੫. ਦੁਚ੍ਚਰਿਤਸੁਤ੍ਤਵਣ੍ਣਨਾ

੬੪. ਪਞ੍ਚਮੇ ਦੁਟ੍ਠੁ ਚਰਿਤਾਨਿ, ਦੁਟ੍ਠਾਨਿ ਵਾ ਚਰਿਤਾਨਿ ਦੁਚ੍ਚਰਿਤਾਨਿ. ਕਾਯੇਨ ਦੁਚ੍ਚਰਿਤਂ, ਕਾਯਤੋ ਵਾ ਪਵਤ੍ਤਂ ਦੁਚ੍ਚਰਿਤਂ ਕਾਯਦੁਚ੍ਚਰਿਤਂ. ਸੇਸੇਸੁਪਿ ਏਸੇਵ ਨਯੋ. ਇਮਾਨਿ ਚ ਦੁਚ੍ਚਰਿਤਾਨਿ ਪਞ੍ਞਤ੍ਤਿਯਾ ਵਾ ਕਥੇਤਬ੍ਬਾਨਿ ਕਮ੍ਮਪਥੇਹਿ ਵਾ. ਤਤ੍ਥ ਪਞ੍ਞਤ੍ਤਿਯਾ ਤਾਵ ਕਾਯਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਸ੍ਸ ਵੀਤਿਕ੍ਕਮੋ ਕਾਯਦੁਚ੍ਚਰਿਤਂ, ਵਚੀਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਸ੍ਸ ਵੀਤਿਕ੍ਕਮੋ ਵਚੀਦੁਚ੍ਚਰਿਤਂ, ਉਭਯਤ੍ਥ ਪਞ੍ਞਤ੍ਤਸ੍ਸ ਵੀਤਿਕ੍ਕਮੋ ਮਨੋਦੁਚ੍ਚਰਿਤਨ੍ਤਿ ਅਯਂ ਪਞ੍ਞਤ੍ਤਿਕਥਾ. ਪਾਣਾਤਿਪਾਤਾਦਯੋ ਪਨ ਤਿਸ੍ਸੋ ਚੇਤਨਾ ਕਾਯਦ੍ਵਾਰੇਪਿ, ਵਚੀਦ੍ਵਾਰੇਪਿ, ਉਪ੍ਪਨ੍ਨਾ ਕਾਯਦੁਚ੍ਚਰਿਤਂ, ਤਥਾ ਚਤਸ੍ਸੋ ਮੁਸਾਵਾਦਾਦਿਚੇਤਨਾ ਵਚੀਦੁਚ੍ਚਰਿਤਂ, ਅਭਿਜ੍ਝਾ, ਬ੍ਯਾਪਾਦੋ, ਮਿਚ੍ਛਾਦਿਟ੍ਠੀਤਿ ਤਯੋ ਚੇਤਨਾਸਮ੍ਪਯੁਤ੍ਤਧਮ੍ਮਾ ਮਨੋਦੁਚ੍ਚਰਿਤਨ੍ਤਿ ਅਯਂ ਕਮ੍ਮਪਥਕਥਾ.

ਗਾਥਾਯਂ ਕਮ੍ਮਪਥਪ੍ਪਤ੍ਤੋਯੇਵ ਪਾਪਧਮ੍ਮੋ ਕਾਯਦੁਚ੍ਚਰਿਤਾਦਿਭਾਵੇਨ ਵੁਤ੍ਤੋਤਿ ਤਦਞ੍ਞਂ ਪਾਪਧਮ੍ਮਂ ਸਙ੍ਗਣ੍ਹਿਤੁਂ ‘‘ਯਞ੍ਚਞ੍ਞਂ ਦੋਸਸਞ੍ਹਿਤ’’ਨ੍ਤਿ ਵੁਤ੍ਤਂ. ਤਤ੍ਥ ਦੋਸਸਞ੍ਹਿਤਨ੍ਤਿ ਰਾਗਾਦਿਕਿਲੇਸਸਂਹਿਤਂ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਪਞ੍ਚਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.