੧੬. ਪਿਯਵਗ੍ਗੋ

੧. ਤਯੋਜਨਪਬ੍ਬਜਿਤਵਤ੍ਥੁ

ਅਯੋਗੇਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਤਯੋ ਪਬ੍ਬਜਿਤੇ ਆਰਬ੍ਭ ਕਥੇਸਿ.

ਸਾਵਤ੍ਥਿਯਂ ਕਿਰ ਏਕਸ੍ਮਿਂ ਕੁਲੇ ਮਾਤਾਪਿਤੂਨਂ ਏਕਪੁਤ੍ਤਕੋ ਅਹੋਸਿ ਪਿਯੋ ਮਨਾਪੋ. ਸੋ ਏਕਦਿਵਸਂ ਗੇਹੇ ਨਿਮਨ੍ਤਿਤਾਨਂ ਭਿਕ੍ਖੂਨਂ ਅਨੁਮੋਦਨਂ ਕਰੋਨ੍ਤਾਨਂ ਧਮ੍ਮਕਥਂ ਸੁਤ੍ਵਾ ਪਬ੍ਬਜਿਤੁਕਾਮੋ ਹੁਤ੍ਵਾ ਮਾਤਾਪਿਤਰੋ ਪਬ੍ਬਜ੍ਜਂ ਯਾਚਿ. ਤੇ ਨਾਨੁਜਾਨਿਂਸੁ. ਤਸ੍ਸ ਏਤਦਹੋਸਿ – ‘‘ਅਹਂ ਮਾਤਾਪਿਤੂਨਂ ਅਪਸ੍ਸਨ੍ਤਾਨਂਯੇਵ ਬਹਿ ਗਨ੍ਤ੍ਵਾ ਪਬ੍ਬਜਿਸ੍ਸਾਮੀ’’ਤਿ. ਅਥਸ੍ਸ ਪਿਤਾ ਬਹਿ ਨਿਕ੍ਖਮਨ੍ਤੋ ‘‘ਇਮਂ ਰਕ੍ਖੇਯ੍ਯਾਸੀ’’ਤਿ ਮਾਤਰਂ ਪਟਿਚ੍ਛਾਪੇਸਿ, ਮਾਤਾ ਬਹਿ ਨਿਕ੍ਖਮਨ੍ਤੀ ਪਿਤਰਂ ਪਟਿਚ੍ਛਾਪੇਸਿ. ਅਥਸ੍ਸ ਏਕਦਿਵਸਂ ਪਿਤਰਿ ਬਹਿ ਗਤੇ ਮਾਤਾ ‘‘ਪੁਤ੍ਤਂ ਰਕ੍ਖਿਸ੍ਸਾਮੀ’’ਤਿ ਏਕਂ ਦ੍ਵਾਰਬਾਹਂ ਨਿਸ੍ਸਾਯ ਏਕਂ ਪਾਦੇਹਿ ਉਪ੍ਪੀਲ਼ੇਤ੍ਵਾ ਛਮਾਯ ਨਿਸਿਨ੍ਨਾ ਸੁਤ੍ਤਂ ਕਨ੍ਤਤਿ. ਸੋ ‘‘ਇਮਂ ਵਞ੍ਚੇਤ੍ਵਾ ਗਮਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ, ‘‘ਅਮ੍ਮ, ਥੋਕਂ ਤਾਵ ਅਪੇਹਿ, ਸਰੀਰਵਲਞ੍ਜਂ ਕਰਿਸ੍ਸਾਮੀ’’ਤਿ ਵਤ੍ਵਾ ਤਾਯ ਪਾਦੇ ਸਮਿਞ੍ਜਿਤੇ ਨਿਕ੍ਖਮਿਤ੍ਵਾ ਵੇਗੇਨ ਵਿਹਾਰਂ ਗਨ੍ਤ੍ਵਾ ਭਿਕ੍ਖੂ ਉਪਸਙ੍ਕਮਿਤ੍ਵਾ ‘‘ਪਬ੍ਬਾਜੇਥ ਮਂ, ਭਨ੍ਤੇ’’ਤਿ ਯਾਚਿਤ੍ਵਾ ਤੇਸਂ ਸਨ੍ਤਿਕੇ ਪਬ੍ਬਜਿ.

ਅਥਸ੍ਸ ਪਿਤਾ ਆਗਨ੍ਤ੍ਵਾ ਮਾਤਰਂ ਪੁਚ੍ਛਿ – ‘‘ਕਹਂ ਮੇ ਪੁਤ੍ਤੋ’’ਤਿ? ‘‘ਸਾਮਿ, ਇਮਸ੍ਮਿਂ ਪਦੇਸੇ ਅਹੋਸੀ’’ਤਿ. ਸੋ ‘‘ਕਹਂ ਨੁ ਖੋ ਮੇ ਪੁਤ੍ਤੋ’’ਤਿ ਓਲੋਕੇਨ੍ਤੋ ਤਂ ਅਦਿਸ੍ਵਾ ‘‘ਵਿਹਾਰਂ ਗਤੋ ਭਵਿਸ੍ਸਤੀ’’ਤਿ ਵਿਹਾਰਂ ਗਨ੍ਤ੍ਵਾ ਪੁਤ੍ਤਂ ਪਬ੍ਬਜਿਤਂ ਦਿਸ੍ਵਾ ਕਨ੍ਦਿਤ੍ਵਾ ਰੋਦਿਤ੍ਵਾ, ‘‘ਤਾਤ, ਕਿਂ ਮਂ ਨਾਸੇਸੀ’’ਤਿ ਵਤ੍ਵਾ ‘‘ਮਮ ਪੁਤ੍ਤੇ ਪਬ੍ਬਜਿਤੇ ਅਹਂ ਇਦਾਨਿ ਗੇਹੇ ਕਿਂ ਕਰਿਸ੍ਸਾਮੀ’’ਤਿ ਸਯਮ੍ਪਿ ਭਿਕ੍ਖੂ ਯਾਚਿਤ੍ਵਾ ਪਬ੍ਬਜਿ. ਅਥਸ੍ਸ ਮਾਤਾਪਿ ‘‘ਕਿਂ ਨੁ ਖੋ ਮੇ ਪੁਤ੍ਤੋ ਚ ਪਤਿ ਚ ਚਿਰਾਯਨ੍ਤਿ, ਕਚ੍ਚਿ ਵਿਹਾਰਂ ਗਨ੍ਤ੍ਵਾ ਪਬ੍ਬਜਿਤਾ’’ਤਿ ਤੇ ਓਲੋਕੇਨ੍ਤੀ ਵਿਹਾਰਂ ਗਨ੍ਤ੍ਵਾ ਉਭੋਪਿ ਪਬ੍ਬਜਿਤੇ ਦਿਸ੍ਵਾ ‘‘ਇਮੇਸਂ ਪਬ੍ਬਜਿਤਕਾਲੇ ਮਮ ਗੇਹੇਨ ਕੋ ਅਤ੍ਥੋ’’ਤਿ ਸਯਮ੍ਪਿ ਭਿਕ੍ਖੁਨਿਉਪਸ੍ਸਯਂ ਗਨ੍ਤ੍ਵਾ ਪਬ੍ਬਜਿ. ਤੇ ਪਬ੍ਬਜਿਤ੍ਵਾਪਿ ਵਿਨਾ ਭਵਿਤੁਂ ਨ ਸਕ੍ਕੋਨ੍ਤਿ, ਵਿਹਾਰੇਪਿ ਭਿਕ੍ਖੁਨਿਉਪਸ੍ਸਯੇਪਿ ਏਕਤੋਵ ਨਿਸੀਦਿਤ੍ਵਾ ਸਲ੍ਲਪਨ੍ਤਾ ਦਿਵਸਂ ਵੀਤਿਨਾਮੇਨ੍ਤਿ. ਤੇਨ ਭਿਕ੍ਖੂਪਿ ਭਿਕ੍ਖੂਨਿਯੋਪਿ ਉਬ੍ਬਾਲ਼੍ਹਾ ਹੋਨ੍ਤਿ.

ਅਥੇਕਦਿਵਸਂ ਭਿਕ੍ਖੂ ਨੇਸਂ ਕਿਰਿਯਂ ਸਤ੍ਥੁਂ ਆਰੋਚੇਸੁਂ. ਸਤ੍ਥਾ ਤੇ ਪਕ੍ਕੋਸਾਪੇਤ੍ਵਾ ‘‘ਸਚ੍ਚਂ ਕਿਰ ਤੁਮ੍ਹੇ ਏਵਂ ਕਰੋਥਾ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚ’’ਨ੍ਤਿ ਵੁਤ੍ਤੇ ‘‘ਕਸ੍ਮਾ ਏਵਂ ਕਰੋਥ? ਨ ਹਿ ਏਸ ਪਬ੍ਬਜਿਤਾਨਂ ਯੋਗੋ’’ਤਿ. ‘‘ਭਨ੍ਤੇ, ਵਿਨਾ ਭਵਿਤੁਂ ਨ ਸਕ੍ਕੋਮਾ’’ਤਿ. ‘‘ਪਬ੍ਬਜਿਤਕਾਲਤੋ ਪਟ੍ਠਾਯ ਏਵਂ ਕਰਣਂ ਅਯੁਤ੍ਤਂ. ਪਿਯਾਨਞ੍ਹਿ ਅਦਸ੍ਸਨਂ, ਅਪ੍ਪਿਯਾਨਞ੍ਚ ਦਸ੍ਸਨਂ ਦੁਕ੍ਖਮੇਵ. ਤਸ੍ਮਾ ਸਤ੍ਤੇਸੁ ਚ ਸਙ੍ਖਾਰੇਸੁ ਚ ਕਞ੍ਚਿ ਪਿਯਂ ਵਾ ਅਪ੍ਪਿਯਂ ਵਾ ਕਾਤੁਂ ਨ ਵਟ੍ਟਤੀ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੨੦੯. ‘‘ਅਯੋਗੇ ਯੁਞ੍ਜਮਤ੍ਤਾਨਂ, ਯੋਗਸ੍ਮਿਞ੍ਚ ਅਯੋਜਯਂ;

ਅਤ੍ਥਂ ਹਿਤ੍ਵਾ ਪਿਯਗ੍ਗਾਹੀ, ਪਿਹੇਤਤ੍ਤਾਨੁਯੋਗਿਨਂ.

੨੧੦. ‘‘ਮਾ ਪਿਯੇਹਿ ਸਮਾਗਞ੍ਛਿ, ਅਪ੍ਪਿਯੇਹਿ ਕੁਦਾਚਨਂ;

ਪਿਯਾਨਂ ਅਦਸ੍ਸਨਂ ਦੁਕ੍ਖਂ, ਅਪ੍ਪਿਯਾਨਞ੍ਚ ਦਸ੍ਸਨਂ.

੨੧੧. ‘‘ਤਸ੍ਮਾ ਪਿਯਂ ਨ ਕਯਿਰਾਥ, ਪਿਯਾਪਾਯੋ ਹਿ ਪਾਪਕੋ;

ਗਨ੍ਥਾ ਤੇਸਂ ਨ ਵਿਜ੍ਜਨ੍ਤਿ, ਯੇਸਂ ਨਤ੍ਥਿ ਪਿਯਾਪ੍ਪਿਯ’’ਨ੍ਤਿ.

ਤਤ੍ਥ ਅਯੋਗੇਤਿ ਅਯੁਞ੍ਜਿਤਬ੍ਬੇ ਅਯੋਨਿਸੋਮਨਸਿਕਾਰੇ. ਵੇਸਿਯਾਗੋਚਰਾਦਿਭੇਦਸ੍ਸ ਹਿ ਛਬ੍ਬਿਧਸ੍ਸ ਅਗੋਚਰਸ੍ਸ ਸੇਵਨਂ ਇਧ ਅਯੋਨਿਸੋਮਨਸਿਕਾਰੋ ਨਾਮ, ਤਸ੍ਮਿਂ ਅਯੋਨਿਸੋਮਨਸਿਕਾਰੇ ਅਤ੍ਤਾਨਂ ਯੁਞ੍ਜਨ੍ਤੋਤਿ ਅਤ੍ਥੋ. ਯੋਗਸ੍ਮਿਨ੍ਤਿ ਤਬ੍ਬਿਪਰੀਤੇ ਚ ਯੋਨਿਸੋਮਨਸਿਕਾਰੇ ਅਯੁਞ੍ਜਨ੍ਤੋਤਿ ਅਤ੍ਥੋ. ਅਤ੍ਥਂ ਹਿਤ੍ਵਾਤਿ ਪਬ੍ਬਜਿਤਕਾਲਤੋ ਪਟ੍ਠਾਯ ਅਧਿਸੀਲਾਦਿਸਿਕ੍ਖਤ੍ਤਯਂ ਅਤ੍ਥੋ ਨਾਮ, ਤਂ ਅਤ੍ਥਂ ਹਿਤ੍ਵਾ. ਪਿਯਗ੍ਗਾਹੀਤਿ ਪਞ੍ਚਕਾਮਗੁਣਸਙ੍ਖਾਤਂ ਪਿਯਮੇਵ ਗਣ੍ਹਨ੍ਤੋ. ਪਿਹੇਤਤ੍ਤਾਨੁਯੋਗਿਨਨ੍ਤਿ ਤਾਯ ਪਟਿਪਤ੍ਤਿਯਾ ਸਾਸਨਤੋ ਚੁਤੋ ਗਿਹਿਭਾਵਂ ਪਤ੍ਵਾ ਪਚ੍ਛਾ ਯੇ ਅਤ੍ਤਾਨੁਯੋਗਂ ਅਨੁਯੁਤ੍ਤਾ ਸੀਲਾਦੀਨਿ ਸਮ੍ਪਾਦੇਤ੍ਵਾ ਦੇਵਮਨੁਸ੍ਸਾਨਂ ਸਨ੍ਤਿਕਾ ਸਕ੍ਕਾਰਂ ਲਭਨ੍ਤਿ, ਤੇਸਂ ਪਿਹੇਤਿ, ‘‘ਅਹੋ ਵਤਾਹਮ੍ਪਿ ਏਵਰੂਪੋ ਅਸ੍ਸ’’ਨ੍ਤਿ ਇਚ੍ਛਤੀਤਿ ਅਤ੍ਥੋ.

