੨੧. ਪਕਿਣ੍ਣਕਵਗ੍ਗੋ

੧. ਅਤ੍ਤਨੋਪੁਬ੍ਬਕਮ੍ਮਵਤ੍ਥੁ

ਮਤ੍ਤਾਸੁਖਪਰਿਚ੍ਚਾਗਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਅਤ੍ਤਨੋ ਪੁਬ੍ਬਕਮ੍ਮਂ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਸਮਯੇ ਵੇਸਾਲੀ ਇਦ੍ਧਾ ਅਹੋਸਿ ਫੀਤਾ ਬਹੁਜਨਾ ਆਕਿਣ੍ਣਮਨੁਸ੍ਸਾ. ਤਤ੍ਥ ਹਿ ਵਾਰੇਨ ਵਾਰੇਨ ਰਜ੍ਜਂ ਕਾਰੇਨ੍ਤਾਨਂ ਖਤ੍ਤਿਯਾਨਂਯੇਵ ਸਤ੍ਤਸਤਾਧਿਕਾਨਿ ਸਤ੍ਤਸਹਸ੍ਸਾਨਿ ਸਤ੍ਤ ਚ ਖਤ੍ਤਿਯਾ ਅਹੇਸੁਂ. ਤੇਸਂ ਵਸਨਤ੍ਥਾਯ ਤਤ੍ਤਕਾਯੇਵ ਪਾਸਾਦਾ ਤਤ੍ਤਕਾਨੇਵ ਕੂਟਾਗਾਰਾਨਿ ਉਯ੍ਯਾਨੇ ਵਿਹਾਰਤ੍ਥਾਯ ਤਤ੍ਤਕਾਯੇਵ ਆਰਾਮਾ ਚ ਪੋਕ੍ਖਰਣਿਯੋ ਚ ਅਹੇਸੁਂ. ਸਾ ਅਪਰੇਨ ਸਮਯੇਨ ਦੁਬ੍ਭਿਕ੍ਖਾ ਅਹੋਸਿ ਦੁਸ੍ਸਸ੍ਸਾ. ਤਤ੍ਥ ਛਾਤਕਭਯੇਨ ਪਠਮਂ ਦੁਗ੍ਗਤਮਨੁਸ੍ਸਾ ਕਾਲਮਕਂਸੁ. ਤੇਸਂ ਤੇਸਂ ਤਤ੍ਥ ਤਤ੍ਥ ਛਡ੍ਡਿਤਾਨਂ ਕੁਣਪਾਨਂ ਗਨ੍ਧੇਨ ਅਮਨੁਸ੍ਸਾ ਨਗਰਂ ਪਵਿਸਿਂਸੁ. ਅਮਨੁਸ੍ਸੂਪਦ੍ਦਵੇਨ ਬਹੁਤਰਾ ਕਾਲਮਕਂਸੁ. ਤੇਸਂ ਕੁਣਪਗਨ੍ਧਪਟਿਕ੍ਕੂਲਤਾਯ ਸਤ੍ਤਾਨਂ ਅਹਿਵਾਤਰੋਗੋ ਉਪ੍ਪਜ੍ਜਿ. ਏਵਂ ਦੁਬ੍ਭਿਕ੍ਖਭਯਂ ਅਮਨੁਸ੍ਸਭਯਂ ਰੋਗਭਯਨ੍ਤਿ ਤੀਣਿ ਭਯਾਨਿ ਉਪ੍ਪਜ੍ਜਿਂਸੁ.

ਨਗਰਵਾਸਿਨੋ ਸਨ੍ਨਿਪਤਿਤ੍ਵਾ ਰਾਜਾਨਂ ਆਹਂਸੁ – ‘‘ਮਹਾਰਾਜ, ਇਮਸ੍ਮਿਂ ਨਗਰੇ ਤੀਣਿ ਭਯਾਨਿ ਉਪ੍ਪਨ੍ਨਾਨਿ, ਇਤੋ ਪੁਬ੍ਬੇ ਯਾਵ ਸਤ੍ਤਮਾ ਰਾਜਪਰਿਵਟ੍ਟਾ ਏਵਰੂਪਂ ਭਯਂ ਨਾਮ ਨ ਉਪ੍ਪਨ੍ਨਪੁਬ੍ਬਂ. ਅਧਮ੍ਮਿਕਰਾਜੂਨਞ੍ਹਿ ਕਾਲੇ ਏਵਰੂਪਂ ਭਯਂ ਉਪ੍ਪਜ੍ਜਤੀ’’ਤਿ. ਰਾਜਾ ਸਨ੍ਥਾਗਾਰੇ ਸਬ੍ਬੇਸਂ ਸਨ੍ਨਿਪਾਤਂ ਕਾਰੇਤ੍ਵਾ ‘‘ਸਚੇ ਮੇ ਅਧਮ੍ਮਿਕਭਾਵੋ ਅਤ੍ਥਿ, ਤਂ ਵਿਚਿਨਥਾ’’ਤਿ ਆਹ. ਵੇਸਾਲਿਵਾਸਿਨੋ ਸਬ੍ਬਂ ਪਵੇਣਿ ਵਿਚਿਨਨ੍ਤਾ ਰਞ੍ਞੋ ਕਞ੍ਚਿ ਦੋਸਂ ਅਦਿਸ੍ਵਾ, ‘‘ਮਹਾਰਾਜ, ਨਤ੍ਥਿ ਤੇ ਦੋਸੋ’’ਤਿ ਵਤ੍ਵਾ ‘‘ਕਥਂ ਨੁ ਖੋ ਇਦਂ ਅਮ੍ਹਾਕਂ ਭਯਂ ਵੂਪਸਮਂ ਗਚ੍ਛੇਯ੍ਯਾ’’ਤਿ ਮਨ੍ਤਯਿਂਸੁ. ਤਤ੍ਥ ਏਕਚ੍ਚੇਹਿ ‘‘ਬਲਿਕਮ੍ਮੇਨ ਆਯਾਚਨਾਯ ਮਙ੍ਗਲਕਿਰਿਯਾਯਾ’’ਤਿ ਵੁਤ੍ਤੇ ਸਬ੍ਬਮ੍ਪਿ ਤਂ ਵਿਧਿਂ ਕਤ੍ਵਾ ਪਟਿਬਾਹਿਤੁਂ ਨਾਸਕ੍ਖਿਂਸੁ. ਅਥਞ੍ਞੇ ਏਵਮਾਹਂਸੁ – ‘‘ਛ ਸਤ੍ਥਾਰੋ ਮਹਾਨੁਭਾਵਾ, ਤੇਸੁ ਇਧਾਗਤਮਤ੍ਤੇਸੁ ਭਯਂ ਵੂਪਸਮੇਯ੍ਯਾ’’ਤਿ. ਅਪਰੇ ‘‘ਸਮ੍ਮਾਸਮ੍ਬੁਦ੍ਧੋ ਲੋਕੇ ਉਪ੍ਪਨ੍ਨੋ. ਸੋ ਹਿ ਭਗਵਾ ਸਬ੍ਬਸਤ੍ਤਹਿਤਾਯ ਧਮ੍ਮਂ ਦੇਸੇਤਿ, ਮਹਿਦ੍ਧਿਕੋ ਮਹਾਨੁਭਾਵੋ. ਤਸ੍ਮਿਂ ਇਧ ਆਗਤੇ ਇਮਾਨਿ ਭਯਾਨਿ ਵੂਪਸਮੇਯ੍ਯੁ’’ਨ੍ਤਿ ਆਹਂਸੁ. ਤੇਸਂ ਵਚਨਂ ਸਬ੍ਬੇਪਿ ਅਭਿਨਨ੍ਦਿਤ੍ਵਾ ‘‘ਕਹਂ ਨੁ ਖੋ ਸੋ ਭਗਵਾ ਏਤਰਹਿ ਵਿਹਰਤੀ’’ਤਿ ਆਹਂਸੁ. ਤਦਾ ਪਨ ਸਤ੍ਥਾ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਰਞ੍ਞੋ ਬਿਮ੍ਬਿਸਾਰਸ੍ਸ ਪਟਿਞ੍ਞਂ ਦਤ੍ਵਾ ਵੇਲ਼ੁਵਨੇ ਵਿਹਰਤਿ. ਤੇਨ ਚ ਸਮਯੇਨ ਬਿਮ੍ਬਿਸਾਰਸਮਾਗਮੇ ਬਿਮ੍ਬਿਸਾਰੇਨ ਸਦ੍ਧਿਂ ਸੋਤਾਪਤ੍ਤਿਫਲਂ ਪਤ੍ਤੋ ਮਹਾਲਿ ਨਾਮ ਲਿਚ੍ਛਵੀ ਤਸ੍ਸਂ ਪਰਿਸਾਯਂ ਨਿਸਿਨ੍ਨੋ ਹੋਤਿ.

ਵੇਸਾਲਿਵਾਸਿਨੋ ਮਹਨ੍ਤਂ ਪਣ੍ਣਾਕਾਰਂ ਸਜ੍ਜੇਤ੍ਵਾ ਰਾਜਾਨਂ ਬਿਮ੍ਬਿਸਾਰਂ ਸਞ੍ਞਾਪੇਤ੍ਵਾ ‘‘ਸਤ੍ਥਾਰਂ ਇਧਾਨੇਥਾ’’ਤਿ ਮਹਾਲਿਞ੍ਚੇਵ ਲਿਚ੍ਛਵਿਂ ਪੁਰੋਹਿਤਪੁਤ੍ਤਞ੍ਚ ਪਹਿਣਿਂਸੁ. ਤੇ ਗਨ੍ਤ੍ਵਾ ਰਞ੍ਞੋ ਪਣ੍ਣਾਕਾਰਂ ਦਤ੍ਵਾ ਤਂ ਪਵਤ੍ਤਿਂ ਨਿਵੇਦੇਤ੍ਵਾ, ‘‘ਮਹਾਰਾਜ, ਸਤ੍ਥਾਰਂ ਅਮ੍ਹਾਕਂ ਨਗਰਂ ਪੇਸੇਥਾ’’ਤਿ ਯਾਚਿਂਸੁ. ਰਾਜਾ ‘‘ਤੁਮ੍ਹੇਵ ਜਾਨਾਥਾ’’ਤਿ ਨ ਸਮ੍ਪਟਿਚ੍ਛਿ. ਤੇ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਯਾਚਿਂਸੁ – ‘‘ਭਨ੍ਤੇ, ਵੇਸਾਲਿਯਂ ਤੀਣਿ ਭਯਾਨਿ ਉਪ੍ਪਨ੍ਨਾਨਿ, ਤਾਨਿ ਤੁਮ੍ਹੇਸੁ ਆਗਤੇਸੁ ਵੂਪਸਮਿਸ੍ਸਨ੍ਤਿ, ਏਥ, ਭਨ੍ਤੇ, ਗਚ੍ਛਾਮਾ’’ਤਿ. ਸਤ੍ਥਾ ਤੇਸਂ ਵਚਨਂ ਸੁਤ੍ਵਾ ਆਵਜ੍ਜੇਨ੍ਤੋ ‘‘ਵੇਸਾਲਿਯਂ ਰਤਨਸੁਤ੍ਤੇ (ਖੁ. ਪਾ. ੬.੧ ਆਦਯੋ; ਸੁ. ਨਿ. ੨੨੪ ਆਦਯੋ) ਵੁਤ੍ਤੇ ਸਾ ਰਕ੍ਖਾ ਚਕ੍ਕਵਾਲ਼ਾਨਂ ਕੋਟਿਸਤਸਹਸ੍ਸਂ ਫਰਿਸ੍ਸਤਿ, ਸੁਤ੍ਤਪਰਿਯੋਸਾਨੇ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਭਵਿਸ੍ਸਤਿ, ਤਾਨਿ ਚ ਭਯਾਨਿ ਵੂਪਸਮਿਸ੍ਸਨ੍ਤੀ’’ਤਿ ਞਤ੍ਵਾ ਤੇਸਂ ਵਚਨਂ ਸਮ੍ਪਟਿਚ੍ਛਿ.

ਰਾਜਾ ਬਿਮ੍ਬਿਸਾਰੋ ‘‘ਸਤ੍ਥਾਰਾ ਕਿਰ ਵੇਸਾਲਿਗਮਨਂ ਸਮ੍ਪਟਿਚ੍ਛਿਤ’’ਨ੍ਤਿ ਸੁਤ੍ਵਾ ਨਗਰੇ ਘੋਸਨਂ ਕਾਰੇਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ‘‘ਕਿਂ, ਭਨ੍ਤੇ, ਵੇਸਾਲਿਗਮਨਂ ਸਮ੍ਪਟਿਚ੍ਛਿਤ’’ਨ੍ਤਿ ਪੁਚ੍ਛਿਤ੍ਵਾ ‘‘ਆਮ, ਮਹਾਰਾਜਾ’’ਤਿ ਵੁਤ੍ਤੇ ‘‘ਤੇਨ ਹਿ, ਭਨ੍ਤੇ, ਆਗਮੇਥ, ਤਾਵ ਮਗ੍ਗਂ ਪਟਿਯਾਦੇਸ੍ਸਾਮੀ’’ਤਿ ਵਤ੍ਵਾ ਰਾਜਗਹਸ੍ਸ ਚ ਗਙ੍ਗਾਯ ਚ ਅਨ੍ਤਰੇ ਪਞ੍ਚਯੋਜਨਭੂਮਿਂ ਸਮਂ ਕਾਰੇਤ੍ਵਾ ਯੋਜਨੇ ਯੋਜਨੇ ਵਿਹਾਰਂ ਪਤਿਟ੍ਠਾਪੇਤ੍ਵਾ ਸਤ੍ਥੁ ਗਮਨਕਾਲਂ ਆਰੋਚੇਸਿ. ਸਤ੍ਥਾ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਮਗ੍ਗਂ ਪਟਿਪਜ੍ਜਿ. ਰਾਜਾ ਯੋਜਨਨ੍ਤਰੇ ਜਣ੍ਣੁਮਤ੍ਤੇਨ ਓਧਿਨਾ ਪਞ੍ਚਵਣ੍ਣਾਨਿ ਪੁਪ੍ਫਾਨਿ ਓਕਿਰਾਪੇਤ੍ਵਾ ਧਜਪਟਾਕਕਦਲੀਆਦੀਨਿ ਉਸ੍ਸਾਪੇਤ੍ਵਾ ਭਗਵਤੋ ਛਤ੍ਤਾਤਿਛਤ੍ਤਂ ਕਤ੍ਵਾ ਦ੍ਵੇ ਸੇਤਚ੍ਛਤ੍ਤਾਨਿ ਏਕਮੇਕਸ੍ਸ ਭਿਕ੍ਖੁਨੋ ਏਕਮੇਕਂ ਸੇਤਚ੍ਛਤ੍ਤਂ ਉਪਰਿ ਧਾਰੇਤ੍ਵਾ ਸਪਰਿਵਾਰੋ ਪੁਪ੍ਫਗਨ੍ਧਾਦੀਹਿ ਪੂਜਂ ਕਰੋਨ੍ਤੋ ਸਤ੍ਥਾਰਂ ਏਕੇਕਸ੍ਮਿਂ ਵਿਹਾਰੇ ਵਸਾਪੇਤ੍ਵਾ ਮਹਾਦਾਨਾਦੀਨਿ ਦਤ੍ਵਾ ਪਞ੍ਚਹਿ ਦਿਵਸੇਹਿ ਗਙ੍ਗਾਤੀਰਂ ਪਾਪੇਤ੍ਵਾ ਤਤ੍ਥ ਨਾਵਂ ਅਲਙ੍ਕਰੋਨ੍ਤੋ ਵੇਸਾਲਿਕਾਨਂ ਸਾਸਨਂ ਪੇਸੇਸਿ – ‘‘ਮਗ੍ਗਂ ਪਟਿਯਾਦੇਤ੍ਵਾ ਸਤ੍ਥੁ ਪਚ੍ਚੁਗ੍ਗਮਨਂ ਕਰੋਨ੍ਤੂ’’ਤਿ. ਤੇ ‘‘ਦਿਗੁਣਂ ਪੂਜਂ ਕਰਿਸ੍ਸਾਮਾ’’ਤਿ ਵੇਸਾਲਿਯਾ ਚ ਗਙ੍ਗਾਯ ਚ ਅਨ੍ਤਰੇ ਤਿਯੋਜਨਭੂਮਿਂ ਸਮਂ ਕਾਰੇਤ੍ਵਾ ਭਗਵਤੋ ਚਤੂਹਿ ਸੇਤਚ੍ਛਤ੍ਤੇਹਿ ਏਕਮੇਕਸ੍ਸ ਭਿਕ੍ਖੁਨੋ ਦ੍ਵੀਹਿ ਦ੍ਵੀਹਿ ਸੇਤਚ੍ਛਤ੍ਤੇਹਿ ਛਤ੍ਤਾਤਿਛਤ੍ਤਾਨਿ ਸਜ੍ਜੇਤ੍ਵਾ ਪੂਜਂ ਕੁਰੁਮਾਨਾ ਆਗਨ੍ਤ੍ਵਾ ਗਙ੍ਗਾਤੀਰੇ ਅਟ੍ਠਂਸੁ. ਬਿਮ੍ਬਿਸਾਰੋ ਦ੍ਵੇ ਨਾਵਾ ਸਙ੍ਘਾਟੇਤ੍ਵਾ ਮਣ੍ਡਪਂ ਕਾਰੇਤ੍ਵਾ ਪੁਪ੍ਫਦਾਮਾਦੀਹਿ ਅਲਙ੍ਕਾਰਾਪੇਤ੍ਵਾ ਸਬ੍ਬਰਤਨਮਯਂ ਬੁਦ੍ਧਾਸਨਂ ਪਞ੍ਞਾਪੇਸਿ. ਭਗਵਾ ਤਸ੍ਮਿਂ ਨਿਸੀਦਿ. ਭਿਕ੍ਖੂਪਿ ਨਾਵਂ ਅਭਿਰੁਹਿਤ੍ਵਾ ਭਗਵਨ੍ਤਂ ਪਰਿਵਾਰੇਤ੍ਵਾ ਨਿਸੀਦਿਂਸੁ. ਰਾਜਾ ਅਨੁਗਚ੍ਛਨ੍ਤੋ ਗਲਪ੍ਪਮਾਣਂ ਉਦਕਂ ਓਤਰਿਤ੍ਵਾ ‘‘ਯਾਵ, ਭਨ੍ਤੇ, ਭਗਵਾ ਆਗਚ੍ਛਤਿ, ਤਾਵਾਹਂ ਇਧੇਵ ਗਙ੍ਗਾਤੀਰੇ ਵਸਿਸ੍ਸਾਮੀ’’ਤਿ ਵਤ੍ਵਾ ਨਾਵਂ ਉਯ੍ਯੋਜੇਤ੍ਵਾ ਨਿਵਤ੍ਤਿ. ਸਤ੍ਥਾ ਯੋਜਨਮਤ੍ਤਂ ਅਦ੍ਧਾਨਂ ਗਙ੍ਗਾਯ ਗਨ੍ਤ੍ਵਾ ਵੇਸਾਲਿਕਾਨਂ ਸੀਮਂ ਪਾਪੁਣਿ.

