੧੦. ਜਾਗਰਿਯਸੁਤ੍ਤਵਣ੍ਣਨਾ

੪੭. ਦਸਮੇ ਜਾਗਰੋਤਿ ਜਾਗਰਕੋ ਵਿਗਤਨਿਦ੍ਦੋ ਜਾਗਰਿਯਂ ਅਨੁਯੁਤ੍ਤੋ, ਰਤ੍ਤਿਨ੍ਦਿਵਂ ਕਮ੍ਮਟ੍ਠਾਨਮਨਸਿਕਾਰੇ ਯੁਤ੍ਤਪ੍ਪਯੁਤ੍ਤੋਤਿ ਅਤ੍ਥੋ. ਵੁਤ੍ਤਞ੍ਹੇਤਂ –

‘‘ਕਥਞ੍ਚ, ਭਿਕ੍ਖਵੇ, ਭਿਕ੍ਖੁ ਪੁਬ੍ਬਰਤ੍ਤਾਪਰਰਤ੍ਤਂ ਜਾਗਰਿਯਾਨੁਯੋਗਮਨੁਯੁਤ੍ਤੋ ਹੋਤਿ? ਇਧ ਭਿਕ੍ਖੁ ਦਿਵਸਂ ਚਙ੍ਕਮੇਨ ਨਿਸਜ੍ਜਾਯ ਆਵਰਣੀਯੇਹਿ ਧਮ੍ਮੇਹਿ ਚਿਤ੍ਤਂ ਪਰਿਸੋਧੇਤਿ, ਰਤ੍ਤਿਯਾ ਪਠਮਂ ਯਾਮਂ ਚਙ੍ਕਮੇਨ ਨਿਸਜ੍ਜਾਯ ਆਵਰਣੀਯੇਹਿ ਧਮ੍ਮੇਹਿ ਚਿਤ੍ਤਂ ਪਰਿਸੋਧੇਤਿ, ਰਤ੍ਤਿਯਾ ਮਜ੍ਝਿਮਂ ਯਾਮਂ ਦਕ੍ਖਿਣੇਨ ਪਸ੍ਸੇਨ ਸੀਹਸੇਯ੍ਯਂ ਕਪ੍ਪੇਤਿ ਪਾਦੇ ਪਾਦਂ ਅਚ੍ਚਾਧਾਯ ਸਤੋ ਸਮ੍ਪਜਾਨੋ ਉਟ੍ਠਾਨਸਞ੍ਞਂ ਮਨਸਿ ਕਰਿਤ੍ਵਾ, ਰਤ੍ਤਿਯਾ ਪਚ੍ਛਿਮਂ ਯਾਮਂ ਪਚ੍ਚੁਟ੍ਠਾਯ ਚਙ੍ਕਮੇਨ ਨਿਸਜ੍ਜਾਯ ਆਵਰਣੀਯੇਹਿ ਧਮ੍ਮੇਹਿ ਚਿਤ੍ਤਂ ਪਰਿਸੋਧੇਤਿ. ਏਵਂ ਭਿਕ੍ਖੁ ਪੁਬ੍ਬਰਤ੍ਤਾਪਰਰਤ੍ਤਂ ਜਾਗਰਿਯਾਨੁਯੋਗਮਨੁਯੁਤ੍ਤੋ ਹੋਤੀ’’ਤਿ (ਵਿਭ. ੫੧੯).

