੩. ਦ੍ਵਤ੍ਤਿਂਸਾਕਾਰਵਣ੍ਣਨਾ

ਪਦਸਮ੍ਬਨ੍ਧਵਣ੍ਣਨਾ

ਇਦਾਨਿ ਯਦਿਦਂ ਏਵਂ ਦਸਹਿ ਸਿਕ੍ਖਾਪਦੇਹਿ ਪਰਿਸੁਦ੍ਧਪਯੋਗਸ੍ਸ ਸੀਲੇ ਪਤਿਟ੍ਠਿਤਸ੍ਸ ਕੁਲਪੁਤ੍ਤਸ੍ਸ ਆਸਯਪਰਿਸੁਦ੍ਧਤ੍ਥਂ ਚਿਤ੍ਤਭਾਵਨਤ੍ਥਞ੍ਚ ਅਞ੍ਞਤ੍ਰ ਬੁਦ੍ਧੁਪ੍ਪਾਦਾ ਅਪ੍ਪਵਤ੍ਤਪੁਬ੍ਬਂ ਸਬ੍ਬਤਿਤ੍ਥਿਯਾਨਂ ਅਵਿਸਯਭੂਤਂ ਤੇਸੁ ਤੇਸੁ ਸੁਤ੍ਤਨ੍ਤੇਸੁ –

‘‘ਏਕਧਮ੍ਮੋ, ਭਿਕ੍ਖਵੇ, ਭਾਵਿਤੋ ਬਹੁਲੀਕਤੋ ਮਹਤੋ ਸਂਵੇਗਾਯ ਸਂਵਤ੍ਤਤਿ. ਮਹਤੋ ਅਤ੍ਥਾਯ ਸਂਵਤ੍ਤਤਿ. ਮਹਤੋ ਯੋਗਕ੍ਖੇਮਾਯ ਸਂਵਤ੍ਤਤਿ. ਮਹਤੋ ਸਤਿਸਮ੍ਪਜਞ੍ਞਾਯ ਸਂਵਤ੍ਤਤਿ. ਞਾਣਦਸ੍ਸਨਪ੍ਪਟਿਲਾਭਾਯ ਸਂਵਤ੍ਤਤਿ. ਦਿਟ੍ਠਧਮ੍ਮਸੁਖਵਿਹਾਰਾਯ ਸਂਵਤ੍ਤਤਿ. ਵਿਜ੍ਜਾਵਿਮੁਤ੍ਤਿਫਲਸਚ੍ਛਿਕਿਰਿਯਾਯ ਸਂਵਤ੍ਤਤਿ. ਕਤਮੋ ਏਕਧਮ੍ਮੋ? ਕਾਯਗਤਾ ਸਤਿ. ਅਮਤਂ ਤੇ, ਭਿਕ੍ਖਵੇ, ਨ ਪਰਿਭੁਞ੍ਜਨ੍ਤਿ, ਯੇ ਕਾਯਗਤਾਸਤਿਂ ਨ ਪਰਿਭੁਞ੍ਜਨ੍ਤਿ. ਅਮਤਂ ਤੇ, ਭਿਕ੍ਖਵੇ, ਪਰਿਭੁਞ੍ਜਨ੍ਤਿ, ਯੇ ਕਾਯਗਤਾਸਤਿਂ ਪਰਿਭੁਞ੍ਜਨ੍ਤਿ. ਅਮਤਂ ਤੇਸਂ, ਭਿਕ੍ਖਵੇ, ਅਪਰਿਭੁਤ੍ਤਂ ਪਰਿਭੁਤ੍ਤਂ, ਪਰਿਹੀਨਂ ਅਪਰਿਹੀਨਂ, ਵਿਰਦ੍ਧਂ ਆਰਦ੍ਧਂ, ਯੇਸਂ ਕਾਯਗਤਾ ਸਤਿ ਆਰਦ੍ਧਾ’’ਤਿ. (ਅ. ਨਿ. ੧.੫੬੪-੫੭੦) –

ਏਵਂ ਭਗਵਤਾ ਅਨੇਕਾਕਾਰੇਨ ਪਸਂਸਿਤ੍ਵਾ –

‘‘ਕਥਂ ਭਾਵਿਤਾ, ਭਿਕ੍ਖਵੇ, ਕਾਯਗਤਾਸਤਿ ਕਥਂ ਬਹੁਲੀਕਤਾ ਮਹਬ੍ਬਲਾ ਹੋਤਿ ਮਹਾਨਿਸਂਸਾ? ਇਧ, ਭਿਕ੍ਖਵੇ, ਭਿਕ੍ਖੁ ਅਰਞ੍ਞਗਤੋ ਵਾ’’ਤਿ (ਮ. ਨਿ. ੩.੧੫੪) –

ਆਦਿਨਾ ਨਯੇਨ ਆਨਾਪਾਨਪਬ੍ਬਂ ਇਰਿਯਾਪਥਪਬ੍ਬਂ ਚਤੁਸਮ੍ਪਜਞ੍ਞਪਬ੍ਬਂ ਪਟਿਕੂਲਮਨਸਿਕਾਰਪਬ੍ਬਂ ਧਾਤੁਮਨਸਿਕਾਰਪਬ੍ਬਂ ਨਵ ਸਿਵਥਿਕਪਬ੍ਬਾਨੀਤਿ ਇਮੇਸਂ ਚੁਦ੍ਦਸਨ੍ਨਂ ਪਬ੍ਬਾਨਂ ਵਸੇਨ ਕਾਯਗਤਾਸਤਿਕਮ੍ਮਟ੍ਠਾਨਂ ਨਿਦ੍ਦਿਟ੍ਠਂ. ਤਸ੍ਸ ਭਾਵਨਾਨਿਦ੍ਦੇਸੋ ਅਨੁਪ੍ਪਤ੍ਤੋ. ਤਤ੍ਥ ਯਸ੍ਮਾ ਇਰਿਯਾਪਥਪਬ੍ਬਂ ਚਤੁਸਮ੍ਪਜਞ੍ਞਪਬ੍ਬਂ ਧਾਤੁਮਨਸਿਕਾਰਪਬ੍ਬਨ੍ਤਿ ਇਮਾਨਿ ਤੀਣਿ ਵਿਪਸ੍ਸਨਾਵਸੇਨ ਵੁਤ੍ਤਾਨਿ. ਨਵ ਸਿਵਥਿਕਪਬ੍ਬਾਨਿ ਵਿਪਸ੍ਸਨਾਞਾਣੇਸੁਯੇਵ ਆਦੀਨਵਾਨੁਪਸ੍ਸਨਾਵਸੇਨ ਵੁਤ੍ਤਾਨਿ. ਯਾਪਿ ਚੇਤ੍ਥ ਉਦ੍ਧੁਮਾਤਕਾਦੀਸੁ ਸਮਾਧਿਭਾਵਨਾ ਇਚ੍ਛੇਯ੍ਯ, ਸਾ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਤੋ ਅਸੁਭਭਾਵਨਾਨਿਦ੍ਦੇਸੇ ਪਕਾਸਿਤਾ ਏਵ. ਆਨਾਪਾਨਪਬ੍ਬਂ ਪਨ ਪਟਿਕੂਲਮਨਸਿਕਾਰਪਬ੍ਬਞ੍ਚੇਤਿ ਇਮਾਨੇਤ੍ਥ ਦ੍ਵੇ ਸਮਾਧਿਵਸੇਨ ਵੁਤ੍ਤਾਨਿ. ਤੇਸੁ ਆਨਾਪਾਨਪਬ੍ਬਂ ਆਨਾਪਾਨਸ੍ਸਤਿਵਸੇਨ ਵਿਸੁਂ ਕਮ੍ਮਟ੍ਠਾਨਂਯੇਵ. ਯਂ ਪਨੇਤਂ –

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਇਮਮੇਵ ਕਾਯਂ ਉਦ੍ਧਂ ਪਾਦਤਲਾ ਅਧੋ ਕੇਸਮਤ੍ਥਕਾ ਤਚਪਰਿਯਨ੍ਤਂ ਪੂਰਂ ਨਾਨਪ੍ਪਕਾਰਸ੍ਸ ਅਸੁਚਿਨੋ ਪਚ੍ਚਵੇਕ੍ਖਤਿ ‘ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ, ਲੋਮਾ…ਪੇ… ਮੁਤ੍ਤ’’ਨ੍ਤਿ (ਮ. ਨਿ. ੩.੧੫੪).

ਏਵਂ ਤਤ੍ਥ ਤਤ੍ਥ ਮਤ੍ਥਲੁਙ੍ਗਂ ਅਟ੍ਠਿਮਿਞ੍ਜੇਨ ਸਙ੍ਗਹੇਤ੍ਵਾ ਦੇਸਿਤਂ ਕਾਯਗਤਾਸਤਿਕੋਟ੍ਠਾਸਭਾਵਨਾਪਰਿਯਾਯਂ ਦ੍ਵਤ੍ਤਿਂਸਾਕਾਰਕਮ੍ਮਟ੍ਠਾਨਂ ਆਰਦ੍ਧਂ, ਤਸ੍ਸਾਯਂ ਅਤ੍ਥਵਣ੍ਣਨਾ –

ਤਤ੍ਥ ਅਤ੍ਥੀਤਿ ਸਂਵਿਜ੍ਜਨ੍ਤਿ. ਇਮਸ੍ਮਿਨ੍ਤਿ ਯ੍ਵਾਯਂ ਉਦ੍ਧਂ ਪਾਦਤਲਾ ਅਧੋ ਕੇਸਮਤ੍ਥਕਾ ਤਚਪਰਿਯਨ੍ਤੋ ਪੂਰੋ ਨਾਨਪ੍ਪਕਾਰਸ੍ਸ ਅਸੁਚਿਨੋਤਿ ਵੁਚ੍ਚਤਿ, ਤਸ੍ਮਿਂ. ਕਾਯੇਤਿ ਸਰੀਰੇ. ਸਰੀਰਞ੍ਹਿ ਅਸੁਚਿਸਞ੍ਚਯਤੋ, ਕੁਚ੍ਛਿਤਾਨਂ ਵਾ ਕੇਸਾਦੀਨਞ੍ਚੇਵ ਚਕ੍ਖੁਰੋਗਾਦੀਨਞ੍ਚ ਰੋਗਸਤਾਨਂ ਆਯਭੂਤਤੋ ਕਾਯੋਤਿ ਵੁਚ੍ਚਤਿ. ਕੇਸਾ…ਪੇ… ਮੁਤ੍ਤਨ੍ਤਿ ਏਤੇ ਕੇਸਾਦਯੋ ਦ੍ਵਤ੍ਤਿਂਸਾਕਾਰਾ, ਤਤ੍ਥ ‘‘ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ ਅਤ੍ਥਿ ਲੋਮਾ’’ਤਿ ਏਵਂ ਸਮ੍ਬਨ੍ਧੋ ਵੇਦਿਤਬ੍ਬੋ. ਤੇਨ ਕਿਂ ਕਥਿਤਂ ਹੋਤਿ? ਇਮਸ੍ਮਿਂ ਪਾਦਤਲਾ ਪਟ੍ਠਾਯ ਉਪਰਿ, ਕੇਸਮਤ੍ਥਕਾ ਪਟ੍ਠਾਯ ਹੇਟ੍ਠਾ, ਤਚਤੋ ਪਟ੍ਠਾਯ ਪਰਿਤੋਤਿ ਏਤ੍ਤਕੇ ਬ੍ਯਾਮਮਤ੍ਤੇ ਕਲ਼ੇਵਰੇ ਸਬ੍ਬਾਕਾਰੇਨਾਪਿ ਵਿਚਿਨਨ੍ਤੋ ਨ ਕੋਚਿ ਕਿਞ੍ਚਿ ਮੁਤ੍ਤਂ ਵਾ ਮਣਿਂ ਵਾ ਵੇਲ਼ੁਰਿਯਂ ਵਾ ਅਗਰੁਂ ਵਾ ਚਨ੍ਦਨਂ ਵਾ ਕੁਙ੍ਕੁਮਂ ਵਾ ਕਪ੍ਪੂਰਂ ਵਾ ਵਾਸਚੁਣ੍ਣਾਦਿਂ ਵਾ ਅਣੁਮਤ੍ਤਮ੍ਪਿ ਸੁਚਿਭਾਵਂ ਪਸ੍ਸਤਿ, ਅਥ ਖੋ ਪਰਮਦੁਗ੍ਗਨ੍ਧਜੇਗੁਚ੍ਛਂ ਅਸ੍ਸਿਰਿਕਦਸ੍ਸਨਂ ਨਾਨਪ੍ਪਕਾਰਂ ਕੇਸਲੋਮਾਦਿਭੇਦਂ ਅਸੁਚਿਮੇਵ ਪਸ੍ਸਤੀਤਿ.

ਅਯਂ ਤਾਵੇਤ੍ਥ ਪਦਸਮ੍ਬਨ੍ਧਤੋ ਵਣ੍ਣਨਾ.

ਅਸੁਭਭਾਵਨਾ

ਅਸੁਭਭਾਵਨਾਵਸੇਨ ਪਨਸ੍ਸ ਏਵਂ ਵਣ੍ਣਨਾ ਵੇਦਿਤਬ੍ਬਾ – ਏਵਮੇਤਸ੍ਮਿਂ ਪਾਣਾਤਿਪਾਤਾਵੇਰਮਣਿਸਿਕ੍ਖਾਪਦਾਦਿਭੇਦੇ ਸੀਲੇ ਪਤਿਟ੍ਠਿਤੇਨ ਪਯੋਗਸੁਦ੍ਧੇਨ ਆਦਿਕਮ੍ਮਿਕੇਨ ਕੁਲਪੁਤ੍ਤੇਨ ਆਸਯਸੁਦ੍ਧਿਯਾ ਅਧਿਗਮਨਤ੍ਥਂ ਦ੍ਵਤ੍ਤਿਂਸਾਕਾਰਕਮ੍ਮਟ੍ਠਾਨਭਾਵਨਾਨੁਯੋਗਮਨੁਯੁਞ੍ਜਿਤੁਕਾਮੇਨ ਪਠਮਂ ਤਾਵਸ੍ਸ ਆਵਾਸਕੁਲਲਾਭਗਣਕਮ੍ਮਦ੍ਧਾਨਞਾਤਿਗਨ੍ਥਰੋਗਇਦ੍ਧਿਪਲਿਬੋਧੇਨ ਕਿਤ੍ਤਿਪਲਿਬੋਧੇਨ ਵਾ ਸਹ ਦਸ ਪਲਿਬੋਧਾ ਹੋਨ੍ਤਿ. ਅਥਾਨੇਨ ਆਵਾਸਕੁਲਲਾਭਗਣਞਾਤਿਕਿਤ੍ਤੀਸੁ ਸਙ੍ਗਪ੍ਪਹਾਨੇਨ, ਕਮ੍ਮਦ੍ਧਾਨਗਨ੍ਥੇਸੁ ਅਬ੍ਯਾਪਾਰੇਨ, ਰੋਗਸ੍ਸ ਤਿਕਿਚ੍ਛਾਯਾਤਿ ਏਵਂ ਤੇ ਦਸ ਪਲਿਬੋਧਾ ਉਪਚ੍ਛਿਨ੍ਦਿਤਬ੍ਬਾ, ਅਥਾਨੇਨ ਉਪਚ੍ਛਿਨ੍ਨਪਲਿਬੋਧੇਨ ਅਨੁਪਚ੍ਛਿਨ੍ਨਨੇਕ੍ਖਮ੍ਮਾਭਿਲਾਸੇਨ ਕੋਟਿਪ੍ਪਤ੍ਤਸਲ੍ਲੇਖਵੁਤ੍ਤਿਤਂ ਪਰਿਗ੍ਗਹੇਤ੍ਵਾ ਖੁਦ੍ਦਾਨੁਖੁਦ੍ਦਕਮ੍ਪਿ ਵਿਨਯਾਚਾਰਂ ਅਪ੍ਪਜਹਨ੍ਤੇਨ ਆਗਮਾਧਿਗਮਸਮਨ੍ਨਾਗਤੋ ਤਤੋ ਅਞ੍ਞਤਰਙ੍ਗਸਮਨ੍ਨਾਗਤੋ ਵਾ ਕਮ੍ਮਟ੍ਠਾਨਦਾਯਕੋ ਆਚਰਿਯੋ ਵਿਨਯਾਨੁਰੂਪੇਨ ਵਿਧਿਨਾ ਉਪਗਨ੍ਤਬ੍ਬੋ, ਵਤ੍ਤਸਮ੍ਪਦਾਯ ਚ ਆਰਾਧਿਤਚਿਤ੍ਤਸ੍ਸ ਤਸ੍ਸ ਅਤ੍ਤਨੋ ਅਧਿਪ੍ਪਾਯੋ ਨਿਵੇਦੇਤਬ੍ਬੋ. ਤੇਨ ਤਸ੍ਸ ਨਿਮਿਤ੍ਤਜ੍ਝਾਸਯਚਰਿਯਾਧਿਮੁਤ੍ਤਿਭੇਦਂ ਞਤ੍ਵਾ ਯਦਿ ਏਤਂ ਕਮ੍ਮਟ੍ਠਾਨਮਨੁਰੂਪਂ, ਅਥ ਯਸ੍ਮਿਂ ਵਿਹਾਰੇ ਅਤ੍ਤਨਾ ਵਸਤਿ, ਯਦਿ ਤਸ੍ਮਿਂਯੇਵ ਸੋਪਿ ਵਸਿਤੁਕਾਮੋ ਹੋਤਿ, ਤਤੋ ਸਙ੍ਖੇਪਤੋ ਕਮ੍ਮਟ੍ਠਾਨਂ ਦਾਤਬ੍ਬਂ. ਅਥ ਅਞ੍ਞਤ੍ਰ ਵਸਿਤੁਕਾਮੋ ਹੋਤਿ, ਤਤੋ ਪਹਾਤਬ੍ਬਪਰਿਗ੍ਗਹੇਤਬ੍ਬਾਦਿਕਥਨਵਸੇਨ ਸਪੁਰੇਕ੍ਖਾਰਂ ਰਾਗਚਰਿਤਾਨੁਕੁਲਾਦਿਕਥਨਵਸੇਨ ਸਪ੍ਪਭੇਦਂ ਵਿਤ੍ਥਾਰੇਨ ਕਥੇਤਬ੍ਬਂ. ਤੇਨ ਤਂ ਸਪੁਰੇਕ੍ਖਾਰਂ ਸਪ੍ਪਭੇਦਂ ਕਮ੍ਮਟ੍ਠਾਨਂ ਉਗ੍ਗਹੇਤ੍ਵਾ ਆਚਰਿਯਂ ਆਪੁਚ੍ਛਿਤ੍ਵਾ ਯਾਨਿ ਤਾਨਿ –

‘‘ਮਹਾਵਾਸਂ ਨਵਾਵਾਸਂ, ਜਰਾਵਾਸਞ੍ਚ ਪਨ੍ਥਨਿਂ;

ਸੋਣ੍ਡਿਂ ਪਣ੍ਣਞ੍ਚ ਪੁਪ੍ਫਞ੍ਚ, ਫਲਂ ਪਤ੍ਥਿਤਮੇਵ ਚ.

‘‘ਨਗਰਂ ਦਾਰੁਨਾ ਖੇਤ੍ਤਂ, ਵਿਸਭਾਗੇਨ ਪਟ੍ਟਨਂ;

ਪਚ੍ਚਨ੍ਤਸੀਮਾਸਪ੍ਪਾਯਂ, ਯਤ੍ਥ ਮਿਤ੍ਤੋ ਨ ਲਬ੍ਭਤਿ.

‘‘ਅਟ੍ਠਾਰਸੇਤਾਨਿ ਠਾਨਾਨਿ, ਇਤਿ ਵਿਞ੍ਞਾਯ ਪਣ੍ਡਿਤੋ;

ਆਰਕਾ ਪਰਿਵਜ੍ਜੇਯ੍ਯ, ਮਗ੍ਗਂ ਸਪ੍ਪਟਿਭਯਂ ਯਥਾ’’ਤਿ. (ਵਿਸੁਦ੍ਧਿ. ੧.੫੨) –

ਏਵਂ ਅਟ੍ਠਾਰਸ ਸੇਨਾਸਨਾਨਿ ਪਰਿਵਜ੍ਜੇਤਬ੍ਬਾਨੀਤਿ ਵੁਚ੍ਚਨ੍ਤਿ. ਤਾਨਿ ਵਜ੍ਜੇਤ੍ਵਾ, ਯਂ ਤਂ –

‘‘ਕਥਞ੍ਚ, ਭਿਕ੍ਖਵੇ, ਸੇਨਾਸਨਂ ਪਞ੍ਚਙ੍ਗਸਮਨ੍ਨਾਗਤਂ ਹੋਤਿ? ਇਧ, ਭਿਕ੍ਖਵੇ, ਸੇਨਾਸਨਂ ਨਾਤਿਦੂਰਂ ਹੋਤਿ, ਨਚ੍ਚਾਸਨ੍ਨਂ, ਗਮਨਾਗਮਨਸਮ੍ਪਨ੍ਨਂ, ਦਿਵਾ ਅਪ੍ਪਾਕਿਣ੍ਣਂ, ਰਤ੍ਤਿਂ ਅਪ੍ਪਸਦ੍ਦਂ ਅਪ੍ਪਨਿਗ੍ਘੋਸਂ ਅਪ੍ਪਡਂਸਮਕਸਵਾਤਾਤਪਸਰੀਸਪਸਮ੍ਫਸ੍ਸਂ. ਤਸ੍ਮਿਂ ਖੋ ਪਨ ਸੇਨਾਸਨੇ ਵਿਹਰਨ੍ਤਸ੍ਸ ਅਪ੍ਪਕਸਿਰੇਨ ਉਪ੍ਪਜ੍ਜਨ੍ਤਿ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾ. ਤਸ੍ਮਿਂ ਖੋ ਪਨ ਸੇਨਾਸਨੇ ਥੇਰਾ ਭਿਕ੍ਖੂ ਵਿਹਰਨ੍ਤਿ ਬਹੁਸ੍ਸੁਤਾ ਆਗਤਾਗਮਾ ਧਮ੍ਮਧਰਾ ਵਿਨਯਧਰਾ ਮਾਤਿਕਾਧਰਾ, ਤੇ ਕਾਲੇਨ ਕਾਲਂ ਉਪਸਙ੍ਕਮਿਤ੍ਵਾ ਪਰਿਪੁਚ੍ਛਤਿ ਪਰਿਪਞ੍ਹਤਿ ‘ਇਦਂ, ਭਨ੍ਤੇ, ਕਥਂ, ਇਮਸ੍ਸ ਕੋ ਅਤ੍ਥੋ’ਤਿ? ਤਸ੍ਸ, ਤੇ ਆਯਸ੍ਮਨ੍ਤੋ ਅਵਿਵਟਞ੍ਚੇਵ ਵਿਵਰਨ੍ਤਿ, ਅਨੁਤ੍ਤਾਨੀਕਤਞ੍ਚ ਉਤ੍ਤਾਨਿਂ ਕਰੋਨ੍ਤਿ, ਅਨੇਕਵਿਹਿਤੇਸੁ ਚ ਕਙ੍ਖਾਠਾਨਿਯੇਸੁ ਧਮ੍ਮੇਸੁ ਕਙ੍ਖਂ ਪਟਿਵਿਨੋਦੇਨ੍ਤਿ. ਏਵਂ ਖੋ, ਭਿਕ੍ਖਵੇ, ਸੇਨਾਸਨਂ ਪਞ੍ਚਙ੍ਗਸਮਨ੍ਨਾਗਤਂ ਹੋਤੀ’’ਤਿ (ਅ. ਨਿ. ੧੦.੧੧). –

ਏਵਂ ਪਞ੍ਚਙ੍ਗਸਮਨ੍ਨਾਗਤਂ ਸੇਨਾਸਨਂ ਵੁਤ੍ਤਂ. ਤਥਾਰੂਪਂ ਸੇਨਾਸਨਂ ਉਪਗਮ੍ਮ ਕਤਸਬ੍ਬਕਿਚ੍ਚੇਨ ਕਾਮੇਸੁ ਆਦੀਨਵਂ, ਨੇਕ੍ਖਮ੍ਮੇ ਚ ਆਨਿਸਂਸਂ ਪਚ੍ਚਵੇਕ੍ਖਿਤ੍ਵਾ ਬੁਦ੍ਧਸੁਬੁਦ੍ਧਤਾਯ ਧਮ੍ਮਸੁਧਮ੍ਮਤਾਯ ਸਙ੍ਘਸੁਪ੍ਪਟਿਪਨ੍ਨਤਾਯ ਚ ਅਨੁਸ੍ਸਰਣੇਨ ਚਿਤ੍ਤਂ ਪਸਾਦੇਤ੍ਵਾ ਯਂ ਤਂ –

‘‘ਵਚਸਾ ਮਨਸਾ ਚੇਵ, ਵਣ੍ਣਸਣ੍ਠਾਨਤੋ ਦਿਸਾ;

ਓਕਾਸਤੋ ਪਰਿਚ੍ਛੇਦਾ, ਸਤ੍ਤਧੁਗ੍ਗਹਣਂ ਵਿਦੂ’’ਤਿ. –

ਏਵਂ ਸਤ੍ਤਵਿਧਂ ਉਗ੍ਗਹਕੋਸਲ੍ਲਂ; ਅਨੁਪੁਬ੍ਬਤੋ, ਨਾਤਿਸੀਘਤੋ, ਨਾਤਿਸਣਿਕਤੋ, ਵਿਕ੍ਖੇਪਪ੍ਪਟਿਬਾਹਨਤੋ, ਪਣ੍ਣਤ੍ਤਿਸਮਤਿਕ੍ਕਮਤੋ, ਅਨੁਪੁਬ੍ਬਮੁਞ੍ਚਨਤੋ, ਅਪ੍ਪਨਾਤੋ, ਤਯੋ ਚ ਸੁਤ੍ਤਨ੍ਤਾਤਿ ਏਵਂ ਦਸਵਿਧਂ ਮਨਸਿਕਾਰਕੋਸਲ੍ਲਞ੍ਚ ਵੁਤ੍ਤਂ. ਤਂ ਅਪਰਿਚ੍ਚਜਨ੍ਤੇਨ ਦ੍ਵਤ੍ਤਿਂਸਾਕਾਰਭਾਵਨਾ ਆਰਭਿਤਬ੍ਬਾ. ਏਵਞ੍ਹਿ ਆਰਭਤੋ ਸਬ੍ਬਾਕਾਰੇਨ ਦ੍ਵਤ੍ਤਿਂਸਾਕਾਰਭਾਵਨਾ ਸਮ੍ਪਜ੍ਜਤਿ ਨੋ ਅਞ੍ਞਥਾ.

ਤਤ੍ਥ ਆਦਿਤੋਵ ਤਚਪਞ੍ਚਕਂ ਤਾਵ ਗਹੇਤ੍ਵਾ ਅਪਿ ਤੇਪਿਟਕੇਨ ‘‘ਕੇਸਾ ਲੋਮਾ’’ਤਿਆਦਿਨਾ ਨਯੇਨ ਅਨੁਲੋਮਤੋ, ਤਸ੍ਮਿਂ ਪਗੁਣੀਭੂਤੇ ‘‘ਤਚੋ ਦਨ੍ਤਾ’’ਤਿ ਏਵਮਾਦਿਨਾ ਨਯੇਨ ਪਟਿਲੋਮਤੋ, ਤਸ੍ਮਿਮ੍ਪਿ ਪਗੁਣੀਭੂਤੇ ਤਦੁਭਯਨਯੇਨੇਵ ਅਨੁਲੋਮਪ੍ਪਟਿਲੋਮਤੋ ਬਹਿ ਵਿਸਟਵਿਤਕ੍ਕਵਿਚ੍ਛੇਦਨਤ੍ਥਂ ਪਾਲ਼ਿਪਗੁਣੀਭਾਵਤ੍ਥਞ੍ਚ ਵਚਸਾ ਕੋਟ੍ਠਾਸਸਭਾਵਪਰਿਗ੍ਗਹਤ੍ਥਂ ਮਨਸਾ ਚ ਅਦ੍ਧਮਾਸਂ ਭਾਵੇਤਬ੍ਬਂ. ਵਚਸਾ ਹਿਸ੍ਸ ਭਾਵਨਾ ਬਹਿ ਵਿਸਟਵਿਤਕ੍ਕੇ ਵਿਚ੍ਛਿਨ੍ਦਿਤ੍ਵਾ ਮਨਸਾ ਭਾਵਨਾਯ ਪਾਲ਼ਿਪਗੁਣਤਾਯ ਚ ਪਚ੍ਚਯੋ ਹੋਤਿ, ਮਨਸਾ ਭਾਵਨਾ ਅਸੁਭਵਣ੍ਣਲਕ੍ਖਣਾਨਂ ਅਞ੍ਞਤਰਵਸੇਨ ਪਰਿਗ੍ਗਹਸ੍ਸ, ਅਥ ਤੇਨੇਵ ਨਯੇਨ ਵਕ੍ਕਪਞ੍ਚਕਂ ਅਦ੍ਧਮਾਸਂ, ਤਤੋ ਤਦੁਭਯਮਦ੍ਧਮਾਸਂ, ਤਤੋ ਪਪ੍ਫਾਸਪਞ੍ਚਕਮਦ੍ਧਮਾਸਂ, ਤਤੋ ਤਂ ਪਞ੍ਚਕਤ੍ਤਯਮ੍ਪਿ ਅਦ੍ਧਮਾਸਂ, ਅਥ ਅਨ੍ਤੇ ਅਵੁਤ੍ਤਮ੍ਪਿ ਮਤ੍ਥਲੁਙ੍ਗਂ ਪਥਵੀਧਾਤੁਆਕਾਰੇਹਿ ਸਦ੍ਧਿਂ ਏਕਤੋ ਭਾਵਨਤ੍ਥਂ ਇਧ ਪਕ੍ਖਿਪਿਤ੍ਵਾ ਮਤ੍ਥਲੁਙ੍ਗਪਞ੍ਚਕਂ ਅਦ੍ਧਮਾਸਂ, ਤਤੋ ਪਞ੍ਚਕਚਤੁਕ੍ਕਮ੍ਪਿ ਅਦ੍ਧਮਾਸਂ, ਅਥ ਮੇਦਛਕ੍ਕਮਦ੍ਧਮਾਸਂ, ਤਤੋ ਮੇਦਛਕ੍ਕੇਨ ਸਹ ਪਞ੍ਚਕਚਤੁਕ੍ਕਮ੍ਪਿ ਅਦ੍ਧਮਾਸਂ, ਅਥ ਮੁਤ੍ਤਛਕ੍ਕਮਦ੍ਧਮਾਸਂ, ਤਤੋ ਸਬ੍ਬਮੇਵ ਦ੍ਵਤ੍ਤਿਂਸਾਕਾਰਮਦ੍ਧਮਾਸਨ੍ਤਿ ਏਵਂ ਛ ਮਾਸੇ ਵਣ੍ਣਸਣ੍ਠਾਨਦਿਸੋਕਾਸਪਰਿਚ੍ਛੇਦਤੋ ਵਵਤ੍ਥਪੇਨ੍ਤੇਨ ਭਾਵੇਤਬ੍ਬਂ. ਏਤਂ ਮਜ੍ਝਿਮਪਞ੍ਞਂ ਪੁਗ੍ਗਲਂ ਸਨ੍ਧਾਯ ਵੁਤ੍ਤਂ. ਮਨ੍ਦਪਞ੍ਞੇਨ ਤੁ ਯਾਵਜੀਵਂ ਭਾਵੇਤਬ੍ਬਂ ਤਿਕ੍ਖਪਞ੍ਞਸ੍ਸ ਨ ਚਿਰੇਨੇਵ ਭਾਵਨਾ ਸਮ੍ਪਜ੍ਜਤੀਤਿ.

