੬. ਚੂਲ਼ਸਾਰਿਵਤ੍ਥੁ

ਸੁਜੀਵਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਚੂਲ਼ਸਾਰਿਂ ਨਾਮ ਸਾਰਿਪੁਤ੍ਤਤ੍ਥੇਰਸ੍ਸ ਸਦ੍ਧਿਵਿਹਾਰਿਕਂ ਆਰਬ੍ਭ ਕਥੇਸਿ.

ਸੋ ਕਿਰ ਏਕਦਿਵਸੇ ਵੇਜ੍ਜਕਮ੍ਮਂ ਕਤ੍ਵਾ ਪਣੀਤਭੋਜਨਂ ਲਭਿਤ੍ਵਾ ਆਦਾਯ ਨਿਕ੍ਖਮਨ੍ਤੋ ਅਨ੍ਤਰਾਮਗ੍ਗੇ ਥੇਰਂ ਦਿਸ੍ਵਾ, ‘‘ਭਨ੍ਤੇ, ਇਦਂ ਮਯਾ ਵੇਜ੍ਜਕਮ੍ਮਂ ਕਤ੍ਵਾ ਲਦ੍ਧਂ, ਤੁਮ੍ਹੇ ਅਞ੍ਞਤ੍ਥ ਏਵਰੂਪਂ ਭੋਜਨਂ ਨ ਲਭਿਸ੍ਸਥ, ਇਮਂ ਭੁਞ੍ਜਥ, ਅਹਂ ਤੇ ਵੇਜ੍ਜਕਮ੍ਮਂ ਕਤ੍ਵਾ ਨਿਚ੍ਚਕਾਲਂ ਏਵਰੂਪਂ ਆਹਾਰਂ ਆਹਰਿਸ੍ਸਾਮੀ’’ਤਿ ਆਹ. ਥੇਰੋ ਤਸ੍ਸ ਵਚਨਂ ਸੁਤ੍ਵਾ ਤੁਣ੍ਹੀਭੂਤੋਵ ਪਕ੍ਕਾਮਿ. ਭਿਕ੍ਖੂ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਤਮਤ੍ਥਂ ਆਰੋਚੇਸੁਂ. ਸਤ੍ਥਾ, ‘‘ਭਿਕ੍ਖਵੇ, ਅਹਿਰਿਕੋ ਨਾਮ ਪਗਬ੍ਭੋ ਕਾਕਸਦਿਸੋ ਹੁਤ੍ਵਾ ਏਕਵੀਸਤਿਵਿਧਾਯ ਅਨੇਸਨਾਯ ਠਤ੍ਵਾ ਸੁਖਂ ਜੀਵਤਿ, ਹਿਰਿਓਤ੍ਤਪ੍ਪਸਮ੍ਪਨ੍ਨੋ ਪਨ ਦੁਕ੍ਖਂ ਜੀਵਤੀ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੨੪੪. ‘‘ਸੁਜੀਵਂ ਅਹਿਰਿਕੇਨ, ਕਾਕਸੂਰੇਨ ਧਂਸਿਨਾ;

ਪਕ੍ਖਨ੍ਦਿਨਾ ਪਗਬ੍ਭੇਨ, ਸਂਕਿਲਿਟ੍ਠੇਨ ਜੀਵਿਤਂ.

੨੪੫. ‘‘ਹਿਰੀਮਤਾ ਚ ਦੁਜ੍ਜੀਵਂ, ਨਿਚ੍ਚਂ ਸੁਚਿਗਵੇਸਿਨਾ;

ਅਲੀਨੇਨਾਪ੍ਪਗਬ੍ਭੇਨ, ਸੁਦ੍ਧਾਜੀਵੇਨ ਪਸ੍ਸਤਾ’’ਤਿ.

