੨. ਸਨ੍ਥਵਵਗ੍ਗੋ

[੧੬੧] ੧. ਇਨ੍ਦਸਮਾਨਗੋਤ੍ਤਜਾਤਕਵਣ੍ਣਨਾ

ਨ ਸਨ੍ਥਵਂ ਕਾਪੁਰਿਸੇਨ ਕਯਿਰਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਦੁਬ੍ਬਚਜਾਤਿਕਂ ਆਰਬ੍ਭ ਕਥੇਸਿ. ਤਸ੍ਸ ਵਤ੍ਥੁ ਨਵਕਨਿਪਾਤੇ ਗਿਜ੍ਝਜਾਤਕੇ (ਜਾ. ੧.੯.੧ ਆਦਯੋ) ਆਵਿਭਵਿਸ੍ਸਤਿ. ਸਤ੍ਥਾ ਪਨ ਤਂ ਭਿਕ੍ਖੁਂ ‘‘ਪੁਬ੍ਬੇਪਿ ਤ੍ਵਂ, ਭਿਕ੍ਖੁ, ਦੁਬ੍ਬਚਤਾਯ ਪਣ੍ਡਿਤਾਨਂ ਵਚਨਂ ਅਕਤ੍ਵਾ ਮਤ੍ਤਹਤ੍ਥਿਪਾਦੇਹਿ ਸਞ੍ਚੁਣ੍ਣਿਤੋ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵੁਡ੍ਢਿਪ੍ਪਤ੍ਤੋ ਘਰਾਵਾਸਂ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਪਞ੍ਚਨ੍ਨਂ ਇਸਿਸਤਾਨਂ ਗਣਸਤ੍ਥਾ ਹੁਤ੍ਵਾ ਹਿਮਵਨ੍ਤਪਦੇਸੇ ਵਾਸਂ ਕਪ੍ਪੇਸਿ. ਤਦਾ ਤੇਸੁ ਤਾਪਸੇਸੁ ਇਨ੍ਦਸਮਾਨਗੋਤ੍ਤੋ ਨਾਮੇਕੋ ਤਾਪਸੋ ਅਹੋਸਿ ਦੁਬ੍ਬਚੋ ਅਨੋਵਾਦਕੋ. ਸੋ ਏਕਂ ਹਤ੍ਥਿਪੋਤਕਂ ਪੋਸੇਸਿ. ਬੋਧਿਸਤ੍ਤੋ ਸੁਤ੍ਵਾ ਤਂ ਪਕ੍ਕੋਸਿਤ੍ਵਾ ‘‘ਸਚ੍ਚਂ ਕਿਰ ਤ੍ਵਂ ਹਤ੍ਥਿਪੋਤਕਂ ਪੋਸੇਸੀ’’ਤਿ ਪੁਚ੍ਛਿ. ‘‘ਸਚ੍ਚਂ, ਆਚਰਿਯ, ਮਤਮਾਤਿਕਂ ਏਕਂ ਹਤ੍ਥਿਪੋਤਕਂ ਪੋਸੇਮੀ’’ਤਿ. ‘‘ਹਤ੍ਥਿਨੋ ਨਾਮ ਵੁਡ੍ਢਿਪ੍ਪਤ੍ਤਾ ਪੋਸਕੇਯੇਵ ਮਾਰੇਨ੍ਤਿ, ਮਾ ਤਂ ਪੋਸੇਹੀ’’ਤਿ. ‘‘ਤੇਨ ਵਿਨਾ ਵਤ੍ਤਿਤੁਂ ਨ ਸਕ੍ਕੋਮਿ ਆਚਰਿਯਾ’’ਤਿ. ‘‘ਤੇਨ ਹਿ ਪਞ੍ਞਾਯਿਸ੍ਸਸੀ’’ਤਿ. ਸੋ ਤੇਨ ਪੋਸਿਯਮਾਨੋ ਅਪਰਭਾਗੇ ਮਹਾਸਰੀਰੋ ਅਹੋਸਿ.

ਅਥੇਕਸ੍ਮਿਂ ਕਾਲੇ ਤੇ ਇਸਯੋ ਵਨਮੂਲਫਲਾਫਲਤ੍ਥਾਯ ਦੂਰਂ ਗਨ੍ਤ੍ਵਾ ਤਤ੍ਥੇਵ ਕਤਿਪਾਹਂ ਵਸਿਂਸੁ. ਹਤ੍ਥੀਪਿ ਅਗ੍ਗਦਕ੍ਖਿਣਵਾਤੇ ਪਭਿਨ੍ਨਮਦੋ ਹੁਤ੍ਵਾ ਤਸ੍ਸ ਪਣ੍ਣਸਾਲਂ ਵਿਦ੍ਧਂਸੇਤ੍ਵਾ ਪਾਨੀਯਘਟਂ ਭਿਨ੍ਦਿਤ੍ਵਾ ਪਾਸਾਣਫਲਕਂ ਖਿਪਿਤ੍ਵਾ ਆਲਮ੍ਬਨਫਲਕਂ ਲੁਞ੍ਚਿਤ੍ਵਾ ‘‘ਤਂ ਤਾਪਸਂ ਮਾਰੇਤ੍ਵਾਵ ਗਮਿਸ੍ਸਾਮੀ’’ਤਿ ਏਕਂ ਗਹਨਟ੍ਠਾਨਂ ਪਵਿਸਿਤ੍ਵਾ ਤਸ੍ਸ ਆਗਮਨਮਗ੍ਗਂ ਓਲੋਕੇਨ੍ਤੋ ਅਟ੍ਠਾਸਿ. ਇਨ੍ਦਸਮਾਨਗੋਤ੍ਤੋ ਤਸ੍ਸ ਗੋਚਰਂ ਗਹੇਤ੍ਵਾ ਸਬ੍ਬੇਸਂ ਪੁਰਤੋਵ ਆਗਚ੍ਛਨ੍ਤੋ ਤਂ ਦਿਸ੍ਵਾ ਪਕਤਿਸਞ੍ਞਾਯੇਵਸ੍ਸ ਸਨ੍ਤਿਕਂ ਅਗਮਾਸਿ. ਅਥ ਨਂ ਸੋ ਹਤ੍ਥੀ ਗਹਨਟ੍ਠਾਨਾ ਨਿਕ੍ਖਮਿਤ੍ਵਾ ਸੋਣ੍ਡਾਯ ਪਰਾਮਸਿਤ੍ਵਾ ਭੂਮਿਯਂ ਪਾਤੇਤ੍ਵਾ ਸੀਸਂ ਪਾਦੇਨ ਅਕ੍ਕਮਿਤ੍ਵਾ ਜੀਵਿਤਕ੍ਖਯਂ ਪਾਪੇਤ੍ਵਾ ਮਦ੍ਦਿਤ੍ਵਾ ਕੋਞ੍ਚਨਾਦਂ ਕਤ੍ਵਾ ਅਰਞ੍ਞਂ ਪਾਵਿਸਿ. ਸੇਸਤਾਪਸਾ ਤਂ ਪਵਤ੍ਤਿਂ ਬੋਧਿਸਤ੍ਤਸ੍ਸ ਆਰੋਚੇਸੁਂ. ਬੋਧਿਸਤ੍ਤੋ ‘‘ਕਾਪੁਰਿਸੇਹਿ ਨਾਮ ਸਦ੍ਧਿਂ ਸਂਸਗ੍ਗੋ ਨ ਕਾਤਬ੍ਬੋ’’ਤਿ ਵਤ੍ਵਾ ਇਮਾ ਗਾਥਾ ਆਹ –

੨੧. ‘‘ਨ ਸਨ੍ਥਵਂ ਕਾਪੁਰਿਸੇਨ ਕਯਿਰਾ, ਅਰਿਯੋ ਅਨਰਿਯੇਨ ਪਜਾਨਮਤ੍ਥਂ;

ਚਿਰਾਨੁਵੁਤ੍ਥੋਪਿ ਕਰੋਤਿ ਪਾਪਂ, ਗਜੋ ਯਥਾ ਇਨ੍ਦਸਮਾਨਗੋਤ੍ਤਂ.

੨੨. ‘‘ਯਂ ਤ੍ਵੇਵ ਜਞ੍ਞਾ ਸਦਿਸੋ ਮਮਨ੍ਤਿ, ਸੀਲੇਨ ਪਞ੍ਞਾਯ ਸੁਤੇਨ ਚਾਪਿ;

ਤੇਨੇਵ ਮੇਤ੍ਤਿਂ ਕਯਿਰਾਥ ਸਦ੍ਧਿਂ, ਸੁਖੋ ਹਵੇ ਸਪ੍ਪੁਰਿਸੇਨ ਸਙ੍ਗਮੋ’’ਤਿ.

ਤਤ੍ਥ ਨ ਸਨ੍ਥਵਂ ਕਾਪੁਰਿਸੇਨ ਕਯਿਰਾਤਿ ਕੁਚ੍ਛਿਤੇਨ ਕੋਧਪੁਰਿਸੇਨ ਸਦ੍ਧਿਂ ਤਣ੍ਹਾਸਨ੍ਥਵਂ ਵਾ ਮਿਤ੍ਤਸਨ੍ਥਵਂ ਵਾ ਨ ਕਯਿਰਾਥ. ਅਰਿਯੋ ਅਨਰਿਯੇਨ ਪਜਾਨਮਤ੍ਥਨ੍ਤਿ ਅਰਿਯੋਤਿ ਚਤ੍ਤਾਰੋ ਅਰਿਯਾ ਆਚਾਰਅਰਿਯੋ ਲਿਙ੍ਗਅਰਿਯੋ ਦਸ੍ਸਨਅਰਿਯੋ ਪਟਿਵੇਧਅਰਿਯੋਤਿ. ਤੇਸੁ ਆਚਾਰਅਰਿਯੋ ਇਧ ਅਧਿਪ੍ਪੇਤੋ. ਸੋ ਪਜਾਨਮਤ੍ਥਂ ਅਤ੍ਥਂ ਪਜਾਨਨ੍ਤੋ ਅਤ੍ਥਾਨਤ੍ਥਕੁਸਲੋ ਆਚਾਰੇ ਠਿਤੋ ਅਰਿਯਪੁਗ੍ਗਲੋ ਅਨਰਿਯੇਨ ਨਿਲ੍ਲਜ੍ਜੇਨ ਦੁਸ੍ਸੀਲੇਨ ਸਦ੍ਧਿਂ ਸਨ੍ਥਵਂ ਨ ਕਰੇਯ੍ਯਾਤਿ ਅਤ੍ਥੋ. ਕਿਂ ਕਾਰਣਾ? ਚਿਰਾਨੁਵੁਤ੍ਥੋਪਿ ਕਰੋਤਿ ਪਾਪਨ੍ਤਿ, ਯਸ੍ਮਾ ਅਨਰਿਯੋ ਚਿਰਂ ਏਕਤੋ ਅਨੁਵੁਤ੍ਥੋਪਿ ਤਂ ਏਕਤੋ ਨਿਵਾਸਂ ਅਗਣੇਤ੍ਵਾ ਕਰੋਤਿ ਪਾਪਂ ਲਾਮਕਕਮ੍ਮਂ ਕਰੋਤਿਯੇਵ. ਯਥਾ ਕਿਂ? ਗਜੋ ਯਥਾ ਇਨ੍ਦਸਮਾਨਗੋਤ੍ਤਨ੍ਤਿ, ਯਥਾ ਸੋ ਗਜੋ ਇਨ੍ਦਸਮਾਨਗੋਤ੍ਤਂ ਮਾਰੇਨ੍ਤੋ ਪਾਪਂ ਅਕਾਸੀਤਿ ਅਤ੍ਥੋ. ਯਂ ਤ੍ਵੇਵ ਜਞ੍ਞਾ ਸਦਿਸੋ ਮਮਨ੍ਤਿਆਦੀਸੁ ਯਂ ਤ੍ਵੇਵ ਪੁਗ੍ਗਲਂ ‘‘ਅਯਂ ਮਮ ਸੀਲਾਦੀਹਿ ਸਦਿਸੋ’’ਤਿ ਜਾਨੇਯ੍ਯ, ਤੇਨੇਵ ਸਦ੍ਧਿਂ ਮੇਤ੍ਤਿਂ ਕਯਿਰਾਥ, ਸਪ੍ਪੁਰਿਸੇਨ ਸਦ੍ਧਿਂ ਸਮਾਗਮੋ ਸੁਖਾਵਹੋਤਿ.

ਏਵਂ ਬੋਧਿਸਤ੍ਤੋ ‘‘ਅਨੋਵਾਦਕੇਨ ਨਾਮ ਨ ਭਵਿਤਬ੍ਬਂ, ਸੁਸਿਕ੍ਖਿਤੇਨ ਭਵਿਤੁਂ ਵਟ੍ਟਤੀ’’ਤਿ ਇਸਿਗਣਂ ਓਵਦਿਤ੍ਵਾ ਇਨ੍ਦਸਮਾਨਗੋਤ੍ਤਸ੍ਸ ਸਰੀਰਕਿਚ੍ਚਂ ਕਾਰੇਤ੍ਵਾ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਇਨ੍ਦਸਮਾਨਗੋਤ੍ਤੋ ਅਯਂ ਦੁਬ੍ਬਚੋ ਅਹੋਸਿ, ਗਣਸਤ੍ਥਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਇਨ੍ਦਸਮਾਨਗੋਤ੍ਤਜਾਤਕਵਣ੍ਣਨਾ ਪਠਮਾ.

[੧੬੨] ੨. ਸਨ੍ਥਵਜਾਤਕਵਣ੍ਣਨਾ

ਨ ਸਨ੍ਥਵਸ੍ਮਾ ਪਰਮਤ੍ਥਿ ਪਾਪਿਯੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਗ੍ਗਿਜੁਹਨਂ ਆਰਬ੍ਭ ਕਥੇਸਿ. ਵਤ੍ਥੁ ਹੇਟ੍ਠਾ ਨਙ੍ਗੁਟ੍ਠਜਾਤਕੇ (ਜਾ. ੧.੧.੧੪੪ ਆਦਯੋ) ਕਥਿਤਸਦਿਸਮੇਵ. ਭਿਕ੍ਖੂ ਤੇ ਅਗ੍ਗਿਂ ਜੁਹਨ੍ਤੇ ਦਿਸ੍ਵਾ ‘‘ਭਨ੍ਤੇ, ਜਟਿਲਾ ਨਾਨਪ੍ਪਕਾਰਂ ਮਿਚ੍ਛਾਤਪਂ ਕਰੋਨ੍ਤਿ, ਅਤ੍ਥਿ ਨੁ ਖੋ ਏਤ੍ਥ ਵੁਡ੍ਢੀ’’ਤਿ ਭਗਵਨ੍ਤਂ ਪੁਚ੍ਛਿਂਸੁ. ‘‘ਨ, ਭਿਕ੍ਖਵੇ, ਏਤ੍ਥਕਾਚਿ ਵੁਡ੍ਢਿ ਨਾਮ ਅਤ੍ਥਿ, ਪੋਰਾਣਕਪਣ੍ਡਿਤਾਪਿ ਅਗ੍ਗਿਜੁਹਨੇ ਵੁਡ੍ਢਿ ਅਤ੍ਥੀਤਿ ਸਞ੍ਞਾਯ ਚਿਰਂ ਅਗ੍ਗਿਂ ਜੁਹਿਤ੍ਵਾ ਤਸ੍ਮਿਂ ਕਮ੍ਮੇ ਅਵੁਡ੍ਢਿਮੇਵ ਦਿਸ੍ਵਾ ਅਗ੍ਗਿਂ ਉਦਕੇਨ ਨਿਬ੍ਬਾਪੇਤ੍ਵਾ ਸਾਖਾਦੀਹਿ ਪੋਥੇਤ੍ਵਾ ਪੁਨ ਨਿਵਤ੍ਤਿਤ੍ਵਾਪਿ ਨ ਓਲੋਕੇਸੁ’’ਨ੍ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ. ਮਾਤਾਪਿਤਰੋ ਤਸ੍ਸ ਜਾਤਗ੍ਗਿਂ ਗਹੇਤ੍ਵਾ ਤਂ ਸੋਲ਼ਸਵਸ੍ਸੁਦ੍ਦੇਸੇ ਠਿਤਂ ਆਹਂਸੁ – ‘‘ਕਿਂ, ਤਾਤ, ਜਾਤਗ੍ਗਿਂ ਗਹੇਤ੍ਵਾ ਅਰਞ੍ਞੇ ਅਗ੍ਗਿਂ ਪਰਿਚਰਿਸ੍ਸਸਿ, ਉਦਾਹੁ ਤਯੋ ਵੇਦੇ ਉਗ੍ਗਣ੍ਹਿਤ੍ਵਾ ਕੁਟੁਮ੍ਬਂ ਸਣ੍ਠਪੇਤ੍ਵਾ ਘਰਾਵਾਸਂ ਵਸਿਸ੍ਸਸੀ’’ਤਿ. ਸੋ ‘‘ਨ ਮੇ ਘਰਾਵਾਸੇਨ ਅਤ੍ਥੋ, ਅਰਞ੍ਞੇ ਅਗ੍ਗਿਂ ਪਰਿਚਰਿਤ੍ਵਾ ਬ੍ਰਹ੍ਮਲੋਕਪਰਾਯਣੋ ਭਵਿਸ੍ਸਾਮੀ’’ਤਿ ਜਾਤਗ੍ਗਿਂ ਗਹੇਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਪਣ੍ਣਸਾਲਾਯ ਵਾਸਂ ਕਪ੍ਪੇਤ੍ਵਾ ਅਗ੍ਗਿਂ ਪਰਿਚਰਿ. ਸੋ ਏਕਦਿਵਸਂ ਨਿਮਨ੍ਤਿਤਟ੍ਠਾਨਂ ਗਨ੍ਤ੍ਵਾ ਸਪ੍ਪਿਨਾ ਪਾਯਾਸਂ ਲਭਿਤ੍ਵਾ ‘‘ਇਮਂ ਪਾਯਾਸਂ ਮਹਾਬ੍ਰਹ੍ਮੁਨੋ ਯਜਿਸ੍ਸਾਮੀ’’ਤਿ ਤਂ ਪਾਯਾਸਂ ਆਹਰਿਤ੍ਵਾ ਅਗ੍ਗਿਂ ਜਾਲੇਤ੍ਵਾ ‘‘ਅਗ੍ਗਿਂ ਤਾਵ ਭਵਨ੍ਤਂ ਸਪ੍ਪਿਯੁਤ੍ਤਂ ਪਾਯਾਸਂ ਪਾਯੇਮੀ’’ਤਿ ਪਾਯਾਸਂ ਅਗ੍ਗਿਮ੍ਹਿ ਪਕ੍ਖਿਪਿ. ਬਹੁਸਿਨੇਹੇ ਪਾਯਾਸੇ ਅਗ੍ਗਿਮ੍ਹਿ ਪਕ੍ਖਿਤ੍ਤਮਤ੍ਤੇਯੇਵ ਅਗ੍ਗਿ ਜਲਿਤ੍ਵਾ ਪਚ੍ਚੁਗ੍ਗਤਾਹਿ ਅਚ੍ਚੀਹਿ ਪਣ੍ਣਸਾਲਂ ਝਾਪੇਸਿ. ਬ੍ਰਾਹ੍ਮਣੋ ਭੀਤਤਸਿਤੋ ਪਲਾਯਿਤ੍ਵਾ ਬਹਿ ਠਤ੍ਵਾ ‘‘ਕਾਪੁਰਿਸੇਹਿ ਨਾਮ ਸਨ੍ਥਵੋ ਨ ਕਾਤਬ੍ਬੋ, ਇਦਾਨਿ ਮੇ ਇਮਿਨਾ ਅਗ੍ਗਿਨਾ ਕਿਚ੍ਛੇਨ ਕਤਾ ਪਣ੍ਣਸਾਲਾ ਝਾਪਿਤਾ’’ਤਿ ਵਤ੍ਵਾ ਪਠਮਂ ਗਾਥਮਾਹ –

