੧. ਗੋਘਾਤਕਪੁਤ੍ਤਵਤ੍ਥੁ

ਪਣ੍ਡੁਪਲਾਸੋਵ ਦਾਨਿਸੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਗੋਘਾਤਕਪੁਤ੍ਤਂ ਆਰਬ੍ਭ ਕਥੇਸਿ.

ਸਾਵਤ੍ਥਿਯਂ ਕਿਰੇਕੋ ਗੋਘਾਤਕੋ ਗਾਵੋ ਵਧਿਤ੍ਵਾ ਵਰਮਂਸਾਨਿ ਗਹੇਤ੍ਵਾ ਪਚਾਪੇਤ੍ਵਾ ਪੁਤ੍ਤਦਾਰੇਹਿ ਸਦ੍ਧਿਂ ਨਿਸੀਦਿਤ੍ਵਾ ਮਂਸਞ੍ਚ ਖਾਦਤਿ, ਮੂਲੇਨ ਚ ਵਿਕ੍ਕਿਣਿਤ੍ਵਾ ਜੀਵਿਕਂ ਕਪ੍ਪੇਸਿ. ਸੋ ਏਵਂ ਪਞ੍ਚਪਣ੍ਣਾਸ ਵਸ੍ਸਾਨਿ ਗੋਘਾਤਕਕਮ੍ਮਂ ਕਰੋਨ੍ਤੋ ਧੁਰਵਿਹਾਰੇ ਵਿਹਰਨ੍ਤਸ੍ਸ ਸਤ੍ਥੁ ਏਕਦਿਵਸਮ੍ਪਿ ਕਟਚ੍ਛੁਮਤ੍ਤਮ੍ਪਿ ਯਾਗੁਂ ਵਾ ਭਤ੍ਤਂ ਵਾ ਨ ਅਦਾਸਿ. ਸੋ ਚ ਵਿਨਾ ਮਂਸੇਨ ਭਤ੍ਤਂ ਨ ਭੁਞ੍ਜਤਿ. ਸੋ ਏਕਦਿਵਸਂ ਦਿਵਸਭਾਗੇ ਮਂਸਂ ਵਿਕ੍ਕਿਣਿਤ੍ਵਾ ਅਤ੍ਤਨੋ ਅਤ੍ਥਾਯ ਪਚਿਤੁਂ ਏਕਂ ਮਂਸਖਣ੍ਡਂ ਭਰਿਯਾਯ ਦਤ੍ਵਾ ਨ੍ਹਾਯਿਤੁਂ ਅਗਮਾਸਿ. ਅਥਸ੍ਸ ਸਹਾਯਕੋ ਗੇਹਂ ਗਨ੍ਤ੍ਵਾ ਭਰਿਯਂ ਆਹ – ‘‘ਥੋਕਂ ਮੇ ਵਿਕ੍ਕਿਣਿਯਮਂਸਂ ਦੇਹਿ, ਗੇਹਂ ਮੇ ਪਾਹੁਨਕੋ ਆਗਤੋ’’ਤਿ. ਨਤ੍ਥਿ ਵਿਕ੍ਕਿਣਿਯਮਂਸਂ, ਸਹਾਯਕੋ ਤੇ ਮਂਸਂ ਵਿਕ੍ਕਿਣਿਤ੍ਵਾ ਇਦਾਨਿ ਨ੍ਹਾਯਿਤੁਂ ਗਤੋਤਿ. ਮਾ ਏਵਂ ਕਰਿ, ਸਚੇ ਮਂਸਖਣ੍ਡਂ ਅਤ੍ਥਿ, ਦੇਹੀਤਿ. ਸਹਾਯਕਸ੍ਸ ਤੇ ਨਿਕ੍ਖਿਤ੍ਤਮਂਸਂ ਠਪੇਤ੍ਵਾ ਅਞ੍ਞਂ ਨਤ੍ਥੀਤਿ. ਸੋ ‘‘ਸਹਾਯਕਸ੍ਸ ਮੇ ਅਤ੍ਥਾਯ ਠਪਿਤਮਂਸਤੋ ਅਞ੍ਞਂ ਮਂਸਂ ਨਤ੍ਥਿ, ਸੋ ਚ ਵਿਨਾ ਮਂਸੇਨ ਨ ਭੁਞ੍ਜਤਿ, ਨਾਯਂ ਦਸ੍ਸਤੀ’’ਤਿ ਸਾਮਂਯੇਵ ਤਂ ਮਂਸਂ ਗਹੇਤ੍ਵਾ ਪਕ੍ਕਾਮਿ.