ਮਾ ਪਿਯੇਹੀਤਿ ਪਿਯੇਹਿ ਸਤ੍ਤੇਹਿ ਵਾ ਸਙ੍ਖਾਰੇਹਿ ਵਾ ਕੁਦਾਚਨਂ ਏਕਕ੍ਖਣੇਪਿ ਨ ਸਮਾਗਚ੍ਛੇਯ੍ਯ, ਤਥਾ ਅਪ੍ਪਿਯੇਹਿ. ਕਿਂ ਕਾਰਣਾ? ਪਿਯਾ ਨਞ੍ਹਿ ਵਿਯੋਗਵਸੇਨ ਅਦਸ੍ਸਨਂ ਅਪ੍ਪਿਯਾਨਞ੍ਚ ਉਪਸਙ੍ਕਮਨਵਸੇਨ ਦਸ੍ਸਨਂ ਨਾਮ ਦੁਕ੍ਖਂ. ਤਸ੍ਮਾਤਿ ਯਸ੍ਮਾ ਇਦਂ ਉਭਯਮ੍ਪਿ ਦੁਕ੍ਖਂ, ਤਸ੍ਮਾ ਕਞ੍ਚਿ ਸਤ੍ਤਂ ਵਾ ਸਙ੍ਖਾਰਂ ਵਾ ਪਿਯਂ ਨਾਮ ਨ ਕਰੇਯ੍ਯ. ਪਿਯਾਪਾਯੋ ਹੀਤਿ ਪਿਯੇਹਿ ਅਪਾਯੋ ਵਿਯੋਗੋ. ਪਾਪਕੋਤਿ ਲਾਮਕੋ. ਗਨ੍ਥਾ ਤੇਸਂ ਨ ਵਿਜ੍ਜਨ੍ਤੀਤਿ ਯੇਸਂ ਪਿਯਂ ਨਤ੍ਥਿ, ਤੇਸਂ ਅਭਿਜ੍ਝਾਕਾਯਗਨ੍ਥੋ ਪਹੀਯਤਿ. ਯੇਸਂ ਅਪ੍ਪਿਯਂ ਨਤ੍ਥਿ, ਤੇਸਂ ਬ੍ਯਾਪਾਦੋ ਕਾਯਗਨ੍ਥੋ. ਤੇਸੁ ਪਨ ਦ੍ਵੀਸੁ ਪਹੀਨੇਸੁ ਸੇਸਗਨ੍ਥਾ ਪਹੀਨਾ ਹੋਨ੍ਤਿ. ਤਸ੍ਮਾ ਪਿਯਂ ਵਾ ਅਪ੍ਪਿਯਂ ਵਾ ਨ ਕਤ੍ਤਬ੍ਬਨ੍ਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ. ਤੇਨ ਪਨ ਤਯੋ ਜਨਾ ‘‘ਮਯਂ ਵਿਨਾ ਭਵਿਤੁਂ ਨ ਸਕ੍ਕੋਮਾ’’ਤਿ ਵਿਬ੍ਭਮਿਤ੍ਵਾ ਗੇਹਮੇਵ ਅਗਮਿਂਸੂਤਿ.

ਤਯੋਜਨਪਬ੍ਬਜਿਤਵਤ੍ਥੁ ਪਠਮਂ.

੨. ਅਞ੍ਞਤਰਕੁਟੁਮ੍ਬਿਕਵਤ੍ਥੁ

ਪਿਯਤੋ ਜਾਯਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਕੁਟੁਮ੍ਬਿਕਂ ਆਰਬ੍ਭ ਕਥੇਸਿ.

ਸੋ ਹਿ ਅਤ੍ਤਨੋ ਪੁਤ੍ਤੇ ਕਾਲਕਤੇ ਪੁਤ੍ਤਸੋਕਾਭਿਭੂਤੋ ਆਲ਼ਾਹਨਂ ਗਨ੍ਤ੍ਵਾ ਰੋਦਤਿ, ਪੁਤ੍ਤਸੋਕਂ ਸਨ੍ਧਾਰੇਤੁਂ ਨ ਸਕ੍ਕੋਤਿ. ਸਤ੍ਥਾ ਪਚ੍ਚੂਸਕਾਲੇ ਲੋਕਂ ਵੋਲੋਕੇਨ੍ਤੋ ਤਸ੍ਸ ਸੋਤਾਪਤ੍ਤਿਮਗ੍ਗਸ੍ਸੂਪਨਿਸ੍ਸਯਂ ਦਿਸ੍ਵਾ ਪਿਣ੍ਡਪਾਤਪਟਿਕ੍ਕਨ੍ਤੋ ਏਕਂ ਪਚ੍ਛਾਸਮਣਂ ਗਹੇਤ੍ਵਾ ਤਸ੍ਸ ਗੇਹਦ੍ਵਾਰਂ ਅਗਮਾਸਿ. ਸੋ ਸਤ੍ਥੁ ਆਗਤਭਾਵਂ ਸੁਤ੍ਵਾ ‘‘ਮਯਾ ਸਦ੍ਧਿਂ ਪਟਿਸਨ੍ਥਾਰਂ ਕਾਤੁਕਾਮੋ ਭਵਿਸ੍ਸਤੀ’’ਤਿ ਸਤ੍ਥਾਰਂ ਪਵੇਸੇਤ੍ਵਾ ਗੇਹਮਜ੍ਝੇ ਆਸਨਂ ਪਞ੍ਞਾਪੇਤ੍ਵਾ ਸਤ੍ਥਰਿ ਨਿਸਿਨ੍ਨੇ ਆਗਨ੍ਤ੍ਵਾ ਏਕਮਨ੍ਤਂ ਨਿਸੀਦਿ. ਅਥ ਨਂ ਸਤ੍ਥਾ ‘‘ਕਿਂ ਨੁ ਖੋ, ਉਪਾਸਕ, ਦੁਕ੍ਖਿਤੋਸੀ’’ਤਿ ਪੁਚ੍ਛਿਤ੍ਵਾ ਤੇਨ ਪੁਤ੍ਤਵਿਯੋਗਦੁਕ੍ਖੇ ਆਰੋਚਿਤੇ, ‘‘ਉਪਾਸਕ, ਮਾ ਚਿਨ੍ਤਯਿ, ਇਦਂ ਮਰਣਂ ਨਾਮ ਨ ਏਕਸ੍ਮਿਂਯੇਵ ਠਾਨੇ, ਨ ਚ ਏਕਸ੍ਸੇਵ ਹੋਤਿ, ਯਾਵਤਾ ਪਨ ਭਵੁਪ੍ਪਤ੍ਤਿ ਨਾਮ ਅਤ੍ਥਿ, ਸਬ੍ਬਸਤ੍ਤਾਨਂ ਹੋਤਿਯੇਵ. ਏਕਸਙ੍ਖਾਰੋਪਿ ਨਿਚ੍ਚੋ ਨਾਮ ਨਤ੍ਥਿ. ਤਸ੍ਮਾ ‘ਮਰਣਧਮ੍ਮਂ ਮਤਂ, ਭਿਜ੍ਜਨਧਮ੍ਮਂ ਭਿਨ੍ਨ’ਨ੍ਤਿ ਯੋਨਿਸੋ ਪਚ੍ਚਵੇਕ੍ਖਿਤਬ੍ਬਂ, ਨ ਸੋਚਿਤਬ੍ਬਂ. ਪੋਰਾਣਪਣ੍ਡਿਤਾਪਿ ਹਿ ਪੁਤ੍ਤਸ੍ਸ ਮਤਕਾਲੇ ‘ਮਰਣਧਮ੍ਮਂ ਮਤਂ, ਭਿਜ੍ਜਨਧਮ੍ਮਂ ਭਿਨ੍ਨ’ਨ੍ਤਿ ਸੋਕਂ ਅਕਤ੍ਵਾ ਮਰਣਸ੍ਸਤਿਮੇਵ ਭਾਵਯਿਂਸੂ’’ਤਿ ਵਤ੍ਵਾ, ‘‘ਭਨ੍ਤੇ, ਕੇ ਏਵਮਕਂਸੁ, ਕਦਾ ਚ ਅਕਂਸੁ, ਆਚਿਕ੍ਖਥ ਮੇ’’ਤਿ ਯਾਚਿਤੋ ਤਸ੍ਸਤ੍ਥਸ੍ਸ ਪਕਾਸਨਤ੍ਥਂ ਅਤੀਤਂ ਆਹਰਿਤ੍ਵਾ –

‘‘ਉਰਗੋਵ ਤਚਂ ਜਿਣ੍ਣਂ, ਹਿਤ੍ਵਾ ਗਚ੍ਛਤਿ ਸਂ ਤਨੁਂ;

ਏਵਂ ਸਰੀਰੇ ਨਿਬ੍ਭੋਗੇ, ਪੇਤੇ ਕਾਲਕਤੇ ਸਤਿ.

‘‘ਡਯ੍ਹਮਾਨੋ ਨ ਜਾਨਾਤਿ, ਞਾਤੀਨਂ ਪਰਿਦੇਵਿਤਂ;

ਤਸ੍ਮਾ ਏਤਂ ਨ ਸੋਚਾਮਿ, ਗਤੋ ਸੋ ਤਸ੍ਸ ਯਾ ਗਤੀ’’ਤਿ. (ਜਾ. ੧.੫.੧੯-੨੦) –

ਇਮਂ ਪਞ੍ਚਕਨਿਪਾਤੇ ਉਰਗਜਾਤਕਂ ਵਿਤ੍ਥਾਰੇਤ੍ਵਾ ‘‘ਏਵਂ ਪੁਬ੍ਬੇ ਪਣ੍ਡਿਤਾ ਪਿਯਪੁਤ੍ਤੇ ਕਾਲਕਤੇ ਯਥਾ ਏਤਰਹਿ ਤ੍ਵਂ ਕਮ੍ਮਨ੍ਤੇ ਵਿਸ੍ਸਜ੍ਜੇਤ੍ਵਾ ਨਿਰਾਹਾਰੋ ਰੋਦਨ੍ਤੋ ਵਿਚਰਸਿ, ਤਥਾ ਅਵਿਚਰਿਤ੍ਵਾ ਮਰਣਸ੍ਸਤਿਭਾਵਨਾਬਲੇਨ ਸੋਕਂ ਅਕਤ੍ਵਾ ਆਹਾਰਂ ਪਰਿਭੁਞ੍ਜਿਂਸੁ, ਕਮ੍ਮਨ੍ਤਞ੍ਚ ਅਧਿਟ੍ਠਹਿਂਸੁ. ਤਸ੍ਮਾ ‘ਪਿਯਪੁਤ੍ਤੋ ਮੇ ਕਾਲਕਤੋ’ਤਿ ਮਾ ਚਿਨ੍ਤਯਿ. ਉਪ੍ਪਜ੍ਜਮਾਨੋ ਹਿ ਸੋਕੋ ਵਾ ਭਯਂ ਵਾ ਪਿਯਮੇਵ ਨਿਸ੍ਸਾਯ ਉਪ੍ਪਜ੍ਜਤੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੧੨. ‘‘ਪਿਯਤੋ ਜਾਯਤੀ ਸੋਕੋ, ਪਿਯਤੋ ਜਾਯਤੀ ਭਯਂ;

ਪਿਯਤੋ ਵਿਪ੍ਪਮੁਤ੍ਤਸ੍ਸ, ਨਤ੍ਥਿ ਸੋਕੋ ਕੁਤੋ ਭਯ’’ਨ੍ਤਿ.

