੨. ਦੁਕਨਿਪਾਤੋ

੧. ਦਲ਼੍ਹਵਗ੍ਗੋ

[੧੫੧] ੧. ਰਾਜੋਵਾਦਜਾਤਕਵਣ੍ਣਨਾ

ਦਲ਼੍ਹਂ ਦਲ਼੍ਹਸ੍ਸ ਖਿਪਤੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਰਾਜੋਵਾਦਂ ਆਰਬ੍ਭ ਕਥੇਸਿ. ਸੋ ਤੇਸਕੁਣਜਾਤਕੇ (ਜਾ. ੨.੧੭.੧ ਆਦਯੋ) ਆਵਿ ਭਵਿਸ੍ਸਤਿ. ਏਕਸ੍ਮਿਂ ਪਨ ਦਿਵਸੇ ਕੋਸਲਰਾਜਾ ਏਕਂ ਅਗਤਿਗਤਂ ਦੁਬ੍ਬਿਨਿਚ੍ਛਯਂ ਅਡ੍ਡਂ ਵਿਨਿਚ੍ਛਿਨਿਤ੍ਵਾ ਭੁਤ੍ਤਪਾਤਰਾਸੋ ਅਲ੍ਲਹਤ੍ਥੋਵ ਅਲਙ੍ਕਤਰਥਂ ਅਭਿਰੁਯ੍ਹ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਫੁਲ੍ਲਪਦੁਮਸਸ੍ਸਿਰਿਕੇਸੁ ਪਾਦੇਸੁ ਨਿਪਤਿਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਅਥ ਨਂ ਸਤ੍ਥਾ ਏਤਦਵੋਚ – ‘‘ਹਨ੍ਦ ਕੁਤੋ ਨੁ ਤ੍ਵਂ, ਮਹਾਰਾਜ, ਆਗਚ੍ਛਸਿ ਦਿਵਾ ਦਿਵਸ੍ਸਾ’’ਤਿ. ‘‘ਭਨ੍ਤੇ, ਅਜ੍ਜ ਏਕਂ ਅਗਤਿਗਤਂ ਦੁਬ੍ਬਿਨਿਚ੍ਛਯਂ ਅਡ੍ਡਂ ਵਿਨਿਚ੍ਛਿਨਨ੍ਤੋ ਓਕਾਸਂ ਅਲਭਿਤ੍ਵਾ ਇਦਾਨਿ ਤਂ ਤੀਰੇਤ੍ਵਾ ਭੁਞ੍ਜਿਤ੍ਵਾ ਅਲ੍ਲਹਤ੍ਥੋਵ ਤੁਮ੍ਹਾਕਂ ਉਪਟ੍ਠਾਨਂ ਆਗਤੋਮ੍ਹੀ’’ਤਿ. ਸਤ੍ਥਾ ‘‘ਮਹਾਰਾਜ, ਧਮ੍ਮੇਨ ਸਮੇਨ ਅਡ੍ਡਵਿਨਿਚ੍ਛਯਂ ਨਾਮ ਕੁਸਲਂ, ਸਗ੍ਗਮਗ੍ਗੋ ਏਸ. ਅਨਚ੍ਛਰਿਯਂ ਖੋ ਪਨੇਤਂ, ਯਂ ਤੁਮ੍ਹੇ ਮਾਦਿਸਸ੍ਸ ਸਬ੍ਬਞ੍ਞੁਬੁਦ੍ਧਸ੍ਸ ਸਨ੍ਤਿਕਾ ਓਵਾਦਂ ਲਭਮਾਨਾ ਧਮ੍ਮੇਨ ਸਮੇਨ ਅਡ੍ਡਂ ਵਿਨਿਚ੍ਛਿਨੇਯ੍ਯਾਥ. ਏਤਦੇਵ ਅਚ੍ਛਰਿਯਂ, ਯਂ ਪੁਬ੍ਬੇ ਰਾਜਾਨੋ ਅਸਬ੍ਬਞ੍ਞੂਨਮ੍ਪਿ ਪਣ੍ਡਿਤਾਨਂ ਵਚਨਂ ਸੁਤ੍ਵਾ ਧਮ੍ਮੇਨ ਸਮੇਨ ਅਡ੍ਡਂ ਵਿਨਿਚ੍ਛਿਨਨ੍ਤਾ ਚਤ੍ਤਾਰਿ ਅਗਤਿਗਮਨਾਨਿ ਵਜ੍ਜੇਤ੍ਵਾ ਦਸ ਰਾਜਧਮ੍ਮੇ ਅਕੋਪੇਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਸਗ੍ਗਪੁਰਂ ਪੂਰਯਮਾਨਾ ਅਗਮਿਂਸੂ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਹੇਤ੍ਵਾ ਲਦ੍ਧਗਬ੍ਭਪਰਿਹਾਰੋ ਸੋਤ੍ਥਿਨਾ ਮਾਤੁਕੁਚ੍ਛਿਮ੍ਹਾ ਨਿਕ੍ਖਮਿ. ਨਾਮਗ੍ਗਹਣਦਿਵਸੇ ਪਨਸ੍ਸ ‘‘ਬ੍ਰਹ੍ਮਦਤ੍ਤਕੁਮਾਰੋ’’ਤ੍ਵੇਵ ਨਾਮਂ ਅਕਂਸੁ. ਸੋ ਅਨੁਪੁਬ੍ਬੇਨ ਵਯਪ੍ਪਤ੍ਤੋ ਸੋਲ਼ਸਵਸ੍ਸਕਾਲੇ ਤਕ੍ਕਸਿਲਂ ਗਨ੍ਤ੍ਵਾ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਵਾ ਪਿਤੁ ਅਚ੍ਚਯੇਨ ਰਜ੍ਜੇ ਪਤਿਟ੍ਠਾਯ ਧਮ੍ਮੇਨ ਸਮੇਨ ਰਜ੍ਜਂ ਕਾਰੇਸਿ, ਛਨ੍ਦਾਦਿਵਸੇਨ ਅਗਨ੍ਤ੍ਵਾ ਵਿਨਿਚ੍ਛਯਂ ਅਨੁਸਾਸਿ. ਤਸ੍ਮਿਂ ਏਵਂ ਧਮ੍ਮੇਨ ਰਜ੍ਜਂ ਕਾਰੇਨ੍ਤੇ ਅਮਚ੍ਚਾਪਿ ਧਮ੍ਮੇਨੇਵ ਵੋਹਾਰਂ ਵਿਨਿਚ੍ਛਿਨਿਂਸੁ. ਵੋਹਾਰੇਸੁ ਧਮ੍ਮੇਨ ਵਿਨਿਚ੍ਛਯਮਾਨੇਸੁ ਕੂਟਡ੍ਡਕਾਰਕਾ ਨਾਮ ਨਾਹੇਸੁਂ, ਤੇਸਂ ਅਭਾਵਾ ਅਡ੍ਡਤ੍ਥਾਯ ਰਾਜਙ੍ਗਣੇ ਉਪਰਵੋ ਪਚ੍ਛਿਜ੍ਜਿ. ਅਮਚ੍ਚਾ ਦਿਵਸਮ੍ਪਿ ਵਿਨਿਚ੍ਛਯਟ੍ਠਾਨੇ ਨਿਸੀਦਿਤ੍ਵਾ ਕਞ੍ਚਿ ਵਿਨਿਚ੍ਛਯਤ੍ਥਾਯ ਆਗਚ੍ਛਨ੍ਤਂ ਅਦਿਸ੍ਵਾ ਉਟ੍ਠਾਯ ਪਕ੍ਕਮਨ੍ਤਿ, ਵਿਨਿਚ੍ਛਯਟ੍ਠਾਨਂ ਛਡ੍ਡੇਤਬ੍ਬਭਾਵਂ ਪਾਪੁਣਿ.

ਬੋਧਿਸਤ੍ਤੋ ਚਿਨ੍ਤੇਸਿ – ‘‘ਮਯਿ ਧਮ੍ਮੇਨ ਰਜ੍ਜਂ ਕਾਰੇਨ੍ਤੇ ਵਿਨਿਚ੍ਛਯਟ੍ਠਾਨਂ ਆਗਚ੍ਛਨ੍ਤਾ ਨਾਮ ਨਤ੍ਥਿ, ਉਪਰਵੋ ਪਚ੍ਛਿਜ੍ਜਿ, ਵਿਨਿਚ੍ਛਯਟ੍ਠਾਨਂ ਛਡ੍ਡੇਤਬ੍ਬਭਾਵਂ ਪਤ੍ਤਂ, ਇਦਾਨਿ ਮਯਾ ਅਤ੍ਤਨੋ ਅਗੁਣਂ ਪਰਿਯੇਸਿਤੁਂ ਵਟ੍ਟਤਿ ‘ਅਯਂ ਨਾਮ ਮੇ ਅਗੁਣੋ’ਤਿ ਸੁਤ੍ਵਾ ਤਂ ਪਹਾਯ ਗੁਣੇਸੁਯੇਵ ਵਤ੍ਤਿਸ੍ਸਾਮੀ’’ਤਿ. ਤਤੋ ਪਟ੍ਠਾਯ ‘‘ਅਤ੍ਥਿ ਨੁ ਖੋ ਮੇ ਕੋਚਿ ਅਗੁਣਵਾਦੀ’’ਤਿ ਪਰਿਗ੍ਗਣ੍ਹਨ੍ਤੋ ਅਨ੍ਤੋਵਲ਼ਞ੍ਜਕਾਨਂ ਅਨ੍ਤਰੇ ਕਞ੍ਚਿ ਅਗੁਣਵਾਦਿਂ ਅਦਿਸ੍ਵਾ ਅਤ੍ਤਨੋ ਗੁਣਕਥਮੇਵ ਸੁਤ੍ਵਾ ‘‘ਏਤੇ ਮਯ੍ਹਂ ਭਯੇਨਾਪਿ ਅਗੁਣਂ ਅਵਤ੍ਵਾ ਗੁਣਮੇਵ ਵਦੇਯ੍ਯੁ’’ਨ੍ਤਿ ਬਹਿਵਲ਼ਞ੍ਜਨਕੇ ਪਰਿਗ੍ਗਣ੍ਹਨ੍ਤੋ ਤਤ੍ਥਾਪਿ ਅਦਿਸ੍ਵਾ ਅਨ੍ਤੋਨਗਰੇ ਪਰਿਗ੍ਗਣ੍ਹਿ. ਬਹਿਨਗਰੇ ਚਤੂਸੁ ਦ੍ਵਾਰੇਸੁ ਚਤੁਗਾਮਕੇ ਪਰਿਗ੍ਗਣ੍ਹਿ. ਤਤ੍ਥਾਪਿ ਕਞ੍ਚਿ ਅਗੁਣਵਾਦਿਂ ਅਦਿਸ੍ਵਾ ਅਤ੍ਤਨੋ ਗੁਣਕਥਮੇਵ ਸੁਤ੍ਵਾ ‘‘ਜਨਪਦਂ ਪਰਿਗ੍ਗਣ੍ਹਿਸ੍ਸਾਮੀ’’ਤਿ ਅਮਚ੍ਚੇ ਰਜ੍ਜਂ ਪਟਿਚ੍ਛਾਪੇਤ੍ਵਾ ਰਥਂ ਆਰੁਯ੍ਹ ਸਾਰਥਿਮੇਵ ਗਹੇਤ੍ਵਾ ਅਞ੍ਞਾਤਕਵੇਸੇਨ ਨਗਰਾ ਨਿਕ੍ਖਮਿਤ੍ਵਾ ਜਨਪਦਂ ਪਰਿਗ੍ਗਣ੍ਹਮਾਨੋ ਯਾਵ ਪਚ੍ਚਨ੍ਤਭੂਮਿਂ ਗਨ੍ਤ੍ਵਾ ਕਞ੍ਚਿ ਅਗੁਣਵਾਦਿਂ ਅਦਿਸ੍ਵਾ ਅਤ੍ਤਨੋ ਗੁਣਕਥਮੇਵ ਸੁਤ੍ਵਾ ਪਚ੍ਚਨ੍ਤਸੀਮਤੋ ਮਹਾਮਗ੍ਗੇਨ ਨਗਰਾਭਿਮੁਖੋਯੇਵ ਨਿਵਤ੍ਤਿ.

ਤਸ੍ਮਿਂ ਪਨ ਕਾਲੇ ਬਲ੍ਲਿਕੋ ਨਾਮ ਕੋਸਲਰਾਜਾਪਿ ਧਮ੍ਮੇਨ ਰਜ੍ਜਂ ਕਾਰੇਨ੍ਤੋ ਅਗੁਣਕਥਂ ਗਵੇਸਨ੍ਤੋ ਹੁਤ੍ਵਾ ਅਨ੍ਤੋਵਲ਼ਞ੍ਜਕਾਦੀਸੁ ਅਗੁਣਵਾਦਿਂ ਅਦਿਸ੍ਵਾ ਅਤ੍ਤਨੋ ਗੁਣਕਥਮੇਵ ਸੁਤ੍ਵਾ ਜਨਪਦਂ ਪਰਿਗ੍ਗਣ੍ਹਨ੍ਤੋ ਤਂ ਪਦੇਸਂ ਅਗਮਾਸਿ. ਤੇ ਉਭੋਪਿ ਏਕਸ੍ਮਿਂ ਨਿਨ੍ਨਟ੍ਠਾਨੇ ਸਕਟਮਗ੍ਗੇ ਅਭਿਮੁਖਾ ਅਹੇਸੁਂ, ਰਥਸ੍ਸ ਉਕ੍ਕਮਨਟ੍ਠਾਨਂ ਨਤ੍ਥਿ. ਅਥ ਬਲ੍ਲਿਕਰਞ੍ਞੋ ਸਾਰਥਿ ਬਾਰਾਣਸਿਰਞ੍ਞੋ ਸਾਰਥਿਂ ‘‘ਤਵ ਰਥਂ ਉਕ੍ਕਮਾਪੇਹੀ’’ਤਿ ਆਹ. ਸੋਪਿ ‘‘ਅਮ੍ਭੋ ਸਾਰਥਿ, ਤਵ ਰਥਂ ਉਕ੍ਕਮਾਪੇਹਿ, ਇਮਸ੍ਮਿਂ ਰਥੇ ਬਾਰਾਣਸਿਰਜ੍ਜਸਾਮਿਕੋ ਬ੍ਰਹ੍ਮਦਤ੍ਤਮਹਾਰਾਜਾ ਨਿਸਿਨ੍ਨੋ’’ਤਿ ਆਹ. ਇਤਰੋਪਿ ਨਂ ‘‘ਅਮ੍ਭੋ ਸਾਰਥਿ, ਇਮਸ੍ਮਿਂ ਰਥੇ ਕੋਸਲਰਜ੍ਜਸਾਮਿਕੋ ਬਲ੍ਲਿਕਮਹਾਰਾਜਾ ਨਿਸਿਨ੍ਨੋ, ਤਵ ਰਥਂ ਉਕ੍ਕਮਾਪੇਤ੍ਵਾ ਅਮ੍ਹਾਕਂ ਰਞ੍ਞੋ ਰਥਸ੍ਸ ਓਕਾਸਂ ਦੇਹੀ’’ਤਿ ਆਹ. ਬਾਰਾਣਸਿਰਞ੍ਞੋ ਸਾਰਥਿ ‘‘ਅਯਮ੍ਪਿ ਕਿਰ ਰਾਜਾਯੇਵ, ਕਿਂ ਨੁ ਖੋ ਕਾਤਬ੍ਬ’’ਨ੍ਤਿ ਚਿਨ੍ਤੇਨ੍ਤੋ ‘‘ਅਤ੍ਥੇਸੋ ਉਪਾਯੋ’’ਤਿ ਵਯਂ ਪੁਚ੍ਛਿਤ੍ਵਾ ‘‘ਦਹਰਸ੍ਸ ਰਥਂ ਉਕ੍ਕਮਾਪੇਤ੍ਵਾ ਮਹਲ੍ਲਕਸ੍ਸ ਓਕਾਸਂ ਦਾਪੇਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਤਂ ਸਾਰਥਿਂ ਕੋਸਲਰਞ੍ਞੋ ਵਯਂ ਪੁਚ੍ਛਿਤ੍ਵਾ ਪਰਿਗ੍ਗਣ੍ਹਨ੍ਤੋ ਉਭਿਨ੍ਨਮ੍ਪਿ ਸਮਾਨਵਯਭਾਵਂ ਞਤ੍ਵਾ ਰਜ੍ਜਪਰਿਮਾਣਂ ਬਲਂ ਧਨਂ ਯਸਂ ਜਾਤਿਂ ਗੋਤ੍ਤਂ ਕੁਲਪਦੇਸਨ੍ਤਿ ਸਬ੍ਬਂ ਪੁਚ੍ਛਿਤ੍ਵਾ ‘‘ਉਭੋਪਿ ਤਿਯੋਜਨਸਤਿਕਸ੍ਸ ਰਜ੍ਜਸ੍ਸ ਸਾਮਿਨੋ ਸਮਾਨਬਲਧਨਯਸਜਾਤਿਗੋਤ੍ਤਕੁਲਪਦੇਸਾ’’ਤਿ ਞਤ੍ਵਾ ‘‘ਸੀਲਵਨ੍ਤਸ੍ਸ ਓਕਾਸਂ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਭੋ ਸਾਰਥਿ, ਤੁਮ੍ਹਾਕਂ ਰਞ੍ਞੋ ਸੀਲਾਚਾਰੋ ਕੀਦਿਸੋ’’ਤਿ ਪੁਚ੍ਛਿ. ਸੋ ‘‘ਅਯਞ੍ਚ ਅਯਞ੍ਚ ਅਮ੍ਹਾਕਂ ਰਞ੍ਞੋ ਸੀਲਾਚਾਰੋ’’ਤਿ ਅਤ੍ਤਨੋ ਰਞ੍ਞੋ ਅਗੁਣਮੇਵ ਗੁਣਤੋ ਪਕਾਸੇਨ੍ਤੋ ਪਠਮਂ ਗਾਥਮਾਹ –

੧. ‘‘ਦਲ਼੍ਹਂ ਦਲ਼੍ਹਸ੍ਸ ਖਿਪਤਿ, ਬਲ੍ਲਿਕੋ ਮੁਦੁਨਾ ਮੁਦੁਂ;

ਸਾਧੁਮ੍ਪਿ ਸਾਧੁਨਾ ਜੇਤਿ, ਅਸਾਧੁਮ੍ਪਿ ਅਸਾਧੁਨਾ;

ਏਤਾਦਿਸੋ ਅਯਂ ਰਾਜਾ, ਮਗ੍ਗਾ ਉਯ੍ਯਾਹਿ ਸਾਰਥੀ’’ਤਿ.

ਤਤ੍ਥ ਦਲ਼੍ਹਂ ਦਲ਼੍ਹਸ੍ਸ ਖਿਪਤੀਤਿ ਯੋ ਦਲ਼੍ਹੋ ਹੋਤਿ ਬਲਵਦਲ਼੍ਹੇਨ ਪਹਾਰੇਨ ਵਾ ਵਚਨੇਨ ਵਾ ਜਿਨਿਤਬ੍ਬੋ, ਤਸ੍ਸ ਦਲ਼੍ਹਮੇਵ ਪਹਾਰਂ ਵਾ ਵਚਨਂ ਵਾ ਖਿਪਤਿ. ਏਵਂ ਦਲ਼੍ਹੋਵ ਹੁਤ੍ਵਾ ਤਂ ਜਿਨਾਤੀਤਿ ਦਸ੍ਸੇਤਿ. ਬਲ੍ਲਿਕੋਤਿ ਤਸ੍ਸ ਰਞ੍ਞੋ ਨਾਮਂ. ਮੁਦੁਨਾ ਮੁਦੁਨ੍ਤਿ ਮੁਦੁਪੁਗ੍ਗਲਂ ਸਯਮ੍ਪਿ ਮੁਦੁ ਹੁਤ੍ਵਾ ਮੁਦੁਨਾਵ ਉਪਾਯੇਨ ਜਿਨਾਤਿ. ਸਾਧੁਮ੍ਪਿ ਸਾਧੁਨਾ ਜੇਤੀਤਿ ਯੇ ਸਾਧੂ ਸਪ੍ਪੁਰਿਸਾ, ਤੇ ਸਯਮ੍ਪਿ ਸਾਧੁ ਹੁਤ੍ਵਾ ਸਾਧੁਨਾਵ ਉਪਾਯੇਨ ਜਿਨਾਤਿ. ਅਸਾਧੁਮ੍ਪਿ ਅਸਾਧੁਨਾਤਿ ਯੇ ਪਨ ਅਸਾਧੂ, ਤੇ ਸਯਮ੍ਪਿ ਅਸਾਧੁ ਹੁਤ੍ਵਾ ਅਸਾਧੁਨਾਵ ਉਪਾਯੇਨ ਜਿਨਾਤੀਤਿ ਦਸ੍ਸੇਤਿ. ਏਤਾਦਿਸੋ ਅਯਂ ਰਾਜਾਤਿ ਅਯਂ ਅਮ੍ਹਾਕਂ ਕੋਸਲਰਾਜਾ ਸੀਲਾਚਾਰੇਨ ਏਵਰੂਪੋ. ਮਗ੍ਗਾ ਉਯ੍ਯਾਹਿ ਸਾਰਥੀਤਿ ਅਤ੍ਤਨੋ ਰਥਂ ਮਗ੍ਗਾ ਉਕ੍ਕਮਾਪੇਤ੍ਵਾ ਉਯ੍ਯਾਹਿ, ਉਪ੍ਪਥੇਨ ਯਾਹਿ, ਅਮ੍ਹਾਕਂ ਰਞ੍ਞੋ ਮਗ੍ਗਂ ਦੇਹੀਤਿ ਵਦਤਿ.

ਅਥ ਨਂ ਬਾਰਾਣਸਿਰਞ੍ਞੋ ਸਾਰਥਿ ‘‘ਅਮ੍ਭੋ, ਕਿਂ ਪਨ ਤਯਾ ਅਤ੍ਤਨੋ ਰਞ੍ਞੋ ਗੁਣਕਥਾ ਕਥਿਤਾ’’ਤਿ ਵਤ੍ਵਾ ‘‘ਆਮਾ’’ਤਿ ਵੁਤ੍ਤੇ ‘‘ਯਦਿ ਪਨ ਏਤੇ ਗੁਣਾਤਿ ਵਦਸਿ, ਅਗੁਣਾ ਪਨ ਕੀਦਿਸੀ’’ਤਿ ਵਤ੍ਵਾ ‘‘ਏਤੇ ਤਾਵ ਅਗੁਣਾ ਹੋਨ੍ਤੁ, ਤੁਮ੍ਹਾਕਂ ਪਨ ਰਞ੍ਞੋ ਕੀਦਿਸੋ ਗੁਣੋ’’ਤਿ ਵੁਤ੍ਤੇ ‘‘ਤੇਨ ਹਿ ਸੁਣਾਹੀ’’ਤਿ ਦੁਤਿਯਂ ਗਾਥਮਾਹ –

੨. ‘‘ਅਕ੍ਕੋਧੇਨ ਜਿਨੇ ਕੋਧਂ, ਅਸਾਧੁਂ ਸਾਧੁਨਾ ਜਿਨੇ;

ਜਿਨੇ ਕਦਰਿਯਂ ਦਾਨੇਨ, ਸਚ੍ਚੇਨਾਲਿਕਵਾਦਿਨਂ;

ਏਤਾਦਿਸੋ ਅਯਂ ਰਾਜਾ, ਮਗ੍ਗਾ ਉਯ੍ਯਾਹਿ ਸਾਰਥੀ’’ਤਿ.

ਤਤ੍ਥ ਏਤਾਦਿਸੋਤਿ ਏਤੇਹਿ ‘‘ਅਕ੍ਕੋਧੇਨ ਜਿਨੇ ਕੋਧ’’ਨ੍ਤਿਆਦਿਵਸੇਨ ਵੁਤ੍ਤੇਹਿ ਗੁਣੇਹਿ ਸਮਨ੍ਨਾਗਤੋ. ਅਯਞ੍ਹਿ ਕੁਦ੍ਧਂ ਪੁਗ੍ਗਲਂ ਸਯਂ ਅਕ੍ਕੋਧੋ ਹੁਤ੍ਵਾ ਅਕ੍ਕੋਧੇਨ ਜਿਨਾਤਿ, ਅਸਾਧੁਂ ਪਨ ਸਯਂ ਸਾਧੁ ਹੁਤ੍ਵਾ ਸਾਧੁਨਾਵ ਉਪਾਯੇਨ ਜਿਨਾਤਿ, ਕਦਰਿਯਂ ਥਦ੍ਧਮਚ੍ਛਰਿਂ ਸਯਂ ਦਾਯਕੋ ਹੁਤ੍ਵਾ ਦਾਨੇਨ ਜਿਨਾਤਿ. ਸਚ੍ਚੇਨਾਲਿਕਵਾਦਿਨਨ੍ਤਿ ਮੁਸਾਵਾਦਿਂ ਸਯਂ ਸਚ੍ਚਵਾਦੀ ਹੁਤ੍ਵਾ ਸਚ੍ਚੇਨ ਜਿਨਾਤਿ. ਮਗ੍ਗਾ ਉਯ੍ਯਾਹਿ ਸਾਰਥੀਤਿ, ਸਮ੍ਮ ਸਾਰਥਿ, ਮਗ੍ਗਤੋ ਅਪਗਚ੍ਛ. ਏਵਂਵਿਧਸੀਲਾਚਾਰਗੁਣਯੁਤ੍ਤਸ੍ਸ ਅਮ੍ਹਾਕਂ ਰਞ੍ਞੋ ਮਗ੍ਗਂ ਦੇਹਿ, ਅਮ੍ਹਾਕਂ ਰਾਜਾ ਮਗ੍ਗਸ੍ਸ ਅਨੁਚ੍ਛਵਿਕੋਤਿ.

ਏਵਂ ਵੁਤ੍ਤੇ ਬਲ੍ਲਿਕਰਾਜਾ ਚ ਸਾਰਥਿ ਚ ਉਭੋਪਿ ਰਥਾ ਓਤਰਿਤ੍ਵਾ ਅਸ੍ਸੇ ਮੋਚੇਤ੍ਵਾ ਰਥਂ ਅਪਨੇਤ੍ਵਾ ਬਾਰਾਣਸਿਰਞ੍ਞੋ ਮਗ੍ਗਂ ਅਦਂਸੁ. ਬਾਰਾਣਸਿਰਾਜਾ ਬਲ੍ਲਿਕਰਞ੍ਞੋ ‘‘ਰਞ੍ਞਾ ਨਾਮ ਇਦਞ੍ਚਿਦਞ੍ਚ ਕਾਤੁਂ ਵਟ੍ਟਤੀ’’ਤਿ ਓਵਾਦਂ ਦਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਜੀਵਿਤਪਰਿਯੋਸਾਨੇ ਸਗ੍ਗਪੁਰਂ ਪੂਰੇਸਿ. ਬਲ੍ਲਿਕਰਾਜਾਪਿ ਤਸ੍ਸ ਓਵਾਦਂ ਗਹੇਤ੍ਵਾ ਜਨਪਦਂ ਪਰਿਗ੍ਗਹੇਤ੍ਵਾ ਅਤ੍ਤਨੋ ਅਗੁਣਵਾਦਿਂ ਅਦਿਸ੍ਵਾਵ ਸਕਨਗਰਂ ਗਨ੍ਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਜੀਵਿਤਪਰਿਯੋਸਾਨੇ ਸਗ੍ਗਪੁਰਮੇਵ ਪੂਰੇਸਿ.

ਸਤ੍ਥਾ ਕੋਸਲਰਾਜਸ੍ਸ ਓਵਾਦਤ੍ਥਾਯ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਬਲ੍ਲਿਕਰਞ੍ਞੋ ਸਾਰਥਿ ਮੋਗ੍ਗਲ੍ਲਾਨੋ ਅਹੋਸਿ, ਬਲ੍ਲਿਕਰਾਜਾ ਆਨਨ੍ਦੋ, ਬਾਰਾਣਸਿਰਞ੍ਞੋ ਸਾਰਥਿ ਸਾਰਿਪੁਤ੍ਤੋ, ਬਾਰਾਣਸਿਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਰਾਜੋਵਾਦਜਾਤਕਵਣ੍ਣਨਾ ਪਠਮਾ.

[੧੫੨] ੨. ਸਿਙ੍ਗਾਲਜਾਤਕਵਣ੍ਣਨਾ

ਅਸਮੇਕ੍ਖਿਤਕਮ੍ਮਨ੍ਤਨ੍ਤਿ ਇਦਂ ਸਤ੍ਥਾ ਕੂਟਾਗਾਰਸਾਲਾਯਂ ਵਿਹਰਨ੍ਤੋ ਵੇਸਾਲਿਵਾਸਿਕਂ ਏਕਂ ਨ੍ਹਾਪਿਤਪੁਤ੍ਤਂ ਆਰਬ੍ਭ ਕਥੇਸਿ. ਤਸ੍ਸ ਕਿਰ ਪਿਤਾ ਰਾਜੂਨਂ ਰਾਜੋਰੋਧਾਨਂ ਰਾਜਕੁਮਾਰਾਨਂ ਰਾਜਕੁਮਾਰਿਕਾਨਞ੍ਚ ਮਸ੍ਸੁਕਰਣਕੇਸਸਣ੍ਠਪਨਅਟ੍ਠਪਦਟ੍ਠਪਨਾਦੀਨਿ ਸਬ੍ਬਕਿਚ੍ਚਾਨਿ ਕਰੋਤਿ ਸਦ੍ਧੋ ਪਸਨ੍ਨੋ ਤਿਸਰਣਗਤੋ ਸਮਾਦਿਨ੍ਨਪਞ੍ਚਸੀਲੋ, ਅਨ੍ਤਰਨ੍ਤਰੇ ਸਤ੍ਥੁ ਧਮ੍ਮਂ ਸੁਣਨ੍ਤੋ ਕਾਲਂ ਵੀਤਿਨਾਮੇਤਿ. ਸੋ ਏਕਸ੍ਮਿਂ ਦਿਵਸੇ ਰਾਜਨਿਵੇਸਨੇ ਕਮ੍ਮਂ ਕਾਤੁਂ ਗਚ੍ਛਨ੍ਤੋ ਅਤ੍ਤਨੋ ਪੁਤ੍ਤਂ ਗਹੇਤ੍ਵਾ ਗਤੋ. ਸੋ ਤਤ੍ਥ ਏਕਂ ਦੇਵਚ੍ਛਰਾਪਟਿਭਾਗਂ ਅਲਙ੍ਕਤਪਟਿਯਤ੍ਤਂ ਲਿਚ੍ਛਵਿਕੁਮਾਰਿਕਂ ਦਿਸ੍ਵਾ ਕਿਲੇਸਵਸੇਨ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ਪਿਤਰਾ ਸਦ੍ਧਿਂ ਰਾਜਨਿਵੇਸਨਾ ਨਿਕ੍ਖਮਿਤ੍ਵਾ ‘‘ਏਤਂ ਕੁਮਾਰਿਕਂ ਲਭਮਾਨੋ ਜੀਵਿਸ੍ਸਾਮਿ, ਅਲਭਮਾਨਸ੍ਸ ਮੇ ਏਤ੍ਥੇਵ ਮਰਣ’’ਨ੍ਤਿ ਆਹਾਰੁਪਚ੍ਛੇਦਂ ਕਤ੍ਵਾ ਮਞ੍ਚਕਂ ਪਰਿਸ੍ਸਜਿਤ੍ਵਾ ਨਿਪਜ੍ਜਿ.