ਏਤ੍ਥਾਹ – ‘‘ਕਥਂ ਪਨਾਯਮਿਮਂ ਦ੍ਵਤ੍ਤਿਂਸਾਕਾਰਂ ਵਣ੍ਣਾਦਿਤੋ ਵਵਤ੍ਥਪੇਤੀ’’ਤਿ? ਅਯਞ੍ਹਿ ‘‘ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ’’ਤਿ ਏਵਮਾਦਿਨਾ ਨਯੇਨ ਤਚਪਞ੍ਚਕਾਦਿਵਿਭਾਗਤੋ ਦ੍ਵਤ੍ਤਿਂਸਾਕਾਰਂ ਭਾਵੇਨ੍ਤੋ ਕੇਸਾ ਤਾਵ ਵਣ੍ਣਤੋ ਕਾਲ਼ਕਾਤਿ ਵਵਤ੍ਥਪੇਤਿ, ਯਾਦਿਸਕਾ ਵਾਨੇਨ ਦਿਟ੍ਠਾ ਹੋਨ੍ਤਿ. ਸਣ੍ਠਾਨਤੋ ਦੀਘਵਟ੍ਟਲਿਕਾ ਤੁਲਾਦਣ੍ਡਮਿਵਾਤਿ ਵਵਤ੍ਥਪੇਤਿ. ਦਿਸਤੋ ਪਨ ਯਸ੍ਮਾ ਇਮਸ੍ਮਿਂ ਕਾਯੇ ਨਾਭਿਤੋ ਉਦ੍ਧਂ ਉਪਰਿਮਾ ਦਿਸਾ ਅਧੋ ਹੇਟ੍ਠਿਮਾਤਿ ਵੁਚ੍ਚਤਿ, ਤਸ੍ਮਾ ਇਮਸ੍ਸ ਕਾਯਸ੍ਸ ਉਪਰਿਮਾਯ ਦਿਸਾਯ ਜਾਤਾਤਿ ਵਵਤ੍ਥਪੇਤਿ. ਓਕਾਸਤੋ ਨਲਾਟਨ੍ਤਕਣ੍ਣਚੂਲ਼ਿਕਗਲਵਾਟਕਪਰਿਚ੍ਛਿਨ੍ਨੇ ਸੀਸਚਮ੍ਮੇ ਜਾਤਾਤਿ. ਤਤ੍ਥ ਯਥਾ ਵਮ੍ਮਿਕਮਤ੍ਥਕੇ ਜਾਤਾਨਿ ਕੁਣ੍ਠਤਿਣਾਨਿ ਨ ਜਾਨਨ੍ਤਿ ‘‘ਮਯਂ ਵਮ੍ਮਿਕਮਤ੍ਥਕੇ ਜਾਤਾਨੀ’’ਤਿ; ਨਪਿ ਵਮ੍ਮਿਕਮਤ੍ਥਕੋ ਜਾਨਾਤਿ ‘‘ਮਯਿ ਕੁਣ੍ਠਤਿਣਾਨਿ ਜਾਤਾਨੀ’’ਤਿ; ਏਵਮੇਵ ਨ ਕੇਸਾ ਜਾਨਨ੍ਤਿ ‘‘ਮਯਂ ਸੀਸਚਮ੍ਮੇ ਜਾਤਾ’’ਤਿ, ਨਪਿ ਸੀਸਚਮ੍ਮਂ ਜਾਨਾਤਿ ‘‘ਮਯਿ ਕੇਸਾ ਜਾਤਾ’’ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ ਅਚੇਤਨਾ ਅਬ੍ਯਾਕਤਾ ਸੁਞ੍ਞਾ ਪਰਮਦੁਗ੍ਗਨ੍ਧਜੇਗੁਚ੍ਛਪ੍ਪਟਿਕੂਲਾ, ਨ ਸਤ੍ਤੋ ਨ ਪੁਗ੍ਗਲੋਤਿ ਵਵਤ੍ਥਪੇਤਿ. ਪਰਿਚ੍ਛੇਦਤੋਤਿ ਦੁਵਿਧੋ ਪਰਿਚ੍ਛੇਦੋ ਸਭਾਗਵਿਸਭਾਗਵਸੇਨ. ਤਤ੍ਥ ਕੇਸਾ ਹੇਟ੍ਠਾ ਪਤਿਟ੍ਠਿਤਚਮ੍ਮਤਲੇਨ ਤਤ੍ਥ ਵੀਹਗ੍ਗਮਤ੍ਤਂ ਪਵਿਸਿਤ੍ਵਾ ਪਤਿਟ੍ਠਿਤੇਨ ਅਤ੍ਤਨੋ ਮੂਲਤਲੇਨ ਚ ਉਪਰਿ ਆਕਾਸੇਨ ਤਿਰਿਯਂ ਅਞ੍ਞਮਞ੍ਞੇਨ ਪਰਿਚ੍ਛਿਨ੍ਨਾਤਿ ਏਵਂ ਸਭਾਗਪਰਿਚ੍ਛੇਦਤੋ, ਕੇਸਾ ਨ ਅਵਸੇਸਏਕਤਿਂਸਾਕਾਰਾ. ਅਵਸੇਸਾ ਏਕਤਿਂਸਾ ਨ ਕੇਸਾਤਿ ਏਵਂ ਵਿਸਭਾਗਪਰਿਚ੍ਛੇਦਤੋ ਚ ਵਵਤ੍ਥਪੇਤਿ. ਏਵਂ ਤਾਵ ਕੇਸੇ ਵਣ੍ਣਾਦਿਤੋ ਵਵਤ੍ਥਪੇਤਿ.

ਅਵਸੇਸੇਸੁ ਲੋਮਾ ਵਣ੍ਣਤੋ ਯੇਭੁਯ੍ਯੇਨ ਨੀਲਵਣ੍ਣਾਤਿ ਵਵਤ੍ਥਪੇਤਿ, ਯਾਦਿਸਕਾ ਵਾਨੇਨ ਦਿਟ੍ਠਾ ਹੋਨ੍ਤਿ. ਸਣ੍ਠਾਨਤੋ ਓਣਤਚਾਪਸਣ੍ਠਾਨਾ, ਉਪਰਿ ਵਙ੍ਕਤਾਲਹੀਰਸਣ੍ਠਾਨਾ ਵਾ, ਦਿਸਤੋ ਦ੍ਵੀਸੁ ਦਿਸਾਸੁ ਜਾਤਾ, ਓਕਾਸਤੋ ਹਤ੍ਥਤਲਪਾਦਤਲੇ ਠਪੇਤ੍ਵਾ ਯੇਭੁਯ੍ਯੇਨ ਅਵਸੇਸਸਰੀਰਚਮ੍ਮੇ ਜਾਤਾਤਿ.

ਤਤ੍ਥ ਯਥਾ ਪੁਰਾਣਗਾਮਟ੍ਠਾਨੇ ਜਾਤਾਨਿ ਦਬ੍ਬਤਿਣਾਨਿ ਨ ਜਾਨਨ੍ਤਿ ‘‘ਮਯਂ ਪੁਰਾਣਗਾਮਟ੍ਠਾਨੇ ਜਾਤਾਨੀ’’ਤਿ, ਨ ਚ ਪੁਰਾਣਗਾਮਟ੍ਠਾਨਂ ਜਾਨਾਤਿ ‘‘ਮਯਿ ਦਬ੍ਬਤਿਣਾਨਿ ਜਾਤਾਨੀ’’ਤਿ, ਏਵਮੇਵ ਨ ਲੋਮਾ ਜਾਨਨ੍ਤਿ ‘‘ਮਯਂ ਸਰੀਰਚਮ੍ਮੇ ਜਾਤਾ’’ਤਿ, ਨਪਿ ਸਰੀਰਚਮ੍ਮਂ ਜਾਨਾਤਿ ‘‘ਮਯਿ ਲੋਮਾ ਜਾਤਾ’’ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ ਅਚੇਤਨਾ ਅਬ੍ਯਾਕਤਾ ਸੁਞ੍ਞਾ ਪਰਮਦੁਗ੍ਗਨ੍ਧਜੇਗੁਚ੍ਛਪਟਿਕੂਲਾ, ਨ ਸਤ੍ਤੋ ਨ ਪੁਗ੍ਗਲੋਤਿ ਵਵਤ੍ਥਪੇਤਿ. ਪਰਿਚ੍ਛੇਦਤੋ ਹੇਟ੍ਠਾ ਪਤਿਟ੍ਠਿਤਚਮ੍ਮਤਲੇਨ ਤਤ੍ਥ ਲਿਕ੍ਖਾਮਤ੍ਤਂ ਪਵਿਸਿਤ੍ਵਾ ਪਤਿਟ੍ਠਿਤੇਨ ਅਤ੍ਤਨੋ ਮੂਲੇਨ ਚ ਉਪਰਿ ਆਕਾਸੇਨ ਤਿਰਿਯਂ ਅਞ੍ਞਮਞ੍ਞੇਨ ਪਰਿਚ੍ਛਿਨ੍ਨਾਤਿ ਵਵਤ੍ਥਪੇਤਿ. ਅਯਮੇਤੇਸਂ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਲੋਮੇ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਨਖਾ ਯਸ੍ਸ ਪਰਿਪੁਣ੍ਣਾ, ਤਸ੍ਸ ਵੀਸਤਿ. ਤੇ ਸਬ੍ਬੇਪਿ ਵਣ੍ਣਤੋ ਮਂਸਵਿਨਿਮੁਤ੍ਤੋਕਾਸੇ ਸੇਤਾ, ਮਂਸਸਮ੍ਬਨ੍ਧੇ ਤਮ੍ਬਵਣ੍ਣਾਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਯਥਾਸਕਪਤਿਟ੍ਠਿਤੋਕਾਸਸਣ੍ਠਾਨਾ, ਯੇਭੁਯ੍ਯੇਨ ਮਧੁਕਫਲਟ੍ਠਿਕਸਣ੍ਠਾਨਾ, ਮਚ੍ਛਸਕਲਿਕਸਣ੍ਠਾਨਾ ਵਾਤਿ ਵਵਤ੍ਥਪੇਤਿ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤਾ, ਓਕਾਸਤੋ ਅਙ੍ਗੁਲੀਨਂ ਅਗ੍ਗੇਸੁ ਪਤਿਟ੍ਠਿਤਾਤਿ.

ਤਤ੍ਥ ਯਥਾ ਨਾਮ ਗਾਮਦਾਰਕੇਹਿ ਦਣ੍ਡਕਗ੍ਗੇਸੁ ਮਧੁਕਫਲਟ੍ਠਿਕਾ ਠਪਿਤਾ ਨ ਜਾਨਨ੍ਤਿ ‘‘ਮਯਂ ਦਣ੍ਡਕਗ੍ਗੇਸੁ ਠਪਿਤਾ’’ਤਿ, ਨਪਿ ਦਣ੍ਡਕਾ ਜਾਨਨ੍ਤਿ ‘‘ਅਮ੍ਹੇਸੁ ਮਧੁਕਫਲਟ੍ਠਿਕਾ ਠਪਿਤਾ’’ਤਿ; ਏਵਮੇਵ ਨਖਾ ਨ ਜਾਨਨ੍ਤਿ ‘‘ਮਯਂ ਅਙ੍ਗੁਲੀਨਂ ਅਗ੍ਗੇਸੁ ਪਤਿਟ੍ਠਿਤਾ’’ਤਿ, ਨਪਿ ਅਙ੍ਗੁਲਿਯੋ ਜਾਨਨ੍ਤਿ ‘‘ਅਮ੍ਹਾਕਂ ਅਗ੍ਗੇਸੁ ਨਖਾ ਪਤਿਟ੍ਠਿਤਾ’’ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ ਅਚੇਤਨਾ…ਪੇ… ਨ ਪੁਗ੍ਗਲੋਤਿ ਵਵਤ੍ਥਪੇਤਿ. ਪਰਿਚ੍ਛੇਦਤੋ ਹੇਟ੍ਠਾ ਮੂਲੇ ਚ ਅਙ੍ਗੁਲਿਮਂਸੇਨ, ਤਤ੍ਥ ਪਤਿਟ੍ਠਿਤਤਲੇਨ ਵਾ ਉਪਰਿ ਅਗ੍ਗੇ ਚ ਆਕਾਸੇਨ, ਉਭਤੋਪਸ੍ਸੇਸੁ ਅਙ੍ਗੁਲੀਨਂ ਉਭਤੋਕੋਟਿਚਮ੍ਮੇਨ ਪਰਿਚ੍ਛਿਨ੍ਨਾਤਿ ਵਵਤ੍ਥਪੇਤਿ. ਅਯਮੇਤੇਸਂ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਨਖੇ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਦਨ੍ਤਾ ਯਸ੍ਸ ਪਰਿਪੁਣ੍ਣਾ, ਤਸ੍ਸ ਦ੍ਵਤ੍ਤਿਂਸ. ਤੇ ਸਬ੍ਬੇਪਿ ਵਣ੍ਣਤੋ ਸੇਤਵਣ੍ਣਾਤਿ ਵਵਤ੍ਥਪੇਤਿ. ਯਸ੍ਸ ਸਮਸਣ੍ਠਿਤਾ ਹੋਨ੍ਤਿ, ਤਸ੍ਸ ਖਰਪਤ੍ਤਚ੍ਛਿਨ੍ਨਸਙ੍ਖਪਟਲਮਿਵ ਸਮਗਨ੍ਥਿਤਸੇਤਕੁਸੁਮਮਕੁਲ਼ਮਾਲਾ ਵਿਯ ਚ ਖਾਯਨ੍ਤਿ. ਯਸ੍ਸ ਵਿਸਮਸਣ੍ਠਿਤਾ, ਤਸ੍ਸ ਜਿਣ੍ਣਆਸਨਸਾਲਾਪੀਠਕਪਟਿਪਾਟਿ ਵਿਯ ਨਾਨਾਸਣ੍ਠਾਨਾਤਿ ਸਣ੍ਠਾਨਤੋ ਵਵਤ੍ਥਪੇਤਿ. ਤੇਸਞ੍ਹਿ ਉਭਯਦਨ੍ਤਪਨ੍ਤਿਪਰਿਯੋਸਾਨੇਸੁ ਹੇਟ੍ਠਤੋ ਉਪਰਿਤੋ ਚ ਦ੍ਵੇ ਦ੍ਵੇ ਕਤ੍ਵਾ ਅਟ੍ਠ ਦਨ੍ਤਾ ਚਤੁਕੋਟਿਕਾ ਚਤੁਮੂਲਿਕਾ ਆਸਨ੍ਦਿਕਸਣ੍ਠਾਨਾ, ਤੇਸਂ ਓਰਤੋ ਤੇਨੇਵ ਕਮੇਨ ਸਨ੍ਨਿਵਿਟ੍ਠਾ ਅਟ੍ਠ ਦਨ੍ਤਾ ਤਿਕੋਟਿਕਾ ਤਿਮੂਲਿਕਾ ਸਿਙ੍ਘਾਟਕਸਣ੍ਠਾਨਾ. ਤੇਸਮ੍ਪਿ ਓਰਤੋ ਤੇਨੇਵ ਕਮੇਨ ਹੇਟ੍ਠਤੋ ਉਪਰਿਤੋ ਚ ਏਕਮੇਕਂ ਕਤ੍ਵਾ ਚਤ੍ਤਾਰੋ ਦਨ੍ਤਾ ਦ੍ਵਿਕੋਟਿਕਾ ਦ੍ਵਿਮੂਲਿਕਾ ਯਾਨਕੂਪਤ੍ਥਮ੍ਭਿਨੀਸਣ੍ਠਾਨਾ. ਤੇਸਮ੍ਪਿ ਓਰਤੋ ਤੇਨੇਵ ਕਮੇਨ ਸਨ੍ਨਿਵਿਟ੍ਠਾ ਚਤ੍ਤਾਰੋ ਦਾਠਾਦਨ੍ਤਾ ਏਕਕੋਟਿਕਾ ਏਕਮੂਲਿਕਾ ਮਲ੍ਲਿਕਾਮਕੁਲ਼ਸਣ੍ਠਾਨਾ. ਤਤੋ ਉਭਯਦਨ੍ਤਪਨ੍ਤਿਵੇਮਜ੍ਝੇ ਹੇਟ੍ਠਾ ਚਤ੍ਤਾਰੋ ਉਪਰਿ ਚਤ੍ਤਾਰੋ ਕਤ੍ਵਾ ਅਟ੍ਠ ਦਨ੍ਤਾ ਏਕਕੋਟਿਕਾ ਏਕਮੂਲਿਕਾ ਤੁਮ੍ਬਬੀਜਸਣ੍ਠਾਨਾ. ਦਿਸਤੋ ਉਪਰਿਮਾਯ ਦਿਸਾਯ ਜਾਤਾ. ਓਕਾਸਤੋ ਉਪਰਿਮਾ ਉਪਰਿਮਹਨੁਕਟ੍ਠਿਕੇ ਅਧੋਕੋਟਿਕਾ, ਹੇਟ੍ਠਿਮਾ ਹੇਟ੍ਠਿਮਹਨੁਕਟ੍ਠਿਕੇ ਉਦ੍ਧਂਕੋਟਿਕਾ ਹੁਤ੍ਵਾ ਪਤਿਟ੍ਠਿਤਾਤਿ.

ਤਤ੍ਥ ਯਥਾ ਨਵਕਮ੍ਮਿਕਪੁਰਿਸੇਨ ਹੇਟ੍ਠਾ ਸਿਲਾਤਲੇ ਪਤਿਟ੍ਠਾਪਿਤਾ ਉਪਰਿਮਤਲੇ ਪਵੇਸਿਤਾ ਥਮ੍ਭਾ ਨ ਜਾਨਨ੍ਤਿ ‘‘ਮਯਂ ਹੇਟ੍ਠਾਸਿਲਾਤਲੇ ਪਤਿਟ੍ਠਾਪਿਤਾ, ਉਪਰਿਮਤਲੇ ਪਵੇਸਿਤਾ’’ਤਿ, ਨ ਹੇਟ੍ਠਾਸਿਲਾਤਲਂ ਜਾਨਾਤਿ ‘‘ਮਯਿ ਥਮ੍ਭਾ ਪਤਿਟ੍ਠਾਪਿਤਾ’’ਤਿ, ਨ ਉਪਰਿਮਤਲਂ ਜਾਨਾਤਿ ‘‘ਮਯਿ ਥਮ੍ਭਾ ਪਵਿਟ੍ਠਾ’’ਤਿ; ਏਵਮੇਵ ਦਨ੍ਤਾ ਨ ਜਾਨਨ੍ਤਿ ‘‘ਮਯਂ ਹੇਟ੍ਠਾਹਨੁਕਟ੍ਠਿਕੇ ਪਤਿਟ੍ਠਿਤਾ, ਉਪਰਿਮਹਨੁਕਟ੍ਠਿਕੇ ਪਵਿਟ੍ਠਾ’’ਤਿ, ਨਾਪਿ ਹੇਟ੍ਠਾਹਨੁਕਟ੍ਠਿਕਂ ਜਾਨਾਤਿ ‘‘ਮਯਿ ਦਨ੍ਤਾ ਪਤਿਟ੍ਠਿਤਾ’’ਤਿ, ਨ ਉਪਰਿਮਹਨੁਕਟ੍ਠਿਕਂ ਜਾਨਾਤਿ ‘‘ਮਯਿ ਦਨ੍ਤਾ ਪਵਿਟ੍ਠਾ’’ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਹੇਟ੍ਠਾ ਹਨੁਕਟ੍ਠਿਕੂਪੇਨ ਹਨੁਕਟ੍ਠਿਕਂ ਪਵਿਸਿਤ੍ਵਾ ਪਤਿਟ੍ਠਿਤੇਨ ਅਤ੍ਤਨੋ ਮੂਲਤਲੇਨ ਚ ਉਪਰਿ ਆਕਾਸੇਨ ਤਿਰਿਯਂ ਅਞ੍ਞਮਞ੍ਞੇਨ ਪਰਿਚ੍ਛਿਨ੍ਨਾਤਿ ਵਵਤ੍ਥਪੇਤਿ. ਅਯਮੇਤੇਸਂ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਦਨ੍ਤੇ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਅਨ੍ਤੋਸਰੀਰੇ ਨਾਨਾਕੁਣਪਸਞ੍ਚਯਪ੍ਪਟਿਚ੍ਛਾਦਕਂ ਤਚੋ ਵਣ੍ਣਤੋ ਸੇਤੋਤਿ ਵਵਤ੍ਥਪੇਤਿ. ਸੋ ਹਿ ਯਦਿਪਿ ਛਵਿਰਾਗਰਞ੍ਜਿਤਤ੍ਤਾ ਕਾਲ਼ਕੋਦਾਤਾਦਿਵਣ੍ਣਵਸੇਨ ਨਾਨਾਵਣ੍ਣੋ ਵਿਯ ਦਿਸ੍ਸਤਿ, ਤਥਾਪਿ ਸਭਾਗਵਣ੍ਣੇਨ ਸੇਤੋ ਏਵ. ਸੋ ਪਨਸ੍ਸ ਸੇਤਭਾਵੋ ਅਗ੍ਗਿਜਾਲਾਭਿਘਾਤਪਹਰਣਪਹਾਰਾਦੀਹਿ ਵਿਦ੍ਧਂਸਿਤਾਯ ਛਵਿਯਾ ਪਾਕਟੋ ਹੋਤਿ. ਸਣ੍ਠਾਨਤੋ ਸਙ੍ਖੇਪੇਨ ਕਞ੍ਚੁਕਸਣ੍ਠਾਨੋ, ਵਿਤ੍ਥਾਰੇਨ ਨਾਨਾਸਣ੍ਠਾਨੋਤਿ. ਤਥਾ ਹਿ ਪਾਦਙ੍ਗੁਲਿਤ੍ਤਚੋ ਕੋਸਕਾਰਕਕੋਸਸਣ੍ਠਾਨੋ, ਪਿਟ੍ਠਿਪਾਦਤ੍ਤਚੋ ਪੁਟਬਦ੍ਧੂਪਾਹਨਸਣ੍ਠਾਨੋ, ਜਙ੍ਘਤ੍ਤਚੋ ਭਤ੍ਤਪੁਟਕਤਾਲਪਣ੍ਣਸਣ੍ਠਾਨੋ, ਊਰੁਤ੍ਤਚੋ ਤਣ੍ਡੁਲਭਰਿਤਦੀਘਤ੍ਥਵਿਕਸਣ੍ਠਾਨੋ, ਆਨਿਸਦਤ੍ਤਚੋ ਉਦਕਪੂਰਿਤਪਟਪਰਿਸ੍ਸਾਵਨਸਣ੍ਠਾਨੋ, ਪਿਟ੍ਠਿਤ੍ਤਚੋ ਫਲਕੋਨਦ੍ਧਚਮ੍ਮਸਣ੍ਠਾਨੋ, ਕੁਚ੍ਛਿਤ੍ਤਚੋ ਵੀਣਾਦੋਣਿਕੋਨਦ੍ਧਚਮ੍ਮਸਣ੍ਠਾਨੋ, ਉਰਤ੍ਤਚੋ ਯੇਭੁਯ੍ਯੇਨ ਚਤੁਰਸ੍ਸਸਣ੍ਠਾਨੋ, ਦ੍ਵਿਬਾਹੁਤ੍ਤਚੋ ਤੂਣੀਰੋਨਦ੍ਧਚਮ੍ਮਸਣ੍ਠਾਨੋ, ਪਿਟ੍ਠਿਹਤ੍ਥਤ੍ਤਚੋ ਖੁਰਕੋਸਸਣ੍ਠਾਨੋ ਫਣਕਤ੍ਥਵਿਕਸਣ੍ਠਾਨੋ ਵਾ, ਹਤ੍ਥਙ੍ਗੁਲਿਤ੍ਤਚੋ ਕੁਞ੍ਚਿਕਾਕੋਸਸਣ੍ਠਾਨੋ, ਗੀਵਤ੍ਤਚੋ ਗਲਕਞ੍ਚੁਕਸਣ੍ਠਾਨੋ, ਮੁਖਤ੍ਤਚੋ ਛਿਦ੍ਦਾਵਛਿਦ੍ਦਕਿਮਿਕੁਲਾਵਕਸਣ੍ਠਾਨੋ, ਸੀਸਤ੍ਤਚੋ ਪਤ੍ਤਤ੍ਥਵਿਕਸਣ੍ਠਾਨੋਤਿ.

ਤਚਪਰਿਗ੍ਗਣ੍ਹਕੇਨ ਚ ਯੋਗਾਵਚਰੇਨ ਉਤ੍ਤਰੋਟ੍ਠਤੋ ਪਟ੍ਠਾਯ ਤਚਸ੍ਸ ਮਂਸਸ੍ਸ ਚ ਅਨ੍ਤਰੇਨ ਚਿਤ੍ਤਂ ਪੇਸੇਨ੍ਤੇਨ ਪਠਮਂ ਤਾਵ ਮੁਖਤ੍ਤਚੋ ਵਵਤ੍ਥਪੇਤਬ੍ਬੋ, ਤਤੋ ਸੀਸਤ੍ਤਚੋ, ਅਥ ਬਹਿਗੀਵਤ੍ਤਚੋ, ਤਤੋ ਅਨੁਲੋਮੇਨ ਪਟਿਲੋਮੇਨ ਚ ਦਕ੍ਖਿਣਹਤ੍ਥਤ੍ਤਚੋ. ਅਥ ਤੇਨੇਵ ਕਮੇਨ ਵਾਮਹਤ੍ਥਤ੍ਤਚੋ, ਤਤੋ ਪਿਟ੍ਠਿਤ੍ਤਚੋ, ਅਥ ਆਨਿਸਦਤ੍ਤਚੋ, ਤਤੋ ਅਨੁਲੋਮੇਨ ਪਟਿਲੋਮੇਨ ਚ ਦਕ੍ਖਿਣਪਾਦਤ੍ਤਚੋ, ਅਥ ਵਾਮਪਾਦਤ੍ਤਚੋ, ਤਤੋ ਵਤ੍ਥਿਉਦਰਹਦਯਅਬ੍ਭਨ੍ਤਰਗੀਵਤ੍ਤਚੋ, ਤਤੋ ਹੇਟ੍ਠਿਮਹਨੁਕਤ੍ਤਚੋ, ਅਥ ਅਧਰੋਟ੍ਠਤ੍ਤਚੋ. ਏਵਂ ਯਾਵ ਪੁਨ ਉਪਰਿ ਓਟ੍ਠਤ੍ਤਚੋਤਿ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤੋ. ਓਕਾਸਤੋ ਸਕਲਸਰੀਰਂ ਪਰਿਯੋਨਨ੍ਧਿਤ੍ਵਾ ਠਿਤੋਤਿ.

ਤਤ੍ਥ ਯਥਾ ਅਲ੍ਲਚਮ੍ਮਪਰਿਯੋਨਦ੍ਧਾਯ ਪੇਲ਼ਾਯ ਨ ਅਲ੍ਲਚਮ੍ਮਂ ਜਾਨਾਤਿ ‘‘ਮਯਾ ਪੇਲ਼ਾ ਪਰਿਯੋਨਦ੍ਧਾ’’ਤਿ, ਨਪਿ ਪੇਲ਼ਾ ਜਾਨਾਤਿ ‘‘ਅਹਂ ਅਲ੍ਲਚਮ੍ਮੇਨ ਪਰਿਯੋਨਦ੍ਧਾ’’ਤਿ; ਏਵਮੇਵ ਨ ਤਚੋ ਜਾਨਾਤਿ ‘‘ਮਯਾ ਇਦਂ ਚਾਤੁਮਹਾਭੂਤਿਕਂ ਸਰੀਰਂ ਓਨਦ੍ਧ’’ਨ੍ਤਿ, ਨਪਿ ਇਦਂ ਚਾਤੁਮਹਾਭੂਤਿਕਂ ਸਰੀਰਂ ਜਾਨਾਤਿ ‘‘ਅਹਂ ਤਚੇਨ ਓਨਦ੍ਧ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਕੇਵਲਂ ਤੁ –

‘‘ਅਲ੍ਲਚਮ੍ਮਪਟਿਚ੍ਛਨ੍ਨੋ, ਨਵਦ੍ਵਾਰੋ ਮਹਾਵਣੋ;

ਸਮਨ੍ਤਤੋ ਪਗ੍ਘਰਤਿ, ਅਸੁਚਿਪੂਤਿਗਨ੍ਧਿਯੋ’’ਤਿ.

