੧੦. ਪੁਰਾਭੇਦਸੁਤ੍ਤਨਿਦ੍ਦੇਸਵਣ੍ਣਨਾ

੮੩. ਦਸਮੇ ਪੁਰਾਭੇਦਸੁਤ੍ਤਨਿਦ੍ਦੇਸੇ ਕਥਂਦਸ੍ਸੀਤਿ ਇਮਸ੍ਸ ਸੁਤ੍ਤਸ੍ਸ ਇਤੋ ਪਰੇਸਞ੍ਚ ਪਞ੍ਚਨ੍ਨਂ ਕਲਹਵਿਵਾਦਚੂਲ਼ਬ੍ਯੂਹਮਹਾਬ੍ਯੂਹਤੁਵਟਕਅਤ੍ਤਦਣ੍ਡਸੁਤ੍ਤਾਨਂ ਸਮ੍ਮਾਪਰਿਬ੍ਬਾਜਨੀਯਸੁਤ੍ਤਵਣ੍ਣਨਾਯਂ (ਸੁ. ਨਿ. ਅਟ੍ਠ. ੨.੩੬੨ ਆਦਯੋ) ਵੁਤ੍ਤਨਯੇਨੇਵ ਸਾਮਞ੍ਞਤੋ ਉਪ੍ਪਤ੍ਤਿ ਵੇਦਿਤਬ੍ਬਾ. ਵਿਸੇਸਤੋ ਪਨ ਯਥੇਵ ਤਸ੍ਮਿਂ ਮਹਾਸਮਯੇ ਰਾਗਚਰਿਤਦੇਵਤਾਨਂ ਸਪ੍ਪਾਯਵਸੇਨ ਧਮ੍ਮਂ ਦੇਸੇਤੁਂ ਨਿਮ੍ਮਿਤਬੁਦ੍ਧੇਨ ਅਤ੍ਤਾਨਂ ਪੁਚ੍ਛਾਪੇਤ੍ਵਾ ਸਮ੍ਮਾਪਰਿਬ੍ਬਾਜਨੀਯਸੁਤ੍ਤਨ੍ਤ- (ਸੁ. ਨਿ. ੩੬੧ ਆਦਯੋ) ਮਭਾਸਿ, ਏਵਂ ਤਸ੍ਮਿਂਯੇਵ ਮਹਾਸਮਯੇ ‘‘ਕਿਂ ਨੁ ਖੋ ਪੁਰਾ ਸਰੀਰਭੇਦਾ ਕਤ੍ਤਬ੍ਬ’’ਨ੍ਤਿ ਉਪ੍ਪਨ੍ਨਚਿਤ੍ਤਾਨਂ ਦੇਵਤਾਨਂ ਚਿਤ੍ਤਂ ਞਤ੍ਵਾ ਤਾਸਂ ਅਨੁਗ੍ਗਹਤ੍ਥਂ ਅਡ੍ਢਤੇਲ਼ਸਭਿਕ੍ਖੁਸਤਪਰਿਵਾਰਂ ਨਿਮ੍ਮਿਤਬੁਦ੍ਧਂ ਆਕਾਸੇਨ ਆਨੇਤ੍ਵਾ ਤੇਨ ਅਤ੍ਤਾਨਂ ਪੁਚ੍ਛਾਪੇਤ੍ਵਾ ਇਮਂ ਸੁਤ੍ਤਮਭਾਸਿ.

ਕਥਂ? ਬੁਦ੍ਧਾ ਨਾਮ ਮਹਨ੍ਤਾ ਏਤੇ ਸਤ੍ਤਵਿਸੇਸਾ, ਯਂ ਸਦੇਵਕਸ੍ਸ ਲੋਕਸ੍ਸ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਪਤ੍ਤਂ ਪਰਿਯੇਸਿਤਂ ਅਨੁਵਿਚਰਿਤਂ ਮਨਸਾ ਨ ਕਿਞ੍ਚਿ ਕਤ੍ਥਚਿ ਨੀਲਾਦਿਵਸੇਨ ਵਿਭਤ੍ਤਰੂਪਾਰਮ੍ਮਣੇਸੁ ਵਿਭਤ੍ਤਰੂਪਾਰਮ੍ਮਣਂ ਵਾ, ਭੇਰਿਸਦ੍ਦਾਦਿਵਸੇਨ ਵਿਭਤ੍ਤਸਦ੍ਦਾਰਮ੍ਮਣਾਦੀਸੁ ਸਦ੍ਦਾਦਿਆਰਮ੍ਮਣਂ ਵਾ ਅਤ੍ਥਿ, ਯਂ ਏਤੇਸਂ ਞਾਣਮੁਖੇ ਆਪਾਥਂ ਨਾਗਚ੍ਛਤਿ. ਯਥਾਹ – ‘‘ਯਂ, ਭਿਕ੍ਖਵੇ, ਸਦੇਵਕਸ੍ਸ ਲੋਕਸ੍ਸ…ਪੇ… ਸਦੇਵਮਨੁਸ੍ਸਾਯ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਪਤ੍ਤਂ ਪਰਿਯੇਸਿਤਂ ਅਨੁਵਿਚਰਿਤਂ ਮਨਸਾ, ਤਮਹਂ ਜਾਨਾਮਿ ਤਮਹਂ ਅਬ੍ਭਞ੍ਞਾਸਿ’’ਨ੍ਤਿ (ਅ. ਨਿ. ੪.੨੪). ਏਵਂ ਸਬ੍ਬਤ੍ਥ ਅਪ੍ਪਟਿਹਤਞਾਣੋ ਭਗਵਾ ਸਬ੍ਬਾਪਿ ਤਾ ਦੇਵਤਾ ਭਬ੍ਬਾਭਬ੍ਬਵਸੇਨ ਦ੍ਵੇ ਕੋਟ੍ਠਾਸੇ ਅਕਾਸਿ. ‘‘ਕਮ੍ਮਾਵਰਣੇਨ ਵਾ ਸਮਨ੍ਨਾਗਤਾ’’ਤਿਆਦਿਨਾ (ਪੁ. ਪ. ੧੨) ਹਿ ਨਯੇਨ ਵੁਤ੍ਤਾ ਸਤ੍ਤਾ ਅਭਬ੍ਬਾ ਨਾਮ. ਤੇ ਏਕਵਿਹਾਰੇ ਵਸਨ੍ਤੇਪਿ ਬੁਦ੍ਧਾ ਨ ਓਲੋਕੇਨ੍ਤਿ. ਵਿਪਰੀਤਾ ਪਨ ਭਬ੍ਬਾ ਨਾਮ. ਤੇ ਦੂਰੇ ਵਸਨ੍ਤੇਪਿ ਗਨ੍ਤ੍ਵਾ ਸਙ੍ਗਣ੍ਹਨ੍ਤਿ. ਤਸ੍ਮਿਂ ਦੇਵਤਾਸਨ੍ਨਿਪਾਤੇ ਯੇ ਅਭਬ੍ਬਾ, ਤੇ ਪਹਾਯ ਭਬ੍ਬੇ ਪਰਿਗ੍ਗਹੇਸਿ. ਪਰਿਗ੍ਗਹੇਤ੍ਵਾ ‘‘ਏਤ੍ਤਕਾ ਏਤ੍ਥ ਰਾਗਚਰਿਤਾ, ਏਤ੍ਤਕਾ ਦੋਸਾਦਿਚਰਿਤਾ’’ਤਿ ਚਰਿਯਵਸੇਨ ਛ ਕੋਟ੍ਠਾਸੇ ਅਕਾਸਿ. ਅਥ ਨੇਸਂ ਸਪ੍ਪਾਯਧਮ੍ਮਦੇਸਨਂ ਉਪਧਾਰੇਨ੍ਤੋ ‘‘ਰਾਗਚਰਿਤਾਨਂ ਦੇਵਾਨਂ ਸਮ੍ਮਾਪਰਿਬ੍ਬਾਜਨੀਯਸੁਤ੍ਤਂ (ਸੁ. ਨਿ. ੩੬੧ ਆਦਯੋ) ਕਥੇਸ੍ਸਾਮਿ, ਦੋਸਚਰਿਤਾਨਂ ਕਲਹਵਿਵਾਦਸੁਤ੍ਤਂ (ਸੁ. ਨਿ. ੮੬੮ ਆਦਯੋ), ਮੋਹਚਰਿਤਾਨਂ ਮਹਾਬ੍ਯੂਹਸੁਤ੍ਤਂ (ਸੁ. ਨਿ. ੯੦੧ ਆਦਯੋ), ਵਿਤਕ੍ਕਚਰਿਤਾਨਂ ਚੂਲ਼ਬ੍ਯੂਹਸੁਤ੍ਤਂ (ਸੁ. ਨਿ. ੮੮੪ ਆਦਯੋ), ਸਦ੍ਧਾਚਰਿਤਾਨਂ ਤੁਵਟਕਸੁਤ੍ਤਂ (ਸੁ. ਨਿ. ੯੨੧ ਆਦਯੋ), ਬੁਦ੍ਧਿਚਰਿਤਾਨਂ ਪੁਰਾਭੇਦਸੁਤ੍ਤਂ (ਸੁ. ਨਿ. ੮੫੪ ਆਦਯੋ) ਕਥੇਸ੍ਸਾਮੀ’’ਤਿ ਦੇਸਨਂ ਵਵਤ੍ਥਾਪੇਤ੍ਵਾ ਪੁਨ ਤਂ ਪਰਿਸਂ ਮਨਸਾਕਾਸਿ ‘‘ਅਤ੍ਤਜ੍ਝਾਸਯੇਨ ਨੁ ਖੋ ਜਾਨੇਯ੍ਯ, ਪਰਜ੍ਝਾਸਯੇਨ, ਅਟ੍ਠੁਪ੍ਪਤ੍ਤਿਕੇਨ, ਪੁਚ੍ਛਾਵਸੇਨਾ’’ਤਿ. ਤਤੋ ‘‘ਪੁਚ੍ਛਾਵਸੇਨ ਜਾਨੇਯ੍ਯਾ’’ਤਿ ਞਤ੍ਵਾ ‘‘ਅਤ੍ਥਿ ਨੁ ਖੋ ਕੋਚਿ ਦੇਵਤਾਨਂ ਅਜ੍ਝਾਸਯਂ ਗਹੇਤ੍ਵਾ ਚਰਿਯਵਸੇਨ ਪਞ੍ਹਂ ਪੁਚ੍ਛਿਤੁਂ ਸਮਤ੍ਥੋ’’ਤਿ ‘‘ਤੇਸੁ ਪਞ੍ਚਸਤੇਸੁ ਭਿਕ੍ਖੂਸੁ ਏਕੋਪਿ ਨ ਸਕ੍ਕੋਤੀ’’ਤਿ ਅਦ੍ਦਸ. ਤਤੋ ਅਸੀਤਿਮਹਾਸਾਵਕੇ, ਦ੍ਵੇ ਅਗ੍ਗਸਾਵਕੇ ਚ ਸਮਨ੍ਨਾਹਰਿਤ੍ਵਾ ‘‘ਤੇਪਿ ਨ ਸਕ੍ਕੋਨ੍ਤੀ’’ਤਿ ਦਿਸ੍ਵਾ ਚਿਨ੍ਤੇਸਿ – ‘‘ਸਚੇ ਪਚ੍ਚੇਕਬੁਦ੍ਧੋ ਭਵੇਯ੍ਯ, ਸਕ੍ਕੁਣੇਯ੍ਯ ਨੁ ਖੋ’’ਤਿ. ‘‘ਸੋਪਿ ਨ ਸਕ੍ਕੁਣੇਯ੍ਯੋ’’ਤਿ ਞਤ੍ਵਾ ‘‘ਸਕ੍ਕਸੁਯਾਮਾਦੀਸੁ ਕੋਚਿ ਸਕ੍ਕੁਣੇਯ੍ਯਾ’’ਤਿ ਸਮਨ੍ਨਾਹਰਿ. ਸਚੇ ਹਿ ਤੇਸੁ ਕੋਚਿ ਸਕ੍ਕੁਣੇਯ੍ਯ, ਤਂ ਪੁਚ੍ਛਾਪੇਤ੍ਵਾ ਅਤ੍ਤਨਾ ਵਿਸ੍ਸਜ੍ਜੇਯ੍ਯ. ਨ ਪਨ ਤੇਸੁਪਿ ਕੋਚਿ ਸਕ੍ਕੋਤਿ. ਅਥਸ੍ਸ ਏਤਦਹੋਸਿ – ‘‘ਮਾਦਿਸੋ ਬੁਦ੍ਧੋਯੇਵ ਸਕ੍ਕੁਣੇਯ੍ਯ, ਅਤ੍ਥਿ ਪਨ ਕਤ੍ਥਚਿ ਅਞ੍ਞੋ ਬੁਦ੍ਧੋ’’ਤਿ ਅਨਨ੍ਤਾਸੁ ਲੋਕਧਾਤੂਸੁ ਅਨਨ੍ਤਞਾਣਂ ਪਤ੍ਥਰਿਤ੍ਵਾ ਲੋਕਂ ਓਲੋਕੇਨ੍ਤੋ ਨ ਅਞ੍ਞਂ ਬੁਦ੍ਧਂ ਅਦ੍ਦਸ. ਅਨਚ੍ਛਰਿਯਞ੍ਚੇਤਂ, ਇਦਾਨਿ ਅਤ੍ਤਨਾ ਸਮਂ ਨ ਪਸ੍ਸੇਯ੍ਯ, ਯੋ ਜਾਤਦਿਵਸੇਪਿ ਬ੍ਰਹ੍ਮਜਾਲਵਣ੍ਣਨਾਯਂ (ਦੀ. ਨਿ. ਅਟ੍ਠ. ੧.੭) ਵੁਤ੍ਤਨਯੇਨ ਅਤ੍ਤਨਾ ਸਮਂ ਅਪਸ੍ਸਨ੍ਤੋ ‘‘ਅਗ੍ਗੋਹਮਸ੍ਮਿ ਲੋਕਸ੍ਸਾ’’ਤਿ (ਦੀ. ਨਿ. ੨.੩੧) ਅਪ੍ਪਟਿਵਤ੍ਤਿਯਂ ਸੀਹਨਾਦਂ ਨਦਿ. ਏਵਂ ਅਞ੍ਞਂ ਅਤ੍ਤਨਾ ਸਮਂ ਅਪਸ੍ਸਿਤ੍ਵਾ ਚਿਨ੍ਤੇਸਿ ‘‘ਸਚੇ ਅਹਂ ਪੁਚ੍ਛਿਤ੍ਵਾ ਅਹਮੇਵ ਵਿਸ੍ਸਜ੍ਜੇਯ੍ਯਂ, ਏਵਂ ਤਾ ਦੇਵਤਾ ਨ ਸਕ੍ਖਿਸ੍ਸਨ੍ਤਿ ਪਟਿਵਿਜ੍ਝਿਤੁਂ. ਅਞ੍ਞਸ੍ਮਿਂ ਪਨ ਬੁਦ੍ਧੇਯੇਵ ਪੁਚ੍ਛਨ੍ਤੇ ਮਯਿ ਚ ਵਿਸ੍ਸਜ੍ਜਨ੍ਤੇ ਅਚ੍ਛੇਰਕਂ ਭਵਿਸ੍ਸਤਿ, ਸਕ੍ਖਿਸ੍ਸਨ੍ਤਿ ਚ ਦੇਵਤਾ ਪਟਿਵਿਜ੍ਝਿਤੁਂ, ਤਸ੍ਮਾ ਨਿਮ੍ਮਿਤਬੁਦ੍ਧਂ ਮਾਪੇਸ੍ਸਾਮੀ’’ਤਿ ਅਭਿਞ੍ਞਾਪਾਦਕਂ ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ‘‘ਪਤ੍ਤਚੀਵਰਗ੍ਗਹਣਂ ਆਲੋਕਿਤਂ ਵਿਲੋਕਿਤਂ ਸਮਿਞ੍ਜਿਤਂ ਪਸਾਰਿਤਞ੍ਚ ਮਮ ਸਦਿਸਂਯੇਵ ਹੋਤੂ’’ਤਿ ਕਾਮਾਵਚਰਚਿਤ੍ਤੇਹਿ ਪਰਿਕਮ੍ਮਂ ਕਤ੍ਵਾ ‘‘ਪਾਚੀਨਯੁਗਨ੍ਧਰਪਰਿਕ੍ਖੇਪਤੋ ਉਲ੍ਲਙ੍ਘਯਮਾਨਂ ਚਨ੍ਦਮਣ੍ਡਲਂ ਭਿਨ੍ਦਿਤ੍ਵਾ ਨਿਕ੍ਖਮਨ੍ਤੋ ਵਿਯ ਆਗਚ੍ਛਤੂ’’ਤਿ ਰੂਪਾਵਚਰਚਿਤ੍ਤੇਨ ਅਧਿਟ੍ਠਾਸਿ. ਦੇਵਸਙ੍ਘੋ ਤਂ ਦਿਸ੍ਵਾ ‘‘ਅਞ੍ਞੋਪਿ ਨੁ ਖੋ ਭੋ, ਚਨ੍ਦੋ ਉਗ੍ਗਤੋ’’ਤਿ ਆਹ. ਅਥ ਚਨ੍ਦਂ ਓਹਾਯ ਆਸਨ੍ਨਤਰੇ ਜਾਤੇ ‘‘ਨ ਚਨ੍ਦੋ, ਸੂਰਿਯੋ ਉਗ੍ਗਤੋ’’ਤਿ. ਪੁਨ ਆਸਨ੍ਨਤਰੇ ਜਾਤੇ ‘‘ਨ ਸੂਰਿਯੋ, ਦੇਵਵਿਮਾਨਂ ਏਤ’’ਨ੍ਤਿ. ਪੁਨ ਆਸਨ੍ਨਤਰੇ ਜਾਤੇ ‘‘ਨ ਦੇਵਵਿਮਾਨਂ, ਦੇਵਪੁਤ੍ਤੋ ਏਸੋ’’ਤਿ. ਪੁਨ ਆਸਨ੍ਨਤਰੇ ਜਾਤੇ ‘‘ਨ ਦੇਵਪੁਤ੍ਤੋ, ਮਹਾਬ੍ਰਹ੍ਮਾ ਏਸੋ’’ਤਿ. ਪੁਨ ਆਸਨ੍ਨਤਰੇ ਜਾਤੇ ‘‘ਨ ਮਹਾਬ੍ਰਹ੍ਮਾ, ਅਪਰੋਪਿ ਭੋ ਬੁਦ੍ਧੋ ਆਗਤੋ’’ਤਿ ਆਹ.

ਤਤ੍ਥ ਪੁਥੁਜ੍ਜਨਦੇਵਤਾ ਚਿਨ੍ਤਯਿਂਸੁ – ‘‘ਏਕਬੁਦ੍ਧਸ੍ਸ ਤਾਵ ਅਯਂ ਦੇਵਤਾਸਨ੍ਨਿਪਾਤੋ. ਦ੍ਵਿਨ੍ਨਂ ਕੀਵਮਹਨ੍ਤੋ ਭਵਿਸ੍ਸਤੀ’’ਤਿ. ਅਰਿਯਦੇਵਤਾ ਚਿਨ੍ਤਯਿਂਸੁ – ‘‘ਏਕਿਸ੍ਸਾ ਲੋਕਧਾਤੁਯਾ ਦ੍ਵੇ ਬੁਦ੍ਧਾ ਨਾਮ ਨਤ੍ਥਿ, ਅਦ੍ਧਾ ਭਗਵਾ ਅਤ੍ਤਨਾ ਸਦਿਸਂ ਅਞ੍ਞਂ ਏਕਂ ਬੁਦ੍ਧਂ ਨਿਮ੍ਮਿਨੀ’’ਤਿ. ਅਥਸ੍ਸ ਦੇਵਸਙ੍ਘਸ੍ਸ ਪਸ੍ਸਨ੍ਤਸ੍ਸੇਵ ਨਿਮ੍ਮਿਤਬੁਦ੍ਧੋ ਆਗਨ੍ਤ੍ਵਾ ਦਸਬਲਂ ਅਵਨ੍ਦਿਤ੍ਵਾਵ ਸਮ੍ਮੁਖਟ੍ਠਾਨੇ ਸਮਸਮਂ ਕਤ੍ਵਾ ਮਾਪਿਤੇ ਆਸਨੇ ਨਿਸੀਦਿ. ਭਗਵਤੋ ਬਾਤ੍ਤਿਂਸਮਹਾਪੁਰਿਸਲਕ੍ਖਣਾਨਿ, ਨਿਮ੍ਮਿਤਸ੍ਸਾਪਿ, ਭਗਵਤੋ ਸਰੀਰਾ ਛਬ੍ਬਣ੍ਣਰਸ੍ਮਿਯੋ ਨਿਕ੍ਖਮਨ੍ਤਿ, ਨਿਮ੍ਮਿਤਸ੍ਸਾਪਿ, ਭਗਵਤੋ ਸਰੀਰਰਸ੍ਮਿਯੋ ਨਿਮ੍ਮਿਤਸਰੀਰੇ ਪਟਿਹਞ੍ਞਨ੍ਤਿ, ਨਿਮ੍ਮਿਤਸ੍ਸ ਰਸ੍ਮਿਯੋ ਭਗਵਤੋ ਕਾਯੇ ਪਟਿਹਞ੍ਞਨ੍ਤਿ. ਤਾ ਦ੍ਵਿਨ੍ਨਮ੍ਪਿ ਬੁਦ੍ਧਾਨਂ ਸਰੀਰਤੋ ਉਗ੍ਗਮ੍ਮ ਭਵਗ੍ਗਂ ਆਹਚ੍ਚ ਤਤੋ ਤਤੋ ਪਟਿਨਿਵਤ੍ਤਿਤ੍ਵਾ ਦੇਵਤਾਨਂ ਮਤ੍ਥਕਮਤ੍ਥਕਪਰਿਯਨ੍ਤੇਨ ਓਤਰਿਤ੍ਵਾ ਚਕ੍ਕਵਾਲ਼ਮੁਖਵਟ੍ਟਿਯਂ ਪਤਿਟ੍ਠਹਿਂਸੁ. ਸਕਲਚਕ੍ਕਵਾਲ਼ਗਬ੍ਭਂ ਸੁਵਣ੍ਣਮਯਵਙ੍ਕਗੋਪਾਨਸਿਵਿਨਦ੍ਧਮਿਵ ਚੇਤਿਯਘਰਂ ਵਿਰੋਚਿਤ੍ਥ. ਦਸਸਹਸ੍ਸਚਕ੍ਕਵਾਲ਼ਦੇਵਤਾ ਏਕਚਕ੍ਕਵਾਲ਼ੇ ਰਾਸਿਭੂਤਾ ਦ੍ਵਿਨ੍ਨਂ ਬੁਦ੍ਧਾਨਂ ਰਸ੍ਮਿਅਬ੍ਭਨ੍ਤਰਂ ਪਵਿਸਿਤ੍ਵਾ ਅਟ੍ਠਂਸੁ. ਨਿਮ੍ਮਿਤੋ ਨਿਸੀਦਨ੍ਤੋਯੇਵ ‘‘ਕਥਂਦਸ੍ਸੀ ਕਥਂਸੀਲੋ, ਉਪਸਨ੍ਤੋਤਿ ਵੁਚ੍ਚਤੀ’’ਤਿਆਦਿਨਾ ਨਯੇਨ ਅਧਿਪਞ੍ਞਾਦਿਕਂ ਪੁਚ੍ਛਨ੍ਤੋ ਗਾਥਮਾਹ.

ਤਤ੍ਥ ਪੁਚ੍ਛਾਯ ਤਾਵ ਸੋ ਨਿਮ੍ਮਿਤੋ ਕਥਂਦਸ੍ਸੀਤਿ ਅਧਿਪਞ੍ਞਂ, ਕਥਂਸੀਲੋਤਿ ਅਧਿਸੀਲਂ, ਉਪਸਨ੍ਤੋਤਿ ਅਧਿਚਿਤ੍ਤਂ ਪੁਚ੍ਛਤਿ. ਸੇਸਂ ਪਾਕਟਮੇਵ.

ਨਿਮ੍ਮਿਤਬੁਦ੍ਧਾਦਿਵਿਭਾਵਨਤ੍ਥਂ ਪੇਟਕੇ –

‘‘ਉਪੇਤਿ ਧਮ੍ਮਂ ਪਰਿਪੁਚ੍ਛਮਾਨੋ, ਕੁਸਲਂ ਅਤ੍ਥੁਪਸਞ੍ਹਿਤਂ;

ਨ ਜੀਵਤਿ ਨ ਨਿਬ੍ਬੁਤੋ ਨ ਮਤੋ, ਤਂ ਪੁਗ੍ਗਲਂ ਕਤਮਂ ਵਦਨ੍ਤਿ ਬੁਦ੍ਧਾ. (ਪਰਿ. ੪੭੯);

‘‘ਸਂਸਾਰਖੀਣੋ ਨ ਚ ਵਨ੍ਤਰਾਗੋ, ਨ ਚਾਪਿ ਸੇਕ੍ਖੋ ਨ ਚ ਦਿਟ੍ਠਧਮ੍ਮੋ;

ਅਖੀਣਾਸਵੋ ਅਨ੍ਤਿਮਦੇਹਧਾਰੀ, ਤਂ ਪੁਗ੍ਗਲਂ ਕਤਮਂ ਵਦਨ੍ਤਿ ਬੁਦ੍ਧਾ.

‘‘ਨ ਦੁਕ੍ਖਸਚ੍ਚੇਨ ਸਮਙ੍ਗਿਭੂਤੋ, ਨ ਮਗ੍ਗਸਚ੍ਚੇਨ ਕੁਤੋ ਨਿਰੋਧੋ;

ਸਮੁਦਯਸਚ੍ਚਤੋ ਸੁਵਿਦੂਰਵਿਦੂਰੋ, ਤਂ ਪੁਗ੍ਗਲਂ ਕਤਮਂ ਵਦਨ੍ਤਿ ਬੁਦ੍ਧਾ.

‘‘ਅਹੇਤੁਕੋ ਨੋਪਿ ਚ ਰੂਪਨਿਸ੍ਸਿਤੋ, ਅਪਚ੍ਚਯੋ ਨੋਪਿ ਚ ਸੋ ਅਸਙ੍ਖਤੋ;

ਅਸਙ੍ਖਤਾਰਮ੍ਮਣੋ ਨੋਪਿ ਚ ਰੂਪੀ, ਤਂ ਪੁਗ੍ਗਲਂ ਕਤਮਂ ਵਦਨ੍ਤਿ ਬੁਦ੍ਧਾ’’ਤਿ. –

ਵੁਤ੍ਤਂ.

ਤਤ੍ਥ ਪਠਮਗਾਥਾ ਨਿਮ੍ਮਿਤਬੁਦ੍ਧਂ ਸਨ੍ਧਾਯ, ਦੁਤਿਯਗਾਥਾ ਪਚ੍ਛਿਮਭਵਿਕਬੋਧਿਸਤ੍ਤਂ ਸਨ੍ਧਾਯ, ਤਤਿਯਗਾਥਾ ਅਰਹਤ੍ਤਫਲਟ੍ਠਂ ਸਨ੍ਧਾਯ, ਚਤੁਤ੍ਥਗਾਥਾ ਅਰੂਪੇ ਨਿਬ੍ਬਾਨਪਚ੍ਚਵੇਕ੍ਖਣਮਨੋਦ੍ਵਾਰਪੁਰੇਚਾਰਿਕਚਿਤ੍ਤਸਮਙ੍ਗਿਂ ਸਨ੍ਧਾਯ ਵੁਤ੍ਤਾਤਿ ਞਾਤਬ੍ਬਾ. ਕੀਦਿਸੇਨ ਦਸ੍ਸਨੇਨਾਤਿ ਕੀਦਿਸਵਸੇਨ ਦਸ੍ਸਨੇਨ. ਕਿਂਸਣ੍ਠਿਤੇਨਾਤਿ ਕਿਂਸਰਿਕ੍ਖੇਨ. ਕਿਂਪਕਾਰੇਨਾਤਿ ਕਿਂਵਿਧੇਨ. ਕਿਂਪਟਿਭਾਗੇਨਾਤਿ ਕਿਂਆਕਾਰੇਨ.

ਯਂ ਪੁਚ੍ਛਾਮੀਤਿ ਯਂ ਪੁਗ੍ਗਲਂ ਪੁਚ੍ਛਾਮਿ, ਤਂ ਮਯ੍ਹਂ ਵਿਯਾਕਰੋਹਿ. ਯਾਚਾਮੀਤਿ ਆਯਾਚਾਮਿ. ਅਜ੍ਝੇਸਾਮੀਤਿ ਆਣਾਪੇਮਿ. ਪਸਾਦੇਮੀਤਿ ਤਵ ਸਨ੍ਤਾਨੇ ਸੋਮਨਸ੍ਸਂ ਉਪ੍ਪਾਦੇਮਿ. ਬ੍ਰੂਹੀਤਿ ਨਿਦ੍ਦੇਸਸ੍ਸ ਉਦ੍ਦੇਸਪਦਂ. ਆਚਿਕ੍ਖਾਤਿ ਦੇਸੇਤਬ੍ਬਾਨਂ ‘‘ਇਮਾਨਿ ਨਾਮਾਨੀ’’ਤਿ ਨਾਮਵਸੇਨ ਕਥੇਹਿ. ਦੇਸੇਹੀਤਿ ਦਸ੍ਸੇਹਿ. ਪਞ੍ਞਪੇਹੀਤਿ ਜਾਨਾਪੇਹਿ. ਞਾਣਮੁਖਵਸੇਨ ਹਿ ਅਪ੍ਪਨਂ ਠਪੇਨ੍ਤੋ ‘‘ਪਞ੍ਞਪੇਹੀ’’ਤਿ ਵੁਚ੍ਚਤਿ. ਪਟ੍ਠਪੇਹੀਤਿ ਪਞ੍ਞਾਪੇਹਿ, ਪਵਤ੍ਤਾਪੇਹੀਤਿ ਅਤ੍ਥੋ. ਞਾਣਮੁਖੇ ਠਪੇਹੀਤਿ ਵਾ. ਵਿਵਰਾਤਿ ਵਿਵਟਂ ਕਰੋਹਿ, ਵਿਵਰਿਤ੍ਵਾ ਦਸ੍ਸੇਹੀਤਿ ਅਤ੍ਥੋ. ਵਿਭਜਾਤਿ ਵਿਭਾਗਕਿਰਿਯਾਯ ਵਿਭਾਵੇਨ੍ਤੋ ਦਸ੍ਸੇਹੀਤਿ ਅਤ੍ਥੋ. ਉਤ੍ਤਾਨੀਕਰੋਹੀਤਿ ਪਾਕਟਭਾਵਂ ਕਰੋਹਿ.

ਅਥ ਵਾ ਆਚਿਕ੍ਖਾਤਿ ਦੇਸਨਾਦੀਨਂ ਛਨ੍ਨਂ ਪਦਾਨਂ ਮੂਲਪਦਂ. ਦੇਸਨਾਦੀਨਿ ਛ ਪਦਾਨਿ ਏਤਸ੍ਸ ਅਤ੍ਥਸ੍ਸ ਵਿਵਰਣਤ੍ਥਂ ਵੁਤ੍ਤਾਨਿ. ਤਤ੍ਥ ਦੇਸੇਹੀਤਿ ਉਗ੍ਘਟਿਤਞ੍ਞੂਨਂ ਵਸੇਨ ਸਙ੍ਖੇਪਤੋ ਪਠਮਂ ਉਦ੍ਦੇਸਵਸੇਨ ਦੇਸੇਹਿ. ਉਗ੍ਘਟਿਤਞ੍ਞੂ ਹਿ ਸਙ੍ਖੇਪੇਨ ਵੁਤ੍ਤਂ ਪਠਮਂ ਵੁਤ੍ਤਞ੍ਚ ਪਟਿਵਿਜ੍ਝਨ੍ਤਿ. ਪਞ੍ਞਪੇਹੀਤਿ ਵਿਪਞ੍ਚਿਤਞ੍ਞੂਨਂ ਵਸੇਨ ਤੇਸਂ ਚਿਤ੍ਤਤੋਸਨੇਨ ਬੁਦ੍ਧਿਨਿਸਾਨੇਨ ਚ ਪਠਮਂ ਸਂਖਿਤ੍ਤਸ੍ਸ ਵਿਤ੍ਥਾਰਤੋ ਨਿਦ੍ਦੇਸਵਸੇਨੇਵ ਪਞ੍ਞਪੇਹਿ. ਪਟ੍ਠਪੇਹੀਤਿ ਤੇਸਂਯੇਵ ਨਿਦ੍ਦਿਟ੍ਠਸ੍ਸ ਨਿਦ੍ਦੇਸਸ੍ਸ ਪਟਿਨਿਦ੍ਦੇਸਵਸੇਨ ਵਿਤ੍ਥਾਰਿਤਵਸੇਨ ਠਪੇਤਿ ਪਟ੍ਠਪੇਹਿ. ਵਿਵਰਾਤਿ ਨਿਦ੍ਦਿਟ੍ਠਸ੍ਸਪਿ ਪੁਨਪ੍ਪੁਨਂ ਵਚਨੇਨ ਵਿਵਰਾਹਿ. ਵਿਭਜਾਤਿ ਪੁਨਪ੍ਪੁਨਂ ਵੁਤ੍ਤਸ੍ਸਾਪਿ ਵਿਭਾਗਕਰਣੇਨ ਵਿਭਜਾਹਿ. ਉਤ੍ਤਾਨੀਕਰੋਹੀਤਿ ਵਿਵਟਸ੍ਸ ਵਿਤ੍ਥਾਰਤਰਵਚਨੇਨ ਵਿਭਤ੍ਤਸ੍ਸ ਚ ਨਿਦਸ੍ਸਨਵਚਨੇਨ ਉਤ੍ਤਾਨਿਂ ਕਰੋਹਿ. ਅਯਂ ਦੇਸਨਾ ਨੇਯ੍ਯਾਨਮ੍ਪਿ ਪਟਿਵੇਧਾਯ ਹੋਤੀਤਿ.