ਤਤ੍ਥ ਅਹਿਰਿਕੇਨਾਤਿ ਛਿਨ੍ਨਹਿਰੋਤ੍ਤਪ੍ਪਕੇਨ. ਏਵਰੂਪੇਨ ਹਿ ਅਮਾਤਰਮੇਵ ‘‘ਮਾਤਾ ਮੇ’’ਤਿ ਅਪਿਤਾਦਯੋ ਏਵ ਚ ‘‘ਪਿਤਾ ਮੇ’’ਤਿਆਦਿਨਾ ਨਯੇਨ ਵਤ੍ਵਾ ਏਕਵੀਸਤਿਵਿਧਾਯ ਅਨੇਸਨਾਯ ਪਤਿਟ੍ਠਾਯ ਸੁਖੇਨ ਜੀਵਤੁਂ ਸਕ੍ਕਾ. ਕਾਕਸੂਰੇਨਾਤਿ ਸੂਰਕਾਕਸਦਿਸੇਨ. ਯਥਾ ਹਿ ਸੂਰਕਾਕੋ ਕੁਲਘਰੇਸੁ ਯਾਗੁਆਦੀਨਿ ਗਣ੍ਹਿਤੁਕਾਮੋ ਭਿਤ੍ਤਿਆਦੀਸੁ ਨਿਸੀਦਿਤ੍ਵਾ ਅਤ੍ਤਨੋ ਓਲੋਕਨਭਾਵਂ ਞਤ੍ਵਾ ਅਨੋਲੋਕੇਨ੍ਤੋ ਵਿਯ ਅਞ੍ਞਵਿਹਿਤਕੋ ਵਿਯ ਨਿਦ੍ਦਾਯਨ੍ਤੋ ਵਿਯ ਚ ਹੁਤ੍ਵਾ ਮਨੁਸ੍ਸਾਨਂ ਪਮਾਦਂ ਸਲ੍ਲਕ੍ਖੇਤ੍ਵਾ ਅਨੁਪਤਿਤ੍ਵਾ ‘‘ਸੂਸੂ’’ਤਿ ਵਦਨ੍ਤੇਸੁਯੇਵ ਭਾਜਨਤੋ ਮੁਖਪੂਰਂ ਗਹੇਤ੍ਵਾ ਪਲਾਯਤਿ, ਏਵਮੇਵਂ ਅਹਿਰਿਕਪੁਗ੍ਗਲੋਪਿ ਭਿਕ੍ਖੂਹਿ ਸਦ੍ਧਿਂ ਗਾਮਂ ਪਵਿਸਿਤ੍ਵਾ ਯਾਗੁਭਤ੍ਤਟ੍ਠਾਨਾਦੀਨਿ ਵਵਤ੍ਥਪੇਤਿ. ਤਤ੍ਥ ਭਿਕ੍ਖੂ ਪਿਣ੍ਡਾਯ ਚਰਿਤ੍ਵਾ ਯਾਪਨਮਤ੍ਤਂ ਆਦਾਯ ਆਸਨਸਾਲਂ ਗਨ੍ਤ੍ਵਾ ਪਚ੍ਚਵੇਕ੍ਖਨ੍ਤਾ ਯਾਗੁਂ ਪਿਵਿਤ੍ਵਾ ਕਮ੍ਮਟ੍ਠਾਨਂ ਮਨਸਿ ਕਰੋਨ੍ਤਿ ਸਜ੍ਝਾਯਨ੍ਤਿ ਆਸਨਸਾਲਂ ਸਮ੍ਮਜ੍ਜਨ੍ਤਿ. ਅਯਂ ਪਨ ਅਕਤ੍ਵਾ ਗਾਮਾਭਿਮੁਖੋਵ ਹੋਤਿ.

ਸੋ ਹਿ ਭਿਕ੍ਖੂਹਿ ‘‘ਪਸ੍ਸਥਿਮ’’ਨ੍ਤਿ ਓਲੋਕਿਯਮਾਨੋਪਿ ਅਨੋਲੋਕੇਨ੍ਤੋ ਵਿਯ ਅਞ੍ਞਵਿਹਿਤੋ ਵਿਯ ਨਿਦ੍ਦਾਯਨ੍ਤੋ ਵਿਯ ਗਣ੍ਠਿਕਂ ਪਟਿਮੁਞ੍ਚਨ੍ਤੋ ਵਿਯ ਚੀਵਰਂ ਸਂਵਿਦਹਨ੍ਤੋ ਵਿਯ ਹੁਤ੍ਵਾ ‘‘ਅਸੁਕਂ ਨਾਮ ਮੇ ਕਮ੍ਮਂ ਅਤ੍ਥੀ’’ਤਿ ਵਦਨ੍ਤੋ ਉਟ੍ਠਾਯਾਸਨਾ ਗਾਮਂ ਪਵਿਸਿਤ੍ਵਾ ਪਾਤੋਵ ਵਵਤ੍ਥਪਿਤਗੇਹੇਸੁ ਅਞ੍ਞਤਰਂ ਗੇਹਂ ਉਪਸਙ੍ਕਮਿਤ੍ਵਾ ਘਰਮਾਨੁਸਕੇਸੁ ਥੋਕਂ ਕਵਾਟਂ ਪਿਧਾਯ ਦ੍ਵਾਰੇ ਨਿਸੀਦਿਤ੍ਵਾ ਕਨ੍ਦਨ੍ਤੇਸੁਪਿ ਏਕੇਨ ਹਤ੍ਥੇਨ ਕਵਾਟਂ ਪਣਾਮੇਤ੍ਵਾ ਅਨ੍ਤੋ ਪਵਿਸਤਿ. ਅਥ ਨਂ ਦਿਸ੍ਵਾ ਅਕਾਮਕਾਪਿ ਆਸਨੇ ਨਿਸੀਦਾਪੇਤ੍ਵਾ ਯਾਗੁਆਦੀਸੁ ਯਂ ਅਤ੍ਥਿ, ਤਂ ਦੇਨ੍ਤਿ. ਸੋ ਯਾਵਦਤ੍ਥਂ ਭੁਞ੍ਜਿਤ੍ਵਾ ਅਵਸੇਸਂ ਪਤ੍ਤੇਨਾਦਾਯ ਪਕ੍ਕਮਤਿ. ਅਯਂ ਕਾਕਸੂਰੋ ਨਾਮ. ਏਵਰੂਪੇਨ ਅਹਿਰਿਕੇਨ ਸੁਜੀਵਨ੍ਤਿ ਅਤ੍ਥੋ.