ਪਰਿਚ੍ਛੇਦਤੋ ਹੇਟ੍ਠਾ ਮਂਸੇਨ ਤਤ੍ਥ ਪਤਿਟ੍ਠਿਤਤਲੇਨ ਵਾ ਉਪਰਿ ਛਵਿਯਾ ਪਰਿਚ੍ਛਿਨ੍ਨੋਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਤਚਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਨਵਪੇਸਿਸਤਪ੍ਪਭੇਦਂ ਮਂਸਂ ਵਣ੍ਣਤੋ ਰਤ੍ਤਂ ਪਾਲਿਭਦ੍ਦਕਪੁਪ੍ਫਸਨ੍ਨਿਭਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਨਾਨਾਸਣ੍ਠਾਨਨ੍ਤਿ. ਤਥਾ ਹਿ ਤਤ੍ਥ ਜਙ੍ਘਮਂਸਂ ਤਾਲਪਤ੍ਤਪੁਟਭਤ੍ਤਸਣ੍ਠਾਨਂ, ਅਵਿਕਸਿਤਕੇਤਕੀਮਕੁਲ਼ਸਣ੍ਠਾਨਨ੍ਤਿਪਿ ਕੇਚਿ. ਊਰੁਮਂਸਂ ਸੁਧਾਪਿਸਨਨਿਸਦਪੋਤਕਸਣ੍ਠਾਨਂ, ਆਨਿਸਦਮਂਸਂ ਉਦ੍ਧਨਕੋਟਿਸਣ੍ਠਾਨਂ, ਪਿਟ੍ਠਿਮਂਸਂ ਤਾਲਗੁਲ਼ਪਟਲਸਣ੍ਠਾਨਂ, ਫਾਸੁਕਦ੍ਵਯਮਂਸਂ ਵਂਸਮਯਕੋਟ੍ਠਕੁਚ੍ਛਿਪਦੇਸਮ੍ਹਿ ਤਨੁਮਤ੍ਤਿਕਾਲੇਪਸਣ੍ਠਾਨਂ, ਥਨਮਂਸਂ ਵਟ੍ਟੇਤ੍ਵਾ ਅਵਕ੍ਖਿਤ੍ਤਦ੍ਧਮਤ੍ਤਿਕਾਪਿਣ੍ਡਸਣ੍ਠਾਨਂ, ਦ੍ਵੇਬਾਹੁਮਂਸਂ ਨਙ੍ਗੁਟ੍ਠਸੀਸਪਾਦੇ ਛੇਤ੍ਵਾ ਨਿਚ੍ਚਮ੍ਮਂ ਕਤ੍ਵਾ ਠਪਿਤਮਹਾਮੂਸਿਕਸਣ੍ਠਾਨਂ, ਮਂਸਸੂਨਕਸਣ੍ਠਾਨਨ੍ਤਿਪਿ ਏਕੇ. ਗਣ੍ਡਮਂਸਂ ਗਣ੍ਡਪ੍ਪਦੇਸੇ ਠਪਿਤਕਰਞ੍ਜਬੀਜਸਣ੍ਠਾਨਂ, ਮਣ੍ਡੂਕਸਣ੍ਠਾਨਨ੍ਤਿਪਿ ਏਕੇ. ਜਿਵ੍ਹਾਮਂਸਂ ਨੁਹੀਪਤ੍ਤਸਣ੍ਠਾਨਂ, ਨਾਸਾਮਂਸਂ ਓਮੁਖਨਿਕ੍ਖਿਤ੍ਤਪਣ੍ਣਕੋਸਸਣ੍ਠਾਨਂ, ੦.ਅਕ੍ਖਿਕੂਪਮਂਸਂ ਅਦ੍ਧਪਕ੍ਕਉਦੁਮ੍ਬਰਸਣ੍ਠਾਨਂ, ਸੀਸਮਂਸਂ ਪਤ੍ਤਪਚਨਕਟਾਹਤਨੁਲੇਪਸਣ੍ਠਾਨਨ੍ਤਿ. ਮਂਸਪਰਿਗ੍ਗਣ੍ਹਕੇਨ ਚ ਯੋਗਾਵਚਰੇਨ ਏਤਾਨੇਵ ਓਲ਼ਾਰਿਕਮਂਸਾਨਿ ਸਣ੍ਠਾਨਤੋ ਵਵਤ੍ਥਪੇਤਬ੍ਬਾਨਿ. ਏਵਞ੍ਹਿ ਵਵਤ੍ਥਾਪਯਤੋ ਸੁਖੁਮਾਨਿ ਮਂਸਾਨਿ ਞਾਣਸ੍ਸ ਆਪਾਥਂ ਆਗਚ੍ਛਨ੍ਤੀਤਿ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤਂ. ਓਕਾਸਤੋ ਸਾਧਿਕਾਨਿ ਤੀਣਿ ਅਟ੍ਠਿਸਤਾਨਿ ਅਨੁਲਿਮ੍ਪਿਤ੍ਵਾ ਠਿਤਨ੍ਤਿ.

ਤਤ੍ਥ ਯਥਾ ਥੂਲਮਤ੍ਤਿਕਾਨੁਲਿਤ੍ਤਾਯ ਭਿਤ੍ਤਿਯਾ ਨ ਥੂਲਮਤ੍ਤਿਕਾ ਜਾਨਾਤਿ ‘‘ਮਯਾ ਭਿਤ੍ਤਿ ਅਨੁਲਿਤ੍ਤਾ’’ਤਿ, ਨਪਿ ਭਿਤ੍ਤਿ ਜਾਨਾਤਿ ‘‘ਅਹਂ ਥੂਲਮਤ੍ਤਿਕਾਯ ਅਨੁਲਿਤ੍ਤਾ’’ਤਿ, ਏਵਮੇਵਂ ਨ ਨਵਪੇਸਿਸਤਪ੍ਪਭੇਦਂ ਮਂਸਂ ਜਾਨਾਤਿ ‘‘ਮਯਾ ਅਟ੍ਠਿਸਤਤ੍ਤਯਂ ਅਨੁਲਿਤ੍ਤ’’ਨ੍ਤਿ, ਨਪਿ ਅਟ੍ਠਿਸਤਤ੍ਤਯਂ ਜਾਨਾਤਿ ‘‘ਅਹਂ ਨਵਪੇਸਿਸਤਪ੍ਪਭੇਦੇਨ ਮਂਸੇਨ ਅਨੁਲਿਤ੍ਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਕੇਵਲਂ ਤੁ –

‘‘ਨਵਪੇਸਿਸਤਾ ਮਂਸਾ, ਅਨੁਲਿਤ੍ਤਾ ਕਲ਼ੇਵਰਂ;

ਨਾਨਾਕਿਮਿਕੁਲਾਕਿਣ੍ਣਂ, ਮੀਲ਼੍ਹਟ੍ਠਾਨਂਵ ਪੂਤਿਕ’’ਨ੍ਤਿ.

ਪਰਿਚ੍ਛੇਦਤੋ ਹੇਟ੍ਠਾ ਅਟ੍ਠਿਸਙ੍ਘਾਟੇਨ ਤਤ੍ਥ ਪਤਿਟ੍ਠਿਤਤਲੇਨ ਵਾ ਉਪਰਿ ਤਚੇਨ ਤਿਰਿਯਂ ਅਞ੍ਞਮਞ੍ਞੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਮਂਸਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਨਵਸਤਪ੍ਪਭੇਦਾ ਨ੍ਹਾਰੂ ਵਣ੍ਣਤੋ ਸੇਤਾਤਿ ਵਵਤ੍ਥਪੇਤਿ, ਮਧੁਵਣ੍ਣਾਤਿਪਿ ਏਕੇ. ਸਣ੍ਠਾਨਤੋ ਨਾਨਾਸਣ੍ਠਾਨਾਤਿ. ਤਥਾ ਹਿ ਤਤ੍ਥ ਮਹਨ੍ਤਾ ਮਹਨ੍ਤਾ ਨ੍ਹਾਰੂ ਕਨ੍ਦਲਮਕੁਲ਼ਸਣ੍ਠਾਨਾ, ਤਤੋ ਸੁਖੁਮਤਰਾ ਸੂਕਰਵਾਗੁਰਰਜ੍ਜੁਸਣ੍ਠਾਨਾ, ਤਤੋ ਅਣੁਕਤਰਾ ਪੂਤਿਲਤਾਸਣ੍ਠਾਨਾ, ਤਤੋ ਅਣੁਕਤਰਾ ਸੀਹਲ਼ਮਹਾਵੀਣਾਤਨ੍ਤਿਸਣ੍ਠਾਨਾ, ਤਤੋ ਅਣੁਕਤਰਾ ਥੂਲਸੁਤ੍ਤਕਸਣ੍ਠਾਨਾ, ਹਤ੍ਥਪਿਟ੍ਠਿਪਾਦਪਿਟ੍ਠੀਸੁ ਨ੍ਹਾਰੂ ਸਕੁਣਪਾਦਸਣ੍ਠਾਨਾ, ਸੀਸੇ ਨ੍ਹਾਰੂ ਗਾਮਦਾਰਕਾਨਂ ਸੀਸੇ ਠਪਿਤਵਿਰਲ਼ਤਰਦੁਕੂਲਸਣ੍ਠਾਨਾ, ਪਿਟ੍ਠਿਯਾ ਨ੍ਹਾਰੂ ਤੇਮੇਤ੍ਵਾ ਆਤਪੇ ਪਸਾਰਿਤਮਚ੍ਛਜਾਲਸਣ੍ਠਾਨਾ, ਅਵਸੇਸਾ ਇਮਸ੍ਮਿਂ ਸਰੀਰੇ ਤਂਤਂਅਙ੍ਗਪਚ੍ਚਙ੍ਗਾਨੁਗਤਾ ਨ੍ਹਾਰੂ ਸਰੀਰੇ ਪਟਿਮੁਕ੍ਕਜਾਲਕਞ੍ਚੁਕਸਣ੍ਠਾਨਾਤਿ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤਾ. ਤੇਸੁ ਚ ਦਕ੍ਖਿਣਕਣ੍ਣਚੂਲ਼ਿਕਤੋ ਪਟ੍ਠਾਯ ਪਞ੍ਚ ਕਣ੍ਡਰਨਾਮਕਾ ਮਹਾਨ੍ਹਾਰੂ ਪੁਰਤੋ ਚ ਪਚ੍ਛਤੋ ਚ ਵਿਨਨ੍ਧਮਾਨਾ ਵਾਮਪਸ੍ਸਂ ਗਤਾ, ਵਾਮਕਣ੍ਣਚੂਲ਼ਿਕਤੋ ਪਟ੍ਠਾਯ ਪਞ੍ਚ ਪੁਰਤੋ ਚ ਪਚ੍ਛਤੋ ਚ ਵਿਨਨ੍ਧਮਾਨਾ ਦਕ੍ਖਿਣਪਸ੍ਸਂ ਗਤਾ, ਦਕ੍ਖਿਣਗਲਵਾਟਕਤੋ ਪਟ੍ਠਾਯ ਪਞ੍ਚ ਪੁਰਤੋ ਚ ਪਚ੍ਛਤੋ ਚ ਵਿਨਨ੍ਧਮਾਨਾ ਵਾਮਪਸ੍ਸਂ ਗਤਾ, ਵਾਮਗਲਵਾਟਕਤੋ ਪਟ੍ਠਾਯ ਪਞ੍ਚ ਪੁਰਤੋ ਚ ਪਚ੍ਛਤੋ ਚ ਵਿਨਨ੍ਧਮਾਨਾ ਦਕ੍ਖਿਣਪਸ੍ਸਂ ਗਤਾ, ਦਕ੍ਖਿਣਹਤ੍ਥਂ ਵਿਨਨ੍ਧਮਾਨਾ ਪੁਰਤੋ ਚ ਪਚ੍ਛਤੋ ਚ ਪਞ੍ਚ ਪਞ੍ਚਾਤਿ ਦਸ ਕਣ੍ਡਰਨਾਮਕਾ ਏਵ ਮਹਾਨ੍ਹਾਰੂ ਆਰੁਲ਼੍ਹਾ. ਤਥਾ ਵਾਮਹਤ੍ਥਂ, ਦਕ੍ਖਿਣਪਾਦਂ, ਵਾਮਪਾਦਞ੍ਚਾਤਿ ਏਵਮੇਤੇ ਸਟ੍ਠਿ ਮਹਾਨ੍ਹਾਰੂ ਸਰੀਰਧਾਰਕਾ ਸਰੀਰਨਿਯਾਮਕਾਤਿਪਿ ਵਵਤ੍ਥਪੇਤਿ. ਓਕਾਸਤੋ ਸਕਲਸਰੀਰੇ ਅਟ੍ਠਿਚਮ੍ਮਾਨਂ ਅਟ੍ਠਿਮਂਸਾਨਞ੍ਚ ਅਨ੍ਤਰੇ ਅਟ੍ਠੀਨਿ ਆਬਨ੍ਧਮਾਨਾ ਠਿਤਾਤਿ.

ਤਤ੍ਥ ਯਥਾ ਵਲ੍ਲਿਸਨ੍ਤਾਨਬਦ੍ਧੇਸੁ ਕੁਟ੍ਟਦਾਰੂਸੁ ਨ ਵਲ੍ਲਿਸਨ੍ਤਾਨਾ ਜਾਨਨ੍ਤਿ ‘‘ਅਮ੍ਹੇਹਿ ਕੁਟ੍ਟਦਾਰੂਨਿ ਆਬਦ੍ਧਾਨੀ’’ਤਿ, ਨਪਿ ਕੁਟ੍ਟਦਾਰੂਨਿ ਜਾਨਨ੍ਤਿ ‘‘ਮਯਂ ਵਲ੍ਲਿਸਨ੍ਤਾਨੇਹਿ ਆਬਦ੍ਧਾਨੀ’’ਤਿ; ਏਵਮੇਵ ਨ ਨ੍ਹਾਰੂ ਜਾਨਨ੍ਤਿ ‘‘ਅਮ੍ਹੇਹਿ ਤੀਣਿ ਅਟ੍ਠਿਸਤਾਨਿ ਆਬਦ੍ਧਾਨੀ’’ਤਿ, ਨਪਿ ਤੀਣਿ ਅਟ੍ਠਿਸਤਾਨਿ ਜਾਨਨ੍ਤਿ ‘‘ਮਯਂ ਨ੍ਹਾਰੂਹਿ ਆਬਦ੍ਧਾਨੀ’’ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਕੇਵਲਂ ਤੁ –

‘‘ਨਵਨ੍ਹਾਰੁਸਤਾ ਹੋਨ੍ਤਿ, ਬ੍ਯਾਮਮਤ੍ਤੇ ਕਲ਼ੇਵਰੇ;

ਬਨ੍ਧਨ੍ਤਿ ਅਟ੍ਠਿਸਙ੍ਘਾਟਂ, ਅਗਾਰਮਿਵ ਵਲ੍ਲਿਯੋ’’ਤਿ.

ਪਰਿਚ੍ਛੇਦਤੋ ਹੇਟ੍ਠਾ ਤੀਹਿ ਅਟ੍ਠਿਸਤੇਹਿ ਤਤ੍ਥ ਪਤਿਟ੍ਠਿਤਤਲੇਹਿ ਵਾ ਉਪਰਿ ਤਚਮਂਸੇਹਿ ਤਿਰਿਯਂ ਅਞ੍ਞਮਞ੍ਞੇਨ ਪਰਿਚ੍ਛਿਨ੍ਨਾਤਿ ਵਵਤ੍ਥਪੇਤਿ. ਅਯਮੇਤੇਸਂ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਨ੍ਹਾਰੂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਦ੍ਵਤ੍ਤਿਂਸਦਨ੍ਤਟ੍ਠਿਕਾਨਂ ਵਿਸੁਂ ਗਹਿਤਤ੍ਤਾ ਸੇਸਾਨਿ ਚਤੁਸਟ੍ਠਿ ਹਤ੍ਥਟ੍ਠਿਕਾਨਿ ਚਤੁਸਟ੍ਠਿ ਪਾਦਟ੍ਠਿਕਾਨਿ ਚਤੁਸਟ੍ਠਿ ਮੁਦੁਕਟ੍ਠਿਕਾਨਿ ਮਂਸਨਿਸ੍ਸਿਤਾਨਿ ਦ੍ਵੇ ਪਣ੍ਹਿਕਟ੍ਠੀਨਿ ਏਕੇਕਸ੍ਮਿਂ ਪਾਦੇ ਦ੍ਵੇ ਦ੍ਵੇ ਗੋਪ੍ਫਕਟ੍ਠਿਕਾਨਿ ਦ੍ਵੇ ਜਙ੍ਘਟ੍ਠਿਕਾਨਿ ਏਕਂ ਜਣ੍ਣੁਕਟ੍ਠਿ ਏਕਂ ਊਰੁਟ੍ਠਿ ਦ੍ਵੇ ਕਟਿਟ੍ਠੀਨਿ ਅਟ੍ਠਾਰਸ ਪਿਟ੍ਠਿਕਣ੍ਟਕਟ੍ਠੀਨਿ ਚਤੁਵੀਸਤਿ ਫਾਸੁਕਟ੍ਠੀਨਿ ਚੁਦ੍ਦਸ ਉਰਟ੍ਠੀਨਿ ਏਕਂ ਹਦਯਟ੍ਠਿ ਦ੍ਵੇ ਅਕ੍ਖਕਟ੍ਠੀਨਿ ਦ੍ਵੇ ਪਿਟ੍ਠਿਬਾਹਟ੍ਠੀਨਿ ਦ੍ਵੇ ਬਾਹਟ੍ਠੀਨਿ ਦ੍ਵੇ ਦ੍ਵੇ ਅਗ੍ਗਬਾਹਟ੍ਠੀਨਿ ਸਤ੍ਤ ਗੀਵਟ੍ਠੀਨਿ ਦ੍ਵੇ ਹਨੁਕਟ੍ਠੀਨਿ ਏਕਂ ਨਾਸਿਕਟ੍ਠਿ ਦ੍ਵੇ ਅਕ੍ਖਿਟ੍ਠੀਨਿ ਦ੍ਵੇ ਕਣ੍ਣਟ੍ਠੀਨਿ ਏਕਂ ਨਲਾਟਟ੍ਠਿ ਏਕਂ ਮੁਦ੍ਧਟ੍ਠਿ ਨਵ ਸੀਸਕਪਾਲਟ੍ਠੀਨੀਤਿ ਏਵਮਾਦਿਨਾ ਨਯੇਨ ਵੁਤ੍ਤਪ੍ਪਭੇਦਾਨਿ ਅਟ੍ਠੀਨਿ ਸਬ੍ਬਾਨੇਵ ਵਣ੍ਣਤੋ ਸੇਤਾਨੀਤਿ ਵਵਤ੍ਥਪੇਤਿ.

ਸਣ੍ਠਾਨਤੋ ਨਾਨਾਸਣ੍ਠਾਨਾਨਿ. ਤਥਾ ਹਿ ਤਤ੍ਥ ਅਗ੍ਗਪਾਦਙ੍ਗੁਲਿਯਟ੍ਠੀਨਿ ਕਤਕਬੀਜਸਣ੍ਠਾਨਾਨਿ, ਤਦਨਨ੍ਤਰਾਨਿ ਅਙ੍ਗੁਲੀਨਂ ਮਜ੍ਝਪਬ੍ਬਟ੍ਠੀਨਿ ਅਪਰਿਪੁਣ੍ਣਪਨਸਟ੍ਠਿਸਣ੍ਠਾਨਾਨਿ, ਮੂਲਪਬ੍ਬਟ੍ਠੀਨਿ ਪਣਵਸਣ੍ਠਾਨਾਨਿ, ਮੋਰਸਕਲਿਸਣ੍ਠਾਨਾਨੀਤਿਪਿ ਏਕੇ. ਪਿਟ੍ਠਿਪਾਦਟ੍ਠੀਨਿ ਕੋਟ੍ਟਿਤਕਨ੍ਦਲਕਨ੍ਦਰਾਸਿਸਣ੍ਠਾਨਾਨਿ ਪਣ੍ਹਿਕਟ੍ਠੀਨਿ ਏਕਟ੍ਠਿਤਾਲਫਲਬੀਜਸਣ੍ਠਾਨਾਨਿ, ਗੋਪ੍ਫਕਟ੍ਠੀਨਿ ਏਕਤੋਬਦ੍ਧਕੀਲ਼ਾਗੋਲ਼ਕਸਣ੍ਠਾਨਾਨਿ, ਜਙ੍ਘਟ੍ਠਿਕੇਸੁ ਖੁਦ੍ਦਕਂ ਧਨੁਦਣ੍ਡਸਣ੍ਠਾਨਂ, ਮਹਨ੍ਤਂ ਖੁਪ੍ਪਿਪਾਸਾਮਿਲਾਤਧਮਨਿਪਿਟ੍ਠਿਸਣ੍ਠਾਨਂ, ਜਙ੍ਘਟ੍ਠਿਕਸ੍ਸ ਗੋਪ੍ਫਕਟ੍ਠਿਕੇਸੁ ਪਤਿਟ੍ਠਿਤਟ੍ਠਾਨਂ ਅਪਨੀਤਤਚਖਜ੍ਜੂਰੀਕਲ਼ੀਰਸਣ੍ਠਾਨਂ, ਜਙ੍ਘਟ੍ਠਿਕਸ੍ਸ ਜਣ੍ਣੁਕਟ੍ਠਿਕੇ ਪਤਿਟ੍ਠਿਤਟ੍ਠਾਨਂ ਮੁਦਿਙ੍ਗਮਤ੍ਥਕਸਣ੍ਠਾਨਂ ਜਣ੍ਣੁਕਟ੍ਠਿ ਏਕਪਸ੍ਸਤੋ ਘਟ੍ਟਿਤਫੇਣਸਣ੍ਠਾਨਂ, ਊਰੁਟ੍ਠੀਨਿ ਦੁਤ੍ਤਚ੍ਛਿਤਵਾਸਿਫਰਸੁਦਣ੍ਡਸਣ੍ਠਾਨਾਨਿ, ਊਰੁਟ੍ਠਿਕਸ੍ਸ ਕਟਟ੍ਠਿਕੇ ਪਤਿਟ੍ਠਿਤਟ੍ਠਾਨਂ ਸੁਵਣ੍ਣਕਾਰਾਨਂ ਅਗ੍ਗਿਜਾਲਨਕਸਲਾਕਾਬੁਨ੍ਦਿਸਣ੍ਠਾਨਂ, ਤਪ੍ਪਤਿਟ੍ਠਿਤੋਕਾਸੋ ਅਗ੍ਗਚ੍ਛਿਨ੍ਨਪੁਨ੍ਨਾਗਫਲਸਣ੍ਠਾਨੋ, ਕਟਿਟ੍ਠੀਨਿ ਦ੍ਵੇਪਿ ਏਕਾਬਦ੍ਧਾਨਿ ਹੁਤ੍ਵਾ ਕੁਮ੍ਭਕਾਰੇਹਿ ਕਤਚੁਲ੍ਲਿਸਣ੍ਠਾਨਾਨਿ, ਤਾਪਸਭਿਸਿਕਾਸਣ੍ਠਾਨਾਨੀਤਿਪਿ ਏਕੇ. ਆਨਿਸਦਟ੍ਠੀਨਿ ਹੇਟ੍ਠਾਮੁਖਠਪਿਤਸਪ੍ਪਫਣਸਣ੍ਠਾਨਾਨਿ, ਸਤ੍ਤਟ੍ਠਟ੍ਠਾਨੇਸੁ ਛਿਦ੍ਦਾਵਛਿਦ੍ਦਾਨਿ ਅਟ੍ਠਾਰਸ ਪਿਟ੍ਠਿਕਣ੍ਟਕਟ੍ਠੀਨਿ ਅਬ੍ਭਨ੍ਤਰਤੋ ਉਪਰੂਪਰਿ ਠਪਿਤਸੀਸਕਪਟ੍ਟਵੇਠਕਸਣ੍ਠਾਨਾਨਿ, ਬਾਹਿਰਤੋ ਵਟ੍ਟਨਾਵਲਿਸਣ੍ਠਾਨਾਨਿ, ਤੇਸਂ ਅਨ੍ਤਰਨ੍ਤਰਾ ਕਕਚਦਨ੍ਤਸਦਿਸਾਨਿ ਦ੍ਵੇ ਤੀਣਿ ਕਣ੍ਟਕਾਨਿ ਹੋਨ੍ਤਿ, ਚਤੁਵੀਸਤਿਯਾ ਫਾਸੁਕਟ੍ਠੀਸੁ ਪਰਿਪੁਣ੍ਣਾਨਿ ਪਰਿਪੁਣ੍ਣਸੀਹਲ਼ਦਾਤ੍ਤਸਣ੍ਠਾਨਾਨਿ, ਅਪਰਿਪੁਣ੍ਣਾਨਿ ਅਪਰਿਪੁਣ੍ਣਸੀਹਲ਼ਦਾਤ੍ਤਸਣ੍ਠਾਨਾਨਿ, ਸਬ੍ਬਾਨੇਵ ਓਦਾਤਕੁਕ੍ਕੁਟਸ੍ਸ ਪਸਾਰਿਤਪਕ੍ਖਦ੍ਵਯਸਣ੍ਠਾਨਾਨੀਤਿਪਿ ਏਕੇ. ਚੁਦ੍ਦਸ ਉਰਟ੍ਠੀਨਿ ਜਿਣ੍ਣਸਨ੍ਦਮਾਨਿਕਫਲਕਪਨ੍ਤਿਸਣ੍ਠਾਨਾਨਿ, ਹਦਯਟ੍ਠਿ ਦਬ੍ਬਿਫਣਸਣ੍ਠਾਨਂ, ਅਕ੍ਖਕਟ੍ਠੀਨਿ ਖੁਦ੍ਦਕਲੋਹਵਾਸਿਦਣ੍ਡਸਣ੍ਠਾਨਾਨਿ, ਤੇਸਂ ਹੇਟ੍ਠਾ ਅਟ੍ਠਿ ਅਦ੍ਧਚਨ੍ਦਸਣ੍ਠਾਨਂ, ਪਿਟ੍ਠਿਬਾਹਟ੍ਠੀਨਿ ਫਰਸੁਫਣਸਣ੍ਠਾਨਾਨਿ, ਉਪਡ੍ਢਚ੍ਛਿਨ੍ਨਸੀਹਲ਼ਕੁਦਾਲਸਣ੍ਠਾਨਾਨੀਤਿਪਿ ਏਕੇ. ਬਾਹਟ੍ਠੀਨਿ ਆਦਾਸਦਣ੍ਡਸਣ੍ਠਾਨਾਨਿ, ਮਹਾਵਾਸਿਦਣ੍ਡਸਣ੍ਠਾਨਾਨੀਤਿਪਿ ਏਕੇ. ਅਗ੍ਗਬਾਹਟ੍ਠੀਨਿ ਯਮਕਤਾਲਕਨ੍ਦਸਣ੍ਠਾਨਾਨਿ, ਮਣਿਬਨ੍ਧਟ੍ਠੀਨਿ ਏਕਤੋ ਅਲ੍ਲਿਯਾਪੇਤ੍ਵਾ ਠਪਿਤਸੀਸਕਪਟ੍ਟਵੇਠਕਸਣ੍ਠਾਨਾਨਿ, ਪਿਟ੍ਠਿਹਤ੍ਥਟ੍ਠੀਨਿ ਕੋਟ੍ਟਿਤਕਨ੍ਦਲਕਨ੍ਦਰਾਸਿਸਣ੍ਠਾਨਾਨਿ, ਹਤ੍ਥਙ੍ਗੁਲਿਮੂਲਪਬ੍ਬਟ੍ਠੀਨਿ ਪਣਵਸਣ੍ਠਾਨਾਨਿ, ਮਜ੍ਝਪਬ੍ਬਟ੍ਠੀਨਿ ਅਪਰਿਪੁਣ੍ਣਪਨਸਟ੍ਠਿਸਣ੍ਠਾਨਾਨਿ, ਅਗ੍ਗਪਬ੍ਬਟ੍ਠੀਨਿ ਕਤਕਬੀਜਸਣ੍ਠਾਨਾਨਿ, ਸਤ੍ਤ ਗੀਵਟ੍ਠੀਨਿ ਦਣ੍ਡੇ ਵਿਜ੍ਝਿਤ੍ਵਾ ਪਟਿਪਾਟਿਯਾ ਠਪਿਤਵਂਸਕਲ਼ੀਰਖਣ੍ਡਸਣ੍ਠਾਨਾਨਿ, ਹੇਟ੍ਠਿਮਹਨੁਕਟ੍ਠਿ ਕਮ੍ਮਾਰਾਨਂ ਅਯੋਕੂਟਯੋਤ੍ਤਕਸਣ੍ਠਾਨਂ, ਉਪਰਿਮਹਨੁਕਟ੍ਠਿ ਅਵਲੇਖਨਸਤ੍ਥਕਸਣ੍ਠਾਨਂ, ਅਕ੍ਖਿਨਾਸਕੂਪਟ੍ਠੀਨਿ ਅਪਨੀਤਮਿਞ੍ਜਤਰੁਣਤਾਲਟ੍ਠਿਸਣ੍ਠਾਨਾਨਿ, ਨਲਾਟਟ੍ਠਿ ਅਧੋਮੁਖਠਪਿਤਭਿਨ੍ਨਸਙ੍ਖਕਪਾਲਸਣ੍ਠਾਨਂ, ਕਣ੍ਣਚੂਲ਼ਿਕਟ੍ਠੀਨਿ ਨ੍ਹਾਪਿਤਖੁਰਕੋਸਸਣ੍ਠਾਨਾਨਿ, ਨਲਾਟਕਣ੍ਣਚੂਲ਼ਿਕਾਨਂ ਉਪਰਿ ਪਟ੍ਟਬਨ੍ਧਨੋਕਾਸੇ ਅਟ੍ਠਿਬਹਲਘਟਪੁਣ੍ਣਪਟਪਿਲੋਤਿਕਖਣ੍ਡਸਣ੍ਠਾਨਂ, ਮੁਦ੍ਧਨਟ੍ਠਿ ਮੁਖਚ੍ਛਿਨ੍ਨਵਙ੍ਕਨਾਲ਼ਿਕੇਰਸਣ੍ਠਾਨਂ, ਸੀਸਟ੍ਠੀਨਿ ਸਿਬ੍ਬੇਤ੍ਵਾ ਠਪਿਤਜਜ੍ਜਰਾਲਾਬੁਕਟਾਹਸਣ੍ਠਾਨਾਨੀਤਿ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤਾਨਿ.

ਓਕਾਸਤੋ ਅਵਿਸੇਸੇਨ ਸਕਲਸਰੀਰੇ ਠਿਤਾਨਿ, ਵਿਸੇਸੇਨ ਤੁ ਸੀਸਟ੍ਠੀਨਿ ਗੀਵਟ੍ਠਿਕੇਸੁ ਪਤਿਟ੍ਠਿਤਾਨਿ, ਗੀਵਟ੍ਠੀਨਿ ਪਿਟ੍ਠਿਕਣ੍ਟਕਟ੍ਠੀਸੁ ਪਤਿਟ੍ਠਿਤਾਨਿ, ਪਿਟ੍ਠਿਕਣ੍ਟਕਟ੍ਠੀਨਿ ਕਟਿਟ੍ਠੀਸੁ ਪਤਿਟ੍ਠਿਤਾਨਿ, ਕਟਿਟ੍ਠੀਨਿ ਊਰੁਟ੍ਠਿਕੇਸੁ ਪਤਿਟ੍ਠਿਤਾਨਿ, ਉਰੁਟ੍ਠੀਨਿ ਜਣ੍ਣੁਕਟ੍ਠਿਕੇਸੁ, ਜਣ੍ਣੁਕਟ੍ਠੀਨਿ ਜਙ੍ਘਟ੍ਠਿਕੇਸੁ, ਜਙ੍ਘਟ੍ਠੀਨਿ ਗੋਪ੍ਫਕਟ੍ਠਿਕੇਸੁ, ਗੋਪ੍ਫਕਟ੍ਠੀਨਿ ਪਿਟ੍ਠਿਪਾਦਟ੍ਠਿਕੇਸੁ ਪਤਿਟ੍ਠਿਤਾਨਿ, ਪਿਟ੍ਠਿਪਾਦਟ੍ਠਿਕਾਨਿ ਚ ਗੋਪ੍ਫਕਟ੍ਠੀਨਿ ਉਕ੍ਖਿਪਿਤ੍ਵਾ ਠਿਤਾਨਿ, ਗੋਪ੍ਫਕਟ੍ਠੀਨਿ ਜਙ੍ਘਟ੍ਠੀਨਿ…ਪੇ… ਗੀਵਟ੍ਠੀਨਿ ਸੀਸਟ੍ਠੀਨਿ ਉਕ੍ਖਿਪਿਤ੍ਵਾ ਠਿਤਾਨੀਤਿ ਏਤੇਨਾਨੁਸਾਰੇਨ ਅਵਸੇਸਾਨਿਪਿ ਅਟ੍ਠੀਨਿ ਵੇਦਿਤਬ੍ਬਾਨਿ.

