੩. ਤਿਸ੍ਸਤ੍ਥੇਰਵਤ੍ਥੁ

ਅਯਸਾਵ ਮਲਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਤਿਸ੍ਸਤ੍ਥੇਰਂ ਨਾਮ ਭਿਕ੍ਖੁਂ ਆਰਬ੍ਭ ਕਥੇਸਿ.

ਏਕੋ ਕਿਰ ਸਾਵਤ੍ਥਿਵਾਸੀ ਕੁਲਪੁਤ੍ਤੋ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਤਿਸ੍ਸਤ੍ਥੇਰੋਤਿ ਪਞ੍ਞਾਯਿ. ਸੋ ਅਪਰਭਾਗੇ ਜਨਪਦਵਿਹਾਰੇ ਵਸ੍ਸੂਪਗਤੋ ਅਟ੍ਠਹਤ੍ਥਕਂ ਥੂਲਸਾਟਕਂ ਲਭਿਤ੍ਵਾ ਵੁਤ੍ਥਵਸ੍ਸੋ ਪਵਾਰੇਤ੍ਵਾ ਤਂ ਆਦਾਯ ਗਨ੍ਤ੍ਵਾ ਭਗਿਨਿਯਾ ਹਤ੍ਥੇ ਠਪੇਸਿ. ਸਾ ‘‘ਨ ਮੇ ਏਸੋ ਸਾਟਕੋ ਭਾਤੁ ਅਨੁਚ੍ਛਵਿਕੋ’’ਤਿ ਤਂ ਤਿਖਿਣਾਯ ਵਾਸਿਯਾ ਛਿਨ੍ਦਿਤ੍ਵਾ ਹੀਰਹੀਰਂ ਕਤ੍ਵਾ ਉਦੁਕ੍ਖਲੇ ਕੋਟ੍ਟੇਤ੍ਵਾ ਪਵਿਸੇਤ੍ਵਾ ਪੋਥੇਤ੍ਵਾ ਵਟ੍ਟੇਤ੍ਵਾ ਸੁਖੁਮਸੁਤ੍ਤਂ ਕਨ੍ਤਿਤ੍ਵਾ ਸਾਟਕਂ ਵਾਯਾਪੇਸਿ. ਥੇਰੋਪਿ ਸੁਤ੍ਤਞ੍ਚੇਵ ਸੂਚਿਯੋ ਚ ਸਂਵਿਦਹਿਤ੍ਵਾ ਚੀਵਰਕਾਰਕੇ ਦਹਰਸਾਮਣੇਰੇ ਸਨ੍ਨਿਪਾਤੇਤ੍ਵਾ ਭਗਿਨਿਯਾ ਸਨ੍ਤਿਕਂ ਗਨ੍ਤ੍ਵਾ ‘‘ਤਂ ਮੇ ਸਾਟਕਂ ਦੇਥ, ਚੀਵਰਂ ਕਾਰੇਸ੍ਸਾਮੀ’’ਤਿ ਆਹ. ਸਾ ਨਵਹਤ੍ਥਂ ਸਾਟਕਂ ਨੀਹਰਿਤ੍ਵਾ ਕਨਿਟ੍ਠਭਾਤਿਕਸ੍ਸ ਹਤ੍ਥੇ ਠਪੇਸਿ. ਸੋ ਤਂ ਗਹੇਤ੍ਵਾ ਵਿਤ੍ਥਾਰੇਤ੍ਵਾ ਓਲੋਕੇਤ੍ਵਾ ‘‘ਮਮ ਸਾਟਕੋ ਥੂਲੋ ਅਟ੍ਠਹਤ੍ਥੋ, ਅਯਂ ਸੁਖੁਮੋ ਨਵਹਤ੍ਥੋ. ਨਾਯਂ ਮਮ ਸਾਟਕੋ, ਤੁਮ੍ਹਾਕਂ ਏਸ, ਨ ਮੇ ਇਮਿਨਾ ਅਤ੍ਥੋ, ਤਮੇਵ ਮੇ ਦੇਥਾ’’ਤਿ ਆਹ. ‘‘ਭਨ੍ਤੇ, ਤੁਮ੍ਹਾਕਮੇਵ ਏਸੋ, ਗਣ੍ਹਥ ਨ’’ਨ੍ਤਿ? ਸੋ ਨੇਵ ਇਚ੍ਛਿ. ਅਥਸ੍ਸ ਅਤ੍ਤਨਾ ਕਤਕਿਚ੍ਚਂ ਸਬ੍ਬਂ ਆਰੋਚੇਤ੍ਵਾ, ‘‘ਭਨ੍ਤੇ, ਤੁਮ੍ਹਾਕਮੇਵੇਸ, ਗਣ੍ਹਥ ਨ’’ਨ੍ਤਿ ਅਦਾਸਿ. ਸੋ ਤਂ ਆਦਾਯ ਵਿਹਾਰਂ ਗਨ੍ਤ੍ਵਾ ਚੀਵਰਕਮ੍ਮਂ ਪਟ੍ਠਪੇਸਿ.

