੧੨. ਸੁਮਨਸਾਮਣੇਰਵਤ੍ਥੁ

ਯੋ ਹਵੇਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਪੁਬ੍ਬਾਰਾਮੇ ਵਿਹਰਨ੍ਤੋ ਸੁਮਨਸਾਮਣੇਰਂ ਆਰਬ੍ਭ ਕਥੇਸਿ. ਤਤ੍ਰਾਯਂ ਅਨੁਪੁਬ੍ਬੀ ਕਥਾ –

ਪਦੁਮੁਤ੍ਤਰਬੁਦ੍ਧਕਾਲਸ੍ਮਿਞ੍ਹਿ ਏਕੋ ਕੁਲਪੁਤ੍ਤੋ ਸਤ੍ਥਾਰਾ ਚਤੁਪਰਿਸਮਜ੍ਝੇ ਏਕਂ ਭਿਕ੍ਖੁਂ ਦਿਬ੍ਬਚਕ੍ਖੁਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਤਂ ਸਮ੍ਪਤ੍ਤਿਂ ਪਤ੍ਥਯਮਾਨੋ ਸਤ੍ਥਾਰਂ ਨਿਮਨ੍ਤੇਤ੍ਵਾ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ, ‘‘ਭਨ੍ਤੇ, ਅਹਮ੍ਪਿ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਸਾਸਨੇ ਦਿਬ੍ਬਚਕ੍ਖੁਕਾਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਪਤ੍ਥਨਂ ਠਪੇਸਿ. ਸਤ੍ਥਾ ਕਪ੍ਪਸਤਸਹਸ੍ਸਂ ਓਲੋਕੇਨ੍ਤੋ ਤਸ੍ਸ ਪਤ੍ਥਨਾਯ ਸਮਿਜ੍ਝਨਭਾਵਂ ਵਿਦਿਤ੍ਵਾ ‘‘ਇਤੋ ਕਪ੍ਪਸਤਸਹਸ੍ਸਮਤ੍ਥਕੇ ਗੋਤਮਬੁਦ੍ਧਸਾਸਨੇ ਦਿਬ੍ਬਚਕ੍ਖੁਕਾਨਂ ਅਗ੍ਗੋ ਅਨੁਰੁਦ੍ਧੋ ਨਾਮ ਭਵਿਸ੍ਸਸੀ’’ਤਿ ਬ੍ਯਾਕਾਸਿ. ਸੋ ਤਂ ਬ੍ਯਾਕਰਣਂ ਸੁਤ੍ਵਾ ਸ੍ਵੇ ਪਤ੍ਤਬ੍ਬਂ ਵਿਯ ਤਂ ਸਮ੍ਪਤ੍ਤਿਂ ਮਞ੍ਞਮਾਨੋ ਪਰਿਨਿਬ੍ਬੁਤੇ ਸਤ੍ਥਰਿ ਭਿਕ੍ਖੂ ਦਿਬ੍ਬਚਕ੍ਖੁਪਰਿਕਮ੍ਮਂ ਪੁਚ੍ਛਿਤ੍ਵਾ ਸਤ੍ਤਯੋਜਨਿਕਂ ਕਞ੍ਚਨਥੂਪਂ ਪਰਿਕ੍ਖਿਪਿਤ੍ਵਾ ਅਨੇਕਾਨਿ ਦੀਪਰੁਕ੍ਖਸਹਸ੍ਸਾਨਿ ਕਾਰੇਤ੍ਵਾ ਦੀਪਪੂਜਂ ਕਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਦੇਵਮਨੁਸ੍ਸੇਸੁ ਕਪ੍ਪਸਤਸਹਸ੍ਸਾਨਿ ਸਂਸਰਿਤ੍ਵਾ ਇਮਸ੍ਮਿਂ ਕਪ੍ਪੇ ਬਾਰਾਣਸਿਯਂ ਦਲਿਦ੍ਦਕੁਲੇ ਨਿਬ੍ਬਤ੍ਤੋ ਸੁਮਨਸੇਟ੍ਠਿਂ ਨਿਸ੍ਸਾਯ ਤਸ੍ਸ ਤਿਣਹਾਰਕੋ ਹੁਤ੍ਵਾ ਜੀਵਿਕਂ ਕਪ੍ਪੇਸਿ. ਅਨ੍ਨਭਾਰੋਤਿਸ੍ਸ ਨਾਮਂ ਅਹੋਸਿ. ਸੁਮਨਸੇਟ੍ਠੀਪਿ ਤਸ੍ਮਿਂ ਨਗਰੇ ਨਿਚ੍ਚਕਾਲਂ ਮਹਾਦਾਨਂ ਦੇਤਿ.

ਅਥੇਕਦਿਵਸਂ ਉਪਰਿਟ੍ਠੋ ਨਾਮ ਪਚ੍ਚੇਕਬੁਦ੍ਧੋ ਗਨ੍ਧਮਾਦਨੇ ਨਿਰੋਧਸਮਾਪਤ੍ਤਿਤੋ ਵੁਟ੍ਠਾਯ ‘‘ਕਸ੍ਸ ਨੁ ਖੋ ਅਜ੍ਜ ਅਨੁਗ੍ਗਹਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਅਜ੍ਜ ਮਯਾ ਅਨ੍ਨਭਾਰਸ੍ਸ ਅਨੁਗ੍ਗਹਂ ਕਾਤੁਂ ਵਟ੍ਟਤਿ, ਇਦਾਨਿ ਚ ਸੋ ਅਟਵਿਤੋ ਤਿਣਂ ਆਦਾਯ ਗੇਹਂ ਆਗਮਿਸ੍ਸਤੀ’’ਤਿ ਞਤ੍ਵਾ ਪਤ੍ਤਚੀਵਰਮਾਦਾਯ ਇਦ੍ਧਿਯਾ ਗਨ੍ਤ੍ਵਾ ਅਨ੍ਨਭਾਰਸ੍ਸ ਸਮ੍ਮੁਖੇ ਪਚ੍ਚੁਟ੍ਠਾਸਿ. ਅਨ੍ਨਭਾਰੋ ਤਂ ਤੁਚ੍ਛਪਤ੍ਤਹਤ੍ਥਂ ਦਿਸ੍ਵਾ ‘‘ਅਪਿ, ਭਨ੍ਤੇ, ਭਿਕ੍ਖਂ ਲਭਿਤ੍ਥਾ’’ਤਿ ਪੁਚ੍ਛਿਤ੍ਵਾ ‘‘ਲਭਿਸ੍ਸਾਮ ਮਹਾਪੁਞ੍ਞਾ’’ਤਿ ਵੁਤ੍ਤੇ ‘‘ਤੇਨ ਹਿ, ਭਨ੍ਤੇ, ਥੋਕਂ ਆਗਮੇਥਾ’’ਤਿ ਤਿਣਕਾਜਂ ਛਡ੍ਡੇਤ੍ਵਾ ਵੇਗੇਨ ਗੇਹਂ ਗਨ੍ਤ੍ਵਾ, ‘‘ਭਦ੍ਦੇ, ਮਯ੍ਹਂ ਠਪਿਤਭਾਗਭਤ੍ਤਂ ਅਤ੍ਥਿ, ਨਤ੍ਥੀ’’ਤਿ ਭਰਿਯਂ ਪੁਚ੍ਛਿਤ੍ਵਾ ‘‘ਅਤ੍ਥਿ, ਸਾਮੀ’’ਤਿ ਵੁਤ੍ਤੇ ਵੇਗੇਨ ਪਚ੍ਚਾਗਨ੍ਤ੍ਵਾ ਪਚ੍ਚੇਕਬੁਦ੍ਧਸ੍ਸ ਪਤ੍ਤਂ ਆਦਾਯ ‘‘ਮਯ੍ਹਂ ਦਾਤੁਕਾਮਤਾਯ ਸਤਿ ਦੇਯ੍ਯਧਮ੍ਮੋ ਨ ਹੋਤਿ, ਦੇਯ੍ਯਧਮ੍ਮੇ ਸਤਿ ਪਟਿਗ੍ਗਾਹਕਂ ਨ ਲਭਾਮਿ. ਅਜ੍ਜ ਪਨ ਮੇ ਪਟਿਗ੍ਗਾਹਕੋ ਚ ਦਿਟ੍ਠੋ, ਦੇਯ੍ਯਧਮ੍ਮੋ ਚ ਅਤ੍ਥਿ, ਲਾਭਾ ਵਤ ਮੇ’’ਤਿ ਗੇਹਂ ਗਨ੍ਤ੍ਵਾ ਭਤ੍ਤਂ ਪਤ੍ਤੇ ਪਕ੍ਖਿਪਾਪੇਤ੍ਵਾ ਪਚ੍ਚਾਹਰਿਤ੍ਵਾ ਪਚ੍ਚੇਕਬੁਦ੍ਧਸ੍ਸ ਹਤ੍ਥੇ ਪਤਿਟ੍ਠਪੇਤ੍ਵਾ –

‘‘ਇਮਿਨਾ ਪਨ ਦਾਨੇਨ, ਮਾ ਮੇ ਦਾਲਿਦ੍ਦਿਯਂ ਅਹੁ;

ਨਤ੍ਥੀਤਿ ਵਚਨਂ ਨਾਮ, ਮਾ ਅਹੋਸਿ ਭਵਾਭਵੇ. –

ਭਨ੍ਤੇ ਏਵਰੂਪਾ ਦੁਜ੍ਜੀਵਿਤਾ ਮੁਚ੍ਚੇਯ੍ਯਂ, ਨਤ੍ਥੀਤਿ ਪਦਮੇਵ ਨ ਸੁਣੇਯ੍ਯ’’ਨ੍ਤਿ ਪਤ੍ਥਨਂ ਠਪੇਸਿ. ਪਚ੍ਚੇਕਬੁਦ੍ਧੋ ‘‘ਏਵਂ ਹੋਤੁ ਮਹਾਪੁਞ੍ਞਾ’’ਤਿ ਵਤ੍ਵਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ.

