕੋਚਿ – ਸਚੇ ਚੁਤੋਤਿ ਗਾਥਾ. ਤਸ੍ਸਤ੍ਥੋ – ਸਚੇ ਤਤੋ ਸੀਲਵਤਤੋ ਪਰਵਿਚ੍ਛਿਨ੍ਦਨੇਨ ਵਾ ਅਨਭਿਸਮ੍ਭੁਣਨ੍ਤੋ ਵਾ ਚੁਤੋ ਹੋਤਿ, ਸੋ ਤਂ ਸੀਲਬ੍ਬਤਕਮ੍ਮਂ ਪੁਞ੍ਞਾਭਿਸਙ੍ਖਾਰਾਦਿਕਮ੍ਮਂ ਵਾ ਵਿਰਾਧਯਿਤ੍ਵਾ ਵੇਧਤੀ. ਨ ਕੇਵਲਞ੍ਚ ਵੇਧਤਿ, ਅਪਿ ਚ ਖੋ ਤਂ ਸੀਲਬ੍ਬਤਸੁਦ੍ਧਿਂ ਪਜਪ੍ਪਤੀ ਚ ਵਿਪ੍ਪਲਪਤਿ ਚ ਪਤ੍ਥਯਤੀ ਚ. ਕਿਮਿਵ? ਸਤ੍ਥਾਵ ਹੀਨੋ ਪਵਸਂ ਘਰਮ੍ਹਾ, ਘਰਮ੍ਹਾ ਪਵਸਨ੍ਤੋ ਸਤ੍ਥਤੋ ਹੀਨੋ ਯਥਾ ਤਂ ਘਰਂ ਵਾ ਸਤ੍ਥਂ ਵਾ ਪਤ੍ਥਯਤੀਤਿ.

ਪਰਵਿਚ੍ਛਿਨ੍ਦਨਾਯ ਵਾਤਿ ਪਰੇਨ ਵਾਰਿਯਮਾਨੋ ਵਾ. ਅਨਭਿਸਮ੍ਭੁਣਨ੍ਤੋ ਵਾਤਿ ਤਂ ਪਟਿਪਤ੍ਤਿਂ ਅਸਮ੍ਪਾਦੇਨ੍ਤੋ ਵਾ.

ਅਞ੍ਞਾਯ ਅਪਰਦ੍ਧੋਤਿ ਨਿਬ੍ਬਾਨੇਨ ਪਰਿਹੀਨੋ ਮਗ੍ਗਤੋ ਵਾ. ਤਂ ਵਾ ਸਤ੍ਥਂ ਅਨੁਬਨ੍ਧਤੀਤਿ ਤਂ ਵਾ ਸਤ੍ਥਂ ਸਬ੍ਬਤ੍ਥ ਪਚ੍ਛਤੋ ਗਚ੍ਛਤਿ.

੧੩੫. ਏਵਂ ਪਨ ਸੀਲੁਤ੍ਤਮਾਨਂ ਪਵੇਧਨਕਾਰਣਂ ਅਰਿਯਸਾਵਕੋ ਸੀਲਬ੍ਬਤਂ ਵਾਪਿ ਪਹਾਯ ਸਬ੍ਬਨ੍ਤਿ ਗਾਥਾ. ਤਤ੍ਥ ਸਾਵਜ੍ਜਾਨਵਜ੍ਜਨ੍ਤਿ ਸਬ੍ਬਾਕੁਸਲਂ ਲੋਕਿਯਕੁਸਲਞ੍ਚ. ਏਤਂ ਸੁਦ੍ਧਿਂ ਅਸੁਦ੍ਧਿਨ੍ਤਿ ਅਪਤ੍ਥਯਾਨੋਤਿ ਪਞ੍ਚਕਾਮਗੁਣਾਦਿਭੇਦਂ ਸੁਦ੍ਧਿਂ ਅਕੁਸਲਾਦਿਭੇਦਂ ਅਸੁਦ੍ਧਿਞ੍ਚ ਅਪਤ੍ਥਯਮਾਨੋ. ਵਿਰਤੋ ਚਰੇਤਿ ਸੁਦ੍ਧਿਯਾ ਅਸੁਦ੍ਧਿਯਾ ਚ ਵਿਰਤੋ ਚਰੇਯ੍ਯ. ਸਨ੍ਤਿ ਮਨੁਗ੍ਗਹਾਯਾਤਿ ਦਿਟ੍ਠਿਂ ਅਗ੍ਗਹੇਤ੍ਵਾ.