ਅਥ ਨਂ ਪਿਤਾ ਉਪਸਙ੍ਕਮਿਤ੍ਵਾ ‘‘ਤਾਤ, ਅਵਤ੍ਥੁਮ੍ਹਿ ਛਨ੍ਦਰਾਗਂ ਮਾ ਕਰਿ, ਹੀਨਜਚ੍ਚੋ ਤ੍ਵਂ ਨ੍ਹਾਪਿਤਪੁਤ੍ਤੋ, ਲਿਚ੍ਛਵਿਕੁਮਾਰਿਕਾ ਖਤ੍ਤਿਯਧੀਤਾ ਜਾਤਿਸਮ੍ਪਨ੍ਨਾ, ਨ ਸਾ ਤੁਯ੍ਹਂ ਅਨੁਚ੍ਛਵਿਕਾ, ਅਞ੍ਞਂ ਤੇ ਜਾਤਿਗੋਤ੍ਤੇਹਿ ਸਦਿਸਂ ਕੁਮਾਰਿਕਂ ਆਨੇਸ੍ਸਾਮੀ’’ਤਿ ਆਹ. ਸੋ ਪਿਤੁ ਕਥਂ ਨ ਗਣ੍ਹਿ. ਅਥ ਨਂ ਮਾਤਾ ਭਾਤਾ ਭਗਿਨੀ ਚੂਲ਼ਪਿਤਾ ਚੂਲ਼ਮਾਤਾਤਿ ਸਬ੍ਬੇਪਿ ਞਾਤਕਾ ਚੇਵ ਮਿਤ੍ਤਸੁਹਜ੍ਜਾ ਚ ਸਨ੍ਨਿਪਤਿਤ੍ਵਾ ਸਞ੍ਞਾਪੇਨ੍ਤਾਪਿ ਸਞ੍ਞਾਪੇਤੁਂ ਨਾਸਕ੍ਖਿਂਸੁ. ਸੋ ਤਤ੍ਥੇਵ ਸੁਸ੍ਸਿਤ੍ਵਾ ਪਰਿਸੁਸ੍ਸਿਤ੍ਵਾ ਜੀਵਿਤਕ੍ਖਯਂ ਪਾਪੁਣਿ. ਅਥਸ੍ਸ ਪਿਤਾ ਸਰੀਰਕਿਚ੍ਚਪੇਤਕਿਚ੍ਚਾਨਿ ਕਤ੍ਵਾ ਤਨੁਸੋਕੋ ‘‘ਸਤ੍ਥਾਰਂ ਵਨ੍ਦਿਸ੍ਸਾਮੀ’’ਤਿ ਬਹੁਂ ਗਨ੍ਧਮਾਲਾਵਿਲੇਪਨਂ ਗਹੇਤ੍ਵਾ ਮਹਾਵਨਂ ਗਨ੍ਤ੍ਵਾ ਸਤ੍ਥਾਰਂ ਪੂਜੇਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ‘‘ਕਿਂ ਨੁ ਖੋ, ਉਪਾਸਕ, ਬਹੂਨਿ ਦਿਵਸਾਨਿ ਨ ਦਿਸ੍ਸਸੀ’’ਤਿ ਵੁਤ੍ਤੇ ਤਮਤ੍ਥਂ ਆਰੋਚੇਸਿ. ਸਤ੍ਥਾ ‘‘ਨ ਖੋ, ਉਪਾਸਕ, ਇਦਾਨੇਵ ਤਵ ਪੁਤ੍ਤੋ ਅਵਤ੍ਥੁਸ੍ਮਿਂ ਛਨ੍ਦਰਾਗਂ ਉਪ੍ਪਾਦੇਤ੍ਵਾ ਵਿਨਾਸਂ ਪਾਪੁਣਿ, ਪੁਬ੍ਬੇਪਿ ਪਤ੍ਤੋਯੇਵਾ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਹਿਮਵਨ੍ਤਪਦੇਸੇ ਸੀਹਯੋਨਿਯਂ ਨਿਬ੍ਬਤ੍ਤਿ. ਤਸ੍ਸ ਛ ਕਨਿਟ੍ਠਭਾਤਰੋ ਏਕਾ ਚ ਭਗਿਨੀ ਅਹੋਸਿ, ਸਬ੍ਬੇਪਿ ਕਞ੍ਚਨਗੁਹਾਯਂ ਵਸਨ੍ਤਿ. ਤਸ੍ਸਾ ਪਨ ਗੁਹਾਯ ਅਵਿਦੂਰੇ ਰਜਤਪਬ੍ਬਤੇ ਏਕਾ ਫਲਿਕਗੁਹਾ ਅਤ੍ਥਿ, ਤਤ੍ਥੇਕੋ ਸਿਙ੍ਗਾਲੋ ਵਸਤਿ. ਅਪਰਭਾਗੇ ਸੀਹਾਨਂ ਮਾਤਾਪਿਤਰੋ ਕਾਲਮਕਂਸੁ. ਤੇ ਭਗਿਨਿਂ ਸੀਹਪੋਤਿਕਂ ਕਞ੍ਚਨਗੁਹਾਯਂ ਠਪੇਤ੍ਵਾ ਗੋਚਰਾਯ ਪਕ੍ਕਮਿਤ੍ਵਾ ਮਂਸਂ ਆਹਰਿਤ੍ਵਾ ਤਸ੍ਸਾ ਦੇਨ੍ਤਿ. ਸੋ ਸਿਙ੍ਗਾਲੋ ਤਂ ਸੀਹਪੋਤਿਕਂ ਦਿਸ੍ਵਾ ਪਟਿਬਦ੍ਧਚਿਤ੍ਤੋ ਅਹੋਸਿ. ਤਸ੍ਸਾ ਪਨ ਮਾਤਾਪਿਤੂਨਂ ਧਰਮਾਨਕਾਲੇ ਓਕਾਸਂ ਨਾਲਤ੍ਥ, ਸੋ ਸਤ੍ਤਨ੍ਨਮ੍ਪਿ ਤੇਸਂ ਗੋਚਰਾਯ ਪਕ੍ਕਨ੍ਤਕਾਲੇ ਫਲਿਕਗੁਹਾਯ ਓਤਰਿਤ੍ਵਾ ਕਞ੍ਚਨਗੁਹਾਯ ਦ੍ਵਾਰਂ ਗਨ੍ਤ੍ਵਾ ਸੀਹਪੋਤਿਕਾਯ ਪੁਰਤੋ ਲੋਕਾਮਿਸਪਟਿਸਂਯੁਤ੍ਤਂ ਏਵਰੂਪਂ ਰਹਸ੍ਸਕਥਂ ਕਥੇਸਿ – ‘‘ਸੀਹਪੋਤਿਕੇ, ਅਹਮ੍ਪਿ ਚਤੁਪ੍ਪਦੋ, ਤ੍ਵਮ੍ਪਿ ਚਤੁਪ੍ਪਦਾ, ਤ੍ਵਂ ਮੇ ਪਜਾਪਤੀ ਹੋਹਿ, ਅਹਂ ਤੇ ਪਤਿ ਭਵਿਸ੍ਸਾਮਿ, ਤੇ ਮਯਂ ਸਮਗ੍ਗਾ ਸਮ੍ਮੋਦਮਾਨਾ ਵਸਿਸ੍ਸਾਮ, ਤ੍ਵਂ ਇਤੋ ਪਟ੍ਠਾਯ ਮਂ ਕਿਲੇਸਵਸੇਨ ਸਙ੍ਗਣ੍ਹਾਹੀ’’ਤਿ. ਸਾ ਤਸ੍ਸ ਵਚਨਂ ਸੁਤ੍ਵਾ ਚਿਨ੍ਤੇਸਿ – ‘‘ਅਯਂ ਸਿਙ੍ਗਾਲੋ ਚਤੁਪ੍ਪਦਾਨਂ ਅਨ੍ਤਰੇ ਹੀਨੋ ਪਟਿਕੁਟ੍ਠੋ ਚਣ੍ਡਾਲਸਦਿਸੋ, ਮਯਂ ਉਤ੍ਤਮਰਾਜਕੁਲਸਮ੍ਮਤਾ, ਏਸ ਖੋ ਮਯਾ ਸਦ੍ਧਿਂ ਅਸਬ੍ਭਿਂ ਅਨਨੁਚ੍ਛਵਿਕਂ ਕਥਂ ਕਥੇਤਿ, ਅਹਂ ਏਵਰੂਪਂ ਕਥਂ ਸੁਤ੍ਵਾ ਜੀਵਿਤੇਨ ਕਿਂ ਕਰਿਸ੍ਸਾਮਿ, ਨਾਸਾਵਾਤਂ ਸਨ੍ਨਿਰੁਜ੍ਝਿਤ੍ਵਾ ਮਰਿਸ੍ਸਾਮੀ’’ਤਿ. ਅਥਸ੍ਸਾ ਏਤਦਹੋਸਿ – ‘‘ਮਯ੍ਹਂ ਏਵਮੇਵ ਮਰਣਂ ਅਯੁਤ੍ਤਂ, ਭਾਤਿਕਾ ਤਾਵ ਮੇ ਆਗਚ੍ਛਨ੍ਤੁ, ਤੇਸਂ ਕਥੇਤ੍ਵਾ ਮਰਿਸ੍ਸਾਮੀ’’ਤਿ. ਸਿਙ੍ਗਾਲੋਪਿ ਤਸ੍ਸਾ ਸਨ੍ਤਿਕਾ ਪਟਿਵਚਨਂ ਅਲਭਿਤ੍ਵਾ ‘‘ਇਦਾਨਿ ਏਸਾ ਮਯ੍ਹਂ ਕੁਜ੍ਝਤੀ’’ਤਿ ਦੋਮਨਸ੍ਸਪ੍ਪਤ੍ਤੋ ਫਲਿਕਗੁਹਾਯਂ ਪਵਿਸਿਤ੍ਵਾ ਨਿਪਜ੍ਜਿ.

ਅਥੇਕੋ ਸੀਹਪੋਤਕੋ ਮਹਿਂਸਵਾਰਣਾਦੀਸੁ ਅਞ੍ਞਤਰਂ ਵਧਿਤ੍ਵਾ ਮਂਸਂ ਖਾਦਿਤ੍ਵਾ ਭਗਿਨਿਯਾ ਭਾਗਂ ਆਹਰਿਤ੍ਵਾ ‘‘ਅਮ੍ਮ, ਮਂਸਂ ਖਾਦਸ੍ਸੂ’’ਤਿ ਆਹ. ‘‘ਭਾਤਿਕ, ਨਾਹਂ ਮਂਸਂ ਖਾਦਾਮਿ, ਮਰਿਸ੍ਸਾਮੀ’’ਤਿ. ‘‘ਕਿਂ ਕਾਰਣਾ’’ਤਿ? ਸਾ ਤਂ ਪਵਤ੍ਤਿਂ ਆਚਿਕ੍ਖਿ. ‘‘ਇਦਾਨਿ ਕਹਂ ਸੋ ਸਿਙ੍ਗਾਲੋ’’ਤਿ ਚ ਵੁਤ੍ਤੇ ਫਲਿਕਗੁਹਾਯਂ ਨਿਪਨ੍ਨਂ ਸਿਙ੍ਗਾਲਂ ‘‘ਆਕਾਸੇ ਨਿਪਨ੍ਨੋ’’ਤਿ ਮਞ੍ਞਮਾਨਾ ‘‘ਭਾਤਿਕ, ਕਿਂ ਨ ਪਸ੍ਸਸਿ, ਏਸੋ ਰਜਤਪਬ੍ਬਤੇ ਆਕਾਸੇ ਨਿਪਨ੍ਨੋ’’ਤਿ. ਸੀਹਪੋਤਕੋ ਤਸ੍ਸ ਫਲਿਕਗੁਹਾਯਂ ਨਿਪਨ੍ਨਭਾਵਂ ਅਜਾਨਨ੍ਤੋ ‘‘ਆਕਾਸੇ ਨਿਪਨ੍ਨੋ’’ਤਿ ਸਞ੍ਞੀ ਹੁਤ੍ਵਾ ‘‘ਮਾਰੇਸ੍ਸਾਮਿ ਨ’’ਨ੍ਤਿ ਸੀਹਵੇਗੇਨ ਪਕ੍ਖਨ੍ਦਿਤ੍ਵਾ ਫਲਿਕਗੁਹਂ ਹਦਯੇਨੇਵ ਪਹਰਿ. ਸੋ ਹਦਯੇਨ ਫਲਿਤੇਨ ਤਤ੍ਥੇਵ ਜੀਵਿਤਕ੍ਖਯਂ ਪਤ੍ਵਾ ਪਬ੍ਬਤਪਾਦੇ ਪਤਿ. ਅਥਾਪਰੋ ਆਗਚ੍ਛਿ, ਸਾ ਤਸ੍ਸਪਿ ਤਥੇਵ ਕਥੇਸਿ. ਸੋਪਿ ਤਥੇਵ ਕਤ੍ਵਾ ਜੀਵਿਤਕ੍ਖਯਂ ਪਤ੍ਵਾ ਪਬ੍ਬਤਪਾਦੇ ਪਤਿ.

ਏਵਂ ਛਸੁਪਿ ਭਾਤਿਕੇਸੁ ਮਤੇਸੁ ਸਬ੍ਬਪਚ੍ਛਾ ਬੋਧਿਸਤ੍ਤੋ ਆਗਚ੍ਛਿ. ਸਾ ਤਸ੍ਸਪਿ ਤਂ ਕਾਰਣਂ ਆਰੋਚੇਤ੍ਵਾ ‘‘ਇਦਾਨਿ ਸੋ ਕੁਹਿ’’ਨ੍ਤਿ ਵੁਤ੍ਤੇ ‘‘ਏਸੋ ਰਜਤਪਬ੍ਬਤਮਤ੍ਥਕੇ ਆਕਾਸੇ ਨਿਪਨ੍ਨੋ’’ਤਿ ਆਹ. ਬੋਧਿਸਤ੍ਤੋ ਚਿਨ੍ਤੇਸਿ – ‘‘ਸਿਙ੍ਗਾਲਾਨਂ ਆਕਾਸੇ ਪਤਿਟ੍ਠਾ ਨਾਮ ਨਤ੍ਥਿ, ਫਲਿਕਗੁਹਾਯਂ ਨਿਪਨ੍ਨਕੋ ਭਵਿਸ੍ਸਤੀ’’ਤਿ. ਸੋ ਪਬ੍ਬਤਪਾਦਂ ਓਤਰਿਤ੍ਵਾ ਛ ਭਾਤਿਕੇ ਮਤੇ ਦਿਸ੍ਵਾ ‘‘ਇਮੇ ਅਤ੍ਤਨੋ ਬਾਲਤਾਯ ਪਰਿਗ੍ਗਣ੍ਹਨਪਞ੍ਞਾਯ ਅਭਾਵੇਨ ਫਲਿਕਗੁਹਭਾਵਂ ਅਜਾਨਿਤ੍ਵਾ ਹਦਯੇਨ ਪਹਰਿਤ੍ਵਾ ਮਤਾ ਭਵਿਸ੍ਸਨ੍ਤਿ, ਅਸਮੇਕ੍ਖਿਤ੍ਵਾ ਅਤਿਤੁਰਿਤਂ ਕਰੋਨ੍ਤਾਨਂ ਕਮ੍ਮਂ ਨਾਮ ਏਵਰੂਪਂ ਹੋਤੀ’’ਤਿ ਵਤ੍ਵਾ ਪਠਮਂ ਗਾਥਮਾਹ –

੩. ‘‘ਅਸਮੇਕ੍ਖਿਤਕਮ੍ਮਨ੍ਤਂ, ਤੁਰਿਤਾਭਿਨਿਪਾਤਿਨਂ;

ਸਾਨਿ ਕਮ੍ਮਾਨਿ ਤਪ੍ਪੇਨ੍ਤਿ, ਉਣ੍ਹਂਵਜ੍ਝੋਹਿਤਂ ਮੁਖੇ’’ਤਿ.

ਤਤ੍ਥ ਅਸਮੇਕ੍ਖਿਤਕਮ੍ਮਨ੍ਤਂ, ਤੁਰਿਤਾਭਿਨਿਪਾਤਿਨਨ੍ਤਿ ਯੋ ਪੁਗ੍ਗਲੋ ਯਂ ਕਮ੍ਮਂ ਕਤ੍ਤੁਕਾਮੋ ਹੋਤਿ, ਤਤ੍ਥ ਦੋਸਂ ਅਸਮੇਕ੍ਖਿਤ੍ਵਾ ਅਨੁਪਧਾਰੇਤ੍ਵਾ ਤੁਰਿਤੋ ਹੁਤ੍ਵਾ ਵੇਗੇਨੇਵ ਤਂ ਕਮ੍ਮਂ ਕਾਤੁਂ ਅਭਿਨਿਪਤਤਿ ਪਕ੍ਖਨ੍ਦਤਿ ਪਟਿਪਜ੍ਜਤਿ, ਤਂ ਅਸਮੇਕ੍ਖਿਤਕਮ੍ਮਨ੍ਤਂ ਤੁਰਿਤਾਭਿਨਿਪਾਤਿਨਂ ਏਵਂ ਸਾਨਿ ਕਮ੍ਮਾਨਿ ਤਪ੍ਪੇਨ੍ਤਿ, ਸੋਚੇਨ੍ਤਿ ਕਿਲਮੇਨ੍ਤਿ. ਯਥਾ ਕਿਂ? ਉਣ੍ਹਂਵਜ੍ਝੋਹਿਤਂ ਮੁਖੇਤਿ, ਯਥਾ ਭੁਞ੍ਜਨ੍ਤੇਨ ‘‘ਇਦਂ ਸੀਤਲਂ ਇਦਂ ਉਣ੍ਹ’’ਨ੍ਤਿ ਅਨੁਪਧਾਰੇਤ੍ਵਾ ਉਣ੍ਹਂ ਅਜ੍ਝੋਹਰਣੀਯਂ ਮੁਖੇ ਅਜ੍ਝੋਹਰਿਤਂ ਠਪਿਤਂ ਮੁਖਮ੍ਪਿ ਕਣ੍ਠਮ੍ਪਿ ਕੁਚ੍ਛਿਮ੍ਪਿ ਦਹਤਿ ਸੋਚੇਤਿ ਕਿਲਮੇਤਿ, ਏਵਂ ਤਥਾਰੂਪਂ ਪੁਗ੍ਗਲਂ ਸਾਨਿ ਕਮ੍ਮਾਨਿ ਤਪ੍ਪੇਨ੍ਤਿ.

ਇਤਿ ਸੋ ਸੀਹੋ ਇਮਂ ਗਾਥਂ ਵਤ੍ਵਾ ‘‘ਮਮ ਭਾਤਿਕਾ ਅਨੁਪਾਯਕੁਸਲਤਾਯ ‘ਸਿਙ੍ਗਾਲਂ ਮਾਰੇਸ੍ਸਾਮਾ’ਤਿ ਅਤਿਵੇਗੇਨ ਪਕ੍ਖਨ੍ਦਿਤ੍ਵਾ ਸਯਂ ਮਤਾ, ਅਹਂ ਪਨ ਏਵਰੂਪਂ ਅਕਤ੍ਵਾ ਸਿਙ੍ਗਾਲਸ੍ਸ ਫਲਿਕਗੁਹਾਯਂ ਨਿਪਨ੍ਨਸ੍ਸੇਵ ਹਦਯਂ ਫਾਲੇਸ੍ਸਾਮੀ’’ਤਿ ਸਿਙ੍ਗਾਲਸ੍ਸ ਆਰੋਹਨਓਰੋਹਨਮਗ੍ਗਂ ਸਲ੍ਲਕ੍ਖੇਤ੍ਵਾ ਤਦਭਿਮੁਖੋ ਹੁਤ੍ਵਾ ਤਿਕ੍ਖਤ੍ਤੁਂ ਸੀਹਨਾਦਂ ਨਦਿ, ਪਥਵਿਯਾ ਸਦ੍ਧਿਂ ਆਕਾਸਂ ਏਕਨਿਨ੍ਨਾਦਂ ਅਹੋਸਿ. ਸਿਙ੍ਗਾਲਸ੍ਸ ਫਲਿਕਗੁਹਾਯਂ ਨਿਪਨ੍ਨਸ੍ਸੇਵ ਸੀਤਤਸਿਤਸ੍ਸ ਹਦਯਂ ਫਲਿ, ਸੋ ਤਤ੍ਥੇਵ ਜੀਵਿਤਕ੍ਖਯਂ ਪਾਪੁਣਿ.

ਸਤ੍ਥਾ ‘‘ਏਵਂ ਸੋ ਸਿਙ੍ਗਾਲੋ ਸੀਹਨਾਦਂ ਸੁਤ੍ਵਾ ਜੀਵਿਤਕ੍ਖਯਂ ਪਤ੍ਤੋ’’ਤਿ ਵਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਦੁਤਿਯਂ ਗਾਥਮਾਹ –

੪. ‘‘ਸੀਹੋ ਚ ਸੀਹਨਾਦੇਨ, ਦਦ੍ਦਰਂ ਅਭਿਨਾਦਯਿ;

ਸੁਤ੍ਵਾ ਸੀਹਸ੍ਸ ਨਿਗ੍ਘੋਸਂ, ਸਿਙ੍ਗਾਲੋ ਦਦ੍ਦਰੇ ਵਸਂ;

ਭੀਤੋ ਸਨ੍ਤਾਸਮਾਪਾਦਿ, ਹਦਯਞ੍ਚਸ੍ਸ ਅਪ੍ਫਲੀ’’ਤਿ.

ਤਤ੍ਥ ਸੀਹੋਤਿ ਚਤ੍ਤਾਰੋ ਸੀਹਾ – ਤਿਣਸੀਹੋ, ਪਣ੍ਡੁਸੀਹੋ, ਕਾਲ਼ਸੀਹੋ, ਸੁਰਤ੍ਤਹਤ੍ਥਪਾਦੋ ਕੇਸਰਸੀਹੋਤਿ. ਤੇਸੁ ਕੇਸਰਸੀਹੋ ਇਧ ਅਧਿਪ੍ਪੇਤੋ. ਦਦ੍ਦਰਂ ਅਭਿਨਾਦਯੀਤਿ ਤੇਨ ਅਸਨਿਪਾਤਸਦ੍ਦਸਦਿਸੇਨ ਭੇਰਵਤਰੇਨ ਸੀਹਨਾਦੇਨ ਤਂ ਰਜਤਪਬ੍ਬਤਂ ਅਭਿਨਾਦਯਿ ਏਕਨਿਨ੍ਨਾਦਂ ਅਕਾਸਿ. ਦਦ੍ਦਰੇ ਵਸਨ੍ਤਿ ਫਲਿਕਮਿਸ੍ਸਕੇ ਰਜਤਪਬ੍ਬਤੇ ਵਸਨ੍ਤੋ. ਭੀਤੋ ਸਨ੍ਤਾਸਮਾਪਾਦੀਤਿ ਮਰਣਭਯੇਨ ਭੀਤੋ ਚਿਤ੍ਤੁਤ੍ਰਾਸਂ ਆਪਾਦਿ. ਹਦਯਞ੍ਚਸ੍ਸ ਅਪ੍ਫਲੀਤਿ ਤੇਨ ਚਸ੍ਸ ਭਯੇਨ ਹਦਯਂ ਫਲੀਤਿ.

ਏਵਂ ਸੀਹੋ ਸਿਙ੍ਗਾਲਂ ਜੀਵਿਤਕ੍ਖਯਂ ਪਾਪੇਤ੍ਵਾ ਭਾਤਰੋ ਏਕਸ੍ਮਿਂ ਠਾਨੇ ਪਟਿਚ੍ਛਾਦੇਤ੍ਵਾ ਤੇਸਂ ਮਤਭਾਵਂ ਭਗਿਨਿਯਾ ਆਚਿਕ੍ਖਿਤ੍ਵਾ ਤਂ ਸਮਸ੍ਸਾਸੇਤ੍ਵਾ ਯਾਵਜੀਵਂ ਕਞ੍ਚਨਗੁਹਾਯਂ ਵਸਿਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਪਾਸਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ‘‘ਤਦਾ ਸਿਙ੍ਗਾਲੋ ਨ੍ਹਾਪਿਤਪੁਤ੍ਤੋ ਅਹੋਸਿ, ਸੀਹਪੋਤਿਕਾ ਲਿਚ੍ਛਵਿਕੁਮਾਰਿਕਾ, ਛ ਕਨਿਟ੍ਠਭਾਤਰੋ ਅਞ੍ਞਤਰਥੇਰਾ ਅਹੇਸੁਂ, ਜੇਟ੍ਠਭਾਤਿਕਸੀਹੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਿਙ੍ਗਾਲਜਾਤਕਵਣ੍ਣਨਾ ਦੁਤਿਯਾ.

[੧੫੩] ੩. ਸੂਕਰਜਾਤਕਵਣ੍ਣਨਾ

ਚਤੁਪ੍ਪਦੋ ਅਹਂ, ਸਮ੍ਮਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਮਹਲ੍ਲਕਤ੍ਥੇਰਂ ਆਰਬ੍ਭ ਕਥੇਸਿ. ਏਕਸ੍ਮਿਞ੍ਹਿ ਦਿਵਸੇ ਰਤ੍ਤਿਂ ਧਮ੍ਮਸ੍ਸਵਨੇ ਵਤ੍ਤਮਾਨੇ ਸਤ੍ਥਰਿ ਗਨ੍ਧਕੁਟਿਦ੍ਵਾਰੇ ਰਮਣੀਯੇ ਸੋਪਾਨਫਲਕੇ ਠਤ੍ਵਾ ਭਿਕ੍ਖੁਸਙ੍ਘਸ੍ਸ ਸੁਗਤੋਵਾਦਂ ਦਤ੍ਵਾ ਗਨ੍ਧਕੁਟਿਂ ਪਵਿਟ੍ਠੇ ਧਮ੍ਮਸੇਨਾਪਤਿ ਸਤ੍ਥਾਰਂ ਵਨ੍ਦਿਤ੍ਵਾ ਅਤ੍ਤਨੋ ਪਰਿਵੇਣਂ ਅਗਮਾਸਿ. ਮਹਾਮੋਗ੍ਗਲ੍ਲਾਨੋਪਿ ਪਰਿਵੇਣਮੇਵ ਗਨ੍ਤ੍ਵਾ ਮੁਹੁਤ੍ਤਂ ਵਿਸ੍ਸਮਿਤ੍ਵਾ ਥੇਰਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ਪਞ੍ਹਂ ਪੁਚ੍ਛਿ, ਪੁਚ੍ਛਿਤਪੁਚ੍ਛਿਤਂ ਧਮ੍ਮਸੇਨਾਪਤਿ ਗਗਨਤਲੇ ਪੁਣ੍ਣਚਨ੍ਦਂ ਉਟ੍ਠਾਪੇਨ੍ਤੋ ਵਿਯ ਵਿਸ੍ਸਜ੍ਜੇਤ੍ਵਾ ਪਾਕਟਮਕਾਸਿ. ਚਤਸ੍ਸੋਪਿ ਪਰਿਸਾ ਧਮ੍ਮਂ ਸੁਣਮਾਨਾ ਨਿਸੀਦਿਂਸੁ. ਤਤ੍ਥੇਕੋ ਮਹਲ੍ਲਕਤ੍ਥੇਰੋ ਚਿਨ੍ਤੇਸਿ – ‘‘ਸਚਾਹਂ ਇਮਿਸ੍ਸਾ ਪਰਿਸਾਯ ਮਜ੍ਝੇ ਸਾਰਿਪੁਤ੍ਤਂ ਆਲੁਲ਼ੇਨ੍ਤੋ ਪਞ੍ਹਂ ਪੁਚ੍ਛਿਸ੍ਸਾਮਿ, ਅਯਂ ਮੇ ਪਰਿਸਾ ‘ਬਹੁਸ੍ਸੁਤੋ ਅਯ’ਨ੍ਤਿ ਞਤ੍ਵਾ ਸਕ੍ਕਾਰਸਮ੍ਮਾਨਂ ਕਰਿਸ੍ਸਤੀ’’ਤਿ ਪਰਿਸਨ੍ਤਰਾ ਉਟ੍ਠਾਯ ਥੇਰਂ ਉਪਸਙ੍ਕਮਿਤ੍ਵਾ ਏਕਮਨ੍ਤਂ ਠਤ੍ਵਾ ‘‘ਆਵੁਸੋ ਸਾਰਿਪੁਤ੍ਤ, ਮਯਮ੍ਪਿ ਤਂ ਏਕਂ ਪਞ੍ਹਂ ਪੁਚ੍ਛਾਮ, ਅਮ੍ਹਾਕਮ੍ਪਿ ਓਕਾਸਂ ਕਰੋਹਿ, ਦੇਹਿ ਮੇ ਵਿਨਿਚ੍ਛਯਂ ਆਵੇਧਿਕਾਯ ਵਾ ਨਿਵੇਧਿਕਾਯ ਵਾ ਨਿਗ੍ਗਹੇ ਵਾ ਪਗ੍ਗਹੇ ਵਾ ਵਿਸੇਸੇ ਵਾ ਪਟਿਵਿਸੇਸੇ ਵਾ’’ਤਿ ਆਹ. ਥੇਰੋ ਤਂ ਓਲੋਕੇਤ੍ਵਾ ‘‘ਅਯਂ ਮਹਲ੍ਲਕੋ ਇਚ੍ਛਾਚਾਰੇ ਠਿਤੋ ਤੁਚ੍ਛੋ ਨ ਕਿਞ੍ਚਿ ਜਾਨਾਤੀ’’ਤਿ ਤੇਨ ਸਦ੍ਧਿਂ ਅਕਥੇਤ੍ਵਾਵ ਲਜ੍ਜਮਾਨੋ ਬੀਜਨਿਂ ਠਪੇਤ੍ਵਾ ਆਸਨਾ ਓਤਰਿਤ੍ਵਾ ਪਰਿਵੇਣਂ ਪਾਵਿਸਿ, ਮੋਗ੍ਗਲ੍ਲਾਨਤ੍ਥੇਰੋਪਿ ਅਤ੍ਤਨੋ ਪਰਿਵੇਣਮੇਵ ਅਗਮਾਸਿ.

