੬. ਅਜਾਤਸੁਤ੍ਤਵਣ੍ਣਨਾ

੪੩. ਛਟ੍ਠੇ ਅਤ੍ਥਿ, ਭਿਕ੍ਖਵੇਤਿ ਕਾ ਉਪ੍ਪਤ੍ਤਿ? ਏਕਦਿਵਸਂ ਕਿਰ ਭਗਵਤਾ ਅਨੇਕਪਰਿਯਾਯੇਨ ਸਂਸਾਰੇ ਆਦੀਨਵਂ ਪਕਾਸੇਤ੍ਵਾ ਤਦੁਪਸਮਨਾਦਿਵਸੇਨ ਨਿਬ੍ਬਾਨਪਟਿਸਂਯੁਤ੍ਤਾਯ ਧਮ੍ਮਦੇਸਨਾਯ ਕਤਾਯ ਭਿਕ੍ਖੂਨਂ ਏਤਦਹੋਸਿ ‘‘ਅਯਂ ਸਂਸਾਰੋ ਭਗਵਤਾ ਅਵਿਜ੍ਜਾਦੀਹਿ ਕਾਰਣੇਹਿ ਸਹੇਤੁਕੋ ਵੁਤ੍ਤੋ, ਨਿਬ੍ਬਾਨਸ੍ਸ ਪਨ ਤਦੁਪਸਮਸ੍ਸ ਨ ਕਿਞ੍ਚਿ ਕਾਰਣਂ ਵੁਤ੍ਤਂ, ਤਯਿਦਂ ਅਹੇਤੁਕਂ ਕਥਂ ਸਚ੍ਚਿਕਟ੍ਠਪਰਮਤ੍ਥੇਨ ਉਪਲਬ੍ਭਤੀ’’ਤਿ. ਅਥ ਭਗਵਾ ਤੇਸਂ ਭਿਕ੍ਖੂਨਂ ਵਿਮਤਿਵਿਧਮਨਤ੍ਥਞ੍ਚੇਵ, ‘‘ਇਧ ਸਮਣਬ੍ਰਾਹ੍ਮਣਾਨਂ ‘ਨਿਬ੍ਬਾਨਂ ਨਿਬ੍ਬਾਨ’ਨ੍ਤਿ ਵਾਚਾਵਤ੍ਥੁਮਤ੍ਤਮੇਵ, ਨਤ੍ਥਿ ਹਿ ਪਰਮਤ੍ਥਤੋ ਨਿਬ੍ਬਾਨਂ ਨਾਮ ਅਨੁਪਲਬ੍ਭਮਾਨਸਭਾਵਤ੍ਤਾ’’ਤਿ ਲੋਕਾਯਤਿਕਾਦਯੋ ਵਿਯ ਵਿਪ੍ਪਟਿਪਨ੍ਨਾਨਂ ਬਹਿਦ੍ਧਾ ਚ ਪੁਥੁਦਿਟ੍ਠਿਗਤਿਕਾਨਂ ਮਿਚ੍ਛਾਵਾਦਭਞ੍ਜਨਤ੍ਥਞ੍ਚ, ਅਮਤਮਹਾਨਿਬ੍ਬਾਨਸ੍ਸ ਪਰਮਤ੍ਥਤੋ ਅਤ੍ਥਿਭਾਵਦੀਪਨਤ੍ਥਂ ਤਸ੍ਸ ਚ ਨਿਸ੍ਸਰਣਭਾਵਾਦਿਆਨੁਭਾਵਵਨ੍ਤਤਾਦੀਪਨਤ੍ਥਂ ਪੀਤਿਵੇਗੇਨ ਉਦਾਨਵਸੇਨ ਇਦਂ ਸੁਤ੍ਤਂ ਅਭਾਸਿ. ਤਥਾ ਹਿ ਇਦਂ ਸੁਤ੍ਤਂ ਉਦਾਨੇਪਿ (ਉਦਾ. ੭੨-੭੪) ਸਙ੍ਗੀਤਂ.

