੧੨. ਚੂਲ਼ਬ੍ਯੂਹਸੁਤ੍ਤਨਿਦ੍ਦੇਸਵਣ੍ਣਨਾ

ਦ੍ਵਾਦਸਮੇ ਚੂਲ਼ਬ੍ਯੂਹਸੁਤ੍ਤਨਿਦ੍ਦੇਸੇ ਸਕਂਸਕਂਦਿਟ੍ਠਿਪਰਿਬ੍ਬਸਾਨਾਤਿ ਇਦਮ੍ਪਿ ਤਸ੍ਮਿਂਯੇਵ ਮਹਾਸਮਯੇ ‘‘ਸਬ੍ਬੇਪਿਮੇ ਦਿਟ੍ਠਿਗਤਿਕਾ ‘ਸਾਧੁਰੂਪਾਮ੍ਹਾ’ਤਿ ਭਣਨ੍ਤਿ, ਕਿਂ ਨੁ ਖੋ ਸਾਧੁਰੂਪਾਵ ਇਮੇ ਅਤ੍ਤਨੋ ਏਵ ਦਿਟ੍ਠਿਯਾ ਪਤਿਟ੍ਠਹਨ੍ਤਿ, ਉਦਾਹੁ ਅਞ੍ਞਮ੍ਪਿ ਦਿਟ੍ਠਿਂ ਗਣ੍ਹਨ੍ਤੀ’’ਤਿ ਉਪ੍ਪਨ੍ਨਚਿਤ੍ਤਾਨਂ ਏਕਚ੍ਚਾਨਂ ਦੇਵਤਾਨਂ ਤਮਤ੍ਥਂ ਪਕਾਸੇਤੁਂ ਪੁਰਿਮਨਯੇਨੇਵ ਨਿਮ੍ਮਿਤਬੁਦ੍ਧੇਨ ਅਤ੍ਤਾਨਂ ਪੁਚ੍ਛਾਪੇਤ੍ਵਾ ਵੁਤ੍ਤਂ.

੧੧੩. ਤਤ੍ਥ ਆਦਿਤੋ ਦ੍ਵੇਪਿ ਗਾਥਾ ਪੁਚ੍ਛਾਗਾਥਾਯੇਵ. ਤਾਸੁ ਸਕਂ ਸਕਂ ਦਿਟ੍ਠਿਪਰਿਬ੍ਬਸਾਨਾਤਿ ਅਤ੍ਤਨੋ ਅਤ੍ਤਨੋ ਦਿਟ੍ਠਿਯਾ ਵਸਮਾਨਾ. ਵਿਗ੍ਗਯ੍ਹ ਨਾਨਾ ਕੁਸਲਾ ਵਦਨ੍ਤੀਤਿ ਤਂ ਦਿਟ੍ਠਿਂ ਬਲਵਗ੍ਗਾਹਂ ਗਹੇਤ੍ਵਾ ‘‘ਤਤ੍ਥ ਕੁਸਲਾਮ੍ਹਾ’’ਤਿ ਪਟਿਜਾਨਮਾਨਾ ਪੁਥੁ ਪੁਥੁ ਵਦਨ੍ਤਿ, ਏਕਂ ਨ ਵਦਨ੍ਤਿ. ਯੋ ਏਵਂ ਜਾਨਾਤਿ ਸ ਵੇਦਿ ਧਮ੍ਮਂ, ਇਦਂ ਪਟਿਕ੍ਕੋਸਮਕੇਵਲੀ ਸੋਤਿ ਤਞ੍ਚ ਦਿਟ੍ਠਿਂ ਸਨ੍ਧਾਯ ਯੋ ਏਵਂ ਜਾਨਾਤਿ, ਸੋ ਧਮ੍ਮਂ ਵੇਦਿਯਿ. ਇਦਂ ਪਨ ਪਟਿਕ੍ਕੋਸਨ੍ਤੋ ਹੀਨੋ ਹੋਤੀਤਿ ਚ ਵਦਨ੍ਤਿ.

