੧੦. ਮੇਣ੍ਡਕਸੇਟ੍ਠਿਵਤ੍ਥੁ

ਸੁਦਸ੍ਸਂ ਵਜ੍ਜਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਭਦ੍ਦਿਯਨਗਰਂ ਨਿਸ੍ਸਾਯ ਜਾਤਿਯਾਵਨੇ ਵਿਹਰਨ੍ਤੋ ਮੇਣ੍ਡਕਸੇਟ੍ਠਿਂ ਆਰਬ੍ਭ ਕਥੇਸਿ.

ਸਤ੍ਥਾ ਕਿਰ ਅਙ੍ਗੁਤ੍ਤਰਾਪੇਸੁ ਚਾਰਿਕਂ ਚਰਨ੍ਤੋ ਮੇਣ੍ਡਕਸੇਟ੍ਠਿਨੋ ਚ, ਭਰਿਯਾਯ ਚਸ੍ਸ ਚਨ੍ਦਪਦੁਮਾਯ, ਪੁਤ੍ਤਸ੍ਸ ਚ ਧਨਞ੍ਚਯਸੇਟ੍ਠਿਨੋ, ਸੁਣਿਸਾਯ ਚ ਸੁਮਨਦੇਵਿਯਾ, ਨਤ੍ਤਾਯ ਚਸ੍ਸ ਵਿਸਾਖਾਯ, ਦਾਸਸ੍ਸ ਚ ਪੁਣ੍ਣਸ੍ਸਾਤਿ ਇਮੇਸਂ ਸੋਤਾਪਤ੍ਤਿਫਲੂਪਨਿਸ੍ਸਯਂ ਦਿਸ੍ਵਾ ਭਦ੍ਦਿਯਨਗਰਂ ਗਨ੍ਤ੍ਵਾ ਜਾਤਿਯਾਵਨੇ ਵਿਹਾਸਿ. ਮੇਣ੍ਡਕਸੇਟ੍ਠਿ ਸਤ੍ਥੁ ਆਗਮਨਂ ਅਸ੍ਸੋਸਿ. ਕਸ੍ਮਾ ਪਨੇਸ ਮੇਣ੍ਡਕਸੇਟ੍ਠਿ ਨਾਮ ਜਾਤੋਤਿ? ਤਸ੍ਸ ਕਿਰ ਪਚ੍ਛਿਮਗੇਹੇ ਅਟ੍ਠਕਰੀਸਮਤ੍ਤੇ ਠਾਨੇ ਹਤ੍ਥਿਅਸ੍ਸਉਸਭਪਮਾਣਾ ਸੁਵਣ੍ਣਮੇਣ੍ਡਕਾ ਪਥਵਿਂ ਭਿਨ੍ਦਿਤ੍ਵਾ ਪਿਟ੍ਠਿਯਾ ਪਿਟ੍ਠਿਂ ਪਹਰਮਾਨਾ ਉਟ੍ਠਹਿਂਸੁ. ਤੇਸਂ ਮੁਖੇਸੁ ਪਞ੍ਚਵਣ੍ਣਾਨਂ ਸੁਤ੍ਤਾਨਂ ਗੇਣ੍ਡੁਕਾ ਪਕ੍ਖਿਤ੍ਤਾ ਹੋਨ੍ਤਿ. ਸਪ੍ਪਿਤੇਲਮਧੁਫਾਣਿਤਾਦੀਹਿ ਵਾ ਵਤ੍ਥਚ੍ਛਾਦਨਹਿਰਞ੍ਞਸੁਵਣ੍ਣਾਦੀਹਿ ਵਾ ਅਤ੍ਥੇ ਸਤਿ ਤੇਸਂ ਮੁਖਤੋ ਗੇਣ੍ਡੁਕੇ ਅਪਨੇਨ੍ਤਿ, ਏਕਸ੍ਸਾਪਿ ਮੇਣ੍ਡਕਸ੍ਸ ਮੁਖਤੋ ਜਮ੍ਬੁਦੀਪਵਾਸੀਨਂ ਪਹੋਨਕਂ ਸਪ੍ਪਿਤੇਲਮਧੁਫਾਣਿਤਵਤ੍ਥਚ੍ਛਾਦਨਹਿਰਞ੍ਞਸੁਵਣ੍ਣਂ ਨਿਕ੍ਖਮਤਿ. ਤਤੋ ਪਟ੍ਠਾਯ ਮੇਣ੍ਡਕਸੇਟ੍ਠੀਤਿ ਪਞ੍ਞਾਯਿ.

