੨. ਅਞ੍ਞਤਰਬ੍ਰਾਹ੍ਮਣਵਤ੍ਥੁ

ਅਨੁਪੁਬ੍ਬੇਨਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਬ੍ਰਾਹ੍ਮਣਂ ਆਰਬ੍ਭ ਕਥੇਸਿ.

ਸੋ ਕਿਰ ਏਕਦਿਵਸਂ ਪਾਤੋਵ ਨਿਕ੍ਖਮਿਤ੍ਵਾ ਭਿਕ੍ਖੂਨਂ ਚੀਵਰਪਾਰੁਪਨਟ੍ਠਾਨੇ ਭਿਕ੍ਖੂ ਚੀਵਰਂ ਪਾਰੁਪਨ੍ਤੇ ਓਲੋਕੇਨ੍ਤੋ ਅਟ੍ਠਾਸਿ. ਤਂ ਪਨ ਠਾਨਂ ਵਿਰੂਲ਼੍ਹਤਿਣਂ ਹੋਤਿ. ਅਥੇਕਸ੍ਸ ਭਿਕ੍ਖੁਨੋ ਚੀਵਰਂ ਪਾਰੁਪਨ੍ਤਸ੍ਸ ਚੀਵਰਕਣ੍ਣੋ ਤਿਣੇਸੁ ਪਵਟ੍ਟੇਨ੍ਤੋ ਉਸ੍ਸਾਵਬਿਨ੍ਦੂਹਿ ਤੇਮਿ. ਬ੍ਰਾਹ੍ਮਣੋ ‘‘ਇਮਂ ਠਾਨਂ ਅਪ੍ਪਹਰਿਤਂ ਕਾਤੁਂ ਵਟ੍ਟਤੀ’’ਤਿ ਪੁਨਦਿਵਸੇ ਕੁਦ੍ਦਾਲਂ ਆਦਾਯ ਗਨ੍ਤ੍ਵਾ ਤਂ ਠਾਨਂ ਤਚ੍ਛੇਤ੍ਵਾ ਖਲਮਣ੍ਡਲਸਦਿਸਂ ਅਕਾਸਿ. ਪੁਨਦਿਵਸੇਪਿ ਤਂ ਠਾਨਂ ਆਗਨ੍ਤ੍ਵਾ ਭਿਕ੍ਖੂਸੁ ਚੀਵਰਂ ਪਾਰੁਪਨ੍ਤੇਸੁ ਏਕਸ੍ਸ ਚੀਵਰਕਣ੍ਣਂ ਭੂਮਿਯਂ ਪਤਿਤ੍ਵਾ ਪਂਸੁਮ੍ਹਿ ਪਵਟ੍ਟਮਾਨਂ ਦਿਸ੍ਵਾ ‘‘ਇਧ ਵਾਲੁਕਂ ਓਕਿਰਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਵਾਲੁਕਂ ਆਹਰਿਤ੍ਵਾ ਓਕਿਰਿ.