੨੩. ‘‘ਨ ਸਨ੍ਥਵਸ੍ਮਾ ਪਰਮਤ੍ਥਿ ਪਾਪਿਯੋ, ਯੋ ਸਨ੍ਥਵੋ ਕਾਪੁਰਿਸੇਨ ਹੋਤਿ;

ਸਨ੍ਤਪ੍ਪਿਤੋ ਸਪ੍ਪਿਨਾ ਪਾਯਸੇਨ, ਕਿਚ੍ਛਾਕਤਂ ਪਣ੍ਣਕੁਟਿਂ ਅਦਯ੍ਹੀ’’ਤਿ.

ਤਤ੍ਥ ਨ ਸਨ੍ਥਵਸ੍ਮਾਤਿ ਤਣ੍ਹਾਸਨ੍ਥਵਾਪਿ ਚ ਮਿਤ੍ਤਸਨ੍ਥਵਾਪਿ ਚਾਤਿ ਦੁਵਿਧਾਪਿ ਏਤਸ੍ਮਾ ਸਨ੍ਥਵਾ ਪਰਂ ਉਤ੍ਤਰਿ ਅਞ੍ਞਂ ਪਾਪਤਰਂ ਨਤ੍ਥਿ, ਲਾਮਕਤਰਂ ਨਾਮ ਨਤ੍ਥੀਤਿ ਅਤ੍ਥੋ. ਯੋ ਸਨ੍ਥਵੋ ਕਾਪੁਰਿਸੇਨਾਤਿ ਯੋ ਪਾਪਕੇਨ ਕਾਪੁਰਿਸੇਨ ਸਦ੍ਧਿਂ ਦੁਵਿਧੋਪਿ ਸਨ੍ਥਵੋ, ਤਤੋ ਪਾਪਤਰਂ ਅਞ੍ਞਂ ਨਤ੍ਥਿ. ਕਸ੍ਮਾ? ਸਨ੍ਤਪ੍ਪਿਤੋ …ਪੇ…ਅਦਯ੍ਹੀਤਿ, ਯਸ੍ਮਾ ਸਪ੍ਪਿਨਾ ਚ ਪਾਯਾਸੇਨ ਚ ਸਨ੍ਤਪ੍ਪਿਤੋਪਿ ਅਯਂ ਅਗ੍ਗਿ ਮਯਾ ਕਿਚ੍ਛੇਨ ਕਤਂ ਪਣ੍ਣਸਾਲਂ ਝਾਪੇਸੀਤਿ ਅਤ੍ਥੋ.

ਸੋ ਏਵਂ ਵਤ੍ਵਾ ‘‘ਨ ਮੇ ਤਯਾ ਮਿਤ੍ਤਦੁਬ੍ਭਿਨਾ ਅਤ੍ਥੋ’’ਤਿ ਤਂ ਅਗ੍ਗਿਂ ਉਦਕੇਨ ਨਿਬ੍ਬਾਪੇਤ੍ਵਾ ਸਾਖਾਹਿ ਪੋਥੇਤ੍ਵਾ ਅਨ੍ਤੋਹਿਮਵਨ੍ਤਂ ਪਵਿਸਿਤ੍ਵਾ ਏਕਂ ਸਾਮਮਿਗਿਂ ਸੀਹਸ੍ਸ ਚ ਬ੍ਯਗ੍ਘਸ੍ਸ ਚ ਦੀਪਿਨੋ ਚ ਮੁਖਂ ਲੇਹਨ੍ਤਿਂ ਦਿਸ੍ਵਾ ‘‘ਸਪ੍ਪੁਰਿਸੇਹਿ ਸਦ੍ਧਿਂ ਸਨ੍ਥਵਾ ਪਰਂ ਸੇਯ੍ਯੋ ਨਾਮ ਨਤ੍ਥੀ’’ਤਿ ਚਿਨ੍ਤੇਤ੍ਵਾ ਦੁਤਿਯਂ ਗਾਥਮਾਹ –

੨੪. ‘‘ਨ ਸਨ੍ਥਵਸ੍ਮਾ ਪਰਮਤ੍ਥਿ ਸੇਯ੍ਯੋ, ਯੋ ਸਨ੍ਥਵੋ ਸਪ੍ਪੁਰਿਸੇਨ ਹੋਤਿ;

ਸੀਹਸ੍ਸ ਬ੍ਯਗ੍ਘਸ੍ਸ ਚ ਦੀਪਿਨੋ ਚ, ਸਾਮਾ ਮੁਖਂ ਲੇਹਤਿ ਸਨ੍ਥਵੇਨਾ’’ਤਿ.

ਤਤ੍ਥ ਸਾਮਾ ਮੁਖਂ ਲੇਹਤਿ ਸਨ੍ਥਵੇਨਾਤਿ ਸਾਮਾ ਨਾਮ ਮਿਗੀ ਇਮੇਸਂ ਤਿਣ੍ਣਂ ਜਨਾਨਂ ਸਨ੍ਥਵੇਨ ਸਿਨੇਹੇਨ ਮੁਖਂ ਲੇਹਤੀਤਿ.

ਏਵਂ ਵਤ੍ਵਾ ਬੋਧਿਸਤ੍ਤੋ ਅਨ੍ਤੋਹਿਮਵਨ੍ਤਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਜੀਵਿਤਪਰਿਯੋਸਾਨੇ ਬ੍ਰਹ੍ਮਲੋਕੂਪਗੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤੇਨ ਸਮਯੇਨ ਤਾਪਸੋ ਅਹਮੇਵ ਅਹੋਸਿ’’ਨ੍ਤਿ.

ਸਨ੍ਥਵਜਾਤਕਵਣ੍ਣਨਾ ਦੁਤਿਯਾ.

[੧੬੩] ੩. ਸੁਸੀਮਜਾਤਕਵਣ੍ਣਨਾ

ਕਾਲ਼ਾ ਮਿਗਾ ਸੇਤਦਨ੍ਤਾ ਤਵੀਮੇਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਛਨ੍ਦਕਦਾਨਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਞ੍ਹਿ ਕਦਾਚਿ ਏਕਮੇਵ ਕੁਲਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਾਨਂ ਦੇਤਿ, ਕਦਾਚਿ ਅਞ੍ਞਤਿਤ੍ਥਿਯਾਨਂ ਦੇਤਿ, ਕਦਾਚਿ ਗਣਬਨ੍ਧਨੇਨ ਬਹੂ ਏਕਤੋ ਹੁਤ੍ਵਾ ਦੇਨ੍ਤਿ, ਕਦਾਚਿ ਵੀਥਿਸਭਾਗੇਨ, ਕਦਾਚਿ ਸਕਲਨਗਰਵਾਸਿਨੋ ਛਨ੍ਦਕਂ ਸਂਹਰਿਤ੍ਵਾ ਦਾਨਂ ਦੇਨ੍ਤਿ. ਇਮਸ੍ਮਿਂ ਪਨ ਕਾਲੇ ਸਕਲਨਗਰਵਾਸਿਨੋ ਛਨ੍ਦਕਂ ਸਂਹਰਿਤ੍ਵਾ ਸਬ੍ਬਪਰਿਕ੍ਖਾਰਦਾਨਂ ਸਜ੍ਜੇਤ੍ਵਾ ਦ੍ਵੇ ਕੋਟ੍ਠਾਸਾ ਹੁਤ੍ਵਾ ਏਕਚ੍ਚੇ ‘‘ਇਮਂ ਸਬ੍ਬਪਰਿਕ੍ਖਾਰਦਾਨਂ ਅਞ੍ਞਤਿਤ੍ਥਿਯਾਨਂ ਦਸ੍ਸਾਮਾ’’ਤਿ ਆਹਂਸੁ, ਏਕਚ੍ਚੇ ‘‘ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸਾ’’ਤਿ. ਏਵਂ ਪੁਨਪ੍ਪੁਨਂ ਕਥਾਯ ਵਤ੍ਤਮਾਨਾਯ ਅਞ੍ਞਤਿਤ੍ਥਿਯਸਾਵਕੇਹਿ ਅਞ੍ਞਤਿਤ੍ਥਿਯਾਨਞ੍ਞੇਵ, ਬੁਦ੍ਧਸਾਵਕੇਹਿ ‘‘‘ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸੇਵਾ’ਤਿ ਵੁਤ੍ਤੇ ਸਮ੍ਬਹੁਲਂ ਕਰਿਸਾਮਾ’’ਤਿ ਸਮ੍ਬਹੁਲਾਯ ਕਥਾਯ ‘‘ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਸ੍ਸਾਮਾ’’ਤਿ ਵਦਨ੍ਤਾਯੇਵ ਬਹੁਕਾ ਜਾਤਾ, ਤੇਸਞ੍ਞੇਵ ਕਥਾ ਪਤਿਟ੍ਠਾਸਿ. ਅਞ੍ਞਤਿਤ੍ਥਿਯਸਾਵਕਾ ਬੁਦ੍ਧਾਨਂ ਦਾਤਬ੍ਬਦਾਨਸ੍ਸ ਅਨ੍ਤਰਾਯਂ ਕਾਤੁਂ ਨਾਸਕ੍ਖਿਂਸੁ. ਨਾਗਰਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ ਸਤ੍ਤਮੇ ਦਿਵਸੇ ਸਬ੍ਬਪਰਿਕ੍ਖਾਰੇ ਅਦਂਸੁ. ਸਤ੍ਥਾ ਅਨੁਮੋਦਨਂ ਕਤ੍ਵਾ ਮਹਾਜਨਂ ਮਗ੍ਗਫਲੇਹਿ ਪਬੋਧੇਤ੍ਵਾ ਜੇਤਵਨਵਿਹਾਰਮੇਵ ਗਨ੍ਤ੍ਵਾ ਭਿਕ੍ਖੁਸਙ੍ਘੇਨ ਵਤ੍ਤੇ ਦਸ੍ਸਿਤੇ ਗਨ੍ਧਕੁਟਿਪ੍ਪਮੁਖੇ ਠਤ੍ਵਾ ਸੁਗਤੋਵਾਦਂ ਦਤ੍ਵਾ ਗਨ੍ਧਕੁਟਿਂ ਪਾਵਿਸਿ.

ਸਾਯਨ੍ਹਸਮਯੇ ਭਿਕ੍ਖੂ ਧਮ੍ਮਸਭਾਯਂ ਸਨ੍ਨਿਪਤਿਤ੍ਵਾ ਕਥਂ ਸਮੁਟ੍ਠਾਪੇਸੁਂ – ‘‘ਆਵੁਸੋ, ਅਞ੍ਞਤਿਤ੍ਥਿਯਸਾਵਕਾ ਬੁਦ੍ਧਾਨਂ ਦਾਤਬ੍ਬਦਾਨਸ੍ਸ ਅਨ੍ਤਰਾਯਕਰਣਤ੍ਥਾਯ ਵਾਯਮਨ੍ਤਾਪਿ ਅਨ੍ਤਰਾਯਂ ਕਾਤੁਂ ਨਾਸਕ੍ਖਿਂਸੁ, ਤਂ ਸਬ੍ਬਪਰਿਕ੍ਖਾਰਦਾਨਂ ਬੁਦ੍ਧਾਨਂਯੇਵ ਪਾਦਮੂਲਂ ਆਗਤਂ, ਅਹੋ ਬੁਦ੍ਧਬਲਂ ਨਾਮ ਮਹਨ੍ਤ’’ਨ੍ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਏਤੇ ਅਞ੍ਞਤਿਤ੍ਥਿਯਸਾਵਕਾ ਇਦਾਨੇਵ ਮਯ੍ਹਂ ਦਾਤਬ੍ਬਦਾਨਸ੍ਸ ਅਨ੍ਤਰਾਯਕਰਣਤ੍ਥਾਯ ਵਾਯਮਨ੍ਤਿ, ਪੁਬ੍ਬੇਪਿ ਵਾਯਮਿਂਸੁ, ਸੋ ਪਨ ਪਰਿਕ੍ਖਾਰੋ ਸਬ੍ਬਕਾਲੇਪਿ ਮਮੇਵ ਪਾਦਮੂਲਂ ਆਗਚ੍ਛਤੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਸੁਸੀਮੋ ਨਾਮ ਰਾਜਾ ਅਹੋਸਿ. ਤਦਾ ਬੋਧਿਸਤ੍ਤੋ ਤਸ੍ਸ ਪੁਰੋਹਿਤਸ੍ਸ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ, ਤਸ੍ਸ ਸੋਲ਼ਸਵਸ੍ਸਿਕਕਾਲੇ ਪਿਤਾ ਕਾਲਮਕਾਸਿ. ਸੋ ਪਨ ਧਰਮਾਨਕਾਲੇ ਰਞ੍ਞੋ ਹਤ੍ਥਿਮਙ੍ਗਲਕਾਰਕੋ ਅਹੋਸਿ. ਹਤ੍ਥੀਨਂ ਮਙ੍ਗਲਕਰਣਟ੍ਠਾਨੇ ਆਭਤਉਪਕਰਣਭਣ੍ਡਞ੍ਚ ਹਤ੍ਥਾਲਙ੍ਕਾਰਞ੍ਚ ਸਬ੍ਬਂ ਸੋਯੇਵ ਅਲਤ੍ਥ. ਏਵਮਸ੍ਸ ਏਕੇਕਸ੍ਮਿਂ ਮਙ੍ਗਲੇ ਕੋਟਿਮਤ੍ਤਂ ਧਨਂ ਉਪ੍ਪਜ੍ਜਤਿ. ਅਥ ਤਸ੍ਮਿਂ ਕਾਲੇ ਹਤ੍ਥਿਮਙ੍ਗਲਛਣੋ ਸਮ੍ਪਾਪੁਣਿ. ਸੇਸਾ ਬ੍ਰਾਹ੍ਮਣਾ ਰਾਜਾਨਂ ਉਪਸਙ੍ਕਮਿਤ੍ਵਾ ‘‘ਮਹਾਰਾਜ, ਹਤ੍ਥਿਮਙ੍ਗਲਛਣੋ ਸਮ੍ਪਤ੍ਤੋ, ਮਙ੍ਗਲਂ ਕਾਤੁਂ ਵਟ੍ਟਤਿ. ਪੁਰੋਹਿਤਬ੍ਰਾਹ੍ਮਣਸ੍ਸ ਪਨ ਪੁਤ੍ਤੋ ਅਤਿਦਹਰੋ, ਨੇਵ ਤਯੋ ਵੇਦੇ ਜਾਨਾਤਿ, ਨ ਹਤ੍ਥਿਸੁਤ੍ਤਂ, ਮਯਂ ਹਤ੍ਥਿਮਙ੍ਗਲਂ ਕਰਿਸ੍ਸਾਮਾ’’ਤਿ ਆਹਂਸੁ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਬ੍ਰਾਹ੍ਮਣਾ ਪੁਰੋਹਿਤਪੁਤ੍ਤਸ੍ਸ ਹਤ੍ਥਿਮਙ੍ਗਲਂ ਕਾਤੁਂ ਅਦਤ੍ਵਾ ‘‘ਹਤ੍ਥਿਮਙ੍ਗਲਂ ਕਤ੍ਵਾ ਮਯਂ ਧਨਂ ਗਣ੍ਹਿਸ੍ਸਾਮਾ’’ਤਿ ਹਟ੍ਠਤੁਟ੍ਠਾ ਵਿਚਰਨ੍ਤਿ. ਅਥ ‘‘ਚਤੁਤ੍ਥੇ ਦਿਵਸੇ ਹਤ੍ਥਿਮਙ੍ਗਲਂ ਭਵਿਸ੍ਸਤੀ’’ਤਿ ਬੋਧਿਸਤ੍ਤਸ੍ਸ ਮਾਤਾ ਤਂ ਪਵਤ੍ਤਿਂ ਸੁਤ੍ਵਾ ‘‘ਹਤ੍ਥਿਮਙ੍ਗਲਕਰਣਂ ਨਾਮ ਯਾਵ ਸਤ੍ਤਮਾ ਕੁਲਪਰਿਵਟ੍ਟਾ ਅਮ੍ਹਾਕਂ ਵਂਸੋ, ਵਂਸੋ ਚ ਨੋ ਓਸਕ੍ਕਿਸ੍ਸਤਿ, ਧਨਾ ਚ ਪਰਿਹਾਯਿਸ੍ਸਾਮਾ’’ਤਿ ਅਨੁਸੋਚਮਾਨਾ ਪਰੋਦਿ.