੮੪. ਵਿਸ੍ਸਜ੍ਜਨੇ ਪਨ ਭਗਵਾ ਸਰੂਪੇਨ ਅਧਿਪਞ੍ਞਾਦੀਨਿ ਅਵਿਸ੍ਸਜ੍ਜੇਤ੍ਵਾਵ ਅਧਿਪਞ੍ਞਾਦਿਪ੍ਪਭਾਵੇਨ ਯੇਸਂ ਕਿਲੇਸਾਨਂ ਉਪਸਮਾ ‘‘ਉਪਸਨ੍ਤੋ’’ਤਿ ਵੁਚ੍ਚਤਿ, ਨਾਨਾਦੇਵਤਾਨਂ ਆਸਯਾਨੁਲੋਮੇਨ ਤੇਸਂ ਉਪਸਮਮੇਵ ਦੀਪੇਨ੍ਤੋ ‘‘ਵੀਤਤਣ੍ਹੋ’’ਤਿਆਦਿਕਾ ਗਾਥਾਯੋ ਅਭਾਸਿ. ਤਤ੍ਥ ਆਦਿਤੋ ਅਟ੍ਠਨ੍ਨਂ ਗਾਥਾਨਂ ‘‘ਤਂ ਬ੍ਰੂਮਿ ਉਪਸਨ੍ਤੋ’’ਤਿ ਇਮਾਯ ਗਾਥਾਯ ਸਮ੍ਬਨ੍ਧੋ ਵੇਦਿਤਬ੍ਬੋ, ਤਤੋ ਪਰਾਸਂ ‘‘ਸ ਵੇ ਸਨ੍ਤੋਤਿ ਵੁਚ੍ਚਤੀ’’ਤਿ ਇਮਿਨਾ ਸਬ੍ਬਪਚ੍ਛਿਮੇਨ ਪਦੇਨ.

ਅਨੁਪਦਵਣ੍ਣਨਾਨਯੋ – ਵੀਤਤਣ੍ਹੋ ਪੁਰਾਭੇਦਾਤਿ ਯੋ ਸਰੀਰਭੇਦਾ ਪੁਬ੍ਬਮੇਵ ਪਹੀਨਤਣ੍ਹੋ. ਪੁਬ੍ਬਮਨ੍ਤਮਨਿਸ੍ਸਿਤੋਤਿ ਅਤੀਤਦ੍ਧਾਦਿਭੇਦਂ ਪੁਬ੍ਬਅਨ੍ਤਂ ਅਨਿਸ੍ਸਿਤੋ. ਵੇਮਜ੍ਝੇ ਨੁਪਸਙ੍ਖੇਯ੍ਯੋਤਿ ਪਚ੍ਚੁਪ੍ਪਨ੍ਨੇਪਿ ਅਦ੍ਧਨਿ ‘‘ਰਤ੍ਤੋ’’ਤਿਆਦਿਨਾ ਨਯੇਨ ਨ ਉਪਸਙ੍ਖਾਤਬ੍ਬੋ. ਤਸ੍ਸ ਨਤ੍ਥਿ ਪੁਰਕ੍ਖਤਨ੍ਤਿ ਤਸ੍ਸ ਅਰਹਤੋ ਦ੍ਵਿਨ੍ਨਂ ਪੁਰੇਕ੍ਖਾਰਾਨਂ ਅਭਾਵਾ ਅਨਾਗਤੇ ਅਦ੍ਧਨਿ ਪੁਰਕ੍ਖਤਮਪਿ ਨਤ੍ਥਿ, ਤਂ ਬ੍ਰੂਮਿ ਉਪਸਨ੍ਤੋਤਿ ਏਵਮੇਤ੍ਥ ਯੋਜਨਾ ਵੇਦਿਤਬ੍ਬਾ. ਏਸ ਨਯੋ ਸਬ੍ਬਤ੍ਥ.

ਪੁਰਾ ਕਾਯਸ੍ਸ ਭੇਦਾਤਿ ਕਰਜਕਾਯਸ੍ਸ ਭੇਦਤੋ ਪੁਬ੍ਬੇਯੇਵ. ਅਤ੍ਤਭਾਵਸ੍ਸਾਤਿ ਸਕਲਤ੍ਤਭਾਵਸ੍ਸ. ਕਲ਼ੇਵਰਸ੍ਸ ਨਿਕ੍ਖੇਪਾਤਿ ਕਲ਼ੇਵਰਸ੍ਸ ਨਿਕ੍ਖੇਪਤੋ ਸਰੀਰਸ੍ਸ ਠਪਨਤੋ. ਜੀਵਿਤਿਨ੍ਦ੍ਰਿਯਸ੍ਸ ਉਪਚ੍ਛੇਦਾਤਿ ਦੁਵਿਧਸ੍ਸ ਜੀਵਿਤਿਨ੍ਦ੍ਰਿਯਸ੍ਸ ਉਪਚ੍ਛੇਦਤੋ ਪੁਬ੍ਬਮੇਵ.

ਪੁਬ੍ਬਨ੍ਤੋ ਵੁਚ੍ਚਤਿ ਅਤੀਤੋ ਅਦ੍ਧਾਤਿ ਪੁਬ੍ਬਸਙ੍ਖਾਤੋ ਅਨ੍ਤੋ ਕੋਟ੍ਠਾਸੋ ‘‘ਅਤੀਤੋ ਅਦ੍ਧਾਤਿ, ਅਤਿਕ੍ਕਨ੍ਤੋ ਕਾਲੋ’’ਤਿ ਕਥੀਯਤਿ. ਅਤੀਤਂ ਅਦ੍ਧਾਨਂ ਆਰਬ੍ਭਾਤਿ ਅਤੀਤਕਾਲਂ ਪਟਿਚ੍ਚ ਤਣ੍ਹਾ ਪਹੀਨਾ.

ਅਪਰਮ੍ਪਿ ਭਦ੍ਦੇਕਰਤ੍ਤਪਰਿਯਾਯਂ (ਮ. ਨਿ. ੩.੨੭੨ ਆਦਯੋ) ਦਸ੍ਸੇਨ੍ਤੋ ‘‘ਅਥ ਵਾ’’ਤਿਆਦਿਮਾਹ. ਤਤ੍ਥ ਏਵਂਰੂਪੋ ਅਹੋਸਿਨ੍ਤਿ ਕਾਲ਼ੋਪਿ ਸਮਾਨੋ ਇਨ੍ਦਨੀਲਮਣਿਵਣ੍ਣੋ ਅਹੋਸਿਨ੍ਤਿ ਏਵਂ ਮਨੁਞ੍ਞਰੂਪਵਸੇਨੇਵ ਏਵਂਰੂਪੋ ਅਹੋਸਿਂ. ਕੁਸਲਸੁਖਸੋਮਨਸ੍ਸਵੇਦਨਾਵਸੇਨੇਵ ਏਵਂਵੇਦਨੋ. ਤਂ ਸਮ੍ਪਯੁਤ੍ਤਾਨਂਯੇਵ ਸਞ੍ਞਾਦੀਨਂ ਵਸੇਨ ਏਵਂਸਞ੍ਞੋ. ਏਵਂਸਙ੍ਖਾਰੋ. ਏਵਂਵਿਞ੍ਞਾਣੋ ਅਹੋਸਿਂ ਅਤੀਤਮਦ੍ਧਾਨਨ੍ਤਿ ਤਤ੍ਥ ਨਨ੍ਦਿਂ ਨ ਸਮਨ੍ਨਾਨੇਤੀਤਿ ਤੇਸੁ ਰੂਪਾਦੀਸੁ ਤਣ੍ਹਂ ਵਾ ਤਣ੍ਹਾਸਮ੍ਪਯੁਤ੍ਤਦਿਟ੍ਠਿਂ ਵਾ ਨਾਨੁਪਵਤ੍ਤਯਤਿ. ਅਪਰੇਨ ਪਰਿਯਾਯੇਨ ਮਹਾਕਚ੍ਚਾਨਭਦ੍ਦੇਕਰਤ੍ਤਪਰਿਯਾਯਂ ਦਸ੍ਸੇਨ੍ਤੋ ‘‘ਅਥ ਵਾ ਇਤਿ ਮੇ ਚਕ੍ਖੁ ਅਹੋਸੀ’’ਤਿਆਦਿਮਾਹ. ਤਤ੍ਥ ਚਕ੍ਖੂਤਿ ਚਕ੍ਖੁਪਸਾਦੋ. ਰੂਪਾਤਿ ਚਤੁਸਮੁਟ੍ਠਾਨਿਕਰੂਪਾ. ਇਮਿਨਾ ਨਯੇਨ ਸੇਸਾਯਤਨਾਨਿਪਿ ਵੇਦਿਤਬ੍ਬਾਨਿ. ਵਿਞ੍ਞਾਣਨ੍ਤਿ ਨਿਸ੍ਸਯਵਿਞ੍ਞਾਣਂ. ਨ ਤਦਭਿਨਨ੍ਦਤੀਤਿ ਤਂ ਚਕ੍ਖੁਞ੍ਚੇਵ ਰੂਪਞ੍ਚ ਤਣ੍ਹਾਦਿਟ੍ਠਿਵਸੇਨ ਨਾਭਿਨਨ੍ਦਤਿ. ਇਤਿ ਮੇ ਮਨੋ ਅਹੋਸਿ ਇਤਿ ਧਮ੍ਮਾਤਿ ਏਤ੍ਥ ਪਨ ਮਨੋਤਿ ਭਵਙ੍ਗਚਿਤ੍ਤਂ. ਧਮ੍ਮਾਤਿ ਤੇਭੂਮਕਧਮ੍ਮਾਰਮ੍ਮਣਂ. ਹਸਿਤਲਪਿਤਕੀਲ਼ਿਤਾਨੀਤਿ ਦਨ੍ਤਵਿਦਂਸਕਹਸਿਤਞ੍ਚ ਵਾਚਾਲਪਿਤਞ੍ਚ ਕਾਯਕੀਲ਼ਾਦਿਕੀਲ਼ਿਤਞ੍ਚਾਤਿ ਹਸਿਤਲਪਿਤਕੀਲ਼ਿਤਾਨਿ. ਨ ਤਦਸ੍ਸਾਦੇਤੀਤਿ ਤਾਨਿ ਹਸਿਤਾਦੀਨਿ ਨਾਭਿਨਨ੍ਦਤਿ. ਨ ਤਂ ਨਿਕਾਮੇਤੀਤਿ ਕਨ੍ਤਂ ਨ ਕਰੋਤਿ. ਨ ਚ ਤੇਨ ਵਿਤ੍ਤਿਂ ਆਪਜ੍ਜਤੀਤਿ ਤੇਨ ਚ ਤੁਟ੍ਠਿਂ ਨ ਪਾਪੁਣਾਤਿ.

ਤਂ ਤਂ ਪਚ੍ਚਯਂ ਪਟਿਚ੍ਚ ਉਪ੍ਪਨ੍ਨੋਤਿ ਪਚ੍ਚੁਪ੍ਪਨ੍ਨੋ. ਰਤ੍ਤੋਤਿ ਨੁਪਸਙ੍ਖੇਯ੍ਯੋਤਿ ਰਾਗੇਨ ਰਤ੍ਤੋਤਿ ਗਣਨਂ ਨ ਉਪਨੇਤਬ੍ਬੋ. ਉਪਰਿਪਿ ਏਸੇਵ ਨਯੋ. ਏਵਰੂਪੋ ਸਿਯਨ੍ਤਿਆਦੀਸੁ ਪਣੀਤਮਨੁਞ੍ਞਰੂਪਾਦਿਵਸੇਨੇਵ ਤਣ੍ਹਾਦਿਟ੍ਠਿਪਵਤ੍ਤਨਸਙ੍ਖਾਤਾ ਨਨ੍ਦੀ ਸਮਨ੍ਨਾਨਯਨਾ ਵੇਦਿਤਬ੍ਬਾ. ਨ ਪਣਿਦਹਤੀਤਿ ਪਤ੍ਥਨਾਵਸੇਨ ਨ ਠਪੇਤਿ. ਅਪ੍ਪਣਿਧਾਨਪਚ੍ਚਯਾਤਿ ਨ ਪਤ੍ਥਨਾਠਪਨਕਾਰਣੇਨ.

੮੫. ਅਸਨ੍ਤਾਸੀਤਿ ਤੇਨ ਤੇਨ ਅਲਾਭਤੋ ਅਸਨ੍ਤਸਨ੍ਤੋ. ਅਵਿਕਤ੍ਥੀਤਿ ਸੀਲਾਦੀਹਿ ਅਵਿਕਤ੍ਥਨਸੀਲੋ. ਅਕੁਕ੍ਕੁਚੋਤਿ ਹਤ੍ਥਕੁਕ੍ਕੁਚ੍ਚਾਦਿਵਿਰਹਿਤੋ. ਮਨ੍ਤਭਾਣੀਤਿ ਮਨ੍ਤਾਯ ਪਰਿਗ੍ਗਹੇਤ੍ਵਾ ਵਾਚਂ ਭਾਸਿਤਾ. ਅਨੁਦ੍ਧਤੋਤਿ ਉਦ੍ਧਚ੍ਚਵਿਰਹਿਤੋ. ਸ ਵੇ ਵਾਚਾਯਤੋਤਿ ਸੋ ਵਾਚਾਯ ਯਤੋ ਸਂਯਤੋ ਚਤੁਦੋਸਵਿਰਹਿਤਂ ਵਾਚਂ ਭਾਸਿਤਾ ਹੋਤਿ.

ਅਕ੍ਕੋਧਨੋਤਿ ਯਞ੍ਹਿ ਖੋ ਵੁਤ੍ਤਨ੍ਤਿ ‘‘ਨ ਕੋਧਨੋ ਅਕੋਧਨੋ ਕੋਧਵਿਰਹਿਤੋ’’ਤਿ ਯਂ ਕਥਿਤਂ, ਤਂ ਪਠਮਂ ਤਾਵ ਕੋਧਂ ਕਥੇਤੁਕਾਮੋ ‘‘ਅਪਿਚ ਕੋਧੋ ਤਾਵ ਵਤ੍ਤਬ੍ਬੋ’’ਤਿ ਆਹ. ਕੋਧੋ ਤਾਵ ਵਤ੍ਤਬ੍ਬੋਤਿ ਪਠਮਂ ਕੋਧੋ ਕਥੇਤਬ੍ਬੋ. ਦਸਹਾਕਾਰੇਹਿ ਕੋਧੋ ਜਾਯਤੀਤਿ ਦਸਹਿ ਕਾਰਣੇਹਿ ਕੋਧੋ ਉਪ੍ਪਜ੍ਜਤਿ. ਅਨਤ੍ਥਂ ਮੇ ਅਚਰੀਤਿ ਅਵਡ੍ਢਿਂ ਮੇ ਅਕਾਸਿ, ਇਮਿਨਾ ਉਪਾਯੇਨ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ. ਅਟ੍ਠਾਨੇ ਵਾ ਪਨ ਕੋਧੋ ਜਾਯਤੀਤਿ ਅਕਾਰਣੇ ਕੋਧੋ ਉਪ੍ਪਜ੍ਜਤਿ. ਏਕਚ੍ਚੋ ਹਿ ‘‘ਦੇਵੋ ਅਤਿਵਸ੍ਸਤੀ’’ਤਿ ਕੁਪ੍ਪਤਿ, ‘‘ਨ ਵਸ੍ਸਤੀ’’ਤਿ ਕੁਪ੍ਪਤਿ, ‘‘ਸੂਰਿਯੋ ਤਪ੍ਪਤੀ’’ਤਿ ਕੁਪ੍ਪਤਿ, ‘‘ਨ ਤਪ੍ਪਤੀ’’ਤਿ ਕੁਪ੍ਪਤਿ, ਵਾਤੇ ਵਾਯਨ੍ਤੇਪਿ ਕੁਪ੍ਪਤਿ, ਅਵਾਯਨ੍ਤੇਪਿ ਕੁਪ੍ਪਤਿ, ਸਮ੍ਮਜ੍ਜਿਤੁਂ ਅਸਕ੍ਕੋਨ੍ਤੋ ਬੋਧਿਪਣ੍ਣਾਨਂ ਕੁਪ੍ਪਤਿ, ਚੀਵਰਂ ਪਾਰੁਪਿਤੁਂ ਅਸਕ੍ਕੋਨ੍ਤੋ ਵਾਤਸ੍ਸ ਕੁਪ੍ਪਤਿ, ਉਪਕ੍ਖਲਿਤ੍ਵਾ ਖਾਣੁਕਸ੍ਸ ਕੁਪ੍ਪਤਿ. ਇਦਂ ਸਨ੍ਧਾਯ ਵੁਤ੍ਤਂ – ‘‘ਅਟ੍ਠਾਨੇ ਵਾ ਪਨ ਕੋਧੋ ਜਾਯਤੀ’’ਤਿ. ਤਤ੍ਥ ਹੇਟ੍ਠਾ ਨਵਸੁ ਠਾਨੇਸੁ ਸਤ੍ਤੇ ਆਰਬ੍ਭ ਉਪ੍ਪਨ੍ਨਤ੍ਤਾ ਕਮ੍ਮਪਥਭੇਦੋ ਹੋਤਿ.

ਅਟ੍ਠਾਨਘਾਤੋ ਪਨ ਸਙ੍ਖਾਰੇਸੁ ਉਪ੍ਪਨ੍ਨੋ ਕਮ੍ਮਪਥਭੇਦਂ ਨ ਕਰੋਤਿ. ਚਿਤ੍ਤਂ ਆਘਾਤੇਨ੍ਤੋ ਉਪ੍ਪਨ੍ਨੋਤਿ ਚਿਤ੍ਤਸ੍ਸ ਆਘਾਤੋ. ਤਤੋ ਬਲਵਤਰੋ ਪਟਿਘਾਤੋ. ਪਟਿਹਞ੍ਞਨਵਸੇਨ ਪਟਿਘਂ. ਪਟਿਵਿਰੁਜ੍ਝਤੀਤਿ ਪਟਿਵਿਰੋਧੋ. ਕੁਪ੍ਪਨਵਸੇਨ ਕੋਪੋ. ਪਕੋਪੋ ਸਮ੍ਪਕੋਪੋਤਿ ਉਪਸਗ੍ਗਵਸੇਨ ਪਦਂ ਵਡ੍ਢਿਤਂ. ਦੁਸ੍ਸਨਵਸੇਨ ਦੋਸੋ. ਪਦੋਸੋ ਸਮ੍ਪਦੋਸੋਤਿ ਉਪਸਗ੍ਗਵਸੇਨ ਪਦਂ ਵਡ੍ਢਿਤਂ. ਚਿਤ੍ਤਸ੍ਸ ਬ੍ਯਾਪਤ੍ਤੀਤਿ ਚਿਤ੍ਤਸ੍ਸ ਵਿਪਨ੍ਨਤਾ ਵਿਪਰਿਵਤ੍ਤਨਾਕਾਰੋ. ਮਨਂ ਪਦੂਸਯਮਾਨੋ ਉਪ੍ਪਜ੍ਜਤੀਤਿ ਮਨੋਪਦੋਸੋ. ਕੁਜ੍ਝਨਵਸੇਨ ਕੋਧੋ. ਕੁਜ੍ਝਨਾਕਾਰੋ ਕੁਜ੍ਝਨਾ. ਕੁਜ੍ਝਿਤਸ੍ਸ ਭਾਵੋ ਕੁਜ੍ਝਿਤਤ੍ਤਂ. ਦੁਸ੍ਸਤੀਤਿ ਦੋਸੋ. ਦੁਸ੍ਸਨਾਤਿ ਦੁਸ੍ਸਨਾਕਾਰੋ. ਦੁਸ੍ਸਿਤਤ੍ਤਨ੍ਤਿ ਦੁਸ੍ਸਿਤਭਾਵੋ. ਪਕਤਿਭਾਵਵਿਜਹਨਟ੍ਠੇਨ ਬ੍ਯਾਪਜ੍ਜਨਂ ਬ੍ਯਾਪਤ੍ਤਿ. ਬ੍ਯਾਪਜ੍ਜਨਾਤਿ ਬ੍ਯਾਪਜ੍ਜਨਾਕਾਰੋ. ਵਿਰੁਜ੍ਝਤੀਤਿ ਵਿਰੋਧੋ. ਪੁਨਪ੍ਪੁਨਂ ਵਿਰੁਜ੍ਝਤੀਤਿ ਪਟਿਵਿਰੋਧੋ. ਵਿਰੁਦ੍ਧਾਕਾਰਪਟਿਵਿਰੁਦ੍ਧਾਕਾਰਵਸੇਨ ਵਾ ਇਦਂ ਵੁਤ੍ਤਂ. ਚਣ੍ਡਿਕੋ ਵੁਚ੍ਚਤਿ ਚਣ੍ਡੋ, ਥਦ੍ਧਪੁਗ੍ਗਲੋ, ਤਸ੍ਸ ਭਾਵੋ ਚਣ੍ਡਿਕ੍ਕਂ. ਨ ਏਤੇਨ ਸੁਰੋਪਿਤਂ ਵਚਨਂ ਹੋਤਿ, ਦੁਰੁਤ੍ਤਂ ਅਪਰਿਪੁਣ੍ਣਮੇਵ ਹੋਤੀਤਿ ਅਸੁਰੋਪੋ. ਕੁਦ੍ਧਕਾਲੇ ਹਿ ਪਰਿਪੁਣ੍ਣਵਚਨਂ ਨਾਮ ਨਤ੍ਥਿ, ਸਚੇਪਿ ਕਸ੍ਸਚਿ ਹੋਤਿ, ਤਂ ਅਪ੍ਪਮਾਣਂ. ਅਪਰੇ ਪਨ ‘‘ਅਸ੍ਸੁਜਨਨਟ੍ਠੇਨ ਅਸ੍ਸੁਰੋਪਨਤੋ ਅਸ੍ਸੁਰੋਪੋ’’ਤਿ ਵਦਨ੍ਤਿ, ਤਂ ਅਕਾਰਣਂ ਸੋਮਨਸ੍ਸਸ੍ਸਾਪਿ ਅਸ੍ਸੁਜਨਨਤੋ. ਹੇਟ੍ਠਾਵੁਤ੍ਤਅਤ੍ਤਮਨਤਾਪਟਿਪਕ੍ਖਤੋ ਨ ਅਤ੍ਤਮਨਤਾਤਿ ਅਨਤ੍ਤਮਨਤਾ. ਸਾ ਪਨ ਯਸ੍ਮਾ ਚਿਤ੍ਤਸ੍ਸੇਵ, ਨ ਸਤ੍ਤਸ੍ਸ, ਤਸ੍ਮਾ ‘‘ਚਿਤ੍ਤਸ੍ਸਾ’’ਤਿ ਵੁਤ੍ਤਂ.

ਅਧਿਮਤ੍ਤਪਰਿਤ੍ਤਤਾ ਵੇਦਿਤਬ੍ਬਾਤਿ ਅਧਿਮਤ੍ਤਭਾਵੋ ਪਰਿਤ੍ਤਭਾਵੋ ਚ, ਬਲਵਭਾਵੋ ਮਨ੍ਦਭਾਵੋਤਿ ਅਤ੍ਥੋ. ਕਞ੍ਚਿ ਕਾਲੇਤਿ ਏਕਦਾ. ‘‘ਕਞ੍ਚਿ ਕਾਲ’’ਨ੍ਤਿਪਿ ਪਾਠੋ. ਚਿਤ੍ਤਾਵਿਲਕਰਣਮਤ੍ਤੋ ਹੋਤੀਤਿ ਚਿਤ੍ਤਸ੍ਸ ਆਵਿਲਕਰਣਪ੍ਪਮਾਣੋ, ਚਿਤ੍ਤਕਿਲਿਟ੍ਠਕਰਣਪ੍ਪਮਾਣੋਤਿ ਅਤ੍ਥੋ. ‘‘ਚਿਤ੍ਤਾਲਸਕਰਣਮਤ੍ਤੋ’’ਤਿਪਿ ਪਾਠੋ, ਤਂ ਨ ਸੁਨ੍ਦਰਂ. ਤਸ੍ਸ ਚਿਤ੍ਤਕਿਲਮਥਕਰਣਮਤ੍ਤੋਤਿ ਅਤ੍ਥੋ. ਨ ਚ ਤਾਵ ਮੁਖਕੁਲਾਨਵਿਕੁਲਾਨੋ ਹੋਤੀਤਿ ਮੁਖਸ੍ਸ ਸਙ੍ਕੋਚਨਵਿਸਙ੍ਕੋਚਨੋ ਨ ਚ ਤਾਵ ਹੋਤਿ. ਨ ਚ ਤਾਵ ਹਨੁਸਞ੍ਚੋਪਨੋ ਹੋਤੀਤਿ ਦ੍ਵਿਨ੍ਨਂ ਹਨੂਨਂ ਅਪਰਾਪਰਂ ਚਲਨੋ ਨ ਚ ਤਾਵ ਹੋਤਿ. ਨ ਚ ਤਾਵ ਫਰੁਸਵਾਚਂ ਨਿਚ੍ਛਾਰਣੋ ਹੋਤੀਤਿ ਪਰੇਸਂ ਮਮ੍ਮਚ੍ਛੇਦਕਂ ਫਰੁਸਵਾਚਂ ਮੁਖਤੋ ਨੀਹਰਣੇਨ ਬਹਿ ਨਿਕ੍ਖਮਨੋ ਨ ਚ ਤਾਵ ਹੋਤਿ. ਨ ਚ ਤਾਵ ਦਿਸਾਵਿਦਿਸਾਨੁਵਿਲੋਕਨੋ ਹੋਤੀਤਿ ਪਰਸ੍ਸ ਅਬ੍ਭੁਕ੍ਕਿਰਣਤ੍ਥਂ ਦਣ੍ਡਾਦਿਅਤ੍ਥਾਯ ਦਿਸਞ੍ਚ ਅਨੁਦਿਸਞ੍ਚ ਪੁਨਪ੍ਪੁਨਂ ਵਿਲੋਕਨੋ ਨ ਚ ਤਾਵ ਹੋਤਿ.

ਨ ਚ ਤਾਵ ਦਣ੍ਡਸਤ੍ਥਪਰਾਮਸਨੋ ਹੋਤੀਤਿ ਆਘਾਤਨਤ੍ਥਂ ਦਣ੍ਡਞ੍ਚ ਏਕਤੋਧਾਰਾਦਿਸਤ੍ਥਞ੍ਚ ਆਦਿਯਨੋ ਨ ਚ ਤਾਵ ਹੋਤਿ. ਨ ਚ ਤਾਵ ਦਣ੍ਡਸਤ੍ਥਅਬ੍ਭੁਕ੍ਕਿਰਣੋ ਹੋਤੀਤਿ ਵੁਤ੍ਤਪ੍ਪਕਾਰਂ ਦਣ੍ਡਸਤ੍ਥਂ ਉਕ੍ਖਿਪਿਤ੍ਵਾ ਪਹਰਣੋ ਨ ਚ ਤਾਵ ਹੋਤਿ. ਨ ਚ ਤਾਵ ਦਣ੍ਡਸਤ੍ਥਅਭਿਨਿਪਾਤਨੋ ਹੋਤੀਤਿ ਏਤਂ ਦੁਵਿਧਂ ਪਰਸ੍ਸ ਪਹਰਣਤ੍ਥਂ ਨ ਚ ਤਾਵ ਖਿਪਨੋ ਹੋਤਿ. ਨ ਚ ਤਾਵ ਛਿਨ੍ਨਵਿਚ੍ਛਿਨ੍ਨਕਰਣੋ ਹੋਤੀਤਿ ਦਣ੍ਡਸਤ੍ਥਾਦਿਖਿਪਨੇਨ ਪਰਸਰੀਰਂ ਦ੍ਵਿਧਾਕਰਣੋ ਚ ਵਿਵਿਧਾਕਾਰੇਨ ਵਣਕਰਣੋ ਚ ਨ ਤਾਵ ਹੋਤਿ. ‘‘ਛਿਦ੍ਦਵਿਚ੍ਛਿਦ੍ਦਕਰਣੋ’’ਤਿਪਿ ਪਾਠੋ. ਨ ਚ ਤਾਵ ਸਮ੍ਭਞ੍ਜਨਪਲਿਭਞ੍ਜਨੋ ਹੋਤੀਤਿ ਸਰੀਰਂ ਭਞ੍ਜਿਤ੍ਵਾ ਚੁਣ੍ਣਵਿਚੁਣ੍ਣਕਰਣੋ ਨ ਚ ਤਾਵ ਹੋਤਿ. ਨ ਚ ਤਾਵ ਅਙ੍ਗਮਙ੍ਗਅਪਕਡ੍ਢਨੋ ਹੋਤੀਤਿ ਅਙ੍ਗਪਚ੍ਚਙ੍ਗਂ ਸਮ੍ਪਗ੍ਗਹੇਤ੍ਵਾ ਅਪਨੇਤ੍ਵਾ ਕਡ੍ਢਨੋ ਨ ਚ ਤਾਵ ਹੋਤਿ. ਨ ਚ ਤਾਵ ਜੀਵਿਤਾ ਵੋਰੋਪਨੋ ਹੋਤੀਤਿ ਜੀਵਿਤਿਨ੍ਦ੍ਰਿਯਤੋ ਵੋਰੋਪਨੋ ਨ ਚ ਤਾਵ ਹੋਤਿ. ਨ ਚ ਤਾਵ ਸਬ੍ਬਚਾਗਪਰਿਚ੍ਚਾਗਾਯ ਸਣ੍ਠਿਤੋ ਹੋਤੀਤਿ ਸਬ੍ਬਂ ਪਰਸ੍ਸ ਜੀਵਿਤਂ ਨਾਸੇਤ੍ਵਾ ਅਤ੍ਤਨੋ ਜੀਵਿਤਨਾਸਨਤ੍ਥਾਯ ਸਣ੍ਠਿਤੋ ਨ ਚ ਤਾਵ ਹੋਤਿ. ਇਦਂ ਵੁਤ੍ਤਂ ਹੋਤਿ – ਯਦਾ ਅਞ੍ਞਂ ਜੀਵਿਤਾ ਵੋਰੋਪੇਤ੍ਵਾ ਅਤ੍ਤਾਨਂ ਜੀਵਿਤਾ ਵੋਰੋਪਨਤ੍ਥਾਯ ਠਿਤੋ, ਤਦਾ ਸਬ੍ਬਚਾਗਪਰਿਚ੍ਚਾਗਾ ਨਾਮ ਹੋਤਿ. ਵੁਤ੍ਤਞ੍ਹੇਤਂ ਭਗਵਤਾ –

‘‘ਕੋਧਂ ਛੇਤ੍ਵਾ ਸੁਖਂ ਸੇਤਿ, ਕੋਧਂ ਛੇਤ੍ਵਾ ਨ ਸੋਚਤਿ;

ਕੋਧਸ੍ਸ ਵਿਸਮੂਲਸ੍ਸ, ਮਧੁਰਗ੍ਗਸ੍ਸ ਬ੍ਰਾਹ੍ਮਣ;

ਵਧਂ ਅਰਿਯਾ ਪਸਂਸਨ੍ਤਿ, ਤਞ੍ਹਿ ਛੇਤ੍ਵਾ ਨ ਸੋਚਤੀ’’ਤਿ. (ਸਂ. ਨਿ. ੧.੧੮੭, ੨੬੭);

ਯਤੋਤਿ ਯਦਾ. ਪਰਪੁਗ੍ਗਲਂ ਘਾਟੇਤ੍ਵਾਤਿ ਪਰਪੁਗ੍ਗਲਂ ਨਾਸੇਤ੍ਵਾ. ਅਤ੍ਤਾਨਂ ਘਾਟੇਤੀਤਿ ਅਤ੍ਤਾਨਂ ਮਾਰੇਤਿ. ਪਰਮੁਸ੍ਸਦਗਤੋਤਿ ਅਤਿਬਲਵਭਾਵਂ ਗਤੋ. ਪਰਮਵੇਪੁਲ੍ਲਪ੍ਪਤ੍ਤੋਤਿ ਅਤਿਵਿਪੁਲਭਾਵਂ ਪਤ੍ਤੋ. ਕੋਧਸ੍ਸ ਪਹੀਨਤ੍ਤਾਤਿ ਅਨਾਗਾਮਿਮਗ੍ਗੇਨ ਵੁਤ੍ਤਪ੍ਪਕਾਰਸ੍ਸ ਕੋਧਸ੍ਸ ਪਹੀਨਭਾਵੇਨ. ਕੋਧਵਤ੍ਥੁਸ੍ਸ ਪਰਿਞ੍ਞਾਤਤ੍ਤਾਤਿ ਕੋਧਸ੍ਸ ਪਤਿਟ੍ਠਾਭੂਤਸ੍ਸ ਕਾਰਣਭੂਤਸ੍ਸ ਪਿਯਾਪਿਯਅਟ੍ਠਾਨਸਙ੍ਖਾਤਸ੍ਸ ਵਤ੍ਥੁਸ੍ਸ ਞਾਤਤੀਰਣਪਰਿਞ੍ਞਾਹਿ ਬ੍ਯਾਪੇਤ੍ਵਾ ਞਾਤਭਾਵੇਨ. ਕੋਧਹੇਤੁਸ੍ਸ ਉਪਚ੍ਛਿਨ੍ਨਤ੍ਤਾਤਿ ਕੋਧਸ੍ਸ ਜਨਕਹੇਤੁਨੋ ਦੋਮਨਸ੍ਸਸਹਗਤਚਿਤ੍ਤੁਪ੍ਪਾਦਸ੍ਸ ਉਚ੍ਛਿਨ੍ਨਭਾਵੇਨ.

ਤਾਸੀਤਿ ਭਾਯਨਸੀਲੋ ਹੋਤਿ. ਉਤ੍ਤਾਸੀਤਿ ਅਤਿਭਾਯਨਸੀਲੋ. ਪਰਿਤ੍ਤਾਸੀਤਿ ਸਮਨ੍ਤਤੋ ਭਾਯਨਸੀਲੋ. ਭਾਯਤੀਤਿ ਭਯਂ ਉਪ੍ਪਜ੍ਜਤਿ. ਸਨ੍ਤਾਸਂ ਆਪਜ੍ਜਤੀਤਿ ਵਿਰੂਪਭਾਵਂ ਪਾਪੁਣਾਤਿ. ਕਤ੍ਥੀ ਹੋਤੀਤਿ ਅਤ੍ਤਨੋ ਵਣ੍ਣਭਣਨਸੀਲੋ ਹੋਤਿ. ਵਿਕਤ੍ਥੀਤਿ ਵਿਵਿਧਾ ਨਾਨਪ੍ਪਕਾਰਤੋ ਵਣ੍ਣਭਣਨਸੀਲੋ. ਜਾਤਿਯਾ ਵਾਤਿ ਖਤ੍ਤਿਯਭਾਵਾਦਿਜਾਤਿਸਮ੍ਪਤ੍ਤਿਯਾ ਵਾ. ਗੋਤ੍ਤੇਨ ਵਾਤਿ ਗੋਤਮਗੋਤ੍ਤਾਦਿਨਾ ਉਕ੍ਕਟ੍ਠਗੋਤ੍ਤੇਨ ਵਾ. ਕੋਲਪੁਤ੍ਤਿਯੇਨ ਵਾਤਿ ਮਹਾਕੁਲਭਾਵੇਨ ਵਾ. ਵਣ੍ਣਪੋਕ੍ਖਰਤਾਯ ਵਾਤਿ ਵਣ੍ਣਸਮ੍ਪਨ੍ਨਸਰੀਰਤਾਯ ਵਾ. ਸਰੀਰਞ੍ਹਿ ‘‘ਪੋਕ੍ਖਰ’’ਨ੍ਤਿ ਵੁਚ੍ਚਤਿ, ਤਸ੍ਸ ਵਣ੍ਣਸਮ੍ਪਤ੍ਤਿਯਾ ਅਭਿਰੂਪਭਾਵੇਨਾਤਿ ਅਤ੍ਥੋ. ਧਨੇਨ ਵਾਤਿਆਦੀਨਿ ਉਤ੍ਤਾਨਤ੍ਥਾਨੇਵ.

