੨੨. ਨਿਰਯਵਗ੍ਗੋ

੧. ਸੁਨ੍ਦਰੀਪਰਿਬ੍ਬਾਜਿਕਾਵਤ੍ਥੁ

ਅਭੂਤਵਾਦੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸੁਨ੍ਦਰਿਂ ਪਰਿਬ੍ਬਾਜਿਕਂ ਆਰਬ੍ਭ ਕਥੇਸਿ.

‘‘ਤੇਨ ਖੋ ਪਨ ਸਮਯੇਨ ਭਗਵਾ ਸਕ੍ਕਤੋ ਹੋਤਿ ਗਰੁਕਤੋ ਮਾਨਿਤੋ ਪੂਜਿਤੋ’’ਤਿ ਵਤ੍ਥੁ ਵਿਤ੍ਥਾਰਤੋ ਉਦਾਨੇ (ਉਦਾ. ੩੮) ਆਗਤਮੇਵ. ਅਯਂ ਪਨੇਤ੍ਥ ਸਙ੍ਖੇਪੋ – ਭਗਵਤੋ ਕਿਰ ਭਿਕ੍ਖੁਸਙ੍ਘਸ੍ਸ ਚ ਪਞ੍ਚਨ੍ਨਂ ਮਹਾਨਦੀਨਂ ਮਹੋਘਸਦਿਸੇ ਲਾਭਸਕ੍ਕਾਰੇ ਉਪ੍ਪਨ੍ਨੇ ਹਤਲਾਭਸਕ੍ਕਾਰਾ ਅਞ੍ਞਤਿਤ੍ਥਿਯਾ ਸੂਰਿਯੁਗ੍ਗਮਨਕਾਲੇ ਖਜ੍ਜੋਪਨਕਾ ਵਿਯ ਨਿਪ੍ਪਭਾ ਹੁਤ੍ਵਾ ਏਕਤੋ ਸਨ੍ਨਿਪਤਿਤ੍ਵਾ ਮਨ੍ਤਯਿਂਸੁ – ‘‘ਮਯਂ ਸਮਣਸ੍ਸ ਗੋਤਮਸ੍ਸ ਉਪ੍ਪਨ੍ਨਕਾਲਤੋ ਪਟ੍ਠਾਯ ਹਤਲਾਭਸਕ੍ਕਾਰਾ, ਨ ਨੋ ਕੋਚਿ ਅਤ੍ਥਿਭਾਵਮ੍ਪਿ ਜਾਨਾਤਿ, ਕੇਨ ਨੁ ਖੋ ਸਦ੍ਧਿਂ ਏਕਤੋ ਹੁਤ੍ਵਾ ਸਮਣਸ੍ਸ ਗੋਤਮਸ੍ਸ ਅਵਣ੍ਣਂ ਉਪ੍ਪਾਦੇਤ੍ਵਾ ਲਾਭਸਕ੍ਕਾਰਮਸ੍ਸ ਅਨ੍ਤਰਧਾਪੇਯ੍ਯਾਮਾ’’ਤਿ. ਅਥ ਨੇਸਂ ਏਤਦਹੋਸਿ – ‘‘ਸੁਨ੍ਦਰਿਯਾ ਸਦ੍ਧਿਂ ਏਕਤੋ ਹੁਤ੍ਵਾ ਸਕ੍ਕੁਣਿਸ੍ਸਾਮਾ’’ਤਿ. ਤੇ ਏਕਦਿਵਸਂ ਸੁਨ੍ਦਰਿਂ ਤਿਤ੍ਥਿਯਾਰਾਮਂ ਪਵਿਸਿਤ੍ਵਾ ਵਨ੍ਦਿਤ੍ਵਾ ਠਿਤਂ ਨਾਲਪਿਂਸੁ. ਸਾ ਪੁਨਪ੍ਪੁਨਂ ਸਲ੍ਲਪਨ੍ਤੀਪਿ ਪਟਿਵਚਨਂ ਅਲਭਿਤ੍ਵਾ ‘‘ਅਪਿ ਪਨਯ੍ਯਾ, ਕੇਨਚਿ ਵਿਹੇਠਿਤਤ੍ਥਾ’’ਤਿ ਪੁਚ੍ਛਿ. ‘‘ਕਿਂ, ਭਗਿਨਿ, ਸਮਣਂ ਗੋਤਮਂ ਅਮ੍ਹੇ ਵਿਹੇਠੇਤ੍ਵਾ ਹਤਲਾਭਸਕ੍ਕਾਰੇ ਕਤ੍ਵਾ ਵਿਚਰਨ੍ਤਂ ਨ ਪਸ੍ਸਸੀ’’ਤਿ? ‘‘ਮਯਾ ਏਤ੍ਥ ਕਿਂ ਕਾਤੁਂ ਵਟ੍ਟਤੀ’’ਤਿ? ‘‘ਤ੍ਵਂ ਖੋਸਿ, ਭਗਿਨਿ, ਅਭਿਰੂਪਾ ਸੋਭਗ੍ਗਪ੍ਪਤ੍ਤਾ, ਸਮਣਸ੍ਸ ਗੋਤਮਸ੍ਸ ਅਯਸਂ ਆਰੋਪੇਤ੍ਵਾ ਮਹਾਜਨਂ ਤਵ ਕਥਂ ਗਾਹਾਪੇਤ੍ਵਾ ਹਤਲਾਭਸਕ੍ਕਾਰਂ ਕਰੋਹੀ’’ਤਿ. ਸਾ ਤਂ ਸੁਤ੍ਵਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਪਕ੍ਕਨ੍ਤਾ ਤਤੋ ਪਟ੍ਠਾਯ ਮਾਲਾਗਨ੍ਧਵਿਲੇਪਨਕਪ੍ਪੂਰਕਟੁਕਫਲਾਦੀਨਿ ਗਹੇਤ੍ਵਾ ਸਾਯਂ ਮਹਾਜਨਸ੍ਸ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਨਗਰਂ ਪਵਿਸਨਕਾਲੇ ਜੇਤਵਨਾਭਿਮੁਖੀ ਗਚ੍ਛਤਿ, ‘‘ਕਹਂ ਗਚ੍ਛਸੀ’’ਤਿ ਚ ਪੁਟ੍ਠਾ ‘‘ਸਮਣਸ੍ਸ ਗੋਤਮਸ੍ਸ ਸਨ੍ਤਿਕਂ ਗਮਿਸ੍ਸਾਮਿ, ਅਹਞ੍ਹਿ ਤੇਨ ਸਦ੍ਧਿਂ ਏਕਗਨ੍ਧਕੁਟਿਯਂ ਵਸਾਮੀ’’ਤਿ ਵਤ੍ਵਾ ਅਞ੍ਞਤਰਸ੍ਮਿਂ ਤਿਤ੍ਥਿਯਾਰਾਮੇ ਵਸਿਤ੍ਵਾ ਪਾਤੋਵ ਜੇਤਵਨਮਗ੍ਗਂ ਓਤਰਿਤ੍ਵਾ ਨਗਰਾਭਿਮੁਖੀ ਆਗਚ੍ਛਨ੍ਤੀ ‘‘ਕਿਂ, ਸੁਨ੍ਦਰਿ, ਕਹਂ ਗਤਾਸੀ’’ਤਿ ਪੁਟ੍ਠਾ ‘‘ਸਮਣੇਨ ਗੋਤਮੇਨ ਸਦ੍ਧਿਂ ਏਕਗਨ੍ਧਕੁਟਿਯਂ ਵਸਿਤ੍ਵਾ ਤਂ ਕਿਲੇਸਰਤਿਯਾ ਰਮਾਪੇਤ੍ਵਾ ਆਗਤਾਮ੍ਹੀ’’ਤਿ ਵਦਤਿ.

