੫. ਅਞ੍ਞਤਰਕੁਲਪੁਤ੍ਤਵਤ੍ਥੁ

ਮਲਿਤ੍ਥਿਯਾ ਦੁਚ੍ਚਰਿਤਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਅਞ੍ਞਤਰਂ ਕੁਲਪੁਤ੍ਤਂ ਆਰਬ੍ਭ ਕਥੇਸਿ.

ਤਸ੍ਸ ਕਿਰ ਸਮਾਨਜਾਤਿਕਂ ਕੁਲਕੁਮਾਰਿਕਂ ਆਨੇਸੁਂ. ਸਾ ਆਨੀਤਦਿਵਸਤੋ ਪਟ੍ਠਾਯ ਅਤਿਚਾਰਿਨੀ ਅਹੋਸਿ. ਸੋ ਕੁਲਪੁਤ੍ਤੋ ਤਸ੍ਸਾ ਅਤਿਚਾਰੇਨ ਲਜ੍ਜਿਤੋ ਕਸ੍ਸਚਿ ਸਮ੍ਮੁਖੀਭਾਵਂ ਉਪਗਨ੍ਤੁਂ ਅਸਕ੍ਕੋਨ੍ਤੋ ਬੁਦ੍ਧੁਪਟ੍ਠਾਨਾਦੀਨਿ ਪਚ੍ਛਿਨ੍ਦਿਤ੍ਵਾ ਕਤਿਪਾਹਚ੍ਚਯੇਨ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ‘‘ਕਿਂ, ਉਪਾਸਕ, ਨ ਦਿਸ੍ਸਸੀ’’ਤਿ ਵੁਤ੍ਤੇ ਤਮਤ੍ਥਂ ਆਰੋਚੇਸਿ. ਅਥ ਨਂ ਸਤ੍ਥਾ, ‘‘ਉਪਾਸਕ, ਪੁਬ੍ਬੇਪਿ ਮਯਾ ‘ਇਤ੍ਥਿਯੋ ਨਾਮ ਨਦੀਆਦਿਸਦਿਸਾ, ਤਾਸੁ ਪਣ੍ਡਿਤੇਨ ਕੋਧੋ ਨ ਕਾਤਬ੍ਬੋ’ਤਿ ਵੁਤ੍ਤਂ, ਤ੍ਵਂ ਪਨ ਭਵਪਟਿਚ੍ਛਨ੍ਨਤ੍ਤਾ ਨ ਸਲ੍ਲਕ੍ਖੇਸੀ’’ਤਿ ਵਤ੍ਵਾ ਤੇਨ ਯਾਚਿਤੋ –

‘‘ਯਥਾ ਨਦੀ ਚ ਪਨ੍ਥੋ ਚ, ਪਾਨਾਗਾਰਂ ਸਭਾ ਪਪਾ;

ਏਵਂ ਲੋਕਿਤ੍ਥਿਯੋ ਨਾਮ, ਵੇਲਾ ਤਾਸਂ ਨ ਵਿਜ੍ਜਤੀ’’ਤਿ. (ਜਾ. ੧.੧.੬੫; ੧.੧੨.੯) –

ਜਾਤਕਂ ਵਿਤ੍ਥਾਰੇਤ੍ਵਾ, ‘‘ਉਪਾਸਕ, ਇਤ੍ਥਿਯਾ ਹਿ ਅਤਿਚਾਰਿਨਿਭਾਵੋ ਮਲਂ, ਦਾਨਂ ਦੇਨ੍ਤਸ੍ਸ ਮਚ੍ਛੇਰਂ ਮਲਂ, ਇਧਲੋਕਪਰਲੋਕੇਸੁ ਸਤ੍ਤਾਨਂ ਅਕੁਸਲਕਮ੍ਮਂ ਵਿਨਾਸਨਤ੍ਥੇਨ ਮਲਂ, ਅਵਿਜ੍ਜਾ ਪਨ ਸਬ੍ਬਮਲਾਨਂ ਉਤ੍ਤਮਮਲ’’ਨ੍ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੨੪੨. ‘‘ਮਲਿਤ੍ਥਿਯਾ ਦੁਚ੍ਚਰਿਤਂ, ਮਚ੍ਛੇਰਂ ਦਦਤੋ ਮਲਂ;

ਮਲਾ ਵੇ ਪਾਪਕਾ ਧਮ੍ਮਾ, ਅਸ੍ਮਿਂ ਲੋਕੇ ਪਰਮ੍ਹਿ ਚ.