ਗੋਘਾਤਕੋਪਿ ਨ੍ਹਤ੍ਵਾ ਆਗਤੋ ਤਾਯ ਅਤ੍ਤਨੋ ਪਕ੍ਕਪਣ੍ਣੇਨ ਸਦ੍ਧਿਂ ਵਡ੍ਢੇਤ੍ਵਾ ਭਤ੍ਤੇ ਉਪਨੀਤੇ ਆਹ ‘‘ਕਹਂ ਮਂਸ’’ਨ੍ਤਿ? ‘‘ਨਤ੍ਥਿ, ਸਾਮੀ’’ਤਿ. ਨਨੁ ਅਹਂ ਪਚ੍ਚਨਤ੍ਥਾਯ ਮਂਸਂ ਦਤ੍ਵਾ ਗਤੋਤਿ. ਤਵ ਸਹਾਯਕੋ ਆਗਨ੍ਤ੍ਵਾ ‘‘ਪਾਹੁਨਕੋ ਮੇ ਆਗਤੋ, ਵਿਕ੍ਕਿਣਿਯਮਂਸਂ ਦੇਹੀ’’ਤਿ ਵਤ੍ਵਾ ਮਯਾ ‘‘ਸਹਾਯਕਸ੍ਸ ਤੇ ਠਪਿਤਮਂਸਤੋ ਅਞ੍ਞਂ ਮਂਸਂ ਨਤ੍ਥਿ, ਸੋ ਚ ਵਿਨਾ ਮਂਸੇਨ ਨ ਭੁਞ੍ਜਤੀ’’ਤਿ ਵੁਤ੍ਤੇਪਿ ਬਲਕ੍ਕਾਰੇਨ ਤਂ ਮਂਸਂ ਸਾਮਂਯੇਵ ਗਹੇਤ੍ਵਾ ਗਤੋਤਿ. ਅਹਂ ਵਿਨਾ ਮਂਸੇਨ ਭਤ੍ਤਂ ਨ ਭੁਞ੍ਜਾਮਿ, ਹਰਾਹਿ ਨਨ੍ਤਿ. ਕਿਂ ਸਕ੍ਕਾ ਕਾਤੁਂ, ਭੁਞ੍ਜ, ਸਾਮੀਤਿ. ਸੋ ‘‘ਨਾਹਂ ਭੁਞ੍ਜਾਮੀ’’ਤਿ ਤਂ ਭਤ੍ਤਂ ਹਰਾਪੇਤ੍ਵਾ ਸਤ੍ਥਂ ਆਦਾਯ ਪਚ੍ਛਾਗੇਹੇ ਠਿਤੋ ਗੋਣੋ ਅਤ੍ਥਿ, ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਮੁਖੇ ਹਤ੍ਥਂ ਪਕ੍ਖਿਪਿਤ੍ਵਾ ਜਿਵ੍ਹਂ ਨੀਹਰਿਤ੍ਵਾ ਸਤ੍ਥੇਨ ਮੂਲੇ ਛਿਨ੍ਦਿਤ੍ਵਾ ਆਦਾਯ ਗਨ੍ਤ੍ਵਾ ਅਙ੍ਗਾਰੇਸੁ ਪਚਾਪੇਤ੍ਵਾ ਭਤ੍ਤਮਤ੍ਥਕੇ ਠਪੇਤ੍ਵਾ ਨਿਸਿਨ੍ਨੋ ਏਕਂ ਭਤ੍ਤਪਿਣ੍ਡਂ ਭੁਞ੍ਜਿਤ੍ਵਾ ਏਕਂ ਮਂਸਖਣ੍ਡਂ ਮੁਖੇ ਠਪੇਸਿ. ਤਙ੍ਖਣਞ੍ਞੇਵਸ੍ਸ ਜਿਵ੍ਹਾ ਛਿਜ੍ਜਿਤ੍ਵਾ ਭਤ੍ਤਪਾਤਿਯਂ ਪਤਿ. ਤਙ੍ਖਣਞ੍ਞੇਵ ਕਮ੍ਮਸਰਿਕ੍ਖਕਂ ਵਿਪਾਕਂ ਲਭਿ. ਸੋਪਿ ਖੋ ਗੋਣੋ ਵਿਯ ਲੋਹਿਤਧਾਰਾਯ ਮੁਖਤੋ ਪਗ੍ਘਰਨ੍ਤਿਯਾ ਅਨ੍ਤੋਗੇਹਂ ਪਵਿਸਿਤ੍ਵਾ ਜਣ੍ਣੁਕੇਹਿ ਵਿਚਰਨ੍ਤੋ ਵਿਰਵਿ.

