੪. ਪਞ੍ਞਾਪਰਿਹੀਨਸੁਤ੍ਤਵਣ੍ਣਨਾ

੪੧. ਚਤੁਤ੍ਥੇ ਸੁਪਰਿਹੀਨਾਤਿ ਸੁਟ੍ਠੁ ਪਰਿਹੀਨਾ. ਯੇ ਅਰਿਯਾਯ ਪਞ੍ਞਾਯ ਪਰਿਹੀਨਾਤਿ ਯੇ ਸਤ੍ਤਾ ਪਞ੍ਚਨ੍ਨਂ ਖਨ੍ਧਾਨਂ ਉਦਯਬ੍ਬਯਪਟਿਵਿਜ੍ਝਨੇਨ ਚਤੁਸਚ੍ਚਪਟਿਵਿਜ੍ਝਨੇਨ ਚ ਕਿਲੇਸੇਹਿ ਆਰਕਾ ਠਿਤਤ੍ਤਾ ਅਰਿਯਾਯ ਪਰਿਸੁਦ੍ਧਾਯ ਵਿਪਸ੍ਸਨਾਪਞ੍ਞਾਯ ਚ ਮਗ੍ਗਪਞ੍ਞਾਯ ਚ ਪਰਿਹੀਨਾ, ਤੇ ਲੋਕਿਯਲੋਕੁਤ੍ਤਰਾਹਿ ਸਮ੍ਪਤ੍ਤੀਹਿ ਅਤਿਵਿਯ ਪਰਿਹੀਨਾ ਮਹਾਜਾਨਿਕਾ. ਕੇ ਪਨ ਤੇਤਿ? ਯੇ ਕਮ੍ਮਾਵਰਣੇਨ ਸਮਨ੍ਨਾਗਤਾ. ਤੇ ਹਿ ਮਿਚ੍ਛਤ੍ਤਨਿਯਤਭਾਵਤੋ ਏਕਨ੍ਤੇਨ ਪਰਿਹੀਨਾ ਅਪਰਿਪੁਣ੍ਣਾ ਮਹਾਜਾਨਿਕਾ. ਤੇਨਾਹ ‘‘ਦੁਗ੍ਗਤਿ ਪਾਟਿਕਙ੍ਖਾ’’ਤਿ. ਵਿਪਾਕਾਵਰਣਸਮਙ੍ਗਿਨੋਪਿ ਪਰਿਹੀਨਾ. ਅਥ ਵਾ ਸੁਕ੍ਕਪਕ੍ਖੇ ਅਪਰਿਹੀਨਾ ਨਾਮ ਤਿਵਿਧਾਵਰਣਵਿਰਹਿਤਾ ਸਮ੍ਮਾਦਿਟ੍ਠਿਕਾ ਕਮ੍ਮਸ੍ਸਕਤਞਾਣੇਨ ਚ ਸਮਨ੍ਨਾਗਤਾ. ਸੇਸਂ ਵੁਤ੍ਤਨਯਾਨੁਸਾਰੇਨ ਵੇਦਿਤਬ੍ਬਂ.

ਗਾਥਾਸੁ ਪਞ੍ਞਾਯਾਤਿ ਨਿਸ੍ਸਕ੍ਕਵਚਨਂ, ਵਿਪਸ੍ਸਨਾਞਾਣਤੋ ਮਗ੍ਗਞਾਣਤੋ ਚ ਪਰਿਹਾਨੇਨਾਤਿ. ਸਾਮਿਵਚਨਂ ਵਾ ਏਤਂ, ਯਥਾਵੁਤ੍ਤਞਾਣਸ੍ਸ ਪਰਿਹਾਨੇਨਾਤਿ, ਉਪ੍ਪਾਦੇਤਬ੍ਬਸ੍ਸ ਅਨੁਪ੍ਪਾਦਨਮੇਵ ਚੇਤ੍ਥ ਪਰਿਹਾਨਂ. ਨਿਵਿਟ੍ਠਂ ਨਾਮਰੂਪਸ੍ਮਿਨ੍ਤਿ ਨਾਮਰੂਪੇ ਉਪਾਦਾਨਕ੍ਖਨ੍ਧਪਞ੍ਚਕੇ ‘‘ਏਤਂ ਮਮਾ’’ਤਿਆਦਿਨਾ ਤਣ੍ਹਾਦਿਟ੍ਠਿਵਸੇਨ ਅਭਿਨਿਵਿਟ੍ਠਂ ਅਜ੍ਝੋਸਿਤਂ, ਤਤੋ ਏਵ ਇਦਂ ਸਚ੍ਚਨ੍ਤਿ ਮਞ੍ਞਤੀਤਿ ‘‘ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ ਮਞ੍ਞਤਿ. ‘‘ਸਦੇਵਕੇ ਲੋਕੇ’’ਤਿ ਵਿਭਤ੍ਤਿ ਪਰਿਣਾਮੇਤਬ੍ਬਾ.

ਏਵਂ ਪਠਮਗਾਥਾਯ ਸਂਕਿਲੇਸਪਕ੍ਖਂ ਦਸ੍ਸੇਤ੍ਵਾ ਇਦਾਨਿ ਯਸ੍ਸਾ ਅਨੁਪ੍ਪਤ੍ਤਿਯਾ ਨਾਮਰੂਪਸ੍ਮਿਂ ਮਞ੍ਞਨਾਭਿਨਿਵੇਸੇਹਿ ਕਿਲੇਸਵਟ੍ਟਂ ਵਤ੍ਤਤਿ, ਤਸ੍ਸਾ ਉਪ੍ਪਤ੍ਤਿਯਾ ਵਟ੍ਟਸ੍ਸ ਉਪਚ੍ਛੇਦੋਤਿ ਪਞ੍ਞਾਯ ਆਨੁਭਾਵਂ ਪਕਾਸੇਨ੍ਤੋ ‘‘ਪਞ੍ਞਾ ਹਿ ਸੇਟ੍ਠਾ ਲੋਕਸ੍ਮਿ’’ਨ੍ਤਿ ਗਾਥਮਾਹ.

ਤਤ੍ਥ ਲੋਕਸ੍ਮਿਨ੍ਤਿ ਸਙ੍ਖਾਰਲੋਕਸ੍ਮਿਂ. ਸਮ੍ਮਾਸਮ੍ਬੁਦ੍ਧੋ ਵਿਯ ਸਤ੍ਤੇਸੁ, ਸਙ੍ਖਾਰੇਸੁ ਪਞ੍ਞਾਸਦਿਸੋ ਧਮ੍ਮੋ ਨਤ੍ਥਿ. ਪਞ੍ਞੁਤ੍ਤਰਾ ਹਿ ਕੁਸਲਾ ਧਮ੍ਮਾ, ਪਞ੍ਞਾਯ ਚ ਸਿਦ੍ਧਾਯ ਸਬ੍ਬੇ ਅਨਵਜ੍ਜਧਮ੍ਮਾ ਸਿਦ੍ਧਾ ਏਵ ਹੋਨ੍ਤਿ. ਤਥਾ ਹਿ ਵੁਤ੍ਤਂ ‘‘ਸਮ੍ਮਾਦਿਟ੍ਠਿਸ੍ਸ ਸਮ੍ਮਾਸਙ੍ਕਪ੍ਪੋ ਪਹੋਤੀ’’ਤਿਆਦਿ (ਮ. ਨਿ. ੩.੧੪੧; ਸਂ. ਨਿ. ੫.੧). ਯਾ ਪਨੇਤ੍ਥ ਪਞ੍ਞਾ ਅਧਿਪ੍ਪੇਤਾ, ਸਾ ਸੇਟ੍ਠਾਤਿ ਥੋਮਿਤਾ. ਯਥਾ ਚ ਸਾ ਪਵਤ੍ਤਤਿ, ਤਂ ਦਸ੍ਸੇਤੁਂ ‘‘ਯਾਯਂ ਨਿਬ੍ਬੇਧਗਾਮਿਨੀ’’ਤਿਆਦਿ ਵੁਤ੍ਤਂ. ਤਸ੍ਸਤ੍ਥੋ – ਯਾ ਅਯਂ ਪਞ੍ਞਾ ਅਨਿਬ੍ਬਿਦ੍ਧਪੁਬ੍ਬਂ ਅਪਦਾਲਿਤਪੁਬ੍ਬਂ ਲੋਭਕ੍ਖਨ੍ਧਾਦਿਂ ਨਿਬ੍ਬਿਜ੍ਝਨ੍ਤੀ ਪਦਾਲੇਨ੍ਤੀ ਗਚ੍ਛਤਿ ਪਵਤ੍ਤਤੀਤਿ ਨਿਬ੍ਬੇਧਗਾਮਿਨੀ, ਯਾਯ ਚ ਤਸ੍ਮਿਂ ਤਸ੍ਮਿਂ ਭਵਯੋਨਿਗਤਿਵਿਞ੍ਞਾਣਟ੍ਠਿਤਿਸਤ੍ਤਾਵਾਸੇਸੁ ਸਤ੍ਤਨਿਕਾਯੇਸੁ ਖਨ੍ਧਾਨਂ ਪਠਮਾਭਿਨਿਬ੍ਬਤ੍ਤਿਸਙ੍ਖਾਤਾਯ ਜਾਤਿਯਾ ਤਂਨਿਮਿਤ੍ਤਸ੍ਸ ਚ ਕਮ੍ਮਭਵਸ੍ਸ ਪਰਿਕ੍ਖਯਂ ਪਰਿਯੋਸਾਨਂ ਨਿਬ੍ਬਾਨਂ ਅਰਹਤ੍ਤਞ੍ਚ ਸਮ੍ਮਾ ਅਵਿਪਰੀਤਂ ਜਾਨਾਤਿ ਸਚ੍ਛਿਕਰੋਤਿ, ਅਯਂ ਸਹਵਿਪਸ੍ਸਨਾ ਮਗ੍ਗਪਞ੍ਞਾ ਸੇਟ੍ਠਾ ਲੋਕਸ੍ਮਿਨ੍ਤਿ.

ਇਦਾਨਿ ਯਥਾਵੁਤ੍ਤਪਞ੍ਞਾਨੁਭਾਵਸਮ੍ਪਨ੍ਨੇ ਖੀਣਾਸਵੇ ਅਭਿਤ੍ਥਵਨ੍ਤੋ ‘‘ਤੇਸਂ ਦੇਵਾ ਮਨੁਸ੍ਸਾ ਚਾ’’ਤਿ ਓਸਾਨਗਾਥਮਾਹ. ਤਸ੍ਸਤ੍ਥੋ – ਤੇਸਂ ਚਤੂਸੁ ਅਰਿਯਸਚ੍ਚੇਸੁ ਪਰਿਞ੍ਞਾਦੀਨਂ ਸੋਲ਼ਸਨ੍ਨਂ ਕਿਚ੍ਚਾਨਂ ਨਿਟ੍ਠਿਤਤ੍ਤਾ ਚਤੁਸਚ੍ਚਸਮ੍ਬੋਧੇਨ ਸਮ੍ਬੁਦ੍ਧਾਨਂ, ਸਤਿਵੇਪੁਲ੍ਲਪ੍ਪਤ੍ਤਿਯਾ ਸਤਿਮਤਂ, ਵੁਤ੍ਤਨਯੇਨ ਸਮੁਗ੍ਘਾਤਿਤਸਮ੍ਮੋਹਤ੍ਤਾ ਪਞ੍ਞਾਵੇਪੁਲ੍ਲਪ੍ਪਤ੍ਤਿਯਾ ਹਾਸਪਞ੍ਞਾਨਂ, ਪੁਬ੍ਬਭਾਗੇ ਵਾ ਸੀਲਾਦਿਪਾਰਿਪੂਰਿਤੋ ਪਟ੍ਠਾਯ ਯਾਵ ਨਿਬ੍ਬਾਨਸਚ੍ਛਿਕਿਰਿਯਾਯ ਹਾਸਵੇਦਤੁਟ੍ਠਿਪਾਮੋਜ੍ਜਬਹੁਲਤਾਯ ਹਾਸਪਞ੍ਞਾਨਂ, ਸਬ੍ਬਸੋ ਪਰਿਕ੍ਖੀਣਭਵਸਂਯੋਜਨਤ੍ਤਾ ਅਨ੍ਤਿਮਸਰੀਰਧਾਰੀਨਂ ਖੀਣਾਸਵਾਨਂ ਦੇਵਾ ਮਨੁਸ੍ਸਾ ਚ ਪਿਹਯਨ੍ਤਿ ਪਿਯਾ ਹੋਨ੍ਤਿ, ਤਬ੍ਭਾਵਂ ਅਧਿਗਨ੍ਤੁਂ ਇਚ੍ਛਨ੍ਤਿ ‘‘ਅਹੋ ਪਞ੍ਞਾਨੁਭਾਵੋ, ਅਹੋ ਵਤ ਮਯਮ੍ਪਿ ਏਦਿਸਾ ਏਵਂ ਨਿਤ੍ਤਿਣ੍ਣਸਬ੍ਬਦੁਕ੍ਖਾ ਭਵੇਯ੍ਯਾਮਾ’’ਤਿ.

ਚਤੁਤ੍ਥਸੁਤ੍ਤਵਣ੍ਣਨਾ ਨਿਟ੍ਠਿਤਾ.