ਕਿਂ ਪਨਸ੍ਸ ਪੁਬ੍ਬਕਮ੍ਮਨ੍ਤਿ? ਵਿਪਸ੍ਸੀਬੁਦ੍ਧਕਾਲੇ ਕਿਰ ਏਸ ਅਵਰੋਜਸ੍ਸ ਨਾਮ ਕੁਟੁਮ੍ਬਿਕਸ੍ਸ ਭਾਗਿਨੇਯ੍ਯੋ ਮਾਤੁਲੇਨ ਸਮਾਨਨਾਮੋ ਅਵਰੋਜੋ ਨਾਮ ਅਹੋਸਿ. ਅਥਸ੍ਸ ਮਾਤੁਲੋ ਸਤ੍ਥੁ ਗਨ੍ਧਕੁਟਿਂ ਕਾਤੁਂ ਆਰਭਿ. ਸੋ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ, ‘‘ਮਾਤੁਲ, ਉਭੋਪਿ ਸਹੇਵ ਕਰੋਮਾ’’ਤਿ ਵਤ੍ਵਾ ‘‘ਅਹਂ ਅਞ੍ਞੇਹਿ ਸਦ੍ਧਿਂ ਅਸਾਧਾਰਣਂ ਕਤ੍ਵਾ ਏਕਕੋਵ ਕਰਿਸ੍ਸਾਮੀ’’ਤਿ ਤੇਨ ਪਨ ਪਟਿਕ੍ਖਿਤ੍ਤਕਾਲੇ ‘‘ਇਮਸ੍ਮਿਂ ਠਾਨੇ ਗਨ੍ਧਕੁਟਿਯਾ ਕਤਾਯ ਇਮਸ੍ਮਿਂ ਨਾਮ ਠਾਨੇ ਕੁਞ੍ਜਰਸਾਲਂ ਨਾਮ ਲਦ੍ਧੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਅਰਞ੍ਞਤੋ ਦਬ੍ਬਸਮ੍ਭਾਰੇ ਆਹਰਾਪੇਤ੍ਵਾ ਏਕਂ ਥਮ੍ਭਂ ਸੁਵਣ੍ਣਖਚਿਤਂ, ਏਕਂ ਰਜਤਖਚਿਤਂ, ਏਕਂ ਮਣਿਖਚਿਤਂ, ਏਕਂ ਸਤ੍ਤਰਤਨਖਚਿਤਨ੍ਤਿ ਏਵਂ ਤੁਲਾਸਙ੍ਘਾਤਦ੍ਵਾਰਕਵਾਟਵਾਤਪਾਨਗੋਪਾਨਸੀਛਦਨਿਟ੍ਠਕਾ ਸਬ੍ਬਾਪਿ ਸੁਵਣ੍ਣਾਦਿਖਚਿਤਾਵ ਕਾਰੇਤ੍ਵਾ ਗਨ੍ਧਕੁਟਿਯਾ ਸਮ੍ਮੁਖਟ੍ਠਾਨੇ ਤਥਾਗਤਸ੍ਸ ਸਤ੍ਤਰਤਨਮਯਂ ਕੁਞ੍ਜਰਸਾਲਂ ਕਾਰੇਸਿ. ਤਸ੍ਸਾ ਉਪਰਿ ਘਨਰਤ੍ਤਸੁਵਣ੍ਣਮਯਾ ਕਮ੍ਬਲਾ ਪਵਾਲ਼ਮਯਾ ਸਿਖਰਥੂਪਿਕਾਯੋ ਅਹੇਸੁਂ. ਕੁਞ੍ਜਰਸਾਲਾਯ ਮਜ੍ਝੇ ਠਾਨੇ ਰਤਨਮਣ੍ਡਪਂ ਕਾਰੇਤ੍ਵਾ ਧਮ੍ਮਾਸਨਂ ਪਤਿਟ੍ਠਾਪੇਸਿ. ਤਸ੍ਸ ਘਨਰਤ੍ਤਸੁਵਣ੍ਣਮਯਾ ਪਾਦਾ ਅਹੇਸੁਂ, ਤਥਾ ਚਤਸ੍ਸੋ ਅਟਨਿਯੋ. ਚਤ੍ਤਾਰੋ ਪਨ ਸੁਵਣ੍ਣਮੇਣ੍ਡਕੇ ਕਾਰਾਪੇਤ੍ਵਾ ਆਸਨਸ੍ਸ ਚਤੁਨ੍ਨਂ ਪਾਦਾਨਂ ਹੇਟ੍ਠਾ ਠਪੇਸਿ, ਦ੍ਵੇ ਮੇਣ੍ਡਕੇ ਕਾਰਾਪੇਤ੍ਵਾ ਪਾਦਪੀਠਕਾਯ ਹੇਟ੍ਠਾ ਠਪੇਸਿ, ਛ ਸੁਵਣ੍ਣਮੇਣ੍ਡਕੇ ਕਾਰਾਪੇਤ੍ਵਾ ਮਣ੍ਡਪਂ ਪਰਿਕ੍ਖਿਪੇਨ੍ਤੋ ਠਪੇਸਿ. ਧਮ੍ਮਾਸਨਂ ਪਠਮਂ ਸੁਤ੍ਤਮਯੇਹਿ ਰਜ੍ਜੁਕੇਹਿ ਵਾਯਾਪੇਤ੍ਵਾ ਮਜ੍ਝੇ ਸੁਵਣ੍ਣਸੁਤ੍ਤਮਯੇਹਿ ਉਪਰਿ ਮੁਤ੍ਤਮਯੇਹਿ ਸੁਤ੍ਤੇਹਿ ਵਾਯਾਪੇਸਿ. ਤਸ੍ਸ ਚਨ੍ਦਨਮਯੋ ਅਪਸ੍ਸਯੋ ਅਹੋਸਿ. ਏਵਂ ਕੁਞ੍ਜਰਸਾਲਂ ਨਿਟ੍ਠਾਪੇਤ੍ਵਾ ਸਾਲਾਮਹਂ ਕਰੋਨ੍ਤੋ ਅਟ੍ਠਸਟ੍ਠੀਹਿ ਭਿਕ੍ਖੁਸਤਸਹਸ੍ਸੇਹਿ ਸਦ੍ਧਿਂ ਸਤ੍ਥਾਰਂ ਨਿਮਨ੍ਤੇਤ੍ਵਾ ਚਤ੍ਤਾਰੋ ਮਾਸੇ ਦਾਨਂ ਦਤ੍ਵਾ ਓਸਾਨਦਿਵਸੇ ਤਿਚੀਵਰਂ ਅਦਾਸਿ. ਤਤ੍ਥ ਸਙ੍ਘਨਵਕਸ੍ਸ ਸਤਸਹਸ੍ਸਗ੍ਘਨਿਕਂ ਪਾਪੁਣਿ.

ਏਵਂ ਵਿਪਸ੍ਸੀਬੁਦ੍ਧਕਾਲੇ ਪੁਞ੍ਞਕਮ੍ਮਂ ਕਤ੍ਵਾ ਤਤੋ ਚੁਤੋ ਦੇਵੇਸੁ ਚ ਮਨੁਸ੍ਸੇਸੁ ਚ ਸਂਸਰਨ੍ਤੋ ਇਮਸ੍ਮਿਂ ਭਦ੍ਦਕਪ੍ਪੇ ਬਾਰਾਣਸਿਯਂ ਮਹਾਭੋਗਕੁਲੇ ਨਿਬ੍ਬਤ੍ਤਿਤ੍ਵਾ ਬਾਰਾਣਸਿਸੇਟ੍ਠਿ ਨਾਮ ਅਹੋਸਿ. ਸੋ ਏਕਦਿਵਸਂ ਰਾਜੂਪਟ੍ਠਾਨਂ ਗਚ੍ਛਨ੍ਤੋ ਪੁਰੋਹਿਤਂ ਦਿਸ੍ਵਾ ‘‘ਕਿਂ, ਆਚਰਿਯ, ਨਕ੍ਖਤ੍ਤਮੁਹੁਤ੍ਤਂ, ਉਪਧਾਰੇਥਾ’’ਤਿ ਆਹ. ਆਮ, ਉਪਧਾਰੇਮਿ, ਕਿਂ ਅਞ੍ਞਂ ਅਮ੍ਹਾਕਂ ਕਮ੍ਮਨ੍ਤਿ. ਤੇਨ ਹਿ ਕੀਦਿਸਂ ਜਨਪਦਚਾਰਿਤ੍ਤਨ੍ਤਿ? ਏਕਂ ਭਯਂ ਭਵਿਸ੍ਸਤੀਤਿ. ਕਿਂ ਭਯਂ ਨਾਮਾਤਿ? ਛਾਤਕਭਯਂ ਸੇਟ੍ਠੀਤਿ. ਕਦਾ ਭਵਿਸ੍ਸਤੀਤਿ? ਇਤੋ ਤਿਣ੍ਣਂ ਸਂਵਚ੍ਛਰਾਨਂ ਅਚ੍ਚਯੇਨਾਤਿ. ਤਂ ਸੁਤ੍ਵਾ ਸੇਟ੍ਠਿ ਬਹੁਂ ਕਸਿਕਮ੍ਮਂ ਕਾਰੇਤ੍ਵਾ ਗੇਹੇ ਵਿਜ੍ਜਮਾਨਧਨੇਨਾਪਿ ਧਞ੍ਞਮੇਵ ਗਹੇਤ੍ਵਾ ਅਡ੍ਢਤੇਰਸਾਨਿ ਕੋਟ੍ਠਸਤਾਨਿ ਕਾਰੇਤ੍ਵਾ ਸਬ੍ਬਕੋਟ੍ਠਕੇ ਵੀਹੀਹਿ ਪਰਿਪੂਰੇਸਿ. ਕੋਟ੍ਠੇਸੁ ਅਪ੍ਪਹੋਨ੍ਤੇਸੁ ਚਾਟਿਆਦੀਨਿ ਪੂਰੇਤ੍ਵਾ ਅਵਸੇਸਂ ਭੂਮਿਯਂ ਆਵਾਟੇ ਕਤ੍ਵਾ ਨਿਖਣਿ. ਨਿਧਾਨਾਵਸੇਸਂ ਮਤ੍ਤਿਕਾਯ ਸਦ੍ਧਿਂ ਮਦ੍ਦਿਤ੍ਵਾ ਭਿਤ੍ਤਿਯੋ ਲਿਮ੍ਪਾਪੇਸਿ.

