੧੧. ਆਪਾਯਿਕਸੁਤ੍ਤਵਣ੍ਣਨਾ

੪੮. ਏਕਾਦਸਮੇ ਆਪਾਯਿਕਾਤਿ ਅਪਾਯੇ ਨਿਬ੍ਬਤ੍ਤਿਸ੍ਸਨ੍ਤੀਤਿ ਆਪਾਯਿਕਾ. ਤਤ੍ਥਾਪਿ ਨਿਰਯੇ ਨਿਬ੍ਬਤ੍ਤਿਸ੍ਸਨ੍ਤੀਤਿ ਨੇਰਯਿਕਾ. ਇਦਮਪ੍ਪਹਾਯਾਤਿ ਇਦਂ ਇਦਾਨਿ ਵਕ੍ਖਮਾਨਂ ਦੁਵਿਧਂ ਪਾਪਸਮਾਚਾਰਂ ਅਪ੍ਪਜਹਿਤ੍ਵਾ, ਤਥਾਪਟਿਪਤ੍ਤਿਤਥਾਪਗ੍ਗਹਣਵਸੇਨ ਪਵਤ੍ਤਂ ਵਾਚਂ ਚਿਤ੍ਤਂ ਦਿਟ੍ਠਿਞ੍ਚ ਅਪ੍ਪਟਿਨਿਸ੍ਸਜ੍ਜਿਤ੍ਵਾਤਿ ਅਤ੍ਥੋ. ਅਬ੍ਰਹ੍ਮਚਾਰੀਤਿ ਬ੍ਰਹ੍ਮਸੇਟ੍ਠਂ ਚਰਤੀਤਿ ਬ੍ਰਹ੍ਮਚਾਰੀ, ਬ੍ਰਹ੍ਮਾ ਵਾ ਸੇਟ੍ਠੋ ਆਚਾਰੋ ਏਤਸ੍ਸ ਅਤ੍ਥੀਤਿ ਬ੍ਰਹ੍ਮਚਾਰੀ, ਨ ਬ੍ਰਹ੍ਮਚਾਰੀਤਿ ਅਬ੍ਰਹ੍ਮਚਾਰੀ, ਬ੍ਰਹ੍ਮਚਾਰਿਪਟਿਰੂਪਕੋ ਦੁਸ੍ਸੀਲੋਤਿ ਅਤ੍ਥੋ. ਬ੍ਰਹ੍ਮਚਾਰਿਪਟਿਞ੍ਞੋਤਿ ‘‘ਬ੍ਰਹ੍ਮਚਾਰੀ ਅਹ’’ਨ੍ਤਿ ਏਵਂਪਟਿਞ੍ਞੋ. ਪਰਿਪੁਣ੍ਣਨ੍ਤਿ ਅਖਣ੍ਡਾਦਿਭਾਵੇਨ ਅਵਿਕਲਂ. ਪਰਿਸੁਦ੍ਧਨ੍ਤਿ ਉਪਕ੍ਕਿਲੇਸਾਭਾਵੇਨ ਪਰਿਸੁਦ੍ਧਂ. ਅਮੂਲਕੇਨਾਤਿ ਦਿਟ੍ਠਾਦਿਮੂਲਵਿਰਹਿਤੇਨ, ਦਿਟ੍ਠਂ ਸੁਤਂ ਪਰਿਸਙ੍ਕਿਤਨ੍ਤਿ ਇਮੇਹਿ ਚੋਦਨਾਮੂਲੇਹਿ ਵਜ੍ਜਿਤੇਨ. ਅਬ੍ਰਹ੍ਮਚਰਿਯੇਨ ਅਸੇਟ੍ਠਚਰਿਯੇਨ. ਅਨੁਦ੍ਧਂਸੇਤੀਤਿ ‘‘ਪਰਿਸੁਦ੍ਧੋ ਅਯ’’ਨ੍ਤਿ ਜਾਨਨ੍ਤੋਵ ਪਾਰਾਜਿਕਵਤ੍ਥੁਨਾ ਧਂਸੇਤਿ ਪਧਂਸੇਤਿ, ਚੋਦੇਤਿ ਅਕ੍ਕੋਸਤਿ ਵਾ.

