੪. ਅਸਦਿਸਵਗ੍ਗੋ

[੧੮੧] ੧. ਅਸਦਿਸਜਾਤਕਵਣ੍ਣਨਾ

ਧਨੁਗ੍ਗਹੋ ਅਸਦਿਸੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਹਾਭਿਨਿਕ੍ਖਮਨਂ ਆਰਬ੍ਭ ਕਥੇਸਿ. ਏਕਦਿਵਸਞ੍ਹਿ ਭਿਕ੍ਖੂ ਧਮ੍ਮਸਭਾਯਂ ਸਨ੍ਨਿਸਿਨ੍ਨਾ ਭਗਵਤੋ ਮਹਾਨਿਕ੍ਖਮਪਾਰਮਿਂ ਵਣ੍ਣੇਨ੍ਤਾ ਨਿਸੀਦਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਤਥਾਗਤੋ ਇਦਾਨੇਵ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋ, ਪੁਬ੍ਬੇਪਿ ਸੇਤਚ੍ਛਤ੍ਤਂ ਪਹਾਯ ਨਿਕ੍ਖਨ੍ਤੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ, ਤਸ੍ਸ ਸੋਤ੍ਥਿਨਾ ਜਾਤਸ੍ਸ ਨਾਮਗ੍ਗਹਣਦਿਵਸੇ ‘‘ਅਸਦਿਸਕੁਮਾਰੋ’’ਤਿ ਨਾਮਂ ਅਕਂਸੁ. ਅਥਸ੍ਸ ਆਧਾਵਿਤ੍ਵਾ ਪਰਿਧਾਵਿਤ੍ਵਾ ਵਿਚਰਣਕਾਲੇ ਅਞ੍ਞੋ ਪੁਞ੍ਞਵਾ ਸਤ੍ਤੋ ਦੇਵਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ, ਤਸ੍ਸ ਸੋਤ੍ਥਿਨਾ ਜਾਤਸ੍ਸ ਨਾਮਗ੍ਗਹਣਦਿਵਸੇ ‘‘ਬ੍ਰਹ੍ਮਦਤ੍ਤਕੁਮਾਰੋ’’ਤਿ ਨਾਮਂ ਅਕਂਸੁ. ਤੇਸੁ ਬੋਧਿਸਤ੍ਤੋ ਸੋਲ਼ਸਵਸ੍ਸਕਾਲੇ ਤਕ੍ਕਸਿਲਂ ਗਨ੍ਤ੍ਵਾ ਦਿਸਾਪਾਮੋਕ੍ਖਸ੍ਸ ਆਚਰਿਯਸ੍ਸ ਸਨ੍ਤਿਕੇ ਤਯੋ ਵੇਦੇ ਅਟ੍ਠਾਰਸ ਚ ਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਤੇਸੁ ਇਸ੍ਸਾਸਸਿਪ੍ਪੇ ਅਸਦਿਸੋ ਹੁਤ੍ਵਾ ਬਾਰਾਣਸਿਂ ਪਚ੍ਚਾਗਮਿ. ਰਾਜਾ ਕਾਲਂ ਕਰੋਨ੍ਤੋ ‘‘ਅਸਦਿਸਕੁਮਾਰਸ੍ਸ ਰਜ੍ਜਂ ਦਤ੍ਵਾ ਬ੍ਰਹ੍ਮਦਤ੍ਤਸ੍ਸ ਓਪਰਜ੍ਜਂ ਦੇਥਾ’’ਤਿ ਵਤ੍ਵਾ ਕਾਲਮਕਾਸਿ. ਤਸ੍ਮਿਂ ਕਾਲਕਤੇ ਬੋਧਿਸਤ੍ਤੋ ਅਤ੍ਤਨੋ ਰਜ੍ਜੇ ਦੀਯਮਾਨੇ ‘‘ਨ ਮਯ੍ਹਂ ਰਜ੍ਜੇਨਤ੍ਥੋ’’ਤਿ ਪਟਿਕ੍ਖਿਪਿ, ਬ੍ਰਹ੍ਮਦਤ੍ਤਂ ਰਜ੍ਜੇ ਅਭਿਸਿਞ੍ਚਿਂਸੁ. ਬੋਧਿਸਤ੍ਤੋ ‘‘ਮਯ੍ਹਂ ਰਜ੍ਜੇਨ ਅਤ੍ਥੋ ਨਤ੍ਥੀ’’ਤਿ ਕਿਞ੍ਚਿਪਿ ਨ ਇਚ੍ਛਿ, ਕਨਿਟ੍ਠੇ ਰਜ੍ਜਂ ਕਾਰੇਨ੍ਤੇ ਪਕਤਿਯਾ ਵਸਨਾਕਾਰੇਨੇਵ ਵਸਿ. ਰਾਜਪਾਦਮੂਲਿਕਾ ‘‘ਅਸਦਿਸਕੁਮਾਰੋ ਰਜ੍ਜਂ ਪਤ੍ਥੇਤੀ’’ਤਿ ਵਤ੍ਵਾ ਰਞ੍ਞੋ ਸਨ੍ਤਿਕੇ ਬੋਧਿਸਤ੍ਤਂ ਪਰਿਭਿਨ੍ਦਿਂਸੁ. ਸੋਪਿ ਤੇਸਂ ਵਚਨਂ ਗਹੇਤ੍ਵਾ ਪਰਿਭਿਨ੍ਨਚਿਤ੍ਤੋ ‘‘ਭਾਤਰਂ ਮੇ ਗਣ੍ਹਥਾ’’ਤਿ ਮਨੁਸ੍ਸੇ ਪਯੋਜੇਸਿ.

ਅਥੇਕੋ ਬੋਧਿਸਤ੍ਤਸ੍ਸ ਅਤ੍ਥਚਰਕੋ ਤਂ ਕਾਰਣਂ ਬੋਧਿਸਤ੍ਤਸ੍ਸ ਆਰੋਚੇਸਿ. ਬੋਧਿਸਤ੍ਤੋ ਕਨਿਟ੍ਠਭਾਤਿਕਸ੍ਸ ਕੁਜ੍ਝਿਤ੍ਵਾ ਨਗਰਾ ਨਿਕ੍ਖਮਿਤ੍ਵਾ ਅਞ੍ਞਂ ਰਟ੍ਠਂ ਗਨ੍ਤ੍ਵਾ ‘‘ਏਕੋ ਧਨੁਗ੍ਗਹੋ ਆਗਨ੍ਤ੍ਵਾ ਰਾਜਦ੍ਵਾਰੇ ਠਿਤੋ’’ਤਿ ਰਞ੍ਞੋ ਆਰੋਚਾਪੇਸਿ. ਰਾਜਾ ‘‘ਕਿਤ੍ਤਕਂ ਭੋਗਂ ਇਚ੍ਛਸੀ’’ਤਿ ਪੁਚ੍ਛਿ. ‘‘ਏਕਸਂਵਚ੍ਛਰੇਨ ਸਤਸਹਸ੍ਸ’’ਨ੍ਤਿ. ‘‘ਸਾਧੁ ਆਗਚ੍ਛਤੂ’’ਤਿ. ਅਥ ਨਂ ਆਗਨ੍ਤ੍ਵਾ ਸਮੀਪੇ ਠਿਤਂ ਪੁਚ੍ਛਿ – ‘‘ਤ੍ਵਂ ਧਨਗ੍ਗਹੋਸੀ’’ਤਿ? ‘‘ਆਮ, ਦੇਵਾ’’ਤਿ. ‘‘ਸਾਧੁ ਮਂ ਉਪਟ੍ਠਹਸ੍ਸੂ’’ਤਿ. ਸੋ ਤਤੋ ਪਟ੍ਠਾਯ ਰਾਜਾਨਂ ਉਪਟ੍ਠਹਿ. ਤਸ੍ਸ ਪਰਿਬ੍ਬਯਂ ਦੀਯਮਾਨਂ ਦਿਸ੍ਵਾ ‘‘ਅਤਿਬਹੁਂ ਲਭਤੀ’’ਤਿ ਪੋਰਾਣਕਧਨੁਗ੍ਗਹਾ ਉਜ੍ਝਾਯਿਂਸੁ. ਅਥੇਕਦਿਵਸਂ ਰਾਜਾ ਉਯ੍ਯਾਨਂ ਗਨ੍ਤ੍ਵਾ ਮਙ੍ਗਲਸਿਲਾਪਟ੍ਟਸਮੀਪੇ ਸਾਣਿਪਾਕਾਰਂ ਪਰਿਕ੍ਖਿਪਾਪੇਤ੍ਵਾ ਅਮ੍ਬਰੁਕ੍ਖਮੂਲੇ ਮਹਾਸਯਨੇ ਨਿਪਨ੍ਨੋ ਉਦ੍ਧਂ ਓਲੋਕੇਨ੍ਤੋ ਰੁਕ੍ਖਗ੍ਗੇ ਏਕਂ ਅਮ੍ਬਪਿਣ੍ਡਿਂ ਦਿਸ੍ਵਾ ‘‘ਇਮਂ ਨ ਸਕ੍ਕਾ ਅਭਿਰੁਹਿਤ੍ਵਾ ਗਣ੍ਹਿਤੁ’’ਨ੍ਤਿ ਧਨੁਗ੍ਗਹੇ ਪਕ੍ਕੋਸਾਪੇਤ੍ਵਾ ‘‘ਇਮਂ ਅਮ੍ਬਪਿਣ੍ਡਿਂ ਸਰੇਨ ਛਿਨ੍ਦਿਤ੍ਵਾ ਪਾਤੇਤੁਂ ਸਕ੍ਖਿਸ੍ਸਥਾ’’ਤਿ ਆਹ. ਨ ਤਂ, ਦੇਵ, ਅਮ੍ਹਾਕਂ ਗਰੁ, ਦੇਵੇਨ ਪਨ ਨੋ ਬਹੁਵਾਰੇ ਕਮ੍ਮਂ ਦਿਟ੍ਠਪੁਬ੍ਬਂ, ਅਧੁਨਾਗਤੋ ਧਨੁਗ੍ਗਹੋ ਅਮ੍ਹੇਹਿ ਬਹੁਤਰਂ ਲਭਤਿ, ਤਂ ਪਾਤਾਪੇਥਾਤਿ.

ਰਾਜਾ ਬੋਧਿਸਤ੍ਤਂ ਪਕ੍ਕੋਸਾਪੇਤ੍ਵਾ ‘‘ਸਕ੍ਖਿਸ੍ਸਸਿ, ਤਾਤ, ਏਤਂ ਪਾਤੇਤੁ’’ਨ੍ਤਿ ਪੁਚ੍ਛਿ. ‘‘ਆਮ, ਮਹਾਰਾਜ, ਏਕਂ ਓਕਾਸਂ ਲਭਮਾਨੋ ਸਕ੍ਖਿਸ੍ਸਾਮੀ’’ਤਿ. ‘‘ਕਤਰੋਕਾਸ’’ਨ੍ਤਿ? ‘‘ਤੁਮ੍ਹਾਕਂ ਸਯਨਸ੍ਸ ਅਨ੍ਤੋਕਾਸ’’ਨ੍ਤਿ. ਰਾਜਾ ਸਯਨਂ ਹਰਾਪੇਤ੍ਵਾ ਓਕਾਸਂ ਕਾਰੇਸਿ. ਬੋਧਿਸਤ੍ਤਸ੍ਸ ਹਤ੍ਥੇ ਧਨੁ ਨਤ੍ਥਿ, ਨਿਵਾਸਨਨ੍ਤਰੇ ਧਨੁਂ ਸਨ੍ਨਯ੍ਹਿਤ੍ਵਾ ਵਿਚਰਤਿ, ਤਸ੍ਮਾ ‘‘ਸਾਣਿਂ ਲਦ੍ਧੁਂ ਵਟ੍ਟਤੀ’’ਤਿ ਆਹ. ਰਾਜਾ ‘‘ਸਾਧੂ’’ਤਿ ਸਾਣਿਂ ਆਹਰਾਪੇਤ੍ਵਾ ਪਰਿਕ੍ਖਿਪਾਪੇਸਿ. ਬੋਧਿਸਤ੍ਤੋ ਅਨ੍ਤੋਸਾਣਿਂ ਪਵਿਸਿਤ੍ਵਾ ਉਪਰਿਨਿਵਤ੍ਥਂ ਸੇਤਵਤ੍ਥਂ ਹਰਿਤ੍ਵਾ ਏਕਂ ਰਤ੍ਤਪਟਂ ਨਿਵਾਸੇਤ੍ਵਾ ਕਚ੍ਛਂ ਬਨ੍ਧਿਤ੍ਵਾ ਏਕਂ ਰਤ੍ਤਪਟਂ ਉਦਰੇ ਬਨ੍ਧਿਤ੍ਵਾ ਪਸਿਬ੍ਬਕਤੋ ਸਨ੍ਧਿਯੁਤ੍ਤਂ ਖਗ੍ਗਂ ਨੀਹਰਿਤ੍ਵਾ ਵਾਮਪਸ੍ਸੇ ਸਨ੍ਨਯ੍ਹਿਤ੍ਵਾ ਸੁਵਣ੍ਣਕਞ੍ਚੁਕਂ ਪਟਿਮੁਞ੍ਚਿਤ੍ਵਾ ਚਾਪਨਾਲ਼ਿਂ ਪਿਟ੍ਠਿਯਂ ਸਨ੍ਨਯ੍ਹਿਤ੍ਵਾ ਸਨ੍ਧਿਯੁਤ੍ਤਮੇਣ੍ਡਕਮਹਾਧਨੁਂ ਆਦਾਯ ਪਵਾਲ਼ਵਣ੍ਣਂ ਜਿਯਂ ਆਰੋਪੇਤ੍ਵਾ ਉਣ੍ਹੀਸਂ ਸੀਸੇ ਪਟਿਮੁਞ੍ਚਿਤ੍ਵਾ ਤਿਖਿਣਖੁਰਪ੍ਪਂ ਨਖੇਹਿ ਪਰਿਵਤ੍ਤਯਮਾਨੋ ਸਾਣਿਂ ਦ੍ਵਿਧਾ ਕਤ੍ਵਾ ਪਥਵਿਂ ਫਾਲੇਤ੍ਵਾ ਅਲਙ੍ਕਤਨਾਗਕੁਮਾਰੋ ਵਿਯ ਨਿਕ੍ਖਮਿਤ੍ਵਾ ਸਰਖਿਪਨਟ੍ਠਾਨਂ ਗਨ੍ਤ੍ਵਾ ਖੁਰਪ੍ਪਂ ਸਨ੍ਨਯ੍ਹਿਤ੍ਵਾ ਰਾਜਾਨਂ ਆਹ – ‘‘ਕਿਂ, ਮਹਾਰਾਜ, ਏਤਂ ਅਮ੍ਬਪਿਣ੍ਡਿਂ ਉਦ੍ਧਂ ਆਰੋਹਨਕਣ੍ਡੇਨ ਪਾਤੇਮਿ, ਉਦਾਹੁ ਅਧੋ ਓਰੋਹਨਕਣ੍ਡੇਨਾ’’ਤਿ. ‘‘ਤਾਤ, ਬਹੂ ਮਯਾ ਆਰੋਹਨਕਣ੍ਡੇਨ ਪਾਤੇਨ੍ਤਾ ਦਿਟ੍ਠਪੁਬ੍ਬਾ, ਓਰੋਹਨਕਣ੍ਡੇਨ ਪਨ ਪਾਤੇਨ੍ਤਾ ਮਯਾ ਨ ਦਿਟ੍ਠਪੁਬ੍ਬਾ, ਓਰੋਹਨਕਣ੍ਡੇਨ ਪਾਤੇਹੀ’’ਤਿ. ‘‘ਮਹਾਰਾਜ, ਇਦਂ ਕਣ੍ਡਂ ਦੂਰਂ ਆਰੋਹਿਸ੍ਸਤਿ, ਯਾਵ ਚਾਤੁਮਹਾਰਾਜਿਕਭਵਨਂ, ਤਾਵ ਗਨ੍ਤ੍ਵਾ ਸਯਂ ਓਰੋਹਿਸ੍ਸਤਿ, ਯਾਵਸ੍ਸ ਓਰੋਹਨਂ, ਤਾਵ ਤੁਮ੍ਹੇਹਿ ਅਧਿਵਾਸੇਤੁਂ ਵਟ੍ਟਤੀ’’ਤਿ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ.

ਅਥ ਨਂ ਪੁਨ ਆਹ – ‘‘ਮਹਾਰਾਜ, ਇਦਂ ਕਣ੍ਡਂ ਪਨ ਆਰੋਹਮਾਨਂ ਅਮ੍ਬਪਿਣ੍ਡਿਵਣ੍ਟਂ ਯਾਵਮਜ੍ਝਂ ਕਨ੍ਤਮਾਨਂ ਆਰੋਹਿਸ੍ਸਤਿ, ਓਰੋਹਮਾਨਂ ਕੇਸਗ੍ਗਮਤ੍ਤਮ੍ਪਿ ਇਤੋ ਵਾ ਏਤ੍ਤੋ ਵਾ ਅਗਨ੍ਤ੍ਵਾ ਉਜੁਞ੍ਞੇਵ ਪਤਿਤ੍ਵਾ ਅਮ੍ਬਪਿਣ੍ਡਿਂ ਗਹੇਤ੍ਵਾ ਓਤਰਿਸ੍ਸਤਿ, ਪਸ੍ਸ, ਮਹਾਰਾਜਾ’’ਤਿ ਵੇਗਂ ਜਨੇਤ੍ਵਾ ਕਣ੍ਡਂ ਖਿਪਿ. ਤਂ ਕਣ੍ਡਂ ਅਮ੍ਬਪਿਣ੍ਡਿਵਣ੍ਟਂ ਯਾਵਮਜ੍ਝਂ ਕਨ੍ਤਮਾਨਂ ਅਭਿਰੁਹਿ. ਬੋਧਿਸਤ੍ਤੋ ‘‘ਇਦਾਨਿ ਤਂ ਕਣ੍ਡਂ ਯਾਵ ਚਾਤੁਮਹਾਰਾਜਿਕਭਵਨਂ ਗਤਂ ਭਵਿਸ੍ਸਤੀ’’ਤਿ ਞਤ੍ਵਾ ਪਠਮਂ ਖਿਤ੍ਤਕਣ੍ਡਤੋ ਅਧਿਕਤਰਂ ਵੇਗਂ ਜਨੇਤ੍ਵਾ ਅਞ੍ਞਂ ਕਣ੍ਡਂ ਖਿਪਿ, ਤਂ ਗਨ੍ਤ੍ਵਾ ਪੁਰਿਮਕਣ੍ਡਪੁਙ੍ਖੇ ਪਹਰਿਤ੍ਵਾ ਨਿਵਤ੍ਤਿਤ੍ਵਾ ਸਯਂ ਤਾਵਤਿਂਸਭਵਨਂ ਅਭਿਰੁਹਿ. ਤਤ੍ਥ ਨਂ ਦੇਵਤਾ ਅਗ੍ਗਹੇਸੁਂ, ਨਿਵਤ੍ਤਨਕਣ੍ਡਸ੍ਸ ਵਾਤਛਿਨ੍ਨਸਦ੍ਦੋ ਅਸਨਿਸਦ੍ਦੋ ਵਿਯ ਅਹੋਸਿ. ਮਹਾਜਨੇਨ ‘‘ਕਿਂ ਏਸੋ ਸਦ੍ਦੋ’’ਤਿ ਵੁਤ੍ਤੇ ਬੋਧਿਸਤ੍ਤੋ ‘‘ਨਿਵਤ੍ਤਨਕਣ੍ਡਸ੍ਸ ਸਦ੍ਦੋ’’ਤਿ ਵਤ੍ਵਾ ਅਤ੍ਤਨੋ ਅਤ੍ਤਨੋ ਸਰੀਰੇ ਕਣ੍ਡਸ੍ਸ ਪਤਨਭਾਵਂ ਞਤ੍ਵਾ ਭੀਤਤਸਿਤਂ ਮਹਾਜਨਂ ‘‘ਮਾ ਭਾਯਿਤ੍ਥਾ’’ਤਿ ਸਮਸ੍ਸਾਸੇਤ੍ਵਾ ‘‘ਕਣ੍ਡਸ੍ਸ ਭੂਮਿਯਂ ਪਤਿਤੁਂ ਨ ਦਸ੍ਸਾਮੀ’’ਤਿ ਆਹ. ਕਣ੍ਡਂ ਓਤਰਮਾਨਂ ਕੇਸਗ੍ਗਮਤ੍ਤਮ੍ਪਿ ਇਤੋ ਵਾ ਏਤ੍ਤੋ ਵਾ ਅਗਨ੍ਤ੍ਵਾ ਉਜੁਞ੍ਞੇਵ ਪਤਿਤ੍ਵਾ ਅਮ੍ਬਪਿਣ੍ਡਿਂ ਛਿਨ੍ਦਿ. ਬੋਧਿਸਤ੍ਤੋ ਅਮ੍ਬਪਿਣ੍ਡਿਯਾ ਚ ਕਣ੍ਡਸ੍ਸ ਚ ਭੂਮਿਯਂ ਪਤਿਤੁਂ ਅਦਤ੍ਵਾ ਆਕਾਸੇਯੇਵ ਸਮ੍ਪਟਿਚ੍ਛਨ੍ਤੋ ਏਕੇਨ ਹਤ੍ਥੇਨ ਅਮ੍ਬਪਿਣ੍ਡਿਂ, ਏਕੇਨ ਹਤ੍ਥੇਨ ਕਣ੍ਡਂ ਅਗ੍ਗਹੇਸਿ. ਮਹਾਜਨੋ ਤਂ ਅਚ੍ਛਰਿਯਂ ਦਿਸ੍ਵਾ ‘‘ਨ ਨੋ ਏਵਰੂਪਂ ਦਿਟ੍ਠਪੁਬ੍ਬ’’ਨ੍ਤਿ ਮਹਾਪੁਰਿਸਂ ਪਸਂਸਤਿ ਉਨ੍ਨਦਤਿ ਅਪ੍ਫੋਟੇਤਿ ਅਙ੍ਗੁਲਿਯੋ ਵਿਧੂਨਤਿ, ਚੇਲੁਕ੍ਖੇਪਸਹਸ੍ਸਾਨਿ ਪਵਤ੍ਤੇਤਿ. ਰਾਜਪਰਿਸਾਯ ਤੁਟ੍ਠਪਹਟ੍ਠਾਯ ਬੋਧਿਸਤ੍ਤਸ੍ਸ ਦਿਨ੍ਨਧਨਂ ਕੋਟਿਮਤ੍ਤਂ ਅਹੋਸਿ. ਰਾਜਾਪਿਸ੍ਸ ਧਨਵਸ੍ਸਂ ਵਸ੍ਸੇਨ੍ਤੋ ਵਿਯ ਬਹੁਂ ਧਨਂ ਮਹਨ੍ਤਞ੍ਚ ਯਸਂ ਅਦਾਸਿ.