ਸੁਮਨਸੇਟ੍ਠਿਨੋਪਿ ਛਤ੍ਤੇ ਅਧਿਵਤ੍ਥਾ ਦੇਵਤਾ ‘‘ਅਹੋ ਦਾਨਂ ਪਰਮਦਾਨਂ, ਉਪਰਿਟ੍ਠੇ ਸੁਪਤਿਟ੍ਠਿਤ’’ਨ੍ਤਿ ਵਤ੍ਵਾ ਤਿਕ੍ਖਤ੍ਤੁਂ ਸਾਧੁਕਾਰਮਦਾਸਿ. ਅਥ ਨਂ ਸੇਟ੍ਠਿ ‘‘ਕਿਂ ਮਂ ਏਤ੍ਤਕਂ ਕਾਲਂ ਦਾਨਂ ਦਦਮਾਨਂ ਨ ਪਸ੍ਸਸੀ’’ਤਿ ਆਹ. ਨਾਹਂ ਤਵ ਦਾਨਂ ਆਰਬ੍ਭ ਸਾਧੁਕਾਰਂ ਦੇਮਿ, ਅਨ੍ਨਭਾਰੇਨ ਪਨ ਉਪਰਿਟ੍ਠਸ੍ਸ ਦਿਨ੍ਨਪਿਣ੍ਡਪਾਤੇ ਪਸੀਦਿਤ੍ਵਾ ਮਯਾ ਏਸ ਸਾਧੁਕਾਰੋ ਪਵਤ੍ਤਿਤੋਤਿ. ਸੋ ‘‘ਅਚ੍ਛਰਿਯਂ ਵਤ, ਭੋ, ਅਹਂ ਏਤ੍ਤਕਂ ਕਾਲਂ ਦਾਨਂ ਦਦਨ੍ਤੋ ਦੇਵਤਂ ਸਾਧੁਕਾਰਂ ਦਾਪੇਤੁਂ ਨਾਸਕ੍ਖਿਂ, ਅਨ੍ਨਭਾਰੋ ਮਂ ਨਿਸ੍ਸਾਯ ਜੀਵਨ੍ਤੋ ਏਕਪਿਣ੍ਡਪਾਤੇਨੇਵ ਸਾਧੁਕਾਰਂ ਦਾਪੇਸਿ, ਤਸ੍ਸ ਦਾਨੇ ਅਨੁਚ੍ਛਵਿਕਂ ਕਤ੍ਵਾ ਤਂ ਪਿਣ੍ਡਪਾਤਂ ਮਮ ਸਨ੍ਤਕਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਂ ਪਕ੍ਕੋਸਾਪੇਤ੍ਵਾ ‘‘ਅਜ੍ਜ ਤਯਾ ਕਸ੍ਸਚਿ ਕਿਞ੍ਚਿ ਦਿਨ੍ਨ’’ਨ੍ਤਿ ਪੁਚ੍ਛਿ. ‘‘ਆਮ, ਸਾਮਿ, ਉਪਰਿਟ੍ਠਪਚ੍ਚੇਕਬੁਦ੍ਧਸ੍ਸ ਮੇ ਅਜ੍ਜ ਭਾਗਭਤ੍ਤਂ ਦਿਨ੍ਨ’’ਨ੍ਤਿ. ‘‘ਹਨ੍ਦ, ਭੋ, ਕਹਾਪਣਂ ਗਹੇਤ੍ਵਾ ਏਤਂ ਮਯ੍ਹਂ ਪਿਣ੍ਡਪਾਤਂ ਦੇਹੀ’’ਤਿ? ‘‘ਨ ਦੇਮਿ, ਸਾਮੀ’’ਤਿ. ਸੋ ਯਾਵ ਸਹਸ੍ਸਂ ਵਡ੍ਢੇਸਿ, ਇਤਰੋ ਸਹਸ੍ਸੇਨਾਪਿ ਨਾਦਾਸਿ. ਅਥ ਨਂ ‘‘ਹੋਤੁ, ਭੋ, ਯਦਿ ਪਿਣ੍ਡਪਾਤਂ ਨ ਦੇਸਿ, ਸਹਸ੍ਸਂ ਗਹੇਤ੍ਵਾ ਪਤ੍ਤਿਂ ਮੇ ਦੇਹੀ’’ਤਿ ਆਹ. ਸੋ ‘‘ਅਯ੍ਯੇਨ ਸਦ੍ਧਿਂ ਮਨ੍ਤੇਤ੍ਵਾ ਜਾਨਿਸ੍ਸਾਮੀ’’ਤਿ ਵੇਗੇਨ ਪਚ੍ਚੇਕਬੁਦ੍ਧਂ ਸਮ੍ਪਾਪੁਣਿਤ੍ਵਾ, ‘‘ਭਨ੍ਤੇ ਸੁਮਨਸੇਟ੍ਠਿ, ਸਹਸ੍ਸਂ ਦਤ੍ਵਾ ਤੁਮ੍ਹਾਕਂ ਪਿਣ੍ਡਪਾਤੇ ਪਤ੍ਤਿਂ ਯਾਚਤਿ, ਕਿਂ ਕਰੋਮੀ’’ਤਿ ਪੁਚ੍ਛਿ.

ਅਥਸ੍ਸ ਸੋ ਉਪਮਂ ਆਹਰਿ ‘‘ਸੇਯ੍ਯਥਾਪਿ, ਪਣ੍ਡਿਤ, ਕੁਲਸਤਿਕੇ ਗਾਮੇ ਏਕਸ੍ਮਿਂ ਘਰੇ ਦੀਪਂ ਜਾਲੇਯ੍ਯ, ਸੇਸਾ ਅਤ੍ਤਨੋ ਤੇਲੇਨ ਵਟ੍ਟਿਂ ਤੇਮੇਤ੍ਵਾ ਜਾਲਾਪੇਤ੍ਵਾ ਗਣ੍ਹੇਯ੍ਯੁਂ, ਪੁਰਿਮਪਦੀਪਸ੍ਸ ਪਭਾ ਅਤ੍ਥੀਤਿ ਵਤ੍ਤਬ੍ਬਾ ਨਤ੍ਥੀ’’ਤਿ. ਅਤਿਰੇਕਤਰਾ, ਭਨ੍ਤੇ, ਪਭਾ ਹੋਤੀਤਿ. ਏਵਮੇਵਂ ਪਣ੍ਡਿਤ ਉਲ਼ੁਙ੍ਕਯਾਗੁ ਵਾ ਹੋਤੁ, ਕਟਚ੍ਛੁਭਿਕ੍ਖਾ ਵਾ, ਅਤ੍ਤਨੋ ਪਿਣ੍ਡਪਾਤੇ ਪਰੇਸਂ ਪਤ੍ਤਿਂ ਦੇਨ੍ਤਸ੍ਸ ਯਤ੍ਤਕਾਨਂ ਦੇਤਿ, ਤਤ੍ਤਕਂ ਵਡ੍ਢਤਿ. ਤ੍ਵਞ੍ਹਿ ਏਕਮੇਵ ਪਿਣ੍ਡਪਾਤਂ ਅਦਾਸਿ, ਸੇਟ੍ਠਿਸ੍ਸ ਪਨ ਪਤ੍ਤਿਯਾ ਦਿਨ੍ਨਾਯ ਦ੍ਵੇ ਪਿਣ੍ਡਪਾਤਾ ਹੋਨ੍ਤਿ ਏਕੋ ਤਵ, ਏਕੋ ਤਸ੍ਸਾਤਿ.

ਸੋ ‘‘ਸਾਧੁ, ਭਨ੍ਤੇ’’ਤਿ ਤਂ ਅਭਿਵਾਦੇਤ੍ਵਾ ਸੇਟ੍ਠਿਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਗਣ੍ਹ, ਸਾਮਿ, ਪਤ੍ਤਿ’’ਨ੍ਤਿ ਆਹ. ਤੇਨ ਹਿ ਇਮੇ ਕਹਾਪਣੇ ਗਣ੍ਹਾਤਿ. ਨਾਹਂ ਪਿਣ੍ਡਪਾਤਂ ਵਿਕ੍ਕਿਣਾਮਿ, ਸਦ੍ਧਾਯ ਤੇ ਪਤ੍ਤਿਂ ਦਮ੍ਮੀਤਿ. ‘‘ਤ੍ਵਂ ਸਦ੍ਧਾਯ ਦੇਸਿ, ਅਹਮ੍ਪਿ ਤਵ ਗੁਣੇ ਪੂਜੇਮਿ, ਗਣ੍ਹ, ਤਾਤ, ਇਤੋ ਪਟ੍ਠਾਯ ਚ ਪਨ ਮਾ ਸਹਤ੍ਥਾ ਕਮ੍ਮਮਕਾਸਿ, ਵੀਥਿਯਂ ਘਰਂ ਮਾਪੇਤ੍ਵਾ ਵਸ. ਯੇਨ ਚ ਤੇ ਅਤ੍ਥੋ ਹੋਤਿ, ਸਬ੍ਬਂ ਮਮ ਸਨ੍ਤਿਕਾ ਗਣ੍ਹਾਹੀ’’ਤਿ ਆਹ. ਨਿਰੋਧਾ ਵੁਟ੍ਠਿਤਸ੍ਸ ਪਨ ਦਿਨ੍ਨਪਿਣ੍ਡਪਾਤੋ ਤਦਹੇਵ ਵਿਪਾਕਂ ਦੇਤਿ. ਤਸ੍ਮਾ ਰਾਜਾਪਿ ਤਂ ਪਵਤ੍ਤਿਂ ਸੁਤ੍ਵਾ ਅਨ੍ਨਭਾਰਂ ਪਕ੍ਕੋਸਾਪੇਤ੍ਵਾ ਪਤ੍ਤਿਂ ਗਹੇਤ੍ਵਾ ਮਹਨ੍ਤਂ ਭੋਗਂ ਦਤ੍ਵਾ ਤਸ੍ਸ ਸੇਟ੍ਠਿਟ੍ਠਾਨਂ ਦਾਪੇਸਿ.

