੧੯. ਧਮ੍ਮਟ੍ਠਵਗ੍ਗੋ

੧. ਵਿਨਿਚ੍ਛਯਮਹਾਮਤ੍ਤਵਤ੍ਥੁ

ਨ ਤੇਨ ਹੋਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਵਿਨਿਚ੍ਛਯਮਹਾਮਤ੍ਤੇ ਆਰਬ੍ਭ ਕਥੇਸਿ.

ਏਕਦਿਵਸਞ੍ਹਿ ਭਿਕ੍ਖੂ ਸਾਵਤ੍ਥਿਯਂ ਉਤ੍ਤਰਦ੍ਵਾਰਗਾਮੇ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਪਟਿਕ੍ਕਨ੍ਤਾ ਨਗਰਮਜ੍ਝੇਨ ਵਿਹਾਰਂ ਆਗਚ੍ਛਨ੍ਤਿ. ਤਸ੍ਮਿਂ ਖਣੇ ਮੇਘੋ ਉਟ੍ਠਾਯ ਪਾਵਸ੍ਸਿ. ਤੇ ਸਮ੍ਮੁਖਾਗਤਂ ਵਿਨਿਚ੍ਛਯਸਾਲਂ ਪਵਿਸਿਤ੍ਵਾ ਵਿਨਿਚ੍ਛਯਮਹਾਮਤ੍ਤੇ ਲਞ੍ਜਂ ਗਹੇਤ੍ਵਾ ਸਾਮਿਕੇ ਅਸਾਮਿਕੇ ਕਰੋਨ੍ਤੇ ਦਿਸ੍ਵਾ ‘‘ਅਹੋ ਇਮੇ ਅਧਮ੍ਮਿਕਾ, ਮਯਂ ਪਨ ‘ਇਮੇ ਧਮ੍ਮੇਨ ਵਿਨਿਚ੍ਛਯਂ ਕਰੋਨ੍ਤੀ’ਤਿ ਸਞ੍ਞਿਨੋ ਅਹੁਮ੍ਹਾ’’ਤਿ ਚਿਨ੍ਤੇਤ੍ਵਾ ਵਸ੍ਸੇ ਵਿਗਤੇ ਵਿਹਾਰਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨਾ ਤਮਤ੍ਥਂ ਆਰੋਚੇਸੁਂ. ਸਤ੍ਥਾ ‘‘ਨ, ਭਿਕ੍ਖਵੇ, ਛਨ੍ਦਾਦਿਵਸਿਕਾ ਹੁਤ੍ਵਾ ਸਾਹਸੇਨ ਅਤ੍ਥਂ ਵਿਨਿਚ੍ਛਿਨਨ੍ਤਾ ਧਮ੍ਮਟ੍ਠਾ ਨਾਮ ਹੋਨ੍ਤਿ, ਅਪਰਾਧਂ ਪਨ ਅਨੁਵਿਜ੍ਜਿਤ੍ਵਾ ਅਪਰਾਧਾਨੁਰੂਪਂ ਅਸਾਹਸੇਨ ਵਿਨਿਚ੍ਛਯਂ ਕਰੋਨ੍ਤਾ ਏਵ ਧਮ੍ਮਟ੍ਠਾ ਨਾਮ ਹੋਨ੍ਤੀ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੨੫੬. ‘‘ਨ ਤੇਨ ਹੋਤਿ ਧਮ੍ਮਟ੍ਠੋ, ਯੇਨਤ੍ਥਂ ਸਾਹਸਾ ਨਯੇ;

ਯੋ ਚ ਅਤ੍ਥਂ ਅਨਤ੍ਥਞ੍ਚ, ਉਭੋ ਨਿਚ੍ਛੇਯ੍ਯ ਪਣ੍ਡਿਤੋ.

੨੫੭. ‘‘ਅਸਾਹਸੇਨ ਧਮ੍ਮੇਨ, ਸਮੇਨ ਨਯਤੀ ਪਰੇ;

ਧਮ੍ਮਸ੍ਸ ਗੁਤ੍ਤੋ ਮੇਧਾਵੀ, ਧਮ੍ਮਟ੍ਠੋਤਿ ਪਵੁਚ੍ਚਤੀ’’ਤਿ.

ਤਤ੍ਥ ਤੇਨਾਤਿ ਏਤ੍ਤਕੇਨੇਵ ਕਾਰਣੇਨ. ਧਮ੍ਮਟ੍ਠੋਤਿ ਰਾਜਾ ਹਿ ਅਤ੍ਤਨੋ ਕਾਤਬ੍ਬੇ ਵਿਨਿਚ੍ਛਯਧਮ੍ਮੇ ਠਿਤੋਪਿ ਧਮ੍ਮਟ੍ਠੋ ਨਾਮ ਨ ਹੋਤਿ. ਯੇਨਾਤਿ ਯੇਨ ਕਾਰਣੇਨ. ਅਤ੍ਥਨ੍ਤਿ ਓਤਿਣ੍ਣਂ ਵਿਨਿਚ੍ਛਿਤਬ੍ਬਂ ਅਤ੍ਥਂ. ਸਾਹਸਾ ਨਯੇਤਿ ਛਨ੍ਦਾਦੀਸੁ ਪਤਿਟ੍ਠਿਤੋ ਸਾਹਸੇਨ ਮੁਸਾਵਾਦੇਨ ਵਿਨਿਚ੍ਛੇਯ੍ਯ. ਯੋ ਹਿ ਛਨ੍ਦੇ ਪਤਿਟ੍ਠਾਯ ਞਾਤੀਤਿ ਵਾ ਮਿਤ੍ਤੋਤਿ ਵਾ ਮੁਸਾ ਵਤ੍ਵਾ ਅਸਾਮਿਕਮੇਵ ਸਾਮਿਕਂ ਕਰੋਤਿ, ਦੋਸੇ ਪਤਿਟ੍ਠਾਯ ਅਤ੍ਤਨੋ ਵੇਰੀਨਂ ਮੁਸਾ ਵਤ੍ਵਾ ਸਾਮਿਕਮੇਵ ਅਸਾਮਿਕਂ ਕਰੋਤਿ, ਮੋਹੇ ਪਤਿਟ੍ਠਾਯ ਲਞ੍ਜਂ ਗਹੇਤ੍ਵਾ ਵਿਨਿਚ੍ਛਯਕਾਲੇ ਅਞ੍ਞਵਿਹਿਤੋ ਵਿਯ ਇਤੋ ਚਿਤੋ ਚ ਓਲੋਕੇਨ੍ਤੋ ਮੁਸਾ ਵਤ੍ਵਾ ‘‘ਇਮਿਨਾ ਜਿਤਂ, ਅਯਂ ਪਰਾਜਿਤੋ’’ਤਿ ਪਰਂ ਨੀਹਰਤਿ, ਭਯੇ ਪਤਿਟ੍ਠਾਯ ਕਸ੍ਸਚਿਦੇਵ ਇਸ੍ਸਰਜਾਤਿਕਸ੍ਸ ਪਰਾਜਯਂ ਪਾਪੁਣਨ੍ਤਸ੍ਸਾਪਿ ਜਯਂ ਆਰੋਪੇਤਿ, ਅਯਂ ਸਾਹਸੇਨ ਅਤ੍ਥਂ ਨੇਤਿ ਨਾਮ. ਏਸੋ ਧਮ੍ਮਟ੍ਠੋ ਨਾਮ ਨ ਹੋਤੀਤਿ ਅਤ੍ਥੋ. ਅਤ੍ਥਂ ਅਨਤ੍ਥਞ੍ਚਾਤਿ ਭੂਤਞ੍ਚ ਅਭੂਤਞ੍ਚ ਕਾਰਣਂ. ਉਭੋ ਨਿਚ੍ਛੇਯ੍ਯਾਤਿ ਯੋ ਪਨ ਪਣ੍ਡਿਤੋ ਉਭੋ ਅਤ੍ਥਾਨਤ੍ਥੇ ਵਿਨਿਚ੍ਛਿਨਿਤ੍ਵਾ ਵਦਤਿ. ਅਸਾਹਸੇਨਾਤਿ ਅਮੁਸਾਵਾਦੇਨ. ਧਮ੍ਮੇਨਾਤਿ ਵਿਨਿਚ੍ਛਯਧਮ੍ਮੇਨ, ਨ ਛਨ੍ਦਾਦਿਵਸੇਨ. ਸਮੇਨਾਤਿ ਅਪਰਾਧਾਨੁਰੂਪੇਨੇਵ ਪਰੇ ਨਯਤਿ, ਜਯਂ ਵਾ ਪਰਾਜਯਂ ਵਾ ਪਾਪੇਤਿ. ਧਮ੍ਮਸ੍ਸ ਗੁਤ੍ਤੋਤਿ ਸੋ ਧਮ੍ਮਗੁਤ੍ਤੋ ਧਮ੍ਮਰਕ੍ਖਿਤੋ ਧਮ੍ਮੋਜਪਞ੍ਞਾਯ ਸਮਨ੍ਨਾਗਤੋ ਮੇਧਾਵੀ ਵਿਨਿਚ੍ਛਯਧਮ੍ਮੇ ਠਿਤਤ੍ਤਾ ਧਮ੍ਮਟ੍ਠੋਤਿ ਪਵੁਚ੍ਚਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਵਿਨਿਚ੍ਛਯਮਹਾਮਤ੍ਤਵਤ੍ਥੁ ਪਠਮਂ.