ਅਥ ਤੇ ਕਤਿਪਾਹਚ੍ਚਯੇਨ ਧੁਤ੍ਤਾਨਂ ਕਹਾਪਣੇ ਦਤ੍ਵਾ ‘‘ਗਚ੍ਛਥ ਸੁਨ੍ਦਰਿਂ ਮਾਰੇਤ੍ਵਾ ਸਮਣਸ੍ਸ ਗੋਤਮਸ੍ਸ ਗਨ੍ਧਕੁਟਿਯਾ ਸਮੀਪੇ ਮਾਲਾਕਚਵਰਨ੍ਤਰੇ ਨਿਕ੍ਖਿਪਿਤ੍ਵਾ ਏਥਾ’’ਤਿ ਵਦਿਂਸੁ. ਤੇ ਤਥਾ ਅਕਂਸੁ. ਤਤੋ ਤਿਤ੍ਥਿਯਾ ‘‘ਸੁਨ੍ਦਰਿਂ ਨ ਪਸ੍ਸਾਮਾ’’ਤਿ ਕੋਲਾਹਲਂ ਕਤ੍ਵਾ ਰਞ੍ਞੋ ਆਰੋਚੇਤ੍ਵਾ ‘‘ਕਹਂ ਵੋ ਆਸਙ੍ਕਾ’’ਤਿ ਵੁਤ੍ਤਾ ‘‘ਇਮੇਸੁ ਦਿਵਸੇਸੁ ਜੇਤਵਨੇ ਵਸਤਿ, ਤਤ੍ਥਸ੍ਸਾ ਪਵਤ੍ਤਿਂ ਨ ਜਾਨਾਮਾ’’ਤਿ ਵਤ੍ਵਾ ‘‘ਤੇਨ ਹਿ ਗਚ੍ਛਥ, ਨਂ ਵਿਚਿਨਥਾ’’ਤਿ ਰਞ੍ਞਾ ਅਨੁਞ੍ਞਾਤਾ ਅਤ੍ਤਨੋ ਉਪਟ੍ਠਾਕੇ ਗਹੇਤ੍ਵਾ ਜੇਤਵਨਂ ਗਨ੍ਤ੍ਵਾ ਵਿਚਿਨਨ੍ਤਾ ਮਾਲਾਕਚਵਰਨ੍ਤਰੇ ਤਂ ਦਿਸ੍ਵਾ ਮਞ੍ਚਕਂ ਆਰੋਪੇਤ੍ਵਾ ਨਗਰਂ ਪਵੇਸੇਤ੍ਵਾ ‘‘ਸਮਣਸ੍ਸ ਗੋਤਮਸ੍ਸ ਸਾਵਕਾ ‘ਸਤ੍ਥਾਰਾ ਕਤਂ ਪਾਪਕਮ੍ਮਂ ਪਟਿਚ੍ਛਾਦੇਸ੍ਸਾਮਾ’ਤਿ ਸੁਨ੍ਦਰਿਂ ਮਾਰੇਤ੍ਵਾ ਮਾਲਾਕਚਵਰਨ੍ਤਰੇ ਨਿਕ੍ਖਿਪਿਂਸੂ’’ਤਿ ਰਞ੍ਞੋ ਆਰੋਚਯਿਂਸੁ. ਰਾਜਾ ‘‘ਤੇਨ ਹਿ ਗਚ੍ਛਥ, ਨਗਰਂ ਆਹਿਣ੍ਡਥਾ’’ਤਿ ਆਹ. ਤੇ ਨਗਰਵੀਥੀਸੁ ‘‘ਪਸ੍ਸਥ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਕਮ੍ਮ’’ਨ੍ਤਿਆਦੀਨਿ ਵਤ੍ਵਾ ਪੁਨ ਰਞ੍ਞੋ ਨਿਵੇਸਨਦ੍ਵਾਰਂ ਆਗਮਿਂਸੁ. ਰਾਜਾ ਸੁਨ੍ਦਰਿਯਾ ਸਰੀਰਂ ਆਮਕਸੁਸਾਨੇ ਅਟ੍ਟਕਂ ਆਰੋਪੇਤ੍ਵਾ ਰਕ੍ਖਾਪੇਸਿ. ਸਾਵਤ੍ਥਿਵਾਸਿਨੋ ਠਪੇਤ੍ਵਾ ਅਰਿਯਸਾਵਕੇ ਸੇਸਾ ਯੇਭੁਯ੍ਯੇਨ ‘‘ਪਸ੍ਸਥ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਕਮ੍ਮ’’ਨ੍ਤਿਆਦੀਨਿ ਵਤ੍ਵਾ ਅਨ੍ਤੋਨਗਰੇਪਿ ਬਹਿਨਗਰੇਪਿ ਭਿਕ੍ਖੂ ਅਕ੍ਕੋਸਨ੍ਤਾ ਵਿਚਰਨ੍ਤਿ. ਭਿਕ੍ਖੂ ਤਂ ਪਵਤ੍ਤਿਂ ਤਥਾਗਤਸ੍ਸ ਆਰੋਚੇਸੁਂ. ਸਤ੍ਥਾ ‘‘ਤੇਨ ਹਿ ਤੁਮ੍ਹੇਪਿ ਤੇ ਮਨੁਸ੍ਸੇ ਏਵਂ ਪਟਿਚੋਦੇਥਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੩੦੬. ‘‘ਅਭੂਤਵਾਦੀ ਨਿਰਯਂ ਉਪੇਤਿ,

ਯੋ ਵਾਪਿ ਕਤ੍ਵਾ ਨ ਕਰੋਮਿਚਾਹ;

ਉਭੋਪਿ ਤੇ ਪੇਚ੍ਚ ਸਮਾ ਭਵਨ੍ਤਿ,

ਨਿਹੀਨਕਮ੍ਮਾ ਮਨੁਜਾ ਪਰਤ੍ਥਾ’’ਤਿ.

ਤਤ੍ਥ ਅਭੂਤਵਾਦੀਤਿ ਪਰਸ੍ਸ ਦੋਸਂ ਅਦਿਸ੍ਵਾਵ ਮੁਸਾਵਾਦਂ ਕਤ੍ਵਾ ਤੁਚ੍ਛੇਨ ਪਰਂ ਅਬ੍ਭਾਚਿਕ੍ਖਨ੍ਤੋ. ਕਤ੍ਵਾਤਿ ਯੋ ਵਾ ਪਨ ਪਾਪਕਮ੍ਮਂ ਕਤ੍ਵਾ ‘‘ਨਾਹਂ ਏਤਂ ਕਰੋਮੀ’’ਤਿ ਆਹ. ਪੇਚ੍ਚ ਸਮਾ ਭਵਨ੍ਤੀਤਿ ਤੇ ਉਭੋਪਿ ਜਨਾ ਪਰਲੋਕਂ ਗਨ੍ਤ੍ਵਾ ਨਿਰਯਂ ਉਪਗਮਨੇਨ ਗਤਿਯਾ ਸਮਾ ਭਵਨ੍ਤਿ. ਗਤਿਯੇਵ ਨੇਸਂ ਪਰਿਚ੍ਛਿਨ੍ਨਾ, ਆਯੁ ਪਨ ਨੇਸਂ ਨ ਪਰਿਚ੍ਛਿਨ੍ਨਂ. ਬਹੁਕਞ੍ਹਿ ਪਾਪਕਮ੍ਮਂ ਕਤ੍ਵਾ ਚਿਰਂ ਨਿਰਯੇ ਪਚ੍ਚਨ੍ਤਿ, ਪਰਿਤ੍ਤਂ ਕਤ੍ਵਾ ਅਪ੍ਪਮਤ੍ਤਕਮੇਵ ਕਾਲਂ. ਯਸ੍ਮਾ ਪਨ ਨੇਸਂ ਉਭਿਨ੍ਨਮ੍ਪਿ ਲਾਮਕਮੇਵ ਕਮ੍ਮਂ, ਤੇਨ ਵੁਤ੍ਤਂ – ‘‘ਨਿਹੀਨਕਮ੍ਮਾ ਮਨੁਜਾ ਪਰਤ੍ਥਾ’’ਤਿ. ਪਰਤ੍ਥਾਤਿ ਇਮਸ੍ਸ ਪਨ ਪਦਸ੍ਸ ਪੁਰਤੋ ਪੇਚ੍ਚਪਦੇਨ ਸਮ੍ਬਨ੍ਧੋ. ਪੇਚ੍ਚ ਪਰਤ੍ਥ ਇਤੋ ਗਨ੍ਤ੍ਵਾ ਤੇ ਨਿਹੀਨਕਮ੍ਮਾ ਪਰਲੋਕੇ ਸਮਾ ਭਵਨ੍ਤੀਤਿ ਅਤ੍ਥੋ. ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਰਾਜਾ ‘‘ਸੁਨ੍ਦਰਿਯਾ ਅਞ੍ਞੇਹਿ ਮਾਰਿਤਭਾਵਂ ਜਾਨਾਥਾ’’ਤਿ ਪੁਰਿਸੇ ਉਯ੍ਯੋਜੇਸਿ. ਅਥ ਤੇ ਧੁਤ੍ਤਾ ਤੇਹਿ ਕਹਾਪਣੇਹਿ ਸੁਰਂ ਪਿਵਨ੍ਤਾ ਅਞ੍ਞਮਞ੍ਞਂ ਕਲਹਂ ਕਰਿਂਸੁ. ਏਕੋ ਏਕਂ ਆਹ – ‘‘ਤ੍ਵਂ ਸੁਨ੍ਦਰਿਂ ਏਕਪ੍ਪਹਾਰੇਨੇਵ ਮਾਰੇਤ੍ਵਾ ਮਾਲਾਕਚਵਰਨ੍ਤਰੇ ਨਿਕ੍ਖਿਪਿਤ੍ਵਾ ਤਤੋ ਲਦ੍ਧਕਹਾਪਣੇਹਿ ਸੁਰਂ ਪਿਵਸਿ, ਹੋਤੁ ਹੋਤੂ’’ਤਿ. ਰਾਜਪੁਰਿਸਾ ਤੇ ਧੁਤ੍ਤੇ ਗਹੇਤ੍ਵਾ ਰਞ੍ਞੋ ਦਸ੍ਸੇਸੁਂ. ਅਥ ਨੇ ਰਾਜਾ ‘‘ਤੁਮ੍ਹੇਹਿ ਸਾ ਮਾਰਿਤਾ’’ਤਿ ਪੁਚ੍ਛਿ. ‘‘ਆਮ, ਦੇਵਾ’’ਤਿ. ‘‘ਕੇਹਿ ਮਾਰਾਪਿਤਾ’’ਤਿ? ‘‘ਅਞ੍ਞਤਿਤ੍ਥਿਯੇਹਿ, ਦੇਵਾ’’ਤਿ. ਰਾਜਾ ਤਿਤ੍ਥਿਯੇ ਪਕ੍ਕੋਸਾਪੇਤ੍ਵਾ ਪੁਚ੍ਛਿ. ਤੇ ਤਥੇਵ ਵਦਿਂਸੁ. ਤੇਨ ਹਿ ਗਚ੍ਛਥ ਤੁਮ੍ਹੇ ਏਵਂ ਵਦਨ੍ਤਾ ਨਗਰਂ ਆਹਿਣ੍ਡਥ – ‘‘ਅਯਂ ਸੁਨ੍ਦਰੀ ਸਮਣਸ੍ਸ ਗੋਤਮਸ੍ਸ ਅਵਣ੍ਣਂ ਆਰੋਪੇਤੁਕਾਮੇਹਿ ਅਮ੍ਹੇਹਿ ਮਾਰਾਪਿਤਾ, ਨੇਵ ਸਮਣਸ੍ਸ ਗੋਤਮਸ੍ਸ, ਨ ਸਾਵਕਾਨਂ ਦੋਸੋ ਅਤ੍ਥਿ, ਅਮ੍ਹਾਕਮੇਵ ਦੋਸੋ’’ਤਿ. ਤੇ ਤਥਾ ਕਰਿਂਸੁ. ਬਾਲਮਹਾਜਨੋ ਤਦਾ ਸਦ੍ਦਹਿ, ਤਿਤ੍ਥਿਯਾਪਿ ਧੁਤ੍ਤਾਪਿ ਪੁਰਿਸਵਧਦਣ੍ਡਂ ਪਾਪੁਣਿਂਸੁ. ਤਤੋ ਪਟ੍ਠਾਯ ਬੁਦ੍ਧਾਨਂ ਸਕ੍ਕਾਰੋ ਮਹਾ ਅਹੋਸੀਤਿ.

ਸੁਨ੍ਦਰੀਪਰਿਬ੍ਬਾਜਿਕਾਵਤ੍ਥੁ ਪਠਮਂ.

