੫. ਰੁਹਕਵਗ੍ਗੋ

[੧੯੧] ੧. ਰੁਹਕਜਾਤਕਵਣ੍ਣਨਾ

ਅਪਿ ਰੁਹਕ ਛਿਨ੍ਨਾਪੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਪੁਰਾਣਦੁਤਿਯਿਕਾਪਲੋਭਨਂ ਆਰਬ੍ਭ ਕਥੇਸਿ. ਵਤ੍ਥੁ ਅਟ੍ਠਕਨਿਪਾਤੇ ਇਨ੍ਦ੍ਰਿਯਜਾਤਕੇ (ਜਾ. ੧.੮.੬੦ ਆਦਯੋ) ਆਵਿਭਵਿਸ੍ਸਤਿ. ਸਤ੍ਥਾ ਪਨ ਤਂ ਭਿਕ੍ਖੁਂ ‘‘ਅਯਂ ਤੇ ਭਿਕ੍ਖੁ ਇਤ੍ਥੀ ਅਨਤ੍ਥਕਾਰਿਕਾ, ਪੁਬ੍ਬੇਪਿ ਤੇ ਏਸਾ ਸਰਾਜਿਕਾਯ ਪਰਿਸਾਯ ਮਜ੍ਝੇ ਲਜ੍ਜਾਪੇਤ੍ਵਾ ਗੇਹਾ ਨਿਕ੍ਖਮਨਾਕਾਰਂ ਕਾਰੇਸੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਪਿਤੁ ਅਚ੍ਚਯੇਨ ਰਜ੍ਜੇ ਪਤਿਟ੍ਠਾਯ ਧਮ੍ਮੇਨ ਰਜ੍ਜਂ ਕਾਰੇਸਿ. ਤਸ੍ਸ ਰੁਹਕੋ ਨਾਮ ਪੁਰੋਹਿਤੋ ਅਹੋਸਿ, ਤਸ੍ਸ ਪੁਰਾਣੀ ਨਾਮ ਬ੍ਰਾਹ੍ਮਣੀ ਭਰਿਯਾ. ਰਾਜਾ ਬ੍ਰਾਹ੍ਮਣਸ੍ਸ ਅਸ੍ਸਭਣ੍ਡਕੇਨ ਅਲਙ੍ਕਰਿਤ੍ਵਾ ਅਸ੍ਸਂ ਅਦਾਸਿ. ਸੋ ਤਂ ਅਸ੍ਸਂ ਆਰੁਯ੍ਹ ਰਞ੍ਞੋ ਉਪਟ੍ਠਾਨਂ ਗਚ੍ਛਤਿ. ਅਥ ਨਂ ਅਲਙ੍ਕਤਅਸ੍ਸਸ੍ਸ ਪਿਟ੍ਠੇ ਨਿਸੀਦਿਤ੍ਵਾ ਗਚ੍ਛਨ੍ਤਂ ਆਗਚ੍ਛਨ੍ਤਞ੍ਚ ਦਿਸ੍ਵਾ ਤਹਿਂ ਤਹਿਂ ਠਿਤਾ ਮਨੁਸ੍ਸਾ ‘‘ਅਹੋ ਅਸ੍ਸਸ੍ਸ ਰੂਪਂ, ਅਹੋ ਅਸ੍ਸੋ ਸੋਭਤੀ’’ਤਿ ਅਸ੍ਸਮੇਵ ਪਸਂਸਨ੍ਤਿ. ਸੋ ਗੇਹਂ ਆਗਨ੍ਤ੍ਵਾ ਪਾਸਾਦਂ ਅਭਿਰੁਯ੍ਹ ਭਰਿਯਂ ਆਮਨ੍ਤੇਸਿ – ‘‘ਭਦ੍ਦੇ, ਅਮ੍ਹਾਕਂ ਅਸ੍ਸੋ ਅਤਿਵਿਯ ਸੋਭਤਿ, ਉਭੋਸੁ ਪਸ੍ਸੇਸੁ ਠਿਤਾ ਮਨੁਸ੍ਸਾ ਅਮ੍ਹਾਕਂ ਅਸ੍ਸਮੇਵ ਵਣ੍ਣੇਨ੍ਤੀ’’ਤਿ. ਸਾ ਪਨ ਬ੍ਰਾਹ੍ਮਣੀ ਥੋਕਂ ਛਿਨ੍ਨਿਕਾ ਧੁਤ੍ਤਿਕਧਾਤੁਕਾ, ਤੇਨ ਨਂ ਏਵਮਾਹ – ‘‘ਅਯ੍ਯ, ਤ੍ਵਂ ਅਸ੍ਸਸ੍ਸ ਸੋਭਨਕਾਰਣਂ ਨ ਜਾਨਾਸਿ, ਅਯਂ ਅਸ੍ਸੋ ਅਤ੍ਤਨੋ ਅਲਙ੍ਕਤਂ ਅਸ੍ਸਭਣ੍ਡਕਂ ਨਿਸ੍ਸਾਯ ਸੋਭਤਿ, ਸਚੇ ਤ੍ਵਮ੍ਪਿ ਅਸ੍ਸੋ ਵਿਯ ਸੋਭਿਤੁਕਾਮੋ ਅਸ੍ਸਭਣ੍ਡਕਂ ਪਿਲ਼ਨ੍ਧਿਤ੍ਵਾ ਅਨ੍ਤਰਵੀਥਿਂ ਓਰੁਯ੍ਹ ਅਸ੍ਸੋ ਵਿਯ ਪਾਦੇ ਕੋਟ੍ਟਯਮਾਨੋ ਗਨ੍ਤ੍ਵਾ ਰਾਜਾਨਂ ਪਸ੍ਸ, ਰਾਜਾਪਿ ਤਂ ਵਣ੍ਣਯਿਸ੍ਸਤਿ, ਮਨੁਸ੍ਸਾਪਿ ਤਞ੍ਞੇਵ ਵਣ੍ਣਯਿਸ੍ਸਨ੍ਤੀ’’ਤਿ.

ਸੋ ਉਮ੍ਮਤ੍ਤਕਜਾਤਿਕੋ ਬ੍ਰਾਹ੍ਮਣੋ ਤਸ੍ਸਾ ਵਚਨਂ ਸੁਤ੍ਵਾ ‘‘ਇਮਿਨਾ ਨਾਮ ਕਾਰਣੇਨ ਸਾ ਮਂ ਵਦਤੀ’’ਤਿ ਅਜਾਨਿਤ੍ਵਾ ਤਥਾਸਞ੍ਞੀ ਹੁਤ੍ਵਾ ਤਥਾ ਅਕਾਸਿ. ਯੇ ਯੇ ਪਸ੍ਸਨ੍ਤਿ, ਤੇ ਤੇ ਪਰਿਹਾਸਂ ਕਰੋਨ੍ਤਾ ‘‘ਸੋਭਤਿ ਆਚਰਿਯੋ’’ਤਿ ਵਦਿਂਸੁ. ਰਾਜਾ ਪਨ ਨਂ ‘‘ਕਿਂ, ਆਚਰਿਯ, ਪਿਤ੍ਤਂ ਤੇ ਕੁਪਿਤਂ, ਉਮ੍ਮਤ੍ਤਕੋਸਿ ਜਾਤੋ’’ਤਿਆਦੀਨਿ ਵਤ੍ਵਾ ਲਜ੍ਜਾਪੇਸਿ. ਤਸ੍ਮਿਂ ਕਾਲੇ ਬ੍ਰਾਹ੍ਮਣੋ ‘‘ਅਯੁਤ੍ਤਂ ਮਯਾ ਕਤ’’ਨ੍ਤਿ ਲਜ੍ਜਿਤੋ ਬ੍ਰਾਹ੍ਮਣਿਯਾ ਕੁਜ੍ਝਿਤ੍ਵਾ ‘‘ਤਾਯਮ੍ਹਿ ਸਰਾਜਿਕਾਯ ਪਰਿਸਾਯ ਅਨ੍ਤਰੇ ਲਜ੍ਜਾਪਿਤੋ, ਪੋਥੇਤ੍ਵਾ ਤਂ ਨਿਕ੍ਕਡ੍ਢਿਸ੍ਸਾਮੀ’’ਤਿ ਗੇਹਂ ਅਗਮਾਸਿ. ਧੁਤ੍ਤਿਕਬ੍ਰਾਹ੍ਮਣੀ ਤਸ੍ਸ ਕੁਜ੍ਝਿਤ੍ਵਾ ਆਗਮਨਭਾਵਂ ਞਤ੍ਵਾ ਪੁਰੇਤਰਞ੍ਞੇਵ ਚੂਲ਼ਦ੍ਵਾਰੇਨ ਨਿਕ੍ਖਮਿਤ੍ਵਾ ਰਾਜਨਿਵੇਸਨਂ ਗਨ੍ਤ੍ਵਾ ਚਤੂਹਪਞ੍ਚਾਹਂ ਤਤ੍ਥੇਵ ਅਹੋਸਿ. ਰਾਜਾ ਤਂ ਕਾਰਣਂ ਞਤ੍ਵਾ ਪੁਰੋਹਿਤਂ ਪਕ੍ਕੋਸਾਪੇਤ੍ਵਾ ‘‘ਆਚਰਿਯ, ਮਾਤੁਗਾਮਸ੍ਸ ਨਾਮ ਦੋਸੋ ਹੋਤਿਯੇਵ, ਬ੍ਰਾਹ੍ਮਣਿਯਾ ਖਮਿਤੁਂ ਵਟ੍ਟਤੀ’’ਤਿ ਖਮਾਪਨਤ੍ਥਾਯ ਪਠਮਂ ਗਾਥਮਾਹ –

੮੧. ‘‘ਅਪਿ ਰੁਹਕ ਛਿਨ੍ਨਾਪਿ, ਜਿਯਾ ਸਨ੍ਧੀਯਤੇ ਪੁਨ;

ਸਨ੍ਧੀਯਸ੍ਸੁ ਪੁਰਾਣਿਯਾ, ਮਾ ਕੋਧਸ੍ਸ ਵਸਂ ਗਮੀ’’ਤਿ.

ਤਤ੍ਰਾਯਂ ਸਙ੍ਖੇਪਤ੍ਥੋ – ਭੋ ਰੁਹਕ, ਨਨੁ ਛਿਨ੍ਨਾਪਿ ਧਨੁਜਿਯਾ ਪੁਨ ਸਨ੍ਧੀਯਤਿ ਘਟੀਯਤਿ, ਏਵਮੇਵ ਤ੍ਵਮ੍ਪਿ ਪੁਰਾਣਿਯਾ ਸਦ੍ਧਿਂ ਸਨ੍ਧੀਯਸ੍ਸੁ, ਕੋਧਸ੍ਸ ਵਸਂ ਮਾ ਗਮੀਤਿ.

ਤਂ ਸੁਤ੍ਵਾ ਰੁਹਕੋ ਦੁਤਿਯਂ ਗਾਥਮਾਹ –

੮੨. ‘‘ਵਿਜ੍ਜਮਾਨੇਸੁ ਵਾਕੇਸੁ, ਵਿਜ੍ਜਮਾਨੇਸੁ ਕਾਰਿਸੁ;

ਅਞ੍ਞਂ ਜਿਯਂ ਕਰਿਸ੍ਸਾਮਿ, ਅਲਞ੍ਞੇਵ ਪੁਰਾਣਿਯਾ’’ਤਿ.

ਤਸ੍ਸਤ੍ਥੋ – ਮਹਾਰਾਜ, ਧਨੁਕਾਰਮੁਦੁਵਾਕੇਸੁ ਚ ਜਿਯਕਾਰਕੇਸੁ ਚ ਮਨੁਸ੍ਸੇਸੁ ਵਿਜ੍ਜਮਾਨੇਸੁ ਅਞ੍ਞਂ ਜਿਯਂ ਕਰਿਸ੍ਸਾਮਿ, ਇਮਾਯ ਛਿਨ੍ਨਾਯ ਪੁਰਾਣਿਯਾ ਜਿਯਾਯ ਅਲਂ, ਨਤ੍ਥਿ ਮੇ ਕੋਚਿ ਅਤ੍ਥੋਤਿ. ਏਵਞ੍ਚ ਪਨ ਵਤ੍ਵਾ ਤਂ ਨੀਹਰਿਤ੍ਵਾ ਅਞ੍ਞਂ ਬ੍ਰਾਹ੍ਮਣਿਂ ਆਨੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ – ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ‘‘ਤਦਾ, ਬ੍ਰਾਹ੍ਮਣੀ, ਪੁਰਾਣਦੁਤਿਯਿਕਾ ਅਹੋਸਿ, ਰੁਹਕੋ ਉਕ੍ਕਣ੍ਠਿਤਭਿਕ੍ਖੁ, ਬਾਰਾਣਸਿਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਰੁਹਕਜਾਤਕਵਣ੍ਣਨਾ ਪਠਮਾ.

[੧੯੨] ੨. ਸਿਰਿਕਾਲ਼ਕਣ੍ਣਿਜਾਤਕਵਣ੍ਣਨਾ

ਇਤ੍ਥੀ ਸਿਯਾ ਰੂਪਵਤੀਤਿ ਇਦਂ ਸਿਰਿਕਾਲ਼ਕਣ੍ਣਿਜਾਤਕਂ ਮਹਾਉਮਙ੍ਗਜਾਤਕੇ ਆਵਿਭਵਿਸ੍ਸਤਿ.

ਸਿਰਿਕਾਲ਼ਕਣ੍ਣਿਜਾਤਕਵਣ੍ਣਨਾ ਦੁਤਿਯਾ.

[੧੯੩] ੩. ਚੂਲ਼ਪਦੁਮਜਾਤਕਵਣ੍ਣਨਾ

ਅਯਮੇਵ ਸਾ ਅਹਮਪਿ ਸੋ ਅਨਞ੍ਞੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਕ੍ਕਣ੍ਠਿਤਭਿਕ੍ਖੁਂ ਆਰਬ੍ਭ ਕਥੇਸਿ. ਵਤ੍ਥੁ ਉਮ੍ਮਾਦਨ੍ਤੀਜਾਤਕੇ (ਜਾ. ੨.੨੦.੫੭ ਆਦਯੋ) ਆਵਿਭਵਿਸ੍ਸਤਿ. ਸੋ ਪਨ ਭਿਕ੍ਖੁ ਸਤ੍ਥਾਰਾ ‘‘ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਉਕ੍ਕਣ੍ਠਿਤੋ’’ਤਿ ਵੁਤ੍ਤੇ ‘‘ਸਚ੍ਚਂ, ਭਗਵਾ’’ਤਿ ਵਤ੍ਵਾ ‘‘ਕੇਨ ਪਨ ਤ੍ਵਂ ਉਕ੍ਕਣ੍ਠਾਪਿਤੋ’’ਤਿ ਵੁਤ੍ਤੇ ‘‘ਅਹਂ, ਭਨ੍ਤੇ, ਏਕਂ ਅਲਙ੍ਕਤਪਟਿਯਤ੍ਤਂ ਮਾਤੁਗਾਮਂ ਦਿਸ੍ਵਾ ਕਿਲੇਸਾਨੁਵਤ੍ਤਕੋ ਹੁਤ੍ਵਾ ਉਕ੍ਕਣ੍ਠਿਤੋਮ੍ਹੀ’’ਤਿ ਆਹ. ਅਥ ਨਂ ਸਤ੍ਥਾ ‘‘ਭਿਕ੍ਖੁ, ਮਾਤੁਗਾਮੋ ਨਾਮ ਅਕਤਞ੍ਞੂ ਮਿਤ੍ਤਦੁਬ੍ਭੀ ਬਹੁਮਾਯਾ, ਪੋਰਾਣਕਪਣ੍ਡਿਤਾਪਿ ਅਤ੍ਤਨੋ ਦਕ੍ਖਿਣਜਾਣੁਲੋਹਿਤਂ ਪਾਯੇਤ੍ਵਾ ਯਾਵਜੀਵਿਤਦਾਨਮ੍ਪਿ ਦਤ੍ਵਾ ਮਾਤੁਗਾਮਸ੍ਸ ਚਿਤ੍ਤਂ ਨ ਲਭਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ, ਨਾਮਗ੍ਗਹਣਦਿਵਸੇ ਚਸ੍ਸ ‘‘ਪਦੁਮਕੁਮਾਰੋ’’ਤਿ ਨਾਮਂ ਅਕਂਸੁ. ਤਸ੍ਸ ਅਪਰੇਨ ਛ ਕਨਿਟ੍ਠਭਾਤਿਕਾ ਅਹੇਸੁਂ. ਤੇ ਸਤ੍ਤਪਿ ਜਨਾ ਅਨੁਪੁਬ੍ਬੇਨ ਵੁਡ੍ਢਿਪ੍ਪਤ੍ਤਾ ਘਰਾਵਾਸਂ ਗਹੇਤ੍ਵਾ ਰਞ੍ਞੋ ਸਹਾਯਾ ਵਿਯ ਵਿਚਰਨ੍ਤਿ. ਅਥੇਕਦਿਵਸਂ ਰਾਜਾ ਰਾਜਙ੍ਗਣਂ ਓਲੋਕੇਨ੍ਤੋ ਠਿਤੋ ਤੇ ਮਹਾਪਰਿਵਾਰੇਨ ਰਾਜੁਪਟ੍ਠਾਨਂ ਆਗਚ੍ਛਨ੍ਤੇ ਦਿਸ੍ਵਾ ‘‘ਇਮੇ ਮਂ ਵਧਿਤ੍ਵਾ ਰਜ੍ਜਮ੍ਪਿ ਗਣ੍ਹੇਯ੍ਯੁ’’ਨ੍ਤਿ ਆਸਙ੍ਕਂ ਉਪ੍ਪਾਦੇਤ੍ਵਾ ਤੇ ਪਕ੍ਕੋਸਾਪੇਤ੍ਵਾ – ‘‘ਤਾਤਾ, ਤੁਮ੍ਹੇ ਇਮਸ੍ਮਿਂ ਨਗਰੇ ਵਸਿਤੁਂ ਨ ਲਭਥ, ਅਞ੍ਞਤ੍ਥ ਗਨ੍ਤ੍ਵਾ ਮਮ ਅਚ੍ਚਯੇਨ ਆਗਨ੍ਤ੍ਵਾ ਕੁਲਸਨ੍ਤਕਂ ਰਜ੍ਜਂ ਗਣ੍ਹਥਾ’’ਤਿ ਆਹ. ਤੇ ਪਿਤੁ ਵਚਨਂ ਸਮ੍ਪਟਿਚ੍ਛਿਤ੍ਵਾ ਰੋਦਿਤ੍ਵਾ ਕਨ੍ਦਿਤ੍ਵਾ ਅਤ੍ਤਨੋ ਅਤ੍ਤਨੋ ਘਰਾਨਿ ਗਨ੍ਤ੍ਵਾ ਪਜਾਪਤਿਯੋ ਆਦਾਯ ‘‘ਯਤ੍ਥ ਵਾ ਤਤ੍ਥ ਵਾ ਗਨ੍ਤ੍ਵਾ ਜੀਵਿਸ੍ਸਾਮਾ’’ਤਿ ਨਗਰਾ ਨਿਕ੍ਖਮਿਤ੍ਵਾ ਮਗ੍ਗਂ ਗਚ੍ਛਨ੍ਤਾ ਏਕਂ ਕਨ੍ਤਾਰਂ ਪਤ੍ਵਾ ਅਨ੍ਨਪਾਨਂ ਅਲਭਮਾਨਾ ਖੁਦਂ ਅਧਿਵਾਸੇਤੁਂ ਅਸਕ੍ਕੋਨ੍ਤਾ ‘‘ਮਯਂ ਜੀਵਮਾਨਾ ਇਤ੍ਥਿਯੋ ਲਭਿਸ੍ਸਾਮਾ’’ਤਿ ਕਨਿਟ੍ਠਸ੍ਸ ਭਰਿਯਂ ਮਾਰੇਤ੍ਵਾ ਤੇਰਸ ਕੋਟ੍ਠਾਸੇ ਕਤ੍ਵਾ ਮਂਸਂ ਖਾਦਿਂਸੁ. ਬੋਧਿਸਤ੍ਤੋ ਅਤ੍ਤਨੋ ਚ ਭਰਿਯਾਯ ਚ ਲਦ੍ਧਕੋਟ੍ਠਾਸੇਸੁ ਏਕਂ ਠਪੇਤ੍ਵਾ ਏਕਂ ਦ੍ਵੇਪਿ ਖਾਦਿਂਸੁ. ਏਵਂ ਛ ਦਿਵਸੇ ਛ ਇਤ੍ਥਿਯੋ ਮਾਰੇਤ੍ਵਾ ਮਂਸਂ ਖਾਦਿਂਸੁ.