੨. ਛਬ੍ਬਗ੍ਗਿਯਵਤ੍ਥੁ

ਨ ਤੇਨ ਪਣ੍ਡਿਤੋ ਹੋਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਛਬ੍ਬਗ੍ਗਿਯੇ ਆਰਬ੍ਭ ਕਥੇਸਿ.

ਤੇ ਕਿਰ ਵਿਹਾਰੇਪਿ ਗਾਮੇਪਿ ਭਤ੍ਤਗ੍ਗਂ ਆਕੁਲਂ ਕਰੋਨ੍ਤਾ ਵਿਚਰਨ੍ਤਿ. ਅਥੇਕਦਿਵਸੇ ਭਿਕ੍ਖੂ ਗਾਮੇ ਭਤ੍ਤਕਿਚ੍ਚਂ ਕਤ੍ਵਾ ਆਗਤੇ ਦਹਰੇ ਸਾਮਣੇਰੇ ਚ ਪੁਚ੍ਛਿਂਸੁ – ‘‘ਕੀਦਿਸਂ, ਆਵੁਸੋ, ਭਤ੍ਤਗ੍ਗ’’ਨ੍ਤਿ? ਭਨ੍ਤੇ, ਮਾ ਪੁਚ੍ਛਥ, ਛਬ੍ਬਗ੍ਗਿਯਾ ‘‘ਮਯਮੇਵ ਵਿਯਤ੍ਤਾ, ਮਯਮੇਵ ਪਣ੍ਡਿਤਾ, ਇਮੇ ਪਹਰਿਤ੍ਵਾ ਸੀਸੇ ਕਚਵਰਂ ਆਕਿਰਿਤ੍ਵਾ ਨੀਹਰਿਸ੍ਸਾਮਾ’’ਤਿ ਵਤ੍ਵਾ ਅਮ੍ਹੇ ਪਿਟ੍ਠਿਯਂ ਗਹੇਤ੍ਵਾ ਕਚਵਰਂ ਓਕਿਰਨ੍ਤਾ ਭਤ੍ਤਗ੍ਗਂ ਆਕੁਲਂ ਅਕਂਸੂਤਿ. ਭਿਕ੍ਖੂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਆਰੋਚੇਸੁਂ. ਸਤ੍ਥਾ ‘‘ਨਾਹਂ, ਭਿਕ੍ਖਵੇ, ਬਹੁਂ ਭਾਸਿਤ੍ਵਾ ਪਰੇ ਵਿਹੇਠਯਮਾਨਂ ‘ਪਣ੍ਡਿਤੋ’ਤਿ ਵਦਾਮਿ, ਖੇਮਿਨਂ ਪਨ ਅਵੇਰੀਨਂ ਅਭਯਮੇਵ ਪਣ੍ਡਿਤੋਤਿ ਵਦਾਮੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੫੮. ‘‘ਨ ਤੇਨ ਪਣ੍ਡਿਤੋ ਹੋਤਿ, ਯਾਵਤਾ ਬਹੁ ਭਾਸਤਿ;

ਖੇਮੀ ਅਵੇਰੀ ਅਭਯੋ, ਪਣ੍ਡਿਤੋਤਿ ਪਵੁਚ੍ਚਤੀ’’ਤਿ.

ਤਤ੍ਥ ਯਾਵਤਾਤਿ ਯਤ੍ਤਕੇਨ ਕਾਰਣੇਨ ਸਙ੍ਘਮਜ੍ਝਾਦੀਸੁ ਬਹੁਂ ਕਥੇਤਿ, ਤੇਨ ਪਣ੍ਡਿਤੋ ਨਾਮ ਨ ਹੋਤਿ. ਯੋ ਪਨ ਸਯਂ ਖੇਮੀ ਪਞ੍ਚਨ੍ਨਂ ਵੇਰਾਨਂ ਅਭਾਵੇਨ ਅਵੇਰੀ ਨਿਬ੍ਭਯੋ, ਯਂ ਵਾ ਆਗਮ੍ਮ ਮਹਾਜਨਸ੍ਸ ਭਯਂ ਨ ਹੋਤਿ, ਸੋ ਪਣ੍ਡਿਤੋ ਨਾਮ ਹੋਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਛਬ੍ਬਗ੍ਗਿਯਵਤ੍ਥੁ ਦੁਤਿਯਂ.

੩. ਏਕੁਦਾਨਖੀਣਾਸਵਤ੍ਥੇਰਵਤ੍ਥੁ

ਨ ਤਾਵਤਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕੁਦਾਨਤ੍ਥੇਰਂ ਨਾਮ ਖੀਣਾਸਵਂ ਆਰਬ੍ਭ ਕਥੇਸਿ.

ਸੋ ਕਿਰ ਏਕਕੋਵ ਏਕਸ੍ਮਿਂ ਵਨਸਣ੍ਡੇ ਵਿਹਰਤਿ, ਏਕਮੇਵਸ੍ਸ ਉਦਾਨਂ ਪਗੁਣਂ –

‘‘ਅਧਿਚੇਤਸੋ ਅਪ੍ਪਮਜ੍ਜਤੋ,

ਮੁਨਿਨੋ ਮੋਨਪਥੇਸੁ ਸਿਕ੍ਖਤੋ;

ਸੋਕਾ ਨ ਭਵਨ੍ਤਿ ਤਾਦਿਨੋ,

ਉਪਸਨ੍ਤਸ੍ਸ ਸਦਾ ਸਤੀਮਤੋ’’ਤਿ. (ਪਾਚਿ. ੧੫੩; ਉਦਾ. ੩੭);

ਸੋ ਕਿਰ ਉਪੋਸਥਦਿਵਸੇਸੁ ਸਯਮੇਵ ਧਮ੍ਮਸ੍ਸਵਨਂ ਘੋਸੇਤ੍ਵਾ ਇਮਂ ਗਾਥਂ ਵਦਤਿ. ਪਥਵਿਉਨ੍ਦ੍ਰਿਯਨਸਦ੍ਦੋ ਵਿਯ ਦੇਵਤਾਨਂ ਸਾਧੁਕਾਰਸਦ੍ਦੋ ਹੋਤਿ. ਅਥੇਕਸ੍ਮਿਂ ਉਪੋਸਥਦਿਵਸੇ ਪਞ੍ਚਪਞ੍ਚਸਤਪਰਿਵਾਰਾ ਦ੍ਵੇ ਤਿਪਿਟਕਧਰਾ ਭਿਕ੍ਖੂ ਤਸ੍ਸ ਵਸਨਟ੍ਠਾਨਂ ਅਗਮਂਸੁ. ਸੋ ਤੇ ਦਿਸ੍ਵਾਵ ਤੁਟ੍ਠਮਾਨਸੋ ‘‘ਸਾਧੁ ਵੋ ਕਤਂ ਇਧ ਆਗਚ੍ਛਨ੍ਤੇਹਿ, ਅਜ੍ਜ ਮਯਂ ਤੁਮ੍ਹਾਕਂ ਧਮ੍ਮਂ ਸੁਣਿਸ੍ਸਾਮਾ’’ਤਿ ਆਹ. ਅਤ੍ਥਿ ਪਨ, ਆਵੁਸੋ, ਇਧ ਧਮ੍ਮਂ ਸੋਤੁਕਾਮਾਤਿ. ਅਤ੍ਥਿ, ਭਨ੍ਤੇ, ਅਯਂ ਵਨਸਣ੍ਡੋ ਧਮ੍ਮਸ੍ਸਵਨਦਿਵਸੇ ਦੇਵਤਾਨਂ ਸਾਧੁਕਾਰਸਦ੍ਦੇਨ ਏਕਨਿਨ੍ਨਾਦੋ ਹੋਤੀਤਿ. ਤੇਸੁ ਏਕੋ ਤਿਪਿਟਕਧਰੋ ਧਮ੍ਮਂ ਓਸਾਰੇਸਿ, ਏਕੋ ਕਥੇਸਿ. ਏਕਦੇਵਤਾਪਿ ਸਾਧੁਕਾਰਂ ਨਾਦਾਸਿ. ਤੇ ਆਹਂਸੁ – ‘‘ਤ੍ਵਂ, ਆਵੁਸੋ, ਧਮ੍ਮਸ੍ਸਵਨਦਿਵਸੇ ਇਮਸ੍ਮਿਂ ਵਨਸਣ੍ਡੇ ਦੇਵਤਾ ਮਹਨ੍ਤੇਨ ਸਦ੍ਦੇਨ ਸਾਧੁਕਾਰਂ ਦੇਨ੍ਤੀਤਿ ਵਦੇਸਿ, ਕਿਂ ਨਾਮੇਤ’’ਨ੍ਤਿ. ਭਨ੍ਤੇ, ਅਞ੍ਞੇਸੁ ਦਿਵਸੇਸੁ ਸਾਧੁਕਾਰਸਦ੍ਦੇਨ ਏਕਨਿਨ੍ਨਾਦੋ ਏਵ ਹੋਤਿ, ਨ ਅਜ੍ਜ ਪਨ ਜਾਨਾਮਿ ‘‘ਕਿਮੇਤ’’ਨ੍ਤਿ. ‘‘ਤੇਨ ਹਿ, ਆਵੁਸੋ, ਤ੍ਵਂ ਤਾਵ ਧਮ੍ਮਂ ਕਥੇਹੀ’’ਤਿ. ਸੋ ਬੀਜਨਿਂ ਗਹੇਤ੍ਵਾ ਆਸਨੇ ਨਿਸਿਨ੍ਨੋ ਤਮੇਵ ਗਾਥਂ ਵਦੇਸਿ. ਦੇਵਤਾ ਮਹਨ੍ਤੇਨ ਸਦ੍ਦੇਨ ਸਾਧੁਕਾਰਮਦਂਸੁ. ਅਥ ਨੇਸਂ ਪਰਿਵਾਰਾ ਭਿਕ੍ਖੂ ਉਜ੍ਝਾਯਿਂਸੁ ‘‘ਇਮਸ੍ਮਿਂ ਵਨਸਣ੍ਡੇ ਦੇਵਤਾ ਮੁਖੋਲੋਕਨੇਨ ਸਾਧੁਕਾਰਂ ਦਦਨ੍ਤਿ, ਤਿਪਿਟਕਧਰਭਿਕ੍ਖੂਸੁ ਏਤ੍ਤਕਂ ਭਣਨ੍ਤੇਸੁਪਿ ਕਿਞ੍ਚਿ ਪਸਂਸਨਮਤ੍ਤਮ੍ਪਿ ਅਵਤ੍ਵਾ ਏਕੇਨ ਮਹਲ੍ਲਕਤ੍ਥੇਰੇਨ ਏਕਗਾਥਾਯ ਕਥਿਤਾਯ ਮਹਾਸਦ੍ਦੇਨ ਸਾਧੁਕਾਰਂ ਦਦਨ੍ਤੀ’’ਤਿ. ਤੇਪਿ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਤਮਤ੍ਥਂ ਆਰੋਚੇਸੁਂ.