੨. ਦੁਚ੍ਚਰਿਤਫਲਪੀਲ਼ਿਤਵਤ੍ਥੁ

ਕਾਸਾਵਕਣ੍ਠਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਦੁਚ੍ਚਰਿਤਫਲਾਨੁਭਾਵੇਨ ਪੀਲ਼ਿਤੇ ਸਤ੍ਤੇ ਆਰਬ੍ਭ ਕਥੇਸਿ.

ਆਯਸ੍ਮਾ ਹਿ ਮੋਗ੍ਗਲ੍ਲਾਨੋ ਲਕ੍ਖਣਤ੍ਥੇਰੇਨ ਸਦ੍ਧਿਂ ਗਿਜ੍ਝਕੂਟਾ ਓਰੋਹਨ੍ਤੋ ਅਟ੍ਠਿਸਙ੍ਖਲਿਕਪੇਤਾਦੀਨਂ ਅਤ੍ਤਭਾਵੇ ਦਿਸ੍ਵਾ ਸਿਤਂ ਕਰੋਨ੍ਤੋ ਲਕ੍ਖਣਤ੍ਥੇਰੇਨ ਸਿਤਕਾਰਣਂ ਪੁਟ੍ਠੋ ‘‘ਅਕਾਲੋ, ਆਵੁਸੋ, ਇਮਸ੍ਸ ਪਞ੍ਹਸ੍ਸ, ਤਥਾਗਤਸ੍ਸ ਸਨ੍ਤਿਕੇ ਮਂ ਪੁਚ੍ਛੇਯ੍ਯਾਸੀ’’ਤਿ ਵਤ੍ਵਾ ਤਥਾਗਤਸ੍ਸ ਸਨ੍ਤਿਕੇ ਥੇਰੇਨ ਪੁਟ੍ਠੋ ਅਟ੍ਠਿਸਙ੍ਖਲਿਕਪੇਤਾਦੀਨਂ ਦਿਟ੍ਠਭਾਵਂ ਆਚਿਕ੍ਖਿਤ੍ਵਾ ‘‘ਇਧਾਹਂ, ਆਵੁਸੋ, ਗਿਜ੍ਝਕੂਟਾ ਪਬ੍ਬਤਾ ਓਰੋਹਨ੍ਤੋ ਅਦ੍ਦਸਂ ਭਿਕ੍ਖੁਂ ਵੇਹਾਸਂ ਗਚ੍ਛਨ੍ਤਂ, ਤਸ੍ਸ ਸਙ੍ਘਾਟਿਪਿ ਆਦਿਤ੍ਤਾ ਸਮ੍ਪਜ੍ਜਲਿਤਾ ਸਜੋਤਿਭੂਤਾ…ਪੇ… ਕਾਯੋਪਿ ਆਦਿਤ੍ਤੋ’’ਤਿਆਦਿਨਾ (ਪਾਰਾ. ੨੩੦; ਸਂ. ਨਿ. ੨.੨੧੮) ਨਯੇਨ ਸਦ੍ਧਿਂ ਪਤ੍ਤਚੀਵਰਕਾਯਬਨ੍ਧਨਾਦੀਹਿ ਡਯ੍ਹਮਾਨੇ ਪਞ੍ਚ ਸਹਧਮ੍ਮਿਕੇ ਆਰੋਚੇਸਿ. ਸਤ੍ਥਾ ਤੇਸਂ ਕਸ੍ਸਪਦਸਬਲਸ੍ਸ ਸਾਸਨੇ ਪਬ੍ਬਜਿਤ੍ਵਾ ਪਬ੍ਬਜ੍ਜਾਯ ਅਨੁਰੂਪਂ ਕਾਤੁਂ ਅਸਕ੍ਕੋਨ੍ਤਾਨਂ ਪਾਪਭਾਵਂ ਆਚਿਕ੍ਖਿਤ੍ਵਾ ਤਸ੍ਮਿਂ ਖਣੇ ਤਤ੍ਥ ਨਿਸਿਨ੍ਨਾਨਂ ਬਹੂਨਂ ਪਾਪਭਿਕ੍ਖੂਨਂ ਦੁਚ੍ਚਰਿਤਕਮ੍ਮਸ੍ਸ ਵਿਪਾਕਂ ਦਸ੍ਸੇਨ੍ਤੋ ਇਮਂ ਗਾਥਮਾਹ –

੩੦੭. ‘‘ਕਾਸਾਵਕਣ੍ਠਾ ਬਹਵੋ, ਪਾਪਧਮ੍ਮਾ ਅਸਞ੍ਞਤਾ;

ਪਾਪਾ ਪਾਪੇਹਿ ਕਮ੍ਮੇਹਿ, ਨਿਰਯਂ ਤੇ ਉਪਪਜ੍ਜਰੇ’’ਤਿ.

ਤਤ੍ਥ ਕਾਸਾਵਕਣ੍ਠਾਤਿ ਕਾਸਾਵੇਨ ਪਲਿਵੇਠਿਤਕਣ੍ਠਾ. ਪਾਪਧਮ੍ਮਾਤਿ ਲਾਮਕਧਮ੍ਮਾ. ਅਸਞ੍ਞਤਾਤਿ ਕਾਯਾਦਿਸਂਯਮਰਹਿਤਾ, ਤਥਾਰੂਪਾ ਪਾਪਪੁਗ੍ਗਲਾ ਅਤ੍ਤਨਾ ਕਤੇਹਿ ਅਕੁਸਲਕਮ੍ਮੇਹਿ ਨਿਰਯਂ ਉਪਪਜ੍ਜਨ੍ਤਿ, ਤੇ ਤਤ੍ਥ ਪਚ੍ਚਿਤ੍ਵਾ ਤਤੋ ਚੁਤਾ ਵਿਪਾਕਾਵਸੇਸੇਨ ਪੇਤੇਸੁਪਿ ਏਵਂ ਪਚ੍ਚਨ੍ਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਦੁਚ੍ਚਰਿਤਫਲਪੀਲ਼ਿਤਵਤ੍ਥੁ ਦੁਤਿਯਂ.

੩. ਵਗ੍ਗੁਮੁਦਾਤੀਰਿਯਭਿਕ੍ਖੁਵਤ੍ਥੁ

ਸੇਯ੍ਯੋ ਅਯੋਗੁਲ਼ੋਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਸਾਲਿਂ ਉਪਨਿਸ੍ਸਾਯ ਮਹਾਵਨੇ ਵਿਹਰਨ੍ਤੋ ਵਗ੍ਗੁਮੁਦਾਤੀਰਿਯੇ ਭਿਕ੍ਖੂ ਆਰਬ੍ਭ ਕਥੇਸਿ. ਵਤ੍ਥੁ ਉਤ੍ਤਰਿਮਨੁਸ੍ਸਧਮ੍ਮਪਾਰਾਜਿਕੇ (ਪਾਰਾ. ੧੯੩ ਆਦਯੋ) ਆਗਤਮੇਵ.

ਤਦਾ ਹਿ ਸਤ੍ਥਾ ਤੇ ਭਿਕ੍ਖੂ ‘‘ਕਿਂ ਪਨ ਤੁਮ੍ਹੇ, ਭਿਕ੍ਖਵੇ, ਉਦਰਸ੍ਸਤ੍ਥਾਯ ਗਿਹੀਨਂ ਅਞ੍ਞਮਞ੍ਞਸ੍ਸ ਉਤ੍ਤਰਿਮਨੁਸ੍ਸਧਮ੍ਮਸ੍ਸ ਵਣ੍ਣਂ ਭਾਸਿਤ੍ਥਾ’’ਤਿ ਵਤ੍ਵਾ ਤੇਹਿ ‘‘ਆਮ, ਭਨ੍ਤੇ’’ਤਿ ਵੁਤ੍ਤੇ ਤੇ ਭਿਕ੍ਖੂ ਅਨੇਕਪਰਿਯਾਯੇਨ ਗਰਹਿਤ੍ਵਾ ਇਮਂ ਗਾਥਮਾਹ –

੩੦੮. ‘‘ਸੇਯ੍ਯੋ ਅਯੋਗੁਲ਼ੋ ਭੁਤ੍ਤੋ, ਤਤ੍ਤੋ ਅਗ੍ਗਿਸਿਖੂਪਮੋ;

ਯਞ੍ਚੇ ਭੁਞ੍ਜੇਯ੍ਯ ਦੁਸ੍ਸੀਲੋ, ਰਟ੍ਠਪਿਣ੍ਡਮਸਞ੍ਞਤੋ’’ਤਿ.

ਤਤ੍ਥ ਯਞ੍ਚੇ ਭੁਞ੍ਜੇਯ੍ਯਾਤਿ ਯਂ ਦੁਸ੍ਸੀਲੋ ਨਿਸ੍ਸੀਲਪੁਗ੍ਗਲੋ ਕਾਯਾਦੀਹਿ ਅਸਞ੍ਞਤੋ ਰਟ੍ਠਵਾਸੀਹਿ ਸਦ੍ਧਾਯ ਦਿਨ੍ਨਂ ਰਟ੍ਠਪਿਣ੍ਡਂ ‘‘ਸਮਣੋਮ੍ਹੀ’’ਤਿ ਪਟਿਜਾਨਨ੍ਤੋ ਗਹੇਤ੍ਵਾ ਭੁਞ੍ਜੇਯ੍ਯ, ਤਤ੍ਤੋ ਆਦਿਤ੍ਤੋ ਅਗ੍ਗਿਵਣ੍ਣੋ ਅਯੋਗੁਲ਼ੋਵ ਭੁਤ੍ਤੋ ਸੇਯ੍ਯੋ ਸੁਨ੍ਦਰਤਰੋ. ਕਿਂ ਕਾਰਣਾ? ਤਪ੍ਪਚ੍ਚਯਾ ਹਿ ਏਕੋਵ ਅਤ੍ਤਭਾਵੋ ਝਾਯੇਯ੍ਯ, ਦੁਸ੍ਸੀਲੋ ਪਨ ਸਦ੍ਧਾਦੇਯ੍ਯਂ ਭੁਞ੍ਜਿਤ੍ਵਾ ਅਨੇਕਾਨਿਪਿ ਜਾਤਿਸਤਾਨਿ ਨਿਰਯੇ ਪਚ੍ਚੇਯ੍ਯਾਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਵਗ੍ਗੁਮੁਦਾਤੀਰਿਯਭਿਕ੍ਖੁਵਤ੍ਥੁ ਤਤਿਯਂ.

੪. ਖੇਮਕਸੇਟ੍ਠਿਪੁਤ੍ਤਵਤ੍ਥੁ

ਚਤ੍ਤਾਰਿ ਠਾਨਾਨੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਨਾਥਪਿਣ੍ਡਿਕਸ੍ਸ ਭਾਗਿਨੇਯ੍ਯਂ ਖੇਮਕਂ ਨਾਮ ਸੇਟ੍ਠਿਪੁਤ੍ਤਂ ਆਰਬ੍ਭ ਕਥੇਸਿ.

ਸੋ ਕਿਰ ਅਭਿਰੂਪੋ ਅਹੋਸਿ, ਯੇਭੁਯ੍ਯੇਨ ਇਤ੍ਥਿਯੋ ਤਂ ਦਿਸ੍ਵਾ ਰਾਗਾਭਿਭੂਤਾ ਸਕਭਾਵੇਨ ਸਣ੍ਠਾਤੁਂ ਨਾਸਕ੍ਖਿਂਸੁ. ਸੋਪਿ ਪਰਦਾਰਕਮ੍ਮਾਭਿਰਤੋਵ ਅਹੋਸਿ. ਅਥ ਨਂ ਰਤ੍ਤਿਂ ਰਾਜਪੁਰਿਸਾ ਗਹੇਤ੍ਵਾ ਰਞ੍ਞੋ ਦਸ੍ਸੇਸੁਂ. ਰਾਜਾ ਮਹਾਸੇਟ੍ਠਿਸ੍ਸ ਲਜ੍ਜਾਮੀਤਿ ਤਂ ਕਿਞ੍ਚਿ ਅਵਤ੍ਵਾ ਵਿਸ੍ਸਜ੍ਜਾਪੇਸਿ. ਸੋ ਪਨ ਨੇਵ ਵਿਰਮਿ. ਅਥ ਨਂ ਦੁਤਿਯਮ੍ਪਿ ਤਤਿਯਮ੍ਪਿ ਰਾਜਪੁਰਿਸਾ ਗਹੇਤ੍ਵਾ ਰਞ੍ਞੋ ਦਸ੍ਸੇਸੁਂ. ਰਾਜਾ ਵਿਸ੍ਸਜ੍ਜਾਪੇਸਿਯੇਵ. ਮਹਾਸੇਟ੍ਠਿ, ਤਂ ਪਵਤ੍ਤਿਂ ਸੁਤ੍ਵਾ ਤਂ ਆਦਾਯ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਤਂ ਪਵਤ੍ਤਿਂ ਆਰੋਚੇਤ੍ਵਾ, ‘‘ਭਨ੍ਤੇ, ਇਮਸ੍ਸ ਧਮ੍ਮਂ ਦੇਸੇਥਾ’’ਤਿ ਆਹ. ਸਤ੍ਥਾ ਤਸ੍ਸ ਸਂਵੇਗਕਥਂ ਵਤ੍ਵਾ ਪਰਦਾਰਸੇਵਨਾਯ ਦੋਸਂ ਦਸ੍ਸੇਨ੍ਤੋ ਇਮਾ ਗਾਥਾ ਅਭਾਸਿ –

੩੦੯. ‘‘ਚਤ੍ਤਾਰਿ ਠਾਨਾਨਿ ਨਰੋ ਪਮਤ੍ਤੋ,

ਆਪਜ੍ਜਤਿ ਪਰਦਾਰੂਪਸੇਵੀ;

ਅਪੁਞ੍ਞਲਾਭਂ ਨ ਨਿਕਾਮਸੇਯ੍ਯਂ,

ਨਿਨ੍ਦਂ ਤਤੀਯਂ ਨਿਰਯਂ ਚਤੁਤ੍ਥਂ.

੩੧੦. ‘‘ਅਪੁਞ੍ਞਲਾਭੋ ਚ ਗਤੀ ਚ ਪਾਪਿਕਾ,

ਭੀਤਸ੍ਸ ਭੀਤਾਯ ਰਤੀ ਚ ਥੋਕਿਕਾ;

ਰਾਜਾ ਚ ਦਣ੍ਡਂ ਗਰੁਕਂ ਪਣੇਤਿ,

ਤਸ੍ਮਾ ਨਰੋ ਪਰਦਾਰਂ ਨ ਸੇਵੇ’’ਤਿ.

ਤਤ੍ਥ ਠਾਨਾਨੀਤਿ ਦੁਕ੍ਖਕਾਰਣਾਨਿ. ਪਮਤ੍ਤੋਤਿ ਸਤਿਵੋਸ੍ਸਗ੍ਗੇਨ ਸਮਨ੍ਨਾਗਤੋ. ਆਪਜ੍ਜਤੀਤਿ ਪਾਪੁਣਾਤਿ. ਪਰਦਾਰੂਪਸੇਵੀਤਿ ਪਰਦਾਰਂ ਉਪਸੇਵਨ੍ਤੋ ਉਪ੍ਪਥਚਾਰੀ. ਅਪੁਞ੍ਞਲਾਭਨ੍ਤਿ ਅਕੁਸਲਲਾਭਂ. ਨ ਨਿਕਾਮਸੇਯ੍ਯਨ੍ਤਿ ਯਥਾ ਇਚ੍ਛਤਿ, ਏਵਂ ਸੇਯ੍ਯਂ ਅਲਭਿਤ੍ਵਾ ਅਨਿਚ੍ਛਿਤਂ ਪਰਿਤ੍ਤਕਮੇਵ ਕਾਲਂ ਸੇਯ੍ਯਂ ਲਭਤਿ. ਅਪੁਞ੍ਞਲਾਭੋ ਚਾਤਿ ਏਵਂ ਤਸ੍ਸ ਅਯਞ੍ਚ ਅਪੁਞ੍ਞਲਾਭੋ, ਤੇਨ ਚ ਅਪੁਞ੍ਞੇਨ ਨਿਰਯਸਙ੍ਖਾਤਾ ਪਾਪਿਕਾ ਗਤਿ ਹੋਤਿ. ਰਤੀ ਚ ਥੋਕਿਕਾਤਿ ਯਾ ਤਸ੍ਸ ਭੀਤਸ੍ਸ ਭੀਤਾਯ ਇਤ੍ਥਿਯਾ ਸਦ੍ਧਿਂ ਰਤਿ, ਸਾਪਿ ਥੋਕਿਕਾ ਪਰਿਤ੍ਤਾ ਹੋਤਿ. ਗਰੁਕਨ੍ਤਿ ਰਾਜਾ ਚ ਹਤ੍ਥਚ੍ਛੇਦਾਦਿਵਸੇਨ ਗਰੁਕਂ ਦਣ੍ਡਂ ਪਣੇਤਿ. ਤਸ੍ਮਾਤਿ ਯਸ੍ਮਾ ਪਰਦਾਰਂ ਸੇਵਨ੍ਤੋ ਏਤਾਨਿ ਅਪੁਞ੍ਞਾਦੀਨਿ ਪਾਪੁਣਾਤਿ, ਤਸ੍ਮਾ ਪਰਦਾਰਂ ਨ ਸੇਵੇਯ੍ਯਾਤਿ ਅਤ੍ਥੋ.

ਦੇਸਨਾਵਸਾਨੇ ਖੇਮਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਤੋ ਪਟ੍ਠਾਯ ਮਹਾਜਨੋ ਸੁਖਂ ਵੀਤਿਨਾਮੇਸਿ. ਕਿਂ ਪਨਸ੍ਸ ਪੁਬ੍ਬਕਮ੍ਮਨ੍ਤਿ? ਸੋ ਕਿਰ ਕਸ੍ਸਪਬੁਦ੍ਧਕਾਲੇ ਉਤ੍ਤਮਮਲ੍ਲੋ ਹੁਤ੍ਵਾ ਦ੍ਵੇ ਸੁਵਣ੍ਣਪਟਾਕਾ ਦਸਬਲਸ੍ਸ ਕਞ੍ਚਨਥੂਪੇ ਆਰੋਪੇਤ੍ਵਾ ਪਤ੍ਥਨਂ ਪਟ੍ਠਪੇਸਿ ‘‘ਠਪੇਤ੍ਵਾ ਞਾਤਿਸਾਲੋਹਿਤਿਤ੍ਥਿਯੋ ਅਵਸੇਸਾ ਮਂ ਦਿਸ੍ਵਾ ਰਜ੍ਜਨ੍ਤੂ’’ਤਿ. ਇਦਮਸ੍ਸ ਪੁਬ੍ਬਕਮ੍ਮਨ੍ਤਿ. ਤੇਨ ਤਂ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਦਿਸ੍ਵਾ ਪਰੇਸਂ ਇਤ੍ਥਿਯੋ ਸਕਭਾਵੇਨ ਸਣ੍ਠਾਤੁਂ ਨਾਸਕ੍ਖਿਂਸੂਤਿ.

ਖੇਮਕਸੇਟ੍ਠਿਪੁਤ੍ਤਵਤ੍ਥੁ ਚਤੁਤ੍ਥਂ.

੫. ਦੁਬ੍ਬਚਭਿਕ੍ਖੁਵਤ੍ਥੁ

ਕੁਸੋ ਯਥਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਦੁਬ੍ਬਚਭਿਕ੍ਖੁਂ ਆਰਬ੍ਭ ਕਥੇਸਿ.