ਚਸਦ੍ਦੋ ਸਮ੍ਪਿਣ੍ਡਨਤ੍ਥੋ, ਤੇਨ ਵਕ੍ਖਮਾਨੇ ਸਤਾਦਿਭਾਵੇ ਸਮ੍ਪਿਣ੍ਡੇਤਿ. ਅਸ੍ਸਾਤਿ ਸਿਯਾ, ਭਵੇਯ੍ਯਾਤਿ ਅਤ੍ਥੋ. ‘‘ਜਾਗਰੋ ਚ ਭਿਕ੍ਖੁ ਵਿਹਰੇਯ੍ਯਾ’’ਤਿ ਚ ਪਠਨ੍ਤਿ. ਸਬ੍ਬਤ੍ਥ ਸਬ੍ਬਦਾ ਚ ਕਮ੍ਮਟ੍ਠਾਨਾਵਿਜਹਨਵਸੇਨ ਸਤਿਅਵਿਪ੍ਪਵਾਸੇਨ ਸਤੋ ਸਮ੍ਪਜਾਨੋਤਿ ਸਤ੍ਤਟ੍ਠਾਨਿਯਸ੍ਸ ਚਤੁਬ੍ਬਿਧਸ੍ਸਪਿ ਸਮ੍ਪਜਞ੍ਞਸ੍ਸ ਵਸੇਨ ਸਮ੍ਪਜਾਨੋ. ਸਮਾਹਿਤੋਤਿ ਉਪਚਾਰਸਮਾਧਿਨਾ ਅਪ੍ਪਨਾਸਮਾਧਿਨਾ ਚ ਸਮਾਹਿਤੋ ਏਕਗ੍ਗਚਿਤ੍ਤੋ. ਪਮੁਦਿਤੋਤਿ ਪਟਿਪਤ੍ਤਿਯਾ ਆਨਿਸਂਸਦਸ੍ਸਨੇਨ ਉਤ੍ਤਰੁਤ੍ਤਰਿ ਵਿਸੇਸਾਧਿਗਮੇਨ ਵੀਰਿਯਾਰਮ੍ਭਸ੍ਸ ਚ ਅਮੋਘਭਾਵਦਸ੍ਸਨੇਨ ਪਮੁਦਿਤੋ ਪਾਮੋਜ੍ਜਬਹੁਲੋ. ਵਿਪ੍ਪਸਨ੍ਨੋਤਿ ਤਤੋ ਏਵ ਪਟਿਪਤ੍ਤਿਭੂਤਾਸੁ ਤੀਸੁ ਸਿਕ੍ਖਾਸੁ ਪਟਿਪਤ੍ਤਿਦੇਸਕੇ ਚ ਸਤ੍ਥਰਿ ਸਦ੍ਧਾਬਹੁਲਤਾਯ ਸੁਟ੍ਠੁ ਪਸਨ੍ਨੋ. ਸਬ੍ਬਤ੍ਥ ਅਸ੍ਸਾਤਿ ਸਮ੍ਬਨ੍ਧੋ ਵਿਹਰੇਯ੍ਯਾਤਿ ਵਾ.