ਸੋ ਸੁਮਨਸੇਟ੍ਠਿਸ੍ਸ ਸਹਾਯਕੋ ਹੁਤ੍ਵਾ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕਪਿਲਵਤ੍ਥੁਨਗਰੇ ਅਮਿਤੋਦਨਸ੍ਸ ਸਕ੍ਕਸ੍ਸ ਗੇਹੇ ਪਟਿਸਨ੍ਧਿਂ ਗਣ੍ਹਿ, ਅਨੁਰੁਦ੍ਧੋਤਿਸ੍ਸ ਨਾਮਂ ਅਕਂਸੁ. ਸੋ ਮਹਾਨਾਮਸਕ੍ਕਸ੍ਸ ਕਨਿਟ੍ਠਭਾਤਾ, ਸਤ੍ਥੁ ਚੂਲ਼ਪਿਤੁ ਪੁਤ੍ਤੋ ਪਰਮਸੁਖੁਮਾਲੋ ਮਹਾਪੁਞ੍ਞੋ ਅਹੋਸਿ. ਏਕਦਿਵਸਂ ਕਿਰ ਛਸੁ ਖਤ੍ਤਿਯੇਸੁ ਪੂਵੇ ਲਕ੍ਖਂ ਕਤ੍ਵਾ ਗੁਲ਼ੇਹਿ ਕੀਲ਼ਨ੍ਤੇਸੁ ਅਨੁਰੁਦ੍ਧੋ ਪਰਾਜਿਤੋ ਪੂਵਾਨਂ ਅਤ੍ਥਾਯ ਮਾਤੁ ਸਨ੍ਤਿਕਂ ਪਹਿਣਿ. ਸਾ ਮਹਨ੍ਤਂ ਸੁਵਣ੍ਣਥਾਲਂ ਪੂਰੇਤ੍ਵਾ ਪੂਵੇ ਪੇਸੇਸਿ. ਪੂਵੇ ਖਾਦਿਤ੍ਵਾ ਪੁਨ ਕੀਲ਼ਨ੍ਤੋ ਪਰਾਜਿਤੋ ਤਥੇਵ ਪਹਿਣਿ. ਏਵਂ ਤਿਕ੍ਖਤ੍ਤੁਂ ਪੂਵੇਸੁ ਆਹਟੇਸੁ ਚਤੁਤ੍ਥੇ ਵਾਰੇ ਮਾਤਾ ‘‘ਇਦਾਨਿ ਪੂਵਾ ਨਤ੍ਥੀ’’ਤਿ ਪਹਿਣਿ. ਤਸ੍ਸਾ ਵਚਨਂ ਸੁਤ੍ਵਾ ‘‘ਨਤ੍ਥੀ’’ਤਿ ਪਦਸ੍ਸ ਅਸੁਤਪੁਬ੍ਬਤਾਯ ‘‘ਨਤ੍ਥਿਪੂਵਾ ਨਾਮ ਇਦਾਨਿ ਭਵਿਸ੍ਸਨ੍ਤੀ’’ਤਿ ਸਞ੍ਞਂ ਕਤ੍ਵਾ ‘‘ਗਚ੍ਛ ਨਤ੍ਥਿਪੂਵੇ ਆਹਰਾ’’ਤਿ ਪੇਸੇਸਿ. ਅਥਸ੍ਸ ਮਾਤਾ ‘‘ਨਤ੍ਥਿਪੂਵੇ ਕਿਰ, ਅਯ੍ਯੇ, ਦੇਥਾ’’ਤਿ ਵੁਤ੍ਤੇ ‘‘ਮਮ ਪੁਤ੍ਤੇਨ ਨਤ੍ਥੀਤਿ ਪਦਂ ਨ ਸੁਤਪੁਬ੍ਬਂ, ਕਥਂ ਨੁ ਖੋ ਨਤ੍ਥਿਭਾਵਂ ਜਾਨਾਪੇਯ੍ਯ’’ਨ੍ਤਿ ਸੁਵਣ੍ਣਪਾਤਿਂ ਧੋਵਿਤ੍ਵਾ ਅਪਰਾਯ ਸੁਵਣ੍ਣਪਾਤਿਯਾ ਪਟਿਕੁਜ੍ਜਿਤ੍ਵਾ ‘‘ਹਨ੍ਦ, ਤਾਤ, ਇਮਂ ਮਮ ਪੁਤ੍ਤਸ੍ਸ ਦੇਹੀ’’ਤਿ ਪਹਿਣਿ. ਤਸ੍ਮਿਂ ਖਣੇ ਨਗਰਪਰਿਗ੍ਗਾਹਿਕਾ ਦੇਵਤਾ ‘‘ਅਮ੍ਹਾਕਂ ਸਾਮਿਨਾ ਅਨ੍ਨਭਾਰਕਾਲੇ ਉਪਰਿਟ੍ਠਸ੍ਸ ਪਚ੍ਚੇਕਬੁਦ੍ਧਸ੍ਸ ਭਾਗਭਤ੍ਤਂ ਦਤ੍ਵਾ ‘ਨਤ੍ਥੀਤਿ ਪਦਮੇਵ ਨ ਸੁਣੇਯ੍ਯ’ਨ੍ਤਿ ਪਤ੍ਥਨਾ ਨਾਮ ਠਪਿਤਾ. ਸਚੇ ਮਯਂ ਤਮਤ੍ਥਂ ਞਤ੍ਵਾ ਅਜ੍ਝੁਪੇਕ੍ਖੇਯ੍ਯਾਮ, ਮੁਦ੍ਧਾਪਿ ਨੋ ਸਤ੍ਤਧਾ ਫਲੇਯ੍ਯਾ’’ਤਿ ਚਿਨ੍ਤੇਤ੍ਵਾ ਦਿਬ੍ਬਪੂਵੇਹਿ ਪਾਤਿਂ ਪੂਰਯਿਂਸੁ. ਸੋ ਪੁਰਿਸੋ ਪਾਤਿਂ ਆਹਰਿਤ੍ਵਾ ਤਸ੍ਸ ਸਨ੍ਤਿਕੇ ਠਪੇਤ੍ਵਾ ਵਿਵਰਿ. ਤੇਸਂ ਗਨ੍ਧੋ ਸਕਲਨਗਰਂ ਫਰਿ. ਪੂਵੋ ਪਨ ਮੁਖੇ ਠਪਿਤਮਤ੍ਤੋਵ ਸਤ੍ਤਰਸਹਰਣਿਸਹਸ੍ਸਾਨਿ ਫਰਿਤ੍ਵਾ ਅਟ੍ਠਾਸਿ.

ਅਨੁਰੁਦ੍ਧੋਪਿ ਚਿਨ੍ਤੇਸਿ – ‘‘ਨ ਮਂ ਮਞ੍ਞੇ ਇਤੋ ਪੁਬ੍ਬੇ ਮਾਤਾ ਪਿਯਾਯਤਿ. ਨ ਹਿ ਮੇ ਅਞ੍ਞਦਾ ਤਾਯ ਨਤ੍ਥਿਪੂਵਾ ਨਾਮ ਪਕ੍ਕਪੁਬ੍ਬਾ’’ਤਿ. ਸੋ ਗਨ੍ਤ੍ਵਾ ਮਾਤਰਂ ਏਵਮਾਹ – ‘‘ਅਮ੍ਮ, ਨਾਹਂ ਤਵ ਪਿਯੋ’’ਤਿ. ਤਾਤ, ਕਿਂ ਵਦੇਸਿ, ਮਮ ਅਕ੍ਖੀਹਿਪਿ ਹਦਯਮਂਸਤੋਪਿ ਤ੍ਵਂ ਪਿਯਤਰੋਤਿ. ਸਚਾਹਂ, ਅਮ੍ਮ, ਤਵ ਪਿਯੋ, ਕਸ੍ਮਾ ਮਮ ਪੁਬ੍ਬੇ ਏਵਰੂਪੇ ਨਤ੍ਥਿਪੂਵੇ ਨਾਮ ਨ ਅਦਾਸੀਤਿ. ਸਾ ਤਂ ਪੁਰਿਸਂ ਪੁਚ੍ਛਿ – ‘‘ਤਾਤ, ਕਿਞ੍ਚਿ ਪਾਤਿਯਂ ਅਹੋਸੀ’’ਤਿ. ਆਮ, ਅਯ੍ਯੇ, ਪੂਵਾਨਂ ਪਾਤਿ ਪਰਿਪੁਣ੍ਣਾ ਅਹੋਸਿ, ਨ ਮੇ ਏਵਰੂਪਾ ਦਿਟ੍ਠਪੁਬ੍ਬਾਤਿ. ਸਾ ਚਿਨ੍ਤੇਸਿ – ‘‘ਪੁਤ੍ਤੋ ਮੇ ਕਤਪੁਞ੍ਞੋ, ਦੇਵਤਾਹਿਸ੍ਸ ਦਿਬ੍ਬਪੂਵਾ ਪਹਿਤਾ ਭਵਿਸ੍ਸਨ੍ਤੀ’’ਤਿ. ਸੋਪਿ ਮਾਤਰਂ ਆਹ – ‘‘ਅਮ੍ਮ, ਨ ਮਯਾ ਏਵਰੂਪਾ ਪੂਵਾ ਖਾਦਿਤਪੁਬ੍ਬਾ, ਇਤੋ ਪਟ੍ਠਾਯ ਮੇ ਨਤ੍ਥਿਪੂਵਮੇਵ ਪਚੇਯ੍ਯਾਸੀ’’ਤਿ. ਸਾ ਤਤੋ ਪਟ੍ਠਾਯ ਤੇਨ ‘‘ਪੂਵੇ ਖਾਦਿਤੁਕਾਮੋਮ੍ਹੀ’’ਤਿ ਵੁਤ੍ਤਕਾਲੇ ਸੁਵਣ੍ਣਪਾਤਿਂ ਧੋਵਿਤ੍ਵਾ ਅਞ੍ਞਾਯ ਪਾਤਿਯਾ ਪਟਿਕੁਜ੍ਜਿਤ੍ਵਾ ਪਹਿਣਤਿ, ਦੇਵਤਾ ਪਾਤਿਂ ਪੂਰੇਨ੍ਤਿ. ਏਵਂ ਸੋ ਅਗਾਰਮਜ੍ਝੇ ਵਸਨ੍ਤੋ ਨਤ੍ਥੀਤਿ ਪਦਸ੍ਸ ਅਤ੍ਥਂ ਅਜਾਨਿਤ੍ਵਾ ਦਿਬ੍ਬਪੂਵੇਯੇਵ ਪਰਿਭੁਞ੍ਜਿ.