ਮਨੁਸ੍ਸਾ ਉਟ੍ਠਾਯ ‘‘ਗਣ੍ਹਥੇਤਂ ਤੁਚ੍ਛਮਹਲ੍ਲਕਂ, ਮਧੁਰਧਮ੍ਮਸ੍ਸਵਨਂ ਨੋ ਸੋਤੁਂ ਨ ਅਦਾਸੀ’’ਤਿ ਅਨੁਬਨ੍ਧਿਂਸੁ. ਸੋ ਪਲਾਯਨ੍ਤੋ ਵਿਹਾਰਪਚ੍ਚਨ੍ਤੇ ਭਿਨ੍ਨਪਦਰਾਯ ਵਚ੍ਚਕੁਟਿਯਾ ਪਤਿਤ੍ਵਾ ਗੂਥਮਕ੍ਖਿਤੋ ਅਟ੍ਠਾਸਿ. ਮਨੁਸ੍ਸਾ ਤਂ ਦਿਸ੍ਵਾ ਵਿਪ੍ਪਟਿਸਾਰਿਨੋ ਹੁਤ੍ਵਾ ਸਤ੍ਥੁ ਸਨ੍ਤਿਕਂ ਅਗਮਂਸੁ. ਸਤ੍ਥਾ ਤੇ ਦਿਸ੍ਵਾ ‘‘ਕਿਂ ਉਪਾਸਕਾ ਅਵੇਲਾਯ ਆਗਤਤ੍ਥਾ’’ਤਿ ਪੁਚ੍ਛਿ, ਮਨੁਸ੍ਸਾ ਤਮਤ੍ਥਂ ਆਰੋਚੇਸੁਂ. ਸਤ੍ਥਾ ‘‘ਨ ਖੋ ਉਪਾਸਕਾ ਇਦਾਨੇਵੇਸ ਮਹਲ੍ਲਕੋ ਉਪ੍ਪਿਲਾਵਿਤੋ ਹੁਤ੍ਵਾ ਅਤ੍ਤਨੋ ਬਲਂ ਅਜਾਨਿਤ੍ਵਾ ਮਹਾਬਲੇਹਿ ਸਦ੍ਧਿਂ ਪਯੋਜੇਤ੍ਵਾ ਗੂਥਮਕ੍ਖਿਤੋ ਜਾਤੋ, ਪੁਬ੍ਬੇਪੇਸ ਉਪ੍ਪਿਲਾਵਿਤੋ ਹੁਤ੍ਵਾ ਅਤ੍ਤਨੋ ਬਲਂ ਅਜਾਨਿਤ੍ਵਾ ਮਹਾਬਲੇਹਿ ਸਦ੍ਧਿਂ ਪਯੋਜੇਤ੍ਵਾ ਗੂਥਮਕ੍ਖਿਤੋ ਅਹੋਸੀ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਸੀਹੋ ਹੁਤ੍ਵਾ ਹਿਮਵਨ੍ਤਪਦੇਸੇ ਪਬ੍ਬਤਗੁਹਾਯ ਵਾਸਂ ਕਪ੍ਪੇਸਿ. ਤਸ੍ਸਾ ਅਵਿਦੂਰੇ ਏਕਂ ਸਰਂ ਨਿਸ੍ਸਾਯ ਬਹੂ ਸੂਕਰਾ ਨਿਵਾਸਂ ਕਪ੍ਪੇਸੁਂ. ਤਮੇਵ ਸਰਂ ਨਿਸ੍ਸਾਯ ਤਾਪਸਾਪਿ ਪਣ੍ਣਸਾਲਾਸੁ ਵਾਸਂ ਕਪ੍ਪੇਸੁਂ. ਅਥੇਕਦਿਵਸਂ ਸੀਹੋ ਮਹਿਂਸਵਾਰਣਾਦੀਸੁ ਅਞ੍ਞਤਰਂ ਵਧਿਤ੍ਵਾ ਯਾਵਦਤ੍ਥਂ ਮਂਸਂ ਖਾਦਿਤ੍ਵਾ ਤਂ ਸਰਂ ਓਤਰਿਤ੍ਵਾ ਪਾਨੀਯਂ ਪਿਵਿਤ੍ਵਾ ਉਤ੍ਤਰਿ. ਤਸ੍ਮਿਂ ਖਣੇ ਏਕੋ ਥੂਲਸੂਕਰੋ ਤਂ ਸਰਂ ਨਿਸ੍ਸਾਯ ਗੋਚਰਂ ਗਣ੍ਹਾਤਿ. ਸੀਹੋ ਤਂ ਦਿਸ੍ਵਾ ‘‘ਅਞ੍ਞਂ ਏਕਦਿਵਸਂ ਇਮਂ ਖਾਦਿਸ੍ਸਾਮਿ, ਮਂ ਖੋ ਪਨ ਦਿਸ੍ਵਾ ਪੁਨ ਨ ਆਗਚ੍ਛੇਯ੍ਯਾ’’ਤਿ ਤਸ੍ਸ ਅਨਾਗਮਨਭਯੇਨ ਸਰਤੋ ਉਤ੍ਤਰਿਤ੍ਵਾ ਏਕੇਨ ਪਸ੍ਸੇਨ ਗਨ੍ਤੁਂ ਆਰਭਿ. ਸੂਕਰੋ ਓਲੋਕੇਤ੍ਵਾ ‘‘ਏਸ ਮਂ ਦਿਸ੍ਵਾ ਮਮ ਭਯੇਨ ਉਪਗਨ੍ਤੁਂ ਅਸਕ੍ਕੋਨ੍ਤੋ ਭਯੇਨ ਪਲਾਯਤਿ, ਅਜ੍ਜ ਮਯਾ ਇਮਿਨਾ ਸੀਹੇਨ ਸਦ੍ਧਿਂ ਪਯੋਜੇਤੁਂ ਵਟ੍ਟਤੀ’’ਤਿ ਸੀਸਂ ਉਕ੍ਖਿਪਿਤ੍ਵਾ ਤਂ ਯੁਦ੍ਧਤ੍ਥਾਯ ਅਵ੍ਹਯਨ੍ਤੋ ਪਠਮਂ ਗਾਥਮਾਹ –

੫. ‘‘ਚਤੁਪ੍ਪਦੋ ਅਹਂ ਸਮ੍ਮ, ਤ੍ਵਮ੍ਪਿ ਸਮ੍ਮ ਚਤੁਪ੍ਪਦੋ;

ਏਹਿ ਸਮ੍ਮ ਨਿਵਤ੍ਤਸ੍ਸੁ, ਕਿਂ ਨੁ ਭੀਤੋ ਪਲਾਯਸੀ’’ਤਿ.

ਸੀਹੋ ਤਸ੍ਸ ਕਥਂ ਸੁਤ੍ਵਾ ‘‘ਸਮ੍ਮ ਸੂਕਰ, ਅਜ੍ਜ ਅਮ੍ਹਾਕਂ ਤਯਾ ਸਦ੍ਧਿਂ ਸਙ੍ਗਾਮੋ ਨਤ੍ਥਿ, ਇਤੋ ਪਨ ਸਤ੍ਤਮੇ ਦਿਵਸੇ ਇਮਸ੍ਮਿਂਯੇਵ ਠਾਨੇ ਸਙ੍ਗਾਮੋ ਹੋਤੂ’’ਤਿ ਵਤ੍ਵਾ ਪਕ੍ਕਾਮਿ. ਸੂਕਰੋ ‘‘ਸੀਹੇਨ ਸਦ੍ਧਿਂ ਸਙ੍ਗਾਮੇਸ੍ਸਾਮੀ’’ਤਿ ਹਟ੍ਠਪਹਟ੍ਠੋ ਤਂ ਪਵਤ੍ਤਿਂ ਞਾਤਕਾਨਂ ਆਰੋਚੇਸਿ. ਤੇ ਤਸ੍ਸ ਕਥਂ ਸੁਤ੍ਵਾ ਭੀਤਤਸਿਤਾ ‘‘ਇਦਾਨਿ ਤ੍ਵਂ ਸਬ੍ਬੇਪਿ ਅਮ੍ਹੇ ਨਾਸੇਸ੍ਸਸਿ, ਅਤ੍ਤਨੋ ਬਲਂ ਅਜਾਨਿਤ੍ਵਾ ਸੀਹੇਨ ਸਦ੍ਧਿਂ ਸਙ੍ਗਾਮਂ ਕਤ੍ਤੁਕਾਮੋਤਿ, ਸੀਹੋ ਆਗਨ੍ਤ੍ਵਾ ਸਬ੍ਬੇਪਿ ਅਮ੍ਹੇ ਜੀਵਿਤਕ੍ਖਯਂ ਪਾਪੇਸ੍ਸਤਿ, ਸਾਹਸਿਕਕਮ੍ਮਂ ਮਾ ਕਰੀ’’ਤਿ ਆਹਂਸੁ. ਸੋਪਿ ਭੀਤਤਸਿਤੋ ‘‘ਇਦਾਨਿ ਕਿਂ ਕਰੋਮੀ’’ਤਿ ਪੁਚ੍ਛਿ. ਸੂਕਰਾ ‘‘ਸਮ੍ਮ, ਤ੍ਵਂ ਏਤੇਸਂ ਤਾਪਸਾਨਂ ਉਚ੍ਚਾਰਭੂਮਿਂ ਗਨ੍ਤ੍ਵਾ ਪੂਤਿਗੂਥੇ ਸਤ੍ਤ ਦਿਵਸਾਨਿ ਸਰੀਰਂ ਪਰਿਵਟ੍ਟੇਤ੍ਵਾ ਸੁਕ੍ਖਾਪੇਤ੍ਵਾ ਸਤ੍ਤਮੇ ਦਿਵਸੇ ਸਰੀਰਂ ਉਸ੍ਸਾਵਬਿਨ੍ਦੂਹਿ ਤੇਮੇਤ੍ਵਾ ਸੀਹਸ੍ਸ ਆਗਮਨਤੋ ਪੁਰਿਮਤਰਂ ਗਨ੍ਤ੍ਵਾ ਵਾਤਯੋਗਂ ਞਤ੍ਵਾ ਉਪਰਿਵਾਤੇ ਤਿਟ੍ਠ, ਸੁਚਿਜਾਤਿਕੋ ਸੀਹੋ ਤਵ ਸਰੀਰਗਨ੍ਧਂ ਘਾਯਿਤ੍ਵਾ ਤੁਯ੍ਹਂ ਜਯਂ ਦਤ੍ਵਾ ਗਮਿਸ੍ਸਤੀ’’ਤਿ ਆਹਂਸੁ. ਸੋ ਤਥਾ ਕਤ੍ਵਾ ਸਤ੍ਤਮੇ ਦਿਵਸੇ ਤਤ੍ਥ ਅਟ੍ਠਾਸਿ. ਸੀਹੋ ਤਸ੍ਸ ਸਰੀਰਗਨ੍ਧਂ ਘਾਯਿਤ੍ਵਾ ਗੂਥਮਕ੍ਖਿਤਭਾਵਂ ਞਤ੍ਵਾ ‘‘ਸਮ੍ਮ ਸੂਕਰ, ਸੁਨ੍ਦਰੋ ਤੇ ਲੇਸੋ ਚਿਨ੍ਤਿਤੋ, ਸਚੇ ਤ੍ਵਂ ਗੂਥਮਕ੍ਖਿਤੋ ਨਾਭਵਿਸ੍ਸ, ਇਧੇਵ ਤਂ ਜੀਵਿਤਕ੍ਖਯਂ ਅਪਾਪੇਸ੍ਸਂ, ਇਦਾਨਿ ਪਨ ਤੇ ਸਰੀਰਂ ਨੇਵ ਮੁਖੇਨ ਡਂਸਿਤੁਂ, ਨ ਪਾਦੇਨ ਪਹਰਿਤੁਂ ਸਕ੍ਕਾ, ਜਯਂ ਤੇ ਦਮ੍ਮੀ’’ਤਿ ਵਤ੍ਵਾ ਦੁਤਿਯਂ ਗਾਥਮਾਹ –

੬. ‘‘ਅਸੁਚਿ ਪੂਤਿਲੋਮੋਸਿ, ਦੁਗ੍ਗਨ੍ਧੋ ਵਾਸਿ ਸੂਕਰ;

ਸਚੇ ਯੁਜ੍ਜਿਤੁਕਾਮੋਸਿ, ਜਯਂ ਸਮ੍ਮ ਦਦਾਮਿ ਤੇ’’ਤਿ.

ਤਤ੍ਥ ਪੂਤਿਲੋਮੋਤਿ ਮੀਲ਼੍ਹਮਕ੍ਖਿਤਤ੍ਤਾ ਦੁਗ੍ਗਨ੍ਧਲੋਮੋ. ਦੁਗ੍ਗਨ੍ਧੋ ਵਾਸੀਤਿ ਅਨਿਟ੍ਠਜੇਗੁਚ੍ਛਪਟਿਕੂਲਗਨ੍ਧੋ ਹੁਤ੍ਵਾ ਵਾਯਸਿ. ਜਯਂ, ਸਮ੍ਮ, ਦਦਾਮਿ ਤੇਤਿ ‘‘ਤੁਯ੍ਹਂ ਜਯਂ ਦੇਮਿ, ਅਹਂ ਪਰਾਜਿਤੋ, ਗਚ੍ਛ ਤ੍ਵ’’ਨ੍ਤਿ ਵਤ੍ਵਾ ਸੀਹੋ ਤਤੋਵ ਨਿਵਤ੍ਤਿਤ੍ਵਾ ਗੋਚਰਂ ਗਹੇਤ੍ਵਾ ਸਰੇ ਪਾਨੀਯਂ ਪਿਵਿਤ੍ਵਾ ਪਬ੍ਬਤਗੁਹਮੇਵ ਗਤੋ. ਸੂਕਰੋਪਿ ‘‘ਸੀਹੋ ਮੇ ਜਿਤੋ’’ਤਿ ਞਾਤਕਾਨਂ ਆਰੋਚੇਸਿ. ਤੇ ਭੀਤਤਸਿਤਾ ‘‘ਪੁਨ ਏਕਦਿਵਸਂ ਆਗਚ੍ਛਨ੍ਤੋ ਸੀਹੋ ਸਬ੍ਬੇਵ ਅਮ੍ਹੇ ਜੀਵਿਤਕ੍ਖਯਂ ਪਾਪੇਸ੍ਸਤੀ’’ਤਿ ਪਲਾਯਿਤ੍ਵਾ ਅਞ੍ਞਤ੍ਥ ਅਗਮਂਸੁ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸੂਕਰੋ ਮਹਲ੍ਲਕੋ ਅਹੋਸਿ, ਸੀਹੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੂਕਰਜਾਤਕਵਣ੍ਣਨਾ ਤਤਿਯਾ.

[੧੫੪] ੪. ਉਰਗਜਾਤਕਵਣ੍ਣਨਾ

ਇਧੂਰਗਾਨਂ ਪਵਰੋ ਪਵਿਟ੍ਠੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸੇਣਿਭਣ੍ਡਨਂ ਆਰਬ੍ਭ ਕਥੇਸਿ. ਕੋਸਲਰਞ੍ਞੋ ਕਿਰ ਸੇਵਕਾ ਸੇਣਿਪਮੁਖਾ ਦ੍ਵੇ ਮਹਾਮਤ੍ਤਾ ਅਞ੍ਞਮਞ੍ਞਂ ਦਿਟ੍ਠਟ੍ਠਾਨੇ ਕਲਹਂ ਕਰੋਨ੍ਤਿ, ਤੇਸਂ ਵੇਰਿਭਾਵੋ ਸਕਲਨਗਰੇ ਪਾਕਟੋ ਜਾਤੋ. ਤੇ ਨੇਵ ਰਾਜਾ, ਨ ਞਾਤਿਮਿਤ੍ਤਾ ਸਮਗ੍ਗੇ ਕਾਤੁਂ ਸਕ੍ਖਿਂਸੁ. ਅਥੇਕਦਿਵਸਂ ਸਤ੍ਥਾ ਪਚ੍ਚੂਸਸਮਯੇ ਬੋਧਨੇਯ੍ਯਬਨ੍ਧਵੇ ਓਲੋਕੇਨ੍ਤੋ ਤੇਸਂ ਉਭਿਨ੍ਨਮ੍ਪਿ ਸੋਤਾਪਤ੍ਤਿਮਗ੍ਗਸ੍ਸ ਉਪਨਿਸ੍ਸਯਂ ਦਿਸ੍ਵਾ ਪੁਨਦਿਵਸੇ ਏਕਕੋਵ ਸਾਵਤ੍ਥਿਯਂ ਪਿਣ੍ਡਾਯ ਪਵਿਸਿਤ੍ਵਾ ਤੇਸੁ ਏਕਸ੍ਸ ਗੇਹਦ੍ਵਾਰੇ ਅਟ੍ਠਾਸਿ. ਸੋ ਨਿਕ੍ਖਮਿਤ੍ਵਾ ਪਤ੍ਤਂ ਗਹੇਤ੍ਵਾ ਸਤ੍ਥਾਰਂ ਅਨ੍ਤੋਨਿਵੇਸਨਂ ਪਵੇਸੇਤ੍ਵਾ ਆਸਨਂ ਪਞ੍ਞਪੇਤ੍ਵਾ ਨਿਸੀਦਾਪੇਸਿ. ਸਤ੍ਥਾ ਨਿਸੀਦਿਤ੍ਵਾ ਤਸ੍ਸ ਮੇਤ੍ਤਾਭਾਵਨਾਯ ਆਨਿਸਂਸਂ ਕਥੇਤ੍ਵਾ ਕਲ੍ਲਚਿਤ੍ਤਤਂ ਞਤ੍ਵਾ ਸਚ੍ਚਾਨਿ ਪਕਾਸੇਸਿ, ਸੋ ਸਚ੍ਚਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਹਿ.

ਸਤ੍ਥਾ ਤਸ੍ਸ ਸੋਤਾਪਨ੍ਨਭਾਵਂ ਞਤ੍ਵਾ ਤਮੇਵ ਪਤ੍ਤਂ ਗਾਹਾਪੇਤ੍ਵਾ ਉਟ੍ਠਾਯ ਇਤਰਸ੍ਸ ਗੇਹਦ੍ਵਾਰਂ ਅਗਮਾਸਿ. ਸੋਪਿ ਨਿਕ੍ਖਮਿਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ‘‘ਪਵਿਸਥ, ਭਨ੍ਤੇ’’ਤਿ ਘਰਂ ਪਵੇਸੇਤ੍ਵਾ ਨਿਸੀਦਾਪੇਸਿ. ਇਤਰੋਪਿ ਪਤ੍ਤਂ ਗਹੇਤ੍ਵਾ ਸਤ੍ਥਾਰਾ ਸਦ੍ਧਿਂਯੇਵ ਪਾਵਿਸਿ. ਸਤ੍ਥਾ ਤਸ੍ਸ ਏਕਾਦਸ ਮੇਤ੍ਤਾਨਿਸਂਸੇ ਵਣ੍ਣੇਤ੍ਵਾ ਕਲ੍ਲਚਿਤ੍ਤਤਂ ਞਤ੍ਵਾ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਸੋਪਿ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਇਤਿ ਤੇ ਉਭੋਪਿ ਸੋਤਾਪਨ੍ਨਾ ਹੁਤ੍ਵਾ ਅਞ੍ਞਮਞ੍ਞਂ ਅਚ੍ਚਯਂ ਦਸ੍ਸੇਤ੍ਵਾ ਖਮਾਪੇਤ੍ਵਾ ਸਮਗ੍ਗਾ ਸਮ੍ਮੋਦਮਾਨਾ ਏਕਜ੍ਝਾਸਯਾ ਅਹੇਸੁਂ. ਤਂ ਦਿਵਸਞ੍ਞੇਵ ਚ ਭਗਵਤੋ ਸਮ੍ਮੁਖਾਵ ਏਕਤੋ ਭੁਞ੍ਜਿਂਸੁ. ਸਤ੍ਥਾ ਭਤ੍ਤਕਿਚ੍ਚਂ ਨਿਟ੍ਠਾਪੇਤ੍ਵਾ ਵਿਹਾਰਂ ਅਗਮਾਸਿ. ਤੇ ਬਹੂਨਿ ਮਾਲਾਗਨ੍ਧਵਿਲੇਪਨਾਨਿ ਚੇਵ ਸਪ੍ਪਿਮਧੁਫਾਣਿਤਾਦੀਨਿ ਚ ਆਦਾਯ ਸਤ੍ਥਾਰਾ ਸਦ੍ਧਿਂਯੇਵ ਨਿਕ੍ਖਮਿਂਸੁ. ਸਤ੍ਥਾ ਭਿਕ੍ਖੁਸਙ੍ਘੇਨ ਵਤ੍ਤੇ ਦਸ੍ਸਿਤੇ ਸੁਗਤੋਵਾਦਂ ਦਤ੍ਵਾ ਗਨ੍ਧਕੁਟਿਂ ਪਾਵਿਸਿ.

ਭਿਕ੍ਖੂ ਸਾਯਨ੍ਹਸਮਯੇ ਧਮ੍ਮਸਭਾਯਂ ਸਤ੍ਥੁ ਗੁਣਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਸਤ੍ਥਾ ਅਦਨ੍ਤਦਮਕੋ, ਯੇ ਨਾਮ ਦ੍ਵੇ ਮਹਾਮਤ੍ਤੇ ਚਿਰਂ ਵਾਯਮਮਾਨੋਪਿ ਨੇਵ ਰਾਜਾ ਸਮਗ੍ਗੇ ਕਾਤੁਂ ਸਕ੍ਖਿ, ਨ ਞਾਤਿਮਿਤ੍ਤਾਦਯੋ ਸਕ੍ਖਿਂਸੁ, ਤੇ ਏਕਦਿਵਸੇਨੇਵ ਤਥਾਗਤੇਨ ਦਮਿਤਾ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵਾਹਂ ਇਮੇ ਦ੍ਵੇ ਜਨੇ ਸਮਗ੍ਗੇ ਅਕਾਸਿਂ, ਪੁਬ੍ਬੇਪੇਤੇ ਮਯਾ ਸਮਗ੍ਗਾ ਕਤਾਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬਾਰਾਣਸਿਯਂ ਉਸ੍ਸਵੇ ਘੋਸਿਤੇ ਮਹਾਸਮਜ੍ਜਂ ਅਹੋਸਿ. ਬਹੂ ਮਨੁਸ੍ਸਾ ਚੇਵ ਦੇਵਨਾਗਸੁਪਣ੍ਣਾਦਯੋ ਚ ਸਮਜ੍ਜਦਸ੍ਸਨਤ੍ਥਂ ਸਨ੍ਨਿਪਤਿਂਸੁ. ਤਤ੍ਰੇਕਸ੍ਮਿਂ ਠਾਨੇ ਏਕੋ ਨਾਗੋ ਚ ਸੁਪਣ੍ਣੋ ਚ ਸਮਜ੍ਜਂ ਪਸ੍ਸਮਾਨਾ ਏਕਤੋ ਅਟ੍ਠਂਸੁ. ਨਾਗੋ ਸੁਪਣ੍ਣਸ੍ਸ ਸੁਪਣ੍ਣਭਾਵਂ ਅਜਾਨਨ੍ਤੋ ਅਂਸੇ ਹਤ੍ਥਂ ਠਪੇਸਿ. ਸੁਪਣ੍ਣੋ ‘‘ਕੇਨ ਮੇ ਅਂਸੇ ਹਤ੍ਥੋ ਠਪਿਤੋ’’ਤਿ ਨਿਵਤ੍ਤਿਤ੍ਵਾ ਓਲੋਕੇਨ੍ਤੋ ਨਾਗਂ ਸਞ੍ਜਾਨਿ. ਨਾਗੋਪਿ ਓਲੋਕੇਨ੍ਤੋ ਸੁਪਣ੍ਣਂ ਸਞ੍ਜਾਨਿਤ੍ਵਾ ਮਰਣਭਯਤਜ੍ਜਿਤੋ ਨਗਰਾ ਨਿਕ੍ਖਮਿਤ੍ਵਾ ਨਦੀਪਿਟ੍ਠੇਨ ਪਲਾਯਿ. ਸੁਪਣ੍ਣੋਪਿ ‘‘ਤਂ ਗਹੇਸ੍ਸਾਮੀ’’ਤਿ ਅਨੁਬਨ੍ਧਿ. ਤਸ੍ਮਿਂ ਸਮਯੇ ਬੋਧਿਸਤ੍ਤੋ ਤਾਪਸੋ ਹੁਤ੍ਵਾ ਤਸ੍ਸਾ ਨਦਿਯਾ ਤੀਰੇ ਪਣ੍ਣਸਾਲਾਯ ਵਸਮਾਨੋ ਦਿਵਾ ਦਰਥਪਟਿਪ੍ਪਸ੍ਸਮ੍ਭਨਤ੍ਥਂ ਉਦਕਸਾਟਿਕਂ ਨਿਵਾਸੇਤ੍ਵਾ ਵਕ੍ਕਲਂ ਬਹਿ ਠਪੇਤ੍ਵਾ ਨਦਿਂ ਓਤਰਿਤ੍ਵਾ ਨ੍ਹਾਯਤਿ. ਨਾਗੋ ‘‘ਇਮਂ ਪਬ੍ਬਜਿਤਂ ਨਿਸ੍ਸਾਯ ਜੀਵਿਤਂ ਲਭਿਸ੍ਸਾਮੀ’’ਤਿ ਪਕਤਿਵਣ੍ਣਂ ਵਿਜਹਿਤ੍ਵਾ ਮਣਿਕ੍ਖਨ੍ਧਵਣ੍ਣਂ ਮਾਪੇਤ੍ਵਾ ਵਕ੍ਕਲਨ੍ਤਰਂ ਪਾਵਿਸਿ. ਸੁਪਣ੍ਣੋ ਅਨੁਬਨ੍ਧਮਾਨੋ ਤਂ ਤਤ੍ਥ ਪਵਿਟ੍ਠਂ ਦਿਸ੍ਵਾ ਵਕ੍ਕਲੇ ਗਰੁਭਾਵੇਨ ਅਗ੍ਗਹੇਤ੍ਵਾ ਬੋਧਿਸਤ੍ਤਂ ਆਮਨ੍ਤੇਤ੍ਵਾ ‘‘ਭਨ੍ਤੇ, ਅਹਂ ਛਾਤੋ, ਤੁਮ੍ਹਾਕਂ ਵਕ੍ਕਲਂ ਗਣ੍ਹਥ, ਇਮਂ ਨਾਗਂ ਖਾਦਿਸ੍ਸਾਮੀ’’ਤਿ ਇਮਮਤ੍ਥਂ ਪਕਾਸੇਤੁਂ ਪਠਮਂ ਗਾਥਮਾਹ –

੭. ‘‘ਇਧੂਰਗਾਨਂ ਪਵਰੋ ਪਵਿਟ੍ਠੋ, ਸੇਲਸ੍ਸ ਵਣ੍ਣੇਨ ਪਮੋਕ੍ਖਮਿਚ੍ਛਂ;

ਬ੍ਰਹ੍ਮਞ੍ਚ ਵਣ੍ਣਂ ਅਪਚਾਯਮਾਨੋ, ਬੁਭੁਕ੍ਖਿਤੋ ਨੋ ਵਿਤਰਾਮਿ ਭੋਤ੍ਤੁ’’ਨ੍ਤਿ.

