੮. ਪਟਿਸਲ੍ਲਾਨਸੁਤ੍ਤਵਣ੍ਣਨਾ

੪੫. ਅਟ੍ਠਮੇ ਪਟਿਸਲ੍ਲਾਨਰਾਮਾਤਿ ਤੇਹਿ ਤੇਹਿ ਸਤ੍ਤਸਙ੍ਖਾਰੇਹਿ ਪਟਿਨਿਵਤ੍ਤਿਤ੍ਵਾ ਸਲ੍ਲਾਨਂ ਪਟਿਸਲ੍ਲਾਨਂ, ਏਕਵਿਹਾਰੋ ਏਕਮਨ੍ਤਸੇਵਿਤਾ, ਕਾਯਵਿਵੇਕੋਤਿ ਅਤ੍ਥੋ. ਤਂ ਪਟਿਸਲ੍ਲਾਨਂ ਰਮਨ੍ਤਿ ਰੋਚਨ੍ਤੀਤਿ ਪਟਿਸਲ੍ਲਾਨਰਾਮਾ. ‘‘ਪਟਿਸਲ੍ਲਾਨਾਰਾਮਾ’’ਤਿਪਿ ਪਾਠੋ. ਯਥਾ ਵੁਤ੍ਤਂ ਪਟਿਸਲ੍ਲਾਨਂ ਆਰਮਿਤਬ੍ਬਤੋ ਆਰਾਮੋ ਏਤੇਸਨ੍ਤਿ ਪਟਿਸਲ੍ਲਾਨਾਰਾਮਾ. ਵਿਹਰਥਾਤਿ ਏਵਂਭੂਤਾ ਹੁਤ੍ਵਾ ਵਿਹਰਥਾਤਿ ਅਤ੍ਥੋ. ਪਟਿਸਲ੍ਲਾਨੇ ਰਤਾ ਨਿਰਤਾ ਸਮ੍ਮੁਦਿਤਾਤਿ ਪਟਿਸਲ੍ਲਾਨਰਤਾ. ਏਤ੍ਤਾਵਤਾ ਜਾਗਰਿਯਾਨੁਯੋਗੋ, ਤਸ੍ਸ ਨਿਮਿਤ੍ਤਭੂਤਾ ਵੂਪਕਟ੍ਠਕਾਯਤਾ ਚ ਦਸ੍ਸਿਤਾ. ਜਾਗਰਿਯਾਨੁਯੋਗੋ, ਸੀਲਸਂਵਰੋ, ਇਨ੍ਦ੍ਰਿਯੇਸੁ, ਗੁਤ੍ਤਦ੍ਵਾਰਤਾ, ਭੋਜਨੇ ਮਤ੍ਤਞ੍ਞੁਤਾ, ਸਤਿਸਮ੍ਪਜਞ੍ਞਨ੍ਤਿ ਇਮੇਹਿ ਧਮ੍ਮੇਹਿ ਵਿਨਾ ਨ ਵਤ੍ਤਤੀਤਿ ਤੇਪਿ ਇਧ ਅਤ੍ਥਤੋ ਵੁਤ੍ਤਾ ਏਵਾਤਿ ਵੇਦਿਤਬ੍ਬਾ.

ਅਜ੍ਝਤ੍ਤਂ ਚੇਤੋਸਮਥਮਨੁਯੁਤ੍ਤਾਤਿ ਅਤ੍ਤਨੋ ਚਿਤ੍ਤਸਮਥੇ ਅਨੁਯੁਤ੍ਤਾ. ਅਜ੍ਝਤ੍ਤਂ ਅਤ੍ਤਨੋਤਿ ਚ ਏਤਂ ਏਕਤ੍ਥਂ, ਬ੍ਯਞ੍ਜਨਮੇਵ ਨਾਨਂ. ਭੁਮ੍ਮਤ੍ਥੇ ਚੇਤਂ ਸਮਥਨ੍ਤਿ ਅਨੁਸਦ੍ਦਯੋਗੇਨ ਉਪਯੋਗਵਚਨਂ. ਅਨਿਰਾਕਤਜ੍ਝਾਨਾਤਿ ਬਹਿ ਅਨੀਹਤਜ੍ਝਾਨਾ ਅਵਿਨਾਸਿਤਜ੍ਝਾਨਾ ਵਾ. ਨੀਹਰਣਂ ਵਿਨਾਸੋ ਵਾਤਿ ਇਦਂ ਨਿਰਾਕਤਂ ਨਾਮ ‘‘ਥਮ੍ਭਂ ਨਿਰਂਕਤ੍ਵਾ ਨਿਵਾਤਵੁਤ੍ਤੀ’’ਤਿਆਦੀਸੁ (ਸੁ. ਨਿ. ੩੨੮) ਵਿਯ. ਵਿਪਸ੍ਸਨਾਯ ਸਮਨ੍ਨਾਗਤਾਤਿ ਸਤ੍ਤਵਿਧਾਯ ਅਨੁਪਸ੍ਸਨਾਯ ਯੁਤ੍ਤਾ. ਸਤ੍ਤਵਿਧਾ ਅਨੁਪਸ੍ਸਨਾ ਨਾਮ ਅਨਿਚ੍ਚਾਨੁਪਸ੍ਸਨਾ, ਦੁਕ੍ਖਾਨੁਪਸ੍ਸਨਾ, ਅਨਤ੍ਤਾਨੁਪਸ੍ਸਨਾ, ਨਿਬ੍ਬਿਦਾਨੁਪਸ੍ਸਨਾ, ਵਿਰਾਗਾਨੁਪਸ੍ਸਨਾ, ਨਿਰੋਧਾਨੁਪਸ੍ਸਨਾ, ਪਟਿਨਿਸ੍ਸਗ੍ਗਾਨੁਪਸ੍ਸਨਾ ਚ, ਤਾ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਾਵ.