ਏਵਂ ਬੋਧਿਸਤ੍ਤੇ ਤੇਨ ਰਞ੍ਞਾ ਸਕ੍ਕਤੇ ਗਰੁਕਤੇ ਤਤ੍ਥ ਵਸਨ੍ਤੇ ‘‘ਅਸਦਿਸਕੁਮਾਰੋ ਕਿਰ ਬਾਰਾਣਸਿਯਂ ਨਤ੍ਥੀ’’ਤਿ ਸਤ੍ਤ ਰਾਜਾਨੋ ਆਗਨ੍ਤ੍ਵਾ ਬਾਰਾਣਸਿਨਗਰਂ ਪਰਿਵਾਰੇਤ੍ਵਾ ‘‘ਰਜ੍ਜਂ ਵਾ ਦੇਤੁ ਯੁਦ੍ਧਂ ਵਾ’’ਤਿ ਰਞ੍ਞੋ ਪਣ੍ਣਂ ਪੇਸੇਸੁਂ. ਰਾਜਾ ਮਰਣਭਯਭੀਤੋ ‘‘ਕੁਹਿਂ ਮੇ ਭਾਤਾ ਵਸਤੀ’’ਤਿ ਪੁਚ੍ਛਿਤ੍ਵਾ ‘‘ਏਕਂ ਸਾਮਨ੍ਤਰਾਜਾਨਂ ਉਪਟ੍ਠਹਤੀ’’ਤਿ ਸੁਤ੍ਵਾ ‘‘ਮਮ ਭਾਤਿਕੇ ਅਨਾਗਚ੍ਛਨ੍ਤੇ ਮਯ੍ਹਂ ਜੀਵਿਤਂ ਨਤ੍ਥਿ, ਗਚ੍ਛਥ ਤਸ੍ਸ ਮਮ ਵਚਨੇਨ ਪਾਦੇ ਵਨ੍ਦਿਤ੍ਵਾ ਖਮਾਪੇਤ੍ਵਾ ਗਣ੍ਹਿਤ੍ਵਾ ਆਗਚ੍ਛਥਾ’’ਤਿ ਦੂਤੇ ਪਾਹੇਸਿ. ਤੇ ਗਨ੍ਤ੍ਵਾ ਬੋਧਿਸਤ੍ਤਸ੍ਸ ਤਂ ਪਵਤ੍ਤਿਂ ਆਰੋਚੇਸੁਂ. ਬੋਧਿਸਤ੍ਤੋ ਤਂ ਰਾਜਾਨਂ ਆਪੁਚ੍ਛਿਤ੍ਵਾ ਬਾਰਾਣਸਿਂ ਪਚ੍ਚਾਗਨ੍ਤ੍ਵਾ ਰਾਜਾਨਂ ‘‘ਮਾ ਭਾਯੀ’’ਤਿ ਸਮਸ੍ਸਾਸੇਤ੍ਵਾ ਕਣ੍ਡੇ ਅਕ੍ਖਰਾਨਿ ਛਿਨ੍ਦਿਤ੍ਵਾ ‘‘ਅਹਂ ਅਸਦਿਸਕੁਮਾਰੋ ਆਗਤੋ, ਅਞ੍ਞਂ ਏਕਕਣ੍ਡਂ ਖਿਪਨ੍ਤੋ ਸਬ੍ਬੇਸਂ ਵੋ ਜੀਵਿਤਂ ਹਰਿਸ੍ਸਾਮਿ, ਜੀਵਿਤੇਨ ਅਤ੍ਥਿਕਾ ਪਲਾਯਨ੍ਤੂ’’ਤਿ ਅਟ੍ਟਾਲਕੇ ਠਤ੍ਵਾ ਸਤ੍ਤਨ੍ਨਂ ਰਾਜੂਨਂ ਭੁਞ੍ਜਨ੍ਤਾਨਂ ਕਞ੍ਚਨਪਾਤਿਮਕੁਲੇਯੇਵ ਕਣ੍ਡਂ ਪਾਤੇਸਿ. ਤੇ ਅਕ੍ਖਰਾਨਿ ਦਿਸ੍ਵਾ ਮਰਣਭਯਭੀਤਾ ਸਬ੍ਬੇਵ ਪਲਾਯਿਂਸੁ. ਏਵਂ ਮਹਾਸਤ੍ਤੋ ਖੁਦ੍ਦਕਮਕ੍ਖਿਕਾਯ ਪਿਵਨਮਤ੍ਤਮ੍ਪਿ ਲੋਹਿਤਂ ਅਨੁਪ੍ਪਾਦੇਤ੍ਵਾ ਸਤ੍ਤ ਰਾਜਾਨੋ ਪਲਾਪੇਤ੍ਵਾ ਕਨਿਟ੍ਠਭਾਤਰਂ ਅਪਲੋਕੇਤ੍ਵਾ ਕਾਮੇ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਜੀਵਿਤਪਰਿਯੋਸਾਨੇ ਬ੍ਰਹ੍ਮਲੋਕੂਪਗੋ ਅਹੋਸਿ.

ਸਤ੍ਥਾ ‘‘ਏਵਂ, ਭਿਕ੍ਖਵੇ, ਅਸਦਿਸਕੁਮਾਰੋ ਸਤ੍ਤ ਰਾਜਾਨੋ ਪਲਾਪੇਤ੍ਵਾ ਵਿਜਿਤਸਙ੍ਗਾਮੋ ਇਸਿਪਬ੍ਬਜ੍ਜਂ ਪਬ੍ਬਜਿਤੋ’’ਤਿ ਅਭਿਸਮ੍ਬੁਦ੍ਧੋ ਹੁਤ੍ਵਾ ਇਮਾ ਗਾਥਾ ਅਵੋਚ –

੬੧. ‘‘ਧਨੁਗ੍ਗਹੋ ਅਸਦਿਸੋ, ਰਾਜਪੁਤ੍ਤੋ ਮਹਬ੍ਬਲੋ;

ਦੂਰੇਪਾਤੀ ਅਕ੍ਖਣਵੇਧੀ, ਮਹਾਕਾਯਪ੍ਪਦਾਲਨੋ.

੬੨. ‘‘ਸਬ੍ਬਾਮਿਤ੍ਤੇ ਰਣਂ ਕਤ੍ਵਾ, ਨ ਚ ਕਞ੍ਚਿ ਵਿਹੇਠਯਿ;

ਭਾਤਰਂ ਸੋਤ੍ਥਿਂ ਕਤ੍ਵਾਨ, ਸਂਯਮਂ ਅਜ੍ਝੁਪਾਗਮੀ’’ਤਿ.

ਤਤ੍ਥ ਅਸਦਿਸੋਤਿ ਨ ਕੇਵਲਂ ਨਾਮੇਨੇਵ, ਬਲਵੀਰਿਯਪਞ੍ਞਾਹਿਪਿ ਅਸਦਿਸੋਵ. ਮਹਬ੍ਬਲੋਤਿ ਕਾਯਬਲੇਨਪਿ ਪਞ੍ਞਾਬਲੇਨਪਿ ਮਹਬ੍ਬਲੋ. ਦੂਰੇਪਾਤੀਤਿ ਯਾਵ ਚਾਤੁਮਹਾਰਾਜਿਕਭਵਨਾ ਤਾਵਤਿਂਸਭਵਨਾ ਚ ਕਣ੍ਡਂ ਪੇਸੇਤੁਂ ਸਮਤ੍ਥਤਾਯ ਦੂਰੇਪਾਤੀ. ਅਕ੍ਖਣਵੇਧੀਤਿ ਅਵਿਰਾਧਿਤਵੇਧੀ. ਅਥ ਵਾ ਅਕ੍ਖਣਾ ਵੁਚ੍ਚਤਿ ਵਿਜ੍ਜੁ, ਯਾਵ ਏਕਾ ਵਿਜ੍ਜੁ ਨਿਚ੍ਛਰਤਿ, ਤਾਵ ਤੇਨੋਭਾਸੇਨ ਸਤ੍ਤਟ੍ਠ ਵਾਰੇ ਕਣ੍ਡਾਨਿ ਗਹੇਤ੍ਵਾ ਵਿਜ੍ਝਤੀਤਿ ਅਕ੍ਖਣਵੇਧੀ. ਮਹਾਕਾਯਪ੍ਪਦਾਲਨੋਤਿ ਮਹਨ੍ਤੇ ਕਾਯੇ ਪਦਾਲੇਤਿ. ਚਮ੍ਮਕਾਯੋ, ਦਾਰੁਕਾਯੋ, ਲੋਹਕਾਯੋ, ਅਯੋਕਾਯੋ, ਵਾਲਿਕਕਾਯੋ, ਉਦਕਕਾਯੋ, ਫਲਕਕਾਯੋਤਿ ਇਮੇ ਸਤ੍ਤ ਮਹਾਕਾਯਾ ਨਾਮ. ਤਤ੍ਥ ਅਞ੍ਞੋ ਚਮ੍ਮਕਾਯਪਦਾਲਨੋ ਮਹਿਂਸਚਮ੍ਮਂ ਵਿਨਿਵਿਜ੍ਝਤਿ, ਸੋ ਪਨ ਸਤਮ੍ਪਿ ਮਹਿਂਸਚਮ੍ਮਾਨਂ ਵਿਨਿਵਿਜ੍ਝਤਿਯੇਵ. ਅਞ੍ਞੋ ਅਟ੍ਠਙ੍ਗੁਲਬਹਲਂ ਉਦੁਮ੍ਬਰਪਦਰਂ, ਚਤੁਰਙ੍ਗੁਲਬਹਲਂ ਅਸਨਪਦਰਂ ਵਿਨਿਵਿਜ੍ਝਤਿ, ਸੋ ਪਨ ਫਲਕਸਤਮ੍ਪਿ ਏਕਤੋ ਬਦ੍ਧਂ ਵਿਨਿਵਿਜ੍ਝਤਿ, ਤਥਾ ਦ੍ਵਙ੍ਗੁਲਬਹਲਂ ਤਮ੍ਬਲੋਹਪਟ੍ਟਂ, ਅਙ੍ਗੁਲਬਹਲਂ ਅਯਪਟ੍ਟਂ. ਵਾਲਿਕਸਕਟਸ੍ਸ ਬਦਰਸਕਟਸ੍ਸ ਪਲਾਲਸਕਟਸ੍ਸ ਵਾ ਪਚ੍ਛਾਭਾਗੇਨ ਕਣ੍ਡਂ ਪਵੇਸੇਤ੍ਵਾ ਪੁਰੇਭਾਗੇਨ ਅਤਿਪਾਤੇਤਿ, ਪਕਤਿਯਾ ਉਦਕੇ ਚਤੁਉਸਭਟ੍ਠਾਨਂ ਕਣ੍ਡਂ ਪੇਸੇਤਿ, ਥਲੇ ਅਟ੍ਠਉਸਭਨ੍ਤਿ ਏਵਂ ਇਮੇਸਂ ਸਤ੍ਤਨ੍ਨਂ ਮਹਾਕਾਯਾਨਂ ਪਦਾਲਨਤੋ ਮਹਾਕਾਯਪ੍ਪਦਾਲਨੋ. ਸਬ੍ਬਾਮਿਤ੍ਤੇਤਿ ਸਬ੍ਬੇ ਅਮਿਤ੍ਤੇ. ਰਣਂ ਕਤ੍ਵਾਤਿ ਯੁਦ੍ਧਂ ਕਤ੍ਵਾ ਪਲਾਪੇਸੀਤਿ ਅਤ੍ਥੋ. ਨ ਚ ਕਞ੍ਚਿ ਵਿਹੇਠਯੀਤਿ ਏਕਮ੍ਪਿ ਨ ਵਿਹੇਠੇਸਿ. ਅਵਿਹੇਠਯਨ੍ਤੋਯੇਵ ਪਨ ਤੇਹਿ ਸਦ੍ਧਿਂ ਕਣ੍ਡਪੇਸਨੇਨੇਵ ਰਣਂ ਕਤ੍ਵਾ. ਸਂਯਮਂ ਅਜ੍ਝੁਪਾਗਮੀਤਿ ਸੀਲਸਂਯਮਂ ਪਬ੍ਬਜ੍ਜਂ ਉਪਗਤੋ.

ਏਵਂ ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕਨਿਟ੍ਠਭਾਤਾ ਆਨਨ੍ਦੋ ਅਹੋਸਿ, ਅਸਦਿਸਕੁਮਾਰੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਅਸਦਿਸਜਾਤਕਵਣ੍ਣਨਾ ਪਠਮਾ.

[੧੮੨] ੨. ਸਙ੍ਗਾਮਾਵਚਰਜਾਤਕਵਣ੍ਣਨਾ

ਸਙ੍ਗਾਮਾਵਚਰੋ ਸੂਰੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਨਨ੍ਦਤ੍ਥੇਰਂ ਆਰਬ੍ਭ ਕਥੇਸਿ. ਸਤ੍ਥਰਿ ਹਿ ਪਠਮਗਮਨੇਨ ਕਪਿਲਪੁਰਂ ਗਨ੍ਤ੍ਵਾ ਕਨਿਟ੍ਠਭਾਤਿਕਂ ਨਨ੍ਦਰਾਜਕੁਮਾਰਂ ਪਬ੍ਬਾਜੇਤ੍ਵਾ ਕਪਿਲਪੁਰਾ ਨਿਕ੍ਖਮ੍ਮ ਅਨੁਪੁਬ੍ਬੇਨ ਸਾਵਤ੍ਥਿਂ ਗਨ੍ਤ੍ਵਾ ਵਿਹਰਨ੍ਤੇ ਆਯਸ੍ਮਾ ਨਨ੍ਦੋ ਭਗਵਤੋ ਪਤ੍ਤਂ ਆਦਾਯ ਤਥਾਗਤੇਨ ਸਦ੍ਧਿਂ ਗੇਹਾ ਨਿਕ੍ਖਮਨਕਾਲੇ ‘‘ਨਨ੍ਦਕੁਮਾਰੋ ਕਿਰ ਸਤ੍ਥਾਰਾ ਸਦ੍ਧਿਂ ਗਚ੍ਛਤੀ’’ਤਿ ਸੁਤ੍ਵਾ ਅਡ੍ਢੁਲ੍ਲਿਖਿਤੇਹਿ ਕੇਸੇਹਿ ਵਾਤਪਾਨਨ੍ਤਰੇਨ ਓਲੋਕੇਤ੍ਵਾ ‘‘ਤੁਵਟਂ ਖੋ, ਅਯ੍ਯਪੁਤ੍ਤ, ਆਗਚ੍ਛੇਯ੍ਯਾਸੀ’’ਤਿ ਇਦਂ ਜਨਪਦਕਲ੍ਯਾਣਿਯਾ ਵੁਤ੍ਤਵਚਨਂ ਅਨੁਸ੍ਸਰਨ੍ਤੋ ਉਕ੍ਕਣ੍ਠਿਤੋ ਅਨਭਿਰਤੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ ਅਹੋਸਿ. ਸਤ੍ਥਾ ਤਸ੍ਸ ਤਂ ਪਵਤ੍ਤਿਂ ਞਤ੍ਵਾ ‘‘ਯਂਨੂਨਾਹਂ ਨਨ੍ਦਂ ਅਰਹਤ੍ਤੇ ਪਤਿਟ੍ਠਾਪੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਤਸ੍ਸ ਵਸਨਪਰਿਵੇਣਂ ਗਨ੍ਤ੍ਵਾ ਪਞ੍ਞਤ੍ਤਾਸਨੇ ਨਿਸਿਨ੍ਨੋ ‘‘ਕਚ੍ਚਿ, ਨਨ੍ਦ, ਇਮਸ੍ਮਿਂ ਸਾਸਨੇ ਅਭਿਰਮਸੀ’’ਤਿ ਪੁਚ੍ਛਿ. ‘‘ਭਨ੍ਤੇ, ਜਨਪਦਕਲ੍ਯਾਣਿਯਾ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ਨਾਭਿਰਮਾਮੀ’’ਤਿ. ‘‘ਹਿਮਵਨ੍ਤਚਾਰਿਕਂ ਗਤਪੁਬ੍ਬੋਸਿ ਨਨ੍ਦਾ’’ਤਿ? ‘‘ਨ ਗਤਪੁਬ੍ਬੋ, ਭਨ੍ਤੇ’’ਤਿ. ‘‘ਤੇਨ ਹਿ ਗਚ੍ਛਾਮਾ’’ਤਿ. ‘‘ਨਤ੍ਥਿ ਮੇ, ਭਨ੍ਤੇ, ਇਦ੍ਧਿ, ਕਤਾਹਂ ਗਮਿਸ੍ਸਾਮੀ’’ਤਿ. ਸਤ੍ਥਾ ‘‘ਅਹਂ ਤਂ, ਨਨ੍ਦ, ਮਮ ਇਦ੍ਧਿਬਲੇਨ ਨੇਸ੍ਸਾਮੀ’’ਤਿ ਥੇਰਂ ਹਤ੍ਥੇ ਗਹੇਤ੍ਵਾ ਆਕਾਸਂ ਪਕ੍ਖਨ੍ਦਨ੍ਤੋ ਅਨ੍ਤਰਾਮਗ੍ਗੇ ਏਕਸ੍ਮਿਂ ਝਾਮਖੇਤ੍ਤੇ ਝਾਮਖਾਣੁਕੇ ਨਿਸਿਨ੍ਨਂ ਛਿਨ੍ਨਕਣ੍ਣਨਾਸਨਙ੍ਗੁਟ੍ਠਂ ਝਾਮਲੋਮਂ ਛਿਨ੍ਨਛਵਿਂ ਚਮ੍ਮਮਤ੍ਤਂ ਲੋਹਿਤਪਲਿਗੁਣ੍ਠਿਤਂ ਏਕਂ ਪਲੁਟ੍ਠਮਕ੍ਕਟਿਂ ਦਸ੍ਸੇਸਿ – ‘‘ਪਸ੍ਸਸਿ, ਨਨ੍ਦ, ਏਤਂ ਮਕ੍ਕਟਿ’’ਨ੍ਤਿ. ‘‘ਆਮ, ਭਨ੍ਤੇ’’ਤਿ. ‘‘ਸੁਟ੍ਠੁ ਪਚ੍ਚਕ੍ਖਂ ਕਰੋਹੀ’’ਤਿ.