ਸਤ੍ਥਾ ‘‘ਨਾਹਂ, ਭਿਕ੍ਖਵੇ, ਯੋ ਬਹੁਮ੍ਪਿ ਉਗ੍ਗਣ੍ਹਤਿ ਵਾ ਭਾਸਤਿ ਵਾ, ਤਂ ਧਮ੍ਮਧਰੋਤਿ ਵਦਾਮਿ. ਯੋ ਪਨ ਏਕਮ੍ਪਿ ਗਾਥਂ ਉਗ੍ਗਣ੍ਹਿਤ੍ਵਾ ਸਚ੍ਚਾਨਿ ਪਟਿਵਿਜ੍ਝਤਿ, ਅਯਂ ਧਮ੍ਮਧਰੋ ਨਾਮਾ’’ਤਿ ਵਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੨੫੯. ‘‘ਨ ਤਾਵਤਾ ਧਮ੍ਮਧਰੋ, ਯਾਵਤਾ ਬਹੁ ਭਾਸਤਿ;

ਯੋ ਚ ਅਪ੍ਪਮ੍ਪਿ ਸੁਤ੍ਵਾਨ, ਧਮ੍ਮਂ ਕਾਯੇਨ ਪਸ੍ਸਤਿ;

ਸ ਵੇ ਧਮ੍ਮਧਰੋ ਹੋਤਿ, ਯੋ ਧਮ੍ਮਂ ਨਪ੍ਪਮਜ੍ਜਤੀ’’ਤਿ.

ਤਤ੍ਥ ਯਾਵਤਾਤਿ ਯਤ੍ਤਕੇਨ ਉਗ੍ਗਹਣਧਾਰਣਵਾਚਨਾਦਿਨਾ ਕਾਰਣੇਨ ਬਹੁਂ ਭਾਸਤਿ, ਤਾਵਤ੍ਤਕੇਨ ਧਮ੍ਮਧਰੋ ਨ ਹੋਤਿ, ਵਂਸਾਨੁਰਕ੍ਖਕੋ ਪਨ ਪਵੇਣਿਪਾਲਕੋ ਨਾਮ ਹੋਤਿ. ਯੋ ਚ ਅਪ੍ਪਮ੍ਪੀਤਿ ਯੋ ਪਨ ਅਪ੍ਪਮਤ੍ਤਕਮ੍ਪਿ ਸੁਤ੍ਵਾ ਧਮ੍ਮਮਨ੍ਵਾਯ ਅਤ੍ਥਮਨ੍ਵਾਯ ਧਮ੍ਮਾਨੁਧਮ੍ਮਪ੍ਪਟਿਪਨ੍ਨੋ ਹੁਤ੍ਵਾ ਨਾਮਕਾਯੇਨ ਦੁਕ੍ਖਾਦੀਨਿ ਪਰਿਜਾਨਨ੍ਤੋ ਚਤੁਸਚ੍ਚਧਮ੍ਮਂ ਪਸ੍ਸਤਿ, ਸ ਵੇ ਧਮ੍ਮਧਰੋ ਹੋਤਿ. ਯੋ ਧਮ੍ਮਂ ਨਪ੍ਪਮਜ੍ਜਤੀਤਿ ਯੋਪਿ ਆਰਦ੍ਧਵੀਰਿਯੋ ਹੁਤ੍ਵਾ ਅਜ੍ਜ ਅਜ੍ਜੇਵਾਤਿ ਪਟਿਵੇਧਂ ਆਕਙ੍ਖਨ੍ਤੋ ਧਮ੍ਮਂ ਨਪ੍ਪਮਜ੍ਜਤਿ, ਅਯਮ੍ਪਿ ਧਮ੍ਮਧਰੋਯੇਵਾਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਏਕੁਦਾਨਖੀਣਾਸਵਤ੍ਥੇਰਵਤ੍ਥੁ ਤਤਿਯਂ.

੪. ਲਕੁਣ੍ਡਕਭਦ੍ਦਿਯਤ੍ਥੇਰਵਤ੍ਥੁ

ਨ ਤੇਨ ਥੇਰੋ ਸੋ ਹੋਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਲਕੁਣ੍ਡਕਭਦ੍ਦਿਯਤ੍ਥੇਰਂ ਆਰਬ੍ਭ ਕਥੇਸਿ.

ਏਕਦਿਵਸਞ੍ਹਿ ਤਸ੍ਮਿਂ ਥੇਰੇ ਸਤ੍ਥੁ ਉਪਟ੍ਠਾਨਂ ਗਨ੍ਤ੍ਵਾ ਪਕ੍ਕਨ੍ਤਮਤ੍ਤੇ ਤਿਂਸਮਤ੍ਤਾ ਆਰਞ੍ਞਿਕਾ ਭਿਕ੍ਖੂ ਤਂ ਪਸ੍ਸਨ੍ਤਾ ਏਵ ਆਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਨਿਸੀਦਿਂਸੁ. ਸਤ੍ਥਾ ਤੇਸਂ ਅਰਹਤ੍ਤੂਪਨਿਸ੍ਸਯਂ ਦਿਸ੍ਵਾ ਇਮਂ ਪਞ੍ਹਂ ਪੁਚ੍ਛਿ – ‘‘ਇਤੋ ਗਤਂ ਏਕਂ ਥੇਰਂ ਪਸ੍ਸਥਾ’’ਤਿ? ‘‘ਨ ਪਸ੍ਸਾਮ, ਭਨ੍ਤੇ’’ਤਿ. ‘‘ਕਿਂ ਨੁ ਦਿਟ੍ਠੋ ਵੋ’’ਤਿ? ‘‘ਏਕਂ, ਭਨ੍ਤੇ, ਸਾਮਣੇਰਂ ਪਸ੍ਸਿਮ੍ਹਾ’’ਤਿ. ‘‘ਨ ਸੋ, ਭਿਕ੍ਖਵੇ, ਸਾਮਣੇਰੋ, ਥੇਰੋ ਏਵ ਸੋ’’ਤਿ? ‘‘ਅਤਿਵਿਯ ਖੁਦ੍ਦਕੋ, ਭਨ੍ਤੇ’’ਤਿ. ‘‘ਨਾਹਂ, ਭਿਕ੍ਖਵੇ, ਮਹਲ੍ਲਕਭਾਵੇਨ ਥੇਰਾਸਨੇ ਨਿਸਿਨ੍ਨਮਤ੍ਤਕੇਨ ਥੇਰੋਤਿ ਵਦਾਮਿ. ਯੋ ਪਨ ਸਚ੍ਚਾਨਿ ਪਟਿਵਿਜ੍ਝਿਤ੍ਵਾ ਮਹਾਜਨਸ੍ਸ ਅਹਿਂਸਕਭਾਵੇ ਠਿਤੋ, ਅਯਂ ਥੇਰੋ ਨਾਮਾ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੨੬੦. ‘‘ਨ ਤੇਨ ਥੇਰੋ ਸੋ ਹੋਤਿ, ਯੇਨਸ੍ਸ ਪਲਿਤਂ ਸਿਰੋ;

ਪਰਿਪਕ੍ਕੋ ਵਯੋ ਤਸ੍ਸ, ਮੋਘਜਿਣ੍ਣੋਤਿ ਵੁਚ੍ਚਤਿ.