ਬੋਧਿਸਤ੍ਤੋ ਪਨ ਦਿਵਸੇ ਦਿਵਸੇ ਏਕੇਕਂ ਠਪੇਤ੍ਵਾ ਛ ਕੋਟ੍ਠਾਸੇ ਠਪੇਸਿ. ਸਤ੍ਤਮੇ ਦਿਵਸੇ ‘‘ਬੋਧਿਸਤ੍ਤਸ੍ਸ ਭਰਿਯਂ ਮਾਰੇਸ੍ਸਾਮਾ’’ਤਿ ਵੁਤ੍ਤੇ ਬੋਧਿਸਤ੍ਤੋ ਤੇ ਛ ਕੋਟ੍ਠਾਸੇ ਤੇਸਂ ਦਤ੍ਵਾ ‘‘ਅਜ੍ਜ ਤਾਵ ਇਮੇ ਛ ਕੋਟ੍ਠਾਸੇ ਖਾਦਥ, ਸ੍ਵੇ ਜਾਨਿਸ੍ਸਾਮਾ’’ਤਿ ਵਤ੍ਵਾ ਤੇਸਂ ਮਂਸਂ ਖਾਦਿਤ੍ਵਾ ਨਿਦ੍ਦਾਯਨਕਾਲੇ ਭਰਿਯਂ ਗਹੇਤ੍ਵਾ ਪਲਾਯਿ. ਸਾ ਥੋਕਂ ਗਨ੍ਤ੍ਵਾ ‘‘ਗਨ੍ਤੁਂ ਨ ਸਕ੍ਕੋਮਿ, ਸਾਮੀ’’ਤਿ ਆਹ. ਅਥ ਨਂ ਬੋਧਿਸਤ੍ਤੋ ਖਨ੍ਧੇਨਾਦਾਯ ਅਰੁਣੁਗ੍ਗਮਨਵੇਲਾਯ ਕਨ੍ਤਾਰਾ ਨਿਕ੍ਖਮਿ. ਸਾ ਸੂਰਿਯੇ ਉਗ੍ਗਤੇ ‘‘ਪਿਪਾਸਿਤਾਮ੍ਹਿ, ਸਾਮੀ’’ਤਿ ਆਹ. ਬੋਧਿਸਤ੍ਤੋ ‘‘ਉਦਕਂ ਨਤ੍ਥਿ, ਭਦ੍ਦੇ’’ਤਿ ਵਤ੍ਵਾ ਪੁਨਪ੍ਪੁਨਂ ਕਥਿਤੇ ਖਗ੍ਗੇਨ ਦਕ੍ਖਿਣਜਾਣੁਕਂ ਪਹਰਿਤ੍ਵਾ – ‘‘ਭਦ੍ਦੇ, ਪਾਨੀਯਂ ਨਤ੍ਥਿ, ਇਦਂ ਪਨ ਮੇ ਦਕ੍ਖਿਣਜਾਣੁਲੋਹਿਤਂ ਪਿਵਮਾਨਾ ਨਿਸੀਦਾਹੀ’’ਤਿ ਆਹ. ਸਾ ਤਥਾ ਅਕਾਸਿ. ਤੇ ਅਨੁਪੁਬ੍ਬੇਨ ਮਹਾਗਙ੍ਗਂ ਪਤ੍ਵਾ ਪਿਵਿਤ੍ਵਾ ਚ ਨ੍ਹਤ੍ਵਾ ਚ ਫਲਾਫਲਂ ਖਾਦਿਤ੍ਵਾ ਫਾਸੁਕਟ੍ਠਾਨੇ ਵਿਸ੍ਸਮਿਤ੍ਵਾ ਏਕਸ੍ਮਿਂ ਗਙ੍ਗਾਨਿਵਤ੍ਤਨੇ ਅਸ੍ਸਮਪਦਂ ਮਾਪੇਤ੍ਵਾ ਵਾਸਂ ਕਪ੍ਪੇਸੁਂ.

ਅਥੇਕਦਿਵਸਂ ਉਪਰਿਗਙ੍ਗਾਯ ਰਾਜਾਪਰਾਧਿਕਂ ਚੋਰਂ ਹਤ੍ਥਪਾਦੇ ਚ ਕਣ੍ਣਨਾਸਞ੍ਚ ਛਿਨ੍ਦਿਤ੍ਵਾ ਏਕਸ੍ਮਿਂ ਅਮ੍ਬਣਕੇ ਨਿਪਜ੍ਜਾਪੇਤ੍ਵਾ ਮਹਾਗਙ੍ਗਾਯ ਪਵਾਹੇਸੁਂ. ਸੋ ਮਹਨ੍ਤਂ ਅਟ੍ਟਸ੍ਸਰਂ ਕਰੋਨ੍ਤੋ ਤਂ ਠਾਨਂ ਪਾਪੁਣਿ. ਬੋਧਿਸਤ੍ਤੋ ਤਸ੍ਸ ਕਰੁਣਂ ਪਰਿਦੇਵਿਤਸਦ੍ਦਂ ਸੁਤ੍ਵਾ ‘‘ਦੁਕ੍ਖਪ੍ਪਤ੍ਤੋ ਸਤ੍ਤੋ ਮਯਿ ਠਿਤੇ ਮਾ ਨਸ੍ਸੀ’’ਤਿ ਗਙ੍ਗਾਤੀਰਂ ਗਨ੍ਤ੍ਵਾ ਤਂ ਉਤ੍ਤਾਰੇਤ੍ਵਾ ਅਸ੍ਸਮਪਦਂ ਆਨੇਤ੍ਵਾ ਕਾਸਾਵਧੋਵਨਲੇਪਨਾਦੀਹਿ ਵਣਪਟਿਕਮ੍ਮਂ ਅਕਾਸਿ. ਭਰਿਯਾ ਪਨਸ੍ਸ ‘‘ਏਵਰੂਪਂ ਨਾਮ ਦੁਸ੍ਸੀਲਂ ਕੁਣ੍ਠਂ ਗਙ੍ਗਾਯ ਆਵਾਹੇਤ੍ਵਾ ਪਟਿਜਗ੍ਗਨ੍ਤੋ ਵਿਚਰਤੀ’’ਤਿ ਵਤ੍ਵਾ ਤਂ ਕੁਣ੍ਠਂ ਜਿਗੁਚ੍ਛਮਾਨਾ ਨਿਟ੍ਠੁਭਨ੍ਤੀ ਵਿਚਰਤਿ. ਬੋਧਿਸਤ੍ਤੋ ਤਸ੍ਸ ਵਣੇਸੁ ਸਂਵਿਰੁਲ਼੍ਹੇਸੁ ਭਰਿਯਾਯ ਸਦ੍ਧਿਂ ਤਂ ਅਸ੍ਸਮਪਦੇਯੇਵ ਠਪੇਤ੍ਵਾ ਅਟਵਿਤੋ ਫਲਾਫਲਾਨਿ ਆਹਰਿਤ੍ਵਾ ਤਞ੍ਚ ਭਰਿਯਞ੍ਚ ਪੋਸੇਸਿ. ਤੇਸੁ ਏਵਂ ਵਸਨ੍ਤੇਸੁ ਸਾ ਇਤ੍ਥੀ ਏਤਸ੍ਮਿਂ ਕੁਣ੍ਠੇ ਪਟਿਬਦ੍ਧਚਿਤ੍ਤਾ ਹੁਤ੍ਵਾ ਤੇਨ ਸਦ੍ਧਿਂ ਅਨਾਚਾਰਂ ਚਰਿਤ੍ਵਾ ਏਕੇਨੁਪਾਯੇਨ ਬੋਧਿਸਤ੍ਤਂ ਮਾਰੇਤੁਕਾਮਾ ਹੁਤ੍ਵਾ ਏਵਮਾਹ – ‘‘ਸਾਮਿ, ਅਹਂ ਤੁਮ੍ਹਾਕਂ ਅਂਸੇ ਨਿਸੀਦਿਤ੍ਵਾ ਕਨ੍ਤਾਰਾ ਨਿਕ੍ਖਮਮਾਨਾ ਏਕਂ ਪਬ੍ਬਤਂ ਓਲੋਕੇਤ੍ਵਾ ਅਯ੍ਯੇ ਪਬ੍ਬਤਮ੍ਹਿ ਨਿਬ੍ਬਤ੍ਤਦੇਵਤੇ ‘ਸਚੇ ਅਹਂ ਸਾਮਿਕੇਨ ਸਦ੍ਧਿਂ ਅਰੋਗਾ ਜੀਵਿਤਂ ਲਭਿਸ੍ਸਾਮਿ, ਬਲਿਕਮ੍ਮਂ ਤੇ ਕਰਿਸ੍ਸਾਮੀ’ਤਿ ਆਯਾਚਿਂ, ਸਾ ਮਂ ਇਦਾਨਿ ਉਤ੍ਤਾਸੇਤਿ, ਕਰੋਮਸ੍ਸਾ ਬਲਿਕਮ੍ਮ’’ਨ੍ਤਿ. ਬੋਧਿਸਤ੍ਤੋ ਤਂ ਮਾਯਂ ਅਜਾਨਨ੍ਤੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਬਲਿਕਮ੍ਮਂ ਸਜ੍ਜੇਤ੍ਵਾ ਤਾਯ ਬਲਿਭਾਜਨਂ ਗਾਹਾਪੇਤ੍ਵਾ ਪਬ੍ਬਤਮਤ੍ਥਕਂ ਅਭਿਰੁਹਿ. ਅਥ ਨਂ ਸਾ ਏਵਮਾਹ – ‘‘ਸਾਮਿ, ਦੇਵਤਾਯਪਿ ਤ੍ਵਞ੍ਞੇਵ ਉਤ੍ਤਮਦੇਵਤਾ, ਪਠਮਂ ਤਾਵ ਤਂ ਵਨਪੁਪ੍ਫੇਹਿ ਪੂਜੇਤ੍ਵਾ ਪਦਕ੍ਖਿਣਂ ਕਤ੍ਵਾ ਵਨ੍ਦਿਤ੍ਵਾ ਪਚ੍ਛਾ ਦੇਵਤਾਯ ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ. ਸਾ ਬੋਧਿਸਤ੍ਤਂ ਪਪਾਤਾਭਿਮੁਖਂ ਠਪੇਤ੍ਵਾ ਵਨਪੁਪ੍ਫੇਹਿ ਪੂਜੇਤ੍ਵਾ ਪਦਕ੍ਖਿਣਂ ਕਤ੍ਵਾ ਵਨ੍ਦਿਤੁਕਾਮਾ ਵਿਯ ਹੁਤ੍ਵਾ ਪਿਟ੍ਠਿਪਸ੍ਸੇ ਠਤ੍ਵਾ ਪਿਟ੍ਠਿਯਂ ਪਹਰਿਤ੍ਵਾ ਪਪਾਤੇ ਪਾਤੇਤ੍ਵਾ ‘‘ਦਿਟ੍ਠਾ ਮੇ ਪਚ੍ਚਾਮਿਤ੍ਤਸ੍ਸ ਪਿਟ੍ਠੀ’’ਤਿ ਤੁਟ੍ਠਮਾਨਸਾ ਪਬ੍ਬਤਾ ਓਰੋਹਿਤ੍ਵਾ ਕੁਣ੍ਠਸ੍ਸ ਸਨ੍ਤਿਕਂ ਅਗਮਾਸਿ.

ਬੋਧਿਸਤ੍ਤੋਪਿ ਪਪਾਤਾਨੁਸਾਰੇਨ ਪਬ੍ਬਤਾ ਪਤਨ੍ਤੋ ਉਦੁਮ੍ਬਰਰੁਕ੍ਖਮਤ੍ਥਕੇ ਏਕਸ੍ਮਿਂ ਅਕਣ੍ਟਕੇ ਪਤ੍ਤਸਞ੍ਛਨ੍ਨੇ ਗੁਮ੍ਬੇ ਲਗ੍ਗਿ, ਹੇਟ੍ਠਾਪਬ੍ਬਤਂ ਪਨ ਓਰੋਹਿਤੁਂ ਨ ਸਕ੍ਕਾ. ਸੋ ਉਦੁਮ੍ਬਰਫਲਾਨਿ ਖਾਦਿਤ੍ਵਾ ਸਾਖਨ੍ਤਰੇ ਨਿਸੀਦਿ. ਅਥੇਕੋ ਮਹਾਸਰੀਰੋ ਗੋਧਰਾਜਾ ਹੇਟ੍ਠਾਪਬ੍ਬਤਪਾਦਤੋ ਅਭਿਰੁਹਿਤ੍ਵਾ ਤਸ੍ਮਿਂ ਉਦੁਮ੍ਬਰਫਲਾਨਿ ਖਾਦਤਿ. ਸੋ ਤਂ ਦਿਵਸਂ ਬੋਧਿਸਤ੍ਤਂ ਦਿਸ੍ਵਾ ਪਲਾਯਿ, ਪੁਨਦਿਵਸੇ ਆਗਨ੍ਤ੍ਵਾ ਏਕਸ੍ਮਿਂ ਪਸ੍ਸੇ ਫਲਾਨਿ ਖਾਦਿਤ੍ਵਾ ਪਕ੍ਕਾਮਿ. ਸੋ ਏਵਂ ਪੁਨਪ੍ਪੁਨਂ ਆਗਚ੍ਛਨ੍ਤੋ ਬੋਧਿਸਤ੍ਤੇਨ ਸਦ੍ਧਿਂ ਵਿਸ੍ਸਾਸਂ ਆਪਜ੍ਜਿਤ੍ਵਾ ‘‘ਤ੍ਵਂ ਇਮਂ ਠਾਨਂ ਕੇਨ ਕਾਰਣੇਨ ਆਗਤੋਸੀ’’ਤਿ ਪੁਚ੍ਛਿਤ੍ਵਾ ‘‘ਇਮਿਨਾ ਨਾਮ ਕਾਰਣੇਨਾ’’ਤਿ ਵੁਤ੍ਤੇ ‘‘ਤੇਨ ਹਿ ਮਾ ਭਾਯੀ’’ਤਿ ਵਤ੍ਵਾ ਬੋਧਿਸਤ੍ਤਂ ਅਤ੍ਤਨੋ ਪਿਟ੍ਠਿਯਂ ਨਿਪਜ੍ਜਾਪੇਤ੍ਵਾ ਓਤਾਰੇਤ੍ਵਾ ਅਰਞ੍ਞਤੋ ਨਿਕ੍ਖਮਿਤ੍ਵਾ ਮਹਾਮਗ੍ਗੇ ਠਪੇਤ੍ਵਾ ‘‘ਤ੍ਵਂ ਇਮਿਨਾ ਮਗ੍ਗੇਨ ਗਚ੍ਛਾਹੀ’’ਤਿ ਉਯ੍ਯੋਜੇਤ੍ਵਾ ਅਰਞ੍ਞਮੇਵ ਪਾਵਿਸਿ. ਬੋਧਿਸਤ੍ਤੋ ਏਕਂ ਗਾਮਕਂ ਗਨ੍ਤ੍ਵਾ ਤਤ੍ਥੇਵ ਵਸਨ੍ਤੋ ਪਿਤੁ ਕਾਲਕਤਭਾਵਂ ਸੁਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਕੁਲਸਨ੍ਤਕੇ ਰਜ੍ਜੇ ਪਤਿਟ੍ਠਾਯ ਪਦੁਮਰਾਜਾ ਨਾਮ ਹੁਤ੍ਵਾ ਦਸ ਰਾਜਧਮ੍ਮੇ ਅਕੋਪੇਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਨ੍ਤੋ ਚਤੂਸੁ ਨਗਰਦ੍ਵਾਰੇਸੁ ਨਗਰਮਜ੍ਝੇ ਨਿਵੇਸਨਦ੍ਵਾਰੇਤਿ ਛ ਦਾਨਸਾਲਾਯੋ ਕਾਰੇਤ੍ਵਾ ਦੇਵਸਿਕਂ ਛ ਸਤਸਹਸ੍ਸਾਨਿ ਵਿਸ੍ਸਜ੍ਜੇਤ੍ਵਾ ਦਾਨਂ ਅਦਾਸਿ.

ਸਾਪਿ ਖੋ ਇਤ੍ਥੀ ਤਂ ਕੁਣ੍ਠਂ ਖਨ੍ਧੇ ਨਿਸੀਦਾਪੇਤ੍ਵਾ ਅਰਞ੍ਞਾ ਨਿਕ੍ਖਮਿਤ੍ਵਾ ਮਨੁਸ੍ਸਪਥੇ ਭਿਕ੍ਖਂ ਚਰਮਾਨਾ ਯਾਗੁਭਤ੍ਤਂ ਸਂਹਰਿਤ੍ਵਾ ਤਂ ਕੁਣ੍ਠਂ ਪੋਸੇਸਿ. ਮਨੁਸ੍ਸਾ ‘‘ਅਯਂ ਤੇ ਕਿਂ ਹੋਤੀ’’ਤਿ ਪੁਚ੍ਛਿਯਮਾਨਾ ‘‘ਅਹਂ ਏਤਸ੍ਸ ਮਾਤੁਲਧੀਤਾ, ਪਿਤੁਚ੍ਛਾਪੁਤ੍ਤੋ ਮੇ ਏਸੋ, ਏਤਸ੍ਸੇਵ ਮਂ ਅਦਂਸੁ, ਸਾਹਂ ਵਜ੍ਝਪ੍ਪਤ੍ਤਮ੍ਪਿ ਅਤ੍ਤਨੋ ਸਾਮਿਕਂ ਉਕ੍ਖਿਪਿਤ੍ਵਾ ਪਰਿਹਰਨ੍ਤੀ ਭਿਕ੍ਖਂ ਚਰਿਤ੍ਵਾ ਪੋਸੇਮੀ’’ਤਿ. ਮਨੁਸ੍ਸਾ ‘‘ਅਯਂ ਪਤਿਬ੍ਬਤਾ’’ਤਿ ਤਤੋ ਪਟ੍ਠਾਯ ਬਹੁਤਰਂ ਯਾਗੁਭਤ੍ਤਂ ਅਦਂਸੁ. ਅਪਰੇ ਪਨ ਜਨਾ ਏਵਮਾਹਂਸੁ – ‘‘ਤ੍ਵਂ ਮਾ ਏਵਂ ਵਿਚਰਿ, ਪਦੁਮਰਾਜਾ ਬਾਰਾਣਸਿਯਂ ਰਜ੍ਜਂ ਕਾਰੇਤਿ, ਸਕਲਜਮ੍ਬੁਦੀਪਂ ਸਙ੍ਖੋਭੇਤ੍ਵਾ ਦਾਨਂ ਦੇਤਿ, ਸੋ ਤਂ ਦਿਸ੍ਵਾ ਤੁਸ੍ਸਿਸ੍ਸਤਿ, ਤੁਟ੍ਠੋ ਤੇ ਬਹੁਂ ਧਨਂ ਦਸ੍ਸਤਿ, ਤਵ ਸਾਮਿਕਂ ਇਧੇਵ ਨਿਸੀਦਾਪੇਤ੍ਵਾ ਗਚ੍ਛਾ’’ਤਿ ਥਿਰਂ ਕਤ੍ਵਾ ਵੇਤ੍ਤਪਚ੍ਛਿਂ ਅਦਂਸੁ. ਸਾ ਅਨਾਚਾਰਾ ਤਂ ਕੁਣ੍ਠਂ ਵੇਤ੍ਤਪਚ੍ਛਿਯਂ ਨਿਸੀਦਾਪੇਤ੍ਵਾ ਪਚ੍ਛਿਂ ਉਕ੍ਖਿਪਿਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਦਾਨਸਾਲਾਸੁ ਭੁਞ੍ਜਮਾਨਾ ਵਿਚਰਤਿ. ਬੋਧਿਸਤ੍ਤੋ ਅਲਙ੍ਕਤਹਤ੍ਥਿਕ੍ਖਨ੍ਧਵਰਗਤੋ ਦਾਨਗ੍ਗਂ ਗਨ੍ਤ੍ਵਾ ਅਟ੍ਠਨ੍ਨਂ ਵਾ ਦਸਨ੍ਨਂ ਵਾ ਸਹਤ੍ਥਾ ਦਾਨਂ ਦਤ੍ਵਾ ਪੁਨ ਗੇਹਂ ਗਚ੍ਛਤਿ. ਸਾ ਅਨਾਚਾਰਾ ਤਂ ਕੁਣ੍ਠਂ ਪਚ੍ਛਿਯਂ ਨਿਸੀਦਾਪੇਤ੍ਵਾ ਪਚ੍ਛਿਂ ਉਕ੍ਖਿਪਿਤ੍ਵਾ ਤਸ੍ਸ ਗਮਨਮਗ੍ਗੇ ਅਟ੍ਠਾਸਿ.