ਅਥਸ੍ਸ ਭਗਿਨੀ ਚੀਵਰਕਾਰਾਨਂ ਅਤ੍ਥਾਯ ਯਾਗੁਭਤ੍ਤਾਦੀਨਿ ਸਮ੍ਪਾਦੇਸਿ. ਚੀਵਰਸ੍ਸ ਨਿਟ੍ਠਿਤਦਿਵਸੇ ਪਨ ਅਤਿਰੇਕਸਕ੍ਕਾਰਂ ਕਾਰੇਸਿ. ਸੋ ਚੀਵਰਂ ਓਲੋਕੇਤ੍ਵਾ ਤਸ੍ਮਿਂ ਉਪ੍ਪਨ੍ਨਸਿਨੇਹੋ ‘‘ਸ੍ਵੇ ਦਾਨਿ ਨਂ ਪਾਰੁਪਿਸ੍ਸਾਮੀ’’ਤਿ ਸਂਹਰਿਤ੍ਵਾ ਚੀਵਰਵਂਸੇ ਠਪੇਤ੍ਵਾ ਤਂ ਰਤ੍ਤਿਂ ਭੁਤ੍ਤਾਹਾਰਂ ਜਿਰਾਪੇਤੁਂ ਅਸਕ੍ਕੋਨ੍ਤੋ ਕਾਲਂ ਕਤ੍ਵਾ ਤਸ੍ਮਿਂਯੇਵ ਚੀਵਰੇ ਊਕਾ ਹੁਤ੍ਵਾ ਨਿਬ੍ਬਤ੍ਤਿ. ਭਗਿਨੀਪਿਸ੍ਸ ਕਾਲਕਿਰਿਯਂ ਸੁਤ੍ਵਾ ਭਿਕ੍ਖੂਨਂ ਪਾਦੇਸੁ ਪਵਤ੍ਤਮਾਨਾ ਰੋਦਿ. ਭਿਕ੍ਖੂ ਤਸ੍ਸ ਸਰੀਰਕਿਚ੍ਚਂ ਕਤ੍ਵਾ ਗਿਲਾਨੁਪਟ੍ਠਾਕਸ੍ਸ ਅਭਾਵੇਨ ਸਙ੍ਘਸ੍ਸੇਵ ਤਂ ਪਾਪੁਣਾਤਿ. ‘‘ਭਾਜੇਸ੍ਸਾਮ ਨ’’ਨ੍ਤਿ ਤਂ ਚੀਵਰਂ ਨੀਹਰਾਪੇਸੁਂ. ਸਾ ਊਕਾ ‘‘ਇਮੇ ਮਮ ਸਨ੍ਤਕਂ ਵਿਲੁਮ੍ਪਨ੍ਤੀ’’ਤਿ ਵਿਰਵਨ੍ਤੀ ਇਤੋ ਚਿਤੋ ਚ ਸਨ੍ਧਾਵਿ. ਸਤ੍ਥਾ ਗਨ੍ਧਕੁਟਿਯਂ ਨਿਸਿਨ੍ਨੋਵ ਦਿਬ੍ਬਾਯ ਸੋਤਧਾਤੁਯਾ ਤਂ ਸਦ੍ਦਂ ਸੁਤ੍ਵਾ, ‘‘ਆਨਨ੍ਦ, ਤਿਸ੍ਸਸ੍ਸ ਚੀਵਰਂ ਅਭਾਜੇਤ੍ਵਾ ਸਤ੍ਤਾਹਂ ਨਿਕ੍ਖਿਪਿਤੁਂ ਵਦੇਹੀ’’ਤਿ ਆਹ. ਥੇਰੋ ਤਥਾ ਕਾਰੇਸਿ. ਸਾਪਿ ਸਤ੍ਤਮੇ ਦਿਵਸੇ ਕਾਲਂ ਕਤ੍ਵਾ ਤੁਸਿਤਵਿਮਾਨੇ ਨਿਬ੍ਬਤ੍ਤਿ. ਸਤ੍ਥਾ ‘‘ਅਟ੍ਠਮੇ ਦਿਵਸੇ ਤਿਸ੍ਸਸ੍ਸ ਚੀਵਰਂ ਭਾਜੇਤ੍ਵਾ ਗਣ੍ਹਥਾ’’ਤਿ ਆਣਾਪੇਸਿ. ਭਿਕ੍ਖੂ ਤਥਾ ਕਰਿਂਸੁ.

ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਕਸ੍ਮਾ ਨੁ ਖੋ ਸਤ੍ਥਾ ਤਿਸ੍ਸਸ੍ਸ ਚੀਵਰਂ ਸਤ੍ਤ ਦਿਵਸੇ ਠਪਾਪੇਤ੍ਵਾ ਅਟ੍ਠਮੇ ਦਿਵਸੇ ਗਣ੍ਹਿਤੁਂ ਅਨੁਜਾਨੀ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ, ‘‘ਭਿਕ੍ਖਵੇ, ਤਿਸ੍ਸੋ ਅਤ੍ਤਨੋ ਚੀਵਰੇ ਊਕਾ ਹੁਤ੍ਵਾ ਨਿਬ੍ਬਤ੍ਤੋ, ਤੁਮ੍ਹੇਹਿ ਤਸ੍ਮਿਂ ਭਾਜਿਯਮਾਨੇ ‘ਇਮੇ ਮਮ ਸਨ੍ਤਕਂ ਵਿਲੁਮ੍ਪਨ੍ਤੀ’ਤਿ ਵਿਰਵਨ੍ਤੀ ਇਤੋ ਚਿਤੋ ਚ ਧਾਵਿ. ਸਾ ਤੁਮ੍ਹੇਹਿ ਚੀਵਰੇ ਗਯ੍ਹਮਾਨੇ ਤੁਮ੍ਹੇਸੁ ਮਨਂ ਪਦੁਸ੍ਸਿਤ੍ਵਾ ਨਿਰਯੇ ਨਿਬ੍ਬਤ੍ਤੇਯ੍ਯ, ਤੇਨ ਚਾਹਂ ਚੀਵਰਂ ਨਿਕ੍ਖਿਪਾਪੇਸਿਂ. ਇਦਾਨਿ ਪਨ ਸਾ ਤੁਸਿਤਵਿਮਾਨੇ ਨਿਬ੍ਬਤ੍ਤਾ, ਤੇਨ ਵੋ ਮਯਾ ਚੀਵਰਗਹਣਂ ਅਨੁਞ੍ਞਾਤ’’ਨ੍ਤਿ ਵਤ੍ਵਾ ਪੁਨ ਤੇਹਿ ‘‘ਭਾਰਿਯਾ ਵਤ ਅਯਂ, ਭਨ੍ਤੇ, ਤਣ੍ਹਾ ਨਾਮਾ’’ਤਿ ਵੁਤ੍ਤੇ ‘‘ਆਮ, ਭਿਕ੍ਖਵੇ, ਇਮੇਸਂ ਸਤ੍ਤਾਨਂ ਤਣ੍ਹਾ ਨਾਮ ਭਾਰਿਯਾ. ਯਥਾ ਅਯਤੋ ਮਲਂ ਉਟ੍ਠਹਿਤ੍ਵਾ ਅਯਮੇਵ ਖਾਦਤਿ ਵਿਨਾਸੇਤਿ ਅਪਰਿਭੋਗਂ ਕਰੋਤਿ, ਏਵਮੇਵਾਯਂ ਤਣ੍ਹਾ ਇਮੇਸਂ ਸਤ੍ਤਾਨਂ ਅਬ੍ਭਨ੍ਤਰੇ ਉਪ੍ਪਜ੍ਜਿਤ੍ਵਾ ਤੇ ਸਤ੍ਤੇ ਨਿਰਯਾਦੀਸੁ ਨਿਬ੍ਬਤ੍ਤਾਪੇਤਿ, ਵਿਨਾਸਂ ਪਾਪੇਤੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੪੦. ‘‘ਅਯਸਾਵ ਮਲਂ ਸਮੁਟ੍ਠਿਤਂ,