ਲਿਚ੍ਛਵੀਰਾਜਾਨੋ ਸਤ੍ਥਾਰਂ ਪਚ੍ਚੁਗ੍ਗਨ੍ਤ੍ਵਾ ਗਲਪ੍ਪਮਾਣਂ ਉਦਕਂ ਓਤਰਿਤ੍ਵਾ ਨਾਵਂ ਤੀਰਂ ਉਪਨੇਤ੍ਵਾ ਸਤ੍ਥਾਰਂ ਨਾਵਾਤੋ ਓਤਾਰਯਿਂਸੁ. ਸਤ੍ਥਾਰਾ ਓਤਰਿਤ੍ਵਾ ਤੀਰੇ ਅਕ੍ਕਨ੍ਤਮਤ੍ਤੇਯੇਵ ਮਹਾਮੇਘੋ ਉਟ੍ਠਹਿਤ੍ਵਾ ਪੋਕ੍ਖਰਵਸ੍ਸਂ ਵਸ੍ਸਿ. ਸਬ੍ਬਤ੍ਥ ਜਣ੍ਣੁਪ੍ਪਮਾਣਊਰੁਪ੍ਪਮਾਣਕਟਿਪ੍ਪਮਾਣਾਦੀਨਿ ਉਦਕਾਨਿ ਸਨ੍ਦਨ੍ਤਾਨਿ ਸਬ੍ਬਕੁਣਪਾਨਿ ਗਙ੍ਗਂ ਪਵੇਸਯਿਂਸੁ, ਪਰਿਸੁਦ੍ਧੋ ਭੂਮਿਭਾਗੋ ਅਹੋਸਿ. ਲਿਚ੍ਛਵੀਰਾਜਾਨੋ ਸਤ੍ਥਾਰਂ ਯੋਜਨੇ ਯੋਜਨੇ ਵਸਾਪੇਤ੍ਵਾ ਮਹਾਦਾਨਂ ਦਤ੍ਵਾ ਦਿਗੁਣਂ ਪੂਜਂ ਕਰੋਨ੍ਤਾ ਤੀਹਿ ਦਿਵਸੇਹਿ ਵੇਸਾਲਿਂ ਨਯਿਂਸੁ. ਸਕ੍ਕੋ ਦੇਵਰਾਜਾ ਦੇਵਗਣਪਰਿਵੁਤੋ ਆਗਮਾਸਿ, ਮਹੇਸਕ੍ਖਾਨਂ ਦੇਵਾਨਂ ਸਨ੍ਨਿਪਾਤੇਨ ਅਮਨੁਸ੍ਸਾ ਯੇਭੁਯ੍ਯੇਨ ਪਲਾਯਿਂਸੁ. ਸਤ੍ਥਾ ਸਾਯਂ ਨਗਰਦ੍ਵਾਰੇ ਠਤ੍ਵਾ ਆਨਨ੍ਦਤ੍ਥੇਰਂ ਆਮਨ੍ਤੇਸਿ – ‘‘ਇਮਂ, ਆਨਨ੍ਦ, ਰਤਨਸੁਤ੍ਤਂ ਉਗ੍ਗਣ੍ਹਿਤ੍ਵਾ ਲਿਚ੍ਛਵੀਕੁਮਾਰੇਹਿ ਸਦ੍ਧਿਂ ਵਿਚਰਨ੍ਤੋ ਵੇਸਾਲਿਯਾ ਤਿਣ੍ਣਂ ਪਾਕਾਰਾਨਂ ਅਨ੍ਤਰੇ ਪਰਿਤ੍ਤਂ ਕਰੋਹੀ’’ਤਿ.

ਥੇਰੋ ਸਤ੍ਥਾਰਾ ਦਿਨ੍ਨਂ ਰਤਨਸੁਤ੍ਤਂ ਉਗ੍ਗਣ੍ਹਿਤ੍ਵਾ ਸਤ੍ਥੁ ਸੇਲਮਯਪਤ੍ਤੇਨ ਉਦਕਂ ਆਦਾਯ ਨਗਰਦ੍ਵਾਰੇ ਠਿਤੋ ਪਣਿਧਾਨਤੋ ਪਟ੍ਠਾਯ ਤਥਾਗਤਸ੍ਸ ਦਸ ਪਾਰਮਿਯੋ ਦਸ ਉਪਪਾਰਮਿਯੋ ਦਸ ਪਰਮਤ੍ਥਪਾਰਮਿਯੋਤਿ ਸਮਤਿਂਸ ਪਾਰਮਿਯੋ ਪਞ੍ਚ ਮਹਾਪਰਿਚ੍ਚਾਗੇ ਲੋਕਤ੍ਥਚਰਿਯਾ ਞਾਤਤ੍ਥਚਰਿਯਾ ਬੁਦ੍ਧਤ੍ਥਚਰਿਯਾਤਿ ਤਿਸ੍ਸੋ ਚਰਿਯਾਯੋ ਪਚ੍ਛਿਮਭਵੇ ਗਬ੍ਭਵੋਕ੍ਕਨ੍ਤਿਂ ਜਾਤਿਂ ਅਭਿਨਿਕ੍ਖਮਨਂ ਪਧਾਨਚਰਿਯਂ ਬੋਧਿਪਲ੍ਲਙ੍ਕੇ ਮਾਰਵਿਜਯਂ ਸਬ੍ਬਞ੍ਞੁਤਞ੍ਞਾਣਪਟਿਵੇਧਂ ਧਮ੍ਮਚਕ੍ਕਪਵਤ੍ਤਨਂ ਨਵਲੋਕੁਤ੍ਤਰਧਮ੍ਮੇਤਿ ਸਬ੍ਬੇਪਿਮੇ ਬੁਦ੍ਧਗੁਣੇ ਆਵਜ੍ਜੇਤ੍ਵਾ ਨਗਰਂ ਪਵਿਸਿਤ੍ਵਾ ਤਿਯਾਮਰਤ੍ਤਿਂ ਤੀਸੁ ਪਾਕਾਰਨ੍ਤਰੇਸੁ ਪਰਿਤ੍ਤਂ ਕਰੋਨ੍ਤੋ ਵਿਚਰਿ. ਤੇਨ ‘‘ਯਂਕਿਞ੍ਚੀ’’ਤਿ ਵੁਤ੍ਤਮਤ੍ਤੇਯੇਵ ਉਦ੍ਧਂ ਖਿਤ੍ਤਉਦਕਂ ਅਮਨੁਸ੍ਸਾਨਂ ਉਪਰਿ ਪਤਿ. ‘‘ਯਾਨੀਧ ਭੂਤਾਨੀ’’ਤਿ ਗਾਥਾਕਥਨਤੋ ਪਟ੍ਠਾਯ ਰਜਤਵਟਂਸਕਾ ਵਿਯ ਉਦਕਬਿਨ੍ਦੂਨਿ ਆਕਾਸੇਨ ਗਨ੍ਤ੍ਵਾ ਗਿਲਾਨਮਨੁਸ੍ਸਾਨਂ ਉਪਰਿ ਪਤਿਂਸੁ. ਤਾਵਦੇਵ ਵੂਪਸਨ੍ਤਰੋਗਾ ਮਨੁਸ੍ਸਾ ਉਟ੍ਠਾਯੁਟ੍ਠਾਯ ਥੇਰਂ ਪਰਿਵਾਰੇਸੁਂ. ‘‘ਯਂਕਿਞ੍ਚੀ’’ਤਿ ਵੁਤ੍ਤਪਦਤੋ ਪਟ੍ਠਾਯ ਪਨ ਉਦਕਫੁਸਿਤੇਹਿ ਫੁਟ੍ਠਫੁਟ੍ਠਾ ਸਬ੍ਬੇ ਅਪਲਾਯਨ੍ਤਾ ਸਙ੍ਕਾਰਕੂਟਭਿਤ੍ਤਿਪਦੇਸਾਦਿਨਿਸ੍ਸਿਤਾ ਅਮਨੁਸ੍ਸਾ ਤੇਨ ਤੇਨ ਦ੍ਵਾਰੇਨ ਪਲਾਯਿਂਸੁ. ਦ੍ਵਾਰਾਨਿ ਅਨੋਕਾਸਾਨਿ ਅਹੇਸੁਂ. ਤੇ ਓਕਾਸਂ ਅਲਭਨ੍ਤਾ ਪਾਕਾਰਂ ਭਿਨ੍ਦਿਤ੍ਵਾਪਿ ਪਲਾਯਿਂਸੁ.

ਮਹਾਜਨੋ ਨਗਰਮਜ੍ਝੇ ਸਨ੍ਥਾਗਾਰਂ ਸਬ੍ਬਗਨ੍ਧੇਹਿ ਉਪਲਿਮ੍ਪੇਤ੍ਵਾ ਉਪਰਿ ਸੁਵਣ੍ਣਤਾਰਕਾਦਿਵਿਚਿਤ੍ਤਂ ਵਿਤਾਨਂ ਬਨ੍ਧਿਤ੍ਵਾ ਬੁਦ੍ਧਾਸਨਂ ਪਞ੍ਞਾਪੇਤ੍ਵਾ ਸਤ੍ਥਾਰਂ ਆਨੇਸਿ. ਸਤ੍ਥਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਭਿਕ੍ਖੁਸਙ੍ਘੋਪਿ ਲਿਚ੍ਛਵੀਗਣੋਪਿ ਸਤ੍ਥਾਰਂ ਪਰਿਵਾਰੇਤ੍ਵਾ ਨਿਸੀਦਿ. ਸਕ੍ਕੋ ਦੇਵਰਾਜਾ ਦੇਵਗਣਪਰਿਵੁਤੋ ਪਤਿਰੂਪੇ ਓਕਾਸੇ ਅਟ੍ਠਾਸਿ. ਥੇਰੋਪਿ ਸਕਲਨਗਰਂ ਅਨੁਵਿਚਰਿਤ੍ਵਾ ਵੂਪਸਨ੍ਤਰੋਗੇਨ ਮਹਾਜਨੇਨ ਸਦ੍ਧਿਂ ਆਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਨਿਸੀਦਿ. ਸਤ੍ਥਾ ਪਰਿਸਂ ਓਲੋਕੇਤ੍ਵਾ ਤਦੇਵ ਰਤਨਸੁਤ੍ਤਂ ਅਭਾਸਿ. ਦੇਸਨਾਵਸਾਨੇ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਏਵਂ ਪੁਨਦਿਵਸੇਪੀਤਿ ਸਤ੍ਤਾਹਂ ਤਦੇਵ ਰਤਨਸੁਤ੍ਤਂ ਦੇਸੇਤ੍ਵਾ ਸਬ੍ਬਭਯਾਨਂ ਵੂਪਸਨ੍ਤਭਾਵਂ ਞਤ੍ਵਾ ਲਿਚ੍ਛਵੀਗਣਂ ਆਮਨ੍ਤੇਤ੍ਵਾ ਵੇਸਾਲਿਤੋ ਨਿਕ੍ਖਮਿ. ਲਿਚ੍ਛਵੀਰਾਜਾਨੋ ਦਿਗੁਣਂ ਸਕ੍ਕਾਰਂ ਕਰੋਨ੍ਤਾ ਪੁਨ ਤੀਹਿ ਦਿਵਸੇਹਿ ਸਤ੍ਥਾਰਂ ਗਙ੍ਗਾਤੀਰਂ ਨਯਿਂਸੁ.

ਗਙ੍ਗਾਯ ਨਿਬ੍ਬਤ੍ਤਨਾਗਰਾਜਾਨੋ ਚਿਨ੍ਤੇਸੁਂ – ‘‘ਮਨੁਸ੍ਸਾ ਤਥਾਗਤਸ੍ਸ ਸਕ੍ਕਾਰਂ ਕਰੋਨ੍ਤਿ, ਮਯਂ ਕਿਂ ਨ ਕਰੋਮਾ’’ਤਿ. ਤੇ ਸੁਵਣ੍ਣਰਜਤਮਣਿਮਯਾ ਨਾਵਾਯੋ ਮਾਪੇਤ੍ਵਾ ਸੁਵਣ੍ਣਰਜਤਮਣਿਮਯੇ ਪਲ੍ਲਙ੍ਕੇ ਪਞ੍ਞਾਪੇਤ੍ਵਾ ਪਞ੍ਚਵਣ੍ਣਪਦੁਮਸਞ੍ਛਨ੍ਨਂ ਉਦਕਂ ਕਰਿਤ੍ਵਾ, ‘‘ਭਨ੍ਤੇ, ਅਮ੍ਹਾਕਮ੍ਪਿ ਅਨੁਗ੍ਗਹਂ ਕਰੋਥਾ’’ਤਿ ਅਤ੍ਤਨੋ ਅਤ੍ਤਨੋ ਨਾਵਂ ਅਭਿਰੁਹਣਤ੍ਥਾਯ ਸਤ੍ਥਾਰਂ ਯਾਚਿਂਸੁ. ‘‘ਮਨੁਸ੍ਸਾ ਚ ਨਾਗਾ ਚ ਤਥਾਗਤਸ੍ਸ ਪੂਜਂ ਕਰੋਨ੍ਤਿ, ਮਯਂ ਪਨ ਕਿਂ ਨ ਕਰੋਮਾ’’ਤਿ ਭੂਮਟ੍ਠਕਦੇਵੇਪਿ ਆਦਿਂ ਕਤ੍ਵਾ ਯਾਵ ਅਕਨਿਟ੍ਠਬ੍ਰਹ੍ਮਲੋਕਾ ਸਬ੍ਬੇ ਦੇਵਾ ਸਕ੍ਕਾਰਂ ਕਰਿਂਸੁ. ਤਤ੍ਥ ਨਾਗਾ ਯੋਜਨਿਕਾਨਿ ਛਤ੍ਤਾਤਿਛਤ੍ਤਾਨਿ ਉਕ੍ਖਿਪਿਂਸੁ. ਏਵਂ ਹੇਟ੍ਠਾ ਨਾਗਾ ਭੂਮਿਤਲੇ ਰੁਕ੍ਖਗਚ੍ਛਪਬ੍ਬਤਾਦੀਸੁ ਭੂਮਟ੍ਠਕਾ ਦੇਵਤਾ, ਅਨ੍ਤਲਿਕ੍ਖੇ ਆਕਾਸਟ੍ਠਦੇਵਾਤਿ ਨਾਗਭਵਨਂ ਆਦਿਂ ਕਤ੍ਵਾ ਚਕ੍ਕਵਾਲ਼ਪਰਿਯਨ੍ਤੇਨ ਯਾਵ ਬ੍ਰਹ੍ਮਲੋਕਾ ਛਤ੍ਤਾਤਿਛਤ੍ਤਾਨਿ ਉਸ੍ਸਾਪਿਤਾਨਿ ਅਹੇਸੁਂ. ਛਤ੍ਤਨ੍ਤਰੇਸੁ ਧਜਾ, ਧਜਨ੍ਤਰੇਸੁ ਪਟਾਕਾ, ਤੇਸਂ ਅਨ੍ਤਰਨ੍ਤਰਾ ਪੁਪ੍ਫਦਾਮਵਾਸਚੁਣ੍ਣਧੁਮਾਦੀਹਿ ਸਕ੍ਕਾਰੋ ਅਹੋਸਿ. ਸਬ੍ਬਲਙ੍ਕਾਰਪਟਿਮਣ੍ਡਿਤਾ ਦੇਵਪੁਤ੍ਤਾ ਛਣਵੇਸਂ ਗਹੇਤ੍ਵਾ ਉਗ੍ਘੋਸਯਮਾਨਾ ਆਕਾਸੇ ਵਿਚਰਿਂਸੁ. ਤਯੋ ਏਵ ਕਿਰ ਸਮਾਗਮਾ ਮਹਨ੍ਤਾ ਅਹੇਸੁਂ – ਯਮਕਪਾਟਿਹਾਰਿਯਸਮਾਗਮੋ ਦੇਵੋਰੋਹਣਸਮਾਗਮੋ ਅਯਂ ਗਙ੍ਗੋਰੋਹਣਸਮਾਗਮੋਤਿ.

ਪਰਤੀਰੇ ਬਿਮ੍ਬਿਸਾਰੋਪਿ ਲਿਚ੍ਛਵੀਹਿ ਕਤਸਕ੍ਕਾਰਤੋ ਦਿਗੁਣਂ ਸਕ੍ਕਾਰਂ ਸਜ੍ਜੇਤ੍ਵਾ ਭਗਵਤੋ ਆਗਮਨਂ ਉਦਿਕ੍ਖਮਾਨੋ ਅਟ੍ਠਾਸਿ. ਸਤ੍ਥਾ ਗਙ੍ਗਾਯ ਉਭੋਸੁ ਪਸ੍ਸੇਸੁ ਰਾਜੂਨਂ ਮਹਨ੍ਤਂ ਪਰਿਚ੍ਚਾਗਂ ਓਲੋਕੇਤ੍ਵਾ ਨਾਗਾਦੀਨਞ੍ਚ ਅਜ੍ਝਾਸਯਂ ਵਿਦਿਤ੍ਵਾ ਏਕੇਕਾਯ ਨਾਵਾਯ ਪਞ੍ਚਪਞ੍ਚਭਿਕ੍ਖੁਸਤਪਰਿਵਾਰਂ ਏਕੇਕਂ ਨਿਮ੍ਮਿਤਬੁਦ੍ਧਂ ਮਾਪੇਸਿ. ਸੋ ਏਕੇਕਸ੍ਸ ਸੇਤਚ੍ਛਤ੍ਤਸ੍ਸ ਚੇਵ ਕਪ੍ਪਰੁਕ੍ਖਸ੍ਸ ਚ ਪੁਪ੍ਫਦਾਮਸ੍ਸ ਚ ਹੇਟ੍ਠਾ ਨਾਗਗਣਪਰਿਵੁਤੋ ਨਿਸਿਨ੍ਨੋ ਹੋਤਿ. ਭੂਮਟ੍ਠਕਦੇਵਤਾਦੀਸੁਪਿ ਏਕੇਕਸ੍ਮਿਂ ਓਕਾਸੇ ਸਪਰਿਵਾਰਂ ਏਕੇਕਂ ਨਿਮ੍ਮਿਤਬੁਦ੍ਧਂ ਮਾਪੇਸਿ. ਏਵਂ ਸਕਲਚਕ੍ਕਵਾਲ਼ਗਬ੍ਭੇ ਏਕਾਲਙ੍ਕਾਰੇ ਏਕੁਸ੍ਸਵੇ ਏਕਛਣੇਯੇਵ ਚ ਜਾਤੇ ਸਤ੍ਥਾ ਨਾਗਾਨਮਨੁਗ੍ਗਹਂ ਕਰੋਨ੍ਤੋ ਏਕਂ ਰਤਨਨਾਵਂ ਅਭਿਰੁਹਿ. ਭਿਕ੍ਖੂਸੁਪਿ ਏਕੇਕੋ ਏਕੇਕਮੇਵ ਅਭਿਰੁਹਿ. ਨਾਗਰਾਜਾਨੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਾਗਭਵਨਂ ਪਵੇਸੇਤ੍ਵਾ ਸਬ੍ਬਰਤ੍ਤਿਂ ਸਤ੍ਥੁ ਸਨ੍ਤਿਕੇ ਧਮ੍ਮਕਥਂ ਸੁਤ੍ਵਾ ਦੁਤਿਯਦਿਵਸੇ ਦਿਬ੍ਬੇਨ ਖਾਦਨੀਯੇਨ ਭੋਜਨੀਯੇਨ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਰਿਵਿਸਿਂਸੁ. ਸਤ੍ਥਾ ਅਨੁਮੋਦਨਂ ਕਤ੍ਵਾ ਨਾਗਭਵਨਾ ਨਿਕ੍ਖਮਿਤ੍ਵਾ ਸਕਲਚਕ੍ਕਵਾਲ਼ਦੇਵਤਾਹਿ ਪੂਜਿਯਮਾਨੋ ਪਞ੍ਚਹਿ ਨਾਵਾਸਤੇਹਿ ਗਙ੍ਗਾਨਦਿਂ ਅਤਿਕ੍ਕਮਿ.