ਸੋ ਅਪਰੇਨ ਸਮਯੇਨ ਛਾਤਕਭਯੇ ਸਮ੍ਪਤ੍ਤੇ ਯਥਾਨਿਕ੍ਖਿਤ੍ਤਂ ਧਞ੍ਞਂ ਪਰਿਭੁਞ੍ਜਨ੍ਤੋ ਕੋਟ੍ਠੇਸੁ ਚ ਚਾਟਿਆਦੀਸੁ ਚ ਨਿਕ੍ਖਿਤ੍ਤਧਞ੍ਞੇ ਪਰਿਕ੍ਖੀਣੇ ਪਰਿਜਨੇ ਪਕ੍ਕੋਸਾਪੇਤ੍ਵਾ ਆਹ – ‘‘ਗਚ੍ਛਥ, ਤਾਤਾ, ਪਬ੍ਬਤਪਾਦਂ ਪਵਿਸਿਤ੍ਵਾ ਜੀਵਨ੍ਤਾ ਸੁਭਿਕ੍ਖਕਾਲੇ ਮਮ ਸਨ੍ਤਿਕਂ ਆਗਨ੍ਤੁਕਾਮਾ ਆਗਚ੍ਛਥ, ਅਨਾਗਨ੍ਤੁਕਾਮਾ ਤਤ੍ਥ ਤਤ੍ਥੇਵ ਜੀਵਥਾ’’ਤਿ. ਤੇ ਰੋਦਮਾਨਾ ਅਸ੍ਸੁਮੁਖਾ ਹੁਤ੍ਵਾ ਸੇਟ੍ਠਿਂ ਵਨ੍ਦਿਤ੍ਵਾ ਖਮਾਪੇਤ੍ਵਾ ਸਤ੍ਤਾਹਂ ਨਿਸੀਦਿਤ੍ਵਾ ਤਥਾ ਅਕਂਸੁ. ਤਸ੍ਸ ਪਨ ਸਨ੍ਤਿਕੇ ਵੇਯ੍ਯਾਵਚ੍ਚਕਰੋ ਏਕੋਵ ਪੁਣ੍ਣੋ ਨਾਮ ਦਾਸੋ ਓਹੀਯਿ, ਤੇਨ ਸਦ੍ਧਿਂ ਸੇਟ੍ਠਿਜਾਯਾ ਸੇਟ੍ਠਿਪੁਤ੍ਤੋ ਸੇਟ੍ਠਿਸੁਣਿਸਾਤਿ ਪਞ੍ਚੇਵ ਜਨਾ ਅਹੇਸੁਂ. ਤੇ ਭੂਮਿਯਂ ਆਵਾਟੇਸੁ ਨਿਹਿਤਧਞ੍ਞੇਪਿ ਪਰਿਕ੍ਖੀਣੇ ਭਿਤ੍ਤਿਮਤ੍ਤਿਕਂ ਪਾਤੇਤ੍ਵਾ ਤੇਮੇਤ੍ਵਾ ਤਤੋ ਲਦ੍ਧਧਞ੍ਞੇਨ ਯਾਪਯਿਂਸੁ. ਅਥਸ੍ਸ ਜਾਯਾ ਛਾਤਕੇ ਅਵਤ੍ਥਰਨ੍ਤੇ ਮਤ੍ਤਿਕਾਯ ਖੀਯਮਾਨਾਯ ਭਿਤ੍ਤਿਪਾਦੇਸੁ ਅਵਸਿਟ੍ਠਮਤ੍ਤਿਕਂ ਪਾਤੇਤ੍ਵਾ ਤੇਮੇਤ੍ਵਾ ਅਡ੍ਢਾਲ਼੍ਹਕਮਤ੍ਤਂ ਵੀਹਿਂ ਲਭਿਤ੍ਵਾ ਕੋਟ੍ਟੇਤ੍ਵਾ ਏਕਂ ਤਣ੍ਡੁਲਨਾਲ਼ਿਂ ਗਹੇਤ੍ਵਾ ‘‘ਛਾਤਕਕਾਲੇ ਚੋਰਾ ਬਹੂ ਹੋਨ੍ਤੀ’’ਤਿ ਚੋਰਭਯੇਨ ਏਕਸ੍ਮਿਂ ਕੁਟੇ ਪਕ੍ਖਿਪਿਤ੍ਵਾ ਪਿਦਹਿਤ੍ਵਾ ਭੂਮਿਯਂ ਨਿਖਣਿਤ੍ਵਾ ਠਪੇਸਿ. ਅਥ ਨਂ ਸੇਟ੍ਠਿ ਰਾਜੂਪਟ੍ਠਾਨਤੋ ਆਗਨ੍ਤ੍ਵਾ ਆਹ – ‘‘ਭਦ੍ਦੇ, ਛਾਤੋਮ੍ਹਿ, ਅਤ੍ਥਿ ਕਿਞ੍ਚੀ’’ਤਿ. ਸਾ ਵਿਜ੍ਜਮਾਨਂ ‘‘ਨਤ੍ਥੀ’’ਤਿ ਅਵਤ੍ਵਾ ‘‘ਏਕਾ ਤਣ੍ਡੁਲਨਾਲ਼ਿ ਅਤ੍ਥੀ’’ਤਿ ਆਹ. ‘‘ਕਹਂ ਸਾ’’ਤਿ? ‘‘ਚੋਰਭਯੇਨ ਮੇ ਨਿਖਣਿਤ੍ਵਾ ਠਪਿਤਾ’’ਤਿ. ‘‘ਤੇਨ ਹਿ ਨਂ ਉਦ੍ਧਰਿਤ੍ਵਾ ਕਿਞ੍ਚਿ ਪਚਾਹੀ’’ਤਿ. ‘‘ਸਚੇ ਯਾਗੁਂ ਪਚਿਸ੍ਸਾਮਿ, ਦ੍ਵੇ ਵਾਰੇ ਲਭਿਸ੍ਸਤਿ. ਸਚੇ ਭਤ੍ਤਂ ਪਚਿਸ੍ਸਾਮਿ, ਏਕਵਾਰਮੇਵ ਲਭਿਸ੍ਸਤਿ, ਕਿਂ ਪਚਾਮਿ, ਸਾਮੀ’’ਤਿ ਆਹ. ‘‘ਅਮ੍ਹਾਕਂ ਅਞ੍ਞੋ ਪਚ੍ਚਯੋ ਨਤ੍ਥਿ, ਭਤ੍ਤਂ ਭੁਞ੍ਜਿਤ੍ਵਾ ਮਰਿਸ੍ਸਾਮ, ਭਤ੍ਤਮੇਵ ਪਚਾਹੀ’’ਤਿ. ਸਾ ਭਤ੍ਤਂ ਪਚਿਤ੍ਵਾ ਪਞ੍ਚ ਕੋਟ੍ਠਾਸੇ ਕਤ੍ਵਾ ਸੇਟ੍ਠਿਨੋ ਕੋਟ੍ਠਾਸਂ ਵਡ੍ਢੇਤ੍ਵਾ ਪੁਰਤੋ ਠਪੇਸਿ.