ਨਾਨਾ ਵਦਨ੍ਤੀਤਿ ਨਾਨਾਕਾਰਣਂ ਭਣਨ੍ਤਿ. ਵਿਵਿਧਂ ਵਦਨ੍ਤੀਤਿ ਨਾਨਾਵਿਧਂ ਭਣਨ੍ਤਿ. ਅਞ੍ਞੋਞ੍ਞਂ ਵਦਨ੍ਤੀਤਿ ਏਕਂ ਅਵਤ੍ਵਾ ਅਞ੍ਞਂ ਅਞ੍ਞਂ ਗਹੇਤ੍ਵਾ ਵਦਨ੍ਤਿ. ਅਕੇਵਲੀ ਸੋਤਿ ਯੋ ਅਕੁਸਲੋ ਅਯਂ. ਅਸਮਤ੍ਤੋਤਿ ਨ ਪਰਿਪੂਰੋ. ਅਪਰਿਪੁਣ੍ਣੋਤਿ ਨ ਸਮ੍ਪੁਣ੍ਣੋ.

੧੧੪. ਬਾਲੋਤਿ ਹੀਨੋ. ਅਕ੍ਕੁਸਲੋਤਿ ਅਵਿਦ੍ਵਾ.

੧੧੫. ਇਦਾਨਿ ਤਿਸ੍ਸੋ ਵਿਸ੍ਸਜ੍ਜਨਗਾਥਾ ਹੋਨ੍ਤੀਤਿ. ਤਾ ਪੁਰਿਮਡ੍ਢੇਨ ਵੁਤ੍ਤਮਤ੍ਥਂ ਪਚ੍ਛਿਮਡ੍ਢੇਨ ਪਟਿਬ੍ਯੂਹਿਤ੍ਵਾ ਠਿਤਾ. ਤੇਨ ਬ੍ਯੂਹੇਨ ਉਤ੍ਤਰਸੁਤ੍ਤਤੋ ਚ ਅਪ੍ਪਕਤ੍ਤਾ ਇਦਂ ਸੁਤ੍ਤਂ ‘‘ਚੂਲ਼ਬ੍ਯੂਹ’’ਨ੍ਤਿ ਨਾਮਂ ਲਭਿ. ਤਤ੍ਥ ਪਠਮਗਾਥਾਯਂ ਤਾਵ ਪਰਸ੍ਸ ਚੇ ਧਮ੍ਮਨ੍ਤਿ ਪਰਸ੍ਸ ਦਿਟ੍ਠਿਂ. ਸਬ੍ਬੇਵਿਮੇ ਬਾਲਾਤਿ ਏਵਂ ਸਨ੍ਤੇ ਸਬ੍ਬੇਵ ਇਮੇ ਬਾਲਾ ਹੋਨ੍ਤੀਤਿ ਅਧਿਪ੍ਪਾਯੋ. ਕਿਂਕਾਰਣਾ? ਸਬ੍ਬੇਵਿਮੇ ਦਿਟ੍ਠਿਪਰਿਬ੍ਬਸਾਨਾਤਿ.

੧੧੬. ਸਨ੍ਦਿਟ੍ਠਿਯਾ ਚੇਵ ਨ ਵੀਵਦਾਤਾ, ਸਂਸੁਦ੍ਧਪਞ੍ਞਾ ਕੁਸਲਾ ਮੁਤੀਮਾਤਿ ਸਕਾਯ ਦਿਟ੍ਠਿਯਾ ਅਨਵੀਵਦਾਤਾ ਅਵੋਦਾਤਾ ਸਂਕਿਲਿਟ੍ਠਾਵ ਸਮਾਨਾ ਸਂਸੁਦ੍ਧਪਞ੍ਞਾ ਚ ਕੁਸਲਾ ਚ ਮੁਤਿਮਨ੍ਤੋ ਚ ਤੇ ਹੋਨ੍ਤਿ ਚੇ. ਅਥ ਵਾ ‘‘ਸਨ੍ਦਿਟ੍ਠਿਯਾ ਚੇ ਵਦਾਤਾ’’ਤਿ ਪਾਠੋ, ਤਸ੍ਸਤ੍ਥੋ – ਸਕਾਯ ਪਨ ਦਿਟ੍ਠਿਯਾ ਵੋਦਾਤਾ ਸਂਸੁਦ੍ਧਪਞ੍ਞਾ ਕੁਸਲਾ ਮੁਤਿਮਨ੍ਤੋ ਹੋਨ੍ਤਿ ਚੇ, ਨ ਤੇਸਂ ਕੋਚੀਤਿ ਏਵਂ ਸਨ੍ਤੇ ਤੇਸਂ ਏਕੋਪਿ ਨਿਹੀਨਪਞ੍ਞੋ ਨ ਹੋਤਿ, ਕਿਂਕਾਰਣਾ? ਦਿਟ੍ਠੀ ਹਿ ਤੇਸਮ੍ਪਿ ਤਥਾ ਸਮਤ੍ਤਾ, ਯਥਾ ਇਤਰੇਸਨ੍ਤਿ.