ਤਤ੍ਥ ਕਾਲਵਿਪਸ੍ਸੀ ਚ ਕੁਸਲੇਸੁ ਧਮ੍ਮੇਸੂਤਿ ਤਸ੍ਮਿਂ ਕਾਲੇ ਵਿਪਸ੍ਸਕੋ, ਤਤ੍ਥ ਵਾ ਕਮ੍ਮਟ੍ਠਾਨਾਨੁਯੋਗੇ ਕਾਲਵਿਪਸ੍ਸੀ ਕਾਲਾਨੁਰੂਪਂ ਵਿਪਸ੍ਸਕੋ. ਕਿਂ ਵੁਤ੍ਤਂ ਹੋਤਿ? ਵਿਪਸ੍ਸਨਂ ਪਟ੍ਠਪੇਤ੍ਵਾ ਕਲਾਪਸਮ੍ਮਸਨਾਦਿਵਸੇਨ ਸਮ੍ਮਸਨ੍ਤੋ ਆਵਾਸਾਦਿਕੇ ਸਤ੍ਤ ਅਸਪ੍ਪਾਯੇ ਵਜ੍ਜੇਤ੍ਵਾ ਸਪ੍ਪਾਯੇ ਸੇਵਨ੍ਤੋ ਅਨ੍ਤਰਾ ਵੋਸਾਨਂ ਅਨਾਪਜ੍ਜਿਤ੍ਵਾ ਪਹਿਤਤ੍ਤੋ ਚਿਤ੍ਤਸ੍ਸ ਸਮਾਹਿਤਾਕਾਰਂ ਸਲ੍ਲਕ੍ਖੇਨ੍ਤੋ ਸਕ੍ਕਚ੍ਚਂ ਨਿਰਨ੍ਤਰਂ ਅਨਿਚ੍ਚਾਨੁਪਸ੍ਸਨਾਦਿਂ ਪਵਤ੍ਤੇਨ੍ਤੋ ਯਸ੍ਮਿਂ ਕਾਲੇ ਵਿਪਸ੍ਸਨਾਚਿਤ੍ਤਂ ਲੀਨਂ ਹੋਤਿ, ਤਸ੍ਮਿਂ ਧਮ੍ਮਵਿਚਯਵੀਰਿਯਪੀਤਿਸਙ੍ਖਾਤੇਸੁ, ਯਸ੍ਮਿਂ ਪਨ ਕਾਲੇ ਚਿਤ੍ਤਂ ਉਦ੍ਧਤਂ ਹੋਤਿ, ਤਸ੍ਮਿਂ ਪਸ੍ਸਦ੍ਧਿਸਮਾਧਿਉਪੇਕ੍ਖਾਸਙ੍ਖਾਤੇਸੁ ਕੁਸਲੇਸੁ ਅਨਵਜ੍ਜੇਸੁ ਬੋਜ੍ਝਙ੍ਗਧਮ੍ਮੇਸੂਤਿ ਏਵਂ ਤਤ੍ਥ ਤਸ੍ਮਿਂ ਤਸ੍ਮਿਂ ਕਾਲੇ, ਤਸ੍ਮਿਂ ਵਾ ਕਮ੍ਮਟ੍ਠਾਨਾਨੁਯੋਗੇ ਕਾਲਾਨੁਰੂਪਂ ਵਿਪਸ੍ਸਕੋ ਅਸ੍ਸਾਤਿ. ਸਤਿਸਮ੍ਬੋਜ੍ਝਙ੍ਗੋ ਪਨ ਸਬ੍ਬਤ੍ਥੇਵ ਇਚ੍ਛਿਤਬ੍ਬੋ. ਵੁਤ੍ਤਞ੍ਹੇਤਂ ‘‘ਸਤਿਞ੍ਚ ਖ੍ਵਾਹਂ, ਭਿਕ੍ਖਵੇ, ਸਬ੍ਬਤ੍ਥਿਕਂ ਵਦਾਮੀ’’ਤਿ (ਸਂ. ਨਿ. ੫.੨੩੪; ਮਿ. ਪ. ੨.੧.੧੩). ਏਤ੍ਤਾਵਤਾ ਪੁਗ੍ਗਲਾਧਿਟ੍ਠਾਨਾਯ ਦੇਸਨਾਯ ਜਾਗਰਿਯਂ ਦਸ੍ਸੇਤ੍ਵਾ ਯੇਹਿ ਧਮ੍ਮੇਹਿ ਜਾਗਰਿਯਾਨੁਯੋਗੋ ਸਮ੍ਪਜ੍ਜਤਿ, ਤੇ ਪਕਾਸੇਤਿ.

ਏਵਂ ਭਗਵਾ ਆਰਦ੍ਧਵਿਪਸ੍ਸਕਸ੍ਸ ਭਿਕ੍ਖੁਨੋ ਸਙ੍ਖੇਪੇਨੇਵ ਸਦ੍ਧਿਂ ਉਪਕਾਰਕਧਮ੍ਮੇਹਿ ਸਮ੍ਮਸਨਚਾਰਂ ਦਸ੍ਸੇਤ੍ਵਾ ਇਦਾਨਿ ਤਥਾ ਪਟਿਪਜ੍ਜਨ੍ਤਸ੍ਸ ਪਟਿਪਤ੍ਤਿਯਾ ਅਵਞ੍ਝਭਾਵਂ ਦਸ੍ਸੇਨ੍ਤੋ ‘‘ਜਾਗਰਸ੍ਸ, ਭਿਕ੍ਖਵੇ, ਭਿਕ੍ਖੁਨੋ’’ਤਿਆਦਿਮਾਹ. ਤਤ੍ਥ ਜਾਗਰਿਯਾਨੁਯੋਗੇ ਸਤਿਸਮ੍ਪਜਞ੍ਞਸਮਾਦਾਨਾਨਿ ਸਬ੍ਬਤ੍ਥਕਾਨਿ ਸਮ੍ਮੋਦਪਸਾਦਾਵਹਾਨਿ, ਤਤ੍ਥ ਕਾਲਵਿਪਸ੍ਸਨਾ ਨਾਮ ਵਿਪਸ੍ਸਨਾਯ ਗਬ੍ਭਗ੍ਗਹਣਂ ਪਰਿਪਾਕਗਤਂ. ਉਪਕ੍ਕਿਲੇਸਵਿਮੁਤ੍ਤੇ ਹਿ ਵੀਥਿਪਟਿਪਨ੍ਨੇ ਵਿਪਸ੍ਸਨਾਞਾਣੇ ਤਿਕ੍ਖੇ ਸੂਰੇ ਵਹਨ੍ਤੇ ਯੋਗਿਨੋ ਉਲ਼ਾਰਂ ਪਾਮੋਜ੍ਜਂ ਪਸਾਦੋ ਚ ਹੋਤਿ, ਤੇਹਿ ਚ ਵਿਸੇਸਾਧਿਗਮਸ੍ਸ ਸਨ੍ਤਿਕੇਯੇਵ. ਵੁਤ੍ਤਞ੍ਹੇਤਂ –