ਅਥ ਨਂ ਗਹੇਤ੍ਵਾ ਸਟ੍ਠਿਯੋਜਨਿਕਂ ਮਨੋਸਿਲਾਤਲਂ, ਅਨੋਤਤ੍ਤਦਹਾਦਯੋ ਸਤ੍ਤ ਮਹਾਸਰੇ, ਪਞ੍ਚ ਮਹਾਨਦਿਯੋ, ਸੁਵਣ੍ਣਪਬ੍ਬਤਰਜਤਪਬ੍ਬਤਮਣਿਪਬ੍ਬਤਪਟਿਮਣ੍ਡਿਤਂ ਅਨੇਕਸਤਰਾਮਣੇਯ੍ਯਕਂ ਹਿਮਵਨ੍ਤਪਬ੍ਬਤਞ੍ਚ ਦਸ੍ਸੇਤ੍ਵਾ ‘‘ਤਾਵਤਿਂਸਭਵਨਂ ਤੇ, ਨਨ੍ਦ, ਦਿਟ੍ਠਪੁਬ੍ਬ’’ਨ੍ਤਿ ਪੁਚ੍ਛਿਤ੍ਵਾ ‘‘ਨ, ਦਿਟ੍ਠਪੁਬ੍ਬਂ, ਭਨ੍ਤੇ’’ਤਿ ਵੁਤ੍ਤੇ ‘‘ਏਹਿ, ਨਨ੍ਦ, ਤਾਵਤਿਂਸਭਵਨਂ ਤੇ ਦਸ੍ਸਯਿਸ੍ਸਾਮੀ’’ਤਿ ਤਤ੍ਥ ਨੇਤ੍ਵਾ ਪਣ੍ਡੁਕਮ੍ਬਲਸਿਲਾਸਨੇ ਨਿਸੀਦਿ. ਸਕ੍ਕੋ ਦੇਵਰਾਜਾ ਦ੍ਵੀਸੁ ਦੇਵਲੋਕੇਸੁ ਦੇਵਸਙ੍ਘੇਨ ਸਦ੍ਧਿਂ ਆਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਅਡ੍ਢਤਿਯਕੋਟਿਸਙ੍ਖਾ ਤਸ੍ਸ ਪਰਿਚਾਰਿਕਾ ਪਞ੍ਚਸਤਾ ਕਕੁਟਪਾਦਾ ਦੇਵਚ੍ਛਰਾਯੋਪਿ ਆਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਸਤ੍ਥਾ ਆਯਸ੍ਮਨ੍ਤਂ ਨਨ੍ਦਂ ਤਾ ਪਞ੍ਚਸਤਾ ਅਚ੍ਛਰਾ ਕਿਲੇਸਵਸੇਨ ਪੁਨਪ੍ਪੁਨਂ ਓਲੋਕਾਪੇਸਿ. ‘‘ਪਸ੍ਸਸਿ, ਨਨ੍ਦ, ਇਮਾ ਕਕੁਟਪਾਦਿਨਿਯੋ ਅਚ੍ਛਰਾਯੋ’’ਤਿ? ‘‘ਆਮ, ਭਨ੍ਤੇ’’ਤਿ. ‘‘ਕਿਂ ਨੁ ਖੋ ਏਤਾ ਸੋਭਨ੍ਤਿ, ਉਦਾਹੁ ਜਨਪਦਕਲ੍ਯਾਣੀ’’ਤਿ. ‘‘ਸੇਯ੍ਯਥਾਪਿ, ਭਨ੍ਤੇ, ਜਨਪਦਕਲ੍ਯਾਣਿਂ ਉਪਨਿਧਾਯ ਸਾ ਪਲੁਟ੍ਠਮਕ੍ਕਟੀ, ਏਵਮੇਵ ਇਮਾ ਉਪਨਿਧਾਯ ਜਨਪਦਕਲ੍ਯਾਣੀ’’ਤਿ. ‘‘ਇਦਾਨਿ ਕਿਂ ਕਰਿਸ੍ਸਸਿ ਨਨ੍ਦਾ’’ਤਿ? ‘‘ਕਿਂ ਕਮ੍ਮਂ ਕਤ੍ਵਾ, ਭਨ੍ਤੇ, ਇਮਾ ਅਚ੍ਛਰਾ ਲਭਨ੍ਤੀ’’ਤਿ? ‘‘ਸਮਣਧਮ੍ਮਂ ਕਤ੍ਵਾ’’ਤਿ. ‘‘ਸਚੇ ਮੇ, ਭਨ੍ਤੇ, ਇਮਾਸਂ ਪਟਿਲਾਭਤ੍ਥਾਯ ਭਗਵਾ ਪਾਟਿਭੋਗੋ ਹੋਤਿ, ਅਹਂ ਸਮਣਧਮ੍ਮਂ ਕਰਿਸ੍ਸਾਮੀ’’ਤਿ. ‘‘ਕਰੋਹਿ, ਨਨ੍ਦ, ਅਹਂ ਤੇ ਪਾਟਿਭੋਗੋ’’ਤਿ. ਏਵਂ ਥੇਰੋ ਦੇਵਸਙ੍ਘਸ੍ਸ ਮਜ੍ਝੇ ਤਥਾਗਤਂ ਪਾਟਿਭੋਗਂ ਗਹੇਤ੍ਵਾ ‘‘ਮਾ, ਭਨ੍ਤੇ, ਅਤਿਪਪਞ੍ਚਂ ਕਰੋਥ, ਏਥ ਗਚ੍ਛਾਮ, ਅਹਂ ਸਮਣਧਮ੍ਮਂ ਕਰਿਸ੍ਸਾਮੀ’’ਤਿ ਆਹ. ਸਤ੍ਥਾ ਤਂ ਆਦਾਯ ਜੇਤਵਨਮੇਵ ਪਚ੍ਚਾਗਮਿ. ਥੇਰੋ ਸਮਣਧਮ੍ਮਂ ਕਾਤੁਂ ਆਰਭਿ.

ਸਤ੍ਥਾ ਧਮ੍ਮਸੇਨਾਪਤਿਂ ਆਮਨ੍ਤੇਤ੍ਵਾ ‘‘ਸਾਰਿਪੁਤ੍ਤ, ਮਯ੍ਹਂ ਕਨਿਟ੍ਠਭਾਤਾ ਨਨ੍ਦੋ ਤਾਵਤਿਂਸਦੇਵਲੋਕੇ ਦੇਵਸਙ੍ਘਸ੍ਸ ਮਜ੍ਝੇ ਦੇਵਚ੍ਛਰਾਨਂ ਕਾਰਣਾ ਮਂ ਪਾਟਿਭੋਗਂ ਅਗ੍ਗਹੇਸੀ’’ਤਿ ਤਸ੍ਸ ਆਚਿਕ੍ਖਿ. ਏਤੇਨੁਪਾਯੇਨ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਮਹਾਕਸ੍ਸਪਤ੍ਥੇਰਸ੍ਸ ਅਨੁਰੁਦ੍ਧਤ੍ਥੇਰਸ੍ਸ ਧਮ੍ਮਭਣ੍ਡਾਗਾਰਿਕਆਨਨ੍ਦਤ੍ਥੇਰਸ੍ਸਾਤਿ ਅਸੀਤਿਯਾ ਮਹਾਸਾਵਕਾਨਂ ਯੇਭੁਯ੍ਯੇਨ ਚ ਸੇਸਭਿਕ੍ਖੂਨਂ ਆਚਿਕ੍ਖਿ. ਧਮ੍ਮਸੇਨਾਪਤਿ ਸਾਰਿਪੁਤ੍ਤਤ੍ਥੇਰੋ ਨਨ੍ਦਤ੍ਥੇਰਂ ਉਪਸਙ੍ਕਮਿਤ੍ਵਾ ‘‘ਸਚ੍ਚਂ ਕਿਰ ਤ੍ਵਂ, ਆਵੁਸੋ ਨਨ੍ਦ, ਤਾਵਤਿਂਸਦੇਵਲੋਕੇ ਦੇਵਸਙ੍ਘਸ੍ਸ ਮਜ੍ਝੇ ‘ਦੇਵਚ੍ਛਰਾ ਲਭਨ੍ਤੋ ਸਮਣਧਮ੍ਮਂ ਕਰਿਸ੍ਸਾਮੀ’ਤਿ ਦਸਬਲਂ ਪਾਟਿਭੋਗਂ ਗਣ੍ਹੀ’’ਤਿ ਵਤ੍ਵਾ ‘‘ਨਨੁ ਏਵਂ ਸਨ੍ਤੇ ਤਵ ਬ੍ਰਹ੍ਮਚਰਿਯਵਾਸੋ ਮਾਤੁਗਾਮਸਨ੍ਨਿਸ੍ਸਿਤੋ ਕਿਲੇਸਸਨ੍ਨਿਸ੍ਸਿਤੋ, ਤਸ੍ਸ ਤੇ ਇਤ੍ਥੀਨਂ ਅਤ੍ਥਾਯ ਸਮਣਧਮ੍ਮਂ ਕਰੋਨ੍ਤਸ੍ਸ ਭਤਿਯਾ ਕਮ੍ਮਂ ਕਰੋਨ੍ਤੇਨ ਕਮ੍ਮਕਾਰਕੇਨ ਸਦ੍ਧਿਂ ਕਿਂ ਨਾਨਾਕਰਣ’’ਨ੍ਤਿ ਥੇਰਂ ਲਜ੍ਜਾਪੇਸਿ ਨਿਤ੍ਤੇਜਂ ਅਕਾਸਿ. ਏਤੇਨੁਪਾਯੇਨ ਸਬ੍ਬੇਪਿ ਅਸੀਤਿਮਹਾਸਾਵਕਾ ਅਵਸੇਸਭਿਕ੍ਖੂ ਚ ਤਂ ਆਯਸ੍ਮਨ੍ਤਂ ਨਨ੍ਦਂ ਲਜ੍ਜਾਪਯਿਂਸੁ.

ਸੋ ‘‘ਅਯੁਤ੍ਤਂ ਵਤ ਮੇ ਕਤ’’ਨ੍ਤਿ ਹਿਰਿਯਾ ਚ ਓਤ੍ਤਪ੍ਪੇਨ ਚ ਵੀਰਿਯਂ ਦਲ਼੍ਹਂ ਪਗ੍ਗਣ੍ਹਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ‘‘ਅਹਂ, ਭਨ੍ਤੇ, ਭਗਵਤੋ ਪਟਿਸ੍ਸਵਂ ਮੁਞ੍ਚਾਮੀ’’ਤਿ ਆਹ. ਸਤ੍ਥਾਪਿ ‘‘ਯਦਾ ਤ੍ਵਂ, ਨਨ੍ਦ, ਅਰਹਤ੍ਤਂ ਪਤ੍ਤੋ, ਤਦਾਯੇਵਾਹਂ ਪਟਿਸ੍ਸਵਾ ਮੁਤ੍ਤੋ’’ਤਿ ਆਹ. ਏਤਮਤ੍ਥਂ ਵਿਦਿਤ੍ਵਾ ਧਮ੍ਮਸਭਾਯਂ ਭਿਕ੍ਖੂ ਕਥਂ ਸਮੁਟ੍ਠਾਪੇਸੁਂ – ‘‘ਯਾਵ ਓਵਾਦਕ੍ਖਮੋ ਚਾਯਂ, ਆਵੁਸੋ, ਨਨ੍ਦਤ੍ਥੇਰੋ ਏਕੋਵਾਦੇਨੇਵ ਹਿਰੋਤ੍ਤਪ੍ਪਂ ਪਚ੍ਚੁਪਟ੍ਠਪੇਤ੍ਵਾ ਸਮਣਧਮ੍ਮਂ ਕਤ੍ਵਾ ਅਰਹਤ੍ਤਂ ਪਤ੍ਤੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਨਨ੍ਦੋ ਓਵਾਦਕ੍ਖਮੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਹਤ੍ਥਾਚਰਿਯਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਹਤ੍ਥਾਚਰਿਯਸਿਪ੍ਪੇ ਨਿਪ੍ਫਤ੍ਤਿਂ ਪਤ੍ਤੋ ਏਕਂ ਬਾਰਾਣਸਿਰਞ੍ਞੋ ਸਪਤ੍ਤਰਾਜਾਨਂ ਉਪਟ੍ਠਾਸਿ. ਸੋ ਤਸ੍ਸ ਮਙ੍ਗਲਹਤ੍ਥਿਂ ਸੁਸਿਕ੍ਖਿਤਂ ਕਤ੍ਵਾ ਸਿਕ੍ਖਾਪੇਸਿ. ਸੋ ਰਾਜਾ ‘‘ਬਾਰਾਣਸਿਰਜ੍ਜਂ ਗਣ੍ਹਿਸ੍ਸਾਮੀ’’ਤਿ ਬੋਧਿਸਤ੍ਤਂ ਗਹੇਤ੍ਵਾ ਮਙ੍ਗਲਹਤ੍ਥਿਂ ਆਰੁਯ੍ਹ ਮਹਤਿਯਾ ਸੇਨਾਯ ਬਾਰਾਣਸਿਂ ਗਨ੍ਤ੍ਵਾ ਪਰਿਵਾਰੇਤ੍ਵਾ ‘‘ਰਜ੍ਜਂ ਵਾ ਦੇਤੁ ਯੁਦ੍ਧਂ ਵਾ’’ਤਿ ਰਞ੍ਞੋ ਪਣ੍ਣਂ ਪੇਸੇਸਿ. ਬ੍ਰਹ੍ਮਦਤ੍ਤੋ ‘‘ਯੁਦ੍ਧਂ ਦਸ੍ਸਾਮੀ’’ਤਿ ਪਾਕਾਰਦ੍ਵਾਰਟ੍ਟਾਲਕਗੋਪੁਰੇਸੁ ਬਲਕਾਯਂ ਆਰੋਪੇਤ੍ਵਾ ਯੁਦ੍ਧਂ ਅਦਾਸਿ. ਸਪਤ੍ਤਰਾਜਾ ਮਙ੍ਗਲਹਤ੍ਥਿਂ ਵਮ੍ਮੇਨ ਛਾਦੇਤ੍ਵਾ ਸਯਮ੍ਪਿ ਵਮ੍ਮਂ ਪਟਿਮੁਞ੍ਚਿਤ੍ਵਾ ਹਤ੍ਤਿਕ੍ਖਨ੍ਧਵਰਗਤੋ ਤਿਖਿਣਂ ਅਙ੍ਕੁਸਂ ਆਦਾਯ ‘‘ਨਗਰਂ ਭਿਨ੍ਦਿਤ੍ਵਾ ਪਚ੍ਚਾਮਿਤ੍ਤਂ ਜੀਵਿਤਕ੍ਖਯਂ ਪਾਪੇਤ੍ਵਾ ਰਜ੍ਜਂ ਹਤ੍ਥਗਤਂ ਕਰਿਸ੍ਸਾਮੀ’’ਤਿ ਹਤ੍ਥਿਂ ਨਗਰਾਭਿਮੁਖਂ ਪੇਸੇਸਿ. ਸੋ ਉਣ੍ਹਕਲਲਾਨਿ ਚੇਵ ਯਨ੍ਤਪਾਸਾਣੇ ਚ ਨਾਨਪ੍ਪਕਾਰਾਨਿ ਚ ਪਹਰਣਾਨਿ ਵਿਸ੍ਸਜ੍ਜੇਨ੍ਤੇ ਦਿਸ੍ਵਾ ਮਰਣਭਯਭੀਤੋ ਉਪਸਙ੍ਕਮਿਤੁਂ ਅਸਕ੍ਕੋਨ੍ਤੋ ਪਟਿਕ੍ਕਮਿ. ਅਥ ਨਂ ਹਤ੍ਥਾਚਰਿਯੋ ਉਪਸਙ੍ਕਮਿਤ੍ਵਾ ‘‘ਤਾਤ, ਤ੍ਵਂ ਸੂਰੋ ਸਙ੍ਗਾਮਾਵਚਰੋ, ਏਵਰੂਪੇ ਠਾਨੇ ਪਟਿਕ੍ਕਮਨਂ ਨਾਮ ਤੁਯ੍ਹਂ ਨਾਨੁਚ੍ਛਵਿਕ’’ਨ੍ਤਿ ਵਤ੍ਵਾ ਹਤ੍ਥਿਂ ਓਵਦਨ੍ਤੋ ਇਮਾ ਗਾਥਾ ਅਵੋਚ –

੬੩. ‘‘ਸਙ੍ਗਾਮਾਵਚਰੋ ਸੂਰੋ, ਬਲਵਾ ਇਤਿ ਵਿਸ੍ਸੁਤੋ;

ਕਿਂ ਨੁ ਤੋਰਣਮਾਸਜ੍ਜ, ਪਟਿਕ੍ਕਮਸਿ ਕੁਞ੍ਜਰ.

੬੪. ‘‘ਓਮਦ੍ਦ ਖਿਪ੍ਪਂ ਪਲਿਘਂ, ਏਸਿਕਾਨਿ ਚ ਅਬ੍ਬਹ;

ਤੋਰਣਾਨਿ ਚ ਮਦ੍ਦਿਤ੍ਵਾ, ਖਿਪ੍ਪਂ ਪਵਿਸ ਕੁਞ੍ਜਰਾ’’ਤਿ.

ਤਤ੍ਥ ਇਤਿ ਵਿਸ੍ਸੁਤੋਤਿ, ਤਾਤ, ਤ੍ਵਂ ਪਵਤ੍ਤਸਮ੍ਪਹਾਰਂ ਸਙ੍ਗਾਮਂ ਮਦ੍ਦਿਤ੍ਵਾ ਅਵਚਰਣਤੋ ਸਙ੍ਗਾਮਾਵਚਰੋ, ਥਿਰਹਦਯਤਾਯ ਸੂਰੋ, ਥਾਮਸਮ੍ਪਤ੍ਤਿਯਾ ਬਲਵਾਤਿ ਏਵਂ ਵਿਸ੍ਸੁਤੋ ਪਞ੍ਞਾਤੋ ਪਾਕਟੋ. ਤੋਰਣਮਾਸਜ੍ਜਾਤਿ ਨਗਰਦ੍ਵਾਰਸਙ੍ਖਾਤਂ ਤੋਰਣਂ ਪਤ੍ਵਾ. ਪਟਿਕ੍ਕਮਸੀਤਿ ਕਿਂ ਨੁ ਖੋ ਓਸਕ੍ਕਸਿ, ਕੇਨ ਕਾਰਣੇਨ ਨਿਵਤ੍ਤਸੀਤਿ ਵਦਤਿ. ਓਮਦ੍ਦਾਤਿ ਅਵਮਦ੍ਦ ਅਧੋ ਪਾਤਯ. ਏਸਿਕਾਨਿ ਚ ਅਬ੍ਬਹਾਤਿ ਨਗਰਦ੍ਵਾਰੇ ਸੋਲ਼ਸਰਤਨਂ ਅਟ੍ਠਰਤਨਂ ਭੂਮਿਯਂ ਪਵੇਸੇਤ੍ਵਾ ਨਿਚ੍ਚਲਂ ਕਤ੍ਵਾ ਨਿਖਾਤਾ ਏਸਿਕਤ੍ਥਮ੍ਭਾ ਹੋਨ੍ਤਿ, ਤੇ ਖਿਪ੍ਪਂ ਉਦ੍ਧਰ ਲੁਞ੍ਚਾਹੀਤਿ ਆਣਾਪੇਤਿ. ਤੋਰਣਾਨਿ ਚ ਮਦ੍ਦਿਤ੍ਵਾਤਿ ਨਗਰਦ੍ਵਾਰਸ੍ਸ ਪਿਟ੍ਠਸਙ੍ਘਾਟੇ ਮਦ੍ਦਿਤ੍ਵਾ. ਖਿਪ੍ਪਂ ਪਵਿਸਾਤਿ ਸੀਘਂ ਨਗਰਂ ਪਵਿਸ. ਕੁਞ੍ਜਰਾਤਿ ਨਾਗਂ ਆਲਪਤਿ.

ਤਂ ਸੁਤ੍ਵਾ ਨਾਗੋ ਬੋਧਿਸਤ੍ਤਸ੍ਸ ਏਕੋਵਾਦੇਨੇਵ ਨਿਵਤ੍ਤਿਤ੍ਵਾ ਏਸਿਕਤ੍ਥਮ੍ਭੇ ਸੋਣ੍ਡਾਯ ਪਲਿਵੇਠੇਤ੍ਵਾ ਅਹਿਚ੍ਛਤ੍ਤਕਾਨਿ ਵਿਯ ਲੁਞ੍ਚਿਤ੍ਵਾ ਤੋਰਣਂ ਮਦ੍ਦਿਤ੍ਵਾ ਪਲਿਘਂ ਓਤਾਰੇਤ੍ਵਾ ਨਗਰਦ੍ਵਾਰਂ ਭਿਨ੍ਦਿਤ੍ਵਾ ਨਗਰਂ ਪਵਿਸਿਤ੍ਵਾ ਰਜ੍ਜਂ ਗਹੇਤ੍ਵਾ ਅਦਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਹਤ੍ਥੀ ਨਨ੍ਦੋ ਅਹੋਸਿ, ਰਾਜਾ ਆਨਨ੍ਦੋ, ਹਤ੍ਥਾਚਰਿਯੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਙ੍ਗਾਮਾਵਚਰਜਾਤਕਵਣ੍ਣਨਾ ਦੁਤਿਯਾ.