ਤਸ੍ਮਿਂ ਖਣੇ ਗਨ੍ਧਮਾਦਨਪਬ੍ਬਤੇ ਪਚ੍ਚੇਕਬੁਦ੍ਧੋ ਸਮਾਪਤ੍ਤਿਤੋ ਵੁਟ੍ਠਾਤਿ. ਅਨ੍ਤੋਸਮਾਪਤ੍ਤਿਯਂ ਕਿਰ ਸਮਾਪਤ੍ਤਿਬਲੇਨ ਜਿਘਚ੍ਛਾ ਨ ਬਾਧਤਿ. ਸਮਾਪਤ੍ਤਿਤੋ ਵੁਟ੍ਠਿਤਾਨਂ ਪਨ ਬਲਵਤੀ ਹੁਤ੍ਵਾ ਉਦਰਪਟਲਂ ਡਯ੍ਹਨ੍ਤੀ ਵਿਯ ਉਪ੍ਪਜ੍ਜਤਿ. ਤਸ੍ਮਾ ਤੇ ਲਭਨਟ੍ਠਾਨਂ ਓਲੋਕੇਤ੍ਵਾ ਗਚ੍ਛਨ੍ਤਿ. ਤਂ ਦਿਵਸਞ੍ਚ ਤੇਸਂ ਦਾਨਂ ਦਤ੍ਵਾ ਸੇਨਾਪਤਿਟ੍ਠਾਨਾਦੀਸੁ ਅਞ੍ਞਤਰਸਮ੍ਪਤ੍ਤਿਂ ਲਭਨ੍ਤਿ. ਤਸ੍ਮਾ ਸੋਪਿ ਦਿਬ੍ਬੇਨ ਚਕ੍ਖੁਨਾ ਓਲੋਕੇਨ੍ਤੋ ‘‘ਸਕਲਜਮ੍ਬੁਦੀਪੇ ਛਾਤਕਭਯਂ ਉਪ੍ਪਨ੍ਨਂ, ਸੇਟ੍ਠਿਗੇਹੇ ਚ ਪਞ੍ਚਨ੍ਨਂ ਜਨਾਨਂ ਨਾਲ਼ਿਕੋਦਨੋਵ ਪਕ੍ਕੋ, ਸਦ੍ਧਾ ਨੁ ਖੋ ਏਤੇ, ਸਕ੍ਖਿਸ੍ਸਨ੍ਤਿ ਵਾ ਮਮ ਸਙ੍ਗਹਂ ਕਾਤੁ’’ਨ੍ਤਿ ਤੇਸਂ ਸਦ੍ਧਭਾਵਞ੍ਚ ਸਙ੍ਗਹਂ ਕਾਤੁਂ ਸਮਤ੍ਥਭਾਵਞ੍ਚ ਦਿਸ੍ਵਾ ਪਤ੍ਤਚੀਵਰਮਾਦਾਯ ਮਹਾਸੇਟ੍ਠਿਸ੍ਸ ਪੁਰਤੋ ਦ੍ਵਾਰੇ ਠਿਤਮੇਵ ਅਤ੍ਤਾਨਂ ਦਸ੍ਸੇਸਿ. ਸੋ ਤਂ ਦਿਸ੍ਵਾ ਪਸਨ੍ਨਚਿਤ੍ਤੋ ‘‘ਪੁਬ੍ਬੇਪਿ ਮਯਾ ਦਾਨਸ੍ਸ ਅਦਿਨ੍ਨਤ੍ਤਾ ਏਵਰੂਪਂ ਛਾਤਕਂ ਦਿਟ੍ਠਂ, ਇਦਂ ਖੋ ਪਨ ਭਤ੍ਤਂ ਮਂ ਏਕਦਿਵਸਮੇਵ ਰਕ੍ਖੇਯ੍ਯ. ਅਯ੍ਯਸ੍ਸ ਪਨ ਦਿਨ੍ਨਂ ਅਨੇਕਾਸੁ ਕਪ੍ਪਕੋਟੀਸੁ ਮਮ ਹਿਤਸੁਖਾਵਹਂ ਭਵਿਸ੍ਸਤੀ’’ਤਿ ਤਂ ਭਤ੍ਤਪਾਤਿਂ ਅਪਨੇਤ੍ਵਾ ਪਚ੍ਚੇਕਬੁਦ੍ਧਂ ਉਪਸਙ੍ਕਮਿਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਗੇਹਂ ਪਵੇਸੇਤ੍ਵਾ ਆਸਨੇ ਨਿਸਿਨ੍ਨਸ੍ਸ ਪਾਦੇ ਧੋਵਿਤ੍ਵਾ ਸੁਵਣ੍ਣਪਾਦਪੀਠੇ ਠਪੇਤ੍ਵਾ ਭਤ੍ਤਪਾਤਿਮਾਦਾਯ ਪਚ੍ਚੇਕਬੁਦ੍ਧਸ੍ਸ ਪਤ੍ਤੇ ਓਕਿਰਿ. ਉਪਡ੍ਢਾਵਸੇਸੇ ਭਤ੍ਤੇ ਪਚ੍ਚੇਕਬੁਦ੍ਧੋ ਹਤ੍ਥੇਨ ਪਤ੍ਤਂ ਪਿਦਹਿ. ਅਥ ਨਂ, ‘‘ਭਨ੍ਤੇ, ਏਕਾਯ ਤਣ੍ਡੁਲਨਾਲ਼ਿਯਾ ਪਞ੍ਚਨ੍ਨਂ ਜਨਾਨਂ ਪਕ੍ਕਓਦਨਸ੍ਸ ਅਯਂ ਏਕੋ ਕੋਟ੍ਠਾਸੋ, ਇਮਂ ਦ੍ਵਿਧਾ ਕਾਤੁਂ ਨ ਸਕ੍ਕਾ. ਮਾ ਮਯ੍ਹਂ ਇਧਲੋਕੇ ਸਙ੍ਗਹਂ ਕਰੋਥ, ਅਹਂ ਨਿਰਵਸੇਸਂ ਦਾਤੁਕਾਮੋਮ੍ਹੀ’’ਤਿ ਵਤ੍ਵਾ ਸਬ੍ਬਂ ਭਤ੍ਤਮਦਾਸਿ. ਦਤ੍ਵਾ ਚ ਪਨ ਪਤ੍ਥਨਂ ਪਟ੍ਠਪੇਸਿ, ‘‘ਮਾ, ਭਨ੍ਤੇ, ਪੁਨ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਏਵਰੂਪਂ ਛਾਤਕਭਯਂ ਅਦ੍ਦਸਂ, ਇਤੋ ਪਟ੍ਠਾਯ ਸਕਲਜਮ੍ਬੁਦੀਪਵਾਸੀਨਂ ਬੀਜਭਤ੍ਤਂ ਦਾਤੁਂ ਸਮਤ੍ਥੋ ਭਵੇਯ੍ਯਂ, ਸਹਤ੍ਥੇਨ ਕਮ੍ਮਂ ਕਤ੍ਵਾ ਜੀਵਿਕਂ ਨ ਕਪ੍ਪੇਯ੍ਯਂ, ਅਡ੍ਢਤੇਰਸ ਕੋਟ੍ਠਸਤਾਨਿ ਸੋਧਾਪੇਤ੍ਵਾ ਸੀਸਂ ਨ੍ਹਾਯਿਤ੍ਵਾ ਤੇਸਂ ਦ੍ਵਾਰੇ ਨਿਸੀਦਿਤ੍ਵਾ ਉਦ੍ਧਂ ਓਲੋਕਿਤਕ੍ਖਣੇਯੇਵ ਮੇ ਰਤ੍ਤਸਾਲਿਧਾਰਾ ਪਤਿਤ੍ਵਾ ਸਬ੍ਬਕੋਟ੍ਠੇ ਪੂਰੇਯ੍ਯੁਂ. ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਚ ਅਯਮੇਵ ਭਰਿਯਾ, ਅਯਮੇਵ ਪੁਤ੍ਤੋ, ਅਯਮੇਵ ਸੁਣਿਸਾ, ਅਯਮੇਵ ਦਾਸੋ ਹੋਤੂ’’ਤਿ.