ਰਾਜਾ ਪਚ੍ਚੁਗ੍ਗਨ੍ਤ੍ਵਾ ਸਤ੍ਥਾਰਂ ਨਾਵਾਤੋ ਓਤਾਰੇਤ੍ਵਾ ਆਗਮਨਕਾਲੇ ਲਿਚ੍ਛਵੀਤਿ ਕਤਸਕ੍ਕਾਰਤੋ ਦਿਗੁਣਂ ਸਕ੍ਕਾਰਂ ਕਤ੍ਵਾ ਪੁਰਿਮਨਯੇਨੇਵ ਪਞ੍ਚਹਿ ਦਿਵਸੇਹਿ ਰਾਜਗਹਂ ਅਭਿਨੇਸਿ. ਦੁਤਿਯਦਿਵਸੇ ਭਿਕ੍ਖੂ ਪਿਣ੍ਡਪਾਤਪਟਿਕ੍ਕਨ੍ਤਾ ਸਾਯਨ੍ਹਸਮਯੇ ਧਮ੍ਮਸਭਾਯਂ ਸਨ੍ਨਿਸਿਨ੍ਨਾ ਕਥਂ ਸਮੁਟ੍ਠਾਪੇਸੁਂ – ‘‘ਅਹੋ ਬੁਦ੍ਧਾਨਂ ਮਹਾਨੁਭਾਵੋ, ਅਹੋ ਸਤ੍ਥਰਿ ਦੇਵਮਨੁਸ੍ਸਾਨਂ ਪਸਾਦੋ, ਗਙ੍ਗਾਯ ਨਾਮ ਓਰਤੋ ਚ ਪਾਰਤੋ ਚ ਅਟ੍ਠਯੋਜਨੇ ਮਗ੍ਗੇ ਬੁਦ੍ਧਗਤੇਨ ਪਸਾਦੇਨ ਰਾਜੂਹਿ ਸਮਤਲਂ ਭੂਮਿਂ ਕਤ੍ਵਾ ਵਾਲੁਕਾ ਓਕਿਣ੍ਣਾ, ਜਣ੍ਣੁਮਤ੍ਤੇਨ ਓਧਿਨਾ ਨਾਨਾਵਣ੍ਣਾਨਿ ਪੁਪ੍ਫਾਨਿ ਸਨ੍ਥਤਾਨਿ, ਗਙ੍ਗਾਯ ਉਦਕਂ ਨਾਗਾਨੁਭਾਵੇਨ ਪਞ੍ਚਵਣ੍ਣੇਹਿ ਪਦੁਮੇਹਿ ਸਞ੍ਛਨ੍ਨਂ, ਯਾਵ ਅਕਨਿਟ੍ਠਭਵਨਾ ਛਤ੍ਤਾਤਿਛਤ੍ਤਾਨਿ ਉਸ੍ਸਾਪਿਤਾਨਿ, ਸਕਲਚਕ੍ਕਵਾਲ਼ਗਬ੍ਭਂ ਏਕਾਲਙ੍ਕਾਰਂ ਏਕੁਸ੍ਸਵਂ ਵਿਯ ਜਾਤ’’ਨ੍ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਏਸ ਪੂਜਾਸਕ੍ਕਾਰੋ ਮਯ੍ਹਂ ਬੁਦ੍ਧਾਨੁਭਾਵੇਨ ਨਿਬ੍ਬਤ੍ਤੋ, ਨ ਨਾਗਦੇਵਬ੍ਰਹ੍ਮਾਨੁਭਾਵੇਨ. ਅਤੀਤੇ ਪਨ ਅਪ੍ਪਮਤ੍ਤਕਪਰਿਚ੍ਚਾਗਾਨੁਭਾਵੇਨ ਨਿਬ੍ਬਤ੍ਤੋ’’ਤਿ ਵਤ੍ਵਾ ਭਿਕ੍ਖੂਹਿ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਤਕ੍ਕਸਿਲਾਯਂ ਸਙ੍ਖੋ ਨਾਮ ਬ੍ਰਾਹ੍ਮਣੋ ਅਹੋਸਿ. ਤਸ੍ਸ ਪੁਤ੍ਤੋ ਸੁਸੀਮੋ ਨਾਮ ਮਾਣਵੋ ਸੋਲ਼ਸਵਸ੍ਸੁਦ੍ਦੇਸਿਕੋ ਏਕਦਿਵਸਂ ਪਿਤਰਂ ਉਪਸਙ੍ਕਮਿਤ੍ਵਾ ਆਹ – ‘‘ਇਚ੍ਛਾਮਹਂ, ਤਾਤ, ਬਾਰਾਣਸਿਂ ਗਨ੍ਤ੍ਵਾ ਮਨ੍ਤੇ ਅਜ੍ਝਾਯਿਤੁ’’ਨ੍ਤਿ. ਅਥ ਨਂ ਪਿਤਾ ਆਹ – ‘‘ਤੇਨ ਹਿ, ਤਾਤ, ਅਸੁਕੋ ਨਾਮ ਬ੍ਰਾਹ੍ਮਣੋ ਮਮ ਸਹਾਯਕੋ, ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਧੀਯਸ੍ਸੂ’’ਤਿ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਅਨੁਪੁਬ੍ਬੇਨ ਬਾਰਾਣਸਿਂ ਗਨ੍ਤ੍ਵਾ ਤਂ ਬ੍ਰਾਹ੍ਮਣਂ ਉਪਸਙ੍ਕਮਿਤ੍ਵਾ ਪਿਤਰਾ ਪਹਿਤਭਾਵਮਾਚਿਕ੍ਖਿ. ਅਥ ਨਂ ਸੋ ‘‘ਸਹਾਯਕਸ੍ਸ ਮੇ ਪੁਤ੍ਤੋ’’ਤਿ ਸਮ੍ਪਟਿਚ੍ਛਿਤ੍ਵਾ ਪਟਿਪਸ੍ਸਦ੍ਧਦਰਥਂ ਭਦ੍ਦਕੇਨ ਦਿਵਸੇਨ ਮਨ੍ਤੇ ਵਾਚੇਤੁਮਾਰਭਿ. ਸੋ ਲਹੁਞ੍ਚ ਗਣ੍ਹਨ੍ਤੋ ਬਹੁਞ੍ਚ ਗਣ੍ਹਨ੍ਤੋ ਅਤ੍ਤਨੋ ਉਗ੍ਗਹਿਤੁਗ੍ਗਹਿਤਂ ਸੁਵਣ੍ਣਭਾਜਨੇ ਪਕ੍ਖਿਤ੍ਤਸੀਹਤੇਲਮਿਵ ਅਵਿਨਸ੍ਸਮਾਨਂ ਧਾਰੇਨ੍ਤੋ ਨ ਚਿਰਸ੍ਸੇਵ ਆਚਰਿਯਸ੍ਸ ਸਮ੍ਮੁਖਤੋ ਉਗ੍ਗਣ੍ਹਿਤਬ੍ਬਂ ਸਬ੍ਬਂ ਉਗ੍ਗਣ੍ਹਿਤ੍ਵਾ ਸਜ੍ਝਾਯਂ ਕਰੋਨ੍ਤੋ ਅਤ੍ਤਨੋ ਉਗ੍ਗਹਿਤਸਿਪ੍ਪਸ੍ਸ ਆਦਿਮਜ੍ਝਮੇਵ ਪਸ੍ਸਤਿ, ਨੋ ਪਰਿਯੋਸਾਨਂ.

ਸੋ ਆਚਰਿਯਂ ਉਪਸਙ੍ਕਮਿਤ੍ਵਾ ‘‘ਅਹਂ ਇਮਸ੍ਸ ਸਿਪ੍ਪਸ੍ਸ ਆਦਿਮਜ੍ਝਮੇਵ ਪਸ੍ਸਾਮਿ, ਨੋ ਪਰਿਯੋਸਾਨ’’ਨ੍ਤਿ ਵਤ੍ਵਾ ਆਚਰਿਯੇਨ ‘‘ਅਹਮ੍ਪਿ, ਤਾਤ, ਨ ਪਸ੍ਸਾਮੀ’’ਤਿ ਵੁਤ੍ਤੇ ‘‘ਅਥ ਕੋ, ਆਚਰਿਯ, ਪਰਿਯੋਸਾਨਂ ਜਾਨਾਤੀ’’ਤਿ ਪੁਚ੍ਛਿਤ੍ਵਾ ‘‘ਇਮੇ, ਤਾਤ, ਇਸਯੋ ਇਸਿਪਤਨੇ ਵਿਹਰਨ੍ਤਿ, ਤੇ ਜਾਨੇਯ੍ਯੁਂ, ਤੇਸਂ ਸਨ੍ਤਿਕਂ ਉਪਸਙ੍ਕਮਿਤ੍ਵਾ ਪੁਚ੍ਛਸ੍ਸੂ’’ਤਿ ਆਚਰਿਯੇਨ ਵੁਤ੍ਤੇ ਪਚ੍ਚੇਕਬੁਦ੍ਧੇ ਉਪਸਙ੍ਕਮਿਤ੍ਵਾ ਪੁਚ੍ਛਿ – ‘‘ਤੁਮ੍ਹੇ ਕਿਰ ਪਰਿਯੋਸਾਨਂ ਜਾਨਾਥਾ’’ਤਿ? ‘‘ਆਮ, ਜਾਨਾਮਾ’’ਤਿ. ‘‘ਤੇਨ ਹਿ ਮੇ ਆਚਿਕ੍ਖਥਾ’’ਤਿ? ‘‘ਨ ਮਯਂ ਅਪਬ੍ਬਜਿਤਸ੍ਸ ਆਚਿਕ੍ਖਾਮ. ਸਚੇ ਤੇ ਪਰਿਯੋਸਾਨੇਨਤ੍ਥੋ, ਪਬ੍ਬਜਸ੍ਸੂ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤੇਸਂ ਸਨ੍ਤਿਕੇ ਪਬ੍ਬਜਿ. ਅਥਸ੍ਸ ਤੇ ‘‘ਇਦਂ ਤਾਵ ਸਿਕ੍ਖਸ੍ਸੂ’’ਤਿ ਵਤ੍ਵਾ ‘‘ਏਵਂ ਤੇ ਨਿਵਾਸੇਤਬ੍ਬਂ, ਏਵਂ ਪਾਰੁਪਿਤਬ੍ਬ’’ਨ੍ਤਿਆਦਿਨਾ ਨਯੇਨ ਆਭਿਸਮਾਚਾਰਿਕਂ ਆਚਿਕ੍ਖਿਂਸੁ. ਸੋ ਤਤ੍ਥ ਸਿਕ੍ਖਨ੍ਤੋ ਉਪਨਿਸ੍ਸਯਸਮ੍ਪਨ੍ਨਤ੍ਤਾ ਨਚਿਰਸ੍ਸੇਵ ਪਚ੍ਚੇਕਸਮ੍ਬੋਧਿਂ ਅਭਿਸਮ੍ਬੁਜ੍ਝਿਤ੍ਵਾ ਸਕਲਬਾਰਾਣਸਿਨਗਰੇ ਗਗਨਤਲੇ ਪੁਣ੍ਣਚਨ੍ਦੋ ਵਿਯ ਪਾਕਟੋ ਲਾਭਗ੍ਗਯਸਗ੍ਗਪ੍ਪਤ੍ਤੋ ਅਹੋਸਿ, ਸੋ ਅਪ੍ਪਾਯੁਕਸਂਵਤ੍ਤਨਿਕਸ੍ਸ ਕਮ੍ਮਸ੍ਸ ਕਤਤ੍ਤਾ ਨ ਚਿਰਸ੍ਸੇਵ ਪਰਿਨਿਬ੍ਬਾਯਿ. ਅਥਸ੍ਸ ਪਚ੍ਚੇਕਬੁਦ੍ਧਾ ਚ ਮਹਾਜਨੋ ਚ ਸਰੀਰਕਿਚ੍ਚਂ ਕਤ੍ਵਾ ਧਾਤੁਯੋ ਚ ਗਹੇਤ੍ਵਾ ਨਗਰਦ੍ਵਾਰੇ ਥੂਪਂ ਕਾਰੇਸੁਂ.

ਸਙ੍ਖੋਪਿ ਬ੍ਰਾਹ੍ਮਣੋ ‘‘ਪੁਤ੍ਤੋ ਮੇ ਚਿਰਂ ਗਤੋ, ਪਵਤ੍ਤਿਮਸ੍ਸ ਜਾਨਿਸ੍ਸਾਮੀ’’ਤਿ ਤਂ ਦਟ੍ਠੁਕਾਮੋ ਤਕ੍ਕਸਿਲਾਤੋ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਬਾਰਾਣਸਿਂ ਪਤ੍ਵਾ ਮਹਾਜਨਕਾਯਂ ਸਨ੍ਨਿਪਤਿਤਂ ਦਿਸ੍ਵਾ ‘‘ਅਦ੍ਧਾ ਇਮੇਸੁ ਏਕੋਪਿ ਮੇ ਪੁਤ੍ਤਸ੍ਸ ਪਵਤ੍ਤਿਂ ਜਾਨਿਸ੍ਸਤੀ’’ਤਿ ਉਪਸਙ੍ਕਮਿਤ੍ਵਾ ਪੁਚ੍ਛਿ – ‘‘ਸੁਸੀਮੋ ਨਾਮ ਮਾਣਵੋ ਇਧਾਗਮਿ, ਅਪਿ ਨੁ ਖੋ ਤਸ੍ਸ ਪਵਤ੍ਤਿਂ ਜਾਨਾਥਾ’’ਤਿ? ‘‘ਆਮ, ਬ੍ਰਾਹ੍ਮਣ, ਜਾਨਾਮ, ਅਸੁਕਸ੍ਸ ਬ੍ਰਾਹ੍ਮਣਸ੍ਸ ਸਨ੍ਤਿਕੇ ਤਯੋ ਵੇਦੇ ਸਜ੍ਝਾਯਿਤ੍ਵਾ ਪਬ੍ਬਜਿਤ੍ਵਾ ਪਚ੍ਚੇਕਸਮ੍ਬੋਧਿਂ ਸਚ੍ਛਿਕਤ੍ਵਾ ਪਰਿਨਿਬ੍ਬੁਤੋ, ਅਯਮਸ੍ਸ ਥੂਪੋ ਪਤਿਟ੍ਠਾਪਿਤੋ’’ਤਿ. ਸੋ ਭੂਮਿਂ ਹਤ੍ਥੇਨ ਪਹਰਿਤ੍ਵਾ ਰੋਦਿਤ੍ਵਾ ਕਨ੍ਦਿਤ੍ਵਾ ਤਂ ਚੇਤਿਯਙ੍ਗਣਂ ਗਨ੍ਤ੍ਵਾ ਤਿਣਾਨਿ ਉਦ੍ਧਰਿਤ੍ਵਾ ਉਤ੍ਤਰਸਾਟਕੇਨ ਵਾਲੁਕਂ ਆਹਰਿਤ੍ਵਾ ਚੇਤਿਯਙ੍ਗਣੇ ਆਕਿਰਿਤ੍ਵਾ ਕਮਣ੍ਡਲੁਤੋ ਉਦਕੇਨ ਪਰਿਪ੍ਫੋਸਿਤ੍ਵਾ ਵਨਪੁਪ੍ਫੇਹਿ ਪੂਜਂ ਕਤ੍ਵਾ ਸਾਟਕੇਨ ਪਟਾਕਂ ਆਰੋਪੇਤ੍ਵਾ ਥੂਪਸ੍ਸ ਉਪਰਿ ਅਤ੍ਤਨੋ ਛਤ੍ਤਕਂ ਬਨ੍ਧਿਤ੍ਵਾ ਪਕ੍ਕਾਮਿ.

ਸਤ੍ਥਾ ਇਦਂ ਅਤੀਤਂ ਆਹਰਿਤ੍ਵਾ ‘‘ਤਦਾ, ਭਿਕ੍ਖਵੇ, ਅਹਂ ਸਙ੍ਖੋ ਬ੍ਰਾਹ੍ਮਣੋ ਅਹੋਸਿਂ. ਮਯਾ ਸੁਸੀਮਸ੍ਸ ਪਚ੍ਚੇਕਬੁਦ੍ਧਸ੍ਸ ਚੇਤਿਯਙ੍ਗਣੇ ਤਿਣਾਨਿ ਉਦ੍ਧਟਾਨਿ, ਤਸ੍ਸ ਮੇ ਕਮ੍ਮਸ੍ਸ ਨਿਸ੍ਸਨ੍ਦੇਨ ਅਟ੍ਠਯੋਜਨਮਗ੍ਗਂ ਵਿਹਤਖਾਣੁਕਕਣ੍ਟਕਂ ਕਤ੍ਵਾ ਸੁਦ੍ਧਂ ਸਮਤਲਂ ਕਰਿਂਸੁ. ਮਯਾ ਤਤ੍ਥ ਵਾਲੁਕਾ ਓਕਿਣ੍ਣਾ, ਤਸ੍ਸ ਮੇ ਨਿਸ੍ਸਨ੍ਦੇਨ ਅਟ੍ਠਯੋਜਨਮਗ੍ਗੇ ਵਾਲੁਕਂ ਓਕਿਰਿਂਸੁ. ਮਯਾ ਤਤ੍ਥ ਵਨਕੁਸੁਮੇਹਿ ਪੂਜਾ ਕਤਾ, ਤਸ੍ਸ ਮੇ ਨਿਸ੍ਸਨ੍ਦੇਨ ਅਟ੍ਠਯੋਜਨਮਗ੍ਗੇ ਨਾਨਾਵਣ੍ਣਾਨਿ ਪੁਪ੍ਫਾਨਿ ਓਕਿਣ੍ਣਾਨਿ, ਏਕਯੋਜਨਟ੍ਠਾਨੇ ਗਙ੍ਗਾਯ ਉਦਕਂ ਪਞ੍ਚਵਣ੍ਣੇਹਿ ਪਦੁਮੇਹਿ ਸਞ੍ਛਨ੍ਨਂ. ਮਯਾ ਤਤ੍ਥ ਕਮਣ੍ਡਲੁਉਦਕੇਨ ਭੂਮਿ ਪਰਿਪ੍ਫੋਸਿਤਾ, ਤਸ੍ਸ ਮੇ ਨਿਸ੍ਸਨ੍ਦੇਨ ਵੇਸਾਲਿਯਂ ਪੋਕ੍ਖਰਵਸ੍ਸਂ ਵਸ੍ਸਿ. ਮਯਾ ਤਤ੍ਥ ਪਟਾਕਾ, ਆਰੋਪਿਤਾ, ਛਤ੍ਤਕਞ੍ਚ ਬਦ੍ਧਂ, ਤਸ੍ਸ ਮੇ ਨਿਸ੍ਸਨ੍ਦੇਨ ਯਾਵ ਅਕਨਿਟ੍ਠਭਵਨਾ ਧਜਪਟਾਕਛਤ੍ਤਾਤਿਛਤ੍ਤਾਦੀਹਿ ਸਕਲਚਕ੍ਕਵਾਲ਼ਗਬ੍ਭਂ ਏਕੁਸ੍ਸਵਂ ਵਿਯ ਜਾਤਂ. ਇਤਿ ਖੋ, ਭਿਕ੍ਖਵੇ, ਏਸ ਪੂਜਾਸਕ੍ਕਾਰੋ ਮਯ੍ਹਂ ਨੇਵ ਬੁਦ੍ਧਾਨੁਭਾਵੇਨ ਨਿਬ੍ਬਤ੍ਤੋ, ਨ ਨਾਗਦੇਵਬ੍ਰਹ੍ਮਾਨੁਭਾਵੇਨ, ਅਤੀਤੇ ਪਨ ਅਪ੍ਪਮਤ੍ਤਕਪਰਿਚ੍ਚਾਗਾਨੁਭਾਵੇਨਾ’’ਤਿ ਵਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੨੯੦. ‘‘ਮਤ੍ਤਾਸੁਖਪਰਿਚ੍ਚਾਗਾ, ਪਸ੍ਸੇ ਚੇ ਵਿਪੁਲਂ ਸੁਖਂ;

ਚਜੇ ਮਤ੍ਤਾਸੁਖਂ ਧੀਰੋ, ਸਮ੍ਪਸ੍ਸਂ ਵਿਪੁਲਂ ਸੁਖ’’ਨ੍ਤਿ.

ਤਤ੍ਥ ਮਤ੍ਤਾਸੁਖਪਰਿਚ੍ਚਾਗਾਤਿ ਮਤ੍ਤਾਸੁਖਨ੍ਤਿ ਪਮਾਣਯੁਤ੍ਤਕਂ ਪਰਿਤ੍ਤਸੁਖਂ ਵੁਚ੍ਚਤਿ, ਤਸ੍ਸ ਪਰਿਚ੍ਚਾਗੇਨ. ਵਿਪੁਲਂ ਸੁਖਨ੍ਤਿ ਉਲ਼ਾਰਂ ਸੁਖਂ ਨਿਬ੍ਬਾਨਸੁਖਂ ਵੁਚ੍ਚਤਿ, ਤਂ ਚੇ ਪਸ੍ਸੇਯ੍ਯਾਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਏਕਞ੍ਹਿ ਭੋਜਨਪਾਤਿਂ ਸਜ੍ਜਾਪੇਤ੍ਵਾ ਭੁਞ੍ਜਨ੍ਤਸ੍ਸ ਮਤ੍ਤਾਸੁਖਂ ਨਾਮ ਉਪ੍ਪਜ੍ਜਤਿ, ਤਂ ਪਨ ਪਰਿਚ੍ਚਜਿਤ੍ਵਾ ਉਪੋਸਥਂ ਵਾ ਕਰੋਨ੍ਤਸ੍ਸ ਦਾਨਂ ਵਾ ਦਦਨ੍ਤਸ੍ਸ ਵਿਪੁਲਂ ਉਲ਼ਾਰਂ ਨਿਬ੍ਬਾਨਸੁਖਂ ਨਾਮ ਨਿਬ੍ਬਤ੍ਤਤਿ. ਤਸ੍ਮਾ ਸਚੇ ਏਵਂ ਤਸ੍ਸ ਮਤ੍ਤਾਸੁਖਸ੍ਸ ਪਰਿਚ੍ਚਾਗਾ ਵਿਪੁਲਂ ਸੁਖਂ ਪਸ੍ਸਤਿ, ਅਥੇਤਂ ਵਿਪੁਲਂ ਸੁਖਂ ਸਮ੍ਮਾ ਪਸ੍ਸਨ੍ਤੋ ਪਣ੍ਡਿਤੋ ਤਂ ਮਤ੍ਤਾਸੁਖਂ ਚਜੇਯ੍ਯਾਤਿ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਅਤ੍ਤਨੋਪੁਬ੍ਬਕਮ੍ਮਵਤ੍ਥੁ ਪਠਮਂ.

੨. ਕੁਕ੍ਕੁਟਅਣ੍ਡਖਾਦਿਕਾਵਤ੍ਥੁ

ਪਰਦੁਕ੍ਖੂਪਧਾਨੇਨਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਕੁਕ੍ਕੁਟਅਣ੍ਡਖਾਦਿਕਂ ਆਰਬ੍ਭ ਕਥੇਸਿ.