ਤਤ੍ਥ ਅਤ੍ਥੀਤਿ ਵਿਜ੍ਜਤਿ ਪਰਮਤ੍ਥਤੋ ਉਪਲਬ੍ਭਤਿ. ਅਜਾਤਂ ਅਭੂਤਂ ਅਕਤਂ ਅਸਙ੍ਖਤਨ੍ਤਿ ਸਬ੍ਬਾਨਿਪਿ ਪਦਾਨਿ ਅਞ੍ਞਮਞ੍ਞਵੇਵਚਨਾਨਿ. ਅਥ ਵਾ ਵੇਦਨਾਦਯੋ ਵਿਯ ਹੇਤੁਪਚ੍ਚਯਸਮਵਾਯਸਙ੍ਖਾਤਾਯ ਕਾਰਣਸਾਮਗ੍ਗਿਯਾ ਨ ਜਾਤਂ ਨ ਨਿਬ੍ਬਤ੍ਤਨ੍ਤਿ ਅਜਾਤਂ. ਕਾਰਣੇਨ ਵਿਨਾ ਸਯਮੇਵ ਨ ਭੂਤਂ ਨ ਪਾਤੁਭੂਤਂ ਨ ਉਪ੍ਪਨ੍ਨਨ੍ਤਿ ਅਭੂਤਂ. ਏਵਂ ਅਜਾਤਤ੍ਤਾ ਅਭੂਤਤ੍ਤਾ ਚ ਯੇਨ ਕੇਨਚਿ ਕਾਰਣੇਨ ਨ ਕਤਨ੍ਤਿ ਅਕਤਂ. ਜਾਤਭੂਤਕਤਸਭਾਵੋ ਚ ਨਾਮਰੂਪਾਦੀਨਂ ਸਙ੍ਖਤਧਮ੍ਮਾਨਂ ਹੋਤਿ, ਨ ਅਸਙ੍ਖਤਸਭਾਵਸ੍ਸ ਨਿਬ੍ਬਾਨਸ੍ਸਾਤਿ ਦਸ੍ਸਨਤ੍ਥਂ ਅਸਙ੍ਖਤਨ੍ਤਿ ਵੁਤ੍ਤਂ. ਪਟਿਲੋਮਤੋ ਵਾ ਸਮੇਚ੍ਚ ਸਮ੍ਭੁਯ੍ਯ ਪਚ੍ਚਯੇਹਿ ਕਤਨ੍ਤਿ ਸਙ੍ਖਤਂ, ਤਥਾ ਨ ਸਙ੍ਖਤਂ, ਸਙ੍ਖਤਲਕ੍ਖਣਰਹਿਤਨ੍ਤਿ ਚ ਅਸਙ੍ਖਤਨ੍ਤਿ ਏਵਂ ਅਨੇਕੇਹਿ ਕਾਰਣੇਹਿ ਨਿਬ੍ਬਤ੍ਤਿਤਭਾਵੇ ਪਟਿਸਿਦ੍ਧੇ ‘‘ਸਿਯਾ ਨੁ ਖੋ ਏਕੇਨੇਵ ਕਾਰਣੇਨ ਕਤ’’ਨ੍ਤਿ ਆਸਙ੍ਕਾਯਂ ‘‘ਨ ਕੇਨਚਿ ਕਤ’’ਨ੍ਤਿ ਦਸ੍ਸਨਤ੍ਥਂ ‘‘ਅਕਤ’’ਨ੍ਤਿ ਵੁਤ੍ਤਂ. ਏਵਂ ਅਪ੍ਪਚ੍ਚਯਮ੍ਪਿ ਸਮਾਨਂ ‘‘ਸਯਮੇਵ ਨੁ ਖੋ ਇਦਂ ਭੂਤਂ ਪਾਤੁਭੂਤ’’ਨ੍ਤਿ ਆਸਙ੍ਕਾਯਂ ਤਨ੍ਨਿਵਤ੍ਤਨਤ੍ਥਂ ‘‘ਅਭੂਤ’’ਨ੍ਤਿ ਵੁਤ੍ਤਂ. ਅਯਞ੍ਚ ਏਤਸ੍ਸ ਅਸਙ੍ਖਤਾਕਤਾਭੂਤਭਾਵੋ ਸਬ੍ਬੇਨ ਸਬ੍ਬਂ ਅਜਾਤਿਧਮ੍ਮਤ੍ਤਾਤਿ ਦਸ੍ਸੇਤੁਂ ‘‘ਅਜਾਤ’’ਨ੍ਤਿ ਵੁਤ੍ਤਨ੍ਤਿ. ਏਵਮੇਤੇਸਂ ਚਤੁਨ੍ਨਮ੍ਪਿ ਪਦਾਨਂ ਸਾਤ੍ਥਕਭਾਵੋ ਵੇਦਿਤਬ੍ਬੋ.