ਤਸ੍ਮਿਂ ਸਮਯੇ ਗੋਘਾਤਕਸ੍ਸ ਪੁਤ੍ਤੋ ਪਿਤਰਂ ਓਲੋਕੇਨ੍ਤੋ ਸਮੀਪੇ ਠਿਤੋ ਹੋਤਿ. ਅਥ ਨਂ ਮਾਤਾ ਆਹ – ‘‘ਪਸ੍ਸ, ਪੁਤ੍ਤ, ਇਮਂ ਗੋਘਾਤਕਂ ਗੋਣਂ ਵਿਯ ਗੇਹਮਜ੍ਝੇ ਜਣ੍ਣੁਕੇਹਿ ਵਿਚਰਿਤ੍ਵਾ ਵਿਰਵਨ੍ਤਂ, ਇਦਂ ਦੁਕ੍ਖਂ ਤਵ ਮਤ੍ਥਕੇ ਪਤਿਸ੍ਸਤਿ, ਮਮਮ੍ਪਿ ਅਨੋਲੋਕੇਤ੍ਵਾ ਅਤ੍ਤਨੋ ਸੋਤ੍ਥਿਂ ਕਰੋਨ੍ਤੋ ਪਲਾਯਸ੍ਸੂ’’ਤਿ. ਸੋ ਮਰਣਭਯਤਜ੍ਜਿਤੋ ਮਾਤਰਂ ਵਨ੍ਦਿਤ੍ਵਾ ਪਲਾਯਿ, ਪਲਾਯਿਤ੍ਵਾ ਚ ਪਨ ਤਕ੍ਕਸਿਲਂ ਅਗਮਾਸਿ. ਗੋਘਾਤਕੋਪਿ ਗੋਣੋ ਵਿਯ ਗੇਹਮਜ੍ਝੇ ਵਿਰਵਨ੍ਤੋ ਵਿਚਰਿਤ੍ਵਾ ਕਾਲਕਤੋ ਅਵੀਚਿਮ੍ਹਿ ਨਿਬ੍ਬਤ੍ਤਿ. ਗੋਣੋਪਿ ਕਾਲਮਕਾਸਿ. ਗੋਘਾਤਕਪੁਤ੍ਤੋਪਿ ਤਕ੍ਕਸਿਲਂ ਗਨ੍ਤ੍ਵਾ ਸੁਵਣ੍ਣਕਾਰਕਮ੍ਮਂ ਉਗ੍ਗਣ੍ਹਿ. ਅਥਸ੍ਸਾਚਰਿਯੋ ਗਾਮਂ ਗਚ੍ਛਨ੍ਤੋ ‘‘ਏਵਰੂਪਂ ਨਾਮ ਅਲਙ੍ਕਾਰਂ ਕਰੇਯ੍ਯਾਸੀ’’ਤਿ ਵਤ੍ਵਾ ਪਕ੍ਕਾਮਿ. ਸੋਪਿ ਤਥਾਰੂਪਂ ਅਲਙ੍ਕਾਰਂ ਅਕਾਸਿ. ਅਥਸ੍ਸਾਚਰਿਯੋ ਆਗਨ੍ਤ੍ਵਾ ਅਲਙ੍ਕਾਰਂ ਦਿਸ੍ਵਾ ‘‘ਅਯਂ ਯਤ੍ਥ ਕਤ੍ਥਚਿ ਗਨ੍ਤ੍ਵਾ ਜੀਵਿਤੁਂ ਸਮਤ੍ਥੋ’’ਤਿ ਵਯਪ੍ਪਤ੍ਤਂ ਅਤ੍ਤਨੋ ਧੀਤਰਂ ਅਦਾਸਿ. ਸੋ ਪੁਤ੍ਤਧੀਤਾਹਿ ਵਡ੍ਢਿ.

