੯. ਸਿਕ੍ਖਾਨਿਸਂਸਸੁਤ੍ਤਵਣ੍ਣਨਾ

੪੬. ਨਵਮੇ ਸਿਕ੍ਖਾਨਿਸਂਸਾਤਿ ਏਤ੍ਥ ਸਿਕ੍ਖਿਤਬ੍ਬਾਤਿ ਸਿਕ੍ਖਾ, ਸਾ ਤਿਵਿਧਾ ਅਧਿਸੀਲਸਿਕ੍ਖਾ, ਅਧਿਚਿਤ੍ਤਸਿਕ੍ਖਾ, ਅਧਿਪਞ੍ਞਾਸਿਕ੍ਖਾਤਿ. ਤਿਵਿਧਾਪਿ ਚੇਸਾ ਸਿਕ੍ਖਾ ਆਨਿਸਂਸਾ ਏਤੇਸਂ, ਨ ਲਾਭਸਕ੍ਕਾਰਸਿਲੋਕਾਤਿ ਸਿਕ੍ਖਾਨਿਸਂਸਾ. ਵਿਹਰਥਾਤਿ ਸਿਕ੍ਖਾਨਿਸਂਸਾ ਹੁਤ੍ਵਾ ਵਿਹਰਥ, ਤੀਸੁ ਸਿਕ੍ਖਾਸੁ ਆਨਿਸਂਸਦਸ੍ਸਾਵਿਨੋ ਹੁਤ੍ਵਾ ਤਾਹਿ ਸਿਕ੍ਖਾਹਿ ਲਦ੍ਧਬ੍ਬਂ ਆਨਿਸਂਸਮੇਵ ਸਮ੍ਪਸ੍ਸਨ੍ਤਾ ਵਿਹਰਥਾਤਿ ਅਤ੍ਥੋ. ਪਞ੍ਞੁਤ੍ਤਰਾਤਿ ਤਾਸੁ ਸਿਕ੍ਖਾਸੁ ਯਾ ਅਧਿਪਞ੍ਞਾਸਿਕ੍ਖਾਸਙ੍ਖਾਤਾ ਪਞ੍ਞਾ, ਸਾ ਉਤ੍ਤਰਾ ਪਧਾਨਾ ਵਿਸਿਟ੍ਠਾ ਏਤੇਸਨ੍ਤਿ ਪਞ੍ਞੁਤ੍ਤਰਾ. ਯੇ ਹਿ ਸਿਕ੍ਖਾਨਿਸਂਸਾ ਵਿਹਰਨ੍ਤਿ, ਤੇ ਪਞ੍ਞੁਤ੍ਤਰਾ ਭਵਨ੍ਤੀਤਿ. ਵਿਮੁਤ੍ਤਿਸਾਰਾਤਿ ਅਰਹਤ੍ਤਫਲਸਙ੍ਖਾਤਾ ਵਿਮੁਤ੍ਤਿ ਸਾਰਂ ਏਤੇਸਨ੍ਤਿ ਵਿਮੁਤ੍ਤਿਸਾਰਾ, ਯਥਾਵੁਤ੍ਤਂ ਵਿਮੁਤ੍ਤਿਂਯੇਵ ਸਾਰਤੋ ਗਹੇਤ੍ਵਾ ਠਿਤਾਤਿ ਅਤ੍ਥੋ. ਯੇ ਹਿ ਸਿਕ੍ਖਾਨਿਸਂਸਾ ਪਞ੍ਞੁਤ੍ਤਰਾ ਚ, ਨ ਤੇ ਭਵਵਿਸੇਸਂ ਪਤ੍ਥੇਨ੍ਤਿ, ਅਪਿਚ ਖੋ ਵਿਭਵਂ ਆਕਙ੍ਖਨ੍ਤਾ ਵਿਮੁਤ੍ਤਿਂਯੇਵ ਸਾਰਤੋ ਪਚ੍ਚੇਨ੍ਤਿ. ਸਤਾਧਿਪਤੇਯ੍ਯਾਤਿ ਜੇਟ੍ਠਕਕਰਣਟ੍ਠੇਨ ਸਤਿ ਅਧਿਪਤੇਯ੍ਯਂ ਏਤੇਸਨ੍ਤਿ ਸਤਾਧਿਪਤੇਯ੍ਯਾ ਅਧਿਪਤਿ ਏਵ ਅਧਿਪਤੇਯ੍ਯਨ੍ਤਿ ਕਤ੍ਵਾ, ਚਤੂਸੁ ਸਤਿਪਟ੍ਠਾਨੇਸੁ ਸੁਪ੍ਪਤਿਟ੍ਠਿਤਚਿਤ੍ਤਾ ਕਾਯਾਨੁਪਸ੍ਸਨਾਦਿਮੁਖੇਨ ਸਮਥਵਿਪਸ੍ਸਨਾਭਾਵਨਾਨੁਯੁਤ੍ਤਾਤਿ ਅਤ੍ਥੋ.