ਭਰਿਯਾਪਿਸ੍ਸ ‘‘ਮਮ ਸਾਮਿਕੇ ਜਿਘਚ੍ਛਾਯ ਪੀਲ਼ਿਯਮਾਨੇ ਨ ਸਕ੍ਕਾ ਮਯਾ ਭੁਞ੍ਜਿਤੁ’’ਨ੍ਤਿ ਚਿਨ੍ਤੇਤ੍ਵਾ ਅਤ੍ਤਨੋ ਕੋਟ੍ਠਾਸਂ ਪਚ੍ਚੇਕਬੁਦ੍ਧਸ੍ਸ ਦਤ੍ਵਾ ਪਤ੍ਥਨਂ ਪਟ੍ਠਪੇਸਿ, ‘‘ਭਨ੍ਤੇ, ਇਦਾਨਿ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਏਵਰੂਪਂ ਛਾਤਕਭਯਂ ਨ ਪਸ੍ਸੇਯ੍ਯਂ, ਭਤ੍ਤਥਾਲਿਕਂ ਪੁਰਤੋ ਕਤ੍ਵਾ ਸਕਲਜਮ੍ਬੁਦੀਪਵਾਸੀਨਂ ਭਤ੍ਤਂ ਦੇਨ੍ਤਿਯਾਪਿ ਚ ਮੇ ਯਾਵ ਨ ਉਟ੍ਠਹਿਸ੍ਸਾਮਿ, ਤਾਵ ਗਹਿਤਗਹਿਤਟ੍ਠਾਨਂ ਪੂਰਿਤਮੇਵ ਹੋਤੁ. ਅਯਮੇਵ ਸਾਮਿਕੋ, ਅਯਮੇਵ ਪੁਤ੍ਤੋ, ਅਯਮੇਵ ਸੁਣਿਸਾ, ਅਯਮੇਵ ਦਾਸੋ ਹੋਤੂ’’ਤਿ. ਪੁਤ੍ਤੋਪਿਸ੍ਸ ਅਤ੍ਤਨੋ ਕੋਟ੍ਠਾਸਂ ਪਚ੍ਚੇਕਬੁਦ੍ਧਸ੍ਸ ਦਤ੍ਵਾ ਪਤ੍ਥਨਂ ਪਟ੍ਠਪੇਸਿ, ‘‘ਭਨ੍ਤੇ, ਇਤੋ ਪਟ੍ਠਾਯ ਏਵਰੂਪਂ ਛਾਤਕਭਯਂ ਨ ਪਸ੍ਸੇਯ੍ਯਂ, ਏਕਞ੍ਚ ਮੇ ਸਹਸ੍ਸਥਵਿਕਂ ਗਹੇਤ੍ਵਾ ਸਕਲਜਮ੍ਬੁਦੀਪਵਾਸੀਨਂ ਕਹਾਪਣਂ ਦੇਨ੍ਤਸ੍ਸਾਪਿ ਅਯਂ ਸਹਸ੍ਸਥਵਿਕਾ ਪਰਿਪੁਣ੍ਣਾਵ ਹੋਤੁ, ਇਮੇਯੇਵ ਮਾਤਾਪਿਤਰੋ ਹੋਨ੍ਤੁ, ਅਯਂ ਭਰਿਯਾ, ਅਯਂ ਦਾਸੋ ਹੋਤੂ’’ਤਿ.

ਸੁਣਿਸਾਪਿਸ੍ਸ ਅਤ੍ਤਨੋ ਕੋਟ੍ਠਾਸਂ ਪਚ੍ਚੇਕਬੁਦ੍ਧਸ੍ਸ ਦਤ੍ਵਾ ਪਤ੍ਥਨਂ ਪਟ੍ਠਪੇਸਿ, ‘‘ਇਤੋ ਪਟ੍ਠਾਯ ਏਵਰੂਪਂ ਛਾਤਕਭਯਂ ਨ ਪਸ੍ਸੇਯ੍ਯਂ, ਏਕਞ੍ਚ ਮੇ ਧਞ੍ਞਪਿਟਕਂ ਪੁਰਤੋ ਠਪੇਤ੍ਵਾ ਸਕਲਜਮ੍ਬੁਦੀਪਵਾਸੀਨਂ ਬੀਜਭਤ੍ਤਂ ਦੇਨ੍ਤਿਯਾਪਿ ਖੀਣਭਾਵੋ ਮਾ ਪਞ੍ਞਾਯਿਤ੍ਥ, ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਇਮੇਯੇਵ ਸਸੁਰਾ ਹੋਨ੍ਤੁ, ਅਯਮੇਵ ਸਾਮਿਕੋ, ਅਯਮੇਵ ਦਾਸੋ ਹੋਤੂ’’ਤਿ. ਦਾਸੋਪਿ ਅਤ੍ਤਨੋ ਕੋਟ੍ਠਾਸਂ ਪਚ੍ਚੇਕਬੁਦ੍ਧਸ੍ਸ ਦਤ੍ਵਾ ਪਤ੍ਥਨਂ ਪਟ੍ਠਪੇਸਿ, ‘‘ਇਤੋ ਪਟ੍ਠਾਯ ਏਵਰੂਪਂ ਛਾਤਕਭਯਂ ਨ ਪਸ੍ਸੇਯ੍ਯਂ, ਸਬ੍ਬੇ ਇਮੇ ਸਾਮਿਕਾ ਹੋਨ੍ਤੁ, ਕਸਨ੍ਤਸ੍ਸ ਚ ਮੇ ਇਤੋ ਤਿਸ੍ਸੋ, ਏਤ੍ਤੋ ਤਿਸ੍ਸੋ, ਮਜ੍ਝੇ ਏਕਾਤਿ ਦਾਰੁਅਮ੍ਬਣਮਤ੍ਤਾ ਸਤ੍ਤ ਸਤ੍ਤ ਸੀਤਾਯੋ ਗਚ੍ਛਨ੍ਤੂ’’ਤਿ. ਸੋ ਤਂ ਦਿਵਸਂ ਸੇਨਾਪਤਿਟ੍ਠਾਨਂ ਪਤ੍ਥੇਤ੍ਵਾ ਲਦ੍ਧੁਂ ਸਮਤ੍ਥੋਪਿ ਸਾਮਿਕੇਸੁ ਸਿਨੇਹੇਨ ‘‘ਇਮੇਯੇਵ ਮੇ ਸਾਮਿਕਾ ਹੋਨ੍ਤੂ’’ਤਿ ਪਤ੍ਥਨਂ ਪਟ੍ਠਪੇਸਿ. ਪਚ੍ਚੇਕਬੁਦ੍ਧੋ ਸਬ੍ਬੇਸਮ੍ਪਿ ਵਚਨਾਵਸਾਨੇ ‘‘ਏਵਂ ਹੋਤੂ’’ਤਿ ਵਤ੍ਵਾ –

‘‘ਇਚ੍ਛਿਤਂ ਪਤ੍ਥਿਤਂ ਤੁਯ੍ਹਂ, ਖਿਪ੍ਪਮੇਵ ਸਮਿਜ੍ਝਤੁ;

ਸਬ੍ਬੇ ਪੂਰੇਨ੍ਤੁ ਸਙ੍ਕਪ੍ਪਾ, ਚਨ੍ਦੋ ਪਨ੍ਨਰਸੋ ਯਥਾ.