ਕਣ੍ਹਂ ਕਣ੍ਹਵਿਪਾਕਨ੍ਤਿ ਅਕੁਸਲਕਮ੍ਮਂ ਅਕੁਸਲਵਿਪਾਕਦਾਯਕਂ. ਸੁਕ੍ਕਂ ਸੁਕ੍ਕਵਿਪਾਕਨ੍ਤਿ ਲੋਕਿਯਕੁਸਲਂ ਅਤ੍ਤਨਾ ਸਦਿਸਂ ਸੁਕ੍ਕਵਿਪਾਕਦਾਯਕਂ.

ਨਿਯਾਮਾਵਕ੍ਕਨ੍ਤਿਨ੍ਤਿ ਮਗ੍ਗਪਵਿਸਨਂ. ਸੇਕ੍ਖਾਤਿ ਸਤ੍ਤ ਸੇਕ੍ਖਾ. ਅਗ੍ਗਧਮ੍ਮਨ੍ਤਿ ਉਤ੍ਤਮਧਮ੍ਮਂ, ਅਰਹਤ੍ਤਫਲਂ.

੧੩੬. ਏਵਂ ਇਤੋ ਬਾਹਿਰਕੇ ਸੀਲੁਤ੍ਤਮੇ ਸਂਯਮੇਨ ਵਿਸੁਦ੍ਧਿਵਾਦੇ ਤੇਸਞ੍ਚ ਵਿਪਾਕਂ ਸੀਲਬ੍ਬਤਪਹਾਯਿਨੋ ਅਰਹਤੋ ਚ ਪਟਿਪਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਅਞ੍ਞਥਾਪਿ ਸੁਦ੍ਧਿਵਾਦੇ ਬਾਹਿਰਕੇ ਦਸ੍ਸੇਨ੍ਤੋ ‘‘ਤਮੂਪਨਿਸ੍ਸਾਯਾ’’ਤਿ ਗਾਥਮਾਹ. ਤਸ੍ਸਤ੍ਥੋ – ਸਨ੍ਤਞ੍ਞੇਪਿ ਸਮਣਬ੍ਰਾਹ੍ਮਣਾ, ਤੇ ਜਿਗੁਚ੍ਛਿਤਂ ਅਮਰਨ੍ਤਪਂ ਵਾ ਦਿਟ੍ਠਸੁਦ੍ਧਿਆਦੀਸੁ ਵਾ ਅਞ੍ਞਤਰਞ੍ਞਤਰਂ ਉਪਨਿਸ੍ਸਾਯਅਕਿਰਿਯਦਿਟ੍ਠਿਯਾ ਵਾ ਉਦ੍ਧਂਸਰਾ ਹੁਤ੍ਵਾ ਭਵਾਭਵੇਸੁ ਅਵੀਤਤਣ੍ਹਾ ਸੁਦ੍ਧਿ’ਮਨੁਤ੍ਥੁਨਨ੍ਤਿ ਵਦਨ੍ਤਿ ਕਥੇਨ੍ਤੀਤਿ.

ਤਪੋਜਿਗੁਚ੍ਛਵਾਦਾਤਿ ਕਾਯਪੀਲ਼ਨਾਦਿਤਪੇਨ ਪਾਪਹਿਰੀਯਨਵਾਦਾ. ਤਪੋਜਿਗੁਚ੍ਛਸਾਰਾਤਿ ਤੇਨੇਵ ਤਪੇਨ ਹਿਰੀਯਨਸਾਰਵਨ੍ਤੋ. ਉਦ੍ਧਂਸਰਾਵਾਦਾਤਿ ਸਂਸਾਰੇਨ ਸੁਦ੍ਧਿਂ ਕਥਯਨ੍ਤਾ.