ਰਾਜਾ ਦਿਸ੍ਵਾ ‘‘ਕਿਂ ਏਤ’’ਨ੍ਤਿ ਪੁਚ੍ਛਿ. ‘‘ਏਕਾ, ਦੇਵ, ਪਤਿਬ੍ਬਤਾ’’ਤਿ. ਅਥ ਨਂ ਪਕ੍ਕੋਸਾਪੇਤ੍ਵਾ ਸਞ੍ਜਾਨਿਤ੍ਵਾ ਕੁਣ੍ਠਂ ਪਚ੍ਛਿਯਾ ਨੀਹਰਾਪੇਤ੍ਵਾ ‘‘ਅਯਂ ਤੇ ਕਿਂ ਹੋਤੀ’’ਤਿ ਪੁਚ੍ਛਿ. ਸਾ ‘‘ਪਿਤੁਚ੍ਛਾਪੁਤ੍ਤੋ ਮੇ, ਦੇਵ, ਕੁਲਦਤ੍ਤਿਕੋ ਸਾਮਿਕੋ’’ਤਿ ਆਹ. ਮਨੁਸ੍ਸਾ ਤਂ ਅਨ੍ਤਰਂ ਅਜਾਨਨ੍ਤਾ ‘‘ਅਹੋ ਪਤਿਬ੍ਬਤਾ’’ਤਿਆਦੀਨਿ ਵਤ੍ਵਾ ਤਂ ਅਨਾਚਾਰਿਤ੍ਥਿਂ ਵਣ੍ਣਯਿਂਸੁ. ਪੁਨ ਰਾਜਾ ‘‘ਅਯਂ ਤੇ ਕੁਣ੍ਠੋ ਕੁਲਦਤ੍ਤਿਕੋ ਸਾਮਿਕੋ’’ਤਿ ਪੁਚ੍ਛਿ. ਸਾ ਰਾਜਾਨਂ ਅਸਞ੍ਜਾਨਨ੍ਤੀ ‘‘ਆਮ, ਦੇਵਾ’’ਤਿ ਸੂਰਾ ਹੁਤ੍ਵਾ ਕਥੇਸਿ. ਅਥ ਨਂ ਰਾਜਾ ‘‘ਕਿਂ ਏਸ ਬਾਰਾਣਸਿਰਞ੍ਞੋ ਪੁਤ੍ਤੋ, ਨਨੁ ਤ੍ਵਂ ਪਦੁਮਕੁਮਾਰਸ੍ਸ ਭਰਿਯਾ ਅਸੁਕਰਞ੍ਞੋ ਧੀਤਾ, ਅਸੁਕਾ ਨਾਮ ਮਮ ਜਾਣੁਲੋਹਿਤਂ ਪਿਵਿਤ੍ਵਾ ਇਮਸ੍ਮਿਂ ਕੁਣ੍ਠੇ ਪਟਿਬਦ੍ਧਚਿਤ੍ਤਾ ਮਂ ਪਪਾਤੇ ਪਾਤੇਸਿ. ਸਾ ਇਦਾਨਿ ਤ੍ਵਂ ਨਲਾਟੇਨ ਮਚ੍ਚੁਂ ਗਹੇਤ੍ਵਾ ਮਂ ‘ਮਤੋ’ਤਿ ਮਞ੍ਞਮਾਨਾ ਇਮਂ ਠਾਨਂ ਆਗਤਾ, ਨਨੁ ਅਹਂ ਜੀਵਾਮੀ’’ਤਿ ਵਤ੍ਵਾ ਅਮਚ੍ਚੇ ਆਮਨ੍ਤੇਤ੍ਵਾ ‘‘ਭੋ, ਅਮਚ੍ਚਾ ਨਨੁ ਚਾਹਂ ਤੁਮ੍ਹੇਹਿ ਪੁਟ੍ਠੋ ਏਵਂ ਕਥੇਸਿਂ ‘ਮਮ ਕਨਿਟ੍ਠਭਾਤਿਕਾ ਛ ਇਤ੍ਥਿਯੋ ਮਾਰੇਤ੍ਵਾ ਮਂਸਂ ਖਾਦਿਂਸੁ, ਅਹਂ ਪਨ ਮਯ੍ਹਂ ਭਰਿਯਂ ਅਰੋਗਂ ਕਤ੍ਵਾ ਗਙ੍ਗਾਤੀਰਂ ਨੇਤ੍ਵਾ ਅਸ੍ਸਮਪਦੇ ਵਸਨ੍ਤੋ ਏਕਂ ਵਜ੍ਝਪ੍ਪਤ੍ਤਂ ਕੁਣ੍ਠਂ ਉਤ੍ਤਾਰੇਤ੍ਵਾ ਪਟਿਜਗ੍ਗਿਂ. ਸਾ ਇਤ੍ਥੀ ਏਤਸ੍ਮਿਂ ਪਟਿਬਦ੍ਧਚਿਤ੍ਤਾ ਮਂ ਪਬ੍ਬਤਪਾਦੇ ਪਾਤੇਸਿ. ਅਹਂ ਅਤ੍ਤਨੋ ਮੇਤ੍ਤਚਿਤ੍ਤਤਾਯ ਜੀਵਿਤਂ ਲਭਿ’ਨ੍ਤਿ. ਯਾਯ ਅਹਂ ਪਬ੍ਬਤਾ ਪਾਤਿਤੋ, ਨ ਸਾ ਅਞ੍ਞਾ, ਏਸਾ ਦੁਸ੍ਸੀਲਾ, ਸੋਪਿ ਵਜ੍ਝਪ੍ਪਤ੍ਤੋ ਕੁਣ੍ਠੋ ਨ ਅਞ੍ਞੋ, ਅਯਮੇਵਾ’’ਤਿ ਵਤ੍ਵਾ ਇਮਾ ਗਾਥਾ ਅਵੋਚ –

੮੫. ‘‘ਅਯਮੇਵ ਸਾ ਅਹਮਪਿ ਸੋ ਅਨਞ੍ਞੋ, ਅਯਮੇਵ ਸੋ ਹਤ੍ਥਚ੍ਛਿਨ੍ਨੋ ਅਨਞ੍ਞੋ;

ਯਮਾਹ ‘ਕੋਮਾਰਪਤੀ ਮਮ’ਨ੍ਤਿ, ਵਜ੍ਝਿਤ੍ਥਿਯੋ ਨਤ੍ਥਿ ਇਤ੍ਥੀਸੁ ਸਚ੍ਚਂ.

੮੬. ‘‘ਇਮਞ੍ਚ ਜਮ੍ਮਂ ਮੁਸਲੇਨ ਹਨ੍ਤ੍ਵਾ, ਲੁਦ੍ਦਂ ਛਵਂ ਪਰਦਾਰੂਪਸੇਵਿਂ;

ਇਮਿਸ੍ਸਾ ਚ ਨਂ ਪਾਪਪਤਿਬ੍ਬਤਾਯ, ਜੀਵਨ੍ਤਿਯਾ ਛਿਨ੍ਦਥ ਕਣ੍ਣਨਾਸ’’ਨ੍ਤਿ.

ਤਤ੍ਥ ਯਮਾਹ ਕੋਮਾਰਪਤੀ ਮਮਨ੍ਤਿ ਯਂ ਏਸਾ ‘‘ਅਯਂ ਮੇ, ਕੋਮਾਰਪਤਿ, ਕੁਲਦਤ੍ਤਿਕੋ ਸਾਮਿਕੋ’’ਤਿ ਆਹ, ਅਯਮੇਵ ਸੋ, ਨ ਅਞ੍ਞੋ. ‘‘ਯਮਾਹੁ, ਕੋਮਾਰਪਤੀ’’ਤਿਪਿ ਪਾਠੋ. ਅਯਮੇਵ ਹਿ ਪੋਤ੍ਥਕੇਸੁ ਲਿਖਿਤੋ, ਤਸ੍ਸਾਪਿ ਅਯਮੇਵਤ੍ਥੋ, ਵਚਨਵਿਪਲ੍ਲਾਸੋ ਪਨੇਤ੍ਥ ਵੇਦਿਤਬ੍ਬੋ. ਯਞ੍ਹਿ ਰਞ੍ਞਾ ਵੁਤ੍ਤਂ, ਤਦੇਵ ਇਧ ਆਗਤਂ. ਵਜ੍ਝਿਤ੍ਥਿਯੋਤਿ ਇਤ੍ਥਿਯੋ ਨਾਮ ਵਜ੍ਝਾ ਵਧਿਤਬ੍ਬਾ ਏਵ. ਨਤ੍ਥਿ ਇਤ੍ਥੀਸੁ ਸਚ੍ਚਨ੍ਤਿ ਏਤਾਸੁ ਸਭਾਵੋ ਨਾਮੇਕੋ ਨਤ੍ਥਿ. ‘‘ਇਮਞ੍ਚ ਜਮ੍ਮ’’ਨ੍ਤਿਆਦਿ ਦ੍ਵਿਨ੍ਨਮ੍ਪਿ ਤੇਸਂ ਦਣ੍ਡਾਣਾਪਨਵਸੇਨ ਵੁਤ੍ਤਂ. ਤਤ੍ਥ ਜਮ੍ਮਨ੍ਤਿ ਲਾਮਕਂ. ਮੁਸਲੇਨ ਹਨ੍ਤ੍ਵਾਤਿ ਮੁਸਲੇਨ ਹਨਿਤ੍ਵਾ ਪੋਥੇਤ੍ਵਾ ਅਟ੍ਠੀਨਿ ਭਞ੍ਜਿਤ੍ਵਾ ਚੁਣ੍ਣਵਿਚੁਣ੍ਣਂ ਕਤ੍ਵਾ. ਲੁਦ੍ਦਨ੍ਤਿ ਦਾਰੁਣਂ. ਛਵਨ੍ਤਿ ਗੁਣਾਭਾਵੇਨ ਨਿਜ੍ਜੀਵਂ ਮਤਸਦਿਸਂ. ਇਮਿਸ੍ਸਾ ਚ ਨਨ੍ਤਿ ਏਤ੍ਥ ਨਨ੍ਤਿ ਨਿਪਾਤਮਤ੍ਤਂ, ਇਮਿਸ੍ਸਾ ਚ ਪਾਪਪਤਿਬ੍ਬਤਾਯ ਅਨਾਚਾਰਾਯ ਦੁਸ੍ਸੀਲਾਯ ਜੀਵਨ੍ਤਿਯਾਵ ਕਣ੍ਣਨਾਸਂ ਛਿਨ੍ਦਥਾਤਿ ਅਤ੍ਥੋ.

ਬੋਧਿਸਤ੍ਤੋ ਕੋਧਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਏਵਂ ਤੇਸਂ ਦਣ੍ਡਂ ਆਣਾਪੇਤ੍ਵਾਪਿ ਨ ਤਥਾ ਕਾਰੇਸਿ. ਕੋਪਂ ਪਨ ਮਨ੍ਦਂ ਕਤ੍ਵਾ ਯਥਾ ਸਾ ਪਚ੍ਛਿਂ ਸੀਸਤੋ ਓਰੋਪੇਤੁਂ ਨ ਸਕ੍ਕੋਤਿ, ਏਵਂ ਗਾਲ਼੍ਹਤਰਂ ਬਨ੍ਧਾਪੇਤ੍ਵਾ ਕੁਣ੍ਠਂ ਤਤ੍ਥ ਪਕ੍ਖਿਪਾਪੇਤ੍ਵਾ ਅਤ੍ਤਨੋ ਵਿਜਿਤਾ ਨੀਹਰਾਪੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ – ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ‘‘ਤਦਾ ਛ ਭਾਤਰੋ ਅਞ੍ਞਤਰਾ ਥੇਰਾ ਅਹੇਸੁਂ, ਭਰਿਯਾ ਚਿਞ੍ਚਮਾਣਵਿਕਾ, ਕੁਣ੍ਠੋ ਦੇਵਦਤ੍ਤੋ, ਗੋਧਰਾਜਾ ਆਨਨ੍ਦੋ, ਪਦੁਮਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਚੂਲ਼ਪਦੁਮਜਾਤਕਵਣ੍ਣਨਾ ਤਤਿਯਾ.

[੧੯੪] ੪. ਮਣਿਚੋਰਜਾਤਕਵਣ੍ਣਨਾ

ਨ ਸਨ੍ਤਿ ਦੇਵਾ ਪਵਸਨ੍ਤਿ ਨੂਨਾਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਵਧਾਯ ਪਰਿਸਕ੍ਕਨ੍ਤਂ ਦੇਵਦਤ੍ਤਂ ਆਰਬ੍ਭ ਕਥੇਸਿ. ਤਦਾ ਪਨ ਸਤ੍ਥਾ ‘‘ਦੇਵਦਤ੍ਤੋ ਵਧਾਯ ਪਰਿਸਕ੍ਕਤੀ’’ਤਿ ਸੁਤ੍ਵਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਮਯ੍ਹਂ ਵਧਾਯ ਪਰਿਸਕ੍ਕਤਿਯੇਵ, ਪਰਿਸਕ੍ਕਨ੍ਤੋਪਿ ਪਨ ਮਂ ਵਧਿਤੁਂ ਨਾਸਕ੍ਖੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਬਾਰਾਣਸਿਤੋ ਅਵਿਦੂਰੇ ਗਾਮਕੇ ਗਹਪਤਿਕੁਲੇ ਨਿਬ੍ਬਤ੍ਤਿ. ਅਥਸ੍ਸ ਵਯਪ੍ਪਤ੍ਤਸ੍ਸ ਬਾਰਾਣਸਿਤੋ ਕੁਲਧੀਤਰਂ ਆਨੇਸੁਂ, ਸਾ ਸੁਵਣ੍ਣਵਣ੍ਣਾ ਅਹੋਸਿ ਅਭਿਰੂਪਾ ਦਸ੍ਸਨੀਯਾ ਦੇਵਚ੍ਛਰਾ ਵਿਯ ਪੁਪ੍ਫਲਤਾ ਵਿਯ ਲਲ਼ਮਾਨਾ ਮਤ੍ਤਕਿਨ੍ਨਰੀ ਵਿਯ ਚ ਸੁਜਾਤਾਤਿ ਨਾਮੇਨ ਪਤਿਬ੍ਬਤਾ ਸੀਲਾਚਾਰਸਮ੍ਪਨ੍ਨਾ ਵਤ੍ਤਸਮ੍ਪਨ੍ਨਾ. ਨਿਚ੍ਚਕਾਲਮ੍ਪਿਸ੍ਸਾ ਪਤਿਵਤ੍ਤਂ ਸਸ੍ਸੁਵਤ੍ਤਂ ਸਸੁਰਵਤ੍ਤਞ੍ਚ ਕਤਮੇਵ ਹੋਤਿ, ਸਾ ਬੋਧਿਸਤ੍ਤਸ੍ਸ ਪਿਯਾ ਅਹੋਸਿ ਮਨਾਪਾ. ਇਤਿ ਉਭੋਪਿ ਤੇ ਸਮ੍ਮੋਦਮਾਨਾ ਏਕਚਿਤ੍ਤਾ ਸਮਗ੍ਗਵਾਸਂ ਵਸਿਂਸੁ.

ਅਥੇਕਦਿਵਸਂ ਸੁਜਾਤਾ ‘‘ਮਾਤਾਪਿਤਰੋ ਦਟ੍ਠੁਕਾਮਾਮ੍ਹੀ’’ਤਿ ਬੋਧਿਸਤ੍ਤਸ੍ਸ ਆਰੋਚੇਸਿ. ‘‘ਸਾਧੁ, ਭਦ੍ਦੇ, ਮਗ੍ਗਪਾਥੇਯ੍ਯਂ ਪਹੋਨਕਂ ਪਟਿਯਾਦੇਹੀ’’ਤਿ ਖਜ੍ਜਵਿਕਤਿਂ ਪਚਾਪੇਤ੍ਵਾ ਖਜ੍ਜਕਾਦੀਨਿ ਯਾਨਕੇ ਠਪੇਤ੍ਵਾ ਯਾਨਕਂ ਪਾਜੇਨ੍ਤੋ ਯਾਨਕਸ੍ਸ ਪੁਰਤੋ ਅਹੋਸਿ, ਇਤਰਾ ਪਚ੍ਛਤੋ. ਤੇ ਨਗਰਸਮੀਪਂ ਗਨ੍ਤ੍ਵਾ ਯਾਨਕਂ ਮੋਚੇਤ੍ਵਾ ਨ੍ਹਤ੍ਵਾ ਭੁਞ੍ਜਿਂਸੁ. ਪੁਨ ਬੋਧਿਸਤ੍ਤੋ ਯਾਨਕਂ ਯੋਜੇਤ੍ਵਾ ਪੁਰਤੋ ਨਿਸੀਦਿ, ਸੁਜਾਤਾ ਵਤ੍ਥਾਨਿ ਪਰਿਵਤ੍ਤੇਤ੍ਵਾ ਅਲਙ੍ਕਰਿਤ੍ਵਾ ਪਚ੍ਛਤੋ ਨਿਸੀਦਿ. ਯਾਨਕਸ੍ਸ ਅਨ੍ਤੋਨਗਰਂ ਪਵਿਟ੍ਠਕਾਲੇ ਬਾਰਾਣਸਿਰਾਜਾ ਹਤ੍ਥਿਕ੍ਖਨ੍ਧਵਰਗਤੋ ਨਗਰਂ ਪਦਕ੍ਖਿਣਂ ਕਰੋਨ੍ਤੋ ਤਂ ਪਦੇਸਂ ਅਗਮਾਸਿ. ਸੁਜਾਤਾ ਓਤਰਿਤ੍ਵਾ ਯਾਨਕਸ੍ਸ ਪਚ੍ਛਤੋ ਪਦਸਾ ਪਾਯਾਸਿ. ਰਾਜਾ ਤਂ ਦਿਸ੍ਵਾ ਤਸ੍ਸਾ ਰੂਪਸਮ੍ਪਤ੍ਤਿਯਾ ਆਕਡ੍ਢਿਯਮਾਨਲੋਚਨੋ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ਏਕਂ ਅਮਚ੍ਚਂ ਆਣਾਪੇਸਿ – ‘‘ਗਚ੍ਛ ਤ੍ਵਂ ਏਤਿਸ੍ਸਾ ਸਸ੍ਸਾਮਿਕਭਾਵਂ ਵਾ ਅਸ੍ਸਾਮਿਕਭਾਵਂ ਵਾ ਜਾਨਾਹੀ’’ਤਿ. ਸੋ ਗਨ੍ਤ੍ਵਾ ਤਸ੍ਸਾ ਸਸ੍ਸਾਮਿਕਭਾਵਂ ਞਤ੍ਵਾ ‘‘ਸਸ੍ਸਾਮਿਕਾ ਕਿਰ, ਦੇਵ, ਯਾਨਕੇ ਨਿਸਿਨ੍ਨੋ ਪੁਰਿਸੋ ਏਤਿਸ੍ਸਾ ਸਾਮਿਕੋ’’ਤਿ ਆਹ.

ਰਾਜਾ ਪਟਿਬਦ੍ਧਚਿਤ੍ਤਂ ਵਿਨੋਦੇਤੁਂ ਅਸਕ੍ਕੋਨ੍ਤੋ ਕਿਲੇਸਾਤੁਰੋ ਹੁਤ੍ਵਾ ‘‘ਏਕੇਨ ਨਂ ਉਪਾਯੇਨ ਮਾਰਾਪੇਤ੍ਵਾ ਇਤ੍ਥਿਂ ਗਣ੍ਹਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਕਂ ਪੁਰਿਸਂ ਆਮਨ੍ਤੇਤ੍ਵਾ ‘‘ਗਚ੍ਛ, ਭੋ, ਇਮਂ ਚੂਲ਼ਾਮਣਿਂ ਵੀਥਿਂ ਗਚ੍ਛਨ੍ਤੋ ਵਿਯ ਹੁਤ੍ਵਾ ਏਤਸ੍ਸ ਪੁਰਿਸਸ੍ਸ ਯਾਨਕੇ ਪਕ੍ਖਿਪਿਤ੍ਵਾ ਏਹੀ’’ਤਿ ਚੂਲ਼ਾਮਣਿਂ ਦਤ੍ਵਾ ਉਯ੍ਯੋਜੇਸਿ. ਸੋ ‘‘ਸਾਧੂ’’ਤਿ ਤਂ ਗਹੇਤ੍ਵਾ ਗਨ੍ਤ੍ਵਾ ਯਾਨਕੇ ਠਪੇਤ੍ਵਾ ‘‘ਠਪਿਤੋ ਮੇ, ਦੇਵਾ’’ਤਿ ਆਗਨ੍ਤ੍ਵਾ ਆਰੋਚੇਸਿ. ਰਾਜਾ ‘‘ਚੂਲ਼ਾਮਣਿ ਮੇ ਨਟ੍ਠੋ’’ਤਿ ਆਹ, ਮਨੁਸ੍ਸਾ ਏਕਕੋਲਾਹਲਂ ਅਕਂਸੁ. ਰਾਜਾ ‘‘ਸਬ੍ਬਦ੍ਵਾਰਾਨਿ ਪਿਦਹਿਤ੍ਵਾ ਸਞ੍ਚਾਰਂ ਛਿਨ੍ਦਿਤ੍ਵਾ ਚੋਰਂ ਪਰਿਯੇਸਥਾ’’ਤਿ ਆਹ, ਰਾਜਪੁਰਿਸਾ ਤਥਾ ਅਕਂਸੁ, ਨਗਰਂ ਏਕਸਙ੍ਖੋਭਂ ਅਹੋਸਿ. ਇਤਰੋ ਪੁਰਿਸੋ ਮਨੁਸ੍ਸੇ ਗਹੇਤ੍ਵਾ ਬੋਧਿਸਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਭੋ, ਯਾਨਕਂ ਠਪੇਹਿ, ਰਞ੍ਞੋ ਚੂਲ਼ਾਮਣਿ ਨਟ੍ਠੋ, ਯਾਨਕਂ ਸੋਧੇਸ੍ਸਾਮੀ’’ਤਿ ਯਾਨਕਂ ਸੋਧੇਨ੍ਤੋ ਅਤ੍ਤਨਾ ਠਪਿਤਮਣਿਂ ਗਹੇਤ੍ਵਾ ਬੋਧਿਸਤ੍ਤਂ ਗਹੇਤ੍ਵਾ ‘‘ਮਣਿਚੋਰੋ’’ਤਿ ਹਤ੍ਥੇਹਿ ਚ ਪਾਦੇਹਿ ਚ ਪੋਥੇਤ੍ਵਾ ਪਚ੍ਛਾਬਾਹਂ ਬਨ੍ਧਿਤ੍ਵਾ ਨੇਤ੍ਵਾ ‘‘ਅਯਂ ਮਣਿਚੋਰੋ’’ਤਿ ਰਞ੍ਞੋ ਦਸ੍ਸੇਸਿ. ਰਾਜਾਪਿ ‘‘ਸੀਸਮਸ੍ਸ ਛਿਨ੍ਦਥਾ’’ਤਿ ਆਣਾਪੇਸਿ.