ਸਾਵਤ੍ਥਿਯਾ ਕਿਰ ਅਵਿਦੂਰੇ ਪਣ੍ਡੁਰਂ ਨਾਮ ਏਕੋ ਗਾਮੋ, ਤਤ੍ਥੇਕੋ ਕੇਵਟ੍ਟੋ ਵਸਤਿ. ਸੋ ਸਾਵਤ੍ਥਿਂ ਗਚ੍ਛਨ੍ਤੋ ਅਚਿਰਵਤਿਯਂ ਕਚ੍ਛਪਅਣ੍ਡਾਨਿ ਦਿਸ੍ਵਾ ਤਾਨਿ ਆਦਾਯ ਸਾਵਤ੍ਥਿਂ ਗਨ੍ਤ੍ਵਾ ਏਕਸ੍ਮਿਂ ਗੇਹੇ ਪਚਾਪੇਤ੍ਵਾ ਖਾਦਨ੍ਤੋ ਤਸ੍ਮਿਂ ਗੇਹੇ ਕੁਮਾਰਿਕਾਯਪਿ ਏਕਂ ਅਣ੍ਡਂ ਅਦਾਸਿ. ਸਾ ਤਂ ਖਾਦਿਤ੍ਵਾ ਤਤੋ ਪਟ੍ਠਾਯ ਅਞ੍ਞਂ ਖਾਦਨੀਯਂ ਨਾਮ ਨ ਇਚ੍ਛਿ. ਅਥਸ੍ਸਾ ਮਾਤਾ ਕੁਕ੍ਕੁਟਿਯਾ ਵਿਜਾਤਟ੍ਠਾਨਤੋ ਏਕਂ ਅਣ੍ਡਂ ਗਹੇਤ੍ਵਾ ਅਦਾਸਿ. ਸਾ ਤਂ ਖਾਦਿਤ੍ਵਾ ਰਸਤਣ੍ਹਾਯ ਬਦ੍ਧਾ ਤਤੋ ਪਟ੍ਠਾਯ ਸਯਮੇਵ ਕੁਕ੍ਕੁਟਿਯਾ ਅਣ੍ਡਾਨਿ ਗਹੇਤ੍ਵਾ ਖਾਦਤਿ. ਕੁਕ੍ਕੁਟੀ ਵਿਜਾਤਵਿਜਾਤਕਾਲੇ ਤਂ ਅਤ੍ਤਨੋ ਅਣ੍ਡਾਨਿ ਗਹੇਤ੍ਵਾ ਖਾਦਨ੍ਤਿਂ ਦਿਸ੍ਵਾ ਤਾਯ ਉਪਦ੍ਦੁਤਾ ਆਘਾਤਂ ਬਨ੍ਧਿਤ੍ਵਾ ‘‘ਇਤੋ ਦਾਨਿ ਚੁਤਾ ਯਕ੍ਖਿਨੀ ਹੁਤ੍ਵਾ ਤਵ ਜਾਤਦਾਰਕੇ ਖਾਦਿਤੁਂ ਸਮਤ੍ਥਾ ਹੁਤ੍ਵਾ ਨਿਬ੍ਬਤ੍ਤੇਯ੍ਯ’’ਨ੍ਤਿ ਪਤ੍ਥਨਂ ਪਟ੍ਠਪੇਤ੍ਵਾ ਕਾਲਂ ਕਤ੍ਵਾ ਤਸ੍ਮਿਂਯੇਵ ਗੇਹੇ ਮਜ੍ਜਾਰੀ ਹੁਤ੍ਵਾ ਨਿਬ੍ਬਤ੍ਤਿ. ਇਤਰਾਪਿ ਕਾਲਂ ਕਤ੍ਵਾ ਤਤ੍ਥੇਵ ਕੁਕ੍ਕੁਟੀ ਹੁਤ੍ਵਾ ਨਿਬ੍ਬਤ੍ਤਿ. ਕੁਕ੍ਕੁਟੀ ਅਣ੍ਡਾਨਿ ਵਿਜਾਯਿ, ਮਜ੍ਜਾਰੀ ਆਗਨ੍ਤ੍ਵਾ ਤਾਨਿ ਖਾਦਿਤ੍ਵਾ ਦੁਤਿਯਮ੍ਪਿ ਤਤਿਯਮ੍ਪਿ ਖਾਦਿਯੇਵ. ਕੁਕ੍ਕੁਟੀ ‘‘ਤਯੋ ਵਾਰੇ ਮਮ ਅਣ੍ਡਾਨਿ ਖਾਦਿਤ੍ਵਾ ਇਦਾਨਿ ਮਮ੍ਪਿ ਖਾਦਿਤੁਕਾਮਾਸਿ, ਇਤੋ ਚੁਤਾ ਸਪੁਤ੍ਤਕਂ ਤਂ ਖਾਦਿਤੁਂ ਲਭੇਯ੍ਯ’’ਨ੍ਤਿ ਪਤ੍ਥਨਂ ਕਤ੍ਵਾ ਤਤੋ ਚੁਤਾ ਦੀਪਿਨੀ ਹੁਤ੍ਵਾ ਨਿਬ੍ਬਤ੍ਤਿ. ਇਤਰਾਪਿ ਕਾਲਂ ਕਤ੍ਵਾ ਮਿਗੀ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸਾ ਵਿਜਾਤਕਾਲੇ ਦੀਪਿਨੀ ਆਗਨ੍ਤ੍ਵਾ ਤਂ ਸਦ੍ਧਿਂ ਪੁਤ੍ਤੇਹਿ ਖਾਦਿ. ਏਵਂ ਖਾਦਨ੍ਤਾ ਪਞ੍ਚਸੁ ਅਤ੍ਤਭਾਵਸਤੇਸੁ ਅਞ੍ਞਮਞ੍ਞਸ੍ਸ ਦੁਕ੍ਖਂ ਉਪ੍ਪਾਦੇਤ੍ਵਾ ਅਵਸਾਨੇ ਏਕਾ ਯਕ੍ਖਿਨੀ ਹੁਤ੍ਵਾ ਨਿਬ੍ਬਤ੍ਤਿ, ਏਕਾ ਸਾਵਤ੍ਥਿਯਂ ਕੁਲਧੀਤਾ ਹੁਤ੍ਵਾ ਨਿਬ੍ਬਤ੍ਤਿ. ਇਤੋ ਪਰਂ ‘‘ਨ ਹਿ ਵੇਰੇਨ ਵੇਰਾਨੀ’’ਤਿ (ਧ. ਪ. ੫) ਗਾਥਾਯ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਧ ਪਨ ਸਤ੍ਥਾ ‘‘ਵੇਰਞ੍ਹਿ ਅਵੇਰੇਨ ਉਪਸਮ੍ਮਤਿ, ਨੋ ਵੇਰੇਨਾ’’ਤਿ ਵਤ੍ਵਾ ਉਭਿਨ੍ਨਮ੍ਪਿ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੨੯੧. ‘‘ਪਰਦੁਕ੍ਖੂਪਧਾਨੇਨ, ਅਤ੍ਤਨੋ ਸੁਖਮਿਚ੍ਛਤਿ;

ਵੇਰਸਂਸਗ੍ਗਸਂਸਟ੍ਠੋ, ਵੇਰਾ ਸੋ ਨ ਪਰਿਮੁਚ੍ਚਤੀ’’ਤਿ.

ਤਤ੍ਥ ਪਰਦੁਕ੍ਖੂਪਧਾਨੇਨਾਤਿ ਪਰਸ੍ਮਿਂ ਦੁਕ੍ਖੂਪਧਾਨੇਨ, ਪਰਸ੍ਸ ਦੁਕ੍ਖੁਪ੍ਪਾਦਨੇਨਾਤਿ ਅਤ੍ਥੋ. ਵੇਰਸਂਸਗ੍ਗਸਂਸਟ੍ਠੋਤਿ ਯੋ ਪੁਗ੍ਗਲੋ ਅਕ੍ਕੋਸਨਪਚ੍ਚਕ੍ਕੋਸਨਪਹਰਣਪਟਿਹਰਣਾਦੀਨਂ ਵਸੇਨ ਅਞ੍ਞਮਞ੍ਞਂ ਕਤੇਨ ਵੇਰਸਂਸਗ੍ਗੇਨ ਸਂਸਟ੍ਠੋ. ਵੇਰਾ ਸੋ ਨ ਪਰਿਮੁਚ੍ਚਤੀਤਿ ਨਿਚ੍ਚਕਾਲਂ ਵੇਰਵਸੇਨ ਦੁਕ੍ਖਮੇਵ ਪਾਪੁਣਾਤੀਤਿ ਅਤ੍ਥੋ.

ਦੇਸਨਾਵਸਾਨੇ ਯਕ੍ਖਿਨੀ ਸਰਣੇਸੁ ਪਤਿਟ੍ਠਾਯ ਪਞ੍ਚ ਸੀਲਾਨਿ ਸਮਾਦਿਯਿਤ੍ਵਾ ਵੇਰਤੋ ਮੁਚ੍ਚਿ, ਇਤਰਾਪਿ ਸੋਤਾਪਤ੍ਤਿਫਲੇ ਪਤਿਟ੍ਠਹਿ, ਸਮ੍ਪਤ੍ਤਾਨਮ੍ਪਿ ਸਾਤ੍ਥਿਕਾ ਧਮ੍ਮਦੇਸਨਾ ਅਹੋਸੀਤਿ.

ਕੁਕ੍ਕੁਟਅਣ੍ਡਖਾਦਿਕਾਵਤ੍ਥੁ ਦੁਤਿਯਂ.

੩. ਭਦ੍ਦਿਯਭਿਕ੍ਖੁਵਤ੍ਥੁ

ਯਞ੍ਹਿ ਕਿਚ੍ਚਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਭਦ੍ਦਿਯਂ ਨਿਸ੍ਸਾਯ ਜਾਤਿਯਾਵਨੇ ਵਿਹਰਨ੍ਤੋ ਭਦ੍ਦਿਯੇ ਭਿਕ੍ਖੂ ਆਰਬ੍ਭ ਕਥੇਸਿ.

ਤੇ ਕਿਰ ਪਾਦੁਕਮਣ੍ਡਨੇ ਉਯ੍ਯੁਤ੍ਤਾ ਅਹੇਸੁਂ. ਯਥਾਹ – ‘‘ਤੇਨ ਖੋ ਪਨ ਸਮਯੇਨ ਭਦ੍ਦਿਯਾ ਭਿਕ੍ਖੂ ਅਨੇਕਵਿਹਿਤਂ ਪਾਦੁਕਮਣ੍ਡਨਾਨੁਯੋਗਮਨੁਯੁਤ੍ਤਾ ਵਿਹਰਨ੍ਤਿ, ਤਿਣਪਾਦੁਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਮੁਞ੍ਜਪਾਦੁਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਪਬ੍ਬਜਪਾਦੁਕਂ ਹਿਨ੍ਤਾਲਪਾਦੁਕਂ ਕਮਲਪਾਦੁਕਂ ਕਮ੍ਬਲਪਾਦੁਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਰਿਞ੍ਚਨ੍ਤਿ ਉਦ੍ਦੇਸਂ ਪਰਿਪੁਚ੍ਛਂ ਅਧਿਸੀਲਂ ਅਧਿਚਿਤ੍ਤਂ ਅਧਿਪਞ੍ਞ’’ਨ੍ਤਿ (ਮਹਾਵ. ੨੫੧). ਭਿਕ੍ਖੂ ਤੇਸਂ ਤਥਾਕਰਣਭਾਵਂ ਜਾਨਿਤ੍ਵਾ ਉਜ੍ਝਾਯਿਤ੍ਵਾ ਸਤ੍ਥੁ ਆਰੋਚੇਸੁਂ. ਸਤ੍ਥਾ ਤੇ ਭਿਕ੍ਖੂ ਗਰਹਿਤ੍ਵਾ, ‘‘ਭਿਕ੍ਖਵੇ, ਤੁਮ੍ਹੇ ਅਞ੍ਞੇਨ ਕਿਚ੍ਚੇਨ ਆਗਤਾ ਅਞ੍ਞਸ੍ਮਿਂਯੇਵ ਕਿਚ੍ਚੇ ਉਯ੍ਯੁਤ੍ਤਾ’’ਤਿ ਵਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

੨੯੨. ‘‘ਯਞ੍ਹਿ ਕਿਚ੍ਚਂ ਅਪਵਿਦ੍ਧਂ, ਅਕਿਚ੍ਚਂ ਪਨ ਕਰੀਯਤਿ;

ਉਨ੍ਨਲ਼ਾਨਂ ਪਮਤ੍ਤਾਨਂ, ਤੇਸਂ ਵਡ੍ਢਨ੍ਤਿ ਆਸਵਾ.

੨੯੩. ‘‘ਯੇਸਞ੍ਚ ਸੁਸਮਾਰਦ੍ਧਾ, ਨਿਚ੍ਚਂ ਕਾਯਗਤਾ ਸਤਿ;

ਅਕਿਚ੍ਚਂ ਤੇ ਨ ਸੇਵਨ੍ਤਿ, ਕਿਚ੍ਚੇ ਸਾਤਚ੍ਚਕਾਰਿਨੋ;

ਸਤਾਨਂ ਸਮ੍ਪਜਾਨਾਨਂ, ਅਤ੍ਥਂ ਗਚ੍ਛਨ੍ਤਿ ਆਸਵਾ’’ਤਿ.

ਤਤ੍ਥ ਯਞ੍ਹਿ ਕਿਚ੍ਚਨ੍ਤਿ ਭਿਕ੍ਖੁਨੋ ਹਿ ਪਬ੍ਬਜਿਤਕਾਲਤੋ ਪਟ੍ਠਾਯ ਅਪਰਿਮਾਣਸੀਲਕ੍ਖਨ੍ਧਗੋਪਨਂ ਅਰਞ੍ਞਾਵਾਸੋ ਧੁਤਙ੍ਗਪਰਿਹਰਣਂ ਭਾਵਨਾਰਾਮਤਾਤਿ ਏਵਮਾਦੀਨਿ ਕਿਚ੍ਚਂ ਨਾਮ. ਇਮੇਹਿ ਪਨ ਯਂ ਅਤ੍ਤਨੋ ਕਿਚ੍ਚਂ, ਤਂ ਅਪਵਿਦ੍ਧਂ ਛਡ੍ਡਿਤਂ. ਅਕਿਚ੍ਚਨ੍ਤਿ ਭਿਕ੍ਖੁਨੋ ਛਤ੍ਤਮਣ੍ਡਨਂ ਉਪਾਹਨਮਣ੍ਡਨਂ ਪਾਦੁਕਪਤ੍ਤਥਾਲਕਧਮ੍ਮਕਰਣਕਾਯਬਨ੍ਧਨਅਂਸਬਦ੍ਧਕਮਣ੍ਡਨਂ ਅਕਿਚ੍ਚਂ ਨਾਮ. ਯੇਹਿ ਤਂ ਕਯਿਰਤਿ, ਤੇਸਂ ਮਾਨਨਲ਼ਂ ਉਕ੍ਖਿਪਿਤ੍ਵਾ ਚਰਣੇਨ ਉਨ੍ਨਲ਼ਾਨਂ ਸਤਿਵੋਸ੍ਸਗ੍ਗੇਨ ਪਮਤ੍ਤਾਨਂ ਚਤ੍ਤਾਰੋ ਆਸਵਾ ਵਡ੍ਢਨ੍ਤੀਤਿ ਅਤ੍ਥੋ. ਸੁਸਮਾਰਦ੍ਧਾਤਿ ਸੁਪਗ੍ਗਹਿਤਾ. ਕਾਯਗਤਾ ਸਤੀਤਿ ਕਾਯਾਨੁਪਸ੍ਸਨਾਭਾਵਨਾ. ਅਕਿਚ੍ਚਨ੍ਤਿ ਤੇ ਏਤਂ ਛਤ੍ਤਮਣ੍ਡਨਾਦਿਕਂ ਅਕਿਚ੍ਚਂ ਨ ਸੇਵਨ੍ਤਿ ਨ ਕਰੋਨ੍ਤੀਤਿ ਅਤ੍ਥੋ. ਕਿਚ੍ਚੇਤਿ ਪਬ੍ਬਜਿਤਕਾਲਤੋ ਪਟ੍ਠਾਯ ਕਤ੍ਤਬ੍ਬੇ ਅਪਰਿਮਾਣਸੀਲਕ੍ਖਨ੍ਧਗੋਪਨਾਦਿਕੇ ਕਰਣੀਯੇ. ਸਾਤਚ੍ਚਕਾਰਿਨੋਤਿ ਸਤਤਕਾਰਿਨੋ ਅਟ੍ਠਿਤਕਾਰਿਨੋ. ਤੇਸਂ ਸਤਿਯਾ ਅਵਿਪ੍ਪਵਾਸੇਨ ਸਤਾਨਂ ਸਾਤ੍ਥਕਸਮ੍ਪਜਞ੍ਞਂ ਸਪ੍ਪਾਯਸਮ੍ਪਜਞ੍ਞਂ ਗੋਚਰਸਮ੍ਪਜਞ੍ਞਂ ਅਸਮ੍ਮੋਹਸਮ੍ਪਜਞ੍ਞਨ੍ਤਿ ਚਤੂਹਿ ਸਮ੍ਪਜਞ੍ਞੇਹਿ ਸਮ੍ਪਜਾਨਾਨਂ ਚਤ੍ਤਾਰੋਪਿ ਆਸਵਾ ਅਤ੍ਥਂ ਗਚ੍ਛਨ੍ਤਿ, ਪਰਿਕ੍ਖਯਂ ਅਭਾਵਂ ਗਚ੍ਛਨ੍ਤੀਤਿ ਅਤ੍ਥੋ.

ਦੇਸਨਾਵਸਾਨੇ ਤੇ ਭਿਕ੍ਖੂ ਅਰਹਤ੍ਤੇ ਪਤਿਟ੍ਠਹਿਂਸੁ, ਸਮ੍ਪਤ੍ਤਾਨਮ੍ਪਿ ਸਾਤ੍ਥਿਕਾ ਧਮ੍ਮਦੇਸਨਾ ਅਹੋਸੀਤਿ.

ਭਦ੍ਦਿਯਵਤ੍ਥੁ ਤਤਿਯਂ.

੪. ਲਕੁਣ੍ਡਕਭਦ੍ਦਿਯਤ੍ਥੇਰਵਤ੍ਥੁ

ਮਾਤਰਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਲਕੁਣ੍ਡਕਭਦ੍ਦਿਯਤ੍ਥੇਰਂ ਆਰਬ੍ਭ ਕਥੇਸਿ.

ਏਕਦਿਵਸਞ੍ਹਿ ਸਮ੍ਬਹੁਲਾ ਆਗਨ੍ਤੁਕਾ ਭਿਕ੍ਖੂ ਸਤ੍ਥਾਰਂ ਦਿਵਾਟ੍ਠਾਨੇ ਨਿਸਿਨ੍ਨਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਤਸ੍ਮਿਂ ਖਣੇ ਲਕੁਣ੍ਡਕਭਦ੍ਦਿਯਤ੍ਥੇਰੋ ਭਗਵਤੋ ਅਵਿਦੂਰੇ ਅਤਿਕ੍ਕਮਤਿ. ਸਤ੍ਥਾ ਤੇਸਂ ਭਿਕ੍ਖੂਨਂ ਚਿਤ੍ਤਾਚਾਰਂ ਞਤ੍ਵਾ ਓਲੋਕੇਤ੍ਵਾ ‘‘ਪਸ੍ਸਥ, ਭਿਕ੍ਖਵੇ, ਅਯਂ ਭਿਕ੍ਖੁ ਮਾਤਾਪਿਤਰੋ ਹਨ੍ਤ੍ਵਾ ਨਿਦ੍ਦੁਕ੍ਖੋ ਹੁਤ੍ਵਾ ਯਾਤੀ’’ਤਿ ਵਤ੍ਵਾ ਤੇਹਿ ਭਿਕ੍ਖੂਹਿ ‘‘ਕਿਂ ਨੁ ਖੋ ਸਤ੍ਥਾ ਵਦਤੀ’’ਤਿ ਅਞ੍ਞਮਞ੍ਞਂ ਮੁਖਾਨਿ ਓਲੋਕੇਤ੍ਵਾ ਸਂਸਯਪਕ੍ਖਨ੍ਦੇਹਿ, ‘‘ਭਨ੍ਤੇ, ਕਿਂ ਨਾਮੇਤਂ ਵਦੇਥਾ’’ਤਿ ਵੁਤ੍ਤੇ ਤੇਸਂ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੨੯੪. ‘‘ਮਾਤਰਂ ਪਿਤਰਂ ਹਨ੍ਤ੍ਵਾ, ਰਾਜਾਨੋ ਦ੍ਵੇ ਚ ਖਤ੍ਤਿਯੇ;

ਰਟ੍ਠਂ ਸਾਨੁਚਰਂ ਹਨ੍ਤ੍ਵਾ, ਅਨੀਘੋ ਯਾਤਿ ਬ੍ਰਾਹ੍ਮਣੋ’’ਤਿ.