ਕੁਕ੍ਕੁਚ੍ਚਨ੍ਤਿ ਨਿਦ੍ਦੇਸਸ੍ਸ ਉਦ੍ਦੇਸਪਦਂ. ਤਤ੍ਥ ਕੁਕ੍ਕੁਚ੍ਚਨ੍ਤਿ ਕੁਚ੍ਛਿਤਂ ਕਤਂ ਕੁਕਤਂ, ਤਸ੍ਸ ਭਾਵੋ ਕੁਕ੍ਕੁਚ੍ਚਂ. ਤਂ ਪਚ੍ਛਾਨੁਤਾਪਲਕ੍ਖਣਂ, ਕਤਾਕਤਾਨੁਸੋਚਨਰਸਂ, ਵਿਪ੍ਪਟਿਸਾਰਪਚ੍ਚੁਪਟ੍ਠਾਨਂ, ਕਤਾਕਤਪਦਟ੍ਠਾਨਂ, ਦਾਸਬ੍ਯਂ ਵਿਯ ਦਟ੍ਠਬ੍ਬਂ. ਹਤ੍ਥਕੁਕ੍ਕੁਚ੍ਚਮ੍ਪੀਤਿ ਹਤ੍ਥੇਹਿ ਕੁਚ੍ਛਿਤਂ ਕਤਂ ਕੁਕਤਂ, ਤਸ੍ਸ ਭਾਵੋ ਹਤ੍ਥਕੁਕ੍ਕੁਚ੍ਚਂ. ਪਾਦਕੁਕ੍ਕੁਚ੍ਚਾਦੀਸੁਪਿ ਏਸੇਵ ਨਯੋ.

ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾਤਿ ਅਚ੍ਛਮਂਸਂ ਸੂਕਰਮਂਸਨ੍ਤਿ ਖਾਦਤਿ, ਦੀਪਿਮਂਸਂ ਮਿਗਮਂਸਨ੍ਤਿ ਖਾਦਤਿ, ਅਕਪ੍ਪਿਯਭੋਜਨਂ ਕਪ੍ਪਿਯਭੋਜਨਨ੍ਤਿ ਭੁਞ੍ਜਤਿ, ਵਿਕਾਲੇ ਕਾਲਸਞ੍ਞਿਤਾਯ ਭੁਞ੍ਜਤਿ, ਅਕਪ੍ਪਿਯਪਾਨਕਂ ਕਪ੍ਪਿਯਪਾਨਕਨ੍ਤਿ ਪਿਵਤਿ. ਅਯਂ ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾ. ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾਤਿ ਸੂਕਰਮਂਸਂ ਅਚ੍ਛਮਂਸਨ੍ਤਿ ਖਾਦਤਿ, ਮਿਗਮਂਸਂ ਦੀਪਿਮਂਸਨ੍ਤਿ ਖਾਦਤਿ, ਕਪ੍ਪਿਯਭੋਜਨਂ ਅਕਪ੍ਪਿਯਭੋਜਨਨ੍ਤਿ ਭੁਞ੍ਜਤਿ, ਕਾਲੇ ਵਿਕਾਲਸਞ੍ਞਿਤਾਯ ਭੁਞ੍ਜਤਿ, ਕਪ੍ਪਿਯਪਾਨਕਂ ਅਕਪ੍ਪਿਯਪਾਨਕਨ੍ਤਿ ਪਿਵਤਿ. ਅਯਂ ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾ. ਅਵਜ੍ਜੇ ਵਜ੍ਜਸਞ੍ਞਿਤਾਤਿ ਨਿਦ੍ਦੋਸੇ ਦੋਸਸਞ੍ਞਿਤਾ. ਵਜ੍ਜੇ ਅਵਜ੍ਜਸਞ੍ਞਿਤਾਤਿ ਸਦੋਸੇ ਨਿਦ੍ਦੋਸਸਞ੍ਞਿਤਾ. ਕੁਕ੍ਕੁਚ੍ਚਾਯਨਾਤਿ ਕੁਕ੍ਕੁਚ੍ਚਾਯਨਾਕਾਰੋ. ਕੁਕ੍ਕੁਚ੍ਚਾਯਿਤਤ੍ਤਨ੍ਤਿ ਕੁਕ੍ਕੁਚ੍ਚਾਯਿਤਭਾਵੋ. ਚੇਤਸੋ ਵਿਪ੍ਪਟਿਸਾਰੋਤਿ ਚਿਤ੍ਤਸ੍ਸ ਵਿਰੂਪੋ ਪਟਿਸਰਣਭਾਵੋ. ਮਨੋਵਿਲੇਖੋਤਿ ਚਿਤ੍ਤਸ੍ਸ ਵਿਲੇਖੋ.

ਕਤਤ੍ਤਾ ਚ ਅਕਤਤ੍ਤਾ ਚਾਤਿ ਕਾਯਦੁਚ੍ਚਰਿਤਾਦੀਨਂ ਕਤਭਾਵੇਨ ਚ ਕਾਯਸੁਚਰਿਤਾਦੀਨਂ ਅਕਤਭਾਵੇਨ ਚ. ਕਤਂ ਮੇ ਕਾਯਦੁਚ੍ਚਰਿਤਨ੍ਤਿ ਮਯਾ ਕਾਯੇਨ ਕਿਲੇਸਪੂਤਿਕਤ੍ਤਾ ਦੁਟ੍ਠੁ ਚਰਿਤਂ ਕਾਯੇਨ ਕਤਂ. ਅਕਤਂ ਮੇ ਕਾਯਸੁਚਰਿਤਨ੍ਤਿ ਮਯਾ ਕਾਯੇਨ ਸੁਟ੍ਠੁ ਚਰਿਤਂ ਨ ਕਤਂ. ਵਚੀਦੁਚ੍ਚਰਿਤਵਚੀਸੁਚਰਿਤਾਦੀਸੁਪਿ ਏਸੇਵ ਨਯੋ ਨਿਰੋਧਪਰਿਯੋਸਾਨੇਸੁ.

ਚਿਤ੍ਤਸ੍ਸਾਤਿ ਨ ਸਤ੍ਤਸ੍ਸ ਨ ਪੋਸਸ੍ਸ. ਉਦ੍ਧਚ੍ਚਨ੍ਤਿ ਉਦ੍ਧਤਾਕਾਰੋ. ਅਵੂਪਸਮੋਤਿ ਨ ਵੂਪਸਮੋ. ਚੇਤੋ ਵਿਕ੍ਖਿਪਤੀਤਿ ਚੇਤਸੋ ਵਿਕ੍ਖੇਪੋ, ਭਨ੍ਤਤ੍ਤਂ ਚਿਤ੍ਤਸ੍ਸਾਤਿ ਚਿਤ੍ਤਸ੍ਸ ਭਨ੍ਤਭਾਵੋ ਭਨ੍ਤਯਾਨਭਨ੍ਤਗੋਣਾਦੀਨਂ ਵਿਯ. ਇਮਿਨਾ ਏਕਾਰਮ੍ਮਣਸ੍ਮਿਂਯੇਵ ਵਿਪ੍ਫਨ੍ਦਨਂ ਕਥਿਤਂ. ਉਦ੍ਧਚ੍ਚਞ੍ਹਿ ਏਕਾਰਮ੍ਮਣੇ ਵਿਪ੍ਫਨ੍ਦਤਿ, ਵਿਚਿਕਿਚ੍ਛਾ ਨਾਨਾਰਮ੍ਮਣੇਤਿ. ਇਦਂ ਵੁਚ੍ਚਤਿ ਉਦ੍ਧਚ੍ਚਨ੍ਤਿ ਅਯਂ ਉਦ੍ਧਤਭਾਵੋ ਕਥੀਯਤਿ.

ਮੁਸਾਵਾਦਂ ਪਹਾਯਾਤਿ ਏਤ੍ਥ ਮੁਸਾਤਿ ਵਿਸਂਵਾਦਨਪੁਰੇਕ੍ਖਾਰਸ੍ਸ ਅਤ੍ਥਭਞ੍ਜਕੋ ਵਚੀਪਯੋਗੋ ਕਾਯਪਯੋਗੋ ਵਾ. ਵਿਸਂਵਾਦਨਾਧਿਪ੍ਪਾਯੇਨ ਪਨਸ੍ਸ ਪਰਵਿਸਂਵਾਦਕਕਾਯਵਚੀਪਯੋਗਸਮੁਟ੍ਠਾਪਿਕਾ ਚੇਤਨਾ ਮੁਸਾਵਾਦੋ.

ਅਪਰੋ ਨਯੋ – ਮੁਸਾਤਿ ਅਭੂਤਂ ਅਤਚ੍ਛਂ ਵਤ੍ਥੁ. ਵਾਦੋਤਿ ਤਸ੍ਸ ਭੂਤਤੋ ਤਚ੍ਛਤੋ ਵਿਞ੍ਞਾਪਨਂ. ਲਕ੍ਖਣਤੋ ਪਨ ਅਤਥਂ ਵਤ੍ਥੁਂ ਤਥਤੋ ਪਰਂ ਵਿਞ੍ਞਾਪੇਤੁਕਾਮਸ੍ਸ ਤਥਾਵਿਞ੍ਞਤ੍ਤਿਸਮੁਟ੍ਠਾਪਿਕਾ ਚੇਤਨਾ ਮੁਸਾਵਾਦੋ, ਤਂ ਮੁਸਾਵਾਦਂ. ਪਹਾਯਾਤਿ ਇਮਂ ਮੁਸਾਵਾਦਚੇਤਨਾਸਙ੍ਖਾਤਂ ਦੁਸ੍ਸੀਲ੍ਯਂ ਪਜਹਿਤ੍ਵਾ. ਪਟਿਵਿਰਤੋਤਿ ਪਹੀਨਕਾਲਤੋ ਪਟ੍ਠਾਯ ਤਤੋ ਦੁਸ੍ਸੀਲ੍ਯਤੋ ਓਰਤੋ ਵਿਰਤੋਵ. ਨਤ੍ਥਿ ਤਸ੍ਸ ਵੀਤਿਕ੍ਕਮਿਸ੍ਸਾਮੀਤਿ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਪਗੇਵ ਕਾਯਵਿਞ੍ਞੇਯ੍ਯਾਤਿ ਇਮਿਨਾ ਨਯੇਨ ਅਞ੍ਞੇਸੁਪਿ ਏਵਰੂਪੇਸੁ ਪਦੇਸੁ ਅਤ੍ਥੋ ਵੇਦਿਤਬ੍ਬੋ.

ਸਚ੍ਚਂ ਵਦਤੀਤਿ ਸਚ੍ਚਵਾਦੀ. ਸਚ੍ਚੇਨ ਸਚ੍ਚਂ ਸਨ੍ਦਹਤਿ ਘਟੇਤੀਤਿ ਸਚ੍ਚਸਨ੍ਧੋ, ਨ ਅਨ੍ਤਰਨ੍ਤਰਾ ਮੁਸਾ ਵਦਤੀਤਿ ਅਤ੍ਥੋ. ਯੋ ਹਿ ਪੁਰਿਸੋ ਕਦਾਚਿ ਮੁਸਾ ਵਦਤਿ, ਕਦਾਚਿ ਸਚ੍ਚਂ, ਤਸ੍ਸ ਮੁਸਾਵਾਦੇਨ ਅਨ੍ਤਰਿਤਤ੍ਤਾ ਸਚ੍ਚਂ ਸਚ੍ਚੇਨ ਨ ਘਟਿਯਤਿ, ਤਸ੍ਮਾ ਸੋ ਨ ਸਚ੍ਚਸਨ੍ਧੋ, ਅਯਂ ਪਨ ਨ ਤਾਦਿਸੋ, ਜੀਵਿਤਹੇਤੁਪਿ ਮੁਸਾ ਅਵਤ੍ਵਾ ਸਚ੍ਚੇਨ ਸਚ੍ਚਂ ਸਨ੍ਦਹਤਿਯੇਵਾਤਿ ਸਚ੍ਚਸਨ੍ਧੋ.

ਥੇਤੋਤਿ ਥਿਰੋ, ਥਿਰਕਥੋਤਿ ਅਤ੍ਥੋ. ਏਕੋ ਹਿ ਪੁਗ੍ਗਲੋ ਹਲਿਦ੍ਦਿਰਾਗੋ ਵਿਯ, ਥੁਸਰਾਸਿਮ੍ਹਿ ਨਿਖਾਤਖਾਣੁ ਵਿਯ, ਅਸ੍ਸਪਿਟ੍ਠੇ ਠਪਿਤਕੁਮ੍ਭਣ੍ਡਮਿਵ ਚ ਨ ਥਿਰਕਥੋ ਹੋਤਿ, ਏਕੋ ਪਾਸਾਣਲੇਖਾ ਵਿਯ, ਇਨ੍ਦਖੀਲਾ ਵਿਯ ਚ ਥਿਰਕਥੋ ਹੋਤਿ, ਅਸਿਨਾ ਸੀਸਂ ਛਿਨ੍ਦਨ੍ਤੇਪਿ ਦ੍ਵੇ ਕਥਾ ਨ ਕਥੇਤਿ, ਅਯਂ ਵੁਚ੍ਚਤਿ ਥੇਤੋ.

ਪਚ੍ਚਯਿਕੋਤਿ ਪਤ੍ਤਿਯਾਯਿਤਬ੍ਬਕੋ, ਸਦ੍ਧਾਯਿਤਬ੍ਬਕੋਤਿ ਅਤ੍ਥੋ. ਏਕਚ੍ਚੋ ਹਿ ਪੁਗ੍ਗਲੋ ਨ ਪਚ੍ਚਯਿਕੋ ਹੋਤਿ, ‘‘ਇਦਂ ਕੇਨ ਵੁਤ੍ਤਂ, ਅਸੁਕੇਨਾ’’ਤਿ ਵੁਤ੍ਤੇ ‘‘ਮਾ ਤਸ੍ਸ ਵਚਨਂ ਸਦ੍ਦਹਥਾ’’ਤਿ ਵਤ੍ਤਬ੍ਬਤਂ ਆਪਜ੍ਜਤਿ. ਏਕੋ ਪਚ੍ਚਯਿਕੋ ਹੋਤਿ, ‘‘ਇਦਂ ਕੇਨ ਵੁਤ੍ਤਂ, ਅਸੁਕੇਨਾ’’ਤਿ ਵੁਤ੍ਤੇ ‘‘ਯਦਿ ਤੇਨ ਵੁਤ੍ਤਂ, ਇਦਮੇਵ ਪਮਾਣਂ, ਇਦਾਨਿ ਉਪਪਰਿਕ੍ਖਿਤਬ੍ਬਂ ਨਤ੍ਥਿ, ਏਵਮੇਵ ਇਦ’’ਨ੍ਤਿ ਵਤ੍ਤਬ੍ਬਤਂ ਆਪਜ੍ਜਤਿ, ਅਯਂ ਵੁਚ੍ਚਤਿ ਪਚ੍ਚਯਿਕੋ.

ਅਵਿਸਂਵਾਦਕੋ ਲੋਕਸ੍ਸਾਤਿ ਤਾਯ ਸਚ੍ਚਵਾਦਿਤਾਯ ਲੋਕਂ ਨ ਵਿਸਂਵਾਦੇਤੀਤਿ ਅਤ੍ਥੋ.

ਪਿਸੁਣਂ ਵਾਚਂ ਪਹਾਯਾਤਿਆਦੀਸੁ ਯਾਯ ਵਾਚਾਯ ਯਸ੍ਸ ਤਂ ਵਾਚਂ ਭਾਸਤਿ, ਤਸ੍ਸ ਹਦਯੇ ਅਤ੍ਤਨੋ ਪਿਯਭਾਵਂ ਪਰਸ੍ਸ ਚ ਸੁਞ੍ਞਭਾਵਂ ਕਰੋਤਿ, ਸਾ ਪਿਸੁਣਾ ਵਾਚਾ. ਯਾਯ ਪਨ ਅਤ੍ਤਾਨਮ੍ਪਿ ਪਰਮ੍ਪਿ ਫਰੁਸਂ ਕਰੋਤਿ, ਯਾ ਵਾਚਾ ਸਯਮ੍ਪਿ ਫਰੁਸਾ, ਨੇਵ ਕਣ੍ਣਸੁਖਾ ਨ ਹਦਯਙ੍ਗਮਾ, ਅਯਂ ਫਰੁਸਾ ਵਾਚਾ. ਯੇਨ ਸਮ੍ਫਂ ਪਲਪਤਿ ਨਿਰਤ੍ਥਕਂ, ਸੋ ਸਮ੍ਫਪ੍ਪਲਾਪੋ. ਯਾ ਤੇਸਂ ਮੂਲਭੂਤਾ ਚੇਤਨਾਪਿ ਪਿਸੁਣਵਾਚਾਦਿਨਾਮਮੇਵ ਲਭਤਿ, ਸਾ ਏਵ ਚ ਇਧ ਅਧਿਪ੍ਪੇਤਾ.

ਇਮੇਸਂ ਭੇਦਾਯਾਤਿ ਯੇਸਂ ਇਤੋ ਵੁਤ੍ਤਾਨਂ ਸਨ੍ਤਿਕੇ ਸੁਤਂ, ਤੇਸਂ ਭੇਦਾਯ. ਭਿਨ੍ਨਾਨਂ ਵਾ ਸਨ੍ਧਾਤਾਤਿ ਦ੍ਵਿਨ੍ਨਂ ਮਿਤ੍ਤਾਨਂ ਵਾ ਸਮਾਨੁਪਜ੍ਝਾਯਕਾਦੀਨਂ ਵਾ ਕੇਨਚਿਦੇਵ ਕਾਰਣੇਨ ਭਿਨ੍ਨਾਨਂ ਏਕਮੇਕਂ ਉਪਸਙ੍ਕਮਿਤ੍ਵਾ ‘‘ਤੁਮ੍ਹਾਕਂ ਈਦਿਸੇ ਕੁਲੇ ਜਾਤਾਨਂ ਏਵਂ ਬਹੁਸ੍ਸੁਤਾਨਂ ਇਦਂ ਨ ਯੁਤ੍ਤ’’ਨ੍ਤਿਆਦੀਨਿ ਵਤ੍ਵਾ ਸਨ੍ਧਾਨਂ ਕਤ੍ਤਾ ਅਨੁਕਤ੍ਤਾ.

ਅਨੁਪ੍ਪਦਾਤਾਤਿ ਸਨ੍ਧਾਨਾਨੁਪ੍ਪਦਾਤਾ. ਦ੍ਵੇ ਜਨੇ ਸਮਗ੍ਗੇ ਦਿਸ੍ਵਾ ‘‘ਤੁਮ੍ਹਾਕਂ ਏਵਰੂਪੇ ਕੁਲੇ ਜਾਤਾਨਂ ਏਵਰੂਪੇਹਿ ਗੁਣੇਹਿ ਸਮਨ੍ਨਾਗਤਾਨਂ ਅਨੁਚ੍ਛਵਿਕਮੇਤ’’ਨ੍ਤਿਆਦੀਨਿ ਵਤ੍ਵਾ ਦਲ਼੍ਹੀਕਮ੍ਮਂ ਕਤ੍ਤਾਤਿ ਅਤ੍ਥੋ. ਸਮਗ੍ਗੋ ਆਰਾਮੋ ਅਸ੍ਸਾਤਿ ਸਮਗ੍ਗਾਰਾਮੋ, ਯਤ੍ਥ ਸਮਗ੍ਗਾ ਨਤ੍ਥਿ, ਤਤ੍ਥ ਵਸਿਤੁਮ੍ਪਿ ਨ ਇਚ੍ਛਤੀਤਿ ਅਤ੍ਥੋ. ‘‘ਸਮਗ੍ਗਰਾਮੋ’’ਤਿਪਿ ਪਾਲ਼ਿ, ਅਯਮੇਵੇਤ੍ਥ ਅਤ੍ਥੋ. ਸਮਗ੍ਗਰਤੋਤਿ ਸਮਗ੍ਗੇਸੁ ਰਤੋ, ਤੇ ਪਹਾਯ ਅਞ੍ਞਤ੍ਰ ਗਨ੍ਤੁਮ੍ਪਿ ਨ ਇਚ੍ਛਤੀਤਿ ਅਤ੍ਥੋ. ਸਮਗ੍ਗੇ ਦਿਸ੍ਵਾਪਿ ਸੁਤ੍ਵਾਪਿ ਨਨ੍ਦਤੀਤਿ ਸਮਗ੍ਗਨਨ੍ਦੀ. ਸਮਗ੍ਗਕਰਣਿਂ ਵਾਚਂ ਭਾਸਿਤਾਤਿ ਯਾ ਵਾਚਾ ਸਤ੍ਤੇ ਸਮਗ੍ਗੇਯੇਵ ਕਰੋਤਿ, ਤਂ ਸਾਮਗ੍ਗਿਗੁਣਪਰਿਦੀਪਿਕਮੇਵ ਵਾਚਂ ਭਾਸਤਿ, ਨ ਇਤਰਨ੍ਤਿ.

ਪਰਸ੍ਸ ਮਮ੍ਮਚ੍ਛੇਦਕਕਾਯਵਚੀਪਯੋਗਸਮੁਟ੍ਠਾਪਿਕਾ ਏਕਨ੍ਤਫਰੁਸਚੇਤਨਾ ਫਰੁਸਾ ਵਾਚਾ, ਨੇਲਾਤਿ ਏਲਂ ਵੁਚ੍ਚਤਿ ਦੋਸੋ, ਨਸ੍ਸਾ ਏਲਨ੍ਤਿ ਨੇਲਾ, ਨਿਦ੍ਦੋਸਾਤਿ ਅਤ੍ਥੋ ‘‘ਨੇਲਙ੍ਗੋ ਸੇਤਪਚ੍ਛਾਦੋ’’ਤਿ ਏਤ੍ਥ (ਉਦਾ. ੬੫; ਪੇਟਕੋ. ੨੫) ਵੁਤ੍ਤਨੇਲਂ ਵਿਯ. ਕਣ੍ਣਸੁਖਾਤਿ ਬ੍ਯਞ੍ਜਨਮਧੁਰਤਾਯ ਕਣ੍ਣਾਨਂ ਸੁਖਾ, ਸੂਚਿਵਿਜ੍ਝਨਂ ਵਿਯ ਕਣ੍ਣਸੂਲਂ ਨ ਜਨੇਤਿ. ਅਤ੍ਥਮਧੁਰਤਾਯ ਸਕਲਸਰੀਰੇ ਕੋਪਂ ਅਜਨੇਤ੍ਵਾ ਪੇਮਂ ਜਨੇਤੀਤਿ ਪੇਮਨੀਯਾ. ਹਦਯਂ ਗਚ੍ਛਤਿ ਅਪਟਿਹਞ੍ਞਮਾਨਾ ਸੁਖੇਨ ਚਿਤ੍ਤਂ ਪਵਿਸਤੀਤਿ ਹਦਯਙ੍ਗਮਾ. ਗੁਣਪਰਿਪੁਣ੍ਣਤਾਯ ਪੁਰੇ ਭਵਾਤਿ ਪੋਰੀ, ਪੁਰੇ ਸਂਵਡ੍ਢਨਾਰੀ ਵਿਯ ਸੁਕੁਮਾਰਾਤਿਪਿ ਪੋਰੀ, ਪੁਰਸ੍ਸ ਏਸਾਤਿਪਿ ਪੋਰੀ, ਨਗਰਵਾਸੀਨਂ ਕਥਾਤਿ ਅਤ੍ਥੋ. ਨਗਰਵਾਸਿਨੋ ਹਿ ਯੁਤ੍ਤਕਥਾ ਹੋਨ੍ਤਿ, ਪਿਤਿਮਤ੍ਤਂ ਪਿਤਾਤਿ ਭਾਤਿਮਤ੍ਤਂ ਭਾਤਾਤਿ ਵਦਨ੍ਤਿ. ਏਵਰੂਪੀ ਕਥਾ ਬਹੁਨੋ ਜਨਸ੍ਸ ਕਨ੍ਤਾ ਹੋਤੀਤਿ ਬਹੁਜਨਕਨ੍ਤਾ. ਕਨ੍ਤਭਾਵੇਨੇਵ ਬਹੁਨੋ ਜਨਸ੍ਸ ਮਨਾਪਾ ਚਿਤ੍ਤਵੁਡ੍ਢਿਕਰਾਤਿ ਬਹੁਜਨਮਨਾਪਾ.

ਅਨਤ੍ਥਵਿਞ੍ਞਾਪਿਕਾ ਕਾਯਵਚੀਪਯੋਗਸਮੁਟ੍ਠਾਪਿਕਾ ਅਕੁਸਲਚੇਤਨਾ ਸਮ੍ਫਪ੍ਪਲਾਪੋ. ਕਾਲੇਨ ਵਦਤੀਤਿ ਕਾਲਵਾਦੀ, ਵਤ੍ਤਬ੍ਬਯੁਤ੍ਤਕਾਲਂ ਸਲ੍ਲਕ੍ਖੇਤ੍ਵਾ ਵਦਤੀਤਿ ਅਤ੍ਥੋ. ਭੂਤਂ ਤਥਂ ਤਚ੍ਛਂ ਸਭਾਵਮੇਵ ਵਦਤੀਤਿ ਭੂਤਵਾਦੀ. ਦਿਟ੍ਠਧਮ੍ਮਿਕਸਮ੍ਪਰਾਯਿਕਤ੍ਥਸਨ੍ਨਿਸ੍ਸਿਤਮੇਵ ਕਤ੍ਵਾ ਵਦਤੀਤਿ ਅਤ੍ਥਵਾਦੀ. ਨਵਲੋਕੁਤ੍ਤਰਧਮ੍ਮਸਨ੍ਨਿਸ੍ਸਿਤਂ ਕਤ੍ਵਾ ਵਦਤੀਤਿ ਧਮ੍ਮਵਾਦੀ. ਸਂਵਰਵਿਨਯਪਹਾਨਵਿਨਯਸਨ੍ਨਿਸ੍ਸਿਤਂ ਕਤ੍ਵਾ ਵਦਤੀਤਿ ਵਿਨਯਵਾਦੀ.

ਨਿਧਾਨਂ ਵੁਚ੍ਚਤਿ ਠਪਨੋਕਾਸੋ, ਨਿਧਾਨਮਸ੍ਸ ਅਤ੍ਥੀਤਿ ਨਿਧਾਨਵਤੀ, ਹਦਯੇ ਨਿਧਾਤਬ੍ਬਯੁਤ੍ਤਕਂ ਵਾਚਂ ਭਾਸਿਤਾਤਿ ਅਤ੍ਥੋ. ਕਾਲੇਨਾਤਿ ਏਵਰੂਪਿਂ ਭਾਸਮਾਨੋਪਿ ਚ ‘‘ਅਹਂ ਨਿਧਾਨਵਤਿਂ ਵਾਚਂ ਭਾਸਿਸ੍ਸਾਮੀ’’ਤਿ ਨ ਅਕਾਲੇਨ ਭਾਸਤਿ, ਯੁਤ੍ਤਕਾਲਂ ਪਨ ਅਪੇਕ੍ਖਿਤ੍ਵਾਵ ਭਾਸਤੀਤਿ ਅਤ੍ਥੋ. ਸਾਪਦੇਸਨ੍ਤਿ ਸਉਪਮਂ, ਸਕਾਰਣਨ੍ਤਿ ਅਤ੍ਥੋ. ਪਰਿਯਨ੍ਤਵਤਿਨ੍ਤਿ ਪਰਿਚ੍ਛੇਦਂ ਦਸ੍ਸੇਤ੍ਵਾ ਯਥਾਸ੍ਸਾ ਪਰਿਚ੍ਛੇਦੋ ਪਞ੍ਞਾਯਤਿ, ਏਵਂ ਭਾਸਤੀਤਿ ਅਤ੍ਥੋ. ਅਤ੍ਥਸਂਹਿਤਨ੍ਤਿ ਅਨੇਕੇਹਿਪਿ ਨਯੇਹਿ ਵਿਭਜਨ੍ਤੇਨ ਪਰਿਯਾਦਾਤੁਂ ਅਸਕ੍ਕੁਣੇਯ੍ਯਤਾਯ ਅਤ੍ਥਸਮ੍ਪਨ੍ਨਂ ਭਾਸਤਿ. ਯਂ ਵਾ ਸੋ ਅਤ੍ਥਵਾਦੀ ਅਤ੍ਥਂ ਵਦਤਿ, ਤੇਨ ਅਤ੍ਥੇਨ ਸਹਿਤਤ੍ਤਾ ਅਤ੍ਥਸਂਹਿਤਂ ਵਾਚਂ ਭਾਸਤਿ, ਨ ਅਞ੍ਞਂ ਨਿਕ੍ਖਿਪਿਤ੍ਵਾ ਅਞ੍ਞਂ ਭਾਸਤੀਤਿ ਵੁਤ੍ਤਂ ਹੋਤਿ. ਚਤੁਦ੍ਦੋਸਾਪਗਤਂ ਵਾਚਂ ਭਾਸਤੀਤਿ ਮੁਸਾਵਾਦਾਦੀਹਿ ਚਤੂਹਿ ਦੋਸੇਹਿ ਅਪਗਤਂ ਵਾਚਂ ਭਾਸਤਿ. ਦ੍ਵਤ੍ਤਿਂਸਾਯ ਤਿਰਚ੍ਛਾਨਕਥਾਯਾਤਿ ਦ੍ਵਤ੍ਤਿਂਸਾਯ ਸਗ੍ਗਮੋਕ੍ਖਾਨਂ ਤਿਰਚ੍ਛਾਨਭੂਤਾਯ ਕਥਾਯ.

ਦਸ ਕਥਾਵਤ੍ਥੂਨੀਤਿ ਅਪ੍ਪਿਚ੍ਛਤਾਦੀਨਿ ਦਸ ਵਿਵਟ੍ਟਨਿਸ੍ਸਿਤਾਯ ਕਥਾਯ ਵਤ੍ਥੁਭੂਤਾਨਿ ਕਾਰਣਾਨਿ. ਅਪ੍ਪਿਚ੍ਛਕਥਨ੍ਤਿ ਏਤ੍ਥ ਅਪ੍ਪਿਚ੍ਛੋਤਿ ਇਚ੍ਛਾਵਿਰਹਿਤੋ ਅਨਿਚ੍ਛੋ ਨਿਤ੍ਤਣ੍ਹੋ. ਏਤ੍ਥ ਹਿ ਬ੍ਯਞ੍ਜਨਂ ਸਾਵਸੇਸਂ ਵਿਯ, ਅਤ੍ਥੋ ਪਨ ਨਿਰਵਸੇਸੋ. ਨ ਹਿ ਖੀਣਾਸਵਸ੍ਸ ਅਣੁਮਤ੍ਤਾਪਿ ਇਚ੍ਛਾ ਨਾਮ ਅਤ੍ਥਿ.