‘‘ਯਤੋ ਯਤੋ ਸਮ੍ਮਸਤਿ, ਖਨ੍ਧਾਨਂ ਉਦਯਬ੍ਬਯਂ;

ਲਭਤੀ ਪੀਤਿਪਾਮੋਜ੍ਜਂ, ਅਮਤਂ ਤਂ ਵਿਜਾਨਤਂ.

‘‘ਪਾਮੋਜ੍ਜਬਹੁਲੋ ਭਿਕ੍ਖੁ, ਪਸਨ੍ਨੋ ਬੁਦ੍ਧਸਾਸਨੇ;

ਅਧਿਗਚ੍ਛੇ ਪਦਂ ਸਨ੍ਤਂ, ਸਙ੍ਖਾਰੂਪਸਮਂ ਸੁਖ’’ਨ੍ਤਿ. (ਧ. ਪ. ੩੭੪, ੩੮੧);

ਗਾਥਾਸੁ ਜਾਗਰਨ੍ਤਾ ਸੁਣਾਥੇਤਨ੍ਤਿ ਏਤਂ ਮਮ ਵਚਨਂ ਏਕਨ੍ਤੇਨੇਵ ਪਮਾਦਨਿਦ੍ਦਾਯ ਅਵਿਜ੍ਜਾਨਿਦ੍ਦਾਯ ਪਬੋਧਨਤ੍ਥਂ ਜਾਗਰਨ੍ਤਾ ਸਤਿਸਮ੍ਪਜਞ੍ਞਾਦਿਧਮ੍ਮਸਮਾਯੋਗੇਨ ਜਾਗਰਿਯਂ ਅਨੁਯੁਤ੍ਤਾ ਸੁਣਾਥ. ਯੇ ਸੁਤ੍ਤਾ ਤੇ ਪਬੁਜ੍ਝਥਾਤਿ ਯੇ ਯਥਾਵੁਤ੍ਤਨਿਦ੍ਦਾਯ ਸੁਤ੍ਤਾ ਸੁਪਨਂ ਉਪਗਤਾ, ਤੇ ਤੁਮ੍ਹੇ ਜਾਗਰਿਯਾਨੁਯੋਗਵਸੇਨ ਇਨ੍ਦ੍ਰਿਯਬਲਬੋਜ੍ਝਙ੍ਗੇ ਸਙ੍ਕਡ੍ਢਿਤ੍ਵਾ ਵਿਪਸ੍ਸਨਂ ਉਸ੍ਸੁਕ੍ਕਾਪੇਨ੍ਤਾ ਅਪ੍ਪਮਾਦਪਟਿਪਤ੍ਤਿਯਾ ਤਤੋ ਪਬੁਜ੍ਝਥ ਅਥ ਵਾ ਜਾਗਰਨ੍ਤਾਤਿ ਜਾਗਰਨਿਮਿਤ੍ਤਾ. ‘‘ਸੁਣਾਥੇਤ’’ਨ੍ਤਿ ਏਤ੍ਥ ‘‘ਏਤ’’ਨ੍ਤਿ ਵੁਤ੍ਤਂ, ਕਿਂ ਤਂ ਵਚਨਨ੍ਤਿ ਆਹ ‘‘ਯੇ ਸੁਤ੍ਤਾ ਤੇ ਪਬੁਜ੍ਝਥਾ’’ਤਿਆਦਿ. ਤਤ੍ਥ ਯੇ ਸੁਤ੍ਤਾਤਿ ਯੇ ਕਿਲੇਸਨਿਦ੍ਦਾਯ ਸੁਤ੍ਤਾ, ਤੇ ਤੁਮ੍ਹੇ ਅਰਿਯਮਗ੍ਗਪਟਿਬੋਧੇਨ ਪਬੁਜ੍ਝਥ. ਸੁਤ੍ਤਾ ਜਾਗਰਿਤਂ ਸੇਯ੍ਯੋਤਿ ਇਦਂ ਪਬੋਧਸ੍ਸ ਕਾਰਣਵਚਨਂ. ਯਸ੍ਮਾ ਯਥਾਵੁਤ੍ਤਸੁਪਤੋ ਵੁਤ੍ਤਪ੍ਪਕਾਰਂ ਜਾਗਰਿਤਂ ਜਾਗਰਣਂ ਅਤ੍ਥਕਾਮਸ੍ਸ ਕੁਲਪੁਤ੍ਤਸ੍ਸ ਸੇਯ੍ਯੋ ਪਾਸਂਸਤਰੋ ਹਿਤਸੁਖਾਵਹੋ, ਤਸ੍ਮਾ ਪਬੁਜ੍ਝਥ. ਨਤ੍ਥਿ ਜਾਗਰਤੋ ਭਯਨ੍ਤਿ ਇਦਂ ਤਤ੍ਥ ਆਨਿਸਂਸਦਸ੍ਸਨਂ. ਯੋ ਹਿ ਸਦ੍ਧਾਦੀਹਿ ਜਾਗਰਣਧਮ੍ਮੇਹਿ ਸਮਨ੍ਨਾਗਮੇਨ ਜਾਗਰੋ ਜਗ੍ਗਤਿ, ਪਮਾਦਨਿਦ੍ਦਂ ਨ ਉਪਗਚ੍ਛਤਿ, ਤਸ੍ਸ ਅਤ੍ਤਾਨੁਵਾਦਭਯਂ ਪਰਾਨੁਵਾਦਭਯਂ ਦਣ੍ਡਭਯਂ ਦੁਗ੍ਗਤਿਭਯਂ ਜਾਤਿਆਦਿਨਿਮਿਤ੍ਤਂ ਸਬ੍ਬਮ੍ਪਿ ਵਟ੍ਟਭਯਂ ਨਤ੍ਥਿ.