ਗਾਥਾਸੁ ਅਭੂਤਵਾਦੀਤਿ ਪਰਸ੍ਸ ਦੋਸਂ ਅਦਿਸ੍ਵਾਵ ਅਭੂਤੇਨ ਤੁਚ੍ਛੇਨ ਮੁਸਾਵਾਦਂ ਕਤ੍ਵਾ ਪਰਂ ਅਬ੍ਭਾਚਿਕ੍ਖਨ੍ਤੋ. ਕਤ੍ਵਾਤਿ ਯੋ ਵਾ ਪਨ ਪਾਪਕਮ੍ਮਂ ਕਤ੍ਵਾ ‘‘ਨਾਹਂ ਏਤਂ ਕਰੋਮੀ’’ਤਿ ਆਹ. ਉਭੋਪਿ ਤੇ ਪੇਚ੍ਚ ਸਮਾ ਭਵਨ੍ਤੀਤਿ ਤੇ ਉਭੋਪਿ ਜਨਾ ਇਤੋ ਪਰਲੋਕਂ ਗਨ੍ਤ੍ਵਾ ਨਿਰਯਂ ਉਪਗਮਨਤੋ ਗਤਿਯਾ ਸਮਾਨਾ ਭਵਨ੍ਤਿ. ਤਤ੍ਥ ਗਤਿਯੇਵ ਨੇਸਂ ਪਰਿਚ੍ਛਿਨ੍ਨਾ, ਨ ਪਨ ਆਯੁ. ਬਹੁਞ੍ਹਿ ਪਾਪਂ ਕਤ੍ਵਾ ਚਿਰਂ ਨਿਰਯੇ ਪਚ੍ਚਤਿ, ਪਰਿਤ੍ਤਂ ਕਤ੍ਵਾ ਅਪ੍ਪਮਤ੍ਤਕਮੇਵ ਕਾਲਂ. ਯਸ੍ਮਾ ਪਨ ਤੇਸਂ ਉਭਿਨ੍ਨਮ੍ਪਿ ਕਮ੍ਮਂ ਲਾਮਕਮੇਵ. ਤੇਨ ਵੁਤ੍ਤਂ ‘‘ਨਿਹੀਨਕਮ੍ਮਾ ਮਨੁਜਾ ਪਰਤ੍ਥਾ’’ਤਿ. ‘‘ਪਰਤ੍ਥਾ’’ਤਿ ਪਨ ਪਦਸ੍ਸ ਪੁਰਤੋ ‘‘ਪੇਚ੍ਚਾ’’ਤਿ ਪਦੇਨ ਸਮ੍ਬਨ੍ਧੋ – ਪਰਤ੍ਥ ਪੇਚ੍ਚ ਇਤੋ ਗਨ੍ਤ੍ਵਾ ਤੇ ਨਿਹੀਨਕਮ੍ਮਾ ਸਮਾ ਭਵਨ੍ਤੀਤਿ.