ਅਪਿਚੇਤ੍ਥ ਅਤ੍ਰਿਚ੍ਛਤਾ ਪਾਪਿਚ੍ਛਤਾ ਮਹਿਚ੍ਛਤਾ ਅਪ੍ਪਿਚ੍ਛਤਾਤਿ ਅਯਂ ਭੇਦੋ ਵੇਦਿਤਬ੍ਬੋ – ਤਤ੍ਥ ਸਕਲਾਭੇ ਅਤਿਤ੍ਤਸ੍ਸ ਪਰਲਾਭਪਤ੍ਥਨਾ ਅਤ੍ਰਿਚ੍ਛਤਾ ਨਾਮ, ਤਾਯ ਸਮਨ੍ਨਾਗਤਸ੍ਸ ਏਕਭਾਜਨੇ ਪਕ੍ਕਪੂਵੇਪਿ ਅਤ੍ਤਨੋ ਪਤ੍ਤੇ ਪਤਿਤੇ ਨ ਸੁਪਕ੍ਕੋ ਵਿਯ ਖੁਦ੍ਦਕੋ ਵਿਯ ਚ ਖਾਯਤਿ, ਸ੍ਵੇਵ ਪਨ ਪਰਸ੍ਸ ਪਤ੍ਤੇ ਪਕ੍ਖਿਤ੍ਤੋ ਸੁਪਕ੍ਕੋ ਵਿਯ ਮਹਨ੍ਤੋ ਵਿਯ ਚ ਖਾਯਤਿ. ਅਸਨ੍ਤਗੁਣਸਮ੍ਭਾਵਨਤਾ ਪਨ ਪਟਿਗ੍ਗਹਣੇ ਚ ਅਮਤ੍ਤਞ੍ਞੁਤਾ ਪਾਪਿਚ੍ਛਤਾ ਨਾਮ, ਸਾ ‘‘ਇਧੇਕਚ੍ਚੋ ਅਸਦ੍ਧੋ ਸਮਾਨੋ ਸਦ੍ਧੋਤਿ ਮਂ ਜਨੋ ਜਾਨਾਤੂ’’ਤਿਆਦਿਨਾ (ਵਿਭ. ੮੫੧) ਨਯੇਨ ਅਤ੍ਰੇਵ ਆਗਤਾਯੇਵ. ਤਾਯ ਚ ਸਮਨ੍ਨਾਗਤੋ ਪੁਗ੍ਗਲੋ ਕੋਹਞ੍ਞੇ ਪਤਿਟ੍ਠਾਤਿ. ਸਨ੍ਤਗੁਣਸਮ੍ਭਾਵਨਤਾ ਪਨ ਪਟਿਗ੍ਗਹਣੇ ਚ ਅਮਤ੍ਤਞ੍ਞੁਤਾ ਮਹਿਚ੍ਛਤਾ ਨਾਮ, ਸਾਪਿ ‘‘ਇਧੇਕਚ੍ਚੋ ਸਦ੍ਧੋ ਸਮਾਨੋ ਸਦ੍ਧੋਤਿ ਮਂ ਜਨੋ ਜਾਨਾਤੂਤਿ ਇਚ੍ਛਤਿ, ਸੀਲਵਾ ਸਮਾਨੋ ਸੀਲਵਾਤਿ ਮਂ ਜਨੋ ਜਾਨਾਤੂ’’ਤਿ (ਵਿਭ. ੮੫੧) ਇਮਿਨਾ ਨਯੇਨ ਆਗਤਾਯੇਵ. ਤਾਯ ਸਮਨ੍ਨਾਗਤੋ ਪੁਗ੍ਗਲੋ ਦੁਸ੍ਸਨ੍ਤਪ੍ਪਯੋ ਹੋਤਿ, ਵਿਜਾਤਮਾਤਾਪਿਸ੍ਸ ਚਿਤ੍ਤਂ ਗਹੇਤੁਂ ਨ ਸਕ੍ਕੋਤਿ. ਤੇਨੇਤਂ ਵੁਚ੍ਚਤਿ –

‘‘ਅਗ੍ਗਿਕ੍ਖਨ੍ਧੋ ਸਮੁਦ੍ਦੋ ਚ, ਮਹਿਚ੍ਛੋ ਚਾਪਿ ਪੁਗ੍ਗਲੋ;

ਸਕਟੇਨ ਪਚ੍ਚਯੇ ਦੇਤੁ, ਤਯੋਪੇਤੇ ਅਤਪ੍ਪਯਾ’’ਤਿ. (ਮ. ਨਿ. ਅਟ੍ਠ. ੧.੨੫੨; ਅ. ਨਿ. ਅਟ੍ਠ. ੧.੧.੬੩; ਉਦਾ. ਅਟ੍ਠ. ੩੧);

ਸਨ੍ਤਗੁਣਨਿਗੂਹਨਤਾ ਪਨ ਪਟਿਗ੍ਗਹਣੇ ਚ ਮਤ੍ਤਞ੍ਞੁਤਾ ਅਪ੍ਪਿਚ੍ਛਤਾ ਨਾਮ, ਤਾਯ ਸਮਨ੍ਨਾਗਤੋ ਪੁਗ੍ਗਲੋ ਅਤ੍ਤਨਿ ਵਿਜ੍ਜਮਾਨਮ੍ਪਿ ਗੁਣਂ ਪਟਿਚ੍ਛਾਦੇਤੁਕਾਮਤਾਯ ਸਦ੍ਧੋ ਸਮਾਨੋ ‘‘ਸਦ੍ਧੋਤਿ ਮਂ ਜਨੋ ਜਾਨਾਤੂ’’ਤਿ ਨ ਇਚ੍ਛਤਿ. ਸੀਲਵਾ… ਪਵਿਵਿਤ੍ਤੋ… ਬਹੁਸ੍ਸੁਤੋ… ਆਰਦ੍ਧਵੀਰਿਯੋ… ਸਮਾਧਿਸਮ੍ਪਨ੍ਨੋ… ਪਞ੍ਞਵਾ… ਖੀਣਾਸਵੋ ਸਮਾਨੋ ‘‘ਖੀਣਾਸਵੋਤਿ ਮਂ ਜਨੋ ਜਾਨਾਤੂ’’ਤਿ ਨ ਇਚ੍ਛਤਿ ਸੇਯ੍ਯਥਾਪਿ ਮਜ੍ਝਨ੍ਤਿਕਤ੍ਥੇਰੋ. ਏਵਂ ਅਪ੍ਪਿਚ੍ਛੋ ਚ ਪਨ ਭਿਕ੍ਖੁ ਅਨੁਪ੍ਪਨ੍ਨਂ ਲਾਭਂ ਉਪ੍ਪਾਦੇਤਿ, ਉਪ੍ਪਨ੍ਨਂ ਥਾਵਰਂ ਕਰੋਤਿ, ਦਾਯਕਾਨਂ ਚਿਤ੍ਤਂ ਆਰਾਧੇਤਿ, ਯਥਾ ਯਥਾ ਹਿ ਸੋ ਅਤ੍ਤਨੋ ਅਪ੍ਪਿਚ੍ਛਤਾਯ ਅਪ੍ਪਂ ਗਣ੍ਹਾਤਿ, ਤਥਾ ਤਥਾ ਤਸ੍ਸ ਵਤ੍ਤੇ ਪਸਨ੍ਨਾ ਮਨੁਸ੍ਸਾ ਬਹੂ ਦੇਨ੍ਤਿ.

ਅਪਰੋਪਿ ਚਤੁਬ੍ਬਿਧੋ ਅਪ੍ਪਿਚ੍ਛੋ ਪਚ੍ਚਯਅਪ੍ਪਿਚ੍ਛੋ ਧੁਤਙ੍ਗਅਪ੍ਪਿਚ੍ਛੋ ਪਰਿਯਤ੍ਤਿਅਪ੍ਪਿਚ੍ਛੋ ਅਧਿਗਮਅਪ੍ਪਿਚ੍ਛੋਤਿ. ਤਤ੍ਥ ਚਤੂਸੁ ਪਚ੍ਚਯੇਸੁ ਅਪ੍ਪਿਚ੍ਛੋ ਪਚ੍ਚਯਅਪ੍ਪਿਚ੍ਛੋ. ਸੋ ਦਾਯਕਸ੍ਸ ਵਸਂ ਜਾਨਾਤਿ, ਦੇਯ੍ਯਧਮ੍ਮਸ੍ਸ ਵਸਂ ਜਾਨਾਤਿ, ਅਤ੍ਤਨੋ ਥਾਮਂ ਜਾਨਾਤਿ. ਯਦਿ ਹਿ ਦੇਯ੍ਯਧਮ੍ਮੋ ਬਹੁ ਹੋਤਿ, ਦਾਯਕੋ ਅਪ੍ਪਂ ਦਾਤੁਕਾਮੋ, ਦਾਯਕਸ੍ਸ ਵਸੇਨ ਅਪ੍ਪਂ ਗਣ੍ਹਾਤਿ. ਦੇਯ੍ਯਧਮ੍ਮੋ ਅਪ੍ਪੋ, ਦਾਯਕੋ ਬਹੁਂ ਦਾਤੁਕਾਮੋ, ਦੇਯ੍ਯਧਮ੍ਮਸ੍ਸ ਵਸੇਨ ਅਪ੍ਪਂ ਗਣ੍ਹਾਤਿ. ਦੇਯ੍ਯਧਮ੍ਮੋਪਿ ਬਹੁ, ਦਾਯਕੋਪਿ ਬਹੁਂ ਦਾਤੁਕਾਮੋ, ਅਤ੍ਤਨੋ ਥਾਮਂ ਞਤ੍ਵਾ ਪਮਾਣੇਨੇਵ ਗਣ੍ਹਾਤਿ.

ਧੁਤਙ੍ਗਸਮਾਦਾਨਸ੍ਸ ਅਤ੍ਤਨਿ ਅਤ੍ਥਿਭਾਵਂ ਨ ਜਾਨਾਪੇਤੁਕਾਮੋ ਧੁਤਙ੍ਗਅਪ੍ਪਿਚ੍ਛੋ ਨਾਮ. ਯੋ ਪਨ ਬਹੁਸ੍ਸੁਤਭਾਵਂ ਨ ਜਾਨਾਪੇਤੁਕਾਮੋ, ਅਯਂ ਪਰਿਯਤ੍ਤਿਅਪ੍ਪਿਚ੍ਛੋ ਨਾਮ. ਯੋ ਪਨ ਸੋਤਾਪਨ੍ਨਾਦੀਸੁ ਅਞ੍ਞਤਰੋ ਹੁਤ੍ਵਾ ਸੋਤਾਪਨ੍ਨਾਦਿਭਾਵਂ ਜਾਨਾਪੇਤੁਂ ਨ ਇਚ੍ਛਤਿ, ਅਯਂ ਅਧਿਗਮਅਪ੍ਪਿਚ੍ਛੋ ਨਾਮ. ਖੀਣਾਸਵੋ ਪਨ ਅਤ੍ਰਿਚ੍ਛਤਂ ਪਾਪਿਚ੍ਛਤਂ ਮਹਿਚ੍ਛਤਂ ਪਹਾਯ ਸਬ੍ਬਸੋ ਇਚ੍ਛਾਪਟਿਪਕ੍ਖਭੂਤਾਯ ਅਲੋਭਸਙ੍ਖਾਤਾਯ ਪਰਿਸੁਦ੍ਧਾਯ ਅਪ੍ਪਿਚ੍ਛਤਾਯ ਸਮਨ੍ਨਾਗਤਤ੍ਤਾ ਅਪ੍ਪਿਚ੍ਛੋ ਨਾਮ. ‘‘ਆਵੁਸੋ, ਅਤ੍ਰਿਚ੍ਛਤਾ ਪਾਪਿਚ੍ਛਤਾ ਮਹਿਚ੍ਛਤਾਤਿ, ਇਮੇ ਧਮ੍ਮਾ ਪਹਾਤਬ੍ਬਾਤਿ, ਤੇਸੁ ਆਦੀਨਵਂ ਦਸ੍ਸੇਤ੍ਵਾ ਏਵਰੂਪਂ ਅਪ੍ਪਿਚ੍ਛਤਂ ਸਮਾਦਾਯ ਵਤ੍ਤਿਤਬ੍ਬ’’ਨ੍ਤਿ ਵਦਨ੍ਤੋ ਅਪ੍ਪਿਚ੍ਛਕਥਂ ਕਥੇਤਿ ਨਾਮ.

ਸਨ੍ਤੁਟ੍ਠੀਕਥਨ੍ਤਿਆਦੀਸੁ ਵਿਸੇਸਤ੍ਥਮੇਵ ਦੀਪਯਿਸ੍ਸਾਮ, ਯੋਜਨਾ ਪਨ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਸਨ੍ਤੁਟ੍ਠੀਕਥਨ੍ਤਿ ਇਤਰੀਤਰਪਚ੍ਚਯਸਨ੍ਤੋਸਂ ਨਿਸ੍ਸਿਤਂ ਕਥਂ. ਸੋ ਪਨੇਸ ਸਨ੍ਤੋਸੋ ਦ੍ਵਾਦਸਵਿਧੋ ਹੋਤਿ. ਸੇਯ੍ਯਥਿਦਂ – ਚੀਵਰੇ ਯਥਾਲਾਭਸਨ੍ਤੋਸੋ, ਯਥਾਬਲਸਨ੍ਤੋਸੋ, ਯਥਾਸਾਰੁਪ੍ਪਸਨ੍ਤੋਸੋਤਿ ਤਿਵਿਧੋ. ਏਵਂ ਪਿਣ੍ਡਪਾਤਾਦੀਸੁਪਿ.

ਤਸ੍ਸਾਯਂ ਪਭੇਦਵਣ੍ਣਨਾ – ਇਧ ਭਿਕ੍ਖੁ ਚੀਵਰਂ ਲਭਤਿ ਸੁਨ੍ਦਰਂ ਵਾ ਅਸੁਨ੍ਦਰਂ ਵਾ. ਸੋ ਤੇਨੇਵ ਯਾਪੇਤਿ, ਅਞ੍ਞਂ ਨ ਪਤ੍ਥੇਤਿ, ਲਭਨ੍ਤੋਪਿ ਨ ਗਣ੍ਹਾਤਿ. ਅਯਮਸ੍ਸ ਚੀਵਰੇ ਯਥਾਲਾਭਸਨ੍ਤੋਸੋ. ਅਥ ਪਨ ਯੋ ਪਕਤਿਦੁਬ੍ਬਲੋ ਵਾ ਹੋਤਿ, ਆਬਾਧਜਰਾਭਿਭੂਤੋ ਵਾ, ਗਰੁਚੀਵਰਂ ਪਾਰੁਪਨ੍ਤੋ ਕਿਲਮਤਿ. ਸੋ ਸਭਾਗੇਨ ਭਿਕ੍ਖੁਨਾ ਸਦ੍ਧਿਂ ਤਂ ਪਰਿਵਤ੍ਤੇਤ੍ਵਾ ਲਹੁਕੇਨ ਯਾਪੇਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ. ਅਯਮਸ੍ਸ ਚੀਵਰੇ ਯਥਾਬਲਸਨ੍ਤੋਸੋ. ਅਪਰੋ ਪਣੀਤਪਚ੍ਚਯਲਾਭੀ ਹੋਤਿ. ਸੋ ਪਤ੍ਤੁਣ੍ਣਚੀਵਰਾਦੀਨਂ ਅਞ੍ਞਤਰਂ ਮਹਗ੍ਘਚੀਵਰਂ, ਬਹੂਨਿ ਵਾ ਪਨ ਚੀਵਰਾਨਿ ਲਭਿਤ੍ਵਾ ‘‘ਇਦਂ ਥੇਰਾਨਂ ਚਿਰਪਬ੍ਬਜਿਤਾਨਂ, ਇਦਂ ਬਹੁਸ੍ਸੁਤਾਨਂ ਅਨੁਰੂਪਂ, ਇਦਂ ਗਿਲਾਨਾਨਂ, ਇਦਂ ਅਪ੍ਪਲਾਭੀਨਂ ਹੋਤੂ’’ਤਿ ਦਤ੍ਵਾ ਤੇਸਂ ਪੁਰਾਣਚੀਵਰਂ ਵਾ ਸਙ੍ਕਾਰਕੂਟਾਦਿਤੋ ਵਾ ਨਨ੍ਤਕਾਨਿ ਉਚ੍ਚਿਨਿਤ੍ਵਾ ਤੇਹਿ ਸਙ੍ਘਾਟਿਂ ਕਤ੍ਵਾ ਧਾਰੇਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ. ਅਯਮਸ੍ਸ ਚੀਵਰੇ ਯਥਾਸਾਰੁਪ੍ਪਸਨ੍ਤੋਸੋ.

ਇਧ ਪਨ ਭਿਕ੍ਖੁ ਪਿਣ੍ਡਪਾਤਂ ਲਭਤਿ ਲੂਖਂ ਵਾ ਪਣੀਤਂ ਵਾ, ਸੋ ਤੇਨੇਵ ਯਾਪੇਤਿ, ਅਞ੍ਞਂ ਨ ਪਤ੍ਥੇਤਿ, ਲਭਨ੍ਤੋਪਿ ਨ ਗਣ੍ਹਾਤਿ. ਅਯਮਸ੍ਸ ਪਿਣ੍ਡਪਾਤੇ ਯਥਾਲਾਭਸਨ੍ਤੋਸੋ. ਯੋ ਪਨ ਅਤ੍ਤਨੋ ਪਕਤਿਵਿਰੁਦ੍ਧਂ ਵਾ ਬ੍ਯਾਧਿਵਿਰੁਦ੍ਧਂ ਵਾ ਪਿਣ੍ਡਪਾਤਂ ਲਭਤਿ, ਯੇਨਸ੍ਸ ਪਰਿਭੁਤ੍ਤੇਨ ਅਫਾਸੁ ਹੋਤਿ, ਸੋ ਤਂ ਸਭਾਗਸ੍ਸ ਭਿਕ੍ਖੁਨੋ ਦਤ੍ਵਾ ਤਸ੍ਸ ਹਤ੍ਥਤੋ ਸਪ੍ਪਾਯਭੋਜਨਂ ਭੁਞ੍ਜਿਤ੍ਵਾ ਸਮਣਧਮ੍ਮਂ ਕਰੋਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ. ਅਯਮਸ੍ਸ ਪਿਣ੍ਡਪਾਤੇ ਯਥਾਬਲਸਨ੍ਤੋਸੋ. ਅਪਰੋ ਬਹੁਂ ਪਣੀਤਂ ਪਿਣ੍ਡਪਾਤਂ ਲਭਤਿ, ਸੋ ਤਂ ਚੀਵਰਂ ਵਿਯ ਥੇਰਚਿਰਪਬ੍ਬਜਿਤਬਹੁਸ੍ਸੁਤਅਪ੍ਪਲਾਭੀਗਿਲਾਨਾਨਂ ਦਤ੍ਵਾ ਤੇਸਂ ਵਾ ਸੇਸਕਂ ਪਿਣ੍ਡਾਯ ਵਾ ਚਰਿਤ੍ਵਾ ਮਿਸ੍ਸਕਾਹਾਰਂ ਭੁਞ੍ਜਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ. ਅਯਮਸ੍ਸ ਪਿਣ੍ਡਪਾਤੇ ਯਥਾਸਾਰੁਪ੍ਪਸਨ੍ਤੋਸੋ.

ਇਧ ਪਨ ਭਿਕ੍ਖੁ ਸੇਨਾਸਨਂ ਲਭਤਿ ਮਨਾਪਂ ਵਾ ਅਮਨਾਪਂ ਵਾ, ਸੋ ਤੇਨ ਨੇਵ ਸੋਮਨਸ੍ਸਂ ਨ ਦੋਮਨਸ੍ਸਂ ਉਪ੍ਪਾਦੇਤਿ, ਅਨ੍ਤਮਸੋ ਤਿਣਸਨ੍ਥਾਰਕੇਨਾਪਿ ਯਥਾਲਦ੍ਧੇਨੇਵ ਤੁਸ੍ਸਤਿ. ਅਯਮਸ੍ਸ ਸੇਨਾਸਨੇ ਯਥਾਲਾਭਸਨ੍ਤੋਸੋ. ਯੋ ਪਨ ਅਤ੍ਤਨੋ ਪਕਤਿਵਿਰੁਦ੍ਧਂ ਵਾ ਬ੍ਯਾਧਿਵਿਰੁਦ੍ਧਂ ਵਾ ਸੇਨਾਸਨਂ ਲਭਤਿ, ਯਤ੍ਥਸ੍ਸ ਵਸਤੋ ਅਫਾਸੁ ਹੋਤਿ, ਸੋ ਤਂ ਸਭਾਗਸ੍ਸ ਭਿਕ੍ਖੁਨੋ ਦਤ੍ਵਾ ਤਸ੍ਸ ਸਨ੍ਤਕੇ ਸਪ੍ਪਾਯਸੇਨਾਸਨੇ ਵਸਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ. ਅਯਮਸ੍ਸ ਸੇਨਾਸਨੇ ਯਥਾਬਲਸਨ੍ਤੋਸੋ.

ਅਪਰੋ ਮਹਾਪੁਞ੍ਞੋ ਲੇਣਮਣ੍ਡਪਕੂਟਾਗਾਰਾਦੀਨਿ ਬਹੂਨਿ ਪਣੀਤਸੇਨਾਸਨਾਨਿ ਲਭਤਿ, ਸੋ ਤਂ ਚੀਵਰਂ ਵਿਯ ਥੇਰਚਿਰਪਬ੍ਬਜਿਤਬਹੁਸ੍ਸੁਤਅਪ੍ਪਲਾਭੀਗਿਲਾਨਾਨਂ ਦਤ੍ਵਾ ਯਤ੍ਥ ਕਤ੍ਥਚਿ ਵਸਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ. ਅਯਮਸ੍ਸ ਸੇਨਾਸਨੇ ਯਥਾਸਾਰੁਪ੍ਪਸਨ੍ਤੋਸੋ. ਯੋਪਿ ‘‘ਉਤ੍ਤਮਸੇਨਾਸਨਂ ਨਾਮ ਪਮਾਦਟ੍ਠਾਨਂ, ਤਤ੍ਥ ਨਿਸਿਨ੍ਨਸ੍ਸ ਥਿਨਮਿਦ੍ਧਂ ਓਕ੍ਕਮਤਿ, ਨਿਦ੍ਦਾਭਿਭੂਤਸ੍ਸ ਪੁਨ ਪਟਿਬੁਜ੍ਝਤੋ ਪਾਪਵਿਤਕ੍ਕਾ ਪਾਤੁਭਵਨ੍ਤੀ’’ਤਿ ਪਟਿਸਞ੍ਚਿਕ੍ਖਿਤ੍ਵਾ ਤਾਦਿਸਂ ਸੇਨਾਸਨਂ ਪਤ੍ਤਮ੍ਪਿ ਨ ਸਮ੍ਪਟਿਚ੍ਛਤਿ, ਸੋ ਤਂ ਪਟਿਕ੍ਖਿਪਿਤ੍ਵਾ ਅਬ੍ਭੋਕਾਸਰੁਕ੍ਖਮੂਲਾਦੀਸੁ ਵਸਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ. ਅਯਮਸ੍ਸ ਸੇਨਾਸਨੇ ਯਥਾਸਾਰੁਪ੍ਪਸਨ੍ਤੋਸੋ.

ਇਧ ਪਨ ਭਿਕ੍ਖੁ ਭੇਸਜ੍ਜਂ ਲਭਤਿ ਲੂਖਂ ਵਾ ਪਣੀਤਂ ਵਾ, ਸੋ ਯਂ ਲਭਤਿ, ਤੇਨੇਵ ਤੁਸ੍ਸਤਿ, ਅਞ੍ਞਂ ਨ ਪਤ੍ਥੇਤਿ, ਲਭਨ੍ਤੋਪਿ ਨ ਗਣ੍ਹਾਤਿ. ਅਯਮਸ੍ਸ ਗਿਲਾਨਪਚ੍ਚਯੇ ਯਥਾਲਾਭਸਨ੍ਤੋਸੋ. ਯੋ ਪਨ ਤੇਲੇਨ ਅਤ੍ਥਿਕੋ ਫਾਣਿਤਂ ਲਭਤਿ, ਸੋ ਤਂ ਸਭਾਗਸ੍ਸ ਭਿਕ੍ਖੁਨੋ ਦਤ੍ਵਾ ਤਸ੍ਸ ਹਤ੍ਥਤੋ ਤੇਲਂ ਗਹੇਤ੍ਵਾ ਅਞ੍ਞਦੇਵ ਵਾ ਪਰਿਯੇਸਿਤ੍ਵਾ ਭੇਸਜ੍ਜਂ ਕਰੋਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ. ਅਯਮਸ੍ਸ ਗਿਲਾਨਪਚ੍ਚਯੇ ਯਥਾਬਲਸਨ੍ਤੋਸੋ.

ਅਪਰੋ ਮਹਾਪੁਞ੍ਞੋ ਬਹੁਂ ਤੇਲਮਧੁਫਾਣਿਤਾਦਿਪਣੀਤਭੇਸਜ੍ਜਂ ਲਭਤਿ, ਸੋ ਤਂ ਚੀਵਰਂ ਵਿਯ ਥੇਰਚਿਰਪਬ੍ਬਜਿਤਬਹੁਸ੍ਸੁਤਅਪ੍ਪਲਾਭੀਗਿਲਾਨਾਨਂ ਦਤ੍ਵਾ ਤੇਸਂ ਆਭਤੇਨ ਯੇਨ ਕੇਨਚਿ ਯਾਪੇਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ. ਯੋ ਪਨ ਏਕਸ੍ਮਿਂ ਭਾਜਨੇ ਚਤੁਮਧੁਰਂ ਠਪੇਤ੍ਵਾ ਏਕਸ੍ਮਿਂ ਮੁਤ੍ਤਹਰੀਤਕਂ ‘‘ਗਣ੍ਹ, ਭਨ੍ਤੇ, ਯਦਿਚ੍ਛਸੀ’’ਤਿ ਵੁਚ੍ਚਮਾਨੋ ‘‘ਸਚਸ੍ਸ ਤੇਸੁ ਅਞ੍ਞਤਰੇਨਪਿ ਰੋਗੋ ਵੂਪਸਮ੍ਮਤਿ, ਅਥ ਮੁਤ੍ਤਹਰੀਤਕਂ ਨਾਮ ਬੁਦ੍ਧਾਦੀਹਿ ਵਣ੍ਣਿਤ’’ਨ੍ਤਿ ਚਤੁਮਧੁਰਂ ਪਟਿਕ੍ਖਿਪਿਤ੍ਵਾ ਮੁਤ੍ਤਹਰੀਤਕੇਨ ਭੇਸਜ੍ਜਂ ਕਰੋਨ੍ਤੋ ਪਰਮਸਨ੍ਤੁਟ੍ਠੋਵ ਹੋਤਿ. ਅਯਮਸ੍ਸ ਗਿਲਾਨਪਚ੍ਚਯੇ ਯਥਾਸਾਰੁਪ੍ਪਸਨ੍ਤੋਸੋ. ਇਮੇਸਂ ਪਨ ਪਚ੍ਚੇਕਪਚ੍ਚਯੇਸੁ ਤਿਣ੍ਣਂ ਤਿਣ੍ਣਂ ਸਨ੍ਤੋਸਾਨਂ ਯਥਾਸਾਰੁਪ੍ਪਸਨ੍ਤੋਸੋਵ ਅਗ੍ਗੋ. ਅਰਹਾ ਏਕੇਕਸ੍ਮਿਂ ਪਚ੍ਚਯੇ ਇਮੇਹਿ ਤੀਹਿਪਿ ਸਨ੍ਤੁਟ੍ਠੋਵ.

ਪਵਿਵੇਕਕਥਨ੍ਤਿ ਪਵਿਵੇਕਨਿਸ੍ਸਿਤਂ ਕਥਂ. ਤਯੋ ਹਿ ਵਿਵੇਕਾ ਕਾਯਵਿਵੇਕੋ ਚਿਤ੍ਤਵਿਵੇਕੋ ਉਪਧਿਵਿਵੇਕੋਤਿ. ਤਤ੍ਥ ਏਕੋ ਗਚ੍ਛਤਿ, ਏਕੋ ਤਿਟ੍ਠਤਿ, ਏਕੋ ਨਿਸੀਦਤਿ, ਏਕੋ ਸੇਯ੍ਯਂ ਕਪ੍ਪੇਤਿ, ਏਕੋ ਗਾਮਂ ਪਿਣ੍ਡਾਯ ਪਵਿਸਤਿ, ਏਕੋ ਪਟਿਕ੍ਕਮਤਿ, ਏਕੋ ਅਭਿਕ੍ਕਮਤਿ, ਏਕੋ ਚਙ੍ਕਮਂ ਅਧਿਟ੍ਠਾਤਿ, ਏਕੋ ਚਰਤਿ, ਏਕੋ ਵਿਹਰਤੀਤਿ ਅਯਂ ਕਾਯਵਿਵੇਕੋ ਨਾਮ. ਅਟ੍ਠ ਸਮਾਪਤ੍ਤਿਯੋ ਪਨ ਚਿਤ੍ਤਵਿਵੇਕੋ ਨਾਮ. ਨਿਬ੍ਬਾਨਂ ਉਪਧਿਵਿਵੇਕੋ ਨਾਮ.

ਵੁਤ੍ਤਮ੍ਪਿ ਹੇਤਂ – ‘‘ਕਾਯਵਿਵੇਕੋ ਚ ਵਿਵੇਕਟ੍ਠਕਾਯਾਨਂ ਨੇਕ੍ਖਮ੍ਮਾਭਿਰਤਾਨਂ. ਚਿਤ੍ਤਵਿਵੇਕੋ ਚ ਪਰਿਸੁਦ੍ਧਚਿਤ੍ਤਾਨਂ ਪਰਮਵੋਦਾਨਪ੍ਪਤ੍ਤਾਨਂ. ਉਪਧਿਵਿਵੇਕੋ ਚ ਨਿਰੁਪਧੀਨਂ ਪੁਗ੍ਗਲਾਨਂ ਵਿਸਙ੍ਖਾਰਗਤਾਨ’’ਨ੍ਤਿ (ਮਹਾਨਿ. ੫੭).

ਅਸਂਸਗ੍ਗਕਥਨ੍ਤਿ ਏਤ੍ਥ ਪਨ ਸਵਨਸਂਸਗ੍ਗੋ ਦਸ੍ਸਨਸਂਸਗ੍ਗੋ ਸਮੁਲ੍ਲਪਨਸਂਸਗ੍ਗੋ ਸਮ੍ਭੋਗਸਂਸਗ੍ਗੋ ਕਾਯਸਂਸਗ੍ਗੋਤਿ ਪਞ੍ਚਵਿਧੋ ਸਂਸਗ੍ਗੋ. ਤੇਸੁ ਇਧ ਭਿਕ੍ਖੁ ਸੁਣਾਤਿ ‘‘ਅਮੁਕਸ੍ਮਿਂ ਗਾਮੇ ਵਾ ਨਿਗਮੇ ਵਾ ਇਤ੍ਥੀ ਵਾ ਕੁਮਾਰੀ ਵਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ’’ਤਿ, ਸੋ ਤਂ ਸੁਤ੍ਵਾ ਸਂਸੀਦਤਿ ਵਿਸੀਦਤਿ, ਨ ਸਕ੍ਕੋਤਿ ਬ੍ਰਹ੍ਮਚਰਿਯਂ ਸਨ੍ਧਾਰੇਤੁਂ, ਸਿਕ੍ਖਾਦੁਬ੍ਬਲ੍ਯਂ ਅਨਾਵਿਕਤ੍ਵਾ ਹੀਨਾਯਾਵਤ੍ਤਤਿ. ਏਵਂ ਪਰੇਹਿ ਕਥਿਯਮਾਨਰੂਪਾਦਿਸਮ੍ਪਤ੍ਤਿਂ ਅਤ੍ਤਨਾ ਵਾ ਹਸਿਤਲਪਿਤਗੀਤਸਦ੍ਦਂ ਸੁਣਨ੍ਤਸ੍ਸ ਸੋਤਵਿਞ੍ਞਾਣਵੀਥਿਵਸੇਨ ਉਪ੍ਪਨ੍ਨੋ ਰਾਗੋ ਸਵਨਸਂਸਗ੍ਗੋ ਨਾਮ.

‘‘ਇਧ ਭਿਕ੍ਖੁ ਨ ਹੇਵ ਖੋ ਸੁਣਾਤਿ, ਅਪਿ ਚ ਖੋ ਸਾਮਂ ਪਸ੍ਸਤਿ ਇਤ੍ਥਿਂ ਵਾ ਕੁਮਾਰਿਂ ਵਾ ਅਭਿਰੂਪਂ ਦਸ੍ਸਨੀਯਂ ਪਾਸਾਦਿਕਂ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਂ, ਸੋ ਤਂ ਦਿਸ੍ਵਾ ਸਂਸੀਦਤਿ ਵਿਸੀਦਤਿ, ਨ ਸਕ੍ਕੋਤਿ ਬ੍ਰਹ੍ਮਚਰਿਯਂ ਸਨ੍ਧਾਰੇਤੁਂ, ਸਿਕ੍ਖਾਦੁਬ੍ਬਲ੍ਯਂ ਅਨਾਵਿਕਤ੍ਵਾ ਹੀਨਾਯਾਵਤ੍ਤਤਿ. ਏਵਂ ਵਿਸਭਾਗਰੂਪਂ ਓਲੋਕੇਨ੍ਤਸ੍ਸ ਪਨ ਚਕ੍ਖੁਵਿਞ੍ਞਾਣਵੀਥਿਵਸੇਨ ਉਪ੍ਪਨ੍ਨਰਾਗੋ ਦਸ੍ਸਨਸਂਸਗ੍ਗੋ ਨਾਮ.

ਅਞ੍ਞਮਞ੍ਞਂ ਅਲ੍ਲਾਪਸਲ੍ਲਾਪਵਸੇਨ ਉਪ੍ਪਨ੍ਨਰਾਗੋ ਪਨ ਸਮੁਲ੍ਲਪਨਸਂਸਗ੍ਗੋ ਨਾਮ. ਭਿਕ੍ਖੁਨੋ ਭਿਕ੍ਖੁਨਿਯਾ ਸਨ੍ਤਕਂ ਭਿਕ੍ਖੁਨਿਯਾ ਵਾ ਭਿਕ੍ਖੁਸ੍ਸ ਸਨ੍ਤਕਂ ਗਹੇਤ੍ਵਾ ਪਰਿਭੋਗਕਰਣਵਸੇਨ ਉਪ੍ਪਨ੍ਨਰਾਗੋ ਸਮ੍ਭੋਗਸਂਸਗ੍ਗੋ ਨਾਮ. ਹਤ੍ਥਗ੍ਗਾਹਾਦਿਵਸੇਨ ਉਪ੍ਪਨ੍ਨਰਾਗੋ ਪਨ ਕਾਯਸਂਸਗ੍ਗੋ ਨਾਮ. ਅਰਹਾ ਇਮੇਹਿ ਪਞ੍ਚਹਿ ਸਂਸਗ੍ਗੇਹਿ ਚਤੂਹਿਪਿ ਪਰਿਸਾਹਿ ਸਦ੍ਧਿਂ ਅਸਂਸਟ੍ਠੋ, ਗਾਹਮੁਤ੍ਤਕੋ ਚੇਵ ਸਂਸਗ੍ਗਮੁਤ੍ਤਕੋ ਚ. ਅਸਂਸਗ੍ਗਸ੍ਸ ਵਣ੍ਣਂ ਭਣਨ੍ਤੋ ਅਸਂਸਗ੍ਗਕਥਂ ਕਥੇਤਿ ਨਾਮ.

ਵੀਰਿਯਾਰਮ੍ਭਕਥਨ੍ਤਿ ਏਤ੍ਥ ਯੋ ਪਗ੍ਗਹਿਤਵੀਰਿਯੋ ਪਰਿਪੁਣ੍ਣਕਾਯਿਕਚੇਤਸਿਕਵੀਰਿਯੋ ਹੋਤਿ, ਗਮਨੇ ਉਪ੍ਪਨ੍ਨਂ ਕਿਲੇਸਂ ਠਾਨਂ ਪਾਪੁਣਿਤੁਂ ਨ ਦੇਤਿ, ਠਾਨੇ ਉਪ੍ਪਨ੍ਨਂ ਕਿਲੇਸਂ ਨਿਸਜ੍ਜਂ, ਨਿਸਜ੍ਜਾਯ ਉਪ੍ਪਨ੍ਨਂ ਕਿਲੇਸਂ ਸਯਨਂ ਪਾਪੁਣਿਤੁਂ ਨ ਦੇਤਿ, ਦਣ੍ਡੇਨ ਕਣ੍ਹਸਪ੍ਪਂ ਉਪ੍ਪੀਲ਼ੇਤ੍ਵਾ ਗਣ੍ਹਨ੍ਤੋ ਵਿਯ ਅਮਿਤ੍ਤਂ ਗੀਵਾਯ ਅਕ੍ਕਮਨ੍ਤੋ ਵਿਯ ਚ ਵਿਚਰਤਿ, ਤਾਦਿਸਸ੍ਸ ਆਰਦ੍ਧਵੀਰਿਯਸ੍ਸ ਵਣ੍ਣਂ ਭਣਨ੍ਤੋ ਵੀਰਿਯਾਰਮ੍ਭਕਥਂ ਕਥੇਤਿ ਨਾਮ.