ਕਾਲੇਨਾਤਿ ਆਵਾਸਸਪ੍ਪਾਯਾਦੀਨਂ ਲਦ੍ਧਕਾਲੇਨ. ਸੋਤਿ ਨਿਪਾਤਮਤ੍ਤਂ. ਸਮ੍ਮਾ ਧਮ੍ਮਂ ਪਰਿਵੀਮਂਸਮਾਨੋਤਿ ਵਿਪਸ੍ਸਨਾਯ ਆਰਮ੍ਮਣਭੂਤਂ ਤੇਭੂਮਕਧਮ੍ਮਂ ਸਮ੍ਮਾ ਞਾਯੇਨ ਯਥਾ ਨਿਬ੍ਬਿਨ੍ਦਨਵਿਰਜ੍ਜਨਾਦਯੋ ਸਮ੍ਭਵਨ੍ਤਿ, ਏਵਂ ਪਰਿਤੋ ਵੀਮਂਸਨ੍ਤੋ, ਸਬ੍ਬਾਕਾਰੇਨ ਵਿਪਸ੍ਸਨ੍ਤੋਤਿ ਅਤ੍ਥੋ. ਏਕੋਦਿਭੂਤੋਤਿ ਏਕੋ ਸੇਟ੍ਠੋ ਹੁਤ੍ਵਾ ਉਦੇਤੀਤਿ ਏਕੋਦਿ, ਸਮਾਧਿ. ਸੋ ਏਕੋਦਿ ਭੂਤੋ ਜਾਤੋ ਉਪ੍ਪਨ੍ਨੋ ਏਤਸ੍ਸਾਤਿ ਏਕੋਦਿਭੂਤੋ. ਅਗ੍ਗਿਆਹਿਤਾਦਿਸਦ੍ਦਾਨਂ ਵਿਯ ਏਤ੍ਥ ਭੂਤਸਦ੍ਦਸ੍ਸ ਪਰਵਚਨਂ ਦਟ੍ਠਬ੍ਬਂ. ਏਕੋਦਿਂ ਵਾ ਭੂਤੋ ਪਤ੍ਤੋਤਿ ਏਕੋਦਿਭੂਤੋ. ਏਤ੍ਥ ਚ ਏਕੋਦੀਤਿ ਮਗ੍ਗਸਮਾਧਿ ਅਧਿਪ੍ਪੇਤੋ, ‘‘ਸਮਾਹਿਤੋ’’ਤਿ ਏਤ੍ਥ ਪਨ ਪਾਦਕਜ੍ਝਾਨਸਮਾਧਿਨਾ ਸਦ੍ਧਿਂ ਵਿਪਸ੍ਸਨਾਸਮਾਧਿ. ਅਥ ਵਾ ਕਾਲੇਨਾਤਿ ਮਗ੍ਗਪਟਿਵੇਧਕਾਲੇਨ. ਸਮ੍ਮਾ ਧਮ੍ਮਂ ਪਰਿਵੀਮਂਸਮਾਨੋਤਿ ਸਮ੍ਮਦੇਵ ਚਤੁਸਚ੍ਚਧਮ੍ਮਂ ਪਰਿਞ੍ਞਾਭਿਸਮਯਾਦਿਵਸੇਨ ਵੀਮਂਸਨ੍ਤੋ, ਏਕਾਭਿਸਮਯੇਨ ਅਭਿਸਮੇਨ੍ਤੋ. ਏਕੋਦਿਭੂਤੋਤਿ ਏਕੋ ਸੇਟ੍ਠੋ ਅਸਹਾਯੋ ਵਾ ਹੁਤ੍ਵਾ ਉਦੇਤੀਤਿ ਏਕੋਦਿ, ਚਤੁਕਿਚ੍ਚਸਾਧਕੋ ਸਮ੍ਮਪ੍ਪਧਾਨੋ. ਸੋ ਏਕੋਦਿ ਭੂਤੋ ਜਾਤੋਤਿ ਸਬ੍ਬਂ ਪੁਰਿਮਸਦਿਸਮੇਵ. ਵਿਹਨੇ ਤਮਂ ਸੋਤਿ ਸੋ ਏਵਂਭੂਤੋ ਅਰਿਯਸਾਵਕੋ ਅਰਹਤ੍ਤਮਗ੍ਗੇਨ ਅਵਿਜ੍ਜਾਤਮਂ ਅਨਵਸੇਸਤੋ ਵਿਹਨੇਯ੍ਯ ਸਮੁਚ੍ਛਿਨ੍ਦੇਯ੍ਯ.