੧੧੭. ਨ ਵਾਹਮੇਤਨ੍ਤਿ ਗਾਥਾਯ ਸਙ੍ਖੇਪਤ੍ਥੋ – ਯਂ ਤੇ ਮਿਥੁ ਦ੍ਵੇ ਦ੍ਵੇ ਜਨਾ ਅਞ੍ਞਮਞ੍ਞਂ ‘‘ਬਾਲੋ’’ਤਿ ਆਹੁ, ਅਹਂ ਏਤਂ ਤਥਿਯਨ੍ਤਿ ਤਚ੍ਛਨ੍ਤਿ ਨੇਵ ਬ੍ਰੂਮਿ. ਕਿਂਕਾਰਣਾ? ਯਸ੍ਮਾ ਸਬ੍ਬੇਵ ਤੇ ਸਕਂ ਸਕਂ ਦਿਟ੍ਠਿਂ ‘‘ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ ਅਕਂਸੁ, ਤੇਨ ਚ ਕਾਰਣੇਨ ਪਰਂ ‘‘ਬਾਲੋ’’ਤਿ ਦਹਨ੍ਤਿ. ਏਤ੍ਥ ਚ ਤਥਿਯਂ, ਤਥੇਵਨ੍ਤਿ (ਸੁ. ਨਿ. ਅਟ੍ਠ. ੨.੮੮੯) ਦ੍ਵੇਪਿ ਪਾਠਾ.

ਤਚ੍ਛਨ੍ਤਿ ਅਤੁਚ੍ਛਂ. ਤਥਨ੍ਤਿ ਅਵਿਪਰੀਤਂ, ਭੂਤਨ੍ਤਿ ਸਨ੍ਤਂ. ਯਾਥਾਵਨ੍ਤਿ ਸਂਵਿਜ੍ਜਮਾਨਂ. ਅਵਿਪਰਿਤਨ੍ਤਿ ਨ ਵਿਸਙ੍ਕੇਤਂ.

੧੧੮. ਯਮਾਹੂਤਿ ਪੁਚ੍ਛਾਗਾਥਾਯ ‘‘ਯਂ ਦਿਟ੍ਠਿਸਚ੍ਚਂ ਤਥਿਯ’’ਨ੍ਤਿ ਏਕੇ ਆਹੁ.

੧੧੯. ਏਕਞ੍ਹਿ ਸਚ੍ਚਨ੍ਤਿ ਵਿਸ੍ਸਜ੍ਜਨਗਾਥਾਯ ਏਕਂ ਸਚ੍ਚਂ ਨਿਰੋਧੋ ਮਗ੍ਗੋ ਵਾ. ਯਸ੍ਮਿਂ ਪਜਾ ਨੋ ਵਿਵਦੇ ਪਜਾਨਨ੍ਤਿ ਯਮ੍ਹਿ ਸਚ੍ਚੇ ਪਜਾਨਨ੍ਤੋ ਪਜਾ ਨੋ ਵਿਵਦੇਯ੍ਯੁਂ. ਸਯਂ ਥੁਨਨ੍ਤੀਤਿ ਅਤ੍ਤਨਾ ਵਦਨ੍ਤਿ.

੧੨੦. ਕਸ੍ਮਾ ਨੂਤਿ ਪੁਚ੍ਛਾਗਾਥਾਯ ਪਵਾਦਿਯਾਸੇਤਿ ਵਾਦਿਨੋ. ਉਦਾਹੁ ਤੇ ਤਕ੍ਕਮਨੁਸ੍ਸਰਨ੍ਤੀਤਿ ਤੇ ਵਾਦਿਨੋ ਉਦਾਹੁ ਅਤ੍ਤਨੋ ਤਕ੍ਕਮਤ੍ਤਂ ਅਨੁਗਚ੍ਛਨ੍ਤਿ.

ਤਕ੍ਕਪਰਿਯਾਹਤਨ੍ਤਿ ਵਿਤਕ੍ਕੇਨ ਸਮਨ੍ਤਤੋ ਆਹਤਂ. ਵੀਮਂਸਾਨੁਚਰਿਤਨ੍ਤਿ ਅਤ੍ਤਨੋ ਉਪਟ੍ਠਿਤਪਞ੍ਞਾਯ ਵਿਚਰਿਤਂ. ਸਯਂਪਟਿਭਾਨਨ੍ਤਿ ਅਤ੍ਤਨੋ ਪਟਿਭਾਨਂ.