ਤਤ੍ਥ ਪਿਯਤੋਤਿ ਵਟ੍ਟਮੂਲਕੋ ਹਿ ਸੋਕੋ ਵਾ ਭਯਂ ਵਾ ਉਪ੍ਪਜ੍ਜਮਾਨਂ ਪਿਯਮੇਵ ਸਤ੍ਤਂ ਵਾ ਸਙ੍ਖਾਰਂ ਵਾ ਨਿਸ੍ਸਾਯ ਉਪ੍ਪਜ੍ਜਤਿ, ਤਤੋ ਪਨ ਵਿਪ੍ਪਮੁਤ੍ਤਸ੍ਸ ਉਭਯਮ੍ਪੇਤਂ ਨਤ੍ਥੀਤਿ ਅਤ੍ਥੋ.

ਦੇਸਨਾਵਸਾਨੇ ਕੁਟੁਮ੍ਬਿਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ, ਸਮ੍ਪਤ੍ਤਾਨਮ੍ਪਿ ਸਾਤ੍ਥਿਕਾ ਧਮ੍ਮਦੇਸਨਾ ਅਹੋਸੀਤਿ.

ਅਞ੍ਞਤਰਕੁਟੁਮ੍ਬਿਕਵਤ੍ਥੁ ਦੁਤਿਯਂ.

੩. ਵਿਸਾਖਾਵਤ੍ਥੁ

ਪੇਮਤੋ ਜਾਯਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਵਿਸਾਖਂ ਉਪਾਸਿਕਂ ਆਰਬ੍ਭ ਕਥੇਸਿ.

ਸਾ ਕਿਰ ਪੁਤ੍ਤਸ੍ਸ ਧੀਤਰਂ ਸੁਦਤ੍ਤਂ ਨਾਮ ਕੁਮਾਰਿਕਂ ਅਤ੍ਤਨੋ ਠਾਨੇ ਠਪੇਤ੍ਵਾ ਗੇਹੇ ਭਿਕ੍ਖੁਸਙ੍ਘਸ੍ਸ ਵੇਯ੍ਯਾਵਚ੍ਚਂ ਕਾਰੇਸਿ. ਸਾ ਅਪਰੇਨ ਸਮਯੇਨ ਕਾਲਮਕਾਸਿ. ਸਾ ਤਸ੍ਸਾ ਸਰੀਰਨਿਕ੍ਖੇਪਂ ਕਾਰੇਤ੍ਵਾ ਸੋਕਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੀ ਦੁਕ੍ਖਿਨੀ ਦੁਮ੍ਮਨਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਅਥ ਨਂ ਸਤ੍ਥਾ ‘‘ਕਿਂ ਨੁ ਖੋ ਤ੍ਵਂ, ਵਿਸਾਖੇ, ਦੁਕ੍ਖਿਨੀ ਦੁਮ੍ਮਨਾ ਅਸ੍ਸੁਮੁਖਾ ਰੋਦਮਾਨਾ ਨਿਸਿਨ੍ਨਾ’’ਤਿ ਆਹ. ਸਾ ਤਮਤ੍ਥਂ ਆਰੋਚੇਤ੍ਵਾ ‘‘ਪਿਯਾ ਮੇ, ਭਨ੍ਤੇ, ਸਾ ਕੁਮਾਰਿਕਾ ਵਤ੍ਤਸਮ੍ਪਨ੍ਨਾ, ਇਦਾਨਿ ਤਥਾਰੂਪਂ ਨ ਪਸ੍ਸਾਮੀ’’ਤਿ ਆਹ. ‘‘ਕਿਤ੍ਤਕਾ ਪਨ, ਵਿਸਾਖੇ, ਸਾਵਤ੍ਥਿਯਂ ਮਨੁਸ੍ਸਾ’’ਤਿ? ‘‘ਭਨ੍ਤੇ, ਤੁਮ੍ਹੇਹਿਯੇਵ ਮੇ ਕਥਿਤਂ ਸਤ੍ਤ ਜਨਕੋਟਿਯੋ’’ਤਿ. ‘‘ਸਚੇ ਪਨਾਯਂ ਏਤ੍ਤਕੋ ਜਨੋ ਤਵ ਨਤ੍ਤਾਯ ਸਦਿਸੋ ਭਵੇਯ੍ਯ, ਇਚ੍ਛੇਯ੍ਯਾਸਿ ਨ’’ਨ੍ਤਿ? ‘‘ਆਮ, ਭਨ੍ਤੇ’’ਤਿ. ‘‘ਕਤਿ ਪਨ ਜਨਾ ਸਾਵਤ੍ਥਿਯਂ ਦੇਵਸਿਕਂ ਕਾਲਂ ਕਰੋਨ੍ਤੀ’’ਤਿ? ‘‘ਬਹੂ, ਭਨ੍ਤੇ’’ਤਿ. ‘‘ਨਨੁ ਏਵਂ, ਭਨ੍ਤੇ, ਤਵ ਅਸੋਚਨਕਾਲੋ ਨ ਭਵੇਯ੍ਯ, ਰਤ੍ਤਿਨ੍ਦਿਵਂ ਰੋਦਨ੍ਤੀਯੇਵ ਵਿਚਰੇਯ੍ਯਾਸੀ’’ਤਿ. ‘‘ਹੋਤੁ, ਭਨ੍ਤੇ, ਞਾਤਂ ਮਯਾ’’ਤਿ. ਅਥ ਨਂ ਸਤ੍ਥਾ ‘‘ਤੇਨ ਹਿ ਮਾ ਸੋਚਿ, ਸੋਕੋ ਵਾ ਭਯਂ ਵਾ ਪੇਮਤੋਵ ਜਾਯਤੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੧੩. ‘‘ਪੇਮਤੋ ਜਾਯਤੀ ਸੋਕੋ, ਪੇਮਤੋ ਜਾਯਤੀ ਭਯਂ;

ਪੇਮਤੋ ਵਿਪ੍ਪਮੁਤ੍ਤਸ੍ਸ, ਨਤ੍ਥਿ ਸੋਕੋ ਕੁਤੋ ਭਯ’’ਨ੍ਤਿ.

ਤਤ੍ਥ ਪੇਮਤੋਤਿ ਪੁਤ੍ਤਧੀਤਾਦੀਸੁ ਕਤਂ ਪੇਮਮੇਵ ਨਿਸ੍ਸਾਯ ਸੋਕੋ ਜਾਯਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਵਿਸਾਖਾਵਤ੍ਥੁ ਤਤਿਯਂ.

੪. ਲਿਚ੍ਛਵੀਵਤ੍ਥੁ

ਰਤਿਯਾ ਜਾਯਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਸਾਲਿਂ ਨਿਸ੍ਸਾਯ ਕੂਟਾਗਾਰਸਾਲਾਯਂ ਵਿਹਰਨ੍ਤੋ ਲਿਚ੍ਛਵੀ ਆਰਬ੍ਭ ਕਥੇਸਿ.

ਤੇ ਕਿਰ ਏਕਸ੍ਮਿਂ ਛਣਦਿਵਸੇ ਅਞ੍ਞਮਞ੍ਞਂ ਅਸਦਿਸੇਹਿ ਅਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਉਯ੍ਯਾਨਗਮਨਤ੍ਥਾਯ ਨਗਰਾ ਨਿਕ੍ਖਮਿਂਸੁ. ਸਤ੍ਥਾ ਪਿਣ੍ਡਾਯ ਪਵਿਸਨ੍ਤੋ ਤੇ ਦਿਸ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਪਸ੍ਸਥ, ਭਿਕ੍ਖਵੇ, ਲਿਚ੍ਛਵਯੋ, ਯੇਹਿ ਦੇਵਾ ਤਾਵਤਿਂਸਾ ਨ ਦਿਟ੍ਠਪੁਬ੍ਬਾ, ਤੇ ਇਮੇ ਓਲੋਕੇਨ੍ਤੂ’’ਤਿ ਵਤ੍ਵਾ ਨਗਰਂ ਪਾਵਿਸਿ. ਤੇਪਿ ਉਯ੍ਯਾਨਂ ਗਚ੍ਛਨ੍ਤਾ ਏਕਂ ਨਗਰਸੋਭਿਨਿਂ ਇਤ੍ਥਿਂ ਆਦਾਯ ਗਨ੍ਤ੍ਵਾ ਤਂ ਨਿਸ੍ਸਾਯ ਇਸ੍ਸਾਭਿਭੂਤਾ ਅਞ੍ਞਮਞ੍ਞਂ ਪਹਰਿਤ੍ਵਾ ਲੋਹਿਤਂ ਨਦਿਂ ਵਿਯ ਪਵਤ੍ਤਯਿਂਸੁ. ਅਥ ਨੇ ਮਞ੍ਚੇਨਾਦਾਯ ਉਕ੍ਖਿਪਿਤ੍ਵਾ ਆਗਮਂਸੁ. ਸਤ੍ਥਾਪਿ ਕਤਭਤ੍ਤਕਿਚ੍ਚੋ ਨਗਰਾ ਨਿਕ੍ਖਮਿ. ਭਿਕ੍ਖੂਪਿ ਲਿਚ੍ਛਵਯੋ ਤਥਾ ਨੀਯਮਾਨੇ ਦਿਸ੍ਵਾ ਸਤ੍ਥਾਰਂ ਆਹਂਸੁ – ‘‘ਭਨ੍ਤੇ, ਲਿਚ੍ਛਵਿਰਾਜਾਨੋ ਪਾਤੋਵ ਅਲਙ੍ਕਤਪਟਿਯਤ੍ਤਾ ਦੇਵਾ ਵਿਯ ਨਗਰਾ ਨਿਕ੍ਖਮਿਤ੍ਵਾ ਇਦਾਨਿ ਏਕਂ ਇਤ੍ਥਿਂ ਨਿਸ੍ਸਾਯ ਇਮਂ ਬ੍ਯਸਨਂ ਪਤ੍ਤਾ’’ਤਿ. ਸਤ੍ਥਾ, ‘‘ਭਿਕ੍ਖਵੇ, ਸੋਕੋ ਵਾ ਭਯਂ ਵਾ ਉਪ੍ਪਜ੍ਜਮਾਨਂ ਰਤਿਂ ਨਿਸ੍ਸਾਯ ਉਪ੍ਪਜ੍ਜਤਿਯੇਵਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੧੪. ‘‘ਰਤਿਯਾ ਜਾਯਤੀ ਸੋਕੋ, ਰਤਿਯਾ ਜਾਯਤੀ ਭਯਂ;

ਰਤਿਯਾ ਵਿਪ੍ਪਮੁਤ੍ਤਸ੍ਸ, ਨਤ੍ਥਿ ਸੋਕੋ ਕੁਤੋ ਭਯ’’ਨ੍ਤਿ.

ਤਤ੍ਥ ਰਤਿਯਾਤਿ ਪਞ੍ਚਕਾਮਗੁਣਰਤਿਤੋ, ਤਂ ਨਿਸ੍ਸਾਯਾਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਲਿਚ੍ਛਵੀਵਤ੍ਥੁ ਚਤੁਤ੍ਥਂ.

੫. ਅਨਿਤ੍ਥਿਗਨ੍ਧਕੁਮਾਰਵਤ੍ਥੁ

ਕਾਮਤੋਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਨਿਤ੍ਥਿਗਨ੍ਧਕੁਮਾਰਂ ਨਾਮ ਆਰਬ੍ਭ ਕਥੇਸਿ.