ਬੋਧਿਸਤ੍ਤੋ ‘‘ਕਸ੍ਮਾ, ਅਮ੍ਮ, ਰੋਦਸੀ’’ਤਿ ਵਤ੍ਵਾ ਤਂ ਕਾਰਣਂ ਸੁਤ੍ਵਾ ‘‘ਨਨੁ, ਅਮ੍ਮ, ਅਹਂ ਮਙ੍ਗਲਂ ਕਰਿਸ੍ਸਾਮੀ’’ਤਿ ਆਹ. ‘‘ਤਾਤ, ਤ੍ਵਂ ਨੇਵ ਤਯੋ ਵੇਦੇ ਜਾਨਾਸਿ, ਨ ਹਤ੍ਥਿਸੁਤ੍ਤਂ, ਕਥਂ ਮਙ੍ਗਲਂ ਕਰਿਸ੍ਸਸੀ’’ਤਿ. ‘‘ਅਮ੍ਮ, ਕਦਾ ਪਨ ਹਤ੍ਥਿਮਙ੍ਗਲਂ ਕਰਿਸ੍ਸਤੀ’’ਤਿ? ‘‘ਇਤੋ ਚਤੁਤ੍ਥੇ ਦਿਵਸੇ, ਤਾਤਾ’’ਤਿ. ‘‘ਅਮ੍ਮ, ਤਯੋ ਪਨ ਵੇਦੇ ਪਗੁਣੇ ਕਤ੍ਵਾ ਹਤ੍ਥਿਸੁਤ੍ਤਂ ਜਾਨਨਕਆਚਰਿਯੋ ਕਹਂ ਵਸਤੀ’’ਤਿ? ‘‘ਤਾਤ, ਏਵਰੂਪੋ ਦਿਸਾਪਾਮੋਕ੍ਖੋ ਆਚਰਿਯੋ ਇਤੋ ਵੀਸਯੋਜਨਸਤਮਤ੍ਥਕੇ ਗਨ੍ਧਾਰਰਟ੍ਠੇ ਤਕ੍ਕਸਿਲਾਯਂ ਵਸਤੀ’’ਤਿ. ‘‘ਅਮ੍ਮ, ਅਮ੍ਹਾਕਂ ਵਂਸਂ ਨ ਨਾਸੇਸ੍ਸਾਮਿ, ਅਹਂ ਸ੍ਵੇ ਏਕਦਿਵਸੇਨੇਵ ਤਕ੍ਕਸਿਲਂ ਗਨ੍ਤ੍ਵਾ ਏਕਰਤ੍ਤੇਨੇਵ ਤਯੋ ਵੇਦੇ ਚ ਹਤ੍ਥਿਸੁਤ੍ਤਞ੍ਚ ਉਗ੍ਗਣ੍ਹਿਤ੍ਵਾ ਪੁਨਦਿਵਸੇ ਆਗਨ੍ਤ੍ਵਾ ਚਤੁਤ੍ਥੇ ਦਿਵਸੇ ਹਤ੍ਥਿਮਙ੍ਗਲਂ ਕਰਿਸ੍ਸਾਮਿ, ਮਾ ਰੋਦੀ’’ਤਿ ਮਾਤਰਂ ਸਮਸ੍ਸਾਸੇਤ੍ਵਾ ਪੁਨਦਿਵਸੇ ਬੋਧਿਸਤ੍ਤੋ ਪਾਤੋਵ ਭੁਞ੍ਜਿਤ੍ਵਾ ਏਕਕੋਵ ਨਿਕ੍ਖਮਿਤ੍ਵਾ ਏਕਦਿਵਸੇਨੇਵ ਤਕ੍ਕਸਿਲਂ ਗਨ੍ਤ੍ਵਾ ਆਚਰਿਯਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ.

ਅਥ ਨਂ ਆਚਰਿਯੋ ‘‘ਕੁਤੋ ਆਗਤੋਸਿ, ਤਾਤਾ’’ਤਿ ਪੁਚ੍ਛਿ. ‘‘ਬਾਰਾਣਸਿਤੋ, ਆਚਰਿਯਾ’’ਤਿ. ‘‘ਕੇਨਤ੍ਥੇਨਾ’’ਤਿ? ‘‘ਤੁਮ੍ਹਾਕਂ ਸਨ੍ਤਿਕੇ ਤਯੋ ਵੇਦੇ ਚ ਹਤ੍ਥਿਸੁਤ੍ਤਞ੍ਚ ਉਗ੍ਗਣ੍ਹਨਤ੍ਥਾਯਾ’’ਤਿ. ‘‘ਸਾਧੁ, ਤਾਤ, ਉਗ੍ਗਣ੍ਹਾ’’ਤਿ. ਬੋਧਿਸਤ੍ਤੋ ‘‘ਆਚਰਿਯ, ਮਯ੍ਹਂ ਕਮ੍ਮਂ ਅਚ੍ਚਾਯਿਕ’’ਨ੍ਤਿ ਸਬ੍ਬਂ ਪਵਤ੍ਤਿਂ ਆਰੋਚੇਤ੍ਵਾ ‘‘ਅਹਂ ਏਕਦਿਵਸੇਨੇਵ ਵੀਸਯੋਜਨਸਤਂ ਆਗਤੋ, ਅਜ੍ਜੇਵੇਕਰਤ੍ਤਿਂ ਮਯ੍ਹਮੇਵ ਓਕਾਸਂ ਕਰੋਥ, ਇਤੋ ਤਤਿਯਦਿਵਸੇ ਹਤ੍ਥਿਮਙ੍ਗਲਂ ਭਵਿਸ੍ਸਤਿ, ਅਹਂ ਏਕੇਨੇਵ ਉਦ੍ਦੇਸਮਗ੍ਗੇਨ ਸਬ੍ਬਂ ਉਗ੍ਗਣ੍ਹਿਸ੍ਸਾਮੀ’’ਤਿ ਵਤ੍ਵਾ ਆਚਰਿਯਂ ਓਕਾਸਂ ਕਾਰੇਤ੍ਵਾ ਆਚਰਿਯਸ੍ਸ ਭੁਤ੍ਤਕਾਲੇ ਸਯਂ ਭੁਞ੍ਜਿਤ੍ਵਾ ਆਚਰਿਯਸ੍ਸ ਪਾਦੇ ਧੋਵਿਤ੍ਵਾ ਸਹਸ੍ਸਤ੍ਥਵਿਕਂ ਪੁਰਤੋ ਠਪੇਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਪਰਿਯਤ੍ਤਿਂ ਪਟ੍ਠਪੇਤ੍ਵਾ ਅਰੁਣੇ ਉਗ੍ਗਚ੍ਛਨ੍ਤੇ ਤਯੋ ਵੇਦੇ ਚ ਹਤ੍ਥਿਸੁਤ੍ਤਞ੍ਚ ਨਿਟ੍ਠਪੇਤ੍ਵਾ ‘‘ਅਞ੍ਞੋਪਿ ਅਤ੍ਥਿ, ਆਚਰਿਯਾ’’ਤਿ ਪੁਚ੍ਛਿਤ੍ਵਾ ‘‘ਨਤ੍ਥਿ ਤਾਤ, ਸਬ੍ਬਂ ਨਿਟ੍ਠਿਤ’’ਨ੍ਤਿ ਵੁਤ੍ਤੇ ‘‘ਆਚਰਿਯ, ਇਮਸ੍ਮਿਂ ਗਨ੍ਥੇ ਏਤ੍ਤਕਂ ਪਦਪਚ੍ਚਾਭਟ੍ਠਂ, ਏਤ੍ਤਕਂ ਸਜ੍ਝਾਯਸਮ੍ਮੋਹਟ੍ਠਾਨਂ, ਇਤੋ ਪਟ੍ਠਾਯ ਤੁਮ੍ਹੇ ਅਨ੍ਤੇਵਾਸਿਕੇ ਏਵਂ ਵਾਚੇਯ੍ਯਾਥਾ’’ਤਿ ਆਚਰਿਯਸ੍ਸ ਸਿਪ੍ਪਂ ਸੋਧੇਤ੍ਵਾ ਪਾਤੋਵ ਭੁਞ੍ਜਿਤ੍ਵਾ ਆਚਰਿਯਂ ਵਨ੍ਦਿਤ੍ਵਾ ਏਕਦਿਵਸੇਨੇਵ ਬਾਰਾਣਸਿਂ ਪਚ੍ਚਾਗਨ੍ਤ੍ਵਾ ਮਾਤਰਂ ਵਨ੍ਦਿਤ੍ਵਾ ‘‘ਉਗ੍ਗਹਿਤਂ ਤੇ, ਤਾਤ, ਸਿਪ੍ਪ’’ਨ੍ਤਿ ਵੁਤ੍ਤੇ ‘‘ਆਮ, ਅਮ੍ਮਾ’’ਤਿ ਵਤ੍ਵਾ ਮਾਤਰਂ ਪਰਿਤੋਸੇਸਿ.

ਪੁਨਦਿਵਸੇ ਹਤ੍ਥਿਮਙ੍ਗਲਛਣੋ ਪਟਿਯਾਦਿਯਿਤ੍ਥ. ਸਤਮਤ੍ਤੇ ਹਤ੍ਥਿਸੋਣ੍ਡਾਲਙ੍ਕਾਰੇ ਚ ਸੁਵਣ੍ਣਦ੍ਧਜੇ ਹੇਮਜਾਲਸਞ੍ਛਨ੍ਨੇ ਕਤ੍ਵਾ ਠਪੇਸੁਂ, ਰਾਜਙ੍ਗਣਂ ਅਲਙ੍ਕਰਿਂਸੁ. ਬ੍ਰਾਹ੍ਮਣਾ ‘‘ਮਯਂ ਹਤ੍ਥਿਮਙ੍ਗਲਂ ਕਰਿਸ੍ਸਾਮ, ਮਯਂ ਕਰਿਸ੍ਸਾਮਾ’’ਤਿ ਮਣ੍ਡਿਤਪਸਾਧਿਤਾ ਅਟ੍ਠਂਸੁ. ਸੁਸੀਮੋਪਿ ਰਾਜਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਉਪਕਰਣਭਣ੍ਡਂ ਗਾਹਾਪੇਤ੍ਵਾ ਮਙ੍ਗਲਟ੍ਠਾਨਂ ਅਗਮਾਸਿ. ਬੋਧਿਸਤ੍ਤੋਪਿ ਕੁਮਾਰਪਰਿਹਾਰੇਨ ਅਲਙ੍ਕਤੋ ਅਤ੍ਤਨੋ ਪਰਿਸਾਯ ਪੁਰਕ੍ਖਤਪਰਿਵਾਰਿਤੋ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ‘‘ਸਚ੍ਚਂ ਕਿਰ, ਮਹਾਰਾਜ, ਤੁਮ੍ਹੇ ਅਮ੍ਹਾਕਂ ਵਂਸਞ੍ਚ ਅਤ੍ਤਨੋ ਵਂਸਞ੍ਚ ਨਾਸੇਤ੍ਵਾ ‘ਅਞ੍ਞੇਹਿ ਬ੍ਰਾਹ੍ਮਣੇਹਿ ਹਤ੍ਥਿਮਙ੍ਗਲਂ ਕਾਰੇਤ੍ਵਾ ਹਤ੍ਥਾਲਙ੍ਕਾਰਞ੍ਚ ਉਪਕਰਣਾਨਿ ਚ ਤੇਸਂ ਦਸ੍ਸਾਮਾ’ਤਿ ਅਵਚੁਤ੍ਥਾ’’ਤਿ ਵਤ੍ਵਾ ਪਠਮਂ ਗਾਥਮਾਹ –

੨੫. ‘‘ਕਾਲ਼ਾ ਮਿਗਾ ਸੇਤਦਨ੍ਤਾ ਤਵੀਮੇ, ਪਰੋਸਤਂ ਹੇਮਜਾਲਾਭਿਛਨ੍ਨਾ;

ਤੇ ਤੇ ਦਦਾਮੀਤਿ ਸੁਸੀਮ ਬ੍ਰੂਸਿ, ਅਨੁਸ੍ਸਰਂ ਪੇਤ੍ਤਿਪਿਤਾਮਹਾਨ’’ਨ੍ਤਿ.

ਤਤ੍ਥ ਤੇ ਤੇ ਦਦਾਮੀਤਿ ਸੁਸੀਮ ਬ੍ਰੂਸੀਤਿ ਤੇ ਏਤੇ ਤਵ ਸਨ੍ਤਕੇ ‘‘ਕਾਲ਼ਾ ਮਿਗਾ ਸੇਤਦਨ੍ਤਾ’’ਤਿ ਏਵਂ ਗਤੇ ਪਰੋਸਤਂ ਸਬ੍ਬਾਲਙ੍ਕਾਰਪਟਿਮਣ੍ਡਿਤੇ ਹਤ੍ਥੀ ਅਞ੍ਞੇਸਂ ਬ੍ਰਾਹ੍ਮਣਾਨਂ ਦਦਾਮੀਤਿ ਸਚ੍ਚਂ ਕਿਰ, ਭੋ ਸੁਸੀਮ, ਏਵਂ ਬ੍ਰੂਸੀਤਿ ਅਤ੍ਥੋ. ਅਨੁਸ੍ਸਰਂ ਪੇਤ੍ਤਿਪਿਤਾਮਹਾਨਨ੍ਤਿ ਅਮ੍ਹਾਕਞ੍ਚ ਅਤ੍ਤਨੋ ਚ ਵਂਸੇ ਪਿਤੁਪਿਤਾਮਹਾਨਂ ਆਚਿਣ੍ਣਂ ਸਰਨ੍ਤੋਯੇਵ. ਇਦਂ ਵੁਤ੍ਤਂ ਹੋਤਿ – ਮਹਾਰਾਜ, ਯਾਵ ਸਤ੍ਤਮਕੁਲਪਰਿਵਟ੍ਟਾ ਤੁਮ੍ਹਾਕਂ ਪੇਤ੍ਤਿਪਿਤਾਮਹਾਨਂ ਅਮ੍ਹਾਕਂ ਪੇਤ੍ਤਿਪਿਤਾਮਹਾ ਚ ਹਤ੍ਥਿਮਙ੍ਗਲਂ ਕਰੋਨ੍ਤਿ, ਸੋ ਤ੍ਵਂ ਏਵਂ ਅਨੁਸ੍ਸਰਨ੍ਤੋਪਿ ਅਮ੍ਹਾਕਞ੍ਚ ਅਤ੍ਤਨੋ ਚ ਵਂਸਂ ਨਾਸੇਤ੍ਵਾ ਸਚ੍ਚਂ ਕਿਰ ਏਵਂ ਬ੍ਰੂਸੀਤਿ.

ਸੁਸੀਮੋ ਰਾਜਾ ਬੋਧਿਸਤ੍ਤਸ੍ਸ ਵਚਨਂ ਸੁਤ੍ਵਾ ਦੁਤਿਯਂ ਗਾਥਮਾਹ –

੨੬. ‘‘ਕਾਲ਼ਾ ਮਿਗਾ ਸੇਤਦਨ੍ਤਾ ਮਮੀਮੇ, ਪਰੋਸਤਂ ਹੇਮਜਾਲਾਭਿਛਨ੍ਨਾ;

ਤੇ ਤੇ ਦਦਾਮੀਤਿ ਵਦਾਮਿ ਮਾਣਵ, ਅਨੁਸ੍ਸਰਂ ਪੇਤ੍ਤਿਪਿਤਾਮਹਾਨ’’ਨ੍ਤਿ.

ਤਤ੍ਥ ਤੇ ਤੇ ਦਦਾਮੀਤਿ ਤੇ ਏਤੇ ਹਤ੍ਥੀ ਅਞ੍ਞੇਸਂ ਬ੍ਰਾਹ੍ਮਣਾਨਂ ਦਦਾਮੀਤਿ ਸਚ੍ਚਮੇਵ ਮਾਣਵ ਵਦਾਮਿ, ਨੇਵ ਹਤ੍ਥੀ ਬ੍ਰਾਹ੍ਮਣਾਨਂ ਦਦਾਮੀਤਿ ਅਤ੍ਥੋ. ਅਨੁਸ੍ਸਰਨ੍ਤਿ ਪੇਤ੍ਤਿਪਿਤਾਮਹਾਨਂ ਕਿਰਿਯਂ ਅਨੁਸ੍ਸਰਾਮਿਯੇਵ, ਨੋ ਨਾਨੁਸ੍ਸਰਾਮਿ, ਅਮ੍ਹਾਕਂ ਪੇਤ੍ਤਿਪਿਤਾਮਹਾਨਂ ਹਤ੍ਥਿਮਙ੍ਗਲਂ ਤੁਮ੍ਹਾਕਂ ਪੇਤ੍ਤਿਪਿਤਾਮਹਾ ਕਰੋਨ੍ਤੀਤਿ ਪਨ ਅਨੁਸ੍ਸਰਨ੍ਤੋਪਿ ਏਵਂ ਵਦਾਮਿਯੇਵਾਤਿ ਅਧਿਪ੍ਪਾਯੇਨੇਵਮਾਹ.