ਅਥ ਨਂ ਰਾਜਪੁਰਿਸਾ ਚਤੁਕ੍ਕੇ ਚਤੁਕ੍ਕੇ ਕਸਾਹਿ ਤਾਲ਼ੇਨ੍ਤਾ ਦਕ੍ਖਿਣਦ੍ਵਾਰੇਨ ਨਗਰਾ ਨਿਕ੍ਖਮਾਪੇਸੁਂ. ਸੁਜਾਤਾਪਿ ਯਾਨਕਂ ਪਹਾਯ ਬਾਹਾ ਪਗ੍ਗਯ੍ਹ ਪਰਿਦੇਵਮਾਨਾ ‘‘ਸਾਮਿ, ਮਂ ਨਿਸ੍ਸਾਯ ਇਮਂ ਦੁਕ੍ਖਂ ਪਤ੍ਤੋਸੀ’’ਤਿ ਪਰਿਦੇਵਮਾਨਾ ਪਚ੍ਛਤੋ ਪਚ੍ਛਤੋ ਅਗਮਾਸਿ. ਰਾਜਪੁਰਿਸਾ ‘‘ਸੀਸਮਸ੍ਸ ਛਿਨ੍ਦਿਸ੍ਸਾਮਾ’’ਤਿ ਬੋਧਿਸਤ੍ਤਂ ਉਤ੍ਤਾਨਂ ਨਿਪਜ੍ਜਾਪੇਸੁਂ. ਤਂ ਦਿਸ੍ਵਾ ਸੁਜਾਤਾ ਅਤ੍ਤਨੋ ਸੀਲਗੁਣਂ ਆਵਜ੍ਜੇਤ੍ਵਾ ‘‘ਨਤ੍ਥਿ ਵਤ ਮਞ੍ਞੇ ਇਮਸ੍ਮਿਂ ਲੋਕੇ ਸੀਲਵਨ੍ਤਾਨਂ ਵਿਹੇਠਕੇ ਪਾਪਸਾਹਸਿਕਮਨੁਸ੍ਸੇ ਨਿਸੇਧੇਤੁਂ ਸਮਤ੍ਥਾ ਦੇਵਤਾ ਨਾਮਾ’’ਤਿਆਦੀਨਿ ਵਤ੍ਵਾ ਪਠਮਂ ਗਾਥਮਾਹ –

੮੭. ‘‘ਨ ਸਨ੍ਤਿ ਦੇਵਾ ਪਵਸਨ੍ਤਿ ਨੂਨ, ਨ ਹਿ ਨੂਨ ਸਨ੍ਤਿ ਇਧ ਲੋਕਪਾਲਾ;

ਸਹਸਾ ਕਰੋਨ੍ਤਾਨਮਸਞ੍ਞਤਾਨਂ, ਨ ਹਿ ਨੂਨ ਸਨ੍ਤਿ ਪਟਿਸੇਧਿਤਾਰੋ’’ਤਿ.

ਤਤ੍ਥ ਨ ਸਨ੍ਤਿ, ਦੇਵਾਤਿ ਇਮਸ੍ਮਿਂ ਲੋਕੇ ਸੀਲਵਨ੍ਤਾਨਂ ਓਲੋਕਨਕਾ ਪਾਪਾਨਞ੍ਚ ਨਿਸੇਧਕਾ ਨ ਸਨ੍ਤਿ ਨੂਨ ਦੇਵਾ. ਪਵਸਨ੍ਤਿ ਨੂਨਾਤਿ ਏਵਰੂਪੇਸੁ ਵਾ ਕਿਚ੍ਚੇਸੁ ਉਪ੍ਪਨ੍ਨੇਸੁ ਨੂਨ ਪਵਸਨ੍ਤਿ ਪਵਾਸਂ ਗਚ੍ਛਨ੍ਤਿ. ਇਧ, ਲੋਕਪਾਲਾਤਿ ਇਮਸ੍ਮਿਂ ਲੋਕੇ ਲੋਕਪਾਲਸਮ੍ਮਤਾ ਸਮਣਬ੍ਰਾਹ੍ਮਣਾਪਿ ਸੀਲਵਨ੍ਤਾਨਂ ਅਨੁਗ੍ਗਾਹਕਾ ਨ ਹਿ ਨੂਨ ਸਨ੍ਤਿ. ਸਹਸਾ ਕਰੋਨ੍ਤਾਨਮਸਞ੍ਞਤਾਨਨ੍ਤਿ ਸਹਸਾ ਅਵੀਮਂਸਿਤ੍ਵਾ ਸਾਹਸਿਕਂ ਦਾਰੁਣਂ ਕਮ੍ਮਂ ਕਰੋਨ੍ਤਾਨਂ ਦੁਸ੍ਸੀਲਾਨਂ. ਪਟਿਸੇਧਿਤਾਰੋਤਿ ਏਵਰੂਪਂ ਕਮ੍ਮਂ ਮਾ ਕਰਿਤ੍ਥ, ਨ ਲਬ੍ਭਾ ਏਤਂ ਕਾਤੁਨ੍ਤਿ ਪਟਿਸੇਧੇਨ੍ਤਾ ਨਤ੍ਥੀਤਿ ਅਤ੍ਥੋ.

ਏਵਂ ਤਾਯ ਸੀਲਸਮ੍ਪਨ੍ਨਾਯ ਪਰਿਦੇਵਮਾਨਾਯ ਸਕ੍ਕਸ੍ਸ ਦੇਵਰਞ੍ਞੋ ਨਿਸਿਨ੍ਨਾਸਨਂ ਉਣ੍ਹਾਕਾਰਂ ਦਸ੍ਸੇਸਿ, ਸਕ੍ਕੋ ‘‘ਕੋ ਨੁ ਖੋ ਮਂ ਸਕ੍ਕਤ੍ਤਤੋ ਚਾਵੇਤੁਕਾਮੋ’’ਤਿ ਆਵਜ੍ਜੇਨ੍ਤੋ ਇਮਂ ਕਾਰਣਂ ਞਤ੍ਵਾ ‘‘ਬਾਰਾਣਸਿਰਾਜਾ ਅਤਿਫਰੁਸਕਮ੍ਮਂ ਕਰੋਤਿ, ਸੀਲਸਮ੍ਪਨ੍ਨਂ ਸੁਜਾਤਂ ਕਿਲਮੇਤਿ, ਗਨ੍ਤੁਂ ਦਾਨਿ ਮੇ ਵਟ੍ਟਤੀ’’ਤਿ ਦੇਵਲੋਕਾ ਓਰੁਯ੍ਹ ਅਤ੍ਤਨੋ ਆਨੁਭਾਵੇਨ ਹਤ੍ਥਿਪਿਟ੍ਠੇ ਨਿਸਿਨ੍ਨਂ ਤਂ ਪਾਪਰਾਜਾਨਂ ਹਤ੍ਥਿਕ੍ਖਨ੍ਧਤੋ ਓਤਾਰੇਤ੍ਵਾ ਧਮ੍ਮਗਣ੍ਡਿਕਾਯ ਉਤ੍ਤਾਨਂ ਨਿਪਜ੍ਜਾਪੇਤ੍ਵਾ ਬੋਧਿਸਤ੍ਤਂ ਉਕ੍ਖਿਪਿਤ੍ਵਾ ਸਬ੍ਬਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਰਾਜਵੇਸਂ ਗਾਹਾਪੇਤ੍ਵਾ ਹਤ੍ਥਿਕ੍ਖਨ੍ਧੇ ਨਿਸੀਦਾਪੇਸਿ. ਰਾਜਪੁਰਿਸਾ ਫਰਸੁਂ ਉਕ੍ਖਿਪਿਤ੍ਵਾ ਸੀਸਂ ਛਿਨ੍ਦਨ੍ਤਾ ਰਞ੍ਞੋ ਸੀਸਂ ਛਿਨ੍ਦਿਂਸੁ, ਛਿਨ੍ਨਕਾਲੇਯੇਵ ਚਸ੍ਸ ਰਞ੍ਞੋ ਸੀਸਭਾਵਂ ਜਾਨਿਂਸੁ. ਸਕ੍ਕੋ ਦੇਵਰਾਜਾ ਦਿਸ੍ਸਮਾਨਕਸਰੀਰੇਨੇਵ ਬੋਧਿਸਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਬੋਧਿਸਤ੍ਤਸ੍ਸ ਰਾਜਾਭਿਸੇਕਂ ਕਤ੍ਵਾ ਸੁਜਾਤਾਯ ਚ ਅਗ੍ਗਮਹੇਸਿਟ੍ਠਾਨਂ ਦਾਪੇਸਿ. ਅਮਚ੍ਚਾ ਚੇਵ ਬ੍ਰਾਹ੍ਮਣਗਹਪਤਿਕਾਦਯੋ ਚ ਸਕ੍ਕਂ ਦੇਵਰਾਜਾਨਂ ਦਿਸ੍ਵਾ ‘‘ਅਧਮ੍ਮਿਕਰਾਜਾ ਮਾਰਿਤੋ, ਇਦਾਨਿ ਅਮ੍ਹੇਹਿ ਸਕ੍ਕਦਤ੍ਤਿਕੋ ਧਮ੍ਮਿਕਰਾਜਾ ਲਦ੍ਧੋ’’ਤਿ ਸੋਮਨਸ੍ਸਪ੍ਪਤ੍ਤਾ ਅਹੇਸੁਂ.

ਸਕ੍ਕੋਪਿ ਆਕਾਸੇ ਠਤ੍ਵਾ ‘‘ਅਯਂ ਵੋ ਸਕ੍ਕਦਤ੍ਤਿਕੋ ਰਾਜਾ, ਇਤੋ ਪਟ੍ਠਾਯ ਧਮ੍ਮੇਨ ਰਜ੍ਜਂ ਕਾਰੇਸ੍ਸਤਿ. ਸਚੇ ਹਿ ਰਾਜਾ ਅਧਮ੍ਮਿਕੋ ਹੋਤਿ, ਦੇਵੋ ਅਕਾਲੇ ਵਸ੍ਸਤਿ, ਕਾਲੇ ਨ ਵਸ੍ਸਤਿ, ਛਾਤਭਯਂ ਰੋਗਭਯਂ ਸਤ੍ਥਭਯਨ੍ਤਿ ਇਮਾਨਿ ਤੀਣਿ ਭਯਾਨਿ ਉਪਗਤਾਨੇਵ ਹੋਨ੍ਤੀ’’ਤਿ ਓਵਦਨ੍ਤੋ ਦੁਤਿਯਂ ਗਾਥਮਾਹ –

੮੮. ‘‘ਅਕਾਲੇ ਵਸ੍ਸਤੀ ਤਸ੍ਸ, ਕਾਲੇ ਤਸ੍ਸ ਨ ਵਸ੍ਸਤਿ;

ਸਗ੍ਗਾ ਚ ਚਵਤਿ ਠਾਨਾ, ਨਨੁ ਸੋ ਤਾਵਤਾ ਹਤੋ’’ਤਿ.

ਤਤ੍ਥ ਅਕਾਲੇਤਿ ਅਧਮ੍ਮਿਕਰਞ੍ਞੋ ਰਜ੍ਜੇ ਅਯੁਤ੍ਤਕਾਲੇ ਸਸ੍ਸਾਨਂ ਪਕ੍ਕਕਾਲੇ ਵਾ ਲਾਯਨਮਦ੍ਦਨਾਦਿਕਾਲੇ ਵਾ ਦੇਵੋ ਵਸ੍ਸਤਿ. ਕਾਲੇਤਿ ਯੁਤ੍ਤਪਯੁਤ੍ਤਕਾਲੇ ਵਪਨਕਾਲੇ ਤਰੁਣਸਸ੍ਸਕਾਲੇ ਗਬ੍ਭਗ੍ਗਹਣਕਾਲੇ ਚ ਨ ਵਸ੍ਸਤਿ. ਸਗ੍ਗਾ ਚ ਚਵਤਿ ਠਾਨਾਤਿ ਸਗ੍ਗਸਙ੍ਖਾਤਾ ਠਾਨਾ ਦੇਵਲੋਕਾ ਚਵਤੀਤਿ ਅਤ੍ਥੋ. ਅਧਮ੍ਮਿਕਰਾਜਾ ਹਿ ਅਪ੍ਪਟਿਲਾਭਵਸੇਨ ਦੇਵਲੋਕਾ ਚਵਤਿ ਨਾਮ, ਸਗ੍ਗੇਪਿ ਵਾ ਰਜ੍ਜਂ ਕਾਰੇਨ੍ਤੋ ਅਧਮ੍ਮਿਕਰਾਜਾ ਤਤੋ ਚਵਤੀਤਿਪਿ ਅਤ੍ਥੋ. ਨਨੁ ਸੋ ਤਾਵਤਾ ਹਤੋਤਿ ਨਨੁ ਸੋ ਅਧਮ੍ਮਿਕੋ ਰਾਜਾ ਏਤ੍ਤਕੇਨ ਹਤੋ ਹੋਤਿ. ਅਥ ਵਾ ਏਕਂਸਵਾਚੀ ਏਤ੍ਥ ਨੁ-ਕਾਰੋ, ਨੇਸੋ ਏਕਂਸੇਨ ਏਤ੍ਤਾਵਤਾ ਹਤੋ, ਅਟ੍ਠਸੁ ਪਨ ਮਹਾਨਿਰਯੇਸੁ ਸੋਲ਼ਸਸੁ ਚ ਉਸ੍ਸਦਨਿਰਯੇਸੁ ਦੀਘਰਤ੍ਤਂ ਸੋ ਹਞ੍ਞਿਸ੍ਸਤੀਤਿ ਅਯਮੇਤ੍ਥ ਅਤ੍ਥੋ.

ਏਵਂ ਸਕ੍ਕੋ ਮਹਾਜਨਸ੍ਸ ਓਵਾਦਂ ਦਤ੍ਵਾ ਅਤ੍ਤਨੋ ਦੇਵਟ੍ਠਾਨਮੇਵ ਅਗਮਾਸਿ. ਬੋਧਿਸਤ੍ਤੋਪਿ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਸਗ੍ਗਪੁਰਂ ਪੂਰੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਅਧਮ੍ਮਿਕਰਾਜਾ ਦੇਵਦਤ੍ਤੋ ਅਹੋਸਿ, ਸਕ੍ਕੋ ਅਨੁਰੁਦ੍ਧੋ, ਸੁਜਾਤਾ ਰਾਹੁਲਮਾਤਾ, ਸਕ੍ਕਦਤ੍ਤਿਯਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਣਿਚੋਰਜਾਤਕਵਣ੍ਣਨਾ ਚਤੁਤ੍ਥਾ.

[੧੯੫] ੫. ਪਬ੍ਬਤੂਪਤ੍ਥਰਜਾਤਕਵਣ੍ਣਨਾ

ਪਬ੍ਬਤੂਪਤ੍ਥਰੇ ਰਮ੍ਮੇਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਕੋਸਲਰਾਜਾਨਂ ਆਰਬ੍ਭ ਕਥੇਸਿ. ਕੋਸਲਰਞ੍ਞੋ ਕਿਰ ਏਕੋ ਅਮਚ੍ਚੋ ਅਨ੍ਤੇਪੁਰੇ ਪਦੁਸ੍ਸਿ. ਰਾਜਾਪਿ ਪਰਿਵੀਮਂਸਮਾਨੋ ਤਂ ਤਥਤੋ ਞਤ੍ਵਾ ‘‘ਸਤ੍ਥੁ ਆਰੋਚੇਸ੍ਸਾਮੀ’’ਤਿ ਜੇਤਵਨਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ‘‘ਭਨ੍ਤੇ, ਅਮ੍ਹਾਕਂ ਅਨ੍ਤੇਪੁਰੇ ਏਕੋ ਅਮਚ੍ਚੋ ਪਦੁਸ੍ਸਿ, ਤਸ੍ਸ ਕਿਂ ਕਾਤੁਂ ਵਟ੍ਟਤੀ’’ਤਿ ਪੁਚ੍ਛਿ. ਅਥ ਨਂ ਸਤ੍ਥਾ ‘‘ਉਪਕਾਰਕੋ ਤੇ, ਮਹਾਰਾਜ, ਸੋ ਚ ਅਮਚ੍ਚੋ ਸਾ ਚ ਇਤ੍ਥੀ ਪਿਯਾ’’ਤਿ ਪੁਚ੍ਛਿਤ੍ਵਾ ‘‘ਆਮ, ਭਨ੍ਤੇ, ਅਤਿਵਿਯ ਉਪਕਾਰਕੋ ਸਕਲਂ ਰਾਜਕੁਲਂ ਸਨ੍ਧਾਰੇਤਿ, ਸਾਪਿ ਮੇ ਇਤ੍ਥੀ ਪਿਯਾ’’ਤਿ ਵੁਤ੍ਤੇ ‘‘ਮਹਾਰਾਜ, ‘ਅਤ੍ਤਨੋ ਉਪਕਾਰਕੇਸੁ ਸੇਵਕੇਸੁ ਪਿਯਾਸੁ ਚ ਇਤ੍ਥੀਸੁ ਦੁਬ੍ਭਿਤੁਂ ਨ ਸਕ੍ਕਾ’ਤਿ ਪੁਬ੍ਬੇਪਿ ਰਾਜਾਨੋ ਪਣ੍ਡਿਤਾਨਂ ਕਥਂ ਸੁਤ੍ਵਾ ਮਜ੍ਝਤ੍ਤਾਵ ਅਹੇਸੁ’’ਨ੍ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਅਮਚ੍ਚਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਤਸ੍ਸ ਅਤ੍ਥਧਮ੍ਮਾਨੁਸਾਸਕੋ ਅਹੋਸਿ. ਅਥਸ੍ਸ ਰਞ੍ਞੋ ਏਕੋ ਅਮਚ੍ਚੋ ਅਨ੍ਤੇਪੁਰੇ ਪਦੁਸ੍ਸਿ. ਰਾਜਾ ਨਂ ਤਥਤੋ ਞਤ੍ਵਾ ‘‘ਅਮਚ੍ਚੋਪਿ ਮੇ ਬਹੂਪਕਾਰੋ, ਅਯਂ ਇਤ੍ਥੀਪਿ ਮੇ ਪਿਯਾ, ਦ੍ਵੇਪਿ ਇਮੇ ਨਾਸੇਤੁਂ ਨ ਸਕ੍ਕਾ, ਪਣ੍ਡਿਤਾਮਚ੍ਚਂ ਪਞ੍ਹਂ ਪੁਚ੍ਛਿਤ੍ਵਾ ਸਚੇ ਸਹਿਤਬ੍ਬਂ ਭਵਿਸ੍ਸਤਿ, ਸਹਿਸ੍ਸਾਮਿ, ਨੋ ਚੇ, ਨ ਸਹਿਸ੍ਸਾਮੀ’’ਤਿ ਬੋਧਿਸਤ੍ਤਂ ਪਕ੍ਕੋਸਾਪੇਤ੍ਵਾ ਆਸਨਂ ਦਤ੍ਵਾ ‘‘ਪਣ੍ਡਿਤ, ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ ਵਤ੍ਵਾ ‘‘ਪੁਚ੍ਛਥ, ਮਹਾਰਾਜ, ਵਿਸ੍ਸਜ੍ਜੇਸ੍ਸਾਮੀ’’ਤਿ ਵੁਤ੍ਤੇ ਪਞ੍ਹਂ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੮੯. ‘‘ਪਬ੍ਬਤੂਪਤ੍ਥਰੇ ਰਮ੍ਮੇ, ਜਾਤਾ ਪੋਕ੍ਖਰਣੀ ਸਿਵਾ;

ਤਂ ਸਿਙ੍ਗਾਲੋ ਅਪਾਪਾਯਿ, ਜਾਨਂ ਸੀਹੇਨ ਰਕ੍ਖਿਤ’’ਨ੍ਤਿ.