੧੩੭. ਏਵਂ ਤੇਸਂ ਅਵੀਤਤਣ੍ਹਾਨਂ ਸੁਦ੍ਧਿਂ ਅਨੁਤ੍ਥੁਨਨ੍ਤਾਨਂ ਯੋਪਿ ਸੁਦ੍ਧਿਪ੍ਪਤ੍ਤਮੇਵ ਅਤ੍ਤਾਨਂ ਮਞ੍ਞੇਯ੍ਯ, ਤਸ੍ਸਾਪਿ ਅਵੀਤਤਣ੍ਹਤ੍ਤਾ ਭਵਾਭਵੇਸੁ ਤਂ ਤਂ ਵਤ੍ਥੁਂ ਪਤ੍ਥਯਮਾਨਸ੍ਸ ਹਿ ਜਪ੍ਪਿਤਾਨਿ ਪੁਨਪ੍ਪੁਨਂ ਹੋਨ੍ਤਿਯੇਵਾਤਿ ਅਧਿਪ੍ਪਾਯੋ. ਤਣ੍ਹਾ ਹਿ ਆਸੇਵਿਤਾ ਤਣ੍ਹਂ ਵਡ੍ਢਯਤੇਵ, ਨ ਕੇਵਲਞ੍ਚ ਜਪ੍ਪਿਤਾਨਿ, ਪਵੇਧਿਤਂ ਵਾਪਿ ਪਕਪ੍ਪਿਤੇਸੁ, ਤਣ੍ਹਾਦਿਟ੍ਠੀਹਿ ਚਸ੍ਸ ਪਕਪ੍ਪਿਤੇਸੁ ਵਤ੍ਥੂਸੁ ਪਵੇਧਿਤਮ੍ਪਿ ਹੋਤੀਤਿ ਵੁਤ੍ਤਂ ਹੋਤਿ. ਭਵਾਭਵੇਸੁ ਪਨ ਵੀਤਤਣ੍ਹਤ੍ਤਾ ਆਯਤਿਂ ਚੁਤੂਪਪਾਤੋ ਇਧ ਯਸ੍ਸ ਨਤ੍ਥਿ, ਸ ਕੇਨ ਵੇਧੇਯ੍ਯ ਕੁਹਿਂ ਵ ਜਪ੍ਪੇਤਿ ਅਯਮੇਤਿਸ੍ਸਾ ਗਾਥਾਯ ਸਮ੍ਬਨ੍ਧੋ.

ਆਗਮਨਨ੍ਤਿ ਪੁਨ ਆਗਮਨਂ. ਗਮਨਨ੍ਤਿ ਇਤੋ ਅਞ੍ਞਤ੍ਥ ਗਮਨਂ. ਗਮਨਾਗਮਨਨ੍ਤਿ ਇਤੋ ਗਨ੍ਤ੍ਵਾ ਪੁਨ ਨਿਵਤ੍ਤਨਂ. ਕਾਲਨ੍ਤਿ ਮਰਣਂ. ਗਤੀਤਿ ਗਮਨਵਸੇਨ ਗਤਿਯਾ ਗਨ੍ਤਬ੍ਬਂ.

੧੩੮. ਯਮਾਹੁ ਧਮ੍ਮਨ੍ਤਿ ਪੁਚ੍ਛਾਗਾਥਾ.

੧੩੯. ਇਦਾਨਿ ਯਸ੍ਮਾ ਏਕੋਪਿ ਏਤ੍ਥ ਵਾਦੋ ਸਚ੍ਚੋ ਨਤ੍ਥਿ, ਕੇਵਲਂ ਦਿਟ੍ਠਿਮਤ੍ਤਕੇਨ ਹਿ ਤੇ ਵਦਨ੍ਤਿ, ਤਸ੍ਮਾ ਤਮਤ੍ਥਂ ਦਸ੍ਸੇਨ੍ਤੋ ‘‘ਸਕਂ ਹੀ’’ਤਿ ਇਮਂ ਤਾਵ ਵਿਸ੍ਸਜ੍ਜਨਗਾਥਮਾਹ. ਤਤ੍ਥ ਸਮ੍ਮੁਤਿਨ੍ਤਿ ਦਿਟ੍ਠਿਂ. ਅਨੋਮਨ੍ਤਿ ਅਨੂਨਂ.

੧੪੦. ਏਵਮੇਤੇਸੁ ਸਕਂ ਧਮ੍ਮਂ ਪਰਿਪੁਣ੍ਣਂ ਬ੍ਰੂਵਨ੍ਤੇਸੁ ਅਞ੍ਞਸ੍ਸ ਧਮ੍ਮਂ ਪਨ ਹੀਨਨ੍ਤਿ ਵਦਨ੍ਤੇਸੁ ਯਸ੍ਸ ਕਸ੍ਸਚਿ – ਪਰਸ੍ਸ ਚੇ ਵਮ੍ਭਯਿਤੇਨ ਹੀਨੋਤਿ ਗਾਥਾ. ਤਸ੍ਸਤ੍ਥੋ – ਯਦਿ ਪਰਸ੍ਸ ਨਿਨ੍ਦਿਤਕਾਰਣਾ ਹੀਨੋ ਭਵੇਯ੍ਯ, ਨ ਕੋਚਿ ਧਮ੍ਮੇਸੁ ਵਿਸੇਸਿ ਅਗ੍ਗੋ ਭਵੇਯ੍ਯ. ਕਿਂਕਾਰਣਾ? ਪੁਥੂ ਹਿ ਅਞ੍ਞਸ੍ਸ ਵਦਨ੍ਤਿ ਧਮ੍ਮਂ ਨਿਹੀਨਤੋ ਸਬ੍ਬੇਵ ਤੇ ਸਮ੍ਹਿ ਦਲ਼੍ਹਂ ਵਦਾਨਾਸਕਧਮ੍ਮੇ ਦਲ਼੍ਹਵਾਦਾ ਏਵ.