ਏਕੋ ਕਿਰ ਭਿਕ੍ਖੁ ਅਸਞ੍ਚਿਚ੍ਚ ਏਕਂ ਤਿਣਂ ਛਿਨ੍ਦਿਤ੍ਵਾ ਕੁਕ੍ਕੁਚ੍ਚੇ ਉਪ੍ਪਨ੍ਨੇ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ, ‘‘ਆਵੁਸੋ, ਯੋ ਤਿਣਂ ਛਿਨ੍ਦਤਿ, ਤਸ੍ਸ ਕਿਂ ਹੋਤੀ’’ਤਿ ਤਂ ਅਤ੍ਤਨਾ ਕਤਭਾਵਂ ਆਰੋਚੇਤ੍ਵਾ ਪੁਚ੍ਛਿ. ਅਥ ਨਂ ਇਤਰੋ ‘‘ਤ੍ਵਂ ਤਿਣਸ੍ਸ ਛਿਨ੍ਨਕਾਰਣਾ ਕਿਞ੍ਚਿ ਹੋਤੀਤਿ ਸਞ੍ਞਂ ਕਰੋਸਿ, ਨ ਏਤ੍ਥ ਕਿਞ੍ਚਿ ਹੋਤਿ, ਦੇਸੇਤ੍ਵਾ ਪਨ ਮੁਚ੍ਚਤੀ’’ਤਿ ਵਤ੍ਵਾ ਸਯਮ੍ਪਿ ਉਭੋਹਿ ਹਤ੍ਥੇਹਿ ਤਿਣਂ ਲੁਞ੍ਚਿਤ੍ਵਾ ਅਗ੍ਗਹੇਸਿ. ਭਿਕ੍ਖੂ ਤਂ ਪਵਤ੍ਤਿਂ ਸਤ੍ਥੁ ਆਰੋਚੇਸੁਂ. ਸਤ੍ਥਾ ਤਂ ਭਿਕ੍ਖੁਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

੩੧੧. ‘‘ਕੁਸੋ ਯਥਾ ਦੁਗ੍ਗਹਿਤੋ, ਹਤ੍ਥਮੇਵਾਨੁਕਨ੍ਤਤਿ;

ਸਾਮਞ੍ਞਂ ਦੁਪ੍ਪਰਾਮਟ੍ਠਂ, ਨਿਰਯਾਯੁਪਕਡ੍ਢਤਿ.

੩੧੨. ‘‘ਯਂ ਕਿਞ੍ਚਿ ਸਿਥਿਲਂ ਕਮ੍ਮਂ, ਸਂਕਿਲਿਟ੍ਠਞ੍ਚ ਯਂ ਵਤਂ;

ਸਙ੍ਕਸ੍ਸਰਂ ਬ੍ਰਹ੍ਮਚਰਿਯਂ, ਨ ਤਂ ਹੋਤਿ ਮਹਪ੍ਫਲਂ.

੩੧੩. ‘‘ਕਯਿਰਾ ਚੇ ਕਯਿਰਾਥੇਨਂ, ਦਲ਼੍ਹਮੇਨਂ ਪਰਕ੍ਕਮੇ;

ਸਿਥਿਲੋ ਹਿ ਪਰਿਬ੍ਬਾਜੋ, ਭਿਯ੍ਯੋ ਆਕਿਰਤੇ ਰਜ’’ਨ੍ਤਿ.

ਤਤ੍ਥ ਕੁਸੋਤਿ ਯਂ ਕਿਞ੍ਚਿ ਤਿਖਿਣਧਾਰਂ ਤਿਣਂ ਅਨ੍ਤਮਸੋ ਤਾਲਪਣ੍ਣਮ੍ਪਿ, ਯਥਾ ਸੋ ਕੁਸੋ ਯੇਨ ਦੁਗ੍ਗਹਿਤੋ, ਤਸ੍ਸ ਹਤ੍ਥਂ ਅਨੁਕਨ੍ਤਤਿ ਫਾਲੇਤਿ, ਏਵਮੇਵ ਸਮਣਧਮ੍ਮਸਙ੍ਖਾਤਂ ਸਾਮਞ੍ਞਮ੍ਪਿ ਖਣ੍ਡਸੀਲਾਦਿਤਾਯ ਦੁਪ੍ਪਰਾਮਟ੍ਠਂ ਨਿਰਯਾਯੁਪਕਡ੍ਢਤਿ, ਨਿਰਯੇ ਨਿਬ੍ਬਤ੍ਤਾਪੇਤੀਤਿ ਅਤ੍ਥੋ. ਸਿਥਿਲਨ੍ਤਿ ਓਲੀਯਿਤ੍ਵਾ ਕਰਣੇਨ ਸਿਥਿਲਗਾਹਂ ਕਤ੍ਵਾ ਕਤਂ ਯਂਕਿਞ੍ਚਿ ਕਮ੍ਮਂ. ਸਂਕਿਲਿਟ੍ਠਨ੍ਤਿ ਵੇਸਿਯਾਦਿਕੇਸੁ ਅਗੋਚਰੇਸੁ ਚਰਣੇਨ ਸਂਕਿਲਿਟ੍ਠਂ. ਸਙ੍ਕਸ੍ਸਰਨ੍ਤਿ ਸਙ੍ਕਾਹਿ ਸਰਿਤਬ੍ਬਂ, ਉਪੋਸਥਕਿਚ੍ਚਾਦੀਸੁ ਅਞ੍ਞਤਰਕਿਚ੍ਚੇਨ ਸਨ੍ਨਿਪਤਿਤਮ੍ਪਿ ਸਙ੍ਘਂ ਦਿਸ੍ਵਾ ‘‘ਅਦ੍ਧਾ ਇਮੇ ਮਮ ਚਰਿਯਂ ਞਤ੍ਵਾ ਮਂ ਉਕ੍ਖਿਪਿਤੁਕਾਮਾਵ ਸਨ੍ਨਿਪਤਿਤਾ’’ਤਿ ਏਵਂ ਅਤ੍ਤਨੋ ਆਸਙ੍ਕਾਹਿ ਸਰਿਤਂ ਉਸ੍ਸਙ੍ਕਿਤਂ ਪਰਿਸਙ੍ਕਿਤਂ. ਨ ਤਂ ਹੋਤੀਤਿ ਤਂ ਏਵਰੂਪਂ ਸਮਣਧਮ੍ਮਸਙ੍ਖਾਤਂ ਬ੍ਰਹ੍ਮਚਰਿਯਂ ਤਸ੍ਸ ਪੁਗ੍ਗਲਸ੍ਸ ਮਹਪ੍ਫਲਂ ਨ ਹੋਤਿ, ਤਸ੍ਸ ਮਹਪ੍ਫਲਾਭਾਵੇਨੇਵ ਭਿਕ੍ਖਦਾਯਕਾਨਮ੍ਪਿਸ੍ਸ ਨ ਮਹਪ੍ਫਲਂ ਹੋਤੀਤਿ ਅਤ੍ਥੋ. ਕਯਿਰਾ ਚੇਤਿ ਤਸ੍ਮਾ ਯਂ ਕਮ੍ਮਂ ਕਰੇਯ੍ਯ, ਤਂ ਕਰੇਯ੍ਯਾਥੇਵ. ਦਲ਼੍ਹਮੇਨਂ ਪਰਕ੍ਕਮੇਤਿ ਥਿਰਕਤਮੇਵ ਕਤ੍ਵਾ ਅਵਤ੍ਤਸਮਾਦਾਨੋ ਹੁਤ੍ਵਾ ਏਨਂ ਕਯਿਰਾ. ਪਰਿਬ੍ਬਾਜੋਤਿ ਸਿਥਿਲਭਾਵੇਨ ਕਤੋ ਖਣ੍ਡਾਦਿਭਾਵਪ੍ਪਤ੍ਤੋ ਸਮਣਧਮ੍ਮੋ. ਭਿਯ੍ਯੋ ਆਕਿਰਤੇ ਰਜਨ੍ਤਿ ਅਬ੍ਭਨ੍ਤਰੇ ਵਿਜ੍ਜਮਾਨਂ ਰਾਗਰਜਾਦਿਂ ਏਵਰੂਪੋ ਸਮਣਧਮ੍ਮੋ ਅਪਨੇਤੁਂ ਨ ਸਕ੍ਕੋਤਿ, ਅਥ ਖੋ ਤਸ੍ਸ ਉਪਰਿ ਅਪਰਮ੍ਪਿ ਰਾਗਰਜਾਦਿਂ ਆਕਿਰਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੁ, ਸੋਪਿ ਭਿਕ੍ਖੁ ਸਂਵਰੇ ਠਤ੍ਵਾ ਪਚ੍ਛਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣੀਤਿ.

ਦੁਬ੍ਬਚਭਿਕ੍ਖੁਵਤ੍ਥੁ ਪਞ੍ਚਮਂ.

੬. ਇਸ੍ਸਾਪਕਤਿਤ੍ਥਿਵਤ੍ਥੁ

ਅਕਤਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਇਸ੍ਸਾਪਕਤਂ ਇਤ੍ਥਿਂ ਆਰਬ੍ਭ ਕਥੇਸਿ.

ਤਸ੍ਸਾ ਕਿਰ ਸਾਮਿਕੋ ਏਕਾਯ ਗੇਹਦਾਸਿਯਾ ਸਦ੍ਧਿਂ ਸਨ੍ਥਵਂ ਅਕਾਸਿ. ਸਾ ਇਸ੍ਸਾਪਕਤਾ ਤਂ ਦਾਸਿਂ ਹਤ੍ਥਪਾਦੇਸੁ ਬਨ੍ਧਿਤ੍ਵਾ ਤਸ੍ਸਾ ਕਣ੍ਣਨਾਸਂ ਛਿਨ੍ਦਿਤ੍ਵਾ ਏਕਸ੍ਮਿਂ ਗੁਲ਼੍ਹਗਬ੍ਭੇ ਪਕ੍ਖਿਪਿਤ੍ਵਾ ਦ੍ਵਾਰਂ ਪਿਦਹਿਤ੍ਵਾ ਤਸ੍ਸ ਕਮ੍ਮਸ੍ਸ ਅਤ੍ਤਨਾ ਕਤਭਾਵਂ ਪਟਿਚ੍ਛਾਦੇਤੁਂ ‘‘ਏਹਿ, ਅਯ੍ਯ, ਵਿਹਾਰਂ ਗਨ੍ਤ੍ਵਾ ਧਮ੍ਮਂ ਸੁਣਿਸ੍ਸਾਮਾ’’ਤਿ ਸਾਮਿਕਂ ਆਦਾਯ ਵਿਹਾਰਂ ਗਨ੍ਤ੍ਵਾ ਧਮ੍ਮਂ ਸੁਣਨ੍ਤੀ ਨਿਸੀਦਿ. ਅਥਸ੍ਸਾ ਆਗਨ੍ਤੁਕਞਾਤਕਾ ਗੇਹਂ ਆਗਨ੍ਤ੍ਵਾ ਦ੍ਵਾਰਂ ਵਿਵਰਿਤ੍ਵਾ ਤਂ ਵਿਪ੍ਪਕਾਰਂ ਦਿਸ੍ਵਾ ਦਾਸਿਂ ਮੋਚਯਿਂਸੁ. ਸਾ ਵਿਹਾਰਂ ਗਨ੍ਤ੍ਵਾ ਚਤੁਪਰਿਸਮਜ੍ਝੇ ਠਿਤਾ ਤਮਤ੍ਥਂ ਦਸਬਲਸ੍ਸ ਆਰੋਚੇਸਿ. ਸਤ੍ਥਾ ਤਸ੍ਸਾ ਵਚਨਂ ਸੁਤ੍ਵਾ ‘‘ਦੁਚ੍ਚਰਿਤਂ ਨਾਮ ‘ਇਦਂ ਮੇ ਅਞ੍ਞੇ ਨ ਜਾਨਨ੍ਤੀ’ਤਿ ਅਪ੍ਪਮਤ੍ਤਕਮ੍ਪਿ ਨ ਕਾਤਬ੍ਬਂ, ਅਞ੍ਞਸ੍ਮਿਂ ਅਜਾਨਨ੍ਤੇਪਿ ਸੁਚਰਿਤਮੇਵ ਕਾਤਬ੍ਬਂ. ਪਟਿਚ੍ਛਾਦੇਤ੍ਵਾ ਕਤਮ੍ਪਿ ਹਿ ਦੁਚ੍ਚਰਿਤਂ ਨਾਮ ਪਚ੍ਛਾਨੁਤਾਪਂ ਕਰੋਤਿ, ਸੁਚਰਿਤਂ ਪਾਮੋਜ੍ਜਮੇਵ ਜਨੇਤੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੩੧੪. ‘‘ਅਕਤਂ ਦੁਕ੍ਕਟਂ ਸੇਯ੍ਯੋ, ਪਚ੍ਛਾ ਤਪ੍ਪਤਿ ਦੁਕ੍ਕਟਂ;