ਅਥ ਨਂ ਬੋਧਿਸਤ੍ਤੋ ਏਤਦਵੋਚ – ‘‘ਮਹਾਰਾਜ, ਅਮ੍ਹਾਕਞ੍ਚ ਅਤ੍ਤਨੋ ਚ ਵਂਸਂ ਅਨੁਸ੍ਸਰਨ੍ਤੋਯੇਵ ਕਸ੍ਮਾ ਮਂ ਠਪੇਤ੍ਵਾ ਅਞ੍ਞੇਹਿ ਹਤ੍ਥਿਮਙ੍ਗਲਂ ਕਾਰਾਪੇਥਾ’’ਤਿ. ‘‘ਤ੍ਵਂ ਕਿਰ, ਤਾਤ, ਤਯੋ ਵੇਦੇ ਹਤ੍ਥਿਸੁਤ੍ਤਞ੍ਚ ਨ ਜਾਨਾਸੀ’’ਤਿ ਮਯ੍ਹਂ ਆਰੋਚੇਸੁਂ, ਤੇਨਾਹਂ ਅਞ੍ਞੇਹਿ ਬ੍ਰਾਹ੍ਮਣੇਹਿ ਕਾਰਾਪੇਮੀਤਿ. ‘‘ਤੇਨ ਹਿ, ਮਹਾਰਾਜ, ਏਤ੍ਤਕੇਸੁ ਬ੍ਰਾਹ੍ਮਣੇਸੁ ਏਕਬ੍ਰਾਹ੍ਮਣੋਪਿ ਤੀਸੁ ਵੇਦੇਸੁ ਵਾ ਹਤ੍ਥਿਸੁਤ੍ਤੇਸੁ ਵਾ ਏਕਦੇਸਮ੍ਪਿ ਯਦਿ ਮਯਾ ਸਦ੍ਧਿਂ ਕਥੇਤੁਂ ਸਮਤ੍ਤੋ ਅਤ੍ਥਿ, ਉਟ੍ਠਹਤੁ, ਤਯੋਪਿ ਵੇਦੇ ਹਤ੍ਥਿਸੁਤ੍ਤਞ੍ਚ ਸਦ੍ਧਿਂ ਹਤ੍ਥਿਮਙ੍ਗਲਕਰਣੇਨ ਮਂ ਠਪੇਤ੍ਵਾ ਅਞ੍ਞੋ ਸਕਲਜਮ੍ਬੁਦੀਪੇਪਿ ਜਾਨਨ੍ਤੋ ਨਾਮ ਨਤ੍ਥੀ’’ਤਿ ਸੀਹਨਾਦਂ ਨਦਿ. ਏਕਬ੍ਰਾਹ੍ਮਣੋਪਿ ਤਸ੍ਸ ਪਟਿਸਤ੍ਤੁ ਹੁਤ੍ਵਾ ਉਟ੍ਠਾਤੁਂ ਨਾਸਕ੍ਖਿ. ਬੋਧਿਸਤ੍ਤੋ ਅਤ੍ਤਨੋ ਕੁਲਵਂਸਂ ਪਤਿਟ੍ਠਾਪੇਤ੍ਵਾ ਮਙ੍ਗਲਂ ਕਤ੍ਵਾ ਬਹੁਂ ਧਨਂ ਆਦਾਯ ਅਤ੍ਤਨੋ ਨਿਵੇਸਨਂ ਅਗਮਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਕੇਚਿ ਸੋਤਾਪਨ੍ਨਾ ਅਹੇਸੁਂ, ਕੇਚਿ ਸਕਦਾਗਾਮਿਨੋ, ਕੇਚਿ ਅਨਾਗਾਮਿਨੋ, ਕੇਚਿ ਅਰਹਤ੍ਤਂ ਪਾਪੁਣਿਂਸੁ. ‘‘ਤਦਾ ਮਾਤਾ ਮਹਾਮਾਯਾ ਅਹੋਸਿ, ਪਿਤਾ ਸੁਦ੍ਧੋਦਨਮਹਾਰਾਜਾ, ਸੁਸੀਮੋ ਰਾਜਾ ਆਨਨ੍ਦੋ, ਦਿਸਾਪਾਮੋਕ੍ਖੋ ਆਚਰਿਯੋ ਸਾਰਿਪੁਤ੍ਤੋ, ਮਾਣਵੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸੁਸੀਮਜਾਤਕਵਣ੍ਣਨਾ ਤਤਿਯਾ.

[੧੬੪] ੪. ਗਿਜ੍ਝਜਾਤਕਵਣ੍ਣਨਾ

ਯਂ ਨੁ ਗਿਜ੍ਝੋ ਯੋਜਨਸਤਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਮਾਤੁਪੋਸਕਭਿਕ੍ਖੁਂ ਆਰਬ੍ਭ ਕਥੇਸਿ. ਵਤ੍ਥੁ ਸਾਮਜਾਤਕੇ (ਜਾ. ੨.੨੨.੨੯੬ ਆਦਯੋ) ਆਵਿਭਵਿਸ੍ਸਤਿ. ਸਤ੍ਥਾ ਪਨ ਤਂ ਭਿਕ੍ਖੁਂ ‘‘ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਗਿਹੀ ਪੋਸੇਸੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚ’’ਨ੍ਤਿ ਵੁਤ੍ਤੇ ‘‘ਕਿਂ ਪਨ ਤੇ ਹੋਨ੍ਤੀ’’ਤਿ ਪੁਚ੍ਛਿਤ੍ਵਾ ‘‘ਮਾਤਾਪਿਤਰੋ ਮੇ, ਭਨ੍ਤੇ’’ਤਿ ਵੁਤ੍ਤੇ ‘‘ਸਾਧੁ ਸਾਧੂ’’ਤਿ ਤਸ੍ਸ ਸਾਧੁਕਾਰਂ ਦਤ੍ਵਾ ‘‘ਮਾ, ਭਿਕ੍ਖਵੇ, ਇਮਂ ਭਿਕ੍ਖੁਂ ਉਜ੍ਝਾਯਿਤ੍ਥ, ਪੋਰਾਣਕਪਣ੍ਡਿਤਾਪਿ ਗੁਣਵਸੇਨ ਅਞ੍ਞਾਤਕਾਨਮ੍ਪਿ ਉਪਕਾਰਂ ਅਕਂਸੁ, ਇਮਸ੍ਸ ਪਨ ਮਾਤਾਪਿਤੂਨਂ ਉਪਕਾਰਕਰਣਂ ਭਾਰੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਗਿਜ੍ਝਕੂਟਪਬ੍ਬਤੇ ਗਿਜ੍ਝਯੋਨਿਯਂ ਨਿਬ੍ਬਤ੍ਤਿਤ੍ਵਾ ਮਾਤਾਪਿਤਰੋ ਪੋਸੇਤਿ. ਅਥੇਕਸ੍ਮਿਂ ਕਾਲੇ ਮਹਤੀ ਵਾਤਵੁਟ੍ਠਿ ਅਹੋਸਿ. ਗਿਜ੍ਝਾ ਵਾਤਵੁਟ੍ਠਿਂ ਸਹਿਤੁਂ ਅਸਕ੍ਕੋਨ੍ਤਾ ਸੀਤਭਯੇਨ ਬਾਰਾਣਸਿਂ ਗਨ੍ਤ੍ਵਾ ਪਾਕਾਰਸਮੀਪੇ ਚ ਪਰਿਖਾਸਮੀਪੇ ਚ ਸੀਤੇਨ ਕਮ੍ਪਮਾਨਾ ਨਿਸੀਦਿਂਸੁ. ਤਦਾ ਬਾਰਾਣਸਿਸੇਟ੍ਠਿ ਨਗਰਾ ਨਿਕ੍ਖਮਿਤ੍ਵਾ ਨ੍ਹਾਯਿਤੁਂ ਗਚ੍ਛਨ੍ਤੋ ਤੇ ਗਿਜ੍ਝੇ ਕਿਲਮਨ੍ਤੇ ਦਿਸ੍ਵਾ ਏਕਸ੍ਮਿਂ ਅਨੋਵਸ੍ਸਕਟ੍ਠਾਨੇ ਸਨ੍ਨਿਪਾਤੇਤ੍ਵਾ ਅਗ੍ਗਿਂ ਕਾਰਾਪੇਤ੍ਵਾ ਗੋਸੁਸਾਨਂ ਪੇਸੇਤ੍ਵਾ ਗੋਮਂਸਂ ਆਹਰਾਪੇਤ੍ਵਾ ਤੇਸਂ ਦਾਪੇਤ੍ਵਾ ਆਰਕ੍ਖਂ ਠਪੇਸਿ. ਗਿਜ੍ਝਾ ਵੂਪਸਨ੍ਤਾਯ ਵਾਤਵੁਟ੍ਠਿਯਾ ਕਲ੍ਲਸਰੀਰਾ ਹੁਤ੍ਵਾ ਪਬ੍ਬਤਮੇਵ ਅਗਮਂਸੁ. ਤੇ ਤਤ੍ਥੇਵ ਸਨ੍ਨਿਪਤਿਤ੍ਵਾ ਏਵਂ ਮਨ੍ਤਯਿਂਸੁ – ‘‘ਬਾਰਾਣਸਿਸੇਟ੍ਠਿਨਾ ਅਮ੍ਹਾਕਂ ਉਪਕਾਰੋ ਕਤੋ, ਕਤੂਪਕਾਰਸ੍ਸ ਚ ਨਾਮ ਪਚ੍ਚੁਪਕਾਰਂ ਕਾਤੁਂ ਵਟ੍ਟਤਿ, ਤਸ੍ਮਾ ਇਤੋ ਪਟ੍ਠਾਯ ਤੁਮ੍ਹੇਸੁ ਯੋ ਯਂ ਵਤ੍ਥਂ ਵਾ ਆਭਰਣਂ ਵਾ ਲਭਤਿ, ਤੇਨ ਤਂ ਬਾਰਾਣਸਿਸੇਟ੍ਠਿਸ੍ਸ ਗੇਹੇ ਆਕਾਸਙ੍ਗਣੇ ਪਾਤੇਤਬ੍ਬ’’ਨ੍ਤਿ.

ਤਤੋ ਪਟ੍ਠਾਯ ਗਿਜ੍ਝਾ ਮਨੁਸ੍ਸਾਨਂ ਵਤ੍ਥਾਭਰਣਾਨਿ ਆਤਪੇ ਸੁਕ੍ਖਾਪੇਨ੍ਤਾਨਂ ਪਮਾਦਂ ਓਲੋਕੇਤ੍ਵਾ ਸੇਨਾ ਵਿਯ ਮਂਸਪੇਸਿਂ ਸਹਸਾ ਗਹੇਤ੍ਵਾ ਬਾਰਾਣਸਿਸੇਟ੍ਠਿਸ੍ਸ ਗੇਹੇ ਆਕਾਸਙ੍ਗਣੇ ਪਾਤੇਨ੍ਤਿ. ਸੋ ਗਿਜ੍ਝਾਨਂ ਆਹਰਣਭਾਵਂ ਞਤ੍ਵਾ ਸਬ੍ਬਾਨਿ ਤਾਨਿ ਵਿਸੁਂਯੇਵ ਠਪੇਸਿ. ‘‘ਗਿਜ੍ਝਾ ਨਗਰਂ ਵਿਲੁਮ੍ਪਨ੍ਤੀ’’ਤਿ ਰਞ੍ਞੋ ਆਰੋਚੇਸੁਂ. ਰਾਜਾ ‘‘ਏਕਂ ਗਿਜ੍ਝਮ੍ਪਿ ਤਾਵ ਗਣ੍ਹਥ, ਸਬ੍ਬਂ ਆਹਰਾਪੇਸ੍ਸਾਮੀ’’ਤਿ ਤਤ੍ਥ ਤਤ੍ਥ ਪਾਸੇ ਚੇਵ ਜਾਲਾਨਿ ਚ ਓਡ੍ਡਾਪੇਸਿ. ਮਾਤੁਪੋਸਕਗਿਜ੍ਝੋ ਪਾਸੇ ਬਜ੍ਝਿ, ਤਂ ਗਹੇਤ੍ਵਾ ‘‘ਰਞ੍ਞੋ ਦਸ੍ਸੇਸ੍ਸਾਮਾ’’ਤਿ ਨੇਨ੍ਤਿ. ਬਾਰਾਣਸਿਸੇਟ੍ਠਿ ਰਾਜੁਪਟ੍ਠਾਨਂ ਗਚ੍ਛਨ੍ਤੋ ਤੇ ਮਨੁਸ੍ਸੇ ਗਿਜ੍ਝਂ ਗਹੇਤ੍ਵਾ ਗਚ੍ਛਨ੍ਤੇ ਦਿਸ੍ਵਾ ‘‘ਮਾ ਇਮਂ ਗਿਜ੍ਝਂ ਬਾਧਯਿਂਸੂ’’ਤਿ ਸਦ੍ਧਿਞ੍ਞੇਵ ਅਗਮਾਸਿ. ਗਿਜ੍ਝਂ ਰਞ੍ਞੋ ਦਸ੍ਸੇਸੁਂ. ਅਥ ਨਂ ਰਾਜਾ ਪੁਚ੍ਛਿ – ‘‘ਤੁਮ੍ਹੇ ਨਗਰਂ ਵਿਲੁਮ੍ਪਿਤ੍ਵਾ ਵਤ੍ਥਾਦੀਨਿ ਗਣ੍ਹਥਾ’’ਤਿ. ‘‘ਆਮ, ਮਹਾਰਾਜਾ’’ਤਿ. ‘‘ਕਸ੍ਸ ਤਾਨਿ ਦਿਨ੍ਨਾਨੀ’’ਤਿ? ‘‘ਬਾਰਾਣਸਿਸੇਟ੍ਠਿਸ੍ਸਾ’’ਤਿ. ‘‘ਕਿਂਕਾਰਣਾ’’ਤਿ? ‘‘ਅਮ੍ਹਾਕਂ ਤੇਨ ਜੀਵਿਤਂ ਦ੍ਵਿਨ੍ਨਂ, ਉਪਕਾਰਸ੍ਸ ਨਾਮ ਪਚ੍ਚੁਪਕਾਰਂ ਕਾਤੁਂ ਵਟ੍ਟਤਿ, ਤਸ੍ਮਾ ਅਦਮ੍ਹਾ’’ਤਿ. ਅਥ ਨਂ ਰਾਜਾ ‘‘ਗਿਜ੍ਝਾ ਕਿਰ ਯੋਜਨਸਤਮਤ੍ਥਕੇ ਠਤ੍ਵਾ ਕੁਣਪਂ ਪਸ੍ਸਨ੍ਤਿ, ਕਸ੍ਮਾ ਤ੍ਵਂ ਅਤ੍ਤਨੋ ਓਡ੍ਡਿਤਂ ਪਾਸਂ ਨ ਪਸ੍ਸਸੀ’’ਤਿ ਵਤ੍ਵਾ ਪਠਮਂ ਗਾਥਮਾਹ –

੨੭. ‘‘ਯਂ ਨੁ ਗਿਜ੍ਝੋ ਯੋਜਨਸਤਂ, ਕੁਣਪਾਨਿ ਅਵੇਕ੍ਖਤਿ;

ਕਸ੍ਮਾ ਜਾਲਞ੍ਚ ਪਾਸਞ੍ਚ, ਆਸਜ੍ਜਾਪਿ ਨ ਬੁਜ੍ਝਸੀ’’ਤਿ.

ਤਤ੍ਥ ਯਨ੍ਤਿ ਨਿਪਾਤਮਤ੍ਤਂ, ਨੂਤਿ ਨਾਮਤ੍ਥੇ ਨਿਪਾਤੋ. ਗਿਜ੍ਝੋ ਨਾਮ ਯੋਜਨਸਤਂ ਅਤਿਕ੍ਕਮਿਤ੍ਵਾ ਠਿਤਾਨਿ ਕੁਣਪਾਨਿ ਅਵੇਕ੍ਖਤਿ, ਪਸ੍ਸਤੀਤਿ ਅਤ੍ਥੋ. ਆਸਜ੍ਜਾਪੀਤਿ ਆਸਾਦੇਤ੍ਵਾਪਿ, ਸਮ੍ਪਾਪੁਣਿਤ੍ਵਾਪੀਤਿ ਅਤ੍ਥੋ. ‘‘ਤ੍ਵਂ ਅਤ੍ਤਨੋ ਅਤ੍ਥਾਯ ਓਡ੍ਡਿਤਂ ਜਾਲਞ੍ਚ ਪਾਸਞ੍ਚ ਪਤ੍ਵਾਪਿ ਕਸ੍ਮਾ ਨ ਬੁਜ੍ਝਸੀ’’ਤਿ ਪੁਚ੍ਛਿ.

ਗਿਜ੍ਝੋ ਤਸ੍ਸ ਵਚਨਂ ਸੁਤ੍ਵਾ ਦੁਤਿਯਂ ਗਾਥਮਾਹ –

੨੮. ‘‘ਯਦਾ ਪਰਾਭਵੋ ਹੋਤਿ, ਪੋਸੋ ਜੀਵਿਤਸਙ੍ਖਯੇ;

ਅਥ ਜਾਲਞ੍ਚ ਪਾਸਞ੍ਚ, ਆਸਜ੍ਜਾਪਿ ਨ ਬੁਜ੍ਝਤੀ’’ਤਿ.

ਤਤ੍ਥ ਪਰਾਭਵੋਤਿ ਵਿਨਾਸੋ. ਪੋਸੋਤਿ ਸਤ੍ਤੋ.