ਵਮ੍ਭਯਿਤਕਾਰਣਾਤਿ ਧਂਸਿਤਕਾਰਣਾ. ਗਰਹਿਤਕਾਰਣਾਤਿ ਲਾਮਕਕਤਕਾਰਣਾ. ਉਪਵਦਿਤਕਾਰਣਾਤਿ ਅਕ੍ਕੋਸਿਤਕਾਰਣਾ. ਸਕਾਯਨਨ੍ਤਿ ਸਕਮਗ੍ਗਂ.

੧੪੧. ਕਿਞ੍ਚ ਭਿਯ੍ਯੋ – ਸਦ੍ਧਮ੍ਮਪੂਜਾਤਿ ਗਾਥਾ. ਤਸ੍ਸਤ੍ਥੋ – ਤੇ ਚ ਤਿਤ੍ਥਿਯਾ ਯਥਾ ਪਸਂਸਨ੍ਤਿ ਸਕਾਯਨਾਨਿ, ਸਦ੍ਧਮ੍ਮਪੂਜਾਪਿ ਨੇਸਂ ਤਥੇਵ ਵਤ੍ਤਤਿ. ਤੇ ਹਿ ਅਤਿਵਿਯ ਸਤ੍ਥਾਰਾਦੀਨਿ ਸਤ੍ਤਰੋਨ੍ਤਿ. ਤਤ੍ਥ ਯਦਿ ਤੇ ਪਮਾਣਾ ਸਿਯੁਂ, ਏਵਂ ਸਨ੍ਤੇ ਸਬ੍ਬੇਵ ਵਾਦਾ ਤਥਿਯਾ ਭਵੇਯ੍ਯੁਂ. ਕਿਂਕਾਰਣਾ? ਸੁਦ੍ਧੀ ਹਿ ਨੇਸਂ ਪਚ੍ਚਤ੍ਤਮੇਵ. ਨ ਸਾ ਅਞ੍ਞਤ੍ਥ ਸਿਜ੍ਝਤਿ, ਨਾਪਿ ਪਰਮਤ੍ਥਤੋ. ਅਤ੍ਤਨਿ ਦਿਟ੍ਠਿਗਾਹਮਤ੍ਤਮੇਵ ਹਿ ਤਂ ਤੇਸਂ ਪਰਪਚ੍ਚਯਨੇਯ੍ਯਬੁਦ੍ਧੀਨਂ. ਪਚ੍ਚਤ੍ਤਮੇਵਾਤਿ ਪਾਟੇਕ੍ਕਮੇਵ.

੧੪੨. ਯੋ ਪਨ ਵਿਪਰੀਤਤੋ ਬਾਹਿਤਪਾਪਤ੍ਤਾ ਬ੍ਰਾਹ੍ਮਣੋ, ਤਸ੍ਸ ਨ ਬ੍ਰਾਹ੍ਮਣਸ੍ਸ ਪਰਨੇਯ੍ਯਮਤ੍ਥੀਤਿ ਗਾਥਾ. ਤਸ੍ਸਤ੍ਥੋ – ਬ੍ਰਾਹ੍ਮਣਸ੍ਸ ਹਿ ‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ’’ਤਿਆਦਿਨਾ ਨਯੇਨ ਸੁਦਿਟ੍ਠਤ੍ਤਾ ਪਰੇਨ ਨੇਤਬ੍ਬਂ ਞਾਣਂ ਨਤ੍ਥਿ. ਦਿਟ੍ਠਿਧਮ੍ਮੇਸੁ ‘‘ਇਦਮੇਵ ਸਚ੍ਚ’’ਨ੍ਤਿ ਨਿਚ੍ਛਿਨਿਤ੍ਵਾ ਸੁਮਗ੍ਗਹੀਤਮ੍ਪਿ ਨਤ੍ਥਿ. ਤਂਕਾਰਣਾ ਸੋ ਦਿਟ੍ਠਿਕਲਹਾਨਿ ਅਤਿਕ੍ਕਨ੍ਤੋ, ਨ ਹਿ ਸੋ ਸੇਟ੍ਠਤੋ ਪਸ੍ਸਤਿ ਧਮ੍ਮਮਞ੍ਞਂ ਅਞ੍ਞਤ੍ਰ ਸਤਿਪਟ੍ਠਾਨਾਦੀਹਿ.