ਸੋ ਕਿਰ ਬ੍ਰਹ੍ਮਲੋਕਾ ਚੁਤਸਤ੍ਤੋ ਸਾਵਤ੍ਥਿਯਂ ਮਹਾਭੋਗਕੁਲੇ ਨਿਬ੍ਬਤ੍ਤੋ ਜਾਤਦਿਵਸਤੋ ਪਟ੍ਠਾਯ ਇਤ੍ਥਿਸਮੀਪਂ ਉਪਗਨ੍ਤੁਂ ਨ ਇਚ੍ਛਤਿ, ਇਤ੍ਥਿਯਾ ਗਯ੍ਹਮਾਨੋ ਰੋਦਤਿ. ਵਤ੍ਥਚੁਮ੍ਬਟਕੇਨ ਨਂ ਗਹੇਤ੍ਵਾ ਥਞ੍ਞਂ ਪਾਯੇਨ੍ਤਿ. ਸੋ ਵਯਪ੍ਪਤ੍ਤੋ ਮਾਤਾਪਿਤੂਹਿ, ‘‘ਤਾਤ, ਆਵਾਹਂ ਤੇ ਕਰਿਸ੍ਸਾਮਾ’’ਤਿ ਵੁਤ੍ਤੇ ‘‘ਨ ਮੇ ਇਤ੍ਥਿਯਾ ਅਤ੍ਥੋ’’ਤਿ ਪਟਿਕ੍ਖਿਪਿਤ੍ਵਾ ਪੁਨਪ੍ਪੁਨਂ ਯਾਚਿਯਮਾਨੋ ਪਞ੍ਚਸਤੇ ਸੁਵਣ੍ਣਕਾਰੇ ਪਕ੍ਕੋਸਾਪੇਤ੍ਵਾ ਰਤ੍ਤਸੁਵਣ੍ਣਨਿਕ੍ਖਸਹਸ੍ਸਂ ਦਾਪੇਤ੍ਵਾ ਅਤਿਵਿਯ ਪਾਸਾਦਿਕਂ ਘਨਕੋਟ੍ਟਿਮਂ ਇਤ੍ਥਿਰੂਪਂ ਕਾਰੇਤ੍ਵਾ ਪੁਨ ਮਾਤਾਪਿਤੂਹਿ, ‘‘ਤਾਤ, ਤਯਿ ਆਵਾਹਂ ਅਕਰੋਨ੍ਤੇ ਕੁਲਵਂਸੋ ਨ ਪਤਿਟ੍ਠਹਿਸ੍ਸਤਿ, ਕੁਮਾਰਿਕਂ ਤੇ ਆਨੇਸ੍ਸਾਮਾ’’ਤਿ ਵੁਤ੍ਤੇ ‘‘ਤੇਨ ਹਿ ਸਚੇ ਮੇ ਏਵਰੂਪਂ ਕੁਮਾਰਿਕਂ ਆਨੇਸ੍ਸਥ, ਕਰਿਸ੍ਸਾਮਿ ਵੋ ਵਚਨ’’ਨ੍ਤਿ ਤਂ ਸੁਵਣ੍ਣਰੂਪਕਂ ਦਸ੍ਸੇਤਿ. ਅਥਸ੍ਸ ਮਾਤਾਪਿਤਰੋ ਅਭਿਞ੍ਞਾਤੇ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ‘‘ਅਮ੍ਹਾਕਂ ਪੁਤ੍ਤੋ ਮਹਾਪੁਞ੍ਞੋ, ਅਵਸ੍ਸਂ ਇਮਿਨਾ ਸਦ੍ਧਿਂ ਕਤਪੁਞ੍ਞਾ ਕੁਮਾਰਿਕਾ ਭਵਿਸ੍ਸਤਿ, ਗਚ੍ਛਥ ਇਮਂ ਸੁਵਣ੍ਣਰੂਪਕਂ ਗਹੇਤ੍ਵਾ ਏਵਰੂਪਂ ਕੁਮਾਰਿਕਂ ਆਹਰਥਾ’’ਤਿ ਪਹਿਣਿਂਸੁ. ਤੇ ‘‘ਸਾਧੂ’’ਤਿ ਚਾਰਿਕਂ ਚਰਨ੍ਤਾ ਮਦ੍ਦਰਟ੍ਠੇ ਸਾਗਲਨਗਰਂ ਗਤਾ. ਤਸ੍ਮਿਞ੍ਚ ਨਗਰੇ ਏਕਾ ਸੋਲ਼ਸਵਸ੍ਸੁਦ੍ਦੇਸਿਕਾ ਅਭਿਰੂਪਾ ਕੁਮਾਰਿਕਾ ਅਹੋਸਿ, ਤਂ ਮਾਤਾਪਿਤਰੋ ਸਤ੍ਤਭੂਮਿਕਸ੍ਸ ਪਾਸਾਦਸ੍ਸੂਪਰਿਮਤਲੇ ਪਰਿਵਾਸੇਸੁਂ. ਤੇਪਿ ਖੋ ਬ੍ਰਾਹ੍ਮਣਾ ‘‘ਸਚੇ ਇਧ ਏਵਰੂਪਾ ਕੁਮਾਰਿਕਾ ਭਵਿਸ੍ਸਤਿ, ਇਮਂ ਦਿਸ੍ਵਾ ‘ਅਯਂ ਅਸੁਕਸ੍ਸ ਕੁਲਸ੍ਸ ਧੀਤਾ ਵਿਯ ਅਭਿਰੂਪਾ’ਤਿ ਵਕ੍ਖਨ੍ਤੀ’’ਤਿ ਤਂ ਸੁਵਣ੍ਣਰੂਪਕਂ ਤਿਤ੍ਥਮਗ੍ਗੇ ਠਪੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ.

ਅਥਸ੍ਸ ਕੁਮਾਰਿਕਾਯ ਧਾਤੀ ਤਂ ਕੁਮਾਰਿਕਂ ਨ੍ਹਾਪੇਤ੍ਵਾ ਸਯਮ੍ਪਿ ਨ੍ਹਾਯਿਤੁਕਾਮਾ ਹੁਤ੍ਵਾ ਤਿਤ੍ਥਂ ਆਗਤਾ ਤਂ ਰੂਪਕਂ ਦਿਸ੍ਵਾ ‘‘ਧੀਤਾ ਮੇ’’ਤਿ ਸਞ੍ਞਾਯ ‘‘ਦੁਬ੍ਬਿਨੀਤਾਸਿ, ਇਦਾਨੇਵਾਹਂ ਨ੍ਹਾਪੇਤ੍ਵਾ ਨਿਕ੍ਖਨ੍ਤਾ, ਤ੍ਵਂ ਮਯਾ ਪੁਰੇਤਰਂ ਇਧਾਗਤਾਸੀ’’ਤਿ ਹਤ੍ਥੇਨ ਪਹਰਿਤ੍ਵਾ ਥਦ੍ਧਭਾਵਞ੍ਚੇਵ ਨਿਬ੍ਬਿਕਾਰਤਞ੍ਚ ਞਤ੍ਵਾ ‘‘ਅਹਂ ਮੇ, ਧੀਤਾਤਿ ਸਞ੍ਞਮਕਾਸਿਂ, ਕਿਂ ਨਾਮੇਤ’’ਨ੍ਤਿ ਆਹ. ਅਥ ਨਂ ਤੇ ਬ੍ਰਾਹ੍ਮਣਾ ‘‘ਏਵਰੂਪਾ ਤੇ, ਅਮ੍ਮ, ਧੀਤਾ’’ਤਿ ਪੁਚ੍ਛਿਂਸੁ. ਅਯਂ ਮਮ ਧੀਤੁ ਸਨ੍ਤਿਕੇ ਕਿਂ ਅਗ੍ਘਤੀਤਿ? ਤੇਨ ਹਿ ਤੇ ਧੀਤਰਂ ਅਮ੍ਹਾਕਂ ਦਸ੍ਸੇਹੀਤਿ. ਸਾ ਤੇਹਿ ਸਦ੍ਧਿਂ ਗੇਹਂ ਗਨ੍ਤ੍ਵਾ ਸਾਮਿਕਾਨਂ ਆਰੋਚੇਸਿ. ਤੇ ਬ੍ਰਾਹ੍ਮਣੇਹਿ ਸਦ੍ਧਿਂ ਕਤਪਟਿਸਮ੍ਮੋਦਨਾ ਧੀਤਰਂ ਓਤਾਰੇਤ੍ਵਾ ਹੇਟ੍ਠਾਪਾਸਾਦੇ ਸੁਵਣ੍ਣਰੂਪਕਸ੍ਸ ਸਨ੍ਤਿਕੇ ਠਪੇਸੁਂ. ਸੁਵਣ੍ਣਰੂਪਕਂ ਨਿਪ੍ਪਭਂ ਅਹੋਸਿ, ਕੁਮਾਰਿਕਾ ਸਪ੍ਪਭਾ ਅਹੋਸਿ. ਬ੍ਰਾਹ੍ਮਣਾ ਤਂ ਤੇਸਂ ਦਤ੍ਵਾ ਕੁਮਾਰਿਕਂ ਪਟਿਚ੍ਛਾਪੇਤ੍ਵਾ ਗਨ੍ਤ੍ਵਾ ਅਨਿਤ੍ਥਿਗਨ੍ਧਕੁਮਾਰਸ੍ਸ ਮਾਤਾਪਿਤੂਨਂ ਆਰੋਚਯਿਂਸੁ. ਤੇ ਤੁਟ੍ਠਮਾਨਸਾ ‘‘ਗਚ੍ਛਥ, ਨਂ ਸੀਘਂ ਆਨੇਥਾ’’ਤਿ ਮਹਨ੍ਤੇਨ ਸਕ੍ਕਾਰੇਨ ਪਹਿਣਿਂਸੁ.

ਕੁਮਾਰੋਪਿ ਤਂ ਪਵਤ੍ਤਿਂ ਸੁਤ੍ਵਾ ‘‘ਕਞ੍ਚਨਰੂਪਤੋਪਿ ਕਿਰ ਅਭਿਰੂਪਤਰਾ ਦਾਰਿਕਾ ਅਤ੍ਥੀ’’ਤਿ ਸਵਨਵਸੇਨੇਵ ਸਿਨੇਹਂ ਉਪ੍ਪਾਦੇਤ੍ਵਾ ‘‘ਸੀਘਂ ਆਨੇਨ੍ਤੂ’’ਤਿ ਆਹ. ਸਾਪਿ ਖੋ ਯਾਨਂ ਆਰੋਪੇਤ੍ਵਾ ਆਨੀਯਮਾਨਾ ਅਤਿਸੁਖੁਮਾਲਤਾਯ ਯਾਨੁਗ੍ਘਾਤੇਨ ਸਮੁਪ੍ਪਾਦਿਤਵਾਤਰੋਗਾ ਅਨ੍ਤਰਾਮਗ੍ਗੇਯੇਵ ਕਾਲਮਕਾਸਿ. ਕੁਮਾਰੋਪਿ ‘‘ਆਗਤਾ’’ਤਿ ਨਿਰਨ੍ਤਰਂ ਪੁਚ੍ਛਤਿ, ਤਸ੍ਸ ਅਤਿਸਿਨੇਹੇਨ ਪੁਚ੍ਛਨ੍ਤਸ੍ਸ ਸਹਸਾਵ ਅਨਾਰੋਚੇਤ੍ਵਾ ਕਤਿਪਾਹਂ ਵਿਕ੍ਖੇਪਂ ਕਤ੍ਵਾ ਤਮਤ੍ਥਂ ਆਰੋਚਯਿਂਸੁ. ਸੋ ‘‘ਤਥਾਰੂਪਾਯ ਨਾਮ ਇਤ੍ਥਿਯਾ ਸਦ੍ਧਿਂ ਸਮਾਗਮਂ ਨਾਲਤ੍ਥ’’ਨ੍ਤਿ ਉਪ੍ਪਨ੍ਨਦੋਮਨਸ੍ਸੋ ਪਬ੍ਬਤੇਨ ਵਿਯ ਸੋਕਦੁਕ੍ਖੇਨ ਅਜ੍ਝੋਤ੍ਥਟੋ ਅਹੋਸਿ. ਸਤ੍ਥਾ ਤਸ੍ਸੂਪਨਿਸ੍ਸਯਂ ਦਿਸ੍ਵਾ ਪਿਣ੍ਡਾਯ ਚਰਨ੍ਤੋ ਤਂ ਗੇਹਦ੍ਵਾਰਂ ਅਗਮਾਸਿ. ਅਥਸ੍ਸ ਮਾਤਾਪਿਤਰੋ ਸਤ੍ਥਾਰਂ ਅਨ੍ਤੋਗੇਹਂ ਪਵੇਸੇਤ੍ਵਾ ਸਕ੍ਕਚ੍ਚਂ ਪਰਿਵਿਸਿਂਸੁ. ਸਤ੍ਥਾ ਭਤ੍ਤਕਿਚ੍ਚਾਵਸਾਨੇ ‘‘ਕਹਂ ਅਨਿਤ੍ਥਿਗਨ੍ਧਕੁਮਾਰੋ’’ਤਿ ਪੁਚ੍ਛਿ. ‘‘ਏਸੋ, ਭਨ੍ਤੇ, ਆਹਾਰੂਪਚ੍ਛੇਦਂ ਕਤ੍ਵਾ ਅਨ੍ਤੋਗਬ੍ਭੇ ਨਿਸਿਨ੍ਨੋ’’ਤਿ. ‘‘ਪਕ੍ਕੋਸਥ ਨ’’ਨ੍ਤਿ. ਸੋ ਆਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਸਤ੍ਥਾ ‘‘ਕਿਂ ਨੁ ਖੋ, ਕੁਮਾਰ, ਬਲਵਸੋਕੋ ਉਪ੍ਪਨ੍ਨੋ’’ਤਿ ਵੁਤ੍ਤੇ, ‘‘ਆਮ, ਭਨ੍ਤੇ, ‘ਏਵਰੂਪਾ ਨਾਮ ਇਤ੍ਥੀ ਅਨ੍ਤਰਾਮਗ੍ਗੇ ਕਾਲਕਤਾ’ਤਿ ਸੁਤ੍ਵਾ ਬਲਵਸੋਕੋ ਉਪ੍ਪਨ੍ਨੋ, ਭਤ੍ਤਮ੍ਪਿ ਮੇ ਨਚ੍ਛਾਦੇਤੀ’’ਤਿ. ਅਥ ਨਂ ਸਤ੍ਥਾ ‘‘ਜਾਨਾਸਿ ਪਨ ਤ੍ਵਂ, ਕੁਮਾਰ, ਕਿਂ ਤੇ ਨਿਸ੍ਸਾਯ ਸੋਕੋ ਉਪ੍ਪਨ੍ਨੋ’’ਤਿ? ‘‘ਨ ਜਾਨਾਮਿ, ਭਨ੍ਤੇ’’ਤਿ. ‘‘ਕਾਮਂ ਨਿਸ੍ਸਾਯ, ਕੁਮਾਰ, ਬਲਵਸੋਕੋ ਉਪ੍ਪਨ੍ਨੋ, ਸੋਕੋ ਵਾ ਭਯਂ ਵਾ ਕਾਮਂ ਨਿਸ੍ਸਾਯ ਉਪ੍ਪਜ੍ਜਤੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੧੫. ‘‘ਕਾਮਤੋ ਜਾਯਤੀ ਸੋਕੋ, ਕਾਮਤੋ ਜਾਯਤੀ ਭਯਂ;

ਕਾਮਤੋ ਵਿਪ੍ਪਮੁਤ੍ਤਸ੍ਸ, ਨਤ੍ਥਿ ਸੋਕੋ ਕੁਤੋ ਭਯ’’ਨ੍ਤਿ.