‘‘ਇਚ੍ਛਿਤਂ ਪਤ੍ਥਿਤਂ ਤੁਯ੍ਹਂ, ਖਿਪ੍ਪਮੇਵ ਸਮਿਜ੍ਝਤੁ;

ਸਬ੍ਬੇ ਪੂਰੇਨ੍ਤੁ ਸਙ੍ਕਪ੍ਪਾ, ਮਣਿ ਜੋਤਿਰਸੋ ਯਥਾ’’ਤਿ. –

ਪਚ੍ਚੇਕਬੁਦ੍ਧਗਾਥਾਹਿ ਅਨੁਮੋਦਨਂ ਕਤ੍ਵਾ ‘‘ਮਯਾ ਇਮੇਸਂ ਚਿਤ੍ਤਂ ਪਸਾਦੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ‘‘ਯਾਵ ਗਨ੍ਧਮਾਦਨਪਬ੍ਬਤਾ ਇਮੇ ਮਂ ਪਸ੍ਸਨ੍ਤੂ’’ਤਿ ਅਧਿਟ੍ਠਹਿਤ੍ਵਾ ਪਕ੍ਕਾਮਿ. ਤੇਪਿ ਓਲੋਕੇਤ੍ਵਾਵ ਅਟ੍ਠਂਸੁ. ਸੋ ਗਨ੍ਤ੍ਵਾ ਤਂ ਭਤ੍ਤਂ ਪਞ੍ਚਹਿ ਪਚ੍ਚੇਕਬੁਦ੍ਧਸਤੇਹਿ ਸਦ੍ਧਿਂ ਸਂਵਿਭਜਿ. ਤਂ ਤਸ੍ਸਾਨੁਭਾਵੇਨ ਸਬ੍ਬੇਸਮ੍ਪਿ ਪਹੋਤਿ. ਤੇ ਓਲੋਕੇਨ੍ਤਾਯੇਵ ਅਟ੍ਠਂਸੁ.

ਅਤਿਕ੍ਕਨ੍ਤੇ ਪਨ ਮਜ੍ਝਨ੍ਹਿਕੇ ਸੇਟ੍ਠਿਭਰਿਯਾ ਉਕ੍ਖਲਿਂ ਧੋਵਿਤ੍ਵਾ ਪਿਦਹਿਤ੍ਵਾ ਠਪੇਸਿ. ਸੇਟ੍ਠਿਪਿ ਜਿਘਚ੍ਛਾਯ ਪੀਲ਼ਿਤੋ ਨਿਪਜ੍ਜਿਤ੍ਵਾ ਨਿਦ੍ਦਂ ਓਕ੍ਕਮਿ. ਸੋ ਸਾਯਨ੍ਹੇ ਪਬੁਜ੍ਝਿਤ੍ਵਾ ਭਰਿਯਂ ਆਹ – ‘‘ਭਦ੍ਦੇ, ਅਤਿਵਿਯ ਛਾਤੋਮ੍ਹਿ, ਅਤ੍ਥਿ ਨੁ ਖੋ ਉਕ੍ਖਲਿਯਾ ਤਲੇ ਝਾਮਕਸਿਤ੍ਥਾਨੀ’’ਤਿ. ਸਾ ਧੋਵਿਤ੍ਵਾ ਉਕ੍ਖਲਿਯਾ ਠਪਿਤਭਾਵਂ ਜਾਨਨ੍ਤੀਪਿ ‘‘ਨਤ੍ਥੀ’’ਤਿ ਅਵਤ੍ਵਾ ‘‘ਉਕ੍ਖਲਿਂ ਵਿਵਰਿਤ੍ਵਾ ਆਚਿਕ੍ਖਿਸ੍ਸਾਮੀ’’ਤਿ ਉਟ੍ਠਾਯ ਉਕ੍ਖਲਿਮੂਲਂ ਗਨ੍ਤ੍ਵਾ ਉਕ੍ਖਲਿਂ ਵਿਵਰਿ, ਤਾਵਦੇਵ ਸੁਮਨਮਕੁਲਸਦਿਸਵਣ੍ਣਸ੍ਸ ਭਤ੍ਤਸ੍ਸ ਪੂਰਾ ਉਕ੍ਖਲਿ ਪਿਧਾਨਂ ਉਕ੍ਖਿਪਿਤ੍ਵਾ ਅਟ੍ਠਾਸਿ. ਸਾ ਤਂ ਦਿਸ੍ਵਾਵ ਪੀਤਿਯਾ ਫੁਟ੍ਠਸਰੀਰਾ ਸੇਟ੍ਠਿਂ ਆਹ – ‘‘ਉਟ੍ਠੇਹਿ, ਸਾਮਿ, ਅਹਂ ਉਕ੍ਖਲਿਂ ਧੋਵਿਤ੍ਵਾ ਪਿਦਹਿਂ, ਸਾ ਪਨ ਸੁਮਨਮਕੁਲਸਦਿਸਵਣ੍ਣਸ੍ਸ ਭਤ੍ਤਸ੍ਸ ਪੂਰਾ, ਪੁਞ੍ਞਾਨਿ ਨਾਮ ਕਤ੍ਤਬ੍ਬਰੂਪਾਨਿ, ਦਾਨਂ ਨਾਮ ਕਤ੍ਤਬ੍ਬਯੁਤ੍ਤਕਂ. ਉਟ੍ਠੇਹਿ, ਸਾਮਿ, ਭੁਞ੍ਜਸ੍ਸੂ’’ਤਿ. ਸਾ ਦ੍ਵਿਨ੍ਨਂ ਪਿਤਾਪੁਤ੍ਤਾਨਂ ਭਤ੍ਤਂ ਅਦਾਸਿ. ਤੇਸੁ ਸੁਤ੍ਵਾ ਉਟ੍ਠਿਤੇਸੁ ਸੁਣਿਸਾਯ ਸਦ੍ਧਿਂ ਨਿਸੀਦਿਤ੍ਵਾ ਭੁਞ੍ਜਿਤ੍ਵਾ ਪੁਣ੍ਣਸ੍ਸ ਭਤ੍ਤਂ ਅਦਾਸਿ. ਗਹਿਤਗਹਿਤਟ੍ਠਾਨਂ ਨ ਖੀਯਤਿ, ਕਟਚ੍ਛੁਨਾ ਸਕਿਂ ਗਹਿਤਟ੍ਠਾਨਮੇਵ ਪਞ੍ਞਾਯਤਿ. ਤਂਦਿਵਸਮੇਵ ਕੋਟ੍ਠਾਦਯੋ ਪੁਬ੍ਬੇ ਪੂਰਿਤਨਿਯਾਮੇਨੇਵ ਪੁਨ ਪੂਰਯਿਂਸੁ. ‘‘ਸੇਟ੍ਠਿਸ੍ਸ ਗੇਹੇ ਭਤ੍ਤਂ ਉਪ੍ਪਨ੍ਨਂ, ਬੀਜਭਤ੍ਤੇਹਿ ਅਤ੍ਥਿਕਾ ਆਗਨ੍ਤ੍ਵਾ ਗਣ੍ਹਨ੍ਤੂ’’ਤਿ ਨਗਰੇ ਘੋਸਨਂ ਕਾਰੇਸਿ. ਮਨੁਸ੍ਸਾ ਤਸ੍ਸ ਗੇਹਤੋ ਬੀਜਭਤ੍ਤਂ ਗਣ੍ਹਿਂਸੁ. ਸਕਲਜਮ੍ਬੁਦੀਪਵਾਸਿਨੋ ਤਂ ਨਿਸ੍ਸਾਯ ਜੀਵਿਤਂ ਲਭਿਂਸੁਯੇਵ.