੨੬੧. ‘‘ਯਮ੍ਹਿ ਸਚ੍ਚਞ੍ਚ ਧਮ੍ਮੋ ਚ, ਅਹਿਂਸਾ ਸਂਯਮੋ ਦਮੋ;

ਸ ਵੇ ਵਨ੍ਤਮਲੋ ਧੀਰੋ, ਥੇਰੋ ਇਤਿ ਪਵੁਚ੍ਚਤੀ’’ਤਿ.

ਤਤ੍ਥ ਪਰਿਪਕ੍ਕੋਤਿ ਪਰਿਣਤੋ, ਵੁਡ੍ਢਭਾਵਂ ਪਤ੍ਤੋਤਿ ਅਤ੍ਥੋ. ਮੋਘਜਿਣ੍ਣੋਤਿ ਅਨ੍ਤੋ ਥੇਰਕਰਾਨਂ ਧਮ੍ਮਾਨਂ ਅਭਾਵੇਨ ਤੁਚ੍ਛਜਿਣ੍ਣੋ ਨਾਮ. ਯਮ੍ਹਿ ਸਚ੍ਚਞ੍ਚ ਧਮ੍ਮੋ ਚਾਤਿ ਯਮ੍ਹਿ ਪਨ ਪੁਗ੍ਗਲੇ ਸੋਲ਼ਸਹਾਕਾਰੇਹਿ ਪਟਿਵਿਦ੍ਧਤ੍ਤਾ ਚਤੁਬ੍ਬਿਧਂ ਸਚ੍ਚਂ, ਞਾਣੇਨ ਸਚ੍ਛਿਕਤਤ੍ਤਾ ਨਵਵਿਧੋ ਲੋਕੁਤ੍ਤਰਧਮ੍ਮੋ ਚ ਅਤ੍ਥਿ. ਅਹਿਂਸਾਤਿ ਅਹਿਂਸਨਭਾਵੋ. ਦੇਸਨਾਮਤ੍ਤਮੇਤਂ, ਯਮ੍ਹਿ ਪਨ ਚਤੁਬ੍ਬਿਧਾਪਿ ਅਪ੍ਪਮਞ੍ਞਾਭਾਵਨਾ ਅਤ੍ਥੀਤਿ ਅਤ੍ਥੋ. ਸਂਯਮੋ ਦਮੋਤਿ ਸੀਲਞ੍ਚੇਵ ਇਨ੍ਦ੍ਰਿਯਸਂਵਰੋ ਚ. ਵਨ੍ਤਮਲੋਤਿ ਮਗ੍ਗਞਾਣੇਨ ਨੀਹਟਮਲੋ. ਧੀਰੋਤਿ ਧਿਤਿਸਮ੍ਪਨ੍ਨੋ. ਥੇਰੋਤਿ ਸੋ ਇਮੇਹਿ ਥਿਰਭਾਵਕਾਰਕੇਹਿ ਸਮਨ੍ਨਾਗਤਤ੍ਤਾ ਥੇਰੋਤਿ ਵੁਚ੍ਚਤੀਤਿ ਅਤ੍ਥੋ.

ਦੇਸਨਾਵਸਾਨੇ ਤੇ ਭਿਕ੍ਖੂ ਅਰਹਤ੍ਤੇ ਪਤਿਟ੍ਠਹਿਂਸੂਤਿ.

ਲਕੁਣ੍ਡਕਭਦ੍ਦਿਯਤ੍ਥੇਰਵਤ੍ਥੁ ਚਤੁਤ੍ਥਂ.

੫. ਸਮ੍ਬਹੁਲਭਿਕ੍ਖੁਵਤ੍ਥੁ

ਨ ਵਾਕ੍ਕਰਣਮਤ੍ਤੇਨਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਸਮਯੇ ਦਹਰੇ ਚੇਵ ਸਾਮਣੇਰੇ ਚ ਅਤ੍ਤਨੋ ਧਮ੍ਮਾਚਰਿਯਾਨਮੇਵ ਚੀਵਰਰਜਨਾਦੀਨਿ ਵੇਯ੍ਯਾਵਚ੍ਚਾਨਿ ਕਰੋਨ੍ਤੇ ਦਿਸ੍ਵਾ ਏਕਚ੍ਚੇ ਥੇਰਾ ਚਿਨ੍ਤਯਿਂਸੁ – ‘‘ਮਯਮ੍ਪਿ ਬ੍ਯਞ੍ਜਨਸਮਯੇ ਕੁਸਲਾ, ਅਮ੍ਹਾਕਮੇਵ ਕਿਞ੍ਚਿ ਨਤ੍ਥਿ. ਯਂਨੂਨ ਮਯਂ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਏਵਂ ਵਦੇਯ੍ਯਾਮ, ‘ਭਨ੍ਤੇ, ਮਯਂ ਬ੍ਯਞ੍ਜਨਸਮਯੇ ਕੁਸਲਾ, ਅਞ੍ਞੇਸਂ ਸਨ੍ਤਿਕੇ ਧਮ੍ਮਂ ਉਗ੍ਗਣ੍ਹਿਤ੍ਵਾਪਿ ਇਮੇਸਂ ਸਨ੍ਤਿਕੇ ਅਸੋਧੇਤ੍ਵਾ ਮਾ ਸਜ੍ਝਾਯਿਤ੍ਥਾਤਿ ਦਹਰਸਾਮਣੇਰੇ ਆਣਾਪੇਥਾ’ਤਿ. ਏਵਞ੍ਹਿ ਅਮ੍ਹਾਕਂ ਲਾਭਸਕ੍ਕਾਰੋ ਵਡ੍ਢਿਸ੍ਸਤੀ’’ਤਿ. ਤੇ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਤਥਾ ਵਦਿਂਸੁ.

ਸਤ੍ਥਾ ਤੇਸਂ ਵਚਨਂ ਸੁਤ੍ਵਾ ‘‘ਇਮਸ੍ਮਿਂ ਸਾਸਨੇ ਪਵੇਣਿਵਸੇਨੇਵ ਏਵਂ ਵਤ੍ਤੁਂ ਲਭਤਿ, ਇਮੇ ਪਨ ਲਾਭਸਕ੍ਕਾਰੇ ਨਿਸ੍ਸਿਤਾਤਿ ਞਤ੍ਵਾ ਅਹਂ ਤੁਮ੍ਹੇ ਵਾਕ੍ਕਰਣਮਤ੍ਤੇਨ ਸਾਧੁਰੂਪਾਤਿ ਨ ਵਦਾਮਿ. ਯਸ੍ਸ ਪਨੇਤੇ ਇਸ੍ਸਾਦਯੋ ਧਮ੍ਮਾ ਅਰਹਤ੍ਤਮਗ੍ਗੇਨ ਸਮੁਚ੍ਛਿਨ੍ਨਾ, ਏਸੋ ਏਵ ਸਾਧੁਰੂਪੋ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੨੬੨. ‘‘ਨ ਵਾਕ੍ਕਰਣਮਤ੍ਤੇਨ, ਵਣ੍ਣਪੋਕ੍ਖਰਤਾਯ ਵਾ;

ਸਾਧੁਰੂਪੋ ਨਰੋ ਹੋਤਿ, ਇਸ੍ਸੁਕੀ ਮਚ੍ਛਰੀ ਸਠੋ.

੨੬੩. ‘‘ਯਸ੍ਸ ਚੇਤਂ ਸਮੁਚ੍ਛਿਨ੍ਨਂ, ਮੂਲਘਚ੍ਚਂ ਸਮੂਹਤਂ;

ਸਵਨ੍ਤਦੋਸੋ ਮੇਧਾਵੀ, ਸਾਧੁਰੂਪੋਤਿ ਵੁਚ੍ਚਤੀ’’ਤਿ.

ਤਤ੍ਥ ਨ ਵਾਕ੍ਕਰਣਮਤ੍ਤੇਨਾਤਿ ਵਚੀਕਰਣਮਤ੍ਤੇਨ ਸਦ੍ਦਲਕ੍ਖਣਸਮ੍ਪਨ੍ਨਵਚਨਮਤ੍ਤੇਨ. ਵਣ੍ਣਪੋਕ੍ਖਰਤਾਯ ਵਾਤਿ ਸਰੀਰਵਣ੍ਣਸ੍ਸ ਮਨਾਪਭਾਵੇਨ ਵਾ. ਨਰੋਤਿ ਏਤ੍ਤਕੇਨੇਵ ਕਾਰਣੇਨ ਪਰਲਾਭਾਦੀਸੁ ਇਸ੍ਸਾਮਨਕੋ ਪਞ੍ਚਵਿਧੇਨ ਮਚ੍ਛੇਰੇਨ ਸਮਨ੍ਨਾਗਤੋ ਕੇਰਾਟਿਕਭਾਵੇਨ ਸਠੋ ਨਰੋ ਸਾਧੁਰੂਪੋ ਨ ਹੋਤਿ. ਯਸ੍ਸ ਚੇਤਨ੍ਤਿ ਯਸ੍ਸ ਚ ਪੁਗ੍ਗਲਸ੍ਸੇਤਂ ਇਸ੍ਸਾਦਿਦੋਸਜਾਤਂ ਅਰਹਤ੍ਤਮਗ੍ਗਞਾਣੇਨ ਸਮੂਲਕਂ ਛਿਨ੍ਨਂ, ਮੂਲਘਾਤਂ ਕਤ੍ਵਾ ਸਮੂਹਤਂ, ਸੋ ਵਨ੍ਤਦੋਸੋ ਧਮ੍ਮੋਜਪਞ੍ਞਾਯ ਸਮਨ੍ਨਾਗਤੋ ਸਾਧੁਰੂਪੋਤਿ ਵੁਚ੍ਚਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਸਮ੍ਬਹੁਲਭਿਕ੍ਖੁਵਤ੍ਥੁ ਪਞ੍ਚਮਂ.