ਗਿਜ੍ਝਸ੍ਸ ਵਚਨਂ ਸੁਤ੍ਵਾ ਰਾਜਾ ਸੇਟ੍ਠਿਂ ਪੁਚ੍ਛਿ – ‘‘ਸਚ੍ਚਂ ਕਿਰ, ਮਹਾਸੇਟ੍ਠਿ, ਗਿਜ੍ਝੇਹਿ ਤੁਮ੍ਹਾਕਂ ਗੇਹੇ ਵਤ੍ਥਾਦੀਨਿ ਆਭਤਾਨੀ’’ਤਿ. ‘‘ਸਚ੍ਚਂ, ਦੇਵਾ’’ਤਿ. ‘‘ਕਹਂ ਤਾਨੀ’’ਤਿ? ‘‘ਦੇਵ, ਮਯਾ ਤਾਨਿ ਸਬ੍ਬਾਨਿ ਵਿਸੁਂ ਠਪਿਤਾਨਿ, ਯਂ ਯੇਸਂ ਸਨ੍ਤਕਂ, ਤਂ ਤੇਸਂ ਦਸ੍ਸਾਮਿ, ਇਮਂ ਗਿਜ੍ਝਂ ਵਿਸ੍ਸਜ੍ਜੇਥਾ’’ਤਿ ਗਿਜ੍ਝਂ ਵਿਸ੍ਸਜ੍ਜਾਪੇਤ੍ਵਾ ਮਹਾਸੇਟ੍ਠਿਂ ਸਬ੍ਬੇਸਂ ਸਨ੍ਤਕਾਨਿ ਦਾਪੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਮਾਤੁਪੋਸਕਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਬਾਰਾਣਸਿਸੇਟ੍ਠਿ ਸਾਰਿਪੁਤ੍ਤੋ, ਮਾਤੁਪੋਸਕਗਿਜ੍ਝੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਗਿਜ੍ਝਜਾਤਕਵਣ੍ਣਨਾ ਚਤੁਤ੍ਥਾ.

[੧੬੫] ੫. ਨਕੁਲਜਾਤਕਵਣ੍ਣਨਾ

ਸਦ੍ਧਿਂ ਕਤ੍ਵਾ ਅਮਿਤ੍ਤੇਨਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸੇਣਿਭਣ੍ਡਨਂ ਆਰਬ੍ਭ ਕਥੇਸਿ. ਵਤ੍ਥੁ ਹੇਟ੍ਠਾ ਉਰਗਜਾਤਕੇ (ਜਾ. ੧.੨.੭-੮) ਕਥਿਤਸਦਿਸਮੇਵ. ਇਧਾਪਿ ਸਤ੍ਥਾ ‘‘ਨ, ਭਿਕ੍ਖਵੇ, ਇਮੇ ਦ੍ਵੇ ਮਹਾਮਤ੍ਤਾ ਇਦਾਨੇਵ ਮਯਾ ਸਮਗ੍ਗਾ ਕਤਾ, ਪੁਬ੍ਬੇਪਾਹਂ ਇਮੇ ਸਮਗ੍ਗੇ ਅਕਾਸਿਂਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਏਕਸ੍ਮਿਂ ਗਾਮਕੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਤਕ੍ਕਸਿਲਾਯਂ ਸਬ੍ਬਸਿਪ੍ਪਾਨਿ ਉਗ੍ਗਹੇਤ੍ਵਾ ਘਰਾਵਾਸਂ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਉਞ੍ਛਾਚਰਿਯਾਯ ਵਨਮੂਲਫਲਾਹਾਰੋ ਹਿਮਵਨ੍ਤਪਦੇਸੇ ਵਾਸਂ ਕਪ੍ਪੇਸਿ. ਤਸ੍ਸ ਚਙ੍ਕਮਨਕੋਟਿਯਂ ਏਕਸ੍ਮਿਂ ਵਮ੍ਮਿਕੇ ਨਕੁਲੋ, ਤਸ੍ਸੇਵ ਸਨ੍ਤਿਕੇ ਏਕਸ੍ਮਿਂ ਰੁਕ੍ਖਬਿਲੇ ਸਪ੍ਪੋ ਚ ਵਾਸਂ ਕਪ੍ਪੇਸਿ. ਤੇ ਉਭੋਪਿ ਅਹਿਨਕੁਲਾ ਨਿਚ੍ਚਕਾਲਂ ਕਲਹਂ ਕਰੋਨ੍ਤਿ. ਬੋਧਿਸਤ੍ਤੋ ਤੇਸਂ ਕਲਹੇ ਆਦੀਨਵਞ੍ਚ ਮੇਤ੍ਤਾਭਾਵਨਾਯ ਚ ਆਨਿਸਂਸਂ ਕਥੇਤ੍ਵਾ ‘‘ਕਲਹਂ ਨਾਮ ਅਕਤ੍ਵਾ ਸਮਗ੍ਗਵਾਸਂ ਵਸਿਤੁਂ ਵਟ੍ਟਤੀ’’ਤਿ ਓਵਦਿਤ੍ਵਾ ਉਭੋਪਿ ਤੇ ਸਮਗ੍ਗੇ ਅਕਾਸਿ. ਅਥ ਸਪ੍ਪਸ੍ਸ ਬਹਿਨਿਕ੍ਖਨ੍ਤਕਾਲੇ ਨਕੁਲੋ ਚਙ੍ਕਮਨਕੋਟਿਯਂ ਵਮ੍ਮਿਕਸ੍ਸ ਬਿਲਦ੍ਵਾਰੇ ਸੀਸਂ ਨੀਹਰਿਤ੍ਵਾ ਮੁਖਂ ਵਿਵਰਿਤ੍ਵਾ ਨਿਪਨ੍ਨੋ ਅਸ੍ਸਸਨ੍ਤੋ ਪਸ੍ਸਸਨ੍ਤੋ ਨਿਦ੍ਦਂ ਉਪਗਞ੍ਛਿ. ਬੋਧਿਸਤ੍ਤੋ ਤਂ ਤਥਾ ਨਿਦ੍ਦਾਯਮਾਨਂ ਦਿਸ੍ਵਾ ‘‘ਕਿਂ ਨੁ ਖੋ ਤੇ ਨਿਸ੍ਸਾਯ ਭਯਂ ਉਪ੍ਪਨ੍ਨ’’ਨ੍ਤਿ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੨੯. ‘‘ਸਨ੍ਧਿਂ ਕਤ੍ਵਾ ਅਮਿਤ੍ਤੇਨ, ਅਣ੍ਡਜੇਨ ਜਲਾਬੁਜ;

ਵਿਵਰਿਯ ਦਾਠਂ ਸੇਸਿ, ਕੁਤੋ ਤੇ ਭਯਮਾਗਤ’’ਨ੍ਤਿ.

ਤਤ੍ਥ ਸਨ੍ਧਿਂ ਕਤ੍ਵਾਤਿ ਮਿਤ੍ਤਭਾਵਂ ਕਰਿਤ੍ਵਾ. ਅਣ੍ਡਜੇਨਾਤਿ ਅਣ੍ਡਕੋਸੇ ਨਿਬ੍ਬਤ੍ਤੇਨ ਨਾਗੇਨ. ਜਲਾਬੁਜਾਤਿ ਨਕੁਲਂ ਆਲਪਤਿ. ਸੋ ਹਿ ਜਲਾਬੁਮ੍ਹਿ ਜਾਤਤ੍ਤਾ ‘‘ਜਲਾਬੁਜੋ’’ਤਿ ਵੁਚ੍ਚਤਿ. ਵਿਵਰਿਯਾਤਿ ਵਿਵਰਿਤ੍ਵਾ.

ਏਵਂ ਬੋਧਿਸਤ੍ਤੇਨ ਵੁਤ੍ਤੋ ਨਕੁਲੋ ‘‘ਅਯ੍ਯ, ਪਚ੍ਚਾਮਿਤ੍ਤੋ ਨਾਮ ਨ ਅਵਜਾਨਿਤਬ੍ਬੋ ਆਸਙ੍ਕਿਤਬ੍ਬੋਯੇਵਾ’’ਤਿ ਵਤ੍ਵਾ ਦੁਤਿਯਂ ਗਾਥਮਾਹ –

੩੦. ‘‘ਸਙ੍ਕੇਥੇਵ ਅਮਿਤ੍ਤਸ੍ਮਿਂ, ਮਿਤ੍ਤਸ੍ਮਿਮ੍ਪਿ ਨ ਵਿਸ੍ਸਸੇ;

ਅਭਯਾ ਭਯਮੁਪ੍ਪਨ੍ਨਂ, ਅਪਿ ਮੂਲਾਨਿ ਕਨ੍ਤਤੀ’’ਤਿ.

ਤਤ੍ਥ ਅਭਯਾ ਭਯਮੁਪ੍ਪਨ੍ਨਨ੍ਤਿ ਨ ਇਤੋ ਤੇ ਭਯਮੁਪ੍ਪਨ੍ਨਨ੍ਤਿ ਅਭਯੋ, ਕੋ ਸੋ? ਮਿਤ੍ਤੋ. ਯਞ੍ਹਿ ਮਿਤ੍ਤਸ੍ਮਿਮ੍ਪਿ ਵਿਸ੍ਸਾਸੇ ਸਤਿ ਤਤੋ ਭਯਂ ਉਪ੍ਪਜ੍ਜਤਿ, ਤਂ ਮੂਲਾਨਿਪਿ ਕਨ੍ਤਤਿ, ਮਿਤ੍ਤਸ੍ਸ ਸਬ੍ਬਰਨ੍ਧਾਨਂ ਵਿਦਿਤਤ੍ਤਾ ਮੂਲਘਚ੍ਚਾਯ ਸਂਵਤ੍ਤਤੀਤਿ ਅਤ੍ਥੋ.

ਅਥ ਨਂ ਬੋਧਿਸਤ੍ਤੋ ‘‘ਮਾ ਭਾਯਿ, ਯਥਾ ਸਪ੍ਪੋ ਤਯਿ ਨ ਦੁਬ੍ਭਤਿ, ਏਵਮਹਂ ਕਰਿਸ੍ਸਾਮਿ, ਤ੍ਵਂ ਇਤੋ ਪਟ੍ਠਾਯ ਤਸ੍ਮਿਂ ਆਸਙ੍ਕਂ ਮਾ ਕਰੀ’’ਤਿ ਓਵਦਿਤ੍ਵਾ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕਪਰਾਯਣੋ ਅਹੋਸਿ. ਤੇਪਿ ਯਥਾਕਮ੍ਮਂ ਗਤਾ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸਪ੍ਪੋ ਚ ਨਕੁਲੋ ਚ ਇਮੇ ਦ੍ਵੇ ਮਹਾਮਤ੍ਤਾ ਅਹੇਸੁਂ, ਤਾਪਸੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਨਕੁਲਜਾਤਕਵਣ੍ਣਨਾ ਪਞ੍ਚਮਾ.

[੧੬੬] ੬. ਉਪਸਾਲ਼ਕਜਾਤਕਵਣ੍ਣਨਾ

ਉਪਸਾਲ਼ਕਨਾਮਾਨੀਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਏਕਂ ਉਪਸਾਲ਼ਕਂ ਨਾਮ ਸੁਸਾਨਸੁਦ੍ਧਿਕਂ ਬ੍ਰਾਹ੍ਮਣਂ ਆਰਬ੍ਭ ਕਥੇਸਿ. ਸੋ ਕਿਰ ਅਡ੍ਢੋ ਅਹੋਸਿ ਮਹਦ੍ਧਨੋ, ਦਿਟ੍ਠਿਗਤਿਕਤ੍ਤਾ ਪਨ ਧੁਰਵਿਹਾਰੇ ਵਸਨ੍ਤਾਨਮ੍ਪਿ ਬੁਦ੍ਧਾਨਂ ਸਙ੍ਗਹਂ ਨਾਮ ਨ ਅਕਾਸਿ. ਪੁਤ੍ਤੋ ਪਨਸ੍ਸ ਪਣ੍ਡਿਤੋ ਅਹੋਸਿ ਞਾਣਸਮ੍ਪਨ੍ਨੋ. ਸੋ ਮਹਲ੍ਲਕਕਾਲੇ ਪੁਤ੍ਤਂ ਆਹ – ‘‘ਮਾ ਖੋ ਮਂ, ਤਾਤ, ਅਞ੍ਞਸ੍ਸ ਵਸਲਸ੍ਸ ਝਾਪਿਤਸੁਸਾਨੇ ਝਾਪੇਹਿ, ਏਕਸ੍ਮਿਂ ਪਨ ਅਨੁਚ੍ਛਿਟ੍ਠਸੁਸਾਨੇਯੇਵ ਮਂ ਝਾਪੇਯ੍ਯਾਸੀ’’ਤਿ. ‘‘ਤਾਤ, ਅਹਂ ਤੁਮ੍ਹਾਕਂ ਝਾਪੇਤਬ੍ਬਯੁਤ੍ਤਕਂ ਠਾਨਂ ਨ ਜਾਨਾਮਿ, ਸਾਧੁ ਵਤ ਮਂ ਆਦਾਯ ਗਨ੍ਤ੍ਵਾ ‘ਇਮਸ੍ਮਿਂ ਠਾਨੇ ਮਂ ਝਾਪੇਯ੍ਯਾਸੀ’ਤਿ ਤੁਮ੍ਹੇਵ ਆਚਿਕ੍ਖਥਾ’’ਤਿ. ਬ੍ਰਾਹ੍ਮਣੋ ‘‘ਸਾਧੁ, ਤਾਤਾ’’ਤਿ ਤਂ ਆਦਾਯ ਨਗਰਾ ਨਿਕ੍ਖਮਿਤ੍ਵਾ ਗਿਜ੍ਝਕੂਟਮਤ੍ਥਕਂ ਅਭਿਰੁਹਿਤ੍ਵਾ ‘‘ਤਾਤ, ਇਦਂ ਅਞ੍ਞਸ੍ਸ ਵਸਲਸ੍ਸ ਅਝਾਪਿਤਟ੍ਠਾਨਂ, ਏਤ੍ਥ ਮਂ ਝਾਪੇਯ੍ਯਾਸੀ’’ਤਿ ਵਤ੍ਵਾ ਪੁਤ੍ਤੇਨ ਸਦ੍ਧਿਂ ਪਬ੍ਬਤਾ ਓਤਰਿਤੁਂ ਆਰਭਿ.