ਨ ਪਰਨੇਯ੍ਯੋਤਿ ਪਰੇਨ ਨੇਤਬ੍ਬੋ ਜਾਨਾਪੇਤਬ੍ਬੋ ਨ ਹੋਤਿ. ਨ ਪਰਪਤ੍ਤਿਯੋ ਨ ਪਰਪਚ੍ਚਯੋਤਿ ਪਰੇਸਂ ਪਚ੍ਚੇਤਬ੍ਬੋ ਨ ਹੋਤਿ. ਨ ਪਰਪਟਿਬਦ੍ਧਗੂਤਿ ਪਰੇਸਂ ਪਟਿਬਦ੍ਧਗਮਨੋ ਨ ਹੋਤਿ.

੧੪੩. ਜਾਨਾਮੀਤਿ ਗਾਥਾਯ ਸਮ੍ਬਨ੍ਧੋ ਅਤ੍ਥੋ ਚ – ਏਵਂ ਤਾਵ ਪਰਮਤ੍ਥਬ੍ਰਾਹ੍ਮਣੋ ਨ ਹਿ ਸੇਟ੍ਠਤੋ ਪਸ੍ਸਤਿ ਧਮ੍ਮਮਞ੍ਞਂ, ਅਞ੍ਞੇ ਪਨ ਤਿਤ੍ਥਿਯਾ ਪਰਚਿਤ੍ਤਞਾਣਾਦੀਹਿ ਜਾਨਨ੍ਤਾਪਿ ਪਸ੍ਸਨ੍ਤਾਪਿ ‘‘ਜਾਨਾਮਿ ਪਸ੍ਸਾਮਿ ਤਥੇਵ ਏਤ’’ਨ੍ਤਿ ਏਵਂ ਵਦਨ੍ਤਾਪਿ ਚ ਦਿਟ੍ਠਿਯਾ ਸੁਦ੍ਧਿਂ ਪਚ੍ਚੇਨ੍ਤਿ. ਕਸ੍ਮਾ? ਯਸ੍ਮਾ ਤੇਸੁ ਏਕੋਪਿ ਅਦਕ੍ਖਿ ਚੇ ਅਦ੍ਦਸ ਚੇਪਿ ਤੇਨ ਪਰਚਿਤ੍ਤਞਾਣਾਦਿਨਾ ਯਥਾਭੂਤਮਤ੍ਥਂ, ਕਿਞ੍ਹਿ ਤੁਮਸ੍ਸ ਤੇਨ ਤਸ੍ਸ ਤੇਨ ਦਸ੍ਸਨੇਨ ਕਿਂ ਕਤਂ, ਕਿਂ ਦੁਕ੍ਖਪਰਿਞ੍ਞਾ ਸਾਧਿਤਾ, ਉਦਾਹੁ ਸਮੁਦਯਪ੍ਪਹਾਨਾਦੀਨਂ ਅਞ੍ਞਤਰਂ, ਯਤੋ ਸਬ੍ਬਥਾਪਿ ਅਤਿਕ੍ਕਮਿਤ੍ਵਾ ਅਰਿਯਮਗ੍ਗਂ ਤੇ ਤਿਤ੍ਥਿਯਾ ਅਞ੍ਞੇਨੇਵ ਵਦਨ੍ਤਿ ਸੁਦ੍ਧਿਂ, ਅਤਿਕ੍ਕਮਿਤ੍ਵਾ ਵਾ ਤੇ ਤਿਤ੍ਥਿਯੇ ਬੁਦ੍ਧਾਦਯੋ ਅਞ੍ਞੇਨੇਵ ਵਦਨ੍ਤਿ ਸੁਦ੍ਧਿਨ੍ਤਿ.

੧੪੪. ਪਸ੍ਸਂ ਨਰੋਤਿ ਗਾਥਾਯ ਸਮ੍ਬਨ੍ਧੋ ਅਤ੍ਥੋ ਚ – ਕਿਞ੍ਚ ਭਿਯ੍ਯੋ? ਯ੍ਵਾਯਂ ਪਰਚਿਤ੍ਤਞਾਣਾਦੀਹਿ ਅਦ੍ਦਕ੍ਖਿ, ਸੋ ਪਸ੍ਸਂ ਨਰੋ ਦਕ੍ਖਤਿ ਨਾਮਰੂਪਂ, ਨ ਤਤੋ ਪਰਂ, ਦਿਸ੍ਵਾਨ ਵਾ ਞਸ੍ਸਤਿ ਤਾਨਿਮੇਵ ਨਾਮਰੂਪਾਨਿ ਨਿਚ੍ਚਤੋ ਸੁਖਤੋ ਵਾ, ਨ ਅਞ੍ਞਥਾ; ਸੋ ਏਵਂ ਪਸ੍ਸਨ੍ਤੋ ਕਾਮਂ ਬਹੁਂ ਪਸ੍ਸਤੁ ਅਪ੍ਪਕਂ ਵਾ ਨਾਮਰੂਪਂ ਨਿਚ੍ਚਤੋ ਸੁਖਤੋ ਚ ਅਥਸ੍ਸ ਏਵਰੂਪੇਨ ਦਸ੍ਸਨੇਨ ਨ ਹਿ ਤੇਨ ਸੁਦ੍ਧਿਂ ਕੁਸਲਾ ਵਦਨ੍ਤਿ.