੬. ਹਤ੍ਥਕਵਤ੍ਥੁ

ਨ ਮੁਣ੍ਡਕੇਨ ਸਮਣੋਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਸਾਵਤ੍ਥਿਯਂ ਵਿਹਰਨ੍ਤੋ ਹਤ੍ਥਕਂ ਆਰਬ੍ਭ ਕਥੇਸਿ.

ਸੋ ਕਿਰ ਵਾਦਕ੍ਖਿਤ੍ਤੋ ‘‘ਤੁਮ੍ਹੇ ਅਸੁਕਵੇਲਾਯ ਅਸੁਕਟ੍ਠਾਨਂ ਨਾਮ ਆਗਚ੍ਛੇਯ੍ਯਾਥ, ਵਾਦਂ ਕਰਿਸ੍ਸਾਮਾ’’ਤਿ ਵਤ੍ਵਾ ਪੁਰੇਤਰਮੇਵ ਤਤ੍ਥ ਗਨ੍ਤ੍ਵਾ ‘‘ਪਸ੍ਸਥ, ਤਿਤ੍ਥਿਯਾ ਮਮ ਭਯੇਨ ਨਾਗਤਾ, ਏਸੋਵ ਪਨ ਨੇਸਂ ਪਰਾਜਯੋ’’ਤਿਆਦੀਨਿ ਵਤ੍ਵਾ ਵਾਦਕ੍ਖਿਤ੍ਤੋ ਅਞ੍ਞੇਨਞ੍ਞਂ ਪਟਿਚਰਨ੍ਤੋ ਵਿਚਰਤਿ. ਸਤ੍ਥਾ ‘‘ਹਤ੍ਥਕੋ ਕਿਰ ਏਵਂ ਕਰੋਤੀ’’ਤਿ ਸੁਤ੍ਵਾ ਤਂ ਪਕ੍ਕੋਸਾਪੇਤ੍ਵਾ ‘‘ਸਚ੍ਚਂ ਕਿਰ ਤ੍ਵਂ, ਹਤ੍ਥਕ, ਏਵਂ ਕਰੋਸੀ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚ’’ਨ੍ਤਿ ਵੁਤ੍ਤੇ, ‘‘ਕਸ੍ਮਾ ਏਵਂ ਕਰੋਸਿ? ਏਵਰੂਪਞ੍ਹਿ ਮੁਸਾਵਾਦਂ ਕਰੋਨ੍ਤੋ ਸੀਸਮੁਣ੍ਡਨਾਦਿਮਤ੍ਤੇਨੇਵ ਸਮਣੋ ਨਾਮ ਨ ਹੋਤਿ. ਯੋ ਪਨ ਅਣੂਨਿ ਵਾ ਥੂਲਾਨਿ ਵਾ ਪਾਪਾਨਿ ਸਮੇਤ੍ਵਾ ਠਿਤੋ, ਅਯਮੇਵ ਸਮਣੋ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੨੬੪. ‘‘ਨ ਮੁਣ੍ਡਕੇਨ ਸਮਣੋ, ਅਬ੍ਬਤੋ ਅਲਿਕਂ ਭਣਂ;

ਇਚ੍ਛਾਲੋਭਸਮਾਪਨ੍ਨੋ, ਸਮਣੋ ਕਿਂ ਭਵਿਸ੍ਸਤਿ.

੨੬੫. ‘‘ਯੋ ਚ ਸਮੇਤਿ ਪਾਪਾਨਿ, ਅਣੁਂ ਥੂਲਾਨਿ ਸਬ੍ਬਸੋ;

ਸਮਿਤਤ੍ਤਾ ਹਿ ਪਾਪਾਨਂ, ਸਮਣੋਤਿ ਪਵੁਚ੍ਚਤੀ’’ਤਿ.

ਤਤ੍ਥ ਮੁਣ੍ਡਕੇਨਾਤਿ ਸੀਸਮੁਣ੍ਡਨਮਤ੍ਤੇਨ. ਅਬ੍ਬਤੋਤਿ ਸੀਲਵਤੇਨ ਚ ਧੁਤਙ੍ਗਵਤੇਨ ਚ ਵਿਰਹਿਤੋ. ਅਲਿਕਂ ਭਣਨ੍ਤਿ ਮੁਸਾਵਾਦਂ ਭਣਨ੍ਤੋ ਅਸਮ੍ਪਤ੍ਤੇਸੁ ਆਰਮ੍ਮਣੇਸੁ ਇਚ੍ਛਾਯ ਪਤ੍ਤੇਸੁ ਚ ਲੋਭੇਨ ਸਮਨ੍ਨਾਗਤੋ ਸਮਣੋ ਨਾਮ ਕਿਂ ਭਵਿਸ੍ਸਤਿ? ਸਮੇਤੀਤਿ ਯੋ ਚ ਪਰਿਤ੍ਤਾਨਿ ਵਾ ਮਹਨ੍ਤਾਨਿ ਵਾ ਪਾਪਾਨਿ ਵੂਪਸਮੇਤਿ, ਸੋ ਤੇਸਂ ਸਮਿਤਤ੍ਤਾ ਸਮਣੋਤਿ ਪਵੁਚ੍ਚਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਹਤ੍ਥਕਵਤ੍ਥੁ ਛਟ੍ਠਂ.

੭. ਅਞ੍ਞਤਰਬ੍ਰਾਹ੍ਮਣਵਤ੍ਥੁ

ਨ ਤੇਨ ਭਿਕ੍ਖੁ ਸੋ ਹੋਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਬ੍ਰਾਹ੍ਮਣਂ ਆਰਬ੍ਭ ਕਥੇਸਿ.

ਸੋ ਕਿਰ ਬਾਹਿਰਸਮਯੇ ਪਬ੍ਬਜਿਤ੍ਵਾ ਭਿਕ੍ਖਂ ਚਰਨ੍ਤੋ ਚਿਨ੍ਤੇਸਿ – ‘‘ਸਮਣੋ ਗੋਤਮੋ ਅਤ੍ਤਨੋ ਸਾਵਕੇ ਭਿਕ੍ਖਾਯ ਚਰਣੇਨ ‘ਭਿਕ੍ਖੂ’ਤਿ ਵਦਤਿ, ਮਮ੍ਪਿ ‘ਭਿਕ੍ਖੂ’ਤਿ ਵਤ੍ਤੁਂ ਵਟ੍ਟਤੀ’’ਤਿ. ਸੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ, ‘‘ਭੋ ਗੋਤਮ, ਅਹਮ੍ਪਿ ਭਿਕ੍ਖਂ ਚਰਿਤ੍ਵਾ ਜੀਵਾਮਿ, ਮਮ੍ਪਿ ‘ਭਿਕ੍ਖੂ’ਤਿ ਵਦੇਹੀ’’ਤਿ ਆਹ. ਅਥ ਨਂ ਸਤ੍ਥਾ ‘‘ਨਾਹਂ, ਬ੍ਰਾਹ੍ਮਣ, ਭਿਕ੍ਖਨਮਤ੍ਤੇਨ ਭਿਕ੍ਖੂਤਿ ਵਦਾਮਿ. ਨ ਹਿ ਵਿਸ੍ਸਂ ਧਮ੍ਮਂ ਸਮਾਦਾਯ ਵਤ੍ਤਨ੍ਤੋ ਭਿਕ੍ਖੁ ਨਾਮ ਹੋਤਿ. ਯੋ ਪਨ ਸਬ੍ਬਸਙ੍ਖਾਰੇਸੁ ਸਙ੍ਖਾਯ ਚਰਤਿ, ਸੋ ਭਿਕ੍ਖੁ ਨਾਮਾ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੨੬੬. ‘‘ਨ ਤੇਨ ਭਿਕ੍ਖੁ ਸੋ ਹੋਤਿ, ਯਾਵਤਾ ਭਿਕ੍ਖਤੇ ਪਰੇ;

ਵਿਸ੍ਸਂ ਧਮ੍ਮਂ ਸਮਾਦਾਯ, ਭਿਕ੍ਖੁ ਹੋਤਿ ਨ ਤਾਵਤਾ.

੨੬੭. ‘‘ਯੋਧ ਪੁਞ੍ਞਞ੍ਚ ਪਾਪਞ੍ਚ, ਬਾਹੇਤ੍ਵਾ ਬ੍ਰਹ੍ਮਚਰਿਯਵਾ;

ਸਙ੍ਖਾਯ ਲੋਕੇ ਚਰਤਿ, ਸ ਵੇ ਭਿਕ੍ਖੂਤਿ ਵੁਚ੍ਚਤੀ’’ਤਿ.

