੩. ਵਿਜ੍ਜਾਸੁਤ੍ਤਵਣ੍ਣਨਾ

੪੦. ਤਤਿਯੇ ਪੁਬ੍ਬਙ੍ਗਮਾਤਿ ਸਹਜਾਤਵਸੇਨ, ਉਪਨਿਸ੍ਸਯਵਸੇਨ ਚਾਤਿ ਦ੍ਵੀਹਿ ਆਕਾਰੇਹਿ ਪੁਬ੍ਬਙ੍ਗਮਾ ਪੁਰਸ੍ਸਰਾ ਪਧਾਨਕਾਰਣਂ. ਨ ਹਿ ਅਵਿਜ੍ਜਾਯ ਵਿਨਾ ਅਕੁਸਲੁਪ੍ਪਤ੍ਤਿ ਅਤ੍ਥਿ. ਸਮਾਪਤ੍ਤਿਯਾਤਿ ਸਮਾਪਜ੍ਜਨਾਯ ਸਭਾਵਪਟਿਲਾਭਾਯ, ਪਵਤ੍ਤਿਯਾਤਿ ਅਤ੍ਥੋ. ਤਤ੍ਥ ਅਕੁਸਲਪ੍ਪਵਤ੍ਤਿਯਾ ਆਦੀਨਵਪ੍ਪਟਿਚ੍ਛਾਦਨੇਨ ਅਯੋਨਿਸੋਮਨਸਿਕਾਰਸ੍ਸ ਪਚ੍ਚਯਭਾਵੇਨ ਅਪ੍ਪਹੀਨਭਾਵੇਨ ਚ ਅਕੁਸਲਧਮ੍ਮਾਨਂ ਉਪਨਿਸ੍ਸਯਭਾਵੋ ਦਿਸ੍ਸਤਿ.

ਏਵਂ ਬ੍ਯਾਧਿਮਰਣਾਦਿਦੁਕ੍ਖਸ੍ਸ ਅਧਿਟ੍ਠਾਨਭਾਵਤੋ ਸਬ੍ਬਾਪਿ ਗਤਿਯੋ ਇਧ ਦੁਗ੍ਗਤਿਯੋ. ਅਥ ਵਾ ਰਾਗਾਦਿਕਿਲੇਸੇਹਿ ਦੂਸਿਤਾ ਗਤਿਯੋ ਕਾਯਵਚੀਚਿਤ੍ਤਾਨਂ ਪਵਤ੍ਤਿਯੋਤਿ ਦੁਗ੍ਗਤਿਯੋ, ਕਾਯਵਚੀਮਨੋਦੁਚ੍ਚਰਿਤਾਨਿ. ਅਸ੍ਮਿਂ ਲੋਕੇਤਿ ਇਧ ਲੋਕੇ ਮਨੁਸ੍ਸਗਤਿਯਂ ਵਾ. ਪਰਮ੍ਹਿ ਚਾਤਿ ਤਤੋ ਅਞ੍ਞਾਸੁ ਗਤੀਸੁ. ਅਵਿਜ੍ਜਾਮੂਲਿਕਾ ਸਬ੍ਬਾਤਿ ਤਾ ਸਬ੍ਬਾਪਿ ਦੁਚ੍ਚਰਿਤਸ੍ਸ ਵਿਪਤ੍ਤਿਯੋ ਵੁਤ੍ਤਨਯੇਨ ਅਵਿਜ੍ਜਾਪੁਬ੍ਬਙ੍ਗਮਤ੍ਤਾ ਅਵਿਜ੍ਜਾਮੂਲਿਕਾ ਏਵ. ਇਚ੍ਛਾਲੋਭਸਮੁਸ੍ਸਯਾਤਿ ਅਸਮ੍ਪਤ੍ਤਵਿਸਯਪਰਿਯੇਸਨਲਕ੍ਖਣਾਯ ਇਚ੍ਛਾਯ, ਸਮ੍ਪਤ੍ਤਵਿਸਯਲੁਬ੍ਭਨਲਕ੍ਖਣੇਨ ਲੋਭੇਨ ਚ ਸਮੁਸ੍ਸਿਤਾ ਉਪਚਿਤਾਤਿ ਇਚ੍ਛਾਲੋਭਸਮੁਸ੍ਸਯਾ.

ਯਤੋਤਿ ਯਸ੍ਮਾ ਅਵਿਜ੍ਜਾਹੇਤੁ ਅਵਿਜ੍ਜਾਯ ਨਿਵੁਤੋ ਹੁਤ੍ਵਾ. ਪਾਪਿਚ੍ਛੋਤਿ ਅਵਿਜ੍ਜਾਯ ਪਟਿਚ੍ਛਾਦਿਤਤ੍ਤਾ ਪਾਪਿਚ੍ਛਤਾਯ ਆਦੀਨਵੇ ਅਪਸ੍ਸਨ੍ਤੋ ਅਸਨ੍ਤਗੁਣਸਮ੍ਭਾਵਨਵਸੇਨ ਕੋਹਞ੍ਞਾਦੀਨਿ ਕਰੋਨ੍ਤੋ ਪਾਪਿਚ੍ਛੋ, ਲੋਭੇਨੇਵ ਅਤ੍ਰਿਚ੍ਛਤਾਪਿ ਗਹਿਤਾਤਿ ਦਟ੍ਠਬ੍ਬਾ. ਅਨਾਦਰੋਤਿ ਲੋਕਾਧਿਪਤਿਨੋ ਓਤ੍ਤਪ੍ਪਸ੍ਸ ਅਭਾਵੇਨ ਸਬ੍ਰਹ੍ਮਚਾਰੀਸੁ ਆਦਰਰਹਿਤੋ. ਤਤੋਤਿ ਤਸ੍ਮਾ ਅਵਿਜ੍ਜਾਪਾਪਿਚ੍ਛਤਾਅਹਿਰਿਕਾਨੋਤ੍ਤਪ੍ਪਹੇਤੁ. ਪਸਵਤੀਤਿ ਕਾਯਦੁਚ੍ਚਰਿਤਾਦਿਭੇਦਂ ਪਾਪਂ ਉਪਚਿਨਤਿ. ਅਪਾਯਂ ਤੇਨ ਗਚ੍ਛਤੀਤਿ ਤੇਨ ਤਥਾ ਪਸੁਤੇਨ ਪਾਪੇਨ ਨਿਰਯਾਦਿਭੇਦਂ ਅਪਾਯਂ ਗਚ੍ਛਤਿ ਉਪਪਜ੍ਜਤਿ.

ਤਸ੍ਮਾਤਿ ਯਸ੍ਮਾ ਏਤੇ ਏਵਂ ਸਬ੍ਬਦੁਚ੍ਚਰਿਤਮੂਲਭੂਤਾ ਸਬ੍ਬਦੁਗ੍ਗਤਿਪਰਿਕ੍ਕਿਲੇਸਹੇਤੁਭੂਤਾ ਚ ਅਵਿਜ੍ਜਾਦਯੋ, ਤਸ੍ਮਾ ਇਚ੍ਛਞ੍ਚ, ਲੋਭਞ੍ਚ, ਅਵਿਜ੍ਜਞ੍ਚ, ਚਸਦ੍ਦੇਨ ਅਹਿਰਿਕਾਨੋਤ੍ਤਪ੍ਪਞ੍ਚ ਵਿਰਾਜਯਂ ਸਮੁਚ੍ਛੇਦਵਸੇਨ ਪਜਹਂ. ਕਥਂ ਵਿਰਾਜੇਤੀਤਿ ਆਹ? ਵਿਜ੍ਜਂ ਉਪ੍ਪਾਦਯਨ੍ਤਿ, ਵਿਪਸ੍ਸਨਾਪਟਿਪਾਟਿਯਾ ਚ, ਮਗ੍ਗਪਟਿਪਾਟਿਯਾ ਚ, ਉਸ੍ਸਕ੍ਕਿਤ੍ਵਾ ਅਰਹਤ੍ਤਮਗ੍ਗਵਿਜ੍ਜਂ ਅਤ੍ਤਨੋ ਸਨ੍ਤਾਨੇ ਉਪ੍ਪਾਦਯਨ੍ਤੋ. ਸਬ੍ਬਾ ਦੁਗ੍ਗਤਿਯੋਤਿ ਸਬ੍ਬਾਪਿ ਦੁਚ੍ਚਰਿਤਸਙ੍ਖਾਤਾ ਦੁਗ੍ਗਤਿਯੋ, ਵਟ੍ਟਦੁਕ੍ਖਸ੍ਸ ਵਾ ਅਧਿਟ੍ਠਾਨਭਾਵਤੋ ਦੁਕ੍ਖਾ, ਸਬ੍ਬਾ ਪਞ੍ਚਪਿ ਗਤਿਯੋ ਜਹੇ ਪਜਹੇਯ੍ਯ ਸਮਤਿਕ੍ਕਮੇਯ੍ਯ. ਕਿਲੇਸਵਟ੍ਟਪ੍ਪਹਾਨੇਨੇਵ ਹਿ ਕਮ੍ਮਵਟ੍ਟਂ ਵਿਪਾਕਵਟ੍ਟਞ੍ਚ ਪਹੀਨਂ ਹੋਤੀਤਿ.

ਤਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਪਠਮਭਾਣਵਾਰਵਣ੍ਣਨਾ ਨਿਟ੍ਠਿਤਾ.