ਸਤ੍ਥੁ ਪਨ ਪਰਿਵਾਰਤ੍ਥਂ ਕੁਲਪਟਿਪਾਟਿਯਾ ਸਾਕਿਯਕੁਮਾਰੇਸੁ ਪਬ੍ਬਜਨ੍ਤੇਸੁ ਮਹਾਨਾਮੇਨ ਸਕ੍ਕੇਨ, ‘‘ਤਾਤ, ਅਮ੍ਹਾਕਂ ਕੁਲਾ ਕੋਚਿ ਪਬ੍ਬਜਿਤੋ ਨਤ੍ਥਿ, ਤਯਾ ਵਾ ਪਬ੍ਬਜਿਤਬ੍ਬਂ, ਮਯਾ ਵਾ’’ਤਿ ਵੁਤ੍ਤੇ ਸੋ ਆਹ – ‘‘ਅਹਂ ਅਤਿਸੁਖੁਮਾਲੋ ਪਬ੍ਬਜਿਤੁਂ ਨ ਸਕ੍ਖਿਸ੍ਸਾਮੀ’’ਤਿ. ਤੇਨ ਹਿ ਕਮ੍ਮਨ੍ਤਂ ਉਗ੍ਗਣ੍ਹ, ਅਹਂ ਪਬ੍ਬਜਿਸ੍ਸਾਮੀਤਿ. ਕੋ ਏਸ ਕਮ੍ਮਨ੍ਤੋ ਨਾਮਾਤਿ? ਸੋ ਹਿ ਭਤ੍ਤਸ੍ਸ ਉਟ੍ਠਾਨਟ੍ਠਾਨਮ੍ਪਿ ਨ ਜਾਨਾਤਿ, ਕਮ੍ਮਨ੍ਤਂ ਕਿਮੇਵ ਜਾਨਿਸ੍ਸਤਿ, ਤਸ੍ਮਾ ਏਵਮਾਹ. ਏਕਦਿਵਸਞ੍ਹਿ ਅਨੁਰੁਦ੍ਧੋ ਭਦ੍ਦਿਯੋ ਕਿਮਿਲੋਤਿ ਤਯੋ ਜਨਾ ‘‘ਭਤ੍ਤਂ ਨਾਮ ਕਹਂ ਉਟ੍ਠਾਤੀ’’ਤਿ ਮਨ੍ਤਯਿਂਸੁ. ਤੇਸੁ ਕਿਮਿਲੋ ‘‘ਕੋਟ੍ਠੇਸੁ ਉਟ੍ਠਾਤੀ’’ਤਿ ਆਹ. ਸੋ ਕਿਰੇਕਦਿਵਸਂ ਵੀਹੀ ਕੋਟ੍ਠਮ੍ਹਿ ਪਕ੍ਖਿਪਨ੍ਤੇ ਅਦ੍ਦਸ, ਤਸ੍ਮਾ ‘‘ਕੋਟ੍ਠੇ ਭਤ੍ਤਂ ਉਪ੍ਪਜ੍ਜਤੀ’’ਤਿ ਸਞ੍ਞਾਯ ਏਵਮਾਹ. ਅਥ ਨਂ ਭਦ੍ਦਿਯੋ ‘‘ਤ੍ਵਂ ਨ ਜਾਨਾਸੀ’’ਤਿ ਵਤ੍ਵਾ ‘‘ਭਤ੍ਤਂ ਨਾਮ ਉਕ੍ਖਲਿਯਂ ਉਟ੍ਠਾਤੀ’’ਤਿ ਆਹ. ਸੋ ਕਿਰੇਕਦਿਵਸਂ ਉਕ੍ਖਲਿਤੋ ਭਤ੍ਤਂ ਵਡ੍ਢੇਨ੍ਤੇ ਦਿਸ੍ਵਾ ‘‘ਏਤ੍ਥੇਵੇਤਂ ਉਪ੍ਪਜ੍ਜਤੀ’’ਤਿ ਸਞ੍ਞਮਕਾਸਿ, ਤਸ੍ਮਾ ਏਵਮਾਹ. ਅਨੁਰੁਦ੍ਧੋ ਤੇ ਉਭੋਪਿ ‘‘ਤੁਮ੍ਹੇ ਨ ਜਾਨਾਥਾ’’ਤਿ ਵਤ੍ਵਾ ‘‘ਭਤ੍ਤਂ ਨਾਮ ਰਤਨੁਬ੍ਬੇਧਮਕੁਲ਼ਾਯ ਮਹਾਸੁਵਣ੍ਣਪਾਤਿਯਂ ਉਟ੍ਠਾਤੀ’’ਤਿ ਆਹ. ਤੇਨ ਕਿਰ ਨੇਵ ਵੀਹਿਂ ਕੋਟ੍ਟੇਨ੍ਤਾ, ਨ ਭਤ੍ਤਂ ਪਚਨ੍ਤਾ ਦਿਟ੍ਠਪੁਬ੍ਬਾ, ਸੁਵਣ੍ਣਪਾਤਿਯਂ ਵਡ੍ਢੇਤ੍ਵਾ ਪੁਰਤੋ ਠਪਿਤਭਤ੍ਤਮੇਵ ਪਸ੍ਸਤਿ, ਤਸ੍ਮਾ ‘‘ਪਾਤਿਯਂਯੇਵੇਤਂ ਉਪ੍ਪਜ੍ਜਤੀ’’ਤਿ ਸਞ੍ਞਮਕਾਸਿ, ਤਸ੍ਮਾ ਏਵਮਾਹ. ਏਵਂ ਭਤ੍ਤੁਟ੍ਠਾਨਟ੍ਠਾਨਮ੍ਪਿ ਅਜਾਨਨ੍ਤੋ ਮਹਾਪੁਞ੍ਞੋ ਕੁਲਪੁਤ੍ਤੋ ਕਮ੍ਮਨ੍ਤੇ ਕਿਂ ਜਾਨਿਸ੍ਸਤਿ.

ਸੋ ‘‘ਏਹਿ ਖੋ ਤੇ, ਅਨੁਰੁਦ੍ਧ, ਘਰਾਵਾਸਤ੍ਥਂ ਅਨੁਸਾਸਿਸ੍ਸਾਮਿ, ਪਠਮਂ ਖੇਤ੍ਤਂ ਕਸਾਪੇਤਬ੍ਬ’’ਨ੍ਤਿਆਦਿਨਾ ਨਯੇਨ ਭਾਤਰਾ ਵੁਤ੍ਤਾਨਂ ਕਮ੍ਮਨ੍ਤਾਨਂ ਅਪਰਿਯਨ੍ਤਭਾਵਂ ਸੁਤ੍ਵਾ ‘‘ਨ ਮੇ ਘਰਾਵਾਸੇਨ ਅਤ੍ਥੋ’’ਤਿ ਮਾਤਰਂ ਆਪੁਚ੍ਛਿਤ੍ਵਾ ਭਦ੍ਦਿਯਪਮੁਖੇਹਿ ਪਞ੍ਚਹਿ ਸਾਕਿਯਕੁਮਾਰੇਹਿ ਸਦ੍ਧਿਂ ਨਿਕ੍ਖਮਿਤ੍ਵਾ ਅਨੁਪਿਯਮ੍ਬਵਨੇ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਪਬ੍ਬਜਿ. ਪਬ੍ਬਜਿਤ੍ਵਾ ਚ ਪਨ ਸਮ੍ਮਾਪਟਿਪਦਂ ਪਟਿਪਨ੍ਨੋ ਅਨੁਪੁਬ੍ਬੇਨ ਤਿਸ੍ਸੋ ਵਿਜ੍ਜਾ ਸਚ੍ਛਿਕਤ੍ਵਾ ਦਿਬ੍ਬੇਨ ਚਕ੍ਖੁਨਾ ਏਕਾਸਨੇ ਨਿਸਿਨ੍ਨੋਵ ਹਤ੍ਥਤਲੇ ਠਪਿਤਆਮਲਕਾਨਿ ਵਿਯ ਸਹਸ੍ਸਲੋਕਧਾਤੁਯੋ ਓਲੋਕਨਸਮਤ੍ਥੋ ਹੁਤ੍ਵਾ –

‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਤੇਵਿਜ੍ਜੋ ਇਦ੍ਧਿਪਤ੍ਤੋਮ੍ਹਿ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ. (ਥੇਰਗਾ. ੩੩੨, ੫੬੨) –

ਉਦਾਨਂ ਉਦਾਨੇਤ੍ਵਾ ‘‘ਕਿਂ ਨੁ ਖੋ ਮੇ ਕਤ੍ਵਾ ਅਯਂ ਸਮ੍ਪਤ੍ਤਿ ਲਦ੍ਧਾ’’ਤਿ ਓਲੋਕੇਨ੍ਤੋ ‘‘ਪਦੁਮੁਤ੍ਤਰਪਾਦਮੂਲੇ ਪਤ੍ਥਨਂ ਠਪੇਸਿ’’ਨ੍ਤਿ ਞਤ੍ਵਾ ਪੁਨ ‘‘ਸਂਸਾਰੇ ਸਂਸਰਨ੍ਤੋ ਅਸੁਕਸ੍ਮਿਂ ਨਾਮ ਕਾਲੇ ਬਾਰਾਣਸਿਯਂ ਸੁਮਨਸੇਟ੍ਠਿਂ ਨਿਸ੍ਸਾਯ ਜੀਵਨ੍ਤੋ ਅਨ੍ਨਭਾਰੋ ਨਾਮ ਅਹੋਸਿ’’ਨ੍ਤਿਪਿ ਞਤ੍ਵਾ –

‘‘ਅਨ੍ਨਭਾਰੋ ਪੁਰੇ ਆਸਿਂ, ਦਲਿਦ੍ਦੋ ਤਿਣਹਾਰਕੋ;