ਅਥ ਵਾ ਸਿਕ੍ਖਾਨਿਸਂਸਾਤਿ ਭਿਕ੍ਖਵੇ, ਏਵਰੂਪੇ ਦੁਲ੍ਲਭਕ੍ਖਣਪਟਿਲਾਭੇ ਤਿਵਿਧਸਿਕ੍ਖਾਸਿਕ੍ਖਨਮੇਵ ਆਨਿਸਂਸਂ ਕਤ੍ਵਾ ਵਿਹਰਥ, ਏਵਂ ਵਿਹਰਨ੍ਤਾ ਚ ਪਞ੍ਞੁਤ੍ਤਰਾ ਪਞ੍ਞਾਯ ਉਤ੍ਤਰਾ ਲੋਕੁਤ੍ਤਰਪਞ੍ਞਾਯ ਸਮਨ੍ਨਾਗਤਾ ਹੁਤ੍ਵਾ ਵਿਹਰਥ, ਏਵਂਭੂਤਾ ਚ ਵਿਮੁਤ੍ਤਿਸਾਰਾ ਨਿਬ੍ਬਾਨਸਾਰਾ ਅਨਞ੍ਞਸਾਰਾ ਵਿਹਰਥ. ਤਥਾਭਾਵਸ੍ਸ ਚਾਯਂ ਉਪਾਯੋ, ਯਂ ਸਤਾਧਿਪਤੇਯ੍ਯਾ ਵਿਹਰਥ, ਸਤਿਪਟ੍ਠਾਨਭਾਵਨਾਯ ਯੁਤ੍ਤਪ੍ਪਯੁਤ੍ਤਾ ਹੋਥ, ਸਬ੍ਬਤ੍ਥ ਵਾ ਸਤਾਰਕ੍ਖੇਨ ਚੇਤਸਾ ਵਿਹਰਥਾਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਇਤਿ ਭਗਵਾ ਤੀਸੁ ਸਿਕ੍ਖਾਸੁ ਭਿਕ੍ਖੂ ਨਿਯੋਜੇਨ੍ਤੋ ਯਥਾ ਤਾ ਸਿਕ੍ਖਿਤਬ੍ਬਾ, ਯੇਨ ਚ ਪਾਰਿਪੂਰਿਂ ਗਚ੍ਛਨ੍ਤਿ, ਤਂ ਸਙ੍ਖੇਪੇਨੇਵ ਦਸ੍ਸੇਤ੍ਵਾ ਇਦਾਨਿ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨਾਨਂ ਫਲਵਿਸੇਸਦਸ੍ਸਨੇਨ ਤਸ੍ਸਾ ਪਟਿਪਤ੍ਤਿਯਾ ਅਮੋਘਭਾਵਂ ਪਕਾਸੇਨ੍ਤੋ ‘‘ਸਿਕ੍ਖਾਨਿਸਂਸਾਨ’’ਨ੍ਤਿਆਦਿਮਾਹ. ਤਂ ਵੁਤ੍ਤਤ੍ਥਮੇਵ.

ਗਾਥਾਸੁ ਪਰਿਪੁਣ੍ਣਸਿਕ੍ਖਨ੍ਤਿ ਅਗ੍ਗਫਲਪ੍ਪਤ੍ਤਿਯਾ ਪਰਿਸੁਦ੍ਧਸਿਕ੍ਖਂ, ਅਸੇਕ੍ਖਨ੍ਤਿ ਅਤ੍ਥੋ. ਅਪਹਾਨਧਮ੍ਮਨ੍ਤਿ ਏਤ੍ਥ ਪਹਾਨਧਮ੍ਮਾ ਵੁਚ੍ਚਨ੍ਤਿ ਕੁਪ੍ਪਾ ਵਿਮੁਤ੍ਤਿਯੋ. ਪਹਾਨਧਮ੍ਮੋਤਿ ਹਿ ਹਾਨਧਮ੍ਮੋ ਕੁਪ੍ਪਧਮ੍ਮੋ. ਨ ਪਹਾਨਧਮ੍ਮੋਤਿ ਅਪਹਾਨਧਮ੍ਮੋ, ਅਕੁਪ੍ਪਧਮ੍ਮੋ. ‘‘ਅਪ੍ਪਹਾਨਧਮ੍ਮੋ’’ਤਿਪਿ ਪਾਲ਼ਿ, ਸੋ ਏਵ ਅਤ੍ਥੋ. ਖਯੋ ਏਵ ਅਨ੍ਤੋਤਿ ਖਯਨ੍ਤੋ, ਜਾਤਿਯਾ ਖਯਨ੍ਤੋ ਜਾਤਿਖਯਨ੍ਤੋ, ਨਿਬ੍ਬਾਨਂ. ਖਯੋ ਵਾ ਮਰਣਂ, ਜਾਤਿਖਯਨ੍ਤੋ ਨਿਬ੍ਬਾਨਮੇਵ, ਤਸ੍ਸ ਦਿਟ੍ਠਤ੍ਤਾ ਜਾਤਿਖਯਨ੍ਤਦਸ੍ਸੀ.