ਤਤ੍ਥ ਕਾਮਤੋਤਿ ਵਤ੍ਥੁਕਾਮਕਿਲੇਸਕਾਮਤੋ, ਦੁਵਿਧਮ੍ਪੇਤਂ ਕਾਮਂ ਨਿਸ੍ਸਾਯਾਤਿ ਅਤ੍ਥੋ.

ਦੇਸਨਾਵਸਾਨੇ ਅਨਿਤ੍ਥਿਗਨ੍ਧਕੁਮਾਰੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ.

ਅਨਿਤ੍ਥਿਗਨ੍ਧਕੁਮਾਰਵਤ੍ਥੁ ਪਞ੍ਚਮਂ.

੬. ਅਞ੍ਞਤਰਬ੍ਰਾਹ੍ਮਣਵਤ੍ਥੁ

ਤਣ੍ਹਾਯ ਜਾਯਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਬ੍ਰਾਹ੍ਮਣਂ ਆਰਬ੍ਭ ਕਥੇਸਿ.

ਸੋ ਕਿਰ ਮਿਚ੍ਛਾਦਿਟ੍ਠਿਕੋ ਏਕਦਿਵਸਂ ਨਦੀਤੀਰਂ ਗਨ੍ਤ੍ਵਾ ਖੇਤ੍ਤਂ ਸੋਧੇਤਿ. ਸਤ੍ਥਾ ਤਸ੍ਸ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਤਸ੍ਸ ਸਨ੍ਤਿਕਂ ਅਗਮਾਸਿ. ਸੋ ਸਤ੍ਥਾਰਂ ਦਿਸ੍ਵਾਪਿ ਸਾਮੀਚਿਕਮ੍ਮਂ ਅਕਤ੍ਵਾ ਤੁਣ੍ਹੀ ਅਹੋਸਿ. ਅਥ ਨਂ ਸਤ੍ਥਾ ਪੁਰੇਤਰਂ ਆਲਪਿਤ੍ਵਾ, ‘‘ਬ੍ਰਾਹ੍ਮਣ, ਕਿਂ ਕਰੋਸੀ’’ਤਿ ਆਹ. ‘‘ਖੇਤ੍ਤਂ, ਭੋ ਗੋਤਮ, ਸੋਧੇਮੀ’’ਤਿ. ਸਤ੍ਥਾ ਏਤ੍ਤਕਮੇਵ ਵਤ੍ਵਾ ਗਤੋ. ਪੁਨਦਿਵਸੇਪਿ ਤਸ੍ਸ ਖੇਤ੍ਤਂ ਕਸਿਤੁਂ ਆਗਤਸ੍ਸ ਸਨ੍ਤਿਕਂ ਗਨ੍ਤ੍ਵਾ, ‘‘ਬ੍ਰਾਹ੍ਮਣ, ਕਿਂ ਕਰੋਸੀ’’ਤਿ ਪੁਚ੍ਛਿਤ੍ਵਾ ‘‘ਖੇਤ੍ਤਂ ਕਸਾਮਿ, ਭੋ ਗੋਤਮਾ’’ਤਿ ਸੁਤ੍ਵਾ ਪਕ੍ਕਾਮਿ. ਪੁਨਦਿਵਸਾਦੀਸੁਪਿ ਤਥੇਵ ਗਨ੍ਤ੍ਵਾ ਪੁਚ੍ਛਿਤ੍ਵਾ, ‘‘ਭੋ ਗੋਤਮ, ਖੇਤ੍ਤਂ ਵਪਾਮਿ ਨਿਦ੍ਦੇਮਿ ਰਕ੍ਖਾਮੀ’’ਤਿ ਸੁਤ੍ਵਾ ਪਕ੍ਕਾਮਿ. ਅਥ ਨਂ ਏਕਦਿਵਸਂ ਬ੍ਰਾਹ੍ਮਣੋ ਆਹ – ‘‘ਭੋ ਗੋਤਮ, ਤ੍ਵਂ ਮਮ ਖੇਤ੍ਤਸੋਧਨਦਿਵਸਤੋ ਪਟ੍ਠਾਯ ਆਗਤੋ. ਸਚੇ ਮੇ ਸਸ੍ਸਂ ਸਮ੍ਪਜ੍ਜਿਸ੍ਸਤਿ, ਤੁਯ੍ਹਮ੍ਪਿ ਸਂਵਿਭਾਗਂ ਕਰਿਸ੍ਸਾਮਿ, ਤੁਯ੍ਹਂ ਅਦਤ੍ਵਾ ਸਯਂ ਨ ਖਾਦਿਸ੍ਸਾਮਿ, ਇਤੋ ਦਾਨਿ ਪਟ੍ਠਾਯ ਤ੍ਵਂ ਮਮ ਸਹਾਯੋ’’ਤਿ.

ਅਥਸ੍ਸ ਅਪਰੇਨ ਸਮਯੇਨ ਸਸ੍ਸਂ ਸਮ੍ਪਜ੍ਜਿ, ਤਸ੍ਸ ‘‘ਸਮ੍ਪਨ੍ਨਂ ਮੇ ਸਸ੍ਸਂ, ਸ੍ਵੇ ਦਾਨਿ ਲਾਯਾਪੇਸ੍ਸਾਮੀ’’ਤਿ ਲਾਯਨਤ੍ਥਂ ਕਤ੍ਤਬ੍ਬਕਿਚ੍ਚਸ੍ਸ ਰਤ੍ਤਿਂ ਮਹਾਮੇਘੋ ਵਸ੍ਸਿਤ੍ਵਾ ਸਬ੍ਬਂ ਸਸ੍ਸਂ ਹਰਿ, ਖੇਤ੍ਤਂ ਤਚ੍ਛੇਤ੍ਵਾ ਠਪਿਤਸਦਿਸਂ ਅਹੋਸਿ. ਸਤ੍ਥਾ ਪਨ ਪਠਮਦਿਵਸਂਯੇਵ ‘‘ਤਂ ਸਸ੍ਸਂ ਨ ਸਮ੍ਪਜ੍ਜਿਸ੍ਸਤੀ’’ਤਿ ਅਞ੍ਞਾਸਿ. ਬ੍ਰਾਹ੍ਮਣੋ ਪਾਤੋਵ ‘‘ਖੇਤ੍ਤਂ ਓਲੋਕੇਸ੍ਸਾਮੀ’’ਤਿ ਗਤੋ ਤੁਚ੍ਛਂ ਖੇਤ੍ਤਂ ਦਿਸ੍ਵਾ ਉਪ੍ਪਨ੍ਨਬਲਵਸੋਕੋ ਚਿਨ੍ਤੇਸਿ – ‘‘ਸਮਣੋ ਗੋਤਮੋ ਮਮ ਖੇਤ੍ਤਸੋਧਨਕਾਲਤੋ ਪਟ੍ਠਾਯ ਆਗਤੋ, ਅਹਮ੍ਪਿ ਨਂ ‘ਇਮਸ੍ਮਿਂ ਸਸ੍ਸੇ ਨਿਪ੍ਫਨ੍ਨੇ ਤੁਯ੍ਹਮ੍ਪਿ ਸਂਵਿਭਾਗਂ ਕਰਿਸ੍ਸਾਮਿ, ਤੁਯ੍ਹਂ ਅਦਤ੍ਵਾ ਸਯਂ ਨ ਖਾਦਿਸ੍ਸਾਮਿ, ਇਤੋ ਪਟ੍ਠਾਯ ਦਾਨਿ ਤ੍ਵਂ ਮਮ ਸਹਾਯੋ’ਤਿ ਅਵਚਂ. ਸੋਪਿ ਮੇ ਮਨੋਰਥੋ ਮਤ੍ਥਕਂ ਨ ਪਾਪੁਣੀ’’ਤਿ ਆਹਾਰੂਪਚ੍ਛੇਦਂ ਕਤ੍ਵਾ ਮਞ੍ਚਕੇ ਨਿਪਜ੍ਜਿ. ਅਥਸ੍ਸ ਸਤ੍ਥਾ ਗੇਹਦ੍ਵਾਰਂ ਅਗਮਾਸਿ. ਸੋ ਸਤ੍ਥੁ ਆਗਮਨਂ ਸੁਤ੍ਵਾ ‘‘ਸਹਾਯਂ ਮੇ ਆਨੇਤ੍ਵਾ ਇਧ ਨਿਸੀਦਾਪੇਥਾ’’ਤਿ ਆਹ. ਪਰਿਜਨੋ ਤਥਾ ਅਕਾਸਿ. ਸਤ੍ਥਾ ਨਿਸੀਦਿਤ੍ਵਾ ‘‘ਕਹਂ ਬ੍ਰਾਹ੍ਮਣੋ’’ਤਿ ਪੁਚ੍ਛਿਤ੍ਵਾ ‘‘ਗਬ੍ਭੇ ਨਿਪਨ੍ਨੋ’’ਤਿ ਵੁਤ੍ਤੇ ‘‘ਪਕ੍ਕੋਸਥ ਨ’’ਨ੍ਤਿ ਪਕ੍ਕੋਸਾਪੇਤ੍ਵਾ ਆਗਨ੍ਤ੍ਵਾ ਏਕਮਨ੍ਤਂ ਨਿਸਿਨ੍ਨਂ ਆਹ ‘‘ਕਿਂ, ਬ੍ਰਾਹ੍ਮਣਾ’’ਤਿ? ਭੋ ਗੋਤਮ, ਤੁਮ੍ਹੇ ਮਮ ਖੇਤ੍ਤਸੋਧਨਦਿਵਸਤੋ ਪਟ੍ਠਾਯ ਆਗਤਾ, ਅਹਮ੍ਪਿ ‘‘ਸਸ੍ਸੇ ਨਿਪ੍ਫਨ੍ਨੇ ਤੁਮ੍ਹਾਕਂ ਸਂਵਿਭਾਗਂ ਕਰਿਸ੍ਸਾਮੀ’’ਤਿ ਅਵਚਂ. ਸੋ ਮੇ ਮਨੋਰਥੋ ਅਨਿਪ੍ਫਨ੍ਨੋ, ਤੇਨ ਮੇ ਸੋਕੋ ਉਪ੍ਪਨ੍ਨੋ, ਭਤ੍ਤਮ੍ਪਿ ਮੇ ਨਚ੍ਛਾਦੇਤੀਤਿ. ਅਥ ਨਂ ਸਤ੍ਥਾ ‘‘ਜਾਨਾਸਿ ਪਨ, ਬ੍ਰਾਹ੍ਮਣ, ਕਿਂ ਤੇ ਨਿਸ੍ਸਾਯ ਸੋਕੋ ਉਪ੍ਪਨ੍ਨੋ’’ਤਿ ਪੁਚ੍ਛਿਤ੍ਵਾ ‘‘ਨ ਜਾਨਾਮਿ, ਭੋ ਗੋਤਮ, ਤ੍ਵਂ ਪਨ ਜਾਨਾਸੀ’’ਤਿ ਵੁਤ੍ਤੇ, ‘‘ਆਮ, ਬ੍ਰਾਹ੍ਮਣ, ਉਪ੍ਪਜ੍ਜਮਾਨੋ ਸੋਕੋ ਵਾ ਭਯਂ ਵਾ ਤਣ੍ਹਂ ਨਿਸ੍ਸਾਯ ਉਪ੍ਪਜ੍ਜਤੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੧੬. ‘‘ਤਣ੍ਹਾਯ ਜਾਯਤੀ ਸੋਕੋ, ਤਣ੍ਹਾਯ ਜਾਯਤੀ ਭਯਂ;

ਤਣ੍ਹਾਯ ਵਿਪ੍ਪਮੁਤ੍ਤਸ੍ਸ, ਨਤ੍ਥਿ ਸੋਕੋ ਕੁਤੋ ਭਯ’’ਨ੍ਤਿ.