ਤਤ੍ਥ ਪਬ੍ਬਤੂਪਤ੍ਥਰੇ ਰਮ੍ਮੇਤਿ ਹਿਮਵਨ੍ਤਪਬ੍ਬਤਪਾਦੇ ਪਤ੍ਥਰਿਤ੍ਵਾ ਠਿਤੇ ਅਙ੍ਗਣਟ੍ਠਾਨੇਤਿ ਅਤ੍ਥੋ. ਜਾਤਾ ਪੋਕ੍ਖਰਣੀ ਸਿਵਾਤਿ ਸਿਵਾ ਸੀਤਲਾ ਮਧੁਰੋਦਕਾ ਪੋਕ੍ਖਰਣੀ ਨਿਬ੍ਬਤ੍ਤਾ, ਅਪਿਚ ਖੋ ਪੋਕ੍ਖਰਸਞ੍ਛਨ੍ਨਾ ਨਦੀਪਿ ਪੋਕ੍ਖਰਣੀਯੇਵ. ਅਪਾਪਾਯੀਤਿ ਅਪ-ਇਤਿ ਉਪਸਗ੍ਗੋ, ਅਪਾਯੀਤਿ ਅਤ੍ਥੋ. ਜਾਨਂ ਸੀਹੇਨ ਰਕ੍ਖਿਤਨ੍ਤਿ ਸਾ ਪੋਕ੍ਖਰਣੀ ਸੀਹਪਰਿਭੋਗਾ ਸੀਹੇਨ ਰਕ੍ਖਿਤਾ, ਸੋਪਿ ਨਂ ਸਿਙ੍ਗਾਲੋ ‘‘ਸੀਹੇਨ ਰਕ੍ਖਿਤਾ ਅਯ’’ਨ੍ਤਿ ਜਾਨਨ੍ਤੋਵ ਅਪਾਯਿ. ਤਂ ਕਿਂ ਮਞ੍ਞਤਿ, ਬਾਲੋ ਸਿਙ੍ਗਾਲੋ ਸੀਹਸ੍ਸ ਅਭਾਯਿਤ੍ਵਾ ਪਿਵੇਯ੍ਯ ਏਵਰੂਪਂ ਪੋਕ੍ਖਰਣਿਨ੍ਤਿ ਅਯਮੇਤ੍ਥਾਧਿਪ੍ਪਾਯੋ.

ਬੋਧਿਸਤ੍ਤੋ ‘‘ਅਦ੍ਧਾ ਏਤਸ੍ਸ ਅਨ੍ਤੇਪੁਰੇ ਏਕੋ ਅਮਚ੍ਚੋ ਪਦੁਟ੍ਠੋ ਭਵਿਸ੍ਸਤੀ’’ਤਿ ਞਤ੍ਵਾ ਦੁਤਿਯਂ ਗਾਥਮਾਹ –

੯੦. ‘‘ਪਿਵਨ੍ਤਿ ਚੇ ਮਹਾਰਾਜ, ਸਾਪਦਾਨਿ ਮਹਾਨਦਿਂ;

ਨ ਤੇਨ ਅਨਦੀ ਹੋਤਿ, ਖਮਸ੍ਸੁ ਯਦਿ ਤੇ ਪਿਯਾ’’ਤਿ.

ਤਤ੍ਥ ਸਾਪਦਾਨੀਤਿ ਨ ਕੇਵਲਂ ਸਿਙ੍ਗਾਲੋਵ, ਅਵਸੇਸਾਨਿ ਸੁਨਖਪਸਦਬਿਲ਼ਾਰਮਿਗਾਦੀਨਿ ਸਬ੍ਬਸਾਪਦਾਨਿ ਤਂ ਪੋਕ੍ਖਰਸਞ੍ਛਨ੍ਨਤ੍ਤਾ ‘‘ਪੋਕ੍ਖਰਣੀ’’ਤਿ ਲਦ੍ਧਨਾਮਂ ਨਦਿਂ ਪਿਵਨ੍ਤਿ ਚੇ. ਨ ਤੇਨ ਅਨਦੀ ਹੋਤੀਤਿ ਨਦਿਯਞ੍ਹਿ ਦ੍ਵਿਪਦਚਤੁਪ੍ਪਦਾਪਿ ਅਹਿਮਚ੍ਛਾਪਿ ਸਬ੍ਬੇ ਪਿਪਾਸਿਤਾ ਪਾਨੀਯਂ ਪਿਵਨ੍ਤਿ, ਨ ਸਾ ਤੇਨ ਕਾਰਣੇਨ ਅਨਦੀ ਨਾਮ ਹੋਤਿ, ਨਾਪਿ ਉਚ੍ਛਿਟ੍ਠਨਦੀ. ਕਸ੍ਮਾ? ਸਬ੍ਬੇਸਂ ਸਾਧਾਰਣਤ੍ਤਾ. ਯਥਾ ਨਦੀ ਯੇਨ ਕੇਨਚਿ ਪੀਤਾ ਨ ਦੁਸ੍ਸਤਿ, ਏਵਂ ਇਤ੍ਥੀਪਿ ਕਿਲੇਸਵਸੇਨ ਸਾਮਿਕਂ ਅਤਿਕ੍ਕਮਿਤ੍ਵਾ ਅਞ੍ਞੇਨ ਸਦ੍ਧਿਂ ਸਂਵਾਸਂ ਗਤਾ ਨੇਵ ਅਨਿਤ੍ਥੀ ਹੋਤਿ. ਕਸ੍ਮਾ? ਸਬ੍ਬੇਸਂ ਸਾਧਾਰਣਭਾਵੇਨ. ਨਾਪਿ ਉਚ੍ਛਿਟ੍ਠਿਤ੍ਥੀ. ਕਸ੍ਮਾ? ਓਦਕਨ੍ਤਿਕਤਾਯ ਸੁਦ੍ਧਭਾਵੇਨ. ਖਮਸ੍ਸੁ ਯਦਿ ਤੇ ਪਿਯਾਤਿ ਯਦਿ ਪਨ ਤੇ ਸਾ ਇਤ੍ਥੀ ਪਿਯਾ, ਸੋ ਚ ਅਮਚ੍ਚੋ ਬਹੂਪਕਾਰੋ, ਤੇਸਂ ਉਭਿਨ੍ਨਮ੍ਪਿ ਖਮਸ੍ਸੁ ਮਜ੍ਝਤ੍ਤਭਾਵੇਨ ਤਿਟ੍ਠਾਹੀਤਿ.

ਏਵਂ ਮਹਾਸਤ੍ਤੋ ਰਞ੍ਞੋ ਓਵਾਦਂ ਅਦਾਸਿ. ਰਾਜਾ ਤਸ੍ਸ ਓਵਾਦੇ ਠਤ੍ਵਾ ‘‘ਪੁਨ ਏਵਰੂਪਂ ਪਾਪਕਮ੍ਮਂ ਮਾ ਕਰਿਤ੍ਥਾ’’ਤਿ ਵਤ੍ਵਾ ਉਭਿਨ੍ਨਮ੍ਪਿ ਖਮਿ. ਤਤੋ ਪਟ੍ਠਾਯ ਤੇ ਓਰਮਿਂਸੁ. ਰਾਜਾਪਿ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਜੀਵਿਤਪਰਿਯੋਸਾਨੇ ਸਗ੍ਗਪੁਰਂ ਪੂਰੇਸਿ. ਕੋਸਲਰਾਜਾਪਿ ਇਮਂ ਧਮ੍ਮਦੇਸਨਂ ਸੁਤ੍ਵਾ ਤੇਸਂ ਉਭਿਨ੍ਨਮ੍ਪਿ ਖਮਿਤ੍ਵਾ ਮਜ੍ਝਤ੍ਤੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਪਣ੍ਡਿਤਾਮਚ੍ਚੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਪਬ੍ਬਤੂਪਤ੍ਥਰਜਾਤਕਵਣ੍ਣਨਾ ਪਞ੍ਚਮਾ.

[੧੯੬] ੬. ਵਲਾਹਕਸ੍ਸਜਾਤਕਵਣ੍ਣਨਾ

ਯੇ ਨ ਕਾਹਨ੍ਤਿ ਓਵਾਦਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਉਕ੍ਕਣ੍ਠਿਤਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਹਿ ਭਿਕ੍ਖੁ ਸਤ੍ਥਾਰਾ ‘‘ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਉਕ੍ਕਣ੍ਠਿਤੋਸੀ’’ਤਿ ਪੁਟ੍ਠੋ ‘‘ਸਚ੍ਚ’’ਨ੍ਤਿ ਵਤ੍ਵਾ ‘‘ਕਿਂ ਕਾਰਣਾ’’ਤਿ ਵੁਤ੍ਤੇ ‘‘ਏਕਂ ਅਲਙ੍ਕਤਂ ਮਾਤੁਗਾਮਂ ਦਿਸ੍ਵਾ ਕਿਲੇਸਵਸੇਨਾ’’ਤਿ ਆਹ. ਅਥ ਨਂ ਸਤ੍ਥਾ ‘‘ਇਤ੍ਥਿਯੋ ਨਾਮੇਤਾ ਭਿਕ੍ਖੁ ਅਤ੍ਤਨੋ ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬੇਹਿ ਚੇਵ ਇਤ੍ਥਿਕੁਤ੍ਤਵਿਲਾਸੇਹਿ ਚ ਪੁਰਿਸੇ ਪਲੋਭੇਤ੍ਵਾ ਅਤ੍ਤਨੋ ਵਸੇ ਕਤ੍ਵਾ ਵਸਂ ਉਪਗਤਭਾਵਂ ਞਤ੍ਵਾ ਸੀਲਵਿਨਾਸਞ੍ਚੇਵ ਧਨਵਿਨਾਸਞ੍ਚ ਪਾਪਨਟ੍ਠੇਨ ‘ਯਕ੍ਖਿਨਿਯੋ’ਤਿ ਵੁਚ੍ਚਨ੍ਤਿ. ਪੁਬ੍ਬੇਪਿ ਹਿ ਯਕ੍ਖਿਨਿਯੋ ਇਤ੍ਥਿਕੁਤ੍ਤੇਨ ਏਕਂ ਪੁਰਿਸਸਤ੍ਥਂ ਉਪਸਙ੍ਕਮਿਤ੍ਵਾ ਵਾਣਿਜੇ ਪਲੋਭੇਤ੍ਵਾ ਅਤ੍ਤਨੋ ਵਸੇ ਕਤ੍ਵਾ ਪੁਨ ਅਞ੍ਞੇ ਪੁਰਿਸੇ ਦਿਸ੍ਵਾ ਤੇ ਸਬ੍ਬੇਪਿ ਜੀਵਿਤਕ੍ਖਯਂ ਪਾਪੇਤ੍ਵਾ ਉਭੋਹਿ ਹਨੁਕਪਸ੍ਸੇਹਿ ਲੋਹਿਤੇਨ ਪਗ੍ਘਰਨ੍ਤੇਨ ਮੁਖਂ ਪੂਰਾਪੇਤ੍ਵਾ ਖਾਦਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਤਮ੍ਬਪਣ੍ਣਿਦੀਪੇ ਸਿਰੀਸਵਤ੍ਥੁ ਨਾਮ ਯਕ੍ਖਨਗਰਂ ਅਹੋਸਿ, ਤਤ੍ਥ ਯਕ੍ਖਿਨਿਯੋ ਵਸਿਂਸੁ. ਤਾ ਭਿਨ੍ਨਨਾਵਾਨਂ ਵਾਣਿਜਾਨਂ ਆਗਤਕਾਲੇ ਅਲਙ੍ਕਤਪਟਿਯਤ੍ਤਾ ਖਾਦਨੀਯਭੋਜਨੀਯਂ ਗਾਹਾਪੇਤ੍ਵਾ ਦਾਸਿਗਣਪਰਿਵੁਤਾ ਦਾਰਕੇ ਅਙ੍ਕੇਨਾਦਾਯ ਵਾਣਿਜੇ ਉਪਸਙ੍ਕਮਨ੍ਤਿ. ਤੇਸਂ ‘‘ਮਨੁਸ੍ਸਾਵਾਸਂ ਆਗਤਮ੍ਹਾ’’ਤਿ ਸਞ੍ਜਾਨਨਤ੍ਥਂ ਤਤ੍ਥ ਤਤ੍ਥ ਕਸਿਗੋਰਕ੍ਖਾਦੀਨਿ ਕਰੋਨ੍ਤੇ ਮਨੁਸ੍ਸੇ ਗੋਗਣੇ ਸੁਨਖੇਤਿ ਏਵਮਾਦੀਨਿ ਦਸ੍ਸੇਨ੍ਤਿ, ਵਾਣਿਜਾਨਂ ਸਨ੍ਤਿਕਂ ਗਨ੍ਤ੍ਵਾ ‘‘ਇਮਂ ਯਾਗੁਂ ਪਿਵਥ, ਭਤ੍ਤਂ ਭੁਞ੍ਜਥ, ਖਾਦਨੀਯਂ ਖਾਦਥਾ’’ਤਿ ਵਦਨ੍ਤਿ. ਵਾਣਿਜਾ ਅਜਾਨਨ੍ਤਾ ਤਾਹਿ ਦਿਨ੍ਨਂ ਪਰਿਭੁਞ੍ਜਨ੍ਤਿ. ਅਥ ਤੇਸਂ ਖਾਦਿਤ੍ਵਾ ਭੁਞ੍ਜਿਤ੍ਵਾ ਪਿਵਿਤ੍ਵਾ ਵਿਸ੍ਸਮਿਤਕਾਲੇ ਪਟਿਸਨ੍ਥਾਰਂ ਕਰੋਨ੍ਤਿ, ‘‘ਤੁਮ੍ਹੇ ਕਤ੍ਥ ਵਾਸਿਕਾ, ਕੁਤੋ ਆਗਤਾ, ਕਹਂ ਗਚ੍ਛਿਸ੍ਸਥ, ਕੇਨ ਕਮ੍ਮੇਨ ਇਧਾਗਤਤ੍ਥਾ’’ਤਿ ਪੁਚ੍ਛਨ੍ਤਿ. ‘‘ਭਿਨ੍ਨਨਾਵਾ ਹੁਤ੍ਵਾ ਇਧਾਗਤਮ੍ਹਾ’’ਤਿ ਵੁਤ੍ਤੇ ‘‘ਸਾਧੁ, ਅਯ੍ਯਾ, ਅਮ੍ਹਾਕਮ੍ਪਿ ਸਾਮਿਕਾਨਂ ਨਾਵਂ ਅਭਿਰੁਹਿਤ੍ਵਾ ਗਤਾਨਂ ਤੀਣਿ ਸਂਵਚ੍ਛਰਾਨਿ ਅਤਿਕ੍ਕਨ੍ਤਾਨਿ, ਤੇ ਮਤਾ ਭਵਿਸ੍ਸਨ੍ਤਿ; ਤੁਮ੍ਹੇਪਿ ਵਾਣਿਜਾਯੇਵ, ਮਯਂ ਤੁਮ੍ਹਾਕਂ ਪਾਦਪਰਿਚਾਰਿਕਾ ਭਵਿਸ੍ਸਾਮਾ’’ਤਿ ਵਤ੍ਵਾ ਤੇ ਵਾਣਿਜੇ ਇਤ੍ਥਿਕੁਤ੍ਤਹਾਵਭਾਵਵਿਲਾਸੇਹਿ ਪਲੋਭੇਤ੍ਵਾ ਯਕ੍ਖਨਗਰਂ ਨੇਤ੍ਵਾ ਸਚੇ ਪਠਮਗਹਿਤਾ ਮਨੁਸ੍ਸਾ ਅਤ੍ਥਿ, ਤੇ ਦੇਵਸਙ੍ਖਲਿਕਾਯ ਬਨ੍ਧਿਤ੍ਵਾ ਕਾਰਣਘਰੇ ਪਕ੍ਖਿਪਨ੍ਤਿ, ਅਤ੍ਤਨੋ ਵਸਨਟ੍ਠਾਨੇ ਭਿਨ੍ਨਨਾਵੇ ਮਨੁਸ੍ਸੇ ਅਲਭਨ੍ਤਿਯੋ ਪਨ ਪਰਤੋ ਕਲ੍ਯਾਣਿਂ ਓਰਤੋ ਨਾਗਦੀਪਨ੍ਤਿ ਏਵਂ ਸਮੁਦ੍ਦਤੀਰਂ ਅਨੁਸਞ੍ਚਰਨ੍ਤਿ. ਅਯਂ ਤਾਸਂ ਧਮ੍ਮਤਾ.

ਅਥੇਕਦਿਵਸਂ ਪਞ੍ਚਸਤਾ ਭਿਨ੍ਨਨਾਵਾ ਵਾਣਿਜਾ ਤਾਸਂ ਨਗਰਸਮੀਪੇ ਉਤ੍ਤਰਿਂਸੁ. ਤਾ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ਪਲੋਭੇਤ੍ਵਾ ਯਕ੍ਖਨਗਰਂ ਨੇਤ੍ਵਾ ਪਠਮਂ ਗਹਿਤੇ ਮਨੁਸ੍ਸੇ ਦੇਵਸਙ੍ਖਲਿਕਾਯ ਬਨ੍ਧਿਤ੍ਵਾ ਕਾਰਣਘਰੇ ਪਕ੍ਖਿਪਿਤ੍ਵਾ ਜੇਟ੍ਠਯਕ੍ਖਿਨੀ ਜੇਟ੍ਠਕਵਾਣਿਜਂ, ਸੇਸਾ ਸੇਸੇਤਿ ਤਾ ਪਞ੍ਚਸਤਾ ਯਕ੍ਖਿਨਿਯੋ ਤੇ ਪਞ੍ਚਸਤੇ ਵਾਣਿਜੇ ਅਤ੍ਤਨੋ ਸਾਮਿਕੇ ਅਕਂਸੁ. ਅਥ ਸਾ ਜੇਟ੍ਠਯਕ੍ਖਿਨੀ ਰਤ੍ਤਿਭਾਗੇ ਵਾਣਿਜੇ ਨਿਦ੍ਦਂ ਉਪਗਤੇ ਉਟ੍ਠਾਯ ਗਨ੍ਤ੍ਵਾ ਕਾਰਣਘਰੇ ਮਨੁਸ੍ਸੇ ਮਾਰੇਤ੍ਵਾ ਮਂਸਂ ਖਾਦਿਤ੍ਵਾ ਆਗਚ੍ਛਤਿ, ਸੇਸਾਪਿ ਤਥੇਵ ਕਰੋਨ੍ਤਿ. ਜੇਟ੍ਠਯਕ੍ਖਿਨਿਯਾ ਮਨੁਸ੍ਸਮਂਸਂ ਖਾਦਿਤ੍ਵਾ ਆਗਤਕਾਲੇ ਸਰੀਰਂ ਸੀਤਲਂ ਹੋਤਿ. ਜੇਟ੍ਠਵਾਣਿਜੋ ਪਰਿਗ੍ਗਣ੍ਹਨ੍ਤੋ ਤਸ੍ਸਾ ਯਕ੍ਖਿਨਿਭਾਵਂ ਞਤ੍ਵਾ ‘‘ਇਮਾ ਪਞ੍ਚਸਤਾ ਯਕ੍ਖਿਨਿਯੋ ਭਵਿਸ੍ਸਨ੍ਤਿ, ਅਮ੍ਹੇਹਿ ਪਲਾਯਿਤੁਂ ਵਟ੍ਟਤੀ’’ਤਿ ਪੁਨਦਿਵਸੇ ਪਾਤੋਵ ਮੁਖਧੋਵਨਤ੍ਥਾਯ ਗਨ੍ਤ੍ਵਾ ਸੇਸਵਾਣਿਜਾਨਂ ਆਰੋਚੇਸਿ – ‘‘ਇਮਾ ਯਕ੍ਖਿਨਿਯੋ, ਨ ਮਨੁਸ੍ਸਿਤ੍ਥਿਯੋ, ਅਞ੍ਞੇਸਂ ਭਿਨ੍ਨਨਾਵਾਨਂ ਆਗਤਕਾਲੇ ਤੇ ਸਾਮਿਕੇ ਕਤ੍ਵਾ ਅਮ੍ਹੇਪਿ ਖਾਦਿਸ੍ਸਨ੍ਤਿ, ਏਥ ਇਤੋ ਪਲਾਯਿਸ੍ਸਾਮਾ’’ਤਿ ਤੇਸੁ ਪਞ੍ਚਸਤੇਸੁ ਅਡ੍ਢਤੇਯ੍ਯਸਤਾ ‘‘ਨ ਮਯਂ ਏਤਾ ਵਿਜਹਿਤੁਂ ਸਕ੍ਖਿਸ੍ਸਾਮ, ਤੁਮ੍ਹੇ ਗਚ੍ਛਥ, ਮਯਂ ਨ ਪਲਾਯਿਸ੍ਸਾਮਾ’’ਤਿ ਆਹਂਸੁ. ਜੇਟ੍ਠਵਾਣਿਜੋ ਅਤ੍ਤਨੋ ਵਚਨਕਾਰੇ ਅਡ੍ਢਤੇਯ੍ਯਸਤੇ ਗਹੇਤ੍ਵਾ ਤਾਸਂ ਭੀਤੋ ਪਲਾਯਿ.