ਸੀਲਕਥਨ੍ਤਿਆਦੀਸੁ ਸੀਲਨ੍ਤਿ ਚਤੁਪਾਰਿਸੁਦ੍ਧਿਸੀਲਂ. ਸਮਾਧੀਤਿ ਵਿਪਸ੍ਸਨਾਪਾਦਕਾ ਅਟ੍ਠ ਸਮਾਪਤ੍ਤਿਯੋ. ਪਞ੍ਞਾਤਿ ਲੋਕਿਯਲੋਕੁਤ੍ਤਰਞਾਣਂ. ਵਿਮੁਤ੍ਤੀਤਿ ਅਰਹਤ੍ਤਫਲਵਿਮੁਤ੍ਤਿ. ਵਿਮੁਤ੍ਤਿਞਾਣਦਸ੍ਸਨਨ੍ਤਿ ਏਕੂਨਵੀਸਤਿਵਿਧਂ ਪਚ੍ਚਵੇਕ੍ਖਣਞਾਣਂ. ਸੀਲਾਦੀਨਂ ਗੁਣਂ ਪਕਾਸੇਨ੍ਤੋ ਸੀਲਾਦਿਕਥਂ ਕਥੇਤਿ ਨਾਮ.

ਸਤਿਪਟ੍ਠਾਨਕਥਨ੍ਤਿਆਦੀਨਿ ਸਙ੍ਗਜਾਲਮਤਿਚ੍ਚ ਸੋ ਮੁਨੀਤਿਪਰਿਯੋਸਾਨਾਨਿ ਪੁਬ੍ਬੇ ਵੁਤ੍ਤਾਨੁਸਾਰੇਨ ਵੇਦਿਤਬ੍ਬਾਨਿ.

੮੬. ਨਿਰਾਸਤ੍ਤੀਤਿ ਨਿਤ੍ਤਣ੍ਹੋ. ਵਿਵੇਕਦਸ੍ਸੀ ਫਸ੍ਸੇਸੂਤਿ ਪਚ੍ਚੁਪ੍ਪਨ੍ਨੇਸੁ ਚਕ੍ਖੁਸਮ੍ਫਸ੍ਸਾਦੀਸੁ ਅਤ੍ਤਾਦਿਭਾਵਵਿਵੇਕਂ ਪਸ੍ਸਤਿ. ਦਿਟ੍ਠੀਸੁ ਚ ਨ ਨੀਯਤੀਤਿ ਦ੍ਵਾਸਟ੍ਠਿਯਾ ਦਿਟ੍ਠੀਸੁ ਕਾਯਚਿ ਦਿਟ੍ਠਿਯਾ ਨ ਨੀਯਤਿ.

ਵਿਪਰਿਣਤਂ ਵਾ ਵਤ੍ਥੁਂ ਨ ਸੋਚਤੀਤਿ ਪਕਤਿਭਾਵਂ ਜਹਿਤ੍ਵਾ ਨਟ੍ਠੇ ਕਿਸ੍ਮਿਞ੍ਚਿ ਵਤ੍ਥੁਸ੍ਮਿਂ ਨ ਸੋਕਂ ਆਪਜ੍ਜਤਿ. ਵਿਪਰਿਣਤਸ੍ਮਿਂ ਵਾਤਿ ਵਿਨਸ੍ਸਮਾਨੇ ਵਤ੍ਥੁਮ੍ਹਿ.

ਚਕ੍ਖੁਸਮ੍ਫਸ੍ਸੋਤਿ ਚਕ੍ਖੁਂ ਵਤ੍ਥੁਂ ਕਤ੍ਵਾ ਚਕ੍ਖੁਵਿਞ੍ਞਾਣਸਹਜਾਤੋ ਫਸ੍ਸੋ ਚਕ੍ਖੁਸਮ੍ਫਸ੍ਸੋ. ਸੇਸੇਸੁਪਿ ਏਸੇਵ ਨਯੋ. ਏਤ੍ਥ ਚ ਪੁਰਿਮਾ ਚਕ੍ਖੁਪਸਾਦਾਦਿਵਤ੍ਥੁਕਾਵ, ਮਨੋਸਮ੍ਫਸ੍ਸੋ ਹਦਯਵਤ੍ਥੁਕੋਪਿ ਅਵਤ੍ਥੁਕੋਪਿ ਸਬ੍ਬੋ ਚਤੁਭੂਮਕੋ ਫਸ੍ਸੋ. ਅਧਿਵਚਨਸਮ੍ਫਸ੍ਸੋਤਿ ਪਰਿਯਾਯੇਨ ਏਤਸ੍ਸ ਨਾਮਂ ਹੋਤਿਯੇਵ. ਤਯੋ ਹਿ ਅਰੂਪਿਨੋ ਖਨ੍ਧਾ ਸਯਂ ਪਿਟ੍ਠਿਵਟ੍ਟਕਾ ਹੁਤ੍ਵਾ ਅਤ੍ਤਨੋ ਸਹਜਾਤਸਮ੍ਫਸ੍ਸਸ੍ਸ ਅਧਿਵਚਨਸਮ੍ਫਸ੍ਸੋਤਿ ਨਾਮਂ ਕਰੋਨ੍ਤਿ. ਪਟਿਘਸਮ੍ਫਸ੍ਸੋਤਿ ਨਿਪ੍ਪਰਿਯਾਯੇਨ ਪਨ ਪਟਿਘਸਮ੍ਫਸ੍ਸੋ ਨਾਮ ਪਞ੍ਚਦ੍ਵਾਰਿਕਫਸ੍ਸੋ. ਅਧਿਵਚਨਸਮ੍ਫਸ੍ਸੋ ਨਾਮ ਮਨੋਦ੍ਵਾਰਿਕਫਸ੍ਸੋ. ਸੁਖਵੇਦਨੀਯੋ ਫਸ੍ਸੋਤਿ ਸੁਖਵੇਦਨਾਯ ਹਿਤੋ ਉਪ੍ਪਾਦਕੋ ਫਸ੍ਸੋ. ਇਤਰਦ੍ਵਯੇਪਿ ਏਸੇਵ ਨਯੋ. ਕੁਸਲੋ ਫਸ੍ਸੋਤਿ ਏਕਵੀਸਤਿਕੁਸਲਚਿਤ੍ਤਸਹਜਾਤੋ ਫਸ੍ਸੋ. ਅਕੁਸਲੋਤਿ ਦ੍ਵਾਦਸਅਕੁਸਲਸਹਜਾਤੋ ਫਸ੍ਸੋ. ਅਬ੍ਯਾਕਤੋਤਿ ਛਪ੍ਪਞ੍ਞਾਸਅਬ੍ਯਾਕਤਸਹਜਾਤੋ ਫਸ੍ਸੋ. ਕਾਮਾਵਚਰੋਤਿ ਚਤੁਪਞ੍ਞਾਸਕਾਮਾਵਚਰਸਹਜਾਤੋ ਫਸ੍ਸੋ. ਰੂਪਾਵਚਰੋਤਿ ਕੁਸਲਾਦਿਪਞ੍ਚਦਸਰੂਪਾਵਚਰਸਮ੍ਪਯੁਤ੍ਤੋ. ਅਰੂਪਾਵਚਰੋਤਿ ਕੁਸਲਾਬ੍ਯਾਕਤਵਸੇਨ ਦ੍ਵਾਦਸਅਰੂਪਾਵਚਰਸਮ੍ਪਯੁਤ੍ਤੋ.

ਸੁਞ੍ਞਤੋਤਿ ਅਨਤ੍ਤਾਨੁਪਸ੍ਸਨਾਵਸੇਨ ਵਿਪਸ੍ਸਨ੍ਤਸ੍ਸ ਉਪ੍ਪਨ੍ਨੋ ਮਗ੍ਗੋ ਸੁਞ੍ਞਤੋ, ਤੇਨ ਸਹਜਾਤੋ ਫਸ੍ਸੋ ਸੁਞ੍ਞਤੋ ਫਸ੍ਸੋ. ਇਤਰਦ੍ਵਯੇਪਿ ਏਸੇਵ ਨਯੋ. ਅਨਿਮਿਤ੍ਤੋਤਿ ਏਤ੍ਥ ਅਨਿਚ੍ਚਾਨੁਪਸ੍ਸਨਾਵਸੇਨ ਵਿਪਸ੍ਸਨ੍ਤਸ੍ਸ ਉਪ੍ਪਨ੍ਨੋ ਮਗ੍ਗੋ ਅਨਿਮਿਤ੍ਤੋ. ਅਪ੍ਪਣਿਹਿਤੋਤਿ ਦੁਕ੍ਖਾਨੁਪਸ੍ਸਨਾਵਸੇਨ ਵਿਪਸ੍ਸਨ੍ਤਸ੍ਸ ਉਪ੍ਪਨ੍ਨੋ ਮਗ੍ਗੋ ਅਪ੍ਪਣਿਹਿਤੋ. ਲੋਕਿਯੋਤਿ ਲੋਕੋ ਵੁਚ੍ਚਤਿ ਲੁਜ੍ਜਨਪਲੁਜ੍ਜਨਟ੍ਠੇਨ ਵਟ੍ਟੋ, ਤਸ੍ਮਿਂ ਪਰਿਯਾਪਨ੍ਨਭਾਵੇਨ ਲੋਕੇ ਨਿਯੁਤ੍ਤੋਤਿ ਲੋਕਿਯੋ, ਤੇਭੂਮਕੋ ਧਮ੍ਮੋ. ਲੋਕੁਤ੍ਤਰੋਤਿ ਲੋਕਤੋ ਉਤ੍ਤਰੋ ਉਤ੍ਤਿਣ੍ਣੋਤਿ ਲੋਕੁਤ੍ਤਰੋ, ਲੋਕੇ ਅਪਰਿਯਾਪਨ੍ਨਭਾਵੇਨਪਿ ਲੋਕੁਤ੍ਤਰੋ. ਅਤ੍ਤੇਨ ਵਾਤਿ ਅਤ੍ਤਭਾਵੇਨ ਵਾ. ਅਤ੍ਤਨਿਯੇਨ ਵਾਤਿ ਅਤ੍ਤਾਯਤ੍ਤੇਨ ਵਾ.

੮੭. ਪਤਿਲੀਨੋਤਿ ਰਾਗਾਦੀਨਂ ਪਹੀਨਤ੍ਤਾ ਤਤੋ ਅਪਗਤੋ. ਅਕੁਹਕੋਤਿ ਅਵਿਮ੍ਹਾਪਕੋ ਤੀਹਿ ਕੁਹਨਵਤ੍ਥੂਹਿ. ਅਪਿਹਾਲੂਤਿ ਅਪਿਹਨਸੀਲੋ, ਪਤ੍ਥਨਾਤਣ੍ਹਾਯ ਰਹਿਤੋਤਿ ਵੁਤ੍ਤਂ ਹੋਤਿ. ਅਮਚ੍ਛਰੀਤਿ ਪਞ੍ਚਮਚ੍ਛੇਰਵਿਰਹਿਤੋ. ਅਪ੍ਪਗਬ੍ਭੋਤਿ ਕਾਯਪਾਗਬ੍ਭਿਯਾਦਿਵਿਰਹਿਤੋ. ਅਜੇਗੁਚ੍ਛੋਤਿ ਸਮ੍ਪਨ੍ਨਸੀਲਾਦਿਤਾਯ ਅਜੇਗੁਚ੍ਛਨੀਯੋ ਅਸੇਚਨਕੋ ਮਨਾਪੋ. ਪੇਸੁਣੇਯ੍ਯੇ ਚ ਨੋ ਯੁਤੋਤਿ ਦ੍ਵੀਹਿ ਆਕਾਰੇਹਿ ਉਪਸਂਹਰਿਤਬ੍ਬੇ ਪਿਸੁਣਕਮ੍ਮੇ ਅਯੁਤ੍ਤੋ.

ਰਾਗਸ੍ਸ ਪਹੀਨਤ੍ਤਾਤਿ ਅਰਹਤ੍ਤਮਗ੍ਗੇਨ ਰਾਗਕਿਲੇਸਸ੍ਸ ਪਹੀਨਭਾਵੇਨ. ਅਸ੍ਮਿਮਾਨੋ ਪਹੀਨੋ ਹੋਤੀਤਿ ਅਸ੍ਮੀਤਿ ਉਨ੍ਨਤਿਮਾਨੋ ਸਮੁਚ੍ਛੇਦਵਸੇਨ ਪਹੀਨੋ ਹੋਤਿ.

ਤੀਣਿ ਕੁਹਨਵਤ੍ਥੂਨੀਤਿ ਤੀਣਿ ਵਿਮ੍ਹਾਪਨਕਾਰਣਾਨਿ. ਪਚ੍ਚਯਪਟਿਸੇਵਨਸਙ੍ਖਾਤਂ ਕੁਹਨਵਤ੍ਥੂਤਿਆਦੀਸੁ ਚੀਵਰਾਦੀਹਿ ਨਿਮਨ੍ਤਿਤਸ੍ਸ ਤਦਤ੍ਥਿਕਸ੍ਸੇਵ ਸਤੋ ਪਾਪਿਚ੍ਛਤਂ ਨਿਸ੍ਸਾਯ ਪਟਿਕ੍ਖਿਪਨੇਨ ਤੇ ਚ ਗਹਪਤਿਕੇ ਅਤ੍ਤਨਿ ਸੁਪ੍ਪਤਿਟ੍ਠਿਤਪਸਾਦੇ ਞਤ੍ਵਾ ਪੁਨ ਤੇਸਂ ‘‘ਅਹੋ ਅਯ੍ਯੋ ਅਪ੍ਪਿਚ੍ਛੋ, ਨ ਕਿਞ੍ਚਿ ਪਟਿਗ੍ਗਣ੍ਹਿਤੁਂ ਇਚ੍ਛਤਿ, ਸੁਲਦ੍ਧਂ ਵਤ ਨੋ ਅਸ੍ਸ, ਸਚੇ ਅਪ੍ਪਮਤ੍ਤਕਮ੍ਪਿ ਕਿਞ੍ਚਿ ਪਟਿਗ੍ਗਣ੍ਹੇਯ੍ਯਾ’’ਤਿ ਨਾਨਾਵਿਧੇਹਿ ਉਪਾਯੇਹਿ ਪਣੀਤਾਨਿ ਚੀਵਰਾਦੀਨਿ ਉਪਨੇਨ੍ਤਾਨਂ ਤਦਨੁਗ੍ਗਹਕਾਮਤਂਯੇਵ ਅਵਿਕਤ੍ਵਾ ਪਟਿਗ੍ਗਹਣੇਨ ਚ ਤਤੋ ਪਭੁਤਿ ਅਪਿ ਸਕਟਭਾਰੇਹਿ ਉਪਨਾਮਨਹੇਤੁਭੂਤਂ ਵਿਮ੍ਹਾਪਨਂ ਪਚ੍ਚਯਪਟਿਸੇਵਨਸਙ੍ਖਾਤਂ ਕੁਹਨਵਤ੍ਥੂਤਿ ਵੇਦਿਤਬ੍ਬਂ. ਪਾਪਿਚ੍ਛਸ੍ਸੇਵ ਪਨ ਸਤੋ ਸਮ੍ਭਾਵਨਾਧਿਪ੍ਪਾਯੇਨ ਕਤੇਨ ਇਰਿਯਾਪਥੇਨ ਵਿਮ੍ਹਾਪਨਂ ਇਰਿਯਾਪਥਸਙ੍ਖਾਤਂ ਕੁਹਨਵਤ੍ਥੂਤਿ ਵੇਦਿਤਬ੍ਬਂ. ਪਾਪਿਚ੍ਛਸ੍ਸੇਵ ਪਨ ਸਤੋ ਉਤ੍ਤਰਿਮਨੁਸ੍ਸਧਮ੍ਮਾਧਿਗਮਪਰਿਦੀਪਨਵਾਚਾਯ ਤਥਾ ਤਥਾ ਵਿਮ੍ਹਾਪਨਂ ਸਾਮਨ੍ਤਜਪ੍ਪਨਸਙ੍ਖਾਤਂ ਕੁਹਨਵਤ੍ਥੂਤਿ ਵੇਦਿਤਬ੍ਬਂ.

ਕਤਮਂ ਪਚ੍ਚਯਪਟਿਸੇਵਨਸਙ੍ਖਾਤਨ੍ਤਿ ਏਤ੍ਥ ਪਚ੍ਚਯਪਟਿਸੇਵਨਨ੍ਤਿ ਏਵਂ ਸਙ੍ਖਾਤਂ ਪਚ੍ਚਯਪਟਿਸੇਵਨਸਙ੍ਖਾਤਂ. ਨਿਮਨ੍ਤੇਨ੍ਤੀਤਿ ਇਧ ਗਹਪਤਿਕਾ ‘‘ਭਿਕ੍ਖਂ ਗਣ੍ਹਥਾ’’ਤਿ ਭਿਕ੍ਖੂ ਨਿਮਨ੍ਤੇਨ੍ਤਿ. ਅਯਮੇਵ ਵਾ ਪਾਠੋ. ‘‘ਨਿਮਨ੍ਤੇਤੀ’’ਤਿ ਵਾ ‘‘ਵਦਨ੍ਤੀ’’ਤਿ ਵਾ ਕੇਚਿ ਪਠਨ੍ਤਿ. ਤਾਦਿਸੇ ਨਿਮਨ੍ਤਾਪੇਨ੍ਤਿ. ਨਿਮਨ੍ਤੇਨ੍ਤੀਤਿ ਪਾਠਸ੍ਸ ਸਮ੍ਭਵੋ ਦਟ੍ਠਬ੍ਬੋ. ਚੀਵਰਂ ਪਚ੍ਚਕ੍ਖਾਤੀਤਿ ਚੀਵਰਂ ਪਟਿਕ੍ਖਿਪਤਿ. ਏਤਂ ਸਾਰੁਪ੍ਪਂ, ਯਂ ਸਮਣੋਤਿ ਯਂ ਚੀਵਰਧਾਰਣਂ ਸਮਣੋ ਕਰੋਤਿ, ਏਤਂ ਸਾਰੁਪ੍ਪਂ ਅਨੁਚ੍ਛਵਿਕਂ. ਪਾਪਣਿਕਾ ਵਾ ਨਨ੍ਤਕਾਨੀਤਿ ਆਪਣਦ੍ਵਾਰੇ ਪਤਿਕਾਨਿ ਅਨ੍ਤਵਿਰਹਿਤਾਨਿ ਪਿਲੋਤਿਕਾਨਿ. ਉਚ੍ਚਿਨਿਤ੍ਵਾਤਿ ਸਂਕਡ੍ਢਿਤ੍ਵਾ. ਉਞ੍ਛਾਚਰਿਯਾਯਾਤਿ ਭਿਕ੍ਖਾਚਰਣੇਨ. ਪਿਣ੍ਡਿਯਾਲੋਪੇਨਾਤਿ ਪਿਣ੍ਡਂ ਕਤ੍ਵਾ ਲਦ੍ਧਆਲੋਪੇਨ. ਪੂਤਿਮੁਤ੍ਤੇਨ ਵਾਤਿ ਗੋਮੁਤ੍ਤੇਨ ਵਾ. ਓਸਧਂ ਕਰੇਯ੍ਯਾਤਿ ਭੇਸਜ੍ਜਕਿਚ੍ਚਂ ਕਰੇਯ੍ਯ. ਤਦੁਪਾਦਾਯਾਤਿ ਤਤੋ ਪਟ੍ਠਾਯ. ਧੁਤਵਾਦੋਤਿ ਧੁਤਗੁਣਵਾਦੀ. ਭਿਯ੍ਯੋ ਭਿਯ੍ਯੋ ਨਿਮਨ੍ਤੇਨ੍ਤੀਤਿ ਉਪਰੂਪਰਿ ਨਿਮਨ੍ਤੇਨ੍ਤਿ. ਸਮ੍ਮੁਖੀਭਾਵਾਤਿ ਸਮ੍ਮੁਖੀਭਾਵੇਨ, ਵਿਜ੍ਜਮਾਨਤਾਯਾਤਿ ਅਤ੍ਥੋ. ਪਸਵਤੀਤਿ ਪਟਿਲਭਤਿ. ਸਦ੍ਧਾਯ ਸਮ੍ਮੁਖੀਭਾਵੇਨ ਸਕ੍ਕਾ ਕਾਤੁਨ੍ਤਿ ‘‘ਸਦ੍ਧਾਯ ਸਮ੍ਮੁਖੀਭਾਵਾ’’ਤਿਆਦਿਮਾਹ. ਦੇਯ੍ਯਧਮ੍ਮਾ ਸੁਲਭਾ ਦਕ੍ਖਿਣੇਯ੍ਯਾ ਚ, ਸਦ੍ਧਾ ਪਨ ਦੁਲ੍ਲਭਾ. ਪੁਥੁਜ੍ਜਨਸ੍ਸ ਹਿ ਸਦ੍ਧਾ ਅਥਾਵਰਾ, ਪਦਵਾਰੇ ਪਦਵਾਰੇ ਨਾਨਾ ਹੋਤਿ. ਤੇਨੇਵਸ੍ਸ ਮਹਾਮੋਗ੍ਗਲ੍ਲਾਨਸਦਿਸੋਪਿ ਅਗ੍ਗਸਾਵਕੋ ਪਾਟਿਭੋਗੋ ਭਵਿਤੁਂ ਅਸਕ੍ਕੋਨ੍ਤੋ ਆਹ ‘‘ਦ੍ਵਿਨ੍ਨਂ ਖੋ ਨੇਸਂ ਆਵੁਸੋ ਧਮ੍ਮਾਨਂ ਪਾਟਿਭੋਗੋ ਭੋਗਾਨਞ੍ਚ ਜੀਵਿਤਸ੍ਸ ਚ, ਸਦ੍ਧਾਯ ਪਨ ਤ੍ਵਂ ਪਾਟਿਭੋਗੋ’’ਤਿ.

ਏਵਂ ਤੁਮ੍ਹੇ ਪੁਞ੍ਞੇਨ ਪਰਿਬਾਹਿਰਾ ਭਵਿਸ੍ਸਥਾਤਿ ਏਤ੍ਥ ਪੁਞ੍ਞੇਨਾਤਿ ਨਿਸ੍ਸਕ੍ਕਤ੍ਥੇ ਕਰਣਵਚਨਂ. ਪੁਞ੍ਞਤੋ ਪਰਿਹੀਨਾ ਪਰਮ੍ਮੁਖਾ ਭਵਿਸ੍ਸਥ. ਭਾਕੁਟਿਕਾਤਿ ਮੁਖਾਨਂ ਪਧਾਨਪੁਰਿਮਟ੍ਠਿਤਭਾਵਦਸ੍ਸਨੇਨ ਭਾਕੁਟਿਕਰਣਂ, ਮੁਖਸਙ੍ਕੋਚੋਤਿ ਵੁਤ੍ਤਂ ਹੋਤਿ. ਭਾਕੁਟਿਕਰਣਂ ਸੀਲਮਸ੍ਸਾਤਿ ਭਾਕੁਟਿਕੋ, ਭਾਕੁਟਿਕਸ੍ਸ ਭਾਵੋ ਭਾਕੁਟਿਯਂ. ਕੁਹਨਾਤਿ ਵਿਮ੍ਹਾਪਨਾ. ਕੁਹਸ੍ਸ ਆਯਨਾ ਕੁਹਾਯਨਾ. ਕੁਹਿਤਸ੍ਸ ਭਾਵੋ ਕੁਹਿਤਤ੍ਤਂ.

ਪਾਪਿਚ੍ਛੋਤਿ ਅਸਨ੍ਤਗੁਣਦੀਪਨਕਾਮੋ. ਇਚ੍ਛਾਪਕਤੋਤਿ ਇਚ੍ਛਾਯ ਅਪਕਤੋ, ਉਪਦ੍ਦੁਤੋਤਿ ਅਤ੍ਥੋ. ਸਮ੍ਭਾਵਨਾਧਿਪ੍ਪਾਯੋਤਿ ਬਹੁਮਾਨਜ੍ਝਾਸਯੋ. ਗਮਨਂ ਸਣ੍ਠਪੇਤੀਤਿ ਅਭਿਕ੍ਕਮਾਦਿਗਮਨਂ ਅਭਿਸਙ੍ਖਰੋਤਿ, ਪਾਸਾਦਿਕਭਾਵਂ ਕਰੋਤੀਤਿ ਵੁਤ੍ਤਂ ਹੋਤਿ. ਇਤਰੇਸੁਪਿ ਏਸੇਵ ਨਯੋ. ਪਣਿਧਾਯ ਗਚ੍ਛਤੀਤਿ ਪਤ੍ਥਨਂ ਠਪੇਤ੍ਵਾ ਗਚ੍ਛਤਿ. ਸੇਸੇਸੁਪਿ ਏਸੇਵ ਨਯੋ. ਸਮਾਹਿਤੋ ਵਿਯ ਗਚ੍ਛਤੀਤਿ ਉਪਚਾਰਪ੍ਪਤ੍ਤੋ ਵਿਯ ਗਚ੍ਛਤਿ. ਸੇਸੇਸੁਪਿ ਏਸੇਵ ਨਯੋ.

ਆਪਾਥਕਜ੍ਝਾਯੀਵ ਹੋਤੀਤਿ ਸਮ੍ਮੁਖਾ ਆਗਤਾਨਂ ਮਨੁਸ੍ਸਾਨਂ ਝਾਨਂ ਸਮਾਪਜ੍ਜਨ੍ਤੋ ਵਿਯ ਸਨ੍ਤਭਾਵਂ ਦਸ੍ਸੇਤਿ. ਇਰਿਯਾਪਥਸ੍ਸਾਤਿ ਚਤੁਇਰਿਯਾਪਥਸ੍ਸ. ਆਠਪਨਾਤਿ ਆਦਿਟ੍ਠਪਨਾ, ਆਦਰੇਨ ਵਾ ਠਪਨਾ. ਠਪਨਾਤਿ ਠਪਨਾਕਾਰੋ. ਸਣ੍ਠਪਨਾਤਿ ਅਭਿਸਙ੍ਖਰਣਂ, ਪਾਸਾਦਿਕਭਾਵਕਰਣਨ੍ਤਿ ਵੁਤ੍ਤਂ ਹੋਤਿ. ਅਰਿਯਧਮ੍ਮਸਨ੍ਨਿਸ੍ਸਿਤਨ੍ਤਿ ਲੋਕੁਤ੍ਤਰਧਮ੍ਮਪਟਿਬਦ੍ਧਂ. ਕੁਞ੍ਚਿਕਨ੍ਤਿ ਅਵਾਪੁਰਣਂ. ਮਿਤ੍ਤਾਤਿ ਸਿਨੇਹਵਨ੍ਤੋ. ਸਨ੍ਦਿਟ੍ਠਾਤਿ ਦਿਟ੍ਠਮਤ੍ਤਾ. ਸਮ੍ਭਤ੍ਤਾਤਿ ਦਲ਼੍ਹਮਿਤ੍ਤਾ. ਉਦ੍ਦਣ੍ਡੇਤਿ ਏਕੋ ਪਤਿਸ੍ਸਯਵਿਸੇਸੋ.

ਕੋਰਜਿਕਕੋਰਜਿਕੋਤਿ ਸਙ੍ਕੋਚਸਙ੍ਕੋਚਕੋ, ਅਤਿਸਙ੍ਕੋਚਕੋਤਿ ਵੁਤ੍ਤਂ ਹੋਤਿ. ‘‘ਕੋਰਚਕਕੋਰਚਕੋ’’ਤਿ ਵਾ ਪਾਠੋ. ਭਾਕੁਟਿਕਭਾਕੁਟਿਕੋਤਿ ਅਤਿਵਿਯ ਮੁਖਸਙ੍ਕੋਚਨਸੀਲੋ. ਕੁਹਕਕੁਹਕੋਤਿ ਅਤਿਵਿਯ ਵਿਮ੍ਹਾਪਕੋ. ਲਪਕਲਪਕੋਤਿ ਅਤਿਵਿਯ ਸਲ੍ਲਾਪਕੋ. ਮੁਖਸਮ੍ਭਾਵਿਕੋਤਿ ਅਤ੍ਤਨੋ ਮੁਖਵਸੇਨ ਅਞ੍ਞੇਹਿ ਸਹ ਸਮ੍ਭਾਵਿਕੋ, ਅਪ੍ਪਿਤਚਿਤ੍ਤੋਤਿ ਏਕੇ. ਸਨ੍ਤਾਨਨ੍ਤਿ ਕਿਲੇਸਸਨ੍ਤਤਾਯ ਸਨ੍ਤਾਨਂ. ਸਮਾਪਤ੍ਤੀਨਨ੍ਤਿ ਸਮਾਪਜ੍ਜਿਤਬ੍ਬਾਨਂ. ਗਮ੍ਭੀਰਨ੍ਤਿ ਨਿਨ੍ਨਪਤਿਟ੍ਠਾਨਂ. ਗੂਲ਼੍ਹਨ੍ਤਿ ਦਸ੍ਸੇਤੁਂ ਦੁਕ੍ਖਂ. ਨਿਪੁਣਨ੍ਤਿ ਸੁਖੁਮਂ. ਪਟਿਚ੍ਛਨ੍ਨਨ੍ਤਿ ਪਦਤ੍ਥੇਨ ਦੁਪ੍ਪਟਿਵਿਜ੍ਝਾਧਿਪ੍ਪਾਯਂ. ਲੋਕੁਤ੍ਤਰਨ੍ਤਿ ਧਮ੍ਮਦੀਪਕਂ. ਸੁਞ੍ਞਤਾਪਟਿਸਞ੍ਞੁਤ੍ਤਨ੍ਤਿ ਨਿਬ੍ਬਾਨਪਟਿਸਞ੍ਞੁਤ੍ਤਂ. ਅਥ ਵਾ ਲੋਕੁਤ੍ਤਰਸੁਞ੍ਞਤਾਪਟਿਸਞ੍ਞੁਤ੍ਤਨ੍ਤਿ ਲੋਕੁਤ੍ਤਰਧਮ੍ਮਭੂਤਨਿਬ੍ਬਾਨਪਟਿਸਞ੍ਞੁਤ੍ਤਂ.

ਕਾਯਿਕਂ ਪਾਗਬ੍ਭਿਯਨ੍ਤਿ ਕਾਯੇ ਭਵਂ ਕਾਯਿਕਂ. ਵਾਚਸਿਕਚੇਤਸਿਕੇਸੁਪਿ ਏਸੇਵ ਨਯੋ. ਅਚਿਤ੍ਤੀਕਾਰਕਤੋਤਿ ਬਹੁਮਾਨਕਿਰਿਯਰਹਿਤੋ. ਅਨੁਪਾਹਨਾਨਂ ਚਙ੍ਕਮਨ੍ਤਾਨਨ੍ਤਿ ਉਪਾਹਨਵਿਰਹਿਤਾਨਂ ਚਙ੍ਕਮਨ੍ਤਾਨਂ ਸਮੀਪੇ, ਅਨਾਦਰੇ ਵਾ ਸਾਮਿਵਚਨਂ. ਸਉਪਾਹਨੋਤਿ ਉਪਾਹਨਾਰੂਲ਼੍ਹੋ ਹੁਤ੍ਵਾ ਚਙ੍ਕਮਤਿ. ਨੀਚੇ ਚਙ੍ਕਮੇ ਚਙ੍ਕਮਨ੍ਤਾਨਨ੍ਤਿ ਅਕਤਪਰਿਚ੍ਛੇਦਾਯ ਭੂਮਿਯਾ ਚਙ੍ਕਮਨ੍ਤੇ ਪਰਿਚ੍ਛੇਦਂ ਕਤ੍ਵਾ ਵਾਲੁਕਂ ਆਕਿਰਿਤ੍ਵਾ ਆਲਮ੍ਬਨਂ ਯੋਜੇਤ੍ਵਾ ਕਤਚਙ੍ਕਮੇ ਨੀਚੇਪਿ ਚਙ੍ਕਮੇ ਚਙ੍ਕਮਨ੍ਤੇ. ਉਚ੍ਚੇ ਚਙ੍ਕਮੇ ਚਙ੍ਕਮਤੀਤਿ ਇਟ੍ਠਕਚਯਨਸਮ੍ਪਨ੍ਨੇ ਵੇਦਿਕਾਪਰਿਕ੍ਖਿਤ੍ਤੇ ਉਚ੍ਚੇ ਚਙ੍ਕਮੇ ਚਙ੍ਕਮਤਿ. ਸਚੇ ਪਾਕਾਰਪਰਿਕ੍ਖਿਤ੍ਤੋ ਹੋਤਿ ਦ੍ਵਾਰਕੋਟ੍ਠਕਯੁਤ੍ਤੋ, ਪਬ੍ਬਤਨ੍ਤਰਵਨਨ੍ਤਰਭੂਮਨ੍ਤਰਸ੍ਸ ਵਾ ਸੁਪ੍ਪਟਿਚ੍ਛਨ੍ਨੋ, ਤਾਦਿਸੇ ਚਙ੍ਕਮੇ ਚਙ੍ਕਮਿਤੁਂ ਵਟ੍ਟਤਿ, ਅਪ੍ਪਟਿਚ੍ਛਨ੍ਨੇਪਿ ਉਪਚਾਰਂ ਮੁਞ੍ਚਿਤ੍ਵਾ ਵਟ੍ਟਤਿ. ਘਟ੍ਟਯਨ੍ਤੋਪਿ ਤਿਟ੍ਠਤੀਤਿ ਅਤਿਸਮੀਪੇ ਤਿਟ੍ਠਤਿ. ਪੁਰਤੋਪਿ ਤਿਟ੍ਠਤੀਤਿ ਪੁਰਤ੍ਥਿਮਤੋਪਿ ਤਿਟ੍ਠਤਿ. ਠਿਤਕੋਪਿ ਭਣਤੀਤਿ ਖਾਣੁਕੋ ਵਿਯ ਅਨੋਨਮਿਤ੍ਵਾ ਭਣਤਿ. ਬਾਹਾਵਿਕ੍ਖੇਪਕੋਤਿ ਬਾਹੁਂ ਖਿਪਿਤ੍ਵਾ ਖਿਪਿਤ੍ਵਾ ਭਣਤਿ.

ਅਨੁਪਖਜ੍ਜਾਤਿ ਸਬ੍ਬੇਸਂ ਨਿਸਿਨ੍ਨਟ੍ਠਾਨਂ ਪਵਿਸਿਤ੍ਵਾ. ਨਵੇਪਿ ਭਿਕ੍ਖੂ ਆਸਨੇਨ ਪਟਿਬਾਹਤੀਤਿ ਅਤ੍ਤਨੋ ਪਤ੍ਤਾਸਨੇ ਅਨਿਸੀਦਿਤ੍ਵਾ ਪੁਰੇ ਵਾ ਪਚ੍ਛਾ ਵਾ ਪਵਿਸਨ੍ਤੋ ਆਸਨੇਨ ਪਟਿਬਾਹਤਿ ਨਾਮ.