ਤਤ੍ਥ ਯਥਾ ਇਟ੍ਠਕਗੋਪਾਨਸਿਚਯਾਦੀਸੁ ਨ ਉਪਰਿਮਾ ਇਟ੍ਠਕਾਦਯੋ ਜਾਨਨ੍ਤਿ ‘‘ਮਯਂ ਹੇਟ੍ਠਿਮੇਸੁ ਪਤਿਟ੍ਠਿਤਾ’’ਤਿ, ਨਪਿ ਹੇਟ੍ਠਿਮਾ ਜਾਨਨ੍ਤਿ ‘‘ਮਯਂ ਉਪਰਿਮਾਨਿ ਉਕ੍ਖਿਪਿਤ੍ਵਾ ਠਿਤਾ’’ਤਿ; ਏਵਮੇਵ ਨ ਸੀਸਟ੍ਠਿਕਾਨਿ ਜਾਨਨ੍ਤਿ ‘‘ਮਯਂ ਗੀਵਟ੍ਠਿਕੇਸੁ ਪਤਿਟ੍ਠਿਤਾਨੀ’’ਤਿ…ਪੇ… ਨ ਗੋਪ੍ਫਕਟ੍ਠਿਕਾਨਿ ਜਾਨਨ੍ਤਿ ‘‘ਮਯਂ ਪਿਟ੍ਠਿਪਾਦਟ੍ਠਿਕੇਸੁ ਪਤਿਟ੍ਠਿਤਾਨੀ’’ਤਿ, ਨਪਿ ਪਿਟ੍ਠਿਪਾਦਟ੍ਠਿਕਾਨਿ ਜਾਨਨ੍ਤਿ ‘‘ਮਯਂ ਗੋਪ੍ਫਕਟ੍ਠੀਨਿ ਉਕ੍ਖਿਪਿਤ੍ਵਾ ਠਿਤਾਨੀ’’ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਕੇਵਲਂ ਤੁ ਇਮਾਨਿ ਸਾਧਿਕਾਨਿ ਤੀਣਿ ਅਟ੍ਠਿਸਤਾਨਿ ਨਵਹਿ ਨ੍ਹਾਰੁਸਤੇਹਿ ਨਵਹਿ ਚ ਮਂਸਪੇਸਿਸਤੇਹਿ ਆਬਦ੍ਧਾਨੁਲਿਤ੍ਤਾਨਿ, ਏਕਘਨਚਮ੍ਮਪਰਿਯੋਨਦ੍ਧਾਨਿ, ਸਤ੍ਤਰਸਹਰਣੀਸਹਸ੍ਸਾਨੁਗਤਸਿਨੇਹਸਿਨੇਹਿਤਾਨਿ, ਨਵਨਵੁਤਿਲੋਮਕੂਪਸਹਸ੍ਸਪਰਿਸ੍ਸਵਮਾਨਸੇਦਜਲ੍ਲਿਕਾਨਿ ਅਸੀਤਿਕਿਮਿਕੁਲਾਨਿ, ਕਾਯੋਤ੍ਵੇਵ ਸਙ੍ਖ੍ਯਂ ਗਤਾਨਿ, ਯਂ ਸਭਾਵਤੋ ਉਪਪਰਿਕ੍ਖਨ੍ਤੋ ਯੋਗਾਵਚਰੋ ਨ ਕਿਞ੍ਚਿ ਗਯ੍ਹੂਪਗਂ ਪਸ੍ਸਤਿ, ਕੇਵਲਂ ਤੁ ਨ੍ਹਾਰੁਸਮ੍ਬਨ੍ਧਂ ਨਾਨਾਕੁਣਪਸਙ੍ਕਿਣ੍ਣਂ ਅਟ੍ਠਿਸਙ੍ਘਾਟਮੇਵ ਪਸ੍ਸਤਿ. ਯਂ ਦਿਸ੍ਵਾ ਦਸਬਲਸ੍ਸ ਪੁਤ੍ਤਭਾਵਂ ਉਪੇਤਿ. ਯਥਾਹ –

‘‘ਪਟਿਪਾਟਿਯਟ੍ਠੀਨਿ ਠਿਤਾਨਿ ਕੋਟਿਯਾ,

ਅਨੇਕਸਨ੍ਧਿਯਮਿਤੋ ਨ ਕੇਹਿਚਿ;

ਬਦ੍ਧੋ ਨਹਾਰੂਹਿ ਜਰਾਯ ਚੋਦਿਤੋ,

ਅਚੇਤਨੋ ਕਟ੍ਠਕਲਿਙ੍ਗਰੂਪਮੋ.

‘‘ਕੁਣਪਂ ਕੁਣਪੇ ਜਾਤਂ, ਅਸੁਚਿਮ੍ਹਿ ਚ ਪੂਤਿਨਿ;

ਦੁਗ੍ਗਨ੍ਧੇ ਚਾਪਿ ਦੁਗ੍ਗਨ੍ਧਂ, ਭੇਦਨਮ੍ਹਿ ਚ ਵਯਧਮ੍ਮਂ.

‘‘ਅਟ੍ਠਿਪੁਟੇ ਅਟ੍ਠਿਪੁਟੋ, ਨਿਬ੍ਬਤ੍ਤੋ ਪੂਤਿਨਿ ਪੂਤਿਕਾਯਮ੍ਹਿ;

ਤਮ੍ਹਿ ਚ ਵਿਨੇਥ ਛਨ੍ਦਂ, ਹੇਸ੍ਸਥ ਪੁਤ੍ਤਾ ਦਸਬਲਸ੍ਸਾ’’ਤਿ ਚ.

ਪਰਿਚ੍ਛੇਦਤੋ ਅਨ੍ਤੋ ਅਟ੍ਠਿਮਿਞ੍ਜੇਨ ਉਪਰਿਤੋ ਮਂਸੇਨ ਅਗ੍ਗੇ ਮੂਲੇ ਚ ਅਞ੍ਞਮਞ੍ਞੇਨ ਪਰਿਚ੍ਛਿਨ੍ਨਾਨੀਤਿ ਵਵਤ੍ਥਪੇਤਿ. ਅਯਮੇਤੇਸਂ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਅਟ੍ਠੀਨਿ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਯਥਾਵੁਤ੍ਤਪ੍ਪਭੇਦਾਨਂ ਅਟ੍ਠੀਨਂ ਅਬ੍ਭਨ੍ਤਰਗਤਂ ਅਟ੍ਠਿਮਿਞ੍ਜਂ ਵਣ੍ਣਤੋ ਸੇਤਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਅਤ੍ਤਨੋ ਓਕਾਸਸਣ੍ਠਾਨਨ੍ਤਿ. ਸੇਯ੍ਯਥਿਦਂ – ਮਹਨ੍ਤਮਹਨ੍ਤਾਨਂ ਅਟ੍ਠੀਨਂ ਅਬ੍ਭਨ੍ਤਰਗਤਂ ਸੇਦੇਤ੍ਵਾ ਵਟ੍ਟੇਤ੍ਵਾ ਮਹਨ੍ਤੇਸੁ ਵਂਸਨਲ਼ਕਪਬ੍ਬੇਸੁ ਪਕ੍ਖਿਤ੍ਤਮਹਾਵੇਤ੍ਤਙ੍ਕੁਰਸਣ੍ਠਾਨਂ, ਖੁਦ੍ਦਾਨੁਖੁਦ੍ਦਕਾਨਂ ਅਬ੍ਭਨ੍ਤਰਗਤਂ ਸੇਦੇਤ੍ਵਾ ਵਟ੍ਟੇਤ੍ਵਾ ਖੁਦ੍ਦਾਨੁਖੁਦ੍ਦਕੇਸੁ ਵਂਸਨਲ਼ਕਪਬ੍ਬੇਸੁ ਪਕ੍ਖਿਤ੍ਤਤਨੁਵੇਤ੍ਤਙ੍ਕੁਰਸਣ੍ਠਾਨਨ੍ਤਿ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤਂ. ਓਕਾਸਤੋ ਅਟ੍ਠੀਨਂ ਅਬ੍ਭਨ੍ਤਰੇ ਪਤਿਟ੍ਠਿਤਨ੍ਤਿ.

ਤਤ੍ਥ ਯਥਾ ਵੇਲ਼ੁਨਲ਼ਕਾਦੀਨਂ ਅਨ੍ਤੋਗਤਾਨਿ ਦਧਿਫਾਣਿਤਾਨਿ ਨ ਜਾਨਨ੍ਤਿ ‘‘ਮਯਂ ਵੇਲ਼ੁਨਲ਼ਕਾਦੀਨਂ ਅਨ੍ਤੋਗਤਾਨੀ’’ਤਿ, ਨਪਿ ਵੇਲ਼ੁਨਲ਼ਕਾਦਯੋ ਜਾਨਨ੍ਤਿ ‘‘ਦਧਿਫਾਣਿਤਾਨਿ ਅਮ੍ਹਾਕਂ ਅਨ੍ਤੋਗਤਾਨੀ’’ਤਿ; ਏਵਮੇਵ ਨ ਅਟ੍ਠਿਮਿਞ੍ਜਂ ਜਾਨਾਤਿ ‘‘ਅਹਂ ਅਟ੍ਠੀਨਂ ਅਨ੍ਤੋਗਤ’’ਨ੍ਤਿ, ਨਪਿ ਅਟ੍ਠੀਨਿ ਜਾਨਨ੍ਤਿ ‘‘ਅਟ੍ਠਿਮਿਞ੍ਜਂ ਅਮ੍ਹਾਕਂ ਅਨ੍ਤੋਗਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਅਟ੍ਠੀਨਂ ਅਬ੍ਭਨ੍ਤਰਤਲੇਹਿ ਅਟ੍ਠਿਮਿਞ੍ਜਭਾਗੇਨ ਚ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਅਟ੍ਠਿਮਿਞ੍ਜਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰਸ੍ਸ ਅਬ੍ਭਨ੍ਤਰੇ ਦ੍ਵਿਗੋਲ਼ਕਪ੍ਪਭੇਦਂ ਵਕ੍ਕਂ ਵਣ੍ਣਤੋ ਮਨ੍ਦਰਤ੍ਤਂ ਪਾਲ਼ਿਭਦ੍ਦਕਟ੍ਠਿਵਣ੍ਣਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਗਾਮਦਾਰਕਾਨਂ ਸੁਤ੍ਤਾਵੁਤਕੀਲ਼ਾਗੋਲ਼ਕਸਣ੍ਠਾਨਂ, ਏਕਵਣ੍ਟਸਹਕਾਰਦ੍ਵਯਸਣ੍ਠਾਨਨ੍ਤਿਪਿ ਏਕੇ. ਦਿਸਤੋ ਉਪਰਿਮਾਯ ਦਿਸਾਯ ਜਾਤਂ. ਓਕਾਸਤੋ ਗਲਵਾਟਕਾ ਵਿਨਿਕ੍ਖਨ੍ਤੇਨ ਏਕਮੂਲੇਨ ਥੋਕਂ ਗਨ੍ਤ੍ਵਾ ਦ੍ਵਿਧਾ ਭਿਨ੍ਨੇਨ ਥੂਲਨ੍ਹਾਰੁਨਾ ਵਿਨਿਬਦ੍ਧਂ ਹੁਤ੍ਵਾ ਹਦਯਮਂਸਂ ਪਰਿਕ੍ਖਿਪਿਤ੍ਵਾ ਠਿਤਨ੍ਤਿ.

ਤਤ੍ਥ ਯਥਾ ਵਣ੍ਟੂਪਨਿਬਦ੍ਧਂ ਸਹਕਾਰਦ੍ਵਯਂ ਨ ਜਾਨਾਤਿ ‘‘ਅਹਂ ਵਣ੍ਟੇਨ ਉਪਨਿਬਦ੍ਧ’’ਨ੍ਤਿ, ਨਪਿ ਵਣ੍ਟਂ ਜਾਨਾਤਿ ‘‘ਮਯਾ ਸਹਕਾਰਦ੍ਵਯਂ ਉਪਨਿਬਦ੍ਧ’’ਨ੍ਤਿ; ਏਵਮੇਵ ਨ ਵਕ੍ਕਂ ਜਾਨਾਤਿ ‘‘ਅਹਂ ਥੂਲਨ੍ਹਾਰੁਨਾ ਉਪਨਿਬਦ੍ਧ’’ਨ੍ਤਿ, ਨਪਿ ਥੂਲਨ੍ਹਾਰੁ ਜਾਨਾਤਿ ‘‘ਮਯਾ ਵਕ੍ਕਂ ਉਪਨਿਬਦ੍ਧ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਵਕ੍ਕਂ ਵਕ੍ਕਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਵਕ੍ਕਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰਸ੍ਸ ਅਬ੍ਭਨ੍ਤਰੇ ਹਦਯਂ ਵਣ੍ਣਤੋ ਰਤ੍ਤਂ ਰਤ੍ਤਪਦੁਮਪਤ੍ਤਪਿਟ੍ਠਿਵਣ੍ਣਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਬਾਹਿਰਪਤ੍ਤਾਨਿ ਅਪਨੇਤ੍ਵਾ ਅਧੋਮੁਖਠਪਿਤਪਦੁਮਮਕੁਲ਼ਸਣ੍ਠਾਨਂ, ਤਞ੍ਚ ਅਗ੍ਗਚ੍ਛਿਨ੍ਨਪੁਨ੍ਨਾਗਫਲਮਿਵ ਵਿਵਟੇਕਪਸ੍ਸਂ ਬਹਿ ਮਟ੍ਠਂ ਅਨ੍ਤੋ ਕੋਸਾਤਕੀਫਲਸ੍ਸ ਅਬ੍ਭਨ੍ਤਰਸਦਿਸਂ. ਪਞ੍ਞਾਬਹੁਲਾਨਂ ਥੋਕਂ ਵਿਕਸਿਤਂ, ਮਨ੍ਦਪਞ੍ਞਾਨਂ ਮਕੁਲ਼ਿਤਮੇਵ. ਯਂ ਰੂਪਂ ਨਿਸ੍ਸਾਯ ਮਨੋਧਾਤੁ ਚ ਮਨੋਵਿਞ੍ਞਾਣਧਾਤੁ ਚ ਪਵਤ੍ਤਨ੍ਤਿ, ਤਂ ਅਪਨੇਤ੍ਵਾ ਅਵਸੇਸਮਂਸਪਿਣ੍ਡਸਙ੍ਖਾਤਹਦਯਬ੍ਭਨ੍ਤਰੇ ਅਦ੍ਧਪਸਤਮਤ੍ਤਂ ਲੋਹਿਤਂ ਸਣ੍ਠਾਤਿ, ਤਂ ਰਾਗਚਰਿਤਸ੍ਸ ਰਤ੍ਤਂ, ਦੋਸਚਰਿਤਸ੍ਸ ਕਾਲ਼ਕਂ, ਮੋਹਚਰਿਤਸ੍ਸ ਮਂਸਧੋਵਨੋਦਕਸਦਿਸਂ, ਵਿਤਕ੍ਕਚਰਿਤਸ੍ਸ ਕੁਲਤ੍ਥਯੂਸਵਣ੍ਣਂ, ਸਦ੍ਧਾਚਰਿਤਸ੍ਸ ਕਣਿਕਾਰਪੁਪ੍ਫਵਣ੍ਣਂ, ਪਞ੍ਞਾਚਰਿਤਸ੍ਸ ਅਚ੍ਛਂ ਵਿਪ੍ਪਸਨ੍ਨਮਨਾਵਿਲਂ, ਨਿਦ੍ਧੋਤਜਾਤਿਮਣਿ ਵਿਯ ਜੁਤਿਮਨ੍ਤਂ ਖਾਯਤਿ. ਦਿਸਤੋ ਉਪਰਿਮਾਯ ਦਿਸਾਯ ਜਾਤਂ. ਓਕਾਸਤੋ ਸਰੀਰਬ੍ਭਨ੍ਤਰੇ ਦ੍ਵਿਨ੍ਨਂ ਥਨਾਨਂ ਮਜ੍ਝੇ ਪਤਿਟ੍ਠਿਤਨ੍ਤਿ.

ਤਤ੍ਥ ਯਥਾ ਦ੍ਵਿਨ੍ਨਂ ਵਾਤਪਾਨਕਵਾਟਕਾਨਂ ਮਜ੍ਝੇ ਠਿਤੋ ਅਗ੍ਗਲ਼ਤ੍ਥਮ੍ਭਕੋ ਨ ਜਾਨਾਤਿ ‘‘ਅਹਂ ਦ੍ਵਿਨ੍ਨਂ ਵਾਤਪਾਨਕਵਾਟਕਾਨਂ ਮਜ੍ਝੇ ਠਿਤੋ’’ਤਿ, ਨਪਿ ਵਾਤਪਾਨਕਵਾਟਕਾਨਿ ਜਾਨਨ੍ਤਿ ‘‘ਅਮ੍ਹਾਕਂ ਮਜ੍ਝੇ ਅਗ੍ਗਲ਼ਤ੍ਥਮ੍ਭਕੋ ਠਿਤੋ’’ਤਿ; ਏਵਮੇਵਂ ਨ ਹਦਯਂ ਜਾਨਾਤਿ ‘‘ਅਹਂ ਦ੍ਵਿਨ੍ਨਂ ਥਨਾਨਂ ਮਜ੍ਝੇ ਠਿਤ’’ਨ੍ਤਿ, ਨਪਿ ਥਨਾਨਿ ਜਾਨਨ੍ਤਿ ‘‘ਹਦਯਂ ਅਮ੍ਹਾਕਂ ਮਜ੍ਝੇ ਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਹਦਯਂ ਹਦਯਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਹਦਯਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰਸ੍ਸ ਅਬ੍ਭਨ੍ਤਰੇ ਯਕਨਸਞ੍ਞਿਤਂ ਯਮਕਮਂਸਪਿਣ੍ਡਂ ਵਣ੍ਣਤੋ ਰਤ੍ਤਂ ਰਤ੍ਤਕੁਮੁਦਬਾਹਿਰਪਤ੍ਤਪਿਟ੍ਠਿਵਣ੍ਣਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਏਕਮੂਲਂ ਹੁਤ੍ਵਾ ਅਗ੍ਗੇ ਯਮਕਂ ਕੋਵਿਲ਼ਾਰਪਤ੍ਤਸਣ੍ਠਾਨਂ, ਤਞ੍ਚ ਦਨ੍ਧਾਨਂ ਏਕਂਯੇਵ ਹੋਤਿ ਮਹਨ੍ਤਂ, ਪਞ੍ਞਵਨ੍ਤਾਨਂ ਦ੍ਵੇ ਵਾ ਤੀਣਿ ਵਾ ਖੁਦ੍ਦਕਾਨੀਤਿ. ਦਿਸਤੋ ਉਪਰਿਮਾਯ ਦਿਸਾਯ ਜਾਤਂ. ਓਕਾਸਤੋ ਦ੍ਵਿਨ੍ਨਂ ਥਨਾਨਂ ਅਬ੍ਭਨ੍ਤਰੇ ਦਕ੍ਖਿਣਪਸ੍ਸਂ ਨਿਸ੍ਸਾਯ ਠਿਤਨ੍ਤਿ.

ਤਤ੍ਥ ਯਥਾ ਪਿਠਰਕਪਸ੍ਸੇ ਲਗ੍ਗਾ ਮਂਸਪੇਸਿ ਨ ਜਾਨਾਤਿ ‘‘ਅਹਂ ਪਿਠਰਕਪਸ੍ਸੇ ਲਗ੍ਗਾ’’ਤਿ, ਨਪਿ ਪਿਠਰਕਪਸ੍ਸਂ ਜਾਨਾਤਿ ‘‘ਮਯਿ ਮਂਸਪੇਸਿ ਲਗ੍ਗਾ’’ਤਿ; ਏਵਮੇਵ ਨ ਯਕਨਂ ਜਾਨਾਤਿ ‘‘ਅਹਂ ਦ੍ਵਿਨ੍ਨਂ ਥਨਾਨਂ ਅਬ੍ਭਨ੍ਤਰੇ ਦਕ੍ਖਿਣਪਸ੍ਸਂ ਨਿਸ੍ਸਾਯ ਠਿਤ’’ਨ੍ਤਿ, ਨਪਿ ਥਨਾਨਂ ਅਬ੍ਭਨ੍ਤਰੇ ਦਕ੍ਖਿਣਪਸ੍ਸਂ ਜਾਨਾਤਿ ‘‘ਮਂ ਨਿਸ੍ਸਾਯ ਯਕਨਂ ਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਪਨ ਯਕਨਂ ਯਕਨਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਯਕਨਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਪਟਿਚ੍ਛਨ੍ਨਾਪਟਿਚ੍ਛਨ੍ਨਭੇਦਤੋ ਦੁਵਿਧਂ ਕਿਲੋਮਕਂ ਵਣ੍ਣਤੋ ਸੇਤਂ ਦੁਕੂਲਪਿਲੋਤਿਕਵਣ੍ਣਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਅਤ੍ਤਨੋ ਓਕਾਸਸਣ੍ਠਾਨਂ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤਂ. ਓਕਾਸਤੋ ਪਟਿਚ੍ਛਨ੍ਨਕਿਲੋਮਕਂ ਹਦਯਞ੍ਚ ਵਕ੍ਕਞ੍ਚ ਪਰਿਵਾਰੇਤ੍ਵਾ, ਅਪ੍ਪਟਿਚ੍ਛਨ੍ਨਕਿਲੋਮਕਂ ਸਕਲਸਰੀਰੇ ਚਮ੍ਮਸ੍ਸ ਹੇਟ੍ਠਤੋ ਮਂਸਂ ਪਰਿਯੋਨਨ੍ਧਿਤ੍ਵਾ ਠਿਤਨ੍ਤਿ.

ਤਤ੍ਥ ਯਥਾ ਪਿਲੋਤਿਕਾਯ ਪਲਿਵੇਠਿਤੇ ਮਂਸੇ ਨ ਪਿਲੋਤਿਕਾ ਜਾਨਾਤਿ ‘‘ਮਯਾ ਮਂਸਂ ਪਲਿਵੇਠਿਤ’’ਨ੍ਤਿ, ਨਪਿ ਮਂਸਂ ਜਾਨਾਤਿ ‘‘ਅਹਂ ਪਿਲੋਤਿਕਾਯ ਪਲਿਵੇਠਿਤ’’ਨ੍ਤਿ; ਏਵਮੇਵ ਨ ਕਿਲੋਮਕਂ ਜਾਨਾਤਿ ‘‘ਮਯਾ ਹਦਯਵਕ੍ਕਾਨਿ ਸਕਲਸਰੀਰੇ ਚ ਚਮ੍ਮਸ੍ਸ ਹੇਟ੍ਠਤੋ ਮਂਸਂ ਪਲਿਵੇਠਿਤ’’ਨ੍ਤਿ. ਨਪਿ ਹਦਯਵਕ੍ਕਾਨਿ ਸਕਲਸਰੀਰੇ ਚ ਮਂਸਂ ਜਾਨਾਤਿ ‘‘ਅਹਂ ਕਿਲੋਮਕੇਨ ਪਲਿਵੇਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਹੇਟ੍ਠਾ ਮਂਸੇਨ ਉਪਰਿ ਚਮ੍ਮੇਨ ਤਿਰਿਯਂ ਕਿਲੋਮਕਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਕਿਲੋਮਕਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰਸ੍ਸ ਅਬ੍ਭਨ੍ਤਰੇ ਪਿਹਕਂ ਵਣ੍ਣਤੋ ਨੀਲਂ ਮੀਲਾਤਨਿਗ੍ਗੁਣ੍ਡੀਪੁਪ੍ਫਵਣ੍ਣਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਯੇਭੁਯ੍ਯੇਨ ਸਤ੍ਤਙ੍ਗੁਲਪ੍ਪਮਾਣਂ ਅਬਨ੍ਧਨਂ ਕਾਲ਼ਵਚ੍ਛਕਜਿਵ੍ਹਾਸਣ੍ਠਾਨਂ. ਦਿਸਤੋ ਉਪਰਿਮਾਯ ਦਿਸਾਯ ਜਾਤਂ. ਓਕਾਸਤੋ ਹਦਯਸ੍ਸ ਵਾਮਪਸ੍ਸੇ ਉਦਰਪਟਲਸ੍ਸ ਮਤ੍ਥਕਪਸ੍ਸਂ ਨਿਸ੍ਸਾਯ ਠਿਤਂ, ਯਮ੍ਹਿ ਪਹਰਣਪਹਾਰੇਨ ਬਹਿ ਨਿਕ੍ਖਨ੍ਤੇ ਸਤ੍ਤਾਨਂ ਜੀਵਿਤਕ੍ਖਯੋ ਹੋਤੀਤਿ.

ਤਤ੍ਥ ਯਥਾ ਕੋਟ੍ਠਕਮਤ੍ਥਕਪਸ੍ਸਂ ਨਿਸ੍ਸਾਯ ਠਿਤਾ ਨ ਗੋਮਯਪਿਣ੍ਡਿ ਜਾਨਾਤਿ ‘‘ਅਹਂ ਕੋਟ੍ਠਕਮਤ੍ਥਕਪਸ੍ਸਂ ਨਿਸ੍ਸਾਯ ਠਿਤਾ’’ਤਿ, ਨਪਿ ਕੋਟ੍ਠਕਮਤ੍ਥਕਪਸ੍ਸਂ ਜਾਨਾਤਿ ‘‘ਗੋਮਯਪਿਣ੍ਡਿ ਮਂ ਨਿਸ੍ਸਾਯ ਠਿਤਾ’’ਤਿ; ਏਵਮੇਵ ਨ ਪਿਹਕਂ ਜਾਨਾਤਿ ‘‘ਅਹਂ ਉਦਰਪਟਲਸ੍ਸ ਮਤ੍ਥਕਪਸ੍ਸਂ ਨਿਸ੍ਸਾਯ ਠਿਤ’’ਨ੍ਤਿ, ਨਪਿ ਉਦਰਪਟਲਸ੍ਸ ਮਤ੍ਥਕਪਸ੍ਸਂ ਜਾਨਾਤਿ ‘‘ਪਿਹਕਂ ਮਂ ਨਿਸ੍ਸਾਯ ਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਪਿਹਕਂ ਪਿਹਕਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਪਿਹਕਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰਸ੍ਸ ਅਬ੍ਭਨ੍ਤਰੇ ਦ੍ਵਤ੍ਤਿਂਸਮਂਸਖਣ੍ਡਪ੍ਪਭੇਦਂ ਪਪ੍ਫਾਸਂ ਵਣ੍ਣਤੋ ਰਤ੍ਤਂ ਨਾਤਿਪਰਿਪਕ੍ਕਉਦੁਮ੍ਬਰਵਣ੍ਣਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਵਿਸਮਚ੍ਛਿਨ੍ਨਪੂਵਸਣ੍ਠਾਨਂ, ਛਦਨਿਟ੍ਠਕਖਣ੍ਡਪੁਞ੍ਜਸਣ੍ਠਾਨਨ੍ਤਿਪਿ ਏਕੇ. ਤਦੇਤਂ ਅਬ੍ਭਨ੍ਤਰੇ ਅਸਿਤਪੀਤਾਦੀਨਂ ਅਭਾਵੇ ਉਗ੍ਗਤੇਨ ਕਮ੍ਮਜਤੇਜੁਸ੍ਮਨਾ ਅਬ੍ਭਾਹਤਤ੍ਤਾ ਸਙ੍ਖਾਦਿਤਪਲਾਲਪਿਣ੍ਡਮਿਵ ਨਿਰਸਂ ਨਿਰੋਜਂ ਹੋਤਿ. ਦਿਸਤੋ ਉਪਰਿਮਾਯ ਦਿਸਾਯ ਜਾਤਂ. ਓਕਾਸਤੋ ਸਰੀਰਬ੍ਭਨ੍ਤਰੇ ਦ੍ਵਿਨ੍ਨਂ ਥਨਾਨਂ ਅਬ੍ਭਨ੍ਤਰੇ ਹਦਯਞ੍ਚ ਯਕਨਞ੍ਚ ਉਪਰਿ ਛਾਦੇਤ੍ਵਾ ਓਲਮ੍ਬਨ੍ਤਂ ਠਿਤਨ੍ਤਿ.

ਤਤ੍ਥ ਯਥਾ ਜਿਣ੍ਣਕੋਟ੍ਠਬ੍ਭਨ੍ਤਰੇ ਲਮ੍ਬਮਾਨੋ ਸਕੁਣਕੁਲਾਵਕੋ ਨ ਜਾਨਾਤਿ ‘‘ਅਹਂ ਜਿਣ੍ਣਕੋਟ੍ਠਬ੍ਭਨ੍ਤਰੇ ਲਮ੍ਬਮਾਨੋ ਠਿਤੋ’’ਤਿ, ਨਪਿ ਜਿਣ੍ਣਕੋਟ੍ਠਬ੍ਭਨ੍ਤਰਂ ਜਾਨਾਤਿ ‘‘ਸਕੁਣਕੁਲਾਵਕੋ ਮਯਿ ਲਮ੍ਬਮਾਨੋ ਠਿਤੋ’’ਤਿ; ਏਵਮੇਵ ਨ ਪਪ੍ਫਾਸਂ ਜਾਨਾਤਿ ‘‘ਅਹਂ ਸਰੀਰਬ੍ਭਨ੍ਤਰੇ ਦ੍ਵਿਨ੍ਨਂ ਥਨਾਨਂ ਅਨ੍ਤਰੇ ਲਮ੍ਬਮਾਨਂ ਠਿਤ’’ਨ੍ਤਿ, ਨਪਿ ਸਰੀਰਬ੍ਭਨ੍ਤਰੇ ਦ੍ਵਿਨ੍ਨਂ ਥਨਾਨਂ ਅਨ੍ਤਰਂ ਜਾਨਾਤਿ ‘‘ਮਯਿ ਪਪ੍ਫਾਸਂ ਲਮ੍ਬਮਾਨਂ ਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਪਪ੍ਫਾਸਂ ਪਪ੍ਫਾਸਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਪਪ੍ਫਾਸਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਅਨ੍ਤੋਸਰੀਰੇ ਪੁਰਿਸਸ੍ਸ ਦ੍ਵਤ੍ਤਿਂਸਹਤ੍ਥਂ, ਇਤ੍ਥਿਯਾ ਅਟ੍ਠਵੀਸਤਿਹਤ੍ਥਂ, ਏਕਵੀਸਤਿਯਾ ਠਾਨੇਸੁ ਓਭਗ੍ਗਂ ਅਨ੍ਤਂ ਵਣ੍ਣਤੋ ਸੇਤਂ ਸਕ੍ਖਰਸੁਧਾਵਣ੍ਣਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਸੀਸਂ ਛਿਨ੍ਦਿਤ੍ਵਾ ਲੋਹਿਤਦੋਣਿਯਂ ਸਂਵੇਲ੍ਲੇਤ੍ਵਾ ਠਪਿਤਧਮ੍ਮਨਿਸਣ੍ਠਾਨਂ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤਂ. ਓਕਾਸਤੋ ਉਪਰਿ ਗਲਵਾਟਕੇ ਹੇਟ੍ਠਾ ਚ ਕਰੀਸਮਗ੍ਗੇ ਵਿਨਿਬਨ੍ਧਤ੍ਤਾ ਗਲਵਾਟਕਕਰੀਸਮਗ੍ਗਪਰਿਯਨ੍ਤੇ ਸਰੀਰਬ੍ਭਨ੍ਤਰੇ ਠਿਤਨ੍ਤਿ.