੨੪੩. ‘‘ਤਤੋ ਮਲਾ ਮਲਤਰਂ, ਅਵਿਜ੍ਜਾ ਪਰਮਂ ਮਲਂ;

ਏਤਂ ਮਲਂ ਪਹਨ੍ਤ੍ਵਾਨ, ਨਿਮ੍ਮਲਾ ਹੋਥ ਭਿਕ੍ਖਵੋ’’ਤਿ.

ਤਤ੍ਥ ਦੁਚ੍ਚਰਿਤਨ੍ਤਿ ਅਤਿਚਾਰੋ. ਅਤਿਚਾਰਿਨਿਞ੍ਹਿ ਇਤ੍ਥਿਂ ਸਾਮਿਕੋਪਿ ਗੇਹਾ ਨੀਹਰਤਿ, ਮਾਤਾਪਿਤੂਨਂ ਸਨ੍ਤਿਕਂ ਗਤਮ੍ਪਿ ‘‘ਤ੍ਵਂ ਕੁਲਸ੍ਸ ਅਗਾਰਵਭੂਤਾ, ਅਕ੍ਖੀਹਿਪਿ ਨ ਦਟ੍ਠਬ੍ਬਾ’’ਤਿ ਤਂ ਨੀਹਰਨ੍ਤਿ. ਸਾ ਅਨਾਥਾ ਵਿਚਰਨ੍ਤੀ ਮਹਾਦੁਕ੍ਖਂ ਪਾਪੁਣਾਤਿ. ਤੇਨਸ੍ਸਾ ਦੁਚ੍ਚਰਿਤਂ ‘‘ਮਲ’’ਨ੍ਤਿ ਵੁਤ੍ਤਂ. ਦਦਤੋਤਿ ਦਾਯਕਸ੍ਸ. ਯਸ੍ਸ ਹਿ ਖੇਤ੍ਤਕਸਨਕਾਲੇ ‘‘ਇਮਸ੍ਮਿਂ ਖੇਤ੍ਤੇ ਸਮ੍ਪਨ੍ਨੇ ਸਲਾਕਭਤ੍ਤਾਦੀਨਿ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਨਿਪ੍ਫਨ੍ਨੇ ਸਸ੍ਸੇਪਿ ਮਚ੍ਛੇਰਂ ਉਪ੍ਪਜ੍ਜਿਤ੍ਵਾ ਚਾਗਚਿਤ੍ਤਂ ਨਿਵਾਰੇਤਿ, ਸੋ ਮਚ੍ਛੇਰਵਸੇਨ ਚਾਗਚਿਤ੍ਤੇ ਅਵਿਰੂਹਨ੍ਤੇ ਮਨੁਸ੍ਸਸਮ੍ਪਤ੍ਤਿਂ ਦਿਬ੍ਬਸਮ੍ਪਤ੍ਤਿਂ ਨਿਬ੍ਬਾਨਸਮ੍ਪਤ੍ਤਿਨ੍ਤਿ ਤਿਸ੍ਸੋ ਸਮ੍ਪਤ੍ਤਿਯੋ ਨ ਲਭਤਿ. ਤੇਨ ਵੁਤ੍ਤਂ – ‘‘ਮਚ੍ਛੇਰਂ ਦਦਤੋ ਮਲ’’ਨ੍ਤਿ. ਸੇਸੇਸੁਪਿ ਏਸੇਵ ਨਯੋ. ਪਾਪਕਾ ਧਮ੍ਮਾਤਿ ਅਕੁਸਲਧਮ੍ਮਾ ਪਨ ਇਧਲੋਕੇ ਚ ਪਰਲੋਕੇ ਚ ਮਲਮੇਵ.

ਤਤੋਤਿ ਹੇਟ੍ਠਾ ਵੁਤ੍ਤਮਲਤੋ. ਮਲਤਰਨ੍ਤਿ ਅਤਿਰੇਕਮਲਂ ਵੋ ਕਥੇਮੀਤਿ ਅਤ੍ਥੋ. ਅਵਿਜ੍ਜਾਤਿ ਅਟ੍ਠਵਤ੍ਥੁਕਂ ਅਞ੍ਞਾਣਮੇਵ ਪਰਮਂ ਮਲਂ. ਪਹਨ੍ਤ੍ਵਾਨਾਤਿ ਏਤਂ ਮਲਂ ਜਹਿਤ੍ਵਾ, ਭਿਕ੍ਖਵੇ, ਤੁਮ੍ਹੇ ਨਿਮ੍ਮਲਾ ਹੋਥਾਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਅਞ੍ਞਤਰਕੁਲਪੁਤ੍ਤਵਤ੍ਥੁ ਪਞ੍ਚਮਂ.