ਇਤਿ ਭਗਵਾ ‘‘ਅਤ੍ਥਿ, ਭਿਕ੍ਖਵੇ, ਅਜਾਤਂ ਅਭੂਤਂ ਅਕਤਂ ਅਸਙ੍ਖਤ’’ਨ੍ਤਿ ਪਰਮਤ੍ਥਤੋ ਨਿਬ੍ਬਾਨਸ੍ਸ ਅਤ੍ਥਿਭਾਵਂ ਵਤ੍ਵਾ ਤਤ੍ਥ ਹੇਤੁਂ ਦਸ੍ਸੇਨ੍ਤੋ ‘‘ਨੋ ਚੇਤਂ, ਭਿਕ੍ਖਵੇ’’ਤਿਆਦਿਮਾਹ. ਤਸ੍ਸਾਯਂ ਸਙ੍ਖੇਪੋ – ਭਿਕ੍ਖਵੇ, ਯਦਿ ਅਜਾਤਾਦਿਸਭਾਵਾ ਅਸਙ੍ਖਤਾ ਧਾਤੁ ਨ ਅਭਵਿਸ੍ਸ ਨ ਸਿਯਾ, ਇਧ ਲੋਕੇ ਜਾਤਾਦਿਸਭਾਵਸ੍ਸ ਰੂਪਾਦਿਕ੍ਖਨ੍ਧਪਞ੍ਚਕਸਙ੍ਖਾਤਸ੍ਸ ਸਙ੍ਖਾਰਗਤਸ੍ਸ ਨਿਸ੍ਸਰਣਂ ਅਨਵਸੇਸਵਟ੍ਟੁਪਸਮੋ ਨ ਪਞ੍ਞਾਯੇਯ੍ਯ ਨ ਉਪਲਬ੍ਭੇਯ੍ਯ ਨ ਸਮ੍ਭਵੇਯ੍ਯ. ਨਿਬ੍ਬਾਨਞ੍ਹਿ ਆਰਮ੍ਮਣਂ ਕਤ੍ਵਾ ਪਵਤ੍ਤਮਾਨਾ ਸਮ੍ਮਾਦਿਟ੍ਠਿਆਦਯੋ ਅਰਿਯਮਗ੍ਗਧਮ੍ਮਾ ਅਨਵਸੇਸਤੋ ਕਿਲੇਸੇ ਸਮੁਚ੍ਛਿਨ੍ਦਨ੍ਤਿ, ਤੇਨੇਤ੍ਥ ਸਬ੍ਬਸ੍ਸਪਿ ਵਟ੍ਟਦੁਕ੍ਖਸ੍ਸ ਅਪ੍ਪਵਤ੍ਤਿ ਅਪਗਮੋ ਨਿਸ੍ਸਰਣਂ ਪਞ੍ਞਾਯਤਿ.