ਪਿਣ੍ਡਪਾਤੋ ਮਯਾ ਦਿਨ੍ਨੋ, ਉਪਰਿਟ੍ਠਸ੍ਸ ਤਾਦਿਨੋ’’ਤਿ. –

ਆਹ. ਅਥਸ੍ਸ ਏਤਦਹੋਸਿ – ‘‘ਯੋ ਸੋ ਤਦਾ ਮਯਾ ਉਪਰਿਟ੍ਠਸ੍ਸ ਦਿਨ੍ਨਪਿਣ੍ਡਪਾਤਤੋ ਕਹਾਪਣੇ ਦਤ੍ਵਾ ਪਤ੍ਤਿਂ ਅਗ੍ਗਹੇਸਿ, ਮਮ ਸਹਾਯਕੋ ਸੁਮਨਸੇਟ੍ਠਿ ਕਹਂ ਨੁ ਖੋ ਸੋ ਏਤਰਹਿ ਨਿਬ੍ਬਤ੍ਤੋ’’ਤਿ. ਅਥ ਨਂ ‘‘ਵਿਞ੍ਝਾਟਵਿਯਂ ਪਬ੍ਬਤਪਾਦੇ ਮੁਣ੍ਡਨਿਗਮੋ ਨਾਮ ਅਤ੍ਥਿ, ਤਤ੍ਥ ਮਹਾਮੁਣ੍ਡਸ੍ਸ ਨਾਮ ਉਪਾਸਕਸ੍ਸ ਮਹਾਸੁਮਨੋ ਚੂਲ਼ਸੁਮਨੋਤਿ ਦ੍ਵੇ ਪੁਤ੍ਤਾ, ਤੇਸੁ ਸੋ ਚੂਲ਼ਸੁਮਨੋ ਹੁਤ੍ਵਾ ਨਿਬ੍ਬਤ੍ਤੋ’’ਤਿ ਅਦ੍ਦਸ. ਦਿਸ੍ਵਾ ਚ ਪਨ ਚਿਨ੍ਤੇਸਿ – ‘‘ਅਤ੍ਥਿ ਨੁ ਖੋ ਤਤ੍ਥ ਮਯਿ ਗਤੇ ਉਪਕਾਰੋ, ਨਤ੍ਥੀ’’ਤਿ. ਸੋ ਉਪਧਾਰੇਨ੍ਤੋ ਇਦਂ ਅਦ੍ਦਸ ‘‘ਸੋ ਤਤ੍ਥ ਮਯਿ ਗਤੇ ਸਤ੍ਤਵਸ੍ਸਿਕੋਵ ਨਿਕ੍ਖਮਿਤ੍ਵਾ ਪਬ੍ਬਜਿਸ੍ਸਤਿ, ਖੁਰਗ੍ਗੇਯੇਵ ਚ ਅਰਹਤ੍ਤਂ ਪਾਪੁਣਿਸ੍ਸਤੀ’’ਤਿ. ਦਿਸ੍ਵਾ ਚ ਪਨ ਉਪਕਟ੍ਠੇ ਅਨ੍ਤੋਵਸ੍ਸੇ ਆਕਾਸੇਨ ਗਨ੍ਤ੍ਵਾ ਗਾਮਦ੍ਵਾਰੇ ਓਤਰਿ. ਮਹਾਮੁਣ੍ਡੋ ਪਨ ਉਪਾਸਕੋ ਥੇਰਸ੍ਸ ਪੁਬ੍ਬੇਪਿ ਵਿਸ੍ਸਾਸਿਕੋ ਏਵ. ਸੋ ਥੇਰਂ ਪਿਣ੍ਡਪਾਤਕਾਲੇ ਚੀਵਰਂ ਪਾਰੁਪਨ੍ਤਂ ਦਿਸ੍ਵਾ ਪੁਤ੍ਤਂ ਮਹਾਸੁਮਨਂ ਆਹ – ‘‘ਤਾਤ, ਅਯ੍ਯੋ, ਮੇ ਅਨੁਰੁਦ੍ਧਤ੍ਥੇਰੋ ਆਗਤੋ, ਯਾਵਸ੍ਸ ਅਞ੍ਞੋ ਕੋਚਿ ਪਤ੍ਤਂ ਨ ਗਣ੍ਹਾਤਿ, ਤਾਵਸ੍ਸ ਗਨ੍ਤ੍ਵਾ ਪਤ੍ਤਂ ਗਣ੍ਹ, ਅਹਂ ਆਸਨਂ ਪਞ੍ਞਾਪੇਸ੍ਸਾਮੀ’’ਤਿ. ਸੋ ਤਥਾ ਅਕਾਸਿ. ਉਪਾਸਕੋ ਥੇਰਂ ਅਨ੍ਤੋਨਿਵੇਸਨੇ ਸਕ੍ਕਚ੍ਚਂ ਪਰਿਵਿਸਿਤ੍ਵਾ ਤੇਮਾਸਂ ਵਸਨਤ੍ਥਾਯ ਪਟਿਞ੍ਞਂ ਗਣ੍ਹਿ, ਥੇਰੋਪਿ ਅਧਿਵਾਸੇਸਿ.

ਅਥ ਨਂ ਏਕਦਿਵਸਂ ਪਟਿਜਗ੍ਗਨ੍ਤੋ ਵਿਯ ਤੇਮਾਸਂ ਪਟਿਜਗ੍ਗਿਤ੍ਵਾ ਮਹਾਪਵਾਰਣਾਯ ਤਿਚੀਵਰਞ੍ਚੇਵ ਗੁਲ਼ਤੇਲਤਣ੍ਡੁਲਾਦੀਨਿ ਚ ਆਹਰਿਤ੍ਵਾ ਥੇਰਸ੍ਸ ਪਾਦਮੂਲੇ ਠਪੇਤ੍ਵਾ ‘‘ਗਣ੍ਹਥ, ਭਨ੍ਤੇ’’ਤਿ ਆਹ. ‘‘ਅਲਂ, ਉਪਾਸਕ, ਨ ਮੇ ਇਮਿਨਾ ਅਤ੍ਥੋ’’ਤਿ. ‘‘ਤੇਨ ਹਿ, ਭਨ੍ਤੇ, ਵਸ੍ਸਾਵਾਸਿਕਲਾਭੋ ਨਾਮੇਸ, ਗਣ੍ਹਥ ਨ’’ਨ੍ਤਿ? ‘‘ਨ ਗਣ੍ਹਾਮਿ, ਉਪਾਸਕਾ’’ਤਿ. ‘‘ਕਿਮਤ੍ਥਂ ਨ ਗਣ੍ਹਥ, ਭਨ੍ਤੇ’’ਤਿ? ‘‘ਮਯ੍ਹਂ ਸਨ੍ਤਿਕੇ ਕਪ੍ਪਿਯਕਾਰਕੋ ਸਾਮਣੇਰੋਪਿ ਨਤ੍ਥੀ’’ਤਿ. ‘‘ਤੇਨ ਹਿ, ਭਨ੍ਤੇ, ਮਮ ਪੁਤ੍ਤੋ ਮਹਾਸੁਮਨੋ ਸਾਮਣੇਰੋ ਭਵਿਸ੍ਸਤੀ’’ਤਿ. ‘‘ਨ ਮੇ, ਉਪਾਸਕ, ਮਹਾਸੁਮਨੇਨਤ੍ਥੋ’’ਤਿ. ‘‘ਤੇਨ ਹਿ, ਭਨ੍ਤੇ, ਚੂਲ਼ਸੁਮਨਂ ਪਬ੍ਬਾਜੇਥਾ’’ਤਿ. ਥੇਰੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਚੂਲ਼ਸੁਮਨਂ ਪਬ੍ਬਾਜੇਸਿ. ਸੋ ਖੁਰਗ੍ਗੇਯੇਵ ਅਰਹਤ੍ਤਂ ਪਾਪੁਣਿ. ਥੇਰੋ ਤੇਨ ਸਦ੍ਧਿਂ ਅਡ੍ਢਮਾਸਮਤ੍ਤਂ ਤਤ੍ਥੇਵ ਵਸਿਤ੍ਵਾ ‘‘ਸਤ੍ਥਾਰਂ ਪਸ੍ਸਿਸ੍ਸਾਮੀ’’ਤਿ ਤਸ੍ਸ ਞਾਤਕੇ ਆਪੁਚ੍ਛਿਤ੍ਵਾ ਆਕਾਸੇਨੇਵ ਗਨ੍ਤ੍ਵਾ ਹਿਮਵਨ੍ਤਪਦੇਸੇ ਅਰਞ੍ਞਕੁਟਿਕਾਯ ਓਤਰਿ.

ਥੇਰੋ ਪਨ ਪਕਤਿਯਾਪਿ ਆਰਦ੍ਧਵੀਰਿਯੋ, ਤਸ੍ਸ ਤਤ੍ਥ ਪੁਬ੍ਬਰਤ੍ਤਾਪਰਰਤ੍ਤਂ ਚਙ੍ਕਮਨ੍ਤਸ੍ਸ ਉਦਰਵਾਤੋ ਸਮੁਟ੍ਠਹਿ. ਅਥ ਨਂ ਕਿਲਨ੍ਤਰੂਪਂ ਦਿਸ੍ਵਾ ਸਾਮਣੇਰੋ ਪੁਚ੍ਛਿ – ‘‘ਭਨ੍ਤੇ, ਕਿਂ ਵੋ ਰੁਜ੍ਜਤੀ’’ਤਿ? ‘‘ਉਦਰਵਾਤੋ ਮੇ ਸਮੁਟ੍ਠਿਤੋ’’ਤਿ. ‘‘ਅਞ੍ਞਦਾਪਿ ਸਮੁਟ੍ਠਿਤਪੁਬ੍ਬੋ, ਭਨ੍ਤੇ’’ਤਿ? ‘‘ਆਮਾਵੁਸੋ’’ਤਿ. ‘‘ਕੇਨ ਫਾਸੁਕਂ ਹੋਤਿ, ਭਨ੍ਤੇ’’ਤਿ? ‘‘ਅਨੋਤਤ੍ਤਤੋ ਪਾਨੀਯੇ ਲਦ੍ਧੇ ਫਾਸੁਕਂ ਹੋਤਿ, ਆਵੁਸੋ’’ਤਿ. ‘‘ਤੇਨ ਹਿ, ਭਨ੍ਤੇ, ਆਹਰਾਮੀ’’ਤਿ. ‘‘ਸਕ੍ਖਿਸ੍ਸਸਿ ਸਾਮਣੇਰਾ’’ਤਿ? ‘‘ਆਮ, ਭਨ੍ਤੇ’’ਤਿ. ਤੇਨ ਹਿ ਅਨੋਤਤ੍ਤੇ ਪਨ੍ਨਗੋ ਨਾਮ ਨਾਗਰਾਜਾ ਮਂ ਜਾਨਾਤਿ, ਤਸ੍ਸ ਆਚਿਕ੍ਖਿਤ੍ਵਾ ਭੇਸਜ੍ਜਤ੍ਥਾਯ ਏਕਂ ਪਾਨੀਯਵਾਰਕਂ ਆਹਰਾਤਿ. ਸੋ ਸਾਧੂਤਿ ਉਪਜ੍ਝਾਯਂ ਵਨ੍ਦਿਤ੍ਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਪਞ੍ਚਯੋਜਨਸਤਂ ਠਾਨਂ ਅਗਮਾਸਿ. ਤਂ ਦਿਵਸਂ ਪਨ ਨਾਗਰਾਜਾ ਨਾਗਨਾਟਕਪਰਿਵੁਤੋ ਉਦਕਕੀਲ਼ਂ ਕੀਲ਼ਿਤੁਕਾਮੋ ਹੋਤਿ. ਸੋ ਸਾਮਣੇਰਂ ਆਗਚ੍ਛਨ੍ਤਂ ਦਿਸ੍ਵਾਵ ਕੁਜ੍ਝਿ, ‘‘ਅਯਂ ਮੁਣ੍ਡਕਸਮਣੋ ਅਤ੍ਤਨੋ ਪਾਦਪਂਸੁਂ ਮਮ ਮਤ੍ਥਕੇ ਓਕਿਰਨ੍ਤੋ ਵਿਚਰਤਿ, ਅਨੋਤਤ੍ਤੇ ਪਾਨੀਯਤ੍ਥਾਯ ਆਗਤੋ ਭਵਿਸ੍ਸਤਿ, ਨ ਦਾਨਿਸ੍ਸ ਪਾਨੀਯਂ ਦਸ੍ਸਾਮੀ’’ਤਿ ਪਣ੍ਣਾਸਯੋਜਨਿਕਂ ਅਨੋਤਤ੍ਤਦਹਂ ਮਹਾਪਾਤਿਯਾ ਉਕ੍ਖਲਿਂ ਪਿਦਹਨ੍ਤੋ ਵਿਯ ਫਣੇਨ ਪਿਦਹਿਤ੍ਵਾ ਨਿਪਜ੍ਜਿ. ਸਾਮਣੇਰੋ ਨਾਗਰਾਜਸ੍ਸ ਆਕਾਰਂ ਓਲੋਕੇਤ੍ਵਾਵ ‘‘ਕੁਦ੍ਧੋ ਅਯ’’ਨ੍ਤਿ ਞਤ੍ਵਾ ਇਮਂ ਗਾਥਮਾਹ –

‘‘ਸੁਣੋਹਿ ਮੇ ਨਾਗਰਾਜ, ਉਗ੍ਗਤੇਜ ਮਹਬ੍ਬਲ;

ਦੇਹਿ ਮੇ ਪਾਨੀਯਘਟਂ, ਭੇਸਜ੍ਜਤ੍ਥਮ੍ਹਿ ਆਗਤੋ’’ਤਿ.