ਤਤ੍ਥ ਇਧੂਰਗਾਨਂ ਪਵਰੋ ਪਵਿਟ੍ਠੋਤਿ ਇਮਸ੍ਮਿਂ ਵਕ੍ਕਲੇ ਉਰਗਾਨਂ ਪਵਰੋ ਨਾਗਰਾਜਾ ਪਵਿਟ੍ਠੋ. ਸੇਲਸ੍ਸ ਵਣ੍ਣੇਨਾਤਿ ਮਣਿਵਣ੍ਣੇਨ, ਮਣਿਕ੍ਖਨ੍ਧੋ ਹੁਤ੍ਵਾ ਪਵਿਟ੍ਠੋਤਿ ਅਤ੍ਥੋ. ਪਮੋਕ੍ਖਮਿਚ੍ਛਨ੍ਤਿ ਮਮ ਸਨ੍ਤਿਕਾ ਮੋਕ੍ਖਂ ਇਚ੍ਛਮਾਨੋ. ਬ੍ਰਹ੍ਮਞ੍ਚ ਵਣ੍ਣਂ ਅਪਚਾਯਮਾਨੋਤਿ ਅਹਂ ਪਨ ਤੁਮ੍ਹਾਕਂ ਬ੍ਰਹ੍ਮਵਣ੍ਣਂ ਸੇਟ੍ਠਵਣ੍ਣਂ ਪੂਜੇਨ੍ਤੋ ਗਰੁਂ ਕਰੋਨ੍ਤੋ. ਬੁਭੁਕ੍ਖਿਤੋ ਨੋ ਵਿਤਰਾਮਿ ਭੋਤ੍ਤੁਨ੍ਤਿ ਏਤਂ ਨਾਗਂ ਵਕ੍ਕਲਨ੍ਤਰਂ ਪਵਿਟ੍ਠਂ ਛਾਤੋਪਿ ਸਮਾਨੋ ਭਕ੍ਖਿਤੁਂ ਨ ਸਕ੍ਕੋਮੀਤਿ.

ਬੋਧਿਸਤ੍ਤੋ ਉਦਕੇ ਠਿਤੋਯੇਵ ਸੁਪਣ੍ਣਰਾਜਸ੍ਸ ਥੁਤਿਂ ਕਤ੍ਵਾ ਦੁਤਿਯਂ ਗਾਥਮਾਹ –

੮. ‘‘ਸੋ ਬ੍ਰਹ੍ਮਗੁਤ੍ਤੋ ਚਿਰਮੇਵ ਜੀਵ, ਦਿਬ੍ਯਾ ਚ ਤੇ ਪਾਤੁਭਵਨ੍ਤੁ ਭਕ੍ਖਾ;

ਯੋ ਬ੍ਰਹ੍ਮਵਣ੍ਣਂ ਅਪਚਾਯਮਾਨੋ, ਬੁਭੁਕ੍ਖਿਤੋ ਨੋ ਵਿਤਰਾਸਿ ਭੋਤ੍ਤੁ’’ਨ੍ਤਿ.

ਤਤ੍ਥ ਸੋ ਬ੍ਰਹ੍ਮਗੁਤ੍ਤੋਤਿ ਸੋ ਤ੍ਵਂ ਬ੍ਰਹ੍ਮਗੋਪਿਤੋ ਬ੍ਰਹ੍ਮਰਕ੍ਖਿਤੋ ਹੁਤ੍ਵਾ. ਦਿਬ੍ਯਾ ਚ ਤੇ ਪਾਤੁਭਵਨ੍ਤੁ ਭਕ੍ਖਾਤਿ ਦੇਵਤਾਨਂ ਪਰਿਭੋਗਾਰਹਾ ਭਕ੍ਖਾ ਚ ਤਵ ਪਾਤੁਭਵਨ੍ਤੁ, ਮਾ ਪਾਣਾਤਿਪਾਤਂ ਕਤ੍ਵਾ ਨਾਗਮਂਸਖਾਦਕੋ ਅਹੋਸਿ.

ਇਤਿ ਬੋਧਿਸਤ੍ਤੋ ਉਦਕੇ ਠਿਤੋਵ ਅਨੁਮੋਦਨਂ ਕਤ੍ਵਾ ਉਤ੍ਤਰਿਤ੍ਵਾ ਵਕ੍ਕਲਂ ਨਿਵਾਸੇਤ੍ਵਾ ਤੇ ਉਭੋਪਿ ਗਹੇਤ੍ਵਾ ਅਸ੍ਸਮਪਦਂ ਗਨ੍ਤ੍ਵਾ ਮੇਤ੍ਤਾਭਾਵਨਾਯ ਵਣ੍ਣਂ ਕਥੇਤ੍ਵਾ ਦ੍ਵੇਪਿ ਜਨੇ ਸਮਗ੍ਗੇ ਅਕਾਸਿ. ਤੇ ਤਤੋ ਪਟ੍ਠਾਯ ਸਮਗ੍ਗਾ ਸਮ੍ਮੋਦਮਾਨਾ ਸੁਖਂ ਵਸਿਂਸੁ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਨਾਗੋ ਚ ਸੁਪਣ੍ਣੋ ਚ ਇਮੇ ਦ੍ਵੇ ਮਹਾਮਤ੍ਤਾ ਅਹੇਸੁਂ, ਤਾਪਸੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਉਰਗਜਾਤਕਵਣ੍ਣਨਾ ਚਤੁਤ੍ਥਾ.

[੧੫੫] ੫. ਭਗ੍ਗਜਾਤਕਵਣ੍ਣਨਾ

ਜੀਵ ਵਸ੍ਸਸਤਂ ਭਗ੍ਗਾਤਿ ਇਦਂ ਸਤ੍ਥਾ ਜੇਤਵਨਸਮੀਪੇ ਪਸੇਨਦਿਕੋਸਲੇਨ ਰਞ੍ਞਾ ਕਾਰਿਤੇ ਰਾਜਕਾਰਾਮੇ ਵਿਹਰਨ੍ਤੋ ਅਤ੍ਤਨੋ ਖਿਪਿਤਕਂ ਆਰਬ੍ਭ ਕਥੇਸਿ. ਏਕਸ੍ਮਿਞ੍ਹਿ ਦਿਵਸੇ ਸਤ੍ਥਾ ਰਾਜਕਾਰਾਮੇ ਚਤੁਪਰਿਸਮਜ੍ਝੇ ਨਿਸੀਦਿਤ੍ਵਾ ਧਮ੍ਮਂ ਦੇਸੇਨ੍ਤੋ ਖਿਪਿ. ਭਿਕ੍ਖੂ ‘‘ਜੀਵਤੁ, ਭਨ੍ਤੇ ਭਗਵਾ, ਜੀਵਤੁ, ਸੁਗਤੋ’’ਤਿ ਉਚ੍ਚਾਸਦ੍ਦਂ ਮਹਾਸਦ੍ਦਂ ਅਕਂਸੁ, ਤੇਨ ਸਦ੍ਦੇਨ ਧਮ੍ਮਕਥਾਯ ਅਨ੍ਤਰਾਯੋ ਅਹੋਸਿ. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਪਿ ਨੁ ਖੋ, ਭਿਕ੍ਖਵੇ, ਖਿਪਿਤੇ ‘ਜੀਵਾ’ਤਿ ਵੁਤ੍ਤੋ ਤਪ੍ਪਚ੍ਚਯਾ ਜੀਵੇਯ੍ਯ ਵਾ ਮਰੇਯ੍ਯ ਵਾ’’ਤਿ? ‘‘ਨੋ ਹੇਤਂ ਭਨ੍ਤੇ’’ਤਿ. ‘‘ਨ, ਭਿਕ੍ਖਵੇ, ਖਿਪਿਤੇ ‘ਜੀਵਾ’ਤਿ ਵਤ੍ਤਬ੍ਬੋ, ਯੋ ਵਦੇਯ੍ਯ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੮੮). ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਭਿਕ੍ਖੂਨਂ ਖਿਪਿਤੇ ‘‘ਜੀਵਥ, ਭਨ੍ਤੇ’’ਤਿ ਵਦਨ੍ਤਿ, ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨਾਲਪਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ‘ਜੀਵਥ, ਭਨ੍ਤੇ’ਤਿ ਵੁਚ੍ਚਮਾਨਾ ਨਾਲਪਿਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਗਿਹੀ, ਭਿਕ੍ਖਵੇ, ਮਙ੍ਗਲਿਕਾ, ਅਨੁਜਾਨਾਮਿ, ਭਿਕ੍ਖਵੇ, ਗਿਹੀਨਂ ‘‘ਜੀਵਥ, ਭਨ੍ਤੇ’’ਤਿ ਵੁਚ੍ਚਮਾਨੇਨ ‘‘ਚਿਰਂ ਜੀਵਾ’’ਤਿ ਵਤ੍ਤੁਨ੍ਤਿ. ਭਿਕ੍ਖੂ ਭਗਵਨ੍ਤਂ ਪੁਚ੍ਛਿਂਸੁ – ‘‘ਭਨ੍ਤੇ, ਜੀਵਪਟਿਜੀਵਂ ਨਾਮ ਕਦਾ ਉਪ੍ਪਨ੍ਨ’’ਨ੍ਤਿ? ਸਤ੍ਥਾ ‘‘ਭਿਕ੍ਖਵੇ, ਜੀਵਪਟਿਜੀਵਂ ਨਾਮ ਪੋਰਾਣਕਾਲੇ ਉਪ੍ਪਨ੍ਨ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਕਾਸਿਰਟ੍ਠੇ ਏਕਸ੍ਮਿਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ. ਤਸ੍ਸ ਪਿਤਾ ਵੋਹਾਰਂ ਕਤ੍ਵਾ ਜੀਵਿਕਂ ਕਪ੍ਪੇਤਿ, ਸੋ ਸੋਲ਼ਸਵਸ੍ਸੁਦ੍ਦੇਸਿਕਂ ਬੋਧਿਸਤ੍ਤਂ ਮਣਿਕਭਣ੍ਡਂ ਉਕ੍ਖਿਪਾਪੇਤ੍ਵਾ ਗਾਮਨਿਗਮਾਦੀਸੁ ਚਰਨ੍ਤੋ ਬਾਰਾਣਸਿਂ ਪਤ੍ਵਾ ਦੋਵਾਰਿਕਸ੍ਸ ਘਰੇ ਭਤ੍ਤਂ ਪਚਾਪੇਤ੍ਵਾ ਭੁਞ੍ਜਿਤ੍ਵਾ ਨਿਵਾਸਟ੍ਠਾਨਂ ਅਲਭਨ੍ਤੋ ‘‘ਅਵੇਲਾਯ ਆਗਤਾ ਆਗਨ੍ਤੁਕਾ ਕਤ੍ਥ ਵਸਨ੍ਤੀ’’ਤਿ ਪੁਚ੍ਛਿ. ਅਥ ਨਂ ਮਨੁਸ੍ਸਾ ‘‘ਬਹਿਨਗਰੇ ਏਕਾ ਸਾਲਾ ਅਤ੍ਥਿ, ਸਾ ਪਨ ਅਮਨੁਸ੍ਸਪਰਿਗ੍ਗਹਿਤਾ. ਸਚੇ ਇਚ੍ਛਥ, ਤਤ੍ਥ ਵਸਥਾ’’ਤਿ ਆਹਂਸੁ. ਬੋਧਿਸਤ੍ਤੋ ‘‘ਏਥ, ਤਾਤ, ਗਚ੍ਛਾਮ, ਮਾ ਯਕ੍ਖਸ੍ਸ ਭਾਯਿਤ੍ਥ, ਅਹਂ ਤਂ ਦਮੇਤ੍ਵਾ ਤੁਮ੍ਹਾਕਂ ਪਾਦੇਸੁ ਪਾਤੇਸ੍ਸਾਮੀ’’ਤਿ ਪਿਤਰਂ ਗਹੇਤ੍ਵਾ ਤਤ੍ਥ ਗਤੋ. ਅਥਸ੍ਸ ਪਿਤਾ ਫਲਕੇ ਨਿਪਜ੍ਜਿ, ਸਯਂ ਪਿਤੁ ਪਾਦੇ ਸਮ੍ਬਾਹਨ੍ਤੋ ਨਿਸੀਦਿ. ਤਤ੍ਥ ਅਧਿਵਤ੍ਥੋ ਯਕ੍ਖੋ ਦ੍ਵਾਦਸ ਵਸ੍ਸਾਨਿ ਵੇਸ੍ਸਵਣਂ ਉਪਟ੍ਠਹਿਤ੍ਵਾ ਤਂ ਸਾਲਂ ਲਭਨ੍ਤੋ ‘‘ਇਮਂ ਸਾਲਂ ਪਵਿਟ੍ਠਮਨੁਸ੍ਸੇਸੁ ਯੋ ਖਿਪਿਤੇ ‘ਜੀਵਾ’ਤਿ ਵਦਤਿ, ਯੋ ਚ ‘ਜੀਵਾ’ਤਿ ਵੁਤ੍ਤੇ ‘ਪਟਿਜੀਵਾ’ਤਿ ਵਦਤਿ, ਤੇ ਜੀਵਪਟਿਜੀਵਭਾਣਿਨੋ ਠਪੇਤ੍ਵਾ ਅਵਸੇਸੇ ਖਾਦੇਯ੍ਯਾਸੀ’’ਤਿ ਲਭਿ. ਸੋ ਪਿਟ੍ਠਿਵਂਸਥੂਣਾਯ ਵਸਤਿ. ਸੋ ‘‘ਬੋਧਿਸਤ੍ਤਸ੍ਸ ਪਿਤਰਂ ਖਿਪਾਪੇਸ੍ਸਾਮੀ’’ਤਿ ਅਤ੍ਤਨੋ ਆਨੁਭਾਵੇਨ ਸੁਖੁਮਚੁਣ੍ਣਂ ਵਿਸ੍ਸਜ੍ਜੇਸਿ, ਚੁਣ੍ਣੋ ਆਗਨ੍ਤ੍ਵਾ ਤਸ੍ਸ ਨਾਸਪੁਟੇ ਪਾਵਿਸਿ. ਸੋ ਫਲਕੇ ਨਿਪਨ੍ਨਕੋਵ ਖਿਪਿ, ਬੋਧਿਸਤ੍ਤੋ ਨ ‘‘ਜੀਵਾ’’ਤਿ ਆਹ. ਯਕ੍ਖੋ ਤਂ ਖਾਦਿਤੁਂ ਥੂਣਾਯ ਓਤਰਤਿ. ਬੋਧਿਸਤ੍ਤੋ ਤਂ ਓਤਰਨ੍ਤਂ ਦਿਸ੍ਵਾ ‘‘ਇਮਿਨਾ ਮੇ ਪਿਤਾ ਖਿਪਾਪਿਤੋ ਭਵਿਸ੍ਸਤਿ, ਅਯਂ ਸੋ ਖਿਪਿਤੇ ‘ਜੀਵਾ’ਤਿ ਅਵਦਨ੍ਤਂ ਖਾਦਕਯਕ੍ਖੋ ਭਵਿਸ੍ਸਤੀ’’ਤਿ ਪਿਤਰਂ ਆਰਬ੍ਭ ਪਠਮਂ ਗਾਥਮਾਹ –

੯. ‘‘ਜੀਵ ਵਸ੍ਸਸਤਂ ਭਗ੍ਗ, ਅਪਰਾਨਿ ਚ ਵੀਸਤਿਂ;

ਮਾ ਮਂ ਪਿਸਾਚਾ ਖਾਦਨ੍ਤੁ, ਜੀਵ ਤ੍ਵਂ ਸਰਦੋਸਤ’’ਨ੍ਤਿ.

ਤਤ੍ਥ ਭਗ੍ਗਾਤਿ ਪਿਤਰਂ ਨਾਮੇਨਾਲਪਤਿ. ਅਪਰਾਨਿ ਚ ਵੀਸਤਿਨ੍ਤਿ ਅਪਰਾਨਿ ਚ ਵੀਸਤਿ ਵਸ੍ਸਾਨਿ ਜੀਵ. ਮਾ ਮਂ ਪਿਸਾਚਾ ਖਾਦਨ੍ਤੂਤਿ ਮਂ ਪਿਸਾਚਾ ਮਾ ਖਾਦਨ੍ਤੁ. ਜੀਵ ਤ੍ਵਂ ਸਰਦੋਸਤਨ੍ਤਿ ਤ੍ਵਂ ਪਨ ਵੀਸੁਤ੍ਤਰਂ ਵਸ੍ਸਸਤਂ ਜੀਵਾਤਿ. ਸਰਦੋਸਤਞ੍ਹਿ ਗਣਿਯਮਾਨਂ ਵਸ੍ਸਸਤਮੇਵ ਹੋਤਿ, ਤਂ ਪੁਰਿਮੇਹਿ ਵੀਸਾਯ ਸਦ੍ਧਿਂ ਵੀਸੁਤ੍ਤਰਂ ਇਧ ਅਧਿਪ੍ਪੇਤਂ.

ਯਕ੍ਖੋ ਬੋਧਿਸਤ੍ਤਸ੍ਸ ਵਚਨਂ ਸੁਤ੍ਵਾ ‘‘ਇਮਂ ਤਾਵ ਮਾਣਵਂ ‘ਜੀਵਾ’ਤਿ ਵੁਤ੍ਤਤ੍ਤਾ ਖਾਦਿਤੁਂ ਨ ਸਕ੍ਕਾ, ਪਿਤਰਂ ਪਨਸ੍ਸ ਖਾਦਿਸ੍ਸਾਮੀ’’ਤਿ ਪਿਤੁ ਸਨ੍ਤਿਕਂ ਅਗਮਾਸਿ. ਸੋ ਤਂ ਆਗਚ੍ਛਨ੍ਤਂ ਦਿਸ੍ਵਾ ਚਿਨ੍ਤੇਸਿ – ‘‘ਅਯਂ ਸੋ ‘ਪਟਿਜੀਵਾ’ਤਿ ਅਭਣਨ੍ਤਾਨਂ ਖਾਦਕਯਕ੍ਖੋ ਭਵਿਸ੍ਸਤਿ, ਪਟਿਜੀਵਂ ਕਰਿਸ੍ਸਾਮੀ’’ਤਿ. ਸੋ ਪੁਤ੍ਤਂ ਆਰਬ੍ਭ ਦੁਤਿਯਂ ਗਾਥਮਾਹ –

੧੦. ‘‘ਤ੍ਵਮ੍ਪਿ ਵਸ੍ਸਸਤਂ ਜੀਵਂ, ਅਪਰਾਨਿ ਚ ਵੀਸਤਿਂ;

ਵਿਸਂ ਪਿਸਾਚਾ ਖਾਦਨ੍ਤੁ, ਜੀਵ ਤ੍ਵਂ ਸਰਦੋਸਤ’’ਨ੍ਤਿ.

ਤਤ੍ਥ ਵਿਸਂ ਪਿਸਾਚਾ ਖਾਦਨ੍ਤੂਤਿ ਪਿਸਾਚਾ ਹਲਾਹਲਵਿਸਂ ਖਾਦਨ੍ਤੁ.

ਯਕ੍ਖੋ ਤਸ੍ਸ ਵਚਨਂ ਸੁਤ੍ਵਾ ‘‘ਉਭੋਪਿ ਮੇ ਨ ਸਕ੍ਕਾ ਖਾਦਿਤੁ’’ਨ੍ਤਿ ਪਟਿਨਿਵਤ੍ਤਿ. ਅਥ ਨਂ ਬੋਧਿਸਤ੍ਤੋ ਪੁਚ੍ਛਿ – ‘‘ਭੋ ਯਕ੍ਖ, ਕਸ੍ਮਾ ਤ੍ਵਂ ਇਮਂ ਸਾਲਂ ਪਵਿਟ੍ਠਮਨੁਸ੍ਸੇ ਖਾਦਸੀ’’ਤਿ? ‘‘ਦ੍ਵਾਦਸ ਵਸ੍ਸਾਨਿ ਵੇਸ੍ਸਵਣਂ ਉਪਟ੍ਠਹਿਤ੍ਵਾ ਲਦ੍ਧਤ੍ਤਾ’’ਤਿ. ‘‘ਕਿਂ ਪਨ ਸਬ੍ਬੇਵ ਖਾਦਿਤੁਂ ਲਭਸੀ’’ਤਿ? ‘‘ਜੀਵਪਟਿਜੀਵਭਾਣਿਨੋ ਠਪੇਤ੍ਵਾ ਅਵਸੇਸੇ ਖਾਦਾਮੀ’’ਤਿ. ‘‘ਯਕ੍ਖ, ਤ੍ਵਂ ਪੁਬ੍ਬੇਪਿ ਅਕੁਸਲਂ ਕਤ੍ਵਾ ਕਕ੍ਖਲ਼ੋ ਫਰੁਸੋ ਪਰਵਿਹਿਂਸਕੋ ਹੁਤ੍ਵਾ ਨਿਬ੍ਬਤ੍ਤੋ, ਇਦਾਨਿਪਿ ਤਾਦਿਸਂ ਕਮ੍ਮਂ ਕਤ੍ਵਾ ਤਮੋ ਤਮਪਰਾਯਣੋ ਭਵਿਸ੍ਸਤਿ, ਤਸ੍ਮਾ ਇਤੋ ਪਟ੍ਠਾਯ ਪਾਣਾਤਿਪਾਤਾਦੀਹਿ ਵਿਰਮਸ੍ਸੂ’’ਤਿ ਤਂ ਯਕ੍ਖਂ ਦਮੇਤ੍ਵਾ ਨਿਰਯਭਯੇਨ ਤਜ੍ਜੇਤ੍ਵਾ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ਯਕ੍ਖਂ ਪੇਸਨਕਾਰਕਂ ਵਿਯ ਅਕਾਸਿ.

ਪੁਨਦਿਵਸੇ ਸਞ੍ਚਰਨ੍ਤਾ ਮਨੁਸ੍ਸਾ ਯਕ੍ਖਂ ਦਿਸ੍ਵਾ ਬੋਧਿਸਤ੍ਤੇਨ ਚਸ੍ਸ ਦਮਿਤਭਾਵਂ ਞਤ੍ਵਾ ਰਞ੍ਞੋ ਆਰੋਚੇਸੁਂ – ‘‘ਦੇਵ, ਏਕੋ ਮਾਣਵੋ ਤਂ ਯਕ੍ਖਂ ਦਮੇਤ੍ਵਾ ਪੇਸਨਕਾਰਕਂ ਵਿਯ ਕਤ੍ਵਾ ਠਿਤੋ’’ਤਿ. ਰਾਜਾ ਬੋਧਿਸਤ੍ਤਂ ਪਕ੍ਕੋਸਾਪੇਤ੍ਵਾ ਸੇਨਾਪਤਿਟ੍ਠਾਨੇ ਠਪੇਸਿ, ਪਿਤੁ ਚਸ੍ਸ ਮਹਨ੍ਤਂ ਯਸਂ ਅਦਾਸਿ. ਸੋ ਯਕ੍ਖਂ ਬਲਿਪਟਿਗ੍ਗਾਹਕਂ ਕਤ੍ਵਾ ਬੋਧਿਸਤ੍ਤਸ੍ਸ ਓਵਾਦੇ ਠਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਸਗ੍ਗਪੁਰਂ ਪੂਰੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਜੀਵਪਟਿਜੀਵਂ ਨਾਮ ਤਸ੍ਮਿਂ ਕਾਲੇ ਉਪ੍ਪਨ੍ਨ’’ਨ੍ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਯਕ੍ਖੋ ਅਙ੍ਗੁਲਿਮਾਲੋ ਅਹੋਸਿ, ਰਾਜਾ ਆਨਨ੍ਦੋ, ਪਿਤਾ ਕਸ੍ਸਪੋ, ਪੁਤ੍ਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਭਗ੍ਗਜਾਤਕਵਣ੍ਣਨਾ ਪਞ੍ਚਮਾ.

[੧੫੬] ੬. ਅਲੀਨਚਿਤ੍ਤਜਾਤਕਵਣ੍ਣਨਾ

ਅਲੀਨਚਿਤ੍ਤਂ ਨਿਸ੍ਸਾਯਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਓਸ੍ਸਟ੍ਠਵੀਰਿਯਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਵਤ੍ਥੁ ਏਕਾਦਸਨਿਪਾਤੇ ਸਂਵਰਜਾਤਕੇ (ਜਾ. ੧.੧੧.੯੭ ਆਦਯੋ) ਆਵਿਭਵਿਸ੍ਸਤਿ. ਸੋ ਪਨ ਭਿਕ੍ਖੁ ਸਤ੍ਥਾਰਾ ‘‘ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਵੀਰਿਯਂ ਓਸ੍ਸਜੀ’’ਤਿ ਵੁਤ੍ਤੇ ‘‘ਸਚ੍ਚਂ, ਭਗਵਾ’’ਤਿ ਆਹ. ਅਥ ਨਂ ਸਤ੍ਥਾ ‘‘ਨਨੁ ਤ੍ਵਂ, ਭਿਕ੍ਖੁ, ਪੁਬ੍ਬੇ ਵੀਰਿਯਂ ਅਵਿਸ੍ਸਜ੍ਜੇਤ੍ਵਾ ਮਂਸਪੇਸਿਸਦਿਸਸ੍ਸ ਦਹਰਕੁਮਾਰਸ੍ਸ ਦ੍ਵਾਦਸਯੋਜਨਿਕੇ ਬਾਰਾਣਸਿਨਗਰੇ ਰਜ੍ਜਂ ਗਹੇਤ੍ਵਾ ਅਦਾਸਿ, ਇਦਾਨਿ ਕਸ੍ਮਾ ਏਵਰੂਪੇ ਸਾਸਨੇ ਪਬ੍ਬਜਿਤ੍ਵਾ ਵੀਰਿਯਂ ਓਸ੍ਸਜਸੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬਾਰਾਣਸਿਤੋ ਅਵਿਦੂਰੇ ਵਡ੍ਢਕੀਗਾਮੋ ਅਹੋਸਿ, ਤਤ੍ਥ ਪਞ੍ਚਸਤਾ ਵਡ੍ਢਕੀ ਵਸਨ੍ਤਿ. ਤੇ ਨਾਵਾਯ ਉਪਰਿਸੋਤਂ ਗਨ੍ਤ੍ਵਾ ਅਰਞ੍ਞੇ ਗੇਹਸਮ੍ਭਾਰਦਾਰੂਨਿ ਕੋਟ੍ਟੇਤ੍ਵਾ ਤਤ੍ਥੇਵ ਏਕਭੂਮਿਕਦ੍ਵਿਭੂਮਿਕਾਦਿਭੇਦੇ ਗੇਹਸਮ੍ਭਾਰੇ ਸਜ੍ਜੇਤ੍ਵਾ ਥਮ੍ਭਤੋ ਪਟ੍ਠਾਯ ਸਬ੍ਬਦਾਰੂਸੁ ਸਞ੍ਞਂ ਕਤ੍ਵਾ ਨਦੀਤੀਰਂ ਨੇਤ੍ਵਾ ਨਾਵਂ ਆਰੋਪੇਤ੍ਵਾ ਅਨੁਸੋਤੇਨ ਨਗਰਂ ਆਗਨ੍ਤ੍ਵਾ ਯੇ ਯਾਦਿਸਾਨਿ ਗੇਹਾਨਿ ਆਕਙ੍ਖਨ੍ਤਿ, ਤੇਸਂ ਤਾਦਿਸਾਨਿ ਕਤ੍ਵਾ ਕਹਾਪਣੇ ਗਹੇਤ੍ਵਾ ਪੁਨ ਤਤ੍ਥੇਵ ਗਨ੍ਤ੍ਵਾ ਗੇਹਸਮ੍ਭਾਰੇ ਆਹਰਨ੍ਤਿ. ਏਵਂ ਤੇਸਂ ਜੀਵਿਕਂ ਕਪ੍ਪੇਨ੍ਤਾਨਂ ਏਕਸ੍ਮਿਂ ਕਾਲੇ ਖਨ੍ਧਾਵਾਰਂ ਬਨ੍ਧਿਤ੍ਵਾ ਦਾਰੂਨਿ ਕੋਟ੍ਟੇਨ੍ਤਾਨਂ ਅਵਿਦੂਰੇ ਏਕੋ ਹਤ੍ਥੀ ਖਦਿਰਖਾਣੁਕਂ ਅਕ੍ਕਮਿ. ਤਸ੍ਸ ਸੋ ਖਾਣੁਕੋ ਪਾਦਂ ਵਿਜ੍ਝਿ, ਬਲਵਵੇਦਨਾ ਵਤ੍ਤਨ੍ਤਿ, ਪਾਦੋ ਉਦ੍ਧੁਮਾਯਿਤ੍ਵਾ ਪੁਬ੍ਬਂ ਗਣ੍ਹਿ. ਸੋ ਵੇਦਨਾਪ੍ਪਤ੍ਤੋ ਤੇਸਂ ਦਾਰੁਕੋਟ੍ਟਨਸਦ੍ਦਂ ਸੁਤ੍ਵਾ ‘‘ਇਮੇ ਵਡ੍ਢਕੀ ਨਿਸ੍ਸਾਯ ਮਯ੍ਹਂ ਸੋਤ੍ਥਿ ਭਵਿਸ੍ਸਤੀ’’ਤਿ ਮਞ੍ਞਮਾਨੋ ਤੀਹਿ ਪਾਦੇਹਿ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ਅਵਿਦੂਰੇ ਨਿਪਜ੍ਜਿ, ਵਡ੍ਢਕੀ ਤਂ ਉਦ੍ਧੁਮਾਤਪਾਦਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਪਾਦੇ ਖਾਣੁਕਂ ਦਿਸ੍ਵਾ ਤਿਖਿਣਵਾਸਿਯਾ ਖਾਣੁਕਸ੍ਸ ਸਮਨ੍ਤਤੋ ਓਧਿਂ ਦਤ੍ਵਾ ਰਜ੍ਜੁਯਾ ਬਨ੍ਧਿਤ੍ਵਾ ਆਕਡ੍ਢਨ੍ਤਾ ਖਾਣੁਂ ਨੀਹਰਿਤ੍ਵਾ ਪੁਬ੍ਬਂ ਮੋਚੇਤ੍ਵਾ ਉਣ੍ਹੋਦਕੇਨ ਧੋਵਿਤ੍ਵਾ ਤਦਨੁਰੂਪੇਹਿ ਭੇਸਜ੍ਜੇਹਿ ਮਕ੍ਖੇਤ੍ਵਾ ਨਚਿਰਸ੍ਸੇਵ ਵਣਂ ਫਾਸੁਕਂ ਕਰਿਂਸੁ.

