੩. ਤਤਿਯਵਗ੍ਗੋ

੧. ਪਸਨ੍ਨਚਿਤ੍ਤਸੁਤ੍ਤਵਣ੍ਣਨਾ

੨੧. ਤਤਿਯਵਗ੍ਗਸ੍ਸ ਪਠਮੇ ਪਸਨ੍ਨਚਿਤ੍ਤਨ੍ਤਿ ਰਤਨਤ੍ਤਯਸਦ੍ਧਾਯ ਕਮ੍ਮਫਲਸਦ੍ਧਾਯ ਚ ਪਸਨ੍ਨਮਾਨਸਂ. ਸੁਗਤਿਨ੍ਤਿ ਸੁਨ੍ਦਰਂ ਗਤਿਂ, ਸੁਖਸ੍ਸ ਵਾ ਗਤਿਨ੍ਤਿ ਸੁਗਤਿਂ. ਸਗ੍ਗਨ੍ਤਿ ਰੂਪਾਦਿਸਮ੍ਪਤ੍ਤੀਹਿ ਸੁਟ੍ਠੁ ਅਗ੍ਗਨ੍ਤਿ ਸਗ੍ਗਂ. ਲੋਕਨ੍ਤਿ ਲੋਕਿਯਨ੍ਤਿ ਏਤ੍ਥ ਪੁਞ੍ਞਪਾਪਫਲਾਨਿ, ਲੁਜ੍ਜਨਟ੍ਠੇਨੇਵ ਵਾ ਲੋਕਂ. ਏਤ੍ਥ ਚ ਸੁਗਤਿਗ੍ਗਹਣੇਨ ਮਨੁਸ੍ਸਗਤਿਪਿ ਸਙ੍ਗਯ੍ਹਤਿ, ਸਗ੍ਗਗ੍ਗਹਣੇਨ ਦੇਵਗਤਿ ਏਵ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

ਪਠਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਮੇਤ੍ਤਸੁਤ੍ਤਵਣ੍ਣਨਾ

੨੨. ਦੁਤਿਯੇ ਮਾ, ਭਿਕ੍ਖਵੇ, ਪੁਞ੍ਞਾਨਨ੍ਤਿ ਏਤ੍ਥ ਮਾਤਿ ਪਟਿਸੇਧੇ ਨਿਪਾਤੋ. ਪੁਞ੍ਞਸਦ੍ਦੋ ‘‘ਕੁਸਲਾਨਂ, ਭਿਕ੍ਖਵੇ, ਧਮ੍ਮਾਨਂ ਸਮਾਦਾਨਹੇਤੁ ਏਵਮਿਦਂ ਪੁਞ੍ਞਂ ਪਵਡ੍ਢਤੀ’’ਤਿਆਦੀਸੁ (ਦੀ. ਨਿ. ੩.੩੮੦) ਪੁਞ੍ਞਫਲੇ ਆਗਤੋ. ‘‘ਅਵਿਜ੍ਜਾਗਤੋਯਂ, ਭਿਕ੍ਖਵੇ, ਪੁਰਿਸਪੁਗ੍ਗਲੋ ਪੁਞ੍ਞਞ੍ਚੇ ਸਙ੍ਖਾਰਂ ਅਭਿਸਙ੍ਖਰੋਤੀ’’ਤਿਆਦੀਸੁ (ਸਂ. ਨਿ. ੨.੫੧) ਕਾਮਰੂਪਾਵਚਰਸੁਚਰਿਤੇ. ‘‘ਪੁਞ੍ਞੂਪਗਂ ਭਵਤਿ ਵਿਞ੍ਞਾਣ’’ਨ੍ਤਿਆਦੀਸੁ ਸੁਗਤਿਵਿਸੇਸਭੂਤੇ ਉਪਪਤ੍ਤਿਭਵੇ. ‘‘ਤੀਣਿਮਾਨਿ, ਭਿਕ੍ਖਵੇ, ਪੁਞ੍ਞਕਿਰਿਯਵਤ੍ਥੂਨਿ – ਦਾਨਮਯਂ ਪੁਞ੍ਞਕਿਰਿਯਵਤ੍ਥੁ, ਸੀਲਮਯਂ ਪੁਞ੍ਞਕਿਰਿਯਵਤ੍ਥੁ, ਭਾਵਨਾਮਯਂ ਪੁਞ੍ਞਕਿਰਿਯਵਤ੍ਥੂ’’ਤਿਆਦੀਸੁ (ਇਤਿਵੁ. ੬੦; ਅ. ਨਿ. ੮.੩੬) ਕੁਸਲਚੇਤਨਾਯਂ. ਇਧ ਪਨ ਤੇਭੂਮਕਕੁਸਲਧਮ੍ਮੇ ਵੇਦਿਤਬ੍ਬੋ. ਭਾਯਿਤ੍ਥਾਤਿ ਏਤ੍ਥ ਦੁਵਿਧਂ ਭਯਂ ਞਾਣਭਯਂ, ਸਾਰਜ੍ਜਭਯਨ੍ਤਿ. ਤਤ੍ਥ ‘‘ਯੇਪਿ ਤੇ, ਭਿਕ੍ਖਵੇ, ਦੇਵਾ ਦੀਘਾਯੁਕਾ ਵਣ੍ਣਵਨ੍ਤੋ ਸੁਖਬਹੁਲਾ ਉਚ੍ਚੇਸੁ ਵਿਮਾਨੇਸੁ ਚਿਰਟ੍ਠਿਤਿਕਾ, ਤੇਪਿ ਤਥਾਗਤਸ੍ਸ ਧਮ੍ਮਦੇਸਨਂ ਸੁਤ੍ਵਾ ਯੇਭੁਯ੍ਯੇਨ ਭਯਂ ਸਂਵੇਗਂ ਸਨ੍ਤਾਸਂ ਆਪਜ੍ਜਨ੍ਤੀ’’ਤਿਆਦੀਸੁ (ਅ. ਨਿ. ੪.੩੩) ਆਗਤਂ ਞਾਣਭਯਂ. ‘‘ਅਹੁਦੇਵ ਭਯਂ, ਅਹੁ ਛਮ੍ਭਿਤਤ੍ਤਂ, ਅਹੁ ਲੋਮਹਂਸੋ’’ਤਿਆਦੀਸੁ (ਦੀ. ਨਿ. ੨.੩੧੮) ਆਗਤਂ ਸਾਰਜ੍ਜਭਯਂ. ਇਧਾਪਿ ਸਾਰਜ੍ਜਭਯਮੇਵ. ਅਯਞ੍ਹੇਤ੍ਥ ਅਤ੍ਥੋ – ਭਿਕ੍ਖਵੇ, ਦੀਘਰਤ੍ਤਂ ਕਾਯਵਚੀਸਂਯਮੋ ਵਤ੍ਤਪਟਿਵਤ੍ਤਪੂਰਣਂ ਏਕਾਸਨਂ, ਏਕਸੇਯ੍ਯਂ, ਇਨ੍ਦ੍ਰਿਯਦਮੋ, ਧੁਤਧਮ੍ਮੇਹਿ ਚਿਤ੍ਤਸ੍ਸ ਨਿਗ੍ਗਹੋ, ਸਤਿਸਮ੍ਪਜਞ੍ਞਂ, ਕਮ੍ਮਟ੍ਠਾਨਾਨੁਯੋਗਵਸੇਨ ਵੀਰਿਯਾਰਮ੍ਭੋਤਿ ਏਵਮਾਦੀਨਿ ਯਾਨਿ ਭਿਕ੍ਖੁਨਾ, ਨਿਰਨ੍ਤਰਂ ਪਵਤ੍ਤੇਤਬ੍ਬਾਨਿ ਪੁਞ੍ਞਾਨਿ, ਤੇਹਿ ਮਾ ਭਾਯਿਤ੍ਥ, ਮਾ ਭਯਂ ਸਨ੍ਤਾਸਂ ਆਪਜ੍ਜਿਤ੍ਥ, ਏਕਚ੍ਚਸ੍ਸ ਦਿਟ੍ਠਧਮ੍ਮਸੁਖਸ੍ਸ ਉਪਰੋਧਭਯੇਨ ਸਮ੍ਪਰਾਯਿਕਨਿਬ੍ਬਾਨਸੁਖਦਾਯਕੇਹਿ ਪੁਞ੍ਞੇਹਿ ਮਾ ਭਾਯਿਤ੍ਥਾਤਿ. ਨਿਸ੍ਸਕ੍ਕੇ ਹਿ ਇਦਂ ਸਾਮਿਵਚਨਂ.

ਇਦਾਨਿ ਤਤੋ ਅਭਾਯਿਤਬ੍ਬਭਾਵੇ ਕਾਰਣਂ ਦਸ੍ਸੇਨ੍ਤੋ ‘‘ਸੁਖਸ੍ਸੇਤ’’ਨ੍ਤਿਆਦਿਮਾਹ. ਤਤ੍ਥ ਸੁਖਸਦ੍ਦੋ ‘‘ਸੁਖੋ ਬੁਦ੍ਧਾਨਂ ਉਪ੍ਪਾਦੋ, ਸੁਖਾ ਵਿਰਾਗਤਾ ਲੋਕੇ’’ਤਿਆਦੀਸੁ (ਧ. ਪ. ੧੯੪) ਸੁਖਮੂਲੇ ਆਗਤੋ. ‘‘ਯਸ੍ਮਾ ਚ ਖੋ, ਮਹਾਲਿ, ਰੂਪਂ ਸੁਖਂ ਸੁਖਾਨੁਪਤਿਤਂ ਸੁਖਾਵਕ੍ਕਨ੍ਤ’’ਨ੍ਤਿਆਦੀਸੁ (ਸਂ. ਨਿ. ੩.੬੦) ਸੁਖਾਰਮ੍ਮਣੇ. ‘‘ਯਾਵਞ੍ਚਿਦਂ, ਭਿਕ੍ਖਵੇ, ਨ ਸੁਕਰਂ ਅਕ੍ਖਾਨੇਨ ਪਾਪੁਣਿਤੁਂ ਯਾਵ ਸੁਖਾ ਸਗ੍ਗਾ’’ਤਿਆਦੀਸੁ (ਮ. ਨਿ. ੩.੨੫੫) ਸੁਖਪਚ੍ਚਯਟ੍ਠਾਨੇ. ‘‘ਸੁਖੋ ਪੁਞ੍ਞਸ੍ਸ ਉਚ੍ਚਯੋ’’ਤਿਆਦੀਸੁ (ਧ. ਪ. ੧੧੮) ਸੁਖਹੇਤੁਮ੍ਹਿ. ‘‘ਦਿਟ੍ਠਧਮ੍ਮਸੁਖਵਿਹਾਰਾ ਏਤੇ ਧਮ੍ਮਾ’’ਤਿਆਦੀਸੁ (ਮ. ਨਿ. ੧.੮੨) ਅਬ੍ਯਾਪਜ੍ਜੇ. ‘‘ਨਿਬ੍ਬਾਨਂ ਪਰਮਂ ਸੁਖ’’ਨ੍ਤਿਆਦੀਸੁ (ਧ. ਪ. ੨੦੪; ਮ. ਨਿ. ੨.੨੧੫) ਨਿਬ੍ਬਾਨੇ. ‘‘ਸੁਖਸ੍ਸ ਚ ਪਹਾਨਾ’’ਤਿਆਦੀਸੁ (ਚੂਲ਼ਨਿ. ਖਗ੍ਗਵਿਸਾਣਸੁਤ੍ਤਨਿਦ੍ਦੇਸ ੧੨੫) ਸੁਖਵੇਦਨਾਯਂ. ‘‘ਅਦੁਕ੍ਖਮਸੁਖਂ ਸਨ੍ਤਂ, ਸੁਖਮਿਚ੍ਚੇਵ ਭਾਸਿਤ’’ਨ੍ਤਿਆਦੀਸੁ (ਸਂ. ਨਿ. ੪.੨੫੩; ਇਤਿਵੁ. ੫੩) ਉਪੇਕ੍ਖਾਵੇਦਨਾਯਂ. ‘‘ਦ੍ਵੇਪਿ ਮਯਾ, ਆਨਨ੍ਦ, ਵੇਦਨਾ ਵੁਤ੍ਤਾ ਪਰਿਯਾਯੇਨ ਸੁਖਾ ਵੇਦਨਾ, ਦੁਕ੍ਖਾ ਵੇਦਨਾ’’ਤਿਆਦੀਸੁ (ਮ. ਨਿ. ੨.੮੯) ਇਟ੍ਠਸੁਖੇ. ‘‘ਸੁਖੋ ਵਿਪਾਕੋ ਪੁਞ੍ਞਾਨ’’ਨ੍ਤਿਆਦੀਸੁ (ਪੇਟਕੋ. ੨੩) ਸੁਖਵਿਪਾਕੇ. ਇਧਾਪਿ ਇਟ੍ਠਵਿਪਾਕੇ ਏਵ ਦਟ੍ਠਬ੍ਬੋ. ਇਟ੍ਠਸ੍ਸਾਤਿਆਦੀਸੁ ਏਸਿਤਬ੍ਬਤੋ ਅਨਿਟ੍ਠਪਟਿਕ੍ਖੇਪਤੋ ਚ ਇਟ੍ਠਸ੍ਸ, ਕਮਨੀਯਤੋ ਮਨਸ੍ਮਿਞ੍ਚ ਕਮਨਤੋ ਪਵਿਸਨਤੋ ਕਨ੍ਤਸ੍ਸ, ਪਿਯਾਯਿਤਬ੍ਬਤੋ ਸਨ੍ਤਪ੍ਪਨਤੋ ਚ ਪਿਯਸ੍ਸ, ਮਾਨਨੀਯਤੋ ਮਨਸ੍ਸ ਪਵਡ੍ਢਨਤੋ ਚ ਮਨਾਪਸ੍ਸਾਤਿ ਅਤ੍ਥੋ ਵੇਦਿਤਬ੍ਬੋ. ਯਦਿਦਂ ਪੁਞ੍ਞਾਨੀਤਿ ‘‘ਪੁਞ੍ਞਾਨੀ’’ਤਿ ਯਦਿਦਂ ਵਚਨਂ, ਏਤਂ ਸੁਖਸ੍ਸ ਇਟ੍ਠਸ੍ਸ ਵਿਪਾਕਸ੍ਸ ਅਧਿਵਚਨਂ ਨਾਮਂ, ਸੁਖਮੇਵ ਤਂ ਯਦਿਦਂ ਪੁਞ੍ਞਨ੍ਤਿ ਫਲੇਨ ਕਾਰਣਸ੍ਸ ਅਭੇਦੂਪਚਾਰਂ ਵਦਤਿ. ਤੇਨ ਕਤੂਪਚਿਤਾਨਂ ਪੁਞ੍ਞਾਨਂ ਅਵਸ੍ਸਂਭਾਵਿਫਲਂ ਸੁਤ੍ਵਾ ਅਪ੍ਪਮਤ੍ਤੇਨ ਸਕ੍ਕਚ੍ਚਂ ਪੁਞ੍ਞਾਨਿ ਕਾਤਬ੍ਬਾਨੀਤਿ ਪੁਞ੍ਞਕਿਰਿਯਾਯਂ ਨਿਯੋਜੇਤਿ, ਆਦਰਞ੍ਚ ਨੇਸਂ ਤਤ੍ਥ ਉਪ੍ਪਾਦੇਤਿ.

ਇਦਾਨਿ ਅਤ੍ਤਨਾ ਸੁਨੇਤ੍ਤਕਾਲੇ ਕਤੇਨ ਪੁਞ੍ਞਕਮ੍ਮੇਨ ਦੀਘਰਤ੍ਤਂ ਪਚ੍ਚਨੁਭੂਤਂ ਭਵਨ੍ਤਰਪਟਿਚ੍ਛਨ੍ਨਂ ਉਲ਼ਾਰਤਮਂ ਪੁਞ੍ਞਵਿਪਾਕਂ ਉਦਾਹਰਿਤ੍ਵਾ ਤਮਤ੍ਥਂ ਪਾਕਟਂ ਕਰੋਨ੍ਤੋ ‘‘ਅਭਿਜਾਨਾਮਿ ਖੋ ਪਨਾਹ’’ਨ੍ਤਿਆਦਿਮਾਹ. ਤਤ੍ਥ ਅਭਿਜਾਨਾਮੀਤਿ ਅਭਿਵਿਸਿਟ੍ਠੇਨ ਞਾਣੇਨ ਜਾਨਾਮਿ, ਪਚ੍ਚਕ੍ਖਤੋ ਬੁਜ੍ਝਾਮਿ. ਦੀਘਰਤ੍ਤਨ੍ਤਿ ਚਿਰਕਾਲਂ. ਪੁਞ੍ਞਾਨਨ੍ਤਿ ਦਾਨਾਦਿਕੁਸਲਧਮ੍ਮਾਨਂ. ਸਤ੍ਤ ਵਸ੍ਸਾਨੀਤਿ ਸਤ੍ਤ ਸਂਵਚ੍ਛਰਾਨਿ. ਮੇਤ੍ਤਚਿਤ੍ਤਨ੍ਤਿ ਮਿਜ੍ਜਤੀਤਿ ਮੇਤ੍ਤਾ, ਸਿਨਿਯ੍ਹਤੀਤਿ ਅਤ੍ਥੋ. ਮਿਤ੍ਤੇ ਭਵਾ, ਮਿਤ੍ਤਸ੍ਸ ਵਾ ਏਸਾ ਪਵਤ੍ਤੀਤਿਪਿ ਮੇਤ੍ਤਾ. ਲਕ੍ਖਣਾਦਿਤੋ ਪਨ ਹਿਤਾਕਾਰਪ੍ਪਵਤ੍ਤਿਲਕ੍ਖਣਾ, ਹਿਤੂਪਸਂਹਾਰਰਸਾ, ਆਘਾਤਵਿਨਯਪਚ੍ਚੁਪਟ੍ਠਾਨਾ, ਸਤ੍ਤਾਨਂ ਮਨਾਪਭਾਵਦਸ੍ਸਨਪਦਟ੍ਠਾਨਾ. ਬ੍ਯਾਪਾਦੂਪਸਮੋ ਏਤਿਸ੍ਸਾ ਸਮ੍ਪਤ੍ਤਿ, ਸਿਨੇਹਾਸਮ੍ਭਵੋ ਵਿਪਤ੍ਤਿ. ਸਾ ਏਤਸ੍ਸ ਅਤ੍ਥੀਤਿ ਮੇਤ੍ਤਚਿਤ੍ਤਂ. ਭਾਵੇਤ੍ਵਾਤਿ ਮੇਤ੍ਤਾਸਹਗਤਂ ਚਿਤ੍ਤਂ, ਚਿਤ੍ਤਸੀਸੇਨ ਸਮਾਧਿ ਵੁਤ੍ਤੋਤਿ ਮੇਤ੍ਤਾਸਮਾਧਿਂ ਮੇਤ੍ਤਾਬ੍ਰਹ੍ਮਵਿਹਾਰਂ ਉਪ੍ਪਾਦੇਤ੍ਵਾ ਚੇਵ ਵਡ੍ਢੇਤ੍ਵਾ ਚ. ਸਤ੍ਤ ਸਂਵਟ੍ਟਵਿਵਟ੍ਟਕਪ੍ਪੇਤਿ ਸਤ੍ਤ ਮਹਾਕਪ੍ਪੇ. ਸਂਵਟ੍ਟ-ਵਿਵਟ੍ਟਗ੍ਗਹਣੇਨੇਵ ਹਿ ਸਂਵਟ੍ਟਟ੍ਠਾਯਿ-ਵਿਵਟ੍ਟਟ੍ਠਾਯਿਨੋਪਿ ਗਹਿਤਾ. ਇਮਂ ਲੋਕਨ੍ਤਿ ਕਾਮਲੋਕਂ. ਸਂਵਟ੍ਟਮਾਨੇ ਸੁਦਨ੍ਤਿ ਸਂਵਟ੍ਟਮਾਨੇ. ਸੁਦਨ੍ਤਿ ਨਿਪਾਤਮਤ੍ਤਂ ਵਿਨਸ੍ਸਮਾਨੇਤਿ ਅਤ੍ਥੋ. ‘‘ਸਂਵਤ੍ਤਮਾਨੇ ਸੁਦ’’ਨ੍ਤਿ ਚ ਪਠਨ੍ਤਿ. ਕਪ੍ਪੇਤਿ ਕਾਲੇ. ਕਪ੍ਪਸੀਸੇਨ ਹਿ ਕਾਲੋ ਵੁਤ੍ਤੋ. ਕਾਲੇ ਖੀਯਮਾਨੇ ਕਪ੍ਪੋਪਿ ਖੀਯਤੇਵ. ਯਥਾਹ –

‘‘ਕਾਲੋ ਘਸਤਿ ਭੂਤਾਨਿ, ਸਬ੍ਬਾਨੇਵ ਸਹਤ੍ਤਨਾ’’ਤਿ. (ਜਾ. ੧.੨.੧੯੦);