ਤਂ ਸੁਤ੍ਵਾ ਨਾਗਰਾਜਾ ਇਮਂ ਗਾਥਮਾਹ –

‘‘ਪੁਰਤ੍ਥਿਮਸ੍ਮਿਂ ਦਿਸਾਭਾਗੇ, ਗਙ੍ਗਾ ਨਾਮ ਮਹਾਨਦੀ;

ਮਹਾਸਮੁਦ੍ਦਮਪ੍ਪੇਤਿ, ਤਤੋ ਤ੍ਵਂ ਪਾਨੀਯਂ ਹਰਾ’’ਤਿ.

ਤਂ ਸੁਤ੍ਵਾ ਸਾਮਣੇਰੋ ‘‘ਅਯਂ ਨਾਗਰਾਜਾ ਅਤ੍ਤਨੋ ਇਚ੍ਛਾਯ ਨ ਦਸ੍ਸਤਿ, ਅਹਂ ਬਲਕ੍ਕਾਰਂ ਕਤ੍ਵਾ ਆਨੁਭਾਵਂ ਜਾਨਾਪੇਤ੍ਵਾ ਇਮਂ ਅਭਿਭਵਿਤ੍ਵਾਵ ਪਾਨੀਯਂ ਗਣ੍ਹਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ, ‘‘ਮਹਾਰਾਜ, ਉਪਜ੍ਝਾਯੋ ਮਂ ਅਨੋਤਤ੍ਤਤੋਵ ਪਾਨੀਯਂ ਆਹਰਾਪੇਤਿ, ਤੇਨਾਹਂ ਇਦਮੇਵ ਹਰਿਸ੍ਸਾਮਿ, ਅਪੇਹਿ, ਮਾ ਮਂ ਵਾਰੇਹੀ’’ਤਿ ਵਤ੍ਵਾ ਇਮਂ ਗਾਥਮਾਹ –

‘‘ਇਤੋਵ ਪਾਨੀਯਂ ਹਾਸ੍ਸਂ, ਇਮਿਨਾਵਮ੍ਹਿ ਅਤ੍ਥਿਕੋ;

ਯਦਿ ਤੇ ਥਾਮਬਲਂ ਅਤ੍ਥਿ, ਨਾਗਰਾਜ ਨਿਵਾਰਯਾ’’ਤਿ.

ਅਥ ਨਂ ਨਾਗਰਾਜਾ ਆਹ –

‘‘ਸਾਮਣੇਰ ਸਚੇ ਅਤ੍ਥਿ, ਤਵ ਵਿਕ੍ਕਮ ਪੋਰਿਸਂ;

ਅਭਿਨਨ੍ਦਾਮਿ ਤੇ ਵਾਚਂ, ਹਰਸ੍ਸੁ ਪਾਨੀਯਂ ਮਮਾ’’ਤਿ.

ਅਥ ਨਂ ਸਾਮਣੇਰੋ ‘‘ਏਵਂ, ਮਹਾਰਾਜ, ਹਰਾਮੀ’’ਤਿ ਵਤ੍ਵਾ ‘‘ਯਦਿ ਸਕ੍ਕੋਨ੍ਤੋ ਹਰਾਹੀ’’ਤਿ ਵੁਤ੍ਤੇ – ‘‘ਤੇਨ ਹਿ ਸੁਟ੍ਠੁ ਜਾਨਸ੍ਸੂ’’ਤਿ ਤਿਕ੍ਖਤ੍ਤੁਂ ਪਟਿਞ੍ਞਂ ਗਹੇਤ੍ਵਾ ‘‘ਬੁਦ੍ਧਸਾਸਨਸ੍ਸ ਆਨੁਭਾਵਂ ਦਸ੍ਸੇਤ੍ਵਾ ਮਯਾ ਪਾਨੀਯਂ ਹਰਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਆਕਾਸਟ੍ਠਦੇਵਤਾਨਂ ਤਾਵ ਸਨ੍ਤਿਕਂ ਅਗਮਾਸਿ. ਤਾ ਆਗਨ੍ਤ੍ਵਾ ਵਨ੍ਦਿਤ੍ਵਾ ‘‘ਕਿਂ, ਭਨ੍ਤੇ’’ਤਿ ਵਤ੍ਵਾ ਅਟ੍ਠਂਸੁ. ‘‘ਏਤਸ੍ਮਿਂ ਅਨੋਤਤ੍ਤਦਹਪਿਟ੍ਠੇ ਪਨ੍ਨਗਨਾਗਰਾਜੇਨ ਸਦ੍ਧਿਂ ਮਮ ਸਙ੍ਗਾਮੋ ਭਵਿਸ੍ਸਤਿ, ਤਤ੍ਥ ਗਨ੍ਤ੍ਵਾ ਜਯਪਰਾਜਯਂ ਓਲੋਕੇਥਾ’’ਤਿ ਆਹ. ਸੋ ਏਤੇਨੇਵ ਨੀਹਾਰੇਨ ਚਤ੍ਤਾਰੋ ਲੋਕਪਾਲੇ ਸਕ੍ਕਸੁਯਾਮਸਨ੍ਤੁਸਿਤਪਰਨਿਮ੍ਮਿਤਵਸਵਤ੍ਤੀ ਚ ਉਪਸਙ੍ਕਮਿਤ੍ਵਾ ਤਮਤ੍ਥਂ ਆਰੋਚੇਸਿ. ਤਤੋ ਪਰਂ ਪਟਿਪਾਟਿਯਾ ਯਾਵ ਬ੍ਰਹ੍ਮਲੋਕਂ ਗਨ੍ਤ੍ਵਾ ਤਤ੍ਥ ਤਤ੍ਥ ਬ੍ਰਹ੍ਮੇਹਿ ਆਗਨ੍ਤ੍ਵਾ ਵਨ੍ਦਿਤ੍ਵਾ ਠਿਤੇਹਿ ‘‘ਕਿਂ, ਭਨ੍ਤੇ’’ਤਿ ਪੁਟ੍ਠੋ ਤਮਤ੍ਥਂ ਆਰੋਚੇਸਿ. ਏਵਂ ਸੋ ਅਸਞ੍ਞੇ ਚ ਅਰੂਪਿਬ੍ਰਹ੍ਮਾਨੋ ਚ ਠਪੇਤ੍ਵਾ ਸਬ੍ਬਤ੍ਥ ਮੁਹੁਤ੍ਤੇਨੇਵ ਆਹਿਣ੍ਡਿਤ੍ਵਾ ਆਰੋਚੇਸਿ. ਤਸ੍ਸ ਵਚਨਂ ਸੁਤ੍ਵਾ ਸਬ੍ਬਾਪਿ ਦੇਵਤਾ ਅਨੋਤਤ੍ਤਦਹਪਿਟ੍ਠੇ ਨਾਲ਼ਿਯਂ ਪਕ੍ਖਿਤ੍ਤਾਨਿ ਪਿਟ੍ਠਚੁਣ੍ਣਾਨਿ ਵਿਯ ਆਕਾਸਂ ਨਿਰਨ੍ਤਰਂ ਪੂਰੇਤ੍ਵਾ ਸਨ੍ਨਿਪਤਿਂਸੁ. ਸਨ੍ਨਿਪਤਿਤੇ ਦੇਵਸਙ੍ਘੇ ਸਾਮਣੇਰੋ ਆਕਾਸੇ ਠਤ੍ਵਾ ਨਾਗਰਾਜਂ ਆਹ –

‘‘ਸੁਣੋਹਿ ਮੇ ਨਾਗਰਾਜ, ਉਗ੍ਗਤੇਜ ਮਹਬ੍ਬਲ;

ਦੇਹਿ ਮੇ ਪਾਨੀਯਘਟਂ, ਭੇਸਜ੍ਜਤ੍ਥਮ੍ਹਿ ਆਗਤੋ’’ਤਿ.

ਅਥ ਨਂ ਨਾਗੋ ਆਹ –

‘‘ਸਾਮਣੇਰ ਸਚੇ ਅਤ੍ਥਿ, ਤਵ ਵਿਕ੍ਕਮ ਪੋਰਿਸਂ;

ਅਭਿਨਨ੍ਦਾਮਿ ਤੇ ਵਾਚਂ, ਹਰਸ੍ਸੁ ਪਾਨੀਯਂ ਮਮਾ’’ਤਿ.