ਤਤ੍ਥ ਯਥਾ ਲੋਹਿਤਦੋਣਿਯਂ ਠਪਿਤਂ ਛਿਨ੍ਨਸੀਸਂ ਧਮ੍ਮਨਿਕਲ਼ੇਵਰਂ ਨ ਜਾਨਾਤਿ ‘‘ਅਹਂ ਲੋਹਿਤਦੋਣਿਯਂ ਠਿਤ’’ਨ੍ਤਿ, ਨਪਿ ਲੋਹਿਤਦੋਣਿ ਜਾਨਾਤਿ ‘‘ਮਯਿ ਛਿਨ੍ਨਸੀਸਂ ਧਮ੍ਮਨਿਕਲ਼ੇਵਰਂ ਠਿਤ’’ਨ੍ਤਿ; ਏਵਮੇਵ ਨ ਅਨ੍ਤਂ ਜਾਨਾਤਿ ‘‘ਅਹਂ ਸਰੀਰਬ੍ਭਨ੍ਤਰੇ ਠਿਤ’’ਨ੍ਤਿ, ਨਪਿ ਸਰੀਰਬ੍ਭਨ੍ਤਰਂ ਜਾਨਾਤਿ ‘‘ਮਯਿ ਅਨ੍ਤਂ ਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਅਨ੍ਤਂ ਅਨ੍ਤਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਅਨ੍ਤਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਅਨ੍ਤੋਸਰੀਰੇ ਅਨ੍ਤਨ੍ਤਰੇ ਅਨ੍ਤਗੁਣਂ ਵਣ੍ਣਤੋ ਸੇਤਂ ਦਕਸੀਤਲਿਕਮੂਲਵਣ੍ਣਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਦਕਸੀਤਲਿਕਮੂਲਸਣ੍ਠਾਨਮੇਵਾਤਿ, ਗੋਮੁਤ੍ਤਸਣ੍ਠਾਨਨ੍ਤਿਪਿ ਏਕੇ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤਂ. ਓਕਾਸਤੋ ਕੁਦਾਲਫਰਸੁਕਮ੍ਮਾਦੀਨਿ ਕਰੋਨ੍ਤਾਨਂ ਯਨ੍ਤਾਕਡ੍ਢਨਕਾਲੇ ਯਨ੍ਤਸੁਤ੍ਤਕਮਿਵ ਯਨ੍ਤਫਲਕਾਨਿ ਅਨ੍ਤਭੋਗੇ ਏਕਤੋ ਅਗ੍ਗਲ਼ਨ੍ਤੇ ਆਬਨ੍ਧਿਤ੍ਵਾ ਪਾਦਪੁਞ੍ਛਨਰਜ੍ਜੁਮਣ੍ਡਲਕਸ੍ਸ ਅਨ੍ਤਰਾ ਤਂ ਸਿਬ੍ਬਿਤ੍ਵਾ ਠਿਤਰਜ੍ਜੁਕਾ ਵਿਯ ਏਕਵੀਸਤਿਯਾ ਅਨ੍ਤਭੋਗਾਨਂ ਅਨ੍ਤਰਾ ਠਿਤਨ੍ਤਿ.

ਤਤ੍ਥ ਯਥਾ ਪਾਦਪੁਞ੍ਛਨਰਜ੍ਜੁਮਣ੍ਡਲਕਂ ਸਿਬ੍ਬਿਤ੍ਵਾ ਠਿਤਰਜ੍ਜੁਕਾ ਨ ਜਾਨਾਤਿ ‘‘ਮਯਾ ਪਾਦਪੁਞ੍ਛਨਰਜ੍ਜੁਮਣ੍ਡਲਕਂ ਸਿਬ੍ਬਿਤ’’ਨ੍ਤਿ, ਨਪਿ ਪਾਦਪੁਞ੍ਛਨਰਜ੍ਜੁਮਣ੍ਡਲਕਂ ਜਾਨਾਤਿ ‘‘ਰਜ੍ਜੁਕਾ ਮਂ ਸਿਬ੍ਬਿਤ੍ਵਾ ਠਿਤਾ’’ਤਿ, ਏਵਮੇਵ ਅਨ੍ਤਗੁਣਂ ਨ ਜਾਨਾਤਿ ‘‘ਅਹਂ ਅਨ੍ਤਂ ਏਕਵੀਸਤਿਭੋਗਬ੍ਭਨ੍ਤਰੇ ਆਬਨ੍ਧਿਤ੍ਵਾ ਠਿਤ’’ਨ੍ਤਿ, ਨਪਿ ਅਨ੍ਤਂ ਜਾਨਾਤਿ ‘‘ਅਨ੍ਤਗੁਣਂ ਮਂ ਆਬਨ੍ਧਿਤ੍ਵਾ ਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਅਨ੍ਤਗੁਣਂ ਅਨ੍ਤਗੁਣਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਅਨ੍ਤਗੁਣਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਅਨ੍ਤੋਸਰੀਰੇ ਉਦਰਿਯਂ ਵਣ੍ਣਤੋ ਅਜ੍ਝੋਹਟਾਹਾਰਵਣ੍ਣਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਪਰਿਸ੍ਸਾਵਨੇ ਸਿਥਿਲਬਦ੍ਧਤਣ੍ਡੁਲਸਣ੍ਠਾਨਂ. ਦਿਸਤੋ ਉਪਰਿਮਾਯ ਦਿਸਾਯ ਜਾਤਂ. ਓਕਾਸਤੋ ਉਦਰੇ ਠਿਤਨ੍ਤਿ. ਉਦਰਂ ਨਾਮ ਉਭਤੋ ਨਿਪ੍ਪੀਲ਼ਿਯਮਾਨਸ੍ਸ ਅਲ੍ਲਸਾਟਕਸ੍ਸ ਮਜ੍ਝੇ ਸਞ੍ਜਾਤਫੋਟਕਸਦਿਸਂ ਅਨ੍ਤਪਟਲਂ, ਬਹਿ ਮਟ੍ਠਂ, ਅਨ੍ਤੋ ਮਂਸਕਸਮ੍ਬੁਪਲਿਵੇਠਿਤਂ, ਕਿਲਿਟ੍ਠਪਾਵਾਰਪੁਪ੍ਫਸਦਿਸਂ, ਕੁਥਿਤਪਨਸਫਲਸ੍ਸ ਅਬ੍ਭਨ੍ਤਰਸਦਿਸਨ੍ਤਿਪਿ ਏਕੇ. ਤਤ੍ਥ ਤਕ੍ਕੋਲਕਾ ਗਣ੍ਡੁਪ੍ਪਾਦਕਾਤਾਲਹੀਰਕਾਸੂਚਿਮੁਖਕਾਪਟਤਨ੍ਤੁਸੁਤ੍ਤਕਾਤਿ ਏਵਮਾਦਿਦ੍ਵਤ੍ਤਿਂਸਕੁਲਪ੍ਪਭੇਦਾ ਕਿਮਯੋ ਆਕੁਲਬ੍ਯਾਕੁਲਾ ਸਣ੍ਡਸਣ੍ਡਚਾਰਿਨੋ ਹੁਤ੍ਵਾ ਨਿਵਸਨ੍ਤਿ, ਯੇ ਪਾਨਭੋਜਨਾਦਿਮ੍ਹਿ ਅਵਿਜ੍ਜਮਾਨੇ ਉਲ੍ਲਙ੍ਘਿਤ੍ਵਾ ਵਿਰਵਨ੍ਤਾ ਹਦਯਮਂਸਂ ਅਭਿਤੁਦਨ੍ਤਿ ਪਾਨਭੋਜਨਾਦੀਨਿ ਅਜ੍ਝੋਹਰਣਵੇਲਾਯਞ੍ਚ ਉਦ੍ਧਂਮੁਖਾ ਹੁਤ੍ਵਾ ਪਠਮਜ੍ਝੋਹਟੇ ਦ੍ਵੇ ਤਯੋ ਆਲੋਪੇ ਤੁਰਿਤਤੁਰਿਤਾ ਵਿਲੁਮ੍ਪਨ੍ਤਿ. ਯਂ ਏਤੇਸਂ ਕਿਮੀਨਂ ਪਸੂਤਿਘਰਂ ਵਚ੍ਚਕੁਟਿ ਗਿਲਾਨਸਾਲਾ ਸੁਸਾਨਞ੍ਚ ਹੋਤਿ, ਯਤ੍ਥ ਸੇਯ੍ਯਥਾਪਿ ਨਾਮ ਚਣ੍ਡਾਲਗਾਮਦ੍ਵਾਰੇ ਚਨ੍ਦਨਿਕਾਯ ਸਰਦਸਮਯੇ ਥੂਲਫੁਸਿਤਕੇ ਦੇਵੇ ਵਸ੍ਸਨ੍ਤੇ ਉਦਕੇਨ ਆਵੂਲ਼੍ਹਂ ਮੁਤ੍ਤਕਰੀਸਚਮ੍ਮਟ੍ਠਿਨ੍ਹਾਰੁਖਣ੍ਡਖੇਲ਼ਸਿਙ੍ਘਾਣਿਕਾਲੋਹਿਤਪ੍ਪਭੁਤਿਨਾਨਾਕੁਣਪਜਾਤਂ ਨਿਪਤਿਤ੍ਵਾ ਕਦ੍ਦਮੋਦਕਾਲੁਲ਼ਿਤਂ ਸਞ੍ਜਾਤਕਿਮਿਕੁਲਾਕੁਲਂ ਹੁਤ੍ਵਾ ਦ੍ਵੀਹਤੀਹਚ੍ਚਯੇਨ ਸੂਰਿਯਾਤਪਸਨ੍ਤਾਪਵੇਗਕੁਥਿਤਂ ਉਪਰਿ ਫੇਣਪੁਪ੍ਫੁਲ਼ਕੇ ਮੁਞ੍ਚਨ੍ਤਂ ਅਭਿਨੀਲਵਣ੍ਣਂ ਪਰਮਦੁਗ੍ਗਨ੍ਧਜੇਗੁਚ੍ਛਂ ਉਪਗਨ੍ਤੁਂ ਵਾ ਦਟ੍ਠੁਂ ਵਾ ਅਨਰਹਰੂਪਤਂ ਆਪਜ੍ਜਿਤ੍ਵਾ ਤਿਟ੍ਠਤਿ, ਪਗੇਵ ਘਾਯਿਤੁਂ ਵਾ ਸਾਯਿਤੁਂ ਵਾ; ਏਵਮੇਵ ਨਾਨਪ੍ਪਕਾਰਪਾਨਭੋਜਨਾਦਿ ਦਨ੍ਤਮੁਸਲਸਂਚੁਣ੍ਣਿਤਂ ਜਿਵ੍ਹਾਹਤ੍ਥਸਮ੍ਪਰਿਵਤ੍ਤਿਤਂ ਖੇਲ਼ਲਾਲਾਪਲਿਬੁਦ੍ਧਂ ਤਙ੍ਖਣਵਿਗਤਵਣ੍ਣਗਨ੍ਧਰਸਾਦਿਸਮ੍ਪਦਂ ਕੋਲਿਯਖਲਿਸੁਵਾਨਵਮਥੁਸਦਿਸਂ ਨਿਪਤਿਤ੍ਵਾ ਪਿਤ੍ਤਸੇਮ੍ਹਵਾਤਪਲਿਵੇਠਿਤਂ ਹੁਤ੍ਵਾ ਉਦਰਗ੍ਗਿਸਨ੍ਤਾਪਵੇਗਕੁਥਿਤਂ ਕਿਮਿਕੁਲਾਕੁਲਂ ਉਪਰੂਪਰਿ ਫੇਣਪੁਪ੍ਫੁਲ਼ਕਾਨਿ ਮੁਞ੍ਚਨ੍ਤਂ ਪਰਮਕਸਮ੍ਬੁਦੁਗ੍ਗਨ੍ਧਜੇਗੁਚ੍ਛਭਾਵਮਾਪਜ੍ਜਿਤ੍ਵਾ ਤਿਟ੍ਠਤਿ. ਯਂ ਸੁਤ੍ਵਾਪਿ ਪਾਨਭੋਜਨਾਦੀਸੁ ਅਮਨੁਞ੍ਞਤਾ ਸਣ੍ਠਾਤਿ, ਪਗੇਵ ਪਞ੍ਞਾਚਕ੍ਖੁਨਾ ਓਲੋਕੇਤ੍ਵਾ. ਯਤ੍ਥ ਚ ਪਤਿਤਂ ਪਾਨਭੋਜਨਾਦਿ ਪਞ੍ਚਧਾ ਵਿਵੇਕਂ ਗਚ੍ਛਤਿ, ਏਕਂ ਭਾਗਂ ਪਾਣਕਾ ਖਾਦਨ੍ਤਿ, ਏਕਂ ਭਾਗਂ ਉਦਰਗ੍ਗਿ ਝਾਪੇਤਿ, ਏਕੋ ਭਾਗੋ ਮੁਤ੍ਤਂ ਹੋਤਿ, ਏਕੋ ਭਾਗੋ ਕਰੀਸਂ ਹੋਤਿ, ਏਕੋ ਭਾਗੋ ਰਸਭਾਵਂ ਆਪਜ੍ਜਿਤ੍ਵਾ ਸੋਣਿਤਮਂਸਾਦੀਨਿ ਉਪਬ੍ਰੂਹਯਤੀਤਿ.

ਤਤ੍ਥ ਯਥਾ ਪਰਮਜੇਗੁਚ੍ਛਾਯ ਸੁਵਾਨਦੋਣਿਯਾ ਠਿਤੋ ਸੁਵਾਨਵਮਥੁ ਨ ਜਾਨਾਤਿ ‘‘ਅਹਂ ਸੁਵਾਨਦੋਣਿਯਾ ਠਿਤੋ’’ਤਿ; ਨਪਿ ਸੁਵਾਨਦੋਣਿ ਜਾਨਾਤਿ ‘‘ਮਯਿ ਸੁਵਾਨਵਮਥੁ ਠਿਤੋ’’ਤਿ. ਏਵਮੇਵ ਨ ਉਦਰਿਯਂ ਜਾਨਾਤਿ ‘‘ਅਹਂ ਇਮਸ੍ਮਿਂ ਪਰਮਦੁਗ੍ਗਨ੍ਧਜੇਗੁਚ੍ਛੇ ਉਦਰੇ ਠਿਤ’’ਨ੍ਤਿ; ਨਪਿ ਉਦਰਂ ਜਾਨਾਤਿ ‘‘ਮਯਿ ਉਦਰਿਯਂ ਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਉਦਰਿਯਂ ਉਦਰਿਯਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਉਦਰਿਯਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਅਨ੍ਤੋਸਰੀਰੇ ਕਰੀਸਂ ਵਣ੍ਣਤੋ ਯੇਭੁਯ੍ਯੇਨ ਅਜ੍ਝੋਹਟਾਹਾਰਵਣ੍ਣਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਓਕਾਸਸਣ੍ਠਾਨਂ, ਦਿਸਤੋ ਹੇਟ੍ਠਿਮਾਯ ਦਿਸਾਯ ਜਾਤਂ, ਓਕਾਸਤੋ ਪਕ੍ਕਾਸਯੇ ਠਿਤਨ੍ਤਿ. ਪਕ੍ਕਾਸਯੋ ਨਾਮ ਹੇਟ੍ਠਾ ਨਾਭਿਪਿਟ੍ਠਿਕਣ੍ਟਕਮੂਲਾਨਂ ਅਨ੍ਤਰੇ ਅਨ੍ਤਾਵਸਾਨੇ ਉਬ੍ਬੇਧੇਨ ਅਟ੍ਠਙ੍ਗੁਲਮਤ੍ਤੋ ਵਂਸਨਲ਼ਕਬ੍ਭਨ੍ਤਰਸਦਿਸੋ ਪਦੇਸੋ, ਯਤ੍ਥ ਸੇਯ੍ਯਥਾਪਿ ਨਾਮ ਉਪਰਿਭੂਮਿਭਾਗੇ ਪਤਿਤਂ ਵਸ੍ਸੋਦਕਂ ਓਗਲ਼ਿਤ੍ਵਾ ਹੇਟ੍ਠਾਭੂਮਿਭਾਗਂ ਪੂਰੇਤ੍ਵਾ ਤਿਟ੍ਠਤਿ, ਏਵਮੇਵ ਯਂਕਿਞ੍ਚਿ ਆਮਾਸਯੇ ਪਤਿਤਂ ਪਾਨਭੋਜਨਾਦਿਕਂ ਉਦਰਗ੍ਗਿਨਾ ਫੇਣੁਦ੍ਦੇਹਕਂ ਪਕ੍ਕਂ ਪਕ੍ਕਂ ਸਣ੍ਹਕਰਣਿਯਾ ਪਿਟ੍ਠਮਿਵ ਸਣ੍ਹਭਾਵਂ ਆਪਜ੍ਜਿਤ੍ਵਾ ਅਨ੍ਤਬਿਲੇਨ ਓਗਲ਼ਿਤ੍ਵਾ ਓਮਦ੍ਦਿਤ੍ਵਾ ਵਂਸਨਲ਼ਕੇ ਪਕ੍ਖਿਤ੍ਤਪਣ੍ਡੁਮਤ੍ਤਿਕਾ ਵਿਯ ਸਨ੍ਨਿਚਿਤਂ ਹੁਤ੍ਵਾ ਤਿਟ੍ਠਤਿ.

ਤਤ੍ਥ ਯਥਾ ਵਂਸਨਲ਼ਕੇ ਓਮਦ੍ਦਿਤ੍ਵਾ ਪਕ੍ਖਿਤ੍ਤਪਣ੍ਡੁਮਤ੍ਤਿਕਾ ਨ ਜਾਨਾਤਿ ‘‘ਅਹਂ ਵਂਸਨਲ਼ਕੇ ਠਿਤਾ’’ਤਿ, ਨਪਿ ਵਂਸਨਲ਼ਕੋ ਜਾਨਾਤਿ ‘‘ਮਯਿ ਪਣ੍ਡੁਮਤ੍ਤਿਕਾ ਠਿਤਾ’’ਤਿ; ਏਵਮੇਵ ਨ ਕਰੀਸਂ ਜਾਨਾਤਿ ‘‘ਅਹਂ ਪਕ੍ਕਾਸਯੇ ਠਿਤ’’ਨ੍ਤਿ, ਨਪਿ ਪਕ੍ਕਾਸਯੋ ਜਾਨਾਤਿ ‘‘ਮਯਿ ਕਰੀਸਂ ਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਕਰੀਸਂ ਕਰੀਸਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਕਰੀਸਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਸੀਸਕਟਾਹਬ੍ਭਨ੍ਤਰੇ ਮਤ੍ਥਲੁਙ੍ਗਂ ਵਣ੍ਣਤੋ ਸੇਤਂ ਅਹਿਛਤ੍ਤਕਪਿਣ੍ਡਿਵਣ੍ਣਨ੍ਤਿ ਵਵਤ੍ਥਪੇਤਿ. ਪਕ੍ਕੁਥਿਤਦੁਦ੍ਧਵਣ੍ਣਨ੍ਤਿਪਿ ਏਕੇ. ਸਣ੍ਠਾਨਤੋ ਓਕਾਸਸਣ੍ਠਾਨਂ. ਦਿਸਤੋ ਉਪਰਿਮਾਯ ਦਿਸਾਯ ਜਾਤਂ. ਓਕਾਸਤੋ ਸੀਸਕਟਾਹਸ੍ਸ ਅਬ੍ਭਨ੍ਤਰੇ ਚਤ੍ਤਾਰੋ ਸਿਬ੍ਬਿਨਿਮਗ੍ਗੇ ਨਿਸ੍ਸਾਯ ਸਮੋਧਾਯ ਠਪਿਤਾ ਚਤ੍ਤਾਰੋ ਪਿਟ੍ਠਪਿਣ੍ਡਿਕਾ ਵਿਯ ਸਮੋਹਿਤਂ ਚਤੁਮਤ੍ਥਲੁਙ੍ਗਪਿਣ੍ਡਪ੍ਪਭੇਦਂ ਹੁਤ੍ਵਾ ਠਿਤਨ੍ਤਿ.

ਤਤ੍ਥ ਯਥਾ ਪੁਰਾਣਲਾਬੁਕਟਾਹੇ ਪਕ੍ਖਿਤ੍ਤਪਿਟ੍ਠਪਿਣ੍ਡਿ ਪਕ੍ਕੁਥਿਤਦੁਦ੍ਧਂ ਵਾ ਨ ਜਾਨਾਤਿ ‘‘ਅਹਂ ਪੁਰਾਣਲਾਬੁਕਟਾਹੇ ਠਿਤ’’ਨ੍ਤਿ, ਨਪਿ ਪੁਰਾਣਲਾਬੁਕਟਾਹਂ ਜਾਨਾਤਿ ‘‘ਮਯਿ ਪਿਟ੍ਠਪਿਣ੍ਡਿ ਪਕ੍ਕੁਥਿਤਦੁਦ੍ਧਂ ਵਾ ਠਿਤ’’ਨ੍ਤਿ; ਏਵਮੇਵ ਨ ਮਤ੍ਥਲੁਙ੍ਗਂ ਜਾਨਾਤਿ ‘‘ਅਹਂ ਸੀਸਕਟਾਹਬ੍ਭਨ੍ਤਰੇ ਠਿਤ’’ਨ੍ਤਿ, ਨਪਿ ਸੀਸਕਟਾਹਬ੍ਭਨ੍ਤਰਂ ਜਾਨਾਤਿ ‘‘ਮਯਿ ਮਤ੍ਥਲੁਙ੍ਗਂ ਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਮਤ੍ਥਲੁਙ੍ਗਂ ਮਤ੍ਥਲੁਙ੍ਗਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਮਤ੍ਥਲੁਙ੍ਗਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਬਦ੍ਧਾਬਦ੍ਧਭੇਦਤੋ ਦੁਵਿਧਮ੍ਪਿ ਪਿਤ੍ਤਂ ਵਣ੍ਣਤੋ ਬਹਲਮਧੁਕਤੇਲਵਣ੍ਣਨ੍ਤਿ ਵਵਤ੍ਥਪੇਤਿ. ਅਬਦ੍ਧਪਿਤ੍ਤਂ ਮਿਲਾਤਬਕੁਲਪੁਪ੍ਫਵਣ੍ਣਨ੍ਤਿਪਿ ਏਕੇ. ਸਣ੍ਠਾਨਤੋ ਓਕਾਸਸਣ੍ਠਾਨਂ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤਂ. ਓਕਾਸਤੋ ਅਬਦ੍ਧਪਿਤ੍ਤਂ ਕੇਸਲੋਮਨਖਦਨ੍ਤਾਨਂ ਮਂਸਵਿਨਿਮੁਤ੍ਤਟ੍ਠਾਨਂ ਥਦ੍ਧਸੁਕ੍ਖਚਮ੍ਮਞ੍ਚ ਵਜ੍ਜੇਤ੍ਵਾ ਉਦਕਮਿਵ ਤੇਲਬਿਨ੍ਦੁ ਅਵਸੇਸਸਰੀਰਂ ਬ੍ਯਾਪੇਤ੍ਵਾ ਠਿਤਂ, ਯਮ੍ਹਿ ਕੁਪਿਤੇ ਅਕ੍ਖੀਨਿ ਪੀਤਕਾਨਿ ਹੋਨ੍ਤਿ ਭਮਨ੍ਤਿ, ਗਤ੍ਤਂ ਕਮ੍ਪਤਿ ਕਣ੍ਡੂਯਤਿ. ਬਦ੍ਧਪਿਤ੍ਤਂ ਹਦਯਪਪ੍ਫਾਸਾਨਮਨ੍ਤਰੇ ਯਕਨਮਂਸਂ ਨਿਸ੍ਸਾਯ ਪਤਿਟ੍ਠਿਤੇ ਮਹਾਕੋਸਾਤਕਿਕੋਸਕਸਦਿਸੇ ਪਿਤ੍ਤਕੋਸਕੇ ਠਿਤਂ, ਯਮ੍ਹਿ ਕੁਪਿਤੇ ਸਤ੍ਤਾ ਉਮ੍ਮਤ੍ਤਕਾ ਹੋਨ੍ਤਿ, ਵਿਪਲ੍ਲਤ੍ਥਚਿਤ੍ਤਾ ਹਿਰੋਤ੍ਤਪ੍ਪਂ ਛਡ੍ਡੇਤ੍ਵਾ ਅਕਤ੍ਤਬ੍ਬਂ ਕਰੋਨ੍ਤਿ, ਅਭਾਸਿਤਬ੍ਬਂ ਭਾਸਨ੍ਤਿ, ਅਚਿਨ੍ਤਿਤਬ੍ਬਂ ਚਿਨ੍ਤੇਨ੍ਤਿ.

ਤਤ੍ਥ ਯਥਾ ਉਦਕਂ ਬ੍ਯਾਪੇਤ੍ਵਾ ਠਿਤਂ ਤੇਲਂ ਨ ਜਾਨਾਤਿ ‘‘ਅਹਂ ਉਦਕਂ ਬ੍ਯਾਪੇਤ੍ਵਾ ਠਿਤ’’ਨ੍ਤਿ, ਨਪਿ ਉਦਕਂ ਜਾਨਾਤਿ ‘‘ਤੇਲਂ ਮਂ ਬ੍ਯਾਪੇਤ੍ਵਾ ਠਿਤ’’ਨ੍ਤਿ; ਏਵਮੇਵ ਨ ਅਬਦ੍ਧਪਿਤ੍ਤਂ ਜਾਨਾਤਿ ‘‘ਅਹਂ ਸਰੀਰਂ ਬ੍ਯਾਪੇਤ੍ਵਾ ਠਿਤ’’ਨ੍ਤਿ, ਨਪਿ ਸਰੀਰਂ ਜਾਨਾਤਿ ‘‘ਅਬਦ੍ਧਪਿਤ੍ਤਂ ਮਂ ਬ੍ਯਾਪੇਤ੍ਵਾ ਠਿਤ’’ਨ੍ਤਿ. ਯਥਾ ਚ ਕੋਸਾਤਕਿਕੋਸਕੇ ਠਿਤਂ ਵਸ੍ਸੋਦਕਂ ਨ ਜਾਨਾਤਿ ‘‘ਅਹਂ ਕੋਸਾਤਕਿਕੋਸਕੇ ਠਿਤ’’ਨ੍ਤਿ, ਨਪਿ ਕੋਸਾਤਕਿਕੋਸਕੋ ਜਾਨਾਤਿ ‘‘ਮਯਿ ਵਸ੍ਸੋਦਕਂ ਠਿਤ’’ਨ੍ਤਿ; ਏਵਮੇਵ ਨ ਬਦ੍ਧਪਿਤ੍ਤਂ ਜਾਨਾਤਿ ‘‘ਅਹਂ ਪਿਤ੍ਤਕੋਸਕੇ ਠਿਤ’’ਨ੍ਤਿ, ਨਪਿ ਪਿਤ੍ਤਕੋਸਕੋ ਜਾਨਾਤਿ ‘‘ਮਯਿ ਬਦ੍ਧਪਿਤ੍ਤਂ ਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਪਿਤ੍ਤਂ ਪਿਤ੍ਤਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਪਿਤ੍ਤਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰਬ੍ਭਨ੍ਤਰੇ ਏਕਪਤ੍ਤਪੂਰਪ੍ਪਮਾਣਂ ਸੇਮ੍ਹਂ ਵਣ੍ਣਤੋ ਸੇਤਂ ਕਚ੍ਛਕਪਣ੍ਣਰਸਵਣ੍ਣਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਓਕਾਸਸਣ੍ਠਾਨਂ. ਦਿਸਤੋ ਉਪਰਿਮਾਯ ਦਿਸਾਯ ਜਾਤਂ. ਓਕਾਸਤੋ ਉਦਰਪਟਲੇ ਠਿਤਨ੍ਤਿ. ਯਂ ਪਾਨਭੋਜਨਾਦਿਅਜ੍ਝੋਹਰਣਕਾਲੇ ਸੇਯ੍ਯਥਾਪਿ ਨਾਮ ਉਦਕੇ ਸੇਵਾਲਪਣਕਂ ਕਟ੍ਠੇ ਵਾ ਕਥਲੇ ਵਾ ਪਤਨ੍ਤੇ ਛਿਜ੍ਜਿਤ੍ਵਾ ਦ੍ਵਿਧਾ ਹੁਤ੍ਵਾ ਪੁਨ ਅਜ੍ਝੋਤ੍ਥਰਿਤ੍ਵਾ ਤਿਟ੍ਠਤਿ, ਏਵਮੇਵ ਪਾਨਭੋਜਨਾਦਿਮ੍ਹਿ ਨਿਪਤਨ੍ਤੇ ਛਿਜ੍ਜਿਤ੍ਵਾ ਦ੍ਵਿਧਾ ਹੁਤ੍ਵਾ ਪੁਨ ਅਜ੍ਝੋਤ੍ਥਰਿਤ੍ਵਾ ਤਿਟ੍ਠਤਿ, ਯਮ੍ਹਿ ਚ ਮਨ੍ਦੀਭੂਤੇ ਪਕ੍ਕਮਿਵ ਗਣ੍ਡਂ ਪੂਤਿਕਮਿਵ ਕੁਕ੍ਕੁਟਣ੍ਡਂ ਉਦਰਪਟਲਂ ਪਰਮਜੇਗੁਚ੍ਛਕੁਣਪਗਨ੍ਧਂ ਹੋਤਿ. ਤਤੋ ਉਗ੍ਗਤੇਨ ਚ ਗਨ੍ਧੇਨ ਉਗ੍ਗਾਰੋਪਿ ਮੁਖਮ੍ਪਿ ਦੁਗ੍ਗਨ੍ਧਂ ਪੂਤਿਕੁਣਪਸਦਿਸਂ ਹੋਤਿ, ਸੋ ਚ ਪੁਰਿਸੋ ‘‘ਅਪੇਹਿ ਦੁਗ੍ਗਨ੍ਧਂ ਵਾਯਸੀ’’ਤਿ ਵਤ੍ਤਬ੍ਬਤਂ ਆਪਜ੍ਜਤਿ, ਯਞ੍ਚ ਅਭਿਵਡ੍ਢਿਤਂ ਬਹਲਤ੍ਤਮਾਪਨ੍ਨਂ ਪਟਿਕੁਜ੍ਜਨਫਲਕਮਿਵ ਵਚ੍ਚਕੁਟਿਯਾ ਉਦਰਪਟਲਬ੍ਭਨ੍ਤਰੇ ਏਵ ਕੁਣਪਗਨ੍ਧਂ ਸਨ੍ਨਿਰੁਮ੍ਭਿਤ੍ਵਾ ਤਿਟ੍ਠਤਿ.