ਤਤ੍ਥ ਸਾਨੁਚਰਨ੍ਤਿ ਆਯਸਾਧਕੇਨ ਆਯੁਤ੍ਤਕੇਨ ਸਹਿਤਂ. ਏਤ੍ਥ ਹਿ ‘‘ਤਣ੍ਹਾ ਜਨੇਤਿ ਪੁਰਿਸ’’ਨ੍ਤਿ (ਸਂ. ਨਿ. ੧.੫੫-੫੭) ਵਚਨਤੋ ਤੀਸੁ ਭਵੇਸੁ ਸਤ੍ਤਾਨਂ ਜਨਨਤੋ ਤਣ੍ਹਾ ਮਾਤਾ ਨਾਮ. ‘‘ਅਹਂ ਅਸੁਕਸ੍ਸ ਨਾਮ ਰਞ੍ਞੋ ਵਾ ਰਾਜਮਹਾਮਤ੍ਤਸ੍ਸ ਵਾ ਪੁਤ੍ਤੋ’’ਤਿ ਪਿਤਰਂ ਨਿਸ੍ਸਾਯ ਅਸ੍ਮਿਮਾਨਸ੍ਸ ਉਪ੍ਪਜ੍ਜਨਤੋ ਅਸ੍ਮਿਮਾਨੋ ਪਿਤਾ ਨਾਮ. ਲੋਕੋ ਵਿਯ ਰਾਜਾਨਂ ਯਸ੍ਮਾ ਸਬ੍ਬਦਿਟ੍ਠਿਗਤਾਨਿ ਦ੍ਵੇ ਸਸ੍ਸਤੁਚ੍ਛੇਦਦਿਟ੍ਠਿਯੋ ਭਜਨ੍ਤਿ, ਤਸ੍ਮਾ ਦ੍ਵੇ ਸਸ੍ਸਤੁਚ੍ਛੇਦਦਿਟ੍ਠਿਯੋ ਦ੍ਵੇ ਖਤ੍ਤਿਯਰਾਜਾਨੋ ਨਾਮ. ਦ੍ਵਾਦਸਾਯਤਨਾਨਿ ਵਿਤ੍ਥਤਟ੍ਠੇਨ ਰਟ੍ਠਦਿਸਤ੍ਤਾ ਰਟ੍ਠਂ ਨਾਮ. ਆਯਸਾਧਕੋ ਆਯੁਤ੍ਤਕਪੁਰਿਸੋ ਵਿਯ ਤਨ੍ਨਿਸ੍ਸਿਤੋ ਨਨ੍ਦਿਰਾਗੋ ਅਨੁਚਰੋ ਨਾਮ. ਅਨੀਘੋਤਿ ਨਿਦ੍ਦੁਕ੍ਖੋ. ਬ੍ਰਾਹ੍ਮਣੋਤਿ ਖੀਣਾਸਵੋ. ਏਤੇਸਂ ਤਣ੍ਹਾਦੀਨਂ ਅਰਹਤ੍ਤਮਗ੍ਗਞਾਣਾਸਿਨਾ ਹਤਤ੍ਤਾ ਖੀਣਾਸਵੋ ਨਿਦ੍ਦੁਕ੍ਖੋ ਹੁਤ੍ਵਾ ਯਾਤੀਤਿ ਅਯਮੇਤ੍ਥਤ੍ਥੋ.

ਦੇਸਨਾਵਸਾਨੇ ਤੇ ਭਿਕ੍ਖੂ ਅਰਹਤ੍ਤੇ ਪਤਿਟ੍ਠਹਿਂਸੁ.

ਦੁਤਿਯਗਾਥਾਯਪਿ ਵਤ੍ਥੁ ਪੁਰਿਮਸਦਿਸਮੇਵ. ਤਦਾ ਹਿ ਸਤ੍ਥਾ ਲਕੁਣ੍ਡਕਭਦ੍ਦਿਯਤ੍ਥੇਰਮੇਵ ਆਰਬ੍ਭ ਕਥੇਸਿ. ਤੇਸਂ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੨੯੫. ‘‘ਮਾਤਰਂ ਪਿਤਰਂ ਹਨ੍ਤ੍ਵਾ, ਰਾਜਾਨੋ ਦ੍ਵੇ ਚ ਸੋਤ੍ਥਿਯੇ;

ਵੇਯਗ੍ਘਪਞ੍ਚਮਂ ਹਨ੍ਤ੍ਵਾ, ਅਨੀਘੋ ਯਾਤਿ ਬ੍ਰਾਹ੍ਮਣੋ’’ਤਿ.

ਤਤ੍ਥ ਦ੍ਵੇ ਚ ਸੋਤ੍ਥਿਯੇਤਿ ਦ੍ਵੇ ਚ ਬ੍ਰਾਹ੍ਮਣੇ. ਇਮਿਸ੍ਸਾ ਗਾਥਾਯ ਸਤ੍ਥਾ ਅਤ੍ਤਨੋ ਧਮ੍ਮਿਸ੍ਸਰਤਾਯ ਚ ਦੇਸਨਾਵਿਧਿਕੁਸਲਤਾਯ ਚ ਸਸ੍ਸਤੁਚ੍ਛੇਦਦਿਟ੍ਠਿਯੋ ਦ੍ਵੇ ਬ੍ਰਾਹ੍ਮਣਰਾਜਾਨੋ ਚ ਕਤ੍ਵਾ ਕਥੇਸਿ. ਵੇਯਗ੍ਘਪਞ੍ਚਮਨ੍ਤਿ ਏਤ੍ਥ ਬ੍ਯਗ੍ਘਾਨੁਚਰਿਤੋ ਸਪ੍ਪਟਿਭਯੋ ਦੁਪ੍ਪਟਿਪਨ੍ਨੋ ਮਗ੍ਗੋ ਵੇਯਗ੍ਘੋ ਨਾਮ, ਵਿਚਿਕਿਚ੍ਛਾਨੀਵਰਣਮ੍ਪਿ ਤੇਨ ਸਦਿਸਤਾਯ ਵੇਯਗ੍ਘਂ ਨਾਮ, ਤਂ ਪਞ੍ਚਮਂ ਅਸ੍ਸਾਤਿ ਨੀਵਰਣਪਞ੍ਚਕਂ ਵੇਯਗ੍ਘਪਞ੍ਚਮਂ ਨਾਮ. ਇਦਞ੍ਚ ਵੇਯਗ੍ਘਪਞ੍ਚਮਂ ਅਰਹਤ੍ਤਮਗ੍ਗਞਾਣਾਸਿਨਾ ਨਿਸ੍ਸੇਸਂ ਹਨ੍ਤ੍ਵਾ ਅਨੀਘੋਵ ਯਾਤਿ ਬ੍ਰਾਹ੍ਮਣੋਤਿ ਅਯਮੇਤ੍ਥਤ੍ਥੋ. ਸੇਸਂ ਪੁਰਿਮਸਦਿਸਮੇਵਾਤਿ.

ਲਕੁਣ੍ਡਕਭਦ੍ਦਿਯਤ੍ਥੇਰਵਤ੍ਥੁ ਚਤੁਤ੍ਥਂ.

੫. ਦਾਰੁਸਾਕਟਿਕਪੁਤ੍ਤਵਤ੍ਥੁ

ਸੁਪ੍ਪਬੁਦ੍ਧਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਦਾਰੁਸਾਕਟਿਕਸ੍ਸ ਪੁਤ੍ਤਂ ਆਰਬ੍ਭ ਕਥੇਸਿ.

ਰਾਜਗਹਸ੍ਮਿਞ੍ਹਿ ਸਮ੍ਮਾਦਿਟ੍ਠਿਕਪੁਤ੍ਤੋ ਮਿਚ੍ਛਾਦਿਟ੍ਠਿਕਪੁਤ੍ਤੋਤਿ ਦ੍ਵੇ ਦਾਰਕਾ ਅਭਿਕ੍ਖਣਂ ਗੁਲ਼ਕੀਲ਼ਂ ਕੀਲ਼ਨ੍ਤਿ. ਤੇਸੁ ਸਮ੍ਮਾਦਿਟ੍ਠਿਕਪੁਤ੍ਤੋ ਗੁਲ਼ਂ ਖਿਪਮਾਨੋ ਬੁਦ੍ਧਾਨੁਸ੍ਸਤਿਂ ਆਵਜ੍ਜੇਤ੍ਵਾ ‘‘ਨਮੋ ਬੁਦ੍ਧਸ੍ਸਾ’’ਤਿ ਵਤ੍ਵਾ ਵਤ੍ਵਾ ਗੁਲ਼ਂ ਖਿਪਤਿ. ਇਤਰੋ ਤਿਤ੍ਥਿਯਗੁਣੇ ਉਦ੍ਦਿਸਿਤ੍ਵਾ ‘‘ਨਮੋ ਅਰਹਨ੍ਤਾਨ’’ਨ੍ਤਿ ਵਤ੍ਵਾ ਵਤ੍ਵਾ ਖਿਪਤਿ. ਤੇਸੁ ਸਮ੍ਮਾਦਿਟ੍ਠਿਕਸ੍ਸ ਪੁਤ੍ਤੋ ਜਿਨਾਤਿ, ਇਤਰੋ ਪਨ ਪਰਾਜਯਤਿ. ਸੋ ਤਸ੍ਸ ਕਿਰਿਯਂ ਦਿਸ੍ਵਾ ‘‘ਅਯਂ ਏਵਂ ਅਨੁਸ੍ਸਰਿਤ੍ਵਾ ਏਵਂ ਵਤ੍ਵਾ ਗੁਲ਼ਂ ਖਿਪਨ੍ਤੋ ਮਮਂ ਜਿਨਾਤਿ, ਅਹਮ੍ਪਿ ਏਵਰੂਪਂ ਕਰਿਸ੍ਸਾਮੀ’’ਤਿ ਬੁਦ੍ਧਾਨੁਸ੍ਸਤਿਯਂ ਪਰਿਚਯਮਕਾਸਿ. ਅਥੇਕਦਿਵਸਂ ਤਸ੍ਸ ਪਿਤਾ ਸਕਟਂ ਯੋਜੇਤ੍ਵਾ ਦਾਰੂਨਂ ਅਤ੍ਥਾਯ ਗਚ੍ਛਨ੍ਤੋ ਤਮ੍ਪਿ ਦਾਰਕਂ ਆਦਾਯ ਗਨ੍ਤ੍ਵਾ ਅਟਵਿਯਂ ਦਾਰੂਨਂ ਸਕਟਂ ਪੂਰੇਤ੍ਵਾ ਆਗਚ੍ਛਨ੍ਤੋ ਬਹਿਨਗਰੇ ਸੁਸਾਨਸਾਮਨ੍ਤੇ ਉਦਕਫਾਸੁਕਟ੍ਠਾਨੇ ਗੋਣੇ ਮੋਚੇਤ੍ਵਾ ਭਤ੍ਤਵਿਸ੍ਸਗ੍ਗਮਕਾਸਿ. ਅਥਸ੍ਸ ਤੇ ਗੋਣਾ ਸਾਯਨ੍ਹਸਮਯੇ ਨਗਰਂ ਪਵਿਸਨ੍ਤੇਨ ਗੋਗਣੇਨ ਸਦ੍ਧਿਂ ਨਗਰਮੇਵ ਪਵਿਸਿਂਸੁ. ਸਾਕਟਿਕੋਪਿ ਗੋਣੇ ਅਨੁਬਨ੍ਧਨ੍ਤੋ ਨਗਰਂ ਪਵਿਸਿਤ੍ਵਾ ਸਾਯਂ ਗੋਣੇ ਦਿਸ੍ਵਾ ਆਦਾਯ ਨਿਕ੍ਖਮਨ੍ਤੋ ਦ੍ਵਾਰਂ ਨ ਸਮ੍ਪਾਪੁਣਿ. ਤਸ੍ਮਿਞ੍ਹਿ ਅਸਮ੍ਪਤ੍ਤੇਯੇਵ ਦ੍ਵਾਰਂ ਪਿਹਿਤਂ.

ਅਥਸ੍ਸ ਪੁਤ੍ਤੋ ਏਕਕੋਵ ਰਤ੍ਤਿਭਾਗੇ ਸਕਟਸ੍ਸ ਹੇਟ੍ਠਾ ਨਿਪਜ੍ਜਿਤ੍ਵਾ ਨਿਦ੍ਦਂ ਓਕ੍ਕਮਿ. ਰਾਜਗਹਂ ਪਨ ਪਕਤਿਯਾਪਿ ਅਮਨੁਸ੍ਸਬਹੁਲਂ. ਅਯਞ੍ਚ ਸੁਸਾਨਸਨ੍ਤਿਕੇ ਨਿਪਨ੍ਨੋ. ਤਤ੍ਥ ਨਂ ਦ੍ਵੇ ਅਮਨੁਸ੍ਸਾ ਪਸ੍ਸਿਂਸੁ. ਏਕੋ ਸਾਸਨਸ੍ਸ ਪਟਿਕਣ੍ਡਕੋ ਮਿਚ੍ਛਾਦਿਟ੍ਠਿਕੋ, ਏਕੋ ਸਮ੍ਮਾਦਿਟ੍ਠਿਕੋ. ਤੇਸੁ ਮਿਚ੍ਛਾਦਿਟ੍ਠਿਕੋ ਆਹ – ‘‘ਅਯਂ ਨੋ ਭਕ੍ਖੋ, ਇਮਂ ਖਾਦਿਸ੍ਸਾਮਾ’’ਤਿ. ਇਤਰੋ ‘‘ਅਲਂ ਮਾ ਤੇ ਰੁਚ੍ਚੀ’’ਤਿ ਨਿਵਾਰੇਤਿ. ਸੋ ਤੇਨ ਨਿਵਾਰਿਯਮਾਨੋਪਿ ਤਸ੍ਸ ਵਚਨਂ ਅਨਾਦਿਯਿਤ੍ਵਾ ਦਾਰਕਂ ਪਾਦੇਸੁ ਗਹੇਤ੍ਵਾ ਆਕਡ੍ਢਿ. ਸੋ ਬੁਦ੍ਧਾਨੁਸ੍ਸਤਿਯਾ ਪਰਿਚਿਤਤ੍ਤਾ ਤਸ੍ਮਿਂ ਖਣੇ ‘‘ਨਮੋ ਬੁਦ੍ਧਸ੍ਸਾ’’ਤਿ ਆਹ. ਅਮਨੁਸ੍ਸੋ ਮਹਾਭਯਭੀਤੋ ਪਟਿਕ੍ਕਮਿਤ੍ਵਾ ਅਟ੍ਠਾਸਿ. ਅਥ ਨਂ ਇਤਰੋ ‘‘ਅਮ੍ਹੇਹਿ ਅਕਿਚ੍ਚਂ ਕਤਂ, ਦਣ੍ਡਕਮ੍ਮਂ ਤਸ੍ਸ ਕਰੋਮਾ’’ਤਿ ਵਤ੍ਵਾ ਤਂ ਰਕ੍ਖਮਾਨੋ ਅਟ੍ਠਾਸਿ. ਮਿਚ੍ਛਾਦਿਟ੍ਠਿਕੋ ਨਗਰਂ ਪਵਿਸਿਤ੍ਵਾ ਰਞ੍ਞੋ ਭੋਜਨਪਾਤਿਂ ਪੂਰੇਤ੍ਵਾ ਭੋਜਨਂ ਆਹਰਿ. ਅਥ ਨਂ ਉਭੋਪਿ ਤਸ੍ਸ ਮਾਤਾਪਿਤਰੋ ਵਿਯ ਹੁਤ੍ਵਾ ਉਪਟ੍ਠਾਪੇਤ੍ਵਾ ਭੋਜੇਤ੍ਵਾ ‘‘ਇਮਾਨਿ ਅਕ੍ਖਰਾਨਿ ਰਾਜਾਵ ਪਸ੍ਸਤੁ, ਮਾ ਅਞ੍ਞੋ’’ਤਿ ਤਂ ਪਵਤ੍ਤਿਂ ਪਕਾਸੇਨ੍ਤਾ ਯਕ੍ਖਾਨੁਭਾਵੇਨ ਭੋਜਨਪਾਤਿਯਂ ਅਕ੍ਖਰਾਨਿ ਛਿਨ੍ਦਿਤ੍ਵਾ ਪਾਤਿਂ ਦਾਰੁਸਕਟੇ ਪਕ੍ਖਿਪਿਤ੍ਵਾ ਸਬ੍ਬਰਤ੍ਤਿਂ ਆਰਕ੍ਖਂ ਕਤ੍ਵਾ ਪਕ੍ਕਮਿਂਸੁ.

ਪੁਨਦਿਵਸੇ ‘‘ਰਾਜਕੁਲਤੋ ਚੋਰੇਹਿ ਭੋਜਨਭਣ੍ਡਂ ਅਵਹਟ’’ਨ੍ਤਿ ਕੋਲਾਹਲਂ ਕਰੋਨ੍ਤਾ ਦ੍ਵਾਰਾਨਿ ਪਿਦਹਿਤ੍ਵਾ ਓਲੋਕੇਨ੍ਤਾ ਤਤ੍ਥ ਅਪਸ੍ਸਨ੍ਤਾ ਨਗਰਾ ਨਿਕ੍ਖਮਿਤ੍ਵਾ ਇਤੋ ਚਿਤੋ ਚ ਓਲੋਕੇਨ੍ਤਾ ਦਾਰੁਸਕਟੇ ਸੁਵਣ੍ਣਪਾਤਿਂ ਦਿਸ੍ਵਾ ‘‘ਅਯਂ ਚੋਰੋ’’ਤਿ ਤਂ ਦਾਰਕਂ ਗਹੇਤ੍ਵਾ ਰਞ੍ਞੋ ਦਸ੍ਸੇਸੁਂ. ਰਾਜਾ ਅਕ੍ਖਰਾਨਿ ਦਿਸ੍ਵਾ ‘‘ਕਿਂ ਏਤਂ, ਤਾਤਾ’’ਤਿ ਪੁਚ੍ਛਿਤ੍ਵਾ ‘‘ਨਾਹਂ, ਦੇਵ, ਜਾਨਾਮਿ, ਮਾਤਾਪਿਤਰੋ ਮੇ ਆਗਨ੍ਤ੍ਵਾ ਰਤ੍ਤਿਂ ਭੋਜੇਤ੍ਵਾ ਰਕ੍ਖਮਾਨਾ ਅਟ੍ਠਂਸੁ, ਅਹਮ੍ਪਿ ਮਾਤਾਪਿਤਰੋ ਮਂ ਰਕ੍ਖਨ੍ਤੀਤਿ ਨਿਬ੍ਭਯੋਵ ਨਿਦ੍ਦਂ ਉਪਗਤੋ. ਏਤ੍ਤਕਂ ਅਹਂ ਜਾਨਾਮੀ’’ਤਿ. ਅਥਸ੍ਸ ਮਾਤਾਪਿਤਰੋਪਿ ਤਂ ਠਾਨਂ ਆਗਮਂਸੁ. ਰਾਜਾ ਤਂ ਪਵਤ੍ਤਿਂ ਞਤ੍ਵਾ ਤੇ ਤਯੋਪਿ ਜਨੇ ਆਦਾਯ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਸਬ੍ਬਂ ਆਰੋਚੇਤ੍ਵਾ ‘‘ਕਿਂ ਨੁ ਖੋ, ਭਨ੍ਤੇ, ਬੁਦ੍ਧਾਨੁਸ੍ਸਤਿ ਏਵ ਰਕ੍ਖਾ ਹੋਤਿ, ਉਦਾਹੁ ਧਮ੍ਮਾਨੁਸ੍ਸਤਿਆਦਯੋਪੀ’’ਤਿ ਪੁਚ੍ਛਿ. ਅਥਸ੍ਸ ਸਤ੍ਥਾ, ‘‘ਮਹਾਰਾਜ, ਨ ਕੇਵਲਂ ਬੁਦ੍ਧਾਨੁਸ੍ਸਤਿਯੇਵ ਰਕ੍ਖਾ, ਯੇਸਂ ਪਨ ਛਬ੍ਬਿਧੇਨ ਚਿਤ੍ਤਂ ਸੁਭਾਵਿਤਂ, ਤੇਸਂ ਅਞ੍ਞੇਨ ਰਕ੍ਖਾਵਰਣੇਨ ਵਾ ਮਨ੍ਤੋਸਧੇਹਿ ਵਾ ਕਿਚ੍ਚਂ ਨਤ੍ਥੀ’’ਤਿ ਵਤ੍ਵਾ ਛ ਠਾਨਾਨਿ ਦਸ੍ਸੇਨ੍ਤੋ ਇਮਾ ਗਾਥਾ ਅਭਾਸਿ.

੨੯੬. ‘‘ਸੁਪ੍ਪਬੁਦ੍ਧਂ ਪਬੁਜ੍ਝਨ੍ਤਿ, ਸਦਾ ਗੋਤਮਸਾਵਕਾ;

ਯੇਸਂ ਦਿਵਾ ਚ ਰਤ੍ਤੋ ਚ, ਨਿਚ੍ਚਂ ਬੁਦ੍ਧਗਤਾ ਸਤਿ.