‘‘ਆਭਸ੍ਸਰੂਪਗੋ ਹੋਮੀ’’ਤਿ ਵੁਤ੍ਤਤ੍ਤਾ ਤੇਜੋਸਂਵਟ੍ਟਵਸੇਨੇਤ੍ਥ ਕਪ੍ਪਵੁਟ੍ਠਾਨਂ ਵੇਦਿਤਬ੍ਬਂ. ਆਭਸ੍ਸਰੂਪਗੋਤਿ ਤਤ੍ਥ ਪਟਿਸਨ੍ਧਿਗ੍ਗਹਣਵਸੇਨ ਆਭਸ੍ਸਰਬ੍ਰਹ੍ਮਲੋਕਂ ਉਪਗਚ੍ਛਾਮੀਤਿ ਆਭਸ੍ਸਰੂਪਗੋ ਹੋਮਿ. ਵਿਵਟ੍ਟਮਾਨੇਤਿ ਸਣ੍ਠਹਮਾਨੇ, ਜਾਯਮਾਨੇਤਿ ਅਤ੍ਥੋ. ਸੁਞ੍ਞਂ ਬ੍ਰਹ੍ਮਵਿਮਾਨਂ ਉਪਪਜ੍ਜਾਮੀਤਿ ਕਸ੍ਸਚਿ ਸਤ੍ਤਸ੍ਸ ਤਤ੍ਥ ਨਿਬ੍ਬਤ੍ਤਸ੍ਸ ਅਭਾਵਤੋ ਸੁਞ੍ਞਂ, ਯਂ ਪਠਮਜ੍ਝਾਨਭੂਮਿਸਙ੍ਖਾਤਂ ਬ੍ਰਹ੍ਮਵਿਮਾਨਂ ਆਦਿਤੋ ਨਿਬ੍ਬਤ੍ਤਂ, ਤਂ ਪਟਿਸਨ੍ਧਿਗ੍ਗਹਣਵਸੇਨ ਉਪਪਜ੍ਜਾਮਿ ਉਪੇਮਿ. ਬ੍ਰਹ੍ਮਾਤਿ ਕਾਮਾਵਚਰਸਤ੍ਤੇਹਿ ਸੇਟ੍ਠਟ੍ਠੇਨ ਤਥਾ ਤਥਾ ਬ੍ਰੂਹਿਤਗੁਣਤਾਯ ਬ੍ਰਹ੍ਮਵਿਹਾਰਤੋ ਨਿਬ੍ਬਤ੍ਤਟ੍ਠੇਨ ਚ ਬ੍ਰਹ੍ਮਾ. ਬ੍ਰਹ੍ਮਪਾਰਿਸਜ੍ਜਬ੍ਰਹ੍ਮਪੁਰੋਹਿਤੇਹਿ ਮਹਨ੍ਤੋ ਬ੍ਰਹ੍ਮਾਤਿ ਮਹਾਬ੍ਰਹ੍ਮਾ. ਤਤੋ ਏਵ ਤੇ ਅਭਿਭਵਿਤ੍ਵਾ ਠਿਤਤ੍ਤਾ ਅਭਿਭੂ. ਤੇਹਿ ਕੇਨਚਿ ਗੁਣੇਨ ਨ ਅਭਿਭੂਤੋਤਿ ਅਨਭਿਭੂਤੋ. ਅਞ੍ਞਦਤ੍ਥੂਤਿ ਏਕਂਸਵਚਨੇ ਨਿਪਾਤੋ. ਦਸੋਤਿ ਦਸ੍ਸਨਸੀਲੋ, ਸੋ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਦਸ੍ਸਨਸਮਤ੍ਥੋ, ਅਭਿਞ੍ਞਾਣੇਨ ਪਸ੍ਸਿਤਬ੍ਬਂ ਪਸ੍ਸਾਮੀਤਿ ਅਤ੍ਥੋ. ਸੇਸਬ੍ਰਹ੍ਮਾਨਂ ਇਦ੍ਧਿਪਾਦਭਾਵਨਾਬਲੇਨ ਅਤ੍ਤਨੋ ਚਿਤ੍ਤਞ੍ਚ ਮਮ ਵਸੇ ਵਤ੍ਤੇਮੀਤਿ ਵਸਵਤ੍ਤੀ ਹੋਮੀਤਿ ਯੋਜੇਤਬ੍ਬਂ. ਤਦਾ ਕਿਰ ਬੋਧਿਸਤ੍ਤੋ ਅਟ੍ਠਸਮਾਪਤ੍ਤਿਲਾਭੀਪਿ ਸਮਾਨੋ ਤਥਾ ਸਤ੍ਤਹਿਤਂ ਅਤ੍ਤਨੋ ਪਾਰਮਿਪਰਿਪੂਰਣਞ੍ਚ ਓਲੋਕੇਨ੍ਤੋ ਤਾਸੁ ਏਵ ਦ੍ਵੀਸੁ ਝਾਨਭੂਮੀਸੁ ਨਿਕਨ੍ਤਿਂ ਉਪ੍ਪਾਦੇਤ੍ਵਾ ਮੇਤ੍ਤਾਬ੍ਰਹ੍ਮਵਿਹਾਰਵਸੇਨ ਅਪਰਾਪਰਂ ਸਂਸਰਿ. ਤੇਨ ਵੁਤ੍ਤਂ ‘‘ਸਤ੍ਤਵਸ੍ਸਾਨਿ…ਪੇ… ਵਸਵਤ੍ਤੀ’’ਤਿ.

ਏਵਂ ਭਗਵਾ ਰੂਪਾਵਚਰਪੁਞ੍ਞਸ੍ਸ ਵਿਪਾਕਮਹਨ੍ਤਤਂ ਪਕਾਸੇਤ੍ਵਾ ਇਦਾਨਿ ਕਾਮਾਵਚਰਪੁਞ੍ਞਸ੍ਸਾਪਿ ਤਂ ਦਸ੍ਸੇਨ੍ਤੋ ‘‘ਛਤ੍ਤਿਂਸਕ੍ਖਤ੍ਤੁ’’ਨ੍ਤਿਆਦਿਮਾਹ. ਤਤ੍ਥ ਸਕ੍ਕੋ ਅਹੋਸਿਨ੍ਤਿ ਛਤ੍ਤਿਂਸ ਵਾਰੇ ਅਞ੍ਞਤ੍ਥ ਅਨੁਪਪਜ੍ਜਿਤ੍ਵਾ ਨਿਰਨ੍ਤਰਂ ਸਕ੍ਕੋ ਦੇਵਾਨਮਿਨ੍ਦੋ ਤਾਵਤਿਂਸਦੇਵਰਾਜਾ ਅਹੋਸਿ. ਰਾਜਾ ਅਹੋਸਿਨ੍ਤਿਆਦੀਸੁ ਚਤੂਹਿ ਅਚ੍ਛਰਿਯਧਮ੍ਮੇਹਿ ਚਤੂਹਿ ਚ ਸਙ੍ਗਹਵਤ੍ਥੂਹਿ ਲੋਕਂ ਰਞ੍ਜੇਤੀਤਿ ਰਾਜਾ. ਚਕ੍ਕਰਤਨਂ ਵਤ੍ਤੇਤਿ, ਚਤੂਹਿ ਸਮ੍ਪਤ੍ਤਿਚਕ੍ਕੇਹਿ ਵਤ੍ਤਤਿ, ਤੇਹਿ ਚ ਪਰਂ ਵਤ੍ਤੇਤਿ, ਪਰਹਿਤਾਯ ਚ ਇਰਿਯਾਪਥਚਕ੍ਕਾਨਂ ਵਤ੍ਤੋ ਏਤਸ੍ਮਿਂ ਅਤ੍ਥੀਤਿ ਚਕ੍ਕਵਤ੍ਤੀ. ਰਾਜਾਤਿ ਚੇਤ੍ਥ ਸਾਮਞ੍ਞਂ, ਚਕ੍ਕਵਤ੍ਤੀਤਿ ਵਿਸੇਸਂ. ਧਮ੍ਮੇਨ ਚਰਤੀਤਿ ਧਮ੍ਮਿਕੋ. ਞਾਯੇਨ ਸਮੇਨ ਵਤ੍ਤਤੀਤਿ ਅਤ੍ਥੋ. ਧਮ੍ਮੇਨੇਵ ਰਜ੍ਜਂ ਲਭਿਤ੍ਵਾ ਰਾਜਾ ਜਾਤੋਤਿ ਧਮ੍ਮਰਾਜਾ. ਪਰਹਿਤਧਮ੍ਮਚਰਣੇਨ ਵਾ ਧਮ੍ਮਿਕੋ, ਅਤ੍ਤਹਿਤਧਮ੍ਮਚਰਣੇਨ ਧਮ੍ਮਰਾਜਾ, ਚਤੁਰਨ੍ਤਾਯ ਇਸ੍ਸਰੋਤਿ ਚਾਤੁਰਨ੍ਤੋ, ਚਤੁਸਮੁਦ੍ਦਨ੍ਤਾਯ ਚਤੁਬ੍ਬਿਧਦੀਪਵਿਭੂਸਿਤਾਯ ਚ ਪਥਵਿਯਾ ਇਸ੍ਸਰੋਤਿ ਅਤ੍ਥੋ. ਅਜ੍ਝਤ੍ਤਂ ਕੋਪਾਦਿਪਚ੍ਚਤ੍ਥਿਕੇ, ਬਹਿਦ੍ਧਾ ਚ ਸਬ੍ਬਰਾਜਾਨੋ ਅਦਣ੍ਡੇਨ ਅਸਤ੍ਥੇਨ ਵਿਜੇਸੀਤਿ ਵਿਜਿਤਾਵੀ. ਜਨਪਦੇ ਥਾਵਰਭਾਵਂ ਧੁਵਭਾਵਂ ਪਤ੍ਤੋ, ਨ ਸਕ੍ਕਾ ਕੇਨਚਿ ਤਤੋ ਚਾਲੇਤੁਂ ਜਨਪਦੋ ਵਾ ਤਮ੍ਹਿ ਥਾਵਰਿਯਪ੍ਪਤ੍ਤੋ ਅਨੁਯੁਤ੍ਤੋ ਸਕਮ੍ਮਨਿਰਤੋ ਅਚਲੋ ਅਸਮ੍ਪਵੇਧੀਤਿ ਜਨਪਦਤ੍ਥਾਵਰਿਯਪ੍ਪਤ੍ਤੋ.

ਚਕ੍ਕਰਤਨਂ, ਹਤ੍ਥਿਰਤਨਂ, ਅਸ੍ਸਰਤਨਂ, ਮਣਿਰਤਨਂ, ਇਤ੍ਥਿਰਤਨਂ, ਗਹਪਤਿਰਤਨਂ, ਪਰਿਣਾਯਕਰਤਨਨ੍ਤਿ ਇਮੇਹਿ ਸਤ੍ਤਹਿ ਰਤਨੇਹਿ ਸਮੁਪੇਤੋਤਿ ਸਤ੍ਤਰਤਨਸਮਨ੍ਨਾਗਤੋ. ਤੇਸੁ ਹਿ ਰਾਜਾ ਚਕ੍ਕਵਤ੍ਤਿ ਚਕ੍ਕਰਤਨੇਨ ਅਜਿਤਂ ਜਿਨਾਤਿ, ਹਤ੍ਥਿਅਸ੍ਸਰਤਨੇਹਿ ਵਿਜਿਤੇ ਸੁਖੇਨੇਵ ਅਨੁਵਿਚਰਤਿ, ਪਰਿਣਾਯਕਰਤਨੇਨ ਵਿਜਿਤਮਨੁਰਕ੍ਖਤਿ, ਸੇਸੇਹਿ ਉਪਭੋਗਸੁਖਮਨੁਭਵਤਿ. ਪਠਮੇਨ ਚਸ੍ਸ ਉਸ੍ਸਾਹਸਤ੍ਤਿਯੋਗੋ, ਪਚ੍ਛਿਮੇਨ ਮਨ੍ਤਸਤ੍ਤਿਯੋਗੋ, ਹਤ੍ਥਿਅਸ੍ਸਗਹਪਤਿਰਤਨੇਹਿ ਪਭੂਸਤ੍ਤਿਯੋਗੋ ਸੁਪਰਿਪੁਣ੍ਣੋ ਹੋਤਿ, ਇਤ੍ਥਿਮਣਿਰਤਨੇਹਿ ਤਿਵਿਧਸਤ੍ਤਿਯੋਗਫਲਂ. ਸੋ ਇਤ੍ਥਿਮਣਿਰਤਨੇਹਿ ਪਰਿਭੋਗਸੁਖਮਨੁਭਵਤਿ, ਸੇਸੇਹਿ ਉਪਭੋਗਸੁਖਂ. ਵਿਸੇਸਤੋ ਚਸ੍ਸ ਪੁਰਿਮਾਨਿ ਤੀਣਿ ਅਦੋਸਕੁਸਲਮੂਲਜਨਿਤਕਮ੍ਮਾਨੁਭਾਵੇਨ ਸਮ੍ਪਜ੍ਜਨ੍ਤਿ, ਮਜ੍ਝਿਮਾਨਿ ਅਲੋਭਕੁਸਲਮੂਲਜਨਿਤਕਮ੍ਮਾਨੁਭਾਵੇਨ, ਪਚ੍ਛਿਮਮੇਕਂ ਅਮੋਹਕੁਸਲਮੂਲਜਨਿਤਕਮ੍ਮਾਨੁਭਾਵੇਨਾਤਿ ਵੇਦਿਤਬ੍ਬਂ ਪਦੇਸਰਜ੍ਜਸ੍ਸਾਤਿ ਖੁਦ੍ਦਕਰਜ੍ਜਸ੍ਸ.

ਏਤਦਹੋਸੀਤਿ ਅਤ੍ਤਨੋ ਸਮ੍ਪਤ੍ਤਿਯੋ ਪਚ੍ਚਵੇਕ੍ਖਨ੍ਤਸ੍ਸ ਪਚ੍ਛਿਮੇ ਚਕ੍ਕਵਤ੍ਤਿਕਾਲੇ ਏਤਂ ‘‘ਕਿਸ੍ਸ ਨੁ ਖੋ ਮੇ ਇਦਂ ਕਮ੍ਮਸ੍ਸ ਫਲ’’ਨ੍ਤਿਆਦਿਕਂ ਅਹੋਸਿ. ਸਬ੍ਬਤ੍ਥਕਮੇਵ ਤਸ੍ਮਿਂ ਤਸ੍ਮਿਮ੍ਪਿ ਭਵੇ ਏਤਦਹੋਸਿਯੇਵ. ਤਤ੍ਥਾਯਂ ਚਕ੍ਕਵਤ੍ਤਿਕਾਲਵਸੇਨ ਯੋਜਨਾ. ਏਵਂਮਹਿਦ੍ਧਿਕੋਤਿ ਮਣਿਰਤਨਹਤ੍ਥਿਰਤਨਾਦਿਪ੍ਪਮੁਖਾਯ ਕੋਸਵਾਹਨਸਮ੍ਪਤ੍ਤਿਯਾ ਜਨਪਦਤ੍ਥਾਵਰਿਯਪ੍ਪਤ੍ਤਿਯਾ ਚ ਏਵਂਮਹਿਦ੍ਧਿਕੋ. ਏਵਂਮਹਾਨੁਭਾਵੋਤਿ ਚਕ੍ਕਰਤਨਾਦਿਸਮਨ੍ਨਾਗਮੇਨ ਕਸ੍ਸਚਿਪਿ ਪੀਲ਼ਂ ਅਕਰੋਨ੍ਤੋਵ ਸਬ੍ਬਰਾਜੂਹਿ ਸਿਰਸਾ ਸਮ੍ਪਟਿਚ੍ਛਿਤਸਾਸਨਵੇਹਾਸਗਮਨਾਦੀਹਿ ਏਵਂ ਮਹਾਨੁਭਾਵੋ. ਦਾਨਸ੍ਸਾਤਿ ਅਨ੍ਨਾਦਿਦੇਯ੍ਯਧਮ੍ਮਪਰਿਚ੍ਚਾਗਸ੍ਸ. ਦਮਸ੍ਸਾਤਿ ਚਕ੍ਖਾਦਿਇਨ੍ਦ੍ਰਿਯਦਮਨਸ੍ਸ ਚੇਵ ਸਮਾਧਾਨਵਸੇਨ ਰਾਗਾਦਿਕਿਲੇਸਦਮਨਸ੍ਸ ਚ. ਸਂਯਮਸ੍ਸਾਤਿ ਕਾਯਵਚੀਸਂਯਮਸ੍ਸ. ਤਤ੍ਥ ਯਂ ਸਮਾਧਾਨਵਸੇਨ ਕਿਲੇਸਦਮਨਂ, ਤਂ ਭਾਵਨਾਮਯਂ ਪੁਞ੍ਞਂ, ਤਞ੍ਚ ਖੋ ਮੇਤ੍ਤਾਬ੍ਰਹ੍ਮਵਿਹਾਰਭੂਤਂ ਇਧਾਧਿਪ੍ਪੇਤਂ. ਤਸ੍ਮਿਞ੍ਚ ਉਪਚਾਰਪ੍ਪਨਾਭੇਦੇਨ ਦੁਵਿਧੇ ਯਂ ਅਪ੍ਪਨਾਪ੍ਪਤ੍ਤਂ, ਤੇਨਸ੍ਸ ਯਥਾਵੁਤ੍ਤਾਸੁ ਦ੍ਵੀਸੁ ਝਾਨਭੂਮੀਸੁ ਉਪਪਤ੍ਤਿ ਅਹੋਸਿ. ਇਤਰੇਨ ਤਿਵਿਧੇਨਾਪਿ ਯਥਾਰਹਂ ਪਤ੍ਤਚਕ੍ਕਵਤ੍ਤਿਆਦਿਭਾਵੋਤਿ ਵੇਦਿਤਬ੍ਬਂ.

ਇਤਿ ਭਗਵਾ ਅਤ੍ਤਾਨਂ ਕਾਯਸਕ੍ਖਿ ਕਤ੍ਵਾ ਪੁਞ੍ਞਾਨਂ ਵਿਪਾਕਮਹਨ੍ਤਤਂ ਪਕਾਸੇਤ੍ਵਾ ਇਦਾਨਿ ਤਮੇਵਤ੍ਥਂ ਗਾਥਾਬਨ੍ਧੇਨ ਦਸ੍ਸੇਨ੍ਤੋ ‘‘ਪੁਞ੍ਞਮੇਵਾ’’ਤਿਆਦਿਮਾਹ. ਤਤ੍ਥ ਪੁਞ੍ਞਮੇਵ ਸੋ ਸਿਕ੍ਖੇਯ੍ਯਾਤਿ ਯੋ ਅਤ੍ਥਕਾਮੋ ਕੁਲਪੁਤ੍ਤੋ, ਸੋ ਪੁਞ੍ਞਫਲਨਿਬ੍ਬਤ੍ਤਨਤੋ, ਅਤ੍ਤਨੋ ਸਨ੍ਤਾਨਂ ਪੁਨਨਤੋ ਚ ‘‘ਪੁਞ੍ਞ’’ਨ੍ਤਿ ਲਦ੍ਧਨਾਮਂ ਤਿਵਿਧਂ ਕੁਸਲਮੇਵ ਸਿਕ੍ਖੇਯ੍ਯ ਨਿਵੇਸੇਯ੍ਯ ਉਪਚਿਨੇਯ੍ਯ ਪਸਵੇਯ੍ਯਾਤਿ ਅਤ੍ਥੋ. ਆਯਤਗ੍ਗਨ੍ਤਿ ਵਿਪੁਲਫਲਤਾਯ ਉਲ਼ਾਰਫਲਤਾਯ ਆਯਤਗ੍ਗਂ, ਪਿਯਮਨਾਪਫਲਤਾਯ ਵਾ ਆਯਤਿਂ ਉਤ੍ਤਮਨ੍ਤਿ ਆਯਤਗ੍ਗਂ, ਆਯੇਨ ਵਾ ਯੋਨਿਸੋਮਨਸਿਕਾਰਾਦਿਪ੍ਪਚ੍ਚਯੇਨ ਉਲ਼ਾਰਤਮੇਨ ਅਗ੍ਗਨ੍ਤਿ ਆਯਤਗ੍ਗਂ. ਤਕਾਰੋ ਪਦਸਨ੍ਧਿਕਰੋ. ਅਥ ਵਾ ਆਯੇਨ ਪੁਞ੍ਞਫਲੇਨ ਅਗ੍ਗਂ ਪਧਾਨਨ੍ਤਿ ਆਯਤਗ੍ਗਂ. ਤਤੋ ਏਵ ਸੁਖੁਦ੍ਰਯਂ ਸੁਖਵਿਪਾਕਨ੍ਤਿ ਅਤ੍ਥੋ.