ਹਤ੍ਥੀ ਅਰੋਗੋ ਹੁਤ੍ਵਾ ਚਿਨ੍ਤੇਸਿ – ‘‘ਮਯਾ ਇਮੇ ਵਡ੍ਢਕੀ ਨਿਸ੍ਸਾਯ ਜੀਵਿਤਂ ਲਦ੍ਧਂ, ਇਦਾਨਿ ਤੇਸਂ ਮਯਾ ਉਪਕਾਰਂ ਕਾਤੁਂ ਵਟ੍ਟਤੀ’’ਤਿ. ਸੋ ਤਤੋ ਪਟ੍ਠਾਯ ਵਡ੍ਢਕੀਹਿ ਸਦ੍ਧਿਂ ਰੁਕ੍ਖੇ ਨੀਹਰਤਿ, ਤਚ੍ਛੇਨ੍ਤਾਨਂ ਪਰਿਵਤ੍ਤੇਤ੍ਵਾ ਦੇਤਿ, ਵਾਸਿਆਦੀਨਿ ਉਪਸਂਹਰਤਿ, ਸੋਣ੍ਡਾਯ ਵੇਠੇਤ੍ਵਾ ਕਾਲ਼ਸੁਤ੍ਤਕੋਟਿਯਂ ਗਣ੍ਹਾਤਿ. ਵਡ੍ਢਕੀਪਿਸ੍ਸ ਭੋਜਨਵੇਲਾਯ ਏਕੇਕਂ ਪਿਣ੍ਡਂ ਦੇਨ੍ਤਾ ਪਞ੍ਚ ਪਿਣ੍ਡਸਤਾਨਿ ਦੇਨ੍ਤਿ. ਤਸ੍ਸ ਪਨ ਹਤ੍ਥਿਸ੍ਸ ਪੁਤ੍ਤੋ ਸਬ੍ਬਸੇਤੋ ਹਤ੍ਥਾਜਾਨੀਯਪੋਤਕੋ ਅਤ੍ਥਿ, ਤੇਨਸ੍ਸ ਏਤਦਹੋਸਿ – ‘‘ਅਹਂ ਏਤਰਹਿ ਮਹਲ੍ਲਕੋ. ਇਦਾਨਿ ਮਯਾ ਇਮੇਸਂ ਵਡ੍ਢਕੀਨਂ ਕਮ੍ਮਕਰਣਤ੍ਤਾਯ ਪੁਤ੍ਤਂ ਦਤ੍ਵਾ ਗਨ੍ਤੁਂ ਵਟ੍ਟਤੀ’’ਤਿ. ਸੋ ਵਡ੍ਢਕੀਨਂ ਅਨਾਚਿਕ੍ਖਿਤ੍ਵਾਵ ਅਰਞ੍ਞਂ ਪਵਿਸਿਤ੍ਵਾ ਪੁਤ੍ਤਂ ਆਨੇਤ੍ਵਾ ‘‘ਅਯਂ ਹਤ੍ਥਿਪੋਤਕੋ ਮਮ ਪੁਤ੍ਤੋ, ਤੁਮ੍ਹੇਹਿ ਮਯ੍ਹਂ ਜੀਵਿਤਂ ਦਿਨ੍ਨਂ, ਅਹਂ ਵੋ ਵੇਜ੍ਜਵੇਤਨਤ੍ਥਾਯ ਇਮਂ ਦਮ੍ਮਿ, ਅਯਂ ਤੁਮ੍ਹਾਕਂ ਇਤੋ ਪਟ੍ਠਾਯ ਕਮ੍ਮਾਨਿ ਕਰਿਸ੍ਸਤੀ’’ਤਿ ਵਤ੍ਵਾ ‘‘ਇਤੋ ਪਟ੍ਠਾਯ, ਪੁਤ੍ਤਕ, ਯਂ ਮਯਾ ਕਤ੍ਤਬ੍ਬਂ ਕਮ੍ਮਂ, ਤਂ ਤ੍ਵਂ ਕਰੋਹੀ’’ਤਿ ਪੁਤ੍ਤਂ ਓਵਦਿਤ੍ਵਾ ਵਡ੍ਢਕੀਨਂ ਦਤ੍ਵਾ ਸਯਂ ਅਰਞ੍ਞਂ ਪਾਵਿਸਿ.

ਤਤੋ ਪਟ੍ਠਾਯ ਹਤ੍ਥਿਪੋਤਕੋ ਵਡ੍ਢਕੀਨਂ ਵਚਨਕਰੋ ਓਵਾਦਕ੍ਖਮੋ ਹੁਤ੍ਵਾ ਸਬ੍ਬਕਿਚ੍ਚਾਨਿ ਕਰੋਤਿ. ਤੇਪਿ ਤਂ ਪਞ੍ਚਹਿ ਪਿਣ੍ਡਸਤੇਹਿ ਪੋਸੇਨ੍ਤਿ, ਸੋ ਕਮ੍ਮਂ ਕਤ੍ਵਾ ਨਦਿਂ ਓਤਰਿਤ੍ਵਾ ਨ੍ਹਤ੍ਵਾ ਕੀਲ਼ਿਤ੍ਵਾ ਆਗਚ੍ਛਤਿ, ਵਡ੍ਢਕੀਦਾਰਕਾਪਿ ਤਂ ਸੋਣ੍ਡਾਦੀਸੁ ਗਹੇਤ੍ਵਾ ਉਦਕੇਪਿ ਥਲੇਪਿ ਤੇਨ ਸਦ੍ਧਿਂ ਕੀਲ਼ਨ੍ਤਿ. ਆਜਾਨੀਯਾ ਪਨ ਹਤ੍ਥਿਨੋਪਿ ਅਸ੍ਸਾਪਿ ਪੁਰਿਸਾਪਿ ਉਦਕੇ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਨ ਕਰੋਨ੍ਤਿ, ਤਸ੍ਮਾ ਸੋਪਿ ਉਦਕੇ ਉਚ੍ਚਾਰਪਸ੍ਸਾਵਂ ਅਕਤ੍ਵਾ ਬਹਿਨਦੀਤੀਰੇਯੇਵ ਕਰੋਤਿ. ਅਥੇਕਸ੍ਮਿਂ ਦਿਵਸੇ ਉਪਰਿਨਦਿਯਾ ਦੇਵੋ ਵਸ੍ਸਿ, ਅਥ ਸੁਕ੍ਖਂ ਹਤ੍ਥਿਲਣ੍ਡਂ ਉਦਕੇਨ ਨਦਿਂ ਓਤਰਿਤ੍ਵਾ ਗਚ੍ਛਨ੍ਤਂ ਬਾਰਾਣਸੀਨਗਰਤਿਤ੍ਥੇ ਏਕਸ੍ਮਿਂ ਗੁਮ੍ਬੇ ਲਗ੍ਗੇਤ੍ਵਾ ਅਟ੍ਠਾਸਿ. ਅਥ ਰਞ੍ਞੋ ਹਤ੍ਥਿਗੋਪਕਾ ‘‘ਹਤ੍ਥੀ ਨ੍ਹਾਪੇਸ੍ਸਾਮਾ’’ਤਿ ਪਞ੍ਚ ਹਤ੍ਥਿਸਤਾਨਿ ਨਯਿਂਸੁ. ਆਜਾਨੀਯਲਣ੍ਡਸ੍ਸ ਗਨ੍ਧਂ ਘਾਯਿਤ੍ਵਾ ਏਕੋਪਿ ਹਤ੍ਥੀ ਨਦਿਂ ਓਤਰਿਤੁਂ ਨ ਉਸ੍ਸਹਿ. ਸਬ੍ਬੇਪਿ ਨਙ੍ਗੁਟ੍ਠਂ ਉਕ੍ਖਿਪਿਤ੍ਵਾ ਪਲਾਯਿਤੁਂ ਆਰਭਿਂਸੁ, ਹਤ੍ਥਿਗੋਪਕਾ ਹਤ੍ਥਾਚਰਿਯਾਨਂ ਆਰੋਚੇਸੁਂ. ਤੇ ‘‘ਉਦਕੇ ਪਰਿਪਨ੍ਥੇਨ ਭਵਿਤਬ੍ਬ’’ਨ੍ਤਿ ਉਦਕਂ ਸੋਧਾਪੇਤ੍ਵਾ ਤਸ੍ਮਿਂ ਗੁਮ੍ਬੇ ਤਂ ਆਜਾਨੀਯਲਣ੍ਡਂ ਦਿਸ੍ਵਾ ‘‘ਇਦਮੇਤ੍ਥ ਕਾਰਣ’’ਨ੍ਤਿ ਞਤ੍ਵਾ ਚਾਟਿਂ ਆਹਰਾਪੇਤ੍ਵਾ ਉਦਕਸ੍ਸ ਪੂਰੇਤ੍ਵਾ ਤਂ ਤਤ੍ਥ ਮਦ੍ਦਿਤ੍ਵਾ ਹਤ੍ਥੀਨਂ ਸਰੀਰੇ ਸਿਞ੍ਚਾਪੇਸੁਂ, ਸਰੀਰਾਨਿ ਸੁਗਨ੍ਧਾਨਿ ਅਹੇਸੁਂ. ਤਸ੍ਮਿਂ ਕਾਲੇ ਤੇ ਨਦਿਂ ਓਤਰਿਤ੍ਵਾ ਨ੍ਹਾਯਿਂਸੁ.

ਹਤ੍ਥਾਚਰਿਯਾ ਰਞ੍ਞੋ ਤਂ ਪਵਤ੍ਤਿਂ ਆਰੋਚੇਤ੍ਵਾ ‘‘ਤਂ ਹਤ੍ਥਾਜਾਨੀਯਂ ਪਰਿਯੇਸਿਤ੍ਵਾ ਆਨੇਤੁਂ ਵਟ੍ਟਤਿ, ਦੇਵਾ’’ਤਿ ਆਹਂਸੁ. ਰਾਜਾ ਨਾਵਾਸਙ੍ਘਾਟੇਹਿ ਨਦਿਂ ਪਕ੍ਖਨ੍ਦਿਤ੍ਵਾ ਉਦ੍ਧਂਗਾਮੀਹਿ ਨਾਵਾਸਙ੍ਘਾਟੇਹਿ ਵਡ੍ਢਕੀਨਂ ਵਸਨਟ੍ਠਾਨਂ ਸਮ੍ਪਾਪੁਣਿ. ਹਤ੍ਥਿਪੋਤਕੋ ਨਦਿਯਂ ਕੀਲ਼ਨ੍ਤੋ ਭੇਰਿਸਦ੍ਦਂ ਸੁਤ੍ਵਾ ਗਨ੍ਤ੍ਵਾ ਵਡ੍ਢਕੀਨਂ ਸਨ੍ਤਿਕੇ ਅਟ੍ਠਾਸਿ. ਵਡ੍ਢਕੀ ਰਞ੍ਞੋ ਪਚ੍ਚੁਗ੍ਗਮਨਂ ਕਤ੍ਵਾ ‘‘ਦੇਵ, ਸਚੇ ਦਾਰੂਹਿ ਅਤ੍ਥੋ, ਕਿਂ ਕਾਰਣਾ ਆਗਤਤ੍ਥ, ਕਿਂ ਪੇਸੇਤ੍ਵਾ ਆਹਰਾਪੇਤੁਂ ਨ ਵਟ੍ਟਤੀ’’ਤਿ ਆਹਂਸੁ. ‘‘ਨਾਹਂ, ਭਣੇ, ਦਾਰੂਨਂ ਅਤ੍ਥਾਯ ਆਗਤੋ, ਇਮਸ੍ਸ ਪਨ ਹਤ੍ਥਿਸ੍ਸ ਅਤ੍ਥਾਯ ਆਗਤੋਮ੍ਹੀ’’ਤਿ. ‘‘ਗਾਹਾਪੇਤ੍ਵਾ ਗਚ੍ਛਥ, ਦੇਵਾ’’ਤਿ. ਹਤ੍ਥਿਪੋਤਕੋ ਗਨ੍ਤੁਂ ਨ ਇਚ੍ਛਿ. ‘‘ਕਿਂ ਕਾਰਾਪੇਤਿ, ਭਣੇ, ਹਤ੍ਥੀ’’ਤਿ? ‘‘ਵਡ੍ਢਕੀਨਂ ਪੋਸਾਵਨਿਕਂ ਆਹਰਾਪੇਤਿ, ਦੇਵਾ’’ਤਿ. ‘‘ਸਾਧੁ, ਭਣੇ’’ਤਿ ਰਾਜਾ ਹਤ੍ਥਿਸ੍ਸ ਚਤੁਨ੍ਨਂ ਪਾਦਾਨਂ ਸੋਣ੍ਡਾਯ ਨਙ੍ਗੁਟ੍ਠਸ੍ਸ ਚ ਸਨ੍ਤਿਕੇ ਸਤਸਹਸ੍ਸਸਤਸਹਸ੍ਸਕਹਾਪਣੇ ਠਪਾਪੇਸਿ. ਹਤ੍ਥੀ ਏਤ੍ਤਕੇਨਾਪਿ ਅਗਨ੍ਤ੍ਵਾ ਸਬ੍ਬਵਡ੍ਢਕੀਨਂ ਦੁਸ੍ਸਯੁਗੇਸੁ ਵਡ੍ਢਕੀਭਰਿਯਾਨਂ ਨਿਵਾਸਨਸਾਟਕੇਸੁ ਦਿਨ੍ਨੇਸੁ ਸਦ੍ਧਿਂਕੀਲ਼ਿਤਾਨਂ ਦਾਰਕਾਨਞ੍ਚ ਦਾਰਕਪਰਿਹਾਰੇ ਕਤੇ ਨਿਵਤ੍ਤਿਤ੍ਵਾ ਵਡ੍ਢਕੀ ਚ ਇਤ੍ਥਿਯੋ ਚ ਦਾਰਕੇ ਚ ਓਲੋਕੇਤ੍ਵਾ ਰਞ੍ਞਾ ਸਦ੍ਧਿਂ ਅਗਮਾਸਿ.

ਰਾਜਾ ਤਂ ਆਦਾਯ ਨਗਰਂ ਗਨ੍ਤ੍ਵਾ ਨਗਰਞ੍ਚ ਹਤ੍ਥਿਸਾਲਞ੍ਚ ਅਲਙ੍ਕਾਰਾਪੇਤ੍ਵਾ ਹਤ੍ਥਿਂ ਨਗਰਂ ਪਦਕ੍ਖਿਣਂ ਕਾਰੇਤ੍ਵਾ ਹਤ੍ਥਿਸਾਲਂ ਪਵੇਸੇਤ੍ਵਾ ਸਬ੍ਬਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਅਭਿਸੇਕਂ ਦਤ੍ਵਾ ਓਪਵਯ੍ਹਂ ਕਤ੍ਵਾ ਅਤ੍ਤਨੋ ਸਹਾਯਟ੍ਠਾਨੇ ਠਪੇਤ੍ਵਾ ਉਪਡ੍ਢਰਜ੍ਜਂ ਹਤ੍ਥਿਸ੍ਸ ਦਤ੍ਵਾ ਅਤ੍ਤਨਾ ਸਮਾਨਪਰਿਹਾਰਂ ਅਕਾਸਿ. ਹਤ੍ਥਿਸ੍ਸ ਆਗਤਕਾਲਤੋ ਪਟ੍ਠਾਯ ਰਞ੍ਞੋ ਸਕਲਜਮ੍ਬੁਦੀਪੇ ਰਜ੍ਜਂ ਹਤ੍ਥਗਤਮੇਵ ਅਹੋਸਿ. ਏਵਂ ਕਾਲੇ ਗਚ੍ਛਨ੍ਤੇ ਬੋਧਿਸਤ੍ਤੋ ਤਸ੍ਸ ਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਤਸ੍ਸਾ ਗਬ੍ਭਪਰਿਪਾਕਕਾਲੇ ਰਾਜਾ ਕਾਲਮਕਾਸਿ. ਹਤ੍ਥੀ ਪਨ ਸਚੇ ਰਞ੍ਞੋ ਕਾਲਕਤਭਾਵਂ ਜਾਨੇਯ੍ਯ, ਤਤ੍ਥੇਵਸ੍ਸ ਹਦਯਂ ਫਲੇਯ੍ਯ, ਤਸ੍ਮਾ ਹਤ੍ਥਿਂ ਰਞ੍ਞੋ ਕਾਲਕਤਭਾਵਂ ਅਜਾਨਾਪੇਤ੍ਵਾਵ ਉਪਟ੍ਠਹਿਂਸੁ. ਰਞ੍ਞੋ ਪਨ ਕਾਲਕਤਭਾਵਂ ਸੁਤ੍ਵਾ ‘‘ਤੁਚ੍ਛਂ ਕਿਰ ਰਜ੍ਜ’’ਨ੍ਤਿ ਅਨਨ੍ਤਰਸਾਮਨ੍ਤਕੋਸਲਰਾਜਾ ਮਹਤਿਯਾ ਸੇਨਾਯ ਆਗਨ੍ਤ੍ਵਾ ਨਗਰਂ ਪਰਿਵਾਰੇਸਿ. ਨਗਰਵਾਸਿਨੋ ਦ੍ਵਾਰਾਨਿ ਪਿਦਹਿਤ੍ਵਾ ਕੋਸਲਰਞ੍ਞੋ ਸਾਸਨਂ ਪਹਿਣਿਂਸੁ – ‘‘ਅਮ੍ਹਾਕਂ ਰਞ੍ਞੋ ਅਗ੍ਗਮਹੇਸੀ ਪਰਿਪੁਣ੍ਣਗਬ੍ਭਾ ‘ਇਤੋ ਕਿਰ ਸਤ੍ਤਮੇ ਦਿਵਸੇ ਪੁਤ੍ਤਂ ਵਿਜਾਯਿਸ੍ਸਤੀ’ਤਿ ਅਙ੍ਗਵਿਜ੍ਜਾਪਾਠਕਾ ਆਹਂਸੁ. ਸਚੇ ਸਾ ਪੁਤ੍ਤਂ ਵਿਜਾਯਿਸ੍ਸਤਿ, ਮਯਂ ਸਤ੍ਤਮੇ ਦਿਵਸੇ ਯੁਦ੍ਧਂ ਦਸ੍ਸਾਮ, ਨ ਰਜ੍ਜਂ, ਏਤ੍ਤਕਂ ਕਾਲਂ ਆਗਮੇਥਾ’’ਤਿ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ.

ਦੇਵੀ ਸਤ੍ਤਮੇ ਦਿਵਸੇ ਪੁਤ੍ਤਂ ਵਿਜਾਯਿ. ਤਸ੍ਸ ਨਾਮਗ੍ਗਹਣਦਿਵਸੇ ਪਨ ਮਹਾਜਨਸ੍ਸ ਅਲੀਨਚਿਤ੍ਤਂ ਪਗ੍ਗਣ੍ਹਨ੍ਤੋ ਜਾਤੋਤਿ ‘‘ਅਲੀਨਚਿਤ੍ਤਕੁਮਾਰੋ’’ਤ੍ਵੇਵਸ੍ਸ ਨਾਮਂ ਅਕਂਸੁ. ਜਾਤਦਿਵਸਤੋਯੇਵ ਪਨਸ੍ਸ ਪਟ੍ਠਾਯ ਨਾਗਰਾ ਕੋਸਲਰਞ੍ਞਾ ਸਦ੍ਧਿਂ ਯੁਜ੍ਝਿਂਸੁ. ਨਿਨ੍ਨਾਯਕਤ੍ਤਾ ਸਙ੍ਗਾਮਸ੍ਸ ਮਹਨ੍ਤਮ੍ਪਿ ਬਲਂ ਯੁਜ੍ਝਮਾਨਂ ਥੋਕਂ ਥੋਕਂ ਓਸਕ੍ਕਤਿ. ਅਮਚ੍ਚਾ ਦੇਵਿਯਾ ਤਮਤ੍ਥਂ ਆਰੋਚੇਤ੍ਵਾ ‘‘ਮਯਂ ਏਵਂ ਓਸਕ੍ਕਮਾਨੇ ਬਲੇ ਪਰਾਜਯਭਾਵਸ੍ਸ ਭਾਯਾਮ, ਅਮ੍ਹਾਕਂ ਪਨ ਰਞ੍ਞੋ ਕਾਲਕਤਭਾਵਂ, ਪੁਤ੍ਤਸ੍ਸ ਜਾਤਭਾਵਂ, ਕੋਸਲਰਞ੍ਞੋ ਆਗਨ੍ਤ੍ਵਾ ਯੁਜ੍ਝਾਨਭਾਵਞ੍ਚ ਰਞ੍ਞੋ ਸਹਾਯਕੋ ਮਙ੍ਗਲਹਤ੍ਥੀ ਨ ਜਾਨਾਤਿ, ਜਾਨਾਪੇਮ ਨ’’ਨ੍ਤਿ ਪੁਚ੍ਛਿਂਸੁ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਪੁਤ੍ਤਂ ਅਲਙ੍ਕਰਿਤ੍ਵਾ ਦੁਕੂਲਚੁਮ੍ਬਟਕੇ ਨਿਪਜ੍ਜਾਪੇਤ੍ਵਾ ਪਾਸਾਦਾ ਓਰੁਯ੍ਹ ਅਮਚ੍ਚਗਣਪਰਿਵੁਤਾ ਹਤ੍ਥਿਸਾਲਂ ਗਨ੍ਤ੍ਵਾ ਬੋਧਿਸਤ੍ਤਂ ਹਤ੍ਥਿਸ੍ਸ ਪਾਦਮੂਲੇ ਨਿਪਜ੍ਜਾਪੇਤ੍ਵਾ ‘‘ਸਾਮਿ, ਸਹਾਯੋ ਤੇ ਕਾਲਕਤੋ, ਮਯਂ ਤੁਯ੍ਹਂ ਹਦਯਫਾਲਨਭਯੇਨ ਨਾਰੋਚਯਿਮ੍ਹ, ਅਯਂ ਤੇ ਸਹਾਯਸ੍ਸ ਪੁਤ੍ਤੋ, ਕੋਸਲਰਾਜਾ ਆਗਨ੍ਤ੍ਵਾ ਨਗਰਂ ਪਰਿਵਾਰੇਤ੍ਵਾ ਤਵ ਪੁਤ੍ਤੇਨ ਸਦ੍ਧਿਂ ਯੁਜ੍ਝਤਿ, ਬਲਂ ਓਸਕ੍ਕਤਿ, ਤਵ ਪੁਤ੍ਤਂ ਤ੍ਵਞ੍ਞੇਵ ਵਾ ਮਾਰੇਹਿ, ਰਜ੍ਜਂ ਵਾਸ੍ਸ ਗਣ੍ਹਿਤ੍ਵਾ ਦੇਹੀ’’ਤਿ ਆਹ.

ਤਸ੍ਮਿਂ ਕਾਲੇ ਹਤ੍ਥੀ ਬੋਧਿਸਤ੍ਤਂ ਸੋਣ੍ਡਾਯ ਪਰਾਮਸਿਤ੍ਵਾ ਉਕ੍ਖਿਪਿਤ੍ਵਾ ਕੁਮ੍ਭੇ ਠਪੇਤ੍ਵਾ ਰੋਦਿਤ੍ਵਾ ਬੋਧਿਸਤ੍ਤਂ ਓਤਾਰੇਤ੍ਵਾ ਦੇਵਿਯਾ ਹਤ੍ਥੇ ਨਿਪਜ੍ਜਾਪੇਤ੍ਵਾ ‘‘ਕੋਸਲਰਾਜਂ ਗਣ੍ਹਿਸ੍ਸਾਮੀ’’ਤਿ ਹਤ੍ਥਿਸਾਲਤੋ ਨਿਕ੍ਖਮਿ. ਅਥਸ੍ਸ ਅਮਚ੍ਚਾ ਵਮ੍ਮਂ ਪਟਿਮੁਞ੍ਚਿਤ੍ਵਾ ਅਲਙ੍ਕਰਿਤ੍ਵਾ ਨਗਰਦ੍ਵਾਰਂ ਅਵਾਪੁਰਿਤ੍ਵਾ ਤਂ ਪਰਿਵਾਰੇਤ੍ਵਾ ਨਿਕ੍ਖਮਿਂਸੁ. ਹਤ੍ਥੀ ਨਗਰਾ ਨਿਕ੍ਖਮਿਤ੍ਵਾ ਕੋਞ੍ਚਨਾਦਂ ਕਤ੍ਵਾ ਮਹਾਜਨਂ ਸਨ੍ਤਾਸੇਤ੍ਵਾ ਪਲਾਪੇਤ੍ਵਾ ਬਲਕੋਟ੍ਠਕਂ ਭਿਨ੍ਦਿਤ੍ਵਾ ਕੋਸਲਰਾਜਾਨਂ ਚੂਲ਼ਾਯ ਗਹੇਤ੍ਵਾ ਆਨੇਤ੍ਵਾ ਬੋਧਿਸਤ੍ਤਸ੍ਸ ਪਾਦਮੂਲੇ ਨਿਪਜ੍ਜਾਪੇਤ੍ਵਾ ਮਾਰਣਤ੍ਥਾਯਸ੍ਸ ਉਟ੍ਠਿਤੇ ਵਾਰੇਤ੍ਵਾ ‘‘ਇਤੋ ਪਟ੍ਠਾਯ ਅਪ੍ਪਮਤ੍ਤੋ ਹੋਹਿ, ‘ਕੁਮਾਰੋ ਦਹਰੋ’ਤਿ ਸਞ੍ਞਂ ਮਾ ਕਰੀ’’ਤਿ ਓਵਦਿਤ੍ਵਾ ਉਯ੍ਯੋਜੇਸਿ. ਤਤੋ ਪਟ੍ਠਾਯ ਸਕਲਜਮ੍ਬੁਦੀਪੇ ਰਜ੍ਜਂ ਬੋਧਿਸਤ੍ਤਸ੍ਸ ਹਤ੍ਥਗਤਮੇਵ ਜਾਤਂ, ਅਞ੍ਞੋ ਪਟਿਸਤ੍ਤੁ ਨਾਮ ਉਟ੍ਠਹਿਤੁਂ ਸਮਤ੍ਥੋ ਨਾਹੋਸਿ. ਬੋਧਿਸਤ੍ਤੋ ਸਤ੍ਤਵਸ੍ਸਿਕਕਾਲੇ ਅਭਿਸੇਕਂ ਕਤ੍ਵਾ ਅਲੀਨਚਿਤ੍ਤਰਾਜਾ ਨਾਮ ਹੁਤ੍ਵਾ ਧਮ੍ਮੇਨ ਰਜ੍ਜਂ ਕਾਰੇਤ੍ਵਾ ਜੀਵਿਤਪਰਿਯੋਸਾਨੇ ਸਗ੍ਗਪੁਰਂ ਪੂਰੇਸਿ.

ਸਤ੍ਥਾ ਇਮਂ ਅਤੀਤਂ ਆਹਰਿਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਇਮਂ ਗਾਥਾਦ੍ਵਯਮਾਹ –

੧੧. ‘‘ਅਲੀਨਚਿਤ੍ਤਂ ਨਿਸ੍ਸਾਯ, ਪਹਟ੍ਠਾ ਮਹਤੀ ਚਮੂ;

ਕੋਸਲਂ ਸੇਨਾਸਨ੍ਤੁਟ੍ਠਂ, ਜੀਵਗ੍ਗਾਹਂ ਅਗਾਹਯਿ.

੧੨. ‘‘ਏਵਂ ਨਿਸ੍ਸਯਸਮ੍ਪਨ੍ਨੋ, ਭਿਕ੍ਖੁ ਆਰਦ੍ਧਵੀਰਿਯੋ;

ਭਾਵਯਂ ਕੁਸਲਂ ਧਮ੍ਮਂ, ਯੋਗਕ੍ਖੇਮਸ੍ਸ ਪਤ੍ਤਿਯਾ;

ਪਾਪੁਣੇ ਅਨੁਪੁਬ੍ਬੇਨ, ਸਬ੍ਬਸਂਯੋਜਨਕ੍ਖਯ’’ਨ੍ਤਿ.