ਤਤ੍ਥ ਯਥਾ ਚਨ੍ਦਨਿਕਾਯ ਉਪਰਿਫੇਣਪਟਲਂ ਨ ਜਾਨਾਤਿ ‘‘ਅਹਂ ਚਨ੍ਦਨਿਕਾਯ ਠਿਤ’’ਨ੍ਤਿ, ਨਪਿ ਚਨ੍ਦਨਿਕਾ ਜਾਨਾਤਿ ‘‘ਮਯਿ ਫੇਣਪਟਲਂ ਠਿਤ’’ਨ੍ਤਿ; ਏਵਮੇਵ ਨ ਸੇਮ੍ਹਂ ਜਾਨਾਤਿ ‘‘ਅਹਂ ਉਦਰਪਟਲੇ ਠਿਤ’’ਨ੍ਤਿ, ਨਪਿ ਉਦਰਪਟਲਂ ਜਾਨਾਤਿ ‘‘ਮਯਿ ਸੇਮ੍ਹਂ ਠਿਤਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਸੇਮ੍ਹਂ ਸੇਮ੍ਹਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਸੇਮ੍ਹਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਪੁਬ੍ਬੋ ਵਣ੍ਣਤੋ ਪਣ੍ਡੁਪਲਾਸਵਣ੍ਣੋਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਓਕਾਸਸਣ੍ਠਾਨੋ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤੋ. ਓਕਾਸਤੋ ਪੁਬ੍ਬਸ੍ਸ ਓਕਾਸੋ ਨਾਮ ਨਿਬਦ੍ਧੋ ਨਤ੍ਥਿ. ਯਤ੍ਥ ਪੁਬ੍ਬੋ ਸਨ੍ਨਿਚਿਤੋ ਤਿਟ੍ਠੇਯ੍ਯ, ਯਤ੍ਰ ਯਤ੍ਰ ਖਾਣੁਕਣ੍ਟਕਪ੍ਪਹਰਣਗ੍ਗਿਜਾਲਾਦੀਹਿ ਅਭਿਹਤੇ ਸਰੀਰਪ੍ਪਦੇਸੇ ਲੋਹਿਤਂ ਸਣ੍ਠਹਿਤ੍ਵਾ ਪਚ੍ਚਤਿ, ਗਣ੍ਡਪਿਲ਼ਕਾਦਯੋ ਵਾ ਉਪ੍ਪਜ੍ਜਨ੍ਤਿ, ਤਤ੍ਰ ਤਤ੍ਰ ਤਿਟ੍ਠਤਿ.

ਤਤ੍ਥ ਯਥਾ ਰੁਕ੍ਖਸ੍ਸ ਤਤ੍ਥ ਤਤ੍ਥ ਫਰਸੁਧਾਰਾਦੀਹਿ ਪਹਤਪ੍ਪਦੇਸੇ ਅਵਗਲ਼ਿਤ੍ਵਾ ਠਿਤੋ ਨਿਯ੍ਯਾਸੋ ਨ ਜਾਨਾਤਿ ‘‘ਅਹਂ ਰੁਕ੍ਖਸ੍ਸ ਪਹਤਪ੍ਪਦੇਸੇ ਠਿਤੋ’’ਤਿ, ਨਪਿ ਰੁਕ੍ਖਸ੍ਸ ਪਹਤਪ੍ਪਦੇਸੋ ਜਾਨਾਤਿ ‘‘ਮਯਿ ਨਿਯ੍ਯਾਸੋ ਠਿਤੋ’’ਤਿ; ਏਵਮੇਵ ਨ ਪੁਬ੍ਬੋ ਜਾਨਾਤਿ ‘‘ਅਹਂ ਸਰੀਰਸ੍ਸ ਤਤ੍ਥ ਤਤ੍ਥ ਖਾਣੁਕਣ੍ਟਕਾਦੀਹਿ ਅਭਿਹਤਪ੍ਪਦੇਸੇ ਗਣ੍ਡਪਿਲ਼ਕਾਦੀਨਂ ਉਟ੍ਠਿਤਪ੍ਪਦੇਸੇ ਵਾ ਠਿਤੋ’’ਤਿ, ਨਪਿ ਸਰੀਰਪ੍ਪਦੇਸੋ ਜਾਨਾਤਿ ‘‘ਮਯਿ ਪੁਬ੍ਬੋ ਠਿਤੋ’’ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਪੁਬ੍ਬੋ ਪੁਬ੍ਬਭਾਗੇਨ ਪਰਿਚ੍ਛਿਨ੍ਨੋਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਪੁਬ੍ਬਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਸਨ੍ਨਿਚਿਤਲੋਹਿਤਂ ਸਂਸਰਣਲੋਹਿਤਨ੍ਤਿ ਏਵਂ ਦੁਵਿਧੇ ਲੋਹਿਤੇ ਸਨ੍ਨਿਚਿਤਲੋਹਿਤਂ ਤਾਵ ਵਣ੍ਣਤੋ ਬਹਲਕੁਥਿਤਲਾਖਾਰਸਵਣ੍ਣਨ੍ਤਿ ਵਵਤ੍ਥਪੇਤਿ, ਸਂਸਰਣਲੋਹਿਤਂ ਅਚ੍ਛਲਾਖਾਰਸਵਣ੍ਣਨ੍ਤਿ. ਸਣ੍ਠਾਨਤੋ ਸਬ੍ਬਮ੍ਪਿ ਅਤ੍ਤਨੋ ਓਕਾਸਸਣ੍ਠਾਨਂ. ਦਿਸਤੋ ਸਨ੍ਨਿਚਿਤਲੋਹਿਤਂ ਉਪਰਿਮਾਯ ਦਿਸਾਯ ਜਾਤਂ, ਸਂਸਰਣਲੋਹਿਤਂ ਦ੍ਵੀਸੁਪੀਤਿ. ਓਕਾਸਤੋ ਸਂਸਰਣਲੋਹਿਤਂ ਕੇਸਲੋਮਨਖਦਨ੍ਤਾਨਂ ਮਂਸਵਿਨਿਮੁਤ੍ਤਟ੍ਠਾਨਞ੍ਚੇਵ ਥਦ੍ਧਸੁਕ੍ਖਚਮ੍ਮਞ੍ਚ ਵਜ੍ਜੇਤ੍ਵਾ ਧਮਨਿਜਾਲਾਨੁਸਾਰੇਨ ਸਬ੍ਬਂ ਉਪਾਦਿਨ੍ਨਕਸਰੀਰਂ ਫਰਿਤ੍ਵਾ ਠਿਤਂ. ਸਨ੍ਨਿਚਿਤਲੋਹਿਤਂ ਯਕਨਸ੍ਸ ਹੇਟ੍ਠਾਭਾਗਂ ਪੂਰੇਤ੍ਵਾ ਏਕਪਤ੍ਤਪੂਰਣਮਤ੍ਤਂ ਵਕ੍ਕਹਦਯਪਪ੍ਫਾਸਾਨਂ ਉਪਰਿ ਥੋਕਂ ਥੋਕਂ ਬਿਨ੍ਦੁਂ ਪਾਤੇਨ੍ਤਂ ਵਕ੍ਕਹਦਯਯਕਨਪਪ੍ਫਾਸੇ ਤੇਮੇਨ੍ਤਂ ਠਿਤਂ, ਯਮ੍ਹਿ ਵਕ੍ਕਹਦਯਾਦੀਨਿ ਅਤੇਮੇਨ੍ਤੇ ਸਤ੍ਤਾ ਪਿਪਾਸਿਤਾ ਹੋਨ੍ਤਿ.

ਤਤ੍ਥ ਯਥਾ ਜਜ੍ਜਰਕਪਾਲੇ ਠਿਤਂ ਉਦਕਂ ਹੇਟ੍ਠਾ ਲੇਡ੍ਡੁਖਣ੍ਡਾਦੀਨਿ ਤੇਮੇਨ੍ਤਂ ਨ ਜਾਨਾਤਿ ‘‘ਅਹਂ ਜਜ੍ਜਰਕਪਾਲੇ ਠਿਤਂ ਹੇਟ੍ਠਾ ਲੇਡ੍ਡੁਖਣ੍ਡਾਦੀਨਿ ਤੇਮੇਮੀ’’ਤਿ, ਨਪਿ ਜਜ੍ਜਰਕਪਾਲਂ ਹੇਟ੍ਠਾ ਲੇਡ੍ਡੁਖਣ੍ਡਾਦੀਨਿ ਵਾ ਜਾਨਨ੍ਤਿ ‘‘ਮਯਿ ਉਦਕਂ ਠਿਤਂ, ਅਮ੍ਹੇ ਵਾ ਤੇਮੇਨ੍ਤਂ ਠਿਤ’’ਨ੍ਤਿ; ਏਵਮੇਵ ਨ ਲੋਹਿਤਂ ਜਾਨਾਤਿ ‘‘ਅਹਂ ਯਕਨਸ੍ਸ ਹੇਟ੍ਠਾਭਾਗੇ ਵਕ੍ਕਹਦਯਾਦੀਨਿ ਤੇਮੇਨ੍ਤਂ ਠਿਤ’’ਨ੍ਤਿ, ਨਪਿ ਯਕਨਸ੍ਸ ਹੇਟ੍ਠਾਭਾਗਟ੍ਠਾਨਂ ਵਕ੍ਕਹਦਯਾਦੀਨਿ ਵਾ ਜਾਨਨ੍ਤਿ ‘‘ਮਯਿ ਲੋਹਿਤਂ ਠਿਤਂ, ਅਮ੍ਹੇ ਵਾ ਤੇਮੇਨ੍ਤਂ ਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਲੋਹਿਤਂ ਲੋਹਿਤਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਲੋਹਿਤਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਸੇਦੋ ਵਣ੍ਣਤੋ ਪਸਨ੍ਨਤਿਲਤੇਲਵਣ੍ਣੋਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਓਕਾਸਸਣ੍ਠਾਨੋ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤੋ. ਓਕਾਸਤੋ ਸੇਦਸ੍ਸ ਓਕਾਸੋ ਨਾਮ ਨਿਬਦ੍ਧੋ ਨਤ੍ਥਿ, ਯਤ੍ਥ ਸੇਦੋ ਲੋਹਿਤਂ ਵਿਯ ਸਦਾ ਤਿਟ੍ਠੇਯ੍ਯ. ਯਸ੍ਮਾ ਵਾ ਯਦਾ ਅਗ੍ਗਿਸਨ੍ਤਾਪਸੂਰਿਯਸਨ੍ਤਾਪਉਤੁਵਿਕਾਰਾਦੀਹਿ ਸਰੀਰਂ ਸਨ੍ਤਪਤਿ, ਅਥ ਉਦਕਤੋ ਅਬ੍ਬੂਲ਼੍ਹਮਤ੍ਤਵਿਸਮਚ੍ਛਿਨ੍ਨਭਿਸਮੁਲ਼ਾਲਕੁਮੁਦਨਾਲਕਲਾਪਉਦਕਮਿਵ ਸਬ੍ਬਕੇਸਲੋਮਕੂਪਵਿਵਰੇਹਿ ਪਗ੍ਘਰਤਿ. ਤਸ੍ਮਾ ਤੇਸਂ ਕੇਸਲੋਮਕੂਪਵਿਵਰਾਨਂ ਵਸੇਨ ਤਂ ਸਣ੍ਠਾਨਤੋ ਵਵਤ੍ਥਪੇਤਿ. ‘‘ਸੇਦਪਰਿਗ੍ਗਣ੍ਹਕੇਨ ਚ ਯੋਗਾਵਚਰੇਨ ਕੇਸਲੋਮਕੂਪਵਿਵਰੇ ਪੂਰੇਤ੍ਵਾ ਠਿਤਵਸੇਨੇਵ ਸੇਦੋ ਮਨਸਿਕਾਤਬ੍ਬੋ’’ਤਿ ਵੁਤ੍ਤਂ ਪੁਬ੍ਬਾਚਰਿਯੇਹਿ.

ਤਤ੍ਥ ਯਥਾ ਭਿਸਮੁਲ਼ਾਲਕੁਮੁਦਨਾਲਕਲਾਪਵਿਵਰੇਹਿ ਪਗ੍ਘਰਨ੍ਤਂ ਉਦਕਂ ਨ ਜਾਨਾਤਿ ‘‘ਅਹਂ ਭਿਸਮੁਲ਼ਾਲਕੁਮੁਦਨਾਲਕਲਾਪਵਿਵਰੇਹਿ ਪਗ੍ਘਰਾਮੀ’’ਤਿ, ਨਪਿ ਭਿਸਮੁਲ਼ਾਲਕੁਮੁਦਨਾਲਕਲਾਪਵਿਵਰਾ ਜਾਨਨ੍ਤਿ ‘‘ਅਮ੍ਹੇਹਿ ਉਦਕਂ ਪਗ੍ਘਰਤੀ’’ਤਿ; ਏਵਮੇਵ ਨ ਸੇਦੋ ਜਾਨਾਤਿ ‘‘ਅਹਂ ਕੇਸਲੋਮਕੂਪਵਿਵਰੇਹਿ ਪਗ੍ਘਰਾਮੀ’’ਤਿ, ਨਪਿ ਕੇਸਲੋਮਕੂਪਵਿਵਰਾ ਜਾਨਨ੍ਤਿ ‘‘ਅਮ੍ਹੇਹਿ ਸੇਦੋ ਪਗ੍ਘਰਤੀ’’ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਸੇਦੋ ਸੇਦਭਾਗੇਨ ਪਰਿਚ੍ਛਿਨ੍ਨੋਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਸੇਦਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਚਮ੍ਮਮਂਸਨ੍ਤਰੇ ਮੇਦੋ ਵਣ੍ਣਤੋ ਫਾਲਿਤਹਲਿਦ੍ਦਿਵਣ੍ਣੋਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਓਕਾਸਸਣ੍ਠਾਨੋ. ਤਥਾ ਹਿ ਸੁਖਿਨੋ ਥੂਲਸਰੀਰਸ੍ਸ ਚਮ੍ਮਮਂਸਨ੍ਤਰੇ ਫਰਿਤ੍ਵਾ ਠਿਤੋ ਹਲਿਦ੍ਦਿਰਤ੍ਤਦੁਕੂਲਪਿਲੋਤਿਕਸਣ੍ਠਾਨੋ, ਕਿਸਸਰੀਰਸ੍ਸ ਜਙ੍ਘਮਂਸਊਰੁਮਂਸਪਿਟ੍ਠਿਕਣ੍ਟਕਨਿਸ੍ਸਿਤਪਿਟ੍ਠਿਮਂਸਉਦਰਪਟਲਮਂਸਾਨਿ ਨਿਸ੍ਸਾਯ ਸਂਵੇਲ੍ਲਿਤ੍ਵਾ ਠਪਿਤਹਲਿਦ੍ਦਿਰਤ੍ਤਦੁਕੂਲਪਿਲੋਤਿਕਖਣ੍ਡਸਣ੍ਠਾਨੋ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤੋ. ਓਕਾਸਤੋ ਥੂਲਸਰੀਰਸ੍ਸ ਸਕਲਸਰੀਰਂ ਫਰਿਤ੍ਵਾ ਕਿਸਸ੍ਸ ਜਙ੍ਘਾਮਂਸਾਦੀਨਿ ਨਿਸ੍ਸਾਯ ਠਿਤੋ, ਯੋ ਸਿਨੇਹਸਙ੍ਖਾਤੋਪਿ ਹੁਤ੍ਵਾ ਪਰਮਜੇਗੁਚ੍ਛਤ੍ਤਾ ਨ ਮਤ੍ਥਕਤੇਲਤ੍ਥਂ ਨ ਗਣ੍ਡੂਸਤੇਲਤ੍ਥਂ ਨ ਦੀਪਜਾਲਨਤ੍ਥਂ ਸਙ੍ਗਯ੍ਹਤਿ.

ਤਤ੍ਥ ਯਥਾ ਮਂਸਪੁਞ੍ਜਂ ਨਿਸ੍ਸਾਯ ਠਿਤਾ ਹਲਿਦ੍ਦਿਰਤ੍ਤਦੁਕੂਲਪਿਲੋਤਿਕਾ ਨ ਜਾਨਾਤਿ ‘‘ਅਹਂ ਮਂਸਪੁਞ੍ਜਂ ਨਿਸ੍ਸਾਯ ਠਿਤਾ’’ਤਿ, ਨਪਿ ਮਂਸਪੁਞ੍ਜੋ ਜਾਨਾਤਿ ‘‘ਹਲਿਦ੍ਦਿਰਤ੍ਤਦੁਕੂਲਪਿਲੋਤਿਕਾ ਮਂ ਨਿਸ੍ਸਾਯ ਠਿਤਾ’’ਤਿ; ਏਵਮੇਵ ਨ ਮੇਦੋ ਜਾਨਾਤਿ ‘‘ਅਹਂ ਸਕਲਸਰੀਰਂ ਜਙ੍ਘਾਦੀਸੁ ਵਾ ਮਂਸਂ ਨਿਸ੍ਸਾਯ ਠਿਤੋ’’ਤਿ, ਨਪਿ ਸਕਲਸਰੀਰਂ ਜਾਨਾਤਿ ਜਙ੍ਘਾਦੀਸੁ ਵਾ ਮਂਸਂ ‘‘ਮੇਦੋ ਮਂ ਨਿਸ੍ਸਾਯ ਠਿਤੋ’’ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਮੇਦੋ ਹੇਟ੍ਠਾ ਮਂਸੇਨ, ਉਪਰਿ ਚਮ੍ਮੇਨ, ਸਮਨ੍ਤਤੋ ਮੇਦਭਾਗੇਨ ਪਰਿਚ੍ਛਿਨ੍ਨੋਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਮੇਦਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਅਸ੍ਸੁ ਵਣ੍ਣਤੋ ਪਸਨ੍ਨਤਿਲਤੇਲਵਣ੍ਣਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਓਕਾਸਸਣ੍ਠਾਨਂ. ਦਿਸਤੋ ਉਪਰਿਮਾਯ ਦਿਸਾਯ ਜਾਤਂ. ਓਕਾਸਤੋ ਅਕ੍ਖਿਕੂਪਕੇਸੁ ਠਿਤਨ੍ਤਿ. ਨ ਚੇਤਂ ਪਿਤ੍ਤਕੋਸਕੇ ਪਿਤ੍ਤਮਿਵ ਅਕ੍ਖਿਕੂਪਕੇਸੁ ਸਦਾ ਸਨ੍ਨਿਚਿਤਂ ਹੁਤ੍ਵਾ ਤਿਟ੍ਠਤਿ, ਕਿਨ੍ਤੁ ਯਦਾ ਸੋਮਨਸ੍ਸਜਾਤਾ ਸਤ੍ਤਾ ਮਹਾਹਸਿਤਂ ਹਸਨ੍ਤਿ, ਦੋਮਨਸ੍ਸਜਾਤਾ ਰੋਦਨ੍ਤਿ ਪਰਿਦੇਵਨ੍ਤਿ, ਤਥਾਰੂਪਂ ਵਿਸਮਾਹਾਰਂ ਵਾ ਹਰਨ੍ਤਿ, ਯਦਾ ਚ ਤੇਸਂ ਅਕ੍ਖੀਨਿ ਧੂਮਰਜਪਂਸੁਕਾਦੀਹਿ ਅਭਿਹਞ੍ਞਨ੍ਤਿ, ਤਦਾ ਏਤੇਹਿ ਸੋਮਨਸ੍ਸਦੋਮਨਸ੍ਸਵਿਸਮਾਹਾਰਾਦੀਹਿ ਸਮੁਟ੍ਠਹਿਤ੍ਵਾ ਅਸ੍ਸੁ ਅਕ੍ਖਿਕੂਪਕੇਸੁ ਪੂਰੇਤ੍ਵਾ ਤਿਟ੍ਠਤਿ ਪਗ੍ਘਰਤਿ ਚ. ‘‘ਅਸ੍ਸੁਪਰਿਗ੍ਗਣ੍ਹਕੇਨ ਚ ਯੋਗਾਵਚਰੇਨ ਅਕ੍ਖਿਕੂਪਕੇ ਪੂਰੇਤ੍ਵਾ ਠਿਤਵਸੇਨੇਵ ਤਂ ਮਨਸਿਕਾਤਬ੍ਬ’’ਨ੍ਤਿ ਪੁਬ੍ਬਾਚਰਿਯਾ ਵਣ੍ਣਯਨ੍ਤਿ.

ਤਤ੍ਥ ਯਥਾ ਮਤ੍ਥਕਚ੍ਛਿਨ੍ਨਤਰੁਣਤਾਲਟ੍ਠਿਕੂਪਕੇਸੁ ਠਿਤਂ ਉਦਕਂ ਨ ਜਾਨਾਤਿ ‘‘ਅਹਂ ਮਤ੍ਥਕਚ੍ਛਿਨ੍ਨਤਰੁਣਤਾਲਟ੍ਠਿਕੂਪਕੇਸੁ ਠਿਤ’’ਨ੍ਤਿ, ਨਪਿ ਮਤ੍ਥਕਚ੍ਛਿਨ੍ਨਤਰੁਣਤਾਲਟ੍ਠਿਕੂਪਕਾ ਜਾਨਨ੍ਤਿ ‘‘ਅਮ੍ਹੇਸੁ ਉਦਕਂ ਠਿਤ’’ਨ੍ਤਿ; ਏਵਮੇਵ ਨ ਅਸ੍ਸੁ ਜਾਨਾਤਿ ‘‘ਅਹਂ ਅਕ੍ਖਿਕੂਪਕੇਸੁ ਠਿਤ’’ਨ੍ਤਿ, ਨਪਿ ਅਕ੍ਖਿਕੂਪਕਾ ਜਾਨਨ੍ਤਿ ‘‘ਅਮ੍ਹੇਸੁ ਅਸ੍ਸੁ ਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਅਸ੍ਸੁ ਅਸ੍ਸੁਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਅਸ੍ਸੁਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਵਿਲੀਨਸਿਨੇਹਸਙ੍ਖਾਤਾ ਵਸਾ ਵਣ੍ਣਤੋ ਆਚਾਮੇ ਆਸਿਤ੍ਤਤੇਲਵਣ੍ਣਾਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਓਕਾਸਸਣ੍ਠਾਨਾ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤਾ. ਓਕਾਸਤੋ ਹਤ੍ਥਤਲਹਤ੍ਥਪਿਟ੍ਠਿਪਾਦਤਲਪਾਦਪਿਟ੍ਠਿਨਾਸਾਪੁਟਨਲਾਟਅਂਸਕੂਟੇਸੁ ਠਿਤਾਤਿ. ਨ ਚੇਸਾ ਏਤੇਸੁ ਓਕਾਸੇਸੁ ਸਦਾ ਵਿਲੀਨਾ ਏਵ ਹੁਤ੍ਵਾ ਤਿਟ੍ਠਤਿ, ਕਿਨ੍ਤੁ ਯਦਾ ਅਗ੍ਗਿਸਨ੍ਤਾਪਸੂਰਿਯਸਨ੍ਤਾਪਉਤੁਵਿਸਭਾਗਧਾਤੁਵਿਸਭਾਗੇਹਿ ਤੇ ਪਦੇਸਾ ਉਸ੍ਮਾਜਾਤਾ ਹੋਨ੍ਤਿ, ਤਦਾ ਤਤ੍ਥ ਵਿਲੀਨਾਵ ਹੁਤ੍ਵਾ ਪਸਨ੍ਨਸਲਿਲਾਸੁ ਉਦਕਸੋਣ੍ਡਿਕਾਸੁ ਨੀਹਾਰੋ ਵਿਯ ਸਰਤਿ.

ਤਤ੍ਥ ਯਥਾ ਉਦਕਸੋਣ੍ਡਿਯੋ ਅਜ੍ਝੋਤ੍ਥਰਿਤ੍ਵਾ ਠਿਤੋ ਨੀਹਾਰੋ ਨ ਜਾਨਾਤਿ ‘‘ਅਹਂ ਉਦਕਸੋਣ੍ਡਿਯੋ ਅਜ੍ਝੋਤ੍ਥਰਿਤ੍ਵਾ ਠਿਤੋ’’ਤਿ, ਨਪਿ ਉਦਕਸੋਣ੍ਡਿਯੋ ਜਾਨਨ੍ਤਿ ‘‘ਨੀਹਾਰੋ ਅਮ੍ਹੇ ਅਜ੍ਝੋਤ੍ਥਰਿਤ੍ਵਾ ਠਿਤੋ’’ਤਿ; ਏਵਮੇਵ ਨ ਵਸਾ ਜਾਨਾਤਿ ‘‘ਅਹਂ ਹਤ੍ਥਤਲਾਦੀਨਿ ਅਜ੍ਝੋਤ੍ਥਰਿਤ੍ਵਾ ਠਿਤਾ’’ਤਿ, ਨਪਿ ਹਤ੍ਥਤਲਾਦੀਨਿ ਜਾਨਨ੍ਤਿ ‘‘ਵਸਾ ਅਮ੍ਹੇ ਅਜ੍ਝੋਤ੍ਥਰਿਤ੍ਵਾ ਠਿਤਾ’’ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਵਸਾ ਵਸਾਭਾਗੇਨ ਪਰਿਚ੍ਛਿਨ੍ਨਾਤਿ ਵਵਤ੍ਥਪੇਤਿ. ਅਯਮੇਤਿਸ੍ਸਾ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਵਸਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਮੁਖਸ੍ਸਬ੍ਭਨ੍ਤਰੇ ਖੇਲ਼ੋ ਵਣ੍ਣਤੋ ਸੇਤੋ ਫੇਣਵਣ੍ਣੋਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਓਕਾਸਸਣ੍ਠਾਨੋਤਿ, ਸਮੁਦ੍ਦਫੇਣਸਣ੍ਠਾਨੋਤਿਪਿ ਏਕੇ. ਦਿਸਤੋ ਉਪਰਿਮਾਯ ਦਿਸਾਯ ਜਾਤੋ. ਓਕਾਸਤੋ ਉਭੋਹਿ ਕਪੋਲਪਸ੍ਸੇਹਿ ਓਰੋਹਿਤ੍ਵਾ ਜਿਵ੍ਹਾਯ ਠਿਤੋਤਿ. ਨ ਚੇਸੋ ਏਤ੍ਥ ਸਦਾ ਸਨ੍ਨਿਚਿਤੋ ਹੁਤ੍ਵਾ ਤਿਟ੍ਠਤਿ, ਕਿਨ੍ਤੁ ਯਦਾ ਸਤ੍ਤਾ ਤਥਾਰੂਪਂ ਆਹਾਰਂ ਪਸ੍ਸਨ੍ਤਿ ਵਾ ਸਰਨ੍ਤਿ ਵਾ, ਉਣ੍ਹਤਿਤ੍ਤਕਟੁਕਲੋਣਮ੍ਬਿਲਾਨਂ ਵਾ ਕਿਞ੍ਚਿ ਮੁਖੇ ਠਪੇਨ੍ਤਿ. ਯਦਾ ਚ ਤੇਸਂ ਹਦਯਂ ਆਗਿਲਾਯਤਿ, ਕਿਸ੍ਮਿਞ੍ਚਿਦੇਵ ਵਾ ਜਿਗੁਚ੍ਛਾ ਉਪ੍ਪਜ੍ਜਤਿ, ਤਦਾ ਖੇਲ਼ੋ ਉਪ੍ਪਜ੍ਜਿਤ੍ਵਾ ਉਭੋਹਿ ਕਪੋਲਪਸ੍ਸੇਹਿ ਓਰੋਹਿਤ੍ਵਾ ਜਿਵ੍ਹਾਯ ਸਣ੍ਠਾਤਿ. ਅਗ੍ਗਜਿਵ੍ਹਾਯ ਚੇਸ ਖੇਲ਼ੋ ਤਨੁਕੋ ਹੋਤਿ, ਮੂਲਜਿਵ੍ਹਾਯ ਬਹਲੋ, ਮੁਖੇ ਪਕ੍ਖਿਤ੍ਤਞ੍ਚ ਪੁਥੁਕਂ ਵਾ ਤਣ੍ਡੁਲਂ ਵਾ ਅਞ੍ਞਂ ਵਾ ਕਿਞ੍ਚਿ ਖਾਦਨੀਯਂ ਨਦਿਪੁਲਿਨੇ ਖਤਕੂਪਸਲਿਲਮਿਵ ਪਰਿਕ੍ਖਯਮਗਚ੍ਛਨ੍ਤੋਵ ਸਦਾ ਤੇਮਨਸਮਤ੍ਥੋ ਹੋਤਿ.