ਸਤ੍ਥਾ ਪਨ ਤਂ ਦਿਵਸਂ ਪਚ੍ਚੂਸਕਾਲੇ ਬੋਧਨੇਯ੍ਯਬਨ੍ਧਵੇ ਓਲੋਕੇਨ੍ਤੋ ਤੇਸਂ ਪਿਤਾਪੁਤ੍ਤਾਨਂ ਸੋਤਾਪਤ੍ਤਿਮਗ੍ਗਸ੍ਸ ਉਪਨਿਸ੍ਸਯਂ ਅਦ੍ਦਸ. ਤਸ੍ਮਾ ਮਗ੍ਗਂ ਗਹੇਤ੍ਵਾ ਠਿਤਲੁਦ੍ਦਕੋ ਵਿਯ ਪਬ੍ਬਤਪਾਦਂ ਗਨ੍ਤ੍ਵਾ ਤੇਸਂ ਪਬ੍ਬਤਮਤ੍ਥਕਾ ਓਤਰਨ੍ਤਾਨਂ ਆਗਮਯਮਾਨੋ ਨਿਸੀਦਿ, ਤੇ ਓਤਰਨ੍ਤਾ ਸਤ੍ਥਾਰਂ ਅਦ੍ਦਸਂਸੁ. ਸਤ੍ਥਾ ਪਟਿਸਨ੍ਥਾਰਂ ਕਰੋਨ੍ਤੋ ‘‘ਕਹਂ ਗਮਿਸ੍ਸਥ ਬ੍ਰਾਹ੍ਮਣਾ’’ਤਿ ਪੁਚ੍ਛਿ. ਮਾਣਵੋ ਤਮਤ੍ਥਂ ਆਰੋਚੇਸਿ. ਸਤ੍ਥਾ ‘‘ਤੇਨ ਹਿ ਏਹਿ, ਤਵ ਪਿਤਰਾ ਆਚਿਕ੍ਖਿਤਟ੍ਠਾਨਂ ਗਚ੍ਛਾਮਾ’’ਤਿ ਉਭੋ ਪਿਤਾਪੁਤ੍ਤੇ ਗਹੇਤ੍ਵਾ ਪਬ੍ਬਤਮਤ੍ਥਕਂ ਆਰੁਯ੍ਹ ‘‘ਕਤਰਂ ਠਾਨ’’ਨ੍ਤਿ ਪੁਚ੍ਛਿ. ਮਾਣਵੋ ‘‘ਇਮੇਸਂ ਤਿਣ੍ਣਂ ਪਬ੍ਬਤਾਨਂ ਅਨ੍ਤਰਂ ਆਚਿਕ੍ਖਿ, ਭਨ੍ਤੇ’’ਤਿ ਆਹ. ਸਤ੍ਥਾ ‘‘ਨ ਖੋ, ਮਾਣਵ, ਤਵ ਪਿਤਾ ਇਦਾਨੇਵ ਸੁਸਾਨਸੁਦ੍ਧਿਕੋ, ਪੁਬ੍ਬੇਪਿ ਸੁਸਾਨਸੁਦ੍ਧਿਕੋਵ, ਨ ਚੇਸ ਇਦਾਨੇਵ ‘ਇਮਸ੍ਮਿਂ ਠਾਨੇ ਮਂ ਝਾਪੇਯ੍ਯਾਸੀ’ਤਿ ਤਵ ਆਚਿਕ੍ਖਤਿ, ਪੁਬ੍ਬੇਪਿ ਇਮਸ੍ਮਿਂਯੇਵ ਠਾਨੇ ਅਤ੍ਤਨੋ ਝਾਪਿਤਭਾਵਂ ਆਚਿਕ੍ਖੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਇਮਸ੍ਮਿਞ੍ਞੇਵ ਰਾਜਗਹੇ ਅਯਮੇਵ ਉਪਸਾਲ਼ਕੋ ਬ੍ਰਾਹ੍ਮਣੋ ਅਯਮੇਵਸ੍ਸ ਪੁਤ੍ਤੋ ਅਹੋਸਿ. ਤਦਾ ਬੋਧਿਸਤ੍ਤੋ ਮਗਧਰਟ੍ਠੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਪਰਿਪੁਣ੍ਣਸਿਪ੍ਪੋ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਝਾਨਕੀਲ਼ਂ ਕੀਲ਼ਨ੍ਤੋ ਹਿਮਵਨ੍ਤਪਦੇਸੇ ਚਿਰਂ ਵਸਿਤ੍ਵਾ ਲੋਣਮ੍ਬਿਲਸੇਵਨਤ੍ਥਾਯ ਗਿਜ੍ਝਕੂਟੇ ਪਣ੍ਣਸਾਲਾਯਂ ਵਿਹਾਸਿ. ਤਦਾ ਸੋ ਬ੍ਰਾਹ੍ਮਣੋ ਇਮਿਨਾਵ ਨਿਯਾਮੇਨ ਪੁਤ੍ਤਂ ਵਤ੍ਵਾ ਪੁਤ੍ਤੇਨ ‘‘ਤੁਮ੍ਹੇਯੇਵ ਮੇ ਤਥਾਰੂਪਂ ਠਾਨਂ ਆਚਿਕ੍ਖਥਾ’’ਤਿ ਵੁਤ੍ਤੇ ‘‘ਇਦਮੇਵ ਠਾਨ’’ਨ੍ਤਿ ਆਚਿਕ੍ਖਿਤ੍ਵਾ ਪੁਤ੍ਤੇਨ ਸਦ੍ਧਿਂ ਓਤਰਨ੍ਤੋ ਬੋਧਿਸਤ੍ਤਂ ਦਿਸ੍ਵਾ ਤਸ੍ਸ ਸਨ੍ਤਿਕਂ ਉਪਸਙ੍ਕਮਿ. ਬੋਧਿਸਤ੍ਤੋ ਇਮਿਨਾਵ ਨਿਯਾਮੇਨ ਪੁਚ੍ਛਿਤ੍ਵਾ ਮਾਣਵਸ੍ਸ ਵਚਨਂ ਸੁਤ੍ਵਾ ‘‘ਏਹਿ, ਤਵ ਪਿਤਰਾ ਆਚਿਕ੍ਖਿਤਟ੍ਠਾਨਸ੍ਸ ਉਚ੍ਛਿਟ੍ਠਭਾਵਂ ਵਾ ਅਨੁਚ੍ਛਿਟ੍ਠਭਾਵਂ ਵਾ ਜਾਨਿਸ੍ਸਾਮਾ’’ਤਿ ਤੇਹਿ ਸਦ੍ਧਿਂ ਪਬ੍ਬਤਮਤ੍ਥਕਂ ਆਰੁਯ੍ਹ ‘‘ਇਦਂ ਤਿਣ੍ਣਂ ਪਬ੍ਬਤਾਨਂ ਅਨ੍ਤਰਂ ਅਨੁਚ੍ਛਿਟ੍ਠਟ੍ਠਾਨ’’ਨ੍ਤਿ ਮਾਣਵੇਨ ਵੁਤ੍ਤੇ ‘‘ਮਾਣਵ, ਇਮਸ੍ਮਿਂਯੇਵ ਠਾਨੇ ਝਾਪਿਤਕਾਨਂ ਪਮਾਣਂ ਨਤ੍ਥਿ, ਤਵੇਵ ਪਿਤਾ ਇਮਸ੍ਮਿਂਯੇਵ ਰਾਜਗਹੇ ਬ੍ਰਾਹ੍ਮਣਕੁਲੇਯੇਵ ਨਿਬ੍ਬਤ੍ਤਿਤ੍ਵਾ ਉਪਸਾਲ਼ਕੋਯੇਵ ਨਾਮ ਹੁਤ੍ਵਾ ਇਮਸ੍ਮਿਂਯੇਵ ਪਬ੍ਬਤਨ੍ਤਰੇ ਚੁਦ੍ਦਸ ਜਾਤਿਸਹਸ੍ਸਾਨਿ ਝਾਪਿਤੋ. ਪਥਵਿਯਞ੍ਹਿ ਅਝਾਪਿਤਟ੍ਠਾਨਂ ਵਾ ਅਸੁਸਾਨਟ੍ਠਾਨਂ ਵਾ ਸੀਸਾਨਂ ਅਨਿਵੇਸਿਤਟ੍ਠਾਨਂ ਵਾ ਲਦ੍ਧੁਂ ਨ ਸਕ੍ਕਾ’’ਤਿ ਪੁਬ੍ਬੇਨਿਵਾਸਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਇਮਂ ਗਾਥਾਦ੍ਵਯਮਾਹ –

੩੧. ‘‘ਉਪਸਾਲ਼ਕਨਾਮਾਨਿ, ਸਹਸ੍ਸਾਨਿ ਚਤੁਦ੍ਦਸ;

ਅਸ੍ਮਿਂ ਪਦੇਸੇ ਦਡ੍ਢਾਨਿ, ਨਤ੍ਥਿ ਲੋਕੇ ਅਨਾਮਤਂ.

੩੨. ‘‘ਯਮ੍ਹਿ ਸਚ੍ਚਞ੍ਚ ਧਮ੍ਮੋ ਚ, ਅਹਿਂਸਾ ਸਂਯਮੋ ਦਮੋ;

ਏਤਂ ਅਰਿਯਾ ਸੇਵਨ੍ਤਿ, ਏਤਂ ਲੋਕੇ ਅਨਾਮਤ’’ਨ੍ਤਿ.

ਤਤ੍ਥ ਅਨਾਮਤਨ੍ਤਿ ਮਤਟ੍ਠਾਨਂ. ਤਞ੍ਹਿ ਉਪਚਾਰਵਸੇਨ ‘‘ਅਮਤ’’ਨ੍ਤਿ ਵੁਚ੍ਚਤਿ, ਤਂ ਪਟਿਸੇਧੇਨ੍ਤੋ ‘‘ਅਨਾਮਤ’’ਨ੍ਤਿ ਆਹ. ‘‘ਅਨਮਤ’’ਨ੍ਤਿਪਿ ਪਾਠੋ, ਲੋਕਸ੍ਮਿਞ੍ਹਿ ਅਨਮਤਟ੍ਠਾਨਂ ਅਸੁਸਾਨਂ ਨਾਮ ਨਤ੍ਥੀਤਿ ਅਤ੍ਥੋ. ਯਮ੍ਹਿ ਸਚ੍ਚਞ੍ਚ ਧਮ੍ਮੋ ਚਾਤਿ ਯਸ੍ਮਿਂ ਪੁਗ੍ਗਲੇ ਚਤੁਸਚ੍ਚਵਤ੍ਥੁਕਂ ਪੁਬ੍ਬਭਾਗਸਚ੍ਚਞਾਣਞ੍ਚ ਲੋਕੁਤ੍ਤਰਧਮ੍ਮੋ ਚ ਅਤ੍ਥਿ. ਅਹਿਂਸਾਤਿ ਪਰੇਸਂ ਅਵਿਹੇਸਾ ਅਵਿਹੇਠਨਾ. ਸਂਯਮੋਤਿ ਸੀਲਸਂਯਮੋ. ਦਮੋਤਿ ਇਨ੍ਦ੍ਰਿਯਦਮਨਂ. ਇਦਞ੍ਚ ਗੁਣਜਾਤਂ ਯਮ੍ਹਿ ਪੁਗ੍ਗਲੇ ਅਤ੍ਥਿ, ਏਤਂ ਅਰਿਯਾ ਸੇਵਨ੍ਤੀਤਿ, ਅਰਿਯਾ ਬੁਦ੍ਧਾ ਚ ਪਚ੍ਚੇਕਬੁਦ੍ਧਾ ਚ ਬੁਦ੍ਧਸਾਵਕਾ ਚ ਏਤਂ ਠਾਨਂ ਸੇਵਨ੍ਤਿ, ਏਵਰੂਪਂ ਪੁਗ੍ਗਲਂ ਉਪਸਙ੍ਕਮਨ੍ਤਿ ਭਜਨ੍ਤੀਤਿ ਅਤ੍ਥੋ. ਏਤਂ ਲੋਕੇ ਅਨਾਮਤਨ੍ਤਿ ਏਤਂ ਗੁਣਜਾਤਂ ਲੋਕੇ ਅਮਤਭਾਵਸਾਧਨਤੋ ਅਨਾਮਤਂ ਨਾਮ.

ਏਵਂ ਬੋਧਿਸਤ੍ਤੋ ਪਿਤਾਪੁਤ੍ਤਾਨਂ ਧਮ੍ਮਂ ਦੇਸੇਤ੍ਵਾ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕਪਰਾਯਣੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਭੋ ਪਿਤਾਪੁਤ੍ਤਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ. ‘‘ਤਦਾ ਪਿਤਾਪੁਤ੍ਤਾਵ ਏਤਰਹਿ ਪਿਤਾਪੁਤ੍ਤਾ ਅਹੇਸੁਂ, ਤਾਪਸੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਉਪਸਾਲ਼ਕਜਾਤਕਵਣ੍ਣਨਾ ਛਟ੍ਠਾ.

[੧੬੭] ੭. ਸਮਿਦ੍ਧਿਜਾਤਕਵਣ੍ਣਨਾ

ਅਭੁਤ੍ਵਾ ਭਿਕ੍ਖਸਿ ਭਿਕ੍ਖੂਤਿ ਇਦਂ ਸਤ੍ਥਾ ਰਾਜਗਹਂ ਉਪਨਿਸ੍ਸਾਯ ਤਪੋਦਾਰਾਮੇ ਵਿਹਰਨ੍ਤੋ ਸਮਿਦ੍ਧਿਥੇਰਂ ਆਰਬ੍ਭ ਕਥੇਸਿ. ਏਕਦਿਵਸਞ੍ਹਿ ਆਯਸ੍ਮਾ ਸਮਿਦ੍ਧਿ ਸਬ੍ਬਰਤ੍ਤਿਂ ਪਧਾਨਂ ਪਦਹਿਤ੍ਵਾ ਅਰੁਣੁਗ੍ਗਮਨਵੇਲਾਯ ਨ੍ਹਤ੍ਵਾ ਸੁਵਣ੍ਣਵਣ੍ਣਂ ਅਤ੍ਤਭਾਵਂ ਸੁਕ੍ਖਾਪਯਮਾਨੋ ਅਨ੍ਤਰਵਾਸਕਂ ਨਿਵਾਸੇਤ੍ਵਾ ਉਤ੍ਤਰਾਸਙ੍ਗਂ ਹਤ੍ਥੇਨ ਗਹੇਤ੍ਵਾ ਅਟ੍ਠਾਸਿ ਸੁਪਰਿਕਮ੍ਮਕਤਾ ਵਿਯ ਸੁਵਣ੍ਣਪਟਿਮਾ. ਅਤ੍ਤਭਾਵਸਮਿਦ੍ਧਿਯਾਯੇਵ ਹਿਸ੍ਸ ‘‘ਸਮਿਦ੍ਧੀ’’ਤਿ ਨਾਮਂ ਅਹੋਸਿ. ਅਥਸ੍ਸ ਸਰੀਰਸੋਭਗ੍ਗਂ ਦਿਸ੍ਵਾ ਏਕਾ ਦੇਵਧੀਤਾ ਪਟਿਬਦ੍ਧਚਿਤ੍ਤਾ ਥੇਰਂ ਏਵਮਾਹ – ‘‘ਤ੍ਵਂ ਖੋਸਿ, ਭਿਕ੍ਖੁ, ਦਹਰੋ ਯੁਵਾ ਸੁਸੁ ਕਾਲ਼ਕੇਸੋ ਭਦ੍ਰੇਨ ਯੋਬ੍ਬਨੇਨ ਸਮਨ੍ਨਾਗਤੋ ਅਭਿਰੂਪੋ ਦਸ੍ਸਨੀਯੋ ਪਾਸਾਦਿਕੋ, ਏਵਰੂਪਸ੍ਸ ਤਵ ਕਾਮੇ ਅਪਰਿਭੁਞ੍ਜਿਤ੍ਵਾ ਕੋ ਅਤ੍ਥੋ ਪਬ੍ਬਜ੍ਜਾਯ, ਕਾਮੇ ਤਾਵ ਪਰਿਭੁਞ੍ਜਸ੍ਸੁ, ਪਚ੍ਛਾ ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਰਿਸ੍ਸਸੀ’’ਤਿ. ਅਥ ਨਂ ਥੇਰੋ ਆਹ – ‘‘ਦੇਵਧੀਤੇ, ‘ਅਸੁਕਸ੍ਮਿਂ ਨਾਮ ਵਯੇ ਠਿਤੋ ਮਰਿਸ੍ਸਾਮੀ’ਤਿ ਮਮ ਮਰਣਕਾਲਂ ਨ ਜਾਨਾਮਿ, ਏਸ ਮੇ ਕਾਲੋ ਪਟਿਚ੍ਛਨ੍ਨੋ, ਤਸ੍ਮਾ ਤਰੁਣਕਾਲੇਯੇਵ ਸਮਣਧਮ੍ਮਂ ਕਤ੍ਵਾ ਦੁਕ੍ਖਸ੍ਸਨ੍ਤਂ ਕਰਿਸ੍ਸਾਮੀ’’ਤਿ. ਸਾ ਥੇਰਸ੍ਸ ਸਨ੍ਤਿਕਾ ਪਟਿਸਨ੍ਥਾਰਂ ਅਲਭਿਤ੍ਵਾ ਤਤ੍ਥੇਵ ਅਨ੍ਤਰਧਾਯਿ. ਥੇਰੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਏਤਮਤ੍ਥਂ ਆਰੋਚੇਸਿ. ਸਤ੍ਥਾ ‘‘ਨ ਖੋ, ਸਮਿਦ੍ਧਿ, ਤ੍ਵਞ੍ਞੇਵ ਏਤਰਹਿ ਦੇਵਧੀਤਾਯ ਪਲੋਭਿਤੋ, ਪੁਬ੍ਬੇਪਿ ਦੇਵਧੀਤਰੋ ਪਬ੍ਬਜਿਤੇ ਪਲੋਭਿਂਸੁਯੇਵਾ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਏਕਸ੍ਮਿਂ ਕਾਸਿਗਾਮਕੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਹਿਮਵਨ੍ਤਪਦੇਸੇ ਏਕਂ ਜਾਤਸ੍ਸਰਂ ਨਿਸ੍ਸਾਯ ਵਾਸਂ ਕਪ੍ਪੇਸਿ. ਸੋ ਸਬ੍ਬਰਤ੍ਤਿਂ ਪਧਾਨਂ ਪਦਹਿਤ੍ਵਾ ਅਰੁਣੁਗ੍ਗਮਨਵੇਲਾਯ ਨ੍ਹਤ੍ਵਾ ਏਕਂ ਵਕ੍ਕਲਂ ਨਿਵਾਸੇਤ੍ਵਾ ਏਕਂ ਹਤ੍ਥੇਨ ਗਹੇਤ੍ਵਾ ਸਰੀਰਂ ਵੋਦਕਂ ਕਰੋਨ੍ਤੋ ਅਟ੍ਠਾਸਿ. ਅਥਸ੍ਸ ਰੂਪਸੋਭਗ੍ਗਪ੍ਪਤ੍ਤਂ ਅਤ੍ਤਭਾਵਂ ਓਲੋਕੇਤ੍ਵਾ ਪਟਿਬਦ੍ਧਚਿਤ੍ਤਾ ਏਕਾ ਦੇਵਧੀਤਾ ਬੋਧਿਸਤ੍ਤਂ ਪਲੋਭਯਮਾਨਾ ਪਠਮਂ ਗਾਥਮਾਹ –

੩੩. ‘‘ਅਭੁਤ੍ਵਾ ਭਿਕ੍ਖਸਿ ਭਿਕ੍ਖੁ, ਨ ਹਿ ਭੁਤ੍ਵਾਨ ਭਿਕ੍ਖਸਿ;

ਭੁਤ੍ਵਾਨ ਭਿਕ੍ਖੁ ਭਿਕ੍ਖਸ੍ਸੁ, ਮਾ ਤਂ ਕਾਲੋ ਉਪਚ੍ਚਗਾ’’ਤਿ.