ਸੋ ਤਿਕ੍ਖਤ੍ਤੁਂ ਨਾਗਰਾਜਸ੍ਸ ਪਟਿਞ੍ਞਂ ਗਹੇਤ੍ਵਾ ਆਕਾਸੇ ਠਿਤਕੋਵ ਦ੍ਵਾਦਸਯੋਜਨਿਕਂ ਬ੍ਰਹ੍ਮਤ੍ਤਭਾਵਂ ਮਾਪੇਤ੍ਵਾ ਆਕਾਸਤੋ ਓਰੁਯ੍ਹ ਨਾਗਰਾਜਸ੍ਸ ਫਣੇ ਅਕ੍ਕਮਿਤ੍ਵਾ ਅਧੋਮੁਖਂ ਨਿਪ੍ਪੀਲ਼ੇਸਿ, ਤਾਵਦੇਵ ਬਲਵਤਾ ਪੁਰਿਸੇਨ ਅਕ੍ਕਨ੍ਤਅਲ੍ਲਚਮ੍ਮਂ ਵਿਯ ਨਾਗਰਾਜਸ੍ਸ ਫਣੇ ਅਕ੍ਕਨ੍ਤਮਤ੍ਤੇ ਓਗਲਿਤ੍ਵਾ ਦਬ੍ਬਿਮਤ੍ਤਾ ਫਣਪੁਟਕਾ ਅਹੇਸੁਂ. ਨਾਗਰਾਜਸ੍ਸ ਫਣੇਹਿ ਮੁਤ੍ਤਮੁਤ੍ਤਟ੍ਠਾਨਤੋ ਤਾਲਕ੍ਖਨ੍ਧਪਮਾਣਾ ਉਦਕਵਟ੍ਟਿਯੋ ਉਗ੍ਗਞ੍ਛਿਂਸੁ. ਸਾਮਣੇਰੋ ਆਕਾਸੇਯੇਵ ਪਾਨੀਯਵਾਰਕਂ ਪੂਰੇਸਿ. ਦੇਵਸਙ੍ਘੋ ਸਾਧੁਕਾਰਮਦਾਸਿ. ਅਥ ਨਾਗਰਾਜਾ ਲਜ੍ਜਿਤ੍ਵਾ ਸਾਮਣੇਰਸ੍ਸ ਕੁਜ੍ਝਿ, ਜਯਕੁਸੁਮਵਣ੍ਣਾਨਿਸ੍ਸ ਅਕ੍ਖੀਨਿ ਅਹੇਸੁਂ. ਸੋ ‘‘ਅਯਂ ਮਂ ਦੇਵਸਙ੍ਘਂ ਸਨ੍ਨਿਪਾਤੇਤ੍ਵਾ ਪਾਨੀਯਂ ਗਹੇਤ੍ਵਾ ਲਜ੍ਜਾਪੇਸਿ, ਏਤਂ ਗਹੇਤ੍ਵਾ ਮੁਖੇ ਹਤ੍ਥਂ ਪਕ੍ਖਿਪਿਤ੍ਵਾ ਹਦਯਮਂਸਂ ਵਾਸ੍ਸ ਮਦ੍ਦਾਮਿ, ਪਾਦੇ ਵਾ ਨਂ ਗਹੇਤ੍ਵਾ ਪਾਰਗਙ੍ਗਾਯਂ ਖਿਪਾਮੀ’’ਤਿ ਵੇਗੇਨ ਅਨੁਬਨ੍ਧਿ. ਅਨੁਬਨ੍ਧਨ੍ਤੋਪਿ ਨਂ ਪਾਪੁਣਿਤੁਂ ਨਾਸਕ੍ਖਿਯੇਵ. ਸਾਮਣੇਰੋ ਗਨ੍ਤ੍ਵਾ ਉਪਜ੍ਝਾਯਸ੍ਸ ਹਤ੍ਥੇ ਪਾਨੀਯਂ ਠਪੇਤ੍ਵਾ ‘‘ਪਿਵਥ, ਭਨ੍ਤੇ’’ਤਿ ਆਹ. ਨਾਗਰਾਜਾਪਿ ਪਚ੍ਛਤੋ ਆਗਨ੍ਤ੍ਵਾ, ‘‘ਭਨ੍ਤੇ ਅਨੁਰੁਦ੍ਧ, ਸਾਮਣੇਰੋ ਮਯਾ ਅਦਿਨ੍ਨਮੇਵ ਪਾਨੀਯਂ ਗਹੇਤ੍ਵਾ ਆਗਤੋ, ਮਾ ਪਿਵਿਤ੍ਥਾ’’ਤਿ ਆਹ. ਏਵਂ ਕਿਰ ਸਾਮਣੇਰਾਤਿ. ‘‘ਪਿਵਥ, ਭਨ੍ਤੇ, ਇਮਿਨਾ ਮੇ ਦਿਨ੍ਨਂ ਪਾਨੀਯਂ ਆਹਟ’’ਨ੍ਤਿ ਆਹ. ਥੇਰੋ ‘‘ਖੀਣਾਸਵਸਾਮਣੇਰਸ੍ਸ ਮੁਸਾਕਥਨਂ ਨਾਮ ਨਤ੍ਥੀ’’ਤਿ ਞਤ੍ਵਾ ਪਾਨੀਯਂ ਪਿਵਿ. ਤਙ੍ਖਣਞ੍ਞੇਵਸ੍ਸ ਆਬਾਧੋ ਪਟਿਪਸ੍ਸਮ੍ਭਿ. ਪੁਨ ਨਾਗੋ ਥੇਰਂ ਆਹ – ‘‘ਭਨ੍ਤੇ, ਸਾਮਣੇਰੇਨਮ੍ਹਿ ਸਬ੍ਬਂ ਦੇਵਗਣਂ ਸਨ੍ਨਿਪਾਤੇਤ੍ਵਾ ਲਜ੍ਜਾਪਿਤੋ, ਅਹਮਸ੍ਸ ਹਦਯਂ ਵਾ ਫਾਲੇਸ੍ਸਾਮਿ, ਪਾਦੇ ਵਾ ਨਂ ਗਹੇਤ੍ਵਾ ਪਾਰਗਙ੍ਗਾਯ ਖਿਪਿਸ੍ਸਾਮੀ’’ਤਿ. ਮਹਾਰਾਜ, ਸਾਮਣੇਰੋ ਮਹਾਨੁਭਾਵੋ, ਤੁਮ੍ਹੇ ਸਾਮਣੇਰੇਨ ਸਦ੍ਧਿਂ ਸਙ੍ਗਾਮੇਤੁਂ ਨ ਸਕ੍ਖਿਸ੍ਸਥ, ਖਮਾਪੇਤ੍ਵਾ ਨਂ ਗਚ੍ਛਥਾਤਿ. ਸੋ ਸਯਮ੍ਪਿ ਸਾਮਣੇਰਸ੍ਸ ਆਨੁਭਾਵਂ ਜਾਨਾਤਿਯੇਵ, ਲਜ੍ਜਾਯ ਪਨ ਅਨੁਬਨ੍ਧਿਤ੍ਵਾ ਆਗਤੋ. ਅਥ ਨਂ ਥੇਰਸ੍ਸ ਵਚਨੇਨ ਖਮਾਪੇਤ੍ਵਾ ਤੇਨ ਸਦ੍ਧਿਂ ਮਿਤ੍ਤਸਨ੍ਥਵਂ ਕਤ੍ਵਾ ‘‘ਇਤੋ ਪਟ੍ਠਾਯ ਅਨੋਤਤ੍ਤਉਦਕੇਨ ਅਤ੍ਥੇ ਸਤਿ ਤੁਮ੍ਹਾਕਂ ਆਗਮਨਕਿਚ੍ਚਂ ਨਤ੍ਥਿ, ਮਯ੍ਹਂ ਪਹਿਣੇਯ੍ਯਾਥ, ਅਹਮੇਵ ਆਹਰਿਤ੍ਵਾ ਦਸ੍ਸਾਮੀ’’ਤਿ ਵਤ੍ਵਾ ਪਕ੍ਕਾਮਿ.