ਧਂਸਿਨਾਤਿ ‘‘ਅਸੁਕਤ੍ਥੇਰੋ ਨਾਮ ਅਪ੍ਪਿਚ੍ਛੋ’’ਤਿਆਦੀਨਿ ਵਦਨ੍ਤੇਸੁ – ‘‘ਕਿਂ ਪਨ ਮਯਂ ਨ ਅਪ੍ਪਿਚ੍ਛਾ’’ਤਿਆਦਿਵਚਨੇਨ ਪਰੇਸਂ ਗੁਣਧਂਸਨਤਾਯ ਧਂਸਿਨਾ. ਤਥਾਰੂਪਸ੍ਸ ਵਚਨਂ ਸੁਤ੍ਵਾ ‘‘ਅਯਮ੍ਪਿ ਅਪ੍ਪਿਚ੍ਛਤਾਦਿਗੁਣੇ ਯੁਤ੍ਤੋ’’ਤਿ ਮਞ੍ਞਮਾਨਾ ਮਨੁਸ੍ਸਾ ਦਾਤਬ੍ਬਂ ਮਞ੍ਞਨ੍ਤਿ. ਸੋ ਪਨ ਤਤੋ ਪਟ੍ਠਾਯ ਵਿਞ੍ਞੂਪੁਰਿਸਾਨਂ ਚਿਤ੍ਤਂ ਆਰਾਧੇਤੁਂ ਅਸਕ੍ਕੋਨ੍ਤੋ ਤਮ੍ਹਾਪਿ ਲਾਭਾ ਪਰਿਹਾਯਤਿ. ਏਵਂ ਧਂਸਿਪੁਗ੍ਗਲੋ ਅਤ੍ਤਨੋਪਿ ਪਰਸ੍ਸਪਿ ਲਾਭਂ ਨਾਸੇਤਿਯੇਵ.