ਤਤ੍ਥ ਅਭੁਤ੍ਵਾ ਭਿਕ੍ਖਸਿ ਭਿਕ੍ਖੂਤਿ ਭਿਕ੍ਖੁ ਤ੍ਵਂ ਦਹਰਕਾਲੇ ਕਿਲੇਸਕਾਮਵਸੇਨ ਵਤ੍ਥੁਕਾਮੇ ਅਭੁਤ੍ਵਾਵ ਭਿਕ੍ਖਾਯ ਚਰਸਿ. ਨ ਹਿ ਭੁਤ੍ਵਾਨ ਭਿਕ੍ਖਸੀਤਿ ਨਨੁ ਨਾਮ ਪਞ੍ਚ ਕਾਮਗੁਣੇ ਭੁਤ੍ਵਾ ਭਿਕ੍ਖਾਯ ਚਰਿਤਬ੍ਬਂ, ਕਾਮੇ ਅਭੁਤ੍ਵਾਵ ਭਿਕ੍ਖਾਚਰਿਯਂ ਉਪਗਤੋਸਿ. ਭੁਤ੍ਵਾਨ ਭਿਕ੍ਖੁ ਭਿਕ੍ਖਸ੍ਸੂਤਿ ਭਿਕ੍ਖੁ ਦਹਰਕਾਲੇ ਤਾਵ ਕਾਮੇ ਭੁਞ੍ਜਿਤ੍ਵਾ ਪਚ੍ਛਾ ਮਹਲ੍ਲਕਕਾਲੇ ਭਿਕ੍ਖਸ੍ਸੁ. ਮਾ ਤਂ ਕਾਲੋ ਉਪਚ੍ਚਗਾਤਿ ਅਯਂ ਕਾਮੇ ਭੁਞ੍ਜਨਕਾਲੋ ਦਹਰਕਾਲੋ, ਤਂ ਮਾ ਅਤਿਕ੍ਕਮਤੂਤਿ.

ਬੋਧਿਸਤ੍ਤੋ ਦੇਵਤਾਯ ਵਚਨਂ ਸੁਤ੍ਵਾ ਅਤ੍ਤਨੋ ਅਜ੍ਝਾਸਯਂ ਪਕਾਸੇਨ੍ਤੋ ਦੁਤਿਯਂ ਗਾਥਮਾਹ –

੩੪. ‘‘ਕਾਲਂ ਵੋਹਂ ਨ ਜਾਨਾਮਿ, ਛਨ੍ਨੋ ਕਾਲੋ ਨ ਦਿਸ੍ਸਤਿ;

ਤਸ੍ਮਾ ਅਭੁਤ੍ਵਾ ਭਿਕ੍ਖਾਮਿ, ਮਾ ਮਂ ਕਾਲੋ ਉਪਚ੍ਚਗਾ’’ਤਿ.

ਤਤ੍ਥ ਕਾਲਂ ਵੋਹਂ ਨ ਜਾਨਾਮੀਤਿ ਵੋਤਿ ਨਿਪਾਤਮਤ੍ਤਂ. ਅਹਂ ਪਨ ‘‘ਪਠਮਵਯੇ ਵਾ ਮਯਾ ਮਰਿਤਬ੍ਬਂ ਮਜ੍ਝਿਮਵਯੇ ਵਾ ਪਚ੍ਛਿਮਵਯੇ ਵਾ’’ਤਿ ਏਵਂ ਅਤ੍ਤਨੋ ਮਰਣਕਾਲਂ ਨ ਜਾਨਾਮਿ. ਪਣ੍ਡਿਤੇਨ ਹਿ ਪੁਗ੍ਗਲੇਨ –

‘‘ਜੀਵਿਤਂ ਬ੍ਯਾਧਿ ਕਾਲੋ ਚ, ਦੇਹਨਿਕ੍ਖੇਪਨਂ ਗਤਿ;

ਪਞ੍ਚੇਤੇ ਜੀਵਲੋਕਸ੍ਮਿਂ, ਅਨਿਮਿਤ੍ਤਾ ਨ ਨਾਯਰੇ’’ਤਿ.

ਛਨ੍ਨੋ ਕਾਲੋ ਨ ਦਿਸ੍ਸਤੀਤਿ ਯਸ੍ਮਾ ‘‘ਅਸੁਕਸ੍ਮਿਂ ਨਾਮ ਵਯਕਾਲੇ ਹੇਮਨ੍ਤਾਦਿਉਤੁਕਾਲੇ ਵਾ ਮਯਾ ਮਰਿਤਬ੍ਬ’’ਨ੍ਤਿ ਮਯ੍ਹਮ੍ਪੇਸ ਛਨ੍ਨੋ ਹੁਤ੍ਵਾ ਕਾਲੋ ਨ ਦਿਸ੍ਸਤਿ, ਸੁਪ੍ਪਟਿਚ੍ਛਨ੍ਨੋ ਹੁਤ੍ਵਾ ਠਿਤੋ ਨ ਪਞ੍ਞਾਯਤਿ. ਤਸ੍ਮਾ ਅਭੁਤ੍ਵਾ ਭਿਕ੍ਖਾਮੀਤਿ ਤੇਨ ਕਾਰਣੇਨ ਪਞ੍ਚ ਕਾਮਗੁਣੇ ਅਭੁਤ੍ਵਾ ਭਿਕ੍ਖਾਮਿ. ਮਾ ਮਂ ਕਾਲੋ ਉਪਚ੍ਚਗਾਤਿ ਮਂ ਸਮਣਧਮ੍ਮਕਰਣਕਾਲੋ ਮਾ ਅਤਿਕ੍ਕਮਤੂਤਿ ਅਤ੍ਥੋ. ਇਮਿਨਾ ਕਾਰਣੇਨ ਦਹਰੋਵ ਸਮਾਨੋ ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਰੋਮੀਤਿ. ਦੇਵਧੀਤਾ ਬੋਧਿਸਤ੍ਤਸ੍ਸ ਵਚਨਂ ਸੁਤ੍ਵਾ ਤਤ੍ਥੇਵ ਅਨ੍ਤਰਧਾਯਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਦੇਵਧੀਤਾ ਅਯਂ ਦੇਵਧੀਤਾ ਅਹੋਸਿ, ਅਹਮੇਵ ਤੇਨ ਸਮਯੇਨ ਤਾਪਸੋ ਅਹੋਸਿ’’ਨ੍ਤਿ.

ਸਮਿਦ੍ਧਿਜਾਤਕਵਣ੍ਣਨਾ ਸਤ੍ਤਮਾ.

[੧੬੮] ੮. ਸਕੁਣਗ੍ਘਿਜਾਤਕਵਣ੍ਣਨਾ

ਸੇਨੋ ਬਲਸਾ ਪਤਮਾਨੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਤ੍ਤਜ੍ਝਾਸਯਂ ਸਕੁਣੋਵਾਦਸੁਤ੍ਤਂ (ਸਂ. ਨਿ. ੫.੩੭੨) ਆਰਬ੍ਭ ਕਥੇਸਿ. ਏਕਦਿਵਸਞ੍ਹਿ ਸਤ੍ਥਾ ਭਿਕ੍ਖੂ ਆਮਨ੍ਤੇਤ੍ਵਾ ‘‘ਗੋਚਰੇ, ਭਿਕ੍ਖਵੇ, ਚਰਥ ਸਕੇ ਪੇਤ੍ਤਿਕੇ ਵਿਸਯੇ’’ਤਿ (ਸਂ. ਨਿ. ੫.੩੭੨) ਇਮਂ ਸਂਯੁਤ੍ਤਮਹਾਵਗ੍ਗੇ ਸੁਤ੍ਤਨ੍ਤਂ ਕਥੇਨ੍ਤੋ ‘‘ਤੁਮ੍ਹੇ ਤਾਵ ਤਿਟ੍ਠਥ, ਪੁਬ੍ਬੇ ਤਿਰਚ੍ਛਾਨਗਤਾਪਿ ਸਕਂ ਪੇਤ੍ਤਿਕਵਿਸਯਂ ਪਹਾਯ ਅਗੋਚਰੇ ਚਰਨ੍ਤਾ ਪਚ੍ਚਾਮਿਤ੍ਤਾਨਂ ਹਤ੍ਥਪਥਂ ਗਨ੍ਤ੍ਵਾਪਿ ਅਤ੍ਤਨੋ ਪਞ੍ਞਾਸਮ੍ਪਤ੍ਤਿਯਾ ਉਪਾਯਕੋਸਲ੍ਲੇਨ ਪਚ੍ਚਾਮਿਤ੍ਤਾਨਂ ਹਤ੍ਥਾ ਮੁਚ੍ਚਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਲਾਪਸਕੁਣਯੋਨਿਯਂ ਨਿਬ੍ਬਤ੍ਤਿਤ੍ਵਾ ਨਙ੍ਗਲਕਟ੍ਠਕਰਣੇ ਲੇਡ੍ਡੁਟ੍ਠਾਨੇ ਵਾਸਂ ਕਪ੍ਪੇਸਿ. ਸੋ ਏਕਦਿਵਸਂ ‘‘ਸਕਵਿਸਯੇ ਗੋਚਰਗਹਣਂ ਪਹਾਯ ਪਰਵਿਸਯੇ ਗੋਚਰਂ ਗਣ੍ਹਿਸ੍ਸਾਮੀ’’ਤਿ ਅਟਵਿਪਰਿਯਨ੍ਤਂ ਅਗਮਾਸਿ. ਅਥ ਨਂ ਤਤ੍ਥ ਗੋਚਰਂ ਗਣ੍ਹਨ੍ਤਂ ਦਿਸ੍ਵਾ ਸਕੁਣਗ੍ਘਿ ਸਹਸਾ ਅਜ੍ਝਪ੍ਪਤ੍ਤਾ ਅਗ੍ਗਹੇਸਿ. ਸੋ ਸਕੁਣਗ੍ਘਿਯਾ ਹਰਿਯਮਾਨੋ ਏਵਂ ਪਰਿਦੇਵਸਿ – ‘‘ਮਯਮੇਵਮ੍ਹ ਅਲਕ੍ਖਿਕਾ, ਮਯਂ ਅਪ੍ਪਪੁਞ੍ਞਾ, ਯੇ ਮਯਂ ਅਗੋਚਰੇ ਚਰਿਮ੍ਹ ਪਰਵਿਸਯੇ, ਸਚੇਜ੍ਜ ਮਯਂ ਗੋਚਰੇ ਚਰੇਯ੍ਯਾਮ ਸਕੇ ਪੇਤ੍ਤਿਕੇ ਵਿਸਯੇ, ਨ ਮ੍ਯਾਯਂ ਸਕੁਣਗ੍ਘਿ ਅਲਂ ਅਭਵਿਸ੍ਸ ਯਦਿਦਂ ਯੁਦ੍ਧਾਯਾ’’ਤਿ. ‘‘ਕੋ ਪਨ, ਤੇ ਲਾਪ, ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋ’’ਤਿ? ‘‘ਯਦਿਦਂ ਨਙ੍ਗਲਕਟ੍ਠਕਰਣਂ ਲੇਡ੍ਡੁਟ੍ਠਾਨ’’ਨ੍ਤਿ. ਅਥ ਨਂ ਸਕੁਣਗ੍ਘਿ ਸਕੇ ਬਲੇ ਅਪਤ੍ਥਦ੍ਧਾ ਅਮੁਞ੍ਚਿ – ‘‘ਗਚ੍ਛ ਖੋ, ਤ੍ਵਂ ਲਾਪ, ਤਤ੍ਰਪਿ ਮੇ ਗਨ੍ਤ੍ਵਾ ਨ ਮੋਕ੍ਖਸੀ’’ਤਿ. ਸੋ ਤਤ੍ਥ ਗਨ੍ਤ੍ਵਾ ਮਹਨ੍ਤਂ ਲੇਡ੍ਡੁਂ ਅਭਿਰੁਹਿਤ੍ਵਾ ‘‘ਏਹਿ ਖੋ ਦਾਨਿ ਸਕੁਣਗ੍ਘੀ’’ਤਿ ਸੇਨਂ ਅਵ੍ਹਯਨ੍ਤੋ ਅਟ੍ਠਾਸਿ. ਸਕੁਣਗ੍ਘਿ ਸਕੇ ਬਲੇ ਅਪਤ੍ਥਦ੍ਧਾ ਉਭੋ ਪਕ੍ਖੇ ਸਨ੍ਨਯ੍ਹ ਲਾਪਸਕੁਣਂ ਸਹਸਾ ਅਜ੍ਝਪ੍ਪਤ੍ਤਾ. ਯਦਾ ਪਨ ਤਂ ਲਾਪੋ ‘‘ਬਹੁਆਗਤਾ ਖੋ ਮ੍ਯਾਯਂ ਸਕੁਣਗ੍ਘੀ’’ਤਿ ਅਞ੍ਞਾਸਿ, ਅਥ ਪਰਿਵਤ੍ਤਿਤ੍ਵਾ ਤਸ੍ਸੇਵ ਲੇਡ੍ਡੁਸ੍ਸ ਅਨ੍ਤਰਂ ਪਚ੍ਚਾਪਾਦਿ. ਸਕੁਣਗ੍ਘਿ ਵੇਗਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੀ ਤਤ੍ਥੇਵ ਉਰਂ ਪਚ੍ਚਤਾਲ਼ੇਸਿ. ਏਵਂ ਸਾ ਭਿਨ੍ਨੇਨ ਹਦਯੇਨ ਨਿਕ੍ਖਨ੍ਤੇਹਿ ਅਕ੍ਖੀਹਿ ਜੀਵਿਤਕ੍ਖਯਂ ਪਾਪੁਣਿ.

ਸਤ੍ਥਾ ਇਮਂ ਅਤੀਤਂ ਦਸ੍ਸੇਤ੍ਵਾ ‘‘ਏਵਂ, ਭਿਕ੍ਖਵੇ, ਤਿਰਚ੍ਛਾਨਗਤਾਪਿ ਅਗੋਚਰੇ ਚਰਨ੍ਤਾ ਸਪਤ੍ਤਹਤ੍ਥਂ ਗਚ੍ਛਨ੍ਤਿ, ਗੋਚਰੇ ਪਨ ਸਕੇ ਪੇਤ੍ਤਿਕੇ ਵਿਸਯੇ ਚਰਨ੍ਤਾ ਸਪਤ੍ਤੇ ਨਿਗ੍ਗਣ੍ਹਨ੍ਤਿ, ਤਸ੍ਮਾ ਤੁਮ੍ਹੇਪਿ ਮਾ ਅਗੋਚਰੇ ਚਰਥ ਪਰਵਿਸਯੇ. ਅਗੋਚਰੇ, ਭਿਕ੍ਖਵੇ, ਚਰਤਂ ਪਰਵਿਸਯੇ ਲਚ੍ਛਤਿ ਮਾਰੋ ਓਤਾਰਂ, ਲਚ੍ਛਤਿ ਮਾਰੋ ਆਰਮ੍ਮਣਂ. ਕੋ ਚ, ਭਿਕ੍ਖਵੇ, ਭਿਕ੍ਖੁਨੋ ਅਗੋਚਰੋ ਪਰਵਿਸਯੋ? ਯਦਿਦਂ ਪਞ੍ਚ ਕਾਮਗੁਣਾ. ਕਤਮੇ ਪਞ੍ਚ? ਚਕ੍ਖੁਵਿਞ੍ਞੇਯ੍ਯਾ ਰੂਪਾ…ਪੇ… ਅਯਂ, ਭਿਕ੍ਖਵੇ, ਭਿਕ੍ਖੁਨੋ ਅਗੋਚਰੋ ਪਰਵਿਸਯੋ’’ਤਿ ਵਤ੍ਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਪਠਮਂ ਗਾਥਮਾਹ –

੩੫. ‘‘ਸੇਨੋ ਬਲਸਾ ਪਤਮਾਨੋ, ਲਾਪਂ ਗੋਚਰਠਾਯਿਨਂ;

ਸਹਸਾ ਅਜ੍ਝਪ੍ਪਤ੍ਤੋਵ, ਮਰਣਂ ਤੇਨੁਪਾਗਮੀ’’ਤਿ.

ਤਤ੍ਥ ਬਲਸਾ ਪਤਮਾਨੋਤਿ ‘‘ਲਾਪਂ ਗਣ੍ਹਿਸ੍ਸਾਮੀ’’ਤਿ ਬਲੇਨ ਥਾਮੇਨ ਪਤਮਾਨੋ. ਗੋਚਰਠਾਯਿਨਨ੍ਤਿ ਸਕਵਿਸਯਾ ਨਿਕ੍ਖਮਿਤ੍ਵਾ ਗੋਚਰਤ੍ਥਾਯ ਅਟਵਿਪਰਿਯਨ੍ਤੇ ਠਿਤਂ. ਅਜ੍ਝਪ੍ਪਤ੍ਤੋਤਿ ਸਮ੍ਪਤ੍ਤੋ. ਮਰਣਂ ਤੇਨੁਪਾਗਮੀਤਿ ਤੇਨ ਕਾਰਣੇਨ ਮਰਣਂ ਪਤ੍ਤੋ.

ਤਸ੍ਮਿਂ ਪਨ ਮਰਣਂ ਪਤ੍ਤੇ ਲਾਪੋ ਨਿਕ੍ਖਮਿਤ੍ਵਾ ‘‘ਦਿਟ੍ਠਾ ਵਤ ਮੇ ਪਚ੍ਚਾਮਿਤ੍ਤਸ੍ਸ ਪਿਟ੍ਠੀ’’ਤਿ ਤਸ੍ਸ ਹਦਯੇ ਠਤ੍ਵਾ ਉਦਾਨਂ ਉਦਾਨੇਨ੍ਤੋ ਦੁਤਿਯਂ ਗਾਥਮਾਹ –

੩੬. ‘‘ਸੋਹਂ ਨਯੇਨ ਸਮ੍ਪਨ੍ਨੋ, ਪੇਤ੍ਤਿਕੇ ਗੋਚਰੇ ਰਤੋ;

ਅਪੇਤਸਤ੍ਤੁ ਮੋਦਾਮਿ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ’’ਤਿ.

ਤਤ੍ਥ ਨਯੇਨਾਤਿ ਉਪਾਯੇਨ. ਅਤ੍ਥਮਤ੍ਤਨੋਤਿ ਅਤ੍ਤਨੋ ਅਰੋਗਭਾਵਸਙ੍ਖਾਤਂ ਵੁਡ੍ਢਿਂ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਬਹੂ ਭਿਕ੍ਖੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੁ. ‘‘ਤਦਾ ਸੇਨੋ ਦੇਵਦਤ੍ਤੋ ਅਹੋਸਿ, ਲਾਪੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਸਕੁਣਗ੍ਘਿਜਾਤਕਵਣ੍ਣਨਾ ਅਟ੍ਠਮਾ.