ਅਨਾਪੁਚ੍ਛਮ੍ਪਿ ਕਟ੍ਠਂ ਪਕ੍ਖਿਪਤੀਤਿ ਅਨਾਪੁਚ੍ਛਿਤ੍ਵਾ ਅਨਪਲੋਕੇਤ੍ਵਾ ਅਗ੍ਗਿਮ੍ਹਿ ਦਾਰੁਂ ਖਿਪਤਿ. ਦ੍ਵਾਰਂ ਪਿਦਹਤੀਤਿ ਜਨ੍ਤਾਘਰੇ ਪਿਦਹਤਿ.

ਓਤਰਤੀਤਿ ਉਦਕਤਿਤ੍ਥਂ ਪਵਿਸਤਿ. ਨ੍ਹਾਯਤੀਤਿ ਸਰੀਰਂ ਸਿਨੇਹੇਤਿ. ਉਤ੍ਤਰਤੀਤਿ ਉਦਕਤਿਤ੍ਥਤੋ ਤੀਰਂ ਉਗ੍ਗਚ੍ਛਤਿ.

ਵੋਕ੍ਕਮ੍ਮਾਪੀਤਿ ਅਤਿਕ੍ਕਮਿਤ੍ਵਾਪਿ. ਓਵਰਕਾਨੀਤਿ ਗਬ੍ਭੇ ਪਤਿਟ੍ਠਿਤਸਯਨਘਰਾਨਿ.

ਗੂਲ਼੍ਹਾਨੀਤਿ ਪਟਿਚ੍ਛਨ੍ਨਾਨਿ. ਪਟਿਚ੍ਛਨ੍ਨਾਨੀਤਿ ਅਞ੍ਞੇਹਿ ਪਟਿਚ੍ਛਾਦਿਤਾਨਿ.

ਅਨਜ੍ਝਿਟ੍ਠੋ ਵਾਤਿ ਥੇਰੇਹਿ ‘‘ਧਮ੍ਮਂ ਭਣਾਹੀ’’ਤਿ ਅਨਾਣਤ੍ਤੋ ਅਨਾਯਾਚਿਤੋ ਚ.

ਪਾਪਧਮ੍ਮੋਤਿ ਲਾਮਕਧਮ੍ਮੋ. ਅਸੁਚਿਸਙ੍ਕਸਰਸਮਾਚਾਰੋਤਿ ਅਞ੍ਞੇਹਿ ‘‘ਅਯਂ ਦੁਸ੍ਸੀਲੋ’’ਤਿ ਸਙ੍ਕਾਯ ਸਰਿਤਬ੍ਬੋ ਆਚਾਰੋ ਸਂਯੋਗੋ ਏਤਸ੍ਸਾਤਿ ਅਸੁਚਿਸਙ੍ਕਸਰਸਮਾਚਾਰੋ. ਸਙ੍ਕਸ੍ਸਰਸਮਾਚਾਰੋਤਿ ਸਕਾਰਂ ਸਂਯੋਗਂ ਕਤ੍ਵਾਪਿ ਪਠਨ੍ਤਿ. ਪਟਿਚ੍ਛਨ੍ਨਕਮ੍ਮਨ੍ਤੋਤਿ ਪਟਿਚ੍ਛਾਦਿਤਕਾਯਵਚੀਕਮ੍ਮਨ੍ਤੋ. ਅਸ੍ਸਮਣੋਤਿ ਨ ਸਮਣੋ. ਸਮਣਪਟਿਞ੍ਞੋਤਿ ‘‘ਅਹਂ ਸਮਣੋ’’ਤਿ ਪਟਿਜਾਨਨ੍ਤੋ. ਅਬ੍ਰਹ੍ਮਚਾਰੀਤਿ ਸੇਟ੍ਠਚਰਿਯਾ ਵਿਰਹਿਤੋ. ਬ੍ਰਹ੍ਮਚਾਰਿਪਟਿਞ੍ਞੋਤਿ ਵੁਤ੍ਤਪਟਿਪਕ੍ਖੋ. ਅਨ੍ਤੋਪੂਤੀਤਿ ਅਬ੍ਭਨ੍ਤਰੇ ਕੁਸਲਧਮ੍ਮਵਿਰਹਿਤਤ੍ਤਾ ਅਨ੍ਤੋਪੂਤਿਭਾਵਮਾਪਨ੍ਨੋ. ਅਵਸ੍ਸੁਤੋਤਿ ਰਾਗੇਨ ਤਿਨ੍ਤੋ. ਕਸਮ੍ਬੁਜਾਤੋਤਿ ਸਙ੍ਕਾਰਸਭਾਵੋ. ਆਚਾਰਗੋਚਰਸਮ੍ਪਨ੍ਨੋਤਿ ਏਤ੍ਥ ਭਿਕ੍ਖੁ ਸਗਾਰਵੋ ਸਪ੍ਪਤਿਸ੍ਸੋ ਹਿਰੋਤ੍ਤਪ੍ਪਸਮ੍ਪਨ੍ਨੋ ਸੁਨਿਵਤ੍ਥੋ ਸੁਪਾਰੁਤੋ ਪਾਸਾਦਿਕੇਨ ਅਭਿਕ੍ਕਨ੍ਤੇਨ ਪਟਿਕ੍ਕਨ੍ਤੇਨ ਆਲੋਕਿਤੇਨ ਵਿਲੋਕਿਤੇਨ ਸਮਿਞ੍ਜਿਤੇਨ ਪਸਾਰਿਤੇਨ ਓਕ੍ਖਿਤ੍ਤਚਕ੍ਖੁ ਇਰਿਯਾਪਥਸਮ੍ਪਨ੍ਨੋ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ ਭੋਜਨੇ ਮਤ੍ਤਞ੍ਞੂ ਜਾਗਰਿਯਮਨੁਯੁਤ੍ਤੋ ਸਤਿਸਮ੍ਪਜਞ੍ਞੇਨ ਸਮਨ੍ਨਾਗਤੋ ਅਪ੍ਪਿਚ੍ਛੋ ਸਨ੍ਤੁਟ੍ਠੋ ਆਰਦ੍ਧਵੀਰਿਯੋ ਆਭਿਸਮਾਚਾਰਿਕੇਸੁ ਸਕ੍ਕਚ੍ਚਕਾਰੀ ਗਰੁਚਿਤ੍ਤੀਕਾਰਬਹੁਲੋ ਵਿਹਰਤਿ, ਅਯਂ ਵੁਚ੍ਚਤਿ ਆਚਾਰੋ. ਏਵਂ ਤਾਵ ਆਚਾਰੋ ਵੇਦਿਤਬ੍ਬੋ.

ਗੋਚਰੋ ਪਨ ਤਿਵਿਧੋ ਉਪਨਿਸ੍ਸਯਗੋਚਰੋ ਆਰਕ੍ਖਗੋਚਰੋ ਉਪਨਿਬਨ੍ਧਗੋਚਰੋਤਿ. ਤਤ੍ਥ ਕਤਮੋ ਉਪਨਿਸ੍ਸਯਗੋਚਰੋ? ਦਸਕਥਾਵਤ੍ਥੁਗੁਣਸਮਨ੍ਨਾਗਤੋ ਕਲ੍ਯਾਣਮਿਤ੍ਤੋ, ਯਂ ਨਿਸ੍ਸਾਯ ਅਸ੍ਸੁਤਂ ਸੁਣਾਤਿ, ਸੁਤਂ ਪਰਿਯੋਦਾਪੇਤਿ, ਕਙ੍ਖਂ ਵਿਤਰਤਿ, ਦਿਟ੍ਠਿਂ ਉਜੁਂ ਕਰੋਤਿ, ਚਿਤ੍ਤਂ ਪਸਾਦੇਤਿ; ਯਸ੍ਸ ਵਾ ਪਨ ਅਨੁਸਿਕ੍ਖਮਾਨੋ ਸਦ੍ਧਾਯ ਵਡ੍ਢਤਿ, ਸੀਲੇਨ, ਸੁਤੇਨ, ਚਾਗੇਨ, ਪਞ੍ਞਾਯ ਵਡ੍ਢਤਿ. ਅਯਂ ਵੁਚ੍ਚਤਿ ਉਪਨਿਸ੍ਸਯਗੋਚਰੋ.

ਕਤਮੋ ਆਰਕ੍ਖਗੋਚਰੋ? ਇਧ ਭਿਕ੍ਖੁ ਅਨ੍ਤਰਘਰਂ ਪਵਿਟ੍ਠੋ ਵੀਥਿਂ ਪਟਿਪਨ੍ਨੋ ਓਕ੍ਖਿਤ੍ਤਚਕ੍ਖੁ ਯੁਗਮਤ੍ਤਦਸ੍ਸਾਵੀ ਸੁਸਂਵੁਤੋ ਗਚ੍ਛਤਿ, ਨ ਹਤ੍ਥਿਂ ਓਲੋਕੇਨ੍ਤੋ, ਨ ਅਸ੍ਸਂ, ਨ ਰਥਂ, ਨ ਪਤ੍ਤਿਂ, ਨ ਇਤ੍ਥਿਂ, ਨ ਪੁਰਿਸਂ ਓਲੋਕੇਨ੍ਤੋ, ਨ ਉਦ੍ਧਂ ਉਲ੍ਲੋਕੇਨ੍ਤੋ, ਨ ਅਧੋ ਓਲੋਕੇਨ੍ਤੋ, ਨ ਦਿਸਾਵਿਦਿਸਂ ਪੇਕ੍ਖਮਾਨੋ ਗਚ੍ਛਤਿ. ਅਯਂ ਵੁਚ੍ਚਤਿ ਆਰਕ੍ਖਗੋਚਰੋ.

ਕਤਮੋ ਉਪਨਿਬਨ੍ਧਗੋਚਰੋ? ਚਤ੍ਤਾਰੋ ਸਤਿਪਟ੍ਠਾਨਾ ਯਤ੍ਥ ਚਿਤ੍ਤਂ ਉਪਨਿਬਨ੍ਧਤਿ. ਵੁਤ੍ਤਞ੍ਹੇਤਂ ਭਗਵਤਾ – ‘‘ਕੋ ਚ, ਭਿਕ੍ਖਵੇ, ਭਿਕ੍ਖੁਨੋ ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋ? ਯਦਿਦਂ ਚਤ੍ਤਾਰੋ ਸਤਿਪਟ੍ਠਾਨਾ’’ਤਿ (ਸਂ. ਨਿ. ੫.੩੭੨), ਅਯਂ ਵੁਚ੍ਚਤਿ ਉਪਨਿਬਨ੍ਧਗੋਚਰੋਤਿ. ਇਤਿ ਇਮਿਨਾ ਚ ਆਚਾਰੇਨ ਇਮਿਨਾ ਚ ਗੋਚਰੇਨ ਉਪੇਤੋ…ਪੇ… ਸਮਨ੍ਨਾਗਤੋ. ਤੇਨਪਿ ਵੁਚ੍ਚਤਿ ਆਚਾਰਗੋਚਰਸਮ੍ਪਨ੍ਨੋਤਿ.

ਅਣੁਮਤ੍ਤੇਸੁ ਵਜ੍ਜੇਸੁ ਭਯਦਸ੍ਸਾਵੀਤਿ ਅਣੁਪ੍ਪਮਾਣੇਸੁ ਅਸਞ੍ਚਿਚ੍ਚ ਆਪਨ੍ਨਸੇਖਿਯਅਕੁਸਲਚਿਤ੍ਤੁਪ੍ਪਾਦਾਦਿਭੇਦੇਸੁ ਵਜ੍ਜੇਸੁ ਭਯਦਸ੍ਸਨਸੀਲੋ. ਸਮਾਦਾਯ ਸਿਕ੍ਖਤਿ ਸਿਕ੍ਖਾਪਦੇਸੂਤਿ ਯਂਕਿਞ੍ਚਿ ਸਿਕ੍ਖਾਪਦੇਸੁ ਸਿਕ੍ਖਿਤਬ੍ਬਂ, ਤਂ ਸਬ੍ਬਂ ਸਮ੍ਮਾ ਆਦਾਯ ਸਿਕ੍ਖਤਿ. ਏਤ੍ਥ ਚ ‘‘ਪਾਤਿਮੋਕ੍ਖਸਂਵਰਸਂਵੁਤੋ’’ਤਿ ਏਤ੍ਤਾਵਤਾ ਚ ਪੁਗ੍ਗਲਾਧਿਟ੍ਠਾਨਾਯ ਦੇਸਨਾਯ ਪਾਤਿਮੋਕ੍ਖਸਂਵਰਸੀਲਂ ਦਸ੍ਸਿਤਂ. ‘‘ਆਚਾਰਗੋਚਰਸਮ੍ਪਨ੍ਨੋ’’ਤਿਆਦਿ ਪਨ ਸਬ੍ਬਂ ਯਥਾਪਟਿਪਨ੍ਨਸ੍ਸ ਤਂ ਸੀਲਂ ਸਮ੍ਪਜ੍ਜਤਿ, ਤਂ ਪਟਿਪਤ੍ਤਿਂ ਦਸ੍ਸੇਤੁਂ ਵੁਤ੍ਤਨ੍ਤਿ ਵੇਦਿਤਬ੍ਬਂ.

੮੮. ਸਾਤਿਯੇਸੁ ਅਨਸ੍ਸਾਵੀਤਿ ਸਾਤਵਤ੍ਥੂਸੁ ਕਾਮਗੁਣੇਸੁ ਤਣ੍ਹਾਸਨ੍ਥਵਵਿਰਹਿਤੋ. ਸਣ੍ਹੋਤਿ ਸਣ੍ਹੇਹਿ ਕਾਯਕਮ੍ਮਾਦੀਹਿ ਸਮਨ੍ਨਾਗਤੋ. ਪਟਿਭਾਨਵਾਤਿ ਪਰਿਯਤ੍ਤਿਪਰਿਪੁਚ੍ਛਾਧਿਗਮਪਟਿਭਾਨੇਹਿ ਸਮਨ੍ਨਾਗਤੋ. ਨ ਸਦ੍ਧੋਤਿ ਸਾਮਂ ਅਧਿਗਤਧਮ੍ਮਂ ਨ ਕਸ੍ਸਚਿ ਸਦ੍ਦਹਤਿ. ਨ ਵਿਰਜ੍ਜਤੀਤਿ ਖਯਾ ਰਾਗਸ੍ਸ ਵਿਰਤ੍ਤਤ੍ਤਾ ਇਦਾਨਿ ਨ ਵਿਰਜ੍ਜਤਿ.

ਯੇਸਂ ਏਸਾਤਿ ਯੇਸਂ ਪੁਗ੍ਗਲਾਨਂ ਸਾਤਵਤ੍ਥੂਸੁ ਕਾਮਗੁਣੇਸੁ ਇਚ੍ਛਾ ਤਣ੍ਹਾ. ਅਪ੍ਪਹੀਨਾਤਿ ਸਨ੍ਥਵਸਮ੍ਪਯੁਤ੍ਤਾ ਤਣ੍ਹਾ ਅਰਹਤ੍ਤਮਗ੍ਗੇਨ ਅਪ੍ਪਹੀਨਾ. ਤੇਸਂ ਚਕ੍ਖੁਤੋ ਰੂਪਤਣ੍ਹਾ ਸਵਤੀਤਿ ਏਤੇਸਂ ਚਕ੍ਖੁਦ੍ਵਾਰਤੋ ਪਵਤ੍ਤਜਵਨਵੀਥਿਸਮ੍ਪਯੁਤ੍ਤਾ ਰੂਪਾਰਮ੍ਮਣਾ ਤਣ੍ਹਾ ਉਪ੍ਪਜ੍ਜਤਿ. ਆਸਵਤੀਤਿ ਓਕਾਸਤੋ ਯਾਵ ਭਵਗ੍ਗਾ ਧਮ੍ਮਤੋ ਯਾਵ ਗੋਤ੍ਰਭੂ ਸਵਤਿ. ਸਨ੍ਦਤੀਤਿ ਨਦੀਸੋਤਂ ਵਿਯ ਅਧੋਮੁਖਂ ਸਨ੍ਦਤਿ. ਪਵਤ੍ਤਤੀਤਿ ਪੁਨਪ੍ਪੁਨਂ ਉਪ੍ਪਤ੍ਤਿਵਸੇਨ ਪਵਤ੍ਤਤਿ. ਸੇਸਦ੍ਵਾਰੇਸੁਪਿ ਏਸੇਵ ਨਯੋ. ਸੁਕ੍ਕਪਕ੍ਖੇ ਵੁਤ੍ਤਵਿਪਰਿਯਾਯੇਨ ਤਣ੍ਹਾ ਅਰਹਤ੍ਤਮਗ੍ਗੇਨ ਸੁਪ੍ਪਹੀਨਾ. ਤੇਸਂ ਚਕ੍ਖੁਤੋ ਰੂਪਤਣ੍ਹਾ ਨ ਸਵਤਿ.

ਸਣ੍ਹੇਨ ਕਾਯਕਮ੍ਮੇਨ ਸਮਨ੍ਨਾਗਤੋਤਿ ਅਫਰੁਸੇਨ ਮੁਦੁਨਾ ਕਾਯਕਮ੍ਮੇਨ ਸਮਙ੍ਗੀਭੂਤੋ ਏਕੀਭੂਤੋ. ਵਚੀਕਮ੍ਮਾਦੀਸੁਪਿ ਏਸੇਵ ਨਯੋ. ਸਣ੍ਹੇਹਿ ਸਤਿਪਟ੍ਠਾਨੇਹੀਤਿਆਦੀਸੁ ਸਤਿਪਟ੍ਠਾਨਾਦਯੋ ਲੋਕਿਯਲੋਕੁਤ੍ਤਰਮਿਸ੍ਸਕਾ. ਪਰਿਯਾਪੁਣਨਅਤ੍ਥਾਦਿਪਰਿਪੁਚ੍ਛਾਲੋਕਿਯਲੋਕੁਤ੍ਤਰਧਮ੍ਮਾਧਿਗਮਵਸੇਨ ਸਲ੍ਲਕ੍ਖਣਵਿਭਾਵਨਵਵਤ੍ਥਾਨਕਰਣਸਮਤ੍ਥਾ ਤਿਸ੍ਸੋ ਪਟਿਭਾਨਪ੍ਪਭੇਦਸਙ੍ਖਾਤਾ ਪਞ੍ਞਾ ਯਸ੍ਸ ਅਤ੍ਥਿ, ਸੋ ਪਟਿਭਾਨਵਾ. ਤਸ੍ਸ ਪਰਿਯਤ੍ਤਿਂ ਨਿਸ੍ਸਾਯ ਪਟਿਭਾਯਤੀਤਿ ਤਸ੍ਸ ਪੁਗ੍ਗਲਸ੍ਸ ਪਰਿਯਾਪੁਣਨਂ ਅਲ੍ਲੀਯਿਤ੍ਵਾ ਞਾਣਂ ਜਾਯਤਿ ਞਾਣਂ ਅਭਿਮੁਖਂ ਹੋਤਿ. ਚਤ੍ਤਾਰੋ ਸਤਿਪਟ੍ਠਾਨਾਤਿ ਸਤ੍ਤਤਿਂਸ ਬੋਧਿਪਕ੍ਖਿਯਧਮ੍ਮਾ ਲੋਕਿਯਲੋਕੁਤ੍ਤਰਮਿਸ੍ਸਕਵਸੇਨ ਵੁਤ੍ਤਾ. ਮਗ੍ਗਫਲਾਨਿ ਨਿਬ੍ਬਤ੍ਤਿਤਲੋਕੁਤ੍ਤਰਵਸੇਨ. ਚਤਸ੍ਸੋ ਪਟਿਸਮ੍ਭਿਦਾਯੋ ਛ ਚ ਅਭਿਞ੍ਞਾਯੋ ਵਿਮੋਕ੍ਖਨ੍ਤਿਕਵਸੇਨ ਵੁਤ੍ਤਾਤਿ ਞਾਤਬ੍ਬਾ.

ਤਤ੍ਥ ਚਤਸ੍ਸੋ ਪਟਿਸਮ੍ਭਿਦਾਯੋਤਿ ਚਤ੍ਤਾਰੋ ਞਾਣਪ੍ਪਭੇਦਾਤਿ ਅਤ੍ਥੋ. ਇਦ੍ਧਿਵਿਧਾਦਿਆਸਵਕ੍ਖਯਪਰਿਯੋਸਾਨਾਨਿ ਅਧਿਕਾਨਿ ਛ ਞਾਣਾਨਿ. ਤਸ੍ਸਾਤਿ ਪਰਸ੍ਸ, ਅਤ੍ਥੋ ਪਟਿਭਾਯਤੀਤਿ ਸਮ੍ਬਨ੍ਧੋ. ਅਤ੍ਥੋਤਿ ਸਙ੍ਖੇਪਤੋ ਹੇਤੁਫਲਂ. ਤਞ੍ਹਿ ਯਸ੍ਮਾ ਹੇਤੁਅਨੁਸਾਰੇਨ ਅਰੀਯਤਿ ਅਧਿਗਮੀਯਤਿ ਪਾਪੁਣੀਯਤਿ, ਤਸ੍ਮਾ ਅਤ੍ਥੋਤਿ ਵੁਚ੍ਚਤਿ. ਪਭੇਦਤੋ ਪਨ ਯਂਕਿਞ੍ਚਿ ਪਚ੍ਚਯੁਪ੍ਪਨ੍ਨਂ ਨਿਬ੍ਬਾਨਂ ਭਾਸਿਤਤ੍ਥੋ ਵਿਪਾਕੋ ਕਿਰਿਯਾਤਿ ਇਮੇ ਪਞ੍ਚ ਧਮ੍ਮਾ ਅਤ੍ਥੋਤਿ ਵੇਦਿਤਬ੍ਬਾ, ਤਂ ਅਤ੍ਥਂ ਪਚ੍ਚਵੇਕ੍ਖਨ੍ਤਸ੍ਸ ਸੋ ਅਤ੍ਥੋ ਪਭੇਦਤੋ ਞਾਤੋ ਪਾਕਟੋ ਹੋਤਿ. ਧਮ੍ਮੋਤਿ ਸਙ੍ਖੇਪਤੋ ਪਚ੍ਚਯੋ. ਸੋ ਹਿ ਯਸ੍ਮਾ ਤਂ ਤਂ ਵਿਦਹਤਿ ਪਵਤ੍ਤੇਤਿ ਚੇਵ ਪਾਪੇਤਿ ਚ, ਤਸ੍ਮਾ ਧਮ੍ਮੋਤਿ ਵੁਚ੍ਚਤਿ. ਪਭੇਦਤੋ ਪਨ ਯੋ ਕੋਚਿ ਫਲਨਿਬ੍ਬਤ੍ਤਕੋ ਹੇਤੁ ਅਰਿਯਮਗ੍ਗੋ ਭਾਸਿਤਂ ਕੁਸਲਂ ਅਕੁਸਲਨ੍ਤਿ ਇਮੇ ਪਞ੍ਚ ਧਮ੍ਮਾ ਧਮ੍ਮੋਤਿ ਵੇਦਿਤਬ੍ਬਾ, ਤਂ ਧਮ੍ਮਂ ਪਚ੍ਚਵੇਕ੍ਖਨ੍ਤਸ੍ਸ ਸੋ ਧਮ੍ਮੋ ਪਭੇਦਤੋ ਞਾਤੋ ਪਾਕਟੋ ਹੋਤਿ, ਤਸ੍ਮਿਂ ਅਤ੍ਥੇ ਚ ਧਮ੍ਮੇ ਚ ਯਾ ਸਭਾਵਨਿਰੁਤ੍ਤਿ ਅਬ੍ਯਭਿਚਾਰੀ ਵੋਹਾਰੋ, ਤਸ੍ਸ ਅਭਿਲਾਪੇ ਭਾਸਨੇ ਉਦੀਰਣੇ ਤਂ ਲਪਿਤਂ ਭਾਸਿਤਂ ਉਦੀਰਿਤਂ ਸਭਾਵਨਿਰੁਤ੍ਤਿਸਦ੍ਦਂ ਆਰਮ੍ਮਣਂ ਕਤ੍ਵਾ ਪਚ੍ਚਵੇਕ੍ਖਨ੍ਤਸ੍ਸ ਸਾ ਨਿਰੁਤ੍ਤਿ ਞਾਤਾ ਪਾਕਟਾ ਹੋਤਿ.

ਏਤ੍ਥ ਅਤ੍ਥੇ ਞਾਤੇ ਅਤ੍ਥੋ ਪਟਿਭਾਯਤੀਤਿ ਇਦਾਨਿ ਤਸ੍ਸ ਸਦ੍ਦਂ ਆਹਰਿਤ੍ਵਾ ਵੁਤ੍ਤਪ੍ਪਭੇਦੇ ਅਤ੍ਥੇ ਪਾਕਟੀਭੂਤੇ ਵੁਤ੍ਤਪ੍ਪਭੇਦੋ ਅਤ੍ਥੋ ਤਸ੍ਸ ਪੁਗ੍ਗਲਸ੍ਸ ਪਟਿਭਾਯਤਿ ਞਾਣਾਭਿਮੁਖੋ ਹੋਤਿ. ਧਮ੍ਮੇ ਞਾਤੇ ਧਮ੍ਮੋ ਪਟਿਭਾਯਤੀਤਿ ਵੁਤ੍ਤਪ੍ਪਭੇਦੇ ਧਮ੍ਮੇ ਪਾਕਟੀਭੂਤੇ ਵੁਤ੍ਤਪ੍ਪਭੇਦੋ ਧਮ੍ਮੋ ਪਟਿਭਾਯਤਿ. ਨਿਰੁਤ੍ਤਿਯਾ ਞਾਤਾਯ ਨਿਰੁਤ੍ਤਿ ਪਟਿਭਾਯਤੀਤਿ ਵੁਤ੍ਤਪ੍ਪਭੇਦਾਯ ਨਿਰੁਤ੍ਤਿਯਾ ਪਾਕਟਾਯ ਵੁਤ੍ਤਪ੍ਪਭੇਦਾ ਨਿਰੁਤ੍ਤਿ ਪਟਿਭਾਯਤਿ. ਇਮੇਸੁ ਤੀਸੁ ਞਾਣੇਸੁ ਞਾਣਨ੍ਤਿ ਅਤ੍ਥਧਮ੍ਮਨਿਰੁਤ੍ਤੀਸੁ ਇਮੇਸੁ ਤੀਸੁ ਸਬ੍ਬਤ੍ਥਕਞਾਣਮਾਰਮ੍ਮਣਂ ਕਤ੍ਵਾ ਪਚ੍ਚਵੇਕ੍ਖਨ੍ਤਸ੍ਸ ਤੇਸੁ ਤੀਸੁ ਞਾਣੇਸੁ ਪਭੇਦਗਤਂ ਞਾਣਂ, ਯਥਾਵੁਤ੍ਤੇਸੁ ਵਾ ਤੇਸੁ ਤੀਸੁ ਞਾਣੇਸੁ ਗੋਚਰਕਿਚ੍ਚਾਦਿਵਸੇਨ ਵਿਤ੍ਥਾਰਗਤਂ ਞਾਣਂ ਪਟਿਭਾਨਪਟਿਸਮ੍ਭਿਦਾ. ਇਮਾਯ ਪਟਿਭਾਨਪਟਿਸਮ੍ਭਿਦਾਯਾਤਿ ਇਮਾਯ ਵੁਤ੍ਤਪ੍ਪਕਾਰਾਯ ਯਥਾਵੁਤ੍ਤਵਿਤ੍ਥਾਰਪਞ੍ਞਾਯ ਉਪੇਤੋ ਹੋਤਿ. ਸੋ ਵੁਚ੍ਚਤਿ ਪਟਿਭਾਨਵਾਤਿ ਨਿਗਮੇਨ੍ਤੋ ਆਹ. ਯਸ੍ਸ ਪਰਿਯਤ੍ਤਿ ਨਤ੍ਥੀਤਿ ਪਰਿਯਤ੍ਤਿ ਨਾਮ ਬੁਦ੍ਧਵਚਨਂ. ਤਞ੍ਹਿ ਉਗ੍ਗਣ੍ਹਨ੍ਤਸ੍ਸ ਪਟਿਸਮ੍ਭਿਦਾ ਵਿਸਦਾ ਹੋਨ੍ਤਿ. ਯਸ੍ਸ ਪੁਗ੍ਗਲਸ੍ਸ ਏਵਰੂਪਾ ਪਰਿਯਤ੍ਤਿ ਨਤ੍ਥਿ. ਪਰਿਪੁਚ੍ਛਾ ਨਤ੍ਥੀਤਿ ਪਰਿਪੁਚ੍ਛਾ ਨਾਮ ਪਾਲ਼ਿਅਟ੍ਠਕਥਾਦੀਸੁ ਗਣ੍ਠਿਪਦਅਤ੍ਥਪਦਵਿਨਿਚ੍ਛਯਕਥਾ. ਉਗ੍ਗਹਿਤਪਾਲ਼ਿਆਦੀਸੁ ਹਿ ਅਤ੍ਥਂ ਕਥੇਨ੍ਤਸ੍ਸ ਪਟਿਸਮ੍ਭਿਦਾ ਵਿਸਦਾ ਹੋਨ੍ਤਿ. ਅਧਿਗਮੋ ਨਤ੍ਥੀਤਿ ਅਧਿਗਮੋ ਨਾਮ ਅਰਹਤ੍ਤਪ੍ਪਤ੍ਤਿ. ਅਰਹਤ੍ਤਞ੍ਹਿ ਪਤ੍ਤਸ੍ਸ ਪਟਿਸਮ੍ਭਿਦਾ ਵਿਸਦਾ ਹੋਨ੍ਤਿ. ਯਸ੍ਸ ਵੁਤ੍ਤਪ੍ਪਕਾਰਾ ਤਿਵਿਧਾ ਸਮ੍ਪਤ੍ਤਿ ਨਤ੍ਥਿ. ਕਿਂ ਤਸ੍ਸ ਪਟਿਭਾਯਿਸ੍ਸਤੀਤਿ ਕੇਨ ਕਾਰਣੇਨ ਤਸ੍ਸ ਪੁਗ੍ਗਲਸ੍ਸ ਪਭੇਦਗਤਂ ਞਾਣਂ ਉਪਟ੍ਠਹਿਸ੍ਸਤਿ.

ਸਾਮਨ੍ਤਿ ਸਯਮੇਵ. ਸਯਂ ਅਭਿਞ੍ਞਾਤਨ੍ਤਿ ਸਯਮੇਵ ਤੇਨ ਞਾਣੇਨ ਅਵਗਮਿਤਂ. ਅਤ੍ਤਪਚ੍ਚਕ੍ਖਂ ਧਮ੍ਮਨ੍ਤਿ ਅਤ੍ਤਨਾ ਪਟਿਵਿਜ੍ਝਿਤਂ ਪਚ੍ਚਵੇਕ੍ਖਿਤਂ ਧਮ੍ਮਂ. ਨ ਕਸ੍ਸਚਿ ਸਦ੍ਦਹਤੀਤਿ ਅਤ੍ਤਪਚ੍ਚਕ੍ਖਤਾਯ ਪਰੇਸਂ ਨ ਸਦ੍ਦਹਤਿ, ਸਦ੍ਧਾਯ ਨ ਗਚ੍ਛਤਿ. ਅਵਿਜ੍ਜਾਪਚ੍ਚਯਾ ਸਙ੍ਖਾਰਾਤਿਆਦਿਕਂ ਦ੍ਵਾਦਸਪਦਿਕਪਚ੍ਚਯਾਕਾਰਦਸ੍ਸਨਵਸੇਨ ਵੁਤ੍ਤਂ. ਅਵਿਜ੍ਜਾਨਿਰੋਧਾਤਿਆਦਯੋ ਸਂਸਾਰਨਿਵਤ੍ਤਿਂ ਸਨ੍ਧਾਯ ਵੁਤ੍ਤਾ. ਇਦਂ ਦੁਕ੍ਖਨ੍ਤਿਆਦਿ ਸਚ੍ਚਦਸ੍ਸਨਵਸੇਨ. ਇਮੇ ਆਸਵਾਤਿਆਦਯੋ ਅਪਰੇਨ ਪਰਿਯਾਯੇਨ ਕਿਲੇਸਵਸੇਨ ਪਚ੍ਚਯਦਸ੍ਸਨਵਸੇਨ. ਇਮੇ ਧਮ੍ਮਾ ਅਭਿਞ੍ਞੇਯ੍ਯਾਤਿਆਦਯੋ ਅਭਿਞ੍ਞੇਯ੍ਯਪਰਿਞ੍ਞੇਯ੍ਯਪਹਾਤਬ੍ਬਭਾਵੇਤਬ੍ਬਸਚ੍ਛਿਕਾਤਬ੍ਬਧਮ੍ਮਾਨਂ ਦਸ੍ਸਨਵਸੇਨ. ਛਨ੍ਨਂ ਫਸ੍ਸਾਯਤਨਾਨਨ੍ਤਿਆਦਯੋ ਫਸ੍ਸਾਯਤਨਾਨਂ ਉਪ੍ਪਤ੍ਤਿਞ੍ਚ ਅਤ੍ਥਙ੍ਗਮਞ੍ਚ ਅਸ੍ਸਾਦਞ੍ਚ ਉਪਦ੍ਦਵਞ੍ਚ ਨਿਸ੍ਸਰਣਞ੍ਚ ਦਸ੍ਸਨਵਸੇਨ. ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਪਞ੍ਚਵੀਸਤਿਵਿਧੇਨ ਉਦਯਞ੍ਚ ਵਯਞ੍ਚ, ਤੇਸੁ ਛਨ੍ਦਰਾਗਵਸੇਨ ਅਸ੍ਸਾਦਞ੍ਚ, ਤੇਸਂ ਵਿਪਰਿਣਾਮਂ ਆਦੀਨਵਞ੍ਚ, ਨਿਸ੍ਸਰਣਸਙ੍ਖਾਤਂ ਨਿਬ੍ਬਾਨਞ੍ਚ. ਚਤੁਨ੍ਨਂ ਮਹਾਭੂਤਾਨਂ ਅਵਿਜ੍ਜਾਦਿਸਮੁਦਯਞ੍ਚ, ਅਵਿਜ੍ਜਾਦਿਨਿਰੋਧੇ ਅਤ੍ਥਙ੍ਗਮਞ੍ਚ ਏਵਮਾਦਿਦਸ੍ਸਨਵਸੇਨ ਵੁਤ੍ਤਾ. ਏਤੇ ਧਮ੍ਮਾ ਤਤ੍ਥ ਤਤ੍ਥ ਵੁਤ੍ਤਨਯੇਨ ਵੇਦਿਤਬ੍ਬਾ.