ਸੋ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਭਦ੍ਦਿਯਨਗਰੇ ਸੇਟ੍ਠਿਕੁਲੇ ਨਿਬ੍ਬਤ੍ਤਿ. ਭਰਿਯਾਪਿਸ੍ਸ ਮਹਾਭੋਗਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤਾ ਤਸ੍ਸੇਵ ਗੇਹਂ ਅਗਮਾਸਿ. ਤਸ੍ਸ ਤਂ ਪੁਬ੍ਬਕਮ੍ਮਂ ਨਿਸ੍ਸਾਯ ਪਚ੍ਛਾਗੇਹੇ ਪੁਬ੍ਬੇ ਵੁਤ੍ਤਪ੍ਪਕਾਰਾ ਮੇਣ੍ਡਕਾ ਉਟ੍ਠਹਿਂਸੁ. ਪੁਤ੍ਤੋਪਿ ਨੇਸਂ ਪੁਤ੍ਤੋਵ, ਸੁਣਿਸਾ ਸੁਣਿਸਾਵ, ਦਾਸੋ ਦਾਸੋਵ ਅਹੋਸਿ. ਅਥੇਕਦਿਵਸਂ ਸੇਟ੍ਠਿ ਅਤ੍ਤਨੋ ਪੁਞ੍ਞਂ ਵੀਮਂਸਿਤੁਕਾਮੋ ਅਡ੍ਢਤੇਰਸਾਨਿ ਕੋਟ੍ਠਸਤਾਨਿ ਸੋਧਾਪੇਤ੍ਵਾ ਸੀਸਂ ਨ੍ਹਾਤੋ ਦ੍ਵਾਰੇ ਨਿਸੀਦਿਤ੍ਵਾ ਉਦ੍ਧਂ ਓਲੋਕੇਸਿ. ਸਬ੍ਬਾਨਿਪਿ ਵੁਤ੍ਤਪ੍ਪਕਾਰਾਨਂ ਰਤ੍ਤਸਾਲੀਨਂ ਪੂਰਯਿਂਸੁ. ਸੋ ਸੇਸਾਨਮ੍ਪਿ ਪੁਞ੍ਞਾਨਿ ਵੀਮਂਸਿਤੁਕਾਮੋ ਭਰਿਯਞ੍ਚ ਪੁਤ੍ਤਾਦਯੋ ਚ ‘‘ਤੁਮ੍ਹਾਕਮ੍ਪਿ ਪੁਞ੍ਞਾਨਿ ਵੀਮਂਸਿਸ੍ਸਥਾ’’ਤਿ ਆਹ.

ਅਥਸ੍ਸ ਭਰਿਯਾ ਸਬ੍ਬਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਮਹਾਜਨਸ੍ਸ ਪਸ੍ਸਨ੍ਤਸ੍ਸੇਵ ਤਣ੍ਡੁਲੇ ਮਿਨਾਪੇਤ੍ਵਾ ਤੇਹਿ ਭਤ੍ਤਂ ਪਚਾਪੇਤ੍ਵਾ ਦ੍ਵਾਰਕੋਟ੍ਠਕੇ ਪਞ੍ਞਤ੍ਤਾਸਨੇ ਨਿਸੀਦਿਤ੍ਵਾ ਸੁਵਣ੍ਣਕਟਚ੍ਛੁਂ ਆਦਾਯ ‘‘ਭਤ੍ਤੇਨ ਅਤ੍ਥਿਕਾ ਆਗਚ੍ਛਨ੍ਤੂ’’ਤਿ ਘੋਸਾਪੇਤ੍ਵਾ ਆਗਤਾਗਤਾਨਂ ਉਪਨੀਤਭਾਜਨਾਨਿ ਪੂਰੇਤ੍ਵਾ ਅਦਾਸਿ. ਸਕਲਦਿਵਸਮ੍ਪਿ ਦੇਨ੍ਤਿਯਾ ਕਟਚ੍ਛੁਨਾ ਗਹਿਤਟ੍ਠਾਨਮੇਵ ਪਞ੍ਞਾਯਤਿ. ਤਸ੍ਸਾ ਪਨ ਪੁਰਿਮਬੁਦ੍ਧਾਨਮ੍ਪਿ ਭਿਕ੍ਖੁਸਙ੍ਘਸ੍ਸ ਵਾਮਹਤ੍ਥੇਨ ਉਕ੍ਖਲਿਂ ਦਕ੍ਖਿਣਹਤ੍ਥੇਨ ਕਟਚ੍ਛੁਂ ਗਹੇਤ੍ਵਾ ਏਵਮੇਵ ਪਤ੍ਤੇ ਪੂਰੇਤ੍ਵਾ ਭਤ੍ਤਸ੍ਸ ਦਿਨ੍ਨਤ੍ਤਾ ਵਾਮਹਤ੍ਥਤਲਂ ਪੂਰੇਤ੍ਵਾ ਪਦੁਮਲਕ੍ਖਣਂ ਨਿਬ੍ਬਤ੍ਤਿ, ਦਕ੍ਖਿਣਹਤ੍ਥਤਲਂ ਪੂਰੇਤ੍ਵਾ ਚਨ੍ਦਲਕ੍ਖਣਂ ਨਿਬ੍ਬਤ੍ਤਿ. ਯਸ੍ਮਾ ਪਨ ਵਾਮਹਤ੍ਥਤੋ ਧਮ੍ਮਕਰਣਂ ਆਦਾਯ ਭਿਕ੍ਖੁਸਙ੍ਘਸ੍ਸ ਉਦਕਂ ਪਰਿਸ੍ਸਾਵੇਤ੍ਵਾ ਦਦਮਾਨਾ ਅਪਰਾਪਰਂ ਵਿਚਰਿ, ਤੇਨਸ੍ਸਾ ਦਕ੍ਖਿਣਪਾਦਤਲਂ ਪੂਰੇਤ੍ਵਾ ਚਨ੍ਦਲਕ੍ਖਣਂ ਨਿਬ੍ਬਤ੍ਤਿ, ਵਾਮਪਾਦਤਲਂ ਪੂਰੇਤ੍ਵਾ ਪਦੁਮਲਕ੍ਖਣਂ ਨਿਬ੍ਬਤ੍ਤਿ. ਤਸ੍ਸਾ ਇਮਿਨਾ ਕਾਰਣੇਨ ਚਨ੍ਦਪਦੁਮਾਤਿ ਨਾਮਂ ਕਰਿਂਸੁ.