ਤਸ੍ਮਿਂ ਪਨ ਕਾਲੇ ਬੋਧਿਸਤ੍ਤੋ ਵਲਾਹਕਸ੍ਸਯੋਨਿਯਂ ਨਿਬ੍ਬਤ੍ਤਿ, ਸਬ੍ਬਸੇਤੋ ਕਾਲ਼ਸੀਸੋ ਮੁਞ੍ਜਕੇਸੋ ਇਦ੍ਧਿਮਾ ਵੇਹਾਸਙ੍ਗਮੋ ਅਹੋਸਿ. ਸੋ ਹਿਮਵਨ੍ਤਤੋ ਆਕਾਸੇ ਉਪ੍ਪਤਿਤ੍ਵਾ ਤਮ੍ਬਪਣ੍ਣਿਦੀਪਂ ਗਨ੍ਤ੍ਵਾ ਤਤ੍ਥ ਤਮ੍ਬਪਣ੍ਣਿਸਰੇ ਪਲ੍ਲਲੇ ਸਯਂਜਾਤਸਾਲਿਂ ਖਾਦਿਤ੍ਵਾ ਗਚ੍ਛਤਿ. ਏਵਂ ਗਚ੍ਛਨ੍ਤੋ ਚ ‘‘ਜਨਪਦਂ ਗਨ੍ਤੁਕਾਮਾ ਅਤ੍ਥੀ’’ਤਿ ਤਿਕ੍ਖਤ੍ਤੁਂ ਕਰੁਣਾਪਰਿਭਾਵਿਤਂ ਮਾਨੁਸਿਂ ਵਾਚਂ ਭਾਸਤਿ. ਤੇ ਬੋਧਿਸਤ੍ਤਸ੍ਸ ਵਚਨਂ ਸੁਤ੍ਵਾ ਉਪਸਙ੍ਕਮਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ‘‘ਸਾਮਿ, ਮਯਂ ਜਨਪਦਂ ਗਮਿਸ੍ਸਾਮਾ’’ਤਿ ਆਹਂਸੁ. ਤੇਨ ਹਿ ਮਯ੍ਹਂ ਪਿਟ੍ਠਿਂ ਅਭਿਰੁਹਥਾਤਿ. ਅਪ੍ਪੇਕਚ੍ਚੇ ਅਭਿਰੁਹਿਂਸੁ, ਤੇਸੁ ਏਕਚ੍ਚੇ ਵਾਲਧਿਂ ਗਣ੍ਹਿਂਸੁ, ਏਕਚ੍ਚੇ ਅਞ੍ਜਲਿਂ ਪਗ੍ਗਹੇਤ੍ਵਾ ਅਟ੍ਠਂਸੁਯੇਵ. ਬੋਧਿਸਤ੍ਤੋ ਅਨ੍ਤਮਸੋ ਅਞ੍ਜਲਿਂ ਪਗ੍ਗਹੇਤ੍ਵਾ ਠਿਤੇ ਸਬ੍ਬੇਪਿ ਤੇ ਅਡ੍ਢਤੇਯ੍ਯਸਤੇ ਵਾਣਿਜੇ ਅਤ੍ਤਨੋ ਆਨੁਭਾਵੇਨ ਜਨਪਦਂ ਨੇਤ੍ਵਾ ਸਕਸਕਟ੍ਠਾਨੇਸੁ ਪਤਿਟ੍ਠਪੇਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਆਗਮਾਸਿ. ਤਾਪਿ ਖੋ ਯਕ੍ਖਿਨਿਯੋ ਅਞ੍ਞੇਸਂ ਆਗਤਕਾਲੇ ਤਤ੍ਥ ਓਹੀਨਕੇ ਅਡ੍ਢਤੇਯ੍ਯਸਤੇ ਮਨੁਸ੍ਸੇ ਵਧਿਤ੍ਵਾ ਖਾਦਿਂਸੁ.

ਸਤ੍ਥਾ ਭਿਕ੍ਖੂ ਆਮਨ੍ਤੇਤ੍ਵਾ ‘‘ਭਿਕ੍ਖਵੇ, ਯਥਾ ਤੇ ਯਕ੍ਖਿਨੀਨਂ ਵਸਂ ਗਤਾ ਵਾਣਿਜਾ ਜੀਵਿਤਕ੍ਖਯਂ ਪਤ੍ਤਾ, ਵਲਾਹਕਸ੍ਸਰਾਜਸ੍ਸ ਵਚਨਕਰਾ ਵਾਣਿਜਾ ਸਕਸਕਟ੍ਠਾਨੇਸੁ ਪਤਿਟ੍ਠਿਤਾ, ਏਵਮੇਵ ਬੁਦ੍ਧਾਨਂ ਓਵਾਦਂ ਅਕਰੋਨ੍ਤਾ ਭਿਕ੍ਖੂਪਿ ਭਿਕ੍ਖੁਨਿਯੋਪਿ ਉਪਾਸਕਾਪਿ ਉਪਾਸਿਕਾਯੋਪਿ ਚਤੂਸੁ ਅਪਾਯੇਸੁ ਪਞ੍ਚਵਿਧਬਨ੍ਧਨਕਮ੍ਮਕਰਣਟ੍ਠਾਨਾਦੀਸੁ ਮਹਾਦੁਕ੍ਖਂ ਪਾਪੁਣਨ੍ਤਿ. ਓਵਾਦਕਰਾ ਪਨ ਤਿਸ੍ਸੋ ਕੁਲਸਮ੍ਪਤ੍ਤਿਯੋ ਚ ਛ ਕਾਮਸਗ੍ਗੇ ਵੀਸਤਿ ਬ੍ਰਹ੍ਮਲੋਕੇਤਿ ਇਮਾਨਿ ਚ ਠਾਨਾਨਿ ਪਤ੍ਵਾ ਅਮਤਮਹਾਨਿਬ੍ਬਾਨਂ ਸਚ੍ਛਿਕਤ੍ਵਾ ਮਹਨ੍ਤਂ ਸੁਖਂ ਅਨੁਭਵਨ੍ਤੀ’’ਤਿ ਵਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਇਮਾ ਗਾਥਾ ਅਵੋਚ –

੯੧. ‘‘ਯੇ ਨ ਕਾਹਨ੍ਤਿ ਓਵਾਦਂ, ਨਰਾ ਬੁਦ੍ਧੇਨ ਦੇਸਿਤਂ;

ਬ੍ਯਸਨਂ ਤੇ ਗਮਿਸ੍ਸਨ੍ਤਿ, ਰਕ੍ਖਸੀਹਿਵ ਵਾਣਿਜਾ.

੯੨. ‘‘ਯੇ ਚ ਕਾਹਨ੍ਤਿ ਓਵਾਦਂ, ਨਰਾ ਬੁਦ੍ਧੇਨ ਦੇਸਿਤਂ;

ਸੋਤ੍ਥਿਂ ਪਾਰਂ ਗਮਿਸ੍ਸਨ੍ਤਿ, ਵਲਾਹੇਨੇਵ ਵਾਣਿਜਾ’’ਤਿ.

ਤਤ੍ਥ ਯੇ ਨ ਕਾਹਨ੍ਤੀਤਿ ਯੇ ਨ ਕਰਿਸ੍ਸਨ੍ਤਿ. ਬ੍ਯਸਨਂ ਤੇ ਗਮਿਸ੍ਸਨ੍ਤੀਤਿ ਤੇ ਮਹਾਵਿਨਾਸਂ ਪਾਪੁਣਿਸ੍ਸਨ੍ਤਿ. ਰਕ੍ਖਸੀਹਿਵ ਵਾਣਿਜਾਤਿ ਰਕ੍ਖਸੀਹਿ ਪਲੋਭਿਤਵਾਣਿਜਾ ਵਿਯ. ਸੋਤ੍ਥਿਂ ਪਾਰਂ ਗਮਿਸ੍ਸਨ੍ਤੀਤਿ ਅਨਨ੍ਤਰਾਯੇਨ ਨਿਬ੍ਬਾਨਂ ਪਾਪੁਣਿਸ੍ਸਨ੍ਤਿ. ਵਲਾਹੇਨੇਵ ਵਾਣਿਜਾਤਿ ਵਲਾਹੇਨੇਵ ‘‘ਆਗਚ੍ਛਥਾ’’ਤਿ ਵੁਤ੍ਤਾ ਤਸ੍ਸ ਵਚਨਕਰਾ ਵਾਣਿਜਾ ਵਿਯ. ਯਥਾ ਹਿ ਤੇ ਸਮੁਦ੍ਦਪਾਰਂ ਗਨ੍ਤ੍ਵਾ ਸਕਸਕਟ੍ਠਾਨਂ ਅਗਮਂਸੁ, ਏਵਂ ਬੁਦ੍ਧਾਨਂ ਓਵਾਦਕਰਾ ਸਂਸਾਰਪਾਰਂ ਨਿਬ੍ਬਾਨਂ ਗਚ੍ਛਨ੍ਤੀਤਿ ਅਮਤਮਹਾਨਿਬ੍ਬਾਨੇਨ ਧਮ੍ਮਦੇਸਨਾਯ ਕੂਟਂ ਗਣ੍ਹਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ – ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ, ਅਞ੍ਞੇਪਿ ਬਹੂ ਸੋਤਾਪਤ੍ਤਿਫਲਸਕਦਾਗਾਮਿਫਲਅਨਾਗਾਮਿਫਲਅਰਹਤ੍ਤਫਲਾਨਿ ਪਾਪੁਣਿਂਸੁ. ‘‘ਤਦਾ ਵਲਾਹਕਸ੍ਸਰਾਜਸ੍ਸ ਵਚਨਕਰਾ ਅਡ੍ਢਤੇਯ੍ਯਸਤਾ ਵਾਣਿਜਾ ਬੁਦ੍ਧਪਰਿਸਾ ਅਹੇਸੁਂ, ਵਲਾਹਕਸ੍ਸਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਵਲਾਹਕਸ੍ਸਜਾਤਕਵਣ੍ਣਨਾ ਛਟ੍ਠਾ.

[੧੯੭] ੭. ਮਿਤ੍ਤਾਮਿਤ੍ਤਜਾਤਕਵਣ੍ਣਨਾ

ਨ ਨਂ ਉਮ੍ਹਯਤੇ ਦਿਸ੍ਵਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਅਞ੍ਞਤਰੋ ਭਿਕ੍ਖੁ ‘‘ਮਯਾ ਗਹਿਤੇ ਮਯ੍ਹਂ ਉਪਜ੍ਝਾਯੋ ਨ ਕੁਜ੍ਝਿਸ੍ਸਤੀ’’ਤਿ ਉਪਜ੍ਝਾਯੇਨ ਠਪਿਤਂ ਵਿਸ੍ਸਾਸੇਨ ਏਕਂ ਵਤ੍ਥਖਣ੍ਡਂ ਗਹੇਤ੍ਵਾ ਉਪਾਹਨਤ੍ਥਵਿਕਂ ਕਤ੍ਵਾ ਪਚ੍ਛਾ ਉਪਜ੍ਝਾਯਂ ਆਪੁਚ੍ਛਿ. ਅਥ ਤਂ ਉਪਜ੍ਝਾਯੋ ‘‘ਕਿਂਕਾਰਣਾ ਗਣ੍ਹੀ’’ਤਿ ਵਤ੍ਵਾ ‘‘ਮਯਾ ਗਹਿਤੇ ਨ ਕੁਜ੍ਝਿਸ੍ਸਤੀਤਿ ਤੁਮ੍ਹਾਕਂ ਵਿਸ੍ਸਾਸੇਨਾ’’ਤਿ ਵੁਤ੍ਤੇ ‘‘ਕੋ ਮਯਾ ਸਦ੍ਧਿਂ ਤੁਯ੍ਹਂ ਵਿਸ੍ਸਾਸੋ ਨਾਮਾ’’ਤਿ ਵਤ੍ਵਾ ਕੁਦ੍ਧੋ ਉਟ੍ਠਹਿਤ੍ਵਾ ਪਹਰਿ. ਤਸ੍ਸ ਸਾ ਕਿਰਿਯਾ ਭਿਕ੍ਖੂਸੁ ਪਾਕਟਾ ਜਾਤਾ. ਅਥੇਕਦਿਵਸਂ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ – ‘‘ਆਵੁਸੋ, ਅਸੁਕੋ ਕਿਰ ਦਹਰੋ ਉਪਜ੍ਝਾਯਸ੍ਸ ਵਿਸ੍ਸਾਸੇਨ ਵਤ੍ਥਖਣ੍ਡਂ ਗਹੇਤ੍ਵਾ ਉਪਾਹਨਤ੍ਥਵਿਕਂ ਅਕਾਸਿ. ਅਥ ਨਂ ਉਪਜ੍ਝਾਯੋ ‘ਕੋ ਮਯਾ ਸਦ੍ਧਿਂ ਤੁਯ੍ਹਂ ਵਿਸ੍ਸਾਸੋ ਨਾਮਾ’ਤਿ ਵਤ੍ਵਾ ਕੁਦ੍ਧੋ ਉਟ੍ਠਹਿਤ੍ਵਾ ਪਹਰੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵੇਸ ਭਿਕ੍ਖੁ ਅਤ੍ਤਨੋ ਸਦ੍ਧਿਵਿਹਾਰਿਕੇਨ ਸਦ੍ਧਿਂ ਅਵਿਸ੍ਸਾਸਿਕੋ, ਪੁਬ੍ਬੇਪਿ ਅਵਿਸ੍ਸਾਸਿਕੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਕਾਸਿਰਟ੍ਠੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਗਣਸਤ੍ਥਾ ਹੁਤ੍ਵਾ ਹਿਮਵਨ੍ਤਪਦੇਸੇ ਵਾਸਂ ਕਪ੍ਪੇਸਿ. ਤਸ੍ਮਿਂ ਇਸਿਗਣੇ ਏਕੋ ਤਾਪਸੋ ਬੋਧਿਸਤ੍ਤਸ੍ਸ ਵਚਨਂ ਅਕਤ੍ਵਾ ਏਕਂ ਮਤਮਾਤਿਕਂ ਹਤ੍ਥਿਪੋਤਕਂ ਪਟਿਜਗ੍ਗਿ. ਅਥ ਨਂ ਸੋ ਵੁਦ੍ਧਿਪ੍ਪਤ੍ਤੋ ਮਾਰੇਤ੍ਵਾ ਅਰਞ੍ਞਂ ਪਾਵਿਸਿ. ਤਸ੍ਸ ਸਰੀਰਕਿਚ੍ਚਂ ਕਤ੍ਵਾ ਇਸਿਗਣੋ ਬੋਧਿਸਤ੍ਤਂ ਪਰਿਵਾਰੇਤ੍ਵਾ – ‘‘ਭਨ੍ਤੇ, ਕੇਨ ਨੁ ਕੋ ਕਾਰਣੇਨ ਮਿਤ੍ਤਭਾਵੋ ਵਾ ਅਮਿਤ੍ਤਭਾਵੋ ਵਾ ਸਕ੍ਕਾ ਜਾਨਿਤੁ’’ਨ੍ਤਿ ਪੁਚ੍ਛਿ. ਬੋਧਿਸਤ੍ਤੋ ‘‘ਇਮਿਨਾ ਚ ਇਮਿਨਾ ਚ ਕਾਰਣੇਨਾ’’ਤਿ ਆਚਿਕ੍ਖਨ੍ਤੋ ਇਮਾ ਗਾਥਾ ਅਵੋਚ –

੯੩. ‘‘ਨ ਨਂ ਉਮ੍ਹਯਤੇ ਦਿਸ੍ਵਾ, ਨ ਚ ਨਂ ਪਟਿਨਨ੍ਦਤਿ;

ਚਕ੍ਖੂਨਿ ਚਸ੍ਸ ਨ ਦਦਾਤਿ, ਪਟਿਲੋਮਞ੍ਚ ਵਤ੍ਤਤਿ.

੯੪. ‘‘ਏਤੇ ਭਵਨ੍ਤਿ ਆਕਾਰਾ, ਅਮਿਤ੍ਤਸ੍ਮਿਂ ਪਤਿਟ੍ਠਿਤਾ;

ਯੇਹਿ ਅਮਿਤ੍ਤਂ ਜਾਨੇਯ੍ਯ, ਦਿਸ੍ਵਾ ਸੁਤ੍ਵਾ ਚ ਪਣ੍ਡਿਤੋ’’ਤਿ.

ਤਤ੍ਥ ਨ ਨਂ ਉਮ੍ਹਯਤੇ ਦਿਸ੍ਵਾਤਿ ਯੋ ਹਿ ਯਸ੍ਸ ਅਮਿਤ੍ਤੋ ਹੋਤਿ, ਸੋ ਤਂ ਪੁਗ੍ਗਲਂ ਦਿਸ੍ਵਾ ਨ ਉਮ੍ਹਯਤੇ, ਹਸਿਤਂ ਨ ਕਰੋਤਿ, ਪਹਟ੍ਠਾਕਾਰਂ ਨ ਦਸ੍ਸੇਤਿ. ਨ ਚ ਨਂ ਪਟਿਨਨ੍ਦਤੀਤਿ ਤਸ੍ਸ ਵਚਨਂ ਸੁਤ੍ਵਾਪਿ ਤਂ ਪੁਗ੍ਗਲਂ ਨ ਪਟਿਨਨ੍ਦਤਿ, ਸਾਧੁ ਸੁਭਾਸਿਤਨ੍ਤਿ ਨ ਚਾਨੁਮੋਦਤਿ. ਚਕ੍ਖੂਨਿ ਚਸ੍ਸ ਨ ਦਦਾਤੀਤਿ ਚਕ੍ਖੁਨਾ ਚਕ੍ਖੁਂ ਆਹਚ੍ਚ ਪਟਿਮੁਖੋ ਹੁਤ੍ਵਾ ਨ ਓਲੋਕੇਤਿ, ਅਞ੍ਞਤੋ ਚਕ੍ਖੂਨਿ ਹਰਤਿ. ਪਟਿਲੋਮਞ੍ਚ ਵਤ੍ਤਤੀਤਿ ਤਸ੍ਸ ਕਾਯਕਮ੍ਮਮ੍ਪਿ ਵਚੀਕਮ੍ਮਮ੍ਪਿ ਨ ਰੋਚੇਤਿ, ਪਟਿਲੋਮਗਾਹਂ ਗਣ੍ਹਾਤਿ ਪਚ੍ਚਨੀਕਗਾਹਂ. ਆਕਾਰਾਤਿ ਕਾਰਣਾਨਿ. ਯੇਹਿ ਅਮਿਤ੍ਤਨ੍ਤਿ ਯੇਹਿ ਕਾਰਣੇਹਿ ਤਾਨਿ ਕਾਰਣਾਨਿ ਦਿਸ੍ਵਾ ਸੁਤ੍ਵਾ ਚ ਪਣ੍ਡਿਤੋ ਪੁਗ੍ਗਲੋ ‘‘ਅਯਂ ਮੇ ਅਮਿਤ੍ਤੋ’’ਤਿ ਜਾਨੇਯ੍ਯ, ਤਤੋ ਵਿਪਰੀਤੇਹਿ ਪਨ ਮਿਤ੍ਤਭਾਵੋ ਜਾਨਿਤਬ੍ਬੋਤਿ.