ਤਤੁਟ੍ਠਾਯ ਤਮੇਵ ਖਾਦਤਿ;

ਏਵਂ ਅਤਿਧੋਨਚਾਰਿਨਂ,

ਸਾਨਿ ਕਮ੍ਮਾਨਿ ਨਯਨ੍ਤਿ ਦੁਗ੍ਗਤਿ’’ਨ੍ਤਿ.

ਤਤ੍ਥ ਅਯਸਾਵਾਤਿ ਅਯਤੋ ਸਮੁਟ੍ਠਿਤਂ. ਤਤੁਟ੍ਠਾਯਾਤਿ ਤਤੋ ਉਟ੍ਠਾਯ. ਅਤਿਧੋਨਚਾਰਿਨਨ੍ਤਿ ਧੋਨਾ ਵੁਚ੍ਚਤਿ ਚਤ੍ਤਾਰੋ ਪਚ੍ਚਯੇ ‘‘ਇਦਮਤ੍ਥਂ ਏਤੇ’’ਤਿ ਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਨਪਞ੍ਞਾ, ਤਂ ਅਤਿਕ੍ਕਮਿਤ੍ਵਾ ਚਰਨ੍ਤੋ ਅਤਿਧੋਨਚਾਰੀ ਨਾਮ. ਇਦਂ ਵੁਤ੍ਤਂ ਹੋਤਿ – ਯਥਾ ਅਯਤੋ ਮਲਂ ਸਮੁਟ੍ਠਾਯ ਤਤੋ ਸਮੁਟ੍ਠਿਤਂ ਤਮੇਵ ਖਾਦਤਿ, ਏਵਮੇਵਂ ਚਤੁਪਚ੍ਚਯੇ ਅਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਨ੍ਤਂ ਅਤਿਧੋਨਚਾਰਿਨਂ ਸਾਨਿ ਕਮ੍ਮਾਨਿ ਅਤ੍ਤਨਿ ਠਿਤਤ੍ਤਾ ਅਤ੍ਤਨੋ ਸਨ੍ਤਕਾਨੇਵ ਤਾਨਿ ਕਮ੍ਮਾਨਿ ਦੁਗ੍ਗਤਿਂ ਨਯਨ੍ਤੀਤਿ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਤਿਸ੍ਸਤ੍ਥੇਰਵਤ੍ਥੁ ਤਤਿਯਂ.