ਕਤਞ੍ਚ ਸੁਕਤਂ ਸੇਯ੍ਯੋ, ਯਂ ਕਤ੍ਵਾ ਨਾਨੁਤਪ੍ਪਤੀ’’ਤਿ.

ਤਤ੍ਥ ਦੁਕ੍ਕਟਨ੍ਤਿ ਸਾਵਜ੍ਜਂ ਅਪਾਯਸਂਵਤ੍ਤਨਿਕਂ ਕਮ੍ਮਂ ਅਕਤਮੇਵ ਸੇਯ੍ਯੋ ਵਰਂ ਉਤ੍ਤਮਂ. ਪਚ੍ਛਾ ਤਪ੍ਪਤੀਤਿ ਤਞ੍ਹਿ ਅਨੁਸ੍ਸਰਿਤਾਨੁਸ੍ਸਰਿਤਕਾਲੇ ਤਪ੍ਪਤਿਯੇਵ. ਸੁਕਤਨ੍ਤਿ ਅਨਵਜ੍ਜਂ ਪਨ ਸੁਖਦਾਯਕਂ ਸੁਗਤਿਸਂਵਤ੍ਤਨਿਕਮੇਵ ਕਮ੍ਮਂ ਕਤਂ ਸੇਯ੍ਯੋ. ਯਂ ਕਤ੍ਵਾਤਿ ਯਂ ਕਮ੍ਮਂ ਕਤ੍ਵਾ ਪਚ੍ਛਾ ਅਨੁਸ੍ਸਰਣਕਾਲੇ ਨ ਤਪ੍ਪਤਿ ਨਾਨੁਤਪ੍ਪਤਿ, ਸੋਮਨਸ੍ਸਜਾਤੋਵ ਹੋਤਿ, ਤਂ ਕਮ੍ਮਂ ਵਰਨ੍ਤਿ ਅਤ੍ਥੋ.

ਦੇਸਨਾਵਸਾਨੇ ਉਪਾਸਕੋ ਚ ਸਾ ਚ ਇਤ੍ਥੀ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ. ਤਞ੍ਚ ਪਨ ਦਾਸਿਂ ਤਤ੍ਥੇਵ ਭੁਜਿਸ੍ਸਂ ਕਤ੍ਵਾ ਧਮ੍ਮਚਾਰਿਨਿਂ ਕਰਿਂਸੂਤਿ.

ਇਸ੍ਸਾਪਕਤਿਤ੍ਥਿਵਤ੍ਥੁ ਛਟ੍ਠਂ.

੭. ਸਮ੍ਬਹੁਲਭਿਕ੍ਖੁਵਤ੍ਥੁ

ਨਗਰਂ ਯਥਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸਮ੍ਬਹੁਲੇ ਆਗਨ੍ਤੁਕੇ ਭਿਕ੍ਖੂ ਆਰਬ੍ਭ ਕਥੇਸਿ.

ਤੇ ਕਿਰ ਏਕਸ੍ਮਿਂ ਪਚ੍ਚਨ੍ਤੇ ਵਸ੍ਸਂ ਉਪਗਨ੍ਤ੍ਵਾ ਪਠਮਮਾਸੇ ਸੁਖਂ ਵਿਹਰਿਂਸੁ. ਮਜ੍ਝਿਮਮਾਸੇ ਚੋਰਾ ਆਗਨ੍ਤ੍ਵਾ ਤੇਸਂ ਗੋਚਰਗਾਮਂ ਪਹਰਿਤ੍ਵਾ ਕਰਮਰੇ ਗਹੇਤ੍ਵਾ ਅਗਮਂਸੁ. ਤਤੋ ਪਟ੍ਠਾਯ ਮਨੁਸ੍ਸਾ ਚੋਰਾਨਂ ਪਟਿਬਾਹਨਤ੍ਥਾਯ ਤਂ ਪਚ੍ਚਨ੍ਤਨਗਰਂ ਅਭਿਸਙ੍ਖਰੋਨ੍ਤਾ ਤੇ ਭਿਕ੍ਖੂ ਸਕ੍ਕਚ੍ਚਂ ਉਪਟ੍ਠਾਤੁਂ ਓਕਾਸਂ ਨ ਲਭਿਂਸੁ. ਤੇ ਅਫਾਸੁਕਂ ਵਸ੍ਸਂ ਵਸਿਤ੍ਵਾ ਵੁਤ੍ਥਵਸ੍ਸਾ ਸਤ੍ਥੁ ਦਸ੍ਸਨਾਯ ਸਾਵਤ੍ਥਿਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਸਤ੍ਥਾ ਤੇਹਿ ਸਦ੍ਧਿਂ ਕਤਪਟਿਸਨ੍ਥਾਰੋ ‘‘ਕਿਂ, ਭਿਕ੍ਖਵੇ, ਸੁਖਂ ਵਸਿਤ੍ਥਾ’’ਤਿ ਪੁਚ੍ਛਿਤ੍ਵਾ, ‘‘ਭਨ੍ਤੇ, ਮਯਂ ਪਠਮਮਾਸਮੇਵ ਸੁਖਂ ਵਸਿਮ੍ਹਾ, ਮਜ੍ਝਿਮਮਾਸੇ ਚੋਰਾ ਗਾਮਂ ਪਹਰਿਂਸੁ, ਤਤੋ ਪਟ੍ਠਾਯ ਮਨੁਸ੍ਸਾ ਨਗਰਂ ਅਭਿਸਙ੍ਖਰੋਨ੍ਤਾ ਸਕ੍ਕਚ੍ਚਂ ਉਪਟ੍ਠਾਤੁਂ ਓਕਾਸਂ ਨ ਲਭਿਂਸੁ. ਤਸ੍ਮਾ ਅਫਾਸੁਕਂ ਵਸ੍ਸਂ ਵਸਿਮ੍ਹਾ’’ਤਿ ਵੁਤ੍ਤੇ ‘‘ਅਲਂ, ਭਿਕ੍ਖਵੇ, ਮਾ ਚਿਨ੍ਤਯਿਤ੍ਥ, ਫਾਸੁਵਿਹਾਰੋ ਨਾਮ ਨਿਚ੍ਚਕਾਲਂ ਦੁਲ੍ਲਭੋ, ਭਿਕ੍ਖੁਨਾ ਨਾਮ ਯਥਾ ਤੇ ਮਨੁਸ੍ਸਾ ਨਗਰਂ ਗੋਪਯਿਂਸੁ, ਏਵਂ ਅਤ੍ਤਭਾਵਮੇਵ ਗੋਪਯਿਤੁਂ ਵਟ੍ਟਤੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੩੧੫. ‘‘ਨਗਰਂ ਯਥਾ ਪਚ੍ਚਨ੍ਤਂ, ਗੁਤ੍ਤਂ ਸਨ੍ਤਰਬਾਹਿਰਂ;

ਏਵਂ ਗੋਪੇਥ ਅਤ੍ਤਾਨਂ, ਖਣੋ ਵੋ ਮਾ ਉਪਚ੍ਚਗਾ;

ਖਣਾਤੀਤਾ ਹਿ ਸੋਚਨ੍ਤਿ, ਨਿਰਯਮ੍ਹਿ ਸਮਪ੍ਪਿਤਾ’’ਤਿ.