ਤਤ੍ਥ ਯਥਾ ਨਦਿਪੁਲਿਨੇ ਖਤਕੂਪਤਲੇ ਸਣ੍ਠਿਤਂ ਉਦਕਂ ਨ ਜਾਨਾਤਿ ‘‘ਅਹਂ ਕੂਪਤਲੇ ਸਣ੍ਠਿਤ’’ਨ੍ਤਿ, ਨਪਿ ਕੂਪਤਲਂ ਜਾਨਾਤਿ ‘‘ਮਯਿ ਉਦਕਂ ਠਿਤ’’ਨ੍ਤਿ; ਏਵਮੇਵ ਨ ਖੇਲ਼ੋ ਜਾਨਾਤਿ ‘‘ਅਹਂ ਉਭੋਹਿ ਕਪੋਲਪਸ੍ਸੇਹਿ ਓਰੋਹਿਤ੍ਵਾ ਜਿਵ੍ਹਾਤਲੇ ਸਣ੍ਠਿਤੋ’’ਤਿ, ਨਪਿ ਜਿਵ੍ਹਾਤਲਂ ਜਾਨਾਤਿ ‘‘ਮਯਿ ਉਭੋਹਿ ਕਪੋਲਪਸ੍ਸੇਹਿ ਓਰੋਹਿਤ੍ਵਾ ਖੇਲ਼ੋ ਸਣ੍ਠਿਤੋ’’ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਖੇਲ਼ੋ ਖੇਲ਼ਭਾਗੇਨ ਪਰਿਚ੍ਛਿਨ੍ਨੋਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਖੇਲ਼ਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਸਰੀਰੇ ਸਿਙ੍ਘਾਣਿਕਾ ਵਣ੍ਣਤੋ ਸੇਤਾ ਤਰੁਣਤਾਲਮਿਞ੍ਜਵਣ੍ਣਾਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਓਕਾਸਸਣ੍ਠਾਨਾ, ਸੇਦੇਤ੍ਵਾ ਸੇਦੇਤ੍ਵਾ ਨਾਸਾਪੁਟੇ ਨਿਰਨ੍ਤਰਂ ਪਕ੍ਖਿਤ੍ਤਵੇਤ੍ਤਙ੍ਕੁਰਸਣ੍ਠਾਨਾਤਿਪਿ ਏਕੇ. ਦਿਸਤੋ ਉਪਰਿਮਾਯ ਦਿਸਾਯ ਜਾਤਾ. ਓਕਾਸਤੋ ਨਾਸਾਪੁਟੇ ਪੂਰੇਤ੍ਵਾ ਠਿਤਾਤਿ. ਨ ਚੇਸਾ ਏਤ੍ਥ ਸਦਾ ਸਨ੍ਨਿਚਿਤਾ ਹੁਤ੍ਵਾ ਤਿਟ੍ਠਤਿ, ਕਿਨ੍ਤੁ ਸੇਯ੍ਯਥਾਪਿ ਨਾਮ ਪੁਰਿਸੋ ਪਦੁਮਿਨਿਪਤ੍ਤੇ ਦਧਿਂ ਬਨ੍ਧਿਤ੍ਵਾ ਹੇਟ੍ਠਾ ਪਦੁਮਿਨਿਪਤ੍ਤਂ ਕਣ੍ਟਕੇਨ ਵਿਜ੍ਝੇਯ੍ਯ, ਅਥ ਤੇਨ ਛਿਦ੍ਦੇਨ ਦਧਿਪਿਣ੍ਡਂ ਗਲ਼ਿਤ੍ਵਾ ਬਹਿ ਪਪਤੇਯ੍ਯ; ਏਵਮੇਵ ਯਦਾ ਸਤ੍ਤਾ ਰੋਦਨ੍ਤਿ, ਵਿਸਭਾਗਾਹਾਰਉਤੁਵਸੇਨ ਵਾ ਸਞ੍ਜਾਤਧਾਤੁਕ੍ਖੋਭਾ ਹੋਨ੍ਤਿ, ਤਦਾ ਅਨ੍ਤੋਸੀਸਤੋ ਪੂਤਿਸੇਮ੍ਹਭਾਵਂ ਆਪਨ੍ਨਂ ਮਤ੍ਥਲੁਙ੍ਗਂ ਗਲ਼ਿਤ੍ਵਾ ਤਾਲੁਮਤ੍ਥਕਵਿਵਰੇਨ ਓਤਰਿਤ੍ਵਾ ਨਾਸਾਪੁਟੇ ਪੂਰੇਤ੍ਵਾ ਤਿਟ੍ਠਤਿ.

ਤਤ੍ਥ ਯਥਾ ਸਿਪ੍ਪਿਕਾਯ ਪਕ੍ਖਿਤ੍ਤਂ ਪੂਤਿਦਧਿ ਨ ਜਾਨਾਤਿ ‘‘ਅਹਂ ਸਿਪ੍ਪਿਕਾਯ ਠਿਤ’’ਨ੍ਤਿ, ਨਪਿ ਸਿਪ੍ਪਿਕਾ ਜਾਨਾਤਿ ‘‘ਮਯਿ ਪੂਤਿਕਂ ਦਧਿ ਠਿਤ’’ਨ੍ਤਿ; ਏਵਮੇਵ ਨ ਸਿਙ੍ਘਾਣਿਕਾ ਜਾਨਾਤਿ ‘‘ਅਹਂ ਨਾਸਾਪੁਟੇਸੁ ਠਿਤਾ’’ਤਿ, ਨਪਿ ਨਾਸਾਪੁਟਾ ਜਾਨਨ੍ਤਿ ‘‘ਅਮ੍ਹੇਸੁ ਸਿਙ੍ਘਾਣਿਕਾ ਠਿਤਾ’’ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਸਿਙ੍ਘਾਣਿਕਾ ਸਿਙ੍ਘਾਣਿਕਭਾਗੇਨ ਪਰਿਚ੍ਛਿਨ੍ਨਾਤਿ ਵਵਤ੍ਥਪੇਤਿ. ਅਯਮੇਤਿਸ੍ਸਾ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਸਿਙ੍ਘਾਣਿਕਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਅਨ੍ਤੋਸਰੀਰੇ ਲਸਿਕਾਤਿ ਸਰੀਰਸਨ੍ਧੀਨਂ ਅਬ੍ਭਨ੍ਤਰੇ ਪਿਚ੍ਛਿਲਕੁਣਪਂ. ਸਾ ਵਣ੍ਣਤੋ ਕਣਿਕਾਰਨਿਯ੍ਯਾਸਵਣ੍ਣਾਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਓਕਾਸਸਣ੍ਠਾਨਾ. ਦਿਸਤੋ ਦ੍ਵੀਸੁ ਦਿਸਾਸੁ ਜਾਤਾ. ਓਕਾਸਤੋ ਅਟ੍ਠਿਸਨ੍ਧੀਨਂ ਅਬ੍ਭਞ੍ਜਨਕਿਚ੍ਚਂ ਸਾਧਯਮਾਨਾ ਅਸੀਤਿਸਤਸਨ੍ਧੀਨਂ ਅਬ੍ਭਨ੍ਤਰੇ ਠਿਤਾਤਿ. ਯਸ੍ਸ ਚੇਸਾ ਮਨ੍ਦਾ ਹੋਤਿ, ਤਸ੍ਸ ਉਟ੍ਠਹਨ੍ਤਸ੍ਸ ਨਿਸੀਦਨ੍ਤਸ੍ਸ ਅਭਿਕ੍ਕਮਨ੍ਤਸ੍ਸ ਪਟਿਕ੍ਕਮਨ੍ਤਸ੍ਸ ਸਮਿਞ੍ਜਨ੍ਤਸ੍ਸ ਪਸਾਰੇਨ੍ਤਸ੍ਸ ਅਟ੍ਠਿਕਾਨਿ ਕਟਕਟਾਯਨ੍ਤਿ, ਅਚ੍ਛਰਿਕਾਸਦ੍ਦਂ ਕਰੋਨ੍ਤੋ ਵਿਯ ਵਿਚਰਤਿ, ਏਕਯੋਜਨਦ੍ਵਿਯੋਜਨਮਤ੍ਤਮ੍ਪਿ ਅਦ੍ਧਾਨਂ ਗਤਸ੍ਸ ਵਾਯੋਧਾਤੁ ਕੁਪ੍ਪਤਿ, ਗਤ੍ਤਾਨਿ ਦੁਕ੍ਖਨ੍ਤਿ ਯਸ੍ਸ ਪਨ ਚੇਸਾ ਬਹੁਕਾ ਹੋਤਿ, ਤਸ੍ਸ ਉਟ੍ਠਾਨਨਿਸਜ੍ਜਾਦੀਸੁ ਨ ਅਟ੍ਠੀਨਿ ਕਟਕਟਾਯਨ੍ਤਿ, ਦੀਘਮ੍ਪਿ ਅਦ੍ਧਾਨਂ ਗਤਸ੍ਸ ਨ ਵਾਯੋਧਾਤੁ ਕੁਪ੍ਪਤਿ, ਨ ਗਤ੍ਤਾਨਿ ਦੁਕ੍ਖਨ੍ਤਿ.

ਤਤ੍ਥ ਯਥਾ ਅਬ੍ਭਞ੍ਜਨਤੇਲਂ ਨ ਜਾਨਾਤਿ ‘‘ਅਹਂ ਅਕ੍ਖਂ ਅਬ੍ਭਞ੍ਜਿਤ੍ਵਾ ਠਿਤ’’ਨ੍ਤਿ, ਨਪਿ ਅਕ੍ਖੋ ਜਾਨਾਤਿ ‘‘ਮਂ ਤੇਲਂ ਅਬ੍ਭਞ੍ਜਿਤ੍ਵਾ ਠਿਤ’’ਨ੍ਤਿ; ਏਵਮੇਵ ਨ ਲਸਿਕਾ ਜਾਨਾਤਿ ‘‘ਅਹਂ ਅਸੀਤਿਸਤਸਨ੍ਧਿਯੋ ਅਬ੍ਭਞ੍ਜਿਤ੍ਵਾ ਠਿਤਾ’’ਤਿ, ਨਪਿ ਅਸੀਤਿਸਤਸਨ੍ਧਿਯੋ ਜਾਨਨ੍ਤਿ ‘‘ਲਸਿਕਾ ਅਮ੍ਹੇ ਅਬ੍ਭਞ੍ਜਿਤ੍ਵਾ ਠਿਤਾ’’ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਲਸਿਕਾ ਲਸਿਕਭਾਗੇਨ ਪਰਿਚ੍ਛਿਨ੍ਨਾਤਿ ਵਵਤ੍ਥਪੇਤਿ. ਅਯਮੇਤਿਸ੍ਸਾ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਲਸਿਕਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਤੋ ਪਰਂ ਅਨ੍ਤੋਸਰੀਰੇ ਮੁਤ੍ਤਂ ਵਣ੍ਣਤੋ ਮਾਸਖਾਰੋਦਕਵਣ੍ਣਨ੍ਤਿ ਵਵਤ੍ਥਪੇਤਿ. ਸਣ੍ਠਾਨਤੋ ਉਦਕਂ ਪੂਰੇਤ੍ਵਾ ਅਧੋਮੁਖਠਪਿਤਉਦਕਕੁਮ੍ਭਅਨ੍ਤਰਗਤਉਦਕਸਣ੍ਠਾਨਂ. ਦਿਸਤੋ ਹੇਟ੍ਠਿਮਾਯ ਦਿਸਾਯ ਜਾਤਂ. ਓਕਾਸਤੋ ਵਤ੍ਥਿਸ੍ਸਬ੍ਭਨ੍ਤਰੇ ਠਿਤਨ੍ਤਿ. ਵਤ੍ਥਿ ਨਾਮ ਵਤ੍ਥਿਪੁਟੋ ਵੁਚ੍ਚਤਿ, ਯਤ੍ਥ ਸੇਯ੍ਯਥਾਪਿ ਨਾਮ ਚਨ੍ਦਨਿਕਾਯ ਪਕ੍ਖਿਤ੍ਤੇ ਅਮੁਖੇ ਪੇਲ਼ਾਘਟੇ ਚਨ੍ਦਨਿਕਾਰਸੋ ਪਵਿਸਤਿ, ਨ ਚਸ੍ਸ ਪਵਿਸਨਮਗ੍ਗੋ ਪਞ੍ਞਾਯਤਿ; ਏਵਮੇਵ ਸਰੀਰਤੋ ਮੁਤ੍ਤਂ ਪਵਿਸਤਿ, ਨ ਚਸ੍ਸ ਪਵਿਸਨਮਗ੍ਗੋ ਪਞ੍ਞਾਯਤਿ ਨਿਕ੍ਖਮਨਮਗ੍ਗੋ ਏਵ ਤੁ ਪਾਕਟੋ ਹੋਤਿ, ਯਮ੍ਹਿ ਚ ਮੁਤ੍ਤਸ੍ਸ ਭਰਿਤੇ ‘‘ਪਸ੍ਸਾਵਂ ਕਰੋਮਾ’’ਤਿ ਸਤ੍ਤਾਨਂ ਆਯੂਹਨਂ ਹੋਤਿ. ਤਤ੍ਥ ਯਥਾ ਚਨ੍ਦਨਿਕਾਯ ਪਕ੍ਖਿਤ੍ਤੇ ਅਮੁਖੇ ਪੇਲ਼ਾਘਟੇ ਠਿਤੋ ਚਨ੍ਦਨਿਕਾਰਸੋ ਨ ਜਾਨਾਤਿ ‘‘ਅਹਂ ਅਮੁਖੇ ਪੇਲ਼ਾਘਟੇ ਠਿਤੋ’’ਤਿ, ਨਪਿ ਪੇਲ਼ਾਘਟੋ ਜਾਨਾਤਿ ‘‘ਮਯਿ ਚਨ੍ਦਨਿਕਾਰਸੋ ਠਿਤੋ’’ਤਿ; ਏਵਮੇਵ ਮੁਤ੍ਤਂ ਨ ਜਾਨਾਤਿ ‘‘ਅਹਂ ਵਤ੍ਥਿਮ੍ਹਿ ਠਿਤ’’ਨ੍ਤਿ, ਨਪਿ ਵਤ੍ਥਿ ਜਾਨਾਤਿ ‘‘ਮਯਿ ਮੁਤ੍ਤਂ ਠਿਤ’’ਨ੍ਤਿ. ਆਭੋਗਪਚ੍ਚਵੇਕ੍ਖਣਵਿਰਹਿਤਾ ਹਿ ਏਤੇ ਧਮ੍ਮਾ…ਪੇ… ਨ ਪੁਗ੍ਗਲੋਤਿ. ਪਰਿਚ੍ਛੇਦਤੋ ਵਤ੍ਥਿਅਬ੍ਭਨ੍ਤਰੇਨ ਚੇਵ ਮੁਤ੍ਤਭਾਗੇਨ ਚ ਪਰਿਚ੍ਛਿਨ੍ਨਨ੍ਤਿ ਵਵਤ੍ਥਪੇਤਿ. ਅਯਮੇਤਸ੍ਸ ਸਭਾਗਪਰਿਚ੍ਛੇਦੋ, ਵਿਸਭਾਗਪਰਿਚ੍ਛੇਦੋ ਪਨ ਕੇਸਸਦਿਸੋ ਏਵਾਤਿ ਏਵਂ ਮੁਤ੍ਤਂ ਵਣ੍ਣਾਦਿਤੋ ਵਵਤ੍ਥਪੇਤਿ. ਏਵਮਯਂ ਇਮਂ ਦ੍ਵਤ੍ਤਿਂਸਾਕਾਰਂ ਵਣ੍ਣਾਦਿਤੋ ਵਵਤ੍ਥਪੇਤਿ.

ਤਸ੍ਸੇਵਂ ਇਮਂ ਦ੍ਵਤ੍ਤਿਂਸਾਕਾਰਂ ਵਣ੍ਣਾਦਿਵਸੇਨ ਵਵਤ੍ਥਪੇਨ੍ਤਸ੍ਸ ਤਂ ਤਂ ਭਾਵਨਾਨੁਯੋਗਂ ਆਗਮ੍ਮ ਕੇਸਾਦਯੋ ਪਗੁਣਾ ਹੋਨ੍ਤਿ, ਕੋਟ੍ਠਾਸਭਾਵੇਨ ਉਪਟ੍ਠਹਨ੍ਤਿ. ਤਤੋ ਪਭੁਤਿ ਸੇਯ੍ਯਥਾਪਿ ਨਾਮ ਚਕ੍ਖੁਮਤੋ ਪੁਰਿਸਸ੍ਸ ਦ੍ਵਤ੍ਤਿਂਸਵਣ੍ਣਾਨਂ ਪੁਪ੍ਫਾਨਂ ਏਕਸੁਤ੍ਤਗਨ੍ਥਿਤਂ ਮਾਲਂ ਓਲੋਕੇਨ੍ਤਸ੍ਸ ਸਬ੍ਬਪੁਪ੍ਫਾਨਿ ਅਪੁਬ੍ਬਾਪਰਿਯਮਿਵ ਪਾਕਟਾਨਿ ਹੋਨ੍ਤਿ; ਏਵਮੇਵ ‘‘ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ’’ਤਿ ਇਮਂ ਕਾਯਂ ਸਤਿਯਾ ਓਲੋਕੇਨ੍ਤਸ੍ਸ ਸਬ੍ਬੇ ਤੇ ਧਮ੍ਮਾ ਅਪੁਬ੍ਬਾਪਰਿਯਮਿਵ ਪਾਕਟਾ ਹੋਨ੍ਤਿ. ਕੇਸੇਸੁ ਆਵਜ੍ਜਿਤੇਸੁ ਅਸਣ੍ਠਹਮਾਨਾਵ ਸਤਿ ਯਾਵ ਮੁਤ੍ਤਂ, ਤਾਵ ਪਵਤ੍ਤਤਿ. ਤਤੋ ਪਭੁਤਿ ਤਸ੍ਸ ਆਹਿਣ੍ਡਨ੍ਤਾ ਮਨੁਸ੍ਸਤਿਰਚ੍ਛਾਨਾਦਯੋ ਚ ਸਤ੍ਤਾਕਾਰਂ ਵਿਜਹਿਤ੍ਵਾ ਕੋਟ੍ਠਾਸਰਾਸਿਵਸੇਨੇਵ ਉਪਟ੍ਠਹਨ੍ਤਿ, ਤੇਹਿ ਚ ਅਜ੍ਝੋਹਰਿਯਮਾਨਂ ਪਾਨਭੋਜਨਾਦਿ ਕੋਟ੍ਠਾਸਰਾਸਿਮ੍ਹਿ ਪਕ੍ਖਿਪ੍ਪਮਾਨਮਿਵ ਉਪਟ੍ਠਾਤੀਤਿ.

ਏਤ੍ਥਾਹ ‘‘ਅਥਾਨੇਨ ਤਤੋ ਪਰਂ ਕਿਂ ਕਾਤਬ੍ਬ’’ਨ੍ਤਿ? ਵੁਚ੍ਚਤੇ – ਤਦੇਵ ਨਿਮਿਤ੍ਤਂ ਆਸੇਵਿਤਬ੍ਬਂ ਭਾਵੇਤਬ੍ਬਂ ਬਹੁਲੀਕਾਤਬ੍ਬਂ ਸੁਵਵਤ੍ਥਿਤਂ ਵਵਤ੍ਥਪੇਤਬ੍ਬਂ. ਕਥਂ ਪਨਾਯਂ ਤਂ ਨਿਮਿਤ੍ਤਂ ਆਸੇਵਤਿ ਭਾਵੇਤਿ ਬਹੁਲੀਕਰੋਤਿ ਸੁਵਵਤ੍ਥਿਤਂ ਵਵਤ੍ਥਪੇਤੀਤਿ? ਅਯਞ੍ਹਿ ਤਂ ਕੇਸਾਦੀਨਂ ਕੋਟ੍ਠਾਸਭਾਵੇਨ ਉਪਟ੍ਠਾਨਨਿਮਿਤ੍ਤਂ ਆਸੇਵਤਿ, ਸਤਿਯਾ ਅਲ੍ਲਿਯਤਿ ਭਜਤਿ ਉਪਗਚ੍ਛਤਿ, ਸਤਿਗਬ੍ਭਂ ਗਣ੍ਹਾਪੇਤਿ. ਤਤ੍ਥ ਲਦ੍ਧਂ ਵਾ ਸਤਿਂ ਵਡ੍ਢੇਨ੍ਤੋ ਤਂ ਭਾਵੇਤੀਤਿ ਵੁਚ੍ਚਤਿ. ਬਹੁਲੀਕਰੋਤੀਤਿ ਪੁਨਪ੍ਪੁਨਂ ਸਤਿਸਮ੍ਪਯੁਤ੍ਤਂ ਵਿਤਕ੍ਕਵਿਚਾਰਬ੍ਭਾਹਤਂ ਕਰੋਤਿ. ਸੁਵਵਤ੍ਥਿਤਂ ਵਵਤ੍ਥਪੇਤੀਤਿ ਯਥਾ ਸੁਟ੍ਠੁ ਵਵਤ੍ਥਿਤਂ ਹੋਤਿ, ਨ ਪੁਨ ਅਨ੍ਤਰਧਾਨਂ ਗਚ੍ਛਤਿ, ਤਥਾ ਤਂ ਸਤਿਯਾ ਵਵਤ੍ਥਪੇਤਿ, ਉਪਧਾਰੇਤਿ ਉਪਨਿਬਨ੍ਧਤਿ.

ਅਥ ਵਾ ਯਂ ਪੁਬ੍ਬੇ ਅਨੁਪੁਬ੍ਬਤੋ, ਨਾਤਿਸੀਘਤੋ, ਨਾਤਿਸਣਿਕਤੋ, ਵਿਕ੍ਖੇਪਪ੍ਪਹਾਨਤੋ, ਪਣ੍ਣਤ੍ਤਿਸਮਤਿਕ੍ਕਮਨਤੋ, ਅਨੁਪੁਬ੍ਬਮੁਞ੍ਚਨਤੋ, ਲਕ੍ਖਣਤੋ, ਤਯੋ ਚ ਸੁਤ੍ਤਨ੍ਤਾਤਿ ਏਵਂ ਦਸਵਿਧਂ ਮਨਸਿਕਾਰਕੋਸਲ੍ਲਂ ਵੁਤ੍ਤਂ. ਤਤ੍ਥ ਅਨੁਪੁਬ੍ਬਤੋ ਮਨਸਿਕਰੋਨ੍ਤੋ ਆਸੇਵਤਿ, ਨਾਤਿਸੀਘਤੋ ਨਾਤਿਸਣਿਕਤੋ ਚ ਮਨਸਿਕਰੋਨ੍ਤੋ ਭਾਵੇਤਿ, ਵਿਕ੍ਖੇਪਪ੍ਪਹਾਨਤੋ ਮਨਸਿਕਰੋਨ੍ਤੋ ਬਹੁਲੀ ਕਰੋਤਿ, ਪਣ੍ਣਤ੍ਤਿਸਮਤਿਕ੍ਕਮਨਾਦਿਤੋ ਮਨਸਿਕਰੋਨ੍ਤੋ ਸੁਵਵਤ੍ਥਿਤਂ ਵਵਤ੍ਥਪੇਤੀਤਿ ਵੇਦਿਤਬ੍ਬੋ.

ਏਤ੍ਥਾਹ ‘‘ਕਥਂ ਪਨਾਯਂ ਅਨੁਪੁਬ੍ਬਾਦਿਵਸੇਨ ਏਤੇ ਧਮ੍ਮੇ ਮਨਸਿ ਕਰੋਤੀ’’ਤਿ? ਵੁਚ੍ਚਤੇ – ਅਯਞ੍ਹਿ ਕੇਸੇ ਮਨਸਿ ਕਰਿਤ੍ਵਾ ਤਦਨਨ੍ਤਰਂ ਲੋਮੇ ਮਨਸਿ ਕਰੋਤਿ, ਨ ਨਖੇ. ਤਥਾ ਲੋਮੇ ਮਨਸਿ ਕਰਿਤ੍ਵਾ ਤਦਨਨ੍ਤਰਂ ਨਖੇ ਮਨਸਿ ਕਰੋਤਿ, ਨ ਦਨ੍ਤੇ. ਏਸ ਨਯੋ ਸਬ੍ਬਤ੍ਥ. ਕਸ੍ਮਾ? ਉਪ੍ਪਟਿਪਾਟਿਯਾ ਹਿ ਮਨਸਿਕਰੋਨ੍ਤੋ ਸੇਯ੍ਯਥਾਪਿ ਨਾਮ ਅਕੁਸਲੋ ਪੁਰਿਸੋ ਦ੍ਵਤ੍ਤਿਂਸਪਦਂ ਨਿਸ੍ਸੇਣਿਂ ਉਪ੍ਪਟਿਪਾਟਿਯਾ ਆਰੋਹਨ੍ਤੋ ਕਿਲਨ੍ਤਕਾਯੋ ਤਤੋ ਨਿਸ੍ਸੇਣਿਤੋ ਪਪਤਤਿ, ਨ ਆਰੋਹਨਂ ਸਮ੍ਪਾਦੇਤਿ; ਏਵਮੇਵ ਭਾਵਨਾਸਮ੍ਪਤ੍ਤਿਵਸੇਨ ਅਧਿਗਨ੍ਤਬ੍ਬਸ੍ਸ ਅਸ੍ਸਾਦਸ੍ਸ ਅਨਧਿਗਮਨਤੋ ਕਿਲਨ੍ਤਚਿਤ੍ਤੋ ਦ੍ਵਤ੍ਤਿਂਸਾਕਾਰਭਾਵਨਾਤੋ ਪਪਤਤਿ, ਨ ਭਾਵਨਂ ਸਮ੍ਪਾਦੇਤੀਤਿ.

ਅਨੁਪੁਬ੍ਬਤੋ ਮਨਸਿਕਰੋਨ੍ਤੋਪਿ ਚ ਕੇਸਾ ਲੋਮਾਤਿ ਨਾਤਿਸੀਘਤੋਪਿ ਮਨਸਿ ਕਰੋਤਿ. ਅਤਿਸੀਘਤੋ ਹਿ ਮਨਸਿਕਰੋਨ੍ਤੋ ਸੇਯ੍ਯਥਾਪਿ ਨਾਮ ਅਦ੍ਧਾਨਂ ਗਚ੍ਛਨ੍ਤੋ ਪੁਰਿਸੋ ਸਮਵਿਸਮਰੁਕ੍ਖਥਲਨਿਨ੍ਨਦ੍ਵੇਧਾਪਥਾਦੀਨਿ ਮਗ੍ਗਨਿਮਿਤ੍ਤਾਨਿ ਉਪਲਕ੍ਖੇਤੁਂ ਨ ਸਕ੍ਕੋਤਿ, ਤਤੋ ਨ ਮਗ੍ਗਕੁਸਲੋ ਹੋਤਿ, ਅਦ੍ਧਾਨਞ੍ਚ ਪਰਿਕ੍ਖਯਂ ਨੇਤਿ; ਏਵਮੇਵ ਵਣ੍ਣਸਣ੍ਠਾਨਾਦੀਨਿ ਦ੍ਵਤ੍ਤਿਂਸਾਕਾਰਨਿਮਿਤ੍ਤਾਨਿ ਉਪਲਕ੍ਖੇਤੁਂ ਨ ਸਕ੍ਕੋਤਿ, ਤਤੋ ਨ ਦ੍ਵਤ੍ਤਿਂਸਾਕਾਰੇ ਕੁਸਲੋ ਹੋਤਿ, ਕਮ੍ਮਟ੍ਠਾਨਞ੍ਚ ਪਰਿਕ੍ਖਯਂ ਨੇਤਿ.

ਯਥਾ ਚ ਨਾਤਿਸੀਘਤੋ, ਏਵਂ ਨਾਤਿਸਣਿਕਤੋਪਿ ਮਨਸਿ ਕਰੋਤਿ. ਅਤਿਸਣਿਕਤੋ ਹਿ ਮਨਸਿਕਰੋਨ੍ਤੋ ਸੇਯ੍ਯਥਾਪਿ ਨਾਮ ਪੁਰਿਸੋ ਅਦ੍ਧਾਨਮਗ੍ਗਂ ਪਟਿਪਨ੍ਨੋ ਅਨ੍ਤਰਾਮਗ੍ਗੇ ਰੁਕ੍ਖਪਬ੍ਬਤਤਲ਼ਾਕਾਦੀਸੁ ਵਿਲਮ੍ਬਮਾਨੋ ਇਚ੍ਛਿਤਪ੍ਪਦੇਸਂ ਅਪਾਪੁਣਨ੍ਤੋ ਅਨ੍ਤਰਾਮਗ੍ਗੇਯੇਵ ਸੀਹਬ੍ਯਗ੍ਘਾਦੀਹਿ ਅਨਯਬ੍ਯਸਨਂ ਪਾਪੁਣਾਤਿ; ਏਵਮੇਵ ਦ੍ਵਤ੍ਤਿਂਸਾਕਾਰਭਾਵਨਾਸਮ੍ਪਦਂ ਅਪਾਪੁਣਨ੍ਤੋ ਭਾਵਨਾਵਿਚ੍ਛੇਦੇਨ ਅਨ੍ਤਰਾਯੇਵ ਕਾਮਵਿਤਕ੍ਕਾਦੀਹਿ ਅਨਯਬ੍ਯਸਨਂ ਪਾਪੁਣਾਤਿ.

ਨਾਤਿਸਣਿਕਤੋ ਮਨਸਿਕਰੋਨ੍ਤੋਪਿ ਚ ਵਿਕ੍ਖੇਪਪ੍ਪਹਾਨਤੋਪਿ ਮਨਸਿ ਕਰੋਤਿ. ਵਿਕ੍ਖੇਪਪ੍ਪਹਾਨਤੋ ਨਾਮ ਯਥਾ ਅਞ੍ਞੇਸੁ ਨਵਕਮ੍ਮਾਦੀਸੁ ਚਿਤ੍ਤਂ ਨ ਵਿਕ੍ਖਿਪਤਿ, ਤਥਾ ਮਨਸਿ ਕਰੋਤਿ. ਬਹਿਦ੍ਧਾ ਵਿਕ੍ਖੇਪਮਾਨਚਿਤ੍ਤੋ ਹਿ ਕੇਸਾਦੀਸ੍ਵੇਵ ਅਸਮਾਹਿਤਚੇਤੋਵਿਤਕ੍ਕੋ ਭਾਵਨਾਸਮ੍ਪਦਂ ਅਪਾਪੁਣਿਤ੍ਵਾ ਅਨ੍ਤਰਾਵ ਅਨਯਬ੍ਯਸਨਂ ਆਪਜ੍ਜਤਿ ਤਕ੍ਕਸਿਲਾਗਮਨੇ ਬੋਧਿਸਤ੍ਤਸ੍ਸ ਸਹਾਯਕਾ ਵਿਯ. ਅਵਿਕ੍ਖਿਪਮਾਨਚਿਤ੍ਤੋ ਪਨ ਕੇਸਾਦੀਸ੍ਵੇਵ ਸਮਾਹਿਤਚੇਤੋਵਿਤਕ੍ਕੋ ਭਾਵਨਾਸਮ੍ਪਦਂ ਪਾਪੁਣਾਤਿ ਬੋਧਿਸਤ੍ਤੋ ਵਿਯ ਤਕ੍ਕਸਿਲਰਜ੍ਜਸਮ੍ਪਦਨ੍ਤਿ. ਤਸ੍ਸੇਵਂ ਵਿਕ੍ਖੇਪਪ੍ਪਹਾਨਤੋ ਮਨਸਿਕਰੋਤੋ ਅਧਿਕਾਰਚਰਿਯਾਧਿਮੁਤ੍ਤੀਨਂ ਵਸੇਨ ਤੇ ਧਮ੍ਮਾ ਅਸੁਭਤੋ ਵਾ ਵਣ੍ਣਤੋ ਵਾ ਸੁਞ੍ਞਤੋ ਵਾ ਉਪਟ੍ਠਹਨ੍ਤਿ.