ਤਤ੍ਥ ਅਲੀਨਚਿਤ੍ਤਂ ਨਿਸ੍ਸਾਯਾਤਿ ਅਲੀਨਚਿਤ੍ਤਂ ਰਾਜਕੁਮਾਰਂ ਨਿਸ੍ਸਾਯ. ਪਹਟ੍ਠਾ ਮਹਤੀ ਚਮੂਤਿ ‘‘ਪਵੇਣੀਰਜ੍ਜਂ ਨੋ ਦਿਟ੍ਠ’’ਨ੍ਤਿ ਹਟ੍ਠਤੁਟ੍ਠਾ ਹੁਤ੍ਵਾ ਮਹਤੀ ਸੇਨਾ. ਕੋਸਲਂ ਸੇਨਾਸਨ੍ਤੁਟ੍ਠਨ੍ਤਿ ਕੋਸਲਰਾਜਾਨਂ ਸੇਨ ਰਜ੍ਜੇਨ ਅਸਨ੍ਤੁਟ੍ਠਂ ਪਰਰਜ੍ਜਲੋਭੇਨ ਆਗਤਂ. ਜੀਵਗ੍ਗਾਹਂ ਅਗਾਹਯੀਤਿ ਅਮਾਰੇਤ੍ਵਾਵ ਸਾ ਚਮੂ ਤਂ ਰਾਜਾਨਂ ਹਤ੍ਥਿਨਾ ਜੀਵਗ੍ਗਾਹਂ ਗਣ੍ਹਾਪੇਸਿ. ਏਵਂ ਨਿਸ੍ਸਯਸਮ੍ਪਨ੍ਨੋਤਿ ਯਥਾ ਸਾ ਚਮੂ, ਏਵਂ ਅਞ੍ਞੋਪਿ ਕੁਲਪੁਤ੍ਤੋ ਨਿਸ੍ਸਯਸਮ੍ਪਨ੍ਨੋ ਕਲ੍ਯਾਣਮਿਤ੍ਤਂ ਬੁਦ੍ਧਂ ਵਾ ਬੁਦ੍ਧਸਾਵਕਂ ਵਾ ਨਿਸ੍ਸਯਂ ਲਭਿਤ੍ਵਾ. ਭਿਕ੍ਖੂਤਿ ਪਰਿਸੁਦ੍ਧਾਧਿਵਚਨਮੇਤਂ. ਆਰਦ੍ਧਵੀਰਿਯੋਤਿ ਪਗ੍ਗਹਿਤਵੀਰਿਯੋ ਚਤੁਦੋਸਾਪਗਤੇਨ ਵੀਰਿਯੇਨ ਸਮਨ੍ਨਾਗਤੋ. ਭਾਵਯਂ ਕੁਸਲਂ ਧਮ੍ਮਨ੍ਤਿ ਕੁਸਲਂ ਨਿਰਵਜ੍ਜਂ ਸਤ੍ਤਤਿਂਸਬੋਧਿਪਕ੍ਖਿਯਸਙ੍ਖਾਤਂ ਧਮ੍ਮਂ ਭਾਵੇਨ੍ਤੋ. ਯੋਗਕ੍ਖੇਮਸ੍ਸ ਪਤ੍ਤਿਯਾਤਿ ਚਤੂਹਿ ਯੋਗੇਹਿ ਖੇਮਸ੍ਸ ਨਿਬ੍ਬਾਨਸ੍ਸ ਪਾਪੁਣਨਤ੍ਥਾਯ ਤਂ ਧਮ੍ਮਂ ਭਾਵੇਨ੍ਤੋ. ਪਾਪੁਣੇ ਅਨੁਪੁਬ੍ਬੇਨ, ਸਬ੍ਬਸਂਯੋਜਨਕ੍ਖਯਨ੍ਤਿ ਏਵਂ ਵਿਪਸ੍ਸਨਤੋ ਪਟ੍ਠਾਯ ਇਮਂ ਕੁਸਲਂ ਧਮ੍ਮਂ ਭਾਵੇਨ੍ਤੋ ਸੋ ਕਲ੍ਯਾਣਮਿਤ੍ਤੁਪਨਿਸ੍ਸਯਸਮ੍ਪਨ੍ਨੋ ਭਿਕ੍ਖੁ ਅਨੁਪੁਬ੍ਬੇਨ ਵਿਪਸ੍ਸਨਾਞਾਣਾਨਿ ਚ ਹੇਟ੍ਠਿਮਮਗ੍ਗਫਲਾਨਿ ਚ ਪਾਪੁਣਨ੍ਤੋ ਪਰਿਯੋਸਾਨੇ ਦਸਨ੍ਨਮ੍ਪਿ ਸਂਯੋਜਨਾਨਂ ਖਯਨ੍ਤੇ ਉਪ੍ਪਨ੍ਨਤ੍ਤਾ ਸਬ੍ਬਸਂਯੋਜਨਕ੍ਖਯਸਙ੍ਖਾਤਂ ਅਰਹਤ੍ਤਂ ਪਾਪੁਣਾਤਿ. ਯਸ੍ਮਾ ਵਾ ਨਿਬ੍ਬਾਨਂ ਆਗਮ੍ਮ ਸਬ੍ਬਸਂਯੋਜਨਾਨਿ ਖੀਯਨ੍ਤਿ, ਤਸ੍ਮਾ ਤਮ੍ਪਿ ਸਬ੍ਬਸਂਯੋਜਨਕ੍ਖਯਮੇਵ, ਏਵਂ ਅਨੁਪੁਬ੍ਬੇਨ ਨਿਬ੍ਬਾਨਸਙ੍ਖਾਤਂ ਸਬ੍ਬਸਂਯੋਜਨਕ੍ਖਯਂ ਪਾਪੁਣਾਤੀਤਿ ਅਤ੍ਥੋ.

ਇਤਿ ਭਗਵਾ ਅਮਤਮਹਾਨਿਬ੍ਬਾਨੇਨ ਧਮ੍ਮਦੇਸਨਾਯ ਕੂਟਂ ਗਹੇਤ੍ਵਾ ਉਤ੍ਤਰਿਪਿ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਓਸ੍ਸਟ੍ਠਵੀਰਿਯੋ ਭਿਕ੍ਖੁ ਅਰਹਤ੍ਤੇ ਪਤਿਟ੍ਠਹਿ. ‘‘ਤਦਾ ਮਾਤਾ ਮਹਾਮਾਯਾ, ਪਿਤਾ ਸੁਦ੍ਧੋਦਨਮਹਾਰਾਜਾ ਅਹੋਸਿ, ਰਜ੍ਜਂ ਗਹੇਤ੍ਵਾ ਦਿਨ੍ਨਹਤ੍ਥੀ ਅਯਂ ਓਸ੍ਸਟ੍ਠਵੀਰਿਯੋ ਭਿਕ੍ਖੁ, ਹਤ੍ਥਿਸ੍ਸ ਪਿਤਾ ਸਾਰਿਪੁਤ੍ਤੋ, ਸਾਮਨ੍ਤਕੋਸਲਰਾਜਾ ਮੋਗ੍ਗਲ੍ਲਾਨੋ, ਅਲੀਨਚਿਤ੍ਤਕੁਮਾਰੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਅਲੀਨਚਿਤ੍ਤਜਾਤਕਵਣ੍ਣਨਾ ਛਟ੍ਠਾ.

[੧੫੭] ੭. ਗੁਣਜਾਤਕਵਣ੍ਣਨਾ

ਯੇਨ ਕਾਮਂ ਪਣਾਮੇਤੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਆਨਨ੍ਦਤ੍ਥੇਰਸ੍ਸ ਸਾਟਕਸਹਸ੍ਸਲਾਭਂ ਆਰਬ੍ਭ ਕਥੇਸਿ. ਥੇਰਸ੍ਸ ਕੋਸਲਰਞ੍ਞੋ ਅਨ੍ਤੇਪੁਰੇ ਧਮ੍ਮਵਾਚਨਵਤ੍ਥੁ ਹੇਟ੍ਠਾ ਮਹਾਸਾਰਜਾਤਕੇ (ਜਾ. ੧.੧.੯੨) ਆਗਤਮੇਵ. ਇਤਿ ਥੇਰੇ ਰਞ੍ਞੋ ਅਨ੍ਤੇਪੁਰੇ ਧਮ੍ਮਂ ਵਾਚੇਨ੍ਤੇ ਰਞ੍ਞੋ ਸਹਸ੍ਸਗ੍ਘਨਿਕਾਨਂ ਸਾਟਕਾਨਂ ਸਹਸ੍ਸਂ ਆਹਰਿਯਿਤ੍ਥ. ਰਾਜਾ ਤਤੋ ਪਞ੍ਚ ਸਾਟਕਸਤਾਨਿ ਪਞ੍ਚਨ੍ਨਂ ਦੇਵੀਸਤਾਨਂ ਅਦਾਸਿ. ਤਾ ਸਬ੍ਬਾਪਿ ਤੇ ਸਾਟਕੇ ਠਪੇਤ੍ਵਾ ਪੁਨਦਿਵਸੇ ਆਨਨ੍ਦਤ੍ਥੇਰਸ੍ਸ ਦਤ੍ਵਾ ਸਯਂ ਪੁਰਾਣਸਾਟਕੇਯੇਵ ਪਾਰੁਪਿਤ੍ਵਾ ਰਞ੍ਞੋ ਪਾਤਰਾਸਟ੍ਠਾਨਂ ਅਗਮਂਸੁ.

ਰਾਜਾ ‘‘ਮਯਾ ਤੁਮ੍ਹਾਕਂ ਸਹਸ੍ਸਗ੍ਘਨਿਕਾ ਸਾਟਕਾ ਦਾਪਿਤਾ, ਕਸ੍ਮਾ ਤੁਮ੍ਹੇ ਤੇ ਅਪਾਰੁਪਿਤ੍ਵਾਵ ਆਗਤਾ’’ਤਿ ਪੁਚ੍ਛਿ. ‘‘ਦੇਵ, ਅਮ੍ਹੇਹਿ ਤੇ ਆਨਨ੍ਦਤ੍ਥੇਰਸ੍ਸ ਦਿਨ੍ਨਾ’’ਤਿ. ‘‘ਆਨਨ੍ਦਤ੍ਥੇਰੇਨ ਸਬ੍ਬੇ ਗਹਿਤਾ’’ਤਿ? ‘‘ਆਮ, ਦੇਵਾ’’ਤਿ. ‘‘ਸਮ੍ਮਾਸਮ੍ਬੁਦ੍ਧੇਨ ਤਿਚੀਵਰਂ ਅਨੁਞ੍ਞਾਤਂ, ਆਨਨ੍ਦਤ੍ਥੇਰੋ ਦੁਸ੍ਸਵਣਿਜ੍ਜਂ ਮਞ੍ਞੇ ਕਰਿਸ੍ਸਤਿ, ਅਤਿਬਹੂ ਤੇਨ ਸਾਟਕਾ ਗਹਿਤਾ’’ਤਿ ਥੇਰਸ੍ਸ ਕੁਜ੍ਝਿਤ੍ਵਾ ਭੁਤ੍ਤਪਾਤਰਾਸੋ ਵਿਹਾਰਂ ਗਨ੍ਤ੍ਵਾ ਥੇਰਸ੍ਸ ਪਰਿਵੇਣਂ ਪਵਿਸਿਤ੍ਵਾ ਥੇਰਂ ਵਨ੍ਦਿਤ੍ਵਾ ਨਿਸਿਨ੍ਨੋ ਪੁਚ੍ਛਿ – ‘‘ਅਪਿ, ਭਨ੍ਤੇ, ਅਮ੍ਹਾਕਂ ਘਰੇ ਇਤ੍ਥਿਯੋ ਤੁਮ੍ਹਾਕਂ ਸਨ੍ਤਿਕੇ ਧਮ੍ਮਂ ਉਗ੍ਗਣ੍ਹਨ੍ਤਿ ਵਾ ਸੁਣਨ੍ਤਿ ਵਾ’’ਤਿ? ‘‘ਆਮ, ਮਹਾਰਾਜ, ਗਹੇਤਬ੍ਬਯੁਤ੍ਤਕਂ ਗਣ੍ਹਨ੍ਤਿ, ਸੋਤਬ੍ਬਯੁਤ੍ਤਕਂ ਸੁਣਨ੍ਤੀ’’ਤਿ. ‘‘ਕਿਂ ਤਾ ਸੁਣਨ੍ਤਿਯੇਵ, ਉਦਾਹੁ ਤੁਮ੍ਹਾਕਂ ਨਿਵਾਸਨਂ ਵਾ ਪਾਰੁਪਨਂ ਵਾ ਦਦਨ੍ਤੀ’’ਤਿ? ‘‘ਤਾ ਅਜ੍ਜ, ਮਹਾਰਾਜ, ਸਹਸ੍ਸਗ੍ਘਨਿਕਾਨਿ ਪਞ੍ਚ ਸਾਟਕਸਤਾਨਿ ਅਦਂਸੂ’’ਤਿ. ‘‘ਤੁਮ੍ਹੇਹਿ ਗਹਿਤਾਨਿ ਤਾਨਿ, ਭਨ੍ਤੇ’’ਤਿ? ‘‘ਆਮ, ਮਹਾਰਾਜਾ’’ਤਿ. ‘‘ਨਨੁ, ਭਨ੍ਤੇ, ਸਤ੍ਥਾਰਾ ਤਿਚੀਵਰਮੇਵ ਅਨੁਞ੍ਞਾਤ’’ਨ੍ਤਿ? ‘‘ਆਮ, ਮਹਾਰਾਜ, ਭਗਵਤਾ ਏਕਸ੍ਸ ਭਿਕ੍ਖੁਨੋ ਤਿਚੀਵਰਮੇਵ ਪਰਿਭੋਗਸੀਸੇਨ ਅਨੁਞ੍ਞਾਤਂ, ਪਟਿਗ੍ਗਹਣਂ ਪਨ ਅਵਾਰਿਤਂ, ਤਸ੍ਮਾ ਮਯਾਪਿ ਅਞ੍ਞੇਸਂ ਜਿਣ੍ਣਚੀਵਰਿਕਾਨਂ ਦਾਤੁਂ ਤੇ ਸਾਟਕਾ ਪਟਿਗ੍ਗਹਿਤਾ’’ਤਿ. ‘‘ਤੇ ਪਨ ਭਿਕ੍ਖੂ ਤੁਮ੍ਹਾਕਂ ਸਨ੍ਤਿਕਾ ਸਾਟਕੇ ਲਭਿਤ੍ਵਾ ਪੋਰਾਣਚੀਵਰਾਨਿ ਕਿਂ ਕਰਿਸ੍ਸਨ੍ਤੀ’’ਤਿ? ‘‘ਪੋਰਾਣਸਙ੍ਘਾਟਿਂ ਉਤ੍ਤਰਾਸਙ੍ਗਂ ਕਰਿਸ੍ਸਨ੍ਤੀ’’ਤਿ? ‘‘ਪੋਰਾਣਉਤ੍ਤਰਾਸਙ੍ਗਂ ਕਿਂ ਕਰਿਸ੍ਸਨ੍ਤੀ’’ਤਿ? ‘‘ਅਨ੍ਤਰਵਾਸਕਂ ਕਰਿਸ੍ਸਨ੍ਤੀ’’ਤਿ. ‘‘ਪੋਰਾਣਅਨ੍ਤਰਵਾਸਕਂ ਕਿਂ ਕਰਿਸ੍ਸਨ੍ਤੀ’’ਤਿ? ‘‘ਪਚ੍ਚਤ੍ਥਰਣਂ ਕਰਿਸ੍ਸਨ੍ਤੀ’’ਤਿ. ‘‘ਪੋਰਾਣਪਚ੍ਚਤ੍ਥਰਣਂ ਕਿਂ ਕਰਿਸ੍ਸਨ੍ਤੀ’’ਤਿ? ‘‘ਭੁਮ੍ਮਤ੍ਥਰਣਂ ਕਰਿਸ੍ਸਨ੍ਤੀ’’ਤਿ. ‘‘ਪੋਰਾਣਭੁਮ੍ਮਤ੍ਥਰਣਂ ਕਿਂ ਕਰਿਸ੍ਸਨ੍ਤੀ’’ਤਿ? ‘‘ਪਾਦਪੁਞ੍ਛਨਂ ਕਰਿਸ੍ਸਨ੍ਤੀ’’ਤਿ. ‘‘ਪੋਰਾਣਪਾਦਪੁਞ੍ਛਨਂ ਕਿਂ ਕਰਿਸ੍ਸਨ੍ਤੀ’’ਤਿ? ‘‘ਮਹਾਰਾਜ, ਸਦ੍ਧਾਦੇਯ੍ਯਂ ਨਾਮ ਵਿਨਿਪਾਤੇਤੁਂ ਨ ਲਬ੍ਭਤਿ, ਤਸ੍ਮਾ ਪੋਰਾਣਪਾਦਪੁਞ੍ਛਨਂ ਵਾਸਿਯਾ ਕੋਟ੍ਟੇਤ੍ਵਾ ਮਤ੍ਤਿਕਾਯ ਮਕ੍ਖੇਤ੍ਵਾ ਸੇਨਾਸਨੇਸੁ ਮਤ੍ਤਿਕਾਲੇਪਨਂ ਕਰਿਸ੍ਸਨ੍ਤੀ’’ਤਿ. ‘‘ਭਨ੍ਤੇ, ਤੁਮ੍ਹਾਕਂ ਦਿਨ੍ਨਂ ਯਾਵ ਪਾਦਪੁਞ੍ਛਨਾਪਿ ਨਸ੍ਸਿਤੁਂ ਨ ਲਬ੍ਭਤੀ’’ਤਿ? ‘‘ਆਮ, ਮਹਾਰਾਜ, ਅਮ੍ਹਾਕਂ ਦਿਨ੍ਨਂ ਨਸ੍ਸਿਤੁਂ ਨ ਲਬ੍ਭਤਿ, ਪਰਿਭੋਗਮੇਵ ਹੋਤੀ’’ਤਿ.

ਰਾਜਾ ਤੁਟ੍ਠੋ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ਇਤਰਾਨਿਪਿ ਗੇਹੇ ਠਪਿਤਾਨਿ ਪਞ੍ਚ ਸਾਟਕਸਤਾਨਿ ਆਹਰਾਪੇਤ੍ਵਾ ਥੇਰਸ੍ਸ ਦਤ੍ਵਾ ਅਨੁਮੋਦਨਂ ਸੁਤ੍ਵਾ ਥੇਰਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਥੇਰੋ ਪਠਮਲਦ੍ਧਾਨਿ ਪਞ੍ਚ ਸਾਟਕਸਤਾਨਿ ਜਿਣ੍ਣਚੀਵਰਿਕਾਨਂ ਭਿਕ੍ਖੂਨਂ ਅਦਾਸਿ. ਥੇਰਸ੍ਸ ਪਨ ਪਞ੍ਚਮਤ੍ਤਾਨਿ ਸਦ੍ਧਿਵਿਹਾਰਿਕਸਤਾਨਿ, ਤੇਸੁ ਏਕੋ ਦਹਰਭਿਕ੍ਖੁ ਥੇਰਸ੍ਸ ਬਹੂਪਕਾਰੋ ਪਰਿਵੇਣਂ ਸਮ੍ਮਜ੍ਜਤਿ, ਪਾਨੀਯਪਰਿਭੋਜਨੀਯਂ ਉਪਟ੍ਠਪੇਤਿ, ਦਨ੍ਤਕਟ੍ਠਂ ਮੁਖੋਦਕਂ ਨ੍ਹਾਨੋਦਕਂ ਦੇਤਿ, ਵਚ੍ਚਕੁਟਿਜਨ੍ਤਾਘਰਸੇਨਾਸਨਾਨਿ ਪਟਿਜਗ੍ਗਤਿ, ਹਤ੍ਥਪਰਿਕਮ੍ਮਪਾਦਪਰਿਕਮ੍ਮਪਿਟ੍ਠਿਪਰਿਕਮ੍ਮਾਦੀਨਿ ਕਰੋਤਿ. ਥੇਰੋ ਪਚ੍ਛਾ ਲਦ੍ਧਾਨਿ ਪਞ੍ਚ ਸਾਟਕਸਤਾਨਿ ‘‘ਅਯਂ ਮੇ ਬਹੂਪਕਾਰੋ’’ਤਿ ਯੁਤ੍ਤਵਸੇਨ ਸਬ੍ਬਾਨਿ ਤਸ੍ਸੇਵ ਅਦਾਸਿ. ਸੋਪਿ ਸਬ੍ਬੇ ਤੇ ਸਾਟਕੇ ਭਾਜੇਤ੍ਵਾ ਅਤ੍ਤਨੋ ਸਮਾਨੁਪਜ੍ਝਾਯਾਨਂ ਅਦਾਸਿ.

ਏਵਂ ਸਬ੍ਬੇਪਿ ਤੇ ਲਦ੍ਧਸਾਟਕਾ ਭਿਕ੍ਖੂ ਸਾਟਕੇ ਛਿਨ੍ਦਿਤ੍ਵਾ ਰਜਿਤ੍ਵਾ ਕਣਿਕਾਰਪੁਪ੍ਫਵਣ੍ਣਾਨਿ ਕਾਸਾਯਾਨਿ ਨਿਵਾਸੇਤ੍ਵਾ ਚ ਪਾਰੁਪਿਤ੍ਵਾ ਚ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਤ੍ਵਾ ਏਵਮਾਹਂਸੁ – ‘‘ਭਨ੍ਤੇ, ਸੋਤਾਪਨ੍ਨਸ੍ਸ ਅਰਿਯਸਾਵਕਸ੍ਸ ਮੁਖੋਲੋਕਨਦਾਨਂ ਨਾਮ ਅਤ੍ਥੀ’’ਤਿ. ‘‘ਨ, ਭਿਕ੍ਖਵੇ, ਅਰਿਯਸਾਵਕਾਨਂ ਮੁਖੋਲੋਕਨਦਾਨਂ ਨਾਮ ਅਤ੍ਥੀ’’ਤਿ. ‘‘ਭਨ੍ਤੇ, ਅਮ੍ਹਾਕਂ ਉਪਜ੍ਝਾਯੇਨ ਧਮ੍ਮਭਣ੍ਡਾਗਾਰਿਕਤ੍ਥੇਰੇਨ ਸਹਸ੍ਸਗ੍ਘਨਿਕਾਨਂ ਸਾਟਕਾਨਂ ਪਞ੍ਚ ਸਤਾਨਿ ਏਕਸ੍ਸੇਵ ਦਹਰਭਿਕ੍ਖੁਨੋ ਦਿਨ੍ਨਾਨਿ, ਸੋ ਪਨ ਅਤ੍ਤਨਾ ਲਦ੍ਧੇ ਭਾਜੇਤ੍ਵਾ ਅਮ੍ਹਾਕਂ ਅਦਾਸੀ’’ਤਿ. ‘‘ਨ, ਭਿਕ੍ਖਵੇ, ਆਨਨ੍ਦੋ ਮੁਖੋਲੋਕਨਭਿਕ੍ਖਂ ਦੇਤਿ, ਸੋ ਪਨਸ੍ਸ ਭਿਕ੍ਖੁ ਬਹੂਪਕਾਰੋ, ਤਸ੍ਮਾ ਅਤ੍ਤਨੋ ਉਪਕਾਰਸ੍ਸ ਉਪਕਾਰਵਸੇਨ ਗੁਣਵਸੇਨ ਯੁਤ੍ਤਵਸੇਨ ‘ਉਪਕਾਰਸ੍ਸ ਨਾਮ ਪਚ੍ਚੁਪਕਾਰੋ ਕਾਤੁਂ ਵਟ੍ਟਤੀ’ਤਿ ਕਤਞ੍ਞੁਕਤਵੇਦਿਭਾਵੇਨ ਅਦਾਸਿ. ਪੋਰਾਣਕਪਣ੍ਡਿਤਾਪਿ ਹਿ ਅਤ੍ਤਨੋ ਉਪਕਾਰਾਨਞ੍ਞੇਵ ਪਚ੍ਚੁਪਕਾਰਂ ਕਰਿਂਸੂ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਸੀਹੋ ਹੁਤ੍ਵਾ ਪਬ੍ਬਤਗੁਹਾਯਂ ਵਸਤਿ. ਸੋ ਏਕਦਿਵਸਂ ਗੁਹਾਯ ਨਿਕ੍ਖਮਿਤ੍ਵਾ ਪਬ੍ਬਤਪਾਦਂ ਓਲੋਕੇਸਿ, ਤਂ ਪਨ ਪਬ੍ਬਤਪਾਦਂ ਪਰਿਕ੍ਖਿਪਿਤ੍ਵਾ ਮਹਾਸਰੋ ਅਹੋਸਿ. ਤਸ੍ਸ ਏਕਸ੍ਮਿਂ ਉਨ੍ਨਤਟ੍ਠਾਨੇ ਉਪਰਿਥਦ੍ਧਕਦ੍ਦਮਪਿਟ੍ਠੇ ਮੁਦੂਨਿ ਹਰਿਤਤਿਣਾਨਿ ਜਾਯਿਂਸੁ. ਸਸਕਾ ਚੇਵ ਹਰਿਣਾਦਯੋ ਚ ਸਲ੍ਲਹੁਕਮਿਗਾ ਕਦ੍ਦਮਮਤ੍ਥਕੇ ਵਿਚਰਨ੍ਤਾ ਤਾਨਿ ਖਾਦਨ੍ਤਿ. ਤਂ ਦਿਵਸਮ੍ਪਿ ਏਕੋ ਮਿਗੋ ਤਾਨਿ ਖਾਦਨ੍ਤੋ ਵਿਚਰਤਿ. ਸੀਹੋ ‘‘ਤਂ ਮਿਗਂ ਗਣ੍ਹਿਸ੍ਸਾਮੀ’’ਤਿ ਪਬ੍ਬਤਮਤ੍ਥਕਾ ਉਪ੍ਪਤਿਤ੍ਵਾ ਸੀਹਵੇਗੇਨ ਪਕ੍ਖਨ੍ਦਿ, ਮਿਗੋ ਮਰਣਭਯਤਜ੍ਜਿਤੋ ਵਿਰਵਨ੍ਤੋ ਪਲਾਯਿ. ਸੀਹੋ ਵੇਗਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੋ ਕਲਲਪਿਟ੍ਠੇ ਨਿਪਤਿਤ੍ਵਾ ਓਸੀਦਿਤ੍ਵਾ ਉਗ੍ਗਨ੍ਤੁਂ ਅਸਕ੍ਕੋਨ੍ਤੋ ਚਤ੍ਤਾਰੋ ਪਾਦਾ ਥਮ੍ਭਾ ਵਿਯ ਓਸੀਦਿਤ੍ਵਾ ਸਤ੍ਤਾਹਂ ਨਿਰਾਹਾਰੋ ਅਟ੍ਠਾਸਿ.

ਅਥ ਨਂ ਏਕੋ ਸਿਙ੍ਗਾਲੋ ਗੋਚਰਪ੍ਪਸੁਤੋ ਤਂ ਦਿਸ੍ਵਾ ਭਯੇਨ ਪਲਾਯਿ. ਸੀਹੋ ਤਂ ਪਕ੍ਕੋਸਿਤ੍ਵਾ ‘‘ਭੋ ਸਿਙ੍ਗਾਲ, ਮਾ ਪਲਾਯਿ, ਅਹਂ ਕਲਲੇ ਲਗ੍ਗੋ, ਜੀਵਿਤਂ ਮੇ ਦੇਹੀ’’ਤਿ ਆਹ. ਸਿਙ੍ਗਾਲੋ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਅਹਂ ਤਂ ਉਦ੍ਧਰੇਯ੍ਯਂ, ਉਦ੍ਧਟੋ ਪਨ ਮਂ ਖਾਦੇਯ੍ਯਾਸੀਤਿ ਭਾਯਾਮੀ’’ਤਿ ਆਹ. ‘‘ਮਾ ਭਾਯਿ, ਨਾਹਂ ਤਂ ਖਾਦਿਸ੍ਸਾਮਿ, ਮਹਨ੍ਤਂ ਪਨ ਤੇ ਗੁਣਂ ਕਰਿਸ੍ਸਾਮਿ, ਏਕੇਨੁਪਾਯੇਨ ਮਂ ਉਦ੍ਧਰਾਹੀ’’ਤਿ. ਸਿਙ੍ਗਾਲੋ ਤਸ੍ਸ ਪਟਿਞ੍ਞਂ ਗਹੇਤ੍ਵਾ ਚਤੁਨ੍ਨਂ ਪਾਦਾਨਂ ਸਮਨ੍ਤਾ ਕਲਲੇ ਅਪਨੇਤ੍ਵਾ ਚਤੁਨ੍ਨਮ੍ਪਿ ਪਾਦਾਨਂ ਚਤਸ੍ਸੋ ਮਾਤਿਕਾ ਖਣਿਤ੍ਵਾ ਉਦਕਾਭਿਮੁਖਂ ਅਕਾਸਿ, ਉਦਕਂ ਪਵਿਸਿਤ੍ਵਾ ਕਲਲਂ ਮੁਦੁਂ ਅਕਾਸਿ. ਤਸ੍ਮਿਂ ਖਣੇ ਸਿਙ੍ਗਾਲੋ ਸੀਹਸ੍ਸ ਉਦਰਨ੍ਤਰਂ ਅਤ੍ਤਨੋ ਸੀਸਂ ਪਵੇਸੇਤ੍ਵਾ ‘‘ਵਾਯਾਮਂ ਕਰੋਹਿ, ਸਾਮੀ’’ਤਿ ਉਚ੍ਚਾਸਦ੍ਦਂ ਕਰੋਨ੍ਤੋ ਸੀਸੇਨ ਉਦਰਂ ਪਹਰਿ. ਸੀਹੋ ਵੇਗਂ ਜਨੇਤ੍ਵਾ ਕਲਲਾ ਉਗ੍ਗਨ੍ਤ੍ਵਾ ਪਕ੍ਖਨ੍ਦਿਤ੍ਵਾ ਥਲੇ ਅਟ੍ਠਾਸਿ. ਸੋ ਮੁਹੁਤ੍ਤਂ ਵਿਸ੍ਸਮਿਤ੍ਵਾ ਸਰਂ ਓਰੁਯ੍ਹ ਕਦ੍ਦਮਂ ਧੋਵਿਤ੍ਵਾ ਨ੍ਹਾਯਿਤ੍ਵਾ ਦਰਥਂ ਪਟਿਪ੍ਪਸ੍ਸਮ੍ਭੇਤ੍ਵਾ ਏਕਂ ਮਹਿਂਸਂ ਵਧਿਤ੍ਵਾ ਦਾਠਾਹਿ ਓਵਿਜ੍ਝਿਤ੍ਵਾ ਮਂਸਂ ਉਬ੍ਬਤ੍ਤੇਤ੍ਵਾ ‘‘ਖਾਦ, ਸਮ੍ਮਾ’’ਤਿ ਸਿਙ੍ਗਾਲਸ੍ਸ ਪੁਰਤੋ ਠਪੇਤ੍ਵਾ ਤੇਨ ਖਾਦਿਤੇ ਪਚ੍ਛਾ ਅਤ੍ਤਨਾ ਖਾਦਿ. ਪੁਨ ਸਿਙ੍ਗਾਲੋ ਏਕਂ ਮਂਸਪੇਸਿਂ ਡਂਸਿਤ੍ਵਾ ਗਣ੍ਹਿ. ‘‘ਇਦਂ ਕਿਮਤ੍ਥਾਯ, ਸਮ੍ਮਾ’’ਤਿ ਚ ਵੁਤ੍ਤੇ ‘‘ਤੁਮ੍ਹਾਕਂ ਦਾਸੀ ਅਤ੍ਥਿ, ਤਸ੍ਸਾ ਭਾਗੋ ਭਵਿਸ੍ਸਤੀ’’ਤਿ ਆਹ. ਸੀਹੋ ‘‘ਗਣ੍ਹਾਹੀ’’ਤਿ ਵਤ੍ਵਾ ਸਯਮ੍ਪਿ ਸੀਹਿਯਾ ਅਤ੍ਥਾਯ ਮਂਸਂ ਗਣ੍ਹਿਤ੍ਵਾ ‘‘ਏਹਿ, ਸਮ੍ਮ, ਅਮ੍ਹਾਕਂ ਪਬ੍ਬਤਮੁਦ੍ਧਨਿ ਠਤ੍ਵਾ ਸਖਿਯਾ ਵਸਨਟ੍ਠਾਨਂ ਗਮਿਸ੍ਸਾਮਾ’’ਤਿ ਵਤ੍ਵਾ ਤਤ੍ਥ ਗਨ੍ਤ੍ਵਾ ਮਂਸਂ ਖਾਦਾਪੇਤ੍ਵਾ ਸਿਙ੍ਗਾਲਞ੍ਚ ਸਿਙ੍ਗਾਲਿਞ੍ਚ ਅਸ੍ਸਾਸੇਤ੍ਵਾ ‘‘ਇਤੋ ਪਟ੍ਠਾਯ ਇਦਾਨਿ ਅਹਂ ਤੁਮ੍ਹੇ ਪਟਿਜਗ੍ਗਿਸ੍ਸਾਮੀ’’ਤਿ ਅਤ੍ਤਨੋ ਵਸਨਟ੍ਠਾਨਂ ਨੇਤ੍ਵਾ ਗੁਹਾਯ ਦ੍ਵਾਰੇ ਅਞ੍ਞਿਸ੍ਸਾ ਗੁਹਾਯ ਵਸਾਪੇਸਿ. ਤੇ ਤਤੋ ਪਟ੍ਠਾਯ ਗੋਚਰਾਯ ਗਚ੍ਛਨ੍ਤਾ ਸੀਹਿਞ੍ਚ ਸਿਙ੍ਗਾਲਿਞ੍ਚ ਠਪੇਤ੍ਵਾ ਸਿਙ੍ਗਾਲੇਨ ਸਦ੍ਧਿਂ ਗਨ੍ਤ੍ਵਾ ਨਾਨਾਮਿਗੇ ਵਧਿਤ੍ਵਾ ਉਭੋਪਿ ਤਤ੍ਥੇਵ ਮਂਸਂ ਖਾਦਿਤ੍ਵਾ ਇਤਰਾਸਮ੍ਪਿ ਦ੍ਵਿਨ੍ਨਂ ਆਹਰਿਤ੍ਵਾ ਦੇਨ੍ਤਿ.