੧੨੧. ਨ ਹੇਵਾਤਿ ਵਿਸ੍ਸਜ੍ਜਨਗਾਥਾਯ ਅਞ੍ਞਤ੍ਰ ਸਞ੍ਞਾਯ ਨਿਚ੍ਚਾਨੀਤਿ ਠਪੇਤ੍ਵਾ ਸਞ੍ਞਾਮਤ੍ਤੇਨ ਨਿਚ੍ਚਨ੍ਤਿ ਗਹਿਤਗ੍ਗਹਣਾਨਿ. ਤਕ੍ਕਞ੍ਚ ਦਿਟ੍ਠੀਸੁ ਪਕਪ੍ਪਯਿਤ੍ਵਾਤਿ ਅਤ੍ਤਨੋ ਨਿਚ੍ਚਸਙ੍ਕਪ੍ਪਮਤ੍ਤਂ ਦਿਟ੍ਠੀਸੁ ਜਨੇਤ੍ਵਾ.

ਯਸ੍ਮਾ ਪਨ ਦਿਟ੍ਠੀਸੁ ਵਿਤਕ੍ਕਂ ਜਨੇਨ੍ਤਾ ਦਿਟ੍ਠਿਯੋ ਸਞ੍ਜਨੇਨ੍ਤਿ, ਤਸ੍ਮਾ ਵੁਤ੍ਤਂ ‘‘ਦਿਟ੍ਠਿਗਤਾਨਿ ਜਨੇਨ੍ਤਿ ਸਞ੍ਜਨੇਨ੍ਤੀ’’ਤਿਆਦਿ. ਜਨੇਨ੍ਤੀਤਿ ਉਪਰੂਪਰਿ ਦਿਟ੍ਠਿਂ ਉਪ੍ਪਾਦੇਨ੍ਤਾ ਜਨੇਨ੍ਤਿ. ਸਞ੍ਜਨੇਨ੍ਤੀਤਿਆਦੀਨਿ ਉਪਸਗ੍ਗਵਸੇਨ ਪਦਂ ਵਡ੍ਢੇਤ੍ਵਾ ਵੁਤ੍ਤਾਨਿ. ਮਯ੍ਹਂ ਸਚ੍ਚਨ੍ਤਿ ਮਮ ਵਚਨਂ ਤਚ੍ਛਂ.

੧੨੨. ਇਦਾਨਿ ਏਵਂ ਨਾਨਾਸਚ੍ਚੇਸੁ ਅਸਨ੍ਤੇਸੁ ਤਕ੍ਕਮਤ੍ਤਂ ਅਨੁਸ੍ਸਰਨ੍ਤਾਨਂ ਦਿਟ੍ਠਿਗਤਿਕਾਨਂ ਵਿਪ੍ਪਟਿਪਤ੍ਤਿਂ ਦਸ੍ਸੇਤੁਂ ‘‘ਦਿਟ੍ਠੇ ਸੁਤੇ’’ਤਿਆਦਿਕਾ ਗਾਥਾਯੋ ਅਭਾਸਿ. ਤਤ੍ਥ ਦਿਟ੍ਠੇਤਿ ਦਿਟ੍ਠਂ, ਦਿਟ੍ਠਸੁਦ੍ਧਿਨ੍ਤਿ ਅਧਿਪ੍ਪਾਯੋ. ਏਸ ਨਯੋ ਸੁਤਾਦੀਸੁ. ਏਤੇ ਚ ਨਿਸ੍ਸਾਯ ਵਿਮਾਨਦਸ੍ਸੀਤਿ ਏਤੇ ਦਿਟ੍ਠਿਧਮ੍ਮੇ ਨਿਸ੍ਸਯਿਤ੍ਵਾ ਸੁਦ੍ਧਿਭਾਵਸਙ੍ਖਾਤਂ ਵਿਮਾਨਂ ਅਸਮ੍ਮਾਨਂ ਪਸ੍ਸਨ੍ਤੋਪਿ. ਵਿਨਿਚ੍ਛਯੇ ਠਤ੍ਵਾ ਪਹਸ੍ਸਮਾਨੋ, ਬਾਲੋ ਪਰੋ ਅਕ੍ਕੁਸਲੋਤਿ ਚਾਹਾਤਿ ਏਵਂ ਵਿਮਾਨਦਸ੍ਸੀਪਿ ਤਸ੍ਮਿਂ ਦਿਟ੍ਠਿਵਿਨਿਚ੍ਛਯੇ ਠਤ੍ਵਾ ਤੁਟ੍ਠਿਜਾਤੋ ਹਾਸਜਾਤੋ ਹੁਤ੍ਵਾ ਪਰੋ ‘‘ਹੀਨੋ ਚ ਅਵਿਦ੍ਵਾ ਚਾ’’ਤਿ ਏਵਂ ਵਦਤਿਯੇਵ.

