੧੧. ਉਜ੍ਝਾਨਸਞ੍ਞਿਤ੍ਥੇਰਵਤ੍ਥੁ

ਪਰਵਜ੍ਜਾਨੁਪਸ੍ਸਿਸ੍ਸਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਜ੍ਝਾਨਸਞ੍ਞਿਂ ਨਾਮ ਏਕਂ ਥੇਰਂ ਆਰਬ੍ਭ ਕਥੇਸਿ.

ਸੋ ਕਿਰ ‘‘ਅਯਂ ਏਵਂ ਨਿਵਾਸੇਤਿ, ਏਵਂ ਪਾਰੁਪਤੀ’’ਤਿ ਭਿਕ੍ਖੂਨਂ ਅਨ੍ਤਰਮੇਵ ਗਵੇਸਨ੍ਤੋ ਵਿਚਰਤਿ. ਭਿਕ੍ਖੂ ‘‘ਅਸੁਕੋ ਨਾਮ, ਭਨ੍ਤੇ, ਥੇਰੋ ਏਵਂ ਕਰੋਤੀ’’ਤਿ ਸਤ੍ਥੁ ਆਰੋਚੇਸੁਂ. ਸਤ੍ਥਾ, ‘‘ਭਿਕ੍ਖਵੇ, ਵਤ੍ਤਸੀਸੇ ਠਤ੍ਵਾ ਏਵਂ ਓਵਦਨ੍ਤੋ ਅਨਨੁਪਵਾਦੋ. ਯੋ ਪਨ ਨਿਚ੍ਚਂ ਉਜ੍ਝਾਨਸਞ੍ਞਿਤਾਯ ਪਰੇਸਂ ਅਨ੍ਤਰਂ ਪਰਿਯੇਸਮਾਨੋ ਏਵਂ ਵਤ੍ਵਾ ਵਿਚਰਤਿ, ਤਸ੍ਸ ਝਾਨਾਦੀਸੁ ਏਕੋਪਿ ਵਿਸੇਸੋ ਨੁਪ੍ਪਜ੍ਜਤਿ, ਕੇਵਲਂ ਆਸਵਾਯੇਵ ਵਡ੍ਢਨ੍ਤੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੫੩. ‘‘ਪਰਵਜ੍ਜਾਨੁਪਸ੍ਸਿਸ੍ਸ, ਨਿਚ੍ਚਂ ਉਜ੍ਝਾਨਸਞ੍ਞਿਨੋ;

ਆਸਵਾ ਤਸ੍ਸ ਵਡ੍ਢਨ੍ਤਿ, ਆਰਾ ਸੋ ਆਸਵਕ੍ਖਯਾ’’ਤਿ.

ਤਤ੍ਥ ਉਜ੍ਝਾਨਸਞ੍ਞਿਨੋਤਿ ਏਵਂ ਨਿਵਾਸੇਤਬ੍ਬਂ ਏਵਂ ਪਾਰੁਪਿਤਬ੍ਬਨ੍ਤਿ ਪਰੇਸਂ ਅਨ੍ਤਰਗਵੇਸਿਤਾਯ ਉਜ੍ਝਾਨਬਹੁਲਸ੍ਸ ਪੁਗ੍ਗਲਸ੍ਸ ਝਾਨਾਦੀਸੁ ਏਕਧਮ੍ਮੋਪਿ ਨ ਵਡ੍ਢਤਿ, ਅਥ ਖੋ ਆਸਵਾਵ ਤਸ੍ਸ ਵਡ੍ਢਨ੍ਤਿ. ਤੇਨੇਵ ਕਾਰਣੇਨ ਸੋ ਅਰਹਤ੍ਤਮਗ੍ਗਸਙ੍ਖਾਤਾ ਆਸਵਕ੍ਖਯਾ ਆਰਾ ਦੂਰਂ ਗਤੋਵ ਹੋਤੀਤਿ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਉਜ੍ਝਾਨਸਞ੍ਞਿਤ੍ਥੇਰਵਤ੍ਥੁ ਏਕਾਦਸਮਂ.