[੧੮੩] ੩. ਵਾਲੋਦਕਜਾਤਕਵਣ੍ਣਨਾ

ਵਾਲੋਦਕਂ ਅਪ੍ਪਰਸਂ ਨਿਹੀਨਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਪਞ੍ਚਸਤੇ ਵਿਘਾਸਾਦੇ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰ ਪਞ੍ਚਸਤਾ ਉਪਾਸਕਾ ਘਰਾਵਾਸਪਲਿਬੋਧਂ ਪੁਤ੍ਤਦਾਰਸ੍ਸ ਨਿਯ੍ਯਾਦੇਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤਾ ਏਕਤੋਵ ਵਿਚਰਨ੍ਤਿ. ਤੇਸੁ ਕੇਚਿ ਸੋਤਾਪਨ੍ਨਾ, ਕੇਚਿ ਸਕਦਾਗਾਮਿਨੋ, ਕੇਚਿ ਅਨਾਗਾਮਿਨੋ, ਏਕੋਪਿ ਪੁਥੁਜ੍ਜਨੋ ਨਾਮ ਨਤ੍ਥਿ, ਸਤ੍ਥਾਰਂ ਨਿਮਨ੍ਤੇਨ੍ਤਾਪਿ ਤੇ ਉਪਾਸਕੇ ਅਨ੍ਤੋਕਰਿਤ੍ਵਾਵ ਨਿਮਨ੍ਤੇਨ੍ਤਿ. ਤੇਸਂ ਪਨ ਦਨ੍ਤਕਟ੍ਠਮੁਖੋਦਕਵਤ੍ਥਗਨ੍ਧਮਾਲਦਾਯਕਾ ਪਞ੍ਚਸਤਾ ਚੂਲ਼ੁਪਟ੍ਠਾਕਾ ਵਿਘਾਸਾਦਾ ਹੁਤ੍ਵਾ ਵਸਨ੍ਤਿ. ਤੇ ਭੁਤ੍ਤਪਾਤਰਾਸਾ ਨਿਦ੍ਦਾਯਿਤ੍ਵਾ ਉਟ੍ਠਾਯ ਅਚਿਰਵਤਿਂ ਗਨ੍ਤ੍ਵਾ ਨਦੀਤੀਰੇ ਉਨ੍ਨਦਨ੍ਤਾ ਮਲ੍ਲਯੁਦ੍ਧਂ ਯੁਜ੍ਝਨ੍ਤਿ. ਤੇ ਪਨ ਪਞ੍ਚਸਤਾ ਉਪਾਸਕਾ ਅਪ੍ਪਸਦ੍ਦਾ ਅਪ੍ਪਨਿਗ੍ਘੋਸਾ ਪਟਿਸਲ੍ਲਾਨਮਨੁਯੁਞ੍ਜਨ੍ਤਿ. ਸਤ੍ਥਾ ਤੇਸਂ ਵਿਘਾਸਾਦਾਨਂ ਉਚ੍ਚਾਸਦ੍ਦਂ ਸੁਤ੍ਵਾ ‘‘ਕਿਂ ਏਸੋ, ਆਨਨ੍ਦ, ਸਦ੍ਦੋ’’ਤਿ ਥੇਰਂ ਪੁਚ੍ਛਿਤ੍ਵਾ ‘‘ਵਿਘਾਸਾਦਸਦ੍ਦੋ, ਭਨ੍ਤੇ’’ਤਿ ਵੁਤ੍ਤੇ ‘‘ਨ ਖੋ, ਆਨਨ੍ਦ, ਇਮੇ ਵਿਘਾਸਾਦਾ ਇਦਾਨੇਵ ਵਿਘਾਸਂ ਖਾਦਿਤ੍ਵਾ ਉਨ੍ਨਦਨ੍ਤਿ, ਪੁਬ੍ਬੇਪਿ ਉਨ੍ਨਦਨ੍ਤਿਯੇਵ, ਇਮੇਪਿ ਉਪਾਸਕਾ ਨ ਇਦਾਨੇਵ ਸਨ੍ਨਿਸਿਨ੍ਨਾ, ਪੁਬ੍ਬੇਪਿ ਸਨ੍ਨਿਸਿਨ੍ਨਾਯੇਵਾ’’ਤਿ ਵਤ੍ਵਾ ਥੇਰੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਅਮਚ੍ਚਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਰਞ੍ਞੋ ਅਤ੍ਥਧਮ੍ਮਾਨੁਸਾਸਕੋ ਅਹੋਸਿ. ਅਥੇਕਸ੍ਮਿਂ ਕਾਲੇ ਸੋ ਰਾਜਾ ‘‘ਪਚ੍ਚਨ੍ਤੋ ਕੁਪਿਤੋ’’ਤਿ ਸੁਤ੍ਵਾ ਪਞ੍ਚਸਤੇ ਸਿਨ੍ਧਵੇ ਕਪ੍ਪਾਪੇਤ੍ਵਾ ਚਤੁਰਙ੍ਗਿਨਿਯਾ ਸੇਨਾਯ ਗਨ੍ਤ੍ਵਾ ਪਚ੍ਚਨ੍ਤਂ ਵੂਪਸਮੇਤ੍ਵਾ ਬਾਰਾਣਸਿਮੇਵ ਪਚ੍ਚਾਗਨ੍ਤ੍ਵਾ ‘‘ਸਿਨ੍ਧਵਾ ਕਿਲਨ੍ਤਾ ਅਲ੍ਲਰਸਮੇਵ ਨੇਸਂ ਮੁਦ੍ਦਿਕਪਾਨਂ ਦੇਥਾ’’ਤਿ ਆਣਾਪੇਸਿ. ਸਿਨ੍ਧਵਾ ਗਨ੍ਧਪਾਨਂ ਪਿਵਿਤ੍ਵਾ ਅਸ੍ਸਸਾਲਂ ਗਨ੍ਤ੍ਵਾ ਅਤ੍ਤਨੋ ਅਤ੍ਤਨੋ ਠਾਨੇਸੁ ਅਟ੍ਠਂਸੁ. ਤੇਸਂ ਪਨ ਦਿਨ੍ਨਾਵਸਿਟ੍ਠਕਂ ਅਪ੍ਪਰਸਂ ਬਹੁਕਸਟਂ ਅਹੋਸਿ. ਮਨੁਸ੍ਸਾ ‘‘ਇਦਂ ਕਿਂ ਕਰੋਮਾ’’ਤਿ ਰਾਜਾਨਂ ਪੁਚ੍ਛਿਂਸੁ. ਰਾਜਾ ਉਦਕੇਨ ਮਦ੍ਦਿਤ੍ਵਾ ਮਕਚਿਪਿਲੋਤਿਕਾਹਿ ਪਰਿਸ੍ਸਾਵੇਤ੍ਵਾ ‘‘ਯੇ ਗਦ੍ਰਭਾ ਸਿਨ੍ਧਵਾਨਂ ਨਿਵਾਪਂ ਪਹਿਂਸੁ, ਤੇਸਂ ਦਾਪੇਥਾ’’ਤਿ ਦਾਪੇਸਿ. ਗਦ੍ਰਭਾ ਕਸਟਉਦਕਂ ਪਿਵਿਤ੍ਵਾ ਮਤ੍ਤਾ ਹੁਤ੍ਵਾ ਵਿਰਵਨ੍ਤਾ ਰਾਜਙ੍ਗਣੇ ਵਿਚਰਿਂਸੁ. ਰਾਜਾ ਮਹਾਵਾਤਪਾਨਂ ਵਿਵਰਿਤ੍ਵਾ ਰਾਜਙ੍ਗਣਂ ਓਲੋਕਯਮਾਨੋ ਸਮੀਪੇ ਠਿਤਂ ਬੋਧਿਸਤ੍ਤਂ ਆਮਨ੍ਤੇਤ੍ਵਾ ‘‘ਪਸ੍ਸ, ਇਮੇ ਗਦ੍ਰਭਾ ਕਸਟੋਦਕਂ ਪਿਵਿਤ੍ਵਾ ਮਤ੍ਤਾ ਹੁਤ੍ਵਾ ਵਿਰਵਨ੍ਤਾ ਉਪ੍ਪਤਨ੍ਤਾ ਵਿਚਰਨ੍ਤਿ, ਸਿਨ੍ਧਵਕੁਲੇ ਜਾਤਸਿਨ੍ਧਵਾ ਪਨ ਗਨ੍ਧਪਾਨਂ ਪਿਵਿਤ੍ਵਾ ਨਿਸ੍ਸਦ੍ਦਾ ਸਨ੍ਨਿਸਿਨ੍ਨਾ ਨ ਉਪ੍ਪਿਲਵਨ੍ਤਿ, ਕਿਂ ਨੁ ਖੋ ਕਾਰਣ’’ਨ੍ਤਿ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੬੫. ‘‘ਵਾਲੋਦਕਂ ਅਪ੍ਪਰਸਂ ਨਿਹੀਨਂ, ਪਿਤ੍ਵਾ ਮਦੋ ਜਾਯਤਿ ਗਦ੍ਰਭਾਨਂ;

ਇਮਞ੍ਚ ਪਿਤ੍ਵਾਨ ਰਸਂ ਪਣੀਤਂ, ਮਦੋ ਨ ਸਞ੍ਜਾਯਤਿ ਸਿਨ੍ਧਵਾਨ’’ਨ੍ਤਿ.

ਤਤ੍ਥ ਵਾਲੋਦਕਨ੍ਤਿ ਮਕਚਿਵਾਲੇਹਿ ਪਰਿਸ੍ਸਾਵਿਤਉਦਕਂ. ‘‘ਵਾਲੁਦਕ’’ਨ੍ਤਿਪਿ ਪਾਠੋ. ਨਿਹੀਨਨ੍ਤਿ ਨਿਹੀਨਰਸਭਾਵੇਨ ਨਿਹੀਨਂ. ਨ ਸਞ੍ਜਾਯਤੀਤਿ ਸਿਨ੍ਧਵਾਨਂ ਮਦੋ ਨ ਜਾਯਤਿ, ਕਿਂ ਨੁ ਖੋ ਕਾਰਣਨ੍ਤਿ ਪੁਚ੍ਛਿ.

ਅਥਸ੍ਸ ਕਾਰਣਂ ਆਚਿਕ੍ਖਨ੍ਤੋ ਬੋਧਿਸਤ੍ਤੋ ਦੁਤਿਯਂ ਗਾਥਮਾਹ –

੬੬. ‘‘ਅਪ੍ਪਂ ਪਿਵਿਤ੍ਵਾਨ ਨਿਹੀਨਜਚ੍ਚੋ, ਸੋ ਮਜ੍ਜਤੀ ਤੇਨ ਜਨਿਨ੍ਦ ਪੁਟ੍ਠੋ;

ਧੋਰਯ੍ਹਸੀਲੀ ਚ ਕੁਲਮ੍ਹਿ ਜਾਤੋ, ਨ ਮਜ੍ਜਤੀ ਅਗ੍ਗਰਸਂ ਪਿਵਿਤ੍ਵਾ’’ਤਿ.

ਤਤ੍ਥ ਤੇਨ ਜਨਿਨ੍ਦ ਪੁਟ੍ਠੋਤਿ ਜਨਿਨ੍ਦ ਉਤ੍ਤਮਰਾਜ ਯੋ ਨਿਹੀਨਜਚ੍ਚੋ, ਤੇਨ ਨਿਹੀਨਜਚ੍ਚਭਾਵੇਨ ਪੁਟ੍ਠੋ ਮਜ੍ਜਤਿ ਪਮਜ੍ਜਤਿ. ਧੋਰਯ੍ਹਸੀਲੀਤਿ ਧੋਰਯ੍ਹਸੀਲੋ ਧੁਰਵਹਨਕਆਚਾਰੇਨ ਸਮ੍ਪਨ੍ਨੋ ਜਾਤਿਸਿਨ੍ਧਵੋ. ਅਗ੍ਗਰਸਨ੍ਤਿ ਸਬ੍ਬਪਠਮਂ ਗਹਿਤਂ ਮੁਦ੍ਦਿਕਰਸਂ ਪਿਵਿਤ੍ਵਾਪਿ ਨ ਮਜ੍ਜਤਿ.

ਰਾਜਾ ਬੋਧਿਸਤ੍ਤਸ੍ਸ ਵਚਨਂ ਸੁਤ੍ਵਾ ਗਦ੍ਰਭੇ ਰਾਜਙ੍ਗਣਾ ਨੀਹਰਾਪੇਤ੍ਵਾ ਤਸ੍ਸੇਵ ਓਵਾਦੇ ਠਿਤੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਪਞ੍ਚਸਤਾ ਗਦ੍ਰਭਾ ਇਮੇ ਵਿਘਾਸਾਦਾ ਅਹੇਸੁਂ, ਪਞ੍ਚਸਤਾ ਸਿਨ੍ਧਵਾ ਇਮੇ ਉਪਾਸਕਾ, ਰਾਜਾ ਆਨਨ੍ਦੋ, ਪਣ੍ਡਿਤਾਮਚ੍ਚੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਵਾਲੋਦਕਜਾਤਕਵਣ੍ਣਨਾ ਤਤਿਯਾ.

[੧੮੪] ੪. ਗਿਰਿਦਤ੍ਤਜਾਤਕਵਣ੍ਣਨਾ

ਦੂਸਿਤੋ ਗਿਰਿਦਤ੍ਤੇਨਾਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਏਕਂ ਵਿਪਕ੍ਖਸੇਵਿਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਵਤ੍ਥੁ ਹੇਟ੍ਠਾ ਮਹਿਲ਼ਾਮੁਖਜਾਤਕੇ (ਜਾ. ੧.੧.੨੬) ਕਥਿਤਮੇਵ. ਸਤ੍ਥਾ ਪਨ ‘‘ਨ, ਭਿਕ੍ਖਵੇ, ਅਯਂ ਭਿਕ੍ਖੁ ਇਦਾਨੇਵ ਵਿਪਕ੍ਖਂ ਸੇਵਤਿ, ਪੁਬ੍ਬੇਪੇਸ ਵਿਪਕ੍ਖਸੇਵਕੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਸਾਮਰਾਜਾ ਰਜ੍ਜਂ ਕਾਰੇਸਿ. ਤਦਾ ਬੋਧਿਸਤ੍ਤੋ ਅਮਚ੍ਚਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਤਸ੍ਸ ਅਤ੍ਥਧਮ੍ਮਾਨੁਸਾਸਕੋ ਅਹੋਸਿ. ਰਞ੍ਞੋ ਪਨ ਪਣ੍ਡਵੋ ਨਾਮ ਮਙ੍ਗਲਸ੍ਸੋ, ਤਸ੍ਸ ਗਿਰਿਦਤ੍ਤੋ ਨਾਮ ਅਸ੍ਸਬਨ੍ਧੋ, ਸੋ ਖਞ੍ਜੋ ਅਹੋਸਿ. ਅਸ੍ਸੋ ਮੁਖਰਜ੍ਜੁਕੇ ਗਹੇਤ੍ਵਾ ਤਂ ਪੁਰਤੋ ਪੁਰਤੋ ਗਚ੍ਛਨ੍ਤਂ ਦਿਸ੍ਵਾ ‘‘ਮਂ ਏਸ ਸਿਕ੍ਖਾਪੇਤੀ’’ਤਿ ਸਞ੍ਞਾਯ ਤਸ੍ਸ ਅਨੁਸਿਕ੍ਖਨ੍ਤੋ ਖਞ੍ਜੋ ਅਹੋਸਿ. ਤਸ੍ਸ ਅਸ੍ਸਸ੍ਸ ਖਞ੍ਜਭਾਵਂ ਰਞ੍ਞੋ ਆਰੋਚੇਸੁਂ, ਰਾਜਾ ਵੇਜ੍ਜੇ ਪੇਸੇਸਿ. ਤੇ ਗਨ੍ਤ੍ਵਾ ਅਸ੍ਸਸ੍ਸ ਸਰੀਰੇ ਰੋਗਂ ਅਪਸ੍ਸਨ੍ਤਾ ‘‘ਰੋਗਮਸ੍ਸ ਨ ਪਸ੍ਸਾਮਾ’’ਤਿ ਰਞ੍ਞੋ ਕਥਯਿਂਸੁ. ਰਾਜਾ ਬੋਧਿਸਤ੍ਤਂ ਪੇਸੇਸਿ – ‘‘ਗਚ੍ਛ ਵਯਸ੍ਸ, ਏਤ੍ਥ ਕਾਰਣਂ ਜਾਨਾਹੀ’’ਤਿ. ਸੋ ਗਨ੍ਤ੍ਵਾ ਖਞ੍ਜਅਸ੍ਸਬਨ੍ਧਸਂਸਗ੍ਗੇਨ ਤਸ੍ਸ ਖਞ੍ਜਭੂਤਭਾਵਂ ਞਤ੍ਵਾ ਰਞ੍ਞੋ ਤਮਤ੍ਥਂ ਆਰੋਚੇਤ੍ਵਾ ‘‘ਸਂਸਗ੍ਗਦੋਸੇਨ ਨਾਮ ਏਵਂ ਹੋਤੀ’’ਤਿ ਦਸ੍ਸੇਨ੍ਤੋ ਪਠਮਂ ਗਾਥਮਾਹ –-

੬੭. ‘‘ਦੂਸਿਤੋ ਗਿਰਿਦਤ੍ਤੇਨ, ਹਯੋ ਸਾਮਸ੍ਸ ਪਣ੍ਡਵੋ;

ਪੋਰਾਣਂ ਪਕਤਿਂ ਹਿਤ੍ਵਾ, ਤਸ੍ਸੇਵਾਨੁਵਿਧਿਯ੍ਯਤੀ’’ਤਿ.

ਤਤ੍ਥ ਹਯੋ ਸਾਮਸ੍ਸਾਤਿ ਸਾਮਸ੍ਸ ਰਞ੍ਞੋ ਮਙ੍ਗਲਸ੍ਸੋ. ਪੋਰਾਣਂ ਪਕਤਿਂ ਹਿਤ੍ਵਾਤਿ ਅਤ੍ਤਨੋ ਪੋਰਾਣਪਕਤਿਂ ਸਿਙ੍ਗਾਰਭਾਵਂ ਪਹਾਯ. ਅਨੁਵਿਧਿਯ੍ਯਤੀਤਿ ਅਨੁਸਿਕ੍ਖਤਿ.

ਅਥ ਨਂ ਰਾਜਾ ‘‘ਇਦਾਨਿ ਵਯਸ੍ਸ ਕਿਂ ਕਤ੍ਤਬ੍ਬ’’ਨ੍ਤਿ ਪੁਚ੍ਛਿ. ਬੋਧਿਸਤ੍ਤੋ ‘‘ਸੁਨ੍ਦਰਂ ਅਸ੍ਸਬਨ੍ਧਂ ਲਭਿਤ੍ਵਾ ਯਥਾ ਪੋਰਾਣੋ ਭਵਿਸ੍ਸਤੀ’’ਤਿ ਵਤ੍ਵਾ ਦੁਤਿਯਂ ਗਾਥਮਾਹ –

੬੮. ‘‘ਸਚੇ ਚ ਤਨੁਜੋ ਪੋਸੋ, ਸਿਖਰਾਕਾਰਕਪ੍ਪਿਤੋ;

ਆਨਨੇ ਨਂ ਗਹੇਤ੍ਵਾਨ, ਮਣ੍ਡਲੇ ਪਰਿਵਤ੍ਤਯੇ;

ਖਿਪ੍ਪਮੇਵ ਪਹਨ੍ਤ੍ਵਾਨ, ਤਸ੍ਸੇਵਾਨੁਵਿਧਿਯ੍ਯਤੀ’’ਤਿ.

ਤਤ੍ਥ ਤਨੁਜੋਤਿ ਤਸ੍ਸ ਅਨੁਜੋ. ਅਨੁਰੂਪਂ ਜਾਤੋ ਹਿ ਅਨੁਜੋ, ਤਸ੍ਸ ਅਨੁਜੋ ਤਨੁਜੋ. ਇਦਂ ਵੁਤ੍ਤਂ ਹੋਤਿ – ਸਚੇ ਹਿ, ਮਹਾਰਾਜ, ਤਸ੍ਸ ਸਿਙ੍ਗਾਰਸ੍ਸ ਆਚਾਰਸਮ੍ਪਨ੍ਨਸ੍ਸ ਅਸ੍ਸਸ੍ਸ ਅਨੁਰੂਪਂ ਜਾਤੋ ਸਿਙ੍ਗਾਰੋ ਆਚਾਰਸਮ੍ਪਨ੍ਨੋ ਪੋਸੋ. ਸਿਖਰਾਕਾਰਕਪ੍ਪਿਤੋਤਿ ਸਿਖਰੇਨ ਸੁਨ੍ਦਰੇਨ ਆਕਾਰੇਨ ਕਪ੍ਪਿਤਕੇਸਮਸ੍ਸੁ ਤਂ ਅਸ੍ਸਂ ਆਨਨੇ ਗਹੇਤ੍ਵਾ ਅਸ੍ਸਮਣ੍ਡਲੇ ਪਰਿਵਤ੍ਤੇਯ੍ਯ, ਖਿਪ੍ਪਮੇਵੇਸ ਤਂ ਖਞ੍ਜਭਾਵਂ ਪਹਾਯ ‘‘ਅਯਂ ਸਿਙ੍ਗਾਰੋ ਆਚਾਰਸਮ੍ਪਨ੍ਨੋ ਅਸ੍ਸਗੋਪਕੋ ਮਂ ਸਿਕ੍ਖਾਪੇਤੀ’’ਤਿ ਸਞ੍ਞਾਯ ਖਿਪ੍ਪਮੇਵ ਤਸ੍ਸ ਅਨੁਵਿਧਿਯ੍ਯਤਿ ਅਨੁਸਿਕ੍ਖਿਸ੍ਸਤਿ, ਪਕਤਿਭਾਵੇਯੇਵ ਠਸ੍ਸਤੀਤਿ ਅਤ੍ਥੋ. ਰਾਜਾ ਤਥਾ ਕਾਰੇਸਿ, ਅਸ੍ਸੋ ਪਕਤਿਭਾਵੇ ਪਤਿਟ੍ਠਾਸਿ. ਰਾਜਾ ‘‘ਤਿਰਚ੍ਛਾਨਾਨਮ੍ਪਿ ਨਾਮ ਆਸਯਂ ਜਾਨਿਸ੍ਸਤੀ’’ਤਿ ਤੁਟ੍ਠਚਿਤ੍ਤੋ ਬੋਧਿਸਤ੍ਤਸ੍ਸ ਮਹਨ੍ਤਂ ਯਸਂ ਅਦਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਗਿਰਿਦਤ੍ਤੋ ਦੇਵਦਤ੍ਤੋ ਅਹੋਸਿ, ਅਸ੍ਸੋ ਵਿਪਕ੍ਖਸੇਵਕੋ ਭਿਕ੍ਖੁ, ਰਾਜਾ ਆਨਨ੍ਦੋ, ਅਮਚ੍ਚਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਗਿਰਿਦਤ੍ਤਜਾਤਕਵਣ੍ਣਨਾ ਚਤੁਤ੍ਥਾ.