ਨ ਸਮ੍ਮਾਨੇਤੀਤਿਪਿ ਵਿਮਾਨਦਸ੍ਸੀਤਿ ਨ ਬਹੁਮਾਨਂ ਕਰੋਤੀਤਿ ਏਵਮ੍ਪਿ ਵਿਮਾਨਦਸ੍ਸੀ ਨ ਬਹੁਮਾਨਦਸ੍ਸੀ. ਦੋਮਨਸ੍ਸਂ ਜਨੇਤੀਤਿ ਪਠਮਂ ਦਿਟ੍ਠਿਨਿਸ੍ਸਯਂ ਅਲ੍ਲੀਯਿਤ੍ਵਾ ਦੋਮਨਸ੍ਸਂ ਪਤ੍ਵਾ ਪਚ੍ਛਾ ਦਿਟ੍ਠਿਵਿਨਿਚ੍ਛਯੇ ਠਿਤਕਾਲੇ ਸੋਮਨਸ੍ਸਂ ਉਪ੍ਪਾਦੇਤੀਤਿ ਅਤ੍ਥੋ.

ਵਿਨਿਚ੍ਛਯਦਿਟ੍ਠਿਯਾ ਠਤ੍ਵਾਤਿ ਸਨ੍ਨਿਟ੍ਠਾਨਂ ਕਤ੍ਵਾ ਗਹਿਤਦਿਟ੍ਠਿਯਾ ਠਤ੍ਵਾ.

੧੨੩. ਏਵਂ ਸਨ੍ਤੇ ਯੇਨੇਵਾਤਿ ਗਾਥਾ. ਤਤ੍ਥ ਸਯਮਤ੍ਤਨਾਤਿ ਸਯਮੇਵ ਅਤ੍ਤਾਨਂ. ਵਿਮਾਨੇਤੀਤਿ ਗਰਹਤਿ. ਤਦੇਵ ਪਾਵਾਤਿ ਤਦੇਵ ਵਚਨਂ ਦਿਟ੍ਠਿਂ ਵਦਤਿ, ਤਂ ਵਾ ਪੁਗ੍ਗਲਂ.

੧੨੪. ਅਤਿਸਾਰਦਿਟ੍ਠਿਯਾਤਿ ਗਾਥਾਯਤ੍ਥੋ – ਸੋ ਏਵਂ ਤਾਯ ਲਕ੍ਖਣਾਤਿਸਾਰਿਨਿਯਾ ਅਤਿਸਾਰਦਿਟ੍ਠਿਯਾ ਸਮਤ੍ਤੋ ਪਰਿਪੁਣ੍ਣੋ ਉਦ੍ਧੁਮਾਤੋ, ਤੇਨ ਚ ਦਿਟ੍ਠਿਮਾਨੇਨ ਮਤ੍ਤੋ ‘‘ਪਰਿਪੁਣ੍ਣੋ ਅਹਂ ਕੇਵਲੀ’’ਤਿ ਏਵਂ ਪਰਿਪੁਣ੍ਣਮਾਨੀ. ਸਯਮੇਵ ਅਤ੍ਤਾਨਂ ਮਨਸਾ ‘‘ਅਹਂ ਪਣ੍ਡਿਤੋ’’ਤਿ ਅਭਿਸਿਞ੍ਚਤਿ. ਕਿਂਕਾਰਣਾ? ਦਿਟ੍ਠੀ ਹਿ ਸਾ ਤਸ੍ਸ ਤਥਾ ਸਮਤ੍ਤਾਤਿ.

ਸਬ੍ਬਾ ਤਾ ਦਿਟ੍ਠਿਯੋ ਲਕ੍ਖਣਾਤਿਕ੍ਕਨ੍ਤਾਤਿ ਤਾ ਸਬ੍ਬਾ ਦ੍ਵਾਸਟ੍ਠਿਦਿਟ੍ਠਿਯੋ ਲਕ੍ਖਣਂ ਅਤੀਤਾ ਅਤਿਸਰਨ੍ਤੀਤਿ ਅਤਿਕ੍ਕਨ੍ਤਾ. ਅਨੋਮੋਤਿ ਅਨੂਨੋ.