੧੪੫. ਨਿਵਿਸ੍ਸਵਾਦੀਤਿ ਗਾਥਾਯ ਸਮ੍ਬਨ੍ਧੋ ਅਤ੍ਥੋ ਚ – ਤੇਨ ਚ ਦਸ੍ਸਨੇਨ ਸੁਦ੍ਧਿਯਾ ਅਸਤਿਯਾਪਿ ਯੋ ‘‘ਜਾਨਾਮਿ ਪਸ੍ਸਾਮਿ ਤਥੇਵ ਏਤ’’ਨ੍ਤਿ ਏਵਂ ਨਿਵਿਸ੍ਸਵਾਦੀ, ਏਤਂ ਵਾ ਦਸ੍ਸਨਂ ਪਟਿਚ੍ਚ ਦਿਟ੍ਠਿਯਾ ਸੁਦ੍ਧਿਂ ਪਚ੍ਚੇਨ੍ਤੋ ‘‘ਇਦਮੇਵ ਸਚ੍ਚ’’ਨ੍ਤਿ ਏਵਂ ਨਿਵਿਸ੍ਸਵਾਦੀ, ਸੋ ਸੁਬ੍ਬਿਨਯੋ ਨ ਹੋਤਿ ਤਂ ਤਥਾ ਪਕਪ੍ਪਿਤਂ ਅਭਿਸਙ੍ਖਤਂ ਦਿਟ੍ਠਿਂ ਪੁਰਕ੍ਖਰਾਨੋ. ਸੋ ਹਿ ਯਂ ਸਤ੍ਥਾਰਾਦਿਂ ਨਿਸ੍ਸਿਤੋ, ਤਤ੍ਥੇਵ ਸੁਭਂ ਵਦਾਨੋ ਸੁਦ੍ਧਿਂ ਵਦੋ, ‘‘ਪਰਿਸੁਦ੍ਧਿਵਾਦੋ ਪਰਿਸੁਦ੍ਧਿਦਸ੍ਸਨੋ ਵਾ ਅਹ’’ਨ੍ਤਿ ਅਤ੍ਤਾਨਂ ਮਞ੍ਞਮਾਨੋ ਤਤ੍ਥ ਤਥਦ੍ਦਸਾ ਸੋ, ਤਤ੍ਥ ਸਕਾਯ ਦਿਟ੍ਠਿਯਾ ਅਵਿਪਰੀਤਮੇਵ ਸੋ ਅਦ੍ਦਸ. ਯਥਾ ਸਾ ਦਿਟ੍ਠਿ ਪਵਤ੍ਤਤਿ, ਤਥੇਵ ਤਂ ਅਦ੍ਦਸ, ਨ ਅਞ੍ਞਥਾ ਪਸ੍ਸਿਤੁਂ ਇਚ੍ਛਤੀਤਿ ਅਧਿਪ੍ਪਾਯੋ.

ਨਿਵਿਸ੍ਸਵਾਦੀਤਿ ਪਤਿਟ੍ਠਹਿਤ੍ਵਾ ਕਥੇਨ੍ਤੋ. ਦੁਬ੍ਬਿਨਯੋਤਿ ਵਿਨੇਤੁਂ ਦੁਕ੍ਖੋ. ਦੁਪ੍ਪਞ੍ਞਾਪਯੋਤਿ ਞਾਪੇਤੁਂ ਚਿਤ੍ਤੇਨ ਲਬ੍ਭਾਪੇਤੁਂ ਦੁਕ੍ਖੋ. ਦੁਨ੍ਨਿਜ੍ਝਾਪਯੋਤਿ ਚਿਤ੍ਤੇਨ ਵੀਮਂਸਿਤ੍ਵਾ ਗਹਣਤ੍ਥਂ ਪੁਨਪ੍ਪੁਨਂ ਨਿਜ੍ਝਾਪਯਿਤੁਂ ਦੁਕ੍ਖੋ. ਦੁਪ੍ਪੇਕ੍ਖਾਪਯੋਤਿ ਇਕ੍ਖਾਪਯਿਤੁਂ ਦੁਕ੍ਖੋ. ਦੁਪ੍ਪਸਾਦਯੋਤਿ ਚਿਤ੍ਤੇ ਪਸਾਦਂ ਉਪ੍ਪਾਦੇਤੁਂ ਦੁਕ੍ਖੋ.