ਅਥੇਕਦਿਵਸਂ ਪੁਰੇਭਤ੍ਤਂ ਚਣ੍ਡੋ ਆਤਪੋ ਅਹੋਸਿ, ਤਦਾਪਿ ਭਿਕ੍ਖੂਨਂ ਚੀਵਰਂ ਪਾਰੁਪਨ੍ਤਾਨਂ ਗਤ੍ਤਤੋ ਸੇਦੇ ਮੁਚ੍ਚਨ੍ਤੇ ਦਿਸ੍ਵਾ ‘‘ਇਧ ਮਯਾ ਮਣ੍ਡਪਂ ਕਾਰੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਮਣ੍ਡਪਂ ਕਾਰੇਸਿ. ਪੁਨਦਿਵਸੇ ਪਾਤੋਵ ਵਸ੍ਸਂ ਵਸ੍ਸਿ, ਵਦ੍ਦਲਿਕਂ ਅਹੋਸਿ. ਤਦਾਪਿ ਬ੍ਰਾਹ੍ਮਣੋ ਭਿਕ੍ਖੂ ਓਲੋਕੇਨ੍ਤੋਵ ਠਿਤੋ ਤਿਨ੍ਤਚੀਵਰਕੇ ਭਿਕ੍ਖੂ ਦਿਸ੍ਵਾ ‘‘ਏਤ੍ਥ ਮਯਾ ਸਾਲਂ ਕਾਰੇਤੁਂ ਵਟ੍ਟਤੀ’’ਤਿ ਸਾਲਂ ਕਾਰੇਤ੍ਵਾ ‘‘ਇਦਾਨਿ ਸਾਲਮਹਂ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਅਨ੍ਤੋ ਚ ਬਹਿ ਚ ਭਿਕ੍ਖੂ ਨਿਸੀਦਾਪੇਤ੍ਵਾ ਭਤ੍ਤਕਿਚ੍ਚਾਵਸਾਨੇ ਅਨੁਮੋਦਨਤ੍ਥਾਯ ਸਤ੍ਥੁ ਪਤ੍ਤਂ ਗਹੇਤ੍ਵਾ, ‘‘ਭਨ੍ਤੇ, ਅਹਂ ਭਿਕ੍ਖੂਨਂ ਚੀਵਰਪਾਰੁਪਨਕਾਲੇ ਇਮਸ੍ਮਿਂ ਠਾਨੇ ਓਲੋਕੇਨ੍ਤੋ ਠਿਤੋ ਇਦਞ੍ਚਿਦਞ੍ਚ ਦਿਸ੍ਵਾ ਇਦਞ੍ਚਿਦਞ੍ਚ ਕਾਰੇਸਿ’’ਨ੍ਤਿ ਆਦਿਤੋ ਪਟ੍ਠਾਯ ਸਬ੍ਬਂ ਤਂ ਪਵਤ੍ਤਿਂ ਆਰੋਚੇਸਿ. ਸਤ੍ਥਾ ਤਸ੍ਸ ਵਚਨਂ ਸੁਤ੍ਵਾ, ‘‘ਬ੍ਰਾਹ੍ਮਣ, ਪਣ੍ਡਿਤਾ ਨਾਮ ਖਣੇ ਖਣੇ ਥੋਕਂ ਕੁਸਲਂ ਕਰੋਨ੍ਤਾ ਅਨੁਪੁਬ੍ਬੇਨ ਅਤ੍ਤਨੋ ਅਕੁਸਲਮਲਂ ਨੀਹਰਨ੍ਤਿਯੇਵਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੩੯. ‘‘ਅਨੁਪੁਬ੍ਬੇਨ ਮੇਧਾਵੀ, ਥੋਕਂ ਥੋਕਂ ਖਣੇ ਖਣੇ;

ਕਮ੍ਮਾਰੋ ਰਜਤਸ੍ਸੇਵ, ਨਿਦ੍ਧਮੇ ਮਲਮਤ੍ਤਨੋ’’ਤਿ.

ਤਤ੍ਥ ਅਨੁਪੁਬ੍ਬੇਨਾਤਿ ਅਨੁਪਟਿਪਾਟਿਯਾ. ਮੇਧਾਵੀਤਿ ਧਮ੍ਮੋਜਪਞ੍ਞਾਯ ਸਮਨ੍ਨਾਗਤੋ. ਖਣੇ ਖਣੇਤਿ ਓਕਾਸੇ ਓਕਾਸੇ ਕੁਸਲਂ ਕਰੋਨ੍ਤੋ. ਕਮ੍ਮਾਰੋ ਰਜਤਸ੍ਸੇਵਾਤਿ ਯਥਾ ਸੁਵਣ੍ਣਕਾਰੋ ਏਕਵਾਰਮੇਵ ਸੁਵਣ੍ਣਂ ਤਾਪੇਤ੍ਵਾ ਕੋਟ੍ਟੇਤ੍ਵਾ ਮਲਂ ਨੀਹਰਿਤ੍ਵਾ ਪਿਲਨ੍ਧਨਵਿਕਤਿਂ ਕਾਤੁਂ ਨ ਸਕ੍ਕੋਤਿ, ਪੁਨਪ੍ਪੁਨਂ ਤਾਪੇਨ੍ਤੋ ਕੋਟ੍ਟੇਨ੍ਤੋ ਪਨ ਮਲਂ ਨੀਹਰਤਿ, ਤਤੋ ਅਨੇਕਵਿਧਂ ਪਿਲਨ੍ਧਨਵਿਕਤਿਂ ਕਰੋਤਿ, ਏਵਮੇਵ ਪੁਨਪ੍ਪੁਨਂ ਕੁਸਲਂ ਕਰੋਨ੍ਤੋ ਪਣ੍ਡਿਤੋ ਅਤ੍ਤਨੋ ਰਾਗਾਦਿਮਲਂ ਨਿਦ੍ਧਮੇਯ੍ਯ, ਏਵਂ ਨਿਦ੍ਧਨ੍ਤਮਲੋ ਨਿਕ੍ਕਿਲੇਸੋਵ ਹੋਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬ੍ਰਾਹ੍ਮਣੋ ਸੋਤਾਪਤ੍ਤਿਫਲੇ ਪਤਿਟ੍ਠਤਿ, ਮਹਾਜਨਸ੍ਸਾਪਿ ਸਾਤ੍ਥਿਕਾ ਧਮ੍ਮਦੇਸਨਾ ਅਹੋਸੀਤਿ.

ਅਞ੍ਞਤਰਬ੍ਰਾਹ੍ਮਣਵਤ੍ਥੁ ਦੁਤਿਯਂ.