ਥੇਰੋਪਿ ਸਾਮਣੇਰਂ ਆਦਾਯ ਪਾਯਾਸਿ. ਸਤ੍ਥਾ ਥੇਰਸ੍ਸ ਆਗਮਨਭਾਵਂ ਞਤ੍ਵਾ ਮਿਗਾਰਮਾਤੁਪਾਸਾਦੇ ਥੇਰਸ੍ਸ ਆਗਮਨਂ ਓਲੋਕੇਨ੍ਤੋ ਨਿਸੀਦਿ. ਭਿਕ੍ਖੂਪਿ ਥੇਰਂ ਆਗਚ੍ਛਨ੍ਤਂ ਦਿਸ੍ਵਾ ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਸੁਂ. ਅਥੇਕਚ੍ਚੇ ਸਾਮਣੇਰਂ ਸੀਸੇਪਿ ਕਣ੍ਣੇਸੁਪਿ ਬਾਹਾਯਮ੍ਪਿ ਗਹੇਤ੍ਵਾ ਸਞ੍ਚਾਲੇਤ੍ਵਾ ‘‘ਕਿਂ, ਸਾਮਣੇਰ ਚੂਲ਼ਕਨਿਟ੍ਠ, ਨ ਉਕ੍ਕਣ੍ਠਿਤੋਸੀ’’ਤਿ ਆਹਂਸੁ. ਸਤ੍ਥਾ ਤੇਸਂ ਕਿਰਿਯਂ ਦਿਸ੍ਵਾ ਚਿਨ੍ਤੇਸਿ – ‘‘ਭਾਰਿਯਂ ਵਤਿਮੇਸਂ ਭਿਕ੍ਖੂਨਂ ਕਮ੍ਮਂ ਆਸੀਵਿਸਂ ਗੀਵਾਯ ਗਣ੍ਹਨ੍ਤਾ ਵਿਯ ਸਾਮਣੇਰਂ ਗਣ੍ਹਨ੍ਤਿ, ਨਾਸ੍ਸ ਆਨੁਭਾਵਂ ਜਾਨਨ੍ਤਿ, ਅਜ੍ਜ ਮਯਾ ਸੁਮਨਸਾਮਣੇਰਸ੍ਸ ਗੁਣਂ ਪਾਕਟਂ ਕਾਤੁਂ ਵਟ੍ਟਤੀ’’ਤਿ. ਥੇਰੋਪਿ ਆਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਨਿਸੀਦਿ. ਸਤ੍ਥਾ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ਆਨਨ੍ਦਤ੍ਥੇਰਂ ਆਮਨ੍ਤੇਸਿ – ‘‘ਆਨਨ੍ਦ, ਅਨੋਤਤ੍ਤਉਦਕੇਨਮ੍ਹਿ ਪਾਦੇ ਧੋਵਿਤੁਕਾਮੋ, ਸਾਮਣੇਰਾਨਂ ਘਟਂ ਦਤ੍ਵਾ ਪਾਨੀਯਂ ਆਹਰਾਪੇਹੀ’’ਤਿ. ਥੇਰੋ ਵਿਹਾਰੇ ਪਞ੍ਚਮਤ੍ਤਾਨਿ ਸਾਮਣੇਰਸਤਾਨਿ ਸਨ੍ਨਿਪਾਤੇਸਿ. ਤੇਸੁ ਸੁਮਨਸਾਮਣੇਰੋ ਸਬ੍ਬਨਵਕੋ ਅਹੋਸਿ. ਥੇਰੋ ਸਬ੍ਬਮਹਲ੍ਲਕਂ ਸਾਮਣੇਰਂ ਆਹ – ‘‘ਸਾਮਣੇਰ, ਸਤ੍ਥਾ ਅਨੋਕਤ੍ਤਦਹਉਦਕੇਨ ਪਾਦੇ ਧੋਵਿਤੁਕਾਮੋ, ਘਟਂ ਆਦਾਯ ਗਨ੍ਤ੍ਵਾ ਪਾਨੀਯਂ ਆਹਰਾ’’ਤਿ. ਸੋ ‘‘ਨ ਸਕ੍ਕੋਮਿ, ਭਨ੍ਤੇ’’ਤਿ ਨ ਇਚ੍ਛਿ. ਥੇਰੋ ਸੇਸੇਪਿ ਪਟਿਪਾਟਿਯਾ ਪੁਚ੍ਛਿ, ਤੇਪਿ ਤਥੇਵ ਵਤ੍ਵਾ ਪਟਿਕ੍ਖਿਪਿਂਸੁ. ‘‘ਕਿਂ ਪਨੇਤ੍ਥ ਖੀਣਾਸਵਸਾਮਣੇਰਾ ਨਤ੍ਥੀ’’ਤਿ? ਅਤ੍ਥਿ, ਤੇ ਪਨ ‘‘ਨਾਯਂ ਅਮ੍ਹਾਕਂ ਬਦ੍ਧੋ ਮਾਲਾਪੁਟੋ, ਸੁਮਨਸਾਮਣੇਰਸ੍ਸੇਵ ਬਦ੍ਧੋ’’ਤਿ ਨ ਇਚ੍ਛਿਂਸੁ, ਪੁਥੁਜ੍ਜਨਾ ਪਨ ਅਤ੍ਤਨੋ ਅਸਮਤ੍ਥਤਾਯੇਵ ਨ ਇਚ੍ਛਿਂਸੁ. ਪਰਿਯੋਸਾਨੇ ਪਨ ਸੁਮਨਸ੍ਸ ਵਾਰੇ ਸਮ੍ਪਤ੍ਤੇ, ‘‘ਸਾਮਣੇਰ, ਸਤ੍ਥਾ ਅਨੋਤਤ੍ਤਦਹਉਦਕੇਨ ਪਾਦੇ ਧੋਵਿਤੁਕਾਮੋ, ਕੁਟਂ ਆਦਾਯ ਕਿਰ ਉਦਕਂ ਆਹਰਾ’’ਤਿ ਆਹ. ਸੋ ‘‘ਸਤ੍ਥਰਿ ਆਹਰਾਪੇਨ੍ਤੇ ਆਹਰਿਸ੍ਸਾਮੀ’’ਤਿ ਸਤ੍ਥਾਰਂ ਵਨ੍ਦਿਤ੍ਵਾ, ‘‘ਭਨ੍ਤੇ, ਅਨੋਤਤ੍ਤਤੋ ਕਿਰ ਮਂ ਉਦਕਂ ਆਹਾਰਾਪੇਥਾ’’ਤਿ ਆਹ. ‘‘ਆਮ, ਸੁਮਨਾ’’ਤਿ. ਸੋ ਵਿਸਾਖਾਯ ਕਾਰਿਤੇਸੁ ਘਨਸੁਵਣ੍ਣਕੋਟ੍ਟਿਮੇਸੁ ਸੇਨਾਸਨਕੁਟੇਸੁ ਏਕਂ ਸਟ੍ਠਿਕੁਟਉਦਕਗਣ੍ਹਨਕਂ ਮਹਾਘਟਂ ਹਤ੍ਥੇਨ ਗਹੇਤ੍ਵਾ ‘‘ਇਮਿਨਾ ਮੇ ਉਕ੍ਖਿਪਿਤ੍ਵਾ ਅਂਸਕੂਟੇ ਠਪਿਤੇਨ ਅਤ੍ਥੋ ਨਤ੍ਥੀ’’ਤਿ ਓਲਮ੍ਬਕਂ ਕਤ੍ਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਹਿਮਵਨ੍ਤਾਭਿਮੁਖੋ ਪਕ੍ਖਨ੍ਦਿ.

ਨਾਗਰਾਜਾ ਸਾਮਣੇਰਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ਪਚ੍ਚੁਗ੍ਗਨ੍ਤ੍ਵਾ ਕੁਟਂ ਅਂਸਕੂਟੇਨ ਆਦਾਯ, ‘‘ਭਨ੍ਤੇ, ਤੁਮ੍ਹੇ ਮਾਦਿਸੇ ਦਾਸੇ ਵਿਜ੍ਜਮਾਨੇ ਕਸ੍ਮਾ ਸਯਂ ਆਗਤਾ, ਉਦਕੇਨਤ੍ਥੇ ਸਤਿ ਕਸ੍ਮਾ ਸਾਸਨਮਤ੍ਤਮ੍ਪਿ ਨ ਪਹਿਣਥਾ’’ਤਿ ਕੁਟੇਨ ਉਦਕਂ ਆਦਾਯ ਸਯਂ ਉਕ੍ਖਿਪਿਤ੍ਵਾ ‘‘ਪੁਰਤੋ ਹੋਥ, ਭਨ੍ਤੇ, ਅਹਮੇਵ ਆਹਰਿਸ੍ਸਾਮੀ’’ਤਿ ਆਹ. ‘‘ਤਿਟ੍ਠਥ ਤੁਮ੍ਹੇ, ਮਹਾਰਾਜ, ਅਹਮੇਵ ਸਮ੍ਮਾਸਮ੍ਬੁਦ੍ਧੇਨ ਆਣਤ੍ਤੋ’’ਤਿ ਨਾਗਰਾਜਾਨਂ ਨਿਵਤ੍ਤਾਪੇਤ੍ਵਾ ਕੁਟਂ ਮੁਖਵਟ੍ਟਿਯਂ ਹਤ੍ਥੇਨ ਗਹੇਤ੍ਵਾ ਆਕਾਸੇਨਾਗਞ੍ਛਿ. ਅਥ ਨਂ ਸਤ੍ਥਾ ਆਗਚ੍ਛਨ੍ਤਂ ਓਲੋਕੇਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਪਸ੍ਸਥ, ਭਿਕ੍ਖਵੇ, ਸਾਮਣੇਰਸ੍ਸ ਲੀਲਂ, ਆਕਾਸੇ ਹਂਸਰਾਜਾ ਵਿਯ ਸੋਭਤੀ’’ਤਿ ਆਹ. ਸੋਪਿ ਪਾਨੀਯਘਟਂ ਠਪੇਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਅਟ੍ਠਾਸਿ. ਅਥ ਨਂ ਸਤ੍ਥਾ ਆਹ – ‘‘ਕਤਿਵਸ੍ਸੋਸਿ ਤ੍ਵਂ, ਸੁਮਨਾ’’ਤਿ? ‘‘ਸਤ੍ਤਵਸ੍ਸੋਮ੍ਹਿ, ਭਨ੍ਤੇਤਿ. ‘‘ਤੇਨ ਹਿ, ਸੁਮਨ, ਅਜ੍ਜ ਪਟ੍ਠਾਯ ਭਿਕ੍ਖੁ ਹੋਹੀ’’ਤਿ ਵਤ੍ਵਾ ਦਾਯਜ੍ਜਉਪਸਮ੍ਪਦਂ ਅਦਾਸਿ. ਦ੍ਵੇਯੇਵ ਕਿਰ ਸਾਮਣੇਰਾ ਸਤ੍ਤਵਸ੍ਸਿਕਾ ਉਪਸਮ੍ਪਦਂ ਲਭਿਂਸੁ – ਅਯਞ੍ਚ ਸੁਮਨੋ ਸੋਪਾਕੋ ਚਾਤਿ.

ਏਵਂ ਤਸ੍ਮਿਂ ਉਪਸਮ੍ਪਨ੍ਨੇ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ, ‘‘ਅਚ੍ਛਰਿਯਂ ਆਵੁਸੋ, ਏਵਰੂਪੋ ਹਿ ਨਾਮ ਦਹਰਸਾਮਣੇਰਸ੍ਸ ਆਨੁਭਾਵੋ ਹੋਤਿ, ਨ ਨੋ ਇਤੋ ਪੁਬ੍ਬੇ ਏਵਰੂਪੋ ਆਨੁਭਾਵੋ ਦਿਟ੍ਠਪੁਬ੍ਬੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ, ‘‘ਭਿਕ੍ਖਵੇ, ਮਮ ਸਾਸਨੇ ਦਹਰੋਪਿ ਸਮ੍ਮਾ ਪਟਿਪਨ੍ਨੋ ਏਵਰੂਪਂ ਸਮ੍ਪਤ੍ਤਿਂ ਲਭਤਿਯੇਵਾ’’ਤਿ ਵਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੩੮੨. ‘‘ਯੋ ਹਵੇ ਦਹਰੋ ਭਿਕ੍ਖੁ, ਯੁਞ੍ਜਤਿ ਬੁਦ੍ਧਸਾਸਨੇ;

ਸੋਮਂ ਲੋਕਂ ਪਭਾਸੇਤਿ, ਅਬ੍ਭਾ ਮੁਤ੍ਤੋਵ ਚਨ੍ਦਿਮਾ’’ਤਿ.

ਤਤ੍ਥ ਯੁਞ੍ਜਤੀਤਿ ਘਟਤਿ ਵਾਯਮਤਿ. ਪਭਾਸੇਤੀਤਿ ਸੋ ਭਿਕ੍ਖੁ ਅਤ੍ਤਨੋ ਅਰਹਤ੍ਤਮਗ੍ਗਞਾਣੇਨ ਅਬ੍ਭਾਦੀਹਿ ਮੁਤ੍ਤੋ ਚਨ੍ਦਿਮਾ ਵਿਯ ਲੋਕਂ ਖਨ੍ਧਾਦਿਭੇਦਂ ਲੋਕਂ ਓਭਾਸੇਤਿ, ਏਕਾਲੋਕਂ ਕਰੋਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਸੁਮਨਸਾਮਣੇਰਵਤ੍ਥੁ ਦ੍ਵਾਦਸਮਂ.

ਭਿਕ੍ਖੁਵਗ੍ਗਵਣ੍ਣਨਾ ਨਿਟ੍ਠਿਤਾ.

ਪਞ੍ਚਵੀਸਤਿਮੋ ਵਗ੍ਗੋ.