[੧੮੫] ੫. ਅਨਭਿਰਤਿਜਾਤਕਵਣ੍ਣਨਾ

ਯਥੋਦਕੇ ਆਵਿਲੇ ਅਪ੍ਪਸਨ੍ਨੇਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਬ੍ਰਾਹ੍ਮਣਕੁਮਾਰਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰ ਏਕੋ ਬ੍ਰਾਹ੍ਮਣਕੁਮਾਰੋ ਤਿਣ੍ਣਂ ਵੇਦਾਨਂ ਪਾਰਗੂ ਬਹੂ ਖਤ੍ਤਿਯਕੁਮਾਰੇ ਚ ਬ੍ਰਾਹ੍ਮਣਕੁਮਾਰੇ ਚ ਮਨ੍ਤੇ ਵਾਚੇਸਿ. ਸੋ ਅਪਰਭਾਗੇ ਘਰਾਵਾਸਂ ਸਣ੍ਠਪੇਤ੍ਵਾ ਵਤ੍ਥਾਲਙ੍ਕਾਰਦਾਸਦਾਸਿਖੇਤ੍ਤਵਤ੍ਥੁਗੋਮਹਿਂਸਪੁਤ੍ਤਦਾਰਾਦੀਨਂ ਅਤ੍ਥਾਯ ਚਿਨ੍ਤਯਮਾਨੋ ਰਾਗਦੋਸਮੋਹਵਸਿਕੋ ਹੁਤ੍ਵਾ ਆਵਿਲਚਿਤ੍ਤੋ ਅਹੋਸਿ, ਮਨ੍ਤੇ ਪਟਿਪਾਟਿਯਾ ਪਰਿਵਤ੍ਤੇਤੁਂ ਨਾਸਕ੍ਖਿ, ਇਤੋ ਚਿਤੋ ਚ ਮਨ੍ਤਾ ਨ ਪਟਿਭਂਸੁ. ਸੋ ਏਕਦਿਵਸਂ ਬਹੁਂ ਗਨ੍ਧਮਾਲਾਦਿਂ ਗਹੇਤ੍ਵਾ ਜੇਤਵਨਂ ਗਨ੍ਤ੍ਵਾ ਸਤ੍ਥਾਰਂ ਪੂਜੇਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਸਤ੍ਥਾ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ‘‘ਕਿਂ, ਮਾਣਵ, ਮਨ੍ਤੇ ਵਾਚੇਸਿ, ਪਗੁਣਾ ਤੇ ਮਨ੍ਤਾ’’ਤਿ ਪੁਚ੍ਛਿ. ‘‘ਪੁਬ੍ਬੇ ਮੇ, ਭਨ੍ਤੇ, ਮਨ੍ਤਾ ਪਗੁਣਾ ਅਹੇਸੁਂ, ਘਰਾਵਾਸਸ੍ਸ ਪਨ ਗਹਿਤਕਾਲਤੋ ਪਟ੍ਠਾਯ ਚਿਤ੍ਤਂ ਮੇ ਆਵਿਲਂ ਜਾਤਂ, ਤੇਨ ਮੇ ਮਨ੍ਤਾ ਨ ਪਗੁਣਾ’’ਤਿ. ਅਥ ਨਂ ਸਤ੍ਥਾ ‘‘ਨ ਖੋ, ਮਾਣਵ, ਇਦਾਨੇਵ, ਪੁਬ੍ਬੇਪਿ ਤੇ ਚਿਤ੍ਤਸ੍ਸ ਅਨਾਵਿਲਕਾਲੇ ਤਵ ਮਨ੍ਤਾ ਪਗੁਣਾ ਅਹੇਸੁਂ, ਰਾਗਾਦੀਹਿ ਪਨ ਆਵਿਲਕਾਲੇ ਤਵ ਮਨ੍ਤਾ ਨ ਪਟਿਭਂਸੂ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਤਕ੍ਕਸਿਲਾਯਂ ਮਨ੍ਤੇ ਉਗ੍ਗਣ੍ਹਿਤ੍ਵਾ ਦਿਸਾਪਾਮੋਕ੍ਖੋ ਆਚਰਿਯੋ ਹੁਤ੍ਵਾ ਬਾਰਾਣਸਿਯਂ ਬਹੂ ਖਤ੍ਤਿਯਕੁਮਾਰੇ ਚ ਬ੍ਰਾਹ੍ਮਣਕੁਮਾਰੇ ਚ ਮਨ੍ਤੇ ਵਾਚੇਸਿ. ਤਸ੍ਸ ਸਨ੍ਤਿਕੇ ਏਕੋ ਬ੍ਰਾਹ੍ਮਣਮਾਣਵੋ ਤਯੋ ਵੇਦੇ ਪਗੁਣੇ ਅਕਾਸਿ, ਏਕਪਦੇਪਿ ਨਿਕ੍ਕਙ੍ਖੋ ਪਿਟ੍ਠਿਆਚਰਿਯੋ ਹੁਤ੍ਵਾ ਮਨ੍ਤੇ ਵਾਚੇਸਿ. ਸੋ ਅਪਰੇਨ ਸਮਯੇਨ ਘਰਾਵਾਸਂ ਗਹੇਤ੍ਵਾ ਘਰਾਵਾਸਚਿਨ੍ਤਾਯ ਆਵਿਲਚਿਤ੍ਤੋ ਮਨ੍ਤੇ ਪਰਿਵਤ੍ਤੇਤੁਂ ਨਾਸਕ੍ਖਿ. ਅਥ ਨਂ ਆਚਰਿਯੋ ਅਤ੍ਤਨੋ ਸਨ੍ਤਿਕਂ ਆਗਤਂ ‘‘ਕਿਂ, ਮਾਣਵ, ਪਗੁਣਾ ਤੇ ਮਨ੍ਤਾ’’ਤਿ ਪੁਚ੍ਛਿਤ੍ਵਾ ‘‘ਘਰਾਵਾਸਗਹਿਤਕਾਲਤੋ ਪਟ੍ਠਾਯ ਮੇ ਚਿਤ੍ਤਂ ਆਵਿਲਂ ਜਾਤਂ, ਮਨ੍ਤੇ ਪਰਿਵਤ੍ਤੇਤੁਂ ਨ ਸਕ੍ਕੋਮੀ’’ਤਿ ਵੁਤ੍ਤੇ ‘‘ਤਾਤ, ਆਵਿਲੇ ਚਿਤ੍ਤਮ੍ਹਿ ਪਗੁਣਾਪਿ ਮਨ੍ਤਾ ਨ ਪਟਿਭਨ੍ਤਿ, ਅਨਾਵਿਲੇ ਪਨ ਚਿਤ੍ਤੇ ਅਪ੍ਪਟਿਭਾਣਂ ਨਾਮ ਨਤ੍ਥੀ’’ਤਿ ਵਤ੍ਵਾ ਇਮਾ ਗਾਥਾ ਆਹ –

੬੯. ‘‘ਯਥੋਦਕੇ ਆਵਿਲੇ ਅਪ੍ਪਸਨ੍ਨੇ, ਨ ਪਸ੍ਸਤਿ ਸਿਪ੍ਪਿਕਸਮ੍ਬੁਕਞ੍ਚ;

ਸਕ੍ਖਰਂ ਵਾਲੁਕਂ ਮਚ੍ਛਗੁਮ੍ਬਂ, ਏਵਂ ਆਵਿਲਮ੍ਹਿ ਚਿਤ੍ਤੇ;

ਨ ਸੋ ਪਸ੍ਸਤਿ ਅਤ੍ਤਦਤ੍ਥਂ ਪਰਤ੍ਥਂ.

੭੦. ‘‘ਯਥੋਦਕੇ ਅਚ੍ਛੇ ਵਿਪ੍ਪਸਨ੍ਨੇ, ਸੋ ਪਸ੍ਸਤਿ ਸਿਪ੍ਪਿਕਸਮ੍ਬੁਕਞ੍ਚ;

ਸਕ੍ਖਰਂ ਵਾਲੁਕਂ ਮਚ੍ਛਗੁਮ੍ਬਂ, ਏਵਂ ਅਨਾਵਿਲਮ੍ਹਿ ਚਿਤ੍ਤੇ;

ਸੋ ਪਸ੍ਸਤਿ ਅਤ੍ਥਦਤ੍ਥਂ ਪਰਤ੍ਥ’’ਨ੍ਤਿ.

ਤਤ੍ਥ ਆਵਿਲੇਤਿ ਕਦ੍ਦਮਾਲੁਲ਼ਿਤੇ. ਅਪ੍ਪਸਨ੍ਨੇਤਿ ਤਾਯੇਵ ਆਵਿਲਤਾਯ ਅਵਿਪ੍ਪਸਨ੍ਨੇ. ਸਿਪ੍ਪਿਕਸਮ੍ਬੁਕਞ੍ਚਾਤਿ ਸਿਪ੍ਪਿਕਞ੍ਚ ਸਮ੍ਬੁਕਞ੍ਚ. ਮਚ੍ਛਗੁਮ੍ਬਨ੍ਤਿ ਮਚ੍ਛਘਟਂ. ਏਵਂ ਆਵਿਲਮ੍ਹੀਤਿ ਏਵਮੇਵ ਰਾਗਾਦੀਹਿ ਆਵਿਲੇ ਚਿਤ੍ਤੇ. ਅਤ੍ਤਦਤ੍ਥਂ ਪਰਤ੍ਥਨ੍ਤਿ ਨੇਵ ਅਤ੍ਤਦਤ੍ਥਂ ਨ ਪਰਤ੍ਥਂ ਪਸ੍ਸਤੀਤਿ ਅਤ੍ਥੋ. ਸੋ ਪਸ੍ਸਤੀਤਿ ਏਵਮੇਵ ਅਨਾਵਿਲੇ ਚਿਤ੍ਤੇ ਸੋ ਪੁਰਿਸੋ ਅਤ੍ਤਦਤ੍ਥਂ ਪਰਤ੍ਥਞ੍ਚ ਪਸ੍ਸਤੀਤਿ.

ਸਤ੍ਥਾ ਇਮਂ ਅਤੀਤਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਬ੍ਰਾਹ੍ਮਣਕੁਮਾਰੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ‘‘ਤਦਾ ਮਾਣਵੋ ਅਯਮੇਵ ਮਾਣਵੋ ਅਹੋਸਿ, ਆਚਰਿਯੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਅਨਭਿਰਤਿਜਾਤਕਵਣ੍ਣਨਾ ਪਞ੍ਚਮਾ.

[੧੮੬] ੬. ਦਧਿਵਾਹਨਜਾਤਕਵਣ੍ਣਨਾ

ਵਣ੍ਣਗਨ੍ਧਰਸੂਪੇਤੋਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਵਿਪਕ੍ਖਸੇਵਿਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਵਤ੍ਥੁ ਹੇਟ੍ਠਾ ਕਥਿਤਮੇਵ. ਸਤ੍ਥਾ ਪਨ ‘‘ਭਿਕ੍ਖਵੇ, ਅਸਾਧੁਸਨ੍ਨਿਵਾਸੋ ਨਾਮ ਪਾਪੋ ਅਨਤ੍ਥਕਰੋ, ਤਤ੍ਥ ਮਨੁਸ੍ਸਭੂਤਾਨਂ ਤਾਵ ਪਾਪਸਨ੍ਨਿਵਾਸਸ੍ਸ ਅਨਤ੍ਥਕਰਤਾਯ ਕਿਂ ਵਤ੍ਤਬ੍ਬਂ, ਪੁਬ੍ਬੇ ਪਨ ਅਸਾਤੇਨ ਅਮਧੁਰੇਨ ਨਿਮ੍ਬਰੁਕ੍ਖੇਨ ਸਦ੍ਧਿਂ ਸਨ੍ਨਿਵਾਸਮਾਗਮ੍ਮ ਮਧੁਰਰਸੋ ਦਿਬ੍ਬਰਸਪਟਿਭਾਗੋ ਅਚੇਤਨੋ ਅਮ੍ਬਰੁਕ੍ਖੋਪਿ ਅਮਧੁਰੋ ਤਿਤ੍ਤਕੋ ਜਾਤੋ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਕਾਸਿਰਟ੍ਠੇ ਚਤ੍ਤਾਰੋ ਭਾਤਰੋ ਬ੍ਰਾਹ੍ਮਣਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਪਦੇਸੇ ਪਟਿਪਾਟਿਯਾ ਪਣ੍ਣਸਾਲਾ ਕਤ੍ਵਾ ਵਾਸਂ ਕਪ੍ਪੇਸੁਂ. ਤੇਸਂ ਜੇਟ੍ਠਕਭਾਤਾ ਕਾਲਂ ਕਤ੍ਵਾ ਸਕ੍ਕਤ੍ਤਂ ਪਾਪੁਣਿ. ਸੋ ਤਂ ਕਾਰਣਂ ਞਤ੍ਵਾ ਅਨ੍ਤਰਨ੍ਤਰਾ ਸਤ੍ਤਟ੍ਠਦਿਵਸਚ੍ਚਯੇਨ ਤੇਸਂ ਉਪਟ੍ਠਾਨਂ ਗਚ੍ਛਨ੍ਤੋ ਏਕਦਿਵਸਂ ਜੇਟ੍ਠਕਤਾਪਸਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਤ੍ਵਾ – ‘‘ਭਨ੍ਤੇ, ਕੇਨ ਤੇ ਅਤ੍ਥੋ’’ਤਿ ਪੁਚ੍ਛਿ. ਪਣ੍ਡੁਰੋਗੋ ਤਾਪਸੋ ‘‘ਅਗ੍ਗਿਨਾ ਮੇ ਅਤ੍ਥੋ’’ਤਿ ਆਹ. ਸੋ ਤਂ ਸੁਤ੍ਵਾ ਤਸ੍ਸ ਵਾਸਿਫਰਸੁਕਂ ਅਦਾਸਿ. ਵਾਸਿਫਰਸੁਕੋ ਨਾਮ ਦਣ੍ਡੇ ਪਵੇਸਨਵਸੇਨ ਵਾਸਿਪਿ ਹੋਤਿ ਫਰਸੁਪਿ. ਤਾਪਸੋ ‘‘ਕੋ ਮੇ ਇਮਂ ਆਦਾਯ ਦਾਰੂਨਿ ਆਹਰਿਸ੍ਸਤੀ’’ਤਿ ਆਹ. ਅਥ ਨਂ ਸਕ੍ਕੋ ਏਵਮਾਹ – ‘‘ਯਦਾ ਤੇ, ਭਨ੍ਤੇ, ਦਾਰੂਹਿ ਅਤ੍ਥੋ, ਇਮਂ ਫਰਸੁਂ ਹਤ੍ਥੇਨ ਪਹਰਿਤ੍ਵਾ ‘ਦਾਰੂਨਿ ਮੇ ਆਹਰਿਤ੍ਵਾ ਅਗ੍ਗਿਂ ਕਰੋਹੀ’ਤਿ ਵਦੇਯ੍ਯਾਸਿ, ਦਾਰੂਨਿ ਆਹਰਿਤ੍ਵਾ ਅਗ੍ਗਿਂ ਕਤ੍ਵਾ ਦਸ੍ਸਤੀ’’ਤਿ. ਤਸ੍ਸ ਵਾਸਿਫਰਸੁਕਂ ਦਤ੍ਵਾ ਦੁਤਿਯਮ੍ਪਿ ਉਪਸਙ੍ਕਮਿਤ੍ਵਾ ‘‘ਭਨ੍ਤੇ, ਕੇਨ ਤੇ ਅਤ੍ਥੋ’’ਤਿ ਪੁਚ੍ਛਿ. ਤਸ੍ਸ ਪਣ੍ਣਸਾਲਾਯ ਹਤ੍ਥਿਮਗ੍ਗੋ ਹੋਤਿ, ਸੋ ਹਤ੍ਥੀਹਿ ਉਪਦ੍ਦੁਤੋ ‘‘ਹਤ੍ਥੀਨਂ ਮੇ ਵਸੇਨ ਦੁਕ੍ਖਂ ਉਪ੍ਪਜ੍ਜਤਿ, ਤੇ ਪਲਾਪੇਹੀ’’ਤਿ ਆਹ. ਸਕ੍ਕੋ ਤਸ੍ਸ ਏਕਂ ਭੇਰਿਂ ਉਪਨਾਮੇਤ੍ਵਾ ‘‘ਭਨ੍ਤੇ, ਇਮਸ੍ਮਿਂ ਤਲੇ ਪਹਟੇ ਤੁਮ੍ਹਾਕਂ ਪਚ੍ਚਾਮਿਤ੍ਤਾ ਪਲਾਯਿਸ੍ਸਨ੍ਤਿ, ਇਮਸ੍ਮਿਂ ਤਲੇ ਪਹਟੇ ਮੇਤ੍ਤਚਿਤ੍ਤਾ ਹੁਤ੍ਵਾ ਚਤੁਰਙ੍ਗਿਨਿਯਾ ਸੇਨਾਯ ਪਰਿਵਾਰੇਸ੍ਸਨ੍ਤੀ’’ਤਿ ਵਤ੍ਵਾ ਤਂ ਭੇਰਿਂ ਦਤ੍ਵਾ ਕਨਿਟ੍ਠਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਭਨ੍ਤੇ, ਕੇਨ ਤੇ ਅਤ੍ਥੋ’’ਤਿ ਪੁਚ੍ਛਿ. ਸੋਪਿ ਪਣ੍ਡੁਰੋਗਧਾਤੁਕੋਵ, ਤਸ੍ਮਾ ‘‘ਦਧਿਨਾ ਮੇ ਅਤ੍ਥੋ’’ਤਿ ਆਹ. ਸਕ੍ਕੋ ਤਸ੍ਸ ਏਕਂ ਦਧਿਘਟਂ ਦਤ੍ਵਾ ‘‘ਸਚੇ ਤੁਮ੍ਹੇ ਇਚ੍ਛਮਾਨਾ ਇਮਂ ਆਸਿਞ੍ਚੇਯ੍ਯਾਥ, ਮਹਾਨਦੀ ਹੁਤ੍ਵਾ ਮਹੋਘਂ ਪਵਤ੍ਤੇਤ੍ਵਾ ਤੁਮ੍ਹਾਕਂ ਰਜ੍ਜਂ ਗਹੇਤ੍ਵਾ ਦਾਤੁਂ ਸਮਤ੍ਥੋਪਿ ਭਵਿਸ੍ਸਤੀ’’ਤਿ ਵਤ੍ਵਾ ਪਕ੍ਕਾਮਿ. ਤਤੋ ਪਟ੍ਠਾਯ ਵਾਸਿਫਰਸੁਕੋ ਜੇਟ੍ਠਭਾਤਿਕਸ੍ਸ ਅਗ੍ਗਿਂ ਕਰੋਤਿ, ਇਤਰੇਨ ਭੇਰਿਤਲੇ ਪਹਟੇ ਹਤ੍ਥੀ ਪਲਾਯਨ੍ਤਿ, ਕਨਿਟ੍ਠੋ ਦਧਿਂ ਪਰਿਭੁਞ੍ਜਤਿ.

ਤਸ੍ਮਿਂ ਕਾਲੇ ਏਕੋ ਸੂਕਰੋ ਏਕਸ੍ਮਿਂ ਪੁਰਾਣਗਾਮਟ੍ਠਾਨੇ ਚਰਨ੍ਤੋ ਆਨੁਭਾਵਸਮ੍ਪਨ੍ਨਂ ਏਕਂ ਮਣਿਕ੍ਖਨ੍ਧਂ ਅਦ੍ਦਸ. ਸੋ ਤਂ ਮਣਿਕ੍ਖਨ੍ਧਂ ਮੁਖੇਨ ਡਂਸਿਤ੍ਵਾ ਤਸ੍ਸਾਨੁਭਾਵੇਨ ਆਕਾਸੇ ਉਪ੍ਪਤਿਤ੍ਵਾ ਸਮੁਦ੍ਦਸ੍ਸ ਮਜ੍ਝੇ ਏਕਂ ਦੀਪਕਂ ਗਨ੍ਤ੍ਵਾ ‘‘ਏਤ੍ਥ ਦਾਨਿ ਮਯਾ ਵਸਿਤੁਂ ਵਟ੍ਟਤੀ’’ਤਿ ਓਤਰਿਤ੍ਵਾ ਫਾਸੁਕਟ੍ਠਾਨੇ ਏਕਸ੍ਸ ਉਦੁਮ੍ਬਰਰੁਕ੍ਖਸ੍ਸ ਹੇਟ੍ਠਾ ਵਾਸਂ ਕਪ੍ਪੇਸਿ. ਸੋ ਏਕਦਿਵਸਂ ਤਸ੍ਮਿਂ ਰੁਕ੍ਖਮੂਲੇ ਮਣਿਕ੍ਖਨ੍ਧਂ ਪੁਰਤੋ ਠਪੇਤ੍ਵਾ ਨਿਦ੍ਦਂ ਓਕ੍ਕਮਿ. ਅਥੇਕੋ ਕਾਸਿਰਟ੍ਠਵਾਸੀ ਮਨੁਸ੍ਸੋ ‘‘ਨਿਰੁਪਕਾਰੋ ਏਸ ਅਮ੍ਹਾਕ’’ਨ੍ਤਿ ਮਾਤਾਪਿਤੂਹਿ ਗੇਹਾ ਨਿਕ੍ਕਡ੍ਢਿਤੋ ਏਕਂ ਪਟ੍ਟਨਗਾਮਂ ਗਨ੍ਤ੍ਵਾ ਨਾਵਿਕਾਨਂ ਕਮ੍ਮਕਾਰੋ ਹੁਤ੍ਵਾ ਨਾਵਂ ਆਰੁਯ੍ਹ ਸਮੁਦ੍ਦਮਜ੍ਝੇ ਭਿਨ੍ਨਾਯ ਨਾਵਾਯ ਫਲਕੇ ਨਿਪਨ੍ਨੋ ਤਂ ਦੀਪਕਂ ਪਤ੍ਵਾ ਫਲਾਫਲਾਨਿ ਪਰਿਯੇਸਨ੍ਤੋ ਤਂ ਸੂਕਰਂ ਨਿਦ੍ਦਾਯਨ੍ਤਂ ਦਿਸ੍ਵਾ ਸਣਿਕਂ ਗਨ੍ਤ੍ਵਾ ਮਣਿਕ੍ਖਨ੍ਧਂ ਗਣ੍ਹਿਤ੍ਵਾ ਤਸ੍ਸ ਆਨੁਭਾਵੇਨ ਆਕਾਸੇ ਉਪ੍ਪਤਿਤ੍ਵਾ ਉਦੁਮ੍ਬਰਰੁਕ੍ਖੇ ਨਿਸੀਦਿਤ੍ਵਾ ਚਿਨ੍ਤੇਸਿ – ‘‘ਅਯਂ ਸੂਕਰੋ ਇਮਸ੍ਸ ਮਣਿਕ੍ਖਨ੍ਧਸ੍ਸ ਆਨੁਭਾਵੇਨ ਆਕਾਸਚਾਰਿਕੋ ਹੁਤ੍ਵਾ ਇਧ ਵਸਤਿ ਮਞ੍ਞੇ, ਮਯਾ ਪਠਮਮੇਵ ਇਮਂ ਸੂਕਰਂ ਮਾਰੇਤ੍ਵਾ ਮਂਸਂ ਖਾਦਿਤ੍ਵਾ ਪਚ੍ਛਾ ਗਨ੍ਤੁਂ ਵਟ੍ਟਤੀ’’ਤਿ. ਸੋ ਏਕਂ ਦਣ੍ਡਕਂ ਭਞ੍ਜਿਤ੍ਵਾ ਤਸ੍ਸ ਸੀਸੇ ਪਾਤੇਤਿ. ਸੂਕਰੋ ਪਬੁਜ੍ਝਿਤ੍ਵਾ ਮਣਿਂ ਅਪਸ੍ਸਨ੍ਤੋ ਇਤੋ ਚਿਤੋ ਚ ਕਮ੍ਪਮਾਨੋ ਵਿਧਾਵਤਿ, ਰੁਕ੍ਖੇ ਨਿਸਿਨ੍ਨਪੁਰਿਸੋ ਹਸਿ. ਸੂਕਰੋ ਓਲੋਕੇਨ੍ਤੋ ਤਂ ਦਿਸ੍ਵਾ ਤਂ ਰੁਕ੍ਖਂ ਸੀਸੇਨ ਪਹਰਿਤ੍ਵਾ ਤਤ੍ਥੇਵ ਮਤੋ.