ਏਵਂ ਬੋਧਿਸਤ੍ਤੋ ਮਿਤ੍ਤਾਮਿਤ੍ਤਭਾਵਕਾਰਣਾਨਿ ਆਚਿਕ੍ਖਿਤ੍ਵਾ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਹਤ੍ਥਿਪੋਸਕਤਾਪਸੋ ਸਦ੍ਧਿਵਿਹਾਰਿਕੋ ਅਹੋਸਿ, ਹਤ੍ਥੀ ਉਪਜ੍ਝਾਯੋ, ਇਸਿਗਣੋ ਬੁਦ੍ਧਪਰਿਸਾ, ਗਣਸਤ੍ਥਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਮਿਤ੍ਤਾਮਿਤ੍ਤਜਾਤਕਵਣ੍ਣਨਾ ਸਤ੍ਤਮਾ.

[੧੯੮] ੮. ਰਾਧਜਾਤਕਵਣ੍ਣਨਾ

ਪਵਾਸਾ ਆਗਤੋ ਤਾਤਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਉਕ੍ਕਣ੍ਠਿਤਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਕਿਰ ਸਤ੍ਥਾਰਾ ‘‘ਸਚ੍ਚਂ ਕਿਰ, ਤ੍ਵਂ ਭਿਕ੍ਖੁ, ਉਕ੍ਕਣ੍ਠਿਤੋ’’ਤਿ ਪੁਟ੍ਠੋ ‘‘ਸਚ੍ਚਂ, ਭਨ੍ਤੇ’’ਤਿ ਵਤ੍ਵਾ ‘‘ਕਿਂਕਾਰਣਾ’’ਤਿ ਵੁਤ੍ਤੇ ‘‘ਏਕਂ ਅਲਙ੍ਕਤਇਤ੍ਥਿਂ ਦਿਸ੍ਵਾ ਕਿਲੇਸਵਸੇਨਾ’’ਤਿ ਆਹ. ਅਥ ਨਂ ਸਤ੍ਥਾ ‘‘ਮਾਤੁਗਾਮੋ ਨਾਮ ਭਿਕ੍ਖੁ ਨ ਸਕ੍ਕਾ ਰਕ੍ਖਿਤੁਂ, ਪੁਬ੍ਬੇਪਿ ਦੋਵਾਰਿਕੇ ਠਪੇਤ੍ਵਾ ਰਕ੍ਖਨ੍ਤਾਪਿ ਰਕ੍ਖਿਤੁਂ ਨ ਸਕ੍ਖਿਂਸੁ, ਕਿਂ ਤੇ ਇਤ੍ਥਿਯਾ, ਲਦ੍ਧਾਪਿ ਸਾ ਰਕ੍ਖਿਤੁਂ ਨ ਸਕ੍ਕਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਸੁਵਯੋਨਿਯਂ ਨਿਬ੍ਬਤ੍ਤਿ, ‘‘ਰਾਧੋ’’ਤਿਸ੍ਸ ਨਾਮਂ, ਕਨਿਟ੍ਠਭਾਤਾ ਪਨਸ੍ਸ ਪੋਟ੍ਠਪਾਦੋ ਨਾਮ. ਤੇ ਉਭੋਪਿ ਤਰੁਣਕਾਲੇਯੇਵ ਏਕੋ ਲੁਦ੍ਦਕੋ ਗਹੇਤ੍ਵਾ ਬਾਰਾਣਸਿਯਂ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਅਦਾਸਿ, ਬ੍ਰਾਹ੍ਮਣੋ ਤੇ ਪੁਤ੍ਤਟ੍ਠਾਨੇ ਠਪੇਤ੍ਵਾ ਪਟਿਜਗ੍ਗਿ. ਬ੍ਰਾਹ੍ਮਣਸ੍ਸ ਪਨ ਬ੍ਰਾਹ੍ਮਣੀ ਅਰਕ੍ਖਿਤਾ ਦੁਸ੍ਸੀਲਾ. ਸੋ ਵੋਹਾਰਕਰਣਤ੍ਥਾਯ ਗਚ੍ਛਨ੍ਤੋ ਤੇ ਸੁਵਪੋਤਕੇ ਆਮਨ੍ਤੇਤ੍ਵਾ ‘‘ਤਾਤਾ, ਅਹਂ ਵੋਹਾਰਕਰਣਤ੍ਥਾਯ ਗਚ੍ਛਾਮਿ, ਕਾਲੇ ਵਾ ਵਿਕਾਲੇ ਵਾ ਤੁਮ੍ਹਾਕਂ ਮਾਤੁ ਕਰਣਕਮ੍ਮਂ ਓਲੋਕੇਯ੍ਯਾਥ, ਅਞ੍ਞਸ੍ਸ ਪੁਰਿਸਸ੍ਸ ਗਮਨਭਾਵਂ ਵਾ ਅਗਮਨਭਾਵਂ ਵਾ ਜਾਨੇਯ੍ਯਾਥਾ’’ਤਿ ਬ੍ਰਾਹ੍ਮਣਿਂ ਸੁਵਪੋਤਕਾਨਂ ਪਟਿਚ੍ਛਾਪੇਤ੍ਵਾ ਅਗਮਾਸਿ. ਸਾ ਤਸ੍ਸ ਨਿਕ੍ਖਨ੍ਤਕਾਲਤੋ ਪਟ੍ਠਾਯ ਅਨਾਚਾਰਂ ਚਰਿ, ਰਤ੍ਤਿਮ੍ਪਿ ਦਿਵਾਪਿ ਆਗਚ੍ਛਨ੍ਤਾਨਞ੍ਚ ਗਚ੍ਛਨ੍ਤਾਨਞ੍ਚ ਪਮਾਣਂ ਨਤ੍ਥਿ.

ਤਂ ਦਿਸ੍ਵਾ ਪੋਟ੍ਠਪਾਦੋ ਰਾਧਂ ਪੁਚ੍ਛਿ – ‘‘ਬ੍ਰਾਹ੍ਮਣੋ ਇਮਂ ਬ੍ਰਾਹ੍ਮਣਿਂ ਅਮ੍ਹਾਕਂ ਨਿਯ੍ਯਾਦੇਤ੍ਵਾ ਗਤੋ, ਅਯਞ੍ਚ ਪਾਪਕਮ੍ਮਂ ਕਰੋਤਿ, ਵਦਾਮਿ ਨ’’ਨ੍ਤਿ. ਰਾਧੋ ‘‘ਮਾ ਵਦਾਹੀ’’ਤਿ ਆਹ. ਸੋ ਤਸ੍ਸ ਵਚਨਂ ਅਗ੍ਗਹੇਤ੍ਵਾ ‘‘ਅਮ੍ਮ, ਕਿਂਕਾਰਣਾ ਪਾਪਕਮ੍ਮਂ ਕਰੋਸੀ’’ਤਿ ਆਹ. ਸਾ ਤਂ ਮਾਰੇਤੁਕਾਮਾ ਹੁਤ੍ਵਾ ‘‘ਤਾਤ, ਤ੍ਵਂ ਨਾਮ ਮਯ੍ਹਂ ਪੁਤ੍ਤੋ, ਇਤੋ ਪਟ੍ਠਾਯ ਨ ਕਰਿਸ੍ਸਾਮਿ, ਏਹਿ, ਤਾਤ, ਤਾਵਾ’’ਤਿ ਪਿਯਾਯਮਾਨਾ ਵਿਯ ਪਕ੍ਕੋਸਿਤ੍ਵਾ ਆਗਤਂ ਗਹੇਤ੍ਵਾ ‘‘ਤ੍ਵਂ ਮਂ ਓਵਦਸਿ, ਅਤ੍ਤਨੋ ਪਮਾਣਂ ਨ ਜਾਨਾਸੀ’’ਤਿ ਗੀਵਂ ਪਰਿਵਤ੍ਤੇਤ੍ਵਾ ਮਾਰੇਤ੍ਵਾ ਉਦ੍ਧਨਨ੍ਤਰੇਸੁ ਪਕ੍ਖਿਪਿ. ਬ੍ਰਾਹ੍ਮਣੋ ਆਗਨ੍ਤ੍ਵਾ ਵਿਸ੍ਸਮਿਤ੍ਵਾ ਬੋਧਿਸਤ੍ਤਂ ‘‘ਕਿਂ, ਤਾਤ ਰਾਧ, ਮਾਤਾ ਤੇ ਅਨਾਚਾਰਂ ਕਰੋਤਿ, ਨ ਕਰੋਤੀ’’ਤਿ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੯੫. ‘‘ਪਵਾਸਾ ਆਗਤੋ ਤਾਤ, ਇਦਾਨਿ ਨਚਿਰਾਗਤੋ;

ਕਚ੍ਚਿਨ੍ਨੁ ਤਾਤ ਤੇ ਮਾਤਾ, ਨ ਅਞ੍ਞਮੁਪਸੇਵਤੀ’’ਤਿ.

ਤਸ੍ਸਤ੍ਥੋ – ਅਹਂ, ਤਾਤ ਰਾਧ, ਪਵਾਸਾ ਆਗਤੋ, ਸੋ ਚਮ੍ਹਿ ਇਦਾਨੇਵ ਆਗਤੋ ਨਚਿਰਾਗਤੋ, ਤੇਨ ਪਵਤ੍ਤਿਂ ਅਜਾਨਨ੍ਤੋ ਤਂ ਪੁਚ੍ਛਾਮਿ – ‘‘ਕਚ੍ਚਿ ਨੁ ਤੇ, ਤਾਤ, ਮਾਤਾ ਅਞ੍ਞਂ ਪੁਰਿਸਂ ਨ ਉਪਸੇਵਤੀ’’ਤਿ.

ਰਾਧੋ ‘‘ਤਾਤ, ਪਣ੍ਡਿਤਾ ਨਾਮ ਭੂਤਂ ਵਾ ਅਭੂਤਂ ਵਾ ਅਨਿਯ੍ਯਾਨਿਕਂ ਨਾਮ ਨ ਕਥੇਸੁ’’ਨ੍ਤਿ ਞਾਪੇਨ੍ਤੋ ਦੁਤਿਯਂ ਗਾਥਮਾਹ –

੯੬. ‘‘ਨ ਖੋ ਪਨੇਤਂ ਸੁਭਣਂ, ਗਿਰਂ ਸਚ੍ਚੁਪਸਂਹਿਤਂ;

ਸਯੇਥ ਪੋਟ੍ਠਪਾਦੋਵ, ਮੁਮ੍ਮੁਰੇ ਉਪਕੂਥਿਤੋ’’ਤਿ.

ਤਤ੍ਥ ਗਿਰਨ੍ਤਿ ਵਚਨਂ. ਤਞ੍ਹਿ ਯਥਾ ਇਦਾਨਿ ਗਿਰਾ, ਏਵਂ ਤਦਾ ‘‘ਗਿਰ’’ਨ੍ਤਿ ਵੁਚ੍ਚਤਿ, ਸੋ ਸੁਵਪੋਤਕੋ ਲਿਙ੍ਗਂ ਅਨਾਦਿਯਿਤ੍ਵਾ ਏਵਮਾਹ. ਅਯਂ ਪਨੇਤ੍ਥ ਅਤ੍ਥੋ – ਤਾਤ, ਪਣ੍ਡਿਤੇਨ ਨਾਮ ਸਚ੍ਚੁਪਸਂਹਿਤਂ ਯਥਾਭੂਤਂ ਅਤ੍ਥਯੁਤ੍ਤਂ ਸਭਾਵਵਚਨਮ੍ਪਿ ਅਨਿਯ੍ਯਾਨਿਕਂ ਨ ਸੁਭਣਂ. ਅਨਿਯ੍ਯਾਨਿਕਞ੍ਚ ਸਚ੍ਚਂ ਭਣਨ੍ਤੋ ਸਯੇਥ ਪੋਟ੍ਠਪਾਦੋਵ, ਮੁਮ੍ਮੁਰੇ ਉਪਕੂਥਿਤੋ, ਯਥਾ ਪੋਟ੍ਠਪਾਦੋ ਕੁਕ੍ਕੁਲ਼ੇ ਝਾਮੋ ਸਯਤਿ, ਏਵਂ ਸਯੇਯ੍ਯਾਤਿ. ‘‘ਉਪਕੂਧਿਤੋ’’ਤਿਪਿ ਪਾਠੋ, ਅਯਮੇਵਤ੍ਥੋ.

ਏਵਂ ਬੋਧਿਸਤ੍ਤੋ ਬ੍ਰਾਹ੍ਮਣਸ੍ਸ ਧਮ੍ਮਂ ਦੇਸੇਤ੍ਵਾ ‘‘ਮਯਾਪਿ ਇਮਸ੍ਮਿਂ ਠਾਨੇ ਵਸਿਤੁਂ ਨ ਸਕ੍ਕਾ’’ਤਿ ਬ੍ਰਾਹ੍ਮਣਂ ਆਪੁਚ੍ਛਿਤ੍ਵਾ ਅਰਞ੍ਞਮੇਵ ਪਾਵਿਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ‘‘ਤਦਾ ਪੋਟ੍ਠਪਾਦੋ ਆਨਨ੍ਦੋ ਅਹੋਸਿ, ਰਾਧੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਰਾਧਜਾਤਕਵਣ੍ਣਨਾ ਅਟ੍ਠਮਾ.

[੧੯੯] ੯. ਗਹਪਤਿਜਾਤਕਵਣ੍ਣਨਾ

ਉਭਯਂ ਮੇ ਨ ਖਮਤੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਕ੍ਕਣ੍ਠਿਤਮੇਵ ਭਿਕ੍ਖੁਂ ਆਰਬ੍ਭ ਕਥੇਸਿ. ਕਥੇਨ੍ਤੋ ਚ ‘‘ਮਾਤੁਗਾਮੋ ਨਾਮ ਅਰਕ੍ਖਿਤੋ, ਪਾਪਕਮ੍ਮਂ ਕਤ੍ਵਾ ਯੇਨ ਕੇਨਚਿ ਉਪਾਯੇਨ ਸਾਮਿਕਂ ਵਞ੍ਚੇਤਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਕਾਸਿਰਟ੍ਠੇ ਗਹਪਤਿਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਘਰਾਵਾਸਂ ਗਣ੍ਹਿ. ਤਸ੍ਸ ਭਰਿਯਾ ਦੁਸ੍ਸੀਲਾ ਗਾਮਭੋਜਕੇਨ ਸਦ੍ਧਿਂ ਅਨਾਚਾਰਂ ਚਰਤਿ. ਬੋਧਿਸਤ੍ਤੋ ਤਂ ਞਤ੍ਵਾ ਪਰਿਗ੍ਗਣ੍ਹਨ੍ਤੋ ਚਰਤਿ. ਤਦਾ ਪਨ ਅਨ੍ਤੋਵਸ੍ਸੇ ਬੀਜੇਸੁ ਨੀਹਟੇਸੁ ਛਾਤਕਂ ਅਹੋਸਿ, ਸਸ੍ਸਾਨਂ ਗਬ੍ਭਗਹਣਕਾਲੋ ਜਾਤੋ. ਸਕਲਗਾਮਵਾਸਿਨੋ ‘‘ਇਤੋ ਮਾਸਦ੍ਵਯੇਨ ਸਸ੍ਸਾਨਿ ਉਦ੍ਧਰਿਤ੍ਵਾ ਵੀਹਿਂ ਦਸ੍ਸਾਮਾ’’ਤਿ ਏਕਤੋ ਹੁਤ੍ਵਾ ਗਾਮਭੋਜਕਸ੍ਸ ਹਤ੍ਥਤੋ ਏਕਂ ਜਰਗੋਣਂ ਗਹੇਤ੍ਵਾ ਮਂਸਂ ਖਾਦਿਂਸੁ.

ਅਥੇਕਦਿਵਸਂ ਗਾਮਭਾਜਕੋ ਖਣਂ ਓਲੋਕੇਤ੍ਵਾ ਬੋਧਿਸਤ੍ਤਸ੍ਸ ਬਹਿਗਤਵੇਲਾਯਂ ਗੇਹਂ ਪਾਵਿਸਿ. ਤੇਸਂ ਸੁਖਨਿਪਨ੍ਨਕ੍ਖਣੇਯੇਵ ਬੋਧਿਸਤ੍ਤੋ ਗਾਮਦ੍ਵਾਰੇਨ ਪਵਿਸਿਤ੍ਵਾ ਗੇਹਾਭਿਮੁਖੋ ਪਾਯਾਸਿ. ਸਾ ਇਤ੍ਥੀ ਗਾਮਦ੍ਵਾਰਾਭਿਮੁਖੀ ਤਂ ਦਿਸ੍ਵਾ ‘‘ਕੋ ਨੁ ਖੋ ਏਸੋ’’ਤਿ ਉਮ੍ਮਾਰੇ ਠਤ੍ਵਾ ਓਲੋਕੇਨ੍ਤੀ ‘‘ਸੋਯੇਵਾ’’ਤਿ ਞਤ੍ਵਾ ਗਾਮਭੋਜਕਸ੍ਸ ਆਚਿਕ੍ਖਿ, ਗਾਮਭੋਜਕੋ ਭੀਤੋ ਪਕਮ੍ਪਿ. ਅਥ ਨਂ ਸਾ ‘‘ਮਾ ਭਾਯਿ, ਅਤ੍ਥੇਕੋ ਉਪਾਯੋ, ਅਮ੍ਹੇਹਿ ਤਵ ਹਤ੍ਥਤੋ ਗੋਣਮਂਸਂ ਖਾਦਿਤਂ, ਤ੍ਵਂ ਮਂਸਮੂਲਂ ਸੋਧੇਨ੍ਤੋ ਵਿਯ ਹੋਹਿ, ਅਹਂ ਕੋਟ੍ਠਂ ਆਰੁਯ੍ਹ ਕੋਟ੍ਠਦ੍ਵਾਰੇ ਠਤ੍ਵਾ ‘ਵੀਹਿ ਨਤ੍ਥੀ’ਤਿ ਵਕ੍ਖਾਮਿ. ਤ੍ਵਂ ਗੇਹਮਜ੍ਝੇ ਠਤ੍ਵਾ ‘ਅਮ੍ਹਾਕਂ ਘਰੇ ਦਾਰਕਾ ਛਾਤਾ, ਮਂਸਮੂਲਂ ਮੇ ਦੇਹੀ’ਤਿ ਪੁਨਪ੍ਪੁਨਂ ਚੋਦੇਯ੍ਯਾਸੀ’’ਤਿ ਵਤ੍ਵਾ ਕੋਟ੍ਠਂ ਆਰੁਯ੍ਹ ਕੋਟ੍ਠਦ੍ਵਾਰੇ ਨਿਸੀਦਿ. ਇਤਰੋ ਗੇਹਮਜ੍ਝੇ ਠਤ੍ਵਾ ‘‘ਮਂਸਮੂਲਂ ਦੇਹੀ’’ਤਿ ਵਦਤਿ. ਸਾ ਕੋਟ੍ਠਦ੍ਵਾਰੇ ਨਿਸਿਨ੍ਨਾ ‘‘ਕੋਟ੍ਠੇ ਵੀਹਿ ਨਤ੍ਥਿ, ਸਸ੍ਸੇ ਉਦ੍ਧਰਨ੍ਤੇ ਦਸ੍ਸਾਮਿ ਗਚ੍ਛਾਹੀ’’ਤਿ ਆਹ.

ਬੋਧਿਸਤ੍ਤੋ ਗੇਹਂ ਪਵਿਸਿਤ੍ਵਾ ਤੇਸਂ ਕਿਰਿਯਂ ਦਿਸ੍ਵਾ ‘‘ਇਮਾਯ ਪਾਪਾਯ ਕਤਉਪਾਯੋ ਏਸ ਭਵਿਸ੍ਸਤੀ’’ਤਿ ਞਤ੍ਵਾ ਗਾਮਭੋਜਕਂ ਆਮਨ੍ਤੇਤ੍ਵਾ ‘‘ਸੋ ਗਾਮਭੋਜਕ ਅਮ੍ਹੇ ਤਵ ਜਰਗੋਣਸ੍ਸ ਮਂਸਂ ਖਾਦਨ੍ਤਾ ‘ਇਤੋ ਮਾਸਦ੍ਵਯੇਨ ਵੀਹਿਂ ਦਸ੍ਸਾਮਾ’ਤਿ ਖਾਦਿਮ੍ਹ, ਤ੍ਵਂ ਅਡ੍ਢਮਾਸਮ੍ਪਿ ਅਨਤਿਕ੍ਕਮਿਤ੍ਵਾ ਇਦਾਨੇਵ ਕਸ੍ਮਾ ਆਹਰਾਪੇਸਿ, ਨ ਤ੍ਵਂ ਇਮਿਨਾ ਕਾਰਣੇਨ ਆਗਤੋ, ਅਞ੍ਞੇਨ ਕਾਰਣੇਨ ਆਗਤੋ ਭਵਿਸ੍ਸਸਿ, ਮਯ੍ਹਂ ਤਵ ਕਿਰਿਯਾ ਨ ਰੁਚ੍ਚਤਿ, ਅਯਮ੍ਪਿ ਅਨਾਚਾਰਾ ਪਾਪਧਮ੍ਮਾ ਕੋਟ੍ਠੇ ਵੀਹੀਨਂ ਅਭਾਵਂ ਜਾਨਾਤਿ, ਸਾ ਦਾਨਿ ਕੋਟ੍ਠਂ ਆਰੁਯ੍ਹ ‘ਵੀਹਿ ਨਤ੍ਥੀ’ਤਿ ਵਦਤਿ, ਤ੍ਵਮ੍ਪਿ ‘ਦੇਹੀ’ਤਿ ਵਦਤਿ, ਉਭਿਨ੍ਨਮ੍ਪਿ ਵੋ ਕਰਣਂ ਮਯ੍ਹਂ ਨ ਰੁਚ੍ਚਤੀ’’ਤਿ ਏਤਮਤ੍ਥਂ ਪਕਾਸੇਨ੍ਤੋ ਇਮਾ ਗਾਥਾ ਅਵੋਚ –

੯੭. ‘‘ਉਭਯਂ ਮੇ ਨ ਖਮਤਿ, ਉਭਯਂ ਮੇ ਨ ਰੁਚ੍ਚਤਿ;

ਯਾਚਾਯਂ ਕੋਟ੍ਠਮੋਤਿਣ੍ਣਾ, ਨਦਸ੍ਸਂ ਇਤਿ ਭਾਸਤਿ.