੧੨੫. ਪਰਸ੍ਸ ਚੇਤਿ ਗਾਥਾਯ ਸਮ੍ਬਨ੍ਧੋ ਅਤ੍ਥੋ ਚ – ਕਿਞ੍ਚ ਭਿਯ੍ਯੋ? ਯੋ ਸੋ ਵਿਨਿਚ੍ਛਯੇ ਠਤ੍ਵਾ ਪਹਸ੍ਸਮਾਨੋ ‘‘ਬਾਲੋ ਪਰੋ ਅਕ੍ਕੁਸਲੋ’’ਤਿ ਚਾਹ, ਤਸ੍ਸ ਪਰਸ੍ਸ ਚੇ ਹਿ ਵਚਸਾ ਸੋ ਤੇਨ ਵੁਚ੍ਚਮਾਨੋ ਨਿਹੀਨੋ ਹੋਤਿ, ਤੁਮੋ ਸਹਾ ਹੋਤਿ ਨਿਹੀਨਪਞ੍ਞੋ, ਸੋਪਿ ਤੇਨੇਵ ਸਹ ਨਿਹੀਨਪਞ੍ਞੋ ਹੋਤਿ. ਸੋਪਿ ਹਿ ਤਂ ‘‘ਬਾਲੋ’’ਤਿ ਵਦਤਿ. ਅਥ ਤਸ੍ਸ ਵਚਨਂ ਅਪ੍ਪਮਾਣਂ, ਸੋ ਪਨ ਸਯਮੇਵ ਵੇਦਗੂ ਚ ਧੀਰੋ ਚ ਹੋਤਿ. ਏਵਂ ਸਨ੍ਤੇ ਨ ਕੋਚਿ ਬਾਲੋ ਸਮਣੇਸੁ ਅਤ੍ਥਿ. ਸਬ੍ਬੇਪਿ ਹਿ ਤੇ ਅਤ੍ਤਨੋ ਇਚ੍ਛਾਯ ਪਣ੍ਡਿਤਾ.

ਵਾਚਾਯਾਤਿ ਕਥਨੇਨ. ਵਚਨੇਨਾਤਿ ਭਾਸਿਤੇਨ. ਨਿਨ੍ਦਿਤਕਾਰਣਾਤਿ ਗਰਹਹੇਤੁਨਾ. ਗਰਹਿਤਕਾਰਣਾਤਿ ਅਵਞ੍ਞਾਤਹੇਤੁਨਾ. ਉਪਵਦਿਤਕਾਰਣਾਤਿ ਉਪਵਾਦਹੇਤੁਨਾ.

੧੨੬. ਅਞ੍ਞਂ ਇਤੋਤਿ ਗਾਥਾਯ ਸਮ੍ਬਨ੍ਧੋ ਅਤ੍ਥੋ ਚ – ‘‘ਅਥ ਚੇ ਸਯਂ ਵੇਦਗੂ ਹੋਤਿ ਧੀਰੋ. ਨ ਕੋਚਿ ਬਾਲੋ ਸਮਣੇਸੁ ਅਤ੍ਥੀ’’ਤਿ ਏਵਞ੍ਹਿ ਵੁਤ੍ਤੇਪਿ ਸਿਯਾ ਕਸ੍ਸਚਿ ‘‘ਕਸ੍ਮਾ’’ਤਿ. ਤਤ੍ਥ ਵੁਚ੍ਚਤੇ – ਯਸ੍ਮਾ ਅਞ੍ਞਂ ਇਤੋ ਯਾਭਿਵਦਨ੍ਤਿ ਧਮ੍ਮਂ, ਅਪਰਦ੍ਧਾ ਸੁਦ੍ਧਿਮਕੇਵਲੀ ਤੇ. ਏਵਮ੍ਪਿ ਤਿਤ੍ਥ੍ਯਾ ਪੁਥੁਸੋ ਵਦਨ੍ਤਿ, ਯੇ ਇਤੋ ਅਞ੍ਞਂ ਦਿਟ੍ਠਿਂ ਅਭਿਵਦਨ੍ਤਿ, ਤੇ ਅਪਰਦ੍ਧਾ ਵਿਰਦ੍ਧਾ ਸੁਦ੍ਧਿਮਗ੍ਗਂ, ਅਕੇਵਲਿਨੋ ਚ ਤੇਤਿ ਏਵਂ ਪੁਥੁਤਿਤ੍ਥਿਯਾ ਯਸ੍ਮਾ ਵਦਨ੍ਤੀਤਿ ਵੁਤ੍ਤਂ ਹੋਤਿ. ਕਸ੍ਮਾ ਪਨੇਵਂ ਵਦਨ੍ਤੀਤਿ ਚੇ? ਸਨ੍ਦਿਟ੍ਠਿਰਾਗੇਨ ਹਿ ਤੇਭਿਰਤ੍ਤਾ, ਯਸ੍ਮਾ ਸਕੇਨ ਦਿਟ੍ਠਿਰਾਗੇਨ ਤੇ ਅਭਿਰਤ੍ਤਾਤਿ ਵੁਤ੍ਤਂ ਹੋਤਿ.