ਤਤ੍ਥ ਤਣ੍ਹਾਯਾਤਿ ਛਦ੍ਵਾਰਿਕਾਯ ਤਣ੍ਹਾਯ, ਏਤਂ ਤਣ੍ਹਂ ਨਿਸ੍ਸਾਯ ਉਪ੍ਪਜ੍ਜਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬ੍ਰਾਹ੍ਮਣੋ ਸੋਤਾਪਤ੍ਤਿਫਲੇ ਪਤਿਟ੍ਠਹੀਤਿ.

ਅਞ੍ਞਤਰਬ੍ਰਾਹ੍ਮਣਵਤ੍ਥੁ ਛਟ੍ਠਂ.

੭. ਪਞ੍ਚਸਤਦਾਰਕਵਤ੍ਥੁ

ਸੀਲਦਸ੍ਸਨਸਮ੍ਪਨ੍ਨਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਅਨ੍ਤਰਾਮਗ੍ਗੇ ਪਞ੍ਚਸਤਦਾਰਕੇ ਆਰਬ੍ਭ ਕਥੇਸਿ.

ਏਕਦਿਵਸਞ੍ਹਿ ਸਤ੍ਥਾ ਅਸੀਤਿਮਹਾਥੇਰੇਹਿ ਸਦ੍ਧਿਂ ਪਞ੍ਚਸਤਭਿਕ੍ਖੁਪਰਿਵਾਰੋ ਰਾਜਗਹਂ ਪਿਣ੍ਡਾਯ ਪਵਿਸਨ੍ਤੋ ਏਕਸ੍ਮਿਂ ਛਣਦਿਵਸੇ ਪਞ੍ਚਸਤੇ ਦਾਰਕੇ ਪੂਵਪਚ੍ਛਿਯੋ ਉਕ੍ਖਿਪਾਪੇਤ੍ਵਾ ਨਗਰਾ ਨਿਕ੍ਖਮ੍ਮ ਉਯ੍ਯਾਨਂ ਗਚ੍ਛਨ੍ਤੇ ਅਦ੍ਦਸ. ਤੇਪਿ ਸਤ੍ਥਾਰਂ ਵਨ੍ਦਿਤ੍ਵਾ ਪਕ੍ਕਮਿਂਸੁ, ਤੇ ਏਕਂ ਭਿਕ੍ਖੁਮ੍ਪਿ ‘‘ਪੂਵਂ ਗਣ੍ਹਥਾ’’ਤਿ ਨ ਵਦਿਂਸੁ. ਸਤ੍ਥਾ ਤੇਸਂ ਗਤਕਾਲੇ ਭਿਕ੍ਖੂ ਆਹ – ‘‘ਖਾਦਿਸ੍ਸਥ, ਭਿਕ੍ਖਵੇ, ਪੂਵੇ’’ਤਿ. ‘‘ਕਹਂ ਭਨ੍ਤੇ, ਪੂਵਾ’’ਤਿ? ‘‘ਕਿਂ ਨ ਪਸ੍ਸਥ ਤੇ ਦਾਰਕੇ ਪੂਵਪਚ੍ਛਿਯੋ ਉਕ੍ਖਿਪਾਪੇਤ੍ਵਾ ਅਤਿਕ੍ਕਨ੍ਤੇ’’ਤਿ? ‘‘ਭਨ੍ਤੇ, ਏਵਰੂਪਾ ਨਾਮ ਦਾਰਕਾ ਕਸ੍ਸਚਿ ਪੂਵਂ ਨ ਦੇਨ੍ਤੀ’’ਤਿ. ‘‘ਭਿਕ੍ਖਵੇ, ਕਿਞ੍ਚਾਪਿ ਏਤੇ ਮਂ ਵਾ ਤੁਮ੍ਹੇ ਵਾ ਪੂਵੇਹਿ ਨ ਨਿਮਨ੍ਤਯਿਂਸੁ, ਪੂਵਸਾਮਿਕੋ ਪਨ ਭਿਕ੍ਖੁ ਪਚ੍ਛਤੋ ਆਗਚ੍ਛਤਿ, ਪੂਵੇ ਖਾਦਿਤ੍ਵਾਵ ਗਨ੍ਤੁਂ ਵਟ੍ਟਤੀ’’ਤਿ. ਬੁਦ੍ਧਾਨਞ੍ਹਿ ਏਕਪੁਗ੍ਗਲੇਪਿ ਇਸ੍ਸਾ ਵਾ ਦੋਸੋ ਵਾ ਨਤ੍ਥਿ, ਤਸ੍ਮਾ ਇਮਂ ਵਤ੍ਵਾ ਭਿਕ੍ਖੁਸਙ੍ਘਂ ਆਦਾਯ ਏਕਸ੍ਮਿਂ ਰੁਕ੍ਖਮੂਲੇ ਛਾਯਾਯ ਨਿਸੀਦਿ. ਦਾਰਕਾ ਮਹਾਕਸ੍ਸਪਤ੍ਥੇਰਂ ਪਚ੍ਛਤੋ ਆਗਚ੍ਛਨ੍ਤਂ ਦਿਸ੍ਵਾ ਉਪ੍ਪਨ੍ਨਸਿਨੇਹਾ ਪੀਤਿਵੇਗੇਨ ਪਰਿਪੁਣ੍ਣਸਰੀਰਾ ਹੁਤ੍ਵਾ ਪਚ੍ਛਿਯੋ ਓਤਾਰੇਤ੍ਵਾ ਥੇਰਂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਪੂਵੇ ਪਚ੍ਛੀਹਿ ਸਦ੍ਧਿਂਯੇਵ ਉਕ੍ਖਿਪਿਤ੍ਵਾ ‘‘ਗਣ੍ਹਥ, ਭਨ੍ਤੇ’’ਤਿ ਥੇਰਂ ਵਦਿਂਸੁ. ਅਥ ਨੇ ਥੇਰੋ ਆਹ – ‘‘ਏਸ ਸਤ੍ਥਾ ਭਿਕ੍ਖੁਸਙ੍ਘਂ ਗਹੇਤ੍ਵਾ ਰੁਕ੍ਖਮੂਲੇ ਨਿਸਿਨ੍ਨੋ, ਤੁਮ੍ਹਾਕਂ ਦੇਯ੍ਯਧਮ੍ਮਂ ਆਦਾਯ ਗਨ੍ਤ੍ਵਾ ਭਿਕ੍ਖੁਸਙ੍ਘਸ੍ਸ ਸਂਵਿਭਾਗਂ ਕਰੋਥਾ’’ਤਿ. ਤੇ ‘‘ਸਾਧੁ, ਭਨ੍ਤੇ’’ਤਿ ਨਿਵਤ੍ਤਿਤ੍ਵਾ ਥੇਰੇਨ ਸਦ੍ਧਿਂਯੇਵ ਗਨ੍ਤ੍ਵਾ ਪੂਵੇ ਦਤ੍ਵਾ ਓਲੋਕਯਮਾਨਾ ਏਕਮਨ੍ਤੇ ਠਤ੍ਵਾ ਪਰਿਭੋਗਾਵਸਾਨੇ ਉਦਕਂ ਅਦਂਸੁ. ਭਿਕ੍ਖੂ ਉਜ੍ਝਾਯਿਂਸੁ ‘‘ਦਾਰਕੇਹਿ ਮੁਖੋਲੋਕਨੇਨ ਭਿਕ੍ਖਾ ਦਿਨ੍ਨਾ, ਸਮ੍ਮਾਸਮ੍ਬੁਦ੍ਧਂ ਵਾ ਮਹਾਥੇਰੇ ਵਾ ਪੂਵੇਹਿ ਅਨਾਪੁਚ੍ਛਿਤ੍ਵਾ ਮਹਾਕਸ੍ਸਪਤ੍ਥੇਰਂ ਦਿਸ੍ਵਾ ਪਚ੍ਛੀਹਿ ਸਦ੍ਧਿਂਯੇਵ ਆਦਾਯ ਆਗਮਿਂਸੂ’’ਤਿ. ਸਤ੍ਥਾ ਤੇਸਂ ਕਥਂ ਸੁਤ੍ਵਾ, ‘‘ਭਿਕ੍ਖਵੇ, ਮਮ ਪੁਤ੍ਤੇਨ ਮਹਾਕਸ੍ਸਪੇਨ ਸਦਿਸੋ ਭਿਕ੍ਖੁ ਦੇਵਮਨੁਸ੍ਸਾਨਂ ਪਿਯੋ ਹੋਤਿ, ਤੇ ਚ ਤਸ੍ਸ ਚਤੁਪਚ੍ਚਯੇਨ ਪੂਜਂ ਕਰੋਨ੍ਤਿਯੇਵਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੧੭. ‘‘ਸੀਲਦਸ੍ਸਨਸਮ੍ਪਨ੍ਨਂ, ਧਮ੍ਮਟ੍ਠਂ ਸਚ੍ਚਵੇਦਿਨਂ;

ਅਤ੍ਤਨੋ ਕਮ੍ਮ ਕੁਬ੍ਬਾਨਂ, ਤਂ ਜਨੋ ਕੁਰੁਤੇ ਪਿਯ’’ਨ੍ਤਿ.

ਤਤ੍ਥ ਸੀਲਦਸ੍ਸਨਸਮ੍ਪਨ੍ਨਨ੍ਤਿ ਚਤੁਪਾਰਿਸੁਦ੍ਧਿਸੀਲੇਨ ਚੇਵ ਮਗ੍ਗਫਲਸਮ੍ਪਯੁਤ੍ਤੇਨ ਚ ਸਮ੍ਮਾਦਸ੍ਸਨੇਨ ਸਮ੍ਪਨ੍ਨਂ. ਧਮ੍ਮਟ੍ਠਨ੍ਤਿ ਨਵਵਿਧਲੋਕੁਤ੍ਤਰਧਮ੍ਮੇ ਠਿਤਂ, ਸਚ੍ਛਿਕਤਲੋਕੁਤ੍ਤਰਧਮ੍ਮਨ੍ਤਿ ਅਤ੍ਥੋ. ਸਚ੍ਚਵੇਦਿਨਨ੍ਤਿ ਚਤੁਨ੍ਨਂ ਸਚ੍ਚਾਨਂ ਸੋਲ਼ਸਹਾਕਾਰੇਹਿ ਸਚ੍ਛਿਕਤਤ੍ਤਾ ਸਚ੍ਚਞਾਣੇਨ ਸਚ੍ਚਵੇਦਿਨਂ. ਅਤ੍ਤਨੋ ਕਮ੍ਮ ਕੁਬ੍ਬਾਨਨ੍ਤਿ ਅਤ੍ਤਨੋ ਕਮ੍ਮਂ ਨਾਮ ਤਿਸ੍ਸੋ ਸਿਕ੍ਖਾ, ਤਾ ਪੂਰਯਮਾਨਨ੍ਤਿ ਅਤ੍ਥੋ. ਤਂ ਜਨੋਤਿ ਤਂ ਪੁਗ੍ਗਲਂ ਲੋਕਿਯਮਹਾਜਨੋ ਪਿਯਂ ਕਰੋਤਿ, ਦਟ੍ਠੁਕਾਮੋ ਵਨ੍ਦਿਤੁਕਾਮੋ ਪਚ੍ਚਯੇਨ ਪੂਜੇਤੁਕਾਮੋ ਹੋਤਿਯੇਵਾਤਿ ਅਤ੍ਥੋ.

ਦੇਸਨਾਵਸਾਨੇ ਸਬ੍ਬੇਪਿ ਤੇ ਦਾਰਕਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੂਤਿ.

ਪਞ੍ਚਸਤਦਾਰਕਵਤ੍ਥੁ ਸਤ੍ਤਮਂ.

੮. ਏਕਅਨਾਗਾਮਿਤ੍ਥੇਰਵਤ੍ਥੁ

ਛਨ੍ਦਜਾਤੋਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਅਨਾਗਾਮਿਤ੍ਥੇਰਂ ਆਰਬ੍ਭ ਕਥੇਸਿ.

