੯. ਕਸ੍ਸਪਦਸਬਲਸ੍ਸ ਸੁਵਣ੍ਣਚੇਤਿਯਵਤ੍ਥੁ

ਪੂਜਾਰਹੇਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਚਾਰਿਕਂ ਚਰਮਾਨੋ ਕਸ੍ਸਪਦਸਬਲਸ੍ਸ ਸੁਵਣ੍ਣਚੇਤਿਯਂ ਆਰਬ੍ਭ ਕਥੇਸਿ.

ਤਥਾਗਤੋ ਸਾਵਤ੍ਥਿਤੋ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਬਾਰਾਣਸਿਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਤੋਦੇਯ੍ਯਗਾਮਸ੍ਸ ਸਮੀਪੇ ਮਹਾਭਿਕ੍ਖੁਸਙ੍ਘਪਰਿਵਾਰੋ ਅਞ੍ਞਤਰਂ ਦੇਵਟ੍ਠਾਨਂ ਸਮ੍ਪਾਪੁਣਿ. ਤਤ੍ਰ ਨਿਸਿਨ੍ਨੋ ਸੁਗਤੋ ਧਮ੍ਮਭਣ੍ਡਾਗਾਰਿਕਂ ਪੇਸੇਤ੍ਵਾ ਅਵਿਦੂਰੇ ਕਸਿਕਮ੍ਮਂ ਕਰੋਨ੍ਤਂ ਬ੍ਰਾਹ੍ਮਣਂ ਪਕ੍ਕੋਸਾਪੇਸਿ. ਸੋ ਬ੍ਰਾਹ੍ਮਣੋ ਆਗਨ੍ਤ੍ਵਾ ਤਥਾਗਤਂ ਅਨਭਿਵਨ੍ਦਿਤ੍ਵਾ ਤਮੇਵ ਦੇਵਟ੍ਠਾਨਂ ਵਨ੍ਦਿਤ੍ਵਾ ਅਟ੍ਠਾਸਿ. ਸੁਗਤੋਪਿ ‘‘ਇਮਂ ਪਦੇਸਂ ਕਿਨ੍ਤਿ ਮਞ੍ਞਸਿ ਬ੍ਰਾਹ੍ਮਣਾ’’ਤਿ ਆਹ. ਅਮ੍ਹਾਕਂ ਪਵੇਣਿਯਾ ਆਗਤਚੇਤਿਯਟ੍ਠਾਨਨ੍ਤਿ ਵਨ੍ਦਾਮਿ, ਭੋ ਗੋਤਮਾਤਿ. ‘‘ਇਮਂ ਠਾਨਂ ਵਨ੍ਦਨ੍ਤੇਨ ਤਯਾ ਸਾਧੁ ਕਤਂ ਬ੍ਰਾਹ੍ਮਣਾ’’ਤਿ ਸੁਗਤੋ ਤਂ ਸਮ੍ਪਹਂਸੇਸਿ. ਤਂ ਸੁਤ੍ਵਾ ਭਿਕ੍ਖੂ ‘‘ਕੇਨ ਨੁ ਖੋ ਕਾਰਣੇਨ ਭਗਵਾ ਏਵਂ ਸਮ੍ਪਹਂਸੇਸੀ’’ਤਿ ਸਂਸਯਂ ਸਞ੍ਜਨੇਸੁਂ. ਤਤੋ ਤਥਾਗਤੋ ਤੇਸਂ ਸਂਸਯਮਪਨੇਤੁਂ ਮਜ੍ਝਿਮਨਿਕਾਯੇ ਘਟਿਕਾਰਸੁਤ੍ਤਨ੍ਤਂ (ਮ. ਨਿ. ੨.੨੮੨ ਆਦਯੋ) ਵਤ੍ਵਾ ਇਦ੍ਧਾਨੁਭਾਵੇਨ ਕਸ੍ਸਪਦਸਬਲਸ੍ਸ ਯੋਜਨੁਬ੍ਬੇਧਂ ਕਨਕਚੇਤਿਯਂ ਅਪਰਞ੍ਚ ਕਨਕਚੇਤਿਯਂ ਆਕਾਸੇ ਨਿਮ੍ਮਿਨਿਤ੍ਵਾ ਮਹਾਜਨਂ ਦਸ੍ਸੇਤ੍ਵਾ, ‘‘ਬ੍ਰਾਹ੍ਮਣ, ਏਵਂਵਿਧਾਨਂ ਪੂਜਾਰਹਾਨਂ ਪੂਜਾ ਯੁਤ੍ਤਤਰਾਵਾ’’ਤਿ ਵਤ੍ਵਾ ਮਹਾਪਰਿਨਿਬ੍ਬਾਨਸੁਤ੍ਤੇ (ਦੀ. ਨਿ. ੨.੨੦੬) ਦਸ੍ਸਿਤਨਯੇਨੇਵ ਬੁਦ੍ਧਾਦਿਕੇ ਚਤ੍ਤਾਰੋ ਥੂਪਾਰਹੇ ਪਕਾਸੇਤ੍ਵਾ ਸਰੀਰਚੇਤਿਯਂ ਉਦ੍ਦਿਸ੍ਸਚੇਤਿਯਂ ਪਰਿਭੋਗਚੇਤਿਯਨ੍ਤਿ ਤੀਣਿ ਚੇਤਿਯਾਨਿ ਵਿਸੇਸਤੋ ਪਰਿਦੀਪੇਤ੍ਵਾ ਇਮਾ ਗਾਥਾ ਅਭਾਸਿ –

