੪. ਆਨਨ੍ਦਤ੍ਥੇਰਪਞ੍ਹਵਤ੍ਥੁ

ਸਬ੍ਬਪਾਪਸ੍ਸ ਅਕਰਣਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਆਨਨ੍ਦਤ੍ਥੇਰਸ੍ਸ ਪਞ੍ਹਂ ਆਰਬ੍ਭ ਕਥੇਸਿ.

ਥੇਰੋ ਕਿਰ ਦਿਵਾਟ੍ਠਾਨੇ ਨਿਸਿਨ੍ਨੋ ਚਿਨ੍ਤੇਸਿ – ‘‘ਸਤ੍ਥਾਰਾ ਸਤ੍ਤਨ੍ਨਂ ਬੁਦ੍ਧਾਨਂ ਮਾਤਾਪਿਤਰੋ ਆਯੁਪਰਿਚ੍ਛੇਦੋ ਬੋਧਿ ਸਾਵਕਸਨ੍ਨਿਪਾਤੋ ਅਗ੍ਗਸਾਵਕਸਨ੍ਨਿਪਾਤੋ ਅਗ੍ਗਸਾਵਕਉਪਟ੍ਠਾਕੋਤਿ ਇਦਂ ਸਬ੍ਬਂ ਕਥਿਤਂ, ਉਪੋਸਥੋ ਪਨ ਅਕਥਿਤੋ, ਕਿਂ ਨੁ ਖੋ ਤੇਸਮ੍ਪਿ ਅਯਮੇਵ ਉਪੋਸਥੋ, ਅਞ੍ਞੋ’’ਤਿ? ਸੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਤਮਤ੍ਥਂ ਪੁਚ੍ਛਿ. ਯਸ੍ਮਾ ਪਨ ਤੇਸਂ ਬੁਦ੍ਧਾਨਂ ਕਾਲਭੇਦੋਵ ਅਹੋਸਿ, ਨ ਕਥਾਭੇਦੋ. ਵਿਪਸ੍ਸੀ ਸਮ੍ਮਾਸਮ੍ਬੁਦ੍ਧੋ ਹਿ ਸਤ੍ਤਮੇ ਸਤ੍ਤਮੇ ਸਂਵਚ੍ਛਰੇ ਉਪੋਸਥਂ ਅਕਾਸਿ. ਏਕਦਿਵਸਂ ਦਿਨ੍ਨੋਵਾਦੋਯੇਵ ਹਿਸ੍ਸ ਸਤ੍ਤਨ੍ਨਂ ਸਂਵਚ੍ਛਰਾਨਂ ਅਲਂ ਹੋਤਿ. ਸਿਖੀ ਚੇਵ ਵੇਸ੍ਸਭੂ ਚ ਛਟ੍ਠੇ ਛਟ੍ਠੇ ਸਂਵਚ੍ਛਰੇ ਉਪੋਸਥਂ ਕਰਿਂਸੁ, ਕਕੁਸਨ੍ਧੋ ਕੋਣਾਗਮਨੋ ਚ ਸਂਵਚ੍ਛਰੇ ਸਂਵਚ੍ਛਰੇ. ਕਸ੍ਸਪਦਸਬਲੋ ਛਟ੍ਠੇ ਛਟ੍ਠੇ ਮਾਸੇ ਉਪੋਸਥਂ ਅਕਾਸਿ. ਏਕਦਿਵਸਂ ਦਿਨ੍ਨੋਵਾਦੋ ਏਵ ਹਿਸ੍ਸ ਛਨ੍ਨਂ ਮਾਸਾਨਂ ਅਲਂ ਅਹੋਸਿ. ਤਸ੍ਮਾ ਸਤ੍ਥਾ ਤੇਸਂ ਇਮਂ ਕਾਲਭੇਦਂ ਆਰੋਚੇਤ੍ਵਾ ‘‘ਓਵਾਦਗਾਥਾ ਪਨ ਨੇਸਂ ਇਮਾਯੇਵਾ’’ਤਿ ਵਤ੍ਵਾ ਸਬ੍ਬੇਸਂ ਏਕਮੇਵ ਉਪੋਸਥਂ ਆਵਿ ਕਰੋਨ੍ਤੋ ਇਮਾ ਗਾਥਾ ਅਭਾਸਿ –

੧੮੩. ‘‘ਸਬ੍ਬਪਾਪਸ੍ਸ ਅਕਰਣਂ, ਕੁਸਲਸ੍ਸ ਉਪਸਮ੍ਪਦਾ;

ਸਚਿਤ੍ਤਪਰਿਯੋਦਪਨਂ, ਏਤਂ ਬੁਦ੍ਧਾਨ ਸਾਸਨਂ.