ਤਤ੍ਥ ਯਾਵਤਾਤਿ ਯਤ੍ਤਕੇਨ ਪਰੇ ਭਿਕ੍ਖਤੇ, ਤੇਨ ਭਿਕ੍ਖਨਮਤ੍ਤੇਨ ਭਿਕ੍ਖੁ ਨਾਮ ਨ ਹੋਤਿ. ਵਿਸ੍ਸਨ੍ਤਿ ਵਿਸਮਂ ਧਮ੍ਮਂ, ਵਿਸ੍ਸਗਨ੍ਧਂ ਵਾ ਕਾਯਕਮ੍ਮਾਦਿਕਂ ਧਮ੍ਮਂ ਸਮਾਦਾਯ ਚਰਨ੍ਤੋ ਭਿਕ੍ਖੁ ਨਾਮ ਨ ਹੋਤਿ. ਯੋਧਾਤਿ ਯੋ ਇਧ ਸਾਸਨੇ ਉਭਯਮ੍ਪੇਤਂ ਪੁਞ੍ਞਞ੍ਚ ਪਾਪਞ੍ਚ ਮਗ੍ਗਬ੍ਰਹ੍ਮਚਰਿਯੇਨ ਬਾਹੇਤ੍ਵਾ ਪਨੁਦਿਤ੍ਵਾ ਬ੍ਰਹ੍ਮਚਰਿਯਵਾ ਹੋਤਿ. ਸਙ੍ਖਾਯਾਤਿ ਞਾਣੇਨ. ਲੋਕੇਤਿ ਖਨ੍ਧਾਦਿਲੋਕੇ ‘‘ਇਮੇ ਅਜ੍ਝਤ੍ਤਿਕਾ ਖਨ੍ਧਾ, ਇਮੇ ਬਾਹਿਰਾ’’ਤਿ ਏਵਂ ਸਬ੍ਬੇਪਿ ਧਮ੍ਮੇ ਜਾਨਿਤ੍ਵਾ ਚਰਤਿ, ਸੋ ਤੇਨ ਞਾਣੇਨ ਕਿਲੇਸਾਨਂ ਭਿਨ੍ਨਤ੍ਤਾ ‘‘ਭਿਕ੍ਖੂ’’ਤਿ ਵੁਚ੍ਚਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਅਞ੍ਞਤਰਬ੍ਰਾਹ੍ਮਣਵਤ੍ਥੁ ਸਤ੍ਤਮਂ.

੮. ਤਿਤ੍ਥਿਯਵਤ੍ਥੁ

ਨ ਮੋਨੇਨਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਤਿਤ੍ਥਿਯੇ ਆਰਬ੍ਭ ਕਥੇਸਿ.

ਤੇ ਕਿਰ ਭੁਤ੍ਤਟ੍ਠਾਨੇਸੁ ਮਨੁਸ੍ਸਾਨਂ ‘‘ਖੇਮਂ ਹੋਤੁ, ਸੁਖਂ ਹੋਤੁ, ਆਯੁ ਵਡ੍ਢਤੁ, ਅਸੁਕਟ੍ਠਾਨੇ ਨਾਮ ਕਲਲਂ ਅਤ੍ਥਿ, ਅਸੁਕਟ੍ਠਾਨੇ ਨਾਮ ਕਣ੍ਟਕੋ ਅਤ੍ਥਿ, ਏਵਰੂਪਂ ਠਾਨਂ ਗਨ੍ਤੁਂ ਨ ਵਟ੍ਟਤੀ’’ਤਿਆਦਿਨਾ ਨਯੇਨ ਮਙ੍ਗਲਂ ਵਤ੍ਵਾ ਪਕ੍ਕਮਨ੍ਤਿ. ਭਿਕ੍ਖੂ ਪਨ ਪਠਮਬੋਧਿਯਂ ਅਨੁਮੋਦਨਾਦੀਨਂ ਅਨਨੁਞ੍ਞਾਤਕਾਲੇ ਭਤ੍ਤਗ੍ਗੇ ਮਨੁਸ੍ਸਾਨਂ ਅਨੁਮੋਦਨਂ ਅਕਤ੍ਵਾ ਪਕ੍ਕਮਨ੍ਤਿ. ਮਨੁਸ੍ਸਾ ‘‘ਤਿਤ੍ਥਿਯਾਨਂ ਸਨ੍ਤਿਕਾ ਮਙ੍ਗਲਂ ਸੁਣਾਮ, ਭਦ੍ਦਨ੍ਤਾ ਪਨ ਤੁਣ੍ਹੀਭੂਤਾ ਪਕ੍ਕਮਨ੍ਤੀ’’ਤਿ ਉਜ੍ਝਾਯਿਂਸੁ. ਭਿਕ੍ਖੂ ਤਮਤ੍ਥਂ ਸਤ੍ਥੁ ਆਰੋਚੇਸੁਂ. ਸਤ੍ਥਾ, ‘‘ਭਿਕ੍ਖਵੇ, ਇਤੋ ਪਟ੍ਠਾਯ ਭਤ੍ਤਗ੍ਗਾਦੀਸੁ ਯਥਾਸੁਖਂ ਅਨੁਮੋਦਨਂ ਕਰੋਥ, ਉਪਨਿਸਿਨ੍ਨਕਥਂ ਕਰੋਥ, ਧਮ੍ਮਂ ਕਥੇਥਾ’’ਤਿ ਅਨੁਜਾਨਿ. ਤੇ ਤਥਾ ਕਰਿਂਸੁ. ਮਨੁਸ੍ਸਾ ਅਨੁਮੋਦਨਾਦੀਨਿ ਸੁਣਨ੍ਤਾ ਉਸ੍ਸਾਹਪ੍ਪਤ੍ਤਾ ਭਿਕ੍ਖੂ ਨਿਮਨ੍ਤੇਤ੍ਵਾ ਸਕ੍ਕਾਰਂ ਕਰੋਨ੍ਤਾ ਵਿਚਰਨ੍ਤਿ. ਤਿਤ੍ਥਿਯਾ ਪਨ ‘‘ਮਯਂ ਮੁਨਿਨੋ ਮੋਨਂ ਕਰੋਮ, ਸਮਣਸ੍ਸ ਗੋਤਮਸ੍ਸ ਸਾਵਕਾ ਭਤ੍ਤਗ੍ਗਾਦੀਸੁ ਮਹਾਕਥਂ ਕਥੇਨ੍ਤਾ ਵਿਚਰਨ੍ਤੀ’’ਤਿ ਉਜ੍ਝਾਯਿਂਸੁ.

ਸਤ੍ਥਾ ਤਮਤ੍ਥਂ ਸੁਤ੍ਵਾ ‘‘ਨਾਹਂ, ਭਿਕ੍ਖਵੇ, ਤੁਣ੍ਹੀਭਾਵਮਤ੍ਤੇਨ ‘ਮੁਨੀ’ਤਿ ਵਦਾਮਿ. ਏਕਚ੍ਚੇ ਹਿ ਅਜਾਨਨ੍ਤਾ ਨ ਕਥੇਨ੍ਤਿ, ਏਕਚ੍ਚੇ ਅਵਿਸਾਰਦਤਾਯ, ਏਕਚ੍ਚੇ ‘ਮਾ ਨੋ ਇਮਂ ਅਤਿਸਯਤ੍ਥਂ ਅਞ੍ਞੇ ਜਾਨਿਂਸੂ’ਤਿ ਮਚ੍ਛੇਰੇਨ. ਤਸ੍ਮਾ ਮੋਨਮਤ੍ਤੇਨ ਮੁਨਿ ਨ ਹੋਤਿ, ਪਾਪਵੂਪਸਮੇਨ ਪਨ ਮੁਨਿ ਨਾਮ ਹੋਤੀ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੨੬੮. ‘‘ਨ ਮੋਨੇਨ ਮੁਨੀ ਹੋਤਿ, ਮੂਲ਼੍ਹਰੂਪੋ ਅਵਿਦ੍ਦਸੁ;

ਯੋ ਚ ਤੁਲਂਵ ਪਗ੍ਗਯ੍ਹ, ਵਰਮਾਦਾਯ ਪਣ੍ਡਿਤੋ.

੨੬੯. ‘‘ਪਾਪਾਨਿ ਪਰਿਵਜ੍ਜੇਤਿ, ਸ ਮੁਨੀ ਤੇਨ ਸੋ ਮੁਨਿ;

ਯੋ ਮੁਨਾਤਿ ਉਭੋ ਲੋਕੇ, ਮੁਨਿ ਤੇਨ ਪਵੁਚ੍ਚਤੀ’’ਤਿ.