ਏਵਂ ਕਾਲੇ ਗਚ੍ਛਨ੍ਤੇ ਸੀਹੀ ਦ੍ਵੇ ਪੁਤ੍ਤੇ ਵਿਜਾਯਿ, ਸਿਙ੍ਗਾਲੀਪਿ ਦ੍ਵੇ ਪੁਤ੍ਤੇ ਵਿਜਾਯਿ. ਤੇ ਸਬ੍ਬੇਪਿ ਸਮਗ੍ਗਵਾਸਂ ਵਸਿਂਸੁ. ਅਥੇਕਦਿਵਸਂ ਸੀਹਿਯਾ ਏਤਦਹੋਸਿ – ‘‘ਅਯਂ ਸੀਹੋ ਸਿਙ੍ਗਾਲਞ੍ਚ ਸਿਙ੍ਗਾਲਿਞ੍ਚ ਸਿਙ੍ਗਾਲਪੋਤਕੇ ਚ ਅਤਿਵਿਯ ਪਿਯਾਯਤਿ, ਨੂਨਮਸ੍ਸ ਸਿਙ੍ਗਾਲਿਯਾ ਸਦ੍ਧਿਂ ਸਨ੍ਥਵੋ ਅਤ੍ਥਿ, ਤਸ੍ਮਾ ਏਵਂ ਸਿਨੇਹਂ ਕਰੋਤਿ, ਯਂਨੂਨਾਹਂ ਇਮਂ ਪੀਲ਼ੇਤ੍ਵਾ ਤਜ੍ਜੇਤ੍ਵਾ ਇਤੋ ਪਲਾਪੇਯ੍ਯ’’ਨ੍ਤਿ. ਸਾ ਸੀਹਸ੍ਸ ਸਿਙ੍ਗਾਲਂ ਗਹੇਤ੍ਵਾ ਗੋਚਰਾਯ ਗਤਕਾਲੇ ਸਿਙ੍ਗਾਲਿਂ ਪੀਲ਼ੇਸਿ ਤਜ੍ਜੇਸਿ ‘‘ਕਿਂਕਾਰਣਾ ਇਮਸ੍ਮਿਂ ਠਾਨੇ ਵਸਤਿ, ਨ ਪਲਾਯਸੀ’’ਤਿ? ਪੁਤ੍ਤਾਪਿਸ੍ਸਾ ਸਿਙ੍ਗਾਲਿਪੁਤ੍ਤੇ ਤਥੇਵ ਤਜ੍ਜਯਿਂਸੁ. ਸਿਙ੍ਗਾਲੀ ਤਮਤ੍ਥਂ ਸਿਙ੍ਗਾਲਸ੍ਸ ਕਥੇਤ੍ਵਾ ‘‘ਸੀਹਸ੍ਸ ਵਚਨੇਨ ਏਤਾਯ ਏਵਂ ਕਤਭਾਵਮ੍ਪਿ ਨ ਜਾਨਾਮ, ਚਿਰਂ ਵਸਿਮ੍ਹਾ, ਨਾਸਾਪੇਯ੍ਯਾਪਿ ਨੋ, ਅਮ੍ਹਾਕਂ ਵਸਨਟ੍ਠਾਨਮੇਵ ਗਚ੍ਛਾਮਾ’’ਤਿ ਆਹ. ਸਿਙ੍ਗਾਲੋ ਤਸ੍ਸਾ ਵਚਨਂ ਸੁਤ੍ਵਾ ਸੀਹਂ ਉਪਸਙ੍ਕਮਿਤ੍ਵਾ ਆਹ – ‘‘ਸਾਮਿ, ਚਿਰਂ ਅਮ੍ਹੇਹਿ ਤੁਮ੍ਹਾਕਂ ਸਨ੍ਤਿਕੇ ਨਿਵੁਤ੍ਥਂ, ਅਤਿਚਿਰਂ ਵਸਨ੍ਤਾ ਨਾਮ ਅਪ੍ਪਿਯਾ ਹੋਨ੍ਤਿ, ਅਮ੍ਹਾਕਂ ਗੋਚਰਾਯ ਪਕ੍ਕਨ੍ਤਕਾਲੇ ਸੀਹੀ ਸਿਙ੍ਗਾਲਿਂ ਵਿਹੇਠੇਤਿ ‘ਇਮਸ੍ਮਿਂ ਠਾਨੇ ਕਸ੍ਮਾ ਵਸਥ, ਪਲਾਯਥਾ’ਤਿ ਤਜ੍ਜੇਤਿ, ਸੀਹਪੋਤਕਾਪਿ ਸਿਙ੍ਗਾਲਪੋਤਕੇ ਤਜ੍ਜੇਨ੍ਤਿ. ਯੋ ਨਾਮ ਯਸ੍ਸ ਅਤ੍ਤਨੋ ਸਨ੍ਤਿਕੇ ਵਾਸਂ ਨ ਰੋਚੇਤਿ, ਤੇਨ ਸੋ ‘ਯਾਹੀ’ਤਿ ਨੀਹਰਿਤਬ੍ਬੋਵ, ਵਿਹੇਠਨਂ ਨਾਮ ਕਿਮਤ੍ਥਿਯ’’ਨ੍ਤਿ ਵਤ੍ਵਾ ਪਠਮਂ ਗਾਥਮਾਹ –

੧੩. ‘‘ਯੇਨ ਕਾਮਂ ਪਣਾਮੇਤਿ, ਧਮ੍ਮੋ ਬਲਵਤਂ ਮਿਗੀ;

ਉਨ੍ਨਦਨ੍ਤੀ ਵਿਜਾਨਾਹਿ, ਜਾਤਂ ਸਰਣਤੋ ਭਯ’’ਨ੍ਤਿ.

ਤਤ੍ਥ ਯੇਨ ਕਾਮਂ ਪਣਾਮੇਤਿ, ਧਮ੍ਮੋ ਬਲਵਤਨ੍ਤਿ ਬਲਵਾ ਨਾਮ ਇਸ੍ਸਰੋ ਅਤ੍ਤਨੋ ਸੇਵਕਂ ਯੇਨ ਦਿਸਾਭਾਗੇਨ ਇਚ੍ਛਤਿ, ਤੇਨ ਦਿਸਾਭਾਗੇਨ ਸੋ ਪਣਾਮੇਤਿ ਨੀਹਰਤਿ. ਏਸ ਧਮ੍ਮੋ ਬਲਵਤਂ ਅਯਂ ਇਸ੍ਸਰਾਨਂ ਸਭਾਵੋ ਪਵੇਣਿਧਮ੍ਮੋਵ, ਤਸ੍ਮਾ ਸਚੇ ਅਮ੍ਹਾਕਂ ਵਾਸਂ ਨ ਰੋਚੇਥ, ਉਜੁਕਮੇਵ ਨੋ ਨੀਹਰਥ, ਵਿਹੇਠਨੇਨ ਕੋ ਅਤ੍ਥੋਤਿ ਦੀਪੇਨ੍ਤੋ ਏਵਮਾਹ. ਮਿਗੀਤਿ ਸੀਹਂ ਆਲਪਤਿ. ਸੋ ਹਿ ਮਿਗਰਾਜਤਾਯ ਮਿਗਾ ਅਸ੍ਸ ਅਤ੍ਥੀਤਿ ਮਿਗੀ. ਉਨ੍ਨਦਨ੍ਤੀਤਿਪਿ ਤਮੇਵ ਆਲਪਤਿ. ਸੋ ਹਿ ਉਨ੍ਨਤਾਨਂ ਦਨ੍ਤਾਨਂ ਅਤ੍ਥਿਤਾਯ ਉਨ੍ਨਤਾ ਦਨ੍ਤਾ ਅਸ੍ਸ ਅਤ੍ਥੀਤਿ ਉਨ੍ਨਦਨ੍ਤੀ. ‘‘ਉਨ੍ਨਤਦਨ੍ਤੀ’’ਤਿਪਿ ਪਾਠੋਯੇਵ. ਵਿਜਾਨਾਹੀਤਿ ‘‘ਏਸ ਇਸ੍ਸਰਾਨਂ ਧਮ੍ਮੋ’’ਤਿ ਏਵਂ ਜਾਨਾਹਿ. ਜਾਤਂ ਸਰਣਤੋ ਭਯਨ੍ਤਿ ਅਮ੍ਹਾਕਂ ਤੁਮ੍ਹੇ ਪਤਿਟ੍ਠਾਨਟ੍ਠੇਨ ਸਰਣਂ, ਤੁਮ੍ਹਾਕਞ੍ਞੇਵ ਸਨ੍ਤਿਕਾ ਭਯਂ ਜਾਤਂ, ਤਸ੍ਮਾ ਅਤ੍ਤਨੋ ਵਸਨਟ੍ਠਾਨਮੇਵ ਗਮਿਸ੍ਸਾਮਾਤਿ ਦੀਪੇਤਿ.

ਅਪਰੋ ਨਯੋ – ਤਵ ਮਿਗੀ ਸੀਹੀ ਉਨ੍ਨਦਨ੍ਤੀਮਮ ਪੁਤ੍ਤਦਾਰਂ ਤਜ੍ਜੇਨ੍ਤੀ ਯੇਨ ਕਾਮਂ ਪਣਾਮੇਤਿ, ਯੇਨ ਯੇਨਾਕਾਰੇਨ ਇਚ੍ਛਤਿ, ਤੇਨ ਪਣਾਮੇਤਿ ਪਵਤ੍ਤਤਿ, ਵਿਹੇਠੇਤਿਪਿ ਪਲਾਪੇਤਿਪਿ, ਏਵਂ ਤ੍ਵਂ ਵਿਜਾਨਾਹਿ, ਤਤ੍ਥ ਕਿਂ ਸਕ੍ਕਾ ਅਮ੍ਹੇਹਿ ਕਾਤੁਂ. ਧਮ੍ਮੋ ਬਲਵਤਂ ਏਸ ਬਲਵਨ੍ਤਾਨਂ ਸਭਾਵੋ, ਇਦਾਨਿ ਮਯਂ ਗਮਿਸ੍ਸਾਮ. ਕਸ੍ਮਾ? ਜਾਤਂ ਸਰਣਤੋ ਭਯਨ੍ਤਿ.

ਤਸ੍ਸ ਵਚਨਂ ਸੁਤ੍ਵਾ ਸੀਹੋ ਸੀਹਿਂ ਆਹ – ‘‘ਭਦ੍ਦੇ, ਅਸੁਕਸ੍ਮਿਂ ਨਾਮ ਕਾਲੇ ਮਮ ਗੋਚਰਤ੍ਥਾਯ ਗਨ੍ਤ੍ਵਾ ਸਤ੍ਤਮੇ ਦਿਵਸੇ ਇਮਿਨਾ ਸਿਙ੍ਗਾਲੇਨ ਇਮਾਯ ਚ ਸਿਙ੍ਗਾਲਿਯਾ ਸਦ੍ਧਿਂ ਆਗਤਭਾਵਂ ਸਰਸੀ’’ਤਿ. ‘‘ਆਮ, ਸਰਾਮੀ’’ਤਿ. ‘‘ਜਾਨਾਸਿ ਪਨ ਮਯ੍ਹਂ ਸਤ੍ਤਾਹਂ ਅਨਾਗਮਨਸ੍ਸ ਕਾਰਣ’’ਨ੍ਤਿ? ‘‘ਨ ਜਾਨਾਮਿ, ਸਾਮੀ’’ਤਿ. ‘‘ਭਦ੍ਦੇ, ਅਹਂ ‘ਏਕਂ ਮਿਗਂ ਗਣ੍ਹਿਸ੍ਸਾਮੀ’ਤਿ ਵਿਰਜ੍ਝਿਤ੍ਵਾ ਕਲਲੇ ਲਗ੍ਗੋ, ਤਤੋ ਨਿਕ੍ਖਮਿਤੁਂ ਅਸਕ੍ਕੋਨ੍ਤੋ ਸਤ੍ਤਾਹਂ ਨਿਰਾਹਾਰੋ ਅਟ੍ਠਾਸਿਂ, ਸ੍ਵਾਹਂ ਇਮਂ ਸਿਙ੍ਗਾਲਂ ਨਿਸ੍ਸਾਯ ਜੀਵਿਤਂ ਲਭਿਂ, ਅਯਂ ਮੇ ਜੀਵਿਤਦਾਯਕੋ ਸਹਾਯੋ. ਮਿਤ੍ਤਧਮ੍ਮੇ ਠਾਤੁਂ ਸਮਤ੍ਥੋ ਹਿ ਮਿਤ੍ਤੋ ਦੁਬ੍ਬਲੋ ਨਾਮ ਨਤ੍ਥਿ, ਇਤੋ ਪਟ੍ਠਾਯ ਮਯ੍ਹਂ ਸਹਾਯਸ੍ਸ ਚ ਸਹਾਯਿਕਾਯ ਚ ਪੁਤ੍ਤਕਾਨਞ੍ਚ ਏਵਰੂਪਂ ਅਵਮਾਨਂ ਮਾ ਅਕਾਸੀ’’ਤਿ ਵਤ੍ਵਾ ਸੀਹੋ ਦੁਤਿਯਂ ਗਾਥਮਾਹ –

੧੪. ‘‘ਅਪਿ ਚੇਪਿ ਦੁਬ੍ਬਲੋ ਮਿਤ੍ਤੋ, ਮਿਤ੍ਤਧਮ੍ਮੇਸੁ ਤਿਟ੍ਠਤਿ;

ਸੋ ਞਾਤਕੋ ਚ ਬਨ੍ਧੁ ਚ, ਸੋ ਮਿਤ੍ਤੋ ਸੋ ਚ ਮੇ ਸਖਾ;

ਦਾਠਿਨਿ ਮਾਤਿਮਞ੍ਞਿਤ੍ਥੋ, ਸਿਙ੍ਗਾਲੋ ਮਮ ਪਾਣਦੋ’’ਤਿ.

ਤਤ੍ਥ ਅਪਿ ਚੇਪੀਤਿ ਏਕੋ ਅਪਿਸਦ੍ਦੋ ਅਨੁਗ੍ਗਹਤ੍ਥੋ, ਏਕੋ ਸਮ੍ਭਾਵਨਤ੍ਥੋ. ਤਤ੍ਰਾਯਂ ਯੋਜਨਾ – ਦੁਬ੍ਬਲੋਪਿ ਚੇ ਮਿਤ੍ਤੋ ਮਿਤ੍ਤਧਮ੍ਮੇਸੁ ਅਪਿ ਤਿਟ੍ਠਤਿ, ਸਚੇ ਠਾਤੁਂ ਸਕ੍ਕੋਤਿ, ਸੋ ਞਾਤਕੋ ਚ ਬਨ੍ਧੁ ਚ, ਸੋ ਮੇਤ੍ਤਚਿਤ੍ਤਤਾਯ ਮਿਤ੍ਤੋ, ਸੋ ਚ ਮੇ ਸਹਾਯਟ੍ਠੇਨ ਸਖਾ. ਦਾਠਿਨਿ ਮਾਤਿਮਞ੍ਞਿਤ੍ਥੋਤਿ, ਭਦ੍ਦੇ, ਦਾਠਾਸਮ੍ਪਨ੍ਨੇ ਸੀਹਿ ਮਾ ਮਯ੍ਹਂ ਸਹਾਯਂ ਵਾ ਸਹਾਯਿਂ ਵਾ ਅਤਿਮਞ੍ਞਿ, ਅਯਞ੍ਹਿ ਸਿਙ੍ਗਾਲੋ ਮਮ ਪਾਣਦੋਤਿ.

ਸਾ ਤਸ੍ਸ ਵਚਨਂ ਸੁਤ੍ਵਾ ਸਿਙ੍ਗਾਲਿਂ ਖਮਾਪੇਤ੍ਵਾ ਤਤੋ ਪਟ੍ਠਾਯ ਸਪੁਤ੍ਤਾਯ ਤਾਯ ਸਦ੍ਧਿਂ ਸਮਗ੍ਗਵਾਸਂ ਵਸਿ. ਸੀਹਪੋਤਕਾਪਿ ਸਿਙ੍ਗਾਲਪੋਤਕੇਹਿ ਸਦ੍ਧਿਂ ਕੀਲ਼ਮਾਨਾ ਸਮ੍ਮੋਦਮਾਨਾ ਮਾਤਾਪਿਤੂਨਂ ਅਤਿਕ੍ਕਨ੍ਤਕਾਲੇਪਿ ਮਿਤ੍ਤਭਾਵਂ ਅਭਿਨ੍ਦਿਤ੍ਵਾ ਸਮ੍ਮੋਦਮਾਨਾ ਵਸਿਂਸੁ. ਤੇਸਂ ਕਿਰ ਸਤ੍ਤਕੁਲਪਰਿਵਟ੍ਟੇ ਅਭਿਜ੍ਜਮਾਨਾ ਮੇਤ੍ਤਿ ਅਗਮਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ – ਸਚ੍ਚਪਰਿਯੋਸਾਨੇ ਕੇਚਿ ਸੋਤਾਪਨ੍ਨਾ, ਕੇਚਿ ਸਕਦਾਗਾਮਿਨੋ, ਕੇਚਿ ਅਨਾਗਾਮਿਨੋ, ਕੇਚਿ ਅਰਹਨ੍ਤੋ ਅਹੇਸੁਂ. ‘‘ਤਦਾ ਸਿਙ੍ਗਾਲੋ ਆਨਨ੍ਦੋ ਅਹੋਸਿ, ਸੀਹੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਗੁਣਜਾਤਕਵਣ੍ਣਨਾ ਸਤ੍ਤਮਾ.

[੧੫੮] ੮. ਸੁਹਨੁਜਾਤਕਵਣ੍ਣਨਾ

ਨਯਿਦਂ ਵਿਸਮਸੀਲੇਨਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦ੍ਵੇ ਚਣ੍ਡਭਿਕ੍ਖੂ ਆਰਬ੍ਭ ਕਥੇਸਿ. ਤਸ੍ਮਿਞ੍ਹਿ ਸਮਯੇ ਜੇਤਵਨੇਪਿ ਏਕੋ ਭਿਕ੍ਖੁ ਚਣ੍ਡੋ ਅਹੋਸਿ ਫਰੁਸੋ ਸਾਹਸਿਕੋ ਜਨਪਦੇਪਿ. ਅਥੇਕਦਿਵਸਂ ਜਾਨਪਦੋ ਭਿਕ੍ਖੁ ਕੇਨਚਿਦੇਵ ਕਰਣੀਯੇਨ ਜੇਤਵਨਂ ਅਗਮਾਸਿ, ਸਾਮਣੇਰਾ ਚੇਵ ਦਹਰਭਿਕ੍ਖੂ ਚ ਤਸ੍ਸ ਚਣ੍ਡਭਾਵਂ ਜਾਨਨ੍ਤਿ. ‘‘ਤੇਸਂ ਦ੍ਵਿਨ੍ਨਂ ਚਣ੍ਡਾਨਂ ਕਲਹਂ ਪਸ੍ਸਿਸ੍ਸਾਮਾ’’ਤਿ ਕੁਤੂਹਲੇਨ ਤਂ ਭਿਕ੍ਖੁਂ ਜੇਤਵਨਵਾਸਿਕਸ੍ਸ ਪਰਿਵੇਣਂ ਪਹਿਣਿਂਸੁ. ਤੇ ਉਭੋਪਿ ਚਣ੍ਡਾ ਅਞ੍ਞਮਞ੍ਞਂ ਦਿਸ੍ਵਾਵ ਪਿਯਸਂਵਾਸਂ ਸਂਸਨ੍ਦਿਂਸੁ ਸਮਿਂਸੁ, ਹਤ੍ਥਪਾਦਪਿਟ੍ਠਿਸਮ੍ਬਾਹਨਾਦੀਨਿ ਅਕਂਸੁ. ਧਮ੍ਮਸਭਾਯਂ ਭਿਕ੍ਖੂ ਕਥਂ ਸਮੁਟ੍ਠਾਪੇਸੁਂ – ‘‘ਆਵੁਸੋ, ਚਣ੍ਡਾ ਭਿਕ੍ਖੂ ਅਞ੍ਞੇਸਂ ਉਪਰਿ ਚਣ੍ਡਾ ਫਰੁਸਾ ਸਾਹਸਿਕਾ, ਅਞ੍ਞਮਞ੍ਞਂ ਪਨ ਉਭੋਪਿ ਸਮਗ੍ਗਾ ਸਮ੍ਮੋਦਮਾਨਾ ਪਿਯਸਂਵਾਸਾ ਜਾਤਾ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪੇਤੇ ਅਞ੍ਞੇਸਂ ਚਣ੍ਡਾ ਫਰੁਸਾ ਸਾਹਸਿਕਾ, ਅਞ੍ਞਮਞ੍ਞਂ ਪਨ ਸਮਗ੍ਗਾ ਸਮ੍ਮੋਦਮਾਨਾ ਪਿਯਸਂਵਾਸਾ ਚ ਅਹੇਸੁ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਸਬ੍ਬਤ੍ਥਸਾਧਕੋ ਅਤ੍ਥਧਮ੍ਮਾਨੁਸਾਸਕੋ ਅਮਚ੍ਚੋ ਅਹੋਸਿ. ਸੋ ਪਨ ਰਾਜਾ ਥੋਕਂ ਧਨਲੋਭਪਕਤਿਕੋ, ਤਸ੍ਸ ਮਹਾਸੋਣੋ ਨਾਮ ਕੂਟਅਸ੍ਸੋ ਅਤ੍ਥਿ. ਅਥ ਉਤ੍ਤਰਾਪਥਕਾ ਅਸ੍ਸਵਾਣਿਜਾ ਪਞ੍ਚ ਅਸ੍ਸਸਤਾਨਿ ਆਨੇਸੁਂ, ਅਸ੍ਸਾਨਂ ਆਗਤਭਾਵਂ ਰਞ੍ਞੋ ਆਰੋਚੇਸੁਂ. ਤਤੋ ਪੁਬ੍ਬੇ ਪਨ ਬੋਧਿਸਤ੍ਤੋ ਅਸ੍ਸੇ ਅਗ੍ਘਾਪੇਤ੍ਵਾ ਮੂਲਂ ਅਪਰਿਹਾਪੇਤ੍ਵਾ ਦਾਪੇਸਿ. ਰਾਜਾ ਤਂ ਪਰਿਹਾਯਮਾਨੋ ਅਞ੍ਞਂ ਅਮਚ੍ਚਂ ਪਕ੍ਕੋਸਾਪੇਤ੍ਵਾ ‘‘ਤਾਤ, ਅਸ੍ਸੇ ਅਗ੍ਘਾਪੇਹਿ, ਅਗ੍ਘਾਪੇਨ੍ਤੋ ਚ ਪਠਮਂ ਮਹਾਸੋਣਂ ਯਥਾ ਤੇਸਂ ਅਸ੍ਸਾਨਂ ਅਨ੍ਤਰਂ ਪਵਿਸਤਿ, ਤਥਾ ਵਿਸ੍ਸਜ੍ਜੇਤ੍ਵਾ ਅਸ੍ਸੇ ਡਂਸਾਪੇਤ੍ਵਾ ਵਣਿਤੇ ਕਾਰਾਪੇਤ੍ਵਾ ਦੁਬ੍ਬਲਕਾਲੇ ਮੂਲਂ ਹਾਪੇਤ੍ਵਾ ਅਸ੍ਸੇ ਅਗ੍ਘਾਪੇਯ੍ਯਾਸੀ’’ਤਿ ਆਹ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਥਾ ਅਕਾਸਿ.

ਅਸ੍ਸਵਾਣਿਜਾ ਅਨਤ੍ਤਮਨਾ ਹੁਤ੍ਵਾ ਤੇਨ ਕਤਕਿਰਿਯਂ ਬੋਧਿਸਤ੍ਤਸ੍ਸ ਆਰੋਚੇਸੁਂ. ਬੋਧਿਸਤ੍ਤੋ ‘‘ਕਿਂ ਪਨ ਤੁਮ੍ਹਾਕਂ ਨਗਰੇ ਕੂਟਅਸ੍ਸੋ ਨਤ੍ਥੀ’’ਤਿ ਪੁਚ੍ਛਿ. ‘‘ਅਤ੍ਥਿ ਸਾਮਿ, ਸੁਹਨੁ ਨਾਮ ਕੂਟਅਸ੍ਸੋ ਚਣ੍ਡੋ ਫਰੁਸੋ’’ਤਿ. ‘‘ਤੇਨ ਹਿ ਪੁਨ ਆਗਚ੍ਛਨ੍ਤਾ ਤਂ ਅਸ੍ਸਂ ਆਨੇਯ੍ਯਾਥਾ’’ਤਿ. ਤੇ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਪੁਨ ਆਗਚ੍ਛਨ੍ਤਾ ਤਂ ਕੂਟਸ੍ਸਂ ਗਾਹਾਪੇਤ੍ਵਾ ਆਗਚ੍ਛਿਂਸੁ. ਰਾਜਾ ‘‘ਅਸ੍ਸਵਾਣਿਜਾ ਆਗਤਾ’’ਤਿ ਸੁਤ੍ਵਾ ਸੀਹਪਞ੍ਜਰਂ ਉਗ੍ਘਾਟੇਤ੍ਵਾ ਅਸ੍ਸੇ ਓਲੋਕੇਤ੍ਵਾ ਮਹਾਸੋਣਂ ਵਿਸ੍ਸਜ੍ਜਾਪੇਸਿ. ਅਸ੍ਸਵਾਣਿਜਾਪਿ ਮਹਾਸੋਣਂ ਆਗਚ੍ਛਨ੍ਤਂ ਦਿਸ੍ਵਾ ਸੁਹਨੁਂ ਵਿਸ੍ਸਜ੍ਜਾਪੇਸੁਂ. ਤੇ ਅਞ੍ਞਮਞ੍ਞਂ ਪਤ੍ਵਾ ਸਰੀਰਾਨਿ ਲੇਹਨ੍ਤਾ ਸਮ੍ਮੋਦਮਾਨਾ ਅਟ੍ਠਂਸੁ. ਰਾਜਾ ਬੋਧਿਸਤ੍ਤਂ ਪੁਚ੍ਛਿ – ‘‘ਪਸ੍ਸਸਿ ਇਮੇ ਦ੍ਵੇ ਕੂਟਸ੍ਸਾ ਅਞ੍ਞੇਸਂ ਚਣ੍ਡਾ ਫਰੁਸਾ ਸਾਹਸਿਕਾ, ਅਞ੍ਞੇ ਅਸ੍ਸੇ ਡਂਸਿਤ੍ਵਾ ਗੇਲਞ੍ਞਂ ਪਾਪੇਨ੍ਤਿ, ਇਦਾਨਿ ਅਞ੍ਞਮਞ੍ਞਂ ਪਨ ਸਰੀਰਂ ਲੇਹਨ੍ਤਾ ਸਮ੍ਮੋਦਮਾਨਾ ਅਟ੍ਠਂਸੁ, ਕਿਂ ਨਾਮੇਤ’’ਨ੍ਤਿ? ਬੋਧਿਸਤ੍ਤੋ ‘‘ਨਯਿਮੇ, ਮਹਾਰਾਜ, ਵਿਸਮਸੀਲਾ, ਸਮਸੀਲਾ ਸਮਧਾਤੁਕਾ ਚ ਏਤੇ’’ਤਿ ਵਤ੍ਵਾ ਇਮਂ ਗਾਥਾਦ੍ਵਯਮਾਹ –

੧੫. ‘‘ਨਯਿਦਂ ਵਿਸਮਸੀਲੇਨ, ਸੋਣੇਨ ਸੁਹਨੂ ਸਹ;

ਸੁਹਨੂਪਿ ਤਾਦਿਸੋਯੇਵ, ਯੋ ਸੋਣਸ੍ਸ ਸਗੋਚਰੋ.