ਏਕਦਿਵਸਞ੍ਹਿ ਤਂ ਥੇਰਂ ਸਦ੍ਧਿਵਿਹਾਰਿਕਾ ਪੁਚ੍ਛਿਂਸੁ – ‘‘ਅਤ੍ਥਿ ਪਨ ਵੋ, ਭਨ੍ਤੇ, ਵਿਸੇਸਾਧਿਗਮੋ’’ਤਿ. ਥੇਰੋ ‘‘ਅਨਾਗਾਮਿਫਲਂ ਨਾਮ ਗਹਟ੍ਠਾਪਿ ਪਾਪੁਣਨ੍ਤਿ, ਅਰਹਤ੍ਤਂ ਪਤ੍ਤਕਾਲੇਯੇਵ ਤੇਹਿ ਸਦ੍ਧਿਂ ਕਥੇਸ੍ਸਾਮੀ’’ਤਿ ਹਰਾਯਮਾਨੋ ਕਿਞ੍ਚਿ ਅਕਥੇਤ੍ਵਾਵ ਕਾਲਕਤੋ ਸੁਦ੍ਧਾਵਾਸਦੇਵਲੋਕੇ ਨਿਬ੍ਬਤ੍ਤਿ. ਅਥਸ੍ਸ ਸਦ੍ਧਿਵਿਹਾਰਿਕਾ ਰੋਦਿਤ੍ਵਾ ਪਰਿਦੇਵਿਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਰੋਦਨ੍ਤਾਵ ਏਕਮਨ੍ਤਂ ਨਿਸੀਦਿਂਸੁ. ਅਥ ਨੇ ਸਤ੍ਥਾ ‘‘ਕਿਂ, ਭਿਕ੍ਖਵੇ, ਰੋਦਥਾ’’ਤਿ ਆਹ. ‘‘ਉਪਜ੍ਝਾਯੋ ਨੋ, ਭਨ੍ਤੇ, ਕਾਲਕਤੋ’’ਤਿ. ‘‘ਹੋਤੁ, ਭਿਕ੍ਖਵੇ, ਮਾ ਚਿਨ੍ਤਯਿਤ੍ਥ, ਧੁਵਧਮ੍ਮੋ ਨਾਮੇਸੋ’’ਤਿ? ‘‘ਆਮ, ਭਨ੍ਤੇ, ਮਯਮ੍ਪਿ ਜਾਨਾਮ, ਅਪਿਚ ਮਯਂ ਉਪਜ੍ਝਾਯਂ ਵਿਸੇਸਾਧਿਗਮਂ ਪੁਚ੍ਛਿਮ੍ਹਾ, ਸੋ ਕਿਞ੍ਚਿ ਅਕਥੇਤ੍ਵਾਵ ਕਾਲਕਤੋ, ਤੇਨਮ੍ਹ ਦੁਕ੍ਖਿਤਾ’’ਤਿ. ਸਤ੍ਥਾ, ‘‘ਭਿਕ੍ਖਵੇ, ਮਾ ਚਿਨ੍ਤਯਿਤ੍ਥ, ਉਪਜ੍ਝਾਯੇਨ ਵੋ ਅਨਾਗਾਮਿਫਲਂ ਪਤ੍ਤਂ, ਸੋ ‘ਗਿਹੀਪੇਤਂ ਪਾਪੁਣਨ੍ਤਿ, ਅਰਹਤ੍ਤਂ ਪਤ੍ਵਾਵ ਨੇਸਂ ਕਥੇਸ੍ਸਾਮੀ’ਤਿ ਹਰਾਯਨ੍ਤੋ ਤੁਮ੍ਹਾਕਂ ਕਿਞ੍ਚਿ ਅਕਥੇਤ੍ਵਾ ਕਾਲਂ ਕਤ੍ਵਾ ਸੁਦ੍ਧਾਵਾਸੇ ਨਿਬ੍ਬਤ੍ਤੋ, ਅਸ੍ਸਾਸਥ, ਭਿਕ੍ਖਵੇ, ਉਪਜ੍ਝਾਯੋ ਵੋ ਕਾਮੇਸੁ ਅਪ੍ਪਟਿਬਦ੍ਧਚਿਤ੍ਤਤਂ ਪਤ੍ਤੋ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੧੮. ‘‘ਛਨ੍ਦਜਾਤੋ ਅਨਕ੍ਖਾਤੇ, ਮਨਸਾ ਚ ਫੁਟੋ ਸਿਯਾ;

ਕਾਮੇਸੁ ਚ ਅਪ੍ਪਟਿਬਦ੍ਧਚਿਤ੍ਤੋ, ਉਦ੍ਧਂਸੋਤੋਤਿ ਵੁਚ੍ਚਤੀ’’ਤਿ.

ਤਤ੍ਥ ਛਨ੍ਦਜਾਤੋਤਿ ਕਤ੍ਤੁਕਾਮਤਾਵਸੇਨ ਜਾਤਛਨ੍ਦੋ ਉਸ੍ਸਾਹਪਤ੍ਤੋ. ਅਨਕ੍ਖਾਤੇਤਿ ਨਿਬ੍ਬਾਨੇ. ਤਞ੍ਹਿ ‘‘ਅਸੁਕੇਨ ਕਤਂ ਵਾ ਨੀਲਾਦੀਸੁ ਏਵਰੂਪਂ ਵਾ’’ਤਿ ਅਵਤ੍ਤਬ੍ਬਤਾਯ ਅਨਕ੍ਖਾਤਂ ਨਾਮ. ਮਨਸਾ ਚ ਫੁਟੋ ਸਿਯਾਤਿ ਹੇਟ੍ਠਿਮੇਹਿ ਤੀਹਿ ਮਗ੍ਗਫਲਚਿਤ੍ਤੇਹਿ ਫੁਟੋ ਪੂਰਿਤੋ ਭਵੇਯ੍ਯ. ਅਪ੍ਪਟਿਬਦ੍ਧਚਿਤ੍ਤੋਤਿ ਅਨਾਗਾਮਿਮਗ੍ਗਵਸੇਨ ਕਾਮੇਸੁ ਅਪ੍ਪਟਿਬਦ੍ਧਚਿਤ੍ਤੋ. ਉਦ੍ਧਂਸੋਤੋਤਿ ਏਵਰੂਪੋ ਭਿਕ੍ਖੁ ਅਵਿਹੇਸੁ ਨਿਬ੍ਬਤ੍ਤਿਤ੍ਵਾ ਤਤੋ ਪਟ੍ਠਾਯ ਪਟਿਸਨ੍ਧਿਵਸੇਨ ਅਕਨਿਟ੍ਠਂ ਗਚ੍ਛਨ੍ਤੋ ਉਦ੍ਧਂਸੋਤੋਤਿ ਵੁਚ੍ਚਤਿ, ਤਾਦਿਸੋ ਵੋ ਉਪਜ੍ਝਾਯੋਤਿ ਅਤ੍ਥੋ.

ਦੇਸਨਾਵਸਾਨੇ ਤੇ ਭਿਕ੍ਖੂ ਅਰਹਤ੍ਤਫਲੇ ਪਤਿਟ੍ਠਹਿਂਸੁ, ਮਹਾਜਨਸ੍ਸਾਪਿ ਸਾਤ੍ਥਿਕਾ ਧਮ੍ਮਦੇਸਨਾ ਅਹੋਸੀਤਿ.

ਏਕਅਨਾਗਾਮਿਤ੍ਥੇਰਵਤ੍ਥੁ ਅਟ੍ਠਮਂ.

੯. ਨਨ੍ਦਿਯਵਤ੍ਥੁ

ਚਿਰਪ੍ਪਵਾਸਿਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਇਸਿਪਤਨੇ ਵਿਹਰਨ੍ਤੋ ਨਨ੍ਦਿਯਂ ਆਰਬ੍ਭ ਕਥੇਸਿ.

ਬਾਰਾਣਸਿਯਂ ਕਿਰ ਸਦ੍ਧਾਸਮ੍ਪਨ੍ਨਸ੍ਸ ਕੁਲਸ੍ਸ ਨਨ੍ਦਿਯੋ ਨਾਮ ਪੁਤ੍ਤੋ ਅਹੋਸਿ, ਸੋ ਮਾਤਾਪਿਤੂਨਂ ਅਨੁਰੂਪੋ ਸਦ੍ਧਾਸਮ੍ਪਨ੍ਨੋ ਸਙ੍ਘੁਪਟ੍ਠਾਕੋ ਅਹੋਸਿ. ਅਥਸ੍ਸ ਮਾਤਾਪਿਤਰੋ ਵਯਪ੍ਪਤ੍ਤਕਾਲੇ ਸਮ੍ਮੁਖਗੇਹਤੋ ਮਾਤੁਲਧੀਤਰਂ ਰੇਵਤਿਂ ਨਾਮ ਆਨੇਤੁਕਾਮਾ ਅਹੇਸੁਂ. ਸਾ ਪਨ ਅਸ੍ਸਦ੍ਧਾ ਅਦਾਨਸੀਲਾ, ਨਨ੍ਦਿਯੋ ਤਂ ਨ ਇਚ੍ਛਿ. ਅਥਸ੍ਸ ਮਾਤਾ ਰੇਵਤਿਂ ਆਹ – ‘‘ਅਮ੍ਮ, ਤ੍ਵਂ ਇਮਸ੍ਮਿਂ ਗੇਹੇ ਭਿਕ੍ਖੁਸਙ੍ਘਸ੍ਸ ਨਿਸਜ੍ਜਨਟ੍ਠਾਨਂ ਉਪਲਿਮ੍ਪਿਤ੍ਵਾ ਆਸਨਾਨਿ ਪਞ੍ਞਾਪੇਹਿ, ਆਧਾਰਕੇ ਠਪੇਹਿ, ਭਿਕ੍ਖੂਨਂ ਆਗਤਕਾਲੇ ਪਤ੍ਤਂ ਗਹੇਤ੍ਵਾ ਨਿਸੀਦਾਪੇਤ੍ਵਾ ਧਮ੍ਮਕਰਣੇਨ ਪਾਨੀਯਂ ਪਰਿਸ੍ਸਾਵੇਤ੍ਵਾ ਭੁਤ੍ਤਕਾਲੇ ਪਤ੍ਤੇ ਧੋਵ, ਏਵਂ ਮੇ ਪੁਤ੍ਤਸ੍ਸ ਆਰਾਧਿਤਾ ਭਵਿਸ੍ਸਸੀ’’ਤਿ. ਸਾ ਤਥਾ ਅਕਾਸਿ. ਅਥ ਨਂ ‘‘ਓਵਾਦਕ੍ਖਮਾ ਜਾਤਾ’’ਤਿ ਪੁਤ੍ਤਸ੍ਸ ਆਰੋਚੇਤ੍ਵਾ ਤੇਨ ਸਾਧੂਤਿ ਸਮ੍ਪਟਿਚ੍ਛਿਤੇ ਦਿਵਸਂ ਠਪੇਤ੍ਵਾ ਆਵਾਹਂ ਕਰਿਂਸੁ.

ਅਥ ਨਂ ਨਨ੍ਦਿਯੋ ਆਹ – ‘‘ਸਚੇ ਭਿਕ੍ਖੁਸਙ੍ਘਞ੍ਚ ਮਾਤਾਪਿਤਰੋ ਚ ਮੇ ਉਪਟ੍ਠਹਿਸ੍ਸਸਿ, ਏਵਂ ਇਮਸ੍ਮਿਂ ਗੇਹੇ ਵਸਿਤੁਂ ਲਭਿਸ੍ਸਸਿ, ਅਪ੍ਪਮਤ੍ਤਾ ਹੋਹੀ’’ਤਿ. ਸਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਕਤਿਪਾਹਂ ਸਦ੍ਧਾ ਵਿਯ ਹੁਤ੍ਵਾ ਭਤ੍ਤਾਰਂ ਉਪਟ੍ਠਹਨ੍ਤੀ ਦ੍ਵੇ ਪੁਤ੍ਤੇ ਵਿਜਾਯਿ. ਨਨ੍ਦਿਯਸ੍ਸਾਪਿ ਮਾਤਾਪਿਤਰੋ ਕਾਲਮਕਂਸੁ, ਗੇਹੇ ਸਬ੍ਬਿਸ੍ਸਰਿਯਂ ਤਸ੍ਸਾਯੇਵ ਅਹੋਸਿ. ਨਨ੍ਦਿਯੋਪਿ ਮਾਤਾਪਿਤੂਨਂ ਕਾਲਕਿਰਿਯਤੋ ਪਟ੍ਠਾਯ ਮਹਾਦਾਨਪਤਿ ਹੁਤ੍ਵਾ ਭਿਕ੍ਖੁਸਙ੍ਘਸ੍ਸ ਦਾਨਂ ਪਟ੍ਠਪੇਸਿ. ਕਪਣਦ੍ਧਿਕਾਦੀਨਮ੍ਪਿ ਗੇਹਦ੍ਵਾਰੇ ਪਾਕਵਤ੍ਤਂ ਪਟ੍ਠਪੇਸਿ. ਸੋ ਅਪਰਭਾਗੇ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਆਵਾਸਦਾਨੇ ਆਨਿਸਂਸਂ ਸਲ੍ਲਕ੍ਖੇਤ੍ਵਾ ਇਸਿਪਤਨੇ ਮਹਾਵਿਹਾਰੇ ਚਤੂਹਿ ਗਬ੍ਭੇਹਿ ਪਟਿਮਣ੍ਡਿਤਂ ਚਤੁਸਾਲਂ ਕਾਰੇਤ੍ਵਾ ਮਞ੍ਚਪੀਠਾਦੀਨਿ ਅਤ੍ਥਰਾਪੇਤ੍ਵਾ ਤਂ ਆਵਾਸਂ ਨਿਯ੍ਯਾਦੇਨ੍ਤੋ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਾਨਂ ਦਤ੍ਵਾ ਤਥਾਗਤਸ੍ਸ ਦਕ੍ਖਿਣੋਦਕਂ ਅਦਾਸਿ. ਸਤ੍ਥੁ ਹਤ੍ਥੇ ਦਕ੍ਖਿਣੋਦਕਪਤਿਟ੍ਠਾਨੇਨ ਸਦ੍ਧਿਂਯੇਵ ਤਾਵਤਿਂਸਦੇਵਲੋਕੇ ਸਬ੍ਬਦਿਸਾਸੁ ਦ੍ਵਾਦਸਯੋਜਨਿਕੋ ਉਦ੍ਧਂ ਯੋਜਨਸਤੁਬ੍ਬੇਧੋ ਸਤ੍ਤਰਤਨਮਯੋ ਨਾਰੀਗਣਸਮ੍ਪਨ੍ਨੋ ਦਿਬ੍ਬਪਾਸਾਦੋ ਉਗ੍ਗਚ੍ਛਿ.