ਤਤ੍ਥ ਨ ਮੋਨੇਨਾਤਿ ਕਾਮਞ੍ਹਿ ਮੋਨੇਯ੍ਯਪਟਿਪਦਾਸਙ੍ਖਾਤੇਨ ਮਗ੍ਗਞਾਣਮੋਨੇਨ ਮੁਨਿ ਨਾਮ ਹੋਤਿ, ਇਧ ਪਨ ਤੁਣ੍ਹੀਭਾਵਂ ਸਨ੍ਧਾਯ ‘‘ਮੋਨੇਨਾ’’ਤਿ ਵੁਤ੍ਤਂ. ਮੂਲ਼੍ਹਰੂਪੋਤਿ ਤੁਚ੍ਛਰੂਪੋ. ਅਵਿਦ੍ਦਸੂਤਿ ਅਵਿਞ੍ਞੂ. ਏਵਰੂਪੋ ਹਿ ਤੁਣ੍ਹੀਭੂਤੋਪਿ ਮੁਨਿ ਨਾਮ ਨ ਹੋਤਿ. ਅਥ ਵਾ ਮੋਨੇਨ ਮੁਨਿ ਨਾਮ ਨ ਹੋਤਿ, ਤੁਚ੍ਛਸਭਾਵੋ ਪਨ ਅਵਿਞ੍ਞੂ ਚ ਹੋਤੀਤਿ ਅਤ੍ਥੋ. ਯੋ ਚ ਤੁਲਂਵ ਪਗਯ੍ਹਾਤਿ ਯਥਾ ਹਿ ਤੁਲਂ ਗਹੇਤ੍ਵਾ ਠਿਤੋ ਅਤਿਰੇਕਂ ਚੇ ਹੋਤਿ, ਹਰਤਿ. ਊਨਂ ਚੇ ਹੋਤਿ, ਪਕ੍ਖਿਪਤਿ. ਏਵਮੇਵ ਯੋ ਅਤਿਰੇਕਂ ਹਰਨ੍ਤੋ ਵਿਯ ਪਾਪਂ ਹਰਤਿ ਪਰਿਵਜ੍ਜੇਤਿ, ਊਨਕੇ ਪਕ੍ਖਿਪਨ੍ਤੋ ਵਿਯ ਕੁਸਲਂ ਪਰਿਪੂਰੇਤਿ. ਏਵਞ੍ਚ ਪਨ ਕਰੋਨ੍ਤੋ ਸੀਲਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਸਙ੍ਖਾਤਂ ਵਰਂ ਉਤ੍ਤਮਮੇਵ ਆਦਾਯ ਪਾਪਾਨਿ ਅਕੁਸਲਕਮ੍ਮਾਨਿ ਪਰਿਵਜ੍ਜੇਤਿ. ਸ ਮੁਨੀਤਿ ਸੋ ਮੁਨਿ ਨਾਮਾਤਿ ਅਤ੍ਥੋ. ਤੇਨ ਸੋ ਮੁਨੀਤਿ ਕਸ੍ਮਾ ਪਨ ਸੋ ਮੁਨੀਤਿ ਚੇ? ਯਂ ਹੇਟ੍ਠਾ ਵੁਤ੍ਤਕਾਰਣਂ, ਤੇਨ ਸੋ ਮੁਨੀਤਿ ਅਤ੍ਥੋ. ਸੋ ਮੁਨਾਤਿ ਉਭੋ ਲੋਕੇਤਿ ਯੋ ਪੁਗ੍ਗਲੋ ਇਮਸ੍ਮਿਂ ਖਨ੍ਧਾਦਿਲੋਕੇ ਤੁਲਂ ਆਰੋਪੇਤ੍ਵਾ ਮਿਨਨ੍ਤੋ ਵਿਯ ‘‘ਇਮੇ ਅਜ੍ਝਤ੍ਤਿਕਾ ਖਨ੍ਧਾ, ਇਮੇ ਬਾਹਿਰਾ’’ਤਿਆਦਿਨਾ ਨਯੇਨ ਇਮੇ ਉਭੋ ਅਤ੍ਥੇ ਮੁਨਾਤਿ. ਮੁਨਿ ਤੇਨ ਪਵੁਚ੍ਚਤੀਤਿ ਤੇਨ ਕਾਰਣੇਨ ਮੁਨੀਤਿ ਵੁਚ੍ਚਤਿਯੇਵਾਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਤਿਤ੍ਥਿਯਵਤ੍ਥੁ ਅਟ੍ਠਮਂ.

੯. ਬਾਲਿਸਿਕਵਤ੍ਥੁ

ਨ ਤੇਨ ਅਰਿਯੋ ਹੋਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਅਰਿਯਂ ਨਾਮ ਬਾਲਿਸਿਕਂ ਆਰਬ੍ਭ ਕਥੇਸਿ.

ਏਕਦਿਵਸਞ੍ਹਿ ਸਤ੍ਥਾ ਤਸ੍ਸ ਸੋਤਾਪਤ੍ਤਿਮਗ੍ਗਸ੍ਸੂਪਨਿਸ੍ਸਯਂ ਦਿਸ੍ਵਾ ਸਾਵਤ੍ਥਿਯਾ ਉਤ੍ਤਰਦ੍ਵਾਰਗਾਮੇ ਪਿਣ੍ਡਾਯ ਚਰਿਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਤਤੋ ਆਗਚ੍ਛਤਿ. ਤਸ੍ਮਿਂ ਖਣੇ ਸੋ ਬਾਲਿਸਿਕੋ ਬਲਿਸੇਨ ਮਚ੍ਛੇ ਗਣ੍ਹਨ੍ਤੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਦਿਸ੍ਵਾ ਬਲਿਸਯਟ੍ਠਿਂ ਛਡ੍ਡੇਤ੍ਵਾ ਅਟ੍ਠਾਸਿ. ਸਤ੍ਥਾ ਤਸ੍ਸ ਅਵਿਦੂਰੇ ਠਾਨੇ ਨਿਵਤ੍ਤਿਤ੍ਵਾ ਠਿਤੋ ‘‘ਤ੍ਵਂ ਕਿਂ ਨਾਮੋਸੀ’’ਤਿ ਸਾਰਿਪੁਤ੍ਤਤ੍ਥੇਰਾਦੀਨਂ ਨਾਮਾਨਿ ਪੁਚ੍ਛਿ. ਤੇਪਿ ‘‘ਅਹਂ ਸਾਰਿਪੁਤ੍ਤੋ ਅਹਂ ਮੋਗ੍ਗਲ੍ਲਾਨੋ’’ਤਿ ਅਤ੍ਤਨੋ ਅਤ੍ਤਨੋ ਨਾਮਾਨਿ ਕਥਯਿਂਸੁ. ਬਾਲਿਸਿਕੋ ਚਿਨ੍ਤੇਸਿ – ‘‘ਸਤ੍ਥਾ ਸਬ੍ਬੇਸਂ ਨਾਮਾਨਿ ਪੁਚ੍ਛਤਿ, ਮਮਮ੍ਪਿ ਨਾਮਂ ਪੁਚ੍ਛਿਸ੍ਸਤਿ ਮਞ੍ਞੇ’’ਤਿ. ਸਤ੍ਥਾ ਤਸ੍ਸ ਇਚ੍ਛਂ ਞਤ੍ਵਾ, ‘‘ਉਪਾਸਕ, ਤ੍ਵਂ ਕੋ ਨਾਮੋਸੀ’’ਤਿ ਪੁਚ੍ਛਿਤ੍ਵਾ ‘‘ਅਹਂ, ਭਨ੍ਤੇ, ਅਰਿਯੋ ਨਾਮਾ’’ਤਿ ਵੁਤ੍ਤੇ ‘‘ਨ, ਉਪਾਸਕ, ਤਾਦਿਸਾ ਪਾਣਾਤਿਪਾਤਿਨੋ ਅਰਿਯਾ ਨਾਮ ਹੋਨ੍ਤਿ, ਅਰਿਯਾ ਪਨ ਮਹਾਜਨਸ੍ਸ ਅਹਿਂਸਨਭਾਵੇ ਠਿਤਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੭੦. ‘‘ਨ ਤੇਨ ਅਰਿਯੋ ਹੋਤਿ, ਯੇਨ ਪਾਣਾਨਿ ਹਿਂਸਤਿ;

ਅਹਿਂਸਾ ਸਬ੍ਬਪਾਣਾਨਂ, ਅਰਿਯੋਤਿ ਪਵੁਚ੍ਚਤੀ’’ਤਿ.

ਤਤ੍ਥ ਅਹਿਂਸਾਤਿ ਅਹਿਂਸਨੇਨ. ਇਦਂ ਵੁਤ੍ਤਂ ਹੋਤਿ – ਯੇਨ ਹਿ ਪਾਣਾਨਿ ਹਿਂਸਤਿ, ਨ ਤੇਨ ਕਾਰਣੇਨ ਅਰਿਯੋ ਹੋਤਿ. ਯੋ ਪਨ ਸਬ੍ਬਪਾਣਾਨਂ ਪਾਣਿਆਦੀਹਿ ਅਹਿਂਸਨੇਨ ਮੇਤ੍ਤਾਦਿਭਾਵਨਾਯ ਪਤਿਟ੍ਠਿਤਤ੍ਤਾ ਹਿਂਸਤੋ ਆਰਾਵ ਠਿਤੋ, ਅਯਂ ਅਰਿਯੋਤਿ ਵੁਚ੍ਚਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਾਲਿਸਿਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ, ਸਮ੍ਪਤ੍ਤਾਨਮ੍ਪਿ ਸਾਤ੍ਥਿਕਾ ਧਮ੍ਮਦੇਸਨਾ ਅਹੋਸੀਤਿ.