ਪਕ੍ਖਨ੍ਦਿਨਾਤਿ ਪਕ੍ਖਨ੍ਦਚਾਰਿਨਾ. ਪਰੇਸਂ ਕਿਚ੍ਚਾਨਿਪਿ ਅਤ੍ਤਨੋ ਕਿਚ੍ਚਾਨਿ ਵਿਯ ਦਸ੍ਸੇਨ੍ਤੋ ਪਾਤੋਵ ਭਿਕ੍ਖੂਸੁ ਚੇਤਿਯਙ੍ਗਣਾਦੀਸੁ ਵਤ੍ਤਂ ਕਤ੍ਵਾ ਕਮ੍ਮਟ੍ਠਾਨਮਨਸਿਕਾਰੇਨ ਥੋਕਂ ਨਿਸੀਦਿਤ੍ਵਾ ਉਟ੍ਠਾਯ ਗਾਮਂ ਪਵਿਸਨ੍ਤੇਸੁ ਮੁਖਂ ਧੋਵਿਤ੍ਵਾ ਪਣ੍ਡੁਕਾਸਾਵਪਾਰੁਪਨਅਕ੍ਖਿਅਞ੍ਜਨਸੀਸਮਕ੍ਖਨਾਦੀਹਿ ਅਤ੍ਤਭਾਵਂ ਮਣ੍ਡੇਤ੍ਵਾ ਸਮ੍ਮਜ੍ਜਨ੍ਤੋ ਵਿਯ ਦ੍ਵੇ ਤਯੋ ਸਮ੍ਮਜ੍ਜਨਿਪਹਾਰੇ ਦਤ੍ਵਾ ਦ੍ਵਾਰਕੋਟ੍ਠਕਾਭਿਮੁਖੋ ਹੋਤਿ. ਮਨੁਸ੍ਸਾ ਪਾਤੋਵ ‘‘ਚੇਤਿਯਂ ਵਨ੍ਦਿਸ੍ਸਾਮ, ਮਾਲਾਪੂਜਂ ਕਰਿਸ੍ਸਾਮਾ’’ਤਿ ਆਗਤਾ ਤਂ ਦਿਸ੍ਵਾ ‘‘ਅਯਂ ਵਿਹਾਰੋ ਇਮਂ ਦਹਰਂ ਨਿਸ੍ਸਾਯ ਪਟਿਜਗ੍ਗਨਂ ਲਭਤਿ, ਇਮਂ ਮਾ ਪਮਜ੍ਜਿਤ੍ਥਾ’’ਤਿ ਵਤ੍ਵਾ ਤਸ੍ਸ ਦਾਤਬ੍ਬਂ ਮਞ੍ਞਨ੍ਤਿ. ਏਵਰੂਪੇਨ ਪਕ੍ਖਨ੍ਦਿਨਾਪਿ ਸੁਜੀਵਂ. ਪਗਬ੍ਭੇਨਾਤਿ ਕਾਯਪਾਗਬ੍ਭਿਯਾਦੀਹਿ ਸਮਨ੍ਨਾਗਤੇਨ. ਸਂਕਿਲਿਟ੍ਠੇਨ ਜੀਵਿਤਨ੍ਤਿ ਏਵਂ ਜੀਵਿਕਂ ਕਪ੍ਪੇਤ੍ਵਾ ਜੀਵਨ੍ਤੇਨ ਹਿ ਪੁਗ੍ਗਲੇਨ ਸਂਕਿਲਿਟ੍ਠੇਨ ਹੁਤ੍ਵਾ ਜੀਵਿਤਂ ਨਾਮ ਹੋਤਿ, ਤਂ ਦੁਜ੍ਜੀਵਿਤਂ ਪਾਪਮੇਵਾਤਿ ਅਤ੍ਥੋ.

ਹਿਰੀਮਤਾ ਚਾਤਿ ਹਿਰੋਤ੍ਤਪ੍ਪਸਮ੍ਪਨ੍ਨੇਨ ਪੁਗ੍ਗਲੇਨ ਦੁਜ੍ਜੀਵਂ. ਸੋ ਹਿ ਅਮਾਤਾਦਯੋਵ ‘‘ਮਾਤਾ ਮੇ’’ਤਿਆਦੀਨਿ ਅਵਤ੍ਵਾ ਅਧਮ੍ਮਿਕੇ ਪਚ੍ਚਯੇ ਗੂਥਂ ਵਿਯ ਜਿਗੁਚ੍ਛਨ੍ਤੋ ਧਮ੍ਮੇਨ ਸਮੇਨ ਪਰਿਯੇਸਨ੍ਤੋ ਸਪਦਾਨਂ ਪਿਣ੍ਡਾਯ ਚਰਿਤ੍ਵਾ ਜੀਵਿਕਂ ਕਪ੍ਪੇਨ੍ਤੋ ਲੂਖਂ ਜੀਵਿਕਂ ਜੀਵਤੀਤਿ ਅਤ੍ਥੋ. ਸੁਚਿਗਵੇਸਿਨਾਤਿ ਸੁਚੀਨਿ ਕਾਯਕਮ੍ਮਾਦੀਨਿ ਗਵੇਸਨ੍ਤੇਨ. ਅਲੀਨੇਨਾਤਿ ਜੀਵਿਤਵੁਤ੍ਤਿਮਨਲ੍ਲੀਨੇਨ. ਸੁਦ੍ਧਾਜੀਵੇਨ ਪਸ੍ਸਤਾਤਿ ਏਵਰੂਪੋ ਹਿ ਪੁਗ੍ਗਲੋ ਸੁਦ੍ਧਾਜੀਵੋ ਨਾਮ ਹੋਤਿ. ਤੇਨ ਏਵਂ ਸੁਦ੍ਧਾਜੀਵੇਨ ਤਮੇਵ ਸੁਦ੍ਧਾਜੀਵਂ ਸਾਰਤੋ ਪਸ੍ਸਤਾ ਲੂਖਜੀਵਿਤਵਸੇਨ ਦੁਜ੍ਜੀਵਂ ਹੋਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਚੂਲ਼ਸਾਰਿਵਤ੍ਥੁ ਛਟ੍ਠਂ.