ਅਥੇਕਦਿਵਸੇ ਮਹਾਮੋਗ੍ਗਲ੍ਲਾਨਤ੍ਥੇਰੋ ਦੇਵਚਾਰਿਕਂ ਗਨ੍ਤ੍ਵਾ ਤਸ੍ਸ ਪਾਸਾਦਸ੍ਸ ਅਵਿਦੂਰੇ ਠਿਤੋ ਅਤ੍ਤਨੋ ਸਨ੍ਤਿਕੇ ਆਗਤੇ ਦੇਵਪੁਤ੍ਤੇ ਪੁਚ੍ਛਿ – ‘‘ਕਸ੍ਸੇਸੋ ਅਚ੍ਛਰਾਗਣਪਰਿਵੁਤੋ ਦਿਬ੍ਬਪਾਸਾਦੋ ਨਿਬ੍ਬਤ੍ਤੋ’’ਤਿ. ਅਥਸ੍ਸ ਦੇਵਪੁਤ੍ਤਾ ਵਿਮਾਨਸਾਮਿਕਂ ਆਚਿਕ੍ਖਨ੍ਤਾ ਆਹਂਸੁ – ‘‘ਭਨ੍ਤੇ, ਯੇਨ ਨਨ੍ਦਿਯੇਨ ਨਾਮ ਗਹਪਤਿਪੁਤ੍ਤੇਨ ਇਸਿਪਤਨੇ ਸਤ੍ਥੁ ਵਿਹਾਰਂ ਕਾਰੇਤ੍ਵਾ ਦਿਨ੍ਨੋ, ਤਸ੍ਸਤ੍ਥਾਯ ਏਤਂ ਵਿਮਾਨਂ ਨਿਬ੍ਬਤ੍ਤ’’ਨ੍ਤਿ. ਅਚ੍ਛਰਾਸਙ੍ਘੋਪਿ ਨਂ ਦਿਸ੍ਵਾ ਪਾਸਾਦਤੋ ਓਰੋਹਿਤ੍ਵਾ ਆਹ – ‘‘ਭਨ੍ਤੇ, ਮਯਂ ‘ਨਨ੍ਦਿਯਸ੍ਸ ਪਰਿਚਾਰਿਕਾ ਭਵਿਸ੍ਸਾਮਾ’ਤਿ ਇਧ ਨਿਬ੍ਬਤ੍ਤਾ, ਤਂ ਪਨ ਅਪਸ੍ਸਨ੍ਤੀ ਅਤਿਵਿਯ ਉਕ੍ਕਣ੍ਠਿਤਮ੍ਹਾ, ਮਤ੍ਤਿਕਪਾਤਿਂ ਭਿਨ੍ਦਿਤ੍ਵਾ ਸੁਵਣ੍ਣਪਾਤਿਗਹਣਂ ਵਿਯ ਮਨੁਸ੍ਸਸਮ੍ਪਤ੍ਤਿਂ ਜਹਿਤ੍ਵਾ ਦਿਬ੍ਬਸਮ੍ਪਤ੍ਤਿਗਹਣਂ, ਇਧਾਗਮਨਤ੍ਥਾਯ ਨਂ ਵਦੇਯ੍ਯਾਥਾ’’ਤਿ. ਥੇਰੋ ਤਤੋ ਆਗਨ੍ਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਪੁਚ੍ਛਿ – ‘‘ਨਿਬ੍ਬਤ੍ਤਤਿ ਨੁ ਖੋ, ਭਨ੍ਤੇ, ਮਨੁਸ੍ਸਲੋਕੇ ਠਿਤਾਨਂਯੇਵ ਕਤਕਲ੍ਯਾਣਾਨਂ ਦਿਬ੍ਬਸਮ੍ਪਤ੍ਤੀ’’ਤਿ. ‘‘ਮੋਗ੍ਗਲ੍ਲਾਨ, ਨਨੁ ਤੇ ਦੇਵਲੋਕੇ ਨਨ੍ਦਿਯਸ੍ਸ ਨਿਬ੍ਬਤ੍ਤਾ ਦਿਬ੍ਬਸਮ੍ਪਤ੍ਤਿ ਸਾਮਂ ਦਿਟ੍ਠਾ, ਕਸ੍ਮਾ ਮਂ ਪੁਚ੍ਛਸੀ’’ਤਿ. ‘‘ਏਵਂ, ਭਨ੍ਤੇ, ਨਿਬ੍ਬਤ੍ਤਤੀ’’ਤਿ.

ਅਥ ਨਂ ਸਤ੍ਥਾ ‘‘ਮੋਗ੍ਗਲ੍ਲਾਨਂ ਕਿਂ ਨਾਮੇਤਂ ਕਥੇਸਿ. ਯਥਾ ਹਿ ਚਿਰਪ੍ਪਵੁਟ੍ਠਂ ਪੁਤ੍ਤਂ ਵਾ ਭਾਤਰਂ ਵਾ ਵਿਪ੍ਪਵਾਸਤੋ ਆਗਚ੍ਛਨ੍ਤਂ ਗਾਮਦ੍ਵਾਰੇ ਠਿਤੋ ਕੋਚਿਦੇਵ ਦਿਸ੍ਵਾ ਵੇਗੇਨ ਗੇਹਂ ਆਗਨ੍ਤ੍ਵਾ ‘ਅਸੁਕੋ ਨਾਮ ਆਗਤੋ’ਤਿ ਆਰੋਚੇਯ੍ਯ, ਅਥਸ੍ਸ ਞਾਤਕਾ ਹਟ੍ਠਪਹਟ੍ਠਾ ਵੇਗੇਨ ਨਿਕ੍ਖਮਿਤ੍ਵਾ ‘ਆਗਤੋਸਿ, ਤਾਤ, ਅਰੋਗੋਸਿ, ਤਾਤਾ’ਤਿ ਤਂ ਅਭਿਨਨ੍ਦੇਯ੍ਯੁਂ, ਏਵਮੇਵ ਇਧ ਕਤਕਲ੍ਯਾਣਂ ਇਤ੍ਥਿਂ ਵਾ ਪੁਰਿਸਂ ਵਾ ਇਮਂ ਲੋਕਂ ਜਹਿਤ੍ਵਾ ਪਰਲੋਕਂ ਗਤਂ ਦਸਵਿਧਂ ਦਿਬ੍ਬਪਣ੍ਣਾਕਾਰਂ ਆਦਾਯ ‘ਅਹਂ ਪੁਰਤੋ, ਅਹਂ ਪੁਰਤੋ’ਤਿ ਪਚ੍ਚੁਗ੍ਗਨ੍ਤ੍ਵਾ ਦੇਵਤਾ ਅਭਿਨਨ੍ਦਨ੍ਤੀ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੨੧੯. ‘‘ਚਿਰਪ੍ਪਵਾਸਿਂ ਪੁਰਿਸਂ, ਦੂਰਤੋ ਸੋਤ੍ਥਿਮਾਗਤਂ;

ਞਾਤਿਮਿਤ੍ਤਾ ਸੁਹਜ੍ਜਾ ਚ, ਅਭਿਨਨ੍ਦਨ੍ਤਿ ਆਗਤਂ.

੨੨੦. ‘‘ਤਥੇਵ ਕਤਪੁਞ੍ਞਮ੍ਪਿ, ਅਸ੍ਮਾ ਲੋਕਾ ਪਰਂ ਗਤਂ;

ਪੁਞ੍ਞਾਨਿ ਪਟਿਗਣ੍ਹਨ੍ਤਿ, ਪਿਯਂ ਞਾਤੀਵ ਆਗਤ’’ਨ੍ਤਿ.

ਤਤ੍ਥ ਚਿਰਪ੍ਪਵਾਸਿਨ੍ਤਿ ਚਿਰਪ੍ਪਵੁਟ੍ਠਂ. ਦੂਰਤੋ ਸੋਤ੍ਥਿਮਾਗਤਨ੍ਤਿ ਵਣਿਜ੍ਜਂ ਵਾ ਰਾਜਪੋਰਿਸਂ ਵਾ ਕਤ੍ਵਾ ਲਦ੍ਧਲਾਭਂ ਨਿਪ੍ਫਨ੍ਨਸਮ੍ਪਤ੍ਤਿਂ ਅਨੁਪਦ੍ਦਵੇਨ ਦੂਰਟ੍ਠਾਨਤੋ ਆਗਤਂ. ਞਾਤਿਮਿਤ੍ਤਾ ਸੁਹਜ੍ਜਾ ਚਾਤਿ ਕੁਲਸਮ੍ਬਨ੍ਧਵਸੇਨ ਞਾਤੀ ਚ ਸਨ੍ਦਿਟ੍ਠਾਦਿਭਾਵੇਨ ਮਿਤ੍ਤਾ ਚ ਸੁਹਦਯਭਾਵੇਨ ਸੁਹਜ੍ਜਾ ਚ. ਅਭਿਨਨ੍ਦਨ੍ਤਿ ਆਗਤਨ੍ਤਿ ਨਂ ਦਿਸ੍ਵਾ ਆਗਤਨ੍ਤਿ ਵਚਨਮਤ੍ਤੇਨ ਵਾ ਅਞ੍ਜਲਿਕਰਣਮਤ੍ਤੇਨ ਵਾ ਗੇਹਸਮ੍ਪਤ੍ਤਂ ਪਨ ਨਾਨਪ੍ਪਕਾਰਪਣ੍ਣਾਕਾਰਾਭਿਹਰਣਵਸੇਨ ਅਭਿਨਨ੍ਦਨ੍ਤਿ. ਤਥੇਵਾਤਿ ਤੇਨੇਵਾਕਾਰੇਨ ਕਤਪੁਞ੍ਞਮ੍ਪਿ ਪੁਗ੍ਗਲਂ ਇਮਸ੍ਮਾ ਲੋਕਾ ਪਰਲੋਕਂ ਗਤਂ ਦਿਬ੍ਬਂ ਆਯੁਵਣ੍ਣਸੁਖਯਸਆਧਿਪਤੇਯ੍ਯਂ, ਦਿਬ੍ਬਂ ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਨ੍ਤਿ ਇਮਂ ਦਸਵਿਧਂ ਪਣ੍ਣਾਕਾਰਂ ਆਦਾਯ ਮਾਤਾਪਿਤੁਟ੍ਠਾਨੇ ਠਿਤਾਨਿ ਪੁਞ੍ਞਾਨਿ ਅਭਿਨਨ੍ਦਨ੍ਤਾਨਿ ਪਟਿਗ੍ਗਣ੍ਹਨ੍ਤਿ. ਪਿਯਂ ਞਾਤੀਵਾਤਿ ਇਧਲੋਕੇ ਪਿਯਞਾਤਕਂ ਆਗਤਂ ਸੇਸਞਾਤਕਾ ਵਿਯਾਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਨਨ੍ਦਿਯਵਤ੍ਥੁ ਨਵਮਂ.

ਪਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.

ਸੋਲ਼ਸਮੋ ਵਗ੍ਗੋ.