ਕਤਮਂ ਪਨ ਤਂ ਪੁਞ੍ਞਂ, ਕਥਞ੍ਚ ਨਂ ਸਿਕ੍ਖੇਯ੍ਯਾਤਿ ਆਹ ‘‘ਦਾਨਞ੍ਚ ਸਮਚਰਿਯਞ੍ਚ, ਮੇਤ੍ਤਚਿਤ੍ਤਞ੍ਚ ਭਾਵਯੇ’’ਤਿ. ਤਤ੍ਥ ਸਮਚਰਿਯਨ੍ਤਿ ਕਾਯਵਿਸਮਾਦੀਨਿ ਵਜ੍ਜੇਤ੍ਵਾ ਕਾਯਸਮਾਦਿਚਰਿਤਂ, ਸੁਵਿਸੁਦ੍ਧਂ ਸੀਲਨ੍ਤਿ ਅਤ੍ਥੋ. ਭਾਵਯੇਤਿ ਅਤ੍ਤਨੋ ਸਨ੍ਤਾਨੇ ਉਪ੍ਪਾਦੇਯ੍ਯ ਵਡ੍ਢੇਯ੍ਯ. ਏਤੇ ਧਮ੍ਮੇਤਿ ਏਤੇ ਦਾਨਾਦਿਕੇ ਸੁਚਰਿਤਧਮ੍ਮੇ. ਸੁਖਸਮੁਦ੍ਦਯੇਤਿ ਸੁਖਾਨਿਸਂਸੇ, ਆਨਿਸਂਸਫਲਮ੍ਪਿ ਨੇਸਂ ਸੁਖਮੇਵਾਤਿ ਦਸ੍ਸੇਤਿ. ਅਬ੍ਯਾਪਜ੍ਜਂ ਸੁਖਂ ਲੋਕਨ੍ਤਿ ਕਾਮਚ੍ਛਨ੍ਦਾਦਿਬ੍ਯਾਪਾਦਵਿਰਹਿਤਤ੍ਤਾ ਅਬ੍ਯਾਪਜ੍ਜਂ ਨਿਦ੍ਦੁਕ੍ਖਂ, ਪਰਪੀਲ਼ਾਭਾਵੇ ਪਨ ਵਤ੍ਤਬ੍ਬਂ ਨਤ੍ਥਿ. ਝਾਨਸਮਾਪਤ੍ਤਿਵਸੇਨ ਸੁਖਬਹੁਲਤ੍ਤਾ ਸੁਖਂ, ਏਕਨ੍ਤਸੁਖਞ੍ਚ ਬ੍ਰਹ੍ਮਲੋਕਂ ਝਾਨਪੁਞ੍ਞਾਨਂ, ਇਤਰਪੁਞ੍ਞਾਨਂ ਪਨ ਤਦਞ੍ਞਂ ਸਮ੍ਪਤ੍ਤਿਭਵਸਙ੍ਖਾਤਂ ਸੁਖਂ ਲੋਕਂ ਪਣ੍ਡਿਤੋ ਸਪ੍ਪਞ੍ਞੋ ਉਪਪਜ੍ਜਤਿ ਉਪੇਤਿ. ਇਤਿ ਇਮਸ੍ਮਿਂ ਸੁਤ੍ਤੇ ਗਾਥਾਸੁ ਚ ਵਟ੍ਟਸਮ੍ਪਤ੍ਤਿ ਏਵ ਕਥਿਤਾ.

ਦੁਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਉਭਯਤ੍ਥਸੁਤ੍ਤਵਣ੍ਣਨਾ

੨੩. ਤਤਿਯੇ ਭਾਵਿਤੋਤਿ ਉਪ੍ਪਾਦਿਤੋ ਚ ਵਡ੍ਢਿਤੋ ਚ. ਬਹੁਲੀਕਤੋਤਿ ਪੁਨਪ੍ਪੁਨਂ ਕਤੋ. ਅਤ੍ਥੋਤਿ ਹਿਤਂ. ਤਞ੍ਹਿ ਅਰਣੀਯਤੋ ਉਪਗਨ੍ਤਬ੍ਬਤੋ ਅਤ੍ਥੋਤਿ ਵੁਚ੍ਚਤਿ. ਸਮਧਿਗਯ੍ਹ ਤਿਟ੍ਠਤੀਤਿ ਸਮ੍ਮਾ ਪਰਿਗ੍ਗਹੇਤ੍ਵਾ ਅਵਿਜਹਿਤ੍ਵਾ ਵਤ੍ਤਤਿ. ਦਿਟ੍ਠਧਮ੍ਮਿਕਨ੍ਤਿ ਦਿਟ੍ਠਧਮ੍ਮੋ ਵੁਚ੍ਚਤਿ ਪਚ੍ਚਕ੍ਖਭੂਤੋ ਅਤ੍ਤਭਾਵੋ, ਦਿਟ੍ਠਧਮ੍ਮੇ ਭਵਂ ਦਿਟ੍ਠਧਮ੍ਮਿਕਂ, ਇਧਲੋਕਪਰਿਯਾਪਨ੍ਨਨ੍ਤਿ ਅਤ੍ਥੋ. ਸਮ੍ਪਰਾਯਿਕਨ੍ਤਿ ਧਮ੍ਮਵਸੇਨ ਸਮ੍ਪਰੇਤਬ੍ਬਤੋ ਸਮ੍ਪਰਾਯੋ, ਪਰਲੋਕੋ, ਸਮ੍ਪਰਾਯੇ ਭਵਂ ਸਮ੍ਪਰਾਯਿਕਂ, ਪਰਲੋਕਪਰਿਯਾਪਨ੍ਨਨ੍ਤਿ ਵੁਤ੍ਤਂ ਹੋਤਿ.

ਕੋ ਪਨੇਸ ਦਿਟ੍ਠਧਮ੍ਮਿਕੋ ਨਾਮ ਅਤ੍ਥੋ, ਕੋ ਵਾ ਸਮ੍ਪਰਾਯਿਕੋਤਿ? ਸਙ੍ਖੇਪੇਨ ਤਾਵ ਯਂ ਇਧਲੋਕਸੁਖਂ, ਯਞ੍ਚੇਤਰਹਿ ਇਧਲੋਕਸੁਖਾਵਹਂ, ਅਯਂ ਦਿਟ੍ਠਧਮ੍ਮਿਕੋ ਅਤ੍ਥੋ. ਸੇਯ੍ਯਥਿਦਂ – ਗਹਟ੍ਠਾਨਂ ਤਾਵ ਇਧ ਯਂ ਕਿਞ੍ਚਿ ਵਿਤ੍ਤੂਪਕਰਣਂ, ਅਨਾਕੁਲਕਮ੍ਮਨ੍ਤਤਾ, ਆਰੋਗ੍ਯਸਂਵਿਧਾਨਂ, ਵਤ੍ਥੁਵਿਸਦਕਿਰਿਯਾਯੋਗਵਿਹਿਤਾਨਿ ਸਿਪ੍ਪਾਯਤਨਵਿਜ੍ਜਾਟ੍ਠਾਨਾਨਿ ਸਙ੍ਗਹਿਤਪਰਿਜਨਤਾਤਿ ਏਵਮਾਦਿ. ਪਬ੍ਬਜਿਤਾਨਂ ਪਨ ਯੇ ਇਮੇ ਜੀਵਿਤਪਰਿਕ੍ਖਾਰਾ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾ. ਤੇਸਂ ਅਕਿਚ੍ਛਲਾਭੋ, ਤਤ੍ਥ ਚ ਸਙ੍ਖਾਯ ਪਟਿਸੇਵਨਾ, ਸਙ੍ਖਾਯ ਪਰਿਵਜ੍ਜਨਾ, ਵਤ੍ਥੁਵਿਸਦਕਿਰਿਯਾ, ਅਪ੍ਪਿਚ੍ਛਤਾ, ਸਨ੍ਤੁਟ੍ਠਿ, ਪਵਿਵੇਕੋ, ਅਸਂਸਗ੍ਗੋਤਿ ਏਵਮਾਦਿ. ਪਤਿਰੂਪਦੇਸਵਾਸਸਪ੍ਪੁਰਿਸੂਪਨਿਸ੍ਸਯਸਦ੍ਧਮ੍ਮਸ੍ਸਵਨਯੋਨਿਸੋਮਨਸਿਕਾਰਾਦਯੋ ਪਨ ਉਭਯੇਸਂ ਸਾਧਾਰਣਾ ਉਭਯਾਨੁਰੂਪਾ ਚਾਤਿ ਵੇਦਿਤਬ੍ਬਾ.

ਅਪ੍ਪਮਾਦੋਤਿ ਏਤ੍ਥ ਅਪ੍ਪਮਾਦੋ ਪਮਾਦਪ੍ਪਟਿਪਕ੍ਖਤੋ ਵੇਦਿਤਬ੍ਬੋ. ਕੋ ਪਨੇਸ ਪਮਾਦੋ ਨਾਮ? ਪਮਜ੍ਜਨਾਕਾਰੋ. ਵੁਤ੍ਤਂ ਹੇਤਂ –

‘‘ਤਤ੍ਥ ਕਤਮੋ ਪਮਾਦੋ? ਕਾਯਦੁਚ੍ਚਰਿਤੇ ਵਾ ਵਚੀਦੁਚ੍ਚਰਿਤੇ ਵਾ ਮਨੋਦੁਚ੍ਚਰਿਤੇ ਵਾ ਪਞ੍ਚਸੁ ਵਾ ਕਾਮਗੁਣੇਸੁ ਚਿਤ੍ਤਸ੍ਸ ਵੋਸ੍ਸਗ੍ਗੋ ਵੋਸ੍ਸਗ੍ਗਾਨੁਪ੍ਪਾਦਨਂ ਕੁਸਲਾਨਂ ਵਾ ਧਮ੍ਮਾਨਂ ਭਾਵਨਾਯ ਅਸਕ੍ਕਚ੍ਚਕਿਰਿਯਤਾ ਅਸਾਤਚ੍ਚਕਿਰਿਯਤਾ ਅਨਟ੍ਠਿਤਕਿਰਿਯਤਾ ਓਲੀਨਵੁਤ੍ਤਿਤਾ ਨਿਕ੍ਖਿਤ੍ਤਛਨ੍ਦਤਾ ਨਿਕ੍ਖਿਤ੍ਤਧੁਰਤਾ ਅਨਾਸੇਵਨਾ ਅਭਾਵਨਾ ਅਬਹੁਲੀਕਮ੍ਮਂ ਅਨਧਿਟ੍ਠਾਨਂ ਅਨਨੁਯੋਗੋਪਮਾਦੋ. ਯੋ ਏਵਰੂਪੋ ਪਮਾਦੋ ਪਮਜ੍ਜਨਾ ਪਮਜ੍ਜਿਤਤ੍ਤਂ. ਅਯਂ ਵੁਚ੍ਚਤਿ ਪਮਾਦੋ’’ਤਿ (ਵਿਭ. ੮੪੬).

ਤਸ੍ਮਾ ਵੁਤ੍ਤਪ੍ਪਟਿਪਕ੍ਖਤੋ ਅਪ੍ਪਮਾਦੋ ਵੇਦਿਤਬ੍ਬੋ. ਅਤ੍ਥਤੋ ਹਿ ਸੋ ਸਤਿਯਾ ਅਵਿਪ੍ਪਵਾਸੋ, ਨਿਚ੍ਚਂ ਉਪਟ੍ਠਿਤਸ੍ਸਤਿਯਾ ਏਤਂ ਨਾਮਂ. ਅਪਰੇ ਪਨ ‘‘ਸਤਿਸਮ੍ਪਜਞ੍ਞਯੋਗੇਨ ਪਵਤ੍ਤਾ ਚਤ੍ਤਾਰੋ ਅਰੂਪਿਨੋ ਖਨ੍ਧਾ ਅਪ੍ਪਮਾਦੋ’’ਤਿ ਵਦਨ੍ਤਿ.

‘‘ਭਾਵਿਤੋ ਬਹੂਲੀਕਤੋ’’ਤਿ ਵੁਤ੍ਤਂ, ਕਥਂ ਪਨਾਯਂ ਅਪ੍ਪਮਾਦੋ ਭਾਵੇਤਬ੍ਬੋਤਿ? ਨ ਅਪ੍ਪਮਾਦਭਾਵਨਾ ਨਾਮ ਵਿਸੁਂ ਏਕਭਾਵਨਾ ਅਤ੍ਥਿ. ਯਾ ਹਿ ਕਾਚਿ ਪੁਞ੍ਞਕਿਰਿਯਾ ਕੁਸਲਕਿਰਿਯਾ, ਸਬ੍ਬਾ ਸਾ ਅਪ੍ਪਮਾਦਭਾਵਨਾਤ੍ਵੇਵ ਵੇਦਿਤਬ੍ਬਾ. ਵਿਸੇਸਤੋ ਪਨ ਵਿਵਟ੍ਟੂਪਨਿਸ੍ਸਯਂ ਸਰਣਗਮਨਂ ਕਾਯਿਕਵਾਚਸਿਕਸਂਵਰਞ੍ਚ ਉਪਾਦਾਯ ਸਬ੍ਬਾ ਸੀਲਭਾਵਨਾ, ਸਬ੍ਬਾ ਸਮਾਧਿਭਾਵਨਾ, ਸਬ੍ਬਾ ਪਞ੍ਞਾਭਾਵਨਾ, ਸਬ੍ਬਾ ਕੁਸਲਭਾਵਨਾ, ਅਨਵਜ੍ਜਭਾਵਨਾ, ਅਪ੍ਪਮਾਦਭਾਵਨਾਤਿ ਵੇਦਿਤਬ੍ਬਾ. ‘‘ਅਪ੍ਪਮਾਦੋ’’ਤਿ ਹਿ ਇਦਂ ਮਹਨ੍ਤਂ ਅਤ੍ਥਂ ਦੀਪੇਤਿ, ਮਹਨ੍ਤਂ ਅਤ੍ਥਂ ਪਰਿਗ੍ਗਹੇਤ੍ਵਾ ਤਿਟ੍ਠਤਿ. ਸਕਲਮ੍ਪਿ ਤੇਪਿਟਕਂ ਬੁਦ੍ਧਵਚਨਂ ਆਹਰਿਤ੍ਵਾ ਅਪ੍ਪਮਾਦਪਦਸ੍ਸ ਅਤ੍ਥਂ ਕਤ੍ਵਾ ਕਥੇਨ੍ਤੋ ਧਮ੍ਮਕਥਿਕੋ ‘‘ਅਤਿਤ੍ਥੇਨ ਪਕ੍ਖਨ੍ਦੋ’’ਤਿ ਨ ਵਤ੍ਤਬ੍ਬੋ. ਕਸ੍ਮਾ? ਅਪ੍ਪਮਾਦਪਦਸ੍ਸ ਮਹਨ੍ਤਭਾਵਤੋ. ਤਥਾ ਹਿ ਸਮ੍ਮਾਸਮ੍ਬੁਦ੍ਧੋ ਕੁਸਿਨਾਰਾਯਂ ਯਮਕਸਾਲਾਨਮਨ੍ਤਰੇ ਪਰਿਨਿਬ੍ਬਾਨਸਮਯੇ ਨਿਪਨ੍ਨੋ ਅਭਿਸਮ੍ਬੋਧਿਤੋ ਪਟ੍ਠਾਯ ਪਞ੍ਚਚਤ੍ਤਾਲੀਸਾਯ ਵਸ੍ਸੇਸੁ ਅਤ੍ਤਨਾ ਭਾਸਿਤਂ ਧਮ੍ਮਂ ਏਕੇਨ ਪਦੇਨ ਸਙ੍ਗਹੇਤ੍ਵਾ ਦਸ੍ਸੇਨ੍ਤੋ – ‘‘ਅਪ੍ਪਮਾਦੇਨ ਸਮ੍ਪਾਦੇਥਾ’’ਤਿ ਭਿਕ੍ਖੂਨਂ ਓਵਾਦਮਦਾਸਿ. ਤਥਾ ਚ ਵੁਤ੍ਤਂ –

‘‘ਸੇਯ੍ਯਥਾਪਿ, ਭਿਕ੍ਖਵੇ, ਯਾਨਿ ਕਾਨਿਚਿ ਜਙ੍ਗਲਾਨਂ ਪਾਣਾਨਂ ਪਦਜਾਤਾਨਿ, ਸਬ੍ਬਾਨਿ ਤਾਨਿ ਹਤ੍ਥਿਪਦੇ ਸਮੋਧਾਨਂ ਗਚ੍ਛਨ੍ਤਿ, ਹਤ੍ਥਿਪਦਂ ਤੇਸਂ ਅਗ੍ਗਮਕ੍ਖਾਯਤਿ ਯਦਿਦਂ ਮਹਨ੍ਤਟ੍ਠੇਨ; ਏਵਮੇਵ ਖੋ, ਭਿਕ੍ਖਵੇ, ਯੇ ਕੇਚਿ ਕੁਸਲਾ ਧਮ੍ਮਾ, ਸਬ੍ਬੇਤੇ ਅਪ੍ਪਮਾਦਮੂਲਕਾ ਅਪ੍ਪਮਾਦਸਮੋਸਰਣਾ, ਅਪ੍ਪਮਾਦੋ ਤੇਸਂ ਧਮ੍ਮਾਨਂ ਅਗ੍ਗਮਕ੍ਖਾਯਤੀ’’ਤਿ (ਮ. ਨਿ. ੧.੩੦੦).

ਗਾਥਾਸੁ ਅਪ੍ਪਮਾਦਂ ਪਸਂਸਨ੍ਤੀਤਿ ਦਾਨਾਦਿਪੁਞ੍ਞਕਿਰਿਯਾਸੁ ਅਪ੍ਪਮਾਦਂ ਅਪ੍ਪਮਜ੍ਜਨਂ ਪਣ੍ਡਿਤਾ ਸਪ੍ਪਞ੍ਞਾ ਬੁਦ੍ਧਾਦਯੋ ਪਸਂਸਨ੍ਤਿ, ਵਣ੍ਣੇਨ੍ਤਿ ਥੋਮੇਨ੍ਤਿ. ਕਸ੍ਮਾ? ਯਸ੍ਮਾ ਅਪ੍ਪਮਤ੍ਤੋ ਉਭੋ ਅਤ੍ਥੇ ਅਧਿਗਣ੍ਹਾਤਿ ਪਣ੍ਡਿਤੋ. ਕੇ ਪਨ ਤੇ ਉਭੋ ਅਤ੍ਥਾਤਿ ਆਹ – ‘‘ਦਿਟ੍ਠੇ ਧਮ੍ਮੇ ਚ ਯੋ ਅਤ੍ਥੋ, ਯੋ ਚਤ੍ਥੋ ਸਮ੍ਪਰਾਯਿਕੋ’’ਤਿ, ਏਵਮੇਤ੍ਥ ਪਦਯੋਜਨਾ ਵੇਦਿਤਬ੍ਬਾ. ਇਧਾਪਿ ਦਿਟ੍ਠੇ ਧਮ੍ਮੇ ਚ ਯੋ ਅਤ੍ਥੋਤਿ ਗਹਟ੍ਠਸ੍ਸ ਤਾਵ ‘‘ਅਨਵਜ੍ਜਾਨਿ ਕਮ੍ਮਾਨਿ, ਅਨਾਕੁਲਾ ਚ ਕਮ੍ਮਨ੍ਤਾ’’ਤਿਆਦਿਨਾ ਨਯੇਨ ਵੁਤ੍ਤੋ ਕਸਿਗੋਰਕ੍ਖਾਦਿਵਿਧਿਨਾ ਲਦ੍ਧਬ੍ਬੋ ਅਤ੍ਥੋ, ਪਬ੍ਬਜਿਤਸ੍ਸ ਪਨ ਅਵਿਪ੍ਪਟਿਸਾਰਾਦਿਅਤ੍ਥੋ ਵੇਦਿਤਬ੍ਬੋ. ਯੋ ਚਤ੍ਥੋ ਸਮ੍ਪਰਾਯਿਕੋਤਿ ਪਨ ਉਭਯੇਸਮ੍ਪਿ ਧਮ੍ਮਚਰਿਯਾਵ ਵੁਤ੍ਤਾਤਿ ਵੇਦਿਤਬ੍ਬਾ. ਅਤ੍ਥਾਭਿਸਮਯਾਤਿ ਦੁਵਿਧਸ੍ਸਪਿ ਅਤ੍ਥਸ੍ਸ ਹਿਤਸ੍ਸ ਪਟਿਲਾਭਾ, ਲਦ੍ਧਬ੍ਬੇਨ ਸਮਿਤਿ ਸਙ੍ਗਤਿ ਸਮੋਧਾਨਨ੍ਤਿ ਸਮਯੋ, ਲਾਭੋ. ਸਮਯੋ ਏਵ ਅਭਿਸਮਯੋ, ਅਭਿਮੁਖਭਾਵੇਨ ਵਾ ਸਮਯੋ ਅਭਿਸਮਯੋਤਿ ਏਵਮੇਤ੍ਥ ਅਭਿਸਮਯੋ ਵੇਦਿਤਬ੍ਬੋ. ਧਿਤਿਸਮ੍ਪਨ੍ਨਤ੍ਤਾ ਧੀਰੋ. ਤਤਿਯੇਨ ਚੇਤ੍ਥ ਅਤ੍ਥ-ਸਦ੍ਦੇਨ ਪਰਮਤ੍ਥਸ੍ਸ ਨਿਬ੍ਬਾਨਸ੍ਸਾਪਿ ਸਙ੍ਗਹੋ ਵੇਦਿਤਬ੍ਬੋ. ਸੇਸਂ ਸੁਵਿਞ੍ਞੇਯ੍ਯਮੇਵ. ਇਤਿ ਇਮਸ੍ਮਿਂ ਸੁਤ੍ਤੇ ਵਟ੍ਟਸਮ੍ਪਤ੍ਤਿ ਏਵ ਕਥਿਤਾ. ਗਾਥਾਯਂ ਪਨ ਵਿਵਟ੍ਟਸ੍ਸਪਿ ਸਙ੍ਗਹੋ ਦਟ੍ਠਬ੍ਬੋ. ਤਥਾ ਹਿ ਵੁਤ੍ਤਂ –

‘‘ਅਪ੍ਪਮਾਦੋ ਅਮਤਪਦਂ, ਪਮਾਦੋ ਮਚ੍ਚੁਨੋ ਪਦਂ;

ਅਪ੍ਪਮਤ੍ਤਾ ਨ ਮੀਯਨ੍ਤਿ, ਯੇ ਪਮਤ੍ਤਾ ਯਥਾ ਮਤਾ.

‘‘ਏਵਂ ਵਿਸੇਸਤੋ ਞਤ੍ਵਾ, ਅਪ੍ਪਮਾਦਮ੍ਹਿ ਪਣ੍ਡਿਤਾ;

ਅਪ੍ਪਮਾਦੇ ਪਮੋਦਨ੍ਤਿ, ਅਰਿਯਾਨਂ ਗੋਚਰੇ ਰਤਾ.