ਸੋ ਪੁਰਿਸੋ ਓਤਰਿਤ੍ਵਾ ਅਗ੍ਗਿਂ ਕਤ੍ਵਾ ਤਸ੍ਸ ਮਂਸਂ ਪਚਿਤ੍ਵਾ ਖਾਦਿਤ੍ਵਾ ਆਕਾਸੇ ਉਪ੍ਪਤਿਤ੍ਵਾ ਹਿਮਵਨ੍ਤਮਤ੍ਥਕੇਨ ਗਚ੍ਛਨ੍ਤੋ ਅਸ੍ਸਮਪਦਂ ਦਿਸ੍ਵਾ ਜੇਟ੍ਠਭਾਤਿਕਸ੍ਸ ਤਾਪਸਸ੍ਸ ਅਸ੍ਸਮੇ ਓਤਰਿਤ੍ਵਾ ਦ੍ਵੀਹਤੀਹਂ ਵਸਿਤ੍ਵਾ ਤਾਪਸਸ੍ਸ ਵਤ੍ਤਪਟਿਵਤ੍ਤਂ ਅਕਾਸਿ, ਵਾਸਿਫਰਸੁਕਸ੍ਸ ਆਨੁਭਾਵਞ੍ਚ ਪਸ੍ਸਿ. ਸੋ ‘‘ਇਮਂ ਮਯਾ ਗਹੇਤੁਂ ਵਟ੍ਟਤੀ’’ਤਿ ਮਣਿਕ੍ਖਨ੍ਧਸ੍ਸ ਆਨੁਭਾਵਂ ਤਾਪਸਸ੍ਸ ਦਸ੍ਸੇਤ੍ਵਾ ‘‘ਭਨ੍ਤੇ, ਇਮਂ ਮਣਿਂ ਗਹੇਤ੍ਵਾ ਵਾਸਿਫਰਸੁਕਂ ਦੇਥਾ’’ਤਿ ਆਹ. ਤਾਪਸੋ ਆਕਾਸੇਨ ਚਰਿਤੁਕਾਮੋ ਤਂ ਗਹੇਤ੍ਵਾ ਵਾਸਿਫਰਸੁਕਂ ਅਦਾਸਿ. ਸੋ ਤਂ ਗਹੇਤ੍ਵਾ ਥੋਕਂ ਗਨ੍ਤ੍ਵਾ ਵਾਸਿਫਰਸੁਕਂ ਪਹਰਿਤ੍ਵਾ ‘‘ਵਾਸਿਫਰਸੁਕ ਤਾਪਸਸ੍ਸ ਸੀਸਂ ਛਿਨ੍ਦਿਤ੍ਵਾ ਮਣਿਕ੍ਖਨ੍ਧਂ ਮੇ ਆਹਰਾ’’ਤਿ ਆਹ. ਸੋ ਗਨ੍ਤ੍ਵਾ ਤਾਪਸਸ੍ਸ ਸੀਸਂ ਛਿਨ੍ਦਿਤ੍ਵਾ ਮਣਿਕ੍ਖਨ੍ਧਂ ਆਹਰਿ. ਸੋ ਵਾਸਿਫਰਸੁਕਂ ਪਟਿਚ੍ਛਨ੍ਨਟ੍ਠਾਨੇ ਠਪੇਤ੍ਵਾ ਮਜ੍ਝਿਮਤਾਪਸਸ੍ਸ ਸਨ੍ਤਿਕਂ ਗਨ੍ਤ੍ਵਾ ਕਤਿਪਾਹਂ ਵਸਿਤ੍ਵਾ ਭੇਰਿਯਾ ਆਨੁਭਾਵਂ ਦਿਸ੍ਵਾ ਮਣਿਕ੍ਖਨ੍ਧਂ ਦਤ੍ਵਾ ਭੇਰਿਂ ਗਣ੍ਹਿਤ੍ਵਾ ਪੁਰਿਮਨਯੇਨੇਵ ਤਸ੍ਸਪਿ ਸੀਸਂ ਛਿਨ੍ਦਾਪੇਤ੍ਵਾ ਕਨਿਟ੍ਠਂ ਉਪਸਙ੍ਕਮਿਤ੍ਵਾ ਦਧਿਘਟਸ੍ਸ ਆਨੁਭਾਵਂ ਦਿਸ੍ਵਾ ਮਣਿਕ੍ਖਨ੍ਧਂ ਦਤ੍ਵਾ ਦਧਿਘਟਂ ਗਹੇਤ੍ਵਾ ਪੁਰਿਮਨਯੇਨੇਵ ਤਸ੍ਸ ਸੀਸਂ ਛਿਨ੍ਦਾਪੇਤ੍ਵਾ ਮਣਿਕ੍ਖਨ੍ਧਞ੍ਚ ਵਾਸਿਫਰਸੁਕਞ੍ਚ ਭੇਰਿਞ੍ਚ ਦਧਿਘਟਞ੍ਚ ਗਹੇਤ੍ਵਾ ਆਕਾਸੇ ਉਪ੍ਪਤਿਤ੍ਵਾ ਬਾਰਾਣਸਿਯਾ ਅਵਿਦੂਰੇ ਠਤ੍ਵਾ ਬਾਰਾਣਸਿਰਞ੍ਞੋ ‘‘ਯੁਦ੍ਧਂ ਵਾ ਮੇ ਦੇਤੁ ਰਜ੍ਜਂ ਵਾ’’ਤਿ ਏਕਸ੍ਸ ਪੁਰਿਸਸ੍ਸ ਹਤ੍ਥੇ ਪਣ੍ਣਂ ਪਾਹੇਸਿ.

ਰਾਜਾ ਸਾਸਨਂ ਸੁਤ੍ਵਾਵ ‘‘ਚੋਰਂ ਗਣ੍ਹਿਸ੍ਸਾਮੀ’’ਤਿ ਨਿਕ੍ਖਮਿ. ਸੋ ਏਕਂ ਭੇਰਿਤਲਂ ਪਹਰਿ, ਚਤੁਰਙ੍ਗਿਨੀ ਸੇਨਾ ਪਰਿਵਾਰੇਸਿ. ਰਞ੍ਞੋ ਅਵਤ੍ਥਰਣਭਾਵਂ ਞਤ੍ਵਾ ਦਧਿਘਟਂ ਵਿਸ੍ਸਜ੍ਜੇਸਿ, ਮਹਾਨਦੀ ਪਵਤ੍ਤਿ. ਮਹਾਜਨੋ ਦਧਿਮ੍ਹਿ ਓਸੀਦਿਤ੍ਵਾ ਨਿਕ੍ਖਮਿਤੁਂ ਨਾਸਕ੍ਖਿ. ਵਾਸਿਫਰਸੁਕਂ ਪਹਰਿਤ੍ਵਾ ‘‘ਰਞ੍ਞੋ ਸੀਸਂ ਆਹਰਾ’’ਤਿ ਆਹ, ਵਾਸਿਫਰਸੁਕੋ ਗਨ੍ਤ੍ਵਾ ਰਞ੍ਞੋ ਸੀਸਂ ਆਹਰਿਤ੍ਵਾ ਪਾਦਮੂਲੇ ਨਿਕ੍ਖਿਪਿ. ਏਕੋਪਿ ਆਵੁਧਂ ਉਕ੍ਖਿਪਿਤੁਂ ਨਾਸਕ੍ਖਿ. ਸੋ ਮਹਨ੍ਤੇਨ ਬਲੇਨ ਪਰਿਵੁਤੋ ਨਗਰਂ ਪਵਿਸਿਤ੍ਵਾ ਅਭਿਸੇਕਂ ਕਾਰੇਤ੍ਵਾ ਦਧਿਵਾਹਨੋ ਨਾਮ ਰਾਜਾ ਹੁਤ੍ਵਾ ਧਮ੍ਮੇਨ ਸਮੇਨ ਰਜ੍ਜਂ ਕਾਰੇਸਿ.

ਤਸ੍ਸੇਕਦਿਵਸਂ ਮਹਾਨਦਿਯਂ ਜਾਲਕਰਣ੍ਡਕੇ ਕੀਲ਼ਨ੍ਤਸ੍ਸ ਕਣ੍ਣਮੁਣ੍ਡਦਹਤੋ ਦੇਵਪਰਿਭੋਗਂ ਏਕਂ ਅਮ੍ਬਪਕ੍ਕਂ ਆਗਨ੍ਤ੍ਵਾ ਜਾਲੇ ਲਗ੍ਗਿ, ਜਾਲਂ ਉਕ੍ਖਿਪਨ੍ਤਾ ਤਂ ਦਿਸ੍ਵਾ ਰਞ੍ਞੋ ਅਦਂਸੁ. ਤਂ ਮਹਨ੍ਤਂ ਘਟਪ੍ਪਮਾਣਂ ਪਰਿਮਣ੍ਡਲਂ ਸੁਵਣ੍ਣਵਣ੍ਣਂ ਅਹੋਸਿ. ਰਾਜਾ ‘‘ਕਿਸ੍ਸ ਫਲਂ ਨਾਮੇਤ’’ਨ੍ਤਿ ਵਨਚਰਕੇ ਪੁਚ੍ਛਿਤ੍ਵਾ ‘‘ਅਮ੍ਬਫਲ’’ਨ੍ਤਿ ਸੁਤ੍ਵਾ ਪਰਿਭੁਞ੍ਜਿਤ੍ਵਾ ਤਸ੍ਸ ਅਟ੍ਠਿਂ ਅਤ੍ਤਨੋ ਉਯ੍ਯਾਨੇ ਰੋਪਾਪੇਤ੍ਵਾ ਖੀਰੋਦਕੇਨ ਸਿਞ੍ਚਾਪੇਸਿ. ਰੁਕ੍ਖੋ ਨਿਬ੍ਬਤ੍ਤਿਤ੍ਵਾ ਤਤਿਯੇ ਸਂਵਚ੍ਛਰੇ ਫਲਂ ਅਦਾਸਿ. ਅਮ੍ਬਸ੍ਸ ਸਕ੍ਕਾਰੋ ਮਹਾ ਅਹੋਸਿ, ਖੀਰੋਦਕੇਨ ਸਿਞ੍ਚਨ੍ਤਿ, ਗਨ੍ਧਪਞ੍ਚਙ੍ਗੁਲਿਕਂ ਦੇਨ੍ਤਿ, ਮਾਲਾਦਾਮਾਨਿ ਪਰਿਕ੍ਖਿਪਨ੍ਤਿ, ਗਨ੍ਧਤੇਲੇਨ ਦੀਪਂ ਜਾਲੇਨ੍ਤਿ, ਪਰਿਕ੍ਖੇਪੋ ਪਨਸ੍ਸ ਪਟਸਾਣਿਯਾ ਅਹੋਸਿ. ਫਲਾਨਿ ਮਧੁਰਾਨਿ ਸੁਵਣ੍ਣਵਣ੍ਣਾਨਿ ਅਹੇਸੁਂ. ਦਧਿਵਾਹਨਰਾਜਾ ਅਞ੍ਞੇਸਂ ਰਾਜੂਨਂ ਅਮ੍ਬਫਲਂ ਪੇਸੇਨ੍ਤੋ ਅਟ੍ਠਿਤੋ ਰੁਕ੍ਖਨਿਬ੍ਬਤ੍ਤਨਭਯੇਨ ਅਙ੍ਕੁਰਨਿਬ੍ਬਤ੍ਤਨਟ੍ਠਾਨਂ ਮਣ੍ਡੂਕਕਣ੍ਟਕੇਨ ਵਿਜ੍ਝਿਤ੍ਵਾ ਪੇਸੇਸਿ. ਤੇਸਂ ਅਮ੍ਬਂ ਖਾਦਿਤ੍ਵਾ ਅਟ੍ਠਿ ਰੋਪਿਤਂ ਨ ਸਮ੍ਪਜ੍ਜਤਿ. ਤੇ ‘‘ਕਿਂ ਨੁ ਖੋ ਏਤ੍ਥ ਕਾਰਣ’’ਨ੍ਤਿ ਪੁਚ੍ਛਨ੍ਤਾ ਤਂ ਕਾਰਣਂ ਜਾਨਿਂਸੁ.

ਅਥੇਕੋ ਰਾਜਾ ਉਯ੍ਯਾਨਪਾਲਂ ਪਕ੍ਕੋਸਿਤ੍ਵਾ ‘‘ਦਧਿਵਾਹਨਸ੍ਸ ਅਮ੍ਬਫਲਾਨਂ ਰਸਂ ਨਾਸੇਤ੍ਵਾ ਤਿਤ੍ਤਕਭਾਵਂ ਕਾਤੁਂ ਸਕ੍ਖਿਸ੍ਸਸੀ’’ਤਿ ਪੁਚ੍ਛਿਤ੍ਵਾ ‘‘ਆਮ, ਦੇਵਾ’’ਤਿ ਵੁਤ੍ਤੇ ‘‘ਤੇਨ ਹਿ ਗਚ੍ਛਾਹੀ’’ਤਿ ਸਹਸ੍ਸਂ ਦਤ੍ਵਾ ਪੇਸੇਸਿ. ਸੋ ਬਾਰਾਣਸਿਂ ਗਨ੍ਤ੍ਵਾ ‘‘ਏਕੋ ਉਯ੍ਯਾਨਪਾਲੋ ਆਗਤੋ’’ਤਿ ਰਞ੍ਞੋ ਆਰੋਚਾਪੇਤ੍ਵਾ ਤੇਨ ਪਕ੍ਕੋਸਾਪਿਤੋ ਪਵਿਸਿਤ੍ਵਾ ਰਾਜਾਨਂ ਵਨ੍ਦਿਤ੍ਵਾ ‘‘ਤ੍ਵਂ ਉਯ੍ਯਾਨਪਾਲੋ’’ਤਿ ਪੁਟ੍ਠੋ ‘‘ਆਮ, ਦੇਵਾ’’ਤਿ ਵਤ੍ਵਾ ਅਤ੍ਤਨੋ ਆਨੁਭਾਵਂ ਵਣ੍ਣੇਸਿ. ਰਾਜਾ ‘‘ਗਚ੍ਛ ਅਮ੍ਹਾਕਂ ਉਯ੍ਯਾਨਪਾਲਸ੍ਸ ਸਨ੍ਤਿਕੇ ਹੋਹੀ’’ਤਿ ਆਹ. ਤੇ ਤਤੋ ਪਟ੍ਠਾਯ ਦ੍ਵੇ ਜਨਾ ਉਯ੍ਯਾਨਂ ਪਟਿਜਗ੍ਗਨ੍ਤਿ. ਅਧੁਨਾਗਤੋ ਉਯ੍ਯਾਨਪਾਲੋ ਅਕਾਲਪੁਪ੍ਫਾਨਿ ਸੁਟ੍ਠੁ ਪੁਪ੍ਫਾਪੇਨ੍ਤੋ ਅਕਾਲਫਲਾਨਿ ਗਣ੍ਹਾਪੇਨ੍ਤੋ ਉਯ੍ਯਾਨਂ ਰਮਣੀਯਂ ਅਕਾਸਿ. ਰਾਜਾ ਤਸ੍ਸ ਪਸੀਦਿਤ੍ਵਾ ਪੋਰਾਣਕਉਯ੍ਯਾਨਪਾਲਂ ਨੀਹਰਿਤ੍ਵਾ ਤਸ੍ਸੇਵ ਉਯ੍ਯਾਨਂ ਅਦਾਸਿ. ਸੋ ਉਯ੍ਯਾਨਸ੍ਸ ਅਤ੍ਤਨੋ ਹਤ੍ਥਗਤਭਾਵਂ ਞਤ੍ਵਾ ਅਮ੍ਬਰੁਕ੍ਖਂ ਪਰਿਵਾਰੇਤ੍ਵਾ ਨਿਮ੍ਬੇ ਚ ਫਗ੍ਗਵਵਲ੍ਲਿਯੋ ਚ ਰੋਪੇਸਿ, ਅਨੁਪੁਬ੍ਬੇਨ ਨਿਮ੍ਬਾ ਵਡ੍ਢਿਂਸੁ, ਮੂਲੇਹਿ ਮੂਲਾਨਿ, ਸਾਖਾਹਿ ਚ ਸਾਖਾ ਸਂਸਟ੍ਠਾ ਓਨਦ੍ਧਵਿਨਦ੍ਧਾ ਅਹੇਸੁਂ. ਤੇਨ ਅਸਾਤਅਮਧੁਰਸਂਸਗ੍ਗੇਨ ਤਾਵਮਧੁਰਫਲੋ ਅਮ੍ਬੋ ਤਿਤ੍ਤਕੋ ਜਾਤੋ ਨਿਮ੍ਬਪਣ੍ਣਸਦਿਸਰਸੋ, ਅਮ੍ਬਫਲਾਨਂ ਤਿਤ੍ਤਕਭਾਵਂ ਞਤ੍ਵਾ ਉਯ੍ਯਾਨਪਾਲੋ ਪਲਾਯਿ.

ਦਧਿਵਾਹਨੋ ਉਯ੍ਯਾਨਂ ਗਨ੍ਤ੍ਵਾ ਅਮ੍ਬਫਲਂ ਖਾਦਨ੍ਤੋ ਮੁਖੇ ਪਵਿਟ੍ਠਂ ਅਮ੍ਬਰਸਂ ਨਿਮ੍ਬਕਸਟਂ ਵਿਯ ਅਜ੍ਝੋਹਰਿਤੁਂ ਅਸਕ੍ਕੋਨ੍ਤੋ ਕਕ੍ਕਾਰੇਤ੍ਵਾ ਨਿਟ੍ਠੁਭਿ. ਤਦਾ ਬੋਧਿਸਤ੍ਤੋ ਤਸ੍ਸ ਅਤ੍ਥਧਮ੍ਮਾਨੁਸਾਸਕੋ ਅਮਚ੍ਚੋ ਅਹੋਸਿ. ਰਾਜਾ ਬੋਧਿਸਤ੍ਤਂ ਆਮਨ੍ਤੇਤ੍ਵਾ ‘‘ਪਣ੍ਡਿਤ, ਇਮਸ੍ਸ ਰੁਕ੍ਖਸ੍ਸ ਪੋਰਾਣਕਪਰਿਹਾਰਤੋ ਪਰਿਹੀਨਂ ਨਤ੍ਥਿ, ਏਵਂ ਸਨ੍ਤੇਪਿਸ੍ਸ ਫਲਂ ਤਿਤ੍ਤਕਂ ਜਾਤਂ, ਕਿਂ ਨੁ ਖੋ ਕਾਰਣ’’ਨ੍ਤਿ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੭੧. ‘‘ਵਣ੍ਣਗਨ੍ਧਰਸੂਪੇਤੋ, ਅਮ੍ਬੋਯਂ ਅਹੁਵਾ ਪੁਰੇ;

ਤਮੇਵ ਪੂਜਂ ਲਭਮਾਨੋ, ਕੇਨਮ੍ਬੋ ਕਟੁਕਪ੍ਫਲੋ’’ਤਿ.

ਅਥਸ੍ਸ ਕਾਰਣਂ ਆਚਿਕ੍ਖਨ੍ਤੋ ਬੋਧਿਸਤ੍ਤੋ ਦੁਤਿਯਂ ਗਾਥਮਾਹ –

੭੨. ‘‘ਪੁਚਿਮਨ੍ਦਪਰਿਵਾਰੋ, ਅਮ੍ਬੋ ਤੇ ਦਧਿਵਾਹਨ;

ਮੂਲਂ ਮੂਲੇਨ ਸਂਸਟ੍ਠਂ, ਸਾਖਾ ਸਾਖਾ ਨਿਸੇਵਰੇ;

ਅਸਾਤਸਨ੍ਨਿਵਾਸੇਨ, ਤੇਨਮ੍ਬੋ ਕਟੁਕਪ੍ਫਲੋ’’ਤਿ.

ਤਤ੍ਥ ਪੁਚਿਮਨ੍ਦਪਰਿਵਾਰੋਤਿ ਨਿਮ੍ਬਰੁਕ੍ਖਪਰਿਵਾਰੋ. ਸਾਖਾ ਸਾਖਾ ਨਿਸੇਵਰੇਤਿ ਪੁਚਿਮਨ੍ਦਸ੍ਸ ਸਾਖਾਯੋ ਅਮ੍ਬਰੁਕ੍ਖਸ੍ਸ ਸਾਖਾਯੋ ਨਿਸੇਵਨ੍ਤਿ. ਅਸਾਤਸਨ੍ਨਿਵਾਸੇਨਾਤਿ ਅਮਧੁਰੇਹਿ ਪੁਚਿਮਨ੍ਦੇਹਿ ਸਦ੍ਧਿਂ ਸਨ੍ਨਿਵਾਸੇਨ. ਤੇਨਾਤਿ ਤੇਨ ਕਾਰਣੇਨ ਅਯਂ ਅਮ੍ਬੋ ਕਟੁਕਪ੍ਫਲੋ ਅਸਾਤਫਲੋ ਤਿਤ੍ਤਕਫਲੋ ਜਾਤੋਤਿ.