ਬ੍ਰੂਹੇਤਾਰੋ ਸੁਞ੍ਞਾਗਾਰਾਨਨ੍ਤਿ ਵਡ੍ਢੇਤਾਰੋ ਸੁਞ੍ਞਾਗਾਰਾਨਂ. ਏਤ੍ਥ ਚ ‘‘ਸੁਞ੍ਞਾਗਾਰਾਨ’’ਨ੍ਤਿ ਯਂਕਿਞ੍ਚਿ ਵਿਵਿਤ੍ਤਂ ਭਾਵਨਾਨੁਯੋਗਸ੍ਸ ਅਨੁਚ੍ਛਵਿਕਟ੍ਠਾਨਂ. ਸਮਥਵਿਪਸ੍ਸਨਾਵਸੇਨ ਕਮ੍ਮਟ੍ਠਾਨਂ ਗਹੇਤ੍ਵਾ ਰਤ੍ਤਿਨ੍ਦਿਵਂ ਸੁਞ੍ਞਾਗਾਰਂ ਪਵਿਸਿਤ੍ਵਾ ਭਾਵਨਾਨੁਯੋਗਵਸੇਨ ਨਿਸੀਦਮਾਨਾ ਭਿਕ੍ਖੂ ‘‘ਬ੍ਰੂਹੇਤਾਰੋ ਸੁਞ੍ਞਾਗਾਰਾਨ’’ਨ੍ਤਿ ਵੇਦਿਤਬ੍ਬਾ. ਏਕਭੂਮਿਕਾਦਿਪਾਸਾਦੇਪਿ ਪਨ ਵਾਸਂ ਕੁਰੁਮਾਨਾ ਝਾਯਿਨੋ ਸੁਞ੍ਞਾਗਾਰਾਨਂ ਬ੍ਰੂਹੇਤਾਰੋਤ੍ਵੇਵ ਵੇਦਿਤਬ੍ਬਾ.

ਏਤ੍ਥ ਚ ਯਾ ‘‘ਪਟਿਸਲ੍ਲਾਨਰਾਮਾ, ਭਿਕ੍ਖਵੇ, ਵਿਹਰਥ ਪਟਿਸਲ੍ਲਾਨਰਤਾ’’ਤਿ ਵੂਪਕਟ੍ਠਕਾਯਤਾ ਵਿਹਿਤਾ, ਸਾ ਪਰਿਸੁਦ੍ਧਸੀਲਸ੍ਸ, ਨ ਅਸੀਲਸ੍ਸ ਅਵਿਸੁਦ੍ਧਸੀਲਸ੍ਸ ਵਾ ਤਸ੍ਸ ਰੂਪਾਰਮ੍ਮਣਾਦਿਤੋ ਚਿਤ੍ਤਵਿਨਿਵਤ੍ਤਨਸ੍ਸੇਵ ਅਭਾਵਤੋਤਿ ਅਤ੍ਥਤੋ ਸੀਲਵਿਸੁਦ੍ਧਿ ਦਸ੍ਸਿਤਾਤਿ ਵੁਤ੍ਤੋਵਾਯਮਤ੍ਥੋ. ‘‘ਅਜ੍ਝਤ੍ਤਂ ਚੇਤੋਸਮਥਮਨੁਯੁਤ੍ਤਾ ਅਨਿਰਾਕਤਜ੍ਝਾਨਾ’’ਤਿ ਪਦਦ੍ਵਯੇਨ ਸਮਾਧਿਭਾਵਨਾ, ‘‘ਵਿਪਸ੍ਸਨਾਯ ਸਮਨ੍ਨਾਗਤਾ’’ਤਿ ਇਮਿਨਾ ਪਞ੍ਞਾਭਾਵਨਾ ਵਿਹਿਤਾਤਿ ਲੋਕਿਯਾ ਤਿਸ੍ਸੋ ਸਿਕ੍ਖਾ ਦਸ੍ਸਿਤਾ.