ਏਵਂ ਬ੍ਯਤਿਰੇਕਵਸੇਨ ਨਿਬ੍ਬਾਨਸ੍ਸ ਅਤ੍ਥਿਭਾਵਂ ਦਸ੍ਸੇਤ੍ਵਾ ਇਦਾਨਿ ਅਨ੍ਵਯਵਸੇਨਪਿ ਤਂ ਦਸ੍ਸੇਤੁਂ ‘‘ਯਸ੍ਮਾ ਚ ਖੋ’’ਤਿਆਦਿ ਵੁਤ੍ਤਂ, ਤਂ ਵੁਤ੍ਤਤ੍ਥਮੇਵ. ਏਤ੍ਥ ਚ ਯਸ੍ਮਾ ‘‘ਅਪਚ੍ਚਯਾ ਧਮ੍ਮਾ, ਅਸਙ੍ਖਤਾ ਧਮ੍ਮਾ (ਧ. ਸ. ਦੁਕਮਾਤਿਕਾ ੭, ੮). ਅਤ੍ਥਿ, ਭਿਕ੍ਖਵੇ, ਤਦਾਯਤਨਂ, ਯਤ੍ਥ ਨੇਵ ਪਥਵੀ (ਉਦਾ. ੭੧). ਇਦਮ੍ਪਿ ਖੋ ਠਾਨਂ ਦੁਦ੍ਦਸਂ ਯਦਿਦਂ ਸਬ੍ਬਸਙ੍ਖਾਰਸਮਥੋ ਸਬ੍ਬੂਪਧਿਪਟਿਨਿਸ੍ਸਗ੍ਗੋ (ਮਹਾਵ. ੭; ਮ. ਨਿ. ੧.੨੮੧). ਅਸਙ੍ਖਤਞ੍ਚ ਵੋ, ਭਿਕ੍ਖਵੇ, ਧਮ੍ਮਂ ਦੇਸੇਸ੍ਸਾਮਿ ਅਸਙ੍ਖਤਗਾਮਿਨਿਞ੍ਚ ਪਟਿਪਦ’’ਨ੍ਤਿਆਦੀਹਿ (ਸਂ. ਨਿ. ੪.੩੬੬) ਅਨੇਕੇਹਿ ਸੁਤ੍ਤਪਦੇਹਿ ‘‘ਅਤ੍ਥਿ, ਭਿਕ੍ਖਵੇ, ਅਜਾਤ’’ਨ੍ਤਿ ਇਮਿਨਾਪਿ ਸੁਤ੍ਤੇਨ ਨਿਬ੍ਬਾਨਧਾਤੁਯਾ ਪਰਮਤ੍ਥਤੋ ਸਬ੍ਭਾਵੋ ਸਬ੍ਬਲੋਕਂ ਅਨੁਕਮ੍ਪਮਾਨੇਨ ਸਮ੍ਮਾਸਮ੍ਬੁਦ੍ਧੇਨ ਦੇਸਿਤੋ, ਤਸ੍ਮਾ ਨ ਪਟਿਕ੍ਖਿਪਿਤਬ੍ਬਂ. ਤਤ੍ਥ ਅਪ੍ਪਚ੍ਚਕ੍ਖਕਾਰੀਨਮ੍ਪਿ ਵਿਞ੍ਞੂਨਂ ਕਙ੍ਖਾ ਵਾ ਵਿਮਤਿ ਵਾ ਨਤ੍ਥਿ ਏਵ. ਯੇ ਪਨ ਅਬੁਦ੍ਧਿਪੁਗ੍ਗਲਾ, ਤੇਸਂ ਵਿਮਤਿਵਿਨੋਦਨਤ੍ਥਂ ਅਯਮੇਤ੍ਥ ਅਧਿਪ੍ਪਾਯਨਿਦ੍ਧਾਰਣਮੁਖੇਨ ਯੁਤ੍ਤਿਵਿਚਾਰਣਾ – ਯਥਾ ਪਰਿਞ੍ਞੇਯ੍ਯਤਾਯ ਸਉਤ੍ਤਰਾਨਂ ਕਾਮਾਨਂ ਰੂਪਾਨਞ੍ਚ ਪਟਿਪਕ੍ਖਭੂਤਂ ਤਬ੍ਬਿਧੁਰਸਭਾਵਂ ਨਿਸ੍ਸਰਣਂ ਪਞ੍ਞਾਯਤਿ, ਏਵਂ ਤਂਸਭਾਵਾਨਂ ਸਬ੍ਬੇਸਂ ਸਙ੍ਖਤਧਮ੍ਮਾਨਂ ਪਟਿਪਕ੍ਖਭੂਤੇਨ ਤਬ੍ਬਿਧੁਰਸਭਾਵੇਨ ਨਿਸ੍ਸਰਣੇਨ ਭਵਿਤਬ੍ਬਂ. ਯਞ੍ਚੇਤਂ ਨਿਸ੍ਸਰਣਂ, ਸਾ ਅਸਙ੍ਖਤਾ ਧਾਤੁ. ਕਿਞ੍ਚ ਭਿਯ੍ਯੋ, ਸਙ੍ਖਤਧਮ੍ਮਾਰਮ੍ਮਣਂ ਵਿਪਸ੍ਸਨਾਞਾਣਂ ਅਪਿ ਅਨੁਲੋਮਞਾਣਂ ਕਿਲੇਸੇ ਸਮੁਚ੍ਛੇਦਵਸੇਨ ਪਜਹਿਤੁਂ ਨ ਸਕ੍ਕੋਤਿ, ਤਥਾ ਸਮ੍ਮੁਤਿਸਚ੍ਚਾਰਮ੍ਮਣਂ ਪਠਮਜ੍ਝਾਨਾਦੀਸੁ ਞਾਣਂ ਵਿਕ੍ਖਮ੍ਭਨਵਸੇਨੇਵ ਕਿਲੇਸੇ ਪਜਹਤਿ, ਨ ਸਮੁਚ੍ਛੇਦਵਸੇਨ. ਇਤਿ ਸਙ੍ਖਤਧਮ੍ਮਾਰਮ੍ਮਣਸ੍ਸ ਸਮ੍ਮੁਤਿਸਚ੍ਚਾਰਮ੍ਮਣਸ੍ਸ ਚ ਞਾਣਸ੍ਸ ਕਿਲੇਸਾਨਂ ਸਮੁਚ੍ਛੇਦਪ੍ਪਹਾਨੇ ਅਸਮਤ੍ਥਭਾਵਤੋ ਤੇਸਂ ਸਮੁਚ੍ਛੇਦਪ੍ਪਹਾਨਕਰਸ੍ਸ ਅਰਿਯਮਗ੍ਗਞਾਣਸ੍ਸ ਤਦੁਭਯਵਿਪਰੀਤਸਭਾਵੇਨ ਆਰਮ੍ਮਣੇਨ ਭਵਿਤਬ੍ਬਂ, ਸਾ ਅਸਙ੍ਖਤਾ ਧਾਤੁ. ਤਥਾ ‘‘ਅਤ੍ਥਿ, ਭਿਕ੍ਖਵੇ, ਅਜਾਤਂ ਅਭੂਤਂ ਅਕਤਂ ਅਸਙ੍ਖਤ’’ਨ੍ਤਿ ਇਦਂ ਨਿਬ੍ਬਾਨਸ੍ਸ ਪਰਮਤ੍ਥਤੋ ਅਤ੍ਥਿਭਾਵਜੋਤਕਵਚਨਂ ਅਵਿਪਰੀਤਤ੍ਥਂ ਭਗਵਤਾ ਭਾਸਿਤਤ੍ਤਾ. ਯਞ੍ਹਿ ਭਗਵਤਾ ਭਾਸਿਤਂ, ਤਂ ਅਵਿਪਰੀਤਤ੍ਥਂ ਪਰਮਤ੍ਥਨ੍ਤਿ ਯਥਾ ਤਂ ‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ, ਸਬ੍ਬੇ ਸਙ੍ਖਾਰਾ ਦੁਕ੍ਖਾ, ਸਬ੍ਬੇ ਧਮ੍ਮਾ ਅਨਤ੍ਤਾ’’ਤਿ (ਧ. ਪ. ੨੭੭-੨੭੯; ਚੂਲ਼ਨਿ. ਹੇਮਕਮਾਣਵਪੁਚ੍ਛਾਨਿਦ੍ਦੇਸ ੫੬). ਤਥਾ ਨਿਬ੍ਬਾਨਸਦ੍ਦੋ ਕਤ੍ਥਚਿ ਵਿਸਯੇ ਯਥਾਭੂਤਪਰਮਤ੍ਥਵਿਸਯੋ ਉਪਚਾਰਵੁਤ੍ਤਿਸਬ੍ਭਾਵਤੋ ਸੇਯ੍ਯਥਾਪਿ ਸੀਹਸਦ੍ਦੋ. ਅਥ ਵਾ ਅਤ੍ਥੇਵ ਪਰਮਤ੍ਥਤੋ ਅਸਙ੍ਖਤਾਧਾਤੁ ਇਤਰਤਬ੍ਬਿਪਰੀਤਵਿਨਿਮੁਤ੍ਤਸਭਾਵਤ੍ਤਾ ਸੇਯ੍ਯਥਾਪਿ ਪਥਵੀਧਾਤੁ ਵੇਦਨਾਤਿ. ਏਵਮਾਦੀਹਿ ਨਯੇਹਿ ਯੁਤ੍ਤਿਤੋਪਿ ਅਸਙ੍ਖਤਾਯ ਧਾਤੁਯਾ ਪਰਮਤ੍ਥਤੋ ਅਤ੍ਥਿਭਾਵੋ ਵੇਦਿਤਬ੍ਬੋ.