ਅਮਤੋਗਧਨ੍ਤਿ ਨਤ੍ਥਿ ਏਤਸ੍ਸ ਮਰਣਸਙ੍ਖਾਤਂ ਮਤਨ੍ਤਿ ਅਮਤਂ. ਕਿਲੇਸਵਿਸਪਟਿਪਕ੍ਖਤ੍ਤਾ ਅਗਦਨ੍ਤਿਪਿ ਅਮਤਂ. ਤਸ੍ਮਿਂ ਨਿਨ੍ਨਤਾਯ ਅਮਤੋਗਧਂ. ਅਮਤਪਰਾਯਨਨ੍ਤਿ ਵੁਤ੍ਤਪ੍ਪਕਾਰਂ ਅਮਤਂ ਪਰਂ ਅਯਨਂ ਗਤਿ ਪਤਿਟ੍ਠਾ ਅਸ੍ਸਾਤਿ ਅਮਤਪਰਾਯਨਂ. ਅਮਤਪਰਿਯੋਸਾਨਨ੍ਤਿ ਤਂ ਅਮਤਂ ਸਂਸਾਰਸ੍ਸ ਨਿਟ੍ਠਾਭੂਤਤ੍ਤਾ ਪਰਿਯੋਸਾਨਮਸ੍ਸਾਤਿ ਅਮਤਪਰਿਯੋਸਾਨਂ.

੮੯. ਲਾਭਕਮ੍ਯਾ ਨ ਸਿਕ੍ਖਤੀਤਿ ਲਾਭਪਤ੍ਥਨਾਯ ਸੁਤ੍ਤਨ੍ਤਾਦੀਨਿ ਨ ਸਿਕ੍ਖਤਿ. ਅਵਿਰੁਦ੍ਧੋ ਚ ਤਣ੍ਹਾਯ, ਰਸੇਸੁ ਨਾਨੁਗਿਜ੍ਝਤੀਤਿ ਵਿਰੋਧਾਭਾਵੇਨ ਚ ਅਵਿਰੁਦ੍ਧੋ ਹੁਤ੍ਵਾ ਤਣ੍ਹਾਯ ਮੂਲਰਸਾਦੀਸੁ ਗੇਧਂ ਨਾਪਜ੍ਜਤਿ.

ਕੇਨ ਨੁ ਖੋਤਿ ਲਾਭਪਤ੍ਥਨਾਯ ਕਾਰਣਚਿਨ੍ਤੇਨ ਪਿਹਸ੍ਸ ਪਰਿਯੇਸਨੇ ਨਿਪਾਤੋ. ਲਾਭਾਭਿਨਿਬ੍ਬਤ੍ਤਿਯਾਤਿ ਚਤੁਨ੍ਨਂ ਪਚ੍ਚਯਾਨਂ ਵਿਸੇਸੇਨ ਉਪ੍ਪਤ੍ਤਿਯਾ. ਲਾਭਂ ਪਰਿਪਾਚੇਨ੍ਤੋਤਿ ਪਚ੍ਚਯੇ ਪਰਿਪਾਚਯਨ੍ਤੋ.

ਅਤ੍ਤਦਮਤ੍ਥਾਯਾਤਿ ਵਿਪਸ੍ਸਨਾਸਮ੍ਪਯੁਤ੍ਤਾਯ ਪਞ੍ਞਾਯ ਅਤ੍ਤਨੋ ਦਮਨਤ੍ਥਾਯ. ਅਤ੍ਤਸਮਤ੍ਥਾਯਾਤਿ ਸਮਾਧਿਸਮ੍ਪਯੁਤ੍ਤਾਯ ਪਞ੍ਞਾਯ ਅਤ੍ਤਨੋ ਸਮਾਧਾਨਤ੍ਥਾਯ. ਅਤ੍ਤਪਰਿਨਿਬ੍ਬਾਪਨਤ੍ਥਾਯਾਤਿ ਦੁਵਿਧੇਨਾਪਿ ਞਾਣੇਨ ਅਤ੍ਤਨੋ ਅਨੁਪਾਦਾਪਰਿਨਿਬ੍ਬਾਨਤ੍ਥਾਯ. ਵੁਤ੍ਤਞ੍ਹੇਤਂ ‘‘ਅਨੁਪਾਦਾਪਰਿਨਿਬ੍ਬਾਨਤ੍ਥਂ ਖੋ ਆਵੁਸੋ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ (ਮ. ਨਿ. ੧.੨੫੯). ਅਪ੍ਪਿਚ੍ਛਞ੍ਞੇਵ ਨਿਸ੍ਸਾਯਾਤਿ ਏਤ੍ਥ ਪਚ੍ਚਯਅਪ੍ਪਿਚ੍ਛੋ ਅਧਿਗਮਅਪ੍ਪਿਚ੍ਛੋ ਪਰਿਯਤ੍ਤਿਅਪ੍ਪਿਚ੍ਛੋ ਧੁਤਙ੍ਗਅਪ੍ਪਿਚ੍ਛੋਤਿ ਚਤ੍ਤਾਰੋ ਅਪ੍ਪਿਚ੍ਛਾ, ਤੇਸਂ ਨਾਨਤ੍ਥਂ ਹੇਟ੍ਠਾ ਵਿਤ੍ਥਾਰਿਤਂ ਏਵ, ਤਂ ਅਪ੍ਪਿਚ੍ਛਂ ਅਲ੍ਲੀਯਿਤ੍ਵਾ. ਸਨ੍ਤੁਟ੍ਠਿਞ੍ਞੇਵਾਤਿ ਚਤੂਸੁ ਪਚ੍ਚਯੇਸੁ ਚ ਤਿਵਿਧਂ ਸਨ੍ਤੋਸਂ ਅਲ੍ਲੀਯਿਤ੍ਵਾ, ਏਤੇਸਂ ਵਿਭਾਗੋ ਹੇਟ੍ਠਾ ਵਿਤ੍ਥਾਰਿਤੋਯੇਵ. ਸਲ੍ਲੇਖਞ੍ਞੇਵਾਤਿ ਕਿਲੇਸਲੇਖਨਂ. ਇਦਮਤ੍ਥਿਤਞ੍ਞੇਵਾਤਿ ਇਮੇਹਿ ਕੁਸਲਧਮ੍ਮੇਹਿ ਅਤ੍ਥਿ ਇਦਮਤ੍ਥਿ, ਤਸ੍ਸ ਭਾਵੋ ਇਦਮਤ੍ਥਿਤਾ, ਤਂ ਇਦਮਤ੍ਥਿਤਂਯੇਵ ਨਿਸ੍ਸਾਯ ਅਲ੍ਲੀਯਿਤ੍ਵਾ.

ਰਸੋਤਿ ਨਿਦ੍ਦੇਸਸ੍ਸ ਉਦ੍ਦੇਸਪਦਂ. ਮੂਲਰਸੋਤਿ ਯਂਕਿਞ੍ਚਿ ਮੂਲਂ ਪਟਿਚ੍ਚ ਨਿਬ੍ਬਤ੍ਤਰਸੋ. ਖਨ੍ਧਰਸਾਦੀਸੁਪਿ ਏਸੇਵ ਨਯੋ. ਅਮ੍ਬਿਲਨ੍ਤਿ ਤਕ੍ਕਮ੍ਬਿਲਾਦਿ. ਮਧੁਰਨ੍ਤਿ ਏਕਨ੍ਤਤੋ ਗੋਸਪ੍ਪਿਆਦਿ. ਮਧੁ ਪਨ ਕਸਾਵਯੁਤ੍ਤਂ ਚਿਰਨਿਕ੍ਖਿਤ੍ਤਂ ਕਸਾਵਂ ਹੋਤਿ, ਫਾਣਿਤਂ ਖਾਰਿਯੁਤ੍ਤਂ ਚਿਰਨਿਕ੍ਖਿਤ੍ਤਂ ਖਾਰਿਯਂ ਹੋਤਿ. ਸਪ੍ਪਿ ਪਨ ਚਿਰਨਿਕ੍ਖਿਤ੍ਤਂ ਵਣ੍ਣਗਨ੍ਧੇ ਜਹਨ੍ਤਮ੍ਪਿ ਰਸਂ ਨ ਜਹਤੀਤਿ ਤਦੇਵ ਏਕਨ੍ਤਮਧੁਰਂ. ਤਿਤ੍ਤਕਨ੍ਤਿ ਨਿਮ੍ਬਪਣ੍ਣਾਦਿ. ਕਟੁਕਨ੍ਤਿ ਸਿਙ੍ਗਿਵੇਰਮਰਿਚਾਦਿ. ਲੋਣਿਕਨ੍ਤਿ ਸਾਮੁਦ੍ਦਿਕਲੋਣਾਦਿ. ਖਾਰਿਕਨ੍ਤਿ ਵਾਤਿਙ੍ਗਣਕਲ਼ੀਰਾਦਿ. ਲਮ੍ਬਿਕਨ੍ਤਿ ਬਦਰਾਮਲਕਕਪਿਟ੍ਠਸਾਲਵਾਦਿ. ਕਸਾਵਨ੍ਤਿ ਹਰੀਤਕਾਦਿ. ਇਮੇ ਸਬ੍ਬੇਪਿ ਰਸਾ ਵਤ੍ਥੁਵਸੇਨ ਵੁਤ੍ਤਾ. ਤਂਤਂਵਤ੍ਥੁਕੋ ਪਨੇਤ੍ਥ ਰਸੋ ਚ ਅਮ੍ਬਿਲਾਦੀਨਿ ਨਾਮੇਹਿ ਵੁਤ੍ਤੋਤਿ ਵੇਦਿਤਬ੍ਬੋ. ਸਾਦੂਤਿ ਇਟ੍ਠਰਸੋ. ਅਸਾਦੂਤਿ ਅਨਿਟ੍ਠਰਸੋ. ਇਮਿਨਾ ਪਦਦ੍ਵਯੇਨ ਸਬ੍ਬੋਪਿ ਰਸੋ ਪਰਿਯਾਦਿਨ੍ਨੋ. ਸੀਤਨ੍ਤਿ ਸੀਤਰਸੋ. ਉਣ੍ਹਨ੍ਤਿ ਉਣ੍ਹਰਸੋ. ਏਵਮਯਂ ਮੂਲਰਸਾਦਿਨਾ ਭੇਦੇਨ ਭਿਨ੍ਨੋਪਿ ਰਸੋ ਲਕ੍ਖਣਾਦੀਹਿ ਅਭਿਨ੍ਨੋਯੇਵ. ਸਬ੍ਬੋਪਿ ਹੇਸ ਜਿਵ੍ਹਾਪਟਿਹਨਨਲਕ੍ਖਣੋ, ਜਿਵ੍ਹਾਵਿਞ੍ਞਾਣਸ੍ਸ ਵਿਸਯਭਾਵਰਸੋ, ਤਸ੍ਸੇਵ ਗੋਚਰਪਚ੍ਚੁਪਟ੍ਠਾਨੋ. ਤੇ ਜਿਵ੍ਹਗ੍ਗੇਨ ਰਸਗ੍ਗਾਨੀਤਿ ਏਤੇ ਸਮਣਬ੍ਰਾਹ੍ਮਣਾ ਪਸਾਦਜਿਵ੍ਹਗ੍ਗੇਨ ਉਤ੍ਤਮਰਸਾਨਿ. ਪਰਿਯੇਸਨ੍ਤਾਤਿ ਗਵੇਸਮਾਨਾ. ਆਹਿਣ੍ਡਨ੍ਤੀਤਿ ਤਤ੍ਥ ਤਤ੍ਥ ਵਿਚਰਨ੍ਤਿ. ਤੇ ਅਮ੍ਬਿਲਂ ਲਭਿਤ੍ਵਾ ਅਨਮ੍ਬਿਲਂ ਪਰਿਯੇਸਨ੍ਤੀਤਿ ਤਕ੍ਕਾਦਿਅਮ੍ਬਿਲਂ ਲਦ੍ਧਾ ਅਨਮ੍ਬਿਲਂ ਗਵੇਸਨ੍ਤਿ. ਏਵਂ ਸਬ੍ਬਂ ਪਰਿਵਤ੍ਤੇਤ੍ਵਾ ਪਰਿਵਤ੍ਤੇਤ੍ਵਾ ਯੋਜਿਤਂ.

ਪਟਿਸਙ੍ਖਾ ਯੋਨਿਸੋ ਆਹਾਰਂ ਆਹਾਰੇਤੀਤਿ ਪਟਿਸਙ੍ਖਾਨਪਞ੍ਞਾਯ ਜਾਨਿਤ੍ਵਾ ਉਪਾਯੇਨ ਆਹਾਰਂ ਆਹਾਰੇਤਿ. ਇਦਾਨਿ ਉਪਾਯਂ ਦਸ੍ਸੇਤੁਂ ‘‘ਨੇਵ ਦਵਾਯਾ’’ਤਿਆਦਿ ਵੁਤ੍ਤਂ.

ਤਤ੍ਥ ਨੇਵ ਦਵਾਯਾਤਿ ਦਵਤ੍ਥਾਯ ਨ ਆਹਾਰੇਤਿ. ਤਤ੍ਥ ਨਟਲਙ੍ਘਕਾਦਯੋ ਦਵਤ੍ਥਾਯ ਆਹਾਰੇਨ੍ਤਿ ਨਾਮ. ਯਞ੍ਹਿ ਭੋਜਨਂ ਭੁਤ੍ਤਸ੍ਸ ਨਚ੍ਚਗੀਤਕਬ੍ਬਸਿਲੋਕਸਙ੍ਖਾਤੋ ਦਵੋ ਅਤਿਰੇਕਤਰੇਨ ਪਟਿਭਾਤਿ, ਤਂ ਭੋਜਨਂ ਅਧਮ੍ਮੇਨ ਵਿਸਮੇਨ ਪਰਿਯੇਸਿਤ੍ਵਾ ਤੇ ਆਹਾਰੇਨ੍ਤਿ. ਅਯਂ ਪਨ ਭਿਕ੍ਖੁ ਨ ਏਵਮਾਹਾਰੇਤਿ.

ਨ ਮਦਾਯਾਤਿ ਮਾਨਮਦਪੁਰਿਸਮਦਾਨਂ ਵਡ੍ਢਨਤ੍ਥਾਯ ਨ ਆਹਾਰੇਤਿ. ਤਤ੍ਥ ਰਾਜਰਾਜਮਹਾਮਤ੍ਤਾ ਮਦਤ੍ਥਾਯ ਆਹਾਰੇਨ੍ਤਿ ਨਾਮ. ਤੇ ਹਿ ਅਤ੍ਤਨੋ ਮਾਨਮਦਪੁਰਿਸਮਦਾਨਂ ਵਡ੍ਢਨਤ੍ਥਾਯ ਪਿਣ੍ਡਰਸਭੋਜਨਾਦੀਨਿ ਪਣੀਤਭੋਜਨਾਨਿ ਭੁਞ੍ਜਨ੍ਤਿ. ਅਯਂ ਪਨ ਭਿਕ੍ਖੁ ਏਵਂ ਨਾਹਾਰੇਤਿ.

ਨ ਮਣ੍ਡਨਾਯਾਤਿ ਸਰੀਰਮਣ੍ਡਨਤ੍ਥਾਯ ਨ ਆਹਾਰੇਤਿ. ਤਤ੍ਥ ਰੂਪੂਪਜੀਵਿਨਿਯੋ ਮਾਤੁਗਾਮਾ ਅਨ੍ਤੇਪੁਰਿਕਾਦਯੋ ਚ ਸਪ੍ਪਿਫਾਣਿਤਾਦੀਨਿ ਪਿਵਨ੍ਤਿ, ਸਿਨਿਦ੍ਧਮੁਦੁਮਦ੍ਦਵਭੋਜਨਂ ਆਹਾਰੇਨ੍ਤਿ. ਏਵਂ ਨੋ ਅਙ੍ਗਲਟ੍ਠਿ ਸੁਸਣ੍ਠਿਤਾ ਭਵਿਸ੍ਸਤਿ, ਸਰੀਰੇ ਛਵਿਵਣ੍ਣੋ ਪਸਨ੍ਨੋ ਭਵਿਸ੍ਸਤੀਤਿ. ਅਯਂ ਪਨ ਭਿਕ੍ਖੁ ਏਵਂ ਨ ਆਹਾਰੇਤਿ.

ਨ ਵਿਭੂਸਨਾਯਾਤਿ ਸਰੀਰੇ ਮਂਸਵਿਭੂਸਨਤ੍ਥਾਯ ਨ ਆਹਾਰੇਤਿ. ਤਤ੍ਥ ਨਿਬ੍ਬੁਦ੍ਧਮਲ੍ਲਮੁਟ੍ਠਿਕਮਲ੍ਲਚੇਟਕਾਦਯੋ ਸੁਸਿਨਿਦ੍ਧੇਹਿ ਮਚ੍ਛਮਂਸਾਦੀਹਿ ਸਰੀਰਂ ਪੀਣੇਨ੍ਤਿ ‘‘ਏਵਂ ਨੋ ਮਂਸਂ ਉਸ੍ਸਦਂ ਭਵਿਸ੍ਸਤਿ ਪਹਾਰਸਹਨਤ੍ਥਾਯਾ’’ਤਿ. ਅਯਂ ਪਨ ਭਿਕ੍ਖੁ ਏਵਂ ਸਰੀਰੇ ਮਂਸਵਿਭੂਸਨਤ੍ਥਾਯ ਨ ਆਹਾਰੇਤਿ.

ਯਾਵਦੇਵਾਤਿ ਆਹਾਰਾਹਰਣਪਯੋਜਨਸ੍ਸ ਪਰਿਚ੍ਛੇਦਨਿਯਮਦਸ੍ਸਨਂ. ਇਮਸ੍ਸ ਕਾਯਸ੍ਸ ਠਿਤਿਯਾਤਿ ਇਮਸ੍ਸ ਚਤੁਮਹਾਭੂਤਿਕਸ੍ਸ ਕਰਜਕਾਯਸ੍ਸ ਠਪਨਤ੍ਥਾਯ ਆਹਾਰੇਤਿ, ਇਦਮਸ੍ਸ ਆਹਾਰਾਹਰਣੇ ਪਯੋਜਨਨ੍ਤਿ ਅਤ੍ਥੋ. ਯਾਪਨਾਯਾਤਿ ਜੀਵਿਤਿਨ੍ਦ੍ਰਿਯਯਾਪਨਤ੍ਥਾਯ ਆਹਾਰੇਤਿ. ਵਿਹਿਂਸੂਪਰਤਿਯਾਤਿ ਵਿਹਿਂਸਾ ਨਾਮ ਅਭੁਤ੍ਤਪਚ੍ਚਯਾ ਉਪ੍ਪਜ੍ਜਨਕਖੁਦ੍ਦਾ, ਤਸ੍ਸਾ ਉਪਰਤਿਯਾ ਵੂਪਸਮਨਤ੍ਥਾਯ ਆਹਾਰੇਤਿ. ਬ੍ਰਹ੍ਮਚਰਿਯਾਨੁਗ੍ਗਹਾਯਾਤਿ ਬ੍ਰਹ੍ਮਚਰਿਯਂ ਨਾਮ ਤਿਸ੍ਸੋ ਸਿਕ੍ਖਾ ਸਕਲਸਾਸਨਂ, ਤਸ੍ਸ ਅਨੁਗ੍ਗਣ੍ਹਤ੍ਥਾਯ ਆਹਾਰੇਤਿ.

ਇਤੀਤਿ ਉਪਾਯਨਿਦਸ੍ਸਨਂ, ਇਮਿਨਾ ਉਪਾਯੇਨਾਤਿ ਅਤ੍ਥੋ. ਪੁਰਾਣਞ੍ਚ ਵੇਦਨਂ ਪਟਿਹਙ੍ਖਾਮੀਤਿ ਪੁਰਾਣਵੇਦਨਂ ਨਾਮ ਅਭੁਤ੍ਤਪਚ੍ਚਯਾ ਉਪ੍ਪਜ੍ਜਨਕਵੇਦਨਾ, ਤਂ ਪਟਿਹਨਿਸ੍ਸਾਮੀਤਿ ਆਹਾਰੇਤਿ. ਨਵਞ੍ਚ ਵੇਦਨਂ ਨ ਉਪ੍ਪਾਦੇਸ੍ਸਾਮੀਤਿ ਨਵਵੇਦਨਾ ਨਾਮ ਅਤਿਭੁਤ੍ਤਪਚ੍ਚਯੇਨ ਉਪ੍ਪਜ੍ਜਨਕਵੇਦਨਾ, ਨ ਤਂ ਉਪ੍ਪਾਦੇਸ੍ਸਾਮੀਤਿ ਆਹਾਰੇਤਿ. ਅਥ ਵਾ ਨਵਵੇਦਨਾ ਨਾਮ ਭੁਤ੍ਤਪਚ੍ਚਯਾ ਨ ਉਪ੍ਪਜ੍ਜਨਕਵੇਦਨਾ, ਤਸ੍ਸਾ ਅਨੁਪ੍ਪਨ੍ਨਾਯ ਅਨੁਪ੍ਪਜ੍ਜਨਤ੍ਥਮੇਵ ਆਹਾਰੇਤਿ.

ਯਾਤ੍ਰਾ ਚ ਮੇ ਭਵਿਸ੍ਸਤੀਤਿ ਯਾਪਨਾ ਚ ਮੇ ਭਵਿਸ੍ਸਤਿ. ਅਨਵਜ੍ਜਤਾ ਚਾਤਿ ਏਤ੍ਥ ਅਤ੍ਥਿ ਸਾਵਜ੍ਜਂ, ਅਤ੍ਥਿ ਅਨਵਜ੍ਜਂ. ਤਤ੍ਥ ਅਧਮ੍ਮਿਕਪਰਿਯੇਸਨਾ ਅਧਮ੍ਮਿਕਪਟਿਗ੍ਗਹਣਂ ਅਧਮ੍ਮੇਨ ਪਰਿਭੋਗੋਤਿ ਇਦਂ ਸਾਵਜ੍ਜਂ ਨਾਮ. ਧਮ੍ਮੇਨ ਪਨ ਪਰਿਯੇਸਿਤ੍ਵਾ ਧਮ੍ਮੇਨ ਪਟਿਗ੍ਗਹੇਤ੍ਵਾ ਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਨਂ ਅਨਵਜ੍ਜਂ ਨਾਮ. ਏਕਚ੍ਚੋ ਅਨਵਜ੍ਜੇਯੇਵ ਸਾਵਜ੍ਜਂ ਕਰੋਤਿ, ‘‘ਲਦ੍ਧਂ ਮੇ’’ਤਿ ਕਤ੍ਵਾ ਪਮਾਣਾਤਿਕ੍ਕਨ੍ਤਂ ਭੁਞ੍ਜਤਿ, ਤਂ ਜੀਰਾਪੇਤੁਂ ਅਸਕ੍ਕੋਨ੍ਤੋ ਉਦ੍ਧਂਵਿਰੇਚਨਅਧੋਵਿਰੇਚਨਾਦੀਹਿ ਕਿਲਮਤਿ, ਸਕਲਵਿਹਾਰੇ ਭਿਕ੍ਖੂ ਤਸ੍ਸ ਸਰੀਰਪਟਿਜਗ੍ਗਨਭੇਸਜ੍ਜਪਰਿਯੇਸਨਾਦੀਸੁ ਉਸ੍ਸੁਕ੍ਕਂ ਆਪਜ੍ਜਨ੍ਤਿ, ‘‘ਕਿਂ ਇਦ’’ਨ੍ਤਿ ਵੁਤ੍ਤੇ ‘‘ਅਸੁਕਸ੍ਸ ਨਾਮ ਉਦਰਂ ਉਦ੍ਧੁਮਾਤ’’ਨ੍ਤਿਆਦਿਂ ਵਦਨ੍ਤਿ. ‘‘ਏਸ ਨਿਚ੍ਚਕਾਲਮ੍ਪਿ ਏਵਂ ਪਕਤਿਕੋਯੇਵ, ਅਤ੍ਤਨੋ ਕੁਚ੍ਛਿਪ੍ਪਮਾਣਂ ਨਾਮ ਨ ਜਾਨਾਤੀ’’ਤਿ ਨਿਨ੍ਦਨ੍ਤਿ ਗਰਹਨ੍ਤਿ. ਅਯਂ ਅਨਵਜ੍ਜੇਯੇਵ ਸਾਵਜ੍ਜਂ ਕਰੋਤਿ ਨਾਮ. ਏਵਂ ਅਕਤ੍ਵਾ ‘‘ਅਨਵਜ੍ਜਤਾ ਚ ਮੇ ਭਵਿਸ੍ਸਤੀ’’ਤਿ ਆਹਾਰੇਤਿ.

ਫਾਸੁਵਿਹਾਰੋ ਚਾਤਿ ਏਤ੍ਥਾਪਿ ਅਤ੍ਥਿ ਫਾਸੁਵਿਹਾਰੋ, ਅਤ੍ਥਿ ਨ ਫਾਸੁਵਿਹਾਰੋ. ਤਤ੍ਥ ਆਹਰਹਤ੍ਥਕੋ ਅਲਂਸਾਟਕੋ ਤਤ੍ਰਵਟ੍ਟਕੋ ਕਾਕਮਾਸਕੋ ਭੁਤ੍ਤਵਮਿਤਕੋਤਿ ਇਮੇਸਂ ਪਞ੍ਚਨ੍ਨਂ ਬ੍ਰਾਹ੍ਮਣਾਨਂ ਭੋਜਨਂ ਨ ਫਾਸੁਵਿਹਾਰੋ ਨਾਮ. ਏਤੇਸੁ ਹਿ ਆਹਰਹਤ੍ਥਕੋ ਨਾਮ ਬਹੁਂ ਭੁਞ੍ਜਿਤ੍ਵਾ ਅਤ੍ਤਨੋ ਧਮ੍ਮਤਾਯ ਉਟ੍ਠਾਤੁਂ ਅਸਕ੍ਕੋਨ੍ਤੋ ‘‘ਆਹਰ ਹਤ੍ਥ’’ਨ੍ਤਿ ਵਦਤਿ. ਅਲਂਸਾਟਕੋ ਨਾਮ ਅਚ੍ਚੁਦ੍ਧੁਮਾਤਕੁਚ੍ਛਿਤਾਯ ਉਟ੍ਠਿਤੋਪਿ ਸਾਟਕਂ ਨਿਵਾਸੇਤੁਂ ਨ ਸਕ੍ਕੋਤਿ. ਤਤ੍ਰਵਟ੍ਟਕੋ ਨਾਮ ਉਟ੍ਠਾਤੁਂ ਅਸਕ੍ਕੋਨ੍ਤੋ ਤਤ੍ਰੇਵ ਪਰਿਵਟ੍ਟਤਿ. ਕਾਕਮਾਸਕੋ ਨਾਮ ਯਥਾ ਕਾਕੇਹਿ ਆਮਸਿਤੁਂ ਸਕ੍ਕੋਤਿ, ਏਵਂ ਯਾਵ ਮੁਖਦ੍ਵਾਰਾ ਆਹਾਰੇਤਿ. ਭੁਤ੍ਤਵਮਿਤਕੋ ਨਾਮ ਮੁਖੇਨ ਸਨ੍ਧਾਰੇਤੁਂ ਅਸਕ੍ਕੋਨ੍ਤੋ ਤਤ੍ਥੇਵ ਵਮਤਿ. ਏਵਂ ਅਕਤ੍ਵਾ ‘‘ਫਾਸੁਵਿਹਾਰੋ ਚ ਮੇ ਭਵਿਸ੍ਸਤੀ’’ਤਿ ਆਹਾਰੇਤਿ. ਫਾਸੁਵਿਹਾਰੋ ਨਾਮ ਚਤੂਹਿ ਪਞ੍ਚਹਿ ਆਲੋਪੇਤਿ ਊਨੂਦਰਤਾ. ਏਤ੍ਤਕਞ੍ਹਿ ਭੁਞ੍ਜਿਤ੍ਵਾ ਪਾਨੀਯਂ ਪਿਵਤੋ ਚਤ੍ਤਾਰੋ ਇਰਿਯਾਪਥਾ ਸੁਖੇਨ ਪਵਤ੍ਤਨ੍ਤਿ. ਤਸ੍ਮਾ ਧਮ੍ਮਸੇਨਾਪਤਿ ਏਵਮਾਹ –

‘‘ਚਤ੍ਤਾਰੋ ਪਞ੍ਚ ਆਲੋਪੇ, ਅਭੁਤ੍ਵਾ ਉਦਕਂ ਪਿਵੇ;

ਅਲਂ ਫਾਸੁਵਿਹਾਰਾਯ, ਪਹਿਤਤ੍ਤਸ੍ਸ ਭਿਕ੍ਖੁਨੋ’’ਤਿ. (ਥੇਰਗਾ. ੯੮੩; ਮਿ. ਪ. ੬.੫.੧੦);

ਇਮਸ੍ਮਿਂ ਪਨ ਠਾਨੇ ਅਙ੍ਗਾਨਿ ਸਮੋਧਾਨੇਤਬ੍ਬਾਨਿ. ਨੇਵ ਦਵਾਯਾਤਿ ਹਿ ਏਕਂ ਅਙ੍ਗਂ, ਨ ਮਦਾਯਾਤਿ ਏਕਂ, ਨ ਮਣ੍ਡਨਾਯਾਤਿ ਏਕਂ, ਨ ਵਿਭੂਸਨਾਯਾਤਿ ਏਕਂ, ਯਾਵਦੇਵ ਇਮਸ੍ਸ ਕਾਯਸ੍ਸ ਠਿਤਿਯਾ ਯਾਪਨਾਯਾਤਿ ਏਕਂ, ਵਿਹਿਂਸੂਪਰਤਿਯਾ ਬ੍ਰਹ੍ਮਚਰਿਯਾਨੁਗ੍ਗਹਾਯਾਤਿ ਏਕਂ, ਇਤਿ ਪੁਰਾਣਞ੍ਚ ਵੇਦਨਂ ਪਟਿਹਙ੍ਖਾਮਿ ਨਵਞ੍ਚ ਵੇਦਨਂ ਨ ਉਪ੍ਪਾਦੇਸ੍ਸਾਮੀਤਿ ਏਕਂ, ਯਾਤ੍ਰਾ ਚ ਮੇ ਭਵਿਸ੍ਸਤੀਤਿ ਏਕਂ ਅਙ੍ਗਂ, ਅਨਵਜ੍ਜਤਾ ਚ ਫਾਸੁਵਿਹਾਰੋ ਚਾਤਿ ਅਯਮੇਤ੍ਥ ਭੋਜਨਾਨਿਸਂਸੋ.

ਮਹਾਸਿਵਤ੍ਥੇਰੋ ਪਨਾਹ – ‘‘ਹੇਟ੍ਠਾ ਚਤ੍ਤਾਰਿ ਅਙ੍ਗਾਨਿ ਪਟਿਕ੍ਖੇਪੋ ਨਾਮ, ਉਪਰਿ ਪਨ ਅਟ੍ਠਙ੍ਗਾਨਿ ਸਮੋਧਾਨੇਤਬ੍ਬਾਨੀ’’ਤਿ. ਤਤ੍ਥ ਯਾਵਦੇਵ ਇਮਸ੍ਸ ਕਾਯਸ੍ਸ ਠਿਤਿਯਾਤਿ ਏਕਂ ਅਙ੍ਗਂ, ਯਾਪਨਾਯਾਤਿ ਏਕਂ, ਵਿਹਿਂਸੂਪਰਤਿਯਾਤਿ ਏਕਂ, ਬ੍ਰਹ੍ਮਚਰਿਯਾਨੁਗ੍ਗਹਾਯਾਤਿ ਏਕਂ, ਇਤਿ ਪੁਰਾਣਞ੍ਚ ਵੇਦਨਂ ਪਟਿਹਙ੍ਖਾਮੀਤਿ ਏਕਂ, ਨਵਞ੍ਚ ਵੇਦਨਂ ਨ ਉਪ੍ਪਾਦੇਸ੍ਸਾਮੀਤਿ ਏਕਂ, ਯਾਤ੍ਰਾ ਚ ਮੇ ਭਵਿਸ੍ਸਤੀਤਿ ਏਕਂ, ਅਨਵਜ੍ਜਤਾ ਚਾਤਿ ਏਕਂ, ਫਾਸੁਵਿਹਾਰੋ ਪਨ ਭੋਜਨਾਨਿਸਂਸੋਤਿ. ਏਵਂ ਅਟ੍ਠਙ੍ਗਸਮਨ੍ਨਾਗਤਂ ਆਹਾਰਂ ਆਹਾਰੇਤਿ.

੯੦. ਉਪੇਕ੍ਖਕੋਤਿ ਛਲ਼ਙ੍ਗੁਪੇਕ੍ਖਾਯ ਸਮਨ੍ਨਾਗਤੋ. ਸਤੋਤਿ ਕਾਯਾਨੁਪਸ੍ਸਨਾਦਿਸਤਿਯੁਤ੍ਤੋ.