[੧੬੯] ੯. ਅਰਕਜਾਤਕਵਣ੍ਣਨਾ

ਯੋ ਵੇ ਮੇਤ੍ਤੇਨ ਚਿਤ੍ਤੇਨਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮੇਤ੍ਤਸੁਤ੍ਤਂ ਆਰਬ੍ਭ ਕਥੇਸਿ. ਏਕਸ੍ਮਿਞ੍ਹਿ ਸਮਯੇ ਸਤ੍ਥਾ ਭਿਕ੍ਖੂ ਆਮਨ੍ਤੇਸਿ – ‘‘ਮੇਤ੍ਤਾਯ, ਭਿਕ੍ਖਵੇ, ਚੇਤੋਵਿਮੁਤ੍ਤਿਯਾ ਆਸੇਵਿਤਾਯ ਭਾਵਿਤਾਯ ਬਹੁਲੀਕਤਾਯ ਯਾਨੀਕਤਾਯ ਵਤ੍ਥੁਕਤਾਯ ਅਨੁਟ੍ਠਿਤਾਯ ਪਰਿਚਿਤਾਯ ਸੁਸਮਾਰਦ੍ਧਾਯ ਏਕਾਦਸਾਨਿਸਂਸਾ ਪਾਟਿਕਙ੍ਖਾ. ਕਤਮੇ ਏਕਾਦਸ? ਸੁਖਂ ਸੁਪਤਿ, ਸੁਖਂ ਪਟਿਬੁਜ੍ਝਤਿ, ਨ ਪਾਪਕਂ ਸੁਪਿਨਂ ਪਸ੍ਸਤਿ, ਮਨੁਸ੍ਸਾਨਂ ਪਿਯੋ ਹੋਤਿ, ਅਮਨੁਸ੍ਸਾਨਂ ਪਿਯੋ ਹੋਤਿ, ਦੇਵਤਾ ਰਕ੍ਖਨ੍ਤਿ, ਨਾਸ੍ਸ ਅਗ੍ਗਿ ਵਾ ਵਿਸਂ ਵਾ ਸਤ੍ਥਂ ਵਾ ਕਮਤਿ, ਤੁਵਟਂ ਚਿਤ੍ਤਂ ਸਮਾਧਿਯਤਿ, ਮੁਖਵਣ੍ਣੋ ਵਿਪ੍ਪਸੀਦਤਿ, ਅਸਮ੍ਮੂਲ਼੍ਹੋ ਕਾਲਂ ਕਰੋਤਿ, ਉਤ੍ਤਰਿ ਅਪ੍ਪਟਿਵਿਜ੍ਝਨ੍ਤੋ ਬ੍ਰਹ੍ਮਲੋਕੂਪਗੋ ਹੋਤਿ. ਮੇਤ੍ਤਾਯ, ਭਿਕ੍ਖਵੇ, ਚੇਤੋਵਿਮੁਤ੍ਤਿਯਾ ਆਸੇਵਿਤਾਯ…ਪੇ… ਸੁਸਮਾਰਦ੍ਧਾਯ ਇਮੇ ਏਕਾਦਸਾਨਿਸਂਸਾ ਪਾਟਿਕਙ੍ਖਾ’’ਤਿ (ਅ. ਨਿ. ੧੧.੧੫). ਇਮੇ ਏਕਾਦਸਾਨਿਸਂਸੇ ਗਹੇਤ੍ਵਾ ਠਿਤਂ ਮੇਤ੍ਤਾਭਾਵਨਂ ਵਣ੍ਣੇਤ੍ਵਾ ‘‘ਭਿਕ੍ਖਵੇ, ਭਿਕ੍ਖੁਨਾ ਨਾਮ ਸਬ੍ਬਸਤ੍ਤੇਸੁ ਓਦਿਸ੍ਸਕਾਨੋਦਿਸ੍ਸਕਵਸੇਨ ਮੇਤ੍ਤਾ ਭਾਵੇਤਬ੍ਬਾ, ਹਿਤੋਪਿ ਹਿਤੇਨ ਫਰਿਤਬ੍ਬੋ, ਅਹਿਤੋਪਿ ਹਿਤੇਨ ਫਰਿਤਬ੍ਬੋ, ਮਜ੍ਝਤ੍ਤੋਪਿ ਹਿਤੇਨ ਫਰਿਤਬ੍ਬੋ. ਏਵਂ ਸਬ੍ਬਸਤ੍ਤੇਸੁ ਓਦਿਸ੍ਸਕਾਨੋਦਿਸ੍ਸਕਵਸੇਨ ਮੇਤ੍ਤਾ ਭਾਵੇਤਬ੍ਬਾ, ਕਰੁਣਾ ਮੁਦਿਤਾ ਉਪੇਕ੍ਖਾ ਭਾਵੇਤਬ੍ਬਾ, ਚਤੂਸੁ ਬ੍ਰਹ੍ਮਵਿਹਾਰੇਸੁ ਕਮ੍ਮਂ ਕਾਤਬ੍ਬਮੇਵ. ਏਵਂ ਕਰੋਨ੍ਤੋ ਹਿ ਮਗ੍ਗਂ ਵਾ ਫਲਂ ਵਾ ਅਲਭਨ੍ਤੋਪਿ ਬ੍ਰਹ੍ਮਲੋਕਪਰਾਯਣੋ ਅਹੋਸਿ, ਪੋਰਾਣਕਪਣ੍ਡਿਤਾਪਿ ਸਤ੍ਤ ਵਸ੍ਸਾਨਿ ਮੇਤ੍ਤਂ ਭਾਵੇਤ੍ਵਾ ਸਤ੍ਤ ਸਂਵਟ੍ਟਵਿਵਟ੍ਟਕਪ੍ਪੇ ਬ੍ਰਹ੍ਮਲੋਕਸ੍ਮਿਂਯੇਵ ਵਸਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਏਕਸ੍ਮਿਂ ਕਪ੍ਪੇ ਬੋਧਿਸਤ੍ਤੋ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਕਾਮੇ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਚਤੁਨ੍ਨਂ ਬ੍ਰਹ੍ਮਵਿਹਾਰਾਨਂ ਲਾਭੀ ਅਰਕੋ ਨਾਮ ਸਤ੍ਥਾ ਹੁਤ੍ਵਾ ਹਿਮਵਨ੍ਤਪਦੇਸੇ ਵਾਸਂ ਕਪ੍ਪੇਸਿ, ਤਸ੍ਸ ਮਹਾ ਪਰਿਵਾਰੋ ਅਹੋਸਿ. ਸੋ ਇਸਿਗਣਂ ਓਵਦਨ੍ਤੋ ‘‘ਪਬ੍ਬਜਿਤੇਨ ਨਾਮ ਮੇਤ੍ਤਾ ਭਾਵੇਤਬ੍ਬਾ, ਕਰੁਣਾ ਮੁਦਿਤਾ ਉਪੇਕ੍ਖਾ ਭਾਵੇਤਬ੍ਬਾ. ਮੇਤ੍ਤਚਿਤ੍ਤਞ੍ਹਿ ਨਾਮੇਤਂ ਅਪ੍ਪਨਾਪ੍ਪਤ੍ਤਂ ਬ੍ਰਹ੍ਮਲੋਕਪਰਾਯਣਤਂ ਸਾਧੇਤੀ’’ਤਿ ਮੇਤ੍ਤਾਯ ਆਨਿਸਂਸਂ ਪਕਾਸੇਨ੍ਤੋ ਇਮਾ ਗਾਥਾ ਆਹ –

੩੭. ‘‘ਯੋ ਵੇ ਮੇਤ੍ਤੇਨ ਚਿਤ੍ਤੇਨ, ਸਬ੍ਬਲੋਕਾਨੁਕਮ੍ਪਤਿ;

ਉਦ੍ਧਂ ਅਧੋ ਚ ਤਿਰਿਯਂ, ਅਪ੍ਪਮਾਣੇਨ ਸਬ੍ਬਸੋ.

੩੮. ‘‘ਅਪ੍ਪਮਾਣਂ ਹਿਤਂ ਚਿਤ੍ਤਂ, ਪਰਿਪੁਣ੍ਣਂ ਸੁਭਾਵਿਤਂ;

ਯਂ ਪਮਾਣਕਤਂ ਕਮ੍ਮਂ, ਨ ਤਂ ਤਤ੍ਰਾਵਸਿਸ੍ਸਤੀ’’ਤਿ.

ਤਤ੍ਥ ਯੋ ਵੇ ਮੇਤ੍ਤੇਨ ਚਿਤ੍ਤੇਨ, ਸਬ੍ਬਲੋਕਾਨੁਕਮ੍ਪਤੀਤਿ ਖਤ੍ਤਿਯਾਦੀਸੁ ਵਾ ਸਮਣਬ੍ਰਾਹ੍ਮਣੇਸੁ ਵਾ ਯੋ ਕੋਚਿ ਅਪ੍ਪਮਾਣੇਨ ਮੇਤ੍ਤੇਨ ਚਿਤ੍ਤੇਨ ਸਕਲਂ ਸਤ੍ਤਲੋਕਂ ਅਨੁਕਮ੍ਪਤਿ. ਉਦ੍ਧਨ੍ਤਿ ਪਥਵਿਤੋ ਯਾਵ ਨੇਵਸਞ੍ਞਾਨਾਸਞ੍ਞਾਯਤਨਬ੍ਰਹ੍ਮਲੋਕਾ. ਅਧੋਤਿ ਪਥਵਿਯਾ ਹੇਟ੍ਠਾ ਉਸ੍ਸਦੇ ਮਹਾਨਿਰਯੇ. ਤਿਰਿਯਨ੍ਤਿ ਮਨੁਸ੍ਸਲੋਕੇ, ਯਤ੍ਤਕਾਨਿ ਚਕ੍ਕਵਾਲ਼ਾਨਿ ਚ ਤੇਸੁ ਸਬ੍ਬੇਸੁ ਏਤ੍ਤਕੇ ਠਾਨੇ ਨਿਬ੍ਬਤ੍ਤਾ ਸਬ੍ਬੇ ਸਤ੍ਤਾ ਅਵੇਰਾ ਹੋਨ੍ਤੁ, ਅਬ੍ਯਾਪਜ੍ਝਾ ਅਨੀਘਾ, ਸੁਖੀ ਅਤ੍ਤਾਨਂ ਪਰਿਹਰਨ੍ਤੂਤਿ ਏਵਂ ਭਾਵਿਤੇਨ ਮੇਤ੍ਤੇਨ ਚਿਤ੍ਤੇਨਾਤਿ ਅਤ੍ਥੋ. ਅਪ੍ਪਮਾਣੇਨਾਤਿ ਅਪ੍ਪਮਾਣਸਤ੍ਤਾਨਂ ਅਪ੍ਪਮਾਣਾਰਮ੍ਮਣਤ੍ਤਾ ਅਪ੍ਪਮਾਣੇਨ. ਸਬ੍ਬਸੋਤਿ ਸਬ੍ਬਾਕਾਰੇਨ, ਉਦ੍ਧਂ ਅਧੋ ਤਿਰਿਯਨ੍ਤਿ ਏਵਂ ਸਬ੍ਬਸੁਗਤਿਦੁਗ੍ਗਤਿਵਸੇਨਾਤਿ ਅਤ੍ਥੋ.

ਅਪ੍ਪਮਾਣਂ ਹਿਤਂ ਚਿਤ੍ਤਨ੍ਤਿ ਅਪ੍ਪਮਾਣਂ ਕਤ੍ਵਾ ਭਾਵਿਤਂ ਸਬ੍ਬਸਤ੍ਤੇਸੁ ਹਿਤਚਿਤ੍ਤਂ. ਪਰਿਪੁਣ੍ਣਨ੍ਤਿ ਅਵਿਕਲਂ. ਸੁਭਾਵਿਤਨ੍ਤਿ ਸੁਵਡ੍ਢਿਤਂ, ਅਪ੍ਪਨਾਚਿਤ੍ਤਸ੍ਸੇਤਂ ਨਾਮਂ. ਯਂ ਪਮਾਣਕਤਂ ਕਮ੍ਮਨ੍ਤਿ ਯਂ ‘‘ਅਪ੍ਪਮਾਣਂ ਅਪ੍ਪਮਾਣਾਰਮ੍ਮਣ’’ਨ੍ਤਿ ਏਵਂ ਆਰਮ੍ਮਣਤ੍ਤਿਕਵਸੇਨ ਚ ਵਸੀਭਾਵਪ੍ਪਤ੍ਤਿਵਸੇਨ ਚ ਅਵਡ੍ਢਿਤ੍ਵਾ ਕਤਂ ਪਰਿਤ੍ਤਂ ਕਾਮਾਵਚਰਕਮ੍ਮਂ. ਨ ਤਂ ਤਤ੍ਰਾਵਸਿਸ੍ਸਤੀਤਿ ਤਂ ਪਰਿਤ੍ਤਂ ਕਮ੍ਮਂ ਯਂ ਤਂ ‘‘ਅਪ੍ਪਮਾਣਂ ਹਿਤਂ ਚਿਤ੍ਤ’’ਨ੍ਤਿ ਸਙ੍ਖਗਤਂ ਰੂਪਾਵਚਰਕਮ੍ਮਂ, ਤਤ੍ਰ ਨ ਅਵਸਿਸ੍ਸਤਿ. ਯਥਾ ਨਾਮ ਮਹੋਘੇਨ ਅਜ੍ਝੋਤ੍ਥਟਂ ਪਰਿਤ੍ਤੋਦਕਂ ਓਘਸ੍ਸ ਅਬ੍ਭਨ੍ਤਰੇ ਤੇਨ ਅਸਂਹੀਰਮਾਨਂ ਨਾਵਸਿਸ੍ਸਤਿ ਨ ਤਿਟ੍ਠਤਿ, ਅਥ ਖੋ ਮਹੋਘੋਵ ਤਂ ਅਜ੍ਝੋਤ੍ਥਰਿਤ੍ਵਾ ਤਿਟ੍ਠਤਿ, ਏਵਮੇਵ ਤਂ ਪਰਿਤ੍ਤਕਮ੍ਮਂ ਤਸ੍ਸ ਮਹਗ੍ਗਤਕਮ੍ਮਸ੍ਸ ਅਬ੍ਭਨ੍ਤਰੇ ਤੇਨ ਮਹਗ੍ਗਤਕਮ੍ਮੇਨ ਅਚ੍ਛਿਨ੍ਦਿਤ੍ਵਾ ਅਗ੍ਗਹਿਤਵਿਪਾਕੋਕਾਸਂ ਹੁਤ੍ਵਾ ਨ ਅਵਸਿਸ੍ਸਤਿ ਨ ਤਿਟ੍ਠਤਿ, ਨ ਸਕ੍ਕੋਤਿ ਅਤ੍ਤਨੋ ਵਿਪਾਕਂ ਦਾਤੁਂ, ਅਥ ਖੋ ਮਹਗ੍ਗਤਕਮ੍ਮਮੇਵ ਤਂ ਅਜ੍ਝੋਤ੍ਥਰਿਤ੍ਵਾ ਤਿਟ੍ਠਤਿ ਵਿਪਾਕਂ ਦੇਤੀਤਿ.

ਏਵਂ ਬੋਧਿਸਤ੍ਤੋ ਅਨ੍ਤੇਵਾਸਿਕਾਨਂ ਮੇਤ੍ਤਾਭਾਵਨਾਯ ਆਨਿਸਂਸਂ ਕਥੇਤ੍ਵਾ ਅਪਰਿਹੀਨਜ੍ਝਾਨੋ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਤ੍ਵਾ ਸਤ੍ਤ ਸਂਵਟ੍ਟਵਿਵਟ੍ਟਕਪ੍ਪੇ ਨ ਇਮਂ ਲੋਕਂ ਪੁਨ ਅਗਮਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਇਸਿਗਣੋ ਬੁਦ੍ਧਪਰਿਸਾ ਅਹੋਸਿ, ਅਰਕੋ ਪਨ ਸਤ੍ਥਾ ਅਹਮੇਵ ਅਹੋਸਿ’’ਨ੍ਤਿ.

ਅਰਕਜਾਤਕਵਣ੍ਣਨਾ ਨਵਮਾ.

[੧੭੦] ੧੦. ਕਕਣ੍ਟਕਜਾਤਕਵਣ੍ਣਨਾ

ਨਾਯਂ ਪੁਰੇ ਉਣ੍ਣਮਤੀਤਿ ਇਦਂ ਕਕਣ੍ਟਕਜਾਤਕਂ ਮਹਾਉਮਙ੍ਗਜਾਤਕੇ (ਜਾ. ੨.੨੨.੫੯੦ ਆਦਯੋ) ਆਵਿਭਵਿਸ੍ਸਤਿ.

ਕਕਣ੍ਟਕਜਾਤਕਵਣ੍ਣਨਾ ਦਸਮਾ.

ਸਨ੍ਥਵਵਗ੍ਗੋ ਦੁਤਿਯੋ.

ਤਸ੍ਸੁਦ੍ਦਾਨਂ –

ਇਨ੍ਦਸਮਾਨਗੋਤ੍ਤਞ੍ਚ, ਸਨ੍ਥਵਂ ਸੁਸੀਮਂ ਗਿਜ੍ਝਂ;

ਨਕੁਲਂ ਉਪਸਾਲ਼ਕਂ, ਸਮਿਦ੍ਧਿ ਚ ਸਕੁਣਗ੍ਘਿ;

ਅਰਕਞ੍ਚ ਕਕਣ੍ਟਕਂ.