੧੬. ‘‘ਪਕ੍ਖਨ੍ਦਿਨਾ ਪਗਬ੍ਭੇਨ, ਨਿਚ੍ਚਂ ਸਨ੍ਦਾਨਖਾਦਿਨਾ;

ਸਮੇਤਿ ਪਾਪਂ ਪਾਪੇਨ, ਸਮੇਤਿ ਅਸਤਾ ਅਸ’’ਨ੍ਤਿ.

ਤਤ੍ਥ ਨਯਿਦਂ ਵਿਸਮਸੀਲੇਨ, ਸੋਣੇਨ ਸੁਹਨੂ ਸਹਾਤਿ ਯਂ ਇਦਂ ਸੁਹਨੁ ਕੂਟਸ੍ਸੋ ਸੋਣੇਨ ਸਦ੍ਧਿਂ ਪੇਮਂ ਕਰੋਤਿ, ਇਦਂ ਨ ਅਤ੍ਤਨੋ ਵਿਸਮਸੀਲੇਨ, ਅਥ ਖੋ ਅਤ੍ਤਨੋ ਸਮਸੀਲੇਨੇਵ ਸਦ੍ਧਿਂ ਕਰੋਤਿ. ਉਭੋਪਿ ਹੇਤੇ ਅਤ੍ਤਨੋ ਅਨਾਚਾਰਤਾਯ ਦੁਸ੍ਸੀਲਤਾਯ ਸਮਸੀਲਾ ਸਮਧਾਤੁਕਾ. ਸੁਹਨੂਪਿ ਤਾਦਿਸੋਯੇਵ, ਯੋ ਸੋਣਸ੍ਸ ਸਗੋਚਰੋਤਿ ਯਾਦਿਸੋ ਸੋਣੋ, ਸੁਹਨੁਪਿ ਤਾਦਿਸੋਯੇਵ, ਯੋ ਸੋਣਸ੍ਸ ਸਗੋਚਰੋ ਯਂਗੋਚਰੋ ਸੋਣੋ, ਸੋਪਿ ਤਂਗੋਚਰੋਯੇਵ. ਯਥੇਵ ਹਿ ਸੋਣੋ ਅਸ੍ਸਗੋਚਰੋ ਅਸ੍ਸੇ ਡਂਸੇਨ੍ਤੋਵ ਚਰਤਿ, ਤਥਾ ਸੁਹਨੁਪਿ. ਇਮਿਨਾ ਨੇਸਂ ਸਮਾਨਗੋਚਰਤਂ ਦਸ੍ਸੇਤਿ.

ਤੇ ਪਨ ਆਚਾਰਗੋਚਰੇ ਏਕਤੋ ਕਤ੍ਵਾ ਦਸ੍ਸੇਤੁਂ ‘‘ਪਕ੍ਖਨ੍ਦਿਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਪਕ੍ਖਨ੍ਦਿਨਾਤਿ ਅਸ੍ਸਾਨਂ ਉਪਰਿ ਪਕ੍ਖਨ੍ਦਨਸੀਲੇਨ ਪਕ੍ਖਨ੍ਦਨਗੋਚਰੇਨ. ਪਗਬ੍ਭੇਨਾਤਿ ਕਾਯਪਾਗਬ੍ਭਿਯਾਦਿਸਮਨ੍ਨਾਗਤੇਨ ਦੁਸ੍ਸੀਲੇਨ. ਨਿਚ੍ਚਂ ਸਨ੍ਦਾਨਖਾਦਿਨਾਤਿ ਸਦਾ ਅਤ੍ਤਨੋ ਬਨ੍ਧਨਯੋਤ੍ਤਂ ਖਾਦਨਸੀਲੇਨ ਖਾਦਨਗੋਚਰੇਨ ਚ. ਸਮੇਤਿ ਪਾਪਂ ਪਾਪੇਨਾਤਿ ਏਤੇਸੁ ਅਞ੍ਞਤਰੇਨ ਪਾਪੇਨ ਸਦ੍ਧਿਂ ਅਞ੍ਞਤਰਸ੍ਸ ਪਾਪਂ ਦੁਸ੍ਸੀਲ੍ਯਂ ਸਮੇਤਿ. ਅਸਤਾ ਅਸਨ੍ਤਿ ਏਤੇਸੁ ਅਞ੍ਞਤਰੇਨ ਅਸਤਾ ਅਨਾਚਾਰਗੋਚਰਸਮ੍ਪਨ੍ਨੇਨ ਸਹ ਇਤਰਸ੍ਸ ਅਸਂ ਅਸਾਧੁਕਮ੍ਮਂ ਸਮੇਤਿ, ਗੂਥਾਦੀਨਿ ਵਿਯ ਗੂਥਾਦੀਹਿ ਏਕਤੋ ਸਂਸਨ੍ਦਤਿ ਸਦਿਸਂ ਨਿਬ੍ਬਿਸੇਸਮੇਵ ਹੋਤੀਤਿ.

ਏਵਂ ਵਤ੍ਵਾ ਚ ਪਨ ਬੋਧਿਸਤ੍ਤੋ ‘‘ਮਹਾਰਾਜ, ਰਞ੍ਞਾ ਨਾਮ ਅਤਿਲੁਦ੍ਧੇਨ ਨ ਭਵਿਤਬ੍ਬਂ, ਪਰਸ੍ਸ ਸਨ੍ਤਕਂ ਨਾਮ ਨਾਸੇਤੁਂ ਨ ਵਟ੍ਟਤੀ’’ਤਿ ਰਾਜਾਨਂ ਓਵਦਿਤ੍ਵਾ ਅਸ੍ਸੇ ਅਗ੍ਘਾਪੇਤ੍ਵਾ ਭੂਤਮੇਵ ਮੂਲਂ ਦਾਪੇਸਿ. ਅਸ੍ਸਵਾਣਿਜਾ ਯਥਾਸਭਾਵਮੇਵ ਮੂਲਂ ਲਭਿਤ੍ਵਾ ਹਟ੍ਠਤੁਟ੍ਠਾ ਅਗਮਂਸੁ. ਰਾਜਾਪਿ ਬੋਧਿਸਤ੍ਤਸ੍ਸ ਓਵਾਦੇ ਠਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਦ੍ਵੇ ਅਸ੍ਸਾ ਇਮੇ ਦ੍ਵੇ ਦੁਟ੍ਠਭਿਕ੍ਖੂ ਅਹੇਸੁਂ, ਰਾਜਾ ਆਨਨ੍ਦੋ, ਪਣ੍ਡਿਤਾਮਚ੍ਚੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੁਹਨੁਜਾਤਕਵਣ੍ਣਨਾ ਅਟ੍ਠਮਾ.

[੧੫੯] ੯. ਮੋਰਜਾਤਕਵਣ੍ਣਨਾ

ਉਦੇਤਯਂ ਚਕ੍ਖੁਮਾ ਏਕਰਾਜਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਉਕ੍ਕਣ੍ਠਿਤਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਹਿ ਭਿਕ੍ਖੁ ਭਿਕ੍ਖੂਹਿ ਸਤ੍ਥੁ ਸਨ੍ਤਿਕਂ ਨੀਤੋ ‘‘ਸਚ੍ਚਂ ਕਿਰ, ਤ੍ਵਂ ਭਿਕ੍ਖੁ, ਉਕ੍ਕਣ੍ਠਿਤੋ’’ਤਿ ਵੁਤ੍ਤੇ ‘‘ਸਚ੍ਚਂ, ਭਨ੍ਤੇ’’ਤਿ ਵਤ੍ਵਾ ‘‘ਕਿਂ ਦਿਸ੍ਵਾ’’ਤਿ ਵੁਤ੍ਤੇ ‘‘ਏਕਂ ਅਲਙ੍ਕਤਪਟਿਯਤ੍ਤਸਰੀਰਂ ਮਾਤੁਗਾਮਂ ਓਲੋਕੇਤ੍ਵਾ’’ਤਿ ਆਹ. ਅਥ ਨਂ ਸਤ੍ਥਾ ‘‘ਭਿਕ੍ਖੁ ਮਾਤੁਗਾਮੋ ਨਾਮ ਕਸ੍ਮਾ ਤੁਮ੍ਹਾਦਿਸਾਨਂ ਚਿਤ੍ਤਂ ਨਾਲੁਲ਼ੇਸ੍ਸਤਿ, ਪੋਰਾਣਕਪਣ੍ਡਿਤਾਨਮ੍ਪਿ ਹਿ ਮਾਤੁਗਾਮਸ੍ਸ ਸਦ੍ਦਂ ਸੁਤ੍ਵਾ ਸਤ੍ਤ ਵਸ੍ਸਸਤਾਨਿ ਅਸਮੁਦਾਚਿਣ੍ਣਕਿਲੇਸਾ ਓਕਾਸਂ ਲਭਿਤ੍ਵਾ ਖਣੇਨੇਵ ਸਮੁਦਾਚਰਿਂਸੁ. ਵਿਸੁਦ੍ਧਾਪਿ ਸਤ੍ਤਾ ਸਂਕਿਲਿਸ੍ਸਨ੍ਤਿ, ਉਤ੍ਤਮਯਸਸਮਙ੍ਗਿਨੋਪਿ ਆਯਸਕ੍ਯਂ ਪਾਪੁਣਨ੍ਤਿ, ਪਗੇਵ ਅਪਰਿਸੁਦ੍ਧਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਮੋਰਯੋਨਿਯਂ ਪਟਿਸਨ੍ਧਿਂ ਗਹੇਤ੍ਵਾ ਅਣ੍ਡਕਾਲੇਪਿ ਕਣਿਕਾਰਮਕੁਲ਼ਵਣ੍ਣਅਣ੍ਡਕੋਸੋ ਹੁਤ੍ਵਾ ਅਣ੍ਡਂ ਭਿਨ੍ਦਿਤ੍ਵਾ ਨਿਕ੍ਖਨ੍ਤੋ ਸੁਵਣ੍ਣਵਣ੍ਣੋ ਅਹੋਸਿ ਦਸ੍ਸਨੀਯੋ ਪਾਸਾਦਿਕੋ ਪਕ੍ਖਾਨਂ ਅਨ੍ਤਰੇ ਸੁਰਤ੍ਤਰਾਜਿਵਿਰਾਜਿਤੋ, ਸੋ ਅਤ੍ਤਨੋ ਜੀਵਿਤਂ ਰਕ੍ਖਨ੍ਤੋ ਤਿਸ੍ਸੋ ਪਬ੍ਬਤਰਾਜਿਯੋ ਅਤਿਕ੍ਕਮ੍ਮ ਚਤੁਤ੍ਥਾਯ ਪਬ੍ਬਤਰਾਜਿਯਾ ਏਕਸ੍ਮਿਂ ਦਣ੍ਡਕਹਿਰਞ੍ਞਪਬ੍ਬਤਤਲੇ ਵਾਸਂ ਕਪ੍ਪੇਸਿ. ਸੋ ਪਭਾਤਾਯ ਰਤ੍ਤਿਯਾ ਪਬ੍ਬਤਮਤ੍ਥਕੇ ਨਿਸਿਨ੍ਨੋ ਸੂਰਿਯਂ ਉਗ੍ਗਚ੍ਛਨ੍ਤਂ ਓਲੋਕੇਤ੍ਵਾ ਅਤ੍ਤਨੋ ਗੋਚਰਭੂਮਿਯਂ ਰਕ੍ਖਾਵਰਣਤ੍ਥਾਯ ਬ੍ਰਹ੍ਮਮਨ੍ਤਂ ਬਨ੍ਧਨ੍ਤੋ ‘‘ਉਦੇਤਯ’’ਨ੍ਤਿਆਦਿਮਾਹ.

੧੭. ‘‘ਉਦੇਤਯਂ ਚਕ੍ਖੁਮਾ ਏਕਰਾਜਾ,

ਹਰਿਸ੍ਸਵਣ੍ਣੋ ਪਥਵਿਪ੍ਪਭਾਸੋ;

ਤਂ ਤਂ ਨਮਸ੍ਸਾਮਿ ਹਰਿਸ੍ਸਵਣ੍ਣਂ ਪਥਵਿਪ੍ਪਭਾਸਂ,

ਤਯਾਜ੍ਜ ਗੁਤ੍ਤਾ ਵਿਹਰੇਮੁ ਦਿਵਸ’’ਨ੍ਤਿ.

ਤਤ੍ਥ ਉਦੇਤੀਤਿ ਪਾਚੀਨਲੋਕਧਾਤੁਤੋ ਉਗ੍ਗਚ੍ਛਤਿ. ਚਕ੍ਖੁਮਾਤਿ ਸਕਲਚਕ੍ਕਵਾਲ਼ਵਾਸੀਨਂ ਅਨ੍ਧਕਾਰਂ ਵਿਧਮਿਤ੍ਵਾ ਚਕ੍ਖੁਪਟਿਲਾਭਕਰਣੇਨ ਯਂ ਤੇਨ ਤੇਸਂ ਦਿਨ੍ਨਂ ਚਕ੍ਖੁ, ਤੇਨ ਚਕ੍ਖੁਨਾ ਚਕ੍ਖੁਮਾ. ਏਕਰਾਜਾਤਿ ਸਕਲਚਕ੍ਕਵਾਲ਼ੇ ਆਲੋਕਕਰਾਨਂ ਅਨ੍ਤਰੇ ਸੇਟ੍ਠਵਿਸਿਟ੍ਠਟ੍ਠੇਨ ਏਕਰਾਜਾ. ਹਰਿਸ੍ਸਵਣ੍ਣੋਤਿ ਹਰਿਸਮਾਨਵਣ੍ਣੋ, ਸੁਵਣ੍ਣਵਣ੍ਣੋਤਿ ਅਤ੍ਥੋ. ਪਥਵਿਪ੍ਪਭਾਸੋਤਿ ਪਥਵਿਯਾ ਪਭਾਸੋ. ਤਂ ਤਂ ਨਮਸ੍ਸਾਮੀਤਿ ਤਸ੍ਮਾ ਤਂ ਏਵਰੂਪਂ ਭਵਨ੍ਤਂ ਨਮਸ੍ਸਾਮਿ ਵਨ੍ਦਾਮਿ. ਤਯਾਜ੍ਜ ਗੁਤ੍ਤਾ ਵਿਹਰੇਮੁ ਦਿਵਸਨ੍ਤਿ ਤਯਾ ਅਜ੍ਜ ਰਕ੍ਖਿਤਾ ਗੋਪਿਤਾ ਹੁਤ੍ਵਾ ਇਮਂ ਦਿਵਸਂ ਚਤੁਇਰਿਯਾਪਥਵਿਹਾਰੇਨ ਸੁਖਂ ਵਿਹਰੇਯ੍ਯਾਮ.

ਏਵਂ ਬੋਧਿਸਤ੍ਤੋ ਇਮਾਯ ਗਾਥਾਯ ਸੂਰਿਯਂ ਨਮਸ੍ਸਿਤ੍ਵਾ ਦੁਤਿਯਗਾਥਾਯ ਅਤੀਤੇ ਪਰਿਨਿਬ੍ਬੁਤੇ ਬੁਦ੍ਧੇ ਚੇਵ ਬੁਦ੍ਧਗੁਣੇ ਚ ਨਮਸ੍ਸਤਿ.

‘‘ਯੇ ਬ੍ਰਾਹ੍ਮਣਾ ਵੇਦਗੂ ਸਬ੍ਬਧਮ੍ਮੇ, ਤੇ ਮੇ ਨਮੋ ਤੇ ਚ ਮਂ ਪਾਲਯਨ੍ਤੁ;

ਨਮਤ੍ਥੁ ਬੁਦ੍ਧਾਨਂ ਨਮਤ੍ਥੁ ਬੋਧਿਯਾ, ਨਮੋ ਵਿਮੁਤ੍ਤਾਨਂ ਨਮੋ ਵਿਮੁਤ੍ਤਿਯਾ;

ਇਮਂ ਸੋ ਪਰਿਤ੍ਤਂ ਕਤ੍ਵਾ, ਮੋਰੋ ਚਰਤਿ ਏਸਨਾ’’ਤਿ.

ਤਤ੍ਥ ਯੇ ਬ੍ਰਾਹ੍ਮਣਾਤਿ ਯੇ ਬਾਹਿਤਪਾਪਾ ਵਿਸੁਦ੍ਧਿਬ੍ਰਾਹ੍ਮਣਾ. ਵੇਦਗੂਤਿ ਵੇਦਾਨਂ ਪਾਰਂ ਗਤਾਤਿਪਿ ਵੇਦਗੂ, ਵੇਦੇਹਿ ਪਾਰਂ ਗਤਾਤਿਪਿ ਵੇਦਗੂ. ਇਧ ਪਨ ਸਬ੍ਬੇ ਸਙ੍ਖਤਾਸਙ੍ਖਤਧਮ੍ਮੇ ਵਿਦਿਤੇ ਪਾਕਟੇ ਕਤ੍ਵਾ ਗਤਾਤਿ ਵੇਦਗੂ. ਤੇਨੇਵਾਹ ‘‘ਸਬ੍ਬਧਮ੍ਮੇ’’ਤਿ. ਸਬ੍ਬੇ ਖਨ੍ਧਾਯਤਨਧਾਤੁਧਮ੍ਮੇ ਸਲਕ੍ਖਣਸਾਮਞ੍ਞਲਕ੍ਖਣਵਸੇਨ ਅਤ੍ਤਨੋ ਞਾਣਸ੍ਸ ਵਿਦਿਤੇ ਪਾਕਟੇ ਕਤ੍ਵਾ ਗਤਾ, ਤਿਣ੍ਣਂ ਮਾਰਾਨਂ ਮਤ੍ਥਕਂ ਮਦ੍ਦਿਤ੍ਵਾ ਦਸਸਹਸ੍ਸਿਲੋਕਧਾਤੁਂ ਉਨ੍ਨਾਦੇਤ੍ਵਾ ਬੋਧਿਤਲੇ ਸਮ੍ਮਾਸਮ੍ਬੋਧਿਂ ਪਤ੍ਵਾ ਸਂਸਾਰਂ ਵਾ ਅਤਿਕ੍ਕਨ੍ਤਾਤਿ ਅਤ੍ਥੋ. ਤੇ ਮੇ ਨਮੋਤਿ ਤੇ ਮਮ ਇਮਂ ਨਮਕ੍ਕਾਰਂ ਪਟਿਚ੍ਛਨ੍ਤੁ. ਤੇ ਚ ਮਂ ਪਾਲਯਨ੍ਤੂਤਿ ਏਵਂ ਮਯਾ ਨਮਸ੍ਸਿਤਾ ਚ ਤੇ ਭਗਵਨ੍ਤੋ ਮਂ ਪਾਲੇਨ੍ਤੁ ਰਕ੍ਖਨ੍ਤੁ ਗੋਪੇਨ੍ਤੁ. ਨਮਤ੍ਥੁ ਬੁਦ੍ਧਾਨਂ ਨਮਤ੍ਥੁ ਬੋਧਿਯਾ, ਨਮੋ ਵਿਮੁਤ੍ਤਾਨਂ ਨਮੋ ਵਿਮੁਤ੍ਤਿਯਾਤਿ ਅਯਂ ਮਮ ਨਮਕ੍ਕਾਰੋ ਅਤੀਤਾਨਂ ਪਰਿਨਿਬ੍ਬੁਤਾਨਂ ਬੁਦ੍ਧਾਨਂ ਅਤ੍ਥੁ, ਤੇਸਞ੍ਞੇਵ ਚਤੂਸੁ ਚ ਮਗ੍ਗੇਸੁ ਚਤੂਸੁ ਫਲੇਸੁ ਞਾਣਸਙ੍ਖਾਤਾਯ ਬੋਧਿਯਾ ਅਤ੍ਥੁ, ਤਥਾ ਤੇਸਞ੍ਞੇਵ ਅਰਹਤ੍ਤਫਲਵਿਮੁਤ੍ਤਿਯਾ ਵਿਮੁਤ੍ਤਾਨਂ ਅਤ੍ਥੁ, ਯਾ ਚ ਨੇਸਂ ਤਦਙ੍ਗਵਿਮੁਤ੍ਤਿ ਵਿਕ੍ਖਮ੍ਭਨਵਿਮੁਤ੍ਤਿ ਸਮੁਚ੍ਛੇਦਵਿਮੁਤ੍ਤਿ ਪਟਿਪ੍ਪਸ੍ਸਦ੍ਧਿਵਿਮੁਤ੍ਤਿ ਨਿਸ੍ਸਰਣਵਿਮੁਤ੍ਤੀਤਿ ਪਞ੍ਚਵਿਧਾ ਵਿਮੁਤ੍ਤਿ, ਤਸ੍ਸਾ ਨੇਸਂ ਵਿਮੁਤ੍ਤਿਯਾਪਿ ਅਯਂ ਮਯ੍ਹਂ ਨਮਕ੍ਕਾਰੋ ਅਤ੍ਥੂਤਿ. ‘‘ਇਮਂ ਸੋ ਪਰਿਤ੍ਤਂ ਕਤ੍ਵਾ, ਮੋਰੋ ਚਰਤਿ ਏਸਨਾ’’ਤਿ ਇਦਂ ਪਨ ਪਦਦ੍ਵਯਂ ਸਤ੍ਥਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਆਹ. ਤਸ੍ਸਤ੍ਥੋ – ਭਿਕ੍ਖਵੇ, ਸੋ ਮੋਰੋ ਇਮਂ ਪਰਿਤ੍ਤਂ ਇਮਂ ਰਕ੍ਖਂ ਕਤ੍ਵਾ ਅਤ੍ਤਨੋ ਗੋਚਰਭੂਮਿਯਂ ਪੁਪ੍ਫਫਲਾਦੀਨਂ ਅਤ੍ਥਾਯ ਨਾਨਪ੍ਪਕਾਰਾਯ ਏਸਨਾਯ ਚਰਤਿ.

ਏਵਂ ਦਿਵਸਂ ਚਰਿਤ੍ਵਾ ਸਾਯਂ ਪਬ੍ਬਤਮਤ੍ਥਕੇ ਨਿਸੀਦਿਤ੍ਵਾ ਅਤ੍ਥਙ੍ਗਤਂ ਸੂਰਿਯਂ ਓਲੋਕੇਨ੍ਤੋ ਬੁਦ੍ਧਗੁਣੇ ਆਵਜ੍ਜੇਤ੍ਵਾ ਨਿਵਾਸਟ੍ਠਾਨੇ ਰਕ੍ਖਾਵਰਣਤ੍ਥਾਯ ਪੁਨ ਬ੍ਰਹ੍ਮਮਨ੍ਤਂ ਬਨ੍ਧਨ੍ਤੋ ‘‘ਅਪੇਤਯ’’ਨ੍ਤਿਆਦਿਮਾਹ.

੧੮. ‘‘ਅਪੇਤਯਂ ਚਕ੍ਖੁਮਾ ਏਕਰਾਜਾ, ਹਰਿਸ੍ਸਵਣ੍ਣੋ ਪਥਵਿਪ੍ਪਭਾਸੋ;

ਤਂ ਤਂ ਨਮਸ੍ਸਾਮਿ ਹਰਿਸ੍ਸਵਣ੍ਣਂ ਪਥਵਿਪ੍ਪਭਾਸਂ, ਤਯਾਜ੍ਜ ਗੁਤ੍ਤਾ ਵਿਹਰੇਮੁ ਰਤ੍ਤਿਂ.

‘‘ਯੇ ਬ੍ਰਾਹ੍ਮਣਾ ਵੇਦਗੂ ਸਬ੍ਬਧਮ੍ਮੇ, ਤੇ ਮੇ ਨਮੋ ਤੇ ਚ ਮਂ ਪਾਲਯਨ੍ਤੁ;

ਨਮਤ੍ਥੁ ਬੁਦ੍ਧਾਨਂ ਨਮਤ੍ਥੁ ਬੋਧਿਯਾ, ਨਮੋ ਵਿਮੁਤ੍ਤਾਨਂ ਨਮੋ ਵਿਮੁਤ੍ਤਿਯਾ;

ਇਮਂ ਸੋ ਪਰਿਤ੍ਤਂ ਕਤ੍ਵਾ, ਮੋਰੋ ਵਾਸਮਕਪ੍ਪਯੀ’’ਤਿ.

ਤਤ੍ਥ ਅਪੇਤੀਤਿ ਅਪਯਾਤਿ ਅਤ੍ਥਂ ਗਚ੍ਛਤਿ. ਇਮਂ ਸੋ ਪਰਿਤ੍ਤਂ ਕਤ੍ਵਾ, ਮੋਰੋ ਵਾਸਮਕਪ੍ਪਯੀਤਿ ਇਦਮ੍ਪਿ ਅਭਿਸਮ੍ਬੁਦ੍ਧੋ ਹੁਤ੍ਵਾ ਆਹ. ਤਸ੍ਸਤ੍ਥੋ – ਭਿਕ੍ਖਵੇ, ਸੋ ਮੋਰੋ ਇਮਂ ਪਰਿਤ੍ਤਂ ਇਮਂ ਰਕ੍ਖਂ ਕਤ੍ਵਾ ਅਤ੍ਤਨੋ ਨਿਵਾਸਟ੍ਠਾਨੇ ਵਾਸਂ ਕਪ੍ਪਯਿਤ੍ਥ, ਤਸ੍ਸ ਰਤ੍ਤਿਂ ਵਾ ਦਿਵਾ ਵਾ ਇਮਸ੍ਸ ਪਰਿਤ੍ਤਸ੍ਸਾਨੁਭਾਵੇਨ ਨੇਵ ਭਯਂ, ਨ ਲੋਮਹਂਸੋ ਅਹੋਸਿ.

ਅਥੇਕੋ ਬਾਰਾਣਸਿਯਾ ਅਵਿਦੂਰੇ ਨੇਸਾਦਗਾਮਵਾਸੀ ਨੇਸਾਦੋ ਹਿਮਵਨ੍ਤਪਦੇਸੇ ਵਿਚਰਨ੍ਤੋ ਤਸ੍ਮਿਂ ਦਣ੍ਡਕਹਿਰਞ੍ਞਪਬ੍ਬਤਮਤ੍ਥਕੇ ਨਿਸਿਨ੍ਨਂ ਬੋਧਿਸਤ੍ਤਂ ਦਿਸ੍ਵਾ ਆਗਨ੍ਤ੍ਵਾ ਪੁਤ੍ਤਸ੍ਸ ਆਰੋਚੇਸਿ. ਅਥੇਕਦਿਵਸਂ ਖੇਮਾ ਨਾਮ ਬਾਰਾਣਸਿਰਞ੍ਞੋ ਦੇਵੀ ਸੁਪਿਨੇਨ ਸੁਵਣ੍ਣਵਣ੍ਣਂ ਮੋਰਂ ਧਮ੍ਮਂ ਦੇਸੇਨ੍ਤਂ ਦਿਸ੍ਵਾ ਪਬੁਦ੍ਧਕਾਲੇ ਰਞ੍ਞੋ ਆਰੋਚੇਸਿ – ‘‘ਅਹਂ, ਦੇਵ, ਸੁਵਣ੍ਣਵਣ੍ਣਸ੍ਸ ਮੋਰਸ੍ਸ ਧਮ੍ਮਂ ਸੋਤੁਕਾਮਾ’’ਤਿ. ਰਾਜਾ ਅਮਚ੍ਚੇ ਪੁਚ੍ਛਿ. ਅਮਚ੍ਚਾ ‘‘ਬ੍ਰਾਹ੍ਮਣਾ ਜਾਨਿਸ੍ਸਨ੍ਤੀ’’ਤਿ ਆਹਂਸੁ. ਬ੍ਰਾਹ੍ਮਣਾ ਤਂ ਸੁਤ੍ਵਾ ‘‘ਸੁਵਣ੍ਣਵਣ੍ਣਾ ਮੋਰਾ ਨਾਮ ਹੋਨ੍ਤੀ’’ਤਿ ਵਤ੍ਵਾ ‘‘ਕਤ੍ਥ ਹੋਨ੍ਤੀ’’ਤਿ ਵੁਤ੍ਤੇ ‘‘ਨੇਸਾਦਾ ਜਾਨਿਸ੍ਸਨ੍ਤੀ’’ਤਿ ਆਹਂਸੁ. ਰਾਜਾ ਨੇਸਾਦੇ ਸਨ੍ਨਿਪਾਤੇਤ੍ਵਾ ਪੁਚ੍ਛਿ. ਅਥ ਸੋ ਨੇਸਾਦਪੁਤ੍ਤੋ ‘‘ਆਮ, ਮਹਾਰਾਜ, ਦਣ੍ਡਕਹਿਰਞ੍ਞਪਬ੍ਬਤੋ ਨਾਮ ਅਤ੍ਥਿ, ਤਤ੍ਥ ਸੁਵਣ੍ਣਵਣ੍ਣੋ ਮੋਰੋ ਵਸਤੀ’’ਤਿ ਆਹ. ‘‘ਤੇਨ ਹਿ ਤਂ ਮੋਰਂ ਅਮਾਰੇਤ੍ਵਾ ਬਨ੍ਧਿਤ੍ਵਾਵ ਆਨੇਹੀ’’ਤਿ. ਨੇਸਾਦੋ ਗਨ੍ਤ੍ਵਾ ਤਸ੍ਸ ਗੋਚਰਭੂਮਿਯਂ ਪਾਸੇ ਓਡ੍ਡੇਸਿ. ਮੋਰੇਨ ਅਕ੍ਕਨ੍ਤਟ੍ਠਾਨੇਪਿ ਪਾਸੋ ਨ ਸਞ੍ਚਰਤਿ. ਨੇਸਾਦੋ ਗਣ੍ਹਿਤੁਂ ਅਸਕ੍ਕੋਨ੍ਤੋ ਸਤ੍ਤ ਵਸ੍ਸਾਨਿ ਵਿਚਰਿਤ੍ਵਾ ਤਤ੍ਥੇਵ ਕਾਲਮਕਾਸਿ. ਖੇਮਾਪਿ ਦੇਵੀ ਪਤ੍ਥਿਤਂ ਅਲਭਮਾਨਾ ਕਾਲਮਕਾਸਿ.