੧੮੪. ‘‘ਖਨ੍ਤੀ ਪਰਮਂ ਤਪੋ ਤਿਤਿਕ੍ਖਾ,

ਨਿਬ੍ਬਾਨਂ ਪਰਮਂ ਵਦਨ੍ਤਿ ਬੁਦ੍ਧਾ;

ਨ ਹਿ ਪਬ੍ਬਜਿਤੋ ਪਰੂਪਘਾਤੀ,

ਨ ਸਮਣੋ ਹੋਤਿ ਪਰਂ ਵਿਹੇਠਯਨ੍ਤੋ.

੧੮੫. ‘‘ਅਨੂਪਵਾਦੋ ਅਨੂਪਘਾਤੋ, ਪਾਤਿਮੋਕ੍ਖੇ ਚ ਸਂਵਰੋ;

ਮਤ੍ਤਞ੍ਞੁਤਾ ਚ ਭਤ੍ਤਸ੍ਮਿਂ, ਪਨ੍ਤਞ੍ਚ ਸਯਨਾਸਨਂ;

ਅਧਿਚਿਤ੍ਤੇ ਚ ਆਯੋਗੋ, ਏਤਂ ਬੁਦ੍ਧਾਨ ਸਾਸਨ’’ਨ੍ਤਿ.

ਤਤ੍ਥ ਸਬ੍ਬਪਾਪਸ੍ਸਾਤਿ ਸਬ੍ਬਸ੍ਸ ਅਕੁਸਲਕਮ੍ਮਸ੍ਸ. ਉਪਸਮ੍ਪਦਾਤਿ ਅਭਿਨਿਕ੍ਖਮਨਤੋ ਪਟ੍ਠਾਯ ਯਾਵ ਅਰਹਤ੍ਤਮਗ੍ਗਾ ਕੁਸਲਸ੍ਸ ਉਪ੍ਪਾਦਨਞ੍ਚੇਵ ਉਪ੍ਪਾਦਿਤਸ੍ਸ ਚ ਭਾਵਨਾ. ਸਚਿਤ੍ਤਪਰਿਯੋਦਪਨਨ੍ਤਿ ਪਞ੍ਚਹਿ ਨੀਵਰਣੇਹਿ ਅਤ੍ਤਨੋ ਚਿਤ੍ਤਸ੍ਸ ਵੋਦਾਪਨਂ. ਏਤਂ ਬੁਦ੍ਧਾਨ ਸਾਸਨਨ੍ਤਿ ਸਬ੍ਬਬੁਦ੍ਧਾਨਂ ਅਯਮਨੁਸਿਟ੍ਠਿ.

ਖਨ੍ਤੀਤਿ ਯਾ ਏਸਾ ਤਿਤਿਕ੍ਖਾਸਙ੍ਖਾਤਾ ਖਨ੍ਤੀ ਨਾਮ, ਇਦਂ ਇਮਸ੍ਮਿਂ ਸਾਸਨੇ ਪਰਮਂ ਉਤ੍ਤਮਂ ਤਪੋ. ਨਿਬ੍ਬਾਨਂ ਪਰਮਂ ਵਦਨ੍ਤਿ ਬੁਦ੍ਧਾਤਿ ਬੁਦ੍ਧਾ ਚ ਪਚ੍ਚੇਕਬੁਦ੍ਧਾ ਚ ਅਨੁਬੁਦ੍ਧਾ ਚਾਤਿ ਇਮੇ ਤਯੋ ਬੁਦ੍ਧਾ ਨਿਬ੍ਬਾਨਂ ਉਤ੍ਤਮਨ੍ਤੀ ਵਦਨ੍ਤਿ. ਨ ਹਿ ਪਬ੍ਬਜਿਤੋਤਿ ਪਾਣਿਆਦੀਹਿ ਪਰਂ ਅਪਹਨਨ੍ਤੋ ਵਿਹੇਠੇਨ੍ਤੋ ਪਰੂਪਘਾਤੀ ਪਬ੍ਬਜਿਤੋ ਨਾਮ ਨ ਹੋਤਿ. ਨ ਸਮਣੋਤਿ ਵੁਤ੍ਤਨਯੇਨੇਵ ਪਰਂ ਵਿਹੇਠਯਨ੍ਤੋ ਸਮਣੋਪਿ ਨ ਹੋਤਿਯੇਵ.