੧੯੫. ‘‘ਪੂਜਾਰਹੇ ਪੂਜਯਤੋ, ਬੁਦ੍ਧੇ ਯਦਿ ਚ ਸਾਵਕੇ;

ਪਪਞ੍ਚਸਮਤਿਕ੍ਕਨ੍ਤੇ, ਤਿਣ੍ਣਸੋਕਪਰਿਦ੍ਦਵੇ.

੧੯੬. ‘‘ਤੇ ਤਾਦਿਸੇ ਪੂਜਯਤੋ, ਨਿਬ੍ਬੁਤੇ ਅਕੁਤੋਭਯੇ;

ਨ ਸਕ੍ਕਾ ਪੁਞ੍ਞਂ ਸਙ੍ਖਾਤੁਂ, ਇਮੇਤ੍ਤਮਪਿ ਕੇਨਚੀ’’ਤਿ. (ਅਪ. ਥੇਰ ੧.੧੦.੧-੨);

ਤਤ੍ਥ ਪੂਜਿਤੁਂ ਅਰਹਾ ਪੂਜਾਰਹਾ, ਪੂਜਿਤੁਂ ਯੁਤ੍ਤਾਤਿ ਅਤ੍ਥੋ. ਪੂਜਾਰਹੇ ਪੂਜਯਤੋਤਿ ਅਭਿਵਾਦਨਾਦੀਹਿ ਚ ਚਤੂਹਿ ਚ ਪਚ੍ਚਯੇਹਿ ਪੂਜੇਨ੍ਤਸ੍ਸ. ਪੂਜਾਰਹੇ ਦਸ੍ਸੇਤਿ ਬੁਦ੍ਧੇਤਿਆਦਿਨਾ. ਬੁਦ੍ਧੇਤਿ ਸਮ੍ਮਾਸਮ੍ਬੁਦ੍ਧੇ. ਯਦੀਤਿ ਯਦਿ ਵਾ, ਅਥ ਵਾਤਿ ਅਤ੍ਥੋ. ਤਤ੍ਥ ਪਚ੍ਚੇਕਬੁਦ੍ਧੇਤਿ ਕਥਿਤਂ ਹੋਤਿ, ਸਾਵਕੇ ਚ. ਪਪਞ੍ਚਸਮਤਿਕ੍ਕਨ੍ਤੇਤਿ ਸਮਤਿਕ੍ਕਨ੍ਤਤਣ੍ਹਾਦਿਟ੍ਠਿਮਾਨਪਪਞ੍ਚੇ. ਤਿਣ੍ਣਸੋਕਪਰਿਦ੍ਦਵੇਤਿ ਅਤਿਕ੍ਕਨ੍ਤਸੋਕਪਰਿਦ੍ਦਵੇ, ਇਮੇ ਦ੍ਵੇ ਅਤਿਕ੍ਕਨ੍ਤੇਤਿ ਅਤ੍ਥੋ. ਏਤੇਹਿ ਪੂਜਾਰਹਤ੍ਤਂ ਦਸ੍ਸਿਤਂ.