ਤੇ ਸੁਦ੍ਧਿਮਗ੍ਗਨ੍ਤਿ ਤੇ ਅਞ੍ਞਤਿਤ੍ਥਿਯਾ ਅਕਿਲਿਟ੍ਠਮਗ੍ਗਂ. ਵਿਸੁਦ੍ਧਿਮਗ੍ਗਨ੍ਤਿ ਨਿਦ੍ਦੋਸਮਗ੍ਗਂ. ਪਰਿਸੁਦ੍ਧਿਮਗ੍ਗਨ੍ਤਿ ਸੁਕ੍ਕਮਗ੍ਗਂ. ਵੋਦਾਤਮਗ੍ਗਨ੍ਤਿ ਪਣ੍ਡਰਮਗ੍ਗਂ. ਪਰਿਯੋਦਾਤਮਗ੍ਗਨ੍ਤਿ ਪਭਾਵਨ੍ਤਮਗ੍ਗਂ. ਵਿਰਦ੍ਧਾਤਿ ਵੁਤ੍ਤਵਿਧਿਨਾ ਮਗ੍ਗੇਨ ਵਿਰਜ੍ਝਿਤ੍ਵਾ ਠਿਤਾ. ਅਪਰਦ੍ਧਾਤਿ ਅਪਰਜ੍ਝਿਤ੍ਵਾ ਠਿਤਾ. ਖਲਿਤਾਤਿ ਪਰਿਹੀਨਾ. ਗਲਿਤਾਤਿ ਤਤੋ ਭਟ੍ਠਾ. ਅਞ੍ਞਾਯਾਤਿ ਅਞ੍ਞਾਣੇਨ. ਅਪਰਦ੍ਧਾਤਿ ਪਰਾਜਯਮਾਪਨ੍ਨਾ. ਅਥ ਵਾ ‘‘ਞਾਯਾਪਰਦ੍ਧਾ’’ਤਿਪਿ ਪਾਠੋ. ਞਾਯੇਨ ਮਗ੍ਗੇਨ ਵਿਰਦ੍ਧਾਤਿ ਅਤ੍ਥੋ.

੧੨੭. ਏਵਂ ਅਭਿਰਤ੍ਤਾ ਚ – ਇਧੇਵ ਸੁਦ੍ਧਿਨ੍ਤਿ ਗਾਥਾ. ਤਤ੍ਥ ਸਕਾਯਨੇਤਿ ਸਕਮਗ੍ਗੇ. ਦਲ਼੍ਹਂ ਵਦਾਨਾਤਿ ਦਲ਼੍ਹਵਾਦਾ.

ਥਿਰਵਾਦਾਤਿ ਸਨ੍ਨਿਟ੍ਠਾਨਵਾਦਾ. ਬਲਿਕਵਾਦਾਤਿ ਬਲਵਨ੍ਤਵਾਦਾ. ਅਵਟ੍ਠਿਤਵਾਦਾਤਿ ਪਤਿਟ੍ਠਹਿਤ੍ਵਾ ਕਥਿਤਵਾਦਾ.