ਉਪੇਕ੍ਖਕੋਤਿ ਛਲ਼ਙ੍ਗੁਪੇਕ੍ਖਾਯ ਸਮਨ੍ਨਾਗਤੋਤਿ ਏਤ੍ਥ ਛਲ਼ਙ੍ਗੁਪੇਕ੍ਖਾਧਮ੍ਮੋ ਨਾਮ ਕੋਤਿ? ਞਾਣਾਦਯੋ. ‘‘ਞਾਣ’’ਨ੍ਤਿ ਵੁਤ੍ਤੇ ਕਿਰਿਯਤੋ ਚਤ੍ਤਾਰਿ ਞਾਣਸਮ੍ਪਯੁਤ੍ਤਾਨਿ ਲਬ੍ਭਨ੍ਤਿ, ‘‘ਸਤਤਵਿਹਾਰੋ’’ਤਿ ਵੁਤ੍ਤੇ ਅਟ੍ਠ ਮਹਾਚਿਤ੍ਤਾਨਿ ਲਬ੍ਭਨ੍ਤਿ, ‘‘ਰਜ੍ਜਨਦੁਸ੍ਸਨਂ ਨਤ੍ਥੀ’’ਤਿ ਵੁਤ੍ਤੇ ਦਸ ਚਿਤ੍ਤਾਨਿ ਲਬ੍ਭਨ੍ਤਿ. ਸੋਮਨਸ੍ਸਂ ਆਸੇਵਨਵਸੇਨ ਲਬ੍ਭਤਿ. ਚਕ੍ਖੁਨਾ ਰੂਪਂ ਦਿਸ੍ਵਾਤਿ ਕਾਰਣਵਸੇਨ ਚਕ੍ਖੂਤਿ ਲਦ੍ਧਵੋਹਾਰੇਨ ਰੂਪਦਸ੍ਸਨਸਮਤ੍ਥੇਨ ਚਕ੍ਖੁਵਿਞ੍ਞਾਣੇਨ ਰੂਪਂ ਦਿਸ੍ਵਾ. ਪੋਰਾਣਾ ਪਨਾਹੁ – ਚਕ੍ਖੁ ਰੂਪਂ ਨ ਪਸ੍ਸਤਿ ਅਚਿਤ੍ਤਕਤ੍ਤਾ, ਚਿਤ੍ਤਮ੍ਪਿ ਨ ਪਸ੍ਸਤਿ ਅਚਕ੍ਖੁਕਤ੍ਤਾ. ਦ੍ਵਾਰਾਰਮ੍ਮਣਸਙ੍ਘਟ੍ਟਨੇਨ ਪਨ ਪਸਾਦਵਤ੍ਥੁਕੇਨ ਚਿਤ੍ਤੇਨ ਪਸ੍ਸਤਿ. ਈਦਿਸੇਸੁ ਪਨ ਠਾਨੇਸੁ ‘‘ਧਨੁਨਾ ਵਿਜ੍ਝਤੀ’’ਤਿਆਦੀਸੁ ਵਿਯ ਸਸਮ੍ਭਾਰਕਥਾ ਨਾਮ ਹੋਤਿ. ਤਸ੍ਮਾ ਚਕ੍ਖੁਵਿਞ੍ਞਾਣੇਨ ਰੂਪਂ ਦਿਸ੍ਵਾਤਿ ਅਯਮੇਵੇਤ੍ਥ ਅਤ੍ਥੋ.

ਨੇਵ ਸੁਮਨੋ ਹੋਤੀਤਿ ਲੋਭੁਪ੍ਪਤ੍ਤਿਵਸੇਨ ਛਨ੍ਦਰਾਗੁਪ੍ਪਤ੍ਤਿਵਸੇਨ ਸੋਮਨਸ੍ਸੋ ਨ ਹੋਤਿ. ਨ ਦੁਮ੍ਮਨੋਤਿ ਪਟਿਘੁਪ੍ਪਤ੍ਤਿਵਸੇਨ ਦੁਟ੍ਠਚਿਤ੍ਤੋ ਨ ਹੋਤਿ. ਉਪੇਕ੍ਖਕੋਤਿ ਉਪਪਤ੍ਤਿਤੋ ਇਕ੍ਖਕੋ ਹੋਤਿ, ਅਪਕ੍ਖਪਤਿਤੋ ਹੁਤ੍ਵਾ ਇਰਿਯਾਪਥਂ ਪਵਤ੍ਤੇਤਿ. ਸਤੋ ਸਮ੍ਪਜਾਨੋਤਿ ਸਤਿਮਾ ਞਾਣਸਮ੍ਪਨ੍ਨੋ. ਮਨਾਪਂ ਨਾਭਿਗਿਜ੍ਝਤੀਤਿ ਮਨਵਡ੍ਢਨਕਂ ਇਟ੍ਠਾਰਮ੍ਮਣਂ ਨਾਭਿਗਿਜ੍ਝਤਿ ਨ ਪਤ੍ਥੇਤਿ. ਨਾਭਿਹਂਸਤੀਤਿ ਨ ਤੁਸ੍ਸਤਿ. ਨ ਰਾਗਂ ਜਨੇਤੀਤਿ ਤਤ੍ਥ ਤਤ੍ਥ ਰਞ੍ਜਨਂ ਨ ਉਪ੍ਪਾਦੇਤਿ. ਤਸ੍ਸ ਠਿਤੋਵ ਕਾਯੋ ਹੋਤੀਤਿ ਤਸ੍ਸ ਖੀਣਾਸਵਸ੍ਸ ਚਕ੍ਖਾਦਿਕਾਯੋ ਕਮ੍ਪਾਰਹਿਤਤ੍ਤਾ ਠਿਤੋ ਨਿਚ੍ਚਲੋ ਹੋਤਿ. ਅਮਨਾਪਨ੍ਤਿ ਅਨਿਟ੍ਠਾਰਮ੍ਮਣਂ. ਨ ਮਙ੍ਕੁ ਹੋਤੀਤਿ ਦੋਮਨਸ੍ਸਿਤੋ ਨ ਹੋਤਿ. ਅਪ੍ਪਤਿਟ੍ਠਿਤਚਿਤ੍ਤੋਤਿ ਕੋਧਵਸੇਨ ਠਿਤਮਨੋ ਨ ਹੋਤਿ. ਅਲੀਨਮਨਸੋਤਿ ਅਲੀਨਚਿਤ੍ਤੋ. ਅਬ੍ਯਾਪਨ੍ਨਚੇਤਸੋਤਿ ਬ੍ਯਾਪਾਦਰਹਿਤਚਿਤ੍ਤੋ.

ਰਜਨੀਯੇ ਨ ਰਜ੍ਜਤੀਤਿ ਰਜਨੀਯਸ੍ਮਿਂ ਵਤ੍ਥੁਸ੍ਮਿਂ ਨ ਰਾਗਂ ਉਪ੍ਪਾਦੇਤਿ. ਦੁਸ੍ਸਨੀਯੇ ਨ ਦੁਸ੍ਸਤੀਤਿ ਦੋਸੁਪ੍ਪਾਦੇ ਵਤ੍ਥੁਸ੍ਮਿਂ ਨ ਦੋਸਂ ਉਪ੍ਪਾਦੇਤਿ. ਮੋਹਨੀਯੇ ਨ ਮੁਯ੍ਹਤੀਤਿ ਮੋਹਨੀਯਸ੍ਮਿਂ ਵਤ੍ਥੁਸ੍ਮਿਂ ਨ ਮੋਹਂ ਉਪ੍ਪਾਦੇਤਿ. ਕੋਪਨੀਯੇ ਨ ਕੁਪ੍ਪਤੀਤਿ ਕੋਧਨੀਯਸ੍ਮਿਂ ਵਤ੍ਥੁਸ੍ਮਿਂ ਨ ਚਲਤਿ. ਮਦਨੀਯੇ ਨ ਮਜ੍ਜਤੀਤਿ ਮਦਨੀਯਸ੍ਮਿਂ ਵਤ੍ਥੁਸ੍ਮਿਂ ਨ ਸਂਸੀਦਤਿ. ਕਿਲੇਸਨੀਯੇ ਨ ਕਿਲਿਸ੍ਸਤੀਤਿ ਉਪਤਪਨੀਯਸ੍ਮਿਂ ਵਤ੍ਥੁਸ੍ਮਿਂ ਨ ਉਪਤਪ੍ਪਤਿ. ਦਿਟ੍ਠੇ ਦਿਟ੍ਠਮਤ੍ਤੋਤਿ ਰੂਪਾਰਮ੍ਮਣੇ ਚਕ੍ਖੁਵਿਞ੍ਞਾਣੇਨ ਦਿਟ੍ਠੇ ਦਿਟ੍ਠਮਤ੍ਤੋ. ਸੁਤੇ ਸੁਤਮਤ੍ਤੋਤਿ ਸਦ੍ਦਾਯਤਨੇ ਸੋਤਵਿਞ੍ਞਾਣੇਨ ਸੁਤੇ ਸੁਤਮਤ੍ਤੋ. ਮੁਤੇ ਮੁਤਮਤ੍ਤੋਤਿ ਘਾਨਜਿਵ੍ਹਾਕਾਯਵਿਞ੍ਞਾਣੇਨ ਪਾਪੁਣਿਤ੍ਵਾ ਗਹਿਤੇ ਗਹਿਤਮਤ੍ਤੋ. ਵਿਞ੍ਞਾਤੇ ਵਿਞ੍ਞਾਤਮਤ੍ਤੋਤਿ ਮਨੋਵਿਞ੍ਞਾਣੇਨ ਞਾਤੇ ਞਾਤਮਤ੍ਤੋ. ਦਿਟ੍ਠੇ ਨ ਲਿਮ੍ਪਤੀਤਿ ਚਕ੍ਖੁਵਿਞ੍ਞਾਣੇਨ ਦਿਟ੍ਠੇ ਰੂਪਾਰਮ੍ਮਣੇ ਤਣ੍ਹਾਦਿਟ੍ਠਿਲੇਪੇਨ ਨ ਲਿਮ੍ਪਤਿ. ਦਿਟ੍ਠੇ ਅਨੂਪਯੋਤਿ ਰੂਪਾਰਮ੍ਮਣੇ ਨਿਤ੍ਤਣ੍ਹੋ ਹੋਤਿ. ਅਨਪਾਯੋਤਿ ਅਪਦੁਟ੍ਠਚਿਤ੍ਤੋ.

ਸਂਵਿਜ੍ਜਤੀਤਿ ਲਬ੍ਭਤਿ. ਪਸ੍ਸਤੀਤਿ ਓਲੋਕੇਤਿ. ਛਨ੍ਦਰਾਗੋਤਿ ਸਿਨੇਹੋ. ਰੂਪਾਰਾਮਨ੍ਤਿ ਰੂਪਂ ਆਰਾਮਂ ਅਸ੍ਸਾਤਿ ਰੂਪਾਰਾਮਂ. ਰੂਪੇ ਰਤਨ੍ਤਿ ਰੂਪਰਤਂ. ਰੂਪੇ ਸਨ੍ਤੁਟ੍ਠੀਤਿ ਰੂਪਸਮ੍ਮੁਦਿਤਂ.

ਦਨ੍ਤਂ ਨਯਨ੍ਤਿ ਸਮਿਤਿਨ੍ਤਿ ਉਯ੍ਯਾਨਕੀਲ਼ਾਮਣ੍ਡਲਾਦੀਸੁ ਮਹਾਜਨਮਜ੍ਝਂ ਗਚ੍ਛਨ੍ਤਾ ਦਨ੍ਤਮੇਵ ਗੋਣਜਾਤਿਂ ਵਾ ਅਸ੍ਸਜਾਤਿਂ ਵਾ ਯਾਨੇ ਯੋਜੇਤ੍ਵਾ ਨਯਨ੍ਤਿ. ਰਾਜਾਤਿ ਤਥਾਰੂਪਾਨੇਵ ਠਾਨਾਨਿ ਗਚ੍ਛਨ੍ਤੋ ਰਾਜਾਪਿ ਦਨ੍ਤਮੇਵ ਅਭਿਰੁਹਤਿ. ਮਨੁਸ੍ਸੇਸੂਤਿ ਮਨੁਸ੍ਸੇਸੁਪਿ ਚਤੂਹਿ ਅਰਿਯਮਗ੍ਗੇਹਿ ਦਨ੍ਤੋ ਨਿਬ੍ਬਿਸੇਵਨੋਵ ਸੇਟ੍ਠੋ. ਯੋਤਿਵਾਕ੍ਯਨ੍ਤਿ ਯੋ ਏਵਰੂਪਂ ਅਤਿਕ੍ਕਮਵਚਨਂ ਪੁਨਪ੍ਪੁਨਂ ਵੁਚ੍ਚਮਾਨਮ੍ਪਿ ਤਿਤਿਕ੍ਖਤਿ ਨ ਪਟਿਪ੍ਫਨ੍ਦਤਿ ਨ ਵਿਹਞ੍ਞਤਿ, ਏਵਰੂਪੋ ਦਨ੍ਤੋ ਸੇਟ੍ਠੋਤਿ ਅਤ੍ਥੋ.

ਅਸ੍ਸਤਰਾਤਿ ਵਲ਼ਵਾਯ ਗਦ੍ਰਭੇਨ ਜਾਤਾ. ਆਜਾਨੀਯਾਤਿ ਯਂ ਅਸ੍ਸਦਮ੍ਮਸਾਰਥਿ ਕਾਰਣਂ ਕਾਰੇਤਿ, ਤਸ੍ਸ ਖਿਪ੍ਪਂ ਜਾਨਨਸਮਤ੍ਥਾ. ਸਿਨ੍ਧਵਾਤਿ ਸਿਨ੍ਧਵਰਟ੍ਠੇ ਜਾਤਾ ਅਸ੍ਸਾ. ਮਹਾਨਾਗਾਤਿ ਕੁਞ੍ਜਰਸਙ੍ਖਾਤਾ ਮਹਾਹਤ੍ਥਿਨੋ. ਅਤ੍ਤਦਨ੍ਤੋਤਿ ਏਤੇ ਅਸ੍ਸਤਰਾ ਵਾ ਆਜਾਨੀਯਾ ਵਾ ਸਿਨ੍ਧਵਾ ਵਾ ਕੁਞ੍ਜਰਾ ਵਾ ਵਰਾ ਦਨ੍ਤਾ, ਨ ਅਦਨ੍ਤਾ. ਯੋ ਪਨ ਚਤੁਮਗ੍ਗਸਙ੍ਖਾਤੇਨ ਅਤ੍ਤਦਨ੍ਤੇਨ ਦਨ੍ਤਤਾਯ ਅਤ੍ਤਦਨ੍ਤੋ ਨਿਬ੍ਬਿਸੇਵਨੋ, ਅਯਂ ਤਤੋਪਿ ਵਰਂ, ਸਬ੍ਬੇਹਿਪਿ ਏਤੇਹਿ ਉਤ੍ਤਰਿਤਰੋਤਿ ਅਤ੍ਥੋ.

ਨ ਹਿ ਏਤੇਹਿ ਯਾਨੇਹੀਤਿ ਯਾਨਿ ਏਤਾਨਿ ਹਤ੍ਥਿਯਾਨਾਦਿਯਾਨਾਨਿ, ਨ ਹਿ ਏਤੇਹਿ ਯਾਨੇਹਿ ਕੋਚਿ ਪੁਗ੍ਗਲੋ ਸੁਪਿਨਨ੍ਤੇਨਪਿ ਅਗਤਪੁਬ੍ਬਤ੍ਤਾ ‘‘ਅਗਤ’’ਨ੍ਤਿ ਸਙ੍ਖਾਤਂ ਨਿਬ੍ਬਾਨਦਿਸਂ, ਤਂ ਠਾਨਂ ਗਚ੍ਛੇਯ੍ਯ. ਯਥਾ ਪੁਬ੍ਬਭਾਗੇ ਇਨ੍ਦ੍ਰਿਯਦਮੇਨ ਦਨ੍ਤੇਨ ਅਪਰਭਾਗੇ ਅਰਿਯਮਗ੍ਗਭਾਵਨਾਯ ਸੁਦਨ੍ਤੇਨ ਦਨ੍ਤੋ ਨਿਬ੍ਬਿਸੇਵਨੋ ਸਪ੍ਪਞ੍ਞੋ ਪੁਗ੍ਗਲੋ ਤਂ ਅਗਤਪੁਬ੍ਬਂ ਦਿਸਂ ਗਚ੍ਛਤਿ, ਦਨ੍ਤਭੂਮਿਂ ਪਾਪੁਣਾਤਿ. ਤਸ੍ਮਾ ਅਤ੍ਤਦਮਨਮੇਵ ਵਰਨ੍ਤਿ ਅਤ੍ਥੋ.

ਵਿਧਾਸੁ ਨ ਵਿਕਮ੍ਪਨ੍ਤੀਤਿ ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀਤਿਆਦੀਸੁ ਮਾਨਵਿਧਾਸੁ ਨ ਚਲਨ੍ਤਿ ਨਪ੍ਪਵੇਧਨ੍ਤਿ. ਵਿਪ੍ਪਮੁਤ੍ਤਾ ਪੁਨਬ੍ਭਵਾਤਿ ਪੁਨਬ੍ਭਵਪਟਿਸਨ੍ਧਿਯਾ ਪੁਨਪ੍ਪੁਨਂ ਉਪ੍ਪਤ੍ਤਿਤੋ ਸੁਟ੍ਠੁ ਮੁਤ੍ਤਾ ਮੁਞ੍ਚਿਤ੍ਵਾ ਠਿਤਾ. ਦਨ੍ਤਭੂਮਿਮਨੁਪ੍ਪਤ੍ਤਾਤਿ ਏਕਨ੍ਤਦਮਨਂ ਅਰਹਤ੍ਤਫਲਭੂਮਿਂ ਪਾਪੁਣਿਤ੍ਵਾ ਠਿਤਾ. ਤੇ ਲੋਕੇ ਵਿਜਿਤਾਵਿਨੋਤਿ ਤੇ ਅਰਹਨ੍ਤੋ ਸਤ੍ਤਲੋਕੇ ਵਿਜਿਤਵਿਜਯਾ ਵਿਜਿਤਵਨ੍ਤੋ ਨਾਮ ਹੋਨ੍ਤਿ.

ਯਸ੍ਮਾ ਚ ਭਾਵਿਤਿਨ੍ਦ੍ਰਿਯੋ ਨਿਬ੍ਭਯੋ ਨਿਬ੍ਬਿਕਾਰੋ ਦਨ੍ਤੋ ਹੋਤਿ, ਤਸ੍ਮਾ ਤਮਤ੍ਥਂ ਦਸ੍ਸੇਨ੍ਤੋ ‘‘ਯਸ੍ਸਿਨ੍ਦ੍ਰਿਯਾਨੀ’’ਤਿ ਗਾਥਮਾਹ. ਤਸ੍ਸਤ੍ਥੋ – ਯਸ੍ਸ ਚਕ੍ਖਾਦੀਨਿ ਛਲ਼ਿਨ੍ਦ੍ਰਿਯਾਨਿ ਗੋਚਰਭਾਵਨਾਯ ਅਨਿਚ੍ਚਾਦਿਤਿਲਕ੍ਖਣਂ ਆਰੋਪੇਤ੍ਵਾ ਵਾਸਨਾਭਾਵਨਾਯ ਸਤਿਸਮ੍ਪਜਞ੍ਞਗਨ੍ਧਂ ਗਾਹਾਪੇਤ੍ਵਾ ਭਾਵਿਤਾਨਿ, ਤਾਨਿ ਚ ਖੋ ਅਜ੍ਝਤ੍ਤਗੋਚਰਭਾਵਨਾਯ, ਏਵਂ ਪਨ ਬਹਿਦ੍ਧਾ ਚ ਸਬ੍ਬਲੋਕੇਤਿ ਯਤ੍ਥ ਯਤ੍ਥ ਇਨ੍ਦ੍ਰਿਯਾਨਂ ਵੇਕਲ੍ਲਤਾ ਵੇਕਲ੍ਲਤੋ ਵਾ ਸਮ੍ਭਵੋ, ਤਤ੍ਥ ਨਾਭਿਜ੍ਝਾਦਿਵਸੇਨ ਭਾਵਿਤਾਨੀਤਿ ਏਵਂ ਨਿਬ੍ਬਿਜ੍ਝ ਞਤ੍ਵਾ ਪਟਿਵਿਜ੍ਝਿਤ੍ਵਾ ਇਮਂ ਪਰਞ੍ਚ ਲੋਕਂ ਸਕਸਨ੍ਤਤਿਖਨ੍ਧਲੋਕਂ ਪਰਸਨ੍ਤਤਿਖਨ੍ਧਲੋਕਞ੍ਚ ਦਨ੍ਤਮਰਣਂ ਮਰਿਤੁਕਾਮੋ ਕਾਲਂ ਕਙ੍ਖਤਿ, ਜੀਵਿਤਕ੍ਖਯਕਾਲਂ ਆਗਮੇਤਿ ਪਤਿਮਾਨੇਤਿ, ਨ ਭਾਯਤਿ ਮਰਣਸ੍ਸ. ਯਥਾਹ –

‘‘ਮਰਣੇ ਮੇ ਭਯਂ ਨਤ੍ਥਿ, ਨਿਕਨ੍ਤਿ ਨਤ੍ਥੀ ਜੀਵਿਤੇ’’. (ਥੇਰਗਾ. ੨੦);

‘‘ਨਾਭਿਕਙ੍ਖਾਮਿ ਮਰਣਂ, ਨਾਭਿਕਙ੍ਖਾਮਿ ਜੀਵਿਤਂ;

ਕਾਲਞ੍ਚ ਪਤਿਮਾਨੇਮਿ, ਨਿਬ੍ਬਿਸਂ ਭਤਕੋ ਯਥਾ’’ਤਿ. (ਥੇਰਗਾ. ੬੦੬, ੬੫੪, ੧੦੦੨; ਮਿ. ਪ. ੨.੨.੪ ਥੋਕਂ ਵਿਸਦਿਸਂ);

ਭਾਵਿਤੋ ਸ ਦਨ੍ਤੋਤਿ ਏਵਂ ਭਾਵਿਤਿਨ੍ਦ੍ਰਿਯੋ ਸੋ ਦਨ੍ਤੋ.

੯੧. ਨਿਸ੍ਸਯਤਾਤਿ ਤਣ੍ਹਾਦਿਟ੍ਠਿਨਿਸ੍ਸਯਾ. ਞਤ੍ਵਾ ਧਮ੍ਮਨ੍ਤਿ ਅਨਿਚ੍ਚਾਦੀਹਿ ਆਕਾਰੇਹਿ ਧਮ੍ਮਂ ਜਾਨਿਤ੍ਵਾ. ਅਨਿਸ੍ਸਿਤੋਤਿ ਏਵਂ ਤੇਹਿ ਨਿਸ੍ਸਯੇਹਿ ਅਨਿਸ੍ਸਿਤੋ. ਤੇਨ ਅਞ੍ਞਤ੍ਰ ਧਮ੍ਮਞਾਣਾ ਨਤ੍ਥਿ ਨਿਸ੍ਸਯਾਨਂ ਅਭਾਵੋਤਿ ਦੀਪੇਤਿ. ਭਵਾਯ ਵਿਭਵਾਯ ਵਾਤਿ ਸਸ੍ਸਤਾਯ ਉਚ੍ਛੇਦਾਯ ਵਾ. ਇਮਿਸ੍ਸਾ ਗਾਥਾਯ ਨਿਦ੍ਦੇਸੋ ਉਤ੍ਤਾਨੋ.

੯੨. ਤਂ ਬ੍ਰੂਮਿ ਉਪਸਨ੍ਤੋਤਿ ਤਂ ਏਵਰੂਪਂ ਏਕੇਕਗਾਥਾਯ ਵੁਤ੍ਤਂ ਉਪਸਨ੍ਤੋਤਿ ਕਥੇਮਿ. ਅਤਰੀ ਸੋ ਵਿਸਤ੍ਤਿਕਨ੍ਤਿ ਸੋ ਇਮਂ ਵਿਸਤਾਦਿਭਾਵੇਨ ਵਿਸਤ੍ਤਿਕਾਸਙ੍ਖਾਤਂ ਮਹਾਤਣ੍ਹਂ ਅਤਰਿ.

ਅਤ੍ਤਨੋ ਦਿਟ੍ਠਿਯਾ ਰਾਗੋ ਅਭਿਜ੍ਝਾਕਾਯਗਨ੍ਥੋਤਿ ਸਯਂ ਗਹਿਤਦਿਟ੍ਠਿਯਾ ਰਞ੍ਜਨਸਙ੍ਖਾਤੋ ਰਾਗੋ ਅਭਿਜ੍ਝਾਕਾਯਗਨ੍ਥੋ. ਪਰਵਾਦੇਸੁ ਆਘਾਤੋ ਅਪ੍ਪਚ੍ਚਯੋਤਿ ਪਰੇਸਂ ਵਾਦਪਟਿਵਾਦੇਸੁ ਕੋਪੋ ਚ ਅਤੁਟ੍ਠਾਕਾਰੋ ਚ ਬ੍ਯਾਪਾਦੋ ਕਾਯਗਨ੍ਥੋ. ਅਤ੍ਤਨੋ ਸੀਲਂ ਵਾ ਵਤਂ ਵਾਤਿ ਸਯਂ ਗਹਿਤਮੇਥੁਨਵਿਰਤਿਸਙ੍ਖਾਤਂ ਸੀਲਂ ਵਾ ਗੋਵਤਾਦਿਵਤਂ ਵਾ. ਸੀਲਬ੍ਬਤਂ ਵਾਤਿ ਤਦੁਭਯਂ ਵਾ. ਪਰਾਮਾਸੋਤਿ ਇਮਿਨਾ ਸੁਦ੍ਧੀਤਿਆਦਿਵਸੇਨ ਪਰਤੋ ਆਮਸਤਿ. ਅਤ੍ਤਨੋ ਦਿਟ੍ਠਿ ਇਦਂਸਚ੍ਚਾਭਿਨਿਵੇਸੋ ਕਾਯਗਨ੍ਥੋਤਿ ਸਯਂ ਗਹਿਤਦਿਟ੍ਠਿਂ ‘‘ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ (ਉਦਾ. ੫੪; ਮ. ਨਿ. ੩.੨੭, ੩੦੧) ਅਯੋਨਿਸੋ ਅਭਿਨਿਵੇਸੋ ਇਦਂਸਚ੍ਚਾਭਿਨਿਵੇਸੋ ਕਾਯਗਨ੍ਥੋ. ਗਨ੍ਥਾ ਤਸ੍ਸ ਨ ਵਿਜ੍ਜਨ੍ਤੀਤਿ ਤਸ੍ਸ ਖੀਣਾਸਵਸ੍ਸ ਦ੍ਵੇ ਦਿਟ੍ਠਿਗਨ੍ਥਾ ਸੋਤਾਪਤ੍ਤਿਮਗ੍ਗੇਨ ਨ ਸਨ੍ਤਿ. ਬ੍ਯਾਪਾਦੋ ਕਾਯਗਨ੍ਥੋ ਅਨਾਗਾਮਿਮਗ੍ਗੇਨ. ਅਭਿਜ੍ਝਾਕਾਯਗਨ੍ਥੋ ਅਰਹਤ੍ਤਮਗ੍ਗੇਨ.

੯੩. ਇਦਾਨਿ ਤਮੇਵ ਉਪਸਨ੍ਤਂ ਪਸਂਸਨ੍ਤੋ ਆਹ ‘‘ਨ ਤਸ੍ਸ ਪੁਤ੍ਤਾ’’ਤਿ ਏਵਮਾਦਿ. ਤਤ੍ਥ ਪੁਤ੍ਤਾ ਅਤ੍ਰਜਾਦਯੋ ਚਤ੍ਤਾਰੋ. ਏਤ੍ਥ ਚ ਪੁਤ੍ਤਪਰਿਗ੍ਗਹਾਦਯੋ ਪੁਤ੍ਤਾਦਿਨਾਮੇਨ ਵੁਤ੍ਤਾਤਿ ਵੇਦਿਤਬ੍ਬਾ. ਤੇ ਹਿਸ੍ਸ ਨ ਵਿਜ੍ਜਨ੍ਤਿ, ਤੇਸਂ ਵਾ ਅਭਾਵੇਨ ਪੁਤ੍ਤਾਦਯੋ ਨ ਵਿਜ੍ਜਨ੍ਤੀਤਿ. ਅਤ੍ਤਾਤਿ ‘‘ਅਤ੍ਤਾ ਅਤ੍ਥੀ’’ਤਿ ਗਹਿਤਾ ਸਸ੍ਸਤਦਿਟ੍ਠਿਂ ਨਤ੍ਥਿ. ਨਿਰਤ੍ਤਾਤਿ ‘‘ਉਚ੍ਛਿਜ੍ਜਤੀ’’ਤਿ ਗਹਿਤਾ ਉਚ੍ਛੇਦਦਿਟ੍ਠਿ.

ਨਤ੍ਥੀਤਿ ਗਹੇਤਬ੍ਬਂ ਨਤ੍ਥਿ. ਮੁਞ੍ਚਿਤਬ੍ਬਂ ਨਤ੍ਥੀਤਿ ਮੋਚੇਤਬ੍ਬਂ ਨਤ੍ਥਿ. ਯਸ੍ਸ ਨਤ੍ਥਿ ਗਹਿਤਨ੍ਤਿ ਯਸ੍ਸ ਪੁਗ੍ਗਲਸ੍ਸ ਤਣ੍ਹਾਦਿਟ੍ਠਿਵਸੇਨ ਗਹਿਤਂ ਨ ਵਿਜ੍ਜਤਿ. ਤਸ੍ਸ ਨਤ੍ਥਿ ਮੁਞ੍ਚਿਤਬ੍ਬਨ੍ਤਿ ਤਸ੍ਸ ਪੁਗ੍ਗਲਸ੍ਸ ਮੁਞ੍ਚਿਤਬ੍ਬਂ ਨ ਵਿਜ੍ਜਤਿ. ਗਾਹਮੁਞ੍ਚਨਸਮਤਿਕ੍ਕਨ੍ਤੋਤਿ ਗਹਣਞ੍ਚ ਮੋਚਨਞ੍ਚ ਵੀਤਿਵਤ੍ਤੋ. ਵੁਦ੍ਧਿਪਰਿਹਾਨਿਵੀਤਿਵਤ੍ਤੋਤਿ ਵੁਡ੍ਢਿਞ੍ਚ ਹਾਨਿਞ੍ਚ ਅਤਿਕ੍ਕਨ੍ਤੋ.

੯੪. ਯੇਨ ਨਂ ਵਜ੍ਜੁਂ ਪੁਥੁਜ੍ਜਨਾ, ਅਥੋ ਸਮਣਬ੍ਰਾਹ੍ਮਣਾਤਿ ਯੇਨ ਤਂ ਰਾਗਾਦਿਨਾ ਵਜ੍ਜੇਨ ਪੁਥੁਜ੍ਜਨਾ ਸਬ੍ਬੇਪਿ ਦੇਵਮਨੁਸ੍ਸਾ ਇਤੋਵ ਬਹਿਦ੍ਧਾ ਸਮਣਬ੍ਰਾਹ੍ਮਣਾ ਚ ਰਤ੍ਤੋਤਿ ਵਾ ਦੁਟ੍ਠੋਤਿ ਵਾ ਵਦੇਯ੍ਯੁਂ. ਤਂ ਤਸ੍ਸ ਅਪੁਰਕ੍ਖਤਨ੍ਤਿ ਤਂ ਰਾਗਾਦਿਵਜ੍ਜਂ ਤਸ੍ਸ ਅਰਹਤੋ ਅਪੁਰਕ੍ਖਤਂ. ਤਸ੍ਮਾ ਵਾਦੇਸੁ ਨੇਜਤੀਤਿ ਤਂਕਾਰਣਾ ਨਿਨ੍ਦਾਵਚਨੇਸੁ ਨ ਕਮ੍ਪਤਿ.

ਨੇਜਤੀਤਿ ਨਿਦ੍ਦੇਸਸ੍ਸ ਉਦ੍ਦੇਸਪਦਂ. ਨ ਇਞ੍ਜਤੀਤਿ ਚਲਨਂ ਨ ਕਰੋਤਿ. ਨ ਚਲਤੀਤਿ ਨ ਤਤ੍ਥ ਨਮਤਿ. ਨ ਵੇਧਤੀਤਿ ਕਮ੍ਪੇਤੁਂ ਅਸਕ੍ਕੁਣੇਯ੍ਯਤਾਯ ਨ ਫਨ੍ਦਤਿ. ਨਪ੍ਪਵੇਧਤੀਤਿ ਨ ਕਮ੍ਪਤਿ. ਨ ਸਮ੍ਪਵੇਧਤੀਤਿ ਨ ਪਰਿਵਤ੍ਤਤਿ.

੯੫. ਨ ਉਸ੍ਸੇਸੁ ਵਦਤੇਤਿ ਵਿਸਿਟ੍ਠੇਸੁ ਅਤ੍ਤਾਨਂ ਅਨ੍ਤੋਕਤ੍ਵਾ ‘‘ਅਹਂ ਵਿਸਿਟ੍ਠੋ’’ਤਿ ਅਤਿਮਾਨਵਸੇਨ ਨ ਵਦਤਿ. ਏਸ ਨਯੋ ਇਤਰੇਸੁ ਦ੍ਵੀਸੁ. ਕਪ੍ਪਂ ਨੇਤਿ ਅਕਪ੍ਪਿਯੋਤਿ ਸੋ ਏਵਰੂਪੋ ਦੁਵਿਧਮ੍ਪਿ ਕਪ੍ਪਂ ਨ ਏਤਿ. ਕਸ੍ਮਾ? ਯਸ੍ਮਾ ਅਕਪ੍ਪਿਯੋ, ਪਹੀਨਕਪ੍ਪੋਤਿ ਵੁਤ੍ਤਂ ਹੋਤਿ. ਇਮਿਸ੍ਸਾਪਿ ਗਾਥਾਯ ਨਿਦ੍ਦੇਸੋ ਉਤ੍ਤਾਨੋਵ.

੯੬. ਸਕਨ੍ਤਿ ਮਯ੍ਹਨ੍ਤਿ ਪਰਿਗ੍ਗਹਿਤਂ. ਅਸਤਾ ਚ ਨ ਸੋਚਤੀਤਿ ਅਵਿਜ੍ਜਮਾਨਾਦਿਨਾ ਅਸਤਾ ਚ ਨ ਸੋਚਤਿ. ਧਮ੍ਮੇਸੁ ਚ ਨ ਗਚ੍ਛਤੀਤਿ ਸਬ੍ਬਧਮ੍ਮੇਸੁ ਛਨ੍ਦਾਦਿਵਸੇਨ ਨ ਗਚ੍ਛਤਿ. ਸ ਵੇ ਸਨ੍ਤੋਤਿ ਵੁਚ੍ਚਤੀਤਿ ਸੋ ਏਵਰੂਪੋ ਨਰੁਤ੍ਤਮੋ ‘‘ਸਨ੍ਤੋ’’ਤਿ ਵੁਚ੍ਚਤਿ. ਇਮਿਸ੍ਸਾਪਿ ਗਾਥਾਯ ਨਿਦ੍ਦੇਸੋ ਉਤ੍ਤਾਨੋਵ. ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ. ਦੇਸਨਾਪਰਿਯੋਸਾਨੇ ਕੋਟਿਸਤਸਹਸ੍ਸਦੇਵਤਾਨਂ ਅਰਹਤ੍ਤਪ੍ਪਤ੍ਤਿ ਅਹੋਸਿ, ਸੋਤਾਪਨ੍ਨਾਦੀਨਂ ਗਣਨਾ ਨਤ੍ਥੀਤਿ.

ਸਦ੍ਧਮ੍ਮਪ੍ਪਜ੍ਜੋਤਿਕਾਯ ਮਹਾਨਿਦ੍ਦੇਸਟ੍ਠਕਥਾਯ

ਪੁਰਾਭੇਦਸੁਤ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.