ਅਨੂਪਵਾਦੋਤਿ ਅਨੂਪਵਾਦਨਞ੍ਚੇਵ ਅਨੂਪਵਾਦਾਪਨਞ੍ਚ. ਅਨੂਪਘਾਤੋਤਿ ਅਨੂਪਘਾਤਨਞ੍ਚੇਵ ਅਨੂਪਘਾਤਾਪਨਞ੍ਚ. ਪਾਤਿਮੋਕ੍ਖੇਤਿ ਜੇਟ੍ਠਕਸੀਲੇ. ਸਂਵਰੋਤਿ ਪਿਦਹਨਂ. ਮਤ੍ਤਞ੍ਞੁਤਾਤਿ ਮਤ੍ਤਞ੍ਞੁਭਾਵੋ ਪਮਾਣਜਾਨਨਂ. ਪਨ੍ਤਨ੍ਤਿ ਵਿਵਿਤ੍ਤਂ. ਅਧਿਚਿਤ੍ਤੇਤਿ ਅਟ੍ਠਸਮਾਪਤ੍ਤਿਸਙ੍ਖਾਤੇ ਅਧਿਚਿਤ੍ਤੇ. ਆਯੋਗੋਤਿ ਪਯੋਗਕਰਣਂ. ਏਤਨ੍ਤਿ ਏਤਂ ਸਬ੍ਬੇਸਂ ਬੁਦ੍ਧਾਨਂ ਸਾਸਨਂ. ਏਤ੍ਥ ਹਿ ਅਨੂਪਵਾਦੇਨ ਵਾਚਸਿਕਂ ਸੀਲਂ ਕਥਿਤਂ, ਅਨੂਪਘਾਤੇਨ ਕਾਯਿਕਸੀਲਂ, ‘‘ਪਾਤਿਮੋਕ੍ਖੇ ਚ ਸਂਵਰੋ’’ਤਿ ਸੀਲਂ ਕਥਿਤਂ, ਅਨੂਪਘਾਤੇਨ ਕਾਯਿਕਸੀਲਂ, ‘‘ਪਾਤਿਮੋਕ੍ਖੇ ਚ ਸਂਵਰੋ’’ਤਿ ਇਮਿਨਾ ਪਾਤਿਮੋਕ੍ਖਸੀਲਞ੍ਚੇਵ ਇਨ੍ਦ੍ਰਿਯਸਂਵਰਞ੍ਚ, ਮਤ੍ਤਞ੍ਞੁਤਾਯ ਆਜੀਵਪਾਰਿਸੁਦ੍ਧਿ ਚੇਵ ਪਚ੍ਚਯਸਨ੍ਨਿਸਿਤਸੀਲਞ੍ਚ, ਪਨ੍ਤਸੇਨਾਸਨੇਨ ਸਪ੍ਪਾਯਸੇਨਾਸਨਂ, ਅਧਿਚਿਤ੍ਤੇਨ ਅਟ੍ਠ ਸਮਾਪਤ੍ਤਿਯੋ. ਏਵਂ ਇਮਾਯ ਗਾਥਾਯ ਤਿਸ੍ਸੋਪਿ ਸਿਕ੍ਖਾ ਕਥਿਤਾ ਏਵ ਹੋਨ੍ਤੀਤਿ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਆਨਨ੍ਦਤ੍ਥੇਰਪਞ੍ਹਵਤ੍ਥੁ ਚਤੁਤ੍ਥਂ.