੯੮. ‘‘ਤਂ ਤਂ ਗਾਮਪਤਿ ਬ੍ਰੂਮਿ, ਕਦਰੇ ਅਪ੍ਪਸ੍ਮਿ ਜੀਵਿਤੇ;

ਦ੍ਵੇ ਮਾਸੇ ਸਙ੍ਗਰਂ ਕਤ੍ਵਾ, ਮਂਸਂ ਜਰਗ੍ਗਵਂ ਕਿਸਂ;

ਅਪ੍ਪਤ੍ਤਕਾਲੇ ਚੋਦੇਸਿ, ਤਮ੍ਪਿ ਮਯ੍ਹਂ ਨ ਰੁਚ੍ਚਤੀ’’ਤਿ.

ਤਤ੍ਥ ਤਂ ਤਂ ਗਾਮਪਤਿ ਬ੍ਰੂਮੀਤਿ, ਅਮ੍ਭੋ ਗਾਮਜੇਟ੍ਠਕ, ਤੇਨ ਕਾਰਣੇਨ ਤਂ ਵਦਾਮਿ. ਕਦਰੇ ਅਪ੍ਪਸ੍ਮਿ ਜੀਵਿਤੇਤਿ ਅਮ੍ਹਾਕਂ ਜੀਵਿਤਂ ਨਾਮ ਕਦਰਞ੍ਚੇਵ ਥਦ੍ਧਂ ਲੂਖਂ ਕਸਿਰਂ ਅਪ੍ਪਞ੍ਚ ਮਨ੍ਦਂ ਪਰਿਤ੍ਤਂ, ਤਸ੍ਮਿਂ ਨੋ ਏਵਰੂਪੇ ਜੀਵਿਤੇ ਵਤ੍ਤਮਾਨੇ. ਦ੍ਵੇ ਮਾਸੇ ਸਙ੍ਗਰਂ ਕਤ੍ਵਾ, ਮਂਸਂ ਜਰਗ੍ਗਵਂ ਕਿਸਨ੍ਤਿ ਅਮ੍ਹਾਕਂ ਮਂਸਂ ਗਣ੍ਹਨ੍ਤਾਨਂ ਜਰਗ੍ਗਵਂ ਕਿਸਂ ਦੁਬ੍ਬਲਂ ਜਰਗੋਣਂ ਦਦਮਾਨੋ ਤ੍ਵਂ ‘‘ਦ੍ਵੀਹਿ ਮਾਸੇਹਿ ਮੂਲਂ ਦਾਤਬ੍ਬ’’ਨ੍ਤਿ ਏਵਂ ਦ੍ਵੇ ਮਾਸੇ ਸਙ੍ਗਰਂ ਪਰਿਚ੍ਛੇਦਂ ਕਤ੍ਵਾ. ਅਪ੍ਪਤ੍ਤਕਾਲੇ ਚੋਦੇਸੀਤਿ ਤਸ੍ਮਿਂ ਕਾਲੇ ਅਸਮ੍ਪਤ੍ਤੇ ਅਨ੍ਤਰਾਵ ਚੋਦੇਸਿ. ਤਮ੍ਪਿ ਮਯ੍ਹਂ ਨ ਰੁਚ੍ਚਤੀਤਿ ਯਾ ਚਾਯਂ ਪਾਪਧਮ੍ਮਾ ਦੁਸ੍ਸੀਲਾ ਅਨ੍ਤੋਕੋਟ੍ਠੇ ਵੀਹੀਨਂ ਨਤ੍ਥਿਭਾਵਂ ਜਾਨਮਾਨਾਵ ਅਜਾਨਨ੍ਤੀ ਵਿਯ ਹੁਤ੍ਵਾ ਕੋਟ੍ਠਮੋਤਿਣ੍ਣਾ ਕੋਟ੍ਠਦ੍ਵਾਰੇ ਠਤ੍ਵਾ ਨ ਦਸ੍ਸਂ ਇਤਿ ਭਾਸਤਿ, ਯਞ੍ਚ ਤ੍ਵਂ ਅਕਾਲੇ ਚੋਦੇਸਿ, ਤਮ੍ਪੀਤਿ ਇਦਂ ਉਭਯਮ੍ਪਿ ਮਮ ਨੇਵ ਖਮਤਿ ਨ ਰੁਚ੍ਚਤੀਤਿ.

ਏਵਂ ਸੋ ਕਥੇਨ੍ਤੋਵ ਗਾਮਭੋਜਕਂ ਚੂਲ਼ਾਯ ਗਹੇਤ੍ਵਾ ਕਡ੍ਢਿਤ੍ਵਾ ਗੇਹਮਜ੍ਝੇ ਪਾਤੇਤ੍ਵਾ ‘‘ਗਾਮਭੋਜਕੋਮ੍ਹੀਤਿ ਪਰਸ੍ਸ ਰਕ੍ਖਿਤਗੋਪਿਤਭਣ੍ਡੇ ਅਪਰਜ੍ਝਸੀ’’ਤਿਆਦੀਹਿ ਪਰਿਭਾਸਿਤ੍ਵਾ ਪੋਥੇਤ੍ਵਾ ਦੁਬ੍ਬਲਂ ਕਤ੍ਵਾ ਗੀਵਾਯ ਗਹੇਤ੍ਵਾ ਗੇਹਾ ਨਿਕ੍ਕਡ੍ਢਿਤ੍ਵਾ ਤਮ੍ਪਿ ਦੁਟ੍ਠਇਤ੍ਥਿਂ ਕੇਸੇਸੁ ਗਹੇਤ੍ਵਾ ਕੋਟ੍ਠਾ ਓਤਾਰੇਤ੍ਵਾ ਨਿਪ੍ਪੋਥੇਤ੍ਵਾ ‘‘ਸਚੇ ਪੁਨ ਏਵਰੂਪਂ ਕਰੋਸਿ, ਜਾਨਿਸ੍ਸਸੀ’’ਤਿ ਸਨ੍ਤਜ੍ਜੇਸਿ. ਤਤੋ ਪਟ੍ਠਾਯ ਗਾਮਭੋਜਕੋ ਤਂ ਗੇਹਂ ਓਲੋਕੇਤੁਮ੍ਪਿ ਨ ਵਿਸਹਿ, ਸਾਪਿ ਪਾਪਾ ਪੁਨ ਮਨਸਾਪਿ ਅਤਿਚਰਿਤੁਂ ਨਾਸਕ੍ਖਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ‘‘ਤਦਾ ਗਾਮਭੋਜਕੋ ਦੇਵਦਤ੍ਤੋ, ਨਿਗ੍ਗਹਕਾਰਕੋ ਗਹਪਤਿ ਪਨ ਅਹਮੇਵ ਅਹੋਸਿ’’ਨ੍ਤਿ.

ਗਹਪਤਿਜਾਤਕਵਣ੍ਣਨਾ ਨਵਮਾ.

[੨੦੦] ੧੦. ਸਾਧੁਸੀਲਜਾਤਕਵਣ੍ਣਨਾ

ਸਰੀਰਦਬ੍ਯਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਬ੍ਰਾਹ੍ਮਣਂ ਆਰਬ੍ਭ ਕਥੇਸਿ. ਤਸ੍ਸ ਕਿਰ ਚਤਸ੍ਸੋ ਧੀਤਰੋ ਅਹੇਸੁਂ. ਤਾ ਚਤ੍ਤਾਰੋ ਜਨਾ ਪਤ੍ਥੇਨ੍ਤਿ, ਤੇਸੁ ਏਕੋ ਅਭਿਰੂਪੋ ਸਰੀਰਸਮ੍ਪਨ੍ਨੋ, ਏਕੋ ਵਯਪ੍ਪਤ੍ਤੋ ਮਹਲ੍ਲਕੋ, ਏਕੋ ਜਾਤਿਸਮ੍ਪਨ੍ਨੋ, ਏਕੋ ਸੀਲਵਾ. ਬ੍ਰਾਹ੍ਮਣੋ ਚਿਨ੍ਤੇਸਿ – ‘‘ਧੀਤਰੋ ਨਿਵੇਸੇਨ੍ਤੇਨ ਪਤਿਟ੍ਠਾਪੇਨ੍ਤੇਨ ਕਸ੍ਸ ਨੁ ਖੋ ਦਾਤਬ੍ਬਾ, ਕਿਂ ਰੂਪਸਮ੍ਪਨ੍ਨਸ੍ਸ, ਉਦਾਹੁ ਵਯਪ੍ਪਤ੍ਤਸ੍ਸ, ਜਾਤਿਸਮ੍ਪਨ੍ਨਸੀਲਵਨ੍ਤਾਨਂ ਅਞ੍ਞਤਰਸ੍ਸਾ’’ਤਿ. ਸੋ ਚਿਨ੍ਤੇਨ੍ਤੋਪਿ ਅਜਾਨਿਤ੍ਵਾ ‘‘ਇਮਂ ਕਾਰਣਂ ਸਮ੍ਮਾਸਮ੍ਬੁਦ੍ਧੋ ਜਾਨਿਸ੍ਸਤਿ, ਤਂ ਪੁਚ੍ਛਿਤ੍ਵਾ ਏਤੇਸਂ ਅਨ੍ਤਰੇ ਅਨੁਚ੍ਛਵਿਕਸ੍ਸ ਦਸ੍ਸਾਮੀ’’ਤਿ ਗਨ੍ਧਮਾਲਾਦੀਨਿ ਗਾਹਾਪੇਤ੍ਵਾ ਵਿਹਾਰਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਆਦਿਤੋ ਪਟ੍ਠਾਯ ਤਮਤ੍ਥਂ ਆਰੋਚੇਤ੍ਵਾ ‘‘ਭਨ੍ਤੇ, ਇਮੇਸੁ ਚਤੂਸੁ ਜਨੇਸੁ ਕਸ੍ਸ ਦਾਤੁਂ ਵਟ੍ਟਤੀ’’ਤਿ ਪੁਚ੍ਛਿ. ਸਤ੍ਥਾ ‘‘ਪੁਬ੍ਬੇਪਿ ਪਣ੍ਡਿਤਾ ਏਤਂ ਪਞ੍ਹਂ ਕਥਯਿਂਸੁ, ਭਵਸਙ੍ਖੇਪਗਤਤ੍ਤਾ ਪਨ ਸਲ੍ਲਕ੍ਖੇਤੁਂ ਨ ਸਕ੍ਕੋਸੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਤਕ੍ਕਸਿਲਾਯਂ ਸਿਪ੍ਪਂ ਉਗ੍ਗਣ੍ਹਿਤ੍ਵਾ ਆਗਨ੍ਤ੍ਵਾ ਬਾਰਾਣਸਿਯਂ ਦਿਸਾਪਾਮੋਕ੍ਖੋ ਆਚਰਿਯੋ ਅਹੋਸਿ. ਅਥੇਕਸ੍ਸ ਬ੍ਰਾਹ੍ਮਣਸ੍ਸ ਚਤਸ੍ਸੋ ਧੀਤਰੋ ਅਹੇਸੁਂ, ਤਾ ਏਵਮੇਵ ਚਤ੍ਤਾਰੋ ਜਨਾ ਪਤ੍ਥਯਿਂਸੁ. ਬ੍ਰਾਹ੍ਮਣੋ ‘‘ਕਸ੍ਸ ਨੁ ਖੋ ਦਾਤਬ੍ਬਾ’’ਤਿ ਅਜਾਨਨ੍ਤੋ ‘‘ਆਚਰਿਯਂ ਪੁਚ੍ਛਿਤ੍ਵਾ ਦਾਤਬ੍ਬਯੁਤ੍ਤਕਸ੍ਸ ਦਸ੍ਸਾਮੀ’’ਤਿ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੯੯. ‘‘ਸਰੀਰਦਬ੍ਯਂ ਵੁਡ੍ਢਬ੍ਯਂ, ਸੋਜਚ੍ਚਂ ਸਾਧੁਸੀਲਿਯਂ;

ਬ੍ਰਾਹ੍ਮਣਂ ਤੇਵ ਪੁਚ੍ਛਾਮ, ਕਨ੍ਨੁ ਤੇਸਂ ਵਨਿਮ੍ਹਸੇ’’ਤਿ.

ਤਤ੍ਥ ‘‘ਸਰੀਰਦਬ੍ਯ’’ਨ੍ਤਿਆਦੀਹਿ ਤੇਸਂ ਚਤੁਨ੍ਨਂ ਵਿਜ੍ਜਮਾਨੇ ਗੁਣੇ ਪਕਾਸੇਤਿ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਧੀਤਰੋ ਮੇ ਚਤ੍ਤਾਰੋ ਜਨਾ ਪਤ੍ਥੇਨ੍ਤਿ, ਤੇਸੁ ਏਕਸ੍ਸ ਸਰੀਰਦਬ੍ਯਮਤ੍ਥਿ, ਸਰੀਰਸਮ੍ਪਦਾ ਅਭਿਰੂਪਭਾਵੋ ਸਂਵਿਜ੍ਜਤਿ. ਏਕਸ੍ਸ ਵੁਡ੍ਢਬ੍ਯਂ ਵੁਡ੍ਢਿਭਾਵੋ ਮਹਲ੍ਲਕਤਾ ਅਤ੍ਥਿ. ਏਕਸ੍ਸ ਸੋਜਚ੍ਚਂ ਸੁਜਾਤਿਤਾ ਜਾਤਿਸਮ੍ਪਦਾ ਅਤ੍ਥਿ. ‘‘ਸੁਜਚ੍ਚ’’ਨ੍ਤਿਪਿ ਪਾਠੋ. ਏਕਸ੍ਸ ਸਾਧੁਸੀਲਿਯਂ ਸੁਨ੍ਦਰਸੀਲਭਾਵੋ ਸੀਲਸਮ੍ਪਦਾ ਅਤ੍ਥਿ. ਬ੍ਰਾਹ੍ਮਣਂ ਤੇਵ ਪੁਚ੍ਛਾਮਾਤਿ ਤੇਸੁ ਅਸੁਕਸ੍ਸ ਨਾਮੇਤਾ ਦਾਤਬ੍ਬਾਤਿ ਅਜਾਨਨ੍ਤਾ ਮਯਂ ਭਵਨ੍ਤਂ ਬ੍ਰਾਹ੍ਮਣਞ੍ਞੇਵ ਪੁਚ੍ਛਾਮ. ਕਨ੍ਨੁ ਤੇਸਂ ਵਨਿਮ੍ਹਸੇਤਿ ਤੇਸਂ ਚਤੁਨ੍ਨਂ ਜਨਾਨਂ ਕਂ ਵਨਿਮ੍ਹਸੇ, ਕਂ ਇਚ੍ਛਾਮ, ਕਸ੍ਸ ਤਾ ਕੁਮਾਰਿਕਾ ਦਦਾਮਾਤਿ ਪੁਚ੍ਛਤਿ.

ਤਂ ਸੁਤ੍ਵਾ ਆਚਰਿਯੋ ‘‘ਰੂਪਸਮ੍ਪਦਾਦੀਸੁ ਵਿਜ੍ਜਮਾਨਾਸੁਪਿ ਵਿਪਨ੍ਨਸੀਲੋ ਗਾਰਯ੍ਹੋ, ਤਸ੍ਮਾ ਤਂ ਨਪ੍ਪਮਾਣਂ, ਅਮ੍ਹਾਕਂ ਸੀਲਵਨ੍ਤਭਾਵੋ ਰੁਚ੍ਚਤੀ’’ਤਿ ਇਮਮਤ੍ਥਂ ਪਕਾਸੇਨ੍ਤੋ ਦੁਤਿਯਂ ਗਾਥਮਾਹ –

੧੦੦. ‘‘ਅਤ੍ਥੋ ਅਤ੍ਥਿ ਸਰੀਰਸ੍ਮਿਂ, ਵੁਡ੍ਢਬ੍ਯਸ੍ਸ ਨਮੋ ਕਰੇ;

ਅਤ੍ਥੋ ਅਤ੍ਥਿ ਸੁਜਾਤਸ੍ਮਿਂ, ਸੀਲਂ ਅਸ੍ਮਾਕ ਰੁਚ੍ਚਤੀ’’ਤਿ.

ਤਤ੍ਥ ਅਤ੍ਥੋ ਅਤ੍ਥਿ ਸਰੀਰਸ੍ਮਿਨ੍ਤਿ ਰੂਪਸਮ੍ਪਨ੍ਨੇ ਸਰੀਰੇਪਿ ਅਤ੍ਥੋ ਵਿਸੇਸੋ ਵੁਦ੍ਧਿ ਅਤ੍ਥਿਯੇਵ, ‘‘ਨਤ੍ਥੀ’’ਤਿ ਨ ਵਦਾਮਿ. ਵੁਡ੍ਢਬ੍ਯਸ੍ਸ ਨਮੋ ਕਰੇਤਿ ਵੁਡ੍ਢਭਾਵਸ੍ਸ ਪਨ ਨਮਕ੍ਕਾਰਮੇਵ ਕਰੋਮਿ. ਵੁਡ੍ਢਭਾਵੋ ਹਿ ਵਨ੍ਦਨਮਾਨਨਂ ਲਭਤਿ. ਅਤ੍ਥੋ ਅਤ੍ਥਿ ਸੁਜਾਤਸ੍ਮਿਨ੍ਤਿ ਸੁਜਾਤੇਪਿ ਪੁਰਿਸੇ ਵੁਡ੍ਢਿ ਅਤ੍ਥਿ, ਜਾਤਿਸਮ੍ਪਤ੍ਤਿਪਿ ਇਚ੍ਛਿਤਬ੍ਬਾਯੇਵ. ਸੀਲਂ ਅਸ੍ਮਾਕ ਰੁਚ੍ਚਤੀਤਿ ਅਮ੍ਹਾਕਂ ਪਨ ਸੀਲਮੇਵ ਰੁਚ੍ਚਤਿ. ਸੀਲਵਾ ਹਿ ਆਚਾਰਸਮ੍ਪਨ੍ਨੋ ਸਰੀਰਦਬ੍ਯਵਿਰਹਿਤੋਪਿ ਪੁਜ੍ਜੋ ਪਾਸਂਸੋਤਿ. ਬ੍ਰਾਹ੍ਮਣੋ ਤਸ੍ਸ ਵਚਨਂ ਸੁਤ੍ਵਾ ਸੀਲਵਨ੍ਤਸ੍ਸੇਵ ਧੀਤਰੋ ਅਦਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ – ਸਚ੍ਚਪਰਿਯੋਸਾਨੇ ਬ੍ਰਾਹ੍ਮਣੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ‘‘ਤਦਾ ਬ੍ਰਾਹ੍ਮਣੋ ਅਯਮੇਵ ਬ੍ਰਾਹ੍ਮਣੋ ਅਹੋਸਿ, ਦਿਸਾਪਾਮੋਕ੍ਖੋ ਆਚਰਿਯੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਾਧੁਸੀਲਜਾਤਕਵਣ੍ਣਨਾ ਦਸਮਾ.

ਰੁਹਕਵਗ੍ਗੋ ਪਞ੍ਚਮੋ.

ਤਸ੍ਸੁਦ੍ਦਾਨਂ –

ਰੁਹਕਂ ਸਿਰਿਕਾਲ਼ਕਂ, ਪਦੁਮਂ ਮਣਿਚੋਰਕਂ;

ਪਬ੍ਬਤੂਪਤ੍ਥਰਵਲਾਹਂ, ਮਿਤ੍ਤਾਮਿਤ੍ਤਞ੍ਚ ਰਾਧਞ੍ਚ;

ਗਹਪਤਿ ਸਾਧੁਸੀਲਂ.