ਅਥਸ੍ਸ ਪੁਤ੍ਤਾ ਵਯਪ੍ਪਤ੍ਤਾ ਸਿਪ੍ਪਂ ਉਗ੍ਗਣ੍ਹਿਤ੍ਵਾ ਅਪਰਭਾਗੇ ਸਾਵਤ੍ਥਿਯਂ ਗਨ੍ਤ੍ਵਾ ਤਤ੍ਥ ਘਰਾਵਾਸਂ ਸਣ੍ਠਪੇਤ੍ਵਾ ਵਸਨ੍ਤਾ ਸਦ੍ਧਾ ਪਸਨ੍ਨਾ ਅਹੇਸੁਂ. ਪਿਤਾਪਿ ਨੇਸਂ ਤਕ੍ਕਸਿਲਾਯਂ ਕਿਞ੍ਚਿ ਕੁਸਲਂ ਅਕਤ੍ਵਾਵ ਜਰਂ ਪਾਪੁਣਿ. ਅਥਸ੍ਸ ਪੁਤ੍ਤਾ ‘‘ਪਿਤਾ ਨੋ ਮਹਲ੍ਲਕੋ’’ਤਿ ਅਤ੍ਤਨੋ ਸਨ੍ਤਿਕਂ ਪਕ੍ਕੋਸਾਪੇਤ੍ਵਾ ‘‘ਪਿਤੁ ਅਤ੍ਥਾਯ ਦਾਨਂ ਦਸ੍ਸਾਮਾ’’ਤਿ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤਯਿਂਸੁ. ਤੇ ਪੁਨਦਿਵਸੇ ਅਨ੍ਤੋਗੇਹੇ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਸਕ੍ਕਚ੍ਚਂ ਪਰਿਵਿਸਿਤ੍ਵਾ ਭਤ੍ਤਕਿਚ੍ਚਾਵਸਾਨੇ ਸਤ੍ਥਾਰਂ ਆਹਂਸੁ – ‘‘ਭਨ੍ਤੇ, ਅਮ੍ਹੇਹਿ ਇਦਂ ਪਿਤੁ ਜੀਵਭਤ੍ਤਂ ਦਿਨ੍ਨਂ, ਪਿਤੁ ਨੋ ਅਨੁਮੋਦਨਂ ਕਰੋਥਾ’’ਤਿ. ਸਤ੍ਥਾ ਤਂ ਆਮਨ੍ਤੇਤ੍ਵਾ, ‘‘ਉਪਾਸਕ, ਤ੍ਵਂ ਮਹਲ੍ਲਕੋ ਪਰਿਪਕ੍ਕਸਰੀਰੋ ਪਣ੍ਡੁਪਲਾਸਸਦਿਸੋ, ਤਵ ਪਰਲੋਕਗਮਨਾਯ ਕੁਸਲਪਾਥੇਯ੍ਯਂ ਨਤ੍ਥਿ, ਅਤ੍ਤਨੋ ਪਤਿਟ੍ਠਂ ਕਰੋਹਿ, ਪਣ੍ਡਿਤੋ ਭਵ, ਮਾ ਬਾਲੋ’’ਤਿ ਅਨੁਮੋਦਨਂ ਕਰੋਨ੍ਤੋ ਇਮਾ ਦ੍ਵੇ ਗਾਥਾ ਅਭਾਸਿ –

੨੩੫. ‘‘ਪਣ੍ਡੁਪਲਾਸੋਵ ਦਾਨਿਸਿ,

ਯਮਪੁਰਿਸਾਪਿ ਚ ਤੇ ਉਪਟ੍ਠਿਤਾ;

ਉਯ੍ਯੋਗਮੁਖੇ ਚ ਤਿਟ੍ਠਸਿ,

ਪਾਥੇਯ੍ਯਮ੍ਪਿ ਚ ਤੇ ਨ ਵਿਜ੍ਜਤਿ.