੨੯੭. ‘‘ਸੁਪ੍ਪਬੁਦ੍ਧਂ ਪਬੁਜ੍ਝਨ੍ਤਿ, ਸਦਾ ਗੋਤਮਸਾਵਕਾ;

ਯੇਸਂ ਦਿਵਾ ਚ ਰਤ੍ਤੋ ਚ, ਨਿਚ੍ਚਂ ਧਮ੍ਮਗਤਾ ਸਤਿ.

੨੯੮. ‘‘ਸੁਪ੍ਪਬੁਦ੍ਧਂ ਪਬੁਜ੍ਝਨ੍ਤਿ, ਸਦਾ ਗੋਤਮਸਾਵਕਾ;

ਯੇਸਂ ਦਿਵਾ ਚ ਰਤ੍ਤੋ ਚ, ਨਿਚ੍ਚਂ ਸਙ੍ਘਗਤਾ ਸਤਿ.

੨੯੯. ‘‘ਸੁਪ੍ਪਬੁਦ੍ਧਂ ਪਬੁਜ੍ਝਨ੍ਤਿ, ਸਦਾ ਗੋਤਮਸਾਵਕਾ;

ਯੇਸਂ ਦਿਵਾ ਚ ਰਤ੍ਤੋ ਚ, ਨਿਚ੍ਚਂ ਕਾਯਗਤਾ ਸਤਿ.

੩੦੦. ‘‘ਸੁਪ੍ਪਬੁਦ੍ਧਂ ਪਬੁਜ੍ਝਨ੍ਤਿ, ਸਦਾ ਗੋਤਮਸਾਵਕਾ;

ਯੇਸਂ ਦਿਵਾ ਚ ਰਤ੍ਤੋ ਚ, ਅਹਿਂਸਾਯ ਰਤੋ ਮਨੋ.

੩੦੧. ‘‘ਸੁਪ੍ਪਬੁਦ੍ਧਂ ਪਬੁਜ੍ਝਨ੍ਤਿ, ਸਦਾ ਗੋਤਮਸਾਵਕਾ;

ਯੇਸਂ ਦਿਵਾ ਚ ਰਤ੍ਤੋ ਚ, ਭਾਵਨਾਯ ਰਤੋ ਮਨੋ’’ਤਿ.

ਤਤ੍ਥ ਸੁਪ੍ਪਬੁਦ੍ਧਂ ਪਬੁਜ੍ਝਨ੍ਤੀਤਿ ਬੁਦ੍ਧਗਤਂ ਸਤਿਂ ਗਹੇਤ੍ਵਾ ਸੁਪਨ੍ਤਾ, ਗਹੇਤ੍ਵਾਯੇਵ ਚ ਪਬੁਜ੍ਝਨ੍ਤਾ ਸੁਪ੍ਪਬੁਦ੍ਧਂ ਪਬੁਜ੍ਝਨ੍ਤਿ ਨਾਮ. ਸਦਾ ਗੋਤਮਸਾਵਕਾਤਿ ਗੋਤਮਗੋਤ੍ਤਸ੍ਸ ਬੁਦ੍ਧਸ੍ਸ ਸਵਨਨ੍ਤੇ ਜਾਤਤ੍ਤਾ ਤਸ੍ਸੇਵ ਅਨੁਸਾਸਨਿਯਾ ਸਵਨਤਾਯ ਗੋਤਮਸਾਵਕਾ. ਬੁਦ੍ਧਗਤਾ ਸਤੀਤਿ ਯੇਸਂ ‘‘ਇਤਿਪਿ ਸੋ ਭਗਵਾ’’ਤਿਆਦਿਪ੍ਪਭੇਦੇ ਬੁਦ੍ਧਗੁਣੇ ਆਰਬ੍ਭ ਉਪ੍ਪਜ੍ਜਮਾਨਾ ਸਤਿ ਨਿਚ੍ਚਕਾਲਂ ਅਤ੍ਥਿ, ਤੇ ਸਦਾਪਿ ਸੁਪ੍ਪਬੁਦ੍ਧਂ ਪਬੁਜ੍ਝਨ੍ਤੀਤਿ ਅਤ੍ਥੋ. ਤਥਾ ਅਸਕ੍ਕੋਨ੍ਤਾ ਪਨ ਏਕਦਿਵਸਂ ਤੀਸੁ ਕਾਲੇਸੁ ਦ੍ਵੀਸੁ ਕਾਲੇਸੁ ਏਕਸ੍ਮਿਮ੍ਪਿ ਕਾਲੇ ਬੁਦ੍ਧਾਨੁਸ੍ਸਤਿਂ ਮਨਸਿ ਕਰੋਨ੍ਤਾ ਸੁਪ੍ਪਬੁਦ੍ਧਂ ਪਬੁਜ੍ਝਨ੍ਤਿਯੇਵ ਨਾਮ. ਧਮ੍ਮਗਤਾ ਸਤੀਤਿ ‘‘ਸ੍ਵਾਖਾਤੋ ਭਗਵਤਾ ਧਮ੍ਮੋ’’ਤਿਆਦਿਪ੍ਪਭੇਦੇ ਧਮ੍ਮਗੁਣੇ ਆਰਬ੍ਭ ਉਪ੍ਪਜ੍ਜਮਾਨਾ ਸਤਿ. ਸਙ੍ਘਗਤਾ ਸਤੀਤਿ ‘‘ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’’ਤਿਆਦਿਪ੍ਪਭੇਦੇ ਸਙ੍ਘਗੁਣੇ ਆਰਬ੍ਭ ਉਪ੍ਪਜ੍ਜਮਾਨਾ ਸਤਿ. ਕਾਯਗਤਾ ਸਤੀਤਿ ਦ੍ਵਤ੍ਤਿਂਸਾਕਾਰਵਸੇਨ ਵਾ ਨਵਸਿਵਥਿਕਾਵਸੇਨ ਵਾ ਚਤੁਧਾਤੁਵਵਤ੍ਥਾਨਵਸੇਨ ਵਾ ਅਜ੍ਝਤ੍ਤਨੀਲਕਸਿਣਾਦਿਰੂਪਜ੍ਝਾਨਵਸੇਨ ਵਾ ਉਪ੍ਪਜ੍ਜਮਾਨਾ ਸਤਿ. ਅਹਿਂਸਾਯ ਰਤੋਤਿ ‘‘ਸੋ ਕਰੁਣਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤੀ’’ਤਿ (ਵਿਭ. ੬੪੨) ਏਵਂ ਵੁਤ੍ਤਾਯ ਕਰੁਣਾਭਾਵਨਾਯ ਰਤੋ. ਭਾਵਨਾਯਾਤਿ ਮੇਤ੍ਤਾਭਾਵਨਾਯ. ਕਿਞ੍ਚਾਪਿ ਹੇਟ੍ਠਾ ਕਰੁਣਾਭਾਵਨਾਯ ਵੁਤ੍ਤਤ੍ਤਾ ਇਧ ਸਬ੍ਬਾਪਿ ਅਵਸੇਸਾ ਭਾਵਨਾ ਨਾਮ, ਇਧ ਪਨ ਮੇਤ੍ਤਾਭਾਵਨਾਵ ਅਧਿਪ੍ਪੇਤਾ. ਸੇਸਂ ਪਠਮਗਾਥਾਯ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਦੇਸਨਾਵਸਾਨੇ ਦਾਰਕੋ ਸਦ੍ਧਿਂ ਮਾਤਾਪਿਤੂਹਿ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਪਚ੍ਛਾ ਪਨ ਪਬ੍ਬਜਿਤ੍ਵਾ ਸਬ੍ਬੇਪਿ ਅਰਹਤ੍ਤਂ ਪਾਪੁਣਿਂਸੁ, ਸਮ੍ਪਤ੍ਤਾਨਮ੍ਪਿ ਸਾਤ੍ਥਿਕਾ ਧਮ੍ਮਦੇਸਨਾ ਅਹੋਸੀਤਿ.

ਦਾਰੁਸਾਕਟਿਕਪੁਤ੍ਤਵਤ੍ਥੁ ਪਞ੍ਚਮਂ.

੬. ਵਜ੍ਜਿਪੁਤ੍ਤਕਭਿਕ੍ਖੁਵਤ੍ਥੁ

ਦੁਪ੍ਪਬ੍ਬਜ੍ਜਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਸਾਲਿਂ ਨਿਸ੍ਸਾਯ ਮਹਾਵਨੇ ਵਿਹਰਨ੍ਤੋ ਅਞ੍ਞਤਰਂ ਵਜ੍ਜਿਪੁਤ੍ਤਕਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਤਂ ਸਨ੍ਧਾਯ ਵੁਤ੍ਤਂ – ਅਞ੍ਞਤਰੋ ਵਜ੍ਜਿਪੁਤ੍ਤਕੋ ਭਿਕ੍ਖੁ ਵੇਸਾਲਿਯਂ ਵਿਹਰਤਿ ਅਞ੍ਞਤਰਸ੍ਮਿਂ ਵਨਸਣ੍ਡੇ, ਤੇਨ ਖੋ ਪਨ ਸਮਯੇਨ ਵੇਸਾਲਿਯਂ ਸਬ੍ਬਰਤ੍ਤਿਛਣੋ ਹੋਤਿ. ਅਥ ਖੋ ਸੋ ਭਿਕ੍ਖੁ ਵੇਸਾਲਿਯਾ ਤੂਰਿਯਤਾਲ਼ਿਤਵਾਦਿਤਨਿਗ੍ਘੋਸਸਦ੍ਦਂ ਸੁਤ੍ਵਾ ਪਰਿਦੇਵਮਾਨੋ ਤਾਯਂ ਵੇਲਾਯਂ ਇਮਂ ਗਾਥਂ ਅਭਾਸਿ –

‘‘ਏਕਕਾ ਮਯਂ ਅਰਞ੍ਞੇ ਵਿਹਰਾਮ,

ਅਪਵਿਦ੍ਧਂਵ ਵਨਸ੍ਮਿਂ ਦਾਰੁਕਂ;

ਏਤਾਦਿਸਿਕਾਯ ਰਤ੍ਤਿਯਾ,

ਕੋਸੁ ਨਾਮਮ੍ਹੇਹਿ ਪਾਪਿਯੋ’’ਤਿ. (ਸਂ. ਨਿ. ੧.੨੨੯);

ਸੋ ਕਿਰ ਵਜ੍ਜਿਰਟ੍ਠੇ ਰਾਜਪੁਤ੍ਤੋ ਵਾਰੇਨ ਸਮ੍ਪਤ੍ਤਂ ਰਜ੍ਜਂ ਪਹਾਯ ਪਬ੍ਬਜਿਤੋ ਵੇਸਾਲਿਯਂ ਚਾਤੁਮਹਾਰਾਜਿਕੇਹਿ ਸਦ੍ਧਿਂ ਏਕਾਬਦ੍ਧਂ ਕਤ੍ਵਾ ਸਕਲਨਗਰੇ ਧਜਪਟਾਕਾਦੀਹਿ ਪਟਿਮਣ੍ਡਿਤੇ ਕੋਮੁਦਿਯਾ ਪੁਣ੍ਣਮਾਯ ਸਬ੍ਬਰਤ੍ਤਿਂ ਛਣਵਾਰੇ ਵਤ੍ਤਮਾਨੇ ਭੇਰਿਯਾਦੀਨਂ ਤੂਰਿਯਾਨਂ ਤਾਲ਼ਿਤਾਨਂ ਨਿਗ੍ਘੋਸਂ ਵੀਣਾਦੀਨਞ੍ਚ ਵਾਦਿਤਾਨਂ ਸਦ੍ਦਂ ਸੁਤ੍ਵਾ ਯਾਨਿ ਵੇਸਾਲਿਯਂ ਸਤ੍ਤ ਰਾਜਸਹਸ੍ਸਾਨਿ ਸਤ੍ਤ ਰਾਜਸਤਾਨਿ ਸਤ੍ਤ ਰਾਜਾਨੋ, ਤਤ੍ਤਕਾ ਏਵ ਚ ਨੇਸਂ ਉਪਰਾਜਸੇਨਾਪਤਿਆਦਯੋ, ਤੇਸੁ ਅਲਙ੍ਕਤਪਟਿਯਤ੍ਤੇਸੁ ਨਕ੍ਖਤ੍ਤਕੀਲ਼ਨਤ੍ਥਾਯ ਵੀਥਿਂ ਓਤਿਣ੍ਣੇਸੁ ਸਟ੍ਠਿਹਤ੍ਥੇ ਮਹਾਚਙ੍ਕਮੇ ਚਙ੍ਕਮਮਾਨੋ ਗਗਨਮਜ੍ਝੇ ਠਿਤਂ ਪੁਣ੍ਣਚਨ੍ਦਂ ਦਿਸ੍ਵਾ ਚਙ੍ਕਮਕੋਟਿਯਂ ਫਲਕਂ ਨਿਸ੍ਸਾਯ ਠਿਤੋ ਵੇਠਨਾਲਙ੍ਕਾਰਵਿਰਹਿਤਤ੍ਤਾ ਵਨੇ ਛਡ੍ਡਿਤਦਾਰੁਕਂ ਵਿਯ ਅਤ੍ਤਭਾਵਂ ਓਲੋਕੇਤ੍ਵਾ ‘‘ਅਤ੍ਥਿ ਨੁ ਖੋ ਅਞ੍ਞੋ ਅਮ੍ਹੇਹਿ ਲਾਮਕਤਰੋ’’ਤਿ ਚਿਨ੍ਤੇਨ੍ਤੋ ਪਕਤਿਯਾ ਆਰਞ੍ਞਕਾਦਿਗੁਣਯੁਤ੍ਤੋਪਿ ਤਸ੍ਮਿਂ ਖਣੇ ਅਨਭਿਰਤਿਯਾ ਪੀਲ਼ਿਤੋ ਏਵਮਾਹ. ਸੋ ਤਸ੍ਮਿਂ ਵਨਸਣ੍ਡੇ ਅਧਿਵਤ੍ਥਾਯ ਦੇਵਤਾਯ ‘‘ਇਮਂ ਭਿਕ੍ਖੁਂ ਸਂਵੇਜੇਸ੍ਸਾਮੀ’’ਤਿ ਅਧਿਪ੍ਪਾਯੇਨ –

‘‘ਏਕਕੋਵ ਤ੍ਵਂ ਅਰਞ੍ਞੇ ਵਿਹਰਸਿ, ਅਪਵਿਦ੍ਧਂਵ ਵਨਸ੍ਮਿਂ ਦਾਰੁਕਂ;

ਤਸ੍ਸ ਤੇ ਬਹੁਕਾ ਪਿਹਯਨ੍ਤਿ, ਨੇਰਯਿਕਾ ਵਿਯ ਸਗ੍ਗਗਾਮਿਨ’’ਨ੍ਤਿ. (ਸਂ. ਨਿ. ੧.੨੨੯) –

ਵੁਤ੍ਤਂ ਇਮਂ ਗਾਥਂ ਸੁਤ੍ਵਾ ਪੁਨਦਿਵਸੇ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਨਿਸੀਦਿ. ਸਤ੍ਥਾ ਤਂ ਪਵਤ੍ਤਿਂ ਞਤ੍ਵਾ ਘਰਾਵਾਸਸ੍ਸ ਦੁਕ੍ਖਤਂ ਪਕਾਸੇਤੁਕਾਮੋ ਪਞ੍ਚ ਦੁਕ੍ਖਾਨਿ ਸਮੋਧਾਨੇਤ੍ਵਾ ਇਮਂ ਗਾਥਮਾਹ –

੩੦੨. ‘‘ਦੁਪ੍ਪਬ੍ਬਜ੍ਜਂ ਦੁਰਭਿਰਮਂ, ਦੁਰਾਵਾਸਾ ਘਰਾ ਦੁਖਾ;

ਦੁਕ੍ਖੋਸਮਾਨਸਂਵਾਸੋ, ਦੁਕ੍ਖਾਨੁਪਤਿਤਦ੍ਧਗੂ;

ਤਸ੍ਮਾ ਨ ਚਦ੍ਧਗੂ ਸਿਯਾ, ਨ ਚ ਦੁਕ੍ਖਾਨੁਪਤਿਤੋ ਸਿਯਾ’’ਤਿ.

ਤਤ੍ਥ ਦੁਪ੍ਪਬ੍ਬਜ੍ਜਨ੍ਤਿ ਅਪ੍ਪਂ ਵਾ ਮਹਨ੍ਤਂ ਵਾ ਭੋਗਕ੍ਖਨ੍ਧਞ੍ਚੇਵ ਞਾਤਿਪਰਿਵਟ੍ਟਞ੍ਚ ਪਹਾਯ ਇਮਸ੍ਮਿਂ ਸਾਸਨੇ ਉਰਂ ਦਤ੍ਵਾ ਪਬ੍ਬਜ੍ਜਂ ਨਾਮ ਦੁਕ੍ਖਂ. ਦੁਰਭਿਰਮਨ੍ਤਿ ਏਵਂ ਪਬ੍ਬਜਿਤੇਨਾਪਿ ਭਿਕ੍ਖਾਚਰਿਯਾਯ ਜੀਵਿਤਵੁਤ੍ਤਿਂ ਘਟੇਨ੍ਤੇਨ ਅਪਰਿਮਾਣਸੀਲਕ੍ਖਨ੍ਧਗੋਪਨਧਮ੍ਮਾਨੁਧਮ੍ਮਪ੍ਪਟਿਪਤ੍ਤਿਪੂਰਣਵਸੇਨ ਅਭਿਰਮਿਤੁਂ ਦੁਕ੍ਖਂ. ਦੁਰਾਵਾਸਾਤਿ ਯਸ੍ਮਾ ਪਨ ਘਰਂ ਆਵਸਨ੍ਤੇਨ ਰਾਜੂਨਂ ਰਾਜਕਿਚ੍ਚਂ, ਇਸ੍ਸਰਾਨਂ ਇਸ੍ਸਰਕਿਚ੍ਚਂ ਵਹਿਤਬ੍ਬਂ, ਪਰਿਜਨਾ ਚੇਵ ਧਮ੍ਮਿਕਾ ਸਮਣਬ੍ਰਾਹ੍ਮਣਾ ਚ ਸਙ੍ਗਹਿਤਬ੍ਬਾ. ਏਵਂ ਸਨ੍ਤੇਪਿ ਘਰਾਵਾਸੋ ਛਿਦ੍ਦਘਟੋ ਵਿਯ ਮਹਾਸਮੁਦ੍ਦੋ ਵਿਯ ਚ ਦੁਪ੍ਪੂਰੋ. ਤਸ੍ਮਾ ਘਰਾਵਾਸਾ ਨਾਮੇਤੇ ਦੁਰਾਵਾਸਾ ਦੁਕ੍ਖਾ ਆਵਸਿਤੁਂ, ਤੇਨੇਵ ਕਾਰਣੇਨ ਦੁਕ੍ਖਾਤਿ ਅਤ੍ਥੋ. ਦੁਕ੍ਖੋ ਸਮਾਨਸਂਵਾਸੋਤਿ ਗਿਹਿਨੋ ਵਾ ਹਿ ਯੇ ਜਾਤਿਗੋਤ੍ਤਕੁਲਭੋਗੇਹਿ ਪਬ੍ਬਜਿਤਾ ਵਾ ਸੀਲਾਚਾਰਬਾਹੁਸਚ੍ਚਾਦੀਹਿ ਸਮਾਨਾਪਿ ਹੁਤ੍ਵਾ ‘‘ਕੋਸਿ ਤ੍ਵਂ, ਕੋਸ੍ਮਿ ਅਹ’’ਨ੍ਤਿਆਦੀਨਿ ਵਤ੍ਵਾ ਅਧਿਕਰਣਪਸੁਤਾ ਹੋਨ੍ਤਿ, ਤੇ ਅਸਮਾਨਾ ਨਾਮ, ਤੇਹਿ ਸਦ੍ਧਿਂ ਸਂਵਾਸੋ ਦੁਕ੍ਖੋਤਿ ਅਤ੍ਥੋ. ਦੁਕ੍ਖਾਨੁਪਤਿਤਦ੍ਧਗੂਤਿ ਯੇ ਵਟ੍ਟਸਙ੍ਖਾਤਂ ਅਦ੍ਧਾਨਂ ਪਟਿਪਨ੍ਨਤ੍ਤਾ ਅਦ੍ਧਗੂ, ਤੇ ਦੁਕ੍ਖੇ ਅਨੁਪਤਿਤਾਵ. ਤਸ੍ਮਾ ਨ ਚਦ੍ਧਗੂਤਿ ਯਸ੍ਮਾ ਦੁਕ੍ਖਾਨੁਪਤਿਤਭਾਵੋਪਿ ਦੁਕ੍ਖੋ ਅਦ੍ਧਗੂਭਾਵੋਪਿ, ਤਸ੍ਮਾ ਵਟ੍ਟਸਙ੍ਖਾਤਂ ਅਦ੍ਧਾਨਂ ਗਮਨਤਾਯ ਅਦ੍ਧਗੂ ਨ ਭਵੇਯ੍ਯ, ਵੁਤ੍ਤਪ੍ਪਕਾਰੇਨ ਦੁਕ੍ਖੇਨ ਅਨੁਪਤਿਤੋਪਿ ਨ ਭਵੇਯ੍ਯਾਤਿ ਅਤ੍ਥੋ.