ਪੁਤ੍ਤੋਪਿਸ੍ਸ ਸੀਸਂ ਨ੍ਹਾਤੋ ਸਹਸ੍ਸਥਵਿਕਂ ਆਦਾਯ ‘‘ਕਹਾਪਣੇਹਿ ਅਤ੍ਥਿਕਾ ਆਗਚ੍ਛਨ੍ਤੂ’’ਤਿ ਵਤ੍ਵਾ ਆਗਤਾਗਤਾਨਂ ਗਹਿਤਭਾਜਨਾਨਿ ਪੂਰੇਤ੍ਵਾ ਅਦਾਸਿ. ਥਵਿਕਾਯ ਕਹਾਪਣਸਹਸ੍ਸਂ ਅਹੋਸਿਯੇਵ. ਸੁਣਿਸਾਪਿਸ੍ਸ ਸਬ੍ਬਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਵੀਹਿਪਿਟਕਂ ਆਦਾਯ ਆਕਾਸਙ੍ਗਣੇ ਨਿਸਿਨ੍ਨਾ ‘‘ਬੀਜਭਤ੍ਤੇਹਿ ਅਤ੍ਥਿਕਾ ਆਗਚ੍ਛਨ੍ਤੂ’’ਤਿ ਵਤ੍ਵਾ ਆਗਤਾਗਤਾਨਂ ਗਹਿਤਭਾਜਨਾਨਿ ਪੂਰੇਤ੍ਵਾ ਅਦਾਸਿ. ਪਿਟਕਂ ਯਥਾਪੂਰਿਤਮੇਵ ਅਹੋਸਿ. ਦਾਸੋਪਿਸ੍ਸ ਸਬ੍ਬਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਸੁਵਣ੍ਣਯੁਗੇਸੁ ਸੁਵਣ੍ਣਯੋਤ੍ਤੇਹਿ ਗੋਣੇ ਯੋਜੇਤ੍ਵਾ ਸੁਵਣ੍ਣਪਤੋਦਯਟ੍ਠਿਂ ਆਦਾਯ ਦ੍ਵਿਨ੍ਨਂ ਗੋਣਾਨਂ ਗਨ੍ਧਪਞ੍ਚਙ੍ਗੁਲਿਕਾਨਿ ਦਤ੍ਵਾ ਵਿਸਾਣੇਸੁ ਸੁਵਣ੍ਣਕੋਸਕੇ ਪਟਿਮੁਞ੍ਚਿਤ੍ਵਾ ਖੇਤ੍ਤਂ ਗਨ੍ਤ੍ਵਾ ਪਾਜੇਸਿ. ਇਤੋ ਤਿਸ੍ਸੋ, ਏਤ੍ਤੋ ਤਿਸ੍ਸੋ, ਮਜ੍ਝੇ ਏਕਾਤਿ ਸਤ੍ਤ ਸੀਤਾ ਭਿਜ੍ਜਿਤ੍ਵਾ ਅਗਮਂਸੁ. ਜਮ੍ਬੁਦੀਪਵਾਸਿਨੋ ਭਤ੍ਤਬੀਜਹਿਰਞ੍ਞਸੁਵਣ੍ਣਾਦੀਸੁ ਯਥਾਰੁਚਿਤਂ ਸੇਟ੍ਠਿਗੇਹਤੋਯੇਵ ਗਣ੍ਹਿਂਸੁ. ਇਮੇ ਪਞ੍ਚ ਮਹਾਪੁਞ੍ਞਾ.

ਏਵਂ ਮਹਾਨੁਭਾਵੋ ਸੇਟ੍ਠਿ ‘‘ਸਤ੍ਥਾ ਕਿਰ ਆਗਤੋ’’ਤਿ ਸੁਤ੍ਵਾ ‘‘ਸਤ੍ਥੁ ਪਚ੍ਚੁਗ੍ਗਮਨਂ ਕਰਿਸ੍ਸਾਮੀ’’ਤਿ ਨਿਕ੍ਖਮਨ੍ਤੋ ਅਨ੍ਤਰਾਮਗ੍ਗੇ ਤਿਤ੍ਥਿਯੇ ਦਿਸ੍ਵਾ ਤੇਹਿ ‘‘ਕਸ੍ਮਾ ਤਂ, ਗਹਪਤਿ, ਕਿਰਿਯਵਾਦੋ ਸਮਾਨੋ ਅਕਿਰਿਯਵਾਦਸ੍ਸ ਸਮਣਸ੍ਸ ਗੋਤਮਸ੍ਸ ਸਨ੍ਤਿਕਂ ਗਚ੍ਛਸੀ’’ਤਿ ਨਿਵਾਰਿਯਮਾਨੋਪਿ ਤੇਸਂ ਵਚਨਂ ਅਨਾਦਿਯਿਤ੍ਵਾ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਅਥਸ੍ਸ ਸਤ੍ਥਾ ਅਨੁਪੁਬ੍ਬਿਂ ਕਥਂ ਕਥੇਸਿ. ਸੋ ਦੇਸਨਾਵਸਾਨੇ ਸੋਤਾਪਤ੍ਤਿਫਲਂ ਪਤ੍ਵਾ ਸਤ੍ਥੁ ਤਿਤ੍ਥਿਯੇਹਿ ਅਵਣ੍ਣਂ ਵਤ੍ਵਾ ਅਤ੍ਤਨੋ ਨਿਵਾਰਿਤਭਾਵਂ ਆਰੋਚੇਸਿ. ਅਥ ਨਂ ਸਤ੍ਥਾ, ‘‘ਗਹਪਤਿ, ਇਮੇ ਸਤ੍ਤਾ ਨਾਮ ਮਹਨ੍ਤਮ੍ਪਿ ਅਤ੍ਤਨੋ ਦੋਸਂ ਨ ਪਸ੍ਸਨ੍ਤਿ, ਅਵਿਜ੍ਜਮਾਨਮ੍ਪਿ ਪਰੇਸਂ ਦੋਸਂ ਵਿਜ੍ਜਮਾਨਂ ਕਤ੍ਵਾ ਤਤ੍ਥ ਤਤ੍ਥ ਭੁਸਂ ਵਿਯ ਓਪੁਨਨ੍ਤੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੫੨. ‘‘ਸੁਦਸ੍ਸਂ ਵਜ੍ਜਮਞ੍ਞੇਸਂ, ਅਤ੍ਤਨੋ ਪਨ ਦੁਦ੍ਦਸਂ;

ਪਰੇਸਞ੍ਹਿ ਸੋ ਵਜ੍ਜਾਨਿ, ਓਪੁਨਾਤਿ ਯਥਾ ਭੁਸਂ;

ਅਤ੍ਤਨੋ ਪਨ ਛਾਦੇਤਿ, ਕਲਿਂਵ ਕਿਤਵਾ ਸਠੋ’’ਤਿ.

ਤਤ੍ਥ ਸੁਦਸ੍ਸਂ ਵਜ੍ਜਨ੍ਤਿ ਪਰਸ੍ਸ ਅਣੁਮਤ੍ਤਮ੍ਪਿ ਵਜ੍ਜਂ ਖਲਿਤਂ ਸੁਦਸ੍ਸਂ ਸੁਖੇਨੇਵ ਪਸ੍ਸਿਤੁਂ ਸਕ੍ਕਾ, ਅਤ੍ਤਨੋ ਪਨ ਅਤਿਮਹਨ੍ਤਮ੍ਪਿ ਦੁਦ੍ਦਸਂ. ਪਰੇਸਂ ਹੀਤਿ ਤੇਨੇਵ ਕਾਰਣੇਨ ਸੋ ਪੁਗ੍ਗਲੋ ਸਙ੍ਘਮਜ੍ਝਾਦੀਸੁ ਪਰੇਸਂ ਵਜ੍ਜਾਨਿ ਉਚ੍ਚਟ੍ਠਾਨੇ ਠਪੇਤ੍ਵਾ ਭੁਸਂ ਓਪੁਨਨ੍ਤੋ ਵਿਯ ਓਪੁਨਾਤਿ. ਕਲਿਂਵ ਕਿਤਵਾ ਸਠੋਤਿ ਏਤ੍ਥ ਸਕੁਣੇਸੁ ਅਪਰਜ੍ਝਨਭਾਵੇਨ ਅਤ੍ਤਭਾਵੋ ਕਲਿ ਨਾਮ, ਸਾਖਭਙ੍ਗਾਦਿਕਂ ਪਟਿਚ੍ਛਾਦਨਂ ਕਿਤਵਾ ਨਾਮ, ਸਾਕੁਣਿਕੋ ਸਠੋ ਨਾਮ. ਯਥਾ ਸਕੁਣਲੁਦ੍ਦਕੋ ਸਕੁਣੇ ਗਹੇਤ੍ਵਾ ਮਾਰੇਤੁਕਾਮੋ ਕਿਤਵਾ ਵਿਯ ਅਤ੍ਤਭਾਵਂ ਪਟਿਚ੍ਛਾਦੇਤਿ, ਏਵਂ ਅਤ੍ਤਨੋ ਵਜ੍ਜਂ ਛਾਦੇਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਮੇਣ੍ਡਕਸੇਟ੍ਠਿਵਤ੍ਥੁ ਦਸਮਂ.