ਰਾਜਾ ਤਸ੍ਸ ਵਚਨਂ ਸੁਤ੍ਵਾ ਸਬ੍ਬੇਪਿ ਪੁਚਿਮਨ੍ਦੇ ਚ ਫਗ੍ਗਵਵਲ੍ਲਿਯੋ ਚ ਛਿਨ੍ਦਾਪੇਤ੍ਵਾ ਮੂਲਾਨਿ ਉਦ੍ਧਰਾਪੇਤ੍ਵਾ ਸਮਨ੍ਤਾ ਅਮਧੁਰਪਂਸੁਂ ਹਰਾਪੇਤ੍ਵਾ ਮਧੁਰਪਂਸੁਂ ਪਕ੍ਖਿਪਾਪੇਤ੍ਵਾ ਖੀਰੋਦਕਸਕ੍ਖਰੋਦਕਗਨ੍ਧੋਦਕੇਹਿ ਅਮ੍ਬਂ ਪਟਿਜਗ੍ਗਾਪੇਸਿ. ਸੋ ਮਧੁਰਸਂਸਗ੍ਗੇਨ ਪੁਨ ਮਧੁਰੋਵ ਅਹੋਸਿ. ਰਾਜਾ ਪਕਤਿਉਯ੍ਯਾਨਪਾਲਸ੍ਸੇਵ ਉਯ੍ਯਾਨਂ ਨਿਯ੍ਯਾਦੇਤ੍ਵਾ ਯਾਵਤਾਯੁਕਂ ਠਤ੍ਵਾ ਯਥਾਕਮ੍ਮਂ ਗਤੋ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਅਹਮੇਵ ਪਣ੍ਡਿਤਾਮਚ੍ਚੋ ਅਹੋਸਿ’’ਨ੍ਤਿ.

ਦਧਿਵਾਹਨਜਾਤਕਵਣ੍ਣਨਾ ਛਟ੍ਠਾ.

[੧੮੭] ੭. ਚਤੁਮਟ੍ਠਜਾਤਕਵਣ੍ਣਨਾ

ਉਚ੍ਚੇ ਵਿਟਭਿਮਾਰੁਯ੍ਹਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਮਹਲ੍ਲਕਭਿਕ੍ਖੁਂ ਆਰਬ੍ਭ ਕਥੇਸਿ. ਏਕਦਿਵਸਂ ਕਿਰ ਦ੍ਵੀਸੁ ਅਗ੍ਗਸਾਵਕੇਸੁ ਅਞ੍ਞਮਞ੍ਞਂ ਪਞ੍ਹਪੁਚ੍ਛਨਵਿਸ੍ਸਜ੍ਜਨਕਥਾਯ ਨਿਸਿਨ੍ਨੇਸੁ ਏਕੋ ਮਹਲ੍ਲਕੋ ਭਿਕ੍ਖੁ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ਤਤਿਯੋ ਹੁਤ੍ਵਾ ਨਿਸੀਦਿਤ੍ਵਾ ‘‘ਭਨ੍ਤੇ, ਮਯਮ੍ਪਿ ਤੁਮ੍ਹੇ ਪਞ੍ਹਂ ਪੁਚ੍ਛਿਸ੍ਸਾਮ, ਤੁਮ੍ਹੇਪਿ ਅਤ੍ਤਨੋ ਕਙ੍ਖਂ ਅਮ੍ਹੇ ਪੁਚ੍ਛਥਾ’’ਤਿ ਆਹ. ਥੇਰਾ ਤਂ ਜਿਗੁਚ੍ਛਿਤ੍ਵਾ ਉਟ੍ਠਾਯ ਪਕ੍ਕਮਿਂਸੁ. ਥੇਰਾਨਂ ਧਮ੍ਮਂ ਸੋਤੁਂ ਨਿਸਿਨ੍ਨਪਰਿਸਾ ਸਮਾਗਮਸ੍ਸ ਭਿਨ੍ਨਕਾਲੇ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ‘‘ਕਿਂ ਅਕਾਲੇ ਆਗਤਤ੍ਥਾ’’ਤਿ ਵੁਤ੍ਤੇ ਤਂ ਕਾਰਣਂ ਆਰੋਚਯਿਂਸੁ. ਸਤ੍ਥਾ ‘‘ਨ, ਭਿਕ੍ਖਵੇ, ਇਦਾਨੇਵ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਏਤਂ ਜਿਗੁਚ੍ਛਿਤ੍ਵਾ ਅਕਥੇਤ੍ਵਾ ਪਕ੍ਕਮਨ੍ਤਿ, ਪੁਬ੍ਬੇਪਿ ਪਕ੍ਕਮਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਅਰਞ੍ਞਾਯਤਨੇ ਰੁਕ੍ਖਦੇਵਤਾ ਅਹੋਸਿ. ਅਥ ਦ੍ਵੇ ਹਂਸਪੋਤਕਾ ਚਿਤ੍ਤਕੂਟਪਬ੍ਬਤਾ ਨਿਕ੍ਖਮਿਤ੍ਵਾ ਤਸ੍ਮਿਂ ਰੁਕ੍ਖੇ ਨਿਸੀਦਿਤ੍ਵਾ ਗੋਚਰਾਯ ਗਨ੍ਤ੍ਵਾ ਨਿਵਤ੍ਤਨ੍ਤਾਪਿ ਤਸ੍ਮਿਂਯੇਵ ਵਿਸ੍ਸਮਿਤ੍ਵਾ ਚਿਤ੍ਤਕੂਟਂ ਗਚ੍ਛਨ੍ਤਿ. ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਤੇਸਂ ਬੋਧਿਸਤ੍ਤੇਨ ਸਦ੍ਧਿਂ ਵਿਸ੍ਸਾਸੋ ਅਹੋਸਿ. ਗਚ੍ਛਨ੍ਤਾ ਚ ਆਗਚ੍ਛਨ੍ਤਾ ਚ ਅਞ੍ਞਮਞ੍ਞਂ ਸਮ੍ਮੋਦਿਤ੍ਵਾ ਧਮ੍ਮਕਥਂ ਕਥੇਤ੍ਵਾ ਪਕ੍ਕਮਿਂਸੁ. ਅਥੇਕਦਿਵਸਂ ਤੇਸੁ ਰੁਕ੍ਖਗ੍ਗੇ ਨਿਸੀਦਿਤ੍ਵਾ ਬੋਧਿਸਤ੍ਤੇਨ ਸਦ੍ਧਿਂ ਕਥੇਨ੍ਤੇਸੁ ਏਕੋ ਸਿਙ੍ਗਾਲੋ ਤਸ੍ਸ ਰੁਕ੍ਖਸ੍ਸ ਹੇਟ੍ਠਾ ਠਤ੍ਵਾ ਤੇਹਿ ਹਂਸਪੋਤਕੇਹਿ ਸਦ੍ਧਿਂ ਮਨ੍ਤੇਨ੍ਤੋ ਪਠਮਂ ਗਾਥਮਾਹ –

੭੩. ‘‘ਉਚ੍ਚੇ ਵਿਟਭਿਮਾਰੁਯ੍ਹ, ਮਨ੍ਤਯਵ੍ਹੋ ਰਹੋਗਤਾ;

ਨੀਚੇ ਓਰੁਯ੍ਹ ਮਨ੍ਤਵ੍ਹੋ, ਮਿਗਰਾਜਾਪਿ ਸੋਸ੍ਸਤੀ’’ਤਿ.

ਤਤ੍ਥ ਉਚ੍ਚੇ ਵਿਟਭਿਮਾਰੁਯ੍ਹਾਤਿ ਪਕਤਿਯਾ ਚ ਉਚ੍ਚੇ ਇਮਸ੍ਮਿਂ ਰੁਕ੍ਖੇ ਉਚ੍ਚਤਰਂ ਏਕਂ ਵਿਟਪਂ ਅਭਿਰੁਹਿਤ੍ਵਾ. ਮਨ੍ਤਯਵ੍ਹੋਤਿ ਮਨ੍ਤੇਥ ਕਥੇਥ. ਨੀਚੇ ਓਰੁਯ੍ਹਾਤਿ ਓਤਰਿਤ੍ਵਾ ਨੀਚੇ ਠਾਨੇ ਠਤ੍ਵਾ ਮਨ੍ਤੇਥ. ਮਿਗਰਾਜਾਪਿ ਸੋਸ੍ਸਤੀਤਿ ਅਤ੍ਤਾਨਂ ਮਿਗਰਾਜਾਨਂ ਕਤ੍ਵਾ ਆਹ. ਹਂਸਪੋਤਕਾ ਜਿਗੁਚ੍ਛਿਤ੍ਵਾ ਉਟ੍ਠਾਯ ਚਿਤ੍ਤਕੂਟਮੇਵ ਗਤਾ.

ਤੇਸਂ ਗਤਕਾਲੇ ਬੋਧਿਸਤ੍ਤੋ ਸਿਙ੍ਗਾਲਸ੍ਸ ਦੁਤਿਯਂ ਗਾਥਮਾਹ –

੭੪. ‘‘ਯਂ ਸੁਵਣ੍ਣੋ ਸੁਵਣ੍ਣੇਨ, ਦੇਵੋ ਦੇਵੇਨ ਮਨ੍ਤਯੇ;

ਕਿਂ ਤੇਤ੍ਥ ਚਤੁਮਟ੍ਠਸ੍ਸ, ਬਿਲਂ ਪਵਿਸ ਜਮ੍ਬੁਕਾ’’ਤਿ.

ਤਤ੍ਥ ਸੁਵਣ੍ਣੋਤਿ ਸੁਨ੍ਦਰਵਣ੍ਣੋ. ਸੁਵਣ੍ਣੇਨਾਤਿ ਦੁਤਿਯੇਨ ਹਂਸਪੋਤਕੇਨ. ਦੇਵੋ ਦੇਵੇਨਾਤਿ ਤੇਯੇਵ ਦ੍ਵੇ ਦੇਵੇ ਕਤ੍ਵਾ ਕਥੇਤਿ. ਚਤੁਮਟ੍ਠਸ੍ਸਾਤਿ ਸਰੀਰੇਨ ਜਾਤਿਯਾ ਸਰੇਨ ਗੁਣੇਨਾਤਿ ਇਮੇਹਿ ਚਤੂਹਿ ਮਟ੍ਠਸ੍ਸ ਸੁਦ੍ਧਸ੍ਸਾਤਿ ਅਕ੍ਖਰਤ੍ਥੋ. ਅਸੁਦ੍ਧਂਯੇਵ ਪਨ ਤਂ ਪਸਂਸਾਵਚਨੇਨ ਨਿਨ੍ਦਨ੍ਤੋ ਏਵਮਾਹ, ਚਤੂਹਿ ਲਾਮਕਸ੍ਸ ਕਿਂ ਤੇ ਏਤ੍ਥ ਸਿਙ੍ਗਾਲਸ੍ਸਾਤਿ ਅਯਮੇਤ੍ਥ ਅਧਿਪ੍ਪਾਯੋ. ‘‘ਬਿਲਂ ਪਵਿਸਾ’’ਤਿ ਇਦਂ ਬੋਧਿਸਤ੍ਤੋ ਭੇਰਵਾਰਮ੍ਮਣਂ ਦਸ੍ਸੇਤ੍ਵਾ ਤਂ ਪਲਾਪੇਨ੍ਤੋ ਆਹ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸਿਙ੍ਗਾਲੋ ਮਹਲ੍ਲਕੋ ਅਹੋਸਿ, ਦ੍ਵੇ ਹਂਸਪੋਤਕਾ ਸਾਰਿਪੁਤ੍ਤਮੋਗ੍ਗਲ੍ਲਾਨਾ, ਰੁਕ੍ਖਦੇਵਤਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਚਤੁਮਟ੍ਠਜਾਤਕਵਣ੍ਣਨਾ ਸਤ੍ਤਮਾ.

[੧੮੮] ੮. ਸੀਹਕੋਤ੍ਥੁਜਾਤਕਵਣ੍ਣਨਾ

ਸੀਹਙ੍ਗੁਲੀ ਸੀਹਨਖੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਕੋਕਾਲਿਕਂ ਆਰਬ੍ਭ ਕਥੇਸਿ. ਏਕਦਿਵਸਂ ਕਿਰ ਕੋਕਾਲਿਕੋ ਅਞ੍ਞੇਸੁ ਬਹੁਸ੍ਸੁਤੇਸੁ ਧਮ੍ਮਂ ਕਥੇਨ੍ਤੇਸੁ ਸਯਮ੍ਪਿ ਕਥੇਤੁਕਾਮੋ ਅਹੋਸੀਤਿ ਸਬ੍ਬਂ ਹੇਟ੍ਠਾ ਵੁਤ੍ਤਨਯੇਨੇਵ ਵਿਤ੍ਥਾਰੇਤਬ੍ਬਂ. ਤਂ ਪਨ ਪਵਤ੍ਤਿਂ ਸੁਤ੍ਵਾ ਸਤ੍ਥਾ ‘‘ਨ, ਭਿਕ੍ਖਵੇ, ਕੋਕਾਲਿਕੋ ਇਦਾਨੇਵ ਅਤ੍ਤਨੋ ਸਦ੍ਦੇਨ ਪਾਕਟੋ ਜਾਤੋ, ਪੁਬ੍ਬੇਪਿ ਪਾਕਟੋ ਅਹੋਸੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਹਿਮਵਨ੍ਤਪਦੇਸੇ ਸੀਹੋ ਹੁਤ੍ਵਾ ਏਕਾਯ ਸਿਙ੍ਗਾਲਿਯਾ ਸਦ੍ਧਿਂ ਸਂਵਾਸਮਨ੍ਵਾਯ ਪੁਤ੍ਤਂ ਪਟਿਲਭਿ. ਸੋ ਅਙ੍ਗੁਲੀਹਿ ਨਖੇਹਿ ਕੇਸਰੇਨ ਵਣ੍ਣੇਨ ਸਣ੍ਠਾਨੇਨਾਤਿ ਇਮੇਹਿ ਆਕਾਰੇਹਿ ਪਿਤੁਸਦਿਸੋ ਅਹੋਸਿ, ਸਦ੍ਦੇਨ ਮਾਤੁਸਦਿਸੋ. ਅਥੇਕਦਿਵਸਂ ਦੇਵੇ ਵਸ੍ਸਿਤ੍ਵਾ ਵਿਗਤੇ ਸੀਹੇਸੁ ਨਦਿਤ੍ਵਾ ਸੀਹਕੀਲ਼ਂ ਕੀਲ਼ਨ੍ਤੇਸੁ ਸੋਪਿ ਤੇਸਂ ਅਨ੍ਤਰੇ ਨਦਿਤੁਕਾਮੋ ਹੁਤ੍ਵਾ ਸਿਙ੍ਗਾਲਿਕਂ ਨਾਦਂ ਨਦਿ. ਅਥਸ੍ਸ ਸਦ੍ਦਂ ਸੁਤ੍ਵਾ ਸੀਹਾ ਤੁਣ੍ਹੀ ਅਹੇਸੁਂ. ਤਸ੍ਸ ਸਦ੍ਦਂ ਸੁਤ੍ਵਾ ਅਪਰੋ ਬੋਧਿਸਤ੍ਤਸ੍ਸ ਸਜਾਤਿਪੁਤ੍ਤੋ ‘‘ਤਾਤ, ਅਯਂ ਸੀਹੋ ਵਣ੍ਣਾਦੀਹਿ ਅਮ੍ਹੇਹਿ ਸਮਾਨੋ, ਸਦ੍ਦੋ ਪਨਸ੍ਸ ਅਞ੍ਞਾਦਿਸੋ, ਕੋ ਨਾਮੇਸੋ’’ਤਿ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੭੫. ‘‘ਸੀਹਙ੍ਗੁਲੀ ਸੀਹਨਖੋ, ਸੀਹਪਾਦਪਤਿਟ੍ਠਿਤੋ;

ਸੋ ਸੀਹੋ ਸੀਹਸਙ੍ਘਮ੍ਹਿ, ਏਕੋ ਨਦਤਿ ਅਞ੍ਞਥਾ’’ਤਿ.

ਤਤ੍ਥ ਸੀਹਪਾਦਪਤਿਟ੍ਠਿਤੋਤਿ ਸੀਹਪਾਦੇਹੇਵ ਪਤਿਟ੍ਠਿਤੋ. ਏਕੋ ਨਦਤਿ ਅਞ੍ਞਥਾਤਿ ਏਕੋਵ ਅਵਸੇਸਸੀਹੇਹਿ ਅਸਦਿਸੇਨ ਸਿਙ੍ਗਾਲਸਦ੍ਦੇਨ ਨਦਨ੍ਤੋ ਅਞ੍ਞਥਾ ਨਦਤਿ.

ਤਂ ਸੁਤ੍ਵਾ ਬੋਧਿਸਤ੍ਤੋ ‘‘ਤਾਤ, ਏਸ ਤਵ ਭਾਤਾ ਸਿਙ੍ਗਾਲਿਯਾ ਪੁਤ੍ਤੋ, ਰੂਪੇਨ ਮਯਾ ਸਦਿਸੋ, ਸਦ੍ਦੇਨ ਮਾਤਰਾ ਸਦਿਸੋ’’ਤਿ ਵਤ੍ਵਾ ਸਿਙ੍ਗਾਲਿਪੁਤ੍ਤਂ ਆਮਨ੍ਤੇਤ੍ਵਾ ‘‘ਤਾਤ, ਤ੍ਵਂ ਇਤੋ ਪਟ੍ਠਾਯ ਇਧ ਵਸਨ੍ਤੋ ਅਪ੍ਪਸਦ੍ਦੋ ਵਸ, ਸਚੇ ਪੁਨ ਨਦਿਸ੍ਸਸਿ, ਸਿਙ੍ਗਾਲਭਾਵਂ ਤੇ ਜਾਨਿਸ੍ਸਨ੍ਤੀ’’ਤਿ ਓਵਦਨ੍ਤੋ ਦੁਤਿਯਂ ਗਾਥਮਾਹ –

੭੬. ‘‘ਮਾ ਤ੍ਵਂ ਨਦਿ ਰਾਜਪੁਤ੍ਤ, ਅਪ੍ਪਸਦ੍ਦੋ ਵਨੇ ਵਸ;

ਸਰੇਨ ਖੋ ਤਂ ਜਾਨੇਯ੍ਯੁਂ, ਨ ਹਿ ਤੇ ਪੇਤ੍ਤਿਕੋ ਸਰੋ’’ਤਿ.

ਤਤ੍ਥ ਰਾਜਪੁਤ੍ਤਾਤਿ ਸੀਹਸ੍ਸ ਮਿਗਰਞ੍ਞੋ ਪੁਤ੍ਤ. ਇਮਞ੍ਚ ਪਨ ਓਵਾਦਂ ਸੁਤ੍ਵਾ ਪੁਨ ਸੋ ਨਦਿਤੁਂ ਨਾਮ ਨ ਉਸ੍ਸਹਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸਿਙ੍ਗਾਲੋ ਕੋਕਾਲਿਕੋ ਅਹੋਸਿ, ਸਜਾਤਿਪੁਤ੍ਤੋ ਰਾਹੁਲੋ, ਮਿਗਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੀਹਕੋਤ੍ਥੁਜਾਤਕਵਣ੍ਣਨਾ ਅਟ੍ਠਮਾ.

[੧੮੯] ੯. ਸੀਹਚਮ੍ਮਜਾਤਕਵਣ੍ਣਨਾ

ਨੇਤਂ ਸੀਹਸ੍ਸ ਨਦਿਤਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਕੋਕਾਲਿਕਞ੍ਞੇਵ ਆਰਬ੍ਭ ਕਥੇਸਿ. ਸੋ ਇਮਸ੍ਮਿਂ ਕਾਲੇ ਸਰਭਞ੍ਞਂ ਭਣਿਤੁਕਾਮੋ ਅਹੋਸਿ. ਸਤ੍ਥਾ ਤਂ ਪਵਤ੍ਤਿਂ ਸੁਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਕਸ੍ਸਕਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਕਸਿਕਮ੍ਮੇਨ ਜੀਵਿਕਂ ਕਪ੍ਪੇਸਿ. ਤਸ੍ਮਿਂ ਕਾਲੇ ਏਕੋ ਵਾਣਿਜੋ ਗਦ੍ਰਭਭਾਰਕੇਨ ਵੋਹਾਰਂ ਕਰੋਨ੍ਤੋ ਵਿਚਰਤਿ. ਸੋ ਗਤਗਤਟ੍ਠਾਨੇ ਗਦ੍ਰਭਸ੍ਸ ਪਿਟ੍ਠਿਤੋ ਭਣ੍ਡਿਕਂ ਓਤਾਰੇਤ੍ਵਾ ਗਦ੍ਰਭਂ ਸੀਹਚਮ੍ਮੇਨ ਪਾਰੁਪਿਤ੍ਵਾ ਸਾਲਿਯਵਖੇਤ੍ਤੇਸੁ ਵਿਸ੍ਸਜ੍ਜੇਤਿ. ਖੇਤ੍ਤਰਕ੍ਖਕਾ ਤਂ ਦਿਸ੍ਵਾ ‘‘ਸੀਹੋ’’ਤਿ ਸਞ੍ਞਾਯ ਉਪਸਙ੍ਕਮਿਤੁਂ ਨ ਸਕ੍ਕੋਨ੍ਤਿ. ਅਥੇਕਦਿਵਸਂ ਸੋ ਵਾਣਿਜੋ ਏਕਸ੍ਮਿਂ ਗਾਮਦ੍ਵਾਰੇ ਨਿਵਾਸਂ ਗਹੇਤ੍ਵਾ ਪਾਤਰਾਸਂ ਪਚਾਪੇਨ੍ਤੋ ਤਤੋ ਗਦ੍ਰਭਂ ਸੀਹਚਮ੍ਮਂ ਪਾਰੁਪਿਤ੍ਵਾ ਯਵਖੇਤ੍ਤੇ ਵਿਸ੍ਸਜ੍ਜੇਸਿ. ਖੇਤ੍ਤਰਕ੍ਖਕਾ ‘‘ਸੀਹੋ’’ਤਿ ਸਞ੍ਞਾਯ ਤਂ ਉਪਸਙ੍ਕਮਿਤੁਂ ਅਸਕ੍ਕੋਨ੍ਤਾ ਗੇਹਂ ਗਨ੍ਤ੍ਵਾ ਆਰੋਚੇਸੁਂ. ਸਕਲਗਾਮਵਾਸਿਨੋ ਆਵੁਧਾਨਿ ਗਹੇਤ੍ਵਾ ਸਙ੍ਖੇ ਧਮੇਨ੍ਤਾ ਭੇਰਿਯੋ ਵਾਦੇਨ੍ਤਾ ਖੇਤ੍ਤਸਮੀਪਂ ਗਨ੍ਤ੍ਵਾ ਉਨ੍ਨਦਿਂਸੁ, ਗਦ੍ਰਭੋ ਮਰਣਭਯਭੀਤੋ ਗਦ੍ਰਭਰਵਂ ਰਵਿ. ਅਥਸ੍ਸ ਗਦ੍ਰਭਭਾਵਂ ਞਤ੍ਵਾ ਬੋਧਿਸਤ੍ਤੋ ਪਠਮਂ ਗਾਥਮਾਹ –

੭੭. ‘‘ਨੇਤਂ ਸੀਹਸ੍ਸ ਨਦਿਤਂ, ਨ ਬ੍ਯਗ੍ਘਸ੍ਸ ਨ ਦੀਪਿਨੋ;

ਪਾਰੁਤੋ ਸੀਹਚਮ੍ਮੇਨ, ਜਮ੍ਮੋ ਨਦਤਿ ਗਦ੍ਰਭੋ’’ਤਿ.