ਦੇਸਨਾਵਸਾਨੇ ਸੋ ਭਿਕ੍ਖੁ ਪਞ੍ਚਸੁ ਠਾਨੇਸੁ ਦਸ੍ਸਿਤੇ ਦੁਕ੍ਖੇ ਨਿਬ੍ਬਿਨ੍ਦਨ੍ਤੋ ਪਞ੍ਚੋਰਮ੍ਭਾਗਿਯਾਨਿ ਪਞ੍ਚ ਉਦ੍ਧਮ੍ਭਾਗਿਯਾਨਿ ਸਂਯੋਜਨਾਨਿ ਪਦਾਲੇਤ੍ਵਾ ਅਰਹਤ੍ਤੇ ਪਤਿਟ੍ਠਹੀਤਿ.

ਵਜ੍ਜਿਪੁਤ੍ਤਕਭਿਕ੍ਖੁਵਤ੍ਥੁ ਛਟ੍ਠਂ.

੭. ਚਿਤ੍ਤਗਹਪਤਿਵਤ੍ਥੁ

ਸਦ੍ਧੋਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਚਿਤ੍ਤਗਹਪਤਿਂ ਆਰਬ੍ਭ ਕਥੇਸਿ. ਵਤ੍ਥੁ ਬਾਲਵਗ੍ਗੇ ‘‘ਅਸਨ੍ਤਂ ਭਾਵਨਮਿਚ੍ਛੇਯ੍ਯਾ’’ਤਿ ਗਾਥਾਵਣ੍ਣਨਾਯ ਵਿਤ੍ਥਾਰਿਤਂ. ਗਾਥਾਪਿ ਤਤ੍ਥੇਵ ਵੁਤ੍ਤਾ. ਵੁਤ੍ਤਞ੍ਹੇਤਂ ਤਤ੍ਥ (ਧ. ਪ. ਅਟ੍ਠ. ੧.੭੪) –

‘‘ਕਿਂ ਪਨ, ਭਨ੍ਤੇ, ਏਤਸ੍ਸ ਤੁਮ੍ਹਾਕਂ ਸਨ੍ਤਿਕਂ ਆਗਚ੍ਛਨ੍ਤਸ੍ਸੇਵਾਯਂ ਲਾਭਸਕ੍ਕਾਰੋ ਉਪ੍ਪਜ੍ਜਤਿ, ਉਦਾਹੁ ਅਞ੍ਞਤ੍ਥ ਗਚ੍ਛਨ੍ਤਸ੍ਸਾਪਿ ਉਪ੍ਪਜ੍ਜਤੀ’’ਤਿ. ‘‘ਆਨਨ੍ਦ, ਮਮ ਸਨ੍ਤਿਕਂ ਆਗਚ੍ਛਨ੍ਤਸ੍ਸਾਪਿ ਅਞ੍ਞਤ੍ਥ ਗਚ੍ਛਨ੍ਤਸ੍ਸਾਪਿ ਤਸ੍ਸ ਉਪ੍ਪਜ੍ਜਤੇਵ. ਅਯਞ੍ਹਿ ਉਪਾਸਕੋ ਸਦ੍ਧੋ ਪਸਨ੍ਨੋ ਸਮ੍ਪਨ੍ਨਸੀਲੋ, ਏਵਰੂਪੋ ਪੁਗ੍ਗਲੋ ਯਂ ਯਂ ਪਦੇਸਂ ਭਜਤਿ, ਤਤ੍ਥ ਤਤ੍ਥੇਵਸ੍ਸ ਲਾਭਸਕ੍ਕਾਰੋ ਨਿਬ੍ਬਤ੍ਤਤੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੩੦੩. ‘‘ਸਦ੍ਧੋ ਸੀਲੇਨ ਸਮ੍ਪਨ੍ਨੋ, ਯਸੋਭੋਗਸਮਪ੍ਪਿਤੋ;

ਯਂ ਯਂ ਪਦੇਸਂ ਭਜਤਿ, ਤਤ੍ਥ ਤਤ੍ਥੇਵ ਪੂਜਿਤੋ’’ਤਿ. (ਧ. ਪ. ਅਟ੍ਠ. ੧.੭੪);

ਤਤ੍ਥ ਸਦ੍ਧੋਤਿ ਲੋਕਿਯਲੋਕੁਤ੍ਤਰਸਦ੍ਧਾਯ ਸਮਨ੍ਨਾਗਤੋ. ਸੀਲੇਨਾਤਿ ਆਗਾਰਿਯਸੀਲਂ, ਅਨਾਗਾਰਿਯਸੀਲਨ੍ਤਿ ਦੁਵਿਧਂ ਸੀਲਂ. ਤੇਸੁ ਇਧ ਆਗਾਰਿਯਸੀਲਂ ਅਧਿਪ੍ਪੇਤਂ, ਤੇਨ ਸਮਨ੍ਨਾਗਤੋਤਿ ਅਤ੍ਥੋ. ਯਸੋਭੋਗਸਮਪ੍ਪਿਤੋਤਿ ਯਾਦਿਸੋ ਅਨਾਥਪਿਣ੍ਡਿਕਾਦੀਨਂ ਪਞ੍ਚਉਪਾਸਕਸਤਪਰਿਵਾਰਸਙ੍ਖਾਤੋ ਆਗਾਰਿਯਯਸੋ, ਤਾਦਿਸੇਨੇਵ ਯਸੇਨ ਧਨਧਞ੍ਞਾਦਿਕੋ ਚੇਵ ਸਤ੍ਤਵਿਧਅਰਿਯਧਨਸਙ੍ਖਾਤੋ ਚਾਤਿ ਦੁਵਿਧੋ ਭੋਗੋ, ਤੇਨ ਸਮਨ੍ਨਾਗਤੋਤਿ ਅਤ੍ਥੋ. ਯਂ ਯਂ ਪਦੇਸਨ੍ਤਿ ਪੁਰਤ੍ਥਿਮਾਦੀਸੁ ਦਿਸਾਸੁ ਏਵਰੂਪੋ ਕੁਲਪੁਤ੍ਤੋ ਯਂ ਯਂ ਪਦੇਸਂ ਭਜਤਿ, ਤਤ੍ਥ ਤਤ੍ਥ ਏਵਰੂਪੇਨ ਲਾਭਸਕ੍ਕਾਰੇਨ ਪੂਜਿਤੋਵ ਹੋਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਚਿਤ੍ਤਗਹਪਤਿਵਤ੍ਥੁ ਸਤ੍ਤਮਂ.

੮. ਚੂਲ਼ਸੁਭਦ੍ਦਾਵਤ੍ਥੁ

ਦੂਰੇ ਸਨ੍ਤੋਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਨਾਥਪਿਣ੍ਡਿਕਸ੍ਸ ਧੀਤਰਂ ਚੂਲ਼ਸੁਭਦ੍ਦਂ ਨਾਮ ਆਰਬ੍ਭ ਕਥੇਸਿ.

ਅਨਾਥਪਿਣ੍ਡਿਕਸ੍ਸ ਕਿਰ ਦਹਰਕਾਲਤੋ ਪਟ੍ਠਾਯ ਉਗ੍ਗਨਗਰਵਾਸੀ ਉਗ੍ਗੋ ਨਾਮ ਸੇਟ੍ਠਿਪੁਤ੍ਤੋ ਸਹਾਯਕੋ ਅਹੋਸਿ. ਤੇ ਏਕਾਚਰਿਯਕੁਲੇ ਸਿਪ੍ਪਂ ਉਗ੍ਗਣ੍ਹਨ੍ਤਾ ਅਞ੍ਞਮਞ੍ਞਂ ਕਤਿਕਂ ਕਰਿਂਸੁ ‘‘ਅਮ੍ਹਾਕਂ ਵਯਪ੍ਪਤ੍ਤਕਾਲੇ ਪੁਤ੍ਤਧੀਤਾਸੁ ਜਾਤਾਸੁ ਯੋ ਪੁਤ੍ਤਸ੍ਸ ਧੀਤਰਂ ਵਾਰੇਤਿ, ਤੇਨ ਤਸ੍ਸ ਧੀਤਾ ਦਾਤਬ੍ਬਾ’’ਤਿ. ਤੇ ਉਭੋਪਿ ਵਯਪ੍ਪਤ੍ਤਾ ਅਤ੍ਤਨੋ ਅਤ੍ਤਨੋ ਨਗਰੇ ਸੇਟ੍ਠਿਟ੍ਠਾਨੇ ਪਤਿਟ੍ਠਹਿਂਸੁ. ਅਥੇਕਸ੍ਮਿਂ ਸਮਯੇ ਉਗ੍ਗਸੇਟ੍ਠਿ ਵਣਿਜ੍ਜਂ ਪਯੋਜੇਨ੍ਤੋ ਪਞ੍ਚਹਿ ਸਕਟਸਤੇਹਿ ਸਾਵਤ੍ਥਿਂ ਅਗਮਾਸਿ. ਅਨਾਥਪਿਣ੍ਡਿਕੋ ਅਤ੍ਤਨੋ ਧੀਤਰਂ ਚੂਲ਼ਸੁਭਦ੍ਦਂ ਆਮਨ੍ਤੇਤ੍ਵਾ, ‘‘ਅਮ੍ਮ, ਪਿਤਾ ਤੇ ਉਗ੍ਗਸੇਟ੍ਠਿ ਨਾਮ ਆਗਤੋ, ਤਸ੍ਸ ਕਤ੍ਤਬ੍ਬਕਿਚ੍ਚਂ ਸਬ੍ਬਂ ਤਵ ਭਾਰੋ’’ਤਿ ਆਣਾਪੇਸਿ. ਸਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਤਸ੍ਸ ਆਗਤਦਿਵਸਤੋ ਪਟ੍ਠਾਯ ਸਹਤ੍ਥੇਨੇਵ ਸੂਪਬ੍ਯਞ੍ਜਨਾਦੀਨਿ ਸਮ੍ਪਾਦੇਤਿ, ਮਾਲਾਗਨ੍ਧਵਿਲੇਪਨਾਦੀਨਿ ਅਭਿਸਙ੍ਖਰੋਤਿ, ਭੋਜਨਕਾਲੇ ਤਸ੍ਸ ਨ੍ਹਾਨੋਦਕਂ ਪਟਿਯਾਦਾਪੇਤ੍ਵਾ ਨ੍ਹਾਨਕਾਲਤੋ ਪਟ੍ਠਾਯ ਸਬ੍ਬਕਿਚ੍ਚਾਨਿ ਸਾਧੁਕਂ ਕਰੋਤਿ.

ਉਗ੍ਗਸੇਟ੍ਠਿ ਤਸ੍ਸਾ ਆਚਾਰਸਮ੍ਪਤ੍ਤਿਂ ਦਿਸ੍ਵਾ ਪਸਨ੍ਨਚਿਤ੍ਤੋ ਏਕਦਿਵਸਂ ਅਨਾਥਪਿਣ੍ਡਿਕੇਨ ਸਦ੍ਧਿਂ ਸੁਖਕਥਾਯ ਸਨ੍ਨਿਸਿਨ੍ਨੋ ‘‘ਮਯਂ ਦਹਰਕਾਲੇ ਏਵਂ ਨਾਮ ਕਤਿਕਂ ਕਰਿਮ੍ਹਾ’’ਤਿ ਸਾਰੇਤ੍ਵਾ ਚੂਲ਼ਸੁਭਦ੍ਦਂ ਅਤ੍ਤਨੋ ਪੁਤ੍ਤਸ੍ਸਤ੍ਥਾਯ ਵਾਰੇਸਿ. ਸੋ ਪਨ ਪਕਤਿਯਾਵ ਮਿਚ੍ਛਾਦਿਟ੍ਠਿਕੋ. ਤਸ੍ਮਾ ਦਸਬਲਸ੍ਸ ਤਮਤ੍ਥਂ ਆਰੋਚੇਤ੍ਵਾ ਸਤ੍ਥਾਰਾ ਉਗ੍ਗਸੇਟ੍ਠਿਸ੍ਸੂਪਨਿਸ੍ਸਯਂ ਦਿਸ੍ਵਾ ਅਨੁਞ੍ਞਾਤੋ ਭਰਿਯਾਯ ਸਦ੍ਧਿਂ ਮਨ੍ਤੇਤ੍ਵਾ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਦਿਵਸਂ ਵਵਤ੍ਥਪੇਤ੍ਵਾ ਧੀਤਰਂ ਵਿਸਾਖਂ ਦਤ੍ਵਾ ਉਯ੍ਯੋਜੇਨ੍ਤੋ ਧਨਞ੍ਚਯਸੇਟ੍ਠਿ ਵਿਯ ਮਹਨ੍ਤਂ ਸਕ੍ਕਾਰਂ ਕਤ੍ਵਾ ਸੁਭਦ੍ਦਂ ਆਮਨ੍ਤੇਤ੍ਵਾ, ‘‘ਅਮ੍ਮ, ਸਸੁਰਕੁਲੇ ਵਸਨ੍ਤਿਯਾ ਨਾਮ ਅਨ੍ਤੋਅਗ੍ਗਿ ਬਹਿ ਨ ਨੀਹਰਿਤਬ੍ਬੋ’’ਤਿ (ਅ. ਨਿ. ਅਟ੍ਠ. ੧.੧.੨੫੯; ਧ. ਪ. ਅਟ੍ਠ. ੧.੫੨ ਵਿਸਾਖਾਵਤ੍ਥੁ) ਧਨਞ੍ਚਯਸੇਟ੍ਠਿਨਾ ਵਿਸਾਖਾਯ ਦਿਨ੍ਨਨਯੇਨੇਵ ਦਸ ਓਵਾਦੇ ਦਤ੍ਵਾ ‘‘ਸਚੇ ਮੇ ਗਤਟ੍ਠਾਨੇ ਧੀਤੁ ਦੋਸੋ ਉਪ੍ਪਜ੍ਜਤਿ, ਤੁਮ੍ਹੇਹਿ ਸੋਧੇਤਬ੍ਬੋ’’ਤਿ ਅਟ੍ਠ ਕੁਟੁਮ੍ਬਿਕੇ ਪਾਟਿਭੋਗੇ ਗਹੇਤ੍ਵਾ ਤਸ੍ਸਾ ਉਯ੍ਯੋਜਨਦਿਵਸੇ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਪੁਰਿਮਭਵੇ ਧੀਤਰਾ ਕਤਾਨਂ ਸੁਚਰਿਤਾਨਂ ਫਲਵਿਭੂਤਿਂ ਲੋਕਸ੍ਸ ਪਾਕਟਂ ਕਤ੍ਵਾ ਦਸ੍ਸੇਨ੍ਤੋ ਵਿਯ ਮਹਨ੍ਤੇਨ ਸਕ੍ਕਾਰੇਨ ਧੀਤਰਂ ਉਯ੍ਯੋਜੇਸਿ. ਤਸ੍ਸਾ ਅਨੁਪੁਬ੍ਬੇਨ ਉਗ੍ਗਨਗਰਂ ਪਤ੍ਤਕਾਲੇ ਸਸੁਰਕੁਲੇਨ ਸਦ੍ਧਿਂ ਮਹਾਜਨੋ ਪਚ੍ਚੁਗ੍ਗਮਨਮਕਾਸਿ.

ਸਾਪਿ ਅਤ੍ਤਨੋ ਸਿਰਿਵਿਭਵਂ ਪਾਕਟਂ ਕਾਤੁਂ ਵਿਸਾਖਾ ਵਿਯ ਸਕਲਨਗਰਸ੍ਸ ਅਤ੍ਤਾਨਂ ਦਸ੍ਸੇਨ੍ਤੀ ਰਥੇ ਠਤ੍ਵਾ ਨਗਰਂ ਪਵਿਸਿਤ੍ਵਾ ਨਾਗਰੇਹਿ ਪੇਸਿਤੇ ਪਣ੍ਣਾਕਾਰੇ ਗਹੇਤ੍ਵਾ ਅਨੁਰੂਪਵਸੇਨ ਤੇਸਂ ਤੇਸਂ ਪੇਸੇਨ੍ਤੀ ਸਕਲਨਗਰਂ ਅਤ੍ਤਨੋ ਗੁਣੇਹਿ ਏਕਾਬਦ੍ਧਮਕਾਸਿ. ਮਙ੍ਗਲਦਿਵਸਾਦੀਸੁ ਪਨਸ੍ਸਾ ਸਸੁਰੋ ਅਚੇਲਕਾਨਂ ਸਕ੍ਕਾਰਂ ਕਰੋਨ੍ਤੋ ‘‘ਆਗਨ੍ਤ੍ਵਾ ਅਮ੍ਹਾਕਂ ਸਮਣੇ ਵਨ੍ਦਤੂ’’ਤਿ ਪੇਸੇਸਿ. ਸਾ ਲਜ੍ਜਾਯ ਨਗ੍ਗੇ ਪਸ੍ਸਿਤੁਂ ਅਸਕ੍ਕੋਨ੍ਤੀ ਗਨ੍ਤੁਂ ਨ ਇਚ੍ਛਤਿ. ਸੋ ਪੁਨਪ੍ਪੁਨਂ ਪੇਸੇਤ੍ਵਾਪਿ ਤਾਯ ਪਟਿਕ੍ਖਿਤ੍ਤੋ ਕੁਜ੍ਝਿਤ੍ਵਾ ‘‘ਨੀਹਰਥ ਨ’’ਨ੍ਤਿ ਆਹ. ਸਾ ‘‘ਨ ਸਕ੍ਕਾ ਮਮ ਅਕਾਰਣੇਨ ਦੋਸਂ ਆਰੋਪੇਤੁ’’ਨ੍ਤਿ ਕੁਟੁਮ੍ਬਿਕੇ ਪਕ੍ਕੋਸਾਪੇਤ੍ਵਾ ਤਮਤ੍ਥਂ ਆਰੋਚੇਸਿ. ਤੇ ਤਸ੍ਸਾ ਨਿਦ੍ਦੋਸਭਾਵਂ ਞਤ੍ਵਾ ਸੇਟ੍ਠਿਂ ਸਞ੍ਞਾਪੇਸੁਂ. ਸੋ ‘‘ਅਯਂ ਮਮ ਸਮਣੇ ਅਹਿਰਿਕਾਤਿ ਨ ਵਨ੍ਦੀ’’ਤਿ ਭਰਿਯਾਯ ਆਰੋਚੇਸਿ. ਸਾ ‘‘ਕੀਦਿਸਾ ਨੁ ਖੋ ਇਮਿਸ੍ਸਾ ਸਮਣਾ, ਅਤਿਵਿਯ ਤੇਸਂ ਪਸਂਸਤੀ’’ਤਿ ਤਂ ਪਕ੍ਕੋਸਾਪੇਤ੍ਵਾ ਆਹ –

‘‘ਕੀਦਿਸਾ ਸਮਣਾ ਤੁਯ੍ਹਂ, ਬਾਲ਼੍ਹਂ ਖੋ ਨੇ ਪਸਂਸਸਿ;

ਕਿਂਸੀਲਾ ਕਿਂਸਮਾਚਾਰਾ, ਤਂ ਮੇ ਅਕ੍ਖਾਹਿ ਪੁਚ੍ਛਿਤਾ’’ਤਿ. (ਅ. ਨਿ. ਅਟ੍ਠ. ੨.੪.੨੪);

ਅਥਸ੍ਸਾ ਸੁਭਦ੍ਦਾ ਬੁਦ੍ਧਾਨਞ੍ਚੇਵ ਬੁਦ੍ਧਸਾਵਕਾਨਞ੍ਚ ਗੁਣੇ ਪਕਾਸੇਨ੍ਤੀ –

‘‘ਸਨ੍ਤਿਨ੍ਦ੍ਰਿਯਾ ਸਨ੍ਤਮਾਨਸਾ, ਸਨ੍ਤਂ ਤੇਸਂ ਗਤਂ ਠਿਤਂ;

ਓਕ੍ਖਿਤ੍ਤਚਕ੍ਖੂ ਮਿਤਭਾਣੀ, ਤਾਦਿਸਾ ਸਮਣਾ ਮਮ. (ਅ. ਨਿ. ਅਟ੍ਠ. ੨.੪.੨੪);

‘‘ਕਾਯਕਮ੍ਮਂ ਸੁਚਿ ਨੇਸਂ, ਵਾਚਾਕਮ੍ਮਂ ਅਨਾਵਿਲਂ;

ਮਨੋਕਮ੍ਮਂ ਸੁਵਿਸੁਦ੍ਧਂ, ਤਾਦਿਸਾ ਸਮਣਾ ਮਮ.