ਏਵਂ ਭਗਵਾ ਅਭੂਤਬ੍ਭਕ੍ਖਾਨਵਸੇਨ ਭੂਤਦੋਸਪਟਿਚ੍ਛਾਦਨਵਸੇਨ ਚ ਪਵਤ੍ਤਸ੍ਸ ਮੁਸਾਵਾਦਸ੍ਸ ਵਿਪਾਕਂ ਦਸ੍ਸੇਤ੍ਵਾ ਇਦਾਨਿ ਤਸ੍ਮਿਂ ਠਾਨੇ ਨਿਸਿਨ੍ਨਾਨਂ ਬਹੂਨਂ ਪਾਪਭਿਕ੍ਖੂਨਂ ਦੁਚ੍ਚਰਿਤਕਮ੍ਮਸ੍ਸ ਵਿਪਾਕਦਸ੍ਸਨੇਨ ਸਂਵੇਜਨਤ੍ਥਂ ਦ੍ਵੇ ਗਾਥਾ ਅਭਾਸਿ. ਤਤ੍ਥ ਕਾਸਾਵਕਣ੍ਠਾਤਿ ਕਸਾਵਰਸਪੀਤਤ੍ਤਾ ਕਾਸਾਵੇਨ ਵਤ੍ਥੇਨ ਪਲਿਵੇਠਿਤਕਣ੍ਠਾ. ਪਾਪਧਮ੍ਮਾਤਿ ਲਾਮਕਧਮ੍ਮਾ. ਅਸਞ੍ਞਤਾਤਿ ਕਾਯਾਦੀਹਿ ਸਞ੍ਞਮਰਹਿਤਾ. ਪਾਪਾਤਿ ਤਥਾਰੂਪਾ ਪਾਪਪੁਗ੍ਗਲਾ, ਪਾਪੇਹਿ ਕਮ੍ਮੇਹਿ ਉਪਪਜ੍ਜਿਤ੍ਵਾ ‘‘ਤਸ੍ਸ ਕਾਯੋਪਿ ਆਦਿਤ੍ਤੋ ਸਮ੍ਪਜ੍ਜਲਿਤੋ ਸਜੋਤਿਭੂਤੋ, ਸਙ੍ਘਾਟਿਪਿ ਆਦਿਤ੍ਤਾ’’ਤਿਆਦਿਨਾ (ਸਂ. ਨਿ. ੨.੨੧੮-੨੧੯; ਪਾਰਾ. ੨੩੦) ਲਕ੍ਖਣਸਂਯੁਤ੍ਤੇ ਵੁਤ੍ਤਨਯੇਨ ਮਹਾਦੁਕ੍ਖਂ ਅਨੁਭਵਨ੍ਤਿਯੇਵ.

ਤਤਿਯਗਾਥਾਯ ਅਯਂ ਸਙ੍ਖੇਪਤ੍ਥੋ – ਯਞ੍ਚੇ ਭੁਞ੍ਜੇਯ੍ਯ ਦੁਸ੍ਸੀਲੋ ਨਿਸ੍ਸੀਲਪੁਗ੍ਗਲੋ ਕਾਯਾਦੀਹਿ ਅਸਞ੍ਞਤੋ ਰਟ੍ਠਵਾਸੀਹਿ ਸਦ੍ਧਾਯ ਦਿਨ੍ਨਂ ਯਂ ਰਟ੍ਠਪਿਣ੍ਡਂ ‘‘ਸਮਣੋਮ੍ਹੀ’’ਤਿ ਪਟਿਜਾਨਨ੍ਤੋ ਗਹੇਤ੍ਵਾ ਭੁਞ੍ਜੇਯ੍ਯ, ਤਤੋ ਆਦਿਤ੍ਤੋ ਅਗ੍ਗਿਵਣ੍ਣੋ ਅਯੋਗੁਲ਼ੋਵ ਭੁਤ੍ਤੋ ਸੇਯ੍ਯੋ ਸੁਨ੍ਦਰਤਰੋ. ਕਿਂਕਾਰਣਾ? ਤਪ੍ਪਚ੍ਚਯਾ ਹਿਸ੍ਸ ਏਕੋਵ ਅਤ੍ਤਭਾਵੋ ਝਾਯੇਯ੍ਯ, ਦੁਸ੍ਸੀਲੋ ਪਨ ਹੁਤ੍ਵਾ ਸਦ੍ਧਾਦੇਯ੍ਯਂ ਭੁਞ੍ਜਿਤ੍ਵਾ ਅਨੇਕਾਨਿਪਿ ਜਾਤਿਸਤਾਨਿ ਨਿਰਯੇ ਉਪ੍ਪਜ੍ਜੇਯ੍ਯਾਤਿ.

ਏਕਾਦਸਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.