ਇਤਿ ਭਗਵਾ ਪਟਿਪਤ੍ਤਿਯਾ ਅਮੋਘਭਾਵਂ ਦਸ੍ਸੇਤ੍ਵਾ ਇਦਾਨਿ ਤਤ੍ਥ ਦਲ਼੍ਹਂ ਨਿਯੋਜੇਨ੍ਤੋ ‘‘ਤਸ੍ਮਾ ਹਵੇ’’ਤਿ ਓਸਾਨਗਾਥਮਾਹ. ਤਤ੍ਥ ਤਸ੍ਮਾਤਿ ਯਸ੍ਮਾ ਜਾਗਰਤੋ ਸਤਿਅਵਿਪ੍ਪਵਾਸਾਦਿਨਾ ਸਮਥਵਿਪਸ੍ਸਨਾਭਾਵਨਾ ਪਾਰਿਪੂਰਿਂ ਗਚ੍ਛਤਿ, ਅਨੁਕ੍ਕਮੇਨ ਅਰਿਯਮਗ੍ਗੋ ਪਾਤੁਭਵਤਿ, ਤਤੋ ਚਸ੍ਸ ਸਬ੍ਬਂ ਵਟ੍ਟਭਯਂ ਨਤ੍ਥਿ, ਤਸ੍ਮਾ. ਹਵੇਤਿ ਏਕਂਸੇਨ ਦਲ਼੍ਹਂ ਵਾ. ਭਜੇਥਾਤਿ ਭਜੇਯ੍ਯ. ਏਵਂ ਜਾਗਰਿਯਂ ਭਜਨ੍ਤੋ ਚ ਆਤਾਪਿਭਾਵਾਦਿਗੁਣਯੁਤ੍ਤੋ ਭਿਕ੍ਖੁ ਸਂਯੋਜਨਾਨਿ ਭਿਨ੍ਦਿਤ੍ਵਾ ਅਗ੍ਗਫਲਞਾਣਸਙ੍ਖਾਤਂ ਅਨੁਤ੍ਤਰਂ ਉਤ੍ਤਰਰਹਿਤਂ ਸਮ੍ਬੋਧਿਂ ਫੁਸੇ ਪਾਪੁਣੇਯ੍ਯ. ਸੇਸਂ ਵੁਤ੍ਤਨਯਮੇਵ.

ਦਸਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.