ਅਥ ਪਣ੍ਣਤ੍ਤਿਸਮਤਿਕ੍ਕਮਨਤੋ ਤੇ ਧਮ੍ਮੇ ਮਨਸਿ ਕਰੋਤਿ. ਪਣ੍ਣਤ੍ਤਿਸਮਤਿਕ੍ਕਮਨਤੋਤਿ ਕੇਸਾ ਲੋਮਾਤਿ ਏਵਮਾਦਿਵੋਹਾਰਂ ਸਮਤਿਕ੍ਕਮਿਤ੍ਵਾ ਵਿਸ੍ਸਜ੍ਜੇਤ੍ਵਾ ਯਥੂਪਟ੍ਠਿਤਾਨਂ ਅਸੁਭਾਦੀਨਂਯੇਵ ਵਸੇਨ ਮਨਸਿ ਕਰੋਤਿ. ਕਥਂ? ਯਥਾ ਅਰਞ੍ਞਨਿਵਾਸੂਪਗਤਾ ਮਨੁਸ੍ਸਾ ਅਪਰਿਚਿਤਭੂਮਿਭਾਗਤ੍ਤਾ ਉਦਕਟ੍ਠਾਨਸਞ੍ਜਾਨਨਤ੍ਥਂ ਸਾਖਾਭਙ੍ਗਾਦਿਨਿਮਿਤ੍ਤਂ ਕਤ੍ਵਾ ਤਦਨੁਸਾਰੇਨ ਗਨ੍ਤ੍ਵਾ ਉਦਕਂ ਪਰਿਭੁਞ੍ਜਨ੍ਤਿ, ਯਦਾ ਪਨ ਪਰਿਚਿਤਭੂਮਿਭਾਗਾ ਹੋਨ੍ਤਿ, ਅਥ ਤਂ ਨਿਮਿਤ੍ਤਂ ਵਿਸ੍ਸਜ੍ਜੇਤ੍ਵਾ ਅਮਨਸਿਕਤ੍ਵਾਵ ਉਦਕਟ੍ਠਾਨਂ ਉਪਸਙ੍ਕਮਿਤ੍ਵਾ ਉਦਕਂ ਪਰਿਭੁਞ੍ਜਨ੍ਤਿ, ਏਵਮੇਵਾਯਂ ਕੇਸਾ ਲੋਮਾਤਿਆਦਿਨਾ ਤਂਤਂਵੋਹਾਰਸ੍ਸ ਵਸੇਨ ਪਠਮਂ ਤੇ ਧਮ੍ਮੇ ਮਨਸਾਕਾਸਿ, ਤੇਸੁ ਧਮ੍ਮੇਸੁ ਅਸੁਭਾਦੀਨਂ ਅਞ੍ਞਤਰਵਸੇਨ ਉਪਟ੍ਠਹਨ੍ਤੇਸੁ ਤਂ ਵੋਹਾਰਂ ਸਮਤਿਕ੍ਕਮਿਤ੍ਵਾ ਵਿਸ੍ਸਜ੍ਜੇਤ੍ਵਾ ਅਸੁਭਾਦਿਤੋਵ ਮਨਸਿ ਕਰੋਤਿ.

ਏਤ੍ਥਾਹ ‘‘ਕਥਂ ਪਨਸ੍ਸ ਏਤੇ ਧਮ੍ਮਾ ਅਸੁਭਾਦਿਤੋ ਉਪਟ੍ਠਹਨ੍ਤਿ, ਕਥਂ ਵਣ੍ਣਤੋ, ਕਥਂ ਸੁਞ੍ਞਤੋ ਵਾ, ਕਥਞ੍ਚਾਯਮੇਤੇ ਅਸੁਭਤੋ ਮਨਸਿ ਕਰੋਤਿ, ਕਥਂ ਵਣ੍ਣਤੋ, ਕਥਂ ਸੁਞ੍ਞਤੋ ਵਾ’’ਤਿ? ਕੇਸਾ ਤਾਵਸ੍ਸ ਵਣ੍ਣਸਣ੍ਠਾਨਗਨ੍ਧਾਸਯੋਕਾਸਵਸੇਨ ਪਞ੍ਚਧਾ ਅਸੁਭਤੋ ਉਪਟ੍ਠਹਨ੍ਤਿ, ਪਞ੍ਚਧਾ ਏਵ ਅਯਮੇਤੇ ਅਸੁਭਤੋ ਮਨਸਿ ਕਰੋਤਿ. ਸੇਯ੍ਯਥਿਦਂ – ਕੇਸਾ ਨਾਮੇਤੇ ਵਣ੍ਣਤੋ ਅਸੁਭਾ ਪਰਮਪ੍ਪਟਿਕੂਲਜੇਗੁਚ੍ਛਾ. ਤਥਾ ਹਿ ਮਨੁਸ੍ਸਾ ਦਿਵਾ ਪਾਨਭੋਜਨੇ ਪਤਿਤਂ ਕੇਸਵਣ੍ਣਂ ਵਾਕਂ ਵਾ ਸੁਤ੍ਤਂ ਵਾ ਦਿਸ੍ਵਾ ਕੇਸਸਞ੍ਞਾਯ ਮਨੋਰਮਮ੍ਪਿ ਪਾਨਭੋਜਨਂ ਛਡ੍ਡੇਨ੍ਤਿ ਵਾ ਜਿਗੁਚ੍ਛਨ੍ਤਿ ਵਾ. ਸਣ੍ਠਾਨਤੋਪਿ ਅਸੁਭਾ. ਤਥਾ ਹਿ ਰਤ੍ਤਿਂ ਪਾਨਭੋਜਨੇ ਪਤਿਤਂ ਕੇਸਸਣ੍ਠਾਨਂ ਵਾਕਂ ਵਾ ਸੁਤ੍ਤਂ ਵਾ ਫੁਸਿਤ੍ਵਾ ਕੇਸਸਞ੍ਞਾਯ ਮਨੋਰਮਮ੍ਪਿ ਪਾਨਭੋਜਨਂ ਛਡ੍ਡੇਨ੍ਤਿ ਵਾ ਜਿਗੁਚ੍ਛਨ੍ਤਿ ਵਾ. ਗਨ੍ਧਤੋਪਿ ਅਸੁਭਾ. ਤਥਾ ਹਿ ਤੇਲਮਕ੍ਖਨਪੁਪ੍ਫਧੂਮਾਦਿਸਙ੍ਖਾਰੇਹਿ ਵਿਰਹਿਤਾਨਂ ਕੇਸਾਨਂ ਗਨ੍ਧੋ ਪਰਮਜੇਗੁਚ੍ਛੋ ਹੋਤਿ, ਅਗ੍ਗੀਸੁ ਪਕ੍ਖਿਤ੍ਤਸ੍ਸ ਕੇਸਸ੍ਸ ਗਨ੍ਧਂ ਘਾਯਿਤ੍ਵਾ ਸਤ੍ਤਾ ਨਾਸਿਕਂ ਪਿਧੇਨ੍ਤਿ, ਮੁਖਮ੍ਪਿ ਵਿਕੁਜ੍ਜੇਨ੍ਤਿ. ਆਸਯਤੋਪਿ ਅਸੁਭਾ. ਤਥਾ ਹਿ ਨਾਨਾਵਿਧੇਨ ਮਨੁਸ੍ਸਾਸੁਚਿਨਿਸ੍ਸਨ੍ਦੇਨ ਸਙ੍ਕਾਰਟ੍ਠਾਨੇ ਤਣ੍ਡੁਲੇਯ੍ਯਕਾਦੀਨਿ ਵਿਯ ਪਿਤ੍ਤਸੇਮ੍ਹਪੁਬ੍ਬਲੋਹਿਤਨਿਸ੍ਸਨ੍ਦੇਨ ਤੇ ਆਚਿਤਾ ਵੁਦ੍ਧਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਗਮਿਤਾਤਿ. ਓਕਾਸਤੋਪਿ ਅਸੁਭਾ. ਤਥਾ ਹਿ ਸਙ੍ਕਾਰਟ੍ਠਾਨੇ ਵਿਯ ਤਣ੍ਡੁਲੇਯ੍ਯਕਾਦੀਨਿ ਪਰਮਜੇਗੁਚ੍ਛੇ ਲੋਮਾਦਿਏਕਤਿਂਸਕੁਣਪਰਾਸਿਮਤ੍ਥਕੇ ਮਨੁਸ੍ਸਾਨਂ ਸੀਸਪਲਿਵੇਠਕੇ ਅਲ੍ਲਚਮ੍ਮੇ ਜਾਤਾਤਿ. ਏਸ ਨਯੋ ਲੋਮਾਦੀਸੁ. ਏਵਂ ਤਾਵ ਅਯਮੇਤੇ ਧਮ੍ਮੇ ਅਸੁਭਤੋ ਉਪਟ੍ਠਹਨ੍ਤੇ ਅਸੁਭਤੋ ਮਨਸਿ ਕਰੋਤਿ.

ਯਦਿ ਪਨਸ੍ਸ ਵਣ੍ਣਤੋ ਉਪਟ੍ਠਹਨ੍ਤਿ, ਅਥ ਕੇਸਾ ਨੀਲਕਸਿਣਵਸੇਨ ਉਪਟ੍ਠਹਨ੍ਤਿ. ਤਥਾ ਲੋਮਾ ਦਨ੍ਤਾ ਓਦਾਤਕਸਿਣਵਸੇਨਾਤਿ. ਏਸ ਨਯੋ ਸਬ੍ਬਤ੍ਥ. ਤਂਤਂਕਸਿਣਵਸੇਨੇਵ ਅਯਮੇਤੇ ਮਨਸਿ ਕਰੋਤਿ, ਏਵਂ ਵਣ੍ਣਤੋ ਉਪਟ੍ਠਹਨ੍ਤੇ ਵਣ੍ਣਤੋ ਮਨਸਿ ਕਰੋਤਿ. ਯਦਿ ਪਨਸ੍ਸ ਸੁਞ੍ਞਤੋ ਉਪਟ੍ਠਹਨ੍ਤਿ, ਅਥ ਕੇਸਾ ਘਨਵਿਨਿਬ੍ਭੋਗਵਵਤ੍ਥਾਨੇਨ ਓਜਟ੍ਠਮਕਸਮੂਹਵਸੇਨ ਉਪਟ੍ਠਹਨ੍ਤਿ. ਤਥਾ ਲੋਮਾਦਯੋ, ਯਥਾ ਉਪਟ੍ਠਹਨ੍ਤਿ. ਅਯਮੇਤੇ ਤਥੇਵ ਮਨਸਿ ਕਰੋਤਿ. ਏਵਂ ਸੁਞ੍ਞਤੋ ਉਪਟ੍ਠਹਨ੍ਤੇ ਸੁਞ੍ਞਤੋ ਮਨਸਿ ਕਰੋਤਿ.

ਏਵਂ ਮਨਸਿਕਰੋਨ੍ਤੋ ਅਯਮੇਤੇ ਧਮ੍ਮੇ ਅਨੁਪੁਬ੍ਬਮੁਞ੍ਚਨਤੋ ਮਨਸਿ ਕਰੋਤਿ. ਅਨੁਪੁਬ੍ਬਮੁਞ੍ਚਨਤੋਤਿ ਅਸੁਭਾਦੀਨਂ ਅਞ੍ਞਤਰਵਸੇਨ ਉਪਟ੍ਠਿਤੇ ਕੇਸੇ ਮੁਞ੍ਚਿਤ੍ਵਾ ਲੋਮੇ ਮਨਸਿਕਰੋਨ੍ਤੋ ਸੇਯ੍ਯਥਾਪਿ ਨਾਮ ਜਲੂਕਾ ਨਙ੍ਗੁਟ੍ਠੇਨ ਗਹਿਤਪ੍ਪਦੇਸੇ ਸਾਪੇਕ੍ਖਾਵ ਹੁਤ੍ਵਾ ਤੁਣ੍ਡੇਨ ਅਞ੍ਞਂ ਪਦੇਸਂ ਗਣ੍ਹਾਤਿ, ਗਹਿਤੇ ਚ ਤਸ੍ਮਿਂ ਇਤਰਂ ਮੁਞ੍ਚਤਿ, ਏਵਮੇਵ ਕੇਸੇਸੁ ਸਾਪੇਕ੍ਖੋਵ ਹੁਤ੍ਵਾ ਲੋਮੇ ਮਨਸਿ ਕਰੋਤਿ, ਲੋਮੇਸੁ ਚ ਪਤਿਟ੍ਠਿਤੇ ਮਨਸਿਕਾਰੇ ਕੇਸੇ ਮੁਞ੍ਚਤਿ. ਏਸ ਨਯੋ ਸਬ੍ਬਤ੍ਥ. ਏਵਂ ਹਿਸ੍ਸ ਅਨੁਪੁਬ੍ਬਮੁਞ੍ਚਨਤੋ ਮਨਸਿਕਰੋਤੋ ਅਸੁਭਾਦੀਸੁ ਅਞ੍ਞਤਰਵਸੇਨ ਤੇ ਧਮ੍ਮਾ ਉਪਟ੍ਠਹਨ੍ਤਾ ਅਨਵਸੇਸਤੋ ਉਪਟ੍ਠਹਨ੍ਤਿ, ਪਾਕਟਤਰੂਪਟ੍ਠਾਨਾ ਚ ਹੋਨ੍ਤਿ.

ਅਥ ਯਸ੍ਸ ਤੇ ਧਮ੍ਮਾ ਅਸੁਭਤੋ ਉਪਟ੍ਠਹਨ੍ਤਿ, ਪਾਕਟਤਰੂਪਟ੍ਠਾਨਾ ਚ ਹੋਨ੍ਤਿ, ਤਸ੍ਸ ਸੇਯ੍ਯਥਾਪਿ ਨਾਮ ਮਕ੍ਕਟੋ ਦ੍ਵਤ੍ਤਿਂਸਤਾਲਕੇ ਤਾਲਵਨੇ ਬ੍ਯਾਧੇਨ ਪਰਿਪਾਤਿਯਮਾਨੋ ਏਕਰੁਕ੍ਖੇਪਿ ਅਸਣ੍ਠਹਨ੍ਤੋ ਪਰਿਧਾਵਿਤ੍ਵਾ ਯਦਾ ਨਿਵਤ੍ਤੋ ਹੋਤਿ ਕਿਲਨ੍ਤੋ, ਅਥ ਏਕਮੇਵ ਘਨਤਾਲਪਣ੍ਣਪਰਿਵੇਠਿਤਂ ਤਾਲਸੁਚਿਂ ਨਿਸ੍ਸਾਯ ਤਿਟ੍ਠਤਿ; ਏਵਮੇਵ ਚਿਤ੍ਤਮਕ੍ਕਟੋ ਦ੍ਵਤ੍ਤਿਂਸਕੋਟ੍ਠਾਸਕੇ ਇਮਸ੍ਮਿਂ ਕਾਯੇ ਤੇਨੇਵ ਯੋਗਿਨਾ ਪਰਿਪਾਤਿਯਮਾਨੋ ਏਕਕੋਟ੍ਠਾਸਕੇਪਿ ਅਸਣ੍ਠਹਨ੍ਤੋ ਪਰਿਧਾਵਿਤ੍ਵਾ ਯਦਾ ਅਨੇਕਾਰਮ੍ਮਣਵਿਧਾਵਨੇ ਅਭਿਲਾਸਾਭਾਵੇਨ ਨਿਵਤ੍ਤੋ ਹੋਤਿ ਕਿਲਨ੍ਤੋ. ਅਥ ਯ੍ਵਾਸ੍ਸ ਕੇਸਾਦੀਸੁ ਧਮ੍ਮੋ ਪਗੁਣਤਰੋ ਚਰਿਤਾਨੁਰੂਪਤਰੋ ਵਾ, ਯਤ੍ਥ ਵਾ ਪੁਬ੍ਬੇ ਕਤਾਧਿਕਾਰੋ ਹੋਤਿ, ਤਂ ਨਿਸ੍ਸਾਯ ਉਪਚਾਰਵਸੇਨ ਤਿਟ੍ਠਤਿ. ਅਥ ਤਮੇਵ ਨਿਮਿਤ੍ਤਂ ਪੁਨਪ੍ਪੁਨਂ ਤਕ੍ਕਾਹਤਂ ਵਿਤਕ੍ਕਾਹਤਂ ਕਰਿਤ੍ਵਾ ਯਥਾਕ੍ਕਮਂ ਪਠਮਂ ਝਾਨਂ ਉਪ੍ਪਾਦੇਤਿ, ਤਤ੍ਥ ਪਤਿਟ੍ਠਾਯ ਵਿਪਸ੍ਸਨਮਾਰਭਿਤ੍ਵਾ ਅਰਿਯਭੂਮਿਂ ਪਾਪੁਣਾਤਿ.

ਯਸ੍ਸ ਪਨ ਤੇ ਧਮ੍ਮਾ ਵਣ੍ਣਤੋ ਉਪਟ੍ਠਹਨ੍ਤਿ, ਤਸ੍ਸਾਪਿ ਸੇਯ੍ਯਥਾਪਿ ਨਾਮ ਮਕ੍ਕਟੋ…ਪੇ… ਅਥ ਯ੍ਵਾਸ੍ਸ ਕੇਸਾਦੀਸੁ ਧਮ੍ਮੋ ਪਗੁਣਤਰੋ ਚਰਿਤਾਨੁਰੂਪਤਰੋ ਵਾ, ਯਤ੍ਥ ਵਾ ਪੁਬ੍ਬੇ ਕਤਾਧਿਕਾਰੋ ਹੋਤਿ, ਤਂ ਨਿਸ੍ਸਾਯ ਉਪਚਾਰਵਸੇਨ ਤਿਟ੍ਠਤਿ. ਅਥ ਤਮੇਵ ਨਿਮਿਤ੍ਤਂ ਪੁਨਪ੍ਪੁਨਂ ਤਕ੍ਕਾਹਤਂ ਵਿਤਕ੍ਕਾਹਤਂ ਕਰਿਤ੍ਵਾ ਯਥਾਕ੍ਕਮਂ ਨੀਲਕਸਿਣਵਸੇਨ ਪੀਤਕਸਿਣਵਸੇਨ ਵਾ ਪਞ੍ਚਪਿ ਰੂਪਾਵਚਰਜ੍ਝਾਨਾਨਿ ਉਪ੍ਪਾਦੇਤਿ, ਤੇਸਞ੍ਚ ਯਤ੍ਥ ਕਤ੍ਥਚਿ ਪਤਿਟ੍ਠਾਯ ਵਿਪਸ੍ਸਨਂ ਆਰਭਿਤ੍ਵਾ ਅਰਿਯਭੂਮਿਂ ਪਾਪੁਣਾਤਿ.

ਯਸ੍ਸ ਪਨ ਤੇ ਧਮ੍ਮਾ ਸੁਞ੍ਞਤੋ ਉਪਟ੍ਠਹਨ੍ਤਿ, ਸੋ ਲਕ੍ਖਣਤੋ ਮਨਸਿ ਕਰੋਤਿ, ਲਕ੍ਖਣਤੋ ਮਨਸਿਕਰੋਨ੍ਤੋ ਤਤ੍ਥ ਚਤੁਧਾਤੁਵਵਤ੍ਥਾਨਵਸੇਨ ਉਪਚਾਰਜ੍ਝਾਨਂ ਪਾਪੁਣਾਤਿ. ਅਥ ਮਨਸਿਕਰੋਨ੍ਤੋ ਤੇ ਧਮ੍ਮੇ ਅਨਿਚ੍ਚਦੁਕ੍ਖਾਨਤ੍ਤਸੁਤ੍ਤਤ੍ਤਯਵਸੇਨ ਮਨਸਿ ਕਰੋਤਿ. ਅਯਮਸ੍ਸ ਵਿਪਸ੍ਸਨਾਨਯੋ. ਸੋ ਇਮਂ ਵਿਪਸ੍ਸਨਂ ਆਰਭਿਤ੍ਵਾ ਯਥਾਕ੍ਕਮਞ੍ਚ ਪਟਿਪਜ੍ਜਿਤ੍ਵਾ ਅਰਿਯਭੂਮਿਂ ਪਾਪੁਣਾਤੀਤਿ.

ਏਤ੍ਤਾਵਤਾ ਚ ਯਂ ਵੁਤ੍ਤਂ – ‘‘ਕਥਂ ਪਨਾਯਂ ਅਨੁਪੁਬ੍ਬਾਦਿਵਸੇਨ ਏਤੇ ਧਮ੍ਮੇ ਮਨਸਿ ਕਰੋਤੀ’’ਤਿ, ਤਂ ਬ੍ਯਾਕਤਂ ਹੋਤਿ. ਯਞ੍ਚਾਪਿ ਵੁਤ੍ਤਂ – ‘‘ਭਾਵਨਾਵਸੇਨ ਪਨਸ੍ਸ ਏਵਂ ਵਣ੍ਣਨਾ ਵੇਦਿਤਬ੍ਬਾ’’ਤਿ, ਤਸ੍ਸਤ੍ਥੋ ਪਕਾਸਿਤੋ ਹੋਤੀਤਿ.

ਪਕਿਣ੍ਣਕਨਯੋ

ਇਦਾਨਿ ਇਮਸ੍ਮਿਂਯੇਵ ਦ੍ਵਤ੍ਤਿਂਸਾਕਾਰੇ ਵਣ੍ਣਨਾਪਰਿਚਯਪਾਟਵਤ੍ਥਂ ਅਯਂ ਪਕਿਣ੍ਣਕਨਯੋ ਵੇਦਿਤਬ੍ਬੋ –

‘‘ਨਿਮਿਤ੍ਤਤੋ ਲਕ੍ਖਣਤੋ, ਧਾਤੁਤੋ ਸੁਞ੍ਞਤੋਪਿ ਚ;

ਖਨ੍ਧਾਦਿਤੋ ਚ ਵਿਞ੍ਞੇਯ੍ਯੋ, ਦ੍ਵਤ੍ਤਿਂਸਾਕਾਰਨਿਚ੍ਛਯੋ’’ਤਿ.

ਤਤ੍ਥ ਨਿਮਿਤ੍ਤਤੋਤਿ ਏਵਂ ਵੁਤ੍ਤਪ੍ਪਕਾਰੇ ਇਮਸ੍ਮਿਂ ਦ੍ਵਤ੍ਤਿਂਸਾਕਾਰੇ ਸਟ੍ਠਿਸਤਂ ਨਿਮਿਤ੍ਤਾਨਿ ਹੋਨ੍ਤਿ, ਯੇਸਂ ਵਸੇਨ ਯੋਗਾਵਚਰੋ ਦ੍ਵਤ੍ਤਿਂਸਾਕਾਰਂ ਕੋਟ੍ਠਾਸਤੋ ਪਰਿਗ੍ਗਣ੍ਹਾਤਿ. ਸੇਯ੍ਯਥਿਦਂ – ਕੇਸਸ੍ਸ ਵਣ੍ਣਨਿਮਿਤ੍ਤਂ, ਸਣ੍ਠਾਨਨਿਮਿਤ੍ਤਂ, ਦਿਸਾਨਿਮਿਤ੍ਤਂ, ਓਕਾਸਨਿਮਿਤ੍ਤਂ, ਪਰਿਚ੍ਛੇਦਨਿਮਿਤ੍ਤਨ੍ਤਿ ਪਞ੍ਚ ਨਿਮਿਤ੍ਤਾਨਿ ਹੋਨ੍ਤਿ. ਏਵਂ ਲੋਮਾਦੀਸੁ.

ਲਕ੍ਖਣਤੋਤਿ ਦ੍ਵਤ੍ਤਿਂਸਾਕਾਰੇ ਅਟ੍ਠਵੀਸਤਿਸਤਂ ਲਕ੍ਖਣਾਨਿ ਹੋਨ੍ਤਿ, ਯੇਸਂ ਵਸੇਨ ਯੋਗਾਵਚਰੋ ਦ੍ਵਤ੍ਤਿਂਸਾਕਾਰਂ ਲਕ੍ਖਣਤੋ ਮਨਸਿ ਕਰੋਤਿ. ਸੇਯ੍ਯਥਿਦਂ – ਕੇਸਸ੍ਸ ਥਦ੍ਧਲਕ੍ਖਣਂ, ਆਬਨ੍ਧਨਲਕ੍ਖਣਂ, ਉਣ੍ਹਤ੍ਤਲਕ੍ਖਣਂ, ਸਮੁਦੀਰਣਲਕ੍ਖਣਨ੍ਤਿ ਚਤ੍ਤਾਰਿ ਲਕ੍ਖਣਾਨਿ ਹੋਨ੍ਤਿ. ਏਵਂ ਲੋਮਾਦੀਸੁ.

ਧਾਤੁਤੋਤਿ ਦ੍ਵਤ੍ਤਿਂਸਾਕਾਰੇ ‘‘ਛਧਾਤੁਰੋ, ਭਿਕ੍ਖਵੇ, ਅਯਂ ਪੁਰਿਸਪੁਗ੍ਗਲੋ’’ਤਿ (ਮ. ਨਿ. ੩.੩੪੩-੩੪੪) ਏਤ੍ਥ ਵੁਤ੍ਤਾਸੁ ਧਾਤੂਸੁ ਅਟ੍ਠਵੀਸਤਿਸਤਂ ਧਾਤੁਯੋ ਹੋਨ੍ਤਿ, ਯਾਸਂ ਵਸੇਨ ਯੋਗਾਵਚਰੋ ਦ੍ਵਤ੍ਤਿਂਸਾਕਾਰਂ ਧਾਤੁਤੋ ਪਰਿਗ੍ਗਣ੍ਹਾਤਿ. ਸੇਯ੍ਯਥਿਦਂ – ਯਾ ਕੇਸੇ ਥਦ੍ਧਤਾ, ਸਾ ਪਥਵੀਧਾਤੁ; ਯਾ ਆਬਨ੍ਧਨਤਾ, ਸਾ ਆਪੋਧਾਤੁ; ਯਾ ਪਰਿਪਾਚਨਤਾ, ਸਾ ਤੇਜੋਧਾਤੁ; ਯਾ ਵਿਤ੍ਥਮ੍ਭਨਤਾ, ਸਾ ਵਾਯੋਧਾਤੂਤਿ ਚਤਸ੍ਸੋ ਧਾਤੁਯੋ ਹੋਨ੍ਤਿ. ਏਵਂ ਲੋਮਾਦੀਸੁ.

ਸੁਞ੍ਞਤੋਤਿ ਦ੍ਵਤ੍ਤਿਂਸਾਕਾਰੇ ਅਟ੍ਠਵੀਸਤਿਸਤਂ ਸੁਞ੍ਞਤਾ ਹੋਨ੍ਤਿ, ਯਾਸਂ ਵਸੇਨ ਯੋਗਾਵਚਰੋ ਦ੍ਵਤ੍ਤਿਂਸਾਕਾਰਂ ਸੁਞ੍ਞਤੋ ਵਿਪਸ੍ਸਤਿ. ਸੇਯ੍ਯਥਿਦਂ – ਕੇਸੇ ਤਾਵ ਪਥਵੀਧਾਤੁ ਆਪੋਧਾਤ੍ਵਾਦੀਹਿ ਸੁਞ੍ਞਾ, ਤਥਾ ਆਪੋਧਾਤ੍ਵਾਦਯੋ ਪਥਵੀਧਾਤ੍ਵਾਦੀਹੀਤਿ ਚਤਸ੍ਸੋ ਸੁਞ੍ਞਤਾ ਹੋਨ੍ਤਿ. ਏਵਂ ਲੋਮਾਦੀਸੁ.

ਖਨ੍ਧਾਦਿਤੋਤਿ ਦ੍ਵਤ੍ਤਿਂਸਾਕਾਰੇ ਕੇਸਾਦੀਸੁ ਖਨ੍ਧਾਦਿਵਸੇਨ ਸਙ੍ਗਯ੍ਹਮਾਨੇਸੁ ‘‘ਕੇਸਾ ਕਤਿ ਖਨ੍ਧਾ ਹੋਨ੍ਤਿ, ਕਤਿ ਆਯਤਨਾਨਿ, ਕਤਿ ਧਾਤੁਯੋ, ਕਤਿ ਸਚ੍ਚਾਨਿ, ਕਤਿ ਸਤਿਪਟ੍ਠਾਨਾਨੀ’’ਤਿ ਏਵਮਾਦਿਨਾ ਨਯੇਨ ਵਿਨਿਚ੍ਛਯੋ ਵੇਦਿਤਬ੍ਬੋ. ਏਵਞ੍ਚਸ੍ਸ ਵਿਜਾਨਤੋ ਤਿਣਕਟ੍ਠਸਮੂਹੋ ਵਿਯ ਕਾਯੋ ਖਾਯਤਿ. ਯਥਾਹ –

‘‘ਨਤ੍ਥਿ ਸਤ੍ਤੋ ਨਰੋ ਪੋਸੋ, ਪੁਗ੍ਗਲੋ ਨੂਪਲਬ੍ਭਤਿ;

ਸੁਞ੍ਞਭੂਤੋ ਅਯਂ ਕਾਯੋ, ਤਿਣਕਟ੍ਠਸਮੂਪਮੋ’’ਤਿ.

ਅਥਸ੍ਸ ਯਾ ਸਾ –

‘‘ਸੁਞ੍ਞਾਗਾਰਂ ਪਵਿਟ੍ਠਸ੍ਸ, ਸਨ੍ਤਚਿਤ੍ਤਸ੍ਸ ਤਾਦਿਨੋ;

ਅਮਾਨੁਸੀ ਰਤਿ ਹੋਤਿ, ਸਮ੍ਮਾ ਧਮ੍ਮਂ ਵਿਪਸ੍ਸਤੋ’’ਤਿ. –

ਏਵਂ ਅਮਾਨੁਸੀ ਰਤਿ ਵੁਤ੍ਤਾ, ਸਾ ਅਦੂਰਤਰਾ ਹੋਤਿ. ਤਤੋ ਯਂ ਤਂ –

‘‘ਯਤੋ ਯਤੋ ਸਮ੍ਮਸਤਿ, ਖਨ੍ਧਾਨਂ ਉਦਯਬ੍ਬਯਂ;

ਲਭਤੀ ਪੀਤਿਪਾਮੋਜ੍ਜਂ, ਅਮਤਂ ਤਂ ਵਿਜਾਨਤ’’ਨ੍ਤਿ. (ਧ. ਪ. ੩੭੩-੩੭੪) –

ਏਵਂ ਵਿਪਸ੍ਸਨਾਮਯਂ ਪੀਤਿਪਾਮੋਜ੍ਜਾਮਤਂ ਵੁਤ੍ਤਂ. ਤਂ ਅਨੁਭਵਨ੍ਤੋ ਨ ਚਿਰੇਨੇਵ ਅਰਿਯਜਨਸੇਵਿਤਂ ਅਜਰਾਮਰਂ ਨਿਬ੍ਬਾਨਾਮਤਂ ਸਚ੍ਛਿਕਰੋਤੀਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕਪਾਠ-ਅਟ੍ਠਕਥਾਯ

ਦ੍ਵਤ੍ਤਿਂਸਾਕਾਰਵਣ੍ਣਨਾ ਨਿਟ੍ਠਿਤਾ.