ਤਤ੍ਥ ਸਨ੍ਤਰਬਾਹਿਰਨ੍ਤਿ, ਭਿਕ੍ਖਵੇ, ਯਥਾ ਤੇਹਿ ਮਨੁਸ੍ਸੇਹਿ ਤਂ ਪਚ੍ਚਨ੍ਤਨਗਰਂ ਦ੍ਵਾਰਪਾਕਾਰਾਦੀਨਿ ਥਿਰਾਨਿ ਕਰੋਨ੍ਤੇਹਿ ਸਅਨ੍ਤਰਂ, ਅਟ੍ਟਾਲਕਪਰਿਖਾਦੀਨਿ ਥਿਰਾਨਿ ਕਰੋਨ੍ਤੇਹਿ ਸਬਾਹਿਰਨ੍ਤਿ ਸਨ੍ਤਰਬਾਹਿਰਂ ਸੁਗੁਤ੍ਤਂ ਕਤਂ, ਏਵਂ ਤੁਮ੍ਹੇਪਿ ਸਤਿਂ ਉਪਟ੍ਠਪੇਤ੍ਵਾ ਅਜ੍ਝਤ੍ਤਿਕਾਨਿ ਛ ਦ੍ਵਾਰਾਨਿ ਪਿਦਹਿਤ੍ਵਾ ਦ੍ਵਾਰਰਕ੍ਖਿਕਂ ਸਤਿਂ ਅਵਿਸ੍ਸਜ੍ਜੇਤ੍ਵਾ ਯਥਾ ਗਯ੍ਹਮਾਨਾਨਿ ਬਾਹਿਰਾਨਿ ਛ ਆਯਤਨਾਨਿ ਅਜ੍ਝਤ੍ਤਿਕਾਨਂ ਉਪਘਾਤਾਯ ਸਂਵਤ੍ਤਨ੍ਤਿ, ਤਥਾ ਅਗ੍ਗਹਣੇਨ ਤਾਨਿਪਿ ਥਿਰਾਨਿ ਕਤ੍ਵਾ ਤੇਸਂ ਅਪ੍ਪਵੇਸਾਯ ਦ੍ਵਾਰਰਕ੍ਖਿਕਂ ਸਤਿਂ ਅਪ੍ਪਹਾਯ ਵਿਚਰਨ੍ਤਾ ਅਤ੍ਤਾਨਂ ਗੋਪੇਥਾਤਿ ਅਤ੍ਥੋ. ਖਣੋ ਵੋ ਮਾ ਉਪਚ੍ਚਗਾਤਿ ਯੋ ਹਿ ਏਵਂ ਅਤ੍ਤਾਨਂ ਨ ਗੋਪੇਤਿ, ਤਂ ਪੁਗ੍ਗਲਂ ਅਯਂ ਬੁਦ੍ਧੁਪ੍ਪਾਦਖਣੋ ਮਜ੍ਝਿਮਦੇਸੇ ਉਪ੍ਪਤ੍ਤਿਖਣੋ ਸਮ੍ਮਾਦਿਟ੍ਠਿਯਾ ਪਟਿਲਦ੍ਧਖਣੋ ਛਨ੍ਨਂ ਆਯਤਨਾਨਂ ਅਵੇਕਲ੍ਲਖਣੋਤਿ ਸਬ੍ਬੋਪਿ ਅਯਂ ਖਣੋ ਅਤਿਕ੍ਕਮਤਿ, ਸੋ ਖਣੋ ਤੁਮ੍ਹੇ ਮਾ ਅਤਿਕ੍ਕਮਤੁ. ਖਣਾਤੀਤਾਤਿ ਯੇ ਹਿ ਤਂ ਖਣਂ ਅਤੀਤਾ, ਤੇ ਚ ਪੁਗ੍ਗਲੇ ਸੋ ਚ ਖਣੋ ਅਤੀਤੋ, ਤੇ ਨਿਰਯਮ੍ਹਿ ਸਮਪ੍ਪਿਤਾ ਹੁਤ੍ਵਾ ਤਤ੍ਥ ਨਿਬ੍ਬਤ੍ਤਿਤ੍ਵਾ ਸੋਚਨ੍ਤੀਤਿ ਅਤ੍ਥੋ.

ਦੇਸਨਾਵਸਾਨੇ ਤੇ ਭਿਕ੍ਖੂ ਉਪ੍ਪਨ੍ਨਸਂਵੇਗਾ ਅਰਹਤ੍ਤੇ ਪਤਿਟ੍ਠਹਿਂਸੂਤਿ.

ਸਮ੍ਬਹੁਲਭਿਕ੍ਖੁਵਤ੍ਥੁ ਸਤ੍ਤਮਂ.

੮. ਨਿਗਣ੍ਠਵਤ੍ਥੁ

ਅਲਜ੍ਜਿਤਾਯੇਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਨਿਗਣ੍ਠੇ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਦਿਵਸੇ ਭਿਕ੍ਖੂ ਨਿਗਣ੍ਠੇ ਦਿਸ੍ਵਾ ਕਥਂ ਸਮੁਟ੍ਠਾਪੇਸੁਂ, ‘‘ਆਵੁਸੋ, ਸਬ੍ਬਸੋ ਅਪ੍ਪਟਿਚ੍ਛਨ੍ਨੇਹਿ ਅਚੇਲਕੇਹਿ ਇਮੇ ਨਿਗਣ੍ਠਾ ਵਰਤਰਾ, ਯੇ ਏਕਂ ਪੁਰਿਮਪਸ੍ਸਮ੍ਪਿ ਤਾਵ ਪਟਿਚ੍ਛਾਦੇਨ੍ਤਿ, ਸਹਿਰਿਕਾ ਮਞ੍ਞੇ ਏਤੇ’’ਤਿ. ਤਂ ਸੁਤ੍ਵਾ ਨਿਗਣ੍ਠਾ ‘‘ਨ ਮਯਂ ਏਤੇਨ ਕਾਰਣੇਨ ਪਟਿਚ੍ਛਾਦੇਮ, ਪਂਸੁਰਜਾਦਯੋ ਪਨ ਪੁਗ੍ਗਲਾ ਏਵ, ਜੀਵਿਤਿਨ੍ਦ੍ਰਿਯਪਟਿਬਦ੍ਧਾ ਏਵ, ਤੇ ਨੋ ਭਿਕ੍ਖਾਭਾਜਨੇਸੁ ਮਾ ਪਤਿਂਸੂਤਿ ਇਮਿਨਾ ਕਾਰਣੇਨ ਪਟਿਚ੍ਛਾਦੇਮਾ’’ਤਿ ਵਤ੍ਵਾ ਤੇਹਿ ਸਦ੍ਧਿਂ ਵਾਦਪਟਿਵਾਦਵਸੇਨ ਬਹੁਂ ਕਥਂ ਕਥੇਸੁਂ. ਭਿਕ੍ਖੂ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਨਿਸਿਨ੍ਨਕਾਲੇ ਤਂ ਪਵਤ੍ਤਿਂ ਆਰੋਚੇਸੁਂ. ਸਤ੍ਥਾ, ‘‘ਭਿਕ੍ਖਵੇ, ਅਲਜ੍ਜਿਤਬ੍ਬੇਨ ਲਜ੍ਜਿਤ੍ਵਾ ਲਜ੍ਜਿਤਬ੍ਬੇਨ ਅਲਜ੍ਜਮਾਨਾ ਨਾਮ ਦੁਗ੍ਗਤਿਪਰਾਯਣਾਵ ਹੋਨ੍ਤੀ’’ਤਿ ਵਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

੩੧੬. ‘‘ਅਲਜ੍ਜਿਤਾਯੇ ਲਜ੍ਜਨ੍ਤਿ, ਲਜ੍ਜਿਤਾਯੇ ਨ ਲਜ੍ਜਰੇ;

ਮਿਚ੍ਛਾਦਿਟ੍ਠਿਸਮਾਦਾਨਾ, ਸਤ੍ਤਾ ਗਚ੍ਛਨ੍ਤਿ ਦੁਗ੍ਗਤਿਂ.

੩੧੭. ‘‘ਅਭਯੇ ਭਯਦਸ੍ਸਿਨੋ, ਭਯੇ ਚਾਭਯਦਸ੍ਸਿਨੋ;

ਮਿਚ੍ਛਾਦਿਟ੍ਠਿਸਮਾਦਾਨਾ, ਸਤ੍ਤਾ ਗਚ੍ਛਨ੍ਤਿ ਦੁਗ੍ਗਤਿ’’ਨ੍ਤਿ.

ਤਤ੍ਥ ਅਲਜ੍ਜਿਤਾਯੇਤਿ ਅਲਜ੍ਜਿਤਬ੍ਬੇਨ. ਭਿਕ੍ਖਾਭਾਜਨਞ੍ਹਿ ਅਲਜ੍ਜਿਤਬ੍ਬਂ ਨਾਮ, ਤੇ ਪਨ ਤਂ ਪਟਿਚ੍ਛਾਦੇਤ੍ਵਾ ਵਿਚਰਨ੍ਤਾ ਤੇਨ ਲਜ੍ਜਨ੍ਤਿ ਨਾਮ. ਲਜ੍ਜਿਤਾਯੇਤਿ ਅਪਟਿਚ੍ਛਨ੍ਨੇਨ ਹਿਰਿਕੋਪੀਨਙ੍ਗੇਨ ਲਜ੍ਜਿਤਬ੍ਬੇਨ. ਤੇ ਪਨ ਤਂ ਅਪਟਿਚ੍ਛਾਦੇਤ੍ਵਾ ਵਿਚਰਨ੍ਤਾ ਲਜ੍ਜਿਤਾਯੇ ਨ ਲਜ੍ਜਨ੍ਤਿ ਨਾਮ. ਤੇਨ ਤੇਸਂ ਅਲਜ੍ਜਿਤਬ੍ਬੇਨ ਲਜ੍ਜਿਤਂ ਲਜ੍ਜਿਤਬ੍ਬੇਨ ਅਲਜ੍ਜਿਤਂ ਤੁਚ੍ਛਗਹਣਭਾਵੇਨ ਚ ਅਞ੍ਞਥਾਗਹਣਭਾਵੇਨ ਚ ਮਿਚ੍ਛਾਦਿਟ੍ਠਿ ਹੋਤਿ. ਤਂ ਸਮਾਦਿਯਿਤ੍ਵਾ ਵਿਚਰਨ੍ਤਾ ਪਨ ਤੇ ਮਿਚ੍ਛਾਦਿਟ੍ਠਿਸਮਾਦਾਨਾ ਸਤ੍ਤਾ ਨਿਰਯਾਦਿਭੇਦਂ ਦੁਗ੍ਗਤਿਂ ਗਚ੍ਛਨ੍ਤੀਤਿ ਅਤ੍ਥੋ. ਅਭਯੇਤਿ ਭਿਕ੍ਖਾਭਾਜਨਂ ਨਿਸ੍ਸਾਯ ਰਾਗਦੋਸਮੋਹਮਾਨਦਿਟ੍ਠਿਕਿਲੇਸਦੁਚ੍ਚਰਿਤਭਯਾਨਂ ਅਨੁਪ੍ਪਜ੍ਜਨਤੋ ਭਿਕ੍ਖਾਭਾਜਨਂ ਅਭਯਂ ਨਾਮ, ਭਯੇਨ ਤਂ ਪਟਿਚ੍ਛਾਦੇਨ੍ਤਾ ਪਨ ਅਭਯੇ ਭਯਦਸ੍ਸਿਨੋ ਨਾਮ. ਹਿਰਿਕੋਪੀਨਙ੍ਗਂ ਪਨ ਨਿਸ੍ਸਾਯ ਰਾਗਾਦੀਨਂ ਉਪ੍ਪਜ੍ਜਨਤੋ ਤਂ ਭਯਂ ਨਾਮ, ਤਸ੍ਸ ਅਪਟਿਚ੍ਛਾਦਨੇਨ ਭਯੇ ਚਾਭਯਦਸ੍ਸਿਨੋ. ਤਸ੍ਸ ਤਂ ਅਯਥਾਗਹਣਸ੍ਸ ਸਮਾਦਿਨ੍ਨਤ੍ਤਾ ਮਿਚ੍ਛਾਦਿਟ੍ਠਿਸਮਾਦਾਨਾ ਸਤ੍ਤਾ ਦੁਗ੍ਗਹਿਂ ਗਚ੍ਛਨ੍ਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਨਿਗਣ੍ਠਾ ਸਂਵਿਗ੍ਗਮਾਨਸਾ ਪਬ੍ਬਜਿਂਸੁ, ਸਮ੍ਪਤ੍ਤਾਨਮ੍ਪਿ ਸਾਤ੍ਥਿਕਾ ਧਮ੍ਮਦੇਸਨਾ ਅਹੋਸੀਤਿ.