ਤਸ੍ਮਾਤਿ ਯਸ੍ਮਾ ਸਿਕ੍ਖਾਪਾਰਿਪੂਰਿਯਾ ਅਯਂ ਜਰਾਪਾਰਙ੍ਗਮਨਪਰਿਯੋਸਾਨੋ ਆਨਿਸਂਸੋ, ਤਸ੍ਮਾ. ਸਦਾਤਿ ਸਬ੍ਬਕਾਲਂ. ਝਾਨਰਤਾਤਿ ਲਕ੍ਖਣੂਪਨਿਜ੍ਝਾਨੇ, ਆਰਮ੍ਮਣੂਪਨਿਜ੍ਝਾਨੇਤਿ ਦੁਵਿਧੇਪਿ ਝਾਨੇ ਰਤਾ, ਤਤੋ ਏਵ ਸਮਾਹਿਤਾ. ਮਾਰਂ ਸਸੇਨਂ ਅਭਿਭੁਯ੍ਯਾਤਿ ਕਿਲੇਸਸੇਨਾਯ ਅਨਟ੍ਠਸੇਨਾਯ ਚ ਸਸੇਨਂ ਅਨਵਸਿਟ੍ਠਂ ਚਤੁਬ੍ਬਿਧਮ੍ਪਿ ਮਾਰਂ ਅਭਿਭਵਿਤ੍ਵਾ. ਦੇਵਪੁਤ੍ਤਮਾਰਸ੍ਸਪਿ ਹਿ ਗੁਣਮਾਰਣੇ ਸਹਾਯਭਾਵੂਪਗਮਨਤੋ ਕਿਲੇਸਾ ‘‘ਸੇਨਾ’’ਤਿ ਵੁਚ੍ਚਨ੍ਤਿ. ਤਥਾ ਰੋਗਾਦਯੋ ਅਨਟ੍ਠਾ ਮਚ੍ਚੁਮਾਰਸ੍ਸ. ਯਥਾਹ –

‘‘ਕਾਮਾ ਤੇ ਪਠਮਾ ਸੇਨਾ, ਦੁਤਿਯਾ ਅਰਤਿ ਵੁਚ੍ਚਤਿ;

ਤਤਿਯਾ ਖੁਪ੍ਪਿਪਾਸਾ ਤੇ, ਚਤੁਤ੍ਥੀ ਤਣ੍ਹਾ ਪਵੁਚ੍ਚਤਿ.

‘‘ਪਞ੍ਚਮੀ ਥਿਨਮਿਦ੍ਧਂ ਤੇ, ਛਟ੍ਠਾ ਭੀਰੂ ਪਵੁਚ੍ਚਤਿ;

ਸਤ੍ਤਮੀ ਵਿਚਿਕਿਚ੍ਛਾ ਤੇ, ਮਕ੍ਖੋ ਥਮ੍ਭੋ ਚ ਅਟ੍ਠਮੋ.

‘‘ਲਾਭੋ ਸਿਲੋਕੋ ਸਕ੍ਕਾਰੋ, ਮਿਚ੍ਛਾਲਦ੍ਧੋ ਚ ਯੋ ਯਸੋ;

ਯੋ ਚਤ੍ਤਾਨਂ ਸਮੁਕ੍ਕਂਸੇ, ਪਰੇ ਚ ਅਵਜਾਨਤਿ.

‘‘ਏਸਾ ਨਮੁਚਿ ਤੇ ਸੇਨਾ, ਕਣ੍ਹਸ੍ਸਾਭਿਪ੍ਪਹਾਰਿਨੀ;

ਨ ਨਂ ਅਸੂਰੋ ਜਿਨਾਤਿ, ਜੇਤ੍ਵਾ ਚ ਲਭਤੇ ਸੁਖ’’ਨ੍ਤਿ. (ਸੁ. ਨਿ. ੪੩੮-੪੪੧; ਮਹਾਨਿ. ੨੮);

ਯਥਾ ਚਾਹ –

‘‘ਅਜ੍ਜੇਵ ਕਿਚ੍ਚਮਾਤਪ੍ਪਂ, ਕੋ ਜਞ੍ਞਾ ਮਰਣਂ ਸੁਵੇ;

ਨ ਹਿ ਨੋ ਸਙ੍ਗਰਂ ਤੇਨ, ਮਹਾਸੇਨੇਨ ਮਚ੍ਚੁਨਾ’’ਤਿ. (ਮ. ਨਿ. ੩.੨੮੦; ਜਾ. ੨.੨੨.੧੨੧);

ਭਵਥ ਜਾਤਿਮਰਣਸ੍ਸ ਪਾਰਗਾਤਿ ਜਾਤਿਯਾ ਮਰਣਸ੍ਸ ਚ ਪਾਰਗਾਮਿਨੋ ਨਿਬ੍ਬਾਨਗਾਮਿਨੋ ਭਵਥਾਤਿ.

ਨਵਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.