ਅਪ੍ਪਸ੍ਸੀਤਿ ਞਾਣੇਨ ਪਟਿਵੇਧਂ ਪਾਪੁਣਿ. ਪਟਿਵਿਜ੍ਝੀਤਿ ਚਿਤ੍ਤੇਨ ਅਵਬੋਧਂ ਪਾਪੁਣਿ.

੧੪੬. ਏਵਂ ਪਕਪ੍ਪਿਤਂ ਦਿਟ੍ਠਿਂ ਪੁਰਕ੍ਖਰਾਨੇਸੁ ਤਿਤ੍ਥਿਯੇਸੁ – ਨ ਬ੍ਰਾਹ੍ਮਣੋ ਕਪ੍ਪਮੁਪੇਤਿ ਸਙ੍ਖਾਤਿ ਗਾਥਾ. ਤਤ੍ਥ ਸਙ੍ਖਾਤਿ ਸਙ੍ਖਾਯ, ਜਾਨਿਤ੍ਵਾਤਿ ਅਤ੍ਥੋ. ਨਪਿ ਞਾਣਬਨ੍ਧੂਤਿ ਸਮਾਪਤ੍ਤਿਞਾਣਾਦਿਨਾ ਅਕਤਤਣ੍ਹਾਦਿਟ੍ਠਿਬਨ੍ਧੁ. ਤਤ੍ਥ ਵਿਗ੍ਗਹੋ – ਨਾਪਿ ਅਸ੍ਸ ਞਾਣੇਨ ਕਤੋ ਬਨ੍ਧੁ ਅਤ੍ਥੀਤਿ ਨਪਿ ਞਾਣਬਨ੍ਧੁ. ਸਮ੍ਮੁਤਿਯੋਤਿ ਦਿਟ੍ਠਿਸਮ੍ਮੁਤਿਯੋ. ਪੁਥੁਜ੍ਜਾਤਿ ਪੁਥੁਜ੍ਜਨਸਮ੍ਭਵਾ. ਉਗ੍ਗਹਣਨ੍ਤਿ ਮਞ੍ਞੇਤਿ ਉਗ੍ਗਹਣਨ੍ਤਿ ਅਞ੍ਞੇ, ਅਞ੍ਞੇ ਤਾ ਸਮ੍ਮੁਤਿਯੋ ਉਗ੍ਗਣ੍ਹਨ੍ਤੀਤਿ ਵੁਤ੍ਤਂ ਹੋਤਿ.

ਉਪੇਕ੍ਖਤੀਤਿ ਉਪਪਤ੍ਤਿਤੋ ਅਪਕ੍ਖਪਤਿਤੋ ਹੁਤ੍ਵਾ ਪਸ੍ਸਤਿ.

੧੪੭. ਕਿਞ੍ਚ ਭਿਯ੍ਯੋ – ਵਿਸ੍ਸਜ੍ਜ ਗਨ੍ਥਾਨੀਤਿ ਗਾਥਾ. ਤਤ੍ਥ ਅਨੁਗ੍ਗਹੋਤਿ ਉਗ੍ਗਹਣਵਿਰਹਿਤੋ, ਸੋਪਿ ਨਾਸ੍ਸ ਉਗ੍ਗਹੋਤਿ ਅਨੁਗ੍ਗਹੋ. ਨ ਵਾ ਉਗ੍ਗਣ੍ਹਾਤੀਤਿ ਅਨੁਗ੍ਗਹੋ.

ਗਨ੍ਥੇ ਵੋਸ੍ਸਜ੍ਜਿਤ੍ਵਾਤਿ ਅਭਿਜ੍ਝਾਦਿਕੇ ਗਨ੍ਥੇ ਚਜਿਤ੍ਵਾ. ਵਿਸ੍ਸਜ੍ਜਾਤਿ ਪੁਨ ਅਨਾਦਿਯਨਵਸੇਨ ਜਹਿਤ੍ਵਾ. ਗਧਿਤੇਤਿ ਘਟਿਤੇ. ਗਨ੍ਥਿਤੇਤਿ ਸੁਤ੍ਤੇਨ ਸਙ੍ਗਹਿਤੇ ਵਿਯ ਗਨ੍ਥਿਤੇ. ਬਨ੍ਧੇਤਿ ਸੁਟ੍ਠੁ ਬਨ੍ਧੇ. ਵਿਬਨ੍ਧੇਤਿ ਵਿਵਿਧਾ ਬਨ੍ਧੇ. ਪਲਿਬੁਦ੍ਧੇਤਿ ਸਮਨ੍ਤਤੋ ਬਨ੍ਧਨੇਨ ਬਨ੍ਧੇ. ਬਨ੍ਧਨੇਤਿ ਕਿਲੇਸਬਨ੍ਧਨੇ. ਫੋਟਯਿਤ੍ਵਾਤਿ ਪਪ੍ਫੋਟੇਤ੍ਵਾ. ਸਚ੍ਚਂ ਵਿਸ੍ਸਜ੍ਜਂ ਕਰੋਨ੍ਤੀਤਿ ਵਿਸਙ੍ਖਰਿਤ੍ਵਾ ਅਪਰਿਭੋਗਂ ਕਰੋਨ੍ਤਿ. ਵਿਕੋਪੇਨ੍ਤੀਤਿ ਚੁਣ੍ਣਵਿਚੁਣ੍ਣਂ ਕਰੋਨ੍ਤਿ.