ਤੇਤਿ ਬੁਦ੍ਧਾਦਯੋ. ਤਾਦਿਸੇਤਿ ਵੁਤ੍ਤਗਹਣਵਸੇਨ. ਨਿਬ੍ਬੁਤੇਤਿ ਰਾਗਾਦਿਨਿਬ੍ਬੁਤਿਯਾ. ਨਤ੍ਥਿ ਕੁਤੋਚਿ ਭਵਤੋ ਵਾ ਆਰਮ੍ਮਣਤੋ ਵਾ ਏਤੇਸਂ ਭਯਨ੍ਤਿ ਅਕੁਤੋਭਯਾ, ਤੇ ਅਕੁਤੋਭਯੇ. ਨ ਸਕ੍ਕਾ ਪੁਞ੍ਞਂ ਸਙ੍ਖਾਤੁਨ੍ਤਿ ਪੁਞ੍ਞਂ ਗਣੇਤੁਂ ਨ ਸਕ੍ਕਾ. ਕਥਨ੍ਤਿ ਚੇ? ਇਮੇਤ੍ਤਮਪਿ ਕੇਨਚੀਤਿ ਇਮਂ ਏਤ੍ਤਕਂ, ਇਮਂ ਏਤ੍ਤਕਨ੍ਤਿ ਕੇਨਚੀਤਿ ਅਪਿਸਦ੍ਦੋ ਇਧ ਸਮ੍ਬਨ੍ਧਿਤਬ੍ਬੋ, ਕੇਨਚਿ ਪੁਗ੍ਗਲੇਨ ਮਾਨੇਨ ਵਾ. ਤਤ੍ਥ ਪੁਗ੍ਗਲੇਨਾਤਿ ਤੇਨ ਬ੍ਰਹ੍ਮਾਦਿਨਾ. ਮਾਨੇਨਾਤਿ ਤਿਵਿਧੇਨ ਮਾਨੇਨ ਤੀਰਣੇਨ ਧਾਰਣੇਨ ਪੂਰਣੇਨ ਵਾ. ਤੀਰਣਂ ਨਾਮ ਇਦਂ ਏਤ੍ਤਕਨ੍ਤਿ ਨਯਤੋ ਤੀਰਣਂ. ਧਾਰਣਨ੍ਤਿ ਤੁਲਾਯ ਧਾਰਣਂ. ਪੂਰਣਂ ਨਾਮ ਅਡ੍ਢਪਸਤਪਤ੍ਥਨਾਲ਼ਿਕਾਦਿਵਸੇਨ ਪੂਰਣਂ. ਕੇਨਚਿ ਪੁਗ੍ਗਲੇਨ ਇਮੇਹਿ ਤੀਹਿ ਮਾਨੇਹਿ ਬੁਦ੍ਧਾਦਿਕੇ ਪੂਜਯਤੋ ਪੁਞ੍ਞਂ ਵਿਪਾਕਵਸੇਨ ਗਣੇਤੁਂ ਨ ਸਕ੍ਕਾ ਪਰਿਯਨ੍ਤਰਹਿਤਤੋਤਿ ਦ੍ਵੀਸੁ ਠਾਨੇਸੁ ਪੂਜਯਤੋ ਕਿਂ ਦਾਨਂ ਪਠਮਂ ਧਰਮਾਨੇ ਬੁਦ੍ਧਾਦੀ ਪੂਜਯਤੋ ਨ ਸਕ੍ਕਾ ਪੁਞ੍ਞਂ ਸਙ੍ਖਾਤੁਂ, ਪੁਨ ਤੇ ਤਾਦਿਸੇ ਕਿਲੇਸਪਰਿਨਿਬ੍ਬਾਨਨਿਮਿਤ੍ਤੇਨ ਖਨ੍ਧਪਰਿਨਿਬ੍ਬਾਨੇਨ ਨਿਬ੍ਬੁਤੇਪਿ ਪੂਜਯਤੋ ਨ ਸਕ੍ਕਾ ਸਙ੍ਖਾਤੁਨ੍ਤਿ ਭੇਦਾ ਯੁਜ੍ਜਨ੍ਤਿ. ਤੇਨ ਹਿ ਵਿਮਾਨਵਤ੍ਥੁਮ੍ਹਿ –

‘‘ਤਿਟ੍ਠਨ੍ਤੇ ਨਿਬ੍ਬੁਤੇ ਚਾਪਿ, ਸਮੇ ਚਿਤ੍ਤੇ ਸਮਂ ਫਲਂ;

ਚੇਤੋਪਣਿਧਿਹੇਤੁ ਹਿ, ਸਤ੍ਤਾ ਗਚ੍ਛਨ੍ਤਿ ਸੁਗ੍ਗਤਿ’’ਨ੍ਤਿ. (ਵਿ. ਵ. ੮੦੬);

ਦੇਸਨਾਵਸਾਨੇ ਸੋ ਬ੍ਰਾਹ੍ਮਣੋ ਸੋਤਾਪਨ੍ਨੋ ਅਹੋਸੀਤਿ. ਯੋਜਨਿਕਂ ਕਨਕਚੇਤਿਯਂ ਸਤ੍ਤਾਹਮਾਕਾਸੇਵ ਅਟ੍ਠਾਸਿ, ਮਹਨ੍ਤੇਨ ਸਮਾਗਮੋ ਚਾਹੋਸਿ, ਸਤ੍ਤਾਹਂ ਚੇਤਿਯਂ ਨਾਨਪ੍ਪਕਾਰੇਨ ਪੂਜੇਸੁਂ. ਤਤੋ ਭਿਨ੍ਨਲਦ੍ਧਿਕਾਨਂ ਲਦ੍ਧਿਭੇਦੋ ਜਾਤੋ, ਬੁਦ੍ਧਾਨੁਭਾਵੇਨ ਤਂ ਚੇਤਿਯਂ ਸਕਟ੍ਠਾਨਮੇਵ ਗਤਂ, ਤਤ੍ਥੇਵ ਤਂਖਣੇ ਮਹਨ੍ਤਂ ਪਾਸਾਣਚੇਤਿਯਂ ਅਹੋਸਿ. ਤਸ੍ਮਿਂ ਸਮਾਗਮੇ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸੀਤਿ.

ਕਸ੍ਸਪਦਸਬਲਸ੍ਸ ਸੁਵਣ੍ਣਚੇਤਿਯਵਤ੍ਥੁ ਨਵਮਂ.

ਬੁਦ੍ਧਵਗ੍ਗਵਣ੍ਣਨਾ ਨਿਟ੍ਠਿਤਾ.

ਚੁਦ੍ਦਸਮੋ ਵਗ੍ਗੋ.

ਪਠਮਭਾਣਵਾਰਂ ਨਿਟ੍ਠਿਤਂ.