ਗਾਥਾਸੁ ਜਾਤਨ੍ਤਿ ਜਾਯਨਟ੍ਠੇਨ ਜਾਤਂ, ਜਾਤਿਲਕ੍ਖਣਪ੍ਪਤ੍ਤਨ੍ਤਿ ਅਤ੍ਥੋ. ਭੂਤਨ੍ਤਿ ਭਵਨਟ੍ਠੇਨ ਭੂਤਂ, ਅਹੁਤ੍ਵਾ ਸਮ੍ਭੂਤਨ੍ਤਿ ਅਤ੍ਥੋ. ਸਮੁਪ੍ਪਨ੍ਨਨ੍ਤਿ ਸਹਿਤਭਾਵੇਨ ਉਪ੍ਪਨ੍ਨਂ, ਸਹਿਤੇਹਿ ਧਮ੍ਮੇਹਿ ਚ ਉਪ੍ਪਨ੍ਨਨ੍ਤਿ ਅਤ੍ਥੋ. ਕਤਨ੍ਤਿ ਕਾਰਣਭੂਤੇਹਿ ਪਚ੍ਚਯੇਹਿ ਨਿਬ੍ਬਤ੍ਤਿਤਂ. ਸਙ੍ਖਤਨ੍ਤਿ ਤੇਹਿਯੇਵ ਸਮੇਚ੍ਚ ਸਮ੍ਭੁਯ੍ਯ ਕਤਨ੍ਤਿ ਸਙ੍ਖਤਂ, ਸਬ੍ਬਮੇਤਂ ਪਚ੍ਚਯਨਿਬ੍ਬਤ੍ਤਸ੍ਸ ਅਧਿਵਚਨਂ. ਨਿਚ੍ਚਸਾਰਾਦਿਵਿਰਹਿਤਤੋ ਅਦ੍ਧੁਵਂ. ਜਰਾਯ ਮਰਣੇਨ ਚ ਏਕਨ੍ਤੇਨੇਵ ਸਙ੍ਘਟਿਤਂ ਸਂਸਟ੍ਠਨ੍ਤਿ ਜਰਾਮਰਣਸਙ੍ਘਾਤਂ. ‘‘ਜਰਾਮਰਣਸਙ੍ਘਟ੍ਟ’’ਨ੍ਤਿਪਿ ਪਠਨ੍ਤਿ, ਜਰਾਯ ਮਰਣੇਨ ਚ ਉਪਦ੍ਦੁਤਂ ਪੀਲ਼ਿਤਨ੍ਤਿ ਅਤ੍ਥੋ. ਅਕ੍ਖਿਰੋਗਾਦੀਨਂ ਅਨੇਕੇਸਂ ਰੋਗਾਨਂ ਨੀਲ਼ਂ ਕੁਲਾਵਕਨ੍ਤਿ ਰੋਗਨੀਲ਼ਂ. ਸਰਸਤੋ ਉਪਕ੍ਕਮਤੋ ਚ ਪਭਙ੍ਗੁਪਰਮਸੀਲਤਾਯ ਪਭਙ੍ਗੁਰਂ.