ਬਾਲਿਸਿਕਵਤ੍ਥੁ ਨਵਮਂ.

੧੦. ਸਮ੍ਬਹੁਲਸੀਲਾਦਿਸਮ੍ਪਨ੍ਨਭਿਕ੍ਖੁਵਤ੍ਥੁ

ਨ ਸੀਲਬ੍ਬਤਮਤ੍ਤੇਨਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸਮ੍ਬਹੁਲੇ ਸੀਲਾਦਿਸਮ੍ਪਨ੍ਨੇ ਭਿਕ੍ਖੂ ਆਰਬ੍ਭ ਕਥੇਸਿ.

ਤੇਸੁ ਕਿਰ ਏਕਚ੍ਚਾਨਂ ਏਵਂ ਅਹੋਸਿ – ‘‘ਮਯਂ ਸਮ੍ਪਨ੍ਨਸੀਲਾ, ਮਯਂ ਧੁਤਙ੍ਗਧਰਾ, ਮਯਂ ਬਹੁਸ੍ਸੁਤਾ, ਮਯਂ ਪਨ੍ਤਸੇਨਾਸਨਵਾਸਿਨੋ, ਮਯਂ ਝਾਨਲਾਭਿਨੋ, ਨ ਅਮ੍ਹਾਕਂ ਅਰਹਤ੍ਤਂ ਦੁਲ੍ਲਭਂ, ਇਚ੍ਛਿਤਦਿਵਸੇਯੇਵ ਅਰਹਤ੍ਤਂ ਪਾਪੁਣਿਸ੍ਸਾਮਾ’’ਤਿ. ਯੇਪਿ ਤਤ੍ਥ ਅਨਾਗਾਮਿਨੋ, ਤੇਸਮ੍ਪਿ ਏਤਦਹੋਸਿ – ‘‘ਨ ਅਮ੍ਹਾਕਂ ਇਦਾਨਿ ਅਰਹਤ੍ਤਂ ਦੁਲ੍ਲਭ’’ਨ੍ਤਿ. ਤੇ ਸਬ੍ਬੇਪਿ ਏਕਦਿਵਸਂ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਨਿਸਿਨ੍ਨਾ ‘‘ਅਪਿ ਨੁ ਖੋ ਵੋ, ਭਿਕ੍ਖਵੇ, ਪਬ੍ਬਜਿਤਕਿਚ੍ਚਂ ਮਤ੍ਥਕਂ ਪਤ੍ਤ’’ਨ੍ਤਿ ਸਤ੍ਥਾਰਾ ਪੁਟ੍ਠਾ ਏਵਮਾਹਂਸੁ – ‘‘ਭਨ੍ਤੇ, ਮਯਂ ਏਵਰੂਪਾ ਏਵਰੂਪਾ ਚ, ਤਸ੍ਮਾ ‘ਇਚ੍ਛਿਤਿਚ੍ਛਿਤਕ੍ਖਣੇਯੇਵ ਅਰਹਤ੍ਤਂ ਪਤ੍ਤੁਂ ਸਮਤ੍ਥਮ੍ਹਾ’ਤਿ ਚਿਨ੍ਤੇਤ੍ਵਾ ਵਿਹਰਾਮਾ’’ਤਿ.

ਸਤ੍ਥਾ ਤੇਸਂ ਵਚਨਂ ਸੁਤ੍ਵਾ, ‘‘ਭਿਕ੍ਖਵੇ, ਭਿਕ੍ਖੁਨਾ ਨਾਮ ਪਰਿਸੁਦ੍ਧਸੀਲਾਦਿਮਤ੍ਤਕੇਨ ਵਾ ਅਨਾਗਾਮਿਸੁਖਪ੍ਪਤ੍ਤਮਤ੍ਤਕੇਨ ਵਾ ‘ਅਪ੍ਪਕਂ ਨੋ ਭਵਦੁਕ੍ਖ’ਨ੍ਤਿ ਵਤ੍ਤੁਂ ਨ ਵਟ੍ਟਤਿ, ਆਸਵਕ੍ਖਯਂ ਪਨ ਅਪ੍ਪਤ੍ਵਾ ‘ਸੁਖਿਤੋਮ੍ਹੀ’ਤਿ ਚਿਤ੍ਤਂ ਨ ਉਪ੍ਪਾਦੇਤਬ੍ਬ’’ਨ੍ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੨੭੧. ‘‘ਨ ਸੀਲਬ੍ਬਤਮਤ੍ਤੇਨ, ਬਾਹੁਸਚ੍ਚੇਨ ਵਾ ਪਨ;

ਅਥ ਵਾ ਸਮਾਧਿਲਾਭੇਨ, ਵਿਵਿਤ੍ਤਸਯਨੇਨ ਵਾ.

੨੭੨. ‘‘ਫੁਸਾਮਿ ਨੇਕ੍ਖਮ੍ਮਸੁਖਂ, ਅਪੁਥੁਜ੍ਜਨਸੇਵਿਤਂ;

ਭਿਕ੍ਖੁ ਵਿਸ੍ਸਾਸਮਾਪਾਦਿ, ਅਪ੍ਪਤ੍ਤੋ ਆਸਵਕ੍ਖਯ’’ਨ੍ਤਿ.

ਤਤ੍ਥ ਸੀਲਬ੍ਬਤਮਤ੍ਤੇਨਾਤਿ ਚਤੁਪਾਰਿਸੁਦ੍ਧਿਸੀਲਮਤ੍ਤੇਨ ਵਾ ਤੇਰਸਧੁਤਙ੍ਗਮਤ੍ਤੇਨ ਵਾ. ਬਾਹੁਸਚ੍ਚੇਨ ਵਾਤਿ ਤਿਣ੍ਣਂ ਪਿਟਕਾਨਂ ਉਗ੍ਗਹਿਤਮਤ੍ਤੇਨ ਵਾ. ਸਮਾਧਿਲਾਭੇਨਾਤਿ ਅਟ੍ਠਸਮਾਪਤ੍ਤਿਯਾ ਲਾਭੇਨ. ਨੇਕ੍ਖਮ੍ਮਸੁਖਨ੍ਤਿ ਅਨਾਗਾਮਿਸੁਖਂ. ਤਂ ਅਨਾਗਾਮਿਸੁਖਂ ਫੁਸਾਮੀਤਿ ਏਤ੍ਤਕਮਤ੍ਤੇਨ ਵਾ. ਅਪੁਥੁਜ੍ਜਨਸੇਵਿਤਨ੍ਤਿ ਪੁਥੁਜ੍ਜਨੇਹਿ ਅਸੇਵਿਤਂ ਅਰਿਯਸੇਵਿਤਮੇਵ. ਭਿਕ੍ਖੂਤਿ ਤੇਸਂ ਅਞ੍ਞਤਰਂ ਆਲਪਨ੍ਤੋ ਆਹ. ਵਿਸ੍ਸਾਸਮਾਪਾਦੀਤਿ ਵਿਸ੍ਸਾਸਂ ਨ ਆਪਜ੍ਜੇਯ੍ਯ. ਇਦਂ ਵੁਤ੍ਤਂ ਹੋਤਿ – ਭਿਕ੍ਖੁ ਇਮਿਨਾ ਸਮ੍ਪਨ੍ਨਸੀਲਾਦਿਭਾਵਮਤ੍ਤਕੇਨੇਵ ‘‘ਮਯ੍ਹਂ ਭਵੋ ਅਪ੍ਪਕੋ ਪਰਿਤ੍ਤਕੋ’’ਤਿ ਆਸਵਕ੍ਖਯਸਙ੍ਖਾਤਂ ਅਰਹਤ੍ਤਂ ਅਪ੍ਪਤ੍ਤੋ ਹੁਤ੍ਵਾ ਭਿਕ੍ਖੁ ਨਾਮ ਵਿਸ੍ਸਾਸਂ ਨਾਪਜ੍ਜੇਯ੍ਯ. ਯਥਾ ਹਿ ਅਪ੍ਪਮਤ੍ਤਕੋਪਿ ਗੂਥੋ ਦੁਗ੍ਗਨ੍ਧੋ ਹੋਤਿ, ਏਵਂ ਅਪ੍ਪਮਤ੍ਤਕੋਪਿ ਭਵੋ ਦੁਕ੍ਖੋਤਿ.

ਦੇਸਨਾਵਸਾਨੇ ਤੇ ਭਿਕ੍ਖੂ ਅਰਹਤ੍ਤੇ ਪਤਿਟ੍ਠਹਂਸੁ, ਸਮ੍ਪਤ੍ਤਾਨਮ੍ਪਿ ਸਾਤ੍ਥਿਕਾ ਧਮ੍ਮਦੇਸਨਾ ਅਹੋਸੀਤਿ.

ਸਮ੍ਬਹੁਲਸੀਲਾਦਿਸਮ੍ਪਨ੍ਨਭਿਕ੍ਖੁਵਤ੍ਥੁ ਦਸਮਂ.

ਧਮ੍ਮਟ੍ਠਵਗ੍ਗਵਣ੍ਣਨਾ ਨਿਟ੍ਠਿਤਾ.

ਏਕੂਨਵੀਸਤਿਮੋ ਵਗ੍ਗੋ.