੨੩੬. ‘‘ਸੋ ਕਰੋਹਿ ਦੀਪਮਤ੍ਤਨੋ,

ਖਿਪ੍ਪਂ ਵਾਯਮ ਪਣ੍ਡਿਤੋ ਭਵ;

ਨਿਦ੍ਧਨ੍ਤਮਲੋ ਅਨਙ੍ਗਣੋ,

ਦਿਬ੍ਬਂ ਅਰਿਯਭੂਮਿਂ ਉਪੇਹਿਸੀ’’ਤਿ.

ਤਤ੍ਥ ਪਣ੍ਡੁਪਲਾਸੋਵ ਦਾਨਿਸੀਤਿ, ਉਪਾਸਕ, ਤ੍ਵਂ ਇਦਾਨਿ ਛਿਜ੍ਜਿਤ੍ਵਾ ਭੂਮਿਯਂ ਪਤਿਤਪਣ੍ਡੁਪਲਾਸੋ ਵਿਯ ਅਹੋਸਿ. ਯਮਪੁਰਿਸਾਤਿ ਯਮਦੂਤਾ ਵੁਚ੍ਚਨ੍ਤਿ, ਇਦਂ ਪਨ ਮਰਣਮੇਵ ਸਨ੍ਧਾਯ ਵੁਤ੍ਤਂ, ਮਰਣਂ ਤੇ ਪਚ੍ਚੁਪਟ੍ਠਿਤਨ੍ਤਿ ਅਤ੍ਥੋ. ਉਯ੍ਯੋਗਮੁਖੇਤਿ ਪਰਿਹਾਨਿਮੁਖੇ, ਅਵੁਡ੍ਢਿਮੁਖੇ ਚ ਠਿਤੋਸੀਤਿ ਅਤ੍ਥੋ. ਪਾਥੇਯ੍ਯਨ੍ਤਿ ਗਮਿਕਸ੍ਸ ਤਣ੍ਡੁਲਾਦਿਪਾਥੇਯ੍ਯਂ ਵਿਯ ਪਰਲੋਕਂ ਗਚ੍ਛਨ੍ਤਸ੍ਸ ਤਵ ਕੁਸਲਪਾਥੇਯ੍ਯਮ੍ਪਿ ਨਤ੍ਥੀਤਿ ਅਤ੍ਥੋ. ਸੋ ਕਰੋਹੀਤਿ ਸੋ ਤ੍ਵਂ ਸਮੁਦ੍ਦੇ ਨਾਵਾਯ ਭਿਨ੍ਨਾਯ ਦੀਪਸਙ੍ਖਾਤਂ ਪਤਿਟ੍ਠਂ ਵਿਯ ਅਤ੍ਤਨੋ ਕੁਸਲਪਤਿਟ੍ਠਂ ਕਰੋਹਿ. ਕਰੋਨ੍ਤੋ ਚ ਖਿਪ੍ਪਂ ਵਾਯਮ, ਸੀਘਂ ਸੀਘਂ ਵੀਰਿਯਂ ਆਰਭ, ਅਤ੍ਤਨੋ ਕੁਸਲਕਮ੍ਮਪਤਿਟ੍ਠਕਰਣੇਨ ਪਣ੍ਡਿਤੋ ਭਵ. ਯੋ ਹਿ ਮਰਣਮੁਖਂ ਅਪ੍ਪਤ੍ਵਾ ਕਾਤੁਂ ਸਮਤ੍ਥਕਾਲੇਵ ਕੁਸਲਂ ਕਰੋਤਿ, ਏਸ ਪਣ੍ਡਿਤੋ ਨਾਮ, ਤਾਦਿਸੋ ਭਵ, ਮਾ ਅਨ੍ਧਬਾਲੋਤਿ ਅਤ੍ਥੋ. ਦਿਬ੍ਬਂ ਅਰਿਯਭੂਮਿਨ੍ਤਿ ਏਵਂ ਵੀਰਿਯਂ ਕਰੋਨ੍ਤੋ ਰਾਗਾਦੀਨਂ ਮਲਾਨਂ ਨੀਹਟਤਾਯ ਨਿਦ੍ਧਨ੍ਤਮਲੋ ਅਙ੍ਗਣਾਭਾਵੇਨ ਅਨਙ੍ਗਣੋ ਨਿਕ੍ਕਿਲੇਸੋ ਹੁਤ੍ਵਾ ਪਞ੍ਚਵਿਧਂ ਸੁਦ੍ਧਾਵਾਸਭੂਮਿਂ ਪਾਪੁਣਿਸ੍ਸਸੀਤਿ ਅਤ੍ਥੋ.