ਚਤੁਬ੍ਬਿਧੋ ਆਹਾਰੋ ਚ ਤਣ੍ਹਾਸਙ੍ਖਾਤਾ ਨੇਤ੍ਤਿ ਚ ਪਭਵੋ ਸਮੁਟ੍ਠਾਨਂ ਏਤਸ੍ਸਾਤਿ ਆਹਾਰਨੇਤ੍ਤਿਪ੍ਪਭਵਂ. ਸਬ੍ਬੋਪਿ ਵਾ ਪਚ੍ਚਯੋ ਆਹਾਰੋ. ਇਧ ਪਨ ਤਣ੍ਹਾਯ ਨੇਤ੍ਤਿਗ੍ਗਹਣੇਨ ਗਹਿਤਤ੍ਤਾ ਤਣ੍ਹਾਵਜ੍ਜਾ ਵੇਦਿਤਬ੍ਬਾ. ਤਸ੍ਮਾ ਆਹਾਰੋ ਚ ਨੇਤ੍ਤਿ ਚ ਪਭਵੋ ਏਤਸ੍ਸਾਤਿ ਆਹਾਰਨੇਤ੍ਤਿਪ੍ਪਭਵਂ. ਆਹਾਰੋ ਏਵ ਵਾ ਨਯਨਟ੍ਠੇਨ ਪਵਤ੍ਤਨਟ੍ਠੇਨ ਨੇਤ੍ਤੀਤਿ ਏਵਮ੍ਪਿ ਆਹਾਰਨੇਤ੍ਤਿਪ੍ਪਭਵਂ. ਨਾਲਂ ਤਦਭਿਨਨ੍ਦਿਤੁਨ੍ਤਿ ਤਂ ਉਪਾਦਾਨਕ੍ਖਨ੍ਧਪਞ੍ਚਕਂ ਏਵਂ ਪਚ੍ਚਯਾਧੀਨਵੁਤ੍ਤਿਕਂ, ਤਤੋ ਏਵ ਅਨਿਚ੍ਚਂ, ਦੁਕ੍ਖਞ੍ਚ ਤਣ੍ਹਾਦਿਟ੍ਠੀਹਿ ਅਭਿਨਨ੍ਦਿਤੁਂ ਅਸ੍ਸਾਦੇਤੁਂ ਨ ਯੁਤ੍ਤਂ.

ਤਸ੍ਸ ਨਿਸ੍ਸਰਣਨ੍ਤਿ ‘‘ਜਾਤਂ ਭੂਤ’’ਨ੍ਤਿਆਦਿਨਾ ਵੁਤ੍ਤਸ੍ਸ ਤਸ੍ਸ ਸਕ੍ਕਾਯਸ੍ਸ ਨਿਸ੍ਸਰਣਂ ਨਿਕ੍ਕਮੋ ਅਨੁਪਸਨ੍ਤਸਭਾਵਸ੍ਸ ਰਾਗਾਦਿਕਿਲੇਸਸ੍ਸ ਸਬ੍ਬਸਙ੍ਖਾਰਸ੍ਸ ਚ ਅਭਾਵੇਨ ਤਦੁਪਸਮਭਾਵੇਨ ਪਸਤ੍ਥਭਾਵੇਨ ਚ ਸਨ੍ਤਂ, ਤਕ੍ਕਞਾਣਸ੍ਸ ਅਗੋਚਰਭਾਵਤੋ ਅਤਕ੍ਕਾਵਚਰਂ, ਨਿਚ੍ਚਟ੍ਠੇਨ ਧੁਵਂ, ਤਤੋ ਏਵ ਅਜਾਤਂ ਅਸਮੁਪ੍ਪਨ੍ਨਂ, ਸੋਕਹੇਤੂਨਂ ਅਭਾਵਤੋ ਅਸੋਕਂ, ਵਿਗਤਰਾਗਾਦਿਰਜਤ੍ਤਾ ਵਿਰਜਂ, ਸਂਸਾਰਦੁਕ੍ਖਟ੍ਟਿਤੇਹਿ ਪਟਿਪਜ੍ਜਿਤਬ੍ਬਤ੍ਤਾ ਪਦਂ, ਜਾਤਿਆਦਿਦੁਕ੍ਖਧਮ੍ਮਾਨਂ ਨਿਰੋਧਹੇਤੁਤਾਯ ਨਿਰੋਧੋ ਦੁਕ੍ਖਧਮ੍ਮਾਨਂ, ਸਬ੍ਬਸਙ੍ਖਾਰਾਨਂ ਉਪਸਮਹੇਤੁਤਾਯ ਸਙ੍ਖਾਰੂਪਸਮੋ, ਤਤੋ ਏਵ ਅਚ੍ਚਨ੍ਤਸੁਖਤਾਯ ਸੁਖੋਤਿ ਸਬ੍ਬਪਦੇਹਿ ਅਮਤਮਹਾਨਿਬ੍ਬਾਨਮੇਵ ਥੋਮੇਤਿ. ਏਵਂ ਭਗਵਾ ਪਠਮਗਾਥਾਯ ਬ੍ਯਤਿਰੇਕਵਸੇਨ, ਦੁਤਿਯਗਾਥਾਯ ਅਨ੍ਵਯਵਸੇਨ ਚ ਨਿਬ੍ਬਾਨਂ ਵਿਭਾਵੇਸਿ.

ਛਟ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.