ਨਿਗਣ੍ਠਵਤ੍ਥੁ ਅਟ੍ਠਮਂ.

੯. ਤਿਤ੍ਥਿਯਸਾਵਕਵਤ੍ਥੁ

ਅਵਜ੍ਜੇਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਤਿਤ੍ਥਿਯਸਾਵਕੇ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਸਮਯੇ ਅਞ੍ਞਤਿਤ੍ਥਿਯਸਾਵਕਾ ਅਤ੍ਤਨੋ ਪੁਤ੍ਤੇ ਸਮ੍ਮਾਦਿਟ੍ਠਿਕਾਨਂ ਉਪਾਸਕਾਨਂ ਪੁਤ੍ਤੇਹਿ ਸਦ੍ਧਿਂ ਸਪਰਿਵਾਰੇ ਕੀਲ਼ਮਾਨੇ ਦਿਸ੍ਵਾ ਗੇਹਂ ਆਗਤਕਾਲੇ ‘‘ਨ ਵੋ ਸਮਣਾ ਸਕ੍ਯਪੁਤ੍ਤਿਯਾ ਵਨ੍ਦਿਤਬ੍ਬਾ, ਨਾਪਿ ਤੇਸਂ ਵਿਹਾਰਂ ਪਵਿਸਿਤਬ੍ਬ’’ਨ੍ਤਿ ਸਪਥਂ ਕਾਰਯਿਂਸੁ. ਤੇ ਏਕਦਿਵਸਂ ਜੇਤਵਨਵਿਹਾਰਸ੍ਸ ਬਹਿਦ੍ਵਾਰਕੋਟ੍ਠਕਸਾਮਨ੍ਤੇ ਕੀਲ਼ਨ੍ਤਾ ਪਿਪਾਸਿਤਾ ਅਹੇਸੁਂ. ਅਥੇਕਂ ਉਪਾਸਕਦਾਰਕਂ ‘‘ਤ੍ਵਂ ਏਤ੍ਥ ਗਨ੍ਤ੍ਵਾ ਪਾਨੀਯਂ ਪਿਵਿਤ੍ਵਾ ਅਮ੍ਹਾਕਮ੍ਪਿ ਆਹਰਾਹੀ’’ਤਿ ਪਹਿਣਿਂਸੁ. ਸੋ ਵਿਹਾਰਂ ਪਵਿਸਿਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਪਾਨੀਯਂ ਪਿਵਿਤ੍ਵਾ ਤਮਤ੍ਥਂ ਆਰੋਚੇਸਿ. ਅਥ ਨਂ ਸਤ੍ਥਾ ‘‘ਤ੍ਵਮੇਵ ਪਾਨੀਯਂ ਪਿਵਿਤ੍ਵਾ ਗਨ੍ਤ੍ਵਾ ਇਤਰੇਪਿ ਪਾਨੀਯਪਿਵਨਤ੍ਥਾਯ ਇਧੇਵ ਪੇਸੇਹੀ’’ਤਿ ਆਹ. ਸੋ ਤਥਾ ਅਕਾਸਿ. ਤੇ ਆਗਨ੍ਤ੍ਵਾ ਪਾਨੀਯਂ ਪਿਵਿਂਸੁ. ਸਤ੍ਥਾ ਤੇ ਪਕ੍ਕੋਸਾਪੇਤ੍ਵਾ ਤੇਸਂ ਸਪ੍ਪਾਯਂ ਧਮ੍ਮਕਥਂ ਕਥੇਤ੍ਵਾ ਤੇ ਅਚਲਸਦ੍ਧੇ ਕਤ੍ਵਾ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਪੇਸਿ. ਤੇ ਸਕਾਨਿ ਗੇਹਾਨਿ ਗਨ੍ਤ੍ਵਾ ਤਮਤ੍ਥਂ ਮਾਤਾਪਿਤੂਨਂ ਆਰੋਚੇਸੁਂ. ਅਥ ਨੇਸਂ ਮਾਤਾਪਿਤਰੋ ‘‘ਪੁਤ੍ਤਕਾ ਨੋ ਵਿਪਨ੍ਨਦਿਟ੍ਠਿਕਾ ਜਾਤਾ’’ਤਿ ਦੋਮਨਸ੍ਸਪ੍ਪਤ੍ਤਾ ਪਰਿਦੇਵਿਂਸੁ. ਅਥ ਤੇਸਂ ਛੇਕਾ ਸਮ੍ਬਹੁਲਾ ਪਟਿਵਿਸ੍ਸਕਾ ਮਨੁਸ੍ਸਾ ਆਗਨ੍ਤ੍ਵਾ ਦੋਮਨਸ੍ਸਵੂਪਸਮਨਤ੍ਥਾਯ ਧਮ੍ਮਂ ਕਥਯਿਂਸੁ. ਤੇ ਤੇਸਂ ਕਥਂ ਸੁਤ੍ਵਾ ‘‘ਇਮੇ ਦਾਰਕੇ ਸਮਣਸ੍ਸ ਗੋਤਮਸ੍ਸੇਵ ਨਿਯ੍ਯਾਦੇਸ੍ਸਾਮਾ’’ਤਿ ਮਹਨ੍ਤੇਨ ਞਾਤਿਗਣੇਨ ਸਦ੍ਧਿਂ ਵਿਹਾਰਂ ਨਯਿਂਸੁ. ਸਤ੍ਥਾ ਤੇਸਂ ਅਜ੍ਝਾਸਯਂ ਓਲੋਕੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

੩੧੮. ‘‘ਅਵਜ੍ਜੇ ਵਜ੍ਜਮਤਿਨੋ, ਵਜ੍ਜੇ ਚਾਵਜ੍ਜਦਸ੍ਸਿਨੋ;

ਮਿਚ੍ਛਾਦਿਟ੍ਠਿਸਮਾਦਾਨਾ, ਸਤ੍ਤਾ ਗਚ੍ਛਨ੍ਤਿ ਦੁਗ੍ਗਤਿਂ.

੩੧੯. ‘‘ਵਜ੍ਜਞ੍ਚ ਵਜ੍ਜਤੋ ਞਤ੍ਵਾ, ਅਵਜ੍ਜਞ੍ਚ ਅਵਜ੍ਜਤੋ;

ਸਮ੍ਮਾਦਿਟ੍ਠਿਸਮਾਦਾਨਾ, ਸਤ੍ਤਾ ਗਚ੍ਛਨ੍ਤਿ ਸੁਗ੍ਗਤਿ’’ਨ੍ਤਿ.

ਤਤ੍ਥ ਅਵਜ੍ਜੇਤਿ ਦਸਵਤ੍ਥੁਕਾਯ ਸਮ੍ਮਾਦਿਟ੍ਠਿਯਾ, ਤਸ੍ਸਾ ਉਪਨਿਸ੍ਸਯਭੂਤੇ ਧਮ੍ਮੇ ਚ. ਵਜ੍ਜਮਤਿਨੋਤਿ ਵਜ੍ਜਂ ਇਦਨ੍ਤਿ ਉਪ੍ਪਨ੍ਨਮਤਿਨੋ. ਦਸਵਤ੍ਥੁਕਾਯ ਮਿਚ੍ਛਾਦਿਟ੍ਠਿਯਾ ਪਨ ਤਸ੍ਸਾ ਉਪਨਿਸ੍ਸਯਭੂਤੇ ਧਮ੍ਮੇ ਚ ਅਵਜ੍ਜਦਸ੍ਸਿਨੋ, ਏਤਿਸ੍ਸਾ ਅਵਜ੍ਜਂ ਵਜ੍ਜਤੋ ਵਜ੍ਜਞ੍ਚ ਅਵਜ੍ਜਤੋ ਞਤ੍ਵਾ ਗਹਣਸਙ੍ਖਾਤਾਯ ਮਿਚ੍ਛਾਦਿਟ੍ਠਿਯਾ ਸਮਾਦਿਨ੍ਨਤ੍ਤਾ ਮਿਚ੍ਛਾਦਿਟ੍ਠਿਸਮਾਦਾਨਾ ਸਤ੍ਤਾ ਦੁਗ੍ਗਤਿਂ ਗਚ੍ਛਨ੍ਤੀਤਿ ਅਤ੍ਥੋ. ਦੁਤਿਯਗਾਥਾਯ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ.

ਦੇਸਨਾਵਸਾਨੇ ਸਬ੍ਬੇਪਿ ਤੇ ਤੀਸੁ ਸਰਣੇਸੁ ਪਤਿਟ੍ਠਾਯ ਅਪਰਾਪਰਂ ਧਮ੍ਮਂ ਸੁਣਨ੍ਤਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੂਤਿ.

ਤਿਤ੍ਥਿਯਸਾਵਕਵਤ੍ਥੁ ਨਵਮਂ.

ਨਿਰਯਵਗ੍ਗਵਣ੍ਣਨਾ ਨਿਟ੍ਠਿਤਾ.

ਦ੍ਵਾਵੀਸਤਿਮੋ ਵਗ੍ਗੋ.