ਦੇਸਨਾਵਸਾਨੇ ਉਪਾਸਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ, ਸਮ੍ਪਤ੍ਤਾਨਮ੍ਪਿ ਸਾਤ੍ਥਿਕਾ ਧਮ੍ਮਦੇਸਨਾ ਅਹੋਸੀਤਿ.

ਤੇ ਪੁਨਦਿਵਸਤ੍ਥਾਯਪਿ ਸਤ੍ਥਾਰਂ ਨਿਮਨ੍ਤੇਤ੍ਵਾ ਦਾਨਂ ਦਤ੍ਵਾ ਕਤਭਤ੍ਤਕਿਚ੍ਚਂ ਸਤ੍ਥਾਰਂ ਅਨੁਮੋਦਨਕਾਲੇ ਆਹਂਸੁ – ‘‘ਭਨ੍ਤੇ, ਇਦਮ੍ਪਿ ਅਮ੍ਹਾਕਂ ਪਿਤੁ ਜੀਵਭਤ੍ਤਮੇਵ, ਇਮਸ੍ਸੇਵ ਅਨੁਮੋਦਨਂ ਕਰੋਥਾ’’ਤਿ. ਸਤ੍ਥਾ ਤਸ੍ਸ ਅਨੁਮੋਦਨਂ ਕਰੋਨ੍ਤੋ ਇਮਾ ਦ੍ਵੇ ਗਾਥਾ ਅਭਾਸਿ –

੨੩੭. ‘‘ਉਪਨੀਤਵਯੋ ਚ ਦਾਨਿਸਿ,

ਸਮ੍ਪਯਾਤੋਸਿ ਯਮਸ੍ਸ ਸਨ੍ਤਿਕਂ;

ਵਾਸੋ ਤੇ ਨਤ੍ਥਿ ਅਨ੍ਤਰਾ,

ਪਾਥੇਯ੍ਯਮ੍ਪਿ ਚ ਤੇ ਨ ਵਿਜ੍ਜਤਿ.

੨੩੮. ‘‘ਸੋ ਕਰੋਹਿ ਦੀਪਮਤ੍ਤਨੋ,

ਖਿਪ੍ਪਂ ਵਾਯਮ ਪਣ੍ਡਿਤੋ ਭਵ;

ਨਿਦ੍ਧਨ੍ਤਮਲੋ ਅਨਙ੍ਗਣੋ,

ਨ ਪੁਨ ਜਾਤਿਜਰਂ ਉਪੇਹਿਸੀ’’ਤਿ.