੧੪੮. ਕਿਞ੍ਚ ਭਿਯ੍ਯੋ – ਸੋ ਏਵਰੂਪੋ – ਪੁਬ੍ਬਾਸਵੇਤਿ ਗਾਥਾ. ਤਤ੍ਥ ਪੁਬ੍ਬਾਸਵੇਤਿ ਅਤੀਤਰੂਪਾਦੀਨਿ ਆਰਬ੍ਭ ਉਪ੍ਪਜ੍ਜਨਧਮ੍ਮਕਿਲੇਸੇ. ਨਵੇਤਿ ਪਚ੍ਚੁਪ੍ਪਨ੍ਨਰੂਪਾਦੀਨਿ ਆਰਬ੍ਭ ਉਪ੍ਪਜ੍ਜਨਧਮ੍ਮੇ. ਨ ਛਨ੍ਦਗੂਤਿ ਛਨ੍ਦਾਦਿਵਸੇਨ ਨ ਗਚ੍ਛਤਿ. ਅਨਤ੍ਤਗਰਹੀਤਿ ਕਤਾਕਤਵਸੇਨ ਅਤ੍ਤਾਨਂ ਅਗਰਹਨ੍ਤੋ.

੧੪੯. ਏਵਂ ਅਨਤ੍ਤਗਰਹੀ ਚ – ਸ ਸਬ੍ਬਧਮ੍ਮੇਸੂਤਿ ਗਾਥਾ. ਤਤ੍ਥ ਸਬ੍ਬਧਮ੍ਮੇਸੂਤਿ ਦ੍ਵਾਸਟ੍ਠਿਦਿਟ੍ਠਿਧਮ੍ਮੇਸੁ ‘‘ਯਂ ਕਿਞ੍ਚਿ ਦਿਟ੍ਠਂ ਵਾ’’ਤਿ ਏਵਂਪਭੇਦੇਸੁ. ਪਨ੍ਨਭਾਰੋਤਿ ਪਤਿਤਭਾਰੋ. ਨ ਕਪ੍ਪੇਤੀਤਿ ਨ ਕਪ੍ਪਿਯੋ, ਦੁਵਿਧਮ੍ਪਿ ਕਪ੍ਪਂ ਨ ਕਰੋਤੀਤਿ ਅਤ੍ਥੋ. ਨੂਪਰਤੋਤਿ ਪੁਥੁਜ੍ਜਨਕਲ੍ਯਾਣਕਸੇਕ੍ਖਾ ਵਿਯ ਉਪਰਤਿਸਮਙ੍ਗੀਪਿ ਨੋ ਹੋਤਿ. ਨ ਪਤ੍ਥਿਯੋਤਿ ਨਿਤ੍ਤਣ੍ਹੋ. ਤਣ੍ਹਾ ਹਿ ਪਤ੍ਥਯਤੀਤਿ ਪਤ੍ਥਿਯਾ, ਨਾਸ੍ਸ ਪਤ੍ਥਿਯਾਤਿ ਨ ਪਤ੍ਥਿਯੋ. ਇਤੋ ਪਰਞ੍ਚ ਹੇਟ੍ਠਾ ਚ ਤਤ੍ਥ ਤਤ੍ਥ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ. ਏਵਂ ਅਰਹਤ੍ਤਨਿਕੂਟੇਨੇਵ ਦੇਸਨਂ ਨਿਟ੍ਠਾਪੇਸਿ, ਦੇਸਨਾਪਰਿਯੋਸਾਨੇ ਪੁਰਾਭੇਦਸੁਤ੍ਤੇ (ਮਹਾਨਿ. ੮੩) ਵੁਤ੍ਤਸਦਿਸੋ ਏਵ ਅਭਿਸਮਯੋ ਅਹੋਸੀਤਿ.

ਸਦ੍ਧਮ੍ਮਪ੍ਪਜ੍ਜੋਤਿਕਾਯ ਮਹਾਨਿਦ੍ਦੇਸਟ੍ਠਕਥਾਯ

ਮਹਾਬ੍ਯੂਹਸੁਤ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.