੧੨੮. ਯੇ ਏਵਞ੍ਚ ਦਲ਼੍ਹਵਾਦਾ, ਤੇਸੁ ਯੋ ਕੋਚਿ ਤਿਤ੍ਥਿਯੋ ਸਕਾਯਨੇ ਵਾਪਿ ਦਲ਼੍ਹਂ ਵਦਾਨੋ ਕਮੇਤ੍ਥ ਬਾਲੋਤਿ ਪਰਂ ਦਹੇਯ੍ਯ, ਸਙ੍ਖੇਪਤੋ ਤਤ੍ਥ ਸਸ੍ਸਤੁਚ੍ਛੇਦਸਙ੍ਖਾਤੇ ਵਿਤ੍ਥਾਰਤੋ ਨਤ੍ਥਿਕਇਸ੍ਸਰਕਾਰਕਨਿਯਤਿਆਦਿਭੇਦੇ ਸਕੇ ਅਯਨੇ ‘‘ਇਦਮੇਵ ਸਚ੍ਚ’’ਨ੍ਤਿ ਦਲ਼੍ਹਂ ਵਦਾਨੋ ਕਂ ਪਰਂ ਏਤ੍ਥ ਦਿਟ੍ਠਿਗਤੇ ‘‘ਬਾਲੋ’’ਤਿ ਸਹ ਧਮ੍ਮੇਨ ਪਸ੍ਸੇਯ੍ਯ, ਨਨੁ ਸਬ੍ਬੋਪਿ ਤਸ੍ਸ ਮਤੇਨ ਪਣ੍ਡਿਤੋ ਏਵ ਸੁਪ੍ਪਟਿਪਨ੍ਨੋ ਏਵ ਚ. ਏਵਂ ਸਨ੍ਤੇ ਸਯਮੇਵ ਸੋ ਮੇਧਗਮਾਵਹੇਯ੍ਯ, ਪਰਂ ਵਦਂ ਬਾਲਮਸੁਦ੍ਧਿਧਮ੍ਮਂ. ਸੋਪਿ ਪਰਂ ‘‘ਬਾਲੋ ਚ ਅਸੁਦ੍ਧਿਧਮ੍ਮੋ ਚ ਅਯ’’ਨ੍ਤਿ ਵਦਨ੍ਤੋ ਅਤ੍ਤਨਾਵ ਕਲਹਂ ਆਵਹੇਯ੍ਯ. ਕਸ੍ਮਾ? ਯਸ੍ਮਾ ਸਬ੍ਬੋਪਿ ਤਸ੍ਸ ਮਤੇਨ ਪਣ੍ਡਿਤੋਯੇਵ ਸੁਪ੍ਪਟਿਪਨ੍ਨੋਯੇਵ ਚ.

੧੨੯. ਏਵਂ ਸਬ੍ਬਥਾਪਿ ਵਿਨਿਚ੍ਛਯੇ ਠਤ੍ਵਾ ਸਯਂ ਪਮਾਯ, ਉਦ੍ਧਂ ਸ ਲੋਕਸ੍ਮਿਂ ਵਿਵਾਦਮੇਤੀਤਿ ਦਿਟ੍ਠਿਯਾ ਠਤ੍ਵਾ ਸਯਞ੍ਚ ਸਤ੍ਥਾਰਾਦਿਂ ਮਿਨਿਤ੍ਵਾ ਸੋ ਭਿਯ੍ਯੋ ਵਿਵਾਦਮੇਤੀਤਿ. ਏਵਂ ਪਨ ਵਿਨਿਚ੍ਛਯੇਸੁ ਆਦੀਨਵਂ ਞਤ੍ਵਾ ਅਰਿਯਮਗ੍ਗੇਨ ਹਿਤ੍ਵਾਨ ਸਬ੍ਬਾਨਿ ਵਿਨਿਚ੍ਛਯਾਨਿ, ਨ ਮੇਧਗਂ ਕੁਬ੍ਬਤਿ ਜਨ੍ਤੁ ਲੋਕੇਤਿ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ.

ਸਯਂ ਪਮਾਯਾਤਿ ਅਤ੍ਤਨਾ ਮਿਨਿਤ੍ਵਾ. ਪਮਿਨਿਤ੍ਵਾਤਿ ਪਮਾਣਂ ਕਤ੍ਵਾ. ‘‘ਪਵਿਨੇਤ੍ਵਾ’’ਤਿਪਿ ਪਾਠੋ, ਤਂ ਨ ਸੁਨ੍ਦਰਂ. ਉਦ੍ਧਂ ਵਾਦੇਨ ਸਦ੍ਧਿਨ੍ਤਿ ਅਤ੍ਤਨੋ ਉਪਰਿ ਕਥੇਨ੍ਤੇਨ ਸਹ. ਦੇਸਨਾਪਰਿਯੋਸਾਨੇ ਪੁਰਾਭੇਦਸੁਤ੍ਤੇ (ਮਹਾਨਿ. ੮੩) ਵੁਤ੍ਤਸਦਿਸੋ ਏਵ ਅਭਿਸਮਯੋ ਅਹੋਸੀਤਿ.

ਸਦ੍ਧਮ੍ਮਪ੍ਪਜ੍ਜੋਤਿਕਾਯ ਮਹਾਨਿਦ੍ਦੇਸਟ੍ਠਕਥਾਯ

ਚੂਲ਼ਬ੍ਯੂਹਸੁਤ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.