ਤਤ੍ਥ ਉਪਨੀਤਵਯੋਤਿ ਉਪਾਤਿ ਨਿਪਾਤਮਤ੍ਤਂ, ਨੀਤਵਯੋਤਿ ਵਿਗਤਵਯੋ ਅਤਿਕ੍ਕਨ੍ਤਵਯੋ, ਤ੍ਵਞ੍ਚਸਿ ਦਾਨਿ ਤਯੋ ਵਯੇ ਅਤਿਕ੍ਕਮਿਤ੍ਵਾ ਮਰਣਮੁਖੇ ਠਿਤੋਤਿ ਅਤ੍ਥੋ. ਸਮ੍ਪਯਾਤੋਸਿ ਯਮਸ੍ਸ ਸਨ੍ਤਿਕਨ੍ਤਿ ਮਰਣਮੁਖਂ ਗਨ੍ਤੁਂ ਸਜ੍ਜੋ ਹੁਤ੍ਵਾ ਠਿਤੋਸੀਤਿ ਅਤ੍ਥੋ. ਵਾਸੋ ਤੇ ਨਤ੍ਥਿ ਅਨ੍ਤਰਾਤਿ ਯਥਾ ਮਗ੍ਗਂ ਗਚ੍ਛਨ੍ਤਾ ਤਾਨਿ ਤਾਨਿ ਕਿਚ੍ਚਾਨਿ ਕਰੋਨ੍ਤਾ ਅਨ੍ਤਰਾਮਗ੍ਗੇ ਵਸਨ੍ਤਿ, ਨ ਏਵਂ ਪਰਲੋਕਂ ਗਚ੍ਛਨ੍ਤਾ. ਨ ਹਿ ਸਕ੍ਕਾ ਪਰਲੋਕਂ ਗਚ੍ਛਨ੍ਤੇਨ ‘‘ਅਧਿਵਾਸੇਥ ਕਤਿਪਾਹਂ, ਦਾਨਂ ਤਾਵ ਦੇਮਿ, ਧਮ੍ਮਂ ਤਾਵ ਸੁਣਾਮੀ’’ਤਿਆਦੀਨਿ ਵਤ੍ਤੁਂ. ਇਤੋ ਪਨ ਚਵਿਤ੍ਵਾ ਪਰਲੋਕੇ ਨਿਬ੍ਬਤ੍ਤੋਵ ਹੋਤਿ. ਇਮਮਤ੍ਥਂ ਸਨ੍ਧਾਯੇਤਂ ਵੁਤ੍ਤਂ. ਪਾਥੇਯ੍ਯਨ੍ਤਿ ਇਦਂ ਕਿਞ੍ਚਾਪਿ ਹੇਟ੍ਠਾ ਵੁਤ੍ਤਮੇਵ, ਉਪਾਸਕਸ੍ਸ ਪਨ ਪੁਨਪ੍ਪੁਨਂ ਦਲ਼੍ਹੀਕਰਣਤ੍ਥਂ ਇਧਾਪਿ ਸਤ੍ਥਾਰਾ ਕਥਿਤਂ. ਜਾਤਿਜਰਨ੍ਤਿ ਏਤ੍ਥ ਬ੍ਯਾਧਿਮਰਣਾਨਿਪਿ ਗਹਿਤਾਨੇਵ ਹੋਨ੍ਤਿ. ਹੇਟ੍ਠਿਮਗਾਥਾਹਿ ਚ ਅਨਾਗਾਮਿਮਗ੍ਗੋ ਕਥਿਤੋ, ਇਧ ਅਰਹਤ੍ਤਮਗ੍ਗੋ ਕਥਿਤੋ. ਏਵਂ ਸਨ੍ਤੇਪਿ ਯਥਾ ਨਾਮ ਰਞ੍ਞਾ ਅਤ੍ਤਨੋ ਮੁਖਪਮਾਣੇਨ ਕਬਲ਼ਂ ਵਡ੍ਢੇਤ੍ਵਾ ਪੁਤ੍ਤਸ੍ਸ ਉਪਨੀਤੇ ਸੋ ਕੁਮਾਰੋ ਅਤ੍ਤਨੋ ਮੁਖਪਮਾਣੇਨੇਵ ਗਣ੍ਹਾਤਿ, ਏਵਮੇਵ ਸਤ੍ਥਾਰਾ ਉਪਰਿਮਗ੍ਗਵਸੇਨ ਧਮ੍ਮੇ ਦੇਸਿਤੇਪਿ ਉਪਾਸਕੋ ਅਤ੍ਤਨੋ ਉਪਨਿਸ੍ਸਯਵਸੇਨ ਹੇਟ੍ਠਾ ਸੋਤਾਪਤ੍ਤਿਫਲਂ ਪਤ੍ਵਾ ਇਮਿਸ੍ਸਾ ਅਨੁਮੋਦਨਾਯ ਅਵਸਾਨੇ ਅਨਾਗਾਮਿਫਲਂ ਪਤ੍ਤੋ. ਸੇਸਪਰਿਸਾਯਪਿ ਸਾਤ੍ਥਿਕਾ ਧਮ੍ਮਦੇਸਨਾ ਅਹੋਸੀਤਿ.

ਗੋਘਾਤਕਪੁਤ੍ਤਵਤ੍ਥੁ ਪਠਮਂ.