ਤਤ੍ਥ ਜਮ੍ਮੋਤਿ ਲਾਮਕੋ. ਗਾਮਵਾਸਿਨੋਪਿ ਤਸ੍ਸ ਗਦ੍ਰਭਭਾਵਂ ਞਤ੍ਵਾ ਤਂ ਅਟ੍ਠੀਨਿ ਭਞ੍ਜਨ੍ਤਾ ਪੋਥੇਤ੍ਵਾ ਸੀਹਚਮ੍ਮਂ ਆਦਾਯ ਅਗਮਂਸੁ.

ਅਥ ਸੋ ਵਾਣਿਜੋ ਆਗਨ੍ਤ੍ਵਾ ਤਂ ਬ੍ਯਸਨਭਾਵਪ੍ਪਤ੍ਤਂ ਗਦ੍ਰਭਂ ਦਿਸ੍ਵਾ ਦੁਤਿਯਂ ਗਾਥਮਾਹ –

੭੮. ‘‘ਚਿਰਮ੍ਪਿ ਖੋ ਤਂ ਖਾਦੇਯ੍ਯ, ਗਦ੍ਰਭੋ ਹਰਿਤਂ ਯਵਂ;

ਪਾਰੁਤੋ ਸੀਹਚਮ੍ਮੇਨ, ਰਵਮਾਨੋਵ ਦੂਸਯੀ’’ਤਿ.

ਤਤ੍ਥ ਤਨ੍ਤਿ ਨਿਪਾਤਮਤ੍ਤਂ, ਅਯਂ ਗਦ੍ਰਭੋ ਅਤ੍ਤਨੋ ਗਦ੍ਰਭਭਾਵਂ ਅਜਾਨਾਪੇਤ੍ਵਾ ਸੀਹਚਮ੍ਮੇਨ ਪਾਰੁਤੋ ਚਿਰਮ੍ਪਿ ਕਾਲਂ ਹਰਿਤਂ ਯਵਂ ਖਾਦੇਯ੍ਯਾਤਿ ਅਤ੍ਥੋ. ਰਵਮਾਨੋਵ ਦੂਸਯੀਤਿ ਅਤ੍ਤਨੋ ਪਨ ਗਦ੍ਰਭਰਵਂ ਰਵਮਾਨੋਵੇਸ ਅਤ੍ਤਾਨਂ ਦੂਸਯਿ, ਨਤ੍ਥੇਤ੍ਥ ਸੀਹਚਮ੍ਮਸ੍ਸ ਦੋਸੋਤਿ. ਤਸ੍ਮਿਂ ਏਵਂ ਕਥੇਨ੍ਤੇਯੇਵ ਗਦ੍ਰਭੋ ਤਤ੍ਥੇਵ ਨਿਪਨ੍ਨੋ ਮਰਿ, ਵਾਣਿਜੋਪਿ ਤਂ ਪਹਾਯ ਪਕ੍ਕਾਮਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਵਾਣਿਜੋ ਦੇਵਦਤ੍ਤੋ ਅਹੋਸਿ, ਗਦ੍ਰਭੋ ਕੋਕਾਲਿਕੋ, ਪਣ੍ਡਿਤਕਸ੍ਸਕੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੀਹਚਮ੍ਮਜਾਤਕਵਣ੍ਣਨਾ ਨਵਮਾ.

[੧੯੦] ੧੦. ਸੀਲਾਨਿਸਂਸਜਾਤਕਵਣ੍ਣਨਾ

ਪਸ੍ਸ ਸਦ੍ਧਾਯ ਸੀਲਸ੍ਸਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਸਦ੍ਧਂ ਉਪਾਸਕਂ ਆਰਬ੍ਭ ਕਥੇਸਿ. ਸੋ ਕਿਰ ਸਦ੍ਧੋ ਪਸਨ੍ਨੋ ਅਰਿਯਸਾਵਕੋ ਏਕਦਿਵਸਂ ਜੇਤਵਨਂ ਗਚ੍ਛਨ੍ਤੋ ਸਾਯਂ ਅਚਿਰਵਤਿਨਦੀਤੀਰਂ ਗਨ੍ਤ੍ਵਾ ਨਾਵਿਕੇ ਨਾਵਂ ਤੀਰੇ ਠਪੇਤ੍ਵਾ ਧਮ੍ਮਸ੍ਸਵਨਤ੍ਥਾਯ ਗਤੇ ਤਿਤ੍ਥੇ ਨਾਵਂ ਅਦਿਸ੍ਵਾ ਬੁਦ੍ਧਾਰਮ੍ਮਣਂ ਪੀਤਿਂ ਗਹੇਤ੍ਵਾ ਨਦਿਂ ਓਤਰਿ, ਪਾਦਾ ਉਦਕਮ੍ਹਿ ਨ ਓਸੀਦਿਂਸੁ. ਸੋ ਪਥਵੀਤਲੇ ਗਚ੍ਛਨ੍ਤੋ ਵਿਯ ਵੇਮਜ੍ਝਂ ਗਤਕਾਲੇ ਵੀਚਿਂ ਪਸ੍ਸਿ. ਅਥਸ੍ਸ ਬੁਦ੍ਧਾਰਮ੍ਮਣਾ ਪੀਤਿ ਮਨ੍ਦਾ ਜਾਤਾ, ਪਾਦਾ ਓਸੀਦਿਤੁਂ ਆਰਭਿਂਸੁ, ਸੋ ਪੁਨ ਬੁਦ੍ਧਾਰਮ੍ਮਣਂ ਪੀਤਿਂ ਦਲ਼੍ਹਂ ਕਤ੍ਵਾ ਉਦਕਪਿਟ੍ਠੇਨੇਵ ਗਨ੍ਤ੍ਵਾ ਜੇਤਵਨਂ ਪਵਿਸਿਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਸਤ੍ਥਾ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ‘‘ਉਪਾਸਕ, ਕਚ੍ਚਿ ਮਗ੍ਗਂ ਆਗਚ੍ਛਨ੍ਤੋ ਅਪ੍ਪਕਿਲਮਥੇਨ ਆਗਤੋਸੀ’’ਤਿ ਪੁਚ੍ਛਿਤ੍ਵਾ ‘‘ਭਨ੍ਤੇ, ਬੁਦ੍ਧਾਰਮ੍ਮਣਂ ਪੀਤਿਂ ਗਹੇਤ੍ਵਾ ਉਦਕਪਿਟ੍ਠੇ ਪਤਿਟ੍ਠਂ ਲਭਿਤ੍ਵਾ ਪਥਵਿਂ ਮਦ੍ਦਨ੍ਤੋ ਵਿਯ ਆਗਤੋਮ੍ਹੀ’’ਤਿ ਵੁਤ੍ਤੇ ‘‘ਨ ਖੋ ਪਨ, ਉਪਾਸਕ, ਤ੍ਵਞ੍ਞੇਵ ਬੁਦ੍ਧਗੁਣੇ ਅਨੁਸ੍ਸਰਿਤ੍ਵਾ ਪਤਿਟ੍ਠਂ ਲਦ੍ਧੋ, ਪੁਬ੍ਬੇਪਿ ਉਪਾਸਕਾ ਸਮੁਦ੍ਦਮਜ੍ਝੇ ਨਾਵਾਯ ਭਿਨ੍ਨਾਯ ਬੁਦ੍ਧਗੁਣੇ ਅਨੁਸ੍ਸਰਨ੍ਤਾ ਪਤਿਟ੍ਠਂ ਲਭਿਂਸੂ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਸੋਤਾਪਨ੍ਨੋ ਅਰਿਯਸਾਵਕੋ ਏਕੇਨ ਨ੍ਹਾਪਿਤਕੁਟੁਮ੍ਬਿਕੇਨ ਸਦ੍ਧਿਂ ਨਾਵਂ ਅਭਿਰੁਹਿ, ਤਸ੍ਸ ਨ੍ਹਾਪਿਤਸ੍ਸ ਭਰਿਯਾ ‘‘ਅਯ੍ਯ, ਇਮਸ੍ਸ ਸੁਖਦੁਕ੍ਖਂ ਤਵ ਭਾਰੋ’’ਤਿ ਨ੍ਹਾਪਿਤਂ ਤਸ੍ਸ ਉਪਾਸਕਸ੍ਸ ਹਤ੍ਥੇ ਨਿਕ੍ਖਿਪਿ. ਅਥ ਸਾ ਨਾਵਾ ਸਤ੍ਤਮੇ ਦਿਵਸੇ ਸਮੁਦ੍ਦਮਜ੍ਝੇ ਭਿਨ੍ਨਾ, ਤੇਪਿ ਦ੍ਵੇ ਜਨਾ ਏਕਸ੍ਮਿਂ ਫਲਕੇ ਨਿਪਨ੍ਨਾ ਏਕਂ ਦੀਪਕਂ ਪਾਪੁਣਿਂਸੁ. ਤਤ੍ਥ ਸੋ ਨ੍ਹਾਪਿਤੋ ਸਕੁਣੇ ਮਾਰੇਤ੍ਵਾ ਪਚਿਤ੍ਵਾ ਖਾਦਨ੍ਤੋ ਉਪਾਸਕਸ੍ਸਪਿ ਦੇਤਿ. ਉਪਾਸਕੋ ‘‘ਅਲਂ ਮਯ੍ਹ’’ਨ੍ਤਿ ਨ ਖਾਦਤਿ. ਸੋ ਚਿਨ੍ਤੇਸਿ – ‘‘ਇਮਸ੍ਮਿਂ ਠਾਨੇ ਅਮ੍ਹਾਕਂ ਠਪੇਤ੍ਵਾ ਤੀਣਿ ਸਰਣਾਨਿ ਅਞ੍ਞਾ ਪਤਿਟ੍ਠਾ ਨਤ੍ਥੀ’’ਤਿ. ਸੋ ਤਿਣ੍ਣਂ ਰਤਨਾਨਂ ਗੁਣੇ ਅਨੁਸ੍ਸਰਿ. ਅਥਸ੍ਸਾਨੁਸਰਨ੍ਤਸ੍ਸ ਤਸ੍ਮਿਂ ਦੀਪਕੇ ਨਿਬ੍ਬਤ੍ਤੋ ਨਾਗਰਾਜਾ ਅਤ੍ਤਨੋ ਸਰੀਰਂ ਮਹਾਨਾਵਂ ਕਤ੍ਵਾ ਮਾਪੇਸਿ, ਸਮੁਦ੍ਦਦੇਵਤਾ ਨਿਯਾਮਕੋ ਅਹੋਸਿ, ਨਾਵਾ ਸਤ੍ਤਹਿ ਰਤਨੇਹਿ ਪੂਰਯਿਤ੍ਥ, ਤਯੋ ਕੂਪਕਾ ਇਨ੍ਦਨੀਲਮਣਿਮਯਾ ਅਹੇਸੁਂ, ਸੁਵਣ੍ਣਮਯੋ ਲਙ੍ਕਾਰੋ, ਰਜਤਮਯਾਨਿ ਯੋਤ੍ਤਾਨਿ, ਸੁਵਣ੍ਣਮਯਾਨਿ ਯਟ੍ਠਿਫਿਯਾਨਿ.

ਸਮੁਦ੍ਦਦੇਵਤਾ ਨਾਵਾਯ ਠਤ੍ਵਾ ‘‘ਅਤ੍ਥਿ ਜਮ੍ਬੁਦੀਪਗਮਿਕਾ’’ਤਿ ਘੋਸੇਸਿ. ਉਪਾਸਕੋ ‘‘ਮਯਂ ਗਮਿਸ੍ਸਾਮਾ’’ਤਿ ਆਹ. ਤੇਨ ਹਿ ਏਹਿ, ਨਾਵਂ ਅਭਿਰੁਹਾਤਿ. ਸੋ ਨਾਵਂ ਅਭਿਰੁਹਿਤ੍ਵਾ ਨ੍ਹਾਪਿਤਂ ਪਕ੍ਕੋਸਿ, ਸਮੁਦ੍ਦਦੇਵਤਾ – ‘‘ਤੁਯ੍ਹਞ੍ਞੇਵ ਲਬ੍ਭਤਿ, ਨ ਏਤਸ੍ਸਾ’’ਤਿ ਆਹ. ‘‘ਕਿਂਕਾਰਣਾ’’ਤਿ? ‘‘ਏਤਸ੍ਸ ਸੀਲਗੁਣਾਚਾਰੋ ਨਤ੍ਥਿ, ਤਂ ਕਾਰਣਂ. ਅਹਞ੍ਹਿ ਤੁਯ੍ਹਂ ਨਾਵਂ ਆਹਰਿਂ, ਨ ਏਤਸ੍ਸਾ’’ਤਿ. ‘‘ਹੋਤੁ, ਅਹਂ ਅਤ੍ਤਨਾ ਦਿਨ੍ਨਦਾਨੇਨ ਰਕ੍ਖਿਤਸੀਲੇਨ ਭਾਵਿਤਭਾਵਨਾਯ ਏਤਸ੍ਸ ਪਤ੍ਤਿਂ ਦਮ੍ਮੀ’’ਤਿ. ਨ੍ਹਾਪਿਤੋ ‘‘ਅਨੁਮੋਦਾਮਿ, ਸਾਮੀ’’ਤਿ ਆਹ. ਦੇਵਤਾ ‘‘ਇਦਾਨਿ ਗਣ੍ਹਿਸ੍ਸਾਮੀ’’ਤਿ ਤਮ੍ਪਿ ਆਰੋਪੇਤ੍ਵਾ ਉਭੋਪਿ ਜਨੇ ਸਮੁਦ੍ਦਾ ਨਿਕ੍ਖਾਮੇਤ੍ਵਾ ਨਦਿਯਾ ਬਾਰਾਣਸਿਂ ਗਨ੍ਤ੍ਵਾ ਅਤ੍ਤਨੋ ਆਨੁਭਾਵੇਨ ਦ੍ਵਿਨ੍ਨਮ੍ਪਿ ਤੇਸਂ ਗੇਹੇ ਧਨਂ ਪਤਿਟ੍ਠਪੇਤ੍ਵਾ ‘‘ਪਣ੍ਡਿਤੇਹੇਵ ਸਦ੍ਧਿਂ ਸਂਸਗ੍ਗੋ ਨਾਮ ਕਾਤਬ੍ਬੋ. ਸਚੇ ਹਿ ਇਮਸ੍ਸ ਨ੍ਹਾਪਿਤਸ੍ਸ ਇਮਿਨਾ ਉਪਾਸਕੇਨ ਸਦ੍ਧਿਂ ਸਂਸਗ੍ਗੋ ਨਾਭਵਿਸ੍ਸ, ਸਮੁਦ੍ਦਮਜ੍ਝੇਯੇਵ ਨਸ੍ਸਿਸ੍ਸਾ’’ਤਿ ਪਣ੍ਡਿਤਸਂਸਗ੍ਗਗੁਣਂ ਕਥਯਮਾਨਾ ਇਮਾ ਗਾਥਾ ਅਵੋਚ –

੭੯. ‘‘ਪਸ੍ਸ ਸਦ੍ਧਾਯ ਸੀਲਸ੍ਸ, ਚਾਗਸ੍ਸ ਚ ਅਯਂ ਫਲਂ;

ਨਾਗੋ ਨਾਵਾਯ ਵਣ੍ਣੇਨ, ਸਦ੍ਧਂ ਵਹਤੁਪਾਸਕਂ.

੮੦. ‘‘ਸਬ੍ਭਿਰੇਵ ਸਮਾਸੇਥ, ਸਬ੍ਭਿ ਕੁਬ੍ਬੇਥ ਸਨ੍ਥਵਂ;

ਸਤਞ੍ਹਿ ਸਨ੍ਨਿਵਾਸੇਨ, ਸੋਤ੍ਥਿਂ ਗਚ੍ਛਤਿ ਨ੍ਹਾਪਿਤੋ’’ਤਿ.

ਤਤ੍ਥ ਪਸ੍ਸਾਤਿ ਕਞ੍ਚਿ ਅਨਿਯਮੇਤ੍ਵਾ ਪਸ੍ਸਥਾਤਿ ਆਲਪਤਿ. ਸਦ੍ਧਾਯਾਤਿ ਲੋਕਿਯਲੋਕੁਤ੍ਤਰਾਯ ਸਦ੍ਧਾਯ. ਸੀਲੇਪਿ ਏਸੇਵ ਨਯੋ. ਚਾਗਸ੍ਸਾਤਿ ਦੇਯ੍ਯਧਮ੍ਮਪਰਿਚ੍ਚਾਗਸ੍ਸ ਚੇਵ ਕਿਲੇਸਪਰਿਚ੍ਚਾਗਸ੍ਸ ਚ. ਅਯਂ ਫਲਨ੍ਤਿ ਇਦਂ ਫਲਂ, ਗੁਣਂ ਆਨਿਸਂਸਨ੍ਤਿ ਅਤ੍ਥੋ. ਅਥ ਵਾ ਚਾਗਸ੍ਸ ਚ ਫਲਂ ਪਸ੍ਸ, ਅਯਂ ਨਾਗੋ ਨਾਵਾਯ ਵਣ੍ਣੇਨਾਤਿ ਏਵਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਨਾਵਾਯ ਵਣ੍ਣੇਨਾਤਿ ਨਾਵਾਯ ਸਣ੍ਠਾਨੇਨ. ਸਦ੍ਧਨ੍ਤਿ ਤੀਸੁ ਰਤਨੇਸੁ ਪਤਿਟ੍ਠਿਤਸਦ੍ਧਂ. ਸਬ੍ਭਿਰੇਵਾਤਿ ਪਣ੍ਡਿਤੇਹਿਯੇਵ. ਸਮਾਸੇਥਾਤਿ ਏਕਤੋ ਆਵਸੇਯ੍ਯ, ਉਪਵਸੇਯ੍ਯਾਤਿ ਅਤ੍ਥੋ. ਕੁਬ੍ਬੇਥਾਤਿ ਕਰੇਯ੍ਯ. ਸਨ੍ਥਵਨ੍ਤਿ ਮਿਤ੍ਤਸਨ੍ਥਵਂ. ਤਣ੍ਹਾਸਨ੍ਥਵੋ ਪਨ ਕੇਨਚਿਪਿ ਸਦ੍ਧਿਂ ਨ ਕਾਤਬ੍ਬੋ. ਨ੍ਹਾਪਿਤੋਤਿ ਨ੍ਹਾਪਿਤਕੁਟੁਮ੍ਬਿਕੋ. ‘‘ਨਹਾਪਿਤੋ’’ਤਿਪਿ ਪਾਠੋ.

ਏਵਂ ਸਮੁਦ੍ਦਦੇਵਤਾ ਆਕਾਸੇ ਠਤ੍ਵਾ ਧਮ੍ਮਂ ਦੇਸੇਤ੍ਵਾ ਓਵਦਿਤ੍ਵਾ ਨਾਗਰਾਜਾਨਂ ਗਣ੍ਹਿਤ੍ਵਾ ਅਤ੍ਤਨੋ ਵਿਮਾਨਮੇਵ ਅਗਮਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ – ਸਚ੍ਚਪਰਿਯੋਸਾਨੇ ਉਪਾਸਕੋ ਸਕਦਾਗਾਮਿਫਲੇ ਪਤਿਟ੍ਠਹਿ. ‘‘ਤਦਾ ਸੋਤਾਪਨ੍ਨਉਪਾਸਕੋ ਪਰਿਨਿਬ੍ਬਾਯਿ, ਨਾਗਰਾਜਾ ਸਾਰਿਪੁਤ੍ਤੋ ਅਹੋਸਿ, ਸਮੁਦ੍ਦਦੇਵਤਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੀਲਾਨਿਸਂਸਜਾਤਕਵਣ੍ਣਨਾ ਦਸਮਾ.

ਅਸਦਿਸਵਗ੍ਗੋ ਚਤੁਤ੍ਥੋ.

ਤਸ੍ਸੁਦ੍ਦਾਨਂ –

ਅਸਦਿਸਞ੍ਚ ਸਙ੍ਗਾਮਂ, ਵਾਲੋਦਕਂ ਗਿਰਿਦਤ੍ਤਂ;

ਨਭਿਰਤਿ ਦਧਿਵਾਹਂ, ਚਤੁਮਟ੍ਠਂ ਸੀਹਕੋਟ੍ਠਂ;

ਸੀਹਚਮ੍ਮਂ ਸੀਲਾਨਿਸਂਸਂ.