‘‘ਵਿਮਲਾ ਸਙ੍ਖਮੁਤ੍ਤਾਭਾ, ਸੁਦ੍ਧਾ ਅਨ੍ਤਰਬਾਹਿਰਾ;

ਪੁਣ੍ਣਾ ਸੁਦ੍ਧੇਹਿ ਧਮ੍ਮੇਹਿ, ਤਾਦਿਸਾ ਸਮਣਾ ਮਮ.

‘‘ਲਾਭੇਨ ਉਨ੍ਨਤੋ ਲੋਕੋ, ਅਲਾਭੇਨ ਚ ਓਨਤੋ;

ਲਾਭਾਲਾਭੇਨ ਏਕਟ੍ਠਾ, ਤਾਦਿਸਾ ਸਮਣਾ ਮਮ.

‘‘ਯਸੇਨ ਉਨ੍ਨਤੋ ਲੋਕੋ, ਅਯਸੇਨ ਚ ਓਨਤੋ;

ਯਸਾਯਸੇਨ ਏਕਟ੍ਠਾ, ਤਾਦਿਸਾ ਸਮਣਾ ਮਮ.

‘‘ਪਸਂਸਾਯੁਨ੍ਨਤੋ ਲੋਕੋ, ਨਿਨ੍ਦਾਯਾਪਿ ਚ ਓਨਤੋ;

ਸਮਾ ਨਿਨ੍ਦਾਪਸਂਸਾਸੁ, ਤਾਦਿਸਾ ਸਮਣਾ ਮਮ.

‘‘ਸੁਖੇਨ ਉਨ੍ਨਤੋ ਲੋਕੋ, ਦੁਕ੍ਖੇਨਾਪਿ ਚ ਓਨਤੋ;

ਅਕਮ੍ਪਾ ਸੁਖਦੁਕ੍ਖੇਸੁ, ਤਾਦਿਸਾ ਸਮਣਾ ਮਮਾ’’ਤਿ. –

ਏਵਮਾਦੀਹਿ ਵਚਨੇਹਿ ਸਸ੍ਸੁਂ ਤੋਸੇਸਿ.

ਅਥ ਨਂ ‘‘ਸਕ੍ਕਾ ਤਵ ਸਮਣੇ ਅਮ੍ਹਾਕਮ੍ਪਿ ਦਸ੍ਸੇਤੁ’’ਨ੍ਤਿ ਵਤ੍ਵਾ ‘‘ਸਕ੍ਕਾ’’ਤਿ ਵੁਤ੍ਤੇ ‘‘ਤੇਨ ਹਿ ਯਥਾ ਮਯਂ ਤੇ ਪਸ੍ਸਾਮ, ਤਥਾ ਕਰੋਹੀ’’ਤਿ ਵੁਤ੍ਤੇ ਸਾ ‘‘ਸਾਧੂ’’ਤਿ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਸਜ੍ਜੇਤ੍ਵਾ ਉਪਰਿਪਾਸਾਦਤਲੇ ਠਤ੍ਵਾ ਜੇਤਵਨਾਭਿਮੁਖੀ ਸਕ੍ਕਚ੍ਚਂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਬੁਦ੍ਧਗੁਣੇ ਆਵਜ੍ਜੇਤ੍ਵਾ ਗਨ੍ਧਵਾਸਪੁਪ੍ਫਧੁਮੇਹਿ ਪੂਜਂ ਕਤ੍ਵਾ, ‘‘ਭਨ੍ਤੇ, ਸ੍ਵਾਤਨਾਯ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਮਿ, ਇਮਿਨਾ ਮੇ ਸਞ੍ਞਾਣੇਨ ਸਤ੍ਥਾ ਨਿਮਨ੍ਤਿਤਭਾਵਂ ਜਾਨਾਤੂ’’ਤਿ ਸੁਮਨਪੁਪ੍ਫਾਨਂ ਅਟ੍ਠ ਮੁਟ੍ਠਿਯੋ ਆਕਾਸੇ ਖਿਪਿ. ਪੁਪ੍ਫਾਨਿ ਗਨ੍ਤ੍ਵਾ ਚਤੁਪਰਿਸਮਜ੍ਝੇ ਧਮ੍ਮਂ ਦੇਸੇਨ੍ਤਸ੍ਸ ਸਤ੍ਥੁਨੋ ਉਪਰਿ ਮਾਲਾਵਿਤਾਨਂ ਹੁਤ੍ਵਾ ਅਟ੍ਠਂਸੁ. ਤਸ੍ਮਿਂ ਖਣੇ ਅਨਾਥਪਿਣ੍ਡਿਕੋਪਿ ਧਮ੍ਮਕਥਂ ਸੁਤ੍ਵਾ ਸ੍ਵਾਤਨਾਯ ਸਤ੍ਥਾਰਂ ਨਿਮਨ੍ਤੇਸਿ. ਸਤ੍ਥਾ ‘‘ਅਧਿਵੁਤ੍ਥਂ ਮਯਾ, ਗਹਪਤਿ, ਸ੍ਵਾਤਨਾਯ ਭਤ੍ਤ’’ਨ੍ਤਿ ਵਤ੍ਵਾ, ‘‘ਭਨ੍ਤੇ, ਮਯਾ ਪੁਰੇਤਰਂ ਆਗਤੋ ਨਤ੍ਥਿ, ਕਸ੍ਸ ਨੁ ਖੋ ਵੋ ਅਧਿਵੁਤ੍ਥ’’ਨ੍ਤਿ ਵੁਤ੍ਤੇ ‘‘ਚੂਲ਼ਸੁਭਦ੍ਦਾਯ, ਗਹਪਤਿ, ਨਿਮਨ੍ਤਿਤੋ’’ਤਿ ਵਤ੍ਵਾ ‘‘ਨਨੁ, ਭਨ੍ਤੇ, ਚੂਲ਼ਸੁਭਦ੍ਦਾ ਦੂਰੇ ਵਸਤਿ ਇਤੋ ਵੀਸਤਿਯੋਜਨਸਤਮਤ੍ਥਕੇ’’ਤਿ ਵੁਤ੍ਤੇ, ‘‘ਆਮ ਗਹਪਤਿ, ਦੂਰੇ ਵਸਨ੍ਤਾਪਿ ਹਿ ਸਪ੍ਪੁਰਿਸਾ ਅਭਿਮੁਖੇ ਠਿਤਾ ਵਿਯ ਪਕਾਸੇਨ੍ਤੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੩੦੪. ‘‘ਦੂਰੇ ਸਨ੍ਤੋ ਪਕਾਸੇਨ੍ਤਿ, ਹਿਮਵਨ੍ਤੋਵ ਪਬ੍ਬਤੋ;

ਅਸਨ੍ਤੇਤ੍ਥ ਨ ਦਿਸ੍ਸਨ੍ਤਿ, ਰਤ੍ਤਿਂ ਖਿਤ੍ਤਾ ਯਥਾ ਸਰਾ’’ਤਿ.

ਤਤ੍ਥ ਸਨ੍ਤੋਤਿ ਰਾਗਾਦੀਨਂ ਸਨ੍ਤਤਾਯ ਬੁਦ੍ਧਾਦਯੋ ਸਨ੍ਤਾ ਨਾਮ. ਇਧ ਪਨ ਪੁਬ੍ਬਬੁਦ੍ਧੇਸੁ ਕਤਾਧਿਕਾਰਾ ਉਸ੍ਸਨ੍ਨਕੁਸਲਮੂਲਾ ਭਾਵਿਤਭਾਵਨਾ ਸਤ੍ਤਾ ਸਨ੍ਤੋਤਿ ਅਧਿਪ੍ਪੇਤਾ. ਪਕਾਸੇਨ੍ਤੀਤਿ ਦੂਰੇ ਠਿਤਾਪਿ ਬੁਦ੍ਧਾਨਂ ਞਾਣਪਥਂ ਆਗਚ੍ਛਨ੍ਤਾ ਪਾਕਟਾ ਹੋਨ੍ਤਿ. ਹਿਮਵਨ੍ਤੋ ਵਾਤਿ ਯਥਾ ਹਿ ਤਿਯੋਜਨਸਹਸ੍ਸਵਿਤ੍ਥਤੋ ਪਞ੍ਚਯੋਜਨਸਤੁਬ੍ਬੇਧੋ ਚਤੁਰਾਸੀਤਿਯਾ ਕੂਟਸਹਸ੍ਸੇਹਿ ਪਟਿਮਣ੍ਡਿਤੋ ਹਿਮਵਨ੍ਤਪਬ੍ਬਤੋ ਦੂਰੇ ਠਿਤਾਨਮ੍ਪਿ ਅਭਿਮੁਖੇ ਠਿਤੋ ਵਿਯ ਪਕਾਸੇਤਿ, ਏਵਂ ਪਕਾਸੇਨ੍ਤੀਤਿ ਅਤ੍ਥੋ. ਅਸਨ੍ਤੇਤ੍ਥਾਤਿ ਦਿਟ੍ਠਧਮ੍ਮਗਰੁਕਾ ਵਿਤਿਣ੍ਣਪਰਲੋਕਾ ਆਮਿਸਚਕ੍ਖੁਕਾ ਜੀਵਿਕਤ੍ਥਾਯ ਪਬ੍ਬਜਿਤਾ ਬਾਲਪੁਗ੍ਗਲਾ ਅਸਨ੍ਤੋ ਨਾਮ, ਤੇ ਏਤ੍ਥ ਬੁਦ੍ਧਾਨਂ ਦਕ੍ਖਿਣਸ੍ਸ ਜਾਣੁਮਣ੍ਡਲਸ੍ਸ ਸਨ੍ਤਿਕੇ ਨਿਸਿਨ੍ਨਾਪਿ ਨ ਦਿਸ੍ਸਨ੍ਤਿ ਨ ਪਞ੍ਞਾਯਨ੍ਤਿ. ਰਤ੍ਤਿਂ ਖਿਤ੍ਤਾਤਿ ਰਤ੍ਤਿਂ ਚਤੁਰਙ੍ਗਸਮਨ੍ਨਾਗਤੇ ਅਨ੍ਧਕਾਰੇ ਖਿਤ੍ਤਸਰਾ ਵਿਯ ਤਥਾਰੂਪਸ੍ਸ ਉਪਨਿਸ੍ਸਯਭੂਤਸ੍ਸ ਪੁਬ੍ਬਹੇਤੁਨੋ ਅਭਾਵੇਨ ਨ ਪਞ੍ਞਾਯਨ੍ਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਸਕ੍ਕੋ ਦੇਵਰਾਜਾ ‘‘ਸਤ੍ਥਾਰਾ ਸੁਭਦ੍ਦਾਯ ਨਿਮਨ੍ਤਨਂ ਅਧਿਵਾਸਿਤ’’ਨ੍ਤਿ ਞਤ੍ਵਾ ਵਿਸ੍ਸਕਮ੍ਮਦੇਵਪੁਤ੍ਤਂ ਆਣਾਪੇਸਿ – ‘‘ਪਞ੍ਚ ਕੂਟਾਗਾਰਸਤਾਨਿ ਨਿਮ੍ਮਿਨਿਤ੍ਵਾ ਸ੍ਵੇ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਉਗ੍ਗਨਗਰਂ ਨੇਹੀ’’ਤਿ. ਸੋ ਪੁਨਦਿਵਸੇ ਪਞ੍ਚਸਤਾਨਿ ਕੂਟਾਗਾਰਾਨਿ ਨਿਮ੍ਮਿਨਿਤ੍ਵਾ ਜੇਤਵਨਦ੍ਵਾਰੇ ਅਟ੍ਠਾਸਿ. ਸਤ੍ਥਾ ਉਚ੍ਚਿਨਿਤ੍ਵਾ ਵਿਸੁਦ੍ਧਖੀਣਾਸਵਾਨਂਯੇਵ ਪਞ੍ਚਸਤਾਨਿ ਆਦਾਯ ਸਪਰਿਵਾਰੋ ਕੂਟਾਗਾਰੇਸੁ ਨਿਸੀਦਿਤ੍ਵਾ ਉਗ੍ਗਨਗਰਂ ਅਗਮਾਸਿ. ਉਗ੍ਗਸੇਟ੍ਠਿਪਿ ਸਪਰਿਵਾਰੋ ਸੁਭਦ੍ਦਾਯ ਦਿਨ੍ਨਨਯੇਨੇਵ ਤਥਾਗਤਸ੍ਸ ਆਗਤਮਗ੍ਗਂ ਓਲੋਕੇਨ੍ਤੋ ਸਤ੍ਥਾਰਂ ਮਹਨ੍ਤੇਨ ਸਿਰਿਵਿਭਵੇਨ ਆਗਚ੍ਛਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਮਾਲਾਦੀਹਿ ਮਹਨ੍ਤਂ ਸਕ੍ਕਾਰਂ ਕਰੋਨ੍ਤੋ ਸਪਰਿਵਾਰੋ ਸਮ੍ਪਟਿਚ੍ਛਿਤ੍ਵਾ ਵਨ੍ਦਿਤ੍ਵਾ ਮਹਾਦਾਨਂ ਦਤ੍ਵਾ ਪੁਨਪ੍ਪੁਨਂ ਨਿਮਨ੍ਤੇਤ੍ਵਾ ਸਤ੍ਤਾਹਂ ਮਹਾਦਾਨਂ ਅਦਾਸਿ. ਸਤ੍ਥਾਪਿਸ੍ਸ ਸਪ੍ਪਾਯਂ ਸਲ੍ਲਕ੍ਖੇਤ੍ਵਾ ਧਮ੍ਮਂ ਦੇਸੇਸਿ. ਤਂ ਆਦਿਂ ਕਤ੍ਵਾ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਸਤ੍ਥਾ ‘‘ਚੂਲ਼ਸੁਭਦ੍ਦਾਯ ਅਨੁਗ੍ਗਹਣਤ੍ਥਂ ਤ੍ਵਂ ਇਧੇਵ ਹੋਹੀ’’ਤਿ ਅਨੁਰੁਦ੍ਧਤ੍ਥੇਰਂ ਨਿਵਤ੍ਤਾਪੇਤ੍ਵਾ ਸਾਵਤ੍ਥਿਮੇਵ ਅਗਮਾਸਿ. ਤਤੋ ਪਟ੍ਠਾਯ ਤਂ ਨਗਰਂ ਸਦ੍ਧਾਸਮ੍ਪਨ੍ਨਂ ਅਹੋਸੀਤਿ.

ਚੂਲ਼ਸੁਭਦ੍ਦਾਵਤ੍ਥੁ ਅਟ੍ਠਮਂ.

੯. ਏਕਵਿਹਾਰਿਤ੍ਥੇਰਵਤ੍ਥੁ

ਏਕਾਸਨਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਵਿਹਾਰਿਤ੍ਥੇਰਂ ਨਾਮ ਆਰਬ੍ਭ ਕਥੇਸਿ.

ਸੋ ਕਿਰ ਥੇਰੋ ਏਕਕੋਵ ਸੇਯ੍ਯਂ ਕਪ੍ਪੇਤਿ, ਏਕਕੋਵ ਨਿਸੀਦਤਿ, ਏਕਕੋਵ ਚਙ੍ਕਮਤਿ, ਏਕਕੋਵ ਤਿਟ੍ਠਤੀਤਿ ਚਤੁਪਰਿਸਨ੍ਤਰੇ ਪਾਕਟੋ ਅਹੋਸਿ. ਅਥ ਨਂ ਭਿਕ੍ਖੂ, ‘‘ਭਨ੍ਤੇ, ਏਵਰੂਪੋ ਨਾਮਾਯਂ ਥੇਰੋ’’ਤਿ ਤਥਾਗਤਸ੍ਸਾਰੋਚੇਸੁਂ. ਸਤ੍ਥਾ ‘‘ਸਾਧੁ ਸਾਧੂ’’ਤਿ ਤਸ੍ਸ ਸਾਧੁਕਾਰਂ ਦਤ੍ਵਾ ‘‘ਭਿਕ੍ਖੁਨਾ ਨਾਮ ਪਵਿਵਿਤ੍ਤੇਨ ਭਵਿਤਬ੍ਬ’’ਨ੍ਤਿ ਵਿਵੇਕੇ ਆਨਿਸਂਸਂ ਕਥੇਤ੍ਵਾ ਇਮਂ ਗਾਥਮਾਹ –

੩੦੫. ‘‘ਏਕਾਸਨਂ ਏਕਸੇਯ੍ਯਂ, ਏਕੋ ਚਰਮਤਨ੍ਦਿਤੋ;

ਏਕੋ ਦਮਯਮਤ੍ਤਾਨਂ, ਵਨਨ੍ਤੇ ਰਮਿਤੋ ਸਿਯਾ’’ਤਿ.

ਤਤ੍ਥ ਏਕਾਸਨਂ ਏਕਸੇਯ੍ਯਨ੍ਤਿ ਭਿਕ੍ਖੁਸਹਸ੍ਸਮਜ੍ਝੇਪਿ ਮੂਲਕਮ੍ਮਟ੍ਠਾਨਂ ਅਵਿਜਹਿਤ੍ਵਾ ਤੇਨੇਵ ਮਨਸਿਕਾਰੇਨ ਨਿਸਿਨ੍ਨਸ੍ਸ ਆਸਨਂ ਏਕਾਸਨਂ ਨਾਮ. ਲੋਹਪਾਸਾਦਸਦਿਸੇਪਿ ਚ ਪਾਸਾਦੇ ਭਿਕ੍ਖੁਸਹਸ੍ਸਮਜ੍ਝੇਪਿ ਪਞ੍ਞਤ੍ਤੇ ਵਿਚਿਤ੍ਰਪਚ੍ਚਤ੍ਥਰਣੂਪਧਾਨੇ ਮਹਾਰਹੇ ਸਯਨੇ ਸਤਿਂ ਉਪਟ੍ਠਪੇਤ੍ਵਾ ਦਕ੍ਖਿਣੇਨ ਪਸ੍ਸੇਨ ਮੂਲਕਮ੍ਮਟ੍ਠਾਨਮਨਸਿਕਾਰੇਨ ਨਿਪਨ੍ਨਸ੍ਸ ਭਿਕ੍ਖੁਨੋ ਸੇਯ੍ਯਾ ਏਕਸੇਯ੍ਯਾ ਨਾਮ. ਏਵਰੂਪਂ ਏਕਾਸਨਞ੍ਚ ਏਕਸੇਯ੍ਯਞ੍ਚ ਭਜੇਥਾਤਿ ਅਤ੍ਥੋ. ਅਤਨ੍ਦਿਤੋਤਿ ਜਙ੍ਘਬਲਂ ਨਿਸ੍ਸਾਯ ਜੀਵਿਤਕਪ੍ਪਨੇਨ ਅਕੁਸੀਤੋ ਹੁਤ੍ਵਾ ਸਬ੍ਬੀਰਿਯਾਪਥੇਸੁ ਏਕਕੋਵ ਚਰਨ੍ਤੋਤਿ ਅਤ੍ਥੋ. ਏਕੋ ਦਮਯਨ੍ਤਿ ਰਤ੍ਤਿਟ੍ਠਾਨਾਦੀਸੁ ਕਮ੍ਮਟ੍ਠਾਨਂ ਅਨੁਯੁਞ੍ਜਿਤ੍ਵਾ ਮਗ੍ਗਫਲਾਧਿਗਮਵਸੇਨ ਏਕੋਵ ਹੁਤ੍ਵਾ ਅਤ੍ਤਾਨਂ ਦਮੇਨ੍ਤੋਤਿ ਅਤ੍ਥੋ. ਵਨਨ੍ਤੇ ਰਮਿਤੋ ਸਿਯਾਤਿ ਏਵਂ ਅਤ੍ਤਾਨਂ ਦਮੇਨ੍ਤੋ ਇਤ੍ਥਿਪੁਰਿਸਸਦ੍ਦਾਦੀਹਿ ਪਵਿਵਿਤ੍ਤੇ ਵਨਨ੍ਤੇਯੇਵ ਅਭਿਰਮਿਤੋ ਭਵੇਯ੍ਯ. ਨ ਹਿ ਸਕ੍ਕਾ ਆਕਿਣ੍ਣਵਿਹਾਰਿਨਾ ਏਵਂ ਅਤ੍ਤਾਨਂ ਦਮੇਤੁਨ੍ਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੁ. ਤਤੋ ਪਟ੍ਠਾਯ ਮਹਾਜਨੋ ਏਕਵਿਹਾਰਿਕਮੇਵ ਪਤ੍ਥੇਸੀਤਿ.

ਏਕਵਿਹਾਰਿਤ੍ਥੇਰਵਤ੍ਥੁ ਨਵਮਂ.

ਪਕਿਣ੍ਣਕਵਗ੍ਗਵਣ੍ਣਨਾ ਨਿਟ੍ਠਿਤਾ.

ਏਕਵੀਸਤਿਮੋ ਵਗ੍ਗੋ.