ਇਦਾਨਿ ਤਾਸੁ ਪਤਿਟ੍ਠਿਤਸ੍ਸ ਅਵਸ੍ਸਂਭਾਵਿਫਲਂ ਦਸ੍ਸੇਤੁਂ ‘‘ਪਟਿਸਲ੍ਲਾਨਰਾਮਾਨ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਬ੍ਰੂਹੇਤਾਨਨ੍ਤਿ ਵਡ੍ਢੇਤਾਨਂ. ਦ੍ਵਿਨ੍ਨਂ ਫਲਾਨਨ੍ਤਿ ਤਤਿਯਚਤੁਤ੍ਥਫਲਾਨਂ. ਪਾਟਿਕਙ੍ਖਨ੍ਤਿ ਇਚ੍ਛਿਤਬ੍ਬਂ ਅਵਸ੍ਸਂਭਾਵੀ. ਅਞ੍ਞਾਤਿ ਅਰਹਤ੍ਤਂ. ਤਞ੍ਹਿ ਹੇਟ੍ਠਿਮਮਗ੍ਗਞਾਣੇਹਿ ਞਾਤਮਰਿਯਾਦਂ ਅਨਤਿਕ੍ਕਮਿਤ੍ਵਾ ਜਾਨਨਤੋ ਪਰਿਪੁਣ੍ਣਜਾਨਨਤ੍ਤਾ ਉਪਰਿ ਜਾਨਨਕਿਚ੍ਚਾਭਾਵਤੋ ਚ ‘‘ਅਞ੍ਞਾ’’ਤਿ ਵੁਚ੍ਚਤਿ. ਸਤਿ ਵਾ ਉਪਾਦਿਸੇਸੇਤਿ ਸਤਿ ਵਾ ਕਿਲੇਸੂਪਾਦਿਸੇਸੇ, ਪਹਾਤੁਂ ਅਸਕ੍ਕੁਣੇਯ੍ਯੇ ਸਤਿ. ਞਾਣੇ ਹਿ ਅਪਰਿਪਕ੍ਕੇ ਯੇ ਤੇਨ ਪਰਿਪਕ੍ਕੇਨ ਪਹਾਤਬ੍ਬਕਿਲੇਸਾ, ਤੇ ਨ ਪਹੀਯਨ੍ਤਿ. ਤਂ ਸਨ੍ਧਾਯਾਹ ‘‘ਸਤਿ ਵਾ ਉਪਾਦਿਸੇਸੇ’’ਤਿ. ਸਤਿ ਚ ਕਿਲੇਸੇ ਖਨ੍ਧਾਭਿਸਙ੍ਖਾਰਾ ਤਿਟ੍ਠਨ੍ਤਿ ਏਵ. ਇਤਿ ਇਮਸ੍ਮਿਂ ਸੁਤ੍ਤੇ ਅਨਾਗਾਮਿਫਲਂ ਅਰਹਤ੍ਤਨ੍ਤਿ ਦ੍ਵੇ ਧਮ੍ਮਾ ਦਸ੍ਸਿਤਾ. ਯਥਾ ਚੇਤ੍ਥ, ਏਵਂ ਇਤੋ ਪਰੇਸੁ ਦ੍ਵੀਸੁ ਸੁਤ੍ਤੇਸੁ.

ਗਾਥਾਸੁ ਯੇ ਸਨ੍ਤਚਿਤ੍ਤਾਤਿ ਯੇ ਯੋਗਾਵਚਰਾ ਤਦਙ੍ਗਵਸੇਨ ਵਿਕ੍ਖਮ੍ਭਨਵਸੇਵ ਚ ਸਮਿਤਕਿਲੇਸਤਾਯ ਸਨ੍ਤਚਿਤ੍ਤਾ. ਨੇਪਕ੍ਕਂ ਵੁਚ੍ਚਤਿ ਪਞ੍ਞਾ, ਤਾਯ ਸਮਨ੍ਨਾਗਤਤ੍ਤਾ ਨਿਪਕਾ. ਇਮਿਨਾ ਤੇਸਂ ਕਮ੍ਮਟ੍ਠਾਨਪਰਿਹਰਣਞਾਣਂ ਦਸ੍ਸੇਤਿ. ਸਤਿਮਨ੍ਤੋ ਚ ਝਾਯਿਨੋਤਿ ਠਾਨਨਿਸਜ੍ਜਾਦੀਸੁ ਕਮ੍ਮਟ੍ਠਾਨਾਵਿਜਹਨਹੇਤੁਭੂਤਾਯ ਸਤਿਯਾ ਸਤਿਮਨ੍ਤੋ, ਆਰਮ੍ਮਣੂਪਨਿਜ੍ਝਾਨਲਕ੍ਖਣੇਨ ਝਾਨੇਨ ਝਾਯਿਨੋ. ਸਮ੍ਮਾ ਧਮ੍ਮਂ ਵਿਪਸ੍ਸਨ੍ਤਿ, ਕਾਮੇਸੁ ਅਨਪੇਕ੍ਖਿਨੋਤਿ ਪੁਬ੍ਬੇਯੇਵ ‘‘ਅਟ੍ਠਿਕਙ੍ਕਲੂਪਮਾ ਕਾਮਾ’’ਤਿਆਦਿਨਾ (ਮ. ਨਿ. ੧.੨੩੪; ਪਾਚਿ. ੪੧੭) ਵਤ੍ਥੁਕਾਮੇਸੁ ਕਿਲੇਸਕਾਮੇਸੁ ਚ ਆਦੀਨਵਪਚ੍ਚਵੇਕ੍ਖਣੇਨ ਅਨਪੇਕ੍ਖਿਨੋ ਅਨਤ੍ਥਿਕਾ ਤੇ ਪਹਾਯ ਅਧਿਗਤਂ ਉਪਚਾਰਸਮਾਧਿਂ ਅਪ੍ਪਨਾਸਮਾਧਿਂ ਵਾ ਪਾਦਕਂ ਕਤ੍ਵਾ ਨਾਮਰੂਪਂ ਤਸ੍ਸ ਪਚ੍ਚਯੇ ਚ ਪਰਿਗ੍ਗਹੇਤ੍ਵਾ ਕਲਾਪਸਮ੍ਮਸਨਾਦਿਕ੍ਕਮੇਨ ਸਮ੍ਮਾ ਅਵਿਪਰੀਤਂ ਪਞ੍ਚਕ੍ਖਨ੍ਧਧਮ੍ਮਂ ਅਨਿਚ੍ਚਾਦਿਤੋ ਵਿਪਸ੍ਸਨ੍ਤਿ.

ਅਪ੍ਪਮਾਦਰਤਾਤਿ ਵੁਤ੍ਤਪ੍ਪਕਾਰਾਯ ਸਮਥਵਿਪਸ੍ਸਨਾਭਾਵਨਾਯ ਅਪ੍ਪਮਜ੍ਜਨੇ ਰਤਾ ਅਭਿਰਤਾ ਤਤ੍ਥ ਅਪ੍ਪਮਾਦੇਨੇਵ ਰਤ੍ਤਿਨ੍ਦਿਵਂ ਵੀਤਿਨਾਮੇਨ੍ਤਾ. ਸਨ੍ਤਾਤਿ ਸਮਾਨਾ. ‘‘ਸਤ੍ਤਾ’’ਤਿਪਿ ਪਾਠੋ, ਪੁਗ੍ਗਲਾਤਿ ਅਤ੍ਥੋ. ਪਮਾਦੇ ਭਯਦਸ੍ਸਿਨੋਤਿ ਨਿਰਯੂਪਪਤ੍ਤਿਆਦਿਕਂ ਪਮਾਦੇ ਭਯਂ ਪਸ੍ਸਨ੍ਤਾ. ਅਭਬ੍ਬਾ ਪਰਿਹਾਨਾਯਾਤਿ ਤੇ ਏਵਰੂਪਾ ਸਮਥਵਿਪਸ੍ਸਨਾਧਮ੍ਮੇਹਿ ਮਗ੍ਗਫਲੇਹਿ ਵਾ ਪਰਿਹਾਨਾਯ ਅਭਬ੍ਬਾ. ਸਮਥਵਿਪਸ੍ਸਨਾਤੋ ਹਿ ਸਮ੍ਪਤ੍ਤਤੋ ਨ ਪਰਿਹਾਯਨ੍ਤਿ, ਇਤਰਾਨਿ ਚ ਅਪ੍ਪਤ੍ਤਾਨਿ ਪਾਪੁਣਨ੍ਤਿ. ਨਿਬ੍ਬਾਨਸ੍ਸੇਵ ਸਨ੍ਤਿਕੇਤਿ ਨਿਬ੍ਬਾਨਸ੍ਸ ਚ ਅਨੁਪਾਦਾਪਰਿਨਿਬ੍ਬਾਨਸ੍ਸ ਚ ਸਨ੍ਤਿਕੇ ਏਵ, ਨ ਚਿਰਸ੍ਸੇਵ ਨਂ ਅਧਿਗਮਿਸ੍ਸਨ੍ਤੀਤਿ.

ਅਟ੍ਠਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.