‘‘ਤੇ ਝਾਯਿਨੋ ਸਾਤਤਿਕਾ, ਨਿਚ੍ਚਂ ਦਲ਼੍ਹਪਰਕ੍ਕਮਾ;

ਫੁਸਨ੍ਤਿ ਧੀਰਾ ਨਿਬ੍ਬਾਨਂ, ਯੋਗਕ੍ਖੇਮਂ ਅਨੁਤ੍ਤਰ’’ਨ੍ਤਿ. (ਧ. ਪ. ੨੧-੨੩);

ਤਸ੍ਮਾ ‘‘ਅਤ੍ਥਾਭਿਸਮਯਾ’’ਤਿ ਏਤ੍ਥ ਲੋਕੁਤ੍ਤਰਤ੍ਥਵਸੇਨਪਿ ਅਤ੍ਥੋ ਵੇਦਿਤਬ੍ਬੋ.

ਤਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਅਟ੍ਠਿਪੁਞ੍ਜਸੁਤ੍ਤਵਣ੍ਣਨਾ

੨੪. ਚਤੁਤ੍ਥੇ ਏਕਪੁਗ੍ਗਲਸ੍ਸਾਤਿ ਏਤ੍ਥ ਪੁਗ੍ਗਲੋਤਿ ਅਯਂ ਵੋਹਾਰਕਥਾ. ਬੁਦ੍ਧਸ੍ਸ ਹਿ ਭਗਵਤੋ ਦੁਵਿਧਾ ਦੇਸਨਾ ਸਮ੍ਮੁਤਿਦੇਸਨਾ ਚ ਪਰਮਤ੍ਥਦੇਸਨਾ ਚਾਤਿ. ਤਤ੍ਥ ‘‘ਪੁਗ੍ਗਲੋ, ਸਤ੍ਤੋ, ਇਤ੍ਥੀ, ਪੁਰਿਸੋ, ਖਤ੍ਤਿਯੋ, ਬ੍ਰਾਹ੍ਮਣੋ, ਦੇਵੋ, ਮਾਰੋ’’ਤਿ ਏਵਰੂਪਾ ਸਮ੍ਮੁਤਿਦੇਸਨਾ. ‘‘ਅਨਿਚ੍ਚਂ, ਦੁਕ੍ਖਂ, ਅਨਤ੍ਤਾ, ਖਨ੍ਧਾ, ਧਾਤੁ, ਆਯਤਨਾ, ਸਤਿਪਟ੍ਠਾਨਾ’’ਤਿ ਏਵਰੂਪਾ ਪਰਮਤ੍ਥਦੇਸਨਾ. ਤਤ੍ਥ ਭਗਵਾ ਯੇ ਸਮ੍ਮੁਤਿਵਸੇਨ ਦੇਸਨਂ ਸੁਤ੍ਵਾ ਵਿਸੇਸਮਧਿਗਨ੍ਤੁਂ ਸਮਤ੍ਥਾ, ਨੇਸਂ ਸਮ੍ਮੁਤਿਦੇਸਨਂ ਦੇਸੇਤਿ. ਯੇ ਪਨ ਪਰਮਤ੍ਥਵਸੇਨ ਦੇਸਨਂ ਸੁਤ੍ਵਾ ਵਿਸੇਸਮਧਿਗਨ੍ਤੁਂ ਸਮਤ੍ਥਾ, ਤੇਸਂ ਪਰਮਤ੍ਥਦੇਸਨਂ ਦੇਸੇਤਿ.

ਤਤ੍ਥਾਯਂ ਉਪਮਾ – ਯਥਾ ਹਿ ਦੇਸਭਾਸਾਕੁਸਲੋ ਤਿਣ੍ਣਂ ਵੇਦਾਨਂ ਅਤ੍ਥਸਂਵਣ੍ਣਨਕੋ ਆਚਰਿਯੋ ਯੇ ਦਮਿਲ਼ਭਾਸਾਯ ਵੁਤ੍ਤੇ ਅਤ੍ਥਂ ਜਾਨਨ੍ਤਿ, ਤੇਸਂ ਦਮਿਲ਼ਭਾਸਾਯ ਆਚਿਕ੍ਖਤਿ. ਯੇ ਅਨ੍ਧਕਭਾਸਾਦੀਸੁ ਅਞ੍ਞਤਰਾਯ, ਤੇਸਂ ਤਾਯ ਤਾਯ ਭਾਸਾਯ. ਏਵਂ ਤੇ ਮਾਣਵਕਾ ਛੇਕਂ ਬ੍ਯਤ੍ਤਂ ਆਚਰਿਯਮਾਗਮ੍ਮ ਖਿਪ੍ਪਮੇਵ ਸਿਪ੍ਪਂ ਉਗ੍ਗਣ੍ਹਨ੍ਤਿ. ਤਤ੍ਥ ਆਚਰਿਯੋ ਵਿਯ ਬੁਦ੍ਧੋ ਭਗਵਾ, ਤਯੋ ਵੇਦਾ ਵਿਯ ਕਥੇਤਬ੍ਬਭਾਵੇ ਠਿਤਾਨਿ ਤੀਣਿ ਪਿਟਕਾਨਿ, ਦੇਸਭਾਸਾਕੋਸਲ੍ਲਮਿਵ ਸਮ੍ਮੁਤਿਪਰਮਤ੍ਥਕੋਸਲ੍ਲਂ, ਨਾਨਾਦੇਸਭਾਸਾ ਮਾਣਵਕਾ ਵਿਯ ਸਮ੍ਮੁਤਿਪਰਮਤ੍ਥਵਸੇਨ ਪਟਿਵਿਜ੍ਝਨਸਮਤ੍ਥਾ ਵੇਨੇਯ੍ਯਾ, ਆਚਰਿਯਸ੍ਸ ਦਮਿਲ਼ਭਾਸਾਦਿਆਚਿਕ੍ਖਨਂ ਵਿਯ ਭਗਵਤੋ ਸਮ੍ਮੁਤਿਪਰਮਤ੍ਥਵਸੇਨ ਦੇਸਨਾ ਵੇਦਿਤਬ੍ਬਾ. ਆਹ ਚੇਤ੍ਥ –

‘‘ਦੁਵੇ ਸਚ੍ਚਾਨਿ ਅਕ੍ਖਾਸਿ, ਸਮ੍ਬੁਦ੍ਧੋ ਵਦਤਂ ਵਰੋ;

ਸਮ੍ਮੁਤਿਂ ਪਰਮਤ੍ਥਞ੍ਚ, ਤਤਿਯਂ ਨੂਪਲਬ੍ਭਤਿ.

‘‘ਸਙ੍ਕੇਤਵਚਨਂ ਸਚ੍ਚਂ, ਲੋਕਸਮ੍ਮੁਤਿਕਾਰਣਾ;

ਪਰਮਤ੍ਥਵਚਨਂ ਸਚ੍ਚਂ, ਧਮ੍ਮਾਨਂ ਭੂਤਕਾਰਣਾ.

‘‘ਤਸ੍ਮਾ ਵੋਹਾਰਕੁਸਲਸ੍ਸ, ਲੋਕਨਾਥਸ੍ਸ ਸਤ੍ਥੁਨੋ;

ਸਮ੍ਮੁਤਿਂ ਵੋਹਰਨ੍ਤਸ੍ਸ, ਮੁਸਾਵਾਦੋ ਨ ਜਾਯਤੀ’’ਤਿ.

ਅਪਿਚ ਅਟ੍ਠਹਿ ਕਾਰਣੇਹਿ ਭਗਵਾ ਪੁਗ੍ਗਲਕਥਂ ਕਥੇਤਿ – ਹਿਰੋਤ੍ਤਪ੍ਪਦੀਪਨਤ੍ਥਂ, ਕਮ੍ਮਸ੍ਸਕਤਾਦੀਪਨਤ੍ਥਂ, ਪਚ੍ਚਤ੍ਤਪੁਰਿਸਕਾਰਦੀਪਨਤ੍ਥਂ,, ਆਨਨ੍ਤਰਿਯਦੀਪਨਤ੍ਥਂ, ਬ੍ਰਹ੍ਮਵਿਹਾਰਦੀਪਨਤ੍ਥਂ, ਪੁਬ੍ਬੇਨਿਵਾਸਦੀਪਨਤ੍ਥਂ, ਦਕ੍ਖਿਣਾਵਿਸੁਦ੍ਧਿਦੀਪਨਤ੍ਥਂ, ਲੋਕਸਮ੍ਮੁਤਿਯਾ ਅਪ੍ਪਹਾਨਤ੍ਥਂ, ਚਾਤਿ. ‘‘ਖਨ੍ਧਧਾਤੁਆਯਤਨਾਨਿ ਹਿਰਿਯਨ੍ਤਿ ਓਤ੍ਤਪ੍ਪਨ੍ਤੀ’’ਤਿ ਹਿ ਵੁਤ੍ਤੇ ਮਹਾਜਨੋ ਨ ਜਾਨਾਤਿ, ਸਮ੍ਮੋਹਂ ਆਪਜ੍ਜਤਿ, ਪਟਿਸਤ੍ਤੁ ਵਾ ਹੋਤਿ – ‘‘ਕਿਮਿਦਂ ਖਨ੍ਧਧਾਤੁਆਯਤਨਾਨਿ ਹਿਰਿਯਨ੍ਤਿ ਓਤ੍ਤਪ੍ਪਨ੍ਤਿ ਨਾਮਾ’’ਤਿ? ‘‘ਇਤ੍ਥੀ ਹਿਰਿਯਤਿ ਓਤ੍ਤਪ੍ਪਤਿ, ਪੁਰਿਸੋ, ਖਤ੍ਤਿਯੋ, ਬ੍ਰਾਹ੍ਮਣੋ, ਦੇਵੋ, ਮਾਰੋ’’ਤਿ ਪਨ ਵੁਤ੍ਤੇ ਜਾਨਾਤਿ, ਨ ਸਮ੍ਮੋਹਂ ਆਪਜ੍ਜਤਿ, ਨ ਪਟਿਸਤ੍ਤੁ ਵਾ ਹੋਤਿ. ਤਸ੍ਮਾ ਭਗਵਾ ਹਿਰੋਤ੍ਤਪ੍ਪਦੀਪਨਤ੍ਥਂ ਪੁਗ੍ਗਲਕਥਂ ਕਥੇਤਿ.

‘‘ਖਨ੍ਧਾ ਕਮ੍ਮਸ੍ਸਕਾ, ਧਾਤੁਯੋ ਆਯਤਨਾਨੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਤਸ੍ਮਾ ਕਮ੍ਮਸ੍ਸਕਤਾਦੀਪਨਤ੍ਥਮ੍ਪਿ ਪੁਗ੍ਗਲਕਥਂ ਕਥੇਤਿ.

‘‘ਵੇਲ਼ੁਵਨਾਦਯੋ ਮਹਾਵਿਹਾਰਾ ਖਨ੍ਧੇਹਿ ਕਾਰਾਪਿਤਾ, ਧਾਤੂਹਿ ਆਯਤਨੇਹੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਤਥਾ ‘‘ਖਨ੍ਧਾ ਮਾਤਰਂ ਜੀਵਿਤਾ ਵੋਰੋਪੇਨ੍ਤਿ, ਪਿਤਰਂ, ਅਰਹਨ੍ਤਂ, ਰੁਹਿਰੁਪ੍ਪਾਦਕਮ੍ਮਂ, ਸਙ੍ਘਭੇਦਕਮ੍ਮਂ ਕਰੋਨ੍ਤਿ, ਧਾਤੁਯੋ ਆਯਤਨਾਨੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ‘‘ਖਨ੍ਧਾ ਮੇਤ੍ਤਾਯਨ੍ਤਿ, ਧਾਤੁਯੋ ਆਯਤਨਾਨੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ‘‘ਖਨ੍ਧਾ ਪੁਬ੍ਬੇਨਿਵਾਸਂ ਅਨੁਸ੍ਸਰਨ੍ਤਿ, ਧਾਤੁਯੋ ਆਯਤਨਾਨੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਤਸ੍ਮਾ ਭਗਵਾ ਪਚ੍ਚਤ੍ਤਪੁਰਿਸਕਾਰਦੀਪਨਤ੍ਥਂ ਆਨਨ੍ਤਰਿਯਦੀਪਨਤ੍ਥਂ ਬ੍ਰਹ੍ਮਵਿਹਾਰਦੀਪਨਤ੍ਥਂ ਪੁਬ੍ਬੇਨਿਵਾਸਦੀਪਨਤ੍ਥਞ੍ਚ ਪੁਗ੍ਗਲਕਥਂ ਕਥੇਤਿ.

‘‘ਖਨ੍ਧਾ ਦਾਨਂ ਪਟਿਗ੍ਗਣ੍ਹਨ੍ਤਿ, ਧਾਤੁਯੋ ਆਯਤਨਾਨੀ’’ਤਿ ਵੁਤ੍ਤੇਪਿ ਮਹਾਜਨੋ ਨ ਜਾਨਾਤਿ, ਸਮ੍ਮੋਹਂ ਆਪਜ੍ਜਤਿ, ਪਟਿਸਤ੍ਤੁ ਵਾ ਹੋਤਿ ‘‘ਕਿਮਿਦਂ ਖਨ੍ਧਾ ਧਾਤੁਯੋ ਆਯਤਨਾਨਿ ਪਟਿਗ੍ਗਣ੍ਹਨ੍ਤਿ ਨਾਮਾ’’ਤਿ? ‘‘ਪੁਗ੍ਗਲਾ ਪਟਿਗ੍ਗਣ੍ਹਨ੍ਤੀ’’ਤਿ ਪਨ ਵੁਤ੍ਤੇ ਜਾਨਾਤਿ, ਨ ਸਮ੍ਮੋਹਂ ਆਪਜ੍ਜਤਿ, ਨ ਪਟਿਸਤ੍ਤੁ ਵਾ ਹੋਤਿ. ਤਸ੍ਮਾ ਭਗਵਾ ਦਕ੍ਖਿਣਾਵਿਸੁਦ੍ਧਿਦੀਪਨਤ੍ਥਂ ਪੁਗ੍ਗਲਕਥਂ ਕਥੇਤਿ.

ਲੋਕਸਮ੍ਮੁਤਿਞ੍ਚ ਬੁਦ੍ਧਾ ਭਗਵਨ੍ਤੋ ਨ ਪਜਹਨ੍ਤਿ, ਲੋਕਸਮਞ੍ਞਾਯ ਲੋਕਨਿਰੁਤ੍ਤਿਯਾ ਲੋਕਾਭਿਲਾਪੇ ਠਿਤਾਯੇਵ ਧਮ੍ਮਂ ਦੇਸੇਨ੍ਤਿ. ਤਸ੍ਮਾ ਭਗਵਾ ਲੋਕਸਮ੍ਮੁਤਿਯਾ ਅਪ੍ਪਹਾਨਤ੍ਥਮ੍ਪਿ ਪੁਗ੍ਗਲਕਥਂ ਕਥੇਤਿ. ਸੋ ਇਧਾਪਿ ਲੋਕਵੋਹਾਰਵਸੇਨ ਦੇਸੇਤਬ੍ਬਮਤ੍ਥਂ ਦਸ੍ਸੇਨ੍ਤੋ ‘‘ਏਕਪੁਗ੍ਗਲਸ੍ਸਾ’’ਤਿਆਦਿਮਾਹ.

ਤਤ੍ਥ ਏਕਪੁਗ੍ਗਲਸ੍ਸਾਤਿ ਏਕਸਤ੍ਤਸ੍ਸ. ਕਪ੍ਪਨ੍ਤਿ ਮਹਾਕਪ੍ਪਂ. ਯਦਿਪਿ ਅਚ੍ਚਨ੍ਤਸਂਯੋਗੇ ਇਦਂ ਉਪਯੋਗਵਚਨਂ, ਯਤ੍ਥ ਪਨ ਸਤ੍ਤਾਨਂ ਸਨ੍ਧਾਵਨਂ ਸਂਸਰਣਂ ਸਮ੍ਭਵਤਿ, ਤਸ੍ਸ ਵਸੇਨ ਗਹੇਤਬ੍ਬਂ. ਅਟ੍ਠਿਕਙ੍ਕਲੋਤਿ ਅਟ੍ਠਿਭਾਗੋ. ‘‘ਅਟ੍ਠਿਖਲੋ’’ਤਿਪਿ ਪਠਨ੍ਤਿ, ਅਟ੍ਠਿਸਞ੍ਚਯੋਤਿ ਅਤ੍ਥੋ. ਅਟ੍ਠਿਪੁਞ੍ਜੋਤਿ ਅਟ੍ਠਿਸਮੂਹੋ. ਅਟ੍ਠਿਰਾਸੀਤਿ ਤਸ੍ਸੇਵ ਵੇਵਚਨਂ. ਕੇਚਿ ਪਨ ‘‘ਕਟਿਪ੍ਪਮਾਣਤੋ ਹੇਟ੍ਠਾ ਸਮੂਹੋ ਕਙ੍ਕਲੋ ਨਾਮ, ਤਤੋ ਉਪਰਿ ਯਾਵ ਤਾਲਪ੍ਪਮਾਣਂ ਪੁਞ੍ਜੋ, ਤਤੋ ਉਪਰਿ ਰਾਸੀ’’ਤਿ ਵਦਨ੍ਤਿ. ਤਂ ਤੇਸਂ ਮਤਿਮਤ੍ਤਂ. ਸਬ੍ਬਮੇਤਂ ਸਮੂਹਸ੍ਸੇਵ ਪਰਿਯਾਯਵਚਨਂ ਵੇਪੁਲ੍ਲਸ੍ਸੇਵ ਉਪਮਾਭਾਵੇਨ ਆਹਟਤ੍ਤਾ.

ਸਚੇ ਸਂਹਾਰਕੋ ਅਸ੍ਸਾਤਿ ਅਵਿਪ੍ਪਕਿਰਣਵਸੇਨ ਸਂਹਰਿਤ੍ਵਾ ਠਪੇਤਾ ਕੋਚਿ ਯਦਿ ਸਿਯਾਤਿ ਪਰਿਕਪ੍ਪਨਵਸੇਨ ਵਦਤਿ. ਸਮ੍ਭਤਞ੍ਚ ਨ ਵਿਨਸ੍ਸੇਯ੍ਯਾਤਿ ਤਥਾ ਕੇਨਚਿ ਸਮ੍ਭਤਞ੍ਚ ਤਂ ਅਟ੍ਠਿਕਙ੍ਕਲਂ ਅਨ੍ਤਰਧਾਨਾਭਾਵੇਨ ਪੂਤਿਭੂਤਂ ਚੁਣ੍ਣਵਿਚੁਣ੍ਣਞ੍ਚ ਅਹੁਤ੍ਵਾ ਸਚੇ ਨ ਵਿਨਸ੍ਸੇਯ੍ਯਾਤਿ ਪਰਿਕਪ੍ਪਨਵਸੇਨੇਵ ਵਦਤਿ. ਅਯਞ੍ਹੇਤ੍ਥ ਅਤ੍ਥੋ – ਭਿਕ੍ਖਵੇ, ਏਕਸ੍ਸ ਸਤ੍ਤਸ੍ਸ ਕਮ੍ਮਕਿਲੇਸੇਹਿ ਅਪਰਾਪਰੁਪ੍ਪਤ੍ਤਿਵਸੇਨ ਏਕਂ ਮਹਾਕਪ੍ਪਂ ਸਨ੍ਧਾਵਨ੍ਤਸ੍ਸ ਸਂਸਰਨ੍ਤਸ੍ਸ ਏਵਂ ਮਹਾਅਟ੍ਠਿਸਞ੍ਚਯੋ ਭਵੇਯ੍ਯ, ਆਰੋਹਪਰਿਣਾਹੇਹਿ ਯਤ੍ਤਕੋਯਂ ਵੇਪੁਲ੍ਲਪਬ੍ਬਤੋ. ਸਚੇ ਪਨਸ੍ਸ ਕੋਚਿ ਸਂਹਰਿਤ੍ਵਾ ਠਪੇਤਾ ਭਵੇਯ੍ਯ, ਸਮ੍ਭਤਞ੍ਚ ਤਂ ਸਚੇ ਅਵਿਨਸ੍ਸਨ੍ਤਂ ਤਿਟ੍ਠੇਯ੍ਯਾਤਿ. ਅਯਞ੍ਚ ਨਯੋ ਨਿਬ੍ਬੁਤਪ੍ਪਦੀਪੇ ਵਿਯ ਭਿਜ੍ਜਨਸਭਾਵੇ ਕਲ਼ੇਵਰਨਿਕ੍ਖੇਪਰਹਿਤੇ ਓਪਪਾਤਿਕਤ੍ਤਭਾਵੇ ਸਬ੍ਬੇਨ ਸਬ੍ਬਂ ਅਨਟ੍ਠਿਕੇ ਚ ਖੁਦ੍ਦਕਤ੍ਤਭਾਵੇ ਵਜ੍ਜੇਤ੍ਵਾ ਵੁਤ੍ਤੋ. ਕੇਚਿ ਪਨ ‘‘ਪਰਿਕਪ੍ਪਨਵਸੇਨ ਇਮਸ੍ਸ ਨਯਸ੍ਸ ਆਹਟਤ੍ਤਾ ਤੇਸਮ੍ਪਿ ਯਦਿ ਸਿਯਾ ਅਟ੍ਠਿਕਙ੍ਕਲੋ, ਤੇਨਾਪਿ ਸਹੇਵ ਅਯਂ ਅਟ੍ਠਿਪੁਞ੍ਜਪਰਿਮਾਣੋ ਵੁਤ੍ਤੋ’’ਤਿ ਵਦਨ੍ਤਿ. ਅਪਰੇ ਪਨ ‘‘ਨਯਿਦਮੇਵਂ ਲਬ੍ਭਮਾਨਸ੍ਸੇਵ ਅਟ੍ਠਿਪੁਞ੍ਜਸ੍ਸ ਵਸੇਨ ਸਬ੍ਬਞ੍ਞੁਤਞ੍ਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਇਮਸ੍ਸ ਪਰਿਮਾਣਸ੍ਸ ਵੁਤ੍ਤਤਾ. ਤਸ੍ਮਾ ਵੁਤ੍ਤਨਯੇਨੇਵ ਅਤ੍ਥੋ ਗਹੇਤਬ੍ਬੋ’’ਤਿ.

ਗਾਥਾਸੁ ਮਹੇਸਿਨਾਤਿ ਮਹਨ੍ਤੇ ਸੀਲਕ੍ਖਨ੍ਧਾਦਯੋ ਏਸਤਿ ਗਵੇਸਤੀਤਿ ਮਹੇਸੀ, ਸਮ੍ਮਾਸਮ੍ਬੁਦ੍ਧੋ. ‘‘ਇਤਿ ਵੁਤ੍ਤਂ ਮਹੇਸਿਨਾ’’ਤਿ ਚ ਭਗਵਾ ‘‘ਦਸਬਲਸਮਨ੍ਨਾਗਤੋ, ਭਿਕ੍ਖਵੇ, ਤਥਾਗਤੋ’’ਤਿਆਦੀਸੁ ਵਿਯ ਅਤ੍ਤਾਨਂ ਅਞ੍ਞਂ ਵਿਯ ਕਤ੍ਵਾ ਦਸ੍ਸੇਤਿ. ਵੇਪੁਲ੍ਲੋਤਿ ਰਾਜਗਹਂ ਪਰਿਵਾਰੇਤ੍ਵਾ ਠਿਤੇਸੁ ਪਞ੍ਚਸੁ ਪਬ੍ਬਤੇਸੁ ਵਿਪੁਲਭਾਵਤੋ ਵੇਪੁਲ੍ਲੋਤਿ ਲਦ੍ਧਨਾਮੋ. ਤਤੋ ਏਵ ਮਹਾ, ਠਿਤਦਿਸਾਭਾਗਵਸੇਨ ਉਤ੍ਤਰੋ ਗਿਜ੍ਝਕੂਟਸ੍ਸ. ਗਿਰਿਬ੍ਬਜੇਤਿ ਗਿਰਿਬ੍ਬਜਪੁਰਨਾਮਕਸ੍ਸ ਰਾਜਗਹਸ੍ਸ ਸਮੀਪੇ.

ਏਤ੍ਤਾਵਤਾ ਭਗਵਾ ‘‘ਏਤ੍ਤਕੇਨਾਪਿ ਕਾਲੇਨ ਅਨੁਪਚ੍ਛਿਨ੍ਨਭਵਮੂਲਸ੍ਸ ਅਪਰਿਞ੍ਞਾਤਵਤ੍ਥੁਕਸ੍ਸ ਪੁਥੁਜ੍ਜਨਸ੍ਸ ਅਯਮੀਦਿਸੀ ਕਟਸਿਵਡ੍ਢਨਾ’’ਤਿ ਵਟ੍ਟੇ ਆਦੀਨਵਂ ਦਸ੍ਸੇਤ੍ਵਾ ਇਦਾਨਿ ਯੇਸਂ ਅਰਿਯਸਚ੍ਚਾਨਂ ਅਨਨੁਬੋਧਾ ਅਪ੍ਪਟਿਵੇਧਾ ਅਨ੍ਧਪੁਥੁਜ੍ਜਨਸ੍ਸ ਏਵਂ ਕਟਸਿਵਡ੍ਢਨਾ, ਤਾਨਿ ਅਰਿਯਸਚ੍ਚਾਨਿ ਦਿਟ੍ਠਵਤੋ ਅਰਿਯਪੁਗ੍ਗਲਸ੍ਸ ਅਯਂ ਨਤ੍ਥੀਤਿ ਦਸ੍ਸੇਨ੍ਤੋ ‘‘ਯਤੋ ਚ ਅਰਿਯਸਚ੍ਚਾਨੀ’’ਤਿਆਦਿਮਾਹ.

ਤਤ੍ਥ ਯਤੋਤਿ ਯਦਾ. ਅਰਿਯਸਚ੍ਚਾਨੀਤਿ ਅਰਣੀਯਤੋ ਅਰਿਯਾਨਿ, ਅਵਿਤਥਭਾਵੇਨ ਸਚ੍ਚਾਨਿ ਚਾਤਿ ਅਰਿਯਸਚ੍ਚਾਨਿ, ਅਰਿਯਭਾਵਕਰਾਨਿ ਵਾ ਸਚ੍ਚਾਨਿ ਅਰਿਯਸਚ੍ਚਾਨਿ, ਅਰਿਯੇਹਿ ਵਾ ਬੁਦ੍ਧਾਦੀਹਿ ਪਟਿਵਿਜ੍ਝਿਤਬ੍ਬਾਨਿ ਸਚ੍ਚਾਨਿ ਅਰਿਯਸਚ੍ਚਾਨਿ. ਅਥ ਵਾ ਅਰਿਯਸ੍ਸ ਸਚ੍ਚਾਨਿ ਅਰਿਯਸਚ੍ਚਾਨਿ. ਸਦੇਵਕੇਨ ਹਿ ਲੋਕੇਨ ਸਰਣਨ੍ਤਿ ਅਰਣੀਯਤੋ ਅਰਿਯੋ ਭਗਵਾ, ਤੇਨ ਸਯਮ੍ਭੁਞਾਣੇਨ ਦਿਟ੍ਠਤ੍ਤਾ ਤਸ੍ਸ ਸਚ੍ਚਾਨੀਤਿ ਅਰਿਯਸਚ੍ਚਾਨਿ. ਸਮ੍ਮਪ੍ਪਞ੍ਞਾਯ ਪਸ੍ਸਤੀਤਿ ਸਮ੍ਮਾ ਹੇਤੁਨਾ ਞਾਯੇਨ ਵਿਪਸ੍ਸਨਾਪਞ੍ਞਾਸਹਿਤਾਯ ਮਗ੍ਗਪਞ੍ਞਾਯ ਪਰਿਞ੍ਞਾਪਹਾਨਸਚ੍ਛਿਕਿਰਿਯਾਭਾਵਨਾਭਿਸਮਯਵਸੇਨ ਪਸ੍ਸਤਿ. ਦੁਕ੍ਖਨ੍ਤਿਆਦਿ ਅਰਿਯਸਚ੍ਚਾਨਂ ਸਰੂਪਦਸ੍ਸਨਂ. ਤਤ੍ਥ ਅਨੇਕੂਪਦ੍ਦਵਾਧਿਟ੍ਠਾਨਤਾਯ ਕੁਚ੍ਛਿਤਭਾਵਤੋ ਬਾਲਜਨਪਰਿਕਪ੍ਪਿਤਧੁਵਸੁਭਸੁਖਤ੍ਤਵਿਰਹੇਨ ਤੁਚ੍ਛਭਾਵਤੋ ਚ ਦੁਕ੍ਖਂ. ਦੁਕ੍ਖਂ ਸਮੁਪ੍ਪਜ੍ਜਤਿ ਏਤੇਨਾਤਿ ਦੁਕ੍ਖਸਮੁਪ੍ਪਾਦੋ, ਦੁਕ੍ਖਸਮੁਦਯੋ. ਦੁਕ੍ਖਂ ਅਤਿਕ੍ਕਮਤਿ ਏਤੇਨ ਆਰਮ੍ਮਣਪ੍ਪਚ੍ਚਯਭੂਤੇਨ, ਏਤ੍ਥ ਵਾਤਿ ਦੁਕ੍ਖਸ੍ਸ ਅਤਿਕ੍ਕਮੋ, ਨਿਬ੍ਬਾਨਂ. ਆਰਕਤ੍ਤਾ ਕਿਲੇਸੇਹਿ ਅਰਣੀਯਤੋ ਚ ਅਰਿਯੋ. ਸਮ੍ਮਾਦਿਟ੍ਠਿਆਦੀਨਂ ਅਟ੍ਠਨ੍ਨਂ ਅਙ੍ਗਾਨਂ ਵਸੇਨ ਅਟ੍ਠਙ੍ਗਿਕੋ. ਮਾਰੇਨ੍ਤੋ ਕਿਲੇਸੇ ਗਚ੍ਛਤਿ, ਨਿਬ੍ਬਾਨਤ੍ਥਿਕੇਹਿ ਮਗ੍ਗੀਯਤਿ, ਸਯਂ ਵਾ ਨਿਬ੍ਬਾਨਂ ਮਗ੍ਗਤੀਤਿ ਮਗ੍ਗੋ. ਤਤੋ ਏਵ ਦੁਕ੍ਖਸ੍ਸ ਉਪਸਮਂ ਨਿਰੋਧਂ ਗਚ੍ਛਤੀਤਿ ਦੁਕ੍ਖੂਪਸਮਗਾਮੀ. ਯਤੋ ਸਮ੍ਮਪ੍ਪਞ੍ਞਾਯ ਪਸ੍ਸਤੀਤਿ ਸਮ੍ਬਨ੍ਧੋ.

ਸ ਸਤ੍ਤਕ੍ਖਤ੍ਤੁਂ ਪਰਮਂ, ਸਨ੍ਧਾਵਿਤ੍ਵਾਨ ਪੁਗ੍ਗਲੋਤਿ ਸੋ ਏਵਂ ਚਤੁਸਚ੍ਚਦਸ੍ਸਾਵੀ ਅਰਿਯਪੁਗ੍ਗਲੋ ਸੋਤਾਪਨ੍ਨੋ ਸਬ੍ਬਮੁਦਿਨ੍ਦ੍ਰਿਯੋ ਸਮਾਨੋ ਸਤ੍ਤਵਾਰਪਰਮਂਯੇਵ ਭਵਾਦੀਸੁ ਅਪਰਾਪਰੁਪ੍ਪਤ੍ਤਿਵਸੇਨ ਸਨ੍ਧਾਵਿਤ੍ਵਾ ਸਂਸਰਿਤ੍ਵਾ. ਏਕਬੀਜੀ, ਕੋਲਂਕੋਲੋ, ਸਤ੍ਤਕ੍ਖਤ੍ਤੁਪਰਮੋਤਿ ਇਨ੍ਦ੍ਰਿਯਾਨਂ ਤਿਕ੍ਖਮਜ੍ਝਿਮਮੁਦੁਭਾਵੇਨ ਤਯੋ ਹਿ ਸੋਤਾਪਨ੍ਨਾ. ਤੇਸੁ ਸਬ੍ਬਮੁਦਿਨ੍ਦ੍ਰਿਯਸ੍ਸ ਵਸੇਨਿਦਂ ਵੁਤ੍ਤਂ ‘‘ਸ ਸਤ੍ਤਕ੍ਖਤ੍ਤੁਂ ਪਰਮਂ, ਸਨ੍ਧਾਵਿਤ੍ਵਾਨਾ’’ਤਿ. ਦੁਕ੍ਖਸ੍ਸਨ੍ਤਕਰੋ ਹੋਤੀਤਿ ਵਟ੍ਟਦੁਕ੍ਖਸ੍ਸ ਅਨ੍ਤਕਰੋ ਪਰਿਯੋਸਾਨਕਰੋ ਹੋਤਿ. ਕਥਂ? ਸਬ੍ਬਸਂਯੋਜਨਕ੍ਖਯਾ ਅਨੁਪੁਬ੍ਬੇਨ ਅਗ੍ਗਮਗ੍ਗਂ ਅਧਿਗਨ੍ਤ੍ਵਾ ਨਿਰਵਸੇਸਾਨਂ ਸਂਯੋਜਨਾਨਂ ਖੇਪਨਾਤਿ ਅਰਹਤ੍ਤਫਲੇਨੇਵ ਦੇਸਨਾਯ ਕੂਟਂ ਗਣ੍ਹਿ.

ਚਤੁਤ੍ਥਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਮੁਸਾਵਾਦਸੁਤ੍ਤਵਣ੍ਣਨਾ

੨੫. ਪਞ੍ਚਮੇ ਏਕਧਮ੍ਮਂ ਅਤੀਤਸ੍ਸਾਤਿ ਕਾ ਉਪ੍ਪਤ੍ਤਿ? ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਮਹਾਲਾਭਸਕ੍ਕਾਰੋ ਉਪ੍ਪਜ੍ਜਿ, ਤਿਤ੍ਥਿਯਾਨਂ ਪਰਿਹਾਯਿ. ਤੇ ਹਤਲਾਭਸਕ੍ਕਾਰਾ ਨਿਪ੍ਪਭਾ ਨਿਤ੍ਤੇਜਾ ਇਸ੍ਸਾਪਕਤਾ ਚਿਞ੍ਚਮਾਣਵਿਕਂ ਨਾਮ ਪਰਿਬ੍ਬਾਜਿਕਂ ਉਯ੍ਯੋਜੇਸੁਂ – ‘‘ਏਹਿ, ਤ੍ਵਂ ਭਗਿਨਿ, ਸਮਣਂ ਗੋਤਮਂ ਅਭੂਤੇਨ ਅਬ੍ਭਾਚਿਕ੍ਖਸ੍ਸੂ’’ਤਿ. ਸਾ ਭਗਵਨ੍ਤਂ ਚਤੁਪਰਿਸਮਜ੍ਝੇ ਧਮ੍ਮਂ ਦੇਸੇਨ੍ਤਂ ਉਪਗਨ੍ਤ੍ਵਾ ਅਭੂਤੇਨ ਅਬ੍ਭਾਚਿਕ੍ਖਿਤ੍ਵਾ ਸਕ੍ਕੇਨਸ੍ਸਾ ਅਭੂਤਭਾਵੇ ਪਕਾਸਿਤੇ ਮਹਾਜਨੇਨ ‘‘ਧੀ ਕਾਲ਼ਕਣ੍ਣੀ’’ਤਿ ਵਿਹਾਰਤੋ ਨਿਕ੍ਕਡ੍ਢਾਪਿਤਾ ਪਥਵਿਯਾ ਵਿਵਰੇ ਦਿਨ੍ਨੇ ਅਵੀਚਿਜਾਲਾਨਂ ਇਨ੍ਧਨਂ ਹੁਤ੍ਵਾਵ ਅਵੀਚਿਨਿਰਯੇ ਨਿਬ੍ਬਤ੍ਤਿ, ਭਿਯ੍ਯੋਸੋਮਤ੍ਤਾਯ ਤਿਤ੍ਥਿਯਾਨਂ ਲਾਭਸਕ੍ਕਾਰੋ ਪਰਿਹਾਯਿ. ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਚਿਞ੍ਚਮਾਣਵਿਕਾ ਏਵਂ ਉਲ਼ਾਰਗੁਣਂ ਅਗ੍ਗਦਕ੍ਖਿਣੇਯ੍ਯਂ ਸਮ੍ਮਾਸਮ੍ਬੁਦ੍ਧਂ ਅਭੂਤੇਨ ਅਕ੍ਕੋਸਿਤ੍ਵਾ ਮਹਾਵਿਨਾਸਂ ਪਤ੍ਤਾ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਸਾ ਮਂ ਅਭੂਤੇਨ ਅਕ੍ਕੋਸਿਤ੍ਵਾ ਮਹਾਵਿਨਾਸਂ ਪਤ੍ਤਾਯੇਵਾ’’ਤਿ ਮਹਾਪਦੁਮਜਾਤਕਮ੍ਪਿ ਵਿਤ੍ਥਾਰੇਤ੍ਵਾ ਉਪਰਿ ਧਮ੍ਮਂ ਦੇਸੇਨ੍ਤੋ ਇਮਿਸ੍ਸਾ ਅਟ੍ਠੁਪ੍ਪਤ੍ਤਿਯਾ ‘‘ਏਕਧਮ੍ਮਂ ਅਤੀਤਸ੍ਸਾ’’ਤਿ ਇਦਂ ਸੁਤ੍ਤਂ ਦੇਸੇਸਿ.

ਤਤ੍ਥ ਏਕਧਮ੍ਮਨ੍ਤਿ ਏਕਂ ਵਚੀਸਚ੍ਚਸਙ੍ਖਾਤਂ ਧਮ੍ਮਂ. ਅਤੀਤਸ੍ਸਾਤਿ ਯਾ ਸਾ ਅਟ੍ਠ ਅਨਰਿਯਵੋਹਾਰੇ ਵਜ੍ਜੇਤ੍ਵਾ ਅਟ੍ਠਸੁ ਅਰਿਯਵੋਹਾਰੇਸੁ ਪਤਿਟ੍ਠਾਪਨਤ੍ਥਂ ‘‘ਸਚ੍ਚਂ, ਭਣੇ, ਨਾਲਿਕ’’ਨ੍ਤਿ ਅਰਿਯੇਹਿ ਠਪਿਤਾ ਮਰਿਯਾਦਾ, ਤਂ ਅਤਿਕ੍ਕਮਿਤ੍ਵਾ ਠਿਤਸ੍ਸ. ਪੁਰਿਸੋ ਏਵ ਪੁਗ੍ਗਲੋਤਿ ਪੁਰਿਸਪੁਗ੍ਗਲੋ, ਤਸ੍ਸ. ਅਕਰਣੀਯਨ੍ਤਿ ਕਾਤੁਂ ਅਸਕ੍ਕੁਣੇਯ੍ਯਂ. ਸਮ੍ਪਜਾਨਮੁਸਾਵਾਦੀ ਹਿ ਪੁਗ੍ਗਲੋ ਕਿਞ੍ਚਿ ਪਾਪਕਮ੍ਮਂ ਕਤ੍ਵਾ ‘‘ਇਦਂ ਨਾਮ ਤਯਾ ਕਤ’’ਨ੍ਤਿ ਵੁਤ੍ਤੇ ‘‘ਨ ਮਯਾ ਕਤ’’ਨ੍ਤਿ ਮੁਸਾਵਾਦੇਨੇਵ ਪਰਿਹਰਿਸ੍ਸਤਿ. ਏਵਞ੍ਚ ਪਟਿਪਜ੍ਜਨ੍ਤੋ ਕਿਞ੍ਚਿ ਪਾਪਕਮ੍ਮਂ ਕਰੋਤਿਯੇਵ, ਨ ਤਤ੍ਥ ਲਜ੍ਜਤਿ ਸਚ੍ਚਮਰਿਯਾਦਾਯ ਸਮਤਿਕ੍ਕਨ੍ਤਤ੍ਤਾ. ਤੇਨ ਵੁਤ੍ਤਂ ‘‘ਕਤਮਂ ਏਕਧਮ੍ਮਂ, ਯਦਿਦਂ, ਭਿਕ੍ਖਵੇ, ਸਮ੍ਪਜਾਨਮੁਸਾਵਾਦੋ’’ਤਿ.

ਗਾਥਾਯਂ ਮੁਸਾਵਾਦਿਸ੍ਸਾਤਿ ਮੁਸਾ ਅਭੂਤਂ ਅਤਚ੍ਛਂ ਪਰੇਸਂ ਵਿਞ੍ਞਾਪਨਵਸੇਨ ਵਦਨਸੀਲਸ੍ਸ. ਯਸ੍ਸ ਦਸਸੁ ਵਚਨੇਸੁ ਏਕਮ੍ਪਿ ਸਚ੍ਚਂ ਨਤ੍ਥਿ, ਏਵਰੂਪੇ ਵਤ੍ਤਬ੍ਬਮੇਵ ਨਤ੍ਥਿ. ਜਨ੍ਤੁਨੋਤਿ ਸਤ੍ਤਸ੍ਸ. ਸਤ੍ਤੋ ਹਿ ਜਾਯਨਟ੍ਠੇਨ ‘‘ਜਨ੍ਤੂ’’ਤਿ ਵੁਚ੍ਚਤਿ. ਵਿਤਿਣ੍ਣਪਰਲੋਕਸ੍ਸਾਤਿ ਵਿਸ੍ਸਟ੍ਠਪਰਲੋਕਸ੍ਸ. ਈਦਿਸੋ ਹਿ ਮਨੁਸ੍ਸਸਮ੍ਪਤ੍ਤਿ ਦੇਵਲੋਕਸਮ੍ਪਤ੍ਤਿ ਅਵਸਾਨੇ ਨਿਬ੍ਬਾਨਸਮ੍ਪਤ੍ਤੀਤਿ ਇਮਾ ਤਿਸ੍ਸੋਪਿ ਸਮ੍ਪਤ੍ਤਿਯੋ ਨ ਪਸ੍ਸਤਿ. ਨਤ੍ਥਿ ਪਾਪਨ੍ਤਿ ਤਸ੍ਸ ਤਾਦਿਸਸ੍ਸ ਇਦਂ ਨਾਮ ਪਾਪਂ ਨ ਕਤ੍ਤਬ੍ਬਨ੍ਤਿ ਨਤ੍ਥੀਤਿ.

ਪਞ੍ਚਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਦਾਨਸੁਤ੍ਤਵਣ੍ਣਨਾ

੨੬. ਛਟ੍ਠੇ ਏਵਞ੍ਚੇਤਿ ਏਤ੍ਥ ਏਵਨ੍ਤਿ ਉਪਮਾਕਾਰੇ ਨਿਪਾਤੋ, ਚੇਤਿ ਪਰਿਕਪ੍ਪਨੇ. ਸਤ੍ਤਾਤਿ ਰੂਪਾਦੀਸੁ ਸਤ੍ਤਾ ਵਿਸਤ੍ਤਾ. ਜਾਨੇਯ੍ਯੁਨ੍ਤਿ ਬੁਜ੍ਝੇਯ੍ਯੁਂ. ਦਾਨਸਂਵਿਭਾਗਸ੍ਸਾਤਿ ਯਾਯ ਹਿ ਚੇਤਨਾਯ ਅਨ੍ਨਾਦਿਦੇਯ੍ਯਧਮ੍ਮਂ ਸਂਹਰਿਤ੍ਵਾ ਅਨੁਕਮ੍ਪਾਪੂਜਾਸੁ ਅਞ੍ਞਤਰਵਸੇਨ ਪਰੇਸਂ ਦੀਯਤਿ, ਤਂ ਦਾਨਂ. ਯਾਯ ਪਨ ਅਤ੍ਤਨਾ ਪਰਿਭੁਞ੍ਜਿਤਬ੍ਬਭਾਵੇਨ ਗਹਿਤਵਤ੍ਥੁਸ੍ਸ ਏਕਦੇਸੋ ਸਂਵਿਭਜਿਤ੍ਵਾ ਦੀਯਤਿ, ਅਯਂ ਸਂਵਿਭਾਗੋ. ਵਿਪਾਕਨ੍ਤਿ ਫਲਂ. ਯਥਾਹਂ ਜਾਨਾਮੀਤਿ ਯਥਾ ਅਹਂ ਜਾਨਾਮਿ. ਇਦਂ ਵੁਤ੍ਤਂ ਹੋਤਿ – ਤਿਰਚ੍ਛਾਨਗਤਸ੍ਸਪਿ ਦਾਨਂ ਦਤ੍ਵਾ ਅਤ੍ਤਭਾਵਸਤੇ ਪਵਤ੍ਤਸੁਖਵਿਪਚ੍ਚਨਵਸੇਨ ਸਤਗੁਣਾ ਦਕ੍ਖਿਣਾ ਹੋਤੀਤਿ ਏਵਮਾਦਿਨਾ, ਭਿਕ੍ਖਵੇ, ਯੇਨ ਪਕਾਰੇਨ ਅਹਂ ਦਾਨਸ੍ਸ ਸਂਵਿਭਾਗਸ੍ਸ ਚ ਵਿਪਾਕਂ ਕਮ੍ਮਵਿਪਾਕਂ ਞਾਣਬਲੇਨ ਪਚ੍ਚਕ੍ਖਤੋ ਜਾਨਾਮਿ, ਏਵਂ ਇਮੇ ਸਤ੍ਤਾ ਯਦਿ ਜਾਨੇਯ੍ਯੁਨ੍ਤਿ. ਨ ਅਦਤ੍ਵਾ ਭੁਞ੍ਜੇਯ੍ਯੁਨ੍ਤਿ ਯਂ ਭੁਞ੍ਜਿਤਬ੍ਬਯੁਤ੍ਤਕਂ ਅਤ੍ਤਨੋ ਅਤ੍ਥਿ, ਤਤੋ ਪਰੇਸਂ ਨ ਅਦਤ੍ਵਾ ਮਚ੍ਛਰਿਯਚਿਤ੍ਤੇਨ ਚ ਤਣ੍ਹਾਲੋਭਵਸੇਨ ਚ ਭੁਞ੍ਜੇਯ੍ਯੁਂ, ਦਤ੍ਵਾਵ ਭੁਞ੍ਜੇਯ੍ਯੁਂ. ਨ ਚ ਨੇਸਂ ਮਚ੍ਛੇਰਮਲਂ ਚਿਤ੍ਤਂ ਪਰਿਯਾਦਾਯ ਤਿਟ੍ਠੇਯ੍ਯਾਤਿ ਅਤ੍ਤਨੋ ਸਮ੍ਪਤ੍ਤੀਨਂ ਪਰੇਹਿ ਸਾਧਾਰਣਭਾਵਾਸਹਨਲਕ੍ਖਣਂ ਚਿਤ੍ਤਸ੍ਸ ਪਭਸ੍ਸਰਭਾਵਦੂਸਕਾਨਂ ਉਪਕ੍ਕਿਲੇਸਭੂਤਾਨਂ ਕਣ੍ਹਧਮ੍ਮਾਨਂ ਅਞ੍ਞਤਰਂ ਮਚ੍ਛੇਰਮਲਂ. ਅਥ ਵਾ ਯਥਾਵੁਤ੍ਤਮਚ੍ਛੇਰਞ੍ਚੇਵ ਅਞ੍ਞਮ੍ਪਿ ਦਾਨਨ੍ਤਰਾਯਕਰਂ ਇਸ੍ਸਾਲੋਭਦੋਸਾਦਿਮਲਞ੍ਚ ਨੇਸਂ ਸਤ੍ਤਾਨਂ ਚਿਤ੍ਤਂ ਯਥਾ ਦਾਨਚੇਤਨਾ ਨ ਪਵਤ੍ਤਤਿ, ਨ ਵਾ ਸੁਪਰਿਸੁਦ੍ਧਾ ਹੋਤਿ, ਏਵਂ ਪਰਿਯਾਦਾਯ ਪਰਿਤੋ ਗਹੇਤ੍ਵਾ ਅਭਿਭਵਿਤ੍ਵਾ ਨ ਤਿਟ੍ਠੇਯ੍ਯ. ਕੋ ਹਿ ਸਮ੍ਮਦੇਵ ਦਾਨਫਲਂ ਜਾਨਨ੍ਤੋ ਅਤ੍ਤਨੋ ਚਿਤ੍ਤੇ ਮਚ੍ਛੇਰਮਲਸ੍ਸ ਓਕਾਸਂ ਦਦੇਯ੍ਯ.

ਯੋਪਿ ਨੇਸਂ ਅਸ੍ਸ ਚਰਿਮੋ ਆਲੋਪੋਤਿ ਨੇਸਂ ਸਤ੍ਤਾਨਂ ਯੋ ਸਬ੍ਬਪਚ੍ਛਿਮਕੋ ਆਲੋਪੋ ਸਿਯਾ. ਚਰਿਮਂ ਕਬਲ਼ਨ੍ਤਿ ਤਸ੍ਸੇਵ ਵੇਵਚਨਂ. ਇਦਂ ਵੁਤ੍ਤਂ ਹੋਤਿ – ਇਮੇ ਸਤ੍ਤਾ ਪਕਤਿਯਾ ਯਤ੍ਤਕੇਹਿ ਆਲੋਪੇਹਿ ਸਯਂ ਯਾਪੇਯ੍ਯੁਂ, ਤੇਸੁ ਏਕਮੇਵ ਆਲੋਪਂ ਅਤ੍ਤਨੋ ਅਤ੍ਥਾਯ ਠਪੇਤ੍ਵਾ ਤਦਞ੍ਞੇ ਸਬ੍ਬੇ ਆਲੋਪੇ ਆਗਤਾਗਤਾਨਂ ਅਤ੍ਥਿਕਾਨਂ ਦਤ੍ਵਾ ਯੋ ਠਪਿਤੋ ਆਲੋਪੋ ਅਸ੍ਸ, ਸੋ ਇਧ ਚਰਿਮੋ ਆਲੋਪੋ ਨਾਮ. ਤਤੋਪਿ ਨ ਅਸਂਵਿਭਜਿਤ੍ਵਾ ਭੁਞ੍ਜੇਯ੍ਯੁਂ, ਸਚੇ ਨੇਸਂ ਪਟਿਗ੍ਗਾਹਕਾ ਅਸ੍ਸੂਤਿ ਨੇਸਂ ਸਤ੍ਤਾਨਂ ਪਟਿਗ੍ਗਾਹਕਾ ਯਦਿ ਸਿਯੁਂ, ਤਤੋਪਿ ਯਥਾਵੁਤ੍ਤਚਰਿਮਾਲੋਪਤੋਪਿ ਸਂਵਿਭਜਿਤ੍ਵਾਵ ਏਕਦੇਸਂ ਦਤ੍ਵਾਵ ਭੁਞ੍ਜੇਯ੍ਯੁਂ, ਯਥਾਹਂ ਦਾਨਸਂਵਿਭਾਗਸ੍ਸ ਵਿਪਾਕਂ ਪਚ੍ਚਕ੍ਖਤੋ ਜਾਨਾਮਿ, ਏਵਂ ਯਦਿ ਜਾਨੇਯ੍ਯੁਨ੍ਤਿ. ਯਸ੍ਮਾ ਚ ਖੋਤਿਆਦਿਨਾ ਕਮ੍ਮਫਲਸ੍ਸ ਅਪ੍ਪਚ੍ਚਕ੍ਖਭਾਵਤੋ ਏਵਮੇਤੇ ਸਤ੍ਤਾ ਦਾਨਸਂਵਿਭਾਗੇਸੁ ਨ ਪਵਤ੍ਤਨ੍ਤੀਤਿ ਯਥਾਧਿਪ੍ਪੇਤਮਤ੍ਥਂ ਕਾਰਣੇਨ ਸਮ੍ਪਟਿਪਾਦੇਤਿ. ਏਤੇਨੇਵ ਤੇਸਂ ਤਦਞ੍ਞਪੁਞ੍ਞੇਸੁ ਚ ਅਪ੍ਪਟਿਪਤ੍ਤਿਯਾ ਅਪੁਞ੍ਞੇਸੁ ਚ ਪਟਿਪਤ੍ਤਿਯਾ ਕਾਰਣਂ ਦਸ੍ਸਿਤਨ੍ਤਿ ਦਟ੍ਠਬ੍ਬਂ.

ਗਾਥਾਸੁ ਯਥਾਵੁਤ੍ਤਂ ਮਹੇਸਿਨਾਤਿ ਮਹੇਸਿਨਾ ਭਗਵਤਾ ‘‘ਤਿਰਚ੍ਛਾਨਗਤੇ ਦਾਨਂ ਦਤ੍ਵਾ ਸਤਗੁਣਾ ਦਕ੍ਖਿਣਾ ਪਾਟਿਕਙ੍ਖਿਤਬ੍ਬਾ’ ਤਿਆਦਿਨਾ, ਇਧੇਵ ਵਾ ‘‘ਏਵਂ ਚੇ ਸਤ੍ਤਾ ਜਾਨੇਯ੍ਯੁ’’ਨ੍ਤਿਆਦਿਨਾ ਯਥਾਵੁਤ੍ਤਂ, ਞਾਣਚਾਰੇਨ ਤਂ ਯਥਾਵੁਤ੍ਤਂ ਚਿਤ੍ਤਂ ਞਾਤਨ੍ਤਿ ਅਤ੍ਥੋ. ਵਿਪਾਕਂ ਸਂਵਿਭਾਗਸ੍ਸਾਤਿ ਸਂਵਿਭਾਗਸ੍ਸਪਿ ਵਿਪਾਕਂ, ਕੋ ਪਨ ਵਾਦੋ ਦਾਨਸ੍ਸ. ਯਥਾ ਹੋਤਿ ਮਹਪ੍ਫਲਨ੍ਤਿ ਯਥਾ ਸੋ ਵਿਪਾਕੋ ਮਹਨ੍ਤਂ ਫਲਂ ਹੋਤਿ, ਏਵਂ ਇਮੇ ਸਤ੍ਤਾ ਯਦਿ ਜਾਨੇਯ੍ਯੁਨ੍ਤਿ ਸਮ੍ਬਨ੍ਧੋ. ਵਿਨੇਯ੍ਯ ਮਚ੍ਛੇਰਮਲਨ੍ਤਿ ਮਚ੍ਛਰਿਯਮਲਂ ਅਪਨੇਤ੍ਵਾ ਕਮ੍ਮਫਲਸਦ੍ਧਾਯ ਰਤਨਤ੍ਤਯਸਦ੍ਧਾਯ ਚ ਵਿਸੇਸਤੋ ਪਸਨ੍ਨੇਨ ਚਿਤ੍ਤੇਨ ਯੇਸੁ ਕਿਲੇਸੇਹਿ ਆਰਕਤ੍ਤਾ ਅਰਿਯੇਸੁ ਸੀਲਾਦਿਗੁਣਸਮ੍ਪਨ੍ਨੇਸੁ ਦਿਨ੍ਨਂ ਅਪ੍ਪਕਮ੍ਪਿ ਦਾਨਂ ਮਹਪ੍ਫਲਂ ਹੋਤਿ, ਤੇਸੁ ਯੁਤ੍ਤਕਾਲੇਨ ਦਜ੍ਜੁਂ ਦਦੇਯ੍ਯੁਂ.

ਮਹਪ੍ਫਲਭਾਵਕਰਣਤੋ ਦਕ੍ਖਿਣਂ ਅਰਹਨ੍ਤੀਤਿ ਦਕ੍ਖਿਣੇਯ੍ਯਾ, ਸਮ੍ਮਾਪਟਿਪਨ੍ਨਾ, ਤੇਸੁ ਦਕ੍ਖਿਣੇਯ੍ਯੇਸੁ. ਦਕ੍ਖਿਣਂ ਪਰਲੋਕਂ ਸਦ੍ਦਹਿਤ੍ਵਾ ਦਾਤਬ੍ਬਂ ਦੇਯ੍ਯਧਮ੍ਮਂ ਯਥਾ ਤਂ ਦਾਨਂ ਹੋਤਿ ਮਹਾਦਾਨਂ, ਏਵਂ ਦਤ੍ਵਾ. ਅਥ ਵਾ ਬਹੁਨੋ ਅਨ੍ਨਂ ਦਤ੍ਵਾ, ਕਥਂ ਪਨ ਅਨ੍ਨਂ ਦਾਤਬ੍ਬਨ੍ਤਿ ਆਹ ‘‘ਦਕ੍ਖਿਣੇਯ੍ਯੇਸੁ ਦਕ੍ਖਿਣ’’ਨ੍ਤਿ. ਇਤੋ ਮਨੁਸ੍ਸਤ੍ਤਾ ਮਨੁਸ੍ਸਤ੍ਤਭਾਵਤੋ ਚੁਤਾ ਪਟਿਸਨ੍ਧਿਵਸੇਨ ਸਗ੍ਗਂ ਗਚ੍ਛਨ੍ਤਿ ਦਾਯਕਾ. ਕਾਮਕਾਮਿਨੋਤਿ ਕਾਮੇਤਬ੍ਬਾਨਂ ਉਲ਼ਾਰਾਨਂ ਦੇਵਭੋਗਾਨਂ ਪਟਿਲਦ੍ਧਰੂਪਵਿਭਵੇਨ ਕਮ੍ਮੁਨਾ ਉਪਗਮਨੇ ਸਾਧੁਕਾਰਿਤਾਯ ਕਾਮਕਾਮਿਨੋ ਸਬ੍ਬਕਾਮਸਮਙ੍ਗਿਨੋ. ਮੋਦਨ੍ਤਿ ਯਥਾਰੁਚਿ ਪਰਿਚਾਰੇਨ੍ਤੀਤਿ ਅਤ੍ਥੋ.

ਛਟ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਮੇਤ੍ਤਾਭਾਵਨਾਸੁਤ੍ਤਵਣ੍ਣਨਾ

੨੭. ਸਤ੍ਤਮੇ ਯਾਨਿ ਕਾਨਿਚੀਤਿ ਅਨਵਸੇਸਪਰਿਯਾਦਾਨਂ. ਓਪਧਿਕਾਨਿ ਪੁਞ੍ਞਕਿਰਿਯਵਤ੍ਥੂਨੀਤਿ

ਤੇਸਂ ਨਿਯਮਨਂ. ਤਤ੍ਥ ਉਪਧਿ ਵੁਚ੍ਚਨ੍ਤਿ ਖਨ੍ਧਾ, ਉਪਧਿਸ੍ਸ ਕਰਣਂ ਸੀਲਂ ਏਤੇਸਂ, ਉਪਧਿਪ੍ਪਯੋਜਨਾਨਿ ਵਾ ਓਪਧਿਕਾਨਿ. ਸਮ੍ਪਤ੍ਤਿਭਵੇ ਅਤ੍ਤਭਾਵਜਨਕਾਨਿ ਪਟਿਸਨ੍ਧਿਪਵਤ੍ਤਿਵਿਪਾਕਦਾਯਕਾਨਿ. ਪੁਞ੍ਞਕਿਰਿਯਵਤ੍ਥੂਨੀਤਿ ਪੁਞ੍ਞਕਿਰਿਯਾ ਚ ਤਾ ਤੇਸਂ ਤੇਸਂ ਫਲਾਨਿਸਂਸਾਨਂ ਵਤ੍ਥੂਨਿ ਚਾਤਿ ਪੁਞ੍ਞਕਿਰਿਯਵਤ੍ਥੂਨਿ. ਤਾਨਿ ਪਨ ਸਙ੍ਖੇਪਤੋ ਦਾਨਮਯਂ, ਸੀਲਮਯਂ, ਭਾਵਨਾਮਯਨ੍ਤਿ ਤਿਵਿਧਾਨਿ ਹੋਨ੍ਤਿ. ਤਤ੍ਥ ਯਂ ਵਤ੍ਤਬ੍ਬਂ, ਤਂ ਪਰਤੋ ਤਿਕਨਿਪਾਤਵਣ੍ਣਨਾਯਂ ਆਵਿ ਭਵਿਸ੍ਸਤਿ. ਮੇਤ੍ਤਾਯ ਚੇਤੋਵਿਮੁਤ੍ਤਿਯਾਤਿ ਮੇਤ੍ਤਾਭਾਵਨਾਵਸੇਨ ਪਟਿਲਦ੍ਧਤਿਕਚਤੁਕ੍ਕਜ੍ਝਾਨਸਮਾਪਤ੍ਤਿਯਾ. ‘‘ਮੇਤ੍ਤਾ’’ਤਿ ਹਿ ਵੁਤ੍ਤੇ ਉਪਚਾਰੋਪਿ ਲਬ੍ਭਤਿ ਅਪ੍ਪਨਾਪਿ, ‘‘ਚੇਤੋਵਿਮੁਤ੍ਤੀ’’ਤਿ ਪਨ ਵੁਤ੍ਤੇ ਅਪ੍ਪਨਾਝਾਨਮੇਵ ਲਬ੍ਭਤਿ. ਤਞ੍ਹਿ ਨੀਵਰਣਾਦਿਪਚ੍ਚਨੀਕਧਮ੍ਮਤੋ ਚਿਤ੍ਤਸ੍ਸ ਸੁਟ੍ਠੁ ਵਿਮੁਤ੍ਤਿਭਾਵੇਨ ਚੇਤੋਵਿਮੁਤ੍ਤੀਤਿ ਵੁਚ੍ਚਤਿ. ਕਲਂ ਨਾਗ੍ਘਨ੍ਤਿ ਸੋਲ਼ਸਿਨ੍ਤਿ ਮੇਤ੍ਤਾਬ੍ਰਹ੍ਮਵਿਹਾਰਸ੍ਸ ਸੋਲ਼ਸਭਾਗਂ ਓਪਧਿਕਾਨਿ ਪੁਞ੍ਞਕਿਰਿਯਵਤ੍ਥੂਨਿ ਨ ਅਗ੍ਘਨ੍ਤਿ. ਇਦਂ ਵੁਤ੍ਤਂ ਹੋਤਿ – ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਯੋ ਵਿਪਾਕੋ, ਤਂ ਸੋਲ਼ਸ ਕੋਟ੍ਠਾਸੇ ਕਤ੍ਵਾ ਤਤੋ ਏਕਂ ਪੁਨ ਸੋਲ਼ਸ ਕੋਟ੍ਠਾਸੇ ਕਤ੍ਵਾ ਤਤ੍ਥ ਯੋ ਏਕਕੋਟ੍ਠਾਸੋ, ਨ ਤਂ ਅਞ੍ਞਾਨਿ ਓਪਧਿਕਾਨਿ ਪੁਞ੍ਞਕਿਰਿਯਵਤ੍ਥੂਨਿ ਅਗ੍ਘਨ੍ਤੀਤਿ. ਅਧਿਗ੍ਗਹੇਤ੍ਵਾਤਿ ਅਭਿਭਵਿਤ੍ਵਾ. ਭਾਸਤੇਤਿ ਉਪਕ੍ਕਿਲੇਸਵਿਸੁਦ੍ਧਿਯਾ ਦਿਪ੍ਪਤਿ. ਤਪਤੇਤਿ ਤਤੋ ਏਵ ਅਨਵਸੇਸੇ ਪਟਿਪਕ੍ਖਧਮ੍ਮੇ ਸਨ੍ਤਪਤਿ. ਵਿਰੋਚਤੀਤਿ ਉਭਯਸਮ੍ਪਤ੍ਤਿਯਾ ਵਿਰੋਚਤਿ. ਮੇਤ੍ਤਾ ਹਿ ਚੇਤੋਵਿਮੁਤ੍ਤਿ ਚਨ੍ਦਾਲੋਕਸਙ੍ਖਾਤਾ ਵਿਗਤੂਪਕ੍ਕਿਲੇਸਾ ਜੁਣ੍ਹਾ ਵਿਯ ਦਿਪ੍ਪਤਿ, ਆਤਪੋ ਵਿਯ ਅਨ੍ਧਕਾਰਂ ਪਚ੍ਚਨੀਕਧਮ੍ਮੇ ਵਿਧਮਨ੍ਤੀ ਤਪਤਿ, ਓਸਧਿਤਾਰਕਾ ਵਿਯ ਵਿਜ੍ਜੋਤਮਾਨਾ ਵਿਰੋਚਤਿ ਚ.

ਸੇਯ੍ਯਥਾਪੀਤਿ ਓਪਮ੍ਮਦਸ੍ਸਨਤ੍ਥੇ ਨਿਪਾਤੋ. ਤਾਰਕਰੂਪਾਨਨ੍ਤਿ ਜੋਤੀਨਂ. ਚਨ੍ਦਿਯਾਤਿ ਚਨ੍ਦਸ੍ਸ ਅਯਨ੍ਤਿ ਚਨ੍ਦੀ, ਤਸ੍ਸਾ ਚਨ੍ਦਿਯਾ, ਪਭਾਯ ਜੁਣ੍ਹਾਯਾਤਿ ਅਤ੍ਥੋ. ਵਸ੍ਸਾਨਨ੍ਤਿ ਵਸ੍ਸਾਨਂ ਬਹੁਵਸੇਨ ਲਦ੍ਧਵੋਹਾਰਸ੍ਸ ਉਤੁਨੋ. ਪਚ੍ਛਿਮੇ ਮਾਸੇਤਿ ਕਤ੍ਤਿਕਮਾਸੇ. ਸਰਦਸਮਯੇਤਿ ਸਰਦਕਾਲੇ. ਅਸ੍ਸਯੁਜਕਤ੍ਤਿਕਮਾਸਾ ਹਿ ਲੋਕੇ ‘‘ਸਰਦਉਤੂ’’ਤਿ ਵੁਚ੍ਚਨ੍ਤਿ. ਵਿਦ੍ਧੇਤਿ ਉਬ੍ਬਿਦ੍ਧੇ, ਮੇਘਵਿਗਮੇਨ ਦੂਰੀਭੂਤੇਤਿ ਅਤ੍ਥੋ. ਤੇਨੇਵਾਹ ‘‘ਵਿਗਤਵਲਾਹਕੇ’’ਤਿ. ਦੇਵੇਤਿ ਆਕਾਸੇ. ਨਭਂ ਅਬ੍ਭੁਸ੍ਸਕ੍ਕਮਾਨੋਤਿ ਉਦਯਟ੍ਠਾਨਤੋ ਆਕਾਸਂ ਉਲ੍ਲਙ੍ਘਨ੍ਤੋ. ਤਮਗਤਨ੍ਤਿ ਤਮਂ. ਅਭਿਵਿਹਚ੍ਚਾਤਿ ਅਭਿਹਨ੍ਤ੍ਵਾ ਵਿਧਮਿਤ੍ਵਾ. ਓਸਧਿਤਾਰਕਾਤਿ ਉਸ੍ਸਨ੍ਨਾ ਪਭਾ ਏਤਾਯ ਧੀਯਤਿ, ਓਸਧੀਨਂ ਵਾ ਅਨੁਬਲਪ੍ਪਦਾਯਿਕਤ੍ਤਾ ਓਸਧੀਤਿ ਲਦ੍ਧਨਾਮਾ ਤਾਰਕਾ.

ਏਤ੍ਥਾਹ – ਕਸ੍ਮਾ ਪਨ ਭਗਵਤਾ ਸਮਾਨੇਪਿ ਓਪਧਿਕਭਾਵੇ ਮੇਤ੍ਤਾ ਇਤਰੇਹਿ ਓਪਧਿਕਪੁਞ੍ਞੇਹਿ ਵਿਸੇਸੇਤ੍ਵਾ ਵੁਤ੍ਤਾਤਿ? ਵੁਚ੍ਚਤੇ – ਸੇਟ੍ਠਟ੍ਠੇਨ ਨਿਦ੍ਦੋਸਭਾਵੇਨ ਚ ਸਤ੍ਤੇਸੁ ਸੁਪ੍ਪਟਿਪਤ੍ਤਿਭਾਵਤੋ. ਸੇਟ੍ਠਾ ਹਿ ਏਤੇ ਵਿਹਾਰਾ, ਸਬ੍ਬਸਤ੍ਤੇਸੁ ਸਮ੍ਮਾਪਟਿਪਤ੍ਤਿਭੂਤਾਨਿ ਯਦਿਦਂ ਮੇਤ੍ਤਾਝਾਨਾਨਿ. ਯਥਾ ਚ ਬ੍ਰਹ੍ਮਾਨੋ ਨਿਦ੍ਦੋਸਚਿਤ੍ਤਾ ਵਿਹਰਨ੍ਤਿ, ਏਵਂ ਏਤੇਹਿ ਸਮਨ੍ਨਾਗਤਾ ਯੋਗਿਨੋ ਬ੍ਰਹ੍ਮਸਮਾਵ ਹੁਤ੍ਵਾ ਵਿਹਰਨ੍ਤਿ. ਤਥਾ ਹਿਮੇ ‘‘ਬ੍ਰਹ੍ਮਵਿਹਾਰਾ’’ਤਿ ਵੁਚ੍ਚਨ੍ਤਿ. ਇਤਿ ਸੇਟ੍ਠਟ੍ਠੇਨ ਨਿਦ੍ਦੋਸਭਾਵੇਨ ਚ ਸਤ੍ਤੇਸੁ ਸੁਪ੍ਪਟਿਪਤ੍ਤਿਭਾਵਤੋ ਮੇਤ੍ਤਾਵ ਇਤਰੇਹਿ ਓਪਧਿਕਪੁਞ੍ਞੇਹਿ ਵਿਸੇਸੇਤ੍ਵਾ ਵੁਤ੍ਤਾ.

ਏਵਮ੍ਪਿ ਕਸ੍ਮਾ ਮੇਤ੍ਤਾਵ ਏਵਂ ਵਿਸੇਸੇਤ੍ਵਾ ਵੁਤ੍ਤਾ? ਇਤਰੇਸਂ ਬ੍ਰਹ੍ਮਵਿਹਾਰਾਨਂ ਅਧਿਟ੍ਠਾਨਭਾਵਤੋ ਦਾਨਾਦੀਨਂ ਸਬ੍ਬੇਸਂ ਕਲ੍ਯਾਣਧਮ੍ਮਾਨਂ ਪਰਿਪੂਰਿਕਤ੍ਤਾ ਚ. ਅਯਞ੍ਹਿ ਸਤ੍ਤੇਸੁ ਹਿਤਾਕਾਰਪ੍ਪਵਤ੍ਤਿਲਕ੍ਖਣਾ ਮੇਤ੍ਤਾ, ਹਿਤੂਪਸਂਹਾਰਸਾ, ਆਘਾਤਵਿਨਯਪਚ੍ਚੁਪਟ੍ਠਾਨਾ. ਯਦਿ ਅਨੋਧਿਸੋ ਭਾਵਿਤਾ ਬਹੁਲੀਕਤਾ, ਅਥ ਸੁਖੇਨੇਵ ਕਰੁਣਾਦਿਭਾਵਨਾ ਸਮ੍ਪਜ੍ਜਨ੍ਤੀਤਿ ਮੇਤ੍ਤਾ ਇਤਰੇਸਂ ਬ੍ਰਹ੍ਮਵਿਹਾਰਾਨਂ ਅਧਿਟ੍ਠਾਨਂ. ਤਥਾ ਹਿ ਸਤ੍ਤੇਸੁ ਹਿਤਜ੍ਝਾਸਯਤਾਯ ਸਤਿ ਨੇਸਂ ਦੁਕ੍ਖਾਸਹਨਤਾ, ਸਮ੍ਪਤ੍ਤਿਵਿਸੇਸਾਨਂ ਚਿਰਟ੍ਠਿਤਿਕਾਮਤਾ, ਪਕ੍ਖਪਾਤਾਭਾਵੇਨ ਸਬ੍ਬਤ੍ਥ ਸਮਪ੍ਪਵਤ੍ਤਚਿਤ੍ਤਤਾ ਚ ਸੁਖੇਨੇਵ ਇਜ੍ਝਨ੍ਤਿ. ਏਵਞ੍ਚ ਸਕਲਲੋਕਹਿਤਸੁਖਵਿਧਾਨਾਧਿਮੁਤ੍ਤਾ ਮਹਾਬੋਧਿਸਤ੍ਤਾ ‘‘ਇਮਸ੍ਸ ਦਾਤਬ੍ਬਂ, ਇਮਸ੍ਸ ਨ ਦਾਤਬ੍ਬ’’ਨ੍ਤਿ ਉਤ੍ਤਮਵਿਚਯਵਸੇਨ ਵਿਭਾਗਂ ਅਕਤ੍ਵਾ ਸਬ੍ਬਸਤ੍ਤਾਨਂ ਨਿਰਵਸੇਸਸੁਖਨਿਦਾਨਂ ਦਾਨਂ ਦੇਨ੍ਤਿ, ਹਿਤਸੁਖਤ੍ਥਮੇਵ ਨੇਸਂ ਸੀਲਂ ਸਮਾਦਿਯਨ੍ਤਿ, ਸੀਲਪਰਿਪੂਰਣਤ੍ਥਂ ਨੇਕ੍ਖਮ੍ਮਂ ਭਜਨ੍ਤਿ, ਤੇਸਂ ਹਿਤਸੁਖੇਸੁ ਅਸਮ੍ਮੋਹਤ੍ਥਾਯ ਪਞ੍ਞਂ ਪਰਿਯੋਦਪੇਨ੍ਤਿ, ਹਿਤਸੁਖਾਭਿਵਡ੍ਢਨਤ੍ਥਮੇਵ ਦਲ਼੍ਹਂ ਵੀਰਿਯਮਾਰਭਨ੍ਤਿ, ਉਤ੍ਤਮਵੀਰਿਯਵਸੇਨ ਵੀਰਭਾਵਂ ਪਤ੍ਤਾਪਿ ਸਤ੍ਤਾਨਂ ਨਾਨਪ੍ਪਕਾਰਂ ਹਿਤਜ੍ਝਾਸਯੇਨੇਵ ਅਪਰਾਧਂ ਖਮਨ੍ਤਿ, ‘‘ਇਦਂ ਵੋ ਦਸ੍ਸਾਮ, ਕਰਿਸ੍ਸਾਮਾ’’ਤਿਆਦਿਨਾ ਕਤਂ ਪਟਿਞ੍ਞਾਤਂ ਨ ਵਿਸਂਵਾਦੇਨ੍ਤਿ, ਤੇਸਂ ਹਿਤਸੁਖਾਯੇਵ ਅਚਲਾਧਿਟ੍ਠਾਨਾ ਹੋਨ੍ਤਿ. ਤੇਸੁ ਅਚਲਾਯ ਮੇਤ੍ਤਾਯ ਪੁਬ੍ਬਕਾਰਿਨੋ ਹਿਤਜ੍ਝਾਸਯੇਨੇਵ ਨੇਸਂ ਵਿਪ੍ਪਕਾਰੇ ਉਦਾਸੀਨਾ ਹੋਨ੍ਤਿ, ਪੁਬ੍ਬਕਾਰਿਤਾਯਪਿ ਨ ਪਚ੍ਚੁਪਕਾਰਮਾਸਿਸਨ੍ਤੀਤਿ. ਏਵਂ ਤੇ ਪਾਰਮਿਯੋ ਪੂਰੇਤ੍ਵਾ ਯਾਵ ਦਸਬਲਚਤੁ-ਵੇਸਾਰਜ੍ਜ-ਛਅਸਾਧਾਰਣਞਾਣ-ਅਟ੍ਠਾਰਸਾਵੇਣਿਕਬੁਦ੍ਧਧਮ੍ਮਪ੍ਪਭੇਦੇ ਸਬ੍ਬੇਪਿ ਕਲ੍ਯਾਣਧਮ੍ਮੇ ਪਰਿਪੂਰੇਨ੍ਤਿ. ਏਵਂ ਦਾਨਾਦੀਨਂ ਸਬ੍ਬੇਸਂ ਕਲ੍ਯਾਣਧਮ੍ਮਾਨਂ ਪਾਰਿਪੂਰਿਕਾ ਮੇਤ੍ਤਾਤਿ ਚ ਇਮਸ੍ਸ ਵਿਸੇਸਸ੍ਸ ਦਸ੍ਸਨਤ੍ਥਂ ਸਾ ਇਤਰੇਹਿ ਵਿਸੇਸੇਤ੍ਵਾ ਵੁਤ੍ਤਾ.

ਅਪਿਚ ਮੇਤ੍ਤਾਯ ਇਤਰੇਹਿ ਓਪਧਿਕਪੁਞ੍ਞੇਹਿ ਮਹਾਨੁਭਾਵਤਾ ਵੇਲਾਮਸੁਤ੍ਤੇਨ ਦੀਪੇਤਬ੍ਬਾ. ਤਤ੍ਥ ਹਿ ਯਥਾ ਨਾਮ ਮਹਤਾ ਵੇਲਾਮਸ੍ਸ ਦਾਨਤੋ ਏਕਸ੍ਸ ਸੋਤਾਪਨ੍ਨਸ੍ਸ ਦਾਨਂ ਮਹਪ੍ਫਲਤਰਂ ਵੁਤ੍ਤਂ, ਏਵਂ ਸੋਤਾਪਨ੍ਨਸਤਤੋ ਏਕਸ੍ਸ ਸਕਦਾਗਾਮਿਸ੍ਸ ਦਾਨਂ…ਪੇ… ਪਚ੍ਚੇਕਬੁਦ੍ਧਸਤਤੋ ਭਗਵਤੋ, ਤਤੋਪਿ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਦਾਨਂ, ਤਤੋਪਿ ਚਾਤੁਦ੍ਦਿਸਸ੍ਸ ਸਙ੍ਘਸ੍ਸ ਵਿਹਾਰਦਾਨਂ, ਤਤੋਪਿ ਸਰਣਗਮਨਂ, ਤਤੋਪਿ ਸੀਲਸਮਾਦਾਨਂ, ਤਤੋਪਿ ਗਦ੍ਦੂਹਨਮਤ੍ਤਂ ਕਾਲਂ ਮੇਤ੍ਤਾਭਾਵਨਾ ਮਹਪ੍ਫਲਤਰਾ ਵੁਤ੍ਤਾ. ਯਥਾਹ –

‘‘ਯਂ ਗਹਪਤਿ ਵੇਲਾਮੋ ਬ੍ਰਾਹ੍ਮਣੋ ਦਾਨਂ ਅਦਾਸਿ ਮਹਾਦਾਨਂ. ਯੋ ਚੇਕਂ ਦਿਟ੍ਠਿਸਮ੍ਪਨ੍ਨਂ ਭੋਜੇਯ੍ਯ, ਇਦਂ ਤਤੋ ਮਹਪ੍ਫਲਤਰਂ. ਯੋ ਚ ਸਤਂ ਦਿਟ੍ਠਿਸਮ੍ਪਨ੍ਨਂ ਭੋਜੇਯ੍ਯ…ਪੇ… ਸੁਰਾਮੇਰਯਮਜ੍ਜਪ੍ਪਮਾਦਟ੍ਠਾਨਾ ਵੇਰਮਣਿਂ. ਯੋ ਚ ਅਨ੍ਤਮਸੋ ਗਦ੍ਦੂਹਨਮਤ੍ਤਮ੍ਪਿ ਮੇਤ੍ਤਚਿਤ੍ਤਂ ਭਾਵੇਯ੍ਯ, ਇਦਂ ਤਤੋ ਮਹਪ੍ਫਲਤਰ’’ਨ੍ਤਿ (ਅ. ਨਿ. ੯.੨੦).

ਮਹਗ੍ਗਤਪੁਞ੍ਞਭਾਵੇਨ ਪਨਸ੍ਸਾ ਪਰਿਤ੍ਤਪੁਞ੍ਞਤੋ ਸਾਤਿਸਯਤਾਯ ਵਤ੍ਤਬ੍ਬਮੇਵ ਨਤ੍ਥਿ. ਵੁਤ੍ਤਞ੍ਹੇਤਂ ‘‘ਯਂ ਪਮਾਣਕਤਂ ਕਮ੍ਮਂ, ਨ ਤਂ ਤਤ੍ਰਾਵਸਿਸ੍ਸਤਿ, ਨ ਤਂ ਤਤ੍ਰਾਵਤਿਟ੍ਠਤੀ’’ਤਿ (ਦੀ. ਨਿ. ੧.੫੫੬; ਸਂ. ਨਿ. ੪.੩੬੦). ਕਾਮਾਵਚਰਕਮ੍ਮਞ੍ਹਿ ਪਮਾਣਕਤਂ ਨਾਮ, ਮਹਗ੍ਗਤਕਮ੍ਮਂ ਪਨ ਪਮਾਣਂ ਅਤਿਕ੍ਕਮਿਤ੍ਵਾ ਓਧਿਸਕਾਨੋਧਿਸਕਫਰਣਵਸੇਨ ਵਡ੍ਢਿਤ੍ਵਾ ਕਤਤ੍ਤਾ ਅਪ੍ਪਮਾਣਕਤਂ ਨਾਮ. ਕਾਮਾਵਚਰਕਮ੍ਮਂ ਤਸ੍ਸ ਮਹਗ੍ਗਤਕਮ੍ਮਸ੍ਸ ਅਨ੍ਤਰਾ ਲਗ੍ਗਿਤੁਂ ਵਾ ਤਂ ਕਮ੍ਮਂ ਅਭਿਭਵਿਤ੍ਵਾ ਅਤ੍ਤਨੋ ਵਿਪਾਕਸ੍ਸ ਓਕਾਸਂ ਗਹੇਤ੍ਵਾ ਠਾਤੁਂ ਵਾ ਨ ਸਕ੍ਕੋਤਿ, ਅਥ ਖੋ ਮਹਗ੍ਗਤਕਮ੍ਮਮੇਵ ਤਂ ਪਰਿਤ੍ਤਕਮ੍ਮਂ ਮਹੋਘੋ ਵਿਯ ਪਰਿਤ੍ਤਂ ਉਦਕਂ ਅਭਿਭਵਿਤ੍ਵਾ ਅਤ੍ਤਨੋ ਓਕਾਸਂ ਗਹੇਤ੍ਵਾ ਤਿਟ੍ਠਤਿ, ਤਸ੍ਸ ਵਿਪਾਕਂ ਪਟਿਬਾਹਿਤ੍ਵਾ ਸਯਮੇਵ ਬ੍ਰਹ੍ਮਸਹਬ੍ਯਤਂ ਉਪਨੇਤੀਤਿ ਅਯਞ੍ਹਿ ਤਸ੍ਸ ਅਤ੍ਥੋਤਿ.

ਗਾਥਾਸੁ ਯੋਤਿ ਯੋ ਕੋਚਿ ਗਹਟ੍ਠੋ ਵਾ ਪਬ੍ਬਜਿਤੋ ਵਾ. ਮੇਤ੍ਤਨ੍ਤਿ ਮੇਤ੍ਤਾਝਾਨਂ. ਅਪ੍ਪਮਾਣਨ੍ਤਿ ਭਾਵਨਾਵਸੇਨ ਆਰਮ੍ਮਣਵਸੇਨ ਚ ਅਪ੍ਪਮਾਣਂ. ਅਸੁਭਭਾਵਨਾਦਯੋ ਵਿਯ ਹਿ ਆਰਮ੍ਮਣੇ ਏਕਦੇਸਗ੍ਗਹਣਂ ਅਕਤ੍ਵਾ ਅਨਵਸੇਸਫਰਣਵਸੇਨ ਅਨੋਧਿਸੋਫਰਣਵਸੇਨ ਚ ਅਪ੍ਪਮਾਣਾਰਮ੍ਮਣਤਾਯ ਪਗੁਣਭਾਵਨਾਵਸੇਨ ਅਪ੍ਪਮਾਣਂ. ਤਨੂ ਸਂਯੋਜਨਾ ਹੋਨ੍ਤੀਤਿ ਮੇਤ੍ਤਾਝਾਨਂ ਪਾਦਕਂ ਕਤ੍ਵਾ ਸਮ੍ਮਸਿਤ੍ਵਾ ਹੇਟ੍ਠਿਮੇ ਅਰਿਯਮਗ੍ਗੇ ਅਧਿਗਚ੍ਛਨ੍ਤਸ੍ਸ ਸੁਖੇਨੇਵ ਪਟਿਘਸਂਯੋਜਨਾਦਯੋ ਪਹੀਯਮਾਨਾ ਤਨੂ ਹੋਨ੍ਤਿ. ਤੇਨਾਹ ‘‘ਪਸ੍ਸਤੋ ਉਪਧਿਕ੍ਖਯ’’ਨ੍ਤਿ. ‘‘ਉਪਧਿਕ੍ਖਯੋ’’ਤਿ ਹਿ ਨਿਬ੍ਬਾਨਂ ਵੁਚ੍ਚਤਿ. ਤਞ੍ਚਸ੍ਸ ਸਚ੍ਛਿਕਿਰਿਯਾਭਿਸਮਯਵਸੇਨ ਮਗ੍ਗਞਾਣੇਨ ਪਸ੍ਸਤਿ. ਅਥ ਵਾ ਤਨੂ ਸਂਯੋਜਨਾ ਹੋਨ੍ਤੀਤਿ ਮੇਤ੍ਤਾਝਾਨਪਦਟ੍ਠਾਨਾਯ ਵਿਪਸ੍ਸਨਾਯ ਅਨੁਕ੍ਕਮੇਨ ਉਪਧਿਕ੍ਖਯਸਙ੍ਖਾਤਂ ਅਰਹਤ੍ਤਂ ਪਤ੍ਵਾ ਤਂ ਪਸ੍ਸਤੋ ਪਗੇਵ ਦਸਪਿ ਸਂਯੋਜਨਾ ਤਨੂ ਹੋਨ੍ਤਿ, ਪਹੀਯਨ੍ਤੀਤਿ ਅਤ੍ਥੋ. ਅਥ ਵਾ ਤਨੂ ਸਂਯੋਜਨਾ ਹੋਨ੍ਤੀਤਿ ਪਟਿਘੋ ਚੇਵ ਪਟਿਘਸਮ੍ਪਯੁਤ੍ਤਸਂਯੋਜਨਾ ਚ ਤਨੁਕਾ ਹੋਨ੍ਤਿ. ਪਸ੍ਸਤੋ ਉਪਧਿਕ੍ਖਯਨ੍ਤਿ ਤੇਸਂਯੇਵ ਕਿਲੇਸੂਪਧੀਨਂ ਖਯਸਙ੍ਖਾਤਂ ਮੇਤ੍ਤਂ ਅਧਿਗਮਵਸੇਨ ਪਸ੍ਸਨ੍ਤ ਸ੍ਸਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.

ਏਵਂ ਕਿਲੇਸਪ੍ਪਹਾਨਂ ਨਿਬ੍ਬਾਨਾਧਿਗਮਞ੍ਚ ਮੇਤ੍ਤਾਭਾਵਨਾਯ ਸਿਖਾਪ੍ਪਤ੍ਤਮਾਨਿਸਂਸਂ ਦਸ੍ਸੇਤ੍ਵਾ ਇਦਾਨਿ ਅਞ੍ਞੇ ਆਨਿਸਂਸੇ ਦਸ੍ਸੇਤੁਂ ‘‘ਏਕਮ੍ਪਿ ਚੇ’’ਤਿਆਦਿਮਾਹ. ਤਤ੍ਥ ਅਦੁਟ੍ਠਚਿਤ੍ਤੋਤਿ ਮੇਤ੍ਤਾਬਲੇਨ ਸੁਟ੍ਠੁ ਵਿਕ੍ਖਮ੍ਭਿਤਬ੍ਯਾਪਾਦਤਾਯ ਬ੍ਯਾਪਾਦੇਨ ਅਦੂਸਿਤਚਿਤ੍ਤੋ. ਮੇਤ੍ਤਾਯਤੀਤਿ ਹਿਤਫਰਣਵਸੇਨ ਮੇਤ੍ਤਂ ਕਰੋਤਿ. ਕੁਸਲੋਤਿ ਅਤਿਸਯੇਨ ਕੁਸਲਵਾ ਮਹਾਪੁਞ੍ਞੋ, ਪਟਿਘਾਦਿਅਨਤ੍ਥਵਿਗਮੇਨ ਵੋ. ਖੇਮੀ ਤੇਨਾਤਿ ਤੇਨ ਮੇਤ੍ਤਾਯਿਤੇਨ. ਸਬ੍ਬੇ ਚ ਪਾਣੇਤਿ ਚਸਦ੍ਦੋ ਬ੍ਯਤਿਰੇਕੇ. ਮਨਸਾਨੁਕਮ੍ਪਨ੍ਤਿ ਚਿਤ੍ਤੇਨ ਅਨੁਕਮ੍ਪਨ੍ਤੋ. ਇਦਂ ਵੁਤ੍ਤਂ ਹੋਤਿ – ਏਕਸਤ੍ਤਵਿਸਯਾਪਿ ਤਾਵ ਮੇਤ੍ਤਾ ਮਹਾਕੁਸਲਰਾਸਿ, ਸਬ੍ਬੇ ਪਨ ਪਾਣੇ ਅਤ੍ਤਨੋ ਪਿਯਪੁਤ੍ਤਂ ਵਿਯ ਹਿਤਫਰਣੇਨ ਮਨਸਾ ਅਨੁਕਮ੍ਪਨ੍ਤੋ ਪਹੂਤਂ ਬਹੁਂ ਅਨਪ੍ਪਕਂ ਅਪਰਿਯਨ੍ਤਂ ਚਤੁਸਟ੍ਠਿਮਹਾਕਪ੍ਪੇਪਿ ਅਤ੍ਤਨੋ ਵਿਪਾਕਪ੍ਪਬਨ੍ਧਂ ਪਵਤ੍ਤੇਤੁਂ ਸਮਤ੍ਥਂ ਉਲ਼ਾਰਪੁਞ੍ਞਂ ਅਰਿਯੋ ਪਰਿਸੁਦ੍ਧਚਿਤ੍ਤੋ ਪੁਗ੍ਗਲੋ ਪਕਰੋਤਿ ਨਿਪ੍ਫਾਦੇਤਿ.

ਸਤ੍ਤਸਣ੍ਡਨ੍ਤਿ ਸਤ੍ਤਸਙ੍ਖਾਤੇਨ ਸਣ੍ਡੇਨ ਸਮਨ੍ਨਾਗਤਂ ਭਰਿਤਂ, ਸਤ੍ਤੇਹਿ ਅਵਿਰਲ਼ਂ ਆਕਿਣ੍ਣਮਨੁਸ੍ਸਨ੍ਤਿ ਅਤ੍ਥੋ. ਵਿਜਿਤ੍ਵਾਤਿ ਅਦਣ੍ਡੇਨ ਅਸਤ੍ਥੇਨ ਧਮ੍ਮੇਨੇਵ ਵਿਜਿਨਿਤ੍ਵਾ. ਰਾਜਿਸਯੋਤਿ ਇਸਿਸਦਿਸਾ ਧਮ੍ਮਿਕਰਾਜਾਨੋ. ਯਜਮਾਨਾਤਿ ਦਾਨਾਨਿ ਦਦਮਾਨਾ. ਅਨੁਪਰਿਯਗਾਤਿ ਵਿਚਰਿਂਸੁ.

ਅਸ੍ਸਮੇਧਨ੍ਤਿਆਦੀਸੁ ਪੋਰਾਣਕਰਾਜਕਾਲੇ ਕਿਰ ਸਸ੍ਸਮੇਧਂ, ਪੁਰਿਸਮੇਧਂ, ਸਮ੍ਮਾਪਾਸਂ, ਵਾਚਾਪੇਯ੍ਯਨ੍ਤਿ ਚਤ੍ਤਾਰਿ ਸਙ੍ਗਹਵਤ੍ਥੂਨਿ ਅਹੇਸੁਂ, ਯੇਹਿ ਰਾਜਾਨੋ ਲੋਕਂ ਸਙ੍ਗਣ੍ਹਿਂਸੁ. ਤਤ੍ਥ ਨਿਪ੍ਫਨ੍ਨਸਸ੍ਸਤੋ ਦਸਮਭਾਗਗ੍ਗਹਣਂ ਸਸ੍ਸਮੇਧਂ ਨਾਮ, ਸਸ੍ਸਸਮ੍ਪਾਦਨੇ, ਮੇਧਾਵਿਤਾਤਿ ਅਤ੍ਥੋ. ਮਹਾਯੋਧਾਨਂ ਛਮਾਸਿਕਂ ਭਤ੍ਤਵੇਤਨਾਨੁਪ੍ਪਦਾਨਂ ਪੁਰਿਸਮੇਧਂ ਨਾਮ, ਪੁਰਿਸਸਙ੍ਗਣ੍ਹਨੇ ਮੇਧਾਵਿਤਾਤਿ ਅਤ੍ਥੋ. ਦਲਿਦ੍ਦਮਨੁਸ੍ਸਾਨਂ ਪੋਤ੍ਥਕੇ ਲੇਖਂ ਗਹੇਤ੍ਵਾ ਤੀਣਿ ਵਸ੍ਸਾਨਿ ਵਿਨਾ ਵਡ੍ਢਿਯਾ ਸਹਸ੍ਸਦ੍ਵਿਸਹਸ੍ਸਮਤ੍ਤਧਨਾਨੁਪ੍ਪਦਾਨਂ ਸਮ੍ਮਾਪਾਸਂ ਨਾਮ. ਤਞ੍ਹਿ ਸਮ੍ਮਾ ਮਨੁਸ੍ਸੇ ਪਾਸੇਤਿ ਹਦਯੇ ਬਨ੍ਧਿਤ੍ਵਾ ਵਿਯ ਠਪੇਤਿ, ਤਸ੍ਮਾ ‘‘ਸਮ੍ਮਾਪਾਸ’’ਨ੍ਤਿ ਵੁਚ੍ਚਤਿ. ‘‘ਤਾਤ ਮਾਤੁਲਾ’’ਤਿਆਦਿਨਾ ਪਨ ਸਣ੍ਹਵਾਚਾਯ ਸਙ੍ਗਹਣਂ ਵਾਚਾਪੇਯ੍ਯਂ ਨਾਮ, ਪੇਯ੍ਯਵਜ੍ਜਂ ਪਿਯਵਾਚਤਾਤਿ ਅਤ੍ਥੋ. ਏਵਂ ਚਤੂਹਿ ਸਙ੍ਗਹਵਤ੍ਥੂਹਿ ਸਙ੍ਗਹਿਤਂ ਰਟ੍ਠਂ ਇਦ੍ਧਞ੍ਚੇਵ ਹੋਤਿ ਫੀਤਞ੍ਚ ਪਹੂਤਅਨ੍ਨਪਾਨਂ ਖੇਮਂ ਨਿਰਬ੍ਬੁਦਂ. ਮਨੁਸ੍ਸਾ ਮੁਦਾ ਮੋਦਮਾਨਾ ਉਰੇ ਪੁਤ੍ਤੇ ਨਚ੍ਚੇਨ੍ਤਾ ਅਪਾਰੁਤਘਰਾ ਵਿਹਰਨ੍ਤਿ. ਇਦਂ ਘਰਦ੍ਵਾਰੇਸੁ ਅਗ੍ਗਲ਼ਾਨਂ ਅਭਾਵਤੋ ‘‘ਨਿਰਗ੍ਗਲ਼’’ਨ੍ਤਿ ਵੁਚ੍ਚਤਿ. ਅਯਂ ਪੋਰਾਣਿਕਾ ਪਵੇਣਿ, ਅਯਂ ਪੋਰਾਣਿਕਾ ਪਕਤਿ.

ਅਪਰਭਾਗੇ ਪਨ ਓਕ੍ਕਾਕਰਾਜਕਾਲੇ ਬ੍ਰਾਹ੍ਮਣਾ ਇਮਾਨਿ ਚਤ੍ਤਾਰਿ ਸਙ੍ਗਹਵਤ੍ਥੂਨਿ ਇਮਞ੍ਚ ਰਟ੍ਠਸਮ੍ਪਤ੍ਤਿਂ ਪਰਿਵਤ੍ਤੇਨ੍ਤਾ ਉਦ੍ਧਮ੍ਮੂਲਂ ਕਤ੍ਵਾ ਅਸ੍ਸਮੇਧਂ ਪੁਰਿਸਮੇਧਨ੍ਤਿਆਦਿਕੇ ਪਞ੍ਚ ਯਞ੍ਞੇ ਨਾਮ ਅਕਂਸੁ. ਵੁਤ੍ਤਞ੍ਹੇਤਂ ਭਗਵਤਾ ਬ੍ਰਾਹ੍ਮਣਧਮ੍ਮਿਯਸੁਤ੍ਤੇ –

‘‘ਤੇਸਂ ਆਸਿ ਵਿਪਲ੍ਲਾਸੋ, ਦਿਸ੍ਵਾਨ ਅਣੁਤੋ ਅਣੁਂ…ਪੇ….

‘‘ਤੇ ਤਤ੍ਥ ਮਨ੍ਤੇ ਗਨ੍ਥੇਤ੍ਵਾ, ਓਕ੍ਕਾਕਂ ਤਦੁਪਾਗਮੁ’’ਨ੍ਤਿ. (ਸੁ. ਨਿ. ੩੦੧-੩੦੪);

ਤਤ੍ਥ ਅਸ੍ਸਮੇਤ੍ਥ ਮੇਧਨ੍ਤਿ ਬਾਧੇਨ੍ਤੀਤਿ ਅਸ੍ਸਮੇਧੋ. ਦ੍ਵੀਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਏਕਵੀਸਤਿਯੂਪਸ੍ਸ ਏਕਸ੍ਮਿਂ ਪਚ੍ਛਿਮਦਿਵਸੇ ਏਵ ਸਤ੍ਤਨਵੁਤਿਪਞ੍ਚਪਸੁਸਤਘਾਤਭੀਸਨਸ੍ਸ ਠਪੇਤ੍ਵਾ ਭੂਮਿਞ੍ਚ ਪੁਰਿਸੇ ਚ ਅਵਸੇਸਸਬ੍ਬਵਿਭਵਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਪੁਰਿਸਮੇਤ੍ਥ ਮੇਧਨ੍ਤਿ ਬਾਧੇਨ੍ਤੀਤਿ ਪੁਰਿਸਮੇਧੋ. ਚਤੂਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਸਦ੍ਧਿਂਭੂਮਿਯਾ ਅਸ੍ਸਮੇਧੇ ਵੁਤ੍ਤਵਿਭਵਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਸਮ੍ਮਮੇਤ੍ਥ ਪਾਸਨ੍ਤਿ ਖਿਪਨ੍ਤੀਤਿ ਸਮ੍ਮਾਪਾਸੋ. ਯੁਗਚ੍ਛਿਗ੍ਗਲ਼ੇ ਪਵੇਸਨਦਣ੍ਡਕਸਙ੍ਖਾਤਂ ਸਮ੍ਮਂ ਖਿਪਿਤ੍ਵਾ ਤਸ੍ਸ ਪਤਿਤੋਕਾਸੇ ਵੇਦਿਂ ਕਤ੍ਵਾ ਸਂਹਾਰਿਮੇਹਿ ਯੂਪਾਦੀਹਿ ਸਰਸ੍ਸਤਿਨਦਿਯਾ ਨਿਮੁਗ੍ਗੋਕਾਸਤੋ ਪਭੁਤਿ ਪਟਿਲੋਮਂ ਗਚ੍ਛਨ੍ਤੇਨ ਯਜਿਤਬ੍ਬਸ੍ਸ ਸਤ੍ਰਯਾਗਸ੍ਸੇਤਂ ਅਧਿਵਚਨਂ ਵਾਜਮੇਤ੍ਥ ਪਿਵਨ੍ਤੀਤਿ ਵਾਜਪੇਯ੍ਯੋ. ਏਕੇਨ ਪਰਿਯਞ੍ਞੇਨ ਸਤ੍ਤਰਸਹਿ ਪਸੂਹਿ ਯਜਿਤਬ੍ਬਸ੍ਸ ਬੇਲ਼ੁਵਯੂਪਸ੍ਸ ਸਤ੍ਤਰਸਕਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਨਤ੍ਥਿ ਏਤ੍ਥ ਅਗ੍ਗਲ਼ੋਤਿ ਨਿਰਗ੍ਗਲ਼ੋ. ਨਵਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਸਦ੍ਧਿਂ ਭੂਮਿਯਾ ਪੁਰਿਸੇਹਿ ਚ ਅਸ੍ਸਮੇਧੇ ਵੁਤ੍ਤਵਿਭਵਦਕ੍ਖਿਣਸ੍ਸ ਸਬ੍ਬਮੇਧਪਰਿਯਾਯਨਾਮਸ੍ਸ ਅਸ੍ਸਮੇਧਵਿਕਪ੍ਪਸ੍ਸੇਤਂ ਅਧਿਵਚਨਂ.

ਚਨ੍ਦਪ੍ਪਭਾਤਿ ਚਨ੍ਦਪ੍ਪਭਾਯ. ਤਾਰਗਣਾਵ ਸਬ੍ਬੇਤਿ ਯਥਾ ਸਬ੍ਬੇਪਿ ਤਾਰਾਗਣਾ ਚਨ੍ਦਿਮਸੋਭਾਯ ਸੋਲ਼ਸਿਮ੍ਪਿ ਕਲਂ ਨਾਗ੍ਘਨ੍ਤਿ, ਏਵਂ ਤੇ ਅਸ੍ਸਮੇਧਾਦਯੋ ਯਞ੍ਞਾ ਮੇਤ੍ਤਚਿਤ੍ਤਸ੍ਸ ਵੁਤ੍ਤਲਕ੍ਖਣੇਨ ਸੁਭਾਵਿਤਸ੍ਸ ਸੋਲ਼ਸਿਮ੍ਪਿ ਕਲਂ ਨਾਨੁਭਵਨ੍ਤਿ, ਨ ਪਾਪੁਣਨ੍ਤਿ, ਨਾਗ੍ਘਨ੍ਤੀਤਿ ਅਤ੍ਥੋ.

ਇਦਾਨਿ ਅਪਰੇਪਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕੇ ਮੇਤ੍ਤਾਭਾਵਨਾਯ ਆਨਿਸਂਸੇ ਦਸ੍ਸੇਤੁਂ ‘‘ਯੋ ਨ ਹਨ੍ਤੀ’’ਤਿਆਦਿ ਵੁਤ੍ਤਂ. ਤਤ੍ਥ ਯੋਤਿ ਮੇਤ੍ਤਾਬ੍ਰਹ੍ਮਵਿਹਾਰਭਾਵਨਾਨੁਯੁਤ੍ਤੋ ਪੁਗ੍ਗਲੋ. ਨ ਹਨ੍ਤੀਤਿ ਤੇਨੇਵ ਮੇਤ੍ਤਾਭਾਵਨਾਨੁਭਾਵੇਨ ਦੂਰਵਿਕ੍ਖਮ੍ਭਿਤਬ੍ਯਾਪਾਦਤਾਯ ਨ ਕਞ੍ਚਿ ਸਤ੍ਤਂ ਹਿਂਸਤਿ, ਲੇਡ੍ਡੁਦਣ੍ਡਾਦੀਹਿ ਨ ਵਿਬਾਧਤਿ ਵਾ. ਨ ਘਾਤੇਤੀਤਿ ਪਰਂ ਸਮਾਦਪੇਤ੍ਵਾ ਨ ਸਤ੍ਤੇ ਹਨਾਪੇਤਿ ਨ ਵਿਬਾਧਾਪੇਤਿ ਚ. ਨ ਜਿਨਾਤੀਤਿ ਸਾਰਮ੍ਭਵਿਗ੍ਗਾਹਿਕਕਥਾਦਿਵਸੇਨ ਨ ਕਞ੍ਚਿ ਜਿਨਾਤਿ ਸਾਰਮ੍ਭਸ੍ਸੇਵ ਅਭਾਵਤੋ, ਜਾਨਿਕਰਣਵਸੇਨ ਵਾ ਅਡ੍ਡਕਰਣਾਦਿਨਾ ਨ ਕਞ੍ਚਿ ਜਿਨਾਤਿ. ਨ ਜਾਪਯੇਤਿ ਪਰੇਪਿ ਪਯੋਜੇਤ੍ਵਾ ਪਰੇਸਂ ਧਨਜਾਨਿਂ ਨ ਕਾਰਾਪੇਯ੍ਯ. ਮੇਤ੍ਤਂਸੋਤਿ ਮੇਤ੍ਤਾਮਯਚਿਤ੍ਤਕੋਟ੍ਠਾਸੋ, ਮੇਤ੍ਤਾਯ ਵਾ ਅਂਸੋ ਅਵਿਜਹਨਟ੍ਠੇਨ ਅਵਯਵਭੂਤੋਤਿ ਮੇਤ੍ਤਂਸੋ. ਸਬ੍ਬਭੂਤੇਸੂਤਿ ਸਬ੍ਬਸਤ੍ਤੇਸੁ. ਤਤੋ ਏਵ ਵੇਰਂ ਤਸ੍ਸ ਨ ਕੇਨਚੀਤਿ ਅਕੁਸਲਵੇਰਂ ਤਸ੍ਸ ਕੇਨਚਿਪਿ ਕਾਰਣੇਨ ਨਤ੍ਥਿ, ਪੁਗ੍ਗਲਵੇਰਸਙ੍ਖਾਤੋ ਵਿਰੋਧੋ ਕੇਨਚਿ ਪੁਰਿਸੇਨ ਸਦ੍ਧਿਂ ਤਸ੍ਸ ਮੇਤ੍ਤਾਵਿਹਾਰਿਸ੍ਸ ਨਤ੍ਥੀਤਿ.

ਏਵਮੇਤਸ੍ਮਿਂ ਏਕਕਨਿਪਾਤੇ ਪਟਿਪਾਟਿਯਾ ਤੇਰਸਸੁ ਸੁਤ੍ਤੇਸੁ ਸਿਕ੍ਖਾਸੁਤ੍ਤਦ੍ਵਯੇ ਚਾਤਿ ਪਨ੍ਨਰਸਸੁ ਸੁਤ੍ਤੇਸੁ ਵਿਵਟ੍ਟਂ ਕਥਿਤਂ, ਨੀਵਰਣਸੁਤ੍ਤਂ ਸਂਯੋਜਨਸੁਤ੍ਤਂ ਅਪ੍ਪਮਾਦਸੁਤ੍ਤਂ ਅਟ੍ਠਿਸਞ੍ਚਯਸੁਤ੍ਤਨ੍ਤਿ ਏਤੇਸੁ ਚਤੂਸੁ ਸੁਤ੍ਤੇਸੁ ਵਟ੍ਟਵਿਵਟ੍ਟਂ ਕਥਿਤਂ. ਇਤਰੇਸੁ ਪਨ ਵਟ੍ਟਮੇਵ ਕਥਿਤਨ੍ਤਿ.

ਸਤ੍ਤਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਪਰਮਤ੍ਥਦੀਪਨਿਯਾ

ਖੁਦ੍ਦਕਨਿਕਾਯ-ਅਟ੍ਠਕਥਾਯ

ਇਤਿਵੁਤ੍ਤਕਸ੍ਸ ਏਕਕਨਿਪਾਤਵਣ੍